2 TIMOTEO

¹ Inye ndi Paulo, owo Ruhanga yayenzire kamba ntumwa ya Yesu Kirisito kuranga oburora obwo yatushuubiize obwo twinabwo omu kujwangana na Yesu Kirisito. ² Ninkuhandikira iwe Timotheo, omwana wange omugonzibwa. Ruhanga Isheichwe n’Omukama waitu Yesu Kirisito basinge bakutunge omugisha n’emilembe, mara bakuganyire. ³ Buli kaanya orwo ndikukwijuka omu nshara zange, ninsiima Ruhanga owo nkolera n’omutima gwezire, nk’okwo batat’enkuru bagiraga. ⁴ Orwo ndikwijuka okulira kwawe nkugilira orushusho kiro na mushana, mbone kushemelerwa muno. ⁵ Okwesiga kwawe okw’amazima ninkwijuka, okwesiga okwo nyokw’enkuru Loisi na nyoko Yunisi babaire bainakwo obubere, na mbwenu nimanyira kimoi okwo okwesiga okwo nikwo oinakwo. ⁶ Nikyo ndikukwijukiza kwinegeza amatungwa ga Ruhanga ag’oinago, ago watungirwe orwo nakutaireho emikono. ⁷ Ruhanga tiyatutungire mutima gwa butini. Akatutunga omutima ogw’amani n’engonzi n’okwelinda. ⁸ Ahonu otalikwatwa nshoni kuba mujulizi wa Mukama waitu, handiki inye omufungwawe. Ekiliho oshasire evangeli, orwo Ruhanga akutungire amani g’okugishasira. ⁹ Akaturokora yashuba yatweta katuba bantube, tutasaine aha rwabikorwa byaitu, shana kuba wenene akakigendelera atyo, n’aha rw’ekisha ekyo yatutungire omuli Yesu Kirisito amakiro gatakabaireho. ¹⁰ Mbwenu ekisha ekyo tukakishurulirwa okwija kw’Omurokozi waitu Yesu Kirisito; ayachwire orufu, akatutunga oburora obutalihwaho omu mani g’evangeli. ¹¹ Nobona inye nkarondwa aha rw’evangeli egi, naba murangi wayo, naba ntumwa yayo mara mwegesa wayo, ¹² mara niyo nshonga nimbona enaku ezi. Kyonkai tindikukwatwa nshoni, aha rw’okuba owo naikiliize nimumanya, mara nimanyira kimoi okwo alikushobora kulinda kurungi ebyo yankwasize kulemwa kuhika aha kiro eky’aliiziraho. ¹³ Ebigambo by’amazima ebyo nakwegesize obikwate geigeigei, nibwo bulebero obw’orahondera, oikare n’okwesiga n’engonzi ebyo ichwe twinabyo tujwangaine na Yesu Kirisito. ¹⁴ Amazima ago wabikisiibwe ogalinde omu mani ga Mwoyo Mutakatifu asingiire omuli ichwe. ¹⁵ Nomanya okwo aba Asia bona bampindukire, omuli abo ni Figelo na Herimogene. ¹⁶ Omukama asinge abonekere eka ya Onesiforo, enshonga emirundi nyingi yampaga ebyera; tiyankwatiirwe nshoni aha rw’okubona ndi mufungwa. ¹⁷ Orwo wenene yagobire Roma akampiiga n’ekihika mara yambona. ¹⁸ Omukama alikasinga amubonekere aha kiro ky’aliija. Kandi na iwe nomanya kurungi ebyo yankoleire omuli Efeso.

¹ Mwana wange Timotheo, ekisha ekyo twigiliirwe aha rw’okushangwa tujwangaine na Yesu Kirisito kikugumise. ² Kandi ebyo wampuliire ningamba omu maisho g’abajulizi batali bake, obyegese bwegesa abantu abalikwesigwa abarashobora nabo kwegesa abandi. ³ Oikilize kushasha nk’omwisherukare wa Yesu Kirisito omwesigwa. ⁴ Taliho mwisherukare omu bwisherukarebwe ayetahya omu mirolere y’abatali baisherukare, enshonga wenene omugendelerogwe ni kushemeleza ayamuhandikire omu bwisherukare. ⁵ Omunzani w’emizano y’okwiruka tibamujweka rukinga, shana kayakusindana ahondeire amateka. ⁶ Omulimi w’ekihika niwe asana kuhaba omugabo gwa mbere aha myaka. ⁷ Ebyo ndikugamba obiteke aha mutima, kuba Omukama naija kukuha okushobokerwa byona. ⁸ Oijuke Yesu Kirisito ayahimbukire omu bafu, alikutabuka ahali Daudi, nk’okwo bili omu vangeli eyo ndanga. ⁹ Egyo niyo vangeli eyo balikuntura, nkajwara n’empingo okw’obona enkoramahano. ¹⁰ Aha rw’ekyo ninteekanira buli kantu aha rw’abantu endonkwa za Ruhanga, babone kurokoka bajwangaine na Yesu Kirisito, babone n’ekitiinwa eky’eirai lyona. ¹¹ Ekigambo eki ky’amazima: «Katuraba twafire nawe, tulirora nawe. ¹² Katulyegumisiliza, kwakwo tulilya nawe engoma. Katulimwetonga, nawe kwakwo alitwetonga. ¹³ Kandi n’orwo tutaba besigwa, wenene aikara ali mwesigwa, aha rw’okuba tahindukana.» ¹⁴ Ebyo ote nobibaijukya, obaragire nobataho Omukama, bate nibatantara ebigambo by’empaka ebitaina mugasho, aha orw’okuba nk’ebyo binaga abalikubihulira. ¹⁵ Okore okw’olikushobora kuba murungi ahali Ruhanga, obe mukozi atalikwebabara kantu, n’ekigambo ky’amazima okyegese kabutekire. ¹⁶ Oyelinde enkuru etainamu kakutiina Ruhanga, nobona enkuru egyo neija kwikara nehindura abantu okutetaho Ruhanga. ¹⁷ Enkuru egi neija kubatemura nk’ekishebe. Omuli bonene abo halimu Himenayo na Fileto. ¹⁸ Aba nibo basigiliire amazima bakagamba ngu okuhimbuka kurabaireho. Nibaita okwikiliza kw’abandi. ¹⁹ Nawe omusingi gwa Ruhanga ogugumire nigwo gwonene gwonene, gwina n’omuhuri ogu: «Omukama namanya abaliba wenene,» kandi, «Kaishe muntu araba namanya okwo wenene aba wa Mukama alekere okufakara.» ²⁰ Omu nju mpango tabamu bikwato bya zahabu na feza byonkai. Habamu n’eby’emiti n’eby’eibumba. Haliho ebyo bakoza emilimo ey’ekitinwa, kandi ebindi babikoza emilimo elikugaywa. ²¹ K’omuntu arachwa emize mibi, aho araba kikwato ky’omulimo ogw’ekitinwa, ogutakatifu ogw’omugasho ahali nyin’enju, ekikwato ekyo yakukikoza omulimo gurungi Aha kaanya kona kona. ²² Kityo oyetange amairu g’obusigazi, oitanire obugorogoki, okwesiga, engonzi n’emilembe, hamoi na bona abatakira Omukama n’omutima gulikwera. ²³ Empaka z’obufera ezitaina mugasho ozileke; nomanya okwo zizarukanwamu enkungana. ²⁴ Mara omukozi wa Ruhanga naragirwa kutaba muntu wa nkungana. Agilire buli muntu obufura, abe mwegesa ayolekeize, abe mwegumisiliza, ²⁵ n’abalikumuhakanisa abahabuze n’obuchulezi. Rundi Ruhanga yakusinga baija bechuza bamanya amazima, ²⁶ bahunga aha mutego gwa Sitani ayabaire abazimatiire, babone kukora ebyo Ruhanga ayenda.

¹ Oramanya okwo omu biro by’amaheleruka halibaho amakiro g’enaku. ² Abantu balyeyenda, bagonze empiya, bagire eikuru, eisinini, babe njumangani, tibalihulira bazaire, baburwe esiimi, babe bantu babi, ³ bekoze ebitali bya buntu, kutonganwaho bakanga kugarulira, babeiyelerangane, tibalyebalira, babe nshanshame, banobe akarungi, ⁴ baliba ndyalya, barakoraga ebintu nibabiita, eitulikizi libaite, baligonza ebinuzi by’ensi kushaaga okugonza Ruhanga, ⁵ balimanya edini kyonkai bange eby’eyegesa. Abantu nk’abo obelinde. ⁶ Enshonga omuli bonene abo halimu abalikushoobera omu maju ga banu, bakahamba abakazi abalikworoba omutima, abafakare ab’emize elikukiza amaani, ⁷ abakazi abalikuhuliliza buli mwegesa, kyonkai agamanya amazima tibainago. ⁸ Nk’okwo na Yane na Yambure bahakanisize Musa, nikwo n’abantu aba balikwanga amazima; bantu abafire amagezi, n’okwikiliza kwabo kw’obugobya. ⁹ Kandi tibalikwija kugoba harai muno, kuba buli omoi naija kubona okwo bali bafera nka Yane na Yambure. ¹⁰ Mbwenu iwe oboine kurungi emyegesheze yange, emigilire yange, ekyo nyitanira omu burora bwange, okwesiga kwange, okwegumisiliza kwange, engonzi zange, okutatantalikwa kwange, ¹¹ okugingizibwa kwange, obushasi bwange, agambaireho Antiokia, Ikonio na Lisitira, n’okugingizibwa okwo nayemeire. Kyonkai Omukama akanyihura kurungi nabirabamu byona. ¹² Omu mazima bona abalikugonza Ruhanga omu burora bwabo bajwangaine na Yesu Kirisito baragingizibwaga, ¹³ kandi abantu ababi, engobya, barabaga babi kushaagaho, barabeiyaga banu, kandi na bonene barabeiywaga. ¹⁴ Kyonkai iwe ogendelere kukwata ebyo wamanyire mara okaikiliza limoi limoi, nomanya owo wabyegeireho, ¹⁵ n’okwo kwema buto bwawe otura nomanya Ebihandiko Bitakatifu ebilikukushoboza kurokoka aha rw’okwesiga kwawe ojwangaine na Yesu Kirisito. ¹⁶ Ebihandiiko Bitakatifu byona bikakyanurwa Ruhanga, mara nibigasha aha kwegesa, n’aha kuhana banu, kubahabura, n’okubegesa okuba bagorogoki, ¹⁷ omuntu wa Ruhanga ashobore kuba mugorogoki, ayetegekire kukora buli mulimo ogurungi.

¹ Ninkuragira nkutaireho Ruhanga na Yesu Kirisito aliramura abalikurora n’abafire, ninkutaho n’okugarukakwe n’engomaye: ² Orange ekigambo, obe mwangu omu kirumo n’orwo kitali kirumo, ohane, otaise, kandi otemu abantu ekihika, mara oyegumisilize n’okwegesa obutalemwa. ³ Obukiro bulija orwo abantu batalikunda bilikwegesibwa eby’amazima. Amatwi gabo galyagayaga. Balihiga abeegesa ababo abatali bake abalibagambira ebyo bonene balikwenda. ⁴ Balisigiilira okuhulira amazima n’ebitangazo bahwere omu bigano. ⁵ Kyonkai iwe oikare ogumire, oyemere obushasi, okore omulimo gw’omurangi w’evangeli, ogobesheleze kurungi oburagirwa bwawe. ⁶ Inye n’orwo ndaba ndi w’okutambwa ekitambo nayetekatekire; akaanya kange kali haihi, naija kufa. ⁷ Ndashaine endashana nungi, okwiruka kwange nkumazire, mara kandi ngumire omu kwesiga. ⁸ Kityo natekatekeirwe orukinga rw’obugorogoki orwo Omukama, omuramuzi omugorogoki, alintunga aha kiro kiliinya eky’aliija, mara taliruntunga nyenkai, shana alirutunga na bona abatuura baramiliize k’agaruka. ⁹ Okore okw’olikushobora ongobe bwangu. ¹⁰ Ahakuba Dema agondize ensi egi elikwija kuhwaho, yansiga yagya Tesalonika. Kereshensi ogwo agiire Galasia, kandi Tito yagya Dalumasia. ¹¹ Luka wenkai niwe tuli hamoi. Ompiigire Mariko omundetere, kuba nagasha muno, nanjuna. ¹² Tikiko ogwo mutumire Efeso. ¹³ Orwo oragya kwija onyizire n’ebebo eyo nasigiire Karipo omu kigo kya Toroa. Oshube ondetere n’ebitabo, omuno muno ondetere ebitabo eby’empu! ¹⁴ Alekisanda omuhesi w’omulinga ogwo akankora kubi muno; Omukama alimurongora ebikorwabye ebyo. ¹⁵ Na iwe oramwelinda, ahakuba ebyo twayegesize akabyanga. ¹⁶ Orwo nabandize kwerabira taliho muntu yagweleire wange; bona bakannagirana. Omukama alikasinga atalibakwata mushango! ¹⁷ Kyonkai Omukama akandabira, yantunga n’amani g’okuranga evangeli ntalikutina, Abanyamahanga bashobore kuhulira evangeli egyo. Kityo akandokora omu kanwa k’entare. ¹⁸ Nikwo alinyihya omu kabi kona kona, akashuba akandokora akantaahya omu bukamabwe obw’omw’iguru. Ekitiinwa kibe kya wenene eira lyona. Amina. ¹⁹ Onshulire Purisika na Akila n’eka ya Onesiforo. ²⁰ Erasito ogwo akasigara Korinto; Tirofimo nkamusiga Mileto arwaire. ²¹ Okore okwo olikushobora kwija ekirumo ky’embeho kitakabandize. Eubulo nakukeisa hamoi na Pudensi, Linusi, Kalaudio na barumuna baitu bona. ²² Omukama abe naiwe. Omugisha gwa Ruhanga gube nainywe.