Romanos

Romanos

¹ Jesucristo ya nosie lä fuaö wei ei camiyä Pablo cä ya, wale lä shimöleno wei ya lä cui. Yai Bada ya etä a̦ dodijidawä wäyäbä wale yaimabou. ² Ö̦jö tä a̦ lä cui, Yai Bada a wa̦no wäyälewä bä lija tä a̦fa wäyäö balöoma. Yai Bada tä a̦ oni jamö tä a̦ cua. ³ Bä ijilubö Jesucristo etä a̦ dodijidawä lä wäyämou wei, ö̦jö tä a̦ waiquiwä. Bada tä David e li nodiwä cuoma. ⁴ Bada tä Jesucristo lä cui, Yai Bada Ijilubö e. A demi lä jocädamaleno wei tänö, Yai Bada tä Bufi lofotenö bä Ijilubö e wawädowä nö ö̦jöbömalema. ⁵ Jesucristo a lä cuaano wei tänö, Yai Badanö wale nofi ojodadalema. Wale nofi fa ojodadalönö wale shimölema, ya wa̦no wäyäö cuaabä. Bluca bä bälöblawä lä yaiblai bänö a nofi fa mölabojenö a nosie fuabeje, wale shimölema. ⁶ Cafä Lomateli wamacö ma cui, Jesucristo wama ecö cublobä wamacö ca̦i nacaa mö fedulema. ⁷ Ö̦jö cudeenö Yai Bada tänö Lomateli wamacö lä nofimaö wei wamacö lija, ei ya tä a̦ oni shimaö lä cule, Yai Bada wama ecö cuobä wamacö nacaa mö lä feduleno wei wamacö lija. Bei. Fayä Yai Bada lija wamacö shi̦lo bayeliblamobä, Bada tä Jesucristo lija ca̦i. Wamacö bufi shi̦lo yanöcömaboböbä. Wamacö nofi ca̦i shi̦lo ojodaboböbä. ⁸ Abenaja ya cuu balöo. Jesucristo wama a nofi lä mölabou wei wamacö a̦fa ji̦limou blaucou cuaaö cudi. Ö̦jö cudeenö ya bufi doblalou. Jesucristo a wa̦nö, Yai Bada ya lä bufiblaö wei lija ya bufi a̦fa doblalou wäyämou talei. ⁹ Ya wa̦ faö däjä, showadi bämacö a̦fa jayumaö talei. Bejedi lä ya wa̦. Yai Bada tänö wale a̦ bejedi daö. Bei ya bufinö ya wa̦ lä fuaö wei ya e, bä Ijilubö ya etä a̦ dodijidawä wäyäbä. ¹⁰ Ö̦jö lija ya wa̦ faö däjä, cafä bämacö fe waloobä ya nacou, wale shimaö ja, mijamö ya ya̦cumö fuu fe yadiobä. ¹¹ Bämacö bufi bayeliblabä bämacö möö bufi doblao malä cui. Bämacö bufi yai lofotoblamabä. ¹² ¿Ö̦jö tawä? Bämacö bufi bluca yai lofotoamayobä. Jesucristo wama a nofi lä mölabou wei tänö, camiyä ma cui ya bufi ca̦i lofotoblou mö feduobä. Inaja showawä, camiyänö ya nofi mölabou mö lä feduo wei tänö cafä wamacö bufi ca̦i lofotoblou mö feduobä. ¹³ Iba wamacö. Cafä wamacö lija ya fuu bufi doblao, Jesucristo lija, judio bä lä mlai ai ya bä bufi bayeliblaö lä cuaaö weinaja, cafä bämacö bufi ca̦i bayeliblaö cuo mö feduobä. ¿Ö̦jö tawä? Ya fubä bluca ya ma wabäo wei ma cui, showadi ai tä lädou dicoo. Ö̦jö wama tä dabä ya wa̦. ¹⁴ Jödödöwä bä lija Jesucristo ya etä a̦ wäyäbä ya. Dodijidawä bä yai lä bälöo wei bä ma cui lija, bä nö bälöo lä beblalou wei bä ma cui lija, ö̦jö bä bluca lija ya tä a̦ wäyäbä. Bä bufi a̦fa jaducäwä lä jilaö wejei bä ma cui, bä bufi jo̦wa dao lä mlai bä ma cui, ö̦jö bä bluca lija ya tä a̦ wäyäbä. ¹⁵ Ö̦jö cudeenö cafä Lomateli wamacö ma cui lija, Jesucristo ya etä a̦ dodijidawä wäyäö bufi ca̦i doblaa lä cule. ¹⁶ Jesucristo ya etä a̦ dodijidawä wäyäö quiliimi. Ö̦jö tä a̦ nofi lä mölabou wejei bä lä cui, Yai Bada tä lofotenö bä bluca malä fucäamou wei. Judio bä lä cui, inaja bä nia yai fucäamou cuo balöoma. Judio bä lä mlai bä ma cui, inaja showawä ö̦jö bä nia ca̦i fucäamou mö feduo. ¹⁷ Ö̦jö etä a̦ dodijidawä lä cui jamö, Yai Bada tänö bämalecö nofi tabou fe lä yadio wei tä dablamou. Bäma tä a̦ nofi yai lä mölabou wei tänö, jai bämacö cadejewä waiquiwä bämalecö nofi tabou. Ö̦jö tä shi̦lonö. Yai Bada tä a̦ oni lä cuu weinaja showawä. Abenaja tä a̦ cuu. Cama a nofi mölabouje yalo, jai bä cadejewä waiquiwä Yai Bada tänö bä nofi tabou. Ö̦jö bä lä cui bä nia shi̦lo yai demi cuo. Einaja tä a̦ cuu. ¹⁸ Wa̦lidiwä tä bluca lä cule tä ja Yai Bada tä nö wa̦lowä lä jushuo wei, fedu jamö culanö etä wawäblou. Wa̦lidiwä talewä bä lija a jushuo, bä doblou lä mlai bä lija. Wa̦lidiwä tä lä taö wejei tänö, bejedi tä a̦ lä cui tä a̦ ji̦lia doblamaimije. ¹⁹ A jushuobä lä. Yai Bada tä lä cule tä malä wawädoi. Bä bufi jaducäblobä cäbä. Bä bufi jaducäblamabä, cama a mayo dablamou malä waiquio wei. ²⁰ ¿Ö̦jö tawä? Bei tä yai dablamou ma mlai ma cui, ulufi a jödödöwä lä tablaleno wei tä ja bä bufi jaducäblou dao. Täbä lä tablaleno wei täbä ja, a lofote shi lä wa̦lii wei etä dablamou. A yai bufiblamobä etä ca̦i dablamou. Ö̦jö cudeenö bä a̦ jole mojodumobä etä cuami waiquiwä. ²¹ Yai Bada tä ma dano wejei ma cui, “Ö̦jö a yai bufiblamobä a”, bä bufi cunomi. Ö̦jö lija bä ma bayeliblamou wei ma cui, bä bufi a̦fa doblalou ca̦i wäyämonomi. Tä nowa lä mlai tä ja, bä bufi shi̦lo cuaablalou bädaoma. Bä bufi dao fa mlacunö, bä bufi mö dödölayoma. ²² Bä bufi a̦fa jaducäwä ma taolanö bä bufi mojodublaliyoma. ²³ Yai Bada tä cua shi lä wa̦lile tä ma doblao wei ma cui, ö̦jö tä fa wailöjenö, yanowamö täbä nö yai ijidubö bufiblaö majöomaje. Yalo bä nö ijidubö ca̦i. Bä lä yäö wei bä nö ijidubö ca̦i. Bä lä joleaö wei bä ma cui, ö̦jö bä nö ca̦i ijidubö bufiblamaje. ²⁴ Ö̦jö cudeenö ya̦cumö bä nowamanomi majöwä. Showadi bä nofi beshili jushuadima yalo, wa̦lidiwä tä ja bä noshi ö̦jödaboma, bä nofi yai jushublalodibä. Bä yai wa̦lidiamayodibä. ²⁵ Yai Bada tä jamö tä a̦ bejedi lä cule tä a̦ fa wailöjenö, jole tä a̦ shi̦lo yai bufiblaö majöomaje. Täbä bluca lä tablaleno wei a lä cui a nofi doamou shi wa̦libä, ö̦jö a waiquiwä. Inaja lä tä cuobä. Ö̦jö ma cui, Yai Bada lija bä möfe bolanö a wa̦fa doblao tanomije. A nosie ca̦i fuanomije. Täbä lä tablamono wei täbä lija bä möfe bolanö, ö̦jö täbä a̦fa shi̦lo yai doblao taö dicoomaje. Ö̦jö bä shi̦lo yai bufiblaö dicoomaje. ²⁶ Ö̦jö cudeenö bä bufi läablalou mlai ja, bä nofi yai jushublalodibä Yai Bada tänö bä noshi ö̦jödabou majöoma. Bä fe̦yalobö sho cäcöbä cuaaö mlai ja, ai suwä a mö feduwä sho cäcöbä cuaabä bä li suwä cuaaö dicooma. ²⁷ Wa̦lo bä ma cui inaja bä cuaaö mö feduoma. Bä suwäbö sho cäcöbä cuaaö mlai ja, ai wa̦lo a mö feduwä sho cäcöbä cuaabä bä yai icuo shi jalimou dicoblaoma. Bä bufi quilijobä etä ma cuono wei ma cui bä bufi quilijonomi. Ö̦jö cudeenö bä nofi lä jushublalou wei tä lä cui, Yai Bada tänö etä nowa yuaö cadidioma, bä nö bleaabä. ²⁸ Yai Bada a nofi jaducäbou bufionomije. Ö̦jö cudeenö wa̦lidiwä tä ja bä bufi cudiobä, Yai Bada tänö bä noshi ö̦jödabou cadidioma, wa̦lidiwä tä tabeje. ²⁹ Wa̦lidiwä tä bluca lä cui ja, showadi bä doblou fa mlacunö bä doblonomi. Bä bufi shi̦lo waiyodima. Bä nö shi̦lo nabämoma. Ai täbä dodijaö ayao ja, showadi bä jushuoma. Bä shäyoma. Bä ishou si ijejeadaloma. Bä jolemoma. Bä nofi wa̦liayoma. Ei bä lä cui bä shi̦lo wa̦nomodii. ³⁰ Bä a̦fa wayoayou. Yai Bada tä nö ca̦i nabämaöje. Täbä a̦fa ca̦i dobloimi taöje. “Camiyä cä yai”, bä bufi cuu. Cama bä nofi doo. Wa̦lidiwä tä ja bä bufi shi̦lo daeodii. Bä fö̦ö ebä nosie fuaimije. Bä nöö ebä nosie ca̦i fuaimije. ³¹ Bä bufi ca̦i daomi. Bä a̦ cadidou mlai ja bä a̦ shi̦lo shomiaö majöo. Täbä nofi ca̦i ojodaboimije. Bä bufi ca̦i asiomi. ³² ¿Ö̦jö tawä? Inaja bä lä cuaaö wei Yai Bada tänö bä nia lä nomamaö wei tä ma daö wejei ma cui, bä shijiloimi. Wa̦lidiwä tä taö mö lä feduo wejei bä lä cui, ö̦jö bä nofi ca̦i doablaöje.

¹ Ai wama bä lä jimaö wei däjä, cafä wamacö ma cui wamacö ca̦i jimamou mö feduo. Ai wama bä nö bleaamaö lä bufio wei däjä, cafä wamacö ma cui wamacö ca̦i waimamou mö feduo. Wama bä ma jimaö wei ma cui, inaja showawä cafä wamacö ca̦i malä cuaaö wei. ² Inaja bä lä cuaaö wei bä lä cui, Yai Bada tänö bä nö bleaamabä bä li waiquiwä. ³ ¿Wedinaja wamacö bufi yai li cuu? Inaja showawä cafä wamacö cuaaö mö ma feduo wei ma cui, ¿ai bei wama bä nia li jimaö? Ö̦jö wama bä jimaö däjä, Yai Bada tänö cafä wamacö nö bleaamaö mlai ja, ¿ö̦jö bä nö nia li bleaamaö ayao daanö? ⁴ Yai Bada tänö dodijidawä wamacö tabou yalo, ¿bei wamacö li waiteliblou da culanö? A bufi asimou yalo, a nö dao balöo yalo, ¿bei wama a nö quili taimi? Wamacö bufi nofi jaducäwämi yai. Dodijidawä Yai Bada tänö wamacö lä tabou wei tä ja, wamacö bufi jaducäblobä tä ma cui, wamacö bufi mö ca̦i yabajadobä tä ma cui, “Inaja yamalecö taamaö bufi doblao”, wama a nofi taboimi waiquiwä. ⁵ Wamacö bufi jifua lä dicole tänö, wamacö bufi mö yabajadou fa mlacunö, cafä wamacö nö bleaamamou dicoquei. Yai Bada tä nö wa̦lowä lä jushudou wei etä wawäblou däjä, wamacö nö nia lä bleaaö wei wama tä balamaö dicoa lä cule. Täbä jimaö däjä a nia yai bejedimou. ⁶ ¿Ö̦jö tawä? Jödödöwä täbä nia malä jimaö wei. Wa̦lidiwä tä lä tamou wei tä ma cui, dodijidawä tä lä tamou wei tä ma cui, cama etä cadidiwä ja tä nowa nia bluca co̦amamou. ⁷ Ai bä lä cuinö bä nia lä ba̦limiblou wei tä shi̦lo dayäaöje. Yai Bada tänö bä nia lä doblamabodayou wei tä ca̦i. Wawädowä bä nia lä tamabou wei tä ca̦i. Ö̦jö bä lä cui Yai Bada tänö bä nia ba̦limiblamaö. ⁸ Ö̦jö ma cui bä a̦ shi̦lo lä lämou wei bä lä cuinö, tä a̦ lä bejedi wei tä a̦ ji̦liaimije. Wa̦lidiwä tä jamö bä luluamou. Yai Bada tä nö wa̦lowä lä jushuo wei etä wawäblou däjä, ö̦jö bä nö nia yai bleaaö fe balojoo. ⁹ Wa̦lidiwä tä lä taö wejei bä lä cui, bä nö nia yai bleaaö nö quiliaö. Bä bufi nia yai jaluaö. Judio bä lä cui, inaja ö̦jö bä nia yai cuaaö. Judio bä lä mlai bä ma cui, inaja bä nia ca̦i cuaaö mö feduo. ¹⁰ Ö̦jö ma cui dodijidawä tä lä taö wejei bä lä cui, Yai Bada tänö ö̦jö bä nia doblamabodayou. Wawädowä bä nia dodijidawä ca̦i tamabou. Bä bufi nia ca̦i yanöcömabou. Judio bä lä cui inaja bä nia yai taamaö. Judio bä lä mlai bä ma cui, inaja showawä cama bä nia ca̦i taamaö mö feduo. ¹¹ Judio bä ma cui, judio bä lä mlai bä ma cui, bä jimaö fe usucubou. ¹² ¿Ö̦jö tawä? Judio bä lä mlai bänö Moisesi etä a̦ taboimije. Wa̦lidiwä tä taöje yalo, tä a̦ tabou mlalajenö bä nomaö shi wa̦lijio. Judio bä lä cuinö tä a̦ yai tabou ma cujei, wa̦lidiwä tä taö mö feduoje. Moisesi tä a̦ ja bä wasömamou fa mlacunö, Yai Bada tänö bä nia jimaö. ¹³ Jai bä cadejewä waiquiwä, Yai Bada tänö bä nofi lä tabou wei bä lä cui, Moisesi etä a̦ ji̦liaö lä buo wejei tänö, bä nofi tabou malä mlai. Tä a̦ nofi yai lä cadidibou wejei bä lä cui, jai bä dodijidawä waiquiwä, ö̦jö bä nofi shi̦lo tabou ayao. ¹⁴ Judio bä lä mlai bä lä cuinö, Moisesi etä a̦ tabou ma mlai ma cujei tä lä dodijidai tä nö ö̦jöböaöje. Bä bufi dao. Bä bufi dao ja lä, Moisesi etä a̦ tabou ma mlajei, ai däjä bä cadidou fe yadio. ¹⁵ Moisesi etä a̦ ja bä cadidou fe lä yadio wei tänö, bei täbä bufi jamö tä a̦ cua lä ja̦tole tä dablamou. Bä bufi dao lä. Tä nö wa̦lidiwä ö̦jöböaöje yalo, ai däjä bä bufi quilijou. Tä nö dodijidawä ca̦i ö̦jöböaöje cudeenö, ai däjä dodijidawä bä cua. ¹⁶ Ö̦jö cudeenö Yai Bada tänö bä nia lä jimaö wei tä cublou däjä, Jesucristonö bä a̦ nö nia bluca wäamaö. Bä bufi cuaablalou lä ja̦too wei tä fa wawäblamanö bä nia jimaö. ¹⁷ Judio wamacö a̦fa jilou bufi doblao. Moisesi wama etä a̦ tabou yalo bei wamacö nia jo̦wa bayeliblamou. Yai Bada wama ecö a̦fa jilamou yalo wamacö nofi li doablamou. ¹⁸ Yai Bada tänö tä tamaö lä bufii wei wama tä jo̦wa daö. Tä yai lä dodijidai wama tä nofi jo̦wa yaibou. Moisesi tä a̦ ja wamacö jo̦wa damamou. ¹⁹ ¿Ö̦jö tawä? Bä lä jubäbö wei wama bä shalilamabä wamacö a̦fa jole jilou. Mö didi tä jamö bä lä fuu wei wama bä ca̦i jo̦wa wacacamabou. ²⁰ Bä bufi jaduquemi lä waiquii wama bä cadidamabä wamacö ca̦i jo̦wa. Bä bufi jaducäwä lä mlai wama bä ca̦i jo̦wa damaö. Moisesi wama etä a̦ tabou yalo, “Yama tä jödödöwä daö waiquiwä”, wamacö bufi jole cuu. “Yamacö bejedimou waiquiwä”, wamacö bufi ca̦i cuu. ²¹ Ja̦o. Ai wama bä jo̦wa lä damaö wei wamacö lä cui, ¿wedi tabä cafä wamacö yai li damamoimi, ö̦jö lä? “Wamacö nia tomömoimi”, wama bä nowa lä taö wei wamacö lä cui, ¿inaja cafä wamacö cuaaimi? ²² “Wamacö nia joleblaloimi”, ai wama bä nowa ma taö wei ma cui, ¿cafä bei wamacö inaja cuaaimi, ö̦jö lä? Täbä nö ijidubö lä bufiblamou wei, wama täbä nofi jo̦wa ma wa̦libou wei ma cui, ¿ö̦jö lä täbä yafibö jamö, bei wamacö lucäö ja̦toomi daanö, wamacö tomömobä? ²³ Moisesi wama etä a̦ tabou yalo wamacö nofi doo ma cui, wama tä a̦ nofi cadidiboimi ja, Yai Bada wama a nö waiblamaö. ²⁴ Yai Bada tä a̦ oni lä cuu weinaja showawä. Abenaja tä a̦ cuu. Cafä wamacö dobloimi tä nowa ja, judio bä lä mlai bänö Yai Bada bei tä nö waiblaö lä cudujei. Einaja tä a̦ cuu. ²⁵ Yai Bada wama ecö jimamobä, judio wamacö mosi sicö joyamou. ¿Ö̦jö tawä? Moisesi wama etä a̦ nofi cadidibolanö, wamacö mosi sicö joyamou ja, wamacö bayeliblamou dao ma cui, wama tä a̦ nofi cadidiboimi ja, tä nowa cuami waiquiwä. Wama tä a̦ nofi cadidiboimi ja, jai wamacö mosi sicö joyamonomi, Yai Bada tänö wamacö nofi tabou. ²⁶ Inaja lä showawä, ai bä mosi sicö joyamou ma mlai ma cui, Moisesi etä a̦ nofi cadidibouje ja, jai bä mosi sicö joyamolayoma, Yai Bada tänö bä nofi nia tabou. ²⁷ Ö̦jö däjä bä mosi sicö joyamou mlalanö, tä a̦ nofi lä cadidibou wejei bä lä cuinö, Yai Bada lija judio wamacö nia waimaö bufiije. Wama tä a̦ oni ma tabou wei ma cui, wamacö mosi sicö ma joyamou wei ma cui, wama tä a̦ nofi cadidiboimi. ²⁸ Judio bä yai lä cui bä mosi sicö joyamou bädao mlai ja, bä bufi bejedimou. Bä bufi bejedilanö bä li taamamobä Yai Bada tänö tä nabä li shimöquema. ²⁹ Yai Bada lija bä bufi yai lä cuo wei bä lä cui, ö̦jö judio bei bä yai. Bä bufi cadidilanö bä mosi sicö lä joyamou wei bä lä cui, ö̦jö bä shi̦lo bejedimou. Bei bä taamamou buomi. Ö̦jö bä lä cui, yanowamö täbä lija bä nofi doablamou mlai ja, Yai Bada lija bä nofi yai doablamou.

¹ Ja̦o. Judio bämacö mosi sicö lä joyamou wei tä ja, ¿wedinaja bämacö bufi yai cubä, ö̦jö lä? ¿Wedi tä ja judio bä a̦fa yai bayeliblamou wäyämou? ² Wedi tä ja mlai, bluca tä cua. Abenaja balöwä. Judio bä yai lija Yai Bada bei tä a̦ jibämoquema. ¿Ö̦jö tawä? ³ Bämacö nö badabö ai bä doblono ma mlai ma cui, cama bä li doblonomi. Bä a̦ cadidou lä mlaono wei tänö, Yai Bada cama a wa̦ nö lä wäono wei, ö̦jö tä wa̦lidiblamanomije. Showadi Yai Bada a wa̦ cadidou. ⁴ Ö̦jö malä cui. Yanowamö täbä bluca ma jolemou wei ma cui, Yai Bada a wa̦ cadidou showaobä a. Abenaja tä a̦ oni malä cuu wei. Showadi wa wa̦ shi̦lo lä cadidou wei tä dablabeje wa. Wa ma jimaöje däjä, wa shi̦lo bejedimou ayaobä cafä bei wa. Einaja tä a̦ cuu. ⁵ ¿Ö̦jö tawä? ¿Wedinaja bämacö bufi daeo li cuobä tä a̦? Wedinaja mlai. Ai bä jimamou fa mojionö, Yai Bada a wa̦fa dobloimi li taöje. Abenaja bä cuu dicoo. “Judio bämacö doblou lä mlai tänö, Yai Bada bäma a yai dodijidawä ma dablamale ma cui, ¿wedi tabä bämalecö nö nia bleaamaö dicoo?” ⁶ ¿Ö̦jö tawä? Ma, inaja bämacö nia cuimi. Judio bämalecö jimaö cadidio mlao fa cunoja, ai bä lä bälöblai bä jimabä a nö ca̦i cuobö mlai. ⁷ Ai bänö abenaja yamalecö wa̦no jo̦wa taöje. “Bämacö jolemou da bädao”, yamacö jo̦wa cuu. “Bämacö jolemou däjä Yai Bada bäma a nö yai ö̦jöböamaö, a shi̦lo bejedimou lä ayai a lä cui. Ö̦jö däjä a nofi yai doablaöje. Ö̦jö cudeenö bämalecö a̦fa wa̦lidiwä talewä tabä tä cuami”, yamacö jo̦wa ca̦i cuu. “Ma. Bämalecö nö bleaamabä tä cuami, Yai Bada bäma a nofi malä doablamaö wei”, yamacö jo̦wa ca̦i cuu. ⁸ Abenaja ca̦i. “Wa̦lidiwä bäma tä taö da bädao, Yai Bada tä nofi nia lä doablamou wei tä dodijidawä waiquiwä”, yamacö jo̦wa ca̦i cuu. Yamalecö nö waiblaöje ja, inaja täbä jole cuu dicoo. ¿Ö̦jö tawä? Inaja bä lä cuu wei bä lä cui, Yai Bada tänö bä nö bleaamabä bä li waiquiwä. ⁹ ¿Wedinaja dodijiwä tawä? Camiyä judio bämacö lija ¿Yai Bada tä Bufi nia asio ayao tawä? Ma, asiomi. Ya cuu malä waiquiofe. Judio bämacö ma cui, judio bä lä mlai bä ma cui, wa̦lidiwä tänö bämalecö bluca lofotobou, ¹⁰ Yai Bada tä a̦ oni lä cuu weinaja showawä. Abenaja tä a̦ cuu. A cadejewä lä waiquii, moli ma cui a cuami waiquiwä. ¹¹ A bufi lä jaducäi a ma cui, Yai Bada lija a bufi lä daeo wei a ma cui, a cuami. Moli ma cui a cuami waiquiwä. ¹² Jödödöwä täbä bluca yaclälayoma cä täbä. Bä nö bluca bleaaö. Dodijidawä tä lä taö wei, moli ma cui a cuami. ¹³ Bä a̦ lä faö wei tänö täbä shäblamaöje. Bä caficö a̦ lä jolemou wei tänö täbä mölamaöje. Olu bä nacö wayu lä culenaja bä a̦ wayu cuwä. ¹⁴ Bä a̦ faö wa̦lidiwä. Bä wajäblabeje bä caficö fe lajowä. ¹⁵ Täbä shäbeje bä mamicö bälöcöblalou. ¹⁶ Bä cuaabä jamö tä bluca wa̦lidiblamaöje. Täbä nö beblalamaöje. ¹⁷ Bä yanöcöwä cuobä, tä ca̦i daimije. ¹⁸ Yai Bada tä nö quili lä tamou wei tä ja, bä bufi ca̦i cudou bädaomi. Einaja tä a̦ cuu. ¹⁹ ¿Ö̦jö tawä? Ei bäma tä daö. Moisesi etä a̦ lä cui, judio bä lija tä a̦ jibämoquema, tä a̦ fuabeje. Judio bä ma cui, judio bä lä mlai bä ma cui, wamicai bä bluca tabobä. Bä a̦ fuo mlai ja, Yai Bada lija bä bluca jimamobä. ²⁰ Moisesi tä a̦ ja bä lä cadidou wei bä cua malä mlai, Yai Bada lija bä dodijidawä dablamobä. Moli ma cui a nia dabloimi. Tä a̦ li fuaimi waiquiweje. Ö̦jö tä a̦ lä cui, bä nö wa̦lidiwä ö̦jöböamobä, ö̦jö bei tä a̦. ²¹ Jai bä cadejewä waiquiwä, Yai Bada tänö bä nofi nia lä tabou wei, fei däjä tä a̦ wawälayoma. Moisesi etä a̦ ja bä lä cadidou wei tänö mlai. Ö̦jö ma cui Moisesi etä a̦ jamö bei tä a̦ shi̦lo wawäa balölayoma. Yai Bada a wa̦no wäyälewä bä a̦ oni jamö ca̦i. ²² ¿Ö̦jö tawä? Jesucristo a bejedi lä bufii wejei bä lä cuinö a nofi mölabouje yalo, jai bä cadejewä waiquiwä Yai Bada tänö bä nofi bluca tabou. Judio bä nia bayeliblaö ayao malä mlai. ²³ Yanowamö täbä jödödöwänö wa̦lidiwä tä taö malä cujei. Yai Bada tä doblao lä culenaja bä cuwä malä mlai. ²⁴ Jesucristonö bä no comaquema yalo, no mlai ja Yai Bada tänö bä nofi ojodabou. Jai bä dodijidawä waiquiwä, fei däjä bä nofi tabou majöwä. ²⁵ - ²⁶ Yai Bada tänö Jesucristo a noshi ö̦jödaboma, a shämou läobä. Ö̦jö a nofi fa mölabojenö, cama bei i̦yäbönö bä doblou lä mlai etä nowa mladou. ¿Ö̦jö tawä? Cama Yai Bada tä nia cadejewä fa dablamonö, inaja a li cuaama. Jaba däjä täbä doblono ma mlai, a bufi asio fa balöonö, a bufi lämoma. Ö̦jö ma cui fei däjä tä nowa yai tabou, cama a cadejewä dablamobä. Jesús a nofi lä mölabou wejei tänö, jai bä dodijidawä waiquiwä bä nofi tabou. ²⁷ ¿Ö̦jö tawä? Yai Bada tänö bämalecö dodijidawä tabou yalo, ¿bämacö nofi nia doo tawä? Bämacö nofi doobä tä cuami. Bämacö lä dodijaö wei tänö bämalecö nofi tabou malä mlai. Jesucristo bäma a nofi lä mölabou wei tänö, jai bämacö dodijidawä waiquiwä bämalecö nofi shi̦lo yai tabou. ²⁸ Abenaja bämacö malä cuu wei. Moisesi etä a̦ ja bä lä cadidou wei tänö mlai, Jesucristo a nofi lä mölabou wejei tänö, Yai Bada lija bä dodijidawä shi̦lo yai dablamou. Ö̦jö tä shi̦lonö. ²⁹ ¿Judio bä lija Yai Bada tä shi̦lo bufiblamobä a daanö? ¿Judio bä lä mlai bä lija a nia bufiblamoimi? Judio bä lä mlai bä ma cui lija a bufiblamobä a waiquiwä. ³⁰ Moli tä Yai Bada malä cule. Bä mosi sicö lä joyamou wei bä lä cuinö, Jesucristo a nofi mölabouje yalo, jai bä dodijidawä waiquiwä bä nofi nia tabou. Inaja showawä, bä mosi sicö joyamou lä mlai bä ma cuinö, Jesucristo a nofi mölabouje yalo, jai bä dodijidawä waiquiwä bä nofi nia tabou mö feduo. ³¹ ¿Ö̦jö tawä? Jesucristo bäma a nofi lä mölabou wei tänö, Yai Bada lija bämacö dodijidawä dablou waiquiwä yalo, ¿Moisesi bäma etä a̦ nia oni joyaö majöo daanö? Mlaicätä. Fei däjä ö̦jö tä a̦ lä cui bäma tä a̦ shi̦lo yai bejedi jimaö.

¹ Judio bämacö nö badabö Ablaamö a lä cui, ¿wedinaja bäma a nofi nia yai tabou, ö̦jö lä? ² Ablaamö a lä dodijano wei tänö Yai Bada lija a dodijidawä dablamou fa cunoja, cama a wa̦fa dodijaö wäamobä tä nö cuobö wei. Yai Bada lija a wa̦ nö fabö ma mlai ma cui, yanowamö täbä lija a wa̦ fabä tä nö cuobö wei. ³ Ö̦jö ma cui abenaja Yai Bada etä a̦ oni cuu. Yai Bada a wa̦ fa ji̦limolunö, Ablaamönö a wa̦ bejedi bufia showadaalema. Cama Yai Bada a wa̦ bufiblamou fa damolalunö, jai a cadejewä waiquiwä bei a nofi Ablaamö tadaö showadalayoma. Einaja tä a̦ oni cuu. ⁴ ¿Ö̦jö tawä? Bä lä ojodamou wei bä no ojode co̦amaöje ja, “No mlai ja wale dobäö”, bä nia cuimi. “Ya dobämou lä, ya malä ojodamono wei”, bä nia shi̦lo cuu. ⁵ Ö̦jö ma cui Yai Bada lija bämacö nia lä bayeliblamou wei, inaja bämacö nia cuimi. Cama bä lä dodijaö wei tä ja bä mölaö lä mlai, Yai Bada tä nofi yai lä mölabou wejei bä lä cui, ö̦jö bä nia shi̦lo yai bayeliblamou ayao. Wa̦lidiwä talewä bä ma cui, Yai Bada lija bä mölaö cudeenö jai bä cadejewä waiquiwä bä nofi tabou. Ö̦jö a lä cuinö, jai bä dodijidawä waiquiwä bä nofi tabou. ⁶ Bada tä David a ma cuinö, ö̦jö tä a̦fa wäyäö balöoma. Jai bä cadejewä waiquiwä, Yai Bada tänö bä nofi lä tabou wei bä lä cui, bä nia jo̦wa bayeliblamoma. Cama bä lä dodijaö wei tänö mlai. ⁷ Abenaja tä a̦ oni cuu. Bä doblou lä mlai, Yai Bada tänö etä nowa lä mladamaö wei bä lä cui, ö̦jö bä bufi yai doblalobä cäbä, etä nowa tabou lä mlai bä lä cui. ⁸ Bada tänö etä nowa nia tabou lä mlai, bä bufi yai doblalobä cäbä. Einaja tä a̦ cuu. ⁹ Täbä a̦fa bayeliblamou lä wäyäno wei, ¿bämacö mosi sicö lä joyamou wei, bämacö nia shi̦lo judio bayeliblamou ayaoma daanö? Ma, judio bä lä mlai bä ma cui bä nia ca̦i bayeliblamou mö feduoma. Abenaja bämacö malä cuu wei. “Ablaamö a lä cuinö, Yai Bada tä nofi mölaboma yalo, jai a cadejewä waiquiwä Yai Bada tänö a nofi taboma.” Einaja bämacö cuu. ¹⁰ ¿Ö̦jö tawä? ¿Wedinaja tä yai cuoma, ö̦jö lä? Yai Bada tänö a nofi lä tabono wei, mosi sicö joyamou showao mlao däjä a nofi tabou showaoma. Mosi sicö joyamoa fa balölönö mlai. ¹¹ ¿Ö̦jö tawä? Ablaamö mosi sicö joyamou showao mlao däjä Yai Bada a nofi mölaboma yalo, jai a cadejewä waiquiwä a nofi taboma. Ö̦jö däjä, Yai Bada tänö a nofi tabou lä waiquile a nö ö̦jöböamobä, mosi sicö li joyamaö bufima. ¿Ö̦jö tawä? Jai bä cadejewä waiquiwä Yai Bada tänö bä nofi tabou lä nodio wei bä lä cuinö, Ablaamö a nofi fö̦ömaö nodiobeje, inaja a li taamaö balöoma. Ö̦jö bä lä cui, bä mosi sicö joyamou ma mlai, Jesucristo a bejedi bufii cudeejenö bä nofi li tabou nomöjöa lä cule. ¹² Inaja showawä, bä mosi sicö lä joyamou wei bä ma cuinö, Ablaamö a bufi owäbouje yalo a nofi ca̦i fö̦ömaö nodio showaoje. Bä mosi sicö joyamou buomi. Bämacö nö badabö Ablaamö mosi sicö joyamou showao mlao däjä, Yai Bada a nofi mölabou lä showadaono weinaja, a nofi li mölabou cuo nodioje. ¹³ Ablaamö lija Yai Bada a wa̦ nö wäoma. Cama a ma cui, cama bä ijilubö ebä nodiwä ma cui, jödödöwä tä jamö ebä nia jo̦wa bälöo lofotooma. ¿Ö̦jö tawä? Moisesi etä a̦ nofi cadidiboma yalo, ¿Ablaamö lija a wa̦ nö wäoma daanö? Ma, a wa̦ nofi yai mölaboma yalo jai a cadejewä waiquiwä a nofi fa tadalönö, a wa̦ nö wäquema. ¹⁴ Moisesi etä a̦ lä tabou wejei bä lä cui, ö̦jö bä nia shi̦lo dobämou ayao fa cunoja, bämacö nö ca̦i jole jole mölablalou buobö wei. Yai Bada tänö tä a̦ lä wäqueno wei tä nö ca̦i bejedi cublobö mlai. ¹⁵ Moisesi bäma etä a̦ fuaimi ja, Yai Bada bäma a jushuo lulubou. Ö̦jö ma cui, tä a̦ läa lä mlai jamö tä a̦ waibeje tä cuami waiquiwä. ¹⁶ Ö̦jö cudeenö, Yai Bada bäma a wa̦ nofi mölabou däjä bämacö li bayeliblamou. No mlai ja bämalecö nofi bluca fa ojodabonö, tä a̦fa bayeli lä wäqueno wei tä a̦ ja bämacö bluca bayeliblamobä tä malä cui. ¿Ö̦jö tawä? Judio bä ma mlai ma cui, Ablaamö bäma a bufi lä owäbou wei bämacö nia bluca bayeliblamou, Moisesi etä a̦ oni lä tabou wejei bä shi̦lo mlai. Ablaamö a lä cuinö, Yai Bada a wa̦ nofi lä mölabono weinaja, bäma a wa̦ nofi mölabou lä nomöjöo wei bämacö ma cuinö, Ablaamö bäma a nofi bluca malä fö̦ömaö wei. ¹⁷ Tä a̦ oni lä cuu weinaja showawä. Yai Bada tänö abenaja Ablaamö a nowa tama. Bluca bä bälöjou lä yaiblai bänö wa nofi fö̦ömabeje, cafä bä tablamalema. Einaja Yai Bada tänö a nowa tama, Ablaamö lija a lä bufiblamono wei a lä cuinö. Ö̦jö a lä cuinö, nomawä bä ma cui bä demi jocädamaö co̦o. Täbä cua lä mlai täbä ma cui, cama a wa̦nö täbä cublou. ¹⁸ ¿Ö̦jö tawä? Ablaamö bä ijilubö ebä cublobä etä cuono ma mlai ma cui, Yai Bada tä a̦ bejedi bufibou fe yadioma. “Ijiluyä nodiwä bä lä cui bä fa blucablalunö, bä nia bälöjou yaiblamou”, a bufi cuu cadidio showaoma, Yai Bada tä lä cuno weinaja showawä. Abenaja Yai Bada tänö a nowa tama. Inaja ijilufä bä nia bluca nodiwä cublou. Einaja a nowa tama. ¹⁹ ¿Ö̦jö tawä? Ablaamö a ma wa̦lobadaono wei ma cui, a mölaö showaoma yalo a bufi lofotoo fe yadio showaoma. Bä ijilubö e taabä etä ca̦i cuonomi. Lasha 100 a jayumaö ajedeo waiquioma. Bä suwäbö Sara a ma cui, a shibönabödalou fa mlacunö a ijilubö cuonomi showawä. Ö̦jö ma cui, Yai Bada tä a̦ nofi mölabou cadidio showao fe yadioma. ²⁰ Yai Bada tänö tä a̦ lä wäqueno wei tä a̦ ja, “Shädayai”, moli ma cui a bufi ca̦i cunomi. A nofi lä mölabou wei tä ja, a bufi yai fa lofotoblalunö, Yai Bada tä nofi doablama. ²¹ “Camiyä lija Yai Bada tänö tä a̦ lä wäqueno wei, tä taö dao lä”, a nofi tabou cadidioma. ²² Ö̦jö cudeenö, a wa̦ nofi mölaboma yalo, jai a cadejewä waiquiwä Yai Bada tänö Ablaamö a nofi tabou showadaoma. Inaja tä a̦ oni malä cuu wei. ²³ ¿Ö̦jö tawä? Ablaamö a nofi lä tabono wei tä a̦ lä cui, cama a wa̦fa wayoamou bädao mlai, ²⁴ camiyä bämacö ma cui bämalecö a̦fa ca̦i wayoaö mö feduo showaoma. Bada tä Jesús a demi jocädamaö lä co̦layono wei a lä cui, ö̦jö bäma a bejedi bufii yalo, bämalecö nofi ca̦i tabou mö feduo. ²⁵ ¿Ö̦jö tawä? Camiyä bämacö doblou lä mlai tä nowa ja, a shämolayoma. Jai bämacö dodijidawä waiquiwä Yai Bada tänö bämalecö nofi tabobä, a demi ca̦i jocädou co̦oma.

¹ ¿Ö̦jö tawä? Jesucristo bäma a nofi mölabou yalo, jai bämacö dodijidawä waiquiwä Yai Bada tänö bämalecö nofi tabou. Bada tä Jesucristo a lä cuaano wei tänö, fei däjä Yai Bada tänö yanöcöwä bämalecö ca̦i cua lä cule. ² Ö̦jö a lä cuaano wei tä nowa ja, fei däjä Yai Bada tänö showadi bämalecö nofi ojodabou. Cama a doblao lä culenaja bämacö nia cuo mö lä feduo wei tä ja, bämacö bufi mölaö ca̦i cua yalo, bämacö bufi doblalou. ³ Ö̦jö bädawä mlai, bämacö nö lä bleaaö wei tä ma cui ja, bämacö bufi ca̦i doblalou fe yadio. Bämacö nö lä bleaaö wei tä showawänö, bämacö nö wa̦lojaö dablou malä cui. ⁴ Bämacö nö lä wa̦lojaö wei tänö, Yai Bada bäma a bufi doblamabou. Bäma a bufi doblamabou yalo, bämalecö nia lä dobäö wei tä ja, bämacö mölaö showao. ⁵ Bämacö mölaö lä showale tä ja, bämalecö nia mölamaimi. Yai Bada tänö bämalecö malä nofimaö wei. Camiyä bämacö lija a Bufi lä jibämobeno wei tänö bäma a nofimou daö. ⁶ Bämacö nö bayeliblamobimi waiquiwä tä cuo däjä, Cristo a shämoa lälayoma. Yai Bada tänö a taamaö lä bufiono wei däjä, ö̦jö däjä showawä a shämolayoma, bämacö doblou lä mlai bämalecö bayeliblabä. ⁷ Inaja yanowamö täbä nö cuaabö mlai. A bejedimou daö lä dodijio wei a ma cui, ö̦jö a bayeliblabeje bä nia shämou läo si ijejeomi. Cuwi. A showadi lä dodijaö wei a bayeliblabä, ai a shämou ojodaa ja̦toquei fa cui. ⁸ Ö̦jö ma cui camiyä bämalecö bayeliblabä, dodijidawä mlai, wa̦lidiwä talewä bämacö yai cuo showao däjä, Cristo a shämoa lälayoma. Ö̦jö tä lä cublaliyono wei tä ja, Yai Bada tänö bämalecö yai lä nofimaö wei tä jimöa cadidiquema. ⁹ ¿Ö̦jö tawä? Jesucristo a nö i̦yä lä bleaamano wejei tä nowanö, fei däjä jai bämacö dodijidawä waiquiwä Yai Bada tänö bämalecö nofi tabou. Inaja bämalecö nofi tabou waiquia ja lä, Yai Bada tä nö wa̦lowä lä jushuo wei tä wawäblou däjä, bämalecö noshi nia yai umlabou. ¹⁰ Yai Bada lija bämacö nö nabämou showao däjä, bä Ijilubö e nomaa lä lälayono wei tä ja, bämalecö nofiblamalema. Inaja a cuaama cudeenö, fei däjä Yai Bada tä sho bämacö nofimayou majöa. Bämacö nofimayou waiquilanö, bä Ijilubö e demi cua lä co̦le tänö bämalecö noshi nia yai umlabou. ¹¹ Abenaja ca̦i. Bada tä Jesucristonö bämalecö nofiblamalema yalo, Yai Bada lija fei däjä bämacö bufi yai doblalou. ¹² Yanowamö moli anö, wa̦lidiwä tä taö balöoma yalo, nomaö tä wawäblaliyoma. Bluca täbä wa̦lidiblou fa nodilonö, tä jödödöblaliyoma. Yanowamö bluca täbänö wa̦lidiwä tä taöje yalo, täbä jödödöwä nomablou cuaaö. ¹³ Bejedi lä Moisesi etä a̦ cuo showao mlao däjä, wa̦lidiwä tä cuo showadaoma. Tä cuo showadaoma ma cui, Moisesi tä a̦ jibäamou showao mlao däjä, tä nowa wa̦lidiwä tabou jaöonomi. ¹⁴ Ö̦jö ma cui Moisesi a cuo showao mlao däjä, Adana a nojamö bä lä bälöono wei bä doblou fa mlacunö, bä bluca nomablou fe yadio showaoma. Adananö Yai Bada tä a̦ fuano lä mlainaja bä cuaaö shaliliono ma mlai ma cui, bä doblono malä mlai. Cristo a nia lä funo wei a lä cui, Adananö ö̦jö a owäbou balöoma. Abenaja tä cuoma. Adana a lä cuinö, wa̦lidiwä tä jödödöblalema. Inaja showawä Jesucristo a mö feduwä lä cuinö, dodijidawä tä ca̦i jödödöblaö mö fedulayoma. ¹⁵ Ö̦jö ma cui cäcöbä shomi mö feduwä. Jaba a lä cuinö täbä wa̦lidiblamalema. A fuu lä nomöjöono wei a lä cuinö, no mlai ja täbä yai bayelibou. ¿Ö̦jö tawä? Yanowamö moli a doblou fa mlacunö täbä bluca nomama ma cui, fei däjä no mlai ja Yai Bada tänö bämalecö nofi bluca yai ojodabou. Jesucristo a wawäa fa nomöjölönö, no mlai ja bämalecö nofi fa ojodabonö, bluca bämalecö yai bayelibou fe balojoa. ¹⁶ Ö̦jö moli anö täbä lä wa̦lidimabono wei tä dodijidaono ma mlai ma cui, no mlai ja bämalecö fei däjä lä bayelibou wei tä yai dodijidawä. Ö̦jö moli a doblou lä mlaono wei tänö, bluca bä waimolayoma. Ö̦jö ma cui, bämacö bluca doblou nodio lä mlai, fei däjä bämacö yai bayeliblamou. Jesucristonö no mlai ja bämalecö lä bayeliblaö wei tänö, jai bämacö dodijidawä waiquiwä Yai Bada tänö bämalecö nofi tabou majöo. ¹⁷ Yanowamö moli a doblou fa mlacunö, nomaö tänö yanowamö täbä bluca lofotoa showadalema. Ö̦jö ma cui, ai a ca̦i yanowamö moli mö feduwä lä cui, Jesucristo a lä cui, ö̦jö a nö shi̦lo yai wa̦lojama. Cama a lä cuaano wei tänö bämacö yai bayeliblamou, Cristo sho bämacö bluca ba̦limi cuobä. No mlai ja bämalecö nofi fa ojodadalönö, jai bämacö cadejewä waiquiwä, Yai Bada tänö no mlai ja bämalecö nofi tabou. ¹⁸ ¿Ö̦jö tawä? Moli a lä cui a jaba doblou fa mlacunö, yanowamö täbä bluca waimolayoma. Inaja showawä, ai a moli mö feduwä lä cui a fa bejedimonö, täbä bluca bayeliblamou majöwä. Bä lä waimolayono wei etä nowa fa mladamalönö, bä bluca ba̦limiblamaö majöo. ¹⁹ Yanowamö moli anö, Yai Bada a wa̦ jaba fuaö lä mlaono wei tänö, wa̦lidiwä talewä bä bluca tablamalema. Inaja showawä, ai a moli mö feduwä lä cuinö, Yai Bada a wa̦ yai lä fuaö wei tänö, jai bä cadejewä waiquiwä bä nofi nia bluca tamabou majöo. ²⁰ Täbä doblou lä mlai bä nö yai ö̦jöböamobä, Moisesi etä a̦ jibämoquema. Ö̦jö ma cui, täbä nö wa̦lidiwä yai lä ö̦jöböamono wei däjä, Yai Bada tänö no mlai ja bä nofi shi̦lo yai ojodabou showao ayaoma, ²¹ bä bayeliblamou fe yadiobä. ¿Ö̦jö tawä? Wa̦lidiwä tänö täbä bluca jaba nomablou lä cuaano weinaja, inaja showawä täbä nofi lä ojodabou wei tänö, bä nia yai ba̦limi bluca cuo nomöjöoma. Bada tä Jesucristo a yai lä cuaano wei tänö, jai bä cadejewä waiquiwä, Yai Bada tänö bä nofi nia tabou fe yadioma.

¹ Ja̦o. ¿Wedinaja bämacö cubä, ö̦jö lä? Yai Bada tänö no mlai ja bämalecö nofi nia ojodabou fe yadio cudeenö, ¿wa̦lidiwä tä ja bämacö nia cudio bädao daanö? ² ¡Ma! Wa̦lidiwä tä ja bämacö nia cudiomi. Wa̦lidiwä tä ja bämacö luluamou co̦dao mlaobä, Jesucristo lija bämacö nomaa malä yädälayono wei. ³ Jesucristo lija bämacö lä yädäle bämacö lä cui, a lä nomalayono wei tä ma cui ja bämacö yädäa. Wama tä malä dale. ⁴ ¿Ö̦jö tawä? Bämalecö fa yädämacönö, Cristo a nomabä jamö bämacö nomaa yädälayoma. A nomawä lä didiqueno wejei jamö ma cui, bämacö ca̦i didio yädäoma, a demi lä jocädono wei tä jamö bämacö ca̦i yädäblou mö feduo showaobä. ¿Ö̦jö tawä? Bä Fö̦ö e lä doblale etä lofotenö a demi jocädamaö lä culayono weinaja, inaja showawä camiyä dude bämalecö ca̦i tablamaö mö fedulayoma, bämacö showadi lä cuaano wei bäma tä bufiblaö co̦o mlaobä. ⁵ A lä nomalayono wei tä jamö, cama lija bämacö yädäa waiquia ja lä, a demi lä jocädaliyono wei tä ma cui ja, bämacö nia yädäblou mö malä feduo wei. ⁶ Ei bäma tä malä dale. Fii balitama tefi ja Jesucristo a lä shäleno wejei däjä, wa̦lidiwä bämacö bufi lä cui, ö̦jamö lä bämacö bufi ca̦i shämoa yädälayoma. Wa̦lidiwä tä jamö bämacö showadi yädäo bufi lä doblao wei, bämacö bufi waiquidou showadaobä. ¿Ö̦jö tawä? Wa̦lidiwä tä ja bämacö luluamou co̦daaö mlaobä. ⁷ Täbä lä nomaö wei bä lä cui, wa̦lidiwä tä ja bä luluamobä bä malä mlai. Bä fa nomalönö, bä nia lä cuaaö wei etä mladou showadao. Wa̦lidiwä tä ja bä li fujeblamolayou. ⁸ ¿Ö̦jö tawä? Inaja showawä, Cristonö bämalecö ca̦i nomaa waiquilayoma ja lä, demi bämalecö ca̦i nia cuo mö feduo. Inaja lä bämacö bufi cuu. ⁹ Cristo a demi jocädou fa co̦lonö, a nomaö co̦daaö mlaicätä. A nomabä ami. ¹⁰ A nomaö däjä, wa̦lidiwä tänö bämalecö lofotobou mlaobä a li nomalayoma. A nia nomaö co̦daaimi. Fei däjä a demi lä cule Yai Bada tä bufi doblamabobä a li demi. ¹¹ Cafä wamacö ma cui, inaja showawä wamacö nofi tamobou mö feduobä. Nomawä anö, wa̦lidiwä tä nofi nö jaducäbobö lä mlainaja wamacö cuobä. Jesucristo lija wamacö cua yalo, cafä wamacö ma cuinö, Yai Bada wama a bufi ca̦i doblamabou mö feduobä. ¹² ¿Ö̦jö tawä? Ö̦jö cudeenö wa̦lidiwä tä ja bä noshi da umlao, wamacö bufi lä waiyou wei tänö wamacö icuamaö dicoo mlaobä. ¹³ Bei wamacö mamocu ma cui, wamacö caficö ma cui, wamacö yömöcacö ma cui, wamacö lä bayucui bä noshi jödödöwä da umlao. Wa̦lidiwä wama tä tabä wamacömi. Yai Bada lija wamacö noshi yai ö̦jödaobä. Wamacö nomabä wamacö ma cuono wei ma cui, ba̦limi wamacö cuobä wamacö tablamalema. Ö̦jö cudeenö wamacö yai bejedimobä, Yai Bada lija bä jödödöwä da jibäamo. ¹⁴ Wa̦lidiwä tä lä cuinö wamacö luluaö fe yadiobä wamacömi. Moisesi tä a̦ ja wamacö nosiemamobä wamacö malä mlai. Fei däjä Yai Bada tänö no mlai ja wamacö nofi lä ojodabou wei wama tä a̦ nofi shi̦lo yai mölabou malä majöle. ¹⁵ ¿Wedinaja tawä? Moisesi tä a̦ ja bämacö nosiemamobä bämacömi cudeenö, fei däjä ¿wa̦lidiwä bäma tä nia shi̦lo taö daanö? Yai Bada tänö no mlai ja bämalecö nofi ojodabou waiquiwä yalo, ¿“Cuaaö buo”, bämacö nia cuu daanö? Ma. Einaja bämacö nia cuimi. ¹⁶ ¿Wama tä daimi daanö? Wamacö nosiemamobä, ai täbä lija wamacö noshi ö̦jödao ja, wama bä nosie lä fuaö wei ö̦jö wama ecö waiquiwä. Wamacö tabouje. ¿Ö̦jö tawä? Wa̦lidiwa tä ja wamacö noshi ö̦jödao dicoo ja, inaja showawä, wa̦lidiwä tänö wamacö tabou waiquiwä. Ö̦jö wama ecö yalo wamacö nomaö shi nia wa̦lijio. Yai Bada wama a wa̦ yai fuabä wamacö noshi ö̦jödao ja, wamacö nia shi̦lo yai bejedimou. ¹⁷ Ö̦jö ma cui, Yai Bada lija yamacö bufi a̦fa doblalou wäyämou. Wa̦lidiwä tä ja wamacö jaba nosiemamoma ma cui, fei däjä inaja wamacö cuaaimi. Yama tä a̦ lä wäyäö wei tä a̦ ja, wamacö damamou bufi fa doblaonö, ö̦jö wama tä a̦ yai fuaö majöobä wamacö cublaliyoma. ¹⁸ Wa̦lidiwä tä ja wamacö fa fujeblamolunö, tä a̦ lä dodijidai tä a̦ ja wamacö nosiemamou majöobä wamacö cublaliyoma, wamacö bejedimobä. ¹⁹ Wamacö bufi showadi lä cuaaö wei tä läa yalo, ya wa̦ nia faö yaclämou, wamacö bufi jaducäblou fe yadiobä. ¿Ö̦jö tawä? Bei wamacö mamocu ma cui, wamacö caficö ma cui, wamacö yömöcacö ma cui, shami tä ja, wamacö bluca lä bayucui wamacö noshi jaba ö̦jödao balöoma. Wamacö wa̦lidiaö nö quiliama. Inaja wamacö jaba lä cuaano weinaja mlai, fei däjä wamacö lä bayucui Yai Bada tä lija bä noshi shi̦lo yai ö̦jödao da majöo, wamacö bejedimobä. Yai Bada wama ecö dodijidawä yaiobä. ²⁰ Wa̦lidiwä tänö wamacö tabou däjä, ö̦jö tä ja wamacö nosiemamoma. Wamacö bejedimobä wamacö cuonomi. ²¹ Ö̦jö ma cui, ö̦jö wama tä wa̦lidiwä lä tano wei tä ja wamacö bayeliblamonomi. Wamacö lä cuaano wei tä ja, fei däjä wamacö bufi yai quilijou majöo. Inaja bä lä cuaaö wei bä nomaö shi wa̦lii. ²² Ö̦jö ma cui wa̦lidiwä tä ja, fei däjä wamacö fujeblaliyoma. Yai Bada wama a nosie yai fuaö majöobä wama ecö cublou fa nomöjölonö, wamacö yai bayeliblamou. Yai Badanö dodijidawä wamacö fa yaimacönö, ba̦limi wamacö cuobä. ²³ Wa̦lidiwä tä lä taö wejei tä nowa ja täbä malä nomaö wei. Ö̦jö ma cui Bada tä Jesucristo lija bämacö bufi cua yalo, Yai Bada tänö no mlai ja bämalecö bayeliblaö, ba̦limi bämacö cuobä.

¹ Iba wamacö. Bada bä bälöo lä dodijio wei bänö tä a̦ läblamaöje däjä, bäma tä a̦ nosie fuabä tä a̦ läblamaöje. Bämacö demi cuo showao däjä, bada bäma bä nosie fuabä bämacö. Bämacö nomaö däjä bämacö shi̦lo fujeblou. ² Suwä a lä cuinö, bä fe̦yalobö e nofi lä tabou weinaja showawä. “Afä a waiquiwä”, bada bä cuu ja, bä fe̦yalobö e a̦ nia showadi fuaö. Ö̦jö ma cui, bä fe̦yalobö e nomalayou ja, a wa̦ lä fuaö wei etä nia ca̦i mladou showadao. ³ Ö̦jö cudeenö, bä fe̦yalobö e demi cuo ma showao däjä ma cui, ai a lija a cua majöblaquei ja, a wa̦fa nia joleblalou taöje. ¿Ö̦jö tawä? Ö̦jö ma cui bä fe̦yalobö e nomaö däjä, ö̦jö a wa̦ lä fuaö wei etä mladaliyo. Ö̦jö däjä, ai a lijamö a cuo ma majöo wei ma cui a wa̦fa nia tamoimi. ⁴ ¿Ö̦jö tawä, iba wamacö? Inaja showawä, Moisesi etä a̦ jamö wamacö jaba ma cuono wei ma cui, Cristo a lä nomalayono wei däjä, wamacö nomaö ca̦i yädäoma, cama lijamö wamacö yai cuo majöobä. A demi jocädamaö lä co̦layono wei a lä cui lijamö wamacö cua majöa, wamacö lä bejedimou wei tänö, Yai Bada wama a dodijidawä dablamabä. ⁵ Yanowamö täbä showadi lä cuaaö wei tä ja, bämacö cuo showao däjä, bämacö shijilodou bufio fa mlacunö bämacö doblonomi. Moisesi tä a̦ ma läono wei ma cui, ö̦jö tä a̦ ja bämacö bufi shi̦lo yai balaa dicolayoma. Bämacö lä cuaano wei tänö, bämacö nomabä tä cuoma. ⁶ Ö̦jö ma cui, Moisesi tä a̦ ja bämacö cuo mlaobä, fei däjä Yai Bada tänö bämalecö yai fujeblamalema. Ö̦jö tä a̦ ja, bämacö nia nosiemamou co̦daaimi. Täbä lä nomaoblou wei bä lä cui, täbä nosiemaö malä mlajei. Jaba tä a̦ mlai ja, fei däjä Yai Bada dude bäma tä a̦ nia shi̦lo yai fuaö majöo, Yai Bada tä Bufinö tä lä jimale jamö bämacö yai cuobä. ⁷ Ja̦o. ¿Wedinaja bämacö cubä, ö̦jö lä? Moisesi etä a̦ lä cui, ¿bäma etä a̦fa nia wa̦lidiwä taö majöo daanö? Ma, bäma tä a̦fa nia wa̦lidiwä taimi. Ö̦jö tä a̦ cuo mlao fa cunoja, ya wa̦lidiwä nö ö̦jöböamobö mlai. ¿Ö̦jö tawä? “Wamacö bufi nia waiyoimi”, tä a̦ cuu mlao fa cunoja, ya bufi lä waiyou wei ya tä nö dabö mlai. ⁸ Ö̦jö ma cui, Moisesi ya etä a̦ daö yalo, ya tä wa̦lidiwä lä didibole tä wawäblaliyo. Ö̦jö däjä abenaja ya bufi cuu majöo. “Shädayai. Bejedi lä ya bufi yai waiyou fe balojoo dicoo”, ya bufi cuu majöo. Moisesi etä a̦ läo mlao fa cunoja ya nö ö̦jöböamobö mlai. ⁹ Moisesi ya etä a̦ daö showao mlao däjä, ya mojodi li cudalou balöoma. Ö̦jö ma cui, ö̦jö tä a̦ ja ya bufi fa jaducäblalunö, wa̦lidiwä tä ja ya bufi mö blucablou dicolayoma. Ya nia nomaö shi lä wa̦lii wei, ya tä daa majölalema. ¹⁰ Demi bämacö cudiobä tä a̦ ma cuono wei ma cui, ö̦jö tä a̦ showawänö, ya nia nomaö shi lä wa̦lii wei tä yai wawäblaliyoma. ¹¹ ¿Ö̦jö tawä? Ya tä wa̦lidiwä lä didibole tänö wale mölamalema, Moisesi tä a̦ ja. Ya nia lä bayeliblamou wei ya tä bufima ma cui, ya nia lä nomaö wei bei ya tä daa majöa dicolalema. ¹² ¿Ö̦jö tawä? Moisesi etä a̦ lä cui, tä a̦ li yaia. Yai Bada tänö tä tamaö lä bufii wei tä a̦ bluca yaia. Tä a̦ bejedi. Tä a̦ dodijidawä. ¹³ Ö̦jö ma cui, “Tä a̦ lä dodijidai tä a̦nö wale shälema”, ya cuimi. Ma. Wa̦lidiwä tänö, ö̦jö tä a̦ ja wale fa mölamalönö, wale yai shäa cadidilema. Ö̦jö tä a̦nö, ya doblou lä mlai ya tä nö yai ö̦jöböaö. Yai Bada tänö tä tamaö lä wasöö wei tä ja ya shijilodou lä mlai, ya tä yai wa̦lidiwä dablaö. ¹⁴ Moisesi etä a̦ lä cui, Yai Bada tä Bufinö tä a̦ jibämoquema. Ö̦jö bäma tä daö. Ö̦jö ma cui, yanowamö bämacö doblou lä mlai, ö̦jö ya. Wa̦lidiwä tä ja ya jibämoquema. Ö̦jö tänö wale lofotobou. ¹⁵ Ya lä cuaaö wei tä ja, ya bufi yai wedinajamou. Ya tä taö bufi lä doblao wei ya tä taö malä mlai. Ya tä nofi lä wa̦libou wei tä ma cui, ö̦jö ya tä taö fe yadio dicoo. ¹⁶ ¿Ö̦jö tawä? Moisesi etä a̦ dodijidawä. Ya tä a̦ nö bejedi ö̦jöböaö. Ya tä taö bufio lä mlai, ya tä taö si ijejewä malä dicoi. ¹⁷ ¿Ö̦jö tawä? Ya tä taö bufi lä doblao wei tänö, ya tä taö ma mlai ma cui, bei ya bufi jamö tä wa̦lidiwä lä läle tänö, wale bufi taamaö fa dicoonö, ya tä li taö. ¹⁸ Ei ya tä malä dale. Yanowamö ya lä cui lija, tä lä dodijidai, wiisibö ma cui tä ca̦i didiami. Dodijidawä ya tä taö bufi ma doblao wei ma cui, ya tä nö tabimi waiquiwä. ¹⁹ Dodijidawä ya tä taö bufi lä doblao wei ya tä taö malä mlai. Wa̦lidiwä ya tä taö lä moji wei, ö̦jö ya tä yai taö dicoo, bei cä ya bufi wa̦lidiwänö. ²⁰ Ya tä taö lä moji wei ya tä taö fe yadio dicoo ja, ¿wedi mayo li? Camiyä ya cuaaö bufi lä doblao weinaja, ya cuaaö malä mlai. Ma, bei ya bufi jamö tä wa̦lidiwä lä läle tänö, wale taamaö fa dicoonö, ya tä li taö. ²¹ Showadi ei tä shi̦lo dablamou. Dodijidawä ya tä taö bufi doblao däjä, wa̦lidiwä tä lä cui tä lämou ajedeo. ²² Yai Bada tänö tä tamaö lä bufii wei tä a̦ ja, ya bufi malä doblalou wei. ²³ Ö̦jö ma cui, camiyä lija tä shomi lä didile, showadi ya tä lämou dablaö. Ya cuaaö bufi lä doblao wei tä ja, showadi a li läo. Wa̦lidiwä ya tä lä didibolenö wale lofotobou. ²⁴ Ya nö yai beblalodii. ¿Wedinö wale nia yai bayeliblaö, ö̦jö lä, showadi ya lä cuaaö wei tänö ya nomaö mlaobä? ²⁵ Wedinö mlai, ¡Yai Badanö! Ö̦jö lija ya bufi a̦fa doblalou wäyämou. Ya nö beblalou mlaobä, Bada tä Jesucristo lija ya bayeliblamou. ¿Ö̦jö tawä? Abenaja camiyä ya cuwä. Yanowamö ya lä cui, wa̦lidiwä tä ja ya wa̦ fuobä ya waiquiwä ma cui, bei ya bufi dude lä cuinö, Yai Bada ya wa̦ fuaö bufi doblao.

¹ Fei däjä Jesucristo lija bämacö lä yädäle, Yai Bada tänö bämalecö nö nia bleaamaimi. ² Yai Bada tä Bufinö bämalecö malä bayeliblaö wei. Jesucristo lija bämalecö fa yädämacönö, dodijidawä bämacö li cua. Wa̦lidiwä tänö bämalecö ma lofotobono wei ma cui, nomaö tänö bämalecö ca̦i ma lofotobono wei ma cui, Yai Bada tä Bufinö bämalecö fujeblamalema. ³ ¿Ö̦jö tawä? Yanowamö bämacö showadi dobloimi yalo, Moisesinö tä a̦ ma lämaqueno wei ma cui, ö̦jö tä a̦ ja, bämacö nö bayeli cublobimi waiquiwä. Ö̦jö ma cui, Yai Bada tänö bämalecö bayeliblaö fe yadioma. Cama bä Ijilubö e fa shimölödunö, e yanowamöblaleyoluma. Bämacö doblou lä mlai tä nowa ja, a shämou läobä. Bä Ijilubö e lija tä nowa mladamabä, a shämalema, ⁴ bämacö cadidou fe yadiobä. Yanowamö täbä showadi lä cuaablalou weinaja bämacö fa cuaanö mlai. Yai Bada tä Bufinö bämacö yai cadidobä. Yai Bada tä Bufinö bämacö fa cadidofälönö, tä tamaö lä bufii wei bäma tä dodijidawä taö fe yadiobä. ⁵ Yanowamö täbä showadi lä cuaablalou wei tä ja bä lä luluamou wei bä lä cui, yanowamö tä a̦ ja bä bufi shi̦lo malä cuaablalou wei. Ö̦jö ma cui, Yai Bada tä Bufi ja bä lä luluamou wei bä lä cui, cama Yai Bada tä a̦ ja bä bufi shi̦lo yai daeou. ⁶ ¿Ö̦jö tawä? Yanowamö täbä showadi lä cuaablalou wei tä ja bä lä luluamou wei bä lä cui, bä nia nomaö shi wa̦lijio. Ö̦jö ma cui, Yai Bada tä Bufi ja bä lä luluamou wei bä lä cui, ba̦limi bä nia yai cuo. Bä bufi nia yai yanöcöo. ⁷ Yanowamö täbä showadi lä cuaablalou wei tä ja bä bufi shi̦lo lä daeodii wei bä lä cuinö, Yai Bada tä nofi wa̦libouje. Yai Bada tänö tä tamaö lä wasöö wei tä ja, bä shijilodoimi. Bä nö shijilobimi waiquiwä. ⁸ Yanowamö täbä showadi lä cuaaö wei tä ja bä lä culenö, Yai Bada tä Bufi ca̦i doblamabou daomije. ⁹ Ö̦jö ma cui, Yai Bada wama a Bufi bejedi tabou ja, yanowamö täbä showadi lä cuaaö wei tä ja wamacö luluamoimi waiquiwä. Ö̦jö lija wamacö bufi yai luluamou. Cristo a Bufi tabou lä mlajei, cama ebämi waiquiwä. ¹⁰ Ö̦jö ma cui Cristo wama a tabou ja, Yai Bada tä Bufinö wamacö ba̦limiblamaö. Wa̦lidiwä tä lä läle tänö, wamacö nia ma nomaö wei ma cui, jai wamacö cadejewä waiquiwä Yai Bada tänö wamacö nofi tabou. Ö̦jö tänö, ba̦limi wamacö nia cuo fe yadio. ¹¹ Jesús a demi jocädamaö lä co̦layono wei wama a Bufi tabou ja, wamacö ma nomaö wei ma cui, wamacö demi nia ca̦i jocädamaö co̦o. Cafä wamacö lija Yai Bada tä Bufi lä bälölenö, wamacö nia inaja taamaö. ¹² Ö̦jö cudeenö, yanowamö täbä showadi lä cuaaö wei bäma tä nia bufiblaimi. Ö̦jö bäma tä bufiblabä bämacömi. Inaja bämacö cuaabä bämacö mlai. ¹³ Yanowamö täbä showadi lä cuaaö wei wama tä bufiblaö ja, wamacö nia nomaö shi wa̦lijio. Ö̦jö ma cui, yanowamö täbä showadi lä cuaaö wei tä lä cui, Yai Bada tä Bufinö wama tä mladamaö ja, ba̦limi wamacö nia yai cuo. ¹⁴ Yai Bada tä Bufi ja bä bluca lä luluamou wei bä lä cui, ö̦jö Yai Bada bei ijilubö ebä waiquiwä malä cui. ¹⁵ Yai Bada lija wamacö quilii co̦daabä a Bufi jibäonomi. Bada a wa̦ fuamobä bä lä tabou wei bä lä cuinö, a nö quili taö lä culajeinaja mlai. Ma, wama a nofi fö̦ömaö cadidobä cafä wamacö lija a Bufi jibämoquema. “¡Fabe, Fabemi!”, bäma ecö cuu ja, ¹⁶ ö̦jö cama a Bufi showawänö, bämalecö bufi taamaö. Yai Bada bäma ecö nö ijilubö ö̦jöböamaö. ¹⁷ Bä ijilubö bäma ecö waiquiwä ja lä, bämalecö befi lä taboladi täbä ja bämacö nia dobämodayou, Cristo a nia lä dobämou weinaja showawä. Cristo a nö bleaamaö lä cuaano wejeinaja bämacö nö bleaamaö mö feduoje ja, ö̦jö sho bämalecö nia bluca doblamabodayou. ¹⁸ Abenaja ya bufi cuu. Bämalecö nö fei däjä lä bleaamaö wejei tä ja, “Shädayai”, bämacö nia cuimi. Tä nowa bolacami. Tä yai lä doblale, camiyä bämacö lija Yai Bada tänö tä nia obi lä jimadayou wei, ö̦jö tä nowa shi̦lo yai bluca. ¹⁹ ¿Ö̦jö tawä? Yai Bada tänö täbä bluca lä tablaleno wei, täbä nö bluca malä dablai. Yai Bada bä ijilubö bämalecö nia dodijidawä lä wawäblamaö wei, bufi shi jalimolanö tä nö dabouje. ²⁰ Täbä bluca lä tablano wei täbä ma cui, täbä malä wa̦lidiblaliyono wei. Inaja cama täbä taamamou bufi fa doblaonö mlai. Yai Bada tänö täbä wa̦lidiblamalema ma cui, täbä nia obi dobladou lä co̦ono wei tä ja, tä nö dao showaoma. ²¹ Täbä bluca lä tablamono wei, täbä nia bayeliblamou. Showadi täbä lä wa̦icou wei tä ja, Yai Bada tänö bä nia fujeblaö, täbä inaja cuaaö co̦daaö mlaobä. Bä ijilubö doblao ebä nia lä tabou weinaja, jödödöwä täbä lä tablamono wei täbä ma cui, bä nia bluca doblamabou mö feduo. ²² Ei bäma tä daö. Täbä bluca lä tablamono wei täbä ma cui, täbä bufi bluca la̦mou ca̦i nö beblalou mö fedua showaa lä cule, ijilu bä nini tabouje däjä bä a̦ nö nini dao lä culenaja showawä. ²³ Täbä bluca lä tablamono wei täbä bädawä mlai. Camiyä bämacö ma cui, Yai Bada tä Bufi ja bämacö jaba dobämou lä balöono wei bämacö lä cui, bämacö bufi nö ca̦i bleaaö. Bä ijilubö bäma ecö nia lä doblaodayou wei bäma tä nö dabolanö, ba̦limi bämalecö nia yai lä tablaö wei bäma tä nö ca̦i dabolanö, bämacö bufi la̦mou ca̦i nö bleaaö. ²⁴ Yai Bada tänö bämalecö lä fucäleno wei däjä ma cui, ö̦jö tä ja bämacö malä mölano wei. ¿Ö̦jö tawä? Bämacö mölaö showaobä lä. Tä dablamou lä waiquile tä ja, ¿wedinaja bämacö mölaö li cuo majöobä? ²⁵ Ö̦jö ma cui, tä dablamou showao mlao däjä bämacö mölaö ja, bämacö bufi yanöcölanö bämacö nö nia dao. ²⁶ Inaja showawä, bämacö bufi ujuduaö si lä ijejei bämacö lä cui, Yai Bada tä Bufinö showadi bämalecö ca̦i bayeliblaö talei. Camiyä bämacö nö bayeli nacao doblou fa mlacunö, cama tä Bufi showawänö bämalecö nö bayeli nacaö. Yanowamö täbä caficö a̦ ja mlai, a wa̦ Bufi yai cadidou showadao. ²⁷ Yanowamö bämalecö bufi lä dale a lä cuinö a wa̦ ji̦liaö walalao. A nacou bufi lä doblao wei tä a̦ daö. Yai Bada bäma ecö nofi bäyäaö däjä, Yai Bada tänö a wa̦ famaö cuo lä bufio weinaja, a wa̦ faö cadidou cuaaö showawä malä cui. ²⁸ Ei bäma tä daö. Tä cublou lä bädao wei tä ma cui, Yai Bada tänö tä fulii yalo, a lä nofimaö wejei bä lä cui bä bayeliblamou. Inaja Yai Bada tänö bä taamaö bufi doblao fa showaonö, bä nacama. ²⁹ Bä daö lä showadaono wei bä lä cui, bä Ijilubö e lä culenaja bä cuo mö feduobä, bä yaibou showadaoma. Bä Ijilubö jaba e lä cui e no jamö, ebä mashi bluca cuobä. ³⁰ Bä lä yaibono wei bä ca̦i nacama. Bä lä nacano wei, jai bä dodijidawä waiquiwä bä nofi ca̦i taboma. Ö̦jö bä nofi lä tabono wei bä lä cui, bä doblaodayobä bä ca̦i tablamalema. ³¹ ¿Ö̦jö tawä? Bämalecö doblamabobä Yai Bada a cua waiquia ja lä, ¿wedinö bämalecö nia li doblamaimi majöo? ³² Cama bä Ijilubö e ma cui, Yai Bada tänö a noshi umlabonomi. Bämalecö bluca bayeliblabä, a noshi malä ö̦jödabono wei. ¿Ö̦jö tawä? Bä Ijilubö e jibäaö ojodao waiquioma ja lä, ai täbä bluca ma cui ja, bei bämalecö dobäa yailei. ³³ Cama bäma ecö lä yaile, jai bämacö dodijidawä waiquiwä, cama Yai Bada tänö bämalecö nofi tabou waiquia ja lä, ¿wedinö bämalecö a̦fa nia li taö majöo? ³⁴ Bämacö doblou lä mlaono wei tä nowa ja, ¿wedinö bämalecö nö nia li bleaamaö? Jesucristo a shämou malä läono wei. A demi jocädou co̦oma. Yai Bada jayu boco mashi jamö, a loadayoa. Bämalecö nofi bäyäbou culadi. ³⁵ Cristonö bämalecö nofimaö waiquiwä. Bämalecö nofimaö mladobä, tä cuami. Bämalecö ma yabäcaö wejei ma cui, bämalecö nia nofimaö showao. Bämalecö nö ma bleaamaö wejei ma cui, bämacö nö ofili ma bleaaö wei ma cui, bämacö didiobä bäma sibä tabou ma mlai ma cui, inaja showawä. Bämacö ma shämou wei ma cui, bämalecö nabä ma queo wejei ma cui, inaja showawä. Bämalecö nofimaö waiquiwä. ³⁶ Tä a̦ oni lä cuu weinaja showawä. Abenaja tä a̦ cuu. Afä yamacö cudeenö, showadi yamalecö shäö bufi doblaoje. Oweja bä nofi lä tabou wejeinaja, yamalecö nofi tabou mö feduoje. “Bä shämobä bä waiquiwä”, yamalecö nofi tabouje. Einaja tä a̦ cuu. ³⁷ Ma. Inaja bämalecö ma taamaö wejei ma cui, bämacö nö wa̦lojaö fe yadiobä bämacö. Bämalecö yai lä nofimale a lija bämacö bayeliblamou ja, bämacö nö yai wa̦lojabä bämacö. ³⁸ - ³⁹ Ei ya tä malä dale. Bämacö ma nomablou däjä ma cui, bämacö demi ma cudio wei ma cui, a̦jele bä ma läblou wei ma cui, fecula bänö bämalecö ma yabäcaöje däjä ma cui, Yai Bada tänö bämalecö nofimaö lä waiquile tä ja, bämalecö fujeblaö majöobä tä cuami waiquiwä. Tä fei däjä cublou lä bädao wei tä ma cui, tä nia obi lä cublou wei tä ma cui, ai tä lofote läa lä bädale tä ma cui, Yai Bada tänö bämalecö nia nofimaö showao. Fedu jamö täbä lä culadi täbä ma cuinö, co̦jomö jamö täbä lä cublai täbä ma cuinö, ai täbä lä tablaleno wei täbä bädawä ma cuinö, Yai Bada tänö bämalecö nofimaö lä waiquile tä ja, ö̦jö lä täbänö bämalecö nia fujeblamaimije. Bada tä Jesucristo lä cuaano wei tänö, bämalecö yai nofimaö waiquia lä culadi.

¹ Ei ya wa̦ lä cui ya wa̦ bejedimou. Ya jolemoimi, Cristo ya e malä cui. Yai Bada tä Bufi ma cuinö wale bufi möö. Wale bejedimou daö. ² Ya bufi o̦quijou fe balojowä. Showadi ya bufi nö bleaadii. ³ Iba mashi ya bä nofi fo̦lijibou, Isaeli ebä mö feduwä lä cui. Shädayai. Camiyä ya waimou tä nowa ja bä bayeliblamou dao fa cunoja, ya nö waimou ojodaobö wei. ⁴ Isaeli ebä nodiwä malä cui, Yai Bada tänö bä lä yaileno wei. Bä nofi ca̦i ijilumama. Ö̦jö lä bä lija tä shi̦i doblao ca̦i dablamoma. Ö̦jö bä lija a wa̦ nö ca̦i wäoma. Moisesi tä a̦ lä cui, ö̦jö bä lija tä a̦ ca̦i jibämoquema. Cama lija bä ajedobä tä ca̦i jimöquema. Bä nia obi lä bayeliblamono wei tä a̦fa ca̦i wäyäö balöoma. ⁵ Ö̦jö bäma bä a̦fa nö ca̦i badabö jayumaö showawä. Yai Bada tänö a shimabä a lä yaileno wei, cama ebä nodiwä lija a nia ca̦i wawämama. ¿Ö̦jö tawä? Yai Bada tä shi̦lo yai Bada lä ayai, a wa̦ nofi yai doablamou shi wa̦libä a. Inaja lä tä cuobä. ⁶ Ö̦jö ma cui, “Yai Bada tä a̦ nö lä wäono wei, tä bejedi cublonomi”, bämacö nia cuimi. ¿Ö̦jö tawä? Isaeli bä ijilubö nodiwä ebä ma bluca wei ma cui, ö̦jö bä bluca bayeliblamobä bämi. Yai Bada lija bä bufi cua lä mlai, bä nofi taboimi. ⁷ Inaja showawä, Ablaamö bä ijilubö nodiwä ebä ca̦i ma bluca wei ma cui, ö̦jö lija bä nodiblou lä bädao wei tänö bä nofi ca̦i tamamoimi. Ablaamö lija Yai Bada a lä cuno weinaja showawä. Abenaja tä a̦ oni cuu. Isaacö lija bä yai lä nodiblou wei, bä a̦fa nia shi̦lo ijilufä jilamou. Einaja tä a̦ cuu. ⁸ Abenaja. Ablaamö bä ijilubö ebä lä cui, Yai Bada tänö cama ebä nofi bluca taboimi. Ablaamö bä ijilubö e a̦fa yai wäyäö lä balöono wei a Isaacö lä cui, ö̦jö bä ijilubö ebä nofi yai shi̦lo ibabou, ⁹ Isaacö a wa̦fa wäyäö ja, a cuu lä balöono weinaja showawä. Abenaja tä a̦ oni cuu. Sara a fa shibönabölönö, obi ei a belibo cublou co̦o däjä bei ijilubö e nia tabou. Bejedi lä ya wa̦. Wafä a ijilu tabou däjä, ya nia fuu co̦o. Einaja tä a̦ cuu. ¹⁰ Abenaja tä ca̦i cuoma. Bämacö nö badabö Isaacö a lä cuinö, bä suwäbö Lebeca lija, ijilu cäcöbä lä e̦lequeblaliyono wei cäcöbä taquema. ¿Ö̦jö tawä? ¹¹ Cäcöbä tablaö showao mlao däjä, dodijidawä tä ma cui, wa̦lidiwä tä ma cui, tä taböönomi. Tä taböö ma mlai ma cui, Yai Bada tänö cäcöbä taamaö lä bufiono wei tä daö showaoma. ¿Ö̦jö tawä? Yanowamö täbä lä cuaaö wei tänö mlai, cama Yai Bada tänö täbä li bufii waiquiwä cudeenö täbä li cadidaö. Inaja tä cuoma yalo, ¹² Lebeca lija abenaja a cuma. Jaba a lä faö wei a lä cuinö, a faö lä yaule a nosie nia shi̦lo fuaö. Einaja a cuma, ¹³ ai tä a̦ oni lä cuu weinaja showawä. Jacobo ya yailema ma cui, Esau ya wailema. Einaja tä a̦ cuu. ¹⁴ ¿Ö̦jö tawä? ¿Wedinaja bämacö cubä, ö̦jö lä? “Yai Bada tänö täbä yaiaö cadidio daimi”, ¿bämacö nia cuu daanö? ¿A dodijaimi tawä? Ma, inaja mlai. ¹⁵ Abenaja Moisesi lija Yai Bada tä malä cuno wei. Ya nofi asibou bufi lä doblao wei a lä cui, ya nofi asibou cuquei. Ya nofi ojodabou bufi lä doblao wei a lä cui, ya nofi ojodabou cuquei. Einaja a cuma. ¹⁶ ¿Ö̦jö tawä? Yai Bada tänö täbä yanowamö lä yaiaö wei, cama bä yaiamou bufi fa doblaonö bä yaiamoimi. Cama bä nö lä wa̦lojoablalou wei tänö mlai. Yai Bada tänö täbä nofi ojodabou bufi fa doblaonö, bä li yaiablaö. ¹⁷ Tä a̦ malä cuu wei. Ejidoteli bada a wa̦fa wäyäö ja, abenaja Yai Bada a cuma. Ö̦jö ma cui, cama lija ya lofote nia fa dablamonö ya li tabou. Ya lofote fa damolalunö, jödödöwä täbä lä bälöblai bä lijamö, wale a̦fa wäyäö blaucobeje, ya li demimabou showaa bäa lä cule. Einaja a cuma. ¹⁸ ¿Ö̦jö tawä? Täbä nofi asibou bufi lä doblao wei täbä lä cui, täbä nofi li asibou. Täbä bufi jifublamaö bufi lä doblao wei täbä bufi ca̦i jifublamaö. ¹⁹ ¿Abenaja wa nia cuu dicoo daanö? “Camanö bämalecö taamaö fa bufinö bämalecö ma taamaö wei ma cui, ¿bämalecö a̦fa nia dobloimi taö majöblao? Cama lija bämacö noshi umlaobä, tä cua malä mlai”, ¿wa nia cuu tawä? Ma, cu dijä. ²⁰ ¿Cafä wedi bei wa wa̦ li bashiwä? Cafä yanowamö wa ma cui, Yai Bada lija, ¿inaja bei wa wa̦ nia fuo li cuaaö? Oshoboli a lä taö wei a lä cui lija, ¿cama oshoboli a wa̦ nia faö daanö? “Wedi tabä inaja bei wale tablaö li cua cule”, ¿oshoboli a nia cuu daanö? ²¹ Oshoboli bolacabö cäcöbä lä tablaö wei a lä cuinö, ¿shi yaiabä ami? “A nofi yai oshoboli doablabeje, ei shinö ya nia tablaö”, a cubä a waiquiwä. “Ei shi mö feduwä lä cuinö ya tabou buobä ya nia tablaö mö feduo”, a ca̦i cubä a showawä malä cui. ²² ¿Ö̦jö tawä? Yai Bada tänö täbä yanowamö taamaö lä bufio weinaja täbä li taamabä a waiquiwä. Wa̦lidiwä tä nowa ja, a nö wa̦lowä lä jushudou wei tä wawämaö ma bufio wei ma cui, a shi jalimoimi. A lofote dablamou bufi ca̦i ma doblao wei ma cui. Täbä mö watäblamobä täbä ma cui, a bufi yanöcöo fe yadio balöoma, ²³ bämalecö nofi nia yai lä asibou wei tä yai wawäblobä. ¿Ö̦jö tawä? Doblao bämalecö tabodayobä, yedu ja ma cui bämalecö nofi tabou showadaoma. ²⁴ ¿Ö̦jö tawä? Judio bämacö shi̦lo bädawä mlai, judio bä lä mlai bä ma cui, bämalecö bluca lä nacano wei, bämalecö nofi ca̦i tabou balöo showaoma. ²⁵ Yai Bada a wa̦no wäyälewä Osea lija a lä cuno weinaja showawä. Abenaja tä a̦ cuu. Iba bä cuono lä mlai bä lä cui, ya bä nofi nia ibaaö majöo. Ö̦jö bä shomi bälöo lä yaiblai bä lä cui, ya bä jaba nofimano ma mlai ma cui, “Iba ya bä lä nofimale cäbä”, ya bä nofi nia tabou majöo. Einaja tä a̦ cuu. ²⁶ “Iba wamacömi”, Yai Bada tänö bä nowa lä tano wei jamö, ö̦jamö lä showawä, Yai Bada tä demi cua shi lä wa̦lile bä ijilubö ebä a̦fa nia jilamou. ²⁷ Isaia a ma cuinö, Isaeli ebä a̦fa taö ja, a wa̦ lofotoaama. Abenaja tä a̦ oni cuu. Modu u casö jamö mlaca mlaca bä nö wabamobimi lä culenaja, Isaeli bä ijilubö ebä nodiwä cublou mö ma feduo wei ma cui, Yai Bada tänö bä noshi nia yai lä umlabou wei bä nia bolacamio dodijio. ²⁸ Bita jamö bä lä bälöblai bä lä cui, Bada tänö bä nö bleaamaö däjä, lobe tä nia taö showadao. Einaja tä a̦ cuu. ²⁹ Isaia a showawänö, ei tä a̦fa ca̦i wäyäö lä balöono weinaja showawä. Abenaja tä a̦ oni cuu. Bada tä Bada lofote lä ayai tänö bämalecö nodiwä feiblamaö mlao fa cunoja, Sodomateli bä lä tablaleno weinaja bämalecö nö tablalebö wei. Comolateli bä lä cublaliyono weinaja showadawä. Einaja tä a̦ cuu. ³⁰ ¿Ö̦jö tawä? Abenaja tä cublaliyoma. Judio bä lä mlai bä lä cuinö, Yai Bada lija bä bejedimou dablamobä tä dayäano ma mlajei ma cui, tä daa bälalemaje. Jesucristo a nofi mölabouje yalo, fei däjä jai bä cadejewä waiquiwä Yai Bada tänö bä nofi tabou. ³¹ Ö̦jö ma cui, Isaeli ebä lä cui, Yai Bada lija bä bejedimou dablamobä, Jesucristo a nofi mölabou mlajei ja, cama bä nia wabäoma. Moisesi etä a̦ jamö bä nia cadidou fe yadioma. Bä nia ma cadidono wei ma cui, tä a̦ nofi cadidibou doblonomije. ³² ¿Wedinaja bä li cuaaö fa dicoonö, bä li doblonomi? Wedinaja mlai. Bä bejedimou dablamobä, Yai Bada tä nofi mölabono malä mlajei. Cama bä nia dodijaö fe fa yadionö, cama bä nofi shi̦lo li mölamoboma. Jesucristo a shämou lä läono wei tä ja bä bufi jaducäblonomi yalo, jai maa ma jamö bä yudulayoma. ³³ Yai Bada a lä cuno weinaja showawä. Abenaja tä a̦ oni cuu. Tä da möje. Isaeli ebä lä fuu wei, maa ma jamö bä mamicö fa difequionö bä yudubä, ya ma nia blaaö läo. Maa bada ma nia blao läo, täbä fa yudulunö täbä quebä. Ö̦jö ma cui, täbä lä yudumaö wei a bejedi lä bufibou wejei bä lä cui, bä nö nia bleaaimi. Einaja tä a̦ cuu.

¹ Iba wamacö. Yai Bada lija bä fucäamobä, judio ya bä nö bayeli nacadii. Bä fucäamou fa cunoja ya bufi nö yai doblalobö wei. ² ¿Ö̦jö tawä? Yai Bada tä bufi doblamabobeje, tä dayäaöje. Ya bä daö yalo ya wa̦. Ö̦jö ma cui, bä bufi jaducäa mlalanö tä li dayäaöje. ³ Yai Bada tänö jai täbä cadejewä waiquiwä täbä nofi lä tabou wei tä lä cui, ö̦jö tä nofi mojodubouje. Cama bä nia dodijaö fe fa yadionö, bä nofi li mölamobou. Jesucristo a nofi mölabou bufiomi malä waiquijei. ⁴ ¿Ö̦jö tawä? A nofi nia lä mölabou wejei, ö̦jö a Cristo waiquiwä yalo, Moisesi tä a̦ ja bä mölabä etä cuami. Cristo a nofi lä mölabou wejei tänö, jai bä dodijidawä waiquiwä Yai Bada tänö bä nofi nia shi̦lo tabou. ⁵ Moisesinö tä a̦ oni taö balöoma. Cama etä a̦ ja bä lä bejedimou wei bä lä cui, ö̦jö bä nia shi̦lo jo̦wa ba̦limi cuoma. ⁶ Ö̦jö ma cui, cama bä nia lä bejedimou wei tä ja, ai bä mölaimi waiquiwä. Yai Bada lija bä bejedimou dablamobä, Cristo a nofi yai mölabouje. Abenaja ö̦jö bä bufi nia cuimi. Fedu jamö, ¿wedi a yai nia duofälöö? Ma, einaja bä bufi nia cuimi. “A fa duofälönö, Cristo a ca̦i itou fa co̦imanö, ö̦jö bäma a wa̦ yai ji̦liabä”, bä nia cuimi. Abenaja ca̦i mlai. ⁷ Bä lä nomaö wei bä cuobä jamö, ¿wedi a nia li itou? Ma, inaja bä bufi nia ca̦i cuimi. “Mashita co̦jomö jamö a fa itolunö, Cristo a fa co̦läcölönö, ö̦jö bäma a wa̦ yai ji̦liabä”, bä nia ca̦i cuimi. ⁸ ¿Wedinaja tä a̦ yai cuu, ö̦jö lä? Abenaja. Wa nia lä bayeliblamou wei tä a̦ yai ajedewä waiquiwä. Wa tä a̦ wayoaö dao. Ö̦jö tä a̦ ja wa bufi ca̦i daeo dao. Einaja tä a̦ yai cuu. ¿Ö̦jö tawä? Yama tä a̦ lä wäyäö wei, ö̦jö tä a̦ li waiquiwä, Jesucristo a nofi mölabobeje tä a̦ lä cui. ⁹ Bei wa caficönö Jesús wa wa̦fa Bada wäaö ja, bei wa bufinö Yai Bada tänö a demi jocädamaö lä co̦layono wei wa tä a̦ bejedi ca̦i bufibou ja, wa fucäamou wä. ¹⁰ Bei täbä bufinö tä a̦ bejedi malä bufibou wejei, jai bä dodijidawä waiquiwä Yai Bada tänö bä nofi tabobä. Bei täbä caficönö bä a̦ nö ca̦i wäo, bä fucäamobä. ¹¹ Abenaja Yai Bada etä a̦ oni cuu. A bejedi lä bufii wejei bä lä cui, bä nia mölaö buomi. Einaja tä a̦ oni cuu. ¹² Yai Bada tänö judio bä nofi tabou ayao malä mlai. Judio bä ma mlai ma cui, bä nofi ca̦i malä tabou wei. Judio bä ma cuinö, judio bä lä mlai bä ma cuinö, ö̦jö a showawä a nofi Badabou malä cujei. Ö̦jö lija bä nö bayeli bluca lä nacao wei bä bluca bayelibou fe balojowä. ¹³ Abenaja tä a̦ malä cuu wei. Bada tä lija bä nö bayeli lä nacao wei, bä nia bluca fucäamou. Einaja tä a̦ malä cuu wei. ¹⁴ Ö̦jö ma cui a bejedi bufii lä mlajei a lija, bä nö bayeli nacaobä etä cuami. A wa̦fa ji̦libou lä mlajei bä lä cuinö a nia ca̦i bufiblaö bädaomije. Bä yömölabä a cuami ja, a wa̦fa nia ca̦i ji̦liaimije. ¹⁵ Bä yömölabeje bä shimamoimi ja, bä nia ca̦i yömölamou bädaomi. Abenaja tä a̦ oni cuu. Dodijidawä tä a̦ ca̦i lä waloo wejei bä lä cui, bä yai dablamou dodijidawä fe balojowä. Einaja tä a̦ oni cuu. ¹⁶ Ö̦jö ma cui, tä a̦ lä dodijidai tä a̦ ma ji̦liaö wejei ma cui, ai bä a̦ fuomi. Isaia a lä cuno weinaja showawä. Abenaja tä a̦ oni cuu. Bada tä. Yama tä a̦ ma wäyäö wei, yamalecö a̦ bejedi bufiimje. Einaja tä a̦ cuu. ¹⁷ ¿Ö̦jö tawä? Cristo a wa̦fa wäyäöje ja, tä a̦ nia shi̦lo ji̦liaöje. Tä a̦ ji̦liaöje ja, a nofi nia shi̦lo mölabouje. ¹⁸ Ö̦jö ma cui, abenaja ya cuu. ¿Judio bänö bei tä a̦ ji̦lianomije daanö? Tä a̦ malä ji̦lileno wejei. Abenaja tä a̦ oni cuu. Bluca bä lä bälöblai bä lijamö, tä a̦ lä wäyäno wejei bä a̦ blaucublaliyoma. Täbä bälöblawä lä jödödöblai jamö ma cui, bä a̦ ji̦liamaje. Einaja tä a̦ oni cuu. ¹⁹ Abenaja ya nia cuu co̦o. Isaeli ebä lä cui, ¿bä bufi jaducäblonomi daanö? Yai Bada a wa̦no wäyäö ja, Moisesi a wa̦ faö balöoma. Abenaja tä a̦ oni cuu. Judio bä lä mlai bä lija wamacö bufi waiyobä, wamacö nia jo̦wa tablamaö, cama bä dodijaö ayao ja. Wama bä bufi a̦fa jaducäwämi lä taö wei bä lä cui lija wamacö nia jushudamaö. Einaja tä a̦ cuu. ²⁰ Tä nö fa dedelönö, Isaia a wa̦ ca̦i waiteliblou nomöjölayoma. Abenaja tä a̦ oni cuu. Yai Bada tä dayäaö lä mlajei bä ma cuinö a jo̦wa dalalemaje. A wa̦lino lä mlajei bä ma cui lija a ca̦i jo̦wa damolaliyoma. Einaja tä a̦ cuu. ²¹ Ö̦jö ma cui, Yai Bada tänö Isaeli ebä a̦fa wäyäö ja, abenaja a jo̦wa cuma. Bä shijiloblao lä mlai ya bä ajedeamaö co̦obä, showadi ya boco ma dododalou wei ma cui, bä wasömamoimi. Einaja a jo̦wa cuma.

¹ Ja̦o. Abenaja ya nia cuu. Cama ebä lä yaileno wei, ¿Yai Bada tänö bä li waia majölema tawä? Mlaicätä. Camiyä Isaeli ö̦jö lä ya e showawä malä cui. Ablaamö nodiwä ya showawä. Bejamino lija ya yai nodiblaliyoma. ² ¿Ö̦jö tawä? Yai Bada tänö cama ebä daö lä balöono wei ebä waii majöonomi. Yai Bada etä a̦ oni jamö, Elianö bä a̦fa lä wäyäno wei, ¿wama tä a̦ daimi daanö? Yai Bada lija Isaeli ebä a̦fa wäyäma. ³ Abenaja tä a̦ cuu. Bada tä. Cafä wa wa̦no wäyälewä bä lä cui, bä shäalalemaje. Wa dobäbeje bä yalo lä maqueblaaö wejei täbä madofi ma cui, täbä wa̦lialalemaje. Camiyä yami ya feiquia ma cule, wale ca̦i dayäaöje, wale shäbeje. Einaja tä a̦ cuu. ⁴ Ö̦jö ma cui, Yai Bada tänö ¿wedinaja Elia a nowa tama? Abenaja tä a̦ cuu. Iba 7.000 ya bä feiquibou fe yadioma, Baala a jole lä bufiblamou wei a nö ijidubö lija bä möfe boo lä mlai. Einaja tä a̦ cuu. ⁵ Inaja showawä, fei däjä ma cui cama ebä feiquibou. Bä nofi fa ojodadalönö bä yailema. ⁶ ¿Ö̦jö tawä? Bä nofi li fa ojodabonö bä li yailema, bä dodijaö fa dablanö mlai. Bä dodijaö fa dablanö bä yaiaö fa cunoja, “Bä nofi fa ojodabonö”, bämacö nö cubö mlai. ⁷ ¿Ö̦jö tawä? ¿Wedinaja tä cublaliyoma, ö̦jö lä? Isaeli ebä dodijidawä cuobä tä ma dayäno wejei ma cujei, tä dablanomije. Yai Bada tänö bä lä yaileno wei bä lä cuinö, ö̦jö bänö tä daa ma ayalaleno wejei ma cui, ai bä mö feduwä lä cui bä bufi shi̦lo jifublaliyoma, ⁸ Yai Bada etä a̦ oni jamö tä a̦ lä cuu weinaja showawä. Abenaja tä a̦ cuu. Yai Bada tänö bä bufi mojodublamalema. Bä mamocu fubäböblamalema. Bä yömöcacö comablamalema. Fei däjä ma cui inaja bä cuwä showawä dicowä. Einaja tä a̦ cuu. ⁹ Nö badabö David a lä cuno weinaja showawä, Yai Bada lija. Abenaja ö̦jö tä a̦ oni cuu. Bä iyaö ca̦i co̦camobä jamö, “Dodijidawä yamacö cua waiquia”, bä bufi jole cuu. Bä mölaö showao däjä, ¡wa etä wa̦lidiblamabä! ¡Wa bä nö bleaamaö majöobä! Bä doblou lä mlai, ¡wa tä nö bäshälö tabä! ¹⁰ Bä bufi möblou mlaobä bä da taama, bä ca̦i yabäcamou nö bleaaö shi wa̦libä. Einaja tä a̦ cuu. ¹¹ Ö̦jö cudeenö, abenaja ya cuu nomöjöo. Judio bänö Jesucristo a fa wailöjenö, jai bä yudulayoma bä cublaliyoma ma cui, bä bladio shi wa̦libä bämi. Jesucristo etä a̦ wailemaje yalo, judio bä lä mlai bä lija etä a̦ wäyämou majöa lä cule, bä fucäamobä. Shomi bä fucäamou ayao ja, judio bä bufi waiyou mö yabao co̦obä. ¹² ¿Ö̦jö tawä? Judio bä mili bayeliblamoma ma cui, Jesucristo a wailemaje yalo, jödödöwä täbä lä bälöblai täbä fei däjä yai bayeliblamou majöa lä cule. Bä doblou lä mlaono wei tänö, fei däjä judio bä lä mlai bä yai bayeliblamou. ¿Ö̦jö tawä? Ö̦jö ma cui judio bä nia yai obi lä dodijaö wei tänö, ö̦jö däjä, ¡bejedi lä täbä nia shi̦lo yai bayeliblamou dodijio! ¹³ Bei. Jesucristonö wale shimölema yalo, cafä judio wamacö lä mlai wamacö lija, fei däjä ya wa̦ faö majöa lä cule. Bämacö yömölabä wale lämabou yalo, bämacö yömölaö bufi doblaa malä cui, ¹⁴ Jesucristo wama a nofi lä mölabou wei tä ja, iba judio bä mö feduwä lä cui ya bä bufi waiyamabä. Bä bufi lä waiyou wei tänö, ai bä bufi fa jaducäblalunö, bä fucäamou fe yadiobä. ¹⁵ ¿Ö̦jö tawä? Yai Bada tänö cama ebä wailema yalo, judio bä lä mlai bä fei däjä nofiblamaö majöa. Ö̦jö ma cui, Jesucristo ya̦cumö a bufiblaö co̦oje däjä, cama ebä nia ajemaö co̦o. Bä ajemaö däjä, jai bä demi jocädamaö co̦layoma bä nia cublou. ¹⁶ Yai Bada lija, nii ji̦bä lä dodobou wejei ji̦bä yaio däjä, cama ai ji̦bä mashi lä cui ji̦bä mashi yaia mö fedua. ¿Öjö tawä? Judio bä lä cui, Yai Bada ebä cuo fa balöonö, fei däjä ma cui bä yaibou showawä. Yai Bada lija fii bei fi nasöcö yaia waiquia cudeenö, ö̦jö bei lä fibä boco bluca ma cui, fibä boco yaia mö fedua showadaa malä cui. ¹⁷ Judio bä lä cui, jai oliba fi lä döbolajei bä cuwä. Ö̦jö fi bococu cäblamou lä culenaja bä ca̦i taamamoma. Cafä judio wamacö lä mlai, shomi tefi bococu diclämaö lä culajeinaja, Yai Bada tänö wamacö li tablamaö mö fedulayoma, oliba fi nasöcönö wamacö dodijidawä cuobä. Inaja wamacö yädäa tamaquema yalo, ¹⁸ oliba fi bococu lä joyamono wei wama fi bococu nofi nia wa̦liboimi. “Camiyä yamacö yai”, wamacö bufi cuu dicoo ja, ei tä nofi da jaducäläje. Fii wamacö fi bococu lä cuinö wama tefi nasöcö bayeliboimi. Ö̦jö tefi nasöcö lä cuinö, cafä wamacö yai li bayelibou. ¹⁹ Abenaja wamacö cuu dao. “Camiyä yamacö yädäobä tefi bococu malä joyaleno wei”, wamacö cuu dao. ²⁰ Bejedi lä. Tefi bococu cäblou lä culenaja, Jesucristo a wa̦ bejedi bufii fa mlacujenö, bä li judio tablamolayoma. Ö̦jö ma cui, cafä wamacö cua lä majöle, “Camiyä yamacö yai”, bä nofi tamamo dijä. Bä shi̦lo yai da moyaweicu. Jesucristo wama a nofi li mölabou yalo wamacö li cua majöa lä cule, ö̦jö lä tä bädawänö. ²¹ Oliba fi bococu yai lä cuono wei, Yai Bada tänö fi bococu cäblaö ojodaoma ja lä, cafä shomi wama tefi bococu lä dicläcäle wama tefi bococu nia ca̦i cäblaö ojodao mö feduo. ²² ¿Ö̦jö tawä? Yai Bada tänö dodijidawä täbä ca̦i nia lä cuo wei tä ja, bä bufi da jaducäicu. Täbä nö lä bleaamaö wei tä ma cui ja. Bä doblou lä mlai bä nö bleaamaö ma cui, cafä dodijidawä wamacö ca̦i cua. ¿Ö̦jö tawä? Wama a wa̦ bejedi bufii showalanö, dodijidawä wamacö nia ca̦i cuo ma cui, wama a wa̦ bejedi bufiimi majöo dicoo ja, fii fi bococu cäblamou lä culenaja wamacö nia taamaö majöo. ²³ Judio bä ma cuinö, Yai Bada tä bejedi bufii majöoje ja, bä nia yädäblamaö co̦o. Inaja lä bä tablamaö co̦obä Yai Bada tä lofote malä cule. ²⁴ ¿Ö̦jö tawä? Ulufi jamö oliba fibä cublawä lä bädainaja, judio wamacö lä mlai wamacö cuoma. Oliba fi döbou lä culajeinaja judio bei bä yai cua. ¿Ö̦jö tawä? Fi yai lä döbou wejei fi colo jamö cafä shomi wamacö yädämaö fe yadio ja lä, cama fi yai lä döamou wei fi bococu cua waiquia cudeenö, ö̦jö fi bococu nia yai yädäblamou si ijejeo. Cama fi bococu waiquiwä malä cui. ²⁵ Iba wamacö. Yai Bada tänö tä a̦ jo̦yabou lä balöono wei tä ja, bämacö nia mojodumaboimi. “Camiyä yai”, wamacö bufi jole cuaablalou dicoo mlaobä. Isaeli ai ebä bufi bluca ma jifuale ma cui, inaja bä bufi cuo shi wa̦libä bämi. Judio bä lä mlai, Yai Bada lija cama ai ebä bufi cuo showao mlao däjä, inaja judio bä li cuaaö balöo. ²⁶ Yai Bada lija, cama judio ebä lä mlai bä bufi bluca fa cuicunö, Isaeli ebä bufi nia bluca jaducäblou nomöjöo, bä fucäamobä. Tä a̦ oni lä cuu weinaja showawä. Abenaja tä a̦ cuu. Täbä nia yai bayeliblaö lä läo wei, judio bämacö lija a nia wawäö. Jacobo bäma ecö doblou lä mlai tä nowa nia mladamaö. Einaja tä a̦ oni cuu. ²⁷ Abenaja ca̦i. Bä doblou lä mlai ya etä nowa nia mladamaö. Ya wa̦ nö wäo waiquiwä. Einaja tä a̦ cuu. ²⁸ Jesucristo dodijidawä etä a̦ waiije yalo, Yai Bada lija bä nö nabämou majöblaliyoma. Cafä judio wamacö lä mlai wamacö fei däjä bayeliblamou majöobä, ö̦jö tä cublaliyoma. Bä nö nabämou majöo ma cui, Yai Bada tänö bä yaia balölema yalo, bä li nofimaö fe yadio showawä. ¿Ö̦jö tawä? Cama bä nö badabö nofimaö balöoma yalo, inaja showawä cama ebä nodiwä ma cui, ebä nofimaö cuwä mö feduwä. ²⁹ Täbä nia lä bayelibou wei tä ma cui, cama ebä lä cadidiablalaö wei tä ma cui, Yai Bada tä Bufi nia shomiablalou majöo malä mlai. ³⁰ Cafä judio wamacö lä mlai wamacönö, Yai Bada wama a wa̦ jaba fuanomi. Fei däjä judio bänö a wa̦ fuaimije yalo, cafä wamacö nofi li yai asibou majöa. ³¹ ¿Ö̦jö tawä? Judio bänö fei däjä Yai Bada a wa̦ fuaö ma mlajei ma cui, cafä wamacö nofi asibou lä majöono weinaja, inaja showawä cama bä ma cui bä nofi nia ca̦i asibou cuo nomöjöo. ³² Yanowamö jödödöwä bä nofi asibou bufi doblao yalo, bä a̦fa jödödöwä dobloimi taö malä cui. ³³ ¿Ö̦jö tawä? Yai Bada tä Bufi yai jaducäwä fe balojowä. Tä bluca daö nö mlawä. Ö̦jö tä ja ya bufi daeo däjä, “¡Joo yai!”, ya bufi shi̦lo cuu. A cuaaö bufi lä doblao wei tä ja, cama a bufi shi̦lo shalilidio ayao. Bämalecö lä taamaö wei tä ja bämacö bufi nö möblobimi waiquiwä. ³⁴ Abenaja tä a̦ oni malä cuu wei. Bada tä bufi lä cuaablalou wei, ¿wedinö tä bufi yai daö? Ö̦jö a lä cui, ¿wedinö a li yömölabou? ³⁵ ¿Wedinö Yai Bada tä dobäö fa balöonö, tä nowa nia co̦amaö? Einaja tä a̦ malä cuu wei. ³⁶ Camanö täbä bluca malä tablaleno wei. Cama a showawänö täbä bluca li fuwäbou. Camanö täbä tabobä täbä. ¿Ö̦jö tawä? Cama a wa̦fa shi̦lo doblao tamou shi wa̦libä. Inaja lä tä cuobä.

¹ Ö̦jö cudeenö, cafä wamacö lija ya wa̦ fe blacäjodii, iba wamacö. ¿Ö̦jö tawä? Yai Bada tänö wamacö nofi ojodabou fe balojoa yalo, ö̦jö lija bä yai da jibäo. Cama lija yalo bä ö̦shö dodobou lä culajeinaja, inaja showawä wamacö demi dodoo cuobä. Cama wama ecö yaiobä. Wama a bufi ca̦i doblamabobä. ¿Ö̦jö tawä? Inaja wamacö cuaaö ja, bufi bejedimolanö Yai Bada lija wamacö yai nia ojodamou. ² Yanowamö täbä bufi showadi lä cuaablalou wei tä ja, bä bufi luluamou dicoo dijä. Yai Bada tänö wamacö taamaö bufi lä doblao wei wama tä dabä, ö̦jö lija wamacö bufi dude yai fa tablamolunö, bä bufi da shomiblalu. Tä lä dodijidai wama tä nö ö̦jöböabä. Yai Bada wama a bufi ca̦i doblamabobä. Dodijidawä wamacö ca̦i cuobä. ³ Yai Bada tänö wale nofi fa ojodabonö, Jesucristo ya wa̦no wäyäö cuaabä wale shimölema. Ö̦jö cudeenö bämacö nowa bluca taö lä cule. ¿Ö̦jö tawä? Cafä wamacö nofi lä tamobole tä ja, bä da bejedimou. Wama tä nö taö doblobimi ja, bä jolemou buo dijä. Yai Bada tänö wamacö taamaö bufi lä doblao wei, ö̦jö wama tä nofi mölabolanö wamacö shi̦lo cuaabä. ⁴ Wa mamocu ma cule ma cui, wa imicö ma cule ma cui, wa caficö ma cule ma cui, inaja wa bayucuwä ma cuwä wei ma cui, wa moli showawä, ¿ö̦jö tawä? Inaja wa lä cuwä wei wa lä cui, cafä wa bayeliblamobä ö̦jö lä täbä li bluca. ⁵ Inaja showawä, Cristo lija bämacö bluca yädäa yalo, bämacö li moli. Bämacö bluca nia lä bayeliblamou wei bämacö shomiblawä. ⁶ Bämalecö nofi ojodabou yalo, bämacö nia lä bayeliblayou wei tä bluca ja, Yai Bada tänö bämalecö nö wa̦lojamaö cuaaö. ¿Ö̦jö tawä? Jesucristo ebä lija wa etä a̦ wäyäbä wa waiquiwä ja, wa nö nia lä wa̦lojomabou wei wa tä nofi mölabolanö, tä a̦ yai da wäyä. ⁷ Jesucristo wa ebä bayeliblabä wa waiquiwä ja, ebä da bayelibla. Yai Bada etä a̦ ja, wa ebä damabä wa waiquiwä ja, dodijidawä bä li da dama. ⁸ Wa ebä yömölabä wa waiquiwä ja, dodijidawä ebä da yömöla. Afä täbä ja wa ebä bayeliblabä wa waiquiwä ja, bufi läablalou mlai ja, dodijidawä bä da bayelibla. Wa bada läobä wa waiquiwä ja, a nö da wa̦lojoicu, ö̦jö lä, dodijidawä wa ebä ca̦i cuobä. Jesucristo ebä nö lä bleaale wa bä nofi ojodabobä wa waiquiwä ja, bufi doblalolanö bä nofi da ojodada. ⁹ Bufi bejedimolanö bä bufi yai da nofimo. Wa̦lidiwä tä nofi da wa̦liboje. Tä lä dodijidai tä da lofotoleje. ¹⁰ Cama täbä bluca nofimayou lä culenaja, bä nofimayou da cuo. Dodijidawä täbä nofi ca̦i wawädowä da taboje. Inaja lä wamacö yai showadi taamayobä. ¹¹ Mojimou mlai ja, Yai Bada lija bä da ojodaicu. Bä bufi shi da jaliblalo. Bada tä nosie yai da fuaje. ¹² Yai Bada tänö wamacö nia lä bayeliblaö wei, bufi doblalolanö tä nö da daboje. Wamacö nö bleaabä tä cua ja, bufi yanöcöwä bä cuo fe da yadio. Yai Bada lija bä nö shi̦lo bayeli da nacao. ¹³ Jesucristo ebä nö fo̦lili bleaaö ja, afä täbä ja bä da bayeliblaje. Jesucristo ebä fama bälömabou bufi da doblaoje. ¹⁴ Wamacö nö lä bleaamaö wejei bä nö bayeli da nacaje. Wama bä wajäblaö mlai, bä yai da bayelimaje. ¹⁵ Bä bufi lä doblalou wei bä lija, bä bufi ca̦i doblalou mö da feduo. Bä lä ö̦cöö wei bä a̦ nofi ca̦i ojode da taje. ¹⁶ Dodijidawä bä ca̦i da cuoje. “Camiyä ya yai”, bä bufi ca̦i cuu dicoo dijä. “Ma, ö̦jö tä ja ya nö ojodamobimi”, bä nofi ca̦i tamobo dijä. Bä ca̦i jimamo dijä. ¹⁷ Wa lä yabäcaö wejei bä lä cui bä ca̦i taamaö mö feduo dijejä. Wamacö nia lä dodijaö wei tä ja bä bufi shi̦lo da daeo, wamacö a̦fa dobloimi taö mlaobeje. ¹⁸ Dodijidawä wama bä ca̦i bluca cuobä, bä wabäo fe da yadio. Wamicai bä da bälöo. ¹⁹ Bämacö lä nofimale wamacö. Bä nö yuo dijä. Täbä doblou lä mlai täbä nö nia lä yuaö wei, ö̦jö Yai Bada tä waiquiwä. Inaja lä tä cuobä. Abenaja tä a̦ oni malä cuu wei. “Nö yualewä camiyä ya yai. Ya tä nowa nia co̦aö”, Bada tä cuu. Einaja tä a̦ oni malä cuu wei. ²⁰ Cafä wamacö nö nia yuomi. Abenaja tä a̦ ca̦i oni cuu. Cafä wamacö lija a nö lä nabämou wei a ofäö ja, a da iyamaje. Dodijidawä a da bälömaboje. Wamacö nofimou lä ayao wei tänö, a bufi nia quilijou majöo. Einaja tä a̦ oni cuu. ²¹ Bä doblou lä mlai tä ja wamacö luluamou mlai, wamacö lä dodijaö wei tänö cama bä yai da luluboje.

¹ Bada bä lä läo wei, bluca wamacönö wama bä a̦ nia fuaö. Yai Bada tänö bä lämaboimi ja bä nia läo bädao malä mlai. Bada bä lä läblai bä lä cui, Yai Bada tänö bä li inaja tamabou ja lä bä li läblawä. ² ¿Ö̦jö tawä? Ö̦jö cudeenö, bada bä lija bä wasömamou lä mlai bä lä cui, Yai Bada tänö bä lä lämabole bä lija bä wasömamoimi. ¿Ö̦jö tawä? Bä wasömamou lä mlai bä nofi ca̦i nacao. ³ Bä lä dodijaö wei bänö, bada bä nö quili tabeje bä malä mlai. Bä doblou lä mlai bä quilibä, ö̦jö bä li. ¿Ö̦jö tawä? Bada bä lija wamacö quilii moji waiquiwä ja, bä shi̦lo da dodija, ö̦jö lä, wamacö a̦fa yai dodijaö tabeje. ⁴ Dodijidawä wamacö cuobä Yai Bada tänö bä malä lämabou wei. Ö̦jö ma cui wamacö dobloimi ja, wama bä nö quili tabä ö̦jö lä bä waiquiwä. Bä a̦ faö bädao malä mlai. Yai Bada tänö bä bada li lämabou, ö̦jö bä lija bä doblou lä mlai bä nö bleaamabä. ⁵ Ö̦jö cudeenö wama bä a̦ nia fuaö, Yai Bada wama a jushuo lulubou mlaobä. Wama bä a̦ fuaö lä mlai tä ja, wamacö bufi ca̦i shädayaimou mlaobä. ⁶ Inaja showawä, dodijidawä wamacö cuobä bä li ojodamou yalo, blada bä lä nacaö wejei bä ma cui, wama bä ca̦i nia jibäaö. Yai Bada tänö tä tamaö lä bufii wei tä malä taö wejei. ⁷ ¿Ö̦jö tawä? Bada bä bluca lä cublai, wama bä nofi nia tabou. Bada bä befi bä blada lä nacaö wejei tä cua ja, wama bä nia jibäaö. Ai tä nowa nia lä nacaö wejei tä cua ja, inaja showawä. Dodijidawä wama bä a̦ ji̦liabä bä waiquiwä ja, wama bä a̦ nia ji̦liaö. Wawädowä wama bä nofi tabobä bä waiquiwä ja, wawädowä wama bä nofi nia tabou. ⁸ Wama tä nowa co̦amabä tä cua ja, tä nowa co̦amaö da showadaoje. Ai tä nowa läa mlai ja, dodijidawä wamacö shi̦lo yai nofimayobä. Cama ai ebä yai lä nofimaö wejei bä lä cuinö, Moisesi etä a̦ nofi bluca cadidibou waiquiweje. ⁹ Yai Bada tänö tä tamaö lä bufiono wei tä a̦ jamö, abenaja tä a̦ oni cuu. Wamacö nia joleblaloimi. Yanowamö wama täbä nia shäimi. Wamacö nia tomömoimi. Wamacö bufi nia waiyoimi. Einaja tä a̦ cuu. Ai täbä a̦ bluca ca̦i cua mö fedua. Ö̦jö wama täbä a̦ bluca fuaö cadidio showadaobä, aifä wama bä nia nofimaö. Abenaja tä a̦ ca̦i cuu. Cafä wa nofi fo̦lio lä culenaja, inaja showawä aifä wa bä nofi tabolanö wa bä nofimabä. Einaja tä a̦ ca̦i cuu. ¹⁰ ¿Ö̦jö tawä? Aifä wama bä yai nofimaö däjä, wama bä nia yabäcaimi. Ö̦jö cudeenö, aifä wama bä yai nofimaö däjä, Moisesi wama tä a̦ nofi cadidibou. ¹¹ Inaja wamacö yai cuaabä. Tä lä cuaale wama tä daö. Tä nö dedei waiquiwä. Jai wamacö midia wamacö cuo mlai, wamacö shi̦lo yai la̦obä. Jaba däjä, Jesucristo bäma a bejedi lä bufiblaleno wei däjä, tä ajedeono ma mlai ma cui, fei däjä bämacö nia yai lä bayeliblou wei tä ajedou lä cuimi. ¹² Mö didi tä mlaafälöö. Tä mö jaluu a lä cuimi. Ö̦jö cudeenö, mö didi däjä tä lä tamou wei tä ja, bämacö da waiquido. Bei bämacö bufi mö lä jalu wei tänö, bämacö yai da nowamöo, bämacö nö wa̦lojaö fe yadiobä. ¹³ Tä mö lä jaluimi tä ajedou yalo, bämacö fei däjä yai da dodija. Bämacö shi wa̦limamou mlai. Bä shi wa̦limamobä jamö bä shifilimou lä cuaaö weinaja, bämacö cuaaö dicoo mlai. Bämacö yabäcäo dicoo mlai. Bämacö a̦ ca̦i läablalou mlai. Ai täbä dodijaö ma ayao däjä, bämacö jushuo dicoo mlai. ¹⁴ Bada tä Jesucristo a shi̦lo yai da owämaje, cama a lä dodijano weinaja wamacö cuaaö mö feduobä. Yanowamö täbä showadi cuaaö bufi lä doblao wei tä ja bä bufi daeo dijä, wamacö inaja cuaaö dicoo mlaobä.

¹ Jesucristo ai ebä lä cui bä bufi lofotemi. Bä bufi ma quilijou däjä, bä nofi tabou fe da yadioje. Wamacö a̦ läablalou mlai ja, dodijidawä bä ca̦i da cuoje. ² Jesucristo ai ebä bufi lofote yalo, bä waio mlai ja täbä jödödöwä waö ma cujei, ai bä mö feduwä lä cui, bä bufi quilijou ja, yalo bä ja bä waio. ³ ¿Ö̦jö tawä? Yalo wama bä waö lä ayao wei wamacönö, bä lä waio wei bä nofi wa̦libo dijejä. Inaja showawä, wamacö lä waio wei wamacö lä cuinö, yalo bä lä waö wejei bä jima dijejä. Yai Bada tänö bä nofi tabou malä cui. ⁴ Cafä wamacö lä waio wei wamacönö, ¿wedi tabä ö̦jö bei wama bä li jimaö dicoo? Cafä wamacö nosie fuamobä bä malä mlai, wama bä dobloimi jimabä. Bä dodijaö ja, cama bada enö bä a̦fa dodijaö li tabä a. Bä dobloimi ja, ö̦jö a showawänö bä dobloimi nia jimaö. Ö̦jö ma cui, bä nia dodijaö fe yadio. Cama bada enö bä dodijidamabobä a waiquiwä malä cui. ⁵ Bämacö bluca shomitawä mö feduwä. Ai bänö ai tä nofi jalu yaibouje. Ai bä mö feduwä lä cuinö, fe usucuwä tä mö nofi bluca jalu tabou mö feduoje. “Inaja ya yai cuaabä”, wamacö bufi cuu cadididou waiquiwä ja, bä li da cuaa. ⁶ Tä nofi jalu lä tabou wejei bänö, Bada tä bufi doblamabobeje tä nofi li tabouje. ¿Ö̦jö tawä? Yalo bä ja bä lä iyaö wei bä ma cuinö, inaja showawä. Bada tä bufi doblamabobeje bä li iyaö. Bä iyaö däjä, Yai Bada lija bä bufi a̦fa doblalou malä wäyämou wei. Bä lä waio wei bä ma cuinö, Bada tä bufi nia fa doblamabojenö, bä li waio. Yai Bada lija ö̦jö bä bufi a̦fa doblalou ca̦i wäyämou mö feduo malä cui. ⁷ Bämacö demi cuo bufi lä doblao wei tänö bämacö demimi. Bämacö nomaö bufi lä doblao wei tänö bämacö ca̦i nomaimi. Yai Bada tänö bämalecö yai tabou malä cui. ⁸ Bämacö demi cua ja, Bada bäma tä bufi doblamabobä bämacö li demi. Bämacö nomaö ja, inaja showawä. ¿Ö̦jö tawä? Bämacö demi cua ma showale ma cui, bämacö ca̦i ma nomaö wei ma cui, Bada bäma ecö showawä. ⁹ Bada a yai cuobä Cristo a malä nomalayono wei, a demi ca̦i jocädou malä co̦layono wei. Bämacö demi ma showai bämacö ma cuinö, bä nomaa ma waiquilayono wei bä ma cuinö, Jesucristo bäma a nofi bluca Badabobä a. ¹⁰ ¿Ö̦jö tawä? ¿Wedi tabä cafä wamacö lä cuaaö weinaja, aifä bä cuaaimi ja, bei wama bä dobloimi li jimaö dicoo? ¿Wedi tabä wama bä nofi li wa̦libou? Yai Bada tänö täbä jimabä jamö, bämacö nia bluca malä icuo wei. ¹¹ Abenaja tä a̦ oni malä cuu wei. Abenaja Bada tä cuu. “Ei ya wa̦ bejedi. Yai Bada ya malä cui. Camiyä lija bä möfe nia bluca booyoluu. Wale nofi doablabeje, bluca bä caficö a̦ nia faö.” Einaja tä a̦ malä cuu wei. ¹² ¿Ö̦jö tawä? Bämacö lä cuaaö wei tä ja, Yai Bada tänö bämalecö a̦ nö nia bluca wäamaö. Ö̦jönö bämalecö nowa nia taö. ¹³ Bämalecö nia yai lä jimaö wei tä cua waiquiadayoa ja lä, bämacö jimayou da mlado. Bämacö nia yai lä doblamayou wei tä ja, bämacö bufi yai da cadido. Camiyä bämacö lä cuaaö wei tänö, Jesucristo ai ebä mö feduwä lä cui bäma ebä yaclämaö dicoo mlaobä. Bäma ebä bufi ca̦i lä wedinajamomaö wei tänö bä dobloimi majöo mlaobä. ¹⁴ Ei ya tä daö. Bada tä Jesucristo lija ya cua yalo, ya bufi shaliliwä waiquiwä. Bäma bä lä waö wei bänö bämacö bufi nia shamibloimi. Ö̦jö ma cui, “Yai Bada tänö ö̦jö bä waö wasöö”, ai bänö bä nofi tabouje. “Shädayai”, bä bufi cuolanö bä iyaö fe yadio ja, bä bufi wa̦lidiblou. ¿Ö̦jö tawä? ¹⁵ “Bämacö iyabä lä”, wamacö cuu fe yadiblou dicoo ja, wama bä bufi wa̦lidiblamaö ja, nofimou wama tä taboimi waiquiwä. Bä bayeliblabä Cristo a ma nomalayono wei ma cui, yalo wama bä waö fe lä yadio wei tänö wama bä bufi wa̦lidiblamaö dicowä. Inaja bä taama dijejä. ¹⁶ Ö̦jö cudeenö, abenaja ya cuu. “Tä dodijidawä waiquiwä”, wama tä nofi tabolanö wama tä ma taö wei ma cui, aifä bä bufi wa̦lidiblama dijejä. Wamacö a̦fa dobloimi taö dicoo mlaobeje ya wa̦. ¹⁷ Yai Bada tänö bämalecö dodijidawä ca̦i cuobä, nii bä a̦fa jayumamobä tämi. Toubä lä coaö wejei toubä ca̦i mlai. Ö̦jö täbä nowa cua malä mlai. Bämacö nia lä bejedimou wei, ö̦jö tä nowa shi̦lo yai bluca. Bämacö bufi nia ca̦i lä yanöcöo wei tä ca̦i. Yai Bada tä Bufinö bämacö bufi nia ca̦i lä doblalou wei tä ca̦i. Ö̦jö tä nowa shi̦lo yai bluca. ¹⁸ Inaja bämacö yai cuaalanö, Cristo bäma a nosie lä fuaö wei tä ja, Yai Bada bäma a bufi nia yai doblamabou. Yanowamö täbä ma cuinö, bämalecö nia nofi ca̦i dodijidawä tabouje. ¹⁹ ¿Ö̦jö tawä? Dodijidawä bämacö nia lä yanöcöo wei bäma tä yai dayäabä, ö̦jö lä. Yai Bada lija bämacö bufi nia lä lofotoamayou wei tä ca̦i. ²⁰ Yai Bada tänö cama ebä bufi bluca bayeliblaö. Yalo wama bä waö bufi lä doblao wei tänö, ö̦jö tä wa̦lia dijejä. Yai Bada tänö yalo bä waö wasöö ma mlai ma cui, wamacö lä iyaö wei tä ja, Jesucristo ai wama ebä yaclämaö dicoo ja, tä wa̦lidiwä waiquiwä. ²¹ Yalo wama bä lä waö wei tä ja, aifä bä yacläö dicoo ja, bä wa dijejä, ö̦jö lä. Tä dodijidawämi. Nashiwä wama toubä lä coaö wei tä ma cui ja, bä yacläö dicoo ja, toubä ca̦i coa dijejä. Wamacö cuaaö lä bädao wei tä ma cui ja, aifä bä yacläö ja, bä cuaa dijä, ö̦jö lä. Tä dodijidawämi. ²² Wamacö nia lä iyaö wei tä ma cui ja, wama toubä nia lä coaö wei tä ma cui ja, ö̦jö tä ja Yai Bada lija wamacö bufi cadidia ja lä, cafä bä da cuaa. Bufi quilijou mlalanö bä lä cuaaö wei, bä bufi shädayaimoimi yalo bä bufi yai doblalou. ²³ Ö̦jö ma cui, bä bufi quilijolanö bä iyaö fe lä yadio wei bä lä cui, bä nia dobloimi jimamou. Yai Bada lija bä bufi lofotoa mlalanö bä malä iyaö wei. ¿Ö̦jö tawä? Bämacö cuaaö lä bädao wei tä ma cui, Yai Bada lija bämacö bufi lofotoa mlalanö bämacö cuaaö dicoo ja, bämacö dobloimi waiquiwä.

¹ Yai Bada lija bämacö bufi lofote lä waiquii bämacönö, bä bufi lä quilijou wei bäma bä bayeliblabä bämacö. Camiyä bämacö cuaaö bufi lä doblao wei tä ja, bämacö cuaabä bämacömi. ² Jesucristo ai bäma ebä bayeliblabä, bäma bä bufi shi̦lo yai da doblamabo, bä bufi lofotoobä. ³ Cristo a ma cui, cama a cuaaö bufi lä doblaono weinaja a cuaano malä mlai. Bä Fö̦ö e lija a lä cuno weinaja showawä. Abenaja tä a̦ cuu. Cafä wa nö lä waiblano wejei däjä, jai camiyä wale nö ca̦i waiblaö mö feduoma tä cuoma. Einaja tä a̦ cuu. ⁴ Jaba däjä tä a̦ lä onimano wejei, camiyä bämacö bufi jaducäblobä tä a̦ onimamaje. Bäma tä a̦ fa ji̦lilänö bämacö nö wa̦lojaö fe yadiobä. Bämacö bufi fa lofotoicunö, Yai Bada tänö tä a̦ lä wäqueno wei tä a̦ ja, bämacö mölaö fe yadiobä. ⁵ Yai Bada lija bämacö nö bayeli nacaö, bämalecö nö lä wa̦lojomabou wei a lä cui lija. Bämacö bufi lä lofotomabou wei a showawä lä cui lija. Ö̦jö lija wamacö yai bayeliblamobä. Jesucristo wama a fa owämanö, cafä wamacö bufi bluca shaliliobä. ⁶ Inaja wamacö cuaaö yalo, bluca wamacö a̦ showadawänö, Yai Bada wama a nofi nia doablaö, Bada tä Jesucristo bä Fö̦ö e lä cui. ⁷ ¿Ö̦jö tawä? Cristonö cafä wamacö nofi lä tabou weinaja, inaja showawä bä nofi da taboyo, wamacö lä dodijaö wei tänö Yai Bada tä nofi doablamobä. ⁸ Wamacö bufi jaducäblobä ya wa̦. Jesucristo a lä cuaano wei, judio bämalecö bayeliblabä a li cuaama, Yai Bada tä nö bejedi ö̦jöböamabä. Bämacö nö badabö lija tä a̦ nö lä wäqueno wei tä a̦ bejedi cublobä. ⁹ Judio bä lä mlai bä ma cuinö, Yai Bada tä bufi lä asimou wei tä ja, a nofi ca̦i doablabeje. Tä a̦ oni lä cuu weinaja showawä. Judio bä lä mlai bä lijamö ya culanö, cafä bä nofi nia doablaö. Cafänö wale amowabö a̦ ji̦liadayobä. Einaja tä a̦ cuu. ¹⁰ Abenaja ai tä a̦ oni ca̦i cuu. Judio wamacö lä mlai, Yai Bada ebä sho bä bufi bluca da doblalo. Einaja tä a̦ ca̦i cuu. ¹¹ Abenaja ai tä a̦ oni ca̦i cuu. Judio wamacö lä mlai wamacö bluca lä cuinö, Bada tä nofi da doablaje. Bluca bä bälöblawä lä yaiblai bä ma cuinö, a nofi doablabeje. Einaja tä a̦ ca̦i cuu. ¹² Isaia a ma cui, a wa̦ ca̦i fama. Abenaja tä a̦ oni cuu. Isai nodiwä bä lija a nia Bada bädou, jai fii fi nasöcö nia cabudu lä faö wei a lä cui. Judio bä lä mlai bä lijamö a läobä, a nia bädou. Ö̦jö lija judio bä lä mlai bä nia mölaö. Einaja tä a̦ cuu. ¹³ Bämacö mölaö showaobä, showadi Yai Bada tänö bämalecö bufi yai bayelibou. Ö̦jö lija cafä bämacö nö bayeli nacaö. Wama a nofi mölabolanö, wamacö bufi shi̦lo yai doblalobä ya wa̦ faö, wamacö bufi shi̦lo ca̦i yanöcöobä. Yai Bada tä Bufi lofotenö, showadi wamacö shi̦lo yai mölaö fe yadio showaobä. ¹⁴ Iba wamacö. Cafä wamacö lija ya bufi doblalou. “Quiji bä nofi dodijaö yai”, bämacö nofi tabou waiquiwä. Wamacö bufi yai dao. Wamacö yömölayobä wamacö. ¹⁵ Ö̦jö ma cui, bämacö bufi nia jaducäblamaö fa co̦onö, ya tä a̦ oniblaö lä cule. Yai Bada tänö wale nofi fa ojodadalönö, cafä bämacö yömölabä wale tablamalema. Inaja wale tablamalema yalo, ya wa̦ li lofotoaö. ¹⁶ ¿Ö̦jö tawä? Judio bä lä mlai bä lija, Jesucristo ya etä a̦ dodijidawä wäyäbä wale tablamalema. Yai Bada ya wa̦ dodijidawä wäyälanö, nofi bäyäalewä bänö täbä nowamaö lä cuaaö wejeinaja, ya bä nofi bäyäbou li cuobä. Yai Bada a dobäö lä cuaaö wejeinaja, inaja showawä, judio bä lä mlai bä ja, ya dobäö cuo mö feduobä. ¿Ö̦jö tawä? Cama ebä cuobä, Yai Bada tä Bufinö bä fa yaimacönö, dodijidawä bä nofi nia tabou. ¹⁷ ¿Ö̦jö tawä? Jesucristo lija ya cua yalo, Yai Bada lija ya lä ojodamou wei tä ja ya bufi doblalou. “Awei, einaja lä yai”, ya bufi cuu talei. ¹⁸ Ö̦jö ya tä a̦fa shi̦lo yai wayoadii malä cui. Judio bä lä mlai ya bä bufi taamabä, Cristonö wale nö wa̦lojomabou, cama etä a̦ yai fuabeje. Ya bä lä yömölaö wei tä ma cuinö, ya lä cuaaö wei tä ma cuinö, ya bä bufi jaducäblamaö talei. ¹⁹ Yai Bada tä Bufi lofotenö tä nö lä quilijii ya tä bluca wawämaö, Yai Bada tä mayo dablabeje. Inaja ya cuaalanö, Jelusaleteli bä ulufibö jamö ya fuu cuaaö fa balöonö, ya tä a̦ ca̦i fuu shoqueaö cuaaö fa showadaofälönö, Ililico tä ulufi ma cui jamö Cristo dodijidawä ya etä a̦ wäyäö jödödou cuaama. ²⁰ ¿Ö̦jö tawä? Ya bä nia yai yömölaö lä cuaaö wei tä ja, ya bufi shaliliblou showalayoma. Cristo a wa̦fa ji̦libou lä mlajei jamö, Jesús ya etä a̦ nia dodijidawä wäyäö cuaaö showaoma. Tä a̦ wäyämou lä balöono wei jamö mlai. Yafi a colo taö lä waiquiono wejei jamö, ai bä yädäo lä bädao weinaja mlai. ²¹ Ma, ei tä a̦ oni jamö ya bufi shaliliblaliyoma. Abenaja tä a̦ lä cuu wei. Ö̦jö bä lija a wa̦fa wäyämono ma mlai ma cui, a wa̦ bejedi nia dablaöje. A wa̦fa ji̦libou ma mlajei, bä bufi nia jaducäblou. Einaja tä a̦ cuu. ²² Inaja ya showadi cuaaö yalo, cafä bämacö fe waloo bufi ma doblao wei ma cui ya shi̦lo yabäcodii. ²³ Ö̦jö ma cui, Jesús a wa̦fa ji̦libou lä mlajei ya bä yömölabä, ei tä ulufi jamö fei däjä tä cuami. Cafä bämacö fe waloo bufi doblalanö, lasha bluca ya ca̦i famaö waiquiwä. ²⁴ Ö̦jö cudeenö bämacö nia lä möö wei tä ja, ya mölaö waiquia. España jamö ya fuu däjä, bämacö möö jayuabä. Cafä wamacö lijamö dodijidawä ya cublaa fa balöicunö, ya fuu co̦ofälöö däjä wamale bayeliblafälöbä. ²⁵ Ö̦jö ma cui, fei däjä Jelusale jamö ya fuu balöa. Jesucristo ebä bayeliblaöje ja, camiyä lija blada bä jibäbemaje, ya bä ca̦i fubä. ¿Ö̦jö tawä? ²⁶ Jelusale jamö Jesucristo ai ebä lä cui, bä nö fo̦lili bleaaö lä cule. Ö̦jö cudeenö, Masedonia jamö Jesucristo ebä lä bälöle bänö, Acaya jamö ebä bälöa mö lä fedule bänö, ö̦jö bä nofi ojode taö bufi fa doblaojenö, bä blada jibäbemaje. ²⁷ Bä bayeliblaö bufi doblaomaje. ¿Ö̦jö tawä? Bä bayeliblabeje lä. Jelusaleteli bä lija, cama judio bä lä mlai bä bayeliblamou malä balöono wei. Jesucristo etä a̦ ja, bä bufi yai bayeliblamou waiquilayoma yalo, madofi bä ma cui ja, bä bayeliblaö mö yabao co̦obeje bä li waiquiwä. ²⁸ Blada bä lä shimomaleno wejei ya bä ca̦i fuu fa balöonö, Jelusaleteli bä lija ya bä nia jibäaö balöo. Ö̦jö däjä, España jamö ya fuu däjä, bämacö fe nia waloo jayuaö. ²⁹ ¿Ö̦jö tawä? Bämacö fe waloo däjä, Cristonö bämalecö nia yai bayelibou, bämacö bufi doblalobä. Ö̦jö ya tä daö waiquia lä cule. ³⁰ Bada tä Jesucristo bäma ecö bluca waiquiwä yalo, Yai Bada tä Bufinö bämacö ca̦i nofimayou waiquiwä cudeenö bämacö nowa taö. Wamale da bayelima. Yai Bada lija camiyä ya nö bayeli lä nacao wei tä ja, cafä wamacö ma cui wamacö a̦ ca̦i yädäobä. ³¹ Judea jamö Jesucristo a bejedi bufibou lä mlajei bä judio lä cui bä lija wale noshi umlabobä. Jelusale jamö Jesucristo ya ebä bayeliblabä ya bä blada ca̦i fuu däjä, bufi doblalolanö bä ca̦i blada däabeje. ³² Yai Bada tänö wale fa bayeliblanö, cafä wamacö lija wale ca̦i shimaö nomöjöobä. Bufi doblalolanö cafä bämacö fe waloo fa nomöjöonö, bämacö dodijidawä lä cuo wei tänö ya bufi yai dobladou co̦obä. ³³ Täbä bufi lä yanöcömabou wei a Yai Bada lija, bämacö nö bayeli nacaö talei, wamacö ca̦i shi̦lo cuobä. ¿Ö̦jö tawä? Inaja lä tä cuobä.

¹ Febe a wa̦fa suwä lä cule wama a nofi bejedi tabobä, ya wa̦fa wäaö lä cule. Camiyä bämacö mashi a waiquiwä. Secleateli bä lä bälöle jamö, ö̦jö a li ojodamou. Jesucristo ebä lä yododaö wei bä bayeliblaö. ² Dodijidawä wama a suwä co̦blamabä ya wa̦. Bada tä Jesucristo e malä cui. Cama dodijidawä bäma ebä waloamabä bämacö waiquiwä. Dodijidawä a cuobä wama a bayeliblabä, ¿ö̦jö tawä? Camanö bluca täbä bayeliblaö malä waiquii. Camiyä ma cui, wale ca̦i bayeliblama. ³ Aquila lija wamale a̦fa da wäyä, bä suwäbö Blisila e lija ca̦i. Jesucristo lija ya ojodamou däjä, ö̦jö cäcöbänö wale ca̦i bayeliblaböö talei. ⁴ Cäcöbä shämobä tä ma cuono wei ma cui, wale bayeliblaböö fe yadioma. Ö̦jö cudeenö, ö̦jö cäcöbä lija ya bufi doblalou. Jesucristo ebä lä yododoblai bä judio lä mlai bä ma cui, ö̦jö cäcöbä lija bä bufi ca̦i bluca doblalou mö feduo, wale bayeliblaböö cudeenö. ⁵ Cama cäcöbä yafibö jamö bä ca̦i lä yododaböö wei bä ma cui lija, wamale a̦fa ca̦i da wäyä. Ebenedo lija ca̦i. Ö̦jö ya yai nofimaö dodijiwä. Asia jamö Jesucristo lija ai bä bufi cuo showao mlao däjä, ö̦jönö a bufiblaö balölayoma. ⁶ María lija wamale a̦fa ca̦i da wäyä, cafä wamacö lija a ojodamou lä dodijio wei a suwä lä cui lija. ⁷ Adonico lija ca̦i, Junia lija ca̦i. Ö̦jö ya cöbä nofi tabou dodijio. Wa̦lidiwä talewä bä fe lä labou wejei jamö, ö̦jö cäcöbä sho yamacö fe bluca laoma. Jesucristonö bä lä shimöleno wei bä lä cuinö, ö̦jö cäcöbä nofi yai tabou dodijioje. Camiyä Jesucristo lija ya bufi cuo showao mlao däjä cäcöbä bufi cuo lä balöblaono wei cäcöbä. ⁸ Abliado lija wamale a̦fa ca̦i da wäyä. Ya nofimaö dodijiwä. Bada tä lija ö̦jö a bufi ca̦i cua. ⁹ Ubano lija wamale a̦fa ca̦i wäaö mö feduobä. Cristo lija yamacö ojodamobä jamö, ö̦jönö yamalecö bayeliblaö talei. Edaqui lija wamale a̦fa ca̦i wäyäbä. Ö̦jö ya ca̦i nofimaö. ¹⁰ Abele lija ca̦i. Cristo a nofi mölabou fe lä yadio wei tänö, a bejedi wawädowä dablamou. Alidobulonö bä ca̦i lä cule bä lija, wamale a̦fa ca̦i da wäyä. ¹¹ Iba mashi Elodiono a ca̦i lija. Nasisonö bä ca̦i lä cule, Bada tä lija bä bufi bluca lä cule bä lä cui, ö̦jö bä lija wamale a̦fa ca̦i da wäyä. ¹² Difena, Difosa cäcöbä lija wamale a̦fa ca̦i da wäyä, Bada tä lija cäcöbä suwä lä ojodamou wei. Besida lija ca̦i. Ö̦jö yama a nofimaö. Bada tä lija a ojodamou ja, ö̦jö bei a nö yai wa̦lojoablalou. ¹³ Lufo lija wamale a̦fa ca̦i da wäyä, bluca bänö Jesucristo e a̦fa dodijidawä yai lä taö wejei a lä cui lija. Bä nöö e ca̦i lija. Ö̦jönö wale nofi shi̦lo yai ijilumaö talei. ¹⁴ Asiclido a ma cui lija, Flecode a ma cui lija, Eleme a ma cui lija, Badoba a ma cui lija, Elema a ma cui lija, ö̦jö bä lija wamale a̦fa ca̦i da wäyä. Ö̦jö bänö bä ca̦i lä culajei bä lija ca̦i, Jesucristo ebä lä cui. ¹⁵ Filoloco a ma cui lija, Julia a ma cui lija, Neleo a ma cui lija, ö̦jö bä yaö e ca̦i lija, Oliba a ca̦i lija, ö̦jö bä lija wamale a̦fa ca̦i wäyäbä, cama bänö bä ca̦i lä culajei bä lija ca̦i, Jesucristo ebä lä cui. ¹⁶ Jesucristo wama ecö yalo, wamacö mö fedudayou ja bä da nofimayo. Cristo ebä bluca lä yododablai bä lä cuinö, cafä wamacö lija bä a̦fa ca̦i wäyämamou bufi doblao. ¹⁷ Iba wamacö. Bämacö yömölaö. Jesucristo ebä lä shifilimomaö wejei bä lija bä da moyaweicu. Cama bä a̦nö bä wa̦lidiblamaö talajei. Jesucristo tä a̦ ja wamacö lä yömölamono wei tä a̦ taboimije. Shomi tä a̦ li lämabouje. Ö̦jö bä ajedemabo dijejä. ¹⁸ Inaja bä lä cuaaö wei bä lä cui, Bada tä Cristonö bä taamaö lä bufii wei tä taö mlajei, cama bä cuaaö bufi lä doblao wei tä shi̦lo yai taöje. Bä a̦ lä dodijiablalou wei tänö, bä moyawäo lä mlai bä bufi yaclämaö si ijejeoje. ¹⁹ ¿Ö̦jö tawä? Jesucristo wama a wa̦ lä fuaö wei, wamacö a̦ ji̦limou blaucou cuaaö cudi. Ö̦jö cudeenö cafä wamacö lija ya bufi doblalou. Ö̦jö ma cui dodijidawä wama tä tabä, bä da moyaweicu. Wa̦lidiwä tä nofi da mojoduboje. ²⁰ Inaja wamacö cuaalanö, bämalecö bufi lä yanöcömabou wei tä Yai Bada lä cuinö wamacö nia nowamöbou. Sadanasi wama a ja̦mabobä wamacö nia lofotomabou. Bei. Bada tä Jesucristo lä cuinö, showadi wamacö shi̦lo bayeliblabä. Wamacö nofi ojodabobä. ²¹ Cafä wamacö lija Timoteo a wa̦fa wäyämou bufi doblao, camiyä sho yafäcö lä ojodamou wei a lä cui. Lusio a ca̦i, Jasono a ca̦i, Sosibade a ca̦i. Ö̦jö camiyä yamacö bluca. ²² Camiyä Desio yanö, ei Pablo ya wa̦no oniblaö lä cule. Camiyä ya ma cuinö, Bada ya tä ca̦i daö. Cafä wamacö lija ya wa̦fa ca̦i wäyämou bufi doblao. ²³ Cayo a wa̦fa ca̦i wäyämou bufi doblao. Ö̦jönö wale bälömabou lä cule. Jesucristo eja ebä lä cule, ö̦jö e yafi jamö bä yododaö talei. Elato a bada ma cui, cafä wamacö lija a wa̦fa ca̦i wäyämou bufi doblao. Ei a shabono jamö, bada bä befi bä blada lä nacaö wejei bä bladabö nowamabä a läa. Ai bämacö mashi lä cui, Cuado a wa̦fa ca̦i lä cule, ö̦jö a wa̦fa ca̦i wäyämamou bufi doblao. ²⁴ Bei. Bada tä Jesucristo lija showadi wamacö bufi bayeliblamobä. Wamacö nofi shi̦lo ojodabobä. Inaja lä tä cuobä. ²⁵ Yai Bada bäma a nofi doablabä a, wamacö bufi lä lofotomabou wei a lä cui. Ö̦jö ya etä a̦ dodijidawä wäyäbä jamö, Jesucristo ya wa̦fa wäyäö. Ö̦jö bejedi tä a̦ lä cui, tä a̦ jo̦yabou ma balöono wei ma cui, ²⁶ ya̦cumö tä a̦ wawäblamalema. Yai Bada a wa̦no wäyälewä bä lä cuinö tä a̦ oniblaö balölayomaje. Fei däjä Yai Bada a cua shi lä wa̦lile tä lä cuinö tä a̦ wäyämaö fa bufinö, bluca bä bälöblawä lä yaiblai bä lija yama tä a̦ wäyäö lä cule, tä a̦ fa ji̦liläjenö, Jesucristo a nofi lä mölabou wejei däjä a nosie fuabeje. ²⁷ Jesucristonö bämalecö bayelibou yalo, Yai Bada tä bufi shi̦lo jaducäwä lä ayai bäma a wa̦fa shi̦lo doblao taö shi wa̦libä. Inaja lä tä cuobä.