ABAFILIPI

ABAFILIPI

¹ Inye Paulo na Timotheo, abairu ba Yesu Kirisito, nituhandikira abegesibwa bona ba Filipi, okwo mujwangaine aha rwa Yesu Kirisito. Nituhandikira n’abaaskofu n’abadiakoni. ² Ruhanga Isheichwe n’Omukama Yesu Kirisito basinge babagilire ekisha, n’emilembe. ³ Buli orwo ndikubaijuka ninsiima Ruhanga wange. ⁴ Ebiro byona omu nshara zange nimbashabira inywena ninshemelerwa ⁵ nyijwire esiimi aha rwa inywe kuranga evangeli kwema aha kiro kya mbere kugoba mwaha. ⁶ Kandi nimanyira kimoi okwo Ruhanga ayatandikire omulimo gurungi ogu omuli inywe aligugobesheleza kiro ekyo Yesu Kirisito alija. ⁷ Kisaine mbebuge nti inywena, enshonga muntura aha mutima. Omugisha ogwo natungirwe, na inywe mukagutungwa, n’orwo ndi jela. Kandi n’orwo mbaire ndi mwegeleere ndwaniliire evangeli yakwata. ⁸ Okwo ndikubagilira orushusho inywena aha rw’engonzi za Yesu Kirisito, Ruhanga niwe mujulizi wange. ⁹ Kandi nimbashabira engonzi zanyu zeyongere muno, mumanye n’okushobokerwa kushaagaho, ¹⁰ mushobore kubona ebili birungi muno, kandi mube ntoronyonyo enzira kamogo, mwetekatekeire ekiro ekyo Kirisito aliija, ¹¹ Mushangwe mwijwire ebigiro by’obugorogoki ebilikutabuka ahali Yesu Kirisito, kubona kuha Ruhanga ekitinwa n’okumusingiza. ¹² Barumuna bange, ningonza kamushobokerwa okwo okufungwa kwange bubaire bushango bw’okurandisiliza evangeli. ¹³ Abaisherukare bona b’ekikaare kya Kaisari n’abasigaire bona bamanyiire okwo nfungirwe ninturwa Kirisito. ¹⁴ Kandi n’abakirisito abangi muno bagizire amani g’okwesiga Omukama aha rw’okufungwa kwange, kandi bamalize kushaagaho, nibagamba ebigambo bya Ruhanga batalikutina. ¹⁵ Ego, nikwo, abandi nibaranga ahali Kirisito basindikirwe okuchuba n’empaka, kyonkai abandi nibaihwa aha mutima gurungi. ¹⁶ Abalikwihwa aha mutima gurungi nibaranga ahali Kirisito basindikirwe engonzi, nibamanya okwo nagirwe jela aha rw’okurabira evangeli. ¹⁷ Abandi okuranga ahali Kirisito nibaihwa aha kungingiza, tikugir’oti nikibaruga aha mutima, shana nibagendelera kumbonesa enaku omu kifungo. ¹⁸ Mbwenu ekyo ti kantu! Inye nikinshemelera; ekikuru Kirisito kurangwa omu muhanda gwona gwona ogulikushoboka, omuntu alikagira mugendelero gurungi anga gubi. ¹⁹ Mazima, kandi ninyija kushemelerwa! Ahakuba nimanya okwo omu nshara zanyu n’omu bujuni bwa Mwoyo wa Yesu Kirisito, barantaishura. ²⁰ Nyina eshubi mpango okwo ntasingwe nkashonara. Nka mbali nkatulira ninyija kumanzara muno, inyena okwo nkali, ndikarora anga ndikafa, ninyija kuhaisa Kirisito ekitinwa. ²¹ Nobona inye Kirisito niwe aba burora bwange; kandi kandafa kurungi kushaagaho. ²² Kandaba nkyali w’okurora nikwo kugir’oti nkyainayo eikora ly’amani kyonkai ely’egoshoko. Kyonkai tinakugamba kyondaihyaho. ²³ Nkwatiirwe embaju zombili. Nakugondize nfe nture na Kirisito, mara ekyo nikyo kirungi kushaaga. ²⁴ Kyonkai n’okufa kw’omugasho bwoli aha bwanyu. ²⁵ Ekyo ninkimanyage okwo ndikwija kwikara kunu hamoi nainywe inywena, mubone kweyongera omu kwesiga, mugire n’ebyera, ²⁶ inye mbahe obushango bw’okwebuga Kirisito Yesu, aha rw’enshonga y’okubagobaho orundi. ²⁷ Ekikuru emirolere yanyu egire entambuka emoi n’evangeli ya Kirisito: Kityo ndikaija nkababona anga ndikaba ntaizire, mpulire okwo mugumire kandi mukomeire hamoi, kandi mwemire hamoi kurabira okwikiliza okwo tuhabwa evangeli, ²⁸ kandi okwo abalikubahakanisa batalikubatinisa aha kigambo kyona kyona. Aka kabonero akali aha mushana, okwo balisilika kyonkai inywe Ruhanga alibarokora. ²⁹ Nobona timwashobozibwe kwesiga Kirisito kushai, mukashoboziibwa n’okumushasira, ³⁰ nimurwana endashana nk’eyo mwaboine nindashana, mara na mwaha nimugimpuliraho.

¹ Oburora bwanyu bw’omujwangano na Kirisito nibubagumisa, n’engonzize nizibamaramara. Kandi inywe nywenene Mwoyo akabajwanganisa, mara leba nimugilirangana obufura n’embabazi. ² Kityonu mugume, mutekeleze kumoi, inywena mugonzangane, mujwangane omu mwoyo n’omu mutima, munshemeleze muno munonga. ³ Mutakukora kantu kona kona nimwihwa aha kweyenda anga aha ikuru. Ekiliho mugire obwetohya, abantu abandi mubabone kuba barungi kushaaga inywe. ⁴ Muleke kweyenda inywe nywenene nywenkai, shana mushemeleze n’abandi. ⁵ Mutekeleze okwo Yesu Kirisito yatekelezaga: ⁶ N’orwo wenene yabaire ali kumoi na Ruhanga, okwigana na Ruhanga tiyakwekwete. ⁷ Akeyanga ekitinwa, wenene n’omwiru baba kumoi; yazarwa nashusha abantu. ⁸ N’orwo yabaire muntu akaba mwetohya, yagira n’omuhuliro kugoba aha kufa. ⁹ Aha rw’ekyo Ruhanga akamukuza muno, yamutunga eibara elikira buli ibara; ¹⁰ k’eibara lya Yesu liragambwaga buli kitondwa omw’iguru n’omu nsi kiteke amajwi, ¹¹ kandi bona bebuge okwo Yesu Kirisito aba Mukama, babe nikwo baha batyo Ruhanga Isheichwe ekitinwa. ¹² Aha rw’ekyo bagonzibwa bange, nk’okwo mwakamupuliire na mbwenu mube nikwo mumpulira; ti rwo ndiho, n’orwo ndaba ntaliho, muteho amani mubone kurokoka, nimutina nimuchundwa. ¹³ Aha rw’okuba Ruhanga nakora omuli inywe, mushobore kwenda n’okukora eby’okumushemeleza. ¹⁴ Ebintu byona mubikore mutalikunonoba anga kuhakana, ¹⁵ nirwo murabona kuba nyakatetere mara enyamibwa, mushobore kuba bana ba Ruhanga enzira kamogo omu makiro aga agabi agashobeize. Omu makiro aga ago mulimu, inywe omu nsi nimwaka nk’etara, ¹⁶ mwekwete ekigambo ky’oburora, kityo orwo Kirisito alija mbone kweshanda kubona okwo amani gange gatafire bushai. ¹⁷ Nangu n’orwo obwamba bwange buraba kitambo bakabushesha aha kihongo n’ekitambo ky’okwikiliza kwanyu, inye ninshemelerwa mara ninyeshanda aha rwanyu inywena. ¹⁸ Kandi nainywe kutyo mushemelerwe mara mweshande hamoi nanye. ¹⁹ Omukama Yesu k’arayenda ninshubira kubatwekera Timotheo bwangu mbone kumanya okwo muli nshemelerwe. ²⁰ Tinyinayo muntu alikumushusha, ow’okubagilira ekihika kwokwokwo aha rw’obuge bwanyu. ²¹ Abandi bona nibakora ebyabo, tibalikukora bya Yesu Kirisito. ²² Kyonkai nimumanya okwo Timotheo asaine, kuba okw’obona omwana na ishe, nikwo twemire hamoi kukora eikora ly’evangeli. ²³ Kityo nyina eshubi kumubatwekera bwangu orwo ndamara kubona okwo ebyange biraba. ²⁴ Mara n’inyesiga Omukama okwo omu mwanya gugufi nanye ndabagobaho. ²⁵ Ntekeleize nabona nikigasha kubatwekera Epafurodito murumuna wange, omukozi mutahi wange mara omwisherukare mutahi wange, mara entumwa yanyu eyo mwatumire kumpwera. ²⁶ Enshonga atura nayegomba kubabona inywena; mara talige, kandi mubaire mwahuliire okwo arwaire. ²⁷ Mazimakwo abaire arwaire yaija kufa. Nawe Ruhanga amuganyiire, mara taganyiire wenene wenkai, akaganyira na inye, obujune butaija bukamberabwo. ²⁸ Kityo nindibaliibwa muno kumutweka, mwije mushemelerwe kushuba kumubona, kandi nanye ndeke kuhwahwana muno. ²⁹ Kityo mumutore n’amashemelerwa gangi nimusindikwa engonzi zanyu ahali Mukama; kandi abantu nk’abo mubahe ekitinwa, ³⁰ aha rw’okuba akiliire hake nazira omulimo gwa Kirisito, abase kunjuna geigeigei emijunire eyo inywe mutakunjunire.

¹ Eky’enzindo barumuna bange, mushemelerwe aha rw’omujwangano gwanyu n’Omukama. Okubahandikira ebigambo byonene byonene inye tikulikundemesa, kandi nainywe ekyo nikibagasira. ² Muramanya abantu babi abo embwa, abaikara bakaliliize okutahirirwa. ³ Ichwe n’ichwe tutahiriirwe kwokwokwo. Ichwe abafukamira Ruhanga twemire na Mwoyo, mara nitwebuga Yesu Kirisito, kandi ebikorwa by’aheru ebyo titubyesigire, ⁴ n’orwo inye kandi ndikushobora kubyesiga. K’omuntu araba nabona nashobora kwesiga eby’aheru, leronu inye ninshagaho: ⁵ bakantahiri aha kiro kya munana. Mba Mwisiraeli ow’oruganda rwa Benjamini, ndi Muyahudi n’akagere. Aha bikwete Amateka mba Mufarisayo, ⁶ kandi ekihika nagira kingi nagingiza enteko. Leronu okwo omuntu aragirwa kuba mugorogoki aha rw’enshonga y’okukwata Amateka, ahali ekyo nabaga nyakatetere. ⁷ Kyonkai ebyo nabonaga biina omugasho ahali inye, nkabihwamu aha rwa Yesu Kirisito. ⁸ Mazima buli kantu nkakahwamu aha rw’enshonga y’okumanya amagoba g’okumanya Yesu Kirisito Omukama wange. Ebintu byona nkabihwamu aha rwa wenene, nimbibona nk’omwejuno, Kirisito ashobore kuba niwe aba itunga lyange, ⁹ mara njwangane nawe, ti aha rwa bugorogoki obwange nyabwange obuzarukana omu Mateka, kyonkai obugorogoki obwo tubonesibwa okwesiga Kirisito. Obugorogoki obulikwema ahali Ruhanga butabuka aha kwesiga; ¹⁰ nyije mbone kumumanya n’okumanya amani g’okuhimbukakwe, nshashe nka wenene, nfe nka wenene, ¹¹ kakilikushoboka nshobore kuhimbuka omu bafu. ¹² Tikugir’oti ebi nabiboine anga nabaire mugorogoki. Nintaho amani kubona emperwa egyo, Yesu Kirisito akandonka naba wa wenene. ¹³ Barumuna bange, tindikugira nti emperwa egyo nagiboine. Ekintu kimoi kyonkai ekyo ndikukora, kwebwa ebyo nakozire, kandi nintaho amani kubona ebili omu maisho. ¹⁴ Ninyitanira omugendelero gwange, niyo mperwa ey’oruguru eyo Ruhanga yatweteire kujwangana na Yesu Kirisito. ¹⁵ Ichwe abalikuhiga obugorogoki tutekeleze emitekeleze nk’egi. Kandi kamuraba nimutekeleza kundi aha kintu kyona kyona, ekyo nakyo Ruhanga alikibashurulira. ¹⁶ Kyonkai amazima ago twaboine tube nigo tugumaho. ¹⁷ Barumuna bange, mwikare nimundondora. Mwekomye abalikwekomya obulebero obwo twabahaire. ¹⁸ Aha rw’okuba haliho bangi abo ndabagambiire emirundi nyingi, mara na mbwenu ninshuba nimbabagambira nindira, omu mirolere yabo nibashemelerwa okufa kwa Kirisito aha musaraba. ¹⁹ Nibaija kufa kubi, orubunda niwe ruhanga wabo, nibebuga ebigoko byabo, amagezi gabo bagataire aha bintu by’ensi. ²⁰ Kyonkai ichwe owaitu n’omw’iguru, ekyo nikyo kilikutuha okulindilira Omurokozi, Omukama Yesu Kirisito, ²¹ alikwija kuhindura omubili gwaitu ogujege kaguba nk’ogwa wenene ogw’ekitinwa, nakoza obushobora obumuhindura Mukama w’ebintu byona.

¹ Aha rw’ekyo barumuna bange, abagonzibwa bange, nimbagilira orushusho, byera byange mara rukinga rwange, mugume muti mujwangaine n’Omukama. ² Evodia na Sintike nimbatagiliza bashobokerwangane aha rw’Omukama. ³ Naiwe mutahi wange omwesigwa, ninkushaba ojune abakazi aba, aha rw’enshonga tukachwazikanira evangeli nibashobokerwangana, tuli hamoi na Kelemensi n’abakozi batahi bange abandi abo amabara gabo gahandikire omu kitabo ky’oburora. ⁴ Mushemelerwe obutosha mujwangaine na Mukama. ⁵ Obwegumisiliza bwanyu bumanyike omu bantu bona, Omukama yaija kwija. ⁶ Ekintu kyona kyona kitabalya mwoyo. Ekiliho omuli buli kantu mumanyise Ruhanga ebyetago byanyu nimushoma enshara, nimutaka mara nimusiima. ⁷ Emilembe ya Ruhanga eshaaga okushobokerwa kwona, elinde emitima yanyu n’ebitekelezo byanyu mwemire na Yesu Kirisito. ⁸ Eky’enzindo barumuna bange, kyona kyona ekiraba kili ky’amazima, kili ky’ekitinwa, kili omw’iteka, kitaina kamogo, kili kirungi, nikigonzibwa, ka haraba haliho ekirungi kyona kyona, ka haraba haliho ekisaine kusiimwa, ebi mube nibyo mutekeleza. ⁹ Ebyo mwanyegeireho, ebyo mwahairwe, ebyo mwampuliireho, n’ebyo mwamboineho mube nibyo mukora; mara aho Ruhanga w’emilembe arasingira omuli inywe. ¹⁰ Omu kujwangana kwange n’Omukama ninshemelerwa muno kubona okwo mwalemwa mukashuba mukanfaho, kyonkai mubaire mutaina bushango. ¹¹ Ekyo tindikukigambisibwa buburabulirwa; nobona nkega okusanirwa omu mibere yona yona eyo nakashangwa ndimu. ¹² Okugaywa ninkumanya, n’okugira bingi muno ninkumanya. Omuli buli kantu n’omu ngeli zona nkega akalyo k’okwiguta n’okurumwa enjara, kugira ebintu bingi n’okusigara bushai. ¹³ Ninshobora kukora buli kantu Kirisito anyemiremu, mara niwe antunga amani. ¹⁴ Kyonkai mukakora kunshasira omu naku zange. ¹⁵ Mara inywe Bafilipi nywenene nimumanya okwo orwo nabandize kubarangira evangeli, orwo narugire Masedonia, taliho nteeko yanfireho. Ndikagira kyonabona anga kuburabulirwa, shana inywe nywenkai n’inywe mwanjunire. ¹⁶ Nangu n’orwo ndi Tesalonika mukeyongera kuntwekera obujuni. ¹⁷ Tikugir’oti nimpiga kamumpa bintu; shana ninyitanira okubona nimugoshoka. ¹⁸ Emperwa ngiboine yona, tindikwetaga bishaagireho. Ebigemuro ebyo mutwekire Epafurodito nibimmara. Muntwekeire ekihongo ky’omugaju, ekitambo ekyo Ruhanga alikwenda mara ekilikumushemelera. ¹⁹ Kandi Ruhanga wange arabatunga buli kimoi ekyo mulikwetaga kuhondera obungi bw’eitungalye ely’ekitinwa mwemire na Yesu Kirisito. ²⁰ Ruhanga waitu mara Isheichwe ahabwe ekitinwa eirai n’eirai. Amina. ²¹ Mushure buli mukirisito omuli Yesu Kirisito. N’abegesibwa abo tuli hamoi nibabakeisa. ²² Abakirisito bona nibabakeisa, okukiraho ab’omutungo gwa Kaisari. ²³ Omukama waitu Yesu Kirisito aikare abagilire ekisha inywena.