Filipenses
11 Pablo cä ya. Timoteo sho yafäcö cua lä cule, Jesucristo yafä a wa̦ lä fuaö wei yafäcö lä cui. Jesucristo lija wamacö lä yädäo wei wamacö lija ya si oni shimaö, Filibo jamö Yai Bada wama ecö lä cui lija. Wamacö ca̦i lä yododaö wejei bä bada lä cui lija ya si oni ca̦i shimaö, wamacö lä bayeliblaö wejei bä bada lija ca̦i. 2 Bei. Fayä Yai Bada lija wamacö shi̦lo bayeliblamobä, Bada tä Jesucristo lija ca̦i. Wamacö bufi shi̦lo yanöcömaboböbä. Wamacö nofi ca̦i shi̦lo ojodaboböbä. 3 Showadi bämacö nofi jaducäblaö. Bämacö nofi jaducäbolanö, Yai Bada ya lä bufiblaö wei tä lija ya bufi shi̦lo doblalou talei. 4 Yai Bada lija bämacö bluca lä bayelimaö wei däjä, ya bufi doblalolanö showadi ya wa̦ shi̦lo faö. 5 Wamale bayeliblaö yalo, Yai Bada lija ya bufi doblalou. Jesucristo tä a̦ dodijidawä wäyämou blaucobä wamale malä bayeliblaö wei. Cafä wamacönö, Jesucristo wama a nofi jaba mölabolanö wamale bayeliblaö lä showaono weinaja, fei däjä ma cui wamacö cuaaö malä showai. 6 Ei ya tä daö malä waiquii. Wamacö bufi jaba lä dodijidablamaleno wei a lä cuinö wamacö bufi nia dodijidamabou shi wa̦lii. Jesucristo a itou co̦oyoluu däjä, dodijidawä wamacö tabobä. 7 ¿Ö̦jö tawä? ¡Inaja bämacö nofi tabou lä! Bämacö malä bufibole. Yai Bada lija ya ojodamobä ya cuono ma mlai ma cui, wale nofi fa ojodadalönö wale shimöa fe yadilema. Ya lä ojodamou wei jamö, blada bä ja wamale bayeliblaö ja, bämacö bufibou. Fei däjä wale cafe ma quefubolajei ma cui, ya fe lao showaono mlai ja ma cui, showadi wamale bayelibladima. Jesucristo ya wa̦ nofi bäyäbou ma cui, ya wa̦ bayelibou ma cui, wamale bayeliblaö showawä. 8 Bejedi lä bämacö bufibou. Jesucristonö wamacö nofimaö fe balojoo lä culenaja, bämacö nofimaö cuwä mö feduwä. Bejedi lä ya wa̦. Yai Bada tänö wale a̦ bejedi daö. 9 Yai Bada lija bämacö bayelimaö däjä, wamacö nofimayou balabä ya wa̦ faö talei. ¿Ö̦jö tawä? Wamacö nofimayou balaa fa dodijilönö, wamacö bufi yai jaducäblobä ya wa̦ faö. Wamacö bufi wedinajamou mlai ja, wamacö bufi shi̦lo yai walalaobä. 10 Wamacö bufi walalalanö, dodijidawä tä lä cui wama tä yaiabä. Wamacö bufi ca̦i shomitawä coyocoablalou mlai ja, wamacö yai dodijabä. Inaja wamacö cuaalanö, Jesucristo a fuu co̦o däjä wamacö dobloimi jimaö mlaobä. 11 Jesucristonö wamacö fa bayeliblanö, cama etä dodijidawä lä cuinö wamacö yai dodijidawä cuobä. Inaja wamacö cuaalanö, Yai Bada wama a dodijaö dablamabä, a nofi doablabeje. 12 Iba wamacö, ei wamale a̦ da ji̦lilä. Ei däjä wale cafe lä quefubolajei tä ma cui ja, bämacö bufi yai da doblalo. Ya nö bleaaö yalo, fei däjä Jesucristo etä a̦ dodijidawä yai ji̦limou malä blajaadi. 13 ¿Ö̦jö tawä? Eja bada a bälöo lä dodijiinö bä lä lämabole bä bluca moyawäblou waiquia lä cule. Ai bä bluca mö feduwä sho, bä ca̦i moyawe waiquiwä. “Jesucristo etä a̦ wäyäö tä nowa ja, a cafe quefubouje”, wale nofi tabou waiquiaje. 14 Abenaja ca̦i. Ya cafe quefua ma cule, ya bayeliblamou fe lä yadio wei tänö, Jesucristo ai ebä bufi bluca ca̦i lofotoblou fe balojoa lä cule. Bada tänö bä bufi fa lofotoamanö, fei däjä bä quilii mlai ja, Yai Bada etä a̦ yai wäyäö waiteliaö lä culajei. 15 Awei, Cristo etä a̦ lä wäyäö wejei bä lija, ai täbä dobloimi coyocowä dicowä. “¡Camiyä yamacö lija bä yömöca daa fa yaiicunö!”, bä bufi cuu fa dicoonö, wale nofi wa̦libou waiquiomaje, ö̦jö bänö. Fei däjä cama bä a̦ nia ji̦lio fa ayaonö, etä a̦ jole wäyäblalaö bädaoje. Ö̦jö ma cui, ai bä mö feduwä lä cui, bä bufi bejedimolanö täbä li yömölaöje. 16 Ö̦jö bä bufi lä cadidou wei bä lä cuinö wale nofimaöje yalo, ya tä a̦ lä wäyäö wei tä a̦ ja, wale a̦ bayelibouje. Bä moyawe malä waiquii. Eja Jesucristo ya etä a̦ dodijidawä nofi bäyäbobä, Yai Bada tänö wale malä lämabou wei. 17 Ai bä mö feduwä lä cui bä bufi cadidiwämi. Cama bä a̦ nia shi̦lo ji̦liamou ayao fa dicoonö, Jesucristo etä a̦ jole wäyäblalaö buoje. Ya cafe lä quefule jamö wale bufi nia li fa jalujamajenö, täbä a̦ li bädawä. 18 Ö̦jö ma cui, ö̦jö bä a̦ ja ya bufi jalujoimi. Jesucristo a wa̦fa malä wäyämou wei. ¡Inaja dodijiwä yai! Ai bä bufi cadidia mlalanö tä a̦ wäyäö ma cujei, ai bä mö feduwä lä cuinö, bufi cadidilanö tä a̦ yai wäyäöje. A wa̦fa wäyämou yalo ya bufi doblao fe yadio. 19 ¡Ya bufi doblalobä lä! Abenaja ya bufi malä cuu wei. “Ya nö lä bleaale, cafä wamacönö wamale bayelimaö malä cui. Yai Bada lija wamacö a̦ fa fanö, Jesucristo a Bufinö wale fa bayelibonö, ya bayelio fe yadio weicätä”, ya bufi cuu talei. 20 Inaja ya bufi lofote ca̦i fa cuonö, ya mölaö showawä. Ya bufi nö wa̦lojolanö, ya quilii mlai ja, ya doblao fe yadiobä. Wale shäö ma cadidio wejei ma cui, ya demi ma showai ma cui, inaja ya bufi lofote cuo showaobä ya mölaö showaa lä cule. Ya lä dodijaö wei tänö, ai bä lija Jesucristo ya dodijadawä dablamabä. 21 Ya demöo showao däjä, Jesucristo ya dodijidawä dablamabä ya e waiquiwä malä cui. Ya shämou bädao ja, ¡awei, inaja lä yai! Wawädowä ya dabladayobä. 22 ¿Wedi jamö tä lä cui ya tä yai yaiabä da tawä? Äyämö ya demi cuo bufi ca̦i doblao, Yai Bada lija ya ojodamou nö wa̦lojaö showaobä. 23 Ya tä yaiabä ya tä daimi. Eja ya fa nomalönö, ¿Cristo lija ya yai cuodayobä daanö? Ö̦jö tä shi̦lo yai dodijidawä. 24 Ö̦jö ma cui, cafä wamacö bayeliobä, eja ya demi cuo showaobä ya ca̦i malä cui. 25 Inaja tä cuwä yalo, ya demi nia cuo fe lä yadio wei tä ja, ya bufi shi̦lo cadidio. Jesucristo wama a nofi mölabou balabä, bämacö nia ca̦i bluca cuo showao. Wama a nofi mölabou fa balalönö, wamacö bufi doblalobä. 26 Bämacö fe walou fa co̦onö, camiyä ya demi cua lä showale tä ja, Jesucristo lija wamacö bufi doblalou fe balojoobä. Inaja lä tä cuobä. 27 Bei tawä. Cristo dodijidawä etä a̦nö wamacö taamaö lä bufii weinaja bä da cuaa. Wamacö cadidoimi fa dicoonö, jai tä a̦ nowa cuami bä bufi tamaö dicoo dijeje. Bämacö möyou co̦obä tä ma cui, bämacö möyou ma mlai ma cui, moli tä ja wamacö bufi bluca lä cadidio wei bämacö wa̦no ji̦liabä. Wamacö fa bayeliblayonö, wamacö nö bluca lä wa̦lojaö wei ya tä a̦ yai ji̦liabä. Jesucristo etä a̦ dodijidawä bufiblamou fe yadiobä. 28 Cafä wamacö lä yabäcaö wejei bä lija wamacö quilii mlai ja, bä nö wa̦lojaö fe da yadio. Wamacö quilibloimi däjä, cama täbä nia lä waiyou wei tä ja, bä bufi nia möblou. Cafä wamacö nia fucäamou lä ayao wei tä ja, bä bufi nia ca̦i möblou. Wamacö bufi nö lä wa̦lojaö wei, Yai Bada tä nö li mayo malä cui. 29 Jesucristo wama a nofi mölabobä, Yai Bada tänö wamacö malä tablamaleno wei. Wama a bejedi bufibou bädaobä mlai, Cristo a nowa ja wamacö nö ca̦i bleaaö mö feduobä wamacö tablamalema malä cui. 30 ¡Bämalecö nö bleaamaöje lä! Wale da yabäcablejei wama tä daö. Wale yabäcaö lä showalajei, wama tä a̦ ca̦i ji̦liaö.
21 ¿Ö̦jö tawä? Jesucristonö bämalecö bufi lofotomabou, bämalecö ca̦i nofimaö. Ö̦jö bäma a Bufi malä tabou wei. Ö̦jönö bämalecö bufi ca̦i malä bayelibou wei. Bämalecö nofi ca̦i malä ojodabou wei. Inaja bämalecö taamaö ja lä, 2 moli tä ja, bä bufi bluca da shalilo. Bä bluca da nofimayo. Moli tä a̦ ja bä bufi mö da blucaicu. Moli tä a̦ ja, wamacö bufi bluca fa shalilonö, dodijidawä bä da cuo. ¿Ö̦jö tawä? Inaja wamacö cuaaö ja, ya bufi nia yai doblalou. 3 Abenaja ya cuu. Jödödöwä wama tä taö lä bädao wei tä ma cui ja, cafä wamacö bädawä mlai, ai wama täbä nofi ca̦i jaducäbobä. Cafä wamacö nofi dodijaö doobä mlai. Wamacö bufi jaducälanö, “¡Jai yä! ¡Cama bä nofi li dodijaö yai!”, ai wama bä nofi ca̦i tabou mö feduobä. 4 Cafä wamacö nia lä bayelio wei tä ja, bä shi dou ayao dijä, ai bä mö feduwä ma cui lija wamacö shi ca̦i jalimou mö feduobä. Bä da bayeliblayo. 5 Jesucristo a bufi lä cuono weinaja, a bufi da owäboje. Cama a lä dodijano weinaja wamacö cuaaö mö feduobä. 6 Jesucristo a lä cui, “Yai Bada a waiquiwä”, a nofi tabobeje a ma cuono wei ma cui, ö̦jö tä ja a bufi mö blucaonomi. 7 Ma, cama etä fa dacöfälönö a itolayoma. Cama a yai nosiemobä a ma cuono wei ma cui, a nosiemamou ojodaoma. A yanowamöblaleyoluma. 8 A fa yanowamöblalunö, a ojodaoma. A fa ojodaonö, a shämobä tä ma cui ja a ojodao fe yadioma. Fii ficö ma cui ja, täbä nofi yai jushuaö fe lä balojoo wei täbä shäö lä cuaaö wejeinaja, a ca̦i tablamou ojodao fe yadioma. 9 Inaja a ojode cuoma yalo, Yai Bada tänö Bada tä yai tablamalema. Ai täbä a̦fa bada ma wäyämou wei ma cui, ö̦jö a wa̦fa shi̦lo yai Bada jilamou dodijiobä, a Bada tablamalema. 10 ¿Ö̦jö tawä? Bluca bä lä bälöjöi bänö Jesús a nö Bada ö̦jöböabeje, Bada bei a yai tablamalema. Fedu jamö bä bluca lä culadi bä ma cui, bita jamö bä bluca lä cublai bä ma cui, mashita a co̦jomö jamö bä bluca lä cublai bä ma cui, Jesús lija bä möfe bluca quilili boobä, Bada a tablamalema. 11 Bluca bä lä cublai bänö Jesucristo a wa̦fa Bada wäyäbeje. Fayä Yai Bada tä doblao ca̦i dablamobä. ¡Inaja lä tä yai cuobä! 12 ¿Ö̦jö tawä? Iba bämacö lä nofimaö wei wamacö. Showadi wamacö a̦ lä fuo weinaja, bä a̦ fuo cuaaö da showao. Jesucristo a wa̦ fuo si malä ijejeono wei. Yai Bada wama a nö quili talanö, wama ecö dodijidawä cuobä. Ö̦jö wamacö bluca lä fucäamou wei, dodijidawä wamacö cuobä wamacö malä cui. Cafä wamacö lija ya lä cuo wei däjä bädawä mlai, mija ya cua lä mlai däjä, öjö däjä dodijidawä wamacö a̦ yai fuobä. 13 Yai Bada wama a bufi doblalamabä, cama a showawänö wamacö bufi shi malä jalijamaö wei. Tä taamaö lä bufii wei tä ja, wamacö nö ca̦i malä wa̦lojamaö wei. 14 Wama tä bluca lä taö wei tä ja, dodijidawä bä da cuo. Wamacö bufi jushujuablalou mlai, wamacö a̦ lafujou mlai, wamacö dodijabä. 15 Wamacö a̦fa wayoamou mlaobä. Wa̦lidiwä tä lä cui tä ja, jai mojodi wamacö cuobä. Yai Bada wama ecö ijilubö dodijidawä cuobä. ¿Ö̦jö tawä? Täbä dobloimi lä waiquii bä lijamö wamacö ma coyocoo wei ma cui, dodijidawä bä cua fe da yadiicu. Shominaja bä cuaaö nö lä quiliaö wei bä lä cui lijamö wamacö ma coyocoo wei ma cui, bä da dodija. Jai tä mö didi sublaobä jamö tä shi̦i wacacadou lä culenaja, wamacö cuobä. 16 Täbä lä ba̦limiblamaö wei wama tä a̦ lofotobolanö, wama tä a̦ wäyäö cuaabä. Jesucristo a itou co̦oyoluu däjä, wamacö nö lä wa̦lojano wei tä ja ya bufi doblalobä. Ya shi jalimobä. “¡Ei malä cui! ¡Ya nö bleaano malä mlai!”, ya cubä. 17 Wale ma shäöje däjä ma cui, bämacö bufi bluca doblao fe yadiobä tä cua. Jesucristo wama a nofi mölabou yalo, wama a wa̦ malä fuaaö wei. Yai Bada lija yalo bä lä dodobou wejeinaja, cafä wamacö ma cui wamacö dodoa cua malä waiquile. Inaja wamacö cuaaö bufi doblao ja, camiyä ya bufi ca̦i doblao mö feduo. Jai bei toubä liyäyamou feyacao lä culenaja, camiyä bei ya i̦yäbö liyäyamou ma cublou däjä ma cui ja, ya bufi nia doblalou fe yadio. 18 Cafä wamacö lija ya bufi doblao lä culenaja, inaja showawä, wamacö wajäaö mlai ja, camiyä lija wamacö bufi ca̦i doblao cuo mö feduobä. 19 Bei. Cafä wamacö lija Timoteo ya nia shimaö fa jaödaonö, Bada tä Jesús lija ya mölablalou showaa lä cule. Ya fa shimölönö, cafä wamacö dodijaö fa dalalönö, wamacö a̦fa dodijaö wäyäö co̦ojolou ja, ya bufi lofotoblou co̦obä. 20 Ö̦jö ya nia shimaö lä cadidio wei a. A bufi bejedilanö wamacö malä nofimaö wei. Ö̦jö Timoteo a nofi lä culenaja, ai a cuami. 21 Ai bä lä cui, cama bä befi shi̦lo tamou. Jesucristonö tä tamaö lä bufii wei tä ma cule, cama bä cuaaö bufi lä doblao wei tä ja, bä yabäcäo. 22 Ö̦jö ma cui, Timoteo wama a dodijaö daö malä waiquii. Cama sho Jesucristo yafä etä a̦ dodijidawä wäyäö cuaabä, wale lä bayeliblaö wei a dodijiwä. Bä ijilubö enö bä fö̦ö e dodijidawä bayeliblaö lä culenaja wale taamaö talei. 23 ¿Ö̦jö tawä? Ö̦jö ya shimaö bufi doblaa ma cule, camiyä lija tä nia lä cublou wei ya tä nö dabou balöo, wamacö yömölaö cadidiobä. 24 Camiyä ya ma cui, cafä wamacö lija ya ca̦i fuu jaödaobä, Bada tä lija ya mölaö showaa lä cule. 25 Aiyä Ebaflodi a lä cui ya shimaö bufi ca̦i doblao. Cafä wamacö lijamö ya shimaö co̦obä, ya bufi dodijidadalio lä cufe, wale bayelibobä cafäteli wama a lä shimöleno wei a lä cui. Jesucristo yafä tä a̦ wäyäbä yafäcö lä ojodamou wei a mö feduwä lä cui. Täbä wayu fubä jamö täbä nö wa̦lojoablalou fe lä yadio weinaja, yafäcö lä cuaaö wei a. 26 Wamacö bufijaö ja, ya nia shimaö co̦o. Cama wama a̦fa jalili ji̦lilema yalo a bufi nö bleaaö. Wamacö bufi jalujou nofi fo̦lijibou. 27 ¡Bejedi lä! A jalilia fa dodijilalunö, a mili nomaa dodijilayoma. Ö̦jö ma cui Yai Bada tänö a nofi fa ojodadalönö, camiyä wale nofi ca̦i fa ojodadalönö, a jaloa co̦malema. Ya bufi fo̦lijiblou fe balojoo dicoo mlaobä a bayeliblalema. 28 Ö̦jö cudeenö, cafä wamacö lijamö ya shimaö shi jalimou co̦a lä cule, wama a demi daa fa co̦lalönö, wamacö bufi doblalou co̦obä. Cafä wamacö lija a cuo co̦o däjä, camiyä ya ma cui ya bufi jalujou fe yadio mlaobä. 29 ¿Ö̦jö tawä? Wamacö bufi doblalolanö a waloa da co̦macöje, ö̦jö lä. Bada tä Jesucristo bäma ecö lä cui, showadi bäma ecö lä taamayou weinaja showawä. Einaja täbä ojodamou lä cuaaö wei, “¡Ei bä nofi dodijaö dodijiwä yai!”, bä nofi shi̦lo da taboje. 30 Cristo lija a ojodamoma yalo a mili malä nomalayono wei. Cafä ai wamacönö wamale bayeliblaö doblou lä mlaono wei däjä, wale bayelibou fe yadiobä, cama a noshi malä ö̦jödaono wei. A nomaö nofi fo̦lio mlai ja, a ojodamolayoma. ¿Ö̦jö tawä? Dodijidawä wama a waloamaö co̦obä, ö̦jö lä.
31 Abenaja ca̦i. Bada wama ecö yalo bä bufi da doblalo, iba wamacö. Ya tä a̦ jaba wäyäö da balöoblei, ö̦jö ya tä a̦ wäyäö co̦a lä cule. Bämacö bufi nia fa jaducämabonö, ya wa̦ modabloimi. Wamacö yaclämaö bufi lä doblao wejei bä lija wamacö nowamöobä, ya wa̦ co̦dawä. 2 Abenaja ya cuu lä cule. Bä da moyaweicu. Jai ji̦ima bä wa̦li waiteli läläo lä culenaja bä cuwänö, wamacö nofi lämaöje. Bä wayu. Bä ca̦i dobloimi waiquiwä. Wamacö niniamaö bufi doblao bädaoje. 3 ¿Ö̦jö tawä? Bä mosi sicö joyamou yalo Yai Bada ebä a̦fa ma jilou wei ma cui, ¡ma! Camiyä bejedi bäma ecö li yaiwä. Jesucristo bäma a nofi mölabou yalo, jai bämacö mosi sicö joyamoa waiquilayoma bämalecö nofi tabou malä waiquiladi. Yai Bada tä Bufinö bämalecö fa bayelibonö, cama bäma a yai bufiblabä bämacö. Camiyä bämacö nofi mölamobobä bämacömi. Jesucristo bäma a nofi yai dobobä bämacö. 4 Camiyä yanowamö bämacö nofi mölamobobä tä cuami waiquiwä. Tä cuo fa cunoja, camiyä ya nofi nö ca̦i mölamobou mö feduobö wei. ¿Ö̦jö tawä? “Ya mölabä lä”, ai täbä jole lä cuu weinaja, camiyä ya nö yai cuu fe balojoobö wei. Abenaja tä malä cule. 5 Ya oshe fa wawälönö, 8 ya tä mö didi fa tablamalönö, wale mosi sicö joyalemaje, Moisesinö täbä taamaö lä bufino weinaja showawä. Isaeli nodiwä ya e. Bejamino bä ijilubö ebä nodiwä lija ya cublou nodilayoma. ¿Ö̦jö tawä? Nayä a ma cui, fayä a ma cui, Isaeli yama ecö lä nodiblou wei, ebleo yamacö bluca. Moisesi ya etä a̦ nofi cadidibou bufi fa doblaonö, faliseo bä lija ya co̦cablaliyoma. 6 Moisesi ya etä a̦no joyaö nofi fa jalubonö, Jesucristo ebä lä yododaö wei ya ebä nö bleaamaö fe balojooma. Moisesi ya wa̦no cadidibou fa dodijionö, yanowamö täbä lija ya wa̦fa tamobä tä cuo fa mlacunö, ya nofi jole doo balöoma. 7 Ya jaba lä mölano wei, “Ö̦jö tänö ya bayeliobä tä dao”, ya bufi ma cuno wei ma cui, ö̦jö tä ja, fei däjä ya mölaimi. Cristo ya yai tabobä, ya bufi jaba lä cuno wei tä lä cui, ya tä joyalema. 8 Ö̦jö lä, jödödöwä ya tä nofi jaba lä tabono wei ya tä bluca joyalema. Bada ya tä Jesucristo yai nofiaö fe balojoobä, “Tä nowa cuami waiquiwä”, ya täbä nofi bluca tabou majöa. Jesucristo ya yai tabobä, ai ya tä bluca waia waiquilema. Jai shii bä jilaa tejemi ya tä nofi tabou nomöjöa lä cule. Jesucristo lija ya fa yädäicunö, ya yai bayelio dodijiobä. 9 Jesucristo ya e cuo cadidiobä ya tä nofi cadidibou lä cule. Moisesi ya wa̦no lä fuano wei tänö ya dodijidablono malä mlai. Ma, Cristo ya nofi mölabou yalo, Yai Bada tänö wale li dodijidablamalema. Jesucristo lija täbä mölaö ja, dodijidawä täbä nofi tabou malä showadao wei. 10 Jesucristo ya daö wawädoobä, ö̦jö ya tä bluca joyaö ojodaoma. A demi lä jocädamaleno wei etä lofote showawänö, showadi wale bayelibobä. Jesucristo ya wa̦ lä fuaö wei tä nowa ja, wale nö ma bleaamaö wejei ma cui, Yai Bada lija ya noshi ö̦jödao fe yadiobä. Yai Bada a wa̦ fuama yalo, Jesucristo a nö bleaaö ojodao malä balöono wei. Ya nomabä tä ma cublou däjä ma cui, ya noshi ö̦jödao fe yadiobä. Cama a nomaö malä ojodaono wei. 11 Ya ma nomaö wei ma cui, wale demi jocädamaö co̦obä ya malä mölaö wei. 12 Abenaja ya cuimi. “Ya doblou waiquiwä. Jesucristo a dodijaö lä culenaja ya cuwä waiquiwä”, ya cuimi. Ya dobloimi malä showai. Ö̦jö ma cui, Jesucristo a lä culenaja ya cuo fe yadiobä, ya nabä cadidou showao. Cama a lä culenaja ya e cuobä, wale malä yaileno wei. 13 Ma, iba wamacö. “Jesucristo a dodijaö lä culenaja ya cuwä”, ya nofi tamobou ma mlai ma cui, abenaja ya cuaaö. Ya jaba lä cuaano wei tä ja, ya mölaimi. Ya tä nofi lä macocobole tä ja ya nö wa̦lojabä, ya yai cadidou. 14 Jesucristo a lä culenaja ya cuobä, ya bufi macocoa dodijia lä cule. Ö̦jö lija ya yädäquema yalo, Yai Bada tänö wale nia malä co̦aö wei. Ö̦jö lä ya nofi macocobou yalo, ya demöo showao däjä ya bufi nö wa̦lojoobä. 15 Yai Bada lija bämacö bufi moyawe lä waiquii bämacö lä cui, ya lä cufe tä a̦ ja bämacö bufi bluca shaliliobä. “Inaja lä waiquiwä”, ai wamacö bufi cuimi bädao ja, Yai Bada tänö tä wawämaö weicätä. 16 Ö̦jö ma cui, Yai Bada tänö tä wawämaö lä waiquile tä ja, ö̦jö tä ja bämacö bluca cadidou da showao. 17 Iba wamacö, abenaja ya cuu. Bluca wamacö showawänö wamale da owälä. Camiyä yamacö lä cuaaö weinaja, ai täbä cuaaö mö lä fedui wama bä ca̦i dodijaö fa mönö, ö̦jö bä ca̦i shi̦lo da owämaje. 18 Bä lä jolemou wei bä malä bluca wei. Yai Bada ebä a̦fa ma jilou wei ma cui, bä lä cuaaö wei tänö bä jolemou dablamou. Yai Bada bäma ecö dodijabä tä ma cuo däjä, bä a̦ läo. Bämacö dodijabä, fii balitama tefi ja Jesucristo a malä shämolayono wei. Ö̦jö ma cui, cama dodijidawä bä cuo bufio fa mlacunö, bä nö nabä. Ö̦jö ya bä a̦fa bluca wäyäö waiquiwä. Ei ya wa̦ lä cui däjä ma cui, ya mabu ubä falanö ya bä a̦fa wäyäö co̦a lä cule. 19 Yai Bada tänö bä nia waiyamaö. Tä tamaö lä bufii wei tä ja bä cadidou mlai, cama bä cuaaö bufi lä doblao wei tä ja, bä bufi shi̦lo macocoo dicoo. Bä lä cuaaö wei tä ja, “Shädayai”, bä bufi cubä tä ma cule, bä nofi dodijaö doo. Showadi täbä yanowamö bufi lä cuaaö weinaja, bä bufi ca̦i cuaaö dicoo. 20 Ö̦jö ma cui, camiyä bämacö lä cui, feduteli bämacö li waiquiwä. Fedu fedole jamö bämacö cuodayobä bämacö li. Ö̦jamö culanö bämalecö fucäabä, bäma a nö dabou waiquia malä cule, Bada tä Jesucristo lä cui. 21 Cama a lofotenö, bei bämacö sicö lä ujudi wei bämacö sicö fa shomiblamalönö, cama sicö dodijidawä lä culenaja, bämacö sicö nia tablamodayou. Cama Jesucristo a lofotenö tä bluca tamobä a malä cui.
41 Iba bämacö lä nofimaö wei wamacö. Bämacö bufibou. Ya bufi doblalobä cafä bei wamacö. Yai Bada lija wamacö lä dodijaö wei tänö, jai ya nowa co̦amamou ya tä nofi tabou waiquiwä. Bämacö lä nofimaö wei wamacö. Ei ya tä a̦ bluca lä onicöfe wama tä a̦ fa cadidibonö, Bada a nofi mölabou fe da yadioje. 2 Miji suwä cäcöbä a̦fa lä tayou wei cäcöbä lija ya wa̦ faö. Ebodia a lä cui, Sidique a ca̦i lä cui, moli tä ja cäcöbä bufi shaliliobä, ya wa̦ fe blacäjou. Bada tä Jesucristo ecöbä malä cui. 3 Cafä lija ya wa̦ ca̦i faö lä cule, cafä sho dodijidawä bäfäcö shi̦lo lä ojodamou wei wa lä cui lija. Ei ya cöbä a̦fa suwä lä jayumafe cäcöbä nofimayou co̦obä, wa cöbä cadidamabä, ö̦jö lä. Dodijidawä wale mada bayeliblaböblei. Jesucristo yama etä a̦ dodijidawä wäyäö fe yadiobä, cäcöbä nö mada wa̦lojablei. Clemede sho, iba ai bä ca̦i bluca lä yädäono wei bä sho, bäma tä a̦ wäyäö fe lä yadiono wei däjä, cäcöbä nö suwä mada wa̦lojablei. Täbä nia lä ba̦limiodayou wei täbä a̦fa lä onibole sibä ja, Bada tänö täbä a̦fa bluca malä oniboladi. 4 Bada tä Jesucristo wama ecö yalo, bä bufi shi̦lo da doblaicu. ¿Ö̦jö tawä? ¡Bä bufi da doblalo! 5 Dodijidawä bä ca̦i da cuoje. Showadi wamacö a̦ lä oquedio wei tä dablamobä. Bada a fuu malä ajedei. 6 Bä bufi jalujou dodijio dijä. Tä bluca cublou lä bädao wei tä ma cui ja, wamacö bufi jalujou mlai, Yai Bada a shi̦lo yai da wa̦lije. Bä nacou nosi da blacäco. Cama lija wamacö bufi a̦fa doblalou fa wäyämonö, bä nö shi̦lo bayeli da nacao. 7 Inaja wamacö cuaaö ja, Yai Bada tänö wamacö bufi wasöbou fe yadiquei. Jesucristo wama a nofi mölabou yalo, wamacö bayeliblaö cuquei. Wamacö bufi dodijidablou co̦obä tä nö cuobö ma mlai, wamacö bufi yanöcömabou fe balojoquei. 8 Abenaja co̦wä, iba wamacö. Dodijidawä wamacö cuobä, abenaja wamacö bufi shi̦lo yai daeo cuaabä. Tä lä bejedi wei tä ja, täbä yai lä dodijidamabou wei tä ja, wamacö bufi yai daeobä, tä lä dodijidai tä ca̦i ja. Tä a̦ shomitawä coyocowä ja, ö̦jö tä ja wamacö bufi daeo mlai. Täbä bufi lä doblalamaö wei tä ja, wamacö bufi yai daeobä. “¡Inaja dodijiwä!”, täbä bufi taamabä tä cua ja, ö̦jö tä ja, wamacö bufi shi̦lo yai daeobä. Tä nofi doamamobä tä cua ja, ö̦jö tä ja wamacö bufi ca̦i daeobä. ¿Ö̦jö tawä? 9 Wamale da owälä. Showadi ya lä cuaaö wei tä ja, wamacö moyawe waiquiwä. Ya täbä damaö lä cuaaö wei, wama tä daö. Wama tä a̦ däabä, cafä wamacö lija ya tä a̦ da wäyäblei däjä wamale a̦ ji̦lilema. Wamale ca̦i möma. Wamale fa owälänö, Yai Badanö wamacö bayelibou cuquei, täbä bufi shi̦lo lä yanöcömabou wei a lä cuinö. 10 Ya̦cumö wamale bayeliblaö co̦a yalo, Bada tä lija ya bufi doblalou. ¡Ya bufi doblalou fe balojoo! Wamale dobäö bufi doblao ma showaono wei ma cui, wama tä shimabä tä cuonomi. 11 “A bufi jalujublalou yalo a wa̦ daanö”, wamale nofi tabou dicoa lä mlale. Ya ma fo̦li wei ma cui, ya ca̦i fo̦li ma mlai ma cui, ö̦jö ma cui ya bufi doblao fe yadiobä ya malä dalaliyono wei. 12 Ya ma fo̦li wei ma cui, dodijidawä ya ma bälöo wei ma cui, ya bufi doblao fe yadio. Tä cublou lä bädao wei tä bluca ma cui ja, dodijidawä ya cuo fe yadio. Nii ya bä ma tabou wei ma cui, ya ma ofäö wei ma cui, ya nö ma madofiböo wei ma cui, ya ma fo̦li wei ma cui, dodijidawä ya cuo fe yadiobä, Yai Bada tänö wale bufi daamaö. 13 Tä cublou lä bädao wei tä ma cui ja, Jesucristonö wale nö wa̦lojomabou yalo, ya doblou fe yadio. 14 Ö̦jö ma cui, ya dodijaö ma waiquio däjä ma cui, wamale lä bayeliblano wei tä ja, wamale bufi doblalamaö dodijioma. 15 Showadi inaja wamacö mada cuaablei. Cafä Filiboteli wamacönö, ö̦jö wama tä daö malä waiquile. Mijamö Masedonia ulufi jamö bämacö jaba da yömölablei däjä, bämacö ulufibö daa fa nomöjöcöfälönö, ai täbänö wale bayeliblanomije. Ai ya täbä yömölaö cuaaö majöobä, wale dobänomije. Ö̦jö däjä cafä wamacönö wamale nö shi̦lo bayeli shimama. 16 Ö̦jamö lä showawä, Desalonicateli bä lija ya lä cuono wei däjä ma cui, wamale nö bayeli shimaö mada bolacaoblei. 17 ¿Ö̦jö tawä? Camiyä ya bayeliobä ya wa̦mi. Cafä wamacö li bayeliobä ya wa̦. Camiyä wamale bayeliblaö tä nowa ja, Yai Bada tänö wamacö bayeliblaö mö lä feduo wei, ö̦jö ya tä nofi cadidibou lä cule. ¿Ö̦jö tawä? 18 Wamale bayeliblabä, aifä Ebaflodi lija wama bä lä shimöbeno wei ya bä dälema. Ai wama bä yädäamaö co̦oma yalo, wamale a̦ fejelaamaö dodijioma. Fei däjä ya fo̦lia mlaa lä cule. Fei däjä dodijidawä ya cuobä, ya tä bluca tabou. Abenaja ca̦i. Wamale nö bayeli lä shimaö wei, ö̦jö tänö Yai Bada wama a bufi ca̦i doblalamaö. Jai Yai Bada cama a dobämou bei tä cuwä. Jai Yai Bada lija, toubä ni cle̦deli liyäyaö lä cuaaö wejeinaja, inaja showawä tä nofi tabou lä culadi. 19 Abenaja ca̦i. Yai Bada ya lä bufiblaö wei a lä cuinö, cafä wamacö ca̦i nia bayeliblaö mö feduo, wamacö nö bleaaö mlaobä. Jesucristo lija wamacö yädäa yalo, wamacö nia dobäö fe balojoo. 20 Ö̦jö Yai Bada bäma a lä bufiblaö wei, bämacö lä Fö̦ömole, ö̦jö tä nofi doablamou shi wa̦libä. Inaja lä tä cuobä. 21 Mija Yai Bada ebä bluca lä cule, Jesucristo a nofi lä mölabou wejei bä lija wamale a̦fa da wäyä. Camiyänö Jesucristo ya ebä ca̦i lä cule, bä a̦fa ca̦i wäyämamou bufio lä cule. 22 Eja Yai Bada ebä bluca lä cule, cafä wamacö lija bä a̦fa wäyämamou bufi ma doblao wei ma cui, Lomateli bada a lä cui e yafi jamö bä lä cule, ö̦jö bä a̦fa shi̦lo yai wäyämamou bufi doblaa dodijia lä cule. ¿Ö̦jö tawä? 23 Bei. Bada tä Jesucristo lija, showadi wamacö bufi bayeliblamobä. Wamacö nofi shi̦lo ojodabobä. Inaja lä tä cuobä.