2 ABATESALONIKA

¹ Inye Paulo, Silivano na Timotheo, nituhandikira ab’enteko y’Abatesalonika tujwangaine na Ruhanga Isheichwe n’Omukama waitu Yesu Kirisito. ² Ruhanga Isheichwe n’Omukama Yesu Kirisito babatunge omugisha n’emilembe. ³ Barumuna bange nituragirwa kubasiimira Ruhanga buli kanya, nk’okwo kisaine, nimweyongera muno omu kwesiga, mara kandi buli omoi nayeyongera kugonza mutahiwe. ⁴ Kityo nitubebuga omu nteko za Ruhanga kubona okwo mugumire mara mwaikara n’okwesiga kwanyu omu kugingizibwa kwanyu n’omu naku zanyu zona mara nimubyemera. ⁵ Aka kabonero okwo eiramu lya Ruhanga ly’amazima mara ekyo nikyo kilibasanisa obukamabwe obwo mulikushasira. ⁶ Ruhanga nabona okwo kisaine kubonabonyia abalikubabonesa enaku, ⁷ kandi inywe abalikushasha abatunge hamoi naichwe emilembe orwo Omukama Yesu aliruga omw’iguru n’abamalaikabe ab’amani omu ndimi z’omuliro. ⁸ Abamalaika abo balibonabonyia abantu abatamanya Ruhanga, abatahulira vangeli y’Omukama waitu Yesu. ⁹ Balishasha eirai lyona tibalirokoka, tibalibona na buso bwa Mukama, n’ekitinwakye eky’amani tibalikitungwa, ¹⁰ orwo alija kiro kilinya abatakatifube kumuha ekitinwa, abakamwesigire bona bamutangaliire, kuba ebyo twabagambiire mukabiikiliza. ¹¹ Ebi nibyo twikara nitubashabira kamubona. Nitushaba Ruhanga waitu asinge abasaanise oburora obwo yabeteire. Omu bushoborabwe asinge agobesheleze emigendelero yanyu y’okukora ebili birungi kandi n’omulimo gwanyu gw’okwesiga nagwo agugobesheleze. ¹² Kityo eibara ly’Omukama waitu Yesu Kirisito libone kuhaisilizibwa omuli inywe, nainywe muhaisilizibwe omuli wenene kuhondera ekisha kya Ruhanga waitu n’Omukama Yesu Kirisito.

¹ Mbwenu aha bikwete okwija kw’Omukama waitu Yesu Kirisito n’okuhurura kwaitu kumwakilira, barumuna bange nitubatagiliza, ² emitima yanyu etagira bwangu kuyuguuma na kwechura. Okubonekerwa kwona kwona anga ekigambo anga ebarua, ebyo balikutekeleza ngu nibitabuka ahali ichwe, n’okugamba okwo ekiro ky’Omukama kili haihi, ebyo bitabaagaraza. ³ Omuntu atagira kwoyababeiya omu muhanda gwona gwona. Nobona ekiro ekyo tikilija; obushengi nibwo bulija mbere, omujeemi ataikiliza Mateka, niwe Musiliikya, amanyike. ⁴ Embanzi egyo negaya buli kintu ekyetwa ruhanga anga ekifukamirwa, nangu n’okugoba aha kushuntama omuli Rwensinga ya Ruhanga n’okweyeta Ruhanga. ⁵ Timulikwijuka okwo eki nakibagambire orwo twabaire tuli hamoi? ⁶ Mara nimumanya ebilikumutanga kuzoka n’orwo wenene yakugondize kuzoka, kyonkai arazoka orwo akanyake karagoba. ⁷ Ekyebisho ky’omujemi ataikiliza Mateka omulimo gwakyo. Alikutanga eky’ebisho ekyo naragirwa arugeho, kuba niwe akyakitangire. ⁸ Aho omujeemi ogwo ataikiliza Mateka alizoka, alimwisa orwoya rw’omukanwa, amwise okwengelera kwa wenene orwo aliija. ⁹ Omujemi ogwo ataikiliza Mateka ogwo aliija ayemirwemu Sitani, akore ebitangazo ebitali bimoi n’eby’amani, kyonkai byona bili bishuba. ¹⁰ Aligira n’ebishuba eby’engeli zona. Ebishuba ebyo biliisa ab’okusilika bona, kuba bakanga amazima agakubarokoire, bagatamwa. ¹¹ Niyo nshonga Ruhanga nabaha okwikiliza ebishuba bingi, ¹² ahonu bona abatalikwikiliza mazima baramurwe, manyasi amafu nigo gabashemelera. ¹³ Ichwe, barumuna baitu abagonzibwa b’Omukama, turagiirwe kubasiimira Ruhanga, kuba akabaronka kwema obubere kamurokoka, orwo Mwoyo yabahindwire batakatifu, kandi mukaikiliza amazima. ¹⁴ Ebi nibyo yabeteire orwo twabarangiire evangeli mubone kutungwa ekitinwa ky’Omukama waitu Yesu Kirisito. ¹⁵ Kityonu barumuna bange, mugume mara mukwate n’emihelejanyio eyo twabegesize omu bigambo anga omu barua. ¹⁶ Mbwenu Omukama waitu Yesu Kirisito wenene, na Ruhanga Isheichwe, ayatugondize akatumaramara eirai lyona, akatuha n’eshubi nungi omu mani g’ekisha, ¹⁷ abe niwe amaramara emitima yanyu n’okubagumisa omuli buli mulimo gurungi n’okugamba ebili birungi.

¹ Eky’enzindo barumuna bange, mutushabire ekigambo ky’Omukama kirahuke kurandilira, kigire n’ekitinwa nk’okwo kyarandiliire n’okutinwa omuli inywe. ² Kandi naichwe mutushabire tukire aha bantu babi abanyarwango, kuba ti bantu bona abalikwikiliza. ³ Kyonkai Omukama aba mwesigwa. Arabagumisa mara abaihure aha mubi. ⁴ Nitwesiga Omukama okwo arabajuna, kandi nitumanya okwo ebyo twabaragiire mulikubikora mara mugendelere mutyo. ⁵ Omukama asinge abahe emitima y’okugonza Ruhanga n’okuguma ahali Kirisito. ⁶ Mbwenu barumuna baitu, nitubaragira omw’ibara ly’Omukama waitu Yesu Kirisito, kweshorora na kaishe mukirisito omunafu, atalikukwata muhelejanyio ogwo twabahaire. ⁷ Inywe nywenene nimumanya okwo muragiirwe kuturondora. Orwo twabaire tuli hamoi nainywe titwanafaraga. ⁸ Titwaliire mukate gwa muntu tutagushashwire. Tukafa twayosha kiro na mushana, tutaija tukaba rusampekire ahali wena wena omuli inywe. ⁹ Tikwo kugir’oti tukaba tutasaine kamutuliisa. Tukagira tutyo kubaha obulebero obwo murahondera. ¹⁰ Aha rw’enshonga n’orwo twabaire tuli bamoi nainywe, tukabaragira tuti: K’omuntu araba atakozire milimo, atalya. ¹¹ Nobona twahuliire okwo abandi omuli inywe balikunafara, bali aho kushai, tibalikukora milimo. ¹² Abantu nk’aba nitubaragira mara nitubashaba tubataireho Omukama Yesu Kirisito bakore emilimo yabo omu buchulezi mara behigire ebirabatunga. ¹³ Barumuna bange, okukora kurungi kutabaira. ¹⁴ K’omuntu wena wena alikwanga kuhulira ebyo tulikugamba omu barua egi, ogwo muramwekomya mara mumuleke aije ashonare. ¹⁵ Mutamubona nka mubisha, ekiliho mumuhane bundi murumuna wanyu. ¹⁶ Omukama w’emilembe wenene asinge abatunge emilembe ebiro byona mara omu ngeli yona yona. Abe nainywe inywena. ¹⁷ Inye Paulo, ebishuuro ebi n’inye ndikubyehandikira. Aka niko kabonero ka buli barua yange, niyo mihandikire yange. ¹⁸ Omugisha gw’Omukama waitu Yesu Kirisito gube nainywe inywena.