TITO

TITO

¹ Inye ndi Paulo, omwiru wa Ruhanga mara entumwa ya Yesu Kirisito, ayatumirwe omu ndonkwa za Ruhanga kabeyongera omu kwikiliza n’omu kumanya amazima againamu okutina Ruhanga, ² baina eshuubi y’oburora obutalihwaho obwo Ruhanga, atachwa igambi yatushuubize ensi etakatonzirwe. ³ Kandi orw’obukiro bwonene bwagobire, oburora obwo Ruhanga Omurokozi waitu yabutwoleka omu kigambo ekyo Ruhanga Omurokozi waitu yankwasize mara akandagira kukiranga: ⁴ N’inye ndikukuhandikira, iwe Tito, omwana wange ow’amazima omu mujwangano gwaitu omu kwikiliza kumoi. Ruhanga Isheichwe na Yesu Kirisito Omurokozi bakugilire ekisha, bakutunge n’emilembe. ⁵ Ekyo nakusigiire Kirete nkagonza k’oshemeza ebyabaire bisigaliire, kandi n’okutaho abagurusi omu bigo byona nk’okwo nakuragiire. ⁶ Omushaija abe atainaho kamogo, ashangwe aina omukazi omoi, n’abaanabe babe nibesiiga, mara batalikwetwa biraragwa anga kugira lyeleme. ⁷ Asikofu, omusigire wa Ruhanga, naragirwa kutagiraho katalizi. Ataba muntu wa ikuru anga alikuzibiitana bwangu, ataba ntamiizi handiki ntemangani anga kurujuukira magoba omu mulimo gwa wenene. ⁸ Abe muntu omufura, omuntu w’emilembe, alikwelinda, omugorogoki, omutakatifu mara ayefutatire. ⁹ Agume aha kigambo ky’amazima nk’okwo kilikwegesibwa, nirwo arabona kwegesa abantu eby’okwegesa eby’amazima n’okukiza amani abalikuhakanisa amani. ¹⁰ Nobona haliho abashengi bangi, abalikusharangura amagambo mara ngobya, kandi omuno balinya abatatahiliirwe. ¹¹ Aho obasize, ahakuba nibatabangura amaka g’abantu nibabegesa ebifire ebyo batasaine kwegesa, bagendeleire kubona empiya z’obushai. ¹² Omoi omuli bonene abo, omurangi mutahi wabo, akagamba ati, «Rwona rwona Abakirete bagamba ebishuba, bikaaka by’eitima, kandi benda okulyaguzibwa batakozire milimo.» ¹³ Eki akakigamba akiboine. Aha rw’ekyo obatere aha mutwe n’amani, nirwo baraguma omu kwikiliza, ¹⁴ kushaaga okuhuliliza ebigano by’Abayahudi anga okukwata eby’abantu abalikwanga amazima. ¹⁵ Abantu barungi babona ebintu byona bili birungi; kyonkai abantu babi mara batakansi tibabona karungi, kuba amagezi gabo gakahagara, kutyo n’ebitekelezo byabo. ¹⁶ Nibagamba okwo bamanya Ruhanga, kyonkai omu bigiro byabo nibamwetonga. Nibasheshemukya, bantu abataina muhuliro, tibaina karungi kona kona ako bakushobora kukora.

¹ Kyonkai iwe ogume, oyegese eby’amazima. ² Ogambire abagurusi bamanye okwebalira, bagire obwelinzi, bakoze amagezi, bagume omu kwesiga n’omu ngonzi, mara batahindukana. ³ Abakaikuru nabo kutyo, obagambire bekunire omu migilire, baleke okugonza enkuru n’etamiiro. Begese ebintu birungi, ⁴ mara begese abakazi bato kugonza baibabo n’abaana babo. ⁵ Babe bantu b’amagezi, bagire obwera bw’omwoyo, bamanye amaka gabo, babe bafura, kandi bagire omuhuliro ahali bashaija babo, ekigambo kya Ruhanga kitaija kikagaywa. ⁶ Kutyo ogambire abasigazi bate nibefutatira. ⁷ Na iwe omuli buli kantu obe bulebero burungi, omu kwegesa kwawe ozoke okwo olikwegesa eby’amazima, n’okwo otalikuzana, abantu batakwetwaliliza. ⁸ Omu fumoro yawe batakumoga, nirwo omubisha arashonara akaburwa ekyo aratuneenaho. ⁹ Abairu obagambire okugira omuhuliro ahali bakama babo, mara buli kantu bakakore kurungi. Baleke kushenga bakama babo, ¹⁰ n’okwiba obuntu obuke buke chei, bagire obwesigwa nyakabara, bakore kurungi buli kantu baihwe ahali bonene bashemelerwe ebyo balikwegesibwa ahali Ruhanga Omurokozi waitu. ¹¹ Nobona Ruhanga akagilira abantu bona ekishakye kabarokoka. ¹² Aha rw’ekisha ekyo akatujuna twamanya Ruhanga, twayejuma amairu g’ensi, twashobora kurora tuchuleire, tuli bagorogoki, twarora oburora obutakatifu omu nsi egi, ¹³ tulindiliire eshuubi yaitu enungi, nikwo kugaruka kwa Ruhanga waitu Nyamukuru mara Omurokozi waitu Yesu Kirisito omu kitinwa, ¹⁴ ayatwehaire kutuchungura omu ntambara zona n’okweyeleza abantu abe abalikwitanira ebigiro birungi. ¹⁵ Ebigambo ebi obigambe. Kandi ohane abantu n’okubatera aha mutwe, okoze obushobora bwona. Omuntu n’omoi atalikugaya.

¹ Abantu bawe obaijukye okuhulira abatwazi n’abaina obushobora, bagire omuhuliro, baikare betekatekire kukora buli mulimo ogurungi. ² Batagambaho kubi muntu, belinde enkungana, bagire obuchulezi n’obufura aha bantu bona. ³ Ichwe eirai twabaga bafera, titwagiraga muhuliro, tukaba tuhabire, twabaga bairu b’obunyama, n’amairu agatali gamoi, oburora bwaitu bwabaga bw’omutima gubi n’akachubirano, abantu batunobaga mara naichwe tukaba nitunobangana. ⁴ Kyonkai kwema orwo twamanyire okwo Ruhanga Omurokozi waitu aba murungi mara atugonza n’obufura, ⁵ akaturokora ti aha rwa bigiro byaitu bya bugorogoki, shana aha rw’obuganyizibwe orwo twayogiibwe n’amaizi tukazarwa buhya twahindurwa bahya omu mani ga Mwoyo Mutakatifu, ⁶ owo yatutungire amanaganage tujwangane na Yesu Kirisito Omurokozi waitu, ⁷ tubone kugarulirwa aha rw’ekishakye tukaba basika orwo tulikushuubirayo oburora obutalihwaho. ⁸ Ekigambo eki ky’amazima. Ningonza k’obakomeleza ebigambo ebi, balinya abesiga Ruhanga bashobore kugira obwegendeleza kuta nibakora kurungi. Ebi birungi muno mara by’omugasho aha bantu. ⁹ Nawe iwe oyelinde empaka z’obufera, orutondelezo rw’abagurusi b’amahiga, akahukano, n’okuhakanisa amateka, kuba ebyo bya katozi mara tibina mugasho. ¹⁰ Omuntu alikuletera banu akaahukano, k’oramara kumuhana limoi anga kabili, omuhwemu. ¹¹ Aho oramanya okwo omuntu nk’ogwo ali mubi mara mufakare. Wenene wenkai naba yayeramwire. ¹² Orwo ndakutwekera Aritemi na Tikiko, oyanguhe muno onshange Nikopoli, ndamwire kuba niyo malira ekirumo ky’embeho. ¹³ Okore okwo olikushobora kubonera Zena omubuya w’amateeka, na Apolo eby’okugenda nabyo; oshare amagezi bataburwa kantu. ¹⁴ Kandi abantu baitu ab’okwo bamanye kwikara nibakora emilimo y’ekitinwa n’okujuna banu orwo bakwatwa, babe bantu b’omugasho. ¹⁵ Abo nyinabo bona nibakushura. Naiwe onshulire abalikutugonza tujwangaine nabo omu kwikiliza. Omugisha gwa Ruhanga gube nainywe inywena.