1 TIMOTI

¹ Yenene Pawulo, umwigendo va Kilisito Yesu kwa ululagi lwa Nguluvi umupoki vetu na Kilisito Yesu uluhuvi lwetu, ² ngukwandikila veve Timoti, umwanangu hilo mulufuuwo. Ngukusukila uwuwuya, ulusungu na uwikalakunoga ukuhuma kwa Nguluvi udadetu, ulusungu na uwikalakunoga uluhuma kwa Nguluvi Udadetu na Kilisito Yesu Umutwa vetu. ³ Ndiwenda veve wikale kuko ku Efeso, ndawe lwengakususile pengabitige ku Makedoniya. Povali avanu de kuko avakwigisa inzigiso isa uwudesi. Vapesage avanu iwo. ⁴ Uvalongelage vasilekage ng’ani sila isimo isa malanga na ing’oono inaali sa avakukwawo, isiletaga ulubesa hela, sindawe isikwigisa ing’ani isa uwupoki sa Nguluvi. ⁵ Lwetwidonya mu lulagi ulu lwe lwa ukuvalamusa muwende uwihumaga mumutima umwelu, inumbula ingolofu, na ulufuuwo lwa nachene. ⁶ Avanu avangi vayasile na ukupitukila ulubesa lwa uwupufi. ⁷ viwenda ukuva vigisi va indagilo, kono sivakusikagula na ing’ani sawo vavene, nambi sila sevisugunala ukulonga. ⁸ Tukulukagula ukuta indagilo nofu, wone sikole mwesidagiwa sikolage. ⁹ Neke lwiwukwagwe ukuta indagilo simbuyape ukwimila avanu avanofu, pesi ulwa ukwimila vala avipiga isisutine na indagilo, na avananzi, avagaya Nguluvi na avanangifu, vala avagaya choga, aviwulagaga avadadawo na vayuvawo, avawulasi, ¹⁰ avasafi, avakwivaga vagosi kwa vagosi, avihiisaga avanu vakuvasopa mu wunyawingi, avadesi na vala avakwilapaga we videta na mbevali vala vevipigaga chechekivesaga ikisutine na inzigiso isa nachene. ¹¹ Inzigiso iso sihumaga mu Lukani Ulunofu, lwe nene ndapelitwe ndalike. Ulukani Ulunofu lwa Nguluvi umunyandolo na umufunyilile ye nene ndapelitwe ndalike. ¹² Ngumulumba Umutwa vetu Yesu Kilisito yeamelye uludali mu kipigo changu. Ngumulumba pakuva ambwene nene ukuta nywanite swe akunyagula ndimupigile, ¹³ nambi pala pamwandi nene ndamuligige na ukumutesa nu kumupigila fibi. Neke Nguluvi ambonele ulusungu, pakuva ndengali ndimugaya lufuuwo, na baho sindalukaguligi lwendapigige. ¹⁴ Neke Umutwa vetu ameelye uwuwuya wakwe uwolofu, ukumeela ulufuuwo na uwende mu kuhanga na Kilisito Yesu. ¹⁵ Ululongwa ulu lwa nachene, kangi lwinoga lwidikilwage hilo ukuta Kilisito Yesu aasile konivala ukuvapoka vanyanzanangifu. Na viva kutala vawo ye nene, ¹⁶ ambonie ulusungu sambi Kilisito alagile uwukangalisi wakwe mbewuli kwa nene, mbe cholelelo kwa vala mbevali ve pambele vamufuuwa na ukwanukila uwumi uwutasila. ¹⁷ Kulumwene Umutwa va mbepali, yesifwisagi, yesiwonekagi na Nguluvi kulumwene luvelage ululumbo na indolo mbepali na mbepali! Ena. ¹⁸ Ve mwanangu Timoti, ngukupela ululagilo ulu ulukwimila mung’ani isa uwuvisi isendonge pidaha kwa veve. Ukwikangalisa mwa siso peuhwana ukuhoma ligalu wunofu, ¹⁹ pakwibatililaga ulufuuwo lwako na ulwiyiwuko ulunofu. Avanu vangi sivasipuliki inziyiwuko sawo na mwalulo vafuvanzile ulufuuwo lwawo. ²⁰ Mwavawo pwali Himenayo na Alekisanda vengavatawe kwa setani, sambi vigisiwe valemwe ukumuliga Nguluvi.

¹ Wesindilalonga kinu, ndilagisa isa ukwisukila inofu ukwifunya, ukwisukila na ululumbo, fitawulwagwe kwa Nguluvi ukwimila avanu mbevali, ² Ukwimila na avatema sambi twikale mumikalile ja uwusikimafu, uwikalakunoga, ukumogopa Nguluvi na mumigendele iminofu. ³ Ulukani ulu lunofu lukumunogela Nguluvi umupoki vetu, ⁴ yeaisaka avanu mbevali vapokwe neke vakulule inachene. ⁵ Pakuva kwali Nguluvi yumwi, kangi kwaliyumwi umunyakuvatang’asa avanu Nguluvi na umunu uyo ye Kilisito Yesu, ⁶ ye itawe yumwene ukuvakombola avanu mbevali uwukombolwa wesawolelelwa palusika ulukwilaniche. ⁷ Pa ulo, nene ndatumitwe mbe mwigendo na mwigisi va avanu avamyanza ndiludalike ulukani lwa ulufuuwo na inachene. Nachene ndilonga sindideta! ⁸ Ino ngembwenda ukuta mumakanisa mbegali pemwisunyalila avagosi vifunyage, vakang’we amawoko wevitawulye ng’ani kwa Nguluvi vagaya lilakali nambi lwitakilo. ⁹ Kangi ndiwenda avang’inetu vafwala imyenda ija wusikimafu valativa ifwili nambi ukwihamba na ifiwuyapile isahabu nambi ukwifwika imyenda ija lutogo, ¹⁰ pesi ukuta vapigage ifipigo ifinofu ifinogela mumigendele ja avang’inetu avanyachoga kwa Nguluvi. ¹¹ Avang’inetu luvavaje ukwikala vakatwike na ukuva vilevesi pevakwiyigisa. ¹² Nene singumutawula umung’inetu amwigise nambi ukumusagila umugosi, lumuvaje ukwikala asikimee. ¹³ Pakuva Adamu yeatasile ukugawa, neke pease Hawa. ¹⁴ Sikwekutigila Adamu yeasanjilwe, pesi yu mung’inetu yeasanjilwe, swe idenya indagilo sa Nguluvi. ¹⁵ Nambi ndahihyo umung’inetu saapokwa ukwimila ukwegala avana, wone anane mulufuuwo, muwende na muwelu na muwilevesi.

¹ Imigendele igi ja nachene: Wone umunu idoboka ukuva mwimilisi mu likanisa, uyo idoboka ikipigo ikinofu. ² Sweno umwimilisi va likanisa lumuvaje avelage yula yesilongwa fibi; lumuvaje avelage ategwe mung’inetu yumwi hela avelage musikimafu yeakwikomalila, mumilongele, munyalulumbo; na lumuvaje avelage mwanukila vagenzi na yeahwanite ukwigisa; ³ alava mugaasi nambi munyamabatu, avelage mulele, simunyalwitakilo, simuwenda amagobole, ⁴ lumuvaje avelage mwimilisi munofu va ikaye yakwe na ukuleka avanakwe vave vanyachoga mwa mbesili. ⁵ Kwekutigila umunu peilemwa ukwimilila ikaye yakwe yumwene imilila ndawuli likanisa lya Nguluvi? ⁶ Umunu yesalakangala mulufuuwo alemwagwe ukupelwa uwimilisi mu likanisa longa idudumbe nu kuhigwa ndawe Setani; ⁷ Avaje ave munu yeipulisa wunofu pa vanu avali kwivala ya ilikanisa, alonga ang’ulwe neke agwile mulutego lwa setani? ⁸ Avatangilisi mu likanisa luvavaje nawo, ukuva vanu vatuunafu sivalongela pavili valava vanywi hilo va idifayi, nambi uwuhatufu, nambi uwudobofu wa amagobole; ⁹ luvavaje vinatilage ulwiyiwuko lunofu ulwa mugati nachene na ulufuuwo. ¹⁰ Lwivaje tandi, vagelwage, pevawonike ulwa vahwanite pepene pevapigage ikipigo chawo. ¹¹ Na avavawo nawo, luvavaje vavelage na imigendele minofu, vesivaheesi va avanu, vavelage vasikimafu; vavelage vevihuvilwa mwa mbesili. ¹² Na umutangilisi mu likanisa lumuvaje avelage ina mung’inetu yumwi hela, kangi avelage yeakwimilila avanakwe na sa mukaye yakwe wunofu. ¹³ Pakuva avatangilisi vevipiga ikipigo chawo wunofu, vakwikwavila imimile minofu na vahwanite valonge isa ulufuuwo lwawo kigaya muhwehwe mwa Kilisito Yesu. ¹⁴ Ngukwandikila ibalula iyi kono we ngwihuvila ukusa kwa veve yilino de. ¹⁵ Neke wone mbe nyaafile, sweno, ibalula iyi yikulongele ulwa imigendele igituvaje mukaye ya Nguluvi, ikaye iyo lye likanisa lya Nguluvi yula umumi, na ilyene che kipanda na ulutu lwanachene. ¹⁶ Pagaya kusina ukwimila uwukomi wa ikinyele cha ulufuuwo lwetu. Awonike mu lwihwano lwa umunu, olelilwe na Umuhe ukuta mugolofu, awonike kwa vanyivaha, adalikwe ku vamyanza, vamufuuvitwe mung’i mbeyili inwilwe kuchanya mu ndolo.

¹ Lino Umuhe ahele ilonga pawelu hela ukuta pamudugo avangi savaluleka ulufuuwo; vakugipulikisa imyuhe ja uwuyasi akwinatila inzigiso sa amasoka. ² Inzigiso isindawe iso, sihele sitagaliswa na avanu avadesi kangi vasanga vanu, ve imitima jawo giva nda minyanye na ichuma ikipyo. ³ Avanu iwo vakwigisa na ukuvakanila ukuta valitegula na kangi ukuta valalya ifinu ifingi de. Neke ulwene Nguluvi agafile ifilyo ifyo, sambi vala avafuuvitwe na vala avakuyikagula inachene valisage we vilumba. ⁴ Chechekivesaga kinu ikigave na Nguluvi kinofu, na sikokili ikivaje ukubihilwa, pesi ukuta mbefili fyanukilwage mu lwifunyo na ikilumbo, ⁵ pakuva ulukani lwa Nguluvi na ulwifunyo lwiwuyapaga ikinu icho kidikilwe na Nguluvi. ⁶ Wone uvapele vanyalukolo mbevali uwulagise uwu, apo uva mukami munofu va Kilisito Yesu, kono wukwiyongelesa mu isa Umuhe mung’ani isa ulufuuwo na inzigiso sa nachene, sila se veve ukave ukwinatila. ⁷ Neke veve usilekage isimo sa ulufuuwo ulugaya kinu. Wisovelesage ukwikala mumigendele iginyachoga kwa Nguluvi. ⁸ Pakuva ukwisovelesa isa umuvili kwiletaga ulugilimati kwayo, neke ukwisovelesa isa Umuhe uko kwiletaga ukwambula ukukwilaniche hilo mwa mbesili, uko kwakutuletela ukwambula uwumi wa yilino kangi na wula uwutasila. ⁹ Ululongwa ulu luhwanite ukwidikilwa na ukulufuuwa. ¹⁰ Hwehwe twisugunala na ukupiga kwa wupifu pakuva twivavikile uluhuvi lwetu, Nguluvi umumi umwene ye mupoki va avanu mbevali, na hilo vala avevamufuuwa. ¹¹ Vapelage uwulagise uwo na inzigiso iso. ¹² Utanage ukwidikila umunu yeyeavesaga ukubedala veve pakuva wimunyakilambo, neke ukalalilage ukuva cholelesi ikikwigwa na avafuuvitwe, mumilongele jako, mumigendele minofu, uwende, ulufuuwo na imikalo minofu. ¹³ Gosage imisika jako, na uwupifu wako mukwimba pamalugu Uwandike Uwelu, ukudalika na ukwigisa, mbaka pesanzusile. ¹⁴ Ulabedala ikipelwa chewinacho veve chewapelitwe ukwimila ing’ani isa avavisi na pewavikiligwe amawoko na avavaha. ¹⁵ Wihosage hilo mwa siso mbesili na ukukwisa mbefili pepene pe ukuvina kwako mumipigile pekuwoneka kwa mbevali. ¹⁶ Komalilage hilo isako yuveve na inzigiso sako. Ginage ukupiga siso, pakuva peupigite ndahihyo, pepene pe wipoka veve pamwi na vala avakukupulikisa.

¹ Ulamukenyela umunu umuvaha, pesi ukuta umugongolage ndawe udado. Vapigilage avanyakilambo nda vanyalukolo vako; ² avang’inetu avagogolo ndawe uyuwo; avahinza nda vahaso, muwelu mbewuli. ³ Uvelage na ichoga ku vang’inetu avafwile na hilo avakiva. ⁴ Neke umufwile wone ave ina vana nave visukulu, iwo luvavaje ukwiyigisa ukukwisa isivavaje mulufuuwo kwa avanyalukolo vawo sambi vavatange avegasi vawo na avavaha vawo,pakuva ulo lwe lukani ulukumunogela Nguluvi. ⁵ Umung’inetu umufwile umukiva, umugaya umunu va ukumutanga, uyo amuviche uluhuvi lwakwe Nguluvi iginaga ukwifunya na ukumusuka uwutanzi ikilo na ikimunyi. ⁶ Neke Umung’inetu yula yeakwikala muwuyamba uyo yeafwe, nambi ave pemumi. ⁷ Vapelage uwulagise uwu, valang’ulilwa lungi. ⁸ Neke wone umunu sakuvalolela avanu va mulukolo lwakwe, na hilo vala va mukaye yakwe, apo. Umunu uyo yealubihye ulufuuwo, na kangi uyo mubi ukulutila umunu yula yesialafuuwa. ⁹ Ulamwandikia mu kitabu cha avafwile, umufwile yeyeavesaga yesalafisa myaka machumi gimutanda, kangi avelage eagomilwe sukumwi swe, ¹⁰ na avelage na migendele minofu, yeavalolye avanakwe wunofu; yeavanuche avagenzi mukaye yakwe, yeawofwige amagulu avanu va Nguluvi yeavatanzile avanu vanyalugudo, na yeitawe ukupiga inofu, ¹¹ Ulavandika avang’inetu avafwile avadodo, pakuva wone uwudobokesi wa imivili jawo wuvasukanise vagomwe kangi neke vapituke vamuleke Kilisito, ¹² Ino vawoneka yevagayite uwuhuvilwa mwa lula lwevevilapite pamwandi. ¹³ Ulungi na ulo vakwiyigisa ukwikalaga hela, na ukupilimapilima mumakaye, neke ulubi hilo vihehaga vanu na ukwingilila ing’ani sa vangi, ing’ani sawo we ngaya wutangilisi. ¹⁴ Sweno ngembwenda avafwile avadodo vagomwage, vegale avana na ukulolela ikaye sawo sambi avatavangu vetu valemwe ukupelwa ikilega cha ukutung’ula mu wananzi hwehwe. ¹⁵ Pakuva avafwile avangi yevakayasile na ukumuminila setani. ¹⁶ Neke wone mwayuva umukilisito ina avafwile mulukolo lwakwe, lumuvaje umwene ukuvalolela na alemwage ukulilekela likanisa ikitegulo kicho, lino sambi likanisa lihwane ukuvalolela vala avafwile avasige viyena hela. ¹⁷ Avavaha avilongosa avanu wunofu vinogela ukupelwa amahombo kavili, na hilo vala vevipifuka ukudalika na ukwigisa. ¹⁸ Pakuva Uwandike Uwelu witigila: “Ulayiwopa isenga umulomo peyilivata ifibete paluga.” “Neke kangi umunyakupiga anoje uluhombo lwakwe.” ¹⁹ Ulidikila ukupulikisa uwutose wa umuvaha pesi kwa uwolelesi wa vanu vavili nave vadatu. ²⁰ Vala avipiga inzanangifu vakenyelage pamalugu sambi avanu vangi wogope, ²¹ Ngukulagisa pa Nguluvi na pa Kilisito na pa vanyivaha avahagule winatilage uwulagise uwu wesiwileka nambi lungi, nambi kwiyendelesa kwa umunu yeyeavesaga mwambesili se uva wipiga. ²² Ulangufya ukumuvikila amawoko umunu yeyeavesaga amupigile Umutwa. Ulahanga mu nzanangifu sa avanu vangi wivikage mu wugolofu. ²³ Ulanywa ululenga hela, pesi unywesage idifai ndondo ukwimila ilileme lyako, pakuva lihele likukufwahisa kolofu na ifitamwa. ²⁴ Inzanangifu sa avanu vangi siwonekaga pawelu hela, naso sikuvalongolela kukuhigwa, neke inzanangifu sa avangi sasiwoneka pambele. ²⁵ Lwindahihyo na ifipigo ifinofu fyafiwoneka pawelu, na fila fyesifili pawelu nafyo sifyafifihwa.

¹ Avanyawingi mbevali luvavaje vavelage na ichoga kwa avavina vawo sambi pave pagaya lukani ulukwambusa ukuligwa ilitawa lya Nguluvi na inzigiso setu. ² Avanyawingi ve avavina vawo Vakilisito valemwage ukuvabedala pakuva iwo vanyalukolo vawo. Ulungi na lulo luvavaje vavapigilage wunofu na ukulutisa, pakuva iwo vevakwambula ukuhuma mufipigo fyawo ve vanyalufuuwo vevavenda. Lukuvaje ukwigisa ing’ani na ukudalika isi. ³ Umunu yeyeavesaga yeakwigisa isisutine na ing’ani isi na yesakwidikila ing’ani sa nachene sa Umutwa vetu Yesu Kilisito na inzigiso, isa ulufuuwo, ⁴ uyo amemile kidada na sikokili cheakisele. Ye munu yeaiwenda ulwiyendo na ulwitakilo mung’ani isa malanga hela, na lulo lwakwambusa uwifu, lwitakilo, maligo, na ukuvahosekesa avanu imbi, ⁵ na ulubesa lwesilwidugagi ukuhuma ku vanu ve uluhala lwawo lufuvangike na vala ve vagayite inachene. Avihosa ukuta ulufuuwo ye ng’asi ya ukwikwavila uwunono. ⁶ Ena, nachene lufuuwo lwalwileta uwunono wukomi kulumunu, wone isikimala na ifinu fyeinafyo. ⁷ Pakuva sitwaletiti kinu chechekivesaga ponivala, na kangi sisatutegula nambi kinu ukuhuma mung’i, ⁸ Sweno wone twinafyo ifilyo na imyenda lutuvaje ukusikimala na fifyo. ⁹ Neke vala veviwenda ukuva vanono, vavigwila mukugelwa, na ukwibatika mulutego lwa uwudobokesi uwubi wa kipuva sesakuvakwegela kuwanangifu. ¹⁰ Pakuva uwudobokesi wa amagobole lye lisina lya inzanangifu mbesili, ukwimila mwalulo vakahele vakibumangila pataali na ulufuuwo nawo vakasitesise inumbula sawo na uwuvafi wolofu. ¹¹ Neke veve,vemunu va Nguluvi, wilegage mwa siso, winatilage uwugolofu, ichoga kwa Nguluvi, Ulufuuwo, Uwende, uwusindile, na uwilevesi. ¹² Dadambale wunofu muligalu ilya ulufuuwo, wibatilile uwumi wa mbepali wewakemelitwe, ulusika lwewalwidikilige ulufuuwo pa wolelesi wa awolofu. ¹³ Ngukulagisa pa Nguluvi yeakufivika ifinu mbefili muwumi, pa Kilisito Yesu yeolelelye na ukwidikila inachene pa Pondyo Pilato, ¹⁴ ngukulagila winatilage uwulagise wako na ukwinatila wunofu mbaka ikimunyi kila chesaelelukila Umutwa vetu Yesu Kilisito. ¹⁵ Ukweleluka kwakwe sakuwoneka mukimunyi ikihwanite ikikele na yumwene Nguluvi, umufunyilile, Umutwa va avatwa, Umuvina va avavina. ¹⁶ Umwene ye iyena hela ainana kitasila, mulung’ali lwesiluhwanite munu alaving’ane nalo. Asukuli umunu ye amuwene na yeahwana ukumuwona. Kulumwene luvelage lulumbo na uludali ulutasila! Ena. ¹⁷ Uvalagisage avanono mumikalile ja neng’ino validusa, na ulwa valihuvila uwunono wesiwinanagi, pesi ukuta vamuhuvilage Nguluvi, ye ukwimila wudeke wakwe akutupela ifinu mbefili fitunogele. ¹⁸ Valagilage vapigage ifinofu, vave vanono kwa ukupiga ifinofu, vavelage vadeke ukutawula ifinu fyawo kwa avanu vangi. ¹⁹ Ukwimila lulo, vivikila ikisande cha uwunono chekiva lutu ulukwilaniche ulusika ulukusa. Ipo pesavanukila uwumi wula uwutasila uwa nachene. ²⁰ Veve Timoti, lolele wunofu mbesili sila sewapelitwe. Wikwegage mulubesa lwa umu mung’i ulubesa lwa uwupuva ukwimila kila che avangi vakukitigila, “Uwimbi.” ²¹ Pakuva avangi vakivahite ukuta vimbite, chekiwoneka mumo kwe ukufuvanga ulufuuwo. Nguvasukila mbemuli uwuwuya!