2 AVAKOLINDO

¹ Ukuhuma kwa Pawulo, umwigendo va Kilisito Yesu kwa uwende wa Nguluvi, na ukuhuma kwa munyalukolo vetu Timoti, tukuvandikila nyenye mwe likanisa lya Nguluvi uko ku Kolindo, na avanu mbevali va Nuguluvi pepepavesaga mu Akaya. ² Tukuvasukila uwuwuya na uwikalakunoga uluhuma kwa Nguluvi udadetu na Umutwa Yesu Kilisito. ³ Alumbwagwe Nguluvi na Dada va Umutwa vetu Yesu Kilisito, Dada munyalusungu na kangi Nguluvi mulunyamaso mbeluli. ⁴ Umwene akutunyamasa hwehwe mulugudo lwetu mbeluli, sambi nahwe tuvanyamase avangi muludugo lwawo, kwa ulunyamaso lulula lwetukwanukila uluhuma kwa Nguluvi. ⁵ Ena, peluva lwigina uluteseko lwa Kilisito mugati mwetu, na ndahihyo petwigina ukunyamasiwa nave. ⁶ Wone tuve twiguda, sweno lwiva kwa ulunyamaso na uwupoki wenyu. Na kangi petunyamasiwe, lwiva kwa ukwimila ukuvanyamasa nyenye na ukuvatanga muve na uludali lwa ukwikangasa muneseko sisila setwiteseka hwehwe. ⁷ Kangi, uluhuvi lwetwinalo kwa nyenye lukangafu; tukulukagula ulwa pemuhanzile muneseko setu, muhanga kangi na mu lunyamaso lwetu. ⁸ Nye vanyalukolo vetu, hwehwe twiwenda ukuvalongela ulwa ukuguda kwetukagudite kula ku Asiya; ukuguda uko kuke kukomi hilo, na uluhuvi mbeluli lukagayite ulwa tuva petwi wumi kangi. ⁹ Ena, tuke tukave witigila avanu avahige ukufwa, sambi twigisiwe ukumwihuvila Nguluvi yeaisilibula avafwe, tulihuvila uludali lwetu yihwehwe. ¹⁰ Umwene atupokite mu lutalamu ulwa ifwa kangi atupoka hwehwe na yihwehwe tuvisile uluhuvi lwetu mulumwene ulwa saatupoka kangi, ¹¹ nyenye kangi ututangage ukukola ukutwifunyila hwehwe, sambi avanu wolofu valumbe pa hwehwe uwufunyilile wetwapelitwe lwiva lupitulo lwa inzifunyo nzolofu. ¹² Hwehwe tukwivahila kinu kimwi hela: ulwa inumbula setu sikutolelela ulwa twikalite mono ing’i iyi, na tutigile hilo ipa pa nyenye, kwa uwilevesi na uwugolofu wetwapelitwe na Nguluvi; sitwasogosiwi na uluhala lwa avanu pesi kwa uwuwuya wa Nguluvi. ¹³ Nambi tukuvandikila Ing’ani semuhwanite mwimbe na ukusikagula. Nahwe twihuvye ulwa musikagula wunofu hilo, ¹⁴ Pakuva mbaka kulino de mung’agwe padodo hela. Ndihuvye ulwa pambele pemutukagulila ng’ani pa ikimunyi kila cha Umutwa Yesu, pesamuhwana ukwilumba ukwimila hwehwe, ndawe hwehwe lwe tukwilumba ukwimila nyenye. ¹⁵ Sweno, ukwimila uluhuvi lulo, ndahosige nale ukusa ukwenyu, sambi mwanukile uwuwuya kavili. ¹⁶ Ndahosige ukugendela ukwenyu pendibita ku Makedoniya kangi, na pendipiluka, sambi nanye munange mulugendo lwangu pendibita ku Yudaya. ¹⁷ Mbi, mwitigila pende nyosise ulo ngali mba ndimugaya kisiko? Mbi, mwitigila ndilamula ifinu ukwimila amahosa ga avanu na ukuta nywanite nigile “Ena” na baho kangi nigile “Nda?” ¹⁸ Nguluvi ye va nachene hilo; sweno, kila chetwavalonje nyenye si lukani lwa “Ena” na “Nda.” ¹⁹ Pakuva Kilisito Yesu, Mwana va Nguluvi, nene, Silwano na Timoti yetwamudalike kwa nyenye, siee munu va “Ena” na “Nda” neke kulumwene mbepali aliye “Ena” ya Nguluvi. ²⁰ Pakuva mulumwene inyuviso mbesili sa Nguluvi sikave “Ena, Nambi kwa lulo “Ena” yetu yilongwa ukwimila umwene, ukumupela indolo Nguluvi. ²¹ Neke Nguluvi yumwene yakutukangasa hwehwe na nyenye kangi mung’asi ya Kilisito, na ye mwene yatubasile amafuta, ²² na ye mwene yeatutemite uluhagi sambi tuve uwunono wakwe yumwene na ukutupela Umuhe munumbula setu sambi ave kipingiko kwa mbesili seatuviche. ²³ Na Nguluvi ye molelesi vangu, umwene yayisele inumbula yangu! Nene sindasili kangi ku Kolindo ati ukwimila kuvawonela ulusungu. ²⁴ Sitwiwenda ukuvakangala mu lufuuwo lwenyu; nyenye mukakange mulufuuwo lwenyu. Ulwisakwa kwa nyenye, lwe lwa ukuhanga ukupiga ikipigo pamwi na hwehwe, ukwimila uluhekelelo lwenyu.

¹ Nambi nene ndilamulye ukuta sindilavasila kangi sambi ndivahuguvike. ² Pakuva wone ndivahuguvike nyenye, sweno, mbi nani yeanyamasa nene? Pesi vavala hela ve ndivahuguvike! ³ Nambi nene ndavandiche ndawe ndapigite, sambi penzusile ndemwe ukuhuguvala kwa vala vevake valeka nyekelele, pakuva ndendihuvye mwa nyenye mbemuli ukuta uluhekelelo lwangu luve luhekelelo lwa nyenye mbemuli kangi. ⁴ Pendevandikilige nde nyuguve nu kung’ula kono we ndivemba, si lwe kwa ukuvahuguvika nyenye, pesi lwe lwa ukuvalagila ukuta ndivenda hilo. ⁵ Wone pwali umunu yamuhuguvike umuyagwe, uyo sanyuguviki nene ndiyena, ava avahuguvike nyenye mbemuli, nane sindiwenda ukuva ndi mukali ukulutisa. ⁶ Neke ulwene ukuhigwa kwe vakamuhigite awolofu mwa nyenye lekage apumile lulo. ⁷ Ulusige lino ikiba mumudegepele umunu sikimika sambi ulwa alahuguvala alutise sambi alemelwe ng’ani. ⁸ Sweno, nguvagongola: mumulagilage ulwa mumwenda. ⁹ Pengwandika ibalula yila ngawendige ndilukagule ulwa mwidikila ukwinatila chechendivalagila. ¹⁰ Wone mumudegepele umunu, nane ngumudegepela. Pakuva pengumudegepela wone nachene ndinacho ulwa ngumudegepela mwa ndidegepela mwa Kilisito ukwimila nyenye, ¹¹ Sambi tulemwe ukumupela Setani ikilega atusange; pakuva tufikagwe ifipeto fyakwe wefiwali. ¹² Peyefikite mu Tolowa ukudalika Ulukani Ulunofu lwa Kilisito, ndafikite kwina kilega cha ukumupigila Umutwa. ¹³ Neke inumbula yangu siyasikimi hilo pakuva sindamufikiti umunyalukolo vetu Tito. Nambi ndavilasile mbevali pala swe ngwibitilaga ku Makedoniya. ¹⁴ Neke, nene ngumulumba Nguluvi yakutusogosa mbepali sambi tudwese kwa uwutanzi wa Kilisito. Umwene akututanga tutagalise uwa nachene wa Kilisito wita wanda hwehwe twinung’ilila wunofu, baha pavesaga. ¹⁵ Pakuva hwehwe twindawe uwunung’ilile wunofu kwa Nguluvi, kwa vala avikombolwa na kwa vala aviyaga. ¹⁶ Kwa vala veviyaga iminung’ilile ijo ye fwa; neke kwa vala vevikombolwa, iminung’ile uyo gileta uwumi. Mbi nani lino yahwanite ukuhanga mu kipigo che kindawe icho? ¹⁷ Hwehwe sitwindawe avangi vevavisulusa na ulukani lwa Nguluvi; neke hwehwe twidalika kwa inumbula yinya wilevesi ndawe alaje Nguluvi,

¹ Mbi, twivanga kangi ukwiyendelesa? Mbi, twisaka i balula ya ukutukagulisa kwa nyenye, apangi iyihuma kwa nyenye, ndawe avanu avangi? ² Yi nyenye hela ye mwibalula yetu; balula inzandike munumbula setu yeyeavesaga ayiwonage na ukwimba. ³ Lulipelu hela ulwa nyenye mwi balula ya Kilisito isindike kwa amawoko getu. Ibalula iyene sinzandike kwa uwino, pesi ukuta nzandike kwa Umuhe umumi va Nguluvi; nzandike si mwitalawe, pesi ukuta munumbula isa avanu. ⁴ Tuhwanite ukulonga iso ukwimila uluhuvi lwetu lwetwinalo kwa Nguluvi ukukola kwa Kilisito. ⁵ Si ukutigila hwehwe tuhwanite ukupiga chekivesaga ukwimila muludali lwetu yihwehwe, pesi ukuta uludali lwetu mbeluli lwihumaga kwa Nguluvi, ⁶ pakuva umwene yeileka tulupigile ulufingano ulupya lwesi lufingano lwa indagilo inzandike, pesi ukuta ulufingano lwa Umuhe. Pakuva indagilo inzandike sasiwulaga, neke Umuhe ayileta uwumi. ⁷ Indagilo senzandike mufibawo ifya amaganga. Neke ulwene pambele umudugo gukave ifwa, neke indolo sakwe sengomi ukulutila, na avana va Isilaeli valemilwe na ukulava uwusu wa Musa ukwimila ukumalavadika kwakwe. Kangi ukumalavadika uko kwe kwa musika mudodo hela, sweno ikipigo cha kila ichaletite ifwa kikapigike mundolo ingomi ndawe iso ⁸ sweno, uwupisi wa Umuhe wina indolo isilutye hilo. ⁹ Sweno, wone kwekwina indolo mu kipigo cha uluhigilo, lulipelu hela ulwa ikipigo ikileta uwogolofu kiva na indolo ingomi isilutye hilo. ¹⁰ Lino indolo ingomi hilo sitegwe pesesipwali indolo isa ukutala, sa ulutogo lwakwe sipelwipwali. ¹¹ Pakuva wone kila cheche cha lusika ludodo hela chekina indolo sakwe, nditigila wanda kila chechakwikala uwutasila kiva na indolo ingomi ukulutila. ¹² Pakuva ulu lwe luhuvi lwetu, hwehwe twilonga kwa uwupifu hilo. ¹³ Hwehwe sitwipiga ndawe Musa yelwamuvaje ukugubika uwusu wakwe na lipembo sambi avanu va Isilaeli valemwe ukuwulava umudogo wa uwumalavadifu uwuhomefu. ¹⁴ Neke inumbula sawo nalamu; mbaka neng’ino de pelukwimbwa ulufingano ululovela, inumbula sawo sisilapituka. Inumbula sawo sisigala ndahihyo pesi pala hela pe umunu peihanga na Kilisito. Uluhala lwawo lwidinduka pala hela pe umunu peihanga na Kilisito. ¹⁵ Ena, mbaka lino de pesivelaga sikwimbwa indagilo sa Musa uluhala lwawo lwalwiva ludinde. ¹⁶ Neke, ulusika pe umunu akumupitukila Umutwa, uwupuva uwo wawihega. ¹⁷ Ipa “Umutwa” ye Umuhe; na pala peipwali Umuhe va Umutwa pewipwali uwutemapakwe. ¹⁸ Swe, hwehwe mbetuli yesitwivadinde amiho, twilagilwa witigila twilavila mu kilole, indolo isa Umutwa; twipitulwa sambi twihwane hilo na uwihwani wakwe uwa indolo sakwe ingomi. Uko kwekupiga kwa Umuhe va Umutwa.

¹ Sweno, Nguluvi kwa ulusungu lwakwe ulukomi, atupelye ikipigo iki nambi nahwe sitwifulugala. ² Nahwe tukasileche ng’ani mbesili inyonga nyoni na isa ikinyele. Twikana ukupiga sila isa wulyalya nambi ukuluhesigila ulukani lwa Nguluvi, nambi twilonga pawelu ulwanachene sambi mbevali vatukagule ulwa twilonga hilo pa Nguluvi. ³ pakuva, wone Ulukani Ulunofu lwetwidalika lufihime, lufihime hela kwa vala veviyaga. ⁴ Lino iwo sivifuuwa pakuva yula nguluvi va mung’i avapufise uluhala lwawo sambi valemwe ukuluwona ulung’ali lwa Ulukani Ulunofu lwa indolo sa Kilisito, yula ye lwihwano lwa Nguluvi. ⁵ Pakuva hwehwe situkwidalika yihwehwe, pesi Kilisito Yesu yula Umutwa, neke hwehwe twiva twivakami venyu ukwimila Kilisito. ⁶ Nguluvi yagafile itigila, “Ulung’ali lung’alikage uluhuma mulwisa,” yeyula yeing’alika inumbula setu, nu kutupela ulung’ali lwa ukusikagula ing’ani isa indolo sa Nguluvi sesikutung’alikila uluhuma muwusu wa Kilisito. ⁷ Sweno, hwehwe yetwina ifisande fya Umuhe, twindawe ifinu ifigade, sambi luwoneke pelu ukuta uludali ulo ulukomi lwihuma kwa Nguluvi si kwa hwehwe nda. ⁸ Mbepali twiguda, neke sitwifwila ng’ani, twihuguvala neke sitwifulugalila ng’ani; ⁹ twiteseka, neke sitwigaya uwutanzi nambi twivagwise pasi, sitwiwulagilwa ng’ani. ¹⁰ Mbepali tukave we tutegwe ifwa ya Kilisito mumivili jetu, sambi uwumi wakwe Kilisito wuwoneke mumivili jetu. ¹¹ Ena, muwumi wetu mbepali tulaving’ine ni fwa ukwimila Yesu, sambi uwumi wakwe Yesu wuwoneke mumivili jetu iginya kufwa. ¹² Ulu kwe kutigila mugati mwa hwehwe ifwa yipiga ikipigo, neke mugati mwanyenye uwumi wewipiga ikipigo. ¹³ Uwandike Uwelu witigila, “Ndafuuvitwe nambi ndalonzile.” Nayihwehwe kangi twina numbula yiyo ya ulufuuwo. Twifuuwa, nambi nahwe twilonga. ¹⁴ Tukulukagula ulwa yula yeamusilibwe Umutwa Yesu alatusilibula na yihwehwe nahwe pamwi na Yesu na kutuvika palumwene pamwi na yinyenye. ¹⁵ Mbesili isi sikwimila kwa ukwambula kwenyu, sambi luve ndawe uwuwuya wa Nguluvi wukuvafikila avanu wolofu hilo na hilo, sambi iwo valumbe hilo indolo sa Nguluvi. ¹⁶ Nambi kwa ulo sitwidedela; nambi uwugave wetu wa kwivala wisakala, neke mugati mwahwehwe twiwuyapwa vapya pepekukisaga. ¹⁷ Ukuguda kwetwiguda kudodo na kwa lusika ludodo hela; neke kukutupela indolo isilutye na amahosa mbegali, indolo ingaya wudugo. ¹⁸ Palulo twilavisa si wita ifinu fyefiwoneka, pesi fila fyesifiwoneka. Pakuva fyefiwoneka ifyo fya lusika ludodo hela; neke fila fyesifiwoneka ifyo fya uwutasila.

¹ Pakuva ikitinga chetu chetukwikala mung’i, chanangitwe, twinayo ikaye iyihuma kwa Nguluvi, yesinzenge kwa mawoko, iya mbepali kuchanya. ² Neke kulino, mung’i umu twivawa kono we twidoboka hilo, tufwikwe uwikalo wetu we wuli kuchanya. ³ Ena, luvaje tufwikwe ndahihyo sambi satuleke ukuwoneka pa Nguluvi twiwufula. ⁴ Petwiva tukaali mulihema ili mung’i, twivemba twivabane; si ukutigila twisaka ukuguhesa umuvili ugu ugunya kufwa, pesi ukuta twidoboka ukufwikwa umuvili gwesigwifwisagi, sambi kila ikinyakufwa kidadilile ng’ani na uwumi. ⁵ Nguluvi umwene yatuviche ukupituka uko, nave atupelye Umuhe vakwe ave kipingiko cha mbesili seatuvichee. ⁶ Twivakangafu ulusika mbeluli, tukulukagula ulwa ukwilegeha kwikala mumuvili twiva pataali na Umutwa. ⁷ Pakuva tukwikala kwa ulufuuwo, si kwa ukulava. ⁸ Neke twivakangafu na tuketwiwenda ukuhama mu wikalo uwu, tuhamile kulu Mutwa. ⁹ Neke ulukani ulunofu ululutye hilo, twiwenda ukupiga isikumunogela, nambi tuvelage petwikala umu mung’i nambi kuko. ¹⁰ Pakuva mbetuli satwima pa kigoda cha pawuhigilo cha Kilisito, sambi yeyeavesaga mwa hwehwe saanukila amahombo agategine na ifipigo fyapigige ulusika lwa uwumi wakwe mung’i, inofu apangi imbi. ¹¹ Sweno, hwehwe tukulukagula ulwileka tumogope Umutwa, nambi kwa lulo hwehwe twiva twivapifu ukuvakwega avangi. Nguluvi nave atukagwe hilo, nani ndihuvye ulwa nanyinyenye mulukagwe hilo. ¹² Si ukutigila wanda hwehwe twisaka ukwiyendelesa kwa nyenye, neke twigela kangi ukuvalagila nyenye isileka hwehwe twilumbe ukwimila nyenye, sambi muve na ulwa ukuvapitula vala vevakwilumbila isa mwivala hela ukulutila lula ulwene lweviwali munumbula. ¹³ Wone lukawonike ulwa tugulwike, ulo luva ukwimila Nguluvi; na wone kangi twina uluhala lunofu hela, ulo luvelage kwa ukwambula kwenyu. ¹⁴ Pakuva uwende wa Kilisito wukutusogosa hwehwe yetukulukagula ulwa umunu yumwi hela yeafwe ukwimila mbevali, na ulo kwekutigila mbevali vihanga mufwa yakwe. ¹⁵ Afwe ukwimila avanu mbevali, sambi mbevali awumi valemwe ukwikala ukwimila uwumi wawo vavene, pesi kwa ukwimila umwene yafwe, kangi asilibwike ukwimila vavene. ¹⁶ Sweno, uluhuma lino, hwehwe situkumugela umunu yeyeavesaga kwa ikigelo cha avanu. Nambi ulusika ulungi twamugelite Kilisito kwa ikigelo cha avanu, lino silwindahihyo kangi nda. ¹⁷ Umunu yeyeavesaga peahangite na Kilisito aiva kigawa kipya, isa pidaha yesilutye, lavage imya susile. ¹⁸ Mbesili isi che kipigo cha Nguluvi umunya kutulamula hwehwe nave, ukwimila Kilisito, swe akutupela nahwe ulwa ukuvalongela avangi vilamule nave. ¹⁹ Pede kwekutigila: Nguluvi, akave akwilamula na ing’i ukwimila Kilisito, wesakwinatila ulwa inzanangifu sa avanu. Umwene akatupelye ulukani ulwa ukuvalamula avanu na Nguluvi. ²⁰ Sweno, hwehwe twivatume na Kilisito, nave Nguluvi umwene ikola mwa hwehwe ukuvagongola nyenye. Sweno, tukuvagongola ukwimila Kilisito, mwilamulage na Nguluvi. ²¹ Kilisito ali mugaya nzanangifu, neke Nguluvi amuwuyipe ingile mu nzanangifu ukwimila hwehwe, sambi kwa ukuhanga nave, tupelwe uwugolofu wakwe Nguluvi.

¹ Sweno, petwiva vanyakupiga pamwinga na Nguluvi, tukuvagongola ulwa mulidikila ukwanukila wula uwuwuya uwihuma kwa Nguluvi wuyage chaka. ² Pakuva itigila de, “Ulusika ulufulwike, ngakupulikise, ulusika lwa uwupoki ngakutanzile.” Sweno lino ulu lwe lusika ulufulwike, lino de che kimunyi cha uwupoki! ³ Sambi ukupiga kwetu kulemwe ukulongwa fibi na umunu yeyeavesaga, sitwiwenda ukumuvikila yeyeavesaga ikikuvaso chechekivesaga. ⁴ Uluyalo na ulo, hwehwe tukwilagila ulwa twivakami va nachene va Nguluvi mwa mbefili; mu kukangalila ulusika lwa ineseko, mu wubane na mu ludugo. ⁵ Tutofilwe, tusopitwe mundinde nu kuyoveleswa mu lung’anavala; tupigite ifipigo mbaka tufulugale, tukavasise miho ikilo mbekili we sitwilya kinu. ⁶ Tukwilagila ulwa twivakami va Nguluvi mu munumbula inzelu, muwimbi, mu kukangalila na mu wunofu; ukwimila Umuhe Umwelu, mu wende uwugaya uwubuganisi, ⁷ kwa ulukani ulwa nachene na muludali lwa Nguluvi. Uwugolofu lye lihomelo lyetu ilya ulubali lwa kundyo na ulubali lwa kung’igi. ⁸ Mu ululumbo na ukuhongelwa inyoni, ukulongwa fibi na ukusumilwa. Twipigilwa nda fing’omong’omo, kumbi twivanachene, ⁹ Nda vesivakagulaniki, kumbi tukagulanike kwa mbevali; wita wanda vevafwe neke ndawe lwemukutuwona, hwehwe twiwumi hilo. ¹⁰ Nambi tukapumiswe, situkafwi; nambi wetwivahuguvafu ulwene twihekelela mbepali; nambi we twivamikaa tuhele twinoniya avanu wolofu; twiwoneka wita avanu avagaya kinu chechekivesaga, kumbi twinafyo mbefili. ¹¹ Nye vanyalukolo vetu Avakolindo, tulonzile nanye wima hela, inumbula setu seesile hilo. ¹² Wone mwiwona ulwa pokili ikikuvaso chechekivesaga kila, apo icho kiva kwa yinyenye hela, si kwa ulubali lwa hwehwe nda. ¹³ Lino ndilonga nanyenye nda mwivana, mweesage inumbula senyu ndawe lwe tupigite hwehwe. ¹⁴ Mulemwage ukwihwana na avanu vesivafuuvitwi. Mbi, uwunofu na uwanangifu fyakwiyidikisa nachene? Ulung’ali na ulwisa fihwana ukwikalasa? ¹⁵ Mbi, Kilisito ahwana wuli ukwiyidikisa na setani? Yafuuvitwe ina uwulilumwi uwindawuli na yesafuuvitwi? ¹⁶ Itembeli ya Nguluvi yina uwulilumwi uwindawuli na ifihwananguluvi? Pakuva hwehwe twi tembeli ya Nguluvi umumi. Ndawe Nguluvi yumwene lwalonzile: “Sandikala nawo, na ukugendasa nawo, samba Nguluvi vawo, nawo savava vanu vangu.” ¹⁷ Sweno Umutwa ilonga kangi, “Muhegage apawo, mukilege nawo, mulapamisa ikinu ikihongawinya, nani ndivanukila. ¹⁸ Nani samba ndi Dadenyu, nanye samuva mwivanangu, avahinza na avakwamisi. Ilonga Umutwa Umunyaludali.”

¹ Sweno, Vanyawende vangu, kono we twivapele inyuviso isi mbesili, twiyeesage mwa mbesili sesihwanite ukutifusa imivili na inumbula setu, sambi tuve tweesile hilo, na twikalage we tukumogopa Nguluvi. ² Tukuvasuka mutwanukilage wunofu mu numbula senyu! Pakuva situkamwananje umunu yeyeavesaga, situkamutesisi nambi ukumusanga yeyeavesaga. ³ Sindilonga ing’ani isi sambi ndimuhige munu, pakuva, ndawe lwengengalonzile, nyenye muli mugati munumbula setu, tufwisasage pamwinga, tunanage pamwinga. ⁴ Nguvihuvila pakomi, pendilonga nanye; ngwipulika hilo ukwimila nyenye! Mu kuguda kwetu mbekuli pemelwa ikinyakusikimika kikomi na ukuhekelela pakomi. ⁵ Nape yetufikite ku Madedoniya twalemilwe nambi ukusuupa. Imbali mbesili twetwivabane na ukuguda; kwivala lwitakilo; mugati muhwehwe. ⁶ Neke Nguluvi, umunyakuvapela avahomefu ilihomelo, atusikimike umutima hwehwe kwa ukusa kwakwe Tito. ⁷ Si kula hela ukusa kwakwe Tito, pesi kangi pakuva nyenye mukamusikimike. Umwene atulonje lula lwe mwidoboka ukumbona, na lwe muhuguve mwiwenda ukunanga mu nalamu. Ulukani ulo lwelwileka ndihekelela ukulutila. ⁸ Pakuva, nambi ibalula yangu yila yikavahuguvike, ndimugaya ulukani ulwa ukuleka nene lumbave munumbula. (nambi we lwambafile) Ena, ndiwona ulwa ibalula iyo lukavahuguvike neke kwa lusika ludodo. ⁹ Lino ndihekelela, si pakuva muhuguve, pesi ukuta kwa ukuhuguvala kwekukavawuyipe mupituke na ukuhongesa ulwa amahosa genyu. Mukahuguve mumigosekese imivike na Nguluvi, na kwa ulo hwehwe situkavananji nyenye kwa lwelweluvesaga. ¹⁰ Ukuhuguvala ukwihumaga kwa Nguluvi, kwiletaga ulupifuko inumbula, ulupituko lwiletaga uwupoki; palulo sikololi ulwa ukuleka nyenye luvavave. Neke ukuhuguvala ulwa mung’i kwakwiletaga ifwa. ¹¹ Lino muhwanite mwilavile amaveleko agihuma mukuhuguvala kwe aiwenda Nguluvi; kulino ye muve vanu avapifu, mukwilagila ulwa mugaya chemwananzile, mulilakali mu kukabuswa nu muhwehwe, na mukudoboka ukupiga inofu, mukumogopa Nguluvi, kono mwigelanise mbepali ukwihoma na mbesili isa uwananzi. Muwonike ulwa mwivagaya nambi lukani lwelweluvesaga ulwa wananzi. ¹² Nambi ndavandiche ibalula yila, siye nzandike ukwimila yula ye ananzile, apangi si kwa yula yee mwanangile. Nene nzandike sambi luwoneke pelu pa Nguluvi lula lwe nyenye muve mwivapifu ukwimila hwehwe. ¹³ Nambi hwehwe ulo lwatunoje ukulutila. Si ukutigila lwatunojee hela, kangi Tito atunojee kwa uluhekelelo lweeinalo lwe nyenye mukamupelye munumbula yakwe. ¹⁴ Nene ndivalumbite hilo nyenye pa umwene, na kwa ulo nene sindisangwa. Tukave mbepali tukuvalongela ulwa nachene, na kula ukuvalumba nyenye pa Tito lukave lukani ulwa nachene hilo. ¹⁵ Nambi uwende wakwe uwa munumbula kwa nyenye ukongelekela ukulutila peakwiwuka lwe nyenye mbemuli mwiyidikise ukuva vanyachoga, na lwe mukamwanuche kwa ichoga nu kukuvila. ¹⁶ Ndihekelela hilo ulwa kulino ngwihuvila pakomi mwa nyenye.

¹ Kangi vanyalukolo vetu, twiwenda nyenye musikagule isa uwuwuya we Nguluvi akagapelye amakanisa ga mu Makedoniya. ² Mbevali avafuuvitwe avali kuko, vakave muneseko isa ulugudo lukomi, pamwinga na lulo uluhekelelo lwawo lukaginite ukongelekela hilo, mbaka vakave vadeke ukuvakemela avangi umwawo, nambi we vamikaa pakomi. ³ Nywanite ukuwolelela ulwa vakave vadeke ukutegana na fye finafyo na kangi vakalutise. Na ulo lukave mukuwenda kwawo vavene hela, ⁴ Vatugongolite hilo vapelwe ikilega icha ukuhanga nahwehwe mu kipigo iki icha ukuvatanga avanu va Nguluvi avali ku Yudaya. ⁵ Ulo lwe lukani lwesitukahosigi nambi ludodo! Pakuva vatasile ukwitawula vavene kulu Mutwa, Pambele kangi swe vakwitawula vavene kwa hwehwe, ndawe mwewigendela uwende wa Umutwa. ⁶ Sweno, tukumugongola Tito yavanzile ikipigo iki avatangilisage, pemuhwana ukupiga ikipigo iki cha uwende mwa nyenye. ⁷ Nyenye mwinafyo mbefili: ulufuuwo, uludali ulwa ukulonga, uwimbi; uwupifu mbewuli uwa ukupiga inofu, na uwende wenyu kwa hwehwe. Nambi lino, tukwihuvila ulwa muva vadeke mu kipigo iki icha uwende. ⁸ Nene singuvapela ululagilo, neke chendiwenda hela ukuvalagila lwe lula lwe avangi vina uwupifu mukuvatanga avangi, sambi nene ndiwukagule uwende wenyu ukuta kumbi wa nachene. ⁹ Pakuva nyenye ndita muwusele uwuwuya wa Umutwa vetu Yesu Kilisito: nambi umwene, ali mwenafyo va mbefili, nambi ndahihyo iwuyipe mumikaa ukwimila nyenye, sambi nyenye munonele mu wumikaa wakwe. ¹⁰ Ukwimila ulukani ulu, sweno nene nguvatigila: lwinoga lino mupigage sisila semwemulamwe ukupiga umwaka ugulutye. Pakuva nyenye ye muke va ukutala ukulamula ukupiga ulukani ulo. ¹¹ Sweno, mukwisage ulukani ulo; ndawe lwe mukawendelige yinyenye ukutanga, sweno musugunalage ndahihyo ukutegana na uludali lwenyu, ukukwisa. ¹² Pakuva wone umunu ina mutima gwa ukutanga, Nguluvi akwanukila chechekivesaga che uyungi ahwanite ukutawula: siaikanilila kila ikitawule. ¹³ Neke silwinoga nyenye muwilwe uludugo lwenyu, sambi avangi vahwene ukukepusiwa uwusito wa ikitegulo chawo ukuvatanga avangi, aa nda, lunoje tulavage na uwuteganifu wa imbali mbesili na ukwimila mu wugolofu. ¹⁴ Chechekivesaga chemwinacho lino ikilutye kinogela icho kivatangage vala vevagulwime, sambi nawo ulusika lwe vava vakwavite nawo ifilutye, nawo pepene pesavavatanga nanye pemugulwime, na ukwimila lulo pepene pepava na uwuteganifu. ¹⁵ Ndawe Uwandike Uwelu wewitigila, “Yakakong’ise ifyolofu, sakavi nafye filutye, na yula yakakong’ise ifikefu nave sakagulwimi kinu.” ¹⁶ Ngumulumba Nguluvi yavikite munumbula ya Tito uwudobofu uwo we nayinene ndinawo uwa ukuvatanga nyenye. ¹⁷ Ulwene siidikisi hela pakuva twamugongolite apige lulo, pesi ukuta na yumwene ali na uwudobofu wukomi uwa ukutanga, mbaka alamwe yumwene kwa ukuwenda kwakwe aase ukwenyu. ¹⁸ Pamwinga nu mwene, tukumutumilisa na munyalukolo uyumwi ye ululumbo lwakwe lukatagalye mu makanisa mbegali ukwimila ukudalika Ulukani Ulunofu. ¹⁹ Si lulo hela, kangi umwene muhagule na amakanisa mbegali avelage na nene petwipiga ikipigo chetu iki icha uwende, ikipigo chetwipiga ukwimila indolo isa Umutwa na ukulagila uwunofu wa amahosa getu, wa ukutanga avangi. ²⁰ Twiwenda ukwilega ukulongwa fibi ukwimila uwimilisi wa ifitawulwa fyetutawe hwehwe ifya uwudeke. ²¹ Neke amahosa getu, twiwenda tupige lunofu hela palu Mutwa, neke kangi na pavanu luvelage ndahihyo. ²² Sweno pamwinga na vanyalukolo vetu vawo, tumutumite nayi munyalukolo vetu uyungi, ye kolofu tukamuwene ukuta na umwene mupifu ukutanga, na kulino de ina luhuvi lukomi kwa nyenye. ²³ Tito ye muyangu, yetwipigasa nave, ikipigo ukwimila nyenye; neke ulwa vanyalukolo iva avangi vevakusasa nawo, iwo vatume na amakanisa, na indolo sivelage kwa Kilisito. ²⁴ Sweno, muvalagilage uwukangafu wa uwende wenyu, sambi amakanisa gilavile nachene ulwa ululumbo lwendinalo kwa nyenye ukuta lwe lugolofu.

¹ Silumbaji nene ngine ukwandika ulwa ikipigo chenyu ukwimila avanu va Nguluvi. ² Ngulukagula lwe nyenye mwina inumbula iya ukutanga, na ngilumbite ukwimila nyenye mu lukani ulo pa vanu va ku Makedoniya. Ndavatige, “Vanyalukolo vetu va ku Akaya vakakwisise uluhuma umwaka ugulutye.” Sweno, uwupifu wenyu wukavalamwise avanu wolofu hilo. ³ Lino, ndivatumite vanyalukolo vetu iwo, sambi ululumbo lwetu ukwimila nyenye luwoneke ulwa si lwa malanga nda, na ulwa nyenye ye mukwisise uwutanzi wenyu ndawe lwe ndendonzile. ⁴ Lulava kangi avanu va ku Makendoniya pevasile pamwi na hwehwe, tuvafike mukaali simulapiga ulo, pepene pemutuhongela inyoni, na inyoni iso sivafika nayinyenye siva ngaya wulongo, pakuva hwehwe twiva tuvahuvye hilo. ⁵ Nambi lino, mbwene lunofu ndivagongole avanyalukolo vetu iva, valongole ukusa, sambi vahwane ukugelanisa ifipelwa nafyo filagila nachene ulwa fitawule chesa mutima si kwa kukangalilwa. ⁶ Mwiwukage, “Umunu yeivyalaga kwa kutagalisa; uyo aibetaga fikefu; yeivyalaga kwa kudida kwa wunofu uyo aibetaga fyolofu.” ⁷ Yeyeavesaga swe, atawulage ululing’ene ndawe lwe alamwe, neke luvelage kwa uwesa mutima si kwa uwuhuguvafu apangi kwa kukangalilwa, pakuva Nguluvi akumwenda yula yeitawula kwa luhekelelo. ⁸ Nguluvi akwilye avapele nyenye ukulutila fila fyemugulwime, sambi mbepalli muvelage mwinafyo mbefili fyemwiwenda, pemugina ukutanga mbepali mufipigo ifinofu, ⁹ ndawe Uwandike Uwelu wewilonga: “Umwene aitawulaga kwa wudeke, akuvapela avamikaa, uwunofu wakwe winanaga kitasila.” ¹⁰ Nguluvi ye mwene yeaitawula inyadikwa ya ukuvyala na ifilyo fya ukulya, palulo Nguluvi avapela nyenye inyadikwa mbesili isa ukuvyala na kangi na isanga ya uwudeke wenyu. ¹¹ Umwene avanonia nyenye mbepali mwa mbefili, sambi avanu vamulumbe Nguluvi ukwimila ifipelwa fyenyu fyevakanuche mumawoko getu. ¹² Pakuva ikipigo iki chelu chemwipiga si witigila wanda kitanga hela fyevagulwime avanu va Nguluvi, pesi ukuta kangi kikwega avanu wolofu vamulumbe Nguluvi. ¹³ Na kwa uwolelesi wewiwoneka wa ikipigo chetu, avanu wolofu vamupela indolo Nguluvi ukwimila uwuhuvilwa wenyu kwa Ulukani Ulunofu lwa Kilisito lwe na kangi ukwimila uwudeke wenyu wemwihanga nawo na avanu mbevali mukwidikila. ¹⁴ Sweno, vavasukila kwa Nguluvi pevakwifunya ukwimila nyenye kwa uwuwuya uwiyena weakavapelye Nguluvi. ¹⁵ Tumulumbage Nguluvi ukwimila ikipelwa chakwe ikigaya ikiganiso!

¹ Nene ye yinene Pawulo, yendiwoneka ulwa ndimulele pendilipamwi nanyenye, neke ndimukali pendilipataali nanyenye, nguvasuka kwa ulusungu nu wunofu wakwe Kilisito. ² Nguvasuka mulasagasa sambi mbe ndimukali ulusika lwe ngusa, pakuva ndina nzeli ulwa ndivakalipila mbevali avakwihosa ukuta hwehwe twigendela imigendele ja mung’i hela. ³ Ulwene nachene twikalite mung’i neke situkwihoma ligalu ukwiga lwa mung’i. ⁴ Pakuva, amahomelo getwikola mwigalu lyetu, si gala amahomelo ga mung’i, pesi ukwimila uludali lwa Nguluvi ulwidenyaga amapuli mbegali. Twakwananga uwusugusugu mbewuli wa uwudesi, ⁵ tukwananga imbesa mbesili na ifya ulwidudumbo ifibesa uwukagusi wa Nguluvi; kangi twigalula amahosa mbegali gave na choga kwa Kilisito. ⁶ Peye mukwilaniche muchoga, hwehwe yetwigelanise ukupumya na ukuhiga lweluvesaga lwa uwugaya choga. ⁷ Nyenye mwilavaga ing’ani isa mwivala hela. Mbi, pwali umunu yeyeavesaga yakwihosa ulwa umwene ye munu va Kilisito? Lunofu! Sweno, atuhosage nahwe ulwa nayi hwehwe kangi twi vanu vakwe Kilisito ndawe umwene uyo lwa nave munu va Kilisito. ⁸ Nambi mbe ndiwoneka ndandigina ukwidudumbila ululagilo lwe Nguluvi atupelye, ululagilo lwa ukuvasikimika nyenye, siwita lula uluvambusa nyenye mugwe nda. ⁹ Sindiwenda muhose ulwa nene ndisaka ukuvakabusa nyenye kwa ibalula sangu. ¹⁰ Pakuva vitigila ukutigila, “Ibalula sa Pawulo ng’ali kangi simemite ing’ani inalamu, neke umwene palipamwi na hwehwe muhomefu, nambi peilonga ing’ani sakwe ngaya kinu.” ¹¹ Na umunu yeilonga ndahihyo ikiba iwuke ulwa ing’ani setukwandika mu balula petuli pataali, na ing’ani setwilonga petuli pamwi na nyenye sisiliwungi nda. ¹² Na kwa lwelweluvesaga hwehwe situhwaniti twivike nambi ukwiteganisa na avanu vala vevakwisumila vavene. Avanu vevakwivika vavene vave kigelo icha ukwigelela, na avanu vevakwiteganisa vavene kwa vavene, iwo vapuva. ¹³ Neke hwehwe sitwidudumba ukulutisa; ukwihala uko kutegana hela na ikigelo cha kila ikipigo chetwapelitwe na Nguluvi, ikipigo chetuhele twipiga kangi na ukwenyu. ¹⁴ Na pakuva nyenye muli mumo munanana mwetupigila, sitwalowiki ndusa petwasige ukwenyu, petukuvaletela Ulukani Ulunofu lwa Kilisito. ¹⁵ Sweno, situkwilumbila ikipigo chevapigite avangi ukulutisa ikigelo chetwapelitwe; pesi ukuta lino tukwihuvila ulwa ulufuuwo lwenyu longelekela mwa nyenye ukutegana na ikigelo cheatupelye Nguluvi. ¹⁶ Ipo petuhwana ukudalika Ulukani Ulunofu mung’i isingi, apataali na nyenye; na ulo si luva lwa nyenye ukwidudumbila ikipigo chevapigite avanu vangi apono apangi. ¹⁷ Neke ndawe wewilonga Uwandike Uwelu, “Yeakwihala ihalage mukipigo chapigite Umutwa.” ¹⁸ Si yula yeakwisumila yumwene, pesi ukuta yula yeisumilwa na Umutwa yeakwanukilwa.

¹ Ikali kiba mung’angalile padodo hela, nambi mbe ndimupuva ulubali ulungi! Ena, mung’angalilage padodo. ² Nene nguvawonela imbafya neke imbafya iso sa Nguluvi; pakuva nyenye mwihwana umuhinza umutuunafu umugolofu yendamulumbye umugosi yumwi hela nave ye Kilisito. ³ Neke ngogopa ulwa, ndawe inzoka yila kwa uwubanga wayo uwa uwudesi yamusanzile Hawa, amahosa genyu gahwanite ukuyaswa, nu kuwuleka uwuhuvilwa wenyu uwa nachene kwa Kilisito. ⁴ Pakuva umunu yeyeavesaga akusa nu ukumudalika Yesu uyungi na yula yetwamudalike, nyenye mukumwanukila uyo mugalalwike, apangi mukugufuuwa umuhe na uwudalisi uwungi wesiwukwiyidikisa na lula Ulukani Ulunofu lwemwanuche ukuhuma kwa hwehwe. ⁵ Singwihuvila ulwa nene ye ndi mudodo ukulutila iwo, “Avigendo avavina.” ⁶ Apangi ngaya ikipelwa icha ukuganula indongele, neke uwimbi ndinawo; ulukani ulu tukalulaje pelu ukwenyu na apono pepepavesaga na ulusika mbeluli. ⁷ Nene ndadalike ukwenyu Ulukani Ulunofu lwa Nguluvi wesindilavisa amahombo; ndileviise sambi ndivakang’ule nyenye. Mbi, ndananzile ukupiga ulo? ⁸ Pendapigige ikipigo apenyu, ndanuche amahombo ukuhuma kwa amakanisa agangi. Tutigile kwa ulubali ulungi ndavanwike avene uwunono wawo sambi ndivapigile nyenye. ⁹ Pende pamwi na nyenye sindamufwahisi, umunu yeyeavesaga ukwimila uwugulumu, vanyalukolo vevahumite ku Makedoniya vandetye mbefili fye ndengulwime. Nane ndikomalilige pakomi sandilava ndi kitegulo ikisito kwa nyenye mwa chechekivesaga, na ngina ukugendela lulo. ¹⁰ Ngwihuvisa ukwimila uwa nachene mwa Kilisito we wuli mugati mwa nene, ulwa kisukuli ikinu chekihwana ukunanila ukwihala mulukani ulo apono baha pavesaga mu Akaya. ¹¹ Mbi ndawuli? Mbi pakuva sindivenda nyenye? Nguluvi akulukagula ukuta ndivenda nyenye! ¹² Mba pemiga ndawe lwe ndipiga lino, sambi ndemwe ukuvalekela ikilega vala vevisaka ikilega, icha ukwihala ukuta ati nawo vipiga ndawe hwehwe. ¹³ Pakuva, iwo vigendo va uwudesi, avapisi avabanga avakwifwila ulwa vigendo va Kilisito. ¹⁴ Neke nambi ndahihyo ulo silwa wuhulo, pakuva na Setani yumwene aakwifwila ave nda munyivaha va ulung’ali! ¹⁵ Sweno si lukani lwa kukabuka wone na iwo avakami vakwe vakwifwila ukuva vapisi va uwugolofu. Neke kumudugo savanukila kila ikivavaje ikitegine na ifipigo fyawo. ¹⁶ Kangi ndipilukila ukulonga: Umunu alemwage ukuhosekesa ukuta ndimupuva. Neke wone mwihose ndahihyo, sweno, mutegulage lulo ukuta ndimupuva sambi nane mbe na icha ukwihala nambi kidodo. ¹⁷ Chendilonga lino si kila cheandaje Umutwa; nda ndimupufi mukwihala, ¹⁸ pakuva wolofu vakwihalila isa mung’i, swe nane ndihala. ¹⁹ Nyenye mwivanyaluhala, nambi mukuvakangalila avapuva! ²⁰ Mukumukangalila nambi umunu yakuvavika nyenye muwunyawingi, umunu yakuvabunza, yakuvasagila, na ukuvavatula kumiho! ²¹ Kwa ukuhonga inyoni ngwidikila ulwa hwehwe twetwivahomefu. Naluve lweluva, neke wone pwali munu yeyeyavesaga yakwigelela ukwihala mu kinu--ndilonga witigila munu umupuva--nene nywanite ndigelele nane ukwihala. ²² Mbi, avene Vaebulaniya? Na yinene. Mbi avene Vaisilaeli? Na yinene. Avene mbegalo ya Abulahamu? Na yinene. HK-00216 Ikipugu (11:25) ²³ Avene vakami va Kilisito? Na yinene ndilonga ulo witigila ngulwike ndi mukami va Kilisito ukulutila avene. Nene ngapigite ikipigo ikitalamu ukulutila, ngikalite mundinde kolofu ukulutila, ngatofilwe kolofu ukulutila, supwe ukuwulagwa nako kolofu. ²⁴ Ndatofilwe ingoda machumi gadatu na sinyigonza na Avayudaya kahanu. ²⁵ Ndatofilwe ingoda kadatu, ndakinyitwe na maganga kamwi; kadatu ndadenyekilwe na ikipugu mubahali, na umo ndagudite ikilo mbekili nu kuhwa ikimunyi mbekili. ²⁶ Ingendo mbesili ndatang’ine na inalamu isa ukukuluka indenga mumikoga, na inalamu isa ukukuluka na amakoko, inalamu ukukuluka uluhuma kwa avanyang’i vayangu na kuvanu va ing’i isingi, inalamu ukukuluka muboma; inalamu ukukuluka mwihala, inalamu ukukuluka mu bahali, inalamu uluhuma kwa vanyalukolo va uwudesi! ²⁷ Ngapigite ikipigo mu lugudo, ngavasise miho kolofu; ukuhwa ndagine na kukeluka kolofu; ndikalige kinge nu kwikala munungwi we ndimugaya mwenda. ²⁸ Neke pamwinga na mbesili isi, mbepali tulaving’ine na ikipigo cha uwimilisi wa amakanisa mbegali. ²⁹ Wone pwali umunu yeyeavesaga ye muhomefu, na yinene nane ndimuhomefu; wone pwali umunu yeyeavesaga ivifisiwa, nayinene nane ndandiva nu wuhuguvafu. ³⁰ Wone lumbagile ukwihala, sweno, ndihala mu wuhomefu wangu. ³¹ Nguluvi na Dada va Umutwa Yesu--litawa lyakwe lipelwage indolo kitasila--umwene akulukagula ulwa sindilonga wudesi. ³² Pende ku Damesiki umutangilisi va Umutema Aleta, peayilolelige iboma ya mu Damesiki sambi andibate. ³³ Neke nene mugati ya lihanga vanzisise ukukola mulinang’ana lya mulukanzi, ndave ndakulukige mumawoka gakwe.

¹ Sweno, muleke nene nambi silunofu! Neke lino ndonga ulwa amaloto na ukugubulilwa kwendapelitwe na Umutwa. ² Ndimusele umunu uyumwi mwa Kilisito, ye kwa imyaka minyichumi na gitayi lino igilutye, umunu uyo emwegule nu kusindikwa kuchanya kula ukwa wudatu a (singulukagula wone e mumuvili apangi mu muhe; Nguluvi ye alukagwe) ³ Ndipilukila ukulonga! Ngulukagula ulwa umunu uyo asindikwe mbaka kuvafwe. (Neke singulukagula wone e mumuvili apangi mumuhe; Nguluvi ye alukagwe) ⁴ Uko apulike ing’ani isa ikinyele se umunu sahwaniti ukusilonga. ⁵ Sweno, ndihala ulwa umunu uyo, neke singwihala ndiyena, pesi mu wuhomefu wangu hela. ⁶ Wone ngembwende ukwihala, singe mba ndi mupuva na ludodo, pakuva nge mba ndilonga ulwa nachene hela. Neke lino sindihala; pakuva nene sindiwenda umunu uyungi anyosekese ukulutila lula lwe akumbona nu kupulika ukuhuma kwa nene. ⁷ Pakumbika nene ndemwe ukuva na ulwidudumbo lukomi ukukola uwolofu wa uwugubulilwe uwo ndapelitwe uwuvafi mumuvili nda wa mifwa, umukomi va Setani akufwahisa ndilidudumba ukulutisa. ⁸ Mu lukani lulo ndamugongolite Umutwa kadatu, sambi luhege. ⁹ Neke umwene anigile, “Uwuwuya wangu wukukukwila; pakuva uludali lwangu lwalwikwilanikila hilo mu wuhomefu.” Sweno, lwinoga hilo ndihale mu wuhomefu wangu sambi uludali lwakwe Kilisito lwikale kwa nene. ¹⁰ Lwelwene ngwidikisa wugolola singo uwuhomefu ukubedalwa, mutalamu, ukubuganisiwa, na ineseko ukwimila Kilisito, pendiva mu wuhomefu pepene pendiva mu ludali. ¹¹ Ngave nda ndi mupuva, neke nyenye yemukanzambwise de. Pakuva ye nyenye ye muke munoje ukusumusa. Pakuva, nambi nene sindi kinu, kwa lwelweluvesaga, nene nambi ndahihyo sindimudodo ukulutila iwo, “Avigendo avavina.” ¹² Imiitu ginyakulagila ukuta nene ndi mwigendo va nachene ifyo fyapigiche apenyu muwukangalisi mbewuli pamwi na imiitu na uwuhulo na ifipigo ifya uludali. ¹³ Mbi kiki chemwaneemite ukulutila amakanisa agangi, pesi nene hela ku lubali lwangu sindavafwahisi mu meele uwutangi wenyu? Mundegepelage lwesindavapiji wunofu. ¹⁴ Neke lino nene yendigelanise hilo ukusa ukwenyu ulwa kadatu, na sindivafwahisa mumeele kinu. Pakuva nene sindisaka ifinu fyenyu, nene ndisaka yinyenye hela. Luvavaje avegasi ukuvakwavila avanawo uwunono, avana ukukwavila avegasi vawo. ¹⁵ Ngembwenda ukupigila mbefili fyendinafyo mukuvatanga nyenye isa mukinyamuhe. Mbi, lino nyenye munzenda padodo, pakuva nene sindivenda nyenye pakomi? ¹⁶ Sweno kangi neke nene yinene sindavafuniti nyenye. Apangi yungi ahwana atigile, “Pakuva Pawulo musugu yeakavibete mu wusugu wakwe.” ¹⁷ Mbi, nene ndavawonie ukukola kwa umunu yeyeavesaga yendamutumite ukwenyu? ¹⁸ Nene ndamukemelye Tito, swe nguvatumila umwene ukwenyu na munyalukolo vetu uyungi. Mbi, lino ndawuli Tito avakalipye? Mbi, simukulukagula ukuta Tito na nene tuhele twilongoswa na Umuhe yuyula yumwi? Na ukuta twakwikala mumikalile iginyawihwana? ¹⁹ Apangi mukwihosa ukuta mbaka kulino hwehwe tukaali petwiyaamila kanisa pa nyenye! Neke ulwene tuhele twilongela ing’ani isi pa Nguluvi, kono we tuhanzile na Kilisito. Neke ing’ani isi mbesili sikwimila ukuvawuyapa wunofu nyenye vanyawende vetu. ²⁰ Nene ngogopa, ulwa apangi penzusile ukwenyu, nywanite ndivafike mwimile wungi, lulemwe ukuvanogela. Nene ngogopa apangi mulava mu lwitakilo na mu gila na mwilakali, muwuhatufu, mu wuheesi, mu lwelango, ulwivifyo, na muwusoming’asa, ikidada na mwiyovo ilileta ulwigawo pagati apenyu. ²¹ Kangi nene ngogopa, ukuta apangi penzusile, Nguluvi andevesa pa nyenye, na kangi nyuguvala kwa vala awolofu vevakapigite inzanangifu, na sivalahongesa uwaafu wawo, na uwudobokesi, pamwinga na uwusafi wawo wevakapigite.

¹ Lino ulu lwe lwa wudatu nene ukusa ukwenyu, “Inalamu mbesili sipulikiswage pa awolelesi vavili apangi vadatu.” Uwandike Uwelu ndawe witigila. ² Ngavakenye vala mbevali vevakapigite uwanangifu pavanu mbevali, kangi nguvakenye wendili pataali, ndawe ndapigite pende ndivagendye ulwa kavili ukuta wone nzuse ndivapunanga. ³ Ipo pepene pemwilavila yinyenye ukuta Kilisito ilongela mwa nene. Yula ye kwa nyenye Kilisito si muhomefu, neke pesi ukuta uludali lwakwe lwipiga mwa nyenye. ⁴ Nambi luve umwene atumbikwe mumusalaba muwuhomefu, neke lino lwe iva mumi muludali lwa Nguluvi. Nayi hwehwe twivahomefu ndahihyo mukuhanga nave, neke nahwehwe twihanga nave muwumi muludali lwa Nguluvi ukwimila nyenye. ⁵ Ongo lino mwigelage we yinyenye sambi mulukagule ukuta wone nachene mukwinatila ulufuuwo. Mwigosage we yinyenye. Mbi, simukulukagula ulwa Kilisito Yesu ali mugati mwa nyenye? Nachene wone mulemilwe ukwigela. ⁶ Neke ndihuvye ukuta nyenye mukulukagula ukutigila hwehwe silulava lutulema. ⁷ Tukwifunya kwa Nguluvi mulemwe ukupiga uwanangifu wewewuvesaga, neke ulwene si kwekutigila, tukagulanike nda vanu avakulwe pesi ukuta muhwane ukupiga inofu nambi hwehwe tuwoneka ukuta tulemilwe. ⁸ Pakuva situhwaniti ukupiga ikinu ikisutana na inachene, pakuva uwutalemwa wetwinawo we wula uwukwimila isa nachene siginage. ⁹ Neke ulwene twihekelela ukuta twivahomefu, neke nyenye mwina ludali, nambi tukuvasukila nyenye muwufikile uwukwilanifu. ¹⁰ Sweno, nambi ngwandika ibalula iyi wendilipataali, sambi pefikite ukwenyu ndemwe ukuva mukali ukukola ululagilo lwe amelyee Umutwa, ena, ululagilo lwa ukuvasikimika na silula lwa ukuvagwisa. ¹¹ Pendisindilisa, vanyalukolo vangu nguvatigila twiwonaga! mukwilanikilage, mwinatilage hilo uwigisi wangu, mwilaganila kumwi, mwikalilage mu wikalakunoga. Na Nguluvi umunya uwende na uwikalakunoga ava pamwi na nyenye. ¹² Kamwene mbemuli, mwinonelage kwa uwende. ¹³ Avanu va Nguluvi kono vakuvatigila kamwene mbemuli. ¹⁴ Uwuwuya wa Umutwa vetu Yesu Kilisito na uwende wa Nguluvi na uwulilumwi wa Umuhe Umwelu, wuvelage nanyenye mbemuli.