1 YOHANA

¹ Nitubahandikira Kigambo w’oburora, ayabaireho kwema eirai lyona owo twahuliire, owo twayeboneire n’amaisho gaitu, owo twalebire nangu tukamukwataho n’emikono yaitu. ² Oburora bukaboneka, twabubona, twabwekomya, obwo nibwo burora obw’eira lyona obwo tulikubagambira, obwaturaga na Isheichwe kandi bukashuba bukazoka omuli ichwe. ³ Oburora obwo twaboine tukahulira nibwo tulikushuba tukabagambira, nainywe mubone kuba hamoi naichwe; mara tuli hamoi na Isheichwe hamoi n’Omwanawe Yesu Kirisito. ⁴ Ebigambo ebi nitubibagambira ebyera byaitu bibone kugobeelera. ⁵ Ebi nibyo twahuliire aha Mwana wa Ruhanga mara nibyo tulikubagambira, okwo Ruhanga aba mushana mara omuli wenene tabamu mwilima n’akake. ⁶ Katuragamba okwo tuli hamoi na wenene kandi okwo nitukora eby’omwilima, nitubeiya mara titulikurora kuhondera amazima. ⁷ Kandi katulikukora eby’omushana, nk’okwo wenene Ruhanga aba mushana, aho naichwe nituba tuli hamoi, n’obwamba bwa Yesu Omwanawe nibutwogya amafu gona. ⁸ Katwakugamba okwo tutaina bufu, nitwebeiya, n’amazima titwinago. ⁹ Katurayetonda amafu gaitu ahali Ruhanga, wenene okwo aba mwesigwa mara w’amazima, aratugarulira amafu ago, atwogye n’entambara zona. ¹⁰ Katuragamba okwo tutakafakaraga, aho nitubeiyesa Ruhanga kandi n’ekigambokye nituba tutakyekomize.

¹ Twana twange, nimbahandikira ebigambo ebi mutaija mukafakara. Kyonkai k’omuntu yakufakara, twina omutongani waitu ahali Isheichwe, omutongani ogwo niwe Yesu Kirisito omugorogoki. ² Niwe ayatilira amafu gaitu, mara tayatilira gaitu gonkai, ayatilira n’amafu ag’ensi yona. ³ Katurakwata emihangoye aho niho twakwema kugamba okwo tulikumumanya. ⁴ Alikugamba ati, «Nimumanya,» kyonkai atakwete mihangoye ogwo mugambi w’ebishuba, kandi naba ataina mazima. ⁵ Mara omuntu ayekomya ekigambokye, ogwo engonzize ahali Ruhanga niziba zihikiliire. Ahali eki niho twakumanyira okwo tujwangaine nawe. ⁶ Omuntu alikugamba okwo ajwangaine na Kirisito naragirwa kuraba omuhanda gwonene gwonene ogwo Kirisito yarabiremu. ⁷ Bagonzibwa bange, tindikubahandikira muhango guhya. Nimbahandikira omuhango ogukuru ogwo mwakaturaga nagwo kwema aha mbandizo. Omuhango ogukuru ogwo nikyo kigambo ekyo mwahuliire. ⁸ Mara kandi ninshuba nimbahandikira omuhango oguhya, ahakuba amazima gagwo nigaboneka omuli Kirisito n’omuli inywe, orw’omwilima gulikugenda niguhwaho kandi omushana nyakabara gwajwire. ⁹ Omuntu alikugamba okwo ajwangaine n’omushana kyonkai okwo nanoba omurumuna, ogwo akyajwangaine n’omwilima. ¹⁰ Ayakagonza omurumuna aikara ajwangaine n’omushana, mara taina nshonga yoyakwemaho kusitara. ¹¹ Kyonkai ayakanoba omurumuna aba ajwangaine n’omwilima mbali alikugya talikuhamanya, manyasi omwilima gukamwigara amaisho. ¹² Twana twange, nimbahandikira aha rw’okuba aha rwa wenene nimugarulirwa amafu ganyu. ¹³ Inywe baishebantu nimbahandikira, aha rw’enshonga okwo Ruhanga abaho kwema eirai lyona nimumanya. Nimbahandikira inywe basigazi, kuba musingire omubisha. Inywe baana nimbahandikira, kuba Isheichwe nimumumanya. ¹⁴ Nimbahandikira inywe baishebantu aha rw’enshonga nimumanya Ruhanga abaho kwema eira lyona. Basigazi nimbahandikira kuba muli manzi, n’ekigambo kya Ruhanga kisingiire omuli inywe, mara musingire omubisha. ¹⁵ Mutaligonza nsi anga kugonza bintu byayo. Omuntu k’agonza ensi aho engonzi ahali Isheichwe naba atainazo. ¹⁶ Ebili omu nsi byona, nk’amairu g’omubili, ebishemelera amaisho, n’ebigiza abantu eikuru omu burora bwabo, ebyo Isheichwe tabigonza, shana ensi niyo ebigonza. ¹⁷ Ensi ehwaho, n’amairu gayo gona. Kyonkai omuntu akora ebyo Ruhanga agonza, ogwo agumaho eirai lyona. ¹⁸ Twana twange, akaanya aka k’amaheleeruka. Mwahuliire okwo omushengi wa Kirisito alikwija, kityo mbwenu ababisha bangi ba Kirisito baizire. Aha rw’ekyo nitumanya okwo akaanya aka kali k’amaheleeruka. ¹⁹ Bakaturugamu, kyonkai bakaba batali baitu. Kabakubaire bali baitu bakutwikairemu. Kyonkai bakagenda kakimanyika bunyanungi okwo ti bona baitu. ²⁰ Kirisito akabatunga Mwoyo Mutakatifu, mara nainywe taliho kyomutalikumanya. ²¹ Tindikubahandikira rwa nshonga timulikumanya mazima, amazima nimugamanya, mara nimumanya okwo omu mazima tabamu kishuba. ²² Omugambi w’ebishuba t’ondijo, n’olinya alikwanga okwo Yesu ali Kirisito. Alikwanga Isheichwe n’Omwana, ogu mushengi wa Kirisito. ²³ Kaishe muntu ayanga Omwana ayanga na Isheichwe. Ayakunda Omwana akunda na Isheichwe. ²⁴ Ebyo mwahuliire kwema orwa mbere mubyekomye. Kamurayekomya ebyo mwahuliire kwema orwa mbere, aho muliguma mujwangaine na Mwana na Isheichwe. ²⁵ Ekyo yaturaganisize niky’eki: Oburora obutalihwaho. ²⁶ Ebi nabibahandikira ningamba ahali balinya abakugondize kubahabisa. ²⁷ Kyonkai Kirisito akabatunga Mwoyo Mutakatifu, timulikwetaga kwegesibwa muntu ondijo wena wena. Kayabatungire Mwoyo Mutakatifu akabegesa buli kantu, amazima, kitali kishuba. Nk’okwo yabegesize orwo yabatungire Mwoyo Mutakatifu, mpaho mugume mujwangaine nawe. ²⁸ Mbwenu inywe twana twange, mugume mujwangane na Kirisito, aho k’aliija tutalikwatwa nshoni, tugire obwesige bungi mara tumanzare tumugobe. ²⁹ Kamuraba nimumanya okwo aba mugorogoki, mumanyire kimoi okwo buli omoi akorage aba mwanawe.

¹ Mulebe engonzi ezo Isheichwe yatugiliire, ichwe kwetwa baana ba Ruhanga, mara nikwo tuli. Ekyo ensi etatumanyira niky’eki: Wenene tiyamumanyire. ² Mbwenu bagonzibwa bange, ichwe twabaire baana ba Ruhanga. Emishusire yaitu okwo tuliba tuli telikuboneka mwaha, kyonkai nitumanya okwo orwo aliija tulimushusha. Tulimubona nk’okwo aliba ali. ³ Kandi buli omoi aina eshuubi egi ataho amaani kuba mutakatifu nk’okwo Kirisito wenene aba mutakatifu. ⁴ Buli muntu akora obufu akwatwa omushango gw’obushengi; manyasi obufu buba bushengi. ⁵ Nimumanya okwo yaizire kutugarulira amafu gaitu, mara wenene tiyakozire bufu. ⁶ Taliho ajwangana na Kirisito akashuba akafakara. Kandi ayafakara ogwo takaabonaga Kirisito, n’okumumanya chei. ⁷ Twana twange, omuntu atakubabeiya. Ayakakora eby’obugorogoki aba mugorogoki, okwo Kirisito wenene aba mugorogoki. ⁸ Akora entambara aba wa Sitani, enshonga Sitani akafakara kwema karai. Ekyalesire Omwana wa Ruhanga akaija kuchwa amafu ga Sitani. ⁹ Ayakazairwe Ruhanga tafakara, manyasi Ruhanga wenene wenene nyakabara aba asingiire omuli ogwo, mara tiyakufakara orwo ali Mwana wa Ruhanga. ¹⁰ Aha niho abali baana ba Ruhanga n’abali baana ba Sitani bakubonekera. Atakora kurungi taba wa Ruhanga, nangu n’atagonza murumuna abulimu. ¹¹ Aga nigo makuru ago mwahuliire kwema aha mbandizo, okwo tulikuragirwa kugonzangana, ¹² tutashusha Kaini ayabaire ali wa Sitani akaita omurumuna. Isi akamwitiraki? Akamwita kuba wenene akaba ali muntu mubi, kandi omurumuna akaba ali mugorogoki. ¹³ Barumuna bange mutatangara kubona nsi nebanoba. ¹⁴ Nitumanya okwo twahimbukire, orwo tulikugonza barumuna baitu. Omuntu atagonza ogwo aba afire. ¹⁵ Ayakanoba omurumuna aba mwisi, mara nimumanya okwo omwisi tagira burora obutalihwaho. ¹⁶ Okutufera kwa Kirisito niho tumanyira engonzi kiki. Naichwe nituragirwa kufera barumuna baitu. ¹⁷ Kyonkai k’omuntu araba ali mutungi, kandi omurumuna ali munaku akashuba akanga kumushumbusha, ogwo engonzi za Ruhanga ainazo ngeliki? ¹⁸ Twana twange, tuleke kugonzangana omu bigambo anga aha rulimi kushai. Tugonzangane omu bikorwa n’omu mazima. ¹⁹ Aha niho turamanyira okwo tuli b’amazima, tukagira n’obwesige ahali wenene. ²⁰ K’emitima yaitu elikutukeena, nitumanya okwo Ruhanga ali muhango kushaaga emitima yaitu yonene mara namanya buli kantu. ²¹ Bagonzibwa bange k’emitima etatukeenire, nitugira obwesige ahali Ruhanga, ²² n’ebyo tulikumushaba byona byona nabitutunga, aha rw’okukwata emihangoye n’okukora ebilikumushemelera. ²³ Omuhangogwe nigw’ogu: Twesige Omwanawe Yesu Kirisito mara tugonzangane, nk’okwo yatuhangre. ²⁴ Bona abekomya emihango ya wenene baikara bajwangaine nawe, nawe aikara ajwangaine nabo. Mwoyo owo yatutungire niwe tumanyiraho okwo Ruhanga asingiire omuli ichwe.

¹ Bagonzibwa bange, mutakwikiliza buli omoi alikwegamba okwo aina Mwoyo. Mubanze munyomoze nka Mwoyo owo ainawe naruga ahali Ruhanga. Ahakuba abarangi b’ebishuba bemaliire omu nsi zona. ² Aha niho muramanyiraga Mwoyo wa Ruhanga: Buli muntu alikugamba okwo Yesu Kirisito yayehindwire muntu, ogwo Mwoyo ow’ainawe naruga ahali Ruhanga. ³ Kandi atalikugamba Yesu migambire egyo, ogwo taina Mwoyo alikuruga ahali Ruhanga. Mwoyo ow’ainawe naruga aha Mushengi wa Kirisito, owo mwahuliire okwo aliija, mara Omushengi ogwo yaizire omu nsi. ⁴ Twana twange, inywe muli ba Ruhanga, mara mwasingire abarangi b’ebishuba. Mwoyo asingiire omuli inywe muhango kushaaga Omushengi wa Kirisito ali omu bantu b’ensi. ⁵ Abarangi b’ebishuba bantu b’ensi, mara n’ensi nebahuliliza. ⁶ Ichwe tuli ba Ruhanga. Weena wena aba wa Ruhanga atuhuliliza, kandi atali wa Ruhanga ogwo tatuhuliliza. Aha niho mumanyira Mwoyo ow’amazima na mwoyo ow’ebishuba. ⁷ Barumuna bange, tugonzangane. Engonzi ziruga ahali Ruhanga, kandi agonza aba mwana wa Ruhanga mara amanya Ruhanga. ⁸ Omuntu atagonza tamanya Ruhanga, manyasi Ruhanga aba ngonzi. ⁹ Omu ngonzi nimwo engonzi za Ruhanga zamanyikiire omuli ichwe, orwo Ruhanga yatumire Omwanawe omumoi omu nsi, katubona oburora omu kujwangana nawe. ¹⁰ Omu ngonzi ezi nimwo engonzi zisingiire: Tikugir’oti ichwe tukagonza Ruhanga, shana Ruhanga niwe yatugondize akatuma Omwanawe kuba nyatano y’amafu gaitu. ¹¹ Inywe abagonzibwa, ka Ruhanga araba yatugondize atyo, na ichwenu turagiirwe kugonzangana. ¹² Taliho muntu araboine Ruhanga. Katuragonzangana, Ruhanga arasingira omuli ichwe, naichwe turagira engonzize ezihikiliire. ¹³ Ruhanga akatugabiraho Mwoyowe, aho niho tumanyira okwo tujwangaine nawe, na wenene ajwangaine naichwe. ¹⁴ Ichwe tukabona mara twakigambira n’abandi okwo Ruhanga yatumire Omwanawe ali Murokozi w’ensi. ¹⁵ Kaishe muntu ayebuga okwo aba Mwana wa Ruhanga, Ruhanga ajwangana n’omuntu ogwo, kandi nawe ajwangana na Ruhanga. ¹⁶ Kityo nitumanya mara nitwikiliza engonzi ezo Ruhanga ainazo ahali ichwe. Ruhanga aba ngonzi, mara omuntu aguma omu ngonzi aguma n’omuli Ruhanga, na Ruhanga aguma omuli wenene. ¹⁷ Engonzi ezo twinazo Ruhanga nazihindura zigorogoki, aha kiro ky’eiramu tushobore kugira obwesige, kuba okwo ali nikwo naichwe tuli omu nsi egi. ¹⁸ Mbali engonzi zili tabaho butini. Engonzi ezihikiliire zikiza obutini amani. Obutini buba nibushura ekiibonabonyio, kandi omuntu atina, ogwo engonzi ezihikiliire aba atainazo. ¹⁹ Twina engonzi, manya Ruhanga niwe yatugondize mbere. ²⁰ K’omuntu araba nagamba ati, «Ngonza Ruhanga,» mara okwo nanoba omurumuna, ogwo nayebeiya. K’araba atalikugonza murumuna ow’atura nabona, yakugonza atai Ruhanga ow’atakabonaga? ²¹ Mara akatuha omuhango ogu: Agonza Ruhanga agonzega n’omurumuna.

¹ Buli omoi aikiliza okwo Yesu aba Kirisito, ogwo aba ali mwana wa Ruhanga. Buli omoi agonza omuzaire agonza n’omwanawe. ² Orwo tugonza Ruhanga tukahulira n’emihangoye aho niho tumanyira okwo tulikugonza abaanabe. ³ Manyasi ezi nizo ngonzi za Ruhanga: Kwekomya emihangoye. Nobona emihangoye tesikiilira muno muntu. ⁴ Wena wena araba ali mwana wa Ruhanga asinga ensi; mara okwesiga nigo mani gasinga ensi. ⁵ Asinga ensi n’ohai k’atali muntu aikiliza okwo Yesu aba Mwana wa Ruhanga? ⁶ Yesu Kirisito ogu niwe yalesirwe omu maizi n’omubwamba. Tiyalesirwe mu maizi gonkai, akaletwa omu maizi n’omubwamba. ⁷ Omujulizi ni Mwoyo, kuba Mwoyo aba mazima. ⁸ Abajulizi bali bashatu: Mwoyo, amaizi n’obwamba; abajulizi bonshatu nibagamba kimoi. ⁹ Katuraba nitwikiliza ebilikugambwa abantu, aho ebilikugambwa Ruhanga wenene biina amani kushaaga. Ruhanga nagamba okwo wenene niwe mujulizi w’Omwanawe. ¹⁰ Omuntu aikiliza Omwana wa Ruhanga aba aina obujulizi nk’obu aha mutima. Omuntu ataikiliza Ruhanga ogwo aba nabeiyesa Ruhanga aha rw’okutaikiliza ebyo Ruhanga alikugamba aha Mwanawe. ¹¹ Obujulizi nibw’obu: Ruhanga akatutunga oburora obutalihwaho, mara oburora obu nibutabuka omu Mwanawe. ¹² Araba ajwangaine n’omwana ogwo aina oburora; atajwangaine na Mwana wa Ruhanga ogwo oburora tainabwo. ¹³ Inywe abalikwikiliza Omwana wa Ruhanga, nimbahandikira okwo mwina oburora obutalihwaho. ¹⁴ Mara nitumwikiliza omu kwikiliza oku, okwo kyona kyona ekyo turamushaba kuhondera okwo alikwenda aratuhulira. ¹⁵ Kandi katulikumanya okwo alikutuhulira orwo tulikumushaba kyona kyona, nitumanya okwo ebyo tulikuba tumushabire nituba twabiboine. ¹⁶ K’orabona murumuna wawe nakora entambara etakumurugirwamu rufu, oshome enshara ahali Ruhanga, aramutunga oburora. Eki kikwete ahali balinya abaina amafu agatakubarugirwamu rufu. Kyonkai haliho entambara ezarukanwamu orufu; egyo tiyo ntambara eyo ndikugamba kamwemaho kushoma enshara ahali Ruhanga. ¹⁷ Buli kikorwa kibi eba ntambara, kyonkai haliho entambara etalikuzarukanwamu rufu. ¹⁸ Nitumanya okwo kaishe muntu ayazairwe Ruhanga atafakara, nobona Omwana wa Ruhanga amulinda, n’omubisha taina kumukoraho. ¹⁹ Nitumanya okwo tuli ba Ruhanga, kandi ensi yona eli omu mani g’omubisha. ²⁰ Ekindi nitumanya okwo Omwana wa Ruhanga yaizire mara akatuha okushobokerwa, tubone kumanya Ruhanga wenene ow’amazima; mara tujwangaine nawe, Ruhanga ow’amazima, hamoi n’Omwanawe Yesu Kirisito. Ogu niwe Ruhanga ow’amazima mara niwe burora obutalihwaho. ²¹ Twana twange, murayelinda ebihuuku.