ABAEFESO

ABAEFESO

¹ Inye Paulo, entumwa ya Yesu Kirisito aha rw’okwenda kwa Ruhanga: Nimbahandikira inywe bakirisito ba Efeso mara abesigwa abajwangaine na Yesu Kirisito. ² Ruhanga Isheichwe n’Omukama waitu Yesu Kirisito babatunge omugisha n’emilembe. ³ Ahaisilizibwe Ruhanga mara Ishe Omukama waitu Yesu Kirisito, ayatungire emyoyo yaitu kaishe mugisha ogw’omw’iguru, aha rw’okujwangana kwaitu na Kirisito. ⁴ Ensi etakatonzirwe, Ruhanga akashangwa yaturonkire katujwangana na Kirisito tukaba batakatifu enzira katalizi omu maishoge. ⁵ Aha rw’engonzize, Ruhanga akaturonka katuba banabe omu kujwangana na Yesu Kirisito, nk’okwo yayenzire omu bweyendezibwe, ⁶ ekishakye eky’ekitinwa ekyo yatugiliire kisingizibwe omu mani g’Omwanawe omugonzibwa. ⁷ Yesu Kirisito akatuchunguza obwambabwe, yatugarulira n’entambara zaitu nk’okwo amani g’ekishakye gali, ⁸ ekisha ekyo yatugiliire. ⁹ Omu bumanyibwe bwona n’omu magezige gona, yatumanyisa ekyebisho ekyo yayendaga, nikyo yabaire agendeleire kugobesheleza omuli Kirisito. ¹⁰ Entegeka egyo akashangwa nagonza kugigobesheleza orwo akaanya nyakabara kakugobire kushoroza ebitondwa byona, buli kitondwa omw’iguru n’omu nsi, Kirisito akaba Mukama wabyo. ¹¹ Ebintu byona bikorwa kuhondera entegeka ya Ruhanga n’okwo yaramura. Aha rw’enshonga y’omugendelerogwe, ogwo yakagendeleire kwema obubere nyabubere, Ruhanga akaturonka katuba bantube tukajwangana na Kirisito. ¹² Aho ichwe ababaire ba mbere kugira eshubi omuli Kirisito, tusingize ekitinwa kya Ruhanga. ¹³ Nainywe kwakwo mukaba bantu ba Ruhanga orwo mwamazire kuhulira ekigambo ky’amazima, niyo vangeli eyabarokoire. Mukaikiliza Kirisito, aho Ruhanga yabataho akamanyiso k’okuba bantube orwo yabatungire Mwoyo Mutakatifu owo yabaire aragaine. ¹⁴ Mwoyo Mutakatifu n’iwe mukwato gw’obusika bwaitu obwo Ruhanga yaraganisize abantube, mara eki nikimanyisa okwo Ruhanga alitunga abalibe obwegeleere nyakabara. Tusingize ekitinwakye. ¹⁵ Aha rw’enshonga egi, kwema mpuliire okwo mulikwesiga Omukama Yesu n’okwo mulikugonza abakirisito bona, ¹⁶ tindikulekera kubasiimira n’okubaijuka omu nshara zange, ¹⁷ Ruhanga w’Omukama waitu Yesu Kirisito, Isheichwe ow’ekitinwa asinge abatunge Mwoyo, Mwoyo ogwo abahe obumanyi mara abashurulire mumanye Ruhanga ogwo. ¹⁸ Abakyanure emitima mumanye eshubi eyo yabeteire, n’emigisha y’okutangaza eyo alikushuubiza abakirisito okwo eina amani. ¹⁹ Mumanye n’okwo aina obushobora bungi obutalengwa omuli ichwe abalikumwesiga. Obushobora obu obuli omuli ichwe nibwo bwonene bwonene ²⁰ obwo yahimbwize Kirisito omu bafu akamara akamushuntamya aha bulyobwe omw’iguru. ²¹ Ruhanga akakuza muno Kirisito yashaga abatwazi bona n’abaina obushobora n’abaina amani, n’abakama, mara yakira na buli ibara elikagambwa, ti mu bukiro obu obwa mbwenu bwonkai nawe n’omu bukiro obulija. ²² Ebintu byona akabimuteka omu maguru, n’omu nteeko yamuhindura Mukama wa buli kantu. ²³ Enteko nigwo mubiligwe, nibwo buhikilirebwe, ebintu byona buli hantu bigorogoki aha rwa Yesu ogwo abindura atyo.

¹ Akabagiza oburora, kuba mukaba mufire aha rw’enshonga y’entambara zanyu n’amafu ganyu ² ago mwakozire nk’ensi egi, nimuhondera omutwazi w’omu rwerwerwe, n’iwe mwoyo alikuha abataina muhuliro amani. ³ Naichwe eirai aba tukaba tubalimu orwo twanulirwaga amairu g’omubili, tukarongotokera orwoyoyo rw’omubili n’amagezi, kityo twaba b’okunigalirwa omu butondwa bwaitu, nk’abantu abandi bona. ⁴ Kyonkai Ruhanga omuganyizi muno, omu ngonzize ezingi muno ezo yatugondize, ⁵ n’orwo twabaire tuli bafu aha rw’entambara zaitu, akatuhindura barora hamoi na Kirisito, ekisha nikyo kyabarokoire. ⁶ Ruhanga akatuhimbulirana na Yesu Kirisito yatwikaza omw’iguru omu bushoborabwe. ⁷ Ruhanga omu kukora atyo akagonza kutwoleka amani agatali ga kulengwa aha rw’engonzize ezo yatugiliire. Ebyo alibitwoleka makiro agalija. ⁸ Aha rw’okwikiliza kwanyu mukarokorwa ekisha. Ekyo timwakyekoleire inywe nywenene; okurokoka kwanyu matungwa ga Ruhanga. ⁹ Okurokoka kwanyu tikwarugire mu bikorwa byanyu, omuntu n’omoi atakwesiima. ¹⁰ Ichwe tuli bitondwabye, akatutondera omuli Yesu Kirisito katukora ebikorwa birungi, ebyo Ruhanga yaragiire kwema karai, kuba nibyo tuta nitukora. ¹¹ Inywe Banyamahanga obubili, abo Abayahudi abeyeta abatahiriirwe bayetaga «Abatatahiliirwe» (ekikorwa ekyo bakoza emikono aha mibili yabo) mwijuke okwo mwabaire muli eirai. ¹² Bukiro buli Kirisito mukaba mutamuliho. Mukaba muli bagenyi, mutalikubalirwa mw’ihanga lya Ruhanga elironkwa. Endagano zikaba zitabakweteho kantu. Endagano ezo zikaba zili aha byo Ruhanga yaraganisize eihangalye. Inywe mwaturaga omu nsi omu mutaina shubi mara mutaina Ruhanga. ¹³ Kyonkai mbwenu omu mani ga Yesu Kirisito inywe ababaire eirai muli harai, obwambabwe bubailiize haihi. ¹⁴ Kuba Kirisito n’iwe mirembe yaitu. Ichwe Abayahudi n’Abanyamahanga akatujwanganisa twaba omoi. Orukuta orwabaire nirututanurana, nibwo bwiko, akarukambura. ¹⁵ Akachwa Amateka g’Abayahudi n’emihango yaho, n’emigenzo, agendeleire omu Bayahudi n’omu Banyamahanga kwihyamu eihanga limoi elijwangaine nawe, yaba nikwo aleta atyo emilembe. ¹⁶ Orwo Kirisito yafeleire aha musaraba akachwa obwiko bw’Abayahudi n’Abanyamahanga. Akakoza omusaraba kubatonganisa, Abayahudi n’Abanyamahanga baba oti muntu omoi, mara yabagarura ahali Ruhanga. ¹⁷ Kityo Kirisito kayaizire akaranga evangeli y’emilembe omu bantu bona. Yarangira inywe Abanyamahanga, orwo mwabaire muli harai na Ruhanga, yagirangira n’Abaayahudi ababaire bamuli haihi. ¹⁸ Kirisito n’iwe alikutushoboza ichwena, Abayahudi n’Abanyamahanga kwija omu mabona ga Isheichwe twemirwemu Mwoyo omoi. ¹⁹ Kityo timukili bagenyi anga bafuruki; mwabaire bamoi n’abakirisito kandi muli b’eka ya Ruhanga, ²⁰ eyombekire aha musingi gw’entumwa n’abarangi, aho Yesu Kirisito wenene ali ibare ly’epembe. ²¹ Eibare elyo ly’epembe niho enju yona elikuteranira ekakura ekarugwamu Rwensinga Ntakatifu omu mani ga Ruhanga. ²² Orwo mujwangaine na Kirisito nainywe nimwombekeranwa n’abandi bona omu mani ga Mwoyo mubone kurugwamu obusingiro bwa Ruhanga.

¹ Inye Paulo omufungwa wa Yesu Kirisito ninturwa inywe, Banyamahanga; ² Nindenga nti mwahuliire okwo ndi musigire w’ekisha kya Ruhanga aha bwanyu, ³ okwo ekyebisho nakimanyiire omu kushurulirwa, nk’okwo nabandize kubahandikira omu bigambo bike. ⁴ Kamurashoma ebi muramanya emishobokelerwe eyo ndikushobokerwa ekyebisho kya Kirisito ⁵ eky’abantu batamanyisiibwe mu mizarwa endijo nk’okwo bir’ebi kishuruliirwe entumwaze ezitakatifu n’abarangi omu mani ga Mwoyo. ⁶ Nikwo kugir’oti Abanyamahanga basika batahi baitu, ngingo z’omubili gwonene gwonene, kandi nabo aha rw’okurangirwa evangeli, ebyo Ruhanga yaragaine nibabitungwa omu mani ga Yesu Kirisito. ⁷ Kuhondera amatungwa g’ekisha kya Ruhanga ekyo natungirwe omu mani g’obushoborabwe, leba nkahinduka murangi w’evangeli egi. ⁸ N’orwo omu bakirisito ndi muke kushaaga bona, nkatungwa omugisha ogu: Kurangira Abanyamahanga eitunga lya Kirisito elitalengwa. ⁹ Kandi n’okumanyisa abantu bona, bakashobokerwa ekyebisho ekyakashelekirwe akarai kona omuli Ruhanga ayatonzire ebintu byona. ¹⁰ Mara omu kaanya aka mbwenu, omw’ikora ly’enteko, abakuru n’abatwazi b’omw’iguru bashobore kumanya obumanyi bwa Ruhanga obw’engeli zingi. ¹¹ Ruhanga akakora ekigambo ekyo kuhondera entegeka ya wenene ey’eirai lyona eyo agobesheleize omuli Yesu Kirisito Omukama waitu. ¹² Orwo twamazire kujwangana na Kirisito aha rw’owikiliza twina obumanzi n’obwesige kugoba ahali Ruhanga. ¹³ Kityo nimbashaba mutashuburugukwa aha rw’enshonga y’obushasi obwo ndikubona aha rwanyu; kanshashe mubone kugasirwa. ¹⁴ Niyo nshonga nimbandama omu mabona ga Isheichwe, ¹⁵ entabuko ya buli ka omw’iguru n’omu nsi. ¹⁶ Nintaka ahali Ruhanga, nk’okwo ekitinwakye kili kingi, omu mani ga Mwoyo we asinge abatunge amagara omu myoyo yanyu mube manzi. ¹⁷ Kandi na Kirisito aikare asingiire omu mitima yanyu aha rw’okwesiga kwanyu. Alikasinga inye nimushaba mugire emizi mara mugume omu ngonzi ¹⁸ mushobore kushobokerwa hamoi n’abakirisito abandi bona obukiika n’oburaiburai, n’obwemi n’oburaiburai bw’okuzimu, ¹⁹ mumanye n’engonzi za Kirisito ezishaaga obumanyi bwona, mushobore kwijurwa Ruhanga. ²⁰ Ruhanga omu bushoborabwe obulikukora omuli ichwe, alikushobora kukora buli kantu akashaaga ebyo tushaba n’ebyo tutekeleza, ²¹ ahabwe ekitinwa omu nteeko n’omuli Yesu Kirisito amakiro gona, eirai lyona. Amina.

¹ Inye omufungwa aha rwa Kirisito, nimbatagiliza murore oburora obulikugendanwa n’omweto gwanyu. ² Buli kaanya mugire obwetohya, obufura, obwegumisiliza, mutekanirangane nimugonzangana. ³ Enkomo y’emilembe ebahe okwitanira okwikara muli bamoi omuli Mwoyo. ⁴ Omubili guba gumoi na Mwoyo ab’omoi, nk’okwo eshubi y’omweto gwanyu eb’emoi. ⁵ Omukama ab’omoi, okwikiliza kuba kumoi, okubatiza kumoi. ⁶ Ruhanga mara Isheichwe chwena omoi, n’iwe akira abantu bona, akora omu bantu bona mara asingiire omuli bona. ⁷ Buli muntu akagilirwa ekisha kuhondera okwo Kirisito yagondize kukimugilira. ⁸ Aha rw’ekyo bagamba bati, «Orwo yatembire eiguru muno, akatwara eihe ly’endore, yatunga abantu amatungwa.» ⁹ (Okugamba oti «Akatemba,» nikwo kugambaki kakutali kugir’oti akabanza yasongoka okuzimu? ¹⁰ Yesu Kirisito ayasongokire n’iwe wenene wenene ayatembire omw’iguru eiguru muno, abone kusingira omunsi yona.) ¹¹ Wenene n’iwe yatungire abantu emyoga. Abandi akabahindura ntumwa, abandi barangi, abandi barangi b’evangeli, abandi bashumba mara begesa. ¹² Omu kugir’atyo Kirisito akagonza kutekateka abakirisito kabashobora kugobesheleza oburagirwa bwabo omu kwombeka omubiligwe. ¹³ Kityo aho turashobora kugira okwikiliza kumoi, n’Omwana wa Ruhanga tumumanye emimanyire emoi, tulemwe tube bagorogoki bwoli nk’okwo Kirisito ali mugorogoki bwoli. ¹⁴ Aho turaba tutakili bana ba kuchundaigurwa bilikwegesibwa eby’okutuchundaigura nk’omuyaga, nibitwihy’oku nibitunag’oku. Ebilikwegesibwa nk’ebyo by’abantu b’obwenge abaina akalyo k’ebishuba. ¹⁵ Ekiliho katuragamba amazima mara okwo nitugonzangana turarondora Kirisito omuli buli kantu, wenene n’iwe mutwe gwaitu. ¹⁶ Omu bushoborabwe omubili gwona nigujwangana, nigujwanganisibwa buli rugingo, mara buli rugingo niruha omubili ogwo amani kuhondera omulimo gwarwo oguli kwagwo. Kityo aho engingo z’omubili gumoi nizigonzangana n’okwombeka omubili ogwo, mara n’omubili gwonene nigukura. ¹⁷ Ekigambo eki ninkigamba malize ninjuliza Omukama: Mulekere kurora emirolere ey’Abanyamahanga, abatekeleza ebya katozi. ¹⁸ Amagezi gabo gakabundwa omwilima; obutamanya bwabo obulikuzarukana omu bugumangani bw’emitima yabo bukabaihya ahali Ruhanga. ¹⁹ Bagumangaine bahwera omu busiyani, bajanga emijangire eya buli ngeli. ²⁰ Kyonkai inywe ebyo tibyo mwamanyire ahali Kirisito! ²¹ Nikwo, mukamuhuliza bamubegesa, mwamanya okwo Yesu ogwo ali w’amazima. ²² Kityonu mulekere emirolere yanyu ey’eirai, obuntu obwa karai mubujure, aha rw’okuba obwo buhabisibwa obunyama bwabwo obububeiyabeiya. ²³ Emyoyo yanyu n’amagezi ganyu bihinduke bihya kakimoi, ²⁴ mube bantu abahya, mushushe Ruhanga, mara mumanyikire aha mirolere mirungi egorogokire mara emitakatifu kwokwokwo. ²⁵ Ahonu mulekere ebishuba, omuntu na mutahiwe mugambe amazima, ahakuba ichwe chwenene tuba ngingo z’omubili gumoi. ²⁶ Kamuranigara mutafakara, eizoba kugya kutobera mube mutakiina kiniga. ²⁷ Sitani mutamuha kaanya. ²⁸ Ayaibaga atakiiba rundi. Hakili achwazikane, akore emilimo n’obwesigwa, nirwo arabona kujuna abetaage. ²⁹ Mutakufumora fumoro mbi. Kamuragyaga kugamba mugambe ekigambo ekili kirungi ekilikushoboka kugasira emyoyo, aho n’abalikukihulira babone kutungwa omugisha. ³⁰ Mutakujunaza Mwoyo Mutakatifu wa Ruhanga, aha rw’okuba mukagiibwaho akabonero ka wenene, nirwo mulibona kurokoka aha kiro ky’okuchungurwa. ³¹ Mulekere obushanshame, obukatili, ekiniga, enkungana, okugeyangana, kandi mulekere n’orwango orwa buli ngeli. ³² Mugilirangane obufura n’obuganyizi, mugarulirangane nk’okwo Ruhanga yabagaruliire aha rwa Kirisito.

¹ Murondore Ruhanga orwo muli bana abagonzibwa. ² Oburora bwanyu bube bw’engonzi, nk’okwo Kirisito yatugondize akatwetambilira, akaba kihongo mara kitambo ky’omugaju eky’okushemelera Ruhanga. ³ Nk’okwo abakirisito baragiirwe, obusiyani n’obuhagare obwa buli ngeli anga obujanga omuli inywe bitakuhulirwamu. ⁴ Mutakugamba bya busheegu, mutakujoborwa anga kugamba ebitakomire mu kibunu, ebitalikusana. Ekiliho mugire esiimi. ⁵ Kimanyikege okwo omusiyani anga enjanga, anga olinya afukamira ebihuku taina kutaha mu bukama bwa Kirisito anga bwa Ruhanga. ⁶ Omuntu atababeiyesa bigambo ebitaina mbali bili, enshonga ebi nibyo bisindika Ruhanga kunigalira abantu abatagira muhuliro. ⁷ Kityo mutamanyirangana nabo. ⁸ Mwaturaga omu mwilima, kyonkai kwema mubaire bantu b’Omukama mbwenu muli omu mushana. Kityo murore nk’abantu ab’omushana, ⁹ nobona omushana nigwo gurugwamu kaishe kantu akarungi, akagorogokire mara ak’amazima. ¹⁰ Mutemu amani mumanye ebishemelera Omukama. ¹¹ Ebikorwa by’omwilima ebitarugwamu birungi mutabikora; hakili mubihere orubona. ¹² Kigambo ky’enshoni kufumora ebigambo eby’abantu bakora bwesheleke. ¹³ Ekintu kyona kyona kakishururwa omushana kiboneka, kuba ekibonekage kyona kyona guba mushana. ¹⁴ Nikyo bagambira bati, «Sisimuka iwe anagiire, ruga omu bafu; Kirisito aije akwakize.» ¹⁵ Muralebagenu emirolere yanyu; mutaba bantu abataina bumanyi, mube bantu b’obumanyi. ¹⁶ Omwanya mugukoze kurungi muno, amakiro aga gabi. ¹⁷ Mutaba balenga, mushobokerwe ebyo Omukama alikwenda. ¹⁸ Muleke kutamiira amarwa, etamiiro ejangisa. Ekiliho mwijurwe Mwoyo. ¹⁹ Efumoro yanyu kube kuhoya ezaburi, etenzi n’empoya z’edini, muhoyere Omukama nimumuhaisiliza n’emitima yanyu yona. ²⁰ Buli kanya musiime Ruhanga Isheichwe omw’ibara ly’Omukama waitu Yesu Kirisito, mumusiimire buli matungwa. ²¹ Muhulirangane aha rw’okukunira Kirisito. ²² Inywe bakazi muhulire bashaija banyu, nk’okwo mulikuhulira Omukama wenene. ²³ Omushaija n’iwe aba mutwe gw’omukazi, nk’okwo Kirisito aba mutwe gw’enteko, nigwo mubiligwe, mara n’iwe murokozi w’enteko egyo. ²⁴ Nk’okwo enteko ehulira Kirisito, n’abakazi kwakwo bahulire baibabo omuli byona. ²⁵ Inywe bashaija mugonze bakazi banyu nk’okwo Kirisito yagondize enteko akagifelekelera, ²⁶ abone kugyeza orwo yagyelize n’ekigambokye n’amaizi; ²⁷ ashobore kukwasa enteko enshemere, etaina kibara anga mikanya, handiki kyona kyona nk’eki, enteko egyo eshobore kuba ntakatifu obuzira kamogo. ²⁸ Abashaija nibaragirwa kugonza abakazi babo nk’okwo bonene balikugonza emibili yabo. Ayakagonza mukaziwe ayegonza wenene. ²⁹ Kuba taliho muntu n’omoi anoba mubiligwe, shana aguliisa n’okuguhyahyanira, nka Kirisito okwo aliisa enteko akagihyahyanira, ³⁰ kuba tuli ngingo z’omubiligwe. ³¹ Orwo bili biti, omuntu arasigagaho ishe na nyina ajwangane na mukaziwe, bombili babe mubili gumoi. ³² Ekyebisho eki ky’amani, mara nikimanyisa Kirisito n’enteko. ³³ Ahonu buli omoi agonze mukaziwe nk’okwo wenene alikwegonza, kandi n’omukazi ateho aga wenene kukunira mushaijawe.

¹ Inywe bana, buragirwa bw’omukirisito kuhulira abazaire banyu, mara eki kisaine. ² «Okunire sho na nyoko» (nigwo muhango gwa mbere ogwinaho endagano), ³ «Nirwo oligoshoka okameleera omu nsi.» ⁴ Na inywe baishe bantu mutagiza bana banyu ntimambi kubanigaza. Mubalere n’okubegesa nk’okwo Omukama alikugonza. ⁵ Inywe bairu muhulire bakama banyu ab’omunsi omu. Mubatine nimuchundwa, mugire omutima gutaina bugobya, nk’okwo mulikuhulira Kirisito. ⁶ Mutabahulira orwo baliho okw’obon’oti nimugonza kushemeleza abantu, shana mube bairu ba Kirisito, nimukora ekyo Ruhanga alikwenda nibibaruga aha mutima. ⁷ Mubakolere n’omutima gurungi oti nimukolera Omukama mutalikukolera bantu. ⁸ Mumanye okwo ekirungi kyona kyona ekyo kaishe muntu akora, Omukama alishuba akimurongore kyonene, alikaba mwiru anga mwegeleere. ⁹ Kandi inywe bakama babo, nainywe mube nikwo mubatwaza, muleke kubatinisa, mumanye okwo Mukama wabo mara Mukama wanyu asingiire omw’iguru, mara tagira kigonzi. ¹⁰ Eky’enzindo mugume mujwangane n’Omukama nimujunwa amanige. ¹¹ Ebikwato ebyo Ruhanga alikubatunga mubijware byona, nirwo mulishobora kwemera emitego ya Sitani. ¹² Nobona titulikurashana na bantu, niturashana n’abatwazi, n’abanyamani, n’abatwazi b’ensi egi ey’omwilima, kandi niturwana n’amahe g’amasitani agatalikuboneka. ¹³ Aha rw’ekyo ebikwato by’endashana ebyo Ruhanga alikubatunga mubikwate byona, nirwo mulibona kumanzara aha kiro ky’endashana. Kamuliba mwamazire endashana mubere kimoi emanzi ezitalikutengeta. ¹⁴ Mwemelere nk’emanzi, omukandara gwanyu omu nyugunyu gabe mazima, omu kifuba obugorogoki mube nibwo mujwara nk’engabo, ¹⁵ kandi okwetegeka kurange evangeli y’emilembe, ebyo bibe nibyo biba biratwa byanyu. ¹⁶ Kandi kwongera ahali ebyo mukwate engabo y’okwesiga, egyo niyo murakoza kuraaza emyambi yona y’omubisha elikurabagira nk’omuliro. ¹⁷ Okurokoka kwanyu niyo helumeta, kandi ekigambo kya Ruhanga niyo mbanda eyo Mwoyo Mutakatifu alikubatunga. ¹⁸ Mushome enshara buli kanya nimwejunisa Mwoyo Mutakatifu. Mushome enshara eza buli ngeli mara mutake. Murare aha nkeera obuzira kunanukwa kulemwa kugoba aha ndekelero, mushabire abakirisito bona, ¹⁹ nanye kwakwo munshabire mbone agagamba n’obumanzi, ndange ekyebisho ky’evangeli. ²⁰ Inye mba mubaka w’okuranga evangeli, n’orwo kanya aka ndi jela. Munshabire nshobore kugiranga n’obumanzi, ngirange okwo ndagiirwe kugiranga. ²¹ Titiko murumuna wange omugonzibwa, mara omukozi wange omwesigwa omu mulimo gw’Omukama, n’iwe arabagambira byona mushobore kumanya okwo ndi n’ebyo ndikukora. ²² Nikyo ndikumutwekera okwo, kamumanya okwo tuli, kandi na wenene abagaruremu akoyo. ²³ Ruhanga Isheichwe n’Omukama Yesu Kirisito basinge batunge abakirisito barumuna baitu emilembe n’engonzi hamoi n’okwesiga. ²⁴ Bona abagonza Omukama waitu Yesu Kirisito engonzi ezigobeleire, batungwe omugisha.