2 PETERO

¹ Inye Simoni Petero, omwiru mara entumwa ya Yesu Kirisito, nimpandikira abaina okwikiliza nk’okwaitu okutalikuyuga omu kurondora Ruhanga waitu kandi Omurokozi waitu Yesu Kirisito. ² Ekisha n’emilembe byeyongere omuli inywe omu kumanya Ruhanga na Yesu Omukama waitu. ³ Ruhanga, amanige nka Ruhanga gakatutunga buli kamoi kona tushobore kugir’oburora n’omutima gw’okumugonza orwo twamazire kumanya Yesu Kirisito ayatwesire katugira ekitinwa ekihango muno nk’ekya wenene. ⁴ Omuli ebyo akatushuubiza ebirungi, mara ebirungi nyakabara eby’eiguzi lihango muno. Omu kuhaba ebyo mushobore kurondora Ruhanga, nimwelinda buli ntambara omu nsi omu ezilikuzarukana omu bunyama. ⁵ Aha rw’enshonga egyo mutemu amani gangi, aha rw’okwesiga kwanyu mugire entwaza ezishemeire, entwaza ezo zibashoboze okumanya Ruhanga. ⁶ Kamuramanya Ruhanga mwagira okwebalira, okwebalira kubagobye aha kutayuga, okutayuga kubashoboze okugonza Ruhanga. ⁷ Kamuragonza Ruhanga muragonzangana bundi barumuna, mara aho muraguma omu ngonzi. ⁸ Kamuragira engesho ezo mara zikeyongera kugira amani omuli inywe, zirabashoboza kukora ebigoshokire, mwije mubone kumanya kurungi Omukama waitu Yesu Kirisito. ⁹ Kaishe muntu wena ataina ngesho ezi ogwo mpume mara taina gabona harai, kandi yayebirwe okwo yagaruliirwe entambaraze eza karai. ¹⁰ Kityo barumuna bange, muteho amani agashaagireho kuguma omu mweto gwanyu ogwo mwaronkeirwe, aha r’okuba kamuragira mutyo timuligwa n’akati. ¹¹ Aho Ruhanga alibasingira mutahe omu bukama bw’eirai lyona obw’Omukama waitu mara Omurokozi Yesu Kirisito. ¹² Nikyo nyendera kubaijukya obutosha ebigambo ebi, n’orwo muraba nimubimanya n’amazima ago mulikumanya mwagagumireho. ¹³ Nintekeleza nti, orwo nkyali omw’ihema eli, mbaijukye mbatengatengyemu. ¹⁴ Kuba nimanya okwo eihema lyange nkwatiliire kulirugamu, nikwo Omukama Yesu Kirisito anyolekire. ¹⁵ Ndalenga okwo ndikushobora kamushobora kwijuka ebigambo ebi n’orwo ndaba nagenzire. ¹⁶ Tukabamanyisa okwo Omukama waitu Yesu Kirisito aba w’amani n’okwo aligaruka. Tikugir’oti tukaba nitubaganira ebigano by’okuhilimya, shana ichwe chwenene tukebonera ekitinwakye eky’obukama. ¹⁷ Nobona Ruhanga Isheichwe akamutunga ekitinwa n’obukuru, n’eiraka lyamugobire omu kitinwa ekilikukira byona, niligamba liti, «Ogu niwe Mwana wange omugonzibwa owo nshemelerwa muno.» ¹⁸ Eiraka eli tukalihulira niliruga omw’iguru, kuba tukashangwa aha ibanga litakatifu. ¹⁹ Kityo eky’abarangi bagambire nitukigumaho. Nainywe muraba mukozirege kamurakyetaho, manyasi nikishusha etara elikwaka omu mwilima, kuhika orw’obwire bulitaishukana n’enyanyinyi y’obwankya ekaaka omu mitima yanyu. ²⁰ Mubanze mumanye ekigambo eki: Okwo hataliho kigambo kya murangi omu Bihandiko Bitakatifu eky’omuntu yakufa yashoborora okwo wenene yayenda. ²¹ Eby’abarangi barangire tibyayemaga muli bonene kushai. Ebyo bagambaga byarugaga ahali Ruhanga nibasindikwa Mwoyo Mutakatifu.

¹ Omu bantu habagamu abarangi b’ebishuba, nk’okwo nainywe omuli inywe halikwija kubamu abegesa b’ebishuba, abalikwija kubatahyamu okwegesa okuhabire mutamanyire kukabaita, nangu betonge na Mukama wabo ayabachungwire, beletere okusilika omu kibwangu. ² Bangi baraikara omu by’obujanga, mara bonene abo barajumisa Omuhanda gw’Amazima. ³ Aha rw’enshonga y’omururu barabagambira ebishuba babone kubaihyaho amagoba. Omuraamo gwabo ogwa karai tiguligwayo, kandi tibaliburwa kusilika. ⁴ Abamalaika abafakaire, Ruhanga tiyabaganyiire. Akabanaga omu muliro ogutalihwaho, yabakomerana omu biina by’omwilima, kwikara omwo balindiliire kuramurwa. ⁵ Ensi ey’obunyakarai nayo tiyagiganyiire, shana akahungya Noa ayabaire ali mugorogoki wa mbere n’abantu abandi mushanju, orwo yalesire omutunga omu nsi kwita abafakare. ⁶ Ebigo bya Sodoma na Gomora akabyokya, yabaita yabamaramu, baba bulebero bw’abalifakara ahanyuma. ⁷ Akakiza Loti omugorogoki, ayabaire yashobeirwe aha rw’emichwo mibi y’abasiyani ⁸ (enshonga Loti ogu omugorogoki akaba abatwiremu nabona mara nahulira ebyo bakoraga, amafu gabo gamushasa buli kiro aha rw’obugorogokibwe). ⁹ Ahonu Omukama namanya emirokolere eyo ararokora abamutina akabaihya omu biyengo, kandi abatali bagorogoki akababonabonyia kuhika aha kiro ky’eiramu, ¹⁰ nangu obungi bwa muno balinya abatwarwa obunyama bakagaya abatwazi. ¹¹ Kandi okwo abamalaika, balikaba baina amani n’obushobora kubashaaga, tibaramura begesa aba omu maisho ga Ruhanga, n’okubajuma tibabajuma. ¹² Bonene bali aho nibashusha ebigunju ebitagira magezi, ebitondwa ebilikutwarwa obuhangwa kushai, bizalirwa okutegwa n’okwitwa. Nibajamya ebyo batalikumanya; baleke balifa nk’ebigunju ebyo, ¹³ enaku ezo babonesize banu nabo nizo balibona. Nibabona kili ky’ebyera omushana gwona kusiiba omu mayaga. Bantu abaina akamosho n’akamogo n’orwo mulikusiiba nabo omu mayaga. ¹⁴ Obusiyani bubaijwire omu maisho, kandi n’entambara tizilikubaira. Niboohya abaina emitima etagumire, kandi bakamanyiira omururu. Bakaraamwa! ¹⁵ Basigire omuhanda bahaba. Bahondeire omuhanda gwa Balaamu eya Beori ayabonaga amafu gainamu amagoba, ¹⁶ kyonkai gakamurugirwamu akabi. Endogobe etagamba ekagamba nk’omuntu, eiraru ly’omurangi yalitera aha mutwe. ¹⁷ Abegesa aba b’ebishuba nibashusha enchuro zitaina maizi n’oruho oruhuutwa omuyaga. Balindiliire okunagwa omu mwilima elindindi. ¹⁸ Bagambira eiguru ebigambo by’okwetutumura ebitaina mugasho, boohya abantu ababa bairukire abatuura bagwire, nibabalembesa amairu g’obunyama. ¹⁹ Babashuubiza obwegeleere, kandi okwo bonene bairu b’obujunde; manyasi omuntu aba mwiru w’ayamusingire. ²⁰ Abantu abashangwa bakizire aha bihagaro by’ensi aha rw’okumanya Omukama mara Omurokozi waitu Yesu Kirisito, kabashuba kwetahya omu bihagaro ebyo, baija babikwatiramu mara bibakiza amani, ahonu baba kubi kushaaga okwo babaire bali orwa mbere. ²¹ Kyakubaire kirungi kushaaga ahali bonene kabatakumanyire muhanda gwa kubahindura bagorogoki, kushaaga okushangwa bagumanyire bakanagaho omuhango ogutakatifu ogwo bahairwe. ²² Babaire nk’okwo omugani gulikugamba amazima, guti, «Embwa eyegarukana entanaki yayo, n’empunu k’emara kwogibwa eshuba eyekurunga omu byondo.»

¹ Abagonzibwa, egi nabahandikira ebarua ya kabili. Ekyo ngendeleire omu barua ezo zombili ni kubasisiimura emitima yanyu etainamu bulyalya, aho nimbaijukya, ² mwijuke eby’entumwa zabagambiire, eby’abarangi abatakatifu barangire hamoi n’omuhango gw’Omukama mara Omurokozi. ³ Mubanze mumanye okwo omu biro by’amaheleruka aliija abasheki nibaruura, nibasindikwa obunyama bwabo ⁴ nibagamba bati, «Kayaragaine kwija mbwenu abahai? Manya kwema batat’enkurw’ichwe bafiire, ebintu bitura okwo bikali kwema ensi etonzirwe.» ⁵ Nibanga amazima muze mumanye okwo eirai Ruhanga yahangire, eiguru likabaho. Ensi ekaruga omu maizi mara nimwo yarabire. ⁶ Kandi aha kigambo kya Ruhanga ensi eyabaire eliho ekamirwa omutunga gw’amaizi, yahwaho. ⁷ Kyonkai eiguru n’ensi ebiliho mwaha, aha kigambo ekyo kyonene, bikaziibweho kulemwa kugoba aha kiro ky’eiramu orwo abantu abatatina Ruhanga balisilikibwa. ⁸ Abagonzibwa, mutalyanga mazima aga, okwo ahali Mukama ekiro kimoi nikiigana emyaka 1,000, n’emyaka 1,000 neigana ekiro kimoi. ⁹ Ekyo Omukama yaragaine takikelereize, nk’okwo abandi balikulenga. Ekiliho wenene ayegumisiliize inywe, enshonga talikwenda muntu wena wena k’afa kubi. Nagonza abantu bona bechuze. ¹⁰ Ekiro ekyo Omukama aliiziraho kiliija nk’omushuma. Eiguru lilihwaho nilihinda muno; enyanyinyi, eizoba, n’okwezi bilisosotorwa omuliro, kandi ensi n’ebikagilimu byona bilihya nabyo bihweho. ¹¹ Ebi byona kabiraba bili by’okuhwaho bityo, mulebe okwo mulikuragirwa kuba batakatifu mara abalikutina Ruhanga omu ntwaza zanyu, ¹² mulindiliire ekiro ekyo Omukama aliiziraho mara nimuramiliza ekiro ekyo kya Ruhanga kakigoba. Aha kir’ekyo eiguru lilihya lihweho, kandi enyanyinyi, okwezi, eizoba n’ebindi nk’ebyo bilisosotorwa omuliro. ¹³ Kuhondera okwo yaturaganisize ichwe tulindiliire eiguru elihya n’ensi empya mbali obugorogoki butura. ¹⁴ Aha rw’ekyo bagonzibwa, orwo mutegeleize ebyo, mutemu amani abashange mutaina kamogo anga katalizi, mara mwina emilembe. ¹⁵ Mumanye okwo obwegumisiliza bw’Omukama waitu nikwo kurokoka kwaitu. Nikwo na murumuna waitu omugonzibwa Paulo, yabahandikiire kuhondera obumanyibwe obwo yatungirwe; ¹⁶ omu baruaze zona nikwo alikugamba atyo. Omu barua ezo halimu ebigambo ebindi ebilikuguma kushoboka, eby’abafera n’abalikuyugayuga bahindura kweletera okusilika, nk’okwo bagira ebihandiko ebindi. ¹⁷ Aha rw’ekyo nainywe bagonzibwa, nk’okwo amakuru ago mushangirwe nimugamanya kwema karai mwelinde, obuhabe bw’abantu babi butakubahabisa mukaruga mbali mukwatire. ¹⁸ Mweyongere kugira ekisha n’okumanya Omukama mara Omurokozi waitu Yesu Kirisito. Ekitiinwa kibe kya wenene mbwenu n’eirai lyona. Amina.