1 ABATESALONIKA

¹ Inye Paulo, Siluwano na Timotheo, nituhandikira enteko y’Abatesalonika tujwangaine na Ruhanga Isheichwe n’Omukama Yesu Kirisito: Mugire omugisha n’emilembe. ² Buli kanya nitusima Ruhanga aha rw’enshonga yanyu inywena. Nitwikara nitubagamba omu nshara. ³ Ahali Ruhanga Isheichwe nitwijuka okwesiga kwanyu okulikumanyikira omu bikorwa, n’engonzi zanyu ezilikubasindika kukoza amani, n’eshubi yanyu etalikuyuga eyo mwinayo omuli Yesu Kirisito Omukama waitu. ⁴ Nitumanya okwo inywe, barumuna baitu abagonzibwa ba Ruhanga, wenene akabaronka. ⁵ Nobona titwabarangiire vangeli mu bigambo bushai. Tukakoza obushobora, kandi Mwoyo Mutakatifu yatuhwera mara twabagambira tumalize ebyo tulikwikiliza. ⁶ Nirwo mwaturondoire, mukarondora n’Omukama, aha rw’okuba mwarangirwaga oku nibabagingiiza. Kyonkai Mwoyo Mutakatifu yabakyanuraga mushemelerwa. ⁷ Niyo nshonga mukaba bulebero bw’abalikwesiga bona omuli Masedonia na Akaya. ⁸ Ekigambo ky’Omukama kyemire ahali inywe kyaraliira, ti muli Masedonia na Akaya mwonkai, kyonkai mpaho n’okwesiga kwanyu ahali Ruhanga kugobire buli hantu nangu titwina kyakugamba. ⁹ Nobona nibabarura okwo mwatwakiiliire, n’okwo mwasigireho ebihuuku mukagya ahali Ruhanga, kukolera Ruhanga asingire mara ow’amazima, ¹⁰ n’okulindilira Omwanawe kuruga omw’iguru, Omwanawe owo yahimbwire omu bafu, niwe Yesu alikwija kutukiza aha kibonabonyio ekilikwija.

¹ Inywe nywenene barumuna baitu, nimumanya okwo orwo twaizire okwo titwateire muhurambwa. ² N’orwo twabaire twashasire, batujangwire omuli Filipi, nimumanya okwo twayeyemiremu nitwesiga Ruhanga twabarangira evangeli ya wenene oku abandi nibatuhakanisa muno. ³ Ekyo tulikubagambira n’amani titulikubabeiya kugir’oti twina mugendelero gubi anga kugir’oti nitwenda kubagobeza. ⁴ Orwo Ruhanga yatusimire akatukwasa evangeli, aho titulikugamba kushemeleza bantu, shana kushemeleza Ruhanga alikumanya ebituli aha mutima. ⁵ Nimumanya okwo tutabajebeka, anga kubenza mpiya bwesheleke: Ruhanga niwe mujulizi waitu. ⁶ Kandi titwaitaniraga kitinwa mu bantu, alikaba inywe anga bantu bandi, n’orwo twakushoboire kugira ebyo twabenza orwo tuli ntumwa za Kirisito. ⁷ Ekiliho tukababera bafura nk’okwo omulezi amanya abaana. ⁸ Kutyo nikwo naichwe twagondize inywe, tutagobire aha kubaha vangeli ya Ruhanga yonkai, nawe naichwe twabehongera; enshonga mukaba muli bagonzibwa baitu. ⁹ Barumuna bange nimumanya okwo twafire tukosha. Twakoraga kiro na mushana tutaija tukababera rusampekire orwo tulikubarangira evangeli ya Ruhanga. ¹⁰ Inywe muli bajulizi na Ruhanga kwakwo, okwo entwaza yaitu ahali inywe abaikiliza, yabaire eli ntakatifu, egorogokire mara etainamu kamogo. ¹¹ Kuba nimumanya, nka ishemuntu n’abanabe, okwo twabahaire ebisha n’okubatamu amani kandi tukabaragira ¹² kamurora oburora obushemeleire Ruhanga, alikubeta kamutaha omu bukamabwe n’omu kitinwakye. ¹³ Kandi naichwe titulikwosha kusima Ruhanga aha rw’ekigambo ekyo, kubona orwo mwatoire ekigambokye ekyo mwahuliire ahali ichwe, timwakikunzire nka kigambo kya bantu, mukakikunda okwo kikali, kigambo kya Ruhanga ekiina amani omuli inywe, abaikiliza. ¹⁴ Inywe barumuna baitu, mukarondora enteko za Ruhanga eza Buyahudi ezijwangaine omuli Yesu Kirisito. Nobona na barumuna banyu abanyansi bakabashasa nk’okwo na bonene Abayahudi babashasize. ¹⁵ Abayahudi bakaita Omukama Yesu n’abarangi, naichwe batubinga. Abantu abo batamisa Ruhanga, kandi bahakanisa buli muntu, ¹⁶ aha rw’enshonga nibatutanga kurangira Abanyamahanga bakarokoka; kityo bonene bafakare mara nibashuba nibeshumbura. Nawe kandi Ruhanga alemirwe yababonabonyia. ¹⁷ Barumuna bange, aha rw’enshonga tukaba tutaishukaine nainywe omwanya guke, aha bubili, ti aha mwoyo, tukataho amani katushuba kubonangana nainywe, kuba tukaba twina orushusho rungi. ¹⁸ Twagonzaga kwija okwo, lero inye Paulo orushusho tirwampwahoga, kyonkai Sitani akatuhimbira. ¹⁹ Isi eshubi yaitu n’ehai, anga ebyera byaitu, anga orukinga rwaitu ebyo twakwebugira Omukama waitu Yesu k’aliija? T’inywe? ²⁰ Inywe n’inywe kitinwa kyaitu mara byera byaitu.

¹ Katwaboine twalemesibwa twabona hakili tusigare Atenzi ichwenkai. ² Twashuba twatweka Timotheo murumuna waitu mara omwiru wa Ruhanga, omurangi w’evangeli ya Kirisito. Tukamutweka k’abagumisa omu kwikiliza n’okubatamu ekihika, ³ omuntu n’omoi ataija akayugumibwa naku ezi. Inywena nimumanya okwo obu nibwo buba buragirwa bwaitu. ⁴ Nobona orwo twabaire tuli hamoi nainywe tukabagambira karai okwo enaku zabaire zitulindiliire; mara okwo mulikumanya nikwo byakabaire. ⁵ Niyo nshonga kanayegumisilize bikanga, natumayo kumanya okwo muli omu kwesiga, aha rw’okutina nti rundi Sitani akabalengesa, kandi n’amani gaitu nigaija kufa bushai. ⁶ Mbwenu orwo Timotheo arugire okwo akatugoba, akatwizira n’amakuru garungi ag’okwesiga kwanyu n’engonzi zanyu, yatubarulira n’okwo buli kaanya mulikutwijuka mara mwina orushusho rwaitu, nk’okwo naichwe tulikubagilira orushusho. ⁷ Aha nshonga egi barumuna bange, okwesiga kwanyu kutumaramazire omu bushasi bwaitu n’omu naku zaitu. ⁸ Mbwenu aha twaguma kamuraikara mujwangaine n’Omukama mutamurugireho. ⁹ Ruhanga tumusiime tutai aha rwanyu aha rw’ebyera byona ebyo tulikwehulira tuli omu mabonage? ¹⁰ Kiro na mushana nitushoma enshara tushobore kubonangana na inywe twijulilize okwesiga kwanyu. ¹¹ Ruhanga waitu, Isheichwe wenene, n’Omukama waitu Yesu basinge batuhabure tubagobe. ¹² Omukama asinge abahe okweyongera kugira engonzi zingi muno, mugonzangane mara mugonze abantu bona nk’okwo ichwe tulikubagonza. ¹³ Aho arabagumisa mube nyakatetere omu kwitanira obutakatifu omu mabona ga Ruhanga waitu mara Isheichwe orwo Omukama waitu Yesu alihabuka n’abatakatifube bona.

¹ Eky’enzindo barumuna bange, nitubatagiliza tubataireho Omukama Yesu, emirolere yanyu eyo mwinayo n’okushemeleza Ruhanga bigume byeyongere omu maisho; manyasi nikwo twabegesize. ² Nimumanya ebyo twabegesize twemire n’Omukama Yesu. ³ Ruhanga nayenda kamuba batakatifu: Mwelinde obusiyani. ⁴ Buli omoi agume ahali mukaziwe omu ntwaza y’obutakatifu n’ekitinwa. ⁵ Aleke kutwarwa obunyama nk’abatakansi abatamanya Ruhanga. ⁶ Omuntu atafakara anga kugobeza mukirisito mutahiwe omu kigambo eki, aha rw’okuba Omukama abonabonyia abakora batyo. Mara tukabatatira karai. ⁷ Ruhanga tiyatwesire katuba bahagare; akatweta katuba batakatifu. ⁸ Aha rw’ekyo buli muntu alikwanga ebigambo ebyo, talikwanga muntu shana nayanga Ruhanga, Ruhanga niwe abatunga Mwoyo Mutakatifu. ⁹ Aha kugonza abakirisito barumuna banyu timulikwetaga muntu kukibahandikiraho. Ruhanga wenene arabegesize okugonzangana, ¹⁰ mara abakirisito barumuna banyu bona omuli Masedonia yona nimubagonza. Kyonkai barumuna bange nitubatagiliza aho mugendelere kushaagaho. ¹¹ Mwitanire oburora bw’obuchulezi, omuntu amanye omulimogwe, mara mukore emilimo nk’okwo twabaragiire. ¹² Aho nirwo abatakaikiliza barabakunira, mara mutakushabiliza mu bandi. ¹³ Barumuna bange, nitugonza mumanye amazima ahali balinya abafire, mutaija mukata nimujunara nk’abatagira shubi. ¹⁴ Orwo tulikwikiliza okwo Yesu yafire akashuba akahimbuka, nikwo Ruhanga alihimbura abafire bajwangaine na Yesu. ¹⁵ Eki nitukibagambira nitujuliza ekigambo ky’Omukama, okwo ichwe abakyarora, abakyaliho kuhika orwo Omukama alija, titulyebembera abafire. ¹⁶ Omukama wenene aliruga omw’iguru nahanga n’eiraka lihango, omumalaika mukuru nayeta, enzamba ya Ruhanga netaaga. Abafire bajwangaine na Kirisito nibo balihimbuka mbere. ¹⁷ Aho ichwe abalikurora abakyaliho, tulibakiranwa n’abahimbuke abo omu bichwi kwakilira Omukama eiguru. Kityo tulituura n’Omukama ebiro byona. ¹⁸ Aha rw’ekyo mumaramazangane ebigambo ebyo.

¹ Barumuna bange, taliho nshonga ya kubahandikira biro na birumo orwo ebi bilibaho. ² Inywe nywenene nimumanya okwo ekiro ky’Omukama kilija bundi mushuma omw’itumbi. ³ Orwo abantu baliba nibagamba bati, «Milembe, taliho kabi,» nirwo akabuta kalibatera kibandagara nk’okwo ebisha bikwata omukazi w’enda, mara tibaliiruka. ⁴ Kyonkai inywe barumuna bange, timuli mu mwilima, kugir’oti ekiro ekyo kilibagwaho kibandagara. ⁵ Nobona inywe inywena muba bana b’omushana. Tituba bana ba kiro anga mwilima. ⁶ Kityonu tutanagira nka banu. Twikare niturora, tutejaaka. ⁷ Abanagira banagira kili kiro, n’abatamiira batamiira omu kiro. ⁸ Kyonkai orwo tuli bana b’omushana tuleke kwejaaka. Omu kifuba tujware engabo y’okwesiga n’engonzi. Ehelumeta yaitu ebe shubi yaitu y’okurokoka. ⁹ Aha Ruhanga talikututekatekera kibonabonyio. Nagonza katurokoka tujwangaine n’Omukama waitu Yesu Kirisito, ¹⁰ ayatufelekeleire: Tulikaba niturora anga tufire tubone kurora hamoi na wenene. ¹¹ Aha rw’ekyo mugumisangane mara mutekanganemu amani, nk’okwo mulikugira mwaha. ¹² Kyonkai barumuna bange, nitubatagiliza mukunire abalikubakolera, kandi ni bakuru banyu omw’ibara ly’Omukama, mara nibabahana. ¹³ Mubahe ekitinwa kingi muno mara mubagonze aha rw’omulimo gwabo. Mugire emilembe omuli inywe. ¹⁴ Barumuna bange, nitubashaba mube nimuhana abanafu; abahahaine emitima mubagaruremu akoyo, abalikworoba mubajune, bona abo mubegumisilize. ¹⁵ Mwelinde hatabaho muntu n’omoi ayayehoroza. Buli kanya muteho amani kukolerangana kurungi mara mukolere kurungi abantu bona. ¹⁶ Mwikare nimushemelerwa, ¹⁷ mushome enshara buli kaanya, ¹⁸ omuli byona musiime, aha rw’enshonga Ruhanga nikwo alikubendera orwo mujwangaine na Yesu Kirisito. ¹⁹ Mutasirasiza Mwoyo. ²⁰ Eby’abarangi balikuranga mutabigaya, ²¹ kyonkaisi mutafa kwikiliza. Mugume aha bili birungi, ²² kandi mwekenge ekili kibi omu ngeli yona yona. ²³ Ruhanga Omukama w’emilembe asinge abahindure batakatifu limoi limoi, kandi Omukama waitu Yesu Kirisito k’alija emitima yanyu n’emyoyo yanyu n’emibili yanyu bishangwe bigumire obuzira kamogo. ²⁴ Yesu Kirisito alikubeta aba mwesigwa, mara niwe wenene alikora ebyo. ²⁵ Barumuna bange mutushabire. ²⁶ Barumuna baitu bona mubakeise n’omunywegero gutakatifu. ²⁷ Nimbatagiliza mbataireho Omukama, ebarua egi mugishomere barumuna baitu bona. ²⁸ Omugisha gw’Omukama waitu Yesu Kirisito gube nainywe.