1 TIMOTEO

¹ Inye Paulo, owo Ruhanga Omurokozi waitu na Yesu Kirisito eshubi yaitu bahangire kuba ntumwa ya Yesu Kirisito, ² ninkuhandikira Timotheo omwana wange ow’amazima owo twajwanganiire omu kwikiliza. Ruhanga Isheichwe na Yesu Kirisito Omukama waitu, bakutunge omugisha n’emilembe, mara bakuganyire. ³ Nk’okwo nakukomeleize orwo nabaire ningya Masedonia, oikare Efeso obone kugira abo watanga kwegesa ebitalibyo. ⁴ Obataise ebigano n’okusiiba nibatonda abagurusi b’enganda. Ebintu ebyo nibimukya empaka za bushai, kandi nibasigiilira omugendelero gwa Ruhanga ogw’okuturokora omu muhanda gw’okwesiga. ⁵ Omugendelero gw’okukuragira ntyo ngonzi ezilikuruga aha njoka n’omutima gurungi n’okwesiga okw’amazima. ⁶ Abantu abandi bakatantalikwa banagaho amazima anga bagya omu mpaka za katozi. ⁷ Nibagonza kwegesa Amateka, kyonkai tibashobokerwa byo bagamba anga anga ebigambo ebyo bakaliliza. ⁸ Nitumanya Amateka okwo gaba garungi k’omuntu agakoza okwo kisaine, ⁹ akashobokerwa okwo gatatairweho aha rwa bagorogoki. Amateka gakatekwaho aha rw’abajeemi n’abatagira muhuliro, abatatina Ruhanga, abafakare, ababi, abasheegu, abaita baishebo na banyinabo n’abantu abandi, ¹⁰ abantu enjanga, abashaija ensiyaga, abanyaga abantu bakatunda, abagambi b’ebishuba n’ababirahira, na buli kimoi ekitalikugenda na bilikwegesibwa eby’amazima ¹¹ kuhondera evangeli ya Ruhanga ow’ekitinwa eyo Ruhanga wenene yankwasize. ¹² Ninsiima Yesu Kirisito Omukama waitu ayantungire amani g’okukora omulimo ogu. Nimusiimira okunsiima akandonka kumukolera, ¹³ n’orwo eirai namurogotagaho, namugingizaga, mujuma. Kyonkai akanganyira ahakuba nabikoraga ninyihwa aha butamanya bwange n’aha kutaikiliza. ¹⁴ Nawe Omukama akangilira ekisha kingi, n’okwikiliza n’engonzi ebitabuka ahali Yesu Kirisito. ¹⁵ Ekigambo eki ky’amazima, kisaine kutorwa bwoli: Okwo Yesu Kirisito yaizire omu nsi kurokora abafakare. Kandi omu bafakare n’inye mufakare rwituza. ¹⁶ Kyonkai ekyo Yesu Kirisito yanganyiliire akenda kubonesa omuli inye, omufakare rwituza, obwegumisilizabwe nyakabara, mbe bulebero bw’abalikwenda kwikiliza kushobora kubona oburora obutalihwaho. ¹⁷ Omukama w’amakiro gona, nyakumelera, ataboneka, wenene wenkai aba Ruhanga, ahabwe ekitinwa mara asingizibwe eirai lyona. Amina. ¹⁸ Mwana wange Timotheo, ninkukwasa omulimo ogu, nk’okwo abarangi bakugambireho, ebyo bibe nibyo biba bikwato byawe eby’okurashanisa endashana egoshokire, ¹⁹ ogume omu kwesiga n’omutima ogulikwera. Abantu abandi bakaburwa kuhulira eiraka ly’emitima yabo, baruga omu kwikiliza, basinjagulika nk’obwato omu nyanja. ²⁰ Omuli abo ni Himenayo na Alekisanda. Abo nkabachwa nabanagira Sitani, baije balekere okurogota.

¹ Ekya mbere na mbere nimbatagiliza mushome enshara mutakilire abantu bona, mubashabire mara mubasiimire. ² Mushabire abakama n’abatwazi bona tubone oburora bw’emilembe, obw’obuchulezi, oburora obwolekeire ahali Ruhanga, mara tube bantu abasaine kukunirwa omuli byona. ³ Ekigambo eki kirungi, mara nikishemelera Ruhanga Omurokozi waitu, ⁴ agonza abantu bona kabarokoka mara bakamanya amazima. ⁵ Ruhanga ab’omoi wenkai, n’omubaka wa Ruhanga n’abantu ab’omoi, mara omubaka ogwo aba Yesu Kirisito, ⁶ ayayeyangire oburorabwe kuchungura abantu bona. Ebyo bikamanyikira omu bukiro bwabyo. ⁷ Inye nkatewaho kuba murangi mara ntumwa (ningamba amazima mara tindikubeiya), mba mwegesa w’Abanyamahanga, mbarangire okwikiliza n’amazima. ⁸ N’inyenda buli hantu abashaija babe nibo bata nibashoma enshara, baimukize emikono nyakatetere, abashaija enzira biniga na mpaka. ⁹ Kwakwo n’abakazi belengye okwo kisaine, batashuka ishoke anga kulitekamu zahabu anga mabare ga iguzi anga kujwara emyendo ey’eiguzi lingi. ¹⁰ Babe b’ebikorwa birungi nk’okwo abakazi abain’edini balikuragirwa kuba. ¹¹ Omukazi amanye kugira omuhuliro nyantayuga obuzira kukeleekeza rulimi. ¹² Tindikujubura mukazi kuba niwe ayegesa mushaija handiki kumutungama aha mutwe. Naragirwa kwesiza. ¹³ Aha rw’okuba Adamu niwe yabumbirwe mbere, Eva yaruga nyuma. ¹⁴ Adamu tiyabeihyabeihirwe; omukazi niwe yabeihyabeihirwe akafakara. ¹⁵ Kyonkai omukazi alirokorwa okuzara abana, k’aliguma omu kwesiga n’omu ngonzi akaikara ali mutakatifu mara akaguma ayebaliire.

¹ Ekigambo eki ky’amazima: K’omuntu alikugonza kuba asikofu, naba agondize omulimo gurungi. ² Asikofu naragirwa kuba muntu ataina kya kugeywaho, abe mushaija aina omukazi omoi, alikwebalira, ow’amagezi, agire ekitinwa omu bantu, ashangwe nanyegeza abantu, kandi abe narahukirwa okwegesa. ³ Ataba ntamiizi, ataba mukatili, abe muchulezi, ataba muntu wa nkungana, n’empiya zitamutwara mwoyo. ⁴ Aragiirwe kumanya kugelera kurungi ekaye, abe muntu alikuhulirwa abanabe, kandi abe mukunirwa omu ngeli zona. ⁵ Kuba k’omuntu alikulemwa kugelera kurungi ekaye, yakumanya atai enteko ya Ruhanga? ⁶ Atashangwa ali muntu abaire mukirisito juba, kitali kityo yakwija ayeshalingya akwatwa omushango ogwakwete Sitani. ⁷ Ab’aheru babe nibamusima, anga aho yakwija aba muntu w’okuneenwa bata nibamugeya. ⁸ Abadiakoni kwakwo, bataba bantu ba muzano. Batahinduka aha rulimi, bataba ntamiizi za marwa, kandi omulimo gwabo ogwo bataguhigamu buhango na mpiya. ⁹ Ekyebisho ky’okwesiga bakigumeho obuzira kabajoka. ¹⁰ Kandi babanze balengwe. Kabarashangwa bataina kyobalikumogwaho, bajuburwe kukora omulimo gw’obudiakoni. ¹¹ Abadiakonikazi nabo nibargirwa kushangwa batali bantu ba muzano. Babe batalikugeya banu, bagire okwebalira, kandi babe besigwa omuli buli kantu. ¹² Abadiakoni bagire omukazi omoi, mara bamanye okulera kurungi abana babo n’okugeleera kurungi amaka gabo. ¹³ Enshonga abakora kurungi omulimo gw’obudiakoni behaisa eibara lirungi n’obumanzi bungi omu kwesiga bajwangaine na Yesu Kirisito. ¹⁴ Timotheo, ninshubira kukugobaho bwangu, kyonkai ebi nabikuhandikira kubikushoborora, ¹⁵ nti rundi kanakukelererwaho oshangwe nomanya okwo omuntu ali w’okugira entwaza nungi omu nju ya Ruhanga, niyo nteko ya Ruhanga asingire, enyomyo mara engambiro y’amazima. ¹⁶ Mara mazima nitwebuga okwo ekyebisho ky’edini yaitu kiba kihango: Ruhanga akaija ali muntu, Mwoyo yamujulira okwo ali w’amazima, abamalaika bamubona, yarangwa omu mahanga, omu nsi bamwesiga, yashuba yatemba n’ekitinwa omw’iguru.

¹ Mwoyo nagambira kimoi okwo bukiro obulija abandi balinaga okwikiliza aha rw’enshonga y’okuhuliliza amasitani agegesa ebishuba. ² Balinagwa obugobya bw’abagambi b’ebishuba ab’emitima etakihulira, ³ abalikwanga obushwere, bakagimba abantu kweshasa bataliire byakulya ebyo Ruhanga yatonzire kabilibwa abalikwesiga nibasiima n’okumanya amazima. ⁴ Buli kimoi ekyatonzirwe Ruhanga kiba kirungi. Eky’omuntu yatora nasiima tikyakwangwa kakiraba nikitorwa n’esiimi. ⁵ Aha rw’okuba ekigambo kya Ruhanga n’enshara nibyo bibihindura bitakatifu. ⁶ Ebigambo ebi k’orabishoborora barumuna baitu, oraba mukozi murungi wa Yesu Kirisito, nolya ebigambo by’okwikiliza n’okwegesa kurungi okwo wakwete. ⁷ Abantu abatetaho Ruhanga otabafaho, nangu n’ebigano eby’obufera. Oyemanyiize okwolekera ahali Ruhanga. ⁸ Omubili kugumanyiza eikora nikugasha kake, kyonkai okwetaho Ruhanga nikugasha omu ngeli zona, enshonga kwina ekyo kuturaganisa aha burora bw’amakiro aga n’obw’amakiro agalikwija. ⁹ Ekigambo ekyo ky’amazima kandi kyokwikilizibwa kimoi. ¹⁰ Nobona eki nikyo tufera tukosha, ahakuba tushubira Ruhanga asingire, Omurokozi w’abantu bona abalikwikiliza. ¹¹ Ebintu ebi obiragire barumuna bawe mara obyegese. ¹² Omuntu atakugaya aha rw’enshonga oli musigazi. Obe bulebero bw’abaikiliza omu migambire n’omu migilire, omu ngonzi, omu kwesiga, n’omu bwera bw’omwoyo. ¹³ Kuhika orwo ndaija, oteho amani kushomera abantu Ebihandiko Bitakatifu, orange mara oyegese. ¹⁴ Amatungwa gawe otagajajaaraho, kuba okagatungwa omu migambire y’abarangi orwo orukiiko rw’abagurusi rwakutaireho emikono. ¹⁵ Ohikyega ebigambo ebi, obiteho omutima, abantu bona babone okwo olikweyongera kugya omu maisho. ¹⁶ Oyelinde iwe wenene, oshube oyelinde n’omu by’olikwegesa. Orayekomya ebyo; kuba k’oragir’otyo orayerokora, oshube orokore n’abarakuhulilizaga.

¹ Otalirotokera mushaija mukuru; omutere ekihika nk’okwo wakugizire sho. Kandi abasigazi obahabure nka barumuna bawe. ² Abakazi bakuru obahabure okw’obon’oti ni banyoko. Abakazi bato obahabure nka banyanyoko, mara bona obahabuze obwera bw’omwoyo. ³ Entumbwa ezili ntumbwakwo ozikunire. ⁴ K’entumbwa erashangwa eina abana anga abaijukuru, abana abo babanze bahikye eby’edini elikubaragira kukolera ababo omu maka gabo, kandi bakolere kurungi abazaire babo nk’okwo abazaire bonene babakoleirege kuba ekyo kishemelera Ruhanga. ⁵ Entumbwakazi eli ntumbwakwo mara etaina babo, niw’ogwo alikushuubira Ruhanga, kandi kiro na mushana nesiiba netaka, neshoma enshara. ⁶ Entumbwa elikwekoza eby’obujanga egyo yafire n’orwo elikurora. ⁷ Obaragire otyo, batagira kyobamogwaho. ⁸ Omuntu atalikufaho bamakwatanege, kandi bungi bwa muno k’atafireho kaye, ogwo yayetongire okwikiliza kw’omukirisito mara mubi kukira omutakansi. ⁹ Entumbwa ehandikwe k’eraba yahikize emyaka nkaga, mara eshangwe eshweirwe omushaija omoi, ¹⁰ kandi babe nibamujulira okwo ali muntu murungi, alezire kurungi abanabe, muntu ow’ekisha, anabisa abakristo amaguru, amaramara abatangirwe, agira ekihika ky’okukora kurungi buli kantu. ¹¹ Abakazi bato entumbwa otakunda kubahandika, enshonga kabalikugonza kushwerwa aho Kirisito bamuhwamu. ¹² Kityo aho bakwatwa omushango gw’okuchwa endagano yabo eya mbere. ¹³ N’ekindi nibabanza kuba banafu, nibararaiga, nibaruga nju egi nibagya nju egi, mara tibalikuba banafu kushai: Nibagonza enkuru, nibetahya n’omu bintu ebitali byabo, nibagamba n’ebitabakwete. ¹⁴ Kityo nakugondize abakazi bato entumbwa kabashwerwa, bakazara abana, bageleere amaka agali gabo, baleke kuha omubisha obushango bw’okutugambaho kubi. ¹⁵ Abandi bararaigiire owa Sitani. ¹⁶ Omukazi wena wena omwikiliza araba ainamu entumbwa omu makwatanege, azijune. Enteko eleke kusikilirwa, eshobore kujuna abali ntumbwakwo. ¹⁷ Abagurusi abalikutwarage basaine kukuzibwa kabili, okukiraho abalikuchwazikana kuranga evangeli n’okwegesa. ¹⁸ Ebihandiko Bitakatifu nibigamba biti, «Otalikoma nte munwa k’erashangwaga nelibata engano,» kandi, «Omukozi asaine emperwaye.» ¹⁹ Batalitoijera mugurusi okaikiliza, shana hazokweho obujulizi bw’abantu babili anga bashatu. ²⁰ Kandi abalikuzigilira kufakara obarwanise omu rwatu, n’abandi baije batinireho. ²¹ Ninkuragira k’okwata Amateka aga omu maisho ga Ruhanga na Yesu Kirisito n’abamalaika endonkwa, ogakwate obuzira kigonzi, buli kantu okakoze amazima. ²² Otalyanguha kutaho muntu mikono, kandi otalikora mafu ga muntu ondijo. Oyelindega, oikare oli nshemere. ²³ Oleke okuta nonywa amaizi gonkai. Onywegaho akadivai aha rw’enshonga y’eibunda lyawe n’endwara zawe eza hati hati. ²⁴ Amafu ag’abantu abandi gali aha mushana, mara galibaisa. Kandi amafu agandi ago gamanyika nyuma. ²⁵ Kutyo n’ebikorwa birungi biba aha mushana; kandi n’orwo byakuba bitali aha mushana, tibiina kugwamu.

¹ Abairu bona bamanye okwo abakama babo b’okukunirwa muno, nirwo omuntu n’omoi ataije akajuma Ruhanga n’aha byo tulikubegesa. ² Abaina bakama babo abalikwikiliza batakubetwaliliza ngu aha rw’enshonga bakirisito batahi babo. Babakolere kurungi okushagaho, ahakuba bakama babo kabalikugasirwa eikora lyabo nibashangwa bali baikiliza mara bagonzibwa babo. ³ Kaishe muntu wena ayegesa kundi, akanga ebilikwegesibwa ebilikugendanwa n’okwolekera ahali Ruhanga, ⁴ ogwo naba aina eikuru, talikumanya kantu. Ogwo arwaire endwara y’empaka n’okuhakana omu bigambo kushai. Endwara z’engeli egi zizarukanwamu ekiisho, enkungana, okugeyangana n’okuramurangana kwonkai, ⁵ n’empaka ez’abantu abafire amagezi, abatakimanya mazima, nibatekeleza ngu okugonza Ruhanga kalyo k’okuboneramu amagoba. ⁶ Marakwo, okugonza Ruhanga n’okusanirwa kw’omutima biina amagoba gangi. ⁷ Ahakuba ichwe titwina kyotwalesire mu nsi, mara taliho kyotwakwiha mu nsi. ⁸ Katuraba twina ekyakulya n’ebijwaro, ebyo bigume bitumazire. ⁹ Kyonkai abagonza kutunga abo bagwa omu kilengeso, bagwa omu kabi, begomba ebintu bingi eby’obufera mara ebilikubashasa ebiisa abantu. ¹⁰ Nobona obugonza mpiya niyo eba ntabuko y’enaku zona. Akaruuju aka niko kaihire abantu abandi aha kwikiliza bakalihweramu, bakeletera enaku zingi. ¹¹ Kyonkai iwe mushaija wa Ruhanga, oyetamuze ebintu ebi byona. Oitanire obugorogoki, okugonza Ruhanga, okwesiga, engonzi, okutayugayuga n’obuchulezi. ¹² Orashane endashana nungi ey’okwesiga, oyekomeleze kimoi oburora obutalihwaho obwo wayeteirwe, obwo washubire okebuga omu maisho g’abajulizi batali bake. ¹³ Omu maisho ga Ruhanga atunga ebintu byona oburora, n’omu maisho ga Yesu Kirisito ayayebugire okwesigakwe omu maisho ga Ponsio Pilato amalize, ¹⁴ ninkukomekeleza kukwata omuhango ogu oli nzira kabi otaina ky’olikumogwaho kulemwa kugoba orwo Omukama waitu Yesu Kirisito alija. ¹⁵ Omu kanya kabyo orwo kaligoba, Nyakusinga wenkai ow’ekitinwa, Omukama w’abakama, Rugaba Nyamukuru niwe alibita aha mushana, ¹⁶ wenene mushai nyakumelera, asingire omu mushana ogutagobwa muntu, ow’omuntu atakabonaga, handiki kugir’oti yakumubona. Alikagira ngoma n’ekitinwa eirai lyona. Amina. ¹⁷ Oragire abatungi omu nsi egi batakugira ikuru. N’eitunga elitaina rugero batalyesiga, shana besige Ruhanga asinga akatutunga buli kantu ak’okutushemelera atainamu kakukomelera. ¹⁸ Kandi bakore kurungi, babe batungi b’ebikorwa birungi, bagire obufura bw’okugabira banu, babe banyakisha. ¹⁹ Babe nikwo beyombekera batyo omusingi gurungi ogw’oburora obw’omu maisho, nirwo balibona kuguma omu burora obuli burora kwo. ²⁰ Iwe Timotheo, oralinda ebyo bakukwasize. Oyeshumbe efumoro y’okurogota ahali Ruhanga n’empaka za katozi ez’abantu abandi balikweta Bwegi. ²¹ Haliho abalikweyeta begi, kyonkai ekibarugiire omwo banagiire okwikiliza kw’omukirisito. Omugisha gwa Ruhanga gube nainywe.