Apocalipsis

Apocalipsis

¹ Camiyä Juan ya nija Jesucristonö tä lä damalaleno wei, ei tä a̦ oni. Jesucristo nija Yai Bada tänö ö̦jö tä bluca wawämalema, cama bäma ecö moyawämabou mö feduobä. Tä nö dedei showao mlao däjä, Yai Bada tänö tä nia lä taö wei tä nia cublou. Jesucristo a nosie juamobä ya lä cui nija tä dablamabä, a̦jele e shömöledayoma. ² Camiyä Juan ya nija Yai Bada a wa̦no lä wäyämono wei ya tä a̦ wäyäbä, ya tä a̦ bluca oniblaö lä cule. Jesucristonö tä a̦ lä wawämano wei tä a̦ ca̦i. Camiyä Juannö ya tä bluca lä dalaleno wei tä a̦ ca̦i. ³ Jesucristo ebä yododabä jamö, ei tä a̦ wawädowä lä doaö wei a lä cui, a bufi nia doblalou. Tä a̦ fa ji̦liläjenö, tä a̦ nofi yai lä cadidibou wejei bä lä cui, ö̦jö bä bufi ca̦i nia doblalou mö feduo. Tä nia lä cublou wei, tä nö dedei mlai ja tä nia malä wawäö wei. ⁴ Camiyä Juan cä ya. Asia tä ulifi jamö Jesucristo 7 wama ecö lä yododoblai wamacö nija, ei ya tä a̦ oni shömaö lä cule. Yai Bada nija ya nö bayeli nacaö, a jaba cuo lä showaono wei, a cua lä showale a lä cui nija. A nia juu lä co̦o wei a showawä lä cui nija. Bada tä lä döcäo wei etäcö ajede jamö, yai 7 bä lä culadi bä ma cui nija ca̦i. Ö̦jö bä nija ya nö bayeli nacaö, wamacö nofi ojodabobeje, wamacö bufi ca̦i yanöcömabobeje. ⁵ Jesucristonö wamacö nofi ca̦i ojodabobä, wamacö bufi ca̦i yanöcömabobä, Yai Bada a wa̦fa wäyäö lä cadidou wei a lä cuinö. A jaba demi jocädou lä co̦layono wei a showawä lä cuinö. Bita jamö bä bada lä cublai, ö̦jönö bä bluca nosiemaö. Ö̦jö Jesucristo a lä cuinö bämalecö nofimaö fe balojowä. Bämacö doblou lä mlai tä blucanö bämacö ma ja̦ono wei ma cui, ö̦jö a fa shämolunö, i̦yäbö fa falönö, bämalecö jujeblamalema. ⁶ Jesucristonö bämalecö ca̦i fa cuonö, Yai Bada bäma ecö cuobä bämalecö tablamalema. Bä Fö̦ö e nija bämacö ojodamou ajedeobä, nofi bäyäalewä bämalecö tablamalema. ¿Ö̦jö tawä? ¡Jesucristo a wa̦fa shino doblao tamobä! ¡Ö̦jö a lojode bälöo dodijio shi wa̦libä! ¡Inaja lä tä cuobä! ⁷ ¿Ö̦jö tawä? Jesucristo a lä cuinö, ölajashi bä befi ca̦i nia waloo co̦oyoluu. Jödödöwä bä blucanö a nia dablaöje. A lä diquiano wejei bä bluca ma cuinö a nia ca̦i dablaöje. Ö̦jö a nowa ja, bita jamö bä jödödöwä lä bälöblai bä nofi fa jo̦lijonö bä a̦ nö nia quilili bleaaö. Einaja lä tä nia cuo dodijio. ¡Inaja lä tä cuobä! ⁸ Bada tä lä bufiblamou wei a lä cui, abinaja a cuu. —Camiyä ya lä cuinö täbä bluca cublaliyoma. Camiyä ya showawä ma cuinö täbä nia bluca waicou —a cuu. Einaja a lojode shi lä wa̦lile a cuu, jaba däjä a cuo fa showaonö a cua lä showale a lä cui. A nia juu lä co̦o wei a lä cui. ⁹ Camiyä Juan ya lä cui camiyä bämacö bluca. Jesucristo a nowa ja wamacö nö bleaamaö lä culajeinaja, inaja showawä camiyä yale nö ca̦i bleaamaö mö feduaje. Jesucristo a bälöa dodijiqueyoluu däjä, cafä wamacö nia lä cuo weinaja camiyä ya nia ca̦i cuo mö feduo. Ö̦jö wama a nö dabolanö wamacö nö wa̦lojaö fe lä yadio weinaja, camiyä ya nö ca̦i wa̦lojaö cuo mö feduo talei. ¿Ö̦jö tawä? Yai Bada ya etä a̦ wäyäö nofi jushuaö yalo, Jesucristonö tä a̦ lä wawämano wei ya etä a̦ ca̦i wayoablalaö fe yadia cudeenö, Bamo tä ulifi lä jo̦cole jamö wale shi wa̦limaquemaje. ¹⁰ Bada tä Jesucristo ebä yododabä tä mö jalu ja, Yai Bada tä Bufinö wale lojodobolanö, bei ya mabucabö jamö ya wa̦ ji̦lia mö talema. Amowa fibä jolaöje däjä fibä a̦ nacläaö lä cuaaö weinaja a wa̦ nacli cuoma. ¹¹ A wa̦ faö ja abinaja wale nowa tama. —Cafä nija tä lä wawäblou wei wa tä a̦ bluca fa oniblalönö, iba 7 bä lä yododoblai bä nijamö si oni da shömölö. Efesoteli bä nija ca̦i, Eminateli bä nija ca̦i, Becamoteli bä nija ca̦i, Diadilateli bä nija ca̦i, Saditeli bä nija ca̦i, Filadefiateli bä nija ca̦i, Laodiseateli bä nija ca̦i —wale nowa tama. ¹² Ö̦jö däjä, a wa̦ lä fale ya nia fa dablanö ya mö femijiblaliyoma. Ya mö fa femijiblalunö, cowa wacöbä shi̦i cublamobä 7 ya täbä dalalema, olo bä ja täbä lä cui. ¹³ Cowa wacöbä shi̦i cublamobä täbä lä i̦tataono wei täbä möamo ja, jai yanowamö a wa̦lo cuwä ya ublaa dalalema. Camishi labe cäcö ja a didioma. Ai cäcö jaleboma. Olo bä mömou fla̦lajawä lä culenaja cäcö cuoma. ¹⁴ Bei feta u̦cu lä cui, shinalu ubä jole au lä culenaja u̦cu cuoma. U̦cu shuducaje fe balojooma. Bei mamocu lä cui, cowa wacöbä lä culenaja mamocu mömou nö quilijiwä cuoma. ¹⁵ Bei mamicö lä cui, duo shibä lä culenaja mamicö cuoma. Wa̦lidiwä tä lä coyocole tä mladamabeje, shibä yabou lä balöo wejeinaja, shibä jölöcaö fa nomöjöojenö shibä shi de̦lelewä lä cublou weinaja showawä. Bei a wa̦ lä cui, bola bä a̦ bada ji̦lio nacli lä culenaja a wa̦ ji̦lio cuoma. ¹⁶ Jayu boconö shidicali 7 bä showaboma. Sibala namo mö feduduwä, bei caficö ja a waejeoma. Bei buficö lä cui, motoca a yo̦loloblou däjä a mömou shi dowäjäwä lä culenaja bei buficö mömou cuoma. ¹⁷ Ya dablaö däjä, ö̦jö lä a cotä jamö jai nomawä ya wäcäblaquema. Ö̦jö ma cui, camiyä nija jayu imicö maquelanö, abinaja wale nowa tama. —A quili dijä. Camiyä jaba ya, jödödö ya ca̦i. ¹⁸ Täbä ba̦limi cudiobä ya tä tabou. Nomawä ya ma cuono wei ma cui, fei däjä ya ba̦limi waiquia. ¿Ö̦jö tawä? Bä lä nomablou wei ya bä demiamaö co̦obä ya tä tabou, täbä lä nomaö wei täbä cuobä jamö, ya tä caloblabä ca̦i. ¹⁹ ’Bei. Wa täbä lä möö wei tä da oniblalö. Fei däjä tä lä cublole tä ma cui, tä nia obi lä cublou wei tä ma cui, ö̦jö tä bluca da oniblalö. ²⁰ Jayu ya boco jamö shidicali 7 wa bä lä möfe täbä jamö, ya tä a̦ nia wawämaö, wa bufi wedinajamou mlaobä. Ö̦jö bä lä cuinö, iba 7 bä lä yododoblai etäbä bada lä läo wei täbä jömamou. Camiyänö ya ebä lämabou. Cowa 7 wacöbä cublamobä täbä lä cuinö, iba 7 bä lä yododoblai bä li jömamou mö feduo —a cuma.

¹ Ya tä lä möno wei abinaja a cuu nomöjöoma. —Efeso jamö iba bä lä yododaö wei bä nija a lä läle a lä cui nija, wa tä a̦ nia oni shömaö. Jayu ya boconö, shidicali 7 ya bä lä showabole ya. Cowa wacöbä shi̦i cublamobä täbä lä i̦tatale jamö ya juadalou, olo bä ja täbä lä cui jamö. Ö̦jö ya lä cui wale wa̦no nia oniblaö. ² Iba Efesoteli bä lä cuaaö wei ya tä daö. Bä cadidou si ijejeobä tä cua ma mlai ma cui, bä dodijaö fe yadio. Bä ma yabäcamou wei ma cui bä waiquidoimi. Bä doblou lä mlai bä lä cui bä a̦ ji̦liaimije. “Jesucristo ya wa̦fa wäyäö cuaabä yale shömölema”, bä lä cuno wei bä lä cui, bä bejedimou fa wabajenö bä jolemou dalalemaje. ³ Ya bä daö. Bä ma yabäcaöje däjä bä waiquidoimi. Camiyä ya nowa ja bä nö ma bleaamaö ma cujei, bä modablou mlai ja bä nö shino wa̦lojaö fe yadio. ⁴ Ö̦jö ma cui, ai etä nowa ca̦i cua. Bä jaba nofimayou lä cuono weinaja, fei däjä bä cuaaimi dicowä. ⁵ ’¿Ö̦jö tawä? —a cuu co̦oma—. Bä jaba lä nofimayono wei tä nofi fa jaducubojenö, bä bufi mö yabajadou co̦obä, ö̦jö lä. Bä jaba lä cuaano weinaja, inaja bä cuaaö co̦obä. Inaja bä cuaaimi ja, bä bufi mö ca̦i yabajadou co̦omi ja, ya bä nabä nia waloyoluu. Cama cowa wacöbä shi̦i cublamobä etä lä i̦tale, ya etä nia co̦aö. ⁶ Inaja tä ma cule ma cui, bä lä dodijaö wei ya tä ca̦i daö. Nicolaida bä lä cuaaö wei tä nofi wa̦libouje, camiyänö ya tä nofi ca̦i lä tabolenaja showawä. ⁷ ’¿Ö̦jö tawä? —a cuma—. Bä yömöcacö lä walalai bä yömöca dao dodijiobä, Yai Bada tä Bufinö iba bä lä yododoblai bä nowa lä taö wei tä a̦ ji̦liabeje. Bä nö shino wa̦lojaö lä ayao wei ya bä nia doblamabou. Yai Bada etä ca jamö, ba̦limiblamodima defi lä ublale defi ja, bä nia iyaö —a cuma. ⁸ Ya tä lä möno wei, abinaja a cuu nomöjöoma. —Emina jamö, iba bä lä yododaö wei bä nija a lä läle a lä cui nija, wa etä a̦ ca̦i nia oni shömaö. Camiyä jaba ya, jödödö ya ca̦i. Nomawä ya ma cuono wei ya demi jocädou co̦layoma. Ö̦jö ya lä cui wale wa̦no nia oniblaö. ⁹ ’Iba Eminateli bä lä cui, bä nö lä bleaamaö wejei ya tä daö. Madofi bä ja bä nö jo̦lili ca̦i bleaaö ma cui, tä nowa yai lä bluca wei tä tabou fe balojooje. Judio bänö iba bä a̦fa lä taö wejei ya bä a̦ ca̦i daö. Judio ö̦jö bä a̦fa yai ma jilou wei ma cui bä jolemou. Sadanasi a nofi yai shino yododoaöje. ¹⁰ ’Iba bä nö nia lä bleaamaö wejei tä ja, bä quilii mlai bä cuobä —a cuma—. Tä nö dedei mlai ja, fecula bada a lä cuinö, iba ai bä fe nia lamabou, bä bluca wabamobä. Bä nö nia bleaamaö nö dedejedouje. Bä lä bejedimou wei tä nowa ja, bä shäbeje tä ma cublou däjä ma cui, bä bejedimou fe yadiobä. Bä bejedimou fe yadio ja, ya bä nia dobäö. Liyäjäwä täcö yojobobeje ya bä nia dobäö. Ba̦limi bä cuobä ya tä nia jöbäaö. ¹¹ ’Bä yömöcacö lä walalai bä yömöca dao dodijiobä, Yai Bada tä Bufinö iba bä lä yododoblai bä nowa lä taö wei tä a̦ ji̦liabeje. Bä nö wa̦lojaö lä ayao wei ya bä nia nowamaö. Täbä nomablou lä co̦o wei tä ja, ö̦jö bä nö nia bleaaimi —a cuma. ¹² Ya tä lä möno wei, abinaja a cuu nomöjöoma. —Becamo jamö, iba bä lä yododaö wei bä nija a lä läle a lä cui nija, wa etä ca̦i nia oni shömaö. Sibala ya namö mö feduduwä lä showabole, wale wa̦no nia oniblaö. ¹³ Sadanasi a bälöo lä dodijio wei jamö, iba Becamoteli bä bälöa, fecula bada a lä döcäo wei etäcö lä cule jamö. Ö̦jamö ya bä bälöa nofi jaducubou. Wale a̦ cadidibou lojodoa fe yadiaje. Ö̦jamö lä wale a̦fa wäyäö lä shaliliono wei a shälemaje, Sadanasi a lä bälöle jamö. A ma shäleno wejei ma cui, iba bä lä cuinö wale nofi mölabou fe yadio showaomaje. A lä shäleno wejei a lä cui, Adiba a wa̦fa cuoma. Showadi a bejedimoma. ¹⁴ ’Ö̦jö ma cui, ö̦jö bä nija, bolacadabö tä nowa ca̦i cua —a cuma—. Balaama a wa̦ lä cadidibou wejei ai bä coyocomabou dicoaje. ¿Ö̦jö tawä? Isaeli nodiwä bä lä cui, ö̦jö a wa̦nö Balaconö bä yaclämalema. Nö idubö täbä ja bä nii lä dodobou wejei bä nii ja, bä nö liyamama. Bä nofi beshili ca̦i jushublalobä bä bufi taamama. ¹⁵ Inaja showawä, nicolaida bä cuu lä dicoo wei tä ja bä ca̦i yaimou. ¹⁶ Bä bufi mö yabajadou co̦obä, o̦jö lä. Bä bufi lädoimi ja, yedu ya bä nabä nia waloyoluu. Ya sibala lä waejemabole anö, bä doblou lä mlai bä nija ya nia ishoyoluu. ¹⁷ ’Bä yömöcacö lä walalai bä yömöca dao dodijiobä —a cuma—. Yai Bada tä Bufinö iba bä lä yododoblai bä nowa lä taö wei tä a̦ ji̦liabeje. Bä nö wa̦lojaö lä ayao wei bä lä cui, ya bä nia iyamaö, nii manaa bä lä jo̦yale bä ja. Maa au ya mabä nia ca̦i oni jöbäö. Dude a wa̦fa ca̦i lä onile, ya mabä nia jöbäö, a wa̦fa daö lä mlajei. Mabä lä däaö wejei bä lä cuinö a wa̦fa nia shino daöje. ¹⁸ Ya tä lä möno wei, abinaja a cuu nomöjöoma. —Bei. Diadila jamö, iba bä lä yododaö wei bä nija a lä läle a lä cui nija, wa etä a̦ ca̦i nia oni shömaö. Yai Bada ya e Ijilubö. Cowa wacö lä culenaja ya mamocu mömou nö quilijiwä cuwä. Duo shibä shi de̦lelewä lä culenaja ya mamicö cuwä. Ö̦jö ya lä cui, wale wa̦no nia oniblaö. ¹⁹ ’Iba Diadilateli bä lä cuaaö wei ya tä daö —a cuma—. Bä lä nofimayou wei tä ca̦i. Bä lä bejedimou wei tä ca̦i. Bä lä bayeliblayou wei ya tä ca̦i daö. Bä nö wa̦lojaö fe lä yadio wei tä ca̦i. Bä jaba lä cuaano weinaja bädawä mlai, fei däjä bä yai shino dodijaö. ²⁰ ’Ö̦jö ma cui, ai etä nowa ca̦i cua —a cuma—. Jesabela a wa̦fa suwä lä cule, a wasöboimije. Yai Bada a wa̦no wäyälewä a wa̦fa suwä ma jilou wei ma cui, a jolemou. Tä a̦ lä wäyäö wei tä a̦nö, wale a̦ lä juaö wejei bä mölamaö. Bä nofi beshili jushublalobä, bä bufi taamaö. Nö idubö täbä lä bufiblamou wei täbä ja, bä nii fa dodobojenö, ö̦jö bä nii ja bä nö liyamaö dicoo. ²¹ Ö̦jö a bufi mö yabajadobä ya nö ma daono wei ma cui, a nofi lä jushublalou wei tä ja, ö̦jö a suwä bufi mö yabajadou moji waiquiwä. ²² ¿Ö̦jö tawä? Ya nia jaliliamaö. Ö̦jö nija bä lä joleblalou wei bä ma cui, bä waiquidoimi ja, ö̦jö ya bä nö nia ca̦i bleaamaö fe balojoo. ²³ Ö̦jö a suwä lä cui, bä ijilubö ya ebä nia shäö showadao, a wa̦ suwä lä juaö wejei bä lä cui, iba bä lä yododoblai bä bufi yai jaducublobä. Bä bufi lä cuaablalou wei ma cui ya tä daö. Bä bufi lä waiyou wei tä ca̦i. Bä lä cuaaö wei tä nowa lä cudalenaja ya tä nowa nia bluca co̦aö cuo. ²⁴ ’¿Ö̦jö tawä? —a cuma—. Ö̦jö ma cui, iba Diadilateli ai bä lä cui, ö̦jö a wa̦ suwä juaö lä mlajei bä nija ya wa̦ faö majöwä, Sadanasi etä a̦fa lojode lä jilamamou wei tä a̦ daö lä mlajei bä nija. Ö̦jö bä nija ai ya tä a̦ nia läamaö fe yadiomi. ²⁵ Abinaja bä shino cuaabä. Ya waloo showao mlao däjä, bä bejedimou lä waiquio wei tä lä cui, ö̦jö tä shino yai cadidibou lojodoo showaobeje. ²⁶ ’Bä nö wa̦lojaö lä ayao wei bä lä cui, bä waicou mlai ja wale nosie lä juadii wejei, bada ya bä nia tablamaö —a cuma—. Yanowamö täbä bälöblawä lä yaiblai bä lä cui nija bä bada läobä, ya bä nö nia wa̦lojomabou. ²⁷ Bä nosiemaöje däjä bä a̦ nia lojodoaö. Duo shibä judenö jaboca bä lä̦cashi cublou si lä ijejeinaja bä nia taamaöje. Camiyä Bada ya nosiemobä, Fayänö wale nö lä wa̦lojomabolenaja, inaja showawä ya bä nia taamaö mö feduo. ²⁸ Ya bä nö wa̦lojaö jömabä, shidicali a faö lä fenablao wei ya e ca̦i nia jöbäaö. ²⁹ ’¿Ö̦jö tawä? —a cuma—. Bä yömöcacö lä walalai bä yömöca dao dodijiobä, Yai Bada tä Bufinö iba bä lä yododoblai bä nowa lä taö wei tä a̦ ji̦liabeje.

¹ Ya tä lä möno wei, abinaja a cuu nomöjöoma. —Bei. Sadi jamö, iba bä lä yododaö wei bä nija a lä läle a lä cui nija, wa etä a̦ ca̦i nia oni shömaö. Yai Bada etä a̦ juamobä ebä 7 yai lä cui, camiyänö ya ebä juwäbou. Shidicali 7 bä lä cui ya bä ca̦i showabou. Ö̦jö ya lä cui, wale wa̦no nia oniblaö. ’Iba Saditeli bä lä cuaaö wei ya tä daö. Bä mömou dodijidawä cudeenö bä a̦fa demi taö ma cujei bä demimi. Bä nomawä. ² Bä la̦ö co̦obä, ö̦jö lä. Bä ijede dodijaö lä showai tä lojodobou co̦obeje, ö̦jö lä, etä mili mlaaö lä waiquile tä lä cui. Ya bä dodijaö dablaimi dicowä. Yai Bada ya wa̦ lä juaö wei tä lä cuinö bä taamaö lä bufio weinaja bä cuaaö cadidiomi. ³ Tä a̦ lä däleno wejei tä a̦ nofi yai jaducubobeje, ö̦jö lä, tä a̦ lä ji̦lileno wejei tä a̦ showawä lä cui. Tä a̦ nofi jaducubolajenö bä bufi mö yai yabajadobä. Bä la̦ö bufiomi dicoo ja, yedu ya bä nabä nia waloo, täbä tomömobä täbä ja̦tomou lä culenaja showawä. ⁴ ’¿Ö̦jö tawä? —a cuma—. Ö̦jö ma cui, iba Saditeli ai bä bolacadabö dodijaö showaa fe yadia. Wa̦lidiwä tä ja bä nowamöo yalo, jai camishi bä shamimabou lä mlajeinaja bä cuwä. ¿Ö̦jö tawä? Camishi au bä ja ya bä didimabolanö, ö̦jö camiyänö ya bä ca̦i nia juu. Ya bä ca̦i nia lä juu wei bä waiquiwä malä cui. ⁵ Camishi au bä ja ö̦jö bä nia lä didio weinaja, inaja showawä bä nö yai lä wa̦lojaö wei bä nia ca̦i didio mö feduo. Bä nia ba̦limi lä cudio wei ya bä a̦fa lä onibole si ja, ya bä a̦fa mladamaö mlaicätä. Fayänö cama a̦jele ebä ca̦i lä cule jamö, ö̦jamö iba ya bä a̦fa nia wawädowä wäaö. ⁶ ’¿Ö̦jö tawä? —a cuma—. Bä yömöcacö lä walalai bä yömöca dao dodijiobä, Yai Bada tä Bufinö iba bä lä yododoblai bä nowa lä taö wei tä a̦ ji̦liabeje. ⁷ Ya tä lä möno wei, abinaja a cuu nomöjöoma. —Filadefia jamö, iba bä lä yododaö wei bä nija a lä läle a lä cui nija, wa etä a̦ ca̦i nia oni shömaö. Camiyä yami ya lä yaile ya. Ya lä bejedimou wei ya. Bada tä David a lojode jömaö ayaobä tä caloblamodima lä cui, camiyänö ya tä tabou nomöjöa lä cule. Camiyänö ya yoca calobou waiquia ja, yoca nia laaimije. Ya yoca labou ja, yoca nia ca̦i caloblaimije. Ö̦jö ya lä cui, wale wa̦no nia oniblaö. ⁸ ’Iba Filadefiateli bä lä cuaaö wei ya tä daö. Bä a̦fa lojode wäyäö lä mlajei, ya bä a̦ ca̦i daö. Ö̦jö ma cui, wale a̦ nofi cadidibouje. Wale a̦ nofi ca̦i jole mojoduboimije. ¿Ö̦jö tawä? Ö̦jö bä mö lä yaile jamö, ya yoca calobou lä cule, yoca laaö dao lä mlajei. ⁹ ¿Ö̦jö tawä? Ö̦jö bä a̦fa jole jole judio lä jilou wei bä lä cui, bä jolemou. Sadanasi a nofi yai co̦camoaöje. ¿Ö̦jö tawä? Iba Filadefiateli bä cotä jamö, ya bä möfe nia bomabou. Iba ö̦jö ya bä showadi lä nofimaö wei, ya tä nia dablamaö. ¹⁰ ¿Ö̦jö tawä? Iba bä nö wa̦lojaö fe yadioma, ya bä nowa lä tano weinaja showawä. Ö̦jö cudeenö, bita jamö yanowamö täbä bluca lä bälöblai bä wabamobä tä cublou däjä, bä nö nia yai lä bleaaö wei däjä, iba bä lä cui ya bä nia lojodomabou fe yadio. ¹¹ ’Lobe ya nia juu co̦o —a cuma—. Ya waloo showao mlao däjä, bä bejedimou lä waiquio wei tä nofi cadidibou lojodoo showaobeje, camä bä nija ya tä nia lä jöbäö wei tä däaö cadidiobeje. Bä nia doblamaö lä mlajei, bä malä läle. ¿Ö̦jö tawä? Liyäjäwä täcö yojobobeje, iba ya bä nia dobäö. ¹² Bä nö wa̦lojaö lä ayao wei bä lä cui, ya bä nia bada tablamaö, Yai Bada ebä nijamö bä läobä. Yai Bada ya wa̦ lä juaö wei etä yafi jamö, jai codobö ya bä bada nia tamabou. Ö̦jamö bä nia cudio shi wa̦lii. Cama ebä yalo, ö̦jö bä nijamö, Yai Bada ya wa̦ lä juaö wei ya wa̦fa nia oniblaö. Yai Bada etä shabono lä cule, ö̦jö etä a̦fa ca̦i. Fedu jamö, Yai Bada ya wa̦ lä juaö wei a lä cule jamö culanö, etä nia shabono itou. Jelusale dude tä shabono lä cui. Camiyä dude ya wa̦fa nia ca̦i oniamou, ö̦jö bä nijamö. ¹³ ’¿Ö̦jö tawä? —a cuma—. Bä yömöcacö lä walalai bä yömöca dao dodijiobä, Yai Bada tä Bufinö iba bä lä yododoblai bä nowa lä taö wei tä a̦ ji̦liabeje —a cuma. ¹⁴ Ya tä lä möno wei, abinaja a cuu nomöjöoma. —Laodisea jamö, iba bä lä yododaö wei bä nija a lä läle a lä cui nija, wa etä a̦ ca̦i nia oni shömaö. Yai Bada nija bä nacou ja, “Inaja lä tä cuobä”, bä ola lä cudou wei tä a̦ bejedi cublobä, camiyä ö̦jö lä ya. Ya tä a̦fa bejedi wäyäö lä shalilio wei, ö̦jö lä ya showawä. Yai Bada tänö täbä bluca lä tablaleno wei däjä, camiyä ya lä cuinö täbä bluca tablamolayoma. Ö̦jö ya lä cui wale wa̦no nia oniblaö. ¹⁵ ’Iba Laodiseateli bä lä cuaaö wei ya tä daö —a cuma—. Wale a̦ waibou cadidio ma mlajei ma cui, wale a̦ juaö ca̦i shaliliomije. Jole jole wale a̦ shi̦lo ji̦liaö bädaoje. Inaja bä cuaaö mlao fa cunoja tä nö doblaobö wei. ¹⁶ ¿Ö̦jö tawä? Bä dodijaimi. Jole jole wale a̦ shi̦lo ji̦liaö bädao dicooje ja, nii wamou wa̦lidiwä lä culenaja ya bä nofi nia tabou. Ya bä nia joleleblaö. ¹⁷ Abinaja bä malä cuu wei. “Ya nö madofibö waiquiwä. Fei däjä dodijidawä ya yai cua lä cule. Ya jo̦li malä mlai”, bä ma cuu wei ma cui bä nö yai beblalou dodijiwä. Bä nofi ojode tablamobä bä li. Bä nö jo̦lili bleaaö. Bä jubäbö. Bä shinoco. ¹⁸ Ö̦jö cudeenö ya bä yömölaö, camiyä nija bä yai bayeliblamobä. Camiyä nija olo bä lulabeje ya wa̦, tä wa̦lidiwä coyocoa lä mlai. Camiyä nija jai olo bä yai lä dodijidai bä fa lulualalöjenö, bä yai bayeliblamobä. Camiyä nija bä camishi lä au wei bä ca̦i fa lulualalöjenö bä didiobä, bä shinoco nö dablamou quilijio mlaobä. Bä mamocu fä̦lömamobä, camiyä nija toubä ca̦i fa lulualalöjenö bä mamocu fä̦lömamobä, täbä möö liyäjäblou co̦obeje. ¹⁹ ’Ya bä lä nofimaö wei ya bä wasöö —a cuma—. Bä cadidobä ya bä nö ca̦i bleaamaö. Ö̦jö cudeenö, ¡lobe wale a̦ juabeje, ö̦jö lä! ¡Lobe bä bufi mö ca̦i yabajadou co̦obä! ²⁰ ¿Ö̦jö tawä? Bei yoca lä jolele jamö ya nö dadia lä cule. Wale famabeje ya tä ca̦i cloocaö. Wale a̦ fa ji̦lilänö, ai tänö yoca caloblaö ja ya nia faö. Ö̦jö sho yafäcö nia iyalayou. ²¹ Bä nö wa̦lojaö lä ayao wei bä lä cui, bada ya bä nia tablamaö. Camiyä ya lä döcäo wei täcö ja bä nia döcäo ajedeblou. Camiyä ya nö ca̦i wa̦lojaö fa ayaonö, Fayä a lä döcäo wei etäcö ajede jamö wale döcämabou lä culenaja showawä. ²² ’¿Ö̦jö tawä? —a cuma—. Bä yömöcacö lä walalai bä yömöca dao dodijiobä, Yai Bada tä Bufinö iba bä lä yododablai bä nowa lä taö wei tä a̦ ji̦liabeje —a cuma.

¹ Ö̦jö ya tä daa fa balölalönö, ai ya tä möö co̦oma. ¿Ö̦jö tawä? Fedu jamö ya yoca caloa dalalema. Amowa fibä jolaöje däjä fibä a̦ nacläaö lä culenaja, ya wa̦ jaba lä ji̦lileno wei a lä cui, abinaja a cuma. —Jabo. Fäyämö a da juoquibiyolu. Obi tä nia lä cublou wei, cafä nija ya tä wawämabä —a cuma. ² Yedu, Yai Bada tä Bufinö wale lojodobolanö, Bada a lä döcäo wei etäcö jamö, ya fedu jamö döcäa dalalema. ¿Ö̦jö tawä? ³ Ö̦jamö a lä döcäono wei bei tä shi̦inö a fe fa̦yoboma. Tä shi̦i auoma, tä shi̦i ca̦i wacäjäoma. A döcäobä täcö feduböcö jamö ai tä shi̦i shoqueo mö feduböcöoma. Jai jedu cäcö shi̦i mömou ma cuono wei ma cui tä shi̦i liyäoma. ⁴ Bada tä döcäobä etäcö ajede jamö, 24 ai ebä döcäo mö feduobä etäbä fe fa̦yooma. Ö̦jö täbä jamö bada 24 ebä döcäcäoma. Camishi au bä ja bä didioma. Olo bä ca̦i yojobomaje. ⁵ ¿Ö̦jö tawä? Bada tä lä döcäo wei etäcö jamö, madula a wacö blada bladamou. Täbä a̦ bluca ca̦i mashiquiwä ji̦lio. Ya̦lu a wa̦ ca̦i faö nö quiliaö showadao. Bada a lä döcäo wei etäcö mashi jamö, cowa 7 wacöbä befi ca̦i i̦tatawä. Ö̦jö wacöbä lä cuinö, Yai Bada etä a̦ lä juaö wejei ebä yai 7 jömamou. ⁶ Bada tä lä döcäo wei etäcö mashi showawä jamö, modu u si flacajawä cobejewä lä culenaja tä cuwä tä blaa. Tä mömou walalawä. ¿Ö̦jö tawä? Bada tä döcäobä etäcö jamö, yaitawä 4 täbä fe fa̦yoa. Bei bä balöcö jamö ma cui, bei bä mabucabö jamö ma cui, cama comi bä jamö jödödöwä bä mamobä cublawä. ⁷ Jaba tä lä cui, öla a lä culenaja tä mömou cuwä. Ai tä lä cui, baca a lä culenaja tä mömou cuwä mö feduwä. Ai tä lä cui, yanowamö mofecö lä culenaja tä mofecö cuwä. Ai tä mö feduwä lä cui, mojomö bä bada lelaaö lä cuaaö weinaja tä mömou cuwä mö feduwä. ⁸ ¿Ö̦jö tawä? Ö̦jö 4 täbä lä cui, 6 täbä majecö cublawä. Bei bä majecö mabucabö jamö ma cui, cama comi bä jamö bä mamobä cublawä nö mlawä. Ö̦jö täbä lä cuinö, täbä yanöcöblou balöa mlai ja ei tä a̦ amowa shino tadiije. Yai Bada tä Bada lojode lä ayai, ¡yami a yaia! Jaba däjä tä cuo fa showaonö tä cua lä showale, ¡yami a yaia! Tä nia juu lä co̦o wei tä showawä lä cui, ¡yami a yaia! Einaja täbä amowamou ja täbä cudii. ⁹ ¿Ö̦jö tawä? Bada tä döcäobä etäcö jamö a lä döcäle, a nia cuo shi lä wa̦lii wei a wa̦fa doblao taöje. A nofi dodijidawä tabouje. Ö̦jö nija täbä bufi lä doblao wei tä a̦fa ca̦i wäyäöje. Inaja cama bä cuaalanö, ¹⁰ Bada tä yai lä cui a cotä jamö, bä 24 lä yädäo wei bä möfe bada boblaaö. A nia cuo shi lä wa̦lii wei a wa̦fa ca̦i Bada doblao taöje. Ö̦jö däjä, olo bä lä yojobou wejei ebä fa jayualalöjenö, amowa täbä a̦ talajenö, Bada tä döcäobä etäcö cotä jamö ebä shäyäblaqueije. Abinaja bä amowabö a̦ cuu. ¹¹ Cafä bäfä nofi lä Badabou wei wa Bada. Bäfä lä bufibou wei cafä wa. Wa wa̦fa doblao tamou ayaobä, ö̦jö wa waiquiwä. Cafä wa lä cui, wa nofi dodijidawä tabou ayaobeje, ö̦jö wa. Cafä wa nofi ca̦i lojode doablamou ayaobä. Jödödöwä wa täbä malä tablaleno wei. Wa täbä tablaö fa bufinö wa täbä tablalema. Einaja bä amowabö a̦ cuu.

¹ Ai ya tä möö co̦o ja, oni ya si cofefama dalalema. Bada tä döcäobä etäcö jamö a lä döcälenö, jayu boconö tä si däboma. Balöcö si ma cui, mabucabö si ma cui, si onio jödödöoma. Si caloblamou mlaobä, mai 7 cocobä sudioma. ² Ö̦jö däjä, a̦jele lojode ya bada dalalema. A wa̦ faö lojodoaö ja abinaja a cuma. —Mai cocobä jädödabä, oni si calomabä, ¿wedi bei a yai? —a cuma. ³ Ö̦jö ma cui, fedu jamö ma cui, bita jamö ma cui, mashita cojomö jamö ma cui, si oni nia lä calomaö wei a cuonomi. Tä a̦ oni möbä a cuonomi. ⁴ ¿Ö̦jö tawä? Si calomabä, tä a̦ oni ca̦i möbä a dablonomi yalo, ya bufi fa wajäblalunö ya ö̦cöa dodijilayoma. ⁵ Ö̦jö däjä, bada 24 bä lä yädäono wei ai a lä cuinö, abinaja wale nowa tama. —A ö̦cö dijä. Judawä nodiwä e a̦fa Öla lä jilamou wei a lä cui, a nö Bada wa̦lojaö ayaoma. David nodiwä bä nija a nia Bada lä bädono wei, ö̦jö lä a showawä, jai fii fi nasöcö nia cabudu faö lä co̦ono wei. Wa̦lidiwä tä ja a nö wa̦lojaö ayaoma yalo, mai 7 cocobä lä sudile cocobä calomabä, ö̦jö a yai. Tä a̦ oni ca̦i möbä, ö̦jö a yai —wale nowa tama. ⁶ Ö̦jö däjä, Bada tä döcäobä etäcö ajede jamö, Oweja a wa̦fa ocalo lä jilou wei ya dalalema, yaitawä 4 täbä möamo jamö. Bada 24 bä lä yädäono wei bä fe fa̦yooma. Ö̦jö Oweja a wa̦fa ocalo lä jilou wei a lä cui, jai a shälemaje a mömou cuoma. 7 yo̦la bä cuoma. 7 mamo bä ca̦i. Ö̦jö bei mamo bänö, yai 7 täbä jömamoma. Yai Bada etä a̦ juamobä ebä 7 lä cui, bita jödödöwä a jamö bä lä shömöleno wei, ö̦jö bä yai cuoma. ⁷ Bada tä döcäobä etäcö jamö a lä döcäle a nija, Oweja a wa̦fa ocalo lä jilou wei a icuquema, jayu boconö si lä däbono wei a nija. Ö̦jö nija a fa icuicunö, si delema. ⁸ Si lä däleno wei däjä, Oweja a wa̦fa ocalo lä jilou wei a cotä jamö, yaitawä 4 täbä lä cui täbä möfe boblaquema. Bada 24 bä lä yädäono wei, inaja showawä. Ö̦jö bä bluca lä cuinö, amowa fibä showabomaje, bei fibä nata lä jubamou wei fibä lä cui. Olo bä ja täbä lä cui täbä ja, täbä nö wa̦queshi li̦yoli u̦cucamabeje täbä fe ca̦i lajowä didibomaje. Ö̦jö täbä lä cui, Yai Bada nija cama ebä nö bayeli lä nacao wei bä a̦ jömamobä bei täbä li cuoma. ⁹ Amowa dude tä a̦ ca̦i tamaje. Abinaja bä amowabö a̦ cuma. Oni wa si däabä, mai wa cocobä caloblabä, cafä wa yai. Cafä wa shämou fa läonö, bei wa i̦yäbönö yanowamö wa täbä nowa bluca malä comaqueno wei. Yai Bada tänö bä tabobä, bluca bä yaiablalou lä nodiaö wei bä nijamö, cama wa ebä nowa comaquema. Bluca bä caficö a̦ lä bou wejei bä nijamö ca̦i. Shomi bä bluca lä bälöblai bä nijamö ca̦i. Bluca bä bälöblawä lä yaiblai bä nijamö ca̦i. ¹⁰ Cafänö wa bä ca̦i fa cuonö, Yai Bada bäma a wa̦ lä juaö wei a nija bä bluca ojodamou ajedeobä wa bä tablamalema, täbä nofi bäyäbobeje. Bita jamö bä nia ca̦i bada läo. Einaja bä amowabö a̦ cuma. ¹¹ Ya tä möö fa co̦onö, a̦jele bluca dodijiwä ya bä a̦ ji̦lilema, bä nö wabamobö lä mlai. Bada tä döcäobä etäcö fa möamoicunö, yaitawä 4 täbä ma cui, bada 24 täbä lä yädäono wei täbä ma cui, ö̦jö täbä ca̦i möamoa mö fedua fa showadaicunö, a̦jele bä a̦ ji̦lio fe fa̦yooma. ¹² Bä i̦cali a̦ faö ja, abinaja bä cuma. Oweja a wa̦fa ocalo lä jilamou wei, a lä shämono wei a lä cui, ö̦jö a nofi lojode doablamobä a yai. Täbä nowa lä bluca wei täbä ja a dobäbeje a. Ö̦jö a bufi nofi shino yai jaducuwä doablamobä. A nö a̦fa ca̦i wa̦lojaö tabeje. A nofi dodijidawä ca̦i tabobeje. A wa̦fa ca̦i doblao tamobä. ¡Bäma a nofi dobobä, ö̦jö a yai! Einaja bä cuma. ¹³ Ya bä a̦ ji̦lilema. Fedu jamö bä lä culadi bä ma cui, bita jamö bä bluca lä cublai bä ma cui, mashita a cojomö jamö bä lä cublai bä ma cui, modu u jamö bä lä cubodi bä ma cui, ö̦jö ya bä a̦ bluca jödödöwä ji̦lia showadalema. Abinaja bä cuma. Bada tä döcäobä etäcö jamö a lä döcäle a ma cui, Oweja a wa̦fa ocalo lä jilamou wei a ma cui, ö̦jö bäma cäcöbö nofi yai dobobä cäcöbö. Wawädowä cäcöbö nofi dodijidawä tabobeje cäcöbö. Cäcöbö a̦fa doblao tamobä. Cäcöbö nö a̦fa ca̦i wa̦lojaö tabeje. Inaja cäcöbö nofi tabou shi wa̦libeje cäcöbö. Einaja bä cuma. ¹⁴ Yaitawä 4 bä lä cui, “¡Inaja lä tä cuobä!”, bä cuma. Bada 24 bä lä yädäono wei bä lä cui, mashita jamö bä möfe fa boalunö cäcöbö a̦fa Bada doblao ca̦i tamaje.

¹ Oweja a wa̦fa ocalo lä jilamou wei a nija ya mamo showao däjä, oni si jamö mai 7 cocobä lä sudiono wei, ö̦jönö jaba coco caloblalema. Ö̦jö däjä, yaitawä 4 bä lä cuono wei, ai a wa̦ fama. Ya̦lu a wa̦ nacli faö lä culenaja a wa̦ ji̦limamou cuoma. —¡A da jabo! —a cuma. ² Ya tä fa mönö, cabayo au ya dalalema. Ö̦jamö a lä döcäono wei a lä cuinö, shälacawä cäcö showaboma. Ö̦jö nija olo a jöbämoquema, a yojobobä. A nö wa̦lojaö waiquilanö a wayu juma, a nö yai wa̦lojaö dodijio ayaobä. ³ Oweja a wa̦fa ocalo lä jilamou wei a lä cuinö, oni si jamö mai 7 cocobä lä sudiono wei, ai a caloblaö co̦layoma. 2 coco caloblaö däjä, yaitawä 4 bä lä cuono wei, ai a wa̦ faö nomöjöoma. —¡A da jabo! —a cuma. ⁴ Einaja a fa cunö, cabayo ai a faa nomöjölayoma. A wacä mö judäoma. Ö̦jamö a lä döcäono wei a lä cui nija, bita jamö tä nö ulifi wayuböblamabä etä jöbämoquema, täbä bluca lä bälöblai bä shäyobä. ¿Ö̦jö tawä? Sibala bada e bada jöbämoquema. ⁵ Oweja a wa̦fa ocalo lä jilamou wei a lä cuinö, mai 3 coco caloblaö lä co̦layono wei däjä, yaitawä 4 bä lä cuono wei, ai a wa̦ faö nomöjöoma. Ya wa̦ ji̦lilema. —¡A da jabo! —a cuma. Ya tä fa mönö, cabayo ö̦shö a wawäa nomöjölayoma. Ö̦jamö a lä döcäono wei a lä cuinö, jude wabamodima tä yäböboma. ⁶ Ö̦jö däjä, yaitawä 4 täbä möamo ja, yanowamö a wa̦ faö lä culenaja ya wa̦ ji̦lilema. Abinaja a cuma, cabayo a ja a lä döcäle nija. —Täbä ojodamou fe ma weyaö wei ma cui, ji̦shima moli a ja, nii ji̦bä fe lajowä shino nia däamou. Ji̦bä nowa bluca lä mlai ji̦bä ma cui, 3 bä ji̦shima bädawä ja, ji̦bä fe lajowä nowa nia shino co̦amamou. Ö̦jö ma cui, dabö dabö ubä mlaö dicoo mlaobä, ubä lä tamou wei fibä wa̦liama dijä. Uba nashiwä toubä ca̦i cuo fe yadiobä, totobä ca̦i wa̦liama dijä —a cuma. ⁷ Oweja a wa̦fa ocalo lä jilamou wei a lä cuinö, mai 4 coco caloblaö lä co̦layono wei däjä, yaitawä 4 bä lä cuono wei, ai a wa̦ faö nomöjöoma. Ya wa̦ ji̦lilema. Abinaja a cuma. —¡A da jabo! ⁸ Ya tä möö däjä, cabayo ai a wawälayoma. ¿Ö̦jö tawä? A mömou nö fla̦lajawä quilijioma. A lä döcäono wei a lä cui, Nomaö a wa̦fa cuoma. Ö̦jö a nodi jamö a lä nocale a lä cui, Täbä lä nomaö wei täbä cuobä jamö, a wa̦fa jilamaje. Bluca bä lä bälöblai bä nijamö, ai bä wa̦liaböö cuaabä etä jöbämoquema. Ai bä lä cui, shäyou tänö bä mö nia watäblamaböma. Ai bä mö feduwä lä cui, ofi tänö bä nia nomamaböma. Ai bä showawä lä cui, shawala anö bä nia waicamaböma. Ai bä lä cui, yalo bä lä ishou wei bä nija bä nabä nia shömöaböma. ⁹ Oweja a wa̦fa ocalo lä jilamou wei a lä cuinö, mai 5 coco caloblaö lä co̦layono wei däjä, Yai Bada nija täbä nia lä dodoblamou wei bä maqueblamobä ya täcö wawädowä dalalema. Ö̦jö täcö cotä jamö, cama ai ebä lä shämono wei ya bä bufi dalalema. Yai Bada a wa̦no wäyäö nofi jushuaöje ja bä shälemaje cäbä, a wa̦fa wäyäö fe yadiomaje cudeenö. ¹⁰ Bä a̦ i̦cali faö ja abinaja bä cuma. —Cafä Bada wa shino yai Bada lä ayai, yami wa yaia. Wa lä bejedimou wei wa. ¡Fei däjä showadawä! Bita jamö bä yanowamö lä cublai wa bä dobloimi fa jömanö, yamalecö i̦yäbö nowa da co̦lä —bä cuma. ¹¹ Ö̦jö däjä, camishi labe shuducaje bä ja, bä dobämolayoma. Abinaja bä nowa tamoma. —Bä yanöcöblaa da balöicu. Aifä bä lä cui, camiyä ya wa̦ juamobä bä nia lä shämou wei bä lä cui, bä oimi showawä, cafä wamacö lä taamamono weinaja bä nia shämou mö lä feduo wei bä lä cui. ¹² Oweja a wa̦fa ocalo lä jilamou wei a lä cuinö, mai 6 coco caloblaö lä co̦layono wei däjä ya tä fa mönö, ulifi ya bada blösö blösömou dalalema. Motoca a mö bada ö̦shö judeblaliyoma. Belibo a bada lä loono wei, i̦yä i̦yä bä mömou lä culenaja a bada cublaliyoma. ¹³ Ö̦jö däjä, judu mösö jamö culanö, shidicali bä bluca blälälaledayoma. Wadoli a bada yacolemou däjä ico bä luwä blälämaö lä cuaaö weinaja showawä. ¹⁴ Judu mösö ma cui, oni si cofedou lä co̦o weinaja mösö fa cublalunö, mösö mladaliyoma. Bei mabä ma cui, täbä ulifi bluca lä jo̦coblai täbä ma cui, ö̦jö täbä bluca fa shomilalunö, ö̦jamö täbä dablou mladaliyoma. ¹⁵ Ö̦jö däjä, jödödöwä bä lä bälöblai bä fa quililalunö, bä jötäolaliyoma. Bä bälöo lä dodijii bä bada lä cublai bä ma cui, ai bä bada lä blowäjäi bä ma cui, wayu bä lä lulubou wejei bä ma cui, bä nö lä madofibö wei bä ma cui, bä lä lojode wei bä ma cui, bä bluca quililaliyoma. Bä nosie juamobä bä lä tabou wejei bä ma cui, bä tabou lä mlajei bä ma cui, ö̦jö lä täbä bluca lä cui, bei mabä jamö bä fa cuicunö mabä lä yalejeblai jamö bä jötäolaliyoma. Bei maca cabä lä cublai jamö ma cui, bä ca̦i lucäolaliyoma. ¹⁶ Ö̦jamö bä fa cuolalunö, maa mabä ma cui nija bä a̦ i̦cali fama. —Wamacö fa wäcölönö, ¡wamalecö da badädäbalö! Bada tä döcäobä etäcö jamö a lä döcälenö yamalecö dablaö mlaobä. Oweja a wa̦fa ocalo lä jilamou wei, a nö wa̦lowä lä jushuole a lä cui nija yamacö nowamöobä. ¹⁷ Cäcöbö nö wa̦lowä lä jushuo wei etä wawäblobä, ei tä jalu jamö etä cublou waiquia lä cule. ¿Täbä demi feiblou fe yadiobä tä daanö? —bä cuma.

¹ Ö̦jö ya tä möö waiquio däjä, bita a 4 lä sha̦coblai jamö, a̦jele 4 ya bä ublajawä fe fa̦yoa dalalema. Wadoli 4 bä lä cui bä ja̦mabomaje, ulifi jamö ma cui, modu ubä lä cublai jamö ma cui, tä wadolimou showadao mlaobä. Fii fibä ca̦i yalä yalämou showadao mlaobä. ² Ö̦jö däjä, motoca a lä faö wei jamö, a̦jele ai ya ösöö dalalema. Yai Bada tä demi shi lä wa̦lile etä madofi onimamodima showaboma. A̦jele 4 bä ublajawä fe lä fa̦yoono wei bä nija a wa̦ i̦cali fama. Ö̦jö bä nija, ulifi a wa̦liabeje tä li jöbämoa waiquiquema, modu ubä ca̦i. ³ Abinaja bä nowa tama. —Bei. Ulifi a ma cui, modu ubä ma cui, fii fibä ma cui, wadoli a ja ö̦jö bä wa̦liamaö showadao dijejä. Yai Bada bäma a lä bufibou wei, a wa̦ juamobä bä lä cui, ö̦jö yama ebä nia onimaö balöo, cama onimamodima etä madofinö. Bei täbä wäyäcu jamö yama täbä nia oni taö cuaaö balöo—bä nowa tama. ⁴ Ö̦jö däjä, bei bä wäyäcu nia lä onimano wejei, 144.000 ya bä a̦fa bluca ji̦lilema. Isaeli bä ijilubö ebä nija bä 12 yaiablalou lä nodiano wei, ö̦jö lä bä mashi yai li cuoma. ⁵ Judawä 12.000 ebä wäyäcu onimamaje, Lubeni 12.000 ebä ca̦i. Cadö 12.000 ebä ca̦i. ⁶ Aselo 12.000 ebä ca̦i. Nefitali 12.000 ebä ca̦i. Manasesi 12.000 ebä ca̦i. ⁷ Simeoni 12.000 ebä ca̦i. Lewi 12.000 ebä ca̦i. Isacala 12.000 ebä ca̦i. ⁸ Sabulono 12.000 ebä ca̦i. José 12.000 ebä ca̦i. Bejamino 12.000 ebä ca̦i. ⁹ Ö̦jö ya tä daa fa balölalönö, ai ya tä möö co̦oma. Yanowamö bluca ya täbä co̦cablou dalalema, bä nö wabamobö lä mlai. Bluca bä bälöblawä lä yaiblai bä mashi coyocomoma. Bluca bä yaiablalou lä nodiaö wei bä ca̦i. Shomi bä bluca lä bälöblai bä ca̦i. Bluca bä caficö a̦ lä bou wejei bä ca̦i. Bada tä döcäobä etäcö mashi jamö bä bluca ublajaoma, Oweja a wa̦fa ocalo lä jilamou wei a mashi showawä jamö. Camishi labe shuducaje bä ja bä didioma. Lasha si jenabä lä culenaja si jenabä cuwä, si jenabä showabomaje. ¹⁰ Bä a̦ i̦cali faö ja, abinaja bä cuma. —¡Bämalecö lä jucäaö wei, ei a, Yai Bada bäma a lä bufibou wei, a Bada lä döcäle! ¡Oweja a wa̦fa ocalo lä jilamou wei a ca̦i! —bä cuma. ¹¹ Ö̦jö bä nija a̦jele bä fe bluca fa̦yooma. Bada tä döcäobä etäcö ma cui, bada 24 täbä lä yädäo wei täbä ma cui, yaitawä 4 täbä ma cui, ö̦jö bä bluca möamöo däjä, a̦jele bä ublajou fe fa̦yooma. Bada tä döcäobä etäcö ajede jamö bä möfe fa boalunö, Yai Bada a wa̦fa Bada doblao tamaje. ¹² Abinaja bä a̦jele cuma. —¡Inaja lä tä cuobä! Yai Bada bäma a lä bufibou wei, ¡bäma a nofi shino yai dobobä! ¡Ö̦jö bäma a wa̦fa shino doblao tabä! ¡Bäma a bufi nofi shino jaducuwä doablabä! ¡Ö̦jö nija bämacö bufi a̦fa doblalou ca̦i wäyämobä! ¡Bäma a nofi dodijidawä tabobä! ¡Bäma a nofi lojode ca̦i doablabä! ¡Ö̦jö a wa̦fa nö shino wa̦lojaö tamobä! ¡Inaja lä tä cuo shi wa̦libä! Inaja lä tä cuobä —bä a̦jele cuma. ¹³ Ö̦jö däjä, bada 24 bä lä yädäono wei ai a lä cui, camiyä nija a wa̦ fama. Abinaja a cuma. —¿Ei wa bä daö cule, camishi shuducaje bä ja bä lä didile? ¿Wedi jamö bä li cuoma bei bä li? —a cuma. ¹⁴ Abinaja ya e cuma. —Bada tä. Cafänö wa bä li daö —ya e cuma. Inaja ya cuu ja wale yömölama. —Fei bä lä cui, yanowamö täbä nö yai bleaaö nö lä quiliano wei däjä, bä demi lä feiblaliyono wei fei cäbä. Oweja a wa̦fa ocalo lä jilamou wei i̦yäbö ja esibä fa yalulalöjenö, esibä li aublaliyoma. ¹⁵ Ö̦jö cudeenö, Yai Bada tä döcäobä täcö mashi jamö bä li cudia lä cule. Cama Yai Bada etä yafi jamö a wa̦ showadi juadiije. Bada tä döcäobä etäcö jamö a lä döcälenö bä ca̦i fa cuonö, bä nia nowamaö shi wa̦lii. ¹⁶ Bä nia ofäö co̦daaimi. Bä nia ca̦i amishaimi. Ö̦jö bä nija motoca shi̦i nia ca̦i difequio co̦daaimi. Yobli tänö täbä si nia fla̦aö co̦daaimi. ¹⁷ Bada tä döcäobä etäcö ajede jamö, Oweja a wa̦fa ocalo lä jilamou weinö bä nia nowamöbou. Oweja bä ca̦i lä cuo wejei bänö bä yalo nowamaö lä cuaaö wejeinaja, inaja showawä bä nia taamaö. Ba̦limiblamodima ubä fe lä jojoblai jamö bä nia lulubou cuaaö. ¿Ö̦jö tawä? Ö̦jö bä lä cui, Yai Bada tänö bä mabuubö nia jödödöwä ya̦jöblaö —bada a cuma.

¹ Oweja a wa̦fa ocalo lä jilamou wei a lä cuinö, mai 7 coco caloblaö lä co̦layono wei däjä, fedu jamö tä mada waiwä nö dedejedaliyoma. ² Ö̦jö däjä, Yai Bada tänö a̦jele 7 ebä lä ajedemabole ya bä möma. Amowa 7 fibä lä jolamou wei fibä ja bä dobämolayoma. ³ Ö̦jö däjä, Yai Bada nija täbä nia lä dodoblamou wei täbä maqueblamobä täcö ajede jamö, a̦jele ai a icuquema. Acanafu bä tablamobä tä madofi showaboma, olo bä ja tä lä tablamolayono wei tä lä cui. Täbä wa̦queshi nö cle̦deli lä u̦cucamou wei täbä bluca ja, a dobämolayoma, Yai Bada nija cama ebä nö bayeli lä nacao wei bä a̦ fa doanö, täbä nö lä cle̦deli wei täbä ja bä a̦ coyocoblamabä. Ö̦jö däjä, täbä nö cle̦deli lä dodoblamou wei täbä maqueblamobä täcö ja, täbä nö cle̦deli nia ucucamama, olo bä ja täcö lä cui ja. ⁴ Einaja a cuaama. A̦jele a lä cuinö, ö̦jö tä fa dodocunö, Yai Bada tä lä cule jamö täbä wa̦queshi nö cle̦deli ösöa showalayoma. Cama ebä nö bayeli nacaobä bä a̦ ca̦i ösöa coyocoa showalayofälöma. ⁵ Ö̦jö däjä, a̦jele a lä cuinö, acanafu täbä tablamobä tä madofi fa dälänö, Yai Bada nija täbä lä dodoblamou wei täbä maqueblamobä täcö jamö, acanafu bä wacö dälema. Acanafu täbä tablamobä tä madofi ja, wacöbä fe fa lajoblamalönö, bita jamö wacöbä shäyäblaquema. Ö̦jö däjä, ya̦lu a wa̦ faö nö quiliaö showadaoma. Bluca täbä a̦ ca̦i mashiquiwä ji̦lioma. Madula a ca̦i wacö blada bladamoma. Ulifi a nö ca̦i bada blösö blösömou quiliaö showadaoma. ⁶ Bei. Amowa 7 fibä lä jolamou wei fibä lä tabono wejei bä a̦jele lä cuinö, fibä jolabeje fibä colo jodaö showalayomaje. ⁷ A̦jele jaba a lä cuinö, cama efi jaba jolaö däjä, bita jamö bleyula bei bä bada blalölödou showadalayoma. Ö̦jamö lä cowa wacöbä ca̦i bläläö coyocaö showadaoma, i̦yä i̦yä bä ca̦i. Ö̦jö bä wacänö ulifi ai a mashi ö̦shölayoma. Ö̦jamö lä fii fibä ca̦i ö̦shöa showadalayoma. Moimoima a ca̦i liyä ö̦shöö jödödöblaliyoma. ⁸ A̦jele 2 a lä cuinö, cama efi jolaö nomöjöo däjä, modu bada u jamö jai bei macö bada cuwä, cowa wacö befi ca̦i quemabalema. ⁹ Wacö fa quemabalönö, ai u bada mashi i̦yäblou showalayoma. Ö̦jö u jamö bä bluca lä juu wei bä mö bluca watäblaliyoma. Canawä a jamö bä befi ca̦i lä caläö wejei bä ma cui, ö̦jö lä bä mö bluca watäblou showadalayoma. ¹⁰ Ö̦jö däjä a̦jele 3 a lä cuinö, cama efi jolaö nomöjöo däjä, judu mösö jamö shidicali a wacö befi ca̦i bada quelayodayoma. A fa quelunö, mau ai ubä mashi jamö a quea culayoma, ai ubä mashi lä jojoblai jamö ca̦i. ¹¹ Ö̦jö a shidicali lä cui, Maocoli a wa̦fa shidicali cua. Ö̦jö anö mau ai ubä mashi lä bayucublai ubä co̦wamiblaliyoma. Ubä fa co̦wamiblalunö, ö̦jö ubänö bluca bä nomalaliyoma. ¹² Ö̦jö däjä a̦jele 4 a lä cuinö, cama efi jolaö nomöjöoma, motoca a wa̦lidiblobä, a nö shi̦i dedeblou mlaobä. Belibo a ma cui, shidicali bä ma cui, inaja showawä bä wa̦lidiblamalema. Jalu däjä ma cui, didi däjä ma cui, tä shi̦i luaaö jaödao cuaama. ¹³ Ö̦jö däjä ya möö fa nonoicunö, mojomö ya wa̦ ji̦lilema. Ösö jamö a yälanö abinaja a cuma. —¡Nö bleaabä cätä! ¡Nö bleaabä cätä! ¡Nö bleaabä cätä! A̦jele ai bä 3 lä cuinö, amowa fibä jolaöje däjä, bita jamö bä yanowamö lä bälöblai, bejedi lä bä nö nia bleaaö —mojomö a cuma.

¹ Ö̦jö däjä, a̦jele 5 a lä cuinö, amowa efi jolaö nomöjöo däjä, fedu jamö a shidicali lä quelayono wei ya möma. Ö̦jö a shidicali nija, täca fe jolocoa lä mlabodi yoca caloblamobä etä jöbämoquema. ² Ö̦jö a shidicali lä cuinö, täca fe jolocoa lä mlabodi yoca fa caloblalönö, cowa wa̦queshi bä bada ushujuwä tolucublamoma, cowa bada wacö lä didibou wejei jamö bä wa̦queshi bada tolulumou lä cuaaö weinaja showawä. Ö̦jö yoca jamö bä wa̦queshi lä falayono wei bänö motoca a jo̦yablaliyoma. Tä mö bluca luwäblaliyoma. ³ Ö̦jö däjä, cowa wa̦queshi bä jamö söcö söcöma bä fa falönö, yanowamö täbä lä bälöblai jamö bä fa itolalunö bä cublaquema. Sufi bänö täbä nö bleaamaö lä cuaaö wejeinaja täbä nö bleaamaö mö feduobeje etä jöbämoquema. ⁴ Ö̦jö bä söcö söcöma lä cui bä wasömamoma, fii defibä wa̦liaö mlaobeje. Moimoima bä ma cui, cau cau bä ma cui, fii fibä ma cui, ö̦jö täbä bluca wa̦liaö mlaobeje bä wasömamoma. Yai Bada etä madofinö, yanowamö bei bä wäyäcu onimamou lä mlai bä nö nia shino yai bleaamamaje. ⁵ Belibo 5 a lublou mlao däjä bä nö nia ma bleaamano wejei ma cui, bä nia shämaö cadidionomije. Bä nö lä bleaano wei, sufi bänö bä si dicaöje däjä bä nö bleaaö lä culenaja bä nö nia bleaaö cuoma. ⁶ Ö̦jö tä cublou däjä, bä nö ninili bleaaö fe fa balojoonö, “Ya nomaö showadaobä”, bä nofi nia ma tamamou wei cui bä nia nomabloimi. Bä bufi mlao showadaobä tä nia ma bufijaö wejei ma cui bä bufi nia mlao showadaoimi. ⁷ Cabayo bä ca̦i wayu jubeje jamö bä jo̦yablaö lä cuaaö wejeinaja, inaja showawä bä söcö söcöma mömou cuoma. Madofi bä liyäjäwä yojobomaje, olo bä lä culenaja. Yanowamö täbä mofecö lä culenaja bä mofecö cuo mö feduoma. ⁸ Suwä bä feta u̦cu lä culenaja bä feta u̦cu ca̦i cuoma. Öla bä nacö lä culenaja, inaja showawä bä nacö cuoma. ⁹ Bä ca̦i sisioma. Wayu bänö shibä jifuwä lä läbou wejeinaja bä sisicö cuoma. Bä yäö däjä, bä majecö a̦ nacläaö fe balojooma. Bä ishobä jamö, cabayo bä nija bä läläamodima shaimabouje däjä, bä a̦ nacläaö lä cuaaö weinaja showawä. ¹⁰ ¿Ö̦jö tawä? Sufi bä shina lä culenaja bä shina cublawä, täbä si dicabeje. Belibo 5 a lublou showao mlao däjä bä si nia lä dicaö wejei, bei bä shinanö bä nö nia li bleaamaöje. ¹¹ Täca fe jolocoa lä mlabodi jamö tä fecula lä läo wei a lä cuinö, söcö söcöma bä nosiemaö. Ö̦jö Waicalewä a wa̦fa lä cule, a nofi badabouje. Ebleo bä caficö a̦ ja, Abadono a wa̦fa ca̦i cua. Clesiateli caficö a̦ ja, Aboliono a wa̦fa ca̦i cua. ¹² Bä nö nia jaba lä bleaamano wei, ö̦jö tä cuo balöoma. Bä nö bleaamaö co̦obä, bolacabö tä nia taö co̦oma. ¹³ Ö̦jö däjä, a̦jele 6 a lä cuinö, amowa efi jolaö co̦o däjä, ai ya wa̦ ji̦lilema. Yai Bada nija täbä dodoblamobä täcö jamö a culanö a wa̦ bädoma, olo bä ja täcö lä cui täcö jamö. Jai yalo yo̦lacö cuwä 4 täbä lä cublai jamö a culanö a wa̦ fa bädalunö, ¹⁴ abinaja amowa fi lä jolano wei a a̦jele nowa tama. —Bei. Euflade u bada jamö, a̦jele 4 bä lä o̦cale bä da jujeblalö —a nowa tama. ¹⁵ Inaja a cuu ja, ö̦jö a̦jele 4 bä lä cui bä jujeblamolayoma. Yai Bada tänö bä ja̦mabou balöo fa bufinö, ya̦cumö yanowamö täbä bluca lä bälöblai bä mashi waicabeje etä yai cublou fa shalililonö, bä jujeblamaö majölayoma. ¹⁶ Ö̦jö däjä, wayu ya täbä dalalema. Cabayo bä jamö wayu bluca fe balojowä bä befi ca̦i läläama. Bä wabamou doblonomi. Bä lä fejeleo wei ya bä a̦ ji̦lilema. ¹⁷ Bä befi ca̦i lä läläano wei, bei balöcö nowamöobä boo shicö jifuwä läbomaje. Abinaja cabayo bä cuwä ya bä dalalema. Bä wacä mö judäoma, cowa wacö lä culenaja showawä. Maa ai mabä wai baushi shi de̦lelewä lä culenaja bä shi ca̦i de̦leleoma. Bä ca̦i fla̦lajaoma, cowa yaitawä nacli wacöbä lä culenaja showawä. Öla bä fe lä culenaja bä fe cuo mö feduoma. Bei bä caficö jamö cowa wacöbä fabloma, wa̦queshi bä ca̦i bluca, cowa yaitawä nacli wacöbä ca̦i. ¹⁸ Cabayo bä caficö jamö ö̦jö bä 3 wayu lä fablono wei bä lä cuinö, yanowamö täbä bluca lä bälöblai bä mashi waicamaje. Cowa wacöbä ma cuinö, wa̦queshi bä ma cuinö, cowa yaitawä nacli wacöbä ma cuinö bä nö bluca bleaama. ¹⁹ Cabayo bä caficö wayunö, bei bä shina ca̦i wayunö bä nö malä blemalaleno wejei. Bei bä shina jamö jai olu bä fe cuwä bä fe bluca cublamoma, bä si wädöbeje. ²⁰ Ö̦jö ma cui, ö̦jö 3 bä wayunö bä yanowamö lä feiblaliyono wei bä lä cui, bä nomaö lä mlaono wei bä lä cui, bä bufi mö yabajadonomi. Nö idubö täbä lä bufiblamou wei täbä joyanomije. Bä möfe bolanö täbä a̦fa bada doblao taö showao fe yadiomaje. Olo bä ja ai bä tablamaje, blada bä ja ai, duo shibä ja ai, maa mabä ja ai, fii fibä ja ai. Ö̦jö bä lä tablamolayono wei bä lä cuinö täbä möimi ma cujei, täbä a̦ ji̦liaimi ma cujei, bä ca̦i cama juimi ma cui, bä bufiblaö fe yadiomaje. Fecula bä ca̦i lä bufiblano wejei tä ma cui ja, bä bufi ca̦i lädonomi dodijiwä. ²¹ Täbä bufi mö yabajadou mlai ja, bä shino shäablayou fe yadio showaoma. Fecula bä nija bä ca̦i wafäblayou fe yadio showaoma. Täbä nofi ca̦i jushublalou fe yadio showaoma. Shomi täbä madofibö ca̦i lämaö fe yadio showaomaje.

¹ Ö̦jö däjä, a̦jele ai ya lojode dalalema. Ölajashi a ja a didilanö, fedu jamö a culanö a itolayoma. Bei feduböcö jamö jedu cäcö shi̦i motoleoma. Motoca a mömou shi dowäjäwä lä culenaja mofecö cuoma. Bei matacö lä cui, jai cowa wacöbä comadiwä cuoma. ² Bei imicönö oni si wai caloboma. Jayu boco jamö mata lä cui, modu u bada jamö mamicö quequema. Ai mata lä cui, ulifi jamö mamicö quea mö feduquema. ³ Ö̦jamö a culanö, öla a wa̦ nö lä quiliaö weinaja i̦cali a comöma. A comöö däjä, ya̦lu 7 bä a̦ nocalayoma. ⁴ Ya̦lu 7 bä a̦ faö waiquio däjä, ya tä a̦ nia oniama ma cui, fedu jamö ya wa̦ ji̦lema. Abinaja a cuma. —Ya̦lu wa bä a̦ lä ji̦lileno wei bä a̦ da jo̦yalö. Ö̦jö tä a̦ onia dijä —a cuma. ⁵ Ö̦jö däjä, a̦jele ya lä möno wei jayu boco yalejedaliyoma. ⁶ Boco fa yalejedalunö abinaja a cuma. —Ya wa̦ nö wäo cadidia lä cule. Tä demi cua shi̦ lä wa̦lile tä malä cule. Judu mösö tablalema, ö̦jamö täbä bluca lä culadi täbä ca̦i. Bita a ca̦i taa mö fedublalema, ö̦jamö täbä bluca lä cublai täbä ca̦i. Modu u ca̦i bada tablalema, ö̦jamö täbä bluca lä cubodi täbä ca̦i. Fei däjä a nö nia dadiomi. ⁷ A̦jele jödödö anö amowa 7 fi jolaö däjä, cama a wa̦no wäyälewä bä nija Yai Bada tänö a wa̦fa wäyäö lä balöono wei tä nia bejedi cublou showadao. Yai Bada tänö tä lä jo̦yabole tä nia wawäblou showadao, cama a wa̦ juamobä ebä nija a lä cuno weinaja showawä. ⁸ Ö̦jö däjä, fedu jamö ya wa̦ lä ji̦lileno wei a wa̦ faö co̦oma. Abinaja wale nowa tama. —Modu u jamö, ulifi jamö a̦jele a ublaa lä lelequele nija wa fa icuicunö, oni si lä calobole si da dälö —wale nowa tama. ⁹ Ö̦jö cudeenö, a̦jele a nija ya fa icuicunö ya si wai oni nacalema. Abinaja wale nowa tama. —Si da dälä. Si waa da showadaalö. Ö̦jö si oninö wa busi nia co̦wamiblou. Ö̦jö ma cui bei wa caficönö wa si waö däjä, buu ubä cledediwä lä culenaja wa caficö nia cledediblou balöo —wale nowa tama. ¹⁰ Ö̦jö däjä, a̦jele imicö ja ya si oni fa dädalönö ya si walema. Buu ubä cledediwä lä culenaja ya caficö cublaliyoma ma cui, ya si fa sufalönö ya busi co̦wamiblaliyoma. ¹¹ Abinaja ya nowa tamamoma. —Yai Bada wa tä a̦no wäyäö co̦obä. Shomi bä bluca lä bälöblai bä nia lä taamaö wei wa tä a̦fa wäyäbä. Bluca bä bälöblawä lä yaiblai bä ma cui, bluca bä caficö a̦ lä bou wejei bä ma cui, bada bluca bä bälöblawä lä dodijii bä ma cui, ö̦jö bä nia bluca lä taamaö wei wa tä a̦fa nia wäyäö.

¹ Ö̦jö däjä, jai shälacawä a ju̦loco cuwä a ja wale dobälema, täbä labe lä wabaö wejei täbä lä culenaja. Abinaja ya nowa tamamoma. —Bei. Ei wabamodima ya lä jöböale tänö, iba yafi a labe da waba. Camiyä nija täbä nia lä dodoblamou wei bä maqueblamobä täcö ca̦i. Ö̦jamö camiyä nija bä möfe bolanö wale a̦fa Bada doblao lä tayoluu wejei, bä ca̦i bluca da mö. ² Ö̦jö ma cui tä yafi sibo lä ji̦coloblai wa tä nia wabaimi. Ö̦jö tä da daacö, ö̦jamö judio bä lä mlai bä bälöo läobä ya tä noshi malä ö̦jödabole. Belibo 42 a lublou showaa mlai ja, iba a shabono lä yaile jamö ö̦jö bä nia cuo läo. ³ Camiyä wale a̦fa wäyädiböbä ya cöbä nia lämabou. Ya cöbä nö nia wa̦lojomabou. Täbä nö wajäwä ö̦jöböamobä, camishi a̦loqui cäcö ö̦shö lä ya̦bou wejei cäcö ja cäcöbö didilanö, belibo 42 a lublou showaa mlai ja wale wa̦no nia taböö —a cuma. ⁴ Bita jamö Bada a yai lä nosiemou wei a lä cui, ö̦jö a wa̦ juamobä cäcöbö li. Cowa wacöbä shi̦i cublamobä täcöbä lä cuono wei cäcöbönö, ö̦jö cäcöbö yai jömamoma. Oliba bolacabö ficöbä ca̦i lä cuono wei ficönö, inaja showawä. ⁵ Cäcöbö famimabeje cäcöbö nabä icuoje däjä, bei cäcöbö caficö jamö cowa wacöbä fablou, cäcöbö nofi lä wa̦libou wejei bä mö watäblamobä. Cäcöbö famimaö lä bufio wejei bä lä cui, inaja bä taamamobä bä li, bä shämobä. ⁶ Yai Bada a wa̦no wäyäböbä cäcöbö läo showao däjä, cäcöbö nö quiliaö dodijiobä cäcöbö nö wa̦lojomabou. Judu mösö wejemaboböö dao, maa a quei mlaobä. Mau ubä ca̦i i̦yäamaböö dao. Yanowamö täbä lä bälöblai, jödödöwä tä wayu shomitawänö bä nö ca̦i bleaamaböö dao. Inaja täbä taamaböö bufi doblao ja, bä taamaböö showadaobä cäcöbö. ⁷ Yai Bada etä a̦ wäyäböö jödödöblou däjä, yalo waiteli a nia ishou. Täca fe jolocoa lä mlabodi jamö a cuoma a fa fabonö, cäcöbö nabä fa quealunö, ö̦jö a nö nia shino yai wa̦lojaö ayao. Cäcöbö nia shäö. ⁸ “Ei bä shino yai lojode”, bä nofi lä tabolajei bä shabonobö jamö, ö̦jamö cäcöbö nia nomawä blaaö. Fii balitama defi jamö cama Bada e lä shäleno wejei jamö showawä. Sodoma ö̦jö a wa̦fa shabono yädämabou ja̦loaöje, Ejido a wa̦fa ca̦i. ⁹ ¿Ö̦jö tawä? Ö̦jamö cäcöbö nomawä blabou showaoje däjä, 3 tä mö fa dödölönö, ai tä mö jalua fa co̦lunö, motoca a yo̦loloblou co̦o ma cui cäcöbö nia nomawä mödii buoje. Bä mamo lä showale bä nija, bluca bä shomi lä bälöblai bä nia mashi coyocomou. Bluca bä yaiablalou lä nodiaö wei bä ca̦i. Bluca bä caficö a̦ lä bou wejei bä ca̦i. Bluca bä bälöblawä lä yaiblai bä ca̦i. Cäcöbö nomawä didiaö mlaobeje bä a̦ nia lämou. ¹⁰ Cäcöbö shälei ja, bita jamö täbä lä bälöblai bä bufi nia bluca doblalou. Bä shi nia jaliblalou. Bä nia dobäyou. Yai Bada a wa̦no wäyälewä cäcöbö lä cuinö, bä nö bleaamaböma cudeenö bä bufi nia yai doblalou. ¹¹ ¿Ö̦jö tawä? Ö̦jö ma cui bolacabö tä mö fa dödölönö, ai tä mö jalu co̦wä ja motoca a yo̦loloblou co̦o däjä, Yai Bada tä fö̦shöacönö cäcöbö demidamaö co̦layoma. Cäcöbö ubladou co̦oma. Ö̦jö däjä cäcöbö lä möno wejei, bä yai quilia fe balojolaliyoma. ¹² Ö̦jö däjä fedu jamö a wa̦ i̦cali ji̦libölema. —Cäcöbö da jabo. Äyämö cäcöbö da ösöima —a cuma. Ö̦jö däjä cäcöbö nofi lä wa̦libono wejei bä mamo mötale ja, cäcöbö ösölayoma, ölajashi a bada jamö. ¹³ Cäcöbö ösölayono wei ja, ulifi a bada blösö blösomou nö quiliaö nodiblou showadalayoma. A shabono bada wa̦lidiblou fa jälonö, ai bä yafi bluca blälälaliyoma. Yanowamö 7.000 bä shäblamolayoma. Bä lä feiblaliyono wei bä quilia fa dodijilalunö, Yai Bada tä fedu jamö lä culadi a wa̦fa doblao wäyämaje. ¹⁴ ¿Ö̦jö tawä? Yai Bada tänö täbä nö nia lä beblalamano wei, ö̦jö 2 tä li cuoma. Täbä nö bleaamaö co̦obä, moli tä nia taö co̦oma. ¹⁵ Ö̦jö däjä a̦jele 7 a lä cuinö, amowa fi jolaö fa co̦onö, fedu jamö bluca bä a̦ i̦cali ji̦lioma. Abinaja bä cuma. —Yai Bada bäma a nofi lä Badabole a lä cui, yanowamö täbä nijamö a dodijidawä yai bälöobä etä cublaliyo lä cufe. A shömabä a lä yaileno wei sho cäcöbö yai nosiemou shi wa̦libä —bä cuma. ¹⁶ Ö̦jö däjä Yai Bada tä ajede jamö, 24 bä bada döcäo lä yädäono wei bä lä cui, Yai Bada tä cotä jamö bä möfe fa boalunö a wa̦fa Bada doblao tamaje. Bada bä döcäobä täbä ja bä döcäo lä yädäono wei, ö̦jö bä cuoma. ¹⁷ Abinaja bä cuma. —Bada wa lä bufiblamou wei, wa shino lojode lä ayai wa lä cui nija yamacö bufi a̦fa doblalou wäyämobä yamacö a̦. Jaba däjä wa cuo fa showaonö, wa cua lä showale. Cafä wa nö yai lä wa̦lojaö wei wa lojode fa damolalunö, fei däjä cafä wa yai Bada läobä wa cuquema. Ö̦jö cudeenö, yamacö bufi doblalou. ¹⁸ Bä bälöblawä lä yaiblai bä wa̦yoamou ma bäle, cafä wa nö wa̦lowä lä jushuo wei tä yai wawäblaliyoma. Täbä bluca lä nomablono wei, cafänö wa bä jömabä tä fei däjä cublaliyoma. Afä wa bä ca̦i dobäbä. Wa nosie juamobä wa wa̦no lä wäyäno wejei bä lä cui, wa bä nia dobäö. Wa nö quili lä tano wejei bä ca̦i. Bä a̦fa lojode lä wäyäno wejei bä ma cui, bä a̦fa lojode wäyäno lä mlajei bä ma cui, inaja showawä afä wa bä nia bluca dobäö cuaaö. Bita jamö täbä mö bluca lä watäano wejei bä lä cui, fei däjä cafänö wa bä mö nia watäblaö —bä cuma. ¹⁹ Ö̦jö däjä, fedu jamö Yai Bada etä yafi yoca fa caloblalönö, cama etä yafi u̦eshi jamö Yai Bada a wa̦no oni lä didile defi ca damolaliyoma. Madula a ca̦i wacö blada bladamoma. Täbä a̦ bluca ca̦i mashiquiwä ji̦lioma. Ya̦lu a wa̦ ca̦i faö nö quiliama. Ulifi a ca̦i bada blösö blösömoma. Bleyula bä ca̦i nö bada blalölou nö quiliama.

¹ Ö̦jö däjä, tä nia lä cublou wei tä jömabä, judu möso jamö ai tä nö bada quilijiwä bädaledayoma. Suwä a wawälayoma. Motoca a ja a didioma. Belibo a jamö mamicö döcäoma. Shidicali 12 bä yojoboma. ² Suwä shöbönabö a cuoma. Bä ijilubö e tablaö bufio yalo, i̦cali a si̦lalamoma. ³ Ö̦jö däjä, ai tä nö quilijiwä damoa nomöjöa co̦laliyoma. ¿Ö̦jö tawä? Yaitawä täcö bada wacä wawälayoma. 7 febä cuoma, 10 bei yo̦labä ca̦i. Bei febä jamö, bada täbänö bä lä yojobou wejei täbä wai 7 yojoblamoma. ⁴ Bei cäcö shinanö, judu mösö jamö bä shidicali lä culadi bä mashi fa yashishiblalönö, bita jamö bä blälämalalema, bei cäcö shinanö. Ö̦jö däjä, suwä a ninimobä jamö cäcö icuquema, bä ijilubö e tablaö däjä a sufaö nocao showadaobä. ⁵ Ö̦jö ma cui, bä ijilubö wa̦lo e fa tablalönö, Yai Bada tänö a jucälema. A lä döcäo wei täcö jamö a ajedelema. Ö̦jö a ijilu lä cui, bluca bä bälöblawä lä yaiblai bä nosiemabä a cuoma. A wa̦ nia lojodoama. Duo shibä judenö, jaboca bä lä̦cashiblamaö si lä ijejeinaja bä nia taamama. ⁶ Ö̦jö däjä, ulifi bloque jamö a suwä doculayoma, a nofi yashuobä, Yai Bada tänö tä ulifi nofi tabou lä waiquiono wei jamö. Belibo 42 a lublou showao mlao däjä, ö̦jamö a nia bayeliblamoma. ⁷ Ö̦jö däjä fedu jamö bä isholayoma. Miqueo a wa̦fa a̦jele bada lä culenö, cama ebä a̦jele ca̦i fa cuonö, yaitawä täcö nabä quequemaje. Yaitawä cama täcönö bä ca̦i lä cuono wei bä yai sho, bä ca̦i ishou mö feduoma. ⁸ Bä ishou mö feduoma ma cui bä nö fa blemalalöjenö, fedu jamö bä cuobä etä cuo majöonomi. ⁹ Ö̦jö däjä Yaitawä täcö bada shäyäbalemaje, täcö cuo lä balöono wei täcö lä cui. Fecula bada täcö a̦fa jilou. Sadanasi täcö a̦fa ca̦i jilou. Jödödöwä bä lä bälöblai bä lä mölamaö wei täcö. Cama täcö ma cui, cama ebä ma cui, bita jamö ö̦jö bä bluca shäyäbalemaje. ¹⁰ Ö̦jö däjä fedu jamö ai ya wa̦ bada ji̦lilema. A wa̦ i̦cali faö ja, abinaja a cuma. —Ya̦cumö Yai Bada tänö cama ebä nia yai lä jucäaö wei etä cublaliyoma. Cama etä lojodenö a nia bälöo dodijio. A shömabä a lä yaileno wei a nia Bada lämabou. Camiyä ai bämacö a̦fa showadi lä tadino wei a Sadanasi lä cui, a malä shäyäbaleno wei. Yai Bada bäma a lä bufibou wei a lä cui nija, jalu däjä ma cui, didi däjä ma cui, showadi bä a̦fa dobloimi wäyädima. ¹¹ ¿Ö̦jö tawä? Oweja a wa̦fa ocalo lä jilamou wei i̦yäbönö, fecula bada a nö bleaamamaje, bejedi tä a̦ lä wäyäno wejei tä a̦ ca̦inö. Bä shämobä tä ma cui ja bä quilino malä mlai. ¹² ’Fedu jamö wamacö bluca lä culadi, bä bufi da doblalo, ö̦jö lä —a cuma—. Ö̦jö ma cui, bita jamö wamacö lä cublai, modu ubä jamö wamacö bluca lä cublai, wamacö nö bleaabä cätä. Cafä wamacö nija fecula bada a jushuo ca̦i itolayou lä cufe. Täbä yabäcabä etä nö nia dedejoimi waiquiwä cudeenö, a nö li wa̦lowä jushuo —a cuma. ¹³ Bita jamö yaitawä täcö shäyäamou fa damolalunö, bä ijilubö wa̦lo a lä tablaleno wei a nabä suwä cadidou showadaoma. ¹⁴ Ö̦jö ma cui, ulifi bloque jamö a suwä yäfälöbä, mojomö majecö bada ja, a dobämolayoma, yaitawä täcö ja a docubä. A nia lä bayeliblamono wei jamö, belibo 42 a lublou showao mlao däjä, a nofi nia yashuo balöoma. ¹⁵ Suwä a docufälöbä jamö, ö̦jö yaitawä täcö lä cuinö, mau bada u lä culenaja u joblalema, a nia fa bacayuafälönö. ¹⁶ Ö̦jö ma cui mashita anö a suwä bayeliblaö lälayoma. Mashita a caficö fa leleicunö, yaitawä täcönö mau u lä joblaleno wei u sufaa mö balema. ¹⁷ Ö̦jö däjä, suwä nija täcö nö wa̦lowä fa jushudalunö, bä ijilubö ai ebä nija a ishou mö juma, Yai Bada tänö tä tamaö lä bufii wei tä a̦ nofi lä cadidibou wejei bä lä cui nija. Jesucristo a wa̦fa lä wäyäö wejei bä nija ca̦i. ¹⁸ Modu u casö jamö täcö ublaaliyoma.

¹ Modu u jamö yalo ya waiteli faö dalalema. Bei yo̦labä 10 cuoma, bei febä 7. Bada täbänö täbä lä yojobou wejei täbä lä cui, bei yo̦labä jamö 10 täbä wai cublamoma. Bei bä fe jamö, oni oni ebä cublamoma, Yai Bada tä nö lä waiblaö wejei täbä a̦ oni. ² Yalo ya waiteli lä dalaleno wei a lä cui, qui̦danali bä lä culenaja a cuoma. Bei mamicö lä cui, däbä bä mamicö lä culenaja mamicö cuoma. Öla bä caficö lä culenaja caficö cuo mö feduoma. Ö̦jö däjä yaitawä täcö lä cuinö a yädämalema. A lojode cublou mö feduobä etä jöbäquema. Cama etäcö jamö täcö döcälanö, täcö nosiemou lojode lä culenaja a cublou mö feduobä, a dobälema. ³ Ö̦jö yalo waiteli ai fe ja, dusi bada ya etä bada dalalema. Jai a nö nomaa cadidia showadalayobö etä mömou cuoma ma cui, a jaloa co̦a fe fa yadilönö, bita jamö bä bluca lä bälöblai, ö̦jö nija bä bufi fa möaanö, cama nija bä bufi cadidioma. ⁴ Yalo waiteli a nö wa̦lojomaboma yalo, yaitawä täcö nija bä möfe bolanö, täcö a̦fa bada doblao tamaje. Yalo waiteli a ma cui, ö̦jö nija bä möfe bolanö, a wa̦fa bada doblao ca̦i taö mö feduoje ja, abinaja bä cuma. —Cafä yalo waiteli wa lä culenaja, ai a cua bädaami. Cafä nija bä nö nia lä wa̦lojaö wei bä cuami —bä cuma. ⁵ Ö̦jö däjä yalo waiteli a wa̦ fabä etä jöbämoquema. A wa̦ faö ja, cama a nofi doo fa ayaonö Yai Bada tä nö waiblama. ¿Ö̦jö tawä? Belibo 42 a lublou showaa mlai ja, a nosiemobä etä jöbämoquema. ⁶ Yalo waiteli a wa̦ faö ja, Yai Bada tä wafäma. A nö ca̦i waiblama, fedu jamö cama ebä lä culadi bä ca̦i. ⁷ Yai Bada ebä nabä queobä a ca̦i dobämolayoma, bä nö bleaamabä etä ca̦i. Bluca bä yaiablalou lä nodiaö wei bä nija a bada läobä etä ca̦i jöbämoquema, shomi bä bluca lä bälöblai bä nija ca̦i. Bluca bä caficö a̦ lä bou wejei bä nija ca̦i. Bluca bä bälöblawä lä yaiblai bä nija ca̦i. ⁸ ¿Ö̦jö tawä? Bita jamö bä yanowamö bluca lä cublai bä lä cui, ö̦jö nija bä möfe bolanö a wa̦fa nia bada doblao taöje. Bä nia ba̦limi lä cudio wei, Yai Bada tänö bä a̦fa lä onibole si ja bä a̦fa lä cule, ö̦jö bä lä cui bä nö bayeli nia shino nacaomi ayao. Ulifi a tablamou showao mlao däjä, ö̦jö bä a̦fa bluca tabou showadaoma. Ö̦jö si lä cui, Oweja a wa̦fa ocalo lä jilamou wei, ö̦jö esi li oni, a lä shämono wei a lä cui. ⁹ Bä yömöcacö lä walalai bä yömöca dao dodijiobä. ¹⁰ A o̦cama öböbobeje a waiquiwä ja, a nia o̦cama öböbouje. Sibala namo mö feduduwä anö a shämobä a waiquiwä ja, sibalanö a nia shämou. ¿Ö̦jö tawä? Yai Bada ebä bejedimolanö ebä nö wa̦lojaö fe yadiobä bä li. ¹¹ Ö̦jö däjä ya tä fa mönö, mashita jamö yalo ai ya waiteli faö dalalema. Ö̦jö a lä cui bolacabö yo̦lacö cuoma, oweja ijilubö yo̦lacö wai lä culenaja showawä. Yaitawä tä nö quiliabä, tä a̦ faö nö lä cuobö weinaja a wa̦ faö cuoma. ¹² ¿Ö̦jö tawä? Yalo waiteli a jaba lä wawälayono wei jamö a culanö, a wa̦ bayeliblaö. Jaba a lä cui a wa̦ ji̦limamou blaucou lä culenaja, ö̦jö a wa̦ ca̦i ji̦liaö blaucaö mö feduaje. Bita jamö bä yanowamö bluca lä bälöblai, ö̦jönö bä nosiemaö. Bä möfe bolanö, yalo a waiteli jaba lä cui a wa̦fa bada doblao tabeje bä nosiemaö, a bada jaloa fe lä yadilayono wei a lä cui. ¹³ Ö̦jönö tä nö lä quilijii tä wawämaö daö fe balojowä. Fedu jamö wacö quemabä tä ma cui, yanowamö täbä mamo bluca showao däjä tä taö. ¹⁴ A lojodoablalobä a dobämolayoma cudeenö, yalo waiteli a jaba lä cuono wei jamö a culanö, tä nö lä quilijii tä bluca wawämaö. Ö̦jö tänö, bita jamö bä yanowamö lä bälöblai bä mölamaö. Yalo a waiteli jaba lä wawälayono wei a nö idubö tablabeje bä nosiemaö, sibala a namo mö feduduwänö a fa shämolunö, a demia co̦a fe lä yadilayono wei a lä cui. ¹⁵ Ö̦jö däjä yalo a waiteli faö lä co̦ono wei a lä cui, cama fö̦shöacönö a nö idubö demidamabä etä jöbämoquema, yalo waiteli a jaba lä cuono wei a nö idubö lä cui. A wa̦ nö idubö famabä etä ca̦i jöbämoa showadaquema. Ö̦jö a wa̦ nö idubö ja, yalo waiteli a jaba lä cuono wei a wa̦fa bada doblao taö lä mlajei bä lä cui, bä shämaö bufibä a wa̦ nö idubö famama, ö̦jö a nö idubö ja bä möfe boo lä mlai bä lä cui. ¹⁶ Yalo a waiteli wawäö lä co̦ono wei a lä cui, abinaja a ca̦i cuaaö. Yanowamö täbä bluca oniblamaö bufii. Bä lä lojode wei bä ma cui, bä lojode lä mlai bä ma cui, bä oniblamaö. Bä lä madofibö wei bä ma cui, bä lä jo̦li wei bä ma cui, bä nosie juamobä bä lä tabou wejei bä ma cui, bä tabou lä mlajei bä ma cui, inaja showawä. Jayu boco jamö bä imicö oniblamaö dao. Bei bä wäyäcu ca̦i oniblamaö dao. ¹⁷ Bä oniblamou lä mlai bä lä cui, blada bä ja täbä nia ca̦i madofi nomöjöamaimi. Madofi bä ma cui ja, blada bä nia ca̦i däamaimi. ¿Ö̦jö tawä? Bä nia lä oniblamou wei, yalo a waiteli jaba lä wawälayono wei bei a wa̦fa oni tamou dao. Bei a wa̦fa oni nowa lä wabamou wei tä ca̦i número tamou dao. ¹⁸ ¿Ö̦jö tawä? Wa bufi jaducuo mlao däjä wale a̦ nia ji̦liaö doblaimi. A bufi lä dao wei a lä cui a bufi dayäobä, ö̦jö lä, a wa̦fa oni nowa lä wabamou wei tä número ja, a bufi jaducuobä. Ö̦jö tä oni lä cuinö, yanowamö tä jömaö malä cui. 666 etä número cua.

¹ Ö̦jö däjä Siono cäcö jamö ya tä fa mönö, Oweja a wa̦fa ocalo lä jilamou wei ya ublaa dalalema. Cama 144.000 ebä ca̦i cuoma. Ö̦jö ebä lä cuinö, bei bä wäyäcu jamö cama a wa̦fa oni tabomaje, bä Fö̦ö e a̦fa ca̦i oni showawä. ² Fedu jamö ai ya wa̦ ca̦i bada ji̦lilema. Ö̦jö a wa̦ lä cui, bola bä a̦ bada ji̦limou nacli lä culenaja a wa̦ ji̦limamou cuoma. Ya̦lu a wa̦ ca̦i bada nacli lä culenaja showawä. Ya wa̦ lä ji̦lileno wei, amowa bei fibä nata lä jubamou wei bä a̦ lä culenaja a wa̦ cuoma. ³ ¿Ö̦jö tawä? Bada tä döcäobä etäcö mashi jamö bä culanö, amowa dude tä a̦ taöje, yaitawä 4 täbä fe lä fa̦yoono wei jamö. Bada 24 ebä ca̦i döcäo yädäo lä ajedeono wei jamö. ¿Ö̦jö tawä? Bita jamö bä lä cublai bä nija, Yai Bada 144.000 ebä nowa lä co̦maqueno wei bä lä cuinö, ö̦jö bänö tä a̦ li amowa shi̦lo taö daö ayaoje. ⁴ Ö̦jö bä lä cui, suwä bä nija bä shamiano lä mlai ö̦jö bei bä. Bä jubaö dao malä mlajei. Oweja a wa̦fa ocalo lä jilamou wei a lä cui, a juu ma bädao wei jamö ma cui ebä yauaö. Bluca bä lä bälöblai bä nijamö bä jaba nowa lä co̦wamamono wei, ö̦jö bä li. Yai Bada tänö bä nofi ibabou. Oweja a wa̦fa ocalo lä jilamou wei a ma cuinö bä nofi ca̦i ibabou. Nii bä jaba lä lalou wei, Yai Bada tänö bä nofi lä ibabou weinaja showawä. ⁵ Bä caficö a̦ jolemou lä mlai, ö̦jö bei bä. Bä a̦fa tamobä etä cua malä mlai. ⁶ Ö̦jö däjä ösö jamö a̦jele ai ya yäö dalalema. Bita jamö täbä jödödöwä lä bälöblai bä yömölabä, tä a̦ lä dodijidai tä a̦ ca̦i juma, täbä lä ba̦limiblamaö wei tä a̦ showawä lä cui. ¿Ö̦jö tawä? Bluca täbä yaiablalou lä nodiaö wei bä ma cui, bluca täbä caficö a̦ lä bou wejei bä ma cui, bluca täbä shomi lä bälöblai bä ma cui, ö̦jö bluca täbä bälöblawä lä yaiblai bä nia jödödöwä yömölaö cuaama. ⁷ A wa̦ i̦cali faö ja, abinaja a̦jele a cuma. —Yai Bada tä nö quili da taje. A wa̦fa Bada lojode ca̦i da taje. Täbä bluca lä bälöblai täbä jömabä, etä malä cublalufe. Wamacö möfe fa boalunö a wa̦fa Bada doblao da taje. Judu mösö ma cui, bita a ma cui, modu ubä ma cui, ubä fe lä jojoblai ubä ma cui, ö̦jö täbä bluca tablalema —a cuma. ⁸ Ö̦jö a nodi jamö ai a a̦jele wawäblou jälayoma. Ö̦jö a a̦jele wawäblou lä jälayono wei a lä cui, abinaja a cuma. —¡Bä waicoma! ¡Bä waicoma! Babiloniateli bä a̦fa lojode lä wäyäno wejei bä waicoma. Cama bä nofi lä jushublalou wei tänö, bluca bä bälöblawä lä yaiblaö bä lä cui bä yaclämalemaje, uba nashiwä toubänö täbä shi wa̦limaö lä cuaaö wejeinaja showawä —a cuma. ⁹ - ¹⁰ Ö̦jö a nodi jamö, ai a a̦jele wawäblou co̦layoma. Ö̦jö a̦jele 3 a lä cui, a wa̦ i̦cali faö ja, abinaja a cuma. —Yalo a waiteli jaba ma cui nija, ö̦jö a nö idubö ma cui nija, ö̦jö cäcöbö nija bä möfe bolanö, cäcöbö a̦fa bada doblao taö dicooje ja, Yai Bada tänö ö̦jö bä nö nia bleaamaö. Cama etä oninö bä wäyäcu ca̦i oniblamou dicoo ja, bä imicö ca̦i oniblamou dicoo ja, inaja showawä bä nö nia yai bleaamaö. Uba nashiwä toubä fe lajoblaö lä cuaaö wejeinaja, Yai Bada tä nö wa̦lowä lä jushuo wei tä ma cui, inaja showawä tä fe lajoblamaö lä cuimadi. A bufi nö asimobimi waiquiwä cudeenö, cama nashiwä e toubä mö jude ma cui, bä fe nia coamaö fe yadio. Cowa wacöbä ma cui ja, cowa yaitawä nacli wacöbä ma cui ja, bä nö nia yai bleaamaö. A̦jele bä lä yaile jamö bä nia inaja taamaö, Oweja a wa̦fa ocalo lä jilamou wei a lä cule jamö showawä. ¹¹ Bä nö bleaabä jamö, ö̦jö bä wa̦queshi nia tolucudio shi wa̦lii. Bä yanöcöblou balöa mlai ja, showadi bä nö nia shino bleaadii. Yalo a waiteli jaba ma cui nija, a nö idubö ma cui nija, ö̦jö cäcöbö nija bä nö bayeli nacaobä bä möfe lä boo wei, inaja bä nia taamaö, ö̦jö etä a̦fa oninö bä ca̦i lä oniblamou wei —a cuma. ¹² ¿Ö̦jö tawä? Yai Bada ebä lä cui, bä nö wa̦lojaö fe yadiobä, ö̦jö lä. Ö̦jö bä lä cuinö, Yai Bada tänö tä tamaö lä bufii wei tä a̦ nofi cadidibouje. Jesús a nofi mölabou fe yadioje. ¹³ Ö̦jö däjä, fedu jamö ai ya wa̦ ca̦i bada ji̦lilema. Abinaja wale nowa tama. —Ei ya̦ wa lä cui, tä a̦ da onicö. Bada tä Jesucristo nija bä yädäo yalo bä shäöje ja, fei däjä bä bufi nia yai doblalou —wale nowa tama. Yai Bada tä a̦ Bufi faö ja, abinaja a cuma. —Bä bufi doblalobä lä. Bejedi lä. Bä nö nia bleaaö co̦daaimi. Bä lä dodijaö wei bä nö nia ö̦jöböamou malä showaodayou wei —a cuma. ¹⁴ Ö̦jö däjä ya tä möö co̦oma. ¿Ö̦jö tawä? Ölajashi au ya fa dalalönö, jai yanowamö a wa̦lo cuwä, ö̦jamö ya döcäa dalalema. Olo a liyäjäwä yojoboma. Bei imicönö sibala iyodowä a namo showaboma. ¹⁵ Ö̦jö däjä Yai Bada etä yafi jamö a̦jele ai ya faö dalalema. Ölajashi a jamö a lä döcäono wei nija, a wa̦ i̦cali falayoma. Abinaja a nowa tama. —Mija a ca̦i sibala quea da showadaicu. Nii bä tamou lä culenaja wa täbä tabä tä cublou waiquia lä cule. Bita jamö täbä lä cublai, wa bä fei däjä tabä cäbä —a nowa tama. ¹⁶ Inaja a nowa tama yalo, ölajashi jamö a lä döcäono wei a lä cuinö, bita jamö a ca̦i sibala quea showadaquema. Bita jamö täbä lä bälöblai bä nia lä tano wei bä taö showadaoma, nii bä lä tamou weinaja showawä. ¹⁷ Ö̦jö däjä fedu jamö, Yai Bada etä yafi jamö, ai ya a̦jele faö daa co̦lalema. Nii bä taöje ja bä nofi sibala lä yaibou wejei a bada namo tabou mö feduoma. ¹⁸ Ö̦jö däjä ai a a̦jele wawälayoma. Yai Bada nija täbä lä dodoblamou wei bä maqueblamobä täcö ajede jamö culanö a falayoma. Ö̦jamö cowa wacö lä nowamano wei a a̦jele cuoma. Sibala iyodowä a namo lä tabono wei a nija a wa̦ i̦cali fama. Abinaja e cuma. —Bita jamö, mija a ca̦i sibala quea da showadaicu, uba totobä lä cule jamö. Uba bä wacä lä yaloloi, bä bäyäö da showadao. Bä bäyämamobä bä wacä malä waiquii —e cuma. ¹⁹ Inaja a nowa tama cudeenö, bita jamö a ca̦i sibala quea showadaquema. Sibala e fa yalejedalönö bä manödaö cuaaö showaodama. Bä nia lä calucaö wejei jamö bä löblaama. ¿Ö̦jö tawä? Yai Bada tä nö wa̦lowä lä jushuo wei a waitelimou bufiobä jamö bä löblaama. ²⁰ Shabono a sibo jamö bä uba fa löcönö bä calucamoma. Bä fa calucamonö, i̦yä i̦yä bä bada fablou nö quiliama. Bä fa caläfälönö, yanowamö a fe yaläjäwä nö lä wädöobö weinaja, bä i̦yä i̦yä fe wädöblaliyoma. Mau u caläö blajaö lä culenaja, i̦yä i̦yä bä blajaa culayoma.

¹ Ö̦jö däjä tä nia lä cublou wei, judu mösö jamö tä nö lä quilijii ya tä daa co̦lalema. Tä nö yai lojode quiliaö dodijioma. A̦jele 7 ya bä dalalema, yanowamö täbä nö nia bleaamaö lä co̦ono wejei. Wayu wayu 7 bä showabomaje. Ö̦jö däjä, “Inaja lä waiquiwä”, Yai Bada a nia cudoma. Ö̦jö 7 bä wayunö täbä nö bleaamaö fa jödödöblalöjenö, a nö wa̦lowä lä jushuo wei etä nia mladou showadaoma. ² Ö̦jö däjä, jai modu u cuwä ya tä si bada flacajawä blaa dalalema. Tä mömou walalaoma. Jai cowa wacöbä coyocowä tä mömou ca̦i cuoma. Ö̦jö modu u lä walalaono wei u casö jamö, yanowamö ya bä ublajaa dalalema. Yai Bada amowä e fibä showabomaje, bei fibä nata lä jubamou wei fibä lä cui. Yalo a waiteli jaba lä cui a nö ca̦i idubö lä cule, ö̦jö nija bä nö wa̦lojaö lä ayaono wei bä li cuoma, bei a wa̦fa número onibono lä mlajei. ³ Yai Bada a nosie juamobä a Moisesi lä cuinö, ö̦jönö tä a̦ amowa taö lä balöono wei tä a̦ taö co̦omaje, Oweja a wa̦fa ocalo lä jilamou wei tä a̦ ca̦i lä tano wei tä a̦ lä cui. Abinaja bä amowabö a̦ cuma. Cafä Yai Bada wa Bada lä cuinö, wa nö yai lä wa̦lojaö wei wa lä cuinö, wa tä lä taö wei tä nö bluca lojode quilijiwä. Bä bälöjou lä yaiblai bä nija wa Bada läo shi lä wa̦lii wei wa lä cui, showadi wa dodijaö. Showadi wa ca̦i bejedimou. ⁴ Bada tä. Bluca täbä nija wa wa̦fa nö quili tamobä wa. Wa wa̦fa yai lojode tamobä wa. Cafä yami wa yaia malä ayale. Wa lä bejedimou wei tä damolaliyoma yalo, cafä nija bä möfe bolanö, bluca bä bälöblawä lä yaiblai bänö wa wa̦fa nia Bada doblao tayoluuje. Einaja bä amowabö a̦ cuma. ⁵ Ö̦jö ya tä daa fa balölalönö, ai ya tä möö co̦oma. Fedu jamö Yai Bada ya etä yano dalalema. Yano yai nowamaö lä dodijio wejei ya e yano ca̦i caloa dalalema. ⁶ Yai Bada etä yano yai nowamaö lä dodijio wejei jamö bä culanö, a̦jele 7 bä lä cuinö, wayu wayu 7 bä ca̦i falayomaje. Camishi shuducaje cäcö ja bä didioma, cäcö au yai lä dodijidai cäcö ja. Ai cäcö jalebomaje. Olo bä mömou fla̦lajawä lä culenaja cäcö cuoma. ⁷ Ö̦jö däjä Yai Bada etäbä yaitawä 4 lä cuono wei ai a lä cuinö, ö̦jö a̦jele 7 bä nija, 7 toubä nashiwä befi ca̦i fe lajowä jöbäaquema. Toubä lä didiono wei, olo bä ja täbä cuoma. Ö̦jö toubä nashiwä lä cuinö, Yai Bada tä nö wa̦lowä lä jushuo wei tä jömamoma, tä cudia shi lä wa̦lile. ⁸ ¿Ö̦jö tawä? Yai Bada etä yano yai nowamaö lä dodijio wejei jamö, wa̦queshi a bada cublaliyoma. Cama a lojodenö a shi̦i ca̦i fa cualunö, wa̦queshi a bada sublenö a yano comablaliyoma. Ö̦jö cudeenö a̦jele 7 bä lä cuinö, 7 bä nö nia lä bleaamano wejei tä jödödöblou showao mlao däjä, ö̦jö yano jamö ai täbä lucäö doblonomi.

¹ Ö̦jö däjä, yano yai nowamaö lä dodijio wejei yano jamö, ai ya wa̦ bada ji̦lilema. I̦cali a wa̦ faö ja, abinaja a̦jele 7 bä lä cui bä nowa tama. —Bei. Bä da alufälö. Yai Bada tä nö wa̦lowä lä jushuo wei tä jömamobä toubä 7 lä cui, bita jamö toubä da löaboduje —bä nowa tama. ² Inaja bä nowa tama cudeenö, a̦jele jaba a lä cuinö, ulifi jamö e toubä ca̦i fa alunö e toubä löblalema. E toubä fa löblalönö, yalo waiteli etä oninö täbä lä oniblamono wei bä lä cui, bä nö bleaaö fe balojooma, ö̦jö a nö idubö nija bä möfe bolanö a wa̦fa bada doblao lä tano wejei bä lä cui. Bä nö walacasibö nö ji̦tali falaliyoma. ³ A̦jele 2 a lä cuinö, modu u ja cama e toubä li löa mö fa fedubalönö, ubä bluca i̦yä blaucuolaliyoma. Nomawä bä i̦yäbö lä culenaja ubä fa cublalunö, modu u jamö bä bluca lä juno wei bä bluca nomalaliyoma. ⁴ A̦jele 3 a lä cuinö, mau ubä jamö cama e toubä löa mö fedubalema, mau ubä fe lä jojoblai jamö ca̦i. Ö̦jö ubä ma cui ubä bluca ca̦i i̦yäolaliyoma. ⁵ Ö̦jö däjä mau ubä lä nowamaö wei a a̦jele lä cui, Yai Bada nija a wa̦ fama. Ya wa̦ ji̦lilema. Abinaja a cuma. —Cafä yami wa lä yaile wa lä cui, wa bä nö lä bleaamafe tä ja wa bejedimou. Jaba däjä wa cuo fa showaonö wa cua lä showale wa. ⁶ Afä bä lä cui bä nö i̦yä blemalalemaje. Cafä wa wa̦no wäyälewä bä nö i̦yä ca̦i blemalalemaje. Ö̦jö cudeenö, fei däjä i̦yä i̦yä bä ja, wa bä fe coamaö nomöjöa. Inaja wa bä taamabä bä li waiquiwä —a cuma. ⁷ Ö̦jö däjä, Yai Bada nija täbä lä dodoblamou wei täbä maqueblamobä täcö jamö, ai ya wa̦ ji̦lilema. Abinaja a cuma. —Awei. Cafä Yai Bada wa Bada lä cui, wa nö yai lä wa̦lojaö wei wa lä cui, wa bä nö lä bleaamafe tä ja wa bejedimou. Wa cadidou showadao —a cuma. ⁸ Ö̦jö däjä a̦jele 4 a lä cuinö, motoca a ja e toubä löquema. Toubä fa löcönö, yobli yobli tänö täbä si ö̦shöbä, motoca a nija etä jöbömoquema. ⁹ Bä si ö̦shöblou yalo, Yai Bada tä wafäblamaje, cama a lojodenö bä nö bleaama yalo. ¿Ö̦jö tawä? Bä doblou lä mlai tä ja bä bufi mö yabajadonomi. Yai Bada a wa̦fa ca̦i doblao wäyänomije. ¹⁰ Ö̦jö däjä a̦jele 5 a lä cuinö, yalo waiteli a döcäobä etäcö jamö e toubä löquema. Toubä fa löcönö, yalo waiteli anö cama ebä ca̦i lä cuono wei jamö tä mö bada dödöblaliyoma. ¿Ö̦jö tawä? Bä nö ninili bleaaö fe balojoa ja, cama bä aca wädöobloma. ¹¹ Bä nö ninili bleaaö yalo, Yai Bada tä fedu jamö lä culadi tä wafäblamaje, bä walacasi wayuo showaoma cudeenö. Bä doblou lä mlai tä ja, bä bufi mö ca̦i yabajadonomi. ¹² A̦jele 6 a lä cuinö, Euflade u bada jamö e toubä löbalema. Toubä fa löbalönö u wejedou showalayoma, ö̦jö u wanoca nojoli jamö bä wayu ca̦i juimabeje, motoca a lä faö wei jamö bä lä bälöle bä bada lä cuinö. ¹³ Ö̦jö däjä ya tä fa mönö, yaitawä täcö caficö jamö, fecula wa̦lidiwä ya faö dalalema. Yalo a jaba waiteli lä cui, ö̦jö caficö jamö ai. Yalo waiteli ai a lä cui, ö̦jö caficö jamö ai. ¿Ö̦jö tawä? Ö̦jönö, yalo waiteli jaba lä cui a wa̦no shino wäyäma yalo, a wa̦no jole jole wäyälewä a wa̦fa jilamoma. Ö̦jö bä caficö ja fecula wa̦lidiwä bä lä fano wei bä lä cui, yoyo bä mömou wa̦lidiwä lä culenaja bä cuoma. ¹⁴ Fecula bada ebä malä cuono wei. ¿Ö̦jö tawä? Fecula bada a mayo dablamabeje, tä nö lä quilijii tä ca̦i bluca wawämamaje. Ö̦jö bä fecula lä cuinö, bada jödödöwä bä lä bälöblai bä co̦ablaö cuaamaje. Yai Bada tä nö shino lä wa̦lojole a lä cuinö, täbä yanowamö yai jömaö lä bufio wei tä mö jalu däjä bä shäyobä. ¹⁵ Abinaja Jesús a malä cuno wei. —Bei. Shomi bä madofibö lä lämaö wejei bä ja̦toblou lä culenaja, inaja showawä camiyä ya nia cublou. ¿Ö̦jö tawä? Shinoco bä dablamou mlaobä, bä nia lä didio wei bä camishi ajedebolajenö bä la̦a lä showale bä lä cui, ö̦jö bä bufi nia shino doblalou, wale nö lä dabou wejei bä lä cui —a cuma. ¹⁶ ¿Ö̦jö tawä? Ö̦jö bä fecula 3 lä cuinö, bada bä fa co̦löjenö, bä wayu yododomaquemaje. Bä wayu lä yododoblaqueno wejei tä ulifi lä cui, ebleo cäficö a̦ ja, Amajedono tä a̦fa jilamou. ¹⁷ Ö̦jö däjä a̦jele jödödö a lä cuinö, toubä däa fa ösöjödalönö toubä löblalema. Toubä fa löblalönö, fedu jamö Yai Bada etä yano yai nowamaö lä dodijio wejei jamö ya wa̦ i̦cali ji̦lilema, Bada tä döcäobä etäcö ajede jamö. Abinaja a cuma. —Ö̦jö cä lä waiquiwä —a cuma. ¹⁸ Madula a wacö blada bladamou showadaoma. Täbä a̦ bluca ca̦i mashiquiwä ji̦lioma. Ya̦lu a wa̦ ca̦i faö nö quiliaö mö feduoma. Ulifi a ca̦i bada blösö blösömou nö quiliaö showadaoma. ¿Ö̦jö tawä? Yedu ja yanowamö täbä ma bälöono wei ma cui, inaja a ulifi bada blösö blösömou nö lä quiliano weinaja, moli ma cui tä ca̦i jaba dablamou cuo bädaonomi. ¹⁹ Babiloniateli bä a̦fa lojode lä wäyäno wejei bä shabonobö jamö, ulifi a bada fa blösö blösömolunö täcabä bada yacläoquema. Täcabä bada i̦clacaobä jamö, 3 bä shabonobö shelelea cublaliyoma. Ai täbä bälöblawä lä yaiblai täbä shabonobö bada ca̦i wäcäcälaliyoma. ¿Ö̦jö tawä? Yai Bada tänö Babiloniateli bä nowa tabou showaoma. Tä nö wa̦lowä lä jushudou wei tä lä cui tä coa jödödöamalema, uba nashiwä toubä jödödöblamaö fe lä yadio wejeinaja showadawä. ²⁰ Ulifi a blösö blösömou nö lä quiliano wei tänö, täbä ulifi bluca lä jo̦coblai täbä mlao showadaolaliyoma. Bei mabä bläläa fa showadaamalalönö, mabä ca̦i bada dablamou co̦daanomi. ²¹ Bleyula bä bada ma cui, judu mösö jamö culanö bä ca̦i bada shäyäjaö nö quiliadayoma. Yanowamö a jude lä culenaja bä jude cuwä, bä bada shäyäjaö nö quiliama. Ö̦jö bä bleyula nö quiliwänö täbä nö bleaaö fe fa balojoonö, Yai Bada a wafäblaö co̦omaje.

¹ Ö̦jö däjä, 7 toubä befi ca̦i lä däbono wejei bä a̦jele ai a lä cuinö, abinaja wale nowa tayoluma. —Jabo. A showadi lä dodoo wei a suwä da mö, Nofi Jushublalodimi a wa̦fa bada shabono lä yädämabole a lä cui. Mau ubä lä bayucube tä möamo ja bä shabonobö blaa. Ö̦jamö bä lä bälöle bä a̦fa lojode wäyäöje. ¿Ö̦jö tawä? Yai Bada tänö bä nö lä bleaamaö wei wa tä nia möö. ² Ö̦jö bä nija, bada bä bluca lä bälöblai bä joleblaloma. Uba nashiwä toubänö täbä shi wa̦limaö lä cuaaö wejeinaja, bä lä joleblalono wei tänö yanowamö täbä shi bluca wa̦li cuwä —wale nowa tama. ³ Ö̦jö däjä Yai Bada tä Bufinö wale lojodobou showao däjä, ulifi bloque a jamö wale bälaquema. Yalo waiteli wacä a jamö, suwä ya döcäa dalalema. Yai Bada tä nö lä waiblaö wejei tä a̦ oninö, a yalo waiteli onio nö mlaoma. Bei febä 7 cuoma, bei yo̦labä 10. ⁴ Wacä ushujuwä cäcö ja a suwä didioma, wacä mö jude cäcö ca̦i ja. Olo bänö a baushioma, maa mabä baushi nowa wai lä bluca wei mabä ca̦inö. Dobä bä nowa wai au lä bluca wei bä ca̦inö. Uba nashiwä toubä fe ca̦i lajowä däboma, olo bä ja tä lä cui tä ja. Ö̦jö toubä lä cuinö, a suwä doblou lä mlai etä jömamoma, Yai Bada tänö tä tamaö nofi lä wa̦libou wei etä lä cui. A showadi lä joleblalou wei etä showawä lä cui. ⁵ Suwä wäyäcu ja tä a̦ oni lä cuono wei, abinaja etä a̦ oni cuu yacläoma. “Babiloniateli bä lä cui ö̦jö ya, ya lä lojode wei. Bä showadi suwä lä dodoo wei bä lä cui, camiyä nija bä balalayoma. Bita jamö bä nofi lä jushublalou wei bä lä cui, inaja camiyä ya jaba li fa cuaanö bä li cuaaö nodiablalou”, tä a̦ oni cuma. ⁶ Ö̦jö ya suwä möö ja, ya shi wa̦li dalalema. Yai Bada ebä i̦yäbönö a shi wa̦lima, Jesucristo a nofi mölabou fe lä yadiono wejei bä lä shäalaleno wejei bä i̦yäbönö. Ya suwä möö däjä ya bufi ca̦i shädayaimoma ma cui, ⁷ abinaja a̦jele a lä cuinö wale nowa tama. —¿Wedi tabä bei wa bufi li shädayaimou cule? Ö̦jö suwä a lä cui nija wa bufi moyawäobä, ya etä a̦ nia wawämaö. A lä döcäo wei a yalo waiteli ma cui nija ya etä a̦ nia ca̦i wawämaö mö feduo, bei febä 7 lä cule, bei yo̦labä 10 ca̦i. ⁸ Yalo wa waiteli lä dalalufe, a demi cuoma ma cui a nomalayoma. A mö nia yai lä watäaö wei jamö a jubä, täca fe jolocoa lä mlabodi jamö a nia faö co̦o. ¿Ö̦jö tawä? A ma cuono wei ma cui, fei däjä a cuami nomöjöwä. A cua ma mlai a nia wawäa co̦layou. Ö̦jö cudeenö bita jamö bä yanowamö lä cublai bä bufi nia shädayaimou, ba̦limi bä cudiobä Yai Bada tänö bä a̦fa lä onibole si ja, bä a̦fa oni cua lä mlai. Ulifi a tablamou showao mlao däjä, bä a̦fa oni cuo showadao lä mlaono wei bä lä cui —wale nowa tama. ⁹ Abinaja camiyä nija a̦jele a cuu co̦oma. —Wa bufi jaducua mlalanö wale a̦ nia ji̦liaö möblaimi. Ö̦jö yalo waiteli 7 febä lä cuinö, jefu 7 bä jömamou. Nofi jushublalodimi a suwä lä döcäo wei bä jefu. ¹⁰ Ö̦jö 7 febä showawä lä cuinö, bada 7 bä ca̦i bada jömamou. 5 bä bada läo balöoma ma cui, fei däjä bä cuami. 6 a lä cui a läa lä cule. Ai a lä cui, 7 a nia bada läo lä nomöjöo wei, a wawäbloimi showawä. Ö̦jö 7 a lä cui a läquei däjä, a nia läo nö dedeaimi. ¹¹ Ai a nia ca̦i bada cuo, 8 a lä cui. Yalo a waiteli demi lä cuono wei a lä cui, a lä nomalayono wei a showawä lä cui, ö̦jö 8 a nia cuo. Ö̦jö ma cui, ö̦jö 7 bä bada lä cui bä nija a ca̦i coyocoa. A mö nia yai lä watäaö wei jamö, ö̦jö a juu —a cuma. ¹² Abinaja a a̦jele cuma. —Yalo waiteli 10 wa yo̦labä lä möno wei yo̦labänö, shomi 10 bä nia bada läblamou mö lä feduo wei bä jömamou. Bä lämaboimi showaweje. Ö̦jö ma cui, yalo a waiteli sho bä nia bada läo. Bä läo däjä bä nö nia bada dedebloimi. ¹³ Yalo yami a waiteli bada yai läo ayaobä, ö̦jö bä bufi nia bada shaliliblou. Ö̦jö a shino bada nosiemou fa ayaonö, a wa̦ nia juaöje. ¹⁴ Oweja a wa̦fa ocalo lä jilamou wei a nabä nia queo ma cujei, ö̦jö a lä cuinö bä nö nia shino bleaamaö ayao. Ö̦jö a shino Bada lojode malä ayai. A nö shino lä wa̦lojaö wei, ö̦jö a Bada. Oweja a wa̦fa ocalo lä jilamou weinö bä ca̦i lä juu wei bä lä cui, Yai Bada tänö bä lä nacano wei ö̦jö lä cäbä. Bä yailema. Ö̦jö bä bejedimou —a a̦jele cuma. ¹⁵ Abinaja a̦jelenö wale nowa ca̦i taö showaoma. —Mau ubä lä bayucube wa tä lä möno wei ya tä a̦ nia wäaö. A suwä lä dodoo wei a lä cui, ö̦jö a lä döcäono wei jamö ubä lä bayucube ubänö, bluca täbä lä bälöblai täbä jömamou. Shomi täbä lä bälöblai täbä ma cui, bluca bä bälöblawä lä yaiblai bä ma cui, bä caficö a̦ bluca lä bou wejei bä ma cui, ö̦jö bä li jömamou. ¹⁶ ¿Ö̦jö tawä? Shomi bä bada jömamobä, yalo waiteli wa yo̦labä lä möno wei ya tä a̦ nia wäaö. Ö̦jö bä yo̦labä lä cuinö, yalo waiteli a ca̦i lä cuinö, suwä wa lä möno wei a nofi nia wa̦libouje, a showadi lä dodoo wei a suwä lä cui. Ebä madofi bluca nia lämaöje. Shinoco a nia tablamaöje. Ya̦jibä nia waöje. Cowa wacöbänö a mö nia watäamaöje. ¹⁷ Yai Bada tänö bä bufi nia taamaö, camanö tä wawämaö bufi lä doblao wei etä cublobä. Camanö bä bufi taamaö cudeenö, cama bä a̦ fabä bä waiquiwä ma cui, yalo waiteli a bada nosiemou ayaobä bä bufi nia shaliliblou. Yai Bada tänö tä nia jo̦wa lä taö wei tä jödödöblou showao mlao däjä, yalo waiteli a nosie nia juaöje. ¹⁸ ’¿Ö̦jö tawä? —a cuma—. Ö̦jö wa suwä lä möno wei a lä cuinö, bä a̦fa yai lojode lä wäyäö wejei bä shabonobö jömamou. Bita jamö bä bada lä bälöblai, ö̦jö bä nija bä bluca nosiemamou —wale nowa tama.

¹ Ö̦jö ya suwä daa fa balölalönö, fedu jamö culanö ai ya tä a̦jele itou daa co̦lalema. Ö̦jö a wa̦ yai ji̦limamobä a cuoma. Cama a̦jele a shi̦inö, bita a bada wacacablaliyoma. ² A wa̦ i̦cali faö ja, abinaja a cuma. —¡Bä waicoma! ¡Bä waicoma! Babiloniateli bä a̦fa lojode lä wäyäno wejei bä waicoma. Ö̦jö bä yafibö lä wa̦liolaliyono wei jamö, fecula bä bälöjou jäa lä cule. Yai bluca täbä wa̦lidiwä lä cublai täbä juadii jäa. Ö̦jamö bä yalo shami lä yäö wei bä bäcabö ca̦i tamou, bä yai lä wa̦lidii. ³ Babiloniateli bä nofi beshili lä jushublalou wei tänö, bluca bä bälöblawä lä yaiblai bä malä wa̦lidiblaliyono wei. Bita jamö bä bada lä bälöblai, ö̦jö bä nija bä bluca joleblalodima. Madofi täbä ja Babiloniateli bä bufi shino yaimoma cudeenö, madofi bä lä nomöjöaö wejei bä lä bälöblai bä nö ca̦i bluca bladaböaliyoma —a cuma. ⁴ Ö̦jö däjä fedu jamö ai ya wa̦ ji̦lilema. Abinaja a cuma. —Ö̦jamö iba wamacö lä cule bä da falalu. Bä doblou mlaobä jamö wamacö coyocoo mlaobä. Ya bä nö bleaamabä jamö, cafä bämacö nö bleaamaö yädäo mlaobä. ⁵ Täbä wa̦lidiwä bluca lä tamou wei täbä yaiblou fa cunoja, fedu jamö täbä fe nö malä wädöblaledayobö wei. ¿Ö̦jö tawä? Bä doblou lä mlai ya tä nofi bluca ca̦i jaducubou —a cuma. ⁶ A wa̦ faö co̦o ja, abinaja a cuma. —Cama bänö täbä lä taamano wejeinaja, inaja showawä bä taamaö mö da feduoje. Bä lä cuaano weinaja bädao mlai, wama tä nowa yai bolacadabä. Ai täbä nija cama uba nashiwä e toubä lä coamano wejei wama tä nö yuaö ja, ubä yai nashiwä lä dodijii toubä ja, bä fe coamaö da nomöjöoje. ⁷ “Camiyä ya yai”, bä bufi cuolanö bä nofi shino doamoma. Madofi täbä ja bä bufi fa yaimonö, täbä lä bufii wejei, ö̦jö lä täbä däablaö showadaomaje. Ö̦jö cudeenö cama bä befi tao fe lä balojoono weinaja, bä nö ca̦i bleaaö cuo nomöjöobä etä ca̦i da jöbäcöje. Bä mö ca̦i ö̦cöö nomöjöobä. Abinaja cama bä bufi malä cuu wei. “Ya bä yai nosiemabä ya. Ya nö yamili beblalobä yami. Ya ö̦cöö mlaicätä”, bä bufi cama cuu. ⁸ Inaja Babiloniateli bä bufi li cuu cudeenö, yedu bä nomablobä etä nia wayu cublou, bä mö ö̦cöbä. Bä nia ca̦i ofälayou. Cowa wacöbänö bä nia ca̦i ö̦shölaliyo. ¿Ö̦jö tawä? Yai Bada tä Bada lä cui, bä dobloimi jömabä a showawä lä cui, ö̦jö a nö shino malä wa̦lojaö wei —a cuma. ⁹ Bita jamö bä bada lä bälöblai bänö, Babiloniateli bä nija bä lä joleblalono wei bä lä cuinö bä nomöa ni bouje. Madofi täbä ja Babiloniateli bä bufi fa yaimonö, täbä lä bufii wejei täbä däablaö lä showadaono wejeinaja, cama bä ma cui bä ca̦i cuaaö mö feduo showaoma. Bä shabonobö lä ö̦shöö wei tä wa̦queshi dablaöje däjä bä nia ö̦cöö. ¹⁰ Babiloniateli bä nö bleaamaö fe lä balojoo weinaja bä taamamou fa quilinö, bä ublaa blajalanö bä nö ojode nia taöje. Abinaja bä nia cuu. —¡Shädayai! Babiloniateli wamacö a̦fa lojode da wäyäblejei, wamacö shabonobö wa̦lioblou lä cule. ¡Wamacö nö a̦fa wa̦lojaö da wäyäblejei! ¡Shädayai! Wamacö lä cuaano wei tä nowa ja, yedu Yai Bada tänö wamacö nö bleaamaö fe balojoa lä cule —bä nia cuu. ¹¹ ¿Ö̦jö tawä? Madofi bä showadi lä nomöjöaö wejei, bä bita jamö lä bälöblai bä ma cui, ö̦jö bä nia ca̦i ö̦cöö. Cama bä madofibö lä bälamamou wei bä nö doabimi co̦wä yaloje, bä nomöa nia bouje. ¹² Olo bä ma cui, blada bä ma cui, maa mabä baushi nowa wai lä bluca wei mabä ma cui, etäbä nia doaö co̦daaimije. Dobä bä nowa au lä bluca wei ebä nia ca̦i doaö co̦daaimije. Camishi shuducaje au bä ma cui, wacä ushujuwä bä ma cui, wacä mö jude bä ma cui, ö̦jö bä nia doaö co̦daaimije. Fii fibä nö lä cle̦deli wei fibä lä̦cashi ma cui, jai yalo bä yo̦lacö cuwä ja täbä lä tablaö wejei täbä ma cui, etäbä nia ca̦i doaö co̦daaimije. Fii fibä nowa lä bluca wei fibä ja täbä madofi lä tablaö wejei täbä ma cui, duo shibä ja täbä lä tablaö wejei täbä ma cui, duo jude shibä ja täbä lä tablaö wejei täbä ma cui, maa liyäjäwä mabä ja täbä lä tablaö wejei täbä ma cui, etäbä nia ca̦i doaö co̦daaimije. ¹³ Täbä lä jölöcamou wei toubä bluca nö cle̦deli lä daböjii e toubä nia ca̦i doaö co̦daaimije. Täbä wa̦queshi nö li̦yoli u̦cucamabeje täbä ma cui, fii defi shu̦u nö lä cle̦deli wei shu̦ubä ma cui, etäbä nia ca̦i doaö co̦daaimije. Uba nashiwä toubä ma cui, dabö dabö ubä ma cui, nii lo̦shi mobä ma cui, si ujudidiwä ji̦bä ma cui, ö̦jö etäbä bluca nia doaö co̦daaimije. Baca bä ma cui, oweja bä ma cui, cabayo bä ma cui, bä befi ca̦i läläabä täbä madofi ma cui, etäbä nia ca̦i doaö co̦daaimije. Täbä nosie juamobä täbä yanowamö showadi lä nomöjöaö wejei täbä ma cui, täbä nia yanowamö ca̦i doaö co̦daaimije. ¹⁴ Madofi bä showadi lä nomöjöaö wejei bä lä bälöblai bänö, Babiloniateli bä bufijalajenö abinaja bä nia cuu. —¡Shädayai! Wama täbä bluca lä bufijano wei wama täbä nia dablaö co̦daaimi. Wamacö dodijobä täbä ma cui, wamacö baushimobä täbä ma cui, wama täbä nia tabou co̦daaimi. Wama täbä nia dablaö co̦daaimi —bä nia cuu. ¹⁵ Ö̦jö täbä bluca lä nomöjöano wejei bä lä cui, Babiloniateli bä nija bä blada lä däblaano wejei bä lä cui, ö̦jö bä nia ö̦cöö. ¿Ö̦jö tawä? Babiloniateli bä nö lä bleaamano weinaja bä taamamou fa quilinö, blajai jamö bä ublalanö, wädowä bä nomöa nia bouje. ¹⁶ Abinaja bä nia cuu. —¡Shädayai! Babiloniateli bä a̦fa lojode lä wäyäno wejei bä fei däjä cuami. Camishi shuducaje au bä ja bä didioma. Wacä ushujuwä bä ca̦i ja, wacä mö jude bä ca̦i ja. ¡Shädayai! Olo bä ja bä baushimoma. Maa mabä baushi nowa wai lä bluca wei mabä ca̦i ja. Dobä bä nowa au lä bluca wei bä ca̦i ja. ¹⁷ Ö̦jö täbä nowa lä bluca wei täbä lä cui, yedu täbä mö jödödöwä watäblamoa showadalayoma —bä nia cuu. Canawä bä ca̦i bada lä cadidamaö wejei bä bluca ma cui, bä lä juwäbou wejei bä ca̦i bluca ma cui, ö̦jamö bä befi ca̦i showadi lä caläö wei bä ca̦i bluca ma cui, canawä bä jamö bä madofibö lä bälamou wei bä ca̦i bluca ma cui, ö̦jö bä blucanö bä blajawä ublalanö tä nia mööje. ¹⁸ Babiloniateli bä shabonobö lä ö̦shöö wei bä wa̦queshi dablaöje ja, bä bufi wa̦lidilanö abinaja bä nia cuu. —Ei täbä a̦fa lojode lä wäyäno wejei täbä lä culenaja, ¿wedi jamö ai täbä lojode li cuwä mö feduwä? Täbä ai cuami waiquiwä —bä nia cuu. ¹⁹ Bä bufi nö bleaaö ö̦jöböamobä, bä öcölanö bä fe ca̦i nia libubö cuo. Bä nomöa bolajenö abinaja bä nia cuu. —¡Shädayai! Babiloniateli bä a̦fa lojode lä wäyäno wejei bä fei däjä cuami. Modu u jamö cama ebä canawä lä cuono wei bä bluca lä cublai, Babiloniateli bä bladabö ja bä nö madofibölaliyoma ma cui, bä cuami nomöjöwä. ¡Shädayai! Yedu täbä mö bluca watäa showadaalema —bä nia cuu. ²⁰ Fedu jamö wamacö lä culadi bä bufi da doblalo. Yai Bada wama ecö ma cui, Jesucristonö wamacö lä shömöleno wei wamacö ma cui, Yai Bada a wa̦no wäyälewä wamacö ma cui, bä bufi yai da doblalo. Babiloniateli bänö wamacö lä taamano wejei tä nowa ja, Yai Bada tänö wamacö nö yulema. ²¹ Ö̦jö däjä a̦jele ai a lojodenö, maa ma bada fa maolönö, modu u jamö ma bada quemabalema. Ma queamalanö abinaja a cuma. —Babiloniateli bä a̦fa lojode lä wäyäö wejei bä lä cui, inaja showawä bä nia taamamou. Yai Bada a waitelimou ja, i̦cali bä nia shäyäaö. Bä nia dablamou co̦daaimi. ²² Ö̦jamö amowa fibä nata lä jubaö wejei bä a̦ nia ji̦lio co̦daaimi. Amowa bä a̦ lä daö wejei täbä a̦ ca̦i mlai. Jai bulinama usibä wai cuwä fibä lä jolaö wejei bä a̦ ca̦i mlai. Amowa bada fibä lä jolamou wei fibä a̦ ca̦i mlai. Täbä madofi dodijidablaö lä daö wejei bä lä cui, ö̦jamö bä nia dablou co̦daaimi. Nii mobä lä washicaö wei tä a̦ ma cui, tä a̦ ca̦i nia ji̦lio co̦omi. ²³ Ö̦jamö cowa wacöbä shi̦i cublamobä täbä ja, wacöbä nia yämabou co̦daaimije. Täbä doayobä jamö täbä nofi lä co̦camoaö wejei täbä a̦ ca̦i nia ji̦lio co̦daaimi. ¿Ö̦jö tawä? Babiloniateli bänö madofi bä showadi lä nomöjöano wejei bä lä cui, ö̦jö bä shino yai lojodoo ayaoma cudeenö bä nö nia bleaaö majöo. Cama täbä lä feculamono wei tänö, bluca täbä bälöblawä lä yaiblai bä mölamaö dicoomaje yalo bä nö nia bleaaö majöo. ²⁴ Babiloniateli bänö Yai Bada a wa̦no wäyälewä bä shälemaje yalo, Yai Bada ai ebä ca̦i shälemaje yalo, ö̦jö bä nö nia yuaö. Bita jamö täbä bluca lä shäleno wejei bä ma cui, ö̦jö Babiloniateli bä mayo showawä.

¹ Ö̦jö a̦jele a wa̦ faö fa balöonö, fedu jamö ai ya täbä a̦ i̦cali faö ji̦lilema. Jai bluca täbä co̦camolayoma dejemi täbä a̦ bada ji̦limamou cuoma. Abinaja täbä cuma. —¡Yai Bada a nofi da doablaje! ¡Bämalecö lä jucäaö wei ö̦jö a, Yai Bada bäma a lä bufibou wei a lä cui! ¡Ö̦jö a wa̦fa shino doblao tamobä! ¡Ö̦jö a nö shino wa̦lojaö ayawä! ² Täbä lä taamaö wei tä ja, a bejedimou. A wa̦ cadidou showadao. A showadi suwä lä dodoono wei a lä cui a dobloimi jömöa waiquiquema, Babiloniateli bä a̦fa lojode lä wäyäno wejei bä lä cui. Bluca bä lä bälöblai bä wa̦lidiblamalemaje, bä showadi lä joleblalono wei tänö. Yai Bada a wa̦ juamobä ebä lä shäleno wejei bä lä cui, ö̦jö bä nija bä i̦yäbö nö yua waiquilema —bä cuma. ³ Ö̦jö däjä bä a̦ i̦cali faö co̦oma. Abinaja bä cuma. —¡Yai Bada tä nofi da doaje! Bä nö bleaabä jamö, bä wa̦queshi nia tolucublamou shi wa̦lii —bä cuma. ⁴ Ö̦jö däjä bada 24 bä lä cuinö, yaitawä 4 bä ca̦i lä cuinö, Yai Bada a döcäobä etäcö cotä jamö bä möfe bolanö, a lä döcäle a wa̦fa Bada doblao tamaje. Abinaja bä cuma. —Inaja lä tä cuobä. ¡Cafä wa nofi yai doamobä! —bä cuma. ⁵ Ö̦jö däjä, Bada a döcäobä etäcö jamö a wa̦ bada ji̦lioma. Abinaja a cuma. —Yai Bada etä a̦ juamobä wamacö bluca lä cuinö, bäma tä lä bufibou wei a nofi yai da doablaje. Wama a nö quili lä taö wei wamacönö, wamacö a̦fa lojode ma wäyäö wejei ma cui, wamacö a̦fa lojode wäyäö ma mlajei ma cui, a nofi yai da doablaje —a cuma. ⁶ Ö̦jö däjä, ai ya bä a̦ i̦cali faö ji̦lilema. Jai bluca täbä co̦camolayoma dejemi täbä a̦ bada ji̦limamou cuoma, bola bä a̦ bada nacli lä culenaja showawä. Ya̦lu a wa̦ i̦cali faö nö lä quiliaö weinaja showawä. Abinaja bä cuma. —Bei. ¡Yai Bada tä nofi da doablaje! Bada bäma tä lä bufibou wei, a nö yai lä wa̦lojaö wei a lä cui, ö̦jö a yai Bada läa ayaa. ⁷ Bämacö bufi da doblalo. “¡Fei däjä yai!”, bämacö da cu. Bäma a wa̦fa doblao da ta. Oweja a wa̦fa ocalo lä jilamou wei a lä cuinö, bä suwäbö e däabä tä ajedou malä waiquile. Bä fe̦yalobö nija a moco cuobä a baushiblaö lä cuaaö wejeinaja, bä suwäbö e taamamou waiquia. ⁸ Camishi shuducaje cäcö ja a didiobä etä jöbämoquema, cäcö au yai lä dodijidai cäcö lä cui —bä cuma. Ö̦jö cäcö lä dodijidai cäcönö, Yai Bada ebä lä dodijaö wei tä jömamou. ⁹ Camiyä nija abinaja a̦jele a cuu nomöjöoma. —Ei wale a̦ da onicö. Yai Bada ya wa̦no wäyäö cadidia lä cule. Tä a̦ bejedi. Oweja a wa̦fa ocalo lä jilamou wei a lä cuinö, bä suwäbö e däabä jamö täbä nia iyaö ca̦i co̦camou. Cäcöbö nofi co̦camoabeje jamö bä lä nacaö wei bä lä cui, bä bufi nia yai doblalou —a cuma. ¹⁰ Ö̦jö däjä, ö̦jö ya wa̦fa Bada doblao tabä, a̦jele bei a cotä jamö ya möfe boblaquema ma cui, wale wasölema. —Inaja dicoo mlai —a cuma—. Camiyä bämacö bluca. Jesucristonö tä a̦ lä wawämano wei wama tä a̦ nofi lä cadidibole wamacö lä cuinö, Yai Bada wama a wa̦ juaö lä cuaaö weinaja ya ca̦i cuaaö mö lä feduo wei cä ya. Wa möfe bolanö, Yai Bada wa tä a̦fa nia shino yai Bada doblao taö —a cuma. Jesucristonö tä a̦ lä wäyäno wei tä a̦ bejedi lä cuinö täbä nö malä wa̦lojoblamaö wei, Yai Bada etä a̦ wäyäbeje. ¹¹ Ö̦jö däjä ya mamo showao däjä, fedu jamö judu mösö caloblaliyoma. ¿Ö̦jö tawä? Mösö fa caloblalunö, cabayo au ya dalalema. Ö̦ja a lä döcäono wei a lä cui, Tä a̦fa bejedi wäyäö lä shalilio wei, bei a wa̦fa cua. Täbä dobloimi jömaö ja a wa̦ cadidou showadao. A bejedimolanö a ishou. ¹² ¿Ö̦jö tawä? Bei mamocu lä cui, jai cowa wacö lä culenaja mamocu cuwä. Bada täbänö täbä lä yojobou wejei täbä wai bluca ja, a fe yojoo. Cama a wa̦fa oni ma tamoqueno wei ma cui, cama a wa̦fa shino damou ayawä. Ai täbä nija a wa̦fa damamoimi. ¹³ Camishi labe cäcö lä i̦yämalaleno wei cäcö ja, a didia. Yai Bada bei tä a̦, bei a wa̦fa jilaöje. ¹⁴ ¿Ö̦jö tawä? Fedu jamö bä wayu jubä bä lä culadi, cabayo au bä ja, ö̦jö nija bä befi ca̦i läläa nocaquema. Camishi shuducaje bä ja bä didioma, bä au yai lä dodijidai bä ja. ¹⁵ Täbä wayu ca̦i lä juu wei a lä cuinö, sibala namo mö feduduwä a ca̦i bada waejemabou. Ö̦jö a namonö, bä bälöblawä lä yaiblai bä nö nia bluca bleaamaö. Bä nosiemaö ja a wa̦ nia lojodoaö. Duo shibä judenö jaboca bä lä̦cashiblou si lä ijejeinaja bä nia taamaö. Yai Bada tä nö lä wa̦lojale a lä cui, a nö wa̦lowä lä jushuo wei a waitelimou bufiobä jamö bä lä löblaaö wejei bä lä cui, ö̦jönö bä nia calucaö. ¹⁶ A lä didile ecö labe jamö a wa̦fa oni cua, bei wacu jamö ca̦i. Abinaja tä a̦ oni cuu. “A nö shino lä wa̦lojaö wei a Bada. A shino Bada lojode lä ayai.” Einaja tä a̦ cuu. ¹⁷ Ö̦jö däjä, motoca a jamö a̦jele ya ublaa dalalema. Ösö jamö bä yalo lä lelaadayou wei bä nija a wa̦ i̦cali faö ja, abinaja a cuma. —¡Bä da jaboje! Fei däjä Yai Bada tänö wamacö nia yai iyamaö. ¹⁸ Bada bä lä läo wei wama bä ya̦jibä wabä. Bä wayu ca̦i lä juu wejei bä ya̦jibä ca̦i. Wayu bä yai lä lojode wei bä ya̦jibä ca̦i. Cabayo bä ma cui, ö̦jamö bä befi ca̦i lä läläaö wei bä ma cui, ö̦jö bä ya̦jibä ca̦i. Bä nosie juamobä bä yanowamö lä tabou wejei bä ma cui, bä tabou lä mlajei bä ma cui, bluca bä lä cublai wama bä ya̦jibä wabä. Bä a̦fa lojode wäyäö lä mlajei bä ma cui, bä a̦fa lojode lä wäyämou wei bä ma cui, ö̦jö bä ca̦i —a cuma. ¹⁹ Yalo waiteli a lä cui ya ca̦i dalalema. Bita jamö bä bada lä cublai bä ca̦i. Cama wayu ebä ca̦i yododoomaje. ¿Ö̦jö tawä? Cabayo a ja a lä döcäo wei a ma cui, cama wayu ebä ma cui, ö̦jö bä nabä bluca queobeje bä yododooma. ²⁰ Cabayo a ja a lä döcäo wei a lä cuinö, yalo a waiteli juwälema. A wa̦no jole jole wäyälewä a ca̦i, yalo waiteli a lä cule jamö a culanö, a nö lä quiliano wei a lä cui. Ö̦jö a lojode nia fa dablamanö, tä nö lä quilijii tä bluca wawämama. A nö lä quiliano wei tänö, yalo waiteli a wa̦fa oni ja täbä lä oniblamono wei bä mölamama, cama a nö idubö ja bä möfe bolanö, a wa̦fa bada doblao lä tano wejei bä lä cui. Ö̦jö cäcöbö fa juwälönö, cowa wacö ca jamö cäcöbö demi quemabefälöma, cowa yaitawä nacli wacöbä lä waole jamö. ²¹ Cabayo a ja a lä döcäo wei e sibalanö, ai bä bluca shäalalema, sibala namo mö feduduwä a bada lä waejemabou wei a showawänö. Ö̦jö däjä, yalo bä ösö jamö lä lelaadayou wei bä lä cui, ö̦jö bä ya̦jibä ja bä bluca bädölaliyoma.

¹ Ö̦jö däjä fedu jamö a̦jele ya itou dalalema. Täca fe jolocoa lä mlabodi yoca caloblamobä tä showaboma, boo shicö cofibö ca̦i, täbä lä o̦caö wejei täcö bada. ² - ³ Yaitawä täcö lä cui täcö bada juwäa showadaalema, täcö cuo lä balöono wei täcö lä cui. Fecula Bada täcö a̦fa cua. Sadanasi täcö a̦fa ca̦i jilamou. Täcö fa juwälönö täcö o̦caquema. Täca nö lä quilijibodi jamö täcö quea fa showadamabafälönö, yoca cofiböquema. Yoca caloblaö mlaobeje, etä ca̦i taa mö feduquema. ¿Ö̦jö tawä? Lasha 1.000 a lalou jaöo mlao däjä, täbä bälöblawä lä yaiblai bä mölamaö jaödao co̦o mlaobä, ö̦jamö täcö nia didibou balöoma. Lasha 1.000 a lalou co̦o däjä, a jujeblamobä etä nia cuo ma cui, a nö nia dedejeblamaimi. ⁴ Ö̦jö däjä bada bä döcäobä ya täbä dalalema, bä bada lä döcäono wei bä ca̦i, yanowamö täbä jömabeje bä lä lämabono wei bä lä cui. Ö̦jö bä bada lä cui, Yai Bada ebä fe lä bafedimano wejei ö̦jö bä bufi cuoma. Yai Bada a wa̦no wäyäö nofi jushuaöje ja bä shälemaje, Jesús a wa̦fa wäyäö fe yadiomaje cudeenö. Ö̦jö bä lä cui, yalo waiteli a ma cui nija, ö̦jö a nö idubo ma cui nija, bä möfe boonomi. Cäcöbö a̦fa bada doblao ca̦i tanomije. Ö̦jö a wa̦fa oni lä cui ja bei bä wäyäcu oniblamonomi. Bei bä imicö ma cui ja, inaja showawä. ¿Ö̦jö tawä? Bä demia co̦layoma, lasha 1.000 a lalou jaöo mlao däjä Cristo sho bä bada läo balöobä. ⁵ Yai Bada tänö bä demi nia jaba jocädamaö lä co̦o wei, ö̦jö lä tä li cuoma. Ai bä bluca lä nomablono wei bä lä cui, lasha 1.000 a lalou däjä, ö̦jö bä nia demi shino jocädamaö nomöjöoma. ⁶ ¿Ö̦jö tawä? Yai Bada tänö bä jaba demi jocädamaö lä co̦o wei, bä bufi nia yai doblalou. Yai Bada nija bä nia yaio. Täbä nomablou lä co̦o wei däjä ö̦jö bä nia nomaimi. Yai Bada nija bä nia ojodamou ajedeo, Cristo nija ca̦i, täbä nofi bäyäbobeje. Lasha 1.000 a lalou showao mlao däjä, Cristo a Bada läobä jamö bä nia läo mö feduo. ⁷ Lasha 1.000 a lalou däjä, Sadanasi a lä o̦cabodi jamö a fa cushäblalönö a nia famaö co̦o. ⁸ ¿Ö̦jö tawä? Bluca bä bälöblawä lä yaiblai bä mölamaö co̦obä, a nia faö co̦imaö. Ö̦jö täbä bluca bälöblawä lä yaiblamou wei bä a̦fa jilamou ja, “Coco, Macoco sho cäcöbö”, bä cuu. Ö̦jö bä nia lä ishou wei jamö täbä nia bluca yododoblamaö. Bä nia lä ishou wei, comi bä nia cuo. Modu u casö jamö mlaca mlaca bä nö wabamobö lä mlainaja bä nia cublou. ⁹ ¿Ö̦jö tawä? Jödödöwä tä ulifi jamö bä culanö bä wayu blacäö fe fa fa̦yoolalunö, Yai Bada ebä lä bälöblaono wei ebä fe fa̦yobomaje. Yai Bada tänö a shabono yai lä nofimale a ca̦i. Ö̦jö ma cui, fedu jamö culanö cowa wacöbä fa blälämalönö bä mö bluca watäblalema. ¹⁰ Bä lä mölamano wei a fecula bada lä cui, cowa wacö ca jamö a quemabalema, cowa yaitawä nacli wacöbä lä waole jamö. Yalo a waiteli lä cui, ö̦jö a wa̦no jole jole wäyälewä a ca̦i lä cui, ö̦jamö cäcöbö cuo waiquio däjä fecula bada a quea nomöjömabalema, bä nö bluca bleaabä. Ö̦jamö bä yanöcöblou balöa mlai ja bä nö nia bleaamaö shi wa̦lii. ¹¹ Ö̦jö däjä Bada tä döcäobä ya täcö bada au dalalema, a lä döcäono wei a ca̦i. A lä döcäono wei a bädou däjä, bita a ma cui, judu mösö ma cui, täbä bluca mladou showalayoma. Täbä dablamou co̦daanomi. ¹² Bä lä nomano wei bä demi jocädou fa co̦lonö, ö̦jö ya bä ca̦i dalalema. Bä a̦fa lojode lä wäyämamono wei bä ma cui, bä a̦fa lojode wäyämamono lä mlai bä ma cui, Bada tä döcäobä etäcö ajede jamö bä bluca ublajao toujuoma. ¿Ö̦jö tawä? Bä lä cuaaö wei bä a̦ lä onibole sibä caloblalemaje. Ba̦limi bä nia lä cuo wei bä a̦fa lä onibole si ca̦i. Ö̦jö däjä, cama bä lä cuaano wei tä oni fa mönö, bä bluca lä nomano wei bä jömöa showadaquema. ¹³ ¿Ö̦jö tawä? Modu u jamö bä lä nomano wei bä ma cui, Yai Bada nija bä icuquema. Ai bä ca̦i bluca nomaö mö lä feduono wei bä ca̦i. Bä lä nomaö wei bä cuobä jamö, bä jödödöwä bluca lä cuono wei bä demi jocädou fa co̦lonö, Yai Bada nija bä bluca icuquema. Bä demi culanö bä lä cuaano wei tä oni fa mönö, bä bluca jömaö showadaoma. ¹⁴ Ö̦jö däjä Nomaö tä lä cui, cowa wacö ca jamö tä quemabalema. Bä lä nomaö wei bä cuobä jamö tä ma cui, inaja showawä tä tablalema. Täbä nomablou lä co̦o wei, ö̦jö bei tä waiquiwä, cowa wacö ca jamö täbä lä queblaamaö wei tä lä cui. ¹⁵ Ba̦limi bä nia lä cudio wei bä a̦fa lä onibole si ja, bä a̦fa oni cua lä mlai bä lä cui, cowa wacö ca jamö bä ca̦i bluca quemabalema.

¹ Ö̦jö däjä, judu dude ya mösö dalalema, bita dude a ca̦i. Jaba mösö lä cuono wei, bita a ca̦i jaba lä cuono wei, cäcöbö malä mladaliyono wei. Modu u ma cui, u cuonomi nomöjöwä. ² Jelusale dude ya tä shabono ca̦i itou dalalema, Yai Bada etä shabono lä yaile a lä cui. Yai Bada tä lä cule jamö a cuoma a itolayoma. Bä fe̦yalobö nija a moco cuobä a baushiblaö lä cuaaö wejeinaja a shabono baushi fa tablamolunö, inaja a cuoma. ³ Bada tä döcäobä etäcö jamö a culanö, ai tä a i̦cali falayoma. Abinaja ya cuu ji̦lilema. —¿Ö̦jö tawä? Fei däjä, yanowamö täbä nijamö Yai Bada tä nia bälöo. Ö̦jö bä nijamö a fa bälöalunö, cama ebä nia cublou cadidio. Cama Yai Bada tä showawänö bä nia ca̦i cuo. ⁴ Yai Bada tänö ö̦jö bä mabuubö nia bluca ya̦jöblaö. Bä nia nomaö co̦daaimi. Täbä nomöa nia boimije. Bä nia ca̦i ö̦cöimi. Bä nia ca̦i ninio co̦daaimi. Inaja tä bluca cuo lä balöono wei tä malä mladaliyono wei —a cuma. ⁵ Bada tä döcäobä etäcö jamö a lä döcäono wei, abinaja a cuma. —¿Ö̦jö tawä? Fei däjä dude ya täbä bluca tablamaö —a cuma. Abinaja a ca̦i cuma. —Ei wale a̦ da onicö. Tä a̦ nofi mölabobeje tä a̦. Tä a̦ bejedi —a cuma. ⁶ Abinaja wale nowa ca̦i tama. —Bei tawä. ¡Inaja lä waiquiwä! Camiyä jaba ya, jödödö ya ca̦i. Camiyä ya lä cuinö täbä jaba bluca cublaliyoma. Camiyä ya showawänö täbä jödödöwä waicou. Bä lä amishaö wei bä lä cui, no mlai ja ya bä amishi nia co̦amaö. Ba̦limiblamodima u fe lä jojole u ja, ya bä nia dobäö. ⁷ Bä nö wa̦lojaö lä ayao wei bä lä cui, dodijidawä bä cuobä ya bä nia dobäö. Cama bä nija ya nia bufiblamou. Ya bä nofi nia ijiluaö. ⁸ Inaja ö̦jö ya bä nia ma taamaö wei ma cui, ai bä lä cui ya bä nö nia bleaamaö ayao. Wale a̦ juaö lä quilii wejei bä ma cui, wale nofi mölabou fe yadio lä mlajei bä ma cui, bä shami nö lä quilii bä ma cui, täbä lä shäö wejei bä ma cui, bä lä joleblalou wei bä ma cui, fecula bä nija täbä nabä lä shömaö wejei bä ma cui, nö idubö täbä lä bufiblaö wejei bä ma cui, bä caficö a̦ lä jolemou wei bä ca̦i bluca ma cui, cowa wacö ca jamö bä queamabä bä li waiquiwä, cowa yaitawä nacli wacöbä lä waole jamö. Täbä nia nomablou lä co̦o wei, ö̦jö bei tä waiquiwä —wale nowa tama. ⁹ Ö̦jö däjä 7 toubä befi ca̦i lä däbono wejei bä a̦jele ai a lä cui a waloquema, wayu wayu 7 täbänö bä nö nia bleaamaö fa jödödöojenö, bä nia waicou lä showadaono wei bä ai a lä cui. Camiyä nija a wa̦ faö ja abinaja a cuma. —Jabo. Oweja a wa̦fa ocalo lä jilamou wei a lä cuinö, a suwä nia lä däaö wei wa möbä —a cuma. ¹⁰ Ö̦jö däjä Yai Bada tä Bufinö wale lojodobolanö, bei macö ösöwä jamö wale bälaquedayoma. Ö̦jamö ya fa bälacudunö, camiyä nija Jelusale a shabono dude damalalema, Yai Bada etä shabono lä yaile. Yai Bada tä lä cule jamö a cuoma ya itou dalalema. ¹¹ Yai Bada tä shi̦inö a bada shabono wacacaoma. Maa au mabä baushi nowa wai lä bluca wei mabä shi̦i faö lä culenaja showawä. A shabono mömou walalaoma. ¹² Ala nabä bada ösöwä fe fa̦yooma. Bä fablaabä, 12 yocabä lä cule jamö a̦jele 12 bä läoma. Bei yocabä lä cuono wei jamö, Isaeli bä ijilubö 12 ebä nija bä yaiablalou lä nodiablalono wei ebä a̦fa oni cublamoma. ¹³ ¿Ö̦jö tawä? Motoca a faö lä cuaaö wei tä mashi jamö, 3 yocabä cuoma. A lä queo wei tä mashi jamö 3 co̦daawä. A faö lä mlai jamö 3 ca̦i. A queo lä mlai jamö 3 co̦wä. ¹⁴ Ala nabä fe bada lä fa̦yoono wei nabä colo ja, maa 12 mabä bada bäfätäoma. Ö̦jö colo 12 mabä jamö, Jesucristonö bä lä shömöleno wei bei bä a̦fa oni cublamoma, Oweja a wa̦fa ocalo lä jilamou wei a lä cuinö. ¹⁵ Wale a̦ lä wayomano wei a a̦jele lä cuinö, jai shälacawä a ju̦loco cuwä tä showaboma, täbä labe lä wabaö wejei tä lä cui. Olo bä ja tä cuoma. Jelusale tä shabono labe wababä tä showaboma, ö̦jamö yocabä lä cublai yocabä ca̦i, ala nabä ca̦i. ¹⁶ ¿Ö̦jö tawä? A shabono blaucuwä lä culenaja a shabono fe wädöblamou cuwä. Jai shälacawä a ju̦loco cuwä tä lä däbono wei tänö, a shabono wabaö showadaoma. A shabono labao fe balojooma. Tä labe lä culenaja, tä blaucuwä cuo mö feduoma. Inaja showawä a ösöwä cuo mö feduo showaoma. ¿Ö̦jö tawä? Tä wabaö däjä tä fe bluca usucuoma. ¹⁷ Ala nabä ma cui, a̦jele anö nabä ösöwä wabaö nomöjöoma, showadi täbä wabaö lä cuaaö wejeinaja showawä. Nabä ösöwä fe balojooma. ¹⁸ Ala nabä lä cui, maa au mabä baushi nowa wai lä bluca wei mabä ja, nabä ala tablamoma. Shabono a yai lä cui, olo bä shino ja a fa cuonö, a mömou walalaoma. ¹⁹ Ala nabä fe bada lä fa̦yoono wei nabä colo ja, maa mabä baushi nowa wai lä bluca wei mabä blucanö, maa 12 mabä bada lä bäfätäono wei mabä baushioma. Jaba ma lä cui, mabä lä au wei mabänö ma baushioma. Ai ma nomöjöwä lä cui, mabä shi lä de̦lelei mabänö ma baushioma. Ai ma majöwä lä cui, mabä lä liyä wei mabänö ma baushioma. Ai ma co̦wä lä cui, mabä liyä mö lä jude wei mabänö ma baushioma. ²⁰ Ai ma nomöjöwä lä cui, mabä oni lä liyäjäi mabänö ma baushioma. Ai ma majöwä lä cui, mabä lä wacäjei mabänö ma baushioma. Ai ma co̦wä lä cui, mabä lä fla̦lajai mabänö ma baushioma. Ai ma nomöjöwä lä cui, mabä shi lä de̦lelei ai mabänö ma baushio mö feduoma. Ai ma majöwä lä cui, mabä lä fla̦le wei mabänö ma baushioma. Ai ma co̦wa lä cui, mabä fla̦lajawä lä fejeleshi wei mabänö ma baushioma. Ai ma nomöjöwä lä cui, mabä wacä lä fejeleshi wei mabänö ma baushioma. Jödödö ma lä cui, mabä ushujuwä mö lä jude wei mabänö ma baushioma. ¿Ö̦jö tawä? Colo mabä lä cui, 12 mabä cuoma. ²¹ Bei yocabä lä joleono wei yocabä 12 lä cui, dobä bä nowa au lä bluca wei bä ja, yocabä tablamoma. Dobä moli bä bada showawä ja, yocabä comadiwä cublamoma. Bä lä jublaaö wei bei yobä lä cui, olo bä shino ja yobä fa cuonö, yobä mömou walalaoma. ²² Ö̦jö a shabono ja, Yai Bada nija bä nö bayeli nacaobä ya yafi dablanomi. Ö̦jamö Bada tä lä bufiblamou weinö bä ca̦i cua malä waiquile, tä shino lojode lä ayai. Oweja a wa̦fa ocalo lä jilamou wei a ma cuinö, ö̦jönö bä ca̦i malä cule. ²³ Ö̦jamö bä lä bälöle bänö, motoca a nia bufijaimije. Belibo a ma cui, inaja showawä. Yai Bada tä shi̦inö tä bluca wacacamabou malä waiquii. Oweja a wa̦fa ocalo lä jilamou wei a lä cui, cowa wacöbä shi̦i cublamobä tä lä culenaja a ca̦i cua malä waiquii. ²⁴ Jelusale jamö tä shi̦i wacacawänö, bluca bä bälöblawä lä yaiblai bä ulifibö nia ca̦i wacacao mö feduo. Bita jamö bä bada lä cublai bänö, Jelusale jamö cama madofi ebä nowa lä bluca wei bä ca̦i nia walooje. ²⁵ Bei yocabä lä joleblou wei yocabä fe nia laomi. Tä mö jaluo däjä yocabä fe lao malä mlai. Ö̦jamö tä mö nia ca̦i dödöomi. ²⁶ Bä bälöblawä lä yaiblai bä lä cuinö, ö̦jamö etäbä madofi bluca lä dodijidai bä nia ca̦i juuje, etäbä madofi nowa lä bluca wei täbä ca̦i. ²⁷ Ö̦jö ma cui, ö̦jamö tä lä shami wei tä nia lucäimi. Yai Bada tänö tä nofi taö lä wa̦libou wei tä lä taö wejei bä lä cui, bä nia ca̦i faimi. Bä lä jolemou wei ca̦i mlai. Ba̦limi bä nia lä cudio wei, Oweja a wa̦fa ocalo lä jilamou wei esi oni ja bä a̦fa oni lä cule, ö̦jö bä nia shino faö ayao.

¹ Ö̦jö däjä a̦jele a lä cuinö, camiyä nija ba̦limiblamamodima u damalalema. U mömou walalawä dodijidaoma. Yai Bada tä döcäobä etäcö cotä jamö culanö u fa falönö u caläma, Oweja a wa̦fa ocalo lä jilamou wei a ca̦i lä döcäo wei jamö. ² Ö̦jö tä shabono ja bä lä jublaaö wei yo bada möamo jamö u caläma. Ai u mashi casö jamö, ai u mashi mö feduwä jamö, ba̦limiblamamodima fibä ublaoma. Belibo a loo lä co̦le däjä ma cui, ai a loo lä co̦le jamö ma cui, ai a ja ma cui, showadi bä nii lalou nosi blacäcodima. Ö̦jö fi jenabänö, bluca bä bälöblawä lä yaiblai bä jalomamobä jenabä li cuoma. ³ Yai Bada tänö tä nofi lä wa̦libou wei, ö̦jamö tä nia cuo co̦daaimi. Ö̦jamö Yai Bada a nia döcäo, cama Bada etäcö jamö. Oweja a wa̦fa ocalo lä jilamou wei a ma cui, ö̦jamö a ca̦i nia döcäo. Yai Bada etä a̦ juamobä bä lä cui, bä möfe bolanö showadi a wa̦fa nia Bada doblao taöje. ⁴ Yai Bada mofecö nia dablaö wawädooje. Bei bä wäyäcu ja, Yai Bada bei a wa̦fa nia oni cublamou. ⁵ Tä mö nia ca̦i dödöö co̦daaimi. Motoca a nia bufijaimije. Cowa wacöbä shi̦i cublamobä täbä ma cui, täbä nia ca̦i bufijaimije. Bada tä lä bufiblamou wei a lä cuinö tä nia malä wacacamabou wei. Cama ebä lä cui, bä nia bada lämabou shi wa̦lii. ⁶ Abinaja camiyä nija a ca̦i cuma. —Ei wa tä a̦ bluca lä ji̦liläfe tä a̦ nofi mölabobeje tä a̦. Tä a̦ bluca bejedi. Bada tä lä cuinö, a wa̦ lä juaö wejei ebä moyawämabä etä a̦jele shömöledayoma, cama a Bufinö a wa̦no wäyälewä bä nö lä wa̦lojomabou wei a showawä lä cuinö. Tä nia lä cublou wei, tä nö dedejeblou mlai ja tä nia wawäblou. ⁷ ¿Ö̦jö tawä? Tä nö dedejeblou mlai ja ya nia juu co̦o —a cuma. Tä nia lä cublou wei, ei si jamö tä a̦ bluca oni cua. Ö̦jö tä a̦ oni nofi lä jaducubou wejei bä lä cui, bä bufi nia yai doblalou. ⁸ ¿Ö̦jö tawä? Ei ya tä a̦ lä ji̦lileno wei, ya tä bluca ca̦i lä möno wei ya lä cui, ö̦jö ei camiyä Juan cä ya. Ya tä a̦ lä ji̦lileno wei däjä, ya tä bluca ca̦i lä möno wei däjä, wale lä yömölano wei a a̦jele cotä jamö ya möfe fa boicunö ya wa̦fa nia doblao tama ma cui ⁹ wale wasölema. Abinaja wale nowa talema. —¡Inaja dicoo mlai! Cafä wa ma cui, Yai Bada a wa̦no wäyälewä ai bä mö feduwä ma cui, ei tä a̦ nofi lä cadidibolajei bä ca̦i bluca ma cui, ö̦jö camiyä bämacö bluca. Yai Bada wama a wa̦ juaö lä cuaaö weinaja ya cuaaö mö lä fedule ya. Yai Bada nija wa möfe bolanö, ö̦jö wa wa̦fa Bada nia shino yai doblao taö —wale nowa tama. ¹⁰ Abinaja wale nowa ca̦i tama. —Tä nia lä cublou wei, ei Yai Bada wa tä a̦no lä onibole tä a̦ nofi mojodumabo dijä. Tä cublou malä ajedei. ¹¹ ¿Ö̦jö tawä? Wa̦lidiwä tä taö bufi doblao lä waiquio wejei bä lä cuinö tä wa̦lidiwä tabeje. Bä shamiaö bufi doblao lä waiquio wei bä lä cui bä shamiabä. ¿Ö̦jö tawä? Bä yai lä dodijaö wei bä lä cui bä cadidou showaobä. Yai Bada ebä lä yaile bä lä cui, wa̦lidiwä tä ja bä wasöo showaobä. ¹² ’¿Ö̦jö tawä? —Jesús a cuma—. Tä nö dedei showao mlao däjä ya nia juu co̦o. Ya täbä dobäbä, ya täbä ca̦i nia juu. Bä lä cuaano wei tä nowa ja, bluca ya bä nia dobäö. ¹³ Camiyä jaba ya, jödödö ya ca̦i. Camiyä ya lä cuinö täbä jaba bluca cublaliyoma. Camiyä ya showawänö täbä jödödöwä waicou —a cuma. ¹⁴ Bä camishibö lä yaluu wejei bä lä cui, bä aublou cudeenö bä bufi nia yai doblalou. Inaja bä cuaaö yalo, Jelusale a shabono dude jamö bä li fablaabä bä li, bei yocabä lä cublai jamö. Ba̦limiblamodima fibä ja bä iyabä. ¹⁵ Sibo jamö ai bä nia cuo. Bä shamiaö bufi lä doblao wei bä nia siboo, fecula bä nija täbä nabä lä shömaö wejei bä ca̦i. Bä lä joleblalou wei bä ca̦i. Täbä lä shäö wejei bä ca̦i. Nö idubö täbä lä bufiblaö wejei bä ca̦i. Bä jolemou bufi lä doblao wei bä ca̦i, bä showadi lä jolemou wei. ¹⁶ Abinaja Jesús a cuma. —Camiyä Jesús ya lä cuinö, iba wamacö lä yododoblai wamacö nija, iba a̦jele ya shömölema, wamacö yömölamobä. David nodiwä bä nija a nia Bada lä bädono wei ei ya, jai fii fi nasöcö ja ya nia cabudu faö lä co̦ono wei ya lä cui. Shidicali a faö lä fenablao wei a no dabou lä cuaaö wejeinaja wale nö ca̦i dabomaje —a cuma. ¹⁷ Yai Bada tä Bufi a̦ faö. Oweja a wa̦fa ocalo lä jilamou wei bä suwäbö e a̦ ca̦i faö. Abinaja cäcöbö cuu. —¡Bä da jabo! —cäcöbö cuu. Ei wama tä a̦ lä ji̦lile wamacö ma cui, wamacö a̦ ca̦i fabä. —¡Bä da jabo! —wamacö cubä. Bä lä amishaö wei bä lä cui bä juimabä, ö̦jö lä. Bä lä bufio wei bä lä cuinö, no mlai ja ba̦limiblamodima u coayolubeje. ¹⁸ Tä nia lä cublou wei, ei ya tä a̦ lä onibole wama tä a̦ lä ji̦liaö wei wamacö lä cui, bämacö nowa taö lä cule. Ei Yai Bada ya wa̦no lä onibole jamö, ai a lä cuinö shomi tä a̦ yädäamaö dicoo ja, Yai Bada tänö ö̦jö a nö nia bleaamaö. Ei tä a̦ oni jamö, wayu wayu 7 ya bä a̦fa lä wayoano wei täbä ja, a nö nia bleaamaö. ¹⁹ Ei Yai Bada ya wa̦no lä onibole jamö, ai a lä cuinö ai tä a̦ joyaö dicoo ja, Yai Bada tänö cama etä nia ca̦i joyaö mö feduo. Ba̦limiblamodima fi ja a nia lä iyano wei tä lä cui, ei tä a̦ oni jamö ya tä a̦fa lä wayoano wei, Yai Bada tänö ö̦jö etä nia joyaö. Tä shabono lä yaile jamö a nia lä bälöono wei tä lä cui, ya tä a̦fa ca̦i lä wäyäno wei, ö̦jö etä nia ca̦i joyaö. ²⁰ Abinaja Jesús a cuma, ei täbä a̦ bluca lä wawämale a lä cui. —Ya nia juu co̦o jaödao —a cuma. —Awei, Bada tä Jesús —ya e cuma. —Wa juu co̦obä lä. ¡Inaja lä tä cuobä! ²¹ Bei. Bada tä Jesús lä cuinö Yai Bada ebä nofi bluca ojodabobä. Inaja lä tä cuobä.