Tito

Tito

¹ Jesucristonö wale lä shimöleno wei, ei Pablo cä ya. Yai Bada ya wa̦ fuabä lä ya e. Yai Bada tänö cama ebä lä yaileno wei ya bä bufi lofotoamabä cä ya. Bejedi tä a̦ cadidabeje ya bä yömölaö, Yai Bada lija bä cadidobä. ² Bä nia lä ba̦limio wei tä ja bä nö daobä, ya bä yömölaö. Yedu ja, bämalecö nia lä ba̦limiblamaö wei, Yai Bada tänö tä a̦fa wäaö balöoma. A jolemoimi. ³ Bämalecö lä fucäaö wei a lä cuinö tä a̦ wawämaö lä bufiono wei däjä, tä a̦ wawämaö showadaoma. Ö̦jö ya etä a̦ wäyäö cuaabä, wale cadidilema. ⁴ U̦asi, Tito. Cafä lija ya si oniblaö lä cule. Cafä sho Jesucristo bäfä a nofi mölabou yalo, bä nofi ijilumaö cadidiwä. Bei. Fayä Yai Bada lija wa shi̦lo bayeliblamobä, Bada tä Jesucristo lija ca̦i. Wa nofi shi̦lo ojodaboböbä. Wa bufi shi̦lo ca̦i yanöcömaboböbä. ⁵ Cledateli bä ulufibö lä jo̦cole jamö bä daquefälöma, Jesucristo ebä lä yododaö wei bä dobloimi lä showai tä ja, wa bä cadidamaö juobä, bä nowa da tableinaja showawä. Ö̦jamö lä bada wa bä tablamaö cuaabä, Jesucristo ebä ca̦i yododabeje. ⁶ Abenaja bä lä cui wa bä bada tablamabä. A wa̦fa tamou dao lä mlai, bä suwäbö moli a lä bole, bä ijilubö ebänö Yai Bada a lä bufiblaö wejei a cuobä. Bä ijilubö ebä a̦fa dodijaö lä tamou wei, ebä lä wasöo wei a shi̦lo bada cuobä. ⁷ Jesucristo ebä ca̦i yododabeje a lä cui, Yai Bada lija a ojodamou cadidia yalo, a lä bejedimou wei a nia shi̦lo cuo. Oquejewä a wa̦ lä faö wei a cuobä, a jushuo si ijejeoblou lä mlai, cama a shi wa̦limamou lä mlai, a waitelimou si ijejeoblou lä mlai, madofi bä ja a bufi waiyou lä mlai a shi̦lo bada cuobä. ⁸ Fama bä bälömabou bufi lä doblao wei a cuobä. A dodijaö bufi lä doblao wei, a wasöo lä dao wei a cuobä. A bufi lä cadidou wei, Yai Bada lija a lä ojodao wei, a bufi lä dao wei a shi̦lo bada cuobä. ⁹ Cama lija bejedi tä a̦ lä wäyämono wei tä a̦ nofi lä cadidibou wei a cuobä, tä a̦ lä dodijidai tä a̦ ja, ai bä yömölaö nomöjöobä. Bä a̦ lä läo wei bä a̦ cadidamabä. ¹⁰ Bä a̦ wasöo lä mlai bä malä tetei, jole jole bä a̦ lä faö wei. Ö̦jö bä a̦nö bä mölamaöje. Judio inaja bä yai cuaaö si ijejewä, showadi täbä mosi sicö joyamaö lä bufii wejei bä lä cui. ¹¹ Ö̦jö bä a̦ wasömamobä. Bluca bä bufi wedinajamomaö malä waiquilajei. Bada bä ma cui, suwä bä ma cui, ijilu bä ma cui bä bufi bluca mlamaö dicooje. Ö̦jö tä a̦ ja bä damabeje bä ma mlai ma cui, bä nia fa dobämonö bä jole damaö bashioje. ¹² Cledateli ai a lä cuinö, a wa̦ shi̦lo lä ji̦liamou wei a lä cuinö, camateli bä waiquiwä ma cui, bä a̦fa tama. Abenaja a cuma. —Cledateli bä jolemodii. Yalo bä bufi dao lä mlai bä waitelimou wasöo lä mlainaja, bä cuaadii. Bä ojodamou mlai, bä mojodili iyadii. Einaja a cuma. ¹³ A wa̦ bejedi. Inaja bä cuaaö ja, bä wasöö da dodijio, Yai Bada etä a̦ shi̦lo yai cadidibobeje. ¹⁴ Judio bä nö badabö tä a̦ lä wäyämou wei tä a̦ ji̦liaö mlajei, Yai Bada etä a̦ shi̦lo yai cadidibobeje. Bejedi tä a̦ lä waibou wejei bä lija, bä yömöca dao mlaobä. ¹⁵ Yai Bada tänö bä bufi aublaö lä waiquii, bä wa̦lidiaö quilibä tä cua malä mlai. Inaja showawä, Yai Bada lija bä bufi aublamou lä mlai, bä dodijidablou fe yadiobä etä cuami. Bä bufi auobä tä a̦ bejedi bufiimi waiquiweje. Bä bufi wa̦lidio fa waiquionö, bä bufi daomi waiquiwä. ¹⁶ Yai Bada ebä a̦fa ma jilou wei, bä lä cuaaö wei tänö bä jolemou damolaliyo. Bä wa̦lidiwä waiquiwä. Bä wasömamoimi. Bä dodijaö fe yadiobä etä cuami.

¹ Ö̦jö ma cui, cafä wa lä cuinö, dodijidawä wa bä nia damaö, Yai Bada tänö bä yömölamaö lä bufii weinaja showawä. ² Fiya wa bä shi̦lo yömölaö mlai, bada wa bä ca̦i nia yömölaö. Dodijidawä bada wa bä fa yömölanö, abenaja wa bä taamabä. Cama bä bufi wasöobä a wa̦ da fa. Dodijidawä bä cuobä. Bä bufi shominajablou mlai, showadi Yai Bada a nofi mölabobeje, bä bufi nofimobä, bä bufi cadidobä. ³ Inaja showawä, suwä bufi moyawe wa bä nia ca̦i yömölaö. Bä lä dodijaö wei tänö Yai Bada a bufi doblamabobeje. Bä a̦fa taö mlaobeje. Bä shi lä wa̦limamou wei toubä ja, bä bufi mö blucao mlaobä. Ai bä dodijaö mö feduobä, bä damabeje. ⁴ Inaja bä suwä cuaalanö, moco bä nia cadidamaö mö feduoje, bä fe̦yalobö ebä nofimabeje, bä ijilubö ebä ca̦i nofimabeje. ⁵ Moco bä bufi daobä bä nia damaöje, cama bä yafibö jamö bä yanöcölanö bä bufi wasöobä. Dodijidawä bä fe̦yalobö ebä nosie fuabeje. Inaja moco bä ca̦i dodijidawä cuobä, Yai Bada tä a̦ lä wäyämou wei tä a̦fa wayoaö mlaobeje. ⁶ Inaja showawä, dodijidawä fiya wa bä ca̦i fa yömölanö, cama bä bufi wasöobä. ⁷ Cafä wa lä cui, showadi wa dodijaö fa dablamonö, wa owämabeje. Wa bä yömölaö däjä, Yai Bada wa etä a̦ wäyäö cadidiobä. Wa wa̦ biyäcou mlai ja, cadidiwä wa wa̦ fabä. ⁸ Wa wa̦ fa cadidonö, wa wa̦fa tamou mlaicätä. Bä a̦ lä lämou wei bä a̦ lafuo bufi ma doblao wei ma cui, bämacö a̦fa tamobä tä cuami yalo, wamicai bä nia cuo. ⁹ Täbä nosie fuamobä bä lä tabou wejei, wa bä ca̦i dodijidawä yömölabä. Bä lä tabou wejei dodijidawä bä a̦ fuabeje. Dodijidawä bä fa ojodamonö, cama bada ebä bufi doblalamabeje. Bä a̦ lafujou mlai ja, bä wamicai cuobä. ¹⁰ Bä ojodamobä bä lä tabou wejei bä madofibö tomöaö mlaobeje, bä yai bejedimou fe balojoobä. Bä showadi lä dodijaö wei tänö, Yai Bada etä a̦ dodijidawä dablamobä, bämalecö lä fucäaö wei tä a̦ lä cui. ¹¹ Yai Bada tänö yanowamö bämalecö bluca fucäaö fa ojodaonö, bämalecö nofi lä ojodabou wei tä dablamou waiquiwä. ¹² Bämalecö nofi lä jalujubou wei bäma tä fa dalalönö, bämacö bufi wasöo cuquei. Yai Bada tänö tä tamaö bufio lä mlai, bäma tä bluca joyaö cuquei, bämacö bufi lä shominajaaö wei tä ja bämacö bufi yacläö mlaobä. Bita jamö bämacö cua showalanö, bufi dao bämacö cuobä. Bufi cadidiwä bämacö cuobä. Yai Bada bäma a bufi doblamabobä. ¹³ ¿Ö̦jö tawä? Jesucristo bäma a itou nö dabolanö, bämacö cadidobä. Bufi doblalolanö, bämacö nö dao. Bämalecö lä fucäaö wei Jesucristo a Bada lä cui, bäma a lä bufiblale, ö̦jö bäma a nö dabou. A nofi nia lä doablamou wei bäma a ca̦i doblao dablabä. ¹⁴ Wa̦lidiwä tä ja bämalecö fucäabä, Jesucristo a jibämoquema. A nomaa lälayoma. Dodijidawä tä ja bämacö shi jalimobä bämalecö bufi aublalema, cama dodijidawä bäma ecö yaiobä. ¹⁵ Ya tä a̦ bluca lä wäyäle tä a̦ da wäyä. Bä yömölaö da dodijio. Bä wasöö da dodijio. Wa bä cadidamabä wa malä cui. A fe da blacäjo.

¹ Mijamö wa bä ca̦i lä cule, bä bufi bluca da jaducäblamalö, bada bä lä cule bä a̦ ji̦liabeje. Bä lä nosiemou wei bä a̦ bada fuabeje. Bä a̦ lämou mlai ja, dodijidawä bä ojodamobä. ² Bä a̦ da wasö, täbä a̦fa taö mlaobeje. Wamicai bä cuobä. Dodijidawä bä bälöobä. Jödödöwä täbä lija bä nofimobä. ³ ¿Ö̦jö tawä? Camiyä bämacö ma cui, bämacö dodijaö mada mlaoblei. Bämacö bufi mojoduo bufi fa doblaonö, bämacö fe mada blacäjoblei. Bämacö bufi yaclälayoma. Bufi waiyou tänö bämacö nö bleaaö fa balalönö, bämacö bayeliblamobä tä cuonomi. Bämacö bufi wa̦lidiwä ca̦i fa bälöonö, bä dodijaö lä ayao wei showadi bäma bä nofi wa̦liboma. Bämacö nofi bluca wa̦liayoma. ⁴ Ö̦jö ma cui, Yai Bada lija bäma tä bayeli dalalema. Bämalecö lä fucäaö wei a li. Yai Bada bäma a nofi fa dalalönö, bämalecö nofi lä ojodadaö wei tä a̦ fa wawäblalunö, bämacö fucäama. ⁵ Bejedi lä, bämalecö fucäama. Dodijidawä bämacö cuo waiquio däjä mlai. Bämacö dodijaö waiquio däjä mlai. Bämalecö nofi fa jalujubonö, bämalecö nofi ojodadalema. Yai Bada tä Bufinö bämalecö bufi fa aublalönö, dude bämalecö tablaö co̦layoma. ⁶ ¿Ö̦jö tawä? Bämalecö lä fucäaö wei Jesucristo a lä cui, ö̦jö bäma a nofi mölabou cudeenö, Yai Bada a Bufi jibämoa fe balojobema. ⁷ Yai Bada tänö bämalecö nofimaö fe balojoo yalo, bämalecö nofi ojodabou. Camiyä bämacö lija tä nowa bluca lä cuono wei tä mladamalema. Cama lija bämalecö cadidimaquema, bämacö nia obi lä ba̦limio wei bäma tä nofi mölabou showaobä. ⁸ Ya tä a̦ lä wäyäle, bejedi lä tä a̦. Wa bä cadidamabä, a wa̦ fe da blacäjo. Yai Bada tä bejedi lä bufibou wejei bä mojimou mlai, showadi bä dodijabä. Ö̦jö tä nö doblaobö wei. Ö̦jö tänö bämacö bluca bayeliobä. ⁹ Bä a̦fa ma lafujayou däjä ma cui, täbä jaba lä bälöono wei tä a̦fa ma wayoaöje däjä ma cui, wa icuo mlai. Bä a̦ ma jö̦shöcou däjä, Moisesi tä a̦ nowa ja bä a̦fa ma tayou däjä ma cui, wamicai a da cuicu. Bä bayeliobä bä a̦mi. Bä a̦ nö bleaaö. ¹⁰ Ai täbä nofi wa̦limamaö dicoo ja, a wa̦ da wasö. Wa wa̦ ji̦liblaimi ja, moli wa wa̦ nia wasöö co̦o. A wasöbloimi showawä ja, wa cadidamabä wa wa̦ nia faö co̦daaimi. “A dobloimi waiquiwä”, wa nofi nia tabou. ¹¹ Inaja a lä cuaaö wei a lä cui, a bufi shominajawä malä waiquii. A doblou malä mlai. A wasöobä etä cua ma cule, a wasöomi. ¹² Cafä lijamö Adema ya shimaö däjä, cafä Nicoboli jamö wa fuu fa jaödaoimanö, ö̦jamö cafä sho bäfäcö cuobä. Tä maaböo däjä, ö̦jamö ya nia malä yanöcöo wei. Cuwi, Adema ya shimaimi ja, Diquico ya shimöa ja̦tolei. ¹³ Moisesi tä a̦ lä cadidibou wei a Sena lä cui, Abolo sho cäcöbä shu̦lucou cä däjä, cäcöbä da bayeliblalö, cäcöbä fo̦limou nö bleaaö mlaofälöbä. ¹⁴ Mijamö Yai Bada wama ebä bufi ca̦i jaducäblamabä. Bäma ebä lä yömölaö wei showadi bä dodijadibä. Bä fo̦limou nö lä bleaaö wei bä bayeliblabeje. Täbä mojodili cudio buo mlai, täbä yai dodijabä. ¹⁵ Camiyä lija bä lä cule, cafä lija bä a̦fa wäamou bufi doblao. Mijamö Yai Bada a nofi lä mölabolajei bä lija yamacö a̦fa ca̦i wäamou bufi doblaa lä cule. Bei. Yai Bada tänö showadi wamacö bayeliblabä. Wamacö nofi bluca ojodabobä.