OKUSHURULIRWA

OKUSHURULIRWA

¹ Ekitabo eki kilimu ebyashurwirwe Yesu Kirisito, ebyo Ruhanga yamuhaire kwoleka abairube, ebyabaire nibiralira kubaho omu bwangu. Akatuma omumalaikawe kubimanyisa omwiruwe Yohana. ² Ogu aba mujulizi w’ekigambo kya Ruhanga, ashuba ajulira Yesu Kirisito, amara ajulira byona ebyo yaboine. ³ Muberwa alikushoma n’eiraka lihango ebi ebilikurangwa, mara baberwa abalikubihulira, n’abalikwekomya ebihandikire omu kitabo eki; aha rw’okuba obukiro buli haihi. ⁴ Inye Yohana, aha nimpandikira enteko mushanju za Asia: Nimbendera ekisha n’emilembe ya Ruhanga asingire, ayasingire mara alikwija kwija. Nimbendera ekisha n’emilembe y’abamalaika mushanju abaikara omu maisho g’enketoye bakurasire. ⁵ Nimbendera ekisha n’emilembe ya Yesu Kirisito omujulizi omwesigwa, kati ka mbanda ayahimbukire omu bafu, Omukama w’abakama b’ensi. Yesu Kirisito ogwo atugonza mara ayatuchungwize obwambabwe akatwihya omu mafu, ⁶ akatuhindura ngoma mara bakuhani ba Ruhanga we kandi Ishe, ekitinwa kibe kya wenene kandi n’obukama eirai lyona. Amina. ⁷ Muraleba naletwa omu bichwi, mara buli muntu aramubona, nangu n’abamuchumisire babulimu. N’enganda zona z’ensi k’araija nizija kuboroga. Mara nikwo. Amina. ⁸ Ruhanga Omukama asingire, mara ayasingire, mara wenene ogwo akwatiliire kwija, Omushobora, byona nagamba ati, «N’inye Alifa, n’inye Omega: N’inye mbandizo, n’inye ndelekero.» ⁹ Inye ndi Yohana murumuna wanyu, omwegesibwa wa Yesu, n’inyema nainywe kwegumisiliza n’okwemera obushasi obulikwizira abaana b’engoma. Bakaba bannagire omu Kizinga kya Patimosi aha rw’enshonga y’okuranga ekigambo kya Ruhanga n’amazima ago Yesu yasherwire. ¹⁰ Kikaba kili kiro ky’Omukama, Mwoyo yambanda, eiraka lihango lyanduga enyuma oti ly’eikondere, ¹¹ niligamba liti, «Eby’olikubona obihandike omu kitabo, ekitabo ekyo okitwekere enteko mushanju, nizo za: Efeso, Simirina, Perigamo, Tiatira, Saridisi, Filadelifia na Laodisea.» ¹² Aho nkubuka kuleba eiraka lilikungambira, nirwo naboine ebinaara mushanju by’ezahabu, ¹³ omugati y’ebinaara ebyo halimu alikushusha Omwana w’Omuntu, ayambaire ekanzu ibili, omukandara gumurabire omu kifuba. ¹⁴ Omutwegwe n’eishoke lyaho ekyelere sufu elikwera, ekyelere ky’eseluji, amaishoge gashusha endimi z’omuliro. ¹⁵ Ebilengebye byashusha omulinga gusingeirwe, oti bagujugutiire omu kyokezo, eirakalye lyahinda nk’omutunga gw’amaizi. ¹⁶ Omu kiganjakye kya bulyo akaba ainaimu enyanyinyi mushanju, omu kanwake yarugwamu embanda ehyoire ey’amogi gabili, obusobwe bwashusha eizoba elyakiire kimoi. ¹⁷ Kanamazire kumubona namugwa omu maguru nk’omufu. Kyonkai wenene yaimukya omukonogwe gwa bulyo yaguntaho nagamba ati, «Otatina, n’inye mbandizo, n’inye ndekelero. ¹⁸ N’inye asingire; nkafa, kyonkai mbwenu ndiho eirai lyona. N’inye nyina enfunguruzo za Rufu na Kuzimu. ¹⁹ Mbwenu eby’olikubona obihandike: Ebiliho n’ebilikwija kubaho ahanyuma. ²⁰ Ekyebisho ky’enyanyinyi mushanju ezo wabona omu kiganja kyange kya bulyo, n’ebinaara mushanju by’ezahabu: enyanyinyi mushanju nibo bamalaika mushanju abalinzi b’enteko mushanju, kandi ebinaara mushanju nizo nteko zonene mushanju.»

¹ Omumalaika omulinzi w’enteko ya Efeso, omuhandikire oti: «Ogwo akwete enyanyinyi mushanju omu mukonogwe gwa bulyo, naraba omu binara mushanju by’ezahabu, nagamba ati, ² ‹Emilimo yawe ningimanya, akachwazikano kawe n’obwegumisiliza bwawe obw’amani. Nimanya n’okwo abantu ababi otalikubaha kaanya, n’abalikweyeta ntumwa okwo batali ntumwa nobamankuza. ³ Nimanya okwo oina obwegumisiliza obw’amani mara nondashanira, mara tokalemirwe. ⁴ Kyonkai kandi nyina ekigambo eki ahali iwe: Engonzi ezo wabaire oinaizo orwa mbere mbwenu tokinaizo. ⁵ Oijuke ekikugwisize, oyechuze oshube okore okwo wakoraga aha mbandizo. K’otechulize ndakwizira, nyihye ekinara omu mwanya gwakyo. ⁶ Kyonkai kandi eki oinakyo: Ebigiro by’Abanikolai tobyenda, nanye kwakwo timbyenda. ⁷ Araba ainai okutwi ahulire ebyo Mwoyo alikugambira enteko ezo. Omuntu alisinga endashana ndimulisa aha muti gw’oburora oguli omuli Paradiso ya Ruhanga.› » ⁸ Omumalaika omulinzi w’enteko ya Simirina omuhandikire oti, «Ebi nibyo owa mbere mara owa nzindo, ayafire akahimbuka, alikugamba, ⁹ ‹Nimanya ebiyengo byawe n’obunaku bwawe (kyonkai oli mutungi), kandi abeyeta Bayahudi okwo batali Bayahudi, shana sinagogi ya Sitani, nimanya okwo balikukugaya. ¹⁰ Obushasi bw’olikwija kubona otabutina. Omuli inywe halimu abo Sitani araliire kunaga jela, mubone kulengwa, mara omu biyengo ebyo muramaramu ebiro 10. Obe mwesigwa, k’oraba nofa ofe, inye ndakuha orukinga rw’oburora. ¹¹ Araba aina okutwi ahulire ebyo Mwoyo alikugambira enteko ezo. Arasinga endashana, orufu orwa kabili tirulimukoraho kantu.› » ¹² Omumalaika omulinzi w’enteko ya Perigamo omuhandikire oti, «Ow’embanda ehyoire ey’amogi gabili nagamba ati, ¹³ ‹Mbali otura nimpamanya, niyo enketo ya Sitani eli. Inye nomanya kandi okanyebuga omu makiro ga Antipasi omujulizi wange, omwesigwa wange, owo baitiire omuli inywe omu bukiro bwa Sitani. ¹⁴ Kyonkai kandi nyinai ebigambo bike ahali iwe: Oinayo abantu abalikukwata ebyo Balaamu yayegesize, ayayegesize Balaki kusitaza Abaisiraeli kulya enyama z’ebitambo ebitambiirwe ebihuku bakashuba bakakora n’obusiyani. ¹⁵ Kandi oinaho n’abalikukwata eby’Abanikolai bayegesize. ¹⁶ Ahonu oyechuze. Kakitali kityo elirandeta ntaraliire ninyija kurashanisa abantu abo n’embanda ey’omu kanwa kange. ¹⁷ Aina okutwi ahulire ebyo Mwoyo alikugambira enteko ezo. Omuntu arasinga endashana ndamuha manu etalikuboneka, muhe eibare lilikwera elihandikirweho eibara elihya elitalikumanywa muntu shana arahabwa eibara elyo.› » ¹⁸ «Omumalaika omulinzi w’enteko ya Tiatira omuhandikire oti: Omwana wa Ruhanga, ow’amasho nk’endimi z’omuliro, ow’ebilenge bilikushusha omulinga gumunywire, nagamba ati, ¹⁹ ‹Ebigiro byawe nimbimanya, n’okwikiliza kwawe, n’eikora lyawe, n’obwegumisiliza bwawe obw’amani, n’okwo ebigiro byawe ebya nyuma bilikushaaga ebya mbere. ²⁰ Kyonkai nkwinaho ekigambo eki: Omukazi Yezebeli, alikweyeta murangikazi nayegesa abairu bange emize nabahabisa kuta nibakora obusiyani n’okulya enyama z’ebitambo ebyo batambiire ebihuku. ²¹ Muhaire omwanya gw’okwechuza, kyonkai talikukunda kwechuza busiyani. ²² Leba ninyija kumusheegesa, taliruga aha kishago, na bagendabe ninyija kubanaga omu biyengo kabarayanga kwechuza obusiyani obwo basiyaine n’omukazi ogwo. ²³ Abaanabe nabo ndabaita. Enteko zona ziramanya okwo n’inye mpenjuuza amagezi g’omuntu n’omutimagwe, mara inywena buli omoi ndamurongora kuhondera ebikorwabye. ²⁴ Kyonkai inywe abandi abali Tiatira, abatalikukunda bilikwegesibwa ebyo, abatalikumanya eby’abandi beta naama za Sitani, kambagambire, tindikwija kubatweka mugugu gundi, ²⁵ ekiliho mukwatire aho mbali muli, kuhika orwo ndaija. ²⁶ Omuntu arasinga endashana, akaguma akozire ebyo muragiire kulemwa kugoba aha ndekelero, ndamuhindura mutwazi w’amahanga, ²⁷ agatwaze enkoni y’ekyoma, agashekashekure nk’enyungu z’eibumba; agire obushobora nk’obwo nanye Tata yantungire. ²⁸ Ndashuba muhe n’enyanyinyi za bwankya karai. ²⁹ Ainai okutwi ahulire ebyo Mwoyo alikugambira enteko ezo.› »

¹ «Omumalaika omulinzi enteko ya Saridisi omuhandikire oti: ‹Olinya aina emyoyo mushanju ya Ruhanga n’enyanyinyi mushanju, nagamba ati: « ‹Ebigiro byawe nimbimanya. Oina eirainga ly’okuba murora kyonkai oli mufu. ² Ruga omu turo, ohamise eby’oraba osigaire nabyo kuba nabyo biraliire kufa, aha rw’enshonga omu mabona ga Ruhanga wange nashanga ebigiro byawe bitali bya bugorogoki. ³ Ijuka ebyo bakwegesize n’ebyo wahuliire. Obyekomye ebyo mara oyeshubeho. K’oraikara omu turo ndaija bundi mushuma, mara tomanye saa eyo ndakubundiraho. ⁴ Kyonkai omuli Saridisi okyainamu abantu bake abatakatokoize bijwaro byabo. Abo basaine kugenda nanye bajwete ebilikwera. ⁵ Alikasinga endashana alijwekwa mijwekerwe egi ey’ebijwaro bilikwera, n’eibaralye tindilifuta mu kitabo ky’oburora. Ndimwebuga omu mabona ga Tata, n’omu maisho g’abamalaikabe. ⁶ Aina okutwi ahulire ebyo Mwoyo alikugambira enteko ezo.› ⁷ «Omumalaika omulinzi w’enteko ya Filadelifia omuhandikire oti: ‹Omutakatifu, ow’amazima, aina orufunguruzo rwa Daudi, akingura omuntu atakinge, akinga omuntu atakingure, nagamba ati: ⁸ « ‹Ebigiro byawe nimbimanya. Olebe nakukingulira oruhigi orw’omuntu n’omoi atakukinga. Nimanya okwo obushobora oinai buke, wayekomya n’ekigambo kyange mara tiwanyetonga. ⁹ Leba ab’esinagogi ya Sitani abeyeta Bayahudi okwo batali Bayahudi kwo, nibabeiya, ndabasindika baije bakubandamire bakugwe omu maguru, bamanye okwo nakugondize. ¹⁰ Kuba oyegumisilize obutananukwa nk’okwo nakugambiire. Ndakwemera omu kaanya ak’enaku zirabunda ensi yona, kulenga abanyansi bamwo. ¹¹ Nkwatiliire kwija. Eby’oinabyo okwatire kimoi, hatabaho wa kukwaka rukinga rwawe. ¹² Alikasinga endashana ndimuhindura nyomyo omuli Rwensinga ya Ruhanga wange. Rwensinga egyo taligirugamu, ndimuhandikaho eibara lya Ruhanga wange, n’eibara ly’ekigo kya Ruhanga, Yerusalemu empya elikusongoka neruga ahali Ruhanga wange omw’iguru. Nshube muhandikeho n’eibara lyange. ¹³ Aina okutwi ahulire ebyo Mwoyo alikugambira enteko ezo.› ¹⁴ «Omumalaika omulinzi w’enteko ya Laodisea omuhandikire oti: ‹Amina, omwesigwa omujulizi nyakabara, entabuko y’ebyo Ruhanga yatonzire, nagamba ati: ¹⁵ « ‹Ebigiro byawe nimbimanya. Tiwahora, kandi okwo towayokya. Hakili kawakuhozire anga okokya! ¹⁶ Mbwenu orw’olikutagatiraho kushai, okwo tiwahora, okwo tiwayokya, kanyije nkutanake. ¹⁷ Enshonga nogamba okw’oli mutungi, okwo otungire okaganagana, otalikwetaga kantu, okaburwa kwemanya okw’oli mujune, mushashe, munaku, mpume, mara tojwete, ¹⁸ kankutegekere: Ongureho ezahabu ejugusirwe omuliro oije otunge, ongureho n’ebijwaro bilikwera ojware osheleke enjuro yawe, ogure n’omubazi gw’amaisho ohumuruguke. ¹⁹ Abo ngonza mbarwanisa mara mbatera. Ahonu ogire ekihika mara oyeshubeho. ²⁰ Oraleba, ndi aha ruhigi ninkomakoma. K’omuntu arampulira eiraka akakingura oruhigi, ndataaha omwa wenene tulye hamoi. ²¹ Alikasinga endashana ndimuha omwanya aha nketo yange, nk’okwo nasingire endashana nkashuntama na Tata aha nketoye. ²² Aina okutwi ahulire ebyo Mwoyo alikugambira enteko ezo.› »

¹ Ebi kabyahoire nabona oruhigi rukingukire omw’iguru. Mpulira eiraka lya mbere nk’ely’enzamba lingambira liti, «Temba kunu nkwoleke ebilikwija kuhonderaho.» ² Niho honkai Mwoyo ambanda, ntangara kubona enketo omw’iguru, mara haliho agibandaireho. ³ Wenene ogwo ayabaire abandaire aha nketo egyo akaba nashusha amabare g’eiguzi: Yasipi na akiki, kandi enketo yonene ekaba ezingoirwe omuhangazima nigushusha zumaridi. ⁴ Enketo egyo ekaba ezingoirwe enketo enketo ezindi 24, zibandairweho abagurusi 24, bambaire enyambarwa zilikwera, baina n’enkinga z’ezahabu aha mitwe. ⁵ Enketo egyo erugwaho endabyo, enkuba netera nesharuka, omu maisho g’enketo etara mushanju z’omuliro nizaka, nibo bamalaika mushanju ba Ruhanga. ⁶ Omu maisho g’enketo hakaba haliho oti enyanja y’ekyoo, neyengelera nk’eibare lya kirisitalo. Enketo yona ekaba ezingoirwe ebitondwa bina ebilikurora, biina amaisho gangi muno omu maisho n’enyuma. ⁷ Ekitondwa kya mbere eky’oburora kikaba nikishusha entare. Ekya kabili nikishusha enumi. Ekya kashatu aha maisho muntu. Ekya kanai kikaba nikishusha enkwaju elikuharara. ⁸ Ebitondwa binai ebyo ebilikurora, buli kimoi kiina amapapa mukaaga, kiina amaisho gangi muno obuzingora nangu n’omunda, kiro na mushana nibihoya obutalekera bikwese, «Omutakatifu, Omutakatifu, Omutakatifu, aba Mukama Ruhanga Rushoborabyona, ayakasingire, asingire, mara naija kwija!» ⁹ Buli orwo ebitondwa bilikurora ebyo bilikuha ekitinwa abandaire aha nketo, Nyakumeleera wenene, nibimukunisa n’okumusiima, ¹⁰ abagurusi 24 nilibandama omu mabonage nilifukamira Nyakumeleera ogwo. Nibakwata enkinga zabo nibaziteka omu maisho g’enketo nibahoya bati, ¹¹ «Mukama Ruhanga waitu, osaine kuhaba obushobora n’ekitinwa, mara bakukunise, kuba n’iwe watonzire byona, aha rw’okuba okenda byahangwa, byabaho.»

¹ Ngya mbona abandaire aha nketo omu mukonogwe gwa bulyo akwete ekitabo kihandikire omunda, kimaamirwe emihuri mushanju. ² Mbona omumalaika w’amani nagamba n’eiraka lihango ati, «Nohai asaine kukingura ekitabo eki, akahenda n’emihuri yakyo mushanju?» ³ Taliho n’omoi mw’iguru anga mu nsi anga kuzimu ayashoboire kukingura kitabo ekyo nangu n’okukilebamu kwonkai. ⁴ Inye aho ndira muno kubona hataliyo asaine kushurura kitabo ekyo nangu n’okukilebamu kwonkai. ⁵ Nirwo omugurusi omoi yangambire ati, «Oleke kulira. Leba entare ya Yuda, Mwijukuru wa Daudi asingire endashana, kityo nashobora kushurura ekitabo ekyo n’okuhenda emihuri yakyo mushanju.» ⁶ Omugati y’enketo n’ebitondwa binai eby’oburora n’omu bagurusi mbonamu Kataama ayemeleire, oti bamwisire, aina amahembe mushanju n’amaisho mushanju, nibo bamalaika mushanju ba Ruhanga abo atumire omu nsi yona. ⁷ Kataama ogwo agenda aihyaho ekitabo omu mukono gwa bulyo gw’ogwo abandaire aha nketo. ⁸ Kayabaire yatwete ekitabo ekyo, ebitondwa binai eby’oburora n’abagurusi 24 babandamira Kataama, buli omoi akwete enanga n’epakuli z’ezahabu zijwire obunuma, obunuma obwo nizo nshara z’abakirisito; ⁹ bahoya oruhoya ruhya bati, «N’iwe osaine kukwata ekitabo okakihenda emihuri, ahakuba bakakwita, kandi obwamba bwawe wabuchunguza abantu aba buli ruganda n’orulimi n’eihanga, wabagarura ahali Ruhanga; ¹⁰ wabahindura ngoma mara bakuhani ba Ruhanga waitu, omu nsi baralya engoma.» ¹¹ Kanagiire kuleba obuzingora bw’enketo, n’ebitondwa bilikurora n’abagurusi mpulira amaraka g’abamalaika bangi obutabarwa, enkumi n’enkumi, ¹² nibagamba n’eiraka lihango bati, «Kataama owo baisire, asaine kuhaba obushobora n’eitunga n’obumanyi n’amani, bamukunise, bamuhe ekitinwa, bamuhaisilize.» ¹³ Nshuba mpulira buli kitondwa omw’iguru n’omu nsi n’okuzimu n’omu nyanja n’ebikagilimu byona nibigamba biti, «Ogwo asingiire aha nketo na Kataama bahaisilizibwe, batinwe, bakunirwe, bagire n’obushobora eirai lyona!» ¹⁴ Ebitondwa ebinai ebilikurora bigamba biti, «Amina!» Abagurusi babandama ahansi, bamufukamira.

¹ Ahanyuma mbona Kataama, omu mihuri mushanju nabamburura gumoi, nshuba omu bitondwa binai ebilikurora mpulira kimoi nikigamba oti nkuba nesharuka kiti, «Ija!» ² Ndeeba, mbona efarasi elikwera, ayabaire agikuubire aina obuta, bamuha orukinga, ashuba atabara ali manzi erashana. ³ Kayabambwire omuhuri gwa kabili mpulira ekitondwa kya kabili ekilikurora nikigamba kiti, «Ija!» ⁴ Aturukwa efarasi endijo netukura neyengelera. Ayabaire agikuubire bamujubura kumara emilembe omu nsi, abantu baitangane; bamuha n’embanda mpango. ⁵ Kayabambwire omuhuri gwa kashatu, mpulira ekitondwa kya kashatu ekilikurora nikigamba kiti, «Ija!» Ndeeba, mbona efarasi elikwiragura, n’ayabaire agikuubire akwete omunzani. ⁶ Mpulira eiraka oti niliruga omu bitondwa binai ebilikurora niligamba liti, «Ekipimo ky’engano kigure edinari, kandi ebipimo bishatu nabyo bigure edinari, kyonkai amajuta n’edivai otabisera!» ⁷ Kayabambwire omuhuri gwa kanai, mpulira eiraka ly’ekitondwa kya kanai eky’oburora nikigamba kiti, «Ija!» ⁸ Kugya kuleba mbona efarasi ekilikurora, agikuubire eibara nibamweta «Rufu,» ahondeirweho «Kuzimu,» bona abo bahaabwa obushobora bw’okwita erobo y’ensi, kugiisa embanda, eifa, endwara n’ebikaaka by’omu nsi. ⁹ Abambura omuhuri gwa kataanu, mbona ahansi ya alutare emyoyo y’abaisirwe nibaturwa evangeli bakaba bajulizi bayo. ¹⁰ Bataka n’eiraka lihango bati, «Waitu Mukama Omutakatifu nyamutaiganwa rugamba mazima, abantu b’omu nsi abatwisire nobaramura maki kutweholera?» ¹¹ Aho bona buli omoi ahabwa ekanzu elikwera, babagambira kuba bakyaikizeho akandi, kuhika orw’orubara rw’abairu bataahi babo na barumuna babo ruragobelera, orwo baramara kwitwa nka bonene. ¹² Abambura omuhuri gwa mukaaga, kugya kuleba mbona okwo aliho omusisi gw’amani. Eizoba liiragura nk’orugunia, okwezi okwabaire kujwire kuhangamwire kushusha obwamba, ¹³ enyanyinyi aha iguru zikuntuka omu nsi okw’obona omuti gw’omutini guchunzirwe omuyaga gw’amani gukakunkumuka etini omu kirumo ky’embeho. ¹⁴ Eiguru lihwaho okw’obona nibazinga ekitabo, kandi amabanga gona na buli kizinga bisimbuka mbali byabaire bili. ¹⁵ Aho abakama b’ensi, abashaija enyanwanwa, abakuru b’eihe, abatungi, abanyamani, buli muntu, omwiru n’atali mwiru, bona bayesheleka omu mpako, n’omu mabare omu mabanga, ¹⁶ nibatakira amabanga n’amabare bati, «Mutugwere mutusheleke, Omukama asingiire aha nketo atatubona, Kataama atatunigalira; ¹⁷ kuba ekiro ky’amani nikyo kyalemwa kyagoba batwehoroza; ow’okwemera ekiro ekyo n’ohai?»

¹ Ebyo kabyahingwire, nikwo kubona abamalaika banai bemeleire aha ndekelero inai z’ensi, nibanyurura engeli inai z’omuyaga, omuyaga na gumoi gutaija gukahuta nsi anga nyanja anga gukasindika muti gwona gwona. ² Nshuba mbona omumalaika yayema oburugaizoba yatemba, akwete omuhuri gwa Ruhanga asingire, ayeta abamalaika abanai n’eiraka lihango, ababaire bahairwe obushobora bw’okwita ensi n’enyanja. ³ Abagambira ati, «Mutaita nsi anga nyanja anga miti, kuhika orwo turata emihuri aha buso bw’abairu ba Ruhanga waitu.» ⁴ Mpulira orubara rw’abatairweho emihuri, 144,000 omuli buli ruganda rw’Abaisiraeli. ⁵ Omu ruganda rwa Yuda abatairweho omuhuri bantu 12,000. Omu ruganda rwa Rubeni bantu 12,000. Omu ruganda rwa Gadi bantu 12,000. ⁶ Omu ruganda rwa Asheri bantu 12,000. Omu ruganda rwa Nafutali bantu 12,000. Omu ruganda rwa Manase bantu 12,000. ⁷ Omu ruganda rwa Simeoni bantu 12,000. Omu ruganda rwa Levi bantu 12,000. Omu ruganda rwa Isakari bantu 12,000. ⁸ Omu ruganda rwa Zebuluni bantu 12,000. Omu ruganda rwa Yozefu bantu 12,000; n’omu ruganda rwa Benjamini abatairweho omuhuri bantu 12,000. ⁹ Ahanyuma kugya kuleba mbona abantu embaga mpango ab’omuntu atakushoboire kubara, abantu aba buli ihanga, ab’enganda zona, abalikugamba endimi zona. Bakaba bemeleire omu mabona g’enketo n’omu mabona ga Kataama, bajwete ekanzu zilikwera, bakwete amatagi g’emikindo, ¹⁰ nibagamba n’eiraka lihango bati, «Ruhanga waitu asingiire aha nketo na Kataama, nibo baturokora!» ¹¹ Abamalaika bona bemelera bazingoire enketo, bazingora n’abagurusi n’ebitondwa binai ebilikurora, bajumara ahansi omu mabona g’enketo bafukamira Ruhanga, ¹² nibagamba bati, «Amina! Eirai lyona Ruhanga waitu asingizibwe, atinwe, bamanye okwo n’iwe aba mumanyi, asiimwe, bamukunise, bamanye okwo obushobora n’amani biba bya wenene! Amina.» ¹³ Aho omugurusi omoi ambaza ati, «Naho aba abajwete ekanzu zilikwera ni baahai? Isi baruga nkahai?» ¹⁴ Muhorora nti, «Rugaba rwange, n’iwe olikumanya.» Angambira ati, «Aba nibo barugire omu naku zingi; bogize ekanzu zabo omu bwamba bwa Kataama, bazeza katare. ¹⁵ Aha rw’ekyo bali omu mabona g’enketo ya Ruhanga nibamukolera kiro na mushana omuli Rwensingaye; kandi wenene ogwo asingire aha nketo naija kubasingira. ¹⁶ Tibalirumwa njara rundi, tibaligira iliho rundi; n’omushana tigulibokya anga kubagiza ichumbano lyona lyona. ¹⁷ Aha rw’okuba Kataama asingiire aha nketo n’iwe arabaga mushumba wabo, atega nabatwara aha nchuro z’amaizi g’oburora; kandi Ruhanga naija kubaragaza amalira gona omu maisho.»

¹ Orwo Kataama yakomoroire omuhuri gwa mushanju, omw’iguru bakesiza bona eibanga ly’enusu saa. ² Aho mbona abamalaika mushanju abaikara bemeleire omu mabona ga Ruhanga, bahaabwa enzamba mushanju. ³ Omumalaika ondijo aija ayemelera aha alutare akwete ekyotezo ky’ezahabu. Bamuha obunuma bungi obw’okurungisa enshara z’abakirisito bona eiguru ya altare y’ezahabu omu mabona g’enketo. ⁴ Omwika gw’obunuma gwimukirana n’enshara z’abakirisito nigwema omu kiganja ky’omumalaika ali omu mabona ga Ruhanga. ⁵ Aho omumalaika akwata ekyotezo akiijuza amakara g’omuliro ago yaihire alutare, amakara ago g’omuliro aganaga omu nsi. Eiguru lihinda, enkuba zisharuka, endabyo zirabya, habaho n’omusisi. ⁶ Abamalaika omushanju ababaire baina enzamba mushanju betekateka kutera enzamba ezo. ⁷ Omumalaika owa mbere atera enzamba eya mbere, aijwa orubare n’omuliro bikwatiraine n’obwamba, bigwa omu nsi. Etheluti emoi y’ensi ehya esosotoka. Etheluti yemiti nayo ehya esosotoka, n’obunyasi bubisi buhya busosotoka. ⁸ Omumalaika wa kabili nawe atera enzamba. Ekintu nikishusha eibanga lihango, nikyaka omuliro, kikuntuka omu nyanja. ⁹ Etheluti emoi y’enyanja ehinduka bwamba, n’etheluti y’ebitondwa bilikurora eby’omu nyanja efa, n’etheluti y’emeli esinjagulika. ¹⁰ Omumalaika wa kashatu atera enzambaye. Enyanyinyi mpango eruga omw’iguru ekuntuka. Emyakire oti rumuli, egwa omu theluthi y’emiiga n’enchuro z’amaizi. ¹¹ Enyanyinyi egyo eibara lyayo ni Bushalizi. Etheluti emoi y’ashalira, Abantu bangi baitwa amaizi ago, aha rw’okuba gakahinduka gashaalira. ¹² Omumalaika wa kanai atera enzambaye. Etheluti y’eizoba, n’ey’okwezi, n’ey’enyanyinyi bihutara, aho n’etheluti y’omushana (ogwabaire nigujwa) eba mwilima. Etheluti ya nyemishana elekera kwaka, kumoi n’etheluti y’ekiro. ¹³ Kugya kuleba mpulira enkwaju elikuharara eiguru eihiremu eiraka lihango eti, «Zabalya, zabalya, zabalya abantu abali omu nsi, orwo enzamba ezo abamalaika bashatu bakwatiliire kutera zirajuga!»

¹ Omumalaika wa katanu atera enzamba. Mbona okwo enyanyinyi yaruga omw’iguru ekagwa ahansi. Aho bamuha orufunguruzo rw’ekina ekitaina bugarukiro. ² Akingura ekiina ekyo ekitaina bugarukiro, kirugwamu omwika nk’ogw’ekyokezo kihango. Omwika gwarugire omu kiina ekyo gubunda eanga n’eizoba. ³ Kandi omu mwika harugwamu enzige, zija omu nsi, ziina amani nk’obumiina. ⁴ Enzige ezo tizajubwirwe kulya bunyasi, anga ekimera kyona kyona, anga omuti gwona gwona, shana zikajuburwa kulya abantu abashangirwe bataina mihuri ya Ruhanga aha buso. ⁵ Enzige ezo zijuburwa kubashasa muno omwanya gw’emyezi etanu. Zibashasa nk’obumiina kyonkai tizajubwirwe kubaita, shana okubatera embuli kushai. ⁶ Omu biro ebyo abantu barahiiga orufu kyonkai tibarubone. Barayegomba kufa, orufu rubairuke. ⁷ Enzige ezo emishusire yazo zikaba nizishusha efarasi ezitekatekeirwe endashana. Aha mitwe zikaba nizishusha oti ziinaho enkinga z’ezahabu. Aha maisho zikaba nizishusha abantu. ⁸ Obwoya bwazo oti ishoke ly’abakazi, amaino gazo oti maino g’entare. ⁹ Omu bifuba zikaba ziina engabo nk’ez’ekyoma, amapapa gazo okuhilira wakumanyire magali agali gangi agalikusikwa efarasi ziligisire zigiire omu ndashana. ¹⁰ Zikaba ziina emikira nk’ey’obumiina, zagira embuli, obushagwa bwazo obwo zahutaize abantu emyezi etanu bukaba buli omu mikira yazo. ¹¹ Omumalaika ayarugire omu kiina kitaina bugarukiro n’iwe yabaire ali mukama wazo. Omu Ruyahudi nayetwa Abadoni, kandi omu Rugiriki nayetwa Apolioni: Nikwo kugamba: Omusiliikya. ¹² Ekibonabonyio ekya mbere kyahingura. Ebindi bibili bikyahonderaho. ¹³ Aho omumalaika wa mukaaga atera enzamba. Mpulira eiraka niliruga aha mahembe agana aga alutare y’ezahabu omu mabona ga Ruhanga, ¹⁴ niligambira omumalaika ogu ayabaire aina enzamba liti, «Abamalaika abana ababohirwe aha Mwiga Guhango ogwa Efurati obataishure.» ¹⁵ Kityo abamalaika abanai bataishurwa. Abamalaika abo bakaba batekatekeirwe esaa, ekiro, omwezi n’omwaka mbali baraitira etheluti y’abantu. ¹⁶ Orubara rw’ab’efarasi bakaba bali 200,000,000. Orubara rwabo orwo nkaruhulira. ¹⁷ Egi niyo mibonere eyo naboine efarasi omu kubonekerwa kwange. Ab’efarasi omu bifuba bakaba bajwete engabo z’ekyoma ezilikushusha omuliro n’omurutu n’obuganga. Emitwe y’efarasi ekaba neshusha emitwe y’entare, omukanwa nizirugwamu omuliro, omwika n’obuganga. ¹⁸ Ebibundo ebi byonshatu bikaita etheluti y’abantu bona. Bakaitwa omuliro n’omwika n’obuganga ebyarugaga omu kanwa k’efarasi ezo. ¹⁹ Amani g’efarasi kanwa kazo n’emikira yazo. Emikira yazo emishusire njoka, mara emikira egyo eina emitwe, kandi emitwe egyo niyo zilikurumisa. ²⁰ Abantu abandi abahonokire aha bibundo ebi tibayechulize bishushani ebyo bakozire. Bagendelera kufukamira amasitani n’ebihuuku by’ezahabu, n’eby’efeza, n’eby’omulinga, n’eby’amabare, n’eby’ebiti ebitabona anga kuhulira anga kutambuka. ²¹ Nangu n’okwita okwo baitaga abantu, okuroga okwo barogaga, n’obusiyani n’obushuma, byona ebi taliho kyobayechulize.

¹ Nshuba mbona omumalaika ondijo omunyamani naruga omw’iguru, ayefubikire ekichwi, omuhangazima gumurabire aha mutwe, obusobwe nibushusha eizoba, kandi amaguru ga wenene nigashusha enyomyo z’omuliro. ² Akaba akwete akatabo kashurwire. Okugurukwe okwa bulyo akwemeleza aha nyanja, okwa bumosho akwemeleza aha rukaru. ³ Okw’obon’entare nesinda, ayeta n’eiraka lihango. Kayayesire zisharuka enkuba mushanju. ⁴ Enkuba ezo mushanju kazabaire zasharukire, nkaba naija kuhandika, aho mpulira eiraka lyemire omw’iguru niligamba liti, «Eby’enkuba mushanju zagamba obikomese omuhuri otabihandika.» ⁵ Omumalaika owo naboine ayemeleire aha nyanja n’aha rukaru aimukya omukonogwe gwa bulyo agwolekeize omw’iguru, ⁶ yarahira obuso bwa Ruhanga asingireho eirai lyona, ayatonzire eiguru n’ebikali omwo, ensi n’ebikali omwo, enyanja n’ebikali omwo, okwo hatabaho kukelererwa kushaagaho. ⁷ Orwo omumalaika wa mushanju aratera enzamba, nirwo Ruhanga aragobesheleza ekyebishokye, nk’okwo yagambiire abairube abarangi. ⁸ Aho eiraka elyo nabaire mpuliire niligamba lyemire omw’iguru lishuba lingambira liti, «Ogende okwate ekitabo ekishurwire omu ngaro z’omumalaika ayemeleire aha nyanja n’aha rukaru.» ⁹ Kityo ngenda ngoba omumalaika, mugambira kumpa akatabo ako. Omumalaika ogwo angambira ati, «Katware okalye, omu kanwa karakunulira nk’obwoki, kyonkai omu rubunda kakweme kubi.» ¹⁰ Omumalaika mwihya akatabo omu byara nkalya. Omu kanwa kanura bundi bwoki, kyonkai kanabaire nakaliire kanyema kubi omu rubunda. ¹¹ Aho ngambirwa kuranga ebiragwera amahanga gangi, abantu aba buli ngeli, n’abakagamba endimi ezitali zimoi n’abakama.

¹ Bakampa orubingo rwemire nk’enkoni y’okupimisa, bangambira bati, «Imuka, opime Rwensinga ya Ruhanga na alutare, omare obare n’abalikufukamira omuli Rwensinga egyo. ² Kyonkai nyarubuga ya Rwensinga otagipima; ogileke, ahakuba egyo bagihaire abanyamahanga, abalikwija kukandagilira Ekigo Kitakatifu emyezi 42. ³ Abajulizi bange bombili bajwete engunia, ninyija kubaha omulimo gw’oburangi bagukore ebiro 1,260.» ⁴ Abajulizi abo bombili niyo miti ebili y’emizeituni n’ebinaara bibili ebyemeleire omu mabona g’Omukama atwara ensi yona. ⁵ K’omuntu ayenda kubakora kubi, omuliro gujumbuka omu kanwa kabo, gurambaramba ababisha babo. K’omuntu alikwenda kubakora kubi, zamulya ziti! Yafa! ⁶ Bainai obushobora bw’okukinga eiguru, enjura ekabura kugwa omu biro ebyo baraba nibakora omulimo gw’oburangi. Baina n’obushobora okuhindura amaizi gakaba bwamba, n’ensi kugiteza buli kibundo emirundi nyingi okwo balikwenda. ⁷ Kabaramara kugamba ebyo batumirwe, ekikaaka kiruge omu kiina owa dondondo kibatabalire, kibasinge mara kibaite. ⁸ Emitumbi yabo eragangarama omu mbarabara y’ekigo kihango ekyo twakweta nitusindata tuti ni Sodoma na Misiri, mbali Omukama wabo yabambiirwe. ⁹ Abantu aba buli ngeli, enganda, abalikugamba endimi zitali zimoi, n’amahanga baramara ebiro bishatu n’enusu bashamaliire emitumbi yabo egyo mara bange kubaziika. ¹⁰ Abanyansi barayeshanda bashemelerwe, bagemulirangane, aha rw’okuba abarangi aba bombili bakabonesa abanyansi enaku. ¹¹ Kyonkai ebiro bishatu n’enusu kabyahoire Ruhanga yabatahyamu omwoyogwe ogw’oburora, bayemelera bwemelera, abantu abababoine bakwatwa obutini. ¹² Abajulizi abo abahimbuke bahulira eiraka lihango lyemire omw’iguru niligamba liti, «Mutembe mwije kunu!» Batemba omw’iguru ekichwi kibabunzire, ababisha babo babalebire. ¹³ Omu saa egyo habaho omusisi gw’amani, ekichweka kya ikumi ky’ekigo kikumba; abantu 7,000 baitwa omusisi ogwo, abasigaire batiina muno, baha Ruhanga w’omw’iguru ekitinwa. ¹⁴ Ekibonabonyio ekya kabili niky’eki kyahingura. Ekya kashatu kili haihi muno nikija. ¹⁵ Omumalaika wa mushanju atera enzamba. Amaraka gahango gahulirwa omw’iguru nigagamba gati, «Engoma y’ensi yaba ngoma y’Omukama waitu na Kirisito wa wenene, aliba Mukama eirai lyona.» ¹⁶ N’abagurusi 24 abasingiire aha nketo zabo omu mabona ga Ruhanga bajumara ahansi, bafukamira Ruhanga, ¹⁷ nibagamba bati, «Nitukusiima Mukama Ruhanga Rushoborabyona, iwe asingire mara ayakasingire, wakoza obushobora bwawe obungi waly’engoma. ¹⁸ Amahanga gagwerwa akabuta, aha rw’okuba wanigara muno, n’akanya niko ak’abafu kuramurwa, okarongora abairu bawe, abarangi n’abegesibwa, balinya abakutina, abake n’abahango. Kaanya k’okusilikya abatura nibasilikya ensi.» ¹⁹ Nirwo Rwensinga y’Omukama omw’iguru yakingukire, Esanduku y’Endagano ekazoka omuli Rwensinga egyo. Endabyo zirabya, amaraka gagamba, eiguru lilindima, habaho omusisi n’orubare.

¹ Akabonero k’okutangaza kaboneka omw’iguru. Omukazi akaba ayambaire eizoba, alibatiire okwezi, aha mutwe ainaiho orukinga rw’enyanyinyi ikumi na ibili. ² Akaba ainai enda, ataka narumwa kuzara, ebisha bimushagashagya. ³ Akabonero akandi kaboneka omw’iguru. Ekinyamugenge kihango katuku, eky’emitwe mushanju n’amahembe ikumi, kandi aha mitwe yakyo egyo kiinaho enkinga mushanju. ⁴ Omukira gwakyo gukukumba etheluti y’enyanyinyi z’aha iguru, kizikuntura omu nsi. Ekinyamugenge nkikyo kyemelera omu maisho g’omukazi ali haihi kuzara, k’aramara kuzara kilye omwana ogwo. ⁵ Omukazi azara omwana w’omwojo, ow’okutwaza amahanga goona enkoni y’ekyoma, kyonkai omwana bamushwaikura bamutwalira Ruhanga bashuba bamuteka aha nketoye. ⁶ Omukazi asingirwa omw’irungu, niho Ruhanga yashangirwe amutekatekeire omwanya, kuba niyo amara ebiro 1,260 nibamuliisa. ⁷ Aho endashana eimuka omw’iguru. Mikaili n’abamalaikabe barashanisa ekinyamugenge. Ekinyamugenge n’abamalaika bakyo lirashana, ⁸ kyonkai basingwa, baba batakiina bwikaro mw’iguru. ⁹ Ekinyamugenge runwanwa kikuntuka ahansi, niyo njoka elinya ey’obunyakarai, n’iwe Ibilisi mara Sitani, ayabeihire ensi akagimaraho, akakunturwa ahansi hamoi n’abamalaikabe. ¹⁰ Aho mpulira eiraka lyatangukire omw’iguru liti, «Mbwenu obushobora n’obukama bwa Ruhanga waitu byagobelera yaturokora, n’Enkorwamajuta ya wenene yaly’engoma: omubisha alega barumuna baitu bamukuntura ahansi, kiro na mushana abahangilira ahali Ruhanga waitu. ¹¹ Bamusingisa obwamba bwa Kataama, n’obujulizi obwo bagamba, orw’okuba bakeyanga bweyanga balemwa bafa. ¹² Ahonu iwe iguru shanduka nangu nainywe abalikaturamu! Kyonkasi zabalya, iwe nsi na nyanja, kuba Ibilisi yabasiliikira n’ekiniga kingi, enshonga nomanya okwo akaanyake kasigara kagufi!» ¹³ Orwo ekinyamugenge kyaboine okwo bakikuntura ahansi, kibinga omukazi ayamara kuzara omwana w’omwojo. ¹⁴ Kyonkai omukazi ogwo bamuha amapapa gombili g’enkwaju mpango aharare ailire harai omw’irungu asinge ekinyamugenge. Omw’irungu omwo abe nimwo amalira emyaka eshatu n’enusu nibamuliisa. ¹⁵ Ekinyamugenge kitanaka amaizi nk’engezi, kigamuhondeza kagamukukumba nk’omutunga. ¹⁶ Nawe ensi eyamba omukazi ogwo, eyashaamuka emira omwiga ogw’ekinyamugenge kyatanaka. ¹⁷ Aho ekinyamugenge kinigalira omukazi ogwo, kisibuka kugya kutabalira abaanabe abasigaire, nibo balinya abakwata emihango ya Ruhanga bakashuba bakebuga Kirisito. Kyayemelera aha mwaro gw’enyanja.

¹ Ngya mbona ekikaaka nikiburuguka omu maizi. Kikaba kiina amahembe 10 n’emitwe 7. Aha mahembe gakyo 10 kiinaho enkinga 10, kandi aha mitwe kiinaho amabara g’ebijumi by’okurogota ahali Ruhanga. ² Ekikaaka ekyo naboine ekyo kikaba nikishusha engoi, amaguru oti g’edubu, omunwa oti gw’entare. Ekinyamugenge kiha ekikaaka ekyo amani gakyo, n’obukama n’obushobora bungi. ³ Omutwe gwakyo ogumoi gukaba gwinaho obuhuta bubi muno, kyonkai obuhuta bwakyo obwo obubi muno bukakira. Ensi yona ekuratira ekikaaka ekyo netangara. ⁴ Abantu bafukamira ekinyamugenge. Obushobora bwakyo kikaba kibuhaire ekikaaka, aho bafukamira n’ekikaaka nibagamba bati, «Ow’okushusha ekikaaka n’ohai? Isi ow’okukirashanisa?» ⁵ Ekikaaka ekyo kyagira akanwa kabi, kyagamba ebigambo by’eituli, kyarogota, kyakoza n’obushobora bwakyo emyaka makumi 42. ⁶ Kyakomorora akanwa kyarogota ahali Ruhanga, kyarogota aha ibaralye na halinya mbali asingiire, n’ahali balinya abatura omw’iguru. ⁷ Kyahabwa n’obushango bw’okurashanisa abakirisito, mara kyabasinga. Kyagira obushobora ahali buli ruganda, abantu b’engeli zona, abakagamba buli rulimi, na buli ihanga. ⁸ Bona abakatura omu nsi balikifukamira. Kandi buli omoi ow’eibaralye kwema ensi etonzirwe litahandikirwe mu kitabo ky’abarora kya Kataama ogwo akaitwa. ⁹ Araba aina okutwi ahulire: ¹⁰ Kaishe muntu ow’okutwarwa endore aratwarwa endore. Aliisa embanda aliitwa embanda. Aha niho okwegumisiliza n’okwikiliza kw’abegesibwa kumanyikira. ¹¹ Ngya mbona ekikaaka ekindi nikijumbuka omw’itaka. Kikaba kiina amahembe gabili okw’obona akataama mara emigambire y’ekinyamugenge. ¹² Kyagya omu maisho g’ekikaaka ekya mbere kyakoza obushobora nk’obw’ekikaaka ekyo, kyaragira ensi n’abantu bwamwo kufukamira ekikaaka ekya mbere, ekyabaire kyakizire obuhuta obwabaire bwizire kukiita. ¹³ Kyayekoza ebishobeize: Kyaihya omuliro omw’iguru kyaguleta omu bantu. ¹⁴ Amahano ago kyajubwirwe kukolera omu maisho g’ekikaaka ekya mbere, kyagakora kubeiya abantu ab’omu nsi, kyabaragira kukora ekishushani eky’ekikaaka ekyabaire kihutaziibwe embanda kikashuba kikarora. ¹⁵ Kyajuburwa kuha ekishushani ky’ekikaaka ekya mbere omwoyo nakyo kikagamba, n’okwisa abarayanga kufukamira ekishushani ky’ekikaaka ekya mbere. ¹⁶ Kwakwo kyaragira abantu bona, abake n’abahango, abatungi n’abanaku, abatali bairu n’abairu kutebwaho obubonero aha kiganja kya bulyo anga aha buso, ¹⁷ omuntu ataija akagwa anga kuguza kintu ataina kabonero ako, nilyo ibara ly’ekikaaka ekyo anga enamba y’eibara lyakyo. ¹⁸ Aha, obumanyi nibwetagwaho: Omushobokerwa ashobokerwe enamba y’ekikaaka ekyo, ahakuba namba y’omuntu. Enamba y’ekikaaka ekyo ni 666.

¹ Ndeeba, mbona Kataama ayemeleire aha Ibanga lya Sioni. Akaba aina abantu 144,000 ababaire baina eibaralye n’elya Ishe gahandikire aha buso bwabo. ² Mpulira eiraka lyemire omw’iguru nk’akahiliro k’amaizi gangi n’okusharuka kw’enkuba y’amani. Eiraka lyonahuliire likaba nilishusha amaraka g’abatezi b’enanga nibatera enanga zabo, ³ nibahoya oruhoya ruhya omu mabona g’enketo n’omu maisho g’ebitondwa binai eby’oburora n’omu mabona g’abagurusi. Taliho n’omoi ayakushoboire kushobokerwa ruhoya orwo shana abantu 144,000 abashangirwe bachungwirwe omu nsi. ⁴ Nib’aba abatahagaziibwe bakazi, ahakuba bakagira obwera bw’omwoyo. Abo nibo bakuratira Kataama hona hona mbali agenda agiire. Aba bakachunguka omu bantu baba biraba bya mbere bya Ruhanga na Kataama. ⁵ Omu kanwa kabo tibagambire kishuba, kuba abo nzira kamogo. ⁶ Kandi mbona omumalaika ondijo naharara omurwerwerwe. Akaba ainai evangeli ey’eirai lyona naija kugirangira abanyansi, kugirangira buli ihanga, oruganda, abantu abakagamba endimi zitali zimoi n’abantu aba buli ngeli. ⁷ Agamba n’eiraka lihango ati, «Mutine Ruhanga, mumuhe ekitinwa, aha rw’enshonga akaanya kagoba yaija kubaramura. Ruhanga ayatonzire eiguru n’ensi, enyanja n’enchuro z’amaizi mumufukamire.» ⁸ Omumalaika ondijo owa kabili, ahonderaho nagamba ati, «Egwire, egwire Babiloni ekigo kihango ekyanyoisize amahanga edivai y’obusiyani bwakyo.» ⁹ Omumalaika ondijo owa kashatu, ahonderaho aha babili aba, aba mbere, ayatangwire eiraka ati, «K’omuntu wena wena arafukamira ekikaaka n’ekishushani kyakyo, akagiibwaho akabonero aha buso anga omu kiganja, ¹⁰ ogwo nawe aranywa edivai ya Ruhanga, edivai egyo nikyo kinigakye ekibi, eyo yafuka omu kikompe ky’ekinigakye etarungirwe, kandi omuntu ogwo arabona ekibonabonyio ky’omuliro n’obuganga omu maisho g’abamalaika n’omu mabona ga Kataama. ¹¹ Omwika gw’omuliro ogurabokya gwikara niguchunkera eirai lyona. Kiro na mushana tibalibona milembe aba abafukamira ekikaaka n’ekishushani kyakyo, na kaishe muntu wena aragiibwaho akabonero kakyo.» ¹² Aha niho obwegumisiliza bw’abegesibwa abekomya emihango ya Ruhanga mara bakaguma baikiliize Yesu bulimanyikira. ¹³ Mpulira eiraka lyemire omw’iguru niligamba liti, «Handika ekigambo eki: Baberwa abarafaga bali ba Mukama kwema mbwenu.» Mwoyo nagamba ati, «Baberwa kwo, babone kuhumura emilimo yabo ey’amani, aha kuba ebigiro byabo birabarugaga enyuma!» ¹⁴ Aho kugya kuleba mbona ekichwi kilikwera, kishuntamirweho alikushusha Omwana w’Omuntu, aina orukinga rw’ezahabu aha mutwe, kandi omu byara ainaimu oruhabyo rw’obwogi. ¹⁵ Omumalaika ondijo aruga Rwensinga, agambira ashuntamire aha kichwi n’eiraka lihango ati, «Kwata oruhabyo rwawe ogeshe, nobona esaa y’eigesha yagoba, kuba ensi yayeza, byayera byachwa einoga.» ¹⁶ Kityo ayabaire ashuntamire ekichwi ajugunya oruhabyorwe omu nsi, aho eigesha libaho. ¹⁷ Omumalaika ondijo nawe aruga Rwensinga y’omw’iguru, na wenene akaba ainai oruhabyo rw’obwogi. ¹⁸ Omumalaika ondijo aruga ahali alutare, n’iwe mumalaika aina obushobora bw’okugelera omuliro, ayeta ow’oruhabyo rw’obwogi n’eiraka lihango ati, «Kwata oruhabyo rwawe oshare engoobe z’ezabibu omu nsi, kuba ezabibu zayezire.» ¹⁹ Kityo omumalaika ajugunya oruhabyorwe omu nsi, achwa ezabibu aha mizabibu, azijugunya omw’ijungiro lihango ly’edivai mbali Ruhanga alikumanyisiza ekinigakye eky’amani. ²⁰ Eijungiro ly’edivai lilibatilirwa enjai y’ekigo, obwamba ekinyamugera buruga omw’ijungiro elyo, egera ekilomita 300, kandi omugera ogwo gukaba guli gw’emita nka ibili okuzimu.

¹ Ngya mbona akabonero akandi omw’iguru, kahango mara k’okutangaza. Abamalaika mushanju baina ebibundo mushanju eby’enzindo, ebyo nibyo birahwerwaho ekiniga ky’Omukama eky’amani. ² Mbona ekyazoka oti nyanja y’ekyoo etabangijainyie n’omuliro. Abantu ababaire basingiire ekikaaka n’ekishushani kyakyo n’enamba y’eibara lyakyo bemeleire aha rubaju rw’enyanja y’ekyoo baina enanga za Ruhanga omu mikono. ³ Bahoya oruhoya rwa Musa, omwiru wa Ruhanga, n’oruhoya rwa Kataama bati, «Waitu Mukama Ruhanga Rushoborabyona, ebikorwa byawe biba by’amani, nibitangaza! Emihango yawe y’obugorogoki kandi y’amazima, Nyakusinga Omukama w’amakiro gona! ⁴ Atakutina akakuha kitinwa n’ohai, Rugaba? Aha rw’okuba omutakatifu aba iwe. Amahanga goona, nigaija kwija gakufukamire, kuba emiramulire yawe y’emishango yamanyikiire.» ⁵ Ebyo kabyahoire ndeba omw’iguru mbona Rwensinga ekingukire einamu Eihema ly’Obusinge ly’Omukama. ⁶ Omuli Rwensinga egyo harugwamu abamalaika mushanju baina ebibundo mushanju, bajwete ekanzu za kitaani nungi nizengelera, bekomire enfufu z’ezahabu omu bifuba. ⁷ Omu bitondwa binai ebilikurora harugwamu kimoi kiha abamalaika mushanju epakuli z’ezahabu zijwire ekiniga kya Ruhanga asingire eirai lyona. ⁸ Ekitinwa kya Ruhanga n’obushoborabwe birugwamu omwika, gwijura Rwensinga. Taliho yashoboire kutaaha Rwensinga kuhika orwo ebibundo mushanju by’abamalaika mushanju byahoire.

¹ Mpulira eiraka lihango lyemire Rwensinga niligambira abamalaika mushanju liti, «Mugende musheshere ensi epakuli mushanju z’ekiniga kya Ruhanga.» ² Omumalaika owa mbere agenda asheshera ensi epakuliye. Abantu abashangirwe baina akabonero k’ekikaaka bakafukamira n’ekishushani kyakyo bakwatwa ebironda ebibi ebilikushenya. ³ Omumalaika wa kabili ashesha epakuliye omu nyanja. Enyanja eshusha obwamba bw’omufu, na buli kimoi ekyabaire kili omwo nikirora kifa. ⁴ Omumalaika wa kashatu ashesha epakuliye omu miiga n’omu nchuro z’amaizi, bihinduka bwamba. ⁵ Mpulira omumalaika w’amaizi nagamba ati, «Iwe omu kuramura emishango oba mugorogoki, iwe Omutakatifu Nyakusinga ayakasingire. ⁶ Abantu bakaita abegesibwa n’abarangi, mbwenu iwe obahaire obwamba bwabo kubunywa. Babunywe!» ⁷ Mpulira na alutare yataka eti, «Nikwo, Mukama Ruhanga Rushoborabyona, oramuza emishango amazima n’obuhikiilire!» ⁸ Omumalaika wa kanai ashesha epakuliye aha izoba. Eizoba lijuburwa kubabuza abantu omushana gwalyo. ⁹ Omushana ogulikwokya babubabu gubabuura abantu, abantu bakeena Ruhanga kuba akaba aina obushobora aha bibundo ebi, tibayechulize anga kumuha kitinwa. ¹⁰ Omumalaika wa kataanu ashesha epakuliye aha nketo y’ekikaaka. Obukama bw’ekikaaka bubambwa omwilima; abantu bayeruma endimi nibagangwa; ¹¹ obushasi bwabo n’ebironda bibarogosa ahali Ruhanga, tibayechulize bikorwa byabo. ¹² Omumalaika wa mukaaga ashesha epakuliye omu Mwiga gwa Efurati, amaizi gayo goma, kutekatekera abakama b’oburugaizoba omuhanda. ¹³ Mbona emyoyo eshatu ehagaire elikushusha ebikere, neruga omu kanwa k’ekinyamugenge, n’omu kanwa k’omurangi, w’ebishuba. ¹⁴ Yonene egi myoyo y’amasitani agakora amahano. Emyoyo egi yonshatu k’eturuka egya omu bakama batwara ensi yona kubahuruza hamoi kurashana endeshana aha kiro kihango kya Ruhanga Rushoborabyona. ¹⁵ («Iyo, ninyija nk’omushuma! Muberwa atanagiire, akwete ebijwarobye ataija akagenda atajwete akazoka ali bushai!») ¹⁶ Abakama abo bakabahuruliza mbali halikwetwa Arimagedoni omu Ruyahudi. ¹⁷ Omumalaika wa mushanju ebakuliye agishesha omu, rwerwerwe n’eiraka lihango liruga Rwensinga, aha nketo, niligamba liti, «Kyahwa!» ¹⁸ Habaho endabyo, eiguru lihinda, enkuba zisharuka, n’omusisi gw’amani ogwabaire gutakabonekaga kwema abantu baizire omu nsi, gukaba guli gw’amani muno. ¹⁹ Ekigo kikuru kibeganukamu ebichweka bishatu, omu mahanga ebigo bikambuka, kandi Ruhanga yaijuka ekigo kihango kya Babiloni, yakinyoisa ekikompe ky’ekinigakye ekibi muno, Babiloni yakinywa yakyomesa. ²⁰ Buli kizinga kyasingirwa muhanda, n’amabanga tigazokire. ²¹ Orubare rwaizirana n’ebibare, buli kibare ky’ekilo 50, biruga omw’iguru bitera abantu, abantu balemwa barogota ahali Ruhanga aha rw’enshonga y’ekibundo ky’orubare, ekibundo ekyo kikatinisa muno.

¹ Omu bamalaika mushanju ababaire baina ebakuli mushanju, omoi aija angambira ati, «Ija nkwoleke omumalaya rwituza ashuntamire aha mutunga gw’amaizi naramurwa. ² Ogu akaba ali mugenda w’abakama b’ensi, mara n’iwe abantu b’ensi batamiire edivai y’obusiyani bwa wenene.» ³ Anteka omuli Mwoyo antwara omw’irungu, mbonayo omukazi ashuntamire aha kikaaka katuku, kyona kishembirwe amabara g’ebijumi by’okurogota, mara kiina emitwe mushanju n’amahembe ikumi. ⁴ Omukazi ogwo akaba ajwete emyendo ya zambarau, n’elikutukura, ayemaliireho ezahabu, amabare g’eiguzi n’enkwanzi, ashutwire ekikompe ky’ezahabu kijwire amahano n’ebihagaro by’obusiyanibwe. ⁵ Aha buso ahandikirweho eibara ly’akabonero: «Babiloni rubamba, omumalaya rwituza mara entabuko y’amahano g’ensi.» ⁶ Mbona omukazi atamiire obwamba bw’abakirisito n’obwamba bw’abajulizi ba Yesu. Kanamuboine kimbera kitangaro ky’amani. ⁷ Kyonkai omumalaika ambaza ati, «Kiki kutangara? Kankugambire akabonero k’omukazi ogu, n’akabonero k’ekikaaka ky’emitwe mushanju n’amahembe ikumi ekilikumutwara. ⁸ Ekikaaka ekyo wabona kyabagaho, mbwenu tikikiliho, nikyenda kuruga omu kiina owa dondondo kigye kisilike. Kandi abanyansi abo amabara gabo gatakahandikwaga mu kitabo ky’abarora kwema ensi kutondwa, baratangara kubona ekikaaka ekyo, aha rw’okuba kyabagaho, kandi mbwenu tikikiliho, okwo nikyenda kwija. ⁹ Ekigambo eki nikyetaaga amagezi n’obumanyi: Emitwe mushanju nigo mabanga mushanju ag’omukazi ashuntamireho; ¹⁰ kandi nibo bakama mushanju, omuli abo abatanu bagwire, omoi akyaliho, kandi ondijo takaizire, mara orw’araija naija kwikaraho akaanya kake. ¹¹ Kandi ekikaaka ekyabagaho mbwenu tikikiliho, n’iwe mukama wa munaana kyonkai nabalirwa omu bakama omushanju, mara nawe naija kusilika. ¹² Amahembe ikumi ago wabona nibo bakama ikumi abatakaboine bushobora bwa butwazi, kyonkai nibaija kubona obushobora bw’abakama esaa emoi yonkai, hamoi n’ekikaaka ekyo. ¹³ Abakama aba emitekelereze yabo emoi. Amani gabo n’obushobora bwabo nibaija kubiha ekikaaka. ¹⁴ Nibaija kurashanisa Kataama, kyonkai Kataama arabasinga, kuba n’iwe aba Rugaba Nyamukuru, Omukama w’abakama; baliinya ab’ainaibo nibo bayesirwe, bakaronkwa bashuba baba besigwa.» ¹⁵ Omumalaika ashuba angambira ati, «Amaizi ago wabona omukazi ashuntamiremu, abo bantu ab’engeli zona, mbaga etali emoi, mahanga, bantu abakagamba kaishe rulimi. ¹⁶ Amahembe ikumi ago wabona, gonene hamoi n’ekikaaka nibija kunoba omumalaya. Nibija kumunagaho wenkai entondore, bishube bimulye, bimare bimusosotoze omuliro. ¹⁷ Ahakuba Ruhanga ataire ekitekelezo omu mitima yabyo kugobesheleza ekyo yagendeleire: Nikwo amahembe ago kwikilijanyia, n’obushobora bwago bw’obukama kubuha ekikaaka, ebyo Ruhanga yagambire bilemwe bigobelere. ¹⁸ Omukazi owo wabona nikyo kigo kikuru ekitwara abakama abatwara ensi.»

¹ Ebyo kabyahoire mbona omumalaika ondijo naruga omw’iguru aina obushobora bungi. Okwengelera kwa wenene kwayengeleza ensi. ² Atamu omuranga ati, «Yagwa, yagwa, Babiloni n’obuhango bwayo! Bwaba buturo bw’amasitani, bwikaro bwa buli mwoyo oguhagaire, bwikaro bwa buli kinyonyi ekibi ekihagaire. ³ Kuba amahanga ganywa ebihagaro by’obusiyanibwe, abakama b’ensi basiyaine nawe, abakama b’omu nsi batungiire aha itunga elyo aihire omu busiyanibwe.» ⁴ Nshuba mpulira eiraka elindi lyemire omw’iguru niligamba liti, «Inywe bantu bange, omumalaya ogwo mumurugemu, mutaija mukafakara nawe, mutaija mukagwerwa bibundo hamoi nawe; ⁵ amafuge gaaba ntuumo gakanga eiguru, mara Ruhanga yaijuka amafu g’omukazi ogwo. ⁶ Mumukore okwo yabakozire, mumubonabonyie kabili aha rw’ebigirobye; ekikompe ekyo yajwangainyie, mukimujwanganyize kabili. ⁷ Okwo yayetungunikire akejaaka, mube nikwo mumushasa akachura. Kuba omu mutima nagamba ati, ‹Ndi mukamakazi, nyeshuntamiire, tindi ntumbwakazi, inye tindichura n’akati.› ⁸ Nikwo ebibundo biramwizira omu kiro kimoi, endwara, enduru n’eifa, bashube bamuteho omuliro; Ruhanga aina obushobora, kuba ni Ruhanga alikumuramura.» ⁹ Kandi abakama b’ensi abasiyaine nawe bakajanguka nawe, baramuchulira bamutongye, kabaramubona nahya omwika niguchunka. ¹⁰ Obushasibwe nibwija kubatinisa, bemelere harai bagambe bati, «Ai bambi, ai bambi! Iwe kigo nyamuhango, iwe Babiloni ekigo ky’amani! Waramurwa omu saa emoi yonkai.» ¹¹ Abatunzi omu nsi nibamuchulira nibamutongya, orwo hatakiliyo n’omoi wa kugura byashara byabo, ¹² ebyashara by’ezahabu, efeza, amabare g’eiguzi n’enkwanzi, kitaani nungi, emyendo ya zambarau, n’esiliki elikutukura, efanicha za buli ngeli, ebintu ebikoziibwe emiino y’enjuju, ebintu byona eby’embaho z’eiguzi, omulinga, ekyoma na marimari, ¹³ omudarasini, ebirungo, obunuma, n’omugaju, eudi, edivai, amajuta g’okulya, ensano nungi n’engano, ente n’entaama, efarasi n’amagali, n’abairu, nibo bantu. ¹⁴ «Eby’omwoyo gwawe washuubiraga kubona byakuhwaho, ebintu byawe byona eby’enshonga n’oburungi bwawe tibikikuliho, tibilizoka rundi!» ¹⁵ Abatunzi b’ebintu ebi, ababaire batungiire omu kigo eki, barayemelera harai nibatiina obushasi bw’ekigo ekyo. Barachura batongye ensi eyatanguke, bati, ¹⁶ «Ai bambi, ai bambi, ekigo ekyo nyamuhango, ekyajwaraga kitaani nungi, n’emyendo ya zambarau na katuku, kyemaliireho ezahabu, amabare g’eiguzi n’enkwanzi! ¹⁷ Eitunga eli lyona lyasisikara omu saa emoi yonkai.» Bakama b’emeli bona, ababugi bazo n’abazisabaragamu na bona abakoraga ebyashara by’enyanja bakemelera harai ¹⁸ batera enduru orwo baboine Babiloni nehya nechunka omwika, bati, « Ni kigoki ekirashusire ekigo eki nyamuhango?» ¹⁹ Bayesiiga eitaka omu mitwe, bachura, batongya, batera n’enduru bati, «Ai bambi, ai bambi, ekigo Nyamukuru mbali bona abagiraga emeli omu nyanja batungisiibwe eitunga ly’omwo! Babiloni yahwaho omu saa emoi. ²⁰ Shemelerwa iwe iguru orwo Babiloni yasilika, shanduka inywe begesibwa, inywe ntumwa na inywe barangi, kuba Ruhanga yabehoroleza ekigo ekyo!» ²¹ Nirwo omumalaika omunyamani yashutwire eibare elilikwigana orubengo ruhango akalikuntura omu nyanja nagamba ati, «Nikwo Babiloni ekigo nyamuhango elikunturwa etyo ahansi n’amani, mara eliba etakiboneka lindi. ²² Amaraka g’abatezi b’enanga, n’abahoyi, n’abatezi b’emilere, n’abatezi b’amakondere, tigalihulirwa rundi muli iwe. N’omubuya w’akalimo kona kona k’obubuya, n’eiraka ly’orubengo omul’iwe tibilizokamu rundi. ²³ Etara telishuba kwaka rundi muli iwe. Eiraka lya kishwera n’omugore liliba likyahulirwamu maki? Abatunzi bawe omu nsi bakaba bali bashaija enyanwanwa, kandi eirogo lyawe likagobeza amahanga gona. ²⁴ Bona abakaisirwe omu nsi, n’abarangi n’abakirisito, bakaitwa Babiloni.»

¹ Ahanyuma mpulira ekyashusha oti iraka ly’embaga mpango omw’iguru niligamba liti, «Musingize Omukama Haleluya! Ekitinwa n’obushobora biba bya Ruhanga waitu, n’iwe aturokora. ² Eiramulye liba lirungi mara ly’amazima. Aramwire omumalaya rwituza; ayahemwize ensi obusiyani bwa wenene. Yamwehora aha rw’obwamba bw’abairube.» ³ Bagarukamu n’eiraka lihango bati, «Musingize Omukama! Omumalaya ogwo alichunkwa omwika eirai lyona.» ⁴ Abagurusi 40 n’ebitondwa binai ebilikurora bajumara ahansi bafukamira Ruhanga asingiire aha nketo nibagamba bati, «Amina. Haleluya!» ⁵ Eiraka lihango nalyo lyema aha nketo liti, «Musingize Ruhanga waitu, inywe bairube inywena abakamutina, omuke n’omuhango.» ⁶ Nshuba mpulira ekyashusha oti iraka ly’embaga mpango, oti kahiliro k’omutunga, gangi, oti iguru nilihinda n’amani, eiraka nilyatanguka liti, «Haleluya! Kuba Omukama Ruhanga waitu Rushoborabyona asingiire aha ngoma. ⁷ Tushemelerwe, tushanduke, tumusingize, kuba obugenyi bw’obushwere bwa Kataama bwahika, n’omugore yayetekatekire, ⁸ Omukama asingiire omugore, yamwambika kitaani nungi, elikwengelera mara etainaimu katokoro.» Kitani nungi nibyo bikorwa by’obugorogoki eby’abakirisito. ⁹ Kandi omumalaika angambira ati, «Handika ekigambo eki: Baberwa abaraliziibwe aha muraagiro gw’obugenyi bw’obushwere bwa Kataama.» Ashuba angambira ati, «Ebigambo bya Ruhanga ebi by’amazima.» ¹⁰ Aho mugwa omu maguru kumufukamira, kyonkai angambira ati, «Ebi otakubikora! Inye ndi mwiru mutahi wawe mara mutaahi wa barumuna bawe abakwete evangeli ya Kirisito. Ruhanga obe n’iwe ofukamira.» Kuba evangeli ya Kirisito niyo eshoboza abarangi kuranga. ¹¹ Nirwo naboine eiguru likingukire, nkabona efarasi elikwera. Ayabaire agishuntamireho akaba nayetwa Mwesigwa mara Omunyamazima, omu kuramura n’omu kurashana wenene aba mugorogoki. ¹² Amaisho nigashusha orulimi rw’omuliro, enkinga zitali zike zimuli aha mutwe; ainai eibara elimuhandikirweho ely’omuntu n’omoi atalikumanya shana wenene wenkai. ¹³ Ayambaire ekanzu eibikire omu bwamba, n’eibara nayetwa Kigambo wa Ruhanga. ¹⁴ Amahe g’omw’iguru, gajwete kitaani nungi, katare etainaimu katokoro, nigamuhondera gakuubire efarasi zilikwera. ¹⁵ Omu kanwa yarugwamu embanda ehyoirwe ey’okwisa amahanga, mara amahanga ago aragatwaza enkoni y’ekyoma. Kandi eijungiro ly’edivai elilimu ekiniga kibi kya Ruhanga Rushoborabyona naija kulilibatilira. ¹⁶ Aha kanzuye n’aha kiberokye ahandikirweho eibara eli: Omukama w’abakama, Rugaba Nyamukuru. ¹⁷ Nshuba mbona omumalaika ayemeleire omw’izoba, ayeta muno amahungu gona agalikuharara eiguru ati, «Mwije, muhurure, mwije aha muraagiro katangaza gwa Ruhanga, ¹⁸ mulye abakama, abakuru b’amahe, abaisherukare, efarasi n’abazikuubire, abantu bona: Omwiru n’atali mwiru, na muke na muhango.» ¹⁹ Mbona ekikaaka n’abakama b’ensi n’amahe gabo bahurwire kurashanisa ogwo asingiire aha farasi n’okurashanisa eihelye. ²⁰ Ekikaaka bakita omu ngaro, n’omurangi w’ebishuba abulimu ayakoraga eby’okutangaza omu maisho gakyo ebyo kyabeiyesaga ababaire bagiirweho akabonero kakyo n’abafukamiraga ekishushani kyakyo. Ekikaaka ekyo hamoi n’omurangi w’ebishuba akabanaga nibarora omu nyanja y’obuganga obulikwokya. ²¹ Abantu abandi bakaitwa embanda y’ogwo asingire aha farasi; niyo mbanda elikumuruga omu kanwa; amahungu gabalya gaiguta gaigusire.

¹ Ngya mbona omumalaika naruga omw’iguru akwete orufunguruzo rw’ekina kitaina bugarukiro n’omunyororo guhango. ² Akwata ekinyamugenge, niyo njoka eya karai, Ibilisi, Sitani, akiboha emyaka 1,000, ³ akijugunya omu kiina ekyo, akikingiranamu, mara ekiina akitaho omuhuri ekinyamugenge kitaija kikashuba kulemba mahanga rundi, kuhika emyaka 1,000 kuhwa. Aho nirwo kilibohororwaho akaanya kake. ⁴ Kandi mbona enketo z’abakama, zisingiirweho abantu ababaire batungirwe obushobora bw’okuramura emishango. Kwakwo nshuba mbona emyoyo y’abantu ababaire batemirweho emitwe aha rw’okwesiga Yesu n’ekigambo kya Ruhanga, ababaire batafukamiire kikaaka anga kishushani kyakyo, kandi batagiirweho kabonero kakyo mu buso anga mu biganja. Bahimbuka, balya engoma na Kirisito emyaka 1,000. ⁵ Abafiire abasigaire tibahimbukire kulemwa kugoba emyaka 1,000 kuhwa. ⁶ Muberwa mara mutakatifu alikuhimbuka omw’ihimbuka elya mbere! Nk’aba tibalifa rundi, ekiliho baliba bakuhani ba Ruhanga na Kirisito, balye nawe engoma emyaka 1,000. ⁷ Emyaka 1,000 k’elihwa, Sitani alitaishurwa aruge jela. ⁸ Alituruka kulemba amahanga aha pembe inai z’ensi, amahanga nigo Gogi na Magogi, babahurulize endashana. Orubara rwabo baliba nk’omushenye gw’omwaro gw’enyanja. ⁹ Bakahurura kuruga embaju zona z’ensi, bazingora orusisira rw’abegesibwa n’ekigo nyamurungi. Nawe omuliro gugya guhanantuka omw’iguru gubokya. ¹⁰ Ibilisi ayabaire abalembire anagwa omu nyanja y’omuliro n’obuganga mbali ekikaaka n’abarangi w’ebishuba bashangirwe bali, balishasha kiro na mushana eirai lyona. ¹¹ Ngya mbona enketo mpango katare n’ayabaire agibandaireho. Ensi n’eiguru bimwiruka, mara biburwa obugyo. ¹² Mbona abafu, abake n’abahango, bemeleire omu maisho g’enketo, n’ebitabo bishurwire. Kwakwo n’ekitabo ekindi, nikyo kitabo ky’oburora, nakyo kikaba kishurwirwe. Abafu baramurwa ebyabaire bihandikirwe omu bitabo ebyo, nibyo bikorwa byabo ebyo babaire bakozire. ¹³ Enyanja eshohoza abafu ababaire bagilimu, Rufu agirakwo na Kuzimu kutyo. Abafu ebyo babaire bakozire biba nibyo bibaramura. ¹⁴ Aho Rufu na Kuzimu bakunturwa omu nyanja y’omuliro. Enyanja y’omuliro nirwo rufu rwa kabili. ¹⁵ Omuntu ow’eibaralye litazokire mu kitabo kya burora akakunturwa omu nyanja y’omuliro.

¹ Aho mbona eiguru elihya n’ensi empya. Eiguru elya mbere likahwaho, n’ensi eya mbere kwakwo; n’enyanja ekaba etakizoka rundi. ² Mbona ekigo kitakatifu, Yerusalemu empya, neruga omw’iguru ahali Ruhanga, elengize nk’okw’obona omugore bamulengeize kishwera. ³ Mpulira eiraka lihango lyemire aha nketo niligamba liti, «Mulebe mbali Ruhanga asingiire nimwo abantu bali. Ruhanga alitura nabo, baliba bantube, kandi Ruhanga wenene alibasingira, ⁴ abaragaze amalira gona omu maisho, rufu achweke, talibaho rundi kuchura anga kulira anga kushasha, aha rw’okuba ebya karai biliba bihoireho.» ⁵ Ayabaire abandaire aha nketo agamba ati, «Olebe ebintu byona nabihindura bihya.» Ashuba agamba ati, «Handika eki: Ebigambo ebi by’amazima mara by’okwikilizibwa.» ⁶ Amara angambira ati, «Byahwa! N’inye Alufa na Omega, mbandizo mara ndekelero. Aragiraga eiliho ndamunyoisaga aha nchuro y’amaizi g’oburora obuzira kugura. ⁷ Alikasinga endashana alitungwa obusika obu, ndiba Ruhanga we na wenene aliba mwana wange. ⁸ Kyonka ebitini, abatali besigwa, abahagaire, abaisi b’abantu, ensiyani, abarogi, abafukamira ebihuuku, ab’ebishuba bona, erongoro yabo baligishanga omu nyanja y’obuganga bulikwaka, nirwo rufu rwa kabili.» ⁹ Aijwa omoi omu bamalaika mushanju abaina epakuli mushanju zijwire ebibundo mushanju eby’enzindo. Omumalaika ogwo angambira ati, «Ija nkwoleke omugore muka Kataama.» ¹⁰ Yanteka omuli Mwoyo yantwara aha ibanga lihango eliralirai, yanyoleka ekigo kitakatifu kya Yerusalemu nikiruga omw’iguru ahali Ruhanga. ¹¹ Ekigo ekyo nikyengelera nk’eibare ly’eiguzi elitazoka muno, elyo beta yasipi, nilimyansa nka kirisitalo, obushemere bwakyo nibutabuka ahali Ruhanga. ¹² Kikaba kiina eboma mpango, eli ndai, ebihigi 12, aha bihigi ebyo haliho abamalaika 12, bihandikirweho n’amabara g’enganda 12 za batabani ba Isiraeli. ¹³ Obugwaizoba haliyo ebihigi bishatu, bikara ebihigi bishatu, kasi ebihigi bishatu, n’obugwaizoba ebihigi bishatu. ¹⁴ Eboma y’ekigo ekyo ekaba eyemeleire aha misingi 12, emisingi egyo einaho amabara g’entumwa 12 za Kataama. ¹⁵ Omumalaika ayabaire nanfumolera akaba aina enkoni y’ezahabu ey’okupimisa, naija kupima ekigo n’ebihigi n’eboma z’ekigo. ¹⁶ Embaju inai z’ekigo zikaba ziganirane, oburai bwakyo nibwiganirana n’obukiika bwakyo. Ekigo omumalaika akakipimisa enkoniye. Oburai bwakyo bukaba buli bw’ekilomita 2,400 obukiika, n’obwemi kutyo. ¹⁷ Eboma yakyo nayo agipima. Yashanga eina emita 60 obwemi. Emipimire y’omuntu, niy’emoi n’ey’omumalaika. ¹⁸ Eboma ekaba eyombekesize amabare ga yasipi, ekigo kili ky’ezahabu enchenkure, nikimyansa nk’ekyoo. ¹⁹ Emisingi y’eboma y’ekigo kya Yerusalemu ekaba elengize n’engeli zona z’amabare g’eiguzi. Yasipi ya mbere, safiro ya kabili, kalukedoni ya kashatu, samaragido ya kanai, ²⁰ onikisi ya kataanu, sarudio ya mukaaga, kirisorito ya mushanju, beruro ya munaana, topazi ya mwendai, kirisopuraso ya ikumi, huwakinto ya ikumi n’emoi, ametisito ya ikumi na ibili. ²¹ Ebihigi ikumi na bibili n’elulu ikumi na ibili, buli kihigi kikoziibwe elulu emoi nyabumoi, embarabara z’ekigo zahabu enchenkure, n’erolekerana nk’ekyoo. ²² Omu kigo kya Yerusalemu Rwensinga tinaigiboinemu. Omukama Ruhanga Rushoborabyona na Kataama nibo Rwensinga y’ekigo ekyo. ²³ Ekigo kikaba kitalikwetaga kwakizibwa izoba anga kwezi, kuba ekitinwa kya Ruhanga nigwo mushana gwakyo, kandi etara yakyo ni Kataama. ²⁴ Amahanga garagenda nigaakizibwa omushana gw’ekigo kya Yerusalemu empya. Abakama b’ensi eitunga nimwo baraliletaga. ²⁵ Ebihigi byakyo taliho orwo bilikingwa mushana gujwire, kandi n’ekiro tikilimanyika omwo. ²⁶ Eitunga ly’amahanga n’ebishaagireho barabiletaga omu kigo ekyo. ²⁷ Kyonkai kyona kyona ekihagaire tikitaahega Yerusalemu empya, nangu n’abakora kubi bona n’ab’ebishuba, shana abahandikire omu kitabo ky’abarora ekya Kataama.

¹ Omumalaika yanyoleka omwiga gw’amaizi agagiza g’oburora, nigengelera nka kirisitalo, nigema aha nketo ya Ruhanga na Kataama nigagera, ² nigaraba omugati y’embarabara ya Yerusalemu empya. Orubaju oru n’oru rw’omwiga haliyo omuti gugiza oburora, nagwo gwina engeli 12 z’ebiraba, gwonene guraba buli mwezi. Amababi g’omuti ogwo g’okutambira amahanga. ³ Omuli Yerusalemu egyo empya talibamu muraamano wena wena, shana enketo ya Ruhanga na Kataama. Kandi abairube baramufukamiraga. ⁴ Balimubona okw’ashusha n’eibaralye lirabaikaraga aha buso bwabo. ⁵ Tililitobera rundi kuba kiro. Tibalyetaaga mushana anga tara anga izoba. Omukama Ruhanga n’iwe arabaga mushana gwabo, mara baliba bakama eirai lyona. ⁶ Omumalaika ogwo ashuba angambira ati, «Ebigambo ebi by’amazima mara by’okwikilizibwa. Omukama Ruhanga atunga abarangi Mwoyo, yatweka omumalaikawe kwoleka abairube ebili byokubaho bwangu. ⁷ Mara ndi haihi kwija.» Ni kilimugisha omuntu alikwekomya eby’ekitabo eki kilikubaasha. ⁸ Inye Yohana, n’inye nahulire ebigambo ebi mara nkabibona. Orwo nabihuliire mara nkabibona nagwa omu maguru g’omumalaika ayabinyolekire, namufukamira. ⁹ Nawe wenene yangambira ati, «Ebyo otabikora! Inye ndi mwiru mutaahi wawe mara mutaahi wa barumuna bawe abarangi, hamoi n’abalikwekomya eby’ekitabo eki kilikugamba. Ruhanga obe n’iwe ofukamira.» ¹⁰ Angambira ati, «Ebigambo eby’ekitabo eki kilikugamba otabikomesa muhuri, enshonga akaanya kaija kugoba. ¹¹ Akora kubi agendelere kukora kubi, omugorogoki agendelere kukora kurungi, kandi omutakatifu aikare ali mutakatifu. ¹² «Inye ndi haihi kwija, nyije n’erongoro yange, buli omoi murongore eby’araba yakozire. ¹³ Inye mba Alufa na Omega, mba wa mbere, mba wa nzindo, n’inye mbandizo mara ndekelero.» ¹⁴ Baberwa abalikwogya ebijwaro byabo bakasana kugoba aha muti gw’oburora, n’okuraba omu bihigi bakataaha omu kigo. ¹⁵ Enjai y’ekigo haliho embwa, abarogi, ensiyani, abaisi, abafukamira ebihuuku, na buli omoi agonza ebishuba akata nibyo agamba. ¹⁶ «Inye Yesu natweka omumalaika wange kukomeleza enteko ebigambo ebi. Mba muzi gwa Daudi mara mba mwanawe, enyanyinyi ya bwankya nyamutangara.» ¹⁷ Mwoyo na Mugore nibagamba bati, «Ija!» N’araaba nahulira agambe ati, «Ija!» Araaba aina eiliho wena aije. Alikwenda atware amaizi g’oburora obuzira kugura. ¹⁸ Nintatira buli omoi alikuhulira eby’ekitabo eki kilikubaasha. K’omuntu alayongeraho ebya wenene ahali ebi, ogwo Ruhanga aramwongeraho ebibundo ebilikwitoitorwa omu kitabo eki. ¹⁹ Kandi k’omuntu aligira ebyo yakonshora aha by’ekitabo eki kilikubasha, nawe ogwo Ruhanga alimwaka amatungwa g’omuti gw’oburora n’ekigo kitakatifu, agalikwitoitorwa omu kitabo eki. ²⁰ Omujulizi w’ebigambo ebi nagamba ati, «Mazima ndi haihi kwija.» Amina. Ija Mukama Yesu! ²¹ Abegesibwa inywena, nimbagondeza omugisha gw’Omukama Yesu. Amina