AVALUMI

AVALUMI

¹ Nene Pawulo, ndimukami va Kilisito Yesu na Ndimwigendo umuhagule na umukemele na Nguluvi uwimila ukudalika Ulukani Ulunofu lwa Nguluvi. ² Ulukani Ulunofu ulo eavahuvise avanu ukukola avavisi vakwe mu Wandike Uwelu. ³ Ulukani Ulunofu ulu lwilonga ulwa Umwana va Nguluvi Umutwa vetu Yesu Kilisito, ye kwa umuvili, e mwegalwa na Daudi, ⁴ Neke kwa Umuhe Umwelu akangiswe kwa uludali ukuva Mwana va Nguluvi kwa ukusilibulwa ukuhuma kuvafwe. ⁵ Ukukola mulumwene, nene ndimupele uwuwuya wukuva mwigendo, sambi ukwimila umwene ndivalongose avanu va ing’i mbesili vafuuwe na ukuva na choga. ⁶ Na yunyenye mwihanga na avanu iwo, mukemelitwe muve vanu vakwe Yesu Kilisito. ⁷ Sweno, ndivandiche nyenye mbemuli yemuli ku Lumi ve Nguluvi avenda, neke avahagule muve mwivanakwe. Uwuwuya na uwikalakunoga wuvelage kwa nyenye ukuhuma kwa Nguluvi udadetu na Umutwa Yesu Kilisito. ⁸ Ukutala kwa mbesili, ngumulumba Nguluvi ukukola kwa Yesu Kilisito ukwimila nyenye mbemuli, pakuva ulufuuwo lwenyu lukave lwipulisa mung’i mbesili. ⁹ Nguluvi yengumusunyalila inumbula yangu mbeyili mu kudalika Ulukani Ulunofu lwa Umwanakwe, ye molelesi vangu ulwa nguviwuka ¹⁰ mbepali mukwifunya kwangu. Ngumusuka Nguluvi wone awende, amele ikilega ikinofu cha ukusila ukwenyu lino de. ¹¹ Pakuva ndidoboka hilo ndivawone nyenye sambi ndivagavile ikipelwa cha Umuhe nu kuvakangasa nyenye. ¹² Kwekutigila twipela uludali: ulufuuwo ulwenyu lung’angasa nene, na ulufuuwo ulwangu luvakangasa nyenye. ¹³ Vanyalukolo vangu ndidaga mulukagule ulu, ulwa mbepali ndadagige ukusa ndivagendele neke lino peminging’aswa. Ngembwenda ukwanukila uwambule uwunofu mwa nyenye ndawe wendanuche mu avanu va ing’i isingi. ¹⁴ Ndina mukole gwa ukudalika Ulukani lwa Nguluvi kuvanu mbevali, avanyalutogo na avagayalutogo, kwa vevimbite na vesivimbiti. ¹⁵ Nambi ndidoboka kangi ukudalika ukwenyu nyenye ye muli ku Lumi Ulukani Ulunofu. ¹⁶ Singuluwonela inyoni Ulukani Ulunofu, ulwene lwe ludali lwa Nguluvi lwelwakuvapoka mbevali vevifuuwa ukutala Avayudaya neke vase avamyanza. ¹⁷ Pakuva Ulukani Ulunofu luvika pawelu lula lwe Nguluvi akuvawuyapa avanu vave vagolofu; ulukani ulo lwipigikilaga mu lufuuwo, uluhuma pamuvango mbaka kumudugo. Ndawe lwandikwe, “Umunu umugolofu kwa ulufuuwo anana.” ¹⁸ Ililakali lya Nguluvi ligubwilwe uluhuma kuchanya ukwimila uwanangifu na uwananzi wa avanu ve kwa ing’asi sawo imbi vibesa inachene yilemwe ukukagulanika. ¹⁹ Pakuva mbesili isihwana ukukagulanika isa Nguluvi silipelu muvene, pakuva Nguluvi yumwene asilaje. ²⁰ Uluhuma Nguluvi peigava ing’i, uludali lwakwe ulwa mbepali na uwunguluvi wakwe nambi sifiwonekagi kwa amiho, fihele fikagulanika hilo. Avanu vahwanite ukufikagula ifyo uwimila ifinu fye agafile Nguluvi. Ino vagaya ng’asi ukwikolela ukukana! ²¹ Nambi we vakulukagula ukuta Nguluvi pwali, nambi ndahihyo neke sivakumupela ululumbo ulumunoje, nave ukumulumba. Ulungi na lulo, amahosa gawo gawuyasi na luluhala lwawo nalo lugaya kinu. ²² Vakwivika nda vanyaluhala kumbi vapuva. ²³ Ino vileka ukumusunyalila Nguluvi uva mbepali neke avene vipitukila ukufisunyalila ifihwananguluvi ifinya lwihwano na umunu umunyakufwa, na finya lwihwano lwa ifikoko na ifidege, na apangi ifikoko ifinyakutambala. ²⁴ Na ukwimila lulo, Nguluvi avalesile vafwile mu wudobokesi uwubi wa inumbula sawo na ukwipigila inzanangifu mumivili jawo. ²⁵ Vipitula uwanachene wa Nguluvi wuve wudesi; vivanachoga na ukukisunyalila ikigawa, vakumuleka Nguluvi umwene, ye anoje ululumbo lwa mbepali! ²⁶ Sweno, Nguluvi avalesile avanu vafwate uwudobokesi uwubi. Na vang’inetu vidulika imipigile igihwana uwugave wa imivili jawo, kwa gila jesigihwana na uwugave wa imivili jawo. ²⁷ Lwindahihyo na vagosi nawo, vileka ukwinatila imipigile igihwana na uwugave wa umugosi nu mung’inetu, neke avene vakwidobokela vagosi ng’ani. Vagosi kwa vagosi, vakwipigila ing’ani inyonga nyoni, na ukwimila lulo, vakwiletela vavene ukuhigwa ukuvaje ifipigo fyawo fya uwanangifu. ²⁸ Pakuva avanu vabihye ukumukagula Nguluvi, Nguluvi avalesile mumahosa gawo amanangifu, vapige sila sesisihwaniti ukupigwa na avene. ²⁹ Uwanangifu uwuvesaga wumemile muvene, uwuposi, uwuhatufu na uwaafu, vamemile uwifu, uwuwulasi, ulwitakilo, uwudesi na igila; uwuheesi, ³⁰ uwusongela, avanu avanyakumuvifya Nguluvi, vakomalafu, vanyakidada na vanyakwivahila uwuvina, vatiganu hilo kukupiga imbi na vagaya choga kuvavaha vawo; ³¹ imitima jawo sijajitinuka, sivavikwisa indagano sawo, vagaya wuwuya nave lusungu kuvangi. ³² Vakulukagula ulwa ululagilo lwa Nguluvi lwalwitigila, avanu avakwikala ndahihyo luvavaje ukufwa. Ukulutila paulo siukutigila vavipiga vavene swe, pesi ulwa vakuvalumba na vala vevavipigaga iso.

¹ Sweno, munyawiyendi, wone ukuvahiga avangi, siuhwaniti wikanile nambi uvelage winani. Pakuva pe ukuvahiga avangi, ukwikotola yuveve pakuva nayuveve wawipiga sisila sewawihiga. ² Tukulukagula ulwa uwuhige wa Nguluvi kwa vala avavipiga ndahihyo wuhige wugolofu. ³ Ino veve, munyawiyendi, yewakuvahiga vala avipiga ing’ani ndawe iso neke nave viva peupiga siso, witigila ukuluka uwuhige wa Nguluvi? ⁴ Apangi ngali wibedala uwuwuya wakwe uwukomi, na uwukangalifu wakwe, na lwikangaliso lwakwe na uwunsindile wakwe sukulukagula ukuta mbesili isi sidonya veve sambi uhongese nu kupela? ⁵ Neke ulwene wi mutalamu ni mbedasi mu numbula yako ukwivikila yuveve ililakali ku kimunyi kila cha uluhigilo lwa uwugolofu cha ililakali lya Nguluvi pesaliva ligubwilwe pawelu. ⁶ Ikimunyi icho Nguluvi saamuhomba yeyeavesaga ukutegana nifipigo fyakwe. ⁷ Vala avakwinatila ukupiga inofu, visaka indolo na ichoga cha Nguluvi na uwutafwa, vapelwa uwumi uwutasila. ⁸ Neke vala avangi vamusatila pakwe, avanyakubihila uwugolofu neke vafwatage uwanangifu, ililakali na imbipi sa Nguluvi sivagwila. ⁹ Sakuva na uluteseko na uwuvafi wesa wuvafika avanu mbevali avipiga uwanangifu. Sawuvafika tandi Avayudaya neke pevase avanu avamyanza. ¹⁰ Neke Nguluvi saavapela Indolo, ululumbo na uwikalakunoga vala avavipiga inofu; Avayudaya tandi neke pevase avanu avamyanza. ¹¹ Pakuva Nguluvi mugaya luhagu. ¹² Vala avavipiga inzanangifu wesivakusikagula indagilo savayaga. Na vala vevavipiga inzanangifu wevakusikagula indagilo na vawo savayaga ukwimila mundagilo. ¹³ Mulatigila vala vevavipulika indagilo vevagolofu kwa Nguluvi hela pesi vala avakwinatila indagilo vevidikilwa ukuta vagolofu. ¹⁴ Ngali tutigile avamyanza vagaya indagilo sa Musa; neke pevikwisa sa indagilo viva vilongoswa na imitima jawo, vavene viva kigelo cha indagilo nave sivakusikagula indagilo. ¹⁵ Imigendele jawo gilagila ikipigo cha indagilo lwe nzandike munumbula sawo. Imitima jawo gikolelela ulwa ulu lwa nachene, pakuva amahosa gawo gahele apamwi gakuvasongela neke apangi gahele gakuvapavila. ¹⁶ Ino ukuhuma mu Lukani Ulunofu ulu, lwendidalika salulava ndahihyo pakivalilo che Nguluvi pesaihiga ing’ani isa mukinyele sa avanu ukwimila kwa Yesu Kilisito. ¹⁷ Na yuveve ndawuli? Umwene veve ukwikemela wi Muyudaya; ukwihuvila indagilo na ukwiwona ulwa veve wiva Nguluvi; ¹⁸ Ukuhuma mundagilo veve ukiyigise pakuhagula ulunofu lweiwenda Nguluvi, ¹⁹ veve ukwiwona ulwa wimulongosi va avabofu, na ulung’ali kwa vala avali mu lwisa. ²⁰ Ukwiwona wimwigisi va avapuva na wimwigisi va vala vesivalakangala. Na mu ndagilo, mwe ukusikagulila inzigiso mbesili sa nachene. ²¹ Lino veve ukwigisa avangi; mbi ndawuli si ukwiyigisa yu veve? Ukuvadalikila avangi valemwe ukuhiisa neke kumbi veve wihiisa. ²² Witigila: “Mulava vagoni,” na kono veve wiva muwugoni, ukufivipila ifihwananguluvi kono veve ukwigelanisa ukuhiisa ifili mutembeli ifihwananguluvi. ²³ Kwa ukwivahila ulwa wina indagilo isa Nguluvi ndawuli siukuluwona ulwa ukwananga indagilo ukumubedala Nguluvi? ²⁴ Ndawe Uwandike Uwelu wewitigila, “Avanu avamyanza valilisile ilitawa lya Nguluvi ikivalwa nyenye nye Vayudaya!” ²⁵ Ukuwoolwa kwako kukupela kwambula, wone winatile indagilo. Neke wone ukwananga indagilo, apo ikiba ukewikale wesiwimuwoole. ²⁶ Wone umunu umumyanza yesimuwoole wone akwise indagilo we sidaga, nachene ahosekesewa nda muwoole. ²⁷ Avanu avamyanza vakuhiga veve ve Muyudaya ulwa ukwananga indagilo nambi wuve wapelitwe Uwandike wa indagilo, na uwuwoole, na kumbi avene vakwinatila indagilo nambi sivawoole. ²⁸ Kwekutigila siyeyeavesaga iwoneka kwivala ulwa Muyudaya ye Muyudaya vanachene kwa ukuwoolwa umuvili. ²⁹ Umuyudaya vanachene ye yula ye Muyudaya munumbula, yula umuwoole munumbula. Ulu lukani lwa Umuhe na silukani lwa Uwandike wa Indagilo. Umunu ndawe uyo akwanukila ululumbo si ukuhuma kwa avanu, pesi ukuhuma kwa Nguluvi.

¹ Ino, Umuyudaya inakiki ikilutye kuvanu vangi? Mbi ukuwoolwa kwileta kiki? ² Ena, kokuli ukwambula mu nzolofu, ukutala Nguluvi avavisikise Avayudaya ulukani lwakwe. ³ Mbi ino luva ndawuli wone avangi vawo sivevafuuwa? Mbi lino ndawuli ulukani ulo luhesa uwufuuwa wa Nguluvi? ⁴ Nangi na ludodo! Nguluvi isigala mufuuwa mbepali, nambi luve avanu mbevali vadesi. Ndawe uwandike uwelu wewitigila, “Peuvesaga wilonga, ing’ani sako sa nachene na pewihiga mbepali wakuvalema.” ⁵ Neke, wone uwanangifu wetu wukolelela ulwa Nguluvi aipiga kwa wugolofu, tutigile ndawuli? Mbi tutigila ulwa igaya uwugolofu pe akututova? (Ipa ndilonga kiwunuwunu.) ⁶ Nangi na ludodo! Luke luvelage ndahihyo, Nguluvi ake ahwana ndawuli ukuyihiga ing’i? ⁷ Napo utigila, “Wone uwutafuuwa wa ulubali lwa nene wukumulagila Nguluvi ulwa mufuuwa ukulutila, na palulo lukumupela indolo, sweno siluke lumbaji nyigwe ukuta ndimunyanzanangifu.!” ⁸ Luli ndawe ukutigila tupigage inzanangifu sambi tupelwe uwunofu lwe vakatufilite ukuta tukwigisa ndahihyo. Nguluvi saavahiga uluvavaje ⁹ Mbi tutigile ndawuli lino? Ngali hwehwe twe Vayudaya twivanofu hilo ukulutila avangi? Nangi na ludodo hela! Pakuva yengaluwene uluhuma pamwandi ulwa Avayudaya na avamyanza mbevali vali muwutema wa inzanangifu. ¹⁰ Ndawe Uwandike Uwelu wewitigila: “Asukuli umugolofu na yumwinga! ¹¹ Asukuli umunu yeakulukagula nave yeakumusaka Nguluvi. ¹² Mbevali vayasile, mbevali vananzile; Asukuli yeaipiga inofu, asukuli na yumwi. ¹³ Imibeta jawo gindawe uwuvi uwulimwasi, indimi sawo simemile uwudesi (uwusanzi) Mumilomo jawo sihuma ing’ani sa uwuwulasi ndawe uwusungu wa inzoka. ¹⁴ Ing’ani sawo simemile ing’ooto ing’ali. ¹⁵ Amagulu gawo ginaluvilo kukuwulaga, ¹⁶ kukwevabitaga vakwananga na ukutesa. ¹⁷ Ing’asi iya uwikalakunoga sivayiseli, ¹⁸ sivihosagi ulwa ukumogopa Nguluvi.” ¹⁹ Tukulukagula ulwa indagilo savisilwe kwa vala avali mundagilo, sambi valemwe ukuva na ulukani lwa ukwikanila. Na ing’i mbeyili yili pasi ya uluhigilo lwa Nguluvi. ²⁰ Pakuva asukuli umunu yeyeavesaga yeakwidikilwa ukuva mugolofu pa Nguluvi uwimila ukwinatila indagilo; ikipigo cha indagilo kilagila umunu ulwa apigite inzanangifu. ²¹ Neke lino ing’asi ya Nguluvi iya ukuvidikila avanu ukuva vagolofu yeyive pawelu, kangi siyikwimila indagilo. Indagilo na avavisi vakolelela lulu. ²² Nguluvi akuvidikila avanu ulwa vagolofu kwa ing’asi ya ulufuuwo lwawo kwa Yesu Kilisito; Nguluvi ipigaga ndahihyo kwa vala mbevali avifuuwa; kugaya luhagu lweluvesaga. ²³ Avanu mbevali vapigite inzanangifu na vagayite indolo sa Nguluvi. ²⁴ Neke pa ikipelwa icha uwuwuya wa Nguluvi, avanu mbevali vakwidikilwa ulwa vagolofu kwa ing’asi ya Yesu Kilisito yeakuvakombola. ²⁵ Nguluvi amutawe Yesu sambi kwa idanda yakwe ave ng’asi ya ukuvahesekesa avanu inzanangifu sawo ukwimila ulufuuwo lwawo kulumwene. Agisile ndahihyo sambi alagile ulwa umwene mugolofu. Pidaha Nguluvi akangalilige satugigi ulwa inzanangifu sa avanu; ²⁶ Neke lino de akwihoma na inzanangifu sa avanu sambi alagile uwugolofu wakwe. Pakugita ndahihyo umwene Nguluvi ailagila ulwa umwene mugolofu, na ulwa akumunosa ukuva mugolofu umunu yeyeavesaga yeakumufuuwa Yesu. ²⁷ Sweno tuva na kiki cha ukwivahila? Kisukuli! Mbi ndawuli kisukuli? Ngali! Pakuva twikwisa indagilo? Nangi! pesi kwa ukukola ulufuuwo. ²⁸ Pakuva umunu akwidikilwa ulwa mugolofu uwimila ulufuuwo, na siwimila ukukwisa indagile mu ndagilo. ²⁹ Ngali Nguluvi ye Nguluvi va Avayudaya viyena apangi na va avamyanza nawo? Ena na vamyanza vawo. ³⁰ Nguluvi yeiyena, nave avanosa Avayudaya vave vagolofu kwa ulufuuwo lwawo na avamyanza nawo kwa ulufuuwo lwawo. ³¹ Ngali twikola ulufuuwo sambi twanange indagilo? Na ludodo; pesi ulwa tukusipela indagilo na uludali lwayo.

¹ Ngali tutigile ndawuli, ino ulwa Abulahamu, ukukwetu? Akwavite kiki? ² Wone yealavikitwe ukuva mugolofu uwimila uwupifu wakwe, sweno inacho kinu cha ukuvahila, neke si kwa Nguluvi. ³ Pakuva Uwandike Uwelu witigila, “Abulahamu amufuuvitwe Nguluvi, nave Nguluvi amwidiche ukuva mugolofu.” ⁴ Umunyakupiga ayipelwa amahombo, amahombo gakwe si kipelwa nda pesi ulwa ulo lumuvaje ukwimila ukupiga kwakwe. ⁵ Neke umunu yesakwimila ifipigo fyakwe yumwene, pesi ulwa ukumufuuwa Nguluvi yeayidegepela avanyanzanangifu, sweno, Nguluvi ayilava hilo ulufuuwo ulwa umunu uyo, na palulo akumwidikila ukuva mugolofu. ⁶ Nave Daudi ilonga de ulwa uluhekelelo lwa umunu yula ye Nguluvi amwidiche ukuva mugolofu wesihosa ulwa ifipigo fyakwe. ⁷ “Vafunyilile vala avanu avadegepele, inzanangifu na Nguluvi, ve inzanangifu sawo sihesiwe. ⁸ Mufunyilile umunu ye inzanangifu sakwe Umutwa sisaiiwuka.” ⁹ Ndawuli uwufunyilile uwu we ilonga Daudi wa vala avawole swe? Nda na kwa avamyanza nawo wawo. Pakuva yetulonzile “Abulahamu amufuuvitwe, nave Nguluvi amwidiche ukuva mugolofu.” ¹⁰ Ngali Abulahamu idikilwe wesialawoolwa apangi peyeawoolitwe? peesalawoolwa, na siukuta peyeawoolitwe. ¹¹ Abulahamu awoolitwe pelulutye ulo, nu kuwoolwa uko kwe kilagilo ikikangasa ulwa Nguluvi amwidiche ukuva mugolofu ukwimila ulufuuwo lwakwe lweenalo wesialawoolwa. Uwimila lulo, Abulahamu akave ye dadawo va vala mbevali, nambi wesivawoole, avakamufuuvitwe Nguluvi nu kuwuyapwa vagolofu. ¹² Lwindahihyo kangi umwene ye dadawo va vala avawoole; neke ulwene si pakuva vawoole, pesi ulwa nawo vakwinatila ing’asi yiyila ya ulufuuwo ye udadetu Abulahamu yealafwatite pesialawoolwa. ¹³ Nguluvi amuhuvise Abulahamu na imbegalo yakwe ulwa ing’i yila sa yive yawo. Uluhuviso ulo silwavi pakuva Abulahamu aliinatye indagilo, pesi ulwa alafuuvitwe, nu kwidikilwa ukuva mugolofu. ¹⁴ Pakuva wone keyive vevipelwa uluhuviso lwa Nguluvi ve vala hela vevakwinatila indagilo, sweno, ulufuuwo lugaya cha kupiga, na uluhuviso lwa Nguluvi nalo sike luva kinu nda. ¹⁵ Indagilo sasileta ililakali, neke wone pagaya indagilo, suhwana ukwananga. ¹⁶ Na ukwimila lulo, ulukani ulu lwakwimila ulufuuwo, palulo uluhuviso ulo lwihumaga mu wuwuya wa Nguluvi na ukuta uluhuviso ulo lwavisilwe kwa avanu mbevali si kwa vala avakwinatila indagilo pesi na kwa vavala avakwikala mulufuuwo ndawe Abulahamu umwene ye dadetu mbetuli. ¹⁷ Ndawe Uwandike Uwelu wewitigila, “Nguvisile uve wi dadawo va avanu mbevali na ing’i mbesili.” Na uluhuviso ulo apelitwe Abulahamu pakuva amufuuvitwe Nguluvi yeakuvasilibula avafwe na kwa ululagilo lwakwe ifinu ifipya fyafigawa. ¹⁸ Nave Abulahamu afuuvitwe nu kwihuvila, mung’ani ise nalamu ukwihuvila, nambi ave dadawo va ing’olo mbesili ndawe Uwandike Uwelu wewilonga, imbegalo yako sayoloka, “Ndawe ing’eng’esi.” ¹⁹ Ali mugogolo yakwenda afike ku myaka ligana, neke ulufuuwo lwakwe silwakepiti, nambi we alukagulige ulwa umuvili gwakwe gwe ndagufwe, na kangi uvakwe Sala e muguumba. ²⁰ Neke Abulahamu sasiniti ulwa lula uluhuviso lwa Nguluvi, apelitwe uludali ukwimila ulufuuwo, nave amulumbite Nguluvi. ²¹ Alalukagwe ulwa Nguluvi ahwana ukukwisa mbesili sealihuvise. ²² Nambi Nguluvi amwidiche ukuva mugolofu, ²³ Pelwilongwa, “Amwidiche.” Silwilongwa ukwimila umwene iyena hela. ²⁴ Ulukani ulu lwidonya hwehwe kangi, yetukumufuuwa Nguluvi yeamusilibwe Yesu, Umutwa vetu uluhuma kuvafwe. ²⁵ Umwene yemutawule afwe ukwimila inzanangifu na asilibwike sambi hwehwe tuve twivagolofu.

¹ Pakuva yetupelitwe uwugolofu ukwimila ulufuuwo, sweno, twina uwikalakunoga na Nguluvi ukwimila Umutwa Yesu Kilisito. ² Ukukola ulufuuwo lwetu, umwene atuletite ipa pa uwuwuya wa Nguluvi pala lino petwipwali. Sweno, tukwivahila uluhuvi lwetwinalo ulwa ukuhanga indolo sa Nguluvi! ³ Ena, silulo hela, pesi ulwa twihekelela na mukuguda we tulukukagula ulwa mwiletaga uwusindile, ⁴ na uwusindile nawo yayileta ulwikangaliso na ulwikangaliso nalo lwalwileta uluhuvi. ⁵ Uluhuvi ulo siluhwaniti lutusange hwehwe, pakuva Nguluvi yeakatupelye munumbula setu uwende wakwe ukukola Umuhe Umwelu yeatupelye hwehwe. ⁶ Ulusika lwave lukwilye, Kilisito afwe ukwimila hwehwe twevananzi! ⁷ Silupefu nda umunu yungi afwile umunu umugolofu; apangi umunu ahwanite afwile umunu umunofu. ⁸ Neke Nguluvi atulaje hwehwe lwe atwenda. Pakuva ulusika lwe twe twivanyanzanangifu, Kilisito afwe ukwimila hwehwe. ⁹ Pakuva lino tupelitwe uwugolofu mu danda ya Kilisito, lulipawelu hilo ulwa yeatupokite ukuhuma mulilakali lya Nguluvi! ¹⁰ Pakuva petwetukaali twivatavangu vakwe, Nguluvi alamwe twilamule nave ukukola ifwa ya umwanakwe. Na pakuva lino yetwilamwe nave, lulipawelu hilo ulwa satupokwa ukukola uwumi wa Kilisito. ¹¹ Kangi si lulo hela nda, pesi ulwa twihekelela kangi mwa Nguluvi ukukola Umutwa vetu Yesu Kilisito yeakatulamwe na Nguluvi. ¹² Ukukola kulumunu yumwi inzanangifu yiinje mung’i, nayo yaletite ifwa. Lino ifwa yatagalye muvanu mbevali, pakuva avanu mbevali vapigite inzanangifu. ¹³ Na indagilo pesisilasa, inzanangifu yeyipwali mung’i, neke inzanangifu siyeyivikwa mulwiwu wone pave pagaya indagilo. ¹⁴ Neke uluhuma ulusika lwa Adamu mbaka ulusika lwa Musa, ifwa yeyitemile kwa mbevali mbaka, na kwa vavala vesivapigiti inzanangifu kwa ukumupituka Nguluvi ndawe Adamu. Adamu ali kilagilo cha yula yeakusa mumbele. ¹⁵ Neke ulwene popali apasutine; uwuwuya wa Nguluvi siwindawe inzanangifu ya Adamu. Nambi inzanangifu sa umunu yumwi sambwise ifwa yuse ku vanu mbevali ukwimila uwuwuya wu munu yumwi, kwekutigila Yesu Kilisito Nguluvi akavagimbite mbevali uwuwuya ni fipelwa fyakwe. ¹⁶ Lino popali apasutine pagati ya ikipelwa cha Nguluvi na inzanangifu isa umunu yula uyumwi. Pakuva pawananzi wa umunu yula uyumwi, Nguluvi ahigite, neke pauwananzi wa avanu wolofu, Nguluvi atawe ikipelwa chakwe cha ukuvadegepela. ¹⁷ Nachene, ukukola inzanangifu ya umunu yumwi ifwa yavanzile ukutema, ukwimila yu yo, neke ulwene lulipawelu hilo lweapigite umunu uyo Yesu Kilisito lunofu hilo. ¹⁸ Sweno, ndawe uwananzi wa umunu uyumwi wambwise ukuhigwa kwa avanu mbevali, lwindahihyo kwa ikipigo kimwi ikigolofu kikuvapela uwutemapawo na uwumi. ¹⁹ Na kwa uwutakwinatila wa umunu yumwi avanu wolofu vave vananzi, lwindahihyo kwa uwinatifu wa umunu yumwi kunosa avanu wolofu vidikilwe na Nguluvi. ²⁰ Ululagilo lwasile, swe lukwambusa ukoloka kwa uwananzi, neke pala peinzanangifu yesolwike, uwuwuya nawo wolwike, ukulutila. ²¹ Ndawe lwe inzanangifu yitemaga mukukola ifwa, lwindahihyo uwuwuya witemaga mu wugolofu na ukuleta uwumi wa mbepali ukukola kwa Yesu Kilisito Umutwa vetu.

¹ Sweno, tutigile ndawuli? Ngali tuvelage petugina ukwikala munzanangifu sambi uwuwuya wa Nguluvi woloke? ² Nangi na ludodo hela! Kulubali lwa inzanangifu hwehwe yetufwe, luva ndawuli tuvelage petugina ukwikala kangi mu nzanangifu? ³ Pakuva, mukulukagula ulwa hwehwe yetwabatisiwe twave kinu kimwi na Kilisito Yesu, twabatisiwe nu kuhanga mufwa yakwe. ⁴ Twavelige twibatisiwa twahanzile mufwa yakwe, nu kutagwa pamwinga nave, sambi ndawe umwene Kilisito lweasilibwike uluhuma kuvafwe ukukola ikipigo ikinyandolo cha udade, sambi nahwe tuve na imigendele imipya. ⁵ Pakuva, ndawe hwehwe yetuhanzile nave mufwa ndawe umwene, lwindahihyo twihanga nave mu kusilibuka ukuhuma kuvafwe ndawe Umwene. ⁶ Tukulukagula ulwa uwunu wetu uwulovela watumbikwe pamwinga na Kilisito sambi wula uwunyanzanangifu wanangwe, sambi tulemwe ukuva vanyawingi va inzanangifu. ⁷ Pakuva, umunu yeafwe inzanangifu yigaya ludali kulumwene. ⁸ Sweno, wone yetufwe pamwinga na Kilisito, tufuuwagwe ulwa satwikala kangi pamwinga nave. ⁹ Pakuva, tukulukagula ulwa Kilisito yeasilibwike uluhuma kuvafwe na sisaafwa kangi, ifwa ngaya ludali kulumwene. ¹⁰ Sweno, pakuva afwe sukumwi hela, inzanangifu ngaya ludali kulumwene, kangi na lino de akwikala muminanile jakwe mu wulilumwi na Nguluvi. ¹¹ Lino, lwindahihyo na nyenye luvavaje mwikagulage ulwa kulubali lwa inzanangifu yemufwe, neke yemuve mwi wumi mu wulilumwi na Nguluvi ukukola kwa Kilisito Yesu. ¹² Sweno, inzanangifu silatema mu mivili jenyu iginya kufwa, nambi mwidikile ukutemwa mu wudobokesi wayo. ¹³ Mulatawula nambi ikigawa muvili chenyu sambi kipigikage mu wanangifu na inzanangifu. Ulungi na lulo, mwitawulage yinyenye kwa Nguluvi nda avanu vevasilibwike uluhuma kuvafwe, muwuhumyage uwunu wenyu mbewuli kwa Nguluvi ukwimila uwugolofu. ¹⁴ Pakuva, inzanangifu sisasivatema nyenye kangi, pakuva simulipasi ya indagilo, pesi ulwa mulipasi pa uwuwuya. ¹⁵ Sweno, tutigile ndawuli? Ngali tupigage inzanangifu pakuva situlipasi ya indagilo, pesi ulwa tulipasi ya wuwuya? Nangi na ludodo hela! ¹⁶ Mukulukagula ulwa wone mwitawule yinyenye nda mwivanyawingi nu kumogopa umunu yungi, mwiva nachene mwivanyawingi vakwe umunu yuyo. Na apangi mwiva vanyawingi va inzanangifu, na chekiwoneka baho ye ifwa, na apangi mwiva vanyawingi vaichoga, na chekiwoneka ipo kwe ukuwuyapwa ukuva vagolofu. ¹⁷ Nambi pamwandi mwe mwivanyawingi va inzanangifu, neke lino ngumulumba Nguluvi mukinatye kwa inumbula mbeyili uwulagile na inzigiso semukanuche. ¹⁸ Mwakombolilwe ukuhuma mu wunyawingi wa inzanangifu, nu kuva vanyawingi va uwugolofu. ¹⁹ Lino ipa ndilonga indongele ya kiwunuwunu iya mbepali hela, ukwimila uwuhomefu wenyu yunyenye. Ndawe ulusika ulungi lwemwitawe yunyenye ukuwupigila uwaafu na uwananzi uwimila uwanangifu, lwindahihyo lino mwitawulage uwunu wenyu yunyenye muwupigile uwugolofu uwimila uwelu wi migendele. ²⁰ Pemwevanyawingi wa inzanangifu, mwe mwivatemapenyu mwe pataali na uwugolofu. ²¹ Lino, mwambulyee kiki ulusika lulo ukuhumila mwasiso se kulino mwiwona sihonga inyoni? Pakuva chekiwoneka mwasiso ye fwa! ²² Neke lino yemukombolilwe uluhuma mu wunyawingi wa inzanangifu, na yemuve mwivakami va Nguluvi, chemukwambulila umo lino we uwelu wa imigendele, na chekiwoneka baho we wumi wa mbepali. ²³ Pakuva amahombo ga inzanangifu ye fwa, neke ikipelwa cheitawula Nguluvi we wumi wa mbepali mukuva kinu kimwi na Kilisito Yesu Umutwa vetu.

¹ Vanyalukolo vangu, nditigila wanda mukulukagula lwengwenda ndonge, pakuva nguvalongela avanu avasisele indagilo. Indagilo sakumutema umunu peiva mumi. ² Tutigile umung’inetu umugomwa, aiva apinzilwe na indagilo ulusika mbeluli pe uvakwe iva mumi, neke wone uvakwe afwe, indagilo iyo sipeyimupinga kangi umung’inetu uyo. ³ Sweno, umung’inetu uyo wone ikalase na umugosi yungi ulusika lwe uvakwe we pe mumi, ava mugoni, neke wone uvakwe ave yeafwe, umung’inetu uyo ava mutemapakwe mu ndagilo, nambi agomwe na umugosi yungi saava mugoni. ⁴ Na lwindahihyo kwa nyenye vanyalukolo vangu, nyenye nanye kulubali lwa indagilo mufwe pakuva nyenye mwilubali ulumwi lwa umuvili gwa Kilisito; lino mukave vanu vakwe umwene yeasilibwike ukuhuma kuvafwe sambi muveleke amaveleko amanofu ukwimila Nguluvi. ⁵ Pakuva, pe twikalige mumigendele ja uwunuwunu hela, uwudobokesi wa inzanangifu ise sipwali ukukola mu ndagilo, sapigige ikipigo mu mivili jetu nu kutuletela ifwa. ⁶ Neke lino tukave vatemapetu ukuhuma mundinde ya indagilo, pakuva yetukafwe mu sa inzanangifu, inzanangifu ingaya ludali kangi kwa hwehwe, lino tuhwana ukumupigila Nguluvi mu mikalile imipya ja Umuhe, na si ndawe ukwiga indagilo inzandike. ⁷ Sweno, tutigile ndawuli indagilo isene nzanangifu? Nangi na ludodo hela! Neke ulwene wone pagaye indagilo, nene sindendisikagula inzanangifu che kiki. Pakuva sindendilukagula ukuta che kiki ukudobokela imbi, wone indagilo sike silemwe ukutigila, “Uladobokela.” ⁸ Kwa ukukola ululagilo ulo, inzanangifu save na ikilega cha ukulamusa uwudobokesi uwubi mugati mwanene. Pakuva apagaya indagilo inzanangifu yayiva yifwe. ⁹ Ulusika ulungi nene nde mumi nde pataali na indagilo, neke pesusile indagilo inzanangifu sasilibwike, ¹⁰ nane ndafwe, sweno indagilo iyadonyige ukuleta uwumi, kwa nene iyo yikandetye ifwa. ¹¹ Pakuva inzanangifu yave na ikilega cheyapelitwe na ulo ululagilo, ulo lwanzanzile nu kumbulaga. ¹² Sweno, indagilo isene nzelu, na ululagilo nalo lwelu lwa wugolofu kangi lunofu. ¹³ Ngali ulu kwekutigila kila ikinofu che kikwambusa ifwa yangu? Nangi, na ludodo hela! Ulwa nachene lwe ulu, ulwa sambi inzanangifu yiwoneke ukuta ye yene hilo, gendye mu ikinu ikinofu kila, swe yikumbulaga. Mwa ulo inzanangifu yiyelelwe ukuta mbi hilo. ¹⁴ Tukulukagula ulwa indagilo ya kinya umuhe; neke nene ndivamung’i hela ndagusiwe mbe munyawingi va inzanangifu. ¹⁵ Singukikagula chendandipiga, pakuva kila chendiwenda ukupiga sindipiga, neke kila chengukivipila chendipiga kicho. ¹⁶ Lino wone, ndipiga ikisutine na chendiwenda nene, sweno ulu kwekutigila kumbi ngwidikila ukuta indagilo nofu. ¹⁷ Kumbi si yenene nachene yendipiga ulo, pesi yila inzanangifu iyilimugati mwanene. ¹⁸ Ngulukagula ulwa lusumuli ulunofu ulweluvesaga mugati muwunu wangu. Pakuva nambi ndiwenda ukupiga ulunofu, na baho ndilemwa. ¹⁹ Pala, apanoje mige ulunofu lwendiwenda, ndipiga lula ulubi lwesimbwendigi. ²⁰ Lino wone, ndipiga isisutine na sesindiwenda nene, sweno ulu kwekutigila si yenene yendipiga iso, pesi sila inzanangifu iyilimugati mwanene. ²¹ Lino, yendigukagwe umusimu ugu; ndiwenda ukupiga ulunofu, neke ngulufika lula ulubi lwenyagwe. ²² Mugati mwanene hilo munumbula yangu ngusihekelela indagilo sa Nguluvi. ²³ Neke ndiwona ulwa kololi ululagilo ulungi ulwipiga mu muvili gwangu, ululagilo ulukwihoma na lula lwe uluhala lwangu lukulwidikila. Ulo lukumbika nene muwunyawingi wa ululagilo lwa inzanangifu ulwipiga mumuvili gwangu. ²⁴ Ndinalyo nene ndemumikaa! Yenani ye amoka ukuhuma mumuvili ugu ugukusindika nene kufwa? ²⁵ Ululumbo luvesage kwa Nguluvi, yeipigaga iso ukukola kulu Mutwa vetu Yesu Kilisito! Sweno, ulu lwendiwali nene; mu luhala lwangu ngulupigila ululagilo lwa inzanangifu neke mu wunu wangu ngulupigila ululagilo lwa inzanangifu.

¹ Sweno, kugaya kuhigwa kwa vala ve mumikalile jawo vave kinu kimwi na Kilisito. ² Pakuva indagilo isa Umuhe, isiletaga uwumi mu kuhanga na Kilisito Yesu sikang’ombwe ukuhuma mu ndagilo sa inzanangifu na ifwa. ³ Nguluvi akakwisise ulukani lula lwe indagilo sisahwaniti ukukwisa uwimila uwuhomefu wa uwunu. Nguluvi amuletite umwanakwe iva ina muvili ugutegine ni mivili jetu hwehwe vanyanzanangifu, sambi ihome na inzanangifu, na kwa umuvili gugo adwesise inzanangifu. ⁴ Nguluvi apigite lulo sambi imbage mu indagilo sa wugolofu sikwilanikile hilo mugati mwetu hwehwe yetwinana, si muludali lwetu lwa uwunu, pesi kwa uludali lwa Umuhe. ⁵ Pakuva vala vevakwikala muwudobokesi wa imivili, iwo vatemitwe na amahosa ga umuvili. Neke vala vevakwikala mumigendele ja Umuhe Umwelu, vavitemelwa na amahosa ga Umuhe. ⁶ Amahosa ga umuvili giletaga ifwa, neke amahosa ga Umuhe giletaga uwumi na uwikalakunoga. ⁷ Pakuva yula yeatemilwe na amahosa ga umuvili uyo mutavangu va Nguluvi, siakwinatilagi indagilo sa Nguluvi na sahwana nambi ukusinatila. ⁸ Avanu avaviwenda isa umuvili sivahwana nambi ukumunogela Nguluvi. ⁹ Neke nyenye simukwikala mu sa umuvili, pesi ulwa mumigendele ja Umuhe, wone Umuhe va Nguluvi akwikala mugati mwenyu. Yeyeavesaga mugaya Umuhe va Kilisito, uyu si munu vakwe Kilisito. ¹⁰ Neke wone Kilisito ali mugati mwenyu, nambi imivili jenyu gifwe uwimila inzanangifu, Umuhe va Nguluvi ye wumi wenyu pakuva muwuyipwe ukuva vagolofu. ¹¹ Wone Umuhe va Nguluvi, yeamusilibwe Kilisito ukuhuma kuvafwe akwikala mugati mwenyu, sweno uyo yeamusilibwe Kilisito ukuhuma kuvafwe agipela uwumi imivili jenyu iginya kufwa, nangi apiga lulo ukukola Umuhe vakwe yeakwikalaga mugati mwanyenye. ¹² Sweno, vanyalukolo vangu, twinanzenga ngomi, si ya ukwikala ndawe imivili jetu we gidaga hwehwe tupige. ¹³ Pakuva wone mwikale ndawe imivili we gidaga, mufwa. Neke wone mwikale mu Muhe muwulaga ifipigo ifya inzanangifu, ipo muva na uwumi. ¹⁴ Vala mbevali avavisogoswa na Umuhe va Nguluvi ve vana va Nguluvi. ¹⁵ Pakuva Umuhe ye mwamwanuche si Muhe yeivikaga avanu mu wunyawingi na mu muhwehwe, silwindahihyo pesi ukuta mwamwanuche Umuhe umunyakuvawuyapa muve vana va Nguluvi, na uwimila uludali kwa yuyo Umuhe hwehwe tuhwana ukumutambula Nguluvi “Dada!” ¹⁶ Nave Umuhe yumwene ihanga ni numbula setu ukutolelela ulwa hwehwe twivana va Nguluvi. ¹⁷ Sweno, pakuva hwehwe twivana va Nguluvi, satwanukila uwufunyilile mbewuli wa Nguluvi weavaviche avanu vakwe, na satuhanga ililila ilyo, pamwinga na Kilisito pakuva wone tuhange ineseko sakwe Kilisito, satuhanga kangi mundolo sakwe. ¹⁸ Nambi nguluwona uluteseko ulu lwalino ukuva si kinu na ludodo, wone tuteganise na yila indolo yesayiwoneka pa hwehwe. ¹⁹ Na ifigawa mbefili fisindila kwa kuguluma Nguluvi avavike pawelu avanakwe. ²⁰ Pakuva ifigawa nafyo fyavisilwe mu wuhomefu uwukomi, neke sifiyendyi fifyene, pesi ulwa fyavikitwe umo ukwimila uwende wakwe Nguluvi. Nambi ndahihyo pepololi uluhuvi, ²¹ pakuva ifyo ifigawa safipokwa uluhuma mu wunyawingi wa uwanangifu, vihange uwutemapawo uwunyandolo wa avana va Nguluvi. ²² Pakuva tukulukagula mbaka lino ifigawa mbefili fivemba kwa uwuvafi ndawe yeakwivikula sambi egale. ²³ Kangi si fifyo hela ifigawa fiyena, pesi na hwehwe yetwinave yuyo Umuhe, uyo ye kipelwa cha uwulongolo mu fipelwa fya Nguluvi, nayuhwehwe twivembela munumbula, twisindila nu kulavisa ukuwuyapwa kwa avana va Nguluvi, naso inumbula setu sikombolwe. ²⁴ Na ukwimila uluhuvi lulo hwehwe yetukombolilwe, neke ulwene uluhuvi si kwekutigila tukukiwona kila chetwihuvye. Mbi yenani lino yeakwihuvila kila cheakukiwona lino? ²⁵ Wone twihuvile kila chesitulakiwona, sweno tukukisindila kwa lwikangaliso. ²⁶ Lwindahihyo, nave Umuhe akututanga mu wuhomefu wetu. Pakuva situluseli ulutuvaje ukwifunya, neke Umuhe yumwene akutusukila kwa Nguluvi kwa wuhuguvafu we umunu sahwana ukolelela. ²⁷ Nave Nguluvi yeailava mugati munumbula sa avanu, akugakagula amahosa ga uyo Umuhe wegiwali; pakuva Umuhe akuvasukila avanu va Nguluvi uwimila mweayiwendela. ²⁸ Tukulukagula ulwa, mwa mbefili, Nguluvi aipiga kipigo na ukukwisa pamwinga na mbevali avamwenda, kwe kutigila vala ve avakemelye, ndawe lweeadonyite. ²⁹ Pakuva vala vevevahagule na Nguluvi ukuhuma pidaha, vawo veavahagwe, sambi vihwane na umwanakwe, sambi umwanakwe ave mulongosi mu vanyalukolo awolofu. ³⁰ Sweno Nguluvi avakemelye vala veavahagwe na iwo veavakemelye avawuyipe kangi vidikilwe palumwene; na iwo veavawuyipe vidikilwe palumwene, avahanzise kangi mundolo sakwe. ³¹ Uluhuma kwa ifi mbefili, tutigile ndawuli kangi? Wone Nguluvi ali lubali lwetu, nani yeahwana ukutubesa?. ³² Nguluvi samutanii; nambi umwanakwe yali iyena, pesi ukuta amutawe ukwimila hwehwe mbetuli. Wone apigite ulo, mbi satupela kangi uwunofu mbewuli? ³³ Nani yeavasongela avahagule va Nguluvi? Nguluvi yumwene akuvahesekesa uwanangifu. ³⁴ Mbi ye nani yeatuhiga? Asukuli! Pakuva Kilisito yeafwe, kangi asilibwike ukuhuma kuvafwe nayeali ulubali lwa kundyo kwa Nguluvi. Umwene akutusukila. ³⁵ Ye nani ino yeatugava hwehwe uluhuma muwende wa Kilisito? Ngali uwubane nave uwutalamu, nave uluteseko nave inzala nave uwumikaa nambi ukufuulika, nave inalamu na ukuwulagwa? ³⁶ Ndawe Uwandike Uwelu witigila: “Uwimila veve, twilaving’ana ni fwa ikimunyi mbekili; tupigilwa wita ing’olo iyidumulwa.” ³⁷ Neke, mwa mbesili iso, twiva tusuumite pakomi kwa uwutanzi wumwene yeatwenda. ³⁸ Ngulukagula hilo ulwa kisukuli chekihwana ukutugava hwehwe uluhuma muwende wakwe: nave ifwa nave wumi; nave vanyivaha nave uludali lwa kuchanya; nambi isiwoneka lino, nave sesasiwoneka pambele, nave uwutema, ³⁹ nave ing’i iya kuchanya, nave iya pasi hilo. Kugaya kinu ikigave chekihwana ukutugava na uwende wa Nguluvi ukukola mwa Kilisito Yesu Umutwa vetu.

¹ Nene ndilonga ulwa nachene, sindideta kono we nyanzile na Kilisito. Inumbula yangu yisogoswa na Umuhe Umwelu, yikunzolelela ulukani ulu. ² Ndiwenda ukutigila de uwuhuguvafu wa nene wukomi hilo: uwuvafi wesiwisilagi munumbula yangu. ³ Ikivalwa avanu vangu, avanyang’i vayangu! Wone kuke kuvelage na kwambula kinu kwa vene ngembwenda nene ng’otoke nu kuvikwa pataali na Kilisito wone ulo kekuvatanga kinu! ⁴ Iwo ve vanu va Isilaeli ve Nguluvi avahagwe vavelage vanakwe, akuvahanza mundolo yakwe, afingine nawo, swe akuvapela indagilo sakwe, ulufuuwo lwanachene na inyuviso sakwe. ⁵ Avene ve visukulu va vakuku, nave Kilisito, kuwunu wakwe, ahumite mulukolo lwawo. Nguluvi yeatemile mwa mbefili, alumbwagwe kitasila! Ena. ⁶ Sinditigila ulwa uluhuviso lwa Nguluvi yelupitwike; pakuva siwita avanu mbevali va mu Isilaeli vahagule va Nguluvi. ⁷ Nasi wita imbegalo mbeyili yakwe. Pesi ukuta ndawe Uwandike Uwelu wewitigila, “Imbegalo yakwe yihuma kwa Isaki.” ⁸ Kwekutigila, ulwa sivala vevawonike kwa ukwegalwa kwa mbepali hela ve vana va Nguluvi, pesi vala avegalwa ukwimila uluhuviso lwa Nguluvi, ve vawo vevatambulwa vanakwe. ⁹ Pakuva uluhuviso ulwene lwe ulu, “Sangusila ulusika ulukwilaniche, nave Sala saegala mwana mukwamisi.” ¹⁰ Na kangi si lulo hela, pesi ulwa Lebeka nave egee vana vanyawendani kulu dadawo yumwi Isaki, yula ukukwetu. ¹¹ Neke sambi Nguluvi awoneke mutemapakwe pa kuhagula, nambi vala vanyalukolo vanyawendani pevevakaali sivalegalwa na sivalafikila pakulukagula ukuhagula ikinofu na ikibi, ¹² Uyuvawo Lebeka swe ilongelwa ulwa yula umwana umulongola amupigila yula va mumbele. Palulo uwuhagusi wa Nguluvi wakwimila lula lweigava yumwene, na siwukwimilagi mufipigo fya avanu. ¹³ Ndawe Uwandike Uwelu we witigila: “Ndamwendite Yakobo neke ndimuvipile Esawu.” ¹⁴ Ino ngali tutigile ndawuli? Ulwa Nguluvi munyaluhagu? Nangi na ludodo hela! ¹⁵ Pakuva amutige Musa: “Ndimuwonela ulusungu yula yendiwenda, ukumuwonela ulusungu; ndimuwonela ulusungu yeyeavesaga yengumwenda.” ¹⁶ Sweno, mbesili sakwimila mulusungu lwa Nguluvi, si wita mu wupifu nambi uwende wa umunu. ¹⁷ Pakuva Uwandike Uwelu witigila de kwa Falawo: “Ndakuvisile uve Mutema sambi ukwimila veve, uludali lwangu salukagulanike, na ilitawa lyangu lidalikwe mung’i mbesili.” ¹⁸ Lino, lulipawelu, ulwa Nguluvi akumuwonela ulusungu umunu yeyeavesaga iwenda ukumuwonela ulusungu, na wone awende ukumuwuyapa uyungi ave munyalubesa, nalo ahwanite alupige. ¹⁹ Apangi umbusa witigila, “Wone luve ndahihyo, mbi Nguluvi ahwana wuli ukumutigila umunu mwananzi? Mbi nani yeahwana ukubesa cheavagite Nguluvi?” ²⁰ Neke, veve ve munu, winani mbaka wigelele ukumuwusa Nguluvi? Ngali ikitonga kihwanite kimuwuse umunyakukigada ulwa, “Mbi ndawuli ungadite de?” ²¹ Umunyakugada ahwanite akole ililongo ukupiga mweiwendela, ahwanite agade fitonga fivili ikola ililongo lilyo hela, ikingi kiva kinyalulumbo, na ikingi kiva kigayalulumbo. ²² Na lwindahihyo kwa Nguluvi. Awendige alagile ililakali lyakwe na ukulukagulanisa uludali lwakwe. Sweno; ali na uwusindile hilo, akuvakangalila vala veve vadonyitwe na ililakali lyakwe, veve vavagilwe ukwanangwa. ²³ Na awendige kangi alagile uwolofu wa indolo sakwe, seatuboholye hwehwe ye twe tudonyitwe ulusungu lwakwe, hwehwe yeatugelanise ukwanukila indolo sakwe. ²⁴ Pakuva ye hwehwe yeatukemelye si ukutigila uluhuma ku Vayudaya, pesi ukuhuma ku vamyanza. ²⁵ Ulu lwelwene lweilonga mukitabu cha Hoseya: “Vala veve si vanu vangu ndivakemela: ‘Vanu vangu!’ Avanu veve sindivenda ndivakemela: ‘Vende vangu!’ ²⁶ Na apono pevavalonje: Nyenye ‘Simwivanu vangu’ ipo vakemelwa ‘Vana va Nguluvi umumi!’ ” ²⁷ Nave Umuvisi Yesaya, kwa Isilaeli akwihuga liswi de; “Nambi avana va Isilaeli wolofu ndawe uluhanga lwa mumwani, neke hela vakefu avapokwa; ²⁸ pakuva Umutwa angufya ukukwisa uluhigilo lwakwe ulukwilaniche mung’i mbeyili. ²⁹ Lwindawe Yesaya lwealonzile pamwandi, “Wone Umutwa va amalugu ake aleke ukutulekela avamwi va avana va Isilaeli, twetusila ndawe ku Sodoma, twetusila ndawe ku Gomola.” ³⁰ Sweno, tutigile ndawuli? Tutigile de! Avanu avamyanza vesivifwahisigi ukwivika mu wugolofu, yevawuyipwe vagolofu ukukola ulufuuwo, ³¹ neke avanu va Isilaeli vevasakige indagilo sa ukuvawuyapa ukuva vagolofu pa Nguluvi, sivayiweni. ³² Mbi ndawuli? Pakuva vihuvyee ifipigo fyawo valemwe ukwihuvila ulufuuwo. Vikuve mwiganga linyakukuvasa. ³³ Ndawe uwilonga Uwandike Uwelu: “Lavage! Ndivika uko ku Sayuni iliganga ilinyakukuvasa ilitalawe ilinyakugwisa avanu. Neke yeamufuuwa sisaahongelwa inyoni!”

¹ Vanyalukolo vangu, ndidoboka hilo kwa inumbula yangu mbeyili ulwa avanyang’i vayangu vakombolwe. Kangi nguvasukila mbepali kwa Nguluvi. ² Kangi nywanite ukolelela ukwimila avene, ulwa nachene vapifu ukumusaka Nguluvi, neke uwupifu wawo siwukwimila mukumukagulila nachene Nguluvi. ³ Pakuva sivalukagwi lwe Nguluvi akuvawuyapa avanu vave vagolofu, na vakivanje ing’asi yawo vavene na palulo sivakuyidikila ing’asi ya Nguluvi ya ukuvawuyapa vave vagolofu. ⁴ Pakuva kwa ukusa kwakwe Kilisito. Indagilo yesifikite pa mudugo, gwa ifipigo fyawo sambi mbevali vevakumufuuwa Nguluvi vawuyapwe vagolofu. ⁵ Ulwa uwugolofu ukwimila indagilo Musa andike de: “Umunu yeyeavesaga ikwisa isisakiwa ni ndagilo anana.” ⁶ Neke ulwa uwugolofu ukukola ulufuuwo, lwilongwa de: “Ulalonga munumbula yako: ‘Nani yeilila kuchanya?’ ” (ukumuleta Kilisito pasi); ⁷ na kangi ulalonga: ‘Nani yeasulunuka kuvafwe?’ (ukumuleta Kilisito ukuhuma kuvafwe?)” ⁸ Uwandike Uwelu witigila de, “Ulukani ulo lwa Nguluvi lulipipi na veve, luli mumulomo gwako na munumbula yako nalo lwe lula ulufuuwo lwetwidalika.” ⁹ Wone widikile kwa umulomo gwako ukuta Kilisito ye Mutwa na ukufuuwa munumbula yako ukuta Nguluvi amusilibwe ukuhuma kuvafwe, upokwe. ¹⁰ Pakuva umunu aifuuwa kwa inumbula nu kuwuyapwa mugolofu, na ukwidikila kwa umulomo gwakwe apokwe. ¹¹ Uwandike Uwelu witigila: “Yeyeavesaga akumufuuwa sisaahongelwa inyoni.” ¹² Ulu lwihanza mbevali, pakuva kugaya luhagu, ulwa Muyahudi na umumyanza, pakuva Mutwa va mbevali ye yumwi, nave muwuya hilo kwa mbevali vevakumusuka. ¹³ Na Uwandike Uwelu witigila: “Yeyeavesaga akumusuka mwitawa lya Umutwa saapokwa.” ¹⁴ Mbino vamusuka ndawuli wone sivalamufuuwa? Na kangi; vamufuuwa ndawuli wone sivalapulika ing’ani sakwe? Na vapulika ndawuli ing’ani sakwe wone asupali umudalisi? ¹⁵ Na avanu vadalika ndawuli wone sivalasindikwa? Ndawe Uwandike Uwelu wewitigila, “Lwinoga witigila kiki kwa ukusa kwa vala avanyakuleta Ulukani Ulunofu.” ¹⁶ Neke mbevali sivalwanuchi Ulukani Ulunofu. Pakuva Yesaya atige, “Mutwa yenani yeafuuvitwe ulukani lwetu? ¹⁷ Sweno, ulufuuwo lwakusa kwa kupulika ulukani, na ulukani ulo lwihuma mu lukani lwa Kilisito.” ¹⁸ Ino nene ndiwusa: Nachene sivapuliki ulukani ulo? Ena vapulike: ndawe Uwandike Uwelu witigila: “Umubumo ugwa iliswi lyawo gwahele kipulisa ing’i mbeyili; ing’ani sawo sifikite kumudugo gwa ing’i.” ¹⁹ Ino nene ndiwusa; lwihwana nachene ulwa avanu va Isilaeli sivalukagwi? Musa yumwene ave mulongola ukupitula: “Nene ndivawuyapa muvawonele mbafya, avanu vesive lukolo lukomi, ndivawuyapa muve na lilakali kuvanu avapuva.” ²⁰ Kangi Yesaya igelye nu kutigila; “Vala vesivasakiti vambwene; Ndiyelelwe kwa avene vesivawusigi isangu.” ²¹ Neke ulwa Isilaeli itigila: “Pakilo na pamunyi ndavagololye amawoko gangu avanu avayasi na vagaya choga.”

¹ Sweno, ndiwusa: Nguluvi avabihye avanu vakwe? Nangi na ludodo hela! Na yinene ipa ndi Mwisilaeli, mbegalo ya Abulahamu, va ulukolo lwa Benyamini. ² Nguluvi siavabihyi avanu vakwe, veavahagwe uluhuma pamuvango. Mukwiwuka Uwandike Uwelu wewitigila ulwa Eliya peamukalalilige Nguluvi ukwimila va Isilaeli: ³ “Mutwa vakavawulige avavisi vako neke vadenye na pifunyo pako. Yinene hela yendiyena yesige, nawo vidaga ukumbulaga.” ⁴ Mbi Nguluvi amupitwe kiki? Amutige, “Ndiviche avanu mbilima simufung’ati vesivakumusunyalila Baali.” ⁵ Sweno, lwe lwiwali, na kulino de; poyili imbalilo iyifulwike vevasige ve Nguluvi avahagwe ukukola wuwuya wakwe. ⁶ Uwuhagusi wakwe wukwimilaga mu wuwuya wakwe na si wukwimilagi mufipigo fyawo. Pakuva, wone uwuhagusi vakwe wuke wuvelage mufipigo fya avanu apo uwuwuya wakwe siwuke wuva wuwuya kangi. ⁷ Lino ndawuli? Avanu va ku Isilaeli sivakiweni chevasakige; neke mbevali avahagule vakiwene. Avangi vadibise amapulikilo valemwe ukwidika. ⁸ Ndawe Uwandike Uwelu wewitigila: “Nguluvi awuyipe inumbula sawo sive sito, mbaka neng’ino de sivahwaniti valave kwa amiho gawo, nambi ukupulika kwa amapulikilo gawo.” ⁹ Nayi Dawudi itigila: “Lekage inyekelelo sawo sive lutego lwa ukuvagwilisa, vagwile neke vapume. ¹⁰ Lekage amiho gawo gatilivale sambi valemwe ukulava. Neke imigongo jawo gidenyeke ukwimila uludugo lwa mbepali! ” ¹¹ Sweno nene ndiwusa, mbi Avayudaya vikuve nu kwanangika sukumwi? Nangi na ludodo hela! Ukwimila uwananzi wawo uwukombolwa uvafiche avanu avangi vesi Vayudaya, sambi Avayudaya vavawonele mbafya. ¹² Uwananzi wa Avayudaya waletite uwufunyilile wolofu kwa avanu va ing’i isingi, na uwutafuuwa wawo wa kinyamuhe wuletite uwufunyilile wukomi uwulutye kwa avanu va ing’i isingi. Sweno lulipawelu hilo ukuta ukwingila kwa imbalilo yawo iyikwilaniche sakuleta uwufunyilile wukomi uwulutye. ¹³ Ino de nguvalongela nyenye nyevamyanza: Pakuva nene ngave mwigendo wa Avamyanza ngwivahila ikipigo changu, ¹⁴ sambi nzambuse avanyang’i vayangu vavawonele nyenye imbafya na palulo sambi ndivapoke avamwi vawo. ¹⁵ Pakuva wone ukubihilwa kwawo kukalesile ing’i yilamule na Nguluvi, luva ndawuli ulusika lwevidikilwa na Nguluvi? Avafwe vasilibuka! ¹⁶ Wone ulubali ulumwi lwa umukate lufunyililwe, umukate mbeguli apo gwiva mufunyilile, wone indela sa umubiki nofu, na matagala nago gava manofu. ¹⁷ Ena amatagala agamwinga ga umuseituni gwa mukinyungu gatotekilwe, neke amatagala ga umuseituni gwa mwihala gwanapikiswe baho. Nyenye nye vamyanza mwindawe umuseituni gwa mwihala neke lino mwihanga muludali na uwunono wa umuseituni ugwa mu kinyungu. ¹⁸ Ino mulavabedala vala avatotekilwe ndawe amatagala! Mbino nave pokili cha ukwivahila, mwiwukage ukuta si nyenye ye umubiki gwisipye, pesi indela semwisipye nyenye. ¹⁹ Ino mutigila, “Ena, ino amatagala gatotekilwe sambi nyalile nene.” ²⁰ Ena gatotekilwe pakuva lwagayite ulufuuwo, neke veve wimye mu lufuuwo lwako. Neke ulwene ulivahila; wikomalilage. ²¹ Lino wone Nguluvi siavalesili Avayudaya, vevindawe amatagala amalovela mumubiki, mwitigila avaleka nyenye? ²² Lino wiwukage, ukuta Nguluvi munofu kangi mukali. Umwene mukali kwa vala avagwe, kangi munofu kwa veve wone uve peuvelaga mu wunofu wakwe; neke wone sindahihyo nayiveve nave utotekelwa uwuuke. ²³ Nawo Avayudaya lwindahihyo, wone vawuleke uwutafuuwa, kangi vapilulwa pevevipwali. Pakuva Nguluvi ina uludali lwa ukuvapilula kangi. ²⁴ Nyenye mwevanu va ing’i isingi, kwa uwulovela mwindawe amatagala ga umuseituni gwa mwihala, lino mwahesiswe kuko, neke munapikisiwe mu museituni umulimilile gwa mu kinyungu, apono pe kwa uwulovela sipe penyu nda. Neke Avayudaya kwa uwulovela vindawe umuseituni gwa mu kinyungu, na salulava lukani lupefu hilo kwa avene ukunapikisiwa kangi mu mubiki gugula. ²⁵ Vanyalukolo vangu, ndiwenda muyikagule inachene iyi yiyeyifihime samulonga mwitigile mwivanyaluhala ukulutila. Ulubesa lwa Avayudaya lwelwa lusika ludodo hela, mbaka avanu va ing’i isingi pevave yevamufiche Nguluvi. ²⁶ Ipo pepene pe ulukolo mbeluli Isilaeli pesalukombolwa, ndawe Uwandike Uwelu wewitigila: “Umukombosi ahuma ku Sayuni, awuhesa uwanangifu wa avana va Yakobo. ²⁷ Ulu lwelufingano lwefingana nawo. Ulusika lwendivahesekesa inzanangifu sawo.” ²⁸ Pakuva Avayudaya vakulubihila Ulukani Ulunofu, Avayudaya yevave vatavangu va Nguluvi, neke ulwene lukwimila ukwambula kwenyu nyenye mwe vanu va ing’i isingi. Neke pakuva vahagule vakaali pe vanyawiyendi va Nguluvi ukwimila avakukwawo. ²⁹ Pakuva Nguluvi peavapelye avanu ifipelwa fyakwe na ukuvahagula, siayihuguvala peapigite ulo. ³⁰ Pamwandi nyenye mwe mugayite ichoga kwa Nguluvi, neke lino mwanuche uwudeke wakwe ukwimila uwugaya ichoga wawo. ³¹ Ndahihyo, ukwimila ulusungu lwemwanuche nyenye, Avayudaya vakumubesa Nguluvi lino, sambi nawo vanukile ulusungu lwa Nguluvi ndahihyo. ³² Pakuva Nguluvi avadindye avanu mbevali mundinde iya imbedasi sambi avalagile mbevali ulusungu lwakwe. ³³ Uwunono na uluhala na uwuseela wa Nguluvi uwukomi ukulutila! Na ulusungu lwakwe silwawulongo! Na ing’asi sakwe nalamu ukukagulanika! Ndawe Uwandike Uwelu wewitigila: ³⁴ “Yenani yahwana ukugakagula amahosa ga Umutwa? yenani yahwana ukumwiyisa Nguluvi? ³⁵ Na apangi yenani yeamupelye kinu tandi sambi ahwane ukupilulilwa kangi ikinu kicho?” ³⁶ Pakuva ifinu mbefili fyagafilwe na umwene na ifinu mbefili fihumaga kulumwene, mbefili finu fyakwe na fili muludali lwakwe. Indolo sivelage kulumwene mbaka ku mbepali na mbepali! Ena.

¹ Ino nguvagongola vanyalukolo vangu, mwitawulage uwunu wenyu kwa Nguluvi, yive nambika iya mbepali, nzelu na iyikumunogela. Iyo ye ng’asi iyanachene ya ukumusunyalila. ² Mulemwa ukwiga imigendele ja mung’i iyi, pesi ulwa mupitukage mugati mwenyu ukwa amahosa genyu. Ipo pepene pe muhwana ukwinatila uwende wa Nguluvi, ulo lwelulagila wunofu, ulukumunogela na ulukwilaniche. ³ Ukwimila uwuwuya weamelye Nguluvi nguvalongela nyenye mbemuli: mulidudumba ukuta mwina kinu ikilutye mwilutisa kwa lula uluvavaje luvelage. Amahosa genyu gavelage gakwilaniche ikigelo cha ulufuuwo lwe Nguluvi amugavye yeyeavesaga mumu. ⁴ Umuvili gwina mbali nzolofu, na ulubali lweluvesaga lwina kipigo chakwe. ⁵ Lwindahihyo nambi hwehwe twiwolofu, twimuvili gumwi pamwi na Kilisito, na yeyeavesaga munu iva lubali lwa umuyagwe. ⁶ Twinafyo ifipelwa ifiliwungi na wungi tufipigilage ukwimila uwuwuya wetwapelitwe; wone uyumwi ina kipelwa icha uwuvisi kivelage kigelela mulufuuwo lwetu. ⁷ Umunyakipelwa cha uwupisi nave akipigilage lulo. Uwunyakipelwa cha uwigisi avelage mwa lulo. ⁸ Umunyakipelwa cha ukukenyela avangi nave avelage mwa lulo. Umunyakugavila avangi che inacho nave avelage mu wudeke. Umutanzi nave Imililage mu wuwuya wuwo; na yeyeavesaga ipiga ulukani lwa ulusungu nave agendelage lulo muluhekelelo. ⁹ Uwende wenyu wuvelage wugaya wubuganisi uwewuvelaga. Mubihilage imbi mbesili, mwinatilage inofu mbesili. ¹⁰ Mwiyendage yinyenye kwa yinyenye nda vanyalukolo; yeyeavesaga mwa nyenye avelage na ichoga kulumuyagwe. ¹¹ Muladedela mu wupifu, mumalavadikage munumbula mu mupigilage Umutwa. ¹² Muhekelelage muluhuvi lwenyu: muvelage na uwusindile mulugudo na mwifunyage mbepali. ¹³ Muvatangage avelu va Nguluvi, mwipigila muwudeke. ¹⁴ Muvasukilage uwufunyilile mbevali vevakuvatesa nyenye; ena, muvasukilage uwufunyilile mulemwa ukuvasukila ululeko. ¹⁵ Muhekelelage pamwi na vala avihekelela muvembage na avivemba. ¹⁶ Muvelage na uwunofu wuwula kwa mbevali. Mulivahila uwuvina, pesi ulwa mwilevesage na mufidodo. ¹⁷ Muliwona nda mwivanyaluhala ukulutila. Mulihombela umukole mu sa uwanangifu. Mwinatilage inofu kwa mbevali. ¹⁸ Kwa lwe luhwana kwa ulubali lwenyu, muvelage na uwikalakunoga na avanu mbevali. ¹⁹ Vanyawende vangu, mulihomela umukole, pesi ulwa mumulekelage Nguluvi ulukani ulo; pakuva Uwandike Uwelu witigila, “Ukuhomela umukole ulo lwangu; nene ye nyomela umukole ilonga Umutwa.” ²⁰ Nda wone, “Umutavangu vako peina nzala; mupelage ichakulya; na wone ave akelwike; mupelage anywe. Pakuva kwa ukupiga ulo pumuhongela inyoni hilo, uva nda umutwikite amakala ga umoto mu mutwe gwakwe.” ²¹ Ulidikila uwubi wukuleme, uwulemage uwubi ku wunofu.

¹ Yeyeavesaga munu lumuvaje awogopage avalongola mu wutema; pakuva ululagi lweluvesaga lwihumaga kwa Nguluvi, nawo vanyalulagi vavike na Nguluvi. ² Yeibesa uwulagise wa avatema ibesa lwealaje Nguluvi, nawo vevipiga siso vakwiyambusa vavene vahigwe. ³ Pakuva; avatema sivavikabusa avanu avanofu, pesi kwa vala avabi. Sweno, wone wisaka ulemwe ukumogopa umunu munyalulagi? Pigage inofu nave akulumba, ⁴ pakuva uyo mukami va Nguluvi yeipiga kwa uwunofu wenyu. Neke wone mupige imbi apo umunu uyo mumwogopage pakuva nachene ina ludali ulwa ukukuhiga. Umwene mukami va Nguluvi na ayikwisa uluvaje ililakali lya Nguluvi kwa vala veipiga imbi. ⁵ Sweno, luvaje ukwilevesa kuvanyalulagi si ukuta ukwimila ukogopa ililakali lya Nguluvi, pesi kangi ukwimila ulwiyiwuko ulwisaka tugendelage lulo. ⁶ Na mwa lulo nyenye mwamwihomba imbemenenge, pakuva avatema iwo vakumupigila Nguluvi wone vikwisa ifipigo fyawo. ⁷ Mumupigilage yeyeavesaga ulumuvaje, umunu va amahombo apelwagwe amahombo, na uva imbemenenge apelwagwe imbemenenge, na umunu yula yeavaje ululumbo nave apelwagwe ululumbo lwakwe. ⁸ Mulava na mukole kulumunu gwesimuhombe, pesi ulwa muvelage na mukole gwa mwiyendi yinyenye kwa yinyenye. Pakuva yeakumwenda umunyafivawo wakwe yeakwisise indagilo. ⁹ Pakuva indagilo isi, “Ulava mugoni; ulawulaga; uladobokela.” na isingi mbesili, sihanga mu ndagilo iyi yimwi hela, “Mwendage umunyafivawo vako ndawe lwe ukwiyenda yiveve.” ¹⁰ Yeyeakumwenda umunyafivawo vakwe samupigila fibi nangi. Sweno, ukwimila uwende indagilo mbesili sikwila. ¹¹ Ukulutila kwa iso, na yinyenye mukulukagula ulwa tufikite palusika ulwindawuli, lino lwe lusika lwa ukulamuka mutulo, ena, uwupoki wetu lino, wuhegelye sindawe petwavangige ukufuuwa. ¹² Ikilo yekisisile na ikimunyi ye sambi kifika. Sweno, tutagage kutali mbesili isa ulwisa, tutegulage amahomelo ga ukwihomela mu lung’ali. ¹³ Na imigendele jetu givelage ja ichoga ndawe ulunoje mu kimunyi, tulava vahatufu nambi vagaasi, avaafu na avagoni, vatakifu na vanya gila. ¹⁴ Mumufwalage Umutwa Yesu Kilisito nda mwenda, mulemwa ukuleka muwudobokesi nambi ukwisa siso.

¹ Mumwanukilage umunu umuhomefu mulufuuwo, neke ulwene mulahwa mukwidadisa ulwa amahosa gakwe. ² Ulufuuwo ulwa umunu uyumwi lukwidikila ukulya mbefili, neke umunu umuhomefu mulufuuwo ailya simboga sa amahamba swe. ³ Umunu yeailya mbefili alamubedala yesiailya; na yula yeailya simboga sa mahamba swe alamuhiga yula yeailye mbefili, pakuva Nguluvi amwanuche uyo. ⁴ Mbi veve winani, yewihiga umukami va umunu uyungi? Wone ave imile apangi agwe ulo lwa umuvina vakwe; ahwana ukumwimya. ⁵ Umunu uyumwi aitigila ikimunyi ikimwi kilutye kufiyafyo, na uyumwi itigila ifimunyi mbefili filing’ene. Yeyeavesaga munu ibatililage amahosa gakwe geinago. ⁶ Yula yeakwinatila ikimunyi ikimwi wita kimunyi ikiliyena, ipigila lulo mulu Mutwa, yeilya inyama ilila mulu Mutwa, pakuva ahele akumulumba Nguluvi; na yula yakwiyima ipigila lulo mulu Mutwa nave ahele akumulumba Nguluvi. ⁷ Pakuva asukuli umunu mwa hwehwe yeakwinanila yumwene hela, na asukuli yeayikwifwila yumwene, ⁸ Pakuva wone tuve twinana twinanila mulu Mutwa, na petwifwa, tukumufwila Umutwa. Sweno, wone twinana nambi twifwa, hwehwe twi wunono hela wa Umutwa. ⁹ Pakuva Kilisito afwe, asilibwike, sambi ave Mutwa va awumi na avafwe. ¹⁰ Mbi ndawuli lino veve, ukumuhiga umunyalukolo vako? Nave ndawuli ukumubedala umunyalukolo vako? Hwehwe mbetuli satwima pa kigoda cha uluhigilo cha Nguluvi. ¹¹ Pakuva Uwandike Uwelu witigila: “Ndawe nene lwe ndi mumi ilonga Umutwa, umunu yeyeavesaga saafugamila. Na umunu yeyeavesaga saidikila ukuta nene ye nene Nguluvi.” ¹² Pakuva, hwehwe mbetuli satwilongela pa Nguluvi umunu na sakwe. ¹³ Sweno, tulekage ukwihiga, pesi ukuta sugunalage hela, ulwa tulongatuve fikuvaso ku munyalukolo na munyalukolo nambi ukumwambusa agwe mu nzanangifu. ¹⁴ Ngulukagula na kangi ndiginalisiwa na Umutwa Yesu, ukuta kisukuli ikinu chechekivesaga ikinyawinya ku kilamuko chakwe; neke wone umunu ahose ukuta ikinu ikingi kinyawinya, sweno, kulumwene chakiva kinyawinya. ¹⁵ Wone umuhuguvike umunyalukolo vako uwimila ichakulya, apo veve imigendele jako sigilongoswa mu wende. Pogole widikile ichakulya chako chambuse uyungi ayage ye Kilisito amufwilye! ¹⁶ Sweno, mulidikila ikinu chemwiwona kinofu sambi kibedalwe. ¹⁷ Pakuva Uwutwa wa Nguluvi si wukwimilagi mu kulya na mu kunywa, pesi ukuta wukwimilaga mu wugolofu, muwikalakunoga na luhekelelo ulwiletwa na Umuhe Umwelu. ¹⁸ Na yeyeavesaga munu yeakumupigila Kilisito ede uyo akumunogela Nguluvi nu kwidikilwa na avanu. ¹⁹ Sweno, twinatilage mbepali ing’ani isiletaga uwikalakunoga na isikututanga ukwisenga yihwehwe kwa yihwehwe. ²⁰ Ino ulananga seapigite Nguluvi ukwimila ulubesa lwa ukulya. Ifyakulya mbefili finofu, neke silwinoga ukulya ichakulya ikikwambusa umunu agwe mu nzanangifu. ²¹ Ikiba peulesile ukulya inyama, na ukunywa idifayi nave ukupiga lweluvesaga lukani ulukwambusa umunyalukolo vako agwe. ²² Sweno, wibatililage chewifuuwa pagati ya veve na Nguluvi vako. Mufunyilile yula ye akwilamulila cheapiga neke inumbula yakwe yilemwe ukumuhiga. ²³ Neke wone umunu ave isina peilya, Nguluvi amuhiga wone alye, pakuva ikipigo icho sikikwimila mulufuuwo. Na chechekivesaga kipigo chesikikwimila mu lufuuwo icho cha wanangifu.

¹ Hwehwe yetukange mulufuuwo lutuvaje ukuvatanga vala avahomefu, sambi vahwane ukulowoka mu nalamu sawo. Tuwulekage uwusatila petu. ² Yeyeavesaga munu mwa hwehwe lumuvaje amunogelage munyafivawo vakwe muwunofu, sambi uyo isenge mulufuuwo. ³ Pakuva Kilisito sapigiti isikumunogela hela yumwene, Pesi ulwa ave ndawe Uwandike Uwelu wewilonga, “Amaligo mbegali gevakulisile gafiche nene.” ⁴ Pakuva mbesili inzandike, sandikwe sambi sitwigise hwehwe nahwe tuve na uluhuvi na ulwikangaliso, na uwusikimafu wetwipelwa mu Wandike uwo Uwelu sambi tuve na uluhuvi. ⁵ Nguluvi yula ye kilamuko cha ulwikangaliso na uwusikimafu mbewuli, avapelage nyenye uwulaganila kumwi ndawe ulwihwana mwa Kilisito Yesu, ⁶ sambi nyenye mbemuli, kwa liswi limwi nu kulaganila kumwi mumupele indolo Nguluvi, Dada va Umutwa vetu Yesu Kilisito. ⁷ Sweno, mwiyanukilage ukwimila indolo sa Nguluvi ndawe Kilisito nave lweavanuche nyenye. ⁸ Pakuva nene nguvalongela nyenye ulwa Kilisito avapijee Avayudaya sambi alagile uwuhuvilwa wa Nguluvi, na sila inyuviso sa Nguluvi seavapelye avakukwetu sambi sikwile, ⁹ sambi nawo avamyanza vamupele indolo Nguluvi ukukola ulusungu lwakwe. Ndawe Uwandike Uwelu wewitigila: “Palulo sangulumba, pagati pa avanu avamyanza sa nzimba ululumbo lwa ilitawa lyako.” ¹⁰ Kangi Uwandike witigila: “Muhekelelage nyenye nye vamyanza pamwi na avanu vakwe Nguluvi.” ¹¹ Kangi witigila: “Mumulumbe Nguluvi, nye vamyanza mbemuli; mumulumbe, nye vanu mbemuli.” ¹² Kangi Yesaya itigila: “Umwisukulu va Yese saasa, saakang’ulwa ateme ku vamyanza; nawo savamwihuvila umwene.” ¹³ Sweno Nguluvi ye kilamuko cha uluhuvi, avapelage nyeye uluhekelelo mbeluli na uwikalakunoga uwihuma mulufuuwo lwenyu, uluhuvi luginage ukoloka muludali lwa Umuhe Umwelu. ¹⁴ Vanyalukolo vangu, nene yinene, ngulukagula nachene ukuta nyenye mumemile uwunofu, na uwimbi mbewuli, na muhwanite ukwiyisa yinyenye kwa yinyenye. ¹⁵ Neke ulwene ndivandiche singi na singi mu balula iyi ngaya muhwehwe, sambi ndiviwuse isingi de. Migite ulo ukukola uwuwuya weamelye Nguluvi ¹⁶ wukuva mukami va Yesu Kilisito kuvanu avamyanza. Icho che kipigo changu cha uwutambisi, ukudalika Ulukani Ulunofu lwa Nguluvi sambi avanu avamyanza vave nambika iyikwidikilwa na Nguluvi, inambika iyesiwe na Umuhe Umwelu. ¹⁷ Sweno, kono wenyanzile na Kilisito nywanite nane ukwivahila ikipigo changu kwa Nguluvi. ¹⁸ Singwigelela ukulonga ikinu kingi ichekivesaga pesi kila hela che Kilisito Yesu apigite ukunuma nene sambi avanu avamyanza vave na ichoga. Apigite ulo ukwimila ing’ani na ifipigo. ¹⁹ Muludali lwa imiitu na uwuhulo na muludali lwa Umuhe va Nguluvi. Sweno, kwa ukugenda polofu ukuhumila ku Yelusalemu mbaka ku Iluliko, ngadalike hilo Ulukani Ulunofu lwa Kilisito. ²⁰ Na mbepali uwudobofu wangu wukave ukudalika Ulukani Ulunofu si pala pe ilitawa lya Kilisito likapulise, longanzenge mu lutu lwa umunu uyungi. ²¹ Ndawe Uwandike Uwelu wewitigila: “Avanu mbevali vesivalongele isa umwene savalava. Na vesivalapulika, savalukagula.” ²² Nambi ukwimila lulo, ngatanilwe kolofu ukusa ukwenyu. ²³ Neke pakuva lino yendusise ikipigo changu imbali isi, na pakuva kwa myaka myolofu ngave na amahosa gaga ga ukusa ukwenyu, ²⁴ ngwihuvila ukupiga ulo lino. Ngembwenda ukuvawona pendilutila mulugendo lwangu pesogwe ku Sipaniya na ukwanukila uwutanzi wenyu mulugendo ulo petutinasa kwa pelusika ludodo na nyenye. ²⁵ Neke, kulino sogwe ukuvapigila avanu va Nguluvi kula ku Yelusalemu. ²⁶ Pakuva amakanisa ga ku Makedoniya na ku Akaya galamwe ukutawula umuhangu gwawo ukuvatanga avanu va Nguluvi avamikaa kula ku Yelusalemu. ²⁷ Vavene vevalamwee ukupiga lulo, neke ulwene nachene icho che kipigo chawo kwa avayawo. Pakuva avanu avamyanza vakahanzile mu wufunyilile wa munumbula wa Avayudaya, luvavaje nawo lino ukuvapigila Avayudaya mwa fyevagulwime ifya mung’i. ²⁸ Pesinzile ikipigo icho nu kuvapela umuhangu ugo gwevakakong’ise ukwimila avene, pendivagendela nyenye pendilutila sogwe ku Sipaniya. ²⁹ Ngulukagula ukuta penzusile ukwenyu ndivasila mu uwufunyilile mbewuli wa Kilisito. ³⁰ Sweno, vanyalukolo vangu, nguvagongola ukwimila Umutwa vetu Yesu Kilisito, na uwimila uwende uwihumaga kwa Umuhe, munangage ukusukila kwa Nguluvi. ³¹ Musukage hilo sambi mokwe ukuhuma mwa vala vesivafuuvitwi avali ku Yudaya, na kikipigo changu nacho uko ku Yelusalemu, sambi nzidikilwe na avanu avelu avali kuko. ³² Sweno, wone Nguluvi awende, nywana ukusa ukwenyu na mutima mwelu, suupe pamwi na nyenye. ³³ Nguluvi yula yemwene ikilamuko cha uwikalakunoga avelage na pamwi na nyenye mbemuli! Ena!

¹ Ndiwenda ukumukagulisa ukwenyu Umuhasa vetu Fwebe umukami va ilikanisa lya ku Kengeleya. ² Mumwanukilage ukwimila Umutwa ndawe ulwinogela avanu va Nguluvi. Mumutangage mwa fyeava agulwime, pakuva umwene akave munu munofu hilo kwa awolofu na kwa nene kangi. ³ Ndihungisa kwa Pilisika na Akila, avanyakupiga vayangu mufipigo fya Kilisito Yesu. ⁴ Avene vevitawe uwumi wawo ukwimila nene. Vinogela ukulumbwa, si ukuta ulo lwa nene hela, pesi na kwa amakanisa mbegali ga avanu avamyanza. ⁵ Ndihungisa kangi na ku likanisa ilikong’ana mukaye yawo. Ndihungisa kwa munyawiyendi vangu Epayineto yula uva ukutala ukumufuuwa Kilisito mulutanana lwa mu Asiya. ⁶ Mumuhungilage nayi Maliya yeapigite kwa wupifu ukwimila nene. ⁷ Ndihungisa kwa Anduloniko na Yuniya avanyang’i avayangu vevasopitwe mundinde pamwi na nene; nawo vakagulanike hilo mwa avigendo, kangi vatasile ukwingila mu wukilisito nene pesindilava nzingila. ⁸ Ndihungisa kwa Ambulyato, munyawiyendi vangu mu kuhanga na Umutwa. ⁹ Ndihungisa kwa Ulubano, umunyakupiga muyangu mu wupisi wa Kilisito, kangi ngumuhungila Sitaku. ¹⁰ Mumuhungilage nayi Apele ye uwufuuwa wakwe kwa Kilisito uwukawonike pelu. Ndihungisa kwa mbevali avali mukaye ya Alisitabulo. ¹¹ Ndihungisa kwa Helodiana, munyang’i muyangu; na kwa mbevali avali kwa Nalikisi yeakamwidiche Umutwa. ¹² Mumuhungilage Tilifena na Tilifosa avipiga ifipigo mu wupisi wa Umutwa, na umunyawiyendi vangu Pelisi ye akapigite nzolofu ukwimila Umutwa. ¹³ Mumuhungilage Lufo, munu umupifu hilo mu kumupigila Umutwa, nayu yuve kangi ye yuvangu nayinene, ¹⁴ mumuhungilage nayi Asungilito, Filegoni, Helena, Patuloba, Helima na avanyalukolo mbevali avali pamwi nawo. ¹⁵ Mumuhungilage Filologo nayi Yuliya, Neleya na umuhase, nayi Olimba pamwi na avanu mbevali va Nguluvi avali pamwi nawo. ¹⁶ Mwihungilage mukwinonela muwende wa kinyalukolo mbemuli. Kamwene mbemuli nguvahungila ukuhuma ku makanisa mbegali ga Kilisito. ¹⁷ Vanyalukolo vangu, nguvagongola muvawuulilage pawelu mbevali avakwambusa ukusutana na ukwambusa avangi vagwe, visutana na inzigiso semwigisiwe. Mwilegage na avanu avindawe iwo, ¹⁸ pakuva avanu avindawe iwo sivakumupigila Kilisito Umutwa vetu, pesi vakugapigila amaleme gawo vavene. Vilonga inofu na ukudalika kwa ukugongolesa viyasa inumbula sa avanu avagolofu. ¹⁹ Pakuva ichoga chemwinacho kikapulise kuvanu mbevali, nambi nene mbe na luhekelelo kwa nyenye, ngembwenda muvelage na uluhala ulukwilaniche mufinu ifinofu na muvelage simwivanga kinu mung’ani imbi. ²⁰ Nave Nguluvi ikilamuko cha uwikalakunoga sahaava ukumukinya setani nu kumuvika pasi pa magulu gakwe. Uwuwuya wa Umutwa vetu Yesu Kilisito wuvelage nanyenye. ²¹ Timoti, umunyakupiga pamwi na nene akuvahungila, nayi Lukio, Yasoni na Sosipatulo Avayudaya vayangu vakuvahungila ²² Nayi nene Telitio ye ngwandika seilonga Pawulo mubalula iyi nguvahungila. ²³ Gayo, yeanzanuche mukaye yakwe na likanisa mbelili ilyalikong’ana kulumwene, likuvatigila kamwene, Elasito, umulolesi va uwunono wa iboma iyi pamwi nayi Kwalito, vakuvahungila. [ ²⁴ Uwuwuya wa Umutwa vetu Yesu Kilisito wuvesage na nyenye mbemuli. Ena.] ²⁵ Sweno, lino tumulumbage Nguluvi! Ye mwene yeahwanite avakangase mu lukani ulunofu lwe ndadalike ulukani lwa Yesu Kilisito, na mwa kila ikinyele ikigubwilwe na ichekifihitwe uluhuma pidaha. ²⁶ Sweno, inachene iyo yiletitwe pawelu na ukuhuma muwandike uwa avavisi lukagulanike ku wutwa wa ing’i mbesili, ukwimila ululagilo lwa Nguluvi uva mbepali sambi vapelwe ichoga cha ukufuuwa. ²⁷ Kwa Nguluvi yeiyena umunyaluhala ulukwilaniche, sivesage indolo kwa ukukola kwa Yesu Kilisito, mbepali na mbepali! Ena.