2 ABAKORINTO

¹ Inye Paulo, owo Ruhanga yagondize kamba ntumwa ya Yesu Kirisito, hamoi na Timotheo murumuna waitu, nitubahandikira inywe ab’enteko ya Ruhanga eya Korinto, hamoi n’abakirisito ba Akaya yona: ² Ruhanga Isheichwe n’Omukama Yesu Kirisito babagilire ekisha babatunge n’emilembe. ³ Agingizibwe Ruhanga mara Ishe Omukama waitu Yesu Kirisito, Isheichwe omuganyizi mara omujuni omuli byona. ⁴ N’iwe atuhumuliza omu naku zona, tubone kuhumuliza abaina enaku zona zona, tubahumulize nk’okwo ichwe chwenene Ruhanga atuhumuliza. ⁵ Nk’okwo tulikushasha muno na Kirisito, nikwo tulikumara marwa tujwangaine na Kirisito wenene. ⁶ Katulikubona enaku, nituzibona kamubona kumaramarwa n’okurokoka. Katulikumaramarwa, nitumaramarwa kamumaramarwa, nk’okwo mulikwebonera orwo mulikushasha nimwegumisiliza nk’okwo ichwe chwenene tulikushasha. ⁷ Ichwe twina eshubi etalikuyuga. Aha rw’okuba nitumanya okwo orwo mulikushasha naichwe, nikwo mulimaramarwa hamoi naichwe. ⁸ Barumuna bange, nitugonza kubamanyisa enaku ezo twaboine Asia. Tukabona enaku ezitali za kugambwa, twayejuma n’omwoyo. ⁹ Tukehulira oti baturamwire kutwasha; kyonkai enaku ezo zikaba zili z’okutwegesa tutesiga mani gaitu, shana kwesiga Ruhanga ahimbura abafu. ¹⁰ Akaturokora aha ndebekelero y’orufu; mara aliturokora; twina eshubi omuli wenene okwo alishuba akaturokore. ¹¹ Na inywe nimuragirwa kutujunisa enshara nirwo Ruhanga arahulira enshara zitali zike ezo mulikutushabira kumusiimira omugisha ogwo tulikutungwa; omu kututunga atyo naba nahorora enshara zingi. ¹² Nitwebuga tuti: Omu mitima yaitu okwo oburora bwaitu omu nsi omu, okukiraho omuli inywe, bubaire buli burora nyakatetere obwo twatungirwe Ruhanga omu mani g’ekishakye, gatali mani ga bumanyi bwa bantu. ¹³ Nitubahandikira ebyo murashobora kushoma mukashobokerwa. Ninshubira murashobokerwa bunyanungi, ¹⁴ nk’okwo mwashobokeirweho kake, mwije mutwebuge nk’okwo ichwe twakwebuga inywe aha kiro ky’Omukama waitu Yesu. ¹⁵ Eki mbaire ninkimanyage, niyo nshonga mbaire ningonza kubandiza owanyu kamushemelerwa kushagaho. ¹⁶ Mbaire ningonza kubagobaho orwo ndikugya Masedonia, nkashuba nkagaruka okwo orwo ndikurugayo, mukashuba mukambonera eby’okugenda nabyo Buyahudi. ¹⁷ Isi orwo nabaire nintekeleza nti nkaba nimpindukana? Nintegeka nk’omuntu wensi, kugamba «Ego» na «Chei» omu kanya kamoi? ¹⁸ Obuso bwa Ruhanga omunyamazima, tukaba tutalikuhindukana omu byo twabagambiire. ¹⁹ Yesu Kirisito Omwana wa Ruhanga, owo Silivano na Timotheo nanye twabarangiire akaba atalikuhinduka aha rulimi. Buli kanya yagambaga ekili ky’amazima. ²⁰ Nobona byona ebyo Ruhanga yaragaine, wenene n’iwe abigobesheleza. Niyo nshonga omu bushobora bwa wenene nitushobora kugamba tuti, «Amina» kuhaisiliza Ruhanga. ²¹ Kyonkai Ruhanga n’iwe alikutujwanganisa na inywe omuli Kirisito: Akatukora amajuta, ²² yatutaho omuhurigwe, yatuha Mwoyo, n’iwe mukwato omu mitima yaitu. ²³ Ninjuliza Ruhanga, n’iwe alikumanya omutima gwange! Okutaija Korinto nkagendelera kubaganyira inywe. ²⁴ Titulikubakaka kamwesiga; nitumanya okwo mugumire omu kwesiga. Ekiliho nituchwazikana na inywe kubaha ebyera, kuba omu kwesiga kwanyu mugumire.

¹ Kityo mboine ntaija okwo rundi kubashasa. ² Aha rw’okuba kandabashasa, arampa ebyera n’ohai k’atali ogwo owo nashasa? ³ Niyo nshonga nkabahandikira ebarua elinya. Nkabona ntaija wanyu abakumpaire ebyera bakaba nibo banshasa. ⁴ Nkabahandikira obujune bundi kubi, nindira ningashaima. Tindikugendelera kubashasa, shana ningonza kubamanyisa obungi bw’engonzi ezo ndikubagonza. ⁵ K’omuntu araba akozire eky’okushasa banu, tashasize inye nyenkai. Ntatairemu gungi nakugamba nti na inywe abashasize inywena. ⁶ Omuntu nk’ogwo ekibonabonyio eky’abangi bamuhaire nikimumara. ⁷ Kityo mugwelere mumuganyire mara mumumaramare, kitali kityo obujune bwakushagulirana bumukiza amani. ⁸ Nimbatagiliza mumwoleke okwo inywe mulikumugonza. ⁹ Orwo nabahandikiire ebarua elinya, nkaba ningonza kubalenga kumanya nk’ebyo ndikubaragira byona nimumpulira. ¹⁰ Wena wena owo mulikugarulira, nanye kwakwo nimugarulira. Ebyo ngarulire, kaharaba haliyo ekyo ngarulire kyona kyona, mbilekire aha rwanyu omu mabona ga Kirisito ¹¹ kutanga Sitani ataija akatwihyaho magoba, ahakuba emitegoye nitugimanya. ¹² Orwo nagobire Toroasi kuranga evangeli ya Kirisito, Omukama yantunga akashango; ¹³ kyonkai omwoyo gumbarabata aha rw’okutashangayo murumuna wange Tito. Kityo aho nirwo nabasigireho nkegendera Masedonia. ¹⁴ Kyonkai Ruhanga nakasinge. Tujwangaine na Kirisito n’iwe atuha amani g’okusinga endashana. Atuha okurandisiliza Kirisito buli hantu okw’obona akataachu. ¹⁵ Nobona ichwe nitushusha obunuma obulikununukage obwo Kirisito ahongera Ruhanga bukagoba abalikwesiga n’abalikwanga kwikiliza. ¹⁶ Abalikwanga kwikiliza nibaitwa ekijunde ekilikunuka chuchuchu; kyonkai abalikwesiga, akataachu niko kalikubaha oburora. Mbwenu aho n’ohai alikwemera omwoga nk’ogu? ¹⁷ Titulikushusha bantu bandi abali bangi, abalikutundurana ekigambo kya Ruhanga. Ruhanga ayatutumire n’iwe mujulizi waitu okwo tuli bairu ba Kirisito abalikugamba amazima.

¹ Isi nitushuba kweshalingya? Anga nk’okwo abandi bagira, nitwetaaga kubaha inywe ebarua z’okubasiima, anga inywe kuziha ichwe? ² Inywe nywenene n’inywe barua yaitu y’okutusiima, ehandikirwe aha mitima yaitu, abantu bona bagimanye bagishome. ³ Inywe muli barua eyo Kirisito yahandikiire akatutweka. Tehandikisiibwe bwino, ehandikisize Mwoyo wa Ruhanga asingire. Tehandikire aha mbengo za mabare, emitima y’abantu nizo mbengo ezo ehandikireho. ⁴ Oku nikwo kwesiga okwo tulikwesiga Ruhanga omuli Kirisito. ⁵ Ichwe titwina kyotwakwesiimira kugira tuti omulimo ogu nitugushobora. Obushobora obwo twinabwo niburuga ahali Ruhanga, ⁶ ayatuhindwire bakozi b’endagano empya, etali ya Mateka agahandikire shana ehandikire omuli Mwoyo. Amateka agahandikire gaita, kyonkai Mwoyo agiza oburora. ⁷ Amateka agaita, agahandikire aha mbengo z’amabare, garaba gabaire gaina ekitinwa, Abaisiraeli bakalemwa kuleba Musa omu buso aha rw’enshonga y’omwengelero gw’Amateka ago, ⁸ aho Mwoyo agiza oburora tazoke omu kitinwa ekishagireho? ⁹ Kokukoza eiramu kuraba kwarugirwemu ekitinwa; aho okukoza obugorogoki tikulikugiza kitinwa ekishagireho! ¹⁰ Mazima okwo bili, ebyagiraga ekitinwa tibikiina kitinwa aha rw’enshonga y’ekitinwa ekilikukira ekitinwa kilinya. ¹¹ Manyasi ebyahoireho kabiraba bikaba bina ekitinwa, aho ekitali kya kuhwaho nikiragirwa kugira ekitinwa ekishagireho. ¹² Aha rw’okuba twina eshubi nk’egi, nitumaza muno. ¹³ Titulikushusha Musa ayayebunzire ekihundwi aha maisho ngu Abaisiraeli bataija bakabona omwengelero niguhwaho. ¹⁴ Kyonkai bonene bakagumangana emitima. Na mambwenu, orwo bakashoma endagano ey’eira, ekihundwi kyonene kyonene tibakihyaho, enshonga tikiina kwo kyakurugaho shana omu bushobora bwa Kirisito. ¹⁵ Na kir’eki orwo bakashoma Amateka ga Musa, ekihundwi kiikara kibabunzire emitima. ¹⁶ Kyonkai orwo omuntu akagaruka aha Mukama ekihundwi kimurugaho. ¹⁷ Mbwenu Omukama wenene n’iwe Mwoyo, kandi mbali Mwoyo wa Mukama asingiire, niho n’obwegeleere buli. ¹⁸ Ahonu ichwena nitushusha Omukama w’ekitinwa n’orwo ekihundwi kituli aha maisho. Ekitinwa kyonene kyonene ekilikutabuka aha Mukama, Mukama n’iwe Mwoyo, nikituhindura nikitushushanisa nawe omu kitinwa ekishagireho.

¹ Ruhanga akatuganyira yatukwasa omuruka ogu katugukora, kityo titulikunanukwa. ² Eby’enshoni twabilekeire, eby’okugobeza banu titulikubyenda, nangu n’okuhindurana ekigambo kya Ruhanga. Kyonkai amazima nitugagamba orubona, buli muntu ashobore kutusiima ebyo tulikukora omu maisho ga Ruhanga. ³ Nangu n’orwo evangeli yaitu eraba etalikushoboka, telikushoboka omuli balinya bonkai abalikusilika. ⁴ Abalikusilika abo, bahumisiibwe ruhanga w’ensi egi omu mitima yabo, batashamulirwa vangeli y’ekitinwa kya Kirisito, enshusho ya Ruhanga. ⁵ Titulikweranga ichwe, nituranga okwo Kirisito aba Mukama, kandi ichwe tuli bakozi banyu aha rwa Yesu. ⁶ Manya Ruhanga n’iwe yagambire ati, «Omu mwilima harugwemu omushana gwake,» n’iwe wenene ayayakize omushana omu mitima yaitu kutumanyisa ekitinwa kya Ruhanga ekyo tumanyira ahali Kirisito. ⁷ Kyonkai eitunga eli tulibiikire omu bikwato by’eibumba, kwoleka okwo obushobora obushagulirane butaba bwaitu, buba bwa Ruhanga. ⁸ Twina enaku za buli ngeli, kyonkai titulikufa; twina amashoberwa kyonkai titulikufa mutima; ⁹ nitugingizibwa kyonkai titulikunagiranwa; nitubona ebiyengo kyonkai nitukira. ¹⁰ Nitushasha kugoba aha kufa nka Yesu, twije tubone kuhimbuka nka wenene. ¹¹ Orwo tukyarora tulebeleire kwitwa kuturwa Yesu, Yesu ogwo aije atunge emibili yaitu elikwija kufa oburora. ¹² Kityo ichwe nitufa, inywe nimugira oburora. ¹³ Kandi orwo tulikwikiliza nk’olinya ayahandikiire ati, «Ebyo naikiliize nibyo nagambire,» na ichwe kutyo nitwikiliza, mara nikwo tulikugamba, ¹⁴ nitumanya okwo na Ruhanga ayahimbwire Omukama Yesu alituhimbura na Yesu mara atutahye hamoi na inywe omu busingebwe. ¹⁵ Byona ebi n’aha bwanyu, nk’okwo abantu balikweyongera kubona ekisha babe nikwo bashaba n’esiimi ahali Ruhanga ow’ekitinwa. ¹⁶ Ichwe titulikufa mutima. N’orwo aha bubili tulikugenda nituhwaho, emyoyo yaitu egyo negendelera kugira amani agahya. ¹⁷ Nobona enaku za kanya aka ezitaina mbali zili nizija kutubonesa ekitinwa eky’eirai lyona ekitali kya kugambwa. ¹⁸ Kuba eshubi yaitu teli mu bintu ebilikuboneka; eshubi yaitu eli omu bintu ebitalikuboneka. Ebilikuboneka bihwaho, kyonkai ebitalikuboneka ebyo biba by’eira lyona.

¹ Nitumanya okwo eihema eli elyo tulikuturamu omu nsi kalilimara kukambuka, Ruhanga alitwombekera enju, enju ey’eirai lyona omw’iguru, etayombekirwe mikono. ² Mazima kunu omu nsi tuliho nitwanja, nituramiiliza kugya omu buturo obw’omw’iguru, ³ tugye omu buturo obwo, tutalija tukashusha abatajwete. ⁴ Orwo tukyali omw’ihema eli nitwanja aha rw’enshonga y’enaku, ti kugir’oti nitwenda kufa, chei, nitwenda kuba batakatifu, nirwo emibili yaitu elitungwa oburora obutalihwaho. ⁵ Ruhanga n’iwe alikututekatekera oburora obu, natuha na Mwoyowe kutumanyisa okwo aina ebyo atubikiire. ⁶ Nikwo tulikwikara tugizire obwesige. Nitumanya okwo orwo tulikuhondera amairu g’omubili nituba tutaishukaine n’Omukama, ⁷ aha rw’okuba nitukora ebyo tulikwikiliza, bitali byotulikubona. ⁸ Nitwikara tugumire, nitubona hakili kujwangana n’Omukama kushaga okuhondera amairu g’omubili. ⁹ Kityo tulikarora anga tulikafa, ekyo tulikwitanira ni kumushemeleza. ¹⁰ Nobona tuliragirwa kwemelera omu maisho g’enketo ya Kirisito k’aturamura, buli muntu abone erongoro anga ashendwe, kuhondera ebyo alishangwa akozire omu burorabwe. ¹¹ Ahakuba nitutina Omukama, nikyo tulikwegeshelereza abantu. Ruhanga natumanya kabutekire, kandi ninshubira na inywe emitima yanyu ekyo nekimanya. ¹² Titulikugonza kushuba kuboleka okwo ichwe tuli bantu b’amazima, nitugonza kubaha obushango bw’okutwebuga, mubone kuhororangana n’abalikwesiga oburungi bw’omuntu obw’aha maisho, kandi oburungi bw’omutima obwo tibabuliho. ¹³ Katuraba tuli bararu, tuli bararu aha rwa Ruhanga; katuraba tutali bararu, tituli bararu tubone kujuna inywe. ¹⁴ Engonzi za Kirisito nizo zilikutubarabata, aha nitumanya okwo yafeleire abantu bona; aha rw’ekyo abantu bona bakafa nawe. ¹⁵ Mara Kirisito akafera abantu bona, balinya abakyarora babe batakikora ebyo bonene balikugonza, bakore ebyo wenene alikugonza, ogwo ayabafelekeleire akashuba akahimbuka aha rwabo. ¹⁶ Kityo titukiramura muntu wena wena omu mibonere y’abantu. N’orwo aha kanya nanka Kirisito tukamuramura tutyo, mbwenu titukiziza. ¹⁷ Orwo omuntu alikumara kujwangana na Kirisito aba kitondwa ekihya; okwo abaire ali orwa mbere ebyo bihwa, aba muntu ondijo. ¹⁸ Ebi byona nibikorwa Ruhanga ayatushoboize okulekera kumunoba mara akashuba akatukwasa omuruka gw’okushoboza n’abandi kulekera kumunoba. ¹⁹ Nikwo kugir’oti omuli Kirisito Ruhanga akashoboza ensi kulekera kumunoba obuzira kwijuka ntambara zabo yashuba naichwe yaturagira katugamba okwo agarulira abantu. ²⁰ Kityonu ichwe tuli babaka ba Kirisito, nitubahana aha mwanya gwa Ruhanga. Nitubatagiliza tubataireho Kirisito, mugaruke ahali Ruhanga. ²¹ Kirisito atamanyaga bufu Ruhanga akamuhindura mufakare aha rwaitu, kityo tujwangaine na Kirisito wenene, tushobore kuba bagorogoki ba Ruhanga.

¹ Ichwe abahwezi ba Ruhanga nitubatagiliza, ekishakye ekyo tulikubona kitabafera bushai. ² Ruhanga wenene nagamba ati, «Akanya kakagobire nkakuhuliliza, ekiro ky’okurokoka kakyagobire nkakurokora.» Leba akanya nik’aka; leba kir’eki nikyo kiro ky’obuchunguzi. ³ Titulikusitaza muntu, omulimo gwaitu gutaija gukagaywa. ⁴ Kyonkai omu byo tulikukora byona nitwoleka okwo tuli bakozi ba Ruhanga: Nitwegumisiliza omu naku, omu biyengo, omu byemba, ⁵ orwo tulikuterwa, orwo tulikufungwa, orwo tulikuhyokerwa, omu milimo y’ensika, orwo tulikuraara aha nkera, n’orwo tulikurumwa enjara; ⁶ omu bwera bw’omwoyo, omu bumanyi, omu bwegumisiliza, omu kugira obufura, omuli Mwoyo Mutakatifu, omu ngonzi ezigobeleire; ⁷ omu kugamba amazima, n’omu bushobora bwa Ruhanga; nitukoza ebikwato by’obugorogoki omu ndashana n’omu kwelinda; ⁸ orwo tulikukunirwa n’orwo tulikugaywa, tulikaitwa ibara anga tulikagambwa kurungi. ⁹ Twashusha abatalikumanyika, kandi okwo nitumanyika muno; twashusha oti tufire, kandi okwo niturora. N’orwo batubonabonyize tibatwisire. ¹⁰ N’orwo tuli bajune, buli kanya nitushemelerwa. N’orwo tuli banaku, abantu abandi nitubatungisa, nitushusha abataina kantu, kyonkai twina buli kantu. ¹¹ Inywe Bakorinto, katubagambire emitima tugishanshurwire. ¹² Ichwe titulikubafundagatanisa. Inywe n’inywe mulikwefundagatanisa. ¹³ Mbwenu nimbagambira nk’alikugambira abaana; na inywe kwakwo mushanshurure emitima. ¹⁴ Mutakumanyirana na batakansi. Obugorogoki n’omutima gubi bigendanwa? Omushana n’omwilima byakwikara hamoi? Beliali omu Ruyahudi ni Sitani omunyarwango. ¹⁵ Kirisito yakushobokerwangana atai na Beliali? ¹⁶ Rwensinga ya Ruhanga yakutahwangana etai n’ebihuuku? Ichwe tuli Rwensinga ya Ruhanga asingire; nk’okwo Ruhanga wenene yagambire ati, «Nditura nabo mara nyikare nabo, ndiba Ruhanga wabo, na bonene baliba ihanga lyange. ¹⁷ Aha rw’ekyo mubarugemu, mutaishukane nabo, alikugamba Mukama, mutalikwata kintu ekihagaire; ¹⁸ aho ndibanyegeza, na inywe mube baana bange; nikwo Omukama Rushoborabyona alikugamba.»

¹ Kityo bagonzibwa, orwo twashubiziibwe ebintu nk’ebi, twenyinye buli kahagare ak’omubili n’omwoyo, tutine Ruhanga, tube bagorogoki omu butakatifu. ² Mutukingulire emitima yanyu. Titukakoleraga muntu kubi; titukasitazaga muntu, anga kugobeza muntu. ³ Tindikugamba bigambo ebi kubakwata mushango, kuba ndabagambiire okwo mutwikara omu mwoyo, tufe hamoi, turore hamoi. ⁴ Nyina obwesige bungi omuli inywe; nimbebuga muno, ndige muno. Omu naku zaitu zona ebyera biraliire kunyita. ⁵ Katwagobire Masedonia, titwahumwire. Tukagwerwa enaku buli rubaju, aheru n’omunda: Baturwanisa twatina. ⁶ Kyonkai Ruhanga nyamuhumuliza abashobeirwe, akatumaramaza okwija kwa Tito, ⁷ tikwija kwa wenene kwonkai, kyonkai mpaho n’okumumaramara okwo mwamumaramazire. Nk’okwo mwangambiire okwo mwina orushusho rwange, okwo mujunaire, n’okwo mulikundwanilira, ebyo nabyo bikanyongera ebyera. ⁸ N’orwo ndaba nabashasize omu barua yange, tindikugyechuza (n’orwo nagyechulize). Nimbona okwo ebarua egyo yabashasizekwo, n’orwo etabashasize mwanya gurai. ⁹ Nk’okwo bili, inye ninshemelerwa, ti rwa nshonga ya inywe kushasha, kyonkai kubona mukashasha mwashuba mwayechuza; mukashasha mwagaruka ahali Ruhanga, aha rw’ekyo ichwe titwabashasize n’akake. ¹⁰ Okushasha mukagaruka ahali Ruhanga kurugwamu okwechuza; kandi okwechuza kurokora omuntu, mara omuntu takwechuza. Kyonkai obushasi obw’ekinyansi burugwamu orufu. ¹¹ Na inywe mulebe obushasi obubagarwire ahali Ruhanga okwo bubagilize ekihika, mwagira amani g’okweyoga entambara, mwatamwa okufakara, mwagira obutini, mwagira orushusho n’obujwahuki, n’okugonza kubona amazima nigahonderwa. Omu bigambo ebyo nimweyoleka okwo mutainamu ntambara. ¹² N’orwo kili kityo tinabahandikiire ngendeleire kujuna ayakozire kubi anga ayakoleirwe kubi. Nkahandika kakimanyikage ahali Ruhanga okwo mulikutugilira ekihika. ¹³ Ekyo na ichwe kikatutera ekihika. Titwateirwe kihika kwonkai; na Tito akatuha ebyera ebishagireho aha rw’okumukorage okwo mwamukozirege. ¹⁴ Nkabebuga ahali wenene, mara kandi na inywe timunkwese nshoni. Buli kanya tubagambira amazima, mara mwonene omwo ebyo twayebugire ahali Tito byazoka bili by’amazima. ¹⁵ Kityo na wenene yayeyongera kubagonza, k’alikwijuka okwo inywena mwayanguhire kwekomya ebyo yabegesize, n’okwo mwamunyegeize n’ekitinwa kingi muno. ¹⁶ Ninshemelerwa kubona okwo nyina obwesige emalimali omuli inywe.

¹ Barumuna bange, nitugonza kubamanyisa ekisha kya Ruhanga ekyo enteko za Masedonia zatungirwe. ² Bakalengwa omu biyengo bingi ebyo barabiremu; kyonkai bakashemelerwa muno, baba bafura ebishobeize, bajuna banu, n’orwo kaziro bali banaku muno. ³ Mbagambire amazima, bakagira ebintu bingi okwo babaire nibashobora, nangu n’okushagaho. Bakeyendera bonene ⁴ batutagiliza na bonene kujuna abantu ba Ruhanga omuli Buyahudi. ⁵ Bakagira kushaaga ebyo twabaire nitushuubira: Bakehayo, bakabanza bayehayo: Ahali Mukama, bashuba bayehayo ahali ichwe nk’okwo Ruhanga yabaire nayenda. ⁶ Aha rw’ekyo tukatagiliza Tito k’amaliliza omuli inywe omulimo ogu gw’engonzi nk’okwo yakagubandize. ⁷ Muli batungi omuli byona ebyo mwinabyo: Omu kwesiga, omu bigambo, omu bumanyi, omu bwegumisiliza obwa buli ngeli, n’omu ngonzi ezo mulikutugonza. Kityo mube nikwo mugira n’obufura omu mulimo ogu gw’engonzi. ⁸ Omu kugamba ntyo tindikubaragira. Ningonza kuboleka ekihika eky’abandi bainakyo omu kujuna banu, mbone kumanya engonzi zanyu zina mazimaki. ⁹ Nimumanya Omukama waitu Yesu Kirisito eky’ekisha kyamukolize: Wenene akaba ali mutungi, kyonkai yayehindura munaku kubarokora, mubone kuba batungi aha rwa wenene kwehindura munaku. ¹⁰ Okwo bili, inye nimbategekera nti: Nikigasha kushaaga kamwakugobesheleza eikora elyo mwamara omwaka gwona mubandize. Ninywe mwabaire ba mbere kuralira ekigambo ekyo mara mukakikora. ¹¹ Mbwenu aho ekigambo ekyo mukimare. Mutemu ekihika kukimara nk’okwo mwakakiraliire: Ebyo mwinabyo mubigire mwaha. ¹² Kamuraba nimwenda kubigira, Ruhanga arasiima egabo zanyu ezo, nabona ebyo mwinabyo mara nimushobora kubigira, ebyo mutainabyo ebyo tabiliho. ¹³ Inywe mutaba n’inywe musikilirwa, abandi kuba nirwo banguhirwa; chei, turabe omu bwiganwa n’amazima. ¹⁴ Ebyo muraba mwinabyo mutalikubyetaga bijune abetaage, nabo orwo baraba baina ebyo batalikwetaga, bajune inywe orwo muraba muli betaage, kityo habeho obwiganwa. ¹⁵ Nk’okwo kyahandikirwe kiti, «Ayashombokize bingi tiyashagwire, n’ayashombokize bike tiyalebeleirwe.» ¹⁶ Omukama nakasinge alikutamu Tito ekihika kyonene kyonene eky’okubajuna. ¹⁷ Ti kugir’oti akesiga kushai aha rw’okuba tukamushaba, nawe akashangwa nayenda muno kujuna abantu, yagoba aha kuramura omu bweyendezibwe kwija okwo. ¹⁸ Twamutweka na murumuna waitu omoi alikumanyika omu nteeko zona aha rw’eiranga ly’okuranga evangeli. ¹⁹ Mara t’ekyo kyonkai: Enteko zikamuronda kuta nagenda na ichwe tukakora hamoi omulimo gurungi ogu ogwo tuliho. ²⁰ Nitwelinda batatulisa mpiya ezi ezo batukwasize. ²¹ Nitugonza kukolera Omukama n’abantu. ²² Hamoi na barumuna baitu abo, twatweka murumuna waitu ondijo; ogwo tubandize twamulebelera muno, twabona okwo aina ekihika ky’okujuna banu, nangu kandi mbwenu ashaagireho aha rw’okuba inywe nabesiga muno. ²³ Tito ogwo ni mutahi wange; omu kubakolera n’inyema nawe. Kyonkai barumuna baitu aba, abo balikwija nabo, batwekirwe enteko, mara bonene abo kitinwa kya Kirisito. ²⁴ Kityo mubakolere kurungi omu nteeko, ebyo tubebugaho babibone.

¹ Aha kujuna abakirisito n’orwo nakuba ntabahandikire bishaagireho. ² Nimanya okwo omulimo ogwo mugutaireho omutima; ekyo nikyo kimpa okubebuga aha Bamasedonia ningamba okwo aba Akaya omulimo bakagutaho omutima kwema mwaka oguhoire, mara bangi muno omuli abo ekihika kyanyu kibatairemu amani. ³ Kyonkai kantweke barumuna baitu, kitaija kikazoka okubebuga kwange aha mulimo ogu kwa bushai, kandi na inywe aho mushangwe mutaire omutima aha mulimo ogu, nk’okwo nagambire okwo muragutaho omutima; ⁴ Abamasedoni bataija bakaija nanye bakashanga omulimo ogu mutagutaireho kihika, ichwe tukashonara aha rw’okubesiga tutyo, kandi tukaba tutakibebuga rundi. ⁵ Kityo mboine nikigasha ntemu barumuna baitu ekihika banyebembere okwo, batekateke eshumbusho egyo eyo mwaragaine, etaija ekazoka yagirwa rwamani, ezoke eli shumbusho y’obweyendezi. ⁶ Ekyo ndikugamba niky’eki: Ayabiba bike aligesha bike, n’ayabiba bingi aligesha bingi. ⁷ Buli muntu naragirwa kukora okwo ayetegekire: Atasindara, kandi butaba bukakwa. Ruhanga agonza ayaha nashemelerwa. ⁸ Ruhanga ogwo nashobora kubatunga omugisha gungi ogwa buli ngeli, buli kanya mushobore kugira ebibamazire, kandi n’abandi mubone kubajunisa bingi eby’okukoza emilimo yona emirungi. ⁹ Nk’okwo kyakahandikirwe kiti; «Abajege abatunga bingi, ekishakye ky’eirai lyona.» ¹⁰ Wenene atunga omubibi embibo n’omukate gw’okulya, n’iwe arabaha obwihyo bungi mara akabongera erongoro aha rw’ekisha kyanyu. ¹¹ Ekisha kyanyu kingi kilibabonesa bingi omuli buli kantu, aho na Ruhanga aije asiimwe aha rw’ekisha kyaitu ekyo. ¹² Kuba omulimo ogu ogwo mulikukora tigulikwija kubonesa bakirisito byo balikwetaga kwonkai, nawe nigwija kusindika abantu bangi kusiima Ruhanga. ¹³ Okwo eikora eli lilikuzoka, nimwija kuhaisa Ruhanga ekitinwa aha rw’omuhuliro gwanyu orwo mulikwebuga evangeli ya Kirisito, n’aha rw’ekisha ekyo mulikubagilira omu kubajuna n’okujuna abantu abandi bona. ¹⁴ Kandi bonene abo baraikara babagiliire orushusho, mara bate nibabashabira aha rw’ekisha kingi ekyo Ruhanga yabatungire inywena. ¹⁵ Ruhanga nakasinge aha rw’amatungwage aga agatali ga kugambwa.

¹ Inye Paulo nyenene, omwetohya orwo ndi hamoi na inywe, emanzi orwo mbali harai, nimbatagiliza mbataireho obufura n’obwetohya bwa Kirisito. ² Nimbatagiliza, orwo ndaba ndi okwo mutakungambisa na mani ago ndagiirwe kukoza orwo ndaba nkwatangaine n’abalikutulenga kuba bantu b’ensi. ³ Enshonga n’orwo tuli omu nsi titulikurashana ndashana ya mu nsi. ⁴ Nobona ebikwato byaitu ebyo tulikurashanisa endashana ti bikwato bya mu nsi omu. Bikwato ebina amani ga Ruhanga agalikushobora kusilikya eboma zona. ⁵ Eby’abantu balikuhakana nitubisirasiza, n’abeikuru abalikwanga obumanyi bwa Ruhanga nitubatera ahansi. Nituhindura ebitekelezo bya buli muntu ashobore kugira omuhuliro ahali Kirisito, ⁶ kandi twetegekire kubonabonyia bona abataina muhuliro, mulemwe mugire omuhuliro nyakabara. ⁷ Ebigambo mubikwate okwo mulikubibona. K’omuntu araba nayemanya okwo ali wa Kirisito, aijuke okwo orwo ali wa Kirisito naichwe kutyo. ⁸ Kuba n’orwo ndayebugaho obushobora obwo twinabwo, obushobora obw’okubombeka, kutali kubakambura, tindikwija kugira nshoni. ⁹ Ntakuzoka nimbatinisa mu barua zange. ¹⁰ Kuba haliho abalikugamba bati, «Ebaruaze zisikiire mara ziina amani, kyonkai obubili nayoroba, n’eby’alikugamba tibina nshai.» ¹¹ Abantu nk’abo bashobokerwe okwo ebyo tulikugamba omu barua orwo tutali okwo, nibyo byonene byonene ebyo tulikugamba orwo tulikwija. ¹² Ichwe titwakuziza kugira tuti nitwigana n’abalikweshalingya. Bonene nibebona nibo bonkai abaina amagezi, mara tibalikukirwa muntu; kyonkai tibaina kyobalikushobokerwa. ¹³ Titulikwija kwesiima tukashagulirana; chei, nitwija kugarukira mbali Ruhanga yatupimiire, nirwo rubimbi orwo yatukwasize, nangu nainywe nitwija kubagoba. ¹⁴ Mara titulikwehanguhya kushagulirana nk’okwo kyakubaire okwo muli omwo mbali Ruhanga yatulengeire, katutakwizire wanyu, n’ichwe twabaire ba mbere kwija owanyu tubaleteire evangeli ya Kirisito. ¹⁵ Titwakwesiimira milimo ya banu kushagulirana. Shana nitushubira okwo okwesiga kwanyu kurayeyongera, aho naichwe tubone obushango bw’okubegesa ebishagireho. ¹⁶ Kityo aho turashobora kuranga evangeli omu nsi ezindi, etali yanyu, tutaizire kwesiimira mulimo ogw’omuntu ayekoleire omu kichwekakye. ¹⁷ «Araba ali w’okwesiima ayesiimire ebyo Ruhanga akozire.» ¹⁸ Alikusimwa t’olinya alikwesiima, shana alikusiimwa Omukama.

¹ Kamwakutekaniire obufera bwange! Muntekanire. ² Nimpulira nimbabubira okwo Ruhanga abubira ab’agonza, mbone kubasiigira mushaija omoi kubagobya ahali Kirisito nimushusha omugore entahagara. ³ Kyonkai nintina. Nk’okwo enjoka yakolize obwenge ekabeiyabeiya Eva, nikwo nainywe ebitekelezo byanyu bilikwija kuhaba mukalekera kuba besigwa ahali Kirisito, mukalekera n’okumugonza engonzi ezihikire. ⁴ K’omuntu araija akabarangira Yesu ondijo atali owo twabarangiire, anga mukagibwamu omutima ogundi ogwo mutagirwemu rwa mbere, anga mukesiga evangeli endijo etali eyo mwaikiliize, ebintu nk’ebyo nimwija kubitora bwangu. ⁵ Tindikulenga nk’omu ntumwa ezikuru inye ndi ntumwa ey’ahansi. ⁶ N’orwo ndaba ntalikumanya kugamba, tikwo kugir’oti tindikumanya kantu. Ebi byona tukabibashoborora kabutekire okwo twabaire nitushobora. ⁷ Isi inye kanayetohize inywe kamutungama, nkakora obufu, aha rw’okuba nkabarangira evangeli ya Ruhanga mutaina kyomumpaire? ⁸ Nka nanyagire enteko ezindi, orwo naikiliize kutora eshumbusho eyo bagizire, mbone kujuna inywe! ⁹ Orwo nabaire ndi okwo nkaburabulirwa, kyonkai taliho wonabeleire rusampekire. Eby’okunyamba bikagirwa barumuna baitu abarugire Masedonia. Kityo nketanga mara ndiguma nyetangire kubera omuntu wena wena orusampekire. ¹⁰ Ningamba amazima aga Kirisito; kityo taliho alikwija kunsiza ntebuga ntyo omu mikoa ya Akaya. ¹¹ Isi kubaki? Aha rw’okuba tindikubagonza? Manya Ruhanga namanya okwo ndikubagonza. ¹² Mara ebyo ndikukora ndiguma mbikozire, nyije mbone kumara amani abalikweshalingya okwo emikolere yabo n’eyaitu niy’emoi. ¹³ Abantu nk’aba ntumwa z’ebishuba, bakozi engobya, abalikwehindura ntumwa za Kirisito. ¹⁴ Kandi mutakutangara! Kuba na Sitani ayehindura mumalaika w’omushana. ¹⁵ Kityo ekyo tikilikushobeza k’abakozi ba Sitani baraba nibehindura bakozi abaina obugorogoki. Ebikorwa byabo ebyo bilibatoijera. ¹⁶ Kanshubemu: Omuntu atandenga mufera. Kyonkai n’orwo muraba nimundenga mutyo, kayo mundenge nk’omufera, buzima nanye nyesimeho kake. ¹⁷ Ebyo ndikugamba tindikubigambisa bushobora bwa Ruhanga, nimbigamba nk’omufera, mara eki ninkyesiimira; ¹⁸ orwo bangi besiimira ebintu by’ensi, nanye ndayesiima. ¹⁹ Inywe nimushemelerwa kwemera ebifera, kandi okwo inywe muli bamanyi! ²⁰ Leba, inywe nimwemera omuntu kubahindura bairu, nimwemera omunyagi, n’alikubakoza kubaihyaho amagoba, n’alikubashaijuruza, n’alikubatera empi. ²¹ Kangire nti ky’enshoni, kubona ichwe ebyo titwabishoboire! Kyonkai kyona kyona eky’omuntu alikumaza kwebuga, kangambe bundi mufera, nanye ekyo nimaza kukyebuga. ²² Isi abo Bayahudi? Manya nanye ndi Muyahudi. Isi Baisiraeli? Manya nanye ndi Mwisiraeli. Isi nibatabuka ahali Aburahamu? Manya nanye n’iwe ntabukaho! ²³ Isi bairu ba Kirisito? Inye ninshaagaho; ahanu nagamba nk’omuraru, kuba emilimo y’amani ninkora eshaagireho, ninfungwa kushaaga abandi, okuterwa tinakubara, emirundi nyingi nagobire aha kwija kufa. ²⁴ Emirundi etanu Abayahudi banteire enshanju 39, kuburwaho rumoi kugoba 40. ²⁵ Ndateirwe enkoni kashatu; limoi nkaterwa amabare, kashatu emeli nizisinjagulika nzilimu, nindara omu nyanja ningisibamu. ²⁶ Omu ngendo zingi ezakambaireho ndaizire kugwa omu miiga, abashuga baija kummara oruguru, ngambeki Abayahudi baitu, leka abanyamahanga, naija kugwa omu kigo, n’omu irungu n’omu nyanja, na barumuna baitu ab’ebishuba baija kummara. ²⁷ Nafa nayosha, omuro gwambaho, enjara n’eiliho biti nkuboine, emirundi nyingi naburwa ekyakulya, embeho n’okuburwa eky’okujwara nabyo ebyo byambaho. ²⁸ Kandi n’orwo ebindi nakuba ntabigambire, enteko zona zitura zimpangaire. ²⁹ Ow’okuburwa amani inye gatambuzire n’ohai? Owo balikugwisa inye ntatamirwe yab’ohai? ³⁰ Kakuraba kuli kwebuga, kanyebuge ebikozirwe obujege bwange. ³¹ Ruhanga olinya Ishe Omukama Yesu namanya okwo ntalikubeiya. ³² Omuli Damasiko gavana ayabaire atairweho Omukama Aretasi, akalinda ekigo ekyo agondize kunkwata. ³³ Kyonkai bakanteka omu kitukuru bansongolera omw’idirisha ly’orukuta namuruga ntyo omu mikono.

¹ Kanyebuge, n’orwo okwebuga kuraba kutaina mugasho. Kyonkai ebyo nabonekeirwe n’ebyo Omukama yanshuruliire nimbigamba. ² Nimanya omukirisito omoi ayashutwirwe akagoba omw’iguru lya kashatu, emyaka 14 eyahingura. Nka yabaire narora anga afire, ekyo tindikukimanya; nikimanywa Ruhanga. ³ Ekiliho nimanya okwo omuntu ogu yashutwirwe akagoba Paradiso. Nka yabaire narora anga afire ekyo tindikukimanya, nikimanywa Ruhanga. ⁴ Wenene ogwo akahulira ebitagambwa, eby’omuntu atakugamba. ⁵ Mbwenu kanyebuge aha rw’omuntu ogu. Tindikwija kwebuga aha rwange shana nyebuge obujege bwange. ⁶ N’orwo nakugonza kwebuga timbe mufera, aha rw’okuba ninyija kugamba amazima. Kyonkai ekyo ninkyenyinya, omuntu ataija akantekeleza kuba kushaaga okwo alikumbona anga kuhulira ebyo ndikugamba. ⁷ Ntaija nkebuga nkashaagulirana aha rw’ebintu bingi ebyo nashuruliirwe, niyo nshonga nkachumitwa eihwa, niyo ntumwa ya Sitani, yambumbulikya, ntaija nkebuga nkatamu gungi. ⁸ Nkatagiliza Omukama kashatu aha rw’enshonga y’ekigambo eki kakindugaho. ⁹ Kyonkai wenene yangambira ati, «Ekisha kyange nikikumara, kuba omu bujege nimwo obushobora bwange obugobeleire bumanyikira.» Ninyija kugendelera kwebuga obujege bwange, nyije mbone kugira amani ga Kirisito. ¹⁰ Niyo nshonga ninshemelerwa kuba mujege, banjume, nshashe, banyite kubi, mpangarwe n’omwoyo nibantura Kirisito. Ahakuba orwo ndikuba mujege nirwo ndikugira amani. ¹¹ Honene inye mbaire mufera! Kyonkai n’inywe mwankakire kuba ntyo, kuba inywe mwakuragiirwe kumpa eibara lirungi. Nobona n’orwo ndaba ntaina kwo ndi, entumwa ezo ezikuru muno tizina kyozilikunkizaho n’akati. ¹² Okwegumisiliza kwange okutali kuke, obubonero n’eby’okutangaza n’ebigiro by’amani ebyo nabakoleire nibwo bubonero obw’entumwa ey’amazima. ¹³ Ni kihai eky’enteko ezindi zabakilizeho? Leba nainywe tinababeleire rusampekire. Munganyire entambara egyo! ¹⁴ Mbwenu ndiyo n’inyetekateka kwija okwo omurundi gwa kashatu. Kandi tindikwija kubabera rusampekire. Ebyo mwinabyo tibyo ndikuhiga, shanasi nimpiga inywe. Kuba abaana tibo baragirwa kubisira bazaire babo; abazaire nibo balikuragirwa kubisira abana babo. ¹⁵ Ndashemelerwa muno munonga kwehayo, mara nyeheyo kurokora emyoyo yanyu. Kandaba nimbagonza muno, inywe aho mungonze mpora? ¹⁶ Inywe nimugira muti tinakubabeleire rusampekire, kyonkai muti nkabakiza obwenge nabagobeza. ¹⁷ Isi omuli balinya abo nabatwekeire halimu owo nabatwekeire kubanyihiraho akagoba kona kona? ¹⁸ Tito n’iwe natagiliize kwija okwo, nashuba namutaho murumuna waitu omoi. Isi Tito wenene ogwo aina akameka ako yabaihireho? Manya wenene nanye twakoraga bimoi! Tukatambuka ntambuka emoi. ¹⁹ Lero aho mbali mukatulira mulenga muti ichwe tukaba nitweyeza ahali inywe? Bagonzibwa, ebyo tukagamba tubigamba omu mabona ga Ruhanga twemirwemu Kirisito, mara ebyo tubigamba kwombeka inywe. ²⁰ Nangu nintina nti haliho orwo nakwija nkabashanga muli okwo ntakwenzire kubashanga, anga inywe kumbona ndi okwo mutakugondize kumbona ndi: Haliho orwo yakubaho enkungana, ekiisho, ebiniga, okweyenda, okuhagikangana, einwa, okwetutumura n’etabangu. ²¹ Mara kandi nintina kandagaruka haliho orwo Ruhanga yakunfutika omu maisho ganyu nkaragirwa kuchulira abafakaire ruli mara batakechuzaga buhagare bwabo, na bujanga, na mairu gabo gabi.

¹ Ogu murundi gwa kashatu ogwo ndikwenda kwija okwo. Buli mushango niguragirwa kujulirwa abajulizi babili anga bashatu. ² Orwo nabaire ndi okwo omurundi gwa kabili, ababaire bafakaire nkabatatira hamoi n’abandi bona. Ninshuba nimbatatira na mbwenu orwo ntaliyo. Kityo orwo ndagaruka tindikwija kubaganyira, ³ orwo mulikwenda kubona orubona okwo Kirisito n’iwe alikugambira omuli inye. Wenene timulikumulema, nabashobora. ⁴ Aha kubambwa akaba mujege, kyonkai mbwenu omu bushobora bwa Ruhanga narora. Ichwe tuli bajege nka wenene, kyonkai omu bushobora bwa Ruhanga turabaga twemire na Kirisito ogwo omu byo turakabakoleraga. ⁵ Inywe nywenene mwelebe nka mugumire omu kwesiga. Mwelebe. Isi timulikubona okwo Yesu Kirisito asingiire omuli inywe? Shana kamuraba muli babi! ⁶ Ninshubira murabona okwo ichwe titwina kitulemire. ⁷ Ekikuru nitushaba Ruhanga mutakukora kubi, kitaija kikazoka okwo nichwe tuli babi. Nitumushaba mukore kurungi, n’orwo turaba nituzoka okwo tulemirwe. ⁸ Amazima titwakugahindura, shana kugahondera. ⁹ Kuba ichwe nitushemelerwa kuba bajege, kandi amani gakagirwa inywe. Ekyo tulikushaba nitushaba kamugendelera omu maisho. ¹⁰ Ebi manti nimbihandika ntaina inywe, kandaba naizire ntaija nkaba mukuutu omu kukoza obushobora obwo Omukama yantungire kwombeka, kutali kukambura. ¹¹ Mpaho barumuna bange, mwikarege. Mweshubeho, ebigambo byange mubyekomye, mushobokerwangane, mwikare n’emilembe, aho Ruhanga ow’engonzi n’emilembe arasingiraga omuli inywe. ¹² Mukeishanyie nimunywegerangana omunywegero gutakatifu. ¹³ Abegesibwa bona nibabakeisa. ¹⁴ omugisha gw’Omukama waitu Yesu Kirisito, n’engonzi za Ruhanga, mujwangaine na Mwoyo Mutakatifu, bisingire omuli inywe inywena.