LUKA

LUKA

¹ Ve mutambule Teofilo: pakuva avanu wolofu vakandike kwa wupifu ing’ani sila sesapigike mwahwehwe. ² Ndawe twetwivalongele na vala vevasiwene ing’ani iso mumiho gawo nu kudalika uluhuma pamuvango. ³ Nayi nene mbwene lunofu ngwandikile kinyandolo veve ve mutambule pakuva ngisache isa nachene uluhuma pa muvango. ⁴ Sambi na yuveve usikagule wunofu ing’ani isanachene. ⁵ Mumisika ja Helodi yeali Mutwa va mung’i ya mu Yudaya epwali umutambisi yeatambuligwe Sakaliya va mukilugu cha Abiya. Uvakwe atambuligwe Elisabeti nave emwegalwa mulukolo lwa Haluni umutambisi. ⁶ Na mbevali we vavili vevagolofu pamiho ga Nguluvi, mbepali ve vinatifu mung’ani na indagilo mbesili isa Nguluvi. ⁷ Navene vevagaya mwana pakuva Elisabeti e muguumba, kangi mbevali we vavili vevagogolo hilo. ⁸ Ikimunyi ikimwi, pelwe lutono lwa ikilugu chakwe ukupiga ikipigo icha uwutambisi mu tembeli ya Nguluvi. ⁹ Ndawe imigendele wegiwali ija uwutambisi, ulutono lwamugwilye Sakaliya ingile mutembeli ya Umutwa akafung’ilise uwufumba. ¹⁰ Na pakivalilo icha ukufung’ilisa uwufumba. ¹¹ Munyivaha va Umutwa amweleluche,imile ulubali lwa kundyo pifunyo peifung’ilisa uwufumba. ¹² Sakaliya avelige akumuwona atinwike na ukogopa. ¹³ Neke munyivaha va Nguluvi amutigile, “Ulogopa, Sakaliya, pakuva ukwifunya ukusuka kwako kupulise na uvako Elisabeti akwegalila Umwana mukwamisi, ilitawa lyakwe akemelwa Yohane. ¹⁴ Veve uva na luhekelelo na lukimililo na awolofu vahekelela ukwegalwa kwa uyo. ¹⁵ Ava munu muvina pamiho ga Umutwa sisaanywa idifayi nambi kinu cha uwugaasi. Na uluhuma pe akali mwileme lya uyuve ava ina Umuhe Umwelu. ¹⁶ Yuyo yavapilula avanu wolofu va mulukolo lwa Isilaeli kwa Nguluvi Umutwa vawo. ¹⁷ Alongola kulu Mutwa ilongoswa mu ludali na umuhe ndawe Eliya. Sambi apitule inumbula sa avadadawo kuvana, avanosa avanyangagu vave na mahosa amagolofu paulo amuwuyapile avanu Umutwa vakwe.” ¹⁸ Neke Sakaliya amulongele munyivaha va Nguluvi, “Ndilukagula ndawuli ulukani ulo? Pakuva nene ndimugogolo na uvangu nave mugogolo.” ¹⁹ Na yula munyivaha va Nguluvi amupitule, “Nene ndi Gabulyeli yengwimaga pa Nguluvi, anumite nzuse ngulongele veve ing’ani isi inofu. ²⁰ Ino wonage, uva wimunyakibubwi sulonga mbaka ikimunyi pesivasikwilye isi pakuva siufuuvitwi ing’ani sesikwila kumisika jakwe.” ²¹ Na avanu vamusindilige Sakaliya kono we visasavala ndawuli ifuvalila pa kuhuma mula mu tembeli. ²² Peyahumite kwivala alemilwe ukulonga nawo. Neke pevalukagule ulwa ava awene kimbilumbilu mula mu tembeli. Neke avange ukuviganisa ni liwoko, swe isigala munyakibubwi. ²³ Neke ulutono lwakwe lwave lwisila ukupiga mu Tembeli, Sakaliya apitwike ibita kukaye yakwe. ²⁴ Pambele uvakwe Elisabeti ave na filo ifihite mukaye myesi gihanu, kono we itigila, ²⁵ “Ulu lwe lwene lweamije Umutwa: mu filo fila fyeakandolelige sambi anyesekese inyoni sangu: pamiho ga avanu.” ²⁶ Mu mwesi ugwa mutanda gwa ifilo fya Elisabeti munyivaha va Nguluvi Gabulyeli atumitwe na Nguluvi ku boma iyitambulwa Nasaleti ya mu Galilaya, ²⁷ abite kulu mwanahinza yee mulumbe na umunu ilitawa lyakwe Yosefu yeali va mulukolo lwa Daudi, umwanahinza uyo umutuunafu ilitawa lyakwe Maliya. ²⁸ Inje akumufika mukaye yakwe nu kutigila, “Kamwene, veve ve mwende, Umutwa alipamwi na veve!” ²⁹ Nave atinwike hilo, ulwa ing’ani iso swe ihosa munumbula, ukuhungilwa kono mbi kwa kinyandawuli? ³⁰ Neke munyivaha va Nguluvi amutigile, “Ulogopa Maliya, pakuva umwene Nguluvi akupelye uwende. ³¹ Veve uva na filo wegala umwana umukwamisi na ilitawa lyakwe umukemela Yesu. ³² Uyo ava muvina, akemelwa mwana va yalikuchanya, na Umutwa Nguluvi amupela ikigoda cha uwutwa wa Daudi ukukwe munyakataali. ³³ Nave atema mulukolo lwa Yakobo kitasila na uwutwa wakwe wugaya wusilo!” ³⁴ Maliya amulonje munyivaha va Nguluvi, “Nene sindilagomwa luva ndawuli ulukani ulo?” ³⁵ Munyivaha va Nguluvi amupitwe, “Umuhe Umwelu, akusila veve na uludali lwakwe, yalikuchanya hilo lukusiika nda mwigigi, pakuva ichali icho chechegalwa kiva chelu mwana va Nguluvi. ³⁶ Lukagulage ulwa nayi Elisabeti umunyalukolo vako nave ina filo we mugogolo, lino de ugu mwesi gwa mutanda gwa umwene yevevamusele ulwa muguumba. ³⁷ Pakuva lusukuli ulukani lwe lumulema Nguluvi.” ³⁸ Swe Maliya itigila, “Lavage nene ndimukami va Umutwa, luvesage ndahihyo ndawe wulonzile veve.” Swe munyivaha va Nguluvi ihega akwibitilaga. ³⁹ Mufilo ifyo Maliya awukite ibita kinyaganisa mung’i inyafidunda mbaka ku boma iya mu Yudaya. ⁴⁰ Uko inje mukaye ya Sakaliya, neke amuhungile Elisabeti. ⁴¹ Ulusika lulo Elisabeti ave ipulika ukuhungila kwa Maliya, ichali mwileme lyakwe, kihesige; Elisabeti amemitwe Umuhe umwelu, ⁴² alonje muchanya itigila’ “Wimufunyilile veve muvang’inetu na yewegala mufunyilile. ⁴³ Kumbi nene ndi nani mbaka na yuyuve va Umutwa vangu ase kwa nene? ⁴⁴ Mbelige ndipulika hela ukuhungila kwako, ichali mwileme lyangu kihesige kwa lukimililo. ⁴⁵ Wimufunyilile veve yukafuuvilwe ukutigila sikwila seakulonje Umutwa.” ⁴⁶ Neke Maliya atigile, ⁴⁷ “Inumbula yangu yilumba Umutwa, umutima gwangu gwihekelela kwa Nguluvi Umupoki va nene. ⁴⁸ Pakuva awulafile uwilevesi wa umuvanda vakwe pakuva uluhuma lino avanu mbevali vanigila ndimufunyilile. ⁴⁹ Pakuva umunyaludali amije ing’ani ingomi, na ilitawa lyakwe lyelu. ⁵⁰ Na ulusungu lwake lwinanaga uluhuma, mbegalo mbaka mbegalo. ⁵¹ Kwa iwo avanyachoga kulumwene alaje uludali kwa iliwoko lyakwe: avatagalise avanyakidada kumahosa ga inumbula sawo. ⁵² Avagwisise avatambule pasi uluhuma mufigoda fyawo fya uwutwa, neke avakung’umike avilevesi pachanya. ⁵³ Avapelye ve vadagine ifilyo ifinono, na avanono avahesise vagaya kinu. ⁵⁴ Amutanzile Isilaeli umukami vakwe, pakwiwuka ulusungu lwakwe. ⁵⁵ Ndawe lwealavalonje avadadetu, Abulahamu ni mbegalo yakwe mbaka kumbepali na mbepali!” ⁵⁶ Maliya ikalite pamwi nave myesi ginda gidatu, ndawe awuyige kukaye yakwe. ⁵⁷ Fyavelige fikwila ifilo Elisabeti egee mwana mukwamisi. ⁵⁸ Vave vipulika avaseela na avanyalukolo ukutigila Umutwa amuwonie ulusungu ulukomi swe vihanga mukuhekelela pamwi nave. ⁵⁹ Chavelige kifika ikimunyi icha munana vakong’ine ukumuwoola umwana kono wevisaka vamupele ilitawa lya udade Sakaliya. ⁶⁰ Neke uyuve atigile, “ndala, ilitawa lyakwe akemwelwa Yohane.” ⁶¹ Swe vakumutigila, “Neke sikwali umunu mulukolo lwakwe umunyalitawa ilyo?” ⁶² Ndawe vamuwusige udade vikola ifiganiso atambule ilitawa lya Umwana uyo. ⁶³ Swe isuka ikibawo akwandika, “Ilitawa lyakwe ye Yohane.” Neke mbevali vasasavale. ⁶⁴ Uluhuma baho adindwike umulomo na ululimi swe ivanga ukulonga akumulumba Nguluvi. ⁶⁵ Swe avaseela mbevali viva na muhwehwe, neke ing’ani iso sitagalile mung’i mbeyili ya mufidunda mu Yudaya. ⁶⁶ Mbevali avapulike ing’ani iso vasokime munumbula sawo vitigila, “Umwana uyu ava munu va kinyandawuli?” Pakuva nachene uludali lwa Nguluvi luke pamwi nave. ⁶⁷ Na udade Sakaliya, amemitwe Umuhe Umwelu, avilite itigila: ⁶⁸ “Alumbwagwe Umutwa Nguluvi va Isilaeli, pakuva avasye na ukuvakombola avanu vakwe, ⁶⁹ Atupelye umupoki umukangafu, umwegalwa va Daudi, umukami vakwe. ⁷⁰ Ndawe alahuvise ipo pidaha ukukola avavisi vakwe avelu, ⁷¹ Ulwa saatupoka mumawoko ga avatavangu vetu, na uluhuma mwavala vevatuvipye. ⁷² Atigee saavasungupila avavaha vetu, na ukwiwuka ulufingano lwakwe ulwelu. ⁷³ Alamwilapye ukukwetu, ulwa saatupela hwehwe. ⁷⁴ Tukombolwe uluhuma kuvatavangu vetu sambi tumupigilage we tuvagaya muhwehwe. ⁷⁵ Tuve vagolofu na vanyandolo palumwene, mufilo mbefili ifya uwunani wetu. ⁷⁶ Nave ve mwanangu, utambulwa: wimuvisi va Nguluvi ye alikuchanya, ulongola kulu mutwa uwuyape ing’asi sakwe. ⁷⁷ ukuvadalikila avanu vakwe ukutigila vapokwa na ukudegepelwa inzanangifu sawo. ⁷⁸ Nguluvi vetu mulele kangi munyalusungu. Ahohomosa uwenzelufu uwimalavadika ukuhuma kuchanya. ⁷⁹ Na ukuvang’alikila mbevali avakwikala mulwisa ulukomi ulwa ifwa, sambi atulongose mung’asi iya uwikalakunoga.” ⁸⁰ Neke Umwana akulage, na ukongelekela uludali munumbula. Ndawe ikalige mwihala mbaka ikimunyi che ilaje kwa Vaisilaeli.

¹ Mufilo ifyo Kaisali Agosito alagise avanu mbevali vavalilwage na ukwandikwa ava mung’i mbeyili iya muwutema wakwe. ² Ukwandikwa uko kwe kwa ukutala, Kilenio pee mutema mung’i iya ku Siliya. ³ Swe mbevali yevevalongele vabite ukwiyandikisa munu ku boma yakwe. ⁴ Nave Yosefu agang’amwike ihuma ku Galilaya, pa boma ya ku Nasaleti ibita ku boma iya mu Yudaya iyitambulwa Betelehemu pakuva e va mukaye na mulukolo lwa Daudi. ⁵ Ahele lumwi na Maliya ukwiyandikisa yee mulumbe vakwe kono weyeafuluge. ⁶ Na pevevakaali kuko ifilo fya ukwisavila umwana yefyefifikite. ⁷ Swe akwisavila umwana umuvele vakwe mukwamisi, neke amufwike imyenda ija pawudodo na ukumulambalika mwipugu pakuva vevagayite uwuvaso mukaye sa ukufikila avagenzi. ⁸ Na mung’i yila vepovali avakwamila ifikwamilwa mwihala avikalige miho vilolela ifikwamilwa fyawo pa kilo. ⁹ Ndawe munyivaha va Umutwa avelelukilige, neke indolo isa Umutwa sivang’alikile imbali mbesili. Neke vave na muhwehwe mukomi. ¹⁰ Neke munyivaha va Nguluvi avatigile, “Mulava na muhwehwe! Pakuva nguvaletela Lukani Lunofu lwa uluhekelelo ulukomi, kuvanu mbevali. ¹¹ Ukwimila nyenye namunyi de muboma ya Daudi awonike umupoki venyu, ye Kilisito Umutwa. ¹² Na kiva che kilagilo kwa nyenye: mumufika umwana mufwike imyenda ja pawudodo, alambale mwipugu.” ¹³ Swe ulusika lulo ililugu ilikomi lya vanyivaha va Nguluvi avakuchanya lyahanzile pamwi na munyivaha va Nguluvi yula vakumulumba Nguluvi vitigila: ¹⁴ “Indolo kwa Nguluvi kuchanya, na mung’i uwikalakunoga mwa vala veinogelwa nawo!” ¹⁵ Na Vanyivaha va Nguluvi pevahesile pala nu kubita kuchanya, vala avakwamili ifikwamilwa valongine: ukutigila, “Nyela tukabitage ku Betelehemu tukalave ulukani ulu lwe luwonike lweatulonje Umutwa.” ¹⁶ Swe vakwangufya pa kuhega pala, vakumufika Maliya na Yosefu na kichali kilambalike mwipugu. ¹⁷ Avakwamila ifikwamilwa vavelige vakumuwona umwana yula, ndawe vavalongelige mbevali ing’ani sevevalongele isa umwana. ¹⁸ Na mbevali avapulike ing’ani iso, isa avakwamili ifikwamilwa vasasave. ¹⁹ Neke Maliya ahosise pakomi ing’ani mbesili iso, neke asivike munumbula yakwe. ²⁰ Vala avakwamili ifikwamilwa vapilwike kono we vilumba na ukumusumisa Nguluvi mung’ani mbesili sevevapulike na ukusiwona; ndawe lwevevalongele. ²¹ Chavelige kifika ikimunyi icha munana ikimunyi cha ukuwoolwa, umwana yula apelitwe ilitawa lya Yesu, ilitawa lyealapelitwe na umunyivaha va Nguluvi uyuve weesalava na ifilo. ²² Ifilo fyavelige fifika fya Maliya na Yosefu fya ukweswa kwawo, ndawe mwelwakolige ululagilo lwa Musa, vamusindike umwana ku Yelusalemu akatawulwe kulumutwa, ²³ Ndawe lwandikwe mululagilo lwa Umutwa, “Yeyeavesaga mwana umuvele umukwamisi akemelwa mwelu va Umutwa.” ²⁴ Vakatawule na inambika ndawe mwelwakolige ululagilo lwa Umutwa, “Ngunda sivili apangi nziva sivili indodo.” ²⁵ Epwali munu mu Yelusalemu, ilitawa lyakwe e Simioni, na umunu uyo e mugolofu na munyachoga kwa Nguluvi, yeasindilige uwukombolwa wa Vaisilaeli. Na Umuhe Umwelu alimulumwene. ²⁶ Alagubulilwe na Umuhe Umwelu ulwa sisaafwa wesalamuwona Kilisito uva Umutwa. ²⁷ Na we isogoswa na Umuhe aasile mu tembeli; na avegasi pevamuletige mula umwana Yesu, apigilwe isa imisimu ija indolo, ²⁸ Simioni amwanuche umwana mumawoko gakwe swe akumulumba Nguluvi weitigila, ²⁹ “Lino Mutwa umutawulage umuvanda vako ibitile na uwikalakunoga, ndawe walulonzile. ³⁰ Pakuva amiho gangu gawuwene uwupoki wako. ³¹ We waluuwuvikite pamiho ga vanu mbevali: ³² Uwelu wa ukuvang’alikila avamyanza, na indolo ku vanu vako Vaisilaeli.” ³³ Na udade na uyuve vasasavalige ukwimila ing’ani isalonzilwe isa umwana uyo. ³⁴ Ndawe Simioni avafunyililige neke peamulongele Maliya uyuve va umwana, “Lavage Umwana uyu avisilwe sambi avanu wolofu va Isilaeli vayage na ukupokwa. Nave ava kilagilo cha ukubihilwa; ³⁵ na amahosa ga wolofu gagubulwa pawelu. Na kwa veve uwuvafi uwindawe wa limage ilyugi wukuhoma munumbula yako.” ³⁶ Kangi epwali umuvisi umung’inetu yeali mugogolo hilo, atambuligwe Anna, yeali mwalive va Fanueli, va mulukolo lwa Aseli. Ali ikalite na ingomwa yakwe myaka gimufung’ati uluhuma muwutavangwa wakwe. ³⁷ Swe iva mufwile mbaka pawugogolo uwa myaka machumi gimunana na gitayi umusika mbeguli ugo ikalige mu Tembeli, kolofu iva akwiyima ukulya sambi ifunyage, ifunyige ikimunyi na kikilo. ³⁸ Uyu imite ulusika lulo, nu kumulumba Nguluvi na ukolelela ing’ani isa umwana uyo kuvanu mbevali avasindilige uwukombolwa wa Yelusalemu. ³⁹ Yosefu na Maliya vavelige visinda ukupiga mbesili isa indagilo isa umutwa, vapilwike ukwawo ku Nasaleti, ku boma ya mu Galilaya. ⁴⁰ Umwana avinite na ukongelekela uludali, kono wamemite uluhala na uwende wa Nguluvi we pamwi na yumwene. ⁴¹ Peguvesaga mwaka avegasi va Yesu vabitige ku Yelusalemu ikimunyi ikikomi cha i Pasaka. ⁴² Nave umwana avelige ifika imyaka ginyichumi na givili, mbevali vahele ku kimunyi ikikomi icha i pasaka ndawe mwejagendelige imisimu. ⁴³ Na pe inyekelelo yesisile, swe ndawe vapilukige, neke umwana Yesu asigale ku Yelusalemu. Avegasi vakwe we vagaya nzeli. ⁴⁴ Vatigilige wanda ava mwilugu lya vanyalugendo, vagendite ikimunyi mbekili swe vivanga ukumolela muvaseela na mu vanyalukolo. ⁴⁵ Na peyevalemilwe ukumuwona, swe vipiluka mbaka ku Yelusalemu kono we vakumolela. ⁴⁶ Ikimunyi cha wudatu swe vakumuwona mu tembeli, ateng’eme na avigisi, akuvapulikisa na ukuvawusa ing’ani. ⁴⁷ Na mbevali avamupulikige ing’ani sakwe vasasave uluhala lwakwe na uwukagusi wakwe na uwupitusi wa ing’ani. ⁴⁸ Avegasi vave vakumuwona vatinwike. Uyuve Maliya amuwusise, “Mwanangu mbi ndawuli utugisile de? Lavage udado na nene tukolelige we tuhuguve.” ⁴⁹ Neke avapitule, “Mbi ndawuli nyenye musakige nene? Simulukaguligi ukutigila lumbaje ukuva mukaye ya Dada vangu?” ⁵⁰ Nawo sivalukagwi ulukani ulo lwe avalonje. ⁵¹ Sweno, Yesu ndawe apilukige nawo, mbaka ku Nasaleti. Kono we iva na choga kuvavaha vakwe, na uyuve avisile ing’ani iso mbesili munumbula yakwe. ⁵² Nave Yesu neke peongelekelage ukuvina umuvili na uluhala, kono we iva mwende kwa Nguluvi na avanu.

¹ Umwaka gwa ichumi na gihanu gwa uwutema wa Kaisali Tibeliyo. Pontio Pilato pee Mutema mung’i ya mu Yudaya, Helodi nave pee mutema ulubali lwa ku Galilaya, na umame Filipo imbali isa ku Ituleya na ku Tulakoniti; nayu Lusania ku Abilene, ² na Anasi na Kayafa peve vatambisi vavina; umusika ugo ulukani lwa Nguluvi lwamusye Yohane umwana va Sakaliya kubalali. ³ Neke Yohane peagende mumbali mbesili isa mung’i isilimwipi na umukoga gwa Yolodani idalika, “Avanu vapele nu kubatisiwa sambi vadegepelwe inzanangifu.” ⁴ Ndawe sandikwe mu kitabu cha Yesaya umuvisi: “Iliswi lya umunu ye iyova mubalali ‘Muwuyapisage ing’asi iya Umutwa. Mukonzage nu kugolola ing’asi sakwe, ⁵ Amakombo mbegali gasilwage, na ifidunda ni ifigang’amukila mbefili, fiyawage fitendemale, apabibindafu pagololwagwe, apanyamalundo pateleswagwe. ⁶ Na avanu mbevali savawuwona uwupoki wa Nguluvi.’ ” ⁷ Ndawe Yohane avalongelige avanu awolofu ve vamusilige sambi vabatisiwe: “Nye nye mbegalo ya inzoka! Ye nani ye avapavye sambi mukuluke ililakali lya Nguluvi ilikusa? ⁸ Apo muvelekage amaveleko agilagila ukutigila mupitwike. Kangi muvanga ukulonga ukuta, ‘Hwehwe twivana va Abulahamu’ Nene nguvalongela Nguluvi ina ludali lwa kupitula amaganga iga gave vana va Abulahamu. ⁹ Lino de ivega mbike pa masina ga imibiki, na umubiki gula gwesigwiveleka amaveleko amanofu gudumulwa na ukutagwa mumoto.” ¹⁰ Neke ililugu ilya avanu limuwuse, “Lino tugitage ndawuli?” ¹¹ Swe akuvapitula itigila, “Yula ye ina imyenda givili, amupelage ugumwi umuyagwe ye ihela, na yula yeina ifilyo nave agitage ndahihyo.” ¹² Nawo avakong’asa imbemenenge, vaasile sambi vabatisiwe neke vamuwuse, “Mwigisi, hwehwe tugitage ndawuli?” ¹³ Neke avapitule, “Mulahofya ukulutisa ifikele.” ¹⁴ Avanyigalu nawo neke vamuwuse vitigila, “Nayi hwehwe nahwe tugitage ndawuli?” Neke avalongele, “Mulamupoka kwa ludali munu nambi ukumutosa ahigwe we mukumufila, kangi mutunalage na ga mahombo genyu.” ¹⁵ Avanu mbevali vihuvilige na ukuvaganisa mu numbula sawo, ukutigila apamwi Yohane ava ye Kilisito. ¹⁶ Neke Yohane avapitule mbevali, “Nene nguvabatisa nu lulenga, neke yakusa munyaludali ukundutila nene, kwa uyo nene sinywaniti nambi ukuhogosa inzisi sa indatu sakwe. Uyo avabatisa nyenye kwa Umuhe Umwelu na umoto. ¹⁷ Uyo ye akolye uluhelo mwiwoko lyakwe, apete ingano sambi akong’ase ingano asope mukisande, umwelelo anyanye mumoto gwe sigwisimagi.” ¹⁸ Neke peavapavile nu kuvadalikila avanu Ulukani Ulunofu. ¹⁹ Neke Yohane amukenyele umutwa yula Helode yee mutema pakuva alamutegwe Helodiya yali mukina umame ave vakwe na uwimila mbesili imbi sealapigite. ²⁰ Kangi Helode awilye mwasiso mbesili ndawe amusopige Yohane mundinde. ²¹ Avanu mbevali vavelige vibatisiwa Yesu nave swe ibatisiwa. Na peali mukwifunya kuchanya kwadindwike, ²² na Umuhe Umwelu iikite kulumwene nda nziva, neke iliswi lihume kuchanya, “Veve ye veve ve mwanangu, ve mwende vangu yendinogelwa na veve.” ²³ Yesu peivanga ifipigo fyakwe, yealafikite wita myaka machumi gadatu de, avanu vamuvaganisige ukutigila mwana va Yosefu, yeali mwana va Heli, ²⁴ Heli e va Matati, yeali umwana va Levi, umwana va Meliki, umwana va Yanayi, umwana va Yosefu, ²⁵ yeali mwana va Matatiya, umwana va Amosi, umwana va Nahumu, umwana va Hesili, mwana va Nagayi, ²⁶ yeali mwana va Maati, umwana va Matatiya, umwana va Semeni, mwana va Yoheli, umwana va Yuda, ²⁷ yeali mwana va Yohanani, umwana va Lesa, umwana va Selubabeli, umwana va Salatieli, umwana va Neli, ²⁸ umwana va Meliki, umwana va Adi, umwana va Kosamu, yeali mwana va Elimadamu, umwana va Eli, ²⁹ yeali mwana va Yosuwa, umwana va Elieseli, umwana va Yolimu, umwana va Matati, umwana va Levi, ³⁰ yeali mwana va Simioni, umwana va Yuda umwana va Yosefu, umwana va Yonamu, umwana va Eliakimu, ³¹ yeali mwana va Maleya, umwana va Mena, umwana va Matata, umwana va Natani, umwana va Daudi, ³² yeali mwana va Yese, umwana va Obedi, umwana va Boasi, umwana va Salimone, umwana va Nasoni, ³³ yeali mwana va Aminadabu, umwana va Adimini, umwana va Alini, umwana va Hesiloni, umwana va Felesi, umwana va Yuda, ³⁴ yeali mwana va Yakobo, umwana va Isaki, umwana va Abulahamu, va Tela, umwana va Naholi, ³⁵ yeali mwana va Selugi, umwana va Leu, umwana va Pelegi, umwana va Ebeli, umwana va Sala, ³⁶ yeali mwana va Kainani, umwana va Alufakisadi, umwana va Semu, umwana va Noha, umwana va Lameki, ³⁷ yeali mwana va Metusela, umwana va Henoki, umwana va Yaledi, umwana va Mahalaleli, umwana va Kenani, ³⁸ yeali mwana va Enosi, umwana va Seti, umwana va Adamu yeali mwana va Nguluvi.

¹ Yesu ahumite ku Yolodani amemite Umuhe Umwelu na ukusogoswa na umuhe ku balali. ² Kula ikalite filo machumi gatayi igelwa na Setani. Ifilo mbefili ifyo iyimite ukulya. Napefilutye ifilo ifyo afwe musale. ³ Setani amutige, “Wone veve wi mwana va Nguluvi lilongele iliganga ili live kilyo.” ⁴ Neke Yesu amupitule, “Lwandike: ‘Umunu siinanilagi kilyo hela.’ ” ⁵ Neke setani amutegule mbaka apono apagang’amufu, na ukumulagila sukumwi uwutema mbewuli wa konivala. ⁶ Neke Setani pamutigile, “Ngupela veve uludali mbeluli, na sindolo sakwe; pakuva ndi mupele ifi mbefili. ⁷ Wone veve unzunyalile, ifyo mbefili fiva fyako.” ⁸ Neke Yesu amupitule, “Lwandike: ‘Wifunyage kwa Nguluvi vako na umupigilage yumwene ye iyena swe.’ ” ⁹ Neke kangi amutegule mbaka ku Yelusalemu, swe akumuvika pa uluneng’esi lwa itembeli, neke pamutigile, “Wone veve wi Mwana va Nguluvi, witoose pasi uluhuma ipa, ¹⁰ pakuva lwandike: ‘avatuma avanyivaha va Nguluvi vakwambile’, ¹¹ na kangi, ‘Vakutegula mumawoko gawo, ulikuvala iligulu lyako mwiganga.’ ” ¹² Neke Yesu amupitwe, “Lwandike: ‘Ulamugela umutwa Nguluvi vako.’ ” ¹³ Setani avelige isinda ukumugela kwa chechekivesaga kigaho, swe ihega akumuleka lusika ludodo. ¹⁴ Yesu apilwike ku Galilaya, muludali lwa Umuhe. Na ing’ani sakwe sapulise mung’i mbesili isilimwipi. ¹⁵ Nave igisige mumasinagogi gawo, kono we isumilwa na mbevali. ¹⁶ Ndawe Yesu ahelelige ku Nasaleti apono pe akulye, pa ikimunyi icha isabato neke ingile musinagogi ndawe lwealasovye. Swe akwima sambi imbe Uwandike Uwelu mu liswi ilipulisa. ¹⁷ Swe ipelwa ikitabu cha umuvisi Yesaya ndawe akidindulige ikitabu asakite apono apandikwe: ¹⁸ “Umuhe va Nguluvi alipamwi na nene, pakuva ahululise amafuta ndivadalikile avamikaa Ulukani Ulunofu. Ndimutume ndivalongele ukudindulilwa kwawo avagalule na avabofu valave kangi ndivawulile aviwonelwa.” ¹⁹ Na ukuvalongela umwaka umwidikile ugwa Umutwa.” ²⁰ Swe idinda ikitabu neke amupilulile umukami swe iteng’emala neke amiho ga mbevali avali musinagogi gamulavile wuhulo. ²¹ Neke avange ukuvalongela, “Neng’ino uwandike uwu yewukwilye mumapulikilo genyu.” ²² Neke mbevali vamulongage wunofu na ukuhaha uwunofu wa ing’ani saalonzile. Neke vatigile, “Ngali uyu siye mwana va Yosefu?” ²³ Neke nave avalongele, “Ndita mundongela ululongwa ulu, ‘Ve mukofi wikovele yuveve’, ‘Mbesili setwapulike sewapigite ku Kapelenaumu, pige na baha.’ ” ²⁴ Swe itigila, “Nachene nguvalongela nyenye sikwali yeikagulanikaga mung’i yakwe yumwene. ²⁵ Lino nachene nguvalongela! Vepovali avang’inetu avafwile wolofu mung’i iya Isilaeli mufilo fya Eliya, ulusika ulo ing’i ye yikalime indonya siyatonyiti myaka gidatu na myesi gimutanda, swe kwiva na ikinge kikomi mung’i mbeyili. ²⁶ Eliya satumitwi nave kwa uyumwi va vala pesi ku Saleputa kung’i iya ku Sidoni kulumung’inetu yeali mufwile. ²⁷ Kangi vepovali avatamwa uwukoma wolofu mung’i ya Isilaeli mufilo fya umuvisi Elisa, mwambevali iwo sikwali yeesiwe pesi Naamani, umunyang’i va ku Siliya” ²⁸ Mbevali avali musinagogi pevapulike iso, vavifile wuhulo. ²⁹ Swe vakwimila ng’ani nu kumudaga mu boma yawo, iyenzenge pachanya pa kidunda neke vamusindike mwivambala lya ikidunda sambi vamukinye na maganga. ³⁰ Neke Yesu ivelelike pagatinagati apawo, swe akwibitilaga. ³¹ Ndawe Yesu ahelelige ku Kapelenaumu, iboma yeye mu Galilaya. Nave igisige ikimunyi icha i Sabato. ³² Na mbevali vasasave uludali lwealinalo pakwigisa. pakuva ulukani lwakwe lwe luna ludali. ³³ Na mula musinagogi emwali umunu umunyalisoka; swe ikoola kwa iliswi likomi, ³⁴ “Aa! Be Yesu va ku Nasaleti ngali wisaka utugite ndawuli hwehwe? Ngali yewusile utwanange? Ngusele veve wi nani; ye veve ve Mwelu va Nguluvi!” ³⁵ Neke Yesu alikenyele, ilisoka itigila, “Katuke! Hume mulumunu uyu!” Swe lisoka ndawe lyamugwisige pagatinagati pevevipwali nu kuhuma wesilitesisi pono. ³⁶ Avanu mbevali vatinwike vakwilonganza vavene ng’ani, “Ngali ulukani ulu lwa kinyandawuli? Pakuva kwa ludali nu uwukangafu ilagisa amasoka nago gihuma!” ³⁷ Ing’ani sakwe satagalye mumbali mbesili isa mung’i yiyo. ³⁸ Yesu ahesile mula musinagogi swe akwingila mukaye ya Simoni. Nave uyuvefyala va Simoni, alibatike hilo ni mbungo, neke vamusuke amuponie. ³⁹ Yesu ahegelye neke ime pipi nu mutamwa swe ikenyela imbungo ndawe aponige. Umung’inetu yula lulusika lulo alamwike swe akuvapigila. ⁴⁰ Na ilisuva pelyasotige mbevali avevina avatamwa vanyafitamwa ifilipolofu vavaletite kulumwene, neke avavikilage amawoko gakwe mwa yumwiyumwi na ukuvaponia. ⁴¹ Amasoka gahumite muvanu wolofu, kono wegikoola gitigila, “Veve wi mwana va Nguluvi.” Neke agakenyele akugakatusa, galalonga pakuva gegalukagwe ukutigila umwene ye Kilisito. ⁴² Kwavelige kwicha ahesile na ukubita apono apagaya vanu. Swe avanu vivanga ukumolela, pevamufisile vagesile ukumutanila alemwa ukuhega apawo. ⁴³ Neke avalongele, “Lumbaje ukudalika Ulukani Ulunofu lwa uwutwa wa Nguluvi na mu boma isingi naso, pakuva ndimutume kwa lulo.” ⁴⁴ Nave adalikige mumasinagogi ga mu Yudaya.

¹ Ikimunyi ikimwi Yesu eimite pa mwani ya inyanza ya ku Genesaleti, na avanu wolofu vamupilime wevibanite, vipulikisa ulukani lwa Nguluvi. ² Afiwene ifipugu fivili palubali lwa inyanza, avanyamwenafyo vevevalofi vali vahumite vakofuga ifilovelo fyawo. ³ Ave Yesu akwingila mukipugu ikimwi kila cheche cha Simoni, neke amusuke akihegelese pawutalo padodo ukuhuma panyanza. Swe iteng’emala mumo, ndawe avangige ukwigisa avanu we alimukipugu. ⁴ Avelige isinda ukulonga amutige Simoni, “Sindike ikipugu kula kululenga ulutaali mutoose ifilovelo fyenyu sambi mulove isomba.” ⁵ Neke Simoni amupitule, “Mulugu tugudite ikilo mbekili sitwambulii kinu, lino pakuva ye ulonzile noosa ifilovelo.” ⁶ Vavelige vitoosa valofile isomba nzolofu wuhulo, na ifilovelo fyawo fyavanzile ukudemuka. ⁷ Swe vakuvasinisa avayawo veve mukipugu ikingi vaase vavatange. Ndawe vaasige neke pevamemye isomba ifipugu mbefili wefivili, supwe nafyo fivange ukusuda mululenga. ⁸ Simoni Petulo avelige akuluwona ulu, afugime pa magulu ga Yesu itigila, “Hege panene, pakuva nene ndi munyanzanangifu, Mutwa.” ⁹ Umwene na avayagwe mbevali vahahite uwolofu uwa isomba sevevalofile. ¹⁰ Na avayawo va Yakobo na Yohane avana va Sebedayo nawo vahahite ndahihyo. Neke Yesu amutigile Simoni, “Ulava na muhwehwe; uluhuma lino, uva wimulofi va avanu.” ¹¹ Swe vavelige vakwegamika ifipugu fyawo pamwani, swe vakufileka mbefili na ukuvanga ukumuninila Yesu. ¹² Yesu peali muboma iyimwi aasile umunu umutamwa uwukoma umuvili mbeguli; avelige akumuwona Yesu agwe kinyalileme, kono we akumugongola, “Mutwa wone wiwenda, wihwana unzese.” ¹³ ndawe Yesu agololige iliwoko lyakwe akumupamisa itigila “Ndiwenda wele.” Swe ulusika lulo uwukoma wipona. ¹⁴ Neke amulagise, “Ulamulongela munu, pesi ulwa lino bitage ukilagile kulumutambisi, ukatawule ifitawulwa ukwimila ukwesewa kwako ndawe alaje Musa wuve wolelesi kwavene ukuta yeuponite. ¹⁵ Pamwinga na ulo, ing’ani sakwe Yesu pepene pesaginite ukutagalila mbekuli, na amalugu ga vanu gakong’ine kukumupulikisa na ukuponesewa uwuhomefu wawo. ¹⁶ Neke umwene anyelebuke abite kubalali ukwifunya. ¹⁷ Ikimunyi ikimwi mufilo ifyo pe Yesu igisige, avafalisayo na avigisi va indagilo uluhuma mufijiji ifya mu Galilaya mu Yudaya na mu Yelusalemu vevateng’eme baho. Na uludali lwa Umutwa lwe lulipamwi na umwene mukuponia. ¹⁸ Lavage, vaasile avanu vamutegwe umunu mulupasa yeali mutamwa ilitela. Vasakige vamwingise kugati vamuvike peepwali Yesu. ¹⁹ Neke valemwe pakwingila, pakuva ililugu lya avanu lye likomi pepagaya kilega, swe vakwilila kwiking’a visalula padodo sambi vamwise mulupasa kidonya pa Yesu. ²⁰ Avelige akuluwona ulufuuwo lwawo, neke atigile, “Muyawe udegepilwe inzanangifu sako.” ²¹ Neke avigisi va indagilo na avafalisayo vavange ukwiwusa vitigila, “Ye nani uyu yakumuliga Nguluvi? Ye nani yeahwanite ukudegepela inzanangifu pe si Nguluvi hela ye iyena?” ²² Yesu avelige akusikagula seviwusige, neke avatigile, “Ndawuli mukwiwusa munumbula senyu? ²³ Ulupefu lulikwi ukutigila, ‘Inzanangifu sako udegepilwe’, na ukutigila, ‘Wuke wibitilage?’ ²⁴ Sambi mulukagule ukuta Umwana va Umunu ina ludali konivala ukudegepela inzanangifu.” Neke amutigile yula yeali mutamwa litela, Ngukulongela veve, hege tegule ulupasa lwako wibitile kukaye.” ²⁵ Ulusika lulo swe akwima pamiho gawo, na ukutegula ulupasa swe ibitaga ukwawo, kono we akumulumba Nguluvi. ²⁶ Neke mbevali vibatike na ulusasavalo na ukumulumba Nguluvi, we vina muhwehwe vitigila, “Setusiwene neng’ino situlutye uluhala!” ²⁷ Neke pambele, Yesu ahumite swe akumuwona Umunu umukong’asa imbemenenge itambulwa Levi ateng’ime pakaye ya imbemenenge, swe akumutigila, “Ninile!” ²⁸ Swe akufileka mbefili, nu kumuninila. ²⁹ Swe Levi akumuwuyapila ikiwungo ikikomi mukaye yakwe. Avakemele na avakong’asa imbemenenge vayagwe na avangi vahange ukulya. ³⁰ Avafalisayo na avigisi vawo va indagilo, vavang’ulite avanyigendo vitigila: “Kumbi ndawuli nyenye mwilya na ukunywa pamwi na avakong’asa imbemenenge na avanyanzanangifu? ” ³¹ Neke Yesu avapitwe, “Avanya pa muvili panofu sivigulumagi mukofi, pesi avatamwa. ³² Nene sindasili kukemela avagolofu nda, pesi avanyanzanangifu vapele.” ³³ Neke vamulongelage, “Avanyigendo va Yohane kolofu vayikwiyima ukulya nu kwifunya, na avanyigendo va avafalisayo nawo vavigita ndahihyo, neke avanyigendo vako vavilya na ukunywa.” ³⁴ Neke Yesu avatigile, “Mwiwona ndawuli luhwanite ukuvatanila avalaalike kuluwungo viyime ukulya munyaluwungo we pealibaho? ³⁵ Neke ifilo safyusa, pesa vamuhesise umunyaluwungo apawo ipo pepene pesaviyima ukulya ifilo fifyo.” ³⁶ Avalonje ululongwa, “Sikwali umunu yeaidemula ikipapiko mu mwenda umupya; neke akahonelese icho mwenda umulovela pakuva pagisile ndahihyo ava ademwe umwenda umupya na umulovela gusakalila ng’ani. ³⁷ Na kangi sikwali umunu yeaisopa idifayi imya mufihela ifilovela; na wone asope idifayi iyo imya yitudisa ifihela ifyo, nayi difayi yibohoka na ifihela fyanangika. ³⁸ Idifayi imya yayisopwa mufihela ifipya. ³⁹ Kangi sikwali yeanywe idifayi indovela yeadobokela imya pakuva aitigila indovela ye nono.”

¹ Ikimunyi ikimwi cha isabato, Yesu na vanyigendo vakwe valutilige mumigunda ija ingano, neke avanyigendo vakwe vadenyage amahoo ga ingano nu kufigiha mumawoko gawo na ukulya. ² Neke avafalisayo avamwi vatigile, “Ndawuli mwipiga ulukani lwesilulagile ukupigwa mukimunyi cha isabato?” ³ Swe Yesu akuvapitula, “Mbi simulimba wealagisile Daudi na avayagwe peali na inzala? Umwene na vala veali nawo. ⁴ Lwe inje mukaye ya Nguluvi, neke egule imikate jejemivike pa Nguluvi, neke alye na ukuvapela avayagwe. Jejemikane na indagilo ukuta sikwali yahwanite ukulya pesi vavatambisi hela.” ⁵ Neke avalongele, “Umwana va Umunu ye Mutwa va isabato.” ⁶ Chave kangi ikimunyi ikingi cha isabato, Yesu inje musinagogi akwigisa, mumo e mwali umunu ye iliwoko lyakwe lya kundyo lye linyalitela. ⁷ Avigisi va indagilo na avafalisayo vagahige sambi vamudadise, wone aponia umutamwa uyo mu kimunyi cha isabato vave na ulukani lwa ukumusongelela Yesu ukuta mwananzi. ⁸ Neke Yesu agakagule amahosa gawo, swe akumutigila yula umunyaliwoko ilinyalitela, “Wuke wime ipa.” ⁹ Neke Yesu avatigile, “Nene nguvawusa nyenye lulagile mu ikimunyi cha isabato ukupiga inofu nu kupiga imbi, ukuponia uwumi na ukuwulaga?” ¹⁰ Peyeavalavye mbevali swe akumutigila umunu yula, “Golole iliwoko lyako.” Swe igita ndahihyo, neke iliwoko lyakwe liponage. ¹¹ Swe mbevali vivipa, vakwing’ulanza lwe vamupigila Yesu. ¹² Mufilo ifyo Yesu ahele kukidunda kukwifunya, neke ifunyage ikilo mbekili kwa Nguluvi. ¹³ Kwavelige kwicha, avakemelye avanyigendo vakwe, neke uluhuma mwa iwo ahagule vanyichumi na vavili, nu kuvatambula vigendo: ¹⁴ Simoni, (ye amupelye ilitawa ilya Petulo), na Andeleya umwanakwawo, Yakobo na Yohane, na Filipo, na Batolomayo, ¹⁵ na Matayo, na Tomasi, Yakobo umwana va Alifayo na Simoni (yevamukemelige Selote), ¹⁶ na Yuda umwanakwawo va Yakobo, na Yuda Isikalyote yula yeamupitwike Yesu. ¹⁷ Ave isulunuka nawo uluhuma kukidunda swe akwima apono apatendemafu, pamwi na ililugu lya vanyigendo vakwe na amalugu ga avanu veve vahumite mu Yudaya mbeyili na mu Yelusalemu na mu mwani isa mu Tilo na mu Sidoni. Avali vaasile kukumupulikisa na ukuponesewa ifitamwa fyawo. ¹⁸ Na vala mbevali avatokige na amasoka nawo vaponite. ¹⁹ Na ililugu mbelili lyasakige ukumupamisa, pakuva uludali lwahumige mulumwene na ukuvaponia avanu mbevali. ²⁰ Ndawe Yesu avalavilige avanyigendo vakwe, neke atigile: “Mwivafunyilile mwevamikaa, pakuva Uwutwa wa Nguluvi wenyu. ²¹ “Mwivafunyilile nyenye ye mwina inzala lino, pakuva samwiguta. “Mwivafunyilile nyenye yemwivemba lino, pakuva samuheka. ²² “Mwivafunyilile nyenye wone avanu vavavipile, vavabagule, vavalige na ukulibedalila ng’ani ilitawa lyenyu wita kinu chaafu, ukwimila Umwana va Umunu. ²³ Nyenye ikimunyi icho samuhekelelage nu kukima, pakuva, uluhombo lwenyu saluva lukomi kuchanya. Pakuva avadadawo vavapije ndahihyo avavisi. ²⁴ “Neke mwinaluleko nyenye nye vanono, pakuva nyenye yemwanuche ulusikimiko lwenyu. ²⁵ “Mwinaluleko nyenye yemwigwita lino, pakuva samudagana. “Mwinaluleko nyenye yemwiheka lino, pakuva samuhuguvala na ukuvemba. ²⁶ “Mwinaluleko nyenye, pemwisumilwa na avanu mbevali, pakuva avadadawo vavapije ndahihyo avavisi va uwudesi. ²⁷ Neke nene nguvalongela nyenye yemwipulika, muvendage avatavangu venyu muvapigilage inofu vala avakuvapigila nyenye. ²⁸ Muvafunyililage vala avakuvakotola nyenye, muvasukilage avakuvaliga nyenye. ²⁹ Umunu yeakukutova pa ulusese ulungi, lekage akutove na luyalo, na yeipoka umwenda gwako mulekelage na yisopeka yako. ³⁰ Yeavesaga yeakukusuka veve kinu mupelage, na yeakukupoka ifyako, ulatigila akupilulile. ³¹ Muvapigilage avanu ndawe lwemwiwenda nyenye ukupigilwa. ³² Wone muvende vala avakuvenda nyenye muva na kiki ikilutye? Pakuva na vanyanzanangifu vakuvenda vala avanyawiyendi vawo. ³³ Wone muvapigile inofu vala avakuvapigila inofu nyenye, muva na kiki ikilutye? Pakuva na vanyanzanangifu vavipiga siso. ³⁴ Wone muvapele ifya umukole avanu vala vemukwihuvila ukuta vavapilulila muva na kiki ikilutye? Pakuva na vanyanzanangifu vakuvapela ifya umukole avanyanzanangifu vayawo, sambi vapilulilwe ifilutye. ³⁵ Nyenye muvendage avatavangu venyu, nu kuvapigila inofu, mutawulage kitapilulilwa, na ikipelwa chenyu sakiva kikomi, samuva mwivana va Nguluvi yalikuchanya. Pakuva umwene muwuya kwa avagaya kilumbo na avanangifu. ³⁶ Muvelage mwivanyalusungu, ndawe Dadenyu lwe munyalusungu. ³⁷ “Mulavahiga avangi nanye sisamuhigwa, mulavasokama fibi avangi nanye sisamusokamwa fibi, muvadegepelage avangi nanye mudegepelwa. ³⁸ Muvapelage avangi fyevagulwime nanye samupelwa. Ena, mwanukila mumawoko genyu ikigelo ikimemite kidinile nu kuhingilisiwa nu kubohoka, pakuva ikigelo kikila chemwigelanikisa avangi kicho chesaavagelanikisa Nguluvi.” ³⁹ Neke avalongele ikiganiso: Ndawuli umunu umubofu ahwanite amusogose umubofu umuyagwe? Sivagwila we vavili mwikombo? ⁴⁰ Umunyigendo sahwanite ukumulutila umwigisi vakwe, na pe ave akulwe wunofu ipo peahwana ukutegana na umwigisi vakwe. ⁴¹ Ndawuli veve wilava ikibandi chekili muliho lya umuyago, neke ulemwe ukuluwona ulwangiko lweluli muliho lyako veve? ⁴² Ino umulongela ndawuli umuyago ukuta, ‘Be! Leke nguhese ikibandi chekili muliho lyako.’ Kono wesiukuluwona ulwangiko lweluli muliho lyako veve? Wimubuganisi veve hese tandi ulwangiko lweluli muliho lyako ipo pepene pulava wunofu peuhwana uhese ikibandi chekili muliho lya umuyago. ⁴³ Pakuva Sikoguli umubiki umunofu gwegwagwiveleka amaveleko amabi, na kangi umubiki umubi gwegwagwiveleka amaveleko amanofu. ⁴⁴ Pakuva umubiki gugweguvesaga gwagwikagulika ukwimila amaveleko gakwe. Pakuva mumifwa sitwatwikova amaveleko aga umusombe, nave amaveleko aga imisabibu uluhuma mumibigili. ⁴⁵ Umunu umunofu uluhuma mukisande cha inumbula yakwe ayihumya ing’ani inofu, ndahihyo na yumunu umwanangifu, nave aihumya inzanangifu uluhuma mukisande cha munumbula yakwe, pakuva umunu ayilonga siso isimumemite munumbula yakwe. ⁴⁶ “Ndawuli mukung’emela nene, ‘Mutwa, Mutwa’, na kono we simwipiga senguvalongela nene? ⁴⁷ Umunu yeyeavesaga akusa kwa nene nu kupulikisa ing’ani sangu nu kupiga, ndivalagila lwe ihwana: ⁴⁸ uyo ihwana na umunu yeisenga ikaye, mulutu uluyave hilo mbaka pasi apakangafu na peyusile ing’uka ululenga lwatofile; ikaye yila, neke yilemwe ukugwa pakuva yenzenge wunofu. ⁴⁹ Neke yula yeaipulika neke alemwe ukupiga ihwana na umunu yeasenzile ikaye muchanya muluhanga apagaya lutu. Ing’uka ya lulenga swe yitova sukumwi hela nu kugwa, nu kung’enyangika!”

¹ Avelige isinda indongwa sakwe mbesili sawendige avanu vapulike Yesu ahele ku Kapelenaumu. ² Ukwene kuko kwe kwina umukami va umuvina va vanyigalu yeali mwende vakwe hilo, uyo ali na mbungo alaatimbite sambi ifwa. ³ Avelige ipulika isa Yesu, atumite avavaha va Avayudaya, vakamusuke aase amuponie umukami vakwe. ⁴ Vavelige vifika kwa Yesu neke vamugongole hilo vitigila, “Uyu anoje ukupigilwa ulukani ulu lweisuka, ⁵ Pakuva avenda, avanu vetu kangi atusenjee na yi sinagogi.” ⁶ Swe Yesu ibita nawo, na wesialafika pa kaye yila, Umuvina va avanyigalu atumite avanyawiyendi vakwe, vakamulongele: “Mutwa alifwahisa, pakuva nene sinywaniti veve wingile mukaye yangu. ⁷ Nambi mbwene sinywaniti nzuse kwa veve. Lino longe lukani hela na umukami vangu apona. ⁸ Pakuva nayi nene nane ndimuvike na avandutye, nane ndina vanyigalu avali pasika panene. Ngumulongela uyu, ‘Bite!’, nave ayibita, na uyungi, ‘Wuse!’ nave akusa na mukami vangu, ‘pige iki!’ ayipiga.” ⁹ Yesu avelige ipulika ulo amusasave, neke avapitukile avamalugu vevamuninilige na ukutigila, “Sinde ndilaluwona nambi mu Isilaeli ulufuuwo ulukomi ulwindawe ulu.” ¹⁰ Na vala veve vatume vave vipiluka kukaye, vamufikite umukami yula yeaponite. ¹¹ Pambele Yesu ahele ku boma iyitambulwa Nayini pamwinga na vanyigendo vakwe na ililugu lya avanu. ¹² Neke lino na peahegelye pa wingililo wa iboma awene avanu avapikite umunyakilambo yeafwe mulupasa, umwana yee iyena hela kulu yuve yeali mufwile na avanu wolofu va paboma velumwi na umufwile uyu. ¹³ Na Umutwa avelige akumuwona umung’inetu uyu amuwonie ulusungu neke amutigile, “Ulavemba.” ¹⁴ Swe ibita ihegelela ipamisa ulupasa, na vala ave vamutegwe vakwima. Swe itigila, “Ve Munyakilambo veve! Ngukulongela, veve lamuke!” ¹⁵ Swe yealafwe ilamuka iteng’emala, neke avange ukulonga neke amutawule kulu yuve. ¹⁶ Mbevali vibatike nu muhwehwe; vakumulumba Nguluvi vitigila, “Umuvisi Umuvina awonike kwa hwehwe na Nguluvi aasile ku vanu vakwe.” ¹⁷ Ing’ani isakwe iso sapulise mung’i mbeyili iya mu Yudaya na ing’i isapilimige i Yudaya. ¹⁸ Neke avanyigendo va Yohane vamulongele ing’ani mbesili sa Yesu. ¹⁹ Ndawe Yohane, avakemelige avanyigendo vakwe avavili, na ukuvatuma kwa Yesu vakamuwuse, “Veve ye veve yeakusa apangi tusindilage uyungi?” ²⁰ Nawo vave vifika kwa Yesu vatige, “Yohane umubatisi atutumite kwa veve, tukuwuse: ‘Veve ye yula yeakusa, apangi tusindilage yungi?’ ” ²¹ Na kikivalilo kikila avaponise avatamwa wolofu avatesekige na ifitamwa na ave vina amasoka na avabofu wolofu valafile vaponite. ²² Pepene Yesu peavapitwe na ukuvatuma vanyigendo, “Mubitage mukamulongele Yohane iso semusiwene na ukupulika: avabofu vilava, avatevafu vigenda, avanya uwukoma vakwesewa, avadibafu vipulika, avafwe visilibuka, na avamikaa vidalikilwa ulukani lunofu. ²³ Mufunyilile umunu yula ye nene singumuvifya.” ²⁴ Vala veve vatumitwe na Yohane vavelige vihega, swe Yesu ivanga ukuvalongela vamalugu ing’ani sa Yohane: “Mwemuhele ku balali kukulava kiki? Ulusoli pelwipugwa na ing’ala? ²⁵ Ino mwemuhele kukulava kiki? Umunu yeafwite imyenda ja ulutogo? Mulukagulage ukutigila vala vevafwite imyenda ja ulutogo na ukulya ifya ulwinomo iwo vali mukaye isa avatema! ²⁶ Ino mundongele mwemuhele kulava kiki? Umuvisi? Ena nguvalongela na yealutye kulu muvisi. ²⁷ Uyu yemwene yeandikilwe ulu: ‘Lavage, ngumutuma umunu pamiho gako, yeawuyapa ing’asi yako pamiho gako.’ ” ²⁸ Nane nguvalongela, “Mwa avanu mbevali sipwali umuvina yeamulutye Yohane neke yula umudodo mu wutwa wa Nguluvi uyo ye muvina yeamulutye.” ²⁹ Avanu mbevali na avakong’asa imbemenenge vave vipulika iso vasumye uwugolofu wa Nguluvi, pakuva yevevabatisiwe nu wubatiso wa Yohane. ³⁰ Neke avafalisayo na avigisi va indagilo vabesise ulukani lwa Nguluvi ulwe luvanoje, pakuva vabihye ukubatisiwa nu mwene. ³¹ Ndivahwananise na kiki, “Avanu va imbegalo iyi, vihwana na kiki? ³² Vihwana na avana avevateng’eme pa ligulilo vakwikemela na avayawo vitigila: ‘Twavakuvye ikilanzi simwihesigi! Twayeyelite na nyenye simwavembiti!’ ³³ Pakuva Yohane umubatisi aasile siilya mukate nambi ukunywa idifai, neke pemumutigile: ‘Ina lisoka!’ ³⁴ Umwana va Umunu aasile ilya nu kunywa nyenye mwitigila: ‘Lavage, umuhatufu uyu na umugaasi va idifai, munyawiyendi na avakong’asa imbemenenge na vanyanzanangifu!’ ³⁵ Nambi ndahihyo uluhala lwa Nguluvi, luwonike lugolofu kwa mbevali avakulwidikisa.” ³⁶ Umunu uyumwi mu vafalisayo amulaalike Yesu akalye ichakulya ukwawo, swe akwingila mukaye ya Umufalisayo uyo nu kuteng’emala pawulilo. ³⁷ Mu boma yila emwali umung’inetu uyumwi yee munyanzanangifu, uyo ave ipulika ulwa Yesu ilya ichakulya mukaye ya Umufalisayo, aletite isupa inyamafuta aginung’ila wunofu. ³⁸ Aasile neke ime pipi pa amagulu ga Yesu ivemba na inzihosi sakwe sihululila amagulu ga Yesu kono we akumupaata Yesu amagulu na ifwili sakwe, na ukumunonela amagulu nu kumubaka amafuta amanofu. ³⁹ Ndawe Umufalisayo yealamulaalike avelige akuluwona ulo ilonzise munumbula yakwe, “Umunu uyu akalaave muvisi, ake amukagula umung’inetu uyu yakumupamisa ukuta ye nani na va kinya ndawuli ulwa munyanzanangifu.” ⁴⁰ Neke Yesu amupitule amutigile, “Simoni, nene ndina lukani lwendisaka ngulongele.” Nave swe itigila; “Mwigisi longe.” ⁴¹ “Swe Yesu itigila epwali umunu uyumwi yee ina vanyamukole vakwe vavili: uyumwi amusigilige magobole dinali magana gahanu na uva kavili dinali machumi gahanu. ⁴² Nawo vavelige vilemwa icha ukumuhomba, avadegepye we vavili. Wita mwa avavili iwo yenani yeagina ukumwenda hilo?” ⁴³ Neke Simoni amupitule atigile, “Ndita wanda ava yula yeadegepilwe amagobole dinali nzolofu.” Itigila, “Uhigite wunofu.” ⁴⁴ Swe akumupitukila umung’inetu kono wakumulongela Simoni, “Ukumuwona umung’inetu uyu? Nene nzinje mukaye yako, sumelii ululenga ng’alave amagulu gangu, neke umung’inetu uyu ahululise inzihosi mumagulu gangu na ukumaata na ifwili sakwe. ⁴⁵ Veve Simoni sunyunji kwa ukunonela, neke uyu umung’inetu uluhuma penzingilige ipa ave peanonelaga amagulu gangu. ⁴⁶ Veve sumbakiti umutwe gwangu amafuta, neke uyu ambakite amafuta mumagulu gangu. ⁴⁷ Lino nene ngukulongela, adegepilwe inzanangifu sakwe, pakuva alaje uwende uwukomi, neke munyakudegepelwa indodo ayiwenda ludodo.” ⁴⁸ Neke amulongele umung’inetu yula, “Udegepilwe inzanangifu sako.” ⁴⁹ Neke vala veve pawulilo pamwinga nave vavange ukwilonganza munumbula sawo, “Ye nani uyu, yeahwanite ukudegepela inzanangifu?” ⁵⁰ Swe akumulongela yula umung’inetu, “Ulufuuwo lwako lukupokite, wibitilage chesa mutima.”

¹ Pambele ludodo pesilutye iso Yesu ahele kigendagenda muboma na mufijiji, idalika Ulukani Lunofu lwa Uwutwa wa Nguluvi. Na vala avanyichumi na vavili vevali pamwinga navee. ² Na vang’inetu avamwi vala veavaponise amasoka na ifitamwa na avene ve iva: Maliya (yeatambuligwe Magadalena), yula yeahumisiwe amasoka agimufung’ati, ³ Na Yoane, umukina Kusa, umukami va Helodi na Susana na avangi wolofu, vevamupigilige Yesu uluhuma mufinu fyawo. ⁴ Na ililugu ilikomi lyavelige likong’ana, avanu vahumile iboma mbesili nu kumusila Yesu neke avalongele, kwa ikiganiso. ⁵ “ Umuvyasi ahele kukuvyala inyadikwa yakwe nave peavyalige, isimwi sagwe mung’asi, neke silivatwe na avalutila ng’asi swe na ifidege filya. ⁶ Na isimwi sagwe pitalawe, savelige simela sanyalite pakuva sagayite uwudodi. ⁷ Na isimwi sagwe mufisaka, imifwa pegikula jatofile inyadikwa. ⁸ Na isimwi sagwe apono apanono, swe simela nu kuveleka nyadikwa yimwi ligana.” Avelige ilonga iso, ihugite iliswi itigila, “Yula yeina mapulikilo aga ukupulikila apulikage!” ⁹ Na avanyigendo vakwe vamuwusise ikiganiso icho kwekutigila ndawuli. ¹⁰ Swe atigile, “Nyenye mwivapele ukusikagula mbesili isa ikinyele sa uwutwa wa Nguluvi; neke avamwi mbaka kwa figaniso, sambi valave valemwe ukusiwona na ukupulika valemwe ukulukagula. ¹¹ Lino ikiganiso icho kwe kutigila de: Inyadikwa lwe ulukani lwa Nguluvi. ¹² Sila isagwe mung’asi vevala vevavipulika; neke Setani aase ahese ulukani ulo munumbula sawo, valafuuwa nu kupokwa. ¹³ Na sila isagwe pitalawe ve vala, vevavipulikisa ulukani, nu kwanukila ulukani lula kwa luhekelelo, we vagaya ndela vavifuuwa lusika ludodo pesigagande vipiluka kumbele. ¹⁴ Na sila isagwe mumifwa, ve vala vevavipulika,na mumikalile jawo vavibanwa ni fipigo fya uwunono nu wudobofu wa uwumi uwu valemwe ukutung’unia amaveleko. ¹⁵ Na sila isagwe apono apanono, vevala vevavipulika ulukani nu kwinatila kwa mutima mwelu na uwugolofu, nu wuwuya wa inumbula sawo neke vaveleke amaveleko kwa kwikangalisa. ¹⁶ “Sikwali umunu yeaikunga ulung’ali neke avike mukisilo nambi mwifungu pesi ulwa ayivika pachanya, paluwumba sambi avakwingila vawuwonage uwelu.” ¹⁷ “Pakuva sikololi lukani ulufike lwesisaluwoneka, nambi ikinu ikifihe chesisakikagulanika na ukuhuma pawelu.” ¹⁸ “Apo mwikomalilage, lwemwikola ukupulika; pakuva yeina ikinu awilwa neke umugaya kinu apokwa na kila cheihosa ulwa inacho.” ¹⁹ Neke uyuve va Yesu na avanyalukolo vakwe vamusilige swe vilemwa ukuhegelela pepwali pakuva kwekwina lilugu lya avanu. ²⁰ Ndawe alongelwige ukutigila, uyuwo na avanyalukolo vako vimite kwivala viwenda vakuwone. ²¹ Neke avatigile, “Yuva va nene na avanyalukolo vangu ve iwo avipulika ulukani lwa Nguluvi na ukupiga.” ²² Ikimunyi ikimwi Yesu na avanyigendo vakwe vinje mukipugu, neke avatigile, “Leke tulowoke mbaka kumwambu gwa inyanza.” Ndawe valowokige. ²³ Vave pevabita ni kipugu ndawe Yesu agonelelige tulo. Swe ikifulufumbi ikikomi kivange ukupuga munyanza na ululenga lwimema mukipugu, swe viva mulutalamu. ²⁴ Avanyigendo vamulamwise Yesu vitigila, “Mulugu mulugu, twifwa!” Yesu swe ilamuka nu kukenyela ikifulufumbi na amavingo ndawe fyasikimalige nu kuva tototo. ²⁵ Swe Yesu akuvawusa, “Lulikwi ulufuuwo lwenyu?” Neke avene wogope nu kusuma, vakwilonganza, “Uyu ye nani, yeikenyela ikifulufumbi na amavingo neke fimupulike?” ²⁶ Ndawe vafikige mumwani ya ing’i ya Avagelasi iyilaving’ine na i Galilaya. ²⁷ Ave ihuma mukipugu atang’ine na umunu yahumige muboma munyamasoka, filo fyolofu safwaligi myenda, na sikaligi mukaye e munu vakwikala mufyanga. ²⁸ Avelige akumuwona Yesu, akoolite nu kugwa pasi pamagulu ga Yesu na ukuyova, “Ndina kiki naveve Yesu ve umwana va Nguluvi yali kuchanya? Ngukugongola, “Ulandogofya!” ²⁹ Alonzile ulo pakuva Yesu yealalikalipye ilisoka ilyo lihume mulumunu yula. Ilisoka ilyo lyamulalulige mbepali mbepali mbaka avanu vamudindilige vamupinzile ni minyololo, najo mbepali adumulige ilalukila mwihala. ³⁰ Swe Yesu akumuwusa, “Ilitawa lyako winani?” neke atigile, ‘Ndi lilugu’ ”--pakuva eina masoka molofu agegamwinje. ³¹ Neke gamugongole alagakenyela gamuhume na ukubita mulikombo ilikomi ilihelesa. ³² Ipo pepokili ikipinga ikikomi cha ingubi ichakwamilige mwivambala lya ikidunda; neke gamugongole agatawule gakingile mukipinga. Swe akugatawula. ³³ Swe amasoka gihuma mulumunu yula nu kwingila mungubi sila; naso swe sisulunuka luvilo mukisulunukila ikitaali sigwila munyanza ndawe safwisige mululenga. ³⁴ Vala avanyakukwamila vavelige vakuluwona ulo, vakimbye na ukutagalisa ulukani mu boma na mulubali. ³⁵ Avanu vahumite vakalave uluwonike, swe vakumubitila Yesu, nu kumuwona umunu yula yegamuhumite amasoka, ateng’ime pamagulu ga Yesu, afwite imyenda ina luhala asikimee, vave na muhwehwe. ³⁶ Na vala avaluwene vavalonje avayawo we lwave lwa imiponele ja yula umunya masoka. ³⁷ Avanu mbevali ava mung’i ya Avagelasi vamugongolite ahege ukwawo pakuva vevibatike nu muhwehwe mukomi, swe ndawe ingilige mukipugu iwuyaga. ³⁸ Yula yegamuhumile amasoka amusukite amuninile. Neke Yesu samwidichi swe akumutigila, ³⁹ “Wuye ukwenyu, ukolelele ingomi mbesili se Nguluvi akupije veve.” Ndawe ibitilige kono we idalika muboma mbeyili ing’ani mbesili seamupije Yesu. ⁴⁰ Yesu ave ipiluka imwambu inzagwe ya inyanza ililugu lya avanu vamwanuche pakuva mbevali vamusindilige. ⁴¹ Baho swe aasile umunu yeitambulwa Yailo, yee muvina va i sinagogi swe akwitoosa pa magulu ga Yesu nu kumugongola abite kukaye yakwe, ⁴² pakuva umwalive yee iyena hela, yagelaniche myaka minyichumi na givili dee ali mutamwa nave alimukufwa. Na lweabitige avanu vevamumemeleche imbali mbesili. ⁴³ Neke mwilugu lila e mwali umung’inetu uyumwi yee mutamwa uwutamwa wa ukuhuma danda myaka minyichumi na givili, ye avakofi migoda vevanuche ifyakwe fyolofu, nambi ndahihyo sivahwaniti ukumukovela apone. ⁴⁴ Aasile mumbele mwa Yesu na ukupamisa ulupindo lwa umwenda gwakwe, lulusika lulo aponite uwutamwa wakwe wa ukuhuma idanda. ⁴⁵ Neke Yesu atigile, “Ye nani yemamise?” Mbevali vakanite, Ndawe Petulo atigilige, “Mulugu, amalugu ga avanu gakupilime nu kukubana!” ⁴⁶ Neke Yesu atigile, “Pwali umunu yeamamise, pakuva ndilukagwe ulwa uludali luhumite.” ⁴⁷ Umung’inetu yula ave iwona sahwana ukwifiha swe akwilagila kono we ikuvila, ndawe agwisige pamalugu ga Yesu nu kwilogolola pa avanu ikilesile amupamise Yesu na ulwave apone sukumwi. ⁴⁸ Ndawe Yesu amutigilige, “Mwalivangu,ulufuuwo lwako lukuponise. Wibitilage chesa mutima.” ⁴⁹ We Yesu pealonga, Yailo vamukutye uluhuma kukaye ulwa, “Umwaliwo yafwe, ino ulamufwahisa Umwigisi?” ⁵⁰ Yesu ave ipulika ulo amulonje Yailo, “Ulogopa fuuwagwe hela nave apona.” ⁵¹ Avelige ifika pakaye Yesu akanite alingila munu pamwi na umwene, pesi Petulo, Yohane, Yakobo, na avegasi va umwanahinza hela. ⁵² Avanu mbevali vamuvembelige nu kwiyayamba, neke Yesu avatigile, “Mulavemba, pakuva umwana salafwa agonelye!” ⁵³ Nawo vamuhesile, vakumubedala pakuva valukagulige ukuta afwe. ⁵⁴ Ndawe Yesu amwibatige iliwoko, akumukemela itigila, “Mwana lamuke!” ⁵⁵ Swe umuhe gwa uwumi gukumupilukila, swe ilamuka ndawe Yesu alagilige vamupele kinu alye. ⁵⁶ Na avegasi vakwe vasasave, neke Yesu avakanile valalongela munu lwelupigike.

¹ Yesu avakemelye avanyigendo vanyichumi na vavili swe akuvapela uludali nu lulagi lwa ukudagila amasoka mbegali nu ukuponia ifitamwa. ² Neke avatume vabite ukudalika uwutwa wa Nguluvi na ukuponia avatamwa. ³ Ndawe avalongelige ulwa, “Mulategula kinu mulugendo lwenyu, nambi lugoda, nambi bogolo, nambi fuka, nambi magobole nambi uyumwi va nyenye aalava na sopeka sivili. ⁴ Na ikaye yeyemwingilaga, mwikalage mumo, mbaka ikimunyi chemwihegela mumo. ⁵ Na apono pepavesaga sivakuvanukila nyenye pemwihega mu boma yila mukung’unage ilingundi lya inzaho senyu ulo luve lukenyelo kwa avene.” ⁶ Swe viwuuka ukubita kidalika Ulukani Lunofu mu fijiji na ukuponia avatamwa kukwekuvesaga. ⁷ Neke lino Helode umutema va ku Galilaya avelige ipulika mbesili sesipigitwe na Yesu, ahuguve pakuva avanu avamwi vatige, “Yohane asilibwike uluhuma kuvafwe!” ⁸ Avangi vatigile Eliya awonike, na avangi kangi vatigile uyo ye yumwi va avavisi va pidaha asilibwike. ⁹ Neke Helode atigile, “Yohane ndamudumwe umutwe; mbino uyu yenani kangi yendipulika ing’ani sakwe?” Asakige ukumuwona. ¹⁰ Avigendo vavelige vipiluka uluhuma mulugendo vamulonje Yesu mbesili sevapigite. Swe akuvasindika viyena ku boma iya ku Betisaida. ¹¹ Avamalugu vavelige vakulukagula swe vakumufwata, nave avanuche akuvalongela isa uwutwa wa Nguluvi, na ukuvaponia vala vevasakige ukupona. ¹² Na ilisuva lyavelige livanga ukusota, vala vanyichumi na vavili vahegelye kulumwene nu kutigila, “Vatawule avanu vabite, mumigunda na mufijiji fyefilimwipi visakile ichakulya na pawuvaso pakuva ipa pebalali hela.” ¹³ Neke avatigile, “Muvapelage nyenye ichakulya.” Swe vakumupitula, “Hwehwe twivagaya kinu chekilutye imikate igihanu na isomba sivili. Apangi tubitage yihwehwe tukavagulile hela ichakulya avanu iva mbevali!” ¹⁴ (Pakuva vevipwali pala avanyidama avakwilaniche mbilima sihanu.) Neke avalongele avanyigendo vakwe, “Vavalongele avanu vateng’emale fiwungu fya avanu machumi gahanu gahanu.” ¹⁵ Nawo avanyigendo vapigite ndahihyo, vakuvatigila avanu vateng’emale mbevali. ¹⁶ Neke ategulage imikate igihanu ni somba isivili alavage kwilanga kuchanya, ifunyilila swe imegulasa imikate akuvapela avanyigendo vakwe vavapele avanu. ¹⁷ Swe vilya vakwile mbevali na ifyefisige vakong’ise neke fimeme ifitangula finyichumi na fivili. ¹⁸ Ikimunyi ikimwi, Yesu peifunyige pakilega, avanyigendo vakwe vepipi nave. Neke peavawuse, “Ulwa avanu vakunigila nene ndinani?” ¹⁹ Neke vamupitulage vatigilage, “Yohane umubatisi, neke avangi vakukutigila wi Eliya, kono avangi awolofu vakukutigila wimuyawo va avavisi vapidaha yasilibwike.” ²⁰ Neke avatigile, “Nyenye mukunigila nene ndinani?” Neke Petulo amutigile, “Veve ye veve Kilisito va Nguluvi.” ²¹ Swe akuvapavila nu kuvakanila valalongela munu ulukani ulo. ²² Neke pe avalongele ukutigila, “Lumuvaje Umwana va Umunu ateseke mwa nzolofu, nu kubihilwa na avavaha, na avavina va avatambisi na avigisi va indagilo nave awulagwa na ikimunyi icha wudatu asilibuka.” ²³ Neke peavalongele mbevali, “Umunu yeyeavesaga isaka ukufwata nene, uyo ikanage uwunu wakwe yumwene, neke peategule umusalaba gwakwe afwate. ²⁴ Pakuva umunu yeisaka ukunania uwumi wakwe uyo awuyasa, neke wone awuyase uwumi wakwe ivalwa nene awupoka kangi. ²⁵ Pakuva lumunogela kiki umunu nave ina wunono mbewuli wa Mung’i kono we iyasa na ukwambusa uwumi wakwe? ²⁶ Pakuva yeyeambonelaga inyoni nene na ing’ani sangu, uyo navee Umwana va Umunu saamuwonela inyoni umunu uyo peakusa mundolo sakwe na sa udade na sa avanyivaha avelu. ²⁷ Neke nachene nene nguvalongela, ipa povali avangi vimite baha vesivatala ukufwa mbaka pevawuwene uwutwa wa Nguluvi.” ²⁸ Fyavelige filutila filo fimunana uluhuma pa kulonga ing’ani iso swe akuvategula pamwi nave Petulo, Yohane na Yakobo, vibita ku kidunda kukwifunya. ²⁹ Na peali mukwifunya Yesu uluhwano lwakwe lwapitwike, na imyenda jakwe jave myelu gimalavadika. ³⁰ Wonage avanu vavili vawonike vilongana nave, iwo ve Musa na Eliya. ³¹ Iwo vaasile mundolo, valongine nave ulwa ifwa yakwe ye ayikwilanikisa ku Yelusalemu. ³² Ino Petulo na avayagwe yevevibatike vafuluge ni tulo vasinzilige, nambi ndahihyo valamwike, vakuyiwona indolo yakwe, na vala avanu avavili avevimite pamwi nave. ³³ Na avanu vala vave pevilekana nave, Petulo amulonje Yesu, “Mutwa, lwinoga ulwa tuliipa ino lekage sweno tusenge ifitinga fidatu, ikimwi cha veve na ikimwi cha Musa na ikingi cha Eliya.” Ulwene nachene sialukaguligi lwealongige. ³⁴ Na pealongige ulo, lyasile ilifufu neke livagubike, na pelyusile ilifufu ilyo, vala vanyigendo vave na muhwehwe mukomi. ³⁵ Na iliswi lyapulise uluhuma mwifufu ilyo ukutigila, “Uyu ye Mwanangu, umuhagule vangu mumupulikage yuyu!” ³⁶ Na iliswi lyavelige likatuka, Yesu awonike iva iyena. Nawo vanyigendo vakatwike sili na sivamulonji nambi munu iso sevevasiwene. ³⁷ Neke ikimunyi icha kavili, Yesu na vanyigendo vakwe peyevasulunwike uluhuma ku kidunda, ililugu ilikomi lya avanu lyatang’ine na Yesu. ³⁸ Swe umunu uyumwi, mula mwilugu neke ayovage atigilage, “Mwigisi! Ngukusuka umulave umwanangu, pakuva ye mwanangu yeiyena hela! ³⁹ Wonage, ilisoka pe likumutova aikoola kangi lyakumuletela ililibisi kono ilifulo we lihuma mumulomo. Lyakumufwahisa nu kumutesa musika silyakwangufya ukumuleka.” ⁴⁰ Ngavasukite avanyigendo vako, valihese ilisoka, neke vakalemilwe.” ⁴¹ Neke Yesu apitule atigile, “Nyela nye mbegalo ingaya ulufuuwo na inyawuyasi! Ndikala na nyenye na ukuvakangalila mbaka panili?” “Mulete umwanako ipa.” ⁴² Na umwana peabitige kwa Yesu ilisoka lila lyamugwisise pasi na ukumuletela ililibisi. Neke Yesu alikenyele ilisoka lila, na ukumuponia umwana swe akumutawula kulu dade. ⁴³ Na mbevali vahahite pevawene uludali ulukomi lwa Nguluvi. ⁴⁴ Vala avanu vepevahaha ifipigo mbefili fyeeapigite, Yesu avalonje vanyigendo vakwe, “Mupulikise hilo nu kwinatila ing’ani isi pakuva Umwana va Umunu ibita kukutawulwa mumawoko ga avanu.” ⁴⁵ Neke avene sivalukagwi ululongwa ulo, lwafihitwe kuvene valalukagula, neke nawo wogopage ukumuwusa ulwa ululongwa ulo. ⁴⁶ Swe vivanga ukwibesa yenani yeava muvina ukulutila avangi mwaavene. ⁴⁷ Nave Yesu peagakagwe amahosa ga inumbula sawo inwe umwana umudodo neke vimase, ⁴⁸ neke avalongele, “Yeyeavesaga akumwanukila umwana uyu mwitawa lyangu nene, akunzanukila nene: na kangi yeyeavesaga akunzanukila nene ava akumwanukila yula yeanumite nene. Pakuva umudodo kwa mbemuli uyo ye muvina yealutye kwa mbemuli.” ⁴⁹ Yohane ipingilike akumutigila, “Mulugu, twamuwene umunu yeihesa amasoka mwitawa lyako, swe tukumutanila, pakuva sitwatwigendanila.” ⁵⁰ Neke Yesu amutigile, “Ulamukanila, pakuva yula umunu yesiakuvabesa nyenye uyo aliulubali ulwenyu.” ⁵¹ Ifilo fyavelige yefihegelye fya Yesu ukubita kuchanya, alamwe ukubita ku Yelusalemu. ⁵² Atumite avanu valongole kuwutalo, nawo swe vibita mbaka kijiji icha Avasamaliya, sambi vamugelanikise apono. ⁵³ Neke avanyang’i sivamwanuchi Yesu, pakuva ealamwe ukubita ku Yelusalemu. ⁵⁴ Na avanyigendo vakwe Yakobo na Yohane vavelige vakuluwona ulo, swe vitigila, “Mutwa wisaka hwehwe tulagise umoto uluhuma kuchanya sambi guvanyanye tipu?” ⁵⁵ Neke umwene avapitukile avakenyele. ⁵⁶ Swe Yesu na avanyigendo vakwe vahesile, vibitaga ku kijiji ikingi. ⁵⁷ Nawo pevabitige mung’asi, umunu uyumwi amutige Yesu, “Nene ngufwata mbekuli kukwe ubita.” ⁵⁸ Neke Yesu atigile, “Ing’eve sina mafinga, na ifidege fina uwusulya, neke Umwana va Umunu mugaya nambi pakulambalika umutwe gwakwe asuupe.” ⁵⁹ Swe akumulongela uyungi, “Ninile.” Neke amutigile, “Mutwa, ndeke tasi mbite ngamutage dada vangu.” ⁶⁰ Neke Yesu amutigile, “Valekage avafwe vavatage avafwe vawo, neke veve bitage ukadalike uwutwa wa Nguluvi.” ⁶¹ Neke uyungi atigile, “Mutwa nene nguninila; ino ndeke tandi ngavilage avali mukaye yangu.” ⁶² Swe Yesu akumutigila, “Umunu yeyeavanzile ukulima neke alave kumbele uyo siavaji kuwutwa wa Nguluvi.”

¹ Savelige silutila iso, neke Umutwa ahagule avangi machumi gimufung’ati na vavili, swe akuvatuma vavili vavili valongole muboma na ifijiji mbefili mwalahosise ukubita yumwene pambele. ² Swe akuvalongela, “Isanga nzolofu, neke avanyakupiga vakefu; lino mumusukage Umutwa va isanga sambi asindike avanyakupiga mu mugunda gwakwe. ³ Lino mubitage kono mulukagulage ukuta nguvatuma nyenye nda ng’olo isibita mukipinga cha ingwami. ⁴ Mulategula kibogolo cha magobole, nambi bogolo nave indatu, mulahungila nambi munu mung’asi. ⁵ Pe mwinje mukaye yeyeyivelaga, mutalage ukutigila, ‘Uwikalakunoga wuvelage mukaye iyi!’ ⁶ Manyi pwali umunu yeawenda uwikalakunoga, uwikalakunoga wenyu wikala nave, neke wone ave asupali uwikalakunoga wuvapilukila nyenye. ⁷ Mwikalage mukaye yiyo mulisage na ukunywa fyevakuvapela, pakuva umunyakupiga ikipigo anoje ukuhombwa amahombo gakwe, mulahama uluhuma ikaye iyi na yila. ⁸ Wone mwingile mu boma yeyeyivesaga neke avanu vavanukile nyenye, mulisage fye vakuvapela. ⁹ Muvaponiage avatamwa vemovali, na muvalongelage avanu, ‘Uwutwa wa Nguluvi ukuta yewuhegelye.’ ¹⁰ Pemwinje muboma yeyeyivesaga neke valemwe ukuvanukila muhegage umo na pemwilutila mung’asi sawo mutigilage: ¹¹ ‘Nalulungundi lwa iboma yenyu ululi mumagulu getu tukuvapunila; neke mulukagulage ulu ukuta uwutwa wa Nguluvi wuhegelye.’ ¹² Nguvalongela, ikimunyi cha ukuhigwa iboma iyo sayihigwa pakomi hilo ukulutila avanu va ku Sodoma! ¹³ “Winalyo veve, Kolasini! Winalyo veve Betisaida! Pakuva imiitu ijo ijapigike kwa nyenye je give gipigike mu Tilo na mu Sidoni, ve vava pesile idaha, na ukufwala amagunila nu kuteng’emala mukifu. ¹⁴ Nambi ndahihyo, ikimunyi cha ukuhigwa nyenye sayihigwa ikiba ukuhigwa kwa iboma sa ku Tilo na ku Sidoni sindawe ukuhigwa kwa nyenye sakuva kukomi wuhulo. ¹⁵ Nayuveve Kapelenaumu wisaka wivinie mbaka kuchanya? Sausulunulwa pasi mbaka kuvafwe!.” ¹⁶ Sweno ndawe atigilige yakuvapulikisa nyenye akumulikisa nene, “Yula yeyeavesaga akuvapulika nyenye akumulika nene, na yeakubihila ukuvanukila nyenye, ibihila ukunzanukila nene. Na yeyeavelage akumbihila ukunzanukila nene ibihila ukumwanukila yula yeanumite.” ¹⁷ Pambele vala avamachumi gimufung’ati na vavili vapilwike we vina luhekelelo vitigila, “Mutwa, na amasoka ginyunyuvala mwitawa lyako.” ¹⁸ Umwene neke atigile, “Ngamuwene Setani isulunuka witigila lung’ali uluhuma kuchanya. ¹⁹ Lavage, ndivapelye ululagi ukulivata inzoka na ingii, na uludali ululutye kwa yula umutavangu, pagaya kinu kangi chekivananga nyenye. ²⁰ Nayilino mulahekelela pakuva amasoka gakuvanyunyuvalila, muhekelelage pakuva amatawa genyu gandikwe kuchanya.” ²¹ Pakivalilo kikila ahekelye mu Muhe Umwelu itigila, “Ngukulumba ve Dada, ve Mutwa va ing’i na kuchanya, pakuva isi uvafihite avanyafigaho nu luhala uvalaje avana. Ena, Dada, pakuva lwakunoje luve ndahihyo.” ²² Neke atigile, “Nene melitwe mbefili na Dada vangu. Asukuli yeamusele Umwana pesi Dada nambi yeamusele Dada pesi Umwana na yeyeavesaga munu ye umwana awendite ukumulagila.” ²³ Neke avapitukile avanyigendo peviyena nu kuvalongela, “Mafunyilile amiho gegilava isi semukusiwona nyenye! ²⁴ Pakuva nguvalongela nachene ukutigila avavisi wolofu na avatwa vadobokige ukusiwona semukusiwona nyenye neke sivasiweni, na ukupulika semwipulika nyenye na sivapuliki.” ²⁵ Wonage, umwigisi uyungi va indagilo iimite akumuwusa Yesu we akumugela, itigila, “Mwigisi, ngitage ndawuli sambi nyale ku wumi wa mbepali?” ²⁶ Neke amuwuse, “Chandikwe kiki mundagilo wakwimba kiki?” ²⁷ Neke amupitule atigile, “Umwendage Nguluvi vako ni numbula yako mbeyili, na umutima gwako mbeguli, na uludali lwako mbeluli, na kwa amahosa gako mbegali, na umwendage umunyafivawo vako ndawe lwe ukwiyenda veve.” ²⁸ Neke Yesu amutigile, “Upitwe wunofu! Gitage ndahihyo nave unana kitasila.” ²⁹ Pakuva umwene asakige uwugolofu wa ukwivangila amuwusise Yesu, “Na umunyafivawo vangu ye nani?” ³⁰ Yesu amupitule, “Epwali umunu uyumwi yeahumige ku Yelusalemu ibita ku Yeliko. Na pe e mung’asi atang’ine na avaposi, swe vakumuwopola imyenda na mbefili nu kumuvayulanga vamulesile asilike. ³¹ Neke yigave umutambisi uyumwi agendele ing’asi yiyo ave akumuwona akwete kulubali. ³² Ndahihyo nayu mulevi, nave avelige ifika pala na ukumuwona akwete kulubali. ³³ Neke Umusamaliya, uyumwi yealimulugendo afikite peeipwali umunu yula nave ave akumuwona, amuwonie ulusungu, ³⁴ swe ihegelela nu kumusopela idifayi na amafuta mumavamba swe, akumuwopela wunofu ndawe amuhofige mu dogovi yakwe akumusindika kukaye ya avagenzi nu kumutamya. ³⁵ Ulwa imilawu yakwe atawe amagobole dinali sivili nu kumupela umunyakaye ya vagenzi itigila, ‘Mutamyage umunu uyu; na chicheutawula ikilutye nguhomba pemilwike.’ ” ³⁶ Wiwona ndawuli, “Veve mwa iwo avadatu, “Yenani yeawonike ulwa munyafivawo va yula yeatofilwe na avaposi?” ³⁷ Neke umwigisi va indagilo atigile, “Yula yeamuwonie ulusungu.”, swe Yesu akumulongela, “Ena, nave gitage ndahihyo.” ³⁸ Na pevali mulugendo viinje mukijiji ikimwi, na umung’inetu uyumwi ilitawa lyakwe Malita amwanuche kukaye yakwe. ³⁹ Malita nave eina mame ilitawa lyakwe Maliya; uyu yalateng’eme pipi na Yesu ipulikisa inzigiso sakwe. ⁴⁰ Neke Malita ali na fipigo fyolofu; swe ibita kwa Yesu na ukumulongela, “Mutwa, siwiwona lubi nda umamangu akundekelesa ndipiga ndiyena? Mulongele anange.” ⁴¹ Swe Umutwa amupitule, “Malita, Malita, witigana na ukufwaha na nzolofu. ⁴² Kinu kimwi swe, ikinoje na Maliya ahagwe ikinu ikinofu, chesisaapokwa na munu.”

¹ Ikimunyi ikimwi, Yesu peifunyige apono apangi ave isinda ukwifunya, uyumwi va avanyigendo vakwe amutige, “Mutwa, twigisage nahwe ukwifunya ndawe lwe Yohane avigise avanyigendo vakwe,” ² Swe Yesu akuvalongela, “Pemukwifunya mutigilage: ‘Ve Dadetu ye Ulikuchanya! Ilitawa lyako lyeswagwe; Uwutwa wako wusage. Uwende wako wupigikage kuchanya Ndawe wewipigika mung’i. ³ Utupelage mbepali ichakulya chetu, ikikwilaniche ni kimunyi. ⁴ Na utudegepelage inzanangifu setu, Pakuva hwehwe nahwe twakumudegepela yeyeatwananje; Na ulatuvika mukugelwa.’ ” ⁵ Swe Yesu avalonje, “Ye nani mwa nyenye yeina munyawiyendi vakwe peamufwatite mwilangali kilo, na ukutigila: ‘Munyawiyendi vangu, nzasimye imikate gidatu, ⁶ pakuva munyawiyendi vangu mugenzi afikite ihuma mulugendo, nane ndimugaya kinu cha ukumupela alye.’ ⁷ Nave peali mukaye kugati ake amupitula atigile: ‘Ulafwahisa nene! Umulyango yegudinzilwe. Hwehwe yetuvasise na avanangu sihwana ukulamuka ngupele!’ ⁸ Nachene nguvalongela nave ake salamuka amupele, uyo munyawiyendi vakwe, neke pakuva uyo umunu igina ukumusuka, yealamuka amupele cheisuka. ⁹ Nane nguvalongela, musukage, nayinyenye mupelwa, musakage, nayinyenye mufiwona, mukong’onage, nayinyenye mudindulilwa. ¹⁰ Pakuva yeyeasukaga akwanukila, na yeisaka afiwona, na yeikong’ona adindulilwa. ¹¹ Dada muki mwa nyenye, umwanakwe peasukite isomba, amupela inzoka? ¹² Nambi peasukite ilikang’a, amupela ingii? ¹³ Pe nyenye, nyevanangifu, mulusele ukuvapela avanenyu ifinu ifinofu. Nachene Dada venyu va kuchanya alutisa pakomi, avapela Umuhe Umwelu vakwe vala avakumusuka.” ¹⁴ Ikimunyi ikimwi, Yesu peahumige ilisoka lyelyelimupelye umunu uyo uwunyakibubwi. Swe lyavelige likumuhuma umunu uyo avanzile ukulonga, na vamalugu vasasave. ¹⁵ Avamwi vitigila, “Aihumya amasoka ikola Belisebuli ilivina lya amasoka.” ¹⁶ Avangi, we vakumugela, vamusakige avalagile ikilagilo uluhuma kuchanya. ¹⁷ Neke umwene we akugakagula amahosa gawo, Swe akuvatigila, “Uwutwa wewuvesaga uwukwilekase wukivala, lwindahihyo na yikaye iyikwilekasa nayo yikivala. ¹⁸ Na wone setani nave alekase uwutwa wakwe, wima ndawuli? Pakuva nyenye mwitigila, ulwa nene ndihumya amasoka ndikola uludali lwa Belisebuli. ¹⁹ Neke wone nene ndihumya amasoka ndikola Belisebuli avanenyu vavihumikisa uludali lwa kiki? Pakuva iwo vevene vesavavahiga nyenye. ²⁰ Neke wone nene ndihumya amasoka ndikola uludali lwa Nguluvi, apo uwutwa wa Nguluvi wuvafiche. ²¹ “Umunu umunyaludali, yeipinyite nu kutegula amahomelo gakwe, nu ukulolela ikaye yakwe, ifinu fyakwe fikala wunofu; ²² Neke umunu umunyaludali ululutye wone amusile amutove nu kumusuuma, uyo amupoka amahomelo gakwe mbegali gahuvilige, pepene peagavasa ifigalule. ²³ Umunu yesalipamwi na nene uyo tusutine, na umunu yesiikong’asa pamwi na nene uyo aitagalisa. ²⁴ “Ilisoka peyelihumite kulumunu, ligendelaga apono apagaya lulenga lisaka apono pawusuupo, pesilipaweni lyalitigila, ‘Milukila kukaye yangu kwengahumite.’ ²⁵ Na pelifikite neke liwone ikaye fyagile nu kuwuyapwa wunofu. ²⁶ Pepene pelyalibita likategulise amasoka gangi gimufung’ati amanangifu ukulutila ilyene, neke gingile nu kwikala umo. Nu munu yula uwunu wakwe wakwanangika ukulutila wa mutalo.” ²⁷ Lwave pealongige ulo, umung’inetu uyumwi mwilugu lya vanu lila ihugite liswi itigila, “Mufunyilile umung’inetu yakweje na ukukoosa!” ²⁸ Neke atigile, “Vafunyilile vala avipulikisa ulukani lwa Nguluvi nu kwinatila.” ²⁹ Avamalugu pevaginige ukongelekela, avanzile ukulonga, “Imbegalo iyi mbegalo mbi, yisaka ikilagilo. Na sisayipelwa ikilagilo pesi ikilagilo cha Yona. ³⁰ Pakuva ndawe Yona,lwee kilagilo ku avanu va ku Ninawi, ndahihyo wesalulava ku Mwana va Umunu nave saava kilagilo ku mbegalo iyi. ³¹ Umung’inetu umutwa uva ku nena saiima ikimunyi cha ukuhigwa imbegalo iyi, nave saavahiga ulwa uwananzi. Pakuva umwene aasile uluhuma kumudugo gwa ing’i apulikise uluhala lwa Solomoni, na ipa pwali umuvina yamulutye Solomoni. ³² Avanu va ku Ninawi savima ikimunyi cha ukuhigwa imbegalo iyi nawo savayihiga ulwa ya wananzi. Pakuva avene vahongise uwimila ukudalika kwa Yona, na ipa pwali umuvina yeamulutye Yona. ³³ “Sipwali umunu yeakwasa itala neke avike apono apasikamu, nambi ukugubikila mukisilo, pesi yayivikwa pachanya paluwumba, sambi avakwingila valuwone ulung’ali. ³⁴ Itala ya umuvili liliho apo iliho lyako pelinofu umuvili gwako mbeguli gwiva mulung’ali; neke wone live silinofu umuvili gwako gwiva mulwisa. ³⁵ Apo mwikomalilage, ulung’ali lwelulimugati umwenyu lulonga luve lwisa. ³⁶ Sweno, wone umuvili gwako mbeguli, gwina lung’ali, neke pagaye nambi apangi panyalwisa, apo umuvili ugo gumalavadika hilo ndawe itala lweyakukung’alikila uwimila ulung’ali lwayo.” ³⁷ Na Yesu pealongige umufalisayo uyumwi amukemelye kukaye yakwe akalye ichakulya, ndawe abitige akwingila iteng’emala pawulilo. ³⁸ Umufalisayo uyo asasave pakuva Yesu alye wesiakalivi tandi. ³⁹ Neke Umutwa amutigile, “Nyenye nye vafalisayo mukofugaga ifinywelo na inyelo mwivala neke mugati mumemile uwuhiisi na uwanangifu. ⁴⁰ Mwivanya lupuva nyenye! Mbi yawuyepe kwivala si yuyula yeawuyepe na mugati? ⁴¹ Lino muvapelage avamikaa ifinu fila ifili mugati, na ifingi mbefili pefiva figolofu kwa nyenye. ⁴² “Neke mwinalyo nye Vafalisayo, pakuva mwitawulaga ifitawulwa ikimwi ku finyichumi, fya ifihatwa, na ilifweni na simboga mbesili kono wesimukwinatila uwugolofu na uwende wa Nguluvi. Lukeluvanogela ukupiga iso tandi, wesikumuleka isingi naso ukwinatila. ⁴³ “Mwinalyo nye Vafalisayo, pakuva mwiwendaga ukuteng’emala kuwulongolo mumasinagogi na ukuhungilwa mu wugulilo.” ⁴⁴ Mwinalyo nyenye, pakuva mwindawe ifyanga fyesifiwoneka, avanu vigendela muchanya wesivakulukagula.” ⁴⁵ Uyumwi va avigisi va indagilo amutige, “Mwigisi, ukulonga iso yeutulisile nayi hwehwe.” ⁴⁶ Neke Yesu atigile, “Mwinalyo nye Vigisi va indagilo, pakuva mwakuvatwika avanu ifitegulo fyesifyawinulo, nyenye wesimwipamisa ifitegulo ifyo nambi na chala hela. ⁴⁷ Mwinalyo nyenye, pakuva mwisengaga ifyanga fya avavisi avawuligwe na avadadenyu. ⁴⁸ Lino mukolelela nu kwiyidikisa ni fipigo fya avadadenyu, pakuva avene vavawulige na nyenye mukuvasengela ifyanga. ⁴⁹ Ino uwimila ulo, Uluhala lwa Nguluvi lwatige: ‘Lavage ndivasindikila avavisi na vigendo, na avamwi vavawulaga nu kuvadaga.’ ⁵⁰ Sambi mu mbegalo iyi, yisakwe idanda mbeyili ya avavisi mbevali yeyitike uluhuma ukugawa kwa ing’i, ⁵¹ uluhuma ukwitwa kwa idanda ya Habeli mbaka idanda ya Sakaliya, yeawuligwe pagati nagati pa itembeli na pifunyo. Ena, nguvalongela ukuta imbegalo iyi yihigwa uwimila ifipigo fyayo ifibi. ⁵² “Mwinalyo nyenye nye vigisi va indagilo, pakuva mufihite ikidindulilo cha ifigaho nayinyenye simwinji na vala vevakwingila mukuvatanila valemwe ukwingila.” ⁵³ Ave ihuma umo, avigisi va indagilo na avafalisayo vavanzile ukumutimbya nu kusovanza sambi alonge nzolofu, ⁵⁴ Vamugwilise vikola ing’ani sakwe.

¹ Ulusika lulo amalugu mbilima mbilima pegakong’ine nu kwilivata avanzile ukuvalongela avanyigendo vakwe tandi, “Mwikomalilage na uwuhahu wa uwubuganisi wa Avafalisayo. ² Ino pagaya lukani ulugubike lwesisalugubulwa nambi ulufihe lwesisalukagulanika. ³ Ino mbesili semwalongige mulwisa sasipulisa pawelu na semwapwepige mwipulikilo lya umunu kugati sasidalikwa mumaking’a ga ikaye. ⁴ “Nani nguvalongela nyenye nye vanyawiyendi vangu: mulawogopa iwo aviwulagaga umuvili, neke valemwe ukupiga ikinu ikingi ikilutye. ⁵ Ino ndivalagila yemuvaje ukumwogopa: mumwogopage yula, peawulige umunu ina uludali lwa ukumusopa mumoto gwa ku kulyoto. Ena, nguvalongela mumwogopage yuyo. ⁶ Ndawuli ifihuna fihanu sifyafigusiwa magobole gavili? Kangi Nguluvi siayikukisemwa nambi kihuna kimwi. ⁷ Na sifwili isa mumitwe jenyu mbalile mbesili. Apo mulonga mogope nyenye mwivanofu ukulutila ifihuna ifyolofu! ⁸ “Nene nguvalongela, yakunzindikila pa vanu, Umwana va Umunu nave saamwidikila umunu uyo pamiho ga vanyivaha va Nguluvi. ⁹ Na yula umunu yeakumbihila pa avanu, uyo saabihilwa pamiho ga vanyivaha va Nguluvi. ¹⁰ “Umunu yeyeavesaga yakumulonga fibi Umwana va Umunu adegepelwa; neke yeakumuliga Umuhe Umwelu sisadegepelwa. ¹¹ “Na pevavasindike nyenye mumasinagogi pamiho ga avavina na avatema, mulahuguvala ukuhosa semulonga na we mugita pakupitula. ¹² Pakuva Umuhe Umwelu avigisa ulusika lulo icha ukulonga.” ¹³ Umunu uyumwi mwilugu amulonje, “Mwigisi, mulongele umunyalukolo vangu angavile ililila lyetu.” ¹⁴ Neke Yesu amulongele, “Ve munu veve, yenani yeambikite nene ndimulamusi kangi mbe ndimugafi va nyenye?” ¹⁵ Neke avalongele, “Mwikomalilage na uwimi, pakuva uwumi wa umunu siwakwimila uwolofu wa ifinu fyeinafyo.” ¹⁶ Neke avalongele ikiganiso itigila: “Umugunda gwa umunu umunono gweguvelike hilo. ¹⁷ Swe ivanga ukwihosa itigila: ‘Ngenza ndawuli? Pakuva ndimugaya pawuviko ifilyo fyangu? ¹⁸ Neke atigile, ngita dee, ndenya ifisande fyangu, nzenge ifingi ifikomi na umo mbika ifilyo fyangu mbefili na fyendinafyo mbefili. ¹⁹ Ipo ndiyilongela inumbula yangu, ve numbula yangu, wina ifinu finofu fyolofu fyewiviche fuka uluhuma imyaka myolofu, lino suupage wilile, winywele, uhekelelage.’ ²⁰ Neke Nguluvi amutigile, ‘Wi mupufi veve! Ikilo iki chaneng’ino visaka inumbula yako; na ifinu fyewiviche fuka fiva fya nani?’ ” ²¹ “We iwali umunu yeakwivikila uwunu wakwe fuka, kumbi mumikaa kwa Nguluvi.” ²² Neke Yesu avalongele vanyigendo vakwe, pa ulo nguvalongela, “Mulahuguvalila iminanile jenyu, ulwa mulya kiki; mufwala kiki. ²³ Pakuva ukunana kulutye ichakulya, na umuvili gulutye imyenda. ²⁴ Muhosage ulwa inyakilumbi, ulwa sisivyalagi nambi kubeta, ngaya fisande nambi wusulya, neke pamwi na lulo Nguluvi akusilisaga. Nyenye mulutye uwunofu kolofu ku fidege! ²⁵ Ye nani mwa nyenye peahuguve ahwanite ukwiyongelesa ulusika lwa uwunani wakwe? ²⁶ Apo wone mwineema na lulo hela uludodo, mbi lino ndawuli mwihuguvalila isingi? ²⁷ Mugahosage amaluva wegagimela. Sigipigagi kipigo nambi kutiva. Nani nguvalongela ulwa nambi yi Solomoni mundolo sakwe mbesili safwikitwi wunofu ndawe ililuva ilyelivesaga. ²⁸ Lino wone Nguluvi akugafwika wunofu amasoli ga mwihala ganamunyi na imilawu gitoswa mumoto, sialutisa ukuvapigila nyenye? Nye nyevanyalufuuwo lukefu! ²⁹ Nyenye mulifwahisa ukwihosa chemulya, nambi chemunywa mulahuguvala. ³⁰ Pakuva iso mbesili se vakwihosaga vesivamuseli Nguluvi, udadenyu alusele ulwa mwiguluma iso. ³¹ Lino mutalage ukusaka uwutwa wa Nguluvi; na iso mbesili muwilwa. ³² “Mulogopa mwe kilugu ikidodo nyenye, pakuva udadenyu awene lunofu ukuvapela uwutwa wula. ³³ Mugusage fyemwinafyo, neke mutawule ifitawulwa. Mwihonelage ifibogolo fyesifisakalagi, mwivikilage ifuka yesiyikepagi kuchanya, apono pesihegelelagi umuhiisi nambi ng’angaga siyikwanangagi. ³⁴ Pakuva pefilipwali ifinu fyenyu baho pesasilava na inumbula senyu. ³⁵ “Muvelage mwipinyite na sitala senyu sivelage sikwaka; ³⁶ nyenye muvelage ndawe avanu vevakumusindila Umutwa vawo yeipiluka uluhuma ku luwungo, sambi peasile nu kukong’ona vangufye ukumudindulila. ³⁷ Vafunyilile avakami vala ve Umutwa vawo avafika valimiho. Umutwa iwopa umukova mukigudi avakemele pawulilo nu kuvapigila. ³⁸ Nambi apiluke mukilo mwilangali, nave pamilawu nu kuvafika wevalimiho, vafunyilile avakami iwo. ³⁹ Neke mulukagulage ulukani ulu, ukutigila umunyakaye ake alukagule ulwa ikivalilo cheasila umuhiisi, ake ava miho na sakalayileka ikaye yakwe yimamulwe. ⁴⁰ Nayi nyenye muvelage miho, pakuva Umwana va Umunu saasa paikivalilo chesimwivaganisa.” ⁴¹ Neke Petulo amutigile, “Mutwa, ngali ikiganiso icho utulonje hwehwe swe twiyena apangi avanu mbevali?” ⁴² Umutwa swe itigila, “Ino ye nani, umukami umuhuvilwa munyaluhala ye avikwa na umutwa vakwe ave muvina va ikaye yakwe avapele avanu ichakulya mu lusika uluhwanite? ⁴³ Mufunyilile umukami yula ye Umutwa vakwe peakusa amufika ipiga ndahihyo. ⁴⁴ Nachene nguvalongela amusagisa mufinu fyakwe mbefili. ⁴⁵ Neke wone umukami yula manyi atigile munumbula yakwe; ‘Umutwa vangu ifuvalila pakusa’, Neke avange ukuvatova avakami avanyidama na vang’inetu, nu kunywa nu kugala, ⁴⁶ Umutwa va umukami uyo asa ikimunyi chesivaganisa na ikivalilo chesiakiseli. Amudumulasa ahume pavili na ukumuvikila uluhombo lwakwe na avatafuuwa. ⁴⁷ Na umukami yula yalasisele sawendige umutwa vakwe, neke alemwe ukupiga siso seemulagile saatowa pakomi hilo. ⁴⁸ Neke yula yesieasiseli, isesimuvaje apige, ipiga isikwambusa ukutowa uyo saatowa padodo. Neke yeyeavesaga mupele ifyolofu kwa uyo safisakwa fyolofu, na umuvisikise ifyolofu kwa uyo safisakwa fyolofu ifilutye. ⁴⁹ “Ndaasile kukukosa umoto, mung’i luke lwinoga hilo wone umoto guke guve yegwakite! ⁵⁰ Ndinawo uwubatiso uwumbaje ndiwanukile, neke ulwene nene nyuguve pakomi mbaka penguwukwisa! ⁵¹ Mbi mwitigila ndaasile mung’i kukuleta uwikalakunoga? Nguvalongela silwidahihyo nda pesi ukuta ndaasile ukuleka avanu vasutane. ⁵² Na uluhuma lino mukaye yimwi muva na vanu vahanu avasutine, avadatu vasutine na avavili, avavili vasutine na avadatu. ⁵³ Udade va umunu vasutana na umwanakwe, umwana asutana na udade, uyuve asutana na umwalive, umwalive asutana na uyuve, uyuvefyala asutana nu mukamwana, na umukamwana asutana na uyuvefyala.” ⁵⁴ Neke Yesu avalongele vamalugu, “Pembe muwonage lifufu limite ulubali lwa kufuka yemwitigila: ‘Indonya yikusa’, nachene lwalwiva ndahihyo. ⁵⁵ Na pembe yipuge iya kunena mwitigilaga, ‘Kuva na mungila’ nachene lwalwiva ndahihyo. ⁵⁶ Mwivabuganisi nyenye kumbi mugisele imigendele ja ing’i nu wulanga mbi lino ndawuli pesi mukulukagula ulwa imisika igi? ⁵⁷ “Mbi ndawuli nyenye mumitima jenyu simwamwihiga isigolwike? ⁵⁸ Ino pemwibitasa na yeakukutosa kulu muhisi, kangalage mung’asi ukwipulika nave, alonga akukwegange mbaka kulumuhisi nave umuhisi akutawule kwa munyigalu sambi akusope mundinde? ⁵⁹ Nguvalongela suhuma umo nda mbaka peyuhombite umukole mbeguli.

¹ Na ulusika lulo vepovali avanu avangi vevamulonje Yesu isa Avagalilaya ve Pilato avawulige pevatawulige inambika sawo. ² Neke Yesu avapitule itigila, “Mwitigila Avagalilaya iwo ve vanyanzanangifu ukulutila Avagalilaya mbevali nambi savafikite iso? ³ Nguvalongela silwindahihyo, nayi nyenye mbemuli pesimupesili muyaga ndahihyo. ⁴ Na kangi vala avanyichumi na vimunana veyavagwilye ikaye inali, ya ku Siloamu, nu kuvawulaga mwitigila vevananzi ukulutila avanu mbevali avikalige mu Yelusalemu? ⁵ Nguvalongela silwindahihyo; nayi nyenye mbemuli pesimupesili muyaga ndahihyo ndawe avene.” ⁶ Swe Yesu akuvalongela ikiganiso iki. “Umunu uyumwi eina mubiki umusombe gwegwemuvyale mumugunda gwakwe gwa imisabibu. Ahele akilava amaveleko neke alemwe ukugawona. ⁷ Neke amulongele umunya kulimilila umugunda gwa imisabibu: ‘Wonage! Ngave we ngusa myaka gidatu ndisaka amaveleko ga umusombe ugu we singwambulila kinu, dumule guhese gukwananga uwunono wa ing’i hela?’ ⁸ Umunyakulimilila ndawe amupitulige: ‘Mulugu tulekele kangi umwaka ugu ndimilile sopa nayi buli. ⁹ Neke wone guveleke amaveleko umwaka umuyago apo luva lunofu, neke wone gulemwe ukuveleka sweno ipo puhwana ukugudumula.’ ” ¹⁰ Ikimunyi ikimwi icha isabato Yesu igisige musinagogi. ¹¹ Ipo epwali umung’inetu ye eina lisoka lya uwuhomefu kwa myaka minyichumi na gimunana nave alaviline sagolokigi nambi. ¹² Yesu avelige akumuwona, amukemelye nu kumutigila, “Yuva, wawulilwe uwuhomefu wako.” ¹³ Swe akumugeleka amawoko gakwe, na ulusika lulo agolwike nu kumulumba Nguluvi. ¹⁴ Swe umuvina va isinagogi ivipa pakuva Yesu alamuponise umunu ikimunyi cha isabato, swe akuvalongela avamalugu, “Kwina filo fimutanda fyefivaje ukupiga ifipigo. Lwinoga musage muponesewe mufilo ifyo si pa ikimunyi cha isabato nda.” ¹⁵ Neke Umutwa apitule atigile, “Nyenye nye vabuganisi! Ye nani yeyeavesaga mwanyenye yesiadindulila isenga yakwe nave idogovi yakwe uluhuma mwigagala pa ikimunyi cha isabato aisindike kukunywa? ¹⁶ Ipa pwali umwalive va Abulahamu yapinzilwe na setani myaka minyichumi na gimunana, silukeluvaji awulilwe uwuhomefu uwu pa kimunyi cha isabato?” ¹⁷ Ave ilonga isi, swe vala avamubesige vihongelwa inyoni, neke avamalugu vahekelye uwimila ing’ani mbesili sinyandolo isesipigitwe. ¹⁸ Neke pealonge, “Uwutwa wa Nguluvi wihwana na kiki? Nane ndiwuhwananise na kiki? ¹⁹ Wihwana inyadikwa iya umuhaladali yeategwe umunu nu kutoosa mumugunda gwakwe; neke yimele yigunge guve mubiki, na ifidege fyamwihala neke fisenge uwusulya mumatagala.” ²⁰ Neke awile ulwa kavili: “Ndiwuhwananise na kiki Uwutwa wa Nguluvi? ²¹ Wihwana na uwuhahu weategwe umung’inetu neke asope muwuse wa liteneka limwi neke pewutupile ng’ani.” ²² Nave Yesu alutilige muboma na mufijiji we akwigisa peibita ku Yelusalemu. ²³ Neke umunu uyumwi amuwuse, “Ndawuli, Mutwa vala avanu avapokwa vakefu?” ²⁴ Swe akuvalongela, “Mkangalage pakwingila mu mulyango umufinyu; pakuva nguvalongela wolofu savasaka ukwingila neke valemwe. ²⁵ Ulusika salusa “Pesaima umunyakaye nu kudinda umulyango. Nyenye samulava mwimile pivala mwikong’ona umulyango mwitigila: ‘Mutwa, tudindulile.’ Umwene saavapitula nu kutigila, ‘Sindivaseli kwemwihuma kwi.’ ²⁶ Pepene pesamuvanga ukutigila, ‘Twalisige na ukunywa pa miho gako; na wigisige mung’asi setu.’ ²⁷ Nave saatigila, ‘Nguvalongela sindivaseli kwemwihuma; muhege ipa kwa nene mbemuli nye vanyanzanangifu.’ ²⁸ Pepene pesakuva ni kivembo nu kugelesula amino, pesamumuwona Abulahamu na Isaki na Yakobo na avavisi mbevali muwutwa wa Nguluvi, neke nyenye we mulikwivala! ²⁹ Na avanu savaasa uluhuma kumihago na kufuka, uluhuma kunena na kusika nu kuteng’emala pawulilo ku wutwa wa Nguluvi. ³⁰ Lavage avamumbele savalava valongola na avalongola savalava va mumbele.” ³¹ Ikivalilo kikila Avafalisayo avamwi vahele nu kumulongela, “Hege ipa ubite ukungi, pakuva Helodi isaka akuwulage veve.” ³² Swe Yesu akuvalongela, “Mubitage mukamulongele yula ng’eve, ‘Lavage, namunyi na imilawu ndihumya amasoka na ukuponia avatamwa, ikimunyi cha wudatu pendikwisa ifipigo fyangu.’ ³³ Nambi ndahihyo lumbaje ukusugunala mung’asi yangu, namunyi, na imilawu na kangi pawucha; pakuva silunoji umuvisi afwile kwivala ya i Yelusalemu. ³⁴ “Be ve Yelusalemu, Yelusalemu! Yewawiwulaga avavisi nu kuvakinya na maganga avatume kwa veve! Kalinga ngawendige ukuvakong’asa avanako, ndawe ing’uku lweyayikong’asa ifiswiya fyakwe mumapiko, neke siwawenditi. ³⁵ Lavage, ikaye ya Nguluvi vako yilekwa. Nani, nguvalongela nachene sisamumbona kangi nda mbaka pesamutigila: ‘Mufunyilile uyo yakusa mwitawa lya umutwa.’ ”

¹ Ikimunyi ikingi cha isabato, Yesu inje ukulya ichakulya, mukaye ya uyumwi va avavina va avafalisayo, avanu avebaho vavanzile ukumusigamila. ² Peeipwali Yesu epwali umunu umutamwa uwutamwa wa kutuna umuvili. ³ Neke Yesu avawuse avigisi va indagilo na avafalisayo, “Ndawuli lugolofu ukuponia ikimunyi cha isabato apangi nda?” ⁴ Swe avene vikatuka. Ndawe Yesu amwibatige uyo umutamwa nu kumuponia swe akumutawula ibitilage. ⁵ Neke avatigile, “Ye nani mwa nyenye yeina umwanakwe nave senga yakwe peyigwilye mukisima yesiake aihumya nambi mukimunyi icha isabato?” ⁶ Nawo sivigeli ukumupitula ulukani ulo. ⁷ Neke Yesu peavalongele ikiganiso icha vala avali valaalike, lwevevahagwe ifigoda fya kuwulongolo itigila, ⁸ “Pulaalikwe nu munu kuluwungo ulateng’emala ku kigoda icha kuwulongolo, apamwi alonga ave pwali umunu umulaalike umutambule ukulutila veve, ⁹ Neke pease umunyakuvalaalika veve nu mwene akutigile, ‘Mulekele uyu!’ Pepene puvanga ni nyoni ukupiluka kumbele ukateng’emale. ¹⁰ Apo pulaalikwe teng’emalage kumbele sambi peasile umunyakuvalaalika akutigile, ‘Munyawiyendi vangu, wuse kono kuwutalo kono, pepene puva na indolo pa avalaalike avayago.’ ¹¹ Pakuva yula yeyeavesaga akwilevesa apelwa ululumbo.” ¹² Neke amulongele yula yealamulaalike, “Putelike ichakulya cha pamunyi nave cha pamihye, ulakemela avanyawiyendi vako, nave vanyalukolo vako, nave avanono, valonga vakulaalike nave sambi uve uhombitwe kwa lula lweuvapije. ¹³ Apo putelike ichakulya kemelage avamikaa, avalema, avatevafu, avabofu, ¹⁴ apo pepene pupelwa uwufunyilile, pakuva iwo vihela chevakuhomba. Ipo pepene pe Nguluvi saakupela uluhombo lwako, ulusika lwe avanu vagolofu pevisilibuka.” ¹⁵ Avelige ipulika iso uyumwi va vala avevateng’eme pamwi na Yesu pawulilo amulonje akumutigila, “Mufunyilile yula yesaalya ikilyo muwutwa wa Nguluvi.” ¹⁶ Swe Yesu akumulongela, “Umunu uyumwi alatelike ifyakulya fyolofu nu kulaalika avanu wolofu. ¹⁷ Ndawe amutumige umukami vakwe, pakivalilo icha ichakulya avevalaalike ukutigila musage pakuva ifilyo mbefili figelanise. ¹⁸ Mbevali swe vivanga ukubihilila ng’ani: ‘Uva kutala amulonje ngusile mugunda ndibita kukulava ndisuka undegepele.’ ¹⁹ Uyumwi swe itigila: ‘Ngusile isenga sinyichumi isa kulima ndibita ngasigele; ngukusuka undegepele.’ ²⁰ Uyumwi neke atigile: ‘Negwe umung’inetu pa ulo sinzusa.’ ²¹ Swe umukami yula swe apilwike, nu kumulongela mbesili umuvina vakwe. Swe umunyakaye yula ivipa, nu kumulongela umukami vakwe: ‘Hume wangufye bite mumakasi na mumikuya ja muboma, kavalaalike ipa avamikaa, avalema, avabofu na avatevafu.’ ²² Umukami neke atigile: ‘Mulugu, iso mbesili sulonzile yesipigike, neke ulwene na ikaye peyina kilega.’ ²³ Neke Umuvina amulongele umukami, ‘Hume kwivala bite mumakasi na mumbali, ukavagongolese vingile sambi ikaye yangu yimeme. ²⁴ Pakuva nguvalongela ukutigila mwavala avake valaalike, asupali nambi yumwi yesagesa ikilyo changu.’ ” ²⁵ Avamalugu pevamufwatige Yesu swe akuvapitukila akuvalongela, ²⁶ “Wone umunu ase kwa nene nave wesakumuvipila udade, nayu yuve, nayu vakwe, na vanakwe, vanyalukolo na vahase, ena nagumutima gwakwe, sahwana ukuva munyigendo vangu. ²⁷ Umunu yeyeavesaga yesitegula umusalaba gwakwe na ukuninila sahwana ukuva munyigendo vangu. ²⁸ Pakuva ye nani mwa nyenye peisaka pakusenga ikaye inali, yesiaitala tandi ukuvalila ifya ukusengela ulwa inafyo mbaka peisinda ukusenga? ²⁹ Alonga alemwe ukusinda kono we yeasenzile na lutu, neke mbevali vavange ukumubedala ³⁰ vitigila: ‘Umunu uyu akala kavanzile ukusenga, neke ave mugaya ludali lwa ukusindilisa.’ ³¹ “Kangi kwina mutema muki, peisaka abite kukwihoma na umutema uyungi, yesiitalagi tandi ukwihosa. Umwene ina vanyigalu mbilima nyichumi wone ahwana ukwihoma na yula yeina vanyigalu mbilima machumi gavili? ³² Manyi awone sahwana, atuma lukani isaka vilamule na umunu yula wepe ali pataali. ³³ Ndawe Yesu asindilisige itigila, “Yeyeavesaga mwanyenye, yesakufileka mbefili fyeinafyo, sahwana ukuva munyigendo vangu.” ³⁴ “Umwino kinu kinofu, neke umwino peguhupite gusopwa kiki gunone? ³⁵ Sigwinogela ing’i nambi buli, avanu vitagaga kwivala. Umunyamapulikilo gakupulikila apulikage!”

¹ Neke ikimunyi ikimwi, avakong’asa imbemenenge wolofu na vanyanzanangifu vahegelye kulumwene vamupulikise. ² Avafalisayo na Avigisi va indagilo vilonganzige vitigila: “Umunu uyu! Aikemela vanyanzanangifu, kangi ailya nawo.” ³ Neke avalongele ikiganiso iki itigila: ⁴ “Ye nani mwa nyenye umunyang’olo ligana, peayasilwe na iyimwi yesiakusileka sila machumi gigonza na nyigonza mwihala, abite akisaka yila iyiyasile mbaka pakuyiwona. ⁵ Nave peayiwene, ayipika mumavega gakwe nu kuhekelela. ⁶ Na pafikite kukaye yakwe, akemela avanyawiyendi vakwe na avanyapafivawo vakwe nu kuvalongela, ‘Muhekelelage pamwi na nene, pakuva yendiyiwene ing’olo yangu yeyikeyiyasile.’ ⁷ Nguvalongela, kuva na luhekelelo ndahihyo, uwimila munyanzanangifu yumwi yeihongesa. Sindawe vala avanu machumi gigonza na vigonza avakwitigila avene vagolofu siviguluma ulwa ukuhongesa. ⁸ “Kangi kwina mung’inetu muki umunya amagobole ganyichumi, peayasilwe na ilimwi yesiaikunga ulung’ali nu kufyagila ikaye weakalalye na ukolela mbaka pakuyiwona? ⁹ Na peayiwene, akemela avanyawiyendi vakwe na avanyapafivawo vakwe nu kuvalongela, ‘Muhekelelage pamwi na nene, pakuva ndiliwene kangi iligobole lila lyelike likayasile.’ ¹⁰ Nguvalongela kwina luhekelelo pamiho ga vanyivaha va Nguluvi uwimila munyanzanangifu yumwi yeihongesa.” ¹¹ Yesu ave pealonga, “umunu eina vana vavili. ¹² Ndawe umudodo amulongelige udade, ‘Dada, ngavile ililila lyangu.’ Swe akuvagavila ifinu fyakwe. ¹³ Pave pilutila filo fikefu, umudodo yula akong’ise mbefili, nu kubita kung’i ya kutaali, uko atagalise uwunono wakwe mu uwudobokesi. ¹⁴ Avelige isinda mbefili swe ikinge ikikomi kigwa mung’i yila, ndawe avangige nave ukuguluma. ¹⁵ Neke peivisise kulu munyang’i uyumwi mung’i yila, nave swe akumusindika kumugunda gwakwe kweakwamilige ingubi. ¹⁶ Avanzile ukudoboka ukulya amabandi gesalisige ingubi kangi siepwali munu yamupelige kinu. ¹⁷ Ave isokama munumbula yakwe atige: ‘Vakami valinga va dada vangu avilya ichakulya nu kusigasa, na nene ipa ndifwa ni nzala? ¹⁸ Nyega, mbita kwa dada vangu nu kumulongela: Dada, ndimwananje Nguluvi na veve. ¹⁹ Sipenywana kangi ukukemelwa ndimwanako, mbelage hela ndawe avakami vako.’ ²⁰ Swe ihega nu kubita kulu dade. Wepe alipataali udade, amuwene, nu kumuwonela ulusungu swe akumukimbilila akumukumbatila neke amunonele hilo. ²¹ “Umwana yula swe akumutigila: ‘Dada, nzananzile kuchanya na pamiho gako, sipenywana ukukemelwa ndimwanako kangi.’ ²² Neke udade avalongele avakami vakwe: ‘Mulete mwangufye umwenda umunofu mumufwike! nayi nyamwidole na sindatu munzaho. ²³ Mukalete isenga ineganifu indutu mudumule tulye tuhekelele! ²⁴ Pakuva umwanangu uyu ake akafwe, nave asilibwike ake akayasile nave awonike.’ Swe vivanga ukuheya. ²⁵ “Lino umwanakwe yula umuvina ali ku mugunda. Na peasige ave ihegelela pipi na ikaye apulike amaswi ga inzimbo nu luheyo. ²⁶ Ndawe amukemelige umukami uyumwi nu kumuwusa,: ‘Ing’ani isi kwekutigila kiki?’ ²⁷ Swe akumulongela: ‘Umwanakwenyu asile na udado amudumulye isenga ineganifu indutu pakuva amuwene kangi wepe mumi.’ ²⁸ Swe ivipa, ibihila na kwingila. Ndawe udade ahumige kwivala nu kumugongola. ²⁹ Swe akumutigila udade, ‘Wonage ngupije imyaka gilinga igi sindilakwanangila nambi lukani lumwi, nave nambi kimunyi kingi sulandumulila nambi chana cha mene nane nyekelele na avanyawiyendi vangu! ³⁰ Lino peasile uyu umwanako yeakalye ifinu fyako pamwi na avang’inetu avalyalya umudumulye isenga ineganifu indutu.’ ³¹ Neke pamulongele: ‘Mwanangu, veve ulipamwi na nene mbepali na mbefili fye ndinafyo fyako. ³² Kangi, ukuhekelela nu kuheya luke luvaje pakuva uyu umwanakwenyu ake akafwe, nave asilibwike ake akayasile, nave awonike.’ ”

¹ Yesu avalonje avanyigendo vakwe, “Epwali umunu uyumwi umunono yeeina umwimilisi vakwe. Umwimilisi uyo emusongele kulumwene ukuta aitagalisa ifinu fyakwe. ² Ndawe amukemelige nu kumutigila: ‘Ng’ani sa kinyandawuli isi sendipulika kwa veve valile ifya uwimilisi wako? Pakuva suva kangi wi mwimilisi’ ³ Umwimilisi yula swe itigila munumbula yakwe: ‘Ngitage ndawuli? Pakuva umuvina vangu yeakunyesekesa uwimilisi; ukulima sinywana, ukusuka ngwiwona inyoni. ⁴ Ndilukagula lwe miga, sambi penyesile muwimilisi, vang’emele mukaye sawo.’ ⁵ Ndawe avakemelige yumwi yumwi vala avanyamikole va umuvina vakwe, akumulongela uva kutala: ‘Wina mukole muki kulu muvina vangu?’ ⁶ Neke atigile: ‘Mapipa ligana ga mafuta ga wuto.’ Swe akumutigila: ‘Wangufye utegule ichandikilo teng’emale wandike machumi gahanu.’ ⁷ Uyungi: ‘Nave wina mukole gwa kiki?’ Ndawe amulongelige itigila: ‘Magunila ligana ga ingano.’ Swe akumulongela: ‘Wangufye utegule ichandikilo wandike machumi gimunana.’ ⁸ “Ndawe umuvina yula amusumilige umwimilisi yula yesimuhuvilwa, uwimila palula lweapigite kwa luhala. Pakuva avana va mung’i mumbegalo yawo vaviva vina luhala ukulutila avana va ulung’ali.” ⁹ Nani nguvalongela, “Mwisakilage avanyawiyendi venyu uwimila ifinu fya mung’i, sambi pefisisile vavanukile muwikalo wa mbepali. ¹⁰ Yeyeavesaga muhuvilwa mufinu fidodo ava muhuvilwa mufinu ifikomi, yeyeavesaga simuhuvilwa mufinu ifidodo sisa ava muhuvilwa mufinu ifikomi. ¹¹ Wone lino nyenye muve simwihuvilwa mufinu ifibi ifya mung’i, ye nani yeavavisikisa ifinu ifya nachene? ¹² Wone nyenye simwivahuvilwa mu finu ifya umunu yungi, ye nani yeavavisikisa ifinu ifyenyu yinyenye? ¹³ “Sikwali umukami yeahwana ukupigila avavina vavili, pakuva yeamuvipigila uyu nu kumwenda uyu, apangi amufuuwa uyu nu kumubedala uyu. Simuhwana ukumupila Nguluvi na uwunono. ¹⁴ Swe Avafalisayo aviwendaga amagobole vapulike iso mbesili neke vamubedale Yesu. ¹⁵ Swe akuvalongela, “Nyenye ye nyenye yemwakisakila uwugolofu pamiho ga vanu, neke Nguluvi avasele munumbula senyu, pakuva ulutambule pa avanu luvifyo pa Nguluvi. ¹⁶ “Indagilo na uwandike wa avavisi fyepofili mbaka ulusika lwa Yohane. Uluhuma ipo Ulukani Ulunofu lwa uwutwa wa Nguluvi lwidalikwa, na yeyeakwingila akwingila kwa ludali. ¹⁷ Neke lupefu hilo ililanga na ing’i ukulutila, neke silupefu ukuyaga nambi wandike wudodo wa Indagilo. ¹⁸ “Yeyeamulekaga uvakwe na ukutegula umung’inetu uyungi, uyo iva mugoni nave yakumutegula umung’inetu yealesilwe nave iva mugoni. ¹⁹ Neke Yesu atigile, “Epwali umunu uyumwi umunono, yeafwalige imyenda iminyakilesi, na imyenda ja uwutwa na ukulya ifinono mbepali. ²⁰ Na umumikaa uyumwi ilitawa lyakwe Lasalo, avikigwe pakinyamulyango pakwe, yee ina fikong’o umuvili mbeguli, ²¹ nave adobokige apelwe uwuwuluwulu wewagwisige pawulilo wa umunono, na imbwa saasige sikumunava ifikong’o fyakwe! ²² “Neke umumikaa yula afwe, ndawe vamutegulige vanyivaha va Nguluvi mbaka pa Abulahamu. Nave umunono swe ifwa nu kutagwa. ²³ Ino kuvafwe peiteseka ave ilava amuwene Abulahamu, kwa pataali na Lasalo valipamwi. ²⁴ Swe, ivemba weitigila: ‘Dada ve Abulahamu, undegepele, umutume Lasalo asabike ichala chakwe mululenga sambi adegefye ululimi lwangu, pakuva nditeseka mumoto ugu.’ ²⁵ Abulahamu neke amutigile: ‘Mwanangu, wiwukage ukutigila veve wanuchee ifinu ifinofu fyako pa wumi wako, nayi Lasalo eina luteseko ndahihyo. Na lino umwene ali ipa isikimikwa na veve wipuma. ²⁶ Pamwi na iso, pagati nagati pa hwehwe na nyenye pina likombo ilihelesa, sambi vevisaka ukusa kwa nyeye uluhuma kono valemwe, na avisaka ukuhuma ukwenyu vaase kwa hwehwe valemwe.’ ²⁷ Yula yee munono neke atigile, ‘Apo kuku ngukusuka umutume abite kukaye ya dada vangu, ²⁸ pakuva ndina vanakwetu vahanu, sambi avapavile valonga vaase nawo apono ipa paluteseko.’ ²⁹ Neke Abulahamu atigile: ‘Vinawo Musa na avavisi; vavapulikage vawo.’ ³⁰ Neke patigile: ‘Ndala, dada Abulahamu, peahele umunu yahumile kono kuvafwe vapela.’ ³¹ Neke amutigile: ‘pesivavapuliki Musa na avavisi, sisavapulika nambi umunu asilibwike uluhuma kuvafwe, sivafuuwa nangi.’ ”

¹ Neke Yesu pavalongele avanyigendo vakwe, “Ifikuvaso ye fyusa, ifileta inzanangifu, neke inalyo umunu yula yeakwambusa. ² Luke lumunogela hilo umunu uyo apingilisiwe ulwala musingo yakwe nu kutooswa mubahali pakuva silwinoga ukumuyasa uyumwi va avadodo iva. ³ Mwikomalilage! Wone umunyalukolo vako akwananje mulonzage pahongise mudegepelage. ⁴ Na wone akwanangile kimufung’ati mu kimunyi kimwi, na wone ave peakusila veve ihongesaga itigila, ‘Nyongise’ mudegepelage.” ⁵ Neke avigendo vamulongele, “Mutwa! Tuwilage ulufuuwo.” ⁶ Neke Umutwa atigile, “Muke muvelage na ulufuuwo ludodo ndawe ulupeke lwa umubiki umuhaladali muke mugulongela umusombe ugu, ‘Kimuke ukilembeke mu bahali’, nago guke guvapulika. ⁷ “Apangi tutigile uyumwi ina mukami yeali kukulima, nambi kukukwamila ing’olo, lwindawuli peapilwike, ukuhuma ku mugunda, amutigile umukami yuyo, ‘Wuse ndawe de ulye ichakulya?’ ⁸ Nda! Pesiamutigila, ‘gelanikisage ichakulya ndye, wipinyage umigile mbaka peyendye na ukunywa, pepene nave peulya na ukunywa.’ ⁹ Samulumba umukami pakuva apigite mbesili seake mulagile? ¹⁰ Ena, na nyenye ndahihyo, peyemupigite mbesili semuke mwivalagile, mutigilage, ‘Hwehwe twivakami hela yetwivagaya cha ukwambula, tukwisise hela isesituvaje ukupiga.’ ” ¹¹ Yesu peali mung’asi ibita ku Yelusalemu, alutilige mung’i ya mu Samaliya na mu Galilaya. ¹² Na peingilige mukijiji ikimwi, atang’ine na avanu vanyichumi avanyauwukoma swe vakwima pataali. ¹³ Swe vikoola vitigila, “Yesu ve Mutwa, ve mulugu tuwonelage ulusungu.” ¹⁴ Avelige akuvawona avalonje, “Mubitage mukilagile kuvatambisi.” Lwave pevibita vesile viva vaponite. ¹⁵ Na uyumwi va vawo avelige akwiwona ukuta aponite, apilwike kono wakumulumba Nguluvi we ilongela pachanya. ¹⁶ Swe akwitoosa pasi kinyalileme pa magulu ga Yesu, we akumulumba umunu uyo e Musamaliya. ¹⁷ Ndawe Yesu apitulige itigila, “Ngali sivaponiti vanyichumi? Ngali vala avigonza valikwiyaga? ¹⁸ Ngali sawoniki uyungi yapilwike na ukumulumba Nguluvi, pesi yuyu hela umugenzi?” ¹⁹ Swe ndawe amulongelige, “Lamuke, wibitilage, ulufuuwo lwako lukuponise.” ²⁰ Ulusika ulungi Avafalisayo vamuwusise Yesu ukutigila, “Uwutwa wa Nguluvi wusa panili?” Avapitwe nu kuvalongela, “Uwutwa wa Nguluvi Siwuusa ukukola ifilagilo kwa kuwugosagosa. ²¹ Na sisavalonga ukutigila, ‘Lave uwu kono’, nambi, ‘Kula’. Pakuva nachene mulukagulage ukuta, uwutwa wa Nguluvi wuli pagati nagati pa nyenye.” ²² Neke avalongele avanyigendo, “Ifilo fyusa pesamudoboka ukukiwona ikimunyi cha Umwana va Umunu, neke sisamukiwona nambi. ²³ Kangi avanu valavalongela, ‘Mulave kula’ apangi ‘Mulave kono’; mulahega pemwipwali nambi kuvafwata. ²⁴ Pakuva ndawe ilimemi lwe lyaling’alika kwilanga ulubali ulungi mbaka uluyalo wesalulava ikimunyi cha Umwana va Umunu. ²⁵ Neke pesilulava ulo lumuvaje tandi ateseke pakomi na ukubihilwa na imbegalo iyi. ²⁶ Na ndawe we lwelwiwali pa filo fya Noha, wesalulava mufilo fya Umwana va Umunu. ²⁷ Valisige na ukunywa, vategulige nu kugomwa, mbaka ikimunyi kila Noha che ingilye mukipugu, ing’uka swe yikusa na ukuvasinda mbevali. ²⁸ Salulava ndawe mumisika ja Loti. Avanu vavelige mukulya na mukunywa, ukugula na ukugusa, ukuvyala inyadikwa na ukusenga. ²⁹ Neke ikimunyi kila Loti cheaheje ku Sodoma, gwasile umoto gwa ulupegeho uluhuma kuchanya na ukuvasinda mbevali. ³⁰ Ulo lwesalulava ikimunyi kila chesaawonekela Umwana va Umunu. ³¹ “Ikimunyi kila, yali mwiking’a, aliika ukwingila mukaye ategule ifinu fyakwe. Lwindahihyo, na yula yali kumugunda alapiluka kumbele. ³² Mwiwukage isamufikite umukina Loti. ³³ Umunu yeyeavesaga yeisaka ukuwupoka uwumi wakwe, uyo awuyasa; na yula yeyeavesaga yeisaka ukuwuyasa uwumi wakwe uyo awupoka. ³⁴ Nguvalongela, pakilo avanu vavili savalava vavasise muwuhaga wumwi; uyumwi saategulwa na uyumwi saalekwa. ³⁵ Avang’inetu vavili savalava vihalula pamwi; uyumwi saategulwa, na uyumwi saalekwa. [ ³⁶ “Avanu vavili savalava kumugunda, uyumwi saategulwa, uyumwi saalekwa.”] ³⁷ Swe vipitula vakumuwusa, “Kwiyaga Mutwa?” Swe akuvalongela, “Pala pepogoli umufimba, pepene pesikong’onaga imbungu.”

¹ Neke Yesu avalongele ikiganiso, ulwa luvavaje ukumusuka Nguluvi ifilo mbefili, na muladedela imitima. ² Neke atigile “Epwali umuhisi uyumwi mu boma yee mugaya choga kwa Nguluvi nambi ukutuga vanu. ³ Na mu boma yiyo epwali umung’inetu mufwile, yamufwatige mbepali, itigila, utuhigage nene na umutavangu vangu. ⁴ Pamwandi abihye, neke pambele ihosise munumbula yakwe itigila, ‘Nambi we singumogopa Nguluvi nambi ukutuga munu, ⁵ neke lino pakuva umufwile uyu akufwahisa, ndimuhigila inongwa yakwe alonga afwahisage mbepali ukunzusila muhongi.’ ” ⁶ Na Umutwa atigee, “Mupulikisage cheilonga umuhisi umugaya choga. ⁷ Ngali mwitigila Nguluvi savakundilila avahagule vakwe avakumuvembela ikilo na ikimunyi? Ngali mwitigila ahaava ukuvakundilila? ⁸ Nguvalongela sisaahava ukuvakundilila. Neke ulwene nambi ndahihyo, ndawuli peyeasila mung’i Umwana va Umunu, saalufika ulufuuwo mung’i!?” ⁹ Neke Yesu avalongele ikiganiso iki cha avanu avanya lwitupyo ukuta awene vakwiwonaga vagolofu na ukuvabedala avangi mbevali. ¹⁰ “Avanu vavili vahele ku tembeli kukwifunya: uyumwi Mufalisayo uvakavili Mukong’asa imbemenenge. ¹¹ Umufalisayo yula imite ivanga ukwifunya kinyele munumbula yakwe itigila, ‘Nguluvi, ngukulumba pakuva nene sindindawe avanu avangi avaposi, avagaya ulufuuwo, avagoni, nambi ndawe uyu umukong’asa imbemenenge. ¹² Nene ndakwiyima ukulya filo fivili mufilo ifimufung’ati, ndatwitawula ifitawulwa kimwi kwa finyichumi mufinu fyangu mbefili. ¹³ Neke yula umukong’asa imbemenenge, imite pataali na sigelii nambi ukukang’ula amiho kuchanya, ndawe atigilige, ‘Nguluvi, ndegepelage nene ndemunyanzanangifu.’ ¹⁴ Nguvalongela, uyu apilwike ibita ukwawo we adegepilwe, ukulutila yula. Pakuva yeyeitupyaga aleveswa yeyeilevesaga uyo akung’umikwa pachanya.” ¹⁵ Neke avanu vamuletele Yesu avana fyali sambi avageleke amawoko. Neke avanyigendo vakwe pevaluwene ulo vavakenyele. ¹⁶ Neke Yesu avakemele vase kulumwene, itigila; “Muvalekage avana avadodo vase kwa nene, mulavatanila, pakuva avanu avindawe iwo uwutwa wa Nguluvi wawo. ¹⁷ Nachene nguvalongela, umunu yeyeavesaga yesiakwanukila uwutwa wa Nguluvi ndawe umwana umudodo sisaingila.” ¹⁸ Umunu uyumwi umutema va Avayudaya, amuwusise Yesu itigila, “Mwigisi ve munofu, ngitage ndawuli pa kuhala uwumi wa mbepali?” ¹⁹ Neke Yesu amutigile, “Mbi ndawuli ukunigila ndimunofu? Asukuli umunofu pesi yumwi hela, nave ye Nguluvi. ²⁰ Usisele Indagilo: ‘Ulava mugoni; ulawulaga, ulahisa, ulolelela uwudesi; velage na choga kulu dado na uyuwo.’ ” ²¹ Neke umwene atigile, “Iso mbesili ndisisele uluhuma pa wana wangu.” ²² Yesu avelige ipulika iso amulonje, “Peupugilwe kinu kimwi, kaguse fyewinafyo mbefili ukavagavile avamikaa, nave uva na uwunono kuchanya, neke pewuse uninile.” ²³ Neke umwene ave ipulika iso ahuguve pakomi, pakuva e munono hilo. ²⁴ Yesu we peamulavila atigee, “Lutalamu vee kuvanono ukwingila ku wutwa wa Nguluvi! ²⁵ Pakuva lwiva lupefu ingamiya pakulutila mukidwi icha ulusingi, sindawe umunu umunono pakwingila mu wutwa wa Nguluvi.” ²⁶ Na avapulike vatigee, “Mbi apo ye nani, yeahwanite ukupokwa?” ²⁷ Yesu atigile, “Lwesiluhwaniti ku avanu kwa Nguluvi luhwanite.” ²⁸ Petulo neke atigile, “Wonage hwehwe tufilesile ifinu fyetu mbefili na ukukuninila!” ²⁹ Swe akuvalongela, “Nachene nguvalongela, asukuli umunu yeayilesile ikaye, nambi uvakwe, nambi munyalukolo, nambi avegasi, nambi vana, wimila uwutwa wa Nguluvi, ³⁰ yesisaanukila kolofu ukulutila ulwa lino; na mung’i iyikusa uwumi wa mbepali.” ³¹ Swe Yesu akuvategula vala avanyichumi na vavili, nu kuvalongela, “Muwonage! Twigang’amuka ukubita ku Yelusalemu, na ing’ani mbesili sikwila, seandikilwe Umwana va Umunu na avavisi. ³² Pakuva atawulwa mumawoko ga avamyanza umo elangwa, apigilwa imbi, afunyilwa amati. ³³ Nawo vamutova ni mikungo iminyamifwa, pambele vamuwulaga, na ikimunyi icha wudatu asilibuka.” ³⁴ Neke avene sivalukagwi ulo nambi ludodo, vevafihe iso kwekutigila kiki, na sivasikagwi isesilonzilwe. ³⁵ Lwave Yesu peahegelye ku Yeliko, umunu uyumwi umubofu alateng’eme palubali pang’asi isuka ifitawulwa. ³⁶ Na avelige ipulika avamalugu pevilutila awusise, “Kwina kiki?” ³⁷ Neke vamulongele, “Yesu uva ku Nasaleti ilutila.” ³⁸ Swe iyova weitigila, “Yesu ve mwana va Daudi, umbonelage ulusungu nene!” ³⁹ Ndawe vala veve valongwe vamukenyelige sambi akatuke, neke umwene peagine hilo ukuyova: “Be mwana va Daudi umbonelage ulusungu nene.” ⁴⁰ Swe Yesu akwima, nu kulagisa vamulete kulumwene. Na peahegelye amuwusise, ⁴¹ “Wisaka ngupigile kiki?” Swe itigila, “Mutwa, ndisaka ukulava.” ⁴² Ndawe Yesu amutigilige, “Upelwage ukulava! Ulufuuwo lwako lukuponise.” ⁴³ Lulusika lulo swe ilava, nu kumufwata, kono we akumulumba Nguluvi. Na avanu mbevali pevasiwene iso vamusumye Nguluvi.

¹ Nave Yesu inje mu Yeliko, na pealutilige, ² umo e mwali umunu, ilitawa lyakwe Sakayo. Yee yumwi va avavina va avakong’asa imbemenenge nave e munono. ³ Uyu asakige ukumuwona Yesu ulwa munu va kinyandawuli, neke alemwage pakuva avanu ve wolofu nave e mufupi. ⁴ Swe akwangufya ilongola asakwilila mu musombe sambi amuwone, pakuva alukagulige ulwa agendela ing’asi yiyila. ⁵ Nave Yesu ave ifika apono pala, alafile kuchanya nu kumulongela, “Sakayo wangufye wike, pakuva namunyi de lumbaje ukuhwa mukaye yako.” ⁶ Swe akwangufya akwika, akumwanukila mu luhekelelo. ⁷ Na avanu vavelige vakuluwona ulo, vahung’wine mbevali vitigila, “Inje na ukwikala kulu munu umunya nzanangifu.” ⁸ Sakayo ndawe imige na ukumulongela Umutwa! “Ve Mutwa, Lavage! Ndigavasa uwunono wendinawo pagati nagati na ukuvapela Avamikaa na wone ndamupokite munu kinu ngumupilulila katayi.” ⁹ Yesu amulongelage, “Neng’ino uwupoki wufikite mukaye iyi, pakuva uyu nave va mumbegalo ya Abulahamu. ¹⁰ Pakuva Umwana va Umunu aasile kukusaka nu kuvapoka avanu avayasile.” ¹¹ Ulusika lwe avanu pevapulikisa ing’ani isi, Yesu awilye ukulonga ikiganiso. (Pakuva yee pipi ukufika ku Yelusalemu, na avene vatigilige wanda uwutwa wa Nguluvi wuwoneka yilino.) ¹² Swe itigila, “Umunu uyumwi yee mutambule awukite lugendo lwa kutaali sambi akakwave uwutwa nu kupiluka. ¹³ Sweno, wesialawuka, avakemelye avakami vakwe vanyichumi, avapelye amagobole dinali kwa yeyeavesaga nu kuvatigila, ‘Mupigilage amagobole iga uwusulusi mbaka pe mbamilwike.’ ¹⁴ Neke avanyang’i vayagwe vevamuvipye; nambi vatumite avanu vabite vakatigile, ‘Sitwiwenda uyu atuteme.’ ¹⁵ “Umunu uyo umutambule apilwike kukaye peyeakwavite uwutwa. Baho peatumite vakemelwe avakami vase vala vealavapelye amagoboledinali, vamulongele chevakambwe mu wusulusi yumwi yumwi. ¹⁶ Umukami uva kutala aasile, itigila, ‘Mulugu, ngakwavite amagobole dinali nyichumi isingi ukulutila sila sewapelye.’ ¹⁷ Nave amutige: ‘Lunofu, veve mukami ve munofu pakuva ukave muhuvilwa mufinu ifidodo, lino usagila muboma sinyichumi!’ ¹⁸ Umukami uva kavili aasile, itigila, ‘Mulugu,ngakwavite amagobole dinali sihanu isingi ukulutila sila sewapelye.’ ¹⁹ Nave amutige, ‘Lino usagila muboma sihanu.’ ²⁰ “Umukami uyungi aasile itigila, ‘Tegule iligobole dinali yako, ndafihite mulipembo, ²¹ pakuva ndakogwipe, veve wi munu mukali. Veve wi munu yewawitegula ifinu fyesifyako, nu kubeta chesiwavyaliti.’ ²² Nave amutige, ‘Ngukuhiga uwimila imilongele jako, veve ve mukami yesiwimuhuvilwa! Valukagwe ulwa nene ndi munu mukali, yendanditegula fyesifyangu nu kubeta chesindavyaliti. ²³ Mbi ndawuli sukavikiti amagobole dinali sangu ku vasulusi sambi penzusile negulise na agongeleche? ²⁴ Neke pavalongele avebaho, ‘Mumupoke iligobole dinali iyo mukamupele yula umunya magobole dinali sinyichumi.’ ²⁵ Ndawe vamulongelige: ‘Mulugu, ina magobole dinali nyichumi!’ ²⁶ Nguvalongela: ‘Yeyevesaga ina kinu saapelwa. Neke yula yeihela kinu apokwa na kila che inacho. ²⁷ Kangi vala, avatavangu vangu vesiviwenda nene ndivateme muvalete ipa muvadumule wendilava.’ ” ²⁸ Na Yesu pealonzile iso, avalongolye ukubita ku Yelusalemu. ²⁹ Nape yeahegelye pipi na ku Betifage na ku Betaniya, mukidunda chekitambulwa Miseituni, ndawe atumige avavili va avanyigendo vakwe ³⁰ itigila, “Mubite mbaka kukijiji che mwilaving’ana na pemufikite muyiwona idogovi indodo minge yesiyilahowa na munu yeyeavesaga, mwawule muyilete ipa. ³¹ Na wone munu avawuse mbi ndawuli mukuyawulila, mumutigilage de Umutwa ayigulwime.” ³² Na vala avevatumitwe vahele neke vasiwone ndahihila ndawe lwe vevalongele. ³³ Na pevayawulilige idogovi indodo, avenayo vavatige, “Mbi ndawuli mukuyawulila idogovi indodo?” ³⁴ Swe vitigila, “Umutwa ayigulwime’ ³⁵ Swe vakuyisindika kwa Yesu. kono we vatandike imyenda jawo muchanya mudogovi swe vakumuhofya Yesu. ³⁶ Na pevabitige vatandalike imyenda jawo mung’asi. ³⁷ Ave peahegelye mukisulunukila cha ikidunda cha Imiseituni, ililugu mbelili lya avanyigendo vakwe, vavanzile ukuhekelela na ukumulumba Nguluvi vayofile, uwimila ifipigo mbefili ifya uludali fye vafiwene; ³⁸ vitigila, “Ye mufunyilile Umutema yeakusila mwitawa lya Umutwa. Uwikalakunoga kuchanya na indolo kuko kuchanya!” ³⁹ Avamwi va Avafalisayo veve mu mukong’ano vamulonje, “Mwigisi vakenyele avanyigendo vako!” ⁴⁰ Neke avapitule atigilage, “Nguvalongela nyenye, pevakatwike iva amaganga gayoya.” ⁴¹ Yesu aveihegelela na ukuyiwona i muboma, ayivembye ⁴² weitigila, “Kiba neng’ino uke uselage ing’ani isa uwikalakunoga! Neke lino sifihitwe pamiho gako. ⁴³ Pakuva ifilo fikusila pe avatavangu vako savakupilima na ukukusigamila imbali mbesili. ⁴⁴ Savakusindila ng’ani veve, pamwinga na avanako avali mumo. Nawo sisavakusigasisa nambi liganga limwi muchanya mwiganga liyagwe, pakuva siwalukagwi ulusika lwe Nguluvi asye ukukupoka.” ⁴⁵ Ndawe Yesu ingilige mu tembeli, nu kuvahaka avasulusi ⁴⁶ we akuvalongela, “Pakuva nzandike, ‘Ikaye yangu sayiva kaye ya nzifunyo.’ Lino nyenye muyipitwe yive lifinga lya avahiisi.” ⁴⁷ Nave igisige mbepali mu tembeli. Neke avavina va avatambisi, na avigisi va indagilo, na avavina va vanu vasakige ing’asi yu kumuwulaga, ⁴⁸ Neke sivibeti nambi lukani ulwe vevahwana vapige, pakuva avanu mbevali vevamumemeleche vakumupulikisa.

¹ Ikimunyi ikimwi, Yesu peavigisige avanu mu tembeli na ukudalika ulukani ulunofu, avavina va avatambisi, na avigisi va indagilo pamwi na avavaha, vamusye, ² Neke vamulongelage vatigilage, “Tulongele! Wipiga ing’ani iso kwa ludali luki, kangi yenani yakupelye uludali ulu? ³ Neke avapitule avatigile, “Nane ndivawusa nyenye lukani, mundogele: ⁴ uwubatiso wa Yohane wahumile kwa Nguluvi apangi kuvanu?” ⁵ Swe vakwiyisa we vavene ng’ani vitigila: “Manyi tutigile wahumite kuchanya, atigila: ‘Apo mbi ndawuli pe simwamufuuvitwi?’ ⁶ Na manyi tutigile wahumile ku vanu, avanu mbevali vatukinya na amaganga, pakuva vevamwidiche Yohane ukuta muvisi.” ⁷ Swe vipitula ukuta, “Situluseli kwe wahumile.” ⁸ Neke Yesu avatigile, “Nayinene singuvalongela nyenye ukuta kwa ludali luki ndipiga isi.” ⁹ Swe Yesu ivanga ukuvalongela avanu ikiganiso iki, “Umunu uyumwi ali na mugunda gwa misabibu, swe ibasikisa avalimi ndawe ahegige nu kwikala kungi musika. ¹⁰ Na imisika ja kutung’una amaveleko, atumite avakami kwa vala avalimi sambi vamupele amaveleko agamwi ga imisabibu. Avalimi vamutofile nu kumudaga mawoko ng’ani. ¹¹ Neke atume umukami yungi; nave neke vatove vamuhongele inyoni nu kumudaga mawoko ng’ani. ¹² Neke atume na vawudatu, uyu nave vamuvaywe malweya nu kumudagilisa kwivala. ¹³ Ndawe umunyamugunda atigilige: ‘Ngitage ndawuli? Ndimutuma umwanangu umwende vangu; apamwi vamutuga.’ ¹⁴ Neke vala avalimi, vave vakumuwona swe vilongana vavene vitigila: ‘Uyu ye munyalilila ili. Tumuwulage sambi ililila live lyetu.’ ¹⁵ Ndawe vamugabikisige kwivala nu kumuwulaga.” Lino, “Yula umunyamungunda avagita ndawuli? ¹⁶ Aasa nu kuvawulaga avalimi vala, na umugunda gula avabasikisa vangi, pevapulike iso vatige, “Nda iso silatufika!” ¹⁷ Neke pe avalavile we itigila, “Kwe kutigila kiki ulukani lwe lwandikwe ‘Iliganga lyevalibihye avasenzi, ilyo live liganga likomi lya palubali?’ ¹⁸ Umunu yeyeagwilaga mwiganga ilyo adenyangika na yula ye limugwilye limung’enyanga tipu!” ¹⁹ Avigisi va indagilo, na avavina va avatambisi vasakige ukumwibata ulusika lulo, neke wogope avanu pakuva valukagwe ukuta mukiganiso iki avaselengige avene. ²⁰ Ndawe vavangige ukumusigamila. Vatumite avatandisi avabuganisi sambi vamwibate mung’ani sakwe na ukumutosa pa wuhigilo. ²¹ Neke pevamuwuse vitigila, “Mwigisi, tukulukagula ukuta wilonga ing’ani sa uwugolofu, kangi wimugaya luhagu wawikwigikisa mumwene ing’asi isa Nguluvi. ²² Ino ndawuli lulagile, ukuhomba imbemenenge kwa Kaisali apangi nda!” ²³ Neke umwene Yesu asikagwe igila sawo akuvatigila, ²⁴ “Mundagile iligobole. Lina wusu na litawa lya nani?” ²⁵ Vamupitwe, “Fya Kaisali.” Swe akuvalongela, “Apo nano, ifya Kaisali mumupelage Kaisali, ifya Nguluvi mumupelage Nguluvi.” ²⁶ Na sivahwaniti ukumwibata pala pa vanu nambi kwa lukani lungi, swe vikalite vakatwike kono we visasavala lwe avapitulige. ²⁷ Ndawe Avasadukayo, avamwi vamubitye vala avavitigilaga ulwa kugaya ulusilibuko, neke vamuwuse: ²⁸ vitigila, “Mwigisi, Musa atwandiche ukuta umunyalukolo va umunu peafwe neke amuleke umufwile mugaya mwana, umunyalukolo vakwe amutegulage ung’inetu uyo sambi amwegalilage avana yula yeafwe. ²⁹ Ino vekovali avewosile pamwi vimufung’ati. Uvakutala alategwe umung’inetu neke afwe we mugaya mwana. ³⁰ Na uva kavili amuhalite umung’inetu yula nave swe ifwa we mugaya mwana; ³¹ mbaka na vawudatu nave amuhale. Na mbevali we vimufung’ati, vafwe wesivegali vana. ³² Pambele swe nayu mung’inetu yula ifwa. ³³ Lino, pevasilibwike umung’inetu saava mukina nani? Pakuva e mukina mbevali we vimufung’ati.” ³⁴ Neke Yesu avalongele, “Avanu ava imisika igi vavitegula na ukugomwa; ³⁵ Neke vala avivalilwa ukuta vavaje ukuhala ing’i yila na ukusilibuka kuvafwe sivitegulagi kangi sivigomwagi. ³⁶ Kangi sisavafwa nda, pakuva savalava nda vanyivaha na vana va Nguluvi, ndawe weviwali avana va ulusilibuko. ³⁷ Neke ulwa avafwe lwevavisilibusiwa, na yu Musa olelye Muwandike Uwelu mumulyango gwa ikisaka chechakige, ipo pamutambwe Umutwa ukuva ye Nguluvi va Abulahamu, Nguluvi va Isaki, na Nguluvi va Yakobo. ³⁸ Nave si Nguluvi va avafwe, Nguluvi va awumi, pakuva mbevali vavinanaga kulumwene.” ³⁹ Avigisi va Indagilo avamwi vamupitule vitigila, “Mwigisi ulonje mumwene.” ⁴⁰ Na sivigeli vamuwuse lukani kangi. ⁴¹ Neke Yesu peavawuse, “Mbi ndawuli avanu vavilonga ukuta Kilisito mwana va Daudi? ⁴² Pakuva umwene atigee mu kitabu cha Sabuli: ‘Umutwa amulonje Mutwa vangu: Wikale kwiwoko lya kundyo ⁴³ mbaka pe ndivavikite avatavangu vako vave nda kigoda cha ukugeleka amagulu gako.’ ⁴⁴ Apo Daudi pakumutambula, ‘Mutwa,’ lwiva ndawuli ave mwanakwe?” ⁴⁵ Na avanu mbevali pevamupulikisige, Yesu avalonje avigendo vakwe, ⁴⁶ “Mwikomalilage na avigisi va Indagilo, aviwendaga ukugenda vafwite isopeka inaali na ukuhungilwa mumagulilo, na ukuteng’emala apatambule mumasinagogi na mufigoda fya uwutambule munyekelelo. ⁴⁷ Vakuvahiisila nu kuvawonela avang’inetu avafwile, kono vakwilagila nda vanu vanofu kwa ukwifunya musika kumbi vabuganisi. Iwo savahigwa pakomi hilo!”

¹ Yesu alafile neke avawone avanono visopa ifitawulwa mukinyawugali cha mu Tembeli, ² swe akumuwona umung’inetu umufwile umumikaa isopa amagobole gavili. ³ Neke atigile, “Nachene nene nguvalongela umufwile uyu umumikaa asopite ukulutila mbevali. ⁴ Pakuva iwo mbevali vasopite ifisige mu wunono wawo, neke uyu mu wumikaa wakwe asopite mbefili fyeakeinafyo.” ⁵ Na avangi pevalonganige isa Itembeli, we yiwali uwunofu na uwunofu wa amaganga na ifitawulwa fya avanu atige, ⁶ “Ifi mbefili fye mukufiwona safyusa ifilo pesisalisigala liganga mwiganga lyesisalidenywa.” ⁷ Neke vamuwuse vitigila, “Mwigisi ing’ani iso siva Panili, na kiki ikilagila ukuta ing’ani iso sili pipi ukuwoneka?” ⁸ Neke atigile, “Mwikomalilage, mulonga musangwe. Pakuva wolofu savasa mwitawa lyangu vitigila, ‘Nene ye nene’, na yilino ikivalilo ye kifikite, samulavafwata iwo! ⁹ Nyenye pemwipulika isa amagalu na ulwitakilo mulogopa pakuva iso sivaje ukuwoneka tandi, neke uwusililo siwangufya wuse.” ¹⁰ Neke pavalongele: “Ing’i ukwihoma na ing’i yingi, uwutwa wukwihoma na uwutwa wungi. ¹¹ Sakuva na ifitulo ifikomi mung’i na kikinge na lulufo, pono pono na ing’ani isa logofyo na uwuhulo uluhuma kwilanga. ¹² Neke pesiva sikaali siwoneke iso mbesili, vavibata, vavatesa nu kuvasindika mumasinagogi neke vavasope mundinde; samusindikwa pa vatema na avanzagila vakuvavala lilitawa lyangu. ¹³ Ulo saluva lwe lusika lwenyu ukolelela. ¹⁴ Apo musikimalage munumbula senyu: na mulahwa mwihosa chemupitula, ¹⁵ pakuva ndivapela icha ukulonga na uluhala, na avatavangu venyu mbevali sivahwana vavaleme nambi kwibesa. ¹⁶ Nayi nyenye sa mupitukwa na avavaha venyu, avanyalukolo venyu, avaseela venyu, na avanyawiyendi venyu, na avamwi mwanyenye sa vawulagwa. ¹⁷ Nyenye sa muvipilwa na mbevali ikivalwa lilitawa lyangu. ¹⁸ Nambi, lufwili lumwi lwa mumitwe jenyu sisaluyaga. ¹⁹ Na mulwikangaliso lwenyu, samusipoka inumbula senyu. ²⁰ “Neke pesamuyiwene iboma ya mu Yelusalemu yipilimwe na avanyigalu, pepene pemulukagulage ukuta lino uwanangifu wuli pipi. ²¹ Pepene lino avali ku Yudaya vakimbililage kufidunda, na avali pagati ya iboma vakimbililage kwivala na avali ku migunda valapiluka. ²² Pakuva ifilo ifyo fye fya ukuhigwa sambi sikwile mbesili isandikwe. ²³ Vinalyo vala avanyafilo na vevakoosa mufilo ifyo! Pakuva sakulava na kuguda mung’i na ililakali ku vanu va ing’i iyi; ²⁴ Savadumulwa na ilimage ilyugi, nawo savagalulwa na ukusindikwa mung’i mbesili nayi Yelusalemu sayilivatwa na avamyanza avanu va ing’i isingi mbaka imisika ja avamyanza iwo va ing’i isingi pegikwilye. ²⁵ “Kangi sakulava na ifilagilo mwisuva na mu mwesi na mu ng’eng’esi. Avanu va mung’i mbesili savalava mulugudo wimila uwuhuguvafu, ibahali peyisukanzwa na amavingo ni mibumo. ²⁶ Avanu savafwa libupwi na umuhwehwe, pevisindila isikusa mung’i pakuva uludali lwa kwilanga saluhogoleka. ²⁷ Neke ipo pesamumuwona Umwana va Umunu akusa mumafufu pamwi na uludali na uwunyandolo uwulutye. ²⁸ Lino wone muwone sivanzile ukuwoneka ing’ani iso, mumamagalage na ukukang’ula imitwe jenyu pakuva uwupoki wenyu wuhegelye.” ²⁹ Ndawe Yesu avalongelige ikiganiso: “Mulavage umusombe na imibiki igingi mbegili. ³⁰ Pembe gikavangage ukutopola, nyenye mwakulukagula ulwa imisika ja pamasika yegihegelye. ³¹ Lwindahihyo, pemuwene iso sivanzile ukuwoneka, mukalukagulage ukutigila, uwutwa wa Nguluvi wuheglye. ³² Nachene nene nguvalongela, imbegalo iyi sisayilutila mbaka iso mbesili pesikwilye. ³³ Kuchanya na ing’i safilutila, neke ing’ani sangu sisasilutila nda. ³⁴ Apo mwikomalilage, inumbula senyu silingila muwuhatufu, mu wugaasi na ukuguda muminanile igi sakilonga kivafikanise ikimunyi kila nda libada. ³⁵ Pakuva ulu wesalulava ku vanu mbevali vevakwikala konivala kono. ³⁶ Apo nyenye muvelage miho mbepali we mukwifunya sambi mupelwe uludali lwa ukulutila wunofu mwa mbesili isi pesiwoneka, na ukwima pa Umwana va Umunu.” ³⁷ Ino Yesu igisige mbepali pamunyi mu tembeli, neke pakilo abitige kukuvasa kukidunda cha Miseituni. ³⁸ Avanu mbevali vilaavige pamilawu ukubita ku tembeli; kukumupulikisa.

¹ Ikimunyi ikikomi cha imikate je simihate uwuhahu, chekitambulwa Pasaka, yechekihegelye. ² Neke avavina va avatambisi na vigisi va indagilo, vasakige ikigaho cha ukumuwulagila lino wogopige avanu. ³ Neke Setani amwingile Yuda Isikalyote, uyumwi va vala avanyichumi na vavili. ⁴ Ndawe ahegige nu kubita kukulongana na avavina va avatambisi na avanyigalu, weagita pakumutawula mu mawoko gawo. ⁵ Vahekelye na ukwiyidikisa nave ukumupela amagobole. ⁶ Nave idikise ivanga ukutandila ikilega cha ukumutawula kuvene apagaya mukong’ano gulonga gulukagule ulo. ⁷ Ndawe chafikige ikimunyi cha imikate je simihate uwuhahu, che lweluvaje ukudumula ing’olo ya i Pasaka. ⁸ Swe Yesu akuvatuma Petulo na Yohane itigila, “Mubitage neke mukatugelanikise ifilyo fya i Pasaka, sambi tulye.” ⁹ Ndawe vamulongelige, “Wisaka tukugelanikise kwi?” ¹⁰ Neke avatigile “Mulavage, pembe mufike muboma, mutang’ana na munyidama yategwe kisilo cha lulenga mumufwatage mwingile mukaye yeingila umwene. ¹¹ Na mumulongelage umunyakaye, ‘Mwigisi akukutigila, yilikwi ikaye ya avagenzi, sambi umo ndile i Pasaka pamwi na vanyigendo vangu?’ ¹² Nave avalagila kuchanya ku bwalo ingelanise, mugelanisage mumo. ¹³ Swe vibita, nu kusiwona ndawe lwealavalonje; nu kugelanisa i Pasaka. ¹⁴ Na ikivalilo peyekifikite, ateng’eme pawulilo umwene na vala avigendo vakwe. ¹⁵ Swe akuvalongela, “Ndidoboka hilo ukulya i Pasaka pamwi na nyenye wesindilava mbe muluteseko, ¹⁶ pakuva nguvalongela ulwa sisandya kangi mbaka pesayikwilye mu wutwa wa Nguluvi.” ¹⁷ Ndawe ategulige ikinywelo, alumbe swe itigila, “Mukote iki, mwivalage pakunywa nyenye kwa yinyenye. ¹⁸ Pakuva nguvalongela, uluhuma lino sisanywa uluveleko lwa umusabibu mbaka uwutwa wa Nguluvi pesawusile.” ¹⁹ Neke ategule umukate, neke alumbe, amegule we itigila, “Ugu gwe muvili gwangu, [ugwitawulwa kwa nyenye. Mugitage ndahihyo pa kunziwuka nene.” ²⁰ Peyevalye ndahihyo ategwe ikinywelo itigila, “Ikinywelo iki lwe lufingano ulupya lwa Nguluvi ulwikangaswa mudanda yangu, iyikwitika ukwimila nyenye.] ²¹ “Ino mulavage iliwoko lya yula yeakumituka lilipamwi twililasa. ²² Pakuva Umwana va Umunu akwibitilaga ndawe lwee mukelele, neke inalyo umunu yula yeakumituka.” ²³ Swe vivanga ukwiwusa we vavene ng’ani ye nani mwavene yeapiga ulukani ulo. ²⁴ Ndawe lwavangige ulubesa mwavavene ulwa ye nani yeava muvina. ²⁵ Swe akuvalongela, “Avatwa va avamyanza va ing’i isingi, na vala avavalutye uludali vavitambulwa vanyawuwuya. ²⁶ Neke kwa nyenye silwindahihyo yeiva muvina kwanyenye avelage ndawe umudodo, na umulongosi avelage ndawe umukami. ²⁷ Pakuva umuvina yealikwi yateng’eme pawulilo, apangi umukami? Si yula yeateng’eme pawulilo? Neke nene mwanyenye ndindawe umukami. ²⁸ “Nyenye ye nyenye ye mukananite pamwi na nene mukugelwa kwangu; ²⁹ nani ndawe Dada vangu lweamelye uwutwa, nani ndahihyo nguvapela nyenye uwutwa. ³⁰ Sambi mulye na ukunywa pawulilo wangu muwutwa wangu, na ukuteng’emala mufigoda fya uwutwa kono we mukusihiga ing’olo nyichumi na sivili sa Vaisilaeli. ³¹ “Simoni, Simoni! Lavage! Setani akuvasaka nyenye, sambi avapete nda ngano. ³² Neke ulwene ngusuche veve ulwa ulufuuwo lwako lulatindagila, nave pupitwike ukangasage vanyalukolo vako.” ³³ Neke pamutigile, “Mutwa pendilipamwi na veve nane nditawe ukubita nambi kwe ndinde.” ³⁴ Neke atigile, “Ngukulongela Petulo, inzogolo namunyi wesiyilavika uva umbihye kadatu ukuta sunzeli.” ³⁵ Swe Yesu akuvawusa, “Ndawuli pengengavatumite we muvagaya kibogolo nambi bogolo nambi ndatu muke mukagayite kinu? Neke vatigile, “Nda.” ³⁶ Neke avatigile, “Lino, umunya kibogolo ategulage na umunyabogolo ndahihyo. Na umugaya limage agusage isopeka yakwe akagule. ³⁷ Pakuva nene nguvalongela inzandike muwandike uwelu; ‘Ukuta vamuhanzise mukilugu cha avananzi, luvaje sikwile. Ena, mbesili isimbaje yesifikila ku wukwilanifu waso,’ ³⁸ Swe vakumutigila Mutwa, “Lavage, ipa pogali mamage gavili.” Swe itigila, “Lukwilye!” ³⁹ Yesu ahumite muboma, ndawe lwealasovye ukubita kukidunda cha ku Miseituni; na avanyigendo vamufwatite. ⁴⁰ Ave ifika apono pala avalonje, “Mwifunyage sambi mulemwe ukwingila mukugelwa.” ⁴¹ Ndawe ikwegige ludodo kwa avene luvala lwa kutosa ng’ongwa swe ifugama akwifunya. ⁴² “Dada wone wiwenda, nyesekese uluteseko ulu, neke lekage lulemwe ukupigika ndawe lwendiwenda nene, luvelage ndawe lwe wiwenda veve.” [ ⁴³ Ipo munyivaha va Nguluvi uluhuma kuchanya, aasile ukumukangasa. ⁴⁴ Nave pakuva ali mwe wuhuguvafu aginite hilo ukwifunya na ilifuke lyahumite wita danda iyidomola pasi.] ⁴⁵ Ave ihega mukwifunya ahele kuvanyigendo, neke avafike vagonelye tulo mu wuhuguvafu. ⁴⁶ Neke avatigile, “ Mbi ndawuli mugonelye tulo? Mulamuke mwifunye mulonga mwingile mukugelwa.” ⁴⁷ Yesu we pealonga, wonage ililugu lya avanu, pamwi na umunu yeitambulwa Yuda uyumwi va vala avanyichumi na vavili, akuvalongosa. Na peahegelye pa Yesu amunonie. ⁴⁸ Neke Yesu amutigile, “Yuda! Ukumupituka Umwana va Umunu kwa kumunonela?” ⁴⁹ Na vala avepipi nave pevasiwene isikwenda suse vatigee, “Mutwa, ngali tuvaputage na amamage?” ⁵⁰ Uyumwi va avene swe akumuputa umukami va umutambisi umuvina ilipulikilo lya kundyo. ⁵¹ Neke Yesu atigile, “ Pa ulu mulawila!” Ndawe amupamisige ilipulikilo nu kumuponia. ⁵² Yesu neke avalongele avavina va avatambisi, na avavina va avanyigalu va mu tembeli, na avavaha va avanu avevasile kulumwene, “Mbi ndawuli musile na amamage ni fisonzo wita wanda mwibita kwibata muhiisi? ⁵³ Mbepali penge na nyenye mu tembeli simwe mulagolola amawoko munzibate. Neke lino iki che kivalilo chenyu, na uludali lwa ulwisa.” ⁵⁴ Swe vakumwibata Yesu na ukumusindika kukaye ya Umutambisi Umuvina, na petulo e mumbele we ali pataali. ⁵⁵ Vavelige vikosa umoto pagati pa ilipala vateng’eme pamwi, nave petulo swe iteng’emala nawo. ⁵⁶ Pepene umukami umwanahinza amuwene Petulo ateng’eme pawelu, ndawe amulavige hilo itigila, “Na yuyu ake pamwi na Yesu.” ⁵⁷ Neke Petulo abihye itigila, “Ve! Mung’inetu veve umunu uyo sindimuseli.” ⁵⁸ Ulusika ludodo pambele umunu uyungi amuwene Petulo itigila, “Veve nave wimuyawo na vavala.” Petulo swe itigila “Munu veve si nene nda!” ⁵⁹ Lwave nda lwa kivalilo kimwi umunu uyungi akangise pakulonga atigile, “Nachene na yuyu ake pamwi nave, pakuva nayiveve wihuma ku Galilaya si lwelulo.” ⁶⁰ Petulo neke atigile, “Munu veve; singulukagula lwe wilonga!” Na baho mumweilonga, inzogolo yavikite. ⁶¹ Neke Umutwa amupituche nu kumulava Petulo. Swe Petulo akwiwuka lula ulukani lwa Umutwa, lwe alaamulonje, “Namunyi wesiyilavika inzogolo, uva ye umbihye kadatu.” ⁶² Swe neke ahume kwivala ivemba ulutalamu. ⁶³ Na vala avanu vevamumingige Yesu vamwelanzile nu kumutova. ⁶⁴ Neke pevamugubike kumiho vakumuwusa wusa vitigila, “Ulonge ye nani yeakutofile?” ⁶⁵ Neke vamulongange fivi na ukumuliga. ⁶⁶ Na kwavelige kwicha, avavaha va avanu, avatambisi avavina na avigisi va indagilo vakong’ine vakumusindika pawuhigilo wawo vitigila, ⁶⁷ “Wone veve wi Kilisito! Tulongele.” Neke atigile, “Na ndivalongele we simufuuwa ha! ⁶⁸ kangi wone ndivawuse lukani simumitula. ⁶⁹ Neke uluhuma lino, Umwana va Umunu saateng’emala ulubali lwa kundyo lwa Nguluvi umunyaludali.” ⁷⁰ Mbevali swe vitigila, “Veve ye veve mwana va Nguluvi!” Swe akuvalongela, “Nyenye mwilonga ukutigila nene yenene.” ⁷¹ Swe vitigila, “Ali lino tuva petusaka wolelesi wakiki kangi? Pakuva twipuliche yihwehwe ing’ani sa mumulomo gwakwe yumwene.”

¹ Neke ililugu mbelili pelimye ng’ani, vakumusindika kwa Pilato. ² Swe vivanga ukumutosa: vitigila, “Tumuwene umunu uyu peiyasa avanu vetu, nu kufunda avanu vabihile ukumuhomba imbemenenge Kaisali, kono we akwihala ulwa umwene ye Mutwa Kilisito.” ³ Ndawe Pilato amuwusige itigila, “Veve ye veve Mutwa va Avayudaya?” Swe Yesu apitwe akumutigila, “Veve ulonzile.” ⁴ Ndawe Pilato avalongelige avatambisi avavina mukilugu cha vanu, “Singuluwona lukani lwa uwananzi kulu munu uyu.” ⁵ Neke avene vakalalile hilo vitigila, “Akuvasagasa avanu ni nzigiso sakwe, mu Yudaya mbeyili avanje mu Galilaya na lino de yeafikite na kono.” ⁶ Pilato ave ipulika iso, awusise ulwa “Kumbi umunu uyu va ku Galilaya? ⁷ Ave akulukagula ulwa uyu munu va muwutema wa Helodi, amusindike kwa Helodi; pakuva ulusika ulo Helodi nave easile mu Yelusalemu. ⁸ Na Helodi ave akumuwona Yesu ahekelye hilo, pakuva uluhuma musika eapulike nzolofu sa umunu uyo, nambi awendige ukumuwona na ukwilavila yumwene Yesu peipiga imiitu. ⁹ Ndawe amuwusige ng’ani nzolofu kwa musika, neke Yesu samupitwi. ¹⁰ Avavina va avatambisi na avigisi va Indagilo vimaje nu kumutosa vavifile hilo. ¹¹ Ndawe Helodi na avanyigalu vakwe vamuhongele inyoni, na ukumwelanga vakumufwika imyenda ja Uwutwa, swe vakumupilula kwa Pilato. ¹² Ndawe ikimunyi kicho Helodi na Pilato vitepulige kinyawiyendi, pakuva pamwandi vevanya wutavangu. ¹³ Ndawe Pilato avatang’asige avavina va avatambisi na avavina va avanu, ¹⁴ swe akuvatigila, “Mumuletite umunu uyu kwa nene mwitigila ukuta muyasa vanu; nane pendimugosige hilo ulwa ulukani ulu panyenye, nda sindiluweni ulukani lwa uwananzi, kulumunu uyu ukwimila mbesili semukumutosa. ¹⁵ Na yi Helodi nave saluweni lukani nambi amupilwe kwa nene. Mulavage sipololi lukani lwapigite uluvaje ukufwa. ¹⁶ Ino ndagila atowe ngoda neke ndimulekese.” [ ¹⁷ Pakuva lwe lumuvaje Pilato ukudindulila umunyandinde yumwi pa ikimunyi ikikomi icha uluhekelelo.] ¹⁸ Neke pevayovele ng’ani vitigila, “Muhese uyu tudindulile Balaba!” ( ¹⁹ Umunu yalasopitwe mundinde wimila ukusagasa iliyowo muboma, na uwuwulasi.) ²⁰ Pilato avalonje ulwa kavili pakuva awendige ukumulekesa Yesu; ²¹ neke pevayovele ng’ani, “Mutumbike, mutumbike uyo!” ²² Swe akuvalongela ulwa wudatu, “Mbi ananzile kiki? Sikololi lukani lweananzile ulumuvaje ahigwe ukufwa, sweno ndimutova ngoda, pambele swe ngumulekesa ibitile.” ²³ Neke pevevaginite hilo ukuyova vitigila, atumbikwagwe. Swe liyowo lyawo lipulisa. ²⁴ Neke Pilato alamwe vahigage lwe viwenda avene lupigike. ²⁵ Swe akumudindulila yula yeemudindile wimila ukusagasa iliyowo na uwuwulasi, akumutawula Yesu vamupigile mwe viwendela. ²⁶ Na pevamusogosige vamwibete umunu uyumwi Simoni uva ku Kilene yahumige ku migunda, swe vakumutwika umusalaba amuteguse Yesu. ²⁷ Ililugu likomi lya avanu lyamufwatige na vala avang’inetu avamuvembelige. ²⁸ Neke Yesu avapitukile itigila, “ Nyenye nye vang’inetu va mu Yelusalemu! Mutane ukumbembela nene, mwivembelage uwunu wenyu na avanenyu. ²⁹ Pakuva, mulavage, safyusa ifilo pesavatigila: ‘Vafunyilile avaguumba na amaleme gesigakwegala, na amavele gesigakoosa!” ³⁰ Pepene pesavavanga ukufilongela ifidunda: ‘Mutugwile!’ na ifigang’amukila, ‘Mutugubike!’ ³¹ Pevapigite isi mumubiki umudodi luva ndawuli ku mukafu? ³² Na avananzi avavili vasindikwe vakawulagwe pamwi na umwene. ³³ Vave vifika apono apitambulwa pa kibang’a, pepene pevamutumbike na vala avananzi uyumwi ulubali lwa kundyo na uyumwi ulubali lwa kung’igi. ³⁴ Swe Yesu atigile, “Dada, uvadegepele pakuva sivakulugula lwe vipiga.” Neke pevagavane imyenda jakwe kwa kutoosa isimbi. ³⁵ Neke avanu avevimile pala vilava na avalongola vakumwelanga vitigila, “Aponige avangi, ali lino iponiage yumwene, wone nachene ye Kilisito umuhagule va Nguluvi!” ³⁶ Na avanyigalu nawo vamwelange ndahihyo: na ukumuletela idifayi inzasamufu, ³⁷ kono wevitigila, “Wone veve ye veve mutwa va Avayudaya wiponiage yuveve.” ³⁸ Na pachanya pa musalaba pepandike, “Uyu ye Mutwa va Avayudaya.” ³⁹ Neke Uyumwi va vala avananzi, veve vatumbike amulisile itigila: “Mbi si nachene ye veve Kilisito? Apo wiponiage yuveve utuponie na hwehwe.” ⁴⁰ Neke yula uva kavili amupilule, akumukenyela itigila, “Veve sukumwogopa Nguluvi, nave wewuli muluhigilo lulo? ⁴¹ Hwehwe ulu lutuvaje pakuva tukwanukila uluhombo ulutegine na ifipigo fyetu neke uyu nangi lusukuli lweananzile.” ⁴² Swe akumutigila Yesu, “Nziwukage pukwingila mu wutwa wako.” ⁴³ Neke Yesu amulongele, “Nachene, ngukulongela namunyi de uva pamwi na nene kuchanya.” ⁴⁴ lwave lwiva pipi na ikivalilo icha mutanda pamunyi, swe kwiva na lwisa mung’i mbeyili mbaka pa kivalilo icha igonza, ⁴⁵ na ilisuva pelipungite ikibupa cha itembeli chademwike nu kuhuma pavili. ⁴⁶ Neke Yesu, akoole itigila ve Dada, mumawoko gako ndivika inumbula yangu.” Pealonzile ulo umutima gwadumwike. ⁴⁷ Yula umuvina va avanyigalu avelige akusiwona isesiwonike pala, amusumye Nguluvi itigila, “Nachene umunu uyu ake mugolofu.” ⁴⁸ Na amalugu mbegali ga avanu avevakong’ine kukulava ing’ani iso pevasiwene isipigike vahele ukwawo viking’ina imambaga sawo vahuguve. ⁴⁹ Na mbevali avevisele nave, na vala avang’inetu avepamwi nave, uluhuma ku Galilaya, vimite pataali we vilava ing’ani iso mbesili. ⁵⁰ Lino aasile umunu ilitawa lyakwe Yosefu yee munu va pa wuhigilo umunu umunyandolo na uwugolofu, ( ⁵¹ yesieahangiti mung’asi sawo) nave e munu va ku Alimataya; iboma iyimwi ya Avayudaya kangi asindilige uwutwa wa Nguluvi. ⁵² Umunu uyo ahele kwa Pilato neke asuke umuvili gwa Yesu. ⁵³ Swe akwisa nu kugufwika isanda inofu na ukugutaga muwuvi wewe wuyave mwitalawe mwesiealatagwa munu. ⁵⁴ Ikimunyi icho che cha ukwigelanisa isabato pakuva yavangige. ⁵⁵ Na vala avang’inetu avevasile nave, uluhuma ku Galilaya, vafwatite na ukukiwona ichanga, na umuvili lwe gwavikigwe. ⁵⁶ Swe vipiluka, na ukugelanisa amafuta aginung’ila wunofu ga ukugubaka umuvili gwa Yesu. Na ikimunyi cha isabato vasuupite ndawe lwelwelulagile mu ndagilo.

¹ Pamilawu hilo pa Jumapili, pe kwidandaluka avang’inetu vahele kuchanga we vategulise amafuta gevevagelanise. ² Vave vifika vawene liganga lya pamulyango gwa ichanga libiduse, lilipataali na ichanga. ³ Vave vakwingila sivaguweni umuvili gwa Umutwa Yesu. ⁴ We pevasasavala na lulo, lavage avanu vavili vevimite pipi nawo vafwite imyenda igimalavadika. ⁵ Nawo avang’inetu vibatike na umuhwehwe, swe vigondama pasi, neke iwo vavalongele, “Mbi ndawuli mukumolela umumi kuvafwe? ⁶ Siipwali ipa, asilibwike; mwiwukage seavalonje peali ku Galilaya, ⁷ ‘Ulwa lumuvaje Umwana va Umunu ukutawulwa mumawoko ga avanu avanyanzanangifu, na ukutumbikwa, na ukusilibuka pa ikimunyi icha wudatu.’ ” ⁸ Ipo iwo avang’inetu viwike ing’ani sakwe, ⁹ pevapilwike uluhuma ku changa, vavalonje mbesili vala avanyichumi na yumwi na avangi mbevali. ¹⁰ Na avavalonje ing’ani isi avigendo veva: Maliya Magadalena, Yoane na Maliya uyuve va Yakobo na avang’inetu avangi veve pamwi nawo. ¹¹ Neke avigendo sivahosisi ukuta ing’ani iso sa nachene, save wita simo hela sivasifuuvitwi. [ ¹² Neke Petulo ahume luvilo mbaka kuchanga, swe igondama nu kuhungilila mugati ndawe ayiwonige yila isanda hela. Ndawe apilukige kukaye kono we isasavala uwimila ing’ani iso isesiwonike.] ¹³ Kikimunyi kikila avanu vavili avayawo na avanyigendo vabitige kukijiji ikimwi ikitambulwa Emawu, iche kilipataali na i Yelusalemu wita lugendo lwa kilomita nyichumi na yimwi. ¹⁴ Nawo valonganige we vavene ing’ani mbesili isesiwonike. ¹⁵ Pe vali mukulongana na ukwiwusa, Yesu umwene ahegelye pipi na ukwihanza nawo. ¹⁶ Neke amiho gawo gatindaje swe galemwe ukumukagula. ¹⁷ Neke avatigile, “Ng’ani ng’iki isi semwilongana de pemwigenda?” Swe vakwima sili, we vakumbing’ine kumiho. ¹⁸ Swe uyumwi, ilitawa lyakwe Kileopa amutigile, “Wi mugenzi wiyena hela mu Yelusalemu ye siukusikagula sesikawonike umu ifilo fifi?” ¹⁹ Neke avawuse, “Ng’ani ng’iki?” Swe vakumutigila, “Ing’ani sa Yesu va ku Nasaleti, ye ake munu muvisi munya ludali pakupiga na ukulonga pamiho ga Nguluvi na pa avanu mbevali. ²⁰ Neke avavina va avatambisi na avatema vetu we vakimise ukumutawula ahigwe ukufwa, na ukumutumbika. ²¹ Nahwe tuke tukahuvye ulwa uyo yemwene yavakombola Isilaeli. Kangi isilutye pasiso, namunyi cha wudatu uluhuma pesikapigike ing’ani iso. ²² Kangi avamwi va avang’inetu va ukwetu vakatutinwise. Ve vake vakahele kuchanga we pemilawu, ²³ neke valemwe ukuguwona umuvili gwakwe. Swe vakusa vitigila vatang’ine na vanyivaha avatige ukuta mumi. ²⁴ Na avanu avake pamwi nahwehwe nawo vake vakahele kuchanga vakilavile, nawo vakalonzile ndahihyo ndawe mwe vakalongelige avang’inetu; neke umwene sivakamuweni.” ²⁵ Neke avatigile, “Mbi uwupufi wa nyenye wa kinyandawuli, nye vanya numbula sito sesisifuuwa indonge mbesili na avavisi? ²⁶ Siluke lukamuvaji ukukola mu neseko isi na ukwingila mundolo sakwe?” ²⁷ Swe ivanga ukuvaganulila mbesili isesimuvaje umwene Muwandike Uwelu, ukuvangila kwa Musa mbaka ku vavisi mbevali. ²⁸ Vave vihegelela pa kijiji kila chevabitige, nave Yesu ave ndaisaka ukuluting’asa; ²⁹ swe vakumugongola, vitigila, “Wikale pamwi na hwehwe, pakuva yekutine na ilisuva yelisalye.” Swe akwingila nu kwikala nawo. ³⁰ peye ateng’eme nawo paichakulya ategwe umukate nu kugufunyilila swe imegula, nu kuvapela. ³¹ Ndawe amiho gawo gamukagulige, swe inyelebuka nu kuyagilila. ³² Swe vakwilonganza, “Mbi ndawuli inumbula setu sisitovigi pealonganige nahwehwe mung’asi, nu kutuganulila Uwandike?” ³³ Swe viwuuka lulusika lulo nu kupiluka ku Yelusalemu, nu kuvafika vala avanyichumi na yumwi pamwi na vala veve pamwi nawo vakong’ine, ³⁴ vitigila, “Nachene Umutwa asilibwike nave amweleluche, Simioni.” ³⁵ Sweno, iwo avavili avayawo na avigendo vavalonje ing’ani isesivafikite mung’asi, na lwelukimite mbaka akagulanike kwa avene na hilo mukumegula umukate. ³⁶ Iwo vepe valonga ing’ani iso, yumwene Yesu imite pagatinagati apawo na ukuvatigila, “Uwikalakunoga wuvelage kwa nyenye.” ³⁷ Swe vikabuka na ukogopa hilo vihosa ulwa vakiwene kisuka. ³⁸ Neke avatigile, “Mbi muhuguvalagi, na ndawuli mwisina munumbula senyu? ³⁹ Mulavage amawoko gangu na amagulu gangu, ukuta nachene ye nene; munzambalage mwilavile ulwa ikisuka kigaya muvili nambi fisege ndawe lwe mukumbona nene ndinafyo.” ⁴⁰ Na pealonzile iso, avalaje amawoko gakwe na amagulu gakwe. ⁴¹ We sivalafuuwa ukwimila uluhekelelo, kono we pevasasavala avatigee, “Mwina chakulya chichekivelaga ipa?” ⁴² Ndawe vamupelige ulusago lwa isomba imbanike. ⁴³ Swe ndawe alisige we vilava. ⁴⁴ Ndawe avatigilige, “Iso se ng’ani sangu sendavalongelige, pende ndilipamwi na nyenye ukuta luvaje sikwilage mbesili sendandikilwe mu ndagilo sa Musa na muwuvisi na mukitabu cha Sabuli.” ⁴⁵ Pepene peavagubulye uluhala lwawo sambi vawukagule Uwandike Uwelu. ⁴⁶ Neke pavalongele, “We lwelwandike ukuta kilisito saateseka, na ukusilibuka ikimunyi cha wudatu uluhuma kuvafwe, ⁴⁷ na ulwa, avanu mbevali vadalikilwa mwitawa lyakwe, ulwa luvavaje avanu mbevali vahongesage na ukupela inzanangifu ukuvangila baha pa Yelusalemu. ⁴⁸ Na nyenye ye nyenye mwe wolelesi va ing’ani iso. ⁴⁹ Na wonage nane ndivaletela yula ye Dada vangu aliihuvise ukumutuma, neke ulwene muvelage pemusindila mumu muboma mbaka pemuva yemupelitwe lula uludali ulwihuma kuchanya.” ⁵⁰ Neke avasogose mbaka ku Betaniya, akang’ule amawoko gakwe nu kuvafunyilila. ⁵¹ Lwave mumwe akuvafunyilila, avalesile na ukwinulwa kuchanya. ⁵² ndawe vamuwunalilige, nu kupiluka ku Yelusalemu we vina luhekelelo lukomi; ⁵³ nawo vavelige mu tembeli mbepali vakumulumba Nguluvi.