IFIPIGO

IFIPIGO

¹ Ve mutambule Teofilo, mu kitabu cha pamwandi ndakwandiche ing’ani mbesili sa Yesu seapigite na ukwigisa ukuhuma pamuvango gwa ifipigo fyakwe ² mbaka pa ikimunyi kikila cheabitye kuchanya. Na wesialabita kuchanya avalagilye kwa uludali lwa Umuhe Umwelu vala avanu veala avahagwe vave vigendo vakwe. ³ Pakuva kwa ulusika lwa ifilo machumi gatayi ukuhuma ukufwa kwakwe ave peavasila kolofu avigendo na ipo ave peavalagila ulwa umwene pe mumi. Vamuwene, nave avalongelige ulwa Uwutwa wa Nguluvi. ⁴ Na peyevakong’ine mbevali, swe ndawe avalagilige de: “Mulahega ipa pa Yelusalemu, muvela pemusindila ulufingano lula lwa Dada lula lwemwamulike nene nguvalongela ulwa ikipelwa. ⁵ Pakuva Yohane abatisige nu ululenga, neke lino pefilutye filo fikefu, nyenye mubatisiwa nu Umuhe Umwelu.” ⁶ Napeyevakong’ine pamwi avigendo na Yesu vamuwusise, “Mutwa ulusika ulu peuvapilulila kangi Uwutwa wula Vaisilaeli?” ⁷ Neke Yesu avapitule, “Imisika na ifivagwa ifyo mbefili filimululagilo na muludali lwa Dada, ulo silwanyenye ukulukagula pesalulava. ⁸ Neke samupelwa uludali pe Umuhe Umwelu aviche nyenye, nanye samuva wolelesi vangu mu Yelusalemu na mu Yudaya mbeyili na mu Samaliya na mung’i mbesili.” ⁹ Avelige ilonga iso, mbevali wevakumulava ndawe, anyanyuligwe kuchanya; lifufu limusikage pamiho gawo sivamuweni kangi. ¹⁰ Na lwevevakali vilava kuchanya umwene peakwibitila, lavage avanu vavili vafwite imyenda myelu, vimite pipi nawo. ¹¹ Swe vitigila, “Nyela mwevanu va mu Galilaya! mbi ndawuli mwimite mwilava kuchanya? Yesu uyu yeibita kuchanya ukuhuma kwa nyenye saasa kangi ndahihyo ndawe lwemumuwene ibita kuchanya.” ¹² Ndawe avigendo vapilukige ku Yelusalemu ukuhuma kukidunda chekitambulwaga miseitumi, ulugendo ulugelaniche wita kilomita yimwi ukuhuma paboma. ¹³ Ndawe wafikige mu boma swe vakwingila kukibupa cha pachanya, apono pevikalige nawo veva: Petulo, Yohane, Yakobo na Andeleya, Filipo na Tomasi, Batolomayo na Matayo, Yakobo umwana va Alufayo, Simioni umuselote na Yuda umwana va Yakobo. ¹⁴ Iva mbevali vakong’anige kwa mutima gumwinga vakwifunya, pamwi na avang’inetu avangi pamwi na Maliya uyuve va Yesu na avanakwave avakwamisi. ¹⁵ Na peyefilutye filo fikefu pepogoli umukong’ano gwa vevevafuuvitwe avendige vafike ku ligana na machumi gavili kwa mbevali ndawe Petulo inukige pa avene, ¹⁶ atige, “Vanyalukolo vangu lwinogela Uwandike Uwelu wukwile, walonzile Umuhe Umwelu ukukola kwa Daudi, ulwa Yuda, yula yeali mulongola vavala vevamwibete Yesu. ¹⁷ Pakuva Yuda alimuyetu na hwehwe, pakuva alimuhagule ukuhanga na hwehwe mukipigo iki. ( ¹⁸ “Mukulukagula ulwa umwene agusile lilungulu, na amagobole geanuche ukuhuma mukipigo chakwe ichanangifu. Agwe pasi neke atudike, na ulutumbu lwakwe luhume mwivala. ¹⁹ Avanu mbevali vevikalige mu Yelusalemu, vapulike iso, sweno valitambule lilungulu lila mundongele yawo vitigila, ‘Akeli Dama’, kwekutigila, ‘Lilungulu lya Idanda.’) ²⁰ Pakuva nzandike mu kitabu icha inzimbo (Sabuli): ‘Lekage ikaye yakwe live lihame; Lekage nambi munu alikala mumo.’ Kangi nzandike: ‘Lekage umunu uyungi ategule apono pakwe mukupiga ikipigo.’ ²¹ - ²² “Ino lunoje umunu yungi, ave molelesi pamwi na hwehwe ulwa ulusilibuko lwakwe Umutwa Yesu. Luvaje ave yumwi mwa vala vevagendasige na hwehwe mufilo mbefili, fye Umutwa Yesu pe avelige na hwehwe, ukuhuma ulusika lwe Yohane abatisige, mbaka ikumunyi kila che Yesu anyanyulilwe ukuhuma kwa hwehwe nu kubita kuchanya.” ²³ Ndawe vatambulige matawa ga vanu vavili, yeatasile Yosefu yevamutambulige Balasaba (apamwi atambuligwe Yusito), na vakavili Matiya. ²⁴ Neke ndawe vifunyige vitigila, “Ve Mutwa, veve yeusikagwe inumbula sa avanu mbevali, lino veve Mutwa, utulagilage yenani mwa iva avavili yeumuhagwe, ²⁵ sambi ahalile mukipigo nu wigendo uwu, weawulesile Yuda, neke ibitilage apakwe yumwene.” ²⁶ Ndawe vatosige isimbi ukuhagula muvanu avavili, isimbi yamudonyite Matiya ndawe ahangige mwa vala avigendo avanyichumi na yumwi.

¹ Na ikimunyi cha i Pendekosite chavelige kifika, vala vevevafuuvitwe vevakong’ine pamwi mbevali. ² Sukumwi kwa kutinukisiwa na umubumo ugwihuma kuchanya gwipulisa witigila kifulufumbi ndawe chamemige mukaye mbeyili yevevikalite. ³ Ndawe savawonekelige indimi, witigila lwenge lwa moto gutagalye uko na uko sikuvikila mumitwe jawo yumwi, yumwi. ⁴ Mbevali ndawe vamemige Umuhe Umwelu, swe vivanga ukulonga mundongele isingi ndawe Umuhe mweavasogokisige. ⁵ Na kuko ku Yelusalemu kwe vikalige Avayudaya na avanu avangi va mung’i mbesili vevakumufuuwa Nguluvi. ⁶ Vavelige vipulika umubumo ugo, neke lilugu likomi swe likong’ana, mbevali vasasave hilo, pakuva avanu mbevali vavapulike iwo vilonga mundongele sawo. ⁷ Neke vasasavale na ukutinuka vitigila, “Mbi iva mbevali vevilonga si vanu va mu Galilaya? ⁸ Lwiva ndawuli, hwehwe mbetuli tukuvapulika iva vilonga indongele isa ukwetu kwetwegalilwe? ⁹ Hwehwe yetwipwali twihuma ku Paliti, Mediya na ku Elami, na avangi ukuhuma ku Mesopotamiya, Yudaya, na ku Kapadokiya, ku Pondo na ku Asiya, ¹⁰ ku Filigiya, na ku Pamufiliya, ku Misili na kumbali sa ku Libiya pipi na ku Kilene; neke avamwi mwahwehwe vihuma ku Lumi, ¹¹ Avayudaya na Avamyanza vevevapituche ulufuuwo lwa Kiyudaya; na avamwi mwahwehwe twihuma ku Kilete na ku Alabiya. Neke mbetuli tukuvapulika iva vilonga indongele setu ifipigo ifikomi fya Nguluvi.” ¹² Mbevali vasasave na ukuhuguvala vasamukwiwusa vavene, “Ulu kwekutigila kiki?” ¹³ Neke avangi vavayovelese vevevafuuvitwe, vitigila, “Avanu iva vagaasi!” ¹⁴ Neke ndawe Petulo imige pamwi na vala avanyichumi na yumwi ivanga ukuvadalikila kwa iliswi likomi: “Vanyalukolo Avayudaya na nyenye mbemuli yemwikalite mu Yelusalemu, mupulikise musikite isi sendilonga. ¹⁵ Avanu iva sivagaaliti ndawe lwemwihosa nyenye; mbona pemilawu hela pekivalilo cha wudatu? ¹⁶ Neke ulwene ulukani ulu lwe lula lwelwelulonge na Umuvisi Yoheli: ¹⁷ ‘Nguluvi itigila de, Mufilo fila fya ku mudugo, Sandivisikisa avanu mbevali Umuhe vangu. Avanenyu, vanyidama na avang’inetu, savadalika ulukani lwangu; Avanyakilambo venyu savagubulilwa ing’ani, na avagogolo venyu savalota amaloto. ¹⁸ Ena, na avavanda vangu, vanyidama na avang’inetu, sandivisikisa Umuhe gwangu ifilo ifyo, nawo savadalika ulukani lwangu. ¹⁹ Samiga imiitu kwilanga kuchanya, na ifilagilo konong’i pasi; sakuva na idanda, umoto na ilisusi lisito; ²⁰ Ilisuva salipituka ukuva lwisa, na Umwesi sagupitulwa guve danda, Lwesikilafika ikimunyi kila ikikomi cha indolo sa Umutwa. ²¹ Ipo, yeyeavesaga yesaifunya mwitawa lya Umutwa saapokwa.’ ²² “Mwevanyang’i va mu Isilaeli, mupulikise ing’ani isi! Yesu uyu va ku Nasaleti e munu munyaludali lwa Nguluvi. Ulu lwawonike wimila mu miitu na uwuhulo we Nguluvi apigite ukukola kulumwene. Nanye mbemuli musisele isi pakuva iso sapigiche pagatinagati apenyu. ²³ Nguluvi mumigosekese jakwe yumwene, yealalamwe ulwa Yesu saatawulwa kwa nyenye; nayi nyenye mwamuwulige kwa ukuvalekela avanu avanyanzanangifu vamutumbike. ²⁴ Neke Nguluvi amusilibwe ukuhuma kwa avafwe na ukumupoka muwuvafi wa ifwa pakuva silweluhwaniti nambi, ifwa yimuleme. ²⁵ Nambi Daudi alonzile kulumwene ulwide: ‘Ndamuwonige Umutwa pamiho gangu mbepali; pakuva ealipamwi na nanene ulubali lwangu lwa kundyo, sambi ndemwe ukudengadenga. ²⁶ Nambi, inumbula yangu yihekelela, nane ndakufile ingulugulu kwa luhekelelo. Na umuvili gwangu sagwikala mu luhuvi; ²⁷ Pakuva veve sisauyileka inumbula yangu kuvafwe, nave ukumutawula umwelu vako awole. ²⁸ Veve undaje ing’asi sa ku wumi, na lwe wiwali, na ulwa wipwali ukumela uluhekelelo!’ ²⁹ “Vanyalukolo vangu, ndiwenda ndivalongele pelu hela isa Daudi ukukwetu. Uyo afwe na ukutagwa, na ichanga chakwe kilibaho mbaka neng’ino de. ³⁰ Neke pakuva ali muvisi, alukagwe ulufingano lwa Nguluvi lweamwilapye kwa ulwilapo ukutigila mumbegalo yakwe, samuvika uyumwi mu kigoda chakwe ateme. ³¹ Mwene Daudi pakuva yealasikagwe iso nambi alulonzile ulusilibuko lwakwe Kilisito peatige. ‘Inumbula yakwe siyalekitwi kuvafwe nambi umuvili gwakwe sigwawosili.’ ³² Sweno, Nguluvi amusilibwe uyo Yesu na hwehwe mbetuli twiwolelesi va ulukani ulo. ³³ Yesu akung’umikwe pachanya mbaka kulubali lwa kundyo kwa Nguluvi, na ukwanukila ukuhuma kulu Dade kila ikipelwa cha Umuhe Umwelu, che alavahuvise nambi isi mbesili semukusiwona lino nu kupulika, kwe kwiswa kwa uyo Umuhe. ³⁴ Neke Daudi umwene, siakung’umikwi kuchanya; neke umwene alonzile: ‘Umutwa amutige Umutwa vangu: Wikale kwiwoko lyangu lya kundyo, ³⁵ mbaka pendivavikite avatavangu vako vave nda kigoda cha ukugeleka amagulu gako.’ ³⁶ “Na avanu mbevali va mu Isilaeli lwinoga valukagule hilo nachene ulwa uyo Yesu yemwamutumbike, ye yuyo ye Nguluvi amuwuyipe ave Mutwa na Mesiya.” ³⁷ Sweno, avanu vavelige vipulika iso, swe lwavavafile munumbula, ndawe vavawusige Petulo na avigendo avayagwe: “Vanyalukolo lino tugitage ndawuli?” ³⁸ Petulo avapitwe, “Muhongesage nu kubatisiwa mbemuli, mwitawa lya Yesu Kilisito, sambi mudegepelwe inzanangifu senyu, nu kwanukila kila ikipelwa, Umuhe Umwelu. ³⁹ Pakuva ulwihuviso ulo mwihuvisiwe yinyenye na avanenyu, na kwa mbevali avali kutali na vala mbevali ve Umutwa Nguluvi saavakemela vamusile.” ⁴⁰ Petulo awolelelye kwa nzolofu, nu kuvasukanisa we akuvagongola avanu akuvatigila, “Mwiponiage nyenye na amalugu inzanangifu senyu.” ⁴¹ Awolofu ikimunyi icho, vidiche ulukani lwakwe nu kubatisiwa. Wongeleche vanu mbilima sidatu kwa avevafuuvitwe. ⁴² Na iva mbevali viyigisige ukuhuma kuvigendo na ukwikala kinyalukolo, na mukumegula umukate nu kwifunya. ⁴³ Pakuva imiitu myolofu na ifilagilo fyolofu fyapigikige mwa avigendo, avanu mbevali vave na muhwehwe. ⁴⁴ Na avevafuuvitwe mbevali vali lumwi, vave vahangite mbefili. ⁴⁵ Vagusige ifinu fyawo, na ukugavana mbevali, umunu mweawendelige. ⁴⁶ Nawo vave pevakong’ana mu Tembeli chechekivesaga kimunyi na valisige ifilyo fyawo pamwi mukaye sawo kwa luhekelelo na mutima gwa uwilevesi, ⁴⁷ Vamulumbige Nguluvi, na ukwendwa na avanu mbevali. Na Umutwa ongelesige avapokigwe we kwache.

¹ Ikimunyi ikimwi, Petulo na Yohane vingilige mu Tembeli pakivalilo cha igonza pelitegamwike ulusika lwa ukwifunya. ² Na baho pipi na umulyango ugwa i Tembeli, gwegwitambulwa “Umulyango umunofu,” pepwali munu mugosi, munyakiteve ukuhuma ukwegalwa kwakwe. Avanu mbepali vamwegulige umunu uyo na ukumuvika baho, sambi isukilisage fya uwuwuya kuvanu avingilige mu Tembeli. ³ Avelige akuvawona va Petulo na Yohane vakwingila mu Tembeli, avasusile vamupele ichekivesaga. ⁴ Petulo na Yohane vamulafile hilo, pambele Petulo amutigee, “Tulavage!” ⁵ Nave ndawe avapitukilige, ahosige ukupelwa ichekivesaga ukuhuma kuvene. ⁶ Ndawe Petulo amutigilige, “Nene ndimugaya magobole nambi sahabu, neke kila chendinacho ngukupela. Mwitawa lya Yesu Kilisito va ku Nasaleti, gende!” ⁷ Kangi, ndawe amwibatige iliwoko lya kundyo, na ukumwimya. Lulusika lululaga amagulu na amafugamilo gakwe swe gikangala. ⁸ Ndawe asumbige, akwima ivanga ukugenda. Swe vakwingilasa na mu Tembeli igenda, kono idibuka dibuka we akumulumba Nguluvi. ⁹ Na avanu mbevali vevebaho vamuwene igenda akumulumba Nguluvi. ¹⁰ Vavelige vakumukagula ukutigila yemwene yeavelige akwisukilisa pa “Umulyango ugwatambuligwe Umunofu” gwa pa Tembeli, vasasave hilo neke valemwe ukulukagula lwelupigike kulumwene. ¹¹ Avanu mbevali wepevasasavala hilo, ndawe vavangige ukukong’ana pamwi pepitambulwaga “Bwalo ya Solomoni,” apono peali ipwali umunu yula iva peavaninila va Petulo na Yohane. ¹² Sweno, Petulo avelige akuvawona avanu iwo ndawe avapitukilige akuvatigila, “Mwevanyang’i va mu Isilaeli mbi ndawuli mukutulava hwehwe, mwitigila wanda kwa ludali lwetu, apangi kwa uwunofu wetu nambi tumwinwise uyu agende? ¹³ Nguluvi va Abulahamu na Isaki na Yokobo, Nguluvi va avakukwetu amupelye indolo umukami vakwe Yesu. Uyu yemwene yemwamuhumise nyenye, neke mumusope mumawoko ga avatema nu kumubihila pa Pilato, nambi Pilato awendige ukumulekesa. ¹⁴ Ali munu munofu kangi mwelu, neke nyenye mwamubihye, mwiwenda umunu uyungi yeali muwulasi adindulilwe. ¹⁵ Swe nyenye mwamuwulige yula ikilamuko cha uwumi. Neke Nguluvi amusilibwe, na hwehwe mbetuli twiwolelesi va ulukani ulu. ¹⁶ Ilitawa lya Yesu na ulufuuwo mwitawa ilyo fyefimupelye uludali umunu uyu yemukumuwona na ukumukagula. Ulufuuwo mwa Yesu, lwelumuponise hilo umunu uyu ndawe lwemukuwona mbemuli. ¹⁷ “Lino vanyalukolo vangu, mukulukagula ulwa nyenye pamwinga na avavina venyu mwapije uwugaya nzeli. ¹⁸ Neke Nguluvi lweasikwisise ndahihyo, sila sealaje idaha ikola imilomo ja avavisi mbevali, ulwa Kilisito vakwe saateseka. ¹⁹ Sweno, mupitulage imigendele jenyu ja uwanangifu, mumupitukile Nguluvi, nave peavahesekesa inzanangifu senyu, ²⁰ Mupigage lulo sambi luse ulusika lwa ukusupa munumbula nukuvaletela yula yeamuhagwe uluhuma pidaha, yemwene Yesu. ²¹ Lumuvaje Yesu asigalile kuchanya mbaka lufike ulusika ulwa ukufivika ifinu mbefili wupya, ndawe Nguluvi lwealonzile ukukola kwa avavisi vakwe avelu ukuhuma pidaha. ²² Pakuva Musa alonzile, ‘Umutwa Nguluvi venyu saavaletela umuvisi yeindawe nene ukuhuma mwa nyenye ye mumupulikage mwa mbesili seilonga. ²³ Umunu yeyeavesaga sakumupulikisa umuvisi uyo saaheswa nu kutoswa kutaali ukuhuma ku vanu va Nguluvi nu kwangamila.’ ²⁴ Avavisi mbevali, ukuhuma kwa Samweli na vala avahumambele mbevali, vadalikige ing’ani isi sesikave sipigika ifilo ifi. ²⁵ Inyuviso sa Nguluvi seihuvise ukukola kwa avavisi sikwimila nyenye; nanye mwihanga ulufingano lula lwe Nguluvi afingine na avakukwenyu, ndawe lwe amulonje Abulahamu: ‘Kwa ukukola ku mbegalo yako, avanu mbevali va mung’i savafunyililwa,’ ²⁶ Sweno, Nguluvi amusilibwe umukami vakwe kwa ukwambula kwenyu tandi, amutumite alete uwufunyilile kwa yeyeavesaga ipela na ukuwuleka uwanangifu wakwe.”

¹ Petulo na Yohane wepe vavadalikila avanu, avatambisi na umuvina va avanyakulolela i Tembeli na Avasadukayo avangi vavasye. ² Vavifile hilo, pakuva avigendo iwo vavigisige nu kuvadalikila avanu ukutigila Yesu asilibwike, ulukani ulwilagila ulwa avafwe savasilibuka. ³ Sweno, ndawe vavibatige pakuva yelyelisalye swe vakuvasopa mundinde mbaka pamilawu. ⁴ Neke awolofu mwa vala vevapulike ulukani ulwadalikigwe vafuuvitwe, nawo vaginite ukongelekela nu kufika wita vanu vagosi mbilima sihanu. ⁵ Peyekuche avavina va Avayudaya, na avavaha na avigisi va indagilo vakong’ine uko ku Yelusalemu. ⁶ Vakong’ine pamwi na Anasi, Kayafa, Yohane, na Alekisanda na avangi veve va mulukolo lwa umutambisi umuvina. ⁷ Swe vakuvimya avigendo pavene, neke vavawuse vitigila, “Mbi nyenye mwipigila isi muludali na mwitawa lya nani?” ⁸ Ipo, Petulo we amemile Muhe Umwelu akuvatigila, “Nye valongosi va avanu na avavaha! ⁹ Wone mukutuwusa neng’ino, ulwa ikipigo ikinofu cheapigilwe yula umunu yeake munyakiteve, na lweaponite uyu, ¹⁰ Sweno, nyenye na vanu mbemuli va mu Isilaeli, luvavaje mulukagule ukuta umunu uyu imile pa nyenye neng’ino, aponite, ukukola uludali lwa ilitawa lya Yesu va ku Nasaleti, ye nyenye mwamutumbike neke Nguluvi amusilibwe ukuhuma kuvafwe. ¹¹ Uyu ye uwandike Uwelu wukumulonga: ‘Iliganga lye mwalibihihye nyenye mwe vasenzi, lino live lye liganga likomi lya mu lutu.’ ¹² Wusukuli uwupoki ukuhuma umunu uyungi yeyeavesaga, pakuva pagaya litawa lya umunu uyungi mung’i lyevapelitwe avanu vapokelwe nalyo.” ¹³ Iwo avavaha va pa wuhigilo, vevavasele va Petulo na Yohane ve vanu hela vesivimbiti, neke vavasasavalige pevakuvawona vilonga kwa wupifu vagaya muhwehwe. Valukagwe ulwa iva vakavelige na Yesu. ¹⁴ Nawo vavelige vakumuwona umunu yula yealaponite vimise pamwi, swe vigaya cha ukulonga. ¹⁵ Sweno, ndawe vavatigilige vahume pivala pawuhigilo, avene vave na ikilega vihehe. ¹⁶ Viwusise, “Lino tuvagitage ndawuli avanu iva? Pakuva umwitu ugu yegukagulanike kuvanu mbevali va mu Yelusalemu, na ulwa ugo gupigitwe navene, nambi hwehwe situhwana ukugukana. ¹⁷ Neke wone tusake ulukani ulu lulemwe ukutagalila mu vanu, sweno tuvakenyelage, valava pevalonga kangi na umunu yeyeavesaga mwitawa lya Yesu.” ¹⁸ Ndawe vavakemelige kangi vingile, swe vakuvakenyela ulwa valalonga kangi pavanu nave ukwigisa umunu mwitawa lya Yesu. ¹⁹ Neke Petulo na Yohane vapitwe vakuvatigila, “ Ulu mululavage yinyenye wone lwinoga nachene pa Nguluvi tuvapulike nyenye nu kulemwa ukumupulika Nguluvi. ²⁰ Pakuva siluhwaniti nambi hwehwe tulemwe ukulonga ing’ani setwapulike nu kusiwona.” ²¹ Nawo, avavaha va pa wuhigilo vave vigina ukuvakenyela, pambele vakuvalekesa. Pakuva sivaluweni ulukani lwa ukuvahiga, na avanu mbevali vamulumbige Nguluvi, ukwimila ulo lwelwelupigike. ²² Nave umunu uyo yeaponiswe yealalutye ku myaka machumi gatayi. ²³ Nawo va Petulo na Yohane vavelige vilekeswa, vahele kuvayawo, nu kuvalongela mbesili sevavalonje avatambisi avavina na avavaha. ²⁴ Pevapulike iso mbevali kwa umutima gumwi vifunyite pamwi kwa Nguluvi swe vitigila, “Mutwa veve ye wagafile kuchanya na ing’i, ibahali na mbefili ifilimumo! ²⁵ Veve ye wamsogwise ukukwetu Daudi alonge ukukola Umuhe Umwelu ukutigila; ‘Mbi ndawuli avamyanza vakalipe? Na avanu vihosa uwupuva? ²⁶ Avatwa va mung’i vigelanise, na avatema vakong’ine pamwi sambi vamubese Umutwa na Kilisito vakwe.’ ²⁷ “Pakuva, nachene lwelwave Helodi, Pondyo Pilato, na ing’olo sa Isilaeli na avamyanza baha pevakong’aniche muboma yiyi ukumubesa Yesu umukami vako Umwelu, yewamuhagwe neke umubake amafuta. ²⁸ Ena, nachene, vakong’ine sambi vapige sisila mbesili, sewavagite nu kusigelanisa mu ludali lwako, ukuhuma pidaha. ²⁹ Lino Mutwa lavage ukukabusa kwawo. Utupelage uludali hwehwe twe vakami vako sambi tudalike ulukani lwako kwa wupifu. ³⁰ Gololage liwoko lyako uvaponie avanu. Pige imiitu na uwuhulo mwitawa lya umukami vako Umwelu Yesu.” ³¹ Vavelige visinda ukwifunya, pala apono pevevakong’ine, pahogalike, nawo mbevali vamemite Umuhe Umwelu. Mbevali vavanzile ukudalika ulukani lwa Nguluvi vagaya muhwehwe. ³² Ililugu mbelili lya avevafuuvitwe vevina mutima na inumbula yimwi. Siekwali umunu yungi yeali na ikinu yeatigilige icho chakwe iyena, pesi ulwa vevahanzile mbefili. ³³ Na avigendo kwa uludali lolofu vawolelelige isa ulusilibuko lwa Umutwa Yesu, nave Nguluvi ndawe avafunyililige hilo. ³⁴ Siekwali umunu yeagulumige kinu, pakuva mbevali avevina amalungulu nave kaye vagusige. ³⁵ Nawo vatawulige amagobole igo kwa avigendo, swe vigavilwa ifikwilaniche umunu na cheawendige ukugula. ³⁶ Alipwali umunu uyumwi va ulukolo lwa Levi, umwegalilwa ku Kipulo, ilitawa lyakwe Yosefu, ye avigendo vamutambulige Balanaba (kwekutigila, “Mnyalusikimiko”). ³⁷ Nave eina lilungulu lyakwe, agusise ndawe asindikige amagobole kwa avigendo.

¹ Neke epwali umunu yeatambuligwe Ananiya na uvakwe Safila nawo vagusise lilungulu lyawo. ² Neke kwa ukwiyidikisa nu vakwe akepwise amagobole agamwi vakuvafiha avigendo. ³ Sweno, Petulo amuwusise Ananiya itigila, “Ananiya, mbi ndawuli Setani akwinje mu numbula yako, sambi umusange Umuhe Umwelu, ukepule amagobole agalipinga gewugusise lilungulu? ⁴ Peuke sulagusa, like lyako, na peye ugusise amagobole gake gako uke upigila mwewiwendela yuveve. Mbi ndawuli lino, ulamwe munumbula yako ukupiga ulukani ulu? Lino ulukagulage ulwa sumusanzili munu pesi Nguluvi!” ⁵ Nave Ananiya avelige ipulika isi, agwe pasi nu kufwa baho. Nu muhwehwe mukomi gwavibete mbevali vevapulike ing’ani isi. ⁶ Vanyakilambo vinwike, vakugufwika isanda umufimba, vakugusindika kwivala kukugutaga muchanga. ⁷ Pefilutye wita fivalilo fidatu de, uvakwe inje mukaye, we sakulukagula uluwonike. ⁸ Petulo amutige, “Be Safila undongele tandi, ati iyi ye mbalilo ya amagobole gemukagusise ililungulu?” Nave atige, “Ena ye mbalilo yiyo.” ⁹ Nave Petulo amutige, “Mbi ndawuli mulagine nu vako ukumugela Umuhe Umwelu? Lavage tandi! Vala avanu vevamutasile uvako, vali pamulyango, nawo vakusindika nayiveve kwivala.” ¹⁰ Lusika lulo Safila agwe pasi pamagulu ga Petulo, swe nave ifwa baho baho. Vanyakilambo vakwingila, vamufikite afwe, nawo vakumusindika kwivala, vakumutaga pipi nu vakwe. ¹¹ Na Ilikanisa mbelili na mbevali vevapulike iso, vibatike nu muhwehwe mukomi hilo. ¹² Avigendo vapigite imiitu na uwuhulo wolofu muvanu. Avevafuuvitwe vakong’anige pamwi kuko mbevali, ku bwalo ya Solomoni. ¹³ Siekwali umunu yungi yesalafuuwa yeigelelige ukwihanza nawo. Nambi ndahihyo mbepali avanu vevesivalafuuwa vavasumilige. ¹⁴ Vevamufuuvitwe Umutwa avagosi na avang’inetu, vaginige ukongelekela. ¹⁵ Na uwimila lulo, avanu vavasindikige avatamwa vawo mumakasi na ukuvalambalika mumasa na ifivasikiso sambi Petulo peilutila, pembe nambi umwigigi gwa Petulo guvafikile avamwi vawo. ¹⁶ Avanu wolofu vasile avihuma muboma isilimwipi na pa Yelusalemu vakuvaleta avatamwa vawo, na vala avevina amasoka, nawo vaponiswe mbevali. ¹⁷ Sweno Umutambisi umuvina na avayagwe vevepamwi na ikilugu cha avasadukayo, vavawonie igila avigendo. ¹⁸ Sweno, vavibete na ukuvasopa mundinde ingomi. ¹⁹ Neke pakilo umunyivaha va Umutwa adindwe imilyango ja indinde, na ukuvahumya kwivala, avatigile, ²⁰ “Mubitage mukime mu Tembeli na ukuvalongela avanu mbesili isa uwumi uwu.” ²¹ Avigendo vamupulike, ndawe vingilige mu Tembeli pamilawu pesililavala, swe vivanga ukwigisa. Umutambisi Umuvina na avayagwe vavelige vifika, vakong’ise umukong’ano gwa pawuhigilo pamwinga na gwa avavaha va Avayudaya mbevali, ndawe vavatumige avanu vabite kundinde vakavalete vala avigendo. ²² Neke avakami iwo pevafisile kula kundinde sivavafisili mula mundinde. Swe ndawe vapilukige ukugulongela umukong’ano, ²³ vitigila, “Tufisile indinde yiwidinde imbali mbesili na avalolesi wevilolela imilyango. Neke tuvelige twidindula mugati situmufisili umunu yeyeavesaga umo.” ²⁴ Umuvina va avalolesi vanyakulolela i Tembeli na avatambisi avavina vavelige vipulika ulukani ulo vakelagine, valemwe pakulukagula ulweluvafikite. ²⁵ Avafisile pala umunu yungi swe akuvatigila, “Vala avanu vemukavasopite mundinde, lino de vimite mu Tembeli, vakwigisa vanu!” ²⁶ Ipo Umuvina va avalolesi va i Tembeli pamwinga na avanu vakwe vahele ku Tembeli, vasakuvaleta. Neke sivavibeti kwa mabatu, pakuva vawogwipe avanu ukutigila vahwanite vakinywe na amaganga. ²⁷ Sweno, ndawe vavasindikige, vasakuvimya pawuhigilo. Umutambisi Umuvina avatige, ²⁸ “Nyenye tukavatanie hilo ulwa muligisa kangi mwitawa lya umunu uyu; lino kumbi nyenye yemutagalise inzigiso senyu mbekuli mu Yelusalemu, na mukalalye mutusongele hwehwe mufwa ya umunu uyo.” ²⁹ Petulo pamwi na avigendo avayagwe vapitwe, “Lutuvaje tumupulike Nguluvi neke si avanu. ³⁰ Nguluvi va avakukwetu amusilibwe Yesu yula ye nyenye mwamuwulige kwa ukumutumbika mu musalaba. ³¹ Uyo ye Nguluvi amukung’umike pachanya kwiwoko lyakwe lya kundyo ave Mulongola, na Umupoki, avawuyape avanu va mu Isilaeli vahongese sambi vadegepelwa inzanangifu sawo. ³² Na hwehwe yetwiwolelesi va isi mbesili, nave Umuhe Umwelu, yula ye Nguluvi avapelye vala vevakumupulika nave akolelela siso.” ³³ Neke mbevali veve pawuhigilo pevapulike iso vavifile swe viva na lilakali, vagahite ukuvawulaga. ³⁴ Neke Umufalisayo uyumwi yeatambuligwe Gamalieli, yeali mwigisi va indagilo yealakagulanike hilo ukulutila mbevali, imite pawuhigilo ndawe avatigilige vavahumyage avigendo kwivala kwa ulusika ludodo. ³⁵ Ndawe avatigilige avapawuhigilo, “Nye vanya ing’i va Isilaeli vayangu, mwikomalilage kwa ulo lwemwisaka ukuvapigila avanu iva! ³⁶ Simisika hilo, pemumwiwuka Tewuda yeitigilige umwene mutambule na avanu ave vafikite magana gatayi neke vamufuuwe na kumuninila. Neke umwene vamuwulige, na vanyigendo vakwe vatagalye nililugu lyakwe mbelili lyayasile. ³⁷ Kangi pealutye uyo awonike Yuda va ku Galilaya pevavaliligwe avanu. Uyu nave ave na vanu wolofu avamuninilige, na yuyu nave vamuwulige, na vanyigendo vakwe mbevali vatagalye. ³⁸ Na kulino nene nguvalongela, nyenye mulavahiga kinu; muvalekage! Pakuva, wone ulukani ulu lwihuma kwa avanu lwisilila lulwene, ³⁹ neke wone lwihuma kwa Nguluvi, simuhwana ukuvatanila nangi longamuwoneke, pambele nda mukwibesa na Nguluvi.” Swe ndawe vamwidikilige. ⁴⁰ Nawo vavelige vakuvakemela avigendo, vavatofile ngoda, na kuvatigila, valekelage ng’ani ukwigisa mwitawa lya Yesu ndawe vavalekesige vitibitilage. ⁴¹ Avigendo vahumite kwivala pawuhigilo vahekelye, pakuva luwonike ulwa avene vanoje ukuhongelwa inyoni vivalwa litawa lya Yesu. ⁴² Nawo vave pevigisa nu kudalika ulukani lunofu lwa Yesu, mu Tembeli na mukaye sa avanu ulwa umwene ye Kilisito.

¹ Pambele pe vanyigendo wongelekelige, pave na lwing’ulanzo mwa vanyigendo vevalongige indongele ya Kigiliki na vala vevalongige iki Hebulaniya, na vevalongige i Kigiliki ving’ulanzige vitigila, avafwile vawo sivavagosigi hilo mu kupelwa ifya muwugulumu wawo wa mbepali. ² Nawo avigendo avanyichumi na vavili vavakemelye lilugu lya avevafuuvitwe mbevali, vakuvatigila,“Silwinoga hwehwe tuleke ukudalika ulukani lwa Nguluvi sambi twingile mukugavila avanu ifinu. ³ Sweno, vanyalukolo vetu, muhagulage mwanyenye vanu vimufung’ati, vanyandolo na vevilongoswa na Umuhe Umwelu na uluhala, sambi tuvapele ikipigo iki. ⁴ Neke hwehwe, tuhwesaga mukwifunya nu kudalika ulukani lwa Nguluvi.” ⁵ Ulukani ulo lwavanoje mbevali vevevafuuvitwe. Ndawe vavahagulige Stefani, umunu munyalufuuwo hilo na yeilongoswa na Umuhe Umwelu, Filipo, Polokolo, Nikanoli, Timoni, Palamena, na Nikolao uva ku Andyokiya yepamwandi eapituche ulufuuwo lwa iki Yudaya. ⁶ Swe ndawe vavavikige pa avigendo, nawo vavagelike amawoko nu kuvafunyilila. ⁷ Ulukani lwa Nguluvi lwaginite ukutagalila na vevevafuuvitwe uko ku Yelusalemu, vaginite ukoloka, na ililugu likomi lya avatambisi nawo vanuche ulufuuwo. ⁸ Sitefani we amemile uwuwuya na uludali apigite ifipigo fya imiitu na fya uwuhulo mu vanu. ⁹ Neke veleluke avanu vangi sambi vibese na Sitefani. Avamwi va avanu iwo vevahumite kwisinagogi ilyatambuligwe, “Lisinagogi lya Avanu Avakombole.” (ndawe lwevalitambulige) nawo vevahumite ku Kilene na ku Alekisanda; avangi vevahumite ku Kilikiya na ku Asiya. ¹⁰ Neke sivamulemiti Sitefani pakuva eina uluhala na kangi eina yula Umuhe yamusogosige ulusika lwealongige. ¹¹ Ndawe vavafupige avanu vangi sambi vatigile, “Tumupulike Sitefani ilonga ing’ani isa maligo kwa Musa na kwa Nguluvi!” ¹² Na kwa ulo, vasongise liyowo muvanu, avavaha na avigisi va indagilo. Swe vakumubitila Sitefani, vakumwibata nu kumusindika pawuhigilo. ¹³ Nawo vavikite awolelesi va uwudesi vevatige, “Umunu uyu mbepali silekagi ukulonga ing’ani sa maligo kwa apono ipa apelu na indagilo sa Musa. ¹⁴ Pakuva yetwetumupulike ati itigila uyo Yesu uva ku Nasaleti saapananga ipa nu kwananga imisimu mbegili jeatulaje Musa.” ¹⁵ Na mbevali avali pawuhigilo vamulafile Sitefani neke vamuwone uwusu wakwe wiva nda wusu wa munyivaha va Nguluvi.

¹ Nave umutambisi Umuvina amuwusise itigila, “Be ing’ani isi sa nachene?” ² Sitefani apitwe, “mumulikise nye vanyalukolo vangu, nanye mwevadadangu! Nguluvi umunyandolo amuwoneche ukukwetu Abulahamu peeali ku Mesopotamiya wesalahamila ku Halani. ³ Neke Nguluvi amulongelage ukutigila: ‘Hege mung’i yako; uvalekage avanyalukolo vako, bitage kung’i ye ngulagila nene!’ ⁴ Swe ndawe, Abulahamu ahegige mung’i iya uwukalidayo asakuhamila ku Halani. Na peyeafwe udade, Nguluvi amuhamise kangi ahege pa Halani nu kumuleta mung’i iyi yemukwikala nyenye lino. ⁵ Nguluvi samupeli nambi lutanana ludodo mung’i iyi sambi live lilungulu lyakwe nda. Neke nambi ndahihyo Nguluvi amwilapye ukutigila saamupela ing’i iyi, yive yakwe na imbegalo yakwe, pealutye umwwene, kono we ulusika ulo Abulahamu ali mugaya mwana. ⁶ Ulu lwe Nguluvi amulonje: ‘Imbegalo yako sayikala mung’i inzagile na avanu vangi, kwesavava vanyawingi nu kupigilwa fivi kwa myaka magana gatayi. ⁷ Neke nene sandivahombela umukole avanu va ing’i iyo vesavavavika muwunyawingi. Sweno sandivahesa mung’i yawo, sambi muse musunyalile apono ipa.’ ⁸ Sweno Nguluvi avisile ukuwoolwa sambi kive kilagilo cha ulufingano. Nambi, Abulahamu amuwoolite umwanakwe Isaki ikimunyi cha munana ukuhuma pakwegalwa. Nayi Isaki ndahihyo, amuwoolite Yakobo. Nayi Yakobo avapije ndahihyo vala avakukwetu avanyichumi na vavili. ⁹ “Nawo avakukwetu vamuwonie igila Yosefu vamugusise nu kumusindika kuwunyawingi ku Misili. Neke Nguluvi alipamwi nu mwene. ¹⁰ Amupokite mu neseko mbesili. Nguluvi amupelye uwuwuya nu luhala pa Falawo umutwa va mung’i ya ku Misili, mbaka Falawo amutemye ave muvina mung’i yiyila, mbaka na mukaye yakwe ya uwutwa. ¹¹ Sweno, chagwe ikinge mung’i mbeyili ya mu Misili na ku Kanani, nacho chaletite neseko ngomi, na avakukwetu sivavi na cha ukuponela. ¹² Neke Yakobo avelige ipulika ulupweng’enyu ulwa uko ku Misili kofili ifilyo, ndawe avatumige avanakwe vala avakukwetu, sambi vabite ku Misili ulugendo ulwa ukutala. ¹³ Ulugendo ulwa kavili, Yosefu ilonzile kwa vanyalukolo vakwe, na Falawo peavakagwe vanyalukolo va Yosefu. ¹⁴ Yosefu atumite ulukani kuludade na kwa vanyalukolo vakwe mbevali, kwa mbevali vevafikite vanu machumi gimufung’ati na vahanu, ukutigila vasage ku Misili. ¹⁵ Sweno, Yakobo ndawe abitige ku Misili, uko kwe umwene na avakukwetu avangi vafwilye kuko. ¹⁶ Neke imifimba jawo vagisindike mbaka ku Sekemu, kwe vagitasile muchanga cha Abulahamu cheagusile na amagobole ku vana va Hamoli. ¹⁷ Ulusika lwavelige lwikwila, Nguluvi akwisise uluhuviso lweeamwilapye Abulahamu, avanu kula ku Misili yevewolwike na ukuva wolofu hilo. ¹⁸ Pambele Umutwa uyungi atemite yeali samuseli Yosefu. ¹⁹ Uyo avatesise hilo avakukwetu avapije fivi, akuvatigila vavahumyage mwivala avana fyali pevawonike valanana. ²⁰ Musa awonike ulusika lulo, nave ali mwana munyawunofu uwiyena. Alolelilwe pa dade kwa myesi gidatu! ²¹ Na vave vakumuhumya kwivala, Umwalive va Falawo amwinwe, nukumulolela wita mwanakwe yeamweje. ²² Musa igisiwe mbesili sa uluhala lwa ava Misili, swe iva mupifu mu milongele nu kupiga. ²³ “Peyeafikite myaka machumi gatayi ukuhuma ukwegalwa alamwe akavagose avanyalukolo vakwe va Isilaeli. ²⁴ Uko amuwene uyumwi va avanyalukolo vakwe ipigilwa fivi, ahele ukumutanga nu kwihombela umukole amuwulige yula umumisili. ( ²⁵ Atige apangi ulwa vanyalukolo vakwe va Isilaeli valukagula ulwa Nguluvi ake akola umwene ukuvakombola, neke silwavi ndahihyo.) ²⁶ Ikimunyi cha kavili, afisile va Isilaeli vavili vakwitova agelite ukuvalamula akuvatigila, ‘Nyenye mwilukolo lwi ndawuli kangi mukwipigila fivi we nyenye ng’ani?’ ²⁷ Yula yeamutovige umuyagwe amusugikise Musa palubali akumutigila: ‘Ye nani yeakakuvisile veve uve wimulongola na ve mulamusi vetu? ²⁸ Ngali ukwenda umbulage ndawe lweukamuwulige yula Umumisili igolo?’ ²⁹ Musa avelige ipulika iso, akimbye mu Misili ikimbilila kung’i ya ku Midiyani na uko kweegalye avana vavili vakwamisi. ³⁰ “Peyegilutye myaka machumi gatayi, munyivaha va Nguluvi amuwoneche Musa mukisaka chechakige umoto ku balali pipi na ikidunda cha Sinayi. ³¹ Musa asasave pakomi, pealuwene ulukani ulo, ndawe ahegelelige pipi alave wunofu; ndawe apulikige iliswi lya Umutwa. ³² ‘Nene ndi Nguluvi va avakuko, Nguluvi va Abulahamu, Isaki na Yakobo!’ Musa akuvye kwa muhwehwe na siigelii ukuva pealava. ³³ Umutwa amutige, ‘Wopole indatu sako pakuva apono ipa pewimite pelu. ³⁴ Ndisiwene ing’ani imbi sevipigilwa avanu vangu kula ku Misili. Ndikipulike ikivembo chawo, nane nzusile ukuvapoka. Sweno wuse ipa ngutume ku Misili.’ ³⁵ “Musa ye yula yevamubihye avanu va Isilaeli. Vakumutigila, ‘Yenani akuvisile veve uve mulongola na umulamusi vetu?’ Yumwene Musa ye Nguluvi amutumite ave mulongola na umukombosi, ukukola kwa yula munyivaha va Nguluvi, yeamuwoneche mukisaka chechakige umoto. ³⁶ Ye yuyo yeavahesise avanu ukuhuma mung’i ya ku Misili, ikola mufipigo fya uwuhulo mung’i ya ku Misili na mu Bahali ya mu Shamu na mubalali kwa ulusika lwa myaka machumi gatayi. ³⁷ Ye mwene yuyo Musa yeavatige avana va Isilaeli, ‘Nguluvi saavahagulila Umuvisi ye indawe nene ukuhuma muvanyalukolo venyu.’ ³⁸ Na ulusika avanu va Isilaeli lwevakong’anige ku balali, ye Musa yeekuko pamwi nawo. Ali alikuko pamwi na avakukwetu, pamwi na yula munyivaha va Nguluvi yevalonganige nave mu kidunda cha ku Sinayi, yeyuyu yeanuche ing’ani sa uwumi, sambi atupele hwehwe. ³⁹ “Neke ye mwene ye avakukwetu vabihye ukumupulika, vamusugikise kulubali, vadobokage ukupiluka ku Misili. ⁴⁰ Ndawe vamulongelige Haluni: ‘Tuwuyapilage fihwana nguluvi fyefitulongolela kuwutalo, pakuva situlalukagula lwe lumuwoneche Musa yeakatulongolelige uluhuma ku Misili!’ ⁴¹ Ipo peviwuyapye ikihwananguluvi kinyalwihwano lwa ingwada vakukitambikila na ukukiheyela ikinu ikiwuyape na amawoko gawo vavene. ⁴² Neke Nguluvi ahesile pavene, avalesile vasunyalile ing’eng’esi sa kwilanga, ndawe lwandikwe mu kitabu cha avavisi, ‘Nye mwe vana va Isilaeli! siye nene yemwanawulye inambika na ifitawulwa kwa myaka machumi gatayi kula ku balali! ⁴³ Nyenye mwapikige ilihema lya kihwana nguluvi Moloki, na ifihwana ing’eng’esi fya nguluvi venyu Lefwani. Ifihwana nguluvi fyemwiwuyapye ifyo fyemwafisunyalye. Na uwimila lulo ndivasindika mwivagalule kutali ukulutila na ku Babiloni!’ ⁴⁴ Uko ku balali avakukwetu vevina ilihema lyelyolelelige ulwa Nguluvi pwali. Nalyo lyeliwuyape ndawe Nguluvi mwealamulonje Musa, sambi live mu lwihwano lulula lwealamulagilye. ⁴⁵ Sweno, avakukwetu vilekelige ilihema mbaka ulusika lwa Yosuwa, lwevingilye ukuyisagila ing’i yevavaposile ing’olo se Nguluvi aliasidasile sihege pavene. Ipo likalite mbaka ulusika lwa Daudi. ⁴⁶ Daudi apelitwe uwuwuya pa Nguluvi, swe akumusuka Nguluvi amutawule amusengele uwikalo wumwene Nguluvi va Yakobo. ⁴⁷ Neke Solomoni yeamusenje Nguluvi ikaye. ⁴⁸ “Neke nambi ndahihyo, Nguluvi Umunyandolo siakwikala mukaye inzenge na amawoko ga avanu, ndawe lweilonga umuvisi: ⁴⁹ ‘Umutwa itigila: Kuchanya chekigoda changu cha indolo, na ing’i wewukanyago wa amagulu gangu. ⁵⁰ Lino kaye iyindawuli yemuhwana ukunzengela? Apono apalikwi pe suupa nene? Ifinu ifi mbefili ye nene yendafigafile? Mbi tutigile siyenene?’ ⁵¹ “Nyenye mwivatalamu ukupulika! Inumbula na amapulikilo genyu gindawe ga avanu vesivamuseli Nguluvi (avamyanza) nyenye mwihwana avakukwenyu. Mbepali mwakumubesa Umuhe Umwelu. ⁵² Mbi kwali umuvisi nambi yumwi ye avakukwenyu sivamutesisi? Vavawulagige avanu avevatumitwe na Nguluvi, uluhuma pidaha vadalike ukusa kwa umukami vakwe umugolofu. Neke lino nyenye mwamupitwike nu kumuwulaga. ⁵³ Na nyenye ye mwanuche indagilo seasiletite kwa nyenye umunyivaha, va Nguluvi, nanye simwinati nambi.” ⁵⁴ Vala avavaha va pawuhigilo pevapulike iso, vavifile hilo, vagelesulage na mino kwa ililakali. ⁵⁵ Neke Sitefani we amemite Umuhe Umwelu, alafile kuchanya swe akusiwona indolo sa Nguluvi na Yesu ikalite ulubali lwa kundyo kwa Nguluvi. ⁵⁶ Atige, “Mulavage! Ndiwona kuchanya kudindwike na Umwana va Umunu imite kulubali lwa kundyo kwa Nguluvi.” ⁵⁷ Ipo, avanu mbevali pala pawuhigilo vayofile na ukudinda amapulikilo gawo ni fyala. Ndawe vamusumbilige mbevali sukumwi, ⁵⁸ vamuhumise kwivala ya iboma, swe vakumukinya na amaganga. Vala awolelesi, vavisile imyenda jawo pasi sambi munyakilambo uyumwi ilitawa lyakwe Sawulo agilolele. ⁵⁹ Vaginite ukumukinyanga Sitefani na amaganga, kono umwene we akwifunya itigila, “Ve mutwa Yesu, wanukilage inumbula yangu!” ⁶⁰ Afugime alongele pachanya itigila, “Be Mutwa, ulavahiga uwimila inzangifu iyi.” Peasinzile ukulonga isi, swe baho baho ifwa. Nave Sawulo lwamunoje hilo ulukani ulu lwa ukumuwulaga.

¹ Na ikimunyi icho kwave na luteseko lukomi mu likanisa ilye ku Yelusalemu. Avevafuuvitwe mbevali, vatagalye vibita mung’i sa mu Yudaya na mu Samaliya, pesi vala hela avigendo vevasigee. ² Avanu avamwenda Nguluvi vamutasile Sitefani nu kumuvembela ikivembo kikomi. ³ Na lulusika lulo, Sawulo eagahite aliduse ilikanisa. Ingilige mukaye mbesili, sambi akwegangage avevafuuvitwe vagosi kwa vang’inetu, avasopage mundinde. ⁴ Vala avevafuuvitwe vevevatagalye, vahele mbekuli vakidalika lula ulukani. ⁵ Nave Filipo inje mu Samaliya akumudalika Kilisito kwa vanyang’i vabaho. ⁶ Avanu wolofu vakong’ine pamwi ukupulikisa kwa uwinatifu lula ulukani lweadalikige Filipo na ukwilavila gila imiitu jeapigige. ⁷ Pakuva avanu wolofu ave vina amasoka, gahumige kono we giyoya. Na awolofu ave vina matela mumivili jawo na avalema mbevali vaponiswe. ⁸ Kwave na luhekelelo lukomi hilo muboma yila. ⁹ Sweno, pepwali umunu uyumwi yeitambulwa Simoni yealapigite nzolofu isa uwuhavi muboma iyo kwa ifilo ifyefilutye yeavahuguvikige avanya Samaliya, uyo ivahige uwuvina. ¹⁰ Avanu mbevali, avavina na avadodo, vamupulikisige kwa winatifu vitigila, “Simoni ye lula uludali lwa Nguluvi ulwitambulwa ‘Uludali ulukomi.’ ” ¹¹ Vamupulikisige hilo pakuva yealavahuguvike kwa uwuhavi wakwe kwa filo fyolofu. ¹² Neke vavelige vakumufuuwa Filipo ulwa ulukani ulunofu lwa uwutwa wa Nguluvi, na ilitawa lya Yesu Kilisito, vabatisiwe vagosi na vang’inetu. ¹³ Nayi Simoni nave afuuvitwe; na peyeabatisiwe ave pamwinga na Filipo, na peilavilige ifilagilo na uwuhulo fyefyapigike asasave pakomi. ¹⁴ Neke vala avigendo avali ku Yelusalemu peyevapulike ulwa avanyang’i vamu Samaliya nawo yevanuche ulukani lwa Nguluvi; vavasindiche va Petulo na Yohane. ¹⁵ Na vavelige vifika vavasuche sambi avevafuuvitwe vamwanukile Umuhe Umwelu, ¹⁶ pakuva ulusika ulo Umuhe Umwelu siealamwikila umunu yeyeavesaga mwaavene, yevevabatisiwe hela mwitawa lya Umutwa Yesu. ¹⁷ Sweno, ndawe vavagelekige amawoko gawo nawo vamwanuche Umuhe Umwelu. ¹⁸ Na ipo Simoni alukagwe kwa ukugelekwa amawoko ga avigendo avevafuuvitwe vanuche Umuhe Umwelu ndawe avapelige amagobole va Petulo na Yohane itigila, ¹⁹ “Mumelage nane uludali ulu sambi umunu yeyeavesaga yendimugeleka amawoko gangu, sambi amwanukile Umuhe Umwelu.” ²⁰ Neke Petulo amupitule, “Yagilage kutali veve na amagobole gako pakuva wihosa ulwa uhwanite ukugula ikipelwa cha Nguluvi na amagobole! ²¹ Veve wimugaya nambi kigawo nave uwulilumwi mukipigo iki pakuva inumbula yako si ngolofu pa Nguluvi. ²² Lino, hongesage inzanangifu iyi wifunye kulu Mutwa, apangi udegepelwa ilihosa lya munumbula yako. ²³ Pakuva ngukuwona umemite igila, kangi upinzilwe ni nzanangifu!” ²⁴ Simoni apitwe itigila, “Nguvagongola musukile kulu Mutwa sambi mbesili semulonzile silemwe ukunzusila nambi yingi.” ²⁵ Avene va Petulo na Yohane vavelige visinda ukolelela nu kudalika ulukani lwa Umutwa, vapilwike ku Yelusalemu, vidalika ulukani ulunofu mu fijiji fyolofu fya ava Samaliya. ²⁶ Na munyivaha va Umutwa amutige Filipo, “Wigelanise ubite ulubali lwa kusika wigendela ing’asi iyihuma ku Yelusalemu yisogwe ku Gasa.” (Ing’asi iyo yigendela mubalali.) ²⁷ Sweno, Filipo ndawe avangige ulugendo. Na ulusika lulo epwali munu Muetopiya, mupase, yeali mulugendo ibita ukwawo. Umunu uyo ali mulongola va avalolesi va uwunono va Kandake, umunumwehe va ku Etopiya. (Mutwa mung’inetu) Ahele ku Yelusalemu ukumusunyalila Nguluvi, na ulusika lulo apilukige ahofile umutuka ugwa ukukwegwa. ²⁸ Na peapilukige ave weakwimba ikitabu cha Umuvisi Yesaya. ²⁹ Sweno, Umuhe Umwelu amulonje Filipo, “Hegelele pipi na umutuka ugo mugendase.” ³⁰ Filipo agukimbilye umutuka gula ndawe amupulikige umunu uyo akwimba mukitabu cha Umuvisi Yesaya. Ipo Filipo amuwusise, “Be usikagula sukwimba iso?” ³¹ Umunu uyo amupitwe, “Mbi ndisikagula ndawuli pesawoniki umunu yeanzigisa?” Swe ndawe amugongolige Filipo ahove vateng’emalase. ³² Sweno pala peimbige mu wandike uwelu pe ipa, “Asindikwe ndawe ing’olo iyisindikwa kukudumulwa, wita chana cha ing’olo wekisikaga pekisegetwa uwubahila. Nave ndahihyo asikite salonzili nambi lukani. ³³ Vamuhonje inyoni na pakuhigwa vamuwonie. Sikwali yeahwana ukusima sa imbegalo yakwe, pakuva uwumi wakwe yewuhesiswe mung’i.” ³⁴ Uyo Umwetopiya amutige Filipo, “Ndongele uyu umuvisi ilonga ing’ani sa nani? Ngali sa umwene apangi sa umunu yungi?” ³⁵ Nave Filipo avanje pa uwandike wuwo uwelu, nave amudaliche isa Yesu. ³⁶ Nape vasogolige, vafikite pa lulenga na umunu uyo atige, “Lavage ipa pololi ululenga ndawuli mbi kokili che kikunanila ukubatisiwa?” ( ³⁷ Filipo atige, “Wone yeufuuvitwe mu numbula yako mbeyili, lukwilye ukubatisiwa.” Nave apitwe swe itigila, “Ena ndifuuwa ulwa Yesu Kilisito ye Mwana va Nguluvi”) ³⁸ Umunu uyo alaje umutuka gwime. Na mbevali ndawe vavili, Filipo na umunu uyo vasulunwike pa lulenga. Neke Filipo ndawe amubatisige. ³⁹ Na pevahumite pa lulenga, Umuhe va Umutwa amunyelebwise Filipo, na uyo Umwetopiya siamuweni kangi: neke umwene ndawe ibitilige na ulugendo lwakwe kono ina luhekelelo lukomi ⁴⁰ Neke Filipo iwene ali ku Asoto. Nave ave peadalika Ulukani Ulunofu muboma mbesili, mbaka pambele afikite na ku Kaisaliya.

¹ Na ulusika ulo Sawulo eaginite ukuwogofya avanu nu nukutosa ukuvawulaga vala avevamufuuvitwe Umutwa. Ahele kwa Umutambisi Umuvina ² asuke ulwandiko ulwa ukumukagulisa mumasinagogi aga Ikiyudaya uko ku Damesiki, sambi wone avafike uko avagosi na avang’inetu vevafuuvitwe ing’asi ya umutwa avibate na ukuvaleta ku Yelusalemu. ³ Neke peali mung’asi pipi na ukufika ku Damesiki, sukumwi ulung’ali uluhuma kwilanga lwamung’aliche imbali mbesili. ⁴ Agwe pasi neke apulike iliswi likumutigila, “Sawulo! Sawulo, mbi ndawuli ukunesa?” ⁵ Nave Sawulo amuwusise, “Wi nani veve Mutwa?” Iliswi lila lyapitwe, “Nene ye nene Yesu yukunesa veve. ⁶ Neke veve wime, wingile muboma uko kwe usakulongelwa lwelukuvaje veve upige.” ⁷ Vala avanu vevagendasige pamwinga na Sawulo vevimite bahala, vafwe libupwi; vapulike lila iliswi neke sivamuweni munu. ⁸ Sawulo imite, na avelige ilava alemilwe ukukiwona nambi kinu; sweno, avanu vala ndawe vamwibatige Sawulo iliwoko vakumusindika mbaka ku boma ya mu Damesiki. ⁹ Sawulo ikalite filo fidatu wesilava, na ulusika ulo salisigi nambi kunywa. ¹⁰ Sweno, uko ku Damesiki epwali munyigendo uyumwi yealafuuvitwe yeitambulwa Ananiya. Umutwa amulonje mu maloto, “Ananiya!” Nave Ananiya akwidika, “Nene ndibaha, Mutwa.” ¹¹ Swe Umutwa amutige, “Wigelanise ubite ku ng’asi iyitambulwa inyakidonya, na mukaye ya Yuda wusage umunu uyumwi Sawulo va ku Taliso. Lino de akwifunya. ¹² Na mumaloto amuwene umunu yeitambulwa Ananiya akwingila na ukumugeleka amawoko sambi alave kangi.” ¹³ Neke Ananiya apitwe, “Mutwa, nene mulike kwa wolofu ing’ani isa umunu uyo; mulike na ing’ani imbi seakuvapigila avanu vako uko ku Yelusalemu. ¹⁴ Na lino asile ipa we ina ululagi ukuhuma kwa Avatambisi avavina ukuvibata mbevali vevakwifunya mwitawa lyako.” ¹⁵ Neke umutwa amutigile, “Veve bite hela, pakuva nene ndimuhagwe amigile, adalike ilitawa lyangu kwa vesivamuseli Nguluvi (avamyanza) na avatwa vawo na kuvana va Isilaeli. ¹⁶ Na yunene ndimulagila inzolofu, sesimwambusa ateseke ukwimila litawa lyangu.” ¹⁷ Sweno, Ananiya ndawe abitige, swe akwingila mukaye yiyo. Ndawe amugelekige Sawulo amawoko gakwe swe itigila, “Munyalukolo Sawulo, Umutwa umwene Yesu yeakweleluche veve mung’asi lweukasige kono, anumite nene sambi ulave kangi na ukupelwa Umuhe Umwelu.” ¹⁸ Sukumwi ifinu witigila ifibandi fyagwe pasi ukuhuma mumiho ga Sawulo, ndawe avangige ukulava kangi. Ndawe imige, swe ibatisiwa. ¹⁹ Na avelige ilya ichakulya, uludali lwakwe ndawe lwemupilukilige kangi. Sawulo ikalite filo fikefu pamwi na vanyigendo uko ku Damesiki. ²⁰ Lusika lulula Sawulo avanzile ukudalika mumasinagogi ukutigila Yesu ye Mwana va Nguluvi. ²¹ Avanu mbevali vevamupulike vasasave, vitigila, “Uyu si ye yuyu yakavawulagige vala vevakifunyige mwitawa lili kula ku Yelusalemu? Kangi akalakasile ipa ina lukani lulo ulwa ukuvibata avanu iwo na ukuvasindika ku vatambisi avavina!” ²² Sawulo aginite ukupelwa uludali, na pe aginige pakuva mupifu pa kulonga ukuta Yesu ye Kilisito, palulo avahuguvike hilo Avayudaya va ku Damesiki. ²³ Pefilutye ifilo fyolofu, Avayudaya vakong’ine sambi vagahe ikigaho cha ukumuwulaga Sawulo. ²⁴ Neke Sawulo apulike ulupweng’enyu lwa ikigaho chawo. Avene pakilo na pamunyi valolelige imilyango ja ukwingilila muboma sambi vamuwulage Sawulo. ²⁵ Sweno pakilo vala avanyigendo vakwe vevepamwi nave, vamutegwe Sawulo mulihang’a, swe vakumwisa mulinang’ana lya mulukanzi ahume. ²⁶ Sawulo peafikite ku Yelusalemu agelite ukwihanza na vala avanyigendo. Neke mbevali vamwogopige, na sivafuuvitwi ulwa nave Sawulo ye ave munyigendo va Yesu. ²⁷ Ipo, ndawe Balanaba asige ukumutegula Sawulo, swe akumusindika ku avigendo na ukuvalongela lwe Sawulo akitang’ine na Umutwa mung’asi na lwe Umutwa akalonzile nave. Avalonje kangi na lwe Sawulo akadalikige ku Damesiki mugaya muhwehwe. ²⁸ Sweno, Sawulo ndawe ikalige nawo, na ukugenda mu Yelusalemu mbeyili idalika ulukani lwa Umutwa we mugaya muhwehwe. ²⁹ Kangi, olelelige na ukwibesa na Avayudaya vevalongige Ikigiliki, neke iwo vagahige ukumuwulaga. ³⁰ Vala vanyalukolo avevafuuvitwe vavelige vakulukagula ulukani ulo, vamutegwe Sawulo, na ukumsindika mbaka ku Kaisaliya swe vakumuleka abite ku Taliso. ³¹ Ulusika ulo ilikanisa mbelili lya mu Yudaya, na mu Galilaya na mu Samaliya lyave muwikalakunoga. Ilikanisa lyaginite ukongelekela na ukusikimala mu choga kulu Mutwa na ukoloka avanu mu ludali lwa Umuhe Umwelu. ³² Petulo peagendige apono polofu afisile kwa avanu va Nguluvi vevikalige ku Luda. ³³ Uko kweamufisile umunu uyumwi yeitambulwa Eneya yeemutamwa kwa myaka gimunana ealambale mulupasa pakuva eina litela. ³⁴ Sweno, Petulo ndawe amutigilige, Eneya, Yesu Kilisito akukuponia. “Lamuke utandike ulupasa lwako.” Eneya ndawe anyaganisige ukulamuka. ³⁵ Avanu mbevali avikalige ku Luda na ku Saloni vamuwene Eneya, na mbevali ndawe vamupitukilige Umutwa. ³⁶ Epwali mung’inetu uyumwi muboma iya ku Yopa yeitambulwa Tabita (kwa Kigiliki ye Dolika, kwekutigila, Nyalusi). Umung’inetu uyo apigige inofu pakuvatanga avamikaa mbepali. ³⁷ Ulusika ulo atamike swe ifwa. Avanu wofwige umufimba gwakwe, neke vaguvike mukibupa cha pachanya. ³⁸ Pa Yopa sipataali hilo ukuhuma ku Luda; swe avanyigendo avevafuuvitwe vavelige vipulika ulwa Petulo ali mu Luda, ndawe vavatumige avanu vavili kulumwene vakamutigile; “Wuse ukwetu yilino de.” ³⁹ Sweno, Petulo ndawe abitasige nawo. Avelige ifika swe vakumusindika pachanya pala pa kibupa avang’inetu avafwile wolofu vamupilime Petulo kono vivemba na ukumulagila imyenda jeawuyapige Dolika peemumi. ⁴⁰ Petulo avahumise mbevali kwivala, ndawe afugamige akwifunya. Ndawe agupitulige gula umufimba swe itigila, “Tabita lamuke.” Nave ndawe adindulige amiho swe ilamuka, na avelige akumuwona Petulo, ndawe ateng’emalige. ⁴¹ Petulo ndawe amutangilisige sambi ime, ndawe avakemelige vala avanu va Nguluvi na vala avang’inetu avafwile, ndawe amutawulige kwa avene yave mumi. ⁴² Ulukani ulwa ikipigo iki lwatagalye mbekuli uko ku Yopa, na avanu wolofu vamufuuvitwe Umutwa. ⁴³ Petulo ikalite filo fyolofu uko ku Yopa, kwa umunu uyumwi umunyakuhona ing’ingo yeitambulwa Simoni.

¹ Epwali umunu ku Kaisaliya yeitambulwa Koleneli, Umuvina va “Avanyigalu va ikilugu chekitambulwa, “Ikilugu cha Kiitalya.” ² Umunu uyo ali munofu, umwene pamwinga na avanu va mukaye yakwe vevina choga kwa Nguluvi. Apigige nzolofu ukuvatanga avamikaa va Ikiyudya ifunyige mbepali kwa Nguluvi. ³ Mu kivalilo wita icha igonza pelitegamwike, awene pelu mumaloto munyivaha va Nguluvi akwingila kugati na ukumutigila, “Koleneli!” ⁴ Koleneli amulafile uyo munyivaha kono we akogopa, amutigee, “Kwina kiki Mulugu?” Uyo umunyivaha amutigee, “Nguluvi idiche na ukwiwuka ukwifunya kwako na ifitawulwa fyako kwa avamikaa. ⁵ Sweno, vatumage avanu ku Yopa vakamukemele umunu uyumwi yeitambulwa Simoni,ilitawa lingi itambulwa Petulo. ⁶ Umwene ali mukaye ya Simoni umunyakuhona ing’ingo yeikaye yakwe yipipi na ibahali.” ⁷ Uyo munyivaha peyealonzile iso ibitye, Koleneli avakemelye avakami vakwe vavili va mukaye na uyumwi va avanyigalu vakwe yee mwogopa Nguluvi, ⁸ swe akuvalongela mbesili sesesiwonike, ndawe avatumige ku Yopa. ⁹ Ikimunyi cha kavili, avanu iwo avadatu we vali mulugendo, neke vepipi ukufika ku Yopa, Petulo iilyee pachanya piking’a mukivalilo icha mutanda pamunyi sambi ifunye. ¹⁰ Inzala yeyimuvafile, neke afwe musale. Peviteleka ichakulya, alotite amaloto. ¹¹ Awene kwilanga kudindwike na ikinu witigila lyenda likomi likwisiwa pasi kono wevalibete imbali sitayi. ¹² Mulyenda ilyo mwemofili ifikoko ifilipolofu: ifikoko finyamagulu gatayi, ifikoko fyefyafitambala na ifidege. ¹³ Apulike iliswi likumutigila, “Petulo lamuke udumule sambi ulye!” ¹⁴ Petulo apitwe, “Nda, Mutwa; sindendilagela nangi ukulya ikinu chaafu nambi ikihongawinya.” ¹⁵ Lila liswi lyapulise kangi litigila: “Ulafitigila fihongawinya ifinu fye Nguluvi afyofwige!” ¹⁶ Ulo lwapigike kadatu, sweno ndawe ilyenda lila lyapilukige kuchanya. ¹⁷ Petulo we peasasavala ulwa amaloto igo gealotite kwekutigila kiki vala avanu avatume na Koleneli, vayikagwe ikaye ya Simoni, vafisile pamulyango, ¹⁸ swe ndawe vihugige ukukemela: ‘Ndawuli ipa pina umunu umugenzi yeitambulwa Simoni Petulo?” ¹⁹ Petulo eakali peihosa amaloto gala kwekutigila kiki, na baho Umuhe amutige, “Pulikise! Kwina vanu vadatu ipa vakukusaka yuveve. ²⁰ Wangufye wike na ulemwa kusina pakubitasa nawo, pakuva ye nene yendivatumite.” ²¹ Sweno, ndawe Petulo ikige pasi, akuvatigila avanu vala, “Ye nene yemukusaka. Mbi ndawuli musile?” ²² Nawo ndawe vamupitulige, “Umuvina va avanyigalu Koleneli ye munu munofu, munyachoga kwa Nguluvi umutambule pamiho ga Avayudaya mbevali atutumite. Munyivaha Umwelu akamulonje akulaalike veve kukaye yakwe, sambi akupulikise veve kwa chechekivesaga winacho icha ukumulongela.” ²³ Petulo ndawe avakemelige vingile mukaye, swe akuvalagila pawuvaso ikilo kikila. Peyekuche, Petulo avangige ukugenda pamwinga nawo na avangi mwavala avevafuuvitwe nawo vahelelise. ²⁴ Ikimunyi icha kavili vafisile ku Kaisaliya na uko Koleneli avasindilige Umwene na va mukaye yakwe na avanyawiyendi vakwe veeavalaalike. ²⁵ Petulo peingilige, Koleneli ahumite kwivala amwanukile, ndawe amufugamilige na ukugondama mbaka pasi. ²⁶ Neke Petulo swe akumwimya, akumutigila, “Wime, pakuva nene ndi munu hela.” ²⁷ Petulo ave pealonga na Koleneli kono vakwingila mukaye umo mwemwemovali avanu wolofu vakong’ine. ²⁸ Petulo avatige, “Nanye mulusele wunofu ukutigila Umuyudaya mutanile na Indagilo sakwe isa ulufuuwo lwakwe ukuhanga na avanu vesivamuseli Nguluvi avamyanza. Neke lino Nguluvi anzigise ulwa ndemwage ukumutigila umunu yeyeavesaga muhongawinya na apangi mwaafu. ²⁹ Nambi kwaulo, muvelige mukung’emela nzusile ndimugaya lukani. Sweno, nguvawusa; mbi ndawuli mung’emelye?” ³⁰ Koleneli atige, “Ifilo fidatu fyefilutye ulusika ndawe lulu, ikivalilo icha igonza pelitegamwike, nene ndifunyige mwidama lyangu. Sukumwi, umunu yealafwite imyenda igimalavadika imite pa nene, ³¹ itigila: ‘Koleneli! Ukwifunya kwako na ifitawulwa fyako kuvamikaa Nguluvi idiche. ³² Mutume umunu ku Yopa akamukemele umunu uyumwi yeitambulwa Simoni, ilitawa ilingi ye Petulo; afiche mukaye ya Simoni umunyakuhona ing’ingo pipi na ibahali.’ ³³ Nambi nene numite avanu kwa veve na sifuvalii pakupiga ulo, nave ugisile wunofu pakusa. Lino, hwehwe tuli pa Nguluvi, tupulikise chechekivesaga che Umutwa akulaje ukutulongela.” ³⁴ Petulo ndawe avangige ukulonga: “Lino yendilukagwe nachene ulwa Nguluvi siayipigila avanu kwa luhagu. ³⁵ Umunu yeyeavesaga mung’i yeyeivesaga yeiva na choga kwa Nguluvi na ukupiga isa uwugolofu uyo akwidikilwa na umwene. ³⁶ Na ulu lwe lukani lwe Nguluvi avasindiche avana va Isilaeli, idalika ulukani ulunofu ulwileta uwikalakunoga ukukola kwa Yesu Kilisito Umutwa va mbevali. ³⁷ Nyenye mulusele ulukani ulwawonike mung’i mbeyili iya Avayudaya ukuvangila ku Galilaya pewulutye wula uwubatiso weadalikige Yohane. ³⁸ Mumusele Yesu uva ku Nasaleti na lwe Nguluvi amuhagwe kwa ukumwisikisa Umuhe Umwelu na uludali. Nguluvi ali pamwinga nave; umwene abitige uko na uko ipiga inofu na ukuponia mbevali avevibatike na yula umwanangifu. ³⁹ Na hwehwe twiwolelesi va ing’ani mbesili seapigite mung’i iya Avayudaya na mu Yelusalemu. Sweno, vamuwulige vakumutumbika mumusalaba; ⁴⁰ neke Nguluvi amusilibwe ikimunyi icha wudatu, amugisile sambi awoneke ⁴¹ si kwa mbevali nda pesi kwa vala ve Nguluvi eavahagwe vave wolelesi vakwe, ukutigila hwehwe yetwalisige na ukunywa pamwinga nave peasilibwike ukuhuma kwa avafwe. ⁴² Na atulaje ukudalika ulukani ulunofu ku vanu mbevali na ukolelela ulwa ye mwene umuhagule na Nguluvi ave muhisi va awumi na avafwe. ⁴³ Avavisi mbevali valonzile isa umwene ulwa umunu yeyeavesaga akumufuuwa saadegepelwa inzanangifu sakwe mbesili mwitawa lyakwe.” ⁴⁴ Petulo weepealonga ing’ani iso, Umuhe Umwelu avasye mbevali vevapulikisige ulukani ulo. ⁴⁵ Vala Avayudaya na avevafuuvitwe vevevasile pamwinga na Petulo ukuhuma ku Yopa vasasave pakuva Nguluvi avapelye ikipelwa cha Umuhe Umwelu vala avamyanza nawo; ⁴⁶ pakuva vapulike vilonga indongele isingi vilumba indolo sa Nguluvi. Ipo Petulo atige, ⁴⁷ “Avanu iva vamwanuche Umuhe Umwelu ndawe hwehwe lwetukamwanuche. Mbi, lino poyoli umunu yeahwanite ukuvatanila valemwe ukubatisiwa kwa ululenga?” ⁴⁸ Sweno, ndawe avalagile vabatisiwe mwitawa lya Yesu Kilisito. Swe ndawe vamusukige Petulo ikale nawo filo fikefu.

¹ Avigendo na avanyalukolo ave ku Yudaya vapulike ukutigila avanu avamyanza nawo yevanuche ulukani lwa Nguluvi. ² Sweno, Petulo avelige apiluka ku Yelusalemu, vala Avayudaya avevafuuvitwe vevawendige avanu avamyanza vawoolwagwe vamung’ulite, Vakumutigila: ³ “Veve ukahele kuvanu vesivawoole neke wikale na ukulya nawo!” ⁴ Ipo Petulo ndawe avangige ukuwolelela wunofu mwa mbesili sesikapigike ukuhuma pamuvango: ⁵ “Ikimunyi Ikimwi pendifunyige muboma ku Yopa, ndalotite amaloto; ndakiwene ikinu witigila lyenda likomi likwika pasi ukuhuma kuchanya kono wevalibete imbali isitayi, swe livikwa palubali panene. ⁶ Ndavelige ndihungilila wunofu mugati ndafiwene ifikoko finyamagulu gatayi, ifikoko ifya mwihala, ifikoko fyefyafitambala pasi, na ifidege fya mwihala. ⁷ Swe ndawe ndapulikige iliswi likunigila, ‘Petulo lamuke udumule sambi ulye.’ ⁸ Neke nene ndatige: ‘Nda, Mutwa; pakuva kwa nene ikinu ikinyawinya sichekilagela kingile mumulomo gwangu.’ ⁹ Iliswi lila lyapulise kangi ukuhuma kuchanya: ‘Ulemwage ukufitigila finyawinya ifinu ifyofuge na Nguluvi.’ ¹⁰ Ulukani ulo lwawonike kadatu, neke pambele ndawe fyapilukige kuchanya. ¹¹ Lulusika lulo, avanu vadatu avevatumitwe kwa nene vihuma ku Kaisaliya vafisile pakaye yendefiche. ¹² Umuhe anige mbitage nawo ndemwakusina. Iwo vanyalukolo avimutanda vahelelise na nene ku Kaisaliya uko twinje mukaye ya Koleneli. ¹³ Nave atulonje lwe akamuwene munyivaha mukaye yakwe na ukumutigila: ‘Mutumage umunu abite ku Yopa akamukemele umunu uyumwi yeitambulwa Simoni, ilitawa ilingi ye Petulo. ¹⁴ Uyo yeakulongela ing’ani veve na va mukaye yako mbevali isa uwupoki.’ ¹⁵ Na ngavelige ndivanga ukulonga, Umuhe Umwelu swe akuvasila ndawe lwe atusye hwehwe pamwandi. ¹⁶ Ipo ndiwike ing’ani sila seealonzile Umutwa: ‘Yohane abatisige na ululenga, neke nyenye mubatisiwa kwa Umuhe Umwelu.’ ¹⁷ Sweno, wone Nguluvi avapelye nawo avanu avamyanza ikipelwa kikila cheatupelye hwehwe peyetumufuuvitwe Umutwa Yesu Kilisito, mbi nene ndendinani yendendimubesa Nguluvi?” ¹⁸ Vavelige vipulika ulo, swe vileka ulubesa vakumulumba Nguluvi vitigila, “Nguluvi avapelye ikilega sambi vahongese na ukupela vave na uwumi!” ¹⁹ Avevafuuvitwe vala vevevatagalye ukwimila ukuteseka ukwe kuwonike ulusika lwe Sitefani vamuwulaje. Avamwi vahele mbaka ku Foinike, na ku Kipulo na ku Andyokiya vidalika ulo ulukani ku Vayudaya swe. ²⁰ Neke avamwi mwavala avevafuuvitwe vevevahumite ku Kipulo na ku Kilene, vahele ku Andyokiya vidalika ulukani ulo kwa avamyanza vakuvadalikila ulukani ulunofu lwa Umutwa Yesu. ²¹ Umutwa avatanzile na avanu wolwike vanyakufuuwa na ukumupitukila Umutwa. ²² Ing’ani sa ulukani ulo sapulise kulikanisa lya ku Yelusalemu. Swe ndawe vamutumige Balanaba abite ku Andyokiya. ²³ Avelige ifika uko na ukwilavila uwuwuya wa Nguluvi kuvanu vala, ahekelye na ukuvasukanisa mbevali vaginage muwuhuvilwa wawo kulu Mutwa. ²⁴ Balanaba ali munu munofu, eamemite Umuhe Umwelu na ulufuuwo. Ililugu likomi lyamupituche Umutwa. ²⁵ Sweno, Balanaba ndawe abitige ku Taliso ukumusaka Sawulo. ²⁶ Na peamuwene amuletite ku Andyokiya. Nawo ndawe vavili vikalite na ilikanisa lila kwa ulusika lwa mwaka mbeguli vakwigisa ililugu likomi lya avanu. Uko ku Andyokiya kwekwene avanyigendo vatasile ukuvatambula vakilisito. ²⁷ Ulusika lulo avamwi va avavisi vasile ku Andyokiya vihuma ku Yelusalemu. ²⁸ Sweno, uyumwi va vawo yeitambulwa Agabo imite, na kwa uludali lwa Umuhe apavite ulwa kuva na kinge mung’i mbeyili (Ikinge icho chawonike ulusika lwe Kulawudio pee Kaisali.) ²⁹ Vala avanyigendo valamwe ukuta umunu yeyeavesaga ina kinu asindikage vavatange avanyalukolo avikalige mu Yudaya. ³⁰ Sweno ndawe vagitige ndahihyo neke vavapelage Balanaba na Sawulo umuhangu ugo vasindike vavene kuvavaha va ilikanisa.

¹ Pipi na Ifilo ifyo baho Umutema Helode avanzile ukuvatesa avanu va likanisa. ² Amuwulige Yakobo umame va Yohane kwa ilimage. ³ Na avelige iwona Avayudaya vahekelye kwa ikipigo icho, ave peawila ulo, amwibete Petulo (Ulo lwapigike ikimunyi ikikomi icha imikate je simihate uwuhahu.) ⁴ Petulo avelige akwibatika, vamutosise mundinde, swe iva mukumingwa na ikilugu cha avanyigalu vatayi, vatayi. Helode adagige ukumuhiga pekilutye ikimunyi ikikomi icha i Pasaka. ⁵ Sweno, Petulo peemundinde, likanisa lyave mukwifunya kwa Nguluvi likumusukila kwa uwupifu mbewuli. ⁶ Pakilo, wesikilafika ikimunyi cha Helode cheadagige ukumuhiga Petulo, Petulo ali agonelye pagati ya avanyigalu vavili. Alimupinge na iminyololo givili na avanyigalu avalolesi vamingige umulyango ugwa Indinde. ⁷ Sukumwi, munyivaha va Umutwa imite pipi na Petulo swe ulung’ali lwing’alika ilidama mbelili ilya indinde. Swe munyivaha amupamise mulubafu akumutigila, “Wawangufye uhege!” ulusika lulo iminyololo jagwe pasi ukuhuma mumawoko gakwe ge gali mapinge. ⁸ Munyivaha amutige, “Wiwopage umusipi gwako fwale na indatu sako.” Swe igita ndahihyo. Swe munyivaha amutige, “Fwale isopeka yako, uninile.” ⁹ Petulo ndawe amuninilige kwivala, neke sialukagwi ulwa mbesili sesapigitwe na munyivaha nachene sesene, ihosige ulwa ilota amaloto. ¹⁰ Valutye pamulyango ugwa ukutala, apepovali avanyigalu, na ugwa kavili, pambele vafisile pamulyango ugwa ichuma ugwa ukwingilila muboma. Umulyango ugo nago gwadindwike gugwene, nawo ndawe vahumige kwivala. Swe vave vigenda mwikasi sukumwi yula munyivaha amulesile Petulo iyena. ¹¹ Ipo pe Petulo pealukagwe chekiwonike, itigila, “Lino yendilukagwe nachene ulwa Umutwa amutumite munyivaha vakwe amoke uluhuma mumawoko ga Helodi na mwa mbesili seavanu va Isilaeli vakalavisige siwoneke.” ¹² Petulo pealukagwe ahele kidonya mbaka kukaye ya Maliya uyuve va Yohane yeitambulwa Maliko. Umo mwe avanu wolofu vevakong’ine vakwifunya. ¹³ Petulo ndawe akong’onige umulyango na umukami uyumwi umwanahinza yeitambulwa Loda, ahele pamulyango ukwidika. ¹⁴ Umwanahinza uyo alikagwe iliswi lya Petulo swe ihekelela hilo, pakuleka adindule umulyango alemilwe swe ibita ukuvalongela avayagwe ulwa Petulo imite pamulyango. ¹⁵ Swe vakumutigila yula umuhinza ulwa, “Be kumbi ugulwike!” Neke umwene atigane ukutigila ulo nachene. Nawo vamutige, “Uyo ye munyivaha vakwe.” ¹⁶ Ipo Petulo epeakong’ona umulyango. Pambele ndawe vamudindulilige, swe vakumuwona neke vasasavale. ¹⁷ Petulo ndawe avasinisige vakatukage, swe akuvalongela lwe Umutwa akamuhumise mundinde. Ndawe avatigilige ulwa ulukani ulo vabitage vakamulongele Yakobo na avanyalukolo avangi, swe ndawe awukige akwibitila apono pangi. ¹⁸ Na pekuche, kwave na uwuhuguvafu wukomi kwa vala vanyigalu kwa chekiwonike kwa Petulo. ¹⁹ Helode alaje ulwa vamusakage hilo, neke nambi ndahihyo sivamuweni. Sweno, ndawe alagilige vala avanyigalu vavanase hilo. neke alagile ulwa vavawulagage. Sweno, Helode ahesile ku Yudaya ibita ku Kaisaliya kweahele ukwikala. ²⁰ Helode vamuvifise hilo avanu va ku Tilo na ku Sidoni. Neke avene vamusindiche avanu kulumwene valongane. Nawo vamususile Bulasito ave ulubali lwawo. Bulasito yee muvina va ikaye ya Umutwa. Sweno, ndawe vamusukige Helode kuve na uwikalakunoga, pakuva ing’i yawo yeyihuvye ukutegula ichakulya ukuhuma mung’i iya Umutwa. ²¹ Ikimunyi ikihagule, Helode we afwite imyenda ija uwutwa na ukwikala mukigoda icha uwutwa, avadalikilige avanu. ²² Avanu vala vamukuvye ing’ongo kwa luhekelelo swe vitigila, “Ili liswi lya Nguluvi, si lya munu nda.” ²³ Lulusika lulo munyivaha va Nguluvi amutofile Helode pakuva samupeli Nguluvi indolo iso. Swe iliiwa na amang’onyo ifwa. ²⁴ Ulukani ulwa Nguluvi lwaginite ukutagalila na ukukangala. ²⁵ Balanaba na Sawulo vavelige visinda ifipigo fyawo, vahesile kangi mu Yelusalemu, vakumutegula Yohane yeitambulwa apangi Maliko pamwinga nawo.

¹ Mu likanisa lya ku Andyokiya kwekovali avanu avangi veve Vavisi na Avigisi, mwavawo ve pwali Balanaba, Simoni yeatambuligwe kangi Umutitu, Lukiyo uva ku Kilene, Manaheni yealakulise pamwi na Helodi Umutema, na Sawulo. ² Nape vamusunyalilige Umutwa na viyimige ukulya, Umuhe Umwelu atigee, “Mumbikile palubali Balanaba na Sawulo sambi vapige ikipigo chendivahagulye.” ³ Swe, peyevaginite ukwiyima ukulya na ukwifunya, ndawe vavagelekige amawoko, swe vakuvaleka vibitilage. ⁴ Swe, Balanaba na Sawulo peyevatumitwe na Umuhe Umwelu, vasulunwike mbaka ku Seleukiya ukuhuma kuko vahofile ikipugu ikikomi mbaka pa kigunguli cha ku Kipulo. ⁵ Vavelige vifika ku Saloni vadalike ulukani lwa Nguluvi mu Masinagogi ga Avayudaya. Yohane (Maliko) nave avatangige. ⁶ Vagenzile uluhuma ulubali ulumwi mbaka ulwa kavili lwa ikigunguli cha ku Pafo, uko vamufisile umunu uyumwi umuhavi Umuyudaya yeitambulwa Baliyesu umuvisi va uwudesi. ⁷ Uyu epamwi na Seligiyo Pawulo umutema va ing’i yila, yee munu umuseela hilo. Seligiyo Pawulo avakemelye Balanaba na Sawulo sambi apulike ulukani lwa Nguluvi. ⁸ Neke uyo Elima, umuhavi (ndawe lwevamutambulige ku Kigiliki), agelite ukuvatanila sambi amutanile uyo Umutema va ing’i alemwe pakupitukila ulufuuwo ulwa uwu Kilisito. ⁹ Swe, Sawulo yeatambuligwe kangi Pawulo, kono we ina Umuhe Umwelu, ndawe amulavilige kwa iliho ilivifu uyo Umuhavi, ¹⁰ swe akumutigila, “Ve mudesi hilo veve! Wi mwana va setani! Veve wi mutavangu va ikinu chechekivesaga ikinofu; siwilekagi ukwananga ing’asi isa Umutwa ingolofu. ¹¹ Lino iliwoko ilya umutwa likudogofya: uva wimubofu na suhwana ukuliwona ilisuva kwa lusika.” Sukumwi amiho gakwe ndawe gatilivalige, swe ivanga ukubumangila akuvasuka avanu vamusogose.” ¹² Yula umutema va ing’i avelige akusiwona iso mbesili, ndawe apitukige swe iva mufuuwa; asasave hilo inzigiso seapulike isa Umutwa. ¹³ Ukuhuma ku Pafo, Pawulo na avayagwe vahofile ikipugu ikikomi ndawe vabitige mbaka ku Pelige mu Pamufiliya; neke Yohane (Maliko) avalesile, swe ipiluka ku Yelusalemu. ¹⁴ Neke avene vave wepevabita ulugendo uluhuma ku Pelige mbaka muboma ya Andyokiya mu Pisidiya. Ikimunyi icha isabato vinje mu Sinagogi, swe viteng’emala. ¹⁵ Pevimbite ukuhuma mukitabu icha indagilo sa Musa na mu wandike wa avavisi, avavina va isinagogi vavatige: “Vanyalukolo muva na ulukani ulwa ukuvalongela avanu ulweluhwanite ukuvakangasa, muvalongele.” ¹⁶ Swe, Pawulo imite, akuvakatusa vamupulikise, swe ivanga ukulonga: “Nye vagosi va mu Isilaeli na avangi mbevali vevakumogopa Nguluvi mupulikisage! ¹⁷ Nguluvi va avanu va Isilaeli avahagwe avakukwetu na ukuvawuyapa vave lukolo lukomi ku Misili. Nguluvi avahumise kwa uludali lwakwe ulukomi. ¹⁸ Ikangalise nawo kula kubalali kwa imyaka gila machumi gatayi. ¹⁹ Peawulige avanu va ing’olo isimufung’ati sa avanu avikalige mu Kanani, avapelye avanu vakwe ing’i iyo yive yawo. Myaka magana gatayi na machumi gahanu pegilutye ijo, ²⁰ avapelye avalamusi vavalongose mbaka mufilo fya umuvisi Samweli. ²¹ Ipo pevawendite ukuva na Umutema, na Nguluvi avapelye Sawulo, umwana va Kisi va mulukolo lwa Benyamini, ave Mutema vawo kwa ulusika lwa myaka machumi gatayi. ²² Peyeamuhesise Sawulo, Nguluvi amuhagwe Dawudi ukuva Mutema vawo. Nguluvi amolelelye itigila: ‘Ndimuwene Dawudi Umwna va Yese; umunu yetukwipulika na nene; umunu yeakwisa mbesili sendimutuma ukupiga.’ ²³ Ukuhuma mulukolo lwakwe umunu uyu, Nguluvi, ndawe lwealonzile, avaletye avanu va mu Isilaeli Umupoki, ye Yesu. ²⁴ Yesu wesialasa, Yohane alongwe ukuvadalikila avanu mbevali va Isilaeli ulwa vahongesage na ukupela na ukubatisiwa. ²⁵ Yohane peasindilisige ikipigo chakwe avalonje avanu: ‘Mwitigila nene ndinani? Nene si ye yula yemukumulavisa. Umunu uyo akusa mumbele mwa nene, nene sinywaniti nambi ukuhogosa inzisi isa indatu sakwe.’ ²⁶ “Vanyalukolo, nyenye ye mwivana va ulukolo lwa Abulahamu, na avangi mbevali vevakumufuuwa Nguluvi! Ulukani ulu ulwa uwupoki luletitwe kwa nyenye. ²⁷ Pakuva avangi va mu Yelusalemu na avavina vawo sivamukagwi umwene ukuva Mupoki, na sivasikagwi ing’ani isa avavisi sesakwimbwa mbepali mukimunyi icha isabato. Nambi ndahihyo vambwise ing’ani isa avavisi sikwile kwa ukumuhiga Yesu ukufwa. ²⁸ Nave sivaluweni ulukani ulwanangifu ulukwambusa awulagwe, vamususile Pilato amuhige ukufwa. ²⁹ Na pevakwisise mbesili ise nzandike ukwimila umwene, vamwisise mumusalaba, swe vakumutaga muchanga. ³⁰ Neke Nguluvi amusilibwe ukuhuma kwa vevafwe. ³¹ Nave, kwa filo fyolofu ilaje kwa vala vevamuninilige ukuhuma ku Galilaya mbaka ku Yelusalemu. Iwo kulino vewolelesi vakwe ku vanu va mu Isilaeli. ³² - ³³ Na hwehwe tusile ukuvaletela nyenye Ulukani Ulunofu lula lwe Nguluvi eavahuvise avakukwetu ukutigila: yeakwisise ulukani ulo kwa hwehwe twevasukulu vawo kwa ukumusilibula Yesu. Na kangi ndawe lwandike mukitabu cha Sabuli (inzimbo) umulyango gwa kavili: ‘Ye veve Mwanangu, neng’ino mbe ndi dado.’ ³⁴ Na ulwa ukumusilibula ukuhuma kuvafwe, na ulwa sisaapilukila kangi uko ku wanangifu Nguluvi alonzile de: ‘Sangupela uwufunyilile uwelu na uwanachene ndawe lwe ndendimuhuvise Dawudi.’ ³⁵ Ena, na ndawe lwelwilongwa mumilyango igingi ija ikitabu cha Inzimbo: (Sabuli) ‘Ulwa sisaumuleka Umwelu vako ingile mu wanangifu.’ ³⁶ Lino, Dawudi umwene akwisise uwende wa Nguluvi ulusika lwakwe, ndawe afwisige na ukutagwa pipi na ifyanga fya avakukwe, na umufimba gwakwe gwawosile. ³⁷ Neke yula ye Nguluvi amusilibwe ukuhuma kuvafwe sawosilii. ³⁸ - ³⁹ Vanyalukolo vangu, mulukagulage lino ulwa, ukukola kwa umunu uyo mwidalikilwa ulukani ulwa ukudegepelwa inzanangifu senyu na ukuta yeyeavesaga akumufuuwa Yesu idegepelwa inzanangifu mbesili, ulukani lwe lukesiluhwaniti ukwimila indagilo sa Musa. ⁴⁰ Sweno, mwikomalilage, sambi mulemwe ukwibatika na sila sesendonge na avavisi: ⁴¹ ‘Mupulikisage nyenye nyevanyambedasi, musasavalage muyage! Pakuva ndipiga ikipigo che simuhwaniti mufuuwe, nambi munu avaganulile.’ ” ⁴² Vavelige vihuma kwivala avanu vavasukite vase kangi vavalongele hilo ing’ani iso isabato ya kavili. ⁴³ Umukong’ano ugo peyegusisile, Avayudaya wolofu na avanu avamyanza avevapituche ulufuuwo lwa Kiyudaya vavafwatite va Pawulo na Balanaba. Nawo avigendo vatinise nawo vakuvakangasa imitima sambi vananage mu wuwuya wa Nguluvi. ⁴⁴ Ikimunyi icha isabato yeyafwatite, avanu va iboma yila vendige vahumile ng’ani ukusa ukupulikisa ulukani lwa Umutwa. ⁴⁵ Neke Avayudaya pevaliwene lila lilugu lya avanu vave na mbafya, swe vivanga ukubesa chechalongigwe na Pawulo na ukumuliga. ⁴⁶ Nambi ndahihyo Pawulo na Balanaba valonzile kwa wupifu hilo, swe vitigila, “Lwe lulagile ukutigila ulukani lwa Nguluvi ludalikwage kwa nyenye tandi, pakuva nyenye mulubihye na ukwiwona simuhwaniti muwumi wa mbepali apo swe tukuvaleka twipitukila avanu avamyanza. ⁴⁷ Pakuva Umutwa atulaje de: ‘Nene nguhagwe veve uve lung’ali kwa avanu avamyanza, uve ing’asi ya uwupoki kwa avanu mbevali konivala.’ ” ⁴⁸ Avamyanza vavelige vipulika ulukani ulo vahekelye hilo, vakululumba ulukani lwa Nguluvi, na vala ave vahagule ukwanukila uwumi uwutasila, swe viva vafuuwa. ⁴⁹ Ulukani lwa Nguluvi lwatagalye mbekuli mulutanana lula. ⁵⁰ Neke Avayudaya vasagise liyowo kwa avang’inetu avamwogopige Nguluvi avevalongola kuvayawo na kwa avagosi avatambule ava muboma yila. Ndawe vavangige ukuvatesa va Pawulo na Balanaba nu kuvahaka vahege mulutanana lula. ⁵¹ Swe, avigendo vapunite lingundi lya mumagulu gawo vakuvakenyela, neke vabitage ku Ikonio. ⁵² Neke vala avanyigendo vamemite uluhekelelo na Umuhe Umwelu.

¹ Kula ku Ikonio ing’ani save ndawe lwe sawonike ku Andyokiya. Pawulo na Balanaba vahele ku sinagogi iya Avayudaya vatinase nawo kwa uwupifu mbaka Avayudaya wolofu na Avagiliki vave vafuuwa. ² Neke Avayudaya avangi avevabihye ukufuuwa swe visagasa liyowo muvanu avangi avamyanza sambi vavavipile iwo vanyalukolo na ukuvabesa. ³ Pawulo na Balanaba vikalite kuko lusika hilo. Valongige kwa wupifu isa Umutwa, nave Umutwa akangise inachene ya ulukani lwevalongige ulwa uwuwuya wakwe, pakuvatanga ukupiga imiitu na uwuhulo. ⁴ Avanu va iboma iyo vigavite. Avangi vimite ulubali lwa Avayudaya, neke avangi vimite ulubali lwa avigendo. ⁵ Pambele, avamyanza na Avayudaya, vihanga na avavina vawo, valamwe ukuvapigila fibi iwo avigendo na ukuvakinya na amaganga. ⁶ Avigendo vavelige vakulukagula ulukani ulo, swe vikimbilila ku Lisitila na Delibe, iboma isa Likaonia, na munanana ise mwipi, ⁷ vave wevadalika Ulukani Ulunofu uko. ⁸ Uko ku Lisitila epwali umunu yee mulema amagulu uluhuma pakwegalwa, na esalagenda nambi. ⁹ Umunu uyo amupulikisige Pawulo peidalika. Pawulo amulafile hilo, na avelige akumuwona ulwa ina lufuuwo lweluhwanite luleke apone, ¹⁰ alonzile kwa iliswi likomi, “Wime ugoloke kwa amagulu gako!” Umunu uyo umulema ndawe inukige sukumwi, swe ivanga ukugenda. ¹¹ Ililugu lya avanu vavelige vakuluwona lweapigite Pawulo, vavanzile ukuyova kwa indongele ya Kilikonia: “Vanguluvi vatwiiche hwehwe mu lwihwano lwa avanu!” ¹² Balanaba vamutambule Sewu, na Pawulo pakuva yee mulonzi, swe itambulwa Heleme. ¹³ Nave umutambisi va i Tembeli ya Sewu yeyepivala pa iboma ndawe aletige ing’ambakwa ya isenga na amaluva pamulyango mukomi ugwa iboma, umwene pamwi na lila ililugu lya avanu vasakige ukuvatambikila iwo avigendo. ¹⁴ Balanaba na Pawulo vavelige vakuluwona ulukani ulo swe ndawe vademulige imyenda jawo vikimbila mula mwilugu lya avanu vilonga kwa iliswi likomi: ¹⁵ Vitigila, “Vanyalukolo mbi ndawuli mwipiga ulukani ulu? Hwehwe nahwe twivanu hela ndawe yunyenye. Nahwe tusile ipa tuvadalikile ulukani ulunofu, sambi mupituke muhume mufileke ifinu ifi ifigayakinu mumupitukile Nguluvi umumi yeagafile ing’i na kuchanya na ibahali na mbefili ifilimung’i. ¹⁶ Pidaha Nguluvi avatawe avanu mbevali vigendele mweviwendela vavene. ¹⁷ Nave ndahihyo Nguluvi sialekiti ukwilagila kwa ukuvapigila uwunofu: akuvaletela indonya ukuhuma kuchanya, kangi akuvapela isanga ulusika pelufisile, akuvapela ichakulya na ukuvagavila uluhekelelo munumbula senyu.” ¹⁸ Nave valonzile ulo nambi ndahihyo silwelupefu ukuvatanila valemwe ukuvatambikila. ¹⁹ Neke Avayudaya avamwi vaasile uluhuma ku Andyokiya na ku Ikonio, vavafundite avanu vave ulubali lwawo, ndawe vamuhudige Pawulo na amaganga na ukumukuluna mbaka pivala ya iboma vihosige ulwa yeafwe. ²⁰ Neke avevafuuvitwe vakong’ine na ukumupilima ndawe alamukige, swe ipiluka muboma. Peyekuche ikimunyi cha kavili, umwene pamwinga na Balanaba vahele ku Delibe. ²¹ Pawulo na Balanaba vavelige vidalika ulukani ulunofu uko ku Delibe na avanu wolofu vevafuuvitwe, swe ndawe vavangige ulugendo vibita ku Lisitila kangi ku Ikonio na ku Andyokiya ya Pisidiya. ²² Vave we vakuvakangasa avevafuuvitwe muboma sila sambi vanane mulufuuwo. Vavalonje, “Ulwa mbetuli lutuvaje ukugendela mukutoka na ukuguda kolofu sambi twingile muwutwa wa Nguluvi.” ²³ Ndawe vavahagulige avavaha va amakanisa ukwimila vevevafuuvitwe na pevifunyite na ukwiyima ukulya sambi vifunyage, ndawe vavavikige avavaha va amakanisa pamiho ga umutwa yevevamufuuvitwe. ²⁴ Na peyevalutye mung’i ya mu Pisidiya, swe ndawe vafikige mu Pamufiliya. ²⁵ Na peyevadalike lula ulukani uko ku Pelige, ndawe vabitige ku Ataliya. ²⁶ Uluhuma uko vagendye mukipugu ikikomi vipiluka ku Andyokiya kula kwe pamutalo vevavisilwe pawulolesi wa uwuwuya wa Nguluvi ukwimila ifipigo fye vevakwisise. ²⁷ Vavelige vifika uko ku Andyokiya vakemelye umukong’ano gwa likanisa gwa apono pala, swe vakuvalongela ing’ani mbesili se Nguluvi akapigite pamwinga nawo, na lwe akavadindulye umulyango avamyanza vingile nawo mulufuuwo. ²⁸ Nawo vikalite na vala avevafuuvitwe kwa misika myolofu.

¹ Sweno, avanu avangi vafisile ku Andyokiya vihuma ku Yudaya ndawe vavangige ukuvigisa vala vanyalukolo swe vitigila, “Wone mulemwe ukuwoolwa ndawe imisimu jealaje Musa, simuhwaniti ukupokwa.” ² Ulukani ulo lwambwise ulubesa lukomi, na Pawulo na Balanaba vavelige visinda ukulongana nawo, ndawe vavahagulige Pawulo na Balanaba pamwinga na avevafuuvitwe avamwi va ilikanisa lya ku Andyokiya vabite ku Yelusalemu, vakavawuse avigendo na avavaha ukwimila ulukani ulu. ³ Swe, ilikanisa ndawe lyavasindikige, nawo pevalutilige mu Foinike na mu Samaliya vavalonje lwe avamyanza vakamupituche Nguluvi. ing’ani isi pevapulike vala avanyalukolo mbevali vahekelye hilo. ⁴ Vavelige vifika ku Yelusalemu likanisa lyavanuche, pamwinga na avigendo na avavaha; nawo ndawe vawolelelige mbesili se Nguluvi akapigite ikola avene. ⁵ Neke avevafuuvitwe avangi va mu Kilugu cha Avafalisayo vimite, vitigila, “Lulagile avamyanza vawoolwagwe na ukwigisiwa ukwinatila indagilo sa Musa.” ⁶ Sweno, avigendo na avavaha vakong’ine pamwi ukugosa hilo ulukani ulo. ⁷ Na peyevalongine misika hilo, Petulo imite, ndawe atigilige, “Vanyalukolo vangu, nyenye mukulukagula ulwa pamwandi Nguluvi awendite ukuhagula nene mwanyenye ndalike ulukani ulunofu, sambi avamyanza vapulike na ukufuuwa. ⁸ Nave Nguluvi yeasisele inumbula sa avanu, akangise ukutigila avidiche pakuvapela Umuhe Umwelu ndawe lweatupelye hwehwe. ⁹ Savisili uluhagu kwa hwehwe na avene; asofwige inumbula sawo kwa ulufuuwo. ¹⁰ Neke lino, mbi ndawuli tumugele Nguluvi kwa ukuvatwika avafuuvitwe ikitegulo che avakukwetu nave hwehwe chatulemite pakupika? ¹¹ Lulemwe ukuva ndahihyo, neke tufuuwagwe ulwa hwehwe na avene mbetuli twipokwa ukwimila uwuwuya wa Umutwa Yesu.” ¹² Neke baho ililugu mbelili lwave sili, likuvapulikisa va Balanaba na Pawulo pevakolelela imiitu na uwuhulo we Nguluvi akapigite kwa ukukola mwa vene mu vanu vesivamuseli Nguluvi. ¹³ Vavelige visinda ukolelela, Yakobo avanzile ukulonga, “Vanyalukolo vangu mumulikisage! ¹⁴ Simoni alonzile lwe Nguluvi pamuvango avalolelige avamyanza, swe ihagula avamwi mwa vene vave vanu vakwe. ¹⁵ Ulukani ulu luling’ene hilo na Ing’ani isendonge na avavisi, ndawe uwandike uwelu lwewitigila: ¹⁶ ‘Pambele pesilutye ing’ani isi samiluka, sanzenga kangi ikipagalo kila cha Dawudi ichagwe; sambuyapa kangi amahame na ukusenga wupya. ¹⁷ Ipo avanu avangi mbevali, avanu va ing’i mbesili, vendavakemelye vave vanu vangu savamusaka Umutwa. ¹⁸ Ulu lweilonga Umutwa, umwene yeagisile ulukani ulu lukagulike uluhuma pidaha.’ ¹⁹ “Apo, nene ndilamula dee: tulemwage ukuvafwahisa avanu vesivamuseli Nguluvi (avamyanza) vevakumupitukila Nguluvi. ²⁰ Neke tuvandikilage hela tuvatigilage ulwa valemwage ukulya ifinu ifinyawinya ifitawule inambika kufihwananguluvi, na vikomalilage na mu wugoni; valemwage ukulya ing’oko yeyibuditwe na ukunywa idanda. ²¹ Pakuva uluhuma idaha ing’ani sa Musa sikave sidalikwa muboma mbesili na ukwimbwa mumasinagogi mbegali mufimunyi ifya isabato.” ²² Avigendo, avavaha na ilikanisa mbelili valamwe ukuvahagula avanu avangi ukuhuma mwavene sambi vavatume ku Andyokiya vabitase na Pawulo na Balanaba. Sweno, ndawe vamuhagulige Yuda yeitambulwa kangi Balanaba, na Sila iwo mbevali vevakagulike hilo mu vanyalukolo. ²³ Ndawe vavapelige ulwandiko ulu, “Hwehwe vigendo na avavaha, vanyalukolo venyu tukuvatigila kamwene mbemuli vanyalukolo vetu ye mwiva mung’i isingi yemwikalite uko ku Andyokiya, ku Siliya na ku Kilikiya. ²⁴ Tukapulike ulwa avanu vangi ukuhuma kono vakasile ukwenyu na ukuvatindasa na ing’ani sawo, na ukuvahuguvika imitima jenyu. Neke vakapigite ing’ani iso wesivalagile na umunu yeyeavesaga mwahwehwe. ²⁵ Neke lino, hwehwe mbetuli tulamwe pamwi ukuvahagula avanu avangi na ukuvatuma kwa nyenye pamwinga na vanyawende vetu Balanaba na Pawulo, ²⁶ vevakitawe uwumi wawo ukwimila ilitawa lya Umutwa vetu Yesu Kilisito. ²⁷ Neke lino, tukuvatuma Yuda na Sila kwa nyenye; iva vavalongela vavene isi setuvandiche. ²⁸ Sweno, Umuhe Umwelu na hwehwe twiyidikise ulwa tulemwage ukuvatwika ikitegulo ikisito pesi sisila hela ing’ani ingomi: ulwa ²⁹ mulemwage ukulya ifinu ifitawule nambika kwa ifihwana nguluvi; na uliya idaho; na inyama ya ing’oko iyibuditwe; mwikomalilage na mu wugoni. Pemupigite ulo muva muwuyipe lunofu. Kamwene mbemuli!” ³⁰ Peyevavilasile, vala avatume vahele ku andyokiya, vavelige vifika vakong’ise umukong’ano gwa avevafuuvitwe mbevali, ndawe vavapelige lula ulwandiko. ³¹ Peyevimbite ulwandiko lula ing’ani isenzandike savakangise imitima jawo, swe vihekelela hilo, ³² Yuda na Sila, venawo ve vavisi, vatinise na iwo vanyalukolo kwa misika myolofu vakuvakangasa imitima na ukuvapela uludali. ³³ Peyevikalite uko kwa lusika de, vanyalukolo va mu Andyokiya ndawe vavilagige vakuvasukila uwikala kunoga, sweno ndawe vapilukige kwa vala avevavatumite. [ ³⁴ Neke Sila awene lunofu ukusigala kuko.] ³⁵ Neke Pawulo na Balanaba vasigee kuko ku Andyokiya kwa lusika ludodo kangi; vakwigisa na ukudalika ulukani lwa Umutwa, viva pamwinga na avanu avangi wolofu. ³⁶ Pefilutye filo fikefu de, Pawulo amutige Balanaba, “Tupiluke tukavagendele vala vanyalukolo muboma mbesili kwetudalikige ulukani lwa Umutwa, tukilavile lweviwali kulino.” ³⁷ Balanaba asakige vamutegule nayi Yohane yeitambulwa kangi Maliko. ³⁸ Neke Pawulo siawendigi ukumutegula Maliko, ye pamwandi avalesile kula ku Pamufiliya na ukubihila pakupigasa ikipigo. ³⁹ Swe ndawe lwalamukige ulubesa lukomi hilo, mwavene, swe vilekana Balanaba amutegwe Maliko swe vihova ikipugu ikikomi vibita ku Kipulo. ⁴⁰ Nave Pawulo ndawe amutegulige Sila, peye vanyalukolo va apono ipo yevamuvikite muwulolesi wa uwuwuya wa Umutwa, ndawe ahegige. ⁴¹ Mulugendo ulo, akwete mu Siliya na mu Kilikiya akugakangasa amakanisa.

¹ Pawulo afisile ku Delibe na ku Lisitila, uko kweikalige umufuuwa uyumwi yeitambulwa Timoti. Uyuve nave ye ee Muyudaya ee mufuuwa; neke udade ali Mugiliki. ² Mwa vavala avanyalukolo kula ku Lisitila na ku Ikonio Timoti ee mulonge wunofu. ³ Pawulo adagige Timoti vagendase nave mulugendo, sweno ndawe amuwolige. Apigite ulo pakuva Avayudaya mbevali vevikalige munanana iso vevalukagwe ulwa udade va Timoti ali Mugiliki. ⁴ Na pevalutilige muboma sila vavalongelige avanu ing’ani isendagise na avigendo na avavaha va kula ku Yelusalemu, na ukuvatigila vinatilage. ⁵ Neke baho, gala amakanisa gaginite ukukangala mulufuuwo, na vevafuuvigwe nawo vaginite ukoloka mbepali wekwache. ⁶ Ndawe vagendelige munanana isa mu Filigiya na mu Galatiya, neke Umuhe Umwelu avakanie ukudalika ulukani ulo mulutanana lwa mu Asiya. ⁷ Na peyevafisile mwipi na mu Misiya vagesile ukwingila mulutanana lwa mu Bitiniya; neke Umuhe va Yesu avakanile. ⁸ Sweno, vagendye ku Misiya, swe vibita kidonya mbaka ku Toloya. ⁹ Neke baho pakilo Pawulo alagilwe mumaloto iva nda akumuwona munu va ku Makedoniya imite baho na ukumusuka itigila, “Lowoke wuse kono ku Makedoniya ukatutange.” ¹⁰ Swe Pawulo pealuwene ulo mumaloto, swe ndawe twigelanisige ukubita ku Makedoniya sitwahafili, twalukagwe nachene ulwa Nguluvi atukemelye tuvasindikile ulukani ulunofu. ¹¹ Ukuhuma ku Toloya, twinje mukipugu ikikomi, swe twibita kidonya mbaka ku Samotulake, na ikimunyi chakavili twafisile ku Neyapoli. ¹² Uluhuma uko, twahele mbaka ku Filipi, iboma ingomi ya mulutanana ulwa mu Makedoniya, kangi ye boma yeyeyina Avalumi wolofu. Twikalite muboma iyo filo fikefu de. ¹³ Ikimunyi icha isabato twahumite pivala ya iboma, ndawe twabitige palubali lwa umukoga apono petwihosige ulwa apangi pava pepakwifunyila. Twateng’eme, tutinase na avang’inetu avevakong’ine apono ipo. ¹⁴ Na mwavawo vevatupulikisige epwali umung’inetu uyumwi, yeemunyachoga kwa Nguluvi yeitambulwa Lidiya munyang’i va ku Tiyatila, yee musulusi va imyenda ginyalivala linyakilesi. Umunu ye Umutwa eadindwe inumbula yakwe sambi anukile Ing’ani sila se Pawulo alongige. ¹⁵ Na abatisiwe umung’inetu pamwinga na vamukaye yakwe atulaalike itigila, “Wone nachene mumbwene nene ulwa ngumufuuwa umutwa swe akutukemela mukaye yakwe, atugongolesige tubite. ¹⁶ Ikimunyi ikimwi, petwabitige apono pakwifunyila, umuhinza uyumwi munyalisoka linya ludali lwa uwulagusi itang’ine na hwehwe. Umuhinza uyo avapelige uwunono hilo, avanyamwenave muwulagusi wakwe. ¹⁷ Sweno, umuhinza uyo amuninilige Pawulo na hwehwe, kono we iyoya na ukutigila, “Avanu iva vavanda va Nguluvi umuvina. Vakuvadalikila ing’asi iya uwupoki.” ¹⁸ Agitige ndahihyo kwa ifilo fyolofu mbaka ikimunyi ikimwi Pawulo avifile, ndawe amupitukilige na ukulitigila lila lisoka, “Ngukulagila mwitawa lya Yesu Kilisito, muhume uyu!” Sukumwi ndawe lisoka ilyo lyahumige. ¹⁹ Avanyamwenave va yula umuhinza pevaluwene ulwa uluhuvi lwawo lwa uwunono yeludusile vavibete Pawulo na Sila, vakuvakuluna mbaka paluvanza, kuvatema. ²⁰ Vakuvasongela kwa avahisi swe vitigila, “Avanu iva Vayudaya lino visagasa liyowo muboma yetu. ²¹ Vakwigisa imisimu je hwehwe twe Valumi sitwivatawule ukwanukila nambi ukwinatila.” ²² Ililugu ilya avanu swe likuvabitila lihanga ukuvatova, na avahisi vavawopwe imyenda jawo ndawe valagilige vatovagwe ni ngoda. ²³ Na peyevatofilwe hilo, swe ndawe vavasopige mundinde, na umunyigalu va indinde vamulagile ulwa avavikage mukumingwa hilo. ²⁴ Umunyigalu peyevamulaje ulo, swe nambi avasopite kugati hilo mwa indinde na ukuvapinga amagulu mufipanda. ²⁵ Neke pipi na mukilo mwilangali Pawulo na Sila vafunyige na ukwimba inzimbo sa ukumulumba Nguluvi, kono avanyandinde avangi vakuvapulikisa. ²⁶ Sukumwi, kwave na ikitulo kikomi na ulutu lwa indinde luhogalike. Ndawe imilyango mbegili ja indinde jadindukige na iminyololo jevevavapinje najo jadumwike. ²⁷ Munyigalu uva indinde avelige ilamuka afisile imilyango mbegili gidindwike, neke ihose ukutigila avanyandinde mbevali vava yevakimbye; ndawe akwegige umumage gwakwe, isaka iwulage. ²⁸ Neke Pawulo amukemele kwa iliswi likomi itigila, “Ulemwa kwitesa pakuva hwehwe mbetuli twibaha.” ²⁹ Munyigalu alagile valete ulung’ali, Neke umwene akimbilile kugati, swe igwa kono ikuvila pa magulu ga Pawulo na Sila. ³⁰ Swe ndawe avalongosige vahume mundinde, ndawe avawusige, “Mwevatambule ngitage ndawuli sambi mokwe?” ³¹ Avene ndawe vamupitulige, “Mufuuwage Umutwa Yesu nave upokwa veve na mbevali avali mukaye yako.” ³² Swe, ndawe vamudalikilige ulukani lwa Umutwa umwene vala ave mukaye yakwe. ³³ Umunyigalu yula, awofuge amavamba gawo ikilo kicho, sweno umwene na mbevali ave mukaye yakwe ndawe vabatisiwige baho. ³⁴ Swe ndawe avasindikige kukaye yakwe yu mwene, swe akuvatengela ichakulya. Neke umwene na vala va mukaye yakwe vave na ikiwungo, pakuva lino yeve vamufuuvitwe Nguluvi. ³⁵ Imilawu peyekuche, avavina va uwuhigilo vavatumite avavina va vanyigalu vawo vitigila, “Muvadindulile avanu vala.” ³⁶ Yula munyigalu ndawe amulongelige Pawulo: “Avavina va uwuhigilo vatumite lukani sambi mudindulilwe. Lino muhwanite ukuhega ipa na ukwibitila kwa uwikalakunoga.” ³⁷ Neke Pawulo amupitule, “Lwindawuli? Nave sitwivananzi, vakatutofile ingoda pavanu kono hwehwe twivanyang’i va mu Lumi. Kangi, vakatusopite mundinde na lino visaka vatudindulile kinyele! Silwindahihyo nda! Luvavaje vase vavene ipa vatudindulile.” ³⁸ Vala avatume vahele ukuvalongela avanu va uwuhigilo ulukani ulo, nawo pevapulike ulwa Pawulo na Sila kumbi vanyang’i va mu Lumi, wogwipe. ³⁹ Sweno, ndawe vabitige ukuhongesa na peyevavadindulye vavagongolite vahege muboma yila. ⁴⁰ Pawulo na Sila vahumite mundinde, swe vibita kukaye ya Lidiya. Uko kweviwene na vanyalukolo avevafuuvitwe na ukuvakangasa imitima swe ndawe vawukige.

¹ Pawulo na avayagwe vagendye mu Amufipoli na mu Apoloniya, ndawe vafikige mu Tesalonike, apono apepina isinagogi iya Avayudaya. ² Swe Pawulo ahele ukuhanga nawo ndawe umusimu gwakwe gwa mbepali alongine nawo kwa lusika lwa sabato sidatu, ikola uwandike uwelu. ³ Avalonje na ukuvalagila ulwa lulagile Kilisito ukuteswa na ukusilibuka ukuhuma kuvafwe. Avalonje ulwa, “Yesu yenguvadalikila nyenye ye Kilisito.” ⁴ Avamwi mwavene vidiche ing’ani iso swe viva lubali lwa Pawulo na Sila. Kangi, awolofu hilo va Avagiliki vevamogopige Nguluvi na avang’inetu wolofu avalongosi nawo vave ulubali lwawo. ⁵ Neke Avayudaya vawene igila; swe vasakulaalika avanu avanyamalanga vavihwesaga mu mumagulilo, sambi vasagase liyowo muboma mbeyili. Vahele vasakwingila mukaye ya Yasoni vihosige ulwa vavafika mumo Pawulo na Sila sambi vavalete pivala pa malugu. ⁶ Neke sivavafisili swe vakumukuluna Yasoni pamwinga na vanyalukolo avangi (avevafuuvitwe) mbaka ku vavina va iboma, kono viyova: “Avanu iva vakave visasing’asa ing’i mbeyili na lino yevafisile ipa pa boma. ⁷ Yasoni avanuche mukaye yakwe mbevali na kwa ulo apigite lwesilulagila na Kaisali pakuva vahele vitigila ati, ‘Pwali Mutema yungi yeitambulwa Yesu.’ ” ⁸ Pa ukulonga ing’ani iso vavahuguvike avavina va iboma na ililugu lya avanu. ⁹ Ndawe vamuhofyige Yasoni na avayagwe swe vakuvaleka vibitilage. ¹⁰ Kwavelige kwitinala pakilo, vala vanyalukolo ndawe vavasindikige Pawulo na Sila vabitage ku Beloya. Napeyevafisile kula, vahele mu sinagogi iya Avayudaya. ¹¹ Avanu va uko vevinatifu hilo ukulutila vala va ku Tesalonike. Iwo vanuche ulukani kwa uwupifu hilo, vagosige Uwandike Uwelu we kwache, sambi vilavile manyi va Pawulo na Sila vilongela mumwene. ¹² Avanu wolofu mwaavene vafuuvitwe; na avang’inetu Avagiliki avalongola na avagosi. ¹³ Neke, Avayudaya va ku Tesalonike pevalukagwe ukutigila Pawulo adalikige ulukani lwa Nguluvi uko ku Beloya, ndawe vabitige kuko, swe ndawe vavangige ukusagasa liyowo mwilugu lya avanu. ¹⁴ Sweno, vala vanyalukolo ndawe vamuhumyige muboma angupe ukubita kumwani neke Sila na Timoti vasige mu Beloya. ¹⁵ Vala vanyalukolo vahelelise na Pawulo mbaka ku Atene. Sweno, ndawe vapilukige na uwulagise ukuhuma kwa Pawulo ukutigila Sila na Timoti vangupage ukumufwata valahaava. ¹⁶ Pawulo peakuvasindila va Sila na Timoti vase ku Atene, avifiswe hilo avelige akuyilava iboma lwe yimemite ifihwana nguluvi. ¹⁷ Alonganige na Avayudaya na avanu avangi vevamogopige Nguluvi mu Sinagogi; na kangi alonganige na avanu avakong’anige muwugulilo na avangi mbevali. ¹⁸ Avangi vevevinatye amahosa ga Epikulewo na ga Sitoiki vibesise nave. Avangi vatige, “Isaki ukulonga kiki uyu munyang’ani nzolofu?” Pakuva Pawulo adalikige Ulukani Ulunofu na ulwa ulusilibuko; avangi vatige, “Iwoneka wanda idalika ing’ani isa nguluvi ngenzi.” ¹⁹ Sweno, ndawe vamutegulige Pawulo, vakumusindika apono pevakong’anige pevapatigilige pa Alyapago swe vitigila, “Twisaka utulongele hilo ulwa ulukani ulu ulugenzi lwewilonga veve. ²⁰ Ing’ani isingi setupulike kwa veve siwoneka ngenzi hilo. Twiwenda utuganulile ing’ani iso kwekutigila kiki?” ²¹ Avanyag’i va mu Atene na avangi mbevali vevawenda mbepali ukolelela na ukupulikisa ing’ani ingenzi. ²² Sweno, Pawulo imite pala pevakong’anige pevapatambulige Alyapago, swe itigila, “Nye mwevanyang’i va mu Atene! Ndiwona ukuta mwaimbesili nyenye mwivanu ye muhele mbepali mwisokama hilo ing’ani isa uwufuuwe. ²³ Na ulo ndilukagwe pendutilige muboma yeyu na ukwilavila yunene ifihwana nguluvi fyenyu fye mukwifunyila neke ndipawene pifunyo apangi pepandike: ‘Ukwimila Nguluvi yula yesikagulanika.’ Sweno, uyo nyenye mwakwifunya wesimumuseli ye yuyo ye nene nguvadalikila. ²⁴ Uyu ye Nguluvi, yeagafile ing’i na mbefili ifilimumo, ye Mutwa va ing’i na kuchanya; Umwene siakwikala mutembeli inzenge na avanu. ²⁵ Nave kupigilwa kwa amawoko ga avanu witigila wanda isaka kinu chechekivesaga kila, pakuva umwene yeakuvapela avanu uwumi, sambi vahwane ukwehela na ukuvapela mbefili. ²⁶ Na ukuhuma kulumunu uyumwi agafile avanu mbevali, na ukuvavika vikale mbekuli konivala. Umwene alamwe na ukugelanisa ulusika na apono pe avanu iwo mbevali pesavikala. ²⁷ Agafile ulo sambi avanu iwo vamusake nave kwa kwambala, nambi ndahihyo. Umwene salipataali na yeyeavesaga munu. ²⁸ Luling’ene na lwealonzile umunu uyumwi: ‘Mulumwene hwehwe twinana, twigenda, na ukuva twipwali!’ Lwindawe avimba nzimbo venyu avangi lwevatige: ‘Hwehwe nahwe twivanakwe.’ ²⁹ Sweno, manyi hwehwe twivana va Nguluvi silwinoga hwehwe tumuhose Nguluvi na ukumwiganisa ulwa ihwana na isahabu, amagobole apangi iliganga ilihongole wunofu na avanu. ³⁰ Imyaka je avanu vevapuva Nguluvi ave nda silava. Neke lino ilagila avanu mbevali, va apono bahapavesaga vahongesage nu kupela vagileke imigendele jawo imyanangifu. ³¹ Pakuva yeavisile ikimunyi chesa ayihiga ing’i kwa uwugolofu ukwimila umunu yula uyumwi umuhagule. Nguluvi yealakangise ulukani ulu kwa ukumusilibula Umunu uyo ukuhuma kuvafwe. ³² Vavelige vipulika Pawulo ilonga ulwa ukusilibuka kwa avafwe, avangi mwaavene vamuhesile kwa kumubedala; neke avangi vatige, “Twisaka ukukupulikisa kangi ulwa ulukani ulu!” ³³ Sweno, Pawulo avalesile, ndawe ahegige pevakong’anige. ³⁴ Neke avanu avangi de vave ulubali lwakwe, swe viva vafuuvitwe. Mwavawo vepovali Dionisi va pa Alyapago, na umung’inetu uyungi yeitambulwa Damali na avangi avayagwe.

¹ Pelulutye ulo, Pawulo ahesile mu Atene, ndawe abitige ku Kolindo. ² Uko ku Kolindo, amufisile uyumwi yeitambulwa Akila Umuyudaya umwegalilwa mu Pondo. Akila pamwinga na uvakwe yeitambulwa Pilisika, yevevapilwike ifilo fifyo hela ukuhuma ku Italiya pakuva Kaisali Kulawudio alalaje ulwa Avayudaya mbevali vahegage mu Lumi. Swe Pawulo ndawe abitige ukuvawona, ³ na pakuva avene vahonige amahema ndawe umwene Pawulo lweapigige, swe Pawulo ikalite nawo ipiga ifipigo. ⁴ Na peyivelaga Sabato Pawulo adalikige na ukulongana nawo mu sinagogi, avagongolige sambi vafuuwe sealongige Avayudaya na Avagiliki. ⁵ Neke peyevafisile va Sila na Timoti ukuhuma ku Makedoniya, Pawulo ave ulusika mbeluli idalika, na ukuvalongela Avayudaya ulwa Yesu ye Kilisito. ⁶ Neke peyevamubesise na ukuvanga ukumuliga, ndawe apumunige imyenda jakwe pamiho gawo swe itigila, “Wone muyage ulo luva lwenyu yunyenye; nene mba sindimwananga kinu ukwimila lulo. Na uluhuma lino nguvapitukila na ukubita kwa avamyanza.” ⁷ Swe, ndawe ahegige pala ndawe abitige ukwikala mukaye ya umunu uyumwi umogopa Nguluvi yeitambulwa Tito Yusito. Ikaye yakwe ye pipi na isinagogi yila. ⁸ Neke Kilisipo, Umuvina va isinagogi, amufuuvitwe Umutwa umwene pamwinga na va mukaye yakwe mbevali. Avakolindo wolofu vapulikise ulukani ulo, ndawe vafuuwigwe na ukubatisiwa. ⁹ Ikimunyi ikimwi pakilo, Umutwa amulonje Pawulo mumaloto; “Ulemwage ukogopa, kalalilage ukudalika hela uladedela, ¹⁰ pakuva nene ndilipamwinga na veve. Pagaya umunu yeigelela ukukutesa pakuva ipa paboma povali avanu wolofu avali ulubali lwa nene” ¹¹ Swe, Pawulo ikalite uko akwigisa ulukani lwa Nguluvi mwavene kwa ulusika lwa mwaka gumwi na ugulipinga. ¹² Neke ulusika lwe Galiyo e Mutema va ulutanana lwa mu Akaya, Avayudaya mbevali vamwibete Pawulo na ukumusindika pawuhigilo. ¹³ Swe vitigila, “Tukumutosa umunu uyu pakuva akuvagongolesa avanu vamusunyalile Nguluvi kwa lwesilulagile mundagilo.” ¹⁴ Pawulo wesalavanga ukulonga, Galiyo ndawe avatigilige Avayudaya, “Mupulikise nyela mwe Vayudaya! Ulukani ulu luke luvelage nachene lwa uwananzi nave wanangifu nene nge ndivapulikisa. ¹⁵ Neke lino lwiva nda lukani lwa ulubesa lwa amatawa na indagilo senyu, ulo muhigage yunyenye. Nene sindiwenda ukwingila mu wuhisi wa ing’ani isi!” ¹⁶ Sweno, ndawe avadagige vahege pawuhigilo. ¹⁷ Nawo mbevali ndawe vamwibatige Sositene ye e muvina va isinagogi, na ukumutova bahala pawuhigilo. Neke Galiyo satugiti. ¹⁸ Pawulo ikalite na vala vanyalukolo uko ku Kolindo filo fyolofu. Sweno, ndawe avilagige, swe ihova ikipugu ikikomi ibita ku Siliya pamwinga na Pilisika na Akila. Uko ku Kengeleya, amosile ifwili sakwe pakuva eamwilapye Nguluvi. ¹⁹ Vafisile ku Efeso na baho Pawulo avalesile va Pilisika na Akila, ndawe abitige ku Sinagogi, asakulongana na Avayudaya. ²⁰ Vamugongolite ikale nawo lusika lolofu hilo, neke ave siidichi. (siawenditi ukuva peikala) ²¹ Neke peahegige, atige, “Nguluvi peawendite sanzusa kangi kwa nyenye.” Ndawe ahegige pa Efeso ihova ikipugu ikikomi. ²² Ikipugu ikikomi kimite pa Kaisaliya, nave Pawulo ndawe abitige ku Yelusalemu ukulihungila likanisa, sweno, ndawe abitige ku Andyokiya. ²³ Ikalite uko lusika ludodo, sweno, ndawe avangige ulugendo, igendela munanana isa mu Galatiya na mu Filigiya akuvakangasa imitima avevafuuvitwe mbevali. ²⁴ Umuyudaya uyumwi yeitambulwa Apolo umwegalilwa ku Alekisandeliya, easile ku Efeso. E munu munyandolo pakulonga na yealawusele Uwandike Uwelu. ²⁵ E mwigise mu ng’asi ya Umutwa, adalikige ulukani lwa Yesu kwa ulwa nachene hilo. Alongige na ukwigisa wunofu hilo, nave alaabatisiwe kwa uwubatiso wa Yohane hela. ²⁶ Pilisika na Akila vavelige vakumupulika idalika kwa uwupifu mula mugati ya i sinagogi, ndawe vamukemelige ukwawo swe vakumwigisa wunofu hilo ulwa ing’asi ya Nguluvi. ²⁷ Apolo peasakige ukubita ku Akaya, vala vanyalukolo vamukangise umutima kwa ukumupela ibalula akavapele avevafuuvitwe kula ku Akaya sambi vamwanukile. Na peafisile uko, kwa uludali na uwuwuya wa Nguluvi, avatanzile hilo vala vanyalukolo avevafuuvitwe; ²⁸ pakuva emupifu avalemige Avayudaya pelu hela akuvalagila muwandike uwelu ulwa Yesu ye Kilisito.

¹ Ulusika lwe Apolo ali mu Kolindo Pawulo agenzile munanana isa mubalali, pambele afisile ku Efeso, uko kwe avafisile avanyigendo avevafuuvitwe avamwi. ² Swe akuvawusa, “Ndawuli mwamwanuche Umuhe Umwelu pala pemwavelige mwifuuwa?” Nawo ndawe vamupitulige, “Nda! Sitwetulapulika ulwa kwali Umuhe Umwelu.” ³ Nave ndawe avawusige, “Mbi lino mwabatisiwe na uwubatiso uwindawuli?” Swe vakumupitula, “Uwubatiso wa Yohane.” ⁴ Nave Pawulo ndawe avatigilige, “Uwubatiso wa Yohane walagilige ukuta avanu vahongise na Yohane avalonje avanu vamufuuwage yula yeakusa mumbele mwa umwene, kwekutigila Yesu.” ⁵ Pevapulike ulo, swe vibatisiwa mwitawa lya Umutwa Yesu. ⁶ Sweno, Pawulo ndawe avagelekige amawoko, na Umuhe Umwelu swe akuvasila, swe vivanga ukulonga indongele isingi na ukulonga isa wuvisi. ⁷ Kwa mbevali vevafikite vanu vagosi vanyichumi na vavili. ⁸ Mulusika lwa myesi gidatu Pawulo abitige mu sinagogi, avelige na ililonge lya ukuvagongolesa hilo isa uwutwa wa Nguluvi. ⁹ Neke avangi vave na lubesa, vabihye pakufuuwa, swe vivanga ukulonga fibi ulwa iyo ing’asi ya Uwutwa. Ipo Pawulo ndawe avalekige uwutipulika, swe akuvategula palubali avevafuuvitwe, atinasige nawo mbepali mukaye ya ukwimbila ya Tilano. ¹⁰ Agitige ndahihyo kwa ulusika lwa myaka givili, mbaka avanyang’i mbevali va mu Asiya, Avayudaya na avamyanza, valupulike ulukani lwa Umutwa. ¹¹ Nguluvi apigite imiitu iminyawuhulo ukukola mu mawoko ga Pawulo. ¹² Avanu vategulige imyenda ija ukupigila na ifitema na igingi jeapigilige Pawulo, ndawe vavasindikilige avatamwa, nawo ndawe vaponige ifitamwa fyawo; na vala ave vina amasoka gahumile mwavene. ¹³ Avayudaya avamwi vevayingige uko na uko vihumya amasoka vagelite ukukola litawa lya Umutwa Yesu vatigilige, “Nguvalagila mwitawa lya Yesu yula ye idalikwa na Pawulo.” ¹⁴ Avana avimufung’ati va Sikeva, Umutambisi Umuvina va Kiyudaya, vevalipamwi na vawo vevapigige ndahihyo. ¹⁵ Neke lisoka lyavapitwe, “Ndimukagwe Yesu, na Pawulo nave ndimukagwe, mbi nyenye yunyenye vanani?” ¹⁶ Sweno, umunu yula munya lisoka swe akuvasumbila kwa ludali mbevali, swe akuvasuuma. Na iwo avana va Sikeva vakimbye vali wufuula ukuhuma mukaye yila kono vina nzeya imivili mbegili. ¹⁷ Mbevali avikalige mu Efeso Avayudaya na Avagiliki valupulike ulukani ulo, neke vave na muhwehwe, swe ndawe valilumbige ilitawa lya Umutwa Yesu. ¹⁸ Avevafuuvitwe wolofu vasile vilogole mbesili sevapigite. ¹⁹ Avamwi pamwandi ve vahavi, vakong’ise ifitabu fyawo fya uwuhavi, vakufinyanya pamiho ga avanu mbevali, ifitabu ifyo fye fihwanite ukugulwa amagobole agafikite mbilima machumi gahanu. ²⁰ Na ukwimila lulo, ulukani lwa Umutwa lwaginite ukutagalila na ukukangala. ²¹ Pesilutye iso, Pawulo alamwe ukubita ku Yelusalemu igendela mu Makedoniya na mu Akaya. Atigee, “Pefikite uko, lumbaje ndiyiwone na i Lumi nayo.” ²² Sweno, ndawe avatumige avatanzi vakwe avavili, Timoti na Elasito, vatale ukubita ku Makedoniya, nave asigee lusika ludodo uko ku Asiya. ²³ Ulusika ulo pelyawonike iliyowo likomi uko ku Efeso ukwimila Ing’asi iya Umutwa. ²⁴ Alikwali umuponzi amagobole uyumwi yeitambulwa Demetiliyo, yee ina ikipigo cha ukuponda ifitembeli ifya amagobole ifyefihwana na itembeli ingomi ya nguluvi ung’inetu yeitambulwa Alitemi. Avaponzi vambulige kinu mukipigo icho. ²⁵ Demetiliyo avakong’ise iwo mbevali vevapigige pamwinga na umwene na avangi avali mukipigo kicho, akuvatigila, “Nyela vayangu, mukulukagula ulwa hwehwe twakwambula kinu kikomi ukuhuma mukipigo iki. ²⁶ Lino, mwipulika na ukwilavila yunyenye ing’ani sa Pawulo seipiga, kangi si baha hela pa Efeso, akave ipiga lulu mu Asiya mbeyili. Umwene akuvagongolesa nu kuvapitula avanu na lino yevidiche ukutigila ifihwana nguluvi fyetwiponda ifyo si finguluvi nda. ²⁷ Sweno, powuli wutalamu siwita hela uwusulusi wetu wupelwa litawa libi. Kangi silulo hela, pakuva ulukani ulu yelwambusa na itembeli ya ukwisunyalila ya Alitemi yive nda kinu cha wupuva. Pambele na lulumbo lwakwe uyo ye i Asiya, na konivala mbekuli vakumusunyalila luduga.” ²⁸ Vavelige yevapulike iso, vave na ililakali, swe vivanga ukuyova: “Alitemi ye muvina mu Efeso!” ²⁹ Iboma mbeyili swe yiva mwiyovo. Ndawe vavasumbilige Gayo na Alisitako, avanyang’i va mu Makedoniya, vevagendasige na Pawulo, swe vakuvakweganga mbaka ku luvanza ulwa ifiwungo. ³⁰ Pawulo umwene awendige ukwitang’ana na ililugu ilya avanu, neke vala ave vafuuvitwe swe vakumutanila. ³¹ Avatema avangi va ulutanana ulo lwa mu Asiya, veve vanyawiyendi vakwe, vamutumye Pawulo ulukani vakumugongola alemwage ukwambusa uwumi wakwe ukubita ku luvanza ulwa ifiwungo. ³² Ulusika ulo, umunu yeyeavesaga ayovige, avangi viyova vilonga ulu na avangi viyova vilonga lula, pakuva umukong’ano gwegusasing’ine. Avangi wolofu sivakikagwi na chechalesile avene vikong’ana pala. ³³ Avamwi vihosige ulwa Isikanda ye mwene yeasagise liyowo, neke Avayudaya vamutige Isikanda abite pawutalo, swe Isikanda ndawe avasinisige avanu vakatuke pakuva awendige ikanile pa ililugu lya avanu. ³⁴ Neke vavelige vakulukagula ulwa umwene Muyudaya, mbevali kwa liswi limwi vayofile, Alitemi ye muvina mu Efeso!” Vave pevayova ndahihyo kwa lusika lwa fivalilo fivili. ³⁵ Pambele umwandisi va iboma iyo ahwanite ukuvakatusa akuvatigila, “Vanyang’i va mu Efeso, mbemuli mukulukagula ukutigila iboma iyi ya Efeso ye yayigosa itembeli ya nguluvi Alitemi na ukugosa ikihwana nguluvi kila chechasulunwike ukuhuma kuchanya. ³⁶ Asukuli yeahwanite ukubesa ulukani ulu. sweno, musike, mulemwage ukupiga kinu mwivagaya wusikimafu. ³⁷ Muvakemelye avanu iva ipa nave sivamulisili nave ukuyilonga fibi itembeli ya nguluvi vetu ung’inetu. ³⁸ Wone luve, Demeteliyo na avaponzi avayagwe vina lukani kwa avanu iva, uwuhigilo powoli na avatema va inanana nawo povali, vahwanite ukuvatosa kuko. ³⁹ Neke wone mwina lukani lungi kangi, musindike apono apahwanite. ⁴⁰ Pakuva tuke tuhwanite ukwisongela ulwa tusagise liyowo kwa ulwiwoneka namunyi lye ligaya kivalwa. Na tuke tulemwa pakolelela kuvatema mbaka vidikile ikivalwa cha iliyowo ili.” ⁴¹ Pealonzile ulo, swe ndawe agutagalisige umukong’ano.

¹ Lila liyowo lya ku Efeso lyavelige yelisisile Pawulo avakong’ise vala ave vafuuvitwe, akuvakangasa imitima. Sweno, ndawe avilagige, ivanga ulugendo ibita ku Makedoniya. ² Alutilige igendela munanana sa ing’i sila akuvakangasa imitima avanu akuvalongela ing’ani nzolofu pambele afisile ku Ugiliki ³ kwe ikalite lusika lwa myesi gidatu pe akwigelanisa ukubita ku Siliya swe avelige akulukagula ulwa Avayudaya vevina lukani lubi kulumwene, swe ndawe alamulige ukupiluka ikola ku Makedoniya. ⁴ Neke Sopatulo umwana va Piho, ukuhuma ku Beloya, ahelelise nave, kangi na Alisitako na Sekundo ukuhuma ku Tesalonike, Gayo ukuhuma ku Delibe, Timoti, Tikiko na Tolofimo va mulutanana lwa mu Asiya. ⁵ Iwo vatutalye vilongola sambi vakatusindile kula ku Toloya. ⁶ Hwehwe, pekilutye ikimunyi ikikomi cha Imikate je simihate uwuhahu, swe ndawe twahovige ikipugu ikikomi ukuhuma ku Filipi na pefilutye filo fihanu twafisile kula ku Toloya. Uko twikalite filo fimufung’ati. ⁷ Ikimunyi icha pa Jumamosi pamihye petwetukong’ine pamwinga sambi tugumegule umukate, Pakuva Pawulo e alamwe ukuhega ikimunyi cha kavili, avadaliche avanu musika hilo mbaka mukilo mwilangali. ⁸ Mula mukibupa cha pachanya, che twetwipwali, mwemofili ifing’ali fyolofu ifikwaka. ⁹ Neke munyakilambo uyumwi yeitambulwa Otika eateng’eme pakinang’ana ulusika lwe Pawulo adalikige. Otika avanzile ukusinzila ludodo ludodo neke pambele akwibatika na itulo ndawe agwisige pasi uluhuma mukibupa cha ikaye ya wudatu uluhuma kuchanya. Vamusafile pasi yeafwe. ¹⁰ Neke Pawulo asulunwike pasi, swe igondama, akumukumbatila itigila, “Mulemwage ukuhuguvala pakuva akaali pe ina uwumi mulumwene .” ¹¹ Sweno ndawe ililige kangi pachanya swe imegula umukate swe ilya. Ave peadalika Ulukani Ulunofu mbaka pekwidandaluka, ndawe ahegige. ¹² Avanu vala vamwegwe yula munyakilambo vakumusindika kukaye iva mumi hilo, ulo lwavapelye ulusikimiko. ¹³ Hwehwe twahofile ikipugu ikikomi swe twilongola ukubita ku Aso kwetwetulagine ukumufika Pawulo. Ulu lwetwetulagine; pakuva awendige ukubita uko igendela mubalali. ¹⁴ Pe, atufisile kula ku Aso, ndawe twamutegulige mula mukipugu ikikomi, ndawe twabitige ku Mitulene. ¹⁵ Ukuhuma uko twagenzile twifika ku Kiyo pamilawu. Ikimunyi chakavili twasuupite pa Samo, ikimunyi cha wudatu kangi twafikite ku Mileto. ¹⁶ Neke Pawulo ealamwe ukugendela mululenga sambi alemwe ukukola ku Efeso ulwa alafuvalila mu Asiya. Angufisige sambi afike ku Yelusalemu manyi luhwane akifike ikimunyi ikikomi cha i Pendekosite. ¹⁷ Uluhuma ku Mileto Pawulo atumite lukani ku vavaha va ku Efeso sambi vatang’ane nave. ¹⁸ Peyevafisile kulumwene avatige, “Mukulukagula lwendave ulusika mbeluli pamwinga na yunyenye uluhuma ikimunyi kila ikilongola chendafiche mu Asiya. ¹⁹ Mukulukagula lwendamupigilige Umutwa kwa kwilevesa hilo, na kwa inzihosi na mung’ani inalamu sesafikite ukuhuma kwa Avayudaya. ²⁰ Mukulukagula ulwa sindawonigi lutalamu pakudalika apelu na mukaye senyu na ukuvigisa chechekivesaga chekihwanite ukuvatanga nyenye. ²¹ Ndavakenyelige mbevali Avayudaya, na avangi avamyanza, vamupitukile Nguluvi na ukumufuuwa Umutwa vetu Yesu. ²² Lino, mupulikise! Nene, Pengumupulika Umuhe, ndibita ku Yelusalemu wesingulukagula ulufika nene. ²³ Lwengulukagula lwe ulwa ukutigila Umuhe Umwelu akunzolelela ulwa muboma mbesili ukutigila ukupingwa na uluteseko ifyo fyefinzindye. ²⁴ Nene, sindihosa hilo ulwa uwumi wangu ukuva kinu hilo kwa nene pesi kula ukukwisa na ukusinda ikipigo chendatumitwe na ukupelwa na Umutwa Yesu sambi migage, kwekutigila ndalikage ulukani ulunofu lwa uwuwuya wa Nguluvi. ²⁵ “Ngave ndibita uko na uko mwanyenye ndidalika Uwutwa wa Nguluvi. Neke lino, ngulukagula ukutigila asukuli nave munu mwanyenye yesaambona kangi. ²⁶ Pede, neng’ino de nguvalongela pelu ukutigila manyi sambi luwoneke umuyenyu uyumwi va nyenye peayasile, nene mba ndimugaya lwakulongwa lwelweluvesaga. ²⁷ Pakuva sindasiniti nambi ludodo ukuvalongela ulukani lwealuvikite Nguluvi tupigage. ²⁸ Mwikomalilage yunyenye; muligosage lila lilugu lye Umuhe Umwelu akavavisile nyenye muve valongola va ilikanisa. Mulikwamilage likanisa lya Nguluvi lyealigusile kwa idanda ya Umwanakwe. ²⁹ Ngulukagula hilo ulwa penyesile nene amagwami amakali gavasila gingila ukwenyu, gava magaya lusungu kwa ikipinga. ³⁰ Na ukuhuma mwa nyenye vawoneka avanu vevalonga ing’ani isa uwudesi sambi vavayase avanu vavafwate avene. ³¹ Na palulo muvela miho mukwiwuka ulwa kwa ulusika lwa myaka gidatu, pakilo na pamunyi sindalekiti ukuvapavila mbemuli kwa inzihosi. ³² “Na swe lino, nguvavika nyenye mumawoko ga Nguluvi avakwamile mulukani lwa uwuwuya wakwe. Umwene yeahwanite ukuvakangasa nyenye sambi muhwane ukupelwa uwufunyilile wula weavaviche avanu vakwe. ³³ Nene nambi sukumwi sindabodochi amagobole, nambi isahabu, nambi imyenda ja munu yeyeavesaga. ³⁴ Mulukagwe yinyenye ukuta ngapigige ndikola amawoko gangu yinene sambi ndikwavile fyengulwime nene na avayangu. ³⁵ Ngavelige mbepali nguvalagila mwigage ukutigila kwa ukupiga ndahihyo twidaga ukuvatanga vala avahomefu, tukwiwuka ing’ani isa Umutwa Yesu umwene weatige: ‘Lwinoga hilo ukutawula sindawe ukwanukila.’ ” ³⁶ Pealonzile ulo, Pawulo afugime pamwinga nawo, swe akwifunya. ³⁷ Neke mbevali vavembite; swe vakumwilaga vakumukumbatila na ukumunonela. ³⁸ Ulukani lwelwavahuguvike hilo lwelula lweatige sivamuwona kangi. Swe, ndawe vamusindikige mbaka ku kipugu ikikomi kumwani.

¹ Twavelige yetuvilasile, twahofile ikipugu ikikomi twibita kidonya mbaka ku Kosi. Ikimunyi cha kavili twafisile ku Lode, na uluhuma uko twahele ku Patala. ² Uko, twakifisile ikipugu ikikomi chechabitige ku Foinike swe ndawe twahovige twiva mulugendo. ³ Peyetuhegelye apono petwahwanite ukuyiwona ing’i ya i Kipulo, twakwete ulubali lwa kunena swe twidonya ku Siliya. Twasupite paboma ya i Tilo apono pevisiige ififundo uluhuma mula mukipugu ikikomi. ⁴ Twavafisile avevafuuvitwe uko, twikalite nawo filo fimufung’ati. Avevafuuvitwe valongige mu uludali lwa Umuhe, vamutige Pawulo alemwage ukubita ku Yelusalemu. ⁵ Neke ifilo peyefisisile twahesile. Mbevali viva pamwinga na avawo na avanawo vatusindikise mbaka vatuhumye muboma. Petufisile pamwani mbetuli twafugime swe tukwifunya. ⁶ Sweno, ndawe vatwilagige, hwehwe swe twihova ikipugu ikikomi, nawo ndawe vapilukige ukwawo. ⁷ Hwehwe twave mulugendo lwetu ukuhuma ku Tilo twafisile ku Tolemayo apono petwavahunje vanyalukolo vetu., twahwe nawo ikimunyi kimwi. ⁸ Imilawu yakwe twawusile swe twibita ku Kaisaliya. Uko twahele ku kaye ya umudalisi yeitambulwa Filipo uyu yeyula uyumwi va vala avimufung’ati avevahagule kula ku Yelusalemu. ⁹ Uyo eina valive vadatu vigani vevavina ikipelwa cha uwuvisi. ¹⁰ Peyetwikalite uko filo fikefu, Umuvisi uyumwi yeitambulwa Agabo asile ukuhuma ku Yudaya. ¹¹ Atusye, (asile kwa hwehwe) swe itegula umusipi gwa Pawulo, akwiyavika mumawoko na mumagulu, ndawe itigila, “Umuhe Umwelu itigila de: ‘Avayudaya kula ku Yelusalemu vamuvika de umunu umunya umukandala ugu na ukumusopa mumawoko ga avamyanza!’ ” (avanu vesivamuseli Nguluvi) ¹² Peyetupulike ulo, hwehwe na vala avanu avangi avebaho twamugongolite Pawulo alemwage ukubita ku Yelusalemu. ¹³ Neke umwene atupitwe, “Mwisaka ukugita kiki? Mwisaka ukudenya umutima gwangu kwa ukuvemba kwenyu? Nene si wita ngwidikila hela ukusopwa mundinde kula ku Yelusalemu pesi nambi ukufwa ukwimila Umutwa Yesu.” ¹⁴ Peyetulemilwe ukumutanila twakatwike, swe twitigila hela, “Uwende wa Nguluvi wewupigikage!” ¹⁵ Petwikalite pala lusika, twawopite ifitegulo fyetu swe, twiva mulugendo twibita ku Yelusalemu. ¹⁶ Avangi mwa vala avevafuuvitwe va ku Kaisaliya vahelelise pamwinga na hwehwe, swe vakutusindika ku kaye ya Munasoni kwe twabitige ukwikala kwa ulusika ludodo. Munasoni ali munyang’i va ku Kipulo na yeafuuvitwe ifilo fyolofu. ¹⁷ Twavelige twifika mu Yelusalemu, vanyalukolo avefauuvitwe vatwanuche lunofu hilo. ¹⁸ Imilawu yakwe Pawulo ahele pamwinga na hwehwe ukumuhungila Yakobo, na avavaha mbevali va ilikanisa vepovali. ¹⁹ Peyetuvahunje, Pawulo ndawe awolelelige mbesili Nguluvi seakapigite kwa avamyanza (avanu vesivamuseli Nguluvi) ukukola mukipigo chakwe. ²⁰ Pevapulike ulo, vamulumbite Nguluvi. Sweno ndawe vamutigilige Pawulo, “Munyalukolo, uvawene ukutigila povali Avayudaya mbilima mbilima vevafuuvitwe na mbevali iwo pevinatila hilo indagilo sa Musa. ²¹ Iwo vakakupulike veve ukutigila uhele ukuvigisa Avayudaya vevakwikala mung’i sa avamyanza valemwage ukwinatila indagilo sa Musa, valemwage ukuvawoola avana vakwamisi na kangi valemwage ukwinatila imisimu ija Avayudaya. ²² Lino, ulukani ulu luva ndawuli? Pakuva nachene yevapulika ukuta veve ulibaha. ²³ Sweno, ugitage lwe hwehwe tukukulongela. Ipa povali vanu vevali mulwilapo. ²⁴ Ubite uhange nawo mulofugo na uvahombelage amagobole ga inambika sambi vamogwe na ifwili sawo. Apo pe avanu mbevali valukagula ukutigila ing’ani sila sevakapulike isa veve kumbi sawudesi, na ukutigila veve pewinatila imisimu na indagilo sa Musa. ²⁵ Neke vala avanu avamyanza vevakafuuvitwe, iwo tukavasindiche ulwandiko tukuvalongela lwe tukalamwe: ulwa valemwage ukulya ikinu ikitawule nambika kwa ifihwana nguluvi ifya uwudesi, valemwage ukulya inyama ya ing’oko yeyibuditwe, valemwage na ukwingila muwugoni.” ²⁶ Sweno, Pekuche Pawulo avinwe vala avanu ndawe vavangige ukusunyalila na ukugita ulofugo pamwinga nawo. Swe ndawe ingilige mutembeli ukuvalongela ulwa uwukwilanifu wa ifilo fya ulofugo na ukutawulwa kwa inambika yumwene na vala avayagwe. ²⁷ Ulusika lwe ifilo ifyo ifimufung’ati sambi fisila, Avayudaya vevevahumite ku lutanana ulwa ku Asiya vamuwene Pawulo mu Tembeli. Ndawe vasagasige ililakali mwilugu lya avanu mbevali, swe vakumwibata, ²⁸ kono viyoya vitigila, “Mwevanyang’i va mu Isilaeli, mutange, mutange! Uyu yeyula umunu yeakwigisa apono bahapavesaga ing’ani sesisomeng’asa avanu va Isilaeli, na indagilo sa Musa na apono ipa apelu. Na kulino de avingise mu tembeli avanu avamyanza na ukupananga apono ipa apelu.” ²⁹ Chechalekite valonge ulo pakuva vevamuwene Tolofimo, umunyang’i va ku Efeso, iva alipamwi na Pawulo muboma, vahosige ulwa Pawulo ake amwingise mu tembeli. ³⁰ Swe iboma mbeyili yave yisomeng’ine, avanu vasile vihuma imbali mbesili, swe vakumwibata Pawulo, vakumukuluna, vakumuhumya mu Tembeli, na baho baho vidinda imilyango ija i Tembeli. ³¹ Ililugu lyawendige ukumuwulaga, neke ulukani ulo lwapulise kwa Umuvina va avanyigalu umulumi ukutigila i Yelusalemu mbeyili yisasing’ine. ³² Swe, ndawe umuvina va avanyigalu ndawe ategulige vanyigalu na umulongola, swe ibitaga ku lililugu lya avanu. Nawo vavelige vakumuwona Umuvina va avanyigalu na vala vanyigalu, swe ndawe vamulekige Pawulo ukumutova. ³³ Umuvina va avanyigalu alaje vamwibate nu kumupinga ni minyololo givili. Sweno ndawe awusige, “Uyu ye nani, na agisile kiki?” ³⁴ Avangi mula mwilugu lya avanu valongige ulu avangi lula. Pakuva avanu vevasasing’ine, Umuvina va avanyigalu alemilwe ukukikagula chevakumuvala, alaje avanu vakwe vamusindike mwipuli. ³⁵ Pawulo avelige ifika pamulyango apagang’amufu, avanyigalu vawene lunofu vamwegale pakuva iliyowo lye likomi mwilugu. ³⁶ Pakuva lilugu likomi lya avanu vavaninilige viyoya vitigila, “Leke tumuwulage!” ³⁷ Pevamusopige mwipuli, Pawulo amususile Umuvina va vanyigalu itigila, “Hwanite ukukulongela lukani?” Yula Umuvina va avanyigalu amupitwe, “Ndawuli uva ukisele i kigiliki? ³⁸ Ngali veve siwiyuyula umumisili ye isusi hela akasagise liyowo na ukuvasindika avanu mbilima sitayi avawulasi kubalali!” ³⁹ Pawulo apitwe, “Nene ndi Muyudaya, umwegalilwa ku Taliso ye yili mulutanana lwa ku Kilikiya, ndimunyang’i va iboma inambulike. Ngukusuka, unawule ndonge na avanu.” ⁴⁰ Yula Umuvina va avanyigalu swe akumutawula alonge. Neke Pawulo pe agang’amwike pachanya, ndawe avasinisige avanu kwa liwoko vavelige vikatuka, swe ndawe avangige ukulonga nawo mundongele ya i Kiebulaniya itigila,

¹ “Vanyalukolo vangu na avadadangu, mumulikisage lino pengwikanila panyenye!” ² Vavelige vipulika ulwa ilonga nawo kwa i Kiebulaniya vaginite ukusika sili ukulutila pamwandi. Nave Pawulo ave pealonga, ³ “Nene ndi Muyudaya, umwegalilwa ku Taliso ye yili mulutanana lwa ku Kilikiya. Neke ndavinie baha ipa pa boma pa Yelusalemu pamagulu ga Umwigisi Gamalieli. Nzigisiwe ukwinatila hilo Indagilo isa avakukwetu. Nditawe inumbula yangu mbeyili kwa Nguluvi ndawe nyenye mbemuli lwe mwiwali mbaka neng’ino de. ⁴ Ndavatesige na ukuvawulaga vala avanu avinatilige ing’asi iyi. Ndavibatige avagosi na avang’inetu na ukuvasopa mundinde. ⁵ Na ulu Umutambisi Umuvina na avavaha mbevali va pawuhigilo vahwanite ukolelela ulukani ulu. Ukuhuma kwa avene ndategulige ulwandiko lwendasindikilige vala vanyalukolo vetu Avayudaya vevikalige ku Demasiki. Ndahele ku Damesiki sambi ngavibate avanu iwo na ukuvaleta ku Yelusalemu kono vapinge sambi vahigwe.” ⁶ “Sweno, pende mung’asi pipi na ukufika ku Damesiki, wita pakivalilo cha mutanda pamunyi, ulung’ali lukomi lwawonike ukuhuma kuchanya kwilanga sukumwi lukung’alikila imbali mbesili. ⁷ Ipo ndagwe pasi, swe ndipulika iliswi likunigila: ‘Sawulo, Sawulo! Mbi ndawuli ukunesa?’ ⁸ Nane ndawusise: ‘Winani veve ve Mutwa?’ Nave ndawe anigilige: ‘Nene ndi Yesu uva ku Nasaleti ye veve ukunesa.’ ⁹ Vala avayangu valuwene lula ulung’ali neke sivapuliki iliswi lya yula yetwalonganige. ¹⁰ Sweno, nene ndawe ndawusige: ‘Ngitage ndawuli ve Mutwa?’ Nave Umutwa akunigila: ‘Wime, ubitage ku Damesiki na kuko kwe usakulongelwa mbesili se upiga veve.’ ¹¹ Pakuva umwangila gwa ulung’ali lula gwahomite amiho lwalesile ndemwe pakulava ipo avayangu vala vetwepamwi vandibete iliwoko vakusogosa mbaka petwifika ku Damesiki.” ¹² “Uko epwali umunu uyumwi yeitambulwa Ananiya, umunu umwogopa Nguluvi, umunyakwinatila indagilo setu na yee mutambule hilo pa Avayudaya vevikalige ku Damasiki. ¹³ Uyo asile ukundava, imite pipi na pende pwali, itigila: ‘Munyalukolo Sawulo! Lavage kangi.’ Ulusika lulo swe ndilava, ndawe ndamulavige. ¹⁴ Ananiya atigee, ‘Nguluvi va avakukwetu akuhagwe veve sambi usikagule ing’ani sakwe, seiwenda na ukumuwona yula umukami vakwe umugolofu na ukumupulika umwene peilonga. ¹⁵ Pakuva umolelela kwa avanu mbevali ukuvalongela mbesili seukasiwene na ukupulika. ¹⁶ Sweno, mbi wihavila kiki? Lamuke ubatisiwe udegepelwe inzanangifu sako na ukulidikila ilitawa lyakwe.’ ” ¹⁷ “Swe, ndapilwike ku Yelusalemu, na pendifunyige mu Tembeli, swe ndilagilwa kinu ndiva ndandilota. ¹⁸ Ndamuwene Umutwa akundongela: ‘Wangufye! Uhege mu Yelusalemu lilino pakuva avanu va ipa sividikila uwolelesi wako kwa nene.’ ¹⁹ Nane ndamupitwe: ‘Ve Mutwa, avene valukagwe hilo ulwa nene yeyuyula yeakolige uko na uko mumasinagogi na ukuvibata na ukuvapinga vala ave vafuuvitwe. ²⁰ Na ukutigila umolelesi vako Sitefani pevamuwulagige, yunene ndebaho ndihekelela ikipigo icho na ukulolela imyenda ja vala vevamuwulagige.’ ²¹ Nave Umutwa andonje: ‘Bitage, ngutuma kutali kwa avamyanza.’ ” ²² Mbaka ipo, avanu vala vepevamupulikisa, neke avelige ilonga ing’ani isi, swe ndawe vavangige ukuyova, “Mumuhesage uyu konivala! Umunu yeindawe uyu silwinoga ave mumi.” ²³ Vaginite ukuyova na ukuyunza imyenda jawo na ukutimulanga amangundi kuchanya. ²⁴ Yula Umuvina va avanyigalu alaje avanu vakwe vamusindike Pawulo mwipuli, akuvatigila vamutovage ingoda sambi vakikagule ikivalwa chekileka avayudaya vamuyoyele. ²⁵ Neke vavelige yevamupinzile sambi vamutove ingoda, Pawulo amuwusise umulongola va avanyigalu uyumwi yeeimite pala, “Mbi nyenye mwivatawule ukumutova ingoda umunu munyang’i va mu Lumi wesalahigwa?” ²⁶ Yula umulongola va avanyigalu peapulike ulo, swe akumulongela Umuvina vawo vanyigalu itigila, “Wisaka ukugita kiki? Umunu uyu munyang’i va mu Lumi!” ²⁷ Swe, umuvina va avanyigalu ahele kwa Pawulo, akumutigila, “Ndongele, nachene veve, wimunyang’i va mu Lumi?” Pawulo ndawe amupitulige, “Ena” ²⁸ Umuvina va avanyigalu atigee, “Nene ndimunyang’i va mu Lumi kwa kugula amagobole molofu.” Swe Pawulo amutigee, “Neke nene ndimunyang’i va mu Lumi kwa kwegalilwa mumo.” ²⁹ Vala avanu vevasakige ukumugosagosa Pawulo swe vitagalila. Na yuyula umuvina va avanyigalu ogwipe avelige akulukagula ulwa kumbi Pawulo munyang’i va mu Lumi na ulwa yeamupingite na iminyololo. ³⁰ Imilawu pekuche, Umuvina va avanyigalu asakige ukukikagula ikivalwa ichene cheisongelelwa Pawulo ku Vayudaya. Ndawe vamuwopolige Pawulo iminyololo, swe ilagila avatambisi avavina na avavaha va pa wuhigilo vakong’anage. Sweno ndawe amuletige Pawulo, akumwimya pala pa wuhigilo.

¹ Neke baho umwene Pawulo swe akuvalavila hilo vala avavaha va pawuhigilo, ndawe avangige ukulonga, “Vanyalukolo vangu, mbaka neng’ino de nene ngave ngwikala na inumbula yangu ngolofu pamiho ga Nguluvi.” ² Ipo umutambisi Umuvina Ananiya swe ilagila vala ave vimite pipi na Pawulo vamutove na ikipi mumulomo. ³ Swe, Pawulo akumutigila, “Umwene Nguluvi akutova ikipi veve yewindawe ulukanzi uluhilive iswakala! Luhwana ndawuli veve uteng’emale ipo sambi unyige nene kwa ukwinatila indagilo kono we yuveve kangi ukwananga indagilo wilagila nene vanovage?” ⁴ Avanu ave vimite pala swe vakumutigila Pawulo, “Ukumuliga umutambisi Umuvina va Nguluvi!” ⁵ Swe Pawulo apitwe, “Vanyalukolo vangu, nene sindilukaguligi ukutigila umwene ye Umutambisi Umuvina. Pakuva Uwandike Uwelu wilonga de: ‘Ulemwage ukumulonga fibi umunzagila va avanu vako.’ ” ⁶ Neke ulusika ulo Pawulo alukagwe ukutigila avamwi mwa vala avavaha va pawuhigilo veve va Sadukayo na avamwi ve va Falisayo. Swe ayofile pala pawuhigilo: “Vanyalukolo vangu nene ndimufalisayo, mwana va umufalisayo. Nene vandetite ipa pawuhigilo pakuva ndihuvye ukutigila avafwe savasilibuka.” ⁷ Pealonzile ulo, swe lwalamwike ulubesa lukomi na iliyowo mwa avafalisayo na Avasadukayo na avavaha va pawuhigilo swe vakwigava pavili. ⁸ Na ikivalwa ichene che iki. Avasadukayo vibatilye ukutigila avafwe sivavisilibuka, vasupali vanyivaha, na imyuhe najo gisupali. Neke Avafalisayo vakwihuvila mbesili iso isidatu. ⁹ Neke liyowo lyaginite na avamwi va avigisi va indagilo va ikilugu cha Avafalisayo vimite vabesise kwa uludali vitigila, “Hwehwe situkuluwona ulukani lwa uwananzi kulumunu uyu, yilava apangi Muhe nave munyivaha alonzile nave.” ¹⁰ Iliyowo lwaginite ukutagalila mbaka umuvina va vanyigalu ogwipe ukutigila Pawulo vahwanite vamunyugulase ahume polofu. Swe, ndawe alagilige vanyigalu vakwe vingile mula mwilugu lya avanu, vamuhese Pawulo na ukumupilula mwipuli. ¹¹ Neke ikilo icho, Umutwa imite pipi na Pawulo, swe akumutigila, “Kangasage Umutima! Unzolelelye mu Yelusalemu, upiga ndahihyo na muboma iya ku Lumi.” ¹² Peyekuche, Avayudaya vakong’ine kinyele, swe viva mulwilapo vitigila: “Situlya nambi ukunywa mbaka peyetumuwulige Pawulo.” ¹³ Avanu iwo vevalutye kuvanu machumi gatayi ave vifingite ukupiga ulukani ulo. ¹⁴ Swe, vahele ku vatambisi avavina na avavaha, vitigila, “Hwehwe twilapite ukutigila situgesa ikinu chechekivesaga mumilomo jetu mbaka ipo petumuwulige Pawulo. ¹⁵ Sweno, nyenye pamwinga na avavaha va pawuhigilo mutumage umunu kwa umuvina va vanyigalu sambi amulete Pawulo kwa nyenye mwiva ndamwisaka ukupulika hilo ulukani kulumwene. Neke hwehwe twigelanisa ukumuwulaga wesalava afika ipa.” ¹⁶ Neke umukwamisi uyumwi umwipwave va Pawulo apulike ikigaho icho, swe ahele mwipuli, ndawe amulongelige Pawulo ulwa ikigaho icho. ¹⁷ Ipo Pawulo amukemelye uyumwi va avanyigalu, akumutigila, “Musindike umukwamisi uyu kwa umuvina va avanyigalu; ina lukani lwa ukumulongela.” ¹⁸ Munyigalu amwegwe yula umukwamisi, akumulongosa mbaka kwa Umuvina va avanyigalu, itigila, “Yula Pawulo yeali mundinde ang’emelye swe akusuka ndimulete umukwamisi uyu kwa veve pakuva ina lukani lwa ukukulongela.” ¹⁹ Umuvina va vanyigalu amwibete liwoko uyo umukwamisi, swe akumusindika apono pa ikilega, ndawe amuwusige, “Wina lukani luki lwewisaka ukundongela?” ²⁰ Umwene ndawe atigilige, “Avayudaya viyidikise sambi vakusuke uvasindikile Pawulo ku wuhigilo vakwigita viva nda vina lukani lwe avavaha va pawuhigilo visaka ukupulika hilo ulwa umwene. ²¹ Neke veve ulemwage ukwidikila pakuva povali vanu vevalutye kuvanu machumi gatayi vevigelanise ukumudibukila. Nawo vilapite ulwa sivalya nambi ukunywa mbaka peyevamuwulige. Na kulino de vigelanise vasindye hela chewilamula veve.” ²² Umuvina va vanyigalu ndawe amulekige ibitilage akumukenyela alemwage ukumulongela munu yeyeavesaga ukutigila amulonje ing’ani iso. ²³ Sweno, umuvina va avanyigalu avakemelye avanyigalu avavili swe akuvatigila, “Muhagulage avanyigalu magana gavili, na vanyakuhova ifwalasi machumi gimufung’ati na vanyigalu magana gavili avakolye imigoha, sambi vabite ku Kaisaliya; sambi muhege wesikilafika pakivalilo icha wudatu neng’ino de pakilo. ²⁴ Muvikage na ifwalasi isingi sambi ahove Pawulo, mumufisage mutelefu kwa Felisi, umutema va ulutanana.” ²⁵ Neke umuvina va avanyigalu andike ulwandiko de: ²⁶ “Nene Kulawudio Lisiya ngukwandikila veve ve mutambule Felisi, ve Mutema va ulutanana. Ngukutigila Kamwene! ²⁷ “Avayudaya vamwibete umunu uyu na supwe vamuwulage manyi nene ndendive sindilalongelwa ukutigila umwene munyang’i va mu Lumi swe nene ndahele pamwinga na vanyigalu ukumupoka. ²⁸ Ndamusindike pawuhigilo wawo uwukomi sambi ndikikagule ikivalwa chevakumusongelela. ²⁹ Ndalukagwe ukutigila inongwa iyo yeyimye mulubesa lwa imisimu igilipangi na pangi mundagilo sawo palulo sindaluweni ulukani lweapigite lweluhwanite ahigwe ukufwa nave ukusopwa mundinde. ³⁰ Ndavelige ndipulika kangi ukutigila Avayudaya vevagahite ukumuwulaga, nene ndalamwe ukumusindika kwa veve. Ndalonje vevakumusongela valetage inongwa iyo kwa veve.” ³¹ Swe, vanyigalu iwo vamwegwe Pawulo ndawe lweve valagile; vamusindike kikilo kicho mbaka ku Andipatele. ³² Pamilawu avanyigalu vevagendige iya ligulu vapilwike kwipuli, swe vakuvaleka vala vanyigalu avevahofile ifwalasi vave pevabita mulugendo pamwinga na Pawulo. ³³ Peyevafisile ku Kaisaliya vamupelye umutema va ulutanana lula ulwandiko na ukumutawula Pawulo kulumwene. ³⁴ Felisi avelige akwimba ulwandiko ulo avawusise Pawulo ihuma ku lutanana ululikwi. Vavelige vakumulongela ukutigila ihuma ku lutanana lwa ku Kilikiya, ³⁵ swe akumutigila, “Ngupulikisa inongwa yako pevala vevakukusongela yevafisile.” Sweno ndawe alagilige Pawulo vamuvike mukumingwa mu bwalo ya Helodi.

¹ Peyefilutye filo fihanu, umutambisi Umuvina Ananiya afisile ku Kaisaliya iva pamwinga na avavaha avamwi na Telitulo umulonzi vawo va indagilo. Vahele kwa yula umutema va ulutanana ukumulongela inongwa yawo na Pawulo. ² Vamukemelye Pawulo, na Telitulo itosa inongwa de: “Ve mutambule Felisi, ukwimila uwutema wako uwunofu wewukalesile uwikalakunoga uwukomi na ukave wipitula pitula ing’ani ingomi ngomi kwa uwunofu wa avanu va ing’i yetu. ³ Na ulukani ulu lukwanukilwa kwa luhekelelo na ululumbo ulukomi hilo mbepali na apono mbepali kwa veve. ⁴ Neke, tuleke ukukufuvalisa hilo, tukukugongola kwa uwunofu wako, utupulikise ulukani lwetu ludodo hela. ⁵ Hwehwe tukalukagwe ukutigila umunu uyu simunofu va kwikomalalila hilo. Umwene ayisagasa liyowo mu Vayudaya apono bahapavesaga konivala na kangi ye muvina va wula uwulilumwi wa Avanasaleti. ⁶ Kangi agelite na ukuliga i Tembeli, nahwe twamwibete na ukumusopa mundinde. [Twasakige tumuhige ukwinatila Indagilo setu. ⁷ Neke Lisiya, Umuvina va avanyigalu, swe akwingilila pagati, akumuhesa kwa ludali ukuhuma mumawoko getu. ⁸ Sweno, ndawe alagilige vanyakumutosa vasage kwa veve.] Manyi nave umugosegose na ukumuwusa wusa yuveve, ulukagula hela ukutigila ing’ani isi setukumutosa twilongela mumwene.” ⁹ Neke Avayudaya avangi vamutange umuyawo vitigila nachene seilonga sesene hilo. ¹⁰ Sweno, Umutema va ulutanana agolwe liwoko akumutawula Pawulo sambi alonge. Nave Pawulo atige, “Nene ndihekelela ukwikanila pa veve pakuva ngulukagula ukutigila ukave mutema va avanu vetu kwa myaka myolofu. ¹¹ Nditigila nave uhwanite ukulukagula yuveve ukutigila ifilo fyefilutye kufinyichumi na fivili pengengahele ukumusunyalila Nguluvi ku Yelusalemu. ¹² Avayudaya sivafisili nene ngwibesa na umunu yeyeavesaga. Na sivafisili nene ndisagasa liyowo mu Tembeli nambi mumasinagogi gawo nambi apono apangi mula muboma iyo. ¹³ Na ipa sivahwaniti ukukangasa kwa uwolelesi mu ng’ani iso sevakusongela nene. ¹⁴ Nene chengwidikila paveve che iki: Nene ndakumusunyalila Nguluvi va avakukwetu na ukwikala kwa ukwinatila Ing’asi yila ye avene vakuyitigila ya vala va uwulilumwi wa avadesi. Na nene ndifuuwa ing’ani mbesili inzandike mufitabu fya Indagilo na avavisi. ¹⁵ Nene ngumwihuvila Nguluvi, na avene nawo vina luhuvi lulo, ukutigila avanu, avanofu na avananzi, savasilibuka. ¹⁶ Palulo ngave mbepali ndimupifu ukuva na inumbula ngolofu pamiho ga Nguluvi na pavanu. ¹⁷ “Peyendikalite imyaka myolofu kutaali, ndapilwike ku Yelusalemu sambi ndivaletele avanyang’i vayangu ifitawulwa na ukutawula inambika. ¹⁸ Ulusika lwendapigige ulo pebaho pevafisile nene mu Tembeli, pendesinzile ulofugo. Ipo pepagaya ililugu lya avanu nambi iliyowo. ¹⁹ Neke pepovali na Avayudaya avangi ukuhuma ku lutanana lwa ku Asiya; iwo vevake vahwanite ukuva ipa paveve vitosa wone vake vave vina lukani lwa ukusongela nene. ²⁰ Apangi, valeke iva vevipwali valonge uwananzi wevakawuwene kwa nene ulusika lwendenzimite pawuhigilo wawo uwukomi, ²¹ pesi ing’ani isi sendavalonje pendenzimite pavene: ‘Nyenye mukunyiga neng’ino de pakuva nene nzinatye ukutigila avafwe savasilibuka!’ ” ²² Ipo, Felisi, yula yealasisele umwene wunofu Ing’asi iyo, swe itigila inongwa yime baho tandi ukupulikiswa. Swe akuvatigila, “Ndiyilamula inongwa iyo peave asile Lisiya, Umuvina va avanyigalu.” ²³ Swe akumulagila yula umulongola va avanyigalu amusope Pawulo mundinde, neke ulwene vamulekelage uwutemapakwe wudodo, vanyawiyendi wakwe sivavatani ukumugendela na ukumutanga fyagulwime. ²⁴ Pefilutye ifilo fikefu, Felisi afisile pamwinga na uvakwe Dulasila yee Muyudaya. Alaje Pawulo vamulete, amupulikise lweilonga ulwa ukumufuuwa Yesu Kilisito. ²⁵ Neke ulusika Pawulo peavangige ukulonga ulwa uwugolofu, na ulwa uwutuunafu na ulwa ikimunyi icha ukuhigwa ikikusa, Felisi ogwipe, sweitigila, “Kulino uhwanite wibitile; sangukemela kangi pendive na ikilega.” ²⁶ Na baho baho ihosige ukutigila Pawulo ake amufupa. Na ukwimila lulo amukemelige Pawulo kolofu kolofu itinasa nave. ²⁷ Pegilutye myaka givili, Polikiyo Fesito ategwe uwutema pa Felisi, swe iva mutema va ulutanana pakuva Felisi awendige ukwiyendelesa kwa Avayudaya, Felisi amulekite Pawulo we ali mundinde.

¹ Neke umwene Fesito peyeafikite pala pa lutanana na ukwikala filo fidatu, ahesile pa Kaisaliya ibita ku Yelusalemu. ² Avatambisi avavina pamwinga na avalongola va Avayudaya vamulonje ulwa inongwa yevinayo kwa Pawulo. Vamugongolite Fesito, ³ sambi avasindikile Pawulo ku Yelusalemu; pakuva yevevagahite ukumusigamila vamuwulage mung’asi. ⁴ Neke Fesito avapitwe, “Pawulo asigala mundinde kuko ku Kaisaliya na yunene sinyava pakubita kuko. ⁵ Mulekage avalongola venyu tubitase nawo sambi vakatose inongwa yawo na Pawulo wone akapigite ikinu chechekivesaga cha wananzi.” ⁶ Fesito ikalite nawo kwa ulusika lwa ifilo fyefifikite kufimunana na apangi finyichumi de, ndawe apilukige ku Kaisaliya. Peyekuche ahele pawuhigilo, swe ilagila vamulete Pawulo umo. ⁷ Neke peafikite Pawulo, Avayudaya avevahumite ku Yelusalemu vamupilime swe vivanga ukumusongela ing’ani nzolofu ingomingomi sesavalemite ukukangasa ulwa vilongela mumwene. ⁸ Pakwikanila, Pawulo atige, “Nene sindananzili kinu chechekivesaga icha indagilo isa Avayudaya, nambi kwa Itembeli, nave kwa Kaisali.” ⁹ Neke Fesito awendige ukwiyendelesa kwa Avayudaya ndawe amuwusige Pawulo, “Ndawuli uke uwenda ukubita ku Yelusalemu sambi uko ukahigwe inongwa yako pa nene?” ¹⁰ Neke Pawulo apitwe, “Nene nzimite ipa pawuhigilo wa Kaisali, na baha ipa pepahwanite nene nyigwe. Ndawe na yuveve we ukulukagula wunofu, ukutigila nene sindavananji Avayudaya ikinu chechekivesaga. ¹¹ Sweno, wone mboneke ndimwananzi na kwa uwananzi uwo nene hwanite nyigwe ukufwa apo nene sindigongola ukudegepelwa nda. Neke wone ing’ani sevakusongela nene avanu iva sawudesi, asupali yeanawula nene kwavene. Nene ndihamya inongwa iyi yibite kwa Kaisali!” ¹² Sweno, Fesito peyealongine na avavaha vakwe swe akumutigila Pawulo, “Ususile ukuhamya inongwa yibite kwa Kaisali, sweno, ubita kwa Kaisali.” ¹³ Peyefilutye filo fikefu, Umutema Agilipa na Belenike vafikite ku Kaisaliya sambi vamuhungile Fesito. ¹⁴ Vikalise na Fesito kwa ifilo fyolofu uko nave Fesito ndawe amolelelige Umutema inongwa ya Pawulo ukutigila, “Ipa pwali umunu uyumwi ye Felisi amulekite musope mundinde. ¹⁵ Ndavelige ndibita ku Yelusalemu avatambisi na avavaha va Avayudaya vamusonje kwa nene na ukusuka ndimuhige. ¹⁶ Neke nene ndavapitwe ukutigila ugo simusimu gwa Avalumi ukumuhiga umunu we salatang’ana na vala vanyakumusongela na ukupelwa ikilega nave agele ukwikanila mwa ing’ani iso sevakumusongela. ¹⁷ Sweno, peyevafisile ipa sindahaafili, swe ndikong’asa avanu pawuhigilo ikimunyi cha kavili, swe ndilagila umunu uyo vamulete. ¹⁸ Vala vanyakumusongela vimite neke sivamusonji ulukani ulubi nambi lwa uwananzi ndawe lwe nene ndihosige. ¹⁹ Neke ndalukagwe ulwa vibesige nave mung’ani isingi singi isa ulufuuwo lwawo na ulwa umunu uyumwi yeitambulwa Yesu yealafwe, neke Pawulo peibatilila ukutigila umunu uyo pemumi. ²⁰ Nene sindaseliti ulwa ukupiga mwidati ilyo. Sweno, ndamuwusise Pawulo wone awenda abite akahigwe pawuhigilo kula ku Yelusalemu ulwa inongwa yakwe. ²¹ Neke Pawulo peasusile ukuhamya inongwa, asuusile asigale mundinde mbaka uwulamusi wa inongwa iyo wulamulwe na Kaisali. Nambi nene ndalamwe ukumuleka mundinde mbaka pemba yenywanite umusindika kwa Kaisali.” ²² Swe Agilipa amutige Fesito, “Nane ngembwenda ukumupulika umunu uyo yunene.” Fesito akumutigila, “Umupulika imilawu.” ²³ Sweno, peyekuche, Agilipa na Belenike vasile mu bwalo ya umukong’ano kwa lulumbo viva pamwinga na avavina va avanyigalu na avatema va iboma. Fesito ndawe alagilige vamuletage Pawulo mula mubwalo, ²⁴ ndawe atigilige, “Ve Mutema Agilipa na mbemuli yemwipwali ipa pamwinga na hwehwe! Ipa apenyu pwali umunu ye Avayudaya mbevali avipwali ipa na vala va ku Yelusalemu vasuusile mige lukani kulumwene we viyova vitigila umunu uyu silukuvagila ulwa avelage peanana. ²⁵ Neke nene sindaluweni ulukani ulubi nambi lwa uwananzi weweuvesaga wewuhwanite uyu ahigwe ukufwa. Neke, pakuva Pawulo umwene akasusile ukuhamya inongwa yibite kwa Kaisali, ngalamwe ukumusindika. ²⁶ Pede kwa ulubali lwa nene ndimugaya lukani hilo lwehwanite ndimwandikile Kaisali ulwa umunu uyu. Nambi nene ndimulesile ipa panyenye na pa veve ve Mutwa Agilipa, petumugosise, sambi ndive na cha ukwandika. ²⁷ Ndihosa ulwa luva lukani lwa wupuva ukumusindika umunyandinde wesiwilonga inongwa iyene yevakumusongela.”

¹ Sweno, ndawe Agilipa amutigilige Pawulo, “Ngukutawula wilongele.” Ipo Pawulo agolwe liwoko lyakwe akwilongela de: ² “Mutema Agilipa, ndina mbalasi hilo neng’ino ukwilongela apako veve ulwa ing’ani se Avayudaya vakusongela nene. ³ Ndihekelela pakuva veve usisele hilo imisimu ja Avayudaya na amadati gawo gevahele vakwilema avene kwa avene, ngukugongola umulikise kwa wukangalifu. ⁴ “Avayudaya vanzele nene uluhuma pa wudodo wangu, na lwendikalige uluhuma pamwandi mung’i yangu uko ku Yelusalemu. ⁵ Vanzele kwa myaka myolofu, wone vawende, vahwanite ukolelela ulo, na ulwa ukutigila nene ndikalige mu uwulilumwi na vala avanyakwinatila hilo ing’ani isa ulufuuwo lwetu, kwekutigila ulwa Kifalisayo. ⁶ Na kulino de ndipwali ipa ndihigwa ukwimila uluhuvi lula lwe Nguluvi avahuvise avakukwetu. ⁷ Uluhuvi ulo lwelulo lwevevihuvye avanu vetu ing’olo ichumi na sivili, vakumupulikisa Nguluvi kwa uwinatifu kikimunyi nakikilo. Ve Mutema, Avayudaya vakusongela ukwimila luluhuvi lulo! ⁸ Mbi ndawuli nyenye mwiwona lutalamu ukufuuwa ukutigila Nguluvi akuvasilibula avafwe? ⁹ Nachene yunene ndefuuvitwe, ukutigila lumbaje nene ukupiga nzolofu ukulibesa litawa lya Yesu Umunasaleti. ¹⁰ Na iso sendapigite uko ku Yelusalemu. Yunene de, pendemelitwe ululagi ukuhuma kwa avatambisi avavina, ndivasope mundinde avanu va Nguluvi. Na pevahigigwe ukuwulagwa ulo nane ndatosige isimbi yangu ngwidikila. ¹¹ Na kolofu ndavatovige mumasinagogi mbegali, na ukuvangala valubihilage ulufuuwo lwawo. Na ililakali lyangu kuvene lyaginite hilo, nambi ndagendige ukuwolela mbaka na mu boma na isilipataali. ¹² “Na papene baho, pendabitige ku Damesiki ikimunyi ikingi ndimupele ululagilo ukuhuma kwa avatambisi avavina. ¹³ Ve mutambule, ulusika lwe nde mung’asi, pakivalilo cha mutanda pamunyi, ndawene ulung’ali ulukomi ukulutila ulwa ilisuva lukutung’alikila imbali mbesili ukuhuma kuchanya, nene na vala avayangu ve twepamwinga nawo mulugendo. ¹⁴ Hwehwe mbetuli twagwe pasi, nane ndapulike iliswi likunigila mundongele ya i Kiebulaniya: ‘Sawulo Sawulo! Mbi mbi ndawuli kunesa nene? Veve ukwifwahisa hela wiva nda idogovi yeyipaana ichuma ichugi cha umunyamwenayo.’ ¹⁵ Nene ndamuwusise: ‘Mbi winani veve Mutwa?’ Neke Umutwa apitwe: ‘Nene ndi Yesu ye veve ukunesa.’ ¹⁶ Nave ndahihyo, lino lamuke, wime unoge. Nguwoneche sambi nguvike nachene uve wimukami vangu. Uvalongela avanu avangi sewilavye neng’ino na isingi sengulagila pambele. ¹⁷ Nene ngupoka kwa Avayudaya na kwa avanu va ing’i isingi avamyanza kwe nene ngutuma. ¹⁸ Veve uvadindula amiho gawo sambi uvawuyape vahume mu lwisa vingile ku welu; vahume mu wutema wa Setani, vamupitukile Nguluvi, sambi pevafuuvitwe, vadegepelwe inzanangifu sawo sambi vahange na vala avana va Nguluvi.’ ” ¹⁹ “Neke lino baho, ve Mutema Agilipa, nene ndalemilwe ukuva na mbedasi kwa ukugubulilwa uko kwekwihuma kuchanya. ²⁰ Neke ndavanzile ukudalika kuvanu va ku Damesiki, pambele kwa vala va ku Yelusalemu na va mung’i mbeyili ya mu Yudaya, kangi na kwa avanu va ing’i isingi vala avamyanza. Ndavasukanise vamupitukile Nguluvi na valagilage mu ifipigo fyawo ukuta yevapitwike munumbula sawo. ²¹ Iso sesene, sesalekite Avayudaya vakunzibata nene pende mutembeli, visaka vambulage. ²² Neke mbaka kulino pe nangwa na Nguluvi nambi nzimite de nguwolela mbevali, avavina na avadodo. Isi sendilonga nene sesisila se valonzile Musa na avavisi ulwa iso sasiwoneka; ²³ Ukutigila Kilisito saateseka kangi na ukuva muvele va kusilibuka ukuhuma kuvafwe, sambi adalike ukutigila ulung’ali lwa uwukombolwa luvang’aliche lino avanu mbevali, Avayudaya na avanu va ing’i isingi avamyanza.” ²⁴ Pawulo avelige iduga ipa pakwilongela, Festo alonzile kwa iliswi likomi itigila, “Pawulo! Mbi wiguluka lukwale! Ukwimba kwako ukulutye kukugulusa lukwale!” ²⁵ Neke Pawulo atige, “Nene singulwiki lukwale nda ve mutambule Fesito. Nene ndilongela mumwene hilo. ²⁶ Veve Mutema usisele ing’ani isi. Nambi nene ndilonga ndimugaya muhwehwe pa veve. Sindihuguvala ukutigila iso mbesili veve usisele pakuva ulukani ulu silwapigiki kwa kifiho. ²⁷ Mutema Agilipa, veve ukuvafuuwa avavisi? Ngulukagula ulwa ukuvafuuwa.” ²⁸ Agilipa swe akumupitula Pawulo, “Kwa ulusika ulu ludodo witigila nayunene umitule mbe mukilisito!” ²⁹ Neke Pawulo amupitwe, “Ngumusuka Nguluvi ukutigila, kwa ulusika ludodo naluve lukomi, si veve hela nditigila mbevali vevakumulikisa neng’ino vavelage ndawe nene, pesi ulwa valava na iminyololo.” ³⁰ Ipo Umutema Agilipa, na Umutema va Ulutanana, na Belenike na vala mbevali veve pamwinga nawo, swe vakwima. ³¹ Avanu peyevahesile pala, vavanzile ukulongana we vitigila, “Umunu uyu simwananga kinu chekihwanite kimwambuse ahigwe ukufwa nambi ukusopwa mundinde.” ³² Nave Agilipa amulonje Fesito ukutigila, “Umunu uyu ake ahwanite adindulilwe ndasi akahamise inongwa yakwe yibite kwa Kaisali.”

¹ Swe vavelige yevalamwe ukutusindika ku Italiya, ndawe vamuhanzige Pawulo na avanyandinde avangi viva mukumingwa na umulongola yeitambulwa,“Yuliyo umuvina va Avanyigalu vanyigana va ikilugu cha Agosito.” ² Twahofile ikipugu ikikomi cha Adilamito chechagendige kikolela mumwani inzolofu isa mulutanana lwa Asiya, swe ndawe twavangige ulugendo. Alisitako umunyang’i va ku Makedoniya ukuhuma ku Tesalonike eali pamwinga na hwehwe. ³ Peyekuche twasuupite pa mwani iya ku Sidoni. Yuliyo amupije lunofu Pawulo pa kumutawula avahungile vanyawiyendi vakwe sambi vamupele ifinu na ifuka yakwe. ⁴ Ukuhuma ipo twave mulugendo neke ikifulufumbi chekikomi chahumige kwetubita, swe twigendela ulubali lwa ing’i ya ikigunguli cha ku Kipulo kwe ikifulufumbi chekidodo. ⁵ Neke ndawe twalowokige ibahali ya ku Kilikiya na ku Pamufiliya, swe twisuupa pa Mula, iboma iya Lukiya. ⁶ Ipo yula umulongola va avanyigalu akifikite ikipugu ikikomi cha Alekisandeliya chechabitige ku Italiya, ndawe atusopige mumo. ⁷ Kwa ifilo fyolofu twagendige mola mola na kwa kutoka twafisile pipi na ku Nido. Pakuva ikifulufumbi chatupilulige kumbele, twahele kuwutalo twigendela mulubali lwa ku Kilete pipi na ku Lasi Salimone kwe ikifulufumbi che kidodo. ⁸ Twakwete palubali twigenda mola mola mbaka tufike apono pepitambulwa, “Pa kilowoko ikinofu.” Pipi na pa boma ya Laseya. ⁹ Ulusika lolofu yelwelulutye, na ulusika lwa ukwiyima ukulya yelwelulutye. Nalo lwe lutalamu ukubitaga nu lugendo mukipugu kila, ndawe Pawulo avakenyelige ukuta, ¹⁰ “Nye vanyalukolo, nene ndihosa ukutigila ulugendo lwetu ulu luva lutalamu na tuyasa fyolofu si kufinu ifilimumu hela na ikipugu, pesi kangi na wuwunani wetu.” ¹¹ Neke yula umulongola va avanyigalu aginite ukumupulikisa yula umunyakugendya ikipugu ikikomi na yula umwenacho ukulutila ing’ani sealonzile Pawulo. ¹² Na pakuva pa kilowoko kila pesipahwaniti vikale ulusika lwa pakitungwi, awolofu vawendige vaginage ukubita nu lugendo, na wone luhwane vafike ku Foinike, kula kwe vevahwana ukwikala ulusika lwa ikitungwi. Foinike che kilowoko cha ku Kilete ikidonyite ulubali lwa kusika kumihago na kunena kumihago. ¹³ Sweno, ulukala ulunofu ulwihuma kulutanana lwavanzile ukupuga, nawo swe vakwihosa ulwa ulo luvatanga; swe vivanga ulugendo vigendela pipi hilo na imwani iya ku Kilete. ¹⁴ Neke silwaluti lusika, ikifulufumbi ikikomi ikitambulwa, “Ikifulufumbi cha ku Kusika cha kumihago.” Chavanzile kihuma pa ing’i ya mu kigunguli. ¹⁵ Ikifulufumbi chatofile ikipugu ikikomi, na pakuva ikifulufumbi yechekitulemite swe ndawe twakilekige kiyunzwage na ikifulufumbi kila. ¹⁶ Neke ing’i iyimwi indodo ya mu kigunguli chekitambulwa Kawuda chatusikite ludodo na ikifulufumbi kila; na petukwete ulubali lwa kunena lwa apono pala twavanzile ludodo ukulongosa, nave ndahihyo ye kwa kutoka. ¹⁷ Vala awogesi va ibahali vakikwegite ikipugu ukuhuma mugati mwa ikipugu ikikomi, ndawe apingige ikipugu ikikomi nu mulegesi vipilimya swe vikangasa, wogopige ulwa vahwanite vahopele mulidope pala pa kilowoko cha Libiya. Swe ndawe visige ilyenda vakukileka ikipugu ikikomi kiyunzwage na ikifulufumbi. ¹⁸ Ikifulufumbi chaginite ukupuga na ikimunyi chakavili swe vavanzile ukutosa ifitegulo mululenga vihumya mukipugu ikikomi. ¹⁹ Ikimunyi chawudatu, vavanzile ukutosa kangi ifinu fya mukipugu ikikomi kwa amawoko gawo vawene. ²⁰ Kwa ifilo fyolofu sitwaliwonigi ilisuva nambi ing’eng’esi, ikifulufumbi chaginite ukupuga na uluhuvi lwa ukuponia uwumi wetu lwayasile. ²¹ Peyetwikalite filo fyolofu wesitwilya, Pawulo imite pagati apawo, itigila, “Vanyalukolo, mwemuve mumulikise tutane ukuhega ukuhuma ku Kilete, mwemupige ulu. ²² Neke lino nene nguvasuka mukangase imitima; asupali nambi mwa hwehwe umunu uyumwi yeayasa uwumi wakwe pesi iki ikipugu ikikomi hela. ²³ Pakuva igolo pakilo munyivaha va Nguluvi yula ye nene ndi munu vakwe na yeyuyo ye nene nda kumusunyalila akanzusye, ²⁴ akunigila: ‘Pawulo, lemwage ukogopa! Lukuvaje veve usakwima pa Kaisali; nave Nguluvi, kwa uwuwuya wakwe, akupelye uwende kwa ukuvapoka mbevali vemugendise na veve sambi valemwe ukuyaga.’ ²⁵ Sweno, Vanyalukolo, mukangasage imitima! Pakuva nene ngumufuuwa Nguluvi ukutigila luva ndahihyo ndawe lweandonje. ²⁶ Neke tutosewa mukilowoko cha pa kagunguli akangi de.” ²⁷ Neke pakilo ikimunyi icha ichumi na fitayi, ikifulufumbi chatuyunzige uko na uko mubahali ya Adiliya. Neke pipi na mukilo mugati awogesi va ibahali valukagwe ulwa tuve twipipi na ing’i ing’afu. ²⁸ Swe ndawe vagelige ukulava ikiseela icha ululenga vitoosa umulegesi umuwope ikinu ikisito, vapatite nzwambo machumi gatayi. Pambele vatoosise kangi vipata nzwambo machumi gadatu. ²⁹ Pakuva wogopige ukubumila amatalawe, vatosise ifinu fitayi ifisito kumbele ya ikipugu ikikomi; swe ndawe vifunyige sambi kwangupe kuche. ³⁰ Awogesi va ibahali vawendige ukukimbila, na yevevasulunwise kila ikipugu ikidodo mululenga viva ndavasogwe ukutosa ifinu ifisito kula kuwutalo wa ikipugu ikikomi. ³¹ Neke Pawulo amulonje yula umulongola va avanyigalu na vanyigalu vakwe ukutigila, “Wone awogesi iva va ibahali valemwe ukusigala mu ikipugu ikikomi, simupokwa nda.” ³² Ipo vala vanyigalu vadumwe imilegesi jejegibete kila ikipugu ikidodo, swe ikipugu kila vakilesile kitegulwe na ululenga. ³³ Pesambi kwicha, Pawulo avagongolite mbevali valisage, “Neng’ino de kimunyi cha ichumi na fitayi we muhuguve simwilya nambi kinu. ³⁴ Sweno, nene nguvagongola ulwa mulisage pemuhwana ukunana. Pakuva asupali nambi munu uyumwi mwa nyenye yeayaga.” ³⁵ Pealonzile ulo, Pawulo aategwe umukate, akumulumba Nguluvi pamiho gawo mbevali, swe imegula, ilisaga. ³⁶ Ipo swe mbevali viva na uludali, swe ivanga nawo ukulya. ³⁷ Kwa mbetuli twetufikite vanu magana gavili na machumi gimufung’ati na vimutanda mula mukipugu ikikomi. ³⁸ Pembetuli yetulye twigwite, vakepwise uwusito wa ikipugu ikikomi vitosa ifilyo mubahali. ³⁹ Peyekuche, awogesi va ibahali sivayikagwi ing’i yila, swe vakupawona apono apepina ikilowoko; swe valamwe wone luhwane vakime baho. ⁴⁰ Sweno, ndawe vadumulige ifinu ifisito fyefyefibete ikipugu ikikomi fikale mubahali, swe vikunga ilyenda ilimwi, sambi ilikala livasindike pa kilowoko. ⁴¹ Neke vafisile apono pe ing’asi sivili isa ibahali sitang’ana, swe ikipugu ikikomi kitwambagala. Kuwutalo ikipugu ikikomi chahopye mulidope nambi kuhogoleka kumbele ikipugu ikikomi chavanzile ukumegulangika kihuma polofu ukwimila amavingo gala amakomi. ⁴² Vanyigalu vawendige vavawulage vanyandinde mbevali wogopige ukutigila wogelela mbaka pakilowoko vakimbile. ⁴³ Neke pakuva yula umulongola va avanyigalu asakige ukumupoka Pawulo, avatanie valemwage ukuvawulaga. Swe ilagila vala vevawusele ukogelela vasumbage vahume wogelele vafike pamwani, ⁴⁴ na avangi vahumage mumbele vibatage ifibawo fya ikipugu ikikomi chekimegulangike. Ulo lwelwave mbetuli twafikite pamwani twivatelefu.

¹ Peyetufikite mbetuli twivatelefu pala pa kilowoko, twapakagwe ukutigila ing’i yila che ikigunguli ikitambulwa Melita. ² Avanyang’i va pala vevanu vanofu hilo kwa hwehwe. Indonya yeyeyivanzile amapingo na ing’ala yenzolofu, swe ndawe vatupwitulilige umoto, swe vakututigila tubite tote. ³ Pawulo asage inzagala ng’efu de swe akusisopa mumoto. Ipo, kwa uluhe lwa umoto, inzoka yahumite mula munzagala swe yikumuluma Pawulo mwiwoko swe yiva weyimung’ang’anie. ⁴ Avanyang’i va pala vavelige vakuyiwona inzoka yimulumite na yitumbiila mwiwoko lyakwe vilonje vavene ukutigila, “Eawulige munu, nave aponite mubahali ukuyaga, ‘Neke uwugolofu’ siwumulesili ave peeanana!” ⁵ Neke Pawulo ayipalikise inzoka mumoto, nave savi kinu nambi ludodo. ⁶ Vala avanu valavisige ulwa ake atuna na baho baho agwa pasi na ukufwa. Pevalavisige lusika lukomi we kugaya kinu ikibi chekiwoneka kwa Pawulo, vilonje vavene kangi ukuta uyu nguluvi. ⁷ Pipi na baho pepogili imigunda ja Pubulio, umutema va ikigunguli icho yeitambulwa Pubulio. Pubulio yealatwanuche wunofu tuve tuvagenzi vakwe kwa filo fidatu. ⁸ Sweno, lwave udade va Pubulio emutamwa alambale muwuhaga yimwibete mbungo na uwutamwa wa mwileme. Pawulo ahele kukumulava na peifunyite, swe ndawe amugelekige amawoko gakwe akumuponia. ⁹ Kwa ukwimila ikipigo icho, avatamwa mbevali va pala pa kigunguli vasile avaponie. ¹⁰ Avanu vatupelye ifinu ifya uwuwuya fyolofu, na petwavangige ulugendo, kangi vatusopye mukipugu ikikomi ifinu fyolofu fiva fuka yetu. ¹¹ Peyegilutye myesi gidatu twavanzile kangi ulugendo tuhofile ikipugu ikikomi ikimwi cha ku Alekisandeliya chekitambulwa, “Nguluvi nyawendani.” Ikipugu icho kikalige umu mu kigunguli pa kitungwi. ¹² Twafisile pa boma iya ku Silakusi, swe tukwikala pala filo fidatu. ¹³ Ukuhuma uko twavanzile ulugendo, twapilime swe twifika ku Legio. Pekilutye ikimunyi kimwi, ilikala lyavanzile ukupuga ukuhuma ulubali lwa kunena. Na pefilutye filo fivili twafisile pamwani iya ku Puteyoli. ¹⁴ Uko twavafisile vanyalukolo vetu avangi iwo vatususile twikale nawo filo fimufung’ati, swe twiva yetufisile ku Lumi. ¹⁵ Avanyalukolo va kula ku Lumi vatupulike, ndawe vasige ukutwanukila pawugulilo pa Apiyo na pa kaye isidatu isa avagenzi. Pawulo peavawene amulumbite Nguluvi, swe isikimala. ¹⁶ Peyetufisile ku Lumi, Pawulo vamutawe ikale iyena na munyigalu yumwi uva ukumuminga. ¹⁷ Pefilutye filo fidatu, Pawulo avakong’ise avalongola va Kiyudaya va apono ipo. Peyevakong’ine, Pawulo avatige, “Nye mwe Vaisilaeli vayangu, nene nambi singapigiti ikinu ikibi nambi ukubesa imisimu ija avavaha vetu. Vandibete kula ku Yelusalemu na ukusopa mumawoko ga Avalumi. ¹⁸ Peyevangosise na ukumbona ulwa sindimwananga kinu, ikikwambusa nene mbulagwe, vawendige ukundekesa. ¹⁹ Neke Avayudaya avamwi vabesise ulukani ulo, neke nene ndamule ukuhamya inongwa yibite kwa Kaisali nambi sinde na lukani ulwakuvasongela avanu vangu. ²⁰ Nambi kwa lulo sukite ukuvawona na ukutinasa na nyenye, pakuva ndimupinge na iminyololo ndivalwa uluhuvi lulula lwa Vaisilaeli.” ²¹ Neke avene ndawe vamutigilige, “Hwehwe situlapelwa ulwandiko uluhumile kuvanu vetu ku Yudaya iyilonga sa veve nambi vanyalukolo nambi yumwi yeakasile ukulonga sa veve. ²² Neke hwehwe tuketuwenda ukupulika amahosa gako. Pakuva hwehwe lwetukulukagula ukuta ikilugu icho kihele kibihilwa bahapavesaga.” ²³ Sweno, ndawe viyidikisige ukukela ikimunyi ichene icha ukutang’ana, na awolofu vafisile uko kweeikwali. Uluhuma pamilawu mbaka pamihye awolelelige na ukuvaganulila ulwa uwutwa wa Nguluvi, igela ukuvahegelesa vamwidikile Yesu ikola indagilo sa Musa na uwandike uwa avavisi. ²⁴ Avamwi mwa avene vidiche ing’ani sakwe, neke avangi sivafuuvitwi. ²⁵ Sweno, kwave na kulekana mumahosa mwavene, pevahegige vakwibitila, Pawulo alonzile ulukani ulu, “Nachene siling’ene sila sesalonzilwe na Umuhe Umwelu kwa avakukwenyu ukukola kwa Umuvisi Yesaya ²⁶ itigila: ‘Bitage kuvanu iva ukavatigile; ukupulika mupulika, neke simulukagula; ukulava mulava, neke simuluwona. ²⁷ Pakuva uluhala lwa avanu iva lusito, vadibise amapulikilo gawo, vasisinise amiho gawo. Pesi ndahihyo, vake valava kwa amiho gawo, vake vapulika na amapulikilo gawo. Vake valukagula mu wuseela wawo, na ukumitukila, ilonga Umutwa, nane ngendivaponia.’ ” ²⁸ Sweno Pawulo asindilise kwa ukutigila, “Mulukagulage ukutigila ulukani lwa Nguluvi ulwa uwupoki yevapelitwe avanu avamyanza. Iwo valupulikisa!” [ ²⁹ Pealonzile ulo, Avayudaya swe vakwibitilaga, kono vakwiwusa avene kwa avene ng’ani nzolofu.] ³⁰ Kwa lusika lwa myaka mbegili givili Pawulo ikalige mukaye yealabasise na mbepali avanukilige avanu mbevali avabitige ukumuhungila. ³¹ Adalikige uwutwa wa Nguluvi na ukwigisa ulwa Umutwa Yesu Kilisito kwa uwupifu wolofu, wesitanilwa na munu.