San Mateo

San Mateo

¹ Jesucristo a yanowamöblou showao mlao däjä, bada ebä cuo lä balöono wei, ei lä tä a̦. Jesucristo a lä cui, David e li nodiwä cuoma, Ablaamö nodiwä e ca̦i. ² Ablaamö bä ijilubö, Isaacö e cuoma. Isaacö bä ijilubö, Jacobo e cuoma. Jacobo bä ijilubö, Judawä ebä mashi ca̦i cuoma. ³ Judawä bä ijilubö, Fale e cuoma, Sala e ca̦i, Damala nija cäcöbö lä taqueno wei cäcöbö lä cui. Fale bä ijilubö, Esomo e cuoma. Esomo bä ijilubö, Alamö e cuoma. ⁴ Alamö bä ijilubö, Aminadaba e cuoma. Aminadaba bä ijilubö, Naasono e cuoma. Naasono bä ijilubö, Samono e cuoma. ⁵ Samono bä ijilubö, Booso e cuoma, Laaba nija a lä taqueno wei a lä cui. Booso bä ijilubö, Obede e cuoma, Ludi nija a lä taqueno wei a lä cui. Obede bä ijilubö, Isai e cuoma. ⁶ Isai bä ijilubö, David e cuoma, a bada bälöo lä dodijiono wei a lä cui. David bä ijilubö, Salomo e cuoma, Ulia bä suwäbö e nija a lä taqueno wei a lä cui. ⁷ Salomo bä ijilubö, Loboama e cuoma. Loboama bä ijilubö, Abiasi e cuoma. Abiasi bä ijilubö, Asa e cuoma. ⁸ Asa bä ijilubö, Josafada e cuoma. Josafada bä ijilubö, Jolamö e cuoma. Jolamö bä ijilubö, Usia e cuoma. ⁹ Usia bä ijilubö, Jodamö e cuoma. Jodamö bä ijilubö, Acasa e cuoma. Acasa bä ijilubö, Esequia e cuoma. ¹⁰ Esequia bä ijilubö, Manasesi e cuoma. Manasesi bä ijilubö, Amono e cuoma. Amono bä ijilubö, Josia e cuoma. ¹¹ Josia bä ijilubö, Jeconia ebä ca̦i mashi cuoma. Babilonia jamö bä ca̦i jubeje, Isaeli ebä lä däalalefälöno wejei däjä, ö̦jö bä li bälöo balöoma. ¹² Babilonia jamö bä ca̦i jubeje, Isaeli ebä däa waiquialalefälöno wejei ja, ei bä lä cui bä bälöo nodiablalou juoma. Jeconia bä ijilubö, Saladiele e cuoma. Saladiele bä ijilubö, Solobabele e cuoma. ¹³ Solobabele bä ijilubö, Abiudu e cuoma. Abiudu bä ijilubö, Eliaquimi e cuoma. Eliaquimi bä ijilubö, Asolo e cuoma. ¹⁴ Asolo bä ijilubö, Sadocu e cuoma. Sadocu bä ijilubö, Aquimi e cuoma. Aquimi bä ijilubö, Eliudu e cuoma. ¹⁵ Eliudu bä ijilubö, Eleasala e cuoma. Eleasala bä ijilubö, Madana e cuoma. Madana bä ijilubö, Jacobo e cuoma. ¹⁶ Jacobo bä ijilubö, José e cuoma. Ö̦jö a José bä suwäbö e nija, Jesús a oshe wawäblaliyoma, Cristo a wa̦fa lä jilabou wejei a lä cui. ¹⁷ ¿Ö̦jö tawä? Ablaamö nodiwä bä bälöablalou fa cuaanö, cuaanö, cuaanö, ya̦cumö David a bälöo nodioma. Ö̦jö däjä, David nodiwä ebä bälöablalou cuaaö fa nomöjöofälönö, ya̦cumö Jeconia a bälöo nodio nomöjöoma. Ö̦jö a lä bälöono wei däjä, Babilonia jamö bä ca̦i jubeje, wayu bänö Isaeli ebä däalalefälömaje. Ö̦jö bä bälöablalou nomöjöo fa cuaanö, cuaanö, ya̦cumö Cristo a oshe wawäa nomöjöa nodilayoma, Yai Bada tänö a shömabä a lä yaileno wei a lä cui. ¹⁸ Jesucristo a oshe lä wawäblaliyono wei däjä, abinaja tä cublaliyoma. Bä nöö María e lä cui, Josénö a wa̦fa boma ma cui, a quilii showao däjä, Yai Bada a Bufi lojodenö, a shöbönabölayoma. A shöbönabö fa damolalunö, ¹⁹ bä fe̦yalobö Josénö a nia däanomi majöwä. ¿Ö̦jö tawä? José showadi a dodijama. A nö quilili bleaamaö bufionomi. Ö̦jö cudeenö, a wa̦ lafujou mlai ja, mamicai a nia daaö bädaoma. ²⁰ Ö̦jö ma cui, a nia lä joyaö wei tä ja, a bufi dayäo showao däjä, Bada etä a̦jele majali damolaliyoma. José abinaja a nowa majali tama. —David nodiwä José wa e lä cuinö, suwäböfä María a däaö quilii dicoo dijä. Bä ijilubö e lä didibole, Yai Bada tä Bufinö a li fa dobälönö, a li shöbönabö. ²¹ Ijilu wa̦lo a nia tablaö. Cama ebä lä cui, bä doblou ma mlai ma cui, etä nowa nia mladamaö. ¿Ö̦jö tawä? Etä nowa nia mladamaö cudeenö, Jesús wa wa̦fa nia jilaö —a nowa majali tama. ²² Yai Bada a wa̦no wäyälewä a nija, Bada tä jaba cuu lä balöono wei etä a̦ bejedi wawäblobä, inaja tä bluca cublaliyoma. Abinaja Yai Bada tä a̦ cuu balöo showaoma. ²³ Moco a jubamou dao lä mlai, a nia shibönabölayou. Bä ijilubö e nia tablaö. Emawele e a̦fa nia jilabouje. Einaja tä a̦ cuu. ¿Ö̦jö tawä? “Emawele”, bä cuu ja, “Yai Bada tänö bämalecö ca̦i cua”, bei bä cuu. ²⁴ Ö̦jö däjä, José a jocäblou fa fenalonö, bä suwäbö e nacaa fenalema, Bada etä a̦jelenö a nowa lä tano weinaja showawä. ²⁵ Ö̦jö ma cui, Maríanö bä ijilubö e tablaö showao mlao däjä, a jubaö mlai ja a tabou balöoma. ¿Ö̦jö tawä? Bä ijilubö e fa tablalönö, Josénö a wa̦fa Jesús jilaquema.

¹ Judea tä ulifi jamö, Lomateli bänö Elode a bada lä lämabono wejei däjä, Belena jamö Jesús a oshe cublaliyoma. A oshe cublaliyono wei ja, motoca a lä faö wei jamö bä lä bälöono wei, ai bä bufi daolewä waloqueyoluma. Tä nia lä cublou wei tä daö showadaobeje, shidicali bä shino mödimaje. Jelusale jamö ö̦jö bä fa yafilionö, abinaja bä cuma. ² —Judio bä nija a Bada läobä a oshe nofi da wawäblalui, ¿wedi jamö bei a? Shidicali a ja, yama a mayo dalalema, motoca a lä faimaö wei jamö. Ö̦jö nija yamacö möfe bolanö, yama a wa̦fa Bada doblao tabä yamacö juma —bä cuma. ³ Ö̦jö bä a̦ fa ji̦lilänö, bada tä Elode lä cui, a bufi shifilimou showadaoma. Jelusaleteli bluca bä ma cui, bä bufi ca̦i shifilimoa mö fedulayoma. ⁴ Elode a lä cuinö täbä bada yododoblamaö showadalayoma. Nofi bäyäalewä blowäjäwä bä ma cui, Moisesi tä a̦ ja täbä lä damaö wejei bä ma cui, ö̦jö bä fa co̦camomalönö, bä wa̦lii cadidioma. Abinaja a cuma. —Yai Bada tänö a shömabä a lä yaileno wei a lä cui, ¿wedi jamö bei a oshe nia jo̦wa li cubloma? —a cuma. ⁵ Abinaja a nowa taö mö feduomaje. —Judea tä ulifi jamö, a oshe nia jo̦wa wawäbloma, Belenateli bä shabonobö jamö. Inaja Yai Bada a wa̦no wäyälewä ai a cuu balöo showaoma. Abinaja tä a̦ cuu. ⁶ Judawä ebä ulifibö jamö, Belenateli wamacö lä bälöle, wamacö nofi yai tabobeje wamacö. Judawä ai ebä bada cublawä bäwä ma cui, iba Isaeli ebä nija a Bada nia yai lä läo wei, cafä Belenateli wamacö nija ya nia wawäblamaö. ’Einaja tä a̦ cuu —Elode a nowa tamaje. ⁷ Ö̦jö däjä, Elode a lä cuinö, bufi daolewä bä nacaa co̦a fa ja̦tolänö, shidicali a wa̦lima. —¿Wedi tä dodijiwä däjä, bei e li shidicali wawäblaliyoma? —a cuma. Ö̦jö bä a̦ fa ji̦lilänö, a ijilu lä badaö wei etä dalalema. ⁸ Ö̦jö däjä, Belena jamö bä shömalanö, abinaja a jole cuma. —Belena jamö bä aa da showadaalu. Ijilu wama a fa dayäblalönö, wama a dalalei yalo wamale yömölaa mö yabaa co̦liyo. ¿Ö̦jö tawä? Wamale yömölalei ja, camiyänö ya ca̦i möö nomöjöobä. Ö̦jö nija ya möfe bolanö, camiyänö ya wa̦fa Bada ca̦i doblao taö mö feduobä —a jole cuma. ⁹ Bufi daolewä bänö bada a wa̦ fa ji̦liläjenö, bä alayoma. Motoca a lä faö wei jamö a shidicali jaba lä möno wejei a lä cui, a balöaö co̦ofälöma. Ijilu a ca̦i lä cuböono wei a yafi fedubö jamö, a yanöcöbalejelayoma. ¹⁰ ¿Ö̦jö tawä? Shidicali a lä dalaleno wejei däjä, ¡bejedi lä bä bufi yai doblalou fe balojooma! ¹¹ Ö̦jamö bä fa co̦blalunö, Maríanö bä ijilubö e ca̦i cuobä jamö, a ijilu dalalemaje. A fa dalalöjenö, mashita jamö bä möfe fa boolalunö, a wa̦fa Bada doblao tamaje. Ö̦jö däjä, bä ca̦i madofibö lä juno wejei, bä fa wawämalalöjenö, a dobämaje. Olo bä ma cui ja, täbä wa̦queshi ni cle̦deli lä u̦cucamamou wei täbä ma cui ja, fii defibä shuu nö lä cle̦deli wei defibä ca̦i shuu ma cui ja, ö̦jö täbä bluca ja, a dobämaje. ¹² Bada tä Elode nijamö bä jayuaö co̦ofälöö mlaobä, majali tänö bä fa wasölönö, shomi yo jamö bä co̦a yacläa co̦layofälöma. ¹³ Ö̦jö bufi daolewä bä co̦layono wei ja, Yai Bada tänö a̦jele e shömöa jälema. José nija a majali fa wawälönö, abinaja e majali cuyoluma. —A da jocäblalu. Ejido jamö suwäböfä sho, ijilu wafä a ca̦i docufälöbä. Bäfä nacaö showao mlao däjä, ö̦jamö lä wamacö yanöcöo cudio balöobä. Bada tä Elode lä cuinö, fei däjä ijilu a nia jädäaö, a nia fa shänö —e majali cuma. ¹⁴ Ö̦jö tä mö didi showawä ja, a la̦a fa showadaalunö, Ejido jamö bä suwäbö e sho, ijilu a ca̦i docua fe jalua showalayofälöma. ¹⁵ Bada tä Elode a nomaö showao mlao däjä, ö̦jamö lä bä cudio balöoma. ¿Ö̦jö tawä? Yai Bada a wa̦no wäyälewä nija, Bada a lä cuno wei tä a̦ bejedi cublobä, ö̦jö tä li cublaliyoma. Abinaja tä a̦ cuu. Ejido jamö, Ijiluyä a faö co̦ofälöbä, ya nacalema. Einaja tä a̦ cuu. ¹⁶ ¿Ö̦jö tawä? Bufi daolewä bänö bada tä Elode a mölamalemaje yalo, a nö bada wa̦lowä jushudou fe balojoa jälayoma. A nö wa̦lowä jushudou fa dodijilonö, Belenateli bä shabonobö jamö ma cui, ö̦jamö bä bälöa fe lä fa̦yoono wei bä nijamö ma cui, ijilu wa̦lo bä bluca shäa showadaamalalema, lasha bolacabö a famaö showaa lä mlajei bä lä cui. Bufi daolewä bä wa̦lii malä waiquiono wei. “Ei tä lä cui däjä, inaja ijilu a bada cua waiquile dao”, a bufi cuma yalo, ö̦jö bä nabä bluca shömöquema. Ijilu bä bluca shäbeje jamö, bada a nia yai lä läo wei a ca̦i ijilu shämou coyocoo showadaobä. ¹⁷ Ijilu bä bluca lä shämaleno wei tänö, Yai Bada a wa̦no wäyälewä Jelemia a lä cuno wei tä a̦ bejedi cublaliyoma. Abinaja tä a̦ cuu. ¹⁸ Lamaa tä ulifi jamö, bä a̦ nö dedeblaloma. Bä ö̦cöma. Bä a̦ nacli ji̦lioma. Laquela nodiwä ebä suwä lä cuinö, bä ijilubö ebä nomöa bomaje. Ebä cuonomi waiquiwä cudeenö, bä bufi nia lojodomabou lä co̦ono wejei bä nija bä noshi umlaoma. Einaja tä a̦ cuu. ¹⁹ Ö̦jö ma cui, bada tä Elode a nomalayono wei ja, Ejido jamö Bada tänö a̦jele e shömöa fa co̦lunö, José nija a majali wawäa co̦malema. Abinaja e majali cuma. ²⁰ —A da jocäblalu. Isaeli ebä ulifibö jamö suwäböfä sho, ijilufä wafä a ca̦i co̦jamöö co̦obä. Ijilu a shäö bufi lä doblaono wejei bä lä cui, bä nomaa waiquilaliyoma —e majali cuma. ²¹ Ö̦jö däjä, José a fa jocäblalunö, Isaeli ebä ulifibö jamö, bä suwäbö sho, bä ijilubö a ca̦i co̦a co̦layofälöma. ²² Ö̦jö ma cui, Judea jamö, Elode bä ijilubö Aquelao e a̦ bada läo juo fa ji̦lilänö, ö̦jamö José a juu quilima. Ö̦jö däjä a majali wasömamou fa co̦onö, Calilea jamö bä aa yacläa majölayofälöma. ²³ Nasale tä a̦fa shabono lä jilaö wejei jamö, bä yai bälöaliyoma. Inaja Yai Bada tänö bä taamama, cama a wa̦no wäyälewä bä lä cuno wei tä a̦ bejedi cublobä. Yai Bada tänö a shömabä a lä yaileno wei a lä cui, ö̦jö a wa̦fa wäyämamou ja abinaja tä a̦ cuu. Nasaleteli a wa̦fa nia jilabouje. Einaja tä a̦ cuu.

¹ Bei. Jesús a bälöo waiquio däjä, Judea tä ulifi bloque jamö fe ojomalewä Juan a wawälayoma. Ö̦jamö lä a fa wawälönö, täbä yömölama. Abinaja bä nowa tama. ² —Wa̦lidiwä tä ja, ¡bä bufi da lädalu! Yai Bada tänö cama ebä ca̦i nia lä cuo wei tä ajedou waiquia lä cuimi —bä nowa tama. ³ ¿Ö̦jö tawä? Juan a cuo showao mlao däjä, Yai Bada a wa̦no wäyälewä Isaia a lä cuinö, yedu jamö a wa̦fa wäyäö balöo showaoma. Abinaja tä a̦ cuu. Ulifi bloque jamö bä yömölaö ja, a wa̦ nia lojodoaö. “¡Bada tä juu lä cuimi!”, a nia cuu. Abinaja bä nowa nia taö, a wa̦ Bada ji̦liaö cadidio showadaobeje. “A nia lä juu wei jamö, bei wama e yo wawämaö fa cuaaimadunö, e yo shaliliblaö da balöloje”, bä nowa nia taö. Einaja tä a̦ cuu, Juan a wa̦fa wäyäö lä balöono wei tä a̦ lä cui. ⁴ Juan a lä cui, yalo cameyo co̦icö ja a didioma. Yalo si ca̦i acadafu ya̦boma. Cösö cösöma bä waama, buu ubä ca̦i. ⁵ Ö̦jö däjä, Juan nija Jelusaleteli bä bluca walobaleyoluma, Judea jamö bä bluca lä bälöblai bä ca̦i. Jodana u sibo jamö bä lä bälöjömono wei bä ca̦i. ⁶ Bä doblono lä mlai tä ja bä a̦ nö wäolanö, Jodana u jamö cama nija bä fe ojoblamolayoma. ⁷ Faliseo bä bada ma cui, ö̦jö bä fe ca̦i nia fa ojoblamonö bä walobaleyoluma. Saduseo bä bada ca̦i. Juannö ö̦jö bä bluca fa dalalönö, bä a̦fa taö ja abinaja bä nowa tama. —¡Olu bä wayu lä culenaja wamacö lä cui! Wamacö jolemou. Wamacö fe ojoblamou lä buo wei tänö, ¿wamacö nia nowamamou daanö? Ma, Yai Bada a ishou däjä, wamacö nia nowamamoimi. ⁸ Wamacö bufi lädou dablamobä, bä bejedimou da wawädoo, ö̦jö lä. ⁹ “Ablaamö nodiwä yama ecö li cudeenö, yamacö doblou fe yadio weicätä”, bä bufi ca̦i cuu dicoo dijä. Ö̦jö tä nowa cuami. Bämacö nowa malä tale. Yai Bada tänö Ablaamö ebä nodiwä tabou bufi doblao fa cunoja, fei maa mabä ma cui ja, bä nö tablamalebö wei. ¹⁰ ¿Ö̦jö tawä? ¿Yai Bada a nia ishoimi daanö? Fii fibä nasöcö jamö a fa̦yocola yalejebou waiquia lä cule. Ö̦jö cudeenö, nii dodijiwä bä lalou lä mlai fibä nia diyämamou. Cowa wacö jamö fibä nia shäyäblamou —Juannö bä nowa tama. ¹¹ Abinaja Juan a cuma. —Camiyänö bämacö fe ojoblaö däjä, mau u ja bämacö jödödöblamaö, wa̦lidiwä tä ja wamacö bufi lädou dablamobä. Inaja camiyä ya cuaaö ma balöo wei ma cui, camiyä ya nodi jamö, a nö yai lä wa̦lojaö wei a nia waloo nomöjöoyoluu. Ö̦jö a shino yai doblaa ayaa cudeenö, ya bayeliblaö bädaobä tä ma cui ja, ya nö quilibö wei. Bei mamicö lä didio wei ecö bädawä ma cui, ya etäbä nö yefibou quilibö wei. Ö̦jö a lä cuinö, bejedi lä wamacö nia yai jödödöblaö. Mau unö mlai, Yai Bada a Bufinö wamacö nia jödödöblaö. Cowa wacönö täbä ca̦i nia jödödöblaö. ¹² ’¿Ö̦jö tawä? —a cuma—. Nii bä tamou däjä, mobä yaiblamou lä culenaja a nia cuaaö. Mobä fa yaiblalöjenö, tä ulifi aublaö co̦oje. ¿Ö̦jö tawä? Shode walalawä fe ca̦i bada juu waiquia lä cuimi, tesibä fa joyalönö mobä feiblamabä. Mobä nia lä cuo wei jamö, mobä taablabä. Ö̦jö ma cui, cowa wacö ludalou dao lä mlai jamö, bei tesibä nia yablaö —Juan a cuma. ¹³ Ö̦jö däjä, Calilea tä ulifi jamö a culanö, Jodana u jamö Jesús a walobaledayoma, Juan nija a fe ojoblamobä. ¹⁴ Ö̦jö ma cui, Juan a wa̦ lämou ja abinaja e cuma. —Shädayai. Cafä nija camiyä ya fe yai ojoblamobä ya ma cui, camiyä nija, ¿inaja bei wa li cuaaö cuboyoi? ¹⁵ Einaja Juan a ma cuno wei ma cui, abinaja Jesús e cuu mö feduoma. —Fei däjä, inaja lä tä yai cuo balöobä. Yai Bada tänö tä tamaö lä bufii wei bäfä tä bluca tabä bäfäcö malä cui —e cuma. Einaja e fa cunö, Juannö a wa̦ julema. ¹⁶ Jesús a fe fa ojoblamolunö, lobe a washölöblou co̦o däjä, judu mösö ca jolablalejelayoma. Mösö ca fa jolablalujulunö, Yai Bada a Bufi, jai joledo a cuwä, Jesúsnö a itou dalalema. Cama nija a loquema. ¹⁷ Ö̦jö däjä, fedu jamö tä a̦ fa bädaludunö, abinaja Yai Bada a cuma. —Ijiluyä ya nofimaö lä dodijile, miji a. Cama nija bejedi lä ya bufi yai doblalou dodijio —a cuma.

¹ Inaja tä cublou fa waiquilonö, ulifi bloque jamö Yai Bada a Bufinö Jesús a lululema, fecula bada nija a yabäcamobä. ² Ö̦jamö a iyaö wasöo showao däjä, 40 tä mö didi fa tablamalönö a ofäö dodijioma. ³ Ö̦jö däjä, yabäcalewä e waloqueyoluma, fecula bada a lä cui. Abinaja e cuma. —Yai Bada wa Ijilubö ja lä, ei maa mabä da nosiema, nii bä cublobä —e cuma. ⁴ Ö̦jö ma cui, abinaja Jesús e cuu mö feduoma. —Ma. Abinaja Yai Bada tä a̦ oni cuu. Nii bä ma waö wejei ma cui, ö̦jö tä bädawänö täbä nia demi cudiomi. Yai Bada tä lä cuu wei tä a̦ blucanö, täbä yai nia shino cudio. ’Einaja tä a̦ oni cuu —Jesús e cuma. ⁵ Ö̦jö däjä, Jelusale jamö, fecula bada anö Jesús a lulua taa majölefälöma, Yai Bada e shabono lä yaile jamö. Yai Bada etä yafi feyaca jamö a fa ublamabajalunö, ⁶ abinaja a nowa tama. —Bei. Yai Bada wa Ijilubö ja lä, a da quelufälö. Abinaja tä a̦ oni malä cuu wei. Cafä nija a̦jele etäbä nia läamaö. ’Einaja tä a̦ oni cuu. Abinaja ca̦i. Dodijidawä wa nia ya̦caaöje, maa mabä ja wa mamicö shäo mlaobä. ’Einaja tä a̦ cuu —fecula badanö a nowa tama. ⁷ Jesús abinaja e cuu nomöjöoma. —Abinaja tä a̦ ca̦i cuu. Cafä wamacö nija Yai Bada ya lä bufiblamou wei ya Bada lä cui, wamale bejedimou nia wabaimi. ’Einaja tä a̦ cuu —a Jesús cuma. ⁸ Ö̦jö däjä, tä jefu ösöwä lä dodijii jamö, fecula badanö Jesús a bälaquedayoma. Ö̦jamö cäcöbö culanö, Jesús nija, bita jamö täbä jödödöwä bälöblawä lä yaiblai täbä jömaö cuaama, täbä madofibö nowa lä bluca wei bä ca̦i. ⁹ Abinaja a nowa tama. —Camiyä ya cotä jamö wa möfe bolanö wale a̦fa bada doblao taö ja, ei täbä bluca lä cublai täbä ja, bäfä dobäö weicätä —a nowa tama. ¹⁰ Ö̦jö däjä, Jesús abinaja a cuu mö feduoma. —Bei, Sadanasi. ¡Shomi jamö a da culufälö! Abinaja tä a̦ oni cuu. Cafä wamacö nija Yai Bada ya lä bufiblamou wei ya. Wamacö möfe bolanö, camiyä Bada ya lä cui wamale a̦fa nia shino Bada doblao taö. Camiyä wamale a̦ nia shino yai juaö. ’Einaja tä a̦ cuu —a Jesús cuma. ¹¹ Ö̦jö däjä, fecula badanö a fa dacöfälönö, a̦jele bänö a bayeliblaö juoyolumaje. ¹² Bei. Juan a lä juwäleno wejei tä a̦ fa ji̦lilänö, Calilea jamö Jesús a aa majölayofälöma. ¹³ Nasaleteli bä shabonobö fa dacöfälönö, Cabenao jamö a bälöblaa majöquema, modu u casö jamö. Ö̦jamö lä, Sabulono ebä nodiwä bälöoma, Nefitali ebä ca̦i nodiwä. ¹⁴ ¿Ö̦jö tawä? Yai Bada a wa̦no wäyälewä Isaia a wa̦ bejedi cublobä, ö̦jamö lä a bälöa majöquema. Abinaja tä a̦ cuu. ¹⁵ Sabulono nodiwä ya ebä a̦fa ulifibö wäyäö lä cule, Nefitali nodiwä bä ca̦i lä bälöle jamö, modu u ja yo lä itobe jamö, Jodana ai u mashi jamö. Ö̦jö Calilea tä a̦fa ulifi lä jilabolajei jamö, judio bä lä mlai bä bälöjöwä. ¹⁶ Ö̦jamö lä bä lä bälöle bänö, bä bufi nia lä wacacao wei tä shi̦i bada dalalemaje. Tä mö dödöobä jamö bä ma cuono wei ma cui, bä nö bleaaö shi wa̦libä bä ca̦i ma cuono wei ma cui, ö̦jö bä nijamö tä shi̦i ca̦i co̦blaliyoma. Einaja tä a̦ cuu. ¹⁷ Ö̦jö lä däjä, Jesúsnö täbä jaba yömölaö cuaaö ja, abinaja bä nowa tama. —¡Fei däjä waiquiwä! ¡Wa̦lidiwä tä ja, bä bufi da lädalu! Yai Bada tänö cama ebä ca̦i nia lä cuo wei tä ajedou waiquia lä cuimi—bä nowa tama. ¹⁸ Modu Calilea u casö jamö Jesús a diquecou cuaafälölanö, Simón a dalalema, bä fääshä Andrés e ca̦i. Ö̦jö a Simón lä cui, Pedro a wa̦fa ca̦i cua. Yuli bä lä ya̦camou wei täcö walalawä queamaböö däjä, cäcöbö dalalema. ¿Ö̦jö tawä? Yuli ya̦calewä cäcöbö cuoma. ¹⁹ Abinaja Jesúsnö cäcöbö nowa tama. —Jabo. Cäcöbö da yauiquiyo. Yuli bä bädawä mlai, yanowamö wafä täbä nabä shino yai jubä, bäfäcö nia tablamaö —cäcöbö nowa tama. ²⁰ A wa̦ fa ji̦libölänö, täcö walalawä daböa fa showadacöfälönö, ö̦jö nijamö cäcöbö yaua showadalayoma. ²¹ Ö̦jö tä fe dolejedale ja, Sebedeo bä ijilubö Santiago e daa majölalema, bä fääshä Juan e ca̦i. Canawä a jamö, bä fö̦ö Sebedeo a lä cuinö cäcöbö ca̦i döcäcäoma. Bä befi ca̦i ca̦lanö, yuli bä lä ya̦camou wei täcö walalawä idudamaje. Cäcöbö fa dalalönö, cäcöbö nacalema. ²² Cäcöbö fa nacalänö, canawä a jamö bä fö̦ö Sebedeo e befi ca̦i daböa fa showadacöfälönö, cäcöbö yaua showalayofälöma. ²³ Calilea jamö Jesús a juu cuaalanö, judio bä yododabä yafi bä jamö, täbä yömölaö cuaama. Yai Badanö cama ebä ca̦i nia lä cuo wei tä a̦ dodijidawä wäyäö cuaafälöma. Bluca tä wayu shomitawänö täbä lä jaliliono wei, täbä bluca jalomaö cuaama. Täbä lä wa̦lidiono wei bä ca̦i. ²⁴ Inaja a cuaaö cudeenö, Silia jamö a wa̦fa ji̦liaö blaucou cuaamaje. A wa̦fa ji̦lilemaje yalo, bä jalili bluca ca̦i waloblaamaje. Bluca tä wayu shomitawänö täbä lä jaliliono wei bä ma cui, bä nö ninili lä bleaano wei bä ma cui, ö̦jö bä bluca jalomalalema. Bä lä feculaböono wei bä ma cui, bä ca̦i cofibö lä cashäshäoblono wei bä ma cui, bä lä ya̦toliböono wei bä ma cui, ö̦jö bä bluca ca̦i jaloa showamalalema. ²⁵ Ö̦jö däjä, Calilea jamö bä lä bälöle bä ma cui, Judea jamö bä lä bälöle bä ma cui, Jesús nija bluca dodijiwä bä yaulayofälöma. Decaboli jamö bä lä bälöle bä ma cui, Jelusale jamö bä lä bälöle bä ma cui, Jodana ai u mashi jamö bä lä bälöle bä ma cui, ö̦jö bä bluca ca̦i yaulayofälöma.

¹ Bluca täbä co̦camou fa dalalönö, jefu tä balöcö jamö Jesús a dolequebefälöma. Ö̦jamö lä a lä lole jamö, cama ebä lä nocamabono wei bä loo ajededou showalayoma. ² Bä yömölaö ja abinaja bä nowa tama. ³ —Yai Bada nija bä jömöo lä mlai bä lä cui, ö̦jö bä bufi yai doblalobä cäbä. Yai Bada tänö bä ca̦i malä cule. ⁴ ’Bä lä ö̦cöö wei bä lä cui, ö̦jö bä bufi yai doblalobä cäbä. Yai Bada tänö bä bufi nia lojodomabou fe malä yadio wei. ⁵ ’Bä bufi lä oquei bä lä cui, ö̦jö bä bufi yai doblalobä cäbä. Yai Bada tänö dodijidawä bä nia malä tabou wei, tä a̦ wäa lä taqueno weinaja showawä. ⁶ ’Yai Bada nija bä cadidou bufi lä doblao wei bä lä cui, ö̦jö bä bufi yai doblalobä cäbä. Yai Bada tänö bä bufi nia malä doblamabou wei. ⁷ ’Täbä nofi lä ojodabou wejei bä lä cui, ö̦jö bä bufi yai doblalobä cäbä. Yai Bada tänö cama bä nofi nia ca̦i ojodabou mö malä feduo wei. ⁸ ’Yai Bada nija täbä bufi mö yai lä blucao wei bä lä cui, ö̦jö bä bufi yai doblalobä cäbä. Wawädowä Yai Bada a nia malä dablaö wejei. ⁹ ’Täbä bufi lä yanöcömabou wejei bä lä cui, ö̦jö bä bufi yai doblalobä cäbä. Yai Bada ijilubö ebä a̦fa nia malä jilamou wei. ¹⁰ ’Täbä dodijaö yalo, bä nö lä bleaamamou wei bä lä cui, ö̦jö bä bufi yai doblalobä cäbä. Yai Bada tänö dodijidawä bä nia ca̦i malä bälöo wei, ¿ö̦jö tawä? ¹¹ ’Camiyä wamale bufii yalo, wamacö a̦fa ma lafumaöje däjä ma cui, wamacö bufi doblalobä wamacö. Wamacö nö ma bleaamaöje däjä ma cui, wa̦lidiwä tä bluca ja wamacö a̦fa jole ca̦i ma taö wejei ma cui, wamacö bufi doblalobä wamacö. ¹² Inaja wamacö taamaöje däjä, bä bufi shino da doblalo. ¡Bä bufi doblalou da dodijio! ¿Ö̦jö tawä? Fedu fedole jamö wamacö nia dobämou fe malä balojoo wei. Cama bä nö badabö ma cuinö, inaja showawä Yai Bada a wa̦no wäyälewä bä nö bleaamaö malä balöono wejei. Ö̦jö bä owäbou nodia dicoa lä culajei. ¹³ ’Bei —Jesús a cuma—. Cafä wamacö lä dodijaö wei tänö, jai sayu wamacö cuwä, wama täbä dodijidawä tamabobä. ¿Ö̦jö tawä? Ö̦jö ma cui, bä sayu oquediblou dicoo ja, bä nia mödadiblou lä co̦o wei etä cuami waiquiwä. Bä oquediwä waiquiwä yalo, bä nia bufiblamou co̦daaimi. Sibo jamö bä fa joyalöjenö, bä nia cadicaö buoje. ¿Ö̦jö tawä? Inaja wamacö cublou dicoo ja, wamacö nofi nia tamamoimi majöo. ¹⁴ Abinaja Jesús e cuma. —Bita jamö täbä bluca lä bälöblai wama täbä wacacamabobä wamacö shi̦i, Yai Bada nija bä cadidofälöbä. ¿Ö̦jö tawä? Jefu tä bololo jamö a shabono cuo ja, a nia jo̦yao malä mlai. Inaja showawä, iba wamacö nia wawädowä lä dablamou wei wamacö. ¹⁵ Cowa wacö ömöamaöje däjä, wöö anö wacö fe nia yojobou majöo malä mlajei. Ma, wacö i̦taobä jamö wacö nia yai i̦tabouje, yafi jamö bä lä cule bänö täbä dablabeje. ¹⁶ Inaja showawä, shi̦i wacacawä wamacö lä cui, wawädowä bä da damolalu. Wamacö dodijaö fa dalalöjenö, Faafä a lä culadi a wa̦fa doblao tabeje —a cuma. ¹⁷ Abinaja Jesús e cuma. —Moisesi ya etä a̦ joyamabä, ya walonomi. Yai Bada a wa̦no wäyälewä bänö tä a̦ jaba lä wäyäno wejei tä a̦ ma cui, ö̦jö ya tä a̦ ca̦i joyamaimi. Ma. Ya tä a̦ joyamaö mlai ja, ya tä a̦ nia shino yai fa wawämanö ya waloqueyoluma, ö̦jö tä a̦ ja wamacö bufi yai jaducublobä. ¹⁸ Cafä wamacö nija ei ya wa̦ lä cui, bejedi lä ya wa̦. Judu mösö ma cui, bita a ma cui, ö̦jö tä bluca cuo showao däjä, Moisesi tä a̦ oni nia joyamou balöomi. Moli tä mamo wai lä onile ma cui, tä nia oni joyamoimi. Moisesi etä a̦ lä cuu wei tä a̦ bejedi cublou showao mlao däjä, tä a̦ nia oni mladou bädaomi. ¹⁹ ’¿Ö̦jö tawä? —a cuma—. Moisesinö tä a̦ bluca lä wäyäno wei tä a̦ lä cui, wama tä a̦ bluca juabä tä a̦. Moisesi ai etä a̦ nofi tabou lä mlajei bä lä cuinö, ai bä nija tä a̦ ca̦i mashi juamaimi dicoweje ja, cama bä ma cui bä nofi nia ca̦i tamamoimi mö feduo. Yai Bada tänö cama ebä ca̦i cuobä jamö, ö̦jö bä nö nia ö̦jöböamaimi. Ö̦jö ma cui, Moisesi etä a̦ yai lä juaö wejei bä lä cuinö, ai bä nija tä a̦ ca̦i bluca juamaö mö feduoje ja, Yai Bada tänö ö̦jö bä nofi nia shino yai tabou ayao. Yai Bada tänö cama ebä ca̦i lä cuo wei jamö, wawädowä ö̦jö bä nö nia shino ö̦jöböamaö. ²⁰ ’Bämacö nowa taö malä waiquio wei —a cuma—. Moisesi tä a̦ ja täbä lä damaö wejei bä lä cui, yanowamö täbä nija bä nia cadidou fa dablamonö bä ma cuaablalou wei ma cui, bä jolemou. Yai Bada a bufi doblamaboimije. Faliseo bä bada ma cui, inaja showawä bä jolemou cuwä. Wamacö yai cadidou mlai ja, ö̦jö bä lä cuaaö weinaja wamacö cuaaö dicoo ja, Yai Bada tänö cama ebä ca̦i cuobä jamö wamacö nia cuomi waiquiwä —a cuma. ²¹ Jesúsnö tä a̦ wawämaö ja, abinaja a cuma. —Judio wamacö nö badabö nija tä a̦ jaba wäyämou lä balöono wei, wama tä a̦ daö waiquia. Abinaja Moisesinö bä nowa tama. Yanowamö wama täbä nia shäimi. Wama täbä shäö dicoo ja, bä dobloimi lä jömaö wejei bä bada lä cuinö wamacö nabä nia shömöaöje. ’Einaja bä nowa tama —a cuma—. ²² Ö̦jö ma cui, abinaja bämacö nowa taö lä cule. Aifä wa shäö ma mlai ma cui, wa nofi wa̦libou dicoo ja, wa nö bleaamabä wa waiquiwä. Aifä wa shäö ma mlai ma cui, ö̦jö nija wa jushudou dicoo ja, wa jömamobä wa waiquiwä. Wa nö waiblaö dicoo ja, bä dobloimi lä jömaö wejei bä bada nija wa ca̦i jubeje wa. ¿Ö̦jö tawä? “¡Wa bufi jaducäwämi nö lä beblalole!”, aifä wa nowa taö dicoo ja, cafä shobali wacö jamö wa jubä wa. ²³ ’¿Ö̦jö tawä? —Jesús a cuma—. Ö̦jö cudeenö abinaja ya cuu. Yai Bada wa dobäbä, yalo bä lä dodoblamou wei bä maqueblamobä täcö jamö wa icuolanö, aifä a lä cuinö, cafä nija tä nowa lä tabole tä ja wa bufi jaducublou yalo, abinaja wa nia cuaaö. ²⁴ Yalo bä lä dodoblamou täcö cotä jamö, Yai Bada nija wa tä nia lä dodobou wei wa tä nia blaaö balöo. Aifä a sho, dodijidawä wafäcö a̦ nia wayou co̦o balöodayou, cafä nija tä nowa lä cule tä nowa mladamabä. Ö̦jö däjä, yalo bä lä dodoblamou wei täcö jamö wa juu mö yabamou fa co̦imanö, afä wa tä lämabou mlai ja, Yai Bada wa tä nia shino yai dobäyoluu. ²⁵ ’Wa wa̦fa dobloimi nia lä wäyäö wei a lä cuinö, bada nijamö wa ca̦i juu showaofälöö däjä, lobe a nofia da co̦lä —Jesús a cuma—. Bada a nija wa juwäamaö fa dicoonö, wa nö bleaamaö mlaobä. ¿Ö̦jö tawä? Täbä fe lä lamaö wei a nija wa juwäa majöa fa dicoblamalänö, wa fe laamaö dicoo mlaobä. ²⁶ Cafä nija ei ya wa̦ lä cui, bejedi lä ya wa̦. Tä nowa lä cule, wa tä nowa bluca co̦amaö showao mlao däjä, wa nia famaö co̦o buomije —a cuma. ²⁷ Abinaja Jesús a cuma. —Tä a̦ jaba wäyämou lä balöono wei, wama tä a̦ daö waiquiwä. Abinaja Moisesinö bä nowa tama. Wamacö nia joleblaloimi. ’Einaja bä nowa tama —a cuma—. ²⁸ Ö̦jö ma cui, abinaja bämacö nowa taö lä cule. Suwä bä nijamö täbä mamo beshili lä showablalou wei bä lä cui, bei bä bufi jamö bä joleblalou waiquia lä cule. ²⁹ ¿Ö̦jö tawä? Wamacö noshi umlaobä wamacö. Jayu wa boco jamö wa mamo lä cuinö wa wa̦lidiaamaö dicoo ja, wa mamo fa ucäblamolunö mamo da joyamolu, ö̦jo lä. Wa lä bayucui wa ma joyamolayou wei ma cui, inaja buo. Shobali wacö jamö wa mamocu befi ca̦i demi shäyäblamou dicoo ja, bei wa nö shino bleaaö yaiquei. ³⁰ Jayu wa boco jamö wa imicö lä cuinö, ö̦jönö wa wa̦lidiaamaö dicoo ja, inaja showawä. Wa imicö fa bäblamolunö imicö da joyamolu, ö̦jö lä. Wa lä bayucui wa ma joyamolayou wei ma cui, inaja buo. Shobali wacö jamö wa imicö befi ca̦i demi juu dicoo ja, bei wa nö shino bleaaö yaiquei. ³¹ ’¿Ö̦jö tawä? —Jesús a cuma—. Abinaja täbä nowa ca̦i jaba taö balöomaje. Bä suwäbö bä joyaö cadidiobeje, bä fe̦yalobö bä lä cuinö tä a̦ oni fa tablajenö, bä suwäbö bä nija tä a̦ oni nia jöböaöje, etä a̦ ca̦i oni shömamou co̦obä. ’Einaja bä nowa jaba ma tano wejei ma cui, ³² abinaja bämacö nowa taö lä cule —a cuma—. Bä suwäbö a nofi beshili jushuaö ma mlai ma cui a joyaö dicoo ja, a doblamaimi. Shinoco a nö cuo majöobimi ja, ai a wa̦lo ja a yabäcäo lä majöle, bä fe̦yalobö e li mayo. Inaja showawä, ai a wa̦lo lä cuinö, suwä joyano a däaö majöo ja, ö̦jö a ca̦i dobloimi mö feduwä. “Bä fe̦yalobö enö a malä joyaleno wei”, a bufi cuu ma bäle ma cui, inaja Yai Bada a bufi cuu mlaicätä. Ma. “A lä joleblalou wei a”, Yai Badanö ö̦jö a nofi tabou. ³³ ’Abinaja ca̦i —Jesús a cuma—. Tä a̦ jaba wäyämou lä balöono wei, wama tä a̦ daö waiquiwä. Yai Bada nija wama tä a̦ lä wäaö wei tä a̦ ja, wamacö nia jolemoimi. Bada tä nija wamacö a̦ nö lä wäo weinaja, wamacö nia cuaaö shalilio showao. ³⁴ ’Einaja bä nowa jaba ma tano wejei ma cui,abinaja camiyänö bämacö nowa taö lä cule —a cuma—. Wamacö bejedimou dablamobä, Yai Bada a wa̦fa jayumaö buo dijejä. “Ya jolemoimi, Yai Bada a malä cule”, wamacö nia cuimi. Judu mösö ma cui, wama mösö a̦fa nia jayumaö buomi. Ö̦jamö Yai Bada a malä läladi. ³⁵ Wamacö nia bejedimou fa dablamonö, bita a ma cui a wa̦fa ca̦i jayuma dijejä. Jai Yai Bada mamicö maquedalobä, a bita cuwä malä cui. Jelusale a wa̦fa shabono ca̦i jayuma dijejä. Bada tä yai lä cui, ö̦jamö a nia lä bälödalou wei a shabono malä cui. ³⁶ Bei wamacö fe ma cui, wamacö bejedimou dablamobä, bä fe a̦fa jayumamou bädao dijä. Wamacö fe lä au wei tä ma cui, wamacö fe lä ushujui tä ma cui, cafä wamacö lojodenö wamacö fe tablamobä wamacö malä mlai. ³⁷ ¿Ö̦jö tawä? “Awei”, wamacö nia lä cuu wei, bä a̦ nö bejediaö da showadao. “Ma”, wamacö nia lä cuu wei, inaja showawä. Wamacö bejedimou dablamobä, ai wama tä a̦fa jayumaö lä bashiblao wei tä lä cui, ö̦jö fecula bada bei mayo li waiquiwä, a yai lä wa̦lidii a lä cui —Jesús a cuma. ³⁸ Abinaja Jesús a cuma. —Ei tä a̦ jaba wäyämou lä balöono wei, wama tä a̦ daö waiquiwä. Ai mamo wa̦liaö lä dicoo wei a lä cui, inaja showawä, cama mamo ca̦i nia tablamamou mö feduo. Ai nacö wa̦liaö ja, cama nacö ca̦i nia wa̦liamamou mö feduo. ’Einaja bä nowa jaba ma tano wejei ma cui, ³⁹ abinaja bämacö nowa taö lä cule —a cuma—. Wa̦lidiwä talewänö wa taamaö bädao ja, a nö yuo dijä. Jayu wa boco jamö wa mamoca lä cui, wa mamoca baiaö ja, wa nö yuo mlai ja, ai mamoca mashi lädou da co̦lo. ⁴⁰ Inaja showawä, wa cö lä feyacabole cäcö nia jöböamaö fa bufinö, bada bä nija ai a wa̦ nö wäo ja, cäcö noshi umabo dijä. Wa cö lä u̦eshibole cäcö ma cui, cäcö ca̦i jöböa yädäa da showadacö. ⁴¹ Ai a bada lä cui, cafä nija a madofibö yefimamou fe yadio ja, a madofibö blajamamou bufio lä culenaja mlai, wa ebä ca̦i madofi yefibou showale, wa ebä ca̦i blajaaö cuaaö fe yadiofälöbä. ⁴² Cafä nija a lä nacou wei a lä cui, a da dobälö. Täbä majöbou bufi lä doblao wei a lä cui nija täbä noshi umabo dijä —Jesús a cuma. ⁴³ Abinaja Jesús a cuma. —Ei tä a̦ jaba wäyämou lä balöono wei, wama tä a̦ daö waiquiwä. Aifä wama bä nia nofimaö. Wamacö nofi lä wa̦libou wejei bä lä cui, ö̦jö wama bä nofi nia ca̦i wa̦libou mö feduo. ⁴⁴ ’Einaja bä jaba ma cuno wei ma cui, abinaja bämacö nowa taö lä cule —a cuma—. Wamacö nofi lä wa̦libou wejei bä ma cui, bä da nofimaje. Wamacö nö lä bleaamaö wejei bä ma cui, Yai Bada nija bä nö bayeli da nacaje, ⁴⁵ Faafä a lä culadi wama a yai owäbobä. ¿Ö̦jö tawä? Wa̦lidiwä talewä bä ma cui, dodijidawä tä jamö bä lä cuo wei bä ma cui, motoca shi̦inö ö̦jö bä bluca wacacamabou fe usucuwä malä cui. Täbä lä dodijaö wei täbä nijamö ma cui, täbä dodijaö lä mlai täbä nijamö ma cui, maa a malä shömaö wei. ⁴⁶ ’Cafä wamacö lä nofimaö wejei, wama bä nofimaö mö feduo yalo, ¿Yai Bada tänö wamacö nia dobädayou daanö? —a cuma—. Ma. Lomateli bada bä befi bä blada lä doaö wejei bä ma cuinö, cama bä lä nofimaö wejei, showadi bä nofimaö mö malä feduo wejei. ⁴⁷ Afä wama bä nofimaö mö bao yalo, “Camiyä yamacö shino dodijaö ayao”, ¿wamacö bufi nia cuu daanö? Ma. Showadi täbä taamayou lä buo weinaja, wamacö cuaaö bädao malä cui. Yai Bada a daö lä mlajei bä ma cui, inaja täbä ca̦i cuaaö talei. ⁴⁸ Ma. Faafä a lä culadi a doblaa lä culenaja, wamacö cuo mö feduobä wama ecö.

¹ ’Bä da moyaweicu —Jesús a cuma—. Yai Bada tänö tä tamaö lä bufii wei wama tä taö däjä, yanowamö täbä nija wamacö dodijidawä mömobä wama tä nia taimi. Inaja wamacö cuaaö dicoo ja, Faafä Yai Bada a lä culadi nija wamacö nia dobämamoimi. ² ’¿Ö̦jö tawä? —a cuma—. Bä lä jo̦li wei wama bä dobäö däjä, wamacö jömöo mlalanö bä da bayeliblaje, bä jole jole lä dodijaö wei bä lä cuaaö weinaja mlai ja. Judio bä yododabä yafi bä jamö ma cui, sibo jamö bä bluca lä juaaö wei jamö ma cui, ö̦jö bä shi öjöde dablamou bufi doblao talei, yanowamö täbä nija bä nofi doablamobä. Inaja bä cuaaö lä dicoo wei bä lä cui, Yai Bada nija bä nia dobämoimi. Yanowamö täbä nija bä nofi doablamobä, ö̦jö cama etä li waiquiwä. ³ Bä lä jo̦li wei wama bä dobäö däjä, ai wama bä mojodumabolanö bä yai da dobäje. ⁴ Wama bä bayeliblaö ma ja̦too wei ma cui, Faafä a lä culadinö wamacö daö weicätä, wamacö dobäö mö feduodayobä —a cuma. ⁵ Abinaja Jesús a cuma. —Wa nö bayeli nacao däjä, bä jole jole lä dodijaö wei bä lä cuaaö weinaja, a cuaa dijä. Judio bä yododabä yafi bä jamö ma cui, sibo jamö bä bluca lä juaaö wei jamö ma cui, ö̦jö bä lä cui, Yai Bada nija wawädowä bä a̦ shino faö bufi doblao talei, yanowamö täbä nija bä nia dodijaö fa dablamonö. Cafä nija ei ya wa̦ lä cui, bejedi lä ya wa̦. Inaja bä lä cuaaö wei bä lä cui, Yai Bada nija bä nia dobämoimi. Yanowamö täbä nija bä dodijaö dablamobä, ö̦jö cama etä li waiquiwä. ⁶ Ma, Yai Bada nija wa nö bayeli nacao bufio ja, afä yano jamö wa fa lucälönö, wa yoca fa lacönö, Faafä nija a wa̦ faö da ja̦too. Wa wa̦ faö ma ja̦too wei ma cui, Faafä a lä culadinö wa wa̦ ji̦liaö fe yadio wä, wa dobäbä. ⁷ ’Abinaja ca̦i —Jesúsnö bä nowa tama—. Yai Bada nija wamacö nö bayeli nacao ja, Yai Bada a daö lä mlajei bä lä cuaaö weinaja, bä cuaa dijä. Ö̦jö bä lä cui, bä aca jayuaö buo talei. “Inaja ya wa̦ labaaö cuaaö ja, wale a̦ yai nia ji̦liadayou”, bä bufi jole cuu dicoo talei. ⁸ Ö̦jö bä lä cuaaö weinaja, bä cuaa dijä. Wamacö lä jo̦li wei, Faafä a lä culadinö wamacö daö waiquiwä. Wamacö nö bayeli nacao showao mlao däjä ma cui, wamacö daö malä waiquile. ⁹ ’¿Ö̦jö tawä? —a cuma—. Yai Bada nija wamacö nö bayeli nacao ja, abinaja wamacö yai cubä. “Fabe, yamacö lä Fö̦ömou wei wa lä culadi, cafä wa wa̦fa shino doblao wäyämobä wa. Wa wa̦fa jole jole jayumamou buobä wami. ¹⁰ Eja yamalecö ca̦i cua da dodijiiquiyo. Fedu jamö wa wa̦ juamou lä culadinaja, ei bita jamö ma cui, inaja showawä wa wa̦ ca̦i juamou cuo mö feduobä. ¹¹ Yamacö nia lä iyaö wei täbä ja, showadi yamalecö da dobä. ¹² Yamacö doblou lä mlai, tä nowa ca̦i da mladamalö, camiyä yamalecö lä yabäcaö wejei bä nija, yama tä nowa bluca mladamaö lä cuaaö weinaja showawä. ¹³ Yamacö nö doblobö lä mlai jamö, yamalecö ca̦i da wasö. Tä lä wa̦lidii tä ja, yamalecö da nowamöbo.” Einaja Yai Bada nija wamacö cubä. ¹⁴ ’Ai täbä nija wamacö nowa lä cule wama tä nowa mladamalei ja, inaja showawä Faafä a lä culadinö wamacö nia taamaö mö feduo malä cui. ¹⁵ Ö̦jö ma cui, täbä doblou lä mlai täbä nija wamacö nowa lä cuo wei, wama tä nowa mladamaimi dicowä ja, cafä wamacö ma cui nija, Faafänö tä nowa lä taboladi tä nia ca̦i mladamaö ayaomi. ¹⁶ Abinaja Jesús a cuma. —Yabäcou mlai ja, Yai Bada nija wamacö nö bayeli nia fa nacaodinö wamacö iyaö wasöo ja, dodijidawä bä mömou fe da yadio, bä jole jole lä dodijaö wei bä lä cuaaö weinaja mlai. Ö̦jö bä lä cui bä iyaö wasöo däjä, Yai Bada nija bä dobämobä bä li cuaaimi. Yanowamö täbä nija bä nö nia fa ö̦jöböamonö, bä li cuaaö buo. ¿Ö̦jö tawä? Bä nö nia fa ö̦jöböamonö, bä mö ya̦lömou mlai ja bä fe shaclacawä bufi ca̦i wa̦lidiwä juadalou. Cafä wamacö nija ei ya wa̦ lä cui, bejedi lä ya wa̦. Yai Bada nija ö̦jö bä lä cui bä nia dobämoimi. Yanowamö täbä nija bä nö ö̦jöböamobä, ö̦jö cama etä li waiquiwä. ¹⁷ ’Ma, cafä wamacö iyaö wasöo däjä, bä mö da ya̦lömolu —a cuma—. Bä feta u̦cu ca̦i da yacäcäblamolu, dodijidawä wamacö dablamou showao fe yadiobä. ¹⁸ Wamacö nia iyaö lä wasöo wei wamacö lä cui, yanowamö täbä nija wamacö nö ö̦jöböamamobä wamacö nia cuaaimi. Ja̦towä täbä iyaö ma wasöo wei ma cui, Faafä a lä culadinö täbä malä daö wei. ¿Ö̦jö tawä? Wamacö iyaö wasöo ma ja̦too wei ma cui, Faafänö wamacö dablaö fe yadio wä, wamacö dobäbä. ¹⁹ ’¿Ö̦jö tawä? —Jesús a cuma—. Bita jamö täbä madofi shimoma dijejä. Wama täbä ma shimomaö wei ma cui, wamacö camishibö nia wädömamou. Wamacö madofibö nia ca̦i amu ushiböaö. Yanowamö täbä lucäö fa ja̦toonö, täbä nia ca̦i tomöablaöje. ²⁰ Ma, fedu jamö afä täbä nowa yai lä bluca wei täbä shino yai shimomaö da balöodu. Ö̦jamö lä camishifä bä nia wädömamoimi. Wamacö madofibö nia ca̦i amu ushiböaö buomi. Täbä nia ca̦i tomöaimije. ²¹ ¿Ö̦jö tawä? Afä wama täbä yai lä bufibou wei täbä lä cule jamö, ö̦jamö lä wamacö bufi nia malä cadididalou wei —a cuma. ²² Abinaja Jesús a cuma. —Cowa wacö lä culenaja bei wamacö mamocu cuwä, wawädowä wama täbä dablabä. Ö̦jö cudeenö, wamacö mamocu demi ja, wama täbä bluca wawädoablaö cuquei. ²³ Ö̦jö ma cui, wamacö mamocu wa̦lidiwä dicowä ja, wama täbä nia dablaimi. ¿Ö̦jö tawä? “Tä shi̦i lä cule jamö camiyä ya cua waiquia lä cule”, wamacö bufi jole cuu bädao ja, wamacö bufi mö didi fe balojowä —Jesús a cuma. ²⁴ Abinaja Jesús a cuu co̦oma. —A lä ojodamou wei a lä cuinö, moli a nosie nia shino juaö cadidio. Ai a wa̦ ma fale ma cui, bolacabö cäcöbö nosie nö juamamou doblobimi waiquiwä. Ai a nosie juaö mlai ja, ai a nosie nia shino yai juaö ayao. Ai a wa̦ shino juaö bufi doblao waiquiwä cudeenö, ai a wa̦ nia waii. Inaja showawä, madofi wama bä nofi yaibou dicoo ja, Yai Bada wama tä nofi nö yaibobimi waiquiwä, wama a nosie juabä —Jesús a cuma. ²⁵ Abinaja Jesús e cuma. —Ö̦jö cudeenö bämacö nowa taö lä cule. Eja dodijidawä wamacö nia lä bälöo wei tä ja, bä bufi jo̦lijo dijä. ¿Ö̦jö tawä? Nii bä ma cui jamö, camishi bä ma cui jamö, bä bufi cuaablalo dijä. Wamacö demi lä cuo wei tä nowa yai bluca, nii wama bä lä waö wei bä nowa lä culenaja mlai. ¿Ö̦jö tawä? Bei wamacö nowa ca̦i bluca, camishi bä nowa lä culenaja mlai. ²⁶ ’Biyomö bä ja bä bufi da jaducublalu —a cuma—. Mobä döaö ma mlajei ma cui, bä iyaö. Nii bä taö ma mlajei ma cui, mobä shi̦liqui shimomaö ma mlajei ma cui, Faafä a lä culadinö bä malä iyamaö wei. Ö̦jö bä nowa ma tabole ma cui, ¡cafä wamacö nowa shino yai blucabou fe balojowä! ²⁷ Wamacö demi nia lä cuo wei, Yai Bada tänö tä daö fe wädöa waiquia. Wamacö bufi lä jalujublalou wei tänö, wiisibö ma cui wamacö nö nia dedejedou majöomi. ²⁸ ’¿Wedi tabä camishi bä ja wamacö bufi nia li jalujublalou dicoo? —a cuma—. Jole jole bä bäwä ma cui ja, ö̦jö bä ja bä bufi da jaducublalu. Bä badaö. Bä ojodamou ma mlai ma cui, shinalu ubä juducaö ma mlajei ma cui, ²⁹ bä liyäjäwä. ¿Ö̦jö tawä? Bämacö nowa taö lä cule. Bada tä Salomo a nö ma madofiböono wei ma cui, camishi ebä ma dodijidaono wei ma cui, ei jole jole bä lä cui, ¡bä shino yai mömou liyäjäwä dodijiwä! ³⁰ Caje caje bä cudio ma mlai ma cui, bä ö̦shömaö ma nocamou wejei ma cui, bei bä jole fa fanö, bä mömou dodijidaobä, Yai Bada tänö bä bayeliblaö. Ö̦jö bä ma bayeliblaö wei ma cui, camishi bä ja ¿cafä bei wamacö nia shino bayeliblamou ayaomi daanö? Yai Bada wama a nofi bejedi mölaboimi showawä. ³¹ ’¿Ö̦jö tawä? —Jesús a cuma—. Ö̦jö cudeenö, wamacö nia lä iyaö wei tä ma cui ja, wama toubä nia lä coaö wei toubä ma cui ja, camishi bä ma cui ja, bä bufi cuaablalo dijä. Wamacö bufi jalujou dodijio mlai. ³² Yai Bada a daö lä mlajei bä lä cui, inaja cama bä bufi li bluca cuaablalou. Ö̦jö ma cui, wamacö lä jo̦li wei, Faafä a lä culadinö wamacö li daö waiquia. ³³ Ö̦jö täbä ja wamacö bufi cuaablalou mlai ja, Yai Bada tänö cama ebä nia ca̦i lä cuo wei tä ja, bä bufi shino yai dayäo da shalilio. Ö̦jö wama a bufi nia lä doblamabou wei tä ca̦i ja. Inaja wamacö bufi shaliliwä cudio ja, ö̦jö täbä ca̦i bluca showawä ma cui ja, wamacö nia dobäö. ³⁴ ’Ö̦jö cudeenö abinaja ya cuu —a cuma—. Fei däjä tä lä cuaale tä ja, bä bufi shino yai da dayäo, fena ja tä nia cublou lä majöo wei tä ja mlai. Fei däjä wamacö nia lä cuaaö wei tä cua ma waiquile ma cui, ¿wedi tabä fena ja wamacö nia lä cuaaö wei, wama tä a̦fa wayoaö li yädäablalou co̦a majöquei? Tä obi nia lä cublou wei tä ja, bä bufi jalujou dodijio dijä. Tä yai lä cublole däjä, ö̦jö däjä wamacö bufi shino yai dayäobä.

¹ Abinaja Jesús a cuma. —Yanowamö bä dobloimi jöma dijejä, Yai Bada tänö cafä wamacö jömaö mö feduo mlaobä. ² Wama bä jömaö si lä ijejeo weinaja, inaja showawä Yai Bada tänö wamacö nia jömaö cuo mö malä feduo wei. Bufi lämou mlai ja ai wama bä jömaö dicoo ja, inaja showawä cafä wamacö ma cui, bufi lämou mlai ja Yai Bada tänö wamacö nia jömaö mö feduo. ³ ’Aifä a mamo jamö libu libu wa ma möö wei, cafä wa mamo jamö fii wa fi bada lä ca̦bole, ¿wa nö ö̦jöböamoimi tawä? —a cuma—. ⁴ Cafä nija fii fi bada ma läo däjä ma cui, ¿aifä nija bei wa wa̦ nia li faö? ¿Aifä mamo jamö libu libu e wai lä ca̦le, ö̦jö bei wa e nia li joyaö? ⁵ ¡Jole jole wa lä dodijaö wei! Cafä wa mamo jamö fi bada lä ca̦le, fi joya da balölö. Ö̦jö däjä wa tä möö fa wacacablalunö, aifä mamo jamö libu libu e wai lä ca̦le, wa e joyaö dodijidaobä —Jesús a cuma. ⁶ Ö̦jö däjä, Yai Bada etä a̦ ji̦liaö lä moji wejei bä a̦fa wayoaö ja, Jesúsnö ji̦ima bä a̦fa jayumaö yacläablaloma. Abinaja a cuma. —Afä täbä dodijidawä lä yaile, ji̦ima bä nija täbä dodobou dicoo dijejä, wamacö nabä läläo mö yabamou cuqueije. Afä maa mabä baushi nowa wai lä bluca wei mabä ma cui, coshino bä nija mabä jöböaö dicoo dijejä, mabä cadicaöje ja, mabä shamiamaö bädao mlaobeje. ⁷ Abinaja Jesús a cuma. —Yai Bada nija bä da naco, wamacö dobäö cuquei. Dodijidawä tä da dayäaje, wama tä dablaö weicätä. Bei yoca da cloocaje, yoca caloblaö wä. ¿Ö̦jö tawä? ⁸ Bä lä nacou wei bä bluca lä cui, bä malä dobämou wei. Inaja showawä, tä dodijidawä lä dayäaö wejei bä nija tä dodijididawä dablamou. Bei yoca lä cloocaö wejei bä ma cui, ö̦jö bä nija yoca caloblamou. ⁹ ’Cafä wamacö ijilubö lä cuinö, nii a nacaöje ja, ¿maa wama ema nia jöböaö yacläo tawä? —a cuma—. ¹⁰ Yuli a nacaöje ja, ¿olu wama ecö nia jöböaö buo daanö? ¹¹ Wa̦lidiwä talewä wamacö ma cui, dodijidawä ijilufä wama bä dobäö daö waiquiwä ja lä, Faafä fedu jamö a lä culadi, ö̦jö bei a nia shino yai dodijaö fe balojoo. Dodijidawä tä ja bä lä nacou wei bä nija tä jöböaö wä. ¹² ’¿Ö̦jö tawä? —a cuma—. Ai täbä nija cafä wamacö nofimamou bufi lä doblao weinaja, inaja showawä ai wama täbä yai nofimaö cuobä. Inaja wamacö cuaaö ja, Moisesi wama etä a̦ nofi cadidibou waiquiwä. Yai Bada a wa̦no wäyälewä bä ma cui, inaja wamacö cuaaö ja, ö̦jö wama bä a̦ nofi ca̦i cadidibou mö feduwä. ¹³ Abinaja Jesús a cuma. —Täbä ba̦limi nia lä cuo wei yo jamö wamacö jubä, wajaquemi yoca jamö bä faö fe da yadiofälö. ¿Ö̦jö tawä? Shobali wacö nö mayo yoca shino blaucuwä. Ö̦jö yo ca̦i wawädowä. Ö̦jamö lä bä lä juu wei, bä bluca fe balojowä. ¹⁴ Ö̦jö ma cui, täbä ba̦limi cuobä yo jamö täbä jubä, yoca wajaquemi. Ö̦jö yo jamö täbä juu si ijejewämi. Ö̦jö yo yai lä dablaö wejei bä lä cui, bä bolacami —a cuma. ¹⁵ Abinaja Jesús a cuma. —Yai Bada a wa̦no wäyälewä bä a̦fa jole lä jilou wei bä nija bä da moyaweicu. Cafä wamacö fe walooje däjä, oweja bä nö ishobimi lä culenaja bä mömou ma cuablalou wei ma cui, bä möla dijä. Ji̦ima bä yai lä waitelimou wei bänö täbä nabä queo si ijejewä lä culajeinaja, inaja bä bufi lä cui cäbä. ¹⁶ Nii bä lalou däjä defibä nö ö̦jöböamou lä culenaja, inaja showawä cama bä ma cui wama bä nö ca̦i nia ö̦jöböaö cuo. ’Mösöcö bä jamö, nii bä jucamou dao malä mlai —a cuma—. Ico bä ma cui, uba bä ma cui, ö̦jamö lä bä nia yädäomi. ¹⁷ Fii fibä lä dodijidai fibä jamö, nii wa̦lidiwä cäcö nia lalou buomi. Inaja showawä, fii wa̦lidii fibä jamö, nii dodijidawä bä nia ca̦i laloimi mö feduo. ¹⁸ Fii fibä lä dodijidai fibä jamö, nii wa̦lidiwä bä nö lalobimi waiquiwä. Fii wa̦lidii fibä ma cui jamö, nii dodijidawä bä nö ca̦i lalobimi mö feduwä. ¹⁹ ¿Ö̦jö tawä? Nii dodijiwä bä lalou lä mlai fibä fa diyälalöjenö, fibä nia yablaöje. ²⁰ ’¿Ö̦jö tawä? —a cuma—. Nii wa̦lidiwä bä lä lalou wei däjä, wama defi nö wa̦lidiwä ö̦jöböaö lä cuaaö weinaja, inaja showawä Yai Bada a wa̦no wäyälewä bä a̦fa jole lä jilou wei bä lä cui, bä doblou lä mlai tänö, wama bä nö nia ca̦i ö̦jöböaö cuo mö feduo —a Jesús cuma. ²¹ Abinaja Jesús a cuma. —Camiyä nija, “¡Bada tä, Bada tä!”, ai bä cuu ma buo wei ma cui, Yai Bada tänö ö̦jö bä ca̦i nia cuomi. Fayä a lä culadinö tä tamaö lä bufii wei tä lä taö wejei bä lä cui, ö̦jö bä ca̦i nia shino yai cuo dodijio. ²² Fayänö täbä yanowamö nia lä jömaö wei etä cublou däjä, abinaja bluca täbä nia cublaloyoluu. “¡Bada tä, Bada tä! Cafä wa wa̦nö, ¿Yai Bada yama tä a̦ wäyänomi daanö? ¿Fecula yama bä ca̦i yashunomi? Tä nö lä quilijii, ¿yama tä bluca ca̦i wawämanomi?”, bä nia cublaloyoluu. ²³ Ö̦jö däjä, ö̦jö bä nija ya wa̦ nö wäo ja, abinaja ya nia cuu. “Bämacö daimi. Shomi wamacö. Bä da alufälö, wa̦lidiwä talewä wamacö lä cui”, ya nia cuu. ¿Ö̦jö tawä? —Jesús a cuma. ²⁴ Abinaja Jesús a cuma. —Camiyä ei wale a̦ lä ji̦liaö wejei däjä, wale a̦ juaö lä showadao wejei bä lä cui, abinaja ö̦jö bä li cuwä. Bufi moyawälanö cama e yafi lä i̦tamano wei a lä culenaja, ö̦jö bä li cuwä. Ö̦jö a lä cuinö täca fa blajamalönö, bei masi blaa lä co̦jomole jamö e defibä colo fa i̦taolalönö, e yafi i̦tao lojodooma. ²⁵ Maa a fa quenö, yafi e jamö u caläö lojodoama ma cui, e yafi lojodoo showaoma. Wadolinö e yafi ma ja̦wedano wei ma cui, bei masi blaobä jamö defibö i̦tatao lojodeoma cudeenö, e yafi ca̦i wäcäö buonomi. ²⁶ ’Ai bä lä cuinö, camiyä ei wale a̦ ma ji̦liaö wejei ma cui, wale a̦ juaimije —a cuma—. Ö̦jö bä lä cui, abinaja bä cuwä mö feduwä. Ai a lä cui, a bufi dao mlalanö cama e yafi i̦tamaö lä bädaono wei a lä culenaja, ö̦jö bä cuwä mö feduwä. A bufi dao fa mlacunö, cama e yafi i̦tamama ma cui, mlaca mlaca bä cuobä jamö e defibä i̦taa bäaquema. ²⁷ Maa a fa quenö, yafi a jamö u caläö fa lojodoanö, wadolinö a yafi ca̦i fa ja̦wedeblalönö, e yafi wäcälayoma. E yafi lä wäcälayono wei däjä, e yafi bada wa̦lioblou showadalayoma —Jesús a cuma. ²⁸ Jesúsnö bä damaö jödödou däjä, a wa̦ lä shaliliablalono wei tä ja, bä bufi möaaö dodijioma. ²⁹ Moisesi etä a̦ ja bä showadi damaö lä cuaano wejeinaja, a wa̦ ji̦limamou cuono malä mlai. Jai tä a̦ yai daö shalilio showadaoma, a wa̦ ji̦liaö malä cuaano wejei.

¹ Jefu balöcö jamö bä culanö, Jesúsnö bä ca̦i dömöa co̦baliyofälöma. A lä juu wei jamö, täbä bluca yaua showaquema. ² Ö̦jö däjä, täbä sicö lä jodemaö wei tä wayunö a nö lä bleaano wei, a jalili waloquema. Jesús nija a fa dijoafälönö, abinaja e cuma. —Bada tä. Wale bayeliblaö ojode ja wale jalomalei dao, ya dodijidablou co̦obä —e cuma. ³ Jesús boco fa dododalunö, a jubädalema. Abinaja e cuma. —Ya ojode lä. A da jalolu, ö̦jö lä, wa dodijidablou co̦obä —e cuma. Täbä sicö lä jodemaö wei etä wayu mladou fa showadalonö, a dodijidablou co̦layoma. ⁴ Ö̦jö däjä, abinaja Jesús e cuma. —Ei bäfä lä jalomalöfe, yanowamö täbä nija wa tä a̦fa nia wäaimi. Nofi bäyäalewä nija a yai da mömodu. Moisesinö tä jöböamaö lä bufino wei, tä da dodobodu. Inaja wa cuaaö ja, bluca täbä nija wa nia demi dablamou wawädoo —a cuma. ⁵ Cabenao jamö Jesús a fa co̦blalunö, cama nija Lomateli bada a waloquema. Sodado 100 bä ca̦i lä cuono wei a bada cuoma. A wa̦ fe blacäjou ja ⁶ abinaja e cuma. —Bada tä. Ya nosie juamobä a lä cui, a fa ya̦tolibölönö a nö bleaaö feyaa —e cuma. ⁷ Ö̦jö nija abinaja Jesús e cuu nomöjöoma. —Bei. A da cuaafälö, ya jalomabä —e cuma. ⁸ Ö̦jö ma cui, Lomateli a bada lä cui, abinaja Jesús nija a cuma. —Bada tä. Bäfä nö yafimabimi camiyänö. Ya quilii. Wale bayeliblabä yami, judio ya malä mlai. Eja culanö ma cui wa wa̦ blajawä faö ja, ya nosie juamobä a lä cui, a nia jalou showadao. ⁹ ¿Ö̦jö tawä? —a cuma—. Täbä nosie lä juaö wejei, ya tä malä dale. Iba bada bä lä cui ya bä a̦ juaö. Inaja showawä, camiyä ya nosiemou ja, iba sodado ya bä ca̦i lä cule bänö wale a̦ ca̦i juaöje. Ai ya shömaö ma cui, ai ya nacaö ma cui, wale a̦ juaö si ijejeweje. Ya nosie juamobä ya lä tabolenö, wale nosie ca̦i juaö showadao malä cui —Jesús nija e cuma. ¹⁰ Ö̦jö a wa̦ ja, bejedi lä Jesús a bufi doblaloma. Bä lä nocaono wei bä nija abinaja a cuma. —Cafä wamacö nija ei ya wa̦ lä cui, bejedi lä ya wa̦. Ei Lomateli a lä cuinö wale nofi mölabou lä culenaja, Isaeli wama ecö nija, moli ma cui ya dablaö bädaami. ¹¹ ¿Ö̦jö tawä? Bämacö nowa taö a lä cule. Yai Bada tänö cama ebä ca̦i cuobä jamö, shomi täbä lä bälöblai täbä nia waloblayoluu. Motoca a lä faö wei jamö ma cui, a lä queo wei jamö ma cui, ö̦jamö bä culanö bä bluca fa co̦camoliyonö, bä nia iyaö ca̦i loo. Ablaamö a ma cui, Isaacö a ma cui, Jacobo a ma cui, ö̦jö bä iyaö ca̦i loobä jamö bä nia yädäoyoluu. ¹² Ö̦jö bä nia ma yädäo wei ma cui, Isaeli ebä nodiwä lä cui, ö̦jamö bä nia cuomi. Sibo jamö bä nia shäyäblaamou, tä mö dödöobä jamö. Ö̦jamö bä nia ö̦cöö. Bä nö beblalou yalo, bä nia lalöö —Jesús a cuma. ¹³ Ö̦jö däjä, sodado bä ca̦i lä cuono wei a lä cui nija, abinaja Jesús a cuu nomöjöoma. —A da co̦lufälö. Wale nofi mölaboma yalo, wa wa̦ juamobä a lä cui, a jaloa waiquilayoma —a cuma. Ö̦jö lä däjä showadawä a jalolayoma. ¹⁴ Simón e yafi jamö Jesús a fa lucälönö, Simón bä yesi e jalili blaa dalalema. A yoblaoma. ¹⁵ Imicö fa jubädalönö, etä yobli mladamaö showadalayoma. Ö̦jö däjä a fa jocädalunö, bä fama iyaa showamalema. ¹⁶ Motoca a lä queo wei däjä, bä lä feculaböono wei bä ca̦i waloblayolumaje. Jesús a wa̦nö ebä fecula yashublaö showadalayoma. Bä lä jaliliono wei bä ma cui, bä ca̦i jaloa showadamalalema. ¹⁷ ¿Ö̦jö tawä? Jesús a nia lä cuaano wei, Yai Bada a wa̦no wäyälewä Isaia a lä cuinö tä a̦ wäyäö showao balöoma. Ö̦jö tä a̦ bejedi wawäblobä, Jesúsnö täbä bayeliblaö cuaama. Abinaja tä a̦ cuu. Camiyä bämacö bufi nö yai bleaabä tä ma cuono wei ma cui, camanö tä bluca däa majölema. Camiyä bämacö nö ninili bleaabä tä ma cuono wei ma cui, ö̦jönö tä däa fa majölönö, a nö bleaaö läoma. Einaja tä a̦ cuu. ¹⁸ Täbä bluca lä co̦camoyoluno wei täbä fa dalalönö, cama ebä nija Jesús a wa̦ fama, bä ca̦i bucaduobä. ¹⁹ Ö̦jö däjä, Moisesi tä a̦ ja täbä lä damaö wejei ai a lä cui, Jesús nija abinaja e cuyoluma. —Tä a̦ wäyäle. Wa juu lä bädao wei jamö ma cui, ö̦jamö ya nia nocao —a cuma. ²⁰ Abinaja Jesús e cuu mö feduoma. —A möla dijä, ya yafibö cuami. Yalo bä bäcabö cublawä. Biyomö bä ma cui, bä yabäcabö cublawä mö feduwä. Ö̦jö ma cui, camiyä ya lä yanowamöblaleyoluno wei ya lä cui, ya yanobö cuami —e cuma. ²¹ Ai a nocao mö lä feduono wei a lä cui, a nia yauo showadao fa mlacunö, abinaja e cuma. —Bada tä. Fayä a lä ujudule etä cublou däjä, ya nomawä didiaö balöobä, ¿ö̦jö tawä? —a cuma. ²² Ö̦jö ma cui, abinaja Jesús e cuma. —Bufi nomawä, cama bä li nomawä didiayobä. Camiyä nija a nocaa da showadaiquiyo —e cuma. ²³ Canawä ajamö Jesús a fa döcäbalunö, cama ebä lä nocamabono wei bä ca̦i döcäcou mö feduo showadaobaliyoma. ²⁴ Ö̦jö däjä, bä befi ca̦i caläfälöbä jamö wadoli a lojode fa cublalunö, canawä a jamö mau u bada lä shäyäjou wei ubä fe lajoaö waiquioma ma cui, Jesús a midio fe yadio dicooma. ²⁵ A jushulajenö, abinaja a nowa tamaje. —¡Bada tä! ¡Yamalecö da bayeliblalö! ¡Bämacö mishi duo a lä cube! ²⁶ Abinaja Jesús e cuma. —¿Wedi tä tabä wamacö li quilii? ¿Yai Bada wama tä nofi li mölaboimi dicoo tawä? —e cuma. Ö̦jö däjä, a fa jocädalunö, wadoli a wasöa showadalema, u ca̦i bada lä shäyäjono wei u ca̦i. Ö̦jö a wa̦nö tä bluca ononodou showadalayoma. ²⁷ Bä bufi yai shädayaimolanö bä wa̦liyoma. —¿Ei wedi bei a li dodijiwä? Wadoli a bada ma cui, mau u bada lä shäyäjou wei u ma cui, cama a wa̦nö täbä nofi mladou si ijejewä yai —bä cuma. ²⁸ Ö̦jö däjä, Cadalateli bä ulifibö jamö Jesús a befi ca̦i waloquema, modu ai u mashi jamö. Jesús a fa itoblalufälönö, bolacabö cäcöbö lä feculaböono wei cäcöbönö a mö bamaböleyoluma. Nomawä täbä didiblaaö lä yaimou wejei jamö cäcöbö lä cuono wei, cäcöbö cuoma. Cäcöbö showadi waitelimou läoma yalo, ö̦jamö lä täbä jayuaö doblonomi. ²⁹ Jesús nija bä a̦ i̦cali falayoma. —Yai Bada wa Ijilubö lä cuinö, ¿wedinaja yamalecö taamabä, bei wa li waloo cuboyoi? Yamalecö nabä jubä tä cubloimi ma showai, ¿wedi tä tabä yamalecö nö nia bleaamaö dicoa cule? —bä fecula cudaliyoma. ³⁰ Bei. Ö̦jö jefu tä balöcö jamö, yalo coshino bluca bä iyaö bayäcäojolayoma. ³¹ Jesús nija fecula bä a̦ fe blacäjou ja, abinaja bä cuma. —Yamalecö nia yashuu ja lä, coshino bä nija yamalecö yai da shömöcö —bä cuma. ³² —¡Ö̦jamö lä bä da alufälö, ö̦jö lä! —bä nowa tama. Ö̦jö cudeenö, cäcöbö shi lä wa̦lino wei cäcöbö fa dacöfälöjenö, coshino bä nija fecula bä bluca lucäa nomöjölaliyoma. Bä fa lucäolalunö, tä mö wädäjäa lä dodijibe jamö coshino bä shi jalijiwä ca̦i fa yo̦balufälönö, mau u jamö bä mishi bluca duobaliyoma. ³³ Coshino bä nofi lä tabono wejei bä lä cui, ö̦jö tä fa dalalöjenö, bä quilili doculayoma. Jesús a lä cuaano wei, shabono jamö tä a̦ bluca wäyäö co̦jolayomaje. Cäcöbö lä feculaböono wei cäcöbö jaloa lä co̦maleno wei tä a̦ ca̦i. ³⁴ Ö̦jö tä a̦ fa ji̦liläjenö, shabono jamö bä lä bälöle bä bluca aa showalayoma, Jesús a möbeje. A fa dalalöjenö, bä nö quilili bleaama yalo, a shömöa co̦lemaje.

¹ Canawä ajamö a döcäa fa co̦balunö, camateli ebä nijamö Jesús a bucadua co̦baliyoma. ² Ö̦jö däjä, Jesús nija a lä ya̦toliböono wei a befi ca̦i cadömaboimamaje. A nofi lä mölabou wejei etä fa dalalönö, abinaja Jesús a cuma, a lä ya̦toliböono wei a nija. —U̦asi. A bufi da lojododalu. Wa doblou lä mlai, afä ya tä nowa bluca mladamaö lä cule —e cuma. ³ Moisesi etä a̦ ja bä lä damaö wejei ai bä lä cui, abinaja ebä bufi cudaliyoma. “Feinö Yai Bada a nö waiblaö lä cule”, bä bufi cudaliyoma. ⁴ Bä bufi cuu lä ja̦toono wei, Jesúsnö bä daö fa showadaonö, a wa̦ fama. —¿Wedi tä tabä, wa̦lidiwä tä ja wamacö bufi li cuaablalou dicoo? ⁵ Ei a lä cui, camiyä bei ya wa̦nö ya jalomaö lä dalenaja, inaja showawä ya etä nowa ca̦i mladamaö si ijejewä cuwä. Ya nowa tabä ya waiquiwä malä cui, a fa jocädalunö a co̦jamöö co̦obä. ¿Ö̦jö tawä? ⁶ Camiyä ya lä yanowamöblaleyoluno wei ya lä cui, eja bita jamö ya lä cule däjä, bä doblou lä mlai bä nija ya etä nowa mladamabä ya waiquiwä. Wama tä möbä, ö̦jö lä —a cuma. Einaja a fa cunö, ö̦jö däjä a wa̦ wawäa showaquema, a lä ya̦toliböono wei a lä cui nija. —Bei. A da ubladalu. Wa lä maquele wa täcö fa jocälänö, täcö ca̦i co̦jamöö da co̦o—a cuma. ⁷ A lä ya̦toliböono wei a fa ubladalunö, täcö ca̦i co̦a showadalayofälöma. ⁸ ¿Ö̦jö tawä? A jalomaö fa dalalöjenö, bä bluca lä co̦camono wei bä quilia fe balojolaliyoma. Yai Bada tänö Jesús a nö yai wa̦lojomabou dodijioma yalo, tä nofi doablaö fe balojoomaje. ⁹ Ö̦jö däjä, Jesús a juu lä cuaano wei jamö, Mateo a wa̦fa lä cule a loa dalalema. Lomateli bada bä befi bä blada lä doaö wei a Mateo cuoma. Blada bä doabä jamö a läa fa dalalönö, abinaja e cuma. —Camiyä nija a da nocaiquiyo —e cuma. A ubladou fa showadalonö, Jesús nijamö a yaua showadalayofälöma. ¹⁰ Mateo e yafi jamö Jesús a iyama, cama ebä lä nocamabono wei bä sho. Bä iyaö ca̦i lä loono wei däjä, Lomateli bada bä befi bä blada lä doaö wejei bä ma cui, ai bä a̦fa ca̦i wa̦lidiwä talewä lä jilaö wejei bä ma cui, ö̦jö bä bluca loaleyoluma. ¹¹ Faliseo bä bada lä cuinö, Jesús nija ö̦jö bä ca̦i iyaö fa dalalöjenö bä jushuoma. Ö̦jö däjä, Jesúsnö bä lä nocamabono wei bä nija abinaja bä cuma. —Cafä wamacö nija tä a̦ lä wäyäö wei a lä cui, ¿wedi tabä inaja a li cuaaö dicoo? Lomateli bada bä befi bä blada lä doaö wejei bä ma cui, wa̦lidiwä talewä ai bä ma cui, ¿wedi tabä ö̦jö bä ca̦i li iyaö dicoo? —bä nowa tamaje. ¹² Jesúsnö ö̦jö bä a̦ fa ji̦lilänö, abinaja bä nowa taö ja̦looma. —Bä jalobä, bä lä demi wei bä nia icuomi. Bä lä jalili wei bä lä cui, ö̦jö bä nia shino yai icuo. ¿Ö̦jö tawä? ¹³ Yai Bada etä a̦ lä cuu wei tä a̦ ja, bä bufi da dayäo, wamacö bufi jaducublobä. Abinaja tä a̦ cuu —a cuma. Yalo wama bä ö̦shö lä dodobou wei, ö̦jö ya tä bufiboimi. Yanowamö wama täbä nofi nia lä ojodabou wei, ö̦jö ya tä shino yai bufii. ’Einaja Yai Bada tä a̦ cuu —a cuma—. Bä dodijidawä lä jömöo wei, ya bä nabä juno malä mlai. Wa̦lidiwä talewä ya bä nabä yai li juma. ¹⁴ Ö̦jö däjä, Juannö bä lä nocamabono wei bä lä cui, Jesús nija bä fa waloiquiyonö, abinaja ebä cuma. —Camiyä yamacö iyaö wasöo si ijejewä, yamacö iyaö yabäcou mlai ja, Yai Bada nija yamacö nö bayeli nacaodibä. Faliseo bä bada ma cui, inaja showawä bä li cuaaö mö feduwä. Ö̦jö ma cui, cafänö wa bä lä nocamabole bä lä cui, inaja bä li cuaaimi. ¿Wedi tabä afä bä ca̦i iyaö wasöomi dicowä? —bä cuma. ¹⁵ Abinaja Jesús e cuu yacläoma. —Fiya anö a suwä däaö däjä, ¿cäcöbö nofi co̦camoabeje jamö täbä wajäaö daanö? Ma. Ö̦jö ma cui, tä nö fa dedelönö a fiya fa co̦lunö, ö̦jö däjä bä fa wajäanö, bä nia shino iyaö juomi. ¿Ö̦jö tawä? —cama a wa̦fa tao ja, a cuma. ¹⁶ Ö̦jö däjä, shomi tä a̦ coyocomabou bufio fa mlacunö, camishi bä a̦fa wayoaö yaclämou nomöjöoma. —Abinaja ca̦i —Jesús a cuma—. Camishi jode cäcö lebesi ja, ai cäcö acadafu läabeje, dude cäcö cacaaimije. Inaja bä cuaaö fa cunoja, cäcö yaluuje däjä, dude cäcö fa busudublalunö, täca jädödou nö blaucublaliyobö wei. ¿Ö̦jö tawä? ¹⁷ ’Inaja showawä, yalo wejediwä sibä ja, nashiwä dude toubä löaimije —a cuma—. Inaja bä cuaaö fa cunoja, ubä lä juluu wei ubänö sibä fa jädölönö, sibä nö wa̦liolaliyobö wei. Toubä nö ca̦i bläshäblaliyobö wei. Wejediwä sibä uduo malä mlai. Ma, yalo dude sibä ja, nashiwä dude toubä nia yai löaöje. Ö̦jö däjä, sibä nia dodijidawä cuo fe yadio. Nashiwä toubä ma cui, inaja showawä toubä nia dodijidawä cuo —Jesús a cuma. ¹⁸ Jesúsinö Juan ebä yömölaö showao däjä, judio bä yododabä yafi jamö a bada lä läo wei a lä cui, a walobaleyoluma. Jesús a cotä jamö a möfe bolanö, abinaja e cuma. —Tääyä a lä cui, a nomaa dicolayou culei. Ö̦jö ma cui, a möblaaö fe da yadioyo. Wa imicö fa maqueicunö, a demi cuo co̦obä —e cuma. ¹⁹ Inaja a cuu ja, bada a nija Jesús a nocaa showalayofälöma, cama ebä lä nocamabono wei bä lä cui sho. ²⁰ ¿Ö̦jö tawä? Jesús nija suwä a jalili yauaö ajedou juofälöma. A nö i̦yä bleaaö showai ja, lasha 12 a faa waiquimalema. A ajedou fa juofälönö, Jesús camishi ecö casö jubäa fe yadia yaulema. ²¹ Abinaja a bufi suwä cuma. “Ya ecö casö jubädaö ma bälayou wei ma cui, ya jalou weicätä”, a bufi cuma. ²² Jesús a mö fa yabadalunö, a dalalema. Abinaja e cuma. —A bufi da lojododalu, Ami. Wale nofi mölaboma yalo, wa jalolayou lä cufe —e cuma. Ö̦jö däjä showawä, yedu a suwä jaloa showadalayoma. ²³ Bada e yafi jamö Jesús a fa co̦blalunö, bä a̦ nö bleaaö dalalema. Täbä ö̦cöbä jamö, showadi madofi bä a̦ lä jolaö wejei, bä a̦ ca̦i jolamaje. Bä lä co̦camono wei bä ca̦i ö̦cöma. Ö̦jö däjä, abinaja bä nowa tama. ²⁴ —Bä siboa da co̦lufälö. Wama a moco nomöa lä bole, a nomaö cadidio malä mlai. A mia bädaa lä cule. Inaja bä nowa tama ma cui, a lä nomalayono wei tä daö waiquiomaje yalo, a noca i̦cablalamaje. ²⁵ Ö̦jö ma cui, bä lä co̦camono wei bä bluca siboa fa co̦malöjenö, a moco nomawä maqueobä jamö Jesús a lucälayoma. Bei boco fa dälönö, a jocädou co̦layoma. ²⁶ ¿Ö̦jö tawä? Ö̦jamö bä bluca lä bälöjono wei bä lä cui nijamö, Jesúsnö a demi jocädamaö lä co̦ono wei tä a̦fa ji̦limou blaucublaliyoma. ²⁷ Jesús a jayuaö lä co̦le jamö, bolacabö cäcöbö jubäbö yauaö juofälöma. Cäcöbö comöö yauaö jäafälölanö, abinaja cäcöbö cuu jäafälöma. —¡David nodiwä wa e lä cui! ¡Yafälecö nofi da ojodadaliyo!—cäcöbö cuma. ²⁸ Ö̦jö däjä, yafi jamö a lä lucälayono wei jamö cäcöbö lucäa yaua jäa fe yadilayofälöma. Jesús nija cäcöbö fa ajedeicunö, cäcöbö wa̦lima. —“Feinö yafälecö jalomaö wei dao”, ¿bei wafäle nofi tabou? —Jesús a cuma. —Awei, Bada tä. Inaja bäfä nofi tabou dodijia lä cule —a nowa taböma. ²⁹ Ö̦jö däjä, cäcöbö mamocu jubälalema. —Bäfäcö mamocu jalomaö a lä cule, yafäle nofi mölabou yalo yafäle nofi lä tabono weinaja showawä —a cuma. Inaja a cuolanö ³⁰ cäcöbö mamocu jaloa showalayoma. Ö̦jö däjä, Jesúsnö cäcöbö a̦ nö wäo wasöö dodijioma. —Bäfäcö mamocu lä jalomalöfe tä ja, ai wafä täbä yömölaö mlai —cäcöbö nowa tama. ³¹ Ö̦jö ma cui, cäcöbö fa alunö, ö̦jamö bä bluca lä bälöblai bä nijamö, tä a̦ wäyäböö blaucou showao fe yadio dicooma. ³² Cäcöbö juu ajedeo showao däjä, fecula anö aca lä bolebömabono wei a lä cui, Jesús nija a ca̦i walobeyolumaje. ³³ Ö̦jö däjä, fecula e fa yashulunö, aca lä boleböono wei a wa̦ faö liyäjäblou co̦layoma. Inaja a cuaaö ja, bä lä co̦camono wei bä lä cui, bä bufi bluca shädayaimoma. Abinaja bä cuma. —Yedu ja ma cui, Isaeli bäma ecö nijamö, ei a jaloa lä tamalufenaja, ¡moli ma cui tä ca̦i jaba dablamou bädaonomi! —bä cuma. ³⁴ Ö̦jö ma cui, faliseo bä bada lä cui, abinaja ö̦jö bä cuma. —Ma. Fecula bada tä lojodenö bä li fecula yashuu buo —bä cuma. ³⁵ Ö̦jö däjä, ai täbä bälöblawä mö lä fedui jamö, shabono bada bä jamö ma cui, wajaquemi bä wai shabono jamö ma cui, ö̦jamö lä Jesús a juu fa cuaanö, täbä yömölaö cuaama. Judio bä yododabä yafi bä jamö, Yai Bada tänö cama ebä nia ca̦i lä cuo wei tä a̦ wäyäö cuaama. Shomitawä bluca tä wayunö täbä lä jaliliano wei bä lä cui, bä bluca jalomaö cuaaö showaoma. Täbä lä wa̦lidiono wei bä ca̦i. ³⁶ Täbä bluca lä mashicou wei täbä fa dalalönö, Jesús a bufi wajäblaliyoma. Oweja bä lä nowamaö wei a cuami däjä, bä nö yamili beblalou lä culenaja, bä nofi tadalema. ³⁷ Ö̦jö däjä, cama ebä lä nocamabono wei bä nija abinaja a cuu yacläoma. —Wale nia lä bufiblaö wejei bä bluca cublawä. Nii bä tamobä bä bada lä waiquiinaja bä cuwä ma cui, bä nii nia lä taö wejei bä bolacami dicowä. ³⁸ Wale nofi mölabobeje, ¿wedi bänö bä nia li yömölaöje? Yai Bada nija bä a̦ da fa, ö̦jö lä. Cama etäca ficali lä cule a Bada lä cui nija wamacö a̦ fa fanö, bä ojodamobä ö̦jönö bä yai shömabä —bä nowa tama.

¹ Ö̦jö däjä, cama 12 ebä lä nocamabono wei bä lä cui, Jesúsnö bä nacaa fa ajedealalönö,fecula bä yashubeje bä tablamalema. Bluca tä wayunö täbä lä jaliliaö wei bä ma cui, täbä bluca lä wa̦lidii bä ma cui, ö̦jö bä ca̦i jalomaö cuaabeje bä tablamalema. ² Jesucristonö bä lä shömöleno wei, ei bä li cuoma. Simón balöwä, Pedro a wa̦fa ca̦i lä cule. Bä fääshä Andrés e ca̦i. Sebedeo bä ijilubö Santiago e ca̦i, ö̦jö bä fääshä Juan e ca̦i. ³ Felipe a ca̦i, Badolomei a ca̦i. Tomás a ca̦i. Mateo a ca̦i, Lomateli bada bä befi bä blada lä doano wei a lä cui. Afeo bä ijilubö Santiago e ca̦i. Tadeo a ca̦i. ⁴ Simón a ca̦i, cama bä ulifibö jamö täbä shomi lämabou nofi lä wa̦libono wei a Simón lä cui. Juda Icaliode a ca̦i, Jesús a nia lä nomojoliano wei a lä cui. ⁵ Jesús ebä 12 lä cui, abinaja ebä nowa talanö ebä shömölema. —Judio bä lä mlai bä nijamö wamacö nia juimi. Samaliateli bä lä bälöle jamö ca̦i mlai. ⁶ Isaeli ebä nodiwä nijamö bä shino da jufälö, iba oweja bä nö yamili lä beblalole bä nijamö. ⁷ Wamacö juu cuaalanö, täbä yömölaö da cuaafälöje. “Yai Bada tänö cama ebä ca̦i nia lä cuo wei, etä ajedou waiquia lä cuimi”, wama bä nowa taö cuaabä. ⁸ Bä lä jalili wei wama bä nia jalomaö cuaaö. Täbä lä nomaö wei wama bä demi nia ca̦i jocädamaö. Bä sicö lä jodei wei wama bä ca̦i nia dodijidablamaö co̦o. Fecula wama bä nia ca̦i yashuu. No mlai ja wamacö lä bayeliblamono weinaja, inaja showawä, no mlai ja wama bä nia bayeliblaö cuo. ⁹ ’Olo bä ma cui, blada bä ma cui, täbä madofi luluamobä ai bä mö feduwä ma cui, ö̦jö wama bä befi ca̦i nia ya̦boimi —a cuma—. ¹⁰ Wamacö lä jublole däjä, shinoco wamacö nia juu. Wama täbä didibofälöbä, wama täbä nia däboimi. Camishi wama bä nia bolacafälöimi. Wamacö mamicö didiobä täbä ma cui, inaja showawä. Fii wama defibä nia ca̦i bofälöimi. ¿Ö̦jö tawä? Shinoco täbä ma juu wei ma cui, bä ojodamou yalo, bä iyamabeje bä li waiquiwä malä cui. ¹¹ ’Ai täbä shabonobö jamö wamacö co̦blaliyou ja, wamacö bälömabou lä ojode wejei bä lä cui nijamö, ö̦jamö bä da yanöcöicu —a cuma—. Wamacö juu co̦ofälöö ja, ö̦jamö lä culanö wamacö nia jocäö co̦o. ¹² Wamacö yafii däjä, ö̦jamö bä lä bälöle wama bä nia bayelimaö showadao, bä bufi ca̦i yanöcöwä cuobä. ¹³ Dodijidawä wamacö waloamaöje ja, Yai Bada tänö bä bufi nia yanöcömabou. Ö̦jö ma cui, dodijidawä wamacö waloamaimi dicooje ja, bä nia bayeliblamoimi. Bä bufi yanöcömabobä bämi. ¹⁴ ’¿Ö̦jö tawä? —a cuma—. Ai bänö wamacö bälömabou bufiomije ja, wamacö a̦ ca̦i ji̦liaö bufiomi dicoweje ja, abinaja wamacö nia cuaaö. Ö̦jö wama bä tabi feiaö yalo wamacö sibolanö, bei wamacö mamicö busi jamö bä libu libu lä sudile, wama ebä nia yaösöblalefälöö. Ö̦jö lä tänö, bä nö nia lä bleaaö wei wama tä nia jömaö. ¹⁵ Cafä wamacö nija ei ya wa̦ lä cui, bejedi lä ya wa̦. Yai Bada tänö täbä jömabä etä cublou däjä, Sodomateli bä nö nia ma bleaaö wei ma cui, Comolateli bä nö nia ca̦i ma bleaaö wei ma cui, ö̦jö lä bä nö nia shino yai bleaaö dodijio. ¹⁶ ’Bämacö shömaö lä cule —Jesús a cuma—. Ji̦ima bä waiteli lä läle jamö, oweja bä shäablamou si ijejewä lä cuo weinaja, wamacö nia cuo. Olu bä moyawe lä culenaja, bä moyawäa da cuicu. Joledo bä a̦ ji̦limamou oquejewä lä culenaja, bä a̦ ca̦i oquewä cuo mö da feduo. ¹⁷ Yanowamö täbä nija bä da moyaweicu. Judio bä bada lä yododoblai bä nijamö wamacö noshi nia ö̦jödabouje, wamacö nö bleaamabeje. Judio bä yododabä yafi bä jamö wamacö si nia ca̦i yafelimaöje. ¹⁸ Iba wamacö yalo, bada bä yai bälöo lä dodijio wei bä nijamö wamacö nia lulubou fe yadioje. Bada bänö cama ebä lämabou mö lä feduo wejei bä ma cui nijamö, inaja showawä. Judio bä ma cui nija, judio bä lä mlai bä ma cui nija, ö̦jö bä nija wamale a̦fa wäyäbä, ö̦jö tä ca̦i nia cuo. ¹⁹ ’Bada bä nija wamacö noshi ö̦jödabouje däjä, wamacö nofi nia lä bäyäo wei tä a̦ ja, bä bufi jo̦lijou dicoo dijä —a cuma—. Wamacö wa̦liije däjä wamacö a̦ moyawe juobä, ö̦jö däjä showawä, wamacö a̦ nia bayeliblamou. ²⁰ Cafä wamacö a̦ mlai, Faafä a lä culadi bei Bufinö wamacö a̦ nia macocamaö. ²¹ ’Tä nia wa̦lidiblou —a cuma—. Cama bä mashi ma cuinö bä noshi nia ö̦jödabouje, bä shäbeje. Bä fö̦ö bä ma cuinö, bä ijilubö ebä noshi nia ö̦jödabouje. Bä ijilubö ebä ma cuinö, bä fö̦ö, bä nöö ebä nabä nia shömaöje, bä shäbeje. ²² Iba wamacö yalo, bluca bänö wamacö nofi nia wa̦libouje. Ö̦jö ma cui, a shämobä etä ma cuo däjä ma cui, a nö wa̦lojaö fe lä yadio wei a lä cui, ö̦jö a nia jucäamou fe yadio. ²³ ’Ai täbä shabonobö jamö wamacö nö bleaamaöje ja, ai lä täbä shabonobö nomöjöwä jamö, bä docua cuablalou da majöofälö —a cuma—. Cafä wamacö nija ei ya wa̦ lä cui, bejedi lä ya wa̦. Isaeli ebä nodiwä lä bälöblai jamö wamale a̦fa wäyäö jödödou cuaaö showao mlao däjä, camiyä ya lä yanowamöblaleyoluno wei ya lä cui, ya nia waloo co̦oyoluu. ²⁴ ’Tä a̦ lä wäyäö wei a wa̦ ji̦liaö mlaoje däjä, cama ebä lä nocale bä a̦ nia ji̦liaö ayaomije —a cuma—. Inaja showawä, bada a lä cui a nofi tabou mlaoje däjä, cama ebä nofi tabou ayao mlajeicätä. ²⁵ Tä a̦ lä wäyäö wei a wa̦ ji̦liaö lä mlajeinaja, inaja showawä cama ebä lä nocao wei bä a̦ nia ji̦liaimi cuo mö feduoje. Bada a nofi tabou lä mlajeinaja, inaja showawä cama ebä nofi nia taboimi cuo mö feduoje. Inaja lä waiquiwä. Bä ca̦i lä cule a bada lä cui, a wa̦fa Sadanasi taö waiquiweje yalo, cama ebä lä cule bei ebä a̦fa wayobou dodijia yaiqueije. ²⁶ ’Yanowamö täbä nö quili ta dijejä, ö̦jö lä —Jesús a cuma—. Tä a̦ fei däjä wäyämamou lä ja̦too wei, wawädowä tä a̦ nia wäyämamou malä nomöjöo wei. Tä a̦ lä jo̦yabou wejei, tä a̦ nia jödödöwä wawäblamou malä cui. ²⁷ Cafä wamacö nija ya tä a̦ wäyäö lä ja̦too wei tä a̦ lä cui, wawädowä tä a̦ da wäyäje. Wajado wama tä a̦ lä ji̦liablaö wei tä a̦ lä cui, wamacö a̦ nacläalanö tä a̦ fe da dolemaje. ²⁸ Yanowamö täbä nö quili ta dijejä. Bei wamacö shäö ma cujei, bei wamacö bufi nia nomamaimije. Ma, Yai Bada a nö quili yai shino da taje. Ö̦jönö täbä shäö däjä, bei täbä ma cui, bei täbä bufi ma cui, shobali wacö jamö täbä nö yai bleaamaö lä daö wei, ö̦jö a. ²⁹ ’Blada moli a wai ja, biyomö bolacabö cäcöbö wai däamamou talei. ¿Ö̦jö tawä? —a cuma—. Biyomö bä nowa bluca ma mlai ma cui, Faafä a lä culadinö bä nofi bluca jaducubou. Bä lä nomablou wei bä ca̦i daö. ³⁰ Bä nofi jo̦lio dijä. Bei wamacö feta u̦cu ma cui, Yai Bada tänö wamacö feta u̦cu bluca daö. ³¹ Bä quili dijä, ö̦jö lä. Biyomö bä nowa lä culenaja mlai, Yai Bada tänö cafä wamacö nowa yai blucabou —a cuma. ³² Abinaja Jesús a cuma. —Yanowamö täbä nija, quilii mlai ja iba bä a̦fa wäamou lä wawädoo wei bä lä cui, iba ya bä a̦fa nia ca̦i wawädowä wäyäö mö feduo. Camiyä ya lä yanowamöblaleyoluno wei ya lä cuinö, Fayä a lä culadi jamö iba ya bä a̦fa nia ca̦i wawädowä wäadayou. ³³ Ö̦jö ma cui, yanowamö täbä nija iba bä a̦fa wäamou lä quilii wei bä lä cui, Fayä a lä culadi jamö ö̦jö ya bä a̦fa nia ca̦i wäyäimi mö feduo. ³⁴ Jesús abinaja a cuma. —Bita jamö yanowamö ya täbä yanöcömabobä, ya junomi. ¿Ö̦jö tawä? Inaja bä bufi cu dijä. Ma, ya täbä shino yai sheleleblamabä, ya juma. ³⁵ Bä fö̦ö nija bä ijilubö e a̦ nia läblou. Bä nöö nija bä tää e a̦ ca̦i nia läo mö feduo. Bä yesi nija bä tatä e a̦ ca̦i nia läo mö feduo. ³⁶ Iba wamacö yalo, afä bä mashi cadidiwä ma cuinö wamacö nofi nia yai wa̦libouje. ³⁷ ’Wale jo̦wa ma bufii wejei ma cui, bä fö̦ö ebä nija bä bufi mö blucao dicoo ja, bä nöö ebä nija bä bufi mö ca̦i blucao dicoo ja, iba bä cuobä bämi waiquiwä. Bä ijilubö ebä ma cui, bä tää ebä ma cui, inaja showawä. Ö̦jö bä nija bä bufi mö blucao dicoo ja, iba bä nia cuomi. ³⁸ Camiyä nija bä nia lä nocao wei bä lä cui, bä cuaaö bufi lä doblao wei tä ja, bä yai nia wasöo. Wale bufiije yalo bä ma shäö wejei ma cui, bä nia ojode cudio fe yadio. Bä nia nocao fe yadio. ³⁹ Eja bä demi nia lä cudio wei tä ja bä bufi mö lä blucao wei bä lä cui, bä ba̦limi nia cuoimi. Ö̦jö ma cui, camiyä ya nowa ja bä shämou lä ojodao wei bä lä cui, ö̦jö bä nia shino ba̦limi cuo ayao. ⁴⁰ Abinaja Jesús a cuma. —Cafä dodijidawä wamacö co̦blamaöje ja, camiyä ma cui wale dodijidawä co̦blamaö mö feduoje. Inaja showawä, dodijidawä wale lä co̦blamaö wejei bä lä cuinö, wale lä shömöleno wei a ma cui, ö̦jö a ca̦i dodijidawä co̦blamaö mö feduoje. ⁴¹ ’Yai Bada a wa̦no wäyäö yalo a dodijidawä lä co̦blamaö wejei bä lä cui, Yai Bada a wa̦no wäyälewä bä nia dobämou lä culenaja, ö̦jö bä nia ca̦i dobämou cuo mö feduodayou. ¿Ö̦jö tawä? —a cuma—. A cadidou yalo a dodijidawä lä co̦blamaö wejei bä lä cui, bä lä cadidou wei bä nia dobämou lä culenaja, inaja showawä ö̦jö bä nia ca̦i dobämou cuo mö feduodayou. ⁴² ’Iba ai a wai bädawä ma cui, camiyä nija a nocao yalo a lä dobäö wejei bä lä cui, inaja showawä ö̦jö bä nia ca̦i dobämou cuo mö feduodayou. Cafä wamacö nija ei ya wa̦ lä cui, bejedi lä ya wa̦. Mau si ajiwä u ja a dobäö bädao ma cujei, bä nia dobämodayou —a cuma.

¹ Cama 12 ebä lä nocamabono wei bä yömölaa fa jödödöblalönö, Jesúsnö bä ca̦i aa co̦layofälöma. Täbä bälöa lä ajedeblai täbä shabonobö jamö bä ca̦i juu cuaama, ö̦jamö lä tä a̦ ca̦i wäyäö cuaafälöbä. ² A fe lä lale jamö Juan a yömöladayomaje, Cristo a lä cuaano wei tä ja. Ö̦jö däjä, Jesús nija Juan a wa̦no wäyädayobeje, cama ebä lä nocamabono wei ai ebä shömölema. ³ Jesús a wa̦liije ja, abinaja ebä cuyoluma. —A jo̦wa nia lä juno wei, ¿ö̦jö cafä wa waiquiwä tawä? Ma, cafä mlai, ¿ai a nia yai lä juu wei yama a nö dabou showaobä daanö? —bä cuma. ⁴ Abinaja Jesúsnö bä nowa tama. —Wama tä a̦ lä ji̦liaö wei tä a̦ ma cui, wama tä lä dablaö wei tä ma cui, Juan nija tä a̦fa bluca da wäyäduje. ⁵ Bä lä jubäbö wei bä lä cui, bä mamocu dodijidablou co̦o. Bä juu dao lä mlai bä lä cui, bä jublou. Täbä sicö lä jodemaö wei tä wayunö bä nö lä bleaaö wei bä lä cui, bä dodijidablou co̦o. Bä yömöca lä comi wei bä lä cui, bä yömöca walalablou co̦o. Bä lä nomaö wei bä lä cui, bä demi jocädou co̦o. Bä lä jo̦li wei bä lä cui, dodijidawä tä a̦ ja bä yömölamou. ⁶ ¿Ö̦jö tawä? Camiyä wale nofi mölabou fe lä yadio wei a lä cui, ö̦jö a bufi nia yai doblalou —bä nowa tama. ⁷ Ö̦jö däjä, Juannö bä lä shömöleno wei bä aa fa co̦lufälönö, bluca bä lä co̦camono wei bä nija, Jesúsnö Juan a wa̦fa wayoaö juoma. —Ulifi bloque a jamö, ¿wedi wama tä möbä wamacö li juma? ¿Wadoli anö cau cau bä lä yalälaö wei wama bä möö bädaobä daanö? Mlaicätä. Wamacö juu buonomi. ⁸ Ja̦o. ¿Wedi wama tä yai nia fa mönö, wamacö li juma, ö̦jö lä? —a cuma—. Camishi dodijidawä bä ja a yai lä didio wei wama a möbä, ¿bei wamacö juma? Ma, camishi dodijidawä bä ja bä lä didio wei bä lä cui, ulifi bloque a jamö, ö̦jö bä nia cuomi. Bada bä bälöo lä dodijio wei bä nija, ö̦jö bä li bälöo. ⁹ ’¿Wedinaja a wa̦lo cuwä wama a yai nia fa mönö, bei wamacö juma, ö̦jö lä? —a cuma—. ¿Yai Bada a wa̦no wäyälewä wama a möö mlaobä daanö? Awei. Ö̦jö wama a möbä lä. Cafä bämacö nowa taö lä cule. Juan a lä cui, Yai Bada a wa̦no wäyälewä ai a bädawä mlai, ö̦jö bei a shino yai bada dodijiwä. ¹⁰ Yai Bada tä a̦ oni jamö, Juan a wa̦fa ca̦i wäyämou balöoma. Abinaja tä a̦ cuu. Bei. Wa nia juu lä cuaafälöö wei jamö wa wa̦no taö balöafälöbä, iba ya nia shömaö balöo, wa wa̦ ji̦liaö dodijidaobeje. ’Einaja tä a̦ cuu —a cuma—. ¹¹ ¿Ö̦jö tawä? Cafä wamacö nija ei ya wa̦ lä cui, bejedi lä ya wa̦. Bluca bä lä bälöblai bä ma cui nija, bä jaba lä bälöjono wei bä ma cui nija, Juan nija a bada fe biyäjäobä a cuami. ¿Ö̦jö tawä? Ö̦jö ma cui, Yai Bada tänö cama ebä ca̦i lä cuo wei bä lä cui, ö̦jö bä nofi shino yai tabobeje cäbä. Ö̦jö bä nijamö a cua lä bäle a ma cui nija Juan a nojablaliyo. ¹² ’¿Ö̦jö tawä? —a cuma—. Yai Bada tänö cama ebä nia ca̦i lä cuo wei tä a̦ ja, ai täbä a̦ läblou. Tä a̦ ca̦i waibouje. Juannö täbä lä yömölano wei däjä, bä a̦ jaba wawäblaliyoma. Fei däjä showawä ma cui, bä a̦ lojodoaö showawä. ¹³ Cama ebä ca̦i nia lä cuo wei, Yai Bada a wa̦no wäyälewä bä bluca lä cuinö tä a̦fa wäyäö balöblaomaje, Juan a cublou showao mlao däjä. Moisesi tä a̦ jamö ma cui, ö̦jö tä a̦fa ca̦i wäyämou showao balöoma. ¹⁴ Ö̦jö wama tä a̦ bejedi bufibou ja, Juan wama a nö nia ö̦jöböaö showao. Elia a nia jo̦wa juu lä co̦ono wei, ö̦jö a cuoma. ¹⁵ Wamacö yömöcacö lä walalai, bä yömöca daa da dodijiicu. ¹⁶ ’Wamacö fei däjä lä bälöblai wamacö lä cui, ¿wedi tä cuwä lä dodijiinaja, bei wamacö cuwä dodijiwä? —a cuma—. Wamacö a̦ juomi fe balojowä. Ijilu bä i̦liyamobä jamö, bä a̦ juayou lä mlainaja showawä. Nii bä lulabeje jamö ijilu bä i̦liyamou däjä, abinaja bä cuaaö. Ai bä mashi i̦liyamou fa shomitaicunö, abinaja bä nowa taöje. ¹⁷ “Uo. ¿Wedi tabä yamalecö a̦ li juaimi dicowä? Amowa yama fi jolaö däjä ma cui, wamacö li blaö blaömoimi. Jole jole yamacö ma ö̦cöö däjä ma cui, wamalecö a̦ ca̦i bayeliblaimi”, bä nowa taöje. Ijilu bä i̦liyamobä jamö, showadi einaja bä li taamayou. ¹⁸ ’¿Ö̦jö tawä? —Jesús a cuma—. Cafä wamacö ma cui, inaja showawä wamacö cuaaö. Wamacö a̦ juomi fe balojowä. Fe ojomalewä Juan a lä cui, ö̦jö wama a wa̦ juano malä mlai. Ö̦jö a fa waloiquiyonö, a iyaö wasöoma. Nashiwä toubä ca̦i coanomi. A waiyoma cudeenö, “A li feculabö”, wama a nofi li taboma. ¹⁹ ¿Ö̦jö tawä? Juan a lä cuaano weinaja, ya cuaaö ma mlai ma cui, inaja showawä camiyä ya lä yanowamöblaleyoluno wei ya lä cui, wamale a̦ ca̦i ji̦liblaimi cuwä mö feduwä. Camiyä ya fa waloiquiyonö, ya ca̦i waiyo mlai ja ya iyaö showawä. Bei ya toubä ca̦i coaö. Ö̦jö ma cui, wamale a̦fa ca̦i wayoaö mö feduwä showawä. “Showadi a iyadii”, wamacö cuu. “A shi wa̦lii bufi fa doblaonö, toubä coadii”, wamacö cuu. “Lomateli bada bä befi, bä blada lä doaö wejei bä ma cui, wa̦lidiwä talewä ai bä ma cui, bä shino nofimadii”, wamacö cuu. ¿Ö̦jö tawä? Inaja wamacö ma cuu däjä ma cui, Yai Bada a wa̦ moyawe. Ö̦jö a wa̦ lä cadidibou wejei bä bluca lä cuinö a bejedi dablamaöje—Jesús a cuma. ²⁰ Ö̦jö däjä, Jesúsnö ai bä lä bälöblai bä nowa blajawä tama. Ö̦jö bä yafibö jamö, tä nö lä quilijii showadi tä bluca ma wawämano wei ma cui, wa̦lidiwä tä ja bä bufi lädonomi cudeenö, bä nowa li tamoma. ²¹ Bä nowa blajawä taö ja, abinaja a cuma. —Colasiniteli wamacö, Besaidateli wamacö, wamacö nö bleaaö fe balojoobä wamacö. Yai Bada wama a lojode dablabä, cafä wamacö nijamö tä nö lä quilijii, bluca ya tä wawämama. Diloteli bä nijamö, inaja ya cuaaö mö feduo fa cunoja, Sidonoteli bä nijamö, ya inaja cuaaö mö feduo fa cunoja, wa̦lidiwä tä ja yedu bä bufi nö lädaliobö wei. Bä doblou lä mlai tä ja, yubu ushibö ja yedu bä nö looquebö wei. Camishi a̦loqui bä ja yedu bä nö didiobö wei, bä bufi nö wa̦lidiwä ö̦jöböamobä. ²² Abinaja bämacö nowa taö lä cule. Yai Bada tänö täbä obi nia lä jömadayou wei jamö, Diloteli bä nö nia ma bleaaö wei ma cui, Sidonoteli bä nö ca̦i nia ma bleaaö wei ma cui, cafä bei wamacö nö nia shino yai bleaaö fe balojoo. ²³ ’Cabenaoteli wamacö —a cuu nomöjöoma—. ¿Fedu jamö, Yai Bada tänö cafä dodijidawä wamacö nia tabodayou daanö? Mlaicätä. Bä lä nomaö wei bä cuobä jamö wamacö nia shäyäjäabodayou, täca nö quiliwä lä cubodi jamö. Yai Bada wama tä lojode dablabä, cafä wamacö nijamö tä nö lä quilijii ya tä bluca malä wawämano wei. Sodomateli bä nijamö, inaja ya ca̦i cuaaö fa cunoja, fei däjä ma cui bä nö yafibö cuo showaobö wei. ²⁴ Abinaja bämacö nowa taö lä cule. Yai Bada tänö täbä obi nia lä jömadayou wei jamö, Sodomateli bä nö nia ma bleaaö wei ma cui, cafä bei wamacö nö nia shino yai bleaaö fe balojoo —a cuma. ²⁵ Ö̦jö däjä, abinaja Jesús a cuma, Yai Bada nija. —Fabe. Fedu jamö ma cui, bita jamö ma cui, cafä lä wa shino Bada cua ayaa. Ei ya tä a̦ lä wäyäfe, bä bufi a̦fa moyawä lä taö wejei bä nija wa tä a̦ nofi mojodumabou. Bä bufi a̦fa dao lä taö wejei bä ma cui nija, inaja showawä. Inaja ö̦jö wa bä ma taamabou däjä ma cui, jai ijilu täbä lä cule bä nija wa tä a̦ yai wawäblamalema. ²⁶ Awei, Fabe. No mlai ja, inaja wa bä taamaö bufi malä doblaono wei. ²⁷ ’Jödödöwä täbä nija ya Bada läobä, Fayänö wale tablamalema —a cuu nomöjöoma—. ¿Ö̦jö tawä? Yanowamö täbänö wale daimije. Fayä a lä culadinö, bä Ijilubö ya e lä cui wale shino daö ayawä. Inaja showawä, Fayä a daö ma mlajei ma cui, camiyä bä Ijilubö ya enö ya shino daö ayawä. Fayä ya dablamaö bufi lä doblao wei bä lä cui nija ya fa damalalönö, ö̦jö bä ma cuinö a daö mö feduweje. ²⁸ ’Wamacö bufi nö modawä lä bleaale wamacö lä cui, wamacö bufi nö wa̦lidiwä ca̦i lä beblalou wei wamacö lä cui, camiyä nijamö ¡bä da juima! Camiyä nija wamacö fa waloboyonö, bämacö bufi nia yanöcömabou. ²⁹ Bämacö nosiemaö ja wamale a̦ da julä, camiyä nija wamacö damamobä. Ya wa̦ oquewä malä cui. Ya ca̦i nofi. Camiyä nija wamacö bufi nia shino yanöcöwä ca̦i cuo. ³⁰ Bä dodijidawä cuobä, ya bä li nosiemaö malä cui. Ya bä lä taamaö wei tänö ya bä bufi nö bleaamaö malä mlai —Jesús a cuma.

¹ Sábado däjä, ficali ca jamö Jesúsnö cama ebä ca̦i jayuafälöma, täbä yanöcöobä tä mö jalu lä cui däjä. Bä lä nocamabono wei bä ofälayofälöma yalo, mobä jucäa jayualalefälömaje, mobä owafälöbeje. ² Ö̦jö ma cui, faliseo bä bada lä cuinö, ö̦jö bä fa dalalöjenö abinaja Jesús nija bä cuma. —Quiji afä wabä lä nocamabole, bä da mö. Täbä yanöcöobä tä mö jalu ja, inaja bä cuaaö mlaobä tä a̦ ma läle ma cui, bä cuaaö fe yadio —bä cuma. ³ Jesúsnö abinaja bä nowa tama. —David a bada lä cuaano wei, ¿bei wama tä a̦ oni daö mlaa cule? Cama a ma cui, cama ebä lä nocaono wei bä ma cui, bä ofäö yalo, ⁴ Yai Bada etä yano jamö a lucäa fa jayulofälönö, Yai Bada ebä nii lä yaimabou wejei bä nii ja, a iyalayofälöma. ¿Ö̦jö tawä? Ö̦jö bä nii ja, nofi bäyäalewä bä iyabä bä nii yaioma. David a iyabä bä nii cuonomi. Cama ebä lä nocamabono wei bä ma cui, inaja showawä. Bä iyaö mlaobä, Moisesi etä a̦ läoma. Ö̦jö ma cui, inaja David a ma cuaano wei ma cui, a jömamonomi. ¿Ö̦jö tawä? ⁵ ’¿Moisesi bei wama etä a̦ oni ca̦i daö mlaa cule? —a cuma—. Täbä yanöcöobä tä mö jalu ja, täbä ojodamou mlaobä tä a̦ ma läle ma cui, Yai Bada etä yafi jamö nofi bäyäalewä showadi bä ojodamou fe malä yadio wei. Inaja bä ma cuaaö wei ma cui, bä jömamobä bämi. ⁶ Yai Bada cama etä yafi li cudeenö, täbä yanöcöobä tä ma cui ja, bä li ojodamou fe yadio. ¿Ö̦jö tawä? Yai Bada etä nofi yafi tabobeje etä yafi malä cui. Ö̦jö ma cui, a nofi nia yai tabou lä dodijio wejei a lä cui, fei däjä a cua lä cule. ⁷ ’¿Ö̦jö tawä? —a cuma—. Iba wama bä jömabä bä ma mlai ma cui, Yai Bada ei wama etä a̦ ji̦liaö walalao dicoo fa mlacunö, wama bä li jömaö yacläoma. Ei tä a̦ ja wamacö bufi yai jaducuo fa cunoja, wamacö a̦ nö fabö mlai. Abinaja tä a̦ cuu. Yalo wama bä ö̦shö lä dodobou wei, ö̦jö ya tä bufiboimi. Yanowamö wama täbä nofi nia lä ojodabou wei, ö̦jö ya tä shino yai bufii. ⁸ ’Einaja tä a̦ cuu —a cuma—. ¿Ö̦jö tawä? Täbä yanöcöobä tä mö jalu jamö täbä nia lä cuaaö wei tä ma cui ja, täbä nia cuaaö lä mlai tä ma cui ja, camiyä ya wa̦ fabä ei Bada ya waiquiwä, ya lä yanowamöblaleyoluno wei ya lä cui. ⁹ Ö̦jamö Jesús a ca̦i fa jayuicunö, judio bä yododabä yafi jamö, a lucäa nomöjölayoma. ¹⁰ Ö̦jamö lä imicö lä cofeono wei a cuoma. ¿Ö̦jö tawä? A nia dobloimi fa jömajenö, Jesús a wa̦limaje. —Sábado däjä täbä nia lä jalomaö wejei, ¿bei tä a̦ läami daanö, täbä yanöcöobä tä mö jalu ja? —bä cuma. ¹¹ Abinaja Jesúsnö bä nowa tama. —Ai wa lä cuinö, täca täca aca jamö moli wa oweja lä tabole a quequei ja, täbä yanöcöobä tä mö jalu ma cui ja, ¿wa nia yäbäaö co̦omi daanö? ¿Ö̦jö tawä? ¹² Oweja bä nowa ma cua wei ma cui, yanowamö täbä nowa shino yai bluca dodijiwä. Täbä yanöcöobä tä mö jalu jamö bämacö dodijaö mlaobä, tä a̦ läami. ¹³ Inaja a fa culunö, imicö lä cofeono wei a nija abinaja e cuma. —Boco da dodoiquiyo. Boco fa dododalunö, imicö cushäshäblou showadalayoma. Ai imicö mashi dodijidawä lä culenaja, imicö cublou co̦layoma. ¹⁴ Ö̦jö ma cui, faliseo bä bada faa fa co̦lufälönö, Jesús a nabä queobeje a nofi washuaö showadaomaje. ¹⁵ Jesús a nofi lä washuaö wejei tä daö fa waiquionö, shomi jamö a aa majölayofälöma. Cama nija bluca bä nocao fa showaofälönö, bä bluca jalomama. ¹⁶ Bä fa jalomanö, bä a̦ wasödaö showaoma, a nö ö̦jöböamaö mlaobeje. ¹⁷ Inaja a lä cuaano wei, Yai Bada a wa̦no wäyälewä Isaia a lä cuinö tä a̦ wäyäö showao balöoma. Ö̦jö etä a̦ bejedi wawäblobä, inaja Jesús a li cuaafälöma. Abinaja tä a̦ cuu. ¹⁸ Bei. Ya wa̦ juamobä, ei ya yailema. Ya nofimaö fe balojowä. Cama nija ya bufi yai doblalou. Bei ya Bufi fa lucälönö, judio bä lä mlai bä nia bluca yömölaö cuaaö. Camiyä nija bä nia dodijidawä cuo fe lä yadio wei tä a̦ nia wäyäö. ¹⁹ A wa̦ nia lafujoimi. Täbä lä juaaö wei jamö, bä a̦fa lä taö wei a wa̦ nia ji̦limamou bädaomi. ²⁰ Bä lä ujudi wei bä lä cui, bä nö nia bleaamaimi. Bä ujudiblou fe balojowä ma cui, dodijidawä bä nia ca̦i cuo fe yadio. Inaja a cuaaö showao däjä, camiyä nija bä dodijidawä cuo fe yadiobä, a nö yai nia wa̦lojaö ayao. ²¹ Judio bä lä mlai bä lä cuinö a nia bufiblaöje. Einaja tä a̦ cuu. ²² Ö̦jö däjä, fecula anö aca lä bolebömabono wei a lä cui, Jesús nija a ca̦i walobeyolumaje. A ca̦i jubäböoma. Jesúsnö a fa jalomalönö, aca lä boleböono wei a wa̦ faö liyäjäblou co̦layoma. Täbä ca̦i möö co̦oma. ²³ Ö̦jö tä fa dalalöjenö, bä bufi bluca shädayaimoma. —¡Jo yai! —bä cuma—. David nodiwä e nia jo̦wa lä waloono wei, ¿fei ö̦jö lä a waiquiwämi daanö? ²⁴ Ö̦jö ma cui, faliseo bä bada lä cuinö, ö̦jö bä a̦ fa ji̦liläjenö abinaja bä cuma. —Ma. Fecula bada Sadanasi tä lojodenö bä li fecula yashuu buo, Yai Bada tä lojodenö mlai —bä cuma. ²⁵ Bä bufi lä cuno wei tä daö waiquioma yalo, abinaja Jesús a cuma. —Bä bälöa lä yaile bä nofi wa̦liayou däjä, bä nia bälöo dobloimi majöo. Cama bä shabonobö jamö bä lä cule bä ma cui, cama bä mashi ma cui, inaja showawä. Bä nofi wa̦liayou däjä, bä nia bälöo lojodoo majöomi. ²⁶ Ma, Sadanasi nija ya cuo fa cunoja, iba ya bä nö yashublabö mlai. ¿Wedinaja cama Sadanasi a yashublamou li cuobä, ö̦jö lä? Ma, Sadanasi ebä lä cui, cama bä nofi wa̦liayou dicolayou ja, ¿wedi jamö tänö bei ebä ca̦i li lojodoa nomöjöquei? ²⁷ ’“Sadanasi a lojodenö bä li fecula yashublaö”, wamale nofi tabou ja lä, ¿inaja showawä afä wama bä nofi ca̦i tabou da culanö, fecula bä lä yashuu wejei bä lä cui? Mlaicätä. Inaja wamacö cuu dicoo ja, afä bä showawä lä cuinö wamacö jolemou jömaö cuqueije —a cuma—. ²⁸ Ö̦jö ma cui, Yai Bada a Bufi lojodenö ö̦jö ya bä li yashuu, Yai Bada tänö cama ebä ca̦i lä cuo wei wama tä dablaö fe yadiobä. ²⁹ ’A lä waiteli wei a lä cuinö, cama madofi ebä nofi läbou däjä etäbä nia yabäcamaimi —a cuma—. Shomi täbä nia lucämaimi. ¿Ö̦jö tawä? Ö̦jö ma cui, a nö yai lä wa̦lojaö wei a lä cuinö a nabä fa waloicunö, a fa o̦cablalönö, ö̦jö däjä cama etäbä bluca lä tabole etäbä nia shino yai däalalei —cama a wa̦fa tao ja, a cuma. ³⁰ —Camiyä wale bayeliblaö lä mlai a lä cuinö, Sadanasi a li bayeliblaö waiquiwä —Jesús a cuma—. Iba ya bä co̦abä jamö bä co̦aö mö feduo lä mlai a lä cuinö, bä yai sheleleblamaö. ³¹ Ö̦jö cudeenö bämacö nowa taö lä cule. Yanowamö täbä nijamö tä nowa wa̦lidiwä bluca lä cule etä nowa mladou dao. Yai Bada a nö waiblaöje ja, tä nowa ca̦i mladamaö dao. Ö̦jö ma cui, Yai Bada a Bufi nö lä waiblaö wejei bä lä cui, etä nia mladoimi waiquiwä. ³² ¿Ö̦jö tawä? Camiyä ya lä yanowamöblaleyoluno wei, wale nö ma waiblaö wejei ma cui, tä nowa nia mladou. Ö̦jö ma cui, Yai Bada a Bufi nö waiblaöje ja bä a̦ wa̦lidiwä lä faö wei bä lä cui, ö̦jö etä nia mladoimi waiquiwä. Fei däjä ma cui, obi ma cui, etä nowa nia shino cudio shi wa̦lii showao. ³³ ’Bä bufi yai da shaliliblalu —Jesús a cuma—. Defi dodijidawä waiquiwä ja, ö̦jö defi jamö dodijidawä täcö nia dablamou. Defi wa̦lidiwä ja, wa̦lidiwä täcö nia ca̦i dablamou mö feduo. Täbä nii lä lalou wei täbä ja, defibä nö malä ö̦jöböamou wei. ³⁴ ’Cafä ¡olu bä wayu lä culenaja, wamacö cuwä! —a cuma—. Wamacö jolemou. Wamacö wa̦lidiwä waiquiwä yalo, ¿wedinaja wamacö a̦ li dodijidawä faö cuo majöobä? Bei täbä bufi jamö tä lä didile etä a̦ shino malä wawäblou wei. ³⁵ A lä dodijaö wei a wa̦ faö däjä, bei bufi jamö tä dodijidawä lä didile etä a̦ nia wawäblou. Inaja showawä, wa̦lidiwä talewä a lä cui a wa̦ faö däjä, bei bufi jamö tä wa̦lidiwä lä didile etä a̦ nia ca̦i wa̦lidiwä wawäblou mö feduo. ³⁶ ’Bämacö nowa taö lä cule —a cuma—. Yai Bada tänö täbä bluca jömaö däjä, yanowamö täbä a̦ faö lä bädao wei tä a̦ ma cui ja, bä a̦ nia wäamadayou. ³⁷ Bä a̦ dodijidawä lä fano wei bä lä cui, bä nia dodijidawä jömamou. Bä a̦ wa̦lidiwä lä fano wei bä lä cui, bä wa̦lidiwä fa jömamonö, bä nö bleaaö cuquei—a cuma. ³⁸ Ö̦jö däjä, Moisesi tä a̦ ja täbä lä damaö wejei bä bada ma cui, faliseo bä ca̦i bada ma cui, abinaja Jesús nija bä cuma. —Tä a̦ wäyäle. Yai Bada wa e nö ö̦jöböamobä, tä nö lä quilijii tä da wawämalö, yama tä möbä —bä cuma. ³⁹ Ö̦jö ma cui, abinaja Jesús e cuma. —Wamacö fei däjä lä bälöblai, wamacö bluca dobloimi fe balojowä. Yai Bada wama a wa̦ juaimi dodijiwä. Yai Bada ya e nö ö̦jöböamobä, tä nö lä quilijii wama tä wawämaö bufi ma doblao wei ma cui, bämacö a̦ nia juaimi. Wama tä nia lä möö wei, Yai Bada a wa̦no wäyälewä Jonasi a lä taamano weinaja, inaja tä cuwä, wama tä nia shino möö. ⁴⁰ ¿Ö̦jö tawä? Yuli busi jamö, Jonasi a didio däjä, bolacabö a fe didi lä cublaliyono weinaja, camiyä ya lä yanowamöblaleyoluno wei ya lä cui, inaja showawä ya fe nia didi cublou, mashita a cojomö jamö. ⁴¹ ’Wamacö fei däjä lä bälöblai wamacö jömadayobä jamö, Ninibeteli bä nia ca̦i ublao yädäo mö feduo —a cuma—. Ö̦jö bä ma cuinö wamacö nia ca̦i jömaöje. Wamacö ca̦i nia waimaö bufiije. Jonasi nija Yai Bada etä a̦ fa ji̦liläjenö, wa̦lidiwä tä ja bä bufi lädou malä showadalayono wei. ¿Ö̦jö tawä? Jonasi a bada ma cui, camiyä bei ya yai bada dodijiwä. Fei däjä, cafä wamacö nijamö camiyä ya yai cua ma cule, wamale a̦ ji̦liblaimi. ⁴² ’Wamacö fei däjä lä bälöblai wamacö jömadayobä jamö, Sabaateliyoma a bada bälöo lä dodijiono wei a suwä nia ca̦i ublao yädäo mö feduo —a cuma—. Ö̦jö a ma cuinö wamacö nia dobloimi jömaö. Wamacö nia waimaö bufii. ¿Ö̦jö tawä? Bada tä Salomo a wa̦ ji̦liabä, ö̦jö a li suwä blajawä waloa fe malä yadiqueno wei. Salomo a bada ma cui, camiyä bei ya yai bada dodijiwä. Fei däjä, cafä wamacö nijamö camiyä ya yai cua ma cule, wamale a̦ ji̦liblaimi —Jesús a cuma. ⁴³ Jesús a wa̦ faö co̦o ja, abinaja a cuma. —Fecula a yashublamou däjä, a lä tabou wei a daquefälöö. Ö̦jö däjä, tä ulifi bloque lä wejedii jamö, a shoqueadii cuaaö bäa. A yanöcöobä, tä ma dayäö wei ma cui, tä dablaimi. ⁴⁴ Ö̦jö däjä, abinaja a fecula cuu. “Ya da dacöi nija ya yai nia bälöo co̦o”, a cuu. Ö̦jö däjä, a lä daquefälöno wei a lä cui nija a waloa fa co̦iquiyonö, yafi bloque a dalalei. A yafi wawädowä. A yafi dodijidablaö jälayoma. ⁴⁵ Ö̦jö däjä, ai bä co̦ablaö aa fa co̦lunö, 7 bä ca̦i fecula waloa co̦queyoluu. Cama a wa̦lidiwä ma waiquii ma cui, bä yai wa̦lidiwä fe lä balojoi bä ca̦i waloa majöqueyoluu. Ö̦jö nija bä fa lucälönö bä bälöaliyo. Bä lä tabou wei a lä cui, a nö jaba ma bleaano wei ma cui, ö̦jö lä däjä, a nö yai bleaaö dodijiquei. Inaja showawä wamacö fei däjä lä bälöle wamacö nia taamamou —a Jesús cuma. ⁴⁶ Täbä yömölaö showao däjä, Jesús bä nöö, bä fääshä ebä walobeyoluma. Sibo jamö bä ublalanö a nacamaö bufimaje. ⁴⁷ Jesús nija abinaja ai e cuma. —Naafä a ma cui, fääshäfä bä ma cui, bä ublaa siboa lä cubiyedi. Wa wa̦ jo̦wa wayomaö bufi doblaoje —a cuma. ⁴⁸ Ö̦jö ma cui, a lä yömölano wei a lä cui nija abinaja Jesús e cuma. —¿Wedi nija bei ya yai li nöömou, ö̦jö lä? ¿Wedi jamö bä nija bei ya yai li fääshämou? —a cuma. ⁴⁹ Ö̦jö däjä, cama nija bä lä nocaono wei bä jömaö fa cuaanö, abinaja a cuu nomöjöoma. —Ei bä lä cui, iba nayä bä waiquiwä. Iba mashi ö̦jö bä ca̦i li showawä. ⁵⁰ Fayä Yai Bada a lä culadinö tä tamaö lä bufii wei tä lä taö wejei bä lä cui, ö̦jö iba lä bä mashi malä waiquii. Ö̦jö nayä bä waiquiwä —a cuma.

¹ Ö̦jö tä mö jalu showawä ja, yafi jamö Jesús a faa fa co̦lufälönö, modu u casö jamö a loalecölöma. ² Cama nija bluca täbä fa co̦camoliyolunö, täbä mashicou dodijioma. Ö̦jö däjä, a bacäjamaö mlaobeje, canawä a jamö Jesús a döcäbaliyoma. ¿Ö̦jö tawä? Modu u casö jamö bä bluca lä co̦camolayono wei bä cuo däjä, ajede jamö a befi ca̦i ca̦lanö ³ bä yömölama. Bä yömölaö ja, shominaja tä a̦ bluca wäyäö yacläablalou ja, bä bufi dayäamama. Abinaja a cuma. —Ai anö mobä shäyäjaö mö alayoma. ⁴ Mobä shäyäjaö cuaafälöö däjä, bei yo jamö ai mobä fa blälälalunö, biyomö bänö mobä owa nocaa jäalalemaje. ⁵ Bei masi blaobä jamö ai mobä blälälaliyoma, mashita a bluca cuono lä mlai jamö. Mashita a fa maquedionö, mobä lobe caua showadalaliyoma ma cui, ⁶ motoca a ösöblou däjä mosibä shi̦liquia nocalayoma. Nasöcö daloblou fa mlacunö, mosibä fälaliyoma. ⁷ Tä mösöcöböobä jamö ai mobä fa blälälalunö, mobä caua ma bälayono wei ma cui, mösöcö bä caua mö fa fedulalunö mosibä baömölayoma. ⁸ Mashita a lä dodijidai jamö ai mobä fa blälälalunö, mobä caua fa liyäjälalunö mosibä badalayoma. Ai mosibä jamö, moli mosi ma cui ja, 30 mobä cublou majölayoma. Ai mosibä jamö, 60. Ai mosibä jamö, 100. ⁹ ’¿Ö̦jö tawä? —a cuma—. Wamacö yömöcacö lä walalai, bä yömöca daa da dodijiicu. ¹⁰ Cama ebä lä nocamabono wei bä lä cui, Jesús nija bä icua ajedea fa jäicunö, a wa̦lii juomaje. —Wa täbä yömölaö däjä, ¿wedi tabä bei wa wa̦ li faö yacläablalou? —bä cuma. ¹¹ Abinaja Jesúsnö bä nowa tama. —Yai Bada tänö cama ebä ca̦i lä cuo wei tä a̦ lä cui ja, cafä wamacö bufi jaducumabou. Tä a̦ ji̦limamou walalao showadao ma mlai ma cui, dodijidawä wama tä a̦ bluca ji̦liaö fe yadiobä, wamacö bufi damaö. Ö̦jö ma cui, ai bä mö feduwä lä cui, bä bufi jaducumaboimi. ¹² ’¿Ö̦jö tawä? —a cuma—. Bä bufi jaducuwä lä waiquii, ö̦jö bei bä bufi jamö tä lä didile, Yai Bada tänö etä nia balamafälöö. Ö̦jö däjä, bä bufi nia yai jaducublou. Ö̦jö ma cui, bä bufi jaducudalou lä mlai bä lä cui nija, etä wai wiisibö daö lä bädale etä nia co̦aö, tä a̦ nofi mojodubou majöobeje. ¹³ ’¿Ö̦jö tawä? —a cuma—. Ai bä lä cui, bä bufi nö jaducublobimi waiquiwä ja, shominaja ya tä a̦ li showadi wäyäö yacläo. Bä mamo ma showao wei ma cui, bä bufi möblou malä mlai. Bä yömöca ma dao wei ma cui, wale a̦ ji̦liaö cadidiomije. ¹⁴ Yai Bada a wa̦no wäyäö ja, Isaianö ö̦jö bä a̦fa wäyäö balöoma. Abinaja tä a̦ cuu. Bejedi lä, fei bä lä cuinö tä a̦ nia ma ji̦liadii wejei ma cui, bä bufi nia jaducubloimi waiquiwä. Bä mamo nia ma showadio wei ma cui, bä bufi nia möbloimi. ¹⁵ Bä bufi jaducudalou malä mlai. Jai bä yömöcacö quefublawä, jai bä mamo casö miblawä bä cuwä. Tä lä dablaö wejei tä nö ö̦jöböaö mlaobeje. Tä a̦ lä ji̦liaö wejei tä a̦ ca̦i ji̦liaö walalao mlaobeje. Bä bufi yai jaducublou mlaobä. Yai Bada nija bä bufi mö fa yabajadalonö, bä demi cudio mlaobä. ’Einaja tä a̦ cuu —Jesús a cuma—. ¹⁶ Ö̦jö ma cui, cafä wamacö lä cuinö, ei däjä tä lä cuaale wama tä fa mönö wamacö bufi yai möblou yalo, wama tä a̦ lä ji̦liaö wei wama tä a̦ ca̦i ji̦liaö walalao cudeenö, wamacö bufi yai doblalobä wamacö. ¹⁷ Cafä wamacö nija ei ya wa̦ lä cui, bejedi lä ya wa̦. Yai Bada a wa̦no wäyälewä bä cuo lä balöono wei bä bluca ma cuinö, ai bä ca̦i dodijaö mö lä feduono wei bä ma cuinö, fei däjä wama tä lä möö wei tä möö bufi ma doblaono wejei ma cui tä mönomije. Wama tä a̦ lä ji̦liaö wei, tä a̦ ca̦i ji̦lii bufi ma doblaono wejei ma cui tä a̦ ji̦lianomije. ¹⁸ ’Bei —Jesús a cuma—. Mobä lä shäyäjaö wei ya wa̦fa wäyäö lä yaclämoblei, abinaja ya yai cuma. ¹⁹ Bei yo jamö ai mobä bläläö lä cuaaö weinaja, ai bänö Yai Bada etä a̦ ji̦liaö cuaaöje. Tä a̦ ji̦liaö ma cujei, bä bufi jaducubloimi dicowä ja, tä yai lä wa̦lidii tä waloa fa showadaicunö, bei bä bufi jamö tä a̦ lä didio wei etä a̦ däa nocalei. ²⁰ ’Bei masi blaobä jamö ai mobä bläläa lä culaliyono weinaja, ai bä mö feduwänö tä a̦ ca̦i ji̦liaö cuaaöje —a cuma—. Tä a̦ ji̦liaöje däjä, bufi doblalolanö tä a̦ däaöje. ²¹ Ö̦jö ma cui, mobä nasöcö daloblou fa mlacunö mosibä nö dedejebloimi. Ö̦jö mosibä lä culenaja bä lä cui, bä nö jaba wa̦lojaö ma bäquei wei ma cui, bä yabäcamou däjä yedu bä waiquidou. Tä a̦ lä däaö wejei tä a̦ nowa ja, bä nö bleaamaöje däjä, inaja showawä bä waicou. ²² ’Tä mösöcöböobä jamö mobä bläläa lä culaliyono weinaja, ai bä ma cuinö tä a̦ ji̦liaö cuwä mö feduweje —a cuma—. Tä a̦ ma ji̦liablaö wejei ma cui, täbä showadi lä yabäcäblou wei tä ja, bä yabäcäablalou majöblao dicoo. Madofi bä ca̦i tabou bufi doblaoje. Ö̦jö däjä, Yai Bada nija bä bufi badadalou fa mlacunö, tä lä dodijidai etä wawädaloimi. ²³ ’Ö̦jö ma cui, a mashita lä dodijidai jamö ai mobä bläläa lä culayono weinaja, ai bä ma cuinö tä a̦ ji̦liaö cuwä mö feduweje —a cuma—. Tä a̦ fa ji̦liajenö, tä a̦ nofi jaducubou dodijioje. Tä lä dodijidai ö̦jö bei etä shino li yai wawäblou. Ai mosibä jamö, 30 mobä faa lä culayono weinaja, ai bä nija inaja etä dodijidawä cublou. Ai mosibä jamö, 60 mobä faa lä culayono weinaja, inaja showawä ai bä nija etä cublou mö feduo. Ai mosibä jamö, 100 mobä faa lä culayono weinaja, inaja showawä ai bä nija etä yai dodijidawä cublaliyo—Jesús a cuma. ²⁴ Jesúsnö täbä yömölaö co̦o ja, jolemolewä bä showadi lä coyocoblai, bei tä a̦fa wawämaö nomöjöoma. Ficali täca a̦fa wäyäö yäclämou ja, abinaja a cuma. —Yai Bada tänö cama ebä ca̦i lä cuo wei tä lä cui, abinaja tä ca̦i cuwä. Ai a lä cui, a ficalimou ja, dodijidawä mobä döalema. ²⁵ Ö̦jö ma cui, cama ebä mio däjä, ai a juu fa ja̦toimanö, dodijidawä mobä lä döaleno wei jamö, wa̦lidiwä mobä döa coyocoa jäalema. Mobä fa döalönö a alayoma. ²⁶ ’Mosibä fa badalönö, mobä yädäcämou waiquio däjä, wa̦lidiwä mosibä ca̦i bluca dablamoa coyocoa showalaliyoma —a cuma—. ²⁷ Ficali etäca lä cule a nija cama ebä a̦ fayoluma. “Bada tä”, bä cuma. “Ficalifä ca jamö, ¿dodijidawä wa mobä döa yaiale nowa tawä? ¿Wedinaja tä li fa cublalunö, wa̦lidiwä bei mosibä dablamou coyocoa dicoa cule?”, bä cuma. ²⁸ ’Abinaja bada e cuma. “A nö lä nabämou wei anö, mobä döa coyocoa jäalema”, a cuma. Inaja a fa cunö, abinaja cama ebä cuu nomöjöoma. “Ja̦o. ¿Wedinaja wa bufi yai cuu? ¿Wa̦lidiwä yama mosibä joyaö showadaobä daanö?”, bä cuma ma cui, ²⁹ bä wasöma. “Ma, wa̦lidiwä wama mosibä ucäö däjä, dodijidawä wama mosibä nia befi ca̦i joyaö dicoo. ³⁰ Nii bäma bä tabä tä cublou showao mlao däjä, bä bluca cublao balöobä. Nii bäma bä yai taö däjä, iba bä nija ya wa̦ faö weicätä, wa̦lidiwä mosibä doaö balöafälöbeje. Mosibä fa manölalöjenö, mosibä bäshäcu fa o̦calalöjenö, mosibä o̦cama nia yablaöje. Dodijidawä mosibö manöa fa nomöjölalöjenö, ya mobä shi̦liqui lä nowamaö wei jamö mobä nia cuo”, a cuma. ¿Ö̦jö tawä? —Jesús a cuma. ³¹ Jesúsnö tä a̦ wäablalaö yacläablalou ja, ei tä a̦ ca̦i wäyäma. —Yai Bada tänö cama ebä ca̦i lä cuo wei tä lä cui,nana shimono wai lä culenaja tä cuwä. Ficali ca jamö ai anö nana shimono wai döquei. ³² Ai mobä wai cublawä ma cui, ö̦jö nana shimono yai wiisibö dodijiwä. Shimono fa dömoicunö, shimono fa caulunö, bei shifi cublaliyou. Shifi fa badalönö, shifi yai ösölayou. Ö̦jö däjä, ö̦jö shifi bococu jamö, biyomö bä yabäcabö nia tamoyoluu —a cuma. ³³ Abinaja Jesús a ca̦i cuu yacläo co̦oma. —Yai Bada tänö cama ebä ca̦i lä cuo wei, suwä anö nii bä lä julumano weinaja tä cuwä. Nii bä lä julumaö wei tä lä cui, nii 3 ji̦bä jamö, wiisibö tä wai coyocoa ma bäqueno wei ma cui, ö̦jö tä wai bädawänö bä bluca julumalema —a cuma. ³⁴ Täbä bluca lä co̦camono wei täbä nija, Jesúsnö ei tä a̦ bluca wäyäö yacläoma. A wa̦ ja̦loablalou mlai ja, täbä yömölanomi. ³⁵ Yai Bada a wa̦no wäyälewä a cuu lä balöono wei tä a̦ bejedi cublobä, inaja a li cuaama. Abinaja tä a̦ cuu. Ya bä yömölaö ja, ya wa̦ nia faö yacläablalou. Yedu ja, bita tä jaba colo lä lojodoblamaleno wei däjä, tä a̦ jo̦yao lä showaono wei ya tä a̦ nia wawäblamaö. Einaja tä a̦ cuu. ³⁶ Ö̦jö däjä, bä lä co̦camono wei bä fa dacöfälönö, yafi a jamö Jesús a lucäa co̦layoma. Ö̦jamö lä, cama ebä lä nocamabono wei bä lucäa fa yaulunö, abinaja bä cuma. —Wa̦lidiwä wa mobä a̦fa wayoaö lä yacläoblei, tä a̦ yai da wawämalö. ¿Wedinaja bei wa cuu da cufanö? —bä cuma. ³⁷ Abinaja a cuma. —Dodijidawä mobä lä döaö wei a lä cui, ö̦jö camiyä bei ya waiquiwä, ya lä yanowamöblaleyoluno wei ya lä cui. ³⁸ Ficali ya täca a̦fa wäyäö lä yacläoblei, ei bita a lä blaucui, ö̦jö lä täca. Dodijidawä mobä lä cui, Yai Bada tänö cama ebä nia ca̦i lä cuo wei, ö̦jö mobä li. ¿Ö̦jö tawä? Wa̦lidiwä mosibä lä cui, tä yai lä wa̦lidii ö̦jö bä ijilubö ebä. ³⁹ A nö lä nabämou wei a lä cui, fecula bada cätä, wa̦lidiwä mobä döa coyocoa lä ja̦toaleno wei a lä cui. Nii bä nia obi lä tamou wei tä a̦ mö feduwä lä cui, Yai Bada tänö obi täbä bluca nia lä jömadayou wei, ö̦jö tä a̦. Nii bä nia lä taö wejei bä lä cui, a̦jele cäbä. ⁴⁰ ’¿Ö̦jö tawä? —a cuma—. Wa̦lidiwä mosibä yaabeje mosibä co̦aö lä culajeinaja, Yai Bada tänö täbä jödödöwä jömadayobä jamö, inaja tä ca̦i nia cuo. ⁴¹ Ya lä yanowamöblaleyoluno wei ya lä cuinö, iba a̦jele ya bä nia shömaö. Yai Bada ebä nijamö bä wa̦lidiwä talewä lä coyocole bä nia co̦aöje, täbä lä wa̦lidiaamaö wejei bä ca̦i. ⁴² Cowa wacö bada jamö bä nia shäyäblaaöje. Ö̦jamö lä bä nia ö̦cöö. Bä nö beblalou yalo, bä nia lalöö. ⁴³ Ö̦jö däjä, bä lä cadidou wei bä lä cui, Fayänö bä nia ca̦i lä cuo wei jamö, bä nia dodijaö dablamou, motoca a wawädowä lä dablamou weinaja showawä. Wamacö yömöcacö lä walalai, bä yömöca daa da dodijiicu. ⁴⁴ ’Yai Bada tänö cama ebä ca̦i lä cuo wei tä lä cui, abinaja tä ca̦i cuwä —Jesús a cuma—. Ficali ca jamö tä nowa yai lä bluca wei, tä jo̦yao balöoma. Ö̦jö täca jamö ai a ojodamou ja, tä daa bädalalema. Tä daa fa bädalalönö, tä tabou bufi ma doblaono wei ma cui, shomi täbä ulifibö cuoma cudeenö, tä däanomi. Lobe tä batelia co̦quema, ai bänö tä dablaö mlaobeje. Ö̦jö lä däjä, cama etä ulifi yai däabä, a bufi fa dayäonö, abinaja a bufi doblao ca̦i cuaama. Cama ebä madofi bluca jöböaquema, blada bä ja. Ö̦jö däjä, ö̦jö lä bä blada ja, täca befi ca̦i lulua showadalema —Jesús a cuma. Yai Bada nija bä nia lä cuo wei tä ja bä bufi mö blucaobä, a wa̦ li cuoma. ⁴⁵ —Yai Bada tänö cama ebä ca̦i lä cuo wei tä lä cui, abinaja tä ca̦i cuwä mö feduwä —Jesús a cuma—. Madofi bä lä nomöjöablaö wei, ai a wa̦lo cuoma. Dobä bä nowa au lä bluca wei bä showadi dayäaö cuaadima. ⁴⁶ Ya̦cumö, a nowa yai lä bluca wei, moli a wai dobä dalalema. Ö̦jö a wai luluaö bufi fa doblaonö, jödödöwä a madofibö jöbömoquema, blada bä ja. Ö̦jö lä bä blada ja, a wai dobä lulua showadalema —a cuma. Yai Bada nija bä nia lä cuo wei tä ja bä bufi mö blucaobä, a wa̦ li cuoma. ⁴⁷ —Yai Bada tänö cama ebä ca̦i lä cuo wei tä lä cui, abinaja tä ca̦i cuwä mö feduwä —Jesús a cuma—. Yuli bä lä ya̦camou wei täcö lä culenaja tä cuwä. Modu u jamö täcö fa quemabalöjenö, bluca bä yuli shomitawä lucälayoma. ⁴⁸ Yuli bä cublou jödödölayono wei ja, bä befi ca̦i shaimamaje, bä washölöblamabeje. Ö̦jö däjä, mau u casö jamö bä fa loicunö, bä yuli yaii majöomaje. Bä lä dodijidai bä tablamaje, bä lä wa̦lidii bä queamaö mö yabao co̦omaje. ⁴⁹ ’¿Ö̦jö tawä? —a cuma—. Yai Bada tänö täbä jödödöwä jömabä jamö, inaja showawä tä ca̦i nia cuo. A̦jele bä fa wawälönö, yanowamö täbä nia yaii cuaaöje. Bä lä cadidou wei bä nijamö, bä wa̦lidiwä lä coyocoblai bä fa yailalöjenö, ⁵⁰ cowa wacö bada jamö bä nia shäyäblaaöje. ¿Ö̦jö tawä? Ö̦jamö lä bä nia ö̦cöö. Bä nö beblalou yalo bä nia lalöö—a cuma. ⁵¹ Ö̦jö däjä, Jesúsnö cama ebä wa̦lima. —Ei ya tä a̦ bluca lä wäyäfe tä a̦ ja, ¿wamacö bufi jaducublou cule? —a cuma. —Awei —ebä cuma. ⁵² Abinaja a cuu nomöjöoma. —Ja̦o. Ö̦jö cudeenö, abinaja ya nia cuu co̦o. Moisesi etä a̦ lä cui, yedu ja etä a̦ li cuo balöoma tä a̦ li. Yai Bada tänö cama ebä ca̦i lä cuo wei tä a̦ lä cui, fei däjä dude ya tä a̦ lä wawämale tä a̦. ¿Ö̦jö tawä? Jaba tä a̦ ja bä bufi lä jaducuo wei bä lä cui, dude tä a̦ ma cui ja, bä bufi jaducuo mö feduo ja, inaja yai. Abinaja ö̦jö bä cuwä. Cama ebä ca̦i lä cuo wei a wa̦lo lä culenaja, ö̦jö bä cuwä mö feduwä. Cama etäbä bluca lä nowamaö wei täbä ja, dude täbä wawäblamaö. Yedu ja täbä tabou lä balöono wei täbä ca̦i. ¿Ö̦jö tawä? —a cuma. ⁵³ Jesúsnö tä a̦ wäyäö lä yacläablalono wei tä a̦ ja a fa waiquidonö, a co̦a co̦layoma. ⁵⁴ Cama etä ulifi jamö a waloa co̦aliyoma, a oshe lä cuono wei jamö. Ö̦jamö a fa waloicunö, judio bä yododabä yafi jamö täbä yömölama. A wa̦ lä ji̦lino wejei bä lä cui, bä bufi bluca shädayaimolanö, abinaja bä nowa tayoma. —Fei a lä cui, ¿wedi nija a bufi li jaducublamolayoma tawä? ¿Wedinaja a li fa taamamonö, tä nö lä quilijii bei tä wawämaö majöa cule? ⁵⁵ Fii fibä ja täbä showadi madofi lä taö wei, ¿fei bä ijilubö emi daanö? ¿Bä nöö e lä cui, ö̦jö María emi? Santiago, José, Juda, Simón bä lä cui, ö̦jö bä a̦iyobö e nofi showawä lä cui. ⁵⁶ Camiyä bämacönö ¡fei bä yaö bäma ebä ca̦i nofi lä bälöle! ¿Wedinaja a li fa taamamonö, bei a li shomiblou nomöjölayoma? —bä nowa tayoma. ⁵⁷ Einaja a nofi tabomaje yalo, a wa̦ wailemaje. Ö̦jö ma cui, abinaja Jesúsnö bä nowa tama. —Yai Bada a wa̦no wäyälewä bä lä cui, shomi täbä ulifibö jamö bä a̦ ji̦liaö bufi ma doblao wejei ma cui, cama bä ulifibö yai ja showadi bä a̦ ji̦liblaimije. Cama e yafi jamö bä lä bälöle bä ma cuinö, showadi bä a̦ waibouje —bä nowa tama. ⁵⁸ A nofi mölabonomije yalo, a nia yai lojode lä dablamou wei tä bluca wawämanomi.

¹ Ö̦jö däjä, Jesús a wa̦fa wäyämou blaucublaliyoma yalo, bada tä Elode a ma cuinö a wa̦fa ca̦i ji̦lia mö fedulema. ² A wa̦ fa ji̦lilänö, a nosie lä juaö wejei bä nija abinaja bada a cuma. —Fe ojomalewä Juan a demi jocädou fa co̦onö, ei ö̦jö a co̦dawä. A demi jocädou fa co̦lonö, a lojode dablamou dodijia malä cule —a cuma. ³ ¿Ö̦jö tawä? Elode a lä cuinö Juan a malä juwämaleno wei. Bococu fa o̦cablamalönö, a fe lamaboma. Wedi tä ja mlai. Suwä a ja Juannö a wasöma cudeenö a fe lamaboma. ¿Ö̦jö tawä? Bada anö, cama mashi Felipe bei suwäbö e lälema, Elodia a wa̦fa suwä lä cui. ⁴ Ö̦jö tä nowa ja, abinaja Juan a malä cuno wei, Elode nija. —Ma, Felipe bä suwäbö wa e taabä wami, tä a̦ läa —a malä cuno wei. ⁵ Bada tä Elode lä cuinö, Juan a shämaö bufi doblao ma showadaono wei ma cui, yanowamö täbä nö quili tama. “Yai Bada a wa̦no wäyälewä a”, a nofi tabomaje yalo, bä jushudamaö bufinomi. ⁶ Ö̦jö ma cui, lasha ai a faa co̦malema yalo, Elode a nofi co̦camoaöje däjä, abinaja tä cublou dicolayoma. Elodia bä tää e lä cui, a wawäblaliyoma, a blaöabä. A blaöaö dodijiablaloma yalo, bada tä Elode a bufi doblaloma. ⁷ A bufi doblamaboma yalo, a nia lä dobäno wei tä a̦fa wäquema. Abinaja Elodia bä tää e nowa tama. —Wa tä lä bufii wei tä a̦fa da yubo. Ya tä nia jöböaö dodijio —a nowa tama. ⁸ Bä nöö e a̦ fa ji̦lilädunö, abinaja bada a nija e cuu co̦oyoluma. —Bei. Juan fe ojomalewä ya fe bufii. Wa fe fa bäblamalönö, madofi a jamö wa fe fa döcämacönö, camiyä nija wa fe befi ca̦i jöböayolubä —e cuma. ⁹ Elodia bä tää e a̦ ja, bada a bufi wajäblaliyoma. Ö̦jö ma cui, wawädowä a wa̦ nö wäo waiquioma yalo, a wa̦ julema. Bä lä nacaleno wei bä badanö, a wa̦ ca̦i malä ji̦lileno wejei. ¹⁰ Ö̦jö cudeenö, ai e shömöa fa showadalönö, täbä fe lä labono wejei jamö Juan a fa juwälönö, ö̦jamö lä showawä a fe bäblalema. ¹¹ Madofi a jamö fe fa döcämacönö, fe befi ca̦i waloa co̦queyoluma. Elodia bä tää e nija fe befi ca̦i fa jöböcönö, ö̦jö länö bä nöö e nija fe befi ca̦i jöböa nomöjöquema. ¹² Juan nija bä lä nocaono wei bä lä cuinö tä a̦ fa ji̦liläjenö, a femata co̦lemaje. A femata fa co̦löjenö, a didiquemaje. Ö̦jö däjä, Jesús a yömöladayomaje. ¹³ Ö̦jö däjä, Juan a lä shämolayono wei tä a̦ fa ji̦lilänö, Jesúsnö cama ebä ca̦i nia yamili cublao fa balöonö, ulifi bloque jamö bä befi ca̦i calälayofälöma. Ö̦jö ma cui, ö̦jamö lä bä lä bälöblamono wei bänö, Jesús a wa̦fa juu fa ji̦liläjenö, a nosi bou showaobeje, washölö jamö bä fe difelilayofälöma. ¹⁴ Jesús a washölöblou däjä, täbä bluca lä co̦camono wei bä dalalema. Bä nofi ojodadaö fa showadalonö, bä jalili ca̦i bluca lä cuono wejei bä bluca jalomalalema. ¹⁵ Tä mö weyaö däjä, Jesús nija cama ebä lä nocamabono wei bä fa icuicunö, abinaja a nowa tamaje. —Ei tä ulifi bloque dodijiwä. Tä mö ca̦i weyaö waiquia lä cule. Fei bä bluca lä co̦camole bä shömöa da co̦lu, bä lä bälöblai bä nija bä nii fa lulualalöjenö, bä iyabä —a nowa tamaje. ¹⁶ Jesús a wa̦ läoma. —Bä shomi jamö juu majöobä tä cuami. Cafä wamacönö wama bä yai iyamabä. ¹⁷ Abinaja bä cuu nomöjöoma. —¿Wedinaja yamacö yai fa cuaanö, yama bä li iyamabä? Nii 5 yama bä tabou bädaa lä cule, yuli bolacabö cäcö ca̦i —bä cuma. ¹⁸ —Fäyämö bä da jöböbayo —a cuma. ¹⁹ Ö̦jö däjä, moimoima a jamö bä bluca lä co̦camono wei bä loamaö fa bufinö, nii 5 bä lä cuono wei bä dälema, yuli bolacabö cäcö ca̦i. Ö̦jö bä fa dälönö, fedu jamö a mö fa nonoicunö, bä nia lä iyano wei tä ja, Yai Bada nija a bufi a̦fa doblalou wäyämoma. Ö̦jö däjä, nii bä fa cälalönö, cama ebä lä nocamabono wei bä nija bä jöböquema. Ö̦jö däjä, cama ebä lä cuinö, bä lä co̦camono wei bä nija bä jöböaö cuaaö nomöjöomaje. ²⁰ ¿Ö̦jö tawä? Bä bluca fa iyaolalunö, bä bädöolaliyoma. Ö̦jö däjä, Jesús ebä lä cuinö bä nii sheje co̦a fa co̦abodujenö, wöö 12 bä jamö bä fe nii shee lajomalalemaje. ²¹ ¿Ö̦jö tawä? Bä lä iyano wei, jai 5.000 bä wa̦lo cuoma. Suwä bä ca̦i, ijilu bä ca̦i. ²² Ö̦jö däjä, cama ebä lä nocamabono wei bä lä cui, canawä a jamö Jesúsnö bä döcäcäa showadaamabalema. Bä lä co̦camono wei bä shömaö co̦o juo däjä, bä bucaduamaö balöo bufima. ²³ Täbä shömöa fa co̦abodunö, jefu a balöcö jamö Jesús a yami dolequea jäbefälöma, Yai Bada nija a wa̦ fabä. Tä mö dödöfälöö däjä, washölö jamö Jesús a yami cuo juo däjä, ²⁴ modu u möamo jamö cama ebä befi ca̦i caläö lä blajalayofälöö wei ja, wadoli a läadalou fe fa jalunö, bä ja̦maboma. Modu u bada shäyä shäyämou nö quiliama. ²⁵ Ö̦jö däjä, tä mö jalufälöö däjä, cama ebä nija, modu u jamö Jesús a jelejewä juu yaua jälayofälöma. ²⁶ Cama ebä lä nocamabono wei bä lä cuinö, modu u feyaca jamö a jelejewä juu fa dalalöjenö, bejedi lä bä nö wa̦lowä quilia dodijilaliyoma. Bolebole a fa bufijenö, bä quilili si̦lalamolayoma. ²⁷ Bä ma quililaliyono wei ma cui, lobe bä quilii wasöblalema. —Bä bufi da lojododalu. Ei camiyä cä ya. Bä quili dijä —bä nowa tama. ²⁸ Pedro a wa̦ jua showalayoma. —Bada tä. Cafä wa ja lä, mau u feyaca jamö ma cui, wale ca̦i da nacalä —e cuma. ²⁹ Jesús lobe a wa̦ nocalayoma. —A da jabo, ö̦jö lä. Inaja Jesús e cuma yalo, mau u feyaca jamö Pedro a fa itoblalunö, Jesús a lä ublale jamö a jelejewä ca̦i icua ajedequema. ³⁰ Ö̦jö ma cui, wadoli a bada lä cuaano wei tä fa mödalönö, lobe a bufi quilia fa dicolalunö, a queofälöma. A queofälöö ja, a i̦cali comölayoma. —¡Bada tä! ¡Wale da bayeliblalö! ³¹ Jesús lobe boco fa dododalunö, imicö ya̦calema. —Wale nofi yai mölaboimi —e cuma—. ¿Wedi tä tabä, wa bufi li ujudublou cufe? ³² Ö̦jö däjä, canawä a jamö cäcöbö fa döcäicunö, a wadoli mladou showadalayoma. ³³ Canawä a jamö cama ebä lä cuono wei bänö, bä möfe bolanö a wa̦fa Bada doblao tamaje. Abinaja bä cuma. —Bejedi lä, Yai Bada wa etä Ijilubö dodijiwä —bä cuma. ³⁴ Bä befi ca̦i fa bucadubalunö, Jenesale tä ulifi jamö bä waloquema. ³⁵ Ö̦jöteli bänö Jesús a nö fa ö̦jöbölöjenö, ö̦jamö bä bluca lä bälöblai bä nijamö täbä shömölemaje, bä jalili co̦ablaö cuaabeje. ³⁶ Jesús camishi ecö casö ma cui, ecö jubädaö bufi fa doblaojenö, bä a̦ fe blacäjoma, bä nia fa jalonö. ¿Ö̦jö tawä? Ecö casö lä jubädano wejei bä lä cui, bä bluca jaloblou showaoma.

¹ Ö̦jö däjä, Jelusale jamö culanö, Jesús nijamö judio bada bä co̦cablaleyoluma. ¿Ö̦jö tawä? Faliseo bä bada ma cui, Moisesi etä a̦ ja täbä lä damaö wejei bä ma cui, ö̦jö bä bada fa co̦cablaleyolunö, abinaja ebä cuma. ² —Judio bämacö nö badabö lä cuaano wei, bäma bä owäbou nodiablalaö showaobä tä ma cule ma cui, ¿wedi tabä afä wa bä lä nocamabole bä lä cui, inaja bei bä li cuaaimi dicowä? Bä imicö ya̦lömou mlai ja, bei bä li iyaö dicoo —ebä cuma. ³ Jesúsnö cama bä wa̦lii nomöjöoma. —Cafä wamacö ma cui, ¿wedi tabä nö badabö tä a̦ ja wamacö bufi mö shino blucao fa dicoonö, Yai Bada tänö tä nabä yai lä shömaö wei wama tä taimi? ⁴ Yai Bada wama tä a̦ juaö malä mlai. ¿Ö̦jö tawä? Jaba däjä, abinaja Yai Bada tänö bä nowa tama. Faafä a ma cui, naafä a ma cui, dodijidawä wama bä ca̦i fa cuonö, wama bä a̦ nia juaö. ’Einaja bä nowa tama. Abinaja ca̦i. Bä fö̦ö e nija a wa̦ wa̦lidiwä faö ja, a shämobä ö̦jö a waiquiwä. Bä nöö e ma cui nija a wa̦ ca̦i wa̦lidiwä faö dicoo ja, inaja showawä. ’¿Ö̦jö tawä? Einaja bä nowa tama —Jesús a cuma—. ⁵ Ö̦jö ma cui, judio wamacö bada lä cui, abinaja cafä wamacö li cuu. “Ma. Faafä, naafä, wama bä bayeliblabä bä ma cule, wama täbä lä tabole, Yai Bada nija wama täbä a̦fa yaia wäyäö ja, faafä nija täbä nö jöböamobimi lä waiquii täbä”, wamacö cuu dicoo. ⁶ ¿Ö̦jö tawä? Yai Bada tä a̦ juamobä tä a̦ waiquiwä ma cui, wamacö nö badabö lä cuaano wei tä ja, wamacö bufi mö shino blucao fa dicoonö, ö̦jö wama tä a̦ li läablalaö, Yai Bada tä a̦ juaö mlaobeje. ⁷ ’Yai Bada a wa̦no wäyälewä Isaia a lä cuinö, cafä wamacö a̦fa wäyäö balöo ja, a bejedimoma —a cuma—. Jole jole wamacö dodijaö buo. Isaia etä a̦ oni jamö, abinaja tä a̦ cuu. ⁸ Fei bä lä cuinö, bei bä caficönö wale nofi doablaö ma buo wejei ma cui, camiyä nija bei bä bufi yai cuami. ⁹ Camiyä wale a̦fa Bada doblao ma taö wejei ma cui, bä jolemou dicoo ja, bä a̦ nö bleo bädao. Iba tä a̦ jo̦wa ma wäyäö wejei ma cui, ö̦jö iba tä a̦mi. Cama yanowamö täbä a̦ li bädawä. ’Einaja tä a̦ cuu —Jesús a cuma. ¹⁰ Ö̦jö däjä, Jesúsnö täbä fa nacaalalönö, abinaja bä nowa tama. —Bei. Wamale a̦ da ji̦liyo. Bä bufi da jaducuicu. ¹¹ Täbä lä waö wejei täbänö, täbä bufi shamiblou daomi. ¿Ö̦jö tawä? Täbä lä cublai täbänö mlai, bei täbä caficö jamö tä a̦ wa̦lidiwä lä wawäblou wei tänö, ö̦jö tänö täbä bufi yai shamiblamou —bä nowa tama. ¹² Ö̦jö däjä, Jesúsnö bä lä nocamabono wei bä lä cui, abinaja bä cuyoluma. —Wa tä a̦ lä wäyäblei tä a̦ ja, faliseo wa bä bufi bada jushudamalema. ¿Wa tä daö cule? —bä cuma. ¹³ Abinaja Jesús a cuu nomöjöoma. —Fayä a lä culadinö fibä döano lä mlai, fibä nia bluca ucäblamou majöo. ¹⁴ Ö̦jö bä bada lä cui, bä a̦ faö buo. Täbä lulubobeje, ö̦jö bä waiquiwä ma cui bä jubäbö. ¿Ö̦jö tawä? Jubäbö a lä cui, ai a jubäbö mö feduwänö a lulubou dicoo ja, täca täca aca jamö cäcöbö nia queo bolacao showadao —a cuma. ¹⁵ Ö̦jö däjä, abinaja Pedro e cuma. —Nii wa bä a̦fa wayoaö lä yacläofe, ¿wedinaja bei wa cuu da cufanö? —e cuma. ¹⁶ Abinaja Jesús a cuu nomöjöoma. —Uo. Cafä wamacö ma cui, ¿wamacö bufi ca̦i jaducuwämi tawä? ¹⁷ Bei wamacö bufi jamö bä nii didio malä mlai, wamacö bufi shamiamabä. Bei wamacö busi jamö bä nii li didio fa balöonö, bä li faoblou co̦o malä cui. ¹⁸ Bei täbä bufi jamö tä wa̦lidiwä lä didile tä lä cui, bei täbä caficö jamö ö̦jö tä a̦ yai wa̦lidiwä wawäblou. Ö̦jö lä tänö täbä bufi yai shamiblou. ¹⁹ Bei täbä bufi jamö tä wa̦lidiwä didia yalo, wa̦lidiwä tä jamö bä bufi shino dayäo. Ö̦jö däjä, täbä yanowamö shäöje. Bä joleblalou. Bä nofi beshili jushuaö. Shomi täbä madofi ca̦i lämaöje. Täbä a̦fa jole jole ca̦i wäyäöje. Täbä a̦fa ca̦i wayoaöje. ²⁰ Ö̦jö tä wa̦lidiwä bluca lä cui, yanowamö täbä bufi jamö tä fa didionö, tä wawäblou. Ö̦jö tänö täbä bufi yai shamiblou, imicö shaminö täbä lä iyaö wei tänö mlai —a cuma. ²¹ Ö̦jamö a jocäa fa co̦lunö, Diloteli bä lä bälöle jamö a alayoma, Sidonoteli bä bälöa mö lä fedule jamö. ²² Ö̦jamö lä, Canaanateliyoma a suwä lä bälöono wei a fa waloicunö, Jesús nija a wa̦ i̦cali fama. —¡Bada tä! ¡David nodiwä wa lä cui! Wale nofi da ojodadalö. Fecula anö tääyä a nö bleaamaö dodijia lä cule —e cuma. ²³ Ö̦jö ma cui, Jesús a wa̦ juonomi. ¿Ö̦jö tawä? A wa̦ juono ma mlai ma cui, a wa̦ suwä faö fe yadiblou showawä ja, Jesús nijamö bä lä nocaono wei bä a̦ fayoluma. Bä a̦ fe blacäjou ja, abinaja bä cuma. —¡Ei shomiteliyoma a suwä shömöa da co̦lö! ¡A wa̦ waidaloimi! —bä cuma. ²⁴ Ö̦jö däjä, abinaja suwä nija Jesús e cuma. —Isaeli ebä nodiwä nija Yai Bada tänö wale yai shömölema, cama oweja ebä nö yamili lä beblalole bä lä cui bä nija. Cafä shomi wamacö nija mlai —e cuma. ²⁵ Ö̦jö ma cui, Canaanateliyoma a suwä fa ajedeblaliyolunö, a möfe bolanö abinaja e cuma. —¡Bada tä! ¡Wale da bayeliblalö! ²⁶ A wa̦ juo ja, a wa̦ faö yacläablaloma. Shomiteliyoma a cuoma cudeenö, abinaja Jesús a cuma. —Ijilu bä nia lä iyaö wei bä nii lä cui, ji̦ima bä nija bä jöböamou bashiblao ja, tä dodijidawämi —a cuma. ²⁷ Ö̦jö ma cui, a nia bayeliblamou fe fa yadionö, abinaja a suwä cuu nomöjöoma. —Awei, Bada tä. Wa bejedimou. Ö̦jö ma cui, bä shö̦ö ebä iyabä jamö, täbä lä̦cashi lä bläläö wei täbä ja, ji̦ima bä ma cui bä ca̦i malä iyaö wei —a suwä cuma. ²⁸ Ö̦jö däjä, abinaja Jesús e cuma. —Ja̦o. ¡Bejedi lä wale nofi yai mölabou! Ö̦jö cudeenö, bäfä bayeliblaö weicätä, wa lä cufenaja showawä —e cuma. Ö̦jö däjä, lobe bä tää e jaloa showadalayoma. ²⁹ Jesús a aa fa co̦lufälönö, modu Calilea u casö jamö a juu cuaama. Jefu tä balöcö jamö a fa dolequebofälönö, a lobejelayoma. ³⁰ Cama nija bluca täbä waloa jebejelayoma. Bä juu lä wa̦lidiono wei bä ma cui, ai bä lä wa̦lidiono wei bä ma cui, bä lä jubäböono wei bä ma cui, bä aca lä boleböono wei bä ma cui, ai bä ca̦i bluca ma cui, Jesús nija bä ca̦i waloa fa jäbojolujenö, bä bluca jaloa showadamalalejelayoma. ³¹ ¿Ö̦jö tawä? Bä aca lä boleböono wei bä a̦ dodijidawä fablamalema. Bä lä wa̦lidiono wei bä ca̦i dodijidablalema. Bä juno lä mlai bä ca̦i jublamalema. Bä lä jubäböono wei bä mamocu ca̦i dodijidablalema. Ö̦jö bä bluca lä jalole bä fa dalalöjenö, täbä lä co̦camono wei täbä a̦ fejelou fe balojooma. Yai Bada a nofi doablaö fe balojoomaje, Isaeli ebä nija a bufiblamobä a lä cui. ³² Bä lä co̦camono wei bä niibö cuo fa mlacunö, cama ebä lä nocamabono wei Jesúsnö bä nacaa ajedelema. Abinaja bä nowa tama. —Ei bä lä co̦camole bä nija ya bufi wajäaö a lä cule. Camiyä nijamö bä lä co̦cale, bolacabö tä mö didi tabou waiquiaje. Bä iyabä täbä ca̦i cuami. Bä ofäö cudeenö ya bä shömaö moji, bä ofili wäcäcou dicoo mlaobä —bä nowa tama. ³³ Bä lä nocamabono wei bä lä cui, abinaja bä cuma. —Ei tä ulifi bloque dodijiwä. ¿Wedi jamö täbä nii ja yama bä li iyamabä? Bä bluca fe balojowä —bä cuma. ³⁴ Abinaja Jesús a cuma. —¿Wedinaja bä nii cudale, wama bä tabou culawä? —Nii 7 yama bä tabou bädaa lä cule —bä cuma—. Yuli bolacadabö cäcö ca̦i wai. ³⁵ Ö̦jö däjä, bä lä co̦camono wei bä lä cui, mashita a jamö bä loamaö bufima. ³⁶ Nii 7 bä lä tabono wejei bä fa dälönö, yuli cäcö ca̦i wai fa dälönö, Yai Bada nija, ö̦jö bä ja a bufi a̦fa doblalou wäyämoma. Ö̦jö däjä, bä nii cäa fa nomöjölalönö, cama ebä lä nocamabono wei bä nija bä jöböquema. Ö̦jö bä lä cuinö, täbä lä co̦camono wei täbä dobäö cuaaö nomöjöomaje. ³⁷ Bä bluca fa iyaolalunö, bä bädöolaliyoma. Ö̦jö däjä, cama ebä lä cuinö, nii bä sheje co̦ablaö fa cuaajenö, wöö 7 bä jamö bä nii sheje fe lajomalalemaje. ³⁸ Bä lä iyano wei bä wa̦lo lä cui, jai 4.000 bä cuoma, suwä bä ca̦i, ijilu bä ca̦i. ³⁹ Ö̦jö däjä, Jesúsnö bä shömöa fa co̦abodunö, canawä a jamö cama ebä ca̦i döcäcäo fa co̦balunö, Macadana tä ulifi jamö bä befi ca̦i caläa nomöjölayofälöma.

¹ Ö̦jö däjä, faliseo bä bada ma cui, saduseo bä ca̦i bada ma cui, Jesús nija bä walooquema. A wa̦ nia bejedi fa wabajenö, abinaja bä cuma. —Yai Bada wa e nö ö̦jöböamobä, tä nö lä quilijii tä da wawämalö —bä cuma. ² Ö̦jö bä nija abinaja Jesús e cuma. —Motoca a queofälöö däjä, judu wama mösö fa mönö, abinaja wamacö cuu. “Fena ja, motoca shi̦i nia cuo, mösö malä wacämole”, wamacö cuu. ³ Fena däjä ma cui, abinaja wamacö ca̦i cudou. “Maa a nö quelayobö, mösö malä fla̦le wei”, wamacö ca̦i cuu. ¿Ö̦jö tawä? Judu mösö ja, wamacö moyawä ma waiquii, camiyä fei däjä ya lä cuaale tä ja, wamacö bufi jaducuwämi dicowä. ⁴ ’Wamacö fei däjä lä bälöblai, wamacö bluca dobloimi fe balojowä —a cuma—. Yai Bada wama a wa̦ juaimi dodijiwä. Yai Bada ya e nö ö̦jöböamobä, tä nö lä quilijii wama tä wawämaö bufi ma doblao wei ma cui, bämacö a̦ nia juaimi. Wama tä nia lä möö wei, Jonasi a lä taamano weinaja, inaja tä cuwä wama tä nia shino dablaö —Jesús a cuma. Ö̦jö däjä, bä fa dacöfälönö, a alayoma. ⁵ Jesúsnö bä lä nocamabono wei bä fa bucadubalunö, nii bä ja bä bufi möblaliyoma, bä nofi mojoduquemaje yalo. ⁶ Ö̦jö däjä, bä moyawämabobä, Jesúsnö nii julumamodima tä a̦fa wäyäö yaclämoma. Abinaja bä nowa tama. —Bä da moyaweicu. Faliseo bä bada lä cui etä julumamodima wayu. Saduseo bä bada ma cui, inaja showawä cama etä ca̦i wayu cuwä mö feduwä —bä nowa tama. ⁷ Jesús a wa̦ ja bä bufi wedinajamolanö, abinaja bä nowa tayoma. —Nii bäma bä ca̦i juu fa mlacunö, nii bä lä juluu wei tä a̦fa taö —bä nowa tayoma. ⁸ Bä bufi lä cuno wei tä daö waiquioma yalo, abinaja Jesús a cuma. —¿Wedi tabä “Nii bäma bä tabou lä mlai tä a̦fa li wayoaö”, wamacö nowa li tayou dicoblaa cule? ¿Wamale nofi mölaboimi showawä tawä? ⁹ ¿Bei wamacö bufi ca̦i möbloimi showawä? Ya bä da iyamablei, ¿wama tä nofi ca̦i jaducuboimi? Nii 5 ya bä da cleyablei däjä, 5.000 ya bä iyamalema. Nii bluca wama bä sheje co̦ablaö cuaama. ¹⁰ ’¿Ö̦jö tawä? —a cuma—. Nii 7 ya bä da cleyablei däjä, 4.000 ya bä ca̦i iyamalema. Ö̦jamö lä nii wama bä sheje bluca ca̦i co̦ablaö da cuaablei, ¿bei wama tä nofi ca̦i jaducuboimi? ¹¹ Nii bä ja ya bufi jo̦lijobä ya malä mlai. ¿Wedi tabä “Nii bei bä a̦fa wayoaö”, wamale nofi tabou dicoa cule? Faliseo bä bada lä cui, ö̦jö etä julumamodima wayu cudeenö ya wa̦. Saduseo bä bada ma cui, inaja showawä cama etä ca̦i wayu cuwä mö feduwä —a cuma. ¹² Ö̦jö däjä, bä bufi yai jaducublaliyoma. Nii julumamodima bä a̦fa yai tanomi. Faliseo bä bada lä cui, ö̦jö bä a̦fa shino yai wayoama, saduseo bä ca̦i bada. Ö̦jö bä a̦ wayu cudeenö, bä moyawämabou bufima. ¹³ Jesúsnö bä lä nocamabono wei, Filibo jamö bä ca̦i aa nomöjölayoma, Sesaleateli bä shabonobö lä cublai jamö. Ö̦ja bä ca̦i wawäblolanö bä wa̦lima. —Camiyä ya lä yanowamöblaleyoluno wei ya lä cui, ¿wedinaja bei wale nofi yai li tabou dodijiaje? ¿Camiyä wedi bei ya jo̦wa? —a cuma. ¹⁴ Abinaja bä cuma. —Fe ojomalewä Juan bei wa jo̦wa fa talei. Ai bä mö feduwänö, Yai Bada a wa̦no wäyälewä Elia a cuo lä balöono wei, ö̦jö wa jo̦wa bufidaö talajei. Ai bä mö feduwä lä cuinö, Jelemia wa bufiije. Ai bä a̦ showawä ja, Yai Bada a wa̦no wäyälewä ai a demi jocädou fa co̦lonö, ö̦jö bei wa jo̦wa co̦dawä fa talei —bä cuma. ¹⁵ —Ö̦jö ma cui, cafä wamacö lä cuinö, ¿wedinaja bei wamale nofi li tabou dodijia cule?—a cuma. ¹⁶ Pedro a wa̦ juoma. —Yai Bada tänö a shömabä a lä yaileno wei, ö̦jö cafä bei wa dodijiwä. Yai Bada a demi cua shi lä wa̦lile, ö̦jö bei wa Ijilubö —bei e cuma. ¹⁷ Abinaja Jesús e cuu nomöjöoma. —Jonasi bä ijilubö Simón wa lä cui, ¡bejedi lä wa bufi doblalobä wa! Wale nö ö̦jöböaö cadidiobä, yanowamö täbä a̦ ja, wa bufi jaducublono malä mlai. Fayä a lä culadinö wa bufi yai jaducublamalema. ¹⁸ ¿Ö̦jö tawä? Bäfä nowa taö a lä cule. Maa ma lojode lä culenaja wa cuwä yalo, Pedro bäfä a̦fa jilabou. Jai maa bei wa ma. Maa ei ma lä cui jamö, iba ya bä fa co̦cablamalönö, yafi bä colo lojodomabou lä culajeinaja, iba ya bä nia lojodomabou cuo. Nomaö tä ma cui ja, bä nö nia wa̦lojaö fe yadio. ¹⁹ Yai Bada tänö cama ebä ca̦i lä cuo wei yoca lä cui jamö, cafä bäfä nia lämabou. Cafänö wa yoca caloblabä, ya tä nia jöböaö, wa bä famabä. Äyämö, bita jamö wa bä wasöö ja, Yai Bada a lä culadinö tä tamaö nofi lä wa̦libole tä shino ja, wa bä nia wasöö. Wa tä tamaö lä bufio wei tä ma cui ja, inaja showawä —Jesús e cuma. ²⁰ Ö̦jö däjä, bä lä nocamabono wei, i̦cali bä a̦ wasöma, Yai Bada tänö a shömabä a lä yaileno wei a nö ö̦jöböamaö showadao mlaobeje. ²¹ Ö̦jö däjä, Jelusale jamö a nö nia lä bleaamano wejei tä a̦ ja, Jesúsnö bä lä nocamabono wei bä jaba yömölaö cuaama. Judio bada bä ma cuinö, nofi bäyäalewä bä blowäjäwä ma cuinö, Moisesi etä a̦ ja täbä lä damaö wejei bä ma cuinö, ö̦jö bänö a nö nia jo̦wa bleaamaö fe balojoomaje. A nia shämou cadidioma. Inaja a taamamobä, a cuo waiquioma. Ö̦jö ma cui, bolacabö tä mö fa dödölönö, a demi nia jo̦wa jocädou co̦oma. ²² Ö̦jö däjä, Jesús a wa̦ fa wämoicunö, Pedronö a ca̦i fa casöblalunö a wa̦ wasöma. —¡Ma, Bada tä! Inaja Yai Bada nija wa taamamobä wa malä mlai —e cuma. ²³ Ö̦jö ma cui, Jesús a mö fa jadublalunö, Pedro nija a wa̦ fama. —¡Sadanasi! ¡A da blajalö! —e cuma—. Wale yabäcaö dicoa lä cule. Yai Bada nija wa bufi taamamou fa mlacunö, yanowamö täbä bufi showadi lä cuu weinaja, wa bufi cuablalou malä dicole —e cuma. ²⁴ Ö̦jö däjä, bä lä nocamabono wei bä lä cui, abinaja Jesúsnö bä nowa tama. —Camiyä nija bä nia lä nocao wei bä lä cui, cama bä cuaaö bufi lä doblao wei tä ja, bä nia yai wasöo. Wale bufiije yalo, bä ma shäöje däjä bä nia ojode cuo fe yadio. Bä nia nocao fe yadio. ²⁵ Eja bä demi cudiobä wale nofi jole lä mojodubou wejei bä lä cui, bä ba̦limi nia cuodayou malä mlai. Ö̦jö ma cui, camiyä ya nowa ja bä shämou lä ojodao wei bä lä cui, ö̦jö bä nia shino ba̦limi cuo ayao. ²⁶ ¿Ö̦jö tawä? Bita jamö bä madofi bluca lä cublai bä madofi ma däamou wei ma cui, bä nia yai lä ba̦limiblou wei tä joyamou dicoo ja, ¿wedi tänö bä yai nia li bayeliblamou majöo, ö̦jö lä? Bä nia ba̦limi lä cuo wei, ö̦jö lä bä madofi ja, tä nowa co̦amamou dao malä mlai. ²⁷ ’Camiyä ya lä yanowamöblaleyoluno wei ya lä cuinö, Fayä tä shi̦i jilajawä ja, iba a̦jele ya bä ca̦i nia itou malä co̦o wei —a cuma—. Ö̦jö däjä, wa̦lidiwä tä lä tano wejei bä nija ya tä nowa nia co̦amaö. Dodijidawä tä lä tano wejei bä ma cui nija, ö̦jö ya tä nowa nia ca̦i co̦amaö shalilio mö feduo. ²⁸ Cafä wamacö nija ei ya wa̦ lä cui, bejedi lä ya wa̦. Ai wamacö lä ublale, wamacö nomaö showaono mlai ja, camiyä ya lä yanowamöblaleyoluno wei wamale nia Bada itou dablaö—Jesús a cuma.

¹ Ö̦jö tä a̦ wäyäö fa balöonö, 6 tä mö didi fa cublalunö, Jesúsnö cama ai ebä nacalema. Pedro a nacalema, Santiago a ca̦i, ö̦jö bä fääshä Juan e ca̦i. Bä fa nacalänö, jefu balöcö ösöwä jamö, ö̦jö bä ca̦i yami dolequebefälöma. ² Ö̦jamö, bä mamo mötale däjä, Jesús a mömou shomiblaliyoma. Motoca shi̦i lä culenaja, wäyäcu cublaliyoma. Camishi ecö ma cui, ecö shi̦i ca̦i wacalamiblaliyoma. ³ Ö̦jö däjä, ai täcöbö fa bädalunö, Jesús sho bä a̦ wayoma. Moisesi, Elia sho cäcöbö cuoma. ⁴ Jesús nija abinaja Pedro a cuma. —Bada tä. Eja bämacö lä cule, tä dodijidawä waiquiwä. Yano 3 ya bä nia wai i̦tamaö, ¿ö̦jö tawä? Afä a, Moisesi e, Elia e, einaja ya bä nia wai yano tablaö, ¿ö̦jö tawä? —a cuma. ⁵ A wa̦ faö showai ja, ölajashi a bada au fa itolunö, bä jo̦yablalema. Ö̦jö däjä, ölajashi jamö culanö a wa̦ bädaliyoma. —Ei Ijiluyä a, ya lä nofimaö wei. Wale bufi lä doblamabou wei a. A wa̦ da ji̦liläje —a cuma. ⁶ Bä lä nocamabono wei bä lä cuinö a wa̦ fa ji̦liläjenö, bä quilili fa dijoblaicunö, bä möfe quilili boblaquema. Bä quilia fe balojolaliyoma. ⁷ Ö̦jö ma cui, Jesús a fa ajedeicunö, bä jubama. Bä jubalanö abinaja bä nowa tama. —Bä ublao da co̦lalu —bä nowa tama—. Bä quili dijä. ⁸ Ö̦jö däjä, tä möö cuaaö fa co̦ojenö, Jesús a yami ublaa daa co̦a majölalemaje, ai täcöbö cuonomi. ⁹ Jefu a jamö bä dömöö fa co̦imanö, Jesúsnö bä wasölefälöma. Abinaja a cuma. —Wama tä lä dalalöfe, wama tä a̦fa wäyäö showadao mlai. Camiyä ya lä yanowamöblaleyoluno wei ya lä cui, ya demi jocädou showao mlao däjä, tä a̦fa wäyäö balöo dijejä —a cuma. ¹⁰ Ö̦jö däjä, Jesúsnö bä lä nocamabono wei bä lä cui, abinaja cama nija bä cuma. —Moisesi tä a̦ ja täbä lä damaö wejei bä lä cuinö, ¿wedi tabä Elia a wa̦fa li juu co̦o wäyäöje? Yai Bada tänö a shömabä a lä yaileno wei, a juu showao mlao däjä, ¿wedi tä tabä ö̦jö bei a nia jo̦wa li juu balöblao? —bä cuma. ¹¹ —Awei —Jesús a cuma—. Inaja tä a̦ malä cuu wei. Tä bluca dodijidablaö co̦obä, Elia a nia jo̦wa juu co̦o balöoma. ¹² Ö̦jö ma cui, abinaja ya cuu. Elia a nia jo̦wa juu lä co̦ono wei, a wawäblou waiquilayou cublei. A nö ö̦jöböanomije. A taamaö bufi lä doblaono wejeinaja, a taamamaje. Inaja showawä, camiyä ya lä yanowamöblaleyoluno wei ya ma cui, wale nö nia ca̦i bleaamaö cuo nomöjöoje —bä nowa tama. ¹³ Ö̦jö däjä, cama ebä lä nocamabono wei bä lä cui, Jesús a wa̦ ja bä bufi yai jaducublaliyoma. Elia a wa̦fa lä jayumano wei a lä cui, Juan a wa̦fa yai li wayoama, bä fe lä ojomano wei a lä cui. ¹⁴ Täbä bluca co̦camoa lä jälayono wei täbä nija, Jesúsinö cama ai ebä ca̦i waloo fa co̦balöcölönö, ai a wa̦lo lä cui, a dijoa mö baa showadaquema. A möfe deilanö abinaja e cuma. ¹⁵ —Bada tä. Ijiluyä a nofi da ojodadaliyo. A fa queoblonö, showadi caficö moshi boyacaoblou, nacö ca̦i wa̦sönöoblou. Einaja a fa cuaanö, a nö yai bleaaö dodijio. Cowa wacö ma cui jamö, mau u ma cui jamö, a shino queoblou cudeenö a nö bleaaö. ¹⁶ Wa bä lä nocamabou wei bä nija ya ca̦i juma ma cui, a jalomaö doblonomije —e cuma. ¹⁷ Abinaja Jesús e cuma. —¡Uo! Äyämö ya nö dedeaö ma waiquile, Yai Bada wama tä nofi nö mölabobimi waiquiwä. Bejedi lä wamacö dobloimi. Wama tä nofi mölabou shaliliobä bämacö nö dabou ja, ya modaaö waiquiwä. Bei. Bä ijilubö e da bälabayoje —e cuma. ¹⁸ Ö̦jö däjä, Jesúsnö fecula e bälöo fa wasönö, e faa co̦a showadalayofälöma. Fiya a lä cui, a jaloa showadalayoma. ¹⁹ Ö̦jö däjä, Jesús a yami cuo däjä, cama ebä lä nocamabono wei bä fa icuicunö, abinaja ebä cuma. —¿Wedinaja yamacö li cuaaö dicoo ja, yama e li yashuu doblonomi dicowä tawä? —bä cuma. ²⁰ Abinaja Jesúsnö bä nowa tama. —Yai Bada wama a nofi lä mölabole, jai wamacö ujudi wamacö cuaaö fa dicoonö, wamacö nö wa̦loblonomi. Cafä wamacö nija ei ya wa̦ lä cui, bejedi lä ya wa̦. Yai Bada wama a nofi lä mölabole, wamacö bufi nö wiisibö wa̦lojolanö wama a nofi bejedi mölajadaö bädao ja, cafä wamacö ma cui nija tä nia cublou. Nana shimono wai wiisibö ma cui, shifibä malä badaö wei. Ö̦jö däjä, quiji a jefu ma cui, Yai Bada wama a nofi yai mölabolanö wama a nowa taö ja, a nia majöblou. Inaja Yai Bada wama a nofi mölabou cuo ja, wamacö doblou mlaobä tä nia cuomi. ²¹ Ö̦jö ma cui, ei bä fecula mö feduwä lä cui, bä yashublamou si ijejewämi talei. Wamacö iyaö wasöolanö, Yai Bada nija wamacö nö bayeli lä nacao wei tänö, ei bä shino yashublamou, ö̦jö tä shinonö —bä nowa tama. ²² Calilea jamö Jesúsnö bä ca̦i yododaö däjä, abinaja bä nowa tama. —Ya lä yanowamöblaleyoluno wei ya lä cui, yanowamö täbä nija ya nia jöböamou. ²³ Wale ma shälei wejei ma cui, bolacabö tä mö didi fa cublalunö, demi ya nia jocädou co̦o —bä nowa tama. Einaja a lä cuu wei a wa̦ fa ji̦liläjenö, ebä bufi nö bleaaö dodijioma. ²⁴ Cabenao jamö Jesúsnö cama ebä cai̦ fa waloicunö, Yai Bada etä yafi dodijidabobeje bä blada lä nacaö wejei bä lä cuinö, Pedro a wa̦liyolumaje. —Yai Bada bäma etä yafi dodijidabobä, cafä nija tä a̦ lä wäyäö wei a lä cuinö, ¿blada a ca̦i jöböquei daanö? ²⁵ —Jö̦ö —Pedro a cuma—. Bä ca̦i jöböaö talei. Yafi jamö a waloo co̦o däjä, Pedro a wa̦ faö showaa mlai däjä, Jesúsnö cama a wa̦lii mö baoma. —Simón, ¿wedinaja bei wa bufi cuu? Bada bä yai bälöo lä dodijii bä lä cublai bänö, ¿wedi jamö täbä nija blada bä li nacaöje? ¿Cama ebä nija bä li nacaö sijewä? Ma, ¿shomi täbä nija daanö? —a cuma. ²⁶ —Shomi täbä nija —Pedro a fa cunö, abinaja Jesús e cuu nomöjöoma. —Bejedi lä wa wa̦. Cama ebä nija bä blada nacaimije. ²⁷ ¿Ö̦jö tawä? Camiyä bämacö nija bä blada nacabeje bämacö ma mlai ma cui, bä jushuo mlaobä, blada bäma bä nia jöböaö fe yadio. ’Modu u jamö, ufeya a da ca̦balöcölö, ö̦jö lä —a cuma—. Yuli wa jaba lä yocäblale, wa caficö fa caloblalönö, blada wa nia didia dablaö. Blada bä lä nacaö wejei bä nija, ö̦jö a blada da jöböbadu. Cafä nija a nia blada lä nacaö wejei a ma cui, camiyä nija a nia nacaö mö lä feduo wejei a ma cui, ö̦jö moli a ma cui ja, bäfäcö nowa nia cuo —Jesús a cuma.

¹ Ö̦jö lä däjä showawä, cama ebä lä nocamabono wei bänö, Jesús a wa̦limaje. Abinaja bä cuma. —Yai Badanö cama ebä ca̦i nia lä cuo wei ebä nija, ¿wedi bei a nia yai bada cuo? ² Inaja bä cuu ja, ijilu a fa nacalänö, cama bä nijamö a fa möamoblamalönö, abinaja bä nowa tama. ³ —Cafä wamacö nija ei ya wa̦ lä cui, bejedi lä ya wa̦. Ijilu bä a̦ juo si ijejeoblou lä culenaja wamacö cubloimi ja, Yai Bada tänö cama ebä ca̦i nia lä cuo wei jamö, wamacö nia cuomi waiquiwä. ⁴ Ei a wai ijilu jömöo lä mlainaja a lä cuaaö wei a lä cui, Yai Bada tänö cama ebä ca̦i lä cuo wei däjä, ö̦jö a nia shino yai bada cuo. ⁵ ’Ei a lä culenaja a wai ijilu lä cui, a shomi ma cui, camiyä ya wa̦nö a wai nofimaö fe yadioje ja, camiyä ma cui wale nofimaö mö feduoje —a cuma—. ⁶ Ö̦jö ma cui, camiya wale bejedi lä bufii wejei bä wai lä cui, wa̦lidiwä tä jamö ö̦jö iba ai a wai luluaö lä dicoo wei tä wayu. Yanowamö a ja, bei olafi jamö maa ma bada fa jalemacöjenö, modu u jamö a befi ca̦i fa queamajenö, a mishi duamaöje ja, ö̦jö a nö bleaaö ma cuquei wei ma cui, iba ai a wai lä wa̦lidiamale a lä cui, ö̦jö bei a nö shino yai bleaaö cuquei —Jesús a cuma. ⁷ Abinaja Jesús a cuma. —Wa̦lidiwä tä jamö täbä yabäcamobä, showadi tä cublawä yalo, bita jamö bä yanowamö lä bälöblai bä nö bleaaö lä cudi. Tä cua ma cule, täbä yai lä yabäcaö wejei bä lä cui, täbä wa̦lidiblamaöje yalo, ö̦jö bä nö nia shino yai bleaaö dodijio. ⁸ ’Abinaja ca̦i —a cuma—. Bei wa imicönö wa wa̦liamou dicoo ja, wa imicö fa bäblamolunö, imicö da joyamolu. Wa imicö bäblamou ja, wa nö nia ma bleaaö wei ma cui, wa demi nia lä cudio wei, ö̦jö bei tä shino yai dodijidawä. Shobali wacö jamö wa imicö demi befi ca̦i shäyäblamou ja, wacö lublou dao lä mlai jamö, ö̦jö däjä wa nö shino yai bleaaö cuquei. ’Bei wa mamicö ma cui, inaja showawä —a cuma—. Bei wa mamicönö wa wa̦liamou dicoo ja, wa mamicö fa bäblamolunö, mamicö da joyamolu. Wa mamicö bäblamou ja, wa nö nia ma bleaaö wei ma cui, shobali wacö jamö wa mamicö demi befi ca̦i shäyäblamou dicoo ja, ö̦jö däjä wa nö shino yai bleaaö cuquei. ⁹ ’Bei wa mamonö wa wa̦liamou dicoo ja, wa mamo fa ucäblamolunö, mamo da joyamolu —a cuma—. Wa mamo ma ucäblamolayou wei ma cui, Yai Bada tänö cama ebä ca̦i cuobä jamö, wa waloo fe lä yadio wei, ö̦jö bei tä shino yai dodijidawä. Shobali wacö jamö, wa mamocu demi befi ca̦i shäyäblamou dicoo ja, ö̦jö däjä wa nö shino yai bleaaö cuquei. ¹⁰ - ¹¹ Abinaja Jesús a cuma. —Ei iba ai a wai lä cui, a nofi wa̦libo dijejä. Bämacö nowa taö lä cule. Ö̦jö bä nija Yai Bada tänö a̦jele ebä malä lämabole. Ö̦jö bä a̦jele lä cui bä a̦ nö wäobä, Fayä a lä culadi nija bä malä ajedeladi. ¹² ’¿Wedinaja wamacö bufi yai cuu dodijio? —a cuma—. Ai a lä cuinö, yalo 100 bä oweja tabou ja, moli e mojolua dicolayou ja, a nia dayäaö, ¿ö̦jö tawä? Jefu tä balöcö jamö, 99 bä lä jäle bä fa dacödunö, moli e lä mojolulayono wei a nia dayäö cuaaö. ¹³ A daa co̦lalei ja, a bufi nia doblalou co̦o. ’¿Ö̦jö tawä? —a cuma—. Cafä wamacö nija ei ya wa̦ lä cui, bejedi lä ya wa̦. Bä mojoluu lä mlaono wei bä 99 lä cui nija a bufi doblao cai̦ ma cuo wei ma cui, a lä mojolulayono wei a lä cui nija a bufi nia shino yai doblalou fe balojoo, a daa co̦a fe yadilalema cudeenö. ¹⁴ Inaja showawä, yanowamö täbänö ei bä nofi wai tabou ma mlajei ma cui, Fayä a lä culadinö bä nofi li yai tabou. Moli a ma cui, a mojolumaö bufiomi waiquiwä —a cuma. ¹⁵ Abinaja Jesús a cuma. —Aifä anö wa yabäcaö ja, cama nija wa fa junö, yami wafäcö culanö, a doblou lä mlaono wei wa etä a̦ nia wäaö. Wa wa̦ ji̦liaö ja, dodijidawä wafäcö nofi nia tamayou co̦o. ¹⁶ Ö̦jö ma cui, wa wa̦ ji̦liaö bufiomi waiquiwä ja, aifä wa nia nacaö. Bolacabö ma cui, wa cöbö nacaö dao. Ö̦jö wa cöbö ca̦i fa junö, wa wasöö lä co̦le däjä, ö̦jö cäcöbö lä cuinö wa wa̦ nia bayeliblaböö, Moisesi tä a̦ lä cuu weinaja showawä. ¿Ö̦jö tawä? Bä dobloimi jömamou ja, moli a wa̦nö bä nia jömamou malä mlai. Bolacabö cäcöbö a̦ ma cuinö, 3 bä a̦ ma cuinö, bä a̦ faö fe lä usucui bä a̦nö bä nia shino yai jömamou. ¹⁷ ’Ö̦jö ma cui, ö̦jö bä a̦ ca̦i ji̦liaö bufiomi showawä ja, iba bä lä yododaö wei bä bluca nija a wa̦fa da wäcö —a cuma—. Iba bä lä cuinö a ma wasöö wejei ma cui, bä a̦ ji̦liaö bufiomi showawä dicowä ja, Yai Bada a daö lä mlajei, wa bä nofi nö lä tabobö weinaja, wa nofi nia ca̦i tabou, Lomateli bada bä befi, bä blada lä doaö wejei, wa bä nofi nö lä tabobö weinaja showawä. ¹⁸ ’Cafä wamacö nija ei ya wa̦ lä cui, bejedi lä ya wa̦ —a cuma—. Äyämö, bita jamö culanö wa bä wasöö ja, Yai Bada a lä culadinö tä tamaö nofi lä wa̦libole tä shino ja, wa bä nia wasöö. Wa tä tamaö lä bufio wei tä ma cui ja, inaja showawä. ¹⁹ ’Bämacö nowa taö co̦a lä cule —a cuma—. Bolacabö ai wafäcö bädawä lä cui, wafäcö bufi shalililanö Yai Bada nija wafäcö nacou ja, wafä tä tamaö lä bufii wei tä lä cui, Fayä a lä culadinö tä taö wä. ²⁰ Camiyä ya wa̦ ja, bolacadabö wamacö lä yododaö wei jamö, ö̦jamö lä camiyänö bämacö nia ca̦i cuo. Bolacabö wafäcö bädawä ma cui, inaja showawä —Jesús a cuma. ²¹ Ö̦jö däjä, Jesús nija Pedro a icua fa ajedeicunö, abinaja e cuma. —Bada tä. Iba ai anö, showadi wale yabäcadii dicoo ja, ¿wedinaja ya yai li cuaabä? ¿Wedinaja tä cudale, ya etä mladamaö cuobä? 7 wale yabäcaö cua ma waiquile ma cui, ¿ya etä nowa mladamaö fe yadiobä tawä? —Pedro e cuma. ²² Abinaja Jesús e cuu nomöjöoma. —Aifä anö 7 wa yabäcaö ma cule, wa etä nowa nia mladamaö. Aifä nija tä nowa lä cule, wa etä nia wabaimi. ²³ Ö̦jö cudeenö, Yai Bada tänö cama ebä ca̦i lä cuo wei tä lä cui, abinaja tä yai cuwä. A bälöo lä dodijio wei a bada cuoma. A nosie lä juamou wei bä nija bä nowa blada taboma. ¿Ö̦jö tawä? Bä nowa lä tabole bä blada co̦amaö co̦obeje, bä nacaa co̦amalalema. ²⁴ ’¿Ö̦jö tawä? —a cuma—. Ö̦jö bä wa̦lii showao däjä, a nosie juamobä ai a lä cui, a ca̦i waloqueyolumaje. Ö̦jö a lä cui nija blada 10.000 tä nowa bada cuoma. ²⁵ Tä nowa cuoma ma cui, blada bä nia lä co̦amaö wei bei etä cuonomi dicowä. Tä nowa nö co̦amabimi yalo, shomi täbä nija bada anö a jöböamaö bufima. Cama a ma cui, bä suwäbö e ma cui, bä ijilubö ebä ma cui, täbä bluca lä tabono wei täbä ma cui, blada bä ja bada anö bä nia bluca nomöjöamama, tä nowa co̦amamou fe yadiobä. ²⁶ ’Inaja a nia taamama yalo, a nosie juamobä a lä cui, bada nija a quilili fa dijoblaicunö, a möfe boblaquema, a nofi nia ojode fa tablamonö. Abinaja a cuma. “Bada tä. A shi jalimou dicoo dijä. Ya tä nowa bluca co̦amaö weicätä”, a cuma. ²⁷ Einaja e cuma yalo, bada a lä cuinö a nofi ojodaboma. A fa jujeblamalönö, etä nowa jödödöwä lä cuono wei etä mladamaö showadalayoma. ²⁸ ’¿Ö̦jö tawä? —Jesús a cuma—. Ö̦jö ma cui, bada a nosie juamobä ö̦jö a showawä lä cui, abinaja cama a cuaaö dicooma. Sibo jamö a faö co̦o däjä, bada a nosie juamobä ai a mö feduwä lä cui, a dalalema. Ö̦jö nija bä nowa blada taboma. Bluca mlai, 100 bä nowa wai blada tabou bädaoma. Ö̦jö ma cui, bä blada co̦amaö showao fe yadiobä, bei olami ja imicö waliblaa showadaquema. “¡Iba blada 100 bä da co̦maba!”, a nowa tadalema. ²⁹ ’Inaja a nowa tama yalo, bada a nosie juamobä a mö feduwä lä cui, a nofi nia ojode fa tablamonö, a quilili fa dijoblaicunö, a möfe boblaquema. A wa̦ fe blacäjolanö abinaja e cuma. “A shi jalimou dicoo dijä. Ya bä co̦amaö wä”, e cuma. ³⁰ Einaja a ma cuno wei ma cui, a nofi ojodabou mlai ja, a fe shino yai laa dicomaquema. Bä blada co̦amaö showao mlao däjä, a nia famaö co̦onomi. ³¹ ’¿Ö̦jö tawä? —Jesús a cuma—. Bada a nosie juamobä bä mö feduwä lä cuinö, ö̦jö tä fa dalalöjenö bä bufi bluca wa̦lidiblaliyoma. Ö̦jö däjä, bada nijamö bä juu fa showadaonö, tä bluca lä cublaliyono wei tä a̦ wäyäö co̦ojolomaje. ³² ’Bada anö cama bä a̦ fa ji̦lilänö, a doblono lä mlai a nacaa co̦malema. A waloo däjä, abinaja a nowa tama. “Wale nosie juabä cafä wa lä cui, wa yai dobloimi fe balojowä. Camiyä nija wa nofi ojode tablamobä wa wa̦ lä fano wei däjä, afä ya tä nowa bluca mladamalema. ³³ ¿Ö̦jö tawä? Cafä bäfä nofi ojodadaö lä culayono weinaja, ¿wedi tabä inaja showawä aifä wa nofi ojode tablanomi dicowä?”, a nowa tama. ³⁴ ’Bada a fa jushudalunö, a fe laa showadamaquema. Tä nowa bluca co̦amaö showao mlao däjä, a nia famaö co̦daanomi. ³⁵ ¿Ö̦jö tawä? —Jesús a cuma—. Einaja showawä, bei wamacö bufi cadidiwänö aifä wama etä nowa mladamaö cuomi dicowä ja, Fayä a lä culadinö afä tä nowa nia ca̦i mladamaö ayaomi.

¹ Ö̦jö tä a̦ ja Jesúsnö täbä yömölaö fa waiconö, Calilea tä ulifi fa dacöfälönö, Judea jamö a aa majölayoma, Jodana u mashi bucadu jamö. ² Jesús nija täbä bluca yauoma. Ö̦jamö lä jalili bä ca̦i lä yauono wejei, bä bluca jalomalalema. ³ Ö̦jö däjä, Jesús nija faliseo bä bada fa icuicunö, a wa̦limaje. A wa̦ bejedi nia fa wabajenö, abinaja bä cuma. —Täbä suwäbö joyao bädao mlaobä, ¿tä a̦ läa tawä? —bä cuma. ⁴ Abinaja Jesús a cuma. —¿Moisesi bei wama etä a̦ oni daö mlaa cule? Yanowamö täbä lä tablaleno wei a lä cuinö täbä jaba lä tablaleno wei däjä, wa̦lo a, suwä a, cäcöbö tablalema. ⁵ Abinaja a ca̦i cuu showaoma. Ö̦jö cudeenö, täbä doayou däjä, täbä shelelou nodiablalou showawä. Bä fö̦ö nijamö, bä nöö nijamö bä jaba ma cublamou wei ma cui, bei suwäbö bä nia fa ajedemabojenö, bä sheleleblou majöo,moli bä cublou majöobä. ’Einaja a cuu showaoma —Jesús a cuma—. ⁶ ¿Ö̦jö tawä? Yai Bada tänö moli cäcöbö tablamaö waiquilayoma ja lä, yanowamö täbänö cäcöbö sheleleblamaö majöobeje, etä cuami waiquiwä —Jesús a cuma. ⁷ Judio bä bada lä cui, abinaja bä cuu nomöjöoma. —Ja̦o. Bä suwäbö bä joyabeje etä cuami waiquiwä ja lä, ¿wedi tä tabä Moisesinö bä joyaö li wasönomi, öjö lä? Bä suwäbö bä joyaö cadidiobeje, tä a̦ oniblamaö malä bufino wei. Bä fe̦yalobö bänö tä a̦ oni fa tablajenö, bä suwäbö bä nija tä a̦ oni nia jöböamaje, etä a̦ ca̦i oni shömamou co̦obä —bä cuma. ⁸ Jesús abinaja a cuma. —Wamacö bufi jifuwä waiquioma yalo, Moisesinö ö̦jö tä a̦ li oniblalema. Ö̦jö ma cui, Yai Bada tänö täbä jaba lä tablaleno wei däjä, inaja cama a bufi cunomi. ⁹ Abinaja bämacö nowa taö lä cule. Ai a lä cuinö, bä suwäbö e nofi beshili jushuaö ma mlai ma cui bä suwäbö e fa joyalönö, ai a suwä däaö majöo ja, a dobloimi. “Iba ya däa majölei lä cufe”, cama a bufi cuu ma bäle ma cui, inaja Yai Bada a bufi cuimi. Ma. “A lä joleblalou wei a”, Yai Badanö a nofi li tabou —a cuma. ¹⁰ Bä lä nocamabono wei bä lä cui, abinaja bä cuma. —Shädayai. Inaja lä tä cua ja lä, bä suwä doamou mlai ja bämacö cuo showadao fa cunoja, tä nö shino doblaobö wei —bä cuma. ¹¹ Einaja bä cuma ma cui, abinaja Jesús a cuu nomöjöoma. —Täbä nia shinoco lä cuo wei tä ja, ya wa̦ fe blacäjoimi. Ai bä lä cui, bä shinoco cuo nö doblobimi waiquiwä. Ö̦jö ma cui, ai bä mö feduwä lä cui, Yai Bada tänö inaja bä bufi li taamaö yalo, bä shinoco li cualiyou. ¹² ¿Ö̦jö tawä? —Jesús a cuma—. Wa̦lo ai bä lä cui, bä natecö oshe ca̦i li wa̦lidiwä cublou fa showadaonö, bä suwä li jubaö daomije. Ai bä mö feduwä lä cui, yanowamö täbänö bä natecö li fa joyajenö, bä li yanöcöwä cudio. Ai bä showawä lä cuinö, yabäcäa mlai ja Yai Bada etä a̦ juaö bufi doblaoje yalo, suwä bä tabou bufiomije. ¿Ö̦jö tawä? “Inaja lä ya yamili cuobä ya waiquiwä”, wamacö bufi cuu waiquiwä ja, ei ya wa̦ lä cui wamale a̦ ji̦liabä —a cuma. ¹³ Ijilu bä wai oshe lä cui bä ca̦i waloblaayolumaje, Jesús imicö maquelanö Yai Bada nija bä bayeliblamabä. Cama ebä lä nocamabono wei bä lä cuinö, ö̦jö bä ca̦i juu fa dalalöjenö, bä ma wasöno wejei ma cui, ¹⁴ abinaja Jesúsnö bä nowa tama. —Wamacö a̦ läablalou dicoo mlai. Camiyä nija ijilu wama bä yai jumabä bä li. Ijilu bä a̦ juo si ijejewä lä culenaja bä lä cui, Yai Bada tänö ö̦jö bä ca̦i cuobä bä malä cui —bä nowa tama. ¹⁵ Ö̦jö däjä, ijilu bä nija imicö maquedou fa cuaanö, bä bayeliblamaö bufima. Inaja bä bayeliblamaö fa bufinö, a aa nomöjölayoma. ¹⁶ Ai däjä, Jesús nija a fiya fa icuicunö, a wa̦lima. —Tä a̦ wäyäle —a cuma—. ¿Wedinaja ya li dodijaö cuaaö fa dodijionö, ya li ba̦limi cuobä? ¹⁷ Abinaja Jesúsnö a nowa tama. —Wa nia lä dodijaö wei, ¿wedi tabä camiyä nija bei wa tä li wa̦lii? A yai lä dodijaö wei a lä cui, moli a shilo yai cuadayoa. Wa ba̦limi cuo bufi doblao ja lä, Yai Badanö tä tamaö lä bufii wei, tä a̦ nofi bluca da cadidilä, ö̦jö lä —a nowa tama. ¹⁸ —Ja̦o. ¿Wedi jamö tä a̦ dodijiwä lä cui, bei ya tä a̦ nofi yai li cadidilei, ö̦jö lä? —e cuu nomöjöoma. Ö̦jö däjä, Yai Bada etä a̦ wawämaö ja, abinaja Jesúsnö a nowa tama. Yanowamö wama täbä nia shäimi. Wamacö nia joleblaloimi. Wamacö nia tomömoimi. Ai wama täbä a̦fa nia jole jole wäyäimi. ¹⁹ Faafä a ma cui, naafä a ma cui, dodijidawä wama bä ca̦i fa cuonö, wama bä a̦ nia juaö. ’Einaja tä a̦ cuu. Abinaja ca̦i. Cafä wa nofi jo̦lio lä culenaja, inaja showawä aifä wa bä nofi tabolanö wa bä nofimabä. ’Einaja tä a̦ cuu —Jesúsnö a nowa tama. ²⁰ Ö̦jö a fiya lä cui, abinaja e cuu nomöjöoma. —Ja̦o. Ö̦jö lä ya täbä a̦ bluca nofi cadidibou waiquia lä cule —a cuma—. ¿Wedi ya tä yai taö nomöjöobä? ²¹ Jesúsnö abinaja a nowa tama. —Dodijidawä wa yai cuobä, abinaja wa nia yai cuaaö. Wa täbä bluca lä tabole, blada bä ja wa täbä fa nomöjöacönö, ö̦jö lä bä blada ja, täbä nö jo̦lili lä bleaaö wei täbä da dobälalö. Inaja wa yai cuaaö ja, afä täbä nowa lä bluca wei wa täbä nia tabodayou. Ö̦jö däjä, camiyä nija a nocaa da showadaiquiyo —a nowa tama. ²² Fiya a lä cuinö, Jesús a wa̦ fa ji̦lilänö, a bufi ca̦i wajäwä co̦layoma, madofi bä bluca tabou dodijioma cudeenö. ²³ Cama ebä lä nocamabou wei bä nija abinaja Jesús a cuu juoma. —Cafä wamacö nija ei ya wa̦ lä cui, bejedi lä ya wa̦. Bä nö lä madofibö wei bä lä cui, Yai Bada tänö cama ebä ca̦i cuobä jamö, ö̦jö bä nia juu si ijejeomi. ²⁴ Mösöcö aca jamö cameyo bä lucäö si ijejewä malä mlai. Bä nö lucäbimi waiquiwä. ¿Ö̦jö tawä? Bämacö nowa taö co̦a lä cule. Mösöcö aca jamö cameyo bä lucäimi ma waiquii, bä nö lä madofibö wei bä lä cui, Yai Bada tänö cama ebä ca̦i cuobä jamö ö̦jö bei bä lucäimi yaiquei —a cuma. ²⁵ Jesús a wa̦ fa ji̦liläjenö, cama ebä lä nocamabono wei bä lä cui, bä bufi yai shädayaimou dodijioma. Abinaja bä cudaliyoma. —Ja̦o. Yai Bada nija ö̦jö lä bä nö cuobimi waiquiwä ja, ¿wedi jamö bä lä cui, bei bä nia shino yai jucäamou, ö̦jö lä? —bä cudaliyoma. ²⁶ Jesúsnö bä möö cuaalanö, abinaja bä nowa tama. —Ma. Cama yanowamö täbä jucäamou buobä, tä cuami waiquiwä. Ö̦jö ma cui, Yai Bada tänö jödödöwä tä tamabä, ö̦jö a —a cuma. ²⁷ Ö̦jö däjä, abinaja Pedro a cudaliyoma. —Ö̦jö ma cui, camiyä yamacö lä cuinö, yama täbä bluca lä tabono wei yama täbä fa daacönö, cafä nija yamacö nocaa lä cule. ¿Ö̦jö tawä? ¿Wedi täbä ja, yamacö yai nia li dobämamou nomöjöo? —a cuma. ²⁸ Jesúsnö abinaja bä nowa tama. —Cafä wamacö nija ei ya wa̦ lä cui, bejedi lä ya wa̦. Bita dude a tablamou co̦o däjä, camiyä ya lä yanowamöblaleyoluno wei ya lä cui, ya döcäobä täcö lä doblale jamö, camiyä ya nia döcäo. Ö̦jamö lä ya döcäo däjä, camiyä nija wamacö lä nocaono wei wamacö lä cui, afä 12 täbä ja, wamacö nia döcäcou yädäo mö feduo. Ö̦jamö lä wamacö döcäcälanö, Isaeli bä ijilubö 12 ebä nodiwä lä yaiablalou wei bä nija wamacö nia bada läo. ²⁹ ’Camiyä nija wamacö bufi mö blucao yalo afä wama täbä daaö ja, wamacö nö bleaaö mlaicätä —a cuma—. Wamacö yafibö ma daamamou wei ma cui, wamacö mashi ma damoquei wei ma cui, faafä, naafä wama bä bluca ma daquei wei ma cui, ijilufä wama bä ma daaö wei ma cui, wamacö ulifibö ma daamamole ma cui, ö̦jö lä täbä bluca showawä ja, wamacö nia dobämamou mö yabao co̦o. Afä wama täbä daa lä tacöfenaja bädawä mlai, bluca täbä ja wamacö nia yai dobämamou fe biyäjäo majöo. Wamacö nia ca̦i ba̦limiblamaö. ³⁰ ’Ö̦jö ma cui, “Camiyä balöwä”, täbä nofi lä tamamou wei bä bluca mö feduwä lä cui, ö̦jö lä bä nia nojablou —a cuma—. Inaja showawä, äyämö bä nojablou si lä ijejei bä lä cui, ö̦jö lä bä nia shino balöblou nomöjöodayou.

¹ Jesúsnö ei tä a̦ ca̦i wäyäö yaclämoma. —Yai Bada tänö cama ebä ca̦i lä cuo wei tä lä cui, abinaja tä ca̦i cuwä. Ficali etäca jamö bä shömabä, bada anö bä dayäaö cuaaö fenaoma. ² Bä a̦ wayou balöo ja, blada a nia lä däaö wejei tä ja, bä bufi bluca shaliliblou balölayoma. Ö̦jö däjä, cama etäca jamö bä shömöa showadalema. ³ ’Motoca a ösöblojolayou däjä, bada a aa fa co̦lufälönö, nii bä showadi lä lulublaaö wejei jamö, ai bä ublao lä bädaono wei bä dalalema. ⁴ Ö̦jö bä lä cui, abinaja bä nowa tama. “Iba täca jamö, bä juu da juofälö. Dodijidawä bämacö nowa co̦amaö wä”, bä nowa tama. Ö̦jö a wa̦ fa ji̦liläjenö, bä aa showadalayoma. ⁵ ’Motoca a yo̦loloblou däjä ma cui, a itou ma yajadodoafälöö däjä ma cui, inaja showawä a cuaaö co̦oma —Jesús a cuma—. ⁶ Tä mö weyaö ma waiquio däjä ma cui, a juu fa co̦onö, ai bä ublaa daa co̦lalema. Abinaja bä nowa tama. “¿Wedi tä tabä, eja bei wamacö li juaadii buo?”, bä nowa tama. ⁷ Abinaja bä cuma. “Yamalecö nosiemaö dicoo fa mlacujenö, eja yamacö li cua bädaa lä cule”, bä cuma. Ö̦jö däjä, abinaja bada a cuma. “Ja̦o. Iba täca jamö bä juu da juofälö”, a cuma. ⁸ ’Tä mö dödöjöblou däjä, abinaja bada e cuma, cama a lä lämabono wei a lä cui nija. “Bei. Bä lä ojodamole bä da nacadu, wa bä nowa co̦amabä. Jödödö ya bä lä shömölöi bä lä cui, ö̦jö bä nowa co̦amaö da balöo. Ö̦jö däjä, motoca a itou yajadodoafälöö däjä ya bä lä shömölöi bä lä cui, ö̦jö bä nowa co̦a da nomöjömacö. Inaja wa bä nowa co̦amaö fa cuaaimadunö, fena däjä ya bä shömöa lä bälölöi bä lä cui, ö̦jö bä nowa ca̦i co̦a da nomöjömacö”, e cuma. ⁹ ¿Ö̦jö tawä? —Jesús a cuma—. Jödödö bä lä shömöleno wei bä ajedeblamaö fa balölonö, täbä lä balölayono wei täbä nija a wa̦fa blada wayoaö lä fenaono wei a ja, bä dobälalema. ¹⁰ ’Jaba bä shömöa lä balöleno wei bä ma cui, ya̦cumö bä nacaa ajedea nomöjölema. Abinaja ö̦jö bä bufi cublaloma. “Bä weyade lä queono wei bä lä cui bä nija, blada a wa̦fa wäyäö lä fenaoblei a ja bä dobämamou waiquiwä yalo, camiyä yamacö queo lä fenablaqueno wei yamacö lä cui nija, blada ai bä yädäamaö co̦o weicätä”, bä bufi cublaloma. Inaja bä bufi cublalou ma buono wei ma cui, inaja showawä bä blada fe usucuwä jöböaquema. ¹¹ ’¿Ö̦jö tawä? —Jesús a cuma—. Ö̦jö a blada däaöje däjä, bada a nija bä nacömoma. ¹² Abinaja bä cuma. “Fei bä lä cui, bä li weyade waloquema ma cui, ¿yamalecö dobäa fe li usucua dicolei tawä? Motoca ma yoblao däjä ma cui, yamacö ojodamou nö lä bleaano wei, ¿tä nowa yai cuami tawä?”, bä cuma ma cui, ¹³ abinaja bada a cuu nomöjöoma, ai a nija. “Ma, Nofi. Bäfä mölamaö malä mlaofe. Blada wa lä dälöfe, ö̦jö wa nowa nia ojode malä tano wei. ‘Ö̦jö waiquiwä’, ¿wa cunomi daanö? ¹⁴ Afä ya wa̦fa blada wäyäö lä fenaoblei wa fa dälönö, a ca̦i da co̦jamö. Cafä bäfä dobäa lä talöfenaja, inaja showawä, fei bä weyade waloa lä jäqueno wei bä ma cui ya bä dobäö cuo mö feduobä, ya bufi shalilia lä cule. ¹⁵ Iba ya bä sheleleblamaö cuo bufi lä doblao weinaja, ya bä sheleleblamaö cuobä, ¿ö̦jö yami daanö? ¿Ö̦jö tawä? Camiyä inaja ya shi ö̦jöde cuwä ja, ¿cafä bei wa bufi li jushujuablalobä, bei wa?” a bada cuma. ¹⁶ ’¿Ö̦jö tawä? —Jesús a cuma—. “Camiyä balöwä”, täbä nofi lä tamamou wei bä lä cui, ö̦jö lä bä nia nojablou majöo. Inaja showawä, äyämö bä nojablou si lä ijejei bä lä cui, ö̦jö lä bä nia shino balöblou nomöjöo. ¹⁷ Jelusale yo jamö Jesúsnö cama ebä ca̦i ayofälöma. Bä jufälöbä jamö, cama 12 ebä lä nocamabono wei bä ca̦i fa bayäcäblaludunö, bä yömölafälöma. Abinaja bä nowa tama. ¹⁸ —Bei. Jelusale jamö bämacö juu lä cuimadi. ¿Ö̦jö tawä? Ya lä yanowamöblaleyoluno wei ya lä cui, bada täbä nija wale nia jöböaöje. Nofi bäyäalewä blowäjäwä bä ma cui, Moisesi tä a̦ ja täbä lä damaö wejei bä ma cui, ö̦jö bä nija ya fa jöbömoicunö, wale shämabeje wale nia jömaöje. ¹⁹ Ö̦jö däjä, judio bä lä mlai bä nija wale noshi nia ö̦jödabou majöoje, wale nö bleaamabeje. Wale nö nia waiblaöje. Wale si ca̦i nia yafelimaöje. Fii balitama defi ja, wale ca̦i nia basuaöje. ¿Ö̦jö tawä? Wale nomawä fa didicöjenö, bolacabö tä mö didi fa cublalunö, ya demi nia jocädou co̦o —bä nowa tama. ²⁰ Ö̦jö däjä, Sebedeo bä ijilubö ecöbö lä cui bei bä nöönö, Jesús nija cäcöbö ca̦i icua ajedequema. A fa dijoafälönö, a möfe bolanö, Jesús nija a nacoma. ²¹ —¿Wedi wa tä yai bufii? —Jesús e cuma. Abinaja a suwä cuma. —Afä wa bä nia ca̦i lä cuo wei ja, ijiluyä wa cöbö bada lomabou ajedeobä ya wa̦. ¿Ö̦jö tawä? Jayu wa boco mashi jamö ai a, acasi wa boco mashi jamö ai a, wa cöbö döcämabou mö feduduobä —e cuma. ²² Ö̦jö ma cui, abinaja Jesús a cuma, ö̦jö suwä a lä cui bä ijilubö ecöbö nija. —Wafä tä lä nacaö wei wafä tä daimi dicowä. Wale nö nia lä bleaamaö wejei däjä, ¿wafäcö nö bleaaö mö feduobä wafäcö daanö?—a cuma. —Awei, inaja lä yafäcö ca̦i tablamamobä yafäcö waiquiwä —cäcöbö cuma. ²³ Ö̦jö däjä, abinaja Jesúsnö cäcöbö nowa tama. —Bejedi lä wafäcö a̦. Wafäcö nö nia bleaaö mö feduo. Ö̦jö ma cui, jayu ya boco mashi jamö a nia lä döcäo wei a lä cui, camiyänö ya tä daimi. Acasi ya boco mashi jamö ma cui, inaja showawä. Cäcöbö nia lä döcämabou wei, Fayänö ö̦jö tä shino daö waiquia —cäcöbö nowa tama. ²⁴ Jesús ai 10 ebä lä cuinö, ö̦jö cäcöbö a̦ fa ji̦liläjenö, Santiago, Juan sho cäcöbö noshi wa̦lidaö dicolayomaje. ²⁵ Inaja bä bufi cudaliyoma yalo, Jesúsnö bä bluca fa nacalänö, abinaja bä nowa tama. —Shomi bä lä bälöblai bä nijamö bä bada lä läblai, cama bä a̦ shino ji̦liamou bufi doblao talei. Cama bä bada lä cuinö bä shino shömaö fe blacäjouje. ²⁶ Ö̦jö ma cui, inaja cafä wamacö nofi tamamobä wamacömi. Ma. Cafä wamacö nija a nosiemou bufi lä doblao wei a lä cuinö, bä nosiemaö fe balojoo mlai, bä shino yai bayeliblabä. ¿Ö̦jö tawä? ²⁷ “Camiyä ya shino yai bada cuobä”, wa nofi lä tamamou wei wa lä cui, aifä showadi wa bä bayelibladibä wa e nia shino yai cuo, ²⁸ camiyä ya lä cuaaö weinaja showawä. Camiyä ya lä yanowamöblaleyoluno wei ya ma cui, ya nosiemobä ya junomi. Ya bä yai bayeliblabä, ya li waloqueyoluma. Yanowamö ai ya bä nowa ca̦i bluca co̦amabä, ya jöböamou mö juma —bä nowa tama. ²⁹ Jelico jamö Jesúsnö cama ebä ca̦i jayuabä jamö, bluca täbä nocaquema. ³⁰ ¿Ö̦jö tawä? Bei yo casö jamö bolacabö cäcöbö jubäbö loo mö baoma. Jesús a lä jayuale a wa̦fa fa ji̦libölänö, i̦cali cäcöbö comöö läoma. —¡David nodiwä wa e lä cui! ¡Yafälecö nofi da ojodadaliyo! ³¹ Mamicai cäcöbö nia fa lomabojenö, bluca bänö cäcöbö a̦ ma wasöno wejei ma cui, cäcöbö a̦ yai nacläa majöa dicolayoma. —¡Bada tä! ¡David nodiwä wa e lä cui! ¡Yafälecö nofi da ojodadaliyo! ³² Jesús a ublaa fa yanöcödalunö, cäcöbö lä jubäböono wei cäcöbö nacalanö, abinaja e cuma. —¿Wedinaja bäfäcö li taamabä, bei wafäle li nacaa lälei? —e cuma. ³³ Cäcöbö lä jubäböono wei, abinaja cäcöbö cuma. —Bada tä. Yafä täbä möbä, wafäle mamocu da dodijidablaliyo —cäcöbö cuma. ³⁴ Jesúsnö cäcöbö nofi fa ojodadalönö, cäcöbö mamocu jubälalema. Ö̦jö däjä, cäcöbö mamocu dodijidablou fa showadalonö, Jesús nijamö cäcöbö yaua showaquema.

¹ Jelusale jamö, Jesúsnö cama ebä ca̦i ajedeblaleyoma. Oliba tä balöcö jamö bä waloquema, Befajeiteli bä lä bälöle jamö. Ö̦jö däjä, ö̦jamö culanö, bä lä nocamabono wei ai cäcöbö shömöa balölema. ² Abinaja cäcöbö nowa tama. —Wafäcö juu fa shaliloimadunö, quiji a shabono jamö cäcöbö da yafilujulu. Wafäcö lä co̦blole jamö, yalo bulo a nata lä cule wafä a nia dablajalayou, ijilubö a ca̦i. Ö̦jö wafä cöbö nata fa cushälänö, äyämö wafä cöbö nia ca̦i juu co̦imaö. ³ Ai anö wafäcö wa̦lii bädao ja, abinaja wafäcö cuu. “Bada anö cäcöbö majöamaö bufii cublei. Lobe cäcöbö nia co̦amaö co̦o cublei”, wafäcö cubä —Jesúsnö cäcöbö nowa tama. ⁴ Yai Bada a wa̦no wäyälewä a lä cuno wei tä a̦ bejedi wawäblobä, ö̦jö tä cublaliyoma. Abinaja tä a̦ cuu. ⁵ Sionoteli bä da yömöla. Cama e Bada juu lä cuimi. A ca̦i Bada jömamou buomi. Yalo bulo a ja a döcälanö, a befi ca̦i juu lä cuimi. Bulo bä ijilubö a ma cui ja, a ca̦i döcäa. Einaja tä a̦ cuu. ⁶ Ö̦jö däjä, Jesúsnö cäcöbö lä nocamabono wei cäcöbö aa fa showalöfälönö, cäcöbö nowa lä tano weinaja, inaja showawä cäcöbö cuaaö cadidioma. ⁷ Jesús nijamö bulo a ca̦i waloböa co̦queyoluma, ijilubö a ca̦i. Cäcöbö ca̦i waloböa fa co̦iquiyonö, yalo cäcöbö mabucabö ja, cäcöbö camishibö maquea fa balöaböcönö, ö̦jamö lä Jesús a döcäquema. ⁸ Jesús a befi ca̦i jubä jamö, bufi doblalolanö a befi ca̦i jayuamamaje. A befi ca̦i nia lä jayuono wei yo jamö bä lä co̦camono wei, ai bä bluca mö feduwä lä cui bä camishibö jilablaamou läafälöma. Ai bä mö feduwä lä cuinö, dejenabä befi ca̦i fa bafedialalöjenö, dejenabä jilamaö cuaaö balöablalou mö feduofälömaje. ⁹ Bä lä balöfälöno wei bä ma cui, bä lä nojaono wei bä ma cui, ö̦jö bä a̦ noshi fa jalilaimadunö, abinaja bä cufälöma. —¡Bada tä David nodiwä e nofi shino yai da doablaje! Yai Bada a wa̦nö a lä juimi, ¡ö̦jö lä a shino yai bayeliblamobä a! ¡Bada tä lä culadi a nofi shino yai doablamobä! —bä cufälöma. ¹⁰ Jelusale jamö Jesús a yafii däjä, ö̦jamö bä lä bälöle bä shi bluca jalimoma. —¿Fei, wedi bei a ca̦i li juu cuimajei? —bä cuma. ¹¹ Ö̦jö däjä, bä bluca lä co̦camono wei bä a̦ nocalayoma. —¡Yai Bada a wa̦no wäyälewä, Nasaleteli fei Jesús ö̦jö lä a, Calilea tä ulifi jamö a lä bälöle! —bä cuma. ¹² Yai Bada etä yafi sibo lä ji̦coloi jamö Jesús a fa lucälönö, blada bä ja täbä madofi lä jöbäö wejei bä lä cui, bä yashublalema, täbä madofi lä lulaö wejei bä ca̦i. Bä blada lä nomöjano wejei bä ma cui, bä bladabö lä maquecono wei täbä ca̦i jocäabodayoma. Joledo bä lä nomöjöano wejei bä ma cui, bä lä döcäcäono wei täbä ca̦i bluca ja̦iyabodayoma. ¹³ Abinaja bä nowa tama. —Bei. Abinaja Yai Bada etä a̦ oni cuu. Iba yafi a lä cui, Täbä nö bayeli nacaobä, a wa̦fa yafi nia shino yai jilamou. ’¿Ö̦jö tawä? Einaja tä a̦ cuu ma cui, täbä lä tomömou wei bei wama tä yafi li tablaö bashiblalayoma —bä nowa tama. ¹⁴ Yai Bada etä yafi jamö Jesús a cuo showao däjä, bä lä jubäböono wei bä ma cui, bä juno lä mlai bä ma cui, cama nija ö̦jö bä ca̦i bluca fa icuicujenö, bä jalomalalema. ¹⁵ Tä nö lä quilijii Jesúsnö tä bluca wawämalema yalo, ijilu bä shi bluca jalimoma. —¡Bada tä David nodiwä etä nofi yai doablamobä! —bä shi jaliwä cuma. ¿Ö̦jö tawä? Jesús a lä cuaano wei tä fa dalalöjenö, ijilu bä a̦ ca̦i fa ji̦liläjenö, nofi bäyäalewä blowäjäwä bä bada jushudaliyoma, Moisesi etä a̦ ja täbä lä damaö wejei bä ca̦i. ¹⁶ Ijilu bä a̦ wasöö fa mlacunö, Jesús nija abinaja ö̦jö bä cuma. —¿Ei wa bä a̦ ji̦liaimi daanö? —ebä cuma. —Ji̦liaö lä —Jesús e cuma—. Yai Bada etä a̦ oni jamö, ¿ei wama tä a̦ doaö daimi tawä? Abinaja tä a̦ cuu. Ijilu oshe bä ma cui, bä lä shadimabou wejei bä ma cui, wa nofi doalajenö bä a̦ dodijiablalobä, cafänö bei wa bä yai taamama. ’Einaja tä a̦ cuu —Jesús e cuma. ¹⁷ Inaja bä nowa fa talöfälönö, shabono jamö a faa co̦layofälöma. Bedania jamö a fe jalulayoma. ¹⁸ Ö̦jö tä fena ja, Jelusale jamö Jesús a aa mö yabaa fa co̦lufälönö, a ofälayoma. ¹⁹ Bei yo casö jamö ico fi fa dalalönö, a ajedofälöma. A fa blacälönö, fi bloque dalalema. Fi jenabä shino shi̦co buoma. Ö̦jö däjä, fi wafäblaö ja, abinaja a cudaliyoma. —Cafä ico wa fi lä cui ja täbä iyabä, ¡wa defi nia bufiblamou co̦daaimi! —a cudaliyoma. Ö̦jö däjä, defi fäa showadalayoma. ²⁰ Ico fi fäö fa dalalöjenö, Jesúsnö bä lä nocamabono wei bä bufi shädayaimou dodijioma. Abinaja Jesús nija bä cuma. —¿Wedinaja tä li fa cublalunö, fi li fäa showadalayou cufe? ²¹ Abinaja Jesús a cuma. —Wedinaja mlai. Yai Bada a nofi yai shino da mölaboje, ö̦jö lä. Cafä wamacö nija ei ya wa̦ lä cui, bejedi lä ya wa̦. Wamacö bufi ujudublou mlai ja, Yai Bada wama a nofi mölabolanö wamacö a̦ faö däjä, tä nia cublou. Ico ya fi lä tablamalufenaja bädawä mlai, quiji a jefu ma cui, wama a nowa taö ja, a nia majöblou. “¡Jefu a da ucäblalufälö! ¡Modu u jamö, a da shäyablamobalu!”, wama a nowa taö däjä, a nia jefu queamamou. ²² Yai Bada nija wamacö nacou däjä, wama a nofi mölabou cadidilanö wamacö a̦ faö ja, wama tä nacaö lä bädale tä ma cui, wama tä nia däaö —a cuma. ²³ Yai Bada etä yafi jamö Jesús a lucäa fa co̦lunö, täbä yömölabä jamö bada bänö a nabä icuquemaje. Nofi bäyäalewä blowäjäwä bä ma cuinö, judio ai bä ca̦i bada ma cuinö, abinaja a nowa tayolumaje. —Bei. Einaja wa cuaabä, ¿cafä bada bei wa tawä? ¿Wedinö bada bei wa tablamalema, ö̦jö lä? —a nowa tamaje. ²⁴ Jesúsinö abinaja bä nowa taö nomöjöoma. —Cafä wamacö ma cui, bämacö ca̦i nia wa̦lii mö feduo. Cafä wamacönö wamale a̦ julei ja, wale Bada lä tablamaleno wei ya wa̦fa nia wawämaö nomöjöo. ²⁵ Ja̦o. ¿Wedinö Juan a shömölema, täbä fe ojomabä? ¿Yai Bada tänö a shömölema tawä? Ma, ¿yanowamö täbänö a shömölema sijewä? —Jesúsnö bä nowa tama. Bä nowa nia lä juo wei tä a̦fa wayoaö balöoje ja, bä a̦ shino läablalodii buoma. Abinaja bä nowa tayoma. —“Juan a lä cui, Yai Bada tänö a shömölema”, bämacö cuu dicoo ja, “Inaja lä wama a nofi ma tabole ma cui, ¿wedi tä tabä wama a wa̦ bejedi li bufinomi, ö̦jö lä?”, a nia cuu majöo dicoo. ²⁶ Ö̦jö ma cui, “Yanowamö täbä nija a shömamoma”, bämacö cuu dicoo ja, ei bä lä co̦camole bä fa jushudalunö, bä a̦ nö nia quiliaö. “Yai Bada a wa̦no wäyälewä Juan a cuoma”, a nofi malä tabolajei —bä nowa tayoma. ²⁷ Ö̦jö cudeenö, abinaja bä shino cuma, Jesús nija. —Cuwi. “Ö̦jönö Juan a shömölema a”, yama a nofi ca̦i taboimi —bä cuma. —Ja̦o —Jesús e cuma—. Camiyä ya ma cui, cafä wamacö nija, “Ö̦jönö wale shömölema ya”, ya ca̦i nia cuu ayaomi —a cuma. ²⁸ Nofi bäyäalewä bada bä ma cui nija, judio ai bä bada ma cui nija, abinaja Jesús a cuma. —Ei tä a̦ ja, wamacö bufi dayäobä. Bä ijilubö ecöbö lä bolacaono wei a wa̦lo cuoma. Ai e nija a icua fa balöicunö, abinaja a nowa tama. “U̦asi. Ficali ca jamö, a da ojodamodu”, e cuma ma cui, ²⁹ “Ma, ya nö jubimi”, e cuu dicooma. Inaja a ma cuno wei ma cui, a bufi läblou fa co̦lonö, a aa fe yadia majölayoma. ³⁰ Bä ijilubö ai e mö feduwä nija a icua fa nomöjöicunö, inaja showawä a nowa ca̦i tama. Ö̦jö a lä cui, bä fö̦ö e a̦ ja a wa̦ dodijidawä juoma. “Awei, Fabe. Ya juu weicätä” a cuma ma cui, a junomi. ³¹ ¿Ö̦jö tawä? —Jesús a cuma—. ¿Wedi jamö a dodijiwä lä cuinö, bä fö̦ö e nosie yai shino julema? —a cuma. —Bä ijilubö jaba e shömaö lä balöblaono wei a lä cuinö —bä cuma—. A bufi mö lä yabajadaliyono wei a lä cuinö. Ö̦jö däjä, abinaja Jesúsnö bä nowa tama. —Cafä wamacö nija ei ya wa̦ lä cui, bejedi lä ya wa̦. Inaja showawä, Yai Bada tänö cafä wamacö ca̦i cuobä wamacö waiquiwä ma cui, wamacö ca̦i nia cuomi. Ö̦jö a ijilubö lä culenaja wamacö cuwä dicowä. “¡Ei!”, wamacö cuu ma buo wei ma cui, wama a nosie yai juaimi. Lomateli bada bä befi bä blada lä doaö wejei bä ma cui, bä suwä lä dodoo wei bä ma cui, ö̦jö lä bä ca̦i nia shino cuo ayao. Bä doblou ma mlai lä ma cui, bä bufi lä läblou wei tänö a wa̦ shino yai juaö ayaaje. ³² ’Dodijidawä wamacö cuobä, fe ojomalewä Juan a lä cuinö wamacö yömölayoluma ma cui, wama a wa̦ bejedi bufiblanomi. Lomateli bada bä befi bä blada lä doaö wejei bänö, a wa̦ bejedi shino yai bufia ayalemaje, bä suwä lä dodoo wei bä ca̦inö. Ö̦jö lä bänö a wa̦ bejedi lä bufileno wejei, wama tä ma dalaleno wei ma cui, wamacö bufi läblonomi showawä, wama a wa̦ bejedi yai bufibobä —bä nowa tama. ³³ Nofi bäyäalewä bada bä ma cui nija, judio ai bä bada ma cui nija, abinaja Jesús a cuma. —Ei ya tä a̦ wäyäö lä yacläo wei tä a̦ ca̦i da ji̦liläje. Ai anö uba totobä bluca fa döalalönö, tä ji̦coloblalema. Ö̦jö däjä, uba bä nia wacä lä cadicaö wejei, täca ca̦i tablaö nomöjölayoma. Tä möö cuaabeje, yafi ösöwä a ca̦i tablaö fa nomöjölonö, cama ficali ca jamö shomi täbä bälömaquefälöma, etäca nowamaö juobeje. Ö̦jö däjä, shomi täbä ulifibö jamö a aa nomöjölayoma. ³⁴ ’Uba a fabä tä cublou däjä, ficali ca ja bä lä bälöblamabole bä nija, a nosie lä juaö wejei ai ebä fa shömölönö, uba bä yefiamaö co̦o bufima. ³⁵ Ö̦jö ma cui, bä lä bälöblamabole bä lä cuinö, ai a nabä quea mö fa baicujenö, a si yafelilalemaje. Ai a shäa cadidilemaje. Maa mabänö ai a shäyälalemaje. ³⁶ Cama ai ebä shömöa ma co̦leno wei ma cui, ai bä jaba tablaö lä balölayono wejeinaja, inaja showawä ö̦jö bä ca̦i tablaö co̦layomaje. ³⁷ ’Bada a lä cuinö, ya̦cumö bä ijilubö e shömöa cadidilema. ¿Ö̦jö tawä? —Jesús a cuma—. “Ijiluyä ei a cadidiwä lä cui, a nofi yai tabobeje”, a bufi cuma yalo, a shömöa nomöjölema. ³⁸ Ö̦jö ma cui, bä lä bälöblamabole bä lä cuinö, bada tä ijilubö e cadidiwä fa dalalöjenö abinaja bä nowa tayolayoma. “Ei bada tä ijilubö cadidiwä, ficali ca nia obi tabou lä juo wei. Fei däjä, bäma a shäa fa showadalönö, camiyä bämacönö bäma täca yai ficali tabou juo nomöjöobä”, bä nowa tayolayoma. ³⁹ ’Ö̦jö däjä, a juwäa mö fa balöjenö, ficali ca sibo jamö a shäyäa fa majölöjenö, a shälemaje. ⁴⁰ ’¿Ö̦jö tawä? —Jesús a cuma—. ¿Wedinaja wamacö bufi yai cuu dodijia cule? Cama a ficalibö ca lä cui a waloqueyoluu däjä, ¿wedinaja bä nia yai taamayoluu, ö̦jö lä? —a cuma. ⁴¹ —¡Wedinaja mlai! —Jesús nija bä cuma—. Ö̦jö bä nö wa̦lidiwä lä beblalole, bä yai nö nia bleaamayoluu. Bä nia waicaö. Shomi täbä nija täca nia jöböaö majöo, uba a lalou däjä bä mashi nia lä jöböaö wejei bä lä cui bä nija —bä cuma. ⁴² Ö̦jö däjä, abinaja Jesús e cuma. —Bejedi lä wamacö a̦. Yai Bada etä a̦ oni jamö, ¿ei bei wama tä a̦ oni daö mlaa cule? Abinaja tä a̦ cuu. Maa mabä ja a yafi nia lä i̦tamaö wejei bä lä cuinö, ma wailemaje. Ö̦jö ma cui, ma lä waileno wejei ma lä cui, a yafi colo lojodoobä ma yai li cublaliyoma. Bada tänö inaja tä taamama. Ö̦jö yama tä dablaö ja, yamacö bufi yai shädayaimou. ’Einaja tä a̦ cuu —Jesús a cuma—. ⁴³ Ö̦jö cudeenö, bämacö nowa taö lä cule. Yai Bada tänö wamacö ca̦i cuobä, Isaeli wama ecö ma cule ma cui, wamacö nia ca̦i cuomi dicoo. Shomi täbä ca̦i nia cuo majöo, a wa̦ nia yai lä juaö wejei bä lä cui. ⁴⁴ Ö̦jö ma jamö bä fa yudublaicunö, bä lä quelayou wei bä lä cui, bä nö nia bleaaö fe balojoo. Ö̦jö bä nö nia ma bleaaö wei ma cui, ai bä lä cui, ö̦jö ma showawänö bä fe yai shäo däjä, ö̦jö bä nia yai cobequeblou fe balojoo —a cuma. ⁴⁵ Jesúsnö shominaja tä a̦ wäyäö yacläablalou ja, bada bänö a wa̦ ji̦liamaje. ¿Ö̦jö tawä? Nofi bäyäalewä bä blowäjäwä ma cui, faliseo bä ca̦i bada ma cui, Jesús a wa̦ ja bä jushudaliyoma. Cama bä a̦fa yai lä wäyämono wei, tä daö showaomaje. ⁴⁶ Ö̦jö ma cui, a nia juwäaö ma showadaono wejei ma cui, yanowamö täbä nija bä quilima. “Yai Bada a wa̦no wäyälewä, ö̦jö a dodijiwä”, a nofi tabomaje yalo, cama bä mamo mötale däjä, a juwäaö quilimaje.

¹ Shominaja tä a̦ wäyäö yaclämolanö Jesúsnö bä yömölaö co̦oma. Abinaja a cuma. ² —Yai Bada tänö cama ebä ca̦i lä cuo wei tä lä cui, abinaja tä ca̦i cuwä. Bada a yai bälöo lä dodijio wei a wa̦lo cuoma. Bä ijilubö e lä cuinö, suwä a nia däama yalo, a nofi nia co̦camoamama. ³ A nofi co̦camoamaö showadaobä, a nosie lä juaö wejei bä fa shömölönö, bä yömölaa lä balöqueno wei bä nacaamaö bufima. Ö̦jö ma cui, bä junomi dicowä. ⁴ ’Bada a lä cuinö, a nosie juamobä ai bä shömaö co̦o ja, abinaja bä nowa tama. “Ya bä yömölaa lä balöqueno wei bä nija, wamale wa̦no da wäyäduje. ¿Ö̦jö tawä? Nii ya bä bluca tablaö waiquilayou lä cufe. Iba baca ya bä shäa waiquiamalalema, yama bä ocalo blewä lä tabono wei bä ca̦i. Ö̦jö ya bä bluca babou waiquia lä cule. Fei däjä, ijiluyänö suwä a nia lä däaö wei bäma cäcöbö nofi nia yai co̦camoaö”, bä nowa tama. ⁵ ’Ö̦jö ma cui, bada a wa̦no lä wäyäno wejei a wa̦no juanomije —Jesús a cuma—. Bä noca flecaöje ja, shomi jamö bä shino jublou yaclämou dicooma. Ai a lä cui, ficali etäca ja a ayoma. Ai a mö feduwä lä cui, a showadi lä läono wei jamö a ojodamou mö juma. ⁶ Ai bä mö feduwä lä cuinö, bada a nosie juamobä ebä li juwäa dicoalalemaje. Bä nö fa waiblalöjenö, bä shäalalemaje. ⁷ ’¿Ö̦jö tawä? —Jesús e cuma—. Inaja bä cuaaö dicoo ja, bada a lä cui a jushudaliyoma. Sodado ebä shömöa fa showadalönö, cama ebä lä shäalaleno wejei bä mö watäblamalema. Bä ca̦i shabonobö ö̦shömalalema. ⁸ Ö̦jö däjä, a nosie juamobä ebä lä cui nija abinaja a cuma. “Ijiluyänö suwä a däaö ja, bäma cäcöbö nofi co̦camoabä ya bä bluca babou ma waiquio däjä ma cui, ya bä yömölaa lä balöqueno wei bä lä cui, ‘Ö̦jö ya bä co̦camabobä’, ya bä nofi taboimi majöa.” ⁹ ’“Bei”, bada a cuma. “Täbä lä bälöblai yobö jamö, bä jublou cuaaö da showadao, ö̦jö lä. Wama bä bluca fa dayäanö, wama bä nacabou fe blacäjoimabä, ijiluyänö suwä a nia lä däaö wei bäma cäcöbö nofi co̦camoaö fe yadiobä”, e bada cuma. ¹⁰ ¿Ö̦jö tawä? A nosie juamobä ebä lä cuinö, täbä lä jublaaö wei yobä jamö bä fa juomobodunö, bä bluca nacaa fe yadialalemaje. Dodijidawä bä ma cui, wa̦lidiwä bä ma cui, bä bluca co̦alalemaje. Inaja bä cuaaö fe yadioma cudeenö, cäcöbö lä doayono wei cäcöbö nofi co̦camoabeje jamö, täbä ou fe yadioyoluma. ¹¹ ’¿Ö̦jö tawä? —Jesús a cuma—. Ö̦jöma cui bada a lä cuinö, bä iyaö lä co̦camou wei bä möö ja a fa lucälönö, ai a wa̦lo dalalema, camishi dodijidawä cäcö ja a didia lä mlai. Cäcöbö nofi co̦camoabeje jamö ma cui, dodijidawä cäcö ja a didio fa mlacunö, ¹² a wa̦lima. “Nofi”, a cuma. “¿Wedinaja wa bufi li fa cunö, dodijidawä cäcö mlai ja bei wa li lucäa bädalayou cufe?”, a cuma. E a̦ juo mlai ja, mamicai e looma. ¹³ ’Ö̦jö däjä, cama ai ebä lä lämabou wei ebä nija abinaja bada e cudaliyoma, “Quiji a lä cui, bococu da o̦cablalöje. Bei matacö ca̦i. Sibo jamö tä mö lä didi wei jamö, a da shäyäblabaduje. Ö̦jamö bä nia ö̦cöö. Bä nö beblalou yalo, bä nia lalöö”, a bada cudaliyoma. ¹⁴ ’¿Ö̦jö tawä? —Jesús e cuma—. Bluca täbä ma nacaablamou wei ma cui, bolacadabö täbä shino yaiamou. ¹⁵ Ö̦jö däjä, Jesús a wa̦ nia dobloimi jömaö fe fa yadiojenö, faliseo bä a̦ bada wayoa balölayoma. Cama ai ebä lä cuinö, a jole jole nofimalajenö a wa̦ nia ji̦limaje, a wa̦no wäyäö co̦ojolobeje. ¹⁶ ¿Ö̦jö tawä? Ö̦jö bä bada nija bä lä nocaono wei, ai ebä shömölemaje, bada tä Elode ai ebä ca̦i mö feduwä. Jesús nija abinaja ebä cuyoluma. —Tä a̦ wäyäle. Wa lä bejedimou wei bäfä daö. Yanowamö wa bä nö quili taimi. Bada bä ma cui, bada bä lä mlai bä ma cui, wa bä nofi tabou fe usucuo fa showaonö, Yai Bada tänö bämalecö taamaö lä bufii wei, quilii mlai ja wa tä a̦ shino yai wäyäö shalilou. ¹⁷ Ö̦jö cudeenö bäfä wa̦lii lä cule. Lomateli bada Sesa a lä cui, ö̦jö befi bä blada lä nacaö wejei, judio bämacö ma cuinö, ¿bäma bä blada jöböabä tawä? ¿Tä a̦ läami daanö? Ma, ¿tä a̦ läa tawä? —bä cuma. ¹⁸ Ö̦jö ma cui, bä bufi wa̦lidiwä daö waiquilanö, abinaja Jesús e cuma. —Jole jole wamacö lä dodijidai, ¿wedi tabä wamale a̦ bejedi wabaö? ¹⁹ Ja̦o. Bada tä Sesa befi bä blada lä nacalajei a blada da jöböbaje, ya möblaabä —a cuma. Ö̦jö däjä, blada a jöböquemaje. ²⁰ Ö̦jö däjä, a blada mömalanö Jesúsnö bä wa̦lima. —Ei ¿wedi bei fe nö e̦le? ¿Wedi bei a wa̦fa oni cua cule? —a cuma. ²¹ —Lomateli bada tä Sesa —bä cuu mö feduoma. —Ja̦o —Jesús a cuma—. Sesa cama etäbä ja, wama a li dobäbä, ö̦jö lä. Yai Bada cama etäbä mö feduwä lä cui täbä ja, cama wama a li dobäö mö feduobä —a Jesús cuma. ²² Jesús a wa̦ ja, bä bufi yai shädayaimolayoma. Ö̦jö däjä, a fa dacöfälöjenö bä jua co̦layoma. ²³ Ö̦jö tä mö jalu showawä ja, saduseo bä bada lä cuinö, Jesús a nabä icua nomöjöquemaje. Ö̦jö bä saduseo lä cui, abinaja bä bufi shino cuu. “Täbä lä nomaö wei bä demi jocädou co̦o mlaicätä”, bä bufi shino cuu. Inaja bä bufi cuu waiquiwä cudeenö, a wa̦ nia fa yaclämajenö a wa̦limaje. ²⁴ Jesús nija abinaja ebä cuma. —Tä a̦ wäyäle. Abinaja Moisesinö judio bämalecö nowa tama. A ijilubö cuo showao mlao däjä, ai e mashi nomaö dicoo ja, bä suwäbö e lä feiblou wei a nia däaö nomöjöo. Ö̦jö a suwä nija bä ijilubö ebä fa tacönö, a lä nomalayono wei a lä cui, ö̦jö bä ijilubö ebä a̦fa nia jilabou nodio juoje. ¿Ö̦jö tawä? ²⁵ ’Bei —bada bä cuu co̦oma, Jesús nija—. Camiyä yamacö nijamö, cama cäbä mashi 7 cuoma. Jaba a lä cui, a suwä lä däleno wei a ijilubö cua showaa mlai ja, a mladaliyoma. Ö̦jö a mashinö e däa nomöjölema. ²⁶ Ö̦jö ma cui, bei ijilubö e cuo showao mlao däjä, cama ma cui a ca̦i nomaa majölayoma. Cama a mashinö e däa ma nomöjöleno wei ma cui, inaja showawä. ¿Ö̦jö tawä? Jödödöwä bä 7 lä cuinö a suwä däa ma nodiadalano wejei ma cui, bä ijilubö cublou showao mlao däjä, bä bluca nomalaliyoma. ²⁷ Ya̦cumö, suwä a ma cui, a ca̦i mladaliyoma. ²⁸ ’¿Ö̦jö tawä? —ebä cuma—. Inaja tä cuoma cudeenö, bäfä wa̦lii lä cule. Yai Bada tänö täbä demi nia jo̦wa jocädamaö lä co̦o wei däjä, ¿wedi jamö a lä cui bei a suwäbö yai nia cuodayou, ö̦jö lä? Bluca bä 7 wa̦lo lä cuinö, a däadalaö malä cuaano wejei —ebä cuma. ²⁹ Abinaja Jesúsnö bä nowa taö nomöjöoma. —Yai Bada wama etä a̦ daimi yalo, wama etä lojode ca̦i daimi cudeenö, wamacö a̦ yacäblalodii lä cule. ³⁰ Yai Bada tänö täbä demi jocädamaö co̦o däjä, täbä nia doayou malä mlai. Täbä nia ca̦i suwäbö jöböamou co̦daaimi. A̦jele täbä doayou lä mlainaja täbä li cublou showadalayou —Jesúsnö bä nowa tama. ³¹ Abinaja Jesúsnö bä nowa taö co̦oma. —Täbä demi nia jocädou lä co̦o wei, Yai Bada tänö wamacö nowa jaba lä tano wei, ¿bei wama tä a̦ oni daö mlaa cule? ³² Yai Bada a wa̦fa wäamamou däjä, abinaja Moisesi nija a malä cuno wei. Ablaamö a ma cui nija, Isaacö a ma cui nija, Jacobo a ma cui nija, ö̦jö bä nija ya lä bufiblamou wei ya. ’Einaja Yai Bada a cuma. ¿Ö̦jö tawä? —bä nowa tama—. Bä demi cua showaa yalo, ö̦jö bä nija a jo̦wa bufiblamou showawä malä cui. Nomawä täbä nija a bufiblamou dao malä mlai. ³³ Bä lä co̦camono wei bä lä cuinö, ö̦jö a wa̦ fa ji̦liläjenö, bä bufi yai shädayaimoma. ³⁴ Inaja Jesús a cuu ja, saduseo bä a̦ nö bada wa̦loblamanomi. Faliseo bä bada lä cuinö, ö̦jö tä a̦ fa ji̦liläjenö, Jesús nijamö ö̦jö bä co̦camou nomöjöoyoluma. ³⁵ Ai a lä cui, Moisesi tä a̦ ja täbä lä damaö wei bei a cuoma. Ö̦jönö Jesús a wa̦ nia bejedi fa mönö, a wa̦lima. ³⁶ —Tä a̦ wäyäle —e cuma—. Moisesinö tä tamaö lä bufino wei tä a̦ bluca ja, ¿wedi jamö bei tä a̦ shino yai lojode dodijiwä? ³⁷ Abinaja Jesús e cuu nomöjöoma. —Tä a̦ shino yai lä lojode wei, ei lä tä a̦ waiquiwä. Bada wama tä yai nia nofimaö, cafä wamacö nija a bufiblamobä a lä cui. Bufi jaduculanö wama a nia nofimaö, bei wamacö bufi yainö. Wamacö bufi lä cuaablalou wei tä ma cuinö, wama a nia ca̦i nofimaö fe balojoo. ³⁸ ’¿Ö̦jö tawä? —Jesús e cuma—. Ö̦jö tä a̦ shino yai lojode dodijiwä. ³⁹ Ei tä a̦ ca̦i lojode cua mö fedua. Cafä wa nofi jo̦lio lä culenaja, inaja showawä aifä wa bä nofi tabolanö wa bä nofimabä. ’¿Ö̦jö tawä? —Jesús e cuma—. ⁴⁰ Einaja wamacö cuaaö däjä, Moisesi wama etä a̦ nofi bluca cadidibou waiquiwä. Yai Bada a wa̦no wäyälewä bä ma cui, ö̦jö wama bä a̦ nofi ca̦i cadidibou mö feduwä showawä. ⁴¹ Faliseo bä bada yododoo showao däjä, Jesúsnö bä wa̦lima. Abinaja e cuma. ⁴² —A shömabä, Yai Bada tänö a lä yaileno wei a lä cui, ¿wedinaja wama a nofi yai tabou? ¿Wedi bei e li nodiwä? —e cuma. —Bada tä David e nodiwä —ebä cuma. ⁴³ Abinaja Jesúsnö bä nowa taö nomöjöoma. —Yai Bada bei tä Bufinö a wa̦ famaö cadidou ja, David cama a showawä ma cui, a nö malä wäono wei. A nofi badabolanö abinaja a cuma. ⁴⁴ Iba Badayä a nija, abinaja Bada tä yai lä cui a cuma. “Bä nö lä nabämou wei bä lä cui, cafä nija ya bä möfe quilili bomabou showao mlao däjä, äyämö, camiyä jayu ya boco mashi jamö a döcäa da balöiquiyo.” ’Einaja David a cuma. ⁴⁵ ¿Ö̦jö tawä? —Jesús a cuma—. Bada tä David a lä cuinö a nofi badabou waiquiwä ja lä, ¿bei e jo̦wa nia li nodiblou majöo tawä? Bä bufi da dayäo, ö̦jö lä —a cuma. ⁴⁶ Moli ma cui, Jesús a wa̦ ja bä a̦ ca̦i juo doblonomi. Ö̦jö däjä, bä a̦ fablamaimi waiquiwä yalo, bä a̦ wabäo quilii showadaoma. A wa̦lii co̦daanomije.

¹ Ö̦jö däjä, täbä lä co̦camono wei täbä nija Jesús a wa̦ fama, cama ebä lä nocamabono wei ebä nija ca̦i. Abinaja bä nowa tama. ² —Moisesi tä a̦ ja täbä lä damaö wejei bä lä cuinö wamacö damabeje cäbä. Faliseo bä bada lä cui, inaja showawä. Moisesi etä a̦ ja wamacö yömölabeje bä li bluca. ³ Bä bada läblawä cudeenö, wama bä a̦ nia ji̦liaö. Wama bä a̦ fa ji̦lilänö, Moisesi etä a̦nö wamacö taamaö lä bufii weinaja, wamacö nia cuaaö. Ö̦jö ma cui, tä a̦ lä wawämaö wejei bä bada lä cui, ö̦jö bä yai owämaö dicoo dijejä. Tä a̦ ma wäyäö wejei ma cui, cama bei bä dodijaö malä mlai. ⁴ ’Yai Bada nija täbä dodijidawä cuobä, ö̦jö bä bada lä cuinö tä nabä bluca shömadii talajei —a cuma—. Ö̦jö ma cui, bä doblamaö mlajei, bä modaablamaö buoje. Jai jude tä bälamaö bädaoje. Bä doblou fe yadiobä, moli ma cui, bä ca̦i bayeliblaö buomije. ⁵ ’Ö̦jö bä lä cui, yanowamö täbä nija bä dodijidawä dablamobä, bä jole jole li dodijaö bäa —a cuma—. Bä bufi nia cadidou fa dablamonö, bei wäyäcu jamö ma cui, bei e̦fetacö jamö ma cui, Yai Bada etä a̦ lä onibolajei täbä shino oni blebou talajei. Bä nö dodijidawä ö̦jöböamamobä, camishi cäcö lä feyacabou wejei cäcö casö febalashi malä lababou wejei. ⁶ Täbä iyaö ca̦i co̦camobä jamö, bada bä nijamö bä loo coyocaö bufi doblao talei. Judio bämacö yododabä jamö ma cui, bada bä lä döcäo wei jamö bä döcäo yaimou mö feduo talei. ⁷ Nii bä lä lulaö wejei jamö, bä nö bada ca̦i ö̦jöböamou bufi doblao. “Tä a̦ wäyäle”, bä nowa tamamou bufi ca̦i doblao. ⁸ ’¿Ö̦jö tawä? —a cuma—. Ö̦jö ma cui, cafä wamacö lä cui, “Tä a̦ wäyäle”, bä nowa tamamou bufio dijä. Cafä wamacö nija ya tä a̦ lä wäyäö wei, ei ö̦jö moli lä ya waiquiwä malä cui. Cafä wamacö lä cui, moli wamacö ca̦i mashi. ⁹ Inaja showawä, bita jamö ai wama a nofi nia fö̦ömaimi. Fedu jamö, Faafä moli a cua malä waiquiladi. ¹⁰ Inaja showawä, bä a̦fa bada jilamamou bufio dijä. Yai Bada tänö wale shömabä wale lä yaileno wei ya lä cui, camiyä wamale nofi yai lä Badabou wei, ei lä ya waiquiwä malä cui. ¹¹ ’Cafä wamacö nija bä nia bada lä cuo wei bä lä cuinö, wamacö nosiemaö mlajei ja, wamacö yai nia shino bayeliblaöje —a cuma—. ¹² ¿Ö̦jö tawä? Cama bä lä jömamou wei bä lä cui, Yai Bada tänö bä nia quilimaö nomöjöo. Bä jömamou lä mlai bä lä cui, wawädowä bä nofi nia shino yai tamabou. ¹³ Abinaja Jesúsnö bä nowa taö nomöjöoma. —Ö̦jö ma cui, Moisesi tä a̦ ja wama täbä lä damaö wei wamacö lä cui, faliseo wamacö ca̦i lä cui, wamacö nö bluca bleaaö dodijiobä wamacö. Jole jole wamacö dodijaö bäa. Yanowamö bä nija Yai Bada a dablamou bufi ma doblao wei ma cui, wama bä bufi jaducublamaimi. Yai Bada cafä wamacönö wama a daimi waiquiwä. Ai bänö a daö bufi ma doblao wejei ma cui, cafä wamacö a̦nö wama bä doblamaimi. ¹⁴ ’Moisesi tä a̦ ja wama täbä lä damaö wei wamacö lä cui, faliseo wamacö ca̦i lä cui, wamacö nö bluca bleaaö dodijiobä wamacö —a cuma—. Jole jole wamacö dodijaö bäa. Suwä bä lä feiblou wei wama bä fa mölamanö, wama bä madofibö bluca däablaö malä läo wei. Ö̦jö däjä, wamacö mömou nia liyäjäo fe fa yadionö, Yai Bada nija wamacö nö bayeli nacao ja, wamacö a̦ jole jole labaaö bädao. Ö̦jö cudeenö, Yai Bada tänö wamacö nö nia shino yai bleaamaö fe balojoo. ¹⁵ ’Moisesi tä a̦ ja wama täbä lä damaö wei wamacö lä cui, faliseo wamacö ca̦i lä cui, wamacö nö bluca bleaaö dodijiobä wamacö —a cuma—. Jole jole wamacö dodijaö bäa. Judio bä lä mlai wama täbä yömölaö bufi doblao, cafä wamacö lä culenaja bä cublou mö feduobä. Moli a ma cui, judio wama a tablamaö fe yadiobä, modu u ma cui jamö, ulifi a ma cui jamö, wamacö aa blajalayou. Ö̦jö däjä wamacö fa alunö, judio wama a tablamalei ma cui, wama a wa̦lidiblamabä wama a tablamalei. Shobali wacö jamö cafä wamacö jubä wamacö waiquiwä ma cui, ö̦jö wama a lä tablamale a lä cui, shobali wacö jamö a nö shino yai bleaaö majöobä, bei wama a li tablamalei. ¹⁶ ’Wamacö nö bluca bleaaö dodijiobä wamacö —a cuma—. Jai jubäbö wamacö ma cuwä wei ma cui, bei wama täbä li jole jole lulublalaö buo. Täbä a̦ nö wäo däjä täbä nia bejedimou fa dablamonö, Yai Bada etä yafi a̦fa ma jayublaö wejei ma cui, wamacö a̦ li läblou. Yai Bada etä yafi lä cui, ¿wedi tabä wama etä nofi yafi taboimi? Ö̦jamö lä bä olo lä yaile wama bä a̦fa shino jayublamaö bufi doblao. Ö̦jö olo bä lä yaile bä a̦fa jayumaöje däjä, “Awei, fei däjä wamacö nia lä bejedimou wei tä cublou lä cule. Fei däjä wamacö a̦ shominajaö majöobä tä cuami”, wama bä nowa li taö. ¹⁷ ¡Wamacö bufi jaducäwämi nö beblalou! Bejedi lä wamacö yai jubäbö. ¡Etä yafi nowa cua lä! Ö̦jö lä a yafi nowa yai cua cudeenö, bä li olo yaia lä cule. ¹⁸ ’¿Ö̦jö tawä? —a cuma—. Täbä a̦ nö wäo däjä täbä nia bejedimou fa dablamonö, Yai Bada nija täbä nia lä dodoblamou wei bä maqueblamobä täcö a̦fa ma jayublaö wejei ma cui, wamacö a̦ ca̦i läo. Wama täcö nofi taboimi dicowä. Ö̦jö täcö jamö täbä lä maquele wama täbä a̦fa shino yai jayublamaö bufi doblao. Ö̦jö täbä a̦fa yai jayumaöje däjä, “Awei, fei däjä wamacö nia lä bejedimou wei tä cublou lä cule. Fei däjä wamacö a̦ shominajaö majöobä tä cuami”, wama bä nowa li taö. ¹⁹ ¡Bejedi lä wamacö yai jubäbö! Täbä nia lä dodoblamou wei bä maqueblamobä täcö lä cui, ¡täcö nowa cua lä! Ö̦jö täcö nowa yai cua cudeenö, täbä lä maquele täbä li yaia malä cule. ²⁰ ’¿Ö̦jö tawä? —a cuma—. Täbä a̦ nö wäo däjä bä bejedimou dablamobä, Yai Bada nija täbä dodoblamobä täcö a̦fa lä jayumaö wejei bä lä cuinö, maloco täcö a̦fa jayumamou buo malä mlai. Ö̦jamö lä täbä lä maqueo wei täbä a̦fa befi ca̦i jayumamou malä cui. ²¹ Inaja showawä, bä nia bejedimou fa dablamonö, Yai Bada etä yafi a̦fa lä jayumaö wejei bä ma cuinö, ö̦jamö lä Yai Bada a lä bälöle tä a̦fa ca̦i jayumaö yädämou showadaoje. ²² Bä a̦ nia shominajaimi waiquiwä yalo, judu mösö a̦fa ca̦i lä jayumaö wejei bä ma cuinö, Yai Bada a döcöadayobä etäcö a̦fa ca̦i jayumaö yädämou mö feduo showadaoje, tä lä döcäladi tä ca̦i. ²³ ’Moisesi tä a̦ ja wama täbä lä damaö wei wamacö lä cui, faliseo wamacö ca̦i lä cui, wamacö nö bluca bleaaö dodijiobä wamacö —a cuma—. Jole jole wamacö dodijaö bäa. Afä nii wama bä bluca lä doaö wei, wajaquemi jenabä wai bädawä ma cui, fe usucuwä 10 wama jenabä fa shedequeblalönö, ai moli jenabä wai ja, Yai Bada showadi wama a dobäö. Ö̦jö ma cui, wamacö yai dodijaö mlai ja, wama a jole jole dobäö waiyoblalou bädao dicoo. Wama täbä nofi ojodabou mlalanö, Yai Bada wama a nofi ca̦i mölabou mlalanö, wama a li dobäblalaö buo. ’Wamacö dodijalanö wama a dobäö fa cunoja, wama täbä nofi ojodabolanö wama a dobäö fa cunoja, tä nö shino doblaobö wei. Yai Bada wama a nofi mölabolanö wama a dobäö fa cunoja, tä nö shino dodijidaobö wei —a cuma—. ²⁴ Bejedi lä wamacö yai jubäbö. Jole jole wama täbä li lulublalaö buo. Tä a̦ nowa wai lä wiisibö wei tä a̦ ja, wamacö ma cuablalou wei ma cui, ¿wedi tabä tä a̦ nowa yai lä lojode wei, wama tä a̦ nofi li mojodubou dicoo? ²⁵ ’¿Ö̦jö tawä? —a cuma—. Moisesi tä a̦ ja wama täbä lä damaö wei wamacö lä cui, faliseo wamacö ca̦i lä cui, wamacö nö bluca bleaaö dodijiobä, wamacö. Jole jole wamacö dodijaö bäa. Ji̦shima bä ma cui, ca̦ö fesibä ma cui, fesibä sibosi aumaö lä culajeinaja wamacö sibosi ma taamamou wei ma cui, bei wamacö u̦eshi shami fe balojowä. Madofi bä ja wamacö bufi shino yaimodii. Wamacö shino nabämou. ²⁶ Faliseo wamacö. ¡Cafä wamacö yai jubäbö! ¡Ji̦shima a mö yalublaö da balöloje! ¡Ca̦ö fesi ca̦i! Ö̦jö däjä, dodijidawä wamacö yai nia shino auo. ²⁷ ’Moisesi tä a̦ ja wama täbä lä damaö wei wamacö lä cui, faliseo wamacö ca̦i lä cui, ¡wamacö nö bluca bleaaö dodijiobä wamacö! —a cuma—. Jole jole wamacö dodijaö bäa. Nomawä bä lä didile täcabä lä culenaja wamacö cuwä bäwä. Maa liyäjäwä mabänö täcabä fe ma labou wejei ma cui, bei täcabä u̦eshi lä cui jamö, nomawä bei tä ubä jilawä. Nomawä bä jodenö täcabä nö shami quiliwä. ²⁸ Inaja showawä, yanowamö täbä nija jai wamacö cadidou wamacö mömou ma cuablalou wei ma cui, bei wamacö bufi wa̦lidiwä fe balojowä. Jole jole wamacö dodijaö buo. ²⁹ ’Moisesi tä a̦ ja wama täbä lä damaö wei wamacö lä cui, faliseo wamacö ca̦i lä cui, ¡wamacö nö bluca bleaaö dodijiobä wamacö! —a cuma—. Jole jole wamacö dodijaö bäa. Yai Bada a wa̦no wäyälewä bä lä cuono wei bä lä cui, ö̦jö wama bä a̦ nofi jaducubou ma mlai, wama bä dodijidawä didimabou bufi doblaa bädaa lä cule. Bä jaba cadidou lä balöono wei bä lä cui, ö̦jö lä bä nomawä lä didile jamö wama täcabä baushibou bufi doblao bädao. ³⁰ Abinaja wamacö cuu. “Bämacö nö badabö lä bälöono wei däjä, ya bälöo mö feduo showao fa cunoja, Yai Bada a wa̦no wäyälewä bä shäbeje jamö ya wa̦ nö yädäobö mlai”, wamacö cuu. ³¹ ¿Ö̦jö tawä? Cama wama ecö a̦fa nodiwä jilamou ja, cafä wamacö jömamou waiquiwä. Yai Bada a wa̦no wäyälewä bä lä shäleno wejei bä lä cui, ö̦jö lä wama ecö nodiwä waiquiwä malä cui. ³² Ja̦o. Wamacö nö badabö lä cuinö, ö̦jö täbä lä taamano wejeinaja, wamale taamaö nodiaö da showao, ö̦jö lä. ³³ ’¡Olu bä wayu lä culenaja, wamacö lä cuwä wei wamacö! —a cuma—. Wamacö jolemou. Yai Bada tänö täbä jömaö däjä, shobali wacö jamö wamacö shömaö dodijio wä. ³⁴ Ö̦jö cudeenö, abinaja ya cuu. Cafä wamacö nija Yai Bada a wa̦no nia lä wäyäö wejei ya bä nia shömaö, bä bufi yai lä jaducui bä ca̦i, wamacö nia lä damaö wejei bä ca̦i. Ö̦jö ya bä nia shömaö ma cui, ai wama bä nia shäö. Ai bä mö feduwä lä cui, fii balitama defi ja wama bä nia basuaö. Ai bä showawä lä cui, judio wamacö yododabä jamö wama bä si ca̦i nia yafelimaö. Wama bä nö bleaamaö yalo, ai bä shabonobö nomöjöwä jamö bä nia docuu ma cuaafälöö däjä ma cui, wama bä nosi nia bou yauafälöö. ’¿Ö̦jö tawä? —a cuma—. Einaja wama bä taamabä ya bä nia shömaö, ³⁵ bä lä cadidou wei bä yanöcö shäö lä cuaano wejei bä lä cui, cafä wamacö nija bä nowa bluca co̦cablobä. ¿Ö̦jö tawä? Abele a jaba shämolayoma. Ö̦jö däjä, Yai Bada ai ebä bluca yanöcöwä shäa jäa fa nomöjöabodujenö, ya̦cumö nofi bäyäalewä Sacalia a shäa nomöjölemaje, Belequia bä ijilubö e lä cui. Yai Bada etä yano je̦fa jamö a nabä quequemaje. Yalo bä ö̦shö lä maqueblaaö wejei täcö ajede ja, Yai Bada etä yano sibo mötale jamö, a shälemaje. ¿Ö̦jö tawä? Cafä wamacö bälöo lä nodiablalou wei wamacö nija, ö̦jö lä bä nowa nia bluca bäshälö tablaö. ³⁶ Cafä wamacö nija ei ya wa̦ lä cui, bejedi lä ya wa̦. Cafä wamacö fei däjä lä bälöle wamacö nija, ö̦jö tä nowa nia bluca jödödöwä cuo —a cuma. ³⁷ Jesús a wa̦ blajawä faö ja, abinaja Jelusaleteli bä nowa tama. —¡Shädayai, Jelusaleteli wamacö! Yai Bada a wa̦no wäyälewä wama bä lä shäö wei wamacö. Cafä wamacö nija Yai Bada tänö bä lä shömaö wei, maa mabänö wama bä lä shäyäö wei wamacö. Cadala bänö bä ijilubö ebä fe yojobou lä cuaaö wejeinaja, inaja showawä cafä showadi bämacö tabou bufi ma doblaono wei ma cui, camiyä nija wamacö nowamamou bufionomi dicowä. ³⁸ Ja̦o. Inaja lä waiquiwä. Fei däjä bämacö nia daaö. Wamacö yafibö nia blocoaö. ³⁹ Abinaja bämacö nowa ca̦i taö showadao. Wamale nofi doaö mö bao showao mlao däjä, wamale nia dablaö co̦daaimi. Abinaja wamacö cuolanö wamale nia shino yai dablaö co̦o. “Yai Bada a wa̦nö a lä juimi a lä cui, Yai Bada nija, ¡ö̦jö lä a shino yai bayeliblamobä a!” ¿Ö̦jö tawä? Einaja wamacö cuolanö wamale nia shino yai dablaö co̦o —bä nowa tama.

¹ Yai Bada etä yafi jamö Jesús a faa fa co̦lufälönö, a jaba jufälöö däjä, cama ebä lä nocamabono wei bä fa ajedeblalunö, Yai Bada etä yafi jömamaje. Bä yafi liyäjäwä jömamaje. ² Ö̦jö ma cui, abinaja Jesús a cuma. —Jö̦ö. Ei wa bä yafi bluca dablaö, ¿ö̦jö tawä? Ö̦jö ma cui, cafä wamacö nija ei ya wa̦ lä cui, ya wa̦ bejedi. Ei wama bä yafi bada lä möle, wama bä nofi dobou ma bäle ma cui, bä nia obi wa̦liaöje. Ö̦jö däjä, ai ma jamö, moli ma cui ma nia maqueo feibloimi —a cuma. ³ Oliba tä balöcö jamö Jesús a dolequea fa majöbofälönö, ö̦jamö a yami loo däjä, cama ebä lä nocamabono wei bänö a wa̦limaje. Abinaja bä cuma. —Wa tä a̦fa lä wäyäblei, ¿wedinaja tä nö yai fa cublalunö, bei tä nia yai wawäblou? Wa juu co̦o lä bufiole däjä, ¿wedi tä dodijiwänö yamacö li moyawäobä, tä nia lä jödödöblou wei tä lä cui tä ja? —bä cuma. ⁴ Abinaja Jesúsnö bä nowa tama. —Bä da moyaweicu, ö̦jö lä, wamacö yaclämaö mlaobeje. ⁵ Obi, bluca bä nia wawäblou. Camiyä ya wa̦fa nia ma wäyämou wei ma cui, bä möla dijä. Abinaja bä nia jole cuu. “Yai Bada tänö wale shömabä wale lä yaileno wei, ¡ö̦jö lä ei ya e waiquiwä!”, bä jole fa cunö, bluca täbä nia lulubouje. ⁶ ’Ai bä lä bälöblai ba nabä nia queayou —a cuma—. Inaja showawä, ai bä wa̦no ca̦i nia ji̦liamou cuo mö feduo. Ö̦jö wama bä wa̦no nia ma ji̦liaö wei ma cui, bä quili dijä. Ö̦jö tämi. Ö̦jö tä nia bluca ma cublou wei ma cui, tä nia bluca waicou showadaomi. ⁷ Bä shomi lä cublai bä nabä nia queayou balöo. Bä bälöblawä lä yaiblai bä ca̦i. Bluca täbä ulifibö lä cublai jamö, ofi tä nia blaucublou. Mashita a ca̦i nia bada qui̦da qui̦damou nö quiliaö. ⁸ Ijilu bä nini jaba cuo däjä bä nö bleaaö lä culenaja, inaja showawä bä nö nia jaba bleaaö cuo. Ö̦jö jaba cätä bädawä. ⁹ ’Ö̦jö däjä, tä nia wa̦lidiblou —a cuma—. Wamacö noshi nia ö̦jödabouje, wamacö nö bleaamabeje. Wamacö nia shäöje. Iba wamacö yalo, bluca bä bälöjöwä lä yaiblai bä ma cuinö wamacö nofi nia wa̦libouje. ¹⁰ Wale jaba bufibou ma balöo wejei ma cui, tä wa̦lidiblou yalo, bluca bä mö feduwä lä cui bä nia waicou. Cama bä ma cui bä nia nomojolimayou. Bä nofi nia wa̦liayou. ¹¹ Yai Bada a wa̦no jole jole lä wäyäö wejei bä lä cui bä fa wawäolalunö, bluca täbä nia yaclämaöje. ¹² ¿Ö̦jö tawä? Wa̦lidiwä tä balablou yalo, ai bä bluca mö feduwä lä cui bä nia nofimayou mlaafälöö. ¹³ Ö̦jö ma cui, a shämobä etä ma cuo däjä ma cui, a nö wa̦lojaö fe lä yadio wei a lä cui, ö̦jö a nia jucäamou fe yadio. ¹⁴ ’Yai Bada tänö cama ebä ca̦i nia lä cuo wei tä a̦ lä cui, bita jödödöwä a jamö tä a̦ nia wäyämamou blaucou cuaaö —a cuma—. Täbä jödödöwä bälöjöwä lä yaiblai täbä yömölamou cuaaö balöono wei ja, Yai Bada tänö täbä nia jödödöwä waicaö. ¹⁵ ’¿Ö̦jö tawä? —a cuma—. Tä yai lä wa̦lidii tä lä cui, tä nö cuobö lä mlai jamö tä nia ublamabou fe yadioje, Yai Bada etä yafi jamö. Täbä bluca nia yai lä wa̦lidiblamaö wei, ö̦jö bei tä. Yai Bada a wa̦no wäyälewä Daniel a bälöo lä balöono wei a lä cuinö, ö̦jönö tä a̦ wäyäö balöoma. ¿Ö̦jö tawä? Ei ya wa̦ ja, wamacö bufi ca̦i jaducuwä cuobä wamacö. Ö̦jamö lä täbä lä wa̦lidiblamaö wei, wama tä ublaa dablaö däjä, ¹⁶ Judea jamö wamacö lä bälöle wamacö lä cui, tä lä jefubö wei jamö bä docuo cuo da showadaomobodu. ¹⁷ Wamacö siboa waiquilayou ja, yafi jamö bä lucäö co̦daa dijä. Madofi wama bä co̦ablaö mlai ja, bä docua cua da showaolalu. ¹⁸ Ficali ca jamö wamacö juu lä waiquile däjä, camishifä wama bä co̦ablaö mö yabao mlai ja, ö̦jamö lä showawä wamacö nia docublou cuaaö. ¹⁹ ’Bä lä shöbönabö wei, ¡bejedi lä ö̦jö bä nö nia bleaaö fe balojoo —a cuma—. Ijilu bä lä shadimabou wejei, inaja showawä bä nö nia bleaaö cuo. ²⁰ Maa däjä tä cublou mlaobä, Yai Bada nija bä da naco, ö̦jö lä. Täbä yanöcöobä tä mö jalu ma cui jamö, tä cublou mlaobä bä a̦ da fa. ²¹ Täbä nö nia yai malä bleaaö wei. Yedu ja Yai Bada tänö täbä bluca lä tablano wei däjä, täbä nö bleaaö ma showaono wei ma cui, ö̦jö tä lä cublole däjä bä nö nia shino yai bleaaö. Inaja täbä nia ca̦i cuaaö co̦o ma mlai ma cui, ö̦jö lä däjä moli bei bä nö nia shino yai bleaaö dodijio. ²² Ö̦jö tä lä cublole däjä, Bada tänö tä ja̦mabou bufio mlao fa cunoja, moli ma cui täbä nö demi feio buobö mlai. Ö̦jö ma cui, cama ebä lä yaimabole bä feimabou fe yadiobä, tä nö nia dedejeblamaimi. ²³ ’Ai bä a̦ ja, bä möla dijä —a cuma—. “¡Bei, bei! ¡Yai Bada tänö a shömabä a lä yaileno wei a lä cui, ¡quijamö a wawälayou lä cufe!”, ai bä ma cuu wei ma cui, “¡Bei, bei! ¡Äyämö a waloqueyoluu lä cufe!”, ai bä ma cuu wei ma cui, ö̦jö bä a̦ bejedi bufibla dijejä. ²⁴ Bä lä jolemou wei bä nia malä wawäblou wei. Abinaja bä nia jole cuu. “Yai Bada tänö wale shömabä, camiyä wale yailema”, bä nia jole cuu. Yai Bada a wa̦no jole jole lä wäyäö wejei bä ma cui, ö̦jö bä nia ca̦i wawäö mö feduo. Yai Bada a mayo nia jole wawämaöje. Tä nö lä quilijii tä nia ca̦i bluca wawämaö fe yadioje, täbä bufi fa taamajenö, täbä yaclämabeje. Yai Bada ebä lä yaimabole bä ma cui, ö̦jö bä bufi taamaö fe yadiobeje bä nia wabäodii. ²⁵ ¿Ö̦jö tawä? Tä nia lä cublou wei tä ja, bämacö yömölaö waiquia lä cule. ²⁶ ’Wamacö nowa jole taöje ja, bä möla dijä, ö̦jö lä —a cuma—. “¡Bei, bei! ¡Ulifi bloque a jamö a wawälayou lä cufe!”, ai bä ma cuu wei ma cui, ö̦jamö bä ju dijä. “¡Bei, bei! ¡Quijamö lä a lucälayou lä cufe!”, ai bä ma cuu wei ma cui, ö̦jö bä a̦ bejedi bufi dijejä. ²⁷ Camiyä ya lä yanowamöblaleyoluno wei ya juu co̦o däjä ya nia juu ja̦toomi. Tä wacö ije ijemou däjä, mösö wawädoblou lä culenaja ya nia wawädowä dablamou. ²⁸ Wamacö bufi jaducublobä tä cuo weicätä. Ai bei tä jode blaobä jamö waduba bä lä co̦camou wei tä malä wawädole —a cuma. ²⁹ Abinaja Jesús a cuma. —Einaja täbä nö nia yai bleaaö lä cuo wei tä jödödöblou fa balölonö, motoca a shi̦i nia luaaö majöo. Belibo a ma cui, inaja showawä a shi̦i nia cuomi majöo. Shidicali bä ma cui, bä nia bläläö. ¿Ö̦jö tawä? Judu mösö jamö bä lä shadiladi bä nia layäcäbladayou. ³⁰ Ö̦jö lä däjä camiyä ya lä yanowamöblaleyoluno wei ya lä cui, wale nia itou lä jömadayou wei, judu mösö jamö tä nia bädodayou. Ö̦jö däjä, jödödöwä bä lä bälöblai bä nia quilili si̦lalamoblalou cuaaö. ’Ö̦jö däjä, camiyä ya lä yanowamöblaleyoluno wei ya nia shino yai bädoyoluu —a cuma—. Ölajashi a jamö ya shi̦i ca̦i bada fa itoimadunö, wale nia lojode dablaöje. ³¹ Ö̦jö däjä, tä a̦ bada jolamou däjä, iba a̦jele bä lä cui ya bä nia shömaö cuaaö. Jödödöwä bä lä bälöblai jamö, iba ya bä lä yaileno wei bä nia co̦ablaö cuaaöje. ³² ’Ico fibä ja, showadi wamacö bufi dao talei —Jesús a cuma—. Defi jenabä ducuu däjä, “Fei däjä motoca shi̦i ajeo co̦a nö culai”, wamacö bufi shino cuu. ³³ Inaja showawä, ei ya tä a̦ bluca lä wäyäfe tä wawäblou däjä, wamacö bufi daobä cätä. “Fei däjä, a itou ajedewä”, wamale nofi tabobä. ³⁴ Cafä wamacö nija ei ya wa̦ lä cui, bejedi lä ya wa̦. Wamacö fei däjä lä bälöblai wamacö bluca nomaö showaono mlai ja, ö̦jö tä nia bluca wawäblou balöo. ³⁵ Judu mösö ma cui, bita a ma cui, ö̦jö bä bluca ma mlaolaliyo wei ma cui, camiyä ya wa̦ nia mladoimi. ³⁶ ’Ö̦jö ma cui, ya tä a̦ lä wäyäfe tä nia yai lä cubloyoluu wei, yanowamö täbänö ö̦jö lä tä yai daimije —a cuma—. Yai Bada a̦jele bä lä culadi bä ma cuinö, inaja showawä tä ca̦i daimi cuweje. Yai Bada bei Ijilubö ya e ma cuinö, inaja showawä ya tä ca̦i daimi cuwä. Fayänö ö̦jö tä shino yai daö ayawä. ³⁷ ’Noewä däjä, bä yanowamö lä cuaano weinaja, inaja showawä, camiyä ya lä yanowamöblaleyoluno wei ya juu co̦o lä bufiole däjä bä nia cuaaö co̦o —a cuma—. ³⁸ Bä showadi iyaö ca̦i co̦camou lä cuaadino weinaja, bä ca̦i doayou lä cuaadino weinaja, inaja bä cuaaö showao däjä, bä nö dao mlai ja, canawä a bada jamö Noewä a lucälayoma. ³⁹ Bä bufi mojodi li ca̦i cublalodii showao däjä, tä ulifi fe bada fa baoblalunö, bä bluca waiquiblaö showadalayoma. ¿Ö̦jö tawä? Camiyä ya lä yanowamöblaleyoluno wei ya juu co̦o däjä, inaja showawä, tä daö mlaoje däjä ya nia itou. ⁴⁰ ’Ö̦jö däjä, ficali ca jamö bolacabö cäcöbö nia ma ojodamou wei, ai a nia co̦amou ayao, ai a nia daamou —a cuma—. ⁴¹ Nii bä jölöcaböbä jamö, suwä bolacabö cäcöbö nia ma ojodamou wei, ai a nia co̦amou ayao, ai a nia daamou. ⁴² Bä nö da daicu, ö̦jö lä. “Ö̦jö däjä Bada a yai nia wawäö”, wama a nofi tabou malä mlai. ⁴³ ’¿Ö̦jö tawä? —a cuma—. Cama e yano jamö a lä cule a moyawä ca̦i cuo fa cunoja, a tomömou lä juimi a nö famaö fe jalubö mlai. “Ö̦jö däjä a juimaö”, a bufi cuu fa cunoja, a nö lucämabö mlai. ⁴⁴ Ö̦jö cudeenö, cafä wamacö ma cui, showadi wamacö nö daobä, ö̦jö lä. Wamacö bufi cuu mlao däjä, camiyä ya lä yanowamöblaleyoluno wei ya nia malä bädou wei —a cuma. ⁴⁵ Abinaja Jesús a cuma. —Camiyä wamale nosie lä juaö wei wamacö lä cui, ¿wedi jamö wa lä cui, wa shino yai dodijaö daanö? Abinaja tä cuwä. Shomi jamö a bada nia lä juno wei a bada cuoma. A lä dodijaö wei a läo juobä, a nosiemafälöma. Abinaja a nowa talefälöma. “Dodijidawä iba bä ca̦i cua da jeicu. Bä iyabä tä cuo däjä, dodijidawä wa bä iyamabä”, a nowa talefälöma. ⁴⁶ ¿Ö̦jö tawä? Bada e lä nosiemofälöno weinaja a cuaaö showao däjä, e bada waloamaö co̦o ja, a bufi doblalolanö e nia co̦blamaö co̦o. ⁴⁷ ’Cafä wamacö nija ei ya wa̦ lä cui, bejedi lä ya wa̦ —a cuma—. A nosie juaö cadidioma yalo, ö̦jö bada a lä cuinö a nia bada läamaö nomöjöo, cama etäbä bluca lä tabou wei etäbä nofi tabobä. ⁴⁸ ’Ö̦jö ma cui, ai a lä cui, bada a nosie juabä a ma cui a dodijaimi ja, abinaja a bufi nia cuu dicoo. “Cuo buo. Bada tä co̦o jaöo malä mlai”, a bufi nia cuu dicoo. ⁴⁹ Bada a nosie juamobä ebä mö feduwä lä cui, bä si nia shino yafelimaö juo dicoo. Täbä iyaö lä co̦camou wei jamö a nia shino judii, bä shi wa̦lii bufi lä doblao wei bä nijamö. ⁵⁰ Inaja a cuaaö showao däjä, a nofi lä badabou wei e nia co̦blou co̦o ja̦toyoluu. “Fei däjä a co̦bei”, a bufi cuu mlao däjä, a nia co̦blou co̦a ja̦tolayou. ⁵¹ A lä shominajaano wei etä fa dalalönö, bada anö a nö nia bleaamaö. Bä jole jole lä dodijaö wei bä nija a nia coyocomabou. Ö̦jamö lä bä nia ö̦cöö. Bä nö beblalou yalo, bä nia lalöö —a cuma.

¹ Abinaja Jesús a cuma. —Yai Bada tänö cama ebä ca̦i lä cuo wei tä lä cui, abinaja tä ca̦i cuwä. Ai däjä, cäcöbö nia lä doayou wei cäcöbö nofi nia co̦camoamaje. Suwä a nia lä däaö wei a nö wa̦lo dabobeje jamö, bä moco 10 alayoma. Didi däjä a wa̦lo nia jo̦wa yafima yalo, cowa wacöbä shi̦i cuobä täbä showabolajenö bä juoquema. ² ’Ö̦jö bä suwä lä cui, ai 5 bä bufi mojodi cuoma —a cuma—. Ai bä 5 mö feduwä lä cui, bä bufi shino moyawäo ayaoma. ³ Bä suwä bufi lä mojodi wei bä lä cuinö, cowa wacöbä shi̦i didibobeje täbä tabou ma buono wejei ma cui, wacöbä nia lä ömöamaö wejei toubä dabö tabonomije. ⁴ Ö̦jö ma cui, bä bufi moco lä moyawäono wei bä lä cuinö, wacöbä shi̦i didibobeje täbä fa showaalalöjenö, wacöbä nia lä ömöamaö wejei toubä ca̦i dabö yefibou ayaomaje. ⁵ ’¿Ö̦jö tawä? —a cuma—. Suwä a nia lä däano wei a lä cui, a co̦dalou jaöo fa mlacunö, suwä bä fa malishalönö, bä bluca miolaliyoma. ⁶ Ö̦jö ma cui, bäshäcuoladi a wa̦ bädaliyoma. “¡Bei, bei, bei! ¡Bä suwäbö e co̦abä, a jo̦wa juu lä cuimi! ¡A mö da baamaduje!” a cuma. ⁷ Ö̦jö däjä, bä moco fa jocäcädalunö, cowa wacöbä lä ömöamaö wejei täbä febalashi wai janölalemaje. ⁸ ’Bä bufi suwä moco lä mojoduono wei bä lä cuinö, bä bufi lä moyawä wei abinaja bä nowa tamaje. “Cowa yama wacöbä ömöamaö mö feduobä, toubä dabö mashi da löabayoje. Yamacö luwämoblalou dicoa lä cule”, bä nowa tamaje. ⁹ Ö̦jö ma cui, bä bufi lä moyawäono wei bä lä cui, abinaja ebä cuma. “Ma, cafä wamacö nija yama toubä mashi löa dicoaquei ja, bämacö bluca jödödöwä nia luwämolayou. Toubä dabö lä jöbäö wejei bä jamö wamacö fa alufälönö, afä toubä shino yai da luluaje”, ebä cuma. ¹⁰ ’Toubä dabö doabeje bä suwä ayono wei ja, bä suwäbö e nia lä däano wei a wa̦lo co̦blou nodia jälayoma. Ö̦jö däjä, toubä dabö tabou lä ayaono wejei bä suwä lä cui, ö̦jö nijamö bä nocao feyaa ayalayoma, cäcöbö nofi nia lä co̦camoano wejei jamö. Bä bluca fa falalunö, yoca laquemaje. ¹¹ Tä nö fa dedejedalönö, bä lä yododale jamö ai bä moco waloa jäquema. Sibo jamö bä culanö bä comöma. “¡Bada tä! ¡Bada tä! ¡Yamalecö da famaliyo!”, bä cuma ma cui, ¹² a wa̦ lämoma. “Ma”, a cuma. “Cafä wamacö nija ei ya wa̦ lä cui, bejedi lä ya wa̦. Bämacö daimi”, a cuma. ¹³ ’¿Ö̦jö tawä? —Jesús a cuma—. Bä nö da daicu, ö̦jö lä. Wamacö bufi cuu mlao däjä, camiyä ya lä yanowamöblaleyoluno wei ya nia malä bädou wei —a cuma. ¹⁴ Abinaja Jesús a cuu nomöjöoma. —Yai Bada tänö cama ebä ca̦i nia lä cuo wei, abinaja tä ca̦i cuwä. Bada a lä cui, shomi jamö a nia juu yalo, cama a nosie lä juamou wei ebä nacalema, bä nosiemafälöbä. Bufi jaduculanö ebä blada fa nomöjöajenö, ebä blada omaö juobeje. ¹⁵ ¿Ö̦jö tawä? “Ei a lä cuinö 5 bä julii daö”, a nofi lä tabono wei a nija, 5 ebä jöböquema. “Ei a lä cuinö bolacabö cäcöbö”, a nofi tabou mö lä feduono wei a nija, bolacabö cäcöbö jöböa mö feduquema. Inaja showawä, ai a nija moli a jöböaquefälöma. Ö̦jö däjä, a alayofälöma. ¹⁶ ’Cama bada e nija 5 bä blada lä däleno wei a lä cuinö, bufi jaduculanö bä blada nomöjöaö fa showadaonö, 5 ai ebä blada co̦cablamaö co̦layoma. ¹⁷ Inaja showawä, bolacabö cäcöbö blada lä däleno wei a lä cuinö, cama ebä ca̦i nomöjöa mö fedua fa showalänö, bolacabö ai ecöbö co̦cablamaö co̦a mö fedulayoma. ¹⁸ Inaja cama bä ma cuaano wei ma cui, blada moli a lä däleno wei a lä cui, a wabäonomi. Mashita jamö täca fa diyäcönö, bada blada e fa didicönö e bateliquema. ¹⁹ ’¿Ö̦jö tawä? —Jesús a cuma—. Tä nö fa dedelönö, bada a co̦blou co̦layoma. A nosie juamobä ebä lä cui bä nacalema, cama ebä blada nomöjöaö lä juono wejei tä ja, bä a̦ nö wäamabä. ²⁰ Ai e lä cuinö, 5 ebä lä jämaqueno wei e lä cuinö, blada 10 ebä ca̦i icua balöblaquema. Abinaja a cuma. “Bada tä. Camiyä nija afä 5 wa bä blada da jöböbai, dodijidawä ya bä nomöjöaö fa juonö, aifä 5 ya bä yädäblamaö co̦layoma”, a cuma. ²¹ Bada abinaja e cuma. “¡Wa dodijaö juo waiquioma lä! Wale nosie juaö si ijejewä waiquiwä. Ya bä blada wai da jöböaquii, cäcö ma bolacamiono wei ma cui, wa dodijaö juo fe yadioma yalo, cafä bada bäfä nia tablamaö. Camiyä nijamö a cua da showadaiquiyo, camiyä sho bäfäcö bufi doblalou ca̦i cuobä”, e cuma. ²² ’Blada bolacabö ecöbö lä jämaqueno wei e lä cui, ö̦jö a icua nomöjöquema. Abinaja a cuma. “Bada tä. Camiyä nija afä bolacabö wa cöbö blada da jöböbai, dodijidawä ya bä nomöjöaö fa juonö, aifä bolacabö ya cö yädäblamaö co̦layoma”, a cuma. ²³ Bada abinaja e cuma. “¡Wa dodijaö juo waiquioma lä! Wale nosie juaö si ijejewä waiquiwä. Ya bä blada wai da jöböaquii, cäcö ma bolacamiono wei ma cui, wa dodijaö juo fe yadioma yalo, cafä bada bäfä nia ca̦i tablamaö mö feduo. Camiyä nijamö a cua da showadaiquiyo, camiyä sho bäfäcö bufi doblalou ca̦i cuobä”, e cuma. ²⁴ ’¿Ö̦jö tawä? —Jesús a cuma—. Blada moli e lä jämaqueno wei a ma cui, ö̦jö a icua nomöjöquema. Abinaja a cuma. “Bada tä. Afä wa bä fe blacäjamaö talei. Ai bä lä ojodamou wei jamö, showadi cafä wa shino bayeliblamou talei. ²⁵ ¿Ö̦jö tawä? Bäfä daö waiquia cudeenö ya quilima. Mashita jamö, afä ya blada jo̦yaboma. Bei. Afä wa blada da jöböbai, eifä a co̦dawä”, a cuma. ²⁶ Ö̦jö ma cui, abinaja bada e cuma. “Bejedi lä wa dobloimi. Wale a̦ juaö dobloimi waiquiwä. Cafä wa wa̦ faö ja, iba ya bä fe jo̦wa lä blacäjamaö wei wa tä dama. Ai bä ojodamobä jamö camiyä ya jo̦wa shino lä bayeliblamou wei, wa tä ca̦i jo̦wa dama. ²⁷ Inaja ya jo̦wa cuaaö waiquiwä ja lä, ¿wedi tä tabä, bei wa li wabäonomi, ö̦jö lä? Bä blada lä nomöjöaö wejei bä nija wa blada majöaö fa cunoja, iba ai wa bä nö shino wai co̦cablamalebö wei”, e cuma. ²⁸ ’Ö̦jö däjä, ai ebä nija bada a wa̦ fama. “Quijinö moli a blada lä tabole, a da co̦leje. 10 bä lä tabole nija a jöböa da majöcöje”, a cuma. ²⁹ “Bä li dodijaö yalo, bä lä tabolajei bä nija ai bä nia jöböamou malä co̦o wei. Inaja bä lä cuaaö wei bänö, bä nia shino yai blucablamaö majöoje”, a cuma. “Ö̦jö ma cui, bä tabou lä mlajei bä nija, wiisibö a tabou ma bälajei ma cui a nia co̦amou, bä li dodijaimi waiquiwä cudeenö”, a cuma. ³⁰ “Ya nosie juamobä ei a doblou lä mlai a lä cui, sibo jamö a da shäyäblacöje, tä mö dödöobä jamö. Ö̦jamö bä nia ö̦cöö. Bä nö beblalou yalo, bä nia lalöö”, bada a cuma. ¿Ö̦jö tawä? —Jesús a cuma. ³¹ Abinaja Jesús a cuma. —Camiyä ya lä yanowamöblaleyoluno wei ya lä cui, ya shi̦i wacacawä jamö a̦jele ya bä ca̦i lä itole däjä, ya döcäobä täcö lä doblale jamö ya nia döcäo. ³² Ö̦jamö, camiyä nija bluca täbä bälöjöwä lä yaiblai bä fa yododoblaliyonö, ya bä nia yaii cuaaö. Yalo shibo bä nijamö oweja ebä lä coyocoblai, bä yaiblamaö lä culajeinaja, ya bä nia tablamaö. ³³ Jayu ya boco mashi jamö, oweja ya bä nia li yaiblamaö. Ai ya boco mashi lä cui jamö, shibo ya bä nia ayabou. ³⁴ ’Ö̦jö däjä, bada ya yai lä cuinö, jayu ya boco mashi jamö bä lä cule, abinaja ya bä nowa nia taö. “Fayänö wamacö lä bayelibou wei wamacö lä cui, äyämö bämacö nia ajedemabou, camiyä nija wamacö dodijidawä cuobä. Bita tä colo jaba lojodobou showao mlao däjä, bämacö ca̦i nia lä cuo wei, Fayänö tä daö showaoma. ³⁵ Ya ofäö däjä, wamale malä iyamano wei”, ya bä nowa nia taö. “Ya ca̦i amishaö däjä, wamale amishi ca̦i malä co̦amano wei. Wamale daö ma mlai ma cui, dodijidawä wamale ca̦i malä bälömabono wei. ³⁶ Ya shinoco cuo däjä, camishi cäcö ja wamale ca̦i malä lucämano wei. Ya jalilio däjä, wamale jalili ca̦i malä loono wei. Ya fe ma lao däjä ma cui, wamale fe ca̦i malä waloono wei.” Einaja ya bä nowa nia taö. ³⁷ ’Ö̦jö däjä, ö̦jö bä lä cadidou wei bä lä cui, camiyä nija abinaja bä nia cuu. “Bada tä. ¿Wedi däjä bäfä ofäö li fa dalalönö, bäfä li iyamama? ¿Wedi däjä bäfä amishaö li fa dalalönö, bäfä amishi li co̦amama? ³⁸ ¿Wedi däjä bäfä daö ma mlai ma cui, bei bäfä li dodijidawä bälömaboma? ¿Wedi däjä bei bäfä li shinoco fa dalalönö, camishi cäcö ja bei bäfä li lucämalema? ³⁹ ¿Wedi däjä bei bäfä jalili li ca̦i looma? ¿Wedi jamö wa fe lao däjä, bei bäfä fe li walooma?” bä nia cuu. ⁴⁰ ’¿Ö̦jö tawä? —Jesús a cuma—. Ö̦jö lä däjä, Bada ya yai lä cui, abinaja ya nia cudou. “Cafä wamacö nija ei ya wa̦ lä cui, bejedi lä ya wa̦. Iba ai bä wai cua lä bädale bä ma cui, ö̦jö wama bä lä bayeliblaö wei däjä, jai camiyä wamale bayeliblama, bämacö nofi tabou showadaoma”, ya nia cudou. ⁴¹ ’Ö̦jö däjä, ai ya boco mashi jamö bä lä cule bä nija ya wa̦ nia faö nomöjöo. Abinaja ya e nia cudou. “Bei. Bä da alufälö. Yai Badanö wamacö nö nia jo̦wa lä bleaamano wei wamacö lä cui, shobali wacö jamö bä da culu, fecula bada a nö bleaaö shi wa̦liblobä wacö lä tablamolayono wei jamö, cama a̦jele ebä wa̦lidiwä ca̦i nia lä cuo wei jamö. ⁴² Ya ma ofäö däjä ma cui, wamale iyamaö malä mlaono wei. Ya amishaö däjä, wamale amishi ca̦i co̦amaö malä mlaono wei. ⁴³ Wamale daö lä mlai ya waloo däjä, wamale ca̦i bälömabou malä mlaono wei. Shinoco ya lä cuono wei däjä, camishi cäcö ja wamale ca̦i lucämaö malä mlaono wei. Ya lä jaliliono wei däjä, ya fe ca̦i lä laono wei däjä, wamacö ca̦i juu malä mlaono wei”, ya e nia cudou. ⁴⁴ ’¿Ö̦jö tawä? —Jesús a cuma—. Ö̦jö däjä, abinaja cama bä nia cuu. “Bada tä. Wa lä ofäno wei däjä, wa ca̦i lä amishano wei däjä, bäfä ca̦i danomi. Bäfä daö mlao däjä, bäfä ca̦i waloo dablanomi. Wa lä shinocono wei däjä ma cui, wa lä jaliliono wei däjä ma cui, wa fe lä laono wei däjä ma cui, ¿wedi jamö bei bäfä li dalalema, bei bäfä li bayeliblanomi?”, bä nia cuu. ⁴⁵ Ö̦jö däjä, abinaja ya bä nowa nia taö. “Cafä wamacö nija ei ya wa̦ lä cui, bejedi lä ya wa̦. Iba ai bä wai cua lä bädale bä ma cui, ö̦jö wama bä bayeliblaö lä mlaono wei däjä, jai camiyä wamale bayeliblanomi wamacö cuoma”, ya bä nowa nia taö. ⁴⁶ ’Ö̦jö däjä, bä nö bleaaö shi wa̦libä, bä nia alayofälöö. Ö̦jö ma cui, bä lä cadidou wei bä lä cui, ba̦limi bä nia lä cudio wei jamö ö̦jö bä nia juu ayao —Jesús a cuma.

¹ Jesúsnö täbä damaö fa waiconö, cama ebä lä nocamabono wei bä nija abinaja e cuu nomöjöoma. ² —Bolacabö tä mö didi fa cublalunö, Yai Bada a waiteli lä jayuano wei a nofi nia co̦camoaö co̦oje. Wama tä daö waiquiwä. Camiyä ya lä yanowamöblaleyoluno wei ya lä cui, wale nia jöböaöje, fii balitama defi ja wale basuabeje —e cuma. ³ Ö̦jö däjä showadawä, nofi bäyäalewä bada e yafi jamö, bada bä co̦camolayoma, Caifasi a wa̦fa lä cule e yafi ja. Ö̦jamö lä judio bä bada co̦camolayoma, nofi bäyäalewä bä blowäjäwä sho. ⁴ Ö̦jamö bä a̦ bluca wayoma. Bä bufi moyawälanö Jesús a nia juwäamaje, a shäbeje. ⁵ Ö̦jö ma cui, abinaja bä cuma. —Täbä iyaö ca̦i co̦camou showaono mlai ja, bäma a yai shäö showadaobä, täbä nia lä co̦camou wei täbä shifilimoblalou dicoo wei —bä cuma. ⁶ Bedaniateli Simón e yafi jamö, Jesús a cuoma. Ö̦jö a Simón lä cui, täbä sicö lä jodemaö wei tä wayunö a lä jaliliono wei, bei a li cuoma. ⁷ Ö̦jö däjä, suwä anö toubä nö lä cle̦deli wei toubä besi ca̦i waloqueyoluma, toubä nowa bluca lä dodijii. Toubä fe fa caloblalönö, Jesús a iyaö ca̦i loo däjä, a fe löblalema. ⁸ Ö̦jö ma cui, Jesúsnö bä lä nocamabono wei bä lä cuinö, ö̦jö tä mööje ja, bä bufi jushujudou dicolayoma. Bä bufi jushudou fa dicolonö, abinaja bä bufi cudaliyoma. “Toubä nowa ma bluca wei ma cui, ¿wedi tabä toubä li wa̦lia bälei? ⁹ Ö̦jö lä toubä ja, ¿wedi tabä blada bä bluca li däanomi, bä lä jo̦li wei bä yai bayeliblamobä?”, bä bufi cudaliyoma. ¹⁰ Ö̦jö ma cui, Jesúsnö bä bufi daö fa showadaonö, abinaja bä nowa tama. —¿Wedi tabä bei wama a bufi li suwä yabäcaö dicoblaa cule? Wale fe lä löblalöfe, tä dodijidawä waiquiwä. ¹¹ Bä lä jo̦li wei bä lä cui, cafä wamacö nijamö showadi bä nia malä cudio wei, wama bä bayeliblabä. Ö̦jö ma cui, camiyä ya yai nia cudiomi. ¹² Toubä nö lä cle̦deli wei toubänö, showadi täbä nomawä lä jölöcaö wejeinaja, bei wale taamaö balöa lä cule. ¹³ ’Cafä wamacö nija ei ya wa̦ lä cui, bejedi lä ya wa̦ —a cuma—. Jödödöwä tä jamö ma cui, iba dodijidawä tä a̦ wäyämamou cuaabä jamö, ei a suwänö wale fe lä löblalöfe, tä a̦fa nia ca̦i wäyämamou cuaaö mö feduo, a lä dodijano wei tä nofi jaducubou nodiablalobeje —bä nowa tama. ¹⁴ Ö̦jö däjä, Jesúsnö bä 12 lä nocamabono wei a Juda Icaliode lä cui, nofi bäyäalewä blowäjäwä bä nijamö a fa alufälönö, ¹⁵ abinaja a cuma. —Cafä wamacö nija Jesús ya jömöaö ja, ¿wedi täbä ja, bei wamale dobälei? —a cuma. Einaja a cuu ja, a nia lä nomojoliano wei tä nowa ja, blada 30 ebä jöböquemaje. ¹⁶ Ö̦jö däjä, a nia lä nomojoliano wei tä dayäaö showadaoma. ¹⁷ Nii bä juluu lä mlai bä ja, bä jaba iyaö ca̦i co̦camou co̦o däjä, cama ebä lä nocamabono wei bä lä cui, abinaja Jesús nija bä cuyoluma. —¿Wedinaja wa bufi cuu? Yai Bada a waiteli lä jayuano wei bäma a nofi co̦camoaö co̦obä, ¿wedi jamö yafi lä cui jamö yama bä nii baabä? —bä cuma. ¹⁸ Abinaja Jesúsnö bä nowa tama. —Bei. Shabono jamö wamacö co̦blou ja, wamale wa̦no nia lä wäyäö wei, wama a nia dablaö. “Tä a̦ lä wäyäö wei, yama a wa̦no wäyäö lä cule”, wama ecö cuu ja, wamacö a̦ nia ji̦liaö. Ya nia lä taamamou wei tä ajedewä waiquiwä cudeenö, ö̦jö lä e yano jamö, cafä bämacö lä nocamabole wamacö sho, bämacö nia iyaö —Jesúsnö bä nowa tama. ¹⁹ Jesúsnö bä nowa lä tano weinaja, inaja showawä cama ebä lä nocamabono wei bä cuaama. Yai Bada a waiteli lä jayuano wei a nofi co̦camoaö co̦obeje, ö̦jö a yafi jamö täbä nii baquemaje. ²⁰ Tä mö weyaaö däjä, Jesúsnö cama 12 ebä lä nocamabono wei bä ca̦i looma, bä iyabä. ²¹ Bä iyaö däjä, abinaja Jesús a cuma. —Cafä wamacö nija ei ya wa̦ lä cui, bejedi lä ya wa̦. Cafä wamacö ai a lä cuinö wale nia nomojoliaö —a cuma. ²² Cama a wa̦ ja bä nofi fa jalujublamolunö, abinaja bä cudaliyoma. —Bada tä. ¿Camiyä inaja ya nia cuaaö tawä? —bä cudou nocalayoma. ²³ Abinaja Jesús a cuma. —Ei nii ya lä ödäale jamö a nii ca̦i ödäaö lä yädämofe a lä cuinö, ö̦jönö wale nia nomojoliaö. ²⁴ ¿Ö̦jö tawä? —a cuma—. Camiyä ya lä yanowamöblaleyoluno wei ya lä cui, bejedi wale nia nomamaöje, Yai Bada etä a̦ oni jamö ya wa̦fa lä wäyämamou weinaja showawä. Ö̦jö ma cui, wale yai nia lä nomojoliaö wei a lä cui, ö̦jö a nö nia shino yai bleaaö dodijio. Bä nöönö a lä didibole jamö, a oshe wai mojodi nomaö showadao fa cunoja, etä nö shino yai doblaobö wei —a cuma. ²⁵ A nia lä nomojoliaö wei Juda a ma cui, abinaja e cuu mö feduoma. —Bada tä. ¿Camiyä inaja ya nia cuaao tawä? —e cuma. Abinaja Jesús e cuu nomöjöoma. —Jö̦ö. Wa lä cufenaja waiquiwä —e cuma. ²⁶ Bä iyaö showao däjä, nii a fa dälänö, Yai Bada nija a bufi a̦fa doblalou wäyämoma. Ö̦jö däjä, a fa joyolalönö, cama ebä lä nocamabono wei bä nija bä jöbäö cuaama. Bä jöbälanö abinaja a cuma. —Ei nii a da dälöje. Bä da walöje. Ei nii a lä cui, camiyä ei bei ya ya̦ji nö owä —a cuma. ²⁷ Ö̦jö däjä, ji̦shima a ja, nashiwä toubä befi ca̦i däa nomöjölema. Yai Bada nija a bufi a̦fa doblalou wäyämou fa balöonö, cama ebä lä nocamabono wei bä nija ubä befi ca̦i fa jöbäcönö, abinaja bä nowa tama. —Bluca wamacönö ei ubä codaö da cuaaje. ²⁸ Yai Bada tänö tä a̦fa lä wäqueno wei tä a̦ bejedi cublobä, ö̦jö bei lä ya i̦yäbö nö owä malä cui. Bluca täbä bayeliblamobä ya i̦yäbö läblalio, täbä doblou lä mlai etä nowa mladobä. ²⁹ Cafä wamacö nija abinaja ya cuu. Ei uba bäma nashiwä toubä lä coale, ya toubä nia coaö co̦o jaöomi. ¿Ö̦jö tawä? Obi, Fayänö bämalecö ca̦i cuobä jamö, cafä wamacö sho, bäma toubä nia shino coaö co̦o —bä nowa tama. ³⁰ Ö̦jö däjä, bä amowamoa fa balölönö, Oliba tä balöcö jamö, Jesúsnö cama ebä ca̦i aa co̦layofälöma. ³¹ Ö̦jamö lä bä ca̦i jufälölanö, abinaja Jesúsnö bä nowa tafälöma. —Waija, didi däjä, wamacö bluca fa quililalunö, yamale nia daa dicoquei. ¿Ö̦jö tawä? Abinaja Yai Bada etä a̦ oni malä cuu wei. Iba oweja bä ca̦i lä cule a lä cui, ö̦jö ya fa shämalönö, cama ebä nia sheleleblamodayou. ’Einaja tä a̦ oni cuu. ³² Ö̦jö ma cui, ya demi jocädou fa co̦lonö, Calilea tä ulifi jamö bämacö möyou co̦obä, ya nia balölayofälöö —Jesús a cuma. ³³ Pedro a nö wäo ja, abinaja e cuma. —Ei bä lä cui bä fa quililalunö, wa ma daquei wejei däjä, camiyä ya inaja cuaaö mlaicätä. Camiyänö bäfä daaö mlaicätä —a cuma. ³⁴ Jesúsnö abinaja Pedro a nowa tama. —Cafä nija ei ya wa̦ lä cui, bejedi lä ya wa̦. Ei tä didi showawä ja, cadala a wa̦ faö showao mlao däjä, cafänö 3 wale nofi nia jole jole mojodubou —a nowa tama. ³⁵ Ö̦jö ma cui, abinaja Pedro e cuu fe yadioma. —Ma. Cafä bäfä bayeliblaö ja, ya shämou mö feduobä tä ma cublole ma cui, bäfä nofi nia jole jole mojoduboimi —e cuma. Inaja showawä, cama ai ebä lä nocamabono wei bä bluca cublalou mö feduo showaoma. ³⁶ Ö̦jö däjä, Jesemani tä a̦fa ulifi lä jilabou wejei jamö, Jesúsnö cama ebä ca̦i alayofälöma. Ö̦jamö bä ca̦i fa waloalunö, cama ebä lä nocamabono wei bä nija abinaja Jesús e cuma. —Yai Bada nija ya nö bayeli nacaodayou däjä, eja bä loa jäa da balöicu —a cuma. ³⁷ Pedro a lä cui, Sebedeo bä ijilubö ecöbö ca̦i lä cui, ö̦jö bä shino nacalefälöma. Ö̦jö bä ca̦i fa bayäcäblaludunö, a bufi jalujublou dodijilayoma. A bufi ca̦i wajäblaliyoma. ³⁸ Abinaja e cuma. —Bufi jalujou tänö jai ya nö nomaa showadalayobö ya bufi cuaaö dicoa lä cuimadi. Eja bä jilaa da jeicu, camiyä ya nö dao däjä, cafä wamacö nö dao mö feduobä —bä nowa tama. ³⁹ Jesús a bayäcäblou fa co̦lodunö, a blaaledayoma. Yai Bada nija a nö bayeli nacao ja, abinaja a cuma. —¡Fabe! Fei däjä wale nö yai nia lä bleaamaö wejei tä lä cui, wa tä blajamabä tä cua ja, tä da blajamalö. Ö̦jö ma cui, wa tä nö blajamabimi waiquiwä ja, ö̦jö waiquiwä. Camiyä ya cuaaö bufi lä doblao weinaja mlai, cafänö wale taamaö bufi lä doblao weinaja, wale da taama —a cuma. ⁴⁰ Ö̦jö däjä, cama ebä lä nocamabono wei bä jilaa lä jäle jamö a waloa fa co̦iquiyonö, bä mia dalalema. Pedro nija abinaja e cudaleyoluma. —Wa nö nia lä dao wei, wa nö dedejebloimi waiquiwä. ⁴¹ Bä nö shino da daicu. Yai Bada nija bä nö ca̦i bayeli da nacao, Sadanasinö wamacö yabäcäblaö däjä, wama a wa̦ juaö yacläo dicoo mlaobä. Wamacö cadidou bufi ma doblao wei ma cui, wamacö ujuduu si ijejewä waiquiwä—Jesús e cuma. ⁴² Ö̦jamö lä a aa mö yabaa fa co̦lunö, a nö bayeli nacao co̦odayoma. Abinaja e cuma. —¡Fabe! Fei däjä ya yai nö nia lä bleaaö wei tä lä cui, tä nö ja̦amodobimi waiquiwä ja, inaja lä waiquiwä. Ya yai taamamobä tä cua ja, ö̦jö tä ca̦i waiquiwä. Cafänö wa tä yai taamaö lä bufii weinaja, tä shino cublobä —e cuma. ⁴³ Ö̦jö däjä, cama ebä jilaa lä juono wei jamö a waloa fa co̦iquiyonö, bä mia daa co̦laleyoluma. Bä malishama yalo, bä la̦diobä bä cuonomi. ⁴⁴ Inaja bä cuaaö dicooma cudeenö, bä daa fa co̦cufälönö, a aa mö yabaa co̦layoma. Yai Bada nija 3 a nö bayeli nacao co̦o ja, a jaba lä cuno weinaja, inaja showawä a cuu co̦oma. ⁴⁵ Ö̦jö däjä, cama ebä lä nocamabono wei bä nija a waloo lä co̦le däjä, abinaja bä nowa tadaleyoluma. —¡Uo! ¿Wamacö midia showaa cule? ¿Bei wamacö washimi jolou showawä tawä? Bei. Fei däjä, tä cublou waiquia lä cule. Ya lä yanowamöblaleyoluno wei wale nia nomojoliaö, täbä doblou lä mlai bä nija wale jöböabä. ⁴⁶ ¿Ö̦jö tawä? Bei. Bä da jocäcädalu. ¡Bämacö da jufälö! ¡Quiji, quiji, tä da möje! Wale nia lä nomojoliaö wei a lä cuinö bä ca̦i juu waiquia lä cuimi —bä nowa tama. ⁴⁷ Jesúsnö inaja bä nowa taö showao däjä, bä lä toujublaliyono wei bä lä cui, yedu Judanö bä ca̦i blacädaleyoluma. Sibala bä showabomaje, nablushi bä ca̦i. ¿Ö̦jö tawä? Ö̦jö Juda a lä cui, Jesúsnö cama 12 ebä lä nocamabono wei ai e cuoma. Nofi bäyäalewä blowäjäwä bä ma cuinö, judio ai bä bada ma cuinö, ö̦jö bänö bä wayu shömölemaje. ⁴⁸ ¿Ö̦jö tawä? Jesús a nia lä nomojoliaö wei a lä cuinö, abinaja bä nowa taö balöoma. —Ya mamocacö nia lä buyucaö wei, ö̦jö bei a waiquiwä, wama a juwäabä —bä nowa taö balöoma. ⁴⁹ ¿Ö̦jö tawä? Jesús a nabä cadidio showadaolanö, abinaja e cuma. —¡Bada tä! —e fa cudalunö, mamocacö buyucaö showadaoma. ⁵⁰ Abinaja Jesús e cuma. —Nofi. Wa tä nia lä taö wei tä taö da showadao —e cuma. Ö̦jö däjä, Jesús a nabä quea fa showadaicujenö, a juwälemaje. ⁵¹ ¿Ö̦jö tawä? Jesúsnö ai e ca̦i lä cuono wei a lä cuinö, sibala a fa ucädalönö a ishoa mö balayoma. Nofi bäyäalewä bada a wa̦ juamobä e nabä fa queicunö, e yömöca baquequeblalema. ⁵² Ö̦jö däjä, abinaja Jesús e cuma. —Sibalafä a taa da co̦cu. Sibala bänö täbä nofi lä bäyäo wei täbä lä cui, sibala bä showawänö täbä ca̦i nia malä shämou wei. ⁵³ “A nö bayeliblamobimi waiquiwä”, ¿bei wale nofi tabou dicoa da culanö? Ma. Fayä nija ya nö bayeli nacao fa cunoja, a̦jele bluca fe balojowä bä lä yododoladi, bä nö shömöa showadalebö wei. ⁵⁴ Ö̦jö ma cui, inaja ya cuaaö dicoo ja, Yai Bada etä a̦ bejedi wawäblou mlaicätä. Ei wale lä taamalajei, Yai Bada etä a̦ bejedi yai cublobä, ö̦jö lä tä waiquiwä —a cuma. ⁵⁵ Ö̦jö däjä, a nabä lä toujono wei bä nija abinaja a Jesús cuma. —Tomömolewä bä nabä juu lä culajeinaja, ¿wedi tä tabä bei wamale nabä li juu cuaaö dicoo cufe? ¿Wedi tä tabä shocobi, nablushi wama bä ca̦i fa juimanö, bei wamale li juwämaö cuboyoi? Yai Bada etä yafi jamö showadi ya lolanö ya täbä yömölama ma cui, wamale juwäano malä mlai. ⁵⁶ Ö̦jö ma cui, Yai Bada etä a̦ oni jamö tä a̦ lä cuu weinaja tä a̦ bejedi cublobä, ei tä waiquiwä —a cuma. Ö̦jö däjä, cama ebä lä nocamabono wei bä lä cuinö, Jesús a fa dacöfälöjenö, bä bluca docuolaliyoma. ⁵⁷ Ö̦jö däjä, Jesús a lä juwäleno wejei bä lä cuinö, Caifasi nijamö a öbölefälömaje, nofi bäyäalewä a bada nijamö. Ö̦jämö lä Moisesi etä a̦ ja täbä lä damaö wejei bä bluca co̦camou waiquioma, judio ai bä bada sho. ⁵⁸ Ö̦jö ma cui, Pedro a jäwäjäwä fa yauicunö, nofi bäyäalewä bada e yafi sibo lä ji̦coloi jamö a lucäa jälayofälöma. Ö̦jamö, Yai Bada tä yafi lä nowamano wejei bä lä loono wei jamö, a ca̦i loa mö fedualiyoma, Jesús a nia lä taamano wejei tä nö daabä. ⁵⁹ Bei. Nofi bäyäalewä blowäjäwä bä ma cuinö, ai bä bada yododaö mö lä feduono wei bä ma cuinö, Jesús a wa̦fa jole wäyäbeje bä dayäamaje, ö̦jö lä bä a̦ ja, a shämaö showadaobeje. ⁶⁰ Bä ma dayäano wejei ma cui, bä cuonomi. A wa̦fa nia jole lä wäyäö wejei bä a̦ bluca faö ma buono wei ma cui, bä a̦ ji̦limamou bejedionomi. Ya̦cumö, bolacabö cäcöbö ublaa möamoblaliyoma. ⁶¹ Abinaja cäcöbö cuma. —Ei a lä cui, abinaja a cuma. “Ei Yai Bada etä yafi lä cui, ya etä yafi fa wa̦lialönö, bolacabö tä mö didi cublou fa co̦lonö, ya etä yafi i̦tabou co̦quei.” Einaja a cuu cublelei —cäcöbö cuma. ⁶² Ö̦jö däjä, nofi bäyälewä bada a fa ubladalunö, Jesús a wa̦ nia fa wäamanö, a wa̦lii cadidioma. —¿Wa wa̦ nia juomi tawä? Wa wa̦fa lä wäyäböfe, ¿cäcöbö a̦ bejedi tawä? —e cuma ma cui, ⁶³ Jesús a wa̦ juo mlai ja, mamicai a ubladioma. Ö̦jö däjä, nofi bäyäalewä bada a lä cui, abinaja a cuu nomöjöoma. —A wa̦ nö da wäicu, Yai Bada a demi shi lä wa̦lile a malä cule. Yai Bada tänö a shömabä a lä yaileno wei, ¿ö̦jö lä cafä bei wa e waiquiwä tawä? ¿Yai Bada wa etä Ijilubö dodijiwä tawä? A wa̦ nö da wäbo —a cuma. ⁶⁴ —Awei. Ö̦jö lä ya e —Jesús e cuma—. Ya lä yanowamöblaleyoluno wei ya lä cui, Yai Bada a nö wa̦lojaö lä ayao wei boco jayu mashi jamö, wamale nia ca̦i döcäa dabladayou. Ölajashi a jamö, wamale ca̦i nia itou dablaö —a cuma. ⁶⁵ Ö̦jö a wa̦ ja, nofi bäyäalewä bada a lä cui, a nö wa̦lowä jushudaliyoma yalo, a camishibö cacablamolayoma. Abinaja bä nowa bluca tama. —¿Ö̦jö tawä? Yai Bada a nö waiblaö lä cufe. ¿Wedi tä tabä ai bäma bä a̦ li ji̦liaa co̦lei? Yai Bada a nö lä waiblafe, fei däjä wama a wa̦ ji̦liaa waiquilei lä cufe. Yanowamö a ma cui, ¡Yai Bada a wa̦fa jilou! ⁶⁶ Fei däjä ¿wedinaja wamacö bufi cuu dodijio? —bä nowa tama. Abinaja bä cuma. —A shämobä a waiquiwä —bä cuma. ⁶⁷ - ⁶⁸ Ö̦jö däjä, a mö cläshamaje. A ca̦i shädaamaje. Ai bä mö feduwä lä cuinö a si ca̦i baidamaje. Mamocu fa jo̦yabojenö, a nö waiblaöje ja, a ca̦i wa̦limaje. —Yai Bada tänö wa shömabä wa jo̦wa lä yaileno wei wa lä cui, tä a̦fa wäa da cadidiba. ¿Wedinö bei wa shälei cufe? —a nowa tamaje. ⁶⁹ Yafi sibo lä ji̦coloi jamö, Pedro a loo showaoma. Ö̦jamö a loo däjä, moco a icua fa ajedeicunö, abinaja a cuma. —Calileateli Jesús a lä cui nija cafä wa ca̦i cuoma —a cuma. ⁷⁰ Ö̦jö ma cui, cama nija bä mamo bluca lä showale däjä, a wa̦ jole mojodumoma. Abinaja a Pedro cuma. —Cuwi. Camiyä nija wa lä cufe, ya tä daimi —suwä nija a cuma. ⁷¹ Yoca lä joleono wei jamö a icua cublou däjä, suwä ai anö a daa fa nomöjölalönö, a wa̦ faö co̦o nomöjöoma, ai bä ublao lä ajedeono wei bä nija. —Nasaleteli Jesús a lä cui nija fei a ca̦i cuoma —a cuma. ⁷² Öjö ma cui, a wa̦ lojodoaö ja, a wa̦ jole mojodumou co̦oma. Abinaja a cuma. —Ö̦jö a wa̦lo lä cui, ya daimi —a jole cuma. ⁷³ Tä nö dedejedou fa co̦lonö, bä ublao lä ajedeono wei bä lä cui, abinaja Pedro nija ebä cuu co̦oma. —Bejedi lä, ö̦jö bä nija cafä wa ca̦i co̦caoma. Calileateli bä a̦ faö lä culenaja, wa wa̦ faö malä cui —bä cuma. ⁷⁴ Ö̦jö ma cui, Pedro a wa̦ jole mojodumou co̦o ja, a wa̦fa wäamoma. Yai Bada a wa̦fa ca̦i jayumama, a jolemou bädao ja, a nö bleaamamou showadaobä. —Ö̦jö a wa̦lo lä cui, ya daimi —a jole cuma. Inaja Pedro a lä cuno wei däjä, yedu cadala a wa̦ nocablaliyoma. ⁷⁵ A wa̦ cadala falayoma yalo, Jesúsnö a nowa lä tano wei Pedronö tä nofi jaducudalema. “Cadala a wa̦ faö showao mlao däjä, 3 wale nofi nia jole mojodubou”, a nowa malä tano wei. Ö̦jö däjä a bufi fa wajäblalunö, a siboa fa showadalunö a ö̦cöma.

¹ Tä mö jaba jaluimaö däjä, nofi bäyäalewä blowäjäwä bä ma cui, judio bada ai bä ma cui, ö̦jö bä bluca fa yododoblalunö, bä a̦ wayolayoma, Jesús a shäbeje. ² Ö̦jö däjä, bococu fa o̦cacöjenö, Bilado nijamö a öbölefälömaje, Lomateli bänö Bilado a bada lä lämabono wejei a nijamö. ³ Cama a wa̦nö Jesús a nia shäö lä showadao wejei tä fa dalalönö, Juda a bufi wa̦lidiblaliyoma, a lä nomojoliano wei a lä cui. A bufi wa̦lidiblaliyoma yalo, bä blada co̦a co̦maquema. ¿Ö̦jö tawä? Nofi bäyäalewä blowäjäwä bä ma cuinö, judio bada ai bä ma cuinö, Jesús a jömöabä bä blada 30 lä jöböqueno wejei, cama bä nija bä co̦a co̦maquema. ⁴ Blada bä co̦amalanö abinaja e cuma. —Jesús a wa̦fa tamobä tä cua ma mlai ma cui, ya nomojolia fa dicolunö ya doblou mlaa lä cule —a cuma. Abinaja bada ebä cuu nomöjöoma. —Cafä wa li dobloimi. Yamalecö yabäca dijä —bä cuma. ⁵ Ö̦jamö lä, Yai Bada etä yafi jamö, blada bä fa shäyäblacöfälönö, a faa co̦layofälöma. A fa alufälönö, cama a olami shi̦amolayoma. ⁶ Nofi bäyäalewä bä blowäjäwä lä cuinö bä blada doa fa jälalöjenö, abinaja bä nowa tayou juoma. —Eja, Yai Bada etä yafi jamö, yama bä blada lä nowamale jamö, ei bä blada nö didiobimi. Tä a̦ läa. Unocaye cäbä —bä nowa tayoma. ⁷ Ö̦jö cudeenö, bä a̦ bluca wayoa fa balölönö, ulifi a nowa co̦a balömaquemaje, jaboca talewä nija. Ö̦jö tä ulifi jamö, shomi bä lä nomaoblou wei bä nia dodijidawä didiblaamaje. ⁸ Ö̦jö cudeenö, fei däjä ma cui, ö̦jö tä ulifi unocaye waiquiwä ja, tä a̦fa ulifi i̦yäbö wei jilaöje. ⁹ ¿Ö̦jö tawä? Inaja bä fa cuaanö, tä a̦ wäyämou lä balöono wei tä a̦ bejedi cublaliyoma. Yai Bada a wa̦no wäyälewä a Jelemia lä cui, cama etä a̦ oni jamö, abinaja tä a̦ oni cuu. Ö̦jö blada 30 bä dälemaje, Isaeli ebä nodiwänö bä a̦fa blada lä wäyäno wejei, yanowamö a nowa co̦amabeje. ¹⁰ Ö̦jö bä blada ja, jaboca talewänö tä ulifi nofi lä tabole tä ulifi nowa co̦maquemaje. Bada tänö wale nosiemaö ja, a lä cuno weinaja showawä. ¿Ö̦jö tawä? Einaja tä a̦ oni cuu balöo showaoma. ¹¹ Ö̦jö däjä, Bilado nija Jesús a icumaquemaje, Lomateli bänö a bada lä lämaqueno wei a lä cui nija. Bada anö a wa̦lii ja, abinaja a cuma. —Cafä ¿judio bada bei wa? —a cuma. —Awei. Wa wa̦ cadidou —Jesús a cuma. ¹² Ö̦jö ma cui, nofi bäyäalewä blowäjäwä bä ma cuinö, judio ai bä bada mö feduwä ma cuinö, ö̦jö bänö a wa̦fa ma taöje däjä ma cui, a wa̦ juo co̦daanomi. ¹³ Ö̦jö däjä, Biladonö a wa̦lii co̦oma. —¿Wa wa̦fa lä talajei, wa täbä a̦ bluca ji̦liaö mlaa cule? —e cuma. Inaja a cuma ma cui ¹⁴ e a̦ juonomi showawä. A wa̦fa lä tano wejei, moli tä a̦ ma cui ja, a wa̦ juo bädaonomi. A wa̦ juono lä mlai tä ja, Bilado a bufi shino yai wedinajamoa dodijilayoma. ¹⁵ Bei. Bada tä Bilado lä cui, abinaja a showadi cuaama. Judio bänö Yai Bada a waiteli lä jayuano wei a nofi co̦camoaö co̦oje däjä, judio bä fe lä labou wei, ai moli a shino fadamaö co̦oma, judio bänö a wa̦fa yubou lä cadidiono wejei a lä cui. ¹⁶ Ö̦jö tä lä cuono wei däjä, Balabasi a wa̦fa lä cui, a fe ca̦i labou mö feduomaje. Ö̦jö a nofi shino jushuama yalo, showadi a wa̦fa ji̦limamoma. ¹⁷ Ö̦jö cudeenö, judio bä bluca fa co̦camoliyonö, Biladonö bä wa̦lima. —Fei däjä ¿wedi jamö a lä cui, bei wama a jujeblamaö bufii cule? ¿Balabasi ya famaö co̦obä tawä? Ma, ö̦jö mlai, ¿Jesús a shino daanö, Yai Bada tänö a shömabä a jo̦wa lä yaileno wei? —a bada cuma. ¹⁸ Einaja Bilado a cuma. Nofi bäyäalewä bä daö malä waiquiono wei. “Jesús a dodijaö ayao cudeenö, a shämaö bufi doblaoje”, bä nofi tabou waiquioma. ¹⁹ Abinaja Bilado etä ca̦i cublaliyoma. Jesús a jömabä a döcäo waiquio däjä, bä suwäbö e wa̦no wäyäyolumaje. Abinaja Bilado bä suwäbö e jo̦wa cuma. —Miji a lä cui a cadidou. A nö bleaama dijä. Cama a nowa ja, ¡bejedi ya nö majali bleaaö dodijio bä lä cublei! —bä suwäbö e jo̦wa cuma. ²⁰ ¿Ö̦jö tawä? Nofi bäyäalewä blowäjäwä bä ma cuinö, judio ai bä bada ma cuinö, täbä shi domaö waiquia dicoaje ja, Balabasi a wa̦fa shino yai yubomaje. Jesús a shämaö bufimaje. ²¹ Ö̦jö däjä, bada tä Bilado a wa̦ wabäo co̦o ja, abinaja a cuma. —Bei. Bolacabö ya cöbö tabou. Cafä wamacö nija ya nia moli co̦amaö lä co̦o wei, ¿wedi jamö a lä cui, bei wama a yai jujeblamaö bufi doblao? —¡Balabasi! —ebä cuma. ²² Abinaja Bilado e cuu nomöjöoma. —Ja̦o. Inaja wamacö cuu ja, ¿wedinaja Jesús ya yai li taamabä, Yai Bada tänö a shömabä a jo̦wa lä yaileno wei? —¡Fii balitama defi jamö, a shino da basumacö! —ebä bluca cublaloma. ²³ —¿Wedi tabä fii balitama defi jamö ya li basua bädamaquei? ¿Wedi bei tä li taö dodijioma? —a Bilado cuma ma cui, ö̦jö a wa̦ ja, bä a̦ yai balaa dicolayoma. —¡Fii balitama defi jamö, a da basumacö! —bä cublaloma. ²⁴ ¿Ö̦jö tawä? Bilado a wa̦ faa doblamanomije. Tä shino yai wa̦lidiblou nomöjölayoma. Ö̦jö cudeenö, mau ubä fa nacalänö, bä lä co̦camole bä mamo mötale jamö, Bilado imicö ya̦lömolayoma. ¿Ö̦jö tawä? Jesús a shämaö bufiono lä mlai a nö yai ö̦jöböamobä, wawädowä imicö li ya̦lömoma. Abinaja e cuma. —Camiyä ya mayonö ei a nia shämoimi. Cafä wamacö cuaaö bufi lä doblao weinaja, cafä wamacö li cuaabä —e cuma. ²⁵ —¡Camiyä yamacönö lä! —bä bluca cublaloma—. Camiyä yamacö ma cui nija, yamacö ijilubö nodiwä ma cui nija, inaja lä tä nowa cuo nodiablalou showaobä lä cätä —bä cublaloma. ²⁶ Ö̦jö däjä, Balabasi e faa co̦malema, bä lä cuno weinaja showawä. Jesús a si fa yafelimalalönö, fii balitama defi jamö a basuabeje, a jöböa majöquema. ²⁷ Ö̦jö däjä, bada tä yafibö sibo lä ji̦coloi jamö, sodado bänö Jesús a öböbou ca̦i siboa majöa co̦layofälömaje. Ö̦jamö lä cama ai bä ca̦i sodado mashi bluca nacaalalemaje. ²⁸ Ö̦jamö lä Jesús camishi ecö fa jayublalöjenö, wacä labe cäcö ja a jole jole lucäa nomöjömalemaje, bä nö bada ö̦jöböamobä, bä showadi lä didio wei cäcö lä culenaja cäcö ja. ²⁹ Too totocö ca̦i mösöcöbö fa motoleblalöjenö, Jesús nija totocö yojoquemaje, bada bänö olo bä showadi yojobou lä cuaaö wejeinaja showawä. Bada bänö fii fibä däbou lä culajeinaja, jayu boco jamö ujudidiwä desi ca̦i dämaquemaje. Ö̦jö däjä, bä möfe ca̦i jole deidolanö, a nofi jole jole badamoamaje. A nö waiblalajenö abinaja a nowa tamaje. —¡Bada tä! Judio bä nija wa bada lä läle, ¡dodijidawä wa bälödiobä! —a nowa tamaje. ³⁰ A ca̦i cläshamaje. Desi däa fa co̦löjenö, a fe ca̦i shäbemaje. ³¹ Inaja a nö waiblaö cuaaö fa balölojenö, labe cäcö jayua fa co̦lujenö, cama ecö ja a didia co̦maquemaje. Ö̦jö däjä, fii balitama defi jamö a basuabeje, sibo jamö a öböa taa majölefälömaje. ³² Jesús a öböbou ca̦i lä juimadujei jamö, Sileneteli a mö bamalefälömaje. Simón a wa̦fa cuoma. A mö fa bamalöjenö, ö̦jö nija fii defi nia lä blilio wei defi yalucua nomöjöa fe yadimaquemaje, edefi ca̦i nojaobä. ³³ Cocoda tä a̦fa ulifi lä jilabou wejei jamö, a ca̦i waloquemaje. ¿Ö̦jö tawä? “Cocoda”, täbä caficö lä cudou wei, Felosi blaobä tä a̦fa ulifi taöje. Ö̦jamö a ca̦i fa walobojolujenö, ³⁴ nashiwä toubä ja, co̦wami täbä fa coyocoblalöjenö, a fe nia fa coamajenö e toubä dodoquemaje. Ö̦jö ma cui, toubä wabaö fa balöonö, toubä wailema. ³⁵ Fii balitama defi ja, a fa basucöjenö, Jesús camishi ebä nia fa sheleleablajenö, jimamodima ebä wai ja, bä wabäoma, camishi bä nia tabou mö lä feduo wejei, bä jömamobä. ³⁶ Ö̦jö däjä, ö̦jamö lä bä lodou showalayoma, Jesús a nö nia nomaö fa daajenö. ³⁷ Jesús a feduböcö jamö etä a̦ oni ca̦i basuquemaje, cama nija tä nowa lä cuono wei tä dablamobä. Abinaja etä a̦ oni cuma. “Judio bä nija a bada cuobä, ei Jesús a”, etä a̦ oni cuma. ³⁸ Fii balitama defi ja, Jesús a basua fa möamobalöjenö, cäcöbö doblou lä mlai cäcöbö ca̦i basua lu̦locuaquemaje. Acasi boco mashi jamö ai a, jayu boco mashi jamö ai a, cäcöbö basua taaquemaje. ³⁹ Ai bä lä cui, bä jayuafälölanö a jömamaje. A nö ca̦i waiblamaje. ⁴⁰ Abinaja ebä cuma. —¡Bei tawä! ¡Wa nö nia jo̦wa lä wa̦lojano wei! Yai Bada wa etä yafi fa wa̦lialönö, bolacabö tä mö didi fa cublalunö, ¡wa etä yafi nia i̦tamaö lä co̦ono wei, wa nofi lä cui! ¡Cafä a yai da bayeliblamolu, ö̦jö lä! Yai Bada wa Ijilubö waiquiwä ja, wa ma basule ma cui, ¡a da itolu! —ebä cuma. ⁴¹ Inaja showawä, judio bada bä ma cuinö a nö ca̦i waiblaö cuo mö feduomaje. Nofi bäyäalewä blowäjäwä bä ma cui, Moisesi etä a̦ ja täbä lä damaö wejei bä ma cui, judio ai bä bada ma cui, abinaja bä cuma. ⁴² —Ai täbä jo̦wa bayeliblaö ma cuaano wei ma cui, ¿wedi tä tabä cama bei a li bayeliblamou mlaa cule? Judio bä nija a bada cuobä a waiquiwä ja, fii balitama defi jamö a basudio dicoo mlai ja, a yai itou showadaobä. Bäma a itou fa dalalönö, ö̦jö däjä bäma a wa̦ bejedi yai bufiblaö showadaobä, ¿ö̦jö tawä? ⁴³ Yai Bada a jo̦wa bufiblaö. Yai Bada tänö a bufii ja lä, fei däjä a noshi yai umabobä, ö̦jö lä. “Yai Bada bei Ijilubö ya e”, a mada cublei —bä cuma. ⁴⁴ Fii balitama ai deficö jamö, tomömolewä cäcöbö basua mö lä fedule cäcöbö ma cuinö a nö ca̦i waiblaböma. ⁴⁵ Bei. Motoca a yo̦loloblojolayou däjä, tä jödödöwa dödöblaliyoma. Motoca a itou bäshäcuaö däjä tä shi̦i jomoblou co̦layoma. ⁴⁶ ¿Ö̦jö tawä? Tä shi̦i jomoblou co̦o lä bufiole däjä, Jesús a wa̦ i̦cali fa falönö, cama bä caficö a̦ ja abinaja a cudaliyoma. —¿Eli, Eli, lema sabadani? Inaja a lä cuobojoli, abinaja a yai cuma. “¡Yai Bada bäfä lä bufiblale! ¡Yai Bada bäfä lä bufiblale! ¿Wedi tä tabä, bei wale li daa dicofälöö cufe?” ¿Ö̦jö tawä? Einaja a yai cudaliyoma. ⁴⁷ Bä ublao lä ajedeono wei ai bä lä cuinö a wa̦ fa ji̦liläjenö, abinaja bä cuma. —¡Bei, bei! Fei a lä cuinö, Elia a jo̦wa nacaö lä cule, Yai Bada a wa̦no wäyälewä a jaba Elia lä cuono wei —bä cuma. ⁴⁸ Ö̦jö däjä, nashiwä toubä befi ca̦i lä i̦taono wei jamö, lobe ai a fa läläicunö, ö̦jö toubä ja tä madofi wai fa ca̦dalönö, fii fi ja tä fa ji̦ibanö, Jesús caficö ja toubä befi ca̦i dodobou ajedeojolayoma. ⁴⁹ Ö̦jö ma cui, abinaja ai bä cuma. —¡Waija, waija! Bämacö nö daablalou da balöo, ¿ö̦jö tawä? Elia bäma a waloo fa mönö, ö̦jönö bäma a bayeliblaö möbä —bä cuma. ⁵⁰ Ö̦jö däjä, Jesús a i̦cali fa la̦amolunö, a möshöa jawäa fa showadaicunö, a nomalayoma. ⁵¹ Ö̦jö däjä showawä, Yai Bada etä yafi jamö, camishi cäcö bada acadafu lä läono wei cäcö cacablou wädätefälöma. Mashita a ma cui, a bada blösö blösömolayoma. Maa mabä ma cui, mabä jafatolaliyoma. ⁵² Nomawä bä lä didibono wejei macabä ma cui, macabä aca calolaliyoma. Yai Bada ebä nomablou lä balöono wei bä ma cui, ai ebä demi jocäcäa fa co̦lalunö ⁵³ maa macabä jamö, bä fao co̦laliyoma. Jesús a demi jocäblou waiquilayono wei ja, Jelusale jamö ö̦jö bä fa alufälönö, bluca täbä nija bä wawälaliyoma. ⁵⁴ Jesús a nofi lä läbono wejei bä sodado lä cuinö, mashita a bada blösö blösömou fa dalalöjenö, bä quilia fe balojolaliyoma. ¿Ö̦jö tawä? Sodado 100 bä ca̦i lä cuono wei a bada ma cuinö, cama ebä ma cuinö, tä bluca lä cublaliyono wei tä dalalemaje. Ö̦jö tä ja, bä quilia fe fa balojolalunö, abinaja bä cudaliyoma. —Bejedi lä, quiji a lä cui, ¡Yai Bada tä Ijilubö e cuo dodijioma! ⁵⁵ Ö̦jamö lä suwä bä ca̦i bluca cuoma, Calilea jamö culanö Jesús nija bä fa nocaofälönö, a lä bayeliblafälöno wejei bä lä cui. Bä jäwäjäwä ca̦i fa ublajaonö, bä nö ca̦i labajami dablalou mö feduo showaoma. ⁵⁶ Ö̦jö bä nijamö Madalateliyoma a María coyocooma. Santiago bä nöö e ca̦i, José bä nöö e showawä lä cui. María ö̦jö a wa̦fa ca̦i cuo mö feduoma. Sebedeo bä ijilubö ecöbö lä cui, ö̦jö bei bä nöö e ca̦i cuoma. ⁵⁷ Tä mö weyaö däjä, Alimadeateli a nö lä madofibö wei a waloquema, José a wa̦fa lä cule. Jesús nija a nocao mö lä feduono wei, a cuoma. ⁵⁸ Bilado nija a fa icuicunö, Jesús a wa̦fa nomawä boma. Ö̦jö däjä Bilado a nosiemou showaoma, a co̦amabeje. ⁵⁹ Josénö a nomawä fa co̦lönö, camishi acadafu au cäcönö a ja̦loblalema. ⁶⁰ Maa maca jamö, cama a nia obi nomawä lä didiano wejei maca jamö, Jesús a nomawä maquequema. ¿Ö̦jö tawä? Jesús a nomawä fa didicöfälönö, maca fe laobä, maa ma bada jiluluquefälöma. Ö̦jö däjä José a co̦layoma. ⁶¹ ¿Ö̦jö tawä? Maa maca casö jamö, Madalateliyoma a María lä cui, a looma. Ai a wa̦fa María cuo mö lä feduono wei sho, cäcöbö looma. ⁶² Ö̦jö tä fena ja, täbä yanöcöobä tä mö jalu cublou däjä, Bilado nija judio bada bä juma. Nofi bäyäalewä blowäjäwä bä ma cui, faliseo bä ca̦i bada ma cui, Bilado nija ö̦jö bä bluca fa icuicunö, ⁶³ abinaja ebä cuma. —Bada tä. Quiji a lä jolemono wei a lä cui, a demöo showao däjä, abinaja a cuu dicoo cublelei. “Bolacabö tä mö didi fa cublalunö, ya nia jocädou co̦o”, a cuma. ⁶⁴ ¿Ö̦jö tawä? Ö̦jö cudeenö, bolacabö tä mö didi cublou showao mlao däjä, a nomawä lä didile maca jamö, sodado bä da lämacö, cama ebä lä nocamabono wei bä lä cui, ö̦jamö bä lucäö ja̦too mlaobä. Bä lucäa fa dicolunö, a nomawä fa dälöfälöjenö, shomi jamö a taaö nomöjöo mlaobeje. Inaja bä cuaaö dicoo ja, täbä mölaa dicomaleije. Cama jolemou a wa̦nö täbä mölamaö ma waiquiono wei ma cui, “A demi jocädou co̦layoma tai”, cama ebä cuu dicoo ja, ö̦jö däjä täbä nia yai mölalayou —ebä cuma. ⁶⁵ —Ja̦o —Bilado e cuma—. Sodado wama bä lämabobä, fei bä da lululöfälöje. Ma yai da lojodocöje —a cuma. ⁶⁶ Inaja a cuma yalo, sodado bä ca̦i fa alufälöjenö, maa ma bada lä läono wei ma tamaö mlaobeje, öjamö bada etä oni sudimaquemaje. Ö̦jö däjä, bä läo juobä, bä sodado lämaquefälömaje.

¹ Täbä lä yanöcöo wei tä mö jalu jayublou waiquilayono wei ja, domingo tä mö jalu lä cublole däjä, Jesús a nomawä lä didiono wei maca nia fa möbönö, suwä cäcöbö aa fenalayoma. Madalateliyoma María a cuoma, ai a wa̦fa María cuo mö lä feduono wei a ca̦i. ² Yedu Bada tänö a̦jele a fa shömölödunö, Jesús a nomawä didiobä maca fe lä lale ma jilulaö däjä, tä ulifi blösö blösomou fe balojolayoma. Ma fa jilublalönö, ö̦jö ma feyaca jamö a döcäa showadaquema. ³ Madula a mömou lä culenaja, a mömou cuoma. A lä didio wei ecö au shi̦i wacalamioma. ⁴ A mömou nö quilijioma yalo, bä sodado lä läono wei bä lä cui, bä quilili fa blösö blösomonö, jai nomawä bä bläläa culaliyoma. ⁵ Suwä cäcöbö nija abinaja a̦jele e cuma. —Cäcöbö quili dijä. Jesús wafä a lä dayäboyoi bäfäcö daö, fii balitama defi jamö a lä basuono wei a lä cui. ⁶ Eja a cuami. A demi jocädou waiquilayoma tai, cama a lä cuno weinaja showawä. Jabo, ö̦jö lä, a nomawä lä maqueono wei wafä tä möblaaö balöobä. ⁷ Wafä tä möblaaö fa balöonö, cama ebä lä nocamabono wei bä lä cui, lobe wafä bä yömölajalayobä. A demi lä jocädaliyono wei, wafä tä a̦ nia wäyäjelayou. Calilea jamö a dablaö co̦obeje, a nia balöfälöö. ¿Ö̦jö tawä? Einaja bäfäcö nowa nia fa tanö, ya waloquei lä cufe —a a̦jele cuma. ⁸ A̦jele a wa̦ fa ji̦libölänö, maa maca jamö lobe cäcöbö quilili faa co̦layofälöma. Cäcöbö bufi ca̦i doblalou fe balojooma. Jesúsnö cama ebä lä nocamabono wei bä yömölaböbä, lobe cäcöbö läläa showalayofälöma. ⁹ Cäcöbö läläafälöbä jamö, yedu Jesús a bädaliyoma. A fa bädalunö, a wa̦ faa mö balayoma. Cäcöbö quilili fa dijoblaicunö, Jesús mamicö ja, cäcöbö imicö waliblaquema. Cäcöbö möfe bolanö a wa̦fa Bada doblao taböma. ¹⁰ Ö̦jö däjä, abinaja Jesús e cuma. —Cäcöbö quilii dicoo dijä. Fääshäyä wafä bä nia yömölajalayou, Calilea jamö bä jufälöbä. Ö̦jamö lä wale nia möö co̦oje —e cuma. ¹¹ Suwä cäcöbö jufälöö däjä, maa maca jamö bä sodado lä läono wei ai bä mö feduwä lä cuinö, Jelusale jamö, tä a̦ ca̦i aa mö fedulayofälömaje. Tä bluca lä cublaliyono wei, nofi bäyäalewä blowäjäwä bä nija tä a̦ wäyäö co̦ojolomaje. ¹² Ö̦jö bä bada lä cuinö, judio ai bä bada fa yododoblamalöjenö, bä a̦ bluca wayolayoma. Ö̦jö däjä, tä lä cublaliyono wei tä a̦ wäaö dicoo mlaobeje, sodado bä nija blada bä jöböquemaje. ¹³ Abinaja bä nowa tamaje. —Bei. Tä lä cublalufe, wama tä a̦ yai wäyäö mlai ja, abinaja wamacö shino cubä. “Jesúsnö bä lä nocamabono wei bä lä cuinö, bä nofi didi waloa fa ja̦toicunö, yamacö mio däjä a nomawä co̦a ja̦tolefälöma sijei”, wamacö cubä. Einaja wamacö shino cubä, ö̦jö lä. ¹⁴ Biladonö tä a̦ ji̦liaö bädao ja, yamacö a̦ läblou weicätä, wamacö nö bleaamaö dicoo mlaobä —bä nowa tama. ¹⁵ Einaja bä cuu ja, sodado bänö bä blada dälemaje. Bä nowa lä tano wejeinaja tä a̦ jole wäyäö cuaadayomaje. Judio bä nija ö̦jö tä a̦ blaucublou fa showadalonö, tä a̦ tabou showaa lä cudujei. ¹⁶ Bei. Jesúsnö cama ebä lä nocamabono wei bä 11 lä cui, Calilea jamö bä fa alufälönö, Jesúsnö tä balöcö a̦fa lä wäyäno wei jamö bä juu showadaoma. ¹⁷ Ö̦jamö lä Jesús a daa fa co̦lalöjenö, bä möfe fa boblaicunö, a wa̦fa Bada doblao tamaje. Ö̦jö ma cui, cama ai ebä mö feduwä lä cui bä bufi wedinajamou showaoma. “Ö̦jö lä a waiquiwä daanö”, a nofi tabou cadidionomije. ¹⁸ Abinaja Jesúsnö bä nowa tama. —Fedu jamö ma cui, bita jamö ma cui, bluca täbä lä cublai täbä ja ya Bada cuobä, camiyä Yai Bada tänö wale tablamalema. ¹⁹ Ö̦jö cudeenö, camiyä ya wa̦nö bä juu da cuaafälö. Bluca bä bälöjöwä lä yaiblai bä da yömöladuje, camiyä nija bä nocao mö feduobä. Fayä a wa̦ ma cuinö, bä Ijilubö ya e a̦ ma cuinö, Yai Bada bei Bufi a wa̦ ma cuinö, ö̦jö yamacö a̦nö wama bä fe ojomaö cuaabä. ²⁰ Cafä wamacö nija ya tä tamaö lä bufino weinaja bä cuaaö mö feduo showaobä, bä damaö da cuaaje. ¿Ö̦jö tawä? Yai Bada tänö täbä jödödöwä waicaö showao mlao däjä, showadi bämacö ca̦i nia cudio —bä nowa tama.