SANTIAGO

SANTIAGO

KARTA KACHASKAMANDA

¹ Nuka, Taita Dius­pa i Iaia Jesu­cristopa lutrin­sina kaspa, Santiagomi suti kani. Ñugpa­manda taita Israelpa chunga iskai wam­bra­kunapa wam­bra­kuna maipi kaug­sa­na­kus­kata: Puangimi nii­ki­chita.

Llakii chaia­ura, mana samba­ias­pa­lla kan­ga­pa niska­manda

² Taita­kuna i mama­kuna, kam­kunata achka lla­kii­kuna chaia­uraka, mana lla­kii­wa kag­sina suma alli iuia­chi­rii­wa kan­gi­chi, ³ kasa iuia­rispa: kam­kuna Iaia Jesus­wa iuia­ri­na­kugta sug rig­cha iuiai­kuna chaia­kug­pika, chaian­mi, mana sam­ba­ias­pa­lla pai­lla­wa iuia­ri­kun­ga­pa, ima kag­pi­pas. ⁴ Iaia Jesus­wa chasa iuia­ris­pa­lla mana sam­ba­ias­pa­lla kag­pika, iukan­gi­chimi tukui alli­lla iuiaipi kanga, ñi ima mana kunga­ris­pa­lla.

⁵ Mai­kan­pas, alli­lla iachaita mana iachas­paka, Taita Diusta mañai­chi. Chasaka chas­kin­kan­gi­chimi. Taita Diuska, tukui­kuna­ta­mi ima mañaska mana tupus­pa­lla kará, mana piña­ris­pa­lla. ⁶ Taita Diusta maña­ku­uraka, paita suma iuia­rispa mañai­chi, mana kasa iuia­ris­pa­lla: “¿Kara­wangachu u mana­chu kara­wanga?”. Mana alli­lla iuiai­wa mañagka, waira­wa iaku kuchata kaima chima kuiu­chispa apa­kug­sina­mi rurá. ⁷ Mai­kan chasa mañagka mana iuia­kuchu: “Atun Taita Dius, ima­pas kara­wangami”. ⁸ Chi runaka, sug rig­cha sug rig­cha iuiaspa, ima rurai kalla­riska­ta­pas mana puchu­ka­durmi tukú.

⁹ Mai­kan­pas kam­pura­manda mana iukag kas­paka, alli iuia­chii­wa kachu. Pai­kuna­taka, Taita Dius kikin kawag suma­mi atun­ia­chin­ga­pa ka. ¹⁰ Chasa­lla­ta, mai­kan iapa iukag kas­ka­taka, Taita Dius kikin­mi pai­taka uchu­lla­ia­chin­ga­pa ka. Chasa kag­pi­pas, alli iuia­chii­lla­wa iuia­ku­chu. Iapa iukagka, ugsa tug­tu­sina­mi mana unailla wañu­rin­ga­pa ka. ¹¹ Indi llug­sispa rupa­ri­uraka, ugsa­kunata chaki­chin­mi. Tug­tu­kuna­ta­pas urma­chin­mi. Chi­wanka, tukui suma kawa­ri puchu­ka­rin­mi. Chasa­lla­ta iapa iukag runa, ima tiaska i iukaska sakispa, chi tugtu­sina­mi chingarí.

¹² Jiru ruran­ga­pa iuiai­kuna cha­ia­uraka, mana chasa rurag­kunaka Taita Dius­pa iapa kuias­ka­mi kan­kan­gi­chi. Chi mana jiru rurag­kunaka, alli suma kaug­sai pri­miu­ta­mi chas­kig­rin­kan­gi­chi. Chi kaug­sai­taka, Taita Dius nirkami, paita kuiag­kunata karan­ga­pa.

¹³ Mai­kan­ta­pas jiru ruran­ga­pa iuiai­kuna chaia­uraka, mana iuia­ri­ku­chu: “Taita Dius­mi chi jiru iuiaita iuia­chi­wa­ku”. Ñi pipas mana Taita Diusta iuia­chin­kuna­chu, jiru ruran­ga­pa. Chasa­lla­ta Taita Diuska, ñi pi­ta­pas mana iuia­chin­chu, jiru ruran­ga­pa. ¹⁴ Chi jiru ruran­ga­pa iuiai­kuna­taka, tukui­kuna iukan­chimi nukan­chi kikinpa iuiai­lla­pi. Chasaka nukan­chita iuia­chispa, jiru rurai­ta­mi muna­chí. ¹⁵ Chi­manda­mi nukan­chi jiru rurai­kunata ruran­chi. Chasa jiru ruras­ka­kuna­mandaka, Dius­pa ñawipi wañuimi tarin­chi.

¹⁶ Nuka­pa iapa kuiaska taita­kuna i mama­kuna, mana panda­rin­gi­chi. ¹⁷ Tukui suma iuiai­kuna i ima minis­tis­ka­kunata, Taita Dius­mi suma luar­manda karamú. Pai­mi ka tukui pun­cha­ia­chig­kunata rurag. Paika, ima­ura­pas pai­lla­mi ka; pun­cha­lla­mi ka. ¹⁸ Pai kikin munas­pa­lla, paipa rimai­wa nukan­chita mana puchu­ka­ri­diru suma kaug­sai­ta­mi kara­murka. (Chi rimai, tukuipi sutipa­mi ka.) Chasaka, tukui pai ima wiña­chis­ka­kuna­manda, nukan­chi pai­manda ñugpa kis­pi­chiska kan­ga­pa.

Sutipa rimas­ka­kunata uiaspa, alli­lla ruran­ga­pa niska­manda

¹⁹ Nuka­pa iapa kuiaska taita­kuna i mama­kuna, kasa uia­wai­chi: tukui kam­kuna, Dius­pa Rimaita alli­lla uian­gi­chi. Alli­manda iuia­rispa riman­gi­chi. Chasa­lla­ta, rabia chaia­ura, mana utka­lla rabia­rin­gi­chi. ²⁰ Rabia­riska runaka, Taita Dius munas­kata mana ruran­chu. ²¹ Chi­manda, tukui millai rurai­kunata i mana alli­lla kaug­sai­kunata sakii­chi. Dius­pa Rimai uias­kata upa­lla chas­kii­chi, mana atun­ia­chi­ris­pa­lla. Chi Dius­pa Rimai­waka, kam­kuna suma iuia­rig­kuna­ta­mi kis­pi­chin­ga­pa ka.

²² Dius­pa Rimaipi imasa willa­ra­ias­ka­sina ruran­gi­chi. Mana ianga uias­pa­lla kan­gi­chi. Ianga uias­pa­lla kag­kunaka, kikin­kuna­mi iuia­nakú: “Alli­lla­pi­mi kani”. Nig­pika, mana chasa kan­chu. ²³ Mai­kan Dius­pa Rimaita uias­pa­pas, mana chasa rurag­kunaka, paipa ñawi imasa kas­kata ispi­jupi kawa­rig­sina­mi kan­kuna. ²⁴ Chasa kawas­paka, kikinpa ñawi imasa kas­kata mana unai­lla­mi kunga­rin­kuna. ²⁵ Ikuti mai­kan­pas, Taita Dius ima nis­kata uiaspa, mana kun­ga­ris­pa­lla umapi waka­chispa rurag­pika, chi runaka, Taita Dius­pa iapa kuias­ka­mi kanga, chasa rurag­manda. Taita Dius ima nis­kaka, tukuipi alli­lla­mi ka. Chasa nis­kata uiaspa rurag­kunaka, wata­raiaska kas­ka­manda kacha­ris­ka­sina­mi tukun­kuna.

²⁶ Mai­kan­pas paipa simita+ 1:26 griego rimai­wa: kallu­wa. mana upa­lla­chig­pika, pai kikinlla, panda­rispa, iangami iuia­ku: “Nuka, Taita Dius­wa­mi kani”. ²⁷ Taita Dius­pa ñawipi, mai­kan ima­pi­pas pai­wa suma iuia­rig­kuna, kasa ruras­pa­mi kaug­san­kuna: wag­chu­kunata i lla­kii­wa kag sapalla kidaska warmi­kunata tukuipi aidaspa; chasa­lla­ta, kai alpapi ima jiru rurai­kunata mana ima­pas ruras­pa­lla.

Suglla iuiai runa­pura tiachu

¹ Kam taita­kuna i mama­kuna, nukan­chipa suma Iaia Jesu­cris­to­wa iuia­rig­kuna kaspa, sug­kunata sug rig­cha sug rig­cha iuiai­wa mana kawan­gi­chi. ² Kasa iuia­ri­sun­chi. Kam­kuna sug­lla­pi tan­da­riska kas­kapi iai­kug­samu­chu sug runa, kuri sur­ti­ja­wa i suma musu katan­ga­wa. Chasa­lla­ta sug mana iukag runa­pas iai­kug­samu­chu, ruku katanga chu­ra­riska. ³ Chi­ura kam­kunaka, chi suma chura­riska iai­kugta suma rimai­wa ailas­ti­maspa nin­kan­gi­chimi: “Samui. Ñugpa ladu tia­rig­samui”. Ikuti mana iukag­taka nin­kan­gi­chimi: “Chi­lla­pi saia­kui” u “Alpapi tia­rii”. ⁴ Chasa ruras­pa­mi kam kikin­pura sug rig­cha sug rig­cha iuiai­wa kawa­na­kun­gi­chi. Mana sug­lla­sina iuia­ris­pa­mi sug­kuna­taka mas sumag­lla kaia­na­kun­gi­chi.

⁵ Nuka­pa kuiaska taita­kuna i mama­kuna, kasa iuia­rii­chi. Kai alpapi mana iukag kag­kuna­ta­mi Taita Dius agllarka, pai­kuna, Jesu­cristota suma iuia­rii­wa iapa iukag­sina tukun­ga­pa­kuna; chi­wanka pai­kuna­pas, Taita Dius suma man­da­kus­kapi iai­kug­rin­ga­pa. Chasa­mi Taita Dius nirka, paita kuiag­kunata karan­ga­pa. ⁶ Ikuti kam­kunaka, mana iukag­kuna­taka mana bali­ta­sina­mi kawan­gi­chi. ¿Mana­chu chi iapa iukag­kunaka, kam­kunata ima­pi­pas mana alli­lla cha­rin­kuna? ¿Mana­chu pai­kuna, kam­kunata jus­ti­sia­kuna­pag­ma aliuspa apa­chin­kuna? ⁷ ¿Mana­chu pai­kuna, Iaia Jesu­cristopa suma suti­manda­pas jiru riman­kuna? Ikuti kam­kunaka, Iaia Jesus­manda­lla­mi suti­chiska kan­gi­chi.

⁸ Taita Dius imasa kaug­san­ga­pa nis­kapi, kasa­mi willa­raiá: “Kam kikinta­sina­mi iukangi, tukui runa­kuna­ta­pas kuianga”. Kam­kuna chasa ruragpi, alli­lla­mi rura­na­kun­gi­chi. ⁹ Ikuti runa­pura sug rig­cha sug rig­cha iuiai­wa kawag­pika, atun panda­riimi rura­na­kun­gi­chi. Chasa rurag­pika, Moisés sakiska willa­raias­kapi ni­raian­mi, kam­kuna mana alli­lla ruraipi urmagta­kuna.

¹⁰ Tukui imasa Moisés sakiska willa­raias­ka­sina rura­kus­pa­pas, sug­lla­pas chi willa­raias­kata panda­rig­pika, tukui chi willa­raias­ka­kuna­ta­mi mana alli­lla rurag­sina tukun­ga­pa ka. ¹¹ Kikin Taita Dius­mi ni: “Mana sugpa warmi­wa kari­wa siri­ringi”. Kasa­pas­mi nirka: “Mana wañu­chingi”. Kam­kunaka, mana sugpa warmi­wa kari­wa siri­ris­pa­pas, mai­kanta wañu­chig­pika, tukui chi willa­raias­ka­kunata mana alli­lla rurag­sina­mi tukug­samun­gi­chi. ¹² Sug­lla willa­raias­ka­pika tian­mi, kam­kuna kis­pi­rin­ga­pa. Chi willa­raias­ka­wa­mi kam­kuna jus­ti­siai tukun­ga­pa kan­gi­chi. Chasa iachas­paka, iukan­gi­chimi tukuipi alli­lla rimaspa i ruraspa kaug­sa­na­kunga. ¹³ Mai­kan sug­kuna­manda mana lla­kig­pika, Taita Dius­pas mana lla­kis­pa­lla­mi pai­kunata jus­ti­sian­ga­pa ka. Ikuti mai­kan­pas sug­kuna­manda lla­kispa suma rurag­kunaka, jus­ti­siai pun­cha paita chaia­uraka, tukui­pi­mi alli­lla llug­sin­ga­pa ka.

Taita Dius­wa iuia­rii­lla­wa mana chaianchu; alli­lla ruraimi chaiá

¹⁴ Taita­kuna i mama­kuna, mai­kan­pas iuia­richu: “Taita Dius­wa suma iuia­rig­mi kani”: chasa iuia­rii­lla­wa kas­paka, ñi ima alli­lla mana rurag­pika, ¿ima­watak kawa­chinga, suma iuia­rig kagta? Pai chasa iuia­rii­lla­wa sug luarpi mana kis­pi­rig­rin­ga­pa kan­chu. ¹⁵ Kasa iuia­ri­sun­chi: mai­kan­pas kam kikin­pura mana katanga iuka­chu, ñi mikui mana tia­pu­chu. ¹⁶ Chasa mana iukas­ka­taka, mai­kan kam­pura nin­tra: “Apai­jim. Alli katanga chura­ringi. Wigsa jundagta mikungi. Kuna­ura riilla”; chasa nis­paka, ñi ima mana karas­pa­lla kachag­pika, ¿imatak alli­lla ruragta ni­raiá? ¹⁷ Chasa­lla­ta, mai­kan­pas iuia­ri­chu: “Taita Dius­wa suma iuia­rig­mi kani”: chasa iuiai­lla­wa kas­paka, ñi ima alli­lla mana rurag­pika, chi iuia­rii, wañus­ka­sina­mi ni­raiá.

¹⁸ Mai­kan ningami: “Kam, Taita Dius­wa sumasi iuia­ringi. Ikuti nukaka, tukui alli­lla­mi rurani. Kam, ñi ima alli­lla mana ruras­pa­pas, kawa­chi­wai pai­wa suma iuia­ri­kugta. Ikuti nukaka, alli­lla ruras­ka­wa­mi kawa­chi­saki, nuka pai­wa suma iuia­rig kagta”.

¹⁹ Sug­lla Taita Dius tiagta kam iuiag­pika, alli­lla­mi ka. Kuku waira­kuna­pas­mi chasa­lla­ta iuian­kuna. Chasa iuia­ris­paka, dimanchaimi chug­chu­rin­kuna. ²⁰ Mana upa­sina kai. ¿Mana­chu kasa iuia­ringi? Kam ñi ima mana alli­lla ruras­pa­lla kaug­sa­kug­pika, kam iuian­trangi: “Taita Dius­lla­wa­mi kani”; chi iuiaika, ñi imapa mana balin­chu; wañus­ka­sina­mi ni­raiá.

²¹ Nukan­chipa ñugpa­manda taita Abra­hamka, ¿mana­chu paipa wam­bra Isaakta altarpi rupa­chin­ga­pa churas­ka­manda, Dius­pa ñawipi alli runa kagta kawarka? ²² ¿Mana­chu iachan­gi­chi: Abra­hamka, chasa ruraspa, pai Taita Dius­wa suma iuia­rig kagta kawa­chi­rirka? Chasa ruras­pa­mi pai ima­pi­pas suma iuia­rig tukurka. ²³ Chi­wanka, ñugpa­manda librupi imasa willa­raias­ka­sina tukug­sa­murka. Kasa­mi ni­raiá:

Abrahamka, Taita Dius imasa nis­kata iuia­ris­pa­mi karka:

“Chasami tukunga”.

Chimandami pai mana panda­rig ni­raiarka.

Paitaka, Taita Dius kikin nirka:

“Kuiaskami kapuangi”.

²⁴ Chimandami niikichita: mai­kan runa Taita Dius­wa iuia­ris­pa­llaka, paipa ñawipi mana alli­lla ni­raian­chu. Pai­wa suma iuia­rispa, alli­lla ruras­ka­kuna­wa­mi mana pan­da­rig tukug­samú.

²⁵ ¿Mana­chu chasa­lla­ta sug kari­sapa warmi, Rahab suti rurarka? Chi warmika, iskai Israel­manda runa­kuna chi pui­blupi paka­lla cha­paspa puri­na­kus­kata paipa wasi uku­ma paka­ku­chir­ka­kunata. Nis­paka, sug ñambita llug­si­chir­ka­kunata. Chasa alli­lla ruras­ka­wa­mi chi warmi mana pan­da­rig tukug­samurka.

²⁶ Imasami, alma llug­si­ura, kuirpu wañuska ka: chasa­lla­ta mai­kan­pas, Taita Dius­wa iuia­rii­lla­wa kas­paka, ñi ima alli­lla mana rurag­pika, chi iuia­rii, wañus­ka­sina­mi ni­raiá.

Simi­wa rimaska­manda

¹ Nuka­pa kuiaska taita­kuna, kam­pura­kuna mana munan­gi­chi, achka­kuna Dius­pa Rimaita iacha­chig­kuna tian­ga­pa. Kasa iuia­ri­sun­chi: nukan­chi iacha­chig­kuna­ka, sug luar­pika sug­kuna­manda­pas masmi tapu­chii tukun­ga­pa kan­chi. ² Tukui­kuna­mi achka ima­pi­pas pan­da­rin­chi. Mai­kan mana pan­da­ris­pa­lla rimagka, chi runa­kar tukui ima­pi­pas alli­lla­mi ka. Paika, paipa kuir­pu­ta­pas­mi mana sakinga, ñi ima jiru­kunata ruran­ga­pa.

³ Kaballupa simita prinumi wataspa churan­chi. Chi­wanka nukan­chi, maima munas­ka­ma­mi pusan­chi. Chasa churas­pa­mi kaba­llupa kuir­puta maima munas­ka­ma ñugpa­chin­chi. ⁴ Kanua­manda­pas iuia­rii­chi, mai­tuku atun kag­pi­pas. Mai­kan­pas kanuata iakupi apa­kug, mai­tuku sin­chi waira­kug­pi­pas, uchu­lla walmu­lla­wa­mi pai maima munas­ka­ma chi kanuata apa­chí. ⁵ Chasa­lla­ta nukan­chipa simi,+ 3:5 griego rimai­wa: kallu­wa. kuir­pupi uchu­lla iukas­pa­pas, nukan­chipa rimai­wa pudi­rin­mi, mai­tuku atun­pas tukug­samunga.

Chasa­lla­ta iuia­rii­chi: asllita nina, sin­di­ris­paka, atun ruku sacha­kuna­ta­pas pudin­mi puchu­kanga. ⁶ Simi­pas, nina­sina waglli­chig­mi ka. Chi simi­waka pudi­rin­mi, tukui kai alpapi kaug­sa­na­kus­kata paipa jiru rimai­wa waglli­chinga. Chi simika, nukan­chipa kuir­pu­pi­mi tia. Chi simi­wa rimas­paka, runa­kunapa iuiai­ta­pas­mi waglli­chig­samú. Chi­wa­mi simika infirnu­manda nina­wa sindi­chis­ka­sina ka. Chi simi­lla­wan­ta­mi sug­kuna­ta­pas kaug­san­kama waglli­chin­ga­pa pudí. ⁷ Sachukupi kaug­sag­kunata i pisku­kunata, alpa­pi aliu­rispa purig­kunata i iaku­pi kaug­sag­kuna­ta­pas, tukui­kuna­ta­mi runa­kuna mansuia­chii pudin­mi i mansuia­chin­kuna­llami. ⁸ Ikuti simi­taka, ñi mai­kan runa­pas mana mansuia­chii pudin­chu. Chi simi­wa rimaita mana pudi­rin­chu, ima­wapas arkan­ga­pa. Simika, wañu­chi­diru wambii junda­chis­ka­sina­mi ka. ⁹ Chi simi­wa­mi nukan­chipa atun Taita Diusta iapa suma kagta nin­chi. Chi­lla­wan­ta­mi runa­kuna­ta­pas mana alli­lla riman­chi, Taita Dius kikin rig­cha­sina ruraska kag­pi­kuna­pas. ¹⁰ Chi simi­lla­wan­ta­mi alli­llata i mana alli­lla­ta­pas riman­chi.

Nuka­pa kuiaska taita­kuna i mama­kuna, chasa rimaika mana alli­lla kan­chu. ¹¹ Sug­lla iaku ñawi­lla­pika, miski iaku i winja iakuka mana llug­sin­chu. ¹² Chasa­lla­ta, nuka­pa kuias­ka­kuna, igus sachapi asiti surku­diru muiu­kunaka mana tia­rin­chu. Ñi ubas sachapi igus muiu­kunaka mana tia­rin­chu. Cha­sa­lla­ta, sug­lla iaku ñawi­pika, kachi iaku i miski iakuka mana llug­sin­chu.

Taita Dius karaska iachai­manda

¹³ ¿Kam­kuna­pura tian­chu tukui­pi iachag? Mai­kan chasa tiag­pika, paipa alli suma kaug­sai­wa uchu­lla­sina tukuspa, kawa­chi­chu pai sutipa iacha kagta. ¹⁴ Ikuti mai­kan sug­kunata jiru iuiai­wa kawaspa, kikin­pura “Nukaka, mas­mi kani” iuia­ri­kugka, mana suma atun­ia­chi­ris­ka­sina iuia­kuchu, mai­tuku iacha kas­pa­pas. Chasa jiru ruras­ka­waka kawa­chi­kumi, tukuipi llu­lla kagta. ¹⁵ Chi iachai­taka, Taita Dius mana karan­chu. Kai alpa­manda­lla runa­kunapa iuiailla i iaia kukupa iuia­chiska­lla­mi ka.

¹⁶ Mai­kan sug­kunata jiru iuiai­wa kawaspa, kikin­pura “Nukaka, mas­mi kani” iuia­rispa kas­ka­kuna­pag­pika, piña­ris­pa­lla i tukui mana alli­lla ruras­pa­lla­mi kaug­san­kuna. ¹⁷ Ikuti Taita Dius karaska iachaita iukag­kunaka, ñi imapi mana panda­ris­pa­lla­mi kaug­san­kuna. Chi­manda, tukui­kuna­wa sumag­lla mana piña­chi­ri­na­kus­pa­lla­mi kaug­san­kuna. Pai­kunapa suma iuiai­wa tukui­kuna­manda­mi alli iuian­kuna. Ima nis­ka­ta­mi uian­kuna. Sug­kuna­manda lla­kispa, tukui ima­pi­pas alli­lla­mi ruran­kuna. Ñi pi­ta­pas mana sug rig­cha sug rig­cha iuiai­wa kawas­pa­lla, ñi ima­pi­pas mana llullas­pa­lla­mi kaug­san­kuna. ¹⁸ Mai­kan sumag­lla pasin­sia­chispa, tukui­kuna­wa sumag­lla kaug­sa­na­kug, pai­kuna­kar, Dius­pa ñawipi alli runa­kuna­mi ni­raian­kuna.

Kai alpapi ima tias­ka­kuna­lla­wa mana iacharin­ga­pa niska­manda

¹ Kam kikin­pura, ¿ima­manda­tak maka­na­kui i piña­chi­ri­na­kui tiag­samú? Kam kikin­kuna mana suma iuiai iukas­pa­mi chasa rura­na­kun­gi­chi. ² Ima munas­kata mana taris­paka, kam kikin­pura­mi wañu­chi­ri­na­kun­gi­chi. Sug­pata iukan­ga­pa muna­rispa, mana kichui pudis­paka, chi­manda­mi maka­na­kuspa i piña­chi­ri­na­kuspa kaug­sa­na­kun­gi­chi. Taita Diusta mana mañas­pa­mi kam­kuna mana iukan­gi­chi. ³ Paita mañas­paka, kam kikin­kuna­manda­lla alli­lla kan­ga­pa iuia­rispa maña­na­kug­manda­mi maña­na­kus­kaka mana chas­kin­gi­chi.

⁴ Kam­kuna, Dius­pa ñawipi sug rigsi iukag­sina­mi kan­gi­chi. ¿Mana­chu iachan­gi­chi: kai alpapi tias­ka­kuna­lla­wa iacha­rigka, Taita Diusta wasa churag­sina­mi ni­raiá? Mai­kan­pas kai alpapi tias­ka­kuna­lla­wa iacha­rigka, Taita Dius­pa kun­tra­mi ka. ⁵ Chi­manda­char ñug­pa­manda librupi kasa willa­raiá:

Imasami kusa, warmindita muná, pai­lla­wa kan­ga­pa;

chasa­lla­ta­mi Santu Ispí­ritu nukan­chipi kaug­sagka,

nukan­chita muná, pai­wa sug­lla kag­sina kan­ga­pa.

⁶ Chi­wanka Taita Diuska, alli iuiai­kuna­ta­mi kará; chasaka, nukan­chi sumag­lla kaug­san­ga­pa. Chi­man­da­mi ñugpa­manda librupi kasa­pas willa­raiá:

Iapa atun­ia­chi­riska iuiai­wa kag­kuna­taka,

Taita Dius­mi pai­kunata piñarí.

Ikuti mana atunias­pa­lla iuiai­wa kag­kuna­taka,

alli iuiai­kuna­ta­mi kará;

chasaka, pai­kuna sumag­lla kaug­san­ga­pa.

⁷ Chimandaka, Taita Dius­pa tukui­chi, pai­manda­lla kan­ga­pa. Iaia kukuta mana saki­ris­pa­lla micha­rii­chi. Chasa rurag­pika, chi iaia kuku­ka kam­kuna­pag­manda miti­kun­gami. ⁸ Taita Dius­pag­ma mana man­chas­pa­lla kailla­iai­chi. Chasa rurag­pika, pai­pas kam­kuna­pag­ma kai­lla­ian­gami.

Mana alli­lla rurag­kuna kas­paka, chi mana alli­llata mai­lla­rig­sina rurai­chi. Kai alpa­wa i Taita Dius­wa sug­lla­pi iuiag­kuna, tukui sun­gupi jiru iuiaita sakii­chi, Taita Dius­pa­lla kan­ga­pa. ⁹ Chi­manda­mi nii­ki­chita: irkiai­chi; wakai­chi; lla­ki­rii­chi. Asi­na­kun­ga­taka, nii­ki­chi­ta­mi: wakai­chi. Suma iuiai­wa kun­tin­tu­lla kan­ga­taka, nii­ki­chi­tami: irkiaspa lla­ki­rii­chi. ¹⁰ Atun Taita Dius­pa ñawipi mana iapa atun­ia­chi­ris­pa­lla iuiai iukai­chi. Chasa rurag­pika, Taita Dius­mi kam­kunata atun­ia­chinga.

¹¹ Taita­kuna i mama­kuna, kam­kuna­pura ñi ima­pi­pas mana jucha­chi­na­kui­chi. Mai­kan­pas sug­kuna­manda jucha­chispa, mana alli­lla rima­kug­pika, Taita Dius ima ruran­ga­pa willas­ka­manda mana alli­lla rimag­mi ni­raiá. Chasa ruras­paka, Taita Dius imasa willas­ka­sina rurag kan­ga­taka, kikin jus­ti­sia kag­sina­mi tukú. ¹² Sug­lla Taita Dius­mi tia, runa­kuna imasa ruran­ga­pa ni­dur. Pai­lla­ta­ta­mi jus­ti­sia kan­ga­pa ka. Pai­mi pudí kis­pi­chin­ga­pa u puchu­kan­ga­pa. Nigpi kamka, ¿pitak kangi, jus­ti­sia tukuspa, kamba waug­kin­di­kuna­manda mana alli­lla rima­kun­ga­pa?

Kaia ima pasa­rin­ga­pa kas­kata mana iachaska­manda

¹³ Kuna­ura uia­wai­chi, kam­kuna kasa nig­kuna: “Kuna pun­cha u kaia, chi pui­blu­ma­mi ri­sun­chi. Ran­dispa katuspa, sug wata­mi chipi chi­sia­sun­chi, kulki mira­chin­kama”. ¹⁴ Kam­kunaka mana iachan­gi­chi­chu, ñi kaia ima pasa­rin­ga­pa kagta. Nukan­chipa kaug­sai, puiu­sina­mi ka; imasa­mi puiuka, kawa­rispa, sug mana unai­lla­pika ikuti mana kawa­rí: chasa. ¹⁵ Mas alli­mi kan­tra, kam­kuna kasa nin­ga­pa: “Atun Taita Dius munag­pika, nukan­chi, kaug­saspa, kasa u chasa­mi rura­sun­chi”. ¹⁶ Chasa nin­ga­taka, kam­kuna atun tukus­pa­mi rima­na­kun­gi­chi. Chasa atun tukuspa iuiag­kunaka, mana alli­lla ruran­kuna­chu. ¹⁷ Mai­kan­pas, alli­lla ruran­ga­pa iachas­pa­pas, mana rurag­pika, pan­da­rig­mi ka.

Iapa iukag­kunata iuia­chiska­manda

¹ Kam­kuna iapa iukag­kuna, kapa­rispa wakai­chi. Kam­kunata iapa lla­kii­mi chaian­ga­pa ka. ² Kam­kuna tukui iukas­kaka, Dius­pa ñawipi ismus­ka­sina­mi kawarí. Kam­kunapa suma katan­ga­kuna­pas, puli­lla mukus­ka­sina­mi ka. ³ Kam­kunapa kuri i kulki­pas, lim waka­ris­ka­sina­mi ni­raiá. Chi waka­ris­kaka kawa­chi­kumi, kam­kuna tukuipi panda­riska kagta­kuna. Chi waka­ris­kaka, kam­kunapa aichata nina tukuspa rupa­chig­mi tukun­ga­pa ka. Chi iukai­kuna waka­chi­ris­ka­kunaka, kai alpa tuku­rii pun­cha­kuna Taita Dius­pa rabia waka­chi­rig­sina­mi ni­raiá.

⁴ Kam­kunapa piun­kunata mana alli­lla pagas­ka­manda, chi kulki­kuna­lla­ta­ta­mi kam­kuna­manda mana alli­lla rura­na­kus­kata willa­ku. Chi piun­kuna lla­kii­wa kapa­ri­na­kus­kata, tukui mandu­iug atun Taita Dius­mi uia­ku. ⁵ Kam­kuna, kai alpa­pi suma mikuspa i upiaspa, imasa munas­ka­sina kaug­sas­paka, wagra wi­raias­ka­sina­mi tukun­gi­chi. Chasaka, ñami wira wagrata wañu­chii pun­cha chaia­kug­sina kam­kunata chaia­muku. ⁶ Kam­kuna, mana alli­lla jus­ti­sias­pa­lla­mi alli runa­kunata wañu­chin­gi­chi. Pai­kunaka, mana micha­rir­ka­kuna­chu.

Iaia Jesús samun­kama, upalla mana sambias­pa­lla suia­na­kuska­manda

⁷ Taita­kuna i mama­kuna, Iaia Jesús samun­kama, upa­lla mana sam­ba­ias­pa­lla suia­na­kun­gi­chi. Chagra rurag runata iachai­kui­chi. Paika, tarpus­kata manara pallan­kama, iukan­mi mana samba­ias­pa­lla suianga, ñugpa tamia i kati tamia ialin­kama. ⁸ Chasa­lla­ta kam­kuna­pas, Taita Dius­wa iuia­riilla kaspa suian­gi­chi, mana sam­ba­ias­pa­lla. Iaia Jesuska, ñami chaiag­samun­ga­pa ka.

⁹ Taita­kuna i mama­kuna, kam kikin­pura mana piña­chi­ri­na­kus­pa­lla kaug­sai­chi. Chasaka, mana jus­ti­siai tukun­kan­gi­chi­chu. Taita Dius jus­ti­siag, ñami punguma chaia­mukug­sina ka.

¹⁰ Taita­kuna i mama­kuna, San­tu Ispi­ri­tu­wa ñugpata rimag­kunata iachai­kui­chi. Pai­kuna, atun Taita Dius­pa Rimaita willas­pa­mi kar­ka­kuna. Lla­kii iukas­pa­pas, mana samba­ias­pa­lla­mi kaug­sar­ka­kuna. Kam­kuna­pas chasa­lla­ta kaug­sai­chi. ¹¹ Mai­kan­pas, lla­kii­wa kas­pa­pas, mana samba­ias­pa­lla kaug­sag­kuna­mandaka nin­chimi: “Taita Dius­pa iapa kuias­ka­mi ka”. Job suti runa, iapa lla­kii­wa kas­pa­pas, mana samba­ias­pa­lla kag­manda ñami iachan­gi­chi. Paita, katima, atun Taita Dius tukuimi kuti­chirka. Atun Taita Diuska, nukan­chita iapa kuiaspa, lla­kii­wa­mi kawa­ku.

¹² Taita­kuna i mama­kuna, imasa kas­kata mana kawag churan­gi­chi sug luarta, ñi kai alpata ñi ima suti­kuna­ta­pas. “Ari” nin­ga­pa cha­iag­pika, “Ari” nin­gi­chi­lla. “Mana” nin­ga­pa chaiag­pika, nin­gi­chi­lla: “Mana”. Chasa nis­paka, mana jus­ti­siai tukun­kan­gi­chi­chu.

Taita Diusta mañai­manda

¹³ Mai­kan­pas lla­kii iukas­paka, Taita Diusta mañan­gi­chi. Mai­kan kun­tin­tu­lla kas­paka, Taita Diusta bir­siu­wa kantan­gi­chi, “Kam, iapa alli­mi kangi” nispa. ¹⁴ Mai­kan ungug kas­paka, Jesus­wa tukuska­pura iacha taita­kunata kaian­gi­chi; Taita Diusta maña­puspa, Iaia Jesus­manda iuia­rispa, asiti­wa paita kaku­chu­kuna. ¹⁵ Iaia Jesus­wa suma iuia­rispa maña­pug­pi­kunaka, paimi, chi ungugta alia­chispa, ata­ri­chin­ga­pa ka. Chi ungug ima panda­ris­ka­kuna­ta­pas­mi pasin­siai tukun­ga­pa ka. ¹⁶ Chi­manda­mi nii­ki­chita: kam kikin­pura ima panda­ris­ka­kunata willa­ri­na­kun­gi­chi. Kam kikin­pura­manda maña­pu­na­kun­gi­chi, Taita Dius kam­kunata alia­chi­chu.

Alli­lla rurag runa, tukui suma iuiai­wa mañas­ka­waka tukuipi iapa­mi pudirí. ¹⁷ Elías suti Santu Ispi­ri­tu­wa ñugpa­manda rimag, pai­mi, nukan­chi­sina­lla­tata kaspa, Taita Diusta: “Mana tamia­chu” suma iuiai­wa mañarka. Chi­uraka, sutipa­mi kimsa wata sugta killa kai alpapi mana tamia urmarka. ¹⁸ Ikuti tamian­ga­pa maña­uraka, chasa­lla­ta­mi tamiag­samurka. Chi­ura, alpa­pi­ka ikuti tukui mikuimi tia­rig­sa­murka.

¹⁹ Nuka­pa taita­kuna i mama­kuna, kasa iuia­rii­chi: kam­kuna­pura­manda mai­kan­pas mana alli­lla­pi urmag­pika, chi runa­taka sug runa­wa iuia­chin­gi­chi, Taita Dius­wa ikuti tigran­ga­pa. ²⁰ Kasa iachai­chi: chi pan­da­ri­kus­kata kis­pi­chig, chi runapa alma­ta­mi kis­pi­chin­ga­pa ka, mana dil­tudu­pa wañun­ga­pa. Chasa­lla­ta, chi tukui panda­rii­kuna­ta­pas­mi pasin­sia­chin­ga­pa ka.