ABAKOLOSAI

ABAKOLOSAI

¹ Inye Paulo, owo Ruhanga yagondize kamba ntumwa ya Yesu Kirisito, hamoi na murumuna waitu Timotheo, ² nituhandikira abakirisito mara barumuna baitu abesigwa abajwangaine na Kirisito, abali Kolosai: Ruhanga Isheichwe abatunge n’emirembe. ³ Buli kanya nitusima Ruhanga, Ishe Omukama waitu Yesu Kirisito, mara nitubashabira. ⁴ Twahuliire okwo mulikwesiga Yesu Kirisito, kandi nimugonza n’abakirisito bona, ⁵ aha rw’eshubi y’ebyo mushubizibwe omw’iguru. Ebi mubaire mwabihulire omu kigambo ky’amazima, niyo vangeli ⁶ eyo mwarangiirwe, nk’okwo eliyo neraba ebiraba mara nekura omu nsi yona, n’omuli inywe kutyo, kwema kiro mwahuliire mara mukashobokerwa ekisha ekyo kya Ruhanga, ⁷ omu ntwaza eya Epafurasi omukozi mutahi waitu omugonzibwa. Epafurasi ogwo mukozi wa Kirisito omwesigwa omw’ibara lyaitu ⁸ mara akatumanyisa engonzi zanyu ezo Mwoyo yabatungire. ⁹ Kwema kiro ekyo twahuliire ekigambo ekyo titukalekeraga kubashabira. Tubaho nitushaba Ruhanga k’abasingira muno mukamanya eby’alikwenda, mugire obumanyi bw’eby’omwoyo, mugire n’okushobokerwa; ¹⁰ mubone kurora oburora obusaine nk’abaana b’Omukama abalikumushemelera muno. Oburora bwanyu buraba bw’ebikorwa birungi byona mara kandi murayeyongera kumanya Ruhanga. ¹¹ Amanige g’ekitinwa n’obushoborabwe bibagumise, mushobore kugira obwegumisiliza bungi n’obutekani omu mashemelerwa, ¹² nimusiima Isheichwe, ayabaronkire kutaha omu bukama bw’omushana. ¹³ Akatwihya omu mani g’omwilima yatutahya omu bukama bw’Omwanawe omugonzibwa, ¹⁴ ayatuchungwire akatugarulira n’entambara zaitu. ¹⁵ Kirisito ashusha Ruhanga ataboneka. Niwe muzigaijo mara mukuru w’ebitondwa byona. ¹⁶ Nobona ebintu byona bikatondwa omu bushoborabwe, n’omw’iguru n’omunsi, ebilikuboneka n’ebitalikuboneka, babe abaikalira nketo anga abakama, anga abategeki anga ab’obushobora, ebintu byona bikatondwa omu bushoborabwe mara aha bwa wenene. ¹⁷ Akabaho ebintu byona bitakabaireho, mara ebintu byona biba omu myanya yabyo omu manige. ¹⁸ Niwe mutwe aha mubili, omubili ogwo niyo nteko; niwe muzigaijo ayarugire omu bafu, abone kuba mukuru omuli buli kantu. ¹⁹ Nobona Ruhanga okwo agobeleire wena akashemelerwa kusingira omuli Kirisito, ²⁰ mara aha bwa Kirisito Ruhanga yagonza kugarulira ensi yona. N’omw’iguru n’omu nsi, Ruhanga akatutunga emilembe aha rw’okwitwa kwa Yesu Kirisito aha musaraba. ²¹ Eirai mukaba mushengire Ruhanga, mwaba babishabe omu bikorwa n’omu bitekelezo. ²² Kyonkai mbwenu aha rw’okufa kw’Omwanawe akabagarulira kubatahya omu busingebwe muli batakatifu enzira kamogo, mara nyakatetere. ²³ Muragiirwe kwikara nimwesiiga, mwikare hamoi, mutanaga eby’evangeli eyo mwahuliire yabashuubiize, evangeli eyo buli muntu omu nsi yarangiirwe, kandi yonene egyo nanye Paulo mba murangi wayo. ²⁴ Kanya aka ninshemelerwa kushasha aha rw’enshonga yanyu, omu bushasi bwange obw’obubili ningobesheleza obushasi bwa Kirisito aha rw’omubiligwe, niyo Nteeko. ²⁵ Enteko egyo nkaba mukozi wayo, omulimo ogwo nkagukwasibwa Ruhanga kukolera inywe, kumanyisa ekigambo kya Ruhanga geigeigei omu bantu, ²⁶ ekyebisho ekitura kitamanywa bamalaika na bantu amakiro gona, kyonkai mbwenu abakirisito ba wenene abolekire ekyebisho ekyo. ²⁷ Abakirisito abo Ruhanga akabona abamanyise okwo ekyebisho ekyo omu Banyamahanga kiina eitunga lingi muno. Ekyebisho ekyo ni Kirisito asingiire omuli inywe, nikwo kugir’oti mulitungwa ekitinwa kya Kirisito ogwo. ²⁸ Kityo nituranga Kirisito omu bantu bona. Nitukoza obumanyi bwona okwo tulikubora kubatatira n’okubegesa tubone kugobya buli omoi omu businge bwa Ruhanga, buli muntu ashangwe ajwangaine na Kirisito limoi limoi. ²⁹ Egi niyo nshonga elikunchwazikya, ninfa ninyosha, ninkoza amani gona ago Kirisito alikuntunga, mara amani ago nigo nyemeleireho.

¹ Nakugondize kamumanya okwo ndikubachwazikira muno, hamoi n’abali Laodisea, na bona abatakantagaho lisho. ² Okugira ntyo ningonza bagume nk’okwo bajwangaine omu ngonzi, babone kushobokerwa kurungi n’okumanyage ekyebisho kya Ruhanga, niwe Kirisito. ³ Omuli Kirisito ogwo nimwo ebirungo byona by’obumanyi n’amagezi bishelekire. ⁴ Ninkigamba omuntu n’omoi ataija akabahabisa na bigambo bya bishuba. ⁵ N’orwo aha bunyamubili ntali kwo, aha bunyamwoyo ndi hamoi nainywe, ninshemelerwa kubona okwo mulige mara mugumire omu kwesiga Kirisito. ⁶ Orwo mwatoire Yesu Kirisito Omukama, mube nikwo murora mujwangaine nawe. ⁷ Musimbe emizi omuli wenene, mumugumeho mara mugume omu kwesiga, nk’okwo mwayegesiibwe, mara mugire n’esiimi nyingi muno. ⁸ Mwelindenu, mutagira muntu ayabegesa nabahabisa n’okubagambira ebishuba ebitaina mbali bili, omu kuhondera omuhelejanyio gw’abantu, n’okuhondera amasitani agatwara ensi, mutahondeire Kirisito wenene! ⁹ Kirisito aba muntu, kandi na Ruhanga agobeleire wena asingire omuli wenene. ¹⁰ Mara inywe orwo mwamazire kujwangana nawe mukatungwa oburora bwonene bwonene. Wenene aba mukuru w’abatwazi bona n’ab’obushobora bwona. ¹¹ Orwo mwajwangaine nawe bakabatahiri okutahiri okutali kwa mikono. Orwo Kirisito yamazire kutahirirwa, inywe aho mukajura obunyama; ¹² mara orwo mwabatiziibwe mwaziikwa nawe. Kandi omu kubatizibwa okwo mukahimbuka nawe omu kwesiga kwanyu omu bushobora bwa Ruhanga ayahimbwire Kirisito ogwo. ¹³ Mara okwo mwashangirwe muli bafu nimuzira entambara zanyu, n’okwo kutatahirirwa, Ruhanga akabatunga oburora hamoi na Kirisito, orwo yamazire kubagarulira entambara zanyu zona, ¹⁴ akafuta omuku gw’eiramu lyaitu ogwatukomaga, yagunaga aha rubaju, yagukoma aha musaraba. ¹⁵ Amasitani ago, Kirisito akagaka obukama n’obukuru, yagashonaza omu maisho g’abantu, orwo yamazire kugasingisa omusaraba akagakurura agateize enjuru nk’endore. ¹⁶ Aha rw’ekyo omuntu atakubaramura aha bikwete okulya anga okunywa anga aha mikolere y’amagenyi n’orwo okwezi kwayema anga ahali Sabato. ¹⁷ Ebyo byona kinyumanyumi kushai ky’ebilikwija. Kirisito niwe mazima gonene. ¹⁸ Omuntu n’omoi atakubaramura okwo wenene nakora eby’obujanga mara nafukamira abamalaika, nasimbagiliza aha by’abonekeirwe, nayeshalingya aha rw’amani ga wenene agataina nshonga, ¹⁹ mara tayekwete Mutwe, manya omutwe ogwo nigwo gulisa omubili gwona, gukajwanganisa n’engingo zona hamoi n’emisi yazo, mara Ruhanga niwe akuza omubili ogwo. ²⁰ Kamuraba mwafire na Kirisito mukejuma amasitani agatwara ensi, kubaki nimurora okw’obon’oti muli bantu b’ensi? Kubaki nimukwata amateka g’engeli egyo ngu, ²¹ «Otalikwataho kintu eki, otalirozaho kintu eki, otalikoraho kintu eki?» ²² Ebi byona kabiba byaliirwe biba bitakiina nshonga. Egyo michwo y’abantu kushai, nibo bagamba batyo. ²³ Amateka nk’aga gemeleire aha kugonza kugimba banu kufukamira abamalaika n’obujanga n’okushasa emibili, kyonkai byonene ebyo tibiina mugasho orwo bitalikubajuna kusinga bunyama.

¹ Ahonu kamuraba mwahimbukire na Kirisito muhige ebili omwiguru, mbali Kirisito ali, asingiire aha bulyo bwa Ruhanga. ² Mutekeleze ebili omwiguru, mutatekeleza bili mu nsi. ³ Aha rw’okuba mukafa, mara oburora bwanyu bushelekire omuli Kirisito ajwangaine na Ruhanga. ⁴ Orwo Kirisito, wenene ali burora bwaitu, aliboneka, nainywe kwakwo muliboneka nawe mwina ekitinwa. ⁵ Ebiraba bili bintu by’ensi omuli inywe mubiite: obusiyani, obujanga, obunyama, amairu gabi n’okufukamira ebihuuku. ⁶ Aha rw’enshonga y’emize egyo Ruhanga naija kunigalira kubi abashengi. ⁷ Eirai ebyo byabaga byanyu orwo mwabikoraga. ⁸ Kyonkai mbwenu mubilekere: Ekiniga, obushanshame, omutima gubi, okugeyangana n’okugamba kubi omu kanwa. ⁹ Mutabeiyangana, nobona timukili kwo mwabaire muli, kandi n’ebyo mwakoraga mukabilekera. ¹⁰ Mukaba bantu abahya, mwaba bahya orwo mwamazire kumanya Omutonzi wanyu mukamurondora. ¹¹ Aha rw’enshonga egyo, hataziza kubaho nshororo ya Muyahudi n’atali Muyahudi, omuntu atahiriirwe n’atatahiriirwe, omuntu agendeleire n’atagendeleire, omwegelere n’omwiru. Manyasi Kirisito niwe rumara gona, mara asingiire omuli bona. ¹² Ahonu orwo muli ndonkwa za Ruhanga, abatakatifu mara abagonzibwa, mube bantu b’embabazi, ekisha, obwetohya, obufura n’obutekani, ¹³ mugumisilizangane, aragira ekigambo ahali mutahiwe mugarulirangane. Okwo Omukama yabagaruliire kutyo nainywe mugarulire. ¹⁴ Kyonkai ekishaagire ebyo byona mugonzangane. Engonzi nizo zijwanganisa abantu bona bakagira obuchulezi obuhikilire. ¹⁵ Mugire emilembe ya Kirisito omu mitima yanyu, nobona muketwa kuba mubili gumoi kamugira emilembe egyo. Kandi mube bantu b’esiimi. ¹⁶ Ekigambo kya Kirisito kisingiire muno omuli inywe, mwegesangane n’okuhanangana nimukoza obumanyi bwa buli ngeli, muhoye ezaburi n’etenzi n’empoya z’edini emitima yanyu eijwire esiimi ahali Ruhanga. ¹⁷ Ekyo murakakoraga kyona kyona, kibe kigambo anga kikorwa, mukikorega omw’ibara ly’Omukama Yesu, nimusima Ruhanga Isheichwe mumutaireho Kirisito. ¹⁸ Inywe bakazi muhulire bashaija banyu nk’okwo Omukama alikugonza. ¹⁹ Inywe bashaija mugonze bakazi banyu mara mutabagilira bukatili. ²⁰ Inywe bana, omuli byona mugire omuhuliro aha bazaire banyu, aha rw’okuba omuhuliro gushemelera Omukama. ²¹ Inywe baishe bantu mutakwema kubi bana bataija bakagira rwetamwo. ²² Abairu muhulire abakama banyu ab’omu nsi. Mara kutaba kubashemeleza aha maisho kushai, kibaruge aha mutima, mutine Omukama. ²³ Ekyo murakakoraga kyona kyona mukikorega nimukihya aha mutima, mukolere Omukama, mutakolera bantu, ²⁴ mumanye okwo Omukama alibarongora obusika. Manyasi nimukolera Omukama Kirisito. ²⁵ Omufakare alirongorwa ebibi byoyakozire, mara talibaho kigonzi.

¹ Inywe bakama mukolere abairu banyu amazima. Mumanye okwo nainywe mwina Mukama wanyu omw’iguru. ² Mwikare nimushoma enshara obutalekera. Mushome enshara omutima mugutaire hamoi mara nimusima. ³ Naichwe mutushabire Ruhanga atutunge obushango bw’okuranga ekigambo, niwe Kirisito ekyebisho ekyo banfungiire, ⁴ mbone kukitoitora omu migambire eyo ndikuragirwa kugamba. ⁵ Ab’aheru mubaturemu n’obwegendeleza, kandi n’omwanya mutagwita bushai. ⁶ Efumoro yanyu eshemere, erungwemu akonyu, nirwo muramanya okwo murahorora buli muntu. ⁷ Tikiko niwe arabagambira agange gona. Wenene ogwo ni murumuna waitu omugonzibwa, mukozi mwesigwa kandi mwiru mutahi waitu w’Omukama. ⁸ Namubatwekera aha rw’omugendelero ogu gwonene gwonene, mushobore kumanya okwo tuli, kandi abagumise emitima. ⁹ Namutweka na Onesimo murumuna waitu omwesigwa mara omugonzibwa, kandi nainywe ni murumuna wanyu. Barabamanyisa gona agalikufa kunu. ¹⁰ Arisitariko, omufungwa mutahi wange nabakeisa, hamoi na Mariko mwihwa wa Barinaba (owo babagambiire okwo k’alija mumutore), ¹¹ na Yesu owo beta Yusito nawe nabakeisa. Aba nibo bonkai abakozi batahi bange Abayahudi abakirisito, abo twemire hamoi kukolera obukama bwa Ruhanga mara bammaramazire. ¹² Murumuna wanyu Epafurasi, omwiru wa Yesu Kirisito, nabakeisa, buli kanya nabaijuka muno omu nsharaze, mubone kuguma obutatengetana kandi mumanyire kimoi ebyo Ruhanga ayenda. ¹³ Epafurasi inye nimujulira okwo abakoleire omulimo guhango hamoi n’aba Laodisea na Hierapoli. ¹⁴ Luka, omutambi omugonzibwa, na Dema nibabakeisa. ¹⁵ Munshulire barumuna baitu aba Laodisea, munshulire na Nimfa hamoi n’enteko y’omwa wenene. ¹⁶ Kamuramara kushomerwa ebarua egi mugishome n’omu bakirisito b’enteko ya Laodisea. Kandi ebarua eraruga Laodisea nainywe mugishome. ¹⁷ Mugambire Arikipo muti, «Oramanya okore kurungi omulimo ogwo Omukama yakukwasize.» ¹⁸ Inye Paulo, ebishuro ebi n’inye ndikubyehandikira Muraijuka okwo ndi jela. Omugisha gw’Omukama gube na inywe.