1 YOHANE

¹ Tukuvandikila isi uwimila ulukani lwa uwumi lwelwepoluli uluhuma pamuvango. Hwehwe twalupulike nu kuluwona mumiho getu yihwehwe, ukuluhuvila nu kulwibata na amawoko getu yihwehwe. ² Na uwumi uwo pewawonekige hwehwe twawuwene na kulino tukuwolelela nu kuvalongela isa uwumi uwo wa mbepali na mbepali wewewikwali kwa Dada wewavikitwe pawelu kwa hwehwe. ³ Icho chetwakiwene nu kukipulika icho chetukuvadalikila nanye kangi, sambi muhwane ukuhanga nahwehwe mu uwulilumwi wetwinawo na Dada nu mwanakwe Yesu Kilisito. ⁴ Tukuvandikila nyenye ing’ani isi sambi uluhekelelo lwetu lukwilanikile. ⁵ Sweno, ulukani lwetwalupulike kulumwene Yesu nu kuvadalikila lwe ulu: Nguluvi ye lung’ali, na kulumwene kugaya lwisa lwelweluvesaga. ⁶ Wone tutigile twina uwulilumwi nave, baho baho tukwikala mulwisa, apo tuva tulonzile wudesi na situkwikala mu wanachene. ⁷ Neke wone twikale mu lung’ali, ndawe umwene nave lweali mulung’ali, sweno, twiva na uwulilumwi yihwehwe, na idanda yakwe Yesu Kilisito umwanakwe, yikutofuga inzanangifu mbesili. ⁸ Wone tutigile twivagaya nzanangifu, apo tukwisanga yihwehwe, na inachene yisumuli mwahwehwe. ⁹ Neke wone tuhongese inzanangifu setu, sweno, Nguluvi ye va kwihuvilwa na mugolofu, nave atudegepela inzanangifu setu nu kutofuga mu wananzi mbewuli. ¹⁰ Wone tutigile ulwa situlapiga inzanangifu, apo tumupela Nguluvi uwudesi, nu lukani lwakwe lusumuli mugati mwahwehwe.

¹ Nye vanangu, nguvandikila ing’ani isi, sambi mulemwe ukupiga inzanangifu. Neke wone lulonga umunu ave apigite inzanangifu, twinave uyumwi ye akutusukila kwa Dada, ye Yesu Kilisito umugolofu hilo. ² Kilisito ye nambika yeyayihesa inzanangifu setu; na siukuta inzanangifu setu hwehwe hela, pesi na inzanangifu sa konivala mbekuli. ³ Wone twinatile indagilo sa Nguluvi, apo, pe tuhwana ukuva nu luhuvi ulwa tukumukagula. ⁴ Umunu wone atigile ukuta akumukagula, neke ave siakwinatila indagilo sakwe, apo, umunu uyo mudesi, na inachene yisumuli mulumwene. ⁵ Neke umunu yeyeavesaga yeakwinatila ulukani lwa Nguluvi uyo yemwene yeina uwende uwukwilaniche wa Nguluvi mulumwene. Palulo petuhwana ukuva nu luhuvi ulwa twihanga nave. ⁶ Umunu yeyeavesaga yeitigila ulwa ahanzile na Nguluvi, lumuvaje ikalage ndawe lweikalige Yesu Kilisito. ⁷ Nye vanyawiyendi vangu, ululagilo ulu lwenguvandikila si lupya nda: lwe lulagilo lulula lwa pidaha lwelwemwinalo uluhuma pamwandi. Ululagilo ulo lwa pidaha lwe lula ulukani lwemwalupulike. ⁸ Nambi ndahihyo, ululagilo ulu lwenguvandikila lwe lulagilo ulupya, na inachene iyo yiwoneka mugati mwa Kilisito na mugati umwenyu kangi. Pakuva ulwisa lwikimbila na ulung’ali ulwa nachene yeluvanzile ukung’alika. ⁹ Yeyeavesaga yeitigila ulwa ali mulung’ali, kono weakumuvipila umunyalukolo vakwe, umunu uyo peakaali alimulwisa. ¹⁰ Yeyeavesaga yeakumwenda umunyalukolo vakwe, uyo ali mulung’ali na mulumwene simokili kinu ikihwanite ukwambusa uyungi apige inzanangifu. ¹¹ Neke yeakumuvipila umunyalukolo vakwe, uyo ali mulwisa; igendela mulwisa, na akwipopela pakuva siakukukagula kweibita, pakuva ulwisa lumubofwise amiho. ¹² Nguvandikila nyenye nyevana, pakuva inzanangifu senyu sidegepilwe mwitawa lya Kilisito. ¹³ Nguvandikila nyenye nye va dada, pakuva mumukagwe yeekwali uluhuma pamuvango. Nguvandikila nyenye vanyakilambo, pakuva mukamulemite yula umwananzi. ¹⁴ Nguvandikila nyenye nye vana, pakuva mukumukagula Dada. Nguvandikila nyenye va dada, pakuva mukumukagula umwene yeekwali uluhuma pamuvango. Nguvandikila nyenye vanyakilambo pakuva mwina ludali; ulukani lwa Nguluvi lulimugati umwenyu na mukamulemite yula umwananzi ¹⁵ Mulonga muyende ing’i nambi ichekivesaga cha mung’i. Umunu yeakuyenda ing’i, uwende wa Dada siwuhwaniti wuve mugati mulumwene. ¹⁶ Ifinu mbefili fya mung’i, uwudobokesi wa umuvili, ifinu fyevakufiwona avanu nu kufidobokela, ulwiwono ulukwambuswaga na uwunono ifyo mbefili sifihumagi kwa Dada, pesi ukuta fihumaga mung’i. ¹⁷ Ing’i pamwi na ifilimumo mbefili finyakudobosa filutila; neke umunu yeipigaga seiwenda Nguluvi, uyo inana kitasila. ¹⁸ Vanangu, umudugo yeguhegelye! Yemukapulike ulwa umutavangua va Kilisito akusa, na kulino de avatavangu wolofu va Kilisito yevakafikite, na palulo tukulukagula ulwa umudugo yeguhegelye. ¹⁹ avanu iwo vakahumite mwahwehwe, neke ulwene nachene sivake vayetu nambi vakatulesile, wone vake vave vayetu, tuke tuva nawo. Neke lino vakawukite, vakwibitilaga, sambi lukagulanike hilo ulwa sivevayetu nangi. ²⁰ Neke nyenye mukapelitwe Umuhe Umwelu va Kilisito, na palulo muyikagwe inachene. ²¹ Sweno, nguvandikila, siukuta simuyikagwi inachene, pesi pakuva muyikagwe, na kangi mukulukagula ulwa uwudesi uwewuvesaga siwukwiyidikisagi nda na inachene. ²² Umudesi yenani? Ye yula yeakumukana Yesu ulwa ye Kilisito? Umunu yeindawe uyo ye mutavangu va Kilisito akumukana Dada nu Mwana. ²³ Pakuva yeyeavesaga akumukana Umwana, akumukana nayi Dada nave. ²⁴ Ino, ulukani lula lwemwalupulike uluhuma pamuvango lwikalage munumbula senyu. Wone ulukani ulo lwemwalupulike uluhuma pamuvango lwikale mugati umwenyu, sweno, apo mwikala mbepali mu wulilumwi nu Mwana na Dada. ²⁵ Nu luhuviso lweatuhuvise hwehwe lwe ulu: Uwumi uwutasila. ²⁶ Ndivandiche ing’ani isi uwimila vala veviwenda ukuvayasa nyenye. ²⁷ Neke, kulubali ulwenyu nyenye, Kilisito akavapelye Umuhe vakwe. Na wone ave peikala mugati umwenyu, simugulumu munu yeyeavesaga avigise. Pakuva Umuhe vakwe akuvigisa mbefili, na uwigisi vakwe wa nachene, si wa wudesi nda. Ino, mwinatilage uwigisi wa yuyo Umuhe na musigalaga mbepali mu wulilumwi na Kilisito. ²⁸ Ena, vanangu, mwikalage mulumwene, sambi ulusika pesaelelwike tuvelage twivakangafu twivagaya muhodo nambi lukani ulwileka twifihe kihonganyoni ikimunyi cha ukusa kwakwe. ²⁹ Mukulukagula ulwa Kilisito mugolofu hilo ino, luvavaje ukulukagula kangi ulwa umunu yeyeavesaga yeipigaga ing’ani isa uwugolofu ye mwana va Nguluvi.

¹ Mulavage ndawuli uwende wa Dada weatupelye hwehwe, nambi twitambulwa vana va Nguluvi, ulo lwe twiwali. Nambi ing’i siyikutukagula hwehwe, pakuva siyimukagwi Nguluvi. ² Vanyawende vangu, hwehwe twivana va Nguluvi lino, neke ulwene silulava lukagulika hilo lwesatulava. Neke tukulukagula ukuta, ulusika lwe Kilisito alava kweleluka, satwihwana nave pakuva satumulava lula lweiwali. ³ Ino, umunu yeyeavesaga ina uluhuvi ulu mwa Kilisito, akwiyesa ndawe lula Kilisito lweesiwe hilo. ⁴ Yeyeavesaga munu ipiga inzanangifu uyo akwananga indagilo sa Nguluvi, pakuva inzanangifu kwe kula ukwananga indagilo. ⁵ Mukulukagula ulwa Kilisito aasile ukuhesa inzanangifu setu, na ukuta kulumwene kugaya nzanangifu sesesivesaga. ⁶ Ino, yeyeavesaga akwikala mukuhanga na Kilisito sipigagi inzanangifu; neke umunu yeyeavesaga ipiga inzanangifu uyo siealamwuwona nangi nambi ukumukagula Kilisito. ⁷ Ino, nye vanangu, mulonga mwidikile ukuyasiwa nu munu yeyeavesaga. Umunu yeipigaga ifipigo ifigolofu uyo mugolofu ndawe lula Kilisito lwe mugolofu hilo. ⁸ Neke yeipigaga inzanangifu uyo va umwanangifu, pakuva umwanangifu ipigaga inzanangifu uluhuma pamuvango. Neke Umwana va Nguluvi aasile konivala ukufyananga ifipigo fya umwanangifu. ⁹ Yeyeavesaga mwana va Nguluvi sipigagi inzanangifu, pakuva ulwihwano lwa Nguluvi luli mulumwene; sahwaniti ukupiga inzanangifu pakuva umwene mwana va Nguluvi. ¹⁰ Neke yeyeavesaga yesiipiga ing’ani ingolofu, nambi yesakumwenda umunyalukolo vakwe, uyo si mwana va Nguluvi. Na uwo we uwuliwungi uwipwali pagatinagati pa avana va Nguluvi na vala avana va setani. ¹¹ Na ulukani lwemukalupulike uluhuma pamuvango lwe ulu: Lutuvaje twiyendage! ¹² Tulonga twihwane na Kayini mu kusogoswa na yula umwanangifu, neke ifipigo fya umwanakwe fye figolofu! ¹³ Sweno, vanyalukolo vangu, mulasasavala wone ing’i yikuvavipila nyenye. ¹⁴ Hwehwe tukulukagula ulwa yetulutye ukuhuma mufwa nu kwingila muwumi pakuva hwehwe tuvenda avanyalukolo vetu. Umunu umugaya uwende uyo isigalaga mufwa. ¹⁵ Yeyeavesaga akumuvipila umunyalukolo vakwe uyo muwulasi; nanye mukulukagula ulwa umuwulasi yeyeavesaga yula mugaya uwumi uwutasila mulumwene. ¹⁶ Hwehwe yetuwukagwe uwende che kiki, pakuva Kilisito awutawe uwumi wakwe ukwimila hwehwe. Nahwe lwindahihyo lutuvaje ukuwutawula uwumi wetu ukwimila vanyalukolo vetu. ¹⁷ Sweno, wone umunu ave na uwunono wa ifinu fyamung’i, neke amuwone umunyalukolo vakwe agulwime, sweno ave na inumbula nalamu alemwe akumuwonela ulusungu, uyo ahwana wuli ukutigila ulwa amwenda Nguluvi? ¹⁸ Nye vanangu, uwende wetu wulonga wuve wa pamulomo hela, pesi wuvelage wa nachene na wa mufipigo. ¹⁹ Ipo pepene petuva nu luhuvi ulwa hwehwe twivanu va nachene; na sisatulava nu wuhuguvafu pa Nguluvi. ²⁰ Pakuva, nambi inumbula yetu yikutuhiga, tukulukagula ulwa Nguluvi muvina hilo ukulutila inumbula, na ulwa umwene afikagwe mbefili. ²¹ Vanyawende vangu, wone inumbula yetu siyikutuhiga lukani, sweno, ipo petuhwana ukuva nu wupifu pa Nguluvi, ²² na ukwanukila kulumwene chekivesaga chetukumusuka, pakuva tukwinatila indagilo sakwe nu kupiga sila isikumunogela. ²³ Ululagilo lwakwe lwe ulu: Ukumufuuwa umwanakwe Kilisito, nu kwiyenda ndawe lweatulajee. ²⁴ Yeakwinatila indagilo sa Nguluvi akwikala mu wulilumwi nave. Ukukola Umuhe ye Nguluvi atupelye hwehwe, tukulukagula ulwa Nguluvi akwikala muwulilumwi na hwehwe.

¹ Vanyawende vangu, mulagifuuwa imyuhe jejegivesaga tandi mutalage ukugigela we musikite, wone imyuhe ijo gisogoswa nu Muhe va Nguluvi, pakuva avavisi wolofu va uwudesi vatagalye mung’i. ² Na iyi ye ng’asi ya ukulukagula wone munu uyo isogoswa nu Muhe va Nguluvi. Yeyeavesaga akwidikila ulwa Kilisito aasile, swe iva munu, umunu uyo inave Umuhe va Nguluvi. ³ Neke umunu yeyeavesaga yesakumwidikila Kilisito ndahihyo, uyo mugaya uyo Umuhe yeihumaga kwa Nguluvi. Umunu uyo ina muhe yula umutavangu va Kilisito; nanye yemukemukapulike ulwa akusa, na linode yeafikite mung’i! ⁴ Neke nyenye, nye vanangu, mwivanu vakwe Nguluvi na yemuvalemite uludali iwo avavisi va uwudesi; pakuva Umuhe yealimugati mwanyenye ina uludali ululutye kwa umuhe yealimugati ava mung’i. ⁵ Avene vilongaga isa mung’i, na ing’i yakuvapulikisa pakuva nawo va mung’i. ⁶ Neke hwehwe twivanu va Nguluvi. Umunu yeamukagwe Nguluvi akutupulikisa, umunu yesiva Nguluvi siakutupulikisa. Ino, uwimila lulo tuhwanite ukuwukagula uwuliwungi uwipwali pagatinagati pa umuhe va nachene na umuhe va uwudesi. ⁷ Vanyawende vangu, twiyendage, pakuva uwende wihumaga kwa Nguluvi. Yeyeavesaga munu yeina uwende uyo ye mwana va Nguluvi, na amukagwe Nguluvi. ⁸ Umunu umugaya uwende siamukagwi Nguluvi, pakuva Nguluvi ye wende. ⁹ Na Nguluvi alajee uwende wakwe kwa hwehwe kwa ukumutuma Umwanakwe yealiyena konivala, sambi tuve na uwumi ukwimila umwene. ¹⁰ Mwa ulu we uwende! Siukuta hwehwe yetwatasile ukumwenda Nguluvi, pesi ulwa umwene yeatwendite hwehwe nambi amutumite Umwanakwe ave nambika ya ukutuhesekesa inzanangifu setu. ¹¹ Vanyawende vangu, wone Nguluvi atwendite ndahihyo, ino, nahwe lutuvaje twiyendage. ¹² Asupali umunu yeamuwene Nguluvi nangi; neke wone tukwiyenda, Nguluvi akwikala mu wulilumwi nahwehwe, nu wende wakwe wikwilanikila mugati mwahwehwe. ¹³ Tukulukagula ulwa tukwikala mu wulilumwi na Nguluvi, nave Nguluvi akwikala mu wulilumwi nahwehwe, pakuva umwene akatupelye Umuhe vakwe. ¹⁴ Hwehwe tuluwene nu kuwolelela avangi ulwa Dada amutumite Umwanakwe ave mupoki va ing’i. ¹⁵ Yeyeavesaga munu yeakwidikila ulwa Yesu ye Mwana va Nguluvi, Nguluvi akwikala muwulilumwi nu munu yuyo, nave akwikala muwulilumwi na Nguluvi. ¹⁶ Ino, hwehwe tukuwukagula nu kuwufuuwa uwende we inawo Nguluvi kwa hwehwe. Nguluvi ye wende, nu munu yeyeavesaga yeakwikala mu wende, uyo akwikala muwulilumwi na Nguluvi, na Nguluvi akwikala muwulilumwi nave. ¹⁷ Uwende wukwilaniche mugati mwahwehwe sambi tuve nu wupifu ikimunyi kila cha Uluhigilo; pakuva imigendele jetu mung’i umu gindawe ja Kilisito. ¹⁸ Pewipwali uwende pagaya muhwehwe, ena, uwende uwukwilaniche wawidaga umuhwehwe mbeguli. Pakuva umuhwehwe gwiletaga ukuhigwa, na umunyamuhwehwe salakwilanikila mu wende. ¹⁹ Hwehwe twina wende pakuva Nguluvi atasile ukutwenda. ²⁰ Yeyeavesaga itigila ulwa Umunu wone atigile ulwa amwenda Nguluvi, kono we akumuvipila umunyalukolo vakwe, uyo mudesi. Pakuva yesiakumwenda umunyalukolo vakwe yeakumuwona, uyo sahwaniti ukumwenda Nguluvi yesialamuwona. ²¹ Sweno, ulu lwe lulagilo lweatupelye Kilisito: Yeakumwenda Nguluvi lumuvaje kangi na ukumwenda umunyalukolo vakwe.

¹ Yeyeavesaga munu yeifuuwa ukuta Yesu ye Kilisito, uyo ye mwana va Nguluvi; na yeakumwenda umwegasi aakumwenda nu mwana umwegale na yuyo umwegasi. ² Ulo lwetukulukagula ukuta tuvenda avana va Nguluvi: kwa ukumwenda Nguluvi nu kwinatila indagilo sakwe; ³ pakuva ukumwenda Nguluvi kwe kwinatila indagilo sakwe. Ni ndagilo sakwe si nalamu, ⁴ pakuva yeyeavesaga mwana va Nguluvi ahwanite ukuyidwesa ing’i ulu de lwetukuyidwesa ing’i: kwa ulufuuwo lwetu. ⁵ Mbi yenani ino, yeahwanite ukuyidwesa ing’i? Ye yula yeifuuwa ukuta Yesu ye Mwana va Nguluvi. ⁶ Yesu Kilisito yeaasile nu lulenga na idanda, siasili nu lulenga hela pesi nu lulenga na idanda. ⁷ Nave Umuhe akolelela ukuta ulo lwa nachene, pakuva Umuhe ye nachene. ⁸ Sweno, povali wolelesi vadatu, Muhe, ululenga ni danda nu wolelesi wa iva avadatu wukwiyidikisa. ⁹ Wone tukuwidikila uwolelesi wa avanu, apo uwolelesi wa Nguluvi wukomi hilo wulutye; na uwu we wa Nguluvi ukwimila Umwanakwe. ¹⁰ Yeakumufuuwa mwana va Nguluvi inawo uwo uwolelesi mulumwene; neke yesiakumufuuwa Nguluvi, akumupela umwene uwudesi, pakuva siawufuuvitwi uwolelesi weolelelye Nguluvi ukwimila Umwanakwe. ¹¹ Nu wolelesi uwene we uwu: Nguluvi atupelye uwumi uwutasila nu wumi uwo wuli Kulumutwa. ¹² Yeyeavesaga inave Umwana va Nguluvi inawo uwo uwumi; yeihela u Mwana va Nguluvi, mugaya wumi. ¹³ Nguvandikila sambi mulukagule ukuta mwinawo uwumi uwutasila nyenye yemufuuwa mwitawa lya Umwana va Nguluvi. ¹⁴ Na hwehwe twivapifu pa Nguluvi pakuva twina luhuvi ukuta wone tumusuke ichekivesaga ndawe lwewigendela uwende wakwe, umwene akutupulika. ¹⁵ Umwene aakutupulika petuvesaga tukumusuka; na pakuva tukulukagula ukuta umwene akutupulika petuvesaga tukumusuka, tukulukagula kangi ukuta atupela mbefili fyetukumusuka. ¹⁶ Wone umunu amuwone umunyalukolo vakwe apigite inzanangifu yesiyikumusindika kufwa, lumuvaje amusukile kwa Nguluvi, nave Nguluvi amupela uwumi. Ukwimila inzanangifu yesiyivaji ifwa. Poyili inzanangifu iyivaje ifwa, sinditigila ukuta luvavaje ukumusuka Nguluvi ukwimila yiyo. ¹⁷ Chechekivesaga kipigo chesikigolofu icho wananzi, neke poyili inzanangifu yesiyisindikagi umunu kufwa. ¹⁸ Tukulukagula ukuta yeyeavesaga umwegalwa na Nguluvi sipigagi inzanangifu, pakuva Umwana va Nguluvi akumulolela wunofu, nayula umwanangifu sahwana ukumwananga. ¹⁹ Tukulukagula ukuta hwehwe twivanu vakwe Nguluvi nambi we ing’i mbeyili nzagile na yula Umwanangifu. ²⁰ Tukulukagula kangi ukuta Umwana va Nguluvi akasile, ukutupela uwukagusi sambi tumukagule Nguluvi uva nachene; twikale mu uwulilumwi na Nguluvi uva nachene mukuhanga na Umwanakwe, Yesu Kilisito. Uyu ye Nguluvi uva nachene, na uwu we wumi uwutasila. ²¹ Nye vanangu, mwilegage na ifihwananguluvi!