2 AVATESALONIKE

¹ Yenene Pawulo, pamwinga na Sila na Timoti tukuvandikila nyenye avanu va mu likanisa lya ku Tesalonike, ve avanu vakwe Nguluvi udadetu na va Umutwa Yesu Kilisito. ² Nguvasukila uwuwuya na uwikalakunoga ukuhuma kwa Nguluvi udadetu na kwa Umutwa Yesu Kilisito. ³ Vanyalukolo, lutuvaje ukumulumba Nguluvi mbepali ukwimila nyenye. Lwinoga hwehwe tupige ndahihyo pakuva ulufuuwo lwenyu lwigina ukongelekela na uwiyendi wenyu nawo wukongelekela hilo. ⁴ Nambi hwehwe tukwitunumikila nyenye mumakanisa ga Nguluvi. Tukwitunumika pakuva mwiva pemufuuwa na ukukangalila Ineseko mbesili semwipigilwa. ⁵ Iso mbesili silagila ukuta uluhigilo lwa Nguluvi lwa wugolofu, na mwasiso pambele muhwana ukuva mu wutwa wakwe we ukwimila wuwo mwiteseka. ⁶ Nguluvi apiga lukani lugolofu; avahombela umukole kwa vala avakuvatesa nyenye, ⁷ na ukuvapela iikiba nyenye ye mwiteseka na hwehwe nahwe. Apiga ulo ulusika lwa ukusila Umutwa ukuhuma kuchanya pamwi na vanyivaha vakwe avavina ⁸ na ifyenge fya umoto, ukuvapumya vala avakumubihila Nguluvi na vala vesivakwinatila Ulukani Ulunofu lwa Umutwa vetu Yesu. ⁹ Ukuhigwa kwawo sakuva ukuyaga kwa mbepali na mbepali na ukuvikwa pataali na indolo yakwe ingomi, ¹⁰ pesaakusa Ikimunyi kila ukwanukila indolo uluhuma kuvanu vakwe, ni choga uluhuma kwa mbevali vevakumufuuwa. Nyenye nanye samuva pamwi na vawo, pakuva mulufuuvitwe ulukani lula lwe twavaletye. ¹¹ Nambi kwa lulo tukuvasukila mbepali. Tukumusuka Nguluvi vetu avatange munogele imikalile je mwakemelilwe mugendele. Tukumusuka, ukukola uludali lwakwe, akwise uwudobofu wenyu uwa ukupiga inofu na ukukwisa ikipigo chenyu icha ulufuuwo.. ¹² Na mwalulo, litawa lya Umutwa vetu Yesu ipelwa indolo ukuhuma ukwenyu, nanye mupelwa indolo ukuhuma kulumwene uwuwuya wa Nguluvi vetu na wa Umutwa Yesu Kilisito.

¹ Lino isa ukusa kwakwe Umutwa vetu Yesu Kilisito na ukukong’aswa kwetu pamwi tumwanukila yumwene, nguvasuka vanyalukolo vangu, ² Mulasomeng’aswa mumahosa genyu apangi ukuhuguvala wone munumbula nambi mu lukani nambi mu balula iyitigilwa yikahumise kwa hwehwe ukuta ikimunyi cha Umutwa kikafikite. ³ Mulidikila ukusangwa nu munu yeyeavesaga yula palweluvesaga. Pakuva ikimunyi icho sisachusa pesiwulawoneka uwanangifu wula uwukomi na yula umwanangifu umuvina peawonike ye Nguluvi saamwananga pamudugo. ⁴ Umwene saabesa chekitigilwa Nguluvi nambi kinu cha kusunyalila, kangi saidudumba ukulutila mbefili na ukwingila mu Tembeli ya Nguluvi ikale mugati akwitigila ulwa umwene nave Nguluvi. ⁵ Mbi, simukwiwuka ulwa ndavalonje siso mbesili pende ukwenyu? ⁶ Lino pokili chekikumutanila, nanye mukukikagula ikinu icho. Ino, Ulusika ulumunoje umwanangifu uyo saawoneka. ⁷ Nambi ndahihyo, umwanangifu uyo yesiwoneka pawelu ahele ipiga ikipigo na yilino, neke lino kila chekiwoneka sisakiwoneka mbaka yula ye akumutanila peyahesiwe. ⁸ Ipo pepene pe umwanangifu pesaawoneka; neke Umutwa Yesu saamuwulaga. ⁹ Uyo umwanangifu saasa nu ludali lwa Setani nu kupiga gwegweguvesaga mwitu na uwuhulo wa uwudesi, ¹⁰ na ukukola uwudesi wewewuvesaga kwa vala vevasutime ku kuyaga. Iwo savayaga pakuva sivanuchi ukuwenda isa nachene sambi vapokwe. ¹¹ Nambi Nguluvi avavikite mu ludali lwa uwuyasi, vafuuwe uwudesi. ¹² Chekiwoneka mumo luva mbevali vesivifuuwa isa nachene, avihekelela inzanangifu, savahigwa. ¹³ Lutuvaje tumulumbage Nguluvi mbepali ukwimila nyenye vanyalukolo, nyenye ye mwivende va Umutwa, pakuva Nguluvi avahagwe uluhuma pamwandi sambi mupokwe kwa uludali lwa Umuhe, sambi muwuyapwe vanu vakwe avelu mulufuuwo lwenyu ulwa nachene. ¹⁴ Nguluvi avakemelelye mulukani ulu ukukola Ulukani Ulunofu lwetwavadaliche; avakemelye sambi mwanukile ililila lyenyu mu ndolo ya Umutwa vetu Yesu Kilisito. ¹⁵ Ino, vanyalukolo, mwime munoge na mwinatilage sila imisimu gila jetwavigise petukuvalongela kwa mulomo apangi mu balula. ¹⁶ Tukwifunya Kulumutwa vetu Yesu Kilisito yumwene na Nguluvi udadetu ye atwendite, na mu uwuwuya wakwe atupelye ulusikimiko lwa mbepali na mbepali na uluhuvi ulunofu, ¹⁷ agisikimikage imitima jenyu nu kuvakangasa sambi muhwane mbepali ukupiga nu kulonga inofu.

¹ Pendidugulisa, vanyalukolo mutusukilage, sambi ulukani lwa Umutwa lwangufya ukutagalila na ukwanukilwa kwa ichoga ndawe we lwiwali kwa nyenye. ² Mwifunyage kangi sambi Nguluvi atupoke kuvanu avayasi na avanangifu, pakuva si mbevali vevakulufuuwa ulukani ulu. ³ Neke Umutwa yevakwihuvilwa. Umwene avakangasa na ukuvagosa wunofu kwa yula umwanangifu. ⁴ Nave Umutwa akutupela uluhuvi lukomi ukwimila nyenye, na sitwihuguvala ukuta mupiga na muva pemupiga sila setwavalonje. ⁵ Umutwa alongosage inumbula senyu mu wende wa Nguluvi na mu wukangalisi we twipelwa na Kilisito. ⁶ Vanyalukolo tukuvalagila mwitawa lya Umutwa vetu Yesu Kilisito ulwa mwilegage na avanyalukolo mbevali avagata na vesivakwinatila setukavalagise. ⁷ Yinyenye vavene mukulukagula ulwa luvavaje ukwiga lwetwipiga hwehwe. Hwehwe petwe ukwenyu sitwavi vagata nambi. ⁸ Na sitwalii ifilyo kulumunu yeyeavesaga we situmuhombiti. Twapigite ifipigo kwa wupifu nu kuguda pakilo na pamunyi sambi pakilo sambi tulemwe ukumufuna umunu yeyeavesaga ukwenyu. ⁹ Twapigite ulo si ukuta si lwelunoje ukwanukila uwutanzi wenyu nda, pesi ukuta twawendite hela tuvapele chemwiga. ¹⁰ Petwe ukwenyu, twavalongelige ukutigila, “Umunu yeyeavesaga yesiwenda ukupiga, alalya.” ¹¹ Twilonga isi pakuva twipulika ukuta kovali avanu avakwikalaga hela muwugata vipilimapilima wesivipiga kinu. ¹² Mwitawa lya Umutwa vetu Yesu Kilisito tukuvalagila nu kuvakenyela avanu iwo vavelage ni choga na vapigage ifipigo sambi vikwavile fyevagulwime. ¹³ Neke nyenye vanyalukolo, mufulugala ukupiga inofu. ¹⁴ Sa lulava ulwa uko kwina munu yesakwinatila ulukani ulu lwetukuvaletela mu balula iyi. Wone luve ndahihyo, mumuvikage pawelu umunu uyo na mulagela ukuhanga nave mwa lwelweluvesaga, sambi iwone inyoni. ¹⁵ Neke nambi ndahihyo, mulamuvika ukumulava umunu uyo ave nda, mumwigisage wita munyalukolo. ¹⁶ Umwene Umutwa ye kilamuko cha uwikalakunoga, avapelage uwikalakunoga mbepali na mwa mbesili. Umutwa avelage nanyenye mbemuli. ¹⁷ Na iliwoko lyangu yinene ngwandika de: Kamwene nene Pawulo ndihungila! Ulu lwe ndangwandika ilitawa lyangu pendisindilisa ibalula. ¹⁸ Tukuvasukila mbemuli uwuwuya wa Umutwa vetu Yesu Kilisito.