YAKOBO

YAKOBO

¹ Ukuhuma kwa Yakobo umukami va Nguluvi na va Umutwa Yesu Kilisito, kwa nyenye, ing’olo nyichumi na sivili, isitagalye mung’i mbesili! Kamwene! ² Vanyalukolo vangu, mulukagulage ukuta mbepali pemwigelwa ulo lukuvanogela muhekelelage, ³ pakuva mukulukagula ukuta ulufuuwo lwenyu pelwidwesa ukugelwa ukwindawe uko, pepene pemupelwa ulwikangaliso ulwihumila mumo. ⁴ Mwihuvilage hilo ukuta ulwikangaliso lwenyu luvakangasa mbaka ku mudugo, sambi muve mukwilaniche mumbali mbesili wesimwineema chechekivesaga. ⁵ Neke wone uyumwi venyu akepite uluhala, sweno, lumuvaje amusukage Nguluvi ye amupela; pakuva Nguluvi akuvapelaga mbevali ifyolofu na mu wudeke. ⁶ Neke lumuvaje peisuka avelage na ulufuuwo wesiisina na ludodo. Pakuva umunu yeisina indawe amavingo ga inyanza gegagisogoswa na ukutoswa na ikifulufumbi. ⁷ - ⁸ Umunu yeindahihyo, yeisina pagati pa isilipavili na umugaya imimile mumigendele jakwe mbegili, alihuvila ukuta saapelwa kinu chechekivesaga ukuhuma kulu Mutwa nangi. ⁹ Umunyalukolo umumikaa lumuvaje ahekelelage ulusika lwe Nguluvi akumukung’umika pachanya; ¹⁰ nave umunono lumuvaje ahekelelage peisulunulwa pasi na Nguluvi. Pakuva umunono saayaga ndawe ililuva lya mwihala. ¹¹ Pakuva ilisuva pelihohomoka na umungila gwalyo gwagwikasa ifimelo, na maluva nago gagilagala, na wuwunofu wago wawukwanangika. Lwindahihyo, nayu munu umunono saayaga mumo mufipigo fyakwe. ¹² Alikiba umunu yula umufunyilile yeisigala muhuvilwa mu ukugelwa, pakuva peakangalye ukugelwa saapelwa ikipelwa cha uwumi we Nguluvi alavahuvise vala avamwenda umwene. ¹³ Neke umunu peigelwa alatigila, “Ndigelwa na Nguluvi.” Pakuva Nguluvi sahwaniti agelwe na uwanangifu na yumwene sakumugelagi munu yeyeavesaga. ¹⁴ Pesi umunu aigelwa na ukukwegelesewa na uwudobokesi wakwe yumwene. ¹⁵ Uwudobokesi pewuve ndamunyafilo wakwegala inzanangifu, na inzanangifu nayo peyikange ifwa. ¹⁶ Vanyalukolo vangu, mulasangwa! ¹⁷ Chechekivesaga ikipelwa ikinofu na chechekivesaga kipelwa ikikwilaniche kihumaga kuchanya; kihumaga kwa Dada, umugafi va uwenzelufu, umwene sipitukagi, kangi mugaya nambi imimile jejegivesaga ja ukupitukapituka. ¹⁸ Ukwimila ukuwenda kwakwe yumwene atwejee ukukola ulukani lwakwe ulwa nachene, sambi hwehwe tuve wita amalongola mufigawa mbefili. ¹⁹ Vanyalukolo vangu avende, mwiwukage ulukani ulu yeyeavesaga munu avelage mupefu ukupulika neke alawa mupefu ukulonga, nambi ukuva na ililakali lya pipi. ²⁰ Pakuva umunyalilakali sahwaniti akwise uwende wa Nguluvi uwa uwugolofu. ²¹ Sweno mugilekelage ng’ani imigendele imyaafu na imikalile imibi; mwanukilage kwa uwulele na lula uluhwanite ukusipoka inumbula senyu. ²² Muvelage mwivapisi va ulukani, mulemwage ukuva vapulisi hela, kono we mukwisanga. ²³ Yeyeavesaga munu yeipulikisa hilo ulukani kono wesipiga, uyo indawe umunu yeakwilava ulwihwano lwakwe yumwene mukilole. ²⁴ Akwilava yumwene, swe akwibitilaga, na sakwiyiwuka lweiwali. ²⁵ Neke umunu yeigosa wunofu indagilo iyikwilaniche yeyakuvapela avanu uwutemapawo, umunu yeigina ukwinatila nasi iva mupulisi na ukusemwa, pesi wita mupisi yeipiga uyo saafunyililwa mwa mbefili fyeapigaga. ²⁶ Wone ihosa ulwa munyalufuuwo, kono we mulonga fibi na ukwisanga yumwene, ulufuuwo lwa umunu uyo lugaya kinu. ²⁷ Ulufuuwo ulofuge na ulugaya wananzi pa Nguluvi Dada lwe ulu: Ukuvatanga avana avakiva na avang’inetu avafwile mulugudo lwawo, na ukwikomalila wunofu ukuta mulatifuswa na isa mung’i umu.

¹ Vanyalukolo vangu, pemwiva mukumufuuwa Umutwa Yesu Kilisito Umutwa va indolo, mulavahagula avanu. ² Tutigile umunu uyungi yeafwite inyamwidole mufyala imbuyapile isahabu na imyenda iminofu, akwingila pamukong’ano gwenyu, na baho kangi akwingila umunu umumikaa yeafwite fibi, ³ wone mumupela ululumbo yula yeafwite wunofu na ukumutigila: “Kong’omale ipa apanofu,” na ukumutigila yula umumikaa, “Veve wimage uko,” apangi, “Kong’omale ipa pasi,” ⁴ mbi ulo si lwe luhagu pagati apenyu? Mbi uwo uwulamusi wenyu siwuhumiti mumahosa amanangifu? ⁵ Vanyalukolo vangu avende, mupulikisage! Mbi Nguluvi si avahagwe avanu vala avamikaa mung’i umu sambi vave vanono mu lufuuwo na ukwanukila Uwutwa wealavahuvise vala avamwenda? ⁶ Neke nyenye mukuvabedala avanu avamikaa! Mbi, avanono sive vawo vevakuvawonela na ukuvakuluna mbaka mu wuhigilo? ⁷ Mbi sive vawo vevakuliliga ilyo ilitawa lyenyu ilinofu lyemwapelitwe? ⁸ Wone mwikwisa yila indagilo ya Umutwa ndawe yandikwe mu Wandike Uwelu; “Mwendage umunyafivawo vako ndawe lukwiyenda yiveve,” apo muva mwipiga wunofu hilo. ⁹ Neke wone muvabagule avanu, ipo, mwipiga inzanangifu, nayo indagilo yivahiga nyenye ukuta mwivananzi. ¹⁰ Yeakwananga ululagilo ulumwi mundagilo, uyo ava mwananzi ananzile indagilo mbesili. ¹¹ Pakuva yuyula yeatigee, “Ulava mugoni,” yeyuyo yealonzile kangi, “Ulawulaga.” Sweno, nambi wone supigiti uwugoni, kumbi uwulige, veve yewananzile indagilo. ¹² Sweno, mulongage na ukupiga wita avanu vesavahigwa ukukola indagilo isiletaga uwutemapawo. ¹³ Pakuva uluhigilo lwalwiva lugaya lusungu kulumunu yesilagila ulusungu; nambi ndahihyo ulusungu lwalwidwesa uluhigilo. ¹⁴ Kwina ukwambula kuki, vanyalukolo vangu, pe umunu itigila ina lufuuwo we mugaya fipigo? Mbi ulufuuwo luhwanite ukumupoka? ¹⁵ Tutigile yuva apangi umuhasa afulike mugaya myenda nambi ifilyo. ¹⁶ Lwinoga kiki nyenye ukuvatigila iwo, “Mugendelage uludodi mukootage umoto pemwiguta.” Wesimukuvapela fila fyevagulwime mu wunani wawo? ¹⁷ Lwindahihyo, ulufuuwo hela lwiyena pelugaya ifipigo ulo lufwe. ¹⁸ Neke umunu ahwanite atigile, “Veve wina ulufuuwo, nane ndina ifipigo!” Ena! Mundagilage lwe umunu ahwanite ave na ulufuuwo ulugaya ifipigo, nani ndivalagila ulufuuwo lwangu ukukola ifipigo fyangu. ¹⁹ Veve wifuuwa ukuta kwali Nguluvi yumwi ulo lunofu! Na amasoka gagifuuwa lulo nu ukukuvila. ²⁰ Ve mupuva veve! Ngali, wisaka ukulagilwa ukuta ulufuuwo ulugaya ifipigo lufwe? ²¹ Mbi Abulahamu ukukwetu lwave ndawuli ukwidikilwa ukuva mugolofu? Kwa ukwimila ifipigo fyakwe, ulusika lweamutawulige umwanakwe Isaki ave nambika pala pifunyo. ²² Wilava, lino ukuta ulufuuwo lwakwe lwagendasige na ifipigo fyakwe; ulufuuwo lwakwilaniche mufipigo fyakwe. ²³ Ipo pepene pewakwilye wula Uwandike Uwelu uwitigilaga: “Abulahamu amufuuvitwe Nguluvi, na ukukola ulufuuwo lwakwe idikilwe ukuva munu mugolofu; na palulo Abulahamu atambulwe munyawiyendi va Nguluvi.” ²⁴ Mwilava, lino, ukuta umunu aakwidikilwa ukuva mugolofu ukwimila ifipigo fyakwe, si wita ukwimila ulufuuwo hela lwiyena. ²⁵ Mbi si lwendahihyo na kwa yula umugoni Lahabu; apelitwe uwugolofu kwa ifipigo peavanuche vala avatume, na ukuvasindika vahume kwa ing’asi iyingi? ²⁶ Sweno, ndawe umuvili pemugaya umuhe gufwe, lwelulo na ulufuuwo pelugaya ifipigo lufwe.

¹ Vanyalukolo vangu, mwevangi mulemwa ukuva vigisi. Ndawe lwemukulukagula, hwehwe twe vigisi satuhigwa pakomi ukulutila avangi. ² Neke wone umunu siisooma mumilongele jakwe, sweno, uyo akwilaniche, na ahwanite awuvike muchoga uwunu wakwe mbewuli. ³ Hwehwe twakusivikila ifwalasi ulupanda mumilomo sambi situpulike, na ukukola lulo twihwana ukusilongosa kukwekuvesaga kwetwiwenda. ⁴ Ifipugu ifikomi nafyo, nambi we fikomi wuhulo, na fyafisugisiwa na ing’ala, fyafipitulwa na kanu kadodo ka ukulongokesa ifipugu, na ukukola kako umunyakugendya ahwanite ukukisindika kukwekuvesaga. ⁵ Lwindahihyo, ululimi nambi we kigawamuvili kidodo mumuvili, lwakwitunumika wuhulo. Umoto mudodo guhwanite gunyanye ilikungu lihafu. ⁶ Welwiwali na ululimi lwindawe umoto. Lumemile uwaafu uwulipolofu, nambi we lwina kilega mumivili jetu na lwalwitagalisa uwaafu muwunu wetu mbewuli. Lwalwilalisa imikalile jetu mbegili ukukola umoto ugwihuma ku Lyoto ukwene. ⁷ Avanu vahwanite ukukwamila ifikoko, na vakasuumite ukukwamila ifikoko mbefili, ifikoko fya mwihala, ifidege, inzoka na ifikoko fya mubahali. ⁸ Asukuli yeahwanite ukulukwamila ululimi. Ululimi kinu chaafu, lugaya kisiko, na lumemile uwusungu uwuwulasi. ⁹ Ukukola ululimi hwehwe twakumulumba Umutwa na Udadetu. Na ukukola lululimi lulo twakuvakotola avanu, avanu avagave mulwihwano lwa Nguluvi. ¹⁰ Ing’ani isa ukukotola na isa ululumbo sihumaga mu mulomo gugo gumwi. Vanyalukolo vangu, ing’ani isi sisivaji ukwima ndahihyo. ¹¹ Ngali, umufwilo gwa ululenga gumwi guhwanite ukuhumya ululenga ululengu na ulutiigu? ¹² Ngali vanyalukolo vangu umusombe guhwanite guveleke iseituni? Apangi, Umusabibu guhwanite guveleke imisombe? Umufwilo ugwa ululenga ulunyamwino siluhwaniti guve na ululenga ulunono. ¹³ Mbi, ye nani munyaluhala mwanyenye? Sweno, alagilage ulukani ulu ukukola imigendele jakwe iminofu na mufipigo fyakwe ifinofu ifipigikila muwilevesi na uluhala. ¹⁴ Neke wone imitima jenyu gimemile igila, imbipi na ulwiyendo, sweno, mulemwa ukwisumila na ukulonga uwudesi we mwisutana na isa nachene, ¹⁵ uluhala lwandahihyo silwindawe ulwihumaga kuchanya, ulo lwa konivala, na si lwa kinyamuhe na umwanangifu. ¹⁶ Pakuva pala pepina igila na ulwiyendo lwa uwusatilapakwe, ipo pava na liyoyo na ifipigo ifya uwanangifu. ¹⁷ Neke uluhala ulwihumaga kuchanya, ulwa ukutala ulu lweesiwe, lwalwiwenda uwikalakunoga, uwulele na ulwitugaga avanu, lumemile ulusungu na lwalwiveleka ifipigo ifinofu, lugaya lubagu nambi wubuganisi. ¹⁸ Uwugolofu ge maveleko ga inyadikwa se avawenda uwikalakunoga vavivyalila mu wikalakunoga.

¹ Mbi kiki ikikwambusa amagalu mwitakile nu kwitova? Siukuta uwudobokesi wenyu wewulimwigalu mwanyenye. ² Mwidobokela ifinu na pakuva simwihwana ukuva nafyo, mukwidikila nambi ukuwulaga; mwidoboka ukulutila ukuva na ifinu, neke simukufiwona; nambi mukwitakila nu kwitova. Simwiva na finu pakuva simumukumusuka Nguluvi. ³ Kangi, napemwisuka simwipelwa pakuva mwisuka fibi, mwisuka sambi mukwise isa uwudobokesi wenyu hela. ⁴ Nyenye mwivanu yemwigaya uwihuvilwa ndawe avagoni. Mbi simukulukagula ulwa ukuva munyawiyendi va ing’i kwe kuva wimutavangu va Nguluvi? Yeyeawendaga ukuva munyawiyendi va ing’i uyo ayiva mutavangu va Nguluvi. ⁵ Mbi mwitigila uwandike wugaya kinu uwitigila, “Nguluvi aiva na gila na Umuhe vakwe yeamuwuyipe ikale mwahwehwe?” ⁶ Neke uwuwuya wetwipelwa na Nguluvi wunyaludali ululutye; ndawe lwewilonga Uwandike Uwelu, Nguluvi akuvabesa vanyakidada, neke akuvapela uwuwuya Avilevesi. ⁷ Sweno, mwivikage pa wulolesi wa Nguluvi; mumukanilage Setani nave avakimbila nyenye. ⁸ Mumuhegelelage Nguluvi, nave avahegelela. Mofugage inumbula senyu nye mwevabuganisi! ⁹ Muhuguvalage, muvembage nu kukwikula, uluheko lwenyu luvelage kivembo na uluhekelelo lwenyu luvelage kivembo kikomi. ¹⁰ Mwilevesage pa Nguluvi, nave avapela ululumbo. ¹¹ Vanyalukolo vangu, mulisokama yinyenye kwa yinyenye. Yakumusokama munyalukolo nu kumuhiga, uyo akwisokama nu kusihiga Indagilo. Lino wone veve isihige Indagilo, sweno, veve sipewinatila Indagilo pesi ukuta lino ukusihiga. ¹² Nguluvi ye iyena hela yemunyakusivika Indagilo na ukusihiga. Na yumwene yeiyena swe yahwanite ukupoka nu kuwulagila ng’ani. Sweno, veve wi nani mbaka umuhige umunu muyago? ¹³ Sweno, lino mupulikisage nyenye yemwitigilaga, “Neng’ino apangi imilawu tubita ku boma iyingi nu kwikala kuko umwaka mbeguli twisulusa nu kwambula,” ¹⁴ Nyenye simuwuseli na wunani wenyu wewuva imilawu! Nyenye mwindawe ing’ungugu yeyayiva yipwali lusika ludodo hela na lusika ludodo kangi yayiva yinyekite. ¹⁵ Ipo luke luvavaje mutigile, “Wone Umutwa awende apo tupiga iki apangi kila.” ¹⁶ Neke, lino mwina kidada na ukwilumba, ikidada icho kibi sikinofu nda. ¹⁷ Sweno, umunu yula yesiipiga ulunofu lweakulukagula ulwa lumuvaje apige ava apigite inzanangifu.

¹ Muse lino nyenye mwevanono! Muvembage muyeyele pakuva sivasila inalamu. ² Uwunono wenyu wuwosile, imyenda jenyu jilifilwe na imalata. ³ Isahabu senyu na amagobole gatovelwa ing’angaga, ing’angaga iyo yiva wolelesi kwa nyenye nayo yilya na gimivili jenyu wita moto. Nyenye mwilundiche uwunono wenyu kwa ifilo fya ku wusililo! ⁴ Mulavage, amahombo ga avakami venyu, ve vavakakalye imigunda jenyu, neke mutane ukuvahomba vikoola na ingoolo sawo sipulisa mumapulikilo ga Umutwa va amalugu. ⁵ Mukikalite mung’i mumikalile ja ulwinomo. Yemwidutwifye ulwa ku kimunyi cha ukudumulwa. ⁶ Mukamuhigite na ukumuwulaga umunu yesimwananga kinu, nave sakavapiluli lukani lubi. ⁷ Vanyalukolo vangu, mukangalilage ukusindila mbaka Umutwa pesaasile. Mumulavage, umulimi lweaisindila we ikangalila ifimelo fyakwe amaveleko isanga amanofu, weikangalila mwalulo. Umwene ayisindila angalyye indonya sa pamasika na isa palusuva. ⁸ Nayi nyenye luvavaje ukuva na uwusindile; mukangasage imitima jenyu, pakuva ikimunyi cha ukusila Umutwa yekihegelye. ⁹ Vanyalukolo vangu, mulilonganza we yinyenye ng’ani mulonga muhigwe na Nguluvi. Umuhisi ye ave pipi, yakwingila. ¹⁰ Vanyalukolo, wone muwende icholelesi cha ukwiga mu wusindile na ulwikangaliso muneseko, mwihosage isa avavisi vevalongige mwitawa lya Umutwa. ¹¹ Tukuvatigila iwo vafunyilile pakuva vakangalye. Mukapulike isa ulwikangaliso lwa Ayubu, na mukwiwuka lwe umutwa amupije pamudugo. Pakuva Nguluvi amemile uwunofu na ulusungu. ¹² Ukulutila iso mbesili, vanyalukolo vangu, mulilapila kuchanya, nambi mung’i nambi ku kinu ikingi chechekivesaga. Mutigilage, “Ena.” Wone nachene mwidonya lulo, na “Nda.” Wone nachene lwelulo, na ipo pesisamuhigwa na Nguluvi. ¹³ Wone, pwali munu uyungi mwanyenye yeabanike, lumuvaje ifunyage. Wone, pwali yeihekelela lumuvaje imbage inzimbo isa ululumbo. ¹⁴ Wone pwali umutamwa mwanyenye lumuvaje avakemele avavaha va likanisa, nawo vamusukila na ukumubaka amafuta mwitawa lya Umutwa. ¹⁵ Wone vifunye mulufuuwo umutamwa apona; Umutwa amupela ikiba, na inzanangifu seapigite adegepelwa. ¹⁶ Sweno, mwinaakilage inzanangifu senyu, na mwisukilage, sambi mupone. Ulwifunyo lwa umunu umunofu mwina ludali ukupiga nzolofu. ¹⁷ Eliya ali munu ndawe yihwehwe. Ifunyite kwa mutima indonya yileke ukutonya, nayo siyatonyiti kwa lusika lwa myaka gidatu na myesi gimutanda. ¹⁸ Sweno, ndawe ifunyige kangi, indonya ndawe yatonyige; na ing’i swe yiveleka wunofu. ¹⁹ Vanyalukolo vangu, wone uyumwi venyu ibumangila mu inachene, na uyungi wone amupilule ²⁰ mulukagulage ukuta, uyo yeakumupilula munyanzanangifu uluhuma mung’asi iya uwuyasi, saayipoka inumbula yakwe ukuhuma mufwa, na inzanangifu sakwe inzolofu sasigubikwa.