MALIKO

MALIKO

¹ Umuvango gwa Ulukani Ulunofu lwa Yesu Kilisito Umwana va Nguluvi. ² Ndawe lwandikwe nu muvisi Yesaya: “Lavage ngumutuma umuvanda vangu akulongolele; yemwene yawuyapa ing’asi yako. ³ Iliswi ilya Umunu ilipulisa mubalali: ‘Mumuwuyapilage ing’asi Umutwa, mugololage ifikolo fyakwe.’ ” ⁴ Yohane umubatisi awonike mubalali idalika ulwa luvavaje avanu ukupela inzanangifu nu kubatisiwa sambi Nguluvi avadegepele inzanangifu sawo. ⁵ Neke pevamubitile avanu mbevali ava ku Yudaya na ava ku Yelusalemu, neke pevabatisiwe na umwene ku mukoga gwa Yolodani vipela inzanangifu sawo. ⁶ Ino Yohane afwalige umwenda ugwe mutive nu lubahila lwa ingamiya na umusipi gwa ing’ingo mukigudi chakwe. Alisige imanzi na uwuuki mwihala. ⁷ Nave adalikige itigila, “Pa nene akusa umunyaludali ukundutila nene; kwa uyu nene sinywaniti ngondame mamise nambi kuhudula imikova ja indatu sakwe. ⁸ Nene nguvabatisa kwa lulenga, neke umwene saavabatisa kwa Umuhe Umwelu.” ⁹ Ifilo fila Yesu aasile uluhuma ku Nasaleti iya ku Galilaya neke abatisiwe na Yohane ku mukoga gwa ku Yolodani. ¹⁰ Neke na peahumile mululenga uluvala lulo awene kuchanya kudindwike neke Umuhe iikage kulumwene wita ingunda. ¹¹ Iliswi lyapulise kuchanya litigila, “Veve ye veve ve mwanangu vemwende vangu yendinogelwa na veve.” ¹² Lulusika lulo Umuhe Umwelu amusogwise Yesu kubalali, ¹³ ikalite kubalali filo machumi gatayi, igelwa na setani. Ekuko pamwi na ifikoko ifya mwihala, neke vanyivaha vamupigilage. ¹⁴ Yohane pevamusopite mundinde, Yesu ahele ku Galilaya idalika Ulukani Ulunofu lwa Nguluvi, Itigila, ¹⁵ “Ulusika yelukwilye, na Uwutwa wa Nguluvi wuhegelye. Mupelage neke mufuuwe Ulukani Ulunofu!” ¹⁶ Na peilutila mumwani iya inyanza ya ku Galilaya, avawene avalofi vavili; Simoni na Andeleya umunyalukolo vakwe vitoosa ifilovelo valove isomba. ¹⁷ Yesu swe akuvatigila, “Muninile nene ndivawuyapa muve mwivalofi va avanu.” ¹⁸ Ulusika lululaga vafilesile ifilovelo fyawo neke vamuninile Yesu. ¹⁹ Na peahele pawutalo ludodo, avawene Yakobo Umwana va Sebedayo nayi Yohane umwanakwave vevevali mukipugu viwuyapa ifilovelo. ²⁰ Yesu avakemelye lulusika lulo, nawo ndawe vamulekige udadawo Sebedayo mukipugu pamwi na avakami, swe vakumuninila. ²¹ Yesu na avanyigendo vakwe vafikite ku Kapelenaumu, na chave kifika ikimunyi icha isabato, Yesu inje musinagogi ivanga ukwigisa. ²² Avanu mbevali vasasave pevapulike inzigiso sakwe, pakuva avigisi nda munu umunyalulagi sindawe avigisi va indagilo. siigisigi ndawe avagisi vawo va indagilo, pesi e munu yeawonekige wita munyalulagi. ²³ Ulusika lulo awonike musinagogi mula umunu umunyalisoka, ²⁴ ayofile, “Wina kiki nahwehwe, veve Yesu va ku Nasaleti? Ngali wusile utwanange? Ngulukagula ulwa veve winani; veve wi Mwelu va Nguluvi!” ²⁵ Neke Yesu alikenyele itigila, “Katuke! Hege kulumunu uyu.” ²⁶ Ndawe ilisoka lyamupelige ililibisi umunu uyo, swe iyovela pachanya, swe ndawe lyamuhumige. ²⁷ Avanu mbevali vasasavale swe vivanga ukwiwusa vitigila, “Iki kiki? Nzigiso mya? Umunu uyu ina uludali ilagila na masoka gakumupulika!” ²⁸ Ing’ani sa Yesu satagalye wuhulo mbekuli mulutanana lwa mu Galilaya. ²⁹ Vahumite musinagogi vahele kidonya mukaye ya Simoni na Andeleya; Yakobo na Yohane vahelelise. ³⁰ Ino umung’inetu uyumwi umukwive va Simoni alavasise imbungo yeyimwibete. Lulusika lulo peafikite Yesu vamulongele ulwa uwutamwa. ³¹ Yesu akumubitila umung’inetu uyo, akumwibata iliwoko akumulamusa. Swe imbungo iyo yikumuleka, ndawe avangige ukuvapigila. ³² Ikinyamihye kikila, ilisuva pelisota, vamuletye Yesu avanu avatamwa mbevali na vanyamasoka. ³³ Neke avanu mbevali va muboma yila vakong’anage pamulyango. ³⁴ Nave Yesu avaponise avanu wolofu avali na ifitamwa ifili polofu; agahumyage na amasoka molofu; na siagatawi amasoka galonge kinu pakuva gegamusele ukuta umwene ye nani. ³⁵ Ikimunyi cha kavili pamilawu we pekutitu, Yesu ahesile swe ibita apono apakinyele akwifunya kuko. ³⁶ Neke Simoni na avayagwe vahele ukumulela. ³⁷ Na pevamuwene, vamulonje, “Avanu mbevali vakukolela veve.” ³⁸ Neke avatigile, “Leke hwehwe tubite mu boma isingi isa mwipi ngadalike nakuko; pakuva ulu lwelwene lwendasye kono.” ³⁹ Swe ndawe agendige mu Galilaya mbeyili idalika uko mu masinagogi na ukugahumya amasoka. ⁴⁰ Umunu uyumwi umunyawukoma ahele kwa Yesu swe akumufugamila na ukumusuka itigila, “Wone wiwenda uhwanite umonie uwukoma!” ⁴¹ Swe Yesu akumuwonela ulusungu, igolola iliwoko lyakwe akumupamisa akumutigila, “Ndisaka uponage!” ⁴² Lulusika lulo uwukoma waponite na umuvili gwitelela. ⁴³ Ndawe Yesu amutigilige angufyage ibitilage na ukumupavila akalipe, ⁴⁴ “Ulamulongela munu ulukani ulu, pesi ukilagilage kulumutambisi; ukatawule ikitawulwa ukwimila ukutelela umuvili ndawe lwe avalaje Musa, sambi wolele ukuta yuponite.” ⁴⁵ Neke umunu uyo ahele, ivanga ukutagalisa ulukani ulo, na ukulonga nzolofu mbekuli, na ukwambusa Yesu alemwe ukwiyelelula mu boma yeyeyivesaga; lwamuvaje ukwikala mwihala, apono pakifiho. Nambi ndahihyo avanu vamubitilige vihuma imbali mbesili.

¹ Na pefilutye ifilo fikefu, Yesu apilwike ku Kapelenaumu, avanu pevapulike ukuta yapilwike. ² Ndawe vakong’anige avanu wolofu wuhulo chagayike na kilega nambi kidodo pamulyango. Yesu avadalikilige ulukani lwakwe; ³ pevamuletige umunu umunyalitela kulumwene we mutegule na vanu vatayi. ⁴ Ukwimila ililugu lilyo lya avanu, sivahwaniti ukumuhelesa kwa Yesu sweno lwavavaje ukusalula padodo liking’a pe alipwali Yesu. Pevasalwe, vamwisise umunu uyo we alambale mulupasa. ⁵ Yesu ave akuluwona ulufuuwo lwawo, ndawe amutigilige umunyalitela, “Mwanangu inzanangifu sako udegepilwe.” ⁶ Avamwi va avigisi va indagilo avevateng’eme baho, vasokime munumbula sawo, ⁷ “Mbi akwigelela ndawuli ukulonga de? Uyu akumuliga Nguluvi! Sikwali munu yahwana ukudegepela inzanangifu pesi Nguluvi yeiyena.” ⁸ Neke Yesu agakagule amahosa gawo, swe akuvatigila, “Mbi ndawuli mwihosa iso munumbula senyu? ⁹ Ulupefu lulikwi ukutigila vemunyalitela, ‘Inzanangifu sako udegepilwe’, na ukutigila, ‘Wime! tegule ikivasikiso chako wibitile?’ ¹⁰ Apo ndisaka mulukagule ukuta Umwana va Umunu ina lulagi mung’i ulwa ukudegepela inzanangifu.” Ndawe atigilige kumunyalitela. ¹¹ “Ngukulongela veve wime, tegule ikivasikiso chako wibitilage kukaye!” ¹² Lulusika lulo, avanu mbevali wevilava swe umunu yula akwima na ukutegula ikivasikiso chakwe swe ihuma kwivala na ukwibitilaga; avanu mbevali vasasave na ukumulumba Nguluvi vitigila, “Sitwetulaluwona ulukani ndawe ulu nangi.” ¹³ Yesu ahele kangi kumwani iya inyanza. Neke amalugu gamukong’anikile, nave ndawe avangige ukuvigisa. ¹⁴ Na pealutilige, amuwene Levi umwana va Alifayo, ateng’eme pakaye iya imbemenenge. Neke amutigile, “Uninile!” Levi imite neke amuninile. ¹⁵ Pambele, Yesu pealisige mukaye ya Levi, avakong’asa imbemenenge wolofu na vanyanzanangifu vamuninilige Yesu na avamwi mwa vawo vateng’eme pamwi na Yesu na avanyigendo mukulya. ¹⁶ Sweno, avamwi va avigisi va indagilo na avafalisayo pevamuwene Yesu ilya pamwi na avanyakukong’asa imbemenenge ndawe vavatigilige, avanyigendo vakwe, “Mbi ndawuli ilya pamwi na avanyakukong’asa imbemenenge na avanyanzanangifu?” ¹⁷ Neke Yesu peapulike ulu ndawe avatigilige, “Vala avanofu sivavisaka umukofi, neke vavatamwa vevavisaka umukofi, nene sindasili mukukemela avagolofu ndasile mukukemela avanyanzanangifu.” ¹⁸ Na avanyigendo va Yohane na va Avafalisayo apamwi viyimige ukulya; neke avanu vaasile kwa Yesu vamutigilage, “Mbi ndawuli avanyigendo va Yohane na va Avafalisayo vakwiyima ukulya, neke avanyigendo vako sivakwiyimagi ukulya?” ¹⁹ Neke Yesu avatigile, “Avalaalike kuluwungo viyima ukulya ndawuli pevalipamwi na munyaluwungo? Pe valipamwi na munyaluwungo sivahwaniti viyime ukulya. ²⁰ Ikimunyi sachusa, pesaava ahesile umunyaluwungo. Ikimunyi icho chesaviyima ukulya. ²¹ “Asukuli umunu ye aihonelesa ikipapiko ikipya mumwenda umulovela. Wone ahonelese ikipapiko icho umwenda ugo umulovela gudemukila wutalo. ²² Asukuli yeaisopa idifayi imya mufihela ifilovela wone asope umo idifayi yitudisa ifihela ifyo neke idifayi na ikihela mbefili fyanangika. Idifayi imya yayisopwa mufihela ifipya.” ²³ Ikimunyi ikimwi icha isabato, Yesu alutilige mumugunda ugwa ingano. Na pevilutila avanyigendo vakwe vavanzile ukudenya amahoo ga ingano. ²⁴ Neke Avafalisayo vamutigile, “Lavage! Mbi ndawuli vipiga lwesilulagile pa ikimunyi icha isabato?” ²⁵ Ndawe avatigilige, “Si mwemulimba Daudi lwe apigite? Pe eina nzala umwene na avayagwe. ²⁶ Inje Mukaye ya Nguluvi, pidaha pee mutambisi muvina Abiatali swe ilya imikate ija ikitawulwa jejesimilagile kwa umunu yeyeavesaga pesi vavatambisi, neke kangi avapele na avayagwe vevevali pamwi.” ²⁷ Neke Yesu peavatigile, “Isabato yavisilwe yivapigile avanu. Siavanu vayipigile isabato! ²⁸ Na kwa ulo, Umwana va Umunu ye Mutwa, va isabato.”

¹ Yesu ingile kangi musinagogi, mwemwe moyoli umunu umunyaliwoko ilinyalitela. ² Vepovali avanu avamulavisige, wone weamuponia ikimunyi cha isabato sambi vamuhige. ³ Neke Yesu amutigile yula umunyaliwoko ilinyalitela, “Wuse ipa.” ⁴ Ndawe awusige, “Ndawuli lugolofu lulikwi ukupiga inofu na ukupiga imbi, pa ikimunyi cha isabato na ukuponia uwumi nu kuwulaga?” Swe vikatuka sili. ⁵ Neke avalavile mbevali kwa ililakali swe ihuguvala ukwimila uwutalamu wa inumbula sawo, swe akumutigila yula, “Golole iliwoko lyako!” Swe ulusika lulula liva yeliponite. ⁶ Avafalisayo vahumite kwivala, neke vakalongane na avahuma kwa Helode sambi vagahe ifigaho vamuwulage Yesu. ⁷ Yesu na avanyigendo vakwe vahesile neke vabite kumwani iya inyanza. Neke amalugu uluhuma ku Galilaya gamufwate. Na avanu iwo vevahumite ku Yudaya, ⁸ na ku Yelusalemu na ku Idumeya na ukuhuma kumwambu ya umukoga gwa Yolodani ku Tilo na ku Sidoni, amalugu makomi ga avanu pevapulike seapigite vahegelye kulumwene. ⁹ Ndawe avalongelige avanyigendo vakwe vamuvikile ikipugu ikimwi sambi amalugu valemwe ukumubana pakuva mbevali vamuhegelelige. ¹⁰ Pakuva alaponise wolofu na avatamwa mbevali vamuhegelelige sambi vamupamise. ¹¹ Na vala veve vina amasoka pevamuwene vagwisige pasi viyova, “Veve wi Mwana va Nguluvi!” ¹² Neke umwene agapavile hilo amasoka galamulonga ku vanu sambi akagulanike. ¹³ Neke Yesu iilye kukidunda, avakemelye vaase vala kulumwene ve avasakige swe vakwidika nu kubita. ¹⁴ Nave avahagwe avanu vanyichumi na vavili avatambule vigendo vave pamwi na umwene sambi avatume kukudalika, ¹⁵ nawo vavelage na ululagi lwa ukuhumya amasoka. ¹⁶ Swe avanu iwo avanyichumi na vavili avahagule ve iva: Simoni (yula Yesu ye amupelye ilitawa lya Petulo) ¹⁷ Yakobo na Yohane avana va Sebedayo (Yesu veavapelye ndawe vavili ilitawa lya Aboanelege, kwekutigila avana va limadadama.) ¹⁸ Andeleya na Filipo, Batolomayo, Matayo, Tomasi, Yakobo umwana va Alufayo na Tadeyi, Simoni uva ku Kana ¹⁹ na Yuda Isikalyote ye amupitwike Yesu ²⁰ Ndawe Yesu abitige kukaye. Neke ililugu ilya avanu likong’ane kangi swe vigaya na pawulilo. ²¹ Na avanyalukolo vakwe pevapulike isi, vahele sambi vamwibate, pakuva vatigilige, aguluka lukwale. ²² Na avigisi va indagilo avahumile ku Yelusalemu vatige, “Ina Libelisebuli! Ilivina lya amasoka na kwa lilyo aihumya amasoka.” ²³ Ipo Yesu avakemelye, neke avalongele ikola ikiganiso, “Mbi setani uyungi amuhumya ndawuli Setani umuyagwe? ²⁴ Wone uwutwa wilekase, uwutwa uwo siwima. ²⁵ Kangi wone ikaye yilekase, ikaye iyo siyihwaniti yime. ²⁶ Na wone setani igalukile yumwene neke ahume polofu, siava na ludali kangi, ava ye asisile. ²⁷ “Asukuli umunu yeakwingilaga kukaye ya umunyaludali neke ahiise ifinu, pesiamupinzili tasi umunyaludali, apo pepene peahwana amupoke ifya mukaye. ²⁸ “Nachene nene nguvalongela nyenye inzanangifu mbesili savadegepelwa avana va avanu, na lyelivesaga liligo lyevalonga. ²⁹ Neke yeyeavesaga iliga Umuhe Umwelu uyo sisaadegepelwa nda, uyo ava na nzanangifu kitasila.” ( ³⁰ Yesu alonzile ulo pakuva vatigilige, “Ina lisoka.”) ³¹ Uyuve va Yesu na avanakwave vaasile, neke vime pivala vatume umunu amukemele Yesu. ³² Na amalugu gegateng’eme gamupilime, ndawe vamulongelige, “Uyuwo na avanakwenyu vali pivala, vakukukemela.” ³³ Yesu avapitule, “Yuva na avanakwetu veva nani?” ³⁴ Swe akuvalavila vala avevamupilime neke atigile, “Iva vevayuva na avanakwetu na vanyalukolo vangu! ³⁵ Yeyeavesaga ipiga isa Nguluvi ye munyalukolo, na ye muhasavangu na ye yuvangu.”

¹ Kangi Yesu avanzile ukwigisa, peali palubali pa inyanza. Neke amalugu makomi gegakong’ine gamupilime, swe akwingila mukipugu neke ateng’emale mugati kono ikipugu we kilimululenga ililugu mbelili lyelili mumwani. ² Neke peavigise ifinu fyolofu ikola figaniso, neke peakwigisa avatigilage, ³ “Mupulikage! Umuvyasi ahele kukuvyala. ⁴ Neke peivyala inyadikwa isingi sagwilye mung’asi, neke ifidege fyuse neke filye. ⁵ Isingi sagwe mwitalawe umwemwina luganga lukefu ulusika silusika samesile, pakuva pepagaya luganga lolofu; ⁶ Neke ilisuva pelivasile sakasile pakuva sengaya ndela. ⁷ Isingi sagwe mumifwa neke imifwa givine swe gitova neke silemwe ukuveleka. ⁸ Neke isingi sagwe muluganga ulunono naso samesile savinite na ukuveleka: iyimwi yiveleka imeke machumi gadatu, na iyimwi machumi gimutanda na iyingi ligana.” ⁹ Neke atigile, “Umunyamapulikilo gakupulikila, apulikage.” ¹⁰ Neke Yesu peeasige iyena, avamwi va vavala avevamupulike na vanyigendo vanyichumi na vavili, vahele ndawe vamuwusige ulwa ikiganiso. ¹¹ Neke avatigile, “Nyenye mwivapele ulupweng’enyu lwa Uwutwa wa Nguluvi, neke kwa avalipivala chichekivesaga vakikagula vikola ifiganiso, ¹² Sambi, ‘Valave hilo, neke valemwe pakuluwona, vapulike hilo, neke valemwe pakulukagula. Wone sindahihyo, vake vamupitukila Nguluvi, Nave ake avadegepela.’ ” ¹³ Neke Yesu avawuse, “Simukukikagula ikiganiso iki? Mbi ino mufikagula ndawuli ifiganiso mbefili? ¹⁴ Umunyakuvyala aivyala ulukani lwa Nguluvi. ¹⁵ Neke iva vevala avali mung’asi, mula mwe ulukani luvyale; na pevapulike ulusika lulo Setani akusa neke ategule ulukani uluvyale muvene. ¹⁶ Neke iva vindawe vala avavyale mwitalawe pevapulike ulukani ulusika lulo vakwanukila kwa luhekelelo. ¹⁷ Kono we vagaya ndela, neke vanane ludodo, neke ulugudo na ineseko pesusile kwa avene vivalwa ulukani ulusika lulo vakululeka. ¹⁸ Neke avangi vevala avavyale mumifwa; vevala avavipulika ulukani. ¹⁹ Neke kwa uwuhuguvafu uwa mung’i, na ukuwenda uwunono, na ukudobokela ifinu ifingi, ifi pefinje fya fitova ulukani ulo, neke valemwe pakuveleka kinu. ²⁰ Neke vala avevavyale muluganga ulunono vevala avavipulika ulukani na ukwanukila, neke vaveleke amaveleko; machumi gadatu avangi machumi gimutanda, na avangi ligana.” ²¹ Yesu ave peavalongela, “Mbi pwali umunu yeaikunga ulung’ali neke afihe mukisilo nave mwifungu lya uwuhaga? Nda sipwali, ulung’ali lwalwivikwa pachanya paluwumba. ²² Pakuva sikokili ikifihe, chesisakivikwa pawelu, kangi sikokili ikigubikile chesisakigubulwa. ²³ Umunu umunya mapulikilo gakupulikila apulikage.” ²⁴ Neke avatigile, “Mwinatilage semwipulika! Ikigelo kila chemwigelanikisa avanu vangi sakiva che kigelo chesamugelanisiwa nyenye na ukuwilwa. ²⁵ Pakuva yula yeinafyo saapelwa, na uluhuma kwa yula yeihela na kikilaga cheinacho saapokwa.” ²⁶ Yesu we peavalongela, “Uwutwa wa Nguluvi windawe umunu yeaivyala inyadikwa mumugunda. ²⁷ Neke ibitilage, wesiakulukagula chekipigika kunyadikwa pakilo na pamunyi. ²⁸ Pakuva ing’i yayimesa yiyene tasi ikimelo, pambele ilihoo ilinyameke isa ingano. ²⁹ Neke ingano peyitung’wine umunyakuvyala aibita na ikibenelo swe ivanga ukubena pakuva isanga yeyifikite.” ³⁰ Neke Yesu atigile, “ Tuwiganisa na kiki uwutwa wa Nguluvi? ³¹ Windawe inyadikwa iya umuhaladali indodo hilo ukulutila inyadikwa mbesili sa mung’i. ³² Neke peyivyalitwe na ukumela yayigunga neke yive mubiki mukomi, ukulutila ifimelo mbefili ifya mumugunda na ukuva na matagala makomi, na ifidege ifya mwihala fihwanite fisenge uwusulya mumatagala.” ³³ Ukukola ifiganiso ifyolofu ifindawe ifi avalongelige avanu ulukani lwakwe, ndawe mwevevahwanite ukulukagula. ³⁴ Sialongigi nawo pesi ukukola ikiganiso, neke kukinyele avaganulilige avanyigendo vakwe ing’ani mbesili. ³⁵ Ikimunyi kikila, peyive kinyamihye avatige, “Leke tulowoke kumwambu.” ³⁶ Neke avaleke vamalugu, swe ibitaga na avanyigendo vakwe mukipugu cheemwali. Pala pepofili ifipugu ifingi fyefyahegise. ³⁷ Neke ikifulufumbi chuse neke amavingo gitova ikipugu na ikipugu yechekivanzile ukumema ululenga. ³⁸ Umwene Yesu alagonelye weihagwee umwihago mukipugu kicho, swe vakumulamusa neke vamutigile, “Mwigisi siwihosa ulwa hwehwe twifwa?” ³⁹ Neke pealamuke akenyele ikifulufumbi swe itigila kumavingo, “Sike! Sikimale!” Swe ikifulufumbi kisika swe kwiva na wutendemafu wukomi. ⁴⁰ Neke avatigile, “Mbi ndawuli mukogopa? muvagaya lufuuwo?” ⁴¹ Neke vave na muhwehwe mukomi vakwiwusa, “Uyu ye nani ye na ikifulufumbi kikumupulika?”

¹ Neke pevafisile kumwambu, kung’i iya Vagelasi. ² Peikite uluhuma mukipugu, kula kufyanga itang’ine na umunu umunyamasoka. ³ Uyo ikalige mufyanga alasukuli umunu yealahwana ukumupinga nambi kwa munyololo. ⁴ Pakuva kolofu vamupingige na inzisi na iminyololo, na mbepali adumulige inzisi na giminyololo na alasukuli umunu yealahwanite ukumwibata. ⁵ Pakilo na pamunyi ikalige kufyanga na mufidunda we ikoolaga na ukwitemanga na amaganga. ⁶ Neke peamuwene Yesu kwa pataali, amukimbilye, swe akamufugamile. ⁷ Iyovela pachanya itigila, “Wisaka upige kiki kwa nene, Yesu ve Mwana va Nguluvi yealikuchanya? Ngukulongela mwitawa lya Nguluvi ngukugongola ulanesa!” ⁸ (Alonzile ndahihyo pakuva Yesu amutige, “Hege kulu Munu uyo ve lisoka.”) ⁹ Ndawe Yesu amuwusige, “Ilitawa lyako winani?” amupitwe, “Ilitawa lyangu ndi kilugu pakuva twiwolofu.” ¹⁰ Neke umunu uyo amugongolite hilo Yesu alagahaka gala amasoka mung’i yila. ¹¹ Ino, kwekwina ikipinga cha ingubi chakwamililige mwivambala lya ikidunda. ¹² Swe amasoka gala gamugongolite gitigila, “Tusindike mungubi sambi hwehwe twingile musene.” ¹³ Neke atigile mubite. Ndawe amasoka gahumite kulumunu yula, swe gakwingila mungubi. Na ikipinga mbekili cha ingubi mbilima sivili chasulunuche pa kisulunukila mbaka mu nyanza kisuda mululenga kifwa. ¹⁴ Avanyakukwamila swe vikimbila, vakuvalongela avanyaboma na ing’i mbeyili. Swe avanu vakusa valave lula ulupigike. ¹⁵ Ndawe vamubitilige Yesu, vakamulave umunyamasoka vakumuwona ateng’eme pala afwite imyenda ina luhala ulukwilaniche hela, umunu yeeina masoka molofu pamwandi neke wogope hilo. ¹⁶ Na vala avaluwene ulwelupigike, ku munyamasoka na kungubi vavalonje avayawo ing’ani mbesili sesapigike ku munyamasoka na kungubi. ¹⁷ Neke pevavange ukumugongola Yesu ahege mulutanana lwa ing’i yawo. ¹⁸ Neke peyeakwingila mukipugu umunu yula yeeina amasoka amusukite ulwa vave pamwi. ¹⁹ Neke Yesu abihile amutigile, “Bite kukaye ku vanyalukolo vako, ukavalongele chakupije umutwa vako, na weagisile ukukuwonela ulusungu.” ²⁰ Ndawe avangige ukudalika kulutanana ulunyaboma isinyichumi isikemelwa Dekapoli ing’ani ingomi mbesili seamupije Yesu; avanu mbevali vasasave pakomi. ²¹ Nave Yesu pealowike kumwambu inzayo na ikipugu. Na amalugu makomi gakong’ine na ukumupilima, nave ealimulubali mwa inyanza. ²² Neke pease umuvina uyumwi va isinagogi ilitawa lyakwe Yailo; nave peamuwone swe e igwa pamagulu ga Yesu. ²³ Igongola hilo itigila, “Umwalivangu mutamwa sambi ifwa, wuse umugeleke amawoko gako, sambi apone ave mumi.” ²⁴ Swe Yesu vibitasa na Yailo kono amalugu gegegamupilime gamuninilige. ²⁵ Na umo emwali umung’inetu yeahumige idanda myaka minyichumi na givili. ²⁶ Na umung’inetu uyo agudite muvakofi va imigoda wolofu na ukutawula mbefili fye alinafyo wesiilamukilagi neke peagine ukusakala hilo. ²⁷ Na peapulike isa Yesu, aninilige mumbele mwa Yesu swe iluting’asa mumalugu ipamisa umwenda. ²⁸ Pakuva atige, “Wone mamise hela umwenda gwakwe mona.” ²⁹ Na lulusika lululaga idanda yadumwike pakuhuma swe akwipulika mumuvili gwakwe ulwa yaponite uwutamwa wakwe. ³⁰ Neke Yesu, lulusika lulula iwene ulwa uludali lwakwe lukepite, swe akuvapitukila avamalugu itigila, “Ye nani yeapamise imyenda jangu?” ³¹ Neke avanyigendo vakwe vamutigile, “Mbi sukugawona amalugu agakubanite, nave witigila ye nani yeakupamise?” ³² Neke umwene pealave kono na kono ulwa wanda amuwona umunu yeagisile ndahihyo. ³³ Neke umung’inetu yula weakulukagula ulupigike kulumwene kono we akogopa swe igwa pamagulu ga Yesu neke peilogole mbesili. ³⁴ Neke Yesu peamutigile, “Mwalivangu ulufuuwo lwako lukuponise. Wibitile na uwikalakunoga, ponage uwutamwa wako.” ³⁵ Ave Yesu wepealonga, vaasile avanu uluhuma kukaye iya Umuvina va isinagogi vakumukutila ulwa, “Umwaliwo afwe. Lweki uve peumufwahisa Umwigisi?” ³⁶ Neke Yesu abedale sevalongige swe akumutigila Umuvina va isinagogi, “Ulogopa, velage na lufuuwo hela.” ³⁷ Neke avakanile avangi valamuninila, pesi Petulo na Yakobo na Yohane umwanakwave va Yakobo. ³⁸ Na peyevafisile kukaye iya umuvina va isinagogi swe akuvawona avanu vasasing’ine vivemba na ukuyova. ³⁹ Neke peinje avatige, “Mbi ndawuli musasing’ine na ukuvemba? Umwana siafwi nda agonelye hela.” ⁴⁰ Neke vamuheke swe akuvahumya mbevali kwivala, swe ibita na udade va Umwana na yu Yuve neke na vala avanyigendo vakwe vakwingila kwe ekwali umwana. ⁴¹ Ndawe amwibatige iliwoko na ukumulongela, “Talita nyichumi,” kwe kutigila, “Ve muhinza, ngukulongela lamuke.” ⁴² Swe ulusika lululaga umuhinza alamwike ivanga ukugenda. (Pakuva alagelaniche myaka ginyichumi na givili.) Na lulusika lululaga avanu vasasavale. ⁴³ Nave avakanie hilo vala, ulwa alalukagula munu ulu, neke peavalongele vamupele ikinu alye.

¹ Yesu ahesile uluhuma pala neke peabite kung’i yakwe, na vanyigendo vakwe vamuninile. ² Na paikimunyi icha isabato avange ukwigisa musinagogi, na awolofu avapulike vasasavale vitigila, “Umunu uyu akasiwene kwi mbesili isi? Wunyandolo wuki we apelitwe? miitu miki igi igipigika na amawoko gakwe? ³ Uyu si yeyuyula umuhongosi, Umwana va Maliya, na Umame va Yakobo, nayi Yosefu, Yuda nayi Simoni? Kangi na vavahase sitwinawo ipa?” Swe vakumubihila. ⁴ Ndawe Yesu avatigilige, “Umuvisi aiva mutambule mbekuli pesi kung’i yakwe na ku vanyalukolo vakwe na mukaye yakwe hela.” ⁵ Neke alemwe ukupiga imiitu baho, pesi avagelike amawoko avatamwa vakefu hela, nu kuvaponia. ⁶ Yesu asasavale ukwimila uwugaya lufuuwo lwawo. Ndawe Yesu abitige mufijiji akwigisa avanu. ⁷ Nave avakemelye avigendo avanyichumi na vavili ndawe avangige ukuvatuma vavili vavili. Neke avapele ululagi lwa ukuhumisa amasoka, ⁸ sweno akuvalagila, “Valategula kinu pesi lulubamba swe, nambi ichakulya nambi bogolo, nambi magobole mumapembo gawo. ⁹ Vafwalage indatu valafwala isopeka sivili.” ¹⁰ Neke peavatigile, “Pe mwinje mukaye, mwikalage baho mbaka pe mwihega. ¹¹ Neke wone pave popali apono pesivavanuchi, vabihile ukuvapulika mupunage ulungundi mumagulu genyu sambi wuve wolelesi kuvene.” ¹² Ndawe vabitige kukudalika ulwa avanu vahongesage na ukupela. ¹³ Nawo vihumya amasoka; na ukubaka amafuta avatamwa wolofu, nawo vaponite. ¹⁴ Umutema Helode apulike iso mbesili, pakuva ilitawa lya Yesu lyelikagulanike mbekuli. Avanu avamwi vatigile, “Ye Yohane umubatisi asilibwike ukuhuma kuvafwe, nambi inakitulo cha imiitu igipigikila mulumwene.” ¹⁵ Neke avangi vatigile, “Ye Eliya.” Neke avangi vatigile, “Uyu ye muvisi, ndawe avavisi avayagwe avapidaha.” ¹⁶ Neke Helode peapulike ulu atigee, “Yohane! Ye ndamudumwe asilibwike.” ¹⁷ Pakuva Helode atumite avanu neke vamwibate Yohane, swe akumusopa mundinde akumuvala Helodiya ye ali mukina Filipo umunyalukolo vawo, pakuva alamutegwe. ¹⁸ Pakuva Yohane atigee kwa Helode, “Silulagile kwa veve ukumutegula umukina munyalukolo vako.” ¹⁹ Neke Helodiya amuvipile wuhulo Yohane, awendige amuwulage. ²⁰ Neke sahwaniti, pakuva Helode amwogopige Yohane, alukagulige ukuta Yohane e munu mugolofu kangi mwelu, nambi amulekige ave muwunofu. Helode awendige ukumupulikisa Yohane, na lwave peyeamupulikise asasing’anige wuhulo. ²¹ Neke ikimunyi ikikomi cha ukwiwuka ukuwoneka kwa Helode awuyepe ikiwungo na ifyakulya sambi ave na uluhekelelo pamwi na avavaha va pawuhigilo na avavina va avanyigalu na avalongola va mu Galilaya. ²² Ndawe aasige umwalive va Helodiya neke awunge, sweno Helode na avagenzi vakwe lwanoje hilo neke umutwa amutigile umuhinza yula, “Sukage nene che wisaka, nene ngupela.” ²³ Neke amwilapile, “Che usuka kwa nene, nene ngupela; nave ulubali ulumwi lwa uwutema wangu.” ²⁴ Neke umuhinza ahumile akumuwusa uyuve, “Sukage kiki?” Neke uyuve atigile, “Umutwe gwa Yohane umubatisi.” ²⁵ Ndawe umuhinza ingilige lulusika lulula ku mutwa itigila, “Ndisaka umele yilinode umutwe gwa Yohane umubatisi muluhelo.” ²⁶ Umutwa swe ihuguvala hilo, ino pakuva yeeilapite ulwilapo lwakwe pa avagenzi siawenditi alemwe ukukwisa ulukani lwakwe ku muhinza uyo. ²⁷ Swe lulusika lulo umutwa ituma umunyigalu akalete umutwe gwa Yohane. Ndawe umunyigalu abitige mundinde mweemwali Yohane swe akumudumula, ²⁸ neke pealete umutwe muluhelo amupele umuhinza, swe umuhinza akumusindikila uyuve. ²⁹ Neke avanyigendo vakwe Yohane pevapulike vahele neke vategule umuvili gwakwe vasakutaga ku matago. ³⁰ Avigendo vapilwike kwa Yesu neke vamulongele mbesili sevapigite na ukwigisa. ³¹ Neke atigile kuvene, “Muse yinyenye kulubali musuupe ludodo pakuva avanu wolofu aavasige nu ukubita neke vagaye uwulegefu uwa ukusuupa na ukulya.” ³² Ndawe vabitige na ikipugu apono pa ikilega. ³³ Ino avanu wolofu vavawene pevibita neke vavakagule. Sweno awolofu vahumite iboma mbesili, vikimbilila kweekwali Yesu na avanyigendo vakwe, avene vilongola ukufika. ³⁴ Nape vikige pamwani Yesu awene amalugu makomi ga vanu neke avawonele ulusungu, pakuva vevindawe ing’olo ingaya umunyakukwamila. Neke peavange ukuvigisa ing’ani nzolofu. ³⁵ Ikimunyi pekilutye avigendo vakwe vaasile kwa Yesu vamutigile, “Ipa pe ihala hela na lisuva yelisalye. ³⁶ Ikiba uvilage avanu iva, vabite mumigunda na mufijiji ifilimwipi neke vigulile ifya ukulya.” ³⁷ Neke avapitule, “Nyenye muvapele ichakulya.” Nawo vamuwusise, “Ngali hwehwe tubitage tukagule imikate ija dinali magana gavili sambi tuvapele valye?” ³⁸ Neke Yesu avawuse, “Mwina mikate gilinga? Mubite mulave.” Neke pevalafile vatigee, “Gihanu na somba sivili.” ³⁹ Neke pealagile mbevali vateng’emale fiwungu fiwungu ⁴⁰ Swe viteng’emala pasi fiwungu fiwungu fya avanu ligana ligana na machumi gahanu gahanu. ⁴¹ Neke egule imikate igihanu na isomba isivili swe ilava kuchanya akumulumba Nguluvi, neke pe amegule umukate, swe avapele avanyigendo vakwe sambi vavagavile avanu. Na sisomba isivili naso avagavie mbevali. ⁴² Swe mbevali valye, neke vigute. ⁴³ Ndawe vasavige uwuwuluwulu wa imikate na isomba fitangula finyichumi na fivili fimemile. ⁴⁴ Na avalye imikate gila ve vanyidama mbilima sihanu. ⁴⁵ Ulusika lulula avatige avanyigendo vakwe vingile mukipugu valongole kumwambu ku Betisaida, umwene epeavilaga vamalugu. ⁴⁶ Na peavilasile ahele kukidunda kukwifunya. ⁴⁷ Na ikinyamihye pekifisile ikipugu che pagati ya inyanza, nave eiyena hela mung’i ing’afu. ⁴⁸ Sweno, avawene avanyigendo vakwe viguda pakugenza ikipugu na imitela pakuva ikifulufumbi chevategulisige. Na pembe kwicha, Yesu ahele kuvene, igenda muchanya mu nyanza. Ave ndaakuvalutila, ⁴⁹ neke pevamuwene igenda munyanza vatigilige vakiwene kisuka swe vikoola; ⁵⁰ pakuva mbevali pevamuwene vave na muhwehwe mukomi. Nave Yesu ndawe avatigilige, “Musikimalage, ye nene. Mulava na muhwehwe!” ⁵¹ Swe akwingila mukipugu, mwevemumo, na ikifulufumbi kisikimala. Nawo vakabwike hilo, ⁵² pakuva sivevalalukagula ulwa imikate, neke inumbula sawo save pesito. ⁵³ Neke na peyevalowike inyanza, vafikite mung’i ya mu Genesaleti. ⁵⁴ Neke na peyevikite mukipugu, ulusika lulula avanu swe vakumukagula Yesu. ⁵⁵ Sweno, ndawe vabitige vakwangupa mung’i yila mbeyili, kukuleta avanu avatamwa mufivasikiso fyawo, vavasindikige mbekuli kweekwali Yesu. ⁵⁶ Na kukweabitige Yesu mufijiji, muboma, na mu malungulu vavalambalikige avatamwa paluvanza, na ukumugongola Yesu ulwa nambi vake vapamise avatamwa ulupindo lwa umwenda gwakwe hela. Na mbevali avapamisige vaponige.

¹ Neke Avafalisayo pamwinga na Avigisi va indagilo, avevahumile ku Yelusalemu swe vikong’ana kwa Yesu. ² Vave vakuvawona avanyigendo vakwe avamwi vilya ichakulya na amawoko amahongawinya kwekutigila sivevakalivi. ³ Pakuva Avafalisayo na Avayudaya mbevali sivilisagi kinu wesivakalivi amawoko gawo wunofu ukwinatila indongwa isa avanyakataali vawo. ⁴ Kangi, sivilisagi kinu chekivesaga ikitumite pamagulilo, mbaka peyevafyofwige. Kangi kosili inzigiso isingi sevevanuche ukuhuma kwa avanyakataali vawo ndawe ukofuga ifinywelo, ifitonga na ifinu fingi ifiwuyape na ifyuma. ⁵ Neke Avafalisayo na avigisi va indagilo vamuwuse Yesu, “Mbi ndawuli avanyigendo vako sivavakwinatila indongwa isa avanyakataali, pevilya na amawoko amahongawinya?” ⁶ Neke peavatigile, “Yesaya avilite wunofu isa nyenye nyevabuganisi ndawe lweandike: ‘Avanu iva vakunzogopa kwakulonga hela, Inumbula sawo silipataali na nene, ⁷ Vakwifwahisa hela ukusunyalila pakuva, vakwigisa fila fye vakwivangila vavene indagilo sawo hela.’ ⁸ Mukusileka indagilo sa Nguluvi neke mwinatile indongwa isa avanu.” ⁹ Neke peavatigile, “Mwivasugu pa kugubika indagilo isa Nguluvi sambi mwinatile indongwa senyu! ¹⁰ Pakuva Musa atige, ‘Mwogopage udado na uyuwo,’ na, ‘Yula ye aliga udade nave uyuve, lumuvaje ukufwa.’ ¹¹ Ino nyenye mwakwigisa, ‘Wone umunu ave na ikinu cheisaka avatange nacho udade na yuyuve, neke hambi atigile ikinu icho kolabani (kwekutigila kitawulwa kwa Nguluvi), ¹² Swe lino silumuvaji ukumutanga udade nambi uyuve.’ ¹³ Uko kwekubedala ulukani ulwa Nguluvi na ukwinatila indongwa senyu semwakwilekela. Kangi mwipigaga nzolofu isihwana na siso.” ¹⁴ Neke Yesu avakemele vamalugu vaase swe akuvatigila, “Mbemuli mupulikisage sambi mulukagule. ¹⁵ Kisukuli ikinu ikikwingilaga mulumunu uluhuma kwivala chekilekaga umunu ave mwanangifu, ali ikinu ikihuma mugati mulumunu icho chechakileka ave mwanangifu. [ ¹⁶ Wone kwina umunu umunyamapulikilo aga ukupulikila lekage apulike!”] ¹⁷ Neke na peinje mukaye weagulesile umukong’ano gwa vanu avanyigendo vakwe neke vamuwuse ulwa ikiganiso. ¹⁸ Neke peavatigile, “Kumbi nayi nyenye mwivagaya luhala? Simukuluwona ulwa ikinu ikikwingila mulumunu uluhuma kwivala sichakileka umunu anangike, ¹⁹ pakuva sichakwingila munumbula, icho chakwingila mwileme neke kiluting’asa na ukutagwa kwihala?” (Pakulonga ulu esise ifilyo mbefili.) ²⁰ Neke peatigile, “Ichakihuma mulumunu che chakileka umunu ave mwanangifu. ²¹ Pakuva mugati munumbula sa avanu, gagihuma amahosa amabi, uwugoni, uwuhiisi, uwuwulasi, ²² Uwusafi, uwung’ung’unu, uwaafu, uwugaya choga, uwifu, igila, uwulisi, ikidada na uwupufi. ²³ Imbi mbesili isi sasihuma mugati mulumunu sesene sesasileka umunu ave mwanangifu.” ²⁴ Neke uluhuma pala awukite swe ibita kung’i iya ku Tilo na ku Sidoni. Ndawe ingilige mukaye iyingi, neke sawenditi umunu alu kagule; nambi ndahihyo ave siafihimi. ²⁵ Neke ulusika lulula, umung’inetu, yeeina umwalive ina masoka, apulike isa Yesu. Neke, pease afugame pamagulu gakwe. ²⁶ Na umung’inetu yula e Mugiliki, uva ku Silofonike. Neke peamugongole agahumye amasoka kulumwalive. ²⁷ Neke Yesu amutigile, “Lekage tasi avana valye pakuva silwinoga pakutegula ichakulya icha avana neke utosekese imbwa.” ²⁸ Neke umung’inetu yula amupitule Yesu, “ Ena Mutwa, lwindahihyo, neke imbwa naso sasisava uwuwuluwulu wewawigwa pawulilo wa avana.” ²⁹ Neke Yesu peamutigile, “Paulu wibitilage, ilisoka limuhumite umwaliwo!” ³⁰ Neke umung’inetu yula abite kukaye neke afike umwana avasise muwuhaga na ilisoka limuhumite. ³¹ Ndawe Yesu ahegige mulutanana lwa mu Tilo, swe igendela ku Sidoni, ndawe afikige ku nyanza ya ku Galilaya igendela mung’i sinyichumi iyitambulwa Dekapoli. ³² Neke pevamuletele umunu yeemudibafu kangi munyakibubwi, neke vamusuke amugeleke amawoko. ³³ Neke Yesu peamutegule palubali uluhuma pa vanu neke avike ifyala fyakwe mumapulikilo neke peafunye amati swe akumupamisa ululimi. ³⁴ Ndawe alavige alavige kuchanya sweihuguvala hilo neke amutigile, “Efata,” kwekutigila,“Dibaluke.” ³⁵ Neke amapulikilo gakwe gadibaluke, ululimi lwakwe luhogohe, swe ilonga wunofu. ³⁶ Neke Yesu avalagile ukutigila valalongela munu; pakulonga ndahihyo ave nda avatumite pakuva pepene pevaginite ukubitakilonga. ³⁷ Swe avanu visasavala hilo vitigila, “Apigite mbesili wunofu: avadibalwe avadibafu vapulike, na avanyakibubwi vilonga!”

¹ Mumisika gijo lula, kwekwina mukong’ano umukomi gwa avanu avevakong’ine neke vave vagaya kinu ichaukulya, Yesu avakemelye avanyigendo vakwe vase kulumwene neke avatigile, ² “Nene nguvawonela ulusungu vamalugu pakuva vave na nene lino filo fidatu, na vagaya chakulya. ³ Neke wone ndivaleke vabite na inzala ukwawo vafwa musale mung’asi, avangi vihuma kutaali.” ⁴ Neke avanyigendo vakwe vamupitule, “Lwima ndawuli umunu avalise avanu mbevali iva mubalali umu?” ⁵ Neke Yesu avawuse, “Mwinajo mikate gilinga?” “Vatigee gimufung’ati.” ⁶ Neke Yesu alagile vamalugu vateng’emale pasi. Neke egule imikate igimufung’ati, neke nape alumbite amegwe neke avapele avanyigendo vakwe, sambi vavatengele avanu, nawo swe vakuvasindikila avamalugu. ⁷ Na kangi vevina fisomba fikefu na Yesu peafunlye alaje ulwa na fifila muvasindikile. ⁸ Neke valye swe vakwiguta. Ndawe vasavige uwuwuluwulu fitangula fimufung’ati fimemile. ⁹ Na avanu avalye vevagelaniche mbilima sitayi swe akuvilaga, ¹⁰ ndawe ahovige ikipugu, umwene na vanyigendo vakwe ibitaga ku lutanana lwa ku Dalumanuta. ¹¹ Avafalisayo vaasile vivanga ukwibesa na Yesu. Nawo vamugelige, pakuva vasakige avalagile ikilagilo chekimolelela ukuta ina lulagi ulwihuma kuchanya. ¹² Neke Yesu ahuguvale hilo munumbula yakwe neke atigile, “Mbi ndawuli, imbegalo iyi yisaka ikilagilo? Nachene nene nguvalongela nyenye kugaya kilagilo chesachusa kumbegelo iyi.” ¹³ Neke Yesu avaleke neke ingile mukipugu swe ilowoka inyanza. ¹⁴ Ino avanyigendo vevasemilwa ukutegula imikate, vevinago gumwi swe mukipugu. ¹⁵ Neke Yesu avapavile ukutigila, “Mulavage! Mwikomalilage! na uwuhahu uwa Avafalisayo na Helodi.” ¹⁶ Neke vavange ukwilonganza ukutigila ngali ilonga ndahihyo pakuva, “Twivagaya mikate.” ¹⁷ Yesu we akulukagula ulu neke avatigile, “Kumbi ndawuli mukwilonganza ulwa mwivagaya mikate? Simulakikagula nda, simwivasugu, mbi mwivapufi? ¹⁸ Mwina miho simwilava? Mwina mapulikilo simwipulika? Kangi simwakwiwuka ¹⁹ nene pendamegwe imikate igihanu kuvanu mbilima sihanu mwategwe fitangula filinga fimemile uwuwuluwulu?” Neke vatigile, “Finyichumi na fivili.” ²⁰ “Neke imikate igimufung’ati kuvanu mbilima sitayi fyefitangula filinga ifye fimemile uwuwuluwulu?” Neke vamutigile, “Fimufung’ati.” ²¹ Neke Yesu avatigile, “ Ngali na yilino simulalukagula nangi?” ²² Ndawe Yesu afikige ku Betisaida. Neke avanu vamuletele umunu umubofu, swe vakusuka amupamise. ²³ Neke Yesu amwibate ni liwoko yula umubofu, neke amusindike vahege mukijiji. Swe akumufunyila amati kumiho na ukumugeleka amawoko neke amuwuse, “Ukukiwona kinu?” ²⁴ Neke umubofu alave kwilanga neke atigile, “Nguvawona avanu, vinda mibiki gigenda.” ²⁵ Neke kangi amugeleke amawoko gakwe mumiho ga yula umubofu ave ilava hilo swe uludali mbeluli lwa ukulavila lwamupiluche ndawe afiwonige mbefili wunofu ndawe wefiwali. ²⁶ Swe Yesu ndawe amutigilige abite kukaye ukwawo, akumupavila itigila, “Lemwa kwingila mukijiji!” ²⁷ Pambele Yesu na vanyigendo vakwe vahele kufijiji fya ku Kaisaliya Filipi. Na pevali mung’asi, avawusise avanyigendo vakwe, “Avanu vavitigila ulwa nene ndinani?” ²⁸ Neke vamulongele ulwa avamwi vavitigila, “Yohane umubatisi, avangi vavitigila Eliya, avangi yumwi va avavisi.” ²⁹ Neke Yesu avawuse, “Neke nyenye mwaitigila nene ulwa ndinani?” Petulo amupitwe, “Yeveve Kilisito.” ³⁰ Neke avapavile valamulongela munu ing’ani sakwe. ³¹ Ndawe Yesu avangige ukuvigisa avanyigendo vakwe itigila, “Lumuvaje Umwana va Umunu ateseke munzolofu, kangi abihilwa na avavaha na avatambisi avavina na avigisi va indagilo. Nave awulagwa, na pefilutye ifilo fidatu asilibuka.” ³² Nave Yesu avalonje wima hela. Nambi Petulo amusindike Yesu palubali swe ivanga ukumukenyela. ³³ Neke Yesu apitwike akuvalava avanyigendo vakwe, ndawe amukenyelige Petulo itigila, “Hege pa nene ve setani! Pakuva amahosa gako si ga Nguluvi, pesi wina amahosa ga uwunu.” ³⁴ Neke Yesu avakemele vamalugu pamwi na vanyigendo vakwe, neke avatigile, “Wone kwina munu yeisaka ukuninila nene lekage ivipile yumwene neke ategule umusalaba gwake neke peaninile nene. ³⁵ Pakuva umunu yeyeavesaga isaka ukuwupoka uwumi wakwe yumwene, uyo awuyasa, neke yula yeawuyasa uwumi wakwe ivalwa nene na Ulukani Ulunofu uyo saawupoka. ³⁶ Pakuva ambulila kiki umunu na apelwe ing’i mbeyili neke awuyase uwumi wakwe? ³⁷ Kangi tutigile umunu mbi atawula kiki chekihalila ku uwumi wakwe? ³⁸ Pakuva yeyeavesaga yakumbonela inyoni nene na ing’ani sangu mu mbegalo iyi inzanangifu na iya uwugoni, kwa uyo Umwana uva Umunu saamuwonela inyoni pesaakusa mundolo isa udade pamwi na vanyivaha avelu.”

¹ Neke Yesu avalongele, “Nachene nene nguvalongela nyenye, povali avanu avimite ipa vesisavafwa wesi valawuwona Uwutwa wa Nguluvi yewusile muludali.” ² Neke pefilutye ifilo fimutanda Yesu avategwe Petulo na Yakobo na Yohane avasindike kukidunda ikitaali viyena. Na pevalikuko we vakumulava, Yesu apitwike ulwihwano lwakwe, ³ na gimyenda jakwe jamalavadikige, myelu wuhulo, asukuli umufufi mung’i yahwanite ukwesa ndahihyo. ⁴ Swe, ndawe vaasige Eliya na Musa, vilongana na Yesu. ⁵ Nave Petulo ndawe amulongelige Yesu, “Mutwa, lwinoga hwehwe tusigale baha. Leke tusenge ifitinga fidatu: ikimwi cha veve, ikingi cha Musa, ikingi cha Eliya.” ⁶ Pakuva sialukaguligi ulwa ukulonga, pakuva vevina muhwehwe mukomi. ⁷ Neke ilifufu livagubike, neke iliswi lyahumite mwifufu litigila, “Uyu ye Mwanangu umwende vangu, mumupulikage umwene.” ⁸ Sukumwi hela we pevalava kono na kono sivamuweni munu yungi kangi pesi Yesu hela. ⁹ Na pevisulunuka uluhuma kukidunda avatanie ulwa valalongela munu sevasiwene mbaka Umwana va Umunu peasilibwike uluhuma kuvafwe. ¹⁰ Swe vakwinatila ululagilo ulo, vakwiwusa vavene ulwa ukusilibuka kuvafwe che kiki. ¹¹ Neke pevamuwuse Yesu, “Mbi ndawuli avigisi va indagilo vavitigila mbaka asaage tasi Eliya?” ¹² Neke avatigile, “Nachene Eliya aasa tasi kukugolola mbesili, neke pamwi na siso Umwana va Umunu andikilwe ndawuli ulwa atesiwa mu nzolofu pamwi na ukubedalwa? ¹³ Ino nguvalongela ulwa Eliya yeeasile neke vamupigile sevawendige avene ndawe lwe andikilwe.” ¹⁴ Na pevafisile ku vanyigendo avevavalesile vawene ililugu ilikomi livapilime. Na avigisi va indagilo vahele vakwibesa nawo. ¹⁵ Neke ulusika lulula amalugu mbegali pevamuwene Yesu vasasave hilo, neke vamukimbilile ukumutang’anila vamuhungile. ¹⁶ Neke Yesu avawuse, “Mbi mukwibesa kiki nawo?” ¹⁷ Uyumwi va avamalugu amupitwe Yesu, “Ve Mwigisi, ndimuletite umwanangu kwa veve, pakuva ina lisoka ilinyakibubwi. ¹⁸ Na pelyakumutova lyakumugwisa pasi, na ukuhumya ilifulo mumulomo na ukugelesula amino, na ukukala umuvili mbeguli. Neke ndivasuke avanyigendo vako valihumye valemilwe.” ¹⁹ Nave Yesu peavapitule, “Nye mbegalo ingaya lufuuwo. Mbi ndikala na nyenye mbaka panili? Mbi ndivakangalila nyenye mbaka panili? Mumulete kwa nene.” ²⁰ Neke pevamusindike umunyakilambo yula kwa Yesu. Neke ilisoka pelimuwene Yesu ulusika lulula lyamuletye ililibisi, neke umunyakilambo yula agwe pasi igalangala, kono we lihuma ilifulo mumulomo. ²¹ Neke Yesu amuwuse udade, “Uluhuma panili ina lisoka ili?” Neke udade atigile, “Uluhuma pawana. ²² Na mbepali lyakumutoosa mumoto na mululenga sambi limwanange. Neke wone wihwana ukupiga kinu tuwonelage ulusungu ututange!” ²³ Neke Yesu amutigile, “Wone uve wihwana! Mbesili sasihwana ukupigika kwa yeifuuwa.” ²⁴ Ulusika lulula udade va umukwamisi ayofile neke atigile, “Ndifuuwa! Nange uwugaya lufuuwo lwangu.” ²⁵ Neke Yesu peawene avamalugu vikimbila vakusa swe akulikenyela ilisoka akulitigila, “Ve lisoka ve munyakibubwi na ve mudibafu, ngukulagila hege kwa uyu na ulapilukila umwingile kangi!” ²⁶ Neke pe likoole, limuletele ililibisi ave nda afwe neke pelihege. Neke awolofu vatigile umunyakilambo, “yeafwe!” ²⁷ Neke Yesu amwibate iliwoko, neke amukang’ule, swe akwima. ²⁸ Neke peinje mukaye, avanyigendo vakwe vamuwuse kukinyele, “Mbi ndawuli hwehwe tulemilwe ukulihumya?” ²⁹ Neke avatigile, “Ilisoka ilya de silike lyakuhesa ndahihi pesi kwa lwifunyo hela.” ³⁰ Neke Yesu na avanyigendo vakwe vahesile uluhuma pala neke vagendele ku Galilaya. Nave Yesu sawendigi alukagule munu pepwali, ³¹ pakuva avigisige avanyigendo vakwe, akuvatigila, “Umwana va Umunu atawulwa mumawoko ga avanu nawo vamuwulaga; na pevamuwulige pefilutye ifilo fidatu asilibuka.” ³² Ino avanyigendo sivalukagwi lwe alongige neke ulwene wogopige pakumuwusa. ³³ Ndawe vafikige ku Kapelenaumu. Na pealimukaye avawusise, “Mulongige kiki mung’asi?” ³⁴ Neke vakatuke pakuva mung’asi vilonganzige ulwa yenani umuvina yealutye mwa veve. ³⁵ Neke Yesu ateng’emale swe akuvakemela vala avanyichumi na vavili, neke avatigile, “Yeyeavesaga iwenda ave mulongola kwa mbevali uyo ava va mumbele na mukami va mbevali.” ³⁶ Neke amutegule Umwana mudodo, neke amuvike pagatinagati apawo; neke amwegule mumawoko gakwe swe akuvatigila, ³⁷ “Yeye amwanukilaga umwana yeindawe uyu mwitawa lyangu akunzanukila nene, na yeakunzanukila nene siakunzanukila nene hela, akumwanukila yula yeanumite nene.” ³⁸ Yohane swe akumutigila, “Mwigisi tumuwene umunu yungi ihumya masoka mwitawa lyako neke tumutanile pakuva sivelagi siayiva pamwi na hwehwe.” ³⁹ Neke Yesu avatigile, “Mulamutanila, pakuva asukuli yeapiga imiitu mwitawa lyangu neke lulusika lulo alonge imbi kwa nene. ⁴⁰ Pakuva yesiakutubihila hwehwe uyo alilubali lwa hwehwe. ⁴¹ Pakuva, yeyeavesaga akuvapela nyenye ululenga mu kinywelo ulwa ukunywa pakuva mwivanu vakwe Kilisito sisaaneema ukupelwa uluhombo.” ⁴² “Umunu yeyeavesaga akwambusa uyumwi va avadodo iva avakufuuwa nene apige inzanangifu, ikiba peawopelesewe ulwala musingo neke atooswe mubahali. ⁴³ Neke wone iliwoko lyako likukuvase upige inzanangifu, dumule! Ikiba veve pewinje kuwumi we wimugaya liwoko sindawe pe wina mawoko gavili neke sambi utoswe kumoto gwa ku Gehena gwe sigwisimagi. [ ⁴⁴ Kula, ifitekenya fyawo sififwisagi, na gumoto sigwisimagi.] ⁴⁵ Neke wone na liligulu likukukuvasa upige inzanangifu, dumule! Ikiba pewinje kuwumi wina ligulu limwi sindawe pe wina magulu gavili neke sambi utoswe kumoto. [ ⁴⁶ Kula, ifitekenya fyawo sififwisagi na gumoto sigwisimagi.] ⁴⁷ Neke wone na liliho lyako likukukuvasa upige inzanangifu ikiba peuling’amatwe neke utage! Lunoje wingile ku wutwa wa Nguluvi na liho limwi sindawe pe wina miho gavili neke sambi utoswe kumoto. ⁴⁸ Kula ifitekenya fyawo sififwisagi na gumoto sigwisimagi. ⁴⁹ “Pakuva yeyeavesaga saafungiswa mumoto. ⁵⁰ Umwino munofu, neke wone guhupe gusopwa kiki neke gunone? Nyenye mwinona mwino, mukikalage mu wikalakunoga yinyenye kwa yinyenye.”

¹ Ndawe Yesu ahegige pala neke abite kulutanana ulwa ku Yudaya na kumwambu ya umukoga gwa ku Yolodani. Neke kangi vamalugu vakong’ane, ndawe Yesu lwealasovye mbepali swe ivanga ukuvigisa. ² Neke Avafalisayo vamusye Yesu sambi vamugele swe vakumuwusa, “Ndawuli lulagile kulumunu ukumuleka uvakwe?” ³ Yesu avapitwe, “Musa avalaje ndawuli nyenye?” ⁴ Neke vamutigile, “Musa atigee umunu amulekage uvakwe kwa ukumupela ulwandiko lwa ukulekana sive viva valekine. ⁵ Neke Yesu avatigile, “Wimila uwutalamu wa inumbula senyu nambi Musa aandike ululagilo ulu. ⁶ Neke uluhuma pakugawa avanu, Nguluvi agafile umunyidama na umung’inetu. ⁷ Paulu umunyidama amuleka udade na uyuve neke abaning’ane pamwi na uvakwe. ⁸ Na iwo avavili savava muvili gumwi viva sipevavili kangi nda vave muvili gumwi. ⁹ Neke kila che aluming’ise Nguluvi umunu alakilekasa.” ¹⁰ Na pevafisile kangi mukaye avanyigendo vamuwusise Yesu kangi ulukani lulula. ¹¹ Neke avatigile, “Yeyeamulekaga uvakwe neke ategule yungi, uyo iva mugoni. ¹² Neke umung’inetu yeakumuleka uvakwe neke agomwe kwa uyungi, apo nave iva mugoni.” ¹³ Avanu vamusindikilage Yesu avana avadodo, ulwa sambi avapamise neke avanyigendo vavakenyele. ¹⁴ Neke Yesu pealuwene ulu avifile, neke peavatigile, “Muvaleke avadodo vase kwa nene, mulatanila pakuva avana avindawe iva uwutwa wa Nguluvi wawo. ¹⁵ Nachene, nene nguvalongela nyenye yeyeavesaga siakwanukila Uwutwa wa Nguluvi ndawe umwana mudodo sisaingila kuwutwa wa Nguluvi.” ¹⁶ Neke peavategule mumawoko gakwe, neke avafunyilile, na ukuvageleka amawoko gakwe. ¹⁷ Na Yesu peavangige ulugendo umunu uyumwi aasile kikimbila neke amufugamile amuwuse, “Ve mwigisi vemunofu, ngite ndawuli sambi nzingile kuwumi wa mbepali?” ¹⁸ Neke Yesu amutigile, “Mbi ndawuli ukung’emela ndimunofu? Asukuli umunu umunofu pesi Nguluvi hela yeiyena. ¹⁹ Ukusikagula indagilo; Ulawulaga, ulava mugoni, ulahisa, ulolelela wudesi, uladeta uvesage na choga kuludado na kuluyuwo.” ²⁰ Neke amutigile, “Mwigisi, isi mbesili ndinatye uluhuma pawana wangu.” ²¹ Neke Yesu amulavile swe akumwenda neke amutigile, “Ukepite kinu kimwi hela bite ukaguse mbefili fyewinafyo uvapele avamikaa nayuveve sauva na uwunono kuchanya, neke pewuse uninile nene.” ²² Peapulike ulo avifisile se ikumbing’ana ku miho swe ibitaga we avifile pakomi, pakuva ali munono hilo. ²³ Neke Yesu alave mbekuli mbekuli neke avatigile avanyigendo vakwe, “Saluva lutalamu kwa vala avanono ukwingila ku Wutwa wa Nguluvi.” ²⁴ Neke avanyigendo vasasavale ulwa ing’ani sakwe. Neke kangi Yesu avatigile, “Nye vana, sakuva lutalamu wuli ukwingila ku wutwa wa Nguluvi! ²⁵ Lupefu ingamiya ukukola mukidwi icha ulusingi neke sindawe umunu umunono ukwingila ku Wutwa wa Nguluvi.” ²⁶ Neke vasasavale hilo neke vamutigile, “Mbino ye nani yeahwanite apokwe?” ²⁷ Neke Yesu avalavile, neke atigile, “Ku vanu siluhwaniti, neke si kwa Nguluvi nda, pakuva ifinu mbefili fihwanite ukupigika kwa Nguluvi.” ²⁸ Petulo neke avange ukumulongela Yesu, “Lavage hwehwe tufilesile mbefili neke tukuninile veve!” ²⁹ Yesu atigee, “Nachene, nene nguvalongela nyenye, asukuli umunu yeailesile ikaye, nave vanyalukolo vakwe, nave avahase, nave uyuve, nave udade, nave avana, nave gimigunda ukwimila ilitawa lyangu na Ulukani Ulunofu. ³⁰ yesisaanukila kanyigana ulwalino, ikaye na avanyalukolo vakwe na vahase na vayuve na vana na gimigunda pamwi nasi neseko, neke pambele uwumi wa mbepali na mbepali. ³¹ Neke awolofu avalongola savalava vamumbele neke avamumbele savalava valongola.” ³² Na pevali mulugendo, vasogwe ku Yelusalemu, Yesu alalongwe, neke vasasavale, nawo avamuninilige vave na muhwehwe. Neke avategule palubali avanyichumi na vavili kangi, swe ivanga Ukuvalongela lula uluwoneka kulumwene, ³³ itigila, “Mulavage, tusogwe ku Yelusalemu, neke Umwana va Umunu atawulwa ku vatambisi avavina na avigisi va indagilo, nawo vamuhiga sambi awulagwe, na ukumutawula kwa avamyanza. ³⁴ Nawo vamwelanga, vamufunyila amati, vamutova na imikungo iminyamifwa na ukumuwulaga, neke pefilutye ifilo fidatu asilibuka.” ³⁵ Neke Yakobo na Yohane, avana va Sebedayo, vabite kwa Yesu neke vamutigile, “Mwigisi hwehwe twisaka utupigile chechekivesaga chetukusuka veve.” ³⁶ Neke avatigile, “Mwisaka nene ndivapigile kiki?” ³⁷ Neke vamutigile, “Lekage hwehwe tuteng’emale, uyumwi kwiwoko lyako lya kundyo neke uyumwi kwiwoko lyako ilya kung’igi, mundolo sako.” ³⁸ Neke Yesu avatigile, “Simukukikagula che mwisuka! muhwanite ukunywela ikinywelo cha uluteseko chenywela nene nave uwubatiso wendibatisiwa nene?” ³⁹ Neke vamutigile, “Tuhwanite.” Neke Yesu avatigile, “Ikinywelo chendandinywela nene munywela, na uwubatiso wendibatisiwa nene, nayi nyenye mubatisiwa. ⁴⁰ Neke ulwa ukuteng’emala kuliwoko lyangu lya kundyo nave ilya kung’igi ulo si lwa nene ukuvapela, Ulo lwa vala avavikile.” ⁴¹ Neke vala avanyichumi peyevapulike swe vivanga ukuvavipila va Yakobo na Yohane. ⁴² Neke Yesu swe akuvakemela, neke avatigile, “Mukulukagula ulwa ukutigila vala avavikagulanika ulwa vatema mu vamyanza vavitema kwa ludali na avavina vawo vakuvavika avanu muwuvanda. ⁴³ Ino sisaluva ndahihyo kwa nyenye, pakuva yeisaka ave muvina mwa nyenye ava mukami venyu. ⁴⁴ Neke yeava mulongola mwa nyenye ava mukami va mbemuli. ⁴⁵ Pakuva nayu Mwana va Umunu siasili apigilwage, pesi apigilage, na ukutawula uwumi wakwe sambi luve luhombo lwa awolofu. ⁴⁶ Neke vafike ku Yeliko, nave Yesu pealutilige mu Yeliko pamwi avanyigendo vakwe na vamalugu, Batimayo, yeali mubofu umususi, umwana va Timayo, eateng’eme palubali pa ng’asi. ⁴⁷ Neke peapulike ulwa ye Yesu uva ku Nasaleti, avanzile ukukoola itigila, “Yesu ve Mwana va Daudi, umbonelage ulusungu nene!” ⁴⁸ Neke awolofu vamukenyele, akatuke, neke umwene aginite ukukoola hilo, “Ve Mwana va Daudi umbonelage ulusungu nene!” ⁴⁹ Swe Yesu akwima neke atigile, “Mumukemele.” swe akumukemela umubofu na ukumutigila, “Wikangase! Wime, akukukemela.” ⁵⁰ Neke atage isopeka yakwe, swe idibuka ibita kwa Yesu. ⁵¹ Neke Yesu amutigile, “Wisaka ngupigile kiki veve?” Neke umubofu amutigile Yesu, “Mutwa ngukusuka ndave.” ⁵² Neke Yesu amutigile, “Wibitilage, ulufuuwo lwako lukuponise.” Na ulusika lulula swe ilava na ukumuninila Yesu kwe abitige.

¹ Pevahegelye ku Yelusalemu vafikite na muboma isa Betifage na Betaniya, mwivambala lya ikidunda icha imiseituni. Kula Yesu avatumite avavili va avanyigendo vakwe, ² avatigee, “Mubitage mbaka kukijiji chemulaving’ine. Na pemukwingila mukijiji, muyifika idogovi minge yesiyeyilahowa na munu. Mwawulage mulete, ³ neke wone umunu avawuse ukutigila, ‘Nyela mbi ndawuli mwigita de?’ Mumutigilage, ‘Umutwa ina kipigo nayo na neke kangi ayipilula baha.’ ” ⁴ Vahele mung’asi swe vakuyiwona idogovi minge pivala pa mulyango gwa ikaye. Swe vakwawula. ⁵ Avanu avamwi avevimile uko swe vakuvatigila, “Mbi ndawuli mukwawula idogovi iyo?” ⁶ Swe vakuvapitula ndawe Yesu lwe alavalonje nawo swe vakuvatawula. ⁷ Nawo vayisindike idogovi kwa Yesu, vitandika imyenda jawo pachanya pa idogovi swe Yesu ihova. ⁸ Avanu wolofu vatandike imyenda jawo mung’asi, na avamwi vadumwe amatagala ga imibiki ukuhuma mumigunda na ukutandika mung’asi. ⁹ Na vala ave valongwe na ava mumbele, vavanzile ukuyova vitigila, “Hosana! Mufunyilile yula ye akusa mwitawa lya Nguluvi! ¹⁰ Wufunyilile Uwutwa we wukusa wa Udadetu Daudi Hosana kuchanya hilo!” ¹¹ Yesu avelige ifika mu Yelusalemu, inje mu Tembeli, ndawe alavige imbali mbesili. Na pekive kinyamihye, awukite swe ibita ku Betaniya na avanyigendo vanyichumi na vavili. ¹² Na ikimunyi icha kavili lwevahumige ku Betaniya inzala yavafile. ¹³ Neke aguwone kwa kutaali umusombe ugunya mahamba. Ahele sambi angule amaveleko mumusombe, na avelige ihegelela sakiweni kinu pe si gamahamba hela kangi silwe lusika lwa amaveleko. ¹⁴ Swe Yesu akugutigila, “Uluhuma lino kwa veve mbaka mbepali pagaya munu yesa alya amaveleko uluhuma kwa veve.” Avanyigendo vakwe vapulike ulo. ¹⁵ Vavelige vifike ku Yelusalemu, Yesu inje mu Tembeli, swe ivanga ukuvahaka mbevali vevagusige na ukugula mula mu tembeli. Swe idulika inyaaga sawo avakowoka amagobole na ifigoda fya avasulusi va ingunda. ¹⁶ Samulekiti munu asave nambi ikinu uluhuma pala pa tembeli. ¹⁷ Neke avange ukuvigisa avanu ukutigila, “Mbi silwandike mu Waandike Uwelu ulwa, ‘Itembeli yangu yiva kaye ya kwifunyo lwa avanu mbevali va ing’i mbesili!’ Neke lino nyenye mudulike yive lifinga lya vahiisi!” ¹⁸ Avatambisi avavina na avigisi va indagilo, pevapulike iso neke vavange ukusaka ifigaho sambi vamuwulage neke ulwene wogopige pakuva mbevali vasasavalige seigisige. ¹⁹ Na lyavelige lisota ilisuva Yesu na vanyigendo vakwe vahegite pala pa boma. ²⁰ Pamilawu pevalutilige, vaguwene umusombe gula gukasile na sindela. ²¹ Petulo agwiwike umusombe gula, neke amutigile Yesu, “Mwigisi, lavage! Umusombe gula gwe ukagufingulise yegukasile!” ²² Neke Yesu avatigile, “Mumufuuwage Nguluvi. ²³ Nachene, nguvalongela, umunu yeyeavesaga na ulufuuwo ahwanite ukutigila ikidunda iki, ‘Kimuke ipo bite ukitoose kunyanza!’ Wone alonge wesiisina munumbula yakwe, we ifuuwa ukuta lweilonga, lugendela mumo, nachene lupigika ndahihyo. ²⁴ Ino nene nguvalongela nyenye, chechemusukaga mukwifunya mufuuwagwe ukuta yemwanuche icho, nacho kiva chenyu. ²⁵ Na pepemuvelaga mwimile mukwifunya, mudegepelage, wone mwina lukani na munu yungi; sambi udadenyu nave yealikuchanya ahwane ukuvadegepela nyenye inzanangifu senyu. [ ²⁶ Neke wone nyenye muve simwidegepela avangi inzanangifu sawo, nayu dadenyu yeali kuchanya savadegepela nyenye inzanangifu senyu.”] ²⁷ Neke pevafikite ku Yelusalemu, na Yesu peagendige mu Tembeli avatambisi avavina na avigisi va indagilo na avavina va avanu neke vamubitile Yesu, ²⁸ swe vakumutigila, “Mbi kwa lulagi luki wipiga isi? Nave ye nani yeakupelye ululagi upige isi?” ²⁹ Neke Yesu avatigile, “Nayi nene ndivawusa lukani, wone mumitule nayinene ndivalongela kwa lulagi na ludali lwa nani ndipiga isi mbesili. ³⁰ Mundongele, uwubatiso wa Yohane wahumite kwa Nguluvi apangi kwa avanu? Mumitule.” ³¹ Swe vivanga ukwilonganza vavene, “Vitigila, ‘Wone tutigile wahumite kwa Nguluvi’, atutigila, ‘Lino mbi ndawuli simwamufuuvitwi?’ ³² Na kangi wone tutigile, ‘Wahumite ku vanu” (Wogwipe avanu pakuva mbevali valukagulige ukuta Yohane ali muvisi nachene.) ³³ Swe vakumupitula Yesu, vakumutigila, “Situluseli.” Neke Yesu avatigile, “Nayi nene sindivalongela nyenye kwa lulagi na ludali lwa nani nene ndipiga isi mbesili.”

¹ Neke Yesu avanzile ukulonga nawo kwa ifiganiso, “Epwali umunu yealalimite umugunda gwa imisabibu, isitila ulusito umugunda mbeguli. Neke awuyape apono pawuhusilo wa amaveleko ga imisabibu, neke awuyape na chuwo. Swe akuvalekela avalimi imigunda neke peawuke ulugendo. ² Ulusika lwavelige lwifika ulwa ukwangula amaveleko, atumite umukami vakwe abite kwa vala avanyakubasa, akategule amaveleko amuletele. ³ Vala vamwibete, neke vamutove, na ukumuhumya mu mugunda we mugaya kinu. ⁴ Neke kangi atume umukami yungi; swe nave vakumuvayula lweya mumutwe na ukumupigila imbi. ⁵ Umunyamugunda amutumite yungi kangi, uyo vamuwulige na avangi avaasige vavapigile ndahihyo, avamwi vavatofile na avamwi vavawulige. ⁶ Ino alasigise umunu yumwi hela, umwanakwe umwende vakwe. Uyo nave pambele amutumite itigila, ‘Uyu apamwinga vamwogopa pakuva muswamuvangu.’ ⁷ Neke vala avanyakubasa umugunda valongane vavene ng’ani, ‘Uyu ye munya lilila lya umugunda, ino lekage tumuwulage, na ililila live lyetu!’ ⁸ Swe vakumwibata, vakumuwulaga, vakumutosa kwivala uluhuma pa mugunda gwa imisabibu. ⁹ “Lino yula umunyamugunda avagita ndawuli? Saasa avasinde avanyakubasa umugunda, na umugunda ugo gwa imisabibu saavabasikisa avangi. ¹⁰ Mbi ndawuli nyenye Uwandike uwu simwemulimba? ‘Iliganga lila lyevalibihye avasenzi, ilyo live liganga likomi lya mulubali. ¹¹ Ulukani ulu luhumite kwa Umutwa, nalo wuhulo pamiho getu. ¹² Avatambisi avavina, avigisi va indagilo na avavaha valukagwe ukuta ikiganiso icho avaselengige avene. Nambi vagahige ukumwibata, neke ulwene vawogopige vamalugu. Swe vakumuleka, swe vakwibitilaga. ¹³ Swe vakuvatuma kwa Yesu Avafalisayo na Avahelode, sambi vamugwilise Yesu mu ng’ani sakwe. ¹⁴ Neke vamubitile vamutigile, “Mwigisi, tukulukagula ukutigila veve wi munu wimulongela mumwene, na siwakwogopa uwuvina wa munu. Pakuva siwawilava uwusu wa umunu wakwigisa mumwene ulukani lwa Nguluvi. Lino witigila ndawuli lunoje tuhombe imbemenenge kwa Kaisali apangi nda?” Tutawulage, tulatawula? ¹⁵ Nave, we akulukagula ukutigila vabuganisi, swe Yesu akuvatigila, “Mbi ndawuli nyenye mukungela? Mlete iligobole ndave.” ¹⁶ Swe vakumusindikila. Neke avalongele uwusu uwu na ilitawa ili lya nani?” Neke vamutigile, “Lya Kaisali.” ¹⁷ Neke Yesu avatigile, “Mumupelage Kaisali ifya Kaisali na ifya Nguluvi mumupelage Nguluvi.” Swe visasavala hilo. ¹⁸ Neke Avasadukayo avitigila kugaya ulusilibuko vahele kwa Yesu, neke vamuwuse, ¹⁹ “Mwigisi, Musa atwandiche ululagi ulwitigila: ‘Wone umunu afwe amuleke uvakwe mugaya mwana, umunyalukolo va yula yeafwe amutegulage yula umufwile sambi amwegalile yula yeafwe avana.’ ²⁰ Lino vepovali avanu vimufung’ati avegalwa pamwinga. Umuvina ategwe umung’inetu, neke afwe we mugaya mwana. ²¹ Umunyalukolo va kavili nave amutegwe yula umung’inetu, nave afwe wesalekiti mwana; na uva wudatu nave ndahihyo. ²² Na mbevali ndawe vimufung’ati vamulekite yula umung’inetu mugaya mwana. Pambele nayu ng’inetu yula aafwe. ²³ Lino pa ikimunyi cha ukusilibuka avanu mbevali uluhuma mufwa, umung’inetu uyo saava mukina nani? Pakuva mbevali ndawe vimufung’ati vevamutegwe.” ²⁴ Neke Yesu avatigile, “Nyenye mwiyaga pakomi, pakuva simuwuseli uwandike uwelu na uludali lwa Nguluvi. ²⁵ Pakuva vevafwe pevave vasilibwike sivitegulagi nambi kugomwa; vaviva vihwana vanyivaha va kuchanya. ²⁶ Na ulo lwa avanu ukusilibuka mbi simwemulimba mukitabu cha Musa pa mulyango gwa ikisaka chechakige umoto? Nguluvi amulonje Musa ukutigila, ‘Nene ndi Nguluvi va Abulahamu, Nguluvi va Isaki na Nguluvi va Yakobo.’ ²⁷ Lino umwene si Nguluvi va avafwe nda, umwene Nguluvi va awumi. Nyenye mwiyaga pakomi.” ²⁸ Uyumwi va avigisi va indagilo afikite neke apulike lwevakwibesa. Avelige ipulika ulwa Yesu avapitwe wunofu, nave ahele amuwuse Yesu, “Mundagilo mbesili ululutye lulikwi?” ²⁹ Neke Yesu amutigile, “Lwa ukutala lwe ulu: ‘Pulikage veve Isilaeli! Nguluvi vetu ye Nguluvi yeiyena. ³⁰ Nayuveve mwendage Nguluvi vako munumbula yako mbeyili, na mu umutima gwako mbeguli, na mu uluhala lwako mbeluli na mu uludali lwako mbeluli.’ ³¹ Na ulwa kavili lwe ulu, ‘Mwendage umuyago ndawe inumbula yako yiveve.’ Pagaya ululagi ulungi, ulukomi lwelulutye kwa isi.” ³² Swe yula umwigisi va indagilo akumutigila, “Nachene ulonje mumwene ukutigila Nguluvi iyena, pagaya yungi pesi yumwene hela. ³³ Na ukumwenda kwa inumbula yako mbeyili, na kwa uluhala lwako mbeluli na kwa uludali lwako mbeluli na umuyago ndawe inumbula yako yuveve, ulukani ulo lwelulutye ku fitawulwa na inambika mbesili.” ³⁴ Nave Yesu avelige akumuwona ukuta alonzile kwa luhala, swe akumutigila, “Veve siulipataali na uwutwa wa Nguluvi.” Uluhuma baho, pagaya umunu yeigelye ukumuwusa kangi Yesu lukani. ³⁵ Neke Yesu pe akwingila mu Tembeli. Avawusise, “Mbi ndawuli avigisi va indagilo vavitigila Kilisito Mwana va Daudi? ³⁶ Kono Daudi yumwene peilongoswa na Umuhe Umwelu atigee: ‘Umutwa atigee kulumutwa vangu. Teng’emale kuliwoko lyangu ilya kundyo, mbaka pendivaletite avatavangu vako pamagulu gako.’ ³⁷ “Umwene Daudi akumukemela Mutwa. Lino luva ndawuli ave kangi Mwanakwe?” Neke ililugu ilya avanu vamupulikisige kwa luhekelelo. ³⁸ Neke Yesu avalongele peakuvigisa, “Mwikomalilage na avigisi va indagilo, aviwendaga ukugenda vafwite isopeka inaali sa ulutogo, na ukuhungilwa mumakasi, ³⁹ na ukwikala pawulongolo mumasinagogi na mufigoda ifya muwulongolo mumbungo. ⁴⁰ Vakuvawonela avang’inetu avafwile, nu kutegula ifinu fyawo, kono we vakuvabuganisa nu kwifunya lusika, iwo savahigwa pakomi ukulutila.” ⁴¹ Nave Yesu alikalite pipi na pala pevisopaga ifitawulwa, mu kinyawugali cha mu tembeli avawene avanu lilugu visopa ifitawulwa. Avanono vasopige amagobole molofu. ⁴² Aasile umung’inetu yungi, mufwile, kangi mumikaa, uyo asopite amagobole makefu wita figobole fivili hela. ⁴³ Neke Yesu avatigile, avanyigendo vakwe, ukutigila, “Nachene nguvalongela uyu umufwile umumikaa atawe ukulutila mbevali avatawe ifitawulwa mukinyawugali. ⁴⁴ Pakuva avangi mbevali vasopite ifinu fyefivalutye uwolofu, neke uyu umung’inetu umumikaa, muwumikaa wakwe atawe mbefili fyeakalinafyo, na fyeakalaahuvye.”

¹ Na Yesu avelige ihuma mu Tembeli uyumwi va vanyigendo vakwe amutige, “Mwigisi, lavage amaganga na ikaye isi wesiwali uwunofu.” ² Yesu amupitwe, neke amulongele, “Ukusiwona ikaye ingomi isi? sipolili nambi iliganga limwi mukaye isi lyesisalidenywa.” ³ Ino Yesu pealateng’eme pa kidunda icha imiseituni alaving’ine na itembeli, Petulo, na Yakobo, Yohane na Andeleya vamuwusise Yesu palubali, ⁴ “Tulongele, ing’ani isi panili pesasiwoneka? Na kiki chekiva kilagilo ukuta ulusika ulo yesambi lwikwila?” ⁵ Neke Yesu avatigile, “Mwikomalilage, umunu alavasanga. ⁶ Pakuva avanu wolofu savasa mwitawa lyangu, vitigila, ‘Nene ye nene!’ Nawo savavasanga wolofu. ⁷ Pesamwipulika ulwa amagalu na simwepo sa amagalu, mulakabuka. Pakuva iso sasusa, neke umudugo guva sigulafika. ⁸ Ing’i sayiwuka ukwihoma na ing’i yingi, na uwutwa ukwihoma na uwutwa uwungi; sakuva na ifitulo pono na pono, sakuva na ikinge. Iso mbesili gwemuvango gwa ukuteseka ndawe umung’inetu peakwivikula. ⁹ “Nayi nyenye mwikomalilage inumbula senyu. Pakuva savavasindika nyenye pawuhigilo, na mumasinagogi sambi mutowe, samusindikwa ku vatema na avatwa sambi muhigwe pemwivalwa ilitawa lyangu, sambi muve wolelesi kwa avene. ¹⁰ Neke pesilulava ulo. Ulukani Ulunofu sa ludalikwa tandi kuvanu mbevali. ¹¹ Nawo pevavibete nyenye na ukuvasindika pawuhigilo, mulahwa kihosa chemulonga, pakuva samupelwa icha ukulonga na Umuhe Umwelu. ¹² Umunyalukolo amupituka umunyalukolo vakwe awulagwe; udade amupituka umwana; na avana vavagalukila avavaha vawo na ukuvawulaga. ¹³ Avanu mbevali savavavipila nyenye, vakuvavala ilitawa lyangu. Neke yula yeyeavesaga akange mbaka pamudugo uyo yesaapokwa. ¹⁴ “Neke pemuluwene ‘Uluvifyo ulwa Uwanangifu’ lulipe sipapene. (Ye akwimba alukagulage!) ipo avanu ve vali ku Yudaya vakimbililage mufidunda. ¹⁵ Umunu ye alikwiking’a lya ikaye aliika mukaye yakwe ategule kinu. ¹⁶ Na ye ali kumugunda alapiluka kukaye akategule umwenda gwakwe. ¹⁷ Neke vinalyo vala vesavava na ifilo na vala vesavakoosa mufilo ifyo! ¹⁸ Mwifunyage kwa Nguluvi sambi ulusika ulo, lulemwa ukuva pa ikitungwi. ¹⁹ Pakuva ukuguda kwa ifilo ifyo sakulava kubi ukulutila, uluhuma ukugawa ing’i mbaka ku lino de, ukuguda uko sikwekulawoneka, na sisakuwoneka kangi nangi. ²⁰ Na wone Nguluvi akalaleke ukufikepula ifilo ifyo, asupali umunu yeakalapokwa. Lino ukwimila avahagule vakwe, Nguluvi akepwise ifilo ifyo. ²¹ “Neke lino, wone umunu avatigile, ‘Mulavage Kilisito ali ipa!’ ‘Na vavatigile ali kula’ mulafuuwa ulo. ²² Pakuva savawoneka wolofu vesavitigila vavene ve Kilisito va wudesi na avavisi va uwudesi nawo savapiga ifilagilo na uwuhulo, sambi vavayase wone luhwane na vavahagule. ²³ Neke nyenye mwikomalilage. Pakuva nene yendivalonje mbesili wesisilava siwoneka. ²⁴ “Neke ifilo ifyo, ukuguda pekulutye, ilisuva salipituka live lwisa, na gumwesi sisaguvala nangi. ²⁵ Na ing’eng’esi sasigwa uluhuma kwilanga, na ludali ulwa kuchanya nalo saluhogoleka. ²⁶ Ipo pesavamuwona Umwana va Umunu akusa mumafufu mu ludali ulukomi na indolo. ²⁷ Nave saavatuma vanyivaha vakwe vavakong’ase; avahagule vakwe, uluhuma imbali mbesili isitayi konivala, uluhuma pawudugo wa ing’i mbaka uwudugo wa kuchanya. ²⁸ “Ukukola umusombe mwiyigisage ikiganiso iki: Pembe muwone matagala ga imisombe gavanzile ukutopola amahamba, mulukagulage ukutigila ikifuku yekihegelye. ²⁹ Lwindahihyo pemusiwene ing’ani mbesili yesiwonike, mulukagulage ukutigila Umwana va Umunu yeahegelye mumilyango. ³⁰ Nachene nene nguvalongela, imbegalo iyi siyilutila mbaka ing’ani iso mbesili peyesikwilye. ³¹ Ing’i na kuchanya safilutila, neke ing’ani sangu mbesili sisasilutila nangi. ³² “Neke ikimunyi na ikivalilo asukuli yeakisele; nambi vanyivaha ava kuchanya nambi Umwana; pesi Dada hela yeiyena. ³³ Mwikomalilage mwikale miho, pakuva simukiseli ikimunyi icho kilava panili. ³⁴ Lwihwana nu umunu yeisaka ukuwuuka ulugendo yeakuyileka yeailesile ikaye yakwe neke avalagile na ukuvagavila ifipigo avakami vakwe, na ukumulongela yula munyakugosa yula umwimilisi va umulyango ikalage miho. ³⁵ Lino mwikalage miho, pakuva simukiseli ikimunyi icha umunyakaye cheasila; ukutigila yilava pamihye, pakilo, apamwinga yilava mukilo mwilangali, kangi apamwi munzogolo mwesivika, nambi pamilawu. ³⁶ Mwikalage miho alonga ase avatinukise afike mugonelye tulo. ³⁷ Na isi senguvalongela nyenye, ndilongela na avangi mbevali ukutigila: Mwikalage miho!”

¹ Lino yefyefisige filo fivili hela ukufika ikimunyi ikikomi icha i Pasaka na ikimunyi cha imikate je simihate uwuhahu. Avatambisi avavina na avigisi va indagilo vasakige ikigaho icha ukumwibata Yesu kwa kinyele sambi vamuwulage. ² Neke vatigile, “Tulamwibata ukumwibata pa ikimunyi ikikomi, valonga avanu vatugalukile.” ³ Yesu ahele ku Betaniya neke peali mukaye ya Simoni umutamwa uwukoma, ateng’eme pawulilo ilya, aasile umung’inetu yeakolye mumawoko gakwe ikisupa icha amafuta amanyakunung’ila wunofu kangi gamagobole molofu, swe akumuhululisa Yesu mumutwe gwakwe. ⁴ Neke avanu avangi avebaho vavifile, vitigila, “Mbi ndawuli akwihesigila amafuta agindawe iga? ⁵ Pakuva amafuta agindawe iga gake gagusiwa ukulutila magobole magana gadatu, neke vapelwe avamikaa!” Neke vamulonge fivi umung’inetu yula. ⁶ Neke Yesu avatigile, “Mumuleke; mbi ndawuli mukumufwahisa? Amije lukani lunofu. ⁷ Pakuva avamikaa mwinawo mbepali, muhwanite ukuvatanga ulusika lulweluvesaga pemuwendite ukuvapigila wunofu. Neke nene si mba na nyenye mbepali. ⁸ Umung’inetu uyu apigite lweawene lumuvaje alupige, agubakite umuvili gwangu amafuta amanofu angelanise nene ulwa ukutagwa kwangu. ⁹ Nachene nene nguvalongela, bahaludalikwaga Ulukani Ulunofu mung’i mbeyili ndita na lulu lweapigite uyu salutambulwa kwa ukumwiwuka.” ¹⁰ Swe Yuda Isikalyote, uyumwi va vala vanyichumi na vavili, ahele kwa avatambisi avavina sambi amupituke Yesu kwa avene. ¹¹ Avatambisi avavina vavelige vipulika ulo neke vahekelele hilo, vamuhuvise ukumupela amagobole. Swe Yuda ivanga ukusaka ikilega na ulusika ulunofu sambi amupituke Yesu. ¹² Ikimunyi cha ukutala cha ikimunyi ikikomi cha imikate je simihate uwuhahu, ipo pepene peyayidumulwa ing’olo ya Pasaka, avanyigendo vakwe vamuwusise vitigila, “Kwiyaga kwewiwenda tukakugelanikise ichakulya cha i Pasaka?” ¹³ Swe Yesu akuvatuma avanyigendo vakwe vavili akuvatigila, “Mubite muboma, na mumo mwitang’ana munu yumwi ategwe ikisilo cha ululenga mumufwatage yuyo, ¹⁴ mbaka mukaye yeasakwingila, umo mumulongelage umunyakaye ukutigila, ‘Umwigisi itigila: ikaye ya avagenzi ndile i Pasaka na avanyigendo vangu?’ ¹⁵ Nave avalagila ibwalo ingomi pachanya mbuyape wunofu. Ipo pemugelasage ichakulya.” ¹⁶ Avanyigendo vavelige vibita muboma, vafikite ndawe Yesu weavalonje. Swe vigelanisa i Pasaka. ¹⁷ Chavelige kifika ikinyamiyhe, Yesu aasile pamwinga na vanyigendo vakwe vanyichumi na vavili. ¹⁸ Na peviva pawulilo vilya, Yesu avalonje ukutigila, “Nachene nene nguvalongela, uyumwinga va nyenye amituka.” ¹⁹ Swe vivanga ukuhuguvala, na ukumuwusa yumwi yumwi, “Napo ye nene?” ²⁰ Neke Yesu, avatigile, “Uyumwi va nyenye vanyichumi na vavili, yeilila inonge na nene mukinyandilo. ²¹ Pakuva Umwana va Umunu akwibitilaga ndawe lweandikilwe, neke inalyo umunu yula yeakumupituka Umwana va Umunu! Luke luva ikiba umunu uyo alaleke ukuwoneka!” ²² Na lwevalisige pala pawulilo, Yesu inwe umukate, swe ifunyilila, swe imegula swe akuvapela itigila, “Mukote ugu gwe muvili gwangu.” ²³ Neke peinule ikinywelo swe ilumba, swe akuvapela; swe vinywela mbevali kicho. ²⁴ Swe akuvatigila, “Iyi ye danda yangu ya ulufingano, yeyikwitika ukwimila awolofu. ²⁵ Nachene nguvalongela nyenye sindilagele kangi nywe umuveleko gwa umusabibu mbaka ikimunyi kila chesanywa umupya kuwutwa wa Nguluvi.” ²⁶ Neke baho vavelige vakwimba ulwimbo, sweno vihuma vibita kukidunda cha imiseituni. ²⁷ Yesu avalonje ukutigila, “Mbemuli nyenye mung’imbila ikilo icha neng’ino, pakuva lwandike: ‘Ndimutova umukwamila ng’olo, nasing’olo sitagalila.’ ²⁸ Neke peyesilibwike, sandongola ukubita ku Galilaya.” ²⁹ Petulo amutigile, “Nambi mbevali vakumbihila veve nu kukuleka, nene singubihila nda!” ³⁰ Nachene ngukulongela, “Ikilo iki, inzogolo wesiyilavika ulwakavili, veve uva ung’anite kadatu.” ³¹ Neke Petulo awile ukwilapa, “Na lumbagile ukufwilasa na veve nambi ndahihyo singukana nda.” Na vanyigendo mbevali valonzile ndahihyo. ³² Swe vavelige vifika apono apitambulwa Getisemane. Yesu avatige avanyigendo vakwe, “Mwikale baha nene pengwifunya.” ³³ Neke avategule Petulo, Yakobo na Yohane; swe ivanga ukuhuguvala munumbula. ³⁴ Swe akuvalongela, “Nene nyuguve hilo munumbula ngwenda fwe, mwikalage baha kono we mwimiho.” ³⁵ Swe ibita pawutalo ludodo swe igwa panyi kinyalileme, neke avange ukwifunya ulwa, wone luke luhwane, alemwe ukwingila mu kivalilo cha uluteseko. ³⁶ Neke atigile, “Dada vangu, kwa mbesili sasihwana. Nyesekese ikinywelo iki cha uluteseko ulu ulwene salulava ndawe lwendiwenda nene. Ulwa luvelage ndawe lwewiwenda veve.” ³⁷ Avelige ipiluka ku vanyigendo vakwe avadatu, avafikite vagonelye tulo. Swe akumuwusa Petulo, “Simoni! Mbi ugonelye? Ulemilwe pakwikala miho nave kivalilo kimwi?” ³⁸ Swe akuvalongela, “Mwikalage miho mwifunye sambi mulemwe ukwingila mu kugelwa. Inumbula yiwenda neke umuvili gwina muhwehwe.” ³⁹ Ahele kangi kukwifunya ipilukila ing’ani sisila. ⁴⁰ Neke apiluke kangi, avafike vagonelye. Pakuva amiho gawo gegatimbite na tulo valemilwe ukumupitula nambi lukani. ⁴¹ Avelige akuvasila ulwa wudatu avatigee, “Pemugonelye tulo nu kusuupa? Lino lukwilye! Ulusika yelufikite! Umwana va Umunu ukutawulwa mumawoko ga vanu avanyanzanangifu. ⁴² Muwuke, tubitage. Mulavage yula umunyakumituka yeahegelye.” ⁴³ Ino Yesu we pealonga, Yuda yula uyumwi va vala avanyichumi na vavili, afikite na ililugu lya avanu vakolye amamage na ifisonzo. Avanu avevatumitwe na avatambisi avavina, na avigisi va indagilo na avavina va avanu. ⁴⁴ Yula Yuda umunyakumupituka Yesu yee avapelye ikilagilo: itigila, “Yula yendimunonela yemwene, yemwibatage na ukumutegula wunofu.” ⁴⁵ Yuda avelige ifika hela, ahele kwa Yesu agolwike, na ukumutigila, “Mwigisi!” Swe akumunonela. ⁴⁶ Swe avanu vakumwibata Yesu, vakumupinga. ⁴⁷ Uyumwi va vala veve vimise na Yesu, ategwe ilimage lyakwe swe akumuputa ilipulikilo umukami va Umutambisi Umuvina. ⁴⁸ Yesu avatigee, “Mbi ndawuli, musile mukolye mamage na ifisonzo mukundibata nene witigila ndimuhiisi? ⁴⁹ Mbepali ndavesige na nyenye mu tembeli ngwigisa, na simwandibatigi. Leke luve sambi Uwandike Uwelu wukwilye.” ⁵⁰ Swe avanyigendo vakwe mbevali vikimbila vakumuleka iyena. ⁵¹ Ino epwali umunyakilambo uyumwi yeamuminilige Yesu kono weafwite kinyasingo, nayuyo vasakige ukumwibata. ⁵² Neke munyakilambo yula asupatuke akuguleka na gumwenda, swe ikimbila wufuula. ⁵³ Swe vakumusindika Yesu kwa umutambisi Umuvina pala pe avatambisi avavina mbevali na avavina va avanu na avigisi va indagilo vevakong’ine. ⁵⁴ Petulo amufwatige Yesu kwa pataali swe akwingila mwidama ilya Umutambisi Umuvina, neke ateng’emale pamwinga na avanyigalu akota umoto. ⁵⁵ Avatambisi avavina mbevali na avavina va pawuhigilo mbevali vasakite uwolelesi wewumusongela Yesu ahigwe ukufwa neke wuve siwawoniki. ⁵⁶ Avanu wolofu vevalonzile uwolelesi wa uwudesi vakumolelela Yesu, neke uwolelesi wawo wuve siwukwiyidikila wisutana pakomi. ⁵⁷ Neke avamwi viime, valonge uwolelesi wa uwudesi vitigila, ⁵⁸ “Twamupulike Umunu uyu itigila, ‘Ndenya itembeli iyasenzilwe na amawoko ga avanu, na mu filo fidatu nzenga iyingi yesinzenge na amawoko.’ ” ⁵⁹ Neke nabaho uwolelesi wawo wave siwikwiyidikisa nambi. ⁶⁰ Swe Umutambisi Umuvina, akwima pagati, neke amuwuse Yesu, “Siwipitula lukani? Avanu iva vakukolelela kiki veve?” ⁶¹ Neke Umwene akatwike sili siapitwi lukani. Umutambisi Umuvina amuwusise kangi, “Veve ye wi Kilisito, ve Mwana va Nguluvi umunyandolo?” ⁶² Neke Yesu atigile, “Ena ye nene. Kangi samumuwona Umwana va Umunu ateng’eme kwiwoko ilya kundyo lya umunyaludali mbeluli akusa mumafufu ga kuchanya.” ⁶³ Swe ipo Umutambisi Umuvina, ivipa na ukudemulanga umwenda gwakwe gwealafwite na ukutigila, “Tuvapetusaka awolelesi veki kangi? ⁶⁴ Mumupulike lwe iliga Nguluvi! Lino nyenye mwitigila ndawuli?” Mbevali valonje pamwi uyu afwisage hela. ⁶⁵ Swe avanu vivanga ukumufunyila amati vakumudinda kumiho vakumutovanga na ukumutigila, “Tulongele yenani yeakutofile!” Na avanyigalu nawo vamutofile na ifipi. ⁶⁶ Petulo lwealateng’eme pala pidama, uyumwi va avakami avang’inetu va umutambisi umuvina aasile. ⁶⁷ Avelige akumuwona Petulo akota umoto, amulafile, swe akumutigila, “Nayuveve uke pamwi na Yesu Umunasaleti.” ⁶⁸ Neke Petulo akane, “Sindiluseli, na singulukagula na lwe wilonga!” Swe Petulo iwuka pala, ibita pivala ulusika lulo inzogolo yavikite. ⁶⁹ Yula umukami umung’inetu avelige akumuwona kangi Petulo, avalonje avanu ave vimite pivala, “Umunu uyu nave muyawe va vavala.” ⁷⁰ Petulo akanite kangi. Pambele ludodo, avevimite pala vamutige Petulo, “Nachene veve wimuyavo, pakuva nayuveve wi Mugalilaya.” ⁷¹ Neke Petulo avange ukwifingulisa akwilapa, “Nene sindimuseli uyu yemwilonga ing’ani sakwe” ⁷² Swe ipo inzogolo yivika lwa kavili. Neke Petulo iwuke lwealamulonje Yesu ukutigila, “We inzogolo siyilavika lwa kavili, uva umbihye kadatu.” Petulo lwamuvafile neke avembe ahulusage na inzihosi.

¹ Neke peyekuche avatambisi avavina, pamwi na avavina va avanu na avigisi va indagilo, na vavahisi mbevali vakong’ane na ukulongana; neke vamupinge Yesu vamusindike na ukumutawula kwa Pilato. ² Neke Pilato amuwuse, “Veve ye veve ve Mutwa va Avayudaya?” Neke Yesu amupitule, “Veve ye ulonzile.” ³ Neke Avatambisi avavina vamusongele mu nzolofu. ⁴ Neke kangi Pilato amuwuse Yesu, “Wimugaya ulwa ukupitula? Wonage iva vakukusongela nzolofu.” ⁵ Neke Yesu siapitwi kinu swe Pilato isasavala. ⁶ Ino paikimunyi ikikomi icha i Pasaka Pilato avadindulilige uyumwinga va avanyandinde yevamuwendige. ⁷ Sweno, epwali umunu uyumwi yatambuligwe Balaba yealasopitwe mundinde pamwi na avananzi avangi kwa ukusagasa liyowo na uwuwulasi. ⁸ Neke vamalugu vamusile Pilato vakumusuka avapigile ndawe lwealasovye ukuvapigila. ⁹ Neke avapitule, “Mwisaka nene ndimudindulile Umutwa va Avayudaya?” ¹⁰ Pakuva alukagwe ulwa avatambisi avavina vevamulesile kulumwene kwa igila hela. ¹¹ Neke avatambisi avavina vahele ukuvakuvilisa avanu vamusuke Pilato avadindulilage Balaba. ¹² Neke Pilato kangi avatigile, Ino ngitage ndawuli na umunu uyu ye itambulwa Mutwa va Avayudaya?” ¹³ Neke pevayove kangi, “Atumbikwage!” ¹⁴ Neke Pilato avatigile, “Mbi wubi wuki? Weapigite?” Neke pevakoole mbevali, “Atumbikwage!” ¹⁵ Nave Pilato asakige ukwiyendelesa kwa avamalugu, swe akumudindulila Balaba. Ndawe alagilige Yesu vamutovangage ni imikungo iminyamifwa, ndawe amutawulige vakamutumbike. ¹⁶ Neke avanyigalu vamusogose Yesu mbaka kwivaha; swe vikong’ana avanyigalu mbevali pamwi. ¹⁷ Neke vamufwike Yesu umwenda ugunyakilesi, neke vative ingela ya imifwa nayo vamufwikite kumutwe. ¹⁸ Neke pevavange ukumuhungila, “Kamwene, ve Mutwa va Avayudaya!” ¹⁹ Neke vamutove na ululasi kumutwe neke vamufunyile amati, neke vamufugamile na ukumusunyalila. ²⁰ Neke peyevamwelanzile, vamuwopwe isopeka neke vamufwike imyenda swe vakumusindika kukumutumbika. ²¹ Nawo vamung’ang’anise umulutilang’asi, Simoni uva ku Kilene yeahumige munanana, Udade va Isikanda na Lufo, sambi amuteguse umusalaba Yesu. ²² Neke vamusindike apono apatambuligwe Goligota kwekutigila, “Apono apa ikibang’a”. ²³ Neke vamupelage idifayi inyanze na imanemane, neke Yesu abihile ukunywa. ²⁴ Swe ndawe vamutumbikige Yesu, neke vagave imyenda jakwe vitovela isimbi ye nani ategule iki. ²⁵ Ino che kivalilo cha wudatu, pevamutumbikige. ²⁶ Pepina uwandike uwa uluhigilo lwa Yesu uwitigila, “Umutwa va Avayudaya.” ²⁷ Pamwi na Yesu vatumbikwe avahiisi vavili, uyungi kwiwoko lya kundyo neke uyungi kung’igi. [ ²⁸ Na Uwandike Uwelu wakwilye wewitigila, “Avalilwe pamwi na avananzi.”] ²⁹ Na vavala avalutilige mung’asi vamuligige viyunza imitwe jawo vitigila, “Aha! Vemunyakudenya itembeli na ukuyisenga mufilo fidatu! ³⁰ Wiponiage yuveve wike mumusalaba!” ³¹ Swe avatambisi avavina na avigisi va indagilo vamwelange vitigila, “Aponise avangi, ilemwa ukwiponia yu mwene! ³² Kumbi ye Kilisito, Umutwa uva Isilaeli! Ike lino uluhuma mu musalaba sambi tulave neke tufuuwe.” Na vavala avevatumbike pamwi nawo vamulisile ndahihyo. ³³ Na pekifisile ikivalilo icha mutanda pamunyi kwave na lwisa mung’i mbeyili mbaka pa ikivalilo icha igonza. ³⁴ Neke paikivalilo icha igonza pelitegamwike Yesu akoolite kwihuga, “Eloi, Eloi, lama sabakitani?” Kwekutigila, “Nguluvi vangu, Nguluvi vangu, mbi ndawuli undesile?” ³⁵ Neke avangi avevimile pevapulike vatigee, “Mulavage! Ikemela Eliya.” ³⁶ Neke uyungi akimbile, swe isopa idifayi inzasamufu neke avike mululasi swe akumunywesa itigila, “Leke tulave wone Eliya aasa amwise pasi!” ³⁷ Neke Yesu akoole akwihuga swe Umutima gwidumuka. ³⁸ Neke ikibupa icha ilyenda lya i tembeli swe kidemuka kihuma pavili uluhuma kuchanya mbaka pasi. ³⁹ Umuvina uyumwi va avanyigalu yeeimite pawutalo pa Yesu amuwene peikoola nu kufwa, atigee, “Nachene Umunu uyu ake Mwana va Nguluvi!” ⁴⁰ Ve povali na avang’inetu ave pataali mwavawo, epwali Maliya Magadalena, Salome na Maliya uyuve va Yakobo na Yose. ⁴¹ Iva vamuninilige Yesu pee ku Galilaya, na ukumupigila, neke kangi na avang’inetu avangi avevahelelige pamwi na Yesu ku Yelusalemu. ⁴² Ikinyamihye yechekifikite. Icho che kimunyi icha ukwigelanisa ikilongola kusabato. ⁴³ Ipo aasile Yosefu uva ku Alimataya, umutambule uyumwi va pawuhigilo. Uyo yemwene nave awulavisige uwutwa wa Nguluvi wuuse. Ahele kwa Pilato wesakogopa, swe isuka apelwe umuvili gwa Yesu. ⁴⁴ Neke Pilato asasavale ukupulika ulwa Yesu yeafwe; neke amukemele umuvina va avanyigalu, amuwuse ulwa wone Yesu yeafwe lusika. ⁴⁵ Neke Pilato peyealukagwe ukuhuma kwa umuvina va avanyigalu ulwa Yeafwe, ndawe amutawulige Yosefu agutegule umufimba. ⁴⁶ Ipo Yosefu agusile isanda inofu swe akumwisa Yesu mumusalaba neke amufwike isanda neke amutage muwuvi uwe wuyave mwitalawe, neke adinde na iliganga pamulyango gwa ichanga. ⁴⁷ Maliya Magadalena na Maliya uyuve va Yose vapawene peali muvike.

¹ Isabato yavelige yilutila Maliya Magadalena na Maliya uyuve va Yakobo, na Salome vagusile amafuta aginung’ilila wunofu sambi vabite vakagubake umufimba gwa Yesu. ² Vilaafile wemilawu, ikimunyi cha pa Jumapili, vahele kuchanga, ilisuva mwelihohomoka. ³ Neke vavange ukwilonganza vavene, “Ye nani yeabidusa iliganga pala pa mulyango gwa ichanga?” ⁴ Na vavelige vilava wunofu, valiwene iliganga libidukise palubali. (pakuva iliganga lye likomi kangi lisito) ⁵ Swe vakwingila mugati muchanga vakumuwona umunyakilambo ateng’eme kwiwoko ilya kundyo, afwite umwenda umwelu, neke vasasavale. ⁶ Nave avatigee, “Mulasasavala. Mukumusaka Yesu Umunasaleti yevakamutumbike. Asilibwike asupali ipa. Mulavage peakemuvike. ⁷ Lino mubitage, mukavalongele avanyigendo vakwe, nayi Petulo ukutigila, ilongola ukubita ku Galilaya. Uko kwe musakumuwona, ndawe lwealavalonje.” ⁸ Swe vihuma pivala, vikimbila uluhuma pachanga pakuva vevibatike na umuhwehwe kono we vikuvila. Sivamulonji nave munu lukani, pakuva wogopige. [ ⁹ Nave Yesu pe isilibuka, ikimunyi cha pa Jumapili, we pemilawu ilaje kwa Maliya Magadalena, yula yealamuhumise amasoka gimufung’ati. ¹⁰ Umung’inetu uyo ahele kukuvalongela avayagwe mbevali, nawo vepevavemba na ukuyeyela. ¹¹ Nawo vavelige vipulika ulwa mumi, na yi Maliya Magadalena amuwene, sivafuuvitwi. ¹² Na peyelulutye ulo, Yesu ilaje ku avanu avavili, we ina lwihwano lungi. Nawo vabitige kumigunda. ¹³ Avanu iwo nawo vahele vakavalongele vala avangi. Navawo sivafuuvitwi. ¹⁴ Pambele Yesu ilaje kwa vala vanyigendo vanyichumi na yumwi pevalisige. Neke avakenyele ukwimila uwutalamu wawo na uwusito wa inumbula sawo pakufuuwa ing’ani isa mbevali vevavalongelige ukutigila asilibwike uluhuma kuvafwe. ¹⁵ Swe akuvalongela, “Mubitage konivala mbekuli, mukadalikage Ulukani Ulunofu kwa mbevali. ¹⁶ Yula yeyeavesaga ifuuwa na ukubatisiwa saapokwa, neke yesiifuuwa saahigwa. ¹⁷ Na ifilagilo ifi figendasa na avifuuwa: mwitawa lyangu vahumya amasoka, valonga indongele ingenzi. ¹⁸ Vibata inzoka, na vanywe mugoda mukali siwuvagita kinu nda. Vavavikila avatamwa amawoko gawo nawo vapona.” ¹⁹ Neke Umutwa avelige yalongine nawo, swe itegulwa kuchanya, na ukuteng’emala kwiwoko ilya kundyo kwa Nguluvi. [ ²⁰ Nawo vala avanyigendo vahesile, nawo vahele vakidalika mbekuli. Na Nguluvi apigige ifipigo pamwinga nawo, na ukusikangasa Ulukani ikola ifilagilo fyevagendasige nalo.]