TITO

¹ Nene Pawulo, umukami va Nguluvi na umwigendo va Yesu Kilisito, ngwandika. Nene ndimuhagule ukulukangasa ulufuuwo lwa avahagule va Nguluvi na uwukagule uwuling’ana na isa uwelu, ² lwe uluhuvi lwa ukupelwa uwumi wa mbepali we Nguluvi yesilongagi uwudesi, atuhuvise uwumi wuwo, pidaha hilo wesigilavanga imisika, ³ na pegikwilye imisika, awuvisile pawelu ukukola ulukani lwakwe. Nene ndapelitwe ulukani ulo ndalike ukugendela mululagilo lwa Nguluvi, umupoki vetu. ⁴ Ngukwandikila veve Tito ve mwanangu va nachene ukukola ulufuuwo lwetwihanga mbetuli. Ngukusukila uwuwuya na uwikalakunoga ukuhuma kwa Nguluvi Dada, na ukuhuma kwa Kilisito Yesu, umunyakutukombola. ⁵ Ndakulesile ku Kilete sambi uwuyapise mbesili ise sisilawuyapwa wunofu, na ukuhagula avavina va amakanisa mu boma mbesili: Wiwukage uwulagise wangu. ⁶ Umuvina va likanisa lumuvaje avelage munu yesimwananga kinu, avelage yeina umung’inetu yumwi swe, na avanakwe luvavaje vavelage yevafuuvitwe, vesivipulisa ukuta vanyamabatu nambi avagaya kwipulika. ⁷ Pakuva umwimilisi va likanisa umwene ye muvisikisiwa va ikipigo cha Nguluvi, lumuvaje avelage munu yesimwananga kinu. Alava munyalwitupyo, munyalilakali, mugaasi, munyamabatu apangi muhatufu, ⁸ Lumuvaje avelage mudeke na yeiwenda ing’ani ingolofu. Lumuvaje avelage mulele, mugolofu, munyanumbula nzelu, na munyachoga. ⁹ Lumuvaje inatilage hilo lula ulukani ulwihuvilwa ndawe mwe lukwigwisiwa. Ipo pepene peahwana ukuvakangasa avangi imitima ukukola inzigiso isa nachene na ukuvawulila pawelu uwananzi wa vala avibesa inzigiso siso. ¹⁰ Pakuva, povali avanu wolofu, na hilo vala vevapitwike ukuhuma mu lufuuwo lwa i Kiyudaya, vala avagaya kwipulika, vevakuvayasa avangi kwa uwupuva wawo. ¹¹ Lutuvaje tupese ing’ani sawo, pesi ndahihyo iva vakuvasasing’asa mbevali kwa ukwigisa ing’ani sesivivagilwa ukwigisa vipiga lulo si kwa lunofu nda, vihosa ulwa ukwambula amagobole. ¹² Na uyumwi va avavisi vawo, ye yumwene nave Mukilete, atige, “Avakilete vilongaga uwudesi mbepali vindawe amakoko amahambuka, vahatufu kangi vagata!” ¹³ Nave alonzile neke atumbule ulwa nachene, na ukwimila lulo lukuvaje uvakalipilage hilo, sambi vave na ulufuuwo ulukwilaniche. ¹⁴ Valava pevibatilisa isimo ingaya kinu sa Kiyudaya na uwulagise wa avanu uwukuvasila vala avibihila isa nachene. ¹⁵ Mbefili fyesiwe kwa vala avanu avevesiwe; neke kisukuli chechesiwe kwa vala avaafu na vesivafuuvitwi, pakuva inziyiwuko na luluhala lwawo lwaafwike. ¹⁶ Avanu avindawe iwo vakwiyigilisa nda vamusele Nguluvi neke ukwimila ifipigo fyawo vakumubihila. Iwo vanyakuvifya avanu pakomi kangi vagaya kwipulika nawo sivikwila mulukani lwa uwunofu lwelweluvesaga.

¹ Neke veve lukuvaje udalikage inzigiso ingolofu. ² Uvalongelage avavaha ukuta luvavaje vavelage vasikimafu, vavelage vatuunafu na valele; avakwilaniche mulufuuwo lwawo, uwende na uwukangalisi. ³ Lwindahihyo uvalongelage na avavina avang’inetu vavelage na imigendele minyachoga kwa Nguluvi, valava vasongela, apangi vanyawingi va uwugaasi. Luvavaje vigisage ing’ani inofu, ⁴ Sambi vavasovelese vamwayuva avadodo vave vanyawende kwa avagosi vawo na avanawo, ⁵ vavelage vatuunafu, na avesiwe, valolelage wunofu isa mukaye sawo, vadeke na vanyachoga kwa avavawo, sambi ulukani lwa Nguluvi lulemwe ukubedalwa. ⁶ Lwindahihyo, uvasukanisage na avilambo nawo vavelage vasikimafu. ⁷ Mwa mbesili veve uvelage wi munu yevakukwiga mumigendele iminofu, uvelage wi musikimafu na munyakitulo peukwigisa. ⁸ Ing’ani sako silava na uwubangabanga wewuvesaga; sambi avatavangu vako vapuve pesi valuweni ulukani ulubi lwevalonga ukwimila hwehwe. ⁹ Avanyawingi luvavaje vavelage na ichoga kwa avavina vawo na ukuvanogela mwa mbesili. Valibesa nawo, ¹⁰ nambi ukuva na kiwokowoko. Ulungi na lulo luvavaje ukwilagila ukuta avene vanu vanofu na avihuvilwa mbepali, sambi kwa ifipigo fyawo mbefili. Vasipele ululumbo ulunofu inzigiso kwa Nguluvi, Umupoki vetu. ¹¹ Pakuva uwuwuya wa Nguluvi wukave pawelu ukwimila uwupoki wa avanu mbevali. ¹² Uwuwuya uwo wukutwigisa ukuta tuwulekage uwanangifu mbewuli na uwudobokesi wa isa mung’i, tuvelage na uwusikimafu, tuvelage na imigendele imigolofu na ija uwelu umu mung’i iyalino, ¹³ kono wetwisindila ikimunyi kila cha uwunofu chetukwihuvila, ulusika pe indolo sa Nguluvi umuvina na umupoki vetu Yesu Kilisito pesasiwoneka. ¹⁴ Umwene itawe yumwene ukwimila hwehwe sambi atukombole mu wanangifu mbewuli na ukutwesa tuve twivanu vakwe yumwene, avanu vevidobokela isa uwunofu. ¹⁵ Ino, veve wigisage ing’ani iso na pigilage kolage ululagi lwako mbeluli ukuvasukanisa na ukuvakenyela vala avakukupulikisa. Na ulolelage munu alakubedala.

¹ Viwusage avanu vavelage na choga ku vatema na vanyalulagi, ukuwogopa na ukwigelanisa mwa mbesili ukupiga inofu mbesili. ² Valongelage valamuliga umunu yeyeavesaga; pesi ulwa vikalilage uwikalakunoga na ulwipuliko, vavelage mbepali valele kwa yeyeavesaga. ³ Pakuva, ulusika ulungi hwehwe twetwivapuva, avagaya kwipulika na avayasi. Twe twivanyawingi wa uwudobokesi na isa mung’i wewevuvesaga. Twikalige muwanangifu na mu gila; neke avanu vatuvipile swe nahwe tukuvavipila. ⁴ Neke ulusika lwe uwunofu na uwende wa Nguluvi, Umupoki vetu wavewigubulwa. ⁵ Atupokite si kwa ukwimila ulukani lwelweluvesaga ulwa uwunofu lwetwetupigite hwehwe, pesi ukuta atupokite ukwimila ulusungu lwakwe, ukukola Umuhe Umwelu yeatupelye imigendele mipya na ukutofuga na ululenga. ⁶ Nguluvi atugimbite ukutupela hwehwe Umuhe Umwelu ukukola kwa Yesu Kilisito, Umupoki vetu, ⁷ Sambi kwa uwuwuya wakwe twidikilwe ukuva vagolofu na ukwanukila uwumi wa mbepali wetwihuvye. ⁸ Ulukani ulu lwa nachene. Ndisaka veve usikangasage hilo ing’ani isi, sambi vala vevakumufuuwa Nguluvi vadoboke ukukola ifilega fyawo ukupiga inofu, sila inofu isikuvatanga avanu. ⁹ Neke ulwene wilegage mulubesa lwa uwupuva, ulwitakilo na ulubesa ukwimila indagilo. Iso ngaya kwambala kinu, iso sa malanga hela. ¹⁰ Yula umunu yeisagasa ulwilekano mukenyelage pakomi wone ave peawila, mukenyelage ulwa kavili, pesapuliki kangi uyo swe mulekage, ¹¹ ukulukagula ukuta umunu va ndahihyo uyo yeayaje ng’ani, na inzanangifu sakwe sikumolelela ukuta nachene ayasile. ¹² Pendimutumite kwa veve Alitema nave Tikiko, wangupage ukusa ku Nikapoli umbone, pakuva ngalamwe ukwikala kuko ulusika lwa ikitungwi. ¹³ Ginage ukumutanga umwimbi va indagilo Sena na Apolo sambi vahwane ukuvanga ingendo sawo, kangi lolelage hilo ukuta vavelage na mbefili, valaguluma kinu. ¹⁴ Luvavaje avanu vetu viyigise ukukola ifilega fyawo ukupiga inofu sambi vatange mufinu fyetwiguluma nachene, na kangi imigendele jawo mbegili givelage ja kwambula inofu. ¹⁵ Avanu mbevali pamwi na nene vakukuhungila. Vahungilage vanyawiyendi vetu mulufuuwo. Nguvasukila mbemuli uwuwuya wa Nguluvi.