2 TIMOTI

¹ Nene Pawulo, ye Nguluvi awendite mbe mwigendo va Kilisito Yesu sambi ndivalongele wula uwumi we twetwivahuvise mu kuhanga na Kilisito Yesu, ² ngukwandikila veve ve mwanangu umwende Timoti: Ngukusukila uwuwuya, ulusungu na uwikalakunoga ukuhuma kwa Nguluvi Dada na Kilisito Yesu Umutwa vetu. ³ Ngumulumba Nguluvi ye ndangumupigila kwa mutima mwelu ndawe lwevapigite avavaha vangu uluhuma pidaha, ngumulumba pembesaga nguviwuka mukwifunya kwangu pakilo na pamunyi. ⁴ Ngwiwuka na inzihosi sako, ndidoboka hilo ukukuwona, pepene pemba memile uluhekelelo. ⁵ Ngwiwuka ulufuuwo lwako lwa nachene, ulufuuwo lweeinalo upapo Loisi na kangi na yuyuwo Ewunike. Ngwihuvila ukuta na yiveve nave winalo. ⁶ Nambi ngukwiwusa ukuta ukifungisage kila ikipelwa chewapelitwe na Nguluvi ulusika pendakugelekige amawoko gangu. ⁷ Pakuva Umuhe yeatupelye Nguluvi siva muhwehwe, sindahihyo nda twapelitwe Umuhe va uludali, uwende na ichoga. ⁸ Sweno, ulamuwonela inyoni ukumolelela Umutwa vetu, na ulawona nyoni pakuva nene ndili mundinde ukwimila umwene. Ulwene hangage muneseko ukwimila Ulukani Ulunofu, wigelela uludali lulula lwewipelwa na Nguluvi. ⁹ Umwene atupokite, neke atukemele tuve vanu vakwe yumwene, si ukwimila uwugolofu wa ifipigo fyetu, pesi ukwimila lula lwealalamwe na uwuwuya wakwe. Atupelye uwuwuya wuwo ukwimila Kilisito Yesu pe umuvango gwesigulava gufika, ¹⁰ lino yewugubuliwe kwa hwehwe, ukwimila ukusa kwakwe umupoki vetu, Yesu Kilisito, umwene apesise uludali lwa ifwa, ukukola Ulukani Ulunofu awuvikite uwumi pawelu wula uwutafwa. ¹¹ Nguluvi anyagwe nene mbe mwigendo na mwigisi ukwimila ukudalika Ulukani Ulunofu, ¹² nane nditeseka mwa isi mbesili ukwimila lulo. Neke ulwene pe ndina luhala lunofu hela pakuva ndimukagwe yula yendamufuuvitwe, kangi ngwihuvila hilo ukuta umwene ahwana ukukilolela wunofu kila cheamelye, mbaka pa kimunyi kicho. ¹³ Winatilage inzigiso sila sa nachene, na ukwikala mwalulo ulufuuwo na mu wende wetu mukuhanga na Kilisito Yesu. ¹⁴ Ulukani lula ulunyandolo lwewapelitwe kalalilage ukulolela muludali lwa Umuhe Umwelu yeali mugati umwetu. ¹⁵ Ndawe lweukapulike, avanu mbevali va mulutanana lwa mu Asiya vakandesile, mwavawo valimumo va Figelo na Helimagene. ¹⁶ Umutwa avadegepelage va mukaye ya Onesifolo; pakuva mbepali uyo ambuyapige, siamboneligi inyoni pakuva ndilimundinde, ¹⁷ ave ifika hela ipa pa Lumi, swe ivanga ukumbusa mbaka peakumbona. ¹⁸ Umutwa amusungukilage ikimunyi kila! Nave ukulukagula wunofu inzolofu seamije uko ku Efeso.

¹ Lino, veve ve mwanangu vesage na ludali, muwuwuya wetwipelwa mukuhanga na Kilisito Yesu. ² Tegulage inzigiso sila semwamulike nene ndilalika pa wolelesi wolofu, uvapelage avanu avihuvilwa, vevahwana na ukuvigisa na avanu vangi. ³ Hangage muneseko nda umunyigalu yeihuvilwa va Kilisito Yesu. ⁴ Umunyigalu peakwihoma ligalu akwilegaga na isa mung’i isa malanga sambi amunogele umuvina va vanyigalu. ⁵ Umunyakukimbila yeyeavesaga mumwihesigo sahwanite adwese avangi nu kupelwa ikipelwa pesiinatii imisilo ja imihesigo. ⁶ Umulimi yeapigite ikipigo ikitalamu anoje ukwanukila ifilyo ifibete ifya pamuvango. ⁷ Wihosage hilo iso sendilonga pakuva Umutwa akudindula uluhala usikagule mbesili. ⁸ Mwiwukage Yesu Kilisito yeasilibwiswe ukuhuma kuvafwe yeali va ulukolo lwa Dawudi ndawe lwelwilonga Ulukani Ulunofu lwendandidalika ⁹ ukwimila ukudalika Ulukani Ulunofu nene nditeseka na minzilwe muminyololo wita mwananzi neke ulukani lwa Nguluvi sisalupigwa. ¹⁰ Na ukukola lulo, nene ndikangalila mbefili ukwimila avahagule va Nguluvi, sambi nawo vapelwe uwukombolwa uwiletwagwa mung’asi ya Yesu Kilisito, na wuwo wiletaga indolo isa mbepali na mbepali. ¹¹ Ululongwa ulu lwa nachene: Wone twafwe pamwi nave, satunana kangi pamwi nave. ¹² Wone tugine ukukangalila, satutema kangi pamwi nave. Wone tumubihile, nave saatubihila kangi; ¹³ Wone tugaye uwuhuvilwa, umwene aisigalaga mbepali muhuvilwa, pakuva umwene sahwaniti ibihile nangi. ¹⁴ Sweno, uviwusage avanu vako ing’ani isi, weukuvakenyela pa Nguluvi, valulekage ulubesa lwa ing’ani, ulubesa ulo silunofu, ulo lwakuvananga vala vevipulika. ¹⁵ Tiganage ukupelwa uwidikile na Nguluvi umunyakupiga yesakukiwonela inyoni ikipigo chakwe, na yeakwigisa wunofu lula ulukani lwa nachene. ¹⁶ Wilegage mulubesa ulwa malanga na ulwa uwupuva pakuva ulo lwalwigina ukuvalekasa avanu pataali na Nguluvi. ¹⁷ Inzigiso isindawe iso siling’ene na ikipemba chekiyavaga umuvili. Avamwi mwavawo vevakwigisa siso veva Heminayo na Fileto. ¹⁸ Iva vayasile wuhulo vahele pataali na inachene, pevitigila ulusilibuko lwetu yelukelupigike vihuguvika ulufuuwo lwa avangi. ¹⁹ Neke ulutu lweavikite Nguluvi lukimee lulibahala hela, na pachanya pa ulutu peandike ing’ani isi; “Umutwa avasele avanu vakwe,” na “Yeyeavesaga akwitigila umwene va Nguluvi, lumuvaje awulekelage ng’ani uwanangifu.” ²⁰ Ino mukaye ingomi, pofili ifinyawugali na ifingi ifilipolofu, ifingi fiwuyapile isahabu, ifimwi fiwuyapile amagobole, ifimwi kangi fiwuyapile mabiki, na ililongo, na ifingi fivike hela fya wutambule na ifingi fipigilwage mbepali. ²¹ Ino, wone umunu iyese akwilega pataali na inzanangifu mbesili iso, uyu ava nda ifinu ifya uwutambule fyesifipigilwa chaka hela, pakuva ava afunyililwe, uyo akumunogela umutwa vakwe na iva mugelanise mukipigo chechekivesaga ikinofu. ²² Lino wilegage na uwudobokesi wa uwunyakilambo, ninilage uwugolofu, ulufuuwo, uwende, uwikalakunoga, pamwi na avanu mbevali avakumusuka umutwa munumbula nzelu. ²³ Wilegage mulubesa ulwa uwupuva na ukugaya luhala; weukulukagula ukuta iso siletaga ulwitakilo. ²⁴ Umukami va Umutwa alitakila na munu. Lumuvaje ave mulele ku vanu mbevali, umwigisi umunofu na mukangalisi; ²⁵ yula ye iva we mulele peikenyela avanyalubesa kulumwene, apangi luhwanite Nguluvi avapele ikilega cha ukuhongesa na ukupela, sambi vayikagule inachene. ²⁶ Ipo pepene pevapilulilwa uluhala lwawo kangi, na ukwisupatula mulutego lwa Setani yeavibete na kuvakuvilisa vakwisaga isakwe.

¹ Wiwukage ukuta, ifilo fya kuwusililo sakuva na lusika lutalamu. ² Pakuva avanu savava vanyakwiyenda vavene, vanyakuwenda amagobole, vanyalwiwono, vanyakidada, vanyamaligo, avagaya choga ku vegasi vawo, avagaya kilumbo, vanangifu, ³ Savawoneka avanu avagaya wunu, avagaya wilamule, avasomeng’asa, vahatufu, vakali, avibihilaga mbesili inofu; ⁴ savava vapituka vayawo, avananga finu, vatiganu na avamemile lwidudumbo; savawenda isa ulwinomo sindawe ukumwenda Nguluvi. ⁵ Kwa mwivala savawoneka wita vanu va Nguluvi, neke kono wevibesa uludali lwakwe. Wilegage na avanu avindawe iwo. ⁶ Avamwi vawo vakwingila mukaye sa vanu vigalula avang’inetu avahomefu avafuuvitwe na inzanangifu avilongoswa na uwudobokesi wewewuvesaga; ⁷ avang’inetu vevavigela mbepali ukwiyigisa nambi lulo sivavifikila ukuyikagula inachene. ⁸ Avanu iwo vakuyibesa inachene ndawe vala va Yane na Yambule lwevamubesise Musa. ⁹ Neke ulwene sivahwana ukuva pevabita na lulo musika pakuva uwupuva wawo wilagila pawelu kwa mbevali. Ndawe lwelwawonike kwa va Yane na Yambule. ¹⁰ Neke, veve, ukafwatite inzigiso sangu nagimigendele jangu, uwukalalile wangu, na iminanile jangu, ulufuuwo lwangu, uwukangalisi wangu, uwende wangu, uwusindile wangu. ¹¹ na ukupigilwa fibi na ineseko. Ukwiwuka sila sesafikite uko ku Andyokiya, ku Ikonio, na ku Lisitila. Ndakangalye ukupigilwa fibi ukukomi ukulutye! Neke Umutwa amokite ukuhuma mwambesili iso. ¹² Umunu yeyeavesaga iwenda ukwikala mukumogopa Nguluvi na mukuhanga na Kilisito Yesu lumuvaje apigilwe fibi. ¹³ Avanu avanangifu na avabuganisi vagina ukuva vanangifu, kono visanga avangi na avene we vakwisanga. ¹⁴ Neke veve nanage mwa yila inachene yila yewigisiwe na ukuyidikila hilo. Ukuvakagula vala veve vigisi vako, ¹⁵ ukwiwuka ukuta uluhuma pa wudodo wako uwukagwe Uwandike Uwelu wewuhwana ukukupela uluhala ulwiletaga uwupoki ukwimila ulufuuwo mwa Kilisito Yesu. ¹⁶ Uwandike Uwelu mbewuli wandikwe muwulongosi wa Nguluvi, wikwila mu kwigisa inachene, ukukenyela, ukugolola isanangike, na ukuvalongosa avanu vikale muwugolofu, ¹⁷ sambi umunu yeakumupigila Nguluvi ave akwilaniche na agelaniche hilo mukupiga ifipigo ifinofu.

¹ Ngukulagila pa Nguluvi, na pa Kilisito Yesu, yesaavahiga avanu awumi na avafwe, pakuva akusa ukutema we Mutwa: ² dalike ulo ulukani, kangalilage ukutagalisa ulukani (ulusika ulunoje na lwesilunoji), kalipilage, kenyelage, na sukanisage avanu na ukuvigisa mu wukangalisi mbewuli. ³ Pakuva lukusa ulusika lwe avanu sisavapulikisa inzigiso isa nachene, pesi ukuta savafwata uwudobokesi wawo vavene na ukwilundikila avigisi wolofu vesavavalongela sisila hela se amapulikilo gawo giwenda ukupulika. ⁴ Savabihila ukupulika isa nachene, neke savapitukila sa uwudesi. ⁵ Neke, veve wikalage, miho mwa mbesili, kangalilage ineseko, pigage ikipigo cha uwudalisi wa Ulukani Ulunofu kwisage hilo ikipigo chako. ⁶ Pakuva nene kulubali lwangu, sambi nditawulwa nambika na ulusika lwa ifwa yangu yelufikite. ⁷ Ngave mupifu mulwitalaniso, yesinzile ulugendo mbeluli na ulufuuwo ngalugosise. ⁸ Lino ulusige lwelula lwa ukupelwa uluhombo lwa ukudwesa ukwimila imigendele ja uwugolofu, uluhombo lwe umutwa Umuhisi va nachene, saameela nene ikimunyi icho, na kangi si yinene hela, pesi na vavala mbevali avilavisa muwende ukweleluka kwakwe. ⁹ Wikangasage wangupe wuse kwa nene. ¹⁰ Pakuva Dema akayendite ing’i iyi akandesile akwibitilaga ku Tesalonike. Kilesike akahele ku Galatiya na Tito akahele ku Dalumatiya. ¹¹ Luka, iyena hela yeakasige pamwi na nene ipa. Wusage na Maliko, pakuva ahwana ukunanga mukipigo changu. ¹² Neke Tikiko ngamutumile ku Efeso. ¹³ Isopeka yangu yendayilesile kwa Kalipo kula ku Toloya; ndetelage pamwi na ifitabu na ing’ingo isa ukwandikila. ¹⁴ Yula umuponzi va isaba yeitambulwa Alekisanda akamije nzolofu imbi, Umutwa saamupulikisa ukuling’ana na ifipigo fyakwe fyeapigite. ¹⁵ Wikomalilage hilo nave, pakuva alubesise ulukani lwetu weakalipe. ¹⁶ Ulusika lwendikanilige ulwa ukutala siepwali umunu yetwahelelise, mbevali vandesile. Nguluvi alavahiga uwananzi ukwimila ulo nda! ¹⁷ Neke Umutwa eimile pamwi na nene neke peamele uludali, sambi kwa ifipigo fyangu ulukani ludalikwe kwa wukwilanifu, sambi avanu mbevali valupulike, kangi ndapokitwe wita mumulomo gwa inyalupala. ¹⁸ Umutwa amoka mwambesili isa uwanangifu, andolela wunofu mbaka kuwutwa wakwe kuchanya. Kulumwene sivesage indolo mbepali na mbepali! Ena. ¹⁹ Vahungilage Pilisika na Akila, pamwi na va mukaye ya Onesifolo. ²⁰ Elasito asige ku Kolindo, nave Tolofimo ndamulesile uko ku Mileto, pakuva emutamwa. ²¹ Wikangasage wuse ikitungwi pesikilagwa. Ebulo, Pude, Lino na Kulawudio vakukuhungila na avanyalukolo avangi. ²² Umutwa avesage na veve munumbula yako. Nguvasukila mbemuli uwuwuya.