1 PETERO

¹ Inye Petero, entumwa ya Yesu Kirisito, n’inye ndikubahandikira inywe bazahe abenaganagire, abali Ponto, Galasia, Kapadokia, Asia na Bitinia. ² Ruhanga Isheichwe akabaronka aina omugendelero aha rwanyu, kandi Mwoyo yabahindura batakatifu kamugira omuhuliro ahali Yesu Kirisito mukashuba mukahasilirwa obwambabwe. Mugire omugisha gungi n’emilembe etali mike. ³ Nakasinge Ruhanga Ishe Omukama waitu Yesu Kirisito! Aha rw’obuganyizibwe obungi tukazarwa bundi buhya, twagira eshubi ey’ebiro byona aha rw’okuba Yesu Kirisito akahimbuka omu bafu. ⁴ Mara aho tulindiliire obusika obw’eira lyona, obutainamu kamogo, obutahwaho. Obusika obwo mwabutekatekeirwe omw’iguru, ⁵ inywe abo Ruhanga alikulinda omu bushobora bwa wenene aha rw’okwesiga kwanyu, mushobore kurokoka omu kurokoka okulimanyika aha maheleruka. ⁶ Aha rw’ekyo mushemelerwe, n’orwo rundi mwakuragirwa kushashaho akabanga kake omu biyengo ebitali bimoi. ⁷ Ebiyengo ebyo nibibagumisa omu kwesiga, okwesiga kuba kw’eiguzi kushaaga ezahabu ehwaho n’orwo bagijuguta omu muliro. Orwo Yesu Kirisito aliija okwesiga kwanyu kulibasiimisa, kulibabonesa ekitinwa, kulibaha okukunirwa. ⁸ Inywe timukamubonaga kyonkai nimumugonza. N’orwo mutalikumubona mwaha nimumwesiga mara mwina n’amashemelerwa agatali ga kugambwa. ⁹ Okwesiga kwanyu kulibarugiramu okurokora emyoyo yanyu. ¹⁰ Abarangi abarangaga omugisha ogwo mwabaire nimwija kugilirwa, bakabaza mara banyomoza aha burokozi obu. ¹¹ Bahenjuzaga ni muntu wa ngeliki n’amakiroki ebyo Mwoyo wa Kirisito ayabaire abasingiiremu yabashuruliraga, akabamanyisa n’obushasi bwa Kirisito butakabaireho, n’ekitinwakye ekilikuhonderaho. ¹² Bakashuruliwa bamanya okwo omulimo gw’oburangi babaire batalikugukora aha bwabo; bakaba nibagukora aha bwanyu, baranga amakuru ago mwagambiirwe ababarangiire evangeli omu mani ga Mwoyo Mutakatifu owo mwatwekeirwe kuruga omw’iguru, amakuru ago abamalaika bagonza kubona. ¹³ Aha rw’ekyo mweyememu mugume emitima, mwelinde muno, mushubire omugisha ogwo mulikwija kutungwa aha maija ga Yesu Kirisito. ¹⁴ Mube baana b’omuhuliro, mutegarukana bunyama obwo mwagiraga aha rw’obutamanya bwanyu. ¹⁵ Omu ntwaza zanyu zona mube batakatifu nka Ruhanga ayabesire. ¹⁶ Kikahandikwa kiti, «Mube batakatifu, aha rw’okuba inye mba Mutakatifu.» ¹⁷ Kandi kamuratakira Ruhanga aramura buli omoi kuhondera ebikorwabye, atamugiliire kigonzi, niwe Isheichwe, murarora kurungi nimumutina ebiro byona orwo muli omu buzahe. ¹⁸ Nimumanya okwo mwachungwirwe omu michwo yanyu etaina mugasho eyo mwaihire ahali bashw’enkurw’inywe. Timwachunguziibwe bintu ebihwaho nk’efeza n’ezahabu; ¹⁹ mukachunguzibwa obwamba bwa Kirisito obw’eiguzi lihango, nk’obw’akataama akataina kamogo anga katalizi. ²⁰ Wenene akamanyika karai ensi etakatonzirwe, kyonkai yaija yaboneka orwo obukiro bwagobire aha rwanyu, ²¹ inywe abo yashoboize kwesiga Ruhanga, ayamuhimbwire omu bafu akamutunga n’ekitiinwa, okwesiga kwanyu kubone kuba niyo shubi yanyu omuli Ruhanga. ²² Mbwenu orwo mwamazire kuba batakatifu aha rw’okugira omuhuliro aha mazima, kushobora kugonza barumuna baanyu obumaramunda, mugonzangane muno engonzi ezilikuruga aha mutima. ²³ Mukazarwa bundi buhya mutarugire mu mbibo elikufa, mukaruga omu mbibo etafa, nikyo kigambo kya Ruhanga ekigiza oburora mara eky’eirai lyona. ²⁴ Nobona, «Abantu bona nibashusha obunyasi, n’oburungi bwabo nibushusha enyakyo z’ebikamba, ebikamba byoma, enyakyo ziragara, ²⁵ kyonkai ekigambo ky’Omukama kiba ky’eirai lyona.» Ekigambo ekyo niyo vangeli eyo mwarangiirwe.

¹ Mulekere eitima, obugobya, akachubirano n’okuchwelererana. Ebi byona mubilekere omu ngeli zona. ² Mube nk’obukelemeke, mugonze amata, kyonkai amata agatakatifu ag’omwoyo, gabakuze gabagobye aha kurokoka. ³ Manyasi mwarolizeho, mwamanyire okwo Ruhanga aba mufura. ⁴ Mugobe Yesu Kirisito eibare ly’oburora, elyayangirwe abantu, kyonkai ahali Ruhanga likaba ibare elironkwa mara ely’eiguzi lihango. ⁵ Mushushe amabaare g’oburora, murugwemu enju y’omwoyo, n’oruganda rutakatifu rw’abakuhani, mutambire Ruhanga ebitambo by’omwoyo ebilikumushemelera mwemire na Yesu Kirisito. ⁶ Enshonga omu bihandiko kikahandiikwa kiti, «Leba omuli Sioni natekamu eibare, eibare ly’epembe elironkwa mara ely’eiguzi lihango, alikamwesiga talishonara.» ⁷ Aha rw’ekyo ahali inywe abalikumwesiga Yesu Kirisito ogwo w’eiguzi lihango. Kyonkai ahali baliinya abatalikumwesiga, kikahandiikwa kiti, «Eibare lyonene lyonene elyayangirwe abombeki, nilyo lyabaire ly’epembe,» ⁸ mara kandi, «Eibare elyo lilibasitaza, orwazi orulibagwisa.» Nibasitara kuba tibaina muhuliro orwo batalikukora nk’okwo bagambiirwe. ⁹ Nawe inywe muli ihanga elironkwa, abakuhani b’Omukama, eihanga litakatifu, abantu ba Ruhanga, abe nyabwe, mubone kuranga oburungi bwa Yesu Kirisito ayabesire akabaihya omu mwilima, akabatahya omu mushanagwe katangaza. ¹⁰ Eirai mukaba mutali ihanga, kyonkai mbwenu mwabaire ihanga lya Ruhanga; eirai mukaba mutagiliirwe buganyizi, kyonkai mbwenu mwagiliirwe obuganyizi. ¹¹ Abagonzibwa, nimbatagiliza, muli bafuruki mara bazahe, mwekenge amairu g’obunyama agatura nigabema kubi. ¹² Mugire emirolere mirungi omu Banyamahanga. Kityo n’orwo bakubagamba okwo muli babi, ahanyuma bashobore kubona ebikorwa byanyu ebirungi bashube basingize Ruhanga aha kiro ky’amaheleruka. ¹³ Aha bwa Mukama muhulire buli butwazi. Alikaba ali rubamba nk’okwo omukama ali, ¹⁴ anga abagavana abo ab’atumire kubonabonyia ababi n’okusiima abarungi, mubahulire. ¹⁵ Aha rw’okuba Ruhanga nagonza kamukora kurungi mukabona kusiza abafera abatalikumanya kantu. ¹⁶ Mugire emilembe aha mwoyo, mara emilembe etali ya bugobya. Mube bairu ba Ruhanga. ¹⁷ Mukunire abantu bona. Mugonze bataahi banyu abalikwesiga. Mutine Ruhanga kandi mukunire omukuru w’eihanga. ¹⁸ Inywe bairu muhulire bakama banyu n’okubakunira muno. Mutahulira bafura na barungi bonkai, kyonkai n’ab’omwaga mubahulire. ¹⁹ Nobona omuntu ayegumisiliza obushasi nibamutura bushai, mara kandi ateebire Ruhanga, omuntu nk’ogwo asiimwa. ²⁰ Mwakusiimwa aha rwa nshongaki kamuraba nimwegumisiliza okuterwa ahakuba mufakaire? Nawe kamulikukorage mukaba nirwo muterwa kyonkai mukegumisiliza, aho Ruhanga nabasiima. ²¹ Ogu nigwo mweto gwanyu, kuba na Kirisito akabashasira, yabasigira obulebero mushobore kumurondora. ²² Wenene tiyakozire bufu mara tiyabeiyaga. ²³ Kyonkai kabamujumire tiyabagarukiremu kubajuma. Akashaasha kyonkai tiyakangire muntu; shana akesiga omuramuzi w’amazima. ²⁴ Akatilira amafu gaitu aha muti k’atugalekera tukaba bagorogoki. Amahutage gakakiza inywe. ²⁵ Mukaba muhabire nk’entaama, kyonkai mbwenu mugarukire aha Mushumba mara Omulinzi w’emyoyo yanyu.

¹ Inywe bakazi muhulire bashaija banyu. Ka haraba haliho abatalikwikiliza kigambo kya Ruhanga, bashobore kuhindurwa emirolere ya bakazi babo bataina kigambo kyona kyona ekyo babagambire, ² orwo barabona emirolere yanyu emirungi eshemeire. ³ Okwechuma kwanyu okw’emibili kutagiramu kusiba ishoke, okwelengya n’ezahabu n’okujwara ebishemeire. ⁴ Okwechuma kwanyu kube kw’omunda aha mitima, ekijwaro ekitafa eky’eibare ly’eiguzi eky’omwoyo gw’obufura n’obuchulezi, ekirungi muno ahali Ruhanga. ⁵ Nikwo n’eirai abakazi batakatifu abamanyaga Ruhanga n’okuhulira baibabo bajwaraga. ⁶ Obulebero ni Sara; yahuliraga Aburahamu namweta «Mukama wange.» Leba mbwenu inywe muli baana ba Sara kamurata nimukorage mutalikusindikwa butini. ⁷ Nainywe bashaija muture mutyo na bakazi banyu. Mukunire omukazi aha rw’okuba amanige gake kushaaga ag’omushaija, nobona inywe hamoi na bonene nimwija kugilirwa ekisha ekilibagiza oburora, enshara zanyu zitaliija zikakwatira. ⁸ Eky’enzindo inywena mugire emitekelereze emoi, mushasirangane, mugonzangane bundi barumuna, mugilirangane embabazi n’omutima gw’obuchulezi. ⁹ Muleke kwehorozangana anga omuntu kukujuma naiwe okamujuma. Omu mwanya gw’ebyo mwenderangane omugisha, manya ogwo nigwo mweto gwanyu, nirwo mulibona kutungwa omugisha. ¹⁰ Manyasi, «Omuntu alikugonza kushemelerwa oburora, mara akagira emilembe orwo alikurora, ayelinde okugamba kubi, n’ekishuba kitalimurugaho. ¹¹ Alekere okufakara, akorege, agonze emilembe mara agiitanire. ¹² Omukama amaisho agataire aha bagorogoki, mara n’enshara zabo azihulira. Kyonkai abakora kubi abaleba kubi.» ¹³ Mbwenu ow’okwija kubakora kubi n’ohai kamuraba mwina ekihika ky’okukora kurungi? ¹⁴ Nangu n’orwo muraba nimushasha nimuturwa obugorogoki, muli baberwa. Mutabatina anga kusiiba nimufa kubi. ¹⁵ Ekiliho muhe Kirisito ekitiinwa omu mitima yanyu, nimumanya okwo aba Mukama. Buli kaanya mwikare mwetekatekire kuhororangana n’omuntu alibashonshomora aha rw’eshubi yanyu eyo mwinayo. Kyonkai muhororangane nawe omu buchulezi n’amakune. ¹⁶ Kandi mwikare n’emitima elikwera, orwo murajumwa, abalikubajumira emikaliire yanyu aha rw’omujwangano gwanyu na Kirisito baije bakwatwe enshoni. ¹⁷ Kirungi kubonabona nimuturwa okukora kurungi, ka Ruhanga alikwenda atyo, kushaaga okubonabona aha rw’enshonga y’okushangwa mukozire kubi. ¹⁸ Manyasi na Kirisito kayafire kwatilira entambara akafa limoi lyonkai, omugorogoki yafera abatali bagorogoki, agendeleire kutugobya ahali Ruhanga. Bakamwita omubili, tibamwisire mwoyo. ¹⁹ Akagenda ali mwoyo gwonaka kurangira emyoyo eyabaire eli jela, ²⁰ nibo bantu aba karai abatahuliire Ruhanga orwo yabegumisiliize omu makiro ga Noa, orwo Noa yakora obwato. Obwato obwo nimwo abantu bake, munaana bonkai, bahungiiremu aha maizi bakakira, ²¹ amaizi ago nigashura okubatiza okulikurokora inywe makiro aga. Okubatiza okwo tikulikwogya nziro za mubili, shana Ruhanga naba aina ekyo alikubaraganisa mara kimurugire aha mutima. Okubatiza kwonene nikubarokora aha rw’okuba Kirisito akahimbuka, ²² yashuba yatemba omw’iguru, asingiire aha bulyo bwa Ruhanga, ali Mukama w’abamalaika, n’abatwazi n’abaina obushobora.

¹ Orwo Kirisito yashasire omubili, nainywe mukwate ebikwato by’endashana, nikwo kugir’oti mutekeleze nka wenene. Omuntu ayashasha omubili tashubira kufakara, ² mubone kumara oburora bwanyu bw’omu nsi mutakitwarwa bunyama, shana kukora ebyo Ruhanga agonza. ³ Omu makiro agahingwire eby’abanyamahanga bagonza ebyo mwakozire nibimara. Byonene ebyo nibwo bujanga, amairu g’obunyama, etamiiro, kulya kushaagulirana, kunywa kuzina kukeisa obwire, n’okufukamira ebihuuku. ⁴ Abatakansi abo nibatangara kubona mutakyema nabo kujanga, mara nibabajuma. ⁵ Kyonkasi muliragirwa kwetonda obusigire ahali Kirisito alikwija kuramura abarora n’abafire. ⁶ Nikyo n’abafire barangiirwe evangeli babone kurora oburora bw’omwoyo nka Ruhanga, n’orwo barashangwa baramwirwe emiramulirwe ey’abantu. ⁷ Amaheleruka ga buli kantu gali haihi. Kityo mwelinde mara mwebalire nirwo murashobora kushoma enshara. ⁸ Ekilikushaga byona mugonzangane buli kaanya; engonzi zatilira amafu gangi. ⁹ Mutahirangane mutalikweboroboita. ¹⁰ Nk’okwo buli omoi yahairwe amatungwa, amatungwa ago agakoze aha rw’obuge bwa mutahiwe, mube bageleezi b’ekisha kya Ruhanga ekitali kya ngeli emoi. ¹¹ Alikugamba agambe nk’alikugamba eby’ashuruliirwe Ruhanga. Alikukolera banu akoze amaani ago Ruhanga amuhaire. Ruhanga abone kuhaisilizibwa omuli byona aha rwa Yesu Kirisito. Obushobora n’ekitiinwa biina wenene eirai lyona. Amina. ¹² Bagonzibwa, omuliro ogwizire kubalenga gutabatangaza, okw’obon’oti mwagwerwa eihano. ¹³ Shana mushemelerwe kubona nimushasha nka Kirisito, mwije mubone kushanduka n’okushemelerwa k’aliboneka omu kitinwakye. ¹⁴ Kamurajumwa nimuzira eibara lya Kirisito muraba muli baberwa, manya Mwoyo w’ekitinwa owa Ruhanga naba abaliho. ¹⁵ Kyonkai hataligira muntu n’omoi omuli inywe ow’okubonabonyibwa aha rw’obwita muntu, anga obushuma, anga okukora kubi, anga kwetahya omu bitamukwete. ¹⁶ K’omuntu arabonabona aha rw’okuba mukirisito, atakwatwa nshoni, shana asingize Ruhanga kubona ali mukirisito. ¹⁷ Nobona obukiro bwagobire, eiramu nilibandiza aha ihanga lya Ruhanga. Mbwenu k’eiramu elyo liraba nilibandiza ahali ichwe, lero amaheleruka g’abatahulira vangeli ya Ruhanga garashusha gatai? ¹⁸ Kandi, «K’omugorogoki araba atazilize kurokoka, atatina Ruhanga n’omufakare baragyahai?» ¹⁹ Aha rw’ekyo abalikubonabona nk’okwo Ruhanga ayenzire bagume bakore kurungi, mara emyoyo yabo bagikwase omutonzi omwesigwa.

¹ Nintagiliza abaraba bali bagurusi omuli inywe, inye ndi mugurusi mutahi wanyu mara omujulizi w’obushasi bwa Kirisito kandi alikwija kubona ekitinwa ekiliboneka ahanyuma. ² Mushumbe obuhyo bwa Ruhanga obwo mwakwasiibwe. Mutabuliisa nk’abagimbirwe, mubuliise mweyendeire. Mutakora mulimo gwanyu mugendeleire kwihyamu magoba agataina mbali gali, shana mugire omutima gw’okukolera banu. ³ Obuhyo obwo mutabutwaza makaka, shana ekiliho mube bulebero ahali bwonene. ⁴ Orw’omushumba mukuru aliija mulibona orukinga orw’eirai lyona. ⁵ Kutyo nainywe abali bato muhulire abagurusi banyu. Mugilirangane obwetohya, nomanya, «Ruhanga tayenda baina ikuru, kandi abetohya nibo agilira ekisha.» ⁶ Ruhanga aba mushobora, aha rw’ekyo mumwetohyeho, nirwo k’obukiro bulihika alibakuza. ⁷ Ebilikubashobeza byona mubikwase wenene, orw’okuba abetaireho. ⁸ Mwelinde mara mwikare muzoire amaisho. Sitani omubisha wanyu nashoita nabazingora nk’entare elikusinda nehigiliza ow’eralya. ⁹ Mumusimbaliire, mugume omu kwesiga kwanyu, kuba nimumanya okwo barumuna banyu omu nsi yona nabo balikubona obushasi nk’obwanyu. ¹⁰ Kamuraba mwashasire akabanga kake, Ruhanga omugizi w’ekisha ayabesire kamutaha omu kitinwakye eky’eirai lyona mujwangaine na Kirisito, arabaha amani mara abagumise, timuliyuga. ¹¹ Obushobora bwina wenene eirai lyona. Amina. ¹² Nabahandikiira ningutura, omuhandiki wange ni Silivano, murumuna waitu omwesigwa okwo inye mubona. Nimbatagiliza mara nimpamisa okwo eki nikyo kisha kya Ruhanga eky’amazima, mara nainywe mugume omu kisha ekyo. ¹³ Enteko ya Babiloni endonkwa nka inywe nebakeisa; kandi kutyo n’omwana wange Mariko. ¹⁴ Mukeishanyie inywena nomunywegero gw’engonzi. Inywena okwo muli ba Kirisito mugire emilembe.