ABAHEBURANIA

ABAHEBURANIA

¹ Omu makiro aga karai Ruhanga yagambiraga batatenkurw’ichwe omu kanwa k’abarangi, omu mihanda nyingi mara etali emoi. ² Kyonkai omu biro ebi ebya nyuma ichwe atugambiire omu kanwa k’Omwanawe, owo yataireho kuba musika w’ebintu byona, kandi n’ensi akagitonza wenene. ³ Wenene ogu aina ekitiinwa kimoi na Ruhanga, mara nawe ni Ruhanga kwo, ensi yona nagitwaza ekigambokye eky’obushobora. Kayamazire kugarulira abantu amafu gabo, yasingira aha mukono gwa bulyo gw’Omukama asingire omwiguru. ⁴ Mwana aina ekitiinwa kushaaga abamalaika, nk’okwo eibara lyoyaboine liina ekitiinwa kushaaga ely’abamalaika bonene. ⁵ Aha rw’okuba Ruhanga takagambiraga mumalaika n’omoi ati, «Iwe waba Mwana wange, kir’eki nakuzara.» Anga kugira mumalaika ati, «Inye ndabaga ishe, kandi wenene arabaga mwana wange.» ⁶ Kandi orwo Ruhanga yabaire natuma Omuzigaijogwe omu nsi, akagamba ati, «Abamalaika ba Ruhanga bona bamufukamire.» ⁷ Abamalaika abo akabagambira ati, «Ruhanga abamalaikabe abahindura muyaga, n’abairube abahindura ndimi z’omuliro.» ⁸ Kyonkai Omwana ogwo Ruhanga akamugambaho ati, «Enketo yawe, Ruhanga, y’eira lyona, n’enkoni yawe y’obukama engorogoki niyo nkoni y’engoma yawe. ⁹ Okagonza obugorogoki wanoba entambara; aha rw’ekyo Ruhanga, Ruhanga wawe akakukora amajuta, yakukora amajuta garungi kushaaga bataahi bawe.» ¹⁰ Yashuba yagamba ati, «Iwe Rugaba, aha mbandizo ensi ekatondwa iwe, n’eiguru kwakwo likatondwa iwe; ¹¹ eiguru n’ensi bilihwaho, kyonkai iwe olimelera; bilikura nk’omwendo, ¹² obizingazinge nk’ebebo, bilihinduka nk’ekijwaro. Kyonkai iwe tohinduka, n’amakiro gawe tigalihwaho.» ¹³ Ni mumalaikaki owo aragambiire ati, «Singira aha buhyo bwange, kulemwa kugoba orwo ababisha bawe ndibahindura katebe k’okuhumuzaho ebilenge byawe?» ¹⁴ Abamalaika aba bona baba myoyo kushai, mara bakozi ba Ruhanga, kandi Ruhanga wenene abatuma kujuna abali b’okurokoka.

¹ Nituragirwa kwekomya ebyo tuhuliire, tutaija tukabinagisibwa. ² K’ebyo abamalaika bagambire biraba bikaba bili by’amazima, kandi buli omoi ayakozire entambara anga atagizire muhuliro akabona ekibonabonyio ekimusaine, ³ ichwe ekibonabonyio twije tukihungeho tutai katuurabura kwetaho omuhanda gukuru nk’ogu ogw’okuturokora? Eki ayakigambire mbere ni Mukama wenene, kandi abamuhuliire batugambira okwo gali mazima. ⁴ Kandi Ruhanga nawe yaba mujulizi wabo, yakora ebitangazo n’eby’amani ebitali bimoi, yayongeraho n’amatungwa ga Mwoyo Mutakatifu ago atunga abantu nk’okwo ayenzire. ⁵ Ruhanga tiyashoboize bamalaika kutwara makiro agalija, ago tulikugamba. ⁶ Haliho mbali kilikugambwa kiti, «Omuntu yab’ohai iwe kumwijuka, anga omwana w’omuntu kintuki iwe kumufaho? ⁷ Okamutonda nakirwaho abamalaika, wamujweka orukinga rw’obukuru n’ekitiinwa. ⁸ Wamuhindura mutwazi wa buli kantu.» Kayamazire kumuhindura mutwazi wa buli kantu, taliho na kimoi eky’atatwete. Okwo bili ichwe titukaboine kwo omuntu atwara bintu byona. ⁹ Kyonkai Yesu ogwo nitumubona. Omu kaanya kake akabanza yakirwa abamalaika, yashuba yabona ekitiinwa aha rw’okushasha n’okufakwe, omu kisha kya Ruhanga abone kufelekelera buli omoi. ¹⁰ Kikaba kisaine ahali Ruhanga, atonda ebintu byona akashuba akabilinda, kuhindura Yesu muhikiilire kyonkai abanze arabe omu bushasi, abone kujuna abantu bangi kubona ekitiinwa nk’ekya wenene. ¹¹ Ahakuba Yesu Kirisito ahindura banu batakatifu, hamoi na bonene abahindura batakatifu, bona bagira ntabuko emoi. Niyo nshonga atalikugira nshoni kubeta barumuna, ¹² nagamba ati, «Ndakwebuga omuli barumuna bange, omu nteko nsingiize iwe.» ¹³ Yashuba ati, «Ndayesigaga Ruhanga.» Yashuba ati, «Leba ndi aha hamoi n’abaana abo Ruhanga yantungire.» ¹⁴ Kityo aha rw’okuba abaana bagira omubili n’obwamba, Yesu nawe kutyo akegira muntu yashushana nabo. Yesu wenene asinga rufu akagira atyo omu kufakwe abone kusinga Sitani, ¹⁵ ashobore kuchungura bona ababaire bali bairu oburora bwabo bwona aha rw’okutina rufu. ¹⁶ Kili aha mushana okwo ab’alikwitanira ti bamalaika, naitanira baijuukuru ba Aburahamu. ¹⁷ Aha rw’ekyo akaragirwa kushusha abarumuna omuli buli kantu, abone kuba mukozi wa Ruhanga ali Mukuhani Nyamukuru omuganyizi mara omwesigwa, kwatilira entambara z’abantu. ¹⁸ Kandi kaanya aka Yesu ogwo nashobora kujuna abalikulengesibwa ahakuba wenene akalengesibwa mara yashasha.

¹ Bakirisito barumuna bange, inywe abo nainywe Ruhanga yayesire! Mutekeleze Yesu, entumwa mara Omukuhani Nyamukuru owo twebuga. ² Akaba mwesigwa ahali Ruhanga ayamutumire, yaba munyamazima, nk’okwo Musa yabaire mwesigwa omuli Rwensinga ya Ruhanga. ³ Kyonkai kandi Yesu yasana kugira ekitiinwa kihango kushaaga Musa, nk’okwo omwombeki w’enju agira ekitiinwa kushaaga enju yonene. ⁴ (Buli nju egira agyombeka, kyonkai omwombeki wa buli kantu aba Ruhanga). ⁵ Musa akaba ali mwiru omuli Rwensinga ya Ruhanga yona, yashuba yagamba ebyabaire nibija kugambwa aha nyuma. ⁶ Kyonkai Kirisito yaba Mwana wa Ruhanga kandi mugelezi omwesigwa wa Rwensinga y’Omukama. Aho ichwe tuli Rwensinga ya wenene katuraguma n’obwesige nitwebuga eshubi yaitu. ⁷ Aha rw’ekyo nk’okwo Mwoyo Mutakatifu alikugamba ati, «Kir’eki kamurahulira eirakalye, ⁸ mutakugumangana mitima nka bashw’enkurw’inywe abashengire Ruhanga kiro kiliinya omw’irungu orwo bamulenga. ⁹ Omw’irungu bashw’enkurw’inywe bakandenga, n’orwo emyaka makumi ganai yona babaire baboine ebyo nabaire mbakoleire. ¹⁰ Omuzarwa gulinya gukantamisa, nanye nagamba nti, ‹Baliikara n’emitima mibi; kuba bangire kwekomya emihango yange.› ¹¹ Nkanigara narahira nti, ‹Ensi eyo nakubahaire bakahumuliramu tibaligitahamu.› » ¹² Muramanya barumuna bange, omuntu n’omoi omuli inywe atakugira mutima gubi ogutalikwesiga, akaija akaruga ahali Ruhanga asingire. ¹³ Orwo tukyagamba «Kir’eki» mute nimwemanganamu buli kiro, omuntu ataija akalembalembwa bufu akagumanganirayo. ¹⁴ Tuli hamoi na Kirisito katuraguma n’obwesige obwo twabandize nabwo kulemwa kugoba aha ndekelero. ¹⁵ Leba nk’okwo kyakagambirwe kiti, «Kir’eki kamurahulira eirakalye mutakugumangana mitima, nka bashw’enkurw’inywe abashengire Ruhanga.» ¹⁶ Ni baahai abo abahuliire bakashuba bakashenga? Ti balinya abo Musa yaihire Misri? ¹⁷ Isi emyaka 40 yona, abamutamisize ni baahai? Ti balinya abafakaire bakashuba bakagwa omw’irungu? ¹⁸ Isi ni baahai abo yarahiire okwo batakutaahire mu nsi eyo yabaire naija kubaha bakahumuliramu, kabatali abayangire kumuhulira? ¹⁹ Kityo nitubona okwo batashoboire kutaaha mu nsi egyo aha rw’enshonga y’okutesiga kwabo.

¹ Orwo Ruhanga akyatushuubiza okwo tulihumulira omuli wenene, twelinde omuntu n’omoi omuli inywe atalija akagwerwa mushango akalemwa kuhumulira omuli Ruhanga. ² Kuba evangeli eyo twarangiirwe niyo yonene yonene eyo barangiirwe. Kyonkai ebyo bahuliire tibyabagasire kantu, nobona bakabihulira kushai, tibabikiliize. ³ Tulibona obuhumuro obwo ichwe abaikiliize nk’okwo Ruhanga wenene yagambire ati, «Nkanigara narahira nti, ‹Tibalitaaha mu nsi eyo nakubahaire bakahumuliramu.› » Eki akakigamba n’orwo kwema orwo yatonzire ensi akaba agobesheleize byona. ⁴ Kuba aina mbali alikugambaho ekiro kya mushanju ati, «Aha kiro kya mushanju Ruhanga akosha emilimoye yona.» ⁵ Kandi na hanu aha nagamba ati, «Tibalitaaha mu nsi eyo nakubahaire bakahumuliramu.» ⁶ N’orwo bili bityo haliho abalitaaha omu nsi egyo bakahumura, n’orwo abarangiirwe evangeli bali ba mbere batagitahire aha rw’okutahulira kwabo. ⁷ Aha rw’ekyo Ruhanga aina ekiro ekyo yataireho, yakyeta «Kir’eki,» orwo aha nyuma yaizire akagamba omu kanwa ka Daudi, omu bigambo ebyajuliziibwe nk’ebi ati, «Kir’eki kamurahulira eirakalye, mutakugumangana mitima.» ⁸ Abantu abo kuba Yoshua yabahaire ensi egyo, ekiro ekindi Ruhanga tiyakukigambire. ⁹ Kityo n’abali ba Ruhanga bakyainayo Sabato y’ekyosi. ¹⁰ Aha rw’okuba kaishe muntu wena ataaha omu nsi ya Ruhanga akahumura, ayosha n’emilimo nk’okwo Ruhanga yayosire. ¹¹ Ahonu tutemu amani kutaaha omu buhumuliro obwo tukaikya, omuntu n’omoi atalija akagwerwa mushango aha rw’okutahulira nk’okwo. ¹² Kuba ekigambo kya Ruhanga kiina oburora n’amani, nikishara kushaaga embanda y’amogi gabili. Nikichumita nikigoba mbali omwoyo n’amagezi biteranira, mbali engingo ziteranira n’eminoita, kimanya eby’omutima gulikutekeleza n’ebyo gulikugendelera. ¹³ Ekitondwa ekyo Ruhanga atabona tikibayo. Byona nabibona geigeigei, kabutekire. Tulimwetondera obusigire. ¹⁴ Mbwenu orwo twagizire Omukuhani Nyamukuru ayagiire omw’iguru, n’iwe Yesu Omwana wa Ruhanga, tugume muno omu kwesiga kwaitu okwo twebuga. ¹⁵ Twina Omukuhani Nyamukuru alikutumanya obujege bwaitu, akalengesibwa omu ngeli zona nka ichwe, kyonkai tiyakozire bufu. ¹⁶ Tugiire nu obwesige, tugye aha nketo ya Ruhanga mbali ekisha kisingiire, tugende atuganyire, atugilire n’ekisha ky’okutujuna omu bwetage bwaitu.

¹ Buli mukuhani arondwa omu mbaga, mara bamutaho kuba mukozi wa Ruhanga ali mubaka w’abantu, kuhonga ebihongo n’ebitambo aha rw’enyatano y’amafu. ² Abatalikumanya n’abalikuhaba nashobora kubegumisiliza akabatwaza obufura, ahakuba na wenene mujege omu ngeli zingi. ³ Enshonga egyo naragirwa kutamba ebitambo kwatilira amafu aga wenene n’amafu ag’embaga. ⁴ Omuntu ow’okweha ekitinwa ekyo tabayo, manya Ruhanga n’iwe amweta nk’okwo yayesire Aroni. ⁵ Nikwo na Kirisito wenene atayehaire kitinwa kya Bukuhani Nyamukuru. Ruhanga n’iwe yamutaireho ayamugambiire ati, «Iwe waba Mwana wange, kir’eki nakuzara;» ⁶ nk’okwo ahandi alikugamba ati, «Oli mukuhani eira lyona, noigana na Melikisedeki.» ⁷ Orwo yabaire akyarora omu nsi, Yesu akashaba ahali Ruhanga namutakaho, nataaga, nalira, natakira Ruhanga ayakushoboire kumukiza ahali Rufu. Ruhanga akamuhulira, kuba Yesu ogwo yamukuniraga. ⁸ N’orwo yashangirwe ali Mwana, omu kushashakwe akegeramu omuhuliro. ⁹ Kayamazire kuba mugorogoki yaba ntabuko y’okurokoka okw’eira lyona ahali balinya abarakamuhuliraga. ¹⁰ Ruhanga akamuronka yaba Mukuhani Nyamukuru alikwigana na Melikisedeki. ¹¹ Ekigambo eki twina bingi eby’okukigambaho, kyonkai nikiguma kukishoborora, kuba timulikukunda kuhulira. ¹² N’orwo kaanya aka mwakuba mwabaire begesa, mukyayetaaga ow’okushuba kubanza bubanza kubegesa ekigambo kya Ruhanga. Amata nigo mulikwetaga; ekyakulya ekilikuguma ekyo chei. ¹³ Omuntu akyali w’okunywa amatai gonkai ogwo mwana, takamanyire kirungi na kibi. ¹⁴ Ekyakulya ekilikuguma kiba ky’abakuzire, nibo balikushobora kwahurana ebirungi n’ebibi.

¹ Aha rw’ekyo evangeli ya Kirisito katuleke kugyema aha mbandizo, twegese eby’obukuru. Tutashuba nyuma kwombeka misingi, nikwo kugir’oti kubegesa okwechuza amafu kwikiliza Ruhanga; ² kubegesa aha kubatiza, okutebwaho emikono, okuhimbuka kw’abafire, n’eiramu ely’eira lyona. ³ Kyonkai ebyo turabikora ka Ruhanga arajubura. ⁴ Ababaire bakyanuliirwe, barolizeho ebirungi by’eiguru, bajwangaine na Mwoyo Mutakatifu, nikiguma kushuba kubahindura bakechuza ⁵ kuba bakaba barolizeho obunuzi bw’ekigambo kya Ruhanga, n’amani g’obusinge obulija. ⁶ Abo kabakugwa bakaba bashengi omu dini, nikiguma kubahindura bakechuza, kuba nibashemelerwa okubamba Omwana wa Ruhanga n’okumugahisa omu bantu. ⁷ Ensi k’etaahwa enjura egwire emirundi nyingi, ekashuba ekameza emikubi y’omugasho ekagasha abalimire ensi egyo, ensi egyo Ruhanga aba agitungire omugisha. ⁸ Kyonkai eitaka kalileta amahwa n’amatojo liba litakiina mugasho, mara lisigara kake kukeenwa. Endekelero yalyo kwokibwa. ⁹ Bagonzibwa bange, n’orwo tulikugamba tutyo, twina eshubi nyingi okwo muli b’okurokoka. ¹⁰ Kuba Ruhanga omunyamazima nayekomya ebyo mwamukoleire, n’engonzi ezo mwamugondize aha rw’ebyo mwakoleire abakirisito omw’ibaralye, nk’okwo mukyakora na mwaha. ¹¹ Ichwe ekyo tulikwetaga muno ni buli omoi omuli inywe kugira ekihika kugoba aha nzindo, nirwo mulibona ebyo mulikushubira. ¹² Titulikwenda kamunafara, nitugonza mushushe abaikiliza bakashuba bakagira obwegumisiliza, ahanyuma bakabona ekyo Ruhanga yaragaine. ¹³ Orwo Ruhanga yaraganisize Aburahamu, akerahira wenene, aha rw’okutagira wa kwerahira alikumushaaga ¹⁴ ati, «Omu mazima ndikuha omugisha nkanyise n’oruzaro rwawe.» ¹⁵ Nikwo Aburahamu yayegumisiliize atyo obutananukwa akalemwa akatungwa ekyo yaraganisiibwe. ¹⁶ Nimumanya okwo abantu berahira abalikubashaaga, kandi empaka zabo zona zimarwa okurahira. ¹⁷ Kityo orwo Ruhanga yayenzire kwoleka bwoli abasika b’ebyo yaragaine, okwo entegekaye etahinduka, entegekaye egyo yagihamisa narahira, ¹⁸ ebintu bibili ebitahinduka, ebyo Ruhanga atashobora kubeiya, bibone kugumisa emitima yaitu geigeigei, ichwe abamuhungiireho tubone kuguma nitushubira ebyo twashubiziibwe. ¹⁹ Eshubi egi eyo twinayo niyo nanga y’omwoyo etetengya anga kuyuga. Niyo shubi eraba omu rutimbe ekataaha ahatakatifu ²⁰ mbali Yesu yatwebembeire orwo yamazire kuba Mukuhani Nyamukuru alikwigana Melikisedeki.

¹ Melikisedeki, omukama wa Salemu, omukuhani wa Ruhanga Rukirabyona, akatanganwa Aburahamu natabaruka omu ndashana asigire yaita abakama, yaha Aburahamu omugisha. ² Kandi Aburahamu wenene ahali buli kimoi kyona ekyo yabaire ainakyo yaihyaho ekichweka kya ikumi yakiha Melikisedeki. Melikisedeki n’iwe mukama wa mbere omugorogoki, nk’enshonga y’eibaralye, mara nashuba naba mukama wa Salemu, nikwo kugir’oti, «Mukama w’emilembe.» ³ Tagira ishe, tagira nyina, n’oruganda chei, talikumanyika akazarwa maki yafa maki. Melikisedeki mukuhani eira lyona, nashusha Omwana wa Ruhanga. ⁴ Mubone okwo aba muhango! Aburahamu akamuha ekichweka kya ikumi aha minyago. ⁵ Baijukuru ba Levi abagira omuruka gw’obukuhani, Amateka garagira abantu kubaha ekichweka kya ikumi, nikwo kugamba oti ekichweka kya ikumi ekyo nibakihabwa barumuna babo n’orwo na bonene bali baijukuru ba Aburahamu. ⁶ Kyonkai Melikisedeki atalikutabuka mu baijuukuru ba Aburahamu, leba Aburahamu akamuha ekichweka kya ikumi, kandi Melikisedeki wenene yaba n’iwe aha Aburahamu omugisha, Aburahamu ayabaire aina endagano. ⁷ Taliho kya kuhakanaho, nikimanyika okwo omugisha omuke aguhabwa omuhango. ⁸ Okwo bili mwaha, ekichweka kya ikumi nibakiha abantu abafa, kyonkai rulinya, nyamugira burora n’iwe yahairwe ekichweka kya ikumi. ⁹ Twakugira tuti Levi wenene owo balikuha ekichweka kya ikumi, na wenene rulinya ekichweka kya ikumi akakigira orwo kyagizirwe Aburahamu, ¹⁰ enshonga akashangwa naija kuzarwa Aburahamu orwo Melikisedeki yatangainwe Aburahamu ogwo. ¹¹ Obukuhani bw’Abalevita nibwo bwahinduraga abantu bagorogoki (kuba orwo obukuhani obwo bwabaire buliho nirwo abantu bahairwe Amateka.) Aho omukuhani alikwigana na Aroni kayakubaire ahikiliire hakubeleirehoki omukuhani alikwigana na Melikisedeki? ¹² Nobona obukuhani kabuhinduka n’Amateka gahinduka. ¹³ Owo tulikugambaho amakuru aga akaba ali wa ruganda rundi orutalikurugwamu mukuhani wa kutamba kitambo ahali altare. ¹⁴ Kili aha mushana okwo Omukama waitu yatabukire omu ruganda rwa Yuda, oruganda orwo Musa atagambireho orwo yagambiire aha bakuhani. ¹⁵ Eki nikigya aha mushana bwoli k’alikwija omukuhani nka Melikisedeki, ¹⁶ akaba mukuhani obuzira kukomwa Mateka, kuleba mbali alikutabuka, kuba wenene ogu w’oburora obw’eira lyona. ¹⁷ Enshoga najulirwa ati, «Oli mukuhani eira lyona, alikwigana na Melikisedeki.» ¹⁸ Omuhango ogwa karai nigurugaho aha rw’obujege bwagwo n’okutagira mugasho ¹⁹ (kuba Amateka tigahindura muntu kuba muhikiilire); aha rw’okuba eshubi enungi kushaaga ey’okututwara ahali Ruhanga twagiboine. ²⁰ Eshubi egyo tukagiragwa. ²¹ Eirai ababaga bakuhani tibagiraga kiragano. Kyonkai ogu Omukuhani Nyamukuru akaragwa ati, «Omukama akarahira, mara talihindura kigambokye, akagamba ati, ‹Iwe oli mukuhani eira lyona.› » ²² Kityo Yesu n’iwe kabonero nyakabara ak’endagano enungi kushaaga. ²³ Abakuhani aba karai bakaba bali bangi, ahakuba rufu yabainuraga aha rubimbi rwabo. ²⁴ Kyonkai Yesu obukuhanibwe naikara nabwo amakiro gona, orwo wenene ali nyakumelera. ²⁵ Aha rw’ekyo buli kaanya aina obushobora bw’okurokora abalikukunda k’abarokora bakamara bakaija ahali Ruhanga, kuba wenene asingireho ebiro byona kubatelera omushango. ²⁶ Kikaba kisainekwo ichwe kugira Omukuhani Nyamukuru nk’ogu, omutakatifu nyakatetere, enzira kamogo, enzira bufu, ow’ekitinwa kingi omw’iguru. ²⁷ Wenene ogu ti nka bakuhani bakuru ab’eira, kuragirwa kutamba bitambo buli kiro, ekya mbere kwatilira amafu age, kushuba akatilira amafu ag’embaga. Ekitambo akakitamba limoi lyonkai yamara orwo yayetambire wenene. ²⁸ Amateka gatekagaho Abakuhani Nyamukuru bali bajege; kyonkai ekiragano kya Ruhanga ekyarugire nyuma, Amateka gabaireho, kikataho Omwanawe ayahindwirwe mugorogoki eira lyona.

¹ Mbwenu ekyo tukagambire niky’eki: Twina Omukuhani Nyamukuru, Omukuhani asingiire aha mukono gwa bulyo gwa Ruhanga Omukama asingiire omw’iguru. ² N’iwe mukozi w’ahatakatifu, mukozi w’omw’ihema nyakabara, elitateirwe muntu, likaterwa Omukama. ³ Nobona buli Mukuhani Nyamukuru bamutaho kuhonga ebihongo n’okutamba ebitambo; kityo omukuhani ogu aragiirwe kugira ekihongo ekyo arahonga. ⁴ Ka Kirisito yakubaire hali omu nsi tiyakubaire mukuhani n’akati, enshonga aliho abakuhani abahonga ebihongo nibaragirwa Amateka. ⁵ Ebyo balikukora nibashubilira ebilikukorwa omw’iguru; kinyumanyumi ky’ebyo. Orwo Musa yaizire kutera eihema, Ruhanga n’iwe yamuragiire ati, «Oramanya okore buli kantu nk’okwo nakwolekire aha ibanga.» ⁶ Kyonkai okwo kili, Kirisito akabona omuruka ogulikushaaga ogwa karai oburungi, aha rw’enshonga endagano enungi kushaaga ekwete ahali wenene, esimbagilize aha biragano ebirungi kushaaga. ⁷ K’endagano eya mbere eraba ekaba etaina kamogo, eya kabili teina kugira kamogo. ⁸ Kyonkai Ruhanga akakwata eihangalye omushango, orwo yagambire ati, «Ebiro bilija, alikugamba Mukama, orwo ndikora endagano empya, ngikore n’oruganda rwa Isiraeli n’oruganda rwa Yuda; ⁹ etali ndagano nk’eyo nakozire na baish’enkurubo, kiro ekyo nabakwete nkabaihya omu nsi ya Misiri. Enshonga tibayekomize ndagano yange, nikyo nanye nabaihireho omutima, alikugamba Mukama. ¹⁰ Omukama nagamba ati, K’amakiro ago galiba gahingwire, egi niyo ndagano eyo ndikora n’oruganda rwa Isiraeli; ndibateka amateka gange omu magezi gabo, ngabahandike aha mitima, ndiba Ruhanga wabo, na bonene baliba ihanga lyange. ¹¹ Taliho muntu alyegesa mutahiwe, anga buli omoi kwegesa murumuna nagamba ati, ‹Omanye Omukama,› enshonga balimanya bona kwema aha muke bwoli kugoba aha muhango bwoli. ¹² Ndibagarulira entambara zabo, amafu gabo ndiba ntakigaijuka rundi.» ¹³ K’Omukama alikugamba endagano empya, aho eya mbere naba atakigilimu. Ekyakura kikahwa aha ishasha ekyo kiba kiraliire kuhwaho.

¹ Endagano eya karai ekaba eina entwaza z’okufukamira Ruhanga n’ez’ahatakatifu ez’omu nsi egi. ² Hakaba haliho Eihema elikozirwe ely’aheru. Omwo nimwo habaga ekinara ky’etara n’emeza y’Omukate gw’Obusinge. Elyo nilyo lyayetwaga «Mwanya Gutakatifu.» ³ Enyuma y’orutimbe rwa kabili niyo habaga Eihema elyayetwaga «Ahatakatifu Muno.» ⁴ Elyo lyagiragamu ealutare y’ezahabu ey’obunuuma n’Esanduku y’Endagano, yona esiigire ezahabu, omwo nimwo habaga epakuli eyabaire ebikirwemu manu, enkoni ya Aroni eyatuturaga n’embengo z’endagano. ⁵ Eiguru yalyo abakerubi b’ekitinwa, amapapa gabo gabunzire enketo y’obuganyizi. Ebi titwakubigamba tukabitoitora mbwenu aha. ⁶ Kabamazire kutebekanisa ebyo byona, abakuhani obutosha batahaga omw’Ihema ely’aheru kukora emiruka yabo y’obukuhani. ⁷ Kyonkai Eihema elya kabili elyo lyatahwagamu Omukuhani Nyamukuru, mara nawe limoi lyonkai omu mwaka, kandi yatahagamu aina obwamba bw’okweyatilira n’okwatilira entambara z’abantu. ⁸ Aho Mwoyo Mutakatifu yamanyisaga okwo omuhanda ogw’okutaaha ahatakatifu gwabaire gutakakingukire orwo Eihema ely’aheru lyabaire likyaliho. ⁹ (Eihema ly’aheru lyabaga kabonero k’amakiro aga ago tulimu). Omu ntwaza nk’ezi bahongaga ebihongo, batamba n’ebitambo, kyonkai omuntu ayashangwa nafukamira Ruhanga tibyamuhinduraga muhikiilire aha mutima. ¹⁰ Ebyo byayolekeraga aha nyakalya, n’eby’okunywa, n’okunaaba okw’engeli etali emoi; gabaga Mateka ag’obunyamubili kuhika orwo obukiro bwakugobire akaijwa ebihya. ¹¹ Kyonkai orwo Kirisito yaizire ali Mukuhani Nyamukuru ow’ebintu ebirungi ebyabaire nibishuubirwa kwija, akaletwa omw’Ihema elilikukira omu kitinwa n’obuhikiilire (elitakozirwe muntu, elitatonzirwe). ¹² Yataaha Ahatakatifu limoi lyonkai yamara, tiyatahiremu na bwamba bwa mbuzi anga bwa nyana: akatahamu n’obwamba obwe, yaba nikwo atuchungura atyo eirai lyona. ¹³ Kuba k’obwamba bw’empaya z’entaama n’obwamba bw’enumi, n’eijwi ly’enyana y’enkiraiziba biraba byashoboire kweza abahagaire, abashaimuliirwe obwamba obwo n’eijwi elyo, babone kurugwaho obuhagare aha mubili, ¹⁴ isi aho obwamba bwa Kirisito burashurwaki? Kirisito ayayetambiliire Ruhanga ekitambo enzira kamogo, omu mani ga Mwoyo ow’eirai lyona! Obwambabwe obwo nibwija kubeza emitima, bubaihye omu mafu, mukolere Ruhanga asingire. ¹⁵ Kityo Kirisito n’iwe mubaka w’endagano empya, kuba wenene akafa kurokora abantu omu ntambara ezo bafakaire omu ndagano eya mbere, abayesirwe kutungwa obusika obw’eirai lyona. ¹⁶ Kuba k’omurago guraba guliho, mukama wagwo naragirwa kushangwa yafire. ¹⁷ Omurago gugira amani orwo mukama wagwo aba yafire. Mukama w’omurago k’aba akyarora, omurago ogwo tigugira mani. ¹⁸ Kityo endagano eya mbere tiyakuhamire k’obwamba butaliho. ¹⁹ Kuba orwo Musa yagambiire abantu bona okwo balikuragirwa Amateka, akakwata obwamba bw’enyana n’empaya z’entaama, hamoi n’amaizi n’esufu katuku na hisopo, obwamba obwo n’amaizi ago yabishaimulira ekitabo ky’Amateka n’embaga yona, ²⁰ nagamba ati, «Obu nibwo bwamba bw’endagano eyo Ruhanga abahangiire.» ²¹ Omu migilire yonene Eihema n’ebikwato ebyakozibwaga omu michonchozo y’okufukamira Ruhanga, nabyo yabishaimulira obwamba obwo. ²² Twakugira tuti Amateka nigaragira buli kantu kushaimulirwa obwamba nirwo karayezibwa, kandi obuzira kwita kitambo omugaruliro gw’amafu tigukabaireho. ²³ Kityo kikaba kiragiirwe ebilikushusha eby’omw’iguru kuhasilirwa omu michonchozo egi, kandi eby’omw’iguru byonene ebyo bikaba bili by’okuhasilirwa ebitambo ebirungi kushaaga ebya karai. ²⁴ Kirisito tiyatahire hatakatifu ahakozirwe bantu, nikwo kugir’oti ahalikushusha ahatakatifu komo. Wenene akataaha omw’iguru lyonene lyonene, abone kutukuratira omu masinge ga Ruhanga. ²⁵ Kandi akaba atali wa kwikara nayetamba, nk’okwo Omukuhani Nyamukuru yatahaga ahatakatifu n’obwamba obutalibwe. ²⁶ Enshonga aho yakubaire ali w’okwikara nashasha kwema ensi kutondwa. Nawe okwo bili akagya yaija aha nzindo y’amakiro kwetamba ekitambo kuchwa obufu. ²⁷ Kandi okwo abantu bali b’okufa limoi mara bakaramurwa, ²⁸ nikwo na Kirisito yatambirwe ekitambo omurundi gumoi gwonkai, kwatilira entambara z’abantu bangi. Mara aligaruka omurundi gwa kabili, ti kwatilira mafu shana kurokora abamulindiliire.

¹ Amateka ga Musa gakaba gakaba gali kinyumanyumi ky’ebirungi ebilikwija, mara kandi tigalikwoleka kurungi myemere ya birungi ebyo. Ebitambo eby’Amateka galikuragira bitambwa orubelera omwaka aha gundi. Kyonkai Amateka ago abalikugakwata tigalikushobora kubahindura bahikilire. ² Kitali kityo ebitambo ebyo byakuba bitakalekeraga kutambwa? Abafukamiraga Ruhanga kabakuuba bahasiliirwe limoi likamara, bakubaire batakimanya bufu. ³ Kyonkai ebitambo ebi bitwijukya obufu omwaka aha gundi. ⁴ Nikiguma obwamba bw’enumi n’empaya kwiza amafu. ⁵ Aha rw’ekyo ka Kirisito yaizire omu nsi egi akagamba ati, «Tokendaga bitambo na bihongo, shana inye okantunga omubili. ⁶ Ebihongo by’okwokibwa n’ebihongo by’enyatano y’amafu, nabyo tobishemelerwa. ⁷ Nirwo nagambire nti, ‹Waitu Ruhanga, leba naizire kukora ekyo iwe olikwenda,› nk’okwo mpandikirweho omu mpapuro z’ekitabo.» ⁸ Obubere akagamba ati, «Ebitambo n’ebihongo, n’ebihongo by’okwokibwa n’ebihongo by’enyatano y’amafu tokabyendaga anga kubishemelerwa.» Ebi manya bitambwa aha rw’okuragirwa Amateka. ⁹ Yashuba yayongeraho ati, «Leba naizire kukora ekyo iwe olikwenda.» Ebitambo ebya karai akabichwa, yataho ekitambo ekihya. ¹⁰ Kirisito ayakozire ebyo Ruhanga alikwenda, omubiligwe gukatambwa ekitambo limoi lyonkai, n’iwe yatusingiire akatuhindura batakatifu. ¹¹ Kandi buli mukuhani naragirwa kwemelera omu mabona ga Ruhanga buli kiro natamba ebitambo byonene byonene ebitakwiza mafu n’akake. ¹² Kyonkai orwo Kirisito yatambire ekitambo kimoi kushai eky’amakiro gona kwatilira amafu, akasingira aha bulyo bwa Ruhanga, ¹³ yashuba yaikara alindiliire ababishabe kabahinduka katebeke k’okuhumuzaho ebilenge. ¹⁴ Orwo yatambire ekitambo kimoi kyonkai, ab’akuhindura bahikilire nirwo yabahindwire bagorogoki ebiro byona . ¹⁵ Byonene ebyo, Mwoyo Mutakatifu n’iwe mujulizi wabyo ahali ichwe; kuba kayamazire kugamba ati, ¹⁶ «Amakiro ago kagalihwa, ndikora nabo endagano egi: Omu mitima yabo nditekamu Amateka gange, ngahandike omu magezi gabo.» ¹⁷ Ruhanga nashuba nagamba ati, «Amafu gabo n’ebikorwa byabo ebibi tindibiijuka rundi.» ¹⁸ Ebi kabiragaruliirwe, taliho kitambo kyona kyona kya nyatano ya bufu. ¹⁹ Barumuna bange, nitwesiga obwamba bwa Yesu okwo bulitutahya ahatakatifu. ²⁰ Wenene akatutemera omuhanda oguhya, omuhanda gw’oburora, orwo yarabire omu rutimbe, nikwo kugir’oti orwo yayehindwire muntu. ²¹ Mara n’iwe Mukuhani Muhango omugeleezi wa Rwensinga ya Ruhanga. ²² Tumugobe n’omutima gulikwera n’obwesige nyantayuga, tutaina kabi kona kona mu mwoyo, n’emibili eyogire amaizi garungi. ²³ Tugume twebugire eshubi yaitu tutalikutengeeta, kuba Ruhanga ayatushubiize ebyo aba mwesigwa. ²⁴ Tumanyangane, tutekanganemu ekihika ky’okugonzangana n’okugira ebigiro birungi. ²⁵ Tutalekera kuterana nk’okwo abandi bamanyiire kuterana, shanasi tutekanganemu ekihika tugendelere kugira tutyo. Nimubona n’okwo ekiro ky’Omukama kili haihi. ²⁶ Katulikuba twamanyire amazima tukashuba tukafakaza ekyekundo, ekitambo ky’okwatilira amafu nikiba kitakiliho. ²⁷ Aho nitusigara tulindiliire eiramu elilikutinisa, n’omuliro gulikurabagira ogulikwija kwokya abashengi. ²⁸ Omuntu ayachwa Amateka ga Musa ogwo bamwita batamuganyiire orwo hamara kubaho obujulizi bw’abantu babili anga bashatu. ²⁹ Lero aho nimulenga muti omuntu alikwanga bwanga Omwana wa Ruhanga, akahagaza obwamba bw’endagano obwamurokoire, akajuma na Mwoyo omugizi w’ekisha, talibona kibonabonyio ekili kibi kushaaga? ³⁰ Ruhanga nitumumanya ayagambiire ati, «Okwehoora kuba kwange, n’inye ndyehoroza.» Yashuba ati, «Omukama aliramura eihangalye.» ³¹ Ihano elilikutinisa omuntu kuramurwa Ruhanga asingire. ³² Orwo Yesu yabakyanwire mwijuke ebiro bya mbere: mukashasha mwayemera ebiyengo; ³³ orundi babajumaga omu maisho g’embaga mara babakora kubi, orundi babashasa n’abandi ababonaga enaku nk’ezo. ³⁴ Aha rw’okuba mwagiliraga abafungwa ekisha, mushemelerwa kubona ebyanyu nibabibaaka rwamani, enshonga mukashangwa nimumanya okwo mwina eitunga elilikushagaho oburungi mara elitali lya kuhwaho. ³⁵ Aha rw’ekyo mugume n’obwesige, obwesige bugira emperwa mpango. ³⁶ Nimwetaga kugira obwegumisiliza, mwije mubone kukora ebyo Ruhanga alikwenda, nirwo mulitungwa ebyo yaturaganisize. ³⁷ «Akaanya akasigaireyo kagufi, kandi Ruhanga alikwija talikwija kukelererwa. ³⁸ Kyonkai omugorogoki wange okwesigakwe kulimugiza oburora; nawe k’alitina akashubanganayo aho tindimushemelerwa.» ³⁹ Nawe ichwe t’ichwe tutiina tukashubanganayo tukasiliika. Ichwe twina obwesige mara nituhyahyanira emyoyo yaitu.

¹ Okwesiga nikwo kumanya hatalimu kulengeshanyia aha byo tushuubira mara bitalikuboneka. ² Abantu ab’eira Ruhanga akabasiima aha rw’okugira okwesiga kw’engeli egi. ³ Okwikiliza nikwo kutuha okushobokerwa okwo ekigambo kya Ruhanga nikyo kyatonzire ensi egi, kityo ebilikuboneka bikaruga omu bintu ebitalikuboneka. ⁴ Omu kwesigakwe Abeli akatambira Ruhanga ekitambo ekirungi yashaga Kaini. Okwesigakwe nikwo kwamuhindwire okuboneka ali mugorogoki, na Ruhanga yakunda ebihongobye kumujulira obugorogoki obwo. Abeli akafa, kyonkai aha rw’okwesigakwe na mwaha akyagambwa. ⁵ Aha rw’okwesiga, Enoki akatwara Ruhanga omw’iguru ataija akafa. Tiyabonekire, kuba Ruhanga akamutwara. Kyonkai Ruhanga atakamutwete akabanza yamusiima, kuba akamushemeleza. ⁶ Obuzira kwikiliza tikilikushoboka kushemeleza Ruhanga. Omuntu kwija kugoba ahali Ruhanga naragirwa kubanza kwikiliza okwo Ruhanga ogwo asingireho mara arongora abamuhiga. ⁷ Ruhanga kayatatiire Noa, akamugambira ebilikwija kubaho, Noa aha rw’okwesigakwe akamuhulira yakora obwato kuhungya omutungogwe. Aha rw’okwesigakwe akoleka ensi okwo etagira kwesiga. Aho Ruhanga yahindura Noa mugorogoki, obugorogoki obwo obuzarukana omu kwesiga. Aho Ruhanga omugorogoki yahindura Noa mugorogoki. ⁸ Aburahamu akagira okwesiga, Ruhanga kayamwesire yamuhulira, yafurukira omu nsi eyo alitungwa obusika, mara yafuruka atalikumanya mbali alikugya. ⁹ Okwesigakwe okwo kwamwikaza omu nsi y’endagano ali mufuruki, omw’ihanga, yatura omu mahema na Isaka na Yakobo abasikabe b’endagano egyo. ¹⁰ Akaba alindiliire ekigo ekyombekire aha misingi, eyayombekirwe Ruhanga wenene. ¹¹ Sara nawe akagira okwesiga yatungwa obushobora bw’okutwara enda, n’orwo amakiro g’okutwaliraho enda gabaire gamulengire. Kyonkai akaba namanya okwo Ruhanga ayabaire amushubiize atyo yabaire ali mwesigwa. ¹² Aha rw’ekyo omuntu omoi, ayabaire nashusha afire, n’iwe yatabukirweho oruganda, abaijukuru bangi nk’enyanyinyi z’aha iguru, obutabarwa nk’omushenye gw’omwaro. ¹³ Aba bona bakagwa omu kwesiga, bafa batakatungirwe byo babaire baraganisiibwe, nibabibonera harai kushai, nibabyebuga, nibamanya kurungi okwo bonene omu nsi egi bali bahinguzi kushai mara bazahe. ¹⁴ Abantu abalikugamba migambire egi nibaba nibolekya okwo balikuhiga ensi ey’okuba yabo bakagituliramu kimoi. ¹⁵ Kabakutekeleize ensi eyo bafurukiiremu, bakuboine obushango bw’okugigarukamu. ¹⁶ Nawe okwo kili nibegomba ensi elikushagaho oburungi, nilyo iguru. Aha rw’ekyo ti kihemu ahali Ruhanga kwetwa ishebo, aha rw’okuba yabatekatekeire ekigo. ¹⁷ Aburahamu omu kwesigakwe Ruhanga akamulenga, yatamba Isaka ekitambo. Aburahamu ayabaire araganisiibwe akaikiliza kutamba omwanawe ekitambo, ¹⁸ owo Ruhanga yabaire agambireho ati, «Baijukuru bawe balyetelerwa ahali Isaka.» ¹⁹ Aburahamu ogu akabona okwo Ruhanga aina obushobora bw’okuhimbura abafire: Yamara yamuha obulebero bw’okuhimbuka, yamugarulira omwanawe. ²⁰ Isaka akagira okwesiga yaha Yakobo na Esau emigisha nashura ebili omu maisho. ²¹ Omu kwesigakwe Yakobo kayabaire nafa, yaha buli mutabani wa Yozefu omugisha. Yayehigika aha mutwe gw’enkoniye, yafukamira Omukama. ²² Omu kwesigakwe Yozefu kayabaire yaija kufa, akagamba okwo Abaisiraeli balifuruka Misiri, yabaragiilira n’okwo baramuziika. ²³ Aha rw’enshonga y’okwesiga Musa kayazairwe abazairebe bamusheleka emyezi eshatu, aha rw’okuba bakabona okwo omwana yabaire ali murungi, n’omuku gwa Farao tibagutiinire. ²⁴ Omu kwesigakwe Musa kayakuzire yayanga kwetwa mutabani wa muhara wa Farao, ²⁵ yabona hakili abone enaku n’eihanga lya Ruhanga kushaaga okushemelerwa amashemelerwa g’amafu agalikuhingura. ²⁶ Akabona okushasha aha rwa Kirisito lili itunga lihango kushaaga eitunga lyona lya Misiri, kuba omu maisho yashubiragayo erongoro. ²⁷ Okwesiga kukamwihya Misiri atatinire kiniga kya Farao; kuba akatekanira byona okw’obon’oti Ruhanga atalikuboneka namubona. ²⁸ Okwesigakwe kukamuha okwekomya Pasika n’okushaimura obwamba, Omusiliikya ayaisire emizigaijo ataija akasilikya mizigaijo ya Isiraeli. ²⁹ Okwesiga kukashoboza abantu kushabuka Enyanja Rutuku oti nibaraba aha nsi etaina maizi; kandi Abamisiri abagondize kurabamu bakamirwa enyanja. ³⁰ Aha rw’enshonga y’okwesiga enkuta za Yeriko zikakumba, ekigo kibunzirwe omubisha ebiro mushanju. ³¹ Okwesiga kukarokora Rahabu omumalaya, kutafa na bashengi, aha rw’enshonga y’okugilira abanyomozi ekisha. ³² Mbwenu ngambe kushagaha kugira ntai? Eizoba lyakumpwaho kanakugya kugamba aga Gideoni, Baraki, Samusoni, Yefuta, Daudi na Samweli n’abarangi. ³³ Omu kwesiga bakasinga engoma z’ensi, bakegesa abantu okukoza amazima, bakabona ebyaragainwe, basiza n’entare, ³⁴ babutamya omuliro ogulikurabagira, bahunga aha bwogi bw’embanda, obujege bwabo bwabarugiramu obumanzi bw’endashana, n’amahe g’abanyamahanga bagakinigya. ³⁵ Nangu n’abakazi bahimbulirwa ababo ababaire bafire. Abandi bakaterwa enkoni ez’okubaita, bayanga kuganyirwa, baije bashobore kuhimbuka bakabona oburora oburungi kushaagaho. ³⁶ Abantu abandi bakaterwa kubi, bajangurwa; nangu n’empingo zabagyaho, babanaga jela. ³⁷ Bakabateza amabaare, babagutuza emishumeno, bajwara emiguta y’entaama n’embuzi, baba banaku kwo, babona enaku ezibi babashasa, ³⁸ ensi yabanuga, babungira omu marungu n’omu mabanga, batura omu mpako n’omu bihokoima omw’itaka okuzimu. ³⁹ Aba bona n’orwo okwesiga kwabo kwababonesize obushongore, ebyo Ruhanga yaragaine tibabiboine. ⁴⁰ Kuba ichwe akashangwa yatutekatekeire ebirungi kushaagaho. Akagonza ichwe hamoi na bonene katunhindurwa bagorogoki omu kaanya kamoi.

¹ Na ichwe, abazingoirwe eihe lihango liti ly’abajulizi, tunage ebilikutusikilira byona, n’entambara ezatubaireho, tugume twiruke omwiruko ogwo turagirwe kwiruka, ² amaisho tugahangire Yesu omwebembezi waitu omu kwesiga kwaitu, n’iwe atuhindura bahikilire omu kwesiga kwaitu okwo. Yesu ogu akatekanira obushasi bw’omusaraba, bamugaya tiyabifaho, nawe aho ashuubiire ebyera eby’alikwija kubona. Mbwenu leba asingiire aha bulyo bw’enketo ya Ruhanga. ³ Mwijuke Yesu Kirisito ayatekaniire kuterwa atyo abafakare, mutaija mukayuga mukananukwa. ⁴ Omu kurashana n’obufu timukagobire aha kwitwa. ⁵ Manya inywe muba baana! Isi mwayebirwe ebigambo ebi ebilikubahana biti, «Mwana wange, eby’Omukama akutanga otabijajaaraho, kandi k’alikuha ekibonabonyio otalinanukwa. ⁶ Aha rw’okuba Omukama abonabonyia ow’agonza, kandi omwana enjanga n’iwe atera.» ⁷ Ebyo mubitekanire bibahane. Ebyo Ruhanga alikubagira nabibagira muli baanabe. Ni mwanaki owo ishe atahana? ⁸ Kamutahanirwe nka bandi bona nimuba mutali baana abazarwa, nimushusha abaana b’ebisisi. ⁹ Kandi omu nsi omu twagiraga batataichwe abatukaliraga, mara tushuba tubakunira. Mbwenu aho Isheichwe atuzara emyoyo tiragiirwe kumuhulira kushaagaho tukaba nirwo tubona oburora? ¹⁰ Mara bonene bakatukalira ebiro bike orwo babonaga nikiragirwa kuba kityo. Mbwenu Ruhanga wenene natukalira katugasirwa, tubone kujwangana nawe omu butakatifubwe. ¹¹ Omuntu orwo aba akyalerwa ashasha, tashemelerwa. Kyonkai abamanyire okukalirwa, okukalirwa okwo ahanyuma kubahindura bagorogoki mara kubarugiramu emilembe. ¹² Niyo nshonga, mugorore emiikono yanyu egyo elikworoba, n’amajwi agalikwinogelerwa. ¹³ Kandi, ebigere byanyu mubitemere emihanda eyemeleire, abalemaire batakusitara, bakire. ¹⁴ Mwitanire okugira emilembe n’abantu bona. Mushube mugire ekihika ky’okuba batakatifu; Omuntu aliba atabaire mutakatifu talibona Mukama. ¹⁵ Muramanya omuntu n’omoi ataburwa kugira kisha kya Ruhanga. «Omuzi ogulikushalira» gutaturura na gumoi, kwija kubatuntuza kandi kwisa banu bangi emize. ¹⁶ Kandi hatabaho musiyani, anga omuntu atalikwetaho dini nka Esau ayagulize obusikabwe bw’obuzigaijo aha rw’akakulya aka limoi. ¹⁷ Nimumanya okwo ahanyuma kayagondize kuhaba obusika bw’omugishagwe gw’omuzigaijo ishe akanga, kuba akashango k’okwechuza tiyakaaboine, n’orwo yagushabire nalira. ¹⁸ Inywe timwizire kuhiiga kyomwakukwata: Tugambe omuliro ogulikurabagira, anga omwilima, anga ekiire, anga enkomaizi, ¹⁹ okujuga kw’enzamba, anga ebigambo eby’abantu bahuliire bakegomba kutagambirwa bindi ebishaagireho. ²⁰ Ahakuba tibashoboire kwemera muku ogwagiireho guti, «Arakwataho eibanga eli, kilikaba kitunganwa, kiterwe amabaare.» ²¹ Mazima ebyakozirw’aho bikaba nibitinisa muno nangu na Musa yagamba ati, «Nyina obutini bungi, ninjugumba.» ²² Kyonkai inywe mugobire aha Ibanga lya Sioni mbali ekigo kya Ruhanga asingire kili, niyo Yerusalemu ey’omw’iguru. Mwagoba aha mahe g’akanyahwera ag’abamalaika obukumbititi. ²³ Mwagoba n’enteko y’omuzigaijo, ab’amabara gabo gahandikire omw’iguru. Mwagoba Ruhanga omuramuzi w’abantu bona, n’emyoyo y’abantu abafura abagobire omu buhikilire. ²⁴ Mwagoba Yesu omubaka w’Endagano Empya, n’obwamba obushaimwirwe obulikutushubiza ebirungi kushaaga obwamba obwa Abeli. ²⁵ Mwelinde, Yesu Kirisito alikugamba mutakwanga kumuhulira. Kabalinya abayangire kumuhulira nagamba ali omu nsi baraba baboine ekibonabonyio, lero ichwe turakira tutai katulikwanga kumuhulira nagamba ayemire omw’iguru! ²⁶ Eirakalye likatengeesa ensi; kyonkai kandi mbwenu arahiire ati, «Ninyija kushuba kutengeesa ensi elindi; kyonkai ti nsi yonkai, n’Eiguru libulimu.» ²⁷ Ekigambo eki «Elindi» nikimanyisa okwo ebitondwa ebiratengeesibwa bikahwaho. Kandi ebitalikutengeesibwa ebyo bibone kurama. ²⁸ Aha rw’ekyo tusiime aha rw’okutungwa engoma etali ya kutengeesibwa, mara tufukamire Ruhanga kurungi, tumutiine nitubomba, ²⁹ aha rw’okuba Ruhanga waitu aba muliro ogusosotora.

¹ Mugume mugonzangane mka abarumuna. ² Munyegeze abagenzi, kuba omu kugira batyo abandi baranyegeize abamalaika batabamanyire. ³ Mwijuke abafungwa okw’oshusha oti muli hamoi na bonene omuli jela. Orwo nainywe muli bantu mwijuke n’abalikwitwa kubi. ⁴ Obushwere inywena mubukunire, kandi abali omu bushwere batahagaza kitabo kyabo, kuba ensiyani Ruhanga aliziramura. ⁵ Omu burora bwanyu mutarujuukira mpiya, mumalirwe ebyo mwinabyo; kuba Omukama akagamba ati, «Tindibarugaho anga kubasigaho.» ⁶ Nikyo tulikugambira n’obwesige tukwese, «Omukama n’iwe aba mujuni wange, tinditina; omuntu yakunkoraki?» ⁷ Mwijuke abebembezi baanyu ababarangiire ekigambo kya Ruhanga. Murore okwo babolekeize, mubarondore omu kwesiga kwabo. ⁸ Yesu Kirisito owa nyeigoro n’iwe wenene wenene owa mbwenu, mara n’iwe w’eirai lyona. ⁹ Emyegeso emijaiijo eya buli ngeli etakuubahabisa. Ahakuba kintu ky’omugasho omutima kuramirwa ekisha kya Ruhanga. Abaliire ekyakulya tikyabagasire kantu. ¹⁰ Twina ealutare ey’abakozi b’omw’Ihema bataikilizibwa kulya bitambo ebigitambiirweho. ¹¹ Enshonga ebitunganwa eby’Omukuhani Nyamukuru atwara obwamba bwabyo ahatakatifu kuba kitambo ky’enyatano y’obufu, ebitunganwa ebyo babyokeza enjai y’orusisira. ¹² Nikwo na Yesu yashasire enjai ya Yerusalemu abone kuhindura abantu kababa batakatifu aha rw’obwambabwe. ¹³ Aha rw’ekyo tumuhondere enjai y’orusisira, twemere ebijumi ebyo yayemeire. ¹⁴ Kunu titwinayo Yerusalemu ey’eirai lyona. Yerusalemu elikwija kwija niyo tulikuhiiga. ¹⁵ Mbwenu tweme na Yesu tutambire Ruhanga ekitambo ky’okumusingiza, nikyo kitambo ekilikugirwa abantu abalikumwebuga okwo n’iwe aba Mukama. ¹⁶ Muteho amani kukora kurungi n’okujunisangana ebyo mwinabyo, aha kuba ebi nibyo bitambo ebishemelera Ruhanga. ¹⁷ Mugire omuhuliro aha batwazi banyu, mumanye okwo muli omu mani gabo; nobona nibo bashumba b’emyoyo yanyu, kuba nibamanya okwo baliragirwa kwetonda obusigire aha rw’enshonga yanyu. Omulimo gwabo ogu bagukore n’amashemelerwa; eby’okujunara babileke, kuba ekyo nainywe tikyakubagasira kantu. ¹⁸ Naichwe mutushabire. Titwina kyotulikweligomwa aha mutima, shana ekyo tulikwitanira ni buli kantu kukakora kurungi. ¹⁹ Nimbatagiliza muno muteho amani gangi kutushabira, nirwo ndabona obushango bw’okugaruka okwo bwangu. ²⁰ Mbwenu Ruhanga w’emilembe, ayasingire akahimbura Yesu omu bafu, Yesu omushumba mukuru w’entaama, aha rw’obwamba bw’endagano ey’eirai lyona, ²¹ abatunge ebirungo byona, mubone kukora ebyo alikwenda, abakoze ebilikumushemelera mujwangaine na Yesu Kirisito. Yesu Kirisito ogu ahabwe ekitinwa eirai lyona. Amina. ²² Barumuna bange nimbatagiliza, ekigambo kyange ekyo nabagambira kubatamu ekihika mukikwate, nobona nabahandikira ningutura. ²³ Nimbamanyisa okwo murumuna waitu Timotheo bamutaishwire omu kifungo. K’arayanguha ndaija nawe okwo tubabone. ²⁴ Mutukeisheze abatwazi banyu bona n’abakirisito bona. Barumuna baitu aba Italia nibabakeisa. ²⁵ Ekisha kya Ruhanga abagilire ekisha inywena. Amina.