AVAEBULANIYA

AVAEBULANIYA

¹ Ipo pidaha, Nguluvi alonzile na avakukwetu kolofu mung’asi isilipolofu ukugendela kwa avavisi, ² neke lino ifilo ifi ifya kuwusililo, alonzile nahwehwe ukugendela kulu Mwanakwe. Uyo yemwene kwa ukugendela kulu mwene Nguluvi aigafile ing’i na amuhagwe afiteme ifinu mbefili. ³ Umwene ye lumalavadiko lwa indolo sa Nguluvi kangi ye lwihwano ulwa nachene lwa Nguluvi umwene, yeakuyikangasa ing’i mulukani lwakwe ulunyaludali. Peyeavesise avanu inzanangifu sawo, ikalite kuchanya kwiwoko lya kundyo lya Nguluvi umunyaludali ulukomi. ⁴ Umwana va Nguluvi ye muvina ukulutila vanyivaha, ndawe litawa lyeapelitwe na Nguluvi, ikomi hilo ukulutila ilitawa lyawo. ⁵ Pakuva Nguluvi samulonji nambi kimunyi munyivaha vakwe yungi atigile. “Veve wi mwanangu; neng’ino mbe ndi Dado.” Na siealamulongela umunyivaha yeyeavesaga yula: “Nene neng’ino mba ndi dade, nave saave Mwanangu.” ⁶ Neke Nguluvi peamutumige konivala Umwanakwe umuvele atige de: “Na vanyivaha mbevali va Nguluvi, luvavaje vamusunyalile.” ⁷ Na kwa vanyivaha, Nguluvi itigila, “Ye nani ye akuvawuyapa avanyivaha vakwe vave ng’ala, na avakami vakwe vave nzenge sa umoto.” ⁸ Neke kusa umwana, Nguluvi itigila, “Uwutwa wako veve ve Nguluvi, winanaga mbepali na mbepali!” Kangi kwa yuyo Nguluvi itigila, “Kuvatema avanu vako aitema muwutwa wakwe kwa uwugolofu. ⁹ Veve wawiwenda uwugolofu, wakuwuvipila uwanangifu. Na uwimila iso nambi Nguluvi, Nguluvi vako akakufunyilye, kangi akupelye uluhekelelo ulukomi ukulutila lweavapelye avayago.” ¹⁰ Kangi itigila: “Mutwa, veve ye veve yewayigafile ing’i ipo pamuvango, na pe wikola amawoko gako wagafile na kuchanya. ¹¹ Iso sa sisila, neke veve winanaga mbepali na mbepali. Na mbesili sa sisakala wita mwenda. ¹² Nave sa asivilasa wita mugolole, naso sasikowong’asiwa wita sopeka. Neke veve ye veve hela kitasila na imyaka jako sigilasila nangi.” ¹³ Kangi Nguluvi siamulonji nambi kimunyi uyungi va avanyivaha vakwe atigile: “Wikalage kwiwoko lyangu lya kundyo mbaka pendivavikite avatavangu vako pasi pa amagulu gako.” ¹⁴ Avanyivaha, vevaki iwo pesi je myuhe hela vevakumupigila Nguluvi, nave Nguluvi akuvatuma sambi vavatange vala avakwanukila uwupoki.

¹ Sweno lutuvaje tuginage hilo ukwinatila mbesili setwapulike, sambi tulemwe ukuyasiwa. ² Pakuva ulukani lula lwevapelitwe avavaha vetu na vanyivaha, lyawonike ukuta lwanachene, nambi mwa mbevali yula yesibeeti na ukwinatila ahigitwe apume ndawe ulwelumuvaje. ³ Ino, hwehwe tupokwa ndawuli pesitwituga uwupoki uwukomi we windawe uwu? Kwa ukutala Umutwa yumwene awulaalike uwupoki uwu, na vala vevawupulike vatolelelye ulwa wa nachene. ⁴ Lwindahihyo Nguluvi atuwilye uwolelesi wakwe, kwa ukukola ifipigo ifilipolofu fya imiitu na uwuhulo, na ukuvagavila avanu ifipelwa fya Umuhe Umwelu ndawe mweawendelige. ⁵ Nguluvi siavavikiti vanyivaha vayitema ing’i iyikusa, kwekutigila ing’i yila yetukuyitinakisisa ing’ani sakwe. ⁶ Kangi yilongwa apono apangi de, muwandike: “Umunu che kiki, mbaka umuhosekese, umwana va umunu che kiki, mbaka umwiwuke? ⁷ Wamugafile hela ave pasika padodo pa vanyivaha; na ukumufwika ingela ya indolo na uwutambule, ⁸ Wakivikite chechekivesaga pasi pa magulu gakwe.” Lwilongwa ulwa Nguluvi amuvisile umunu ave mutema mu ifinu mbefili kwekutigila sichalekitwi nambi kinu kimwi. Nambi ndahihyo mbaka lino de, situkumuwona umunu yeitema ifinu mbefili. ⁹ Neke tukumuwona Yesu ye kwa ulusika ludodo avikitwe ave mudodo hilo pasi ya vanyivaha. Lino tukumuwona Yesu ye kwa ulusika ludodo awuyipwe mudodo kwa avanyivaha, apelitwe ingela ya indolo na uwutambule ukwimila uluteseko lwa ifwa, sambi ukwimila uwuwuya wa Nguluvi afwe akwimila avanu mbevali. ¹⁰ Kangi lwanoje kulumwene, ye ifinu mbefili finanaga ukukola kulumwene na mulumwene mukuvaleta avana wolofu mundolo, na ukuva mulongosi muwupoki uwukwilaniche ukukola uluteseko. ¹¹ Pakuva Umwene aakuvesa avanu inzanangifu sawo, nave pamwi na vala avesiwe, mbevali vinave Dada yumwi. Nambi Yesu siakwiwona nyoni ukuvakemela iwo vanyalukolo vakwe; ¹² Ndawe lweilonga: “Ve Nguluvi, ndivalongela vanyalukolo vangu ifipigo fyako. Sangulumba mumukong’ano gwawo.” ¹³ Kangi itigila: “Ndimuvikila Nguluvi uluhuvi lwangu.” Na kangi: “Nene ndipwali ipa pamwi na avana veamelye Nguluvi.” ¹⁴ Sweno, pakuva avana iwo, ndawe lweakuvakemela, iwo vanu vanya muvili na idanda, Yesu yumwene ave ndawe avene nu kuhanga uwunu wawo. Apigite ndahihyo sambi kwa ukugendela ifwa yakwe amwanange umwananzi, yula umunyalulagi lwa ifwa. ¹⁵ Na palulo avapoke vala veve vanyawingi ulusika mbeluli lwa uwunani wawo ukwimila umuhwehwe gwa ifwa. ¹⁶ Pakuva lulipelu hela ulwa umwene siasili uwimila ukuvatanga vanyivaha, pesi ndawe lwewilonga uwandike, “Akuvatanga avisukulu va Abulahamu.” ¹⁷ Nambi lwelwene lwelwamuvaje ave ndawe vanyalukolo vakwe mwa mbesili, sambi ave Mutambisi Umuvina vawo umuhuvilwa na munyalusungu mukumupigila Nguluvi, nukuhesa inzanangifu sa avanu. ¹⁸ Lino ahwanite ukuvatanga vala vevigelwa, pakuva nayumwene agelitwe muluteseko

¹ Vanyalukolo vangu, nye vanu va Nguluvi yemuvakemele na Nguluvi kuchanya, mwihose ulwa Yesu ye Nguluvi amutumite ave Mutambisi Muvina va ulufuuwo lwetukulwindika. ² Umwene e muhuvilwa kwa Nguluvi yeamuhagwe, apige ikipigo chakwe ndawe Musa lweemuhuvilwa mukaye mbeyili ya Nguluvi. ³ Umunyakusenga ikaye ayipelwa ululumbo ukulutila ikaye yiyene. Lwindahihyo nayi Yesu anoje ululumbo lukomi hilo ukulutila Musa. ⁴ Yeyeyivesaga kaye yisengwagwa na umunu uyungi de--nave Nguluvi ye musenzi va ifinu mbefili. ⁵ Musa emuhuvilwa mukaye mbeyili ya Umutwa wita mukami, na yealonzile ing’ani mbesili se Nguluvi saalonga ipo pambele. ⁶ Neke Kilisito muhuvilwa ndawe umwana umunyalulagilo mukaye ya Nguluvi. Hwehwe twikaye yakwe wone twinatile uwupifu wetu na uwukwilanifu wetu ukwimila kila chetuhele tukwihuvila. ⁷ Sweno, ndawe lweilonga Umuhe Umwelu: “Wone mupulike liswi lya Nguluvi namunyi, ⁸ Mulava nalubesa munumbula senyu ndawe avakukwenyu lweveviwali; pevamupitwike Nguluvi; Ndawe lweveviwali ikimunyi kila kula ku balali, pevamugelite Nguluvi. ⁹ Uko avakukwenyu vangelite na ukumingaminga, ilonga Umutwa, nambi we yevevafiwene ifipigo fyangu myaka machumi gatayi. ¹⁰ Nambi ukwimila lulo vambifise avanu iwo swe nditigila, ‘Amahosa ga avanu iva ga wuyasi, sivalasikagule nangi ing’asi sangu.’ ¹¹ Sweno, ndavipite, swe ngwilapa: ‘Sisavingila uko kwe ngendivapela ulusuupo.’ ” ¹² Swe vanyalukolo, mwikomalilage sisalulava ave pwali mwanyenye munya numbula imbi ndahihyo na yesiafuuvitwi mbaka abape kwa Nguluvi umumi. ¹³ Lino mwitangage munu na muyagwe mbepali, bahayitambulwagwa. “Ineng’ino.” Lulava uyumwi va nyenye ave na numbula ng’angafu pakusangwa munzanangifu. ¹⁴ Pakuva hwehwe twihanga na Kilisito, wone tukwinatila hilo uluhuvi lwetwetwinalo pamwandi: ¹⁵ Uwandike wilonga: “Wone mupulike liswi lya Nguluvi neng’ino, mulonga muve na inumbula nalamu ndawe avakukwenyu lweveviwali ulusika lwevamitwike” ¹⁶ Mbi ve vanani lino, vevapulike liswi lya Nguluvi vamupituke? Ve vavala mbevali vevalongosigwe na Musa uluhuma ku Misili. ¹⁷ Mbi Nguluvi avavipye vanani ulusika lwa imyaka machumi gatayi? Avavipye vavala vevapigite inzanangifu, na imifimba jawo jatagalye mula mubalali. ¹⁸ Nguluvi ave akwilapa atigile, “Sisavingila apangu pawusuupo.” Avalongige vanani? Avalongige vavala avevapitwike. ¹⁹ Ino, tuluwene ukuta sivinji uko. Pakuva sivafuuvitwi.

¹ Sweno, pakuva uluhuviso lwa ulusuupo pepololi tuvelage na muhwehwe alonga umunu yeyeavesaga mwahwehwe alalemwa ukwingila mulusuupo ulo. ² Pakuva Ulukani Ulunofu yeludalikwe ukwetu ndawe welwadalikwe kuvanu va pidaha. Neke ulukani ulo silwavakwili kinu, pakuva valupulike neke vave sivalwanuchi mu lufuuwo. ³ Sweno, hwehwe yetwifuuwa tukwanukila ulusuupo ulo lwe Nguluvi ealuhuvise. Ndawe lwealonzile: “Ndavifile, swe ngwilapa: ‘Sisavingila apangu pawusuupo.’ ” Nguluvi alonzile iso nave ikipigo chakwe yechekisisile uluhuma ukugawa kwa ing’i. ⁴ Pakuva Uwandike wilonga apangi de ulwa ikimunyi icha mufung’ati, “Nguluvi asuupite ikimunyi cha mufung’ati swe akufileka ifipigo fyakwe mbefili.” ⁵ Kangi ulukani ulu nalo lwilongwa, “Sisavingila apangu pawusuupo.” ⁶ ino uluhuviso ulo lwa ukwingila pepololi pakuva vala vevadalikilwe pamwandi valemilwe ukwingila umo pakuva vagayite ulufuuwo. ⁷ Nguluvi avikite ikimunyi ikingi ikitigilwa “Neng’ino”. Alonzile pambele ukugendela kwa Daudi myaka myolofu ijegilutye, ulwa uwandike uwo yewewulonzilwe: “Wone mupulike liswi lya Nguluvi neng’ino, mulonga muve na numbula nalamu.” ⁸ Wone Yosuwa eahwane ukuvapela ulusuupo ulo, Nguluvi siealonga kangi ulwa ikimunyi ikingi. ⁹ Kwa lulo, pepololi ulusuupo lwa avanu va Nguluvi ndawe kula ukusuupa kwakwe Nguluvi ikimunyi icha umufung’ati. ¹⁰ Pakuva, yeyeipigila pawusuupo wa Nguluvi saasuupa uluhuma mukipigo chakwe ndawe Nguluvi lweasuupite uluhuma mu kipigo chakwe. ¹¹ Sweno, tukangalage ukwingila mulusuupo ulo, sambi alemwe ukuva pwali munu mwahwehwe yeigwa mukufuuwa. ¹² Pakuva lukani lwa Nguluvi lunyawumi na kangi lwina ludali; lwina uwugi ukulutila limage ilinyawugi mbekuli. Lyalidumula mbaka apono pe inumbula na Umuhe fitang’ana, mbaka pala pefitang’ana ifigawamuvili na umwindi. Ulukani ulo lwalwihiga uwukalalile na amahosa ga munumbula sa avanu. ¹³ Sikokili ikigawa chechekivesaga ikifihime pa Nguluvi, chechekivesaga kivike pawelu palumwene. Kulumwene, hwehwe mbetuli salutuvagila twilongele isa ifipigo fyetu. ¹⁴ Sweno, lutuvaje ukwinatila hilo ulufuuwo lwetukulwidikila. Pakuva twinave Umutambisi Umuvina yeinje mbaka kwa Nguluvi yumwene--Yesu, Umwana va Nguluvi. ¹⁵ Pakuva sitwinave Umuvina yesi awuseele hilo uwuhomefu wetu, yumwene agelitwe ndawe hwehwe munzolofu na saapigiti nzanangifu. ¹⁶ Sweno, tulava na umuhwehwe ukuhegelela kwa Nguluvi, umunyawuwuya twanukile ulusungu na uwuwuya atutange petwiguluma uwutanzi.

¹ Yeyeavesaga Mutambisi muvina aihagulwa uluhuma muvanu uwimila ukumupigila Nguluvi iva ahalye pavene, atawule ifitawulwa na inambika uwimila inzanangifu sawo. ² Pakuva na yumwene nave muhomefu, ahwana ukuvawonela ulusungu vala aviyaga na avagaya inzeli vipiga inzanangifu. ³ Na ulwa na yumwene pakuva muhomefu ndahihila, lumuvaje atawule inambika uwimila inzanangifu sakwe yumwene, siuwimila inzanangifu sa avanu vangi hela. ⁴ Sikwali umunu yeahwana ukwitegulila ululumbo yumwene lukuva Mutambisi Muvina. Yeavesaga aihagulwa na Nguluvi ukuva Mumbisi Muvina ndawe lweeiwali Haluni. ⁵ Lwindahihyo nayi Kilisito siitegulii yumwene ululumbo lukuva Mutambisi Muvina, pesi ukuta Nguluvi amutige: “Veve wi Mwanangu; Nene neng’ino yembe Dado.” ⁶ Alonzile kangi apono apangi: “Veve wi mutambisi kitasila, mumigosekese gigila ja Melekisedeki.” ⁷ Nave Yesu peikalige umu mung’i, kwa ikivembo kikomi na kwa inzihosi amusukige nu kwifunya kwa Nguluvi yula yeeina uludali lwa ukumuponia mufwa, nave apulikwe pakuva amogopige Nguluvi. ⁸ Nambi, weali mwana va Nguluvi, iyigise ukuva na choga ukugendela uluteseko. ⁹ Na peyeawuyipwe akwilaniche, swe iva kilamuko cha uwupoki uwutasila, kwa vala mbevali avakumupulika, ¹⁰ nave Nguluvi swe akumuhagula ukuva Mutambisi Muvina ikola imigosekese ja uwutambisi wa Melekisedeki. ¹¹ Twina nzolofu isa ukulonga mu lukani ulu, neke lino lutalamu ukuvaganulila, pakuva nyenye simuvapefu ukulukagula. ¹² Ku lino luke luvavagila ukuva vigisi swe lukwile, neke lino pemusaka umunu va ukuvigisa inzigiso isa umuvango isa ulukani lwa Nguluvi. Pakuleka mupelwe ikilyo ikikangafu, ino lukuvavagila mupelwe lisiva munywe. ¹³ Yeyeavesaga munu yeipelwa lisiva anywe uyo pe mwana mudodo, salawukagula uwugolofu chekiki. ¹⁴ Neke ikilyo ikikangafu icho chakiva kuvanu avavina avakange, ve uluhala lwawo lwasoveliswe ukuhiga inofu na imbi.

¹ Sweno, tusilekage inzigiso isa pamuvango isa Kilisito na tubitage kidonya ku nzigiso isa kivina, tulavika ulutu ulungi ulwa ukupela ukuhuma mufipigo ififwe na isa ulufuuwo ulwidonya kwa Nguluvi. ² na uwulagise uwa ulofugo, na uwufunyilile wa ukugelekwa amawoko, ulusilibuko lwa avafwe na uluhigilo lwa mbepali na mbepali. ³ Na ulu satupiga! Wone Nguluvi awende. ⁴ Pakuva avanu vevakululeka ulufuuwo lwawo lwiima ndawuli kangi ukuvapilula sambi vahongese kangi? Avanu iwo yeve vinje mulung’ali lwa Nguluvi, yevevagesise ikipelwa cha kuchanya na ukupelwa Umuhe Umwelu; ⁵ yevevagesise uwunofu wa ulukani lwa Nguluvi nu ludali lwa ing’i iyikusa, ⁶ Sweno, ndawe valulekige ulufuuwo lwawo! Siluhwaniti ukuvapilula kangi vahongese, pakuva yevakumutumbika kangi Umwana va Nguluvi nu kumuhongela inyoni pavanu. ⁷ Nguluvi ayikuyifunyilila ing’i yeyakwanukila indonya peyitonya kolofu,nu kumesa ifimelo ifinya ukwambula kukomi kwa avanya kulima. ⁸ Neke wone ing’i iyo yimese imibiki ija imifwa na amasoli, iyo yigaya cha kwambula; yiva pipi nu kukotolwa na Nguluvi nu mudugo gwakwe kunyanywa mu moto. ⁹ Neke, nambi twilonga de, vanyawende vetu, twina luhuvi lukomi uwimila nyenye. Tukulukagula ulwa yemwanuche uwufunyilile uwunofu uwulutye wa uwupoki wenyu. ¹⁰ Nguluvi sigayagi uwanachene; sisemwagi ikipigo chemupigite ukwimila umwene mukipigo chemwapigite na chemwipiga lino ku vanu vakwe. ¹¹ Lwetwidoboka hwehwe lwe ulu ukuta yeyeavesaga munu mwa nyenye avelage mupifu ndahihyo mbaka ku mudugo, sambi semukwihuvila sikwile. ¹² Lino Mulava vagata pesi ulwa muvelage ndawe vala vevifuuwa na ukukangalila, na palulo vakwanukila sila inyuvise na Nguluvi. ¹³ Nguluvi peamuhuvisige Abulahamu, ilapye ilitawa lyakwe yumwene, pakuva sikwali umuvina ukumulutila Nguluvi, ye kwa yuyo ake ahwana ukumwilapila. ¹⁴ Nguluvi alonzile,“Nachene ngufunyilila na ukukupela imbegalo ingomi.” ¹⁵ Abulahamu asindye kwa kukangalila nambi anuche kila checheilapilwe na Nguluvi. ¹⁶ Avanu pevakwilapa vakwilapila kwa uyumwi ye muvina hilo ukulutila aveve na ulwilapo ulo lwalwidumula ulubesa mbeluli. ¹⁷ Nave Nguluvi akangise uluhuviso lwakwe kwa ulwilapo; na palulo avalaje vala veavilapye ulwa sapitula nangi lweavilapye. ¹⁸ Sweno, kofili finu fivili: fyesihwaniti ukupituka na kangi uwimila ulo Nguluvi sahwaniti alonge wudesi. Sweno, hwehwe yetwakimbilye uwulolesi kulumwene twikangaswa imitima sambi twinatile hilo uluhuvi ulwavisilwe pa hwehwe. ¹⁹ Twinalo uluhuvi lulo wita kimililo mumigendele jetu. Na uluhuvi ulo lukangafu hilo, nalo lukwingila mbaka kukibupa cha itembeli ya kuchanya mbaka pala apelu mugati. ²⁰ Yesu alongwe ukwingila umo uwimila hwehwe, na ave mutambisi muvina kitasila, va imigosekese gigila ja Melekisedeki.

¹ Melekisedeki e Mutwa va ku Salemu, na mutambisi va Nguluvi umuvina. Abulahamu peapilukige ihuma kwigalu kwe avawulige avatwa, Melekisedeki atang’ine nave, swe akumufunyilila, ² nave Abulahamu amomolye pichumi fya ifinu mbefili fyeeakolye uwuganusi wa ilitawa lyakwe Kwekutigila Melekisedeki ye, “Umutwa va uwugolofu”; na, kangi pakuva e Mutwa va ku Salemu, litawa lyakwe kangi kwekutigila, “Umutwa va uwikalakunoga.” ³ Udade nu yuve sivitambulwa nambi, na kangi nambi ulukolo lwakwe silwitambulwa; silwilongwa ulusika lwa ukwegalwa na ulwa afwe panili. Uyu ihwana na Umwana va Nguluvi, na iva peavelaga mutambisi mbepali na mbepali. ⁴ Sweno, mwiwona ulwa umunu uyu lwee mutambule. Kukwetu Abulahamu amomolye fya pichumi fya ifinu mbefili fyeeagalwe kwigalu. ⁵ Tukulukagula kangi ulwa mu ndagilo, avana va Levi avatambisi, vevene vevanoje ukutegula ifya pichumi uluhuma kuvanu, kwe kutigila kwa vanyalukolo vawo, nambi na avene nawo visukulu va Abulahamu. ⁶ Neke uyo Melekisedeki sie va ulukolo lwa Levi, nambi ndahihyo anuche ifya pichumi ukuhuma kwa Abulahamu; kangi amufunyilye umwene yee mupele uluhuviso. ⁷ Sipololi ulukani lwa ukusina nambi padodo, ulwa na mbepali yeakumufunyilila uyungi aiva muvina ukumulutila yula yeifunyililwa. ⁸ Kangi, iwo avatambisi vevakwanukila ifya pichumi, ve vanu ve vifwisaga; neke lino ipa yevakwanukila ifya pichumi kwekuta Melekisedeki itigilwa uyu sifwisagi. ⁹ Twihwana lino, ukutigila ulwa Abulahamu peatawulige ifya pichumi, Levi (ye avanakwe vakwanukila ifya pichumi) nave atawe ifya pichumi. ¹⁰ Pakuva Levi esalegalwa nda, neke iva wita wanda e mumo mumuvili gwa ukukwe Abulahamu, ulusika lwe Melekisedeki peakwitang’ana na ukukwe. ¹¹ Lino wone uwukwilanikile wewuvelage wutufiche ukukola uwutambisi wa Avalevi (pakukola mwalulo avanu vanuche indagilo), mbi kwekuva na kuguluma kwa umutambisi yungi se mumigosekese ja Melekisedeki, pesi yula hela yeitambula mumigosekese ja Haluni? ¹² Pakuva uwutambisi pewupitwike, lwindahihyo na indagilo naso sipitukage. ¹³ Nave Umutwa vetu ye mbesili iso sikumulonga yu mwene, e va ulukolo ulungi, na sipwali va mulukolo lwakwe nambi yumwi yeapigite pala pifunyo iva mutambisi. ¹⁴ Lulonge pelu ulwa umwene egalilwe mulukolo lwa Yuda ulukolo lwe Musa salulonzili pealongige isa avatambisi. ¹⁵ Kangi ulukani ulu lulipelu hilo Umutambisi uyungi yeihwana na Melekisedeki yeakawonike. ¹⁶ Uyo siapelitwi uwutambisi ukukola indagilo na uwulagise wa avanu uwakwanangika, pesi kwa uludali lwa uwumi uwutasila. ¹⁷ Pakuva Uwandike Uwelu witigila, “Veve wi mutambisi kitasila, ukungendela imigosekese ja uwutambisi wa Melekisedeki.” ¹⁸ Sweno, ululagi lula ululovela lwahesiwe pakuva lwe luhomefu na silwanosigi kinu. ¹⁹ Pakuva indagilo sa Musa sisahwaniti ukukwisa ulukani lwelweluvesaga. Neke lino, apono pala pahalye uluhuvi ulunofu ululutye hilo, na uwimila lulo twihwana ukumuhegelela Nguluvi. ²⁰ Siwita lulo hela ipa pololi ulwilapo lwa Nguluvi. Kumbi ulusika lula lwe avangi pevapeligwe uwutambisi ulwilapo ulo silwepololi. ²¹ Neke Yesu apelitwe uwutambisi kwa ulwilapo ulusika lwe Nguluvi amutigilige: “Umutwa ilapite, na sisaapitula lweealulekite: ‘Veve wi mutambisi kitasila.’ ” ²² Uwimila ukusutana uko, Yesu ave kipingiko cha ulufingano ulunofu ululutye hilo. ²³ Kangi kwina ukusutana ukuliwungi; iwo avatambisi avangi vewolofu pakuva vafwisige na sivahwaniti ukuva pevapigaga mbepali. ²⁴ Neke Yesu siindawe avene, umwene inana kitasila, uwutambisi wakwe siwihegagi kulumwene nangi. ²⁵ Uwimila lulo, umwene ihwana lino na mbepali ukuvapoka vala mbevali vevakumubitila Nguluvi ukugendela kulumwene, pakuva umwene inana kitasila avasukilage kwa Nguluvi. ²⁶ Sweno, Yesu ye mutambisi umuvina yeakwilaniche hilo mu wugulumu wetu. Umwene mwelu, mugaya wananzi nambi nzanangifu mulumwene; asumuli mwa vanyanzanangifu na apelitwe indolo mbaka kuchanya. ²⁷ Umwene siindawe vala avatambisi avavina avangi; silumuvaji ukutawula inambika wekwache, ivangila inambika ya inzanangifu sakwe yumwene, pambele uwimila inzanangifu sa avanu vangi. Umwene apigite ulo sukumwi hela peitawulige yumwene nambika, na iyo yikwila mu imisika mbegili. ²⁸ Nachene ululagilo lwa Musa lwalwihagula avahomefu ukuva vatambisi vavina; neke ulwilapo lwa Nguluvi lwealuvikite mu mwilapo na lwelwahumite mu mbele ya ululagilo lumuhagwe Umwana yeavikitwe akwilaniche kitasila.

¹ Sweno, ululutye mwa mbesili setwilonga lwe ulu: hwehwe twinave Umutambisi Umuvina yeindahihyo, yula ye akong’ome kundyo kwa ikigoda cha uwutwa cha umunyaludali Nguluvi kuchanya. ² Umwene ipigaga uwupisi wa umutambisi umuvina apono apelu hilo, kwekutigila mugati mwa ilihema ilya nachene ilisenge nu Mutwa, na si na avanu nda. ³ Yeyeavesaga mutambisi muhagule ukumutawulila Nguluvi ifitawulwa na inambika, na palulo nayi mutambisi Umuvina vetu lumuvaje avelage na ikinu cha ukutawulila inambika. ⁴ Wone Umwene eave va baha ponivala, sieahwana nambi ukuva mutambisi, pakuva povali avatambisi avangi avitawula ifitawulwa ndawe indagilo we sihele silagila. ⁵ Ifipigo fyawo fya uwutambisi ifyo figaniso hela na mwigigi gwa fila ifilikuchanya. Na lwe lwelwiwali na kwa Musa. Ulusika lweepipi ukusenga ilihema, Nguluvi amulonje, “Wuyapage chechekivesaga ukwiga kila ikiganiso walagilwe kula ku kidunda.” ⁶ Neke lino Yesu apelitwe ikipigo cha uwutambisi ikinofu ukulutila cha avene, ndawe ulufingano lwealukangise mu vanu na Nguluvi lunofu ukulutila, pakuva ulutu lwakwe lwimye mu nyuviso sa ing’ani inofu isilutye. ⁷ Pakuva wone ulufingano lula ulwa ukutala lweluvelage lugaya wutenda, apepagaya ikivalwa cha ukuvika ulu ulwa kavili. ⁸ Neke Nguluvi avasokime avanu vakwe peitigila: “Ikimunyi kikusa, ilonga Umutwa, pesambika ulufingano ulupya na avanu va Isilaeli na avanu va mu Yudaya. ⁹ Ulufingano ulu silwihwana na lula lwendavikite na avakukwawo ikimunyi kila pendavalongosige kwa uludali ukuvahumya ku Misili. Sivevahuvilwa mu lufingano lwangu; nambi nane sindavatugiti, ilonga Umutwa. ¹⁰ Na ulu lwelufingano lwangu lwembika na vanu va Isilaeli ifilo ifikusa, ilonga Umutwa: Mbika indagilo sangu mu luhala lwawo, nu kwandika mu numbula sawo. Nane mba Nguluvi vawo nawo vava vanu vangu. ¹¹ Sipwali kangi umunu yeamwigisa umuyagwe, nambi yeamulongela munyalukolo vakwe ukuta: ‘Mukagulage Umutwa.’ Pakuva avanu mbevali, vavina na vadodo, savang’agula nene. ¹² Nane ndivadegepela inzanangifu sawo, na sisanziwuka kangi uwananzi wawo nambi.” ¹³ Na mukulonga sa ulufingano ulupya, Nguluvi alusakise lula ulwa ukutala; na chechekivesaga ikisakalaga nu kuva kilovela icho sikihaavagi ukuyaga.

¹ Nalufingano ulwa ukutala lwe lwina ulwinungo lwakwe lwa ukusunyalila na kangi apono pa ukusunyalila apepasenge na avanu. ² Pawuyipwe ilihema lye pivala pailyo patambuligwe apono apelu. Ipo pepina ikimikiso cha itala, imesa na imikate ijemitawule kwa Nguluvi. ³ Kunzingo ya ikibupa cha kavili, pepina ilihema pepatambuligwe Apono Apelu Hilo. ⁴ Umo mugati pepopali pifunyo apawuyapile isahabu pakufung’ilisa uwufumba, na ilisandiko lya ulufingano, na lilyene lyelibake isahabu imbali mbesili, mugati umo mwemwina ikitonga cha isahabu ichekisope imana, na ingoda ya Haluni yeyeyilembwe amahamba, na fila ifibawo ifivili fyefyefyandikwe Ulufingano, ⁵ pachanya pa ilisandiko pepina ifigawa finyamapiko ifyalagilige uwulipwali wa Nguluvi, na amapiko gegagubike apono pe inzanangifu sadegepiligwe. Neke lino, situhwaniti ukulonga wima ulwa ing’ani iso kangi. ⁶ Iso isapigigwe neke pambele swe save musimu ku vatambisi ukwingila wekwache pa ilihema lya pivala ukupiga uwupisi wawo. ⁷ Neke umutambisi umuvina yeiyena yeingilige pihema lya kavili, nave apigige ulo kamwi peguvesaga mwaka. Na peingilige mugati ategulige idanda yeamutawulilige Nguluvi uwimila umwene na uwimila inzanangifu sa avanu isevapigite kwa uwugaya nzeli. ⁸ Uwimila imigosekese ijo Umuhe Umwelu akwigisa pawelu ukuta ulusika lila lihema lya pivala pelye likali we limite, ing’asi ya ukwingilila Apono Apelu siyiladindulwa. ⁹ Ulukani ulo che kiganiso cha imisika igi ja lino. Lwilagila ulwa ifitawulwa na inambika isitawulwa kwa Nguluvi sisihwaniti ukuwuyapa inumbula sa vala vevakusunyalila ukuva sikwilaniche. ¹⁰ Pakuva iso mbesili sikwimila mu filyo, ifinywewa na imisimu igiliwungi na wungi ja ukukalava. Mbesili iso wulagise wa kwivala hela; na uludali lwayo lwalwiduga ulusika lwe Nguluvi iwuyapa wupya ifinu mbefili. ¹¹ Neke Kilisito yeafisile, iva Mutambisi Muvina va ing’ani inofu, se kulino yesifikite, umwene ipigila pihema ilinofu na ilikwilaniche hilo, lyesiwuyape na amawoko ga vanu, kwekutigila ilyo silya mung’i umu umwagafilwe. ¹² Umwene inje Apono Apelu sukumwi hela, kangi sieategwi nambi danda ya mene nambi ya senga, pesi ulwa inje kwa danda yakwe yumwene, swe akutupela uwukombolwa uwutasila. ¹³ Pakuva ukuhanyilwa avanu avahongawinya idanda ya imene na ing’ambakwa na kangi ikifu cha indamaa fikwesaga na ukuleta uwelu wa umuvili. ¹⁴ Mbi idanda ya Kilisito, sisailutisa ya ukukola mu muhe va mbepali itawe yumwene we mugaya wulongwa fibi ofuga inziyiwuko senyu uluhuma mumipigile iminofu sambi mumupigile Nguluvi umumi. ¹⁵ Palulo Kilisito, yeagosise Ulufingano ulupya sambi vala avakemele na Nguluvi vanukile uwufunyilile wa mbepali na mbepali wealavahuvise, pakuva ifwa yiwonike iyikombolaga avanu uluhuma mula mu wananzi wevapigite ulusika lwa ulufingano ululovela. ¹⁶ Na mbepali ulwandiko lwa uwulagise wa umunu yeaihagula yula umunu yategula amalila ga uwunono wakwe paumwene yaafwe, ulo lwakwidikilwa pala pe ifwa yakwe yiva yeyifikite. ¹⁷ Uwulagise uwo siwuhwaniti wupigilwe kinu mbaka pala peyiwonike ifwa, pakuva uwulagise siwipigilwagi kinu pe yula umunyakulagisa pe mumi. ¹⁸ Nambi na lula ulufingano ulwa ukutala silwawuyipwi wone pagaya ukubohoka danda. ¹⁹ Musa avimbye avanu indagilo mbesili ndawe lwesenzandike swe ndawe ategulige idanda ya isenga na imene pamwi nu lulenga, nu kukola uludete lwa hisopo nu wuhamba uwudung’u, swe akukihanyila ikitabu cha indagilo na vawo avanu mbevali. ²⁰ Musa atige, “Iyi ye danda iyikangasa ulufingano lwe mwivalagile na Nguluvi mwinatilage.” ²¹ Kangi Musa ahanye ilihema idanda na ifinu fyevakolige muwusunyalile. ²² Ena, nachene uwimila indagilo, fikwenda ifinu mbefili fihwane ukofugwa na idanda, na inzanangifu naso sidegepelwaga hela wone idanda yeyibohwike. ²³ Ifinu ifi fye wita mwigigi hela gwa ifinu ifya nachene fya kuchanya, lwafivaje ukofugwa mung’asi yiyo. Neke ifinu fya kuchanya sifiguluma inambika inofu hilo iyilutye. ²⁴ Pakuva Kilisito siinji Apono Apelu apawuyape na amawoko ga vanu, pe wita wanda mwigigi hela gwa fila ifyanachene. Umwene iinje ukwene hilo kuchanya kwe kulino imite pa Nguluvi ukwimila hwehwe. ²⁵ Kangi umwene siingiligi pifunyo kitapilukila ndawe umutambisi umuvina yeingilige pifunyo peguvesaga mwaka weategwe idanda yesiyakwe. ²⁶ wone lweluve ndahihyo, Kilisito lwelumuvagila ukuteseka kolofu uluhuma ukugawa kwa ing’i. Neke lino imisika igi pegihegelela kuwusililo wayo, umwene awonike sukumwi hela, ukuhesa inzanangifu kwa ukwitawula yumwene nambika. ²⁷ Sweno, lwindahihyo yeyeavesaga munu ifwisaga sukumwi hela, swe asakwima pa wuhigilo wa Nguluvi, ²⁸ lwindahihyo nave Kilisito itawe nambika sukumwi hela sambi asihese inzanangifu sa awolofu. Pesaiwoneka ulwa kavili, siwita kangi akusa kukwihoma na inzanangifu, pesi ukuta kukuvapoka vala avakumusindila umwene.

¹ Pakuva indagilo siva mwigigi gwa ifinu ifinofu ifikusa lwihwano ulwa ifya nachene, siluhwaniti ukukola inambika sisila isitawulwagwa mbepali mwa na mwaka sivanoose vave vakwilaniche avihelela pifunyo. ² Pesi ndahihyo lwelusilila baho pakutawulwa? Wone avanu iwo vevakumusunyalila Nguluvi vake vavelage wofugwe inzanangifu sawo nachene, sivake vipulika kangi ukuta vanyanzanangifu, na inambika iso mbesili ngesadusile. ³ Neke ulwene ndahihyo inambika iso satawuligwe peguvesaga mwaka ukuviwusa avanu inzanangifu sawo. ⁴ Pakuva idanda ya ing’ambakwa na imene siyihwaniti nambi ukuhesa inzanangifu. ⁵ Nambi Kilisito peasige mung’i, amutige Nguluvi: “Siwawenditi inambika nambi ikitawulwa, neke ungelanikise umuvili. ⁶ Ifitawulwa fya ukunyanya nambi ifya ukuhesa inzanangifu sifikukunogela. ⁷ Ipo ndatige: ‘Nene ndibaha veve Nguluvi, ndigelanise kukupiga sewiwenda ndawe lwandikwe uwimila nene mu kitabu cha Indagilo.’ ” ⁸ Ulwa ukutala atige, “Siwiwenda, nambi siwinogelwa na inambika na ifitawulwa, ifitawulwa fya ukunyanya nambi fya ukuhesa inzanangifu.” Alonzile ndahihyo nambi ulwene inambika isi mbesili satuwuligwe ukwimila indagilo. ⁹ Kangi ndatige, “Nene ndibaha veve Nguluvi, ndigelanise kukupiga sewiwenda.” Ipo pepene pe Nguluvi ahesise inambika indovela na apono baho ahaalise iya ya Yesu. ¹⁰ Pakuva Yesu Kilisito akwisise uwende wa Nguluvi, hwehwe tukofugwa inzanangifu setu na yila inambika ya umuvili gwakwe gwe agutawe sukumwi hela, swe yikwila. ¹¹ Yeyeavesaga mutambisi va i Kiyudaya aipiga mu wusunyalile mbepali nu kutawula inambika sisilaga kolofu, inambika sesisihwaniti ukuhesa inzanangifu. ¹² Neke Kilisito atawe nambika yimwi wimila inzanangifu, inambika iyikwilaniche mbepali na mbepali ndawe ikalige kulubali lwa kundyo lwa Nguluvi. ¹³ Uko isindila mbaka avatavangu vakwe pevavisilwe pasi ya amagulu gakwe. ¹⁴ Sweno, uwimila inambika yakwe yimwi hela avawuyipe vave vakwilaniche kitasila vala avakofugwa inzanangifu sawo. ¹⁵ Nave Muhe Umwelu akutupela uwolelesi wakwe, ukutala itigila: ¹⁶ “Ulu lwe lufingano lwembuyapa nawo, ifilo ifikusa, ilonga Umutwa: Nene mbika indagilo sangu mu numbula sawo, nu kwandika mu luhala lwawo.” ¹⁷ Kangi awilye ukutigila: “Sisanziwuka kangi inzanangifu sawo, nambi ifipigo fyawo fya uwananzi.” ¹⁸ Sweno, inzanangifu peyesihesiwe, sipava na lukani kangi lwa ukutawula inambika saukuhesekesa inzanangifu. ¹⁹ Sweno, vanyalukolo kwa idanda ya Yesu twikangaswa imitima ukwingila Apono Apelu. ²⁰ Umwene atudindulye ing’asi imya, ing’asi yinyawumi, ukugendela pala pa kibupa, kwekutigila ing’asi ya umuvili gwakwe yumwene. ²¹ Sweno, twinave Umutambisi umutambule umunyaludali mukaye ya Nguluvi. ²² Nambi lino tumuhegelelage Nguluvi kwa mitima imigolofu nu lufuuwo ulukwilaniche, mu numbula inzofuge uluhuma mu mahosa amabi, na mu mivili jesimyofuge nu lulenga ululengu. ²³ Twinatilage uluhuvi lwetu lwetukulwidikila, pakuva Nguluvi yeatwihuvise inyuviso sakwe vanachene. ²⁴ Tusugunalage ukwitanga yihwehwe sambi twiwile uludali lwa ukwiyenda nu kupiga inofu. ²⁵ Satulaguleka gula umusimu gula gwa ukukong’ana pamwi, ndawe avangi lwevipiga. Pesi lutuvaje twitangage nu ukulutisa, pakuva ndawe lwemukwilavila yinyenye, ulwa Ikimunyi kila cha Umutwa yekihegelye. ²⁶ Pakuva, wone tuve petupiga inzanangifu kono we yetulukagwe ulwa nachene, ipo ino sikoyili inambika kangi yeyihwana ukuhesa inzanangifu. ²⁷ Lino chekisige ukusindila hela wetwina muhwehwe ugwa ukuhigwa na Nguluvi nu moto ugukwaka pakomi hilo gwesaguvalalisa mbevali vanyalubesa kulumwene. ²⁸ Umunu yeyeavesaga yesakwinatila indagilo sa Musa, ayiwulagwa kigaya nambi lusungu wone pave na uwolelesi wa vanu vavili nambi vadatu. ²⁹ Mbi ndawuli umunu yula yeakumwelanga Umwana va Nguluvi nu kuyibedala idanda ya ulufingano lwa Nguluvi lwelwamofwige, umunu yeakumuliga Umuhe va Nguluvi? ³⁰ Pakuva tumukagwe yula yealonzile, “Nene yenyomba umukole, nene nyomba,” na yula yealonzile kangi, “Umutwa saavahiga avanu vakwe.” ³¹ Ukugwila mumawoko ga Nguluvi umumi ulo lukani lwakogofya hilo na hilo! ³² Mwiwukage sesawonike ifilo fila ifya pamwandi pemwang’alikilwe ulung’ali lwa Nguluvi. Nambi ifilo ifyo mwatesike pakomi munzolofu. ³³ Apangi kangi mwalisilwe nu kuhongelwa inyoni pavanu; apangi mwidiche ukuhanga na vala vevatesekige ndahihyo. ³⁴ Mwahanzile uluteseko na vanyandinde, na pevavaposile uwunono wenyu mwakangalye muluhekelelo, pakuva mwalukagwe ukuta mwina uwunono uwulutye na uwutasila. ³⁵ Sweno, mulawuleka uwupifu wenyu, pakuva uwo wuvapela amahombo makomi, ³⁶ Lwinoga muvelage vakangalisi, sambi muhwane ukupiga sila seiwenda Nguluvi nu kwanukila kila cheahuvise. ³⁷ Pakuva ndawe Uwandike Uwelu uwilonga: “Lusige lusika ludodo hela, na yula yeakusa, aasa, na safuvalila nambi. ³⁸ Neke umunu vangu yemugolofu afuuwa nu kunana; neke wone apiluke ku mbele nene sindinogelwa na yuyo.” ³⁹ Sweno, hwehwe situlimwavawo vala vevipiluka ku mbele nu kuyaga, pesi hwehwe twifuuwa na ukwikwamila inumbula setu.

¹ Lino ulufuuwo kwekuva na uluhuvi lwa ing’ani sepetwihuvila, ukwidikila ing’ani sesisilava siwoneka pamiho getu. ² Pakuva avavaha va imitalo Nguluvi avidiche uwimila ulufuuwo lwawo. ³ Ukukola ulufuuwo hwehwe tukulukagula ulwa ing’i yagafilwe kukola ulukani lwa Nguluvi, ifinu fyefiwoneka uluhuma mufinu fyesifiwoneka. ⁴ Uwimila ulufuuwo Habeli amutawulye Nguluvi inambika yeye nofu hilo ukulutila yila ya Kayini. Uwimila ulufuuwo lwakwe idikilwe na Nguluvi ukuva mugolofu; Nguluvi yumwene idiche ifitawulwa fyakwe. Uwimila ulufuuwo lwakwe nambi we afwe, akali pealonga. ⁵ Uwimila ulufuuwo Nguluvi amutegwe Enoki wesalingila mufwa. Sawoniki kangi pakuva Nguluvi yealamutegwe. Uwandike witigila ulwa wesialategulwa, umwene yealamunoje Nguluvi. ⁶ Sweno, pesi ukukola ulufuuwo situhwaniti ukumunogela Nguluvi. Pakuva umunu yeyeavesaga akumubihila Nguluvi lumuvaje afuuwage ulwa Nguluvi pwali, na ulwa akuvahomba vala vevakumuninila. ⁷ Uwimila ulufuuwo Nguluvi amupavye Noha ulwa ing’ani isikusa pambele. Ndawe amupulikige Nguluvi, swe iwuyapa ikipugu ikikomi wuhulo mula apokilwe umwene pamwi na avanu vakwe. Na ing’i yahigitwe, Noha anuche uwugolofu uwihuma mu lufuuwo. ⁸ Uwimila ulufuuwo Abulahamu amupulike Nguluvi peikemelwa abite ku ng’i Nguluvi yealamupela yive yakwe. Nambi sieakukagwi kweabitige, nambi ndahihyo Abulahamu ahamite. ⁹ Uwimila ulufuuwo ikalite mu wugenzi mung’i yealamuhuvise Nguluvi ukumupela. Ikalite uko mwihema ndawe lwevikalige Isaki na Yakobo, vala avevahangite muluhuviso lulula. ¹⁰ Pakuva Abulahamu asindilige iboma ing’angafu, iboma ye Nguluvi yumwene ye museela yeaihosise lwe yiva nu kuyisenga. ¹¹ Uwimila ulufuuwo nayi Sala afuuvitwe ulwa Nguluvi ikwisaga inyuviso sakwe, ave na filo nambi we yeagogwe. ¹² Nambi, ukuhuma kulumunu uyo yumwi, Abulahamu, yee wita umunu yeafwe, vawonike vanu wolofu wesivahwaniti ukuvalilwa ndawe ing’eng’esi sa kwilanga na uluhanga lwa mu mwani. ¹³ Avanu mbevali vafwe kono we vina lufuuwo. Vafwe wesivalava vanukila sila ing’ani se Nguluvi alavahuvise; neke kwa apataali vasiwene, swe viheya nu kuhekelela, nu kwidikila pawelu hela ukuta avene vevagenzi na avagaya pakusikimala mung’i. ¹⁴ Avanu vevilonga ing’ani ndawe iso, ulo lwilagila pawelu ukuta visaka ing’i yawo vavene. ¹⁵ Wone vake vakuyihosa ing’i yevahumite pamwandi, vake vava na ikilega cha ukupiluka kuko. ¹⁶ Neke ali lino visaka ing’i inofu ukulutila, kwekutigila ing’i ya kuchanya. Nambi Nguluvi siakwipulika wungi pevakumutambula ulwa umwene ye Nguluvi vawo, pakuva yumwene yeavagelanikise iboma. ¹⁷ Uwimila ulufuuwo Abulahamu amutawe umwanakwe Isaka ave nambika pe Nguluvi amugelige. Uyo Abulahamu ye yula yeanuche uluhuviso lwa Nguluvi, neke nambi ndahihyo, idiche ukumutawula nambika umwanakwe yealiyena. ¹⁸ Nambi we Nguluvi eamulonje, “Imbegalo yako yihuma kwa Isaka.” ¹⁹ Na ulubali ulumwi nachene lwivililo Abulahamu aliafuuvitwe ulwa Nguluvi ahwana ukuvasilibula avafwe, na ulubali ulumwi nachene Abulahamu amwanuche kangi umwanakwe uluhuma kuvafwe. ²⁰ Uwimila ulufuuwo Isaka avafunyilye va Yakobo na Esawu, sambi vanukile uwufunyilile uwukusa pambele. ²¹ Uwimila ulufuuwo Yakobo pee ali pipi ukufwa, avafunyilye avana mbevali va Yosefu, swe akumusunyalila Nguluvi kono we isipye ulubamba lwakwe. ²² Uwimila ulufuuwo Yosefu pe e pipi nu kufwa, avilite ulwa uluwuuko lwa va Isilaeli uluhuma mung’i ya ku Misili, na kangi ukuvalagisa lwa umufimba gwakwe. ²³ Uwimila ulufuuwo avegasi va Musa vamufihite umwana uyo lusika lwa myesi gidatu uluhuma pa kwegalwa kwakwe. Vamuwene ukuta emwana munofu, na siwogwipi ululagilo lwa Umutwa. ²⁴ Uwimila ulufuuwo Musa pe emunu muvina, abihye ukuvalilwa mwana va umwalive va Falawo. ²⁵ Awene ikiba ateseke pamwi na avanu va Nguluvi, silwindawe ukuhekelela mu nzanangifu lusika ludodo hela. ²⁶ Alukagwe ulwa ukuteseka uwimila Kilisito kwina kwambula kukomi hilo ukulutila uwunono mbewuli wa mung’i ya mu Misili, pakuva asindilige ukupelwa amahombo ga pambele. ²⁷ Uwimila ulufuuwo Musa ahamite uluhuma ku Misili wesakogopa ililakali lya Umutwa; na sapilwiki ku mbele kangi, wita wanda emunu yealamuwene yula Nguluvi yesiwonekagi. ²⁸ Ukwimila ulufuuwo inatye i Pasaka ukuhangila idanda sambi umuwulasi va avana avavele alemwe ukuvapamisa. ²⁹ Uwimila ulufuuwo avanu va Isilaeli valowike ibahali ya ku Siliya witigila wanda ye ing’i ng’afu; neke Avamisili pevagelige nawo ukulowoka vafwe mu lulenga. ³⁰ Uwimila ulufuuwo ilipuli lya iboma ya ku Yeliko lyagwe, avanu va Isilaeli peyevalipilime filo fimufung’ati. ³¹ Uwimila ulufuuwo Lahabu munyamiho mataali siafwi pamwi na vala vevamubesige Nguluvi, pakuva ali avanuche vala avatandisi. ³² Sweno, ndonge kiki kangi? Pakuva sindipelwa ikilega ukolelela sa Gidioni, Balaki, Samusoni, Yefuta, Daudi, Samweli na avavisi. ³³ Uwimila ulufuuwo iva mbevali vihomite ligalu na Avatwa, neke vavadwese. Vapigite mu uwugolofu mwa mbesili, swe vakwanukila sila sealahuvise Nguluvi. Vabubite imilomo ja inyalupala, ³⁴ vasimise imyoto igikwaka, vakulwike ukuwulagwa na amamage. Nambi, vevahomefu vapelitwe uludali. Vevapifu mwigalu vavadwesise avanyigalu avagenzi. ³⁵ Na avang’inetu avevafuuvitwe vapilulilwe avafwe vawo viva vasilibwike. Avamwi mwavene vabihye ukudindulilwa mundinde, vatesike mbaka ukufwa, sambi vasilibuke nu kwingila muwunani uwunofu uwulutye hilo. ³⁶ Avangi velanzilwe nu kutowa ni ngoda ni milegehi imiwopele ifisege vapinzilwe ni minyololo nu kusopwa mundinde. ³⁷ Vavakinyite na amaganga, vavadumwe swe vihuma pavili, vavawulige na amamage. Vayingige wevafwite ing’ingo sa imene na ing’olo, ve vanu vamikaa, vavatesige nu kupigilwa fibi. ³⁸ Nambi na ing’i siye yinoji ukuva na vanu avindawe iwo. Vayingige mubalali na mufidunda; vikalige mumapango na mumapalika mung’i ³⁹ Avanu iva mbevali vawonekige ukuva vanyaludali uwimila ulufuuwo lwawo. Nambi ndahihyo, sivanuchi sila mbesili se Nguluvi aliahuvise ukuvapela, ⁴⁰ pakuva Nguluvi eihosise imigosekese iminofu hilo igilutye ukwimila hwehwe,kwekutigila avene vevanukila pamwi na hwehwe.

¹ Pakuva hwehwe twina lilugu ili ilikomi ilitupilime lya awolelesi. Sweno, tukilekelage ng’ani chechekivesaga kikututindasa, ni nzanangifu yila iyikutusila kolofu kolofu. Kangi tukimbilage mu wukangalisi tuvaleme avangi petukwitalanisa nawo. ² Tumulavage Yesu yeatuvanje ulufuuwo lwetu nave alukwisa. Uwimila uluhekelelo lwelwamusindilige, umwene akangalye ifwa mu musalaba, we sihosa lwa inyoni iyihuma mumo, na kulino akong’ome kundyo mukigoda cha umutwa cha Nguluvi. ³ Mwihosage ulwa ing’ani sesamufikite yula, lula lweakangalye ulubesa ulukomi kuvanu vanyanzanangifu. Sweno, mulatilivika imitima, nambi kufulugala. ⁴ Pakuva petukwihoma ni nzanangifu, nyenye simulava mwihoma mbaka ukufikila ukubohola idanda yenyu. ⁵ Ngali, yemusemilwe ing’ani sila isa ulusikimiko lwa imitima lwa Nguluvi akuvatambula nyenye ukuta mwivanakwe? “Mwanangu, ulabedala inzigiso sa Umutwa, nambi kufulugala pewikenyelwa, ⁶ pakuva Umutwa akumwigisa yeyeavesaga yeamwenda, kangi akuvatova mbevali veakuvidikila ukuta vanakwe. ⁷ Mukangalilage ukukenyelwa pakuva se nzigiso; Nguluvi akuvapigila nyenye nda mwivanakwe. Pakuva mwana yealikwi yesiayikenyelwa nu dade? ⁸ Neke lino wone nyenye mulema ukukenyelwa ndawe avana vangi, sweno, nyenye simwivanakwe, pesi ukuta muva mwivana vamwihala. ⁹ Ukulutila ulo, hwehwe tuvelage na ichoga kuvegasi vetu vevatweje na pevakutukenyela. Sweno, lutuvaje ukuva na ichoga hilo kuludadetu va kinyamuhe sambi tunane. ¹⁰ Avegasi vetu va umu mung’i vatukenyelige lusika ludodo, ndawe lwevahosekesige ukuta avene, neke Nguluvi akutukenyela wimila ukwambula kwetu yihwehwe, sambi tuhange Uwelu vakwe. ¹¹ Ukukenyelwa si kinu cha luhekelelo nda, cha kuhuguvika, pambele ulukenyelo lwalwiveleka amaveleko ga uwikalakunoga uwa uwugolofu kwa vala avafunde mwalulo. ¹² Sweno, mugololage amawoko genyu amang’enyangifu, nu kukangasa amafugamilo genyu amahomefu. ¹³ Muvelage pemugenda mung’asi iya uwugolofu, sambi kila ikilema kilalemalila ng’ani pesi ukuta kiponage. ¹⁴ Mupifukage ukwikalasa na avanu mbevali mu wikalakunoga. Na mu migendele ija uwelu, pakuva sikwali umunu yealamuwona Umutwa pesi akwikala mu migendele gijo. ¹⁵ Musugunalage hilo umunu yeyeavesaga alonga awuyase uwuwuya wa Nguluvi. Mwikomalilage sambi gulonga umubiki gwa uwuvafi gutopole mwa nyenye nu kuvawulaga awolofu nu wusungu wa gugo. ¹⁶ Mwikomalilage ukuta mwa nyenye alawoneka umunu umugoni nambi munu yesakumwogopa Nguluvi, ndawe Esawu, yeagusise ululumbo lwa uwuvele wakwe ukwimila ikilyo cha ikimunyi kimwi. ¹⁷ Nanye mulukagwe ukuta pambele peawendige apelwe uwufunyilile wula wewe wakwe, vamubihye, pakuva sipepokili kilega kangi cha ukuhongesa, nambi we akisakige ikilega icho kwa inzihosi. ¹⁸ Neke nyenye simufikiti ku che kihwanite ukupamiswa, mumoto ugukwaka, mulwisa tilili, na ikifulufumbi, ¹⁹ nu mubumo gwa lipembe na iliswi ilyapulisige. Vala avapulike iliswi ilyo vagongolite ukuta valapulika kangi ulukani ulungi, ²⁰ pakuva sivahwaniti ukukangalila ululagi ulwelulagile; “Yeapamisa ikidunda iki nambi kive kikwamilwa, akinywa na maganga mbaka pifwa.” ²¹ Iso mbesili sawonekige ng’ani isikogofya pakomi, nayi Musa alonzile ukuta, “Ngogopa kangi ndikuvila.” ²² Neke nyenye mufikite ku kidunda cha ku Sayuni, ku Boma ya Nguluvi Umumi. Mufikite mu Yelusalemu, iya kuchanya, kwe vakong’ine vanyivaha mbilima mbilima vesivahwaniti ukuvalilwa kulumwene. ²³ Mufikite ku mukong’ano umukomi gwa avavele va Nguluvi ve amatawa gawo gaandikwe kuchanya. Mwimite pa Nguluvi umuhisi va mbevali, na pa myuhe ja avanu vagolofu avawuyipwe vave vakwilaniche. ²⁴ Mufikite kwa Yesu ye awuyipe ulufingano ulupya, na ye idanda yakwe yeyabohwike yilonga ing’ani inofu hilo ukulutila yila ya Habeli. ²⁵ Mwikomalilage mulamubihila yeilonga. Pakuva wone sivepiti pevamubihilige yula yeavakenyelige mung’i, ino saluhwana ndawuli ukumwepa yula yeakutukenyela uluhuma kuchanya. ²⁶ Ulusika lula ing’i yadengadengite uwimila umubumo, neke lino ihuvise ukuta, “Nene mbuyapa ing’i yidengedenge kangi neke si ng’i hela yiyena pesi na kuchanya kangi.” ²⁷ Ulukani ulu: “Kangi.” lukutulagila ulwa ukufihesa ifinu mbefili ifigave, ifidengadenga, mwafila ifyagafilwe, sambi fisigale fila fyesifihwaniti ukudengadenga. ²⁸ Sweno, hwehwe tumulumbage pakuva tukwanukila Uwutwa uwuta dengadenga. Tuvelage ni kilumbo nu kumusunyalila Nguluvi mu ng’asi yeyimunogela, muwilevesi ni choga; ²⁹ pakuva nachene Nguluvi vetu indawe umoto ugukwaka nu kulalisa.

¹ Muvelage we mwiyenda kinyalukolo. ² Mulasemwa ukuvanukila avagenzi; pakuva ukupiga ulo, avanu avangi vahwanite ukuvanukila vanyivaha kitalukagula. ³ Muviwukage vala avasope mundinde wita wanda nanyenye musopitwe pamwi nawo. Muviwukage vala aviteseka wita wanda nayinyenye mwiteseka ndawe avene. ⁴ Ingomwa yivaje yipelwagwe ichoga, na avanu mbevali, na isivaje ingomwa sikwiswage. Nguluvi saavahiga avanya migendele imibi na avagoni. ⁵ Mulava vadobokesi va amagobole; fivakwilage ifinu fyemwinafyo. Nguluvi yumwene atige, “Sisanguleka nangi, nave ukukulekelesa.” ⁶ Nambi tukwigelela ukulonga: “Umutwa ye mutanzi vangu, sisanzogopa. Mbi umunu angita kiki?” ⁷ Muviwukage avalongosi venyu vevavadaliche ulukani lwa Nguluvi. Mwihosage hilo sa imigendele jawo, mukigage ulufuuwo lwawo. ⁸ Yesu Kilisito ye mwene yuyula igolo, neng’ino na mbepali. ⁹ Muliiga inzigiso isingi singi ingenzi. Uwuwuya wa Nguluvi wewene we wukuvakangasa inumbula senyu na siukutigila imisilo ja ifilyo; imisilo ijo sijamutanzili umunu yeyeavesaga yeaginatye. ¹⁰ Hwehwe twinapo pifunyo pala pevala vevakali pevalipigila ilihema, sivatawule ukulya ifilimumo. ¹¹ Na imivili ja ifikwamilwa fye idanda yaletigwe pifunyo na umutambisi umuvina nda nambika isa inzanangifu sanyanyigwe kwivala pa likambi. ¹² Na lwindahihyo nayi Yesu nave, sambi avese avanu ni danda yakwe yumwene, atesiswe nu kufwa pivala pa iboma. ¹³ Sweno, tumubitilage umwene pala pivala iya ilikambi tukiteguse ululeko lwakwe. ¹⁴ Pakuva umu mung’i twivagaya iboma iyinanaga mbepali; neke lino petuguluma yila iboma iyikusa. ¹⁵ Sweno, ukukola kwa Yesu, tumutawulile Nguluvi inambika yinya lulumbo lwa mbepali, kwekuta ululumbo ulwitawulwa ni milomo jejikulidikila ilitawa lyakwe. ¹⁶ Mulonga musemwe ukupiga inofu nu kwitanga, pakuva isi sesene se inambika isikumunogela Nguluvi. ¹⁷ Muvelage na ichoga ku valongosi venyu nu kwinatila indagilo sawo; avene vahele vilolela inumbula senyu, pakuva sawolelela isa uwupisi wawo kwa Nguluvi. Muvaleke vapige ifipigo fyawo kwa luhekelelo, si wuhuguvafu, na pa ulo nyenye simwambula uwinome. ¹⁸ Mutusukilage na yihwehwe. Tukwihuvila ukuta twina mitima myelu, pakuva twiwenda ukupiga isigolwike mbepali. ¹⁹ Nguvagongola hilo musukilage sambi Nguluvi angufye amilule ukwenyu ndawe mweluhwanila. ²⁰ Lino Nguluvi umunyawikalakunoga ye amusilibwe Umutwa vetu Yesu Kilisito umukwamila-ng’olo umuvina ukwimila idanda yakwe va ulufingano ulwa mbepali na mbepali, ²¹ avakwilanisage muchechekivesaga kipigo kinofu, sambi mupigage isimuvaje umwene awuyapage mugati mwa nyenye, ukwimila mwa Kilisito sila isikumunogela umwene. Indolo yivelage kulu mwene, mbepali na mbepali! Ena. ²² Sweno, vanyalukolo, nguvagongola mwanukilage mu wulele ulukani ulu nu kuvasikimika inumbula, pakuva ndivandiche ing’ani. ²³ Ndiwenda ukuvalongela ukuta umunyalukolo vetu Timoti ye akadindulilwe uluhuma mundinde. Wone angufye ukufika ipa, tusasa nave pengusa ukwenyu. ²⁴ Muvahungilage avalongosi venyu mbevali pamwi na avanu va Nguluvi! Vanyalukolo va ku Italiya vakuvahungila vitigila, Kamwene. ²⁵ Tukuvasukila mbemuli uwuwuya wa Nguluvi. Uwuwuya wa Nguluvi wuvesa na nyenye Ena.