VAFILIPI

¹ Yenene Pawulo na Timoti, avakami va Yesu kilisito, tukuvandikila nyenye mwevanu va Nguluvi ye muli uko ku Filipi yemukahangite na Kilisito Yesu pamwinga na nyenye avalongosia na avatanzib mu likanisa. ² Tukuvasukila uwuwuya ukuhuma kwa Nguluvi udadetu na ukuhuma kulu Mutwa Yesu Kilisito. ³ Ngumulumba Nguluvi vangu pembesaga nguviwuka, ⁴ na pembesaga nguvasukila mbemuli, ngwifunya muluhekelelo, ⁵ ndiva na ikilumbo ukwimila uwulilumwi we mwinawo mu Lukani Ulunofu uluhuma ikimunyi icha ukutala ukufika neng’ino. ⁶ Sweno, ngwihuvila ukuta Nguluvi yeavanzile ikipigo iki ikinofu mwanyenye, agina ukukivinia mbaka kikwilanikile mu kimunyi cha Kilisito Yesu. ⁷ Ulo lwelulo lwelumbaje ndivahosekese, pakuva nguviwuka mbepali munumbula yangu. Kangi pakuva nyenye mbemuli mukahangite mu wunofu weamelye Nguluvi, wa ukululolela nu kulukangasa Ulukani Ulunofu, lino pendili mundinde na kangi pala pamwandi pende ndimutemapangu. ⁸ Nguluvi ye molelesi ukuta ndilonga lwa nachene pendiginalisa ukuta, muwende wuwula wa Yesu Kilisito ndidoboka ukuvawona. ⁹ Lwengwifunya lwe ulu; ndisuka uwende wenyu wuginage ukongelekela ukulutila pamwinga nu wuseela wa nachene na lweluvesaga luhala, ¹⁰ sambi muhwane ukuhagula ulukani ulunoje hilo. Ipo pepene pemuva mwesiwe simwilongwa fivi mulukani lweluvesaga lula pa ikimunyi kila cha Kilisito. ¹¹ Uwunani wenyu sawumema mbesili isa nachene na inofu, sila se Yesu Kilisito umwene avapela, ukwimila indolo na ululumbo lwa Nguluvi. ¹² Vanyalukolo vangu, ndiwenda mulukagule ukuta mbesili sesikafikite sikananzile pakomi mukulutagalisa Ulukani Ulunofu. ¹³ Ukuhumila siso, avalolesi mbevali va mwivaha pamwinga na avangi ipa vakulukagula ukuta ndimusope mundinde ukwimila Kilisito. ¹⁴ Na kono ukusopwa mundinde kukambwise avanyalukolo wolofu vave na ulufuuwo kulu Mutwa, na vakave vapifu ukuludalika ulukani lwa Nguluvi vagaya muhwehwe. ¹⁵ Nachene avamwi vawo vakumudalika Kilisito pakuva vina gila na kangi vanu vanyalwitakilo; neke avangi vakumudalika munumbula ngolofu. ¹⁶ Iva vavipiga lulo ukwimila uwende, pakuva vakulukagula ukuta Nguluvi amelye nene ikipigo iki cha ukululolela Ulukani Ulunofu. ¹⁷ Iwo avangi vakumudalika Kilisito kwa ukwitalanisa hela simukwimila munumbula ingolofu nda, vihosa ukuta pevapigite ndahihyo vasongela nene ngine ukuva muluteseko umu mundinde. ¹⁸ Ulwene ulo sikinu nda! Nene ndihekelela wone avanu vakumudalika Kilisito mung’asi mbesili, wone luve muwunofu na apangi mung’asi imbi. Kangi nene ngina hilo ukuhekelela, ¹⁹ pakuva ngulukagula ukuta ukwimila kwifunya kwenyu na muwutanzi wa Umuhe va Yesu Kilisito, nene ng’ombolwa. ²⁰ Chendidoboka na uluhuvi lwangu ukuta mwambesili nene sineema ukukwisa ikipigo changu, pesi ukuta mba na mutima mukangafu imisika mbegili na hilo ulusika ulu, sambi ukukola uwunani wangu mbewuli, mbe muwumi nambi mufwa, ndimuletele Kilisito ululumbo. ²¹ Kulubali lwangu, ukunana ye Kilisito, na ukufwa kwileta ukwambula kukomi. ²² neke, wone kwa ukunana nywana ukupiga ikipigo chekileta ukwambula ukukomi, sweno, singulukagula manyi, mbi nyagulage ululikwi! ²³ Lino ndilaving’ana na isi isivili isiling’ene mbesili. Ndidoboka ukuta nyege muwumi uwu ngikale pamwinga na Kilisito, ulukani ulu lwelwinoga hilo; ²⁴ neke ulukani lwelwinoga hilo kwa nyenye nene mbelage penana. ²⁵ Ngulukagula hilo ulukani ulu, ukuta nene mba penana pamwinga na nyenye mbemuli, sambi ndivatange mongelekele uluhekelelo, ²⁶ sweno, pembe na nyenye kangi, muva na kinu cha ukwivahila ukwimila nene mukuhanga na Kilisito Yesu. ²⁷ Sweno, ulukani ulukomi kwekuta imigendele jenyu ginatilage chetwisaka Ulukani Ulunofu lwa Kilisito, sambi wone nywane ukusa ukwenyu na apangi wone neeme sambi ndipulikile nambi padodo hela ukuta mwimile mukange mwidonya lukani lumwi mbeluli na ukuta mwihoma ligalu we mwilaganila kumwi mbemuli ukwimila ulufuuwo lwa Ulukani Ulunofu. ²⁸ Mutane ukogopa chechekivesaga icha vemukwitalanisa nawo. Iki kiva kilagilo ikilipelu ukwawo chekivadenya, pesi ulwa uwupoki wenyu uwihuma kwa Nguluvi. ²⁹ Pakuva nyenye mwivapele uwunofu mukumupigila Kilisito si ukukola hela ukumufuuwa pesi kangi ukukola ukuteseka ukwimila umwene. ³⁰ Lino muhwanite muhange na nene mukuhoma ligalu. Iligalu ili lyelila lyemwambwene nene ndihoma pala pamwandi, na kulino penyoma ndawe lwe mwipulikaga.

¹ Ngali uwunani wenyu mwa Kilisito wakuvapela uludali? Ngali uwende wakwe ukuvasikimika? Ngali mwinawo uwulilumwi na Umuhe Umwelu nu kwiwonela ulusungu na ukwihuguvalila yinyenye kwa yinyenye? ² Sweno, mukwilanisage uluhekelelo lwangu pemwiva na amahosa gamwi, uwende wumwi, mutima gumwi na kuhosa lumwi. ³ Mulapiga kinu ukwimila imitima ja uwutavangu, nambi kwa ulwidudumbo lwa malanga, muvelage na uwilevesi yinyenye kwa yinyenye, yeyeavesaga amulavage umuyagwe ukuta amulutye uwunu. ⁴ Palava na umunu yeakwisakila ukwambula kwakwe hela iyena, pesi ukuta asakilage ukwambula na kwa avayagwe. ⁵ Muvelage na imimile gigila jealinajo Kilisito Yesu. ⁶ Umwene kukilamuko ali mbepali Nguluvi, neke sahosisi ukuta kula ukuva aling’ene na Nguluvi kive kinu cha kulimbila kwa ludali. ⁷ Pesi kwa ukuwenda kwakwe yumwene, Afilesile ifyo mbefili, akwitegulila ulwa uwunyawingi neke ave ihwana na avanu, neke awonekage wita munu. ⁸ Ilevise na ukuva na ichoga mbaka peifwa, kangi mbaka peifwa mu musalaba. ⁹ Na ukwimila lulo Nguluvi amukang’we pachanya hilo ululumbo lukomi hilo, nu kumupela ululumbo ulukomi, swe akumupela litawa ilikomi ukulutila amatawa mbegali. ¹⁰ Na ukwimila ululumbo lwa ilitawa lya Yesu, ifigawa mbefili kuchanya, mung’i na kuvafwe fimufugamile umwene, ¹¹ na umunu yeyeavesaga idikile ukuta Yesu Kilisito ye Mutwa mundolo sa Nguluvi Dada. ¹² Vanyalukolo vangu, pende pamwi nanyenye mwavelige na ichoga mbepali na kulino pendili pataali nanyenye, muvelage ni choga ndahihila. Mupigage ifipigo we mwina muhwehwe nu kukuvila ukwimila uwupoki wenyu, ¹³ pakuva Nguluvi yeipigaga mbepali mugati mwanyenye, na ukuvapela uludali ukukwisa sila isitegana na mwealahosekise umwene. ¹⁴ Mupigage chekivesaga kitang’ula nambi lubesa, ¹⁵ sambi muve avanu avesiwe, vagaya lubi lwakulongwa, wita avana vagolofu va Nguluvi vevakwikala mung’i iyi imbi ya uwuyasi. Samumalavadika pagatinagati pavene wita ing’eng’esi wesasing’alika kwilanga, ¹⁶ wemukwinatila hilo ulukani lwe luvapoka. Na ipo pepene pe nane sa mba na lwa ukwivahila mu kimunyi kila cha Kilisito, ipo pesaluwoneka pawelu ukuta uwupifu wangu na ikipigo changu sisafiyaga chaka nangi. ¹⁷ Nambi nawulwe ukwimila avangi pamwinga ulufuuwo lwenyu ululi nambika kwa Nguluvi, Sweno, ndihekelela hilo na ukuvahanza nayi nyenye mbemuli muluhekelelo lulo. ¹⁸ Lwindahihyo, nayinyenye luvavaje ukuhekelela na ukunyanza nayinene muluhekelelo lwenyu. ¹⁹ Wone Umutwa Yesu awende ndina luhuvi ukuta nywana ukumutuma Timoti aase ukwenyu lusika lulu, sambi ng’angaswe umutima pemulike ing’ani senyu. ²⁰ Nene ndimugaya munu yungi yeindawe umwene yeakuvagudila nyenye kwa mutima. ²¹ Neke avangi mbevali vigudila sisawo vileka ukugudila ing’ani sa Yesu Kilisito. ²² Nayinyenye mukulukagula ulwa uwukangafu wa Timoti, umwene na nene wita Umwana na Udade, tukapigite ikipigo pamwi nave ukwimila Ulukani Ulunofu, ²³ sweno, ndihosa ukumutuma ukwenyu, pe mba ndilukagwe lwelupigika kwa nene pambele. ²⁴ Na yinene, ndihuvye mulu Mutwa ukuta nane nywanite ukusa ukwenyu si musika. ²⁵ Mbwene lunofu ndimutume ukwenyu umunyalukolo vetu Epafolodito, ye muyangu mukipigo na mwigalu kangi ye e mutume venyu ananzile nene mwa fyendegulwime. ²⁶ Ahele idoboka hilo ukuvawona nyenye mbemuli na akahuguvee hilo pakuva mukapulike ukuta ake mutamwa. ²⁷ Nachene ake mutamwa imbungo yike ngomi ya fwa. Neke Nguluvi amuwonie ulusungu, na siukuta iyena hela, pesi ukuta nayinene kangi sambi ndemwe ukuhuguvala pakomi ukwimila lulo. ²⁸ Sweno, nene ndisugunala hilo ukumutuma aase ukwenyu, sambi pemumuwene muhekelele kangi na uwuhuguvafu wangu wusile. ²⁹ Mu mumwanukila muluhekelelo ulukomi, nda munyalukolo mulu Mutwa. Luvavaje ukuva na ichoga kwa avanu avindawe umwene, ³⁰ pakuva umwene, ali itawe uwumi wakwe mwa mbesili na supwe padodo afwe ukwimila ikipigo cha Kilisito, sambi alete uwutanzi wenyu we nyenye mwalemilwe ukuwuleta.

¹ Ino de, vanyalukolo vangu, muhekelelage mukuhanga kwenyu na Umutwa! Sindifulugala ukupilukila sila sendandike pamwandi pakuva siwongelekesa uwuwunamu. ² Mwikomalilage na imbwa mwikomalilage na avanu vala avipiga uwanangifu, mwikomalilage na avanu avikimbila ukwitemanga imivili. ³ Hwehwe twawoolitwe ulwa nachene siavene nda, pakuva hwehwe twakumusunyalila Nguluvi ukukola mu muhe gwakwe na ukwipulika na ululumbo mukuhanga pamwi na Kilisito Yesu. Sitwituga ifya mwivala hela. ⁴ Nene nane ngenywanite mige ifya mwivala; na wone pwali umunu uyungi yeihosa ukuta ahwanite ukutuga ifyo ifya mwivala, nene ye ngemba na ulwa kwivahila hilo ukuhosa ndahihyo; ⁵ nene ndawoolitwe pa ikimunyi cha umunana ukuhuma pakwegalwa kwangu; nene ndiva mulukolo lwa Isilaeli, imbegalo ya Benyamini, Muebulaniya umugadaga. Kulubali lwa ukwinatila indagilo nene ndi Mufalisayo, ⁶ nane nde ndimupifu hilo, ndalitesise na likanisa. Na kulubali lwa ukwimila uwugolofu wewiwonekaga ukukola ukwinatila indagilo, nene sindendimwananga kinu nda. ⁷ Neke mbesili iso sendahosige ulwa sihwanite sive na kwambula, ngufiwona ulwa iso sa kufwaha hela ukwimila Kilisito. ⁸ Ino ndivalila chechekivesaga ukuta ukufwaha hela, penditeganisa ulwa uwunofu uwa ulamukagula Kilisito Yesu Umutwa vangu. Na mulumwene ngidiche ukufilekela ng’ani mbefili, ngufiwona ifyo nda mahwahwa sambi nzambule Kilisito. ⁹ na ukuhangila ng’ani na umwene. Nene sipembwenda kangi uwugolofu uwihumaga mukwinatila indagilo; lino ndinawo uwugolofu wawihumaga mukumufuuwa Kilisito; uwugolofu uwihumaga kwa Nguluvi na uwukwimilaga mulufuuwo. ¹⁰ Lwendisaka hela ndimukagule Kilisito na ukuluwona uludali lwa ulusilibuko lwakwe, nu kuhanga muneseko sakwe na ukwihwana nave mufwa yakwe, ¹¹ we ngwihuvila ukuta nayi nene sanzilibuka uluhuma kuvafwe. ¹² Sinditigila ulwa yesuumite apangi nigile yeng’wilaniche. Pesugunala sambi meelwe ikipelwa kila che ukwimila kicho Kilisito akasafile nene. ¹³ Ena nachene, Vanyalukolo vangu, sindihosa ukuta yemelitwe ikipelwa kicho, pesi ulukani lumwi lwendipiga ngusisemwa mbesili isilutye na ukusugunala ukwinatila isilikuwutalo. ¹⁴ Ino, ndikimbila sogwe ku kidonya changu, sambi meelwe ikipelwa kila, na ulo lwe lukemelo lwa Nguluvi ku wumi wa kuchanya ukukola mulumwene Kilisito Yesu. ¹⁵ Mbetuli hwehwe yetukange mumigendele ja kinyamuhe lutuvaje ukuva na mimile gijo. Neke wone movali mwanyenye avihosa ululiwungi, sweno, Nguluvi alwelelulila ulukani lulo. ¹⁶ Kwa lweluvesaga tudonyage kuwutalo ukwimila mung’asi yiyo yetukave wepetuninila na kulino. ¹⁷ Vanyalukolo vangu, mwigage ukwiga imigendele jangu. Muvalavage avene avakwinatila ikiganiso chetwavaviche. ¹⁸ Ngavalonje ulu kolofu, nayilino kangi ndipilukila kono wendivemba: Povali avanu wolofu ve imigendele jawo gikuvawuyapa vave vatavangu vaifwa ya Kilisito mumusalaba. ¹⁹ Umudugo gwawo, kwe kudenyeka, amaleme gawo ye nguluvi vawo, indolo sawo sili muwuhonga nyoni pakuva uwudobokesi wa imivili jawo uyo ye nguluvi vawo, vahele vakwihavila ifinu ifihonganyoni, vihosaga mbepali isa mung’i. ²⁰ Neke hwehwe twivanyang’i va kuchanya, na tusindila we tukalalye umupoki ase ukuhuma kuchanya, Umutwa Yesu Kilisito. ²¹ Umwene saagipitula imivili jetu imihomefu sambi agiwuyape gihwane nu muvili gwakwe ugunyandolo, ukwimila uludali lula lwe kwa ukukola lulo ahwana ukufivika ifinu mbefili pasi ya uwutema wakwe.

¹ Palulo, vanyalukolo vangu, aveende, vendidoboka hilo ukuvawona; nyenye ye muli luhekelelo lwangu na ingela ya muludweso lwangu. Nye veende vangu ulo lwe luvavaje ukwikala mukaye mu kuhanga na Umutwa. ² Eudiya na Sindike nguvagongola mwilamulage nda mwivanyalukolo mulu Mutwa. ³ Ino nayuveve munyalupanda vangu vanachene, ngukulagisa uvatangage avang’inetu iva, pakuva vakave vapifu mukipigo cha ukulutagalisa Ulukani Ulunofu pamwinga na nene na Kilemendi na pamwinga na avapisi avayangu avangi mbevali, ve amatawa gawo mavalile kuvalongwe ku uwumi. ⁴ Sweno, muhekelelage mbepali mukuhanga na Umutwa! Ndipilukila ukulonga kangi; muhekelelage! ⁵ Uwulele wenyu wukagulanikage ku vanu mbevali Umutwa alipipi. ⁶ Mulahuguvalila kinu, Neke mwalwe luvesaga mumusukage Nguluvi mulwifunyo mwa fye mugulwime kwa ukumulumba. ⁷ Na uwikalakunoga wa Nguluvi uwulutye uluhala lwa avanu mbevali wuvalolela imitima na uluhala lwenyu mukuhanga na Kilisito Yesu. ⁸ Pendisindilisa, vanyalukolo vangu, mwinatilage Ing’ani Inofu, na isinoje ululumbo, ing’ani isa nachene na uwunofu, isa uwugolofu, na isesinogela na choga. ⁹ Mupigage semwiyigise na ukwanukila ukuhuma kwa nene, ing’ani semwapulike ndilonga na semwasiwene pendipiga. Nave Nguluvi yeakutupelaga uwikalakunoga uwa avamwinga na nyenye. ¹⁰ Mukuhanga na Umutwa lukave luhekelelo lukomi kwa nene ukuta pambele mukapelitwe kangi ikilega ulwa pemunziwuka. Neke ukulongela mumwene mukave mukunziwuka mbepali pesi ukuta muke simulapelwa ikilega hela cha ukulagila ulukani ulo. ¹¹ Sindilonga isi pakuva ndiguluma kinu; pakuva ngakulwe ukusikimala na ifinu fyendinafyo, ¹² Fulwike ukuva nafyo na fulwike ukuguluma mwambefili na bahapavesaga ngiyigise ulwa ikinyele ulwa ukuva na ifyolofu na ukudagana, mufyolofu na pefikepite. ¹³ Ndihwana ukulaving’ana kwa lweluvesaga pakuva Kilisito yeakumeelaga uludali. ¹⁴ Neke ulwene nyenye mukapigite wunofu ukuhanga nane mulugudo lwangu. ¹⁵ Nanye mwe Vafilipi mukulukagula ukuta pamuvango pa ukudalika Ulukani Ulunofu, pendahegige pa Makedoniya, ye nyenye ye mwiyena ye mulikanisa lyelyananzile; ye nyenye ye mwiyena yemwahanzile na nene mukwanukila na ukuvapela avangi mwa fyevagulwime. ¹⁶ Pede-ngulwime uwutanzi kula ku Tesalonike mwandetye kangi ukulutila mu kamwi. ¹⁷ Mulihosa ulwa ndiwenda hela ukwanukila ifipelwa; chendisaka ukwambula kongelekele mufisande fya uwunono wenyu. ¹⁸ sweno, yenzanuche ifinu mbefili fyemukameelye, kangi filutye mula mwengasakilige. Ndinafyo mbefili lino pakuva Epafolodito yeandetye ifipelwa fyenyu. Ifipelwa ifi fiva nda nambika iyinung’ilila wunofu, ikitawulwa chekikwidikilwa na ukumunogela Nguluvi. ¹⁹ Sweno, Nguluvi vangu, muwunono wakwe uwukomi ukukola kwa Kilisito, avapela mbefili fyemwiguluma. ²⁰ Lino indolo sivelage kwa Nguluvi vetu na udadetu, kitasila. Ena. ²¹ Nguvahungila avanu mbevali va Nguluvi avanu vakwe Kilisito Yesu. Vanyalukolo avalipamwi na nene ipa vakuvahungila. ²² Avanu mbevali va Nguluvi ipa, na hilo vala avali mwivaha lya Kaisali, vakuvahungila. ²³ Nguvasukila mbemuli uwuwuya wa Umutwa vetu Yesu Kilisito.