AVAKOLOSAYI

¹ Ye nene Pawulo umwigendo va Kilisito Yesu kwa uwende wa Nguluvi, pamwinga na umunyalukolo vetu Timoti, ² tukuvandikila nyenye nyevanu va Nguluvi uko ku Kolosayi vanyalukolo vetu yemwihuvilwa mukuhanga na Kilisito. Tukuvasukila uwuwuya na uwikalakunoga ukuhuma kwa Nguluvi udadetu. ³ Mbepali twatukumulumba Nguluvi, Udade va Umutwa vetu Yesu Kilisito, petukuvasukila. ⁴ Pakuva tukapulike ulwa ulufuuwo lwenyu mwa Kilisito Yesu na uwende wenyu kuvanu mbevali va Nguluvi. ⁵ Pelufikite lula ulukani ulwa nachene, Ulukani Ulunofu ulwasile pakutala kwa nyenye mwapulike ulwa uluhuvi ulwihuma umo ino ulufuuwo na uwende lukwimila mu luhuvi lulo, lwemwivavikile wunofu kuchanya. ⁶ Ulukani Ulunofu lwigina ukuveleka nu kutagalila mung’i mbesili ndawe we lukapigite ukwenyu nyenye uluhuma ikimunyi kila pemwalupulike lwilongwa ulwa uwuwuya wa Nguluvi na ukuyikagula inachene. ⁷ Mwiyigiise ulwa uwuwuya wa Nguluvi uluhuma kwa Epafala, umukami muyetu, ye mupisi yeihuvilwa va Kilisito ukwimila hwehwe. ⁸ Umwene atulonje isa uwende wemwapelitwe na Umuhe. ⁹ Na ukwimila lulo tukave mbepali tukuvasukila petukwifunya peyetupulike isa nyenye. Tukumusuka Nguluvi avamemye uwuseela uwukwilaniche wa uwende wakwe, avamemyage uluhala mbeluli na ifigaho ifiletwaga uwiletwagwa na Umuhe vakwe. ¹⁰ Apo pemuhwana ukwikala ndawe lweiwenda Umutwa na mbepali mupigaga isikumunogela umwene. Imikalile jenyu giva giveleka amakowo mbegali ga imigendele iminofu nanye muvina mufigaho ifya ukumukagula Nguluvi. ¹¹ Nguluvi avapelage uludali lwakwe ulunyandolo sambi, muhwane ukukangalila kwa chechekivesaga muwusindile mbewuli. ¹² Muluhekelelo mumulumbage Dada yealekite nayi nyenye muve na ililila lyenyu mufinu fila fye Nguluvi alavaviche avanu vakwe kuwutwa uwa ulung’ali. ¹³ Umwene atupokite uluhuma muludali ulwa ulwisa neke atulete wunofu kuwutwa wumwanakwe umwende, ¹⁴ ye ukukola kulumwene twiva na uwukombolwa na ukudegepelwa inzanangifu setu. ¹⁵ Kilisito ye lwihwano lwa Nguluvi yesiwonekagi. Ye Muvele kufigawa mbefili. ¹⁶ Pakuva ukukola kwa yuyo ifinu mbefili fyagafilwe, mung’i na kuchanya, ifiwonekaga na fyesifiwonekagi; ifigoda ifya uwutwa, apangi uwubana malungulu, apangi uludali lwa amasoka, apangi indagi. Mbefili fyagafilwe ukukola mulumwene na ukwimila mulumwene. ¹⁷ Kilisito epwali na pesifilagawa mbefili, kwa ukuhanga na umwene, mbefili finana pefipwali. ¹⁸ Umwene ye mutwe gwa umuvili gwakwe, kwekutigila likanisa, umwene che kilamuko cha uwumi uwa umuvili gugo. Umwene gwe muvango, umuvele yatasile ukusilibusiwa ukuhuma kuvafwe, sambi ave uva ukutala mwambefili. ¹⁹ Pakuva Nguluvi alamwe uwukwilanifu wakwe wave mulumwanakwe. ²⁰ Kwa ukukola mulumwanakwe, Nguluvi alamwe ukupilula ifinu mbefili kulumwene, Nguluvi akwisise uwikalakunoga ukwimila ifwa ya mwanakwe mu musalaba na palulo apilwe ifinu mbefili kulumwene ifya mung’i na ifya kuchanya. ²¹ Pamwandi nyenye nanye mwepataali na Nguluvi mwe vatavangu vakwe pakuva amahosa na imigendele jenyu je myaafu. ²² Neke lino kwa ifwa ya umwanakwe yeikalige mung’i Nguluvi akavatang’ise nave, sambi avalete kulumwene mwiva mwivelu, awofuge, vesivananga kinu. ²³ Ino luvavaje muginage ukuva mulufuuwo kono wemuvisilwe na ukusigalila mulutu ulukangafu, mulidikila ukuhogaswa uluhuma muluhuvi lula lwemwapelitwe pemwapulikige Ulukani Ulunofu. Nene Pawulo ngave mukami va Ulukani Ulunofu lulo ulukadalikwe kulu munu yeyeavesaga mung’i. ²⁴ Na kulino ndihekelela penditeseka ukwimila nyenye, pakuva ukukola uluteseko lwangu umu mung’i, nyele nditanga ukukwisa kila chekikepa muneseko sa Kilisito ukwimila umuvili gwakwe, likanisa. ²⁵ Nene ndavisilwe mbe ndi mukami va likanisa ukugendela imigosekese jakwe Nguluvi jeameelye ukwimila ukwambula kwenyu. Na ulwene lwelwa ukudalika uwukwilanifu wa ulukani lwakwe, ²⁶ na che uwukinyele chealavafihite avanu uluhuma pidaha, neke lino avalaje pawelu avanu vakwe. ²⁷ Lwealavisile Nguluvi lwelwa ukuvalagila pawelu avanu vakwe, ikinyele iki ikikomi na kinyandolo che kikwimila avanu mbevali. Na ikinyele ichene che iki. Kilisito mugati mwenyu, ye luhuvi lwa indolo. ²⁸ Na ukwimila lulo tukumudalika ku vanu mbevali; tukuvakenyela na ukuvigisa mbevali muluhala mbeluli, sambi tumulete yeyeavesaga kwa Nguluvi iva akange mukuhanga na Kilisito. ²⁹ Sambi lupigike ulu nene ndipiga ikipigo kwa kukangala ndikola uludali ulukomi lwa Kilisito ulwipiga mugati mwanene.

¹ Ndiwenda mulukagule lwendipiga ikipigo kwa kukangala ukwimila nyenye na avanu va ku Lawodikeya kangi na ukwimila mbevali vesivalambona. ² Ndipiga ulu sambi inumbula sawo sisikimikwe na ukong’aswa pamwinga muwende, pepene pe vamema uwukwilanifu mbewuli uwiletwagwa na uwukagusi wa nachene. Ipo pevakikagula ikinyele cha Nguluvi na ikinyele ichene ye Kilisito. ³ Mulumwene mwefifihitwe ifisande ifigaho mbefili fya uluhala na ifigaho. ⁴ Sweno, nguvalongela, mulidikila umunu avasange mung’ani isa uwudesi nambi ing’ani sakwe sive nofu wuli. ⁵ Nave nene supali umuvili, neke ulwene ndilipamwi nanye kwa Umuhe, na ndihekelela ukwilavila lwemwimile mukange mbemuli mulufuuwo lwenyu kwa Kilisito. ⁶ Pakuva yemumwanuche Kilisito ukuva ye Mutwa, sweno munanage mukuhanga pamwinga na umwene. ⁷ Luvavaje muyavilage indela mulumwene, uwunani wenyu wimilage hilo mulumwene, nu kukangala mulufuuwo lwenyu, ndawe lwemwigisiwe. Na muvelage mumemile ululumbo. ⁸ Ino de mwikomalilage umunu alavawuyapa mbelembo ukwimila ukwimila muluhala lwa uwuyasi lwa avanu, lwe ikilamuko chalulo kili munzigiso indekelwa na avanu na amasoka agatemile mung’i, na sisahumiti kwa Kilisito Umwene! ⁹ Pakuva, mugati mwakwe Kilisito muwunu wakwe, mowoli uwukwilanifu mbewuli wa Nguluvi, ¹⁰ nanye mupelitwe uwumi uwukwilaniche mukuhanga nave. Umwene ye muvina kwa amasoka agatemile mbegali na avanzagila mbevali. ¹¹ Mukuhanga na Kilisito nyenye mwawolitwe, neke si kwa ukuwolwa ukwiwuyapagwa na avanu, pesi kula ukwiwuyapagwa na Kilisito umwene, na ukuwolwa kula kwekwidonyaga ukukombolwa ukuhuma muwunu wunyanzanangifu. ¹² Pakuva, pemwabatisigwe, mwatasilwe pamwi na Kilisito, na mukubatisiwa mwasilibulwe kangi pamwinga nave mulufuuwo lwenyu ukukola uludali lwa Nguluvi, yula yeamusilibwe Kilisito uluhuma kuvafwe. ¹³ Pamwandi nyenye, mwemufwe ukwimila uwananzi wenyu na pakuva mwe mwivamyanza. Neke lino Nguluvi avapelye nyenye uwumi pamwi na Kilisito. Nguluvi atudegepye inzanangifu setu mbesili, ¹⁴ ademulye ng’ani ulwandiko lula lwa umukole lwetwetulaving’ine ulunyamusilo aluhesise nu kulutovelela pa musalaba. ¹⁵ Uko Kilisito apokite uludali lwago igo amasoka agatemile na avanzagila; alekite vave kinu cha kwinyinyalwa pamalugu na ukuvakuluna wita avagalule mulugendo lwa uludweso lwakwe. ¹⁶ Sweno, mulidikila ukupelwa imisilo na umunu yeyeavesaga ukwimila ifilyo, ifinywewa, ifimunyi fya imbuungo, ifimunyi ifikomi fya umwesi umupya nambi isabato. ¹⁷ Ing’ani isindawe iso, iso mwigigi gwa fila ifikusa, inachene iyene yikwimila mwa Kilisito. ¹⁸ Mulidikila ukusokamwa na umunu yeyeavesaga yeakwisakila uwuvina ukwimila amaloto na yeikangala uwilevesi wa uwudesi na ukuvasunyalila avanyivaha, umunu va ndahihyo apufile ayasiwe na amahosa ga uwudesi ga mung’i ¹⁹ alekine nu kusutana na Kilisito yula ye mutwe gwa umuvili. Muwulongosi wa Kilisito, umuvili mbeguli gwilisiwa na ukufihanza ifigawamuvili na indela, nago gwivina mweiwendela Nguluvi. ²⁰ Nyenye ye mufwe na Kilisito na ukukombolwa ukuhuma muludali lwa amasoka agatemile mung’i. Mbi lwiva ndawuli kangi ukwikala mukwiga sa mung’i umu? Lweki muvikilwe imisilo: ²¹ “Mulibata iki,” “Mulagesa kila,” “Mulapamisa kila!” ( ²² Mbefili ifyo fidonya ifinu finyakwanangika pefipigilwe); ijo misilo na inzigiso imbike na avanu. ²³ Nachene, imisilo ijo giwoneka nda ja luhala mumigendele ja ulusunyalilo ulwa ukwivangila yinyenye, uwilevesi wa uwudesi na ukuguvika umuvili muneseko, neke ulwene sisitanga kinu ukugutanila umuvili mu wudobokesi.

¹ Sweno, wone yemusilibwike pamwi na Kilisito, musugunalage ukusaka isa kuchanya, kula kwekwali Kilisito, akong’ome ulubali lwa kundyo lwa Nguluvi. ² Mudobokelage isa uko kuchanya, na si ifinu fya mung’i. ³ Pakuva nyenye mufwe, na uwumi wenyu wufihe pamwi na Kilisito mwa Nguluvi. ⁴ Uwumi wenyu wa nachene ye Kilisito, neke nape aasile, pepene pe nayi nyenye samusa pamwi na umwene neke muhange mundolo! ⁵ Sweno muwulagilage ng’ani mbesili isili mwanyenye isikwiga isa mung’i; uwuyamba, uwugoni, uwaafu, uwuhatufu, na uwudobokesi, ulo lwe lusunyalilo ku fihwananguluvi. ⁶ Na ukwimila siso, nambi ililakali lya Nguluvi lyakuvasila vala mbevali avagaya ichoga kulumwene. ⁷ Nyenye nanye pamwandi mwagendelige mwa siso, pemwe pasi ya uwutema wa siso. ⁸ Neke lino musilekelage ng’ani mbesili iso, lilakali, ikivikileme, uwanangifu, uwudesi uwubi, uwihuma mumilomo jenyu nambi ing’ani isa malanga. ⁹ Mulidetela, pakuva nyenye yemukawuhesise uwunu uwulovela pamwinga na ifipigo fya wuwo, ¹⁰ na mufwite uwunu uwupya. Uwo wigina ukuwuyapwa na Nguluvi, Umugafi wa wuwo, wutegane mulwihwano lwakwe, sambi muhwane ukumukagula Nguluvi mu wukwilanifu. ¹¹ Napelufiche ulu, sipewipwali kangi uwuliwungi kwa Umugiliki na Umuyudaya, umuwoole na yesimuwoole, yeimbite na yesiimbiti, umunyawingi na umunu umutemapakwe. Kilisito ye mwene mbefili, na alimwambefili, ¹² Pakuva mwivanu vahagule, avelu na avende va Nguluvi vanyalusungu, vanyawudeke avilevesi, avalele, vanyalwikangaliso. ¹³ Mwikangalilage na ukwidegepela wone umunu ave na ulukani lwe asutine na umuyagwe. Luvavaje mwidegepelage ndawe umutwa lweavadegepye nyenye. ¹⁴ Ukulutila kwa iso mbesili mwinatilage uwende, pakuva uwende wawikong’asa mbesili mu wulilumwi uwukwilaniche. ¹⁵ Nawo uwikalakunoga wa Kilisito wusagilage munumbula senyu, pakuva ukwimila lulo nyenye mwakemelitwe mumuvili gugo gumwi. Kangi muvelage na ikilumbo! ¹⁶ Ulukani lwa Kilisito lwikalage mugati umwenyu pamwinga na uwunono wakwe mbewuli mwiyigisage na ukwiyisa mu luhala mbeluli. Mwimbage isabuli, na inzimbo, na uwimbe wa kinyamuhe; mumwimbilage Nguluvi munumbula senyu mwina ikilumbo. ¹⁷ Na kila chemuvelaga mwipiga,mukulonga nambi mukupiga, mupigage mbefili mwitawa lya Umutwa Yesu na ukumulumba Nguluvi Dada ukukola kulumwene. ¹⁸ Nyela nye vang’inetu, muvapulikage avanu venyu, pakuva ulo lweayiwenda Umutwa. ¹⁹ Na yinyenye mwevagosi, muvendage avanu venyu, na mulava mwivakali ku vanu venyu. ²⁰ Nyela mwe vana, muvapulikage avegasi venyu mbepali, pakuva ulo lwakumunogela Umutwa. ²¹ Nanye mwe vegasi, mulavatala avanenyu, pesi ndahihyo vadedela imitima. ²² Nyela vanyawingi, muvapulikage avavina venyu va mung’i mwa mbefili, na si pala hela pevakuvimilila ukuta mwisaka ukwiyendelesa kwa vene; pesi ukuta mupigage ndahihyo chesa mutima, ukwimila ukumogopa umutwa. ²³ Na chemuvelaga mwipiga, mupigage chesa mutima, ukwimila Nguluvi si ukwimila avanu nda. ²⁴ Mwiwukage ukuta umutwa saavapela ikipelwa kila cheavaviiche avanu vakwe. Mumupigilage Kilisito umutwa! ²⁵ Yeipigaga isa uwananzi saahombwa isitegine na uwananzi wakwe; Nguluvi mugaya luhagu.

¹ Nanye mwe vavina, muvapigilage avanyawingi venyu mu wugolofu na uwunofu, kono we mukwiwuka ukuta na yinyenye nanye mwinave umutwa kuchanya. ² Munanage mukwifunya, na pemukwifunya mwikomalilage, mukumulumba Nguluvi. ³ Na kangi pemukwifunya mutwiwukage na yihwehwe sambi Nguluvi adindule umulyango ugwa ulukani lwa ikinyele cha Kilisito ulukumbika nene mbe mundinde. ⁴ Sweno, mwifunyage sambi nywanage ukulonga ulumbaje na ukukivika pawelu ikinyele icho. ⁵ Muvelage na uluhala pemwihanging’ana na vala vesivalafuuwa, mwikola wunofu ifilega mbefili fyemwinafyo. ⁶ Imilongele jenyu givelage ja uwuwuya mbepali minofu na je gikuvakwega na luvavaje ukulukagula lula lwa ukuvapitula wunofu munu yumwi yumwi. ⁷ Tikiko, Munyalukolo, umwende, yeihuvilwa, na umukami umuyetu mukipigo cha umutwa, avalongela isangu mbesili. ⁸ Nambi ngumutuma, sambi avalamuse inumbula peakuvalongela isa hwehwe. ⁹ Uyo akusa pamwi na Onesimo, umunyalukolo vetu, umwende, na yeihuvilwa, umunu va ukwenyu. Iwo vavalongela mbesili isipigika ipa. ¹⁰ Alisitako yealimundinde na nene, akuvahungila; nayi Maliko nave umuhisive va Balanaba (yemupulike uwulagise wa isakwe, peasile ukwenyu mumwanukilage.) ¹¹ Nave Yosuwa yeikemelwa Yusito; akuvahungila. Avayudaya vevakanuche ulufuuwo, ve vava hela viyena vevipigasa na nene ukwimila Uwutwa wa Nguluvi nawo vakave vakunanga pakomi hilo nene. ¹² Epafala umunu uva ukwenyu umukami va kilisito akuvahungila. Mbepali aakuvasukila kwa wupifu peakwifunya sambi mugine ukukangala, mwime munoge na ukukwilanikila hilo mwa mbesili seiwenda Nguluvi. ¹³ Nywanite nzolelele ukuta ipiga ikipigo kwa wupifu ukwimila nyenye na avanu va ku Lawodikeya na ku Hilapoli. ¹⁴ Luka, umukofi vetu umwende, na Dema vakuvahungila. ¹⁵ Muvahungilage avanyalukolo vetu avali ku Lawodikeya mumuhungilage nayi muhasa vetu Nimufa, pamwinga na avafuuvitwe mbevali avikong’ana mukaye yakwe. ¹⁶ Na peyemwimbite ibalula iyi, mugosage ukuta yikimbwagwe kwa avakilisito va ku Lawodikeya; na yinyenye kangi mugosage ukuta ibalula yevakapelitwe avene nanye muyitegulage mukiimbe. ¹⁷ mumulongelage Alikipo, akomalilage ukukwisa ikipigo kila cheapelitwe na Umutwa. ¹⁸ Ngwandika isi kwa iliwoko lyangu yinene; inyungila isi sihuma kwa nene Pawulo. Mwiwukage ukuta nene ndimusope mundinde. Uwuwuya wa Nguluvi wuvesage pamwinga na yinyenye.