1 AVAKOLINDO

¹ Pawulo, yendakemelitwe mbe mwigendo va Kilisito Yesu kwa uwende wa Nguluvi, pamwinga na umunyalukolo vangu Sositene, ² Kulikanisa lya Nguluvi lyelili uko ku Kolindo. Nyenye mukesiwe kwa ukuhanga na Kilisito Yesu, mwakemelitwe sambi muve vanu va Nguluvi mwiva pamwinga na avanu mbevali, vevakumusunyalila Umutwa vetu Yesu Kilisito, ye Umutwa vawo na vetu na hwehwe. ³ Nguvasukila uwende na uwikalakunoga ukuhuma kwa Nguluvi udadetu na Umutwa vetu Yesu Kilisito. ⁴ Nane ngumulumba Nguluvi vangu mbepali ukwimila nyenye pakuva kwa uwunofu wakwe akavapelye uwuwuya wakwe ukwimila Kilisito Yesu. ⁵ Pakuva, kwa ukuhanga na Kilisito mukanonite mwa mbefili. Mukapelitwe uwuseela mbewuli na uludali mbeluli ulwa ukudalika, ⁶ Ulukani lwa Kilisito lukangasiswe mwanyenye, ⁷ na simwigaya ikipelwa chechekivesaga cha kimuhe, pemwisindila ukugubulwa kwakwe Umutwa vetu Yesu Kilisito. ⁸ Umwene avakangasa nyenye mbaka kumudugo sambi samuwoneke simwivananzi ikimunyi kila cha Umutwa Yesu Kilisito. ⁹ Nave yemwene yeavakemelye nyenye, sambi muhange na umwanakwe Yesu Kilisito Umutwa vetu umwene ye vakwihuvilwa. ¹⁰ Vanyalukolo, nene nguvagongola hilo, mwitawa lya Umutwa vetu Yesu Kilisito: muvelage mulaganie kumwi mbemuli mwa mbesili semwilonga, kulemwage ukuva na ulwigawo kwa nyenye; muvelage na amahosa gamwi kangi mwilamulila kumwi mbemuli. ¹¹ Vanyalukolo vangu, ing’ani sengapulike ukuhuma kwa avanu avamwi va mukaye ya Kulove, silagila pelu hela ukutigila uko kwina lwitakilo. ¹² Ndisaka ukutigila de: umunu yeyeavesaga ilonga ulwakwe: uyumwi itigila, “Nene ndiva Pawulo,” Uyungi: “Nene ndiva Apolo,” uyungi kangi: “Nene ndiva Kefa,” na uyungi: “Nene ndiva Kilisito.” ¹³ Mbi, Kilisito akigavite? Mbi, Pawulo yeatumbikwe ukwimila nyenye? Na kangi tutigile, mbi mwabatisiwe mwitawa lya Pawulo? ¹⁴ Nene ngumulumba Nguluvi ulwa sindamubatisisi umunu yeyeavesaga mwa nyenye pesi Kilisipo na Gayo hela. ¹⁵ Sweno nambi nditigila asupali yeatigila akabatisiwe mwitawa lyangu. ( ¹⁶ Aha mundegepele, kumbi ndabatisise kangi avanu va mukaye ya Sitefana; neke vevalutye paiva, singwiwuka wone ndabatisise umunu uyungi yeyeavesaga.) ¹⁷ Pakuva Kilisito sianumiti ukubatisa, pesi ukudalika Ulukani Ulunofu, kangi ndadalikige si kwa ukwimila indongele ya uluhala sambi uludali lwa ifwa ya Kilisito mu musalaba salulava lugaya cha kwambula. ¹⁸ Pakuva ulukani ulwa ifwa ya Kilisito mu musalaba, lwiwoneka nda lukani lwa wupuva kwa vala vevisogola kukuyaga, neke kwa hwehwe yetuli mung’asi ya uwupoki ulukani ulo, lwe ludali lwa Nguluvi. ¹⁹ Pakuva Uwandike Uwelu witigila: “Nene sanzananga uluhala lwa avene avanyaluhala. na ukwimba kwa avaseela sandikutosa kutali.” ²⁰ Mbi alikwi lino, umunyaluhala? Mbi alikwi lino, umwigisi va indagilo? Mbi alikwi yula umuseela va ulubesa va ifilo ifi mbi alikwi? Mbi si Nguluvi aluwuyipe uluhala lwa mung’i luve wupuva? ²¹ Pakuva, kwa uluhala lwa Nguluvi avanu sivahwaniti ukumukagula umwene ukwimila uluhala lwawo. Neke kangi ulungi na ulo, Nguluvi awendite ukuvapoka vala avifuuwa kwa ukwimila lula lwe avanyaluhala vitigila wupuva, kwa lula ulukani lwetwidalika. ²² Avayudaya visaka ikilagilo, na Avagiliki nawo visaka uluhala, ²³ Neke hwehwe tukumudalika Kilisito yevamutumbikea Kwa Avayudaya ulukani lulu kikuvaso, na kwa Avamyanza ulukani ulu wupuva. ²⁴ Neke kwa vala avakemele, Avayudaya na Avagiliki, Kilisito ye uludali na uluhala lwa Nguluvi. ²⁵ Pakuva chekiwoneka wupuva kwa Nguluvi, icho chekiva kina uluhala ululutye uluhala lwa avanu, na chekiwoneka ukuva kihomefu kwa Nguluvi, icho chekiva kikangafu hilo ukulutila uwukangafu wa avanu. ²⁶ Vanyalukolo, mwiwukage ulusika pemwakemeligwe: Awolofu mwanyenye sive vanyaluhala nambi kwa amahosa ga uwunu; avangi sive vanyaludali nambi ukuva vatambule. ²⁷ Kwekutigila, Nguluvi ahagwe ifinu fila fye mung’i fiwoneka wupuva; sambi avahongele inyoni vala avanyaluhala na kangi ahagwe fila fye mung’i fiwoneka fihomefu, sambi avahongele inyoni avakangafu. ²⁸ Nguluvi ahagwe fila fye kwa amahosa ga mung’i fiwoneka si kinu na fihele fibedalwa, ifinu fye siuhwaniti nambi ukwihosa ukuta kofili sambi kwa ukukola mwa fifyo anange fila fye kwa amahosa ga avanu fiva fitambule. ²⁹ Sweno, asupali umunu yeivahila ikinu chechekivesaga pamiho ga Nguluvi. ³⁰ Umwene ye kilamuko cha uwumi wenyu mwa Kilisito Yesu ye Nguluvi amuwuyipe ave luhala lwetu, uwugolofu wetu na ukweswa kwetu na uwukombolwa. ³¹ Sweno, ndawe lwewilonga Uwandike Uwelu: “Yeiwenda ukwivahila, sweno, ivahilage ikipigo cha Umutwa.”

¹ Vanyalukolo, nene pengengasile ukwenyu sindavadalichi ulupweng’enyu ulwa ikinyele kila icha ulukani lwa Nguluvi kwa ukukola uwuseela wa indongele, nambi kwa uluhala lwa avanu. ² Nene pende ukwenyu ndalamwe ukuva ndimupuva ndemwage ukukikagula ikinu chechekivesaga kila pesi ukumukagula Yesu Kilisito, ena, Kilisito yevamutumbike. ³ Nene pende ukwenyu ndenyanzile muwuhomefu na uwogofi wukomi na ukukuvila. ⁴ Uwudalisi wangu na inzolelesi sangu sindalongigi kwa ukuvakwega avanu kwa uluhala, pesi kwa uwolelesi wa uludali lwa Umuhe. ⁵ Ndapigite ulo sambi ulufuuwo lwenyu lwimile muludali lwa Nguluvi, salulonga lwimile muluhala lwa avanu. ⁶ Nambi ndahihyo, kwa vala avakange twikola kangi na luluhala lulo si lwa mung’i yiyi, nambi uluhala lwa avatema va mung’i iyi, vala avasutine kukuyaga. ⁷ Uluhala lwetwikola hwehwe, lwe luhala lwa ulukani lwa Nguluvi ululi ku kinyele, uluhala ulufihe, lwe luhala lwe Nguluvi ealugafile uluhuma pidaha ukwimila indolo setu. ⁸ Uluhala lwe avatema va mung’i umu, valemilwe ukulukagula, pakuva vevalukagule, sivevigelela ukumutumbika Umutwa va indolo mu musalaba, ⁹ Neke, ndawe wewilonga Uwandike Uwelu, “Ing’ani se nambi iliho silyelilasiwona, nambi ilipulikilo silyelilapulika, ing’ani se nambi umunu siealahosa munumbula. Iso Nguluvi avaviche vala vevamwenda.” ¹⁰ Iso se ng’ani Nguluvi, seatuviche pelu ukwimila Umuhe vakwe. Pakuva Umuhe aigosa chechekivesaga, nambi ing’ani isili mugati hilo mwa Nguluvi. ¹¹ Yenani yeahwanite asikagule ing’ani isili kwa umunu uyungi pesi inumbula yakwe umunu uyo? Lwindahihyo, asukuli yeasisele ing’ani sa Nguluvi pesi Umuhe va Nguluvi. ¹² Lino hwehwe sitwanuchi Umuhe va mung’i pesi yula yeihuma kwa Nguluvi sambi atutange ukusikagula mbesili seatugavye Nguluvi. ¹³ Nambi hwehwe tukwigisa, neke situkwigisa ukukola uluhala lwa avanu, pesi twikola Umuhe se atwigise, twiganula ing’ani isa Umuhe kwa vala avinave Umuhe yuyo. ¹⁴ Umunu uva mung’i sakwanukilagi ing’ani sa Umuhe va Nguluvi. Pakuva kulumunu uva ndahihyo ing’ani sa Nguluvi kulumwene uwo wupuva, pakuva iso simulutye uluhala pakuva iso sasikagulanika kwa uwutanzi wa Umuhe hela. ¹⁵ Neke umunu yeinave Umuhe yuyo, yemwene yeahwanite ukuwukagula uwunofu wa mbepali, nave sahwana ukulongwa fibi na umunu yeyeavesaga. ¹⁶ “Yenani yeahwanite alukagule uluhala lwa Umutwa? Yenani yeahwanite ukwigisa ulukani?” Neke hwehwe twina uluhala lwa Kilisito.

¹ Vanyalukolo vangu, nane nene singahwaniti ukulonga nanye witigila mwinave uyo Umuhe. Ndawene lunofu ndonge nanye witigila mwivanu va mung’i, witigila mwivana vadodo mumikalile ija uwukilisito. ² Ndawene lunofu ndivapele lisiva, si uwugali, pakuva simwemuhwana ukulya. Na kulino de simuhwaniti ukulya, ³ pakuva na kulino de nyenye pemwivanu va mung’i. Mbi si nachene ukutigila ukwenyu pekwina igila na ulwitakilo weyinyenye ng’ani? Ulo chekilagilo ulwa nyenye pemukaali mwivanu va mung’i, mukwikala we mukwiga imikalile ija mung’i. ⁴ Uyumwi venyu peitigila, “Nene ndiva Pawulo.” na uyungi, “Nene ndiva Apolo,” mbi, ulo sichekilagilo ukutigila nyenye mukaali pemwiga imikalile ija mung’i mumu hela? ⁵ Mbi Apolo ye nani? Na Pawulo yenani? Hwehwe twivakami hela yetwavaletye nyenye ulufuuwo. Yeyeavesaga mwahwehwe ipiga ikipigo che apelitwe nu Mutwa. ⁶ Nene ndavyalite inyadikwa, Apolo swe iboholela ululenga; neke umunyakuleka yimele ye Nguluvi. ⁷ Lino ipo umunyakupiga hilo si yula yavyalite inyadikwa, nambi yula yaboholye ululenga, ipo munyakupiga hilo ye Nguluvi yalekite inyadikwa yimele nu kutaalipa. ⁸ Yula yeavyalite na yula yaboholye ululenga mbevali valing’ene, nawo mbevali savanukila ikipelwa ikihuma muwupifu wa ikipigo chawo. ⁹ Pakuva hwehwe twilukolo, twivanyakupiga pamwinga na Nguluvi, na nyenye mwilungulu lyakwe, kangi nyenye mwikaye yakwe inzenge. ¹⁰ Na kwa ukukola uwuwuya wa Nguluvi wamelye, ndawe musenzi umupifu, ndavisele ulutu na uyungi isenge baho pachanya. Ino lwinoga umunu yeyeavesaga yeisenga baho pachanya, alavisage hilo. ¹¹ Pakuva asukuli umunu yungi yeahwana ukuvika ulutu ulungi kangi pe silulula lwelwavisilwe pamwandi, kwekutigila ye Yesu Kilisito. ¹² Pachanya pa ulutu ulo umunu yeyeavesaga ahwanite asengele isahabu, amagobole nambi amaganga gegagigusiwa amagobole molofu; ahwanite asengele amagoda, amahamba na apangi ilisoli. ¹³ Kwa lwelweluvelaga, muwunofu wa ikipigo cha yeyeavesaga munu sawuwoneka ikimunyi kila che Kilisito sawuvika pelu. Pakuva, ikimunyi icho saguwoneka umoto, na umoto ugo sagugosa uwunofu wa ikipigo chakwe. ¹⁴ Na chechekivesaga kinu che umunu akwete pakusengela mulutu, wone sakihwane ukukuluka mu moto gula, sweno umunu uyo saanukila ikipelwa chakwe, ¹⁵ neke wone ikinu chasenje, manyi sachuse kipye kisile, sweno umunu uyo sisaanukila ikipelwa chakwe, pesi ulwa umunu uyo umwene, saapokwa witigila yakulwike ukuhuma mumoto. ¹⁶ Mbi, simukulukagula ukutigila nyenye mwitembeli ya Nguluvi, nu kutigila Umuhe va Nguluvi aakwikala mwa nyenye? ¹⁷ Sweno, wone umunu anange i tembeli ya Nguluvi, Nguluvi amwananga umunu uyo; pakuva i tembeli ya Nguluvi nzelu, na i tembeli iyo ye nyenye. ¹⁸ Uyungi alemwage ukuvasanga! Umunu yeyeavesaga mwa nyenye yeitigila ina uluhala aakwiga ulwa mung’i, ikiba itigile mupuva sambi ave na uluhala lwa nachene. ¹⁹ Pakuva uluhala lwa mung’i ulo wupuva pamiho ga Nguluvi. Pakuva Uwandike Uwelu wilonga, “Nguluvi aakuvibata vanyaluhala mu wusugu wawo.” ²⁰ Na kangi, “Umutwa alukagwe ukutigila amahosa ga avanyaluhala sigahwaniti kinu.” ²¹ Sweno, umunu alemwage ukwivahila avanu. Pakuva ifinu mbefili fyeenyu. ²² Pawulo, nambi Apolo nambi Kefa, nambi ing’i, nambi uwumi nambi ifwa, nambi ing’ani isa lino na sesasusa, mbesili isi seenyu. ²³ Neke nyenye mwivanu va Kilisito, nave Kilisito va Nguluvi.

¹ Umunu atuhosage hwehwe ulwa twivakami va Kilisito na avavisikise isa ikinyele sa Nguluvi. ² Ipo chekigoswa kwa yula umuvisikise ulwa avelage munu yeakwihuvilwa. ³ Neke kwa nene si kinu wone nyenye munyige kwa ukukola lwevavihiga avanu, neke nene singwihiga kinu. ⁴ Nene inumbula yangu siyikusongela kwa ikinu chechekivesaga, nambi ndahihyo sinditigila nene ndimugaya lwehwanite nzanange nda. Neke Umutwa yakunyiga nene. ⁵ Sweno, mulahiga ulusika pesilulava lufika, pa Umutwa salasa. Uyo saavika pelu ing’ani isa ikinyele isifihime, na ukugalagila pelu amahosa ga inumbula sa avanu. Ipo umunu yeyeavesaga saanukila ikilumbo ikimuvaje. ⁶ Vanyalukolo vangu, iso mbesili ndonzile ukwimila mwa Apolo na nene, icho kilagilo kwa nyenye, ukwimila ikilagilo chetu nene na Apolo ndisaka sambi mulukagule nachene indongele iyi, “Mwinatilage inzandike.” Kwa nyenye pavelage pagaya umunu yakumududuvila uyungi nambi ukumubedala umunu yungi. ⁷ Mbi nani yakukuwona veve ulwa uli pachanya ya avangi? Mbi lino wina kiki veve chesiwimupele na Nguluvi? Na wone wapelitwe, lwakiki widuduvila icho wiva nda siwapelitwi? ⁸ Lino luvakwilye! Lino yemunonite! Kangi yemuve vatema lwe hwehwe situlava! Ena, nachene, luke lunoga nyenye muteme, sambi na hwehwe petuhwana pamwinga ukutema nanyenye. ⁹ Lwiwoneka pelu kwa nene ukuta Nguluvi atupelye hwehwe avigendo ikilega cha mu mbele, sambi tuve wita avanu avahige ukufwa, twavisilwe tuve vanu va kuhekwa mung’i mbeyili, kwa avanyivaha na kwa avanu. ¹⁰ Hwehwe twivapuva ukwimila Kilisito, neke nyenye mwivanyaluhala ukwimila ukuhanga na Kilisito, hwehwe twivahomefu, neke nyenye mwavanyaludali. Nyenye mwipelwa ululumbo neke hwehwe twibedalwa. ¹¹ Na kulino de, hwehwe tudagine, kangi tukelwike, tufuulike, twipunangwa mufyolofu, twivagaya nambi pono pa wuvaso. ¹² Kangi twiguda, kono we twipiga ifipigo kwa amawoko getu yihwehwe. Na pevatwelanga, hwehwe tukuvasukila uwufunyilile, na petwitesewa, hwehwe twikangalila; ¹³ na pevakutufila, hwehwe twipitula kwa wulele, mbaka kulino de, hwehwe tukave mahwahwa mung’i. ¹⁴ Nene singuvandikila ing’ani isi sambi ndivahongele inyoni nda, pesi ulwa ndivandiche isi, sambi ndivigise hela, nyenye nye vanangu avende. ¹⁵ Pakuva nave mwinawo avalolesi mbilima nzolofu mumikalile ija uwukilisito, nambi ndahihyo mwinave udadenyu yumwi swe, pakuva kwa ulubali lwa uwukilisito nene yendavejee kwa ukuvadalikila Ulukani Ulunofu. ¹⁶ Sweno, nguvagongola munzigage nene. ¹⁷ Nambi nene ndimutumite Timoti aase ukwenyu. Uyo ye mwanangu umwende yengumufuuwa mwitawa lya Umutwa. Uyo aviwusa ing’asi ye nene Pawulo ndigendela mumikalile ija uwukilisito; ing’asi yengwigisa bahapavesaga mumakanisa mbegali. ¹⁸ Neke apamwi avangi mwa nyenye, vavanzile ukwivika pachanya vakwihosa ukuta nene sinzusa kangi ukwenyu. ¹⁹ Neke, ulwene mulukagulage ukuta, wone Umutwa awende, ongo nzusa ukwenyu lilino, napenzusile, pepene pesandilavila yinene, ichene chevahele vilonga vawo vevakwivika pachanya, pebaho pendilavila na luludali lwawo lwevinalo. ²⁰ Pakuva uwutwa wa Nguluvi, siwakwimila mung’ani sa ndahihi hela, pesi muludali. ²¹ Mbi lino nyenye mwiwenda ululikwi? Ngali nzusage ukwenyu weng’olye ulugoda, apangi nzusage na inumbula iya uwende na uwulele?

¹ Lino, kosili ing’ani isa nachene ukutigila ukwenyu kowoli uwugoni, kangi uwugoni uwaafu wesiwulava wuwoneka nambi kuvanu, vesivamuseli Nguluvi kumbi ndipulika ulwa umuyenyu uyumwi akategwe umukina udade! ² Nye! Kumbi ndawuli nyenye mukwisumila? Mbi si muke muhuguvala, na uyo yeipigite uwaafu lwinoga mumuhese ahege mwa nyenye. ³ Ena, kulubali ulwangu, nene nambi ndilipataali nanyenye ku muvili, nambi ndahihyo mu numbula ndilibaho pamwinga na nyenye, ndiva ndandilibaho, nene yendimuhigite umunu uyo yeakapigite uwaafu uwuhonga inyoni. ⁴ Sweno, ulusika lwe mwikong’ana pamwinga mwitawa lya Umutwa Yesu, nane ndiva wita ndili pamwinga na nyenye kwa inumbula, sweno kwa uludali ulwa Umutwa vetu Yesu, ⁵ mumutawulage umunu uyo kwa Setani sambi umuvili gwakwe gwanangwe na inumbula yakwe yihwane ukupokwa ikimunyi kila icha Umutwa. ⁶ Ulwidudumbo lwenyu silwinoga kinu! Mbi, simukulukagula ulwa uwuhahu wudodo wawihahula uwuse mbewuli? ⁷ Ino, mwiyesage nu kutaga kutaali uwuhahu wa pidaha, wa uwananzi, sambi muve vapya uwuhahu ndawe mwiwali. Pakuva Kilisito ye ng’olo ya Pasaka vetu umutawule ave nambika. ⁸ Sweno, tuwuyape ikimunyi ikikomi, si kwa wula uwuhahu wa pidaha, uwuhahu wa uwanangifu pesi kwa umukate gwesimuhate uwuhahu, umukate ugwa uwugolofu wa nachene. ⁹ Ndavandiche ibalula yangu ulwa mulahanga na avanu avagoni. ¹⁰ Neke ulwene singatigiligi avanu mbevali avali mung’i vagoni, avahatufu, vadesi na vala vevavisunyalila ifihwananguluvi. Sweno, muke muwende ukuvakimbila mbevali iwo apo luke luvanogela nyenye muhegele ng’ani mung’i umu! ¹¹ Neke chengalongige pengwandika che iki: Mulahanga na munyalukolo umukilisito umugoni, muhatufu, kangi aisunyalila ifihwananguluvi, musongela avayagwe, mugaasi kangi mudesi. Umunu yeindawe uyo, nambi ukulilasa nave, mulalilasa. ¹² Mbi, ulo lwelwa nene ukuvahiga avanu vala vevali kwivala? Aa nda iwo Nguluvi yeavahiga. Mbi, lino ndawuli, yinyenye nanye simuhwaniti ukuvahiga avakilisito vayenyu? ¹³ Sweno, mumuhakilage kutali na nyenye umunu umwanangifu!

¹ Mbi lwihwana wuli uyumwi va nyenye amusongele umukilisito umuyagwe ku wuhigilo wa avanu vesivamuseli Nguluvi ileka ukumusongela kwa avanu va Nguluvi? ² Mbi, simukulukagula ulwa avanu va Nguluvi savavahiga avanu mbevali mung’i? Lino wone, avanu mbevali savahigwa nanyenye, lino mbi ndawuli mwilemwa ukuhiga ing’ani isi indodo hela? ³ Mbi, simukulukagula ukutigila, silulo hela ulwa ukuhiga ing’ani indodo isa mbepali, satuvahiga na avanyivaha va Nguluvi? ⁴ Nyenye pemwiva na iliyoyo mung’ani isa mbepali, mbi ndawuli mukuvakemela avanu vavahige avagaya choga ku kanisa? ⁵ Nachene ipo mwihonga inyoni! Kwekutigila asukuli umuyenyu uyumwi umunyaluhala yahwanite ukudawula ilidati lyelili mwa avakilisito? ⁶ Lino, nachene guve nda musimu kwa avanyalukolo ukumusindika umunyalukolo ku wuhigilo, kangi na baho kwa avahisi vesivafuuvitwi. ⁷ Pakwisongela weyinyenye ng’ani mukwilagila ulwa nyenye yemulemelilwe ng’ani! Mbi siluke luva lunofu, kwa nyenye nambi muke mupigilwe fibi? Kangi siyike yiva kiba kwa nyenye, nambi muke mwanukwe ifyenyu? ⁸ Neke, lino nyenye yemwipigila avangi fibi na ukwihisila yinyenye ng’ani, umunu na munyalukolo vakwe! ⁹ Apangi mbi, simukulukagula ukutigila avanu avanangifu sisavava, na ililila mu Uwutwa wa Nguluvi? Mulasangwa, avanu vanyamikalile imyanangifu, ija, wugoni, avanyakusunyalila ifihwananguluvi, avayamba, nambi avasafi, ¹⁰ avahiisi, avimi, avagaasi, avaheesi, avaposi, iwo mbevali sisavahanga muwutwa wa Nguluvi. ¹¹ Avangi mwa nyenye pamwandi mwapigige siso, neke lino mukave mwiwofuge, mukofwigwe, mukesiwe na ukwilamula na Nguluvi mwitawa lya Umutwa Yesu Kilisito na uwimila Umuhe va Nguluvi vetu. ¹² Umunu uyungi ahwanite atigile, “Kwa nene mbefili finofu.” Ena, neke si mbefili ifihwanite nda, ngwidikila ukutigila ifinu mbefili finofu neke sindiwenda ifinu fimbike muwunyawingi. ¹³ Uhwanite utigile, “Ichakulya chavisilwe ukwimila lileme, na ilileme ukwimila ichakulya.” Ena, neke Nguluvi saafyananga mbefili ndawe fivili. Umuvili gwa umunu simuvike kwa uwuyamba pesi kwa ukumupigila Umutwa, nave Umutwa ukwimila umuvili. ¹⁴ Sweno, Nguluvi yamusilibwe Umutwa ukuhuma kwa avafwe saatusilibula nayihwehwe kwa uludali lwakwe. ¹⁵ Mbi, simukulukagula ulwa imivili jenyu fye figawamuvili fya umuvili gwa Kilisito? Mbi, mwihosa ulwa nywanite ukutegula ulubali ulumwi lwa umuvili gwa Kilisito na ukuluwuyapa luhange mumuvili gwa umung’inetu umugoni? Pogola siluhwaniti nambi ludodo. ¹⁶ Pakuva, ndawe lwemulukagwe, ukutigila yeihanga na umung’inetu umugoni aiva muvili gumwi nave-ndawe lwandikwe, “Nawo avavili savava muvili gumwi.” ¹⁷ Neke yahangite nu Mutwa aiva numbula yimwi nave. ¹⁸ Neke mwikomalilage hilo na uwugoni. Pakuva inzanangifu isingi mbesili sasipigilwa kwivala kwa umuvili neke umugoni akugupigila inzanangifu umuvili gwakwe yumwene. ¹⁹ Mbi, simukulukagula ulwa imivili jenyu ye tembeli ya Umuhe Umwelu yali mwanyenye, yemwamwanuche ukuhuma kwa Nguluvi? Ino nyenye, simwivanyamwenafyo. ²⁰ Mwivagule na amagobole molofu, ino, mukolage imivili jenyu ukumupela indolo Nguluvi.

¹ Neke lino ing’ani sila semukandike: Ena, lunofu wone umugosi ikale wesategwi umung’inetu, ² neke lino pakwilega na ukugelwa isa uwugoni, apo umunu mugosi yeyeavesaga lwinoga avelage na umung’inetu vakwe yumwene, na umung’inetu yeyeavesaga lwinoga avelage na umugosi vakwe yumwene. ³ Na umugosi akwisage ulukumunogela uvakwe, nave umung’inetu ndahihyo akwisage ulukumunogela umugosi vakwe. ⁴ Umung’inetu mugaya lulagilo ulwa umuvili gwakwe, pesi umunu vakwe yeinalo, lwindahihyo kwa umugosi, nave mugaya lulagilo ulwa umuvili gakwe, pesi uvakwe yeinalo. ⁵ Mulemwage ukwiyima isivavaje mungomwa yenyu, mbaka pala pemuve mwiyidikise ukusuupa lusika ludodo, sambi muve na ikilega ikinofu ukwifunya. Pelulutye ulo kangi mupilukilage ukukwisa isivavaje, sambi setani alemwe ukuvagela ukwimila uwuhomefu wenyu. ⁶ Neke isi senguvalongela nene lino sinditigila wanda sivelage lulagilo aa nda, isi nguvalongela isihuma mumahosa gangu hela. ⁷ Nene ngembwenda avanu mbevali vanzigage nene lwendiwali, neke yeyeavesaga munu inacho ikipelwa chakwe ukuhuma kwa Nguluvi, uyungi ikipelwa iki na yula ikingi. ⁸ Sweno, vala vesivalategula nambi kugomwa na vala avafwile nguvatigila lwinoga vanzigage nene lwendiwali. ⁹ Nambi ndahihyo, wone umunu akwilemwa, ikiba ategule, pakuva ikiba hilo ukutegula sindawe ukudobokela. ¹⁰ Kwavala vevategwe ndina lulagilo, kangi silwangu nda, ulo lwa Umutwa: umung’inetu alemwage ukulekana na umunu vakwe. ¹¹ Neke wone alekane na umunu vakwe, swe ikalage simugomwe; pesi ndahihyo apo, vilamulage na umunu vakwe. Umunu vakwe nave alamupela uvakwe ulwandiko lwa ukulekana. ¹² Kwa vala avangi, (ulu lwandiyena, si lwa Umutwa) nditigila de: Wone umugosi umukilisito inave umung’inetu yesiafuuvitwi, na uyo umung’inetu ave peawenda ukwikalasa, swe alemwage ukumupela ulwandiko lwa ukulekana. ¹³ Na kangi, wone umung’inetu umukilisito mugomwe kwa umunu yesiafuuvitwi, ave peawenda ukwikalasa, swe alamupela umunu vakwe ulwandiko lwa ukulekana. ¹⁴ Pakuva uyo umugosi yesiafuuvitwi akwanukilwa na Nguluvi kwa ukuhanga na uvakwe, na uyo umung’inetu yesiafuuvitwi akwanukilwa na Nguluvi kwa ukuhanga na umunu vakwe pesi ndahihyo avana vevakwegalwa sivake, vava vana va Nguluvi, kumbi lino iwo vana va Nguluvi. ¹⁵ Nambi ndahihyo, wone yula yesiafuuvitwi iwenda ukumuleka umuyagwe ye mukilisito, swe, amulekage hela. Ipo uyo umukilisito umugosi apangi umung’inetu, ava mutemapakwe. Pakuva Nguluvi avakemelye nyenye mwikale mu wikalakunoga. ¹⁶ Veve we mung’inetu umukilisito, ukulukagula ndawuli ulwa suhwaniti nachene umupoke umunu vako? Na kangi, veve ve mugosi umukilisito, ukulukagula ndawuli ulwa suhwaniti nachene umupoke uvako? ¹⁷ Umunu yeyeavesaga lumunoje ikalage mumikalile igigendela mufipelwa fyakwe fyapelitwe na Nguluvi, pala peakemeligwe na Nguluvi. Ulu lwe lulagilo lwangu ku makanisa mbegali. ¹⁸ Wone umunu akemelitwe kono muwoole sweno alemwage ukuva nda simuwoole, na wone kangi umunu akemelitwe wesi muwoole, sweno alemwage ukuwoolwa. ¹⁹ Pakuva ukuwoolwa na ukuleka ukuwoolwa si kinu nda, ikikomi ukwinatila indagilo isa Nguluvi. ²⁰ Sweno, umunu yeyeavesaga ikalage ndawe lweeiwali ulusika pakemeligwe. ²¹ Mbi, veve wewimunyawingi pewakemeligwe? Lunofu, ulahosa ulo hilo, neke wone upelwe ikilega cha uwutemapakwe, pigile lulo. ²² Pakuva yula yakemelitwe nu Mutwa we munyawingi uyo aiva mutemapako kwa Umutwa, lwindahihyo kwa yula yakemelitwe mutemapakwe, aiva munyawingi va Kilisito. ²³ Mbevali mwivagule kwa amagobole molofu, mulemwage ukuva kangi vanyawingi va avanu. ²⁴ Vanyalukolo vangu, umunu yeyeavesaga mwanyenye sweno ikalage na Nguluvi ndawe lweeiwali ulusika peikemelwa. ²⁵ Lino, ulwa avanahinza avigani na vesivalategula, ndimugaya lulagilo uluhuma kwa Umutwa, neke ndilonga sa amahosa gangu nene ye kwa ulusungu lwakwe Umutwa ngapelitwe ukuva munu ye vakufuuwa. ²⁶ Sweno, ukwimila uwubane wewipwali lino, nditigila luke lunoga umunu asigalage weiwali. ²⁷ Mbi, veve wategwe? Sweno, ulemwage ukulekana na uvako. Veve siulategula? Sweno, ulemwage ukutegula. ²⁸ Neke wone utegule sinditigila uva upigite inzanangifu aa nda, na umwanahinza wone agomwe sinditigila ava apigite inzanangifu aa nda. Neke vala vevategula na ukugomwa iwo vafikwa na uwubane uwa mung’i iyi, neke nene singembwenda uwu wuvafike nyenye. ²⁹ Vanyalukolo vangu, ndiwenda ukutigila de: ulusika lwelusige ludodo hela. Na uluhuma lino vala vevategwe vikalage witigila sivalategula; ³⁰ vala vevivemba vavelage witigila wanda sivivemba, na vala vevihekelela vavelage witigila wanda sivihekelela; na vala vevigula ifinu vavelage witigila wanda vagaya kinu, ³¹ nawo vala vevakwifwahisa na ing’ani isa mung’i iyi vavelage witigila wanda vagaya icha ukuyipigila. Pakuva ndawe lwetukulukagula, ukuta ing’i iyi, yilutila. ³² Neke nene ngembwenda nyenye mulemwage ukuhuguvala. Umunu umugaya umung’inetu akwihosa hilo isa ikipigo cha umutwa, lweapiga sambi Umutwa lumunogele. ³³ Neke umunu yeategwe, akwihosa hilo sa ifipigo fya mung’i, lula lweahwana ukupiga sambi lumunogele uvakwe, ³⁴ nave igavite pavili. Nave umung’inetu yesimugomwa, apangi mwigani, akwihosa hilo ing’ani isa Umutwa hela, sambi ihumye umuvili na inumbula yakwe kulu Mutwa. Neke umung’inetu umugomwa akwihosa hilo isa mung’i lula lweamupigila umunu vakwe lumunogele. ³⁵ Nene nguvalongela isi ukwimila ukwambula kwenyu nyenye, sinditigila sambi ndivapinging’ase. Ndiwenda mwihosage lunofu, sambi mumupigile Umutwa kwa inumbula na amahosa we mulaganie kumwi. ³⁶ Wone umunu akwihosa ulwa sakumupigila lunofu umwanahinza yeamulumbite pesamutegwi, na kono uwudobokesi wakwe wukumulema, apigage lweiwona lunofu; vitegulage hela, siava apigite inzanangifu nda. ³⁷ Neke wone umunu uyo alamule kwa ukuwenda yumwene mu numbula yakwe ulwa sategula na wone uwudobokesi wakwe siwumulema na ukulamula lweapiga, sweno, ava ipiga lunofu hilo pesamutegwi uyo umung’inetu umwigani. ³⁸ Kwekutigila de: yula yeilamula ukutegula ipiga lunofu, na yula yeilamula lwa uwukitategula nave ipiga lunofu kangi ululutye. ³⁹ Umung’inetu aiva mupinge na uvakwe ulusika mbeluli pembevali viva wumi. Neke umugosi peafwe, umung’inetu uyo aiva muwopole, na wone awende ahwanite ukugomwa na umunu yungi yeyeavesaga, pesi ulwa vitegulage mung’asi ya uwukilisito. ⁴⁰ Neke lwendiwona nene yike yiva ikiba ikale ndahihyo weiwali. Igo ge mahosa gangu, nayi nene ndihosa ulwa ndinave Umuhe va Nguluvi.

¹ Neke lino ulwa ifilyo ifitawule nambika ku ifihwananguluvi: Tukulukagula ukuta, mbetuli twina wuseela, uwuseela uwo wakwambusa ulwidudumbo neke uwende wawisenga. ² sweno, yula yakwihosa ulwa akisele kinu, kumbi nachene sakiseli chechekivesaga kinu ndawe ulumuvaje akikagule. ³ Neke umunu yamwenda Nguluvi, uyo yakagulanike hilo kwa Nguluvi. ⁴ Sweno ulwa ifilyo ifitawule nambika kwa ifihwananguluvi, hwehwe tukulukagula ukuta ifihwananguluvi si kinu nambi ludodo mung’i, mbetuli tukulukagula ulwa Nguluvi yumwi yeiyena hela. ⁵ Nave kofili mung’i na kuchanya ifinu ifitambulwa nguluvi, nave vave kovali vanguluvi na avavina wolofu, ⁶ nambi ndahihyo, kwa hwehwe kwali Nguluvi yumwi hela; Dada, mugafi va mbefili, ye kwa ukwimila yumwene hwehwe twikwali. Kangi pwali Umutwa yumwi hela, Yesu Kilisito, ye kwa ukwimila umwene ifinu mbefili fyagafilwe, na hwehwe twiva wumi kwa uludali lwakwe. ⁷ Neke, si mbevali vevakulukagula ulu. Pakuva povali avanu avangi vevasovyee ifihwananguluvi, avanu ve mbaka neng’ino de pevilya ifyakulya ifyo vakufiwona ulwa fitawule kwa ifihwananguluvi. Na pakuva inumbula sawo sina lufuuwo luhomefu, swe ifyakulya ifyo fikuvapela uwuhongawinya. ⁸ Neke nambi ndahihyo ifyakulya sifihwaniti ukutuhegelesa pipi hilo na Nguluvi. Na pesitulii ichakulya kicho sitwi neema kinu nda, na petulye sitwiwilwa kinu nda. ⁹ Neke, mwikomalilage; uwutemapenyu wenyu wulemwage ukuvambusa avangi vanyalufuuwo uluhomefu vagwile mu nzanangifu. ¹⁰ Pakuva, umunu ye inumbula yakwe nyomefu, peakuwene veve ye wina uwuseela wilya ifyakulya ifyo mugati mu Tembeli ya ifihwananguluvi, mbi, siwitigila ukuta ulo lumukuvilisa uyo agine ukulya ifyakulya, ifitawule nambika kwa ifihwananguluvi? ¹¹ Sweno, uyo umunyalukolo vako umuhomefu ye Kilisito amufwilye, ayaga ukwimila uwuseela wako. ¹² Neke wone muvambuse avanyalukolo venyu ulwindahihyo, na ukwananga inumbula sawo nyomefu, apo mwiva mumwananje Kilisito. ¹³ Sweno, wone ichakulya kikwambusa umunyalukolo agwe, sisandya inyama nambi, longa nzambuse umunyalukolo vangu agwile munzanangifu.

¹ Mbi, nene sindi mutemapangu? Mbi nene sindimwigendo? Ngali apangi sindamuweni Yesu umutwa vetu? Neke nanyenye nanye, sinyenye mwe maveleko ga ikipigo changu kulu Mutwa?. ² Nambi nene mbe sindi mwigendo ku vanu vangi, neke nane ndi mwigendo kwa nyenye. Nyenye wewolelesi wa uwigendo wangu, kwa ukuhanga na umutwa. ³ Neke ulukani lwangu kwa vala vevakumbesa lwe ulu: ⁴ Ngali ndawuli hwehwe silukutuvagila ukupelwa ichakulya nu lulenga ukwimila ikipigo chetu chetwipiga? ⁵ Ngali hwehwe silutuvaji ukugendasa ulugendo na umung’inetu yeyeavesaga ndawe lwevipiga avigendo avangi na avanyalukolo va umutwa, nayi Kefa nave? ⁶ Apangi tutigile ye nene hela na Balanaba yelutuvaje tupigage ifipigo tandi, sambi twikwavile fyetugulwime? ⁷ Mbi, umunyigalu yalikwi akwihombelaga yumwene peipigila uwunyigalu wakwe? Ngali yealikwi yeayilima umugunda neke aleke ukwambula amaveleko ga imisabibu kangi alemwe ukulya amaveleko? Kangi yenani yeaikwamila ifikwamilwa, neke alemwe ukunywa ilisiva lya ifikwamilwa fyakwe? ⁸ Ngali nyenye mukwihosa ukuta ndilonga isi mung’asi ya uwunuwunu hela? ⁹ Ndawe nzandike mu ndagilo sa Musa, “Lemwage ukuyipinga isenga kumulomo peyikukutanga ukupata isanga.” Mbi, kwekutigila Nguluvi ilonga ulwa isenga? ¹⁰ Mbi, siukulukagula ukuta alongige lwa hwehwe peilonga ulo,silwa isenga nda. Ena, isi nzandike nachene ukwimila hwehwe; pakuva yula yeilima na yula yeibeta, mbevali ndawe vavili vihuvye ukwanukila isanga. ¹¹ Neke wone hwehwe twavavyalye inyadikwa ya Umuhe mwa nyenye, mbi, luva lubi wone twambule ukwangula amaveleko genyu ga mung’i? ¹² Wone avangi vanoje na vilavisa iso ukuhuma kwa nyenye, mbi, hwehwe ndawuli siyetulutye hilo kwa vawo? Neke, hwehwe sitwawenditi ukwimila lulo. Sweno ulungi lwa palulo, twakangalye mbefili sambi tulemwe ukulufuvalisa Ulukani Ulunofu lwa Kilisito. ¹³ Mbi, simukulukagula ukutigila vala vevavipiga mu Tembeli vavilya fya mumo mu Tembeli, na ukutigila vevavitawula inambika pifunyo vavipelwa ulusago ulwa ikitawulwa kicho? ¹⁴ Lwindahihyo nayi Mutwa alaje avadalisi va Ulukani Ulunofu vapelwage ichakulya chawo ukuhuma mumo. ¹⁵ Neke, nene sindapigiti nambi ikimwi mwa siso. Na pengwandika sinditigila sambi melwe kinu, nene ikiba pefwe silwindawe ukuleka uyungi anigile ngwidudumba chaka hela. ¹⁶ Neke pendidalika Ulukani Ulunofu, ulo si lukani lwa kwidudumbila, icho che kipigo chendapelitwe. Neke ndinalyo wone ndemwe ukudalika Ulukani Ulunofu! ¹⁷ Neke ndalimbe nyagwe yinene ukupiga ulu kwa ukwiyendela hela, sweno, ngembwenda ukwanukila amahombo; neke lino ndipiga pakuva ndimulagile, sweno kwekutigila ndipiga ululagile kwa nene. ¹⁸ Sweno, amahombo gangu si kinu kangi? Amahombo gangu kiki hela ikilega cha ukudalika Ulukani Ulunofu kitahombwa, we sindiwenda ukwanukila isimbaje mu kudalika. ¹⁹ Sweno, nambi, nene sindi munyawingi va umunu yeyeavesaga, ngivikite ndi munyawingi va mbevali sambi ndimuletele Kilisito avanu wolofu ndawe lweluhwana. ²⁰ Kwa Avayudaya ndikalite we ndi mu Yudaya sambi ndivalete Avayudaya, kwekutigila, nambi nene sindipanyi ya Indagilo, neke kwa avene nginatye Indagilo, sambi ndivalete iwo vevakwinatila Indagilo. ²¹ Na kwa vala avagaya Indagilo, ngwikala ndawe avene, ndimugaya Indagilo, sambi ndivalete iwo avagaya indagilo. Ulo si kwekutigila nene ndimugaya Indagilo sa Nguluvi aa nda, pakuva nene nachene ndilipanyi ya Indagilo sa uwukilisito. ²² Kwa vala avahomefu nane ngave nda ndimuhomefu sambi ndivalete nawo. Nane ngipitwe polofu na kwa mbevali sambi ndivapoke avamwi. ²³ Nene ndipiga mbesili isi ukwimila Ulukani Ulunofu, sambi melwe uwufunyilile. ²⁴ Mbi, simukulukagula ulwa muluvanza, avakimbisi, vavikimbila mbevali, neke umunu yumwi hela yeaisuuma avayagwe swe yeaipelwa ikipelwa? Lino mukimbilage sambi mupelwe ikipelwa. ²⁵ Avakimbisi mbevali vaviva na ulusika ulwa ukwigelanisa ukukimbila vatigine hilo, vakwiyima na ukupiga isingi; sambi vanukile ikinu iyikwanangika! Neke hwehwe twipiga isi sambi twanukile ikinu chesikikwanangikagi. ²⁶ Nambi, nene sindikimbila chaka, sinditoosa ifunzi nda umunu yeitova ing’ala; ²⁷ Na umuvili gwangu nguguvika mumigendele imitalamu sambi guve na choga nachene, sambi lulava nene ndidalikila avangi vanukilwe kwa Nguluvi neke nene sambihilwe pambele.

¹ Vanyalukolo vangu, ndiwenda mulukagule ukutigila avakukwetu mbevali vepasi ya uwulolesi wa lila lifufu, na ukutigila mbevali valowike mubahali yila. ² Mbevali vabatisiwe sambi vave vahanzile na Musa kwa ukukola lila lifufu na ibahali. ³ Mbevali valye ichakulya kikilaga icha Umuhe, ⁴ mbevali kangi vanywe ikinywewa kikilaga icha umuhe, pakuva vanywe ukuhuma mula mwitalawe lya Umuhe lyelyagendige pamwinga nawo; na ilitalawe ilyo lye ye Kilisito yumwene. ⁵ Nambi ndahihyo, awolofu vamuvifise Nguluvi, na avatasile mubalali. ⁶ Sweno, ing’ani iso mbesili, se nda figaniso hela kwa hwehwe; sikutukenyela hwehwe tulemwage ukudobokela inzanangifu ndawe avene lwevadoboche. ⁷ Mulemwage ukuva vasunyalila ifihwananguluvi ndawe avangi lweveviwali ndawe lwe Uwandike Uwelu wewilonga, “Avanu vateng’eme sambi valye na ukunywa, swe vakwinuka ukuwunga.” ⁸ Tulemwage ukuva vagoni ndawe avangi va avene lwevapigite uwugoni, swe vifwa kimunyi kimwi avanu mbilima machumi gavili na vadatu. ⁹ Tulemwage ukumugela Umutwa ndawe avangi va avene lwevamugelite, swe vifwa vilumwa na inzoka. ¹⁰ Mulemwage ukwilonganza ndawe avangi va avene lwevapigite, swe ndawe Umuwulasi avawulagige! ¹¹ Sweno, ing’ani iso savafikite sambi sivigise avangi, naso sandikwe sambi situkenyele hwehwe ye twipipi na ifilo fya kumudugo. ¹² Yula yeihosa ulwa imile akange ikomalilage alagwa. ¹³ Ukugelwa kwe mukave mwigelwa nyenye kuling’ene hela na ukugelwa kwa avanu. Neke Nguluvi uva ukwihuvilwa, nave sisaavaleka mugelwe ukulutila uludali lwenyu, neke pamwinga na ukugelwa, umwene kangi avapela uludali ulwa ukukangalila na ing’asi ya ukuvahumya umo mwivatelefu. ¹⁴ Lino, nye vanyawende vangu, mwepage ifihwananguluvi. ¹⁵ Ndilonga nanyenye, ndamwivanu vanyaluhala ulukwilye, pede mwihagulilage yinyenye mung’ani iso sendilonga. ¹⁶ Ikinywelo icha uwufunyilile, tukukifunyilila sitwatwihanga idanda ya Kilisito? Lwindahihyo na petwilya pamwinga umukate mbi, sitwatwihanga umuvili gwa Kilisito? ¹⁷ Pakuva umukate ugo gumwi, hwehwe, nambi twiwolofu, twimuvili gumwi, pakuva mbetuli twihanga umukate gugo gumwi. ¹⁸ Leke mwiyigise kwa ikiganiso icha Avayudaya vavene, vavene vevavilya ifitawule nambika pifunyo vahanzile na pala pifunyo. ¹⁹ Pede ndiwenda ukulonga kiki? Kwekutigila ichakulya ikitawule nambika kwa ifihwananguluvi nacho chakiva kinu, mbi ikihwananguluvi nacho kinu? ²⁰ Nambi ludodo! Chendilonga che iki amafunyo gevavitambikila vesivamuseli Nguluvi vavitambikila amasoka, si kwa Nguluvi nda. Nguvakanila nyenye sukumwi, mulemwage ukuhanga na amasoka. ²¹ Simuhwaniti ukunywela ikinywelo icha Umutwa na ikinywelo cha amasoka, simuhwaniti ukuhanga pawulilo wa Umutwa na pawulilo wa amasoka. ²² Apangi mbi twiwenda Nguluvi ave na igila? Ngali mwitigila ukuta hwehwe twina uludali ukumulutila umwene? ²³ Kwa nene ifinu mbefili vigaya mwiko, neke nave ndahihyo si mbefili ifinoje. Ifinu mbefili figaya mwiko neke si mbefili ifyafitanga. ²⁴ Sweno umunu alemwagwe ukusaka hela iyena, pesi uwambule wa umuyagwe. ²⁵ Mulisage chechekivesaga kigusiwa mu wugulilo kono we simwiwusa wusa ukwimila inumbula senyu yinyenye, ²⁶ pakuva Uwandike Uwelu witigila, “Ing’i na mbefili ifilimumo wunono wa Umutwa.” ²⁷ Wone umunu yesafuuvitwi avalaalike nanye mwidikile ukubita, swe, mulisage mbefili fyevavatengela kono we simwiwusawusa ukwimila inumbula senyu. ²⁸ Neke wone umunu avalongele ukuta, “Ichakulya iki kitawule nambika kwa ifihwananguluvi.” Sweno, kwa ukwimila kwa yuyo yeavalonje na ukwimila ulwiyiwuko mulalya. ²⁹ Nditigila, ‘Ukwimila ulwiyiwuko lwakwe si ulwenyu mutane ukulya.’ “Mbi ndawuli uwutemapangu wangu wimile ulwiyiwuko lwa umunu uyungi? ³⁰ Lino wone nene ndilya ichakulya icho kono ngumulumba Nguluvi, lino lwindawuli avangi vasokame kwa ichakulya che nene ngumulumbila Nguluvi?” ³¹ Sweno, chechekivesaga mwipiga nambi ukulya nambi ukunywa, mupigage mbefili ukwimila indolo sa Nguluvi. ³² Mulava kikuvaso kwa Avayudaya nambi Avagiliki, nambi likanisa lya Nguluvi. ³³ Munzigage nene, ndigela ukuvapigila uwunofu mbevali kwa lwelweluvesaga, kono we sindisaka ukwambula kwa ndiyena pesi kwa ukwambula kwa mbevali, sambi vapokwe.

¹ Munzigage nene ndawe nene lwengumwiga Kilisito. ² Nguvalumba hilo lwe mukunziwuka na kangi lwe mukwinatila uwulagise wendavalaje. ³ Neke ndiwenda kangi mulukagule ukutigila Kilisito ye Mutwe gwa yeyeavesaga mugosi, na umugosi gwe Mutwe gwa uvakwe, na Nguluvi ye Mutwe gwa Kilisito. ⁴ Sweno, umugosi yakwifunya nambi ukudalika ulukani lwa Nguluvi kono we afwikite mumutwe gwakwe, uyo akumubedala Kilisito. ⁵ Na umung’inetu pakwifunya nambi ukuvila pesafwiti ulukaya mumutwe gwakwe, uyo akugubedala umutwe gwakwe, yeipiga ulo aling’ene hela na umung’inetu yamogite ifwili mumutwe gwakwe. ⁶ Na umung’inetu yesafwiti ulukaya mumutwe gwakwe, ikiba peamogite ifwili sakwe. Neke kulu mung’inetu uko kuhonga nyoni ukusegeta ifwili nambi ukumogwa, sweno, ikiba afwale ulukaya mumutwe gwakwe. ⁷ Si lwinoga kwa umugosi ukufwala ulukaya mumutwe gwakwe, pakuva umwene ye lwihwano lwa Nguluvi na ikilole cha indolo sa Nguluvi, neke umung’inetu ye kilole na indolo sa umugosi. ⁸ Umugosi saahumiti kulu mung’inetu, pesi umung’inetu yahumite kulu mugosi. ⁹ Umugosi sagafilwi ukwimila umung’inetu, pesi umung’inetu yagafilwe ukwimila umugosi. ¹⁰ Nambi ukwimila lulo umung’inetu afwalage ulukaya mumutwe gwakwe, sambi lulagile ulwa alipasi ya uludali, na kangi kwa ukwimila avanyivaha va Nguluvi. ¹¹ Pamwi na lulo, umung’inetu si mutemapakwe pe asupali umugosi, na mugosi si mutemapakwe pe asupali mung’inetu. ¹² Ndawe lwe umung’inetu ahumite kwa umugosi, na kangi umugosi akwegalwa na umung’inetu, na mbefili fihuma kwa Nguluvi. ¹³ Sweno mulamulage yinyenye: Mbi, lwinoga umung’inetu ifunye kwa Nguluvi wesafwiti kinu mu mutwe gwakwe? ¹⁴ Nambi uwugave wakwe wilagila pelu hela ukuta umugosi pe inafwili nzolofu akwihongela inyoni yumwene; ¹⁵ neke kwa umung’inetu pe inafwili nzolofu sikumupela indolo, uyo apelitwe ifwili nzolofu sambi simugubike. ¹⁶ Wone umunu iwenda ukuleta ulubesa mu ulukani ulu, sweno, alukagulage ukuta hwehwe twivagaya migendele igingi, nambi amakanisa ga Nguluvi gagaya imigendele gingi. ¹⁷ Kono we pendivalagilisa isi, singela na ludodo ukuvalumba ukwimila isi sendivanga ukulonga ulwa imikong’ano jenyu nyenye yemufuuvitwe gileta kufwaha, kisumuli che mukwambula. ¹⁸ Ulwa ukutala, ndipulika pemwikong’ana pamwi mwiva na lwigawo mwa nyenye. Nane ukungi ndifuuwa ludodo, ¹⁹ Neke ulwene ukusutana mumahosa luvaje luve lwipwali mwa nyenye, sambi vala avakange vakagulanike. ²⁰ Nachene mwikong’ana, si ukwimila ukulya ichakulya icha Umutwa! ²¹ Pakuva pemwilya umunu yeyeavesaga akwilila ichakulya chakwe yumwene, mbaka pambele avangi venyu viva vadagine, na avangi vagaalite! ²² Mbi simuhwaniti mulye na ukunywa mukaye senyu! Na apangi mbi, tutigile mukulibedala ilikanisa lya Nguluvi na ukuvahongela inyoni iwo avagaya ikinu? Ndivatigile kiki? Ndivalumbe? Si mulukani ulu nda. ²³ Pakuva nene ndanuche uluhuma kwa Umutwa uwulagise wula wendavaletye nyenye: ukutigila, ikilo kikila cheatawulilwe Umutwa Yesu, ategwe umukate, ²⁴ swe akumulumba Nguluvi, akugumegula, itigila, “Ugu gwe muvili gwangu ugukwimila nyenye, mupigage de kwa ukunziwuka nene.” ²⁵ Lwindahihyo kangi peyealye, ategwe ikinywelo, swe itigila, “Ulu lwe lufingano ulupya mudanda yangu. Mupigage de, pepemuvelaga mwinywa kwa ukunziwuka nene.” ²⁶ Pakuva pemuvelaga mwilya umukate ugu na ukunywela ikinywelo iki, mudalikage ifwa ya Umutwa, mbaka pesaakusa. ²⁷ Sweno, yeyeavesaga ilya umukate ugo nambi ukunywela ikinywelo cha Umutwa mwe siluhwaniti, uyo ava mwananzi ukwimila umuvili na idanda ya Umutwa. ²⁸ Sweno umunu yeyeavesaga igosage umwene tandi, pepene pealisage umukate ugo na ukunywela ikinywelo icho; ²⁹ pakuva yeilya na ukunywa kitilili ulwa umuvili gwa Umutwa, ava ilya na ukunywa uluhigilo lwakwe yumwene. ³⁰ Na mwaulo, awolofu mwa nyenye vahomefu na vatamwa, avangi de vakafwe. ³¹ Neke wone tuke twigose lunofu yihwehwe situke tuhigwa ndahihyo. ³² Sweno, petwihigwa na Umutwa, tukwigisiwa sambi tuve na ichoga, tulonga tuhigwe pamwi na va mung’i. ³³ Sweno, vanyalukolo vangu, pemwikong’ana ukulya ichakulya cha Umutwa, umunu yeyeavesaga amusindilage tandi umuyagwe. ³⁴ Na wone ave pwali umunu yeyeavesaga adagine, alisage tandi kukaye yakwe, sambi ukukong’ana kwenyu kulemwa ukwambusa muhigwe. Neke, ulwa ing’ani sila isimwi, sandivaganulila penzusile.

¹ Vanyalukolo, ulwa ifipelwa fya Umuhe, ndiwenda mulukagule wunofu ulwa ing’ani isi: ² Mukulukagula ulwa, pemwe simulapituka nyenye, mwemuyasiswe kuifihwananguluvi ifigaya kinu nabaho mwasogoswige kukwekuvelaga. ³ Sweno, mulukagulage ulwa umunu yeyeavesaga ilongoswa na Umuhe va Nguluvi sahwaniti atigile, ‘Yesu akotwike!’ Lwindahihyo kangi, umunu yeyeavesaga sahwaniti atigile:‘Yesu ye Mutwa.’ pesiilongoswa na Umuhe Umwelu. ⁴ Ifipelwa fya Umuhe fili polofu, neke Umuhe yakufitawula ye yumwi. ⁵ Posili ng’asi nzolofu isa ukupigila, neke Umutwa yeipigilwa ye yumwi. ⁶ Posili ng’asi isiliwungi isa ukupigila, neke Nguluvi ye yumwi, yeileka mbesili sipigike mwa mbevali. ⁷ Yeyeavesaga munu aipelwa uwenzelufu wa Umuhe kwa uwambule wa mbevali. ⁸ Uyumwi mupele ukukola Umuhe, ulukani lwa uluhala, na uyungi ulukani lwa uwimbi ndawe lweiwenda Umuhe yuyo. ⁹ Kwa uyungi akumupela ulufuuwo, na ukumupela uyungi ikipelwa cha ukuponia; ¹⁰ Kangi akumupela uyungi ikipelwa cha ukupiga imiitu, uyungi ikipelwa cha ukulonga ulukani lwa Nguluvi, uyungi ikipelwa cha ukuganula ifipelwa ifihuma kwa Umuhe na fila fyesi fya Umuhe; akumupela uyungi ikipelwa cha indongele ingenzi na uyungi ikipelwa cha ukuganula indongele iso. ¹¹ Ifyo mbefili fye fipigo fya Umuhe yuyo hela yumwi, yakumupela umunu yeyeavesaga ikipelwa ikiliwungi, ndawe lweiwenda yumwene. ¹² Ndawe lwe umuvili ye gumwi nago gwina ifigawamuvili fyolofu, na ifigawa muvili ifyo mbefili nambi fyolofu-fyafiwuyapa umuvili gumwi, lwelwiwali kangi kwa Kilisito. ¹³ Pakuva hwehwe, yetwi Vayudaya na apangi twivanu va ing’i isingi, twivanyawingi na apangi twivatemapetu, mbetuli twivabatise kwa Umuhe yuyo uyumwi; na mbetuli twanywesiwe Umuhe yuyo uyumwi. ¹⁴ Umuvili siwita gwina ikigawamuvili kimwi hela, pesi ulwa gwina ifigawamuvili fyolofu. ¹⁵ Wone iligulu like lilongele; “Pakuva nene sindi liwoko, sweno, nene sinyanzili mu muvili.” Mbi like livaliwukite ukuhanga mu muvili? Aa nda silwindahihyo! ¹⁶ Wone lipulikilo like lilongele, “Pakuva nene sindi liho, sweno, nene sinyanzili mu muvili.” Mbi, kwa ukulonga ulo liva liwukite ukuhanga mu muvili? Aa nda! ¹⁷ Wone umuvili mbeguli guke guvelage liho, ilipulikilo like liva pi? Na wone umuvili mbeguli guke guvelage lipulikilo, umunu ake ahwana ndawuli ukunusa? ¹⁸ Neke ndawe lwelwiwali, Nguluvi alumbing’ise na ukuvika ifigawamuvili ifiliwungi mu muvili ndawe lweawendite. ¹⁹ Neke wone mbefili fike five kigawamuvili kimwi, mbi, umuvili guke guva pi? ²⁰ Nachene, umuvili gwina figawamuvili fyolofu, neke umuvili ye gumwi. ²¹ Sweno, iliho silihwanite ukulilongela iliwoko: “Singukuwenda veve”, nambi umutwe siguhwaniti ukugalongela amagulu: “Singuvawenda nyenye.” ²² Kangi ulungi, ifigawamuvili fyefiwoneka fihomefu ifyo fyefitambule hilo. ²³ Kangi, ifigawamuvili fila fyetukufihosa ulwa sifitambule hilo, ifyo fyetwakufigosa ukulutila; ifigawamuvili fyesifiwoneka ulwa finofu hilo, ifyo fyefikomalilwa ukulutila, ²⁴ na kofili ifigawamuvili ifingi fyesifisaka ukugoswa pakomi Nguluvi yumuwene yeaguviche umuvili imigosekese jakwe, na ukukipela ikigawamuvili chekikepite, ululumbo ululutye, ²⁵ sambi kulemwe ukuva na ulwigawo mumuvili, na ifigawamuvili mbefili pefihwana ukwitanga pamwi. ²⁶ Na wone ikigawamuvili ikimwi kivawe ifigawamuvili mbefili nafyo fihanga uwuvafi na kicho. Na ikigawamuvili ikimwi wone kipelwe ululumbo ifigawamuvili mbefili nafyo fihekelela pamwi na kicho. ²⁷ Sweno, nyenye mbemuli mwi muvili gwa Kilisito na yeyeavesaga iva kigawamuvili cha umuvili gugo. ²⁸ Nguluvi avisile mu likanisa: ava ukutala avigendo, va kavili avavisi, va wudatu avigisi, sweno ndawe avikige vala avanya ikipelwa cha ukupiga imiitu, ukuponia, ukutanga, avalongola na vanyakulonga indongele ingenzi. ²⁹ Mbi, mbevali vigendo? Mbevali vavisi? Mbevali vigisi? Mbevali vina kipelwa cha ukupiga imiitu? ³⁰ Mbi, mbevali vina kipelwa cha ukuponia? Mbevali vina ikipelwa cha ukulonga indongele ingenzi? Mbi, mbevali vaviganula indongele ingenzi? ³¹ Sweno mbemuli, mudobokage ukupelwa ifipelwa ifinofu hilo. Lino nene ndivalagila ing’asi inofu ukulutila ing’asi isi mbesili.

¹ Nambi ndonge indongele isa avanu nave sa avanyivaha va Nguluvi, neke wone ndimugaya uwende nene ndiva nda kisofu ikikwana kiyoya chaka. ² Kangi, nywanite ukuva na ikipelwa cha ukudalika ulukani lwa Nguluvi, na ukusikagula mbesili isa ikinyele, na ukufikagula mbefili; nywanite ukuva na ulufuuwo mbeluli mbaka nywane ukuhamya ifidunda, neke wone ndimugaya uwende ndiva nene sindi kinu nda. ³ Nambi nawule uwunono wangu mbewuli na ukuvapela avamikaa, na kangi nambi nditawule umuvili gwangu gupye mumoto, wone ndimugaya uwende ulo silunanga kinu chechekivesaga. ⁴ Munyawende aikangalila, ayipiga uwuwuya; munyawende mugaya gila, mugaya ulwidudumbo, nambi kidada. ⁵ Munyawende sigayagi ichoga, kangi siwendagi uwambule uwa iyena hela, na kangi simupefu va ililakali; sivikagi ulwiwu lwa isalutye, ⁶ kangi uwende siwihekelelagi imbi nda, wawihekelela isa nachene. ⁷ Munyawende aikangalila mbefili, aifuuwa mbesili na sifulugalagi ukuva na uwusindile. ⁸ Uwende wugaya mudugo. Wone pave pofili ifipelwa fya ukudalika ulukani lwa Nguluvi, ifyo safiduga kimunyi kimwi, wone pofili ifipelwa fya ukulonga indongele ngenzi, safiduga; wone kowuli uwimbi, nawo sawulutila. ⁹ Pakuva uwuseela wetu wudodo, na ikipelwa chetu cha ukudalika ulukani lwa Nguluvi nacho kidodo. ¹⁰ Neke pekifisile kila ikikwilaniche, mbefili fyesifikwilanichi safiduga. ¹¹ Pende ndi mudodo, ndalongige ndandi mwana, ndihosige ndandi mwana. Neke lino, pakuva ye mbe ndandi munu muvina, ing’ani isa uwanawana ngasilekite. ¹² Setukusiwona lino siva nda twilavila mukilole kwa wutinafu, neke pambele satwilavila kwa amiho getu. Kulino ngusikagula padodo hela, neke pambele sandisikagula mbesili wunofu, ndawe nene ngakagulike wunofu. ¹³ Lino sinana isi isidatu: ulufuuwo, uluhuvi na uwende; neke ululutye uwukomi mwa mbesili isi we uwende.

¹ Lino musugunalage ukuva na uwende. Kangi mupifukage hilo ukuva na ifipelwa ifingi fya Umuhe, na hilo ikipelwa cha ukudalika ulukani lwa Nguluvi. ² Yula yeailonga indongele ingenzi, silonga na avanu pesi ukuta ilongana na Nguluvi. Uyo ailongela muludali lwa Umuhe ing’ani isifihime. ³ Neke yula munyakipelwa cha ukudalika ulukani lwa Nguluvi, ailonga na avanu sambi avatange na ukuvasikimika. ⁴ Munyakulonga indongele ingenzi akwitanga iyena hela. Neke umunyakipelwa cha ukudalika ulukani lwa Nguluvi, uyo akulitanga likanisa. ⁵ Sweno, ngembwenda nyenye mbemuli mulongage indongele ingenzi, neke hilo luke lunogela mbemuli muvelage na ikipelwa cha ukudalika ulukani lwa Nguluvi; pakuva umunu umunya kipelwa cha ukudalika ulukani lwa Nguluvi uyo ye anoje hilo ukulutila yula umunyakulonga indongele ingenzi, pesi lwinoga hela avelage pwali umunu yeahwanite aganule iso seilonga, sambi ilikanisa litangwe. ⁶ Sweno, vanyalukolo vangu, wone nzuse ukwenyu na ukulonga nanye, kwa indongele ingenzi mbi, mwambula kiki? Simwambula ikinu chechekivesaga, pesi ukuta apangi wone ndivalongele sa uwugubulilwe wa Nguluvi, nambi isa uwuseela uwungi wewuvesaga, apangi isa ulukani lwa Nguluvi, na apangi sa inzigiso isingi de. ⁷ Wone amagombo amagaya uwumi ndawe ikilanzi na ikimadinde sifyafing’wisa wunofu ndawuli nani yeagukagula umukino gwakwe. ⁸ Wone ingoolo yikoolwe fibi, mbi, nani yeigelanisa wunofu ategule amahomelo ahume kwigalu? ⁹ Sweno lwindahihyo na kwa nyenye, wone indongele yenyu siyikagulanika wunofu, mbi, nani yalukagula lwemwilonga? Ing’ani iso siyaga chaka hela. ¹⁰ Mung’i mosili indongele nzolofu isiliwungi, na sikoyili indongele nambi yimwi ingaya icha ukuganula. ¹¹ Neke wone sindiyiseli indongele yeilonga umunu uyungi, nene ndiva ndimugenzi kwa umunu uyo, nave iva mugenzi kwa nene. ¹² Sweno, lwindahihyo na kwa nyenye, pakuva mwidoboka ukuva na ifipelwa fya Umuhe, musugunalage hilo, ukwanukila ifipelwa fila fyefikulitanga likanisa. ¹³ Sweno, yeilonga indongele ingenzi lunoje ifunyage apelwe na ikipelwa cha ukusiganula. ¹⁴ Pakuva, wone ngwifunyila mu ndongele ingenzi inumbula yangu hela ye yikwifunya, neke uluhala lwangu lwisigala lugaya kinu. ¹⁵ Lino, ngitage ndawuli? Ndifunyila munumbula yangu, kangi ndifunyila na muluhala lwangu; nzimbila munumbula yangu, kangi nzimbila na muluhala lwangu. ¹⁶ Peukumulumbila Nguluvi munumbula yako hela, luva ndawuli kwa umunu uyungi uva ndahihi yaali mu kanisa pakukwidikisa ukwifunya kwako mululumbo sambi atigile: “Ena,” wone sakulukagula lwewilonga? ¹⁷ Na apangi ukwifunya kwako mululumbo kuhwanite nachene kuve kunofu, neke uyo uyungi sikumutanga kinu nda. ¹⁸ Nene ngumulumba Nguluvi, pakuva ndihwana ukulonga indongele ingenzi kolofu hilo ukulutila nyenye mbemuli. ¹⁹ Neke lino mumikong’ano ja avakilisito, nene ndiwendaga ukulonga nawo ing’ani sihanu isikagulanika sambi ndivigise na avangi, siluling’eni ukulonga ing’ani mbilima yimwi mundongele ingenzi. ²⁰ Vanyalukolo, mulava nda mwivana vadodo mumahosa genyu. Kulubali lwa uwanangifu muvelage nda mwivana vadodo, neke mu mahosa genyu lunoje muvelage nda mwivanu yemukange. ²¹ Pakuva nzandike mu ndagilo: “Umutwa itigila de: ‘Ukukola kwa avanyakulonga indongele ingenzi, na kwa imilomo ja avagenzi, sandonga na avanu iva, nambi ndahihyo, sisavamulikisa nene.’ ” ²² Ikipelwa cha ukulonga indongele ingenzi icho kilagilo, si kwa ukwimila avanu avanyalufuuwo, pesi kwa vala vesivalafuuwa; neke ikipelwa cha uwuvisi icho ukwimila vala vevafuuvitwe na si kwa vala vesivalafuuwa. ²³ Sweno, likanisa mbelili pelikong’ana pamwi, na mbevali swe vivanga ukulonga indongele ingenzi, wone vaase avanu ava ndahihi apamwi vesivalafuuwa vakuvafika ndahihyo, mbi sivavatigila nyenye mugulwike lukwale? ²⁴ Neke, wone mbevali vave vidalika ulukani lwa Nguluvi, wone aase umunu uva ndahihi apamwi yesalafuuwa, mbesili sapulika simumolelela ulwa uwanangifu wakwe yumwene; mbesili sapulika simuhiga. ²⁵ Isa ikinyele cha munumbula yakwe sivikwa pelu, nave afugama na ukwifunya kwa Nguluvi itigila. “Nachene Nguluvi alipamwi na nyenye.” ²⁶ Vanyalukolo, tulonge kiki, lino? Pemwikong’ana uyumwi ina lwimbo, uyungi lwigiso, uyungi uwugubulilwe indongele ingenzi apangi uwuganusi. Mbesili sivelage kwa ukulitanga likanisa. ²⁷ Wone vave povali avanyafipelwa ifya ukulonga indongele ingenzi, valongage vavili apangi vadatu, valalutisa ipo, kangi vivalage yumwi yumwi; na avela pwali umunu umunya kuganula isilonzilwe. ²⁸ Sweno, wone asupali umunu yahwanite ukuganula, swe, umunyakulonga indongele ingenzi akatukage mu likanisa, alongage na inumbula yakwe yumwene swe na Nguluvi. ²⁹ Lekage avavisi vavili nave vadatu valonge neke avangi vagelanisage ing’ani sawo. ³⁰ Wone uyumwi peilonga neke uyumwi va vevipulikisa apelitwe lukani uluhuma kwa Nguluvi, swe, yula yeilonga akatuke tandi. ³¹ Pakuva mbemuli muhwanite ukudalika ulukani lwa Nguluvi, mukwivala yumwi yumwi; sambi mbemuli mwiyigise na ukukangaswa. ³² Ikipelwa cha ukudalika ulukani lwa Nguluvi lwinoga kivelage muwulongosi wa yuyo umunyakipelwa. ³³ Pakuva Nguluvi si Nguluvi va iliyowo, pesi va uwikalakunoga. ³⁴ Ndawe welwelwiwali mu makanisa mbegali ga avanu va Nguluvi, avang’inetu vakatukage mu mikong’ano ja avafuuvitwe. Sivatawule ukulonga; pesi ulwa vavelage vanyachoga ndawe indagilo weyilonga. ³⁵ Wone vave na lukani lwa ukuwusa, vavawusage avavaha vawo mukaye sawo, pakuva lwihonga nyoni kwa umung’inetu ukulonga mu mikong’ano ja avafuuvitwe. ³⁶ Mbi, ndawuli mwihosa ulwa ulukani lwa Nguluvi lwavanje mwa nyenye, na apangi tutigile lwavasye nyenye mwiyena hela? ³⁷ Wone pwali umunu yeihosa ulwa Umwene mukami va Nguluvi yatumitwe, apangi ulwa ina ikipelwa cha Umuhe, alukagulage ulwa isi senguvandikila nyenye lwe lulagilo lwa Umutwa. ³⁸ Neke wone pwali umunu yesakusikagula iso, sweno, umunu alamupulika uyo. ³⁹ Sweno, vanyalukolo vangu, luvavaje mudobokage ukudalika ulukani lwa Nguluvi; neke mulamutanila umunu yeilonga indongele ingenzi. ⁴⁰ Neke mbesili sipigikage mu choga na mumigosekese iminofu.

¹ Lino, vanyalukolo vangu, ndiwenda ukuvalongela lula Ulukani Ulunofu lwendavadaliche, nanye swe mukulwanukila na ukwima mwivakangafu mulwene. ² Na kwa ukola Ulukani Ulunofu umo mwe mwipokwa, wone mwinatye ing’ani sendavadaliche, na wone ukufuuwa kwenyu si kwe kwa malanga. ³ Neke ndavapelye nyenye ing’ani ingomi hilo se nene ndanuche: ulwa Kilisito afwe ukwimila inzanangifu setu ndawe nzandike Muwandike Uwelu, ⁴ ulwa atasilwe, na ulwa asilibwiswe ikimunyi cha wudatu ndawe lwe nzandike; ⁵ ulwa amweleluche Kefa, na pambele aveleluche vala avichumi na vavili. ⁶ Na pambele kangi aveleluche vanyalukolo avalutye ku magana gahanu sukumwi; avangi mwavawo pewumi, neke avamwi mwavawo vaafwe. ⁷ Swe pambele akumwelelukila Yakobo pambele kangi akuvelelukila avigendo mbevali. ⁸ Pevalutye iwo mbevali, swe akunzelelukila nene, yendi mudodo witigila wanda umunu yemwegale ifilo wesifilakwila. ⁹ Pakuva nene yendi mudodo hilo mwa avigendo, na silunoji nene nambi ukutambulwa mwigendo, pakuva ndalitesise ukulutila likanisa lya Nguluvi. ¹⁰ Neke, kwa uwuwuya wakwe Nguluvi, ngave de lwendiwali, na uwuwuya wakwe Nguluvi we si wa malanga. Nene ngapigite ukulutila mbevali; neke siyinene nachene, pesi uwuwuya wa Nguluvi wewipiga pamwi na nene. ¹¹ Neke nave ndahihyo, wone vavene vevidalika apangi nene yendidalika, ulo silukani nda icho che iki che mbetuli twidalika, na icho che nyenye mwifuuwa. ¹² Lino, pakuva lwidalikwa ulwa Kilisito asilibwiswe uluhuma ku vafwe, avamwi mwa nyenye vahwana ndawuli ukutigila kugaya ulusilibuko lwa avafwe? ¹³ Wone kugaya ulusilibuko ulwa avafwe. swe, Kilisito nave sasilibwiki, ¹⁴ na wone Kilisito sasilibwiki, sweno ukudalika kwetu kwa malanga na ulufuuwo lwenyu lwa malanga. ¹⁵ Ululutye ipo, hwehwe tuke tuva wolelesi va wudesi pa Nguluvi, pakuva twatige ukuta Nguluvi amusilibwe Kilisito uluhuma ku vafwe, na kumbi samusilibwi wone-nachene luve avafwe sivavisilibuka. ¹⁶ Pakuva, wone nachene luve avafwe sivavisilibuka, sweno nave Kilisito sasilibwiki nangi. ¹⁷ Na wone Kilisito sasilibwiki, sweno, ulufuuwo lwetu lwa malanga hela, pemukaali mbaka lino mwikalite mu nzanangifu senyu. ¹⁸ Ululutye palulo, mbevali vala avafwe wevahangite na Kilisito apo vayaje ng’ani. ¹⁹ Neke wone uluhuvi lwetu mwa Kilisito lukwimila uwumi uwa lino, sweno, hwehwe ye twivanu yetunoje ukuhuguvalilwa hilo ukulutila avangi mbevali mung’i. ²⁰ Neke lino inachene ye iyi ukuta Kilisito asilibwike uluhuma kuvafwe, uva ukutala kwa vala avavasise mu fwa. ²¹ Pakuva ndawe lula lwe ifwa yalesilwe mung’i na umunu yumwi, na lwindahihyo nalo ulusilibuko uluhuma ku vafwe lwalesilwe na umunu yumwi. ²² Neke ndawe lwe avanu mbevali lwevavifwa kwa ukuhanga na Adamu, lwindahihyo mbevali savasilibuka kwa ukuhanga na Kilisito. ²³ Sweno umunu iva mumigosekese jakwe: itala Kilisito; pambele vakusa avanu vakwe Kilisito pesaasile. ²⁴ Pesilutye iso, uwusililo pesawufika ulusika lwe Kilisito saamutawulila uwutwa Nguluvi Dada, peave adwesise uwutema mbewuli, uludali na uwutwa. ²⁵ Pakuva Kilisito satema mbaka Nguluvi peavadwesise avatavangu vakwe na ukuvanyagalika pasi. ²⁶ Na umutavangu uwa umudugo yesaadogofywa ye fwa. ²⁷ Pakuva Uwandike Uwelu witigila, “Ifinu mbefili safivikwa pasi pa magulu gakwe sambi afiteme, lulipawelu ulwa Nguluvi sakwingila ahange mwilugu lya ifinu, pakuva umwene yeakufivika ifyo pasi ya Kilisito.” ²⁸ Neke ifinu mbefili peyefivisilwe pasi ya uwutema wa Kilisito, pepene pe umwana, nave pesaahwana ukwivika pasi ya uwutema wa Nguluvi, yula yeafivisile mbefili pasi ya uwutema wakwe, sambi Nguluvi ateme mwa mbefili. ²⁹ Ino wone pave pagaya ulusilibuko, avanu vala avabatisiwige ukwimila avafwe, lino vihuvye ukupelwa kiki? Wone avafwe vave sivisilibukagi, lweki lino uyungi abatisiwe ukwimila avene. ³⁰ Nayihwehwe nahwe, lweki twisope mulutalamu imisika mbegili? ³¹ Nye vanyalukolo vangu, ndemuyenyu tulaving’ine na ifwa ifilo mbefili neke lwengwivahila mwanyenye muwunani wetwinawo ukuhanga na Yesu Kilisito Umutwa vetu ulu ulwileka nene ndalike ulu. ³² Ngembelage ndonyite isa uwunu hela, ukwihoma kwa nene na amakoko amakali baha ipa pa Efeso, kuke kumeela kiki? Wone avafwe sivisilibukagi, sweno, “Twililage na ukwinywela, pakuva imilawu twifwila.” ³³ Ena, nachene mulasangwa mumalanga! Uwiyendi uwubi nachene wakwananga imigendele iminofu. ³⁴ Mwiwukage! Muvange ukwikala wunofu, na mulava pemupiga inzanangifu. Avamwi mwanyenye sivamuseli Nguluvi na padodo hela. Ulu nguvalongela nachene, lukuvahongela inyoni pakomi. ³⁵ Neke umunu ahwanite awuse: “Avafwe vavisilibuka ndawuli? Kangi vava na umuvili uguli ndawuli pesavasilibwike kangi? ³⁶ Nyenye mwivapuva! Cheuvyalite sikimelagi pesikifwi tandi. ³⁷ Na chewivyala veve ye nyadikwa hela, apangi ya ingano nambi nyadikwa iyingi, neke siwivyala ikimelo mbekili chekiwoneka pambele. ³⁸ Sweno Nguluvi akuyipela inyadikwa iyo, umuvili gweiwenda yumwene, na inyadikwa yeyeyivesaga yayipelwa umuvili gwakwe uguli wungi. ³⁹ Na imivili ja ifigawa mbefili sigihwana mbegili nda. Imivili ja avanu mbevali gihwana, na ija ifikoko giliwungi, na ija ifidege najo giliwungi, mbaka na imivili ija isomba najo giliwungi. ⁴⁰ Kogili imivili ija kuchanya na kangi kogili ja mung’i; uwunofu wa imivili ja kuchanya wuliwungi, na uwunofu wa imivili ja mung’i, nawo wuliwungi. ⁴¹ Powoli uwunofu wa ilisuva, na uwa umwesi na wa ing’eng’esi na ing’eng’esi nawo siwihwana wusutine. ⁴² Lwindahiyo kwa ulusilibuko lwa avafwe. Ndawe inyadikwa, umuvili gwagwitagwa mu changa, gwitagwa muwanangifu, neke gwagwisilibukila mu wutakwanangika. ⁴³ Gwagwitagwa mu wusakafu, gwagwisilibukila mu ndolo; gwagwitagwa mu wuhomefu, gwagwisilibukila mu ludali. ⁴⁴ Pegwitagwa gwagwiva muvili gwa mumu mung’i, pegwisilibuka gwagwiva muvili gwa umuhe. Pogoli umuvili gwa mung’i na saguva pogoli na umuvili gwa umuhe. ⁴⁵ Pakuva Uwandike Uwelu witigila, “Umunu uva ukutala, Adamu, e kigawa kinyanumbula inya wumi;” neke Adamu uva umudugo, ye Muhe umugava uwumi ku vanu. ⁴⁶ Sweno umuvili gwegwagwitala si gula ugwa umuhe, pesi ukuta gula umuvili gwa mung’i pambele gukusa umuvili gwa umuhe. ⁴⁷ Adamu uva ukutala agafilwe na lilongo ukuhuma mung’i neke umunu uva kavili ahumite kuchanya. ⁴⁸ Sweno, avanu mbevali avahumile kulumwene vihwana na umunu uyo yeagafilwe na ililongo; neke vala ava kuchanya vihwana na yula yahumite kuchanya. ⁴⁹ Ndawe lwe twihwana na yula yeagafilwe mulilongo, lwindahihyo kangi satwihwana na uyo yahumite kuchanya. ⁵⁰ Sweno, vanyalukolo vangu, nditigila de: kila ikigave na umuvili na idanda sikihwaniti ukwingila mu Wutwa wa Nguluvi, na kinyakwanangika sikihwaniti kive muwutakwanangika. ⁵¹ Mupulikise tandi, nguvalongela nyenye isa ikinyele: hwehwe mbetuli sisatuvasa, pesi mbetuli satupitulwa ⁵² sukumwi hela ulwa ulusika lwa ilipembe lya umudugo, pakuva pakuva pesalikufilwe, avafwe savasilibuka vave muwutafwa kangi, na hwehwe satupitulwa. ⁵³ Pakuva lunoje chechekivesaga ikinyakwanangika kifwale uwutakwanangika, umuvili ugwa kufwa gufwale uwutafwa. ⁵⁴ Swe, umuvili ugu ugunyakwanangika pesaguvagufwite uwutakwanangika, na kila ikinyakufwa peyekifwite uwutafwa, ipo pepene pesalukwila ulukani ulwandike: “Ifwa yeyidwesiswe; uwutalemwa yewukwilye!” ⁵⁵ “Lino veve vefwa uwulema avangi wako wulipi? Uludali lwako lwa uwuvafi lulikwi? ⁵⁶ Ifwa yayiva na uludali ukwimila inzanangifu nawo uwanangifu wawipelwa uludali lwakwe mu ndagilo. ⁵⁷ Neke tumulumbage Nguluvi yatupelye uwutalemwa ukwimila Umutwa vetu Yesu Kilisito. ⁵⁸ Sweno, vanyalukolo vangu nyevende, mwimage mukange. Kangi musugunalage mbepali ukumupigila Umutwa muludali, we mukulukagula ulwa ikipigo icho cha ukumupigila Umutwa chemuhele mukumupigila sisakiyaga nangi.

¹ Lino, ulwa umuhangu gula kuvanu va Nguluvi: mupigage ndawe lwe ndavalaje mu makanisa ga ku Galatiya. ² Nyenye mbemuli, mufilo fya i Jumapili mugavage amagobole agangi mwivika palubali ndawe lwe umunu ahwana ukukwava, sambi kulemwe ukuva nu kuhangula penzusile. ³ Nane pe nzusile ukwenyu, ndivatuma avamwi mwanyenye vemuvahagula, sambi vasindike ibalula na ifipelwa fyenyu fya uwuwuya ku Yelusalemu. ⁴ Wone luhwane nane mbite, swe, tubitasa nawo. ⁵ Nene nzusa ukwenyu peyengendye mu Makedoniya, pakuva ndihosa ukugendela kuko ku Makedoniya. ⁶ Apamwi ndikala ukwenyu kwa lusika, apangi nywanite ndikale nanye ulusika mbeluli lwa ikitungwib sambi munange ulugendo lwangu kwekwekuvesaga kula kwembita. ⁷ Sindiwenda ukugendela ukwenyu na ukwangufya ukuhega pemba mulugendo lwangu. Ndihuvye ukwikalasa nanyenye musika, wone Umutwa awende. ⁸ Sweno, sigala baha pa Efeso mbaka ikimunyi cha i Pendekosite. ⁹ Pakuva umulyango gulimwasi gwa ukupiga ikipigo ikikomi chekipwali ipa, nambi povali wolofu avanyalubesa avakumbesa. ¹⁰ Timoti peasile ukwenyu, mumulavisage, alava na muhwehwe gwegweguvesaga ulusika pe alipamwi na nyenye, pakuva nave ahele akumupigila Umutwa ndawe yinene. ¹¹ Sweno, umunu yeyeavesaga alamubedala, pesi ukuta mumutangage sambi ave mu wikalakunoga peiva mulugendo ukunzusila nene kangi, pakuva nene ngumulavisa hilo aase pamwi na avanyalukolo vetu. ¹² Ulwa munyalukolo vetu Apolo, nene ngamugongolite hilo aase ukwenyu, pamwi na avanyalukolo avangi, neke umwene siwendela ng’ani kulino ukusa kuko lino, neke ulwene aasa hela pe ulusika luva lufikite. ¹³ Sweno, mwikalage miho, mwimage mukange mu lufuuwo, mwivagaya muhwehwe, kangi muvelage na uludali. ¹⁴ Na chechekivesaga chemupiga, mupigage mu wende. ¹⁵ Vanyalukolo vangu, muvaseele ava mukaye ya Sitefana; ulwa avene ve vanu vevatasile hilo ukwanukila ulufuuwo ulwa uwukilisito mu Akaya, na lwe vakitawe ukuvapigila avanu va Nguluvi. Nane nguvagongola nyenye vanyalukolo vangu, ¹⁶ muvigage avanu vevindawe iwo na uwulongosi wawo na mu wulongosi wa umunu yeyeavesaga yeipigasa pamwinga nawo. ¹⁷ Nene ndihekelela hilo ulwa ukusa kwa Sitefana, Folotinato na Akayiko vakafikite na ukolelela uwuneemu we tuke twinawo pe nyenye muke musupali. ¹⁸ Ulu lukuyinogela inumbula yangu, kangi na inumbula isenyu. Sweno, lwinoga muviwuke avanu iva. ¹⁹ Amakanisa mbegali ga mu Asiya gakuvatigila kamwene. Nave Akila na Pilisika pamwi na avanu mbevali va Nguluvi va mukaye yawo vakuvatigila kamwene munogage mulu Mutwa. ²⁰ Na vanyalukolo mbevali vakuvatigila kamwene. Nanye mbemuli mwinonelage mu wende wa Nguluvi. ²¹ Nene Pawulo nguvatigila kamwene, pengwandika kwa iliwoko lyangu yinene. ²² Yeyeavesaga yesakumwenda Umutwa, uyo avelage akotwike. Malanata-ve Mutwa, wusage! ²³ Uwuwuya wa Umutwa vetu Yesu Kilisito, wikalage na yinyenye. ²⁴ Uwende wangu wikalage na yinyenye kwa ukuhanga na Kilisito Yesu.