San Marcos

San Marcos

¹ Ei Jesucristo dodijidawä etä a̦ colo, Yai Bada bei Ijilubö e lä cui. ² Juan a cuo showao mlao däjä, Yai Bada a wa̦no wäyälewä Isaia a lä cuinö, yedu jamö a wa̦fa wäyäö lä balöono wei etä a̦ bejedi cublaliyoma. Abinaja tä a̦ cuu. Bei. Wa nia juu lä cuaafälöö wei jamö, wa wa̦no taö balöafälöbä, iba ya nia shömaö balöo, wa wa̦ ji̦liaö dodijidaobeje. ³ Ulifi bloque jamö bä yömölaö ja, a wa̦ nia lojodoaö. “¡Bada tä juu lä cuimi!”, a nia cuu. Abinaja bä nowa nia taö, a wa̦ Bada ji̦liaö cadidio showadaobeje. “A nia lä juu wei jamö, bei wama e yo wawämaö fa cuaaimadunö, e yo shaliliblaö da balöloje”, bä nowa nia taö. Einaja tä a̦ cuu, Juan a wa̦fa wäyäö lä balöono wei tä a̦ lä cui. ⁴ Bei. Ulifi bloque jamö, yacumö, fe ojomalewä Juan a wawälayoma. Bä yömölaö ja, wa̦lidiwä tä ja bä bufi lädamaö bufima, cama nija bä fe ojoblamobä. Bä doblou lä mlai tä ma cule ma cui, Yai Bada tänö tä nowa mladamabä. ⁵ Ö̦jö däjä, Judea jamö bä bluca lä bälöblai, Juan nija bä walobaleyoluma, Jelusaleteli bä ca̦i bluca. Bä doblono lä mlai tä ja, bä a̦ nö wäolanö, Jodana u jamö cama nija bä fe ojoblamolayoma. ⁶ ¿Ö̦jö tawä? Yalo cameyo co̦icö ja, Juan a didioma. Yalo si ca̦i acadafu ya̦boma. Cösö cösöma bä waama, buu ubä ca̦i. ⁷ Täbä yömölaö ja, abinaja a cuma. —Inaja camiyä ya cuaaö ma balöo wei ma cui, camiyä ya nodi jamö a nö yai lä wa̦lojaö wei a nia waloo nomöjöoyoluu. Ö̦jö a shino yai doblaa ayaa cudeenö, ya bayeliblaö bädaobä tä ma cui ja, ya nö quilibö wei. Bei mamicö lä didio wei ya etäcö nata cushaö ja, ya loquei ma cui ya nö quilibö wei. ⁸ Camiyänö bämacö fe ojoblaö däjä, mau u ja bämacö jödödöblamaö ma cui, ö̦jö a lä cuinö, mau unö mlai, Yai Bada a Bufinö wamacö nia jödödöblaö. ⁹ Inaja Juan a cuaaö showao däjä, Calilea tä ulifi jamö Jesús a cuoma. Nasaleteli bä lä bälöle jamö a culanö Jodana u jamö a fa walobaliyonö, Juan nija a fe ojoblamolayoma. ¹⁰ A fe fa ojoblamolunö a washölöblou co̦o däjä, lobe judu mösö ca jolaa dalalema. Yai Bada a Bufi, jai joledo a cuwä, a itou ca̦i daa showaadalalema. ¹¹ Ö̦jö däjä, fedu jamö tä a̦ fa bädaludunö, abinaja Yai Bada a cuma. —Ijiluyä bäfä nofimaö lä dodijile, cafä wa. Cafä nija bejedi lä ya bufi yai doblalou dodijio —a cuma. ¹² Ö̦jö däjä showawä, ulifi bloque jamö, lobe Yai Bada tä Bufinö Jesús a shömölema. ¹³ Ö̦jamö lä yalo bä lä juole jamö Jesús a juu showao däjä, 40 tä mö didi tablamaö däjä, Sadanasinö a yabäcäblalama ma cui, a̦jele bänö a bayeliblamaje. ¹⁴ Bei. Bada bänö Juan a juwäa waiquimaleno wejei ja, Calilea jamö Jesús a cua co̦layoma. Yai Bada dodijidawä tä a̦ ja, bä yömölaö cuaaimalanö, a waloa co̦quema. ¹⁵ Abinaja bä nowa taö cuaama. —¡Fei däjä waiquiwä! ¡Wa̦lidiwä tä ja, bä bufi da lädalu! Yai Bada tänö cama ebä ca̦i nia lä cuo wei, tä ajedou waiquia lä cuimi. Yai Bada dodijidawä tä a̦ bejedi ca̦i da bufije —bä nowa taö cuaama. ¹⁶ Modu Calilea u casö jamö Jesús a diquecou cuaafälölanö, Simón a dalalema, bä fääshä Andrés e ca̦i. Yuli bä lä ya̦camou wei täcö walalawä queamaböö däjä, cäcöbö dalalema. ¿Ö̦jö tawä? Yuli ya̦calewä cäcöbä cuoma. ¹⁷ Abinaja Jesúsnö cäcöbö nowa tama. —Jabo. Cäcöbö da yauiquiyo. Yuli bä bädawä mlai, yanowamö wafä täbä nabä shino yai lä juu wei wafäcö cublobä bäfäcö nia tablamaö —cäcöbö nowa tama. ¹⁸ Ö̦jö däjä, a wa̦ fa ji̦libölänö, täcö walalawä daböa fa showadacöfälönö, ö̦jö nijamö cäcöbö yaua showadalayoma. ¹⁹ Ö̦jö tä fe dolejedale ja, Sebedeo bä ijilubö Santiago e daa majölalema, bä fääshä Juan e ca̦i. Cama bä canawäbö ja cäcöbö befi ca̦i ca̦lanö, yuli bä lä ya̦camou wei täcö walalawä idudaböma. ²⁰ Cäcöbö ca̦i nacaa fa showadaalänö, cäcöbö yaua showaquema. ¿Ö̦jö tawä? Canawä a jamö, bä fö̦ö Sebedeo e daböquefälöma, cama a nosie lä juano wejei bä ca̦i. ²¹ Cabenaoteli bä shabonobö jamö, Jesúsnö cama ebä ca̦i waloa nomöjöquema. Sábado däjä, judio bä yododabä yafi jamö Jesús a lucäa fa showadalunö, Yai Bada etä a̦ ja, bä damama, täbä yanöcöobä tä mö jalu ja. ²² Bä damaö däjä, a wa̦ lä shaliliablalou wei a wa̦ ja, bä bufi möaaö dodijioma. Moisesi etä a̦ ja bä showadi damaö lä cuaano wejeinaja, a wa̦ ji̦limamou cuono malä mlai. Jai tä a̦ yai daö shalilio showadaoma, a wa̦ ji̦liaö malä cuaano wejei. ²³ Ö̦jamö lä, judio bä yododabä yafi jamö, a lä feculaböono wei a ca̦i wa̦lo coyocooma. ²⁴ A wa̦ i̦cali fecula fa falönö, a wa̦ quilili läblaliyoma. —¡Ma! Nasaleteli Jesús wa lä cuinö, ¿wedinaja yamalecö nia fa taamanö, bei wa li waloo cuboyoi? ¿Bei yamalecö nabä juu waiquio cufe? Bäfä daö. Yai Bada tänö wa lä yaileno wei wa e —a cuma. ²⁵ Ö̦jö ma cui, Jesúsnö a wa̦ wasöblalema. —¡A wa̦ fa dijä. E faa da co̦lufälö! —a cuma. ²⁶ Ö̦jö däjä, fecula anö a wa̦lo i̦cali fa yabolemomalönö, a i̦cali si̦lalamolanö a daa showaquefälöma. ²⁷ Ö̦jö tä fa dalalöjenö, bä bluca shädayaimou dodijioma. Abinaja bä nowa tayou ja, bä cuma. —¿Ei wedi bei tä a̦ majöwä? ¡Tä a̦ nofi yai lä shomi wei! A wa̦ fa shalilonö, ¡fecula bä ma cuinö a wa̦ nofi lä juaö wejei! —bä cuma. ²⁸ Ö̦jö däjä, Jesús a wa̦fa wäyäö cuaaö fa showadalujenö, Calilea tä ulifi fe lä fa̦yoi jamö ma cui, a wa̦fa ji̦limou blaucuomobodayoma. ²⁹ Ö̦jö däjä, judio bä yododabä yafi jamö a faa fa co̦lufälönö, Simón, Andrés cäcöbö yafibö jamö, Santiago, Juan sho cäcöbö ca̦i lucäa majölayoma. ³⁰ ¿Ö̦jö tawä? Ö̦jamö Simón bä yesi e lä cui, a fa yoblaonö, e jalili blaoma. Jesús nija a wa̦fa wäyäö showadaomaje. ³¹ A jalili blaobä jamö a fa icuicunö, boco fa dälönö, a jocädamalema. A lä yoblaono wei etä mladou fa showadalonö, bä fama iyaa showadamalema. ³² Bei. Motoca a lä queo wei däjä, bä ca̦i jalili lä cublamono wejei bä ca̦i bluca waloblayolumaje. Bä lä feculaböono wei bä ca̦i. ³³ Bä lä fablaaö wei yoca jamö, Cabenaoteli bä shabonobö jamö bä bluca lä bälöle bä bluca yododablayoluma. ³⁴ Bluca tä wayu shomitawänö bä nö jalili lä bleaano wei bä jalomalalema. Fecula bä bluca ca̦i yashuu showadaoma. ¿Ö̦jö tawä? A nö ö̦jöböamaje yalo, bä a̦ fablamanomi. ³⁵ Tä mö didi sublao showao däjä, Jesús a jocäblou fa jalulonö, täbä bälöa lä mlale jamö a aa fe jalulayoma. Ö̦jamö Yai Bada nija a wa̦ fama. ³⁶ Simónnö bä ca̦i lä cuono wei bä sho, a dayäaö fa juojenö, ³⁷ bä waloa jäqueyoluma. Abinaja ebä cuyoluma. —Bluca täbä jödödöwä lä cuinö wa dayäö jäaje —ebä cuma. ³⁸ Ö̦jö ma cui, Jesús a wa̦ läblaliyoma. Abinaja bä nowa tama. —Ma. Ai bä shabonobö nomöjöwä jamö bämacö nia jayublou nomöjöo, ö̦jamö lä ya tä a̦ ca̦i wäyäbä. Ö̦jö lä ya bä bluca yömölabä, ya malä waloqueyoluno wei —a cuma. ³⁹ Ö̦jö däjä, Calilea jamö Jesús a juu cuaalanö, judio bä yododabä yafi bä jamö, bä yömölaö cuaama. Fecula bä ca̦i yashuu cuaama. ⁴⁰ Täbä sicö lä jodemaö wei tä wayunö a nö lä bleaano wei a jalili waloquema. Jesús nija a fa dijoafälönö, a nofi nia ojode fa tablamonö, a wa̦ fama. Abinaja e cuma. —Wale bayeliblaö ojode ja, wale jalomalei dao, ya dodijidablou co̦obä —e cuma. ⁴¹ Jesúsnö a nofi ojodadaö ja, boco fa dododalunö a jubädalema. Abinaja e cuma. —Ya ojode lä. A da jalolu, ö̦jö lä, wa dodijidablou co̦obä —e cuma. ⁴² Ö̦jö däjä, etä wayu mladou fa showadalonö a dodijidablou co̦layoma. ⁴³ Ö̦jö däjä, a shömaö co̦lanö, a wa̦ nö wäo wasöö dodijioma. ⁴⁴ Abinaja e cuma. —Ei bäfä lä jalomalöfe, yanowamö moli ma cui nija wa tä a̦fa nia wäaimi. Nofi bäyäalewä nija a yai da mömodu. Wa dodijidablou lä co̦lufe tä nowa ja, Moisesinö tä jöböamaö lä bufino wei etä da dodobodu. Inaja wa cuaaö ja, bluca täbä nija wa nia demi dablamou wawädoo —a cuma. ⁴⁵ Ö̦jö ma cui, bluca täbä nijamö Jesús a wa̦fa wäyäö fa showadaonö, tä a̦ yai balamaö cuaama. Inaja a cuaama yalo, bä lä lulono wei bänö Jesús a doblamanomije. Täbä shabonobö jamö, wawädowä a juu doblonomi majöwä. Ulifi jamö a shino yai cua fa majöalunö, ö̦jamö lä jödödöwä bä lä bälöblai ebä waloblaaö majöoyoluma.

¹ Tä fa weyajadalunö, Cabenao jamö Jesús a waloa fa co̦alunö, a co̦blou ji̦lilemaje. ² Ö̦jö däjä, bluca bä fa yododoblaliyonö, je̦fa tä jödödöblou fa waiquilonö, ai bä ublao yädäobä etä cuonomi. Inaja tä mashiquio cuo showao däjä, Yai Bada etä a̦ ja, Jesúsnö bä bluca yömölama. ³ Ö̦jö däjä, Jesús nija a mömabeje, a lä ya̦toliböono wei a lä cui, 4 täbänö a befi ca̦i cadömaboimamaje. ⁴ Ö̦jö ma cui, bä lä co̦camono wei bänö a yafi je̦fa mashiquiwä ja, a ca̦i faö doblonomije. Ö̦jö cudeenö, yafi feyaca sibo jamö a ca̦i dubefälömaje. A ca̦i fa dubofälöjenö, Jesús a feduböcö jamö tä fa jocäblalujulujenö, a lä ya̦toliböono wei a befi ca̦i itomalejelayomaje. ⁵ A nofi lä mölabou wejei etä fa dalalönö, abinaja Jesús a cuma, a lä ya̦toliböono wei a nija. —U̦asi. Wa doblou lä mlai afä ya tä nowa bluca mladamaö lä cule —e cuma. ⁶ Moisesi etä a̦ ja bä lä damaö wejei ai bä lä cui, ö̦jamö bä ca̦i fa loonö, bä bufi jö̦öjömoma. Abinaja bä bufi cudaliyoma. ⁷ “¿Ei wedi a wa̦ bashiwä? Yai Bada a nö waiblaö lä cule. Täbä doblou lä mlai, Yai Bada tänö etä nowa shino mladamaö dao, yanowamö a bashiwänö mlai”, bä bufi cudaliyoma. ⁸ Einaja bä bufi cuu lä ja̦toono wei Jesúsnö bä daö fa showadaonö, a wa̦ fama. —¿Wedi tä tabä, wamacö bufi li jö̦öjömou dicoa cube? ⁹ Ei a lä ya̦tolibö wei a lä cui, camiyä bei ya wa̦nö ya jalomaö lä dalenaja, inaja showawä, ya etä nowa ca̦i mladamaö si ijejewä cuwä. Ya nowa tabä ya waiquiwä malä cui, a lä maquele a fa jocälänö, täcö ca̦i co̦jamö co̦obä. ¿Ö̦jö tawä? ¹⁰ Camiyä ya lä yanowamöblaleyoluno wei ya lä cui, eja, bita jamö ya lä cule däjä, täbä doblou lä mlai ya täbä nowa mladamabä ya waiquiwä. Wama tä möbä, ö̦jö lä —a cuma. Einaja a fa cunö, a wa̦ wawäa showaquema, a lä ya̦toliböono wei nija. ¹¹ —Bei. A da ubladalu. Wa lä maquele wa täcö fa jocälänö, täcö ca̦i co̦jamö da co̦o —a cuma. ¹² Ö̦jö däjä, bä bluca lä co̦camono wei bä mamo showao däjä, a lä ya̦toliböono wei a ubladaliyoma. A lä maqueono wei täcö fa jocädalönö, täcö ca̦i co̦a showadalayofälöma. Inaja a cuaama yalo, bä bluca lä co̦camono wei bä bufi fejeleo dodijioma. Yai Bada a nofi doablalajenö abinaja bä nowa tayoma. —Fei a lä cuaafenaja, bäma tä jaba dablanomi dodijiwä. Ei tä nö yai quilijiwä fe balojowä —bä nowa tayoma. ¹³ Mau u casö jamö Jesús a juu fa co̦onö, cama nija bä bluca fa co̦camoliyonö, Yai Bada etä a̦ ja, bä damama. ¹⁴ Ö̦jö däjä, a juu lä cuaano wei jamö, Afeo bä ijilubö Lewi a loa dalalema, Mateo a wa̦fa ca̦i lä cule. Lomateli bada bä befi bä blada lä doaö wei a Lewi cuoma. Blada bä doabä jamö a läa fa dalalönö, abinaja e cuma. —Camiyä nija a da nocaiquiyo —e cuma. Lewi a ubladou fa showadalonö, Jesús nijamö a yaua showadalayofälöma. ¹⁵ Mateo e yafi jamö Jesús a iyama, cama ebä lä nocamabono wei bä sho. Bä iyaö ca̦i lä loono wei däjä, Lomateli bada bä befi bä blada lä doaö wejei bä ma cui, ai bä a̦fa ca̦i wa̦lidiwä talewä lä jilaö wejei bä ma cui, ö̦jö bä bluca loo mö feduoma. Showadi cama nija ö̦jö bä bluca malä yauono wei. ¹⁶ ¿Ö̦jö tawä? Lomateli bada bä befi bä blada lä doaö wejei bä ma cui, ai bä a̦fa ca̦i wa̦lidiwä talewä lä jilaö wejei bä ma cui, Jesúsnö ö̦jö bä ca̦i lä iyale tä dalalemaje yalo, ai bä bufi bada jushujuoma, Moisesi etä a̦ ja täbä lä damaö wejei bä lä cui. Faliseo bä bada nija ö̦jö bä yädäoma. Ö̦jö däjä, Jesúsnö bä lä nocamabono wei abinaja bä nowa tamaje. —¿Wedi tabä inaja a li cuaaö dicoo? Lomateli bada bä befi bä blada lä doaö wejei bä ma cui, ai bä ca̦i wa̦lidiwä talewä ma cui, ¿wedi tabä ö̦jö bä ca̦i li iyaö dicoo? —bä nowa tamaje. ¹⁷ Jesúsnö ö̦jö bä a̦ fa ji̦lilänö, abinaja bä nowa taö ja̦looma. —Bä jalobä, bä lä demi wei bä nia icuomi. Bä lä jalili wei bä lä cui, ö̦jö bä nia shino yai icuo. ¿Ö̦jö tawä? Bä dodijidawä lä jömöo wei ya bä nabä juno malä mlai. Wa̦lidiwä talewä ya bä nabä yai li juma —bä nowa tama. ¹⁸ Ai däjä, Juannö bä lä nocamabono wei bä lä cui, bä iyaö wasöoma. Faliseo bä bada ma cui, inaja showawä, cama bä ca̦i cuaaö mö feduoma. Yai Bada nija bä nö bayeli nacaodii däjä, bä iyaö yabäcou mlaobä, bä iyaö wasöoma. Inaja bä cuaama cudeenö, Jesús nija ai täbä fa waloiquiyonö, abinaja bä cuma. —Juan a lä cuinö bä lä nocamabole, bä iyaö wasöo si ijejewä, bä iyaö yabäcou mlai ja, Yai Bada nija bä nö bayeli nacaodibä. Faliseo bä bada nija bä lä nocao wei bä ma cui, inaja showawä bä ca̦i cuaaö mö feduo talei. Ö̦jö ma cui, afä wa bä lä nocamabole bä lä cui, inaja bä li cuaaimi. ¿Wedi tabä afä bä ca̦i iyaö wasöomi dicowä? —bä cuma. ¹⁹ Ö̦jö bä nija abinaja Jesús a cuu yacläoma. —Fiya anö a suwä däaö däjä, cäcöbö nofi co̦camoabeje jamö, ¿täbä iyaö wasöo daanö? Ma, ö̦jö a fiyanö bä ca̦i cuo showao däjä, täbä ca̦i nö iyaö wasöobimi. ²⁰ Ö̦jö ma cui, tä nö fa dedelönö, a fiya fa co̦lunö, ö̦jö däjä bä fa wajäanö, bä nia shino iyaö juomi. ¿Ö̦jö tawä? —cama a wa̦fa tao ja, a cuma. ²¹ Ö̦jö däjä, shomi tä a̦ coyocomabou bufio fa mlacunö, camishi bä a̦fa wäyäö yaclämoma. —Camishi jode cäcö lebesi ja, ai cäcö acadafu läabeje, dude cäcö cacaaimije. Inaja bä cuaaö fa cunoja, cäcö yaluuje däjä, dude cäcö fa busudublalunö, täca jädödou nö blaucublaliyobö wei. ¿Ö̦jö tawä? —Jesús a cuma—. ²² Inaja showawä, yalo wejediwä sibä ja, nashiwä dude toubä löaimije. Inaja bä cuaaö fa cunoja, ubä lä juluu wei ubänö sibä fa jädölönö, sibä nö wa̦liolaliyobö wei. Toubä nö ca̦i bläshäblaliyobö wei. Wejediwä sibä uduo malä mlai. Ma, yalo dude sibä ja, nashiwä dude toubä nia yai löaöje. ¿Ö̦jö tawä? —a cuma. ²³ Sábado ai tä mö jalu jamö, ficali ca jamö Jesúsnö cama ebä ca̦i jayuafälöma, täbä yanöcöobä tä mö jalu lä cui däjä. Bä lä nocamabono wei bä lä cuinö, mobä jucäa jayualalefälömaje, mobä owafälöbeje. ²⁴ Ö̦jö däjä, faliseo bä bada lä cui, abinaja Jesús nija bä cuma. —Afä wa bä lä nocamabole, quiji bä da mö. Täbä yanöcöobä tä mö jalu ja, inaja bä cuaaö mlaobä tä a̦ ma läle ma cui, ¿wedi tabä inaja bä li cuaaö fe yadio? —bä cuma. ²⁵ Jesús abinaja a cudaliyoma. —David a bada lä cuaano wei, ¿bei wama tä a̦ daö mlaa cule? Cama a ma cui, cama ebä lä nocaono wei bä ma cui, bä nö ofili bleaafälöma yalo, ²⁶ Yai Bada etä yano jamö a lucäa fa jayulofälönö, Yai Bada ebä nii lä yaimabou wejei bä nii ja, a iyalayofälöma. ¿Ö̦jö tawä? Ö̦jö bä nii ja, nofi bäyäalewä bä iyabä bä nii yaimoma. Bä nofi bäyäalewä lä mlai bä iyabä, bä nii cuonomi. Bä iyaö mlaobä, Moisesi etä a̦ läoma. Ö̦jö ma cui, ö̦jö bä nii ja David a iyama. Bä ca̦i lä juno wei bä ma cui, ö̦jö bä dobäa mö fedua showalalema. Ö̦jö ma cui, inaja David a ma cuaano wei ma cui, a jömamonomi. ¿Ö̦jö tawä? Nofi bäyäalewä bada a lä läono wei, Abiadala a cuoma, ö̦jö däjä —Jesús a cuma. ²⁷ Abinaja a cuma. —Täbä lä yanöcöo wei, yanowamö täbänö tä nofi jalu bäyäbobeje tämi. Yai Bada tänö tä a̦fa jalu shomi lä wäqueno wei tä jalu lä cui, täbä bayeliblamobä, tä li jalu. ²⁸ Ö̦jö cudeenö, täbä yanöcöobä tä mö jalu jamö täbä nia lä cuaaö wei tä ma cui ja, täbä nia cuaaö lä mlai tä ma cui ja, camiyä ya wa̦ fabä ei bada ya waiquiwä, ya lä yanowamöblaleyoluno wei ya lä cui —a cuma.

¹ Judio bä yododabä yafi jamö Jesús a lucäa fa co̦lunö, imicö lä cofeono wei a cuoma. ² Täbä nia lä yanöcöono wei tä mö jalu sábado cuoma cudeenö, Jesús nijamö bä mamo bluca showajaoma. Imicö lä cofeono wei a jalomaö fe yadio ja, a wa̦fa nia dobloimi wäyämaje. ³ Imicö lä cofeono wei abinaja Jesúsnö a nowa tama. —Eja a da ajedeiquiyo —a nowa tama. ⁴ Ö̦jö däjä, bä mamo lä showajaono wei bä nija abinaja Jesús a cuma. —Täbä yanöcöobä tä mö jalu jamö bämacö dodijaö mlaobä, ¿tä a̦ läa daanö? Ma, wa̦lidiwä bäma tä taö mlaobä, tä a̦ shino läa. ¿Ö̦jö daanö? Täbä shäö mlaobeje tä a̦ läa ma cui, täbä jalomabeje tä a̦ läami —a cuma. Inaja a cuma ma cui, bä a̦ juonomi. ⁵ Ö̦jö däjä, bä bufi jifuwä yalo, a bufi jushuolanö Jesúsnö täbä möö shoqueaö cuaama. Imicö lä cofeono wei a nija abinaja e cuma. —Boco da dodoiquiyo. Boco fa dododalunö, imicö cushäshäblou showadalayoma. ⁶ Ö̦jö däjä, faliseo bä bada faa fa co̦lufälönö, Elode ebä fa co̦cablamalöjenö, Jesús a nabä queobeje, lobe a nofi washuaö showadaomaje. ⁷ Ö̦jö däjä, modu u casö jamö, Jesúsnö bä lä nocamabono wei bä ca̦i aa fa majölönö, bluca dodijiwä bä yaulayofälöma. Calilea jamö bä lä bälöle bä ma cui, Judea jamö bä lä bälöle bä ma cui, ⁸ Jelusaleteli bä ma cui, Idumea jamö bä lä bälöle bä ma cui, Jesús a lä cuaano wei tä a̦ fa ji̦liläjenö, ö̦jö bä sho bä bluca co̦camolayoyoluma. Jodana ai u mashi jamö bä lä bälöle bä ma cui, Dilo tä ulifi jamö bä lä bälöblai bä ma cui, Sidono jamö bä lä bälöblai bä ma cui, ö̦jö bä bluca waloqueyoluma. ⁹ Täbä bluca shulilobä jamö a bacäjou mlaobä, bä lä nocamabono wei bä nija, modu u casö jamö canawä a ca̦amaö bufima, ö̦jamö culanö bä yömölabä. ¹⁰ Bluca täbä jaloa waiquimalalema yalo, ai bä bluca jalili lä cuinö tä mashiquiblamaleyolumaje. Bä bayeliblamobä, a jubaö bufi doblaomaje. ¹¹ Fecula bänö Jesús a dablaöje ja, ö̦jö a cotä jamö bä fa wäcäblaoyonö, bä a̦ i̦cali fama. Abinaja bä cuma. —¡Cafä Yai Bada wa tä Ijilubö! —bä cuma. ¹² Ö̦jö däjä, Jesúsnö i̦cali bä a̦ wasödaö showaoma, a nö ö̦jöböamaö mlaobeje. ¹³ Ö̦jö däjä, jefu a jamö Jesús a dolequea fa balöbofälönö, cama ebä lä bufino wei bä nacalema. Bä fa nacalänö, cama nija bä waloa jebejelayoma. ¹⁴ Ö̦jö bä nijamö 12 bä yailema, bä ca̦i cuobä. Täbä yömölabeje, bä nia shömaö nomöjöoma. ¹⁵ Fecula bä ca̦i yashubeje, bä nia ca̦i tablamama. ¹⁶ Bä lä shömöleno wei, ei bä li cuoma. Simón a cuoma, Jesúsnö Pedro a wa̦fa ca̦i jilaa lä yädäqueno wei a lä cui. ¹⁷ Sebedeo bä ijilubö ecöbö ca̦i cuoma, Santiago a wa̦fa lä cuono wei, ö̦jö bä fääshä Juan e ca̦i. Ö̦jö cäcöbö a̦ lojodoaö dodijioma yalo, Boaneje cäcöbö a̦fa ca̦i jilaquema. ¿Ö̦jö tawä? Boaneje tä a̦ lä cui, “Ya̦lu a ijilubö”, tä a̦ li cuu. ¹⁸ Andrés a ca̦i cuoma, Felipe a ca̦i, Badolomei a ca̦i. Mateo a ca̦i cuoma, Tomás a ca̦i, Afeo bä ijilubö Santiago e ca̦i, Tadeo a ca̦i. Simón a ca̦i, cama bä ulifibö jamö täbä shomi lämabou nofi lä wa̦libono wei a Simón lä cui. ¹⁹ Juda Icaliode a ca̦i, Jesús a nia lä nomojoliano wei a lä cui. ²⁰ A co̦a fa co̦lunö, bluca täbä co̦camou co̦oyoluma. Bä bluca mashicou dodijioma yalo, Jesúsnö cama ebä ca̦i iyabä tä ma cui ja, bä doblamanomije. ²¹ Cama ebä mashinö, ö̦jö tä a̦ fa ji̦liläjenö, a co̦abeje ebä waloquema. A shi a̦fa wa̦lii malä wäyäno wejei. ²² Jelusale jamö Moisesi etä a̦ ja täbä lä damaö wejei bä ma cui, ö̦jamö bä fa waloiquiyonö, abinaja bä ca̦i cuyoluma. —Fecula bada Sadanasi a tabou lä cule. Fecula bada tä lojodenö bä li fecula yashuu buo —bä cuma. ²³ Ö̦jö bä nacaa fa showadaalalönö, bä bufi dayäamabä tä a̦ bluca wäyäö yacläablaloma. Abinaja bä nowa tama. —Sadanasi cama a showawä lä cui, ¿wedinaja a nia joyamamou li cuaaö? ²⁴ Bä bälöa lä yaile bä nofi wa̦liayou däjä, bä nia bälöo lojodoo majöomi. ²⁵ Cama bä mashi ma cui, bä nofi wa̦liayou dicoo ja, bä bälöo lojodoo mlaicätä. ²⁶ Cama Sadanasi a nofi wa̦limamou ja, a nia bälöo lojodoomi. Ma, cama ebä nofi wa̦liayou ja, bä mö nia yai watäblamolayou. ²⁷ A lä waiteli wei a lä cuinö, cama madofi ebä nofi läbou däjä etäbä nia yabäcamaimi. Shomi täbä nia lucämaimi. Ö̦jö ma cui, a nö yai lä wa̦lojaö wei a lä cuinö a nabä fa waloicunö, a fa o̦cablalönö, ö̦jö däjä cama etäbä bluca lä tabole etäbä nia shino yai däalalei —cama a wa̦fa tao ja, a cuma—. ²⁸ Abinaja a cuu co̦oma. —Cafä wamacö nija ei ya wa̦ lä cui, bejedi lä ya wa̦ —a cuma—. Yanowamö täbä nijamö tä nowa wa̦lidiwä bluca lä cule, etä nowa mladou dao. Yai Bada a nö waiblaöje ja, tä nowa ca̦i mladamaö dao. ²⁹ Ö̦jö ma cui, Yai Bada a Bufi nö lä waiblaö wejei bä lä cui, etä nia mladoimi waiquiwä. Obi ma cui, etä nowa nia cuo shi wa̦lii —a cuma. ³⁰ Yai Bada a Bufinö bä fecula ma yashublano wei ma cui, a wa̦fa feculabö tamaje yalo, einaja bä nowa li tama. ³¹ Ö̦jö däjä, Jesús bä nöö, bä fääshä ebä walobeyoluma. Sibo jamö bä ublalanö, a nacamaö bufimaje. ³² Jesús nija bä loo fe lä fa̦yoono wei bä lä cuinö a yömölamaje. —Naafä a ma cui, fääshäfä bä ma cui, bä ublaa siboa lä cubiyedi. Wa wa̦liije —bä cuma. ³³ Jesús abinaja a cuma. —¿Wedi nija bei ya yai li nöömou, ö̦jö lä? ¿Wedi jamö bä nija bei ya yai li fääshämou? —a cuma. ³⁴ Ö̦jö däjä, bä loo fe lä fa̦yoono wei bä möö shoqueaö fa cuaanö, abinaja a cuu nomöjöoma. —Ei bä lä cui, iba nayä bä waiquiwä. Iba mashi, ö̦jö bä ca̦i li showawä. ³⁵ Yai Bada tänö tä tamaö lä bufii wei tä lä taö wejei bä lä cui, ö̦jö iba lä bä mashi waiquiwä. Ö̦jö nayä bä waiquiwä —a cuma.

¹ Modu u casö jamö Jesúsnö täbä yömölaö co̦oma. Täbä yömölaö däjä, cama nija bluca täbä fa co̦camoliyolunö, täbä mashicou dodijioma. Ö̦jö däjä, a bacäjamaö mlaobeje, canawä a jamö Jesús a döcäbaliyoma. ¿Ö̦jö tawä? Modu u casö jamö bä bluca lä co̦camolayono wei bä cuo däjä, ajede jamö a befi ca̦i ca̦lanö ² bä yömölama. Bä yömölaö ja, shominaja tä a̦ bluca wäyäö yacläablalou ja, bä bufi dayäamama. Abinaja a cuma. ³ —Ei tä a̦ da ji̦liläje. Ai anö mobä shäyäjaö mö alayoma. ⁴ Mobä shäyäjaö cuaafälöö däjä, bei yo jamö ai mobä fa blälälalunö, biyomö bänö mobä owa nocaa jäalalemaje. ⁵ Bei masi blaobä jamö ai mobä blälälaliyoma, mashita a bluca cuono lä mlai jamö. Mashita a fa maquedionö, mobä lobe caua showadalaliyoma ma cui, ⁶ motoca a ösöblou däjä, mosibä shi̦liquia nocalayoma. Nasöcö daloblou fa mlacunö, mosibä fälaliyoma. ⁷ Tä mösöcöböobä jamö ai mobä fa blälälalunö, mobä caua ma bälayono wei ma cui, mösöcö bä caua mö fa fedulalunö, mosibä baömölayoma. Mosibä fa baömölönö, mobä fanomi. ⁸ Mashita a lä dodijidai jamö ai mobä fa blälälalunö, mobä caua fa liyäjälalunö, mosibä badalayoma. Ö̦jö däjä, mobä shino blucablou majölayoma. Ai mosibä jamö, moli mosi ma cui ja, 30 mobä cublou majölayoma. Ai mosibä jamö, 60. Ai mosibä jamö, 100. ⁹ ’¿Ö̦jö tawä? —a cuma—. Wamacö yömöcacö lä walalai, bä yömöca daa da dodijiicu. ¹⁰ Jesúsnö cama ebä ca̦i yami cuo juo däjä, a wa̦lii juomaje. Cama 12 ebä ma cui, ai bä cuo lä showaono wei bä ma cui, tä a̦fa shino wäyäö lä ja̦loablalono wei tä ja, a wa̦limaje. ¹¹ Abinaja Jesúsnö bä nowa tama. —Iba wamacö lä cui, Yai Bada tänö cama ebä ca̦i lä cuo wei tä a̦ lä cui ja, wamacö bufi jaducumabou. Tä a̦ ji̦limamou walalao showadao ma mlai ma cui, dodijidawä wama tä a̦ bluca ji̦liaö fe yadiobä, wamacö bufi damaö. Ö̦jö ma cui, iba bä lä mlai bä nija, shominaja ya tä a̦ li showadi wäyäö yacläo, ¹² bä bufi li jaducublou mlaobä. Ya lä cuaaö wei tä ja, bä mamo ma showao wei ma cui, bä bufi möblou mlaobä. Bä yömöca ma dao wei ma cui, wale a̦ ji̦liaö walalao mlaobeje. ¿Ö̦jö tawä? Ö̦jö bä lä cui, Yai Bada nija bä bufi mö yabajadou mlaobä, ya wa̦ yacläo, bä doblou lä mlai etä nowa mladamaö mlaobä —bä nowa tama. ¹³ Abinaja Jesús a cuma. —Ya tä a̦ wäyäö lä yacläofe tä a̦ ja, ¿bei wamacö bufi jaducuwämi tawä? Ei tä a̦ ja, wamacö bufi jaducuwämi waiquiwä ja, ai ya tä a̦ bluca lädaö lä majöle tä a̦ ma cui ja, wamacö bufi nia jaducubloimi. ¹⁴ ’Mobä lä shäyäjaö wei a lä cuinö, Yai Bada etä a̦ lä wäyäö wei, ö̦jö ya tä a̦fa yai taö lä cufe. ¹⁵ Bei yo jamö ai mobä bläläa lä culaliyono weinaja, ai bänö Yai Bada etä a̦ ji̦liaö cuaaöje. Tä a̦ ji̦liaöje däjä, Sadanasi a waloa fa showadaicunö, bei bä bufi jamö etä a̦ lä didile etä a̦ däa nocalei. ¹⁶ ’Bei masi blaobä jamö ai mobä bläläa lä culaliyono weinaja, ai bä mö feduwänö tä a̦ ca̦i ji̦liaö cuaaöje —a cuma—. Tä a̦ ji̦liaöje däjä, bufi doblalolanö tä a̦ däaöje. ¹⁷ Ö̦jö ma cui, mobä nasöcö daloblou fa mlacunö, mosibä nö dedejebloimi. Ö̦jö mosibä lä culenaja bä lä cui, bä nö jaba wa̦lojaö ma bäquei wei ma cui, bä yabäcamou däjä, yedu bä waiquidou. Tä a̦ lä däaö wejei tä a̦ nowa ja bä nö bleaamaöje däjä, inaja showawä bä waicou. ¹⁸ ’Tä mösöcöböobä jamö mobä bläläa lä culaliyono weinaja, ai bä ma cuinö tä a̦ ji̦liaö cuwä mö feduweje —a cuma—. Tä a̦ ma ji̦liablaö wejei ma cui, ¹⁹ täbä showadi lä yabäcäblou wei tä ja, bä yabäcäablalou majöblao dicoo. Blada bä ma cui, madofi bä ma cui, ö̦jö bä tabou bufi doblaoje. Ö̦jö däjä, Yai Bada nija bä bufi badadalou fa mlacunö, tä lä dodijidai etä wawädaloimi. ²⁰ ’Ö̦jö ma cui, mashita a lä dodijidai jamö mobä bläläa lä culaliyono weinaja, ai bä ma cuinö tä a̦ ji̦liaö cuwä mö feduweje. Tä a̦ fa ji̦liajenö, tä a̦ däa showadaleije. Tä lä dodijidai, ö̦jö bei etä wawäblou. Ai mosibä jamö, 30 mobä faa lä culayono weinaja, ai bä nija inaja etä dodijidawä cublou. Ai mosibä jamö, 60 mobä faa lä culayono weinaja, inaja showawä, ai bä nija etä cublou mö feduo. Ai mosibä jamö, 100 mobä faa lä culayono weinaja, inaja showawä, ai bä nija etä yai dodijidawä cublaliyo —e cuma. ²¹ Abinaja Jesús a cuma. —Cowa wacö ömöamaöje däjä, ¿wöö anö wacö fe yojobobeje, wacö nia ömöamaöje daanö? ¿A lä mio wei tä bäfätä jamö wacö jo̦yabobeje wacö daanö? Ma. Wacö i̦taobä jamö wacö i̦tabobeje wacö malä cui, tä jödödöwä wawädoobä. ²² Tä a̦ lä jo̦yabou wejei, wawädowä tä a̦ wäyämamou nomöjöobä tä a̦. Tä a̦ fei däjä wäyämamou lä ja̦too wei, tä a̦ jödödöwä wawäblamobä tä a̦ waiquiwä. ²³ Wamacö yömöcacö lä walalai, bä yömöca daa da dodijiicu —e cuma. ²⁴ Abinaja bä nowa ca̦i tama. —Bä da moyaweicu, ya wa̦ lä faö wei wamale a̦ yai ji̦liabä. Dodijidawä wamacö yömöca dao ja, dodijidawä wamacö bufi nia yai jaducublou. Ö̦jö däjä, wamacö bufi nia shino yai balaö. ²⁵ ¿Ö̦jö tawä? Bä bufi jaducuwä lä waiquii, ö̦jö bei bä bufi jamö tä lä didile, Yai Bada tänö etä nia balamafälöö. Ö̦jö ma cui, bä bufi jaducudalou lä mlai bä lä cui, ö̦jö etä wai wiisibö daö lä bädale etä nia co̦aö, tä a̦ nofi mojodubou majöobeje —Jesúsnö bä nowa tama. ²⁶ Abinaja Jesús a ca̦i cuma. —Yai Bada tänö cama ebä ca̦i lä cuo wei tä lä cui, abinaja tä cuwä. Ficali ca jamö ai anö mobä shäyäjaö cuaaö. ²⁷ Mobä shäyäjaö fa cuaanö, a co̦layou. Ö̦jö däjä, a ma mio wei ma cui, a ca̦i ma juadalou wei ma cui, cama mobä cabudu faa jäa bälayou. Mosibä badaö. A mojoduo showao däjä, inaja mobä cublou ja̦tolayou. ²⁸ Cama mashita anö mobä cabudu fa famalönö, mosibä badaö. Bei mobä jaba yädäcou fa nomöjöonö, mobä badalaliyo. ²⁹ Ö̦jö ma cui, mobä shi̦liquilayono wei ja, mobä lä shäyäjano wei anö, shocobi a ca̦i aa co̦layou, mobä tamobä tä cua waiquia cudeenö —a cuma. ³⁰ Abinaja Jesús a cuu yacläoma. —Yai Bada tänö cama ebä ca̦i lä cuo wei tä lä cui, ¿wedi tä cuwä lä dodijiinaja, bei tä li cuwä? Ya wa̦ faö yacläobä, ¿wedinaja ya yai cubä? ³¹ Abinaja. Nana shimono wai lä culenaja tä cuwä. Ficali ca jamö, ai anö nana shimono wai döquei. Ai mobä wai cublawä ma cui, ö̦jö nana shimono yai wiisibö dodijiwä. ³² Ö̦jö ma cui, shimono wai fa dömoicunö, shimono fa caulunö, bei shifi cublaliyou. Shifi fa badalönö, shifi yai ösölayou. Shifi bococu fa blaucublalunö, ö̦jö shifi bococu si ajiwä jamö, biyomö bä yabäcabö nia tamoyoluu —a cuma. ³³ Jesúsnö tä a̦ wäyäö ja, inaja a cuablalou fa yacläablalonö, tä a̦ nö nia ji̦liaö cuo fe lä yadiobö wejeinaja, tä a̦ li wäyäö cuaama. ³⁴ ¿Ö̦jö tawä? A wa̦ ja̦loablalou mlai ja, bä yömölanomi dodijiwä. Ö̦jö ma cui, cama ebä lä nocamabono wei bä ca̦i yamio däjä, cama bä nija tä a̦ bluca wawämama. ³⁵ Ö̦jö däjä, tä fa weyadalunö, abinaja Jesúsnö bä nowa tama. —Bei. Bämacö da bucaduo —bä nowa tama. ³⁶ Ö̦jö däjä, täbä lä co̦camono wei bä fa dacöfälöjenö, canawä a jamö Jesús a lä döcäono wei jamö, bä ca̦i fa döcäcäobalunö, a befi ca̦i calälayofälömaje. Canawä ai bä jamö, ai bä befi ca̦i caläö yädäaö mö feduo showaofälöma. ³⁷ Ö̦jö däjä, wadoli a lojode fa cublalunö, mau u bada lä shäyäjou wei ubä fe lajoaö waiquioma. ³⁸ Ö̦jö ma cui, madofi a ja, Jesús a fe fa maquealunö, canawä colo ajamö a mio dicooma. A jushuuje ja, abinaja a nowa tamaje. —¡Tä a̦ wäyäle! Bämacö mishi lä duobe tä ja, ¿yamalecö nofi jo̦lijiboimi tawä? —a nowa tamaje. ³⁹ Ö̦jö däjä, a fa jocädalunö, wadoli a wasöa showadalema. U ca̦i bada lä shäyäjono wei u ca̦i wasöö ja, abinaja a cuma. —¡U da yanöcöicu! ¡U cuaa dijä! —a cuma. Ö̦jö a wa̦nö wadoli a ca̦i mladou fa showadalonö, tä bluca ononodou showadalayoma. ⁴⁰ Ö̦jö däjä, abinaja cama ebä nowa tama. —¿Wedi tä tabä wamacö li quilii? ¿Wamale nofi li mölaboimi dicoo tawä? —bä nowa tama. ⁴¹ Bä quilii fe balojooma. Bä bufi yai shädayaimou ja, bä wa̦liyoma. —¿Ei wedi bei a li dodijiwä? Wadoli a bada ma cui, mau u bada lä shäyä shäyämou wei u ma cui, cama a wa̦nö täbä nofi mladou si ijejewä yai —bä cuma.

¹ Ö̦jö däjä, Jelasateli bä ulifibö jamö bä befi ca̦i waloquema, modu ai u mashi jamö. ² Jesús a fa itoblalunö, Jelasateli a lä feculaböono wei anö a mö bamaleyoluma. Nomawä täbä didiblaaö lä yaimou wejei jamö a lä cuono wei a cuoma. ³ ¿Ö̦jö tawä? Yafi jamö mlai, nomawä täbä didiblaaö lä yaimou wejei jamö a bälöoma. A jaba ma o̦cabono wejei ma cui, a shino cushäblou nocamoma. Duo shibä ma cuinö a o̦cabou doblonomi majöoje. ⁴ ¿Ö̦jö tawä? Matacö badädäbobeje bä ma wabäodino wei ma cui, duo shibä ca̦i ma wabäablalano wejei ma cui, bä doblonomi. Duo shibä jifedimaö nocamoma. Matacö lä badädäbono wejei tä madofi ma cui, showadi täbä ca̦i wa̦liaö nocamodima. A nia juwäbou ma lojodobono wejei ma cui, bä nö wa̦lojamanomi. ⁵ Jalu däjä ma cui, didi däjä ma cui, nomawä täbä lä didiblaaö wejei jamö culanö, a wa̦ nö shino quiliaö jaludima. Tä ulifi lä jefubö wei jamö ma cui, inaja showawä. Maa ma bänö cama a si ca̦i shino yacäcamodima. ⁶ Jesús a blajawä fa dalalönö, a läläa mö baquema. A läläa mö fa baicunö, Jesús a cotä jamö a möfe fa boblaicunö, a wa̦fa Bada doblao tama. ⁷ Ö̦jö däjä, a wa̦ i̦cali falayoma. —¡Jesús! Yai Bada a Bada lä ayai wa e Ijilubö lä cuinö, ¿wedinaja wale nia fa taamanö, wale nabä li waloo cuboyoi? ¡Wale nö bleaama dijä! ¡Wale a̦ da ji̦lilä, Yai Bada a malä cule! —a cudaliyoma. ⁸ Jesúsnö fecula a lä didile a nowa taö waiquia yalo, e a̦ cuoma. Abinaja a nowa tama. —Fecula wa lä didile, ¡a faa da co̦lufälö! —a nowa tama. ⁹ Jesúsnö a wa̦fa wa̦lima. —Yajalawä ya wa̦fa jilou. Yamacö malä bluca wei —e cuma. ¹⁰ Ö̦jö däjä, a lä feculaböono wei a lä cui, Jesús nija a wa̦ fe blacäjoma, fecula ebä shomi jamö shömaö mlaobä. ¹¹ Bei. Ö̦jamö yalo coshino bluca bä iyama, ö̦jö jefu tä balöcö showawä jamö. ¹² ¿Ö̦jö tawä? Jesús nija fecula bä a̦ fe blacäjou ja, abinaja bä cuma. —Coshino bä nija yamalecö yai da shömöcö—bä cuma. ¹³ Ö̦jö cudeenö, ö̦jö bä nija bä shömöa yacläquema. Ö̦jö däjä, a shi lä wa̦lino wei a fa dacöfälöjenö, coshino bä nija, fecula bä bluca lucäa nomöjölaliyoma. Bä fa lucäolalunö, tä mö wädäjäa lä dodijibe jamö, coshino bä shi jalijiwä ca̦i fa yo̦balufälönö, modu u jamö bä mishi bluca dubaliyoma. ¿Ö̦jö tawä? Coshino jai 2.000 bä cuoma. ¹⁴ Coshino bä nofi lä tabono wejei bä lä cui, ö̦jö tä fa dalalöjenö, bä quilili doculayoma. Shabono jamö bä lä bälöle bä ma cui nijamö, bä bälöo lä siboblai bä ma cui nijamö, tä a̦ wäyäö cuaamaje. Tä a̦ fa ji̦liläjenö, ö̦jamö lä bä bluca aa showalayofälöma, tä möbeje. ¹⁵ Jesús nija bä fa waloicunö, fecula bänö a lä daqueno wejei a demi dalalemaje. Jesús a cotä jamö a bufi demi ca̦i looma. Camishi cäcö ja a didioma. Ö̦jö tä bluca fa dalalöjenö, bä quilia fe balojolaliyoma. ¹⁶ Ö̦jö däjä, bä mamo lä showaono wei bä lä cuinö tä a̦fa bluca wäyämaje. A lä feculaböono wei a ma cui, coshino bä ma cui, Jesúsnö ö̦jö bä bluca lä taamano wei tä a̦fa bluca wäyämaje. ¹⁷ Ö̦jö däjä, bä nö quilili bleaama yalo, Jesús a shömöa co̦lemaje. ¹⁸ Ö̦jö däjä, a shömaö co̦oje ja, canawä a jamö cama ebä ca̦i döcäcäo fa co̦balunö, fecula bänö a lä daqueno wejei a lä cui, Jesús nija a nocao bufi fa doblaonö, a wa̦ fe blacäjoma. ¹⁹ Ö̦jö ma cui, Jesúsnö a shömöa co̦lema. Abinaja e cuma. —Ma, a co̦jamö da co̦o. Bada tänö wa bayeliblaö lä dodijilofe, afä bä nija tä a̦fa shino da wäyäjälu. Wa nofi lä ojodadalufe tä ja, bä da yömölajalu—a cuma. ²⁰ Inaja Jesús a cuma yalo, a co̦a fa showadalufälönö, Decaboli jamö bä lä bälöle bä bluca nija, Jesúsnö a bayeliblaö lä dodijilayono wei, bei tä a̦fa wäyäö cuaaö showaoma. A wa̦ fa ji̦liläjenö, bä bufi möaaö dodijioma. ²¹ Bei. Jesús a befi ca̦i caläa fa co̦lunö, a bucadubaliyoma. Modu u casö jamö a fa itoblalunö, cama nija täbä bluca co̦camolayoyoluma. ²² Ö̦jö däjä, Jailo a wa̦fa bada lä cule a walobaleyoluma, judio bä yododabä yafi jamö ai a bada lä läono wei a lä cui. Jesús a fa dalalönö, ö̦jö a cotä jamö a mö fe bolanö ²³ a wa̦ fama. A wa̦ faö ja, a wa̦ fe blacäjoma. Abinaja e cuma. —Tääyä a nö bleaaö lä cule. A dobloimi waiquiwä tai. Lobe a da jabo, cama nija wa imicö fa maqueicunö wa jalomabä, a demi cuo co̦obä —e cuma. ²⁴ Jailo nija Jesús a nocaa showalayofälöma. Täbä bluca lä co̦camono wei bä mashicou fa dodijionö, a juu cuaabä jamö a bacäjamamaje. ²⁵ A bacäjou cuaafälöbä jamö, suwä a nö jalili bleaaö nö lä dedeano wei a lä cui, a ca̦i cuoma. A nö i̦yä bleaaö showai ja, lasha 12 a faa waiquimalema. ²⁶ A jalomabeje, bluca täbä nija a jublou cuaaö bädaoma ma cui, a jalomaö doblonomije. A jalomaö lä wabano wejei tä nowa ja, blada ebä jödödöwä shino waicaö buomaje. Ö̦jö ma cui, a wanonoblou mlai ja, a shino yai balaa dicolayoma. ²⁷ ¿Ö̦jö tawä? Jesús a wa̦fa ji̦lilema yalo, a lä bacäjamafälöno wejei jamö, a yauaö ajedou juofälöma. A ajedou fa juofälönö, Jesús camishi ecö jubäa fe yadia yaulalema. ²⁸ Abinaja a bufi suwä cuma. “Ya ecö casö jubäa ma bälei wei ma cui, ya jalou weicätä”, a bufi cuma. ²⁹ Ecö casö fa jubädalönö, a i̦yä mladou showadalayoma. “¡Fei däjä, ya nofi lä jalolufe!”, a bufi cudou showadalayoma. ³⁰ Jesús a lojodenö a jalou yalo, tä daö showadaoma. Täbä mashicobä jamö Jesús a mö fa yabädalunö, a wa̦ falayoma. —¿Wedinö bei wale jubädalei cufe? —a cuma. ³¹ Bä lä nocamabono wei bänö abinaja a nowa tamaje. —Bada tä. Täbä lä mashicole wa täbä daö ma cule, ¿wedi tabä “wedinö bei wale jubädalei cufe”, bei wa li cuu dicoo? —a nowa tamaje. ³² A lä jalolayono wei a dablaö fe yadiobä, täbä lä mashicole täbä möö cuaama. ³³ Ö̦jö däjä, a suwä ma quililanö ma cui, a wawäblou fe yadilayoma. A quilili blösö blösomolanö, a ajedequema. Jesús cotä jamö a möfe fa deialunö, a wa̦ nö wäquema. ³⁴ Ö̦jö däjä, abinaja Jesúsnö a nowa tama. —Ami. Wale nofi mölaboma yalo, wa jalolayou a lä cufe. A bufi yanöcöwä ca̦i da co̦jamö. Wa nö lä bleaano wei tä nia wayu cublou co̦daaimi —a nowa tama. ³⁵ A wa̦ faö showao däjä, bada e yafi jamö ai ebä cuo lä jäono wei ebä waloa mö baquema. Jailo a bada nija abinaja bä cuma. —Bei. Inaja lä waiquiwä. Tääfä a waicou waiquio cublei. Tä a̦ lä wäyäö wei, ¿wedi tabä wa nia yabäcaö fe yadio? —bä cuma. ³⁶ Ö̦jö ma cui, jai bä a̦ ji̦lianomi, Jesús a mojodi li cuablalou fe yadio showaoma. Judio bä yododabä yafi jamö a lä läono wei a bada lä cui, abinaja a nowa shino tama. —A bufi jalujo dijä. Wale a̦ bejedi shino bufibou fe da yadio —a nowa tama. ³⁷ Ö̦jö däjä, cama ai ebä mö feduwä lä cui, ebä yauo wasöblalema. Pedro a shino nacalema, Santiago a ca̦i. Santiago bä fääshä Juan e ca̦i. ³⁸ Judio bä yododabä yafi jamö a lä läono wei a lä cui, ö̦jö e yafi jamö, Jesúsnö bä ca̦i fa co̦blalunö, bä a̦ nö bleaaö dalalema. Bä ö̦cöma. Jailo bä tää e nomöa bouje ja, bä a̦ nacläama. ³⁹ Yafi jamö a fa lucälönö, abinaja bä nowa tama. —¿Wedi tabä wamacö a̦ nö li bleaaö cule? Wama a moco nomöa lä bole, a nomaö cadidionomi. A mia bädaa lä cule —bä nowa tama. ⁴⁰ A lä nomalayono wei etä daö waiquiomaje yalo, a noca i̦cablalamaje. Ö̦jö ma cui, bä bluca sibomalema. Ö̦jö däjä, moco a nomawä lä maqueono wei jamö bä ca̦i lucäbä, ö̦jö bä fö̦ö e nacalema, bä nöö e ca̦i, cama ebä lä nacaleno wei bä ca̦i. ⁴¹ A lä nomalayono wei, Jesúsnö boco fa dälänö, cama bä caficö a̦ ja, abinaja e cudaliyoma. —¡Dalida, cumi! Einaja a lä cuole, abinaja a yai cuma. “U̦asi, cafä nija ya wa̦ faö lä cule. A da jocädalu.” Einaja a yai cuma. ⁴² Einaja a nowa fa tadalönö, a juu lojode showai, a jocäblou co̦layoma. Ö̦jö däjä, täbä bluca shädayaimou dodijioma. Jesús a lä cuaano wei tänö bä bufi mlaaö dodijioma. ¿Ö̦jö tawä? Ö̦jö a moco lä cuinö, lasha 12 a faa waiquimalema a moco cuoma. ⁴³ A moco iyamaö showadao bufima. ¿Ö̦jö tawä? Jesús a lä cuaano wei tä a̦ wäyäö mlaobeje, bä a̦ ca̦i wasöa dodijilema.

¹ Ö̦jö däjä, Jesús a fa alufälönö, cama etä ulifi jamö a co̦a co̦layoma, a oshe lä cuono wei jamö. Cama ebä lä nocamabono wei bä yauo showaoma. ² Täbä lä yanöcöo wei, sábado tä mö jalu ja, judio bä yododabä yafi jamö täbä yömölama. A wa̦ lä ji̦lino wejei ai bä lä cui, bä bufi bluca shädayaimolanö abinaja bä nowa tayoma. —Fei a lä cui, ¿wedinaja a li fa taamamonö, a li inaja cuaaö? ¿Wedi nija a bufi li jaducublamolayoma tawä? Tä nö lä quilijii, ¡bejedi lä tä wawämaö fe balojowä! ³ Fii fibä ja, täbä showadi madofi lä taö wei, ¿fei ami daanö? ¿Bä nöö e lä cui, ö̦jö María emi? Santiago, José, Juda, Simón bä lä cui, ö̦jö bä a̦iyobö e nofi showawä lä cui. Camiyä bämacönö, ¡fei bä yaö bäma ebä ca̦i nofi lä bälöle! —bä nowa tayoma. Inaja a nofi tabomaje yalo, a wa̦ wailemaje. ⁴ Abinaja Jesúsnö bä nowa tama. —Yai Bada a wa̦no wäyälewä bä lä cui, shomi täbä ulifibö jamö bä a̦ ji̦liaö bufi ma doblao wejei ma cui, cama bä ulifibö yai ja, showadi bä a̦ ji̦liblaimije. Cama ebä mashi ma cuinö, cama e yafi jamö bä yai lä bälöle bä ma cuinö, showadi bä a̦ waibouje —bä nowa tama. ⁵ ¿Ö̦jö tawä? Jesús imicö fa maqueicunö, ai bolacadabö bäwä bä jalili jalomalalema ma cui, a nia yai lojode lä dablamou wei tä ja, a doblamanomije. ⁶ A nofi mölabou lä mlaono wejei tä ja, Jesús a bufi shädayaimou dodijioma. Ai täbä bälöblawä mö lä fedui jamö, Yai Bada etä a̦ wäyäö cuaama. ⁷ Ö̦jö däjä, cama 12 ebä lä nocamabono wei bä lä cui, Jesúsnö bä nacaa fa ajedealalönö, bä shömaö bolacadou showadaoma. Fecula bä yashubeje bä tablamalema. ⁸ Bä nia lä jublole däjä, shinoco bä jubä, bä nowa talema. Fii defibä nia lä bou wejei, defibä nia shino showabomaje. Bä iyafälöbä, nii bä nia yefibonomije. Täbä didibofälöbeje, täbä nia ca̦i däbonomije. Täbä lulafälöbeje, bä befi ca̦i nia blada ya̦bonomije. ⁹ Bä mamicö nia shino didio showaoma. Camishi moli cäcö ja bä nia shino didioma, ai cäcö feyacabou mlajei ja. ¹⁰ Abinaja bä nowa ca̦i tama. —Wamacö shifilimou mlai ja, wamacö nia lä cuo wei a yafi ja, bä da yanöcöicu. Wamacö juu co̦ofälöö ja, ö̦jamö lä culanö wamacö nia jocäö co̦o. ¹¹ Wamacö juu lä cuaaimadi jamö, ai bänö wamacö bälömabou bufiomije ja, wamacö a̦ ca̦i ji̦liaö bufiomi dicoweje ja, abinaja wamacö nia cuaaö. Ö̦jö wama bä tabi feiaö yalo wamacö sibolanö, bei wamacö mamicö busi jamö bä libu libu lä sudile, wama ebä nia yaösöblalefälöö. Ö̦jö lä tänö bä nö nia lä bleaaö wei wama tä nia jömaö —bä nowa tama. ¹² Inaja bä nowa tama yalo, bä aa fa showalönö, tä a̦ wäyäö cuaamaje. Wa̦lidiwä tä ja bä bufi lädobä, täbä yömölaö cuaamaje. ¹³ Fecula bluca bä ca̦i yashuu cuaamaje. Täbä lä jölöcamou wei toubä dabönö, jalili bluca täbä fa jölöcödajenö, bä ca̦i jalomamaje. ¹⁴ Jesús a wa̦fa wäyämamou blaucublaliyoma yalo, bada tä Elode a ma cuinö, a wa̦fa ca̦i ji̦lia mö fedulema. Ai bä wa̦no lä ji̦lileno wei, abinaja bä jo̦wa cuma. —Fe ojomalewä Juan a demi jocädou fa co̦onö, ö̦jö a co̦dawä. A demi jocädou fa co̦lonö, a lojode dablamou dodijia malä cule —bä jo̦wa cuma. ¹⁵ Ai täbä mö feduwä lä cuinö, Yai Bada a wa̦no wäyälewä a Elia lä cui, ö̦jö a bufiblaö mö fedulayomaje. Ai täbä showawä lä cui, abinaja ö̦jö bä jo̦wa cuu mö feduoma. —Yai Bada a wa̦no wäyälewä a. A wa̦no wäyälewä bä jaba lä bälöono wei bä lä cui, ö̦jö bä owäbou majöa lä cule —bä cuu mö feduoma. ¹⁶ Ö̦jö ma cui, Jesús a wa̦fa ji̦liaö däjä, bada tä Elode lä cui, abinaja cama a cuma. —Juan ya fe da bäblamalii, ö̦jö a demi jocäblou fa co̦lonö, ö̦jö a co̦dawä —a cuma. ¹⁷ ¿Ö̦jö tawä? Elode a lä cuinö, cama ai e fa shömölönö, Juan a malä juwämaleno wei. Bococu fa o̦cablamalönö, a fe lamaboma. Wedi tä ja mlai. Suwä a ja, Juannö a wasöma cudeenö, a fe lamaboma. ¿Ö̦jö tawä? Bada anö, cama mashi Felipe bei suwäbö e lälema, Elodia a wa̦fa suwä lä cui. ¹⁸ Ö̦jö tä nowa ja, abinaja Juan a cuma, Elode nija. —Ma, Felipe bä suwäbö wa e taabä wami, tä a̦ läa —a cuma. ¹⁹ Juan a wa̦ läoma yalo, a suwä jushudaliyoma, Elodia a lä cui. Juan a shämaö showadao bufi ma doblaono wei ma cui, a shämaö doblonomi. ²⁰ Bada tä Elode lä cuinö, Juan a nö quili tama yalo, a nowamaö fe malä yadiono wei. Juan a bejedimou daö waiquioma. Yai Bada e lä cuono wei, a ca̦i dama. Juan a wa̦ ji̦lii däjä, a bufi shino ma wedinajamono wei ma cui, a wa̦ ji̦lii bufi doblao fe yadioma. ²¹ Ö̦jö ma cui, Elodia a suwä lä cuinö, Juan a shämaö fe yadiobä, ya̦cumö etä cublaliyoma. Bada tä Elode a lä cuinö, lasha ai a faa co̦malema yalo cama ebä nacaalalema, bä iyabä. Cama nija bä bada lä yädäono wei bä ma cui, cama sodado ebä ca̦i lä cuono wejei bä bada ma cui, Calileateli ai bä bada ma cui, ö̦jö lä bä bluca co̦camomalema. ²² Bä co̦camobä jamö, Elodia bä tää e lä cui, a wawäblaliyoma, e blaöabä. A blaöaö dodijiablaloma yalo, bada tä Elode ma cui, cama ebä lä nacaalaleno wei bä ma cui, bä bufi bluca doblaloma. Bada a lä cuinö, abinaja Elodia bä tää e nowa taö showadaoma. —Wa tä lä bufii wei tä a̦fa da yubo. Ya tä nia jöböaö dodijio—a nowa tama. ²³ A wa̦ nö wäo cadidia fa showadaicunö, abinaja bada a cuma. —Wa tä bufii lä bädao wei tä ma cui ja, bäfä nia dobäö. Ya bada lä läle tä ulifi ma blaucui ma cui, ö̦jö lä wa tä mashi ulifi ma bufii wei ma cui, ya tä nia jöböaö —a cuma. ²⁴ Ö̦jö däjä, bä nöö e nijamö a moco faa co̦layofälöma, a wa̦libä. —Nabe. ¿Wedi ya tä yai li nacabä? —e cuma. Abinaja bä nöö e cuu showadaoma. —Wedi mlai. Fe ojomalewä Juan a lä cui, wa fe nacabä, ö̦jö lä —a cuma. ²⁵ Bada tä nijamö lobe a mö yabadou fa co̦lofälönö, a wa̦ shi jaliwä faö showadaoma. Abinaja a cuma. —Bei. Juan fe ojomalewä ya fe bufii. Wa fe fa bäblamalönö, madofi a jamö wa fe fa döcämacönö, camiyä nija wa fe befi ca̦i jöböaö showadaobä —e cuma. ²⁶ Elodia bä tää e a̦ ja, bada a bufi wajäblou dodijilayoma. Ö̦jö ma cui, wawädowä a wa̦ nö wäo waiquioma yalo, a wa̦ shominajaaö majöo bufionomi. Bä lä nacaalaleno wei bä ma cuinö, a wa̦ ca̦i malä ji̦lileno wejei. ²⁷ Ö̦jö cudeenö, a nowamabeje ai a sodado lämabou lä ajedeono wei, a shömöa fa showadalönö, Juan fe ca̦i co̦o co̦imabä, a wa̦ faö showadaoma. A lä shömöleno wei a aa fa showadalunö, täbä fe lä labono wejei jamö Juan a fa juwälönö, ö̦jamö lä showawä a fe bäblalema. ²⁸ Madofi a jamö fe fa döcämacönö, fe befi ca̦i waloa co̦queyoluma. Elodia bä tää e nija fe befi ca̦i fa jöböcönö, ö̦jö länö bä nöö e nija fe befi ca̦i jöböa nomöjöquema. ²⁹ Juan nija bä lä nocaono wei bä lä cuinö tä a̦ fa ji̦liläjenö, a femata co̦lemaje. A femata fa co̦löjenö, a didiquemaje. ³⁰ Jesúsnö bä lä shömöleno wei bä co̦blou fa co̦lonö, bä lä cuaano wei tä a̦fa bluca wäyäö co̦ojolomaje, tä a̦ wäyäö lä cuaano wejei tä a̦fa ca̦i. ³¹ Ö̦jö däjä, abinaja Jesúsnö bä nowa tama. —Bämacö yamili cublao balöodayobä, bämacö befi ca̦i da caläfälö, wamacö washimi ca̦i joloo balöobä —bä nowa tama. Täbä bluca juu nomöjodima yalo bä malä yabäcamono wei. Bä iyabä tä ma cui ja, bä ca̦i yanöcöblamanomije. ³² Ö̦jö cudeenö, Jesúsnö cama ebä ca̦i nia yamili cublao fa balöonö, ulifi bloque jamö bä befi ca̦i calälayofälöma. ³³ Ö̦jö ma cui, bä befi ca̦i caläö fa dalalöjenö, bä ca̦i nö ö̦jöböa fa showadalöjenö, bluca täbä lä bälöblai bä lä cui, washölö jamö bä läläa fe difeliblaliyofälöma. Bä befi ca̦i washölöblou showao mlao däjä, ö̦jö bä waloa balöblaquema. ³⁴ Jesús a washölöblou däjä, täbä bluca lä co̦camono wei bä dalalema. Oweja bä lä nowamaö wei a cuami däjä, bä nö yamili bleaaö lä culenaja, bä nofi tadalema. Bä nofi ojodadaö fa showadalonö, bluca bä yömölaö cuaama. ³⁵ Tä mö weyaö däjä, cama ebä lä nocamabono wei bä fa icuicunö, abinaja a nowa tamaje. —Bei. Ei tä ulifi bloque dodijiwä. Tä mö ca̦i weyaö waiquia lä cule. ³⁶ Fei bä shömöa da co̦lu, bä bälöblawä fe lä fa̦yoblai bä nija bä nii fa lulualalöjenö, bä iyabä —a nowa tamaje. ³⁷ Ö̦jö ma cui, Jesús a wa̦ läoma. —Ma, cafä wamacönö wama bä yai iyamabä. Abinaja cama bä cuu nomöjöoma. —¿Wedinaja yamacö fa cuaanö, yama bä li iyamalei? ¿Blada 200 wa bä joyaö bufi doblao tawä, yama bä iyamabä? —bä cuma. ³⁸ Abinaja Jesús e cuu nomöjöoma. —¿Wedinaja bä nii cudale wama bä tabou cule? Bä möö da balöoje —a cuma. Bä nii wabaö fa cuaajenö, abinaja ebä cuu co̦oyoluma. —Nii 5 yama bä tabou bädaa lä cule, yuli bolacabö cäcö ca̦i —bä cuma. ³⁹ Ö̦jö däjä, moimoima a jamö bä loo toujamaö bufima. ⁴⁰ Bä loamaö cuaaö lä bufino wejeinaja, inaja showawä bä loo cuolaliyoma. Ai bä nijamö 50 bä cuoma, ai bä mö feduwä ja 100 bä cuo mö feduoma. ⁴¹ Ö̦jö däjä, nii 5 bä lä cuono wei bä dälema, yuli bolacabö cäcö ca̦i. Ö̦jö bä fa dälönö, fedu jamö a mö fa nonoicunö, bä nia lä iyano wei tä ja, Yai Bada nija a bufi a̦fa doblalou wäyämoma. Ö̦jö däjä, nii bä fa cälalönö, cama ebä lä nocamabono wei bä nija bä jöböquema, bä lä co̦camono wei bä nija bä jöböaö cuaaö nomöjöobeje. Yuli bolacabö cäcö ma cui ja, inaja showawä, bä bluca iyabä, bä omalema. ⁴² ¿Ö̦jö tawä? Bä bluca fa iyaolalunö, bä bädöolaliyoma. ⁴³ Ö̦jö däjä, Jesús ebä lä cuinö bä nii sheje co̦a fa co̦abodujenö, yuli bä ca̦i sheje co̦ablaö mö fa feduojenö, wöö 12 bä jamö bä fe nii shee lajomalalemaje. ⁴⁴ ¿Ö̦jö tawä? Nii bä ja bä lä iyano wei bä lä cui, 5.000 bä wa̦lo cuoma. ⁴⁵ Ö̦jö däjä, cama ebä lä nocamabono wei bä lä cui, canawä a jamö lobe Jesúsnö bä döcäcäa showadaamabalema. Bä lä co̦camono wei bä shömaö co̦o juo däjä, Besaida jamö bä bucaduamaö balöo bufima. ⁴⁶ Täbä shömöa fa co̦abodunö, jefu a balöcö jamö Jesús a dolequea jäbefälöma, Yai Bada nija a wa̦ fabä. ⁴⁷ Tä mö dödöfälöö däjä, modu u möamo jamö cama ebä befi ca̦i caläö showaofälöö däjä, washölö jamö Jesús a yami cuo juoma. ⁴⁸ Ö̦jamö culanö bä nö bleaaö daa fe jalulalema. Wadoli a läadalou fe fa jalunö, bä ja̦maboma. Ö̦jö däjä, tä mö jalufälöö däjä, cama ebä nija, modu u jamö Jesús a jelejewä juu yaua jälayofälöma. A nia ma jayuono wei ma cui, ⁴⁹ modu u feyaca jamö a jelejewä juu fa dalalöjenö, bejedi lä bä nö wa̦lowä quilia dodijilaliyoma. Bolebole a fa bufijenö, bä quilili si̦lalamolayoma. ⁵⁰ Cama ebä blucanö a dalalemaje yalo, bä malä quililaliyono wei. Ö̦jö ma cui, lobe bä quilii wasöblalema. —Bä bufi da lojododalu. Ei camiyä cä ya. Bä quili dijä —bä nowa tama. ⁵¹ Ö̦jö däjä, canawä a jamö a döcäa mö fa fedubalunö, a wadoli mladou showadalayoma. ¿Ö̦jö tawä? Bejedi lä, bä bufi mlaa dodijilayoma. ⁵² Bä bufi jaducublonomi showawä yalo, bä quilima. Nii 5 bä ja, täbä bluca ma iyamaleno wei ma cui, bä bufi yai jifuwä showao dicooma. ⁵³ Bä befi ca̦i fa bucadubalunö, Jenesale tä ulifi jamö bä waloquema. Canawä a nata ya̦quemaje. ⁵⁴ Bä itoblou däjä, Jesús a nö ö̦jöböa showadalemaje. ⁵⁵ Ö̦jö däjä, cama ebä lä bälöle jamö bä läläblalou cuaaö showadaliyoma, bä jalili co̦ablabeje. Jesús a wa̦ juu ji̦liaö ma bädao wejei jamö ma cui, ö̦jamö lä jalili täbä befi ca̦i cadömabolajenö, bä juu läläablalou cuaama. ⁵⁶ Shabono wai wajaquemi bä jamö ma cui, shabono bada bä jamö ma cui, bä yami lä bälöono wei bä nijamö ma cui, Jesús a juu lä bädaono wei jamö ma cui, jalili täbä ca̦i waloomaje. Nii bä showadi lä lulaö wejei jamö bä jalili befi ca̦i blaquemaje. Jesús camishi ecö casö ma cui, ecö casö jubädaö bufi fa doblaojenö bä a̦ fe blacäjoma, bä nia fa jalonö. ¿Ö̦jö tawä? Ecö casö lä jubädano wejei bä lä cui, bä bluca jaloblou showadaoma.

¹ Bei. Jesús nijamö faliseo bä bada co̦cablaleyoluma, Moisesi etä a̦ ja täbä lä damaö wejei ai bä lä cui bä ca̦i, Jelusale jamö bä lä cuono wei bä lä cui. Ö̦jamö bä cuo däjä, ² Jesúsnö bä lä nocamabono wei ai ebä iyaö dalalemaje. Bä imicö ya̦lömonomi cudeenö, judio bänö bä nofi shamibomaje. ³ ¿Ö̦jö tawä? Faliseo bä bada lä cui, bä imicö ya̦lömou mlai ja, bä iyaö malä mlai. Judio ai bä jödödöwä ma cui, bä imicö ya̦lömou mlai ja, bä iyaimi. Inaja bä nö jaba badabö cuaaö fa balöonö, bä cuaaö nodiablalou showawä. ⁴ Nii bä showadi lä lulaö wejei jamö bä juu ja, bä co̦a fa co̦bonö, yedu bä shino ya̦lömou cublaojolou, bä dodijidablou co̦obä. Bä dodijidablou co̦obä, bä cuaaö showao mlao däjä, bä iyaimi. Bä cuaaö lä nodiablalou wei, ai bluca tä ca̦i tabou mö feduoje. Toubä lä coaö wejei täbä madofi ma cui, jaboca bä ma cui, showadi täbä shino yaluuje. Täbä didibobeje, duo shibä ja täbä lä tablamou wei täbä ma cui, inaja showawä täbä shino yaluu cuaaöje. ⁵ Ö̦jö cudeenö, faliseo bä bada ma cuinö, Moisesi etä a̦ ja täbä lä damaö wejei bä ma cuinö, Jesús a wa̦limaje. —Judio bämacö nö badabö lä cuaano wei, bäma bä owäbou nodiablalaö showaobä tä ma cule ma cui, ¿wedi tabä afä wa bä lä nocamabole bä lä cui, inaja bei bä li cuaaimi dicoo? ¿Wedi tabä bä imicö ma shami wei ma cui, bei bä li iyaö dicoo? —a nowa tamaje. ⁶ Abinaja Jesús e cuma. —Yai Bada a wa̦no wäyälewä Isaia a lä cuinö, cafä wamacö a̦fa wäyäö balöo ja, a bejedimoma. Jole jole wamacö dodijaö buo. Abinaja tä a̦ cuu. Fei bä lä cuinö, bei bä caficönö wale nofi doablaö ma buo wejei ma cui, camiyä nija bei bä bufi yai cuami. ⁷ Camiyä wale a̦fa Bada doblao ma taö wejei ma cui, bä jolemou dicoo ja, bä a̦ nö bleo bädao. Iba tä a̦ jo̦wa ma wäyäö wejei ma cui, ö̦jö iba tä a̦mi. Cama yanowamö täbä a̦ li bädawä. ’Einaja tä a̦ cuu —Jesús a cuma—. ⁸ ¿Ö̦jö tawä? Yai Bada tänö tä nabä yai lä shömaö wei wama tä taö mlai ja, wamacö nö badabö lä cuaano wei wama bä shino owäbou bufi doblao dicoo. ⁹ ’Jole jole wamacö li dodijaö —a cuma—. Wamacö nö badabö lä cuaano wei wama bä owäbou fe yadiobä, Yai Bada tänö tä nabä yai lä shömaö wei tä ma cui, wama tä a̦ li waibou. ¹⁰ Yai Bada wama tä a̦ juaö malä mlai. ¿Ö̦jö tawä? Jaba däjä, abinaja Moisesinö bä nowa tama. Faafä a ma cui, naafä a ma cui, dodijidawä wama bä ca̦i fa cuonö, wama bä a̦ nia juaö. ’Einaja bä nowa tama. Abinaja ca̦i. Bä fö̦ö e nija a wa̦ wa̦lidiwä faö ja, a shämobä ö̦jö a waiquiwä. Bä nöö e ma cui nija a wa̦ wa̦lidiwä faö dicoo ja, inaja showawä. ’¿Ö̦jö tawä? Einaja bä nowa tama —Jesús a cuma—. ¹¹ Ö̦jö ma cui, judio wamacö bada lä cui, abinaja cafä wamacö li cuu. “Faafä, naafä wama bä bayeliblabä bä ma cule, wama täbä lä tabole, Yai Bada nija wama täbä a̦fa yaia wäyäö ja, täbä nö jöböamobimi lä waiquii täbä”, wamacö cuu dicoo. ¹² Inaja wamacö cuu yalo, bä fö̦ö, bä nöö, wama bä bayeliblamaimi. ¹³ ¿Ö̦jö tawä? Yai Bada tä a̦ juamobä tä a̦ waiquiwä ma cui, wamacö nö badabö lä cuaano wei tä ja, wamacö bufi mö shino blucao fa dicoonö, ö̦jö wama tä a̦ li läablalaö. Inaja cafä wamacö lä cuaaö weinaja, ai wama bä ca̦i taamaö mö feduo dicoo, Yai Bada tä a̦ juaö mlaobeje. ¿Ö̦jö tawä? Cafä wamacö lä cuaaö wei, bluca tä cua showaa —Jesús a cuma. ¹⁴ Ö̦jö däjä, Jesúsnö täbä nacaa fa co̦alalönö, abinaja bä nowa tama. —Bei. Bluca wamacö lä cuinö wamale a̦ da ji̦liyo. Bä bufi da jaducuicu. ¹⁵ Täbä lä waö wejei täbänö täbä bufi shamiblou daomi. ¿Ö̦jö tawä? Täbä lä cublai täbänö mlai, bei täbä bufi jamö tä lä didilenö, ö̦jö tänö täbä bufi yai shamiblamou —bä nowa tama. ¹⁶ - ¹⁷ Ö̦jö däjä, täbä lä co̦camono wei täbä fa dacöfälönö, yafi jamö a lucäa fa co̦lunö, cama ebä lä nocamabono wei bä ajedeblaleyoluma. A wa̦ faö lä yacläablalono wei, tä a̦ ji̦liaö cadidio fa mlacujenö, tä a̦ wa̦limaje. ¹⁸ Abinaja Jesúsnö bä nowa tama. —Uo. Cafä wamacö ma cui, ¿wamacö bufi ca̦i jaducuwämi tawä? Täbä lä cublai täbänö täbä bufi shamiblou malä mlai. Nii bänö mlai. ¹⁹ Bei wamacö bufi jamö bä nii didio malä mlai, wamacö bufi shamiamabä. Bei wamacö busi jamö bä nii didio fa balöonö, bä li faoblou co̦o malä cui —bä nowa tama. Inaja a lä cuno wei tänö, täbä nii a̦fa bluca au taö showadaoma. ²⁰ Abinaja a cuma. —Bei täbä bufi jamö tä wa̦lidiwä lä didile, ö̦jö tä wawäblou däjä, ö̦jö lä tänö täbä bufi yai shamiblou. ²¹ Bei täbä bufi jamö tä wa̦lidiwä didia yalo, wa̦lidiwä tä jamö bä bufi shino dayäo. Ö̦jö däjä, bä nofi beshili jushuaö. Shomi täbä madofi ca̦i lämaöje. Täbä ca̦i yanowamö shäöje. Bä ca̦i joleblalou. ²² Bä bufi ca̦i waiyou. Wa̦lidiwä tä ca̦i taöje. Bä ca̦i jolemou. Wa̦lidiwä tä taö bufi ca̦i doblaoje. Ai täbä dodijaö ayao ja, täbä nofi ca̦i wa̦libouje. Täbä a̦fa ca̦i wayoaöje. Cama bä nofi ca̦i yaimamou. Bä bufi dao mlalanö bä ca̦i cuaaö buo. ²³ Ö̦jö tä wa̦lidiwä bluca lä cui, yanowamö täbä bufi jamö tä fa didionö, tä wawäblou. Ö̦jö tänö täbä bufi yai shamiblou. ²⁴ Ö̦jamö a jocäa fa co̦lunö, Diloteli bä lä bälöle jamö a alayoma, Sidonoteli bä bälöa mö lä fedule jamö. Ö̦jamö a fa waloicunö, ai bä nijamö a co̦blaliyoma. A lä co̦blaliyono wei a yami cuo balöo ja̦toobä, a nofi ma tamamono wei ma cui etä daö showadaomaje. ²⁵ Ai a suwänö a wa̦fa bälöo fa ji̦lilänö, a nabä yai waloa showadaquema. Fecula anö bä tää e nö wai bleaamaö dodijioma. A fa waloicunö, Jesús a cotä jamö a mö fe boblaquema. ²⁶ Ö̦jö a suwä lä cui, judio a suwä cuonomi. Silofenisiateli bä nijamö a oshe cublaliyoma. Ö̦jö ma cui, a ma shomiono wei ma cui, Jesús nija a wa̦ fe blacäjoma. Bä tää e nija a fecula lä didile e nia fa yashublamanö, a wa̦ fe yadibloma. ²⁷ A wa̦ juo ja, a wa̦ faö yacläablaloma. Shomiteliyoma a cuoma cudeenö, abinaja Jesús a cuma. —Ijilu bä iyaö balöobä. ¿Ö̦jö tawä? Ijilu bä nia lä iyaö wei bä nii lä cui, ji̦ima bä nija bä jöböamou bashiblao ja, tä dodijidawä malä mlai —a cuma. ²⁸ Ö̦jö ma cui, a nia bayeliblamou fe fa yadionö, abinaja a suwä cuu nomöjöoma. —Awei, Bada tä. Wa bejedimou. Ö̦jö ma cui, bä shö̦ö e lä cui, ö̦jö bä ijilubö ebänö täbä lä̦cashi lä blälämaö wejei täbä ja, ji̦ima bä ma cui, bä ca̦i malä iyaö wei —a cuma. ²⁹ Abinaja Jesús e cuma. —Inaja wale nofi taboma yalo, a dodijidawä da co̦jamö. Fecula a lä cui, tääfä nija e faa waiquilayoma —e cuma. ³⁰ A suwä co̦a fa co̦lufälönö, bä tää demi e bälöa dalalejeloma. Fecula a lä didiono wei e docua waiquilayoma. ³¹ Diloteli bä nijamö a cuoma, modu Calilea u jamö Jesús a aa nomöjölayofälöma. Sidonoteli bä lä bälöle jamö a jayublaliyoma, Decaboli tä a̦fa ulifi lä jilabolajei jamö. ³² Ö̦jamö lä a cuo däjä, a yömöcacö lä comi wei a ca̦i waloqueyolumaje. Aca ca̦i boleböoma. Ö̦jö a ca̦i fa waloicujenö, Jesús imicö maqueobä bä a̦ fe blacäjoma, a jalomabä. ³³ Bä bluca lä co̦camono wei jamö Jesúsnö a jalili ca̦i fa bayäcäblalunö, bei yömöcacö jamö imicö lucäa mö fedududaliyoma. Bei canojoli bä fa jämolunö, aca ya̦lebalema. ³⁴ Aca fa ya̦lebalönö, a mö nonolanö a bufi la̦amoma. Ö̦jö däjä, yömöcacö jolablamaö bufii ja, —¡Efada! —a cudaliyoma, cama bä caficö a̦ ja. ³⁵ Inaja a fa cudalunö, yömöcacö jolablou showadalayoma. Aca ca̦i jayublou showadalayoma. ³⁶ Ö̦jö däjä, yömöcacö lä wacacablamaleno wei, aca ca̦i lä jayublamaleno wei tä a̦ wäyäö mlaobeje, bä a̦ wasöma, ai moli a bädawä ma cui nija tä a̦ wäyäö mlaobeje. Inaja bä nowa ma tadano wei ma cui, cama a wa̦ ja, bä a̦ shi shino yai dooblou majöo dicooma. ³⁷ Bä shino shädayaimou fe balojooma. Abinaja bä nowa tayoma. —A cuaaö lä bädao wei tä ma cui ja, showadi a dodijaö. Bä yömöcacö lä comi wei bä ma cui, bä yömöcacö jolablamaö majöo. Bä aca lä bolebö wei bä ma cui, bä a̦ fablamaö majöo —bä nowa tayoma.

¹ Ai däjä, Jesús nija täbä bluca co̦camou co̦oyoluu däjä, bä niibö cuonomi. Bä niibö cuo fa mlacunö, cama ebä lä nocamabono wei bä nacaa ajedelema. Abinaja bä nowa tama. ² —Ei bä lä co̦camole bä nija ya bufi wajäaö a lä cule. Camiyä nijamö bä lä co̦cale, bolacabö tä mö didi tabou waiquiaje. Bä iyabä täbä ca̦i cuami. ³ Bä ofäö ma cui ya bä shömaö fe yadio dicoo ja, bä ofili nia wäcäcou dicoofälöö. Ai bä lä cui, blajai jamö bä cuoma bä malä waloqueno wei —bä nowa tama. ⁴ Bä lä nocamabono wei bä lä cui, abinaja ebä cuma. —Ei tä ulifi bloque dodijiwä. Nii a cuami. ¿Wedinaja yama bä li iyamaö cuaaö buobä? ⁵ Jesúsnö bä wa̦lii ja, abinaja a cuma. —¿Wedinaja bä nii cudale wama bä tabou culawä? —Nii 7 yama bä tabou bädaa lä cule —bä cuma. ⁶ Ö̦jö däjä, bä lä co̦camono wei bä lä cui, mashita a jamö bä loamaö bufima. Nii 7 bä lä tabono wejei bä nii fa dälönö, Yai Bada nija a bufi a̦fa doblalou wäyämoma. Ö̦jö däjä, bä nii cäa fa nomöjölalönö, cama ebä lä nocamabono wei bä nija bä jöböquema, bä lä co̦camole bä dobäö mö feduobeje. ¿Ö̦jö tawä? Bä dobäö cuaaö showaomaje. ⁷ Yuli bolacadabö bä wai ca̦i tabomaje. Jesúsnö ö̦jö bä ca̦i däa nomöjölema. Yai Bada nija, ö̦jö bä ja a bufi a̦fa ca̦i doblalou wäamou fa co̦onö, bä lä co̦camono wei bä nija bä jöböamaö bufima. ⁸ Bä bluca fa iyaolalunö, bä bädöolaliyoma. Ö̦jö däjä, cama ebä lä cuinö, nii bä sheje co̦ablaö fa cuaajenö, wöö 7 bä jamö bä nii sheje fe lajomalalemaje. ⁹ Bä lä iyano wei bä lä cui, jai 4.000 bä cuoma. ¹⁰ Ö̦jö däjä, Jesúsnö bä shömöa fa co̦abodunö, cama ebä lä nocamabou wei bä lä cui, lobe, canawä a jamö bä ca̦i döcäcäo fa co̦balunö, Damanuda tä ulifi jamö bä befi ca̦i caläa co̦layoma. ¹¹ Jesús nija faliseo bä bada waloquema. Bä fa waloicunö, a wa̦ dodijidawä ji̦liaö mlajei ja, bä a̦ shino lämoma. Jesús a wa̦ nia bejedi fa wabajenö, abinaja bä cuma. —Yai Bada wa e nö ö̦jöböamobä, tä nö lä quilijii tä da wawämalö —bä cuma. ¹² Cama bä a̦ ja, Jesús a bufi fa uomodalunö, a bufi la̦amolayoma. Abinaja a cuma. —Wamacö fei däjä lä bälöle wamacönö, ¿wedi tabä wamale a̦ bejedi wabaö bufi li doblao dicoo? Ma, cafä wamacö nija ei ya wa̦ lä cui, bejedi lä ya wa̦. Yai Bada ya e nö ö̦jöböamobä, tä nö lä quilijii wama tä wawämaö bufi ma doblao wei ma cui, bämacö a̦ nia juaimi—a cuma. ¹³ Ö̦jö däjä, bä tabi fa feicönö, canawä a jamö cama ebä ca̦i döcäcäo fa co̦balunö, bä bucaduobä bä calälayoma. ¹⁴ Bei. Jesús nija bä lä nocaono wei bä lä cui, nii bä ja bä bufi möblaliyoma, bä nofi mojoduquemaje yalo. Canawä a jamö nii moli a ca̦i shino wai jumaje. ¹⁵ Ö̦jö däjä, bä moyawämabobä, Jesúsnö nii julumamodima tä a̦fa wäyäö yaclämoma. Abinaja bä nowa tama. —Bä da moyaweicu. Faliseo bä bada lä cui, etä julumamodima wayu. Bada tä Elode a ma cui, inaja showawä cama etä ca̦i wayu cuwä mö feduwä —bä nowa tama. ¹⁶ Jesús a wa̦ ja, bä bufi wedinajamolanö abinaja bä nowa tayoma. —Nii bäma bä ca̦i juu fa mlacunö, nii bä lä juluu wei tä a̦fa taö —bä nowa tayoma. ¹⁷ Bä bufi lä cuno wei tä daö waiquioma yalo, abinaja Jesús a cuma. —¿Wedi tabä “Nii bäma bä tabou lä mlai, tä a̦fa li wayoaö”, wamacö nowa li tayou dicoblaa cule? ¿Bei wamacö bufi ca̦i möbloimi showawä? ¿Bei wamacö bufi jaducudaloimi? ¿Wamacö bufi jifuwä showawä dicoo daanö? ¹⁸ Bei wamacö mamocu ma cule ma cui, wama tä möimi bäwä. Wamacö yömöcacö ca̦i ma cule ma cui, wama tä a̦ ji̦liblaimi showawä. Ya bä da iyamablei, ¿wama tä nofi ca̦i jaducuboimi? ¹⁹ Nii 5 ya bä da cleyablei däjä, 5.000 ya bä iyamalema. ¿Ö̦jö tawä? Nii wama bä sheje da co̦ablablei bä ja, ¿wedinaja bä wöö cudale bä ja, wama bä fe lajoblamalema? —a cuma. —Wöö 12 bä ja —bä cudaliyoma. ²⁰ —Ja̦o, —a cuma—. Nii 7 ya bä da cleyablei däjä, 4.000 ya bä ca̦i iyamalema. Ö̦jamö lä, nii wama bä sheje bluca ca̦i co̦ablaö da cuaablei bä nii sheje ja, ¿wedinaja bä wöö cudale bä ja, wama bä fe lajoblamaö co̦layoma? —Jesús a cuma. —Wöö 7 bä ja —bä cuma. ²¹ —¿Ö̦jö tawä? —Jesús a cuma—. ¿Bei wamacö bufi li jaducubloimi showawä tawä? Nii bä ja ya bufi jalublalobä yami. ¿Wedi tä tabä, “Shomi tä a̦fa li wayoaö da culaanö”, bei wamale nofi li taboimi? —a cuma. ²² Besaidateli bä nijamö Jesúsnö cama ebä ca̦i yafia nomöjölayoma. Ö̦jamö lä, a lä jubäböono wei a ca̦i waloquemaje. Ö̦jö nija Jesús imicö maqueobä, bä a̦ faö fe blacäjoma, a mamocu jalomabä. ²³ Ö̦jö däjä, shabono a sibo jamö, Jesúsnö a lä jubäböono wei a öböa showadalefälöma. Cäcöbö fa sibolunö, bei canojolibö fa jämolunö, a lä jubäböono wei mamo casöcö jölöcölema. Ö̦jö däjä, imicö ca̦i maquea fa baliicunö, a wa̦lima. —¿Fei däjä, wa täbä möö tawä? —a cuma. ²⁴ A lä jubäböono wei a lä cuinö täbä möadalaö fa cuaanö, abinaja e cuma. —Yanowamö ya täbä juu dablaö ma cui, jai fii fibä mömou cuwä dicowä —a cuma. ²⁵ Jesúsnö bei mamo casöcö jubädaö fa co̦lunö, täbä möö dodijodii fa cuaanö, ö̦jö däjä a mamocu yai jaloa cadidia showadalayoma. Täbä bluca möö wacacablou showadalayoma. ²⁶ Ö̦jö däjä, a wa̦ nö wäo mlaobä, shabono jamö a famaö mlai ja, cama e yai yafi jamö Jesúsnö a shömöa taa co̦a showadalema. —Bei. Ei a shabono jamö a lucäö co̦o bädao dijä —e cuma. ²⁷ Jesúsnö bä lä nocamabono wei, Filibo jamö bä ca̦i aa nomöjölayoma, Sesaleateli bä shabonobö lä cublai jamö. Bä ca̦i juu showaofälöö däjä, bä wa̦lifälöma. —¿Wedinaja wale nofi yai li tabou dodijiaje? ¿Camiyä wedi bei ya jo̦wa? —a cuma. ²⁸ Abinaja ebä cuma. —Fe ojomalewä Juan bei wa jo̦wa fa talei. Ai bä mö feduwä lä cuinö, Yai Bada a wa̦no wäyälewä Elia a cuo lä balöono wei, ö̦jö wa jo̦wa bufidaö talajei. Ai bä a̦ showawä ja, Yai Bada a wa̦no wäyälewä ai a demi jocädou fa co̦lonö, ö̦jö bei wa jo̦wa co̦dawä fa talei—bä cuma. ²⁹ —Ö̦jö ma cui, cafä wamacö lä cuinö, ¿wedinaja bei wamale nofi li tabou dodijia cule?—Jesús a cuma. Pedro a wa̦ juoma. —Yai Bada tänö a shömabä a lä yaileno wei, ö̦jö cafä bei wa dodijiwä —bei e cuma. ³⁰ Ö̦jö däjä, bä lä nocamabono wei bä a̦ wasöma, a nö ö̦jöböamaö showadao mlaobeje. ³¹ Ö̦jö däjä, cama a lä yanowamöblaleyoluno wei, Jelusale jamö a nö nia lä bleaamano wejei tä a̦ ja, Jesúsnö bä jaba yömölaö cuaama. Judio bada bä ma cuinö, nofi bäyäalewä bä blowäjäwä ma cuinö, Moisesi etä a̦ ja täbä lä damaö wejei bä ma cuinö, ö̦jö bänö a nö nia jo̦wa bleaamaö fe balojoomaje. A nia waimaje. A nia shämou cadidioma. Inaja a taamamobä a cuo waiquioma. Ö̦jö ma cui, bolacabö tä mö fa dödölönö, a demi nia jo̦wa jocädou co̦oma. ³² Cama a wa̦fa wäyämamou wawädooma. Ö̦jö däjä, Pedronö a ca̦i fa casöblalunö, a wa̦ wasöma. ³³ Ö̦jö ma cui, Jesús a mö fa jadublalunö, cama ebä lä nocamabou wei bä möö fa cuaanö, Pedro a wa̦ wasölema. Abinaja e cuma. —¡A da blajalö, Sadanasi! Yai Bada nija wa bufi taamamou fa mlacunö, yanowamö täbä bufi showadi lä cuu weinaja wa bufi cuablalou malä dicole —e cuma. ³⁴ Ö̦jö däjä, bä bluca lä co̦camono wei bä lä cui, bä nacaa co̦alalema, cama ebä lä nocamabou wei bä ca̦i. Abinaja bä nowa tama. —Camiyä nija bä nia lä nocao wei bä lä cui, cama bä cuaaö bufi lä doblao wei tä ja, bä nia yai wasöo. Wale bufiije yalo, bä ma shäöje däjä, bä nia ojode cuo fe yadio. Bä nia nocao fe yadio. ³⁵ Bita ja bä nia demi lä cudio wei tä ja, bä bufi mö lä blucao wei bä lä cui, bä ba̦limi nia cuodayou malä mlai. Ö̦jö ma cui, camiyä ya nowa ja bä shämou lä ojodao wei bä lä cui, iba dodjidawä tä a̦ wäyäö quilii lä mlajei, ö̦jö bä nia shino ba̦limi cuo ayao. ³⁶ ’¿Ö̦jö tawä? —a cuma—. Bita jamö bä madofi bluca lä cublai, bä madofi ma däamou wei ma cui, bä nia yai lä ba̦limiblou wei tä joyamou dicoo ja, ¿wedi tänö bä yai nia li bayeliblamou majöo, ö̦jö lä? ³⁷ Bä nia ba̦limi lä cuo wei, ö̦jö lä bä madofi ja tä nowa co̦amamou dao malä mlai. ³⁸ ’¿Ö̦jö tawä? Fei täbä doblou lä mlai, täbä nofi lä jushublalou wei täbä lä cule jamö, iba bä a̦fa jilamou quilii dicoo ja, inaja showawä camiyä ya nia quilii cuo mö feduo. Wale a̦fa ca̦i wäyäö quilii dicoo ja, inaja showawä camiyä ya lä yanowamöblaleyoluno wei ya ma cui, ya nia quilii cuo mö feduo—a cuma—. Fayä etä shi̦i lä cule jamö, a̦jele ya etäbä ca̦i itou däjä, camiyä ma cui, “Iba cäbä”, ya nia cuu quilii.

¹ Abinaja Jesúsnö bä nowa ca̦i tama. —Cafä wamacö nija ei ya wa̦ lä cui, bejedi lä ya wa̦. Ai wamacö lä ublale, wamacö nomaö showaono mlai ja, Yai Bada tänö cama ebä nia ca̦i lä cuo wei wama tä lojode nia dablaö —Jesús a cuma. ² Ö̦jö däjä, 6 tä mö didi fa cublalunö, Jesúsnö cama ai ebä nacalema. Pedro a nacalema, Santiago a ca̦i, ö̦jö bä fääshä Juan e ca̦i. Bä fa nacalänö, jefu balöcö ösöwä jamö ö̦jö bä ca̦i yami dolequebefälöma. Ö̦jamö bä mamo mötale däjä, Jesús a mömou shomiblaliyoma. ³ Camishi ecö ma cui, ecö shi̦i ca̦i wacalamiblaliyoma. Bä yaluuje däjä bä lä cublou weinaja bädawä mlai, ebä yai mömou aublou dodijilayoma. ⁴ Ö̦jö däjä, ai täcöbö fa bädalunö, Jesús sho bä a̦ wayoma. Moisesi, Elia sho cäcöbö cuoma. ⁵ Jesús nija abinaja Pedro a cuma. —Tä a̦ wäyäle. Eja bämacö lä cule, tä dodijidawä waiquiwä. Yano 3 yama bä nia wai i̦tamaö, ¿ö̦jö tawä? Afä a, Moisesi e, Elia e, einaja yama bä nia wai yano tablaö, ¿ö̦jö tawä? —a cuma. ⁶ Bä nö quilili bleaama yalo, a wa̦ biyäcou bädaoma. ⁷ Ö̦jö däjä, ölajashi a bada fa itolunö, bä jo̦yablalema. Ö̦jö däjä, ölajashi jamö culanö a wa̦ bädaliyoma. —Ei Ijiluyä a, ya lä nofimaö wei. A wa̦ da ji̦liläje —a cuma. ⁸ Ö̦jö däjä, lobe tä möö fa cuaajenö, cama bä lä cuono wei jamö Jesús a yami ublaa daa co̦a majölalemaje, ai täcöbö cuonomi. ⁹ Jefu a jamö bä dömöö fa co̦imanö, Jesúsnö bä wasölefälöma, tä lä dalaleno wejei tä a̦fa wäaö showadao mlaobeje. ¿Ö̦jö tawä? Cama a lä yanowamöblaleyoluno wei a lä cui, a demi jocädou showao mlao däjä, tä a̦fa wäaö balöo mlaobeje. ¹⁰ Inaja a cuma yalo, ai täbä nija tä a̦fa wäyäö showadaonomije. A demi a̦fa jocädou lä wäyämono wei tä a̦ ja, bä bufi wedinajamoma yalo, cama bä shino wa̦liyodima. ¹¹ Ö̦jö däjä, abinaja Jesús nija bä cuma. —Moisesi tä a̦ ja täbä lä damaö wejei bä lä cuinö, ¿wedi tabä Elia a wa̦fa li juu co̦o wäyäöje? Yai Bada tänö a shömabä a lä yaileno wei a juu showao mlao däjä, ¿wedi tabä ö̦jö bei a nia jo̦wa li juu balöblao? —bä cuma. ¹² —Awei —Jesús a cuma—. Inaja tä a̦ malä cuu wei. Tä bluca dodijidablaö co̦obä, Elia a nia jo̦wa juu co̦o balöoma. Camiyä ya lä yanowamöblaleyoluno wei ya ma cui, yale nö nia lä bleaamano wejei, tä a̦fa ca̦i wäyämou showaoma. Wale nö nia ca̦i jo̦wa waiblamaje. ¹³ Ö̦jö ma cui, abinaja ya cuu. Elia a nia jo̦wa juu lä co̦ono wei a wawäblou waiquilayou cublei. A nö ö̦jöböanomije. A taamaö bufi lä doblaono wejeinaja a taamamaje, Yai Bada etä a̦ oni jamö a wa̦fa lä wäyämou weinaja showawä —a cuma. ¹⁴ Jesúsnö bä lä nocamabou wei bä cuo juobä ja, täbä bluca co̦camoa jälayoma. Cama ai ebä ca̦i waloa fa co̦balucölönö, täbä lä co̦camole täbä dalalemaje. Moisesi etä a̦ ja täbä lä damaö wejei bä lä cui, Jesús ebä nija bä a̦ lämoma. ¹⁵ Bä lä co̦camole bänö Jesús a co̦o fa dalalöjenö, bä shi a̦ bluca dolayoma. A nabä läläa mö baquemaje. ¹⁶ Ö̦jö däjä, Jesúsnö cama ebä wa̦lii ja, abinaja a cuma. —Ei bä sho, ¿wedi bei wama tä a̦fa wayoaö cufe? —a cudaliyoma. ¹⁷ Bä lä co̦camole ai a lä cui, abinaja e cuma. —Tä a̦ wäyäle. Fecula anö ijiluyä aca bolebömabou yalo, cafä nija ya ca̦i waloqueyoluma. ¹⁸ A shi yai lä wa̦limaö wei däjä, i̦cali a shäyäblao. A fa queoblonö, caficö moshi boyacaoblou, nacö ca̦i wa̦sönöoblou. A ca̦i cofibö cashäshäoblou. Afä wa bä lä nocamabou wei bä nija, fecula ya e yashumaö bufima ma cui, bä dobloimi —e cuma. ¹⁹ Abinaja Jesús e cuma. —¡Uo! Äyämö ya nö dedeaö ma waiquile, Yai Bada wama tä nofi nö mölabobimi waiquiwä. Wama tä nofi mölabou shaliliobä bämacö nö dabou ja, ya modaaö waiquiwä. Bei. Bä ijilubö e da bälabayoje —e cuma. ²⁰ Jesús nija bä ijilubö e fa bälacöjenö, fecula a lä didilenö Jesús a dalalema. A fa dalalönö, fiya a shi lobe wa̦lidamaö fa co̦lonö, a i̦cali shäyäblaa co̦quema. Mashita jamö i̦cali a yabolemolanö, caficö moshi boyacaa co̦layoma. ²¹ Jesúsnö bä fö̦ö e wa̦lii ja, abinaja e cuma. —Feculanö inaja ijilufä a lä taamaö wei, ¿a nö dedea culawä? —a fa cunö, —Jö̦ö —bä fö̦ö e cuma—. Oshe a cuo showao däjä, a jaba taamama. ²² Cowa wacö ma cui jamö, feculanö a shäyäblaö cuaaö talei. Mau u jamö ma cui, inaja showawä, a nia waicaö fa showadaonö. ¿Ö̦jö tawä? Wamalecö bayeliblaö dao ja, wamalecö nofi da ojodadalö. Wamalecö da bayeliblalö —e cuma. ²³ Abinaja Jesús e cuma. —¿Wedi tabä “Wamalecö bayeliblaö dao ja”, bei wale nowa li taö dicoa cule? Yai Bada a bejedi bufibouje ja, tä bluca tamou malä dao wei —e cuma. ²⁴ Bä fö̦ö e bufi nö bleaalanö lobe e a̦ fadaliyoma. —¡Ya tä a̦ bejedi bufibou lä! Ya bufi lä ujudi wei, ¡wale bufi da lojodoblamalö, ö̦jö lä! —e cuma. ²⁵ Ö̦jö däjä, täbä lä läläaimi täbä fa dalalönö, Jesús a wa̦ faö showadaoma. Fecula a bälöo wasöö ja, abinaja a nowa tama. —Wa aca lä bolebömabole wa fecula lä cui, wa yömöcacö ca̦i lä comamabole, cafä bäfä nowa taö lä cule. A faa da co̦lufälö. A lucäö co̦daa dijä —a nowa tama. ²⁶ Fecula a i̦cali fa si̦lalamolunö, fiya a shi wa̦lia fa co̦malönö, mashita jamö i̦cali a yabolemou ja, a nö quiliama. Ö̦jö däjä, fecula a faa co̦a fa showadalufälönö, jai nomawä fiya a bloque bladio juoma. Ö̦jö cudeenö, bluca bä fe lä fa̦yoono wei bänö a wa̦fa nomawä tamaje. ²⁷ Ö̦jö ma cui, Jesúsnö a boco fa dälänö, a fa öbödalönö, a ubladou co̦layoma. ²⁸ Yafi jamö Jesús a lucäa fa co̦icunö, a yami cuo däjä cama ebä lä nocamabono wei bä fa icuicunö, abinaja bä cuma. —¿Wedinaja yamacö li cuaaö dicoo ja, yama a li yashuu doblonomi dicowä tawä? —ebä cuma. ²⁹ Abinaja Jesús e cuma. —Ei bä fecula mö feduwä lä cui, bä yashublamou si ijejewämi talei. Wamacö iyaö wasöolanö Yai Bada nija wamacö nö bayeli lä nacao wei tänö, ei bä shino yashublamou, ö̦jö tä shinonö —e cuma. ³⁰ - ³¹ Ö̦jamö lä Jesúsnö bä ca̦i fa jayuicunö, Calilea jamö ja̦towä bä ca̦i jayua nomöjöquefälöma. ¿Ö̦jö tawä? Cama ebä lä nocamabono wei bä damaö ja, a wa̦ yabäcofälöma yalo, a nö ö̦jöböamou bufionomi. Bä damaö ja, abinaja bä nowa tafälöma. —Ya lä yanowamöblaleyoluno wei ya lä cui, yanowamö täbä nija ya nia jöböamou. Wale ma shälei wejei ma cui, bolacabö tä mö didi fa cublalunö, demi ya nia jocädou co̦o —bä nowa tafälöma. ³² Ö̦jö ma cui, cama a wa̦fa lä wäamono wei, a wa̦ ji̦lia möblanomije. Tä a̦ ca̦i wa̦lii quilimaje. ³³ Cabenao jamö Jesúsnö bä ca̦i co̦blou co̦layoma. Yafi jamö bä ca̦i fa co̦blalunö, Jesúsnö bä wa̦lima. —¿Wedi bei wama tä a̦fa li wayoafälöö cublei? —a cuma. ³⁴ Ö̦jö ma cui, bä a̦ juo fa quilinö bä a̦ fanomi. “Camiyä ya yai bada cuobä”, bä nowa bluca tayou ja, bä a̦fa malä tayofälöno wei. ³⁵ Ö̦jö däjä Jesús a fa döcäicunö, cama 12 ebä nacaa ajedelema. Abinaja bä nowa tama. —Cafä ai wa lä cui, bada wa cublou bufi doblao ja, “Camiyä ya shino yai balöwä”, wamacö bufi nia cuimi. Wamacö nia shino yai nojablou. Aifä wama bä nia shino yai bayeliblaö —bä nowa tama. ³⁶ Ö̦jö däjä, ijilu a fa dälänö, a öböbou ca̦i möamoblaliyoma. Ö̦jö däjä a fa yäbölänö, bei wacucu ja a döcämabolanö, abinaja bä nowa tama. ³⁷ —Ei a lä culenaja a wai ijilu lä cui, a shomi ma cui, camiyä ya wa̦nö a wai nofimaö fe yadioje ja, camiyä ma cui wale nofimaö mö feduoje. Inaja showawä, camiyä wale nofimaöje ja, wale lä shömöleno wei a ma cui, ö̦jö a nofimaö mö feduo showaoje —bä nowa tama. ³⁸ Jesús nija Juan a wa̦ fama. —Tä a̦ wäyäle. Ai a lä cuinö, cafä wa wa̦fa jayumalanö fecula bä yashuu. Yama a dalalema. Camiyä bämacö nija a yädäo bufiomi yalo, yama a wasöblalema —a cuma. ³⁹ Ö̦jö ma cui, abinaja Jesúsnö a nowa tama. —A wasö dijejä. Tä nö lä quilijii tä lä wawämaö wejei bä lä cuinö, camiyä wale a̦fa jayumalajenö tä taöje ja, wale a̦fa wa̦lidiwä taö showadaobeje bä malä mlai. ⁴⁰ Camiyä bämacö nija bei bä a̦ läblou dao lä mlai bä lä cui, bämalecö a̦ bayeliblabeje ö̦jö bä li waiquiwä malä cui. ⁴¹ ’Cafä wamacö nija ei ya wa̦ lä cui, bejedi lä ya wa̦ —a cuma—. Iba wamacö lä cui, Cristo wama ecö a̦fa jilou yalo wamacö lä dobäö wejei bä lä cui, inaja showawä ö̦jö bä nia ca̦i dobämou cuo mö feduodayou. Mau si ajiwä u ja wamacö dobäö bädao ma cujei, bejedi lä bä nia dobämodayou. ⁴² ’Wa̦lidiwä tä jamö iba ai a wai luluaö lä dicoo wei tä wayu —a cuma—. Yanowamö a ja, bei olafi jamö maa ma bada fa jalemacöjenö, modu u jamö a befi ca̦i queamaöje ja, ö̦jö a nö bleaaö ma cuquei wei ma cui, iba ai a wai lä wa̦lidiamale a lä cui, ö̦jö bei a nö shino yai bleaaö cuquei. ⁴³ ’Abinaja ca̦i —Jesús a cuma—. Bei wa imicönö wa wa̦liamou dicoo ja, imicö da bäblamolu. Wa imicö bäblamou ja, wa nö nia ma bleaaö wei ma cui, wa demi nia lä cudio wei ö̦jö bei tä shino yai dodijidawä. Shobali wacö jamö wa imicö demi befi ca̦i juu ja, wacö lublou dao lä mlai jamö, ö̦jö däjä wa nö shino yai bleaaö cuquei. ⁴⁴ - ⁴⁵ Abinaja ca̦i. Bei wa mamicö ma cui, inaja showawä. Bei wa mamicönö wa wa̦liamou dicoo ja, mamicö da bäblamolu. Wa mamicö bäblamou ja, wa nö nia ma bleaaö wei ma cui, wa demi nia lä cudio wei, ö̦jö bei tä shino yai dodijidawä. Shobali wacö jamö wa mamicö demi befi ca̦i shäyäblamou dicoo ja, ö̦jö däjä wa nö shino yai bleaaö cuquei. ⁴⁶ - ⁴⁷ Abinaja ca̦i. Bei wa mamonö wa wa̦liamou dicoo ja, mamo da ucäblamolu. Wa mamo ma ucäblamolayou wei ma cui, Yai Bada tänö cama ebä ca̦i cuobä jamö wa waloo fe lä yadio wei, ö̦jö bei tä shino yai dodijidawä. Shobali wacö jamö wa mamocu demi befi ca̦i shäyäblamou dicoo ja, ö̦jö däjä wa nö shino yai bleaaö cuquei. ⁴⁸ Ö̦jamö lä täbä moshabö nia nomadaloimi. Wacö ca̦i ludaloimi. ⁴⁹ ’Nö bleaaö tänö täbä bufi nö yai shino wa̦loblou. Täbä wabamou däjä, dodijidawä täbä li cuo majöobä täbä li wabamou, sayu bänö bä nii mödadiblou majöo lä culenaja showawä. ⁵⁰ Sayu bä dodijidawä. Ö̦jö ma cui, bä oquediblou dicoo ja, bä nia mödadio lä co̦o wei etä cuami waiquiwä. Cafä wamacö lä dodijaö wei tänö, sayu bä lä culenaja wamacö nia yai cuo. Dodijidawä wama bä ca̦i cuobä, ö̦jö tä li. Wamacö bufi yanöcöwä ca̦i bluca bälöobä.

¹ Ö̦jamö lä a fa alufälönö, Judea tä ulifi jamö a waloa fa balöicunö, Jodana u mashi jamö a bucadua nomöjöbaliyoma. Ö̦jamö täbä bluca co̦camoa fa co̦liyonö, Yai Bada etä a̦ ja bä yömölaö co̦oma, showadi a lä cuaano weinaja showawä. ² Ö̦jö däjä, Jesús nija faliseo bä bada fa icuicunö, a wa̦limaje. A wa̦ bejedi nia fa wabajenö, abinaja bä cuma. —Täbä suwäbö joyao mlaobä, ¿tä a̦ läa tawä? —bä cuma. ³ Abinaja Jesús a cuma. —Moisesinö ¿wedinaja wamacö jaba taamaö bufima? —a cuma. ⁴ Judio bä bada lä cui, abinaja bä cuu nomöjöoma. —Ma. Bä suwäbö bä joyaö cadidiobeje, Moisesinö tä a̦ oniblamaö bufima. Bä fe̦yalobö bänö tä a̦ oni fa tablajenö, bä suwäbö bä nija tä a̦ oni nia jöböamaje, etä a̦ ca̦i oni shömamou co̦obä —bä cuma. ⁵ Einaja bä ma cuno wei ma cui, abinaja Jesúsnö bä nowa li tama. —Wamacö bufi jifuwä waiquiwä yalo, Moisesinö ö̦jö tä a̦ li oniblalema. ⁶ Ö̦jö ma cui, Yai Bada tänö täbä jaba lä tablaleno wei däjä, inaja cama a bufi cunomi. Abinaja a ca̦i cuu showaoma. Wa̦lo a, suwä a, cäcöbö tablalema. ⁷ Ö̦jö cudeenö, täbä doayou däjä, täbä shelelou nodiablalou showawä. Bä fö̦ö nijamö, bä nöö nijamö, bä jaba ma cublamou wei ma cui, bä suwäbö bä nia fa ajedemabojenö, bä sheleleblou majöo, ⁸ moli bä cublou majöobä. ’¿Ö̦jö tawä? Einaja a cuu showaoma —Jesúsnö bä nowa tama—. ⁹ ¿Ö̦jö tawä? Yai Bada tänö moli cäcöbö tablamaö waiquilayoma ja lä, yanowamö täbänö cäcöbö sheleleblamaö majöobeje etä cuami waiquiwä —bä nowa tama. ¹⁰ Yafi jamö bä lucäa fa co̦lunö, ö̦jö tä a̦ lä cui ja, cama ebä lä nocamabono wei bänö a wa̦limaje. ¹¹ Abinaja Jesúsnö bä nowa tama. —Ai a lä cuinö, bä suwäbö e fa joyalönö, ai a suwä däaö majöo ja, a dobloimi. A suwäbö cua ma waiquile ma cui, ai a däaö lä majöo wei tä ja, a nö waiblaö. “Iba ya däa majölei lä cufe”, cama a bufi cuu ma bäle ma cui, inaja Yai Bada a bufi cuimi. “A lä joleblalou wei a”, Yai Badanö a nofi li tabou. ¹² Inaja showawä, suwä a ma cuinö, bä fe̦yalobö e fa joyalönö, ai a wa̦lo däaö majöo ja, ö̦jö a ca̦i dobloimi mö feduwä. A fe̦yalobö cua ma waiquile ma cui, ai a däaö majöo dicoo ja, a nö waiblaö. “Iba ya däa majölei lä cufe”, cama a bufi cuu ma bäle ma cui, inja Yai Bada a bufi cuimi. Ma. “A lä joleblalou wei a”, Yai Badanö a nofi li tabou —Jesúsnö bä nowa tama. ¹³ Ijilu bä wai oshe lä cui, bä ca̦i waloomaje, Jesús imicö maquelanö Yai Bada nija bä bayelimabä. Cama ebä lä nocamabono wei bänö, ö̦jö bä ca̦i juu fa dalalöjenö bä wasömaje. ¹⁴ Ö̦jö ma cui, Jesúsnö bä wasöö fa dalalönö a wa̦ läblaliyoma. Abinaja e cuma. —Wamacö a̦ läablalou dicoo mlai. Camiyä nija ijilu wama bä yai jumabä bä li. Ijilu bä a̦ juo si ijejewä lä culenaja bä lä cui, Yai Bada tänö ö̦jö bä ca̦i cuobä bä malä cui —a cuma—. ¹⁵ Ei ya wa̦ lä cui, bejedi lä ya wa̦. Ijilu bänö Yai Bada a wa̦ juaö si ijejewä lä culajeinaja bä cuwä lä mlai, Yai Bada tänö cama ebä ca̦i cuobä jamö, ö̦jö bä nia cuomi waiquiwä —a Jesús cuma. ¹⁶ Inaja a fa cunö, ijilu bä fa däablanö, imicö fa maquedonö bä bayelimama. Bä fa bayelimanö, a aa nomöjölayoma. ¹⁷ Jesús a jaba juu bayäcädou däjä, ai a läläaö mö fa baimanö, a möfe boaleyoluma. Jesús a wa̦lii ja, abinaja e cuma. —Tä a̦ wäyäle, cafä wa yai lä dodijaö wei. ¿Wedinaja camiyä ya yai fa cuaanö, ya li ba̦limi cuobä? —a cuma. ¹⁸ Abinaja Jesúsnö a nowa tama. —¿Wedi tabä camiyä wale a̦fa dodijaö li taö? Yai Bada a lä cui, ö̦jö moli a shino dodijaö ayao. ¹⁹ Moisesi wa etä a̦ daö. Abinaja tä a̦ cuu. Yanowamö wama täbä nia shäimi. Wamacö nia joleblaloimi. Wamacö nia tomömoimi. Ai wama täbä a̦fa nia jole jole wäyäimi. Wama täbä ca̦i nia mölamaö buomi. Faafä a ma cui, naafä a ma cui, dodijidawä wama bä ca̦i fa cuonö, wama bä a̦ nia juaö. ’Einaja tä a̦ cuu —Jesúsnö a nowa tama. ²⁰ Ö̦jö däjä, abinaja Jesús nija a cuma. —Tä a̦ wäyäle. Oshe yanö ya tä a̦ lä ji̦lileno wei ya tä a̦ nofi bluca cadidibou showaa lä cule —a cuma. ²¹ Jesúsnö a nofimalanö a möö shalilioma. Abinaja a nowa tama. —Ei moli wa tä yai taö fa cunoja, wa nö dodijaö cuquebö wei. Wa täbä bluca lä tabole, blada bä ja wa täbä fa nomöjöacönö, ö̦jö lä bä blada ja, täbä nö jo̦lili lä bleaaö wei täbä da dobälalö. Inaja wa yai cuaaö ja, afä täbä nowa lä bluca wei wa täbä nia tabodayou. Ö̦jö däjä, camiyä nija a nocaa da showadaiquiyo —a nowa tama. ²² Jesús a wa̦ fa ji̦lilänö, a bufi ca̦i wajäwä co̦layoma, madofi bä bluca tabou dodijioma cudeenö. ²³ Jesúsnö täbä möö fa cuaanö, bä lä nocamabono wei bä nija abinaja a cuma. —Bä nö lä madofibö wei bä lä cui, Yai Bada tänö cama ebä ca̦i cuobä jamö ö̦jö bä nia juu si ijejeomi —a cuma. ²⁴ Cama ebä lä nocamabono wei bä lä cui, Jesús a wa̦ ja, bä bufi shädayaimou dodijioma. Ö̦jö ma cui, abinaja Jesúsnö bä nowa taö co̦oma. —Ijilu bä. Yai Bada tänö cama ebä ca̦i cuobä jamö, täbä juu si ijejewämi. ²⁵ ¿Ö̦jö tawä? —a cuma—. Mösöcö aca jamö cameyo bä lucäö si ijejewä malä mlai. Bä nö lucäbimi waiquiwä. ¿Ö̦jö tawä? Mösöcö aca jamö cameyo bä lucäimi ma waiquii, bä nö lä madofibö wei bä lä cui, Yai Bada tänö cama ebä ca̦i cuobä jamö, ö̦jö bei bä lucäimi yaiquei —a cuma. ²⁶ Ö̦jö däjä, bä bufi yai shädayaimou dodijioma. Abinaja ebä cudaliyoma. —Ja̦o. Yai Bada nijamö ö̦jö bä nö cuobimi waiquiwä ja, ¿wedi bei bä shino yai jucäamou dao, ö̦jö lä? —ebä cudaliyoma. ²⁷ Jesúsnö bä möö fa cuaanö, abinaja bä nowa tama. —Ma. Yanowamö cama täbä jucäamou buobä, tä cuami waiquiwä. Ö̦jö ma cui, Yai Bada tänö täbä jucäaö dao. Yai Bada tänö jödödöwä tä tamabä, ö̦jö a —a cuma. ²⁸ Abinaja Pedro a cudaliyoma. —Ö̦jö ma cui, camiyä yamacö lä cuinö, yama täbä bluca lä tabono wei yama täbä fa daacönö, cafä nija yamacö nocaa lä cule —a cuma. ²⁹ - ³⁰ Abinaja Jesúsnö bä nowa tama. —Cafä wamacö nija ei ya wa̦ lä cui, bejedi lä ya wa̦. Camiyä nija wamacö bufi mö blucao yalo, iba dodijidawä wama tä a̦ bufibou waiquia cudeenö afä wama täbä daaö ja, wamacö nö bleaaö mlaicätä. Wamacö yafibö ma daamamou wei ma cui, wamacö mashi ma damoquei wei ma cui, faafä, naafä, wama bä bluca ma daquei wei ma cui, ijilufä wama bä ma daaö wei ma cui, wamacö ulifibö ma daamamole ma cui, ö̦jö lä täbä showawä ja, wamacö nia dobämamou mö yabao co̦o. Iba wamacö yalo, yanowamö bänö wamacö nö nia ma bleaamaö wejei ma cui, Yai Bada tänö wamacö nia dobäö. Yafi bä ma cui ja, wamacö mashi ma cui ja, naafä bä ma cui ja, ijilufä bä ma cui ja, ulifi a ma cui ja, ö̦jö lä täbä bluca ja, Yai Bada tänö eja wamacö dobäa fa balölalönö, obi wamacö nia ca̦i ba̦limiblamaö. ³¹ ’Ö̦jö ma cui, “Camiyä balöwä”, täbä nofi lä tamamou wei bä bluca mö feduwä lä cui, ö̦jö lä bä nia nojablou. Inaja showawä, äyämö bä nojablou si lä ijejei bä lä cui, ö̦jö lä bä nia shino balöblou nomöjöodayou —bä nowa tama. ³² Jelusale jamö Jesúsnö bä ca̦i juolanö a balöoma. Jelusaleteli bä lä bälöle jamö tä wa̦lidiwä waiquiwä cudeenö, cama ebä bufi shädayaimou ca̦i jufälöma. Ai bä lä nocaono wei bä ma cui, bä ca̦i quilii dodijioma. Ö̦jö däjä, cama 12 ebä ca̦i fa bayäcäblaludunö, cama a nia lä taamamono wei tä ja, bä yömölalema. ³³ Abinaja bä nowa tama. —Bei. Jelusale jamö bämacö juu lä cuimadi. Ya lä yanowamöblaleyoluno wei ya lä cui, bada täbä nija wale nia jöböaöje. Nofi bäyäalewä blowäjäwä bä ma cui nija, Moisesi tä a̦ ja täbä lä damaö wejei bä ma cui nija, ö̦jö bä nija ya fa jöbömoicunö, wale shämabeje wale nia jömaöje. Ö̦jö däjä, judio bä lä mlai bä nija wale noshi nia ö̦jödabou majöoje. ³⁴ Wale nö nia waiblaöje. Wale ca̦i nia cläshaöje. Wale si ca̦i yafelia fa balölalöjenö, wale nia shäö cadidioje. Ö̦jö ma cui, bolacabö tä mö didi fa cublalunö, ya demi nia jocädou co̦o —a cuma. ³⁵ Ö̦jö däjä, Jesús nija Sebedeo bä ijilubö ecöbö ajedequema, Santiago, Juan sho cäcöbö lä cui. Abinaja a nowa taböma. —Tä a̦ wäyäle. Yafäcö nia lä nacou wei tä ja, yafälecö a̦ da julä, ¿ö̦jö tawä? —a nowa taböma. ³⁶ Abinaja Jesús e cuma. —¿Wedinaja bäfäcö li taamabä, bei wafäcö nia li nacou? —e cuma. ³⁷ Ö̦jö däjä, abinaja cäcöbö cuu nomöjöoma. —Afä wa bä ca̦i bälöa dodijiqueyoluu ja, yafälecö bada lomabou ajedeobä yafäcö a̦. ¿Ö̦jö tawä? Jayu wa boco mashi jamö ai a, acasi wa boco mashi jamö ai a, yafälecö döcämabou mö feduduobä —cäcöbö cuma. ³⁸ Ö̦jö ma cui, abinaja Jesúsnö cäcöbö nowa tama. —Wafä tä lä nacaö wei wafä tä daimi dicowä. Wale nö nia lä bleaamaö wejei däjä, ¿wafäcö nö bleaaö mö feduobä wafäcö daanö? Camiyä wale nia lä taamaö wejeinaja, ¿inaja showawä cafä wafäcö ca̦i tablamou mö feduobä wafäcö? —cäcöbö nowa tama. ³⁹ —Awei, inaja lä yafäcö ca̦i tablamamobä yafäcö waiquiwä —cäcöbö cuma. Ö̦jö däjä, abinaja Jesúsnö cäcöbö nowa tama. —Bejedi lä wafäcö a̦. Wafäcö nö nia bleaaö mö feduo. Wafäcö nia taamaö mö feduoje. ⁴⁰ Ö̦jö ma cui, jayu ya boco mashi jamö a nia lä döcäo wei a lä cui, camiyänö ya tä daimi. Acasi ya boco mashi jamö ma cui, inaja showawä. Cäcöbö nia lä döcämabou wei, Fayänö ö̦jö tä shino daö waiquia —cäcöbö nowa tama. ⁴¹ Jesús a wa̦ lä juaö wejei ai bä 10 lä cuinö cäcöbö wa̦no fa ji̦liläjenö, Santiago, Juan sho cäcöbö noshi wa̦lidalemaje. ⁴² Ö̦jö cudeenö, Jesúsnö bä bluca fa nacalänö, abinaja bä nowa tama. —Shomi bä lä bälöblai bä nijamö bä bada läobä bä lä cui, cama bä a̦ shino ji̦liamou bufi doblao bädao. Cama bä bada lä cuinö bä shino shömaö fe blacäjou talajei. ⁴³ Ö̦jö ma cui, inaja cafä wamacö nofi tamamobä wamacömi. Ma, cafä wamacö nija a nosiemou bufi lä doblao wei a lä cuinö, bä nosiemaö fe balojoo mlai, bä shino yai bayeliblabä. ¿Ö̦jö tawä? ⁴⁴ “Camiyä ya shino yai bada cuobä”, wa nofi lä tamamou wei wa lä cui, aifä showadi wa bä bluca bayelibladibä wa e nia shino yai cuo. ⁴⁵ Camiyä ya lä yanowamöblaleyoluno wei ya ma cui, ya nosiemobä ya juno malä mlai. Ya bä yai bayeliblabä ya li waloqueyoluma. Yanowamö täbä bluca mö feduwä lä cui ya bä nowa ca̦i co̦amabä, ya jöböamou mö juma —bä nowa tama. ⁴⁶ Jelico jamö Jesúsnö cama ebä lä nocamabono wei bä ca̦i jayuablalou cuaafälöbä jamö, ai täbä ca̦i bluca fa nocaicunö, bei yo casö jamö a jubäbö loo mö baoma. Dimeo bä ijilubö e cuoma, Badimeo a wa̦fa lä cule. Täbä lä jayuaö wei täbä nija a nofi nia ojode fa tablamonö, a showadi nacou läadima. ⁴⁷ Nasaleteli Jesús a wa̦fa jayuaö fa ji̦lilänö, i̦cali a comöö läoma. —¡Jesús! ¡David nodiwä wa e lä cui! ¡Wale nofi da ojodadaliyo! ⁴⁸ Mamicai a nia fa lomabojenö, bluca bänö a wa̦ ma wasöno wejei ma cui, a wa̦ yai nacläa majöa dicolayoma. —¡David nodiwä wa lä cui! ¡Wale nofi da ojodadaliyo! ⁴⁹ Jesús a ublaa fa yanöcödalunö, a lä jubäböono wei a ajedeblamaö bufima. Ö̦jö cudeenö a nacaa fa showadalöjenö, abinaja a nowa tamaje. —¡Wa fa jocädalunö, a da ubladalu! Wa nacaö a lä cubiyei, ¡a bufi shi da jalijidalu! —a nowa tamaje. ⁵⁰ Cäcö lä lucäbono wei cäcö fa jayudalönö, lobe a fa jocädalunö, Jesús nija a icua showadaquema. ⁵¹ Abinaja Jesús e cuma. —¿Wedinaja bäfä li taamabä, bei wale li nacaa lälei? —e cuma. A lä jubäböono wei abinaja a cuma. —Bada tä. Ya täbä möbä, wale mamocu da dodijidablaliyo —a cuma. ⁵² Abinaja Jesús e cuma. —Dodijidawä a da co̦jamö. Wale nofi mölaboma yalo, wa jaloa waiquilayou lä cufe —e cuma. Ö̦jö däjä, a mamocu dodijidablou fa showadalonö, Jesús nijamö a yaua showaquema.

¹ Jelusale jamö Jesúsnö cama ebä ca̦i ajedeblaleyoluma. Oliba tä balöcö jamö bä waloquema, Befajeiteli bä lä bälöle jamö. Bedaniateli bä ca̦i bälöa mö lä fedule jamö. Ö̦jö däjä, ö̦jamö culanö bä lä nocamabono wei ai cäcöbö shömöa balölema. ² Abinaja cäcöbö nowa tama. —Wafäcö juu fa shaliloimadunö, quiji a shabono jamö cäcöbö da yafilujulu. Wafäcö lä co̦blole jamö, yalo bulo a nata lä cule wafä a nia ijilubö dablajalayou, täbä döcämabou showaono lä mlai. Ö̦jö wafä a nata fa cushälänö, äyämö a ca̦i juböö da co̦ima. ³ Ai anö wafäcö wa̦lii bädao ja, “¿Wedi tä tabä, inaja wafäcö li cuaaö cufe?”, a cuu bädao ja, abinaja wafäcö cuu. “Bada anö a majöamaö bufii cublei. Lobe a nia co̦amaö co̦o cublei”, wafäcö cubä —Jesúsnö cäcöbö nowa tama. ⁴ Cäcöbö lä shömöleno wei cäcöbö aa fa showalöfälönö, Jesús a lä cuno weinaja, inaja showawä tä dabölalema. Cäcöbö fa co̦blalunö, täbä showadi lä jayublaaö wei jamö bulo ijilubö a nata ya̦a dabölalema, bei yoca lä jolele jamö. A nata cushäa showadabölema. ⁵ Ö̦jamö lä bä lä ublaono wei bä lä cui, abinaja ebä cuma. —¿Wedi wafä tä tabä, bulo bei wafä a nata li ijilubö cushäaö cule? —ebä cuma. ⁶ Ö̦jö ma cui, Jesús a wa̦no wäyäböö ja, ebä a̦ faö co̦daanomi. ⁷ Jesús nija bulo a ijilubö ca̦i waloböa co̦queyoluma. A ca̦i waloböa fa co̦iquiyonö, yalo bei mabucabö ja, cama cäcöbö camishibö maquea fa balöaböcönö, ö̦jamö lä Jesús a döcäquema. ⁸ Jesús a befi ca̦i jubä jamö, bufi doblalolanö a befi ca̦i jayuamamaje. A befi ca̦i nia lä jayuono wei yo jamö, bluca bä camishibö jilablaamou läafälöma. Ai bä mö feduwä lä cuinö, ulifi jamö dejenabä shi̦co befi ca̦i fa bafedialalöjenö, dejenabä jilamaö cuaaö balöablalou mö feduofälömaje. ⁹ Bä lä balöfälöno wei bä ma cui, bä lä nojaono wei bä ma cui, ö̦jö bä a̦ noshi fa jalilaimadunö, abinaja bä cufälöma. —¡Yai Bada a nofi shino yai da doablaje! Bada a wa̦nö a lä juimi, ¡ö̦jö a shino yai bayeliblamobä a! ¹⁰ Bämalecö ca̦i nia lä cuo wei, fei däjä tä cublou ajede waiquiwä, bada tä David a lä cuinö bä ca̦i jaba bälöo lä cuono weinaja showawä. ¡Doblao bämalecö ca̦i nia cudio! ¡Bada tä lä culadi, a nofi shino yai doablamobä! —bä cufälöma. ¹¹ Jelusale jamö Jesús a fa yafilönö, Yai Bada etä yafi jamö a lucäa showalayoma. Ö̦jamö lä täbä bluca möa fa balöabafälönö, tä weyaaö waiquia ja a faa co̦layofälöma. Ö̦jö däjä, Bedania jamö cama 12 ebä ca̦i aa mö yabaa co̦layofälöma. ¹² Bedania jamö Jesúsnö cama ebä ca̦i cua fe fa jalualunö, ö̦jö tä fena ja, Jelusale jamö bä ca̦i aa mö yabaa co̦layofälöma. Bä lä juimi däjä, Jesús a ofälayoma. ¹³ Ö̦jö däjä, tä möö balömou fa cuaanö, ico fi jenabä shi̦co ca̦i blajawä fa dalalönö, a ajedeblaleyoluma, ico bä nia cua fa mönö. A fa icuicunö, fi bloque dalalema. Fi jenabä shino shi̦co buoma. Ico bä showadi lä lalou wei tä cuonomi showawä yalo, fi blocooma. ¹⁴ Ö̦jö däjä, cama ebä lä nocamabono wei bä yömöca dao mötalöo däjä, fi wafäblaö ja, abinaja a cudaliyoma. —Cafä ico wa fi lä cui ja täbä iyabä, ¡wa fi nia bufiblamamou co̦daaimi! —a cudaliyoma. ¹⁵ Jelusale jamö Jesúsnö cama ebä ca̦i fa yafilönö, Yai Bada etä yafi sibo lä ji̦coloi jamö a lucälayoma. Ö̦jamö lä, blada bä ja täbä madofi lä jöbäö wejei bä lä cui, bä yashublalema, täbä madofi lä lulaö wejei bä ca̦i. Bä blada lä nomöjano wejei bä ma cui, bä bladabö lä maquecono wei täbä ca̦i jocäabodayoma. Joledo bä lä nomöjöano wejei bä ma cui, bä lä döcäcäono wei täbä ca̦i ja̦iyabodayoma. ¹⁶ Yai Bada etä yafi lä cule jamö täbä madofi ca̦i juu lä buono wejei bä ma cui, täbä ca̦i madofi yafimanomi. ¹⁷ Ö̦jö däjä, Yai Bada tä a̦ wäyäö ja, abinaja bä nowa tama. —Abinaja Yai Bada etä a̦ oni cuu. Iba yafi a lä cui, jödödöwä bä bälöblawä lä yaiblai bä nö bayeli nacaobä, a wa̦fa yafi nia shino yai jilamou. ’¿Ö̦jö tawä? Einaja tä a̦ cuu ma cui, täbä lä tomömou wei bei wama a yafi li tablaö bashiblalayoma —bä nowa tama. ¹⁸ Nofi bäyäalewä blowäjäwä bä ma cuinö, Moisesi tä a̦ ja täbä lä damaö wejei bä ma cuinö, Jesús a wa̦no ji̦lilemaje. A wa̦no fa ji̦liläjenö, a shäbeje a nofi washuamaje. Jödödöwä täbä lä cui, Jesús a wa̦ ja bä bufi bluca möaama yalo, bada bänö a nö quili malä tano wejei. ¹⁹ ¿Ö̦jö täwä? Tä mö weyaaö däjä, Jelusaleteli bä shabonobö jamö cama ebä ca̦i faa co̦layofälöma. ²⁰ Ö̦jö tä fena ja, ö̦jamö lä bä jayuaö co̦ofälöö ja, ico fi fäwä dalalemaje. Bei fi nasöcö ma cui, fi nasöcö bluca fäa waiquilayoma. ²¹ Pedronö ö̦jö tä nofi jaducubou fa showadaonö, abinaja Jesús nija a cuma. —¡Bada tä! ¡Tä da möbla! Ico wa fi da wafäblablei, ¡fi fäa waiquilayoma tai! —a Pedro cuma. ²² Cama ebä bluca nija abinaja Jesús a cuma. —Yai Bada a nofi yai shino da mölaboje, ö̦jö lä. ²³ Cafä wamacö nija ei ya wa̦ lä cui, bejedi lä ya wa̦. Wamacö bufi ujudublou mlai ja wamacö a̦ faö däjä, cafä wamacö ma cui nija tä nia cublou. Quiji a jefu ma cui, Yai Bada wama a nofi yai mölabolanö wama a nowa taö ja, a nia majöblou. “¡Jefu a da ucäblalufälö! ¡Modu u jamö, a da shäyablamobalu!”, wama a nowa taö däjä, a nia jefu queamamou. ²⁴ Ö̦jö cudeenö, bämacö nowa taö lä cule. Yai Bada nija wamacö nacou däjä, wama tä nacaö lä bädale tä ma cui, jai wa däa waiquilema wama a nofi tabou ja, wama a nia däaö. ²⁵ ’Abinaja ca̦i. Yai Bada nija wamacö nö bayeli nacao däjä, ai a nija wamacö nowa cua bädaa ja, ö̦jö tä mladamaö da balöloje, Faafä a lä culadinö, inaja showawä afä tä ca̦i nowa mladamaö cuo mö feduobä. ²⁶ Ö̦jö ma cui, ai täbä nija wamacö nowa lä cuo wei wama tä nowa mladamaimi dicowä ja, cafä wamacö ma cui nija, Faafä a lä culadinö tä nowa lä taboladi tä nia ca̦i mladamaö ayaomi —bä nowa tama. ²⁷ Jelusale jamö bä waloa co̦quema. Yai Bada etä yafi jamö Jesús a juablalou cuaaö däjä, bada bänö a nabä icuquemaje. Nofi bäyäalewä blowäjäwä bä ma cuinö, Moisesi etä a̦ ja täbä lä damaö wejei bä ma cuinö, judio ai bä ca̦i bada ma cuinö, Jesús a nabä fa icuicujenö ²⁸ abinaja a nowa tayolumaje. —Bei. Einaja wa cuaabä, ¿cafä bada bei wa tawä? ¿Wedinö bada bei wa tablamalema, ö̦jö lä?—a nowa tamaje. ²⁹ Jesús abinaja a cuu mö feduoma. —Cafä wamacö ma cui, bämacö ca̦i nia wa̦lii nomöjöo mö feduo. Wamale a̦ jua da balölöje. Ö̦jö däjä, wale Bada lä tablamaleno wei ya wa̦fa nia wawämaö nomöjöo. ³⁰ Ja̦o. ¿Wedinö Juan a shömölema, täbä fe ojomabä? ¿Yai Bada tänö a shömölema tawä? Ma, ¿yanowamö täbänö a shömölema sijewä? Wamale yömölaa da balölö —Jesús a cuma. ³¹ Bä nowa nia lä juo wei tä a̦fa wayoaö balöoje ja, cama bä a̦ shino läablalodii buoma. Abinaja bä nowa tayodii bädaoma. —“Juan a lä cui, Yai Bada tänö a shömölema”, bämacö cuu dicoquei ja, “Inaja lä wama a nofi ma tabole ma cui, ¿wedi tä tabä wama a wa̦ bejedi li bufinomi, ö̦jö lä?”, a nia cuu majöblao dicoo. ³² Ö̦jö ma cui, “Yanowamö täbä nija a shömamoma”, bämacö cuu dao malä mlai—bä nowa tayoma. Täbä bluca lä ublale täbä nija bä quilima yalo, bä a̦ li cuoma. “Yai Bada a wa̦no wäyälewä Juan a yai cuo dodijioma”, a nofi malä tabono wejei. ³³ Ö̦jö cudeenö, abinaja bä shino cuma, Jesús nija. —Cuwi. “Ö̦jönö Juan a shömölema a”, yama a nofi ca̦i taboimi —bä cuma. —Ja̦o —Jesús e cuma—. Camiyä ya ma cui, cafä wamacö nija, “Ö̦jönö wale shömölema ya”, ya ca̦i nia cuu ayaomi —a cuma.

¹ Bluca täbä nija, shominaja Jesúsnö tä a̦ wäyäö yaclämou ja, abinaja a cudaliyoma. —Ai anö uba totobä bluca fa döalalönö, etäca ji̦coloblalema. Ö̦jö däjä, uba bä nia wacä lä cadicaö wejei täca tablaö nomöjölayoma. Tä möö cuaabeje yafi ösöwä a ca̦i tablaö fa nomöjölonö, cama ficali etäca jamö shomi täbä bälömaquefälöma, etäca nowamaö juobeje. Ö̦jö däjä shomi tä ulifi jamö a aa nomöjölayofälöma. ² ’Uba a fabä tä cublou däjä, ficali ca ja bä lä bälöblamabole bä nija, a nosie lä juaö wei ai e fa shömölönö, uba bä yefiamaö co̦o bufima. ³ Ö̦jö ma cui, täca nowamaö lä juono wejei bä lä cuinö a nabä quea mö fa baicujenö, a si yafelilalemaje. A shinoco ca̦i shömöa mö yabaa co̦lemaje. ⁴ Cama ai e shömöa ma co̦leno wei ma cui, bä doblou co̦o fa mlacunö a fe shäbemaje. ⁵ Ö̦jö däjä, ai e shömöa ma co̦leno wei ma cui, a shälemaje. Inaja showawä, ai ebä shömaö ma co̦ono wei ma cui, ai bä si yafelilalemaje, ai bä shäalalemaje. ⁶ ’Ö̦jö ma cui, bada a lä cui, ai moli e feioma —Jesús a cuma—, bä ijilubö e yai lä cuono wei. Ö̦jö a yai nofimaö dodijioma. Ya̦cumö, ö̦jö a shömöa nomöjölema. “Ijiluyä ei a yai lä cui, a nofi yai tabobeje”, a bufi cuma yalo, a shömöa nomöjölema. ⁷ Ö̦jö ma cui, bä lä bälöblamabole bä lä cuinö, bada tä ijilubö e cadidiwä fa dalalöjenö, abinaja bä nowa tayolayoma. “Ei bada tä ijilubö cadidiwä, ficali ca nia obi tabou lä juo wei. Fei däjä bäma a shäa fa showadalönö, camiyä bämacönö bäma täca yai ficali tabou juo nomöjöobä”, bä nowa tayolayoma. ⁸ Ö̦jö däjä, a juwäa mö fa balöjenö, a shälemaje. A fa shälöjenö, ficali ca sibo jamö a nomawä shäyäblaquemaje. ⁹ ’¿Ö̦jö tawä? —Jesús a cuma—. ¿Wedinaja wamacö bufi cuu cule? Cama a ficalibö ca lä cui, ¿wedinaja a yai nia cuaaö? Wedinaja mlai. Bä nia waicaö mö juimaö. Shomi täbä nija täca nia jöböamou majöo. ¹⁰ Yai Bada etä a̦ oni jamö, ¿ei bei wama tä a̦ oni daö mlaa cule? Abinaja tä a̦ cuu. Maa mabä ja a yafi nia lä i̦tamaö wejei bä lä cuinö, ma wailemaje. Ö̦jö ma cui, ma lä waileno wejei ma lä cui, a yafi colo lojodoobä ma yai li cublaliyoma. ¹¹ Bada tänö inaja tä taamama. Ö̦jö yama tä dablaö ja, ¡yamacö bufi yai shädayaimou! ’Einaja tä a̦ cuu —Jesús a cuma. ¹² Shominaja tä a̦ wäyäö lä ja̦lomono wei tä a̦ ja, cama bada bä a̦fa yai lä wayoano wei tä damaje yalo, a mini juwäamaö showadaoma. Ö̦jö ma cui, yanowamö täbä nö quili tamaje. Ö̦jö cudeenö, a fa dacöfälöjenö, shomi jamö bä alayoma. ¹³ Bada bänö Jesús a wa̦fa jolemou nia fa jömajenö, faliseo bä shömöquemaje, bada tä Elode ai ebä ca̦i mö feduwä. A jole jole nofimalajenö a wa̦ nia ji̦limaje, a wa̦no wäyäö co̦ojolobeje. ¹⁴ Jesús a wa̦liyoluuje ja, abinaja bä cuma. —Tä a̦ wäyäle. Wa lä bejedimou wei bäfä dablaö. Yanowamö wa bä nö quili taimi. Bada bä ma cui, bada bä lä mlai bä ma cui, wa bä nofi tabou fe usucuo fa showadaonö, Yai Bada tänö bämalecö taamaö lä bufii wei, quilii mlai ja wa tä a̦ shino yai wäyäö shalilou. ¿Ö̦jö tawä? Ö̦jö cudeenö, bäfä wa̦lii lä cule. Lomateli bada Sesa a lä cui, ö̦jö befi bä blada lä nacaö wejei, camiyä bämacö ma cuinö, ¿bäma bä blada jöböabä tawä? ¿Tä a̦ läami daanö? Ma, ¿tä a̦ läa tawä? ¹⁵ Judio bämacö lä cuinö, ¿blada bä ja bäma bä dobäbä, bämacö daanö? Ma, camiyä bämacönö, blada bäma bä jöböaö mlaobä, ¿ö̦jö bei bämacö?—ebä cuma. Ö̦jö ma cui, bä jole jole dodijaö lä buono wei bä daö waiquilanö, abinaja Jesús e cuma. —¿Wedi tabä wamale a̦ bejedi wabaö? Ja̦o. Blada a da jöböbaje, ya möblaabä —e cuma. ¹⁶ Blada a fa jöböquiojenö, bä wa̦lima. —Ei ¿wedi bei fe nö e̦le? ¿Wedi bei a wa̦fa oni cua cule? —a cuma. —Lomateli bada tä Sesa —bä cuu mö feduoma. ¹⁷ —Ja̦o —Jesús a cuma—. Sesa cama etäbä ja, wama a li dobäbä. Yai Bada cama etäbä mö feduwä lä cui täbä ja, cama wama a li dobäö mö feduobä —a Jesús cuma. A wa̦ shaliliablalou dodijioma cudeenö, bä bufi yai shädayaimolayoma. ¹⁸ Jesús a wa̦libeje, saduseo bä bada lä cuinö, Jesús a nabä icua nomöjöquemaje. Ö̦jö bä saduseo lä cui, abinaja bä bufi shino cuu. “Täbä lä nomaö wei bä demi jocädou co̦o mlaicätä”, bä bufi shino cuu. Inaja bä bufi cuu waiquiwä cudeenö, a wa̦ nia fa yaclämajenö, a wa̦limaje. Jesús nija abinaja ebä cuma. ¹⁹ —Tä a̦ wäyäle. Moisesi tä a̦ oni jamö, abinaja judio bämalecö nowa tama. A ijilubö cuo showao mlao däjä, ai e mashi nomaö dicoo ja, bä suwäbö e lä feiblou wei a nia däaö nomöjöo. Ö̦jö a suwä nija bä ijilubö ebä fa tacönö, a lä nomalayono wei a lä cui, ö̦jö bä ijilubö ebä a̦fa nia jilabou nodio juoje. ¿Ö̦jö tawä? ²⁰ ’Bei —bada bä cuma, Jesús nija—. Cama cäbä mashi 7 cuoma. Jaba a lä cui, a suwä lä däleno wei a ijilubö cua showaa mlai ja, a mladaliyoma. ²¹ Ö̦jö a mashinö e däa nomöjölema. Ö̦jö ma cui, bei ijilubö e cuo showao mlao däjä, cama ma cui, a ca̦i nomaa majölayoma. Cama a mashinö e däa ma nomöjöleno wei ma cui, inaja showawä. ²² ¿Ö̦jö tawä? Jödödöwä bä 7 lä cuinö a suwä däa ma nodiadalano wejei ma cui, bä ijilubö cublou showao mlao däjä, bä bluca nomalaliyoma. Ya̦cumö, suwä a ma cui, a ca̦i mladaliyoma. ²³ ’¿Ö̦jö tawä? —ebä cuma—. Inaja tä cuoma cudeenö, bäfä wa̦lii lä cule. Yai Bada tänö täbä demi nia jo̦wa jocädamaö lä co̦o wei däjä, ¿wedi jamö a lä cui, bei a suwäbö yai nia cuodayou, ö̦jö lä? Bluca bä 7 wa̦lo lä cuinö a däadalaö malä cuaano wejei —ebä cuma. ²⁴ Abinaja Jesúsnö bä nowa taö nomöjöoma. —Yai Bada wama etä a̦ daimi yalo, wama etä lojode ca̦i daimi cudeenö, wamacö a̦ yacäblalodii lä cule. ¿Ö̦jö tawä? ²⁵ Yai Bada tänö täbä demi jocädamaö co̦o däjä, täbä nia doayou malä mlai. Täbä nia ca̦i suwäbö jöböamou co̦daaimi. A̦jele täbä doayou lä mlainaja täbä li cublou showadalayou. ²⁶ ’¿Ö̦jö tawä? —Jesús a cuma—. Täbä demi nia jocädou lä co̦o wei, Moisesi a ma cuinö tä a̦ jaba wawämaö balöoma. ¿Ö̦jö bei wama tä a̦ oni daö mlaa cule? Fii defi wacö lä waono wei defi jamö, Yai Bada a wa̦fa wäamou däjä, abinaja a malä cuno wei. Ablaamö a ma cui nija, Isaacö a ma cui nija, Jacobo a ma cui nija, ö̦jö bä nija ya lä bufiblamou wei ya. ’Einaja Yai Bada a cuma. ²⁷ ¿Ö̦jö tawä? —bä nowa tama—. Bä demi cua showaa yalo, ö̦jö bä nija a jo̦wa bufiblamou showawä malä cui. Nomawä täbä nija a bufiblamou dao malä mlai. Wamacö a̦ yacläö dodijiwä. ²⁸ Jesús nija täbä a̦ bluca lämou waiquio däjä, Moisesi tä a̦ ja täbä lä damaö wei ai a lä cui, a icuquema. Jesús a wa̦ dodijaö fa ji̦lilänö, a wa̦lii bufi doblaoma. —Moisesinö tä tamaö lä bufino wei tä a̦ bluca ja, ¿wedi jamö tä a̦ lä cui, tä a̦ shino yai lojode dodijiwä? —e cuma. ²⁹ Abinaja Jesús e cuu nomöjöoma. —Yai Bada tä a̦ shino yai lä lojode wei, ei lä tä a̦. Bei. Bä yömöca da daicu, Isaeli wama ecö lä cui. Bada tä lä cui, camiyä bämacö nija a bufiblamobä a lä cui, ö̦jö yami tä Yai Bada cua ayaa. ³⁰ Bada wama tä yai nia nofimaö, cafä wamacö nija a bufiblamobä a lä cui. Bufi jaduculanö wama a nia nofimaö, bei wamacö bufi yainö. Wamacö bufi lä cuaablalou wei tä ma cuinö, wamacö nö lä wa̦lojoablalou wei tä ma cuinö, wama a nia ca̦i nofimaö fe balojoo. ’¿Ö̦jö tawä? —Jesús a cuma—. ³¹ Ei tä a̦ ca̦i lojode cua mö fedua. Cafä wa nofi jo̦lio lä culenaja, inaja showawä, aifä wa bä nofi tabolanö wa bä nia nofimaö. ’¿Ö̦jö tawä? —Jesús e cuma—. Moisesi nija Yai Bada tänö bluca tä nabä ma shömöqueno wei ma cui, ö̦jö lä ya täcö a̦ lä wäyäfe, täcö a̦ shino yai lojode dodijiwä —a cuma. ³² Moisesi tä a̦ ja täbä lä damaö wei a lä cui, abinaja Jesús nija e cuu nomöjöoma. —Tä a̦ wäyäle. Bejedi lä wa wa̦. Yami tä Yai Bada cua ayaa, wa lä cufenaja showawä. Tä bufiblamobä, ö̦jö lä a waiquiwä, ai tä cuami. ³³ Yai Bada nija yalo comi bä bluca ö̦shö dodobou ma cujei, bä yalo bluca shämou ma läo wei ma cui, ö̦jö tä nowa ca̦i cua ma bäle ma cui, wa tä a̦ lä wäyäfe, tä a̦ nowa shino yai bluca. Bufi jaduculanö Yai Bada a nofimaöje ja, ö̦jö tä nowa shino yai cua, bei bufi yainö a nofimaöje ja. Bä nö lä wa̦lojoablalou wei tä ca̦inö. Cama bä nofi jo̦lio lä culenaja, inaja showawä, cama ai ebä nofi tabolajenö bä nofimaö cuo mö feduoje ja, ö̦jö tä nowa shino yai cua —a cuma. ³⁴ Jesúsnö a wa̦ faö moyawäablalou fa ji̦lilänö, abinaja e cuma. —Yai Bada tänö cama ebä ca̦i lä cuo wei jamö, bei wa ajedou lä cuimadi —e cuma. Ö̦jö däjä, bä fa quililalunö, a wa̦lii co̦daanomije. Moli ma cui, a wa̦ fanomi. ³⁵ Yai Bada etä yafi jamö Jesúsnö täbä damalanö, abinaja a cuma. —A shömabä Yai Bada tänö a lä yaileno wei a lä cui, Bada tä David nodiwä e jo̦wa. Moisesi etä a̦ ja täbä lä damaö wejei bä lä cui, inaja bä shino cuu talei. ¿Ö̦jö tawä? ¿Wedinaja bä bufi li fa cunö, David nodiwä bei a wa̦fa li jilabouje? ³⁶ Yai Bada bei tä Bufinö a wa̦ famaö cadidou ja, David cama a showawä ma cui, a wa̦ nö malä wäono wei. Abinaja a cuma. Iba Badayä a nija, abinaja Bada tä yai lä cui a cuma. “Äyämö, camiyä jayu ya boco mashi jamö, a döcäa da balöiquiyo. Bä nö lä nabämou wei bä lä cui, cafä nija ya bä möfe nia quilili bomabou.” ’Einaja David a cuma. ³⁷ ¿Ö̦jö tawä? —Jesús a cuma—. Bada tä David a lä cuinö a nofi ma badabole ma cui, ¿bei e jo̦wa nia li nodiblou majöo tawä? Bä bufi da dayäo, ö̦jö lä —a cuma. Täbä bluca lä co̦camono wei bä lä cuinö, bufi doblalolanö a wa̦ ji̦liamaje. Bada bä a̦ ma fano wei ma cui, Jesús a wa̦ shino yai lojodoaö ayaoma yalo, a wa̦ ji̦liaö bufi doblaomaje. ³⁸ Täbä damalanö, abinaja Jesús a ca̦i cuma. —Moisesi tä a̦ ja täbä lä damaö wejei bä nija bä da moyaweicu. Camishi labe bä ja bä shino didio bufi doblao talei, bä nowa lä bluca wei bä ja. Nii bä lä lulaö wejei jamö, bä nö bada ca̦i ö̦jöböamou bufi doblao. ³⁹ Judio bämacö yododabä jamö, bada bä lä döcäo wei jamö ö̦jamö bä döcäo bufi ca̦i doblao mö feduo. Täbä iyaö ca̦i co̦camobä jamö ma cui, bada bä nijamö bä loo coyocaö bufi ca̦i doblao. ⁴⁰ Ö̦jö bä lä cuinö, suwä bä lä feiblou wei bä fa mölamajenö, bä madofibö bluca däablaö läoje. Ö̦jö däjä, bä mömou nia liyäjäo fe fa yadionö, Yai Bada nija bä nö bayeli nacao ja, bä a̦ jole jole labaaö bädao. Yai Bada tänö ö̦jö bä nö nia shino yai bleaamaö fe balojoo. ⁴¹ Yai Bada nija bä blada jöbööje ja, bä blada lä didiblaaö wejei tä mashi jamö Jesús a döcöaliyoma. Ö̦jamö lä bluca täbä lä co̦camou wei täbänö bä blada didiabeje jamö, bä nö daama. Bä nö lä madofibö wei ai bä bluca lä cuinö, blada bluca bä didiblamaje. ⁴² Ö̦jö däjä, suwä a yami nö jo̦lili lä bleaano wei a fa waloicunö, blada cäcöbö wai nowa lä bolacami wei cäcöbö wai didia mö feduquema. ⁴³ Ö̦jö däjä, cama ebä lä nocamabono wei bä nacaa fa ajedelönö, abinaja Jesús e cuma. —Cafä wamacö nija ei ya wa̦ lä cui, bejedi lä ya wa̦. Ai bä bluca lä cuinö, blada bä bluca ma didiaö wejei ma cui, fei suwä a yami nö jo̦lili lä bleaale a lä cui, ö̦jö lä a shi shino yai ö̦jöde fe balojowä. ⁴⁴ Ai bä lä cuinö, bluca bä li blada tabouje yalo, Yai Bada a malä dobälufajei. Ö̦jö ma cui, fei a suwä nö jo̦lili lä bleaale a lä cuinö, nii bä luluabä cäcöbö shino wai ma tabono wei ma cui, ö̦jö cä lä cäcöbö nö wai jöböa mlaquei lä cufe —Jesús e cuma.

¹ Yai Bada etä yafi jamö a faö co̦o däjä, cama ebä lä nocamabono wei ai a lä cui, abinaja e cuma. —Tä a̦ wäyäle. ¡Tä da mö! Yai Bada etä yafi mömou yai liyäjäwä dodijiwä. ¿Ö̦jö tawä? Maa dodijidawä mabänö, ¡bä yafi baushi liyäjäwä dodijiwä! —e cuma. ² Abinaja Jesús e cuu nomöjöoma. —Jö̦ö. Ei wa bä yafi bada dablaö, ¿ö̦jö tawä? Ö̦jö ma cui, ei wa bä yafi lä möle, wama bä nofi dobou ma bäle ma cui, bä nia obi wa̦liaöje. Ö̦jö däjä ai ma jamö, moli ma cui, ma nia maqueo feibloimi —a cuma. ³ Oliba tä balöcö jamö Jesús a dolequea fa majöbofälönö, Yai Bada etä yafi mö lä yaile jamö, a loa mö yabaa fa co̦bojolunö, cama ai ebä yami cuo däjä a wa̦limaje. Pedro, Santiago, Juan, Andrés bä lä cuinö a wa̦liije ja, abinaja bä cuma. ⁴ —Yamalecö da yömölalö. ¿Wedinaja tä nö fa cublalunö, a yafi nia yai wa̦liaöje? ¿Wedi cä däjä, ö̦jö bei tä nia yai wawäblou? Tä tamou lä bufiole däjä, ¿wedi tä dodijiwänö yamacö nia yai moyawäo? —bä cuma. ⁵ Bä nowa taö ja, abinaja Jesús a cuma. —Bä da moyaweicu, ö̦jö lä, wamacö yabäcaö fa dicoojenö, wamacö yaclämaö mlaobeje. ⁶ Obi, bluca bä nia wawäblou. Camiyä ya wa̦fa nia ma wäyämou wei ma cui, bä möla dijä. “Ö̦jö ya”, bä nia cuu. “Tä bluca waicou bufio lä cule”, bä nia ca̦i ma cuu wei ma cui, ö̦jö bä nija bä nocao dijä. ⁷ ’Ai bä lä bälöblai ba nabä nia queayou. Inaja showawä, ai bä wa̦no ca̦i nia ji̦liamou cuo mö feduo. Ö̦jö wama tä a̦ ji̦liaö däjä, bä quili dijä. Ö̦jö tämi. Ö̦jö tä nia bluca ma cublou wei ma cui, tä nia bluca waicou showadaomi. ⁸ Bä shomi lä cublai bä nabä nia queayou balöo. Bä bälöblawä lä yaiblai bä ca̦i. Bluca täbä ulifibö lä cublai jamö, mashita a ca̦i nia bada qui̦da qui̦damou nö quiliaö. Ofi tä ca̦i nia blaucublou. Ijilu bä nini jaba cuo däjä, bä nö bleaaö lä culenaja, inaja showawä bä nö nia jaba bleaaö cuo. Ö̦jö jaba cätä bädawä. ⁹ ’¿Ö̦jö tawä? Bä da moyaweicu, wamacö nowamöo fe yadiobä —bä nowa tama—. Judio bä bada lä yododoblai bä nijamö wamacö noshi nia ö̦jödabouje, wamacö nö bleaamabeje. Judio bä yododabä yafi bä jamö ma cui, wamacö si nia ca̦i yafelimaöje. Iba wamacö yalo, bada bä bälöo lä dodijio wei bä nijamö wamacö nia icuamaöje, wamacö dobloimi jömabeje. Cama ebä lämabou mö lä feduo wejei bä ma cui nijamö, inaja showawä. Ö̦jö ma cui, ö̦jö bä nija wamale a̦fa wäyäbä, ö̦jö tä nia cuo. ¹⁰ ¿Ö̦jö tawä? Yai Bada tänö täbä jödödöwä waicaö showao mlao däjä, iba dodijidawä tä a̦ ja, täbä jödödöwä bälöjöwä lä yaiblai, bä nia yömölamou balöo. ¹¹ ’¿Ö̦jö tawä? —Jesús a cuma—. Wamacö fa juwäablajenö, bada bä nija wamacö noshi ö̦jödabouje däjä, wamacö nofi nia lä bäyäo wei tä a̦ ja, bä bufi jo̦lijou dicoo dijä. Wamacö wa̦liije däjä, wamacö a̦ moyawe juobä, wamacö a̦ nia bayeliblamou. Cafä wamacö bufi lä cuu wei mlai, Yai Bada tä Bufinö wamacö a̦ nia malä macocamaö wei. ¹² Tä nia wa̦lidiblou. Cama bä mashi ma cuinö bä noshi nia ö̦jödabouje, bä shäbeje. Bä fö̦ö bä ma cuinö bä ijilubö ebä noshi nia ö̦jödabouje. Bä ijilubö ebä ma cuinö, bä fö̦ö, bä nöö ebä nabä nia shömaöje, bä shäbeje. ¹³ Iba wamacö yalo, bluca bä bälöjöwä lä yaiblai bä ma cuinö, wamacö nofi nia wa̦libouje. Ö̦jö ma cui, a shämobä etä ma cuo däjä ma cui, a nö wa̦lojaö fe lä yadio wei a lä cui, ö̦jö a nia jucäamou fe yadio. ¹⁴ ’Ö̦jö ma cui, bä da moyaweicu —Jesús a cuma—. Tä yai lä wa̦lidii tä lä cui, tä nö cuobö lä mlai jamö tä nia ublamabou fe yadioje, Yai Bada etä yafi jamö. Täbä bluca nia yai lä wa̦lidiblamaö wei, ö̦jö bei tä. ¿Ö̦jö tawä? Ei ya wa̦ ja, wamacö bufi ca̦i jaducuwä cuobä wamacö. Yai Bada a wa̦no wäyälewä bä lä cui, inaja bä cuu malä balöono wei. Ö̦jamö lä täbä lä wa̦lidiblamaö wei wama tä ublaa dablaö däjä, Judea jamö wamacö lä bälöle, tä lä jefubö wei jamö bä docuo cuo da showadaomobodu. ¹⁵ Wamacö siboa waiquilayou ja, yafi jamö bä lucäö co̦daa dijä. Madofi wama bä co̦ablaö mlai ja, bä docua da showaolalu. ¹⁶ Ficali ca jamö wamacö juu lä waiquile däjä, camishifä wama bä co̦ablaö mö yabao mlai ja, ö̦jamö lä showawä wamacö nia docublou cuaaö. ¹⁷ ’Bä lä shöbönabö wei, ¡bejedi lä ö̦jö bä nö nia bleaaö fe balojoo —a cuma—. Ijilu bä lä shadimabou wejei, inaja showawä bä nö nia bleaaö cuo. ¹⁸ Maa däjä tä cublou mlaobä, Yai Bada nija bä da naco, ö̦jö lä. ¹⁹ Täbä nö nia yai malä bleaaö wei. Yedu ja Yai Bada tänö täbä bluca lä tablaleno wei däjä, täbä nö bleaaö ma showaono wei ma cui, ö̦jö tä lä cublole däjä täbä nö nia shino yai bleaaö. Inaja täbä nia ca̦i cuaaö co̦o ma mlai ma cui, ö̦jö lä däjä moli bei bä nö nia shino yai bleaaö dodijio. ²⁰ Ö̦jö tä lä cublole däjä, Bada tänö tä ja̦mabou bufio mlao fa cunoja, moli ma cui täbä nö demi feio buobö mlai. Ö̦jö ma cui, cama ebä lä yaimabole bä feimabou fe yadiobä, tä nö nia dedejeblamanomi. ²¹ ’Ai bä a̦ ja, bä möla dijä —a cuma—. “¡Bei, bei! Yai Bada tänö a shömabä a lä yaileno wei a lä cui, ¡quijamö a wawälayou lä cufe!”, ai bä ma cuu wei ma cui, “¡Bei, bei! ¡Äyämö a waloqueyoluu lä cufe!”, ai bä ma cuu wei ma cui, ö̦jö bä a̦ bejedi bufibla dijejä. ²² Bä lä jolemou wei bä nia wawäblou. Abinaja bä nia jole cuu. “Yai Bada tänö wale shömabä camiyä wale yailema”, bä nia jole cuu. Yai Bada a wa̦no jole jole lä wäyäö wejei bä ma cui, ö̦jö bä nia ca̦i wawäö mö feduo. Yai Bada a mayo nia jole wawämaöje. Tä nö lä quilijii tä nia ca̦i bluca wawämaö fe yadioje, täbä bufi fa taamajenö täbä yaclämabeje. Yai Bada ebä lä yaimabole bä ma cui, ö̦jö bä bufi taamaö fe yadiobeje bä nia wabäodii. ²³ ¿Ö̦jö tawä? Ö̦jö ma cui bä da moyaweicu. Bluca tä nia lä cublou wei tä ja, bämacö yömölaö waiquia lä cule. ²⁴ ’Ö̦jö ma cui, einaja täbä nö nia yai bleaaö lä cuo wei tä jödödöblou fa balölonö, motoca shi̦i nia luaaö majöo. Belibo a ma cui, inaja showawä a shi̦i nia cuomi majöo. ²⁵ Shidicali bä ma cui, bä nia bläläö. ¿Ö̦jö tawä? Judu mösö jamö bä lä shadiladi bä nia layäcäbladayou. ²⁶ Ö̦jö lä däjä, camiyä ya lä yanowamöblaleyoluno wei ya nia shino yai bädoyoluu. Ölajashi a jamö ya shi̦i ca̦i fa itoimadunö, wale nia yai lojode dablaöje. ²⁷ Ö̦jö däjä, iba a̦jele ya bä nia shömaö cuaaö, jödödöwä bä lä bälöblai jamö, iba ya bä lä yaileno wei bä co̦ablaö cuaabeje. ²⁸ ’Ico fibä ja, showadi wamacö bufi dao talei —Jesús a cuma—. Defi jenabä ducuu däjä, “Fei däjä motoca shi̦i ajeo co̦a nö culai”, wamacö bufi shino cuu. ²⁹ Inaja showawä, ei ya tä a̦ bluca lä wäyäfe, tä wawäblou däjä, wamacö bufi daobä cätä. “Fei däjä a itou ajedewä”, wamale nofi tabobä. ³⁰ Cafä wamacö nija ei ya wa̦ lä cui, bejedi lä ya wa̦. Wamacö fei däjä lä bälöblai wamacö bluca nomaö showaono mlai ja, ö̦jö tä nia bluca wawäblou balöo. ³¹ Judu mösö ma cui, bita a ma cui, ö̦jö bä bluca ma mlaolaliyo wei ma cui, camiyä ya wa̦ nia mladoimi. ³² ’Ö̦jö ma cui, ya tä a̦ lä wäyäfe tä nia yai lä cubloyoluu wei, yanowamö täbänö ö̦jö lä tä yai daimije —a cuma—. Yai Bada a̦jele bä lä culadi bä ma cuinö, inaja showawä tä ca̦i daimi cuweje. Yai Bada bei Ijilubö ya e ma cuinö, inaja showawä ya tä ca̦i daimi cuwä. Fayänö ö̦jö tä shino yai daö ayawä. ³³ ¿Ö̦jö tawä? Bä nö da daicu, ö̦jö lä. Wamacö bufi cuu mlao däjä, camiyä ya lä yanowamöblaleyoluno wei ya nia malä bädou wei. ³⁴ ’Abinaja tä ca̦i cuwä —Jesús a cuma—. Shomi jamö bada a alayono wei ja, cama a nosie lä juamou wei ebä nö dablalou juo. A juu showao mlao däjä, cama ebä yömölaö balöo. Bä ojodamou juobä, bä nowa bluca taö cuaaö. Yoca lä jolemabou wei a lä cui, a nö dao juobä, a nosiemölefälöö. ³⁵ ¿Ö̦jö tawä? Bä nö da daicu, ö̦jö lä. “Ö̦jö däjä Bada a yai nia wawäö”, wama a nofi tabou malä mlai. A weyade ca̦i nia lä co̦blou wei, wama tä daimi. Bäshäcuoladi tä ca̦i mlai. Cadala bä a̦ faö fe lä jaluu wei däjä ma cui, ö̦jö wama tä ca̦i daimi. A nia lä fenao wei, inaja showawä. ³⁶ A bädou bädalayou ja, wamacö mia dablajalou mlaobä, bä nö da daicu. ³⁷ Cafä bämacö nowa lä talenaja, bluca täbä nowa ca̦i tamamou mö feduobä ya wa̦. Bä nö da daicu, ö̦jö lä.

¹ Judio bänö bolacabö tä mö didi fa cublalunö, Yai Bada a waiteli lä jayuano wei a nofi nia co̦camoaö co̦omaje. Ö̦jö däjä, nii bä juluu lä mlai bä ja, bä jaba iyaö lä cuaano weinaja bä nia ca̦i cuaaö co̦oma, bä jaba lä cuaano wei tä nofi jaducubou showaobeje. Ö̦jö tä nö dabolajenö, bada bänö Jesús a nofi washuamaje. Nofi bäyäalewä blowäjäwä bä ma cuinö, Moisesi etä a̦ ja täbä lä damaö wejei bä ma cuinö, bä bufi moyawälanö a nia fa juwäajenö, a nia shämamaje. ² Abinaja ai bä malä cuno wei. —Täbä iyaö ca̦i co̦camou showaono mlai ja bäma a yai shäö showadaobä, täbä nia lä co̦camou wei täbä shifilimoblalou dicoo wei. ³ Bedaniateli Simón e yafi jamö, Jesús a iyaö ca̦i loaliyoma. Ö̦jö a Simón lä cui, täbä sicö lä jodemaö wei tä wayunö a lä jaliliono wei, bei a li cuoma. Ö̦jö däjä, suwä anö toubä nö lä cle̦deli wei toubä besi ca̦i waloqueyoluma, toubä nowa bluca lä dodijii. Toubä fe fa caloblalönö, Jesús a iyaö ca̦i loo däjä a fe löblalema. ⁴ Ö̦jö ma cui, ai bä lä coyocomono wei bä bufi fa jushujudalunö, abinaja bä bufi cudou dicolayoma. “Toubä nowa ma bluca wei ma cui, ¿wedi tabä toubä li wa̦lia bälei? ⁵ Ö̦jö lä toubä ja ¿wedi tabä blada 300 bä li däanomi, bä lä jo̦li wei bä yai bayeliblamobä?”, bä bufi cudaliyoma. Inaja bä bufi cuolanö, a suwä wasöö showadaomaje. ⁶ Ö̦jö ma cui, abinaja Jesúsnö bä nowa tama. —A suwä wasöö dicoo dijejä. ¿Wedi tabä bei wama a bufi li suwä yabäcaö dicoblaa cule? Wale fe lä löbafe, tä dodijidawä waiquiwä. ⁷ Bä lä jo̦li wei bä lä cui, cafä wamacö nijamö showadi bä nia malä cudio wei. Wama bä bayeliblaö bufi doblao ja, wama bä bayeliblaö juobä lä cäbä. Ö̦jö ma cui, camiyä ya yai nia cudiomi. ⁸ Dodijidawä wale taamabobä toubä ca̦i waloquei lä cufe. Inaja lä yai. Toubä nö lä cle̦deli wei toubänö, showadi täbä nomawä lä jölöcaö wejeinaja, bei wale taamaö balöa lä cule. ¿Ö̦jö tawä? ⁹ Cafä wamacö nija ei ya wa̦ lä cui, bejedi lä ya wa̦. Jödödöwä tä jamö ma cui, iba dodijidawä tä a̦ wäyämamou cuaabä jamö, ei a suwänö wale fe lä löblalöfe tä a̦fa nia ca̦i wäyämamou cuaaö mö feduo, a lä dodijano wei, tä nofi jaducubou nodiablalobeje —bä nowa tama. ¹⁰ Ö̦jö däjä, nofi bäyäalewä blowäjäwä bä nijamö Juda Icaliode a alayoma. Ö̦jö bä nija a jömabä, Jesús a nia lä nomojoliano wei a wa̦fa wäamoma. ¿Ö̦jö tawä? Jesúsnö bä 12 lä nocamabono wei a Juda cuoma. ¹¹ Ö̦jö a wa̦ ja, nofi bäyäalewä bä bufi bada doblaloma. A nia lä jömaö wei tä nowa ja, blada ebä a̦fa wäa showadaquemaje. Ö̦jö däjä, Jesús a nia lä nomojoliano wei tä nofi dayäaö showadaoma. ¹² Nii bä juluu lä mlai bä ja, judio bä jaba iyaö ca̦i co̦camou co̦o däjä, oweja ocalo bä shäbeje tä mö jalu lä cuono wei däjä, cama ebä lä nocamabono wei bä lä cui, abinaja Jesús nija ebä cuma. —¿Wedinaja wa bufi cuu? Yai Bada a waiteli lä jayuano wei bäma a nofi co̦camoaö co̦obä, ¿wedi jamö yafi lä cui jamö yama bä nii baabä? —ebä cuma. ¹³ Ö̦jö cudeenö, cama ebä lä nocamabono wei ai cäcöbö shömöa balölema. Abinaja cäcöbö nowa tama. —Bei. Shabono jamö wafäcö co̦blou ja, mau ubä befi ca̦i lä döcömabole wafä a mö nia wa̦lo baamadayou. Ö̦jö nija wafäcö fa nocalofälönö, ¹⁴ cama a lä fale jamö, wafäcö falö. Ö̦jö a yafibö lä cui nija ya tä a̦ lä wäyäö wei ya lä cui, wafäle wa̦no wäabä. Wafä yano wa̦li. Ö̦jamö iba bämacö lä nocamabole wamacö sho bämacö nia iyaö, Yai Bada a waiteli lä jayuano wei bäma a nofi co̦camoaö co̦obä. ¹⁵ A yano lä feyacale tä bada jömöaö wä, madofi bä befi ca̦i. Ö̦jamö lä bämacö iyabä wafä bä nii bacö —cäcöbö nowa tama. ¹⁶ Ö̦jö däjä, cama ebä lä nocamabono wei cäcöbä lä cui, shabono jamö cäcöbö fa alufälönö, Jesús a lä cuu weinaja, inaja showawä tä dabölalema. Yai Bada a waiteli lä jayuano wei a nofi co̦camoaö co̦obeje, ö̦jö a yafi jamö täbä nii baböquema. ¹⁷ Tä mö weyaaö däjä, ö̦jamö Jesúsnö cama 12 ebä ca̦i waloquema. ¹⁸ Bä iyaö ca̦i loo däjä, abinaja Jesús a cuma. —Cafä wamacö nija ei ya wa̦ lä cui, bejedi lä ya wa̦. Cafä wamacö ai a lä cuinö, camiyä bämacö nija a iyaö ca̦i lä co̦calenö, ö̦jönö wale nia nomojoliaö —a cuma. ¹⁹ Cama a wa̦ ja bä nofi fa jalujublamolunö, abinaja ebä cudaliyoma. —¿Camiyä inaja ya nia cuaaö tawä? —bä cudou nocalayoma. ²⁰ Abinaja Jesús e cuu nomöjöoma. —Iba 12 wamacö nija ai a lä culenö wale nia taamaö. Ei nii ya lä ödäale jamö, a nii ca̦i ödäaö lä yädämole a lä cuinö. ²¹ ¿Ö̦jö tawä? —a cuma—. Camiyä ya lä yanowamöblaleyoluno wei ya lä cui, bejedi lä wale nia nomamaöje, Yai Bada etä a̦ oni jamö ya wa̦fa lä wäyämamou weinaja showawä. Ö̦jö ma cui, wale nia yai lä nomojoliaö wei a lä cui, ö̦jö a nö nia shino yai bleaaö fe balojoo. Bä nöönö a lä didibole jamö, a oshe wai mojodi nomaö showadao fa cunoja, etä nö shino yai doblaobö wei —a cuma. ²² Bä iyaö showao däjä, nii a fa dälänö, Yai Bada nija a bufi a̦fa doblalou wäyämoma. Ö̦jö däjä, a fa joyolalönö, cama ebä nija bä jöbäö cuaama. Bä jöbödalanö abinaja e cuma. —Ei nii a da dälöje. Ei nii a lä cui, camiyä ei bei ya ya̦ji nö owä —e cuma. ²³ Ö̦jö däjä ji̦shima a ja, nashiwä toubä befi ca̦i däa nomöjölema. Yai Bada nija a bufi a̦fa doblalou wäyämou fa balöonö, cama ebä nija toubä befi ca̦i fa jöböcönö, cama ebä blucanö toubä codaö cuaamaje. ²⁴ Ö̦jö däjä abinaja bä nowa tama. —Yai Bada tänö tä a̦fa lä wäqueno wei tä a̦ bejedi cublobä, ö̦jö bei lä ya i̦yäbö nö owä. Bluca täbä bayeliblamobä, ya i̦yäbö läblalio. ²⁵ Cafä wamacö nija ei ya wa̦ lä cui, bejedi lä ya wa̦. Ei uba bäma toubä nashiwä lä coale, ya toubä nia coaö co̦o jaöomi. ¿Ö̦jö tawä? Obi, Yai Bada tänö cama ebä nia ca̦i lä cuo wei däjä, ö̦jö däjä ya toubä nia shino coaö co̦o —a cuma. ²⁶ Ö̦jö däjä, bä amowamoa fa balölönö, Oliba tä balöcö jamö Jesúsnö cama ebä ca̦i aa co̦layofälöma. ²⁷ Abinaja Jesúsnö bä nowa tafälöma. —Wamacö bluca fa quililalunö yamale nia daa dicoquei. ¿Ö̦jö tawä? Abinaja Yai Bada etä a̦ oni malä cuu wei. Oweja bä ca̦i lä cule a lä cui, ö̦jö ya fa shämalönö, cama ebä nia sheleleblamodayou. ’Einaja tä a̦ oni cuu. ²⁸ Ö̦jö ma cui, ya demi jocädou fa co̦lonö, Calilea tä ulifi jamö bämacö möyou co̦obä ya nia balölayofälöö —Jesúsnö bä nowa tafälöma. ²⁹ Abinaja Pedronö a nowa taö nomöjöoma. —Ei ai bä lä cuinö wa ma daquei wejei däjä, camiyä ya inaja cuaaö mlaicätä —a nowa tama. ³⁰ Jesúsnö abinaja a nowa tama. —Cafä nija ei ya wa̦ lä cui, bejedi lä ya wa̦. Ei tä didi showawä ja, cadala a wa̦ faö showao mlao däjä, cafänö 3 wale nofi nia jole jole mojodubou cuo —a cuma. ³¹ Ö̦jö ma cui, Pedro a wa̦ lojodoaö ja, abinaja e cuu fe yadioma. —Ma. Cafä bäfä bayeliblaö ja, ya shämou mö feduobä tä ma cublole ma cui, bäfä nofi nia jole jole mojoduboimi —e cuma. Inaja showawä cama ai ebä bluca cublalou mö feduo showaoma. ³² Jesemani tä a̦fa ulifi lä jilabou wejei jamö bä alayofälöma. Bä fa waloalunö, cama ebä lä nocamabono wei bä nija abinaja Jesús e cuma. —Yai Bada nija ya nö bayeli nacao däjä, äyämö bä loa da balöicu —e cuma. ³³ Pedro, Santiago, Juan bä lä cui, ö̦jö bä shino nacalefälöma. Ö̦jö bä ca̦i fa bayäcäblaludunö, a bufi jalujublou dodijilayoma. A bufi ca̦i wajäblaliyoma. ³⁴ Abinaja e cuma. —Bufi jalujou tänö jai ya nö nomaa showadalayobö, ya bufi cuaaö dicoa lä cuimadi. Eja bä jilaa da jeicu. Bä nö da daicu —bä nowa tama. ³⁵ Jesús a bayäcäblou fa co̦lodunö, a blaaledayoma. Yai Bada nija a nö bayeli nacao ja, abinaja a cuma. —Fei däjä wale nö yai nia lä bleaamaö wejei tä lä cui, wa tä blajamabä tä cua ja, tä da blajamalö. ³⁶ Cafänö wa tä bluca taö daö malä cui. ¡Fabe! —a cuma—. ¡Fabemi! Wale nö nia lä bleaamaö wejei, ¡tä yai da blajamalö! Ö̦jö ma cui, wa tä nö blajamabimi waiquiwä ja, ö̦jö waiquiwä. Camiyä ya cuaaö bufi lä doblao weinaja mlai, cafänö wale taamaö bufi lä doblao weinaja wale da taama —a cuma. ³⁷ Ö̦jö däjä, cama ebä jilaa lä jäle jamö a waloa fa co̦iquiyonö, bä mia dalalema. Pedro nija abinaja e cudaleyoluma. —Simón. ¿Wa midia dicoa mlalawä? Wa nö nia lä dao wei, wa nö dedejebloimi waiquiwä. ³⁸ Bä nö shino da daicu. Yai Bada nija bä nö ca̦i bayeli da nacao, Sadanasinö wamacö yabäcäblaö däjä, wama a wa̦ juaö yacläo dicoo mlaobä. Wamacö cadidou bufi ma doblao wei ma cui, wamacö ujuduu si ijejewä waiquiwä—Jesús e cuma. ³⁹ Ö̦jamö lä a aa fa co̦lufälönö, a jaba lä cuno weinaja a cuu co̦obä, a nö bayeli nacao co̦odayoma. ⁴⁰ Ö̦jö däjä, cama ebä jilao lä juono wei jamö, a waloa fa co̦iquiyonö, bä mia daa co̦laleyoluma. Bä malishama yalo, bä la̦diobä bä cuonomi. Ojö däjä, bä a̦ juobä etä cuo fa mlacunö, bä mamicai mamo li showajao buoma. ⁴¹ Cama ebä nija 3 a waloo lä co̦le däjä, abinaja bä nowa tadaleyoluma. —¡Uo! ¿Wamacö midia showaa cule? ¿Bei wamacö washimi jolou showawä tawä? Inaja lä waiquiwä. Bei. Fei däjä tä cublou waiquia lä cule. Ya lä yanowamöblaleyoluno wei wale nia nomojoliaö, wa̦lidiwä talewä bä nija wale jöböabä. ⁴² ¿Ö̦jö tawä? Bei. Bä da jocäcädalu. ¡Bämacö da jufälö! ¡Quiji, quiji, tä da möje! Wale nia lä nomojoliaö weinö wale nabä juu waiquia lä cuimi —bä nowa tama. ⁴³ Jesúsnö inaja bä nowa taö showao däjä, bä lä toujublaliyono wei bä lä cui, yedu Judanö bä ca̦i blacädaleyoluma. Sibala bä showabomaje, nablushi bä ca̦i. ¿Ö̦jö tawä? Ö̦jö Juda a lä cui, Jesúsnö cama 12 ebä lä nocamabono wei ai e cuoma. Nofi bäyäalewä blowäjäwä bä ma cuinö, Moisesi etä a̦ ja täbä lä damaö wejei bä ma cuinö, judio ai bä bada ma cuinö, ö̦jö bänö bä wayu shömölemaje. ⁴⁴ Jesús a nia lä nomojoliaö weinö, abinaja bä nowa taö malä balöono wei. —Ya mamocacö nia lä buyucaö wei, ö̦jö bei a waiquiwä. Wama a fa juwälönö, wama a documaö mlai ja, wama a öböafälöbä —bä nowa taa balölema. ⁴⁵ ¿Ö̦jö tawä? Jesús a nabä cadidio showadaolanö abinaja Juda e cuma. —¡Bada tä! —e fa cudalunö, mamocacö buyucaö showadaoma. ⁴⁶ Ö̦jö däjä, Jesús a nabä quea fa showadaicujenö, a juwälemaje. ⁴⁷ Ö̦jö ma cui, Jesús ai e ublao lä ajedeono wei a lä cuinö, sibala a fa ucädalönö, a ishoa mö balayoma. Nofi bäyäalewä bada a wa̦ juamobä e nabä fa queicunö, a yömöca baquequeblalema. ⁴⁸ Ö̦jö däjä, a nabä lä juno wejei bä nija abinaja a Jesús cuma. —Tomömolewä bä nabä juu lä culajeinaja, ¿wedi tä tabä bei wamale nabä li juu cuaaö dicoo cufe? ¿Wedi tä tabä shocobi, nablushi wama bä ca̦i fa juimanö, bei wamale li juwämaö cuboyoi? ⁴⁹ Yai Bada etä yafi jamö showadi bämacö ca̦i looma. Ö̦jamö ya täbä yömölaö däjä, wamale juwäano malä mlai. Ö̦jö ma cui, Yai Bada etä a̦ oni jamö tä a̦ lä cuu weinaja tä a̦ bejedi cublobä, ei tä waiquiwä —a cuma. ⁵⁰ Ö̦jö däjä cama ebä lä cuinö, Jesús a fa dacöfälöjenö, bä docuolaliyoma. ⁵¹ ¿Ö̦jö tawä? Jesús nija ai a fiya nocaaö fe yadiofälöma. Camishi cäcö ja a didio mlai ja, acadafu cäcönö a shino jo̦yao bädaoma. Ö̦jö a nia juwäama ma cujei, ⁵² bä imicö lä waliblaole däjä ecö acadafu icocolayoma. Ö̦jö cäcö tabi fa feiquefälönö, shinocu a doculayofälöma. ⁵³ Ö̦jö däjä, nofi bäyäalewä blowäjäwä e yafi jamö, Jesús a öbölefälömaje. Nofi bäyäalewä blowäjäwä bä ma cui, judio ai bä bada ma cui, Moisesi etä a̦ ja täbä lä damaö wejei bä ma cui, ö̦jamö lä ö̦jö bä bluca co̦camoa waiquilayoma bä cuoma. ⁵⁴ Pedro a jäwäjäwä fa yauicunö, nofi bäyäalewä bada e yafi sibo lä ji̦coloi jamö, a lucäa jälayofälöma. Ö̦jamö Yai Bada tä yafi lä nowamano wejei bä sodado lä cui, ö̦jö bä si lä bomono wei jamö a ca̦i loa mö fedualiyoma, a si bomobä. ⁵⁵ Bei. Nofi bäyäalewä blowäjäwä bä ma cuinö, ai bä bada yododaö mö lä feduono wei bä ma cuinö, Jesús a wa̦fa jole wäyäbeje bä dayäamaje, ö̦jö lä bä a̦ ja, a shämaö showadaobeje. Bä ma dayäano wejei ma cui bä cuonomi. ⁵⁶ A wa̦fa jole lä wäyäno wejei bä ma blucaono wei ma cui, bä jolemoma yalo, bä a̦ faö fe usucublonomi. ⁵⁷ Ai bä fa ubladonö, a wa̦fa jole wäyäöje ja abinaja ebä cuma. ⁵⁸ —Ei a lä cui, yama a wa̦ ji̦lilei cublelei. Abinaja a cuma. “Ei Yai Bada etä yafi lä cui, yanowamö bänö a yafi lä tablaleno wejei a lä cui, ya e yafi nia wa̦liaö. Ö̦jö däjä bolacabö tä mö didi cublou fa co̦lonö, ai ya yafi nia tablaö co̦o majöo, yanowamö bänö a yafi tablaö daö lä mlajei a yafi lä cui.” Einaja a cuu cublelei —ebä cuma. ⁵⁹ Inaja a wa̦no wäyäö ma cuaano wejei ma cui, bä a̦ shomiablalou mö feduo fe yadioma. ⁶⁰ Ö̦jö däjä, nofi bäyälewä bada a ublaa fa möamoblalunö, Jesús a wa̦ nia fa wäamanö, a wa̦lii cadidioma. —¿Wa wa̦ nia juomi tawä? ¿Wa wa̦fa lä wäyäfajei bä a̦ bejedi tawä? —e cuma ma cui, ⁶¹ Jesús a wa̦ juo mlai ja, mamicai a ubladioma. Nofi bäyäalewä bada anö a wa̦lii co̦oma. —Yai Bada tänö a shömabä a lä yaileno wei, ¿ö̦jö lä cafä bei wa e waiquiwä tawä? A wa̦fa doblao lä talajei, ¿ö̦jö wa Ijilubö tawä? ⁶² —Awei. Ö̦jö lä ya e —Jesús e cudaliyoma—. Ya lä yanowamöblaleyoluno wei ya lä cui, Yai Bada a nö wa̦lojaö lä ayao wei boco jayu mashi jamö, wamale nia ca̦i döcäa dabladayou. Ölajashi a jamö wamale ca̦i nia itou dablaö —a cuma. ⁶³ Ö̦jö a wa̦ ja, nofi bäyäalewä bada a lä cui, a nö wa̦lowä jushudaliyoma yalo a camishibö cacablamolayoma. Abinaja bä nowa bluca tama. —¿Ö̦jö tawä? ¿Wedi tä tabä ai bäma bä a̦ li ji̦liaa co̦lei? ⁶⁴ Yai Bada a nö lä waiblafe, wama a wa̦ ji̦liaa waiquilei lä cufe. Yanowamö a ma cui, ¡Yai Bada a wa̦fa jilou! Fei däjä, ¿wedinaja wamacö bufi cuu dodijio? —bä nowa tama. Ö̦jö a wa̦ ja, Jesús a shämaö showadao bufimaje. ⁶⁵ Ai bänö a nabä icua showadaquemaje. A mö cläshamaje. A ca̦i shädaamaje. Mamocu fa jo̦yabojenö, a nö waiblaöje ja, a ca̦i wa̦limaje. —Yai Bada a wa̦no wäyälewä wa yalo, tä a̦fa wäa da cadidiba. ¿Wedinö bei wa shälei cufe? —a nowa tamaje. Bä sodado lä läono wei bä ma cuinö a si ca̦i baimaje. ⁶⁶ Yano lä feyacale jamö, Jesús a wa̦lijilayouje däjä, bäfätä jamö Pedro a loo juoma, yafi sibo lä ji̦coloi jamö. Ö̦jamö a loo däjä a suwä waloquema, nofi bäyäalewä bada a wa̦ juamobä a suwä lä cui. ⁶⁷ Pedro a si bomou fa dalalönö, a möö dodijolanö abinaja e cuma. —Nasaleteli Jesús a lä cui nija cafä wa ca̦i cuoma —a cuma. ⁶⁸ Ö̦jö ma cui, a wa̦ jole mojodumoma. Abinaja Pedro a cuma. —Cuwi. Camiyä nija wa lä cufe ya tä daimi —suwä nija a cuma. Einaja e fa cunö, yoca lä joleono wei jamö a icua cublou majölayoma. ⁶⁹ Ö̦jamö lä a cuo majöo däjä, bada a wa̦ juamobä a suwä lä cuinö a daa fa co̦lalönö, a wa̦ faö co̦oma, ai bä ublao lä ajedeono wei bä nija. —Fei a lä cui, ö̦jö lä bä nija a ca̦i co̦caoma —a cuma. ⁷⁰ Öjö ma cui, a wa̦ jole mojodumou co̦oma. Tä nö dedejedou fa co̦lonö, bä ublao lä ajedeono wei bä lä cui, abinaja Pedro nija bä cuu co̦oma. —Bejedi lä ö̦jö bä nija cafä wa ca̦i co̦caoma. Calileateli wa malä cui —bä cuma. ⁷¹ Ö̦jö ma cui, Pedro a wa̦ jole mojodumou co̦oma. Yai Bada a wa̦fa ca̦i jayumama, a jolemou bädao ja, a nö bleaamamou showadaobä. —Ö̦jö wa wa̦fa lä wäyäfe a wa̦lo lä cui, ya daimi —a jole cuma. ⁷² Inaja Pedro a lä cuno wei däjä, yedu cadala a wa̦ nocablaliyoma. A wa̦ cadala faö co̦o waiquioma yalo, Jesúsnö a nowa lä tano wei, Pedronö tä nofi jaducudalema. “Cadala a wa̦ faö co̦o showao mlao däjä, 3 wale nofi nia jole mojodubou”, a nowa malä tano wei. Ö̦jö däjä a bufi fa wajäblalunö, a ö̦cöma.

¹ Tä mö jaba jaluimaö däjä, bada bä bluca yododaö jaluma. Nofi bäyäalewä blowäjäwä bä ma cui, judio bada ai bä ma cui, Moisesi tä a̦ ja täbä lä damaö wejei bä ma cui, ö̦jö bä bluca fa yododoblalunö, bä a̦ wayolayoma, Jesús a shäbeje. Ö̦jö däjä, bococu fa o̦cacöjenö, Bilado nijamö a öbölefälömaje, Lomateli bänö Bilado a bada lä lämabono wei a nijamö. ² Ö̦jö däjä, Biladonö a wa̦lii ja, abinaja a cuma. —¿Cafä judio bada bei wa? —a cuma. —Awei. Wa wa̦ cadidou —Jesús a cuma. ³ Ö̦jö däjä, nofi bäyäalewä blowäjäwä bä lä cuinö, bluca täbä a̦ ja Jesús a wa̦fa tamaje. ⁴ Ö̦jö däjä, Biladonö a wa̦lii co̦oma. —¿Wedi tä tabä wa wa̦ li juomi? —e cuma—. Wa wa̦fa lä talajei, ¿wa täbä a̦ ji̦liblaimi tawä? ⁵ Ö̦jö ma cui, Jesús a wa̦ juo co̦daanomi. A wa̦ juo fa mlacunö, Bilado a bufi shino yai wedinajamoa dodijilayoma. ⁶ Bei. Abinaja Bilado a showadi cuaama. Judio bänö Yai Bada a waiteli lä jayuano wei a nofi co̦camoaö co̦oje däjä, judio bä fe lä labono wei, ai moli a shino fadamaö co̦oma, judio bänö a wa̦fa yubou lä cadidiono wejei a lä cui. ⁷ Ö̦jö däjä, Lomateli bä a̦ bada juaö lä mlajei, ai bä fe labomaje. Ai a lä cui, Balabasi a wa̦fa cuoma. Jelusaleteli bä lä shifilimoblalono wei däjä, ai a shäa dicolema yalo, a fe labomaje. ⁸ Bilado a showadi lä cuaaö wei tä daöje yalo, judio bä bluca fa co̦camoliyonö, bä fe lä laono wei ai moli a famaö co̦o bufimaje. ⁹ A wa̦ juo ja, abinaja Bilado a cuma. —Judio wamacö nija a bada cuobä a lä cui, ¿ö̦jö bei wama a jujeblamaö bufii tawä? —a cuma. ¹⁰ Einaja Bilado a cuma. Nofi bäyäalewä blowäjäwä bä daö malä waiquiono wei. “Jesús a dodijaö ayao cudeenö, a shämaö bufi doblaoje”, bä nofi tabou waiquioma. ¹¹ Ö̦jö ma cui, nofi bäyäalewä blowäjäwä bänö täbä shi domaö waiquia dicoaje yalo, Jesús mlai, Balabasi a wa̦fa shino yai yublalemaje, a jujeblamabä. ¹² Abinaja Bilado e cuu nomöjöoma. —Ja̦o. Inaja wamacö cuu ja, judio wama a wa̦fa bada lä jilabou wei a lä cui, ¿wedinaja ö̦jö ya yai li taamabä? —e cuma. ¹³ Ö̦jö däjä, bä a̦ shi doa co̦a dicolayoma. —¡Fii balitama defi jamö, a shino da basumacö! —ebä cublalou co̦oma. ¹⁴ —¿Wedi tabä fii balitama defi jamö ya li basua bädamaquei? ¿Wedi bei tä li taö dodijioma? —a Bilado cuma ma cui, ö̦jö a wa̦ ja, bä a̦ yai balaa dicolayoma. —¡Fii balitama defi jamö, a da basumacö! —bä cublaloma. ¹⁵ Ö̦jö däjä, bä lä co̦camono wei bä bufi doblamabou bufi doblaoma yalo, Balabasi a faa co̦malema, bä lä cuno weinaja showawä. Jesús a si fa yafelimalalönö, fii balitama defi jamö a basuabeje, a jöböa majöquema. ¹⁶ Ö̦jö däjä, bada tä yafibö sibo lä ji̦coloi jamö, sodado bänö Jesús a öböbou ca̦i siboa majöa co̦layofälömaje. Cama ai bä ca̦i sodado mashi bluca nacaalalemaje. ¹⁷ ¿Ö̦jö tawä? Camishi ushi wacäjäwä labe cäcö ja, a jole jole lucäa nomöjömalemaje, bada bä nö ö̦jöböamobä bä showadi lä didio wei cäcö lä culenaja cäcö ja. Too totocö mösöcöbö fa motoleblalöjenö, Jesús nija totocö yojoquemaje, bada bänö olo bä showadi lä yojobou wejeinaja showawä. ¹⁸ Cama nija bä fa icublaanö, a nö waiblaöje ja, abinaja a nowa jole tamaje. —¡Bada tä! Judio bä nija wa bada lä läle, ¡dodijidawä wa bälödiobä! —a nowa jole tamaje. ¹⁹ Ujudidiwä desinö a fe shäbemaje. A ca̦i cläshamaje. Bä möfe ca̦i jole deidolanö a nofi jole jole badamoamaje. ²⁰ Inaja a nö waiblaö cuaaö fa balöojenö, ushi wacäjäwä cäcö jayua fa co̦lujenö, cama ecö ja a didia co̦maquemaje. Ö̦jö däjä, fii balitama defi jamö a basuabeje, sibo jamö a öböa taa majölefälömaje. ²¹ Jesús a öböbou ca̦i lä juimadujei jamö, Sileneteli Simón a lä co̦imi a mö bamalefälömaje. Alejado, Lufo, ö̦jö cäcöbö lä cui bei fö̦ö e cuoma. A mö fa bamalöjenö, ö̦jö nija fii defi nia lä blilio wei defi yalucua nomöjöa fe yadimaquemaje, edefi ca̦i nojaobä. ²² Cocoda tä a̦fa ulifi lä jilabou wejei jamö, a ca̦i waloquemaje. ¿Ö̦jö tawä? “Cocoda”, täbä caficö lä cudou wei, Felosi blaobä tä a̦fa ulifi taöje. ²³ Nashiwä toubä ja, co̦wami täbä fa coyocoblalöjenö, a fe nia fa coamajenö, e toubä dodoquemaje. Ö̦jö ma cui, toubä coanomi. ²⁴ Fii balitama defi jamö a basuquemaje. Jesús camishi ebä nia fa sheleleablajenö, jömamodima ebä wai ja bä wabäoma, bä nia camishi tabou mö lä feduo wejei bä jömamobä. ²⁵ ¿Ö̦jö tawä? Motoca a ösöfälöö däjä, a basuquemaje. ²⁶ Ö̦jamö etä a̦ oni ca̦i shadimaquemaje, Jesús nija tä nowa lä cuono wei tä dablamobä. Abinaja etä a̦ oni cuma. “Judio bä nija a bada cuobä, ei a”, etä a̦ oni cuma. ²⁷ - ²⁸ Fii balitama defi jamö, Jesús a basua fa möamobalöjenö, cäcöbö doblou lä mlai cäcöbö ca̦i basua lu̦locua mö feduquemaje. Acasi boco mashi jamö ai a, jayu boco mashi jamö ai a, cäcöbö basua taaquemaje. ²⁹ Ai bä lä cui bä jayuafälölanö a jömamaje. A nö ca̦i waiblamaje. Abinaja ebä cuma. —¡Bei tawä! ¡Wa nö nia jo̦wa lä wa̦lojano wei! Yai Bada wa etä yafi fa wa̦lialönö, bolacabö tä mö didi fa cublalunö, ¡wa etä yafi nia i̦tamaö lä co̦ono wei wa nofi lä cui! ³⁰ ¡Cafä a yai da bayeliblamolu, ö̦jö lä! Wa ma basule ma cui, ¡a da itolu! —ebä cuma. ³¹ Inaja showawä judio bada bä ma cuinö a nö ca̦i waiblaö cuo mö feduomaje. Nofi bäyäalewä blowäjäwä bä ma cui, Moisesi etä a̦ ja täbä lä damaö wejei bä ma cui, judio ai bä bada ma cui, abinaja bä nowa tayou ja bä cuma. —Ai täbä jo̦wa bayeliblaö ma cuaano wei ma cui, ¿wedi tä tabä cama bei a li bayeliblamamou mlaa cule? ³² Yai Bada tänö a shömabä a lä yaileno wei, ei a cua waiquiwä ja, judio bä nija a bada cuobä a waiquiwä ja, fii balitama defi jamö a basudio dicoo mlai ja, a yai itou showadaobä. Bäma a itou fa dalalönö, ö̦jö däjä bäma a wa̦ bejedi yai bufiblaö showadaobä, ¿ö̦jö tawä? —bä jole cuma. Fii balitama ai deficö jamö, cäcöbö basua mö lä fedule cäcöbö ma cuinö a nö ca̦i waiblaböma. ³³ Bei. Motoca a yo̦loloblojolayou däjä, tä mö jödödöwa dödölayoma. Motoca a itou bäshäcuaö däjä tä shi̦i jomoblou co̦layoma. ³⁴ ¿Ö̦jö tawä? Tä shi̦i jomoblou co̦o lä bufiole däjä, Jesús a wa̦ i̦cali fa falönö, cama bä caficö a̦ ja, abinaja a cudaliyoma. —¿Eloi, Eloi, lema sabadani? Inaja a lä cuobojoli, abinaja a yai cuma. “¡Yai Bada bäfä lä bufiblale! ¡Yai Bada bäfä lä bufiblale! ¿Wedi tä tabä bei wale li daa dicofälöö cufe?” ¿Ö̦jö tawä? Einaja a yai cudaliyoma. ³⁵ Bä ublao lä ajedeono wei ai bä lä cuinö a wa̦ fa ji̦liläjenö, abinaja bä cuma. —¡Bei, bei! ¡Elia a jo̦wa nacaö lä cule, Yai Bada a wa̦no wäyälewä a jaba Elia lä cuono wei! —bä cuma. ³⁶ Ö̦jö däjä, nashiwä toubä befi ca̦i lä i̦taono wei jamö ai a fa läläicunö, ö̦jö toubä ja tä madofi wai fa ca̦dalönö, fii fi ja tä fa ji̦ibanö, Jesús caficö ja toubä befi ca̦i dodobou ajedeojolayoma. Toubä befi ca̦i dodobolanö, abinaja cama ebä nija a cuma. —¡Waija, waija! Bämacö nö daablalou da balöo, ¿ö̦jö tawä? Elia bäma a waloo fa mönö, ö̦jönö bäma a itoblamaö möbä —a cuma. ³⁷ Ö̦jö däjä, Jesús a i̦cali fa la̦amolunö, a je̦le je̦lemou mladaliyoma. ³⁸ Ö̦jö däjä showawä, Yai Bada etä yafi jamö camishi cäcö bada acadafu lä läono wei, cäcö cacablou wädätefälöma. ³⁹ Sodado 100 bä ca̦i lä cuono wei a bada lä cui, Jesús a mö lä yaile jamö a lä ublaono wei a lä cui, a je̦le je̦lemou mladou fa dalalönö, a wa̦ faö showadaoma. —Bejedi lä quiji a lä cui, ¡Yai Bada tä Ijilubö e cuo dodijioma! —a cuma. ⁴⁰ Ö̦jamö suwä bä ca̦i cuoma. Bä jäwäjäwä ca̦i fa ublajaonö, bä nö ca̦i labajami dablalou mö feduo showaoma. Ö̦jö bä nijamö Madalateliyoma a María cuoma. Santiago a fiya lä cui, ö̦jö bä nöö e ca̦i, José bä nöö e showawä lä cui. María ö̦jö a wa̦fa ca̦i cuo mö feduoma. Salomei a wa̦fa suwä lä cule, ö̦jö a ca̦i cuoma. ⁴¹ Calilea jamö a Jesús cuo däjä, ö̦jö bä suwä lä cui bä showadi yauadima. A bayeliblaö cuaafälömaje. Ai bä ca̦i suwä bluca cuo mö feduoma, Jelusale jamö Jesúsnö bä ca̦i lä juno wei bä lä cui. ⁴² Sábado tä mö jalu nia cublou lä fenao wei tä weyade cublou waiquia ja, bä ojodamou showadaoma. Ö̦jö tä fena ja täbä yanöcöobä tä nia cuoma cudeenö, tä tamobä tä lä cule tä taö showadaomaje. ⁴³ Alimadeateli a José lä cui, a bufi fa lojododalunö, Bilado nija a fa icuicunö, Jesús a wa̦fa nomawä boma. Ö̦jö a José lä cui, judio bada bä lä läono wei bä nija a coyocooma. A nofi yai tabou dodijiomaje. Yai Bada tänö cama ebä nia ca̦i lä cuo wei, José a ma cuinö, ö̦jö tä nö ca̦i shi jaliwä dablalaö mö feduoma. ⁴⁴ Bilado a lä cuinö, “A nomaa waicölöfe daanö”, Jesús a nofi tabou fa mlacunö, sodado 100 bä ca̦i lä cule a bada nacalema, a lä nomalayono wei tä nia wa̦lii fa cadidionö. ⁴⁵ Sodado a bada lä cuinö, a wa̦fa nomaö cadidou tama yalo, José nija a nomawä dämalema. ⁴⁶ Jesús a nomawä ja̦loblabä, Josénö camishi acadafu au cäcö lululema. Ö̦jö däjä, a nomawä fa i̦tomalönö, ö̦jö cäcö au dude ja a ja̦loblalema. Maa maca jamö a maquequema, nomawä bä maqueblaabeje maca lä tablaleno wejei jamö. Ö̦jö däjä, maca fe laobä, maa ma bada jiluluquefälöma. ⁴⁷ Ö̦jamö Madalateliyoma a María lä cui, José bä nöö María e sho, cäcöbö nö daoma. Jesús a nomawä lä maqueono wei a dabölalema.

¹ Täbä lä yanöcöo wei tä mö jalu jayublou waiquilayono wei ja, suwä bänö täbä nö lä cle̦deli wei täbä lulualalemaje, a nomawä lä maqueono wei jamö täbä ca̦i jubeje. Nomawä täbä showadi jölöcaö lä cuaaö wejeinaja, Jesús a nia taamamaje. Madalateliyoma María a cuoma, Santiago bä nöö María e ca̦i, Salomei a ca̦i. ² Bei. Ö̦jö tä fena ja, domingo tä mö jalu lä cublole däjä, suwä bä jocäblou fa fenablalonö, maa maca jamö bä aa fenalayoma, motoca a jaba juimaö däjä. ³ Bä lä juimadi jamö, abinaja bä nowa tayofälöma. —Ö̦jö ma cui, maa maca jamö bämacö lucäbä, maa manö yoca lä lale, ¿wedinö ma li jilulublabä? —bä nowa tayofälöma. ⁴ Ö̦jö däjä, maa maca jamö bä ajedou däjä, tä fa mödalöjenö ma bada jilulano dalalemaje. Bada ma bada cuoma. ⁵ Maa maca jamö bä lucäa fa showadaalunö, jayu boco mashi jamö fiya tä döcöa dalaledayomaje. Camishi aulimi labe cäcö ja a didioma. Ö̦jö a fa dalalöjenö bä bufi shädayaimou dodijioma. ⁶ Abinaja tä cuma. —Bä bufi shädayaimo dijä. Nasaleteli Jesús wama a lä dayäboyoi, fii balitama defi jamö a lä basuqueno wejei a lä cui, fei däjä äyämö a cuami. A demi jocädou waiquilayoma. A nomawä lä maquequeno wejei wama tä möblaaö balöobä, ö̦jö lä. ⁷ Wama tä möblaaö fa balöonö, cama ebä lä nocamabono wei bä lä cui, wama bä yömölajalayobä, Pedro a ca̦i showawä. Calilea jamö a dablaö co̦obeje a nia balöfälöö. A nia dablaö co̦oje, bä nowa lä tano weinaja showawä —e cuma. ⁸ Maa maca jamö bä faa fa co̦bofälönö, bä quilili docua showalayofälöma. Bä nö quilili bleaama cudeenö bä blösö blösömoma. Bä quilii fe balojooma yalo, moli a ma cui nija tä a̦ wäyäö bädaonomije. ⁹ ¿Ö̦jö tawä? Domingo tä mö jalu cublou däjä, Jesús a demi jocäblou co̦o fenalayoma. Madalateliyoma a María lä cui nija a damoa balölaliyoma, ebä fecula 7 lä yashublaleno wei a suwä lä cui nija. ¹⁰ Ö̦jö däjä, Jesúsnö bä lä nocamabono wei bä lä cui bä bluca ö̦cöö däjä, María a waloa co̦beyoluma. A waloa fa co̦boyonö tä a̦ wäyäö showadaojoloma. ¹¹ Ö̦jö ma cui, a wa̦fa demi tama ma cui, a lä dalaleno wei a wa̦fa ca̦i wäyäma ma cui, a wa̦ bejedi bufinomije. ¹² Inaja a cublou waiquilayono wei ja, shomi jamö cama ai ecöbö jufälöbä jamö, jai shomi a damoa cua majölaliyoma. ¹³ Ö̦jö cäcöbö mö yabadou co̦a fa showadalofälönö, cama ebä yömölaböö ma co̦oyoluno wei ma cui, “Ei bejedi lä cäcöbö a̦”, bä bufi ca̦i cunomi co̦wä. ¹⁴ Ö̦jö tä cublou fa balölonö, bä iyabä jamö, cama 11 ebä nija a damoa co̦a majölaleyoluma. A demi jocädou lä möno wejei, bä a̦ bejedi bufinomije yalo, bä a̦fa dobloimi tayoluma. Bä bufi a̦fa ca̦i jifuwä tama. ¹⁵ Abinaja bä nowa tama. —Bä bälöblawä lä jödödöblai bä nijamö wamacö juu fa cuaafälönö, jödödöwä bä lä cublai bä nija iba dodijidawä tä a̦ wäyäö da cuaaje. ¹⁶ Wale a̦ bejedi lä bufii wejei bä lä cui, bä fe fa ojoblamolunö, bä jucäamou wä. Ö̦jö ma cui, wale a̦ bejedi bufii lä mlajei bä waimamobä cäbä. ¹⁷ Wale a̦ bejedi lä bufii wejei bä lä cuinö, tä nö lä quilijii tä nia wawämaö cuaaöje, Yai Bada a mayo lojode dablabeje. Fecula bä nia ca̦i yashuuje. Shomi bä caficö a̦ ma cui ja, bä a̦ ca̦i nia faö. ¹⁸ Olu bä ma däablaö wejei ma cui, toubä lä wayu wei toubä ca̦i ma coaö wejei ma cui, bä nia shominajabloimi. Täbä lä jaliliaö wei bä nija bä imicö fa maqueonö, bä nia jalomaö cuaaöje —bä nowa tama. ¹⁹ Ö̦jö däjä, Bada tä Jesúsnö bä yömölaa jödödöa fa balölönö, fedu jamö a co̦molayoma. Yai Bada boco jayu mashi jamö, a döcäaledayoma. ²⁰ Ö̦jö däjä, cama ebä fa alufälönö, jödödöwä täbä lä bälöblai bä nijamö bä yömölaö blaucou cuaamaje. Bä yömölaöje däjä bä a̦ nö bejedi ö̦jöböamobä, Bada tänö bä ca̦i bayeliblaö cuaama, tä nö lä quilijii tä wawämaö cuaabeje. Inaja lä tä yai cuoma.