AVAEFESO

AVAEFESO

¹ Ye nene Pawulo umwigendo va Kilisito Yesu kwa uwende wa Nguluvi, nguvandikila nyenye mwevanu va Nguluvi ye muli mu Efeso ye yemwihuvilwa mukuhanga na Kilisito Yesu. ² Nguvasukila uwuwuya na uwikalakunoga ukuhuma kwa Nguluvi Udadetu na Umutwa Yesu Kilisito. ³ Alumbwagwe Nguluvi na Udade va Umutwa vetu Yesu Kilisito! Pakuva, kwa ukuhanga na Kilisito atufunyilye kwa ukutupela ifipelwa mbefili fya Mumuhe ukuhuma kuchanya. ⁴ Nguluvi atuhagwe pe na ing’i wesiyilagawa, sambi tuve vanu vakwe mukuhanga na Kilisito, sambi tuve twivelu twivagaya uwananzi palumwene, ukwimila uwende wakwe. ⁵ Nguluvi alahosise muwende wakwe uluhuma pamuvango tuve vanakwe ukugendela kwa Yesu Kilisito. Ndawe lweeahosise ⁶ pakulumba uwuwuya wakwe uwunyandolo wetwapelitwe hwehwe Mumwanakwe Umwende! ⁷ Pakuva kwa idanda yakwe Kilisito hwehwe twivakombole, kwekuta inzanangifu setu sihesiswe. Ulo lwelwiwali ukwimila uwukomi wa uwuwuya wakwe, ⁸ weatupelye uwugaya nambi kigelo! Kwa uluhala na uwuseela wakwe mbewuli. ⁹ Nguluvi akwisise kila chealahosise, nu kutulongela sealawendite isesifihitwe, sealagelanise ukukwisa mung’asi ya Kilisito. ¹⁰ Lula lweawendite ukulukwisa mulusika lwayo, lwa ukufikong’asa ifigawa mbefili, sambi fihange pamwi mwa Kilisito, fya kuchanya na fya mung’i. ¹¹ Ifinu mbefili fyafigawa kwa ukwimila muwukele na uwulamusi wa Nguluvi; nave Nguluvi atuhagwe hwehwe sambi tuve vanu vakwe kwa uwende wakwe mukuhanga na Kilisito, ndawe lweeawendite yumwene mukuhanga na Kilisito ukwimila uwulamusi wakwe wealakelite. ¹² Sweno, hwehwe yetwatasile ukumwihuvila Kilisito lutuvaje ukusilumba indolo sa Nguluvi! ¹³ Kangi nyenye mulumwene mukapulike ulukani ulwa nachene, Ulukani Ulunofu ulwa uwupoki, mukamufuuvitwe umwene, mwatemitwe uluhagi ukwimila uluhuviso lwa Umuhe Umwelu. ¹⁴ Uyu Umuhe che kipingiko cha ililila lya fila mbefili fye Nguluvi fyealavahuvise avanu vakwe, na ulukani ulu lukutulagila ukuta Nguluvi avakombolela ng’ani avanu vakwe mbevali. Tusilumbage indolo sakwe! ¹⁵ Nambi kwa lulo, uluhuma ulusika lwe ndapuliche ulwa ulufuuwo lwenyu kulumutwa Yesu, na uwende wenyu ku vanu va Nguluvi, ¹⁶ Sindalekiti nambi kimunyi kimwi na ukumulumba Nguluvi ukwimila nyenye. Nyele nguviwuka mukwifunya kwangu, ¹⁷ Sambi Nguluvi va Umutwa vetu Yesu Kilisito, Dada umunyandolo, avapele nyenye Umuhe va uluhala na uva uwugubulilwe mumukagula Nguluvi, ¹⁸ sambi mugine ukumukagula hilo munumbula senyu ulwa uluhuvi lweavakemelelye mu wunono na indolo ingomi iya ililila lyeavaviche avanu avelu vakwe, ¹⁹ uwukomi uwulutye wa uludali lwakwe mwahwehwe yetwifuuwa ukuling’ana na ikipigo cha uludali lwakwe ulukomi, ²⁰ ulwakwilye pe amusilibwe Kilisito ukuhuma kuvafwe, neke amukong’omeke kundyo kwakwe kuchanya. ²¹ Uko, Kilisito atemile muvalongola mbevali, uwuvina na uludali na uwutwa mung’i uwuvina wewewuvesaga wewitambulwa mung’i umu na kung’i iyikusa. ²² Nguluvi afivikite mbefili pasi pa amagulu gakwe, swe akumutawula ku likanisa iva muvina va mufinu mbefili. ²³ Likanisa gwe muvili gwa Kilisito, na uwukwilanifu wakwe yumwene yeikwilanisa mbefili na apono bahapavesaga.

¹ Nyenye mwe mufwe ukwimila uwananzi na inzanangifu senyu. ² Ulusika ulo mwikalige we mukwiga imikalile imibi ja mung’i umu, mwagapulikise amasoka manyaludali ga mwilanga, amasoka agakuvasagila lino avanu vesivakumupulika Nguluvi. ³ Na kulino de hwehwe mbetuli twetwindawe vavene; twikalige we tukwiga uwudobokesi wetu wa mung’i nu kupiga sila hela isanogelige imivili nu luhala lwetu. Kwa ulubali lwa mung’i, hwehwe nahwe twindawe avene kangi, twetuvaje ililakaali lya Nguluvi. ⁴ Neke Nguluvi munyalusungu lukomi. Atwendite na uwende uwugaya wulongo, ⁵ nambi we twetufwe ukwimila inzanangifu, atupelye uwumi pamwinga na Kilisito. Ukukola uwuwuya wa Nguluvi nyenye mupokitwe. ⁶ Kwa ukuhanga na Kilisito Yesu, Nguluvi atusilibwe pamwinga nave, sambi tukateme pamwinga nave kuchanya. ⁷ Ulo lweawendite ukululagila kuvanu va imisika igikusa uwukomi wa uwuwuya wakwe weatupelye kwa ulusungu lwa ukuhanga kwetu na Kilisito Yesu. ⁸ Pakuva, kwa uwuwuya wa Nguluvi nyenye ye mukomboliwe ukwimila ulufuuwo. Ulukani ulu silwihumagi muwupifu wenyu, pesi ukuta icho kipelwa cha Nguluvi. ⁹ Nambi kangi silwihumagi mufipigo fyenyu yinyenye, alonga umunu ivahile kinu. ¹⁰ Hwehwe twi figawa fyakwe Nguluvi, na kwa ukuhanga na Kilisito Yesu, atugafile sambi twikale muwupiga inofu sealatuviche tupigage. ¹¹ Nyenye kukilamuko mwatambuligwe, vasila kuwolwa mwalula lwelwitambulwa kuwolwa ulwapigikige na amawoko mumivili jawo. ¹² Mwiyiwukage lwemwemulekine na Nguluvi pamwandi mwe mwiva genzi; mwe kwivala mulukolo lwa Vaisilaeli; mwe mwivagenzi na simwemuhanzili nambi kinu mwa lula ulufingano ulwa inyuviso, mwemugayite uluhuvi, na wita avanu vesivamuseli Nguluvi umu mung’i. ¹³ Neke lino de, kwa ukuhanga na Kilisito Yesu, nyenye ye pamwandi mwe muli pataali, yemuhegelisiwe ukwimila idanda yakwe Kilisito. ¹⁴ Pakuva Kilisito yumwene atuletye uwikalakunoga kwa ukuvahanza Avayudaya na avanu va ing’i isingi ukuva lukolo lumwi. Kwa umuvili gwakwe yumwene amamwe ikibupa kila cheche kivavagulise nu kwambusa vave vatavangu. ¹⁵ Ahesise lula ululagilo lwa Avayudaya na indagilo na imisimu, sambi ing’olo iso isivili agawe lukolo lumwi ulupya mu wulilumwi nave na palulo aletite uwikalakunoga. ¹⁶ Kwa umuvili gakwe, Kilisito awulige uwutavangu wawo; kwa umusalaba gakwe ndawe ahanzise ing’olo iso luve lukolo lumwi na awuyipe uwilamule na Nguluvi. ¹⁷ Sweno, Kilisito aasile idalika Ulukani Ulunofu lwa uwikalakunoga kwa nyenye mwe vanu va ing’i isingi yemwe pataali na Nguluvi, na kangi kwa Avayudaya avali pipi na Nguluvi. ¹⁸ Sweno, ukwimila umwene, hwehwe mbetuli, Avayudaya na avanu va ing’i isingi, tuhwanite ukumubitila Dada kwa mutima gumwi. ¹⁹ Sweno, nyenye si pe mwivagenzi kangi, sipe mwivanu va kwivala nyenye, mwivanyang’i pamwi na avanu va Nguluvi, na mwi vanu va mulukolo lwa Nguluvi. ²⁰ Mwivasengele mulutu uluvike na vigendo na avavisi, nave Kilisito yumwene ye liganga likomi lya mulutu. ²¹ Umwene ye ayibete ikaye mbeyili nu kulumbing’asa mbaka yive Tembeli inzelu ukwimila Umutwa. ²² Na mukuhanga nave, nyenye nanye mwivasengelese pamwi na mbevali vala avangi, sambi muve wikalo wa Nguluvi ukukola Umuhe vakwe.

¹ Nambi ukwimila lulo, nene Pawulo, umunyandinde va Kilisito Yesu ukwimila nyenye, ngwifunya kwa Nguluvi. ² Ndihuvye ukuta mukapulike ukuta Nguluvi, kwa uwuwuya wakwe, amelye ikipigo iki sambi nyenye mwambule. ³ Nguluvi awugubwe uwugelanise wakwe uwewufihime neke wukagulanike kwa nene. Ing’ani is nzandike muwukefu, ⁴ na wone mwimbe isi senzandike mwiyigisa lula ulwa uwukagusi wangu mwa isa ikinyele cha Kilisito. ⁵ pamwandi avanu sivevalagile ikinyele icho; neke lino Nguluvi avalaje avigendo na avavisi vakwe avelu ukukola Umuhe. ⁶ Ikinyele ichene che iki, ukukola Ulukani Ulunofu avanu va ing’i isingi vakwanukila iligawo lyawo pamwinga na Avayudaya mu wufunyilile wula wa Nguluvi; nawo viva figawamuvili fya umuvili gugula, na vihanga mu luhuviso lwe Nguluvi aluwuyipe ukukola mwa Kilisito Yesu. ⁷ Nane ndawuyipwe mbe mukami va Ulukani Ulunofu ukwimila uwuwuya wakwe Nguluvi uwuliyena, weamelye muludali lwakwe ulukomi. ⁸ Nene yendi mudodo ukulutila avanu mbevali va Nguluvi; neke ulwene ndimupele uwuwuya wakwe, sambi ndivadalikile avanu va ing’i isingi uwunono wakwe Kilisito uwugaya kigelo, ⁹ kangi sambi ndivang’alikile avanu mbevali valave uwugelanise wa Nguluvi uwe wafihime wikwilanikila. Nguluvi umugafi va mbefili afihite ikinyele chakwe icho luhuma pidaha, ¹⁰ sambi lino, kwa ukukola likanisa, avavina na vanyalulumbo va kuchanya valukagule uluhala lwa Nguluvi ululi polofu. ¹¹ Nguluvi apigite ulo kwa ukugendela muwulamusi wakwe uwa mbepali na mbepali, ulo lweakalupigite mung’asi ya Kilisito Umutwa vetu. ¹² Sweno, mukuhanga na Kilisito, na mung’asi ya ulufuuwo ululi mwa Kilisito, hwehwe tukwigelela ukumuhegelela Nguluvi kigaya muhwehwe. ¹³ Nambi, nguvagongola muladedela imitima pemwilava ukuguda kwetwiguda ukwimila nyenye, pakuva ukuguda uko kuhele kukuvaletela indolo nyenye. ¹⁴ Nambi, ngumufugamila Dada, ¹⁵ umwene ye kilamuko cha ing’olo mbesili isa mung’i isa kuchanya. ¹⁶ Ngumusuka Nguluvi, mwesigelye indolo sakwe, avapelage uludali lwa Umuhe vakwe, uludali lwa ukukangala mumitima jenyu, ¹⁷ nave Kilisito ikalage mugati umwenyu mulufuuwo. Ngumusuka mupelwe indela na ulutu mu wende ¹⁸ sambi muhwane ukulukagula pamwinga na avanu mbevali va Nguluvi lwe uwende wa Kilisito witigila mu wugasu na uwutaali, na uwima na uwuhelesa uwiwali. ¹⁹ Ena, sambi muwukagule uwende wa Kilisito uwulutye uwimbi mbewuli, mumemage hilo uwukwilanifu mbewuli wa Nguluvi. ²⁰ Kulumwene ye kwa uludali lwakwe ulwipigaga ifipigo mugati umwetu ahwana ukupiga ingomi ukulutila mbesili setuhwanite ukumusuka nambi ukwihosa, ²¹ kulumwene Nguluvi sivelage ndolo mu likanisa na kwa Kilisito Yesu, imisika mbegili, mbepali na mbepali! Ena.

¹ Sweno, nene ye ndimunyandinde pakuva ngumupigila Umutwa, nguvagongola mwikalage imikalile igivaje ulukemelo lwemwakemelilwe. ² Muvelage mbepali muvilevesi, muvalele, muvanya mola, mwikangalilage yinyenye kwa yinyenye mu wende. ³ Musugunalage ukuwugosa uwulilumwi uwiletwa nu Muhe kwa ukwinatila uwikalakunoga uwuli mwa nyenye. ⁴ Koguli muvili gumwi nu Muhe yumwi, ndawe uluhuvi lumwi lwemwakemelilwe. ⁵ Koyuli Mutwa yumwi, lufuuwo lumwi nu wubatiso wumwi; ⁶ poyuli Nguluvi yumwi na ye Dada va mbevali, ye ali pachanya ye mbefili, ayipiga ikipigo mwa mbefili na kangi ali mwa mbefili. ⁷ Yeyeavesaga munu mwa hwehwe mupele uwuwuya, mwekigelye ikigelo chapelitwe na Kilisito. ⁸ Ndawe lwandikwe: “Lweahelelye kuchanya, kuchanya hilo, ategwe avagalule; Avagavye avanu ifipelwa.” ⁹ Sweno, peyilongwa: “Ahele kuchanya,” kwekutigila kiki pesi kwekutigila ulwa ukutala asulunwike pasi hilo mung’i? ¹⁰ Sweno, uyo yeasulunwike pa ing’i ye yuyo yeahele kuchanya hilo sambi afimemye mbefili. ¹¹ Kangi yemwene yeavapelye avanu ifipelwa: Avamwi avapelye vave vigendo, avamwi vavisi, avamwi vave vadalisi Ulukani Ulunofu, avamwi vave vanyakukwamila na avigisi. ¹² Apigite ulo sambi avagelanise avanu mbevali va Nguluvi uwimila ikipigo cha Kilisito sambi umuvili gwa Kilisito gusengwe, ¹³ na palulo mbetuli tuwufikile uwulilumwi wa ulufuuwo na ukumukagula hilo Umwana va Nguluvi; tuve vanu yetukange nu kuwufikila uwukwilanifu wakwe Kilisito yumwene. ¹⁴ Sweno, sisatuva nda twivana kangi, ye twitosewa na ukupugwa uko na uko ni kifulufumbi chechekivesaga cha inzigiso sevakwivangila avanu avabanga, sambi vavayase avangi muwubanga. ¹⁵ Wone twinatile inachene munumbula ya uwende tugina ukuvina mwa mbesili ukutegana na Kilisito, umwene ye mutwe; ¹⁶ pasi pa uwulongola wakwe, ifigawamuvili mbefili fya umuvili pefihangila, nu muvili mbeguli gwisikimala kwa uwutanzi wa ifigawamuvili fyakwe, sweno, ikigawamuvili chechekivesaga kikwisage ikipigo chakwe ulukivaje, umuvili mbeguli gwivina nu kwisenga mu wende. ¹⁷ Sweno, mwitawa lya Umutwa, nguvakenyela mulikala kangi ndawe avanu vesivamuseli Nguluvi, ve amahosa gawo gapufile, ¹⁸ nu luhala lwawo luli mulwisa. Vali pataali na uwumi wa Nguluvi, ukwimila uwupuva uwuli mugati umwawo na uwutalamu wa inumbula. ¹⁹ Vayasile vagaya nyoni, vitanise muukupiga uwaafu; kangi vanya chaka ukupiga chechekivesaga cha uwuhongi nyoni. ²⁰ Neke nyenye simwiyigisi ndahihyo mung’ani sa Kilisito. ²¹ Neke lulipawelu ukuta mwapulike wunofu ing’ani sakwe, na pakuva nyenye mukumuninila, mwivigisi inachene weyiwali mwa Kilisito. ²² Sweno, Mugilekelage ng’ani imigendele jenyu ija pamwandi, ukutigila uwunu wenyu uwulovela wewanangigwe mu wudobokesi wakwe wa uwulyalya. ²³ Mwipitulage wupya munumbula na mumahosa genyu. ²⁴ Mufwalage uwunu uwupya we wagafilwe muluhwano lwa Nguluvi we wiwonekela mu migendele ija nachene ja uwugolofu na uwelu. ²⁵ Sweno, muwulekelage ng’ani uwudesi. Na yeyeavesaga lumuvaje amulongelage umuyagwe isa nachene, pakuva yeyeavesaga mwahwehwe iva kigawamuvili cha umuvili gwa Kilisito. ²⁶ Na wone muvipe, mulidikila ililakali lyenyu livambuse mupige inzanangifu, na kangi mulahwa na ililakali ikimunyi mbekili. ²⁷ Mulagela mumupele Setani ikilega. ²⁸ Yahiisige alagela ahiise kangi, lino avangage ukupiga ikipigo ikinofu kwa amawoko gakwe, peahwane ukuva na ikinu cha ukumutanga umunu yagulwime, ²⁹ na ing’ani sa uwaafu silapulisa kangi kwa nyenye; mbepali ing’ani senyu sivelage nofu na isihwanite sivasenge nu kuvatanga avangi, sambi sivapele uwuwuya avipulikisa. ³⁰ Mulagela mumuvifye Umuhe Umwelu va Nguluvi pakuva Umuhe uyo chekilagilo cha Nguluvi kwa nyenye, ulwa nyenye mwivanu vakwe, na ye wolelesi ukuta ikimunyi sachusa pe Nguluvi saavakombola nyenye. ³¹ Lino swe mululekelage ng’ani ulwigawo, lwivipilo, lilakali, liyoyo, na amaligo! Muwulekage uwanangifu wewewuvesaga! ³² Muvelage na inumbula nofu, na vanyalusungu; umunu yeyeavesaga amudegepelage umuyagwe ndawe nave Nguluvi lwe avadegepye nyenye ukwimila Kilisito.

¹ Pakuva mwivana va Nguluvi avende, luvavaje muvelage ndawe lweiwali umwene. ² Mugendelage uwende, ndawe Kilisito lweatwendite, neke itawule yumwene ave kitawulwa cha inambika iyinung’ilila wunofu na iyikumunogela Nguluvi. ³ Pakuva mwivanu va Nguluvi uwusafi, na uwaafu mbewuli filatambulwa mwa nyenye. ⁴ Kangi ing’ani inyonga nyoni, sa uwupuva nambi ulubesa, iso mbesili sisihwana kwa nyenye; ikiba ing’ani sa ukumulumba Nguluvi, ali iso sesihwanite. ⁵ Mulukagulage ulwa umugoni yeyeavesaga nambi umwaafu, (nambi umusunyalila ifihwananguluvi), nambi umunu yeyeavesaga yeindawe iwo, sisaambulila kinu Muwutwa wa Kilisito na wa Nguluvi. ⁶ Mulagela mwidikile ukusangwa na umunu kwa ing’ani sakwe isa uwubanga pakuva uwimila ing’ani sesindawe iso ililakali lya Nguluvi lyakuvasila avanu mbevali vesivakumogopa. ⁷ Sweno, muliyidikisa nawo. ⁸ Pamwandi nyenye mwe mulwisa, neke lino nyenye mulimulung’ali kwa ukuhanga na Umutwa. Sweno mwikalage nda mwivana va ulung’ali: ⁹ pakuva amaveleko ga ulung’ali we wunofu mbewuli, uwugolofu na inachene. ¹⁰ Mugelage ukulukagula lula lweiwenda Umutwa. ¹¹ Mulahanga mu fipigo fyesifiveleka ifya mulwisa, pesi ulwa mufivikage pawelu. ¹² Mbi ing’ani isipigwa mu kinyele nyonganyoni na pakutambula pamulomo. ¹³ Neke ing’ani sila isipigwa mulung’ali, na inachene yakwe yayivikwa pawelu, ¹⁴ na chechekivesaga kipigilwa pawelu chakiva lung’ali. Nambi Uwandike Uwelu witigila: “Lamuke veve yugonelye, silibuke uluhuma kuvafwe, nave Kilisito akung’alika.” ¹⁵ Sweno, mwikomalilage lwe mwigenda: mulikala ndawe avapuva, pesi ulwa muvelage ndawe vanu avasugu. ¹⁶ Mwikomalilage hilo lwe mukugipigila imisika pakuva ifilo ifi fya uwanangifu. ¹⁷ Sweno, mulava mwivapuva, neke mugelage ukulukagula lula lweiwenda Umutwa. ¹⁸ Mulemwage ukugaala idifai pakuva iyo yivayusa, lino mumemage Umuhe Umwelu. ¹⁹ Muvelage mwitinakisa mung’ani isa mu Sabuli, nzimbo na uwimbe wa munumbula, mumwimbilage Umutwa inzimbo na sa musabuli kono we mukumulumba munumbula senyu. ²⁰ Mumulumbage Nguluvi Dada mbepali ukwimila mbesili mwitawa lya Umutwa vetu Yesu Kilisito. ²¹ Yeyeavesaga munu avelage na ichoga kumuyagwe ukwimila ukumogopa Kilisito. ²² Avang’inetu vavelage na ichoga ku vanu vawo ndawe lwe vakumogopa Umutwa. ²³ Pakuva umugosi ina lulagi ku vakwe, ndawe Kilisito lwe ina lulagi ku likanisa nave Kilisito yumwene yeakulikombola ilikanisa, umuvili gwakwe. ²⁴ Ndawe lula lwe likanisa likumogopa Kilisito, lwindahihyo, avang’inetu vavelage na ichoga ku vawo mwambesili. ²⁵ Nayinyenye nye vagosi, muvendage avenyu ndawe Kilisito lwe alyendite ilikanisa, neke itawulage yumwene ave nambika ukwimila likanisa. ²⁶ Apigite ulo sambi kwa ulukani lwakwe, alifunyilile kwa Nguluvi, peyealyesise kwa ukulyofuga na ululenga, ²⁷ sambi ikwavile likanisa ilyelu na ilyesiwe hilo, ilikanisa iligaya mambilila ga uwaafu nambi wulema nambi ikingi ikindawe siso. ²⁸ Sweno, avagosi luvavaje vavendage avanu vawo ndawe imivili jawo vavene. ( ²⁹ Asupali umunu yakuguvipila umuvili gwakwe; ulungi nalulo aakugulisa na ukugufwika. Lwindahihyo nave Kilisito lweakulilolela ilikanisa, ³⁰ pakuva hwehwe twifigawamuvili fya umuvili gwakwe.) ³¹ Ndawe Uwandike Uwelu uwitigila, “Sweno, umugosi amuleka udade na uyuve, abaning’ana na uvakwe nawo ndawe vavili vava muvili gumwi.” ³² Mung’ani isi moyili inachene iyifihime, ndiwona ukuta isi sidonya ulwa Kilisito na likanisa lyakwe. ³³ Neke kangi sidonya na kwa nyenye: umugosi yeyeavesaga lumuvaje avelage na ichoga ku munu vakwe.

¹ Nye, nyevana, muvelage na ichoga vegasi venyu mu wukilisito pakuva ulu lwe lukani ulunofu. ² “Muvelage na ichoga kuvadadenyu na avayuvenyu,” ulu lwe lulagilo ulwa ukutala ulwiwilwa uluhuviso, ukutigila, ³ “Peufunyililwa na ukunana ifilo fyolofu.” ⁴ Nayi nyenye va dadawo, mulavavifya avanenyu pesi ukuta muvalolelage muchoga na inzigiso isa uwukilisito. ⁵ Nyenye vanyawingi, muvelage na ichoga vavina venyu ava mung’i umu kwa muhwehwe nu kukuvila; mupigage ulo kwa inumbula ngolofu mwiva nda mukumupigila Kilisito. ⁶ Mulemwa kupiga, pevakuvawona hela sambi mwiyendelese kwa avene muvapigilage kwa numbula ngolofu ndawe lweiwenda Nguluvi, pakuva nyenye mwi vakami va Kilisito. ⁷ Mwidikilage ukuvapigila ukwimila Umutwa mulemwe ukwimila avanu. ⁸ Mwiwukage ulwa yeyeavesaga munu yeipiga inofu, ave munyawingi nambi mutemapakwe, saanukila ikipelwa chakwe ukuhuma kulu Mutwa. ⁹ Nayi nyenye yemwipigilwa, muvapigilage ulwindahihyo avanyawingi venyu, na mulagela ukuvahuguvika. Mwiwukage ulwa na yinyenye kangi mwindawe vavene, mwinave Umutwa yuyula kuchanya, kulumwene uwuvina wa umunu si kinu nangi. ¹⁰ Pesilutye iso, nguvagongola mukangalage ukuhanga nu Mutwa na muwutanzi wa uludali lwakwe ulukomi. ¹¹ Mutegulage ingwembe ye akuvapela Nguluvi sambi muhwane ukudwesa ifigaho ifibi fya Ibilisi. ¹² Pakuva iligalu lyenyu si ligalu lya hwehwe na umunu, pesi iligalu lya hwehwe na ililugu ilyanangifu lya mung’i lya ikinyamuhe; tukwihoma na avatema, avavina na vanyaludali avayitemite ing’i iyi iyinya lwisa. ¹³ Nambi kwa lulo mufwalage amahomelo mbegali aga Nguluvi sambi ikimunyi kila pesakifikite samuhwane ukulidwesa ligalu ilihuma kulu mutavangu na peye mwihomite mbaka kumudugo, muvelage pemwivakangafu. ¹⁴ Sweno, mwimage mukangale! Uwanachene wuvelage nda musipi mufigudi fyenyu, uwugolofu wuvelage nda igwanda ya ichumaa iyisiika imambaga. ¹⁵ Na uwenda ukudalika Ulukani Ulunofu ulwa uwikalakunoga wuvelage nda ndatub mumagulu genyu. ¹⁶ Na hilo, ulufuuwo luvelage nda ngwembec mumawoko genyu, sambi yivatange ukusimya indibulo isa moto sa yula umwanangifu. ¹⁷ Muwanukilage uwupoki nda kofiya ya chuma, na ulukani lwa Nguluvi nda limage lye mwipelwa na Umuhe Umwelu. ¹⁸ Mwifunyage mbepali, mwisuka uwutanzi wa Nguluvi. Mwifunyage ulusika mbeluli muludali lwa Umuhe. Mwikalage miho wesimwifulugala pakwifunya ukwimila avanu mbevali va Nguluvi. ¹⁹ Munziwukage nane pe mukwifunya sambi pendilonga Nguluvi amele icha ukulonga, nywane ukuvigisa avanu ikinyele cha ulukani ulunofu. ²⁰ Ukwimila lulo nene ndimutume muminyololo sambi ngine ukudalika ndawe lumbaje. ²¹ Tikiko, umunyalukolo vetu umwende na umukami yeihuvilwa na Umutwa, avalongela mbesili sambi mulukagule chendipiga. ²² Ngumutuma ukwenyu, sambi avalongele mbesili isetu kono hwehwe sambi musikimikwe imitima jenyu, ²³ Nguvasukila uwikalakunoga wuvelage kw nyenye vanyalukolo mbemuli, pamwi na uwende na ulufuuwo uwihuma kwa Nguluvi Dada na kulu Mutwa Yesu Kilisito. ²⁴ Nguvasukila uwuwuya wuvelage kwa nyenye mbemuli yemumwenda umutwa vetu yesu Kilisito muwende uwutasila.