UWUGUBULILWE WA YOHANE .

UWUGUBULILWE WA YOHANE .

¹ Uwugubulwe Yesu Kilisito we Nguluvi amupeelye sambi avalagile avakami vakwe ing’ani isivaje ukuwoneka ulusika ululipipi, alekite lukagulanike pe amutumite umunyivaha vakwe amulongele Yohane, umukami vakwe, ² nave olelye mbesili seasiwene. Na uwu we wolelesi wakwe uwa ulukani lwa Nguluvi na uwolelesi wa Yesu Kilisito na kwa sila mbesili se asiwene. ³ Mufunyilile umunu yula yeakwimba kwa liswi ing’ani isa uwuvisi, vafunyilile vala avanu vevipulikisa na ukwinatila inzandike umu, pakuva ulusika ulu yeluhegelye. ⁴ Ye nene Yohane ngugandikila amakanisa agali ku lutanana lwa mu Asiya. Nguvasukila uwuwuya na uwikalakunoga ukuhuma kulumwene yeikwali, yeekwali na yula yeakusa; na ukuhuma ku myuhe avimufung’ati avali pa kigoda chakwe cha uwutwa, ⁵ na ukuhuma kwa Yesu Kilisito, umolelesi umuhuvilwa, uva ukutala ukusilibulwa uluhuma kuvafwe, na umwene ye mutema va avatwa va mung’i. Umwene atwenda, na kwa idanda yakwe atudindulye uluhuma mundinde isa inzanangifu setu, ⁶ swe akutuwuyapa hwehwe tuve wutwa, wutambisi kw Nguluvi, Udade, Kulumwene sivelage ndolo na uludali, mbepali na mbepali! Ena. ⁷ Lavage! Akusila mumafufu! Yeyeavesaga munu saamuwona, mbevali vevamuhomite, Ing’olo mbesili isa avanu mung’i savamuvembela. Ena! Nachene. ⁸ “Nene ye ndiva ukutala na ukudugilisa.” Ilonga Umutwa Nguluvi yekwali, yeeikwali na yeakusa ye umunyaludali mbeluli. ⁹ Nene Yohane, ndimunyalukolo venyu, ye ndihanga pamwinga nanyenye yemukwikangasa muwutwa wakwe. Nene nde pa kigunguli ikitambulwa Patimo ndivalwa ukudalika ulukani lwa Nguluvi na uwanachene wa Yesu. ¹⁰ Wendisogoswa na Umuhe pa ikimunyi cha Umutwa, ndapulike umubumo mukomi kumbele kwa nene wita mubumo gwa ilipembe. ¹¹ Nago gwatige, “Wandikage mukitabu mbesili seukusiwona, ukasindike ku makanisa iga agimufung’ati: Efeso, Similina, Peligamo, Tuwatila, Salide, Filadelifiya na Lawodikeya.” ¹² Ino, ndawe ndapitukige ndimulave uyo yealongige nanene, ndafiwene ifimikiso ifya itala ifimufung’ati ifiwuyapile isahabu, ¹³ na pagatinagati baho pepina kinu wita munu, nave alafwite isopeka naali na umusipi umuwuyapile isahabu mumambaga. ¹⁴ Umutwe na ifwili sakwe samalavadikige wita uwuhamba uwunofu, wita ikitungwi kinyawumela; amiho gakwe gamalavadikige wita moto, ¹⁵ amagulu gakwe gamalavadikige wita ichuma cha isaba imbuyape wunofu na ukusopwa mumoto na ukutelemesewa hilo, na iliswi lyakwe lye wita umubumo gwa ululenga ulukwitoosa. ¹⁶ Mwiwoko lyakwe ilya kundyo, eakolye ing’eng’esi isimufung’ati, na mumulomo gwakwe mwahumige ilimage ilinyawugi mbekuli mbekuli. Uwusu wakwe wamalavadikige wita ilisuva lyelivala. ¹⁷ Ino, ndavelige ngumuwona hela ndagwe pamagulu gakwe siliike wita munu ye afwe. Neke umwene angelike iliwoko lyakwe lya kundyo swe itigila, “Ulava na muhwehwe! Nene ye uva ukutala na ukudugilisa. ¹⁸ Nene ye nene ye ndi mumi! Nde ndafwe, neke, lavage, lino ndimumi kitasila mbepali. Kangi ndinacho ikidindulilo cha Ifwa na cha Kuvafwe. ¹⁹ Sweno, lino wandike isi seukusiwona, ing’ani isiwoneka lino na sila isasiwoneka pambele. ²⁰ Ikinyele cha ing’eng’esi sila isimufung’ati seusiwene mwiwoko lyangu lya kundyo, na ikinyele cha ifimikiso ifimufung’ati ifya isahabu ifya itala che iki: Sila ing’eng’esi isimufung’ati ve vanyivaha va amakanisa agimufung’ati, na fila ifimikiso ifimufung’ati ifya isahabu ifya itala ge amakanisa agimufung’ati.

¹ “Kwa munyivaha va likanisa lya ku Efeso wandikage de, ulu lwe lukani ukuhuma kulumwene yeakolye ing’eng’esi isi mufung’ati mwiwoko lyakwe lya kundyo, na yula ye igendaga pagatinagati pa ifimikiso ifimufung’ati ifya itala ifiwuyapile isahabu. ² “Ndisikagwe ing’ani sako wuwupifu wako na ulwikangaliso lwako. Ngulukagula ukuta siuhwaniti uvakangalile avanu avanangifu, na ukuta uvagelite vala avakwitigila ulwa vigendo na kumbi sindahihyo, swe uvakagwe ukuta iwo vadesi. ³ Veve wi munyamola, ukakangalye ulugudo ululipolofu ukwimila ilitawa lyangu, na siukadedi umutima. ⁴ Neke ndina lukani lumwi hela kwa veve, veve sipeunzenda kangi lino ndawe pamwandi. ⁵ Sweno, piwukage pala peuke wipwali peuke siulava ugwa, ukasileke inzanangifu sako, na ukupiga ndawe pala pamwandi. Pesi ndahihyo, ngusa kwa veve na ukukihesa ikimikiso cha itala yako pala pekipwali. ⁶ Neke ulwene ngukusumila kwa kinu kimwi: veve ukufivipila fyevipiga Vanikolayia ndawe lwengufivipila nene. ⁷ “Yeina mapulikilo, sweno, apulikage sila se Umuhe akugalongela amakanisa! “Vala vevidwesa sandivapela uwukwilanifu wa ukulya amakowo ga umubiki gwa uwumi uguli mugati ya ikinyungu cha Nguluvi. ⁸ “Kwa munyivaha va likanisa lya Simulina wandikage de: Ulu lwe lukani ukuhuma kulumwene uva ukutala na ukudugilisa, yula yeafwe na ukunana kangi. ⁹ Ndilukagwe ulugudo lwako; ndiwukagwe na uwumikaa wako, nambi ulwene nachene veve wimunono; ndigakagwe na maligo gevakakulisile vala avakwitigila Vayudaya neke ulwene si Vayudaya va nachene, pesi iwo lilugu lwakwe Setani. ¹⁰ Ulava na muhwehwe na ludodo kwa sila isikuvagila uluteseko. Lavage! Setani isaka ukuvagela ikola ukuvasopa avamwi venyu mudinde; nanye muguda kwa lusika lwa filo finyichumi. Muvelage vahuvilwa mbaka pemwifwa, nane sandivapela ingela ya uwumi. ¹¹ “Yeina amapulikilo, sweno, apulikage sila se Umuhe akugalongela amakanisa! “Vala vevidwesa sisavateseka na ifwa iya kavili. ¹² “Kwa munyivaha va likanisa lya ku Peligamo wandikage de: Ulu lwe lukani lwakwe yumwene yakolye ilimage ilinyawugi mbekuli mbekuli. ¹³ Ndikukagwe kwe wikwali; veve wikalite ku wikalo uwukomi wa Setani! Neke ukaali pewibatilila ilitawa lyangu; siulalubihila ulufuuwo lwako kwa nene mbaka mumisika gila je Andipa umolelesi vangu umuhuvilwa, peawulagilwe pala apono peakwilaga Setani. ¹⁴ Neke ndinaso ng’efu hela kwa veve; avamwi venyu mwivanyigendo va Balamu yeamufundite Balaki avagwilise avana va Isilaeli valye ifilyo ifitawule nambika ku fihwananguluvi na ukwingila muwugoni. ¹⁵ Lwindahihyo kangi, povali avangi mwanyenye avanu avakwinatila inzigiso isa Avanikolayi. ¹⁶ Sweno, silekage inzanangifu sako. Pesi ndahihyo, ngusila sinyava na ukwihoma ligalu na avanu iwo ndikola ilimage ilihuma mumulomo gwangu. ¹⁷ “Yeina amapulikilo, sweno, apulikage sila se Umuhe akugalongela amakanisa! “Vala vevidwesa sandivapela yila imanab ifihe. Sandivapela kangi na iliganga ilyelu ilyandike ilitawa ilipya lye sikwali yealikagwe pesi yu yula hela yeakulyanukila. ¹⁸ “Kwa munyivaha va ku likanisa lya ku Tuwatila wandikage de: “Ulu lwe lukani lwa umwana va Nguluvi, ye amiho gakwe gamalavadike wita moto, na amagulu gakwe gimalavidika wita ichuma cha isaba ikiwuyapise wunofu. ¹⁹ Ndisikagwe ing’ani sako mbesili. Ndiwukagwe na uwende wako, ulufuuwo lwako, uwupisi wako na ulwikangaliso lwako. Veve wipiga wunofu hilo lino sindawe pamwandi. ²⁰ Neke ndina lukani lumwi kwa veve; veve uhele ukumukangalila yula umung’inetu Yesebeli yeakwitigila muvisi va Nguluvi. Umwene akwigisa na ukuvayasa avakami vangu vapige uwugoni nave na ukulya ifitawule nambika ku fihwananguluvi. ²¹ Yendimupelye ikilega ahongese na ukupela inzanangifu sakwe, neke siiwenda ukwileka na uwugoni wakwe. ²² Lavage! Lino ngumutosa pawuhaga pala pe umwene pamwinga na mbevali avagonite nave vafikwa na ineseko inalamu. Ena, miga lulo wone valemwe ukuhongesa na ukupela ifipigo fyawo ifyaafu fyevapigite nave. ²³ Kangi ndivawulaga avanyigendo vakwe, sambi amakanisa mbegali galukagule ukuta nene ye nene yendigosaga inumbula na amahosa ga avanu. ²⁴ “Neke nyenye mwevangi yemuli uko ku Tuwatila yesimukwiga inzigiso sakwe Yesebeli; na ye simukiyigisi kila chevakukitigila, ‘Ikinyele cha Setani.’ Nguvalongela ukuta sindivawila ikitegulo ikingi. ²⁵ Luvavaje mwinatilage sila semwinaso lino mbaka pesanzusile. ²⁶ - ²⁸ “Vevidwesa, na vala vevinatila mbaka ku mudugo vipiga sendiwenda, sandivapela ululagi ku vanu va ing’olo isingi, Ena, sandivapela uludali lulula lwendalwanuche kwa Dada; kwekutigila savasitema ing’olo vikola ulugoda lwa ichuma na ukusidenyanga wita ikinu ikigade na lilongo. Kangi sandivapela ing’eng’esi (inema wufuku) ²⁹ “Yeina amapulikilo, sweno, apulikage sila se Umuhe akugalongela amakanisa!

¹ “Kwa munyivaha va ku likanisa lya ku Salide wandike: ‘Ulu lwe lukani ukuhuma kulumwene yeina myuhe igimufung’ati ja Nguluvi nasi ng’eng’esi isimufung’ati. Ndisikagwe ing’ani sako mbesili; ngulukagula ukuta wiwoneka nda wina wumi kumbi ufwe! ² Lamuke! Kiginalisage uludali chechekivesaga ikinofu ikikusigalye nacho wesikilava kikukimbila ng’ani. Pakuva, kulino de, sindilafiwona ifipigo fyako ukuta yefikwilaniche pa Nguluvi vangu. ³ Wiwukage, lino, sila sewimwigise na lwewapulike, winatilage na ukupitula amahosa gako amafu. Wone ulemwe ukwikomalila ngusila kwa kutinukisa wita umuhiisi, na siukikagula ikivalilo chenzusila. ⁴ Neke povali vakefu uko ku Salide vesivalatifusa imyenda jawo. Iwo vevinoga tugendasage pamwinga nawo kono wevafwite imyenda imyelu pakuva vanoje. ⁵ “Vala vevidwesa, savafwikwa imyenda imyelu ndawe vawo. Nane sinyesa amatawa gawo ukuhuma mukitabu cha uwumi. Kangi ndividikila ukuta iwo vangu pa Dada vangu na pa Vanyivaha vakwe. ⁶ “Yeina amapulikilo, Sweno, apulikage sila umuhe se akugalongela amakanisa! ⁷ “Kwa munyivaha va ku likanisa lya ku Filadelifiya wandikage de: Ulu lwe lukani uluhuma kulumwene ye mwelu na va nachene, yeakolye kila ikidindulilo cha Daudi, na yeidindulaga na sikwali umunu ye adinda yeahwana ukudinda na si kwali umunu ye adindula. ⁸ Ndisikagwe ing’ani sako mbesili! Lino, ndindwe umulyango pawulongolo pa veve wesikwali umunu yeahwanite agudinde; ngulukagula ukuta nave wimugaya ludali lukomi, nambi ndahihyo, pewinatila indagilo sangu, ukuva na ichoga ku lukani lwangu na siukalibihyi ilitawa lyangu. ⁹ Lavagee! Ngusindikila veve ililugu lya avanu vakwe Setani, avanu vevakwitigila avene Vayudaya kumbi vadesi. Ena, ndivasindika kwa veve na ukuvawuyapa vakufugamile wewilava, sambi valukagule ukuta nachene ngwenda veve. ¹⁰ Pakuva veve yewinatye uwulagise wangu wukuva na ulwikangaliso, nane kangi ngulolela wunofu ulusika lula lwa ulugudo ulukusa mung’i mbesili ukuvagela mbevali avakwikala mung’i. ¹¹ Ngusa na sinyava! Lolelage hilo, chewinacho lino, ulonga wanukwe na umunu yeyeavesaga ingela yako ya uludweso. ¹² “Vala vevidwesa ndivawuyapa vave kipanda mu Tembeli ya Nguluvi vangu, na sisavahuma umo nangi. Kangi nzandika mwavene ilitawa lya Nguluvi vangu, na ilitawa lya iboma ya Nguluvi vangu, i Yelusalemu imya, ye yiika ukuhuma kuchanya kwa Nguluvi vangu. Kangi nzandika mwavene ilitawa lyangu ilipya. ¹³ “Yeina amapulikilo, sweno apulikage sila Umuhe se akugalongela amakanisa! ¹⁴ “Kwa munyivaha va ku likanisa lya ku Lawodikeya wandikage de: Ulu lwe lukani ukuhuma kulumwene yeitambulwagwa, ‘Ena.’ Umwene ye molelesi umuhuvilwa na uva nachene, yemwene yekilamuko cha ifigawa mbefili fyeagafile Nguluvi. ¹⁵ Ndisikagwe isako mbesili! Ngulukagula ukuta veve si mufu kwa ulubali lwa ikinyamuhe nambi wimugaya uwuvafi ukwimila isa ikinyamuhe. Ikiba uke uvelage ulilubali ulumwi mwa siso. ¹⁶ Sweno, pakuva veve wipagatinagati hela nene lino ngutaga kutaali! ¹⁷ Veve ukwitigila, ‘Nene ndi munono; sinditoka kinu, sindiguluma kinu chechekivesaga.’ Kumbi, veve siukulukagula ukuta veve wi muhomefu, widedeva lusungu hela, wimumikaa, wimubofu kangi uliwufuula! ¹⁸ Ngukuyisa ugulage kwa nene isahabu iyikwete mumoto peyiwuyapiswa wunofu sambi uve munono nachene. Kangi ikiba ugulage isopeka inzelu, ufwale na ukugubika inyoni sa uwufuula wako. Gulage kangi amafuta wibake pamiho sambi ulave wunofu. ¹⁹ Nene yendikenyelaga na ukumupumya yeyeavesaga yendimwenda. Ukukola lulo kangasage umutima, silekage inzanangifu sako. ²⁰ Lavage! Nene nzimile pamulyango ndikong’ona. Umunu wone apulike iliswi lyangu na ukudindula umulyango, nzingila mukaye yakwe na ukulya ikilyo pamwinga nave, nave alya pamwinga na nene. ²¹ “Vala vevadwesa ndivakong’omeka pamwi nanene pa kigoda changu cha uwutwa, ndawe yinene lwendadwesise swe ndikong’omala pamwi na Dada vangu pa kigoda chakwe cha uwutwa. ²² “Yeina amapulikilo, sweno apulikage sila Umuhe se akugalongela amakanisa!”

¹ Pesilutye iso ndalafile, ndaguwene umulyango mudindule kuchanya. Na iliswi lya gula umubumo gwendemulike pamwandi gwe nda mubumo gwa ilipembe, gwatige, “Wusage ipa pachanya nane ngulagila ing’ani sesiwoneka pambele.” ² Ndawe lulusika lulo ndasogoswige na Umuhe. Kumbi uko kuchanya kokili ikigoda cha uwutwa na pachanya baho akong’ome uyumwi. ³ Uyo yealakong’ome pachanya amalavadikige hilo na ilikingambogo lyakipilimige kila ikigoda cha uwutwa imbali mbesili. ⁴ Fyefigombile ifigoda machumi gavili na fitayi fikipilime kila ikigoda cha uwutwa, na baho pachanya pa ifigoda fifyo, avavaha machumi gavili na vatayi vevakong’ome we vafwite imyenda myelu na ingela imbuyapile isahabu mumitwe. ⁵ Ilimemi na umubumo gwa limadadama, fyahumige mukigoda kicho cha uwutwa. Itala isimufung’ati isa umoto saakige baho pakigoda cha uwutwa. Itala iso je myuhe igimufung’ati ja Nguluvi. ⁶ Pawulongolo pa ikigoda cha uwutwa chepokili kinu wita nyanza iya ikilole, chekilangala wita wanda liganga lyelimalavadika pakomi. Mumbali mbesili sa icho ikigoda cha uwutwa na ukukipilima, pepofili ifigawa ifinyawumi fitayi. Ifigawa ifyo fyefimemile amiho kuwutalo na kumbele. ⁷ Ikigawa icha ukutala chekindawe inyalupala, na icha kavili chekindawe isenga, cha wudatu chekina ulwihwano wita lwa umunu, na icha wutayi che wita imbungu iyiguluka. ⁸ Ifigawa ifyo ifinyawunu ifitayi fyefina amapiko gimutanda chechekivesaga, na fyefimemile amiho, mugati na mwivala. Pamunyi na pakilo, wesifisuupa ukwimbaga: Mwelu, Mwelu, Mwelu Ye Mutwa, Nguluvi Munyaludali, yeekwali, yeikwali na yeakusa!” ⁹ Peluvesaga lusika ifigawa ifitayi pefimbige inzimbo isa ukumupela indolo, ichoga na ululumbo uyo yeakong’ome mukigoda cha uwutwa, yeainanaga kitasila, ¹⁰ vala avavaha machumi gavili na vatayi, vakwitosa pasi pa uyo yeakong’ome pa kigoda cha uwutwa na ukumusunyalila uyo yeinanaga mbepali na mbepali na ukusitoosaga ingela sawo pa ikigoda cha uwutwa wevitigila: ¹¹ “Lukuvaje veve uve wi Mutwa na Nguluvi vetu, wanukile indolo na ichoga na uludali pakuva wagafile ifinu mbefili na ukwimila uwende wako fyagafilwe na ukuwoneka.”

¹ Ndawe ndakiwonige ikitabu mwiwoko lya kundyo lya uyo yeakong’ome mukigoda cha uwutwa; nacho chechandike mugati na mwivala na ukuvikwa indoni simufung’ati. ² Kangi ndamuwene umunyivaha munyaludali ilaalika atigine: “Ngali yenani yeahwana iso indoni na ukukidindula icho ikitabu?” ³ Neke sawoniki umunu yeyeavesaga kuchanya, nambi mung’i, nambi pasi kuvafwe, yeahwanite ukukidindula icho ikitabu nave ukukilava mugati. ⁴ Sweno, nene ndavefile hilo pakuva sawoniki umunu yeahwanite ukukidindula, nambi ukukilava mugati. ⁵ Ndawe uyumwi va vala avavaha swe akunigila, “Ulavemba! Lavage! Inyalupala ya ulukolo lwa Yuda, umwisukulu va Daudi adwesise. Sambi ahwana ukuhesa indoni iso isimufung’ati na ukukidindula icho ikitabu.” ⁶ Pala pagatinagati pa kigoda cha uwutwa fila ifigawa ifinyawumi ifitayi, na vala avavaha ndayiwene mwana ng’olo yimite wita ndumule. Eina membe simufung’ati na amiho gimufung’ati ijo je myuhe igimufung’ati ja Nguluvi jeje misindike kukwekuvesaga mung’i, ⁷ ahele swe itegula ikitabu ukuhuma mwiwoko lya kundyo lya yula yealakong’ome mukigoda cha uwutwa. ⁸ Avelige hela itegula icho ikitabu, fila ifigawa ifinyawumi ifitayi pamwinga na vala avavaha machumi gavili na vatayi vaagwe kinyalileme pa ng’olo. Yeyeavesaga alakolye ligombo na ifinyandilo ifiwuyapile isahabu fimemile uwufumba, kilagilo cha ulwifunyo lwa avanu avelu va Nguluvi. ⁹ Sweno, ndawe vimbige ulwimbo ulu ulupya: “Veve winogela ukutegula icho ikitabu na ukuhesa indoni sacho. Pakuva veve wimudumule, na ukukola idanda yako yeumugulye Nguluvi avanu uluhuma mung’olo mbesili, indongele, amalugu, na avanu va ing’i mbesili. ¹⁰ Veve uvawuyipe vave wutwa wa uwutambisi vamupigile Nguluvi vetu nawo savayisagila ing’i.” ¹¹ Ndawe ndalavige, swe ndipulika iliswi lya avanyivaha wolofu hilo imbalilo yesihwaniti yivalilwe, mbilima kwa mbilima. Vevakong’ome vagombite ikigoda cha uwutwa, fila ifigawa ifinyawumi ifitayi na vala avavaha; ¹² Vihugite ukulonga: “Umwanang’olo umudumule yeinogela ukwanukila uludali, uwunono, uluhala, ululagi, indolo na ululumbo.” ¹³ Ndapulike ifigawa mbefili kuchanya; mung’i, pasi kuvafwe, na mubahali fitigila, “Kulumwene yeakong’ome mukigoda cha uwutwa, na kulu mwanang’olo, kuvelage na ululumbo na ichoga na indolo na uwutwa mbepali na mbepali.” ¹⁴ Na fila ifigawa ifitayi ifinyawumi fyatige, “Ena!” Na vala avavaha vaagwe kinyalileme, visunyalila.

¹ Ndawe ndamuwonige umwanang’olo ihesa indoni iyimwi ya sila indoni isimufung’ati. Ndakipulike ikimwi cha fila ifigawa ifinyawumi ifitayi kilonga kikwihuga wita limadadama, “Wusage!” ² Nene ndawe ndalavige, na kumbi pepoyili ifwalasi yimwi yinya livala lyelu baho. Na yeayihofile alakolye uludibulo, swe ipelwa na ingela. Sweno, ahesile wita idwesa kangi aginage ukudwesa. ³ Ndawe, umwanang’olo ahesise indoni iya kavili. Ndakipulike kila ikigawa ikinyawumi kitigila, “Wusage!” ⁴ Nane ndalafile na kumbi pepoyili ifwalasi iyingi baho, dung’u. Yeeayihofile apelitwe ikipigo cha uwusoming’asa sambi uwikalakunoga wugaye mung’i, avanu viwulagage, apelitwe limage likomi. ⁵ Ndawe umwanang’olo ahesige indoni ya wudatu. Ndakipulike kila ikigawa ikinyawumi icha wudatu kitigila, “Wusage!” Lavage kumbi pepoyili ifwalasi iyimwi baho initu. Na yealayihofile eakolye ifigelelo fivili ifya ukugelela uwusito mwiwoko lyakwe. ⁶ Ndapulike nda kinu wita liswi ilihuma mugati mwa fila ifigawa ifinyawumi ifitayi, nalyo lyatige, “Ulukongo lumwi lwa uwuse uwufulwike amagobole dinali yimwi wa ingano, na ing’ongo sidatu sa isayili kwa amagobole dinali yimwi, neke ulwene ulananga amafuta nambi idifayi!” ⁷ Ndawe umwanang’olo ahesise indoni iya wutayi. “Wusage!” ⁸ Nani ndalafile, na kumbi pepoyili ifwalasi iyimwi baho ifudufu. Nailitawa lya yealahofile yee fwa, na kuvafwe amuninilige mumbele. Iwo vapelitwe ululagi lwa ulubali ulumwi uludodo ku ng’i, mbeyili, vavawulage avanu vikola limage, ikinge, ifitamwa na ukukola ifikoko ifikali fya mung’i. ⁹ Ndawe Umwanang’olo ahesige indoni ya wuhanu. Ndawe ndawonige pala pasika pifunyo pakufung’ilisisa uwufumba imyuhe ja vala avevawulage vivalwa ulukani lwa Nguluvi, na ukwimila uwolelesi wewolelelige. ¹⁰ Sweno, ndawe vavembige vakwihuga: “Veve Mutwa, ve Mwelu na ve muhuvilwa, luva panili peufuvalila ukuhombela umukole kwa avakwikala mung’i mbevali ukwimila idanda yetu?” ¹¹ Swe vipelwa yeyeavesaga isopeka inaali iyinya livala lyelu, swe vilongelwa ulwa vaginage ukusupa kwa lusika ludodo, mbaka peyikwilye imbalilo ya avakami avayawo na vanyalukolo vawo ve nawo vawulagwa ndawe vavene lwevavawulige. ¹² Ndawe ndalavige, na ulusika umwanang’olo peahesige indoni iya mutanda, swe piva na ikitulo kikomi cha ing’i; ilisuva lyatilive wita ilyenda ilitifuse; na gu mwesi mbeguli gwave wita danda; ¹³ nasi ng’eng’esi naso sa kwilanga saagwe mung’i wita amakowo ga umusombe amafwamunga lwegilagalaga pasi pe umubiki ugwene gwipuga na ikifulufumbi. ¹⁴ Kwilanga kwipilinzile wita likalatasi lwelyalipilingwa; ifidunda mbefili na ifisima fyahesiwe pala pefyefipwali. ¹⁵ Ndawe avatema va mung’i, avavina, avavina va vanyigalu, avanono, vanyaludali, yeyeavesaga munyawingi na umutemapakwe, vifihite mumapalika na mumapango mufidunda. ¹⁶ Vakufitigila ifyo ifidunda na igo amapalika, “Mutugwilage, mukatufihe pataali na umwene ye ikong’omalaga mukigoda icha uwutwa, na pataali na ililakali lya Umwanang’olo! ¹⁷ Pakuva ikimunyi ichene hilo cha ililakali lyawo yekifikite. Ngali yenani yeahwana vibese nacho?”

¹ Pesilutye iso ndavawene vanyivaha vatayi vimile imbali isitayi isa ing’i, vibatilise ing’ala yilapuga na ludodo hela: nambi mung’i, nambi mubahali, nambi mumibiki. ² ndawe ndamuwonige umunyivaha uyungi akwilila pachanya uluhuma kumihago weakolye ikitemelo cha Nguluvi umumi. Ihugite liswi na ukuvalongela iwo avanyivaha avatayi avapele ukuyananga ing’i na ibahali, ³ “Mulayananga ing’i, nambi ibahali, nambi imibiki, mbaka pala petuve tuvavikite indoni avakami va Nguluvi vetu mu wusu wawo.” ⁴ Kangi ndawe ndapulikige imbalilo yawo iwo avikitwe indoni: Avanu mbilima ligana na machumi gatayi na vatayi va imbegalo isa Isilaeli. ⁵ Imbegalo ya Yuda ve vanu mbilima nyichumi na sivili; imbegalo ya Lubeni, mbilima nyichumi na sivili, imbegalo ya Gadi mbilima nyichumi na sivili, ⁶ imbegalo ya Aseli, mbilima nyichumi na sivili, imbegalo ya Nafutali, mbilima nyichumi na sivili, imbegalo ya Manase, mbilima nyichumi na sivili, ⁷ imbegalo ya Simioni, mbilima nyichumi na sivili; imbegalo ya Levi, mbilima nyichumi na sivili, imbegalo ya Isakali, mbilima nyichumi na sivili; ⁸ imbegalo ya Sabuloni, mbilima nyichumi na sivili, imbegalo ya Yosefu, mbilima nyichumi na sivili; na imbegalo ya Benyamini, mbilima nyichumi na sivili. ⁹ Ndawe ndalavige, swe nguliwona ililugu ikomi lya avanu vesivahwaniti ukuvalilwa: avanu va ing’i mbesili, ing’olo, ulukolo na indongele. Nawo vamemile pa kigoda icha uwutwa cha umwanang’olo, viva vafwite imyenda imyelu na ukwibata amatagala ga imivale mumawoko gawo. ¹⁰ Vihugite amaswi vitigila, “Uwukombolwa wetu wihuma kwa Nguluvi vetu yeakong’ome pa kigoda icha uwutwa, na ukuhuma kulu Mwanang’olo!” ¹¹ Vanyivaha mbevali viimite wevakigombite ikigoda cha uwutwa, avavaha na fila ifigawa ifinyawumi ifitayi. Vaagwe kinyalileme pakigoda cha uwutwa, swe vakumusunyalila Nguluvi, ¹² Vitigila, “Ena! Uwufunyilile, indolo, uluhala, ikilumbo, ichoga, ululagi na uludali fivelage kwa Nguluvi vetu, mbepali na mbepali! Ena!” ¹³ Uyumwi va iwo avavaha swe akumbusa, “Iva vevafwite imyenda imyelu veva nani?” ¹⁴ Nani ndamupitwe! “Ve mutambule, veve ye ulusele!” Nave amitwe, “Iva ve vala avalowike wunofu muneseko ingomi. Wofwige imyenda jawo mudanda ya Umwanang’olo, swe giva myelu. ¹⁵ Nambi vali ipa pa kigoda cha uwutwa cha Nguluvi. Vakumupigilaga Nguluvi ikilo na kikimunyi mu Tembeli yakwe; nave yeakong’ome mukigoda cha uwutwa avakitila ilihema livasiike avalolele. ¹⁶ Sisavadagana nambi kukeluka; lisuva nambi umungila gwalyo, sisalivavalila kangi, ¹⁷ pakuva umwanang’olo ye ali pagatinagati pa kigoda cha uwutwa saava mukwamila ng’olo vawo, nave saavalongosa ku mifwilo ja ululenga ulunyawumi. Nave Nguluvi saavahesa inzihosi mbesili mumiho gawo.”

¹ Na Umwanang’olo ave ihesa indoni iya mufung’ati, kwave sili kuchanya kwa lusika lwa ilipinga lya ikivalilo kimwi de, ² ndawe ndavawonige vala vanyivaha avimufung’ati avakwimaga pa Nguluvi vapelitwe imembe isimufung’ati. ³ Umunyivaha uyungi afikite, weakolye ikifung’lisiso ikiwuyapile isahabu, iimite pifunyo. Nave apelitwe uwufumba wolofu ahanze pamwinga na ulwifunyo lwa avanu mbevali va Nguluvi, pala pifunyo apawuyapile isahabu apali pawulongolo wa ikigoda cha uwutwa. ⁴ Ilisusi lya uwufumba lyahele kiting’a kuchanya, pamwinga na ulwifunyo lwa avanu va Nguluvi, ukuhuma mumawoko gakwe uyo munyivaha yee pa Nguluvi. ⁵ Ndawe umunyivaha ategulige ikifung’ilisiso icho, akukisopa umoto gwa pifunyo akukimemya, swe akukitosa kung’i. Swe kwave na umubumo, limadadama, limemi na ikitulo cha ing’i. ⁶ Ndawe vala avanyivaha avimufung’ati avakolye amapembe agimufung’ati swe vakwigelanisa ukugakuva. ⁷ Umunyivaha uva kutala akufile lipembe lyakwe. Swe indonya iyihanging’ine na amaganga na idanda fyatoosiwe mung’i. Swe iyimwi kwa isidatu ya ing’i yaapye. Na iyimwi kwa isidatu ya imibiki jaapye, na amahamba mbegali amadodi gaapye. ⁸ Umunyivaha uva kavili akufile lipembe lyakwe. Na ikinu wita ikidunda kikomi ikikwaka umoto chatoosiwe mubahali, ⁹ iyimwi kwa isidatu ya ifigawa mbefili fya mubahali fyaafwe, na iyimwi kwa isidatu ya ifipugu ifikomi fyanangike. ¹⁰ Ndawe umunyivaha va wudatu akuvige lipembe lyakwe. Na ing’eng’esi ingomi yeyaakige wita moto, yaagwe ukuhuma kuchanya, na ukwika mu yimwi ya isidatu ya imikoga na imifwilo ja ululenga. ¹¹ Ing’eng’esi iyo yitambulwa, “Wukali.” Sweno, iyimwi ya isidatu ya indenga save ng’ali, avanu wolofu vaafwe ukwimila ululenga lulo, pakuva lwapitwike ukuva lukali. ¹² Ndawe umunyivaha va wutayi akuvige lipembe lyakwe. Iyimwi ya isidatu ya ilisuva, na ya umwesi na ya ing’eng’esi yatofilwe; mbaka lulung’ali lwayo lwayasile ulumwi lwa isidatu lwa uwumalavadifu wayo. Iyimwi kwa isidatu ya ikimunyi nayo yagayike, lwendahihyo na iyimwi ya isidatu ya ikilo nacho. ¹³ Ndawe ndalavige, swe ndipulika imbungu yiguluka kuchanya hilo kwilanga yilonga yihugite, “Mwinalyo, mwinalyo, mwinalyo yemukwikala mung’i ulusika lwe avanyivaha avadatu vevasige pevava vakufile amapembe gawo!”

¹ Ndawe umunyivaha va wuhanu akuvige ilipembe lyakwe. Nani ndayiwene ing’eng’esi yeyeyigwe mung’i uluhuma kuchanya. Nayo yapelitwe ikidindulilo cha ilikombo iligaya mudugo. ² Sweno, ing’eng’esi iyo yadindwe ilikombo iligaya mudugo, lyahumite lisusi wita ilisusi lyelihuma mwitemela lya umoto. Ilisuva na kwilanga kwave lwisa ukwimila ilisusi lilyo lya kuvafwe. ³ Imanzi sahumite mwisusi lilyo, swe sikusa mung’i, sapelitwe uludali lwa ingii sa mung’i. ⁴ Swe silagilwa ulwa silananga ilisoli lya mung’i nambi amahamba nambi imibiki jejegivesaga, pesi sivanangage vala hela vesivateme uluhagi lwa Nguluvi muwusu wawo. ⁵ Imanzi iso sisenawule ukuwulaga avanu, pesi ukuvatesa hela kwa ulusika lwa myesi gihanu. Uwuvafi wesikwambusa windawe uwuvafi wevakumufika umunu pealumitwe na ingii. ⁶ Ulusika ulo avanu savayisaka ifwa neke sisavayiwona nda; kangi savadoboka ukufwa neke ifwa sayivakimbila. ⁷ Pesawonekige mumiho imanzi iso, sesindawe ifwalasi ingelanise kwigalu. Muchanya mumitwe jaso sesifwikitwe ingela isawonekige wita mbuyapile isahabu, na uwusu waso sesihwana na uwusu wa avanu. ⁸ Ifwili sesindawe ifwili sa avang’inetu, na amino gaso gegindawe amino ga Inyalupala. ⁹ Na amabapala wita ngwembe imbuyapile ichuma. Imibumo ja amapiko jaso je wita umubumo gwa ulugendo lwa imituka myolofu igikulunwa na ifwalasi nzolofu isikimbilila kwigalu. ¹⁰ Sesina mikila na imifwa ndawe ja ingii, na ukukola imikila gijo sesina ludali lwa ukwananga avanu kwa lusika lwa myesi gihanu. ¹¹ Kangi sinave umutema yeasitemile, nave ye munyivaha kwikombo iligaya mudugo ilitawa lyakwe ku kiebulaniya ye Abadoni, na ku Kigiliki ye Apolioni, kwekuta Umuwulasi. ¹² Ineseko isa ukutala yesilutye; pesisige isingi sikusa. ¹³ Ndawe munyivaha va mutanda akuvige ilipembe lyakwe. Nani ndapulike iliswi ilimwi ukuhuma imbali isitayi isa pifunyo apawuyapile isahabu ape pa Nguluvi. ¹⁴ Iliswi ilyo lyamutige uyo munyivaha va mutanda yeakolye ilipembe, “Vadindulige avanyivaha avatayi avapinge mu mukoga umukomi gwa Efulata!” ¹⁵ Avanyivaha vevagelanise ku kivalilo, ikimunyi umwesi, ukuwulaga iyimwi kwa isidatu ya avanu. ¹⁶ Ndapulike imbalilo ya vanyigalu avanyakuhova ifwalasi ye mbilima, mbilima magana gavili. ¹⁷ Ulu lwendasiwene iso ifwalasi na vanyakuhova ifwalasi mu maloto gago: vevina ingwembe mumambaga ise moto ng’ani, isinya livala ilinyakilesi na linyaludula na wita ikibiliti. Imitwe ja iso ifwalasi jegindawe ija inyalupala; na umoto ilisusi na ikibiliti fyahumige mumilomo jaso. ¹⁸ Iyimwi kwa isidatu ya avanu vaafwe ukukola ineseko siso isidatu, kwekutigila, umoto, ilisusi na ikibiliti, fyefyahumige mumilomo jaso; ¹⁹ pakuva uludali lwa ifwalasi iso je mumilomo jaso na mumikila jayo. Imikila jayo jegina mitwe wita ja nzoka, na vakolige jijo ukutesekesa avanu. ²⁰ Avanu avangi vevevasige vesivafwii na ineseko siso, sivapitwiki na ukufileka ifinu fyevevawuyipe na amawoko gawo vavene, pesi ulwa vaginite ukusunyalila amasoka, ifihwana nguluvi ifiwuyapile isahabu, amagobole, ichuma cha isaba, amaganga na imibiki, ifinu fyesihwaniti ukulava, ukupulika nambi ukugenda. ²¹ Na sivahongesi nu kupela na ukuwuleka uwuwulasi, uwuhavi, uwugoni na uwuhiisi.

¹ Ndawe ndamuwonige umunyivaha uyungi umunyaludali akwika ukuhuma kuchanya. Na emufwike lifufu, na ilikinga mbogo mumutwe gwakwe. Uwusu wakwe wewindawe wita lisuva, na amagulu gakwe gegindawe wita umoto. ² Mumawoko gakwe eakolye ikitabu kidodo kidindule. Ageliike ligulu lyakwe lya kundyo pachanya mubahali, na lya kung’igi pachanya mung’i ing’afu, ³ na ukukemela akwihuga liswi liva na umubumo wita gwa Inyalupala. Ave akwihuga, imibumo gimufung’ati januche kwa kitulo. ⁴ Na ijo imibumo igimufung’ati pejalongige, nene ndasakige ukwandika. Neke ndapulike iliswi ukuhuma kuchanya litigila, “Ing’ani isa imibumo igimufung’ati ijo kinyele, lemwa kwandika!” ⁵ Ndawe yula umunyivaha yendamuwene imile pachanya mubahali na pachanya mung’i ing’afu akaang’we liwoko lyakwe lya kundyo kuchanya, ⁶ swe akwilapa mwitawa lya Nguluvi yeinanaga mbepali na mbepali, Nguluvi yeagafile kuchanya na mbefili ifilimumo, ibahali na mbefili ifilimumo ing’i na mbefili ifilimumo. Swe itigila, “Ulusika lwa ukugina ukusindila lusisile! ⁷ Neke ulusika lula umunyivaha va mufung’ati peavapulise liswi lyakwe, ulusika lwe ava akufile ilipembe lyakwe, Nguluvi akwisa lula lwealahosise ukupiga ulwa ikinyele ndawe lweeavalaliche avakami vakwe avavisi.” ⁸ Ndawe lila iliswi lyendemulike ukuhuma kuchanya pala pamwandi lyalonzile nanene kangi, “Bitage ukakitegule kila ikitabu ikidindule, chekili mwiwoko lya munyivaha yeimile pachanya mubahali na pachanya mung’i ing’afu.” ⁹ Sweno, ndawe ndamubitilige uyo umunyivaha, swe ngumutigila amelage lino ikitabu ikidodo. Nave anigee, “Kitegule ukilye mumulomo gwako, nacho kiva kinyalwiha wita wuki, neke mwileme kiva kikali wuhulo!” ¹⁰ Sweno, ndawe ndakitegulige ikitabu kicho ikidodo ukuhuma mwiwoko lya yuyo umunyivaha, swe ndilya, nacho chekinyalwiha wita wuki mumulomo gwangu, neke ndavelige ndimila chave kikali wuhulo mwileme lyangu. ¹¹ Ndawe ndalongeligwe, Lukuvaje kangi ukulaalika ulukani lwa Nguluvi kwa avanu wolofu, va ing’i mbesili, ing’olo mbesili, indongele mbesili na avatwa!”

¹ Ndawe ndapeligwe uludete lwelwe wita lugoda lwa kigelelo, swe ndilongelwa, “Winuke ubite ukayigele i tembeli ya Nguluvi, pifunyo, na ukavavalile avanu vevisunyalila mugati mumo. ² Neke yilekage ibwalo iyilikwivala ya i Tembeli, ulayigela, pakuva iyo nawule kwa avanu va ing’i isingi, vala avayilivata iboma inzelu lusika lwa myesi machumi gatayi na givili. ³ Nane ndivapela uludali awolelesi vangu vavili sambi vavile lusika lwa ifilo mbilima yimwi na magana gavili na machumi gimutanda kono we vafwite imyenda imitifuse.” ⁴ Iwo awolelesi avavili je imibiki igivili ja imiseituni na itala isivili isikwimaga pa Mutwa va ing’i. ⁵ Wone umunu igelele ukuvatesa, umoto ugwihumaga mumilomo jawo guvawulaga avatavangu vawo, na yeyeavesaga munu yeigelela ukuvatesa afwila lulo. ⁶ Iwo vina lulagi ukuleka vatanile indonya ukuta yilatonya ulusika pevilalika ulukani lwa Nguluvi. Kangi vina ululagi lwa ukudulika imifwilo mbegili ja ululenga give danda, na ululagi lwa ukwambusa ineseko na ifwa yeyeyivesaga mung’i pevavesaga vawendite. ⁷ Neke pevave vasinzile ukudalika ulo ulukani ing’oko iyihuma mwikombo ilihelesa yihoma nawo ligalu, yivalema na ukuvawulaga. ⁸ Imifimba jawo gisigala mumakasi ga iboma ingomi pa kwigilisa iboma iyo ku Sodoma na Misili kwa Umutwa vave atumbikwe. ⁹ Avanu va ing’olo mbesili indongele, ing’i na ilivala savagilava imifimba ijo kwa ulusika lwa filo fidatu na ikilipinga, na sisavatawula gitagwe. ¹⁰ Avanu avakwikalaga mung’i savahekelela ifwa ya avanu iwo avavili. Savawuyapa uluhekelelo na ukwisindikila ifipelwa pakuva avavisi iva avavili vakavelige vakuvafwahisa pakomi avanu va mung’i. ¹¹ Neke pefilutye ifyo ifilo ifidatu na ikilipinga umuhe gwa uwumi ukuhuma kwa Nguluvi gwavinje, nawo ndawe vimige, mbevali avavawene vibatike na umuhwehwe mukomi. ¹² Ndawe iwo avavisi vapulike iliswi likwihuga ukuhuma kuchanya likuvatigila, “Musage ipa pachanya!” Nawo swe vakwilila pachanya kuchanya mwifufu, avatavangu vawo viva we vakuvalava. ¹³ Pa ikivalilo kicho kwave na ikitulo kikomi cha ing’i, ulubali ulumwi lwa iyimwi kwa nyichumi ya ing’i yanangike. Avanu mbilima simufung’ati vaafwe ukwimila ikitulo kicho cha ing’i. Avanu avasige wogwipe pakomi, swe vakumulumba Nguluvi va kuchanya. ¹⁴ Ineseko isa kavili yesilutye, neke lavage! Ineseko isa wudatu sikusa sikwangufya. ¹⁵ Ndawe umunyivaha uva mufung’ati akuvige ilipembe lyakwe. Na amaswi makomi gapulise kuchanya gitigila, “Lino uwutema wa mung’i ye wuve wa Umutwa vetu na Kilisito vakwe. Nave atema kitasila.” ¹⁶ Ndawe vala avavaha machumi gavili na vatayi na avakong’ome pa Nguluvi mufigoda fyawo fya uwutwa, vagwe kinyalileme, swe vakumusunyalila Nguluvi, ¹⁷ Vitigila: “Mutwa Nguluvi munyaludali, yewikwali na yewewikwali! Tukukulumba, pakuva ukwete uludali lwako ulukomi swe vivanga ukutema! ¹⁸ Avanu avamyanza vibatiike na ililakali, pakuva ulusika lwa uwuvifu wako lufikite, ulusika lwa ukuvahiga avafwe. Lwe lusika lwa ukuvaposa avakami vako avavisi, avanu vako na mbevali avakulipela indolo litawa lyako, avavina na avadodo. Lwe lusika lwa ukuvawulagila ng’ani vala vevakuyiwulagila ng’ani ing’i.” ¹⁹ Itembeli ya Nguluvi kuchanya swe yidindulwa, na Ilisandiko lya Lufingano lwakwe lyawonike mu Tembeli yakwe. Ndawe kwawonekige limemi, liswi, limadadama, ikitulo cha ing’i na indonya ngomi yinyamaganga.

¹ Sweno, ikilagilo ikikomi chawonike kuchanya. Epwali ipo umung’inetu yeemufwike lisuva, na umwesi pasi pa magulu gakwe, na ingela na ing’eng’esi nyichumi na sivili mumutwe gwakwe! ² Umung’inetu uyo ali na filo, ayofile ukwimila uwuvafi wa ukwivikula sambi egale umwana. ³ Ikilagilo ikingi chawonike kuchanya: liyoka likomi lidung’u na linya membe nyichumi na imitwe gimufung’ati, na imitwe mbegili jemifwike ingela. ⁴ Liyoka ilyo lyakulumite likola umukila gwalyo ing’eng’esi iyimwi kwa isidatu ya ing’eng’esi isa kwilanga na ukusitoosa pasi mung’i. Nalyo limite pa uyo Umung’inetu yeali pipi ukwegala umwana, ligelanise hilo ukumumila umwana, pembe hela egalwe. ⁵ Ndawe umung’inetu uyo egalige umwana mukwamisi, yula yeatema avanu va ing’i mbesili ikola ulugoda lwa ichuma. Neke umwana uyo swe inyelebulwa na ukusindikwa kwa Nguluvi na ku kigoda chakwe cha uwutwa. ⁶ Swe uyo mwayuva akimbilye ku balali, kula kwe Nguluvi alamugelanikise apono apawunamu pala pealalolelwa ikale kwa ulusika lwa filo mbilima yimwi na magana gavili na machumi gimutanda (1260). ⁷ Ndawe kwalamukige ligalu kuchanya: Mikaeli na avanyivaha vakwe vihomile na lilyo liyoka, nalyo lyavananzile pamwinga na vanyivaha vakwe. ⁸ Neke ulwene liyoka ilyo silyahwaniti ukuvalema, na pambele kangi sipavi na ikilega chalyo kuchanya ukwimila ilyene nambi vanyivaha valyo. ⁹ Sweno, liyoka lilyo ilikomi lyatosiwe kwivala. Liyoka ilyo ye yula liyoka lya pidaha yuyo yeitambulwagwa kangi, Ibilisi apangi Setani. Ye akuyisanga ing’i mbeyili. Nachene, atoosiwe mung’i, na ililugu lyakwe mbelili pamwinga nave. ¹⁰ Ndawe ndapulikige liswi likomi kuchanya litigila, “Lino uwukombolwa uwihuma kwa Nguluvi yewufikite! Uludali na Uwutwa wa Nguluvi vetu yewuwonike pawelu. Nayi Kilisito aluvisile pawelu ululagi lwakwe! Pakuva yula umusongela va avanyalukolo vetu, yeakwimaga pa Nguluvi akuvasongela pakilo na pakimunyi, lino atoosiwe kwivala. ¹¹ Vanyalukolo vetu yevadwesise kwa idanda ya umwanang’olo na kwa uludali lwa uwanachene wevawulaalikige, pakuva sivawutugiti na uwunani wawo ukuta kinu hilo, swe viva vidiche nambi ukufwa. ¹² Palulo, muhekelelage nyenye mwe kuchanya na mbefili ifikwikala kuko. Neke, mwinalyo nyenye mwe ing’i na ibahali, pakuva Ibilisi avasye we ina lilakali na uwuvifu wukomi, pakuva akulukagula ukuta ifilo fyakwe ifisige ye fikefu.” ¹³ Liyoka lyave likulukagula ukuta litoosiwe pasi mung’i, swe livanga ukumufwima yula mwayuva yee eje umwana umukwamisi. ¹⁴ Neke mwayuva uyo apelitwe amapiko gavili ga imbungu sambi ahwane ukuguluka abite pataali hilo na ilyo liyoka, mbaka apono pakwe ku balali kwe ake alolelwa wunofu ulusika ulutaali. ¹⁵ Sweno, liyoka lyafunyite ululenga lolofu wita mukoga, swe ululenga ulo lwamuninilite uyo mwayuva mumbele sambi lumutegulise. ¹⁶ Neke ing’i yamutanzile uyo mwayuva yadindwike wita wuvi na ukwingisa ululenga ulo ulwahumige mumulomo gwa liyoka lilyo. ¹⁷ Swe, liyoka ilyo lyamuvipye uyo mwayuva, swe likwibitilaga, lyahele ukwihoma na imbegalo iyingi ya uyo mwayuva, kwekutigila vala mbevali avanyachoga ku ndagilo isa Nguluvi na ukwinatila uwanachene wa Yesu. ¹⁸ Na liyoka ilyo lyahele lisakwima pamugekela gwa ibahali.

¹ Ndawe ndayiwonige ing’oko iyimwi yihuma mubahali. Ing’oko iyo yeyina mitwe gimufung’ati na imembe nyichumi, ilipembe lyelivesaga lyelina ingela. Ilitawa lya amaligo lyelyandikwe pachanya pa imitwe gijo. ² Ing’oko iyo yendayiwene yeyindawe duma, na amagulu gayo yeyindawe lisikili, na umulomo gwakwe wita gwa Inyalupala. Lila liyoka lyayipelye yila ing’oko iyo uludali lyalyo; ikigoda chalyo cha uwutwa na ululagi ulukomi. ³ Umutwe ugumwi gwa iyo ing’oko gwawonekige wita gutesike gwina mavamba wuhulo, neke ilivamba ilyene yelyeliponite. Ing’i mbeyili yasasave ing’oko yiyo na ukuyininila. ⁴ Avanu mbevali swe vakulisunyalila lila liyoka pakuva lyayipelye yila Ing’oko uludali lwayo. Vayisunyalye kangi na yila ing’oko vitigila, “Ngali ye nami yeindawe iyi ing’oko? Ngali yenani yeahwana ukwihoma nayo?” ⁵ Ndawe ing’oko iyo swe yitawulwa yilonge ing’ani isa ukwitupya na ukumuliga Nguluvi; swe yipelwa ululagi kwa lusika lwa myesi machumi gatayi na givili. ⁶ Sweno, ndawe yavangige, ukumuliga Nguluvi, ukuliga na ilitawa lyakwe, na mbevali avikwikalaga kuchanya. ⁷ Swe yitawulwa ukuvahoma ligalu na ukuvadwesa avanu va Nguluvi. Yapelitwe ululagi ku avanu va ing’olo mbesili, ulukolo, indongele na ing’i mbesili. ⁸ Mbevali avakwikalaga mung’i savamusunyalila pesi vavala hela ve amatawa gawo gandikwe uluhuma pamuvango gwa ukugawa ing’i mukitabu cha uwumi cha umwanang’olo umudumule. ⁹ “Munyamapulikilo, apulikage! ¹⁰ Wone ave vadonyitwe ukugalulwa luvavaje ukuta iwo savagalulwa; wone vadonyitwe ukuwulagwa kwa ilimage iwo savadumulwa na ukwimila siso, luvavaje avanu va Nguluvi vavelage na ulwikangaliso na ulufuuwo.” ¹¹ Ndawe ndayiwonige ing’oko iyingi yihuma mung’i. Yeyina membe sivili wita sa ng’olo, na yalongige wita liyoka. ¹² Yeyina lulagi ulukwilaniche ukuhuma kwa yila ing’oko iya kutala, na yakwete lululagi lulo pa ing’oko yiyo. Ayikange ing’i mbeyili na mbevali mumo ukuyisunyalila ing’oko yiyo iya kutala yeyina ilivamba lya ifwa lyelyeliponite. ¹³ Sweno, iyi ing’oko iya kavili yapigite imiitu minyawuhulo mbaka yambwise umoto guhume kuchanya gwike mung’i pamiho ga avanu. ¹⁴ Yavayasise avanyang’i va mung’i ukukola imiitu gijo jeyapelitwe ukupiga pa ing’oko yila iya ukutala. Ing’oko yavalonje ava mung’i vawuyapage ikiganiso ukwimila ululumbo lwa yila ing’oko yeyeyitesike yina livamba lya ilimage neke yananite kangi. ¹⁵ Swe ndawe apelitwe uwuwuya ukuyiputila uwumi icho ikiganiso cha yila ing’oko iya ukutala, mbaka chahwanite ukulonga na ukuvawulaga avanu mbevali vesivakisunyali. ¹⁶ Ing’oko yavakange mbevali, vavina na vadodo, avanono na avamikaa, avanu avatemapawo na avanyawingi, vavavikage indoni kwiwoko lya kundyo na muwusu wawo. ¹⁷ Yavakanie mbevali ukugula nambi ukugusa kinu pesi vavala hela avateme uluhagi lulo, kwekutigila ilitawa lya yila ing’oko apangi ulwandiko lwa imbalilo ya ilitawa lilyo. ¹⁸ Ipa lino luvaje muvelage na uluhala, yula umunyaluhala avalilage imbalilo ya ing’oko iyo kwekutigila kiki, pakuva imbalilo iyi ya vanu, imbalilo iyene ye iyi, magana gimutanda, machumi gimutanda na simutanda.

¹ Ndawe ndakiwonige ikidunda cha ku Sayuni, na umwanang’olo imile muchanya; pamwi nave vepwali avanu mbilima ligana na machumi gatayi na vatayi ve valivandikwe muwusu wawo ilitawa lya Umwanang’olo na ilitawa lya Udade. ² Kangi ndawe ndapulikige iliswi ukuhuma kuchanya ilyapulisige wita ululenga ulwibuma lukwitoosa mumatalawe, wita umubumo umukomi gwa limadadama. Lyapulisige wita lwimbo lwa avakufi avikuva amagombo gawo. ³ Iwo avanu mbilima ligana na machumi gatayi na vatayi vimbige ulwimbo ulupya pa kigoda cha uwutwa na pa fila ifigawa ifinyawumi ifitayi na pa vala avavaha. Siekwali umunu yeahwanite ukwiyigisa ukwimba ulwimbo ulo pesi vavala hela avanu avakombole mung’i. ⁴ Avanu vawo, vevala vesivisopiti muwuhongawinya vagendanile na avang’inetu, pakuva veva tunaafu. Avene, vakumuninilaga Umwanang’olo kukwe abitaga. Iwo vevala avagule uluhuma muvanu awolofu, kangi vave ve va ukutala ukutawulwa kwa Nguluvi na kulumwanang’olo. ⁵ Na sivigeli nangi ukuva vadesi; vagaya wananzi uwewuvesaga. ⁶ Ndawe ndamuwonige Umunyivaha uyungi iguluka adonyite kuchanya ina Ulukani Ulunofu lwa mbepali na mbepali lwa Nguluvi sambi alulalike ku vanu mbevali avakwikalaga mung’i ku vanu va ing’i mbesili, ing’olo mbesili, avanu va indongele mbesili na amavala mbegali. ⁷ Alonzile akwihuga, “Muvelage na ichoga kwa Nguluvi na ukumupela indolo! Pakuva ikivalilo yekifikite cha uluhigilo lwakwe. Mumusunyalilage umwene yeagafile ing’i na kuchanya, ibahali na imifwilo ja ululenga.” ⁸ Umunyivaha va kavili amufwatite uyo uva ukutala kono weitigila, “Yeagwe! Ena Babiloni ingomi yeagwe! Babiloni yeavapelye avanu va ing’i mbesili vayinywe idifayi yakwe idifai ing’ali uwuyasi wakwe.” ⁹ Na umunyivaha va wudatu avafwatite iwo avavili ilonga akwihuga, “Yeyeavesaga munu yeakuyisunyalila yila ing’oko na ulwihwana lwayo na ukwidikila ukutemwa uluhagi lwayo muwusu wakwe nambi mwiwoko lyakwe, ¹⁰ uyo atang’anila ilikali lya Nguluvi iligaya uwudegepele. Umunu uyo sa ateseka mumoto gwa ikibiliti pa Vanyivaha avelu na pa Umwanang’olo. ¹¹ Ilisusi lya umoto ugukuvatesa likwililaga kuchanya mbepali na mbepali. Avanu iwo vevayisunyalye ing’oko na ulwihwano lwayo, na ukutemwa uluhagi lwa ilitawa lyayo, sisavava na iikiba yiyeyivesaga pakilo na pamunyi.” ¹² Ukwimila siso, luvavaje avanu va Nguluvi, avanu avakwinatila ululagi lwa Nguluvi na ukumufuuwa Yesu, vavelage na ulwikangaliso. ¹³ Ndawe ndapulikige iliswi ukuhuma kuchanya litigila, “Wandike ulu! Vinomile avanu ve uluhuma lino vifwa kono wevahanzile na Umutwa.” Nave Umuhe itigila, “Vinomite hilo! Pakuva savasuupa uluhuma mu kuguda mbekuli; na amaveleko ga ifipigo fyawo sagagendasa nawo.” ¹⁴ Ndawe ndalavige, kumbi pepolili lifufu ilyenzelufu baho. Na pachanga pa lifufu lilyo pepina kigawa wita munu. Alafwite ingela imbuyapile isahabu mumutwe, kono akolye inyengo mwiwoko lyakwe. ¹⁵ Ndawe umunyivaha uyungi ahumite mu Tembeli weakwihuga akumutigila yula yealakong’ome mwifufu, “Ngukugongola, kolage isenzi yako ukabete isanga, pakuva ulusika lwa isanga yelufikite; isanga ya ing’i yeyitung’wine.” ¹⁶ Sweno, yula yealakong’ome mwifufu atoosise isenzi yakwe mung’i, na isanga ya ing’i ndawe yabetigwe. ¹⁷ Ndawe umunyivaha uyungi ahumite mu Tembeli kuchanya weakolye inyengo inzugi. ¹⁸ Ndawe kangi umunyivaha uyungi umwimilisi va umoto, ahumite pifunyo, akumulongela akwihuga yula umunyivaha yeakolye isenzi iyinyawugi, “Nave kolage iyo isenzi yako inzugi, ukadumule isabibu ukuhuma mumisabibu ja mung’i pakuva isabibu isene yesitung’wine!” ¹⁹ Sweno, umunyivaha uyo ndawe atoosige isenzi yakwe mung’i, swe idumula isabibu sa mung’i, swe akusisopa mu kisilo ikikomi cha ukuhusila isabibu, ikitegulilo cha ililakali lya Nguluvi. ²⁰ Swe isabibu iso sihuswa mugati mwa isavani iyili kwivala kwa iboma, na idanda ukuhuma musavani iyo yanyilime pataali wita nzwambo magana gadatu na uwuhelesa wacho wita nzwambo magana givili.

¹ Ndawe ndakiwonige ikilagilo ikingi kuchanya, kikomi na cha kwinatila. Ipo pepovali vanyivaha avimufung’ati ave vina ineseko iso ingomi isimufung’ati isa kuwusililo. Na ukukola ineseko iso ingomi isimufung’ati, ililakali lya Nguluvi liva likwilaniche. ² Ndawe ndakiwonige kinu wita bahali ya kilole, nyanze na umoto. Ndawene kangi vala avanu vevayidwesise yila ing’oko na ulwihwano lwayo na imbalilo ya ilitawa lyakwe, vevimile palubali pa iyo ibahali ya ikilole, wevakolye amagombo agevapelitwe na Nguluvi. ³ Vimbige ulwimbo lwa Musa umukami va Nguluvi na ulwimbo lwa Umwanang’olo vitigila: “Uwukomi wa uwuhulo wulimufipigo fyako! Veve ve Nguluvi ve Mutwa munyaludali mbeluli ing’asi sako ngolofu na sanachena! Veve ye ulimutema va mbepali kwa mbevali. ⁴ Ye nani mugaya choga na ukulipela indolo ilitawa lyako veve ve Mutwa? Pakuva veve ye wiyena ve mwelu. Avanu va ing’i mbesili savakusila na ukukusunyalila pakuva ifipigo fyako fya wugolofu fiwonike kwa mbevali.” ⁵ Pesilutye iso ndayiwene i Tembeli ndindule kuchanya, na mugati pepolili ilihema ilyalagilige uwulipwali wa Nguluvi. ⁶ sweno, vala avanyivaha avimufung’ati avanya neseko isimufung’ati vahumite mula mu Tembeli, kono wevafwite imyenda igimalavadika ijesiwe hilo na imisipi imiwuyapile isahabu mumambaga sawo. ⁷ Ndawe, uyumwi va ifigawa fila ifitayi avapelye iwo avanyivaha avimufung’ati ifinyandilo ifiwuyapile isahabu ifimemile ililakali lya Nguluvi, yeinanaga kitasila. ⁸ Itembeli yamemile ilisusi ilyambwise na indolo na uludali lwa Nguluvi, na siekwali umunu yeahwanite ukwingila mu Tembeli mbaka pesadusise sila ineseko ingomi isimufung’ati isa vala avanyivaha avimufung’ati.

¹ Ndawe ndapulikige iliswi likwihuga ukuhuma mu Tembeli likuvatigila vala avanyivaha avimufung’ati, “Mubitage mukabohole ifinyandilo ifyo ifimufung’ati fya ililakali lya Nguluvi mung’i.” ² Sweno, umunyivaha uva kutala ahele asakubohola ikinyandilo chakwe mung’i. Ulusika lulo ifipemba ifiyavaga na ukuvava wuhulo fikuvafika avanu mbevali vevevavike indoni ing’oko, na vala avasunyalilige ulwihwano lwayo. ³ Ndawe umunyivaha uva kavili aboholige ikinyandilo chakwe mu bahali. Nayo ibahali yapitwike yiva nda ng’ani, wita ya umunu yeafwe, na ifigawa mbefili mubahali fyaafwe. ⁴ Umunyivaha uva wudatu abohwe ikinyandilo chakwe mumikoga na imifwilo ja ululenga, najo japitwike danda. ⁵ Ndamupulike umunyivaha umwimilisi va ululenga itigila, “Veve ve Mwelu, Yewikwali na yewewikwali! Veve ye wi mugolofu muluhigilo ulu lwe uhigite. ⁶ Pakuva vayibohwe idanda ya avanu vako na ya avavisi, nave uvapelye idanda vanywe; Ulu luvavaje hilo!” ⁷ Ndawe ndapulikige iliswi pifunyo litigila, Ena, Umutwa Nguluvi Munyaludali! Inyigilo sako mbesili sa nachene na sa wugolofu!” ⁸ Ndawe umunyivaha uva wutayi aboholige ikinyandilo chakwe mwisuva. Swe lisuva lipelwa uludali lwa ukuvalalisa avanu likola umoto gwalyo. ⁹ Swe, avanu valalye fivi wuhulo; ndawe vamuligige Nguluvi umunyaludali lwa ineseko iso mbesili ingomi. Neke ulwene sivapesili inzanangifu sawo nambi ukumupela indolo Nguluvi. ¹⁰ Ndawe umunyivaha uva wuhanu abohwe ikinyandilo chakwe pa kigoda cha uwutwa cha yila ing’oko. Ulwisa lyawuselengite uwutema wayo, avanu vageleswe amino gawo ukwimila uwuvafi, ¹¹ vamulisile Nguluvi va kuchanya ukwimila uwuvafi wawo na ifipemba fyawo ifyayavige wuhulo. ¹² Ndawe umunyivaha va mutanda aboholige ikinyandilo chakwe mumukoga umukomi ugwitambulwa Efulata. Ululenga mbeluli lwakasile, na palulo ing’asi yawuyipwe ya amagulu vagendelage avatema va ku mihago. ¹³ Ndawe ndawonige amasoka gadatu age gindawe ifyula, gihuma mumulomo gwa lila liyoka, mumulomo gwa yila ing’oko, na mumulomo gwa yula umuvisi va uwudesi. ¹⁴ Igi jegila imyuhe ja amasoka igipigaga imiitu. Igi jegibitaga kwa avatema va ing’i mbeyili na ukuvakong’asa pamwi ukwimila iligalu likomi. Ikimunyi kila cha Nguluvi Umunyaludali. ( ¹⁵ “Lavage! Nene ngusa wita muhiisi! Mwinomi umunu yula yeiva ivasa mugulo weafwite imyenda jakwe ulwa alagenda wufuula hela uko na uko pa vanu.” ) ¹⁶ Sweno, imyuhe ijo javakong’ise iwo avatema apono apitambulwagwa ku Kiebulaniya Halimagedoni. ¹⁷ Ndawe umunyivaha va mufung’ati aboholige ikinyandilo chakwe mwilanga! Iliswi likomi lyapulise uluhuma pa kigoda cha Umutwa, mu Tembeli, litigila, “Umudugo yegufikite!” ¹⁸ Kwawonike limemi, liyowo, umubumo na ikitulo cha ing’i, chechesikilava kiwoneka uluhuma Nguluvi peakumugava umunu. ¹⁹ Iboma yila ingomi yavagwike yihuma padatu, naso iboma sa avamyanza sagwilye ng’ani. Babiloni, iboma ingomi, yiwikwe na Nguluvi. Ayinywesise ikinywelo cha idifai ya ililakali lyakwe ilikomi. ²⁰ Ifigunguli mbefili fyayasile, nafyo ifidunda sifyawoniki kangi. ²¹ Indonya ya amaganga amakomi yinya wusito wa ng’ongo machumi gahanu yavatonye avanu, nawo vamulisile Nguluvi vakumuvala uluteseko lwa indonya yiyo ya amaganga. Ena, nachene uluteseko lwa indonya iyo ya amaganga lwe lukomi wuhulo.

¹ Uyumwi va vala avanyivaha avimufung’ati avevakolye ifinyandilo aasile, swe akunigila, “Wuse, nane ngulagila, lula lwe umugoni yula umwaafu lweapuma, iboma yila inzenge pipi na imikoga imyolofu. ² Avatema va ing’i vakagonite nave; na avanu avakwikalaga mung’i vagalite idifai ya uwugoni wakwe.” ³ Ndawe, Umuhe andongelige, akusogosa mbaka ku balali. Uko ndamuwene umung’inetu akong’ome pachanya pa ing’oko idung’u. Ing’oko iyo yenzandike amatawa ga amaligo imbali mbesili; nayo yeyina mitwe gimufung’ati na imembe nyichumi. ⁴ Umung’inetu uyo eafwite umwenda gunya livala linyakilesi na lidung’u, aliwuyapise na isahabu, amaganga aga amagobole molofu na ilulu. Mwiwoko alakolye ikinywelo ikiwuyapile isahabu cheche kimemile imbifyo na mbesili isa uwaafu isilagila uwugoni wakwe. ⁵ Emwandike litawa lya inzivililo muwusu wakwe, “Babiloni ingomi, uyuvawo va avagoni na ing’ani mbesili isivifya wuhulo mung’i.” ⁶ Ndamuwene umung’inetu uyo agalite idanda ya avanu va Nguluvi, na idanda ya avanu vevawuligwe vivalwa ukumulaalika Yesu. Pendimuwene ndasasave wuhulo. ⁷ Neke munyivaha anigee, “Mbi ndawuli wisasavala? Nene ngulagila ulwa ikinyele cha umung’inetu uyu na ing’oko iyo yeahofile yinya mitwe gimufung’ati na imembe nyichumi. ⁸ Iyo ing’oko yuyiwene yenzumi pamwandi, neke lino yifwe. Nambi ndahihyo, yilipipi hilo ukwilila ukuhuma mwikombo kuvafwe, na ukubita kuluhigilo avanu mbevali ve amatawa gawo sike galandikwa mukitabu cha uwumi uluhuma umuvango gwa ing’i, savasasavala ukuyiwona iyo ing’oko ye pala pamwandi, yekoyili, yisukuli na sa yusa kangi. ⁹ “Ipa pisigila uluhala na uwusugu! Sweno, imitwe igimufung’ati fye fidunda ifimufung’ati, na uyo umung’inetu yeakong’ome pachanya. Imitwe ijo kangi ve vatema avimufung’ati. ¹⁰ Mwavawo avatema avimufung’ati, avahanu yevakayasile, uyumwi peasigala na kulino, na yula uyungi salafika; na peafikite asigala lusika ludodo. ¹¹ Iyo ing’oko yeye nzumi pamwandi neke kulino sipenzumi kangi ye mutema va munana, nave kangi yeyumwi mwavava avimufung’ati, nave akwibitilaga kukuyasiwa. ¹² “Sila imembe nyichumi seusiwene ve vatema vesivalavanga ukusagila. Neke ulwene vapelwa ululagi lwa ukusagila kwa lusika lwa kivalilo kimwi pamwi na yila ing’oko. ¹³ Lwevadonyite iva mbevali avanyichumi lumwi, nawo vayipela ing’oko yila uludali nu lulagi lwawo mbeluli. ¹⁴ Savihoma ligalu na umwanang’olo, neke umwanang’olo sa avadwesa pakuva umwene ye Mutwa va avatwa na Mutema va avatema. Pamwi na vala veavekemelye nu kuvahagula na vahuvilwa.” ¹⁵ Umunyivaha anigee kangi, “Lula ululenga lweuluwene pala peakong’ome yula umugoni, ve vanu va ing’i mbesili, avanu va amavala mbegali, na indongele. ¹⁶ Imembe sila isinyichumi seusiwene na yila ing’oko simuvipila uyo umugoni. Sitegula mbefili fyeinafyo nu kumuleka aliwufuula; vamulya nyama na ukumulalisa mumoto. ¹⁷ Pakuva Nguluvi avisile lukani mugati mwawo lwevakwisage lweadonyite, kwekutigila ulwa ukuyidikisa avene kwa avene na ukuyipela iyo ing’oko ululagi lwawo lwa ukusagila, mbaka ipo pe ulukani lwa Nguluvi pelwikwila. ¹⁸ “Na yula umung’inetu yumuwene ye yila iboma ingomi iyikuvasagila avatema va mung’i.”

¹ Pesilutye iso, ndamuwene umunyivaha uyungi akwika ukuhuma kuchanya. Ali na ludali lukomi, na ing’i yang’alikwe na ulumalavadiko lwakwe. ² Swe, ihugite liswi itigila, “Ugwe; Babiloni ingomi yugwe! Lino yeuve wikalo wa amasoka; na finyamukela na amatuuyi amaafu na agifivifya wuhulo. ³ Pakuva avanu va ing’i mbesili vagalite idifai ya uwugoni wakwe, nawo avatema va mung’i vagonite nave. Nawo avasulusi va mung’i vanonite vikola uwudobokesi wakwe uwugaya wudugo.” ⁴ Ndawe ndapulikige iliswi ilingi ukuhuma kuchanya litigila, “Avanu vangu, muhege kulumwene, sambi mulemwe ukuhanga nave inzanangifu sakwe, mulahanga hela mukupuma kwakwe. ⁵ Pakuva inzanangifu sakwe siginite wuhulo, sive kilundo mbaka kuchanya, na Nguluvi awiwike uwanangifu wakwe. ⁶ Mumupigilage ndawe lweavapije nyenye; Mwihombelage umukole kavili mwasiso seavapije. Mumemyage ikinywelo chakwe kwa idifai ing’ali kavili ukulutila kila cheavapelye nyenye. ⁷ Mumutesage kwa wuvafi na ikivembo ukutegana na ulwitupyo lwakwe, na ukwikala mulwinomo lwakwe. Pakuva akwilonganza munumbula: “Ndikalite ipa; nene ndi munumwehe. Nene sindimufwile, nambi ukufikwa na isa ikivembo sikilawoneka!” ⁸ Nambi ukwimila lulo ineseko sakwe simufika kimunyi kimwi! uwutamwa, ikivembo, na ikinge. saalalisiwa na umoto, pakuva Umutwa Nguluvi yumwene yemunyakumuhiga ye munyaludali.” ⁹ Avatema va mung’i avagonite nave na ukwikalasa nave imikalile imyaafu savayeyela na ukuvemba pevaliwene ilisusi lya iboma iyo peyipya. ¹⁰ Viima pataali viva na umuhwehwe gwa ineseko sakwe na ukutigila, “Winalyo! Winalyo veve Babiloni, iboma inambulike na inzenge hilo! Kwa lusika lwa kivalilo kimwi hela yeupumite.” ¹¹ Avasulusi va mung’i savavemba na ukupalanga ikivembo, pakuva asupali umunu kangi yeagula ifinu fyawo; ¹² asupali kangi uva ukugula isahabu sawo, amagobole, amaganga agigusiwaga pakomi nambi ilulu, imyenda imyelu nambi ja ilivala ilinyakilesi, nambi bafuta na imyenda imidung’u, ifinu ifingi ifilipolofu ifiwuyapile imibiki hela, nambi ifiwuyapile amino ga Ndembo, na fya imibiki imitambule hilo, ifya isaba, ifya ichuma na amaganga agimalavadika, ¹³ ifihatwa fya umudalasini, uwufumba, imanemane na uwudi, idifai, amafuta, uwuse na ingano, isenga na ing’olo, ifwalasi na imituka ja ukukwegwa, avanyawingi vawo nambi uwunani wa avanu. ¹⁴ Avasulusi vakumutigila; “Ukwambula kwetukalavisige yekudusile, uwunono na uwuvina fitukimbye; suhwana ukuva nafyo kangi!” ¹⁵ Avasulusi avanonite ukukola iboma yiyo, saviima pataali viva na muhwehwe gwa ineseko sayo, savayova na ukuyeyela, ¹⁶ vitigila, “Winalyo! Winalyo ku iboma iyi ingomi. Yeweusovye ukufwala imyenda ija ibafuta, na ija livala ilinyakilesi na imidung’u na ukwiwuyapisa na isahabu, na amaganga agigusiwaga pakomi na ilulu!. ¹⁷ Kwa kivalilo kimwi hela uwunono wako wuhesile!” Kangi na avilongosaga ifipugu ifikomi mbevali na vanyalugendo vawo, avipigilaga mubahali, viimite pataali, ¹⁸ na vavelige vakuliwona lisusi lya umoto gula ugwalalisige iboma, vavembite vikoola vihugite, “Siyeyilawoneka iboma ndawe iboma iyi, ingomi!” ¹⁹ Swe vakwitikila lingundi mumitwe jawo kono we vivemba na kuyeyela; “Winalyo! Winalyo veve ve boma ingomi! Ye boma ye vala avenafyo va ifipugu ifikomi ifigendaga mubahali vanonite vikola uwunono wa iboma yiyo. Kwa lusika lwa kivalilo kimwi hela mbefili yefiyaje ng’ani!” ²⁰ Uhekelelage mulumwene veve ve kuchanya. Nye avanu va Nguluvi, avigendo na avavisi, pakuva Nguluvi ayihigite ukukola mbesili sevavapije nyenye! ²¹ Ndawe umunyivaha uyumwi umunyaludali hilo aakang’we liganga ilihwana na ulwala, swe akulitoosa mubahali itigila, “Ulu lwe i Babiloni yitooswa nu kuyagila ng’ani, ²² uwani wa magombo, na uwani wa ifilanzi na amapembe sisafipulisa kangi mwaveve. Sisaawoneka kangi munu muwupisi avahongosi na avaponzi va mbefili yeyeavesaga mwaveve, nambi ulwala ukupulisa lwipigilwa mwaveve. ²³ Ulung’ali lwa itala sisaluwoneka kangi mwaveve; amaswi ga avanyakwitegula, mwadada na mwayuva sisagapulisa kangi mwaveve. Avasulusi vako ve vavina mung’i mbesili, na ukwimila uwuhavi wako avanu va ing’i mbesili wavayasise!” ²⁴ Iboma iyo yapumite pakuva muboma yiyo idanda ya avavisi yabohwike, idanda ya avanu va Nguluvi na idanda ya avanu mbevali avawuligwe mung’i mbeyili.

¹ Pesilutye iso ndapulike kinu wita liswi likomi lya amalugu ga avanu wolofu kuchanya, vitigila “Haleluya! Uwukombolwa, indolo na uludali ifyo fyakwe Nguluvi vetu! ² Pakuva uluhigo lwakwe lwa nachene na lugolofu. Amuhigite yula umugoni umwaafu ye ayiyasise ing’i mbeyili kwa uwugoni wakwe. Amudogwifye wimila ukubohola idanda ya avakami vakwe!” ³ Vatigee, “Alumbwagwe Nguluvi! Ilisusi lya umoto ugwilalisa iboma iyo gwilila kuchanya mbepali na mbepali!” ⁴ Na vala avavaha machumi gavili na vatayi na fila ifigawa finyawumi ifitayi swe vakwitosa pasi, vakumusunyalila Nguluvi yeateng’eme pachanya pa kigoda cha indolo vitigila, “Ena! Alumbwagwe Nguluvi.” ⁵ Swe, ndawe lyapulisige iliswi uluhuma pakigoda icha uwutwa. “Mumulumbage, Nguluvi, nyenye nye vakami vakwe mbemuli, nyenye yemukumufuuwa, avadodo na avavina.” ⁶ Swe ndipulika kinu wita liswi lya ililugu ilikomi lya avanu na iliswi lya ululenga ulolofu na ulwa umubumo umukomi, gwitigila, “Haleluya! Pakuva Umutwa Nguluvi vetu Munyaludali ye Mutema! ⁷ Tuhekelelage na ukukimilila, tumupelage indolo, pakuva ikivalilo icha uluwungo lwa umwanang’olo yekifikite, na umwigani yeigelanise. ⁸ Apelitwe uludali ulwa ukwifwika umwenda umunofu umwelu na ugwimalavadika!” (umwenda ugo ugwesilwe fye fipigo ifinofu fya avanu va Nguluvi.) ⁹ Swe umunyivaha akunigila, “Wandike isi: Vafunyilile vala avalaalike kuluwungo lwa umwana Ng’olo!” Kangi swe akunigila, “Iso se ng’ani isa nachene sa Nguluvi.” ¹⁰ Swe, nene ndagwe kinyalileme pamagulu gakwe ndisaka ukumusunyalila. Neke umwene anigile, “Luleke! Nene ndimukami hela ndawe veve na avanyalukolo vako; mbetuli tukwinatila uwanachene weatugubulye Yesu. Musunyalile Nguluvi! Pakuva uwanachene weatugubulye Yesu wewene we wukuvang’alikila avavisi.” ¹¹ Swe ndawe ndakuwonige kuchanya kudindwike; na uko kwekwina ifwalasi yimwi nzelu na umuhofi vakwe atambuligwe, “Mufuuwa na Inachene.” Uyo ayihiga na ukwihoma wimila uwugolofu. ¹² Amiho gakwe ndawe ulwenge lwa umoto, na eafwite ingela nzolofu kumutwe. Emwandike ilitawa lye umunu yeyeavesaga asukuli yealisele pesi yumwene hela. ¹³ Eafwite umwenda ugwe musabike mudanda. Na ilitawa lyakwe uyo ye, “Lukani lwa Nguluvi.” ¹⁴ Avanyigalu avakuchanya, vamuninilige we vahofile ifwalasi inzelu na iya ulutogo. ¹⁵ Ilimage ilyugi luhumaga mumulomo gwakwe, na ukukola lilyo saavadwesa avamyanza. Umwene ye saatema kinyalugilimati na ukuhusa idifai mu savani ya ililakaali ilikomi lya Nguluvi umunyaludali. ¹⁶ Mumwenda gwakwe, na pachanya pa iligulu lyakwe, emwandike litawa, “Mutema va Avatema na Umutwa va Avatwa.” ¹⁷ Swe ngumuwona umunyivaha uyumwi imile mwisuva. Swe iyova akufilongela ifidege mbefili ifya gulukige mwilanga, “Muse! Mukong’ane pamwi paluwungo ulukomi lwa Nguluvi. ¹⁸ Muse mulye imivili ija avatema, na ija avavina va avanyigalu, ija avanu avanyaludali, ija ifwalasi na avahofi ava ifwalasi vawo, muse mulye imivili ija avanu mbevali avatemapawo na avanyawingi, avadodo na avavina. ¹⁹ Swe Nguyiwona ing’oko yimwi na umutema va ing’i na avanyigalu vawo vakong’ine pamwi sambi vihome iligalu na yula yeateng’eme pachanya pa ifwalasi, pamwi na avanyigalu vakwe. ²⁰ Neke ing’oko yila yagalulwe pamwi na yu muvisi va uwudesi yeapigige imiitu pa ng’oko. (Ukwimila miitu ijo, yealavayasise vala veve vina ikilagilo icha ing’oko, na vala avasunyalilige ulwihwano lwayo.) Ing’oko iyo pamwi na umuvisi vatoosiswe mbevali nda we vavili wevaliwufilima, mwitemela lya umoto ugwa ikibiliti. ²¹ Avanyigalu vawo vawuligwe na ilimage ilyahumige mumulomo ugwa yula yealahofile ifwalasi. Ifidege mbefili swe filya neke figute inyama sawo.

¹ Swe ngumuwona umunyivaha uyumwi akwika uluhuma kuchanya we ina ikidindulilo icha kuvafwe na umunyololo umukomi mwiwoko lyakwe. ² Swe akulibata iliyoka lila-Iiyoka lya pidaha kwekutigila Ibilisi, apangi Setani-swe akulipinga myaka mbilima yimwi. ³ Swe umunyivaha akulitoosa kuvafwe, swe idinda umulyango ugwa ukwingilila uko na ukutemwa uluhagi sambi lilemwe ukuyasa avanu mbaka ipo imyaka mbilima yimwi pegikwilye. Neke pegilutye imyaka ijo, lidindulilwa kangi, ipo lusika ludodo hela. ⁴ Swe ngufiwona ifigoda ifya uwutwa na avanu ave vateng’ime muchanya, avanu iwo vapelitwe uludali ulwa ukuhiga. Ndagiwene nagi myuhe gila ja avanu avevatumbikwe wimila uwolelesi wa Yesu na wimila ulukani lwa Nguluvi, iva sivasunyalii ing’oko ulwihwano lwayo, sive vateme uluhagi muwusu wawo nave mumawoko gawo. Vapilulilwe uwumi kangi swe vitema pamwi na Kilisito kwa myaka mbilima yimwi. ⁵ (Vala avangi avevafwe sivapelitwe uwumi mbaka imyaka mbilima yimwi pegikwilye) ulo lwe lusilibuko ulwa ukutala. ⁶ Vinomi hilo kangi vafunyilile iwo mbevali avihanga mulusilibuko ulwa ukutala, ifwa iya kavili sisayiva na ludali kuvene savava vatambisi va Nguluvi na va Kilisito na savatema pamwi nave myaka mbilima yimwi. ⁷ Peyesagilutye imyaka mbilima yimwi, setani saadindulilwa uluhuma mundinde yakwe. ⁸ Ino sa ahuma kwivala, neke avange ukuvayasa avanu mbevali avatagalye mung’i mbeyili, kwekutigila, Gogu na Magogu, avakong’asa pamwinga ukwimila iligalu. Nawo savava wolofu nda luhanga lwa mumwani. ⁹ Vatagalye mung’i mbeyili, swe vakuligomba likambi lya avanu va Nguluvi na iboma ya Nguluvi yeayenda. Neke umoto gwikite uluhuma kuchanya, swe gukuvalalisa. ¹⁰ Nave setani ye avayasige, atoosiwe mulitemela lyakumoto gwa kibiliti, mwe molili ilikoko na yula umuvisi uva uwudesi nawo savateswa pakilo na pamunyi, mbepali na mbepali. ¹¹ Ndawe ndakiwonige ikigoda cha uwutwa kikomi chelu, na yula yealateng’eme pachanya. Ing’i na kuchanya swe fikwikwega pamiho gakwe; na ifyo sifyawoniki kangi nangi. ¹² Kangi swe nguvawona avanu, avavina na vavadodo vimile pakigoda icha uwutwa na ifitabu swe fidindulwa. Neke ikitabu ikingi kwekutigila ikitabu icha uwumi, swe nacho kidindulwa avafwe swe vihigwa ukugelela mumigendele jawo ndawe lwandikwe mufitabu ifyo. ¹³ Ibahali swe yikuvahumya avafwe avemumo, ifwa na kuvafwe fikuvahumya ave mumo. Yeyeavesaga ahigitwe ukwimila imigendele jakwe. ¹⁴ Ndawe ifwa na kuvafwe fyatoosiwe mulitemela lya umoto. Ilitemela ili ilya umoto yefwa iya kavili. ¹⁵ Umunu yeyeavesaga ilitawa lyakwe silyawoniki lyandike mukitabu icha uwumi, atoosiwe mwitamela lya umoto.

¹ Swe ngukuwona kuchanya ukupya na ing’i imya. Pakuva kuchanya ukwa ukutala na ing’i iya ukutala yeyilutye na kwekugaya bahali kangi. ² Swe nguyiwona iboma inzelu, i Yelusalemu imya, yikwika uluhuma kwa Nguluvi kuchanya ye mbuyape wunofu wita umwigani ihambite wunofu ye sambi vakwitang’ana nu vakwe. ³ Swe ndipulika iliswi ilikomi uluhuma ku kigoda icha uwutwa litigila, “Lavage Nguluvi awuyipe uwikalo wakwe pagati pa avanu. Ikala pagati apawo, nawo savava vanu vakwe, nave saava Nguluvi vawo. ⁴ Umwene avahesa inzihosi sawo mbesili, sisakuva na ifwa kangi, nambi uwuvafi, nave kivembo, nave neseko, pakuva lula ulwa umutalo yelulutye!” ⁵ Neke yula yealateng’eme mukigoda icha uwutwa atigile, “Lavage ndiwuyapa mbefili ukuva fipya.” Kangi anigee, “Wandike ulu, pakuva ing’ani isi sa kufuuwa na sanachene.” ⁶ Kangi swe akunigila, “Yesikwilye, nene yendi Alifa na Omega, Muvango na Wusililo. Ye akelwike ndimupela ululenga ulwa ukunywa uluhuma mumufwilo gwa ululenga ulwa uwumi kigaya amombo. ⁷ Yeyeavesaga adwesise anukila iki, nayi nene mba ndi Nguluvi vakwe nave ava mwanangu. ⁸ Neke avanu avanyamuhodo, avagaya ulufuuwo, avanangike, neke avanu, avawulasi, avagoni, avahavi, avisunyalilaga ifihwananguluvi, na avadesi mbevali apono pawo pevavikilwe kwitemela ilikwakaga umoto ugwa ikibiliti, iyo yefwaa ya kavili.” ⁹ Swe uyumwi va vala avanyivaha avevakolye ifinyandilo ifimufung’ati ifyefimemile ing’ooto isa uwusililo, aasile na ukunigila, “Wuse! Nane ngulagila umwigani, umukina Umwanang’olo!” ¹⁰ Neke Umuhe asogwise, nave umunyivaha anzindike kuchanya kukidunda, ikitaali hilo swe akundagila iboma inzelu, yikwika uluhuma kwa Nguluvi kuchanya, ¹¹ iyimalavadika indolo sa Nguluvi. Imyakile jakwe jejindawe iliganga ilya amagobole amolofu nda Yasipi lilangala nda kilole. ¹² Ye yina lukanzi lutaali na lukomi lunya imilyango ichumi na givili na gweguvesaga mulyango gwa loleligwe na avanyivaha avalolesi ichumi na vavili. Amatawa ga avalolesi va imilyango ichumi na gavili ga Vaisilaeli gemandike pachanya pa imilyango gijo. ¹³ Lweluvasaga lubali kwekwina milyango gidatu, kumihago milyango gidatu, kufuka milyango gidatu, kunena milyango gidatu, kusika milyango gidatu. ¹⁴ Ing’anzi sa iboma iyo sesenge muchanya mu maganga ichumi na gavili ga ulutu, na pachanya palyelivesaga liganga pepandikwe uyumwi va avanyigendo vanyichumi na vavili va Umwanang’olo. ¹⁵ Ino yula umunyivaha yetwalonganige alakolye ulugoda uluyapile isahabu lwa kigelelo sambi ayigele iboma iyo, imilyango nasi ng’anzi sakwe. ¹⁶ Iboma iyo yeyinyawuling’ene uwugasu nu mutaafu filing’ene, neke umunyivaha yula ayigahite iboma iyo kwa ulugoda lwakwe, iboma iyo yeyina mutaafu na uwugasu na uwutaali ukubita kuchanya siva nda kilomita mbilima sivili na magana gatayi. ¹⁷ Swe igela ulukanzi lwakwe nalo; nalo lwe lwina nzwambo machumi gimutanda kwa ukuvaganisa na amiho ga avanu, che umunyivaha yula akolye kicho. ¹⁸ Ulukanzi ulo lwe lusenge kwa maganga madung’u ga amagobole molofu, nayi boma iyo yenzenge kwa sahabu inofu, iyimalavadika nda kilole. ¹⁹ Amaganga ga ulutu lwa ulukanzi ulu lweluwuyapile maganga ganyamavala molofu aga magobole molofu. Iliganga ilya tasile mulutu lyeliganga lidung’u ilya amagobole molofu yasipi, ilya kavili samawati, ilya wudatu kalibadoni ilyawutayi sumalidi, ²⁰ ilya wuhanu salidoniki, ilya mutanda akiki, ilya mufung’ati kilisolito, ilya munana sambalajadi, ilya igonza topasi, ilya ichumi kilisoputaso, ilya ichumi na yimwi yasindo, ilya ichumi na sivili amatisito. ²¹ Na imilyango gila ginyichumi na givili je lulu sinyichumi na givili. Na gula mulyango gwemuwuyapile lulu yimwi. Ilikasi ilikomi lyeliwuyapile isahabu inofu yilangala nda kilole. ²² Sindayiweni itembeli muboma yila, pakuva Umutwa Nguluvi yumwene na yula Umwanang’olo vevene ve vetembeli. ²³ Iboma iyo siyiguluma lisuva nambi mwesi ukung’alika, pakuva indolo sa Nguluvi sa sesasing’alika na itala yakwe ye yula Umwanang’olo. ²⁴ Avanu va imilongele mbegili. Vagendela mulung’ali lwakwe na avatema va mung’i vawuletela uwunono wawo. ²⁵ Imilyango ja iboma iyo sagiva gilimwasi ikimunyi mbekili, pakuva sisakuva na ikilo mumo. ²⁶ Ululumbo na uwunono wa avanu va indongele sauwuletwa mugati mumo. ²⁷ Neke kisukuli chechekivesaga chaafu chesakingila mumo, nambi umunu yeyeavesaga yeipigaga ifya uluvifyo apangi ifya uwudesi sisaingila mumo. Pesivavala swe avandikwe mukitabu cha uwumi icha Umwanang’olo, vesavingila mugati.

¹ Swe munyivaha akundagila umukoga ugwa ululenga ulwa uwumi lwilangala nda kilole, ulwikwika ku kigoda icha uwutwa cha Nguluvi na Umwanang’olo. ² Umukoga ugo gwa nyilimige gwikola pagati na gati pa ilikuya ilikomi lya iboma kangi. Mulubali lwa umukoga ugo kwekwina mubiki ugwa uwumi ugwavelekige amaveleko kanyichumi na kavili peguvesaga mwesi, gwavelekige na amahamba gakwe gwe mugoda gwa ukuvaponia avanu va ing’i mbesili. ³ Kisukuli ikinu chechekivesaga kikotole che sakiva muboma yila. Ikigoda cha uwutwa cha Nguluvi na cha Umwanang’olo sakiva muboma iyo na avakami vakwe vamusunyalila. ⁴ Vamuwona uwusu wakwe na ilitawa lyakwe lyandikwe pachanya paluhanda lwa uwusu wawo. ⁵ Ikilo sisakiva kokili kangi sivavaguluma lung’ali lwa itala nave lisuva pakuva Umutwa Nguluvi savang’alikila, nawo sa vatema mbepali na mbepali. ⁶ Swe umunyivaha akunigila, “Ing’ani isi sa inachene na sakufuuwa, Umutwa Nguluvi yeakuvapela avavisi umuhe vakwe, amutumite umunyivaha vakwe avalagile avakami vakwe ing’ani sesasusa silusika. ⁷ “Lavage! Ngusa ngwangufya. Mufunyilile yeakwinatila ing’ani isa uwuvisi sesili mukitabu iki.” ⁸ Nene Yohane, ndasiwene na ukupulika ing’ani isi. Napeyemulike na ukusiwona swe ngwitoosa pasi pamagulu ga umunyivaha yula ye andaje ing’ani iso, swe ndisaka ukumusunyalila. ⁹ Neke umwene anigile, “Luleke nene ndimukami hela ndawe yuveve na avanyalukolo vako avavisi na mbevali avakwinatila indagilo isili mukitabu iki. Musunyalilage Nguluvi!” ¹⁰ Kangi swe akunigila, “Ulasifiha ndasa kinyele ing’ani isa uwuvisi isili mukitabu iki, pakuva ikivalilo icha ukukwila kwaso ye kuhegelye. ¹¹ Lino yula yeipiga imbi avesage peapiga imbi na yu mwaafu aginage ukuva mwaafu, umunyakupiga inofu na Umwelu aginage ukuva mwelu.” ¹² “Lavage!” Atige Yesu, “Ngusa ngwangufya, na uluhombo lwendimupela yeyeavesaga munu wimila ifipigo fyakwe. ¹³ Nene ye Alifa na Omega, Umuvango na umudugo, umuvele na umukwangu.” ¹⁴ Vafunyilile vala avifuva imyenda jawo sambi, vatawulwe ukulya amaveleko ga umubiki ugwa uwumi, na ukutawulwa ukwingila ku boma ukugendela pa umulyango gwa iboma. ¹⁵ Neke imbwa, avahavi, avagoni, avawulasi, avasunyalila ifihwananguluvi na mbevali aviwendaga ukulonga uwudesi, savikala kwivala pa iboma. ¹⁶ “Nene Yesu, ndimutumite umunyivaha vangu awolelele ing’ani isi mumakanisa. Nene ndimwegalwa mulukolo lwa Dawudi. Nene nding’eng’esi iyilangala inema wufuku.!” ¹⁷ Umuhe na Umwigani yeigomwa vatigile! “Wuse.” Umunu yeyeavesaga apulike ulu, na atigile, “Wuse.” Umunya ng’elu ase, yeisaka ululenga lwa uwumi asage ategule kitahomba chechekivesaga. ¹⁸ Nene Yohane nguvakenyela mbevali avipulika ing’ani isa uwuvisi sesili mukitabu iki, umunu yeyeavesaga wone awile ikinu chechekivesaga mung’ani isi, Nguluvi amuwila ineseko isandikwe mukitabu iki. ¹⁹ Na umunu yeyeakepusaga chechekivesaga mung’ani isa uwuvisi isili mukitabu iki Nguluvi amupoka iligawo lyakwe mu mubiki gwa uwumi na apono pakwe mu boma inzelu, ifilonge mukitabu iki. ²⁰ Nave yeitawula uwolelesi mufinu ifi itigila, “Nachene! Ngusa ngwangufya.” Ena! Wuse ve Mutwa Yesu! ²¹ Uwuwuya wa Umutwa Yesu wuvelage na avanu mbevali va Nguluvi. Ena! a18:24 Talanda: Amagobole agakwilye amahombo ga myaka minyichumi na gihanu kwa umunu yeibalulila. b18:28 Idinali: Amagobole agakwilye mahombo ga myesi gidatu kwa umunu yeibalulila. a8:50 Muhisi: Yula yeaihiga inongwa sa avanu pe avanu visomye. a1:23 Vamutumbike: Vamutovelye na imisumali. b16:6 Ikitungwi: Icho chalekige na ibahali na nyanza ululenga lwapitukige lwiva liganga, ifipugu sifyahwanigi ukugenda. a12:2 Kuchanya kwa wudatu: Avanu va imisika gijo vihosige ukuta kuchanya kulipolofu. a6:14 Igwanda ya Ichuma: Avanyigalu va Ikilumi vafwalige igwanda ya ichuma visiika imambaga pe vakwihoma. b6:15 Ndatu: Vafwalige na indatu isa ichuma pe vakwihoma visiika amagulu. c6:16 Ingwembe: Vategulige ingwembe vasimye indibulo isaakige umoto pevakwihoma ligalu. a1:1 Avalongosi: Vevala avimilisi apangi va Asikofu. b1:1 Avatanzi: Vevala avatangilisi apangi va Semasi. a2:18 Mutavangu: Umutavangu va Kilisito ipa ye yula yeidalika na ukwigisa isisutine na Kilisito. a2:6 Vanikolayi: Kwekutigila avakami va Nikolasi. b2:17 Imana: Chekilyo che atawe Nguluvi pevevali mubalali. ?? ?? ?? ??