HEBREOKUNATA

HEBREOKUNATA

KARTA KACHASKAMANDA

Taita Dius, paipa wam­brawa nukan­chita willaska­manda

¹ Ñugpataka Taita Dius, nukan­chipa ñugpa­manda taita­kunata ikuti ikuti, sug rig­cha sug rig­cha, Santu Ispi­ri­tu­wa rimag­kuna­wa­mi willa­dur karka. ² Kai tuku­rii pun­cha­kunaka, pai kikinpa wam­bra­wa­mi nukan­chita rimag­sa­murka. Pai kikinpa wam­bra­wa­mi tukui alpa­kunata rurarka. Pai kikin­pa wam­bra­ta­mi tukui kararka. ³ Pai wam­bra­mi ka Taita Dius­pa iapa suma luarpi paipa pun­cha­wa pun­cha­ia­chig. Taita Dius­sina rig­cha­lla­ta­ta­mi kawa­ri ka. Pai, tukui pudispa, pai kikinpa rimai­lla­wan­ta­mi tukuita suma charí. Pai­lla­ta­ta­mi, nukan­chipa panda­rii­kunata anchu­chii ruraspa, suma luarpi iapa atun Taita Dius­pa alli ladu tia­rig­rirka.

Taita Dius­pa wam­bra, anjil­kuna­manda mas atun kaska­manda

⁴ Chasaka, anjil­kuna­manda mas atun­ia­chis­ka­mi tukurka. Paipa suti­pas, pai­kunapa suti­kuna­manda mas atun­mi ka. ⁵ Ñi mai­kan anjil­ta­pas, Taita Dius mana kasa nirka­chu:

Kam, nuka­pa wam­bra­mi kangi.

Nukami kuna pun­cha kaug­sai karaiki.

Kasapasmi ñugpa­manda librupi nirka:

Nukami paipa Taita kan­ga­pa kani.

Pai, nuka­pa wam­bra­mi kan­ga­pa ka.

⁶ Paipa suglla wam­brata kai alpama kacha­mus­paka, kasa­mi nirka:

Nuka­pa tukui anjil­kuna,

paita kungu­rispa, ni­puan­gi­chi:

“Iapa allimi kangi”.

⁷ Anjil­kuna­mandaka kasa­mi ni:

Paipa anjil­kuna­ta­mi kachá,

waira­sina pai ima nis­kata rurag­kuna kan­ga­pa.

Pai ima nis­kata sug nina sindi rilampa­sina mana unailla ruragmi kan­kuna.

⁸ Ikuti kikin Taita Dius­pa wam­bra­taka kasa­mi ni:

Kam, Dius­lla­tata kaspa,

dil­tudupami mandanga­pa kangi,

maituku waranga waranga wata­kuna ialig­pi­pas.

Tukui imapipas alli­lla mandag­mi kangi.

⁹ Alli­kunata­mi kuiar­kangi.

Ikuti mana alli­kuna­taka

mana munar­kangichu.

Chimandami kamba Taita Dius

kam Dius­lla­tata kas­kata agllarka.

Chi­wanka, kamta kara­mur­kami,

kamwa kag­kuna­manda­pas

mas alli iuia­chii­wa kan­ga­pa.

¹⁰ Kasapasmi paita nirka:

Kam Taitikumi kalla­ris­kapi

kai alpata rurar­kangi.

Kam­lla­tata­mi sug luar­ta­pas rurar­kangi.

¹¹ Chi­kunaka, tukuimi puchuka­rin­ga­pa kan­kuna.

Ikuti kamka, ima­ura­pas kaug­sa­lla­mi kan­ga­pa kangi.

Tukui chi wiñas­ka­kunaka,

katanga rukuias­ka­sina­mi tukun­ga­pa kan­kuna.

¹² Katangata pata­rig­sina­mi

ruran­ga­pa kangi sitan­ga­pa.

Maugka katangata sitaspa,

musu katanga chura­chig­sina­mi ruran­ga­pa kangi.

Chasa ruras­pa­pas, kam kikin­lla­ta­ta­mi kan­ga­pa kangi.

Ñi ima­ura­pas mana wañun­ga­pa kangichu.

¹³ Ñi mai­kan anjil­ta­pas, Taita Dius mana ima­ura­pas kasa nirka­chu:

Nuka­pa alli ladu tia­rii,

nuka tukui kamta mana munag­kunata apag­rispa,

kamba chaki saru­diru ukuma churan­kama.

¹⁴ Tukui anjil­kunaka, ispi­ri­tu­kuna­lla­mi kan­kuna, Taita Dius ima munas­kata rurag­kuna. Pai­kuna kacha­mus­ka­mi kan­kuna, suma luarpi dil­tudupa kis­pi­rig­rin­ga­pa kag­kunata aidag kan­ga­pa.

Kispi­rin­ga­pa kaska­manda Alli Willaita mana kunga­ri­sun­chi

¹ Chimandami nukan­chita cha­ia­ku, chi Alli Willai­ta uias­kata mas suma iuia­rin­ga­pa; cha­saka, sug ñambi­pi­sina ri­na­kus­ka­manda mana chin­gag­rin­ga­pa. ² Taita Dius anjil­kuna­wa Moisesta willas­ka­taka, ñugpa­manda­kuna iukar­ka­kunami uiaspa, chi Willai­ta imasa ni­raias­ka­sina ruran­ga­kuna. Mai­kan­kuna­pas chi willas­kata uiaspa, mana chasa rurag­kunaka, imasa chaias­ka­sina­mi jus­ti­siai tukur­ka­kuna. ³ Nig­pika nukan­chi kikin­kuna, chi kis­pi­rin­ga­pa kas­ka­manda iapa suma Alli Willai­ta kunga­rig­pika, ¿ima­sa­tak iuia­sun­chi, Taita Dius llaki­ris­ka­manda kis­pi­rin­ga­pa kagta­kuna? Iaia Jesús kikin­mi ñugpa willarka, nukan­chi imasa ruraspa kis­pi­rin­ga­pa kagta­kuna. Chi­ura­mandaka, paita uiag­kuna­mi nukan­chita chasa kas­kata willag­samur­ka­kuna. ⁴ Taita Dius­pas, ujnan­ga­sina mana pipas ruran­ga­sina­kuna­wa­mi kawa­chi­murka, Jesús sutipa alli­lla willa­kugta. Chi­manda, pai imasa munas­ka­sina, Santu Ispi­ri­tu­wa­mi nukan­chita sug rig­cha sug rig­cha karamú. Chi­kuna­wa­pas­mi kawa­chimú, Jesús sutipa alli­lla willag kagta.

Jesu­cristo, nukan­chi­sina runa tukug­samuska­manda

⁵ Taita Dius mana anjil­kunata chu­rar­ka­chu, nukan­chi rima­na­kuska musu alpata mandag­kuna kan­ga­pa. ⁶ Mana kag­pika, sug ñug­pa­manda librupi, mai­kan­char Taita Diusta kasa nispa willamú:

¿Imapatak runa­kuna­manda­lla iuia­ringi?

¿Imapatak pai­kuna­manda llakingi?

⁷ Manancha unai­lla­pi­mi

pai­kunata churar­kangi,

anjil­kuna­manda­pas mas uchulla ni­raian­ga­pa­kuna.

Chasa churas­pa­pas,

pai­kunata iapa suma llaugtu­chis­pa­mi atun­ia­chir­kangi.

⁸ Tukuita­mi pai­kunapa chaki ukuma kag­sina churar­kangi,

pai­kuna­manda­lla kan­ga­pa.

Taita Dius, chasa tukuita chu­ras­paka, mana sakirka­chu, ñi ima­pas runa­kuna­manda mana kan­ga­pa. Tukuimi sakirka, runa­kuna­manda­lla kan­ga­pa. Chasa kag­pi­pas, kunan­kama manara kawan­chi­chu, tukui imasa nis­ka­sina tukug­sa­mugta. ⁹ Jesus­ta­mi iuiaipi kawan­chi. Pai­ta­mi Taita Dius manan­cha unai­lla­pi churarka, runa tukuspa, anjil­kuna­manda­pas mas uchu­lla kan­ga­pa. Taita Dius kikin­mi nukan­chita iapa kuiaspa munarka, pai Jesús tukui­kuna­manda wañu­chu. Jesús, chasa wañus­paka, kuna­ura iapa suma llaugtu­chispa atun­ia­chis­ka­mi ka.

¹⁰ Tukui tiaska, Taita Dius­wa­mi ka. Tukui, pai­manda­lla­mi tia. Taita Dius­lla­ta­ta­mi muná, achka wam­bra­kunata paipa suma pun­cha luar­ma chaia­chig­rin­ga­pa. Chi­manda­mi nukan­chipa kis­pi­chig Jesús kikinta chaiarka, achka llakii nanai­kuna iukaspa, wañun­ga­pa. Chasa­wa­mi kawa­chirka, paipa Taita Dius imasa muna­kus­ka­sina tukuipi alli­lla ruraspa runa kagta. ¹¹ Pai Jesús, nukan­chita tukui pan­da­rii­kunata anchu­chig, i nukan­chi kikin­kuna­pas, tukui­kuna sug­lla Taita­pa­mi kan­chi. Chi­manda­mi Jesús mana man­chas­pa­lla nukan­chita ni: “Waug­ki­kuna” i “Pani­kuna”. ¹² Chasa­lla­ta­mi ñugpa­manda librupi willa­raiá, kasa Taita Diusta nispa:

Kam­manda nuka­pa waugki i pani­kuna­ta­mi willan­ga­pa kani.

Kamta suma iuia­rig­kuna sug­lla­pi kas­ka­kunapa chaugpi­manda­mi

suma birsiu­kuna kantan­ga­pa kaiki.

¹³ Kasapasmi ni­raiá:

Taita Dius­llatami suma iuia­rispa suian­ga­pa kani.

Ikuti kasapasmi ni­raiá:

Kaipimi kani,

Taita Dius kara­waska wam­bra­kuna­wa.

¹⁴ Imasami suglla taitapa i mama­pa wam­bra­kuna, tukui­kuna chi iawar­manda­lla­tata kan­kuna: chasa­lla­ta­mi Jesus­pas, nukan­chi­sina aicha­iug runa tukug­samurka; chasaka, pai wañus­ka­wa, wañuima apa­kugta bin­sin­ga­pa. Chi wañuima apa­kug­ka, iaia kuku­mi ka. ¹⁵ Wata­ra­iag­sina wañuita man­chaspa kaug­sa­na­kug­manda, tukui pai­kuna kis­pi­rig­sina kan­ga­pa­mi Jesús wañurka. ¹⁶ Paika mana kai alpama samur­ka­chu anjil­kuna­manda. Abra­hampa wam­bra ni­raias­ka­kuna­man­da­mi samurka. ¹⁷ Chi­manda­mi iukarka, runa tukuspa, tukuipi nukan­chi­sina­lla­tata tukug­sa­munga, waug­kin­di­sina kan­ga­pa; cha­saka pai, tukui ima nis­kata alli­lla rurag kaspa, iaia sasir­duti nukan­chi­manda lla­kig, Taita Dius­pa ñugpa ladu tukug­rin­ga­pa; chasa­lla­ta, pai wañus­ka­wa tukui­kunapa pan­da­rii­kunata anchu­chin­ga­pa. ¹⁸ Paika, iapa lla­kii­mi iukarka, jiru ruran­ga­pa iuiai­kuna chaia­ura. Nig­pika, chi iuiai­kunata: “Mana” nis­pa­mi bin­sirka. Chi­manda­mi pudí, mai­kan­ta­pas jiru ruran­ga­pa iuiai­kuna chaias­kata chi iuiai­kuna­manda michanga.

Jesús, Moises­manda mas atun kaska­manda

¹ Chi­manda, Taita Dius­pa­lla kag taita­kuna i mama­kuna, pai­wa suma luarpi kag­rin­ga­pa agllas­ka­kuna, Jesusta suma iuia­rii­chi. Paika, Taita Dius kacha­muska iaia sasir­du­ti­mi tukug­samurka. Pai­wa­mi suma iuia­rispa kan­chi. ² Ima­sa­mi Moi­sés, tukui Israel­manda runa­kuna Dius­pa wasi­sina ni­ra­ias­ka­kuna­manda tukui imasa Taita Dius munas­kata rurarka: chasa­lla­ta­mi Jesús, iaia sasir­duti kan­ga­pa chu­rai tukuspa, Taita Dius tukui ima munas­kata alli­lla rurarka. ³ Ima­sa­mi chaiá, alli­lla wasi­chigta: “Kam ruraska wasi­manda mas alli­mi kangi” nin­ga­pa: chasa­lla­ta­mi Jesusta chaiá, Moi­ses­manda mas suma atun­ia­chin­ga­pa. ⁴ Mai­kan wasi­pas iukan­mi, pipas wasi­chig tianga. Chasa­lla­ta­mi nini: tukui ima kawa­ris­kaka, Taita Dius­mi rurarka. ⁵ Moi­seska, Taita Dius ima munas­kata rurag­lla kaspa, Dius­pa wasi­sina tukui ni­raias­ka­kuna­manda alli­lla­mi rurarka; cha­saka, Taita Dius ima ni­kus­kata willag­ri­dur kan­ga­pa. ⁶ Ikuti Cris­toka, Taita Dius­pa wam­bra kaspa, Dius­pa wasi­sina ni­raiaska, pai kikinpa wasi­pi­sina­mi alli­lla rurarka. Nukan­chi tukui­kuna­mi Dius­pa wasi­sina ni­raian­chi. Paita alli iuia­chii­wa suma iuia­rispa suia­na­kus­kata mana sakis­pa­mi paipa wasi­sina ni­raian­chi.

Taita Dius agllaska­kuna, pai­wa samag­rin­ga­pa kaska­manda

⁷ Chi­wanka, kasami Santu Ispí­ritu ñugpa­manda librupi willarka:

Kuna puncha,

Taita Dius ima rimas­kata

kam­kuna uias­paka,

mana tukun­gi­chi mana uiag­sina.

⁸ Moises­wa chusa sitaska alpapi purig­kuna,

Taita Diusta piña­ris­pa­mi nir­ka­kuna:

“¿Ar pudingichu?”;

pai­kuna­sina mana tuku­na­kun­gi­chi.

⁹ Kam­kunapa ñugpa­manda achala taita­kuna,

chusku chunga wata­kuna

nuka suma alli­lla ruras­kata kawas­pa­pas,

charami chipi ni­war­ka­kuna:

“¿Ar pudingichu?”.

¹⁰ Chimandami chi pun­cha­kuna kaug­sa­na­kus­ka­wa rabia­ri­warka.

Pai­kunamandami nir­kani:

“Ima­ura­pas chingas­ka­kuna­sina mana alli­lla iuias­pa­mi puri­nakú.

Nuka muna­kus­ka­sinaka

mana ima­ura­pas munan­kuna­chu ruraspa kaug­san­ga­pa”.

¹¹ Chimandami,

pai­kuna­wa rabia­rispa,

mana llullas­pa­lla nir­kani:

“Pai­kuna ñi sug mana iai­kug­rin­ga­pa kan­kuna­chu nuka alpa karan­ga­pa niska­ma,

chipi sama­rig­rin­ga­pa”.

¹² Chimandami nii­ki­chita, taita­kuna i mama­kuna, ¡ujala­lla­pas mai­kan, mana alli­lla iuiaspa, Taita Dius kaug­sagwa mana suma iuia­rispa, anchu­ris­ka­sina kan­tran­gi­chi! ¹³ Chasa­paka, chara kai luarpi kaug­san­kama, tukui pun­cha­kuna kam kikin­pura alli­llapa iuia­chi­na­kuspa kaug­sa­na­kui­chi; chasa­waka ñi pipas, mana pan­da­chii tukuspa, subirbi mana uiag tukun­ga­pa. ¹⁴ Imasa­mi Cristo­wa suma iuia­ris­ka­wa kalla­rir­kan­chi: chasa­lla­ta­mi iukan­chi, paita mana kun­ga­ris­pa­lla, wañun­kama iuia­ris­pa­lla kan­ga­kuna; chasaka, Cristo chas­kis­kata nukan­chi­pas chas­kig­rin­ga­pa.

¹⁵ Chimandami kasapas ni­raiá:

Kuna puncha,

Taita Dius ima rimas­kata

kam­kuna uias­paka,

mana tukun­gi­chi mana uiag­kuna.

Moises­wa purig­kuna Taita Diusta piña­rig­kuna­sina

mana tuku­na­kun­gi­chi.

¹⁶ ¿Pi­kunatak, Taita Dius rimas­kata uias­pa­pas, paita piña­rig kar­ka­kuna? ¿Mana­chu kar­ka­kuna Ejipto alpa­manda tukui Moi­sés llugsi­chis­ka­kuna? ¹⁷ Chasa­lla­ta, ¿pi­kuna­watak chusku chunga wata Taita Dius rabia­riska karka? ¿Mana­chu jiru ruraska kag­kuna­wa rabia­riska karka? Chi chusa sitaska alpapi puri­na­kugka, tukui­mi wañur­ka­kuna. ¹⁸ Chasa­lla­ta, ¿pi­kuna­manda­tak Taita Dius mana llu­llas­pa­lla nirka: “Mana iai­kug­rin­ga­pa kan­kuna­chu nuka alpa karan­ga­pa niska­ma, chipi sama­rig­rin­ga­pa”? ¿Mana­chu pai ima nis­kata mana uiag­kuna­manda chasa nirka? ¹⁹ Kasa­pas­mi iachan­chi: Taita Dius­wa mana iuia­rispa kag­manda­mi pai­kuna mana pudir­ka­kuna, chima iai­kug­rin­ga­pa.

¹ Taita Dius charami nukan­chita kaia­ku, pai kaska­ma iai­kug­rispa sama­rig­rin­ga­pa. Chi­manda, kam­kunata kaia­ku­ura, uian­gi­chi. ¡Ama­lai mai­kan, mana uias­paka, mana chima iai­kug­rin­tran­gi­chi! ² Nukan­chi­pas­mi Alli Willai­ta uiar­kan­chi; imasa­mi ñug­pa­manda­kuna uiar­ka­kuna: chasa­lla­ta. Pai­kuna, chi Alli Willai­ta uias­pa­pas, mana munar­ka­kuna­chu, suma iuia­rispa kaug­san­ga­pa­kuna. Chi­manda­mi pai­kuna­manda ñi imapi mana alli­lla tukurka. ³ Nukan­chika, chi Alli Willai­ta uiaspa suma iuia­rispa kaug­sas­pa­mi pai kaska­ma iai­kug­rispa sama­rig­rin­ga­pa kan­chi. Chasa­lla­ta­mi Taita Dius, nukan­chipa ñugpa­manda achala taita­kuna­manda willarka, kasa nispa:

Chimandami,

pai­kuna­wa rabia­rispa,

mana llullas­pa­lla nir­kani:

“Mana iai­kug­rin­ga­pa kan­kuna­chu nuka alpa karan­ga­pa niska­ma,

chipi sama­rig­rin­ga­pa”.

Kasapas. Taita Dius, kai alpata wiña­chispa, pai wiña­chii puchu­kas­paka, ñami sama­rirka. ⁴ Chasa­lla­ta­mi sug ñugpa­manda librupi kan­chisma pun­cha­manda willa­raiá, kasa nispa:

Taita Dius, ña tukui wiña­chis­paka,

kan­chis pun­cha­ma­mi samarka.

⁵ Ikuti­pas­mi kasa nirka:

Mana iaikug­rin­ga­pa kan­kuna­chu nuka alpa karan­ga­pa niska­ma,

chipi samarig­rin­ga­pa.

⁶ Chasa ni­raiag­pi­pas, charami alli ka, Taita Dius kaska­ma sug­kuna iai­kug­rispa sama­rig­rin­ga­pa. Chi ñug­pa­manda runa­kuna Alli Willai­ta uias­ka­kunaka, Taita Dius ima nis­kata mana alli­lla ruras­ka­kuna­man­da­mi mana pudir­ka­kuna, chima iai­kug­rispa sama­rig­rin­ga­pa. ⁷ Chi­manda­mi Taita Diuska, su­urapa sakirka. Chi su­uraka, kuna pun­cha­mi ni­raiá. Chasa­lla­ta­mi, atun mandag David sakiska librupi, achka wata­kunapi willa­raiá, ikuti kasa nispa:

Kuna puncha,

Taita Dius ima rimas­kata

kam­kuna uias­paka,

mana tukun­gi­chi mana uiag­kuna.

⁸ Josué suti Israel­manda runa­kunata mandag, Taita Dius alpa karan­ga­pa niska­ma pusaspa sama­chig­rig­pika, mani­ma­mi Taita Dius sug sama­rig­rin­ga­pa pun­cha­manda ni. ⁹ Chi­manda­mi chara alli ka, Taita Dius agllaska runa­kuna, pai kaska­ma iai­kug­rispa sama­rig­rin­ga­pa. ¹⁰ Imasa­mi Taita Dius, pai ima rura­kus­kata puchukaspa sama­rirka: chasa­lla­ta­mi mai­kan­pas, Taita Dius kaska­ma iai­kug­rispa, pai­pas ima rurai­kunata puchu­kaspa sama­rig­ringa. ¹¹ Chi­manda fuir­sa­ri­sun­chi, tukuipi alli ruraspa kaug­san­ga­pa; chasaka, Taita Dius kas­ka­ma iai­kug­rispa sama­rig­rin­ga­pa. Ima­sa­mi ñugpa­manda runa­kuna, mana uias­pa­lla, Taita Dius ima nis­kata mana ruraspa kar­ka­kuna: ¡ama­lai­lla­pas kam­kuna, chasa­lla­ta kan­tran­gi­chi!

¹² Diuspa Rimaika, kaug­sa­mi ka. Chi­wanka, tukui pudi­ri­mi ka. Iskan­dima afilaska machiti­sina­manda mas kuchug­sina­mi ka. Chasaka, alma u ispi­ri­tuta chaugpi­kama­sina­mi iaikú. Runa­kuna mai­tuku pakalla iuia­na­kus­ka­pi­pas­mi chaiagrí. Tukui imasa nukan­chipa iuiai­lla­pi muna­na­kus­ka­ta­pas­mi rigsí. ¹³ Taita Dius kikin wiña­chis­ka­kuna, ñi pipas mana pai­manda paka­kui pudin­ga­pa kan­chi­chu. Paipa ñawi, tukui­pi­mi alli­lla kawa­ku. Pai­ta­mi nukan­chi tukui ima ruras­kata iukan­chi willa­rig­ringa.

Nukan­chipa iaia sasir­duti, Jesús kag­manda

¹⁴ Taita Diuspa wam­bra Jesús, suma luarma iai­kug­rispa, nukan­chipa iaia sasir­dutimi tukug­sa­murka. Chi­manda­mi iukan­chi, pai­wa suma iuia­rispa kanga, mana sakis­pa­lla. ¹⁵ Nukan­chi samba­iaska ka­ura, pai Jesuska, nukan­chipa iaia sasir­duti kaspa, nukan­chi­manda iapa llaki­rispa, munan­mi aidan­ga­pa. Pai­pas­mi, kai alpapi nukan­chi­sina kaug­sa­ura, tukui pan­da­rii­kunapi urma­chinga­sina tukug­samuska karka. Chasa kag­pi­pas, ñi imapi pai mana panda­rirka­chu. ¹⁶ Chi­manda, kuiaska Taita Dius­pa laduma mana man­chas­pa­lla ima­pas mañan­ga­pa tupa­ri­sun­chi. Chasa mañag­pika, paika, nukan­chita suma uiaspa, lla­ki­ris­pa­mi kawanga. Chasa­lla­ta, nukan­chi ima­ura­pas ima minis­ti­na­ku­ura, nukan­chita suma kuiaspa aidan­gami.

¹ Kasapas. Judíu iaia sasir­duti­kuna, runa­kuna­pura­manda agllas­ka­mi kan­kuna; pai­kunaka, Taita Dius­pa ñawi ladu runa­kuna­manda kawa­rig­rin­ga­pa; chi­pika, pai­kunapa panda­rii­kuna­manda kama­ri­ku­kunata i animal­kunata wañu­chispa rupa­chispa kan­ga­pa­kuna. ² Iaia sasir­du­ti­kuna­ta­pas mana alli­lla iuiai­kuna­mi chaiá. Chi­manda­mi iukan­kuna, mai­kan mana iachas­pa­lla jiru rurag­kuna­manda lla­kii iukan­ga­kuna. ³ Mana alli­lla iuiai­kuna iaia sasir­du­ti­kuna­ta­pas chaiag­manda, runa­kunapa pan­da­rii­kuna­manda ufrinda rupa­chispa, pai kikin­kunapa pan­da­rii­kuna­man­da­pas­mi Taita Diusta ufrinda rupa­chii iukan­kuna.

⁴ Ñi pipas mana pudin­chu, kikin atun­ia­chi­rispa, iaia sasir­duti tukunga. Taita Dius­mi iaia sasir­du­ti­kunata agllá; imasa­mi Moi­sespa waugki Aaronta agllarka: chasa­lla­ta. ⁵ Cristo kikin­pas, mana atun­ia­chi­rispa iaia sasir­duti tukur­ka­chu. Taita Dius­mi paita suma atun­ia­chin­ga­pa agllarka, kasa nispa:

Kam, nuka­pa wam­bra­mi kangi.

Nukami kuna pun­cha kaug­sai karaiki.

⁶ Kasapasmi Taita Dius ñugpa­manda librupi Cristo­manda nirka:

Kam, ima­urapasmi mana puchuka­rin­ga­pa

sasir­duti ka­puangi.

Melki­sedekpa sasir­duti­pura­mi kangi.

⁷ Cristo, kai alpapi kaug­sa­ku­ura, sin­chi kapa­rispa i wakas­pa­mi Taita Diusta sumag­lla maña­kurka. Kikin Taita Dius, pudig­mi karka, wañuita paita kis­pi­chin­ga­pa. Pai Cristo suma manchai­wa mañaspa kag­man­da­mi Taita Dius paita uiarka. ⁸ Cristo, Taita Dius­pa wam­bra kas­pa­pas, iachai­kurkami, tukui lla­kii iukaspa, tukui ima Taita Dius munas­kata ruraspa purin­ga­pa. ⁹ Pai chasa tukui alli­lla ruras­paka, pai ima munas­kata tukui ruras­ka­kunata dil­tudu­pa kis­pi­chig­mi tukug­sa­murka. ¹⁰ Chi­manda­mi Taita Dius paita churarka, Melki­se­dek­sina iaia sasir­duti kan­ga­pa.

¡Ujala Cristowa suma iuia­riita kunga­rin­tran­gi­chi!

¹¹ Chi Melki­sedek­manda achka iacha­chin­ga­pa tiag­pi­pas, kam­kuna iapa alli­manda iuiai iukag­manda­mi manara pudin­chi, kam­kunata chasa tukui alli­lla iacha­chin­ga­pa. ¹² Achka wata­kuna­mi ña ialiska ka; iukar­kan­gi­chimi, kam­kuna­pas ña iacha­chispa kan­ga­kuna. Nig­pika, kam­kunata chaia­kumi, Taita Dius­manda ñugpata iacha­chis­ka­kunata sug­kunaka ikuti ikuti iuia­chispa iacha­chin­ga­pa. Llullu wawa­kuna lichi­lla upia­na­kug­sina­mi chara kan­gi­chi. Iukar­kan­gi­chimi, ña atun wiñaska kag­sina tukui mikui mikuspa kan­ga­kuna. ¹³ Lichi­lla upiag­sina kag­kunaka, chuchug wawa­kuna­sina­mi kan­kuna. Chasa kag­kunaka manara iachai­kun­kuna­chu, Dius­pa Rimaipi imasa willa­raias­ka­sina ima alli­lla u mana alli­lla kagta. ¹⁴ Ña atun wiñas­ka­kuna­mi pudin­kuna, tukui mikui mikuspa kag­sina kan­ga­kuna. Pai­kunaka ñami iachan­kuna, ima alli­lla u mana alli­lla kagta.

¹ Chi­manda, Cristo­manda ñug­pata iachai­kus­ka­kunata sakis­paka, mas iachai­ku­sun­chi, nukan­chi mas alli iuiaipi tukun­kama. Ña­mi kasa iachai­kur­kan­gi­chi: wañuima pusag jiru rurai­kunata sakin­ga­pa, Taita Dius­wa suma iuia­rin­ga­pa, baug­ti­sa­rin­ga­pa, Cristo­wa tukus­ka­kunata umapi maki imasa churan­ga­pa cha­iagta, wañus­ka­kuna kaugsa­rin­ga­pa kas­ka­manda i dil­tudu­pa jus­ti­siai tukun­ga­pa kas­ka­manda. Chi ñug­pata iachai­kus­ka­kunata mana ikuti ikuti chasa­lla­ta iachai­ku­na­ku­sun­chi. ³ Taita Dius chasa munag­pika, mas alli iuiaipi tuku­sun­chi.

⁴ Mai­kan­pas, paipa iuiai­kunata pun­cha­ia­chii tukuspa, Taita Dius kara­mus­kata iachaspa, Santu Ispi­ri­tuta chas­kispa, ⁵ Taita Dius kacha­muska Alli Willai­ta uiaspa iachaspa, samun­ga­pa pun­cha­kuna ima suma kan­ga­pa kaska­ta­pas iachaspa, ⁶ tukui chi­kunata sakig­taka mana pudi­rin­ga­pa kan­chu, ikuti Taita Dius­pagma tigra­chin­ga­pa. Chasa sakig­kunaka, Taita Dius­pa wam­brata ikuti kruspi kikin kla­baspa, tukui­kunapa ñawipi unz̈ag­sina­mi ruran­kuna. ⁷ Tamia iakuta alpa chu­pas­ka­wa, tra­ba­jag­kunapa tar­puska suma pukus­kata pallan­ga­pa tukug­pika, Taita Dius sumag­lla­mi kawá. ⁸ Ikuti mana suma ugsa­kuna ispi­na­kuna­lla tukug­pika, ñi imapa mana balin­chu. Chi­taka, Taita Dius mana sumag­lla­mi kawá. Chi­kuna­taka nina­ma sitan­ga­pag­lla­mi chaiá. Chasa­lla­ta­mi chi runa­kuna Taita Diusta sakig­kunata ruran­ga­pa ka.

Cristota suma iuiai­wa suia­na­kuspa, sin­chi iuia­riska­manda

⁹ Chasa nukan­chi rimas­pa­pas, alli­lla­mi iuian­chi, kam kuias­ka­kuna, suma kaug­sa­na­kuspa, dil­tudu­pa kis­pi­rin­ga­pa ri­na­kugta. ¹⁰ Taita Dius, tukuipi alli kaspa, kam­kuna pai­manda alli­lla rura­na­kus­kata mana kunga­rin­ga­pa kan­chu. Paita kuias­paka, paipalla kas­ka­kuna­ta­mi aidar­kan­gi­chi. Chasa­lla­ta kuna­ura­pas­mi aidas­pa­lla kan­gi­chi. ¹¹ Chi­manda­mi tukui kam­kuna­manda muna­na­kun­chi, chasa animu­lla­wa tuku­rii pun­cha­kama alli­lla ruras­pa­lla kaug­sa­na­kun­ga­pa; chasaka kam­kuna, imasa suia­na­kus­ka­sina alli­lla tukug­samun­ga­pa. ¹² ¡Ujala­lla­pas killa wangu tuku­na­kun­gi­chi! Chasa­paka, imasa­mi sug­kuna, Cristo­wa suma iuia­ris­kata mana sakis­pa­lla, Taita Dius ima kara­mun­ga­pa nis­kata chas­ki­nakú: chasa­lla­ta kam­kuna­pas, suias­pa­lla kaug­sa­na­kun­gi­chi.

¹³ Taita Diuska, mana pipas pai­manda mas atun tiag­manda, Abra­hamta ima ruran­ga­pa nis­kata munaspa, pai kikin­ta­mi chi nis­kata kawag churarka, ¹⁴ kasa nispa:

Ari, kamta iapa kuias­pa­mi

kawan­ga­pa kaiki.

Chi­wanka, kamba wam­bra­pa wam­brapa kati wam­bra­kunata sakin­ga­pa­mi kani,

iapa mira­chu­kuna.

¹⁵ Abra­ham mana sam­ba­ias­pa­lla suma iuiai­wa suia­kug­manda­mi, Taita Dius chasa ruran­ga­pa ni­raias­kata rurarka.

¹⁶ Runa­kuna, “Mana llu­lla­ni­chu” nin­ga­paka, pai­kuna­manda mas atun­ta­mi kawag chu­ran­kuna. Chasa kawag chu­rag­pika, pai­kuna ima ruran­ga­pa nis­kaka iukan­kunami chasa tukunga. ¹⁷ Chasa­lla­ta Taita Diuska, pai ima kara­mun­ga­pa nis­kata chas­kin­ga­pa kag­kunata sutipa kara­mun­ga­pa kas­kata kawa­chin­ga­pa­mi munarka. Nis­pa­mi nirka:

Nuka kikinmi chi nis­kata kawag chu­raspa niiki:

karamungapami kaiki.

¹⁸ Taita Dius mana llu­lla kan­chu. Pai ima kara­mun­ga­pa nis­kata mana pudin­chu, ikuti “Mana” nin­ga­pa. Kai iskai nis­ka­manda, pai kara­mun­ga­pa nis­ka­manda i mana llu­llas­pa­lla kag­manda­mi nukan­chi, Taita Diusta mañag­kuna, iapa sumag­lla iuia­na­kun­chi, nukan­chita kis­pi­chin­ga­pa kagta. Pai ima kara­mun­ga­pa nis­kata chas­kin­ga­pa iuiai­wa­mi suia­na­kun­chi. ¹⁹ Chasa iuias­paka, imasa­mi sug atun barku, saia­chi­diru llasa iru­wa cha­ri­raiá: chasa­sina­mi nukan­chipa suma iuiaita sin­chi cha­ri­raian­chi. Chi suma iuiai­wa­mi pudirí, Taita Dius kas­kapi atun linsu arka­raiaska ukuma iai­kug­rin­ga­pa.+ 6:19 San Mateo 27.51.²⁰ Chi uku­ma­mi Jesús iai­kug­rirka. Nukan­chi­manda­pas­mi iai­kun­ga­pa ñambi rurarka. Dil­tudu­pa­mi iaia sasir­duti chi ukupi tukurka. Melki­se­dekpa sasir­duti­pura­mi kidarka.

Melki­sedek­manda

¹ Chi Melki­sedekka, Salem pui­bluta atun mandag kaspa, tukui­kuna­manda mas atun Taita Dius­pa sasir­duti­mi karka. Abra­ham sug atun mandag­kuna­wa wañu­chi­na­kus­kapi miti­ku­chispa paipa wasi­ma kuti­ku­ura, chi Melki­se­dek­ka, tupag­rispa, kasa­mi nirka: “Taita Dius, kamta iapa kuiaspa kawa­pua­chu”. ² Chi­ura Abra­hamka, wañu­chi­na­kus­kapi tukui ima­pas tan­da­chis­kata, chun­ga­mandaka sug­mi Melki­se­dekta kararka.

Melki­sedek sutika ni­raian­mi: “Tukuipi alli­lla atun man­dag”. Salem ni­raian­mi: “Sumag­lla kaug­sai”. Melki­sedek, Salemta atun man­dag kaspa, ni­raian­mi: “Sumag­lla kaug­saita karag atun man­dag”. ³ Melki­se­dekpa taita, mama i paipa ñug­pa­manda achala taita­kuna­manda­pas mana iacha­rin­chu pi­kuna kagta. Pai tiag­samus­ka­manda i wañus­ka­manda­pas ñi ima mana iacha­rin­chu. Chasa kas­ka­mandaka, paika Taita Dius­pa wam­bra­sina dil­tudu­pa­mi sasir­duti ni­raiá.

Jesús, Levipa wam­bra­kuna­manda mas iaia sasir­duti kaska­manda

⁴ Iuia­rii­chi chi Melki­sedek, atun iaia sasir­duti kagta. Pai­ta­mi Abra­ham, nukan­chipa ñugpa­manda achala taita kaspa, wañu­chi­na­kus­kapi ima­pas tan­da­chis­kata, chun­ga­mandaka sug kararka.

⁵ Kasapas. Leví suti Abra­hampa wam­brapa wam­brapa kati wam­bra­kuna, pai­kuna­pas sasir­du­ti­kuna­mi kan­kuna. Pai­kuna­ta­mi chaiá, Moi­sés imasa ruran­ga­pa willa­raias­ka­sina, tukui runa­kunapa ima tias­kata, chun­ga­mandaka sug chas­kin­ga­pa. Chi Levipa wam­bra­kuna, Abra­hampa wam­brapa wam­brapa wam­bra­kuna kaspa, waug­kin­di­kuna ni­raiag­pi­pas, pai­kuna­ta­pas­mi chasa chas­kin­ga­pa chaiá. ⁶ Ikuti Mel­ki­se­dekka, Levipa wam­bra­kunapa wam­bra mana kas­pa­pas, Abra­ham ima tan­da­chis­kata, chasa­lla­ta chun­ga­manda sug­mi chas­kirka. Taita Dius Abra­hamta kara­mun­ga­pa nis­ka­ta­mi Melki­sedek kasa nirka: “Taita Dius, kamta iapa kuiaspa kawa­pua­chu”.

⁷ Mas atun ni­raiagmi mas uchu­lla­ta kasa nispa kará: “Taita Dius, kamta iapa kuiaspa kawa­pua­chu”. Chasa bin­di­sagka, mas atun­mi ka. Ñi pipas mana sug rig­cha nin­ga­kuna­chu. ⁸ Kai alpapi chun­ga­manda sug chas­kig sasir­du­ti­kuna, wañug­kuna­mi kan­kuna. Ikuti Melki­se­dek­mandaka, ñug­pa­manda librupi ni­raian­mi, kaug­sa­lla kan­ga­pa kagta.

⁹ Kasapasmi pudin­chi ninga: Leví, chun­ga­manda sug chas­kig, Abra­hampa wam­brapa wam­brapa wam­bra kas­pa­mi kikin Melki­se­dekta chasa­lla­ta karag­sina rurarka. ¹⁰ Abra­hamta Melki­sedek tupag­ri­uraka, Leví, paipa achala taita Abra­hampa kuir­pupi kag­sina­mi karka.

¹¹ Levipa wam­bra­kunapa wam­bra­kuna­ta­mi Israel­manda runa­kuna, Moi­sés ima ruran­ga­pa willas­kata chas­kir­ka­kuna iacha­chin­ga­pa. Chi willas­kata tukuipi alli­lla ruraspa kaug­san­ga­pa pudigpi­kunaka, mana­char chaian­ga­pa karka, sug Melki­sedekpa sasir­du­ti­pura kawa­rig­samun­ga­pa. Chi sasir­du­tika, Aarón suti Levipa wam­bra­kunapa kati wam­bra­pa­pura mana kan­chu. ¹² Sug rig­cha sasir­duti tru­ka­rig­samug­pika, chaian­mi Moi­sés ni­raias­ka­pas truka­rig­samun­ga­pa.

¹³ Nukan­chipa Iaia Jesus­man­da­mi ñug­pa­manda librupi chasa sasir­du­ti­manda willa­raiá. Paika, Levipa wam­bra­kunapa wam­bra mana kan­chu. Paipa ñug­pa­manda achala tai­ta­pura, ñi pipas sasir­duti mana kar­ka­chu. ¹⁴ Alli­lla­mi iacharí, nukan­chipa Iaia Jesuska, Judá suti runapa wam­bra­kunapa wam­bra kagta. Moi­sés willa­ku­ura, mana nirka, chi runapa wam­bra­kunapa wam­bra­kuna, sasir­duti kan­ga­pa kag­ta­kuna.

¹⁵ Sug Melki­sedek­sina sasir­duti kawa­rig­samus­ka­wa­mi alli­lla iachan­chi, sug rig­cha man­da­ra­ias­ka­pas truka­rig­samuska kagta. ¹⁶ Paika, imasa Moi­sés nis­kapi mai­kanpa wam­bra­kunapa wam­bra­kuna­manda kas­kapi mana sasir­duti tukug­sa­murka­chu. Mana ima­ura­pas puchu­ka­ri­diru kaug­sai iukas­pa­mi kikin sasir­duti tukug­sa­murka. ¹⁷ Kasa­mi, ñug­pa­manda librupi, Taita Dius pai­manda nirka:

Kam, ima­ura­pas mana puchu­ka­rin­ga­pa

sasir­duti­mi ka­puangi.

Melki­sedekpa sasir­duti­pura­mi kangi.

¹⁸ Ñugpa­manda Levipa wam­bra­kuna sasir­duti kan­ga­pa ni­raiaska anchu­chiimi tukurka, pai­kuna mana kis­pi­chig­kuna pudin­ga­pa kag­manda. ¹⁹ Moi­sés mandas­ka­waka ñi imapi mana alli­lla tukug­sa­mur­ka­chu. Chi mandaita anchu­chii tukus­ka­waka, tukui­manda mas alli­lla chas­kin­ga­pa iuiai­wa­mi ña suia­na­kun­chi. Chi suma iuiaita iukas­pa­mi Taita Dius­pagma kai­lla­ian­chi.

²⁰ Taita Dius, juras­pa­mi Iaia Jesusta chu­rarka, sasir­duti kan­ga­pa. Ikuti Levipa wam­bra­kunaka, sasir­duti tukuspa, pai mana juras­ka­mi kar­ka­kuna. ²¹ Iaia Jesus­ka, Taita Dius juras­ka­wa­mi sasir­duti tukug­samurka. Chasa­lla­ta­mi ñug­pa­manda librupi willa­raiá, kasa nispa:

Atun Taita Diuska jurarkami.

Sug rigchaka mana iuia­rin­ga­pa kan­chu.

Kasami nirka:

“Kam, ima­ura­pas mana puchu­ka­rin­ga­pa

sasir­du­ti­mi ka­puangi”.

²² Chimandami Jesús, Taita Dius­wa runa­kuna­wa ikuti sumag­lla tukun­ga­pa chaugpipi tukug­samurka; chasaka, ñugpa­manda iuia­ri­na­kus­ka­manda mas alli­lla tukun­ga­pa. ²³ Levipa sasir­duti­kunata wañui tiag­manda­mi achka sasir­du­ti­kuna tiag­samurka. ²⁴ Ikuti Jesuska, mana ima­ura­pas wañug­mi ka. Chi­wa­mi pai­lla dil­tudu­pa iaia sasir­duti ka. ²⁵ Chi­wanka, mai­kan pai­wa Taita Dius­pag­ma kai­lla­iag­kunata, pai kikin­mi dil­tudu­pa kis­pi­chin­ga­pa ka. Paika, ima­ura­pas kaug­sa­lla­mi kan­ga­pa ka. Chasaka, chi kai­lla­iag­kuna­manda­mi Taita Diusta mañas­pa­lla kan­ga­pa ka.

²⁶ Chimandami Jesusta minis­tir­kan­chi, nukan­chipa iaia sasir­duti kan­ga­pa. Paimi tukuipi ñi ima mana panda­rig ka. Ñi ima pan­da­rii­kuna­pi­pas mana urmas­pa­lla, tukui­pi­mi alli ka. Pai­ta­mi Taita Dius, pan­da­rig runa­kuna­manda anchu­chispa, suma luar awapi tia­ri­chig­rirka.

²⁷ Kasapas. Jesús mana kan­chu sug iaia sasir­du­ti­kuna­sina. Chi sug sasir­du­ti­kunata tukui pun­cha­kuna­mi chaiá, ñugpa kikin­kunapa pan­da­rii­kuna­manda ufrinda rupa­chin­ga­pa; nis­paka, sug­kuna­manda­pas. Ikuti Jesuska, sug bia­ji­lla­mi wañurka, ufrin­da­sina kikin tukuspa. ²⁸ Moi­sés ni­raias­kapi, pan­da­rig runa­kuna­mi agllai tukur­ka­kuna, iaia sasir­duti kan­ga­pa. Chi manda­raias­kata sakis­ka­ura­manda­mi Taita Diuska, juraspa, paipa wam­brata agllarka, iaia sasir­duti kan­ga­pa. Paipa wam­brata wiña­chir­kami, ñi ima­ura­pas mana pan­da­rig kan­ga­pa.

Dius­wa runa­kuna­wa mas alli­lla kan­ga­pa, Jesús chaugpipi­sina tukug­samuska­manda

¹ Nuka kam­kunata willa­kus­ka­manda, kasa­mi mas minis­tirí iachai­kun­ga­pa: chi iaia sasir­dutika, nukan­chi­manda­mi ka. Paimi suma luarpi iapa atun Taita Dius­pa man­da­diru alli ladu tia­rig­rirka. ² Chi­pika, sasir­duti ruran­ga­pa chaias­kata pai rurag­mi ka. Taita Dius sutipa kaug­sa­diru wasi uku­pi­mi chasa rurag ka. Chi wasika, runa­kuna saia­chiska mana kan­chu. Atun Taita Dius kikin­mi chi wasita saia­chiska ka.

³ Tukui iaia sasir­duti­kunaka agllas­ka­mi kan­kuna, kama­ri­ku­kunata i animal­kunata rupa­chispa, Taita Diusta kawa­chin­ga­pa. Chi­man­da­mi Jesus­ta­pas chaiarka, Taita Diusta ima­pas karan­ga­pa. ⁴ Kai alpapi ñami tia Moi­sés nis­kapi willa­raias­ka­sina Taita Diusta kama­ri­ku­kuna kawa­chig sasir­duti­kuna. Chi­manda Jesús, suma luar­ma sikan­ga­taka chara kai alpapi kag­pika, mana­char sasir­duti ñi ima­pas pai kan­tra. ⁵ Taita Dius­manda iuia­ri­diru linsu wasita Moi­sés ruran­ga­pa ka­uraka, Taita Diuska paita kasa­mi nirka:

Iuiarii. Imasami chi lumapi kawa­chirkaiki:

chasallatami tukui iukangi ruranga.

Chasawaka, sug luarpi suma rurai­kuna tias­ka­manda kawa­chig­sina­lla­mi chi sasir­du­ti­kuna kai alpapi Taita Dius­manda iuia­ri­diru wasi uku­pi rura­nakú. ⁶ Ikuti nukan­chipa iaia sasir­dutika chas­kir­kami, Taita Dius­manda tukuipi mas alli­lla ruran­ga­pa. Taita Dius­wa runa­kuna­wa ikuti sumag­lla tukun­ga­pa, pai­mi chaug­pi­pi tukug­samurka; cha­saka, ñug­pa­manda iuia­ri­na­kus­ka­manda mas alli­lla tukun­ga­pa. Taita Dius mas alli­lla ruran­ga­pa nis­ka­manda­mi chasa tukug­samurka.

⁷ Ñugpa iuiarinakuskawaka Taita Dius­wa runa­kuna­wa tukuipi alli­lla tukug­pika, mana­char tian­ga­pa karka iskaima iuia­ri­na­kun­ga­pa. ⁸ Ñi imapi mana alli­lla runa­kuna kas­ka­manda­mi ñugpa­manda libru­pi kasa ni­raiá:

Atun Taita Dius­mi kasa ni:

“Sug punchakunami chaia­mun­ga­pa ka,

Israel­manda i Juda­manda runa­kuna­wa

sug musu iuiaiwa

nukawa iuiarinakun­gapa.

⁹ Paikunapa ñugpamanda achala taita­kunata

nukapa makiwa Ejipto alpa­manda llugsi­chi­ura,

paikunawa iuiarir­kanchi;

chasaka mana kangapa kan­chu.

Paikunaka, chi suma iuia­rispa kaug­san­ga­pa ni­raias­kata

mana rurar­ka­kuna­chu.

Chimandami paikunata sakir­kani”.

¹⁰ Atun Taita Dius kasa­pas­mi ni:

“Chi punchakuna ialiska­ura­manda,

kasami nukawa

Israel­manda runa­kuna­wa

iuiarinakungapa kanchi:

nuka ima rurangapa nis­ka­kunata

pai­kunapa iuiai­pi­mi chu­ran­ga­pa kani.

Paikunapa sungupimi

imasa ruran­ga­pa kas­kata

iskribin­ga­pa kani.

Chasa ruraspaka,

paikunapa Taita Dius­mi kan­ga­pa kani.

Paikunaka, nuka agllaska runa­kuna­mi ka­puan­ga­pa kan­kuna.

¹¹ Ñi pipas mana iukan­ga­pa kan­kuna­chu,

rigsidu­pura u waugkindi­pura

iacha­chi­na­kuspa nin­ga­kuna:

‘Atun Taita Diusta rigsi­sun­chi’.

Uchulla i atun kag­kuna,

tukuikunami rigsi­wan­ga­pa kan­kuna.

¹² Nukami pai­kunata mana alli­lla ruras­ka­kunata pasin­siaspa kunga­rin­ga­pa kani.

Pai­kuna panda­ris­ka­kuna­ta­pas mana ikuti iuia­rin­ga­pa ka­ni­chu”.

¹³ Taita Dius ikuti runa­kuna­wa sug musu iuia­ri­na­kui­manda willa­uraka, ñugpata iuia­ri­na­kus­kaka mana balig­samurka­chu; ña rukumi tukurka.

Kai alpapi i suma luarpi Dius­manda iuia­ri­diru wasi­kuna­manda

¹ Ñugpa­manda runa­kuna­wa iuia­ris­ka­pika willa­raiarkami, imasa Taita Diusta kungu­rin­ga­pa. Kai alpapi pai­manda iuia­ri­diru wasi imasa ruran­ga­pa kag­ta­pas­mi willarka. ² Chi linsu wasi­pika, kasa­mi karka. Iai­kug­ri­dirulla ukuka ni­raiar­kami: “Taita Dius­pa uku”. Chi uku­pika, bila saia­chi­diru­mi tiarka. Sug misa­pas­mi tiarka, kama­riku tanda chu­ra­diru. ³ Iskaima linsu arka­raiaska ukuka ni­raiar­kami: “Taita Dius­pa­lla tukui­kuna­manda mas alli uku”. ⁴ Chi­pika, insinsu rupa­chin­ga­pa kurita ruraska altar i Taita Dius­wa runa­kuna­wa iuia­ri­na­kuska suti baul­mi tiarka. Chi baulpi tukui laduta kuri­wa mai­tus­ka­mi karka. Chi baulpi tiar­kami sug kuri manga; chi­pika, “maná” suti mikui waka­chiska. Aaronpa tawina tugtu­riska i Taita Dius runa­kuna­wa iuia­riska iskri­bi­raiaska pamba rumi­kuna­pas­mi chipi tiarka. ⁵ Chi baul awa­lla, iskai runa­kuna­sina alas­iug­kuna­mi kar­ka­kuna. Chi­kunaka, Taita Dius suma pun­cha­lla kagta kawa­chig­sina­mi kar­ka­kuna. Chi­kunaka, pan­da­rii­kuna­manda ani­mal­kunapa iawar talli­chi­diru­ta­mi alas­kuna­wa kil­pag­sina sum­bra­ia­chig kar­ka­kuna. Chi­kuna­mandaka, kuna­ura mana chaia­wan­chu, mas riman­ga­pa.

⁶ Chi­kuna ña chasa alli­chiska ka­ura, sasir­duti­kunaka iai­kug­ri­dirulla uku­ma­mi tukui pun­cha­kuna iai­kun­kuna, imasa chaias­ka­sina Taita Diusta kungu­rispa mañan­ga­pa. ⁷ Ikuti iskaima ukumaka, iaia sasir­duti­lla­mi wata watapi sug bia­ji­lla iai­kui iuká. Chima iai­kun­ga­paka, ani­mal­kunapa iawarta apas­pa­mi iaikú. Kikin mana iachas­pa­lla pan­da­ris­ka­kuna­manda i sug runa­kuna mana iachas­pa­lla pan­da­ris­ka­kuna­manda­pas­mi chi iawarta Taita Diusta karag­sina kawa­chigrí.

⁸ Chasa­kuna­waka, Santu Ispí­ritu kasa­mi nukan­chita iacha­chí:

chi ñug­pata wasi chara tiag­pika, Taita Dius­pa­lla tukui­manda mas alli ukuma manara alli ka iai­kun­ga­pa. ⁹ Chi tukui tias­ka­kunaka ni­raian­mi, kuna pun­cha­kuna­manda runa­kuna kawaspa, “Taita Dius­pag­pi chasa­char ka” iuia­rin­ga­pag­lla. Taita Diusta chipi kawa­chiska kama­ri­ku­kuna­wa i animal­kuna rupa­chis­ka­kuna­wa, paita kungu­rig­kunata mana pudi­rin­chu, chi­kuna­lla­wa pan­da­rii­kunata anchu­chii tukun­ga­pa. ¹⁰ Chi nis­ka­kuna­waka, ima mikun­ga­pa, ima upian­ga­pa, suma armaspa kuir­puta mai­lla­rig­sina­lla­mi willa­raiá. Chi­kunaka, Taita Dius sug rig­cha ruran­kama­lla­mi balir­ka­kuna.

¹¹ Kuna­ura Cristoka, ña­mi kawa­rig­samurka. Pai, iaia sasir­duti kas­pa­mi tukui allita apa­murka. Taita Dius kaug­sa­diru wasi, suma luar uku­pi­mi pai iaia sasir­duti ka; chi wasika, tukui­kuna­manda mas suma alli­lla­mi ka. Chi mana kan­chu runa­kuna ruraska wasi. Kai alpa­manda mana kan­chu. ¹² Taita Dius­pa­lla kaska uku­ma­mi Cristo iai­kug­rirka. Mana chi ukuma iai­kug­rirka­chu, kabritupa ñi wagrapa iawar apaspa. Pai kikinpa iawar kruspi icha­chis­ka­wa­mi iai­kug­rirka. Sug bia­ji­lla­mi chi ukuma iai­kug­rirka; cha­saka, nukan­chita tukui pan­da­ris­ka­kuna­manda dil­tudu­pa kis­pi­chin­ga­pa.

¹³ Kari wagrapa i kabritupa iawarta panda­rig runa­kunapa awa­sina­ma­mi shabima­chi­dur kan­kuna. Chasa­lla­ta, warmi wagrata altarpi rupa­chispa, chi uchpata runa­kunapa awa­sina­ma­mi sita­dur kan­kuna. Chasa ruras­paka ni­raian­mi tukui kuir­pu armas­ka­sina tukug­sa­mug­ta­kuna; chasaka, Dius­pa ñawipi alli­lla kawa­rin­ga­pa. ¹⁴ Chasa kag­pika, Cristopa iawar­waka iapa mas achka­mi pudirí. Pai kikin, ñi ima­pi­pas mana mapa­sina kaspa, kuir­pupi wañurka, Taita Diusta ufrin­da­sina kikin tukuspa. Paipa ispi­ri­tuka, ñi ima­ura­pas mana wañun­chu. Paipa iawar­waka nukan­chipa mana suma iuiai­kuna­ta­mi suma­ia­chig­samú, nukan­chi mana dil­tudu­pa wañun­ga­pa; cha­saka, kaug­sag Taita Dius ima munas­kata alli­lla ruraspa kaug­san­ga­pa.

¹⁵ Cristo chasa ruras­ka­wa­mi Taita Dius­wa runa­kuna­wa chaug­pipi pai tukug­samurka; cha­saka, ikuti musu iuiai­wa iuia­ri­na­kun­ga­pa. Ñugpata Taita Dius­wa runa­kuna imasa kaug­san­ga­pa iuia­ris­kata panda­rig­manda­mi kis­pi­chin­ga­pa Cristo wañug­sa­murka; cha­saka, imasa Taita Dius karan­ga­pa nis­ka­sina, pai agllas­ka­kuna mana puchuka­ri­diru suma kaug­sai­ta chas­kig­rin­ga­pa. ¹⁶ Kaug­sa­kuspa, ima sakin­ga­pa willa­raiaska iskri­tura tiag­pika, chi fir­mag wañu­ura­manda­mi chi iskri­tura balí. ¹⁷ Chi fir­mag chara kaug­sa­kug­pika, mana­ra balí. Wañu­ura­manda­mi chi iskri­tura balí. ¹⁸ Chi­man­da­mi Taita Dius­wa ñug­pa­manda runa­kuna­wa iuia­ris­kaka, wañu­chiska ani­mal­kunapa iawar­wa alli­lla tukug­sa­murka. ¹⁹ Moi­sés, tukui imasa ruraspa kaug­san­ga­pa ni­raias­ka­kunata tukui runa­kuna­ta­mi willarka. Nis­paka, puka milma aisaspa, hisopo suti bir­bina sacha­sina­ta­mi watarka. Chi­wanka, kari wag­rapa i kabri­tupa iawar iaku­wa cha­pu­chis­pa­mi kuiu­chirka. Chi­wa­mi chi nis­kata willa­raiaska libru awata tukui chipi kag­kunapa awa­sinama sha­bi­ma­chirka, ²⁰ kasa nispa:

Kai iawarwami

tukui imasa Taita Dius kam­kuna­wa iuia­ris­kaka

allilla tukug­samurka.

²¹ Chasallata, Taita Dius­manda­lla linsu wasita i tukui Taita Dius ima nis­kata ruran­ga­pa chi ukupi tiaska awa­ta­pas­mi iawar­wa sha­bi­ma­chirka. ²² Moi­sés ima ruran­ga­pa willas­kapi ni­raian­mi: ñalla tukui­ta­mi chaiá, iawar­wa mai­llas­ka­sina tukug­samun­ga­pa. Iawar mana icha­chig­pika, pan­da­rii­kuna­ta­pas mana pasin­siai tukun­chu.

Cristo wañuspa, panda­rii­kunata anchu­chiska­manda

²³ Kai alpapi linsu wasi ukupi ima tias­ka­kuna ni­raian­mi suma luarpi kag­sina. Chi ukupi tias­ka­kuna Taita Dius­pa­lla kag­manda­mi chaia­kurka, animal­kunapa iawar­wa mai­llag­sina ruran­ga­pa. Ikuti suma luarpi tias­ka­kuna maillag­sina ruran­ga­paka, mas alli­lla ufrindapa iawar­mi minis­tirí. ²⁴ Taita Dius­manda­lla linsu wasi, runa­kuna kai alpapi ruraska, chi wasika, suma luarpi chasa tiagta kawa­chin­ga­pag­lla­mi ka. Chi wasi ukuma, Cristo mana iai­kurka­chu. Suma luar­ma­mi Cristo iai­kug­rirka; chi­pika, Taita Dius­pa ñawipi kag­rispa, tukui nukan­chi­manda maña­kun­ga­pa. ²⁵ Judíu iaia sasir­duti­kuna, wata wata­pi­mi tukui­kuna­manda mas alli ukuma iai­ku­dur kan­kuna, animal­kunapa iawarta apaspa. Ikuti Cristoka, ufrinda­sina kikin tukuspa, mana mai­tuku biaji wañur­ka­chu. ²⁶ Chasa kag­pika, kai alpa tiaska­ura­manda­ta iukan­trami, achka biaji wañunga. Kai tuku­rii pun­cha­kunaka, sug biaji­lla­mi Cristo kawa­rig­samurka. Samus­paka, ufrin­da­sina wañurka, runa­kunapa pan­da­rii­kunata anchu­chin­ga­pa.

²⁷ Imasa­mi tukui runa­kunata chaiá, sug biajilla wañun­ga­pa; nis­paka, Dius­pa ñawi ladu jus­ti­siai tukug­rin­ga­pa: ²⁸ chasa­lla­ta­mi Cristo sug bia­ji­lla ufrinda­sina wañug­sa­murka, achka­kunapa panda­rii­kunata anchu­chin­ga­pa. Ikutimi parisma kawa­rig­samun­ga­pa ka. Mana samun­ga­pa kan­chu, pan­da­rii­kunata anchu­chin­ga­pa. Paita iuia­rispa suia­na­kugta dil­tudupa kis­pi­chin­ga­pa­mi samun­ga­pa ka.

¹ Moisés ima ruran­ga­pa willa­raias­kaka, kipa samun­ga­pa kaska alli­kunata amsa­pi­sina kawa­chig­sina­lla­mi karka. Chi samun­ga­pa ni­raias­kaka mana kar­ka­chu. Chi­manda, chi nis­kapi willa­raias­ka­sina Taita Dius­manda ani­mal­kunata rupa­chin­ga­pa tukui wata kai­lla­iag­kunaka, chi rupa­chis­ka­kuna­wa mana ima­ura­pas pudin­ga­pa kan­kuna­chu, tukuipi alli tukun­ga­pa­kuna. ² Chi ufrin­da­kuna­wa tukuipi alli tukun­ga­pa pudi­rig­pika, mana pan­da­rig ña ni­raiagta iuia­rig­pi­kunaka, ¿mana­chu sakin­tra­kuna, ufrin­da­kunata rupa­chin­ga­pa? ³ Chasa­paka, chi rupa­chis­ka­kuna­wa­mi pan­da­rig kag­ta­kuna tukui wata­kuna iuia­rin­kuna. ⁴ Kari wagrapa i kabri­tupa iawar­lla­wa mana pudi­rin­chu, pan­da­rii­kunata anchu­chin­ga­pa.

⁵ Chi­wanka Cristo, kai alpama tiag­samus­paka, Taita Diusta kasa­mi nirka:

Kama­riku i rupa­chiska animal­kunata

ña mana munangichu.

Nukata sug kuir­pu­mi kara­war­kangi,

nuka aichaiug runa tukun­ga­pa.

⁶ Runa­kunapa panda­rii­kuna­manda ufrinda­kuna

i animalta rupa­chis­ka­kuna,

kamba ñawipi ña mana suma kawa­rin­chu.

⁷ Chimandami kasa niiki:

“Nukami samuni,

kam kikin Taita Dius ima muna­kus­kata ruran­ga­pa”.

Chasallatami nuka­manda

ñugpa­manda librupi willa­raiá.

⁸ Cristo, kasami ñugpa nirka: “Kama­riku i rupa­chiska animal­kunata ña mana munangichu. Cha­sa­lla­ta ufrinda­kuna, kamba ñawipi ña mana suma kawa­rin­chu”; chi­kuna­waka, panda­rii­kunata anchu­chin­ga­pa. Moi­sés ima ruran­ga­pa willa­raiag­pi­pas, chasa­mi nirka. ⁹ Nis­paka, kasa­pas­mi nirka: “Nuka­mi samuni, kam kikin Taita Dius ima muna­kus­kata ruran­ga­pa”. Chasa nis­kaka ni­raian­mi, ñugpa­manda ufrinda­kunata Cristo anchu­chispa, pai kikin ufrinda tukun­ga­pa. ¹⁰ Sug biaji­lla­mi Jesu­cristo, kikinpa kuir­puta ufrinda­sina chu­raspa wañurka, Taita Dius imasa munas­ka­sina. Chasa­mi wañurka, nukan­chi, panda­rii­kunata anchu­chii tukuspa, Taita Dius­pa­lla kan­ga­pa­kuna.

¹¹ Judíu sasir­duti­kuna­ta­mi chaiá, kada pun­cha mai­tuku ani­mal­kunata wañu­chispa rupa­chin­ga­pa. Chasa kada pun­cha rupa­chi­na­kug­pi­pas, mana ima­ura­pas pudi­rin­ga­pa kan­chu, runa­kunapa pan­da­rii­kunata anchu­chin­ga­pa. ¹² Ikuti Jesu­cristoka, runa­kunapa pan­da­rii­kuna­manda sug bia­ji­lla­mi wañurka, ufrinda­sina kikin tukuspa. Chasa tukuipi alli­lla ruras­paka, Taita Dius­pa alli ladu­mi tia­rig­rirka. ¹³ Chi­pi­mi suia­ku, “paita mana munag­kunata apag­rispa, pai­pa chaki saru­diru ukuma tukui­kunata chu­ran­kama”.

¹⁴ Sug biaji­lla­mi Cristo ufrinda­sina wañurka; chasaka, Taita Dius­pa­lla kas­ka­kuna ima­ura­pas tukuipi alli kan­ga­pa. ¹⁵ Chasa­lla­ta­mi Santu Ispí­ritu willá, kasa nukan­chita nispa:

¹⁶ Atun Taita Dius kasa­mi ni:

“Chi puncha­kuna ialiska­ura­manda,

kasami nuka­wa pai­kuna­wa iuia­ri­na­kun­ga­pa kan­chi:

nuka ima ruran­ga­pa nis­ka­kunata

pai­kunapa iuiai­pi­mi

chu­ran­ga­pa kani.

Paikunapa sungupimi

imasa rurangapa kas­kata

iskribin­ga­pa kani”.

¹⁷ Nispaka, kasapasmi ni:

Pai­kuna panda­riska i mana alli­lla ruras­ka­kuna­ta­pas

mana ikuti iuia­rin­ga­pa ka­ni­chu.

¹⁸ Chasa­manda, nukan­chi panda­rii­kunata ña pasin­siai tukus­ka­man­daka, mana ikuti minis­ti­rin­chu, sug ufrinda­kuna panda­rii­kuna­manda rupa­chin­ga­pa.

Taita Dius­pagma kailla­iai iukaska­manda

¹⁹ Chi­manda, taita­kuna i mama­kuna, Jesuspa iawar­manda­mi pudin­chi, Taita Dius­pa­lla tukui­kuna­manda mas alli ukuma mana manchas­pa­lla iai­kun­ga­kuna. ²⁰ Musu ñambi­sina­mi pai rurarka, nukan­chi suma kaug­saita iukan­ga­pa. Atun linsu arka­raias­kata llikig­sina­mi rurarka, pai kikinpa kuirpu wañuspa. ²¹ Nukan­chi Dius­pa wasi ni­raias­ka­kuna­manda, pai iaia sasir­duti­ta­mi iukan­chi. ²² Chasa­manda, pai Jesus­wa tukuipi suma iuia­rispa, Taita Dius­pagma mana man­chas­pa­lla kailla­ia­sun­chi. Pai­mi tukui nukan­chipa mana alli iuiai­kunata anchu­chirka. Nukan­chipa kuir­pu­ta­pas mana mapa iaku­wa­mi arma­chig­sina rurarka. ²³ Taita Dius ima ruran­ga­pa nis­kata pai ruran­mi, mana kunga­ris­pa­lla. Chi­manda­mi iukan­chi, paita mana samba­ias­pa­lla suia­na­kunga. ²⁴ Iuia­chi­na­ku­sun­chi, tukui nukan­chi­pura kuia­na­kuspa, alli­lla ruraspa kaug­san­ga­pa. ²⁵ Nukan­chi Cristota iuia­rin­ga­pa sug­lla­pi tanda­ri­ura, sug­kunaka mana nukan­chi­wa sug­lla­pi kan­kuna; mana pai­kuna­sina rura­sun­chi. Chasa­paka, Jesu­cristo samun­ga­pa pun­cha ñalla chaia­mukus­kata iachas­pa­mi iukan­chi, sug­lla­pi tanda­rispa, nukan­chi kikin­pura iuia­chi­na­kunga, suma kaug­san­ga­pa.

²⁶ Sutipa Alli Willai­ta ña alli­lla iachaspa, nukan­chi kikinpa munai­wa panda­rig­pika, ñi ima ufrinda, chi panda­rii­kunata anchu­chin­ga­pa mana tian­ga­pa kan­chu. ²⁷ Chasa pan­da­rig­kunaka, man­chai­wa­mi suia­na­kun­ga­pa kan­kuna, Taita Dius, rabia­rispa, pai­kunata dil­tudu­pa ninama sitan­ga­pa kag­manda. Chi nina rupa­kus­ka­ma­mi Taita Diusta mana munag­kunata sitan­ga­pa ka. ²⁸ Mai­kan­pas Moi­sés ima ruran­ga­pa willas­kata mana uias­pa­lla jiru rura­chu: iskai u kim­sa­kuna, chasa kawaspa, willag­pi­kunaka, paita chaian­mi, mana lla­kis­pa­lla wañu­chin­ga­pa. ²⁹ Chi­manda, mai­kan­pas Taita Dius­pa wam­brata sarug­sina ruraspa, paipa iawarta: “Ianga, mana bali­mi ka” nispa, kuiag Santu Ispi­ri­tuta unz̈aspa kaug­sa­na­kug­taka, ¿mana­chu iuian­gi­chi: chasa rurag­kunata chaianga, Taita Dius asku­rinti rabia­rispa, pai­kunata jus­ti­sian­ga­pa kagta? Chi iawar­wa­mi Taita Dius runa­kuna­wa musu iuia­ris­kaka alli­lla tukug­sa­murka. Chi iawar­lla­wan­ta­mi chi runa­kuna­pas Taita Dius­pa­lla tukug­samur­ka­kuna. ³⁰ Kasa­mi iachan­chi: atun Taita Dius­mi nirka:

Nukatami chaia­wa­ku,

jiru ruraikunata randi­chin­ga­pa.

Kasapasmi niraiá:

Atun Taita Diusmi

paipa runakuna ima ruras­ka­kunata kawa­chin­ga­pa ka.

³¹ ¡Ai, Taita Dius mana wañugpa makipi urmag­rin­ga­pa, asku­rinti­mi man­cha­wa­ku, pai­lla­tata jus­ti­siai rurag kag­manda!

³² Kam­kunaka iuia­rii­chi chi ñugpa pun­cha­kuna Taita Dius kam­kunapa iuiai­kunata pun­cha­ia­chis­kata. Chi pun­cha­kunaka, iapa lla­kii iukaspa, mai­kan­kuna­wa maka­na­kug­sina­mi kar­kan­gi­chi, Cristo­wa iuia­ris­kata mana sakin­ga­pa. ³³ Mai­kan­kunaka, tukui­kunapa ñawipi piai kamiimi tukur­kan­gi­chi. Ikuti sug­kunaka, chasa lla­kii iukas­ka­kuna­wa sug­lla­pi­sina­mi tukur­kan­gi­chi. Chasaka, kam­kuna­pas­mi llakii iukar­kan­gi­chi. ³⁴ Karsilpi wich­ka­raias­ka­kuna­manda iapa llakii iukas­pa­mi kawag­rir­kan­gi­chi. Sug­kunaka, ima iukas­ka­kunata kichui tukus­pa­pas, iapa alli iuia­chii­wa ianga­mi saki­na­kur­kan­gi­chi, kasa iuia­rispa: sug luar­pika, mana ima­ura­pas tuku­rin­ga­pa mas suma iukai­kuna­ta­mi iukan­ga­pa kan­chi. ³⁵ Chi­manda­mi nii­ki­chita: chi suma iuiaita mana kunga­ris­pa­lla kai­chi. Chi iuiaita mana sakis­pa­lla kag­pi­kunaka, iapa suma karai­ta­mi sug luarpi chas­kig­rin­kan­gi­chi. ³⁶ Kam­kuna iukan­gi­chimi mana samba­ias­pa­lla kan­ga­kuna, ima lla­kii­kuna cha­iag­pi­pas. Chasaka, Taita Dius ima munas­kata kam­kuna ruraspa kag­pika, pai ima karan­ga­pa nis­ka­ta­mi chas­kig­rin­kan­gi­chi. ³⁷ Kasa­mi ñug­pa­manda librupi Cristo­manda ni­raiá:

Mana unaillami chi samun­ga­pa kag chaia­mun­ga­pa ka.

Mana unaian­ga­pa kan­chu.

³⁸ Nuka­pa ñawipi alli kawa­rig runaka, nuka­wa suma iuia­ris­pa­lla­mi kaug­sanga.

Ikuti llakii­kunata kawaspa mancha­rispa saki­wag­pika,

paitaka mana munan­ga­pa ka­ni­chu.

³⁹ Nukan­chika, Taita Diusta chasa sakig­pura mana kan­chi­chu. Chi sakig­kunaka, dil­tudupa nina­ma­mi sitai tukun­ga­pa kan­kuna. Ikuti nukan­chika, Taita Dius­wa suma iuia­rispa kag­manda­mi kis­pi­rin­ga­pa kan­chi.

Taita Dius­wa suma iuia­rii­manda

¹ Taita Dius­wa suma iuia­rii ni­raian­mi, pai ima ruran­ga­pa nis­kata suia­na­kuska sutipa tukug­samun­ga­pa kas­kata iachai. Chasa suma iuia­rispa, iachan­chimi, mana kawas­pa­pas, sutipa kagta. ² Nukan­chipa ñugpa­manda taita­kuna­pas chasa­lla­ta iuia­rig­manda­mi Taita Dius pai­kunata nirka: “Alli­mi kan­gi­chi”.

³ Taita Dius­wa suma iuia­ris­pa­lla­mi iachan­chi, tukui luar­kuna paipa iachai­lla­wa wiña­chiska kagta. Chi­manda, kuna­ura kawa­ris­ka­kuna, mana kawa­ri­diru­kuna­wa­mi rurarka.

⁴ Abel suti runaka, Taita Dius­wa suma iuia­ris­pa­mi, sug ubija­kuna wañu­chispa, Dius­pa ñawipi rupa­chirka. Ikuti paipa waugki Kaín kama­riku kara­kus­kaka, Dius­pa ñawipi mana suma­mi kawa­rirka. Chi­manda­mi Taita Dius, Abelta nirka: “Mana panda­rig­mi tukungi”. Chasa kag­manda­mi, paita suma kawaspa, chas­kig­sina rurarka. Abel wañuska kas­pa­pas, pai suma iuia­ris­ka­waka kawa­chin­mi, nukan­chi imasa kaug­san­ga­pa.

⁵ Enok suti runaka, Taita Dius­wa suma iuia­ris­pa­lla kaug­sa­kug­manda­mi sug luarma apai tukurka, mana wañus­pa­lla. Paita kai alpapi maska­na­kus­pa­pas, mana tarir­ka­kuna­chu. Taita Dius­mi paita aparka. Ñugpa­manda librupi kasa­mi ni­raiá: pai manara apai tukug­pita, Taita Dius­pa ñawipi alli kag­ta­mi paita kawa­rirka. ⁶ Taita Diusta suma iuia­riska­lla­wa­mi pudirí, paipa ñawipi sumag­lla kawa­rin­ga­pa. Taita Dius­pag­ma kai­lla­ian­ga­pa, iukan­chimi iuiai­lla­pi iuia­ringa pai tiagta, i pai­lla­ta­ta mai­kan paita maska­na­kugta alli karag kagta.

⁷ Noé suti runaka, Taita Dius­lla­wa suma iuia­ris­pa­mi sug atun barku rurarka. Ima tukun­ga­pa kagta Taita Dius willa­ura, manara chasa tukugta kawas­pa­pas, Taita Dius ima nis­kata uias­pa­lla­mi chi bar­kuta rurarka; chasaka, tukui pai­wa kaug­sa­na­kus­kata kis­pi­chin­ga­pa. Taita Dius ima nis­kata uiaspa, suma iuia­ris­pa­mi kai alpapi kaug­sa­na­kus­kata kawa­chirka, pai­kuna puchuka­rii tukun­ga­pa kagta­kuna. Chasa suma iuia­rig­manda­mi paipas mana panda­rig ni­raiag­sa­murka.

⁸ Abra­ham suti runaka, Taita Dius kaia­ura, pai­wa suma iuia­ris­pa­mi uias­pa­lla rirka, Taita Dius alpa karan­ga­pa kaska­ma chaiag­rin­ga­pa. Maima chaiag­rin­ga­pa kagta mana iachas­pa­lla­mi rirka. ⁹ Taita Dius­wa suma iuia­ris­pa­mi, chi alpa Taita Dius paita karan­ga­pa ni­raias­kapi ialig­sinalla kaug­sag­rirka. Karpa wasi­kuna­lla­pi­mi kaug­sa­kurka. Chasa­lla­ta­mi ñugpa­manda taita Isaak i Jakob­pas kaug­sar­ka­kuna. Pai­kuna­ta­pas­mi Taita Dius chi alpa­lla­tata karan­ga­pa ni­raiarka. ¹⁰ Abra­ham suia­kur­kami, mana ima­ura­pas wag­lli­chin­ga­sina pui­blupi suma luarpi kaug­sag­rin­ga­pa. Chi pui­bluta, Taita Dius­mi ka alli iuia­rispa saia­chig.

¹¹ Sara suti Abra­hampa war­mi­pas, chasa­lla­ta Taita Dius­wa suma iuia­ris­pa­mi, ña awila kas­pa­pas, Taita Dius­pa iapa iachai­wa kara­muska wam­bra iukag­samurka. Saraka, ima Taita Dius nis­kata iuia­ris­pa­lla­mi karka, chasa sutipa ruran­ga­pa kagta. ¹² Abra­ham­pas, diruku ña wañun­ga­sina ka­ura­mi chi wam­bra tia­pug­sa­murka. Chasa­pas­mi paipa wam­brapa wam­brapa kati wam­bra­kuna, iapa achka tukug­sa­mur­ka­kuna. Ima­sa­mi awapi iapa achka istri­lla­kuna tia; ima­sa­mi lamar iaku patapi kaska­ju­kunata mana kuin­tan­ga­pa pudirí: chasa­lla­ta­mi Abra­hampa wam­brapa wam­brapa kati wam­bra­kuna, achka tukug­samur­ka­kuna.

¹³ Tukui chi ñugpa­manda taita­kuna i mama­kuna, Taita Dius karan­ga­pa ni­raias­kata mana chas­kis­pa­lla­mi wañur­ka­kuna. Chi runa­kuna kaug­sa­na­ku­ura­mi, Taita Dius­wa suma iuia­rispa, kipama imasa kan­ga­pa kas­kata karu­man­da­lla kawa­na­kug­sina iuiaspa, alli iuia­chii­wa kar­ka­kuna. Chasa­lla­ta­mi kawa­chi­rir­ka­kuna, kai alpapi ialig­kuna­sinalla kagta­kuna. ¹⁴ Chasa kawa­chi­rig­kuna ni­raian­kunami, chara kikin­kunapa chaiag­ri­diru alpata maskaspa puri­na­kugta. ¹⁵ Pai­kuna mai­manda llug­siska alpama kutin­ga­pa muna­na­kug­pika, chasa­mi pudin­tra­kuna. ¹⁶ Chasa pudig­pi­pas, iapa alli alpa­ma­mi chaiag­rin­ga­pa suia­na­kurka. Chika ni­raian­mi sug luar­manda suma luar. Chi­manda­mi Taita Dius sakirí, pai­kunapa Tai­tiku ni­raian­ga­pa. Pai­kuna­manda­mi sug suma pui­blu alli­chiska suia­ku.

¹⁷ Abra­ham Taita Dius­wa suma iuia­ris­ka­manda­mi, Taita Dius maña­ura, paipa wam­bra Isaakta apirka, ufrinda­sina wañu­chispa rupa­chin­ga­pa; chasaka, uia kagta kawa­chi­rin­ga­pa. Paipa sug­lla wam­bra­ta­mi wañu­chin­ga­pa karka, Taita Dius chasa mañag­manda. ¹⁸ Chi wam­bra­manda­mi Taita Dius niska karka: “Isaak­manda­mi achka wam­bra­kuna mira­pug­samun­ga­pa kangi”. ¹⁹ Abra­hampa iuiai­pika iachar­kami, Taita Diuska wañus­ka­kuna­ta­pas kaug­sa­chin­ga­pa pudigta. Chi­wa­mi paipa wam­brata wañun­ga­pa ni­raiagta kaug­sa­chig­sina ikuti kaug­sai­lla sakirka.

²⁰ Isaakka, Taita Dius­wa suma iuia­ris­pa­mi nirka, paipa wam­bra­kuna Jakobta i Esauta, Taita Dius iapa kuiaspa kawan­ga­pa kagta.

²¹ Jakobka, Taita Dius­wa suma iuia­ris­pa­mi, ña wañukuspa nirka, Josepa iskai wam­bra­kunata, Taita Dius iapa kuiaspa kawan­ga­pa kagta. Chasa nis­paka, tawina­wa saia­rispa, Taita Dius­ta­mi nirka: “Kam, iapa alli­mi kangi”.

²² Josepas, Taita Dius­wa suma iuia­ris­pa­mi, ña wañukuspa willar­ka, Israel­manda runa­kuna chi Ejipto alpa­manda llugsin­ga­pa kag­ta­kuna. Chasa iachas­pa­mi nirka: “Kam­kuna, llugsi­na­ku­ura, nuka­pa tullu­kunata apa­puaspa rin­gi­chi, kam­kuna chaiag­rin­ga­pa kas­kapi pam­bag­rin­ga­pa”.

²³ Moisespa taita­kunaka, Taita Dius­wa suma iuia­ris­pa­mi, Moi­sés tiag­samus­kata kimsa killa pakaspa cha­ri­na­kurka. Pai­kuna, Moi­sés iapa suma wawa kagta kawas­pa­mi, chi alpata iaia mandag “Tukui kari wam­bra­kunata wañu­chin­gi­chi” nig­pi­pas, mana manchas­pa­lla pakaspa cha­ri­na­kurka.

²⁴ Moisespas, Taita Dius­wa suma iuia­ris­pa­mi, ña wiña­ura, mana munarka, chi iaia mandagpa warmi wam­brapa wam­bra ni­raian­ga­pa. ²⁵ Panda­rii­kuna­wa mana unai­lla kusi­kuspa kaug­sanga­taka, munar­kami, Taita Dius agllaska runa­kuna­wa sug­lla­pi llakii iukas­ka­kuna­wa kaug­san­ga­pa. ²⁶ Ejiptopi iapa iukag kan­ga­pa muna­rin­ga­taka, mas­mi iuia­rispa karka: “Nukaka, sug kis­pi­chig samun­ga­pa kagta iuia­ris­pa­mi piñai kamii­pas tukusa”. Taita Dius ima karan­ga­pa kas­kata kawag­sina, chasa iuiai­wa­mi iuia­ris­pa­lla karka.

²⁷ Taita Dius­wa suma iuia­ris­pa­mi, Moi­sés, Ejiptota iaia man­dag rabia­ri­kus­kata mana man­chas­pa­lla, chi alpa­manda llug­sispa rirka. Taita Dius mana kawa­rigta kawa­kug­sina iuia­ris­pa­lla­mi rirka. ²⁸ Taita Dius­wa suma iuia­ris­pa­mi Moi­sés nirka: “Wañu­chiska ubijapa iawar­wa pun­guta cha­ri­kuska kaspi­kunata awin­gi­chi. Chasaka anjil wañu­chig, Is­rael­manda runa­kunapa ñugpa kari wam­bra­kunata mana wañu­chin­ga­chu”. Ñug­pata chasa ruras­kaka, judiu­kunapa pas­kua­mi ni­raiá.

²⁹ Ejipto­manda llugsispa, Israel­manda runa­kuna, ri­na­kuspa, Taita Dius­wa suma iuia­ris­pa­mi, Puka Kucha suti atun iakuta, ñambi­sina paskaspa, chaki­chiska alpapi chim­bar­ka­kuna. Ikuti Ejipto­manda­kuna kalpa­chi­na­kugka chasa­lla­ta chim­ba­na­ku­ura, chi iaku wich­ka­rirka. Chi­wanka, tukui­kuna­mi puchu­ka­rir­ka­kuna.

³⁰ Taita Dius­wa suma iuia­rii­wa­mi, Israel­manda runa­kuna Jerikó suti pui­bluta muiu­chi­raiaska atun pata kincha muiundi kan­chis pun­cha muiuska ka­uraka, chi kin­cha pai­lla urmarka.

³¹ Rahab suti kari­sapa war­mika, Taita Dius­wa suma iuia­ris­pa­mi chi alpata paka­lla kawan­ga­pa kachaska runa­kunata sumag­lla chas­kispa pakarka. Chi­manda­mi, Taita Diusta mana uiag­kuna wañu­chii tuku­ura, paika kis­pi­rirka.

³² ¿Ikuti sug­kuna­mandachu willa­sa­ki­chita? Mana pagta­ri­wan­chu, Jedeon­manda, Barak­manda, San­son­manda, Jefte­manda, David­manda, Samuel­manda i Santu Ispi­ri­tu­wa rimag­kuna­manda willan­ga­pa. ³³ Pai­kuna, Taita Dius­wa suma iuia­ris­pa­mi, alpa­kunapi atun man­dag­kuna­wa wañu­chi­na­kuspa miti­ku­chispa, imasa chaias­ka­sina suma ruraspa man­dar­ka­kuna. Sug­kunaka, Taita Dius­wa suma iuia­ris­ka­manda­mi pai ima karan­ga­pa nis­kata chas­kir­ka­kuna. Sug­kunaka, Taita Dius­wa suma iuia­ris­pa­mi liun­kunapa simi­kuna­ta­pas wich­kar­ka­kuna. ³⁴ Chasa­lla­ta sug­kunaka, man­chan­ga­sina nina­kuna­ta­mi wañu­chir­ka­kuna. Sug­kunaka, atun machi­ti­wa wañu­chin­ga­pa­mi kis­pi­rir­ka­kuna. Sug­kunaka, samba­iaska mana pudig­sina kas­pa­pas, pudig­mi tukur­ka­kuna. Iapa pudig tukuspa, sug­nig­manda sul­da­du­kuna wañu­chi­na­kun­ga­pa samug­kuna­ta­mi miti­ku­chir­ka­kuna. ³⁵ Chasa­lla­ta sug war­mi­kunaka, wañuska wam­bra kas­kata kaug­sa­mi chas­kir­ka­kuna.

Ikuti sug­kunaka, pai­kunapa suma iuia­riita sakis­paka, wañu­chin­ga­pa kis­pi­ris­ka­mi kan­tra­kuna. Mana sakig­mandaka, iapa nanai­wa­mi wañu­chii tukur­ka­kuna. “Taita Dius nukan­chita kaug­sa­chi­ura, mas suma kaug­sai­ta­mi iukan­ga­pa kan­chi” iuia­ris­pa­mi chasa wañu­chii tukur­ka­kuna. ³⁶ Sug­kunaka, kamii, unz̈ai, asu­tii­mi tukur­ka­kuna. Sug­kunaka, wataspa kar­sil­pi wich­kai­mi tukur­ka­kuna. ³⁷ Sug­kunaka, rumi­wa piai tukus­pa­mi wañur­ka­kuna. Sug­kunaka, siru­chii­wa chaugpi chaugpi kuchui tukus­pa­mi wañur­ka­kuna. Sug­kunaka, atun machi­ti­wa­mi wañu­chii tukur­ka­kuna. Sug­kunaka, Taita Dius­wa suma iuia­riita mana sakig­manda­mi, llug­si­chii tukuspa, mana katanga iukaspa, iukar­ka­kuna ubijapa i kabri­tupa karata chu­ra­ris­pa­lla puri­na­kunga. Iapa minis­ti­du­kuna­mi kaug­sa­na­kurka. Pai­kunata mana munar­ka­kuna; nis­pa­mi kamispa unz̈aspa kal­pa­chir­ka­kuna. ³⁸ Chi alli runa­kuna­taka mana chaia­kurka, kai alpa­manda­lla iuiai­wa kaug­sa­na­kuska chaug­pipi kaug­san­ga­pa. Pai­kuna llug­si­chii tukus­ka­manda, mana wasi iukaspa, sachuku, chusa sitaska alpa­kuna­pi­mi purin­ga­pa chaiar­ka­kunata. Pata alpa uku­ma­mi iukar­ka­kuna kaug­sa­na­kunga.

³⁹ Tukui pai­kuna Taita Dius­wa suma iuia­ris­ka­kuna­manda­mi pai­kunata nirka: “Alli­mi kan­gi­chi”. Chasa nig­pi­pas, pai karan­ga­pa ni­raias­kata manara chas­kis­pa­lla­mi wañur­ka­kuna. ⁴⁰ Taita Dius, nukan­chi­manda iuia­rispa, ñugpata karas­ka­kuna­manda mas suma­mi karan­ga­pa nirka; chasaka, pai­kuna­wa nukan­chipas sug­lla­pi tukuspa, tukui­kuna alli­llapi tukug­rin­ga­pa.

Jesus­lla­ta kawakug­sina iuia­rispa kaug­sa­sun­chi

¹ Chasaka, achkakunami nukan­chita kawa­chi­rir­ka­kuna, imasa Taita Dius­wa suma iuia­rispa kaug­sagta­kuna. Chi­man­da, nukan­chita ima llasa­kug­sina tukui panda­rii­kunapi urma­chin­ga­pa kas­kata saki­sun­chi. Cha­saka, mana samba­ias­pa­lla kal­pa­kug­sina rura­sun­chi, suma luar­ma chaiag­rin­ga­pa. ² Jesus­lla­ta kawa­kug­sina iuia­rispa kaug­sa­sun­chi. Pai­mi nukan­chita suma iuia­chig­samurka. Pai­lla­ta­ta­mi iuia­chii apa­ku, nukan­chi tukuipi pai­wa suma iuia­rin­ga­pa. Pai kikin iachar­kami, wañus­ka­ura­manda, iapa suma kun­tin­tu­lla kan­ga­pa kagta. Chi­manda­mi saki­rirka kruspi kla­bai tukun­ga­pa, pin­gaita mana man­chas­pa­lla. Chasa­manda­mi Taita Dius­pa manda­diru alli ladu tia­rig­rirka.

³ Iapa panda­rig­kuna paita kamispa, unz̈aspa kagpi­kuna­pas, pai Jesuska upa­lla­mi karka. Pai chasa pasas­kata iuia­rin­gi­chi. Chasa iuia­ris­ka­wa kam­kuna pasa­na­kus­pa­pas, mana sai­kus­ka­sina iuia­rin­gi­chi. Mana samba­ias­pa­lla kan­gi­chi. ⁴ Kam­kuna, panda­rii­kuna­wa maka­na­kug­sina kas­pa­pas, manara iukan­gi­chi­chu Jesus­manda wañu­chii tukun­ga­pa iuia­na­kunga.

⁵ Kasapas. Taita Dius kam­kunata iuia­chis­kaka, ñapash kunga­ri­na­kun­gi­chi. Paipa wam­bra­kuna­ta­sina­mi ñugpa­manda librupi kasa kam­kunata nirka:

Nukapa wambra,

atun Taita Dius kamba alli­llapa iuia­chispa llaki­chig­pika,

mana ningi: “Mana uiasachu”.

Pai piñagpika,

mana samba­iangi.

⁶ Atun Taita Dius kuias­ka­kuna­ta­mi

iuia­chispa llakichí.

Paipa tukui kuiaska wam­bra ni­raias­ka­kuna­ta­mi

chasallata asutig­sina rurá.

⁷ Chasa iuia­ris­paka, Taita Dius kam­kunata llaki­chig­pi­pas, upalla kan­gi­chi. Kam­kuna paipa wam­bra­kuna ni­raias­ka­manda­mi chasa llaki­chii tukun­gi­chi. Mai­kan taita­pas, pai kikinpa wam­bra­ta­mi asutí. ⁸ Chasa­lla­ta Taita Dius, tukui paipa wam­bra ni­raias­ka­kuna­ta­mi asutig­sina rurá. Chi­manda, kam­kunata mana chasa llaki­chig­pika, pai kikinpa wam­bra mana­char kan­tran­gi­chi.

⁹ Kasapas. Nukan­chi uchu­lla wam­bra­kuna ka­ura, nukan­chipa kai alpa­manda taita­kuna nukan­chita asu­tig­mandaka, pai­kunata suma uiaspa kuias­pa­mi kaug­sar­kan­chi. Chi­mandaka, ¿mana­chu nukan­chita chaiá, Taita Dius kaug­sai karagta suma alli­lla uian­ga­pa; chasaka, alli kaug­saita cha­rin­ga­pa? ¹⁰ Nukan­chipa kai alpa­manda taita­kuna, pai­kunaka imasa chaias­ka­sina­mi sug wata­kuna­lla nukan­chita iuia­chispa asu­tir­ka­kuna. Nukan­chi alli­lla kan­ga­pa­mi Taita Dius nukan­chita su­uraka asu­tig­sina rurá; chi­wanka nukan­chi, pai­wa tukuipi alli runa­kuna tukug­samun­ga­pa. ¹¹ Asu­ti­uraka, pita­pas mana alli iuia­chin­chu. Chasa­paka, iapa­mi naná. Chasa pasas­paka, iachai­kug­kunaka, alli­lla ruraspa, sumag­lla­mi kaug­san­ga­kuna.

¹² Chasa­manda, kam­kunapa sai­kuska maki­kunata, kam­kunapa samba­iaska kungur­kunata musuia­chig­sina rurai­chi kam­kunapa iuiaipi. ¹³ Chasa­lla­ta, alli ñambi kas­kata kati­na­kug­sina kaug­sai­chi; chasaka mana alli­lla ñambipi puri­na­kuspa chaki kiwis­kaka, chi­ura­manda ambi­rispa, alli ñambita mana wistuia­chis­pa­lla katig­sina suma iuia­rispa kaug­sa­na­kun­ga­pa.

¡Ujala­lla­pas Taita Dius rimaskata wabutin­gi­chi!

¹⁴ Tukui­kuna­wa sumag­lla kaug­sa­na­kun­ga­pa iuiai­wa kan­gi­chi. Chasa­lla­ta, Taita Dius­manda­lla kaug­san­ga­pa iuiai­lla­ta apa­na­kun­gi­chi. Mana chasa kaug­sas­paka, ñi pipas manima pudin­ga­pa kan­kuna­chu, Iaia Jesusta kawan­ga­pa. ¹⁵ ¡Ujala­lla­pas Taita Dius­pa suma kuiaita sakispa kunga­rin­gi­chi! ¡Ama­lai mai­kan, mana alli ugsa­kunapa angu­sina iukaspa, kam­kunapa iuiaita waglli­chig­samun­tra­kuna; chasa­waka achka­kuna, puchu­ka­rig­sina tukug­samun­ga­pa­kuna! ¹⁶ ¡Ujala pipas, kari warmi­wa pan­da­ri­chu­kuna! ¡Ujala Esau­sina Taita Dius ima karan­ga­pa kas­kata wabu­ti­chu­kuna! Chi runaka, ñugpa wam­bra kas­pa­pas, ima taitata chas­kin­ga­pa kas­kata sug­lla mikui­wa­mi trukarka. ¹⁷ Kam­kuna, Esau­manda kasa­mi iachan­gi­chi: manan­cha unai­pika, paipa taitata maña­kurka: “Taita Dius, kamta iapa kuiaspa kawa­pua­chu” nin­ga­pa; chi­ura, pai­manda mana chasa chaiarka, mikui­wa katuska kag­manda. Mai­tuku waka­kug­pi­pas, mana alli karka ima ruranga.

¹⁸ Kasapas. Kam­kunata mana chaiar­ka­chu, kai alpa­manda lumapi chaiag­rin­ga­pa. Israel­manda runa­kuna­mi chi Sinaí suti lumama chaiag­rir­ka­kuna. Chi­pika, nina sindi­mi rupa­kurka. Iapa iana tuta tukuska, sin­chi waira­wa­mi tamia­kurka. ¹⁹ Sin­chi bututu­sina­mi uia­rirka. Iapa sin­chi rimai­pas­mi uia­rirka. Chi rimaita uias­paka, mañar­ka­kunami, mana mas rima­ku­chu. ²⁰ Taita Dius ima ni­kus­kata uias­paka, wañunga­sina iuia­chig­manda­mi chasa mañar­ka­kuna. Kasa­mi Taita Dius nirka:

Runa u ima animal­pas

kai lumama tupa­rig­rig­pika,

rumi­wa piaspa [u flichaspa]

wañu­chi­chu­kuna.

²¹ Chi lumapi iapa man­chan­ga­sina kawa­rig­manda­mi Moi­ses­pas nirka: “Nuka­pas, asku­rintimi man­chai­wa chugchukuni”.

²² Ikuti kam­kunaka, Taita Dius ima­ura­pas kaug­sagpa pui­blu­ma­mi chaiaska ni­raian­gi­chi. Chimi suti ka suma luarpi Sión luma u Jeru­salén pui­blu. Chi­pi­mi iapa achka waranga waranga anjil­kuna kan­kuna. Sug­lla­pi­mi kusi­kunakú. ²³ Chi­lla­pi­ta­mi ñugpa­manda Taita Dius­pa wam­bra­kuna­pas sug­lla­pi kan­kuna. Pai­kuna, suma luarpi kaug­san­ga­pa willa­raiaska libru­pi­mi iskribi­ra­iaska iukan­kuna. Taita Dius tukui­kunata jus­ti­siai rurag­pag­ma­mi chaiaska ni­raian­gi­chi. Chi­pi­mi alli runa­kunapa alma­kuna kan­kuna. Chi runa­kuna, tukui pan­da­rii­kuna alli­llapi tukus­ka­mi kan­kuna. ²⁴ Jesus­pag­ma­mi chaiaska ni­raian­gi­chi. Pai­mi, Taita Dius­wa runa­kuna­wa chaug­pipi tukug­samurka; chasaka, ikuti musu iuiai­wa iuia­rig­samun­ga­pa. Kruspi kla­baska wañuska iawar­wa­mi chasa rurarka. Paipa iawar, mana Abel­pa­sina ni­raian­chu, Taita Dius randi­chin­ga­pa. Nukan­chita pasin­sian­ga­pa­mi ni­raiá.

²⁵ Kam­kuna, ¡ujala­lla­pas Taita Dius rimas­kata wabutin­gi­chi! Ñug­pata kai alpapi Taita Dius iuia­chispa rimas­kata wabutig­kuna, paipa rabia­manda mana kis­pi­rir­ka­kuna­chu. Suma luar­manda iuia­chispa rimamus­kata nukan­chi wabu­ti­sun­chi; chika manima kis­pi­rin­ga­pa kan­chi­chu. ²⁶ Taita Dius kikin ñugpata Moi­sesta rima­ura, kai alpa­pas­mi iapa chug­chu­rirka. Kuna­uraka, pai nir­kami:

Ikutimi nuka chug­chu­chin­ga­pa kani alpa­lla­ta, manima.

Sug luartapasmi chug­chu­chin­ga­pa kani.

²⁷ Chasa nis­kaka ni­raian­mi, Taita Dius kikin ruras­kata kuiu­chispa anchu­chin­ga­pa kagta. Ikuti mana kuiu­chi­diru kas­ka­kunaka, chasa­lla­mi tian­ga­pa kan­kuna. ²⁸ Taita Dius suma man­da­kus­ka­ta­mi mana pipas kuiu­chin­ga­pa pudí. Chipi nukan­chi iai­kug­rin­ga­pa kag­manda, Taita Diusta: “Pai Siñur” ni­sun­chi. Paita suma man­chaspa, tukui iuiai­wa, pai imasa muna­kus­ka­sina, “Kam, iapa alli­mi kangi” ni­sun­chi. ²⁹ Imasa­mi nina, tukui rupa­chí: chasa­mi nukan­chipa Taita Dius ka.

Taita Diusta imasa kun­tin­ta­chin­ga­pa rurai iukaska­manda

¹ Kam kikin­pura kuia­na­kus­kata mana saki­rii­chi. ² Mana kunga­rin­gi­chi, kam­kunapa wasima mai­kan chaiag­rig­kunata sumag­lla chas­kin­ga­pa. Mai­kan­kuna, wasipi sumag­lla chas­kis­paka, anjil­kuna­ta­mi pi kagta mana iachas­pa­lla ñugpata chas­kir­ka­kuna.

³ Karsilpi wich­ka­raias­ka­kunata kawag­rin­gi­chi; imasa­mi kam­kuna­pas pai­kuna­wa sug­lla­pi wich­ka­raian­tran­gi­chi: chasa. Mai­kan piai tukuska nanai­kuna­wa kas­kata iuia­rin­gi­chi, kam kikin­kunapa kuir­pupi kag­sina.

⁴ Tukui kasaraska kag­kunaka, mana panda­ris­pa­lla kam kikin­pura sumag­lla kuia­na­kuspa kaug­sai­chi. Mai­kan­pas sugpa warmi­wa kari­wa siri­ris­ka­taka, Taita Dius­mi jus­ti­siai ruran­ga­pa ka.

⁵ Kulkita iapa kuiaspa muna­rig­kuna mana kan­gi­chi. Chasa­paka, kam­kuna ima iukaska­lla­wa alli­lla kan­gi­chi, kasa iuia­rispa: Taita Dius­ka nirkami:

Mana sakisakichu.

Ñi imaurapas mana kunga­ri­sa­ki­chu.

⁶ Chimandami nukanchi, mana manchas­pa­lla nin­chi:

Atun Taita Diusmi ka nukata aida­wag.

Chimandami mana manchani

maikan runapas jiru rura­wan­ga­pa iuiaspa kas­kata.

⁷ Ñugpata Diuspa Rimai kam­kunata iacha­chig taita­kuna­manda iuia­rii­chi. Pai­kuna imasa­mi sumag­lla kaug­sar­ka­kuna wañun­kama: chasa­lla­ta kam­kuna­pas, Jesu­cristo­wa suma iuia­rispa kaug­sai­chi.

⁸ Jesu­cristoka, ñugpa­manda­ta, kuna­ura, ima­ura­pas pai­lla­ta­ta­mi ka.

⁹ Mana saki­rin­gi­chi, ima sug rig­cha sug rig­cha iacha­chis­ka­wa pan­da­chii tukun­ga­pa. Chi iacha­chig­kuna nin­kunami: “Kaita mikun­ga­pa, alli­mi ka. Ikuti chita mikun­ga­paka, michan­mi”. Chasa ni­na­kus­kata uian­ga­taka, mas alli­lla­mi ka, Taita Dius­pa suma kuiai­wa iuia­rispa, kam­kunapa iuiaita tukuipi alli­lla cha­rin­ga­pa. Chasa ni­na­kus­kata uiag­kuna­taka ñi ima­pi­pas mana alli­lla tuku­pur­ka­chu.

¹⁰ Jesús ufrinda­sina wañus­ka­manda, kuna­ura sug musu altarmi iukan­chi. Judíu sasir­duti­kuna Dius­manda­lla wasipi pai­manda rurag­kuna, mana pudin­kuna­chu chi musu altar­manda­ta mikunga. ¹¹ Taita Dius­pa­lla tukui­kuna­manda mas alli uku­ma­mi iaia sasir­duti, animal­kunapa iawarta panda­ris­ka­kuna­manda apá. Ikuti chi animal­kunapa kuir­pu­taka, runa­kuna kaug­sa­na­kus­ka­manda llugsi­chis­pa­mi rupa­chig­rin­kuna. ¹² Chasa­lla­ta Jesus­pas, pui­blu­manda llug­si­chii tukus­pa­mi wañu­chii tukurka; chasaka, pai kikinpa iawar­wa runa­kuna Taita Dius­pa­lla tukug­samun­ga­pa­kuna. ¹³ Chi­manda­mi nukan­chi­ta­pas chaia­ku, Jesus­wa tukun­ga­pa munaspa, ñug­pata man­das­ka­kunata sakin­ga­pa, mas­ki­pas pai­sina unz̈ai tukun­ga­ta­pas.

¹⁴ Ima­ura­pas mana puchu­ka­diru pui­bluka kai alpapi mana iukan­chi­chu. Mas nispa samun­ga­pa sug pui­blu­ta­mi suia­na­kun­chi. ¹⁵ Chi­man­da­mi iukan­chi, ima­ura­pas Jesus­wa Taita Diusta ninga: “Kam, iapa suma atun­mi kangi”. Chasa nis­ka­waka pai­manda kama­ri­ku­sina­mi ni­raiá. Taita Diusta iuia­rispa, iapa suma atun kagta ni­sun­chi. ¹⁶ Cha­sa­lla­ta, mana kun­ga­rin­gi­chi, alli­lla ruraspa, mana iukas­ka­kunata mai­lla­lla­pas karan­ga­pa. Chasa ruras­ka­wa­pas kama­ri­ku­sina­mi ni­raiá. Chasa ruras­ka­mi, Taita Dius­pa ñawipi sumag­lla paita kawarí.

¹⁷ Kam­kunata iacha­chig taita­kuna ima nis­kata sumag­lla uiaspa ruran­gi­chi. Pai­kuna­ta­mi chaiá, kam­kunapa almata kawaspa, Dius­pa ñawipi ainig­rin­ga­pa. Pai­kunata sumag­lla uiai­chi; chasaka pai­kuna­pas, suma kun­tin­tu­lla kan­ga­pa­kuna. Kam­kuna mana uiag­manda, pai­kuna llakii­wa kam­kunata iacha­chin­ga­pa chaiag­pika, kam­kunata ñi ima­pi­pas mana alli­lla tukun­ga­pa kan­chu.

¹⁸ Nukan­chi­manda Taita Diusta maña­puai­chi. Iachan­chimi nukan­chipa iuiai alli­lla kagta. Tukuipi alli­lla ruraspa kaug­san­ga­pa­mi munan­chi. ¹⁹ Suma iuia­ris­pa­mi maña­na­kui­ki­chita: Taita Diusta maña­puai­chi, nukata utka­lla kam­kuna­pagma ikuti kacha­wachu.

Taita Diusta iapa suma atun kagta nispa, puchuka­riska­manda

²⁰ Taita Dius sumag­lla kaug­saita kara­mug­mi nukan­chipa Iaia Jesús wañus­kata kaug­sa­chirka. Paipa iawar­wa­mi Taita Dius­wa nukan­chi­wa iuia­ri­na­kun­ga­pa dil­tudu­pa alli­lla rurag­samurka. Pai­mi ka tukui runa­kuna paipa ubija ni­ra­ias­ka­kunapa iaia kawag. ²¹ Taita Dius­lla­tata kam­kunata iuia­chi­chu, tukuipi alli kan­ga­pa; chasaka, pai imasa munas­ka­sina alli­lla ruran­ga­pa­kuna. Chasa­lla­ta, Jesu­cristo­wa tukui nukan­chita pai kikin imasa muna­kus­ka­sina rura­chu. Cristota ima­ura­pas ni­sun­chi: “Kam, iapa suma atun­mi kangi”. Chasa kachu.

²² Kam taita i mama­kunata mañai­ki­chitami: nuka kam­kunata iuia­chis­ka­manda pasin­sia iuka­wai­chi. Mana achka rimai­kuna­lla­wa­mi kacha­na­kui­ki­chita.

²³ Kasa iachai­chi: nukan­chipa waugki Timo­teo, wich­ka­ra­ias­ka­manda kacha­rii­si tukurka. Pai nuka­pag­ma utka­lla chaia­mug­pika, iskan­di­kuna­mi kam­kunata kawag­ri­sun­chi.

²⁴ Kam­kunata tukui iacha­chig taita­kunata: “Puangi” ni­puan­gi­chi. Tukui Dius­pa­lla kag­kuna­ta­pas: “Puangi” ni­puan­gi­chi. Italia alpa­manda kag­kuna­mi kam­kunata: “Puangi” ni­nakú.

²⁵ Taita Dius, tukui kam­kunata sumag­lla kawa­pua­chu.