1 AVATESALONIKE

¹ Ye nene Pawulo, pamwinga na Silivano na Timoti tukuvandikila nyenye mwe vanu va mu likanisa lya ku Tesalonike, avanu vakwe Nguluvi Dada, na va Umutwa Yesu Kilisito. Nguvasukila uwuwuya na uwikalakunoga. ² Tukumulumba Nguluvi mbepali ukwimila nyenye mbemuli na ukuviwuka mbepali petukwifunya. ³ Pakuva, pa Nguluvi udadetu, tukwiwuka lwe mukululagila ulufuuwo lwenyu mufipigo, lwe uwende wenyu wukuvatanga ukupigila muwupifu, na lwe uluhuvi lwenyu ulukwilaniche kulu Mutwa vetu Yesu Kilisito. ⁴ Vanyalukolo, tukulukagula ulwa Nguluvi avenda na ukuta avahagwe muve vanu vakwe, ⁵ pakuva ulusika lwe twavadaliche lula Ulukani Ulunofu silwe lwa malanga hela, pesi muludali na kwa Umuhe Umwelu, kono we tukulukagula hilo, ukuta ulukani ulo lwe lwa nachene. Mukulukagula ukuta petwikalasige na nyenye, twikalige ukwimila ukwambula kwenyu. ⁶ Nanye mwatwigite hwehwe na ukwiga Umutwa; nambi luve mwagudite hilo neke mwanuche ulukani mu luhekelelo ulwihuma kulu Muhe Umwelu. ⁷ Nambi palulo nyenye mukave mwina valongosi vanofu kwa avafuuvitwe mbevali vakwiga nyenye mu Makedoniya na mu Akaya. ⁸ Pakuva, ukwimila uwupifu wenyu ulukani lwa Umutwa lupulise si ukuta ku Makedoniya na ku Akaya hela, ulufuuwo lwenyu kwa Nguluvi lukatagalye mbekuli. Kangi sitwiwenda ukulonga tulutise. ⁹ Avanu iwo vilonga ulwa ulugendo lwetu ukwenyu, lula lwe mukatwanuche, na lwe mukafilekite ifihwana nguluvi swe mukumupitukila Nguluvi u mumi na uva nachene, ¹⁰ na kulino mukumusindila umwanakwe iike uluhuma kuchanya, Yesu, ye Nguluvi amusilibwe uluhuma kuvafwe, na ye akutupoka mwilakali lya Nguluvi ilikusa.

¹ Vanyalukolo, yinyenye mukulukagula ukuta ulugendo lwetu ukwenyu si lwe lwa malanga. ² Mukwiwuka lula lwe vatupije fibi nu kutuliga kula ku Filipi petwesitulava tufika ukwenyu ku Tesaloniki. Nambi kwe na lubesa lukomi, neke Nguluvi vetu atupelye uwupifu uwa ukuvadalikila Ulukani Ulunofu lwakwe. ³ Ulukani lwe twikangasa kwa nyenye si lukani ulukwimila uwudesi nambi amahosa amabi kangi sitwiwenda ukumusanga munu yeyeavesaga. ⁴ Hwehwe mbepali twilonga lula ulukumunogela Nguluvi pakuva atuwene ulwa hwehwe tuhwanite, swe akutupela ulu Ulukani Ulunofu. Si ukuta hwehwe twiwenda ukuvanogela avanu nambi, pesi ulwa twiwenda ukumunogela Nguluvi ye asisele inumbula setu mugati hilo. ⁵ Nanye mukulukagula hilo petwasige ukwenyu, sitwasili na ing’ani isa ukuvatunumika, nambi kwa uwusugusugu twiva ndatwifiha lukani, Nguluvi ye asisele inumbula setu! ⁶ Sitwawenditi lulumbo ukuhuma kuvanu, nambi ukuhuma ukwenyu, nambi ukuhuma ku munu yungi yeyeavesaga, ⁷ nave hwehwe pe tu vigendo va Kilisito, tuke tuhwana ukusaka ulungi de kwa nyenye. Neke hwehwe twe twi valele pagati apeenyu ndawe umung’inetu pa vanakwe. ⁸ Twavendite nyenye hilo mbaka twidikile ukuvahanza si ukuta mu Lukani Ulunofu hela lwa Nguluvi na muwunani wetu. Ulo lwe mwave vanyawende vetu! ⁹ Vanyalukolo, mukwiwuka lwe twapigite ikipigo na lwe twafwahite, pe twavaletelige Ulukani Ulunofu lwa Nguluvi twapigite pakilo na pamunyi sambi tulemwe ukumufuna umunu yeyeavesaga mwa nyenye. ¹⁰ Na yinyenye muhwanite molelele, na Nguluvi, nave ye molelesi, ulwa imigendele jetu pagati apeenyu nyenye ye mwifuuwa je minofu, migolofu na migaya wutenda. ¹¹ Mukulukagula ulwa hwehwe twamupije yeyeavesaga mwa nyenye ndawe lula Dada va avana lwe akuvapigila avanakwe yumwene. ¹² Twavakangise imitima, na ukusikimika na ukuvalamusa sambi mwikalage mumigendele je gikumunogela Nguluvi ye avakemelye muhange mu wutwa na indolo sakwe. ¹³ Kangi twina lukani lungi ulwa ukumulumba nguluvi: petwavaletelige ulukani lwa Nguluvi, nanye mwalupulike, swe mukulwanukila, si wita lukani lwa munu, pesi wita lukani lwa Nguluvi, nachenne welwiwali. Pakuva Nguluvi ahele ipiga mugati umwenyu nyenye ye mwifuuwa. ¹⁴ Vanyalukolo, nyenye mukafikitwe na ing’ani sisila sesikagafikite amakanisa ga Nguluvi agali kula ku Yudaya, ing’ani isikavafikite avanu vakwe Kilisito Yesu. Nyenye mukapigilwe fibi na avanyang’i vayenyu ndawe avene lwe vakapigilwe fibi na Avayudaya vayawo, ¹⁵ vala ve vamuwulige Umutwa Yesu na avavisi, swe vakututesa na yihwehwe kangi. Avanu iwo vakumuvifya Nguluvi, kangi vatavangu va yeyeavesaga munu! ¹⁶ Kangi vagelite ukututanila mulava vadalikila avanu vesivamuseli Nguluvi ulukani lwe luvaletela uwupoki. Mwa Ulu vakwisise ulwinungo lwa inzanangifu mbesili sevapigite ifilo mbefili. Neke lino ililakali lya Nguluvi yelivafiche. ¹⁷ Vanyalukolo, ukwileka kwetu na nyenye kwe kwa lusika ludodo hela, kangi ukwileka uko kwe kwa muvili hela na siwita kwa Umuhe. Lusika ludodo pambele, twave twisusilwe hilo ukuvawona kangi! ¹⁸ Swe twilamula ukuvagendela kangi. Nane, Pawulo, ndagelite kolofu ukusa ukwenyu, neke Setani atutanie. ¹⁹ Mbi, pesatwimite pa Umutwa Yesu pesaasile, ululumbo lwa uwutalemwa wetu sawuva kiki? Samuva yinyenye; nyenye ye lwe luhuvi na uluhekelelo lwetu! ²⁰ Ena, nyenye ye ndolo na uluhekelelo lwetu!

¹ Pambele twalemilwe ukukangalila kangi, twawene lunofu tusigale twiyena kula ku Atene, ² na ukuvasindikila munyalukolo vetu Timoti, ye munyakupiga muyetu ukwimila Nguluvi mu kudalika Ulukani Ulunofu lwa Kilisito. Twavasindiche sambi ase avakangase na ukuvasikimika, ³ sambi ulufuuwo lwa uyungi mwa nyenye luleke ukukepa ukwimila ingudo iso. Neke nyenye mulusele ukuta lutuvaje ukuva mu ngudo. ⁴ Pakuva, pe twe pamwinga na nyenye, twavalonje ukuta tutesewa, na yemulukagwe, ukuta yeluve ndahihyo. ⁵ Nambi ndamutumite ukwenyu Timoti. Sindahwi ndikisindila kangi, swe ngumutuma sambi ndisikagule isa ulufuuwo lwenyu. Salulava apangi umwanangifu akavagelite neke anangileng’ani ikipigo chetukapigite ukwenyu. ⁶ Lino Timoti yeapilwike, nave atuletye ing’ani isa uluhekelelo isa ulufuuwo na uwende wenyu. Atulonje ukuta mukutwiwuka mbepali, na ulwa mutususilwe mwiwenda ukutuwona hwehwe ndawe hwehwe lwe tuvasusilwe twiwenda ukuvawona. ⁷ Sweno ing’ani sa ulufuuwo lwenyu sikatupelye uludali mu neseko na mu kuguda kwetu mbekuli, ⁸ lino nachene tukwikala wone nyenye mwimite mukange mu kuhanga na Umutwa. ⁹ Lino twihwana ukumulumba Nguluvi vetu ukwimila nyenye. Tukumulumba kwa luhekelelo lwetwinalo mulumwene ukwimila nyenye. ¹⁰ Twigina ukumusuka Nguluvi pakilo na pamunyi kwa inumbula mbeyili sambi atupele ikilega cha ukwiwona sambi tuwuyapise chekiva kikepite mu lufuuwo lwenyu. ¹¹ Tukumusuka Nguluvi yumwene udadetu, na Umutwa vetu Yesu atuvikile ing’asi ya ukusila ukwenyu. ¹² Umutwa avatangage nyenye muwiyendi nu kuvenda avanu mbevali hilo na hilo, ndawe hwehwe lwe tuvenda nyenye. ¹³ Ino agikangasa imitima jenyu, nanye muva mukwilaniche na avelu pa Nguluvi na udadetu ulusika lwe Umutwa vetu Yesu pesaasile pamwi na mbevali ve vanu vakwe.

¹ Pendidugilisa, vanyalukolo vangu, ye mukiyigise ukuhuma kwa hwehwe lula uluvavaje ukugenda sambi mumunogele Nguluvi. Nachene mukave mwigenda ndahihyo. Lino tukuvasuka nu kuvagongola mwitawa lya Umutwa Yesu mupigage ulunofu ululutye. ² Pakuva mukulukagula ukuta uwulagise we twavapelye mu mululagi lwa Umutwa Yesu. ³ Nguluvi iwenda nyenye muvelage velu na mwilegage mu migendele imyanangifu. ⁴ Yeyeavesaga mugosi lumuvaje alukagulage lwe akwikalasa na uvakwe mu welu na ichoga, ⁵ na si muwudobokesi uwubi ndawe avanu avamyanza. ⁶ Sweno, umunu yeyeavesaga alamwanangila nambi ukumubunza umuyagwe mu lukani ulu. Yetuke tukavalonje iso na ukuvakenyela ukuta Umutwa avahiga avipiga ing’ani iso. ⁷ Nguluvi satukemelii twikale mumigendele ja uwugoni, pesi ukuta tugendelage mu welu. ⁸ Ino, yeibedala inzigiso iso sakumubedala munu, ava akumubedala yumwene Nguluvi ye akuvapela Umuhe vakwe Umwelu. ⁹ Sikololi lukani lwa ukuvandikila ulwa ukuvenda vanyalukolo venyu avafuuvitwe. Nyenye, yenyenye ye mukigisiwe na Nguluvi lula uluvavaje ukwiyenda. ¹⁰ Na mukave nachene mukuvapigila ndahihyo avanyalukolo venyu mbevali bahapavesaga mu Makedoniya. Ino, vanyalukolo, tukuvasuka mupigage na ukulutisa. ¹¹ Mukalalilage mbemuli ukwikala mu wusikimafu, yeyeavesaga ipiganisage na isakwe yumwene na apigage ifipigo kwa amawoko gakwe yumwene ndawe lwe twavalagise pamwandi. ¹² Na mwalulo mwikwavila ululumbo ulunofu ukuhuma kwa vala vesi vakilisito, na simuvahuvila avanu vangi mwa fyemugulwime. ¹³ Vanyalukolo, twiwenda mulukagule ulwa nachene lwa vala vevafwe, sambi mulemwe ukuhuguvala ndawe avanu vangi avagaya uluhuvi. ¹⁴ Hwehwe twifuuwa ulwa Yesu afwe, asilibwike; na palulo hwehwe nahwe twifuuwa ukuta Nguluvi saavaleta pamwinga na Yesu vala mbevali vevafwe kono we vamufuuvitwe. ¹⁵ Ulu tukuvalongela lwe lwigiso lwa Umutwa; hwehwe ye twi wumi, ye satuva tusige ulusika lwe akusila Umutwa, nachene sisatuvalongolela vala vevafwe. ¹⁶ Pakuva sapava na lulagi, iliswi lya munyivaha umuvina, na ilipembe lya Nguluvi salikuwa, na yumwene Umutwa sa ika uluhuma kuchanya. Pepene vevafwe kono we vakumufuuwa Kilisito savasilibulwa tandi. ¹⁷ Neke nahwe ye twi wumi ulusika ulo satukong’aswa pamwi nawo mu mafufu ukumutang’anila Umutwa mwilanga. Na kwa ndahihyo satuva mbepali na Umutwa. ¹⁸ Sweno, mwisikimikage mung’ani isi.

¹ Vanyalukolo, si poluli lukani lwa ukuvandikila ulusika na imisika pesasiwoneka ing’ani isi. ² Pakuva nayi nyenye mulukagwe ulwa ikimunyi cha Umutwa sachusa ndawe umuhiisi lwe akusaga pakilo. ³ Avanu pesava vitigila, “Kitunafu kangi kuposile.” Pepene pe uwanangifu witinukisa! Iso sasivasila sitinukisa ndawe uwuvafi wa ung’inetu munyafilo peivikwe sambi egale, na avanu sisavakuluka kwa iso nambi, ⁴ neke nyenye, vanyalukolo, simuli mulwisa nda, na ikimunyi icho sikivavaji ukuvasila kivatinukise ndawe umuhiisi. ⁵ Nyenye mbemuli mwivanu ye mwigendela mu lung’ali, avanu va pamunyi. Hwehwe sitwi vanu va pakilo, nambi va mu lwisa. ⁶ Ino, tulavasa tulo ndawe avangi, lutuvaje ukwikala miho na twivatuunafu. ⁷ Vevivasaga vavivasa pakilo, na avagaasi vavigala pakilo. ⁸ Pakuva hwehwe twivanu va ikimunyi luvaje tuvelage vatuunafu, lutuvaje ukwifwika ingwembe ya ulufuuwo na uwende na uluhuvi lwa uwupoki wita nda kofiya ya ichuma. ⁹ Pakuva Nguluvi satuhagwi sambi atusinde na ililakali lyakwe, pesi ukuta tupelwe uwupoki ukwimila Umutwa vetu Yesu Kilisito, ¹⁰ Ye afwee ukwimila hwehwe, sambi twikalase nave, wone twiwumi nambi petufwe. ¹¹ kwa lulo mwisikimikage na ukwitanga yinyenye kwa yinyenye, ndawe lwe mwipiga lino. ¹² Vanyalukolo, tukuvagongola muvelage na choga kwa vala vevipiga ikipigo pagati apeenyu, vala vevakuvalongosa na ukuvigisa ulwa imigendele ja uwukilisito. ¹³ Muwogopage hilo na ukuvenda ukwimila ikipigo chevipiga. Muvelage na uwikalakunoga yinyenye kwa yinyeye. ¹⁴ Vanyalukolo, tukuvagongola hilo muvakenyelage avanu avagata, muvatangage avanyamuhwehwe, muvatangage avanu avahomefu, muvelage mwivakangalisi kwa mbevali. ¹⁵ Mwikomalilage umunu yeyeavesaga alihombela mukole kulumunu yungi uwanangifu, pesi ukuta mudonyage ukwipigila inofu mbepali na ukuvapigila inofu avanu mbevali. ¹⁶ Muhekelelage mbepali, ¹⁷ mwifunyage mbepali, ¹⁸ na muvelage na ikilumbo mwa mbesili. Iso seiwenda Nguluvi kwa nyenye mukuhanga kwenyu na Kilisito Yesu. ¹⁹ Mulamubesa Umuhe Umwelu; ²⁰ Mulabedala uwuvisi, ²¹ Mufigelage ifinu mbefili: mwinatilage ikinofu, ²² na mwilegage na chechekivesaga chawanangifu, ²³ Nguluvi ye akutupela uwikalakunoga--avawuyapage nyenye ukuva velu kwa lwelweluvesaga na ukusigosa inumbula senyu, na imivili jenyu pataali na uwanangifu wewewuvesaga ulusika lwa ukusa kwakwe Umutwa vetu Yetu Kilisito. ²⁴ Yula yeakuvakemela nyenye apiga lulo pakuva umwene va kwihuvilwa. ²⁵ Vanyalukolo, mwifunyage ukwimila hwehwe nahwe. ²⁶ Muvahungilage vanyalukolo mbevali mukuvanonela kwa uwende. ²⁷ Nguvagongola hilo mwitawa lya Umutwa muvimbilage ibalula iyi vanyalukolo vetu mbevali. ²⁸ Tukuvasukila uwuwuya wa Umutwa vetu Yesu Kilisito.