2 PETULO

PETULO

¹ Simoni Petulo, umukami na umwigendo va Yesu Kilisito. Kwa nyenye mbemuli yemukanuche ulufuuwo ululing’ene na ulwa hwehwe muwugolofu uwa Nguluvi vetu na umupoki Yesu Kilisito. ² Ukuta uwuwuya na uwikalakunoga wongelekelage kwa nyenye mukumukagula Nguluvi na Yesu Umutwa vetu. ³ Ukukola uludali lwakwe lwa ukuva Nguluvi, Nguluvi akatupelye mbesili setwiguluma, sambi twikale mumikalile iginya choga kwa Nguluvi mukumukagula umwene yeatukemelye tuhange indolo na uwunofu wakwe yumwene. ⁴ Mwalulo yeatupelye ifipelwa ifikomi na ifigusiwaga amagobole molofu fyealatuhuvise, sambi ukukola ifipelwa fifyo muhwane ukwilega pataali na uwudobokesi uwubi uwuli mung’i, na muhwane ukuhanga muwunu wakwe wa ukuva Nguluvi. ⁵ Nambi ukwimila lulo, musugunalage na ukuwila uwunofu mulufuuwo lwenyu, muwilage uwukagusi muwunofu wenyu, ⁶ na ukwitanila muwukagusi wenyu, ulwikangaliso mukwitanila kuko, ichoga kwa Nguluvi mulwikangaliso lwenyu, ⁷ muchoga chenyu mukangasage uwunyalukolo, na uwende na uwunyalukolo wenyu. ⁸ Mwiva na ululumbo mbeluli ulo muwolofu, luvatanga ukuva vapisi avapifu na mwambula mukumukagula Umutwa vetu Yesu Kilisito. ⁹ Neke umunu yeagayite iso uyo mubofu, sahwana ukulava, na yeasemilwe ukuta yeakesiwe inzanangifu sakwe indovela. ¹⁰ Sweno, vanyalukolo vangu, musugunalage hilo ukuluwuyapa ulo ulukemelo lwenyu lwemwakemelilwe na Nguluvi luvelage lukani lwembepali luli muwunani wenyu; wone mugendele lulo sisamugwa nangi. ¹¹ Mwalulo pemuhwana ukupelwa uwugolofu uwukwilaniche ukwingila muwutwa uwa mbepali wa Umutwa na Umupoki vetu Yesu Kilisito. ¹² Kangi nginaga ukuviwusa mbepali ing’ani isi, nambi we yemusikagwe, na mukange muwanachene wemwawanuche. ¹³ Nditigila ulu lukani lugolofu kwa nene, ulusika mbeluli lwembesaga ndinana ipa pa ing’i, ukuvakangasa imitima na ukuviwusa ulwa ing’ani isi. ¹⁴ Ngulukagula ukuta yesambi tukwileka na umuvili ugu ugunya kufwa, ndawe Umutwa lweandonje wima hela. ¹⁵ Lino, ngihaga ukuvasakila ifipeto ifya ukuviwusisa ing’ani isi peluvesaga lusika, pemba yefwe. ¹⁶ Petwavigisige ulwa ukusa kwakwe ukunyandolo Umutwa vetu Yesu Kilisito, sitwakweti isimo hela isa malanga ingaya kinu. Hwehwe twayiwene indolo yakwe mumiho getu yihwehwe. ¹⁷ Hwehwe twetwipwali peapeligwe ululumbo na indolo na Nguluvi Dada, ulusika pelyapulise iliswi ukuhuma kulumwene ye umwene ye Ndolo Ingomi, litigila; “Uyu ye Mwanangu Umwende, yendinogelwa nave.” ¹⁸ Kangi, yehwehwe yetwapulike iliswi lilyo ukuhuma kuchanya ulusika petwepamwi nave pala pa kidunda ichelu. ¹⁹ Kangi, ulukani lwa avavisi vatulonje vikangasa ulukani lwiva nda lung’ali ulwing’alika apono panyalwisa mbaka kukimunyi kikila pesa kwidandaluka na ulung’ali lwa ing’eng’esi inenawufuku pesaying’alika munumbula senyu. ²⁰ Ukulutila kwa siso, neke ulwene, mwiwukage ukuta sikwali umunu yeyeavesaga yeahwanite aganule yumwene uwuvisi we wuli muwandike Uwelu. ²¹ Pakuva sikololi ulukani lwa uwuvisi ulwihumaga muwende wa avanu, pesi avanu valonzile ulukani lwa Nguluvi visogoswa na Umuhe Umwelu.

¹ Vawonike avavisi ava uwudesi pagati nagati pa avanu, na lwindahihyo avigisi ava uwudesi savawoneka pagati nagati apenyu. Avanu iwo savigisa inzigiso isihahite na ukumubihila Umutwa yeavakombwe, na ukwimila lulo savasukanisa ukwiyambusa sambi vasile. ² Kangi avanu wolofu viiga imigendele gijo imyaafu, vakuvambusa vavene, avangi savabedala ing’asi iya uwanachene. ³ Ukukola uwudobokesi wawo uwubi vakwavila uwunono ukwimila ukuvalongela isimo isa uwudesi, uluhuma pidaha uluhigilo lwawo pololi na lwisindila! ⁴ Avanyivaha vavelige vipiga inzanangifu, Nguluvi savawonii ulusungu, pesi avasopite ku moto gwa ku Gehena kula kwevapinge visindila ikimunyi kila icha uluhigilo. ⁵ Nguluvi siayiwonii ulusungu ing’i iya pidaha, pesi alaje ing’uka ingomi yuse mung’i yila iya avanu avagayi choga kwa Nguluvi; neke Noha ye awudalike uwugolofu, Nguluvi amupokite pamwi na avanu avangi avimufung’ati. ⁶ Nguluvi ayihigite iboma iya ku Sodoma na ku Gomola, ayilalise na umoto, akusiwuyapa sivelage cholelesi cha ing’ani isikusa ukuvafika avanu agayi choga kwa Nguluvi. ⁷ Amupokite Luti, umunu munofu, ye avifisiwe pakomi na imigendele imyaafu ija avanu avayasi. ⁸ Luti ikalige pagatinagati pa avanu vawo, na ifilo fyolofu inumbula yakwe yahuguvalige pakomi peyeapulike isa ifipigo fyawo ifyaafu. ⁹ Sweno, Umutwa alukagwe lwe avapoka uluhuma mukugelwa avanu avanyachoga kwa Nguluvi, na lula lweavavika avanangifu vapumage mbaka ku ikimunyi kila icha uluhigilo, ¹⁰ na hilo vala vevakwiga uwudobokesi uwubi uwa imivili na ukubedala ululagi. Avanu iwo vagaya choga kangi vanyalwitupyo; vakufiliga na ukufibedala ifigawa ifinyandolo ifya kuchanya. ¹¹ Neke avanyivaha, vala vevina ululagi na uludali ukulutila vawo avigisi ava uwudesi, sivakufisongela nambi ukufiliga ifyo pa Nguluvi. ¹² Avanu iwo veviligaga chechekivesaga kila chesivakiseli, vindawe ifikoko ifigaya uluhala, fyefyakwegalwa na pambele vakufibata vidumula! Savasindwa ukwimila uwanangifu wawo vavene, ¹³ na savahombwa ineseko ukwimila ineseko sevakambwise. Uluhekelelo lwawo kwekupiga chechekivesaga chekikwisa isa uwudobokesi uwa imivili jawo, kangi upigila siso mukimunyi hela. Avanu avindahihyo vileta uwuhonganyoni pevikong’ana na nyenye mumbungo senyu mufingi ifikomi, kono we uhekelela imigendele jawo ija uwuyasi. ¹⁴ Amiho gawo gamemile uwugoni na uwutiganu wawo ukupiga inzanangifu wugaya wudugo. Vakuvakwegelesa avanu vesivasikimafu mulufuuwo, avana vanyaluleko. ¹⁵ Vakayilesile ing’ani ingolofu, vakayasile na ukwiga ing’asi yeafwatite Balamu, umwana va Beoli, ye awendite apelwe ukwambula ikola uwudesi, ¹⁶ swe ikenyelwa ukwimila uwanangifu wakwe. Idogovi inyakibubwi yalonzile, yidogofya uwugulufu wa umuvisi. ¹⁷ Avanu iwo wita imifwilo igikasile, wita amafufu agipugwa na ikifulufumbi; uwikalo wawo wevagelanisiwe pepala apono panyalwisa ulukomi. ¹⁸ Vilongaga ing’ani isalwitupyo na isa uwupuva, na ukukola uwudobokesi wawo uwaafu uwa imivili ukuvagwilisa vala vevakilegite ifilo fya pipi uluhuma kuvanu avakwikala muwanangifu. ¹⁹ Vakuvahuvisa avanu avangi ukutigila vava vatemapawo, kumbi avene we vanyawingi va uwuyasi, pakuva umunu aiva munyawingi wa chechekivesaga chekimuvika muwutema wacho. ²⁰ Avanu vevakasupatwike uluhuma muwuyasi wa umu mung’i peyevamukagwe Umutwa na Umupoki vetu Yesu Kilisito, neke wone vidikile ukwibatika na ukusagilwa kangi na uwuyasi wuwo, iwo vakwanangika wuhulo ukulutila ulwa pamwandi. ²¹ Luke luva iikiba kwa avene wone vevalemwe ukuyikagula ing’asi iya uwugolofu sindawe ukuyikagula na kangi ukuyileka na ukuluyasa ululagi ulwelu lwevanuchee. ²² Poluli ululongwa ulwitigilaga! “Imbwa ya yakugapilukila amadeesi gayo yiyene.” na ulungi ulwitigilaga: “Ingubi inzofuge yakwigalangasa mulidope kangi!” lwelwiwali kw avene lino.

¹ Vanyawiyendi vangu, iyi ye balula iya kavili yenguvandikila nyenye. Mu balula iso we sivili ngelite ndamuse amahosa genyu amanofu kwa ukuviwusa ing’ani isi. ² Ndiwenda mwiwukage ing’ani sesalonzilwe pidaha na avavisi avelu, na lula ululagilo lwa Umutwa na Umupoki ulwasile ukukola na avigendo venyu. ³ Ukutala kwa mbesili mulukagule ukuta ifimunyi fya kumudugo savasa avanu ve imigendele jawo gisogoswa na uwudobokesi wawo uwubi savavelanga nyenye, ⁴ na ukutigila: “Alihuvise ukuta aasa! Ngali lino alikwiya? Ing’ani sesisila hela uluhuma avakukwetu pevevakaali wumi; ing’ani sindahihila uluhuma pamuvango gwa ing’i!” ⁵ Avanu iwo, wesivituga, vavisemwa ukuta pidaha Nguluvi alonzile, swe ing’i na kuchanya sagafilwe. Ing’i yagafilwe ukuhuma mululenga na ukukola ululenga; ⁶ na kangi kwa ululenga lulo, kwekuta lula ululenga lwa ing’uka ingomi, ing’i iya imisika gila yasisile tipu. ⁷ Neke kuchanya na ing’i iya lino silolelwa ukukola ulukani lwa Nguluvi ukwimila ukwanangwa na umoto. Mbiike ukwimila Ikimunyi kila pe avanu vesivakumogopa Nguluvi savahigwa na ukusilila ng’ani. ⁸ Lino, vanyawiyendi vangu, mulabedala kinu kimwi! Pa Umutwa, ikimunyi kimwi kiling’ene na imyaka mbilima na imyaka mbilima giling’ene na ikimunyi ikimwi. ⁹ Umutwa sahaava ukukwisa sila sealahuvise ndawe avanu avangi lwe vakwihosa ukuta ihaava. Umwene ina uwusindile wukomi ukwimila nyenye, pakuva siiwenda nambi uyumwi venyu ayage, pesi akuvakwega mbevali vafikile kukuhongesa inzanangifu sawo. ¹⁰ Ikimunyi icha Umutwa sachusa wita muhiisi. Kuchanya na kwilanga sakuyagilila ukwimila umubumo umukomi, ifinu fyawo ifilovesi safilalisiwa nu moto, nayo ing’i na ifipigo fyawo safiyagila pamwi. ¹¹ Lino pakuva mbefili safyanangwa ndahihyo, ngali nyenye luvavaje ukuva mwivanu va kinyandawuli? Luvavaje mwikalage muwelu na ukuva ni choga kwa Nguluvi, ¹² Mwisindila ikimunyi kila cha Nguluvi na ukukisuka changupe ukusa Ikimunyi che kuchanya sakulalisiwa nu moto na ukwanangika, na ifinu mbefili ifilovela safinyeka ukwimila umungila umukali.. ¹³ Neke hwehwe ukwimila uluhuviso lwakwe, twisindila kuchanya ukupya na ing’i imya iyimemile uwugolofu. ¹⁴ Lino, vanyawiyendi vangu, pemuva mwisindila Ikimunyi kila musugunalage hilo ukwiyesa mwiva simwivananga kinu pa Nguluvi, na ukwilamula nave. ¹⁵ Luvavaje muluwonage ulwikangaliso lwa Umutwa ukuta che kilega chemwipelwa sambi mupokwe, ndawe Pawulo umunyalukolo vetu umwende lweavandiche ikola uluhala lweapelitwe na Nguluvi. ¹⁶ Posili ing’ani isingi de mubalula sakwe se nalamu hilo ukusikagula wunofu, ing’ani se avanu avapuva, avagaya imimile, vakusiyasa ndawe lwevahele viyasa mu Uwandike Uwelu uwungi. Palulo vakwisukanisa vavene vayasiwe na ukwanangilwa ng’ani. ¹⁷ Neke nyenye, vanyawiyendi vangu, yemulukagwe ulukani ulu. Lino, muvelage na uwikomalile mulonga muyasiwe na uwananzi wa avayasi, mugwe uluhuma mumimile jenyu igikange wunofu. ¹⁸ Pesi nditigila muginage ukuvina mu wuwuya na mukumukagula Umutwa vetu na Umupoki Yesu Kilisito. Indolo sivelage kulumwene, lino na kumbepali Ena!