AVAGALATIYA

AVAGALATIYA

¹ Ukuhuma kwa nene Pawulo ye ndi mwigendo, na uwigendo uwo siwahumiti kwa avanu nambi muludali lwa umunu, pesi muludali lwa Yesu Kilisito na Nguluvi Dada ye amusilibwe Yesu ukuhuma ku vafwe. ² Avanyalukolo mbevali avaliipa vihanga na nene ukuvahungila avali mumakanisa ga mu Galatiya. ³ Tukuvasukila uwuwuya na uwikalakunoga ukuhuma kwa Nguluvi udadetu na ukuhuma kwa Umutwa vetu Yesu Kilisito. ⁴ Kilisito itawe yumwene ukwimila inzanangifu setu, sambi atupoke mung’i iyi iyinyawanangifu iyalino. ⁵ Kulumwene sivelage indolo mbepali na mbepali! Ena. ⁶ Ndisasavala ukuta nyenye kwa lusika ludodo ululutye, yemumupitwike yula yeavakemelye mu wuwuya wa Kilisito, na ukupitukila ulukani ulungi. ⁷ Neke ulwene lusukuli, “Ulukani Ulunofu ulungi.” Inachene ye iyi ukuta kovali avangi avakuvatindasa nyenye, na avanu vevisaka ukuvayasa mu Ulukani Ulunofu lwa Kilisito. ⁸ Neke ulwene, nambi ave umuyenyu nambi apangi munyivaha ukuhuma kuchanya, avadalikila ulukani ulunofu ukusutana ulukani ulunofu ulwisutana na lula lwetwavadaliche uyo akotokage. ⁹ Hwehwe yetwetulonzile, na kulino ndilonga kangi: Wone yeyeavesaga munu akuvadalikila Ulukani Ulunofu ululiwungi, sindawe lula lwemwalwanuche, uyo akotokage! ¹⁰ Ngali lino ndisaka nani anzidikile, avanu apangi Nguluvi? Ngali ndisaka ukuvanogela avanu? Na wone wemiga lulo, apo nene singe mba ndimukami va Kilisito. ¹¹ Nye vanyalukolo vangu, ndiwenda mulukagule ukutigila Ulukani Ulunofu lula silwe lukani ulukwimila avanu. ¹² Nambi nene sindalwanuchi ukuhuma kwa avanu, nambi ukwigisiwa na umunu. Yesu Kilisito yumwene yeangubulye. ¹³ Ndihuvye ulwa yemwemupulike nene pamwandi ndikalige mukwinatila ulufuuwo lwa i Kiyudaya, kangi na lula lwendalitesige wuhulo ilikanisa lya Nguluvi kangi ndawendige ndilyanangile ng’ani. ¹⁴ Ena, nene ndendivalutye avayangu wolofu avetuling’ene ukwinatila ulufuuwo lwa Kiyudaya, ndasugunalige hilo ukwinatilila imisimu ja avakukwetu. ¹⁵ Neke Nguluvi, muwuwuya wakwe, yealanyagwe nambi wesindendilegalwa, swe akung’emela ndimupigile. ¹⁶ Ave ilamula hela ukungubulila umwanakwe sambi ndalike Ulukani Ulunofu lwakwe kuvanu avamyanza, wesindisindila ukwiyisa na umunu yungi, ¹⁷ nambi ukubita ku Yelusalemu kwa vala avatasile kwa nene mu wigendo, ndatasile ukubita ku Alabiya, ndawe ndapilukige ku Damesiki. ¹⁸ Peyegilutye imyaka gidatu pepene pe ndahele ku Yelusalemu ukwitang’ana na Petulo; ndikalite nave filo finyichumi na fihanu. ¹⁹ Ulwene sindatang’ini na avigendo avangi pesi Yakobo umwanakwave va Umutwa. ²⁰ Mwa isi senguvandikila Nguluvi akulukagula ukuta sindideta. ²¹ Pambele ndahele ku lutanana lwa ku Siliya na ku Kilikiya. ²² Ulusika lulo, nene yendiyena sindeng’agulaniki mumukong’ano gwa ilikanisa lya ku Yudaya. ²³ Lwevevalusele lwe lula lwevapulikige, “Umunu yula ye atutesige pamwandi, lino akuludalika lulula lweagelige ukwananga.” ²⁴ Swe, ndawe vamulumbige Nguluvi ukwimila nene.

¹ Pegilutye imyaka minyichumi na gitayi, ndahele ku Yelusalemu pamwi na Balanaba; ndamutegwe nayi Tito nave pamwi na nene. ² Ndahele uko ukwimila ukugubulilwa na Nguluvi ukuta mbitage. Petwe tukong’ine (apono apawunamu) ndavalonje iwo avanyalulumbo ulwa ulukani ulunofu lwendavadaliche avanu avamyanza. Ndapigite ulo sambi ikipigo changu chendemigite na kila chemiga kilemwe ukuva nda cha malanga hela. ³ Umuyangu Tito yetwipamwi, nambi we e mugiliki sivamugogelisi awolwe, ⁴ nambi vepovali avanyalukolo avangi va uwudesi avawendige awolwe. Avanu iwo visopite mwa hwehwe kwa wusugu sugu sambi vatandile uwutemapetu wetwinawo mukuhanga na Kilisito Yesu, sambi vatusope mu wunyawingi. ⁵ Sitwiyidikisi nawo na ludodo, sambi inachene ya Ulukani Ulunofu yisigale na nyenye mbepali. ⁶ Neke avanu iva avilongwa ukuva valongola-manyi nachene weveviwali, apangi sivevindahihyo kwa nene ulo si kinu nda, pakuva Nguluvi sihigagi ing’ani isiwoneka mwivala, avanu iva vevagaya kinu cha kongelesa mulukani ulunofu lwendidalika. ⁷ Pambele valukagwe ulwa Nguluvi eamelye ikipigo icha ukudalikila avanu vesivawoole, ndawe Petulo nave apelitwe ikipigo cha ukuvadalikila Ulukani Ulunofu vevawoolitwe. ⁸ Pakuva, yula yealesile Petulo ahwane ukuva mwigendo kwa Avayudaya, ye yuyo yealesile nane nywane ukuva mwigendo kwa avanu avamyanza. ⁹ Pevalukagwe ulwa uwuwuya wendapelitwe nene Yakobo, Kefa na Yohane vefye fipanda fya ililugu lila, vatupelye nene na Balanaba ululumbo lwa ikilega cha ukupiga pamwinga, sambi hwehwe tubite ku vamyanza na avene kwa vala avawoole. ¹⁰ Neke, pamwi na lulo, vatulagise hwehwe kinu kimwi ukutigila tulemwage ukuvasemwa avanu vala avamikaa, na ulo lwe lukani lwe mbepali ndisugunala ukupiga. ¹¹ Neke Petulo peasile ku Andyokiya ndamukenyee pa vanu mbevali, pakuva aalasomite. ¹² Pakuva pevesivalasa vala avevatumitwe na Yakobo, Petulo alisige pamwinga na avamyanza. Neke peyevafisile avanu iwo, swe Petulo akwikwega, ilemwa ukulya na avamyanza, pakuva ogopige avanu vala avawendige avamyanza nawo vawoolwagwe. ¹³ Na avanyalukolo avangi Avayudaya vavanzile ukwiyidikisa na Petulo mulukani ulu lwa uwubuganisi, nayi Balanaba nave ihanga muwubuganisi wawo. ¹⁴ Sweno, pendivawene ulwa uwima hilo wawo ukwimila Ulukani Ulunofu swavi wugolwike; ndamulonje Kefa pa mbevali, “Nambi veve we wi Muyudaya, ukwikala ndawe avanu avamyanza na wiva nda si wi Muyudaya! Mbino, ukuvagogelesa ndawuli avanu va ing’i isingi vikale nda Avayudaya?” ¹⁵ Nachene, hwehwe ye twi Vayudaya uluhuma idaha, na sitwivanu Avamyanza avanyanzanangifu! ¹⁶ Nahwe tukulukagula hilo ukuta umunu sahwana ukuvalilwa wugolofu pa Nguluvi kwa ukwinatila indagilo, pesi kwa ukumufuuwa Yesu Kilisito hela. Nayi hwehwe kangi tumufuuvitwe Yesu Kilisito ndahihyo, sambi tuhwane ukwidikilwa na Nguluvi ukwimila ulufuuwo ululi mwa Kilisito, na si kwa ukwimila ukwinatila indagilo. ¹⁷ Lino wone petwisaka tuwuyapwe vagolofu ukukola mukuhanga na Kilisito hwehwe twiwoneka twivanyanzanangifu, ndawe avamyanza weviwali, Ngali kwekutigila Kilisito akututangilisa mukupiga inzanangifu? Nangi na ludodo hela! ¹⁸ Neke wone mbange ukusenga kikila kangi chendamamwe pamwandi, ipo pepene pengwiyolelela yinene ukuta ndimwananzi. ¹⁹ Pakuva, ulwa indagilo iso nene ndimufu indagilo sisene sambulige, sambi melwe uwumi ukwimila Nguluvi. Nene ndafwe pamwi na Kilisito pa musalaba gwakwe, ²⁰ na kulino ndimumi, ulwene si nene kangi pesi Kilisito yeinana mugati mwa nene. Uwumi uwu we ndinana lino, ndinanila mu lufuuwo ukukola Umwana va Nguluvi yeanzendite mbaka awutawule uwumi wakwe ukwimila nene. ²¹ Sindiwenda ukubedala uwuwuya wa Nguluvi. Neke wone umunu ayiwuyapwa mugolofu ukukola indagilo, sweno, Kilisito afwee chaka hela!

¹ Nyenye nye Vagalatiya, mwivapuva nachene! Ye nani yeavahavye nyenye? Pakuva ulukani lwa ukutumbikwa kwa Yesu Kilisito, mwalongelilwe pawelu. ² Lino ndisaka mundongele nene lukani lumwi. Mwanuche Umuhe va Nguluvi ukukola ifipigo fya indagilo apangi ukukola ukupulika mulufuuwo? ³ Mbi mwivapuva va Kinyandawuli? Nyenye mwavanzile mbesili ukwimila uwutanzi wa Umuhe va Nguluvi, ngali lino mukwenda musinde muludali lwenyu? ⁴ Ngali lino mbesili sila sesavafikite nyenye sikave si kinu? Nda silwihwana! ⁵ Ngali Nguluvi akuvapela Umuhe na ukupiga imiitu ati pakuva mwikwisa imbage na indagilo, ngali apangi pakuva mukapulike Ulukani Ulunofu na ukufuuwa? ⁶ Muhosage seapigite Abulahamu: wewitigila, umwene amufuuvitwe Nguluvi, nave Nguluvi amwidiche ukuva mugolofu. ⁷ Sweno, mulukagulage ukuta avanu avakumufuuwa iwo vevene avana va nachene va Abulahamu. ⁸ Uwandike Uwelu walonzile idaha ukuta Nguluvi avawuyapa avanu avamyanza vave vagolofu ukukola ulufuuwo. Palulo Uwandike Uwelu watasile idaha ukumulaalikila Abulahamu Ulukani Ulunofu, “Ukukola kwa veve avanu mbevali savafunyililwa.” ⁹ Sweno, vala vanyalufuuwo vifunyililwa pamwinga na Abulahamu yeafuuvitwe. ¹⁰ Neke vala avakwihuvila hela ukukwisa isa indagilo, iwo vali mung’oto. Pakuva lwandikwe, “Yeyeavesaga munu yesakwinatila mbefili ifyandike mukitabu icha Indagilo akotwike.” ¹¹ Lino de lulipawelu hela ukuta umunu sahwaniti ukuwuyapwa ukwimila indagilo, pakuva Uwandike Uwelu wilonga, “Yula ye mugolofu ukwimila ulufuuwo anana.” ¹² Neke indagilo sisikwimilagi ulufuuwo. Pesi Uwandike Uwelu wewitigila, “Yeyeavesaga ikwisa mbesili imbage mu ndagilo anana.” ¹³ Neke Kilisito atukombwe ukuhuma mung’ooto lwa indagilo kwa ukwitegulila ing’ooto ulo ukwimila hwehwe pakuva Uwandike Uwelu witigila,“Umunu yeyeavesaga atumbikwe mumusalaba mukotofu.” ¹⁴ Ulu lwapigike sambi uwufunyilile wula wapelitwe Abulahamu wuvafikile avamyanza kwa ukukola kwa Kilisito Yesu, sambi kwa ukukola mulufuuwo, twanukile yula Umuhe va Nguluvi ye alatuhuvise. ¹⁵ Vanyalukolo, ndivalongela ikiganiso icha uwunu. Asukuli umunu yeakululeka ulukani ulwa ulufingano nambi kongelesa peyevafingine. ¹⁶ Sweno, Abulahamu apelitwe uluhuviso, umwene pamwi na imbegalo yakwe. Uwandike Uwelu siwitigila, “Na imbegalo sakwe.” Ukutigila wolofu, pesi lino witigila, “Imbegalo yakwe.” Kwekutigila munu yumwi nave ye Kilisito. ¹⁷ Lwengwenda ndonge lwe ulu Nguluvi aluvisile uluhuviso lwakwe, nu kulukangasa; Indagilo sesasile pambele pegilutye imyaka magana gatayi na machumi gadatu, sisihwana ukudenya uluhuviso ulo nambi ukulupitula. ¹⁸ Pakuva, wone ililila lya Nguluvi lyakwimila indagilo, siluva kangi muluhuviso lwa Nguluvi. Pesi Nguluvi amupelye ililila Abulahamu ukwimila uluhuviso. ¹⁹ Mbi lino indagilo seki? Longelesiwe baho sambi lulagile inzanangifu che kiki, mbaka peseasile umwisukulu va Abulahamu, yeapelitwe lula uluhuviso. Indagilo salesilwe na munyivaha va Nguluvi mwiwoko lya umulamusi. ²⁰ Neke nachene, umulamusi siayisakwa ave pwali, wone ulukani ulwene lwitigila munu yumwi; na Nguluvi ye yumwi. ²¹ Ngali tutigile indagilo sikwilema na uluhuviso lwa Nguluvi? Nangi na ludodo hela! Pakuva wone sesuse indagilo sisesihwana ukuvawuyapa avanu vave na uwumi, sweno, twetuwuyapwa vagolofu ukwimila lulo. ²² Neke ulwene silwindahihyo Uwandike Uwelu watigee idaha, ukuta konivala mbekuli kwagwilye mu wutema wa inzanangifu, palulo, ukukola ukumufuuwa Yesu Kilisito avanyalufuuwo vipelwa lula uluhuviso. ²³ Pesitulapelwa ulufuuwo, indagilo yeyituvikite mundinde mbaka pe ulufuuwo lulo lwelwasige lugubulwe. ²⁴ Sweno, indagilo iyo ye nda mulolesi vetu mbaka peasile Kilisito, sambi kwa ukukola ulufuuwo tuwuyapwe vagolofu twidikilwe na Nguluvi. ²⁵ Lino uluhuma ukufika kwa ulo ulufuuwo, indagilo sipe mulolesi kangi va hwehwe. ²⁶ Kwa ukukola ulufuuwo nyenye mbemuli mukave mwivana va Nguluvi mukuhanga na Kilisito Yesu. ²⁷ Nyenye mbemuli yemwabatisiwe mukuhanga na Kilisito, na lino mwiva nda mumufwite Kilisito. ²⁸ Palulo, pagaya uwululiwungi kwa Umuyudaya na Umugiliki, Umunyawingi na umunu umutemapakwe, umunu umugosi na umunu umung’inetu. Nyenye mbemuli mukave kinu kimwi mukuhanga na Kilisito Yesu. ²⁹ Wone nyenye mwivanu va Kilisito, sweno nyenye mwi mbegalo ya Abulahamu, na samwanukila sila sealahuvise Nguluvi.

¹ Neke lino nditigila; Umunyalilila peakaali mudodo, pesalakimilwa saliwungi na umukami, nambi we umwene ye munyamwenafyo va mbefili. ² Ulusika mbeluli ulo aiva mumawoko ga uwimilisi wa avavaha, mbaka pelufikite ulusika ulukele na udade. ³ Lwindahihyo, na kwa yihwehwe petwetukaali vadodo, twetwipasi ya uwutwa wa amasoka agatemite mung’i umu. ⁴ Neke ulusika uluvike lwave lwifika, Nguluvi amutumite Umwanakwe umwegale nu mung’inetu, nave ikalite pasi ya uwutema wa indagilo, ⁵ sambi avakombole vala avali muwutema wa indagilo, hwehwe sambi tuwuyapwe vana va Nguluvi. ⁶ Pakuva, lino nyenye mwivana, Nguluvi amutumite Umuhe va Umwanakwe mu numbula setu Umuhe yeikemelaga, “Dada.” ⁷ Nambi kulino veve sipe wimunywawingi kangi, pesi ulwa wimwana. Na pakuva wimwana, sweno wanukila mbesili se Nguluvi avaviche avanakwe. ⁸ Umutalo, simwemumuseli Nguluvi, nambi mwafipigilige ifihwananguluvi, ifinguluvi fya uwudesi. ⁹ Neke lino yemumukagwe Nguluvi, apangi tutigile pakuva yemukagulanike kwa Nguluvi, mbi lino ndawuli kangi mwipiluka kumbele ku amasoka amamikaa na amahomefu ge mwisaka kangi mugapigile? ¹⁰ Mukwinatila ifilo, myesi, imisika na imyaka. ¹¹ Nene ndihuguvala ulwa salulava ikipigo chengapigite kwa nyenye kive cha kufwaha hela. ¹² Vanyalukolo vangu, nguvagongola muvelage ndawe nene, lwendindawe nyenye. Simwamiji kinu kibi chechekivesaga nene. ¹³ mukulukagula ulwa uwutamwa wangu wewamelye ikilega ndivadalikile Ulukani Ulunofu pamwandi. ¹⁴ Nambi we ndahihyo ulusika ulo simwambedii nambi ukunzinyala ukwimila uwuhomefu wangu, nambi muve mwageligwe mupige lulo, neke ulwene nyenye mwanzanuche wita munyivaha va Nguluvi na kangi wita ndi Kilisito Yesu yumwene. ¹⁵ Mwemwina luhekelelo; mbi kikawonike kiki? Nene ndilongela mumwene, ukuta mulusika lulo mwemuhwanite ukung’amatula amiho genyu, mumele nene. ¹⁶ Mbino ndawuli! Yembe mutavangu venyu penguvalongela inachene? ¹⁷ Vala avanu avangi vakuvagudila nyenye, neke chevakuhosekesa sikinofu nda. Viwenda ukuvalekasa na nene sambi nanye muvagudile avene. ¹⁸ Neke ulwene lunofu mbepali ukuvagudila avangi mu ing’ani inofu, si mulusika lula lwe nene ndipwali na nyenye. ¹⁹ Vanangu, ndawe umung’inetu umunyafilo lweaiguda peakwegala nani ndiguda kangi ukwimila nyenye mbaka pala pe Kilisito ava ahanzile mwa nyenye. ²⁰ Ike yiva kiba ngembe pamwi na nyenye ino, penge melwa uwimo uwusikime ukwimila nyenye. Pakuva ndina wuhuguvafu wukomi ukwimila nyenye! ²¹ Lino mundongelage, nyenye yemwiwenda ukuva pasi pa indagilo. Mbi yemwemupulike indagilo wesilonga? ²² Nzandike mu Uwandike Uwelu ukuta Abulahamu eina vana vavili uyumwi mwegale nu umung’inetu umunyawingi, uva kavili kulumung’inetu umutemapakwe. ²³ Umwana va umunyawingi emwegale ndawe lwevakwegalwa mbevali hela, pesi yula va umung’inetu umutemapakwe, uyo emwagale ukwimila uluhuviso lwa Nguluvi. ²⁴ Lino ing’ani iso nzivililo: avang’inetu iva se ndagano isivili: Ulumwi lwihuma ku kidunda icha ku Sinayi, ulukwegalila anana mu wunyawingi; umung’inetu uyu ye Hagali, ²⁵ Nave Hagali, yeiva nda ikidunda cha ku Sinayi, chekili ku Alabiya, nacho che kiganiso cha i Yelusalemu iya lino iyilimuwunyawingi pamwi na avanakwe. ²⁶ Neke i Yelusalemu iya kuchanya ye boma iyili mu wutemapakwe, na iyo yeyuvetu hwehwe. ²⁷ Pakuva Uwandike Uwelu witigila: Hekelelage veve ve muguumba yesukwegalagi, Koolage veve yesiwe ulegala mwana. Pakuva avana va yula yealesilwe wolofu, sivaling’eni na va yula yeina uvakwe.” ²⁸ Sweno, vanyalukolo vangu, nyenye mwivana va Nguluvi ukwimila uluhuviso lwakwe ndawe Isaki weeiwali. ²⁹ Neke ulusika lula yula yeegilwe ukukola imigendele ija mbepali hela amufwahisige yula yeegilwe ukukola imigendele ija kinya muhe, na lwelwiwali lino. ³⁰ Ino Uwandike Uwelu witigila ndawuli? witigila, “Umudagage umung’inetu umunyawingi pamwi na yumwanakwe, pakuva umwana va umunyawingi sahwana ukuhala ililila pamwi na umwana va umung’inetu umutemapakwe.” ³¹ Sweno vanyalukolo vangu hwehwe sitwivana va munyawingi, hwehwe twiva umung’inetu umutemapakwe.

¹ Kilisito atupelye uwutemapetu, alaje hwehwe tunanage muwutemapetu, sweno, mwimage munoge, na mulidikila uyungi avavike mulupanda lwa uwunyawingi kangi. ² Lino nene Pawulo nguvalongela ukutigila! Wone mwidikile ukuwoolwa Kilisito ava sikinu savapeli cha kwambula kwa nyenye. ³ Kangi nguvapavila wima hela: umunu yeidikila ukuwoolwa lumuvaje ukwinatila, indagilo mbesili. ⁴ Wone mwihosa ukuwuyapwa vagolofu ukukola mu ndagilo, sweno, yemutyesile muhele pataali na Kilisito: Yemuve kwivala mu wuwuya wa Nguluvi. ⁵ Neke kulubali lwetu hwehwe, twilavisa kwa luhuvi ukuta muludali lwa Umuhe twiwuyapwa vagolofu ukwimila ulufuuwo. ⁶ Pakuva wone yetuhanzile na Kilisito Yesu, ukuwoolwa nambi uwutawoolwa uko kufwaha hela, ikikomi ipo lwe lufuuwo ulwipigaga ikipigo muwende. ⁷ Mukabitige wunofu, minofu! Lino, nani yeakavapinging’ise mulemwe ukwinatila inachene? ⁸ Yeakalesile ulukani ulo si Nguluvi yeavakemelye nda. ⁹ “Uwuhahu wukefu hela wawihahya ikisilo mbekili!” ¹⁰ Ukwimila ukuhanga kwetu na Umutwa, ngwihuvila pakomi ukuta nyenye simuva wungi na nene. Kangi yula yeakavasasing’ise nambi ave muvina ndawuli nachene uyo saahigwa neke apume. ¹¹ Na kulubali ulwangu, vanyalukolo, wone mbe ngaali ndidalika ukuta ukuwolwa luvaje mbepali, mbi lweki mbe pe ndagiliswa. Wone luke luve ndahihyo, uwudalisi wangu wa umusalaba wa Kilisito siwuke wuleta inyoni sesivesaga. ¹² Luke lunogela wone vawo vevakuvasasing’asa, vake visawule vavene! ¹³ Neke nyenye vanyalukolo vangu mwakemelitwe muve vanu mwivatemapenyu. Neke nambi ndahihyo uwutemapetu sawulava lifinga lyambuse tuve pasi ya wutema wa uwudobokesi wa isa mung’i; pesi ukuta luvavaje mwipigilage muwende. ¹⁴ Pakuva indagilo mbesili sasikwilanikila mululagilo ulu ulumwi, “Umwendage umunyafivawo vako ndawe lukwiyenda yiveve.” ¹⁵ Neke wone mwilume na ukwilya ndawe amakoko ga mwihala, mwikomalilage samulisinda we yinyenye ng’ani! ¹⁶ Nambi nene nguvalongela de, imikalile jenyu gilongoswage na Umuhe, nanye pesimwiga kangi uwudobokesi wa isa mung’i. ¹⁷ Pakuva uwudobokesi wa isa mung’i wisutanaga mbepali na isa Umuhe, uwudobokesi wa isa umuhe sisutanaga na isa umuhe mbepali sisakwiyidikisa, ukwimila lulo simuhwana ukupiga na semwiwenda yinyenye. ¹⁸ Wone mulongoswe na Umuhe, sweno, simuli pasi ya uwutema wa indagilo. ¹⁹ Sweno, ifipigo ifya umuvili fili pelu hela; uwuyamba, uwaafu, uwudobokesi, ²⁰ uwusunyalila ifihwananguluvi, uwuhavi, uwutavangu, ulwitakilo, uwifu, lilakali, uwimi, ulwigawo, ²¹ gila, uwugaasi, uwuhatufu, ulubesa na isingi isindawe siso. Nguvalongela kangi ndawe lwendendonzile pamwandi avanu vevipiga ing’ani iso, sisavava na ikilega chawo ukwingila muwutwa wa Nguluvi. ²² Neke isihumaga mukulongoswa na Umuhe we uwende, uluhekelelo, uwikalakunoga, uwukangalisi, uwunofu, ulusungu, uwufuuwa, ²³ uwulele na ukwitanila, ukwimila iso sisukuli indagilo isihwanite ukubesa iso. ²⁴ Vala avali mwa Kilisito vakawutumbike uwunu wawo wa mung’i na uwudobokesi na amahosa ga mung’i. ²⁵ Wone twikale muwutanzi wa Umuhe, lutuvaje twigage uwulongosi wakwe. ²⁶ Tulemwe ukwidudumba, nambi ukwisagala nambi ukwiwonela gila.

¹ Vanyalukolo wone mumuwone umuyenyu ananzile, nyenye yemwilongoswa na Umuhe mumukenyelage umunu uyo hilo, ulwene mupigilage iso muwulele, kono we mukwikomalila yinyenye, mulongamugelwe na yinyenye kangi. ² Mwitangage ukwitegusa ifitegulo fyenyu na palulo mukwisa ululagilo lwa Kilisito. ³ Wone uyumwi akwipulika ulwa umwene kinu kumbi si kinu, uyo ava akwisanga weiyena. ⁴ Yeyeavesaga munu igosage mumikalile jakwe. Wone give minofu apo peahwanite ihela mwa cheapigite wesi akwiyiganisa na umunu uyungi. ⁵ Pakuva yeyeavesaga munu inacho ikitegulo chakwe yumwene ikimuvaje ukwitwika. ⁶ Umunyakwigisa ulukani lwa Nguluvi nave amugavilage na umwigisi vakwe cheakwambula mukipigo chakwe. ⁷ Mulisanga yinyenye; Nguluvi sivakwihesigilwa, cheavyalite umunu chekicho chesaabeta. ⁸ Ye ivyala muwudobokesi wa isa mung’i, saabeta wuwo uwanangifu, neke yeivyala mu muhe, saabeta ukuhuma kwa umuhe uwumi uwutasila. ⁹ Lino, tulafulugala mukupiga inofu, pakuva wone tulemwe ukudedela satubeta isanga ulusika pelufikite. ¹⁰ Lwide, pakuva twina ikilega, tuvapigilage avanu mbevali uwunofu; na hilo hilo avanyalukolo va mulufuuwo lwetu. ¹¹ Mulavage tasi, lwenguvandikila na Uwandike wukomi pengwandika kwa iliwoko lyangu yinene! ¹² Vala avisaka ukwilagila ukuta vanofu ukwimila ifipigo fya mwivala fya umuvili, ve vawo vekuvakangala nyenye nanye muwoolwe. vipiga ulo sambi valemwe ukutesekela umusalaba gwa Kilisito. ¹³ Pakuva iwo vavene sivakwinatila indagilo, viwenda nyenye muwolwe sambi vivahile ikilagilo kicho mumivili jenyu. ¹⁴ Neke nene sisandivahila ikinu kingi pesi umusalaba gwa Umutwa vetu Yesu Kilisito, pakuva ukukola umusalaba ugo ing’i yafwe kwa nene, nane ndafwe kung’i. ¹⁵ Ukuwoolwa na uwutawoolwa si kinu, ikikomi hilo tupitukage na ukuva ikigawa kipya. ¹⁶ Kwa vala vevifwata uwulongosi wuwo nguvasukila uwikalakunoga na ulusungu, uwikalakunoga na ulusungu kwa Isilaeli-vanu va Nguluvi. ¹⁷ Sweno, umunu alafwahisa kangi pakuva ndina amavamba ga Yesu mumuvili gwangu. ¹⁸ Vanyalukolo, nguvasukila nyenye mbemuli uwuwuya wa Umutwa vetu Kilisito, Ena.