San Lucas

San Lucas

¹ Camiyä yamacö nijamö, Jesucristo a lä cuaano wei tä a̦ bluca onimabeje, bluca bä wabäo waiquiwä. ² Yamalecö yömölaöje ja bä lä cuno weinaja, inaja showawä tä a̦ oniblaö cadidiomaje. ¿Ö̦jö tawä? Tä bluca lä cuaano wei däjä, bä mamo lä showaono wei bä lä cuinö yamalecö yömölamaje, tä a̦ showadi lä wäyäno wejei bä lä cuinö. ³ Camiyä ya ma cuinö, ya tä a̦ yanöcö wa̦liadalaö fa cuaanö, ya tä a̦ ca̦i oniblaö bufi doblaoma. Tä bluca lä cuaano wei, cafä Deofilo bada wa nija ya tä a̦ oni shömabä, ya tä a̦ oni jödödöbou lä cule, ⁴ ei wa tä a̦ oni fa mönö, cafä nija tä a̦ lä wäyäno wejei wa bä a̦ bejedi dablabä. ⁵ Judea jamö Elode a bada lä läono wei däjä, nofi bäyäalewä Sacalia a bälöo mö feduoma. Bä suwäbö Elisabei e a̦fa cuoma. Ö̦jö a suwä lä cui, Aaloni nodiwä e suwä cuoma. ¿Ö̦jö tawä? Nofi bäyäalewä bä ojodamou lä nomöjono wei bä yaiblamoma. Sacalia a lä cui, Abiasi ebä nija a co̦caoma. ⁶ Ö̦jö cäcöbö lä cui, Yai Bada nija cäcöbö cadidoma. Bada tänö tä tamaö lä bufii wei tä ja, showadi cäcöbö cadidoma yalo, cäcöbö a̦fa tamobä etä cuonomi. ⁷ Ö̦jö ma cui Elisabei a shöbönabödalou fa mlacunö, cäcöbö badao ma waiquiono wei cäcöbö ijilubö cuonomi. ⁸ Bei. Yai Bada etä yafi jamö Abiasi ebä ojodamou nomöjöobä tä lä cublaliyono wei däjä, täbä nofi bäyäabeje jamö Sacalia a läoma. Ö̦jamö a läo däjä, ⁹ u̦eshi yano jamö a fabä a yaimolayoma, wa̦queshi bä nö cle̦deli lä u̦cucamou wei bä wacö döcäbä. ¿Ö̦jö tawä? Abinaja bä showadi cuaama. Nofi bäyäalewä bei bä a̦fa lä cublai bä a̦fa fa onimajenö, a nia lä yaiamou wei a wa̦fa oni wawäblou mömaje. ¹⁰ ¿Ö̦jö tawä? Sacalianö wa̦queshi bä nö cle̦deli lä u̦cucamou wei bä wacö döcäö däjä, Yai Bada etä yafi je̦fa jamö, bä bluca lä yododano wei bä nö bayeli nacao sibooma. ¹¹ Ö̦jö däjä, Bada tänö a̦jele etä fa shömöludunö, Sacalia nija etä wawälayoyoluma. Täbä nö wa̦queshi cle̦deli lä u̦cucamou wei täbä maqueobä defi ola jamö, a ublaa ajedequema. ¹² Ö̦jö tä fa dalalönö, Sacalia a bufi fa mablalunö, a fe taläblaliyoma. ¹³ Ö̦jö ma cui abinaja a̦jelenö a nowa tama. —A quili dijä, Sacalia. Yai Bada nija wa nö bayeli lä nacao wei tä a̦ ji̦lio culadi. Suwäböfä Elisabei a lä cuinö, ijilufä a nia tablaö. Juan wa wa̦fa nia jilaö. ¹⁴ Ö̦jö nija wa bufi nia doblalou. Ai bä ma cui, ijilufä a oshe wawäblou cudeenö bä bufi nia bluca doblalou cuaaö. ¹⁵ Bada dodijiwä a cuobä, Bada tänö a nia malä tablamaö wei. Nashiwä toubä nia coaimi. Ai toubä ma cui, täbä shi lä wa̦lii wei toubä nia coaimi dodijiwä. Bä nöö nija a didio showao däjä, Yai Bada tä Bufinö a nia jödödöbou showao. ¹⁶ ’Isaeli ebä nodiwä lä cui, Yai Bada nija bä bufi mö blucaobä, bluca bä bufi nia taamaö, a bufiblabeje a lä cui nija —a nowa tama—. ¹⁷ Bada tä nijamö ijilufä a nia balöfälöö. Yai Bada a wa̦no wäyälewä Elia a bufi nö wa̦lojomabou lä cuono weinaja, inaja showawä ijilufä a bufi nö nia wa̦lojomabou cuo. Ö̦jö a wa̦ ja, bä fö̦ö ebänö bä ijilubö ebä nia nofiamaö co̦oje. Cama a wa̦ showawä ja, Yai Bada a wa̦ juaö lä mlajei bä ma cui, bä lä dodijaö wei bä bufi jaducuwä lä culenaja, bä bufi nia jaducuwä tablamaö mö feduo. Bada tä nia lä juu wei jamö a wa̦no nia taö balöablalou, a wa̦ ji̦liaö dodijidaobeje —a̦jelenö a nowa tama. ¹⁸ Abinaja Sacalia a cuma. —Wa wa̦ lä fafe, ¿wedi tänö bäfä a̦ nö li bejedi ö̦jöböabä? Wa̦lobada ya malä cui. Iba suwä a ma cui, a suwäbada waiquiwä —a cuma. ¹⁹ Ö̦jö däjä, a̦jele abinaja e cuu mö feduoma. —Camiyä Cablieli cä ya. Yai Bada tä lä cule jamö showadi ya e ajedeo. Cafä bäfä yömölabä wale shömöledayoma, ei dodijidawä ya tä a̦ wäyäyolubä. ²⁰ ¿Ö̦jö tawä? Wale a̦ bejedi bufiimi dicoo tä nowa ja, wa wa̦ nia fablou jaöomi. Ya tä a̦ lä wäyäfe tä bejedi cublou däjä, wa wa̦ nia shino faö dodijidablou co̦o. Tä wawäblou bufio däjä, tä nia bejedi cublou —a̦jele bei a cuma. ²¹ Je̦fa jamö bä lä yododoono wei bänö, Sacalia a faö co̦o nö dabomaje. Yai Bada etä yafi u̦eshi jamö a nö dededayou ja, bä bufi wedinajamoma. ²² Ya̦cumö a faa fa co̦lunö, a wa̦ faö mlai ja, bei imicö juablalou cuaama. Bei imicönö bä lä yömölano wei ebä bufi fa möblalunö, “Yai Bada etä yafi u̦eshi jamö, ¡a̦jele a nofi wawäa yailayodayoma!”, bä bufi cudaliyoma. ²³ Yai Bada etä yafi jamö Sacalia a nia lä läono wei tä fa jödödöblalunö, a co̦layoma. ²⁴ Tä nö fa dedejedalunö, bä suwäbö Elisabei a shöbönabölayoma. A wawäblou mlai ja, belibo 5 bä famalanö, abinaja a suwä cuma. ²⁵ —Ijiluyä ya tablabä, Bada tänö wale bayeliblaleyoluma. Fei däjä wale a̦fa nia wayoaimije —a cuma. ²⁶ Elisabei a lä shöbönabö wei, belibo 6 a famaö bäshäcuaö däjä, a̦jele Cablieli a lä cui, Yai Bada tänö a shömöa co̦lema. Calilea tä ulifi jamö, Nasaleteli bä shabonobö jamö, a shömöa nomöjöledayoma. ²⁷ Ö̦jamö lä María a wa̦fa moco lä cule nija, a shömölema. David nodiwä a José lä cuinö, ö̦jö a nia suwä däama. A wa̦fa boma ma cui, cäcöbö doayonomi showawä. A suwä jubamou dao lä mlai a suwä cuo showaoma. ²⁸ María nija abinaja a̦jele e cuyoluma. —Cafä nija ya wa̦ nia faö, wa bayeliblabä wa nofi lä ojodaboladi wa nija. Bada tänö wa ca̦i cua lä cule —a cuma. ²⁹ Ö̦jö a wa̦ ja, María a bufi fa mablalunö, “¿Wedinaja wale nia fa taamanö, wale nowa li taö cule?”, a bufi cudaliyoma. ³⁰ Ö̦jö däjä, María nija abinaja a̦jele e cuma. —A quili dijä, María. Yai Bada tänö wa bayeliblabä, wa nofi ojodabou waiquia lä cule. ³¹ ¿Ö̦jö tawä? Wa nia shöbönaböö. Ijilufä wa̦lo wa nia tablaö. Jesús wa wa̦fa nia jilaö. ³² Bada a nia yai cuo. Yai Bada tä Bada lä ayai Ijilubö e a̦fa nia jilaöje. Yai Bada tänö bada tä David a bälöa lä lojodomabono weinaja, ijilufä a nia bälöa lojodomabou cuo nomöjöo. ³³ Jacobo ebä nija a nia Bada läo shi wa̦lii. A Bada bälöo lä dodijio wei etä nia mladoimi —e cuma. ³⁴ Abinaja a̦jele a nija María a cuma. —¿Wedinaja ya li shöbönaböa cua bälayou? Ya jubamou dao lä mlai ya showawä —a cuma. ³⁵ Ö̦jö däjä, abinaja a̦jele e cuma. —Yai Bada tä Bufinö wa fe walou däjä, Yai Bada tä Bada lä ayai tä lojodenö wa nia jo̦yablaö. Ö̦jö cudeenö ijilufä a nia yaio. Yai Bada Ijilubö e a̦fa nia jilamou. ³⁶ Abinaja ca̦i. Amiyofä Elisabei a suwäbada lä cui, a shöbönabö. Bä ijilubö wa̦lo a didibou. “A ijilubö nö cublobimi waiquiwä”, a nofi ma tabono wejei ma cui, a lä shöbönabö wei, belibo 6 a famaö bäshäcuaö waiquia lä cule. ³⁷ ¿Ö̦jö tawä? Yai Bada tänö tä taö daö lä mlai, etä cua malä mlai —a cuma. ³⁸ Abinaja María a cuma. —Inaja lä waiquiwä. Wa lä cufenaja tä yai cuobä. Bada a nosie juamobä ya e waiquiwä malä cui —a cuma. Ö̦jö däjä, a̦jelenö a daa co̦quefälöma. ³⁹ Tä fe fa weyadalunö, Judea tä ulifi lä jefubö wei jamö María a shi jalijiwä ca̦i ayofälöma. Ö̦jamö lä, ai bä shabonobö jamö a fa co̦blalunö, ⁴⁰ Sacalia a yai lä bälöle jamö a co̦blou majölayoma. A fa falönö, Elisabei nija a wa̦ fayoluma. ⁴¹ María a wa̦ fa ji̦lilänö, Elisabei bä ijilubö e lä didibono wei e i̦cali qui̦blaliyoma. Ö̦jö däjä, Yai Bada tä Bufinö Elisabei a fa jödödöblalunö, ⁴² a wa̦ bädaliyoma. María nija a wa̦ i̦cali faö ja, abinaja e cuma. —Suwä bluca bämacö ma cule, Yai Bada tänö cafä wa bayelibobä wa yai. Ijilufä wa nia lä tablaö wei a ma cui, ö̦jö a nia ca̦i bayelibou fe balojoo. ⁴³ Iba Badayä bei bä nöö wa e lä cuinö, camiyä wale fe walobä ya mlai ma cui, ¡wale fe nofi waloo jäa dodijia yaiboyoi! ⁴⁴ Bäfä a̦ lä ji̦liaö wei däjä, ijiluyä ya lä didibole a bufi doblalou ja, i̦cali a malä qui̦blalufe. ⁴⁵ Bada wa wa̦ bejedi bufii lä showadaono wei wa lä cui, Yai Bada tänö wa nia yai bayelibou —Elisabei a cuma. ⁴⁶ Ö̦jö däjä, María a wa̦ bädaliyoma. Abinaja a cuma. —Bei ya bufi cadidiwänö Bada ya nofi doablaö. ⁴⁷ Yai Bada nija bejedi lä ya bufi doblalou, wale lä jucäaö wei a lä cui nija. ⁴⁸ Ö̦jö a nosie juamobä ya e lä cui, wale nö bayeliblabö ya ma mlai, wale bayeliblaö. Fei däjä ma cui, obi ma cui, bä bälöaö lä nodiaö wei bä blucanö, wale a̦fa nia wayoaö nodiablalouje. “Yai Bada tänö ö̦jö a nofi yai bayelibou dodijiono wei”, bä nia cuu. ⁴⁹ A yai lä lojode weinö wale bayeliblaö fe malä balojoono wei. Yami a yaia. ⁵⁰ A nö quili lä taö wejei, showadi cama ebä nofi ojodabou nodiablalou. ⁵¹ Cama a lojodenö a nö wa̦lojaö. ’“Camiyä cä yai”, bä nofi lä tamamou wei, Yai Bada tänö bä yashublaö shelelou. ⁵² Bada bä yai bälöo lä dodijio wei bä ma waii wei ma cui, bä dodijidawä jömöo lä mlai bä nofi shino wawädowä tabou. ⁵³ Bä lä ofäö wei, dodijidawä tä ja bä ma dodijamaö däjä ma cui, bä nö lä madofibö wei bä lä cui, ö̦jö bä bloque shömaö co̦o. ⁵⁴ Isaeli bäma ecö lä cui, Yai Bada tänö bämalecö bayeliblaö, a nosie juamobä bäma ecö lä cui. ’A wa̦fa wäyämou lä balöono wei, tä a̦ nofi jaducubolanö bämalecö nofi ojodabou, ⁵⁵ bämacö nö badabö nija a wa̦ nö wäo lä balöono weinaja showawä. Ablaamö a ma cui, cama nodiwä bä ma cui, bä nofi nia bluca ojodabou nodiablalou showaoma —María a cuma. ⁵⁶ Elisabei nijamö Maríanö belibo jai 3 bä fa famalönö, a co̦a co̦layoma. ⁵⁷ Bei. Elisabeinö bä ijilubö e tablabä etä fa cublalunö, bä ijilubö wa̦lo e tablalema. ⁵⁸ Cama nija bä bälöo lä ajedeono wei bä ma cuinö, cama ebä mashi ma cuinö, tä a̦ ji̦lilemaje. Bada tänö a nofi ojodabou fe lä balojoono wei tä a̦ fa ji̦liläjenö, cama bä bufi ca̦i doblalou mö feduoma. ⁵⁹ Ijilu a wainö, 8 tä mö didi fa tablamalönö, a mosi sicö joyabeje, bada bä waloquema. Ö̦jö däjä, bä fö̦ö e nija Sacalia a wa̦fa mini ma yädäamano wejei ma cui, ⁶⁰ bä nöö e a̦ läoma. —Ma —a cuma—. Juan a wa̦fa nia cuo. ⁶¹ Cama nija abinaja bä cuma. —Juan mlai —bä cuma—. Afä bä mashi nija Juan ai a wa̦fa cua malä mlai. ⁶² Ö̦jö däjä bä fö̦ö e nija, bei bä imicönö bä ijilubö e a̦fa wa̦lii nomöjöomaje. ⁶³ A wa̦ oniabä, bä fö̦ö enö etä nacama. Etä fa jöböcöjenö, a wa̦fa oniquema. “Juan a wa̦fa cua”, tä oni fa möjenö, bä bufi bluca shädayaimoma. ⁶⁴ Ö̦jö lä däjä, bä fö̦ö e aca jayublou fa co̦lonö, a wa̦ jaba faö ja, Yai Bada a nofi doablama. ⁶⁵ ¿Ö̦jö tawä? Bä bälöo lä ajedeono wei bä quililaliyoma. Judea tä ulifi lä jefubö wei jamö, bä bluca lä bälöblai bä lä cuinö, ö̦jö tä a̦fa bluca wayoamaje. ⁶⁶ Tä a̦ lä ji̦liano wejei, bä bufi bluca dayäo fe balojooma. Abinaja bä cuma. —¿Wedinaja ei a nia ijilu cuaaö? —bä cuma. Bada tänö a bayelibou malä wawädoono wei. ⁶⁷ Ö̦jö ijilu bä fö̦ö e a̦ falayoma, Sacalia a lä cui. Yai Bada tä Bufinö a fa jödödöblalunö, Yai Bada a wa̦no wäyäö ja, abinaja a cudaliyoma. ⁶⁸ —Isaeli bäma ecö nija a Bada lä bufiblamou wei a waloqueyoluma, cama bäma ecö nowa co̦amabä. ¡Bäma a nofi da doabla, ö̦jö lä! ⁶⁹ Bämalecö jucäabä, a nö lä wa̦lojaö wei a shömölema. Yai Bada a nosie lä juano wei a David lä cui, ö̦jö a nodiwä waiquiwä. ⁷⁰ Yedu jamö ma cui, cama a wa̦no wäyämobä ebä lä yaileno wei, inaja cama bä cuu balöo showadaoma, Yai Bada a wa̦no wäyälewä bä lä cui. ⁷¹ ’A nia lä shömano wei a lä cuinö, bä nö lä nabämou wei bä nija, bämalecö nia jo̦wa jucäaö co̦oma —a cuma—. Bämalecö nofi lä wa̦libou wejei bä bluca nija, bämalecö nia jo̦wa ca̦i nowamaö showaoma. ⁷² Bämacö nö badabö nofi nia lä ojodabono wei tä ja, Yai Bada a yami lä yaile a wa̦ nö wäa balöquema. A wa̦ nö lä wäqueno wei tä a̦ nofi ca̦i jaducubou showawä. ⁷³ ’¿Ö̦jö tawä? —a cuma—. Nö badabö Ablaamö nija a wa̦fa wäyäö lä balöono wei däjä, a wa̦ nö wäo wawädoo showaoma. ⁷⁴ Bämalecö nia jo̦wa bayeliblama. Bä nö lä nabämou wei bä nija bämalecö nia bayeliblaö läoma, quilii mlai ja, cama Yai Bada bäma a nosie yai juaabä. ⁷⁵ Bämacö demi cuo showao däjä, cama bäma ecö lä yaile, bämacö showadi dodijadibä. Cama nija bämacö yai cadidobä. ⁷⁶ ’U̦asi —a cuma—. Cafä ijiluyä wa lä cui, Yai Bada tä Bada lä ayai a wa̦no wäyälewä wa wa̦fa nia jilabouje. Bada tä nia lä juu wei jamö, wa wa̦no nia taö balöablalou, a wa̦ yai ji̦liaö dodijidaobeje. ⁷⁷ Yai Bada ebä nia lä jucäamou wei tä ja, wa bä bufi nia jaducublamaö balöo. Täbä doblou lä mlai tä ma cule, tä nowa nia lä mladamaö wei tä ja, wa bä nia yömölaö. ⁷⁸ Yai Bada bäma a lä bufiblaö wei a lä cuinö, dodijidawä bämalecö nofi malä ojodabou wei. Bämalecö nofi ojodabou yalo, fedu jamö culanö tä shi̦i lä wacacai tä nia waloyoluu. ⁷⁹ Tä mö lä didi wei jamö bä lä bälöle, bä mini lä nomaö wei bä lä cui, ö̦jö bä nija tä mö nia wacacablamaö. Bämacö bufi yanöcöwä ca̦i bälöobä bämalecö nia lulubou —Sacalia a cuma. ⁸⁰ ¿Ö̦jö tawä? Ö̦jö ijilu Juan a lä cui, a yawälayoma. A bufi lojodoblaliyoma. Isaeli ebä nija a wa̦ wawäblou showaa mlai, ulifi bloque jamö a cuo balöoma.

¹ Juan a oshe cuo showao däjä, Lomateli Aucuto a bada nosiemoma, cama bluca ebä lä bälöblai ebä a̦fa oniblamabeje. ² ¿Ö̦jö tawä? Bä a̦fa jaba onimamou balöa mlai ja, ö̦jö lä däjä bä a̦fa jaba onimamoma, Silia jamö Silenio a bada lä läono wei däjä. ³ Bä a̦fa bluca onimamobä, bluca bä lä bälöblai bä lä cui, cama bä nö badabö lä bälöblamono wei jamö, bä jublou cuaama. ⁴ José a ma cui, a aa mö fedulayoma. Calilea tä ulifi jamö, Nasaleteli bä lä bälöle jamö a culanö, Judea tä ulifi jamö a alayoma. David nodiwä a li cuoma yalo, Belenateli bä lä bälöle jamö a juu cadidioma, David a jaba lä bälöono wei jamö. ⁵ A nia lä däano wei a María sho cäcöbö juma, cäcöbö a̦fa oni taamamobä. ¿Ö̦jö tawä? María a shöbönaböoma. ⁶ Ö̦jamö lä cäcöbö cuo däjä, bä ijilubö e tablabä a ninimoma. ⁷ Fama bä lä cublaaö wei tä yafi mashiquio fa dicoonö, yalo bä yanobö jamö cäcöbö cublaquema. Ö̦jamö lä ijilubö jaba e fa tablalönö, camishi acadafu cäcö ja, a bacojeboma. A fa bacojelänö, yalo bä niibö lä bao wei tä ja, a wai didiquema. ⁸ Ö̦jamö a bölösö blao lä ajedeono wei jamö, ai bänö oweja bä ca̦i cuo fe jalumaje, bä nowamabeje. ⁹ Bada tänö a̦jele e fa shömöludunö, ö̦jö bä nija a fa bädalunö, Bada etä shi̦i fe fa̦yoblaliyoma. ¡Bejedi lä bä quilia dodijilaliyoma! ¹⁰ Ö̦jö bä nija abinaja a̦jele e cudaliyoma. —Bä quili dijä. ¿Ö̦jö tawä? Ei dodijidawä ya tä a̦ wäyäyolubä, ya itolayou lä cufe, wamacö bufi doblalobä. Cafä wamacö ma cui, bä bluca lä bälöblai bä ma cui, wamacö bufi bluca doblalou fe balojoobä. ¹¹ ¿Ö̦jö tawä? Wamacö jucäamobä, bada tä David a jaba lä bälöono wei jamö, a oshe wawäblaliyo lä cufe. Yai Bada tänö a shömabä a lä yaileno wei, ö̦jö a Bada. ¹² Wamale a̦ bejedi möbä, ei ya wa̦. Camishi acadafu cäcö ja, wama a nia ijilu bacojea dablaö. Yalo bä niibö lä bale jamö, a wai didia —e cuma. ¹³ Ö̦jö däjä, yedu a̦jele a lä cule jamö ai bä ca̦i a̦jele bluca wawälaliyoma. Yai Bada a nofi doaöje ja, abinaja bä cuma. ¹⁴ —Fedu fedole jamö Yai Bada a lä bälöladi, ¡a nofi shino yai doablamobä! Bita jamö a bufi lä doblamabolajei bä lä cui, ¡dodijidawä bä bufi yanöcöwä ca̦i bälöblamou cuaabä! —bä a̦jele cuma. ¹⁵ Ö̦jö däjä, a̦jele bänö bä daa fa co̦cufälöjenö, fedu jamö bä co̦a co̦layoma. Oweja bä ca̦i lä cuono wejei, abinaja ö̦jö bä nowa tayou juoma. —¡Bei, bei! Belena jamö bämacö juu da showadao, tä jo̦wa lä cublalufe bäma tä möblaabä, Bada tänö tä a̦fa wäyämaö lä bufino wei —bä nowa tayoma. ¹⁶ Bä shi jalimolanö, bä lobe aa fa showadalunö, María, José sho cäcöbö lä cule jamö, bä fa waloicunö, cäcöbö dalalemaje. Yalo bä niibö lä bale jamö, ijilu a didia ca̦i daa mö fedua showalalemaje. ¹⁷ Ijilu a fa dalalöjenö, cama bä nija ijilu a wa̦fa lä wäyäno wei tä a̦ ja, bä bluca yömölaö showadaomaje. ¹⁸ ¿Ö̦jö tawä? Oweja bä ca̦i lä cuono wejei bä a̦ ja, bä bufi bluca shädayaimoma. ¹⁹ Tä bluca lä cublaliyono wei, Maríanö tä nofi jaducubou showalanö a bufi dayäodima. ²⁰ Ö̦jö däjä, oweja bä ca̦i lä cuono wejei bä lä cuinö, Yai Bada a wa̦fa dodijaö taö showajei, bä co̦a co̦layoma. Tä lä möno wejei tä ma cui ja, tä a̦ lä ji̦lileno wejei tä a̦ ma cui ja, Yai Bada a wa̦fa doblao tamaje. Bä lä yömölamono weinaja, tä bejedi cublaliyoma yalo, a nofi doablafälömaje. ²¹ Ö̦jö däjä, 8 tä mö didi fa cublalunö, ijilu mosi sicö joyalemaje. Mosi sicö fa joyalöjenö, Jesús a wa̦fa ijilu jilaquemaje, bä nöö e shöbönaböo showao mlao däjä, a̦jele anö a wa̦fa jilaamaö lä bufino weinaja showawä. ²² Bei. María, José sho cäcöbö dodijidablou co̦obä etä cublaliyoma, Moisesi tä a̦ oni jamö täbä taamaö lä bufino weinaja showawä. Ö̦jö etä cublou däjä, Yai Bada nija bä ijilubö e mömaböbä, Jelusale jamö e ca̦i jubölayoma, Yai Bada etä yafi jamö, ²³ Bada etä a̦ oni lä cuu weinaja showawä. Abinaja tä a̦ cuu. Bä ijilubö cublou lä balöo wei bä lä cui, Yai Bada ebä cuobä wama bä nia yaimabou. Einaja tä a̦ oni cuu. ²⁴ Yai Bada nija yalo cäcöbö nia ca̦i dodoboböö showaoma, Bada etä a̦ oni lä cuu weinaja showawä. Abinaja tä a̦ cuu. Joledo cäcöbö ma cui ja, wacocoa calaba cäcöbö ma cui ja, Yai Bada tä dobäö daoje. Einaja tä a̦ oni cuu. ²⁵ Bei. Jelusale jamö Simeoni a wa̦fa lä cuono wei a bälöoma. Showadi a dodijama. A bejedimou bufi doblaoma. Yai Bada tänö Isaeli nodiwä ebä bufi nia jo̦wa lojodoaamaö lä co̦oyoluu wei tä nö daboma. ¿Ö̦jö tawä? Cama nija Yai Bada tä Bufi yanöcöoma. ²⁶ Yai Bada tä Bufinö a yömölaa waiquilema cudeenö, a nö daoma. A nomaö showao mlai ja, Bada tänö a shömabä a lä yaileno wei a nia jo̦wa möö balöoma. ²⁷ Bei. Yai Bada tä Bufinö a fa shömanö, Yai Bada etä yafi jamö Simeoni a falayoma. Ö̦jamö a cuo däjä, bä ijilubö Jesús a ca̦i waloböquema, Moisesi tä a̦ oni jamö, ijilu bä taamaö lä bufino weinaja a taamaböbä. ²⁸ Ijilu a fa dalalönö, a dälema. A maobolanö Yai Bada a wa̦fa dodijaö tama. Abinaja a cuma. ²⁹ —Bada tä. Cafä wa nosie juamobä ya lä cui, fei däjä bufi yanöcöwä wale nia co̦aö. Wa wa̦ nö lä wäbeno wei, tä bejedi cublaliyo lä cufe. ³⁰ Yamalecö nia lä jucäaö wei, camiyä bei ya mamocunö ya dalalei lä cufe. ³¹ Täbä bluca jucäabä wa lä yaileno wei, bluca bä lä bälöblai bä ma cui nija, wa tä wawäblamaö lä cule. ³² Judio bä lä mlai bä bufi jaducublobä, etä shi̦i nia wacacablou. Isaeli nodiwä, fei däjä yamacö nofi nia yai doablamou —Simeoni a cuma. ³³ Bä ijilubö Jesús e a̦fa lä wayoamou wei ja, José, María sho cäcöbö bufi shädayaimoma. ³⁴ Ö̦jö däjä, Yai Bada nija, Simeoni a lä cuinö cäcöbö bayeliblamaö bufima. Jesús bä nöö nija a wa̦ ca̦i fama. Abinaja María a nowa tama. —Ei ijilu a lä cui nija, Isaeli nodiwä bä bluca wabamobä a waiquiwä. A lä waii wejei, cama bä nia bluca waimamou. A wa̦ lä ji̦liaö wejei, dodijidawä bä nia bluca taamabou. Yai Bada a mayo dablabeje, a nia ma cuo wei ma cui, a wa̦fa nia taöje, ³⁵ bä bufi bluca cuu lä ja̦too wei tä wawäblobä. Cafä bä nöö wa e ma cui, jai shocobi anö wa balöcö diquibalemaje, wa bufi nö nia bleaaö cuaaö, wajä wajä bänö —María a nowa tama. ³⁶ Ö̦jamö lä Yai Bada a wa̦no lä wäyäno wei a ca̦i suwä cuoma, Ana a wa̦fa lä cuono wei. Aselo nodiwä Fanueli e lä cui, ö̦jö bä tää e cuoma. A suwäbadaoma. Bä fe̦yalobö sho cäcöbö cuo däjä, lasha 7 a faböa balömalema. ³⁷ Ö̦jö däjä bä fe̦yalobö e bufi fa mlaicunö, yami a cudalou fa nomöjöonö, a suwäbadao dodijioma. Lasha 84 a faa waiquimalema. Yai Bada etä yafi jamö showadi a cudioma. A möfe bolanö Yai Bada a wa̦fa Bada doblao tama. Didi däjä ma cui, jalu däjä ma cui, a iyaö yabäcou mlai ja, a nö bayeli nacaodima. ³⁸ Ö̦jö a lä cui, María nija, José nija a suwä icua fa showadaicunö, Yai Bada nija a bufi a̦fa doblalou wäyämoma. Ö̦jö däjä, Yai Bada nija Jelusaleteli bä bayeliblamobä bä nö bluca lä daono wei bä lä cui bä nija, ijilu Jesús a wa̦fa wäyädima. ³⁹ Bada tä a̦ oni jamö, tä tamaö lä bufino weinaja tä taa fa jödödöblabölönö, Calilea jamö bä ijilubö a ca̦i co̦böa co̦layoma, cama Nasaleteli bä nijamö. ⁴⁰ Ijilu a lojode badafälöma. Yai Bada tänö a bufi jaducumabou dodijioma. Ö̦jö nija Yai Bada a bufi fa doblalonö, showadi a bayeliboma. ⁴¹ Yai Bada a waiteli lä jayuano wei a nofi co̦camoaö co̦obeje jamö, José, María sho cäcöbö showadi jublaadima, Jelusale jamö. ⁴² Jesúsnö lasha 12 a faa fa waiquimalönö, fiya oshe a cuo däjä, ö̦jö sho bä bluca juu co̦ofälöma, showadi bä lä cuaano weinaja showawä. ⁴³ Bä iyaö fa waiconö, bä co̦ofälöbä jamö Jesús a jäblou fa ja̦tolonö, Jelusale jamö a jäquema. José, María sho cäcöbö mojoduoma. ⁴⁴ “Ai bä juu mö lä fedule jamö a nocaa”, cäcöbö bufi fa cunö, cäcöbö shi jalimonomi. Cäcöbö juu fe lä weyaaö wei, cama mashi ebä nijamö ma cui, cama nofi ebä nijamö ma cui, a dayäaböma ma cui, ⁴⁵ a dablonomi. A dablou fa mlacunö, Jelusale jamö cäcöbö mö yabaö co̦lanö, a dayäböö cuaaö co̦ofälöma. ⁴⁶ Ö̦jamö lä a dayäaböö showao däjä, 3 tä mö didi fa tablamabölönö, Yai Bada etä yafi jamö ya̦cumö a daböa co̦lalema. Yai Bada etä a̦ ja täbä lä damaö wejei bä nija a coyocooma. Bä a̦ ji̦liama, bä ca̦i wa̦lima. ⁴⁷ Jesús a wa̦ lä ji̦liano wejei bä bufi bluca shädayaimoma. A bufi lä jaducuono wei tä ma cui ja, a wa̦ juo lä moyawäono wei tä ma cui ja, bä bufi shädayaimou dodijioma. ⁴⁸ ¿Ö̦jö tawä? Ö̦jamö lä a dablaböö co̦o däjä, cäcöbö bufi ca̦i shädayaimoma. Abinaja bä nöö e cuma. —U̦asi. ¿Wedi tabä wafälecö bufi nö li bleaamaö dicooma? Camiyä ya ma cui, faafä a ma cui, yafäcö bufi jalujolanö bäfä dayäö nö dedeaö waiquiwä. ⁴⁹ Abinaja cäcöbö nowa tama. —¿Wedi tabä Fayä e yafi jamö wafäcö juu cadidou showadao mlai, wafäle li dayäböö cuaaö dicooma? —cäcöbö nowa tama. ⁵⁰ Ö̦jö ma cui, cäcöbö nowa lä tano wei tä ja, cäcöbö bufi jaducublonomi. ⁵¹ Ö̦jö däjä, cama ecöbö nijamö a nocaa co̦layofälöma. Nasale jamö bä co̦a fa co̦lunö, dodijidawä cäcöbö a̦ juama. Tä bluca lä cublaliyono wei, bä nöö enö tä nofi jaducubou showalanö a bufi dayäodima. ⁵² Jesús a fa yawäfälönö, a bufi moyawäafälöma. Yai Bada a bufi cai doblamabou dodijioma, yanowamö bä cai.

¹ Lomateli Dibelio a bada läo showao däjä, lasha 15 a faa fa waiquimalönö, cama ebä lämabou mö lä feduono wei, abinaja ebä a̦fa cublamoma. Judea jamö, Bo̦sio Bilado a lämaboma. Calilea jamö, Elode a lämabou mö feduoma. Idulea jamö, Elode a li mashi lämabou mö feduo showaoma, Daconide jamö ca̦i. Ö̦jö Felipe a wa̦fa cuoma. Abilinia jamö, Lisania a lämabou mö feduoma. ² Jelusale jamö, nofi bäyäalewä Anasi, Caifasi sho cäcöbö bada läoma, Yai Bada etä yafi jamö. Ö̦jö bä bada cublamou cuaaö däjä, ulifi bloque jamö Sacalia bä ijilubö Juan a cuobä jamö, cama nija Yai Bada a wa̦ bädaliyoma. ³ Ö̦jö cudeenö, Yai Bada etä a̦ ja, Jodana u jamö bä bluca lä bälöblai bä yömölaö cuaama. Wa̦lidiwä tä ja bä bufi lädamaö bufima, cama nija bä fe ojoblamobä. Bä doblou lä mlai tä ma cule ma cui, Yai Bada tänö tä nowa mladamabä. ⁴ Juan a cua showao mlao däjä, Yai Bada a wa̦no wäyälewä Isaia a lä cuinö a wa̦fa wäyäö balöo showaoma. Abinaja tä a̦ cuu. Ulifi bloque jamö bä yömölaö ja, a wa̦ nia lojodoaö. “Bada tä juu lä cuimi!”, a nia cuu. Abinaja bä nowa nia taö, a wa̦ Bada ji̦liaö cadidio showadaobeje. “A nia lä juu wei jamö, bei wama e yo wawämaö fa cuaaimadunö, e yo shaliliblaö da balöloje”, bä nowa nia taö. ⁵ “Tä fe yalö lä möamoblai bä nia quefuo. Jefu bä bluca lä cublai, bä fe nia yalöblamou. Yo cabamou lä a̦loqui wei yo nia dodijidablou. ⁶ Bä bälöblawä lä yaiblai bä bluca lä cuinö, Yai Bada tänö täbä jucäaö bufi lä doblao wei tä nia dablaöje.” ¿Ö̦jö tawä? Einaja Juannö bä nowa nia jo̦wa tama. ⁷ Juan nija bä fe ojoblamobä, bä bluca co̦cablamoyoluma. A wa̦ lojodoaö ja, abinaja Juannö bä nowa tama. —¡Olu bä wayu lä culenaja, wamacö lä cui! Wamacö jolemou. Wamacö fe ojoblamou lä buo wei tänö, ¿wamacö nia nowamamou daanö? Ma. Yai Bada a ishou däjä, wamacö nia nowamamoimi. ⁸ Wamacö bufi lädou dablamobä, bä bejedimou da wawädoo, ö̦jö lä. “Ablaamö nodiwä yama ecö li cudeenö, yamacö doblou fe yadio weicätä”, bä nofi ca̦i tamamou dicoo dijä. Ö̦jö tä nowa cuami. Bämacö nowa malä tale. Yai Bada tänö Ablaamö ebä nodiwä tabou bufi doblao fa cunoja, fei maa mabä ma cui ja, bä nö tablamalebö wei. ⁹ ’¿Ö̦jö tawä? —a cuma—. Yai Bada a nia ishoimi daanö? Fii fibä nasöcö jamö, a fa̦yocola yalejebou waiquia lä cule. Ö̦jö cudeenö, nii dodijidawä bä lalou lä mlai fibä nia diyämamou. Cowa wacö jamö fibä nia shäyäblamou —a cuma. ¹⁰ Bä bluca lä co̦camono wei, abinaja bä cuma. —¿Wedinaja yamacö li bejedimou cuobä, ö̦jö lä? ¹¹ Juan abinaja a cuma. —Ja̦o. Ola jamö cäcö lä bolacabolenö, cäcö tabou lä mlai nija cäcö mashi jöböabä, ö̦jö lä. Nii bä lä tabole a ma cuinö, inaja showawä —a cuma. ¹² Lomateli bada bä befi bä blada lä doaö wejei bä ma cui, ö̦jö bä fe ca̦i ojoblamobä, bä waloquema. Abinaja Juan nija bä cuma. —Tä a̦ wäyäle. ¿Wedinaja camiyä yamacö li cuaabä? ¹³ Abinaja bä nowa tama. —Blada bä däamaö bufii lä cuo wejeinaja, bä nacaö da cadidioje, ai wama bä yädäblamaö ja̦too mlai ja —bä nowa tama. ¹⁴ Sodado bä ma cuinö, Juan a ca̦i wa̦lii mö feduomaje. —¿Wedinaja camiyä yamacö li cuaaö mö feduobä? Abinaja Juannö bä nowa tama. —Ai bä nija wamacö waitelimolanö, blada bä doaö fe yadiblo dijejä. Abinaja ca̦i. “Wale dobäimi ja, bada bä nija bäfä a̦fa nia wäyäö”, bä cu dijä. Wamacö nowa ojode lä co̦amaö wejei bä nija bä ca̦i nacömo dijä —bä nowa tama. ¹⁵ Bei. Yai Bada tänö a shömabä a lä yaileno wei a lä cui, bä shi jalimolanö a nö dabomaje. Juan a ma cui nija bä mölama. “Ö̦jö a ja̦towä waiquiwä daanö”, bä bufi bluca cuma. ¹⁶ Ö̦jö cudeenö, Juan abinaja a cuu mö feduoma. —Ma. Camiyänö bämacö fe ojoblaö däjä, mau u ja bämacö jödödöblamaö. Inaja camiyä ya cuaaö ma balöo wei ma cui, a nö yai lä wa̦lojaö wei a nia waloo nomöjöoyoluu. Ö̦jö a shino yai doblaa ayaa cudeenö, ya bayeliblaö bädaobä tä ma cui ja, ya nö quilibö wei. Bei mamicö lä didio wei etäcö nata bädawä ma cui, ya etäcö nö cushaö quilibö wei. Ö̦jö a lä cuinö, bejedi lä wamacö nia yai jödödöblaö. Mau unö mlai, Yai Bada a Bufinö wamacö nia jödödöblaö. Cowa wacönö täbä ca̦i nia jödödöblaö. ¹⁷ ’Nii bä tamou däjä, mobä yaiblamou lä culenaja, a nia cuaaö —a cuma—. Mobä fa yaiblalönö, tä ulifi aublaö co̦obä. ¿Ö̦jö tawä? Shode walalawä fe ca̦i bada juu waiquia lä cuimi, tesibä fa joyalönö, mobä feiblamabä. Mobä nia lä cuo wei jamö, mobä taablabä. Ö̦jö ma cui, cowa wacö ludalou dao lä mlai jamö, bei tesibä nia yablaö —a cuu nö quiliama. ¹⁸ Inaja Juannö tä a̦ bluca wäyäö lojodoaö fa cuaanö, dodijidawä tä a̦ ja bä yömölama. ¹⁹ Ö̦jö ma cui, bada tä Elode a wasöma yalo, etä wa̦lidiblaliyoma. Bada anö cama mashi bei suwäbö e lälema, Elodia a wa̦fa suwä lä cui. Ö̦jö cudeenö Juannö a wasöma. Ö̦jö a nowa suwä shino ja mlai, a lä cuaanö wei tä nowa ca̦i bluca ja, a wasöma. ²⁰ ¿Ö̦jö tawä? Bada a doblonomi ma waiquii ma cui, ö̦jö lä däjä a yai doblonomi fe balojowä. Juan a fa juwämalönö, a fe lamaquema. ²¹ Juan a fe lao showao mlao däjä, bluca bä fe lä ojomano wei däjä, Jesús a ma cui a fe ca̦i ojoblamolayoma. A fe fa ojoblamolunö, Yai Bada nija a wa̦ faö showao däjä, judu mösö ca jolablaliyoma. Mösö ca fa jolablalunö, ²² Yai Bada tä Bufi, jai joledo a cuwä, Jesús nija a itolayoyoluma. Ö̦jö däjä, fedu jamö culanö a wa̦ bädaliyoma. —Ijiluyä bäfä nofimaö lä dodijile, cafä wa. Cafä nija ya bufi yai doblalou dodijia —a cuma. ²³ Jesúsnö lasha jai 30 a faa fa waiquimalönö, Yai Bada etä a̦ ja bä yömölabä, a wawälayoma. ¿Ö̦jö tawä? Jesús a lä cui, “José bä ijilubö e”, a nofi tabomaje. Ö̦jö José bä fö̦ö, Eli e a̦fa cuoma. ²⁴ Eli bä fö̦ö, Madada e a̦fa cuoma. Madada bä fö̦ö, Lewi e a̦fa cuoma. Lewi bä fö̦ö, Mequi e a̦fa cuoma. Mequi bä fö̦ö, Jana e a̦fa cuoma. Jana bä fö̦ö, José e a̦fa cuoma. ²⁵ José bä fö̦ö, Madadia e a̦fa cuoma. Madadia bä fö̦ö, Amosi e a̦fa cuoma. Amosi bä fö̦ö, Naomo e a̦fa cuoma. Naomo bä fö̦ö, Esili e a̦fa cuoma. Esili bä fö̦ö, Nacai e a̦fa cuoma. ²⁶ Nacai bä fö̦ö, Maada e a̦fa cuoma. Maada bä fö̦ö, Madadia e a̦fa cuoma. Madadia bä fö̦ö, Semei e a̦fa cuoma. Semei bä fö̦ö, Joseco e a̦fa cuoma. Joseco bä fö̦ö, Judawä e a̦fa cuoma. ²⁷ Judawä bä fö̦ö, Joanano e a̦fa cuoma. Joanano bä fö̦ö, Lesa e a̦fa cuoma. Lesa bä fö̦ö, Solobabele e a̦fa cuoma. Solobabele bä fö̦ö, Saladiele e a̦fa cuoma. Saladiele bä fö̦ö, Neli e a̦fa cuoma. ²⁸ Neli bä fö̦ö, Mequi e a̦fa cuoma. Mequi bä fö̦ö, Adi e a̦fa cuoma. Adi bä fö̦ö, Cosamö e a̦fa cuoma. Cosamö bä fö̦ö, Emadamo e a̦fa cuoma. Emadamo bä fö̦ö, Ele e a̦fa cuoma. ²⁹ Ele bä fö̦ö, Jesús e a̦fa cuoma. Jesús bä fö̦ö, Elieseli e a̦fa cuoma. Elieseli bä fö̦ö, Jolimi e a̦fa cuoma. Jolimi bä fö̦ö, Madada e a̦fa cuoma. Madada bä fö̦ö, Lewi e a̦fa cuoma. ³⁰ Lewi bä fö̦ö, Simeoni e a̦fa cuoma. Simeoni bä fö̦ö, Judawä e a̦fa cuoma. Judawä bä fö̦ö, José e a̦fa cuoma. José bä fö̦ö, Jonamö e a̦fa cuoma. Jonamö bä fö̦ö, Eliaquimi e a̦fa cuoma. ³¹ Eliaquimi bä fö̦ö, Melea e a̦fa cuoma. Melea bä fö̦ö, Mena e a̦fa cuoma. Mena bä fö̦ö, Madada e a̦fa cuoma. Madada bä fö̦ö, Nadana e a̦fa cuoma. Nadana bä fö̦ö, David e a̦fa cuoma. ³² David bä fö̦ö, Isai e a̦fa cuoma. Isai bä fö̦ö, Obede e a̦fa cuoma. Obede bä fö̦ö, Booso e a̦fa cuoma. Booso bä fö̦ö, Sala e a̦fa cuoma. Sala bä fö̦ö, Naasono e a̦fa cuoma. ³³ Naasono bä fö̦ö, Aminadaba e a̦fa cuoma. Aminadaba bä fö̦ö, Amino e a̦fa cuoma. Amino bä fö̦ö, Ani e a̦fa cuoma. Ani bä fö̦ö, Esomo e a̦fa cuoma. Esomo bä fö̦ö, Fale e a̦fa cuoma. Fale bä fö̦ö, Judawä e a̦fa cuoma. ³⁴ Judawä bä fö̦ö, Jacobo e a̦fa cuoma. Jacobo bä fö̦ö, Isaacö e a̦fa cuoma. Isaacö bä fö̦ö, Ablaamö e a̦fa cuoma. Ablaamö bä fö̦ö, Dalei e a̦fa cuoma. Dalei bä fö̦ö, Nacolo e a̦fa cuoma. ³⁵ Nacolo bä fö̦ö, Selucu e a̦fa cuoma. Selucu bä fö̦ö, Leu e a̦fa cuoma. Leu bä fö̦ö, Beleque e a̦fa cuoma. Beleque bä fö̦ö, Ebelo e a̦fa cuoma. Ebelo bä fö̦ö, Sala e a̦fa cuoma. ³⁶ Sala bä fö̦ö, Cainana e a̦fa cuoma. Cainana bä fö̦ö, Afasada e a̦fa cuoma. Afasada bä fö̦ö, Semö e a̦fa cuoma. Semö bä fö̦ö, Noewä e a̦fa cuoma. Noewä bä fö̦ö, Lameco e a̦fa cuoma. ³⁷ Lameco bä fö̦ö, Medusali e a̦fa cuoma. Medusali bä fö̦ö, Enocö e a̦fa cuoma. Enocö bä fö̦ö, Jalede e a̦fa cuoma. Jalede bä fö̦ö, Malaleli e a̦fa cuoma. Malaleli bä fö̦ö, Cainana e a̦fa cuoma. ³⁸ Cainana bä fö̦ö, Enosi e a̦fa cuoma. Enosi bä fö̦ö, Sede e a̦fa cuoma. Sede bä fö̦ö, Adana e a̦fa cuoma. Adana bä fö̦ö, Yai Bada a cuoma.

¹ Jodana u jamö Jesús a culanö, a waloa co̦quema. Yai Bada tä Bufinö a jödödöbou ja, ulifi bloque jamö a lulubou cuaama. ² Ö̦jamö, ulifi bloque jamö 40 tä fe didi cuaaö däjä, fecula badanö a yabäcäblalama. Ö̦jamö a cudio däjä, a iyaö fa mlacunö, 40 tä mö didi lä cublou wei däjä, a ofäö dodijioma. ³ Jesús nija abinaja fecula bada a cuma. —Yai Bada wa Ijilubö waiquiwä ja, fei maa ma da nosiema, nii a cublobä. ⁴ Ö̦jö däjä, abinaja Jesús a cuu mö feduoma. —Ma. Abinaja Yai Bada tä a̦ oni cuu. Nii bä ma waö wejei ma cui, ö̦jö tä bädawänö täbä nia demi cudiomi. ’Einaja tä a̦ cuu —Jesús a cuma. ⁵ Ö̦jö däjä, tä ösöwä lä dodijii jamö, fecula badanö Jesús a bälaquedayoma. Ö̦jamö cäcöbö culanö, Jesús nija, bita jamö täbä jödödöwä bälöblawä lä yaiblai täbä jömaö cuaama. ⁶ Abinaja a nowa tama. —Ei täbä bluca lä bälöbe täbä nija wa bada cuobä, bäfä nia lä tablamaö wei ya. Etäbä nowa lä bluca wei, cafä nija ya täbä ca̦i jöböabä. Iba ya bä bluca malä däleno wei. Ya dobäö bufi lä doblao wei a lä cui nija ya bä jöböabä, iba bä malä cui. ⁷ ¿Ö̦jö tawä? Camiyä nija wa möfe bolanö wale a̦fa bada doblao taö ja, afä täbä nia bluca cublou —a nowa tama. ⁸ Ö̦jö däjä, Jesús abinaja a cuu mö feduoma. —Ma. Abinaja tä a̦ oni cuu. Cafä wamacö nija Yai Bada ya lä bufiblamou wei ya. Wamacö möfe bolanö, camiyä Bada ya lä cui wamale a̦fa nia shino Bada doblao taö. Camiyä wamale a̦ nia shino yai juaö. ’Einaja tä a̦ oni cuu —a Jesús cuma. ⁹ Ö̦jö däjä, fecula bada a lä cuinö, ö̦jamö culanö Jelusale jamö Jesús a lulua taa majölefälöma. Yai Bada etä yafi feyaca jamö a fa ublamabajalunö, abinaja a nowa tama. —Bei. Yai Bada wa Ijilubö ja lä, eja culanö a da quelufälö. ¹⁰ Abinaja tä a̦ oni malä cuu wei. Cafä nija a̦jele etäbä nia läamaö, wa nowamabeje. ’Einaja tä a̦ oni cuu. ¹¹ Abinaja ca̦i. Dodijidawä wa nia ya̦caaöje, maa mabä ja wa mamicö shäo mlaobä. ’Einaja tä a̦ ca̦i cuu —fecula badanö a nowa tama. ¹² Jesús abinaja e cuu mö feduoma. —Abinaja tä a̦ oni ca̦i cuu. Cafä wamacö nija Yai Bada ya lä bufiblamou wei ya Bada lä cui, wamale bejedimou nia wabaimi. ’Einaja tä a̦ oni cuu —a Jesús cuma. ¹³ Ö̦jö däjä, fecula badanö Jesús a lä yabäcano wei tä fa waiconö, a dablaquema. ¹⁴ Ö̦jö däjä, Calilea jamö Jesús a co̦a co̦layoma. Yai Bada tä Bufinö a nö wa̦lojomabou dodijioma yalo, ö̦jamö bluca bä lä bälöblai bä nija a wa̦fa ji̦limobodayoma. ¹⁵ Judio bä yododabä jamö bä damaö fa cuaanö, bluca bänö a wa̦fa dodijaö tamaje. ¹⁶ Ö̦jö däjä, Nasale jamö Jesús a co̦layoma, a oshe lä cuono wei jamö. Ö̦jamö lä judio bä yododabä yafi jamö a lucälayoma, showadi a lä cuaano weinaja showawä. Täbä nia lä yanöcöono wei tä mö jalu sábado cuoma. Ö̦jamö, wawädowä tä a̦ oni nia fa doanö, a ublalayoma. ¹⁷ Tä a̦ oni doabä, tä si jöbömoquema, Yai Bada a wa̦no wäyälewä Isaia a wa̦ oni lä cui. Ö̦jö tä si fa cushäshäblalönö, tä a̦ doaö bufi lä doblaono wei tä a̦ oni dayäblalema. Ö̦jö däjä, abinaja tä a̦ oni lä cuu wei tä a̦ wawädowä doama. ¹⁸ Bä lä jo̦li wei bä nija, tä a̦ lä dodijidai ya tä a̦ wäyäbä, Yai Bada tänö wale yailema. Ö̦jö cudeenö, Bada tä Bufinö wale ca̦i cua lä cule. Ya bä nia lä bayeliblaö wei ya wa̦fa wäamobä, wale shömölema. Bä shi lä wa̦limabou wejei ya bä nia jujeblamaö. Bä lä jubäbö wei ya bä mamocu nia dodijidablaö co̦o. Bä nö lä bleaamaö wejei ya bä nia bayeliblaö. ¹⁹ Bada tänö fei däjä täbä nia bayeliblaö lä waiquile ya tä a̦ wäyäbä, wale shömölema. Einaja tä a̦ oni lä cuu wei tä a̦ doama. ²⁰ Ö̦jö däjä, si cofublaö fa co̦lonö, a lä läono wei nija si oni co̦maquema. Ö̦jö däjä, camateli bä yömölabä a döcäquema. Judio bä yododabä yafi jamö bä bluca lä loono wei, Jesús nija bä mamo bluca showaoma. ²¹ Bä jaba yömölaö ja, abinaja a cuma. —Fei däjä, wamacö yömöca lä dale däjä, ei ya tä a̦ oni lä doafe tä a̦ lä cuu weinaja, tä bejedi wawäblou waiquilayou lä cufe —a cuma. ²² A wa̦ lä ji̦liano wejei bä blucanö, a wa̦fa dodijaö tamaje. A wa̦ dodijaö ja, bä bufi möaama ma cui, abinaja bä cudou majölayoma. —¿José fei bä ijilubö emi daanö? —bä cuma. ²³ Cama bä nija abinaja Jesús a cuma. —Wamale nowa nia lä taö wei, ya tä daö waiquiwä. Showadi täbä a̦. Täbä bejedimou wabaöje ja, abinaja bä cuu. “Wa bä jalomaö lä daö wei wa waiquiwä ja lä, ¡cafä a da jalomamo, ö̦jö lä! Cabenao jamö bäfä a̦fa lä ji̦libolenaja, ¡afä tä ulifi jamö a yai da cuaayo!” Inaja wamale nowa nia taö, ¿ö̦jö tawä? —Jesús a cuma. ²⁴ Abinaja a ca̦i cuma. —Cafä nija ei ya wa̦ lä cui, bejedi lä ya wa̦. Yai Bada a wa̦no wäyälewä bä lä cui, cama bä ulifibö yai ja, showadi bä a̦ ji̦liblaimije. ²⁵ Cafä wamacö nija ya bejedimou. Yai Bada a wa̦no wäyälewä Elia a jaba lä bälöono wei däjä, Isaeli nodiwä bä ulifibö ofäo nö quilio fe balojooma. Lasha 3 a lalou ma co̦ono wei ma cui, ai a lalou bäshäcuaaö ma co̦ono wei ma cui, maa a quenomi showawä. Ö̦jamö, suwä bä lä feiblono wei bä bluca ma bälöono wei ma cui, ²⁶ Elia a iyamabeje, ö̦jö bä nija Yai Bada tänö a shömöanomi. Saledateliyoma a lä feiblono wei a nija a yai shömölema, Sidono tä ulifi jamö a suwä lä bälöono wei a nija. ²⁷ ’¿Ö̦jö tawä? —a cuma—. Yai Bada a wa̦no wäyälewä Eliseo a bälöo lä nomöjöaliyono wei däjä, Isaeli nodiwä bä ulifibö jamö, jalili bluca bä bälöoma. Täbä sicö lä jodemaö wei tä wayunö, bä jalili bluca bälöo mö ma feduono wei ma cui, ö̦jö bä jaloblonomi. Bä dodijidablou co̦daanomi. Silia tä ulifi jamö a lä bälöono wei a Naamana lä cui, ö̦jö a shino dodijidablou co̦layoma. ¿Ö̦jö tawä? —Jesús a cuma. ²⁸ Shomi täbä bayeliblamou lä ayaono wei tä a̦ fa ji̦liläjenö, judio bä yododabä yafi jamö bä lä cuono wei bä bluca jushudou fe balojolayoma. Bä asi asimoma. ²⁹ Bä jocäcädou fa showadalonö, a nabä quequemaje. Shabono a sibo jamö a jilulaö siboa showadalayfälömaje. ¿Ö̦jö tawä? Jefu a bada jamö a shabono blaoma. Ö̦jö jefu tä feyaca jamö a ca̦i fa culujenö, bei macö balöcö jamö a nia ja̦iblaamaje, a shäblobä. ³⁰ Ö̦jö ma cui, a ca̦i lä juno wejei jamö a mö yabadou fa bälonö, a jayua fa möamoicunö, a aa co̦layofälöma. ³¹ Ö̦jö däjä, Cabenaoteli bä shabonobö jamö Jesús a cua nomöjölayofälöma, Calilea tä ulifi jamö. Täbä yanöcöobä tä mö jalu sábado lä cui ja, bä damama. ³² Bä damaö däjä, a wa̦ lä shaliliablalou wei a wa̦ ja, bä bufi möaaö dodijioma. Jai tä a̦ yai daö shalilio showadaoma, a wa̦ ji̦liaö malä cuaano wejei. ³³ Ö̦jamö lä, judio bä yododabä yafi jamö, a lä feculaböono wei a ca̦i wa̦lo coyocooma. A wa̦ i̦cali fecula fa falönö, a wa̦ quilili läblaliyoma. ³⁴ —¡Ma! ¡Inaja mlai! Nasaleteli Jesús wa lä cuinö, ¿wedinaja yamalecö nia fa taamanö, bei wa li waloo cuboyoi? ¿Bei yamalecö nabä juu waiquio cufe? Bäfä daö. Yai Bada tänö wa lä yaileno wei wa e —a cuma. ³⁵ Ö̦jö ma cui, Jesúsnö a wa̦ wasöblalema. —¡A wa̦ fa dijä. E faa da co̦lufälö! —a cuma. Ö̦jö däjä, cama bä mamo mötale däjä, feculanö a wa̦lo fa shäyäblacöfälönö, a daa showaquefälöma. A famimanomi. ³⁶ Ö̦jö tä fa dalalöjenö, bä bluca shädayaimou dodijioma. Abinaja bä nowa tayou ja bä cuma. —¿Ei wedi bei tä a̦ majöwä? A wa̦ fa shalilonö, a wa̦ ca̦i fa lojodoanö, fecula bä ma cui, ¡bä nofi lä yashublamou wei! —bä cuma. ³⁷ Jesús a wa̦fa wäyäö cuaaö fa showaojenö, tä ulifi fe lä fa̦yoi jamö ma cui, a wa̦fa ji̦limou blaucuomobodayoma. ³⁸ Ö̦jö däjä, judio bä yododabä yafi jamö a faa fa co̦lufälönö, Simón e yafi jamö a lucäa majölayoma. ¿Ö̦jö tawä? Simón bä yesi e lä cui, e jalilioma. A yoblao dodijioma. Jesús nija a bayeliblamaö bufimaje. ³⁹ Ö̦jö cudeenö, a jalili blaobä ja a fa jo̦toiquiyonö, a lä yoblaono wei etä wasölema. Etä fa wasölönö, etä mladou showadalayoma. Ö̦jö däjä, a suwä jocädou fa co̦lonö, bä fama iyaa showadamalema. ⁴⁰ Bei. Motoca a lä queo wei däjä, jalili bä ca̦i lä cublamono wejei bä ca̦i bluca waloqueyolumaje. Bluca tä wayu shomitawänö bä nö bleaama. Ö̦jö bä bluca nija, Jesús imicö maqueblou fa cuaanö, bä jaloa showamalalema. ⁴¹ Bluca bä nija, fecula bä yashuabodayoma. Bä si̦lalamolanö abinaja bä fecula cudoma. —¡Yai Bada bei Ijilubö wa e! —bä cudoma. Ö̦jö ma cui, bä a̦ wasölema. Yai Bada tänö a shömabä a lä yaileno wei a nö ö̦jöböamaje yalo, bä a̦ fablamanomi. ⁴² Tä mö fa jalulunö, täbä bälöa lä mlale jamö a alayoma. A dayäaö lä juono wejei, ya̦cumö bä waloa jäqueyoluma. A daa fa co̦lalöjenö, a juu ma wasöno wejei ma cui, ⁴³ a wa̦ läblaliyoma. Abinaja bä nowa tama. —Ma. Ai bä shabonobö jamö ya tä a̦ dodijidawä wäyäö mö feduobä, Yai Bada tänö wale malä shömöleno wei, öjamö lä Yai Bada tänö cama ebä ca̦i lä cuo wei, ya tä a̦ dodijidawä wäyäö mö feduobä —bä nowa tama. ⁴⁴ Ö̦jö däjä, Judea jamö a juu fa cuaanö, judio bä yododabä yafi bä jamö, bä yömölaö cuaama.

¹ Bei. Modu Jenesale u casö jamö, Jesúsnö Yai Bada etä a̦ wäyäö ja, tä a̦ ji̦liaö bufi fa doblaojenö, bä mashicou dodijioma. ² Ö̦jö däjä, mau u casö jamö, canawä bolacabö cäcöbö ca̦a dalalema. Yuli bä lä ya̦caö wejei bä fa itoblalunö, ya̦camodima täbä walalawä yaluu bayäcäomaje. ³ Simón canawä e ja, Jesús a fa i̦jilaicunö, a jiluludamaö bufima, yawäläwä a culanö bä yömölabä. Ö̦jö däjä, canawä a jamö a döcälanö bä damama. ⁴ Bä yömölaö fa waiconö, Simón nija a wa̦ fama. —Wamacö befi ca̦i fa caläläfälönö, u o̦coobä ja, bä befi ca̦i da ca̦icu. Ö̦jamö walalawä täbä da quemabalöje, yuli wama bä ya̦caabä —a cuma. ⁵ Simón abinaja a cuu mö feduoma. —Bada tä. Yuli yama bä nia fa ya̦caanö, yamacö juu fe jaluma ma cui, yamacö nö bleaaö fe jaluma. Moli yama a ya̦caö buonomi. Ö̦jö ma cui, inaja cafä wa cuu ja, ya täbä nia walalawä queamaö co̦o —a Simón cuma. ⁶ Jesús a lä cuno weinaja bä fa cuaanö, walalawä täbä jamö bä yuli bluca fa ya̦calöjenö, yuli bä judenö täbä jädödou nö quiliama. Täbä jädödou waiquia ja, ⁷ ai a canawä jamö, cama ai ebä befi ca̦i caläö mö lä feduono wei bä nacalemaje, bä bayeliblabeje. Ö̦jö bä befi ca̦i fa waloiquiyonö, yuli bä ja, cäcöbö fe canawä lajoblaö bolacaa showalayomaje. Cäcöbö fe canawä lajoblaö fe fa balojolojenö, yuli bä judenö cäcöbö fe mini canawä ojobaliyoma. ⁸ Simón Pedro a lä cuinö, yuli bä bluca lä ya̦calöfe tä fa dalalönö, Jesús cotä jamö a quilili diyäliquema. A fa diyäliicunö, e a̦ fama. —Bada tä. Camiyä nija a ajedo dijä. Ya doblou malä mlai —a cuma. ⁹ Yuli bä bluca lä ya̦caleno wejei tä ja, cama a ma cui, ai bä cuo mö lä feduono wei bä ma cui, bä bufi malä shädayaimono wei. ¹⁰ Santiago a ma cui, Juan a ma cui, inaja cäcöbö bufi ca̦i cuablalou mö feduo showaoma. Ö̦jö Sebedeo bä ijilubö ecöbö cuoma, Simón sho yuli bä showadi lä ya̦cano wejei. Simón nija abinaja Jesús a cuma. —A quili dijä. Fei däjä, yuli bä bädawä mlai, yanowamö wa bä nabä nia shino yai juu, camiyä nija wa bä lulubobä —a cuma. ¹¹ Bä befi ca̦i fa washölöicunö, mau u casö jamö, canawä ecöbö shailemaje. Ö̦jö däjä, cama etäbä bluca daa fa showadacöfälöjenö, Jesús nijamö bä yaua showadalayoma. ¹² Ai täbä shabonobö jamö Jesús a cuo däjä, täbä sicö lä jodemaö wei tä wayunö a nö lä bleaano wei a jalili waloquema. Sicö bluca jodeoma. Jesús a fa dalaliyonö, mashita jamö a möfe deialiyoma. A möfe deilanö, a nofi nia ojode fa tablamonö, a wa̦ fama. —Bada tä. Wale bayeliblaö ojode ja, wale jalomaö dao, ya dodijidablou co̦obä —a cuma. ¹³ Jesús boco fa dododalunö, a jubädalema. Abinaja e cuma. —Ya ojode lä. A da jalolu, ö̦jö lä, wa dodijidablou co̦obä —e cuma. Sicö lä jodeono wei etä wayu mladou showadalayoma. ¹⁴ Ö̦jö däjä, a wa̦ nö wäo wasöö showaoma. —Ei bäfä lä jalomalöfe, yanowamö täbä nija wa tä a̦fa nia wäaimi. Nofi bäyäalewä nija a yai da mömodu. Wa dodijidablou lä co̦lufe tä nowa ja, Moisesinö tä jöböamaö lä bufino wei etä da dodobodu. Inaja wa cuaaö ja, bluca täbä nija wa demi nia dablamou wawädoo —a cuma. ¹⁵ Ö̦jö ma cui, Jesús a wa̦fa yai wäyäö balaa fa showadaalujenö, Jesús nija bluca bä co̦camoblaayoluma. A wa̦ ji̦liaö bufi doblaomaje. Bä lä jalili wei bä ca̦i jalomamou bufi doblaoma. ¹⁶ Ö̦jö ma cui, ulifi bloque jamö Jesús a fa jublaanö, Yai Bada nija a nö bayeli nacaodima. ¹⁷ Ai däjä, Jesúsnö täbä damaö däjä, faliseo bä bada loo coyocoblamoma, Moisesi tä a̦ ja täbä lä damaö wejei bä ca̦i. Calilea jamö ma cui, Judea jamö ma cui, Jelusale jamö ma cui, ö̦jamö bä culanö bä bada waloqueyoluma. Jalili bä jalomabä, Bada tänö Jesús a nö wa̦lojomaboma. ¹⁸ Ö̦jö däjä, a lä ya̦toliböono wei a befi ca̦i cadömaboimamaje. Jesús nija a befi ca̦i blaabeje, yafi jamö a ca̦i nia fa fajenö, a ca̦i icuquema ma cujei, ¹⁹ bä lä co̦camono wei bänö a yafi je̦fa mashiquiwä yalo, a ca̦i faö doblonomije. Ö̦jö cudeenö, yafi feyaca sibo jamö a ca̦i dubefälömaje. A ca̦i fa dubofälöjenö, tä fa jocäblalujulujenö, a lä ya̦toliböono wei a befi ca̦i itomalejelayomaje. Ö̦jö däjä, Jesús a mötalöbö ja, a befi ca̦i blaquemaje. ²⁰ A nofi lä mölabou wejei, Jesúsnö etä fa dalalönö, abinaja a cuma, a lä ya̦toliböono wei a nija. —Bei. Wa doblou lä mlai, afä ya tä nowa bluca mladamaö lä cule —a cuma. ²¹ Moisesi tä a̦ ja täbä lä damaö wejei bä ma cui, faliseo bä ca̦i bada ma cui, bä bufi bluca jö̦öjömoma. Abinaja bä bufi cudaliyoma. “¿Ei wedi a wa̦ bashiwä? Yai Bada a nö waiblaö lä cule. Täbä doblou lä mlai, Yai Bada tänö etä nowa shino mladamaö dao, yanowamö a bashiwänö mlai”, bä bufi cudaliyoma. ²² Bä bufi cuu lä ja̦toono wei, Jesúsnö bä daö fa showadaonö, a wa̦ fama. —¿Wedi tä tabä wamacö bufi li jö̦öjömou dicoa cube? ²³ Ei a lä cui, camiyä bei ya wa̦nö ya jalomaö lä dalenaja, inaja showawä ya etä nowa ca̦i mladamaö si ijejewä cuwä. Ya nowa tabä ya waiquiwä malä cui, a fa jocädalunö a co̦jamöö co̦obä. ¿Ö̦jö tawä? ²⁴ Camiyä ya lä yanowamöblaleyoluno wei ya lä cui, eja bita jamö ya lä cule däjä, bä doblou lä mlai ya etä nowa mladamabä ya waiquiwä. Wama tä möbä, ö̦jö lä —a cuma. Einaja a fa cunö, a wa̦ wawäa showaquema, a lä ya̦toliböono wei nija. —Bei. Cafä nija abinaja ya cuu. A da ubladalu. Wa lä maquele wa täcö fa jocälänö, täcö ca̦i co̦jamö da co̦o —a cuma. ²⁵ Ö̦jö däjä, bä lä co̦camono wei bä mamo bluca showao däjä, a lä ya̦toliböono wei a lä cui, a fa ubladalunö, a lä maqueono wei etäcö jocälema. Täcö fa jocälänö, Yai Bada a nofi doablaö ca̦i co̦layofälöma. ²⁶ Bä bluca lä co̦camono wei bä bufi shädayaimou dodijioma. Yai Bada a nofi doablamaje. Bä fa quililalunö, abinaja bä nowa tayoma. —Fei däjä, tä nö lä quilijii, ¡bäma tä daa dodijilalei lä cufe! —bä nowa tayolayoma. ²⁷ Ö̦jö däjä, Jesús a faa fa co̦lufälönö, Lewi a wa̦fa lä cule, a loa dalalema. Lomateli bada bä befi bä blada lä doaö wei, a Lewi cuoma. Blada bä doabä jamö a läa fa dalalönö, abinaja e cuma. —Camiyä nijamö a da nocaiquiyo —e cuma. ²⁸ Lewi a ubladou fa showadalonö, täbä bluca daa fa showadacöfälönö, Jesús nija a nocaa showadalayofälöma. ²⁹ Ö̦jö däjä, Jesús sho bä iyabä, Lewinö cama e yafi jamö nii bluca bä tama. Lomateli bada bä befi bä blada lä doaö wejei bä bluca ma cui, ai bä ma cui, bä iyaö ca̦i lä loono wei jamö, ö̦jö bä bluca loo mö feduoma. ³⁰ Ö̦jö tä fa dalalöjenö, faliseo bä bufi bada jushujuoma. Cama ebä lä nocamabono wejei bä ma cui, Moisesi tä a̦ ja täbä lä damaö wejei, ö̦jö bä bufi ca̦i jushujuo mö feduoma. Jesúsnö bä lä nocamabono wei bä lä cui, abinaja bä nowa tamaje. —¿Wedi tabä inaja wamacö li cuaaö dicoo? Lomateli bada bä befi bä blada lä doaö wejei bä ma cui, wa̦lidiwä talewä ai bä ma cui, ¿wedi tabä ö̦jö wama bä ca̦i li iyaö dicoo? —bä nowa tamaje. ³¹ Jesús a wa̦ juo ja, abinaja bä nowa taö ja̦looma. —Bä jalobä, bä lä demi wei bä icuo malä mlai. Bä lä jalili wei bä nia shino yai icuo. ¿Ö̦jö tawä? ³² Bä dodijidawä lä jömöo wei ya bä nabä juno malä mlai. Wa̦lidiwä talewä ya bä nabä yai li juma, wa̦lidiwä tä ja, bä bufi lädobä —bä nowa tama. ³³ Abinaja Jesús nija bä cuma. —Juan a lä cuinö bä lä nocamabole bä iyaö wasöo si ijejewä, bä iyaö yabäcou mlai ja, Yai Bada nija bä nö bayeli nacaodibä. Faliseo bä bada nija bä lä nocao wei bä ma cui, inaja showawä ö̦jö bä ca̦i cuaaö mö feduo talei. Ö̦jö ma cui, afä bä ca̦i iyaö wasöomi dicowä —bä cuma. ³⁴ Ö̦jö bä nija abinaja Jesús a cuma. —Fiya a lä cuinö a suwä däaö däjä, ¿cäcöbö nofi co̦camoabeje jamö wama bä iyaö wasöö daanö? Ma. ³⁵ Ö̦jö ma cui, tä nö fa dedelönö, a fiya co̦molayou ja, ö̦jö däjä bä fa wajäanö, bä nia shino iyaimi juo. ¿Ö̦jö tawä? —cama a wa̦fa tao ja, a cuma. ³⁶ Ö̦jö däjä, shomi tä a̦ coyocomabou bufio fa mlacunö, camishi bä a̦fa ca̦i wäyäö yaclämoma. —Camishi jode cäcö lebesi ja, ai cäcö acadafu läabeje, dude cäcö cacaaimije. Inaja bä cuaaö fa cunoja, cäcö yaluuje däjä, dude cäcö fa busudublalunö, täca jädödou nö blaucublaliyobö wei. Jode cäcö ma cui ja, dude cäcö sudio dicoo ja, cäcö nia mömou nö liyäjäblobimi. ³⁷ Inaja showawä, yalo wejediwä sibä ja, nashiwä dude toubä löaimije. Inaja bä cuaaö fa cunoja, toubä lä juluu wei toubänö sibä fa jädölönö, sibä nö wa̦liolaliyobö wei. Toubä nö ca̦i bläshäblaliyobö wei. Wejediwä sibä uduo malä mlai. ³⁸ Ma, yalo dude sibä ja, nashiwä dude toubä nia yai löaöje. ³⁹ ’Abinaja ca̦i —a cuu co̦oma—. Nashiwä toubä cuo nö lä dedeano wei toubä coaö daö fa waiquiojenö, dude toubä bufiimije. Abinaja bä malä cuu wei. “Ma, toubä cuo nö lä dedeano wei toubä coamou dodijidawä yaiwä”, bä cuu. ¿Ö̦jö tawä? Einaja Jesúsnö bä nowa taö ja, a cuma.

¹ Täbä nia lä yanöcöono wei ai tä mö jalu sábado ja, ficali ca jamö Jesúsnö cama ebä ca̦i jayuafälöö däjä, cama ebä lä nocamabono wei bänö mobä jucäa jayulalefälömaje. Mobä fa juducafälöjenö, lo̦shi mobä waö cuaafälömaje. ² Ö̦jö ma cui, inaja bä cuaama yalo, faliseo ai bä bada lä cui, abinaja bä cuma. —Täbä yanöcöobä tä mö jalu ja, inaja wamacö cuaaö mlaobä tä a̦ ma läle ma cui, ¿wedi tabä inaja wamacö li cuaaö fe yadio? —bä cuma. ³ Jesús a wa̦ juo ja, abinaja a cudaliyoma. —Bada tä David a lä cuaano wei, ¿bei wama tä a̦ oni daö mlaa cule? Cama a ma cui, cama ebä lä nocaono wei bä ma cui, bä ofäö ja, ⁴ Yai Bada etä yano jamö, a lucäa fa jayulofälönö, Yai Bada ebä nii lä yaimabou wejei bä nii ja, a iyalayofälöma. ¿Ö̦jö tawä? Ö̦jö bä nii ja, nofi bäyäalewä bä iyabä bä nii yaimoma. Bä nofi bäyäalewä lä mlai bä iyabä, bä nii cuonomi. Bä iyaö mlaobä, Moisesi etä a̦ läoma. Ö̦jö ma cui, ö̦jö bä nii ja, David a iyama. Bä ca̦i lä juno wei bä ma cui, ö̦jö bä dobäa mö fedua showalalema. Ö̦jö ma cui, inaja David a ma cuaano wei ma cui, a jömamonomi. ¿Ö̦jö tawä? —Jesús a cuma. ⁵ Ö̦jö däjä, abinaja e cuma. —Täbä yanöcöobä tä mö jalu jamö täbä nia lä cuaaö wei tä ma cui ja, täbä nia cuaaö lä mlai tä ma cui ja, camiyä ya wa̦ fabä ei Bada ya waiquiwä, ya lä yanowamöblaleyoluno wei ya lä cui —a cuma. ⁶ Täbä nia lä yanöcöono wei ai tä mö jalu sábado ja, judio bä yododabä yafi jamö Jesús a lucäa fa co̦lunö, bä yömölama. Bä yömölaö däjä, imicö lä cofeono wei a cuoma. ¿Ö̦jö tawä? Jayu boco jamö imicö lä cui, imicö cofeoma. ⁷ Täbä nia lä yanöcöono wei tä mö jalu cuoma cudeenö, Moisesi tä a̦ ja bä lä damaö wejei bä ma cui, faliseo bä ca̦i bada ma cui, Jesús nija ö̦jö bä mamo bluca showajaoma. Imicö lä cofeono wei a jalomaö fe yadio ja, a wa̦fa nia dobloimi wäyämaje. ⁸ Ö̦jö ma cui, bä bufi lä cuu wei, Jesúsnö tä daö fa waiquionö, imicö lä cofeono wei abinaja a nowa tama. —Eja wa fa ajedeicunö, a da ublabaliyo —a nowa tama. A ublaa möamoa showadaquema. ⁹ Ö̦jö däjä, bä mamo lä showajaono wei bä nija abinaja Jesús a cuma. —Bämacö wa̦lii ojodaa lä cule. Täbä yanöcöobä tä mö jalu jamö, ¿bämacö dodijaö mlaobä tä a̦ läa daanö? Ma, wa̦lidiwä bäma tä taö mlaobä tä a̦ shino läa. ¿Ö̦jö daanö? Täbä shäö mlaobeje tä a̦ läa ma cui, täbä jalomabeje tä a̦ läami —a cuma. ¹⁰ Ö̦jö däjä, Jesúsnö täbä bluca möö shoqueaö fa cuaanö, imicö lä cofeono wei a nija abinaja e cuma. —Boco da dodoiquiyo —a cuma. Boco fa dododalunö, imicö cushäshäblou showadalayoma. ¹¹ Ö̦jö ma cui, judio bä bada jushuo dodijioma. Jesús a nia lä taamano wejei tä ja, bä a̦ wayou showadaoma. ¹² Tä nö fa dedejedalunö, a nö bayeli nacaobä, jefu a jamö Jesús a dolequebefälöma. Yai Bada nija a wa̦ faö fe jaluma. ¹³ Ö̦jö tä fena ja, cama nija bä lä nocaono wei bä nacalema. Bä nacaa fa ajedelänö, cama 12 ebä yaialalema. Bä yaiaö ja, abinaja a cuma. —Ei bä lä cui, ya bä nia lä shömaö wei cäbä —a cuma. ¹⁴ Abinaja bä a̦fa lä cule bä cuoma. Simón a cuoma, Pedro a wa̦fa ca̦i lä jilaqueno wei. Ö̦jö bä fääshä Andrés e ca̦i. Santiago a ca̦i, Juan sho. Felipe a ca̦i. Badolomei a ca̦i. ¹⁵ Mateo a ca̦i. Tomás a ca̦i. Afeo bä ijilubö Santiago e ca̦i. Simón a ca̦i, cama bä ulifibö jamö täbä shomi lämabou nofi lä wa̦libono wei a Simón lä cui. ¹⁶ Santiago bä ijilubö Juda e ca̦i. Juda Icaliode a ca̦i, Jesús a nomojoliabä a lä cublaliyono wei a lä cui. ¹⁷ Tä fe yalöobä ja, Jesúsinö ö̦jö bä ca̦i dimöbaliyoma. Ö̦jamö, cama nija bä lä nocaono wei bä ca̦i bluca cuoma. Jelusaleteli bä ma cui, Judea jamö bä bluca lä bälöblaono wei bä ma cui, ö̦jö bä bluca ca̦i co̦cao mö feduoma. Diloteli bä ma cui, Sidonoteli bä ma cui, ö̦jö bä ca̦i bluca cuoma, modu u casö jamö bä lä bälöono wei bä lä cui. Jesús a wa̦ nia fa ji̦liajenö, bä lä jaliliono wei bä ca̦i nia fa jalomamonö, bä bluca co̦camolayoyoluma. ¹⁸ Bä lä feculaböono wei bä ma cui, ö̦jö bä jalomalema. ¹⁹ Jesús etä lojodenö bä bluca jalolayoma yalo, bä bluca lä co̦camono wei bänö a jubaö bufi doblaomaje. ²⁰ Cama nija bä lä nocaono wei bä nija, Jesús a mamo fa showaicunö, abinaja a cuma. —Yai Bada nija wamacö jömöo lä mlai wamacö lä cui, wamacö bufi yai doblalobä wamacö. Yai Bada tänö wamacö ca̦i malä cule. ²¹ ’Yai Bada nija wamacö cadidou bufi lä doblao wei wamacö lä cui, wamacö bufi yai doblalobä wamacö. Yai Bada tänö wamacö bufi nia malä doblamabou wei. ’Wamacö lä ö̦cöö wei wamacö lä cui, wamacö bufi yai doblalobä wamacö. Wamacö nia i̦cablalou malä majöo wei. ²² ’¿Ö̦jö tawä? —a cuma—. Ya lä yanowamöblaleyoluno wei wamale bufii yalo, wamacö nö ma bleaamaöje däjä ma cui, wamacö bufi doblalobä wamacö. Wamacö nofi ma wa̦libouje däjä ma cui, wamacö ma waibouje däjä ma cui, wamacö a̦fa ma lafujaöje däjä ma cui, wamacö a̦fa dobloimi ma taöje däjä ma cui, wamacö bufi doblalobä wamacö. ²³ Inaja wamacö taamaöje däjä, bä bufi shino da doblalo. ¡Bä bufi shino yai doblalou da dodijio! ¿Ö̦jö tawä? Fedu fedole jamö wamacö nia dobämou fe malä balojoo wei. Cama bä nö badabö ma cuinö, inaja showawä Yai Bada a wa̦no wäyälewä bä nö bleaamaö malä balöono wejei. Ö̦jö bä owäbou nodia dicoa lä culajei —Jesús a cuma. ²⁴ Abinaja Jesús a cuma. —Ö̦jö ma cui, wamacö nö lä madofibö wei wamacö nö nia bleaaö majöo. Fei wamacö bufi dodijaö lä waiquile, ö̦jö tä waiquiwä. ²⁵ Wamacö bädöwä lä waiquii, wamacö nö nia bleaaö majöo. Wamacö nia ofäö malä majöo wei. Wamacö lä i̦cablalou wei wamacö nö nia bleaaö majöo. Wamacö fa wajäanö wamacö nia ö̦cöö malä majöo wei. ²⁶ ’¿Ö̦jö tawä? —a cuma—. Bluca bänö wamacö a̦fa dodijaö lä taö wejei däjä, wamacö nö nia bleaaö majöo. Cama bä nö badabö ma cuinö, inaja showawä Yai Bada a wa̦no jole jole lä wäyäno wejei, bä taamaö malä balöono wejei. ²⁷ Abinaja Jesús a cuma. —Wamale a̦ lä ji̦liaö wei wamacö nija, abinaja ya cuu. Wamacö nofi lä wa̦libou wejei bä ma cui, bä da nofimaje. Wamacö nofi ma wa̦libou wejei ma cui, bä da bayeliblaje. ²⁸ Wamacö lä wafäblaö wejei bä ma cui, Yai Bada nija bä da bayelimaje. Wamacö nö lä bleaamaö wejei bä ma cui, bä nö bayeli da nacaje. ²⁹ Bei wa mamoca baiaö ja, wa nö yuo mlai, ai mamoca mashi lädou da co̦lo. Inaja showawä, afä wa cö lä feyacabole cäcö däaö dicoo ja, wa cö lä u̦eshibou wei cäcö ma cui, cäcö noshi umabo dijä. ³⁰ Cafä nija bä lä nacou wei, bä bluca da dobälö. Madofifä a lä däafälöö wei nija a nacaö codaa dijä. ³¹ ¿Ö̦jö tawä? Ai täbä nija cafä wamacö nofimamou bufi lä doblao weinaja, inaja showawä, ai wama täbä yai nofimaö cuobä. ³² ’Cafä wamacö lä nofimaö wejei wama bä nofimaö mö feduo yalo, ¿Yai Bada tänö wamacö a̦fa nia dodijaö taö daanö? —a cuma—. Ma. Wa̦lidiwä talewä bä ma cuinö, cama bä lä nofimaö wejei, showadi bä nofimaö mö malä feduo wejei. ³³ Cafä wamacö lä bayeliblaö wejei bä lä cui wama bä bayeliblaö mö feduo yalo, ¿Yai Bada tänö wamacö a̦fa nia dodijaö taö daanö? Ma. Wa̦lidiwä talewä bä ma cui, inaja showawä cama bä showadi malä taamayou wei. ³⁴ Tä nowa nia lä co̦amaö wejei bä nija wama bä madofi shino majöaö ayao ja, ö̦jö däjä ¿wamacö nia a̦fa shino dodijidawä tamou daanö? Ma. Wa̦lidiwä talewä bä ma cui, inaja cama bä ca̦i taamayou waiquiwä. Tä nowa nia co̦amaö lä jödödöo wejei bä nija bä madofi shino majöaöje. ³⁵ ’Ö̦jö ma cui, abinaja bä yai da cuaa —a cuma—. Wamacö nofi lä wa̦libou wejei bä lä cui wama bä fa nofimanö, bä da bayeliblaje. Tä nowa nia lä co̦amaö wejei tä ja, wamacö mölaö mlai ja, madofifä no mlai ja bä da majöaje. Ö̦jö lä däjä Yai Bada nija wamacö nia yai dobämou. Inaja wa lä cuaaö wei tänö, Yai Bada tä Bada lä ayai wama ecö ijilubö nia dablamou dodijio. ¿Ö̦jö tawä? Cama Yai Bada nija bä bufi a̦fa doblalou wäyämou ma mlai ma cui, bä doblou ma mlai ma cui, dodijidawä bä bayeliblaö fe malä yadio wei. ³⁶ Ma. Faafä Yai Bada a lä culadi a bufi asio lä culenaja, wamacö cuo mö feduobä wama ecö —Jesús a cuma. ³⁷ Abinaja Jesúsnö bä nowa tama. —Yanowamö bä dobloimi jöma dijejä. Ö̦jö däjä, cafä wamacö ma cui Yai Bada tänö wamacö nia jömaimi. Bä ca̦i wai dijejä. Cafä wamacönö wama bä waiimi ja, inaja showawä cafä wamacö nia waimamoimi cuo mö feduo. Bä doblou lä mlai bä nija tä nowa ca̦i tabo dijejä. Ai bä nija wama tä nowa taboimi ja, inaja showawä cafä wamacö nija tä nowa nia cuomi. ³⁸ ’Täbä da dobäje —a cuma—. Wama bä dobäö ja, inaja showawä cafä wamacö nia dobämamou cuo mö feduo. ¡Bejedi lä wamacö nia dobämamou! Fe lajowä wama täbä fa mönö, ¡wamacö nia fejeleo! Ai wama bä dobäö lä cuaaö weinaja, inaja showawä cafä wamacö nia dobämamou cuo mö feduo —a cuma. ³⁹ Jesúsnö bä bufi dayäamabä, shominaja tä a̦ wäyäö yacläoma. —Jubäbö a lä cui, ¿ai a jubäbö mö feduwänö a nia lulubou daanö? ¿Täca täca aca jamö, cäcöbö nia queo bolacao showadaomi daanö? ⁴⁰ ’Tä a̦ lä wäyäö wei a wa̦ ji̦liaö mlaoje däjä, cama ebä lä nocale bä a̦ nia ji̦liaö ayaomije. Ö̦jö ma cui, bä lä nocao wei bä bufi yai jaducublou däjä, tä a̦ lä wäyäö wei a nofi lä tabou wejeinaja, inaja showawä bä nofi ca̦i nia tabou mö feduoje. ⁴¹ ’Aifä a mamo jamö libu libu wa ma möö wei, cafä wa mamo jamö fii wa fi bada lä ca̦bole, ¿wa nö ö̦jöböamoimi tawä? —a cuma—. ⁴² Cafä nija fii fi bada ma läo däjä, ¿aifä nija bei wa wa̦ nia li faö? Aifä mamo jamö libu libu e wai lä ca̦le, ¿ö̦jö bei wa e nia li joyaö? ¡Jole jole wa lä dodijaö wei! Cafä wa mamo jamö fi bada lä ca̦le fi joya da balölö. Ö̦jö däjä, wa tä möö fa wacacablalunö, aifä a mamo lä libubö wei wa e nia shino joyaö dodijidao. ⁴³ Abinaja Jesús a cuma. —Fii fibä lä dodijidai fibä jamö, nii wa̦lidiwä bä nia laloimi. ¿Ö̦jö tawä? Fii wa̦lidii fibä ma cui jamö, nii dodijidawä bä nö ca̦i lalobimi mö feduwä. ⁴⁴ Täbä nii lä lalou wei täbä ja, defibä nö malä ö̦jöböamou wei. ¿Ö̦jö tawä? Mösöcö bä jamö nii bä jucamou dao malä mlai. Ico bä ma cui, uba bä ma cui, ö̦jamö lä bä nia yädäomi. ⁴⁵ ’A lä dodijaö wei a wa̦ faö däjä, bei bufi jamö tä dodijidawä lä didile etä a̦ nia wawäblou —a cuma—. Inaja showawä, wa̦lidiwä talewä a lä cui a wa̦ faö däjä, bei bufi jamö tä wa̦lidiwä lä didile etä a̦ nia ca̦i wa̦lidiwä wawäblou mö feduo. ¿Ö̦jö tawä? Bei täbä bufi jamö tä lä didile etä a̦ shino malä wawäblou wei. ⁴⁶ Abinaja Jesúsnö bä nowa taö showaoma. —Cafä wamacö nija ya tä tamaö lä bufii wei wama tä taö mlao däjä, ¿wedi tä tabä camiyä nija “¡Bada tä, Bada tä!” wamacö jole jole cudii buo? ⁴⁷ Camiyä wale a̦ lä ji̦liayoluu wejei däjä, wale a̦ juaö lä showadao wejei bä lä cui, abinaja ö̦jö bä li cuwä. ⁴⁸ Yafi a lä i̦tamano wei a lä culenaja bä cuwä. Ö̦jö a lä cuinö täca fa blajamalönö, bei masi blaa lä co̦jomole jamö e defibä colo fa i̦taolalönö, e yafi i̦tao lojodooma. Maa a fa quenö, u bada fa o̦conö, yafi e jamö u caläö lojodoama ma cui, e yafi i̦tao jifuo fa waiquionö, e yafi ca̦i bloloaö bädaonomi. ⁴⁹ ’Ö̦jö ma cui, ai bä mö feduwä lä cuinö, wale a̦ ma ji̦liaö wejei ma cui, wale a̦ juaimije —a cuma—. Ö̦jö bä lä cui, abinaja bä cuwä mö feduwä. Yafi a i̦tamaö mö lä feduono wei a lä culenaja bä cuwä mö feduwä. A yafi colo dalomaö mlai ja, a yafi i̦taa bäquema. Tä fa maaböonö, yafi e jamö u caläö fa lojodoanö, e yafi wäcälayoma. E yafi lä wäcälayono wei däjä e yafi bada wa̦lioblou showadalayoma —a cuma.

¹ Jesúsnö bä damaö fa jödödöblalunö, Cabenao jamö a co̦blaliyoma. ² Ö̦jamö sodado 100 bä ca̦i lä cuono wei a Lomateli bada bälöoma. A nosie juamobä e wa̦lo taboma. A nofimaö dodijioma. Ö̦jö e lä cui e fa jalililalunö, e nomaö ajedeoma. ³ Ö̦jö däjä bada a lä cuinö, Jesús a wa̦fa juu fa ji̦lilänö, judio bada bä shömölema, a nacabeje. A nosie juamobä e lä jaliliono wei e jalomayolubä. ⁴ Jesús nija judio bada bä fa waloicunö, a nacablalamaje. Bä a̦ fe blacäjou ja, abinaja bä cuma. —Ö̦jö lä a bada lä cui, wa bayeliblabä a waiquiwä. A dodijaö. ¿Ö̦jö tawä? ⁵ Judio bämalecö malä nofimaö wei. Yamacö yododabä a yafi tablalema —bä cuma. ⁶ Ö̦jö bä nija Jesús a nocaa showalayofälöma. Ö̦jö ma cui, Lomateli bada e yafi jamö a ajedoimaö ja, cama nofi ebä shömöa mö baquema, a wa̦no wäyäbeje. Abinaja Jesús a nowa tamaje. —Bada tä. Sodado bä ca̦i lä cule yama a wa̦no taö. Wa yabäcaö bufiomi. Wa nö jo̦wa yafimabimi. A quilii. “Wale bayeliblabä yami”, a bufi cuu. Judio a malä mlai. ⁷ Ö̦jö cudeenö, cama a icuo showadao mlai, camiyä yamalecö shömöa lälema. Eja culanö ma cui, wa wa̦ blajawä famaö bufii, a nosie juamobä a lä cui, a jalou showadaobä. ⁸ ¿Ö̦jö tawä? Täbä nosie lä juaö wejei tä malä dale. Cama bada ebä lä cui ebä a̦ juaö. Inaja showawä, cama a nosiemou ja, sodado ebä ca̦i lä cule ebänö a wa̦ ca̦i juaöje. Ai a shömaö ma cui, ai a nacaö ma cui, a wa̦ juaö si ijejeweje. A nosie juamobä a lä tabolenö a nosie ca̦i juaö showadao malä cui —Jesús a nowa tamaje. ⁹ Ö̦jö bä a̦ ja, sodado 100 bä ca̦i lä cuono wei a nija, ¡bejedi lä Jesús a bufi doblaloma! A mö fa yabadalunö, bä bluca lä nocaono wei bä nija abinaja a cuma. —Cafä bämacö nowa taö lä cule —a cuma—. Quiji Lomateli a lä cuinö wale nofi mölabou lä culenaja, Isaeli wama ecö nija, moli ma cui ya dablaö bädaami —a cuma. ¹⁰ Ö̦jö däjä, bada anö bä lä shömöleno wei bä co̦a showalayoma. Bä fa co̦bonö, bada a nosie juamobä e lä jaliliono wei a lä cui, a demi dalalejelomaje. ¹¹ Tä nö fa dedejedalunö, Naini tä a̦fa shabono lä cuono wei jamö a Jesús juu majöoma. Cama ebä lä nocamabono wei bä ma cui, ai bä bluca lä co̦caono wei bä ma cui, cama nija bä bluca yaua showalayofälöma. ¹² Nainiteli bä beibö yoca lä joleono wei jamö bä blacäö däjä, yafiteli bänö nomawä a ca̦i faa mö balayomaje. A lä nomalayono wei bä fö̦ö e fa nomalönö, bä nöö e yamiblaliyoma. Ai ebä ijilu ca̦i cuonomi. Ö̦jamö bä lä bälöle bä bluca fa co̦camolunö, a nomöa bolajenö a suwä ca̦i jumaje. ¹³ ¿Ö̦jö tawä? Bada tänö a suwä fa dalalönö, a nofi ojodadalema. Abinaja e cuma. —Ami. A ö̦cö dijä. ¹⁴ Ö̦jö däjä, a fa ajedeblalunö, a besi nomawä jubama. A nomawä ca̦i lä juno wejei bä yanöcöquema. Fiya nomawä a nija abinaja Jesús a cuma. —¡U̦asi! Cafä nija ya wa̦ faö lä cule. A da jocädalö —a cuma. ¹⁵ Inaja a fa cunö, nomawä a fa jocäblalunö, a fa loalunö, a wa̦ fama. Ö̦jö däjä, bä nöö e nija Jesúsnö a demi co̦a co̦maquema. ¹⁶ Ö̦jö tä ja bä bluca fa quililalunö, Yai Bada a nofi doablaöje ja, abinaja bä cuma. —Camiyä yamacö nija, ¡Yai Bada a wa̦no wäyälewä a bada waloqueyoluu lä cufe! ¡Yai Bada tänö bejedi lä cama ebä bayeliblaö dodijilayoyoluu lä cufe! —bä cuma. ¹⁷ Jesús a lä cuaano wei tä a̦fa wäyämou blaucuolaliyoma. Judea jamö bä bluca lä bälöblai bä nija ma cui, bä bälöa fe lä dolejeono wei bä nija ma cui, tä a̦fa wayoamoma. ¹⁸ Ö̦jö däjä, Juannö bä lä nocamabono wei bä lä cuinö, Jesús a lä cuaano wei tä bluca ja, a yömölamaje. ¹⁹ A fa yömölajenö, Juan a wa̦no wäyämobä, cama bolacabö ecöbö fa nacalänö, Bada tä nijamö cäcöbö shömölema. Jesús a wa̦liböö ja, abinaja cäcöbö nia cuma. “A nia jo̦wa lä juno wei, ¿ö̦jö cafä wa waiquiwä tawä?”, bä nia cuma. “Ma, cafä mlai, ¿ai a nia yai lä juu wei yama a nö dabou showaobä daanö?”, cäcöbö nia cuma. ¿Ö̦jö tawä? ²⁰ Jesús nija cäcöbö fa waloicunö, inaja showawä cäcöbö cuyoluma. —Bä fe ojomalewä Juan a lä cui, ö̦jö yafä a wa̦no taö lä cule. A nia jo̦wa lä juno wei, ¿ö̦jö cafä wa waiquiwä tawä? Ma, cafä mlai, ¿ai a nia yai lä juu wei yama a nö dabou showaobä daanö? —cäcöbö cuma. ²¹ Ö̦jamö cäcöbö cuo showao däjä, jalili bluca bä jalomalema. Bluca tä wayu shomitawä mö feduwänö bä nö lä bleaano wei bä ma cui, bä lä feculaböono wei bä ma cui, bä bluca jalomalalema. Bä lä jubäböono wei bä ma cui, bä mamocu bluca dodijidablaö co̦layoma. ²² Ö̦jö cudeenö, abinaja Jesúsnö cäcöbö nowa tama. —Wafä tä lä dalalufe, wafä tä a̦ lä ji̦liläfe, Juan nija tä a̦fa bluca da wäyäbödu. Bä lä jubäbö wei bä lä cui, bä mamocu dodjidablou co̦o. Bä juu dao lä mlai bä lä cui, bä jublou. Täbä sicö lä jodemaö wei tä wayunö bä nö lä bleaaö wei bä lä cui, bä dodijidablou co̦o. Bä yömöca lä comi wei bä lä cui, bä yömöca walalablou co̦o. Bä lä nomaö wei bä lä cui, bä demi jocädou co̦o. Bä lä jo̦li wei bä lä cui, dodijidawä tä a̦ ja, bä yömölamou. ²³ ¿Ö̦jö tawä? Camiyä wale nofi mölabou fe lä yadio wei a lä cui, ö̦jö a bufi nia yai doblalou —cäcöbö nowa tama. ²⁴ Juannö cäcöbö lä shömöleno wei cäcöbö co̦a fa co̦lunö, bluca bä lä co̦camono wei bä nija, Jesúsnö Juan a wa̦fa wayoaö juoma. —Ulifi bloque a jamö, ¿wedi wama tä möbä wamacö li juma? ¿Wadoli anö cau cau bä lä yalälaö wei wama bä möö bädaobä daanö? Mlaicätä. Wamacö juu buonomi. ²⁵ ’Ja̦o. ¿Wedi wama tä yai nia fa mönö, wamacö li juma, ö̦jö lä? —a cuma—. Camishi dodijidawä bä ja a lä didio wei a lä cui, ö̦jö wama a nia fa mönö, ¿bei wamacö juma daanö? Ma, camishi dodijidawä bä ja bä lä didio wei bä lä cui, bä nö lä madofibö wei bä lä cui, ulifi bloque a jamö ö̦jö bä nia cuomi. Bada bä bälöo lä dodijio wei bä nija, ö̦jö bä li bälöo. ²⁶ ’Ja̦o —a cuma—. ¿Wedinaja a wa̦lo cuwä wama a yai nia fa mönö, wamacö juma, ö̦jö lä? ¿Yai Bada a wa̦no wäyälewä wama a möbä mlai daanö? Awei, ö̦jö wama a möbä lä. Cafä bämacö nowa taö lä cule. Juan a lä cui, Yai Bada a wa̦no wäyälewä ai a bädawä mlai, ö̦jö bei a shino yai bada dodijiwä. ²⁷ Yai Bada etä a̦ oni jamö, Juan a wa̦fa ca̦i wäyäö balöomaje. Abinaja tä a̦ cuu. Bei. Wa nia juu lä cuaafälöö wei jamö, wa wa̦no taö balöafälöbä, iba ya nia shömaö balöo, wa wa̦ ji̦liaö dodijidaobeje. ’Einaja tä a̦ cuu —Jesús a cuma—. ²⁸ Cafä bämacö nowa taö lä cule. Bluca bä lä bälöblai bä ma cui nija, bä jaba lä bälöjono wei bä ma cui nija, Juan nija a bada fe biyäjäobä a cuami. ¿Ö̦jö tawä? Ö̦jö ma cui, Yai Bada tänö cama ebä ca̦i lä cuo wei bä lä cui, ö̦jö bä nofi shino yai tabobeje cäbä. Ö̦jö bä nijamö a cua lä bäle a ma cui nija, Juan a nojablaliyo. ²⁹ ’¿Ö̦jö tawä? —a cuma—. Täbä yömölabä, Juan a jaba wawäblou däjä, Lomateli bada bä befi bä blada lä doano wejei bä ma cuinö, ai bä bluca ma cuinö, Juan a wa̦ julemaje. Bä fe bluca ojoblamolayoma, Yai Bada tänö bä taamaö lä bufino weinaja showawä. ³⁰ Ö̦jö ma cui, faliseo bä bada lä cui bä fe ojoblamonomi. Moisesi tä a̦ ja täbä lä damaö wejei bä ma cui, inaja showawä. Yai Bada tänö bä taamaö lä bufino wei tä a̦ wailemaje. ³¹ ’Wamacö fei däjä lä bälöblai, ¿wedi tä cuwä lä dodijiinaja, bei wamacö cuwä dodijiwä? —a cuma—. ¿Wedinaja ya cubä? Wamacö a̦ juomi fe balojowä. ³² Ijilu bä i̦liyamobä jamö, bä a̦ juayou lä mlainaja showawä. Nii bä luluabeje jamö, ijilu bä i̦liyamou däjä, abinaja bä cuaaö. Ai bä mashi i̦liyamou fa shomitaicunö, abinaja bä nowa taöje. “Uo. ¿Wedi tabä yamalecö a̦ li juaimi dicowä? Amowa yama fi jolaö däjä ma cui, wamacö blaö blaömoimi. Jole jole yamacö ma ö̦cöö däjä ma cui, wamalecö a̦ ca̦i bayeliblaimi”, bä nowa taöje. Ijilu bä i̦liyamobä jamö, showadi einaja bä li taamayou. ³³ ’¿Ö̦jö tawä? —a cuma—. Cafä wamacö ma cui, inaja showawä wamacö cuaaö. Wamacö a̦ juomi fe balojowä. Fe ojomalewä Juan a lä cui, ö̦jö wama a wa̦ juano malä mlai. Ö̦jö a fa waloiquiyonö, nii a ja, a wasöoma. Nashiwä toubä ca̦i ja. A waiyoma cudeenö, “A li feculabö”, wama a nofi li taboma. ³⁴ ¿Ö̦jö tawä? Juan a lä cuaano weinaja ya cuaaö ma mlai ma cui, inaja showawä camiyä ya lä yanowamöblaleyoluno wei ya lä cui, wamale a̦ ca̦i ji̦liblaimi cuwä mö feduwä. Camiyä ya fa waloiquiyonö, ya ca̦i waiyo mlai ja ya iyaö showawä. Bei ya toubä ca̦i coaö. Ö̦jö ma cui, wamale a̦fa ca̦i wayoaö mö feduwä showawä. “Showadi a iyadii”, wamacö cuu. “A shi wa̦lii bufi fa doblaonö, toubä coadii”, wamacö cuu. “Lomateli bada bä befi bä blada lä doaö wejei bä ma cui, wa̦lidiwä talewä ai bä ma cui, ö̦jö bä shino nofimadii”, wamacö cuu. ¿Ö̦jö tawä? ³⁵ ’Inaja wamacö ma cuu däjä ma cui, Yai Bada a wa̦ moyawe. Ö̦jö a wa̦ lä cadidibou wejei bä bluca lä cuinö, a bejedi dablamaöje —a cuma. ³⁶ Cama nija a nö liyobä, faliseo ai a badanö Jesús a nacalema. Ö̦jö cudeenö, ö̦jö e yafi ja a fa falönö, bä iyaö ca̦i loobä jamö a cuquema. ³⁷ Faliseo e yafi jamö Jesús a wa̦fa iyaö fa ji̦lilänö, ö̦jöteliyoma a doblou lä mlai a waloquema. ¿Ö̦jö tawä? Toubä nö lä cle̦deli wei toubä ca̦i besi waloquema, toubä nowa bluca lä dodijii. ³⁸ Jesús matacö mö cuobä jamö a ublaqueyoluma. Ö̦jamö a ö̦cölanö a möfe boquema. Bei mabu ubänö Jesús mamicö jelemalalema. Ö̦jö däjä a fa loicunö, cama suwä fe̦ta ucu showawänö mamicö ya̦jöblalema. Mamicö buyucadima. Toubä nö lä cle̦deli wei toubänö mamicö fe löblalema. ³⁹ ¿Ö̦jö tawä? Jesús a lä nacano wei a faliseo lä cuinö, ö̦jö tä fa dalalönö, abinaja a bufi bada cudaliyoma. “Yai Bada a wa̦no wäyälewä ei a yai cuo fa cunoja, a lä jubamole a doblou lä mlai etä nö ö̦jöböabö wei. Fei suwä a doblou lä mlai, etä nofi daimi dodijiwä yai”, a bufi cudaliyoma. ⁴⁰ A wa̦ juo ja, abinaja Jesús a cuma. —Simón, cafä nija ya tä a̦ nia wäaö. —A wa̦ da fabla, tä a̦ wäyäle —e cuma. ⁴¹ Abinaja Jesús a cuma. —Blada showadi bä lä majöaö wei anö, bolacabö cäcöbö nija bä blada majöquema. Ai a nija 500 bä bluca majöquema, bä nowa lä blucai. Ai a mö feduwä nija 50. ⁴² Tä nowa nö co̦amabimi waiquiwä ja, bolacabö cäcöbö nija etä nowa mladamaö showalayoma. ¿Ö̦jö tawä? Cafä ¿wedinaja wa bufi cuu? ¿Wedi jamö a lä cuinö a nia yai nofimaö fe balojowä? —Jesús a cuma. ⁴³ —Abinaja ya bufi cuu —Simón a cuma—. Blada ebä co̦amabä ebä lä blucaono wei a lä cuinö a nia shino yai nofimaö fe balojoo, etä nowa bluca mladamalema cudeenö —a cuma. —Bejedi lä wa wa̦. Wa wa̦ cadidou —Jesús a cuma. ⁴⁴ Ö̦jö däjä, suwä nija a mö fa yaiblalunö, Simón nija abinaja Jesús a cuma. —¿Ei wa suwä dablaö cule? Cafänö dodijidawä wale yafimabä, ya mamicö ya̦lömobä, mau wa ubä jöböabä wa ma cui, wa ubä jöböanomi. Ö̦jö ma cui, ei a suwä lä cuinö, bei mabu ubänö wale mamicö fa jelemalalönö, bei fe̦ta ucunö wale mamicö ya̦jöblalei lä cufe. ⁴⁵ Dodijidawä wale yafimabä, cafänö wale nofimaö mö baono ma mlai ma cui, ei a suwänö wale mamicö malöcaö malä showale. ⁴⁶ Dodijidawä wale yafimabä, dabö dabö ubänö wale fe liyäyabä wa ma cui, wale fe liyäyanomi. Ö̦jö ma cui, toubä nö lä cle̦deli wei toubänö, ei a suwänö wale mamicö fe löblalei lä cufe. ⁴⁷ ’Ö̦jö cudeenö cafä bäfä nowa taö lä cule —a cuma—. Tä doblou lä mlai ya etä nowa bluca mladamaö yalo, ei a suwä lä cuinö wale nofimaö fe balojowä. ¿Ö̦jö tawä? Ö̦jö ma cui, Yai Bada tänö wiisibö etä nowa mladamaö lä buo wei, wiisibö a nia nofimaö bädao —Simón nija Jesús a cuma. ⁴⁸ Suwä nija abinaja a Jesús cuu nomöjöoma. —Wa doblou lä mlai ya tä nowa mladamaö waiquiwä —a cuma. ⁴⁹ Ö̦jö däjä, bä iyabä jamö bä ca̦i lä jilaono wei, abinaja bä nowa tayoma. —¿Wedinaja cama a nofi li tamamou dicoa cule? Bä doblou lä mlai, ¿camanö bei tä nowa nia mladamaö daanö? ⁵⁰ Suwä nija abinaja Jesús a cuu showaoma. —Wale nofi mölabou yalo, Yai Bada tänö wa jucäaö waiquia lä cule. A bufi yanöcöwä ca̦i da cu̦jamö.

¹ Tä no dedeaö mlao däjä, ai täbä bälöblawä mö lä fedui jamö, shabono bada bä jamö ma cui, wajaquemi bä wai shabono jamö ma cui, Yai Bada etä a̦ wäyäö cuaama. Dodijidawä tä a̦ ja, bä yömölaö cuaama, Yai Bada tänö cama ebä nia ca̦i lä cuo wei tä a̦ ja. Cama 12 ebä nocao showaoma, ² ai bä suwä lä jalomano wei bä ca̦i. Bä lä feculaböono wei bä suwä lä cui, ö̦jö bä fa jalolalunö bä cuoma. Shomi tä wayunö ai bä suwä lä jaliliono wei, ö̦jö bä fa jalolalunö bä ca̦i cuo mö feduoma. Madalateliyoma María a ca̦i, fecula 7 ebä lä yashuleno wei a lä cui. ³ Cusa bä suwäbö Wana e ca̦i. Ö̦jö Cusa a lä cui, Elode e yafi jamö a bada läoma. Susana a ma cui, ö̦jö a ca̦i cuoma. Ai bä ca̦i suwä bluca. Ö̦jö bä suwä bladabö showawänö, bä bluca bayeliblamou cuaama. ⁴ Bluca bä lä bälöblai bä fa co̦camoliyonö, bä bufi dayäamabä, Jesúsnö shominaja tä a̦ wäyäö yacläoma. Abinaja a cuma. ⁵ —Ai anö mobä shäyäjaö mö alayoma. Mobä shäyäjaö cuaafälöö däjä, bei yo jamö ai mobä fa blälälalunö, mobä cadiquilalemaje. Biyomö bänö mobä ca̦i owa nocaa jäalalemaje. ⁶ Bei masi blaobä jamö ai mobä blälälaliyoma. Mobä lobe caua showadalaliyoma ma cui, mosibä shi̦liquii nocamou dicooma, mashita a jäläläo dicoo fa mlacunö. ⁷ Tä mösöcöböobä jamö ai mobä fa blälälalunö, mobä caua ma bälayono wei ma cui, mösöcö bä caua mö fa fedulalunö, mosibä baömölayoma. ⁸ Mashita a lä dodijidai jamö ai mobä fa blälälalunö, mobä caua fa liyäjälalunö mosibä badalayoma. Ai mosibä jamö, moli mosi ma cui ja, 100 mobä cublou majölayoma. ’¿Ö̦jö tawä? —a i̦cali cuma—. Wamacö yömöcacö lä walalai, bä yömöca daa da dodijiicu. ⁹ Jesúsnö bä lä nocamabono wei bä bufi wedinajamou yalo, shominaja tä a̦ wäyäö lä yacläono wei tä a̦ ja, a wa̦limaje. A wa̦liije däjä, ¹⁰ abinaja Jesús a cuma. —Yai Bada tänö cama ebä ca̦i lä cuo wei tä a̦ lä cui ja, cafä wamacö bufi jaducumabou. Tä a̦ ji̦limamou walalao showadao ma mlai ma cui, dodijidawä wama tä a̦ bluca ji̦liaö fe yadiobä, wamacö bufi damaö. Ö̦jö ma cui, ai bä mö feduwä lä cui bä nija, shominaja ya tä a̦ li showadi wäyäö yacläo, bä bufi jaducublou mlaobä. Bä mamo ma showao wei ma cui, bä bufi möblou mlaobä. Bä yömöca ma dao wei ma cui, wale a̦ ji̦liaö walalao mlaobeje —Jesús a cuma. ¹¹ Abinaja a cuu co̦oma. —Mobä lä shäyäjamou wei ya mobä a̦fa wäyäö lä yacläofe, ö̦jö Yai Bada ya etä a̦ yai wayoaö lä cufe. Bei mobä lä culenaja, Yai Bada etä a̦ cuwä. ¹² Bei yo jamö mobä bläläö lä cuaaö weinaja, ai bänö Yai Bada etä a̦ ji̦liaö cuaaöje. Tä a̦ ji̦liaöje ja, fecula bada a fa waloiquiyonö, bei bä bufi jamö tä a̦ lä didile etä a̦ doaö nocamou, tä a̦ bejedi bufii mlaobeje. Bä jucäamou mlaobä. ¹³ ’Bei masi blaobä jamö mobä bläläa lä culaliyono weinaja, ai bä mö feduwänö tä a̦ ca̦i ji̦liaö cuaaöje —a cuma—. Tä a̦ ji̦liaöje däjä, bufi doblalanö tä a̦ däaöje. Ö̦jö ma cui, mobä nasöcö daloblou fa mlacunö, mosibä dedejebloimi. Ö̦jö mosibä lä culenaja bä lä cui, tä a̦ bejedi jaba ma bufilei wejei ma cui, bä yabäcamou däjä, bä waiquidou. ¹⁴ ’Tä mösöcöböobä jamö mobä bläläa lä culaliyono weinaja, ai bä ma cuinö tä a̦ ji̦liaö cuwä mö feduweje —a cuma—. Tä a̦ ma ji̦liablaö wejei ma cui, täbä showadi lä yabäcäblou wei tä ja, bä yabäcäablalou majöblao dicoo. Madofi bä ca̦i tabou bufi doblaoje. Cama bä cuaaö bufi lä doblao wei tä ja, bä ca̦i yabäcäo. Ö̦jö däjä, Yai Bada nija bä bufi badadalou fa mlacunö, tä lä dodijidai etä mili wawäblou ma cule, etä liyäjäbloimi. ¹⁵ ’A mashita lä dodijidai jamö ai mobä bläläa lä culayono weinaja, ai bä ma cuinö tä a̦ ji̦liaö cuwä mö feduweje —a cuma—. Ö̦jö bä lä dodijaö wei bä lä cuinö, bä bufi bejedimolanö tä a̦ ji̦liaö cuaaöje. Tä a̦ fa ji̦liajenö, tä a̦ nofi jaducubou dodijioje. Bä bufi yanöcölanö tä a̦ juadiije ja, etä yai dodijidawä cublaliyo. ¹⁶ Abinaja Jesús a cuma. —Cowa wacö ömöamaöje däja, jaboca anö wacö fe nia yojobou majöomije. A lä mio wei tä bäfätä jamö ma cui, wacö ca̦i nia jo̦yaboimije. Ma, wacö i̦taobä jamö wacö yai befi ca̦i nia i̦tabouje, ö̦jö tä shi̦inö, bä lä faö wei bänö wawädowä täbä dablaö showadaobeje. ¿Ö̦jö tawä? ¹⁷ ’Inaja showawä, jödödöwä tä nia bluca wawädowä cuo. Fei däjä ai tä a̦ ji̦limamou nofi mojodi ma cui, obi tä a̦ nia malä walalablou wei. Fei däjä ai tä a̦ ma jo̦yale ma cui, obi tä a̦ nia wawäblou malä nomöjöo wei. ¹⁸ ’Wamacö yömöca dao däjä, bä yömöca daa da dodijiicu, ö̦jö lä, wamacö bufi yai jaducublobä. Bä bufi jaducuwä lä waiquii, ö̦jö bei bä bufi jamö tä lä didile, Yai Bada tänö etä nia balamafälöö. Ö̦jö ma cui, bä bufi jaducudalou lä mlai bä lä cui nija, “Ya tä a̦ wiisibö daö waiquia”, bä bufi ma cuu wei ma cui, etä wai wiisibö jo̦wa daö lä bädale etä nia co̦aö, tä a̦ nofi mojodubou majöobeje —bä nowa tama. ¹⁹ Ö̦jö däjä, Jesús bä nöö, bä fääshä ebä walobeyoluma ma cui, täbä fa mashiquionö bä ajedou doblonomi. ²⁰ Jesús nija abinaja ai e cuma. —Naafä a ma cui, fääshäfä bä ma cui, bä ublaa siboa lä cubiyedi. Wa möö bufi doblaoje —a cuma. ²¹ Ö̦jö ma cui, abinaja Jesús a cuu mö feduoma. —Yai Bada etä a̦ ji̦liaöje däjä, tä a̦ juaö lä showadao wejei bä lä cui, ö̦jö iba nayä cäbä, iba mashi ö̦jö bä ca̦i li showawä —Jesús a cuma. ²² Ai däjä, canawä a jamö, Jesúsnö bä lä nocamabono wei, cama sho bä bluca döcäcäobaliyoma. Abinaja Jesús e cuma. —Modu ai u mashi jamö, bämacö da bucaduo —e cuma. Einaja a fa cunö, bä befi ca̦i caläa showalayofälöma. ²³ Bä befi ca̦i caläfälöbä jamö, Jesús a mialiyoma. Ö̦jö däjä, wadoli a lojode juu fa showadaimanö, mau u bada lä shäyäjou wei ubä fe fa lajoblalunö, bä mishi mini dubaliyoma. ²⁴ A jushulajenö abinaja a nowa tamaje. —¡Tä a̦ wäyäle! ¡Yamalecö da bayeliblalö! ¡Bämacö mishi duo a lä cube! Ö̦jö däjä, a fa jocädalunö, wadoli a wasöa showadalema, u ca̦i bada lä shäyäjono wei u ca̦i. Ö̦jö a wa̦nö wadoli a ca̦i mladou fa showadalonö, tä bluca ononodou showadalayoma. ²⁵ Cama ebä nija abinaja a cuma. —¿Wedi tä tabä wamale nofi li mölaboimi dicoo? —a cuma. Bä quilima. Bä bufi shädayaimou ja, bä wa̦liyoma. —¿Ei wedi bei a li dodijiwä? Wadoli a bada ma cui, mau u bada lä shäyäjou wei u ma cui, cama a wa̦nö täbä nofi mladou si ijejewä yai —bä cuma. ²⁶ Ö̦jö däjä, Jelasateli bä ulifibö jamö, bä befi ca̦i waloquema, Calilea tä mashi jamö. ²⁷ Jesús a fa washölöblalunö, ö̦jöteli a lä feculaböono wei anö a mö bamaleyoluma. Yedu ja camishi bä joyaa fa showadaacönö, a didionomi. Yafi jamö mlai, nomawä täbä didiblaaö lä yaimou wejei jamö, a li bälöoma. ²⁸ Jesús a fa dalalönö, a si̦lalamoma. Ö̦jö a cotä ja a möfe boblaquema, a nofi ojode tablamobä. I̦cali a wa̦ faö ja, abinaja e cuma. —¡Jesús! Yai Bada a Bada lä ayai bä Ijilubö wa e lä cui, ¿wedinaja wale nia fa taamanö wale nabä li waloo cuboyoi? ¡Wale a̦ da ji̦lilä! ¡Wale nö bleaamaö showadao dijä! —a cuma. ²⁹ Fecula a lä didile a faö co̦ofälöbä, Jesúsnö a shömaö waiquia yalo, e a̦ cuoma. ¿Ö̦jö tawä? Feculanö a shi fa wa̦limalönö, showadi a nö bleaamadima. A shi wa̦lii däjä a nö quiliaö ja, bei bococu ma cui, bei matacö ma cui, a showadi o̦cabomaje, boo shicö bada cofibönö. Ö̦jö ma cui, shicö bada jifediblaö fe fa yadilonö, ulifi bloque jamö feculanö a ca̦i juaadima. ³⁰ Ö̦jö däjä, Jesúsnö a wa̦fa wa̦lima. —Yajalawä ya wa̦fa cua —e cuma. Fecula bluca bä taboma yalo, a wa̦ cuoma. ³¹ Jesús nija fecula bä a̦ fe blacäjoma. Abinaja bä cuma. —Täca nö quilijiwä lä cubodi jamö, ¡yamacö shöma dijä!—bä cuma. ³² Bei. Ö̦jamö yalo coshino bluca bä iyama, ö̦jö jefu a balöcö showawä jamö. ¿Ö̦jö tawä? Jesús nija fecula bä a̦ fe blacäjou ja, coshino bä nijamö bä shömamou fa bufinö, ö̦jamö bä shömöa yacläquema. ³³ Ö̦jö däjä, a shi lä wa̦lino wei a fa dacöfälöjenö, coshino bä nija fecula bä bluca lucäa nomöjölaliyoma. Bä fa lucäolalunö, tä mö wädäjäa lä dodijibe jamö, bä shi jaliwä ca̦i fa yo̦balufälönö, modu u jamö bä mishi bluca duobaliyoma. ³⁴ Coshino bä nofi lä tabou wejei bä lä cuinö, ö̦jö tä fa dalalöjenö, bä quilili doculayoma. Shabono jamö bä lä bälöle bä ma cui nija, bä bälöo lä siboblai bä ma cui nija, tä a̦fa wäyäö cuaamaje. ³⁵ Tä a̦ fa ji̦liläjenö, ö̦jamö bä bluca icua showadaquema, tä möbeje. Jesús nija bä fa waloicunö, fecula bänö a lä daqueno wejei, a dodijidawä dalalemaje. Jesús a cotä jamö a bufi demi ca̦i looma. Camishi cäcö ja a didioma. Ö̦jö tä bluca fa dalalöjenö, bä quilia fe balojolaliyoma. ³⁶ Ö̦jö däjä, bä mamo lä showaono wei bä lä cuinö tä a̦fa bluca wäyämaje, a lä feculaböono wei a lä jalomaleno wei tä a̦ lä cui. ³⁷ Ö̦jö däjä, ö̦jamö bä lä bälöblai bä nö quilili bleaama yalo, Jesús a shömöa co̦lemaje. A shömaöje ja, canawä a jamö cama ebä ca̦i döcäcäo co̦baliyoma, bä befi ca̦i caläö co̦ofälöbä. ³⁸ Fecula bänö a lä daqueno wejei a lä cui, Jesús nija a nocao bufi fa doblaonö, a wa̦ fe blacäjoma ma cui, Jesúsnö a shömöa co̦lema. Abinaja e cuma. ³⁹ —Ma, a co̦jamö da co̦o. Yai Bada tänö wa bayeliblaö lä dodijilofe, afä bä nija tä a̦fa shino da wäyäjälu —a cuma. Inaja a cuma yalo, a co̦a fa showadalufälönö, ö̦jamö bä lä bälöle bä bluca nija, Jesúsnö a bayeliblaö lä dodijilayono wei, bei tä a̦fa wäyäö cuaaö showaoma. ⁴⁰ Bei. Modu ai u mashi jamö Jesús a waloa fa co̦icunö, bä lä co̦camono wei bänö a nö dabomaje yalo, bä bufi doblalanö a walomaquemaje. ⁴¹ Ö̦jö bä nijamö, Jailo a wa̦fa bada lä cuono wei a cuoma, judio bä yododabä yafi jamö a lä läono wei. Ö̦jö a fa icuicunö, Jesús a cotä jamö a möfe boaliyoma. Cama e yafi jamö Jesús a lulubou shi jalimou cudeenö, a wa̦ fe blacäjoma. ⁴² Cama bä tää moli e lä cui, e fa jalililalunö e nomaö ajedeoma. Lasha jai 12 a faa waiquimalema, a moco cuoma. Jailo nija Jesús a fa nocalofälönö, täbä mashicou fe fa balojoonö a bacäjamamaje. ⁴³ A bacäjamafälöbeje jamö, suwä a nö jalili bleaaö nö lä dedeano wei a juu coyocooma. A nö i̦yä bleaaö showai ja, lasha 12 a faa waiquimalema. Bluca bä nija a jalomamou ma wabäono wei ma cui, a jalomaö doblonomije. ⁴⁴ ¿Ö̦jö tawä? Jesús nija a yauaö ajedou juofälöma. A ajedou fa juofälönö, Jesús camishi ecö casö jubäa fe yadia yaulalema. Ecö casö fa jubädalönö, a i̦yä mladou showadalayoma. ⁴⁵ Ö̦jö däjä, abinaja Jesús a cuma. —¿Wedinö bei wale jubädalei cufe? —a cuma. —Camiyänö mlai —ebä bluca cuma. Ö̦jö däjä, Pedro a wa̦ fama. —Bada tä. Täbä malä mashicole. Bluca bänö wa malä bacäjamalajei. ⁴⁶ Ö̦jö ma cui, Jesús a wa̦ fe blacäjoma. —A nia fa bayeliblamonö, ai tänö wale jubäa cadidilalei lä cufe. Camiyä ya lojodenö a jalou ja, wale nofi mojodubobä tä cua malä mlai —a cuma. ⁴⁷ Ö̦jö däjä, “Ya lä jubälöfe, tä jo̦yaami waiquiwä”, a suwä bufi fa cunö, a wawäblaliyoma. A quilili blösö blösömolanö a ajedequema. Jesús cotä jamö a möfe fa deialunö, bluca täbä mamo mötale däjä, a wa̦ nö wäquema. A jalobä a jubädaö bufi lä doblaono wei tä ma cui, a jaloa lä showadaaliyono wei tä ma cui, ö̦jö tä a̦fa bluca wäa showadaquema. ⁴⁸ Abinaja Jesús e cuma. —Ami. Camiyä wale nofi mölaboma yalo, wa jalolayou lä cufe. A bufi yanöcöwä ca̦i da co̦jamö —a cuma. ⁴⁹ A wa̦ faö showao däjä, bada e yafi jamö ai e cuo lä jäono wei e waloa mö baquema. Jailo a bada nija abinaja a cuma. —Bei. Inaja lä waiquiwä. Tääfä a waicou waiquio cublei. Tä a̦ lä wäyäö wei a yabäcaö fe blacäjo dijä —a cuma. ⁵⁰ Ö̦jö ma cui, Jesúsnö ö̦jö tä a̦ fa ji̦lilänö, abinaja Jailo a nowa tadaö showalayoma. —A bufi jalujo dijä. Wale a̦ bejedi shino bufibou fe da yadio. Ö̦jö däjä, a jalou wä —a nowa tama. ⁵¹ Jailo e yafi jamö, Jesúsnö bä ca̦i fa waloicunö, moco a nomawä lä maqueono wei jamö, ai bä bluca famanomi. Pedro, Juan, Santiago, ö̦jö bä shino famalema. A lä nomalayono wei bä fö̦ö e, bä nöö e, ö̦jö cäcöbö ca̦i shino famalema. ⁵² ¿Ö̦jö tawä? Bä ö̦cöö waiquioma. A nomöa bluca bomaje. Ö̦jö ma cui, abinaja Jesúsnö bä nowa tama. —Bä ö̦cö dijä. Wama a moco nomöa lä bole a nomaö cadidio malä mlai. A mia bädaa lä cule —bä nowa tama. ⁵³ A lä nomalayono wei tä daö waiquiweje yalo, a noca i̦cablalamaje. ⁵⁴ Ö̦jö ma cui, Jesúsnö boco fa dälänö, a jocäblamaö bufima. —U̦asi. A da jocäblalu —e cuma. ⁵⁵ Inaja e fa cunö, a bufi jomoblou co̦layoma. A jocädou fa showadalonö, Jesúsnö a iyamaö bufii showadaoma. ⁵⁶ Bä fö̦ö e ma cui, bä nöö e ma cui, cäcöbö bufi shädayaimou dodijioma. Ö̦jö ma cui, Jesús a lä cuaano wei tä a̦ wäyäböö mlaobä, cäcöbö a̦ ca̦i wasöa dodijilema.

¹ Ö̦jö däjä, cama 12 ebä lä nocamabono wei bä lä cui, Jesúsnö bä nacaa fa ajedealalönö, fecula bä bluca yashubeje bä tablamalema. Jalili bä jalomabeje bä ca̦i tablamaö mö fedua showalayoma. ² Ö̦jö däjä, Yai Bada tänö cama ebä ca̦i lä cuo wei tä a̦ wäyäö cuaabeje bä shömölema, bä lä jalili wei bä ca̦i jalomaö cuaaö showadaobeje. ³ Abinaja bä nowa tama. —Wamacö lä jublole däjä, shinoco wamacö nia juu. Fii wama defibä nia bofälöimi. Wama täbä didibofälöbä, wama täbä nia däboimi. Wamacö iyafälöbä, nii wama bä nia yefiboimi. Wama täbä lulafälöbä, wama bä nia blada boimi. Camishi wama bä nia bolacafälöimi. ⁴ Wamacö shifilimou mlai, wamacö nia lä cuo wei a yafi ja, bä da yanöcöicu. Wamacö juu co̦fälöö ja, ö̦jamö lä culanö wamacö nia jocäö co̦o. ⁵ ’¿Ö̦jö tawä? —a cuma—. Wamacö juu lä cuaaimadi jamö, wamacö bälömabou bufiomije ja, abinaja wamacö nia cuaaö. Ö̦jö wama bä tabi feiaö yalo wamacö sibolanö, bei wamacö mamicö busi jamö bä libu libu lä sudile, wama ebä nia yaösöblalefälöö. Ö̦jö tänö bä nö nia lä bleaaö wei wama tä nia jömaö —a cuma. ⁶ Bä aa fa showalöfälönö, bluca täbä shabonobö jamö, Yai Bada tänö cama ebä ca̦i lä cuo wei tä a̦ wäyäö cuaamaje. Jalili bä ca̦i jalomaö cuaaö showaomaje. ⁷ Jesús a lä cuaano wei, bada tä Elode ma cuinö tä a̦ ji̦lilema. Ai bä a̦ ja, a bufi ca̦i wedinajamoma. Fe ojomalewä Juan a ma shämono wei ma cui, ö̦jö a fa bufijenö, a wa̦ demi täo co̦omaje. ⁸ Ai bä mö feduwä lä cuinö, Yai Bada a wa̦no jaba lä wäyäno wei, Elia a bufidaö mö fedulayomaje. Ai bä showawä lä cui, abinaja bä bufi cuma. “Yai Bada a wa̦no wäyälewä bä jaba lä cuono wei, ai a demi jocädou fa co̦onö, ö̦jö a jo̦wa”, bä bufi cuu mö feduoma. ⁹ Abinaja Elode a cuma. —Camiyänö Juan ya fe bäblamalema. Ei a wa̦fa bluca lä wäyälajei, ¿wedi bei a jo̦wa li majöwä? —a cuma. Inaja a bufi cuma yalo, Jesús a möö bufi doblaoma. ¹⁰ Jesúsnö bä lä shömöleno wei bä co̦blou fa co̦lonö, bä lä cuaano wei tä a̦fa bluca wäyäö co̦ojolomaje. Ö̦jö däjä, Besaidateli bä ulifibö jamö bä yamili cuo balöobä, bä lululefälöma. ¹¹ Ö̦jö ma cui, bä lä co̦camono wei bänö, ö̦jamö bä a̦fa juu fa ji̦liläjenö, a nosi däbofälömaje. Jesús nijamö bä waloa fa jeicunö, bä dodijidawä walomaquema. Ö̦jö däjä, Yai Bada tänö cama ebä ca̦i lä cuo wei tä a̦ ja, bä bluca yömölama. Bä lä jaliliono wei bä ca̦i jalomama. ¹² Motoca a yajadodoaö däjä, Jesús nija cama 12 ebä fa icuicunö, abinaja a nowa tamaje. —Fei bä bluca lä co̦camole bä shömöa da co̦lu, bä bälöblawä fe lä fa̦yoblai bä nija bä cuo fe jalubä. Ö̦jö bä nija bä nii luluabeje. ¿Ö̦jö tawä? Ei tä ulifi bloque malä cui —a nowa tamaje. ¹³ Ö̦jö ma cui, Jesús a wa̦ läoma. —Ma. Cafä wamacönö wama bä yai iyamabä. Abinaja cama bä cuu nomöjöoma. —Nii yama bä bluca luluadayou mlao däjä, ei yama bä bluca nia lä iyamaö wei tä cuami waiquiwä. Nii 5 yama bä wai tabou bädaa lä cule. Yuli bolacabö cäcö ca̦i —bä cuma. ¹⁴ ¿Ö̦jö tawä? Täbä malä blucaono wei. Wa̦lo bä shino jai 5.000 cuoma. Cama ebä lä nocamabono wei bä nija bä loo toujamaö bufima. —Jai 50 täbä bluca cudale, bä da loamaboduje —a cuma. ¹⁵ Inaja bä cuaaö fa showadaonö, bä bluca loamabodayomaje. ¹⁶ Ö̦jö däjä, nii 5 bä lä cuono wei bä dälema, yuli bolacabö cäcö ca̦i. Ö̦jö bä fa dälönö, fedu jamö a mö fa nonoicunö, bä nia lä iyano wei tä ja, Yai Bada nija a bufi a̦fa doblalou wäyämoma. Ö̦jö däjä, bä nii fa cälalönö, cama ebä lä nocamabono wei bä nija bä jöböquema, bä lä co̦camono wei bä nija bä jöböaö cuaaö nomöjöobeje. ¹⁷ ¿Ö̦jö tawä? Bä bluca fa iyaolalunö, bä bädöolaliyoma. Ö̦jö däjä, Jesús ebä lä cuinö bä nii sheje co̦a fa co̦abodujenö, wöö 12 bä jamö bä fe nii shee lajomalalemaje. ¹⁸ Ai däjä, Yai Bada nija Jesús a no bayeli nacao däjä, cama ebä lä nocamabono wei ebä ca̦i yami culanö, bä wa̦lima. —¿Wedinaja bei wale nofi jo̦wa yai li tabou dodijiaje? Camiyä ¿wedi bei ya jo̦wa? ¹⁹ Abinaja ebä cuma. —Fe ojomalewä Juan bei wa jo̦wa fa talei. Ai bä mö feduwä lä cuinö, Yai Bada a wa̦no wäyälewä Elia a cuo lä balöono wei, ö̦jö wa jo̦wa bufidaö talajei. Ai bä a̦ showawä ja, Yai Bada a wa̦no wäyälewä ai a demi jocädou fa co̦lonö, ö̦jö bei wa jo̦wa co̦dawä fa talei —bä cuma. ²⁰ Abinaja e cuma. —Ö̦jö ma cui, cafä wamacö lä cuinö, ¿wedinaja bei wamale nofi li tabou dodijia cule?—a cuma. Pedro a wa̦ juoma. —Yai Bada tänö a shömabä a lä yaileno wei, ö̦jö cafä bei wa dodijiwä —bei e cuma. ²¹ Ö̦jö ma cui, bä lä nocamabono wei bä a̦ wasöma. Bä nowa taö dodijioma, tä a̦ wäyäö showadao mlaobeje. ²² Abinaja bä nowa tama. —Camiyä ya lä yanowamöblaleyoluno wei ya lä cui, wale nö nia bleaamaöje. Judio bada bä ma cuinö, nofi bäyäalewä blowäjäwä bä ma cuinö, Moisesi tä a̦ ja täbä lä damaö wejei bä ma cuinö, ö̦jö bänö wale nö nia bleaamaö fe balojooje. Wale nia waiije. Ya nia shämou cadidio. Inaja ya taamamobä ya waiquiwä. Ö̦jö ma cui, bolacabö tä mö fa dödölönö, ya demi nia jocädou co̦o —bä nowa tama. ²³ Ö̦jö däjä, abinaja bä nowa bluca tama. —Camiyä nija bä nia lä nocao wei bä lä cui, cama bä cuaaö bufi lä doblao wei tä ja, showadi bä nia yai wasöo. Wale bufiije yalo bä ma shäöje däjä, bä nia ojode cudio fe yadio. Bä nia nocao fe yadio. ²⁴ Bita ja bä nia demi lä cudio wei tä ja, bä bufi mö lä blucao wei bä lä cui, bä ba̦limi nia cuodayou malä mlai. Ö̦jö ma cui, camiyä ya nowa ja bä shämou lä ojodao wei bä lä cui, ö̦jö bä nia shino ba̦limi cuo ayao. ²⁵ Bita jamö bä madofi bluca lä cublai bä madofi ma däamou wei ma cui, bä nia yai lä ba̦limiblou wei tä joyamou dicoo ja, ¿wedi tänö bä yai nia li bayeliblamou majöo, ö̦jö lä? ²⁶ ’¿Ö̦jö tawä? —a cuma—. Iba bä a̦fa jilamou quilii dicoo ja, inaja showawä camiyä ya nia quilii cuo mö feduo. Wale a̦fa ca̦i wäyäö quilii dicoo ja, inaja showawä camiyä ya lä yanowamöblaleyoluno wei ya ma cui, ya nia quilii cuo mö feduo. Ya shi̦i ca̦i itou lä co̦le däjä, camiyä ma cui, “Iba cäbä”, ya nia cuu quilii, Fayä etä shi̦i lä cule jamö a̦jele ya etäbä ca̦i itou däjä. ²⁷ Ö̦jö ma cui, cafä wamacö nija ei ya wa̦ lä cui, bejedi lä ya wa̦. Ai wamacö lä ublale wamacö nomaö showaono mlai ja, Yai Bada tänö cama ebä nia ca̦i lä cuo wei, wama tä nia dablaö. ²⁸ Ö̦jö tä a̦ wäyäö fa balöonö, jai 8 tä mö didi cublou fa co̦lonö, Jesúsnö cama ai ebä nacalema. Pedro, Juan, Santiago bä fa nacalänö, jefu a jamö bä ca̦i dolequebefälöma, Yai Bada nija a nö bayeli nacaojolayobä. ²⁹ A nö bayeli nacao däjä, Jesús wäyäcu mömou shomiblaliyoma. Camishi ecö ma cui, ecö shi̦i ca̦i wacalamiblaliyoma. ³⁰ Ö̦jö däjä, ai täcöbö fa bädalunö, Jesús sho bä a̦ wayoma. Moisesi, Elia sho cäcöbö cuoma. ³¹ Yai Bada tä shi̦i lä cule ja cäcöbö fa wawäblalunö, Jesús a nia lä shämono wei tä a̦fa wayoamaje. Jelusale jamö Yai Bada tänö a shämaö lä bufino weinaja showawä. ³² ¿Ö̦jö tawä? Pedro sho bä lä cuono wei bä fa malishalönö, bä ma miqueno wei ma cui, bä la̦a fa co̦lunö, Jesús etä shi̦i lä doblale etä shi̦i dalalemaje. Jesús nija cäcöbö ublaa lä yädäono wei, cäcöbö ca̦i daa showadaalalemaje. ³³ Ö̦jö däjä, Jesús nija Moisesi, Elia sho cäcöbö mladou co̦fälöö däjä, Pedro a wa̦ fama. —Tä a̦ wäyäle. Eja bämacö lä cule, tä dodijidawä waiquiwä. Yano 3 yama bä nia wai i̦tamaö, ¿ö̦jö tawä? Afä a, Moisesi e, Elia e, einaja yama bä nia wai yano tablaö, ¿ö̦jö tawä? —a cuma. A bufi mlaö yalo, a wa̦ biyäcou bädaoma. ³⁴ A wa̦ faö showai ja, ölajashi a bada fa itolunö, bä jo̦yablalema. Ö̦jamö bä fe fa̦yoblou ja, bä quililaliyoma. ³⁵ Ö̦jö däjä, ölajashi jamö culanö a wa̦ bädaliyoma. —Ei Ijiluyä a, ya lä yaileno wei. A wa̦ da ji̦liläje —a cuma. ³⁶ A wa̦ faö fa waiquidalunö, Jesús a yami ublaa daa co̦a majölalemaje. ¿Ö̦jö tawä? Mamicai bä cudio balöoma. Tä lä möno wejei tä lä cui, moli a ma cui nija tä a̦fa wäaö jaöonomije. ³⁷ Ö̦jö tä fena ja, jefu a jamö bä dömöa fa co̦balufälönö, bä bluca lä co̦camono wei bänö Jesús a mö bamalemaje. ³⁸ Bä lä co̦camono wei bä nija ai a wa̦lo lä ublaono wei, Jesús nija a wa̦ i̦cali fama. —¡Tä a̦ wäyäle! Ei iba ijiluyä a nofi da ojodadalö, ¿ö̦jö tawä? A malä moli wei. ³⁹ Fecula anö a nabä fa queicunö, a si̦lalamou. A shi fa wa̦limalönö, a i̦cali yabolemou. Inaja a fa cuaadinö, showadi caficö moshi boyacaoblou. Ya̦cumö a nö shälebö. A yabäcaö mladoimi. ⁴⁰ Afä wa bä lä nocamabole bä nija ya wa̦ fe blacäjoma ma cui, a yashublaö doblonomije —a cuma. ⁴¹ Abinaja Jesús e cuma. —¡Uo! Äyämö ya nö dedeaö ma waiquile, Yai Bada wama tä nofi nö mölabobimi waiquiwä. Bejedi lä, wamacö dobloimi. Wama tä nofi mölabou shaliliobä bämacö nö dabou ja, ya modaaö waiquiwä. Bei. Bä ijilubö e da bälabayoje —e cuma. ⁴² Bä ijilubö e blacäö däjä, feculanö a fa shäyäblacönö, a i̦cali yabolemolayoma. Ö̦jö ma cui, Jesúsnö fecula e bälöo fa wasönö, e faa co̦a showadalayofälöma. A fiya fa jalomalönö, bä fö̦ö nija a demi icua co̦maquema. ⁴³ Yai Bada a nö Bada lojode lä quiliaö wei tä fa damolalunö, bä bufi bluca shädayaimoa fe balojolayoma. ⁴⁴ —Ei ya wa̦ lä fale, wamale a̦ ji̦liaö buo mlai ja, bei wamacö bufinö tä a̦ yai däa da cadidilöje. Ya lä yanowamöblaleyoluno wei ya lä cui, yanowamö täbä nija ya nia jöböamou —a cuma. ⁴⁵ Ö̦jö ma cui, cama a wa̦fa lä wäamono wei a wa̦ ji̦lia möblanomije. Yai Bada tänö tä a̦ nofi mojodumaboma, bä bufi jaducublou mlaobä. Tä a̦ ca̦i wa̦lii quilimaje. ⁴⁶ Jesús nija bä lä nocaono wei, “Camiyä ya yai bada cuobä”, bä nowa bluca tayou ja, bä a̦fa tayoa dicolayoma. ⁴⁷ Jesúsnö bä bufi daö fa waiquionö, ijilu a fa dälänö, a ublaa ajedemaquema. ⁴⁸ Ö̦jö däjä, abinaja bä nowa tama. —Ei ijilu a lä cui, a shomi ma cui, camiyä ya wa̦nö a wai nofimaö fe yadioje ja, camiyä ma cui wale nofimaö mö feduoje. Inaja showawä, camiyä wale nofimaöje ja, wale lä shömöleno wei a ma cui, ö̦jö a nofimaö mö feduo showaoje. ¿Ö̦jö tawä? Cafä wamacö nijamö a jömöo lä mlai a lä cui, a nofi bada tabou lä mlajei, ö̦jö a lä cui, Yai Bada tänö bada bei a nofi shino yai tabou. ⁴⁹ Jesús nija Juan a wa̦ fama. —Bada tä. Ai a lä cuinö, cafä wa wa̦ ja fecula bä yashuu. Yama a dalalema. Camiyä bämacö nija a yädäo bufiomi yalo, yama a wasöblalema, ¿ö̦jö tawä? ⁵⁰ Ö̦jö ma cui, abinaja Jesúsnö a nowa tama. —A wasö dijejä. Cafä wamacö nija bä a̦ läblou dao lä mlai bä lä cui, wamacö a̦ bayeliblabeje bä li waiquiwä malä cui—a cuma. ⁵¹ Fedu jamö Jesús a nia lä co̦amou wei etä ajedou waiquioma yalo, a bufi cadidilanö Jelusale jamö a aa shalililayoma. ⁵² Cama a wa̦no taö balöodayobeje, bä shömöa balölema. Samalia tä ulifi jamö, ai bä shabonobö jamö bä fa waloicunö, Jesús dodijidawä a waloamabeje bä a̦ faö balöodayoma. ⁵³ Ö̦jö ma cui, Jelusale jamö a cadidou waiquioma yalo, a bälömabou bufionomije. ⁵⁴ Ö̦jö tä fa dabölalönö, Jesúsnö bä lä nocamabono wei ai cäcöbö a̦ fama, Santiago, Juan cäcöbö lä cui. Abinaja Jesús a nowa taböma. —Bada tä. Fedu jamö cowa wacö lä culadi, ¿yama wacöbä blälämabä tawä? Ei bä waicaö showadaobä —a nowa taböma. ⁵⁵ Ö̦jö ma cui, Jesús a mö fa yabadalunö cäcöbö a̦ wasölema. ⁵⁶ Bä jayuaö fa showadaicufälönö, ai a shabono jamö bä waloa majöquema. ⁵⁷ Bä jufälöbä jamö, Jesús nija abinaja ai a cuma. —Wa juu lä bädao wei jamö ma cui, ö̦jamö ya nia nocao —a cuma. ⁵⁸ Abinaja Jesús e cuu mö feduoma. —A möla dijä, ya yafibö cuami. Yalo bä bäcabö cublawä. Biyomö bä ma cui, bä yabäcabö cublawä mö feduwä. Ö̦jö ma cui, camiyä ya lä yanowamöblaleyoluno wei ya lä cui, ya yanobö cuami —e cuma. ⁵⁹ Ai a nija abinaja Jesús a cuma. —Camiyä nija a da nocaiquiyo —a cuma. Ö̦jö ma cui, abinaja a cuu mö feduoma. —Bada tä. Fayä a lä ujudule etä cublou däjä, ya nomawä didiaö balöobä, ¿ö̦jö tawä? —a cuma. ⁶⁰ Ö̦jö ma cui, abinaja Jesúsnö a nowa tama. —Bufi nomawä cama bä li nomawä didiayobä. Cafä a da alufälö. Yai Bada tänö cama ebä ca̦i lä cuo wei tä a̦ da wäyädu —a nowa tama. ⁶¹ Abinaja ai a ca̦i cuma. —Bada tä. ¡Camiyä ca̦i! Cafä nija ya nia nocao. Iba yafi jamö, ya nia lä juu wei ya tä a̦fa wäyäö balöojolayou —a cuma. ⁶² Abinaja Jesúsnö a nowa tama. —Ficali täca jamö a nia ma ojodamou wei ma cui, a bufi shaliliomi dicowä ja, a nia dobloimi. Inaja bä bufi lä jujeblou wei bä lä cui, Yai Bada tänö cama ebä ca̦i nia lä cuo wei tä a̦ wäyäbeje jamö, ö̦jö bä yädäobä bämi—a nowa tama.

¹ Ö̦jö tä cublou fa waiquilonö, Bada tä nia lä juno wei jamö a wa̦no taö balöodayobeje, 70 ai bä yaia nomöjömaquema. Bluca bä lä bälöblai bä nijamö, cama a nia waloadalou lä cuaaö wei jamö, bolacabö bä cudawä bä shömöa balöabodayoma. ² Ö̦jö däjä, ö̦jö bä nija abinaja a cuu yaclämoma. —Wale nia lä bufiblaö wejei bä bluca cublawä. Nii bä tamobä bä bada lä waiquiinaja bä cuwä ma cui, bä nii nia lä taö wejei, bä bolacami dicowä. Wale nofi mölabobeje, ¿wedi bänö bä nia li yömölaöje? Yai Bada tä nija bä a̦ da fa, ö̦jö lä. Cama etäca ficali lä cule, a Bada lä cui nija wamacö a̦ fa fanö, bä ojodamobä ö̦jönö bä yai shömabä. ³ ’Bei —a cuma—. Bä da alufälö. Bämacö shömaö lä cule. Ji̦ima bä waiteli lä läle jamö, oweja bä ocalo shäablamou si ijejewä lä cuo weinaja, wamacö nia cuo. ⁴ Blada wama bä nia besiboimi. Afä wama täbä didibofälöbä tä ma cui, ö̦jö wama täbä ca̦i nia däafälöimi. Wamacö mamicö didio nomöjöobä täcö ma cui, wama täcö nia bolacafälöimi. Bei yo jamö, wama bä a̦ wayomaö mlai, wamacö nia jayuo showadao. ⁵ ’Wamacö yafii cuaabä jamö, Yai Bada nija, ö̦jamö bä lä bälöle wama bä nia bayelimaö showadao, bä bufi ca̦i yanöcöwä cuobä —a cuma—. ⁶ Ö̦jamö bä ca̦i lä culenö dodijidawä wamacö waloamaö ja, Yai Bada tänö a bufi nia yai yanöcömabou. Ö̦jö ma cui, dodijidawä wamacö waloamaimi dicoo ja, a nia bayeliblamoimi. A bufi yanöcömabobä ami. ⁷ ’Wamacö shifilimou mlai ja, wamacö lä cuo wei jamö bä da yanöcöicu, ö̦jö bä nija wamacö nö liyobä. ¿Ö̦jö tawä? Shinoco täbä ma juu wei ma cui, bä ojodamou yalo, bä dobäbeje bä li waiquiwä malä cui. Ai täbä yafibö jamö, wamacö nia bälöadalou cuaaimi. ⁸ ’Wamacö juu cuaabä jamö, ai a shabono jamö dodijidawä wamacö waloamaöje ja, ö̦jamö wamacö niibö lä baaö wejei bä ja, bä da iya —a cuma—. ⁹ Ö̦jamö bä lä jalili wei bä da jalomaje. Abinaja bä nowa da taje. “Yai Bada tänö cama ebä nia ca̦i lä cuo wei, cafä wamacö nija tä ajedou waiquia”, wama bä nowa tabä. ¹⁰ ’¿Ö̦jö tawä? Ö̦jö ma cui, ai a shabono jamö dodijidawä wamacö waloamaimije ja, cama bä lä juu wei jamö, wawädowä wama bä nowa taö ja, abinaja wamacö nia cuu. ¹¹ “Afä shabono jamö bä libu libu lä jilai, bei yamacö mamicö jamö bä lä jeicufe, yama bä yaösöblaö lä cule, bämacö dobloimi jömabä. Ö̦jö ma cui, wamalecö a̦ da ji̦lilä. Yai Bada tänö cama ebä ca̦i nia lä cuo wei, tä ajedou waiquia lä cule”, wamacö nia cuu. Einaja wama bä nowa taö fe yadiobä. ¹² ’Bämacö nowa taö lä cule —a cuma—. Yai Bada tänö täbä jömabä etä cublou däjä, Sodomateli bä nö nia ma bleaaö wei ma cui, ö̦jö lä bä nö nia shino yai bleaaö dodijio —Jesús a cuma. ¹³ Ö̦jö däjä, Jesúsnö ai bä lä bälöblai bä nowa blajawä tama. —Colasiniteli wamacö, Besaidateli wamacö, wamacö nö bleaaö fe balojoobä wamacö. Yai Bada wama a lojode dablabä, cafä wamacö nijamö tä nö lä quilijii bluca ya tä wawämama. Diloteli bä nijamö inaja ya cuaaö mö feduo fa cunoja, Sidonoteli bä nijamö ya inaja cuaaö mö feduo fa cunoja, wa̦lidiwä tä ja, yedu bä bufi nö lädaliobö wei. Bä doblou lä mlai tä ja, yubu ushibö ja yedu bä nö looquebö wei. Camishi a̦loqui bä ja yedu bä nö didiobö wei, bä bufi nö wa̦lidiwä ö̦jöböamobä. ¹⁴ ’Yai Bada tänö täbä obi nia lä jömadayou wei jamö, Diloteli bä nö nia ma bleaaö wei ma cui, Sidonoteli bä nö ca̦i nia ma bleaaö wei ma cui, cafä bei wamacö nö nia shino yai bleaaö fe balojoo. ¹⁵ ’Cabenaoteli wamacö —a cuu nomöjöoma—. ¿Fedu jamö Yai Bada tänö cafä dodijidawä wamacö nia tabodayou daanö? Mlaicätä. Bä lä nomaö wei bä cuobä jamö, wamacö nia shäyäjäabodayou, täca nö quiliwä lä cubodi jamö —a cuma. ¹⁶ Ö̦jö däjä, abinaja Jesús a cuma, cama ebä lä nocamabono wei bä nija. —Cafä wamacö a̦ ji̦liaöje ja, camiyä ma cui wale a̦ ji̦liaö mö feduoje. Wamacö a̦ waii dicooje ja, camiyä ma cui wale a̦ waii mö feduoje. Inaja showawä, camiyä wale a̦ lä waii wejei bä lä cuinö, wale lä shömöleno wei a ma cui, ö̦jö a wa̦ waii mö feduoje —a cuma. ¹⁷ Jesúsnö 70 ebä lä shömöleno wei bä lä cui, bufi doblalolanö bä waloa coquema. Abinaja Jesús nija bä cuu co̦ojoloma. —Bada tä. Cafä wa wa̦nö fecula yama bä yashublamaö däjä, ö̦jö bä ma cuinö yamalecö a̦ juaöje —bä cuma. ¹⁸ Abinaja Jesús a cuu nomöjöoma. —Bejedi lä. Sadanasi a lä ujudulayono wei däjä, fedu jamö ya quei dalalema, madula a wacö quei lä culenaja showawä. ¹⁹ ¿Ö̦jö tawä? Wamacö nö wa̦lojabä, bämacö tablamaö waiquilayoma. Olu wama bä ma cadädäablaö wei ma cui, sufi wama bä ma cadädäablaö wei ma cui, wamacö nö nia bleaaimi. A nö lä nabämou wei a fecula bada lä cui, ö̦jö a ma ishou däjä ma cui, wamacö nö nia wa̦lojaö fe yadio. Ai tä bädawä ma cui ja, wamacö nia famiimi. ²⁰ Ö̦jö ma cui, fecula bänö wamacö a̦ lä juaö wejei tä ja, bä bufi doblalo fe balojoo dijä. Fedu jamö, Yai Bada tänö wamacö a̦fa lä oniboladi tä ja, ö̦jö tä ja bä bufi shino yai da doblalo —bä nowa tama. ²¹ Ö̦jö däjä, Yai Bada tä Bufinö Jesús a bufi doblamabou fe fa balojoonö, bä Fö̦ö nija a wa̦ fama. —Fabe. Fedu jamö ma cui, bita jamö ma cui, cafä lä wa shino Bada cua ayaa. Ei ya tä a̦ lä wäyäfe, bä bufi a̦fa moyawä lä taö wejei bä nija wa tä a̦ nofi mojodumabou. Bä bufi a̦fa dao lä taö wejei bä ma cui nija inaja showawä. Inaja ö̦jö wa bä ma taamabou däjä ma cui, jai ijilu bä lä cule bä nija wa tä a̦ yai wawäblamalema. Awei, Fabe. No mlai ja inaja wa bä taamaö bufi malä doblaono wei. ²² ’¿Ö̦jö tawä? —a cuu nomöjöoma—. Jödödöwä täbä nija ya Bada läobä, Fayänö wale tablamalema. ¿Ö̦jö tawä? Yanowamö täbänö wale daimije. Fayä a lä culadinö, bä Ijilubö ya e lä cui, wale shino daö ayawä. Inaja showawä, Fayä a daö ma mlajei ma cui, camiyä bä Ijilubö ya enö, ya shino daö ayawä. Fayä ya dablamaö bufi lä doblao wei bä lä cui nija ya fa damalalönö, ö̦jö bä ma cuinö a daö mö feduaje —a cuma. ²³ Ö̦jö däjä, cama ebä lä nocamabono wei bä nija a mö fa yaiblalunö, wajado bä yömölama. —Cafä wamacö lä cuinö, ei däjä tä lä cuaale wama tä fa mönö, wamacö bufi yai möblou yalo, wamacö bufi yai doblalobä wamacö. ²⁴ Bämacö nowa malä tale. Yai Bada a wa̦no wäyälewä bä cuo lä balöono wei bä bluca ma cuinö, bä bälöo lä dodijiono wei bä bada ma cuinö, fei däjä wama tä lä möö wei, tä möö bufi ma doblaono wejei ma cui, tä mönomije. Wama tä a̦ lä ji̦liaö wei, tä a̦ ca̦i ji̦liaö bufi ma doblaono wejei ma cui, tä a̦ ji̦lianomije —Jesús a cuma. ²⁵ Ö̦jö däjä, Moisesi tä a̦ yai lä daö wei ai a fa ublaiquiyonö, Jesús a wa̦ bejedi wabama. —Tä a̦ wäyäle. ¿Wedinaja ya yai fa cuaanö, ya li ba̦limi bälöquedayou? ²⁶ Abinaja Jesús e cuma. —Ja̦o. Moisesi esibä oni jamö, ¿wedinaja tä a̦ oni cuu, ö̦jö lä? ¿Wedinaja bämalecö taamabä tä a̦ li? Wa bufi lä cuu wei tä a̦ da wäba —a cuma. ²⁷ Abinaja e cuu mö feduoma. —Abinaja tä a̦ oni cuu. Bada wama tä yai nia nofimaö, cafä wamacö nija a bufiblamobä a lä cui. Bufi jaduculanö wama a nia nofimaö, bei wamacö bufi yainö. Wamacö bufi lä cuaablalou wei tä ma cuinö, wamacö nö lä wa̦lojoablalou wei tä ma cuinö, wama a nia ca̦i nofimaö fe balojoo. Aifä bä ma cui, cafä wamacö nofi jo̦lio lä culenaja, inaja showawä aifä wama bä nofi tabolanö, wama bä nia ca̦i nofimaö. ’Einaja tä a̦ oni cuu —Jesús nija a cuma. ²⁸ —Ja̦o. Wa wa̦ cadidou —Jesús a cuma—. Inaja wa cuaaö ja, wa ba̦limi bälöaledayou —a nowa tama. ²⁹ Ö̦jö ma cui, dodijidawä a nia dablamou fe fa yadionö, abinaja a cuu dicooma. —Ö̦jö ma cui, iba aiyä a jo̦wa nofimamaö lä bufino wei, ¿wedi jamö bei a, ya nofimabä? —a cuma. ³⁰ Jesús abinaja e cuma. —Wale a̦ da ji̦lilä, ö̦jö lä, wa bufi jaducublobä. Jelusale jamö a culanö, Jelicoteli bä nijamö ai a alayoma. A jufälöö däjä, tomömolewä bänö a nabä quea mö baquemaje. Camishi ebä jayualalemaje. A famimaö fe fa balojoojenö, shinoco a jalili daquefälömaje. ³¹ ’¿Ö̦jö tawä? Ö̦jö däjä, a jalili blaobä yo jamö, nofi bäyäalewä a juu fa bädaofälönö, a blaa dalalema. A dablaö däjä, a ja̦loa dicoquefälöma. ³² Inaja showawä, ö̦jamö Lewi nodiwä a juu fa jeimanö, a jalili daa nomöjöaleyoluma. A dablaö däjä, inaja showawä, a ja̦loa cua nomöjöquema. ³³ ’Ö̦jö ma cui, Samaliateli a juu fa nomöjöoimanö, a jalili blaobä jamö a waloa jäa majöqueyoluma —a cuma—. A jalili dablaö däjä, shomiteli a ma cuinö a nofi ojodadaö showadalayoma. ³⁴ A fa icuicunö, dabö dabö ubänö a jalili fä̦lömaö fa showadaonö, nashiwä toubänö nini nini ebä fe lölalema. Acadafu cäcönö ebä o̦caaquema. Ö̦jö däjä, cama yalo e ji̦ima jamö a maquequema. A befi ca̦i fa lululäfälönö, fama bä waloblaabä yafi jamö a fa bälacönö, a bayeliblalema. ³⁵ ’Ö̦jö tä fena ja, blada 2 cäcöbö fa dälönö, cama e yafi lä cui nija cäcöbö jöböquema. Abinaja a nowa tama. “Jalili a nofi taa da jäcö”, a nowa tama. “Wa bayeliblabä ai wa bä blada joyaö bädao ja, ya jayuaö co̦lanö ya tä nowa co̦amaö wä”, a nowa tama. ¿Ö̦jö tawä? ³⁶ ’Ja̦o —a cuma—. Fei däjä ¿cafä wedinaja wa bufi cuu? Tomömolewä bänö a nabä fa queicujenö, a famimalemaje. A jalili blaobä jamö 3 bä waloa jequema. ¿Wedi jamö a lä cuinö a nofi yai tadalema? —Jesús a cuma. ³⁷ —A nofi lä ojodadaleno wei a lä cuinö —a cuma. —Inaja cafä wa ca̦i cuaaö mö feduobä —Jesúsnö a nowa tama. ³⁸ Jelusale jamö, Jesúsnö cama ebä cai̦ juu co̦fälöbä jamö, ai a shabono jamö bä ca̦i yafilayoma. Ö̦jöteliyoma a Marta lä cuinö, cama e yafi jamö a nacalema. ³⁹ Bä fääshä María e a̦fa lä culenö, Bada tä cotä jamö a fa loicunö, tä a̦ lä wäyäno wei tä a̦ ji̦liama. ⁴⁰ Ö̦jö ma cui, fama bä nia fa iyamanö, nii bä ja Marta a li yabäcou dicooma. Jesús nija a fa icuicunö, abinaja a nowa tama. —Bada tä. Fääshäyänö wale daa fa dicocönö, yami ya ojodamou dicoa lä cule. “Inaja waiquiwä buo”, ¿bei wa bufi cuu daanö? Wale bayeliblamaö da bufi, ö̦jö lä. ⁴¹ Ö̦jö ma cui, abinaja Bada tänö a nowa tama. —Ami, Marta. Wa bufi nofi jushublaa dicoa. Bluca täbä ja wa yabäcäablalou dicoa. ⁴² Tä yai lä dodijidai, moli tä cua. Maríanö ö̦jö tä yaia waiquilema. Ya wa̦ nia lämoimi —a cuma.

¹ Ai däjä, Yai Bada nija Jesús a nö bayeli nacaoma. A wa̦ faö waicou däjä, cama ai a lä nocamabono wei e a̦ fama. —Bada tä. Yai Bada nija yamacö a̦ fabä, tä a̦ yai da wäba. Fe ojomalewä Juan a lä cuinö, cama ebä lä nocamabono wei bä nija, tä a̦ wäa lä taqueno weinaja showawä —a cuma. ² Abinaja Jesúsnö bä nowa tama. —Yai Bada nija wamacö nö bayeli nacao ja, abinaja wamacö yai cubä. “Fabe, cafä wa wa̦fa shino doblao wäyämobä wa. Eja yamalecö ca̦i bälöa da dodijiiquiyo. ³ Yamacö nia lä iyaö wei täbä ja, showadi yamalecö da dobä. ⁴ Yamacö doblou lä mlai, tä nowa ca̦i da mladamalö. Camiyä yamacö ma cuinö, yamalecö lä yabäcaö wejei bä nija yama tä nowa bluca malä mladamaö wei. Yamacö nö doblobö lä mlai jamö, yamalecö ca̦i da wasö.” Einaja Yai Bada nija wamacö cubä —Jesúsnö bä nowa tama. ⁵ Ö̦jö däjä, abinaja Jesús a cuma. —Abinaja tä cuwä. Ai wa lä cui, wa lä nofimaö wei a lä cui nija wa nacou ja, bäshäcuoladi wa aa jalulayou. ¿Ö̦jö tawä? Wa ublaa sibolanö abinaja wa e cuu. “¡Nofi!” wa e cuu, “Iba nii 3 bä da majöba. ⁶ Camiyä nija iba nofi a waloquei lä cufe. Ya niibö baabä tä cuami”, wa e cuu. ⁷ ’Yafi u̦eshi jamö culanö a wa̦ faö. “Wale yabäca dijä. Ya yoca laa waiquiquema. Ijiluyä bä sho yamacö mia waiquia lä cule. Bäfä dobäbä ya nö itoblobimi”, a nia cuu. ¿Ö̦jö tawä? ⁸ Ö̦jö ma cui, abinaja bämacö nowa taö lä cule. Ya̦cumö a fa itoblalunö, wa nia dobäö fe yadio. Wa nofimaö cudeenö mlai. Quilii mlai ja wa nacodii cudeenö, a nia ya̦cumö jocäblou. Wa bä lä bufii wei bä nia bluca jöböaö. ⁹ ’¿Ö̦jö tawä? —Jesús a cuma—. Bämacö nowa taö lä cule. Yai Bada nija bä da naco, wamacö dobäö cuquei. Dodijidawä tä da dayäaje, wama tä dablaö weicätä. Bei yoca da cloocaje, yoca caloblaö wä. ¿Ö̦jö tawä? ¹⁰ Bä bluca lä nacou wei bä lä cui, bä malä dobämou wei. Inaja showawä, tä dodijidawä lä dayäaö wejei bä nija tä dodijididawä dablamou. Bei yoca lä cloocaö wejei bä ma cui, ö̦jö bä nija yoca caloblamou. ¹¹ ’Cafä wamacö ijilubö lä cuinö, yuli a nacaöje ja, yuli mlai, ¿olu wama ecö nia jöböaö yacläo daanö? —a cuma—. ¹² Cadala nate nacaö ja, ¿sufi wama e nia jöböaö yacläo daanö? ¹³ Wa̦lidiwä talewä wamacö ma cui, dodijidawä ijilufä wama bä dobäö daö waiquiwä ja lä, Fayä fedu jamö a lä culadi, ö̦jö bei a nia shino yai dodijaö fe balojoo. Cama Yai Bada tä Bufi lä nacaö wejei bä nija a Bufi jöbömoquei —Jesús a cuma. ¹⁴ Ai däjä, Jesúsnö fecula a yashuma. A lä feculaböono wei a lä cui, fecula anö aca fa bolebömalönö, a wa̦ faö doblonomi. Ö̦jö ma cui, fecula e fa yashulunö, aca lä boleböono wei a wa̦ faö liyäjäblou co̦layoma. Bä lä co̦camono wei bä bufi bluca shädayaimoma. ¹⁵ Ö̦jö ma cui, abinaja ai bä cuma. —Fecula bada Sadanasi tä lojodenö bä li fecula yashuu —bä cuma. ¹⁶ Ai bä mö feduwä lä cuinö Jesúsi a wa̦ nia bejedi fa wabajenö, abinaja bä cuma. —Yai Bada wa e nö ö̦jöböamobä, tä nö lä quilijii tä da wawämalö —bä cuma. ¹⁷ Ö̦jö ma cui, Jesúsnö bä bufi daö fa waiquionö, abinaja bä nowa tama. —Bä bälöa lä yaile bä nofi wa̦liayou ja, bä bälöo dobloimi majöo. Cama bä mashi ma cui, inaja showawä, bä nofi wa̦liayou däjä bä nia bälöo lojodoo majöomi. ¹⁸ Ma. Sadanasi ebä lä cui, cama bä nofi wa̦liayou dicolayou ja, ¿wedi jamö tänö bei ebä ca̦i li lojodoa nomöjöquei? Sadanasi a lojodenö ya bä jo̦wa fecula yashublaö yalo ya wa̦. ¹⁹ ’“Sadanasi a lojodenö bä li fecula yashublaö”, wamale nofi tabou ja lä, ¿inaja showawä afä wama bä nofi ca̦i tabou da culanö, fecula bä lä yashuu wejei bä lä cui? Mlaicätä. Ö̦jö cudeenö, inaja wamacö cuu dicoo ja, afä bä showawä lä cuinö wamacö jolemou jömaö cuqueije. ²⁰ Ö̦jö ma cui, Yai Bada a lojodenö ö̦jö ya bä li yai yashuu, Yai Bada tänö cama ebä ca̦i lä cuo wei wama tä dablaö fe yadiobä. ²¹ ’¿Ö̦jö tawä? —a cuma—. A lä waiteli wei a lä cuinö, cama madofi ebä nofi läbou däjä, etäbä nia yabäcamoimi. A ishobä etä madofi ca̦i läa ja, shomi täbä nia lucämaimi. ²² Ö̦jö ma cui, a nö yai lä wa̦lojaö weinö a nabä fa queicunö, a nö bleaamaö ayao. Ö̦jö däjä, cama a nowamöobä etä nofi lä mölabou wei etä jucälei. Cama etäbä bluca lä tabou wei etäbä fa däalalönö, etäbä shedecaö. ¿Ö̦jö tawä? ²³ ’Camiyä wale bayeliblaö lä mlai a lä cuinö, Sadanasi a li bayeliblaö waiquiwä. Iba ya bä co̦abä jamö bä co̦aö mö feduo lä mlai a lä cuinö bä yai sheleleblamaö—a cuma. ²⁴ Abinaja Jesús a cuma. —Fecula a yashublamou däjä, a lä tabou wei a daquefälöö. Ö̦jö däjä, tä ulifi bloque lä wejedii jamö a shoqueadii cuaaö bäa. A yanöcöobä tä ma dayäö wei ma cui, tä dablaimi. Ö̦jö däjä, abinaja a fecula cuu. “Ya da dacöi nija ya yai nia bälöo co̦o”, a cuu. ²⁵ Ö̦jö däjä, a lä daquefälöno wei a lä cui nija a waloa fa co̦iquiyonö, yafi wawädowä a dalalei. A yafi dodijidablaö jälayoma. ²⁶ Ö̦jö däjä, ai bä co̦ablaö aa fa co̦lunö, 7 bä ca̦i fecula waloa co̦queyoluu. Cama a wa̦lidiwä ma waiquii ma cui, bä yai wa̦lidiwä fe lä balojoi bä ca̦i waloa majöqueyoluu. Ö̦jö nija bä fa lucälönö, bä bälöaliyo. Bä lä tabou wei a lä cui, a nö jaba ma bleaano wei ma cui, ö̦jö lä däjä a nö yai bleaaö dodijiquei —a Jesús cuma. ²⁷ Jesúsnö ö̦jö tä a̦ wäyäö showalanö, bä lä co̦camono wei jamö, a wa̦ suwä i̦cali fama. —Naafänö wa lä tablaleno wei a lä cui, wa lä shadimabono wei a lä cui, a bufi yai doblalobä a —a suwä cuma. ²⁸ Ö̦jö ma cui, abinaja Jesús a cuma. —Ma. Yai Bada etä a̦ fa ji̦liajenö, tä a̦ nofi lä jaducubou wejei, ö̦jö bä bufi shino yai doblalobä bä li —a cuma. ²⁹ Täbä lä co̦camono wei täbä mashicou showai ja, abinaja Jesús a cuma. —Wamacö fei däjä lä bälöblai wamacö dobloimi fe balojowä. Yai Bada ya e nö ö̦jöböamobä, tä nö lä quilijii wama tä wawämaö bufi ma doblao wei ma cui, bämacö a̦ nia juaimi. Wama tä nia lä möö wei, Jonasi a lä taamano weinaja, inaja tä cuwä wama tä shino nia dablaö. ³⁰ Ninibeteli bänö Yai Bada tä lojode dablabeje, Jonasi a cuoma. Inaja showawä, cafä wamacö fei däjä lä bälöblai wamacö lä cuinö, Yai Bada wama a lojode dablaö nomöjöobä, ei cä ya, ya lä yanowamöblaleyoluno wei ya lä cui. ³¹ ’Wamacö fei däjä lä bälöblai wamacö jömadayobä jamö, Sabaateliyoma a bada bälöo lä dodijiono wei, a suwä nia ca̦i ublao yädäo mö feduo —a cuma—. Ö̦jö a ma cuinö wamacö nia dobloimi jömaö. Wamacö nia waimaö bufii. ¿Ö̦jö tawä? Bada tä Salomo a wa̦ ji̦liabä, ö̦jö a li suwä blajawä waloa fe malä yadiqueno wei. Salomo a bada ma cui, camiyä bei ya yai bada dodijiwä. Fei däjä, cafä wamacö nijamö camiyä ya yai cua ma cule, wamale a̦ ji̦liblaimi. ³² ’Wamacö fei däjä lä bälöblai wamacö jömadayobä jamö, Ninibeteli bä nia ca̦i ublao yädäo mö feduo. Ö̦jö bä ma cuinö wamacö nia ca̦i jömaöje —a cuma—. Wamacö ca̦i nia waimaö bufiije. Jonasi nija Yai Bada etä a̦ fa ji̦liläjenö, wa̦lidiwä tä ja bä bufi lädou malä showadalayono wei. ¿Ö̦jö tawä? Jonasi a bada ma cui, camiyä bei ya yai bada dodijiwä. Fei däjä, cafä wamacö nijamö camiyä ya yai cua ma cule, wamale a̦ ji̦liblaimi. ³³ Inaja Jesús a cuma. —Cowa wacö ömöamaöje däja, shomi jamö wacö jo̦yabou nomöjöomije. Wöö anö wacö fe nia ca̦i yojobou majöomije. Ma, wacö i̦taobä jamö wacö yai i̦tamabouje, ö̦jö tä shi̦inö, bä lä faö wei bänö wawädowä täbä dablabeje. ¿Ö̦jö tawä? ³⁴ Cowa wacö lä culenaja bei wamacö mamocu cuwä, wawädowä wama täbä dablabä. Wamacö mamocu demi ja, wama täbä bluca wawädoablaö cuquei. Ö̦jö ma cui, wamacö mamocu wa̦lidio däjä, wama täbä nia dablaimi. ³⁵ ’¿Ö̦jö tawä? —a cuma—. Bä da moyaweicu, ö̦jö lä. “Tä shi̦i cuobä jamö ya cua waiquia”, wamacö bufi jole cuu ja, wamacö mölaa bälayou. ³⁶ Ö̦jö cudeenö, wama täbä bluca wawädoablabä wamacö waiquiwä ja, mö didi wama tä coyocomaboimi ja, ¡bejedi lä wama täbä nia bluca wawädobou! Cowa wacö shi̦i cuobä jamö, wamacö wawädowä juu lä cuaaö weinaja showawä. ³⁷ Jesús a wa̦ waicou däjä, faliseo a badanö a nacalema, cama nija a nö liyobä. Ö̦jö cudeenö, ö̦jamö lä a fa junö, bä iyaö ca̦i loobä jamö a cuquema. ³⁸ Bä iyaö showao mlao däjä judio bä imicö showadi lä ya̦lömou wei, Jesús imicö ya̦lömou fa mlacunö, faliseo a bufi shädayaimoma. ³⁹ Ö̦jö däjä, abinaja Bada tä cuma. —Cafä faliseo wamacö lä cui. Ji̦shima bä ma cui, ca̦ö fesibä ma cui, fesibä sibosi aumaö lä culajeinaja wamacö sibosi ma taamamou wei ma cui, bei wamacö u̦eshi shami fe balojowä. Madofi bä ja wamacö bufi shino yaimodii. Wamacö shino nabämou. ⁴⁰ ¡Wamacö bufi jaducuwä lä mlai! Bei wamacö sibo lä tablaleno wei a showawänö, ¿bei wamacö ca̦i mötalö tablaö mö feduonomi daanö? ⁴¹ Inaja wamacö cuaablalou mlai, abinaja wamacö yai cuaabä. Bä nö jo̦lili lä bleaaö wei wama bä nofi yai ojodabobä. Inaja wamacö yai cuaaö ja, “Ei bä au nö mlawä”, Yai Bada tänö wamacö nofi nia shino tabou. ⁴² ’Faliseo wamacö nö bada bleaaö dodijiobä wamacö —a cuma—. Afä nii wama bä bluca lä doaö wei, wajaquemi jenabä wai bädawä ma cui, fe usucuwä 10 wama jenabä fa shedequeblalönö, ai moli jenabä wai ja, Yai Bada showadi wama a dobäö. Ö̦jö ma cui, wamacö yai dodijaö mlai ja, wama a ca̦i nofimaö mlalanö, wama a jole jole dobäö waiyoblalou bädao dicoo. Wamacö dodijalanö wama a dobäö fa cunoja, tä nö doblaobö wei. Wama a nofimalanö wama a dobäö fa cunoja, tä nö dodijidaobö wei. ⁴³ ’Faliseo wamacö nö bleaaö dodijiobä wamacö —a cuma—. Judio bämacö yododabä jamö, bada bä lä döcäo wei jamö wamacö döcäo yaimou mö feduo talei. Nii bä lä lulaö wejei jamö ma cui, wamacö nö bada ca̦i ö̦jöböamou bufi doblao. ⁴⁴ Wamacö nö bleaaö dodijiobä wamacö. Nomawä bä didia lä ja̦tole jamö, tä ulifi jole mömou liyäjäwä lä culenaja, bei wamacö jole mömou dodijidawä cuwä bäwä. “Eja nomawä bä didia lä cule”, bä bufi cuu mlai ja, tä ulifi mojodili cabaöje —Jesús a cuma. ⁴⁵ Ö̦jö däjä, Moisesi tä a̦ yai lä daö wei ai a wa̦ juoma. —Tä a̦ wäyäle. Faliseo bä bada lä cui, inaja wa bä nowa taö dicoo ja, camiyä yamacö ma cui yamalecö nö ca̦i waiblaö mö feduo dicoo —a cuma. ⁴⁶ Abinaja Jesús a cuu showadaoma. —Moisesi wama tä a̦ yai lä daö wei wamacö nö ca̦i bleaaö mö feduobä wamacö. Yai Bada nija täbä dodijidawä cuobä, wama tä nabä bluca shömadii talei. Ö̦jö ma cui, wama bä doblamaö mlai, wama bä modaablamaö buo. Jai jude wama tä bälamaö bädao. Bä doblou fe yadiobä, moli ma cui wama bä bayeliblaö buomi. ⁴⁷ Wamacö nö bleaaö dodijiobä wamacö. Yai Bada a wa̦no wäyälewä bä lä cuono wei bä lä cui, ö̦jö wama bä a̦ nofi jaducubou ma mlai, wama bä dodijidawä didimabou bufi doblaa bädaa lä cule. Cafä wamacö nö badabö showawä lä cuinö bä shäö fa balöojenö, bä lä didile jamö wama tä ulifi baushibou bufi doblao nodio, dodijidawä wamacö mömou cuo fe yadiobä. ⁴⁸ ’¿Ö̦jö tawä? —a cuma—. Cama wama ecö a̦fa nodiwä jilamou ja, cafä wamacö jömamou waiquiwä. Cafä wamacö nö badabö jaba doblou lä mlaono weinaja wamacö cuwä malä showai. Cama bänö bä a̦ waibolajenö bä shälemaje. Cafä wamacö linö wama bä a̦ waibou showalanö, bä lä didile jamö wama tä ulifi baushibou bädawä. ⁴⁹ ’¿Ö̦jö tawä? —a cuma—. Ö̦jö cudeenö, Yai Bada a wa̦ faö moyawäo showaoma. Abinaja a cuma. “Cama bä nija wale wa̦no nia lä wäyäö wejei ya bä nia shömaö. Ya bä shömabä ya bä lä yaimabole, ö̦jö ya bä nia ca̦i shömaö mö feduo. Ö̦jö ma cui, ai bä nia shäöje. Ai bä nö nia bleaamaöje”, a cuma, ⁵⁰ cafä wamacö nija Yai Bada a wa̦no wäyälewä bä yanöcö shäö lä cuaano wejei bä bluca lä cui, cafä wamacö nija bä nowa bluca cuobä. ¿Ö̦jö tawä? Awei. Ei bita a lä tablamono wei däjä, bä jaba lä ishono wei tä ma cui, bä ishou lä nodiablalono wei tä ma cui, cafä wamacö nija tä nowa nia bluca jödödöwä cuo. ⁵¹ ’Abele a jaba shämolayoma —a cuma—. Ö̦jö däjä, Yai Bada ai ebä bluca yanöcö shäa jäa fa nomöjöabodujenö, ya̦cumö nofi bäyäalewä Sacalia a shäa nomöjölemaje. Yai Bada e yano je̦fa jamö a nabä quequemaje. Yalo bä ö̦shö lä maqueblaaö wejei täcö ajede ja, Yai Bada etä yano sibo mötale jamö a shälemaje. ¿Ö̦jö tawä? Awei, cafä bämacö nowa taö lä cule. Cafä wamacö fei däjä lä bälöle wamacö nija, ö̦jö tä nowa nia bluca jödödöwä cuo. ⁵² ’Moisesi wama tä a̦ yai lä daö wei wamacö nö bleaaö dodijiobä wamacö —a cuma—. Yanowamö bä nija Yai Bada a dablamou bufi ma doblao wei ma cui, wama bä bufi jaducublamaimi. Yai Bada cafä wamacönö wama a daimi waiquiwä. Ai bänö a daö bufi ma doblao wejei ma cui, cafä wamacö a̦nö wama bä doblamaimi —Jesús a cuma. ⁵³ Ö̦jö däjä, Jesús a aa lä co̦layofälöno wei däjä, Moisesi tä a̦ ja täbä lä damaö wejei bä ma cuinö, faliseo bä bada ma cuinö, a nofi jaba wawädowä wa̦libomaje. Bluca tä ma cui ja, showadi a wa̦lii fe blacäjomaje. ⁵⁴ A wa̦fa taö bufi fa doblaojenö, a wa̦ nia yaclämaö fe yadiomaje.

¹ Inaja cama bä ma cuaaö däjä, Jesús nija bluca dodijiwä bä co̦camou fa cuaayolunö, bei bä mashicoma. ¿Ö̦jo tawä? Inaja bä mashicou cuaaö showai ja, cama ebä lä nocamabono wei bä nija a wa̦ faö fa balöonö, abinaja a cuma. —Bä da moyaweicu. Faliseo bä bada lä cui etä julumamodima wayu. Jole jole bä dodijaö bäa —a cuma—. ² Tä a̦ fei däjä wäyämamou lä ja̦too wei, wawädowä tä a̦ nia wäyämamou malä nomöjöo wei. Tä a̦ lä jo̦yabou wejei, tä a̦ nia jödödöwä wawäblamou malä cui. ³ ¿Ö̦jö tawä? Ö̦jö cudeenö, tä mö lä didile jamö wamacö a̦ faö ma ja̦toono wei ma cui, wawädowä tä a̦ nia ji̦liamou nomöjöo. U̦eshi yafi jamö wamacö a̦ wajado ma fano wei ma cui, bluca bä nija tä a̦ nia wawädowä wäamamou nomöjöo. ⁴ ’Cafä bämacö lä nofimale bämacö nowa taö lä cule —a cuma—. Yanowamö täbä nö quili ta dijejä. Bei wamacö shäö ma cujei, wamacö bufi nia wa̦liaimi. ⁵ Ma. Ya wa̦ nia wawädoo. Yai Bada a nö shino quili yai da taje. Wamacö shäö fa balöonö, shobali wacö jamö wamacö nia shäyäjaö nomöjöo lä dao wei a. Awei. Ö̦jö wama a nö shino quili yai tabä. ¿Ö̦jö tawä? Bämacö nowa taö lä cule. ⁶ ’Blada bolacabö cäcö wai ja, biyomö 5 bä däamamou talei. ¿Ö̦jö tawä? —a cuma—. Biyomö bä nowa bluca ma mlai ma cui, Yai Bada tänö bä nofi bluca jaducubou. ⁷ ¿Ö̦jö tawä? Bä nofi jo̦lio dijä. Bei wamacö feta u̦cu ma cui, Yai Bada tänö wamacö feta u̦cu bluca daö. Bä quili dijä, ö̦jö lä. Biyomö bä nowa lä culenaja mlai, Yai Bada tänö cafä wamacö nowa yai blucabou. ⁸ ’Cafä bämacö nowa taö lä cule —Jesús a cuma—. Yanowamö täbä nija quilii mlai ja, iba bä a̦fa wäamou lä wawädoo wei bä lä cui, iba ya bä a̦fa nia ca̦i wawädowä wäadayou. Camiyä ya lä yanowamöblaleyoluno wei ya lä cuinö, Yai Bada a̦jele etäbä lä cule jamö, iba ya bä a̦fa nia wawädowä wäadayou. ⁹ ’Ö̦jö ma cui, yanowamö täbä nija iba bä a̦fa wäamou lä quilii wei bä lä cui, Yai Bada a̦jele etäbä lä cule jamö, ö̦jö ya bä a̦fa nia ca̦i wäyäimi mö feduo. ¹⁰ ¿Ö̦jö tawä? Camiyä ya lä yanowamöblaleyoluno wei, wale nö ma waiblaö wejei ma cui tä nowa nia mladou. Ö̦jö ma cui, Yai Bada a Bufi nö lä waiblaö wejei bä lä cui, etä nia mladoimi waiquiwä. ¹¹ ’Judio bada bänö wamacö doblomi jömabeje, bä yododabä yafi bä jamö wamacö ca̦i nia jublou cuaaöje —a cuma—. Ai bä bada lä läblai bä nija ca̦i. Wamacö ca̦i juuje däjä, wamacö nofi nia lä bäyäo wei tä a̦ ja, bä bufi jo̦lijou dicoo dijä. ¹² Wamacö a̦ moyawe juobä, ö̦jö lä däjä showawä, Yai Bada tä Bufinö wamacö a̦ nia malä bälaö wei —a cuma. ¹³ Ö̦jö däjä, bä lä co̦camono wei jamö ai a wa̦ falayoma. —Tä a̦ wäyäle —a cuma—. A̦iwä nija a wa̦ da fa, fayä etäbä bluca lä jäblono wei täbä ja, wale dobäö mö feduobä —a cuma. ¹⁴ Ö̦jö ma cui, abinaja Jesúsnö a nowa tama. —Cafä wafäcö nija faafä ya etäbä sheleleblaö juobä wale läamanomije. Dodijidawä wafä etäbä shelelebou juobä yami —a nowa tama. ¹⁵ Bä lä co̦camono wei bä nija abinaja a cuma. —Bä da moyaweicu, ö̦jö lä, täbä bufi waiyou si lä ijejeoblou weinaja, wamacö cuaaö dicoo mlaobä. Täbä madofi bluca ma doaöje däjä, ö̦jö tänö täbä dodijidawä cudio malä mlai —a cuma. ¹⁶ Ö̦jö däjä bä bufi dayäamabä, shominaja tä a̦ wäyäö yacläo co̦oma. —A nö lä madofibö wei etäca ficali nö nijio fa dodijionö, ¹⁷ abinaja a bufi cudaliyoma. “¿Wedinaja iba nii ya bä li taamabä? Ya bä nia lä shimomaö wei bä yafi cuami”, a bufi cudaliyoma. ¹⁸ “Abinaja ya yai cuaabä”, a bufi cuu nomöjöoma. “Iba yafi ya bä wajaquemi fa wa̦lialönö, bada ya bä yafi nia yai i̦tamaö nomöjöo. Ö̦jamö lä iba madofi bä ma cui, iba nii bä ma cui, ya bä nia bluca nowamaö. ¹⁹ Ö̦jö däjä, abinaja camiyä ya nowa nia shino yai tamamou. ‘Bei. Fei däjä dodijidawä ya bälödiobä, ya täbä bluca nowamöbou waiquia lä cule. Lasha bluca ya lalomaö co̦o ma cui, dodijidawä ya nia cuo shi wa̦lii. Fei däjä ya nia ojodamou co̦daaimi. Ya nia shino iyadii. Bufi doblalolanö yamacö iyabä, showadi ya bä nia nacadii. Fei däjä, ya nia yai dodijaö.’” ’Einaja a bufi cama cudaliyoma. ¿Ö̦jö tawä? —Jesús a cuma—. ²⁰ Einaja a bufi ma cuno wei ma cui, abinaja Yai Bada tänö a nowa tama. “¡Wa bufi nofi jaducuwämi dodijiwä yai!”, a nowa tama. “Fei tä didi showawä ma cui ja, bäfä bufi nia co̦aö. Ei wa bä bluca lä shimomalöfe, ai bänö bä nia ca̦i cuo juoje”, a nowa tama. ²¹ ’¿Ö̦jö tawä? —Jesús a cuma—. Inaja yanowamö täbä bluca cuaaö dicoo. Cama bä dodijidawä bälödiobä täbä ma nowamöbolajei ma cui, Yai Bada nija bä dodijidawä cuodayobä tä taboimije. ²² Cama ebä lä nocamabono wei bä nija abinaja Jesús a ca̦i cuma. —Ö̦jö cudeenö bämacö nowa taö lä cule. Eja dodijidawä wamacö nia lä bälöo wei tä ja, bä bufi jo̦lijo dijä. ¿Ö̦jö tawä? Nii bä ma cui jamö, camishi bä ma cui jamö, bä bufi cuaablalo dijä. ²³ Wamacö demi lä cuo wei tä nowa yai bluca malä cui, nii wama bä lä waö wei bä nowa lä culenaja mlai. Bei wamacö nowa ca̦i bluca, camishi bä nowa lä culenaja mlai. ²⁴ ’¿Ö̦jö tawä? —a cuma—. Male sibä ja bä bufi da jaducublalu. Mobä döaö ma mlajei ma cui bä iyaö. Nii bä taö ma mlajei ma cui, mobä shi̦liqui shimomaö ma mlajei ma cui, Yai Bada tänö bä malä iyamaö wei. Ö̦jö bä nowa ma tabole ma cui, cafä wamacö nowa shino yai blucabou fe balojowä. ²⁵ Wamacö demi nia lä cuo wei, Yai Bada tänö tä daö fe wädöa waiquia. Wamacö bufi lä jalujublalou wei tänö, wiisibö ma cui wamacö nö nia dedejedou majöomi. ²⁶ ¿Ö̦jö tawä? Wamacö bufi lä jalujublalou wei tänö, ö̦jö wiisibö ma cui ja wamacö bayeliblamou daomi waiquiwä ja lä, ¿wedi tabä ai tä bluca ma cui ja, wamacö bufi nö nia jushublao buo? ²⁷ ’¿Ö̦jö tawä? —a cuma—. Jole jole bä bäwä ma cui ja, ö̦jö bä ja, bä bufi da jaducublalu. Bä badaö. Bä ojodamou ma mlai ma cui, shinalu ubä juducaö ma mlajei ma cui, bä liyäjäwä. ¿Ö̦jö tawä? Bämacö nowa taö lä cule. Bada tä Salomo a nö ma madofiböono wei ma cui, camishi ebä ma dodijidaono wei ma cui, ei jole jole bä lä cui bä shino yai mömou liyäjäwä dodijiwä. ²⁸ Caje caje bä cudio ma mlai ma cui, bä ö̦shömaö ma nocamou wejei ma cui, bei bä jole fa fanö, bä mömou dodijidaobä Yai Bada tänö bä bayeliblaö. Ö̦jö bä ma bayeliblaö wei ma cui, ¿camishi bä ja cafä bei wamacö nia shino bayeliblamou ayaomi daanö? Yai Bada wama a nofi bejedi mölaboimi showawä. ²⁹ ’Wamacö nia lä iyaö wei tä jamö bä bufi cuaablalo dijä, ö̦jö lä —a cuma—. Wamacö bufi jalujublalou dodijio mlai. ³⁰ Bluca bä bälöjöwä lä yaiblai bä lä cui, inaja cama bä bufi li bluca cuaablalou. Ö̦jö ma cui, wamacö lä jo̦li wei, Faafä a lä culadinö wamacö li daö waiquia. ³¹ Ö̦jö täbä ja wamacö bufi cuaablalou mlai ja, Yai Bada tänö cama ebä nia ca̦i lä cuo wei tä ja, bä bufi shino dayäo da shalilio. Inaja wamacö bufi shaliliwä cudio ja, ö̦jö täbä ca̦i showawä ma cui ja, wamacö nia dobämou —Jesús a cuma. ³² Abinaja Jesús a cuma. —Bolacadabö oweja bä lä yododoblamou weinaja wamacö cuwä ma cui, bä quili dijä. Wamacö nö wa̦lojabimi ma cui, Faafänö cama ebä ca̦i nia lä cuo wei jamö wamacö yädämabou bufi malä doblale. ¿Ö̦jö tawä? ³³ Wama täbä madofi lä tabole wama täbä fa nomöjöanö, blada bä da luluaje, bä nö lä bleaaö wei wama bä dobäbä. Inaja wamacö cuaalanö, ba̦limi tä ja afä täbä nowa yai lä bluca wei bä fa tablamodunö, eja wamacö cua ma showale ma cui bä nia shimomaö balöodayou. ¿Ö̦jö tawä? Fedu jamö wama täbä lä nowamöbou wei täbä nia mlaö majöomi. Täbä nia tomöaimije. Täbä ca̦i nia wädömamoimi. ³⁴ ¿Ö̦jö tawä? Afä wama täbä yai lä bufibou wei täbä lä cule jamö, ö̦jamö lä wamacö bufi nia malä cadididalou wei. ³⁵ Abinaja Jesús a cuma. —Jai wamacö a̦ juo showadaobä, bä nö daa da cuicu. Camishi acadafu wama bä fa̦yocomabou showale wamacö nö daobä. Cowa wama wacö luamaö mlai wama tä i̦tabou showaobä. ³⁶ Cäcöbö lä doayou wei cäcöbö nofi co̦camoabeje jamö bada a juu däjä, a nö dabou lä juo wejeinaja wamacö cuaabä. Cama e yafi jamö a co̦a lä co̦bei wei däjä, yoca cloocaö ja, yoca caloblaö showadaobeje bä nö dao. ³⁷ ’Bada a co̦blou co̦lanö, a nosie juamobä ebä lä la̦le bä lä cui bä bufi nia shino doblalou mö bao —a cuma—. Cafä wamacö nija ei ya wa̦ lä cui, bejedi lä ya wa̦. Ö̦jö bä lä cui bä nia yai bayeliblamou. Bada a ma cuinö, acadafu cäcö a̦yoa fa majölönö, bä iyabä bä nia ajedamaö. Cama a showawänö, bä niibö nia bablaayoluu. ³⁸ ¿Ö̦jö tawä? Bäshäcuoladi a ma co̦o wei ma cui, tä jalu ajede däjä a ma co̦o wei ma cui, bä nö dao dablaö ja, bä bufi doblalobä ö̦jö bei bä dodijiwä. ³⁹ ’¿Ö̦jö tawä? —a cuma—. Cama e yano jamö a lä cule, a moyawäo fa cunoja, a tomömou lä juimi a nö famabö mlai. “Ö̦jö däjä a juimaö”, a bufi cuu fa cunoja, a nö lucämabö mlai. ⁴⁰ Cafä wamacö ma cui, showadi wamacö nö daobä, ö̦jö lä. Wamacö bufi cuu mlao däjä, camiyä ya lä yanowamöblaleyoluno wei ya nia malä bädou wei —a cuma. ⁴¹ Jesús a wa̦ fa ji̦lilänö, abinaja Pedro a cuma. —Tä a̦ wäyäle. Afä yamalecö a̦fa yai wayoaö ayaobä, ¿ö̦jö wa tä a̦ wäyäö yacläo da cufanö? Ma, ¿yanowamö bluca yamalecö a̦fa wayoabä tä a̦ daanö? —a cuma. ⁴² Bada tä Jesús abinaja a cuma. —Camiyä wamale nosie lä juaö wei wamacö lä cui, ¿wedi jamö wa lä cui wa shino yai dodijaö daanö? Abinaja tä cuwä. Shomi jamö a bada nia lä juno wei a bada cuoma. A lä dodijaö wei a läo juobä a nosiemafälöma. Abinaja a nowa talefälöma. “Dodijidawä iba bä ca̦i cua da jeicu. Bä iyabä tä cuo däjä, dodijidawä wa bä iyamabä”, a nowa talefälöma. ⁴³ ’¿Ö̦jö tawä? —a cuma—. Bada e lä nosiemofälöno weinaja a cuaaö showao däjä e bada waloamaö co̦o ja, a bufi doblalolanö a nia co̦blamaö co̦o. ⁴⁴ Cafä wamacö nija ei ya wa̦ lä cui, bejedi lä ya wa̦. A nosie juaö cadidioma yalo, ö̦jö bada a lä cuinö a nia bada läamaö nomöjöo, cama etäbä bluca lä tabou wei etäbä nofi tabobä. ⁴⁵ ’Ö̦jö ma cui, ai a lä cui, bada a nosie juabä a ma cui, abinaja a bufi nia cuu dicoo. “Cuo buo. Bada tä co̦o jaöo malä mlai”, a bufi nia cuu dicoo —Jesús a cuma—. Bada a nosie juamobä ebä mö feduwä lä cui, bä si nia shino yafelimaö juo dicoo. Täbä iyaö lä co̦camou wei jamö a nia shino judii, bä shi wa̦lii bufi lä doblao wei bä nijamö. ⁴⁶ Inaja a cuaaö showao däjä, a nofi lä badabou wei e nia co̦blou co̦o ja̦toyoluu. “Fei däjä a co̦bei”, a bufi cuu mlao däjä, a nia co̦blou co̦a ja̦tolayou. A lä shominajaano wei etä fa dalalönö, bada anö a nö nia bleaamaö. Yai Bada a wa̦ bejedi bufii lä mlajei bä nijamö a nia coyocomabou. Ö̦jamö lä bä nia ö̦cöö. Bä nö beblalou yalo, bä nia lalöö. ⁴⁷ ’¿Ö̦jö tawä? —Jesús a cuma—. Bada a nosie juamobä a lä cuinö, a taamaö lä bufii wei tä daö ma waiquiono wei ma cui, tä tanomi yalo a nö nia bleaamaö dodijio. ⁴⁸ Ö̦jö ma cui, bada a nosie juamobä ai a mö feduwä lä cuinö, tä tamaö lä bufii wei tä daö fe balojowämi. Tä daimi cudeenö a dobloimi. A dobloimi yalo, a nö bleaamabä a ma cui, a bufi jaducuwä fe balojowämi cudeenö, a nö nia bleaamaö fe balojoomi. ¿Ö̦jö tawä? Tä nowa lä bluca wei tä ja a lä dobäö wejei a lä cui, ö̦jö a nia yai wa̦limamou. Inaja showawä, tä nowa lä bluca wei jamö a lä läamaö wejei a lä cui, ö̦jö a nowa nia shino yai taöje —a cuma. ⁴⁹ A wa̦ faö showai ja, abinaja a cuu co̦oma. —Bita jamö cowa ya wacö ömöamaö mö juma, täbä doblou lä mlai bä nö bleaabä. Wacö ömöo waiquio fa cunoja, ya bufi nö doblaobö wei. ⁵⁰ Ö̦jö ma cui, camiyä wale nö nia bleaamaö balöoje. Bä fe ojoblamou ja, mau ubänö bä jödödöblou lä culenaja, nini nini bänö ya nia jödödöblou cuo. Ö̦jö ya tä nö dabou showalanö ya bufi nö bleaaö. ⁵¹ Bita jamö yanowamö ya täbä bufi yanöcöblamabä ya junomi. ¿Ö̦jö tawä? Cafä bämacö nowa taö lä cule. Ya bä bufi yai sheleleblamabä ya juma. ⁵² ’Abinaja tä nia fei däjä cuo majöo —a cuma—. Moli a yano showawä ja bä lä cui, bä nia sheleleblou. 3 bä nijamö, bolacabö cäcöbö a̦ nia läo. Bolacabö cäcöbö nijamö, 3 bä a̦ nia ca̦i läo mö feduo. ⁵³ Bä nia sheleleblou. Bä ijilubö nija bä fö̦ö e a̦ nia läo. Bä fö̦ö nija bä ijilubö e a̦ nia läo mö feduo. Bä tää nija bä nöö e a̦ nia läo. Bä nöö nija bä tää e a̦ nia läo mö feduo. Bä tatä nija bä yesi e a̦ nia läo. Bä yesi nija bä tatä e a̦ nia läo mö feduo —Jesús a cuma. ⁵⁴ Bä lä co̦camono wei bä nija abinaja a cuma. —Motoca a lä queo wei jamö ölajashi a faö däjä, “Maa a elemashi juu lä cuimi”, wamacö cuu showadao. ¿Ö̦jö tawä? Inaja showawä a maa juu cuaaö. ⁵⁵ Motoca a cuaaö lä mlai jamö wadoli a juimaö däjä, “¡Jo yai! ¡Fei däjä yobli yobli tänö bämacö nö nia bleaaö!”, wamacö ca̦i cuu. Inaja showawä tä yobli cublou. ⁵⁶ ¡Jole jole wamacö lä dodijidai! Judu mösö ma cui ja, bita a ma cui ja, wamacö moyawä ma waiquii, ¿wedi tabä camiyä fei däjä ya lä cuaale tä ja, wamacö bufi jaducudaloimi? —Jesús a cuma. ⁵⁷ Abinaja Jesús a cuu co̦oma. —Yai Bada tänö tä tamaö lä bufii wei wama tä dabä wamacö waiquiwä ma cui, ¿wedi tabä wama tä li taimi? ⁵⁸ Wa wa̦fa nia dobloimi lä wäyäö wei a lä cuinö, bada nijamö wa ca̦i juu showaofälöö däjä, lobe wa tä cadejeblabä a wa̦ nö wäa da showadaicu. Bada a nija wa juwäamaö fa dicoonö, wa nö bleaamaö mlaobä. ¿Ö̦jö tawä? Bä fe lä lamaö wei a nija wa juwäa majöa fa dicoblamalänö, wa fe laamaö dicoo mlaobä. ⁵⁹ Cafä bäfä nowa taö lä cule. Tä nowa lä cule wa tä nowa bluca co̦amaö showao mlao däjä, wa nia famaö co̦o buomije —a cuma.

¹ Ö̦jö däjä showawä, Jesús nija ai bä lä cuono wei bänö Calileateli bä a̦fa shämou wäyämaje. Biladonö bä nabä fa shömöcönö, Yai Bada nija yalo bä lä dodoblamou wei bä maqueblamobä täcö jamö, bä jo̦wa shäamalalema. Yalo i̦yäbö lä jilale jamö, cama bä i̦yäbö quea coyocomalemaje. ² Abinaja Jesúsnö bä nowa tama. —Ö̦jö bä Calileateli shämou nö lä quiliano wei bä lä cui, ¿wedinaja wama bä nofi li tabou? “Calileateli ai bä dobloimi fe balojoo mlai, ö̦jö bä yai doblou fa mlacunö, Yai Bada tänö inaja bä li tablalema”, ¿wama bä nofi tabou tawä? ³ Ma. Inaja tä cuonomi. Cafä bämacö nowa taö lä cule. Wa̦lidiwä tä ja wamacö bufi lädoimi ja, cafä wamacö ma cui, inaja showawä wamacö nia ca̦i shämou cuo mö feduo. ⁴ ’Siloe jamö a yafi ösöwä lä wäcälayono wei däjä, Jelusaleteli 18 bä lä shäblaliyono wei bä lä cui, ¿wedinaja wama bä nofi ö̦jö tabou? —a cuma—. “Jelusaleteli ai bä dobloimi fe balojoo mlai, ö̦jö bä nofi yai doblou fa mlacunö, bä li inaja tablamolayoma”, ¿wama bä nofi tabou tawä? ⁵ Ma. Cafä bämacö nowa taö lä cule. Wa̦lidiwä tä ja wamacö bufi lädoimi ja, cafä wamacö ma cui, inaja showawä wamacö nia ca̦i shämou cuo mö feduo. ⁶ Bä bufi dayäamabä, Jesúsnö ico fi a̦fa wäyäö yacläoma. —Ficali etäca lä cuono wei anö, uba too tobä cuobä jamö ico fi ublamaboma. Ö̦jö fi ja a iyabä, nii bä ma bomano wei ma cui bä cuonomi. ⁷ Ficali etäca jamö a ojodamobä e nija abinaja e cuma. “Bei. Nii ya bä bomaö showai ja, lasha 3 ya famaö waiquia ma cule bä lalobloimi. ¿Ö̦jö tawä? Fi da diyälö. Cäcö fadalou mlai ja, fi ublaa bädaa”, a cuma. ⁸ ’A lä ojodamou wei abinaja e cuma. “Bada tä. Fi diyämaö jaödao bufi dijä. Bei fi cotä jamö mashita ya nia äbäjamaö. Yalo ya shibä nia löblaö. ¿Ö̦jö tawä? ⁹ Lasha ai a lalou co̦o däjä, nii bä lalou ja, inaja lä waiquiwä. Bä laloimi showao ja, ö̦jö däjä yai. Ö̦jö däjä, fi yai diyämou showadaobä”, a nowa tama —Jesús a cuma. ¹⁰ Judio bä yododabä ai a yafi jamö, täbä nia lä yanöcöo wei tä mö sábado jalu ja, Jesúsnö Yai Bada etä a̦ ja bä damama. ¹¹ Ö̦jamö a suwä juu lä tolucuono wei a cuoma. Inaja a cuwä showai ja, lasha 18 a ma famale ma cule, a juu wa̦lidio showaoma. A shaliliblou doblonomi. Fecula anö inaja a li taamama. ¹² Jesúsnö a fa dalalönö, a möamoblamalema. Abinaja a nowa tama. —Ami. Wa juu lä tolucui bäfä jalomaö waiquia lä cule —a cuma. ¹³ Jesús imicö fa maqueicunö a ublao fa shaliloimadunö, Yai Bada a nofi doablalema. ¹⁴ Ö̦jö ma cui, judio bä yododabä yafi jamö a bada lä läono wei a jushudaliyoma. ¿Ö̦jö tawä? Täbä yanöcöobä tä mö jalu ja Jesúsnö a jalomama yalo, a jushudaliyoma. Bä lä yododono wei abinaja bä nowa tama. —Wamacö ojodamodibä 6 tä mö jalu cua. Bämacö nia lä yanöcöo wei tä mö jalu cublou showaa mlai ja, wamacö jalomamou mö juimabä, ö̦jö lä, sábado däjä mlai —bä nowa tama. ¹⁵ Ö̦jö däjä, Bada tä Jesús abinaja e cuu mö feduoma. —¡Jole jole wamacö lä dodijidai! Wama bä wasöö ma cui, cafä inaja wamacö cuaaö mö feduwä malä showai. Täbä yanöcöobä tä mö jalu ma cui ja, ji̦imafä wama bä malä bayeliblaö wei. Baca bä ma cui, bulo bä ma cui, wama bä fa cushanö, wama bä amishi co̦amabä, wama bä malä lulubou wei. ¹⁶ Inaja showawä, ei Ablaamö nodiwä a suwä lä cui, täbä yanöcöobä tä mö jalu ma cui ja, ya bayeliblabä a. Sadanasinö a o̦cabou lä waiquio wei däjä, lasha 18 a famaö malä waiquile —a Jesús cuma. ¹⁷ Inaja a cuu ja, bä a̦ lä läono wei bä quililaliyoma. Bä lä yododoono wei bä lä cui, Jesús showadi a lä dodijano wei tä ja, bä bufi doblalou fe balojooma. ¹⁸ Abinaja Jesús a cuu yacläoma. —Yai Bada tänö cama ebä ca̦i lä cuo wei tä lä cui, ¿wedi tä cuwä lä dodijiinaja tä cuwä? ¿Wedinaja ya yai cubä? ¹⁹ Abinaja. Nana shimono wai lä culenaja tä cuwä. Ficali etäca jamö, ai anö nana shimono wai döquema. Shimono fa caulunö, shifi falayoma. Shifi lä badalayou wei däjä, biyomö bä yabäcabö tamoyoluma —a cuma. ²⁰ Abinaja Jesús a cuu co̦oma. —Yai Bada tänö cama ebä ca̦i lä cuo wei tä lä cui, ¿wedi tä cuwä lä dodijiinaja tä cuwä? ²¹ Suwä anö nii bä lä julumano weinaja tä cuwä. Nii bä lä julumaö wei tä lä cui, nii 3 ji̦bä jamö wiisibö tä wai coyocoa ma bäqueno wei ma cui, ö̦jö tä wai bädawänö, bä bluca julumalema —a cuma. ²² Jelusale jamö Jesús a jufälöbä jamö, bluca täbä shabonobö jamö a jayuadalou fa cuaimadunö, täbä yömölaö cuaafälöma. ²³ Jesús a wa̦lii ja, abinaja ai a cuma. —Tä a̦ wäyäle. Shobali wacö jamö bä juu mlaobä, Yai Bada tänö ¿bä nia bolacadabö shino jucäaö ayao tawä? Inaja a fa cunö, abinaja Jesúsnö bä nowa tama. ²⁴ —Yai Bada tänö cama ebä ca̦i lä cuo wei jamö wamacö cuobä, wajaquemi yoca jamö bä faö fe da yadiofälö. ¿Ö̦jö tawä? Cafä bämacö nowa taö lä cule. Ö̦jamö bä cuobä, bluca bä nia faö ma wabäo wei ma cui, bä nia faö dobloimi. ²⁵ Yoca caloa showaa ma cule, cama yafi e lä cule a fa itoblalunö, yoca fe nia laaö. Ö̦jö däjä, sibo jamö wamacö cudia showaa dicoo ja, wama yoca cloocalanö wamacö a̦ nö nia bleaaö. “¡Bada tä!”, wamacö nia cuu. “¡Yamalecö da famaliyo!”, wamacö nia ma cuu wei ma cui, camanö abinaja wamacö nowa nia taö. “Bämacö daimi. Shomi wamacö”, a nia cuu. ²⁶ ’¿Ö̦jö tawä? —a cuma—. Ö̦jö däjä, abinaja wamacö nia cuu. “Cafä sho bämacö mada iyablei. Camiyä yamacö shabonobö jamö wa tä a̦ ca̦i mada wäyäblei”, wamacö nia cuu ma cui, ²⁷ abinaja a nia cuu. “Bämacö nowa taö waiquia lä cule. Bämacö daimi. Shomi wamacö. Wa̦lidiwä talewä wamacö lä cui, bä da alufälö”, a nia cuu. ²⁸ ’¿Ö̦jö tawä? Yai Bada tänö cama ebä ca̦i nia lä cuo wei jamö, ai wama bä nia blajawä dablaö ayao. Ablaamö a ma cui, Isaacö a ma cui, Jacobo a ma cui, Yai Bada a wa̦no wäyälewä bä ma cui, ö̦jö wama bä blajawä nia ma möö wei ma cui, cafä wamacö nia sibomabou. Ö̦jö däjä wamacö nia ö̦cöö. Wamacö nö beblalou ja, wamacö nia lalöö. ²⁹ Yai Bada tänö cama ebä ca̦i cuobä jamö, shomi täbä lä bälöblai täbä nia waloblayoluu. Motoca a lä faö wei jamö ma cui, a lä queo wei jamö ma cui, a faö lä mlai jamö ma cui, a queo lä mlai jamö ma cui, ö̦jamö bä cuoma bä bluca fa co̦camoliyonö, bä nia iyaö ca̦i loo. ³⁰ ’¿Ö̦jö tawä? —a cuma—. Ö̦jamö täbä cua lä bädao wei täbä ma cui, bada bä nofi tabou lä cuaaö wejeinaja Yai Bada tänö bä nofi nia tabou. Inaja showawä, ai täbä nofi bada ma tabou wejei ma cui, Yai Bada tänö inaja bä nofi nia taboimi. ³¹ Ö̦jö däjä, faliseo ai bä bada fa waloicunö, Jesús a yömölamaje. —A da doculufälö. Bada tä Elode a lä cuinö wa shämaö bufi doblaa waiquia —a nowa tamaje. ³² Abinaja Jesúsnö bä nowa tama. —Wamacö fa alufälönö, ö̦jö a nofi wa̦li lä jushuadii wei nija wamale a̦no da wäcudu. Fei däjä ma cui, fena ja ma cui, fecula ya bä nia yashubladii showao. Jalili ya bä nia jalomadii showao. Ö̦jö tä fena ja ya nia shino waicou. ³³ Wale nia ma shämaö däjä ma cui, ya juu fe yadiofälöbä cä ya. Eja mlai, Jelusale jamö Yai Bada a wa̦no wäyälewä showadi bä shino malä shäö wejei —a Jesús cuma. ³⁴ Jesús a wa̦ blajawä faö ja, abinaja Jelusaleteli bä nowa tama. —¡Shädayai, Jelusaleteli wamacö! Yai Bada a wa̦no wäyälewä wama bä lä shäö wei wamacö. Cafä wamacö nija Yai Bada tänö bä lä shömaö wei, maa mabänö wama bä lä shäyäö wei wamacö. Cadala bänö bä ijilubö ebä fe yojobou lä cuaaö wejeinaja, inaja showawä cafä showadi bämacö tabou bufi ma doblaono wei ma cui, camiyä nija wamacö nowamamou bufionomi dicowä. ³⁵ ’Ja̦o. Inaja lä waiquiwä. Fei däjä bämacö nia daaö. Wamacö yafibö nia blocoaö. Abinaja bämacö nowa ca̦i taö showadao. Wamale nofi doaö bao showao mlao däjä, wamale nia dablaö co̦daaimi. “Yai Bada a wa̦nö a lä juimi a lä cui, Yai Bada nija, ¡ö̦jö lä a shino yai bayeliblamobä a!”, wamacö cuolanö wamale nia shino yai dablaö co̦o —bä nowa tama.

¹ Täbä yanöcöobä ai sábado tä mö jalu däjä, faliseo bada a lä cuinö Jesús a nacalema, a nö liyamabä. Yafi jamö a fa waloicunö, a dobloimi jömaö bufi fa doblaojenö a mödimaje. ² Bei. Jesús a mötalebö ja, jalili a looma. Bei bococu shuwäoma, bei matacö ca̦i. ³ Moisesi tä a̦ yai lä daö wejei bä lä cui, Jesúsnö bä wa̦lima, faliseo bä bada ca̦i. Abinaja a cuma. —Moisesi esibä oni jamö, ¿wedinaja tä a̦ oni cuu? Täbä yanöcöobä tä mö jalu jamö, ¿täbä jalomaö wasöö daanö? Ma, ¿täbä wasöimi tawä? —a cuma. ⁴ Ö̦jö ma cui, bä a̦ juonomi. Ö̦jö däjä, jalili a fa dälänö a jalomalema. A fa jalomalönö a demi shömöa co̦lema. ⁵ Ö̦jö däjä, abinaja bä nowa taö juoma. —Ai wa lä cuinö, mau uca jamö ijilufä a quequei ja, yalofä baca a quequei ja, täbä yanöcöobä tä mö jalu ma cui ja, ¿lobe wa nia yäbäaö co̦omi daanö? ¿Ö̦jö tawä? —bä nowa tama. ⁶ Einaja bä nowa ma tano wei ma cui, bä a̦ juonomi. ⁷ Bä iyabä bä lä nacano wei, Jesúsnö bä yafiblaö nö daama. Bada bä loobä jamö bä loo yaimoma cudeenö, abinaja bä nowa tama. ⁸ —Cäcöbö lä doayou wei cäcöbö nofi co̦camoabeje jamö wa nacaöje däjä, bada bä loobä jamö a loo shi jalimo dijä. ¿Ö̦jö tawä? A yai lä bada wei a nacaö mö feduo ja, ⁹ ö̦jö bada a yai cuobä jamö wa jole ma loblaquei wei ma cui, wafäcö lä nacano wei a lä cuinö, shomi jamö wa loa majöa dicomaquei. “Ei bada a lä cui, eja a yai loobä”, a cuu ja, wa quililanö wa nia shomi ja loo majöo, bä cua lä bädao wei bä nija. ¹⁰ ’¿Ö̦jö tawä? —a cuma—. Wa iyamabeje wa nacaöje ja, bä cua lä bädao wei bä nija a loa co̦caa da showadaicu. Wa lä nacano wei a lä cuinö wa dablaö däjä, bada bä yai loobä jamö wawädowä wa yai loa cadidia ja̦tomaquei. Ö̦jö däjä, bluca bä lä loo wei bä nija wa nö ö̦jöböamou cuquei. ¹¹ ¿Ö̦jö tawä? Cama a lä jömöo wei a lä cui, Yai Bada tänö a nia quilimaö malä majöo wei. A jömöo lä mlai, wawädowä a nofi nia shino yai tamabou —Jesús a cuma. ¹² A nö yai lä liyamano wei nija abinaja Jesús a cuma. —Wa bä nia iyaö ca̦i co̦cablamaö ja, afä nofi bä ma cui, afä mashi bä ma cui, ö̦jö wa bä nacaö mlai. Aifä bä ma cui, cafä nija bä bälöa lä ajedele bä ma cui, bä nö lä niibö wei bä ma cui, ö̦jö bä naca dijä. Inaja wa cuaaö dicoo ja, wa nowa co̦amabeje cafä wa nacaö nomöjöo dicoo mlaobeje. ¹³ ’Wa bä nia iyaö ca̦i co̦cablamaö däjä, abinaja wa yai cuaabä. Bä nö jo̦lili lä bleaaö wei bä yai da naca. Bä lä wa̦lidii bä ma cui, bä juu doblou lä mlai bä ma cui, bä lä jubäbö wei bä ma cui, ¹⁴ ö̦jö wa bä nacaö ja, wa nö nowa co̦amabimi waiquiweje cudeenö, Yai Bada tänö wa bufi nia yai doblamabou. Bä lä dodijaö wei bä demi jocädou lä co̦o wei däjä, ö̦jö däjä wa nowa nia shino yai co̦amamodayou —a cuma. ¹⁵ Bä iyaö ca̦i lä loono wei jamö, ai anö Jesús a wa̦ fa ji̦lilänö, abinaja a cuma. —Yai Bada tänö cama ebä ca̦i cuobä jamö bä nia iyaö ca̦i lä co̦cablou wei, ö̦jö bä bufi yai doblalobä cäbä —a cuma. ¹⁶ Ö̦jö ma cui, abinaja Jesús a cuu mö feduoma. —Bada ai anö, bä nia bluca iyaö ca̦i fa co̦cablamanö, bä yömölaa balölema. ¹⁷ Nii a bluca tabou waiquilanö, a nosie lä juaö wei a fa shömölönö, bä nacaamaö bufima. “¡Fei däjä, fei däjä! Bä shu̦lucua da jödödöolalu”, a cuma. ¹⁸ Ö̦jö ma cui, bä juu fa mojionö, bluca bä a̦fa yabäcou tao showaoma. ’Abinaja ai a cuu balöoma. “Ya nö juu doblobimi dicowä. ¿Ö̦jö tawä? Ficali ya täca lä däleno wei, ya täca mödayou”, a cuma. ¹⁹ Abinaja ai a lä cui a cuu nomöjöoma. “Ya nö juu doblobimi dicowä. ¿Ö̦jö tawä? Iba ji̦ima 10 ya bä baca lä däleno wei, ya bä nia ojode wabaö”, a cuma. ²⁰ Ai a showawä lä cui, abinaja a cuma. “Iba suwä ya delei culoi. Ö̦jö cudeenö, ya nö juu doblobimi”, a cuma. ²¹ ’¿Ö̦jö tawä? —Jesús a cuma—. A lä shömöleno wei, bada e nija a waloa fa co̦icunö, bä a̦fa moji wäyäjäloma. Ö̦jö däjä, bada e fa jushudalunö, a nosie juamobä e shömöa co̦lema. Abinaja a nowa tama. “Ja̦o. ¡Lobe, lobe! Täbä lä bälöblai yobö jamö a jublou cuaaö da showadao, ö̦jö lä. Bä nö lä beblalodii bä nö beliyobö jamö wa ca̦i fa alufälönö, bä nö jo̦lili lä bleaale bä da co̦abla. Bä lä wa̦lidii bä ma cui, bä lä jubäbö wei bä ma cui, bä juu doblou lä mlai bä ma cui, ö̦jö wa bä fa nacalalönö bä ca̦i da juima”, a nowa tama. ²² ’Ö̦jö däjä, bada a nosie juamobä e lä cui, a waloa fa co̦icunö, abinaja e cuma. “Bada tä. Wale nowa lä tano weinaja ya cuaaö bäa ma cule, bä oimi showawä”, a cuma. ²³ Ö̦jö cudeenö, cama e nija abinaja bada e cuu co̦oma. “Sibo jamö bä lä bälöblai yobö jamö wa jublou fa cuaanö, casö jamö bä lä bälöblai bä nacaa fe da yadialalö. Iba yafi jamö ya bä nia ca̦i lä iyaö wei, bä ou fe yadiobä. ²⁴ Cafä bämacö nowa malä tale. Ya bä jaba lä nacaleno wei bänö, ei ya tä lä tale tä nia wabaö buomije”, a bada cuma. ¿Ö̦jö tawä? —Jesús a cuma. ²⁵ Jesús nija, bluca bä lä co̦camoyoluno wei bä nocaa showalayofälöma. Ö̦jö bä nija a mö fa yabadalunö, abinaja bä nowa tama. ²⁶ —Camiyä nija a nocao bufi lä doblao wei a lä cuinö, wale nofi yaiboimi ja, a doblou mlaicätä. Bä fö̦ö e ma cui nija, bä nöö e ma cui nija, bä suwäbö e ma cui nija, ö̦jö bä nija a bufi mö blucao dicoo ja, a nö nocaobimi waiquiwä. Bä ijilubö ebä ma cui, cama ebä mashi ma cui, inaja showawä. Cama a ma cui, a nia demi lä cuo wei tä ja a bufi mö blucao dicoo ja, a dobloimi waiquiwä. ²⁷ Camiyä ya nowa ja a nö bleaamamou bufiomi ja, camiyä nija a nö nocaobimi waiquiwä. ²⁸ ’¿Ö̦jö tawä? —Jesús a cuma—. Cafä ai wanö, yafi ösöwä wa i̦tamaö bufi doblao ja, wa bufi nia dayäo malä balöo wei. Wa yafi jödödöblabä tä cuami ja, wa nia yanöcöo balöo. ²⁹ Wa bufi dayäo balöomi ja, wa yafi colo i̦tamaö ma cui, wa nö waicobimi ja wa noca nia i̦cablalaöje. ³⁰ Abinaja bä nia cuu. “Ö̦jönö colo etä yafi ma i̦tamano wei ma cui, yano nö tabimi majöwä dicowä”, bä nia cuu. ³¹ ’¿Ö̦jö tawä? —a cuma—. Bada ai anö, sodado bä a̦fa juu ji̦liaö ja, cama ebä nia toujublamaö shi jalimoimi. A bufi nia dayäo balöo. 20.000 bä ca̦i bluca lä juu wei, cama 10.000 bä sho, bä mö nia baamaö buomije. “Cama bä bluca ma ayale ma cui, ¿yama bä nö bleaamaö ayaquei tawä?” bä nowa nia tayou. ³² Bä nö wa̦lojabimi waiquiwä ja, ai ebä nia shömaö, bä mö baamabeje. Bä ajedono mlai ja, bä a̦ o̦quemabeje bä nia wa̦liije. ³³ ’Ö̦jö cudeenö bämacö nowa taö lä cule, wamacö bufi dayäo balöobä. Cafä ai wanö, afä wa tä bluca lä tabole wa tä daaö moji ja, camiyä nija wa nö nocaobimi waiquiwä. ³⁴ ’Sayu bä dodijidawä —a cuma—. Ö̦jö ma cui, bä sayu oquediblou dicoo ja, bä nia mödadiblou lä co̦o wei etä cuami waiquiwä. ³⁵ Bä oquediwä waiquiwä ja, bä nia bufiblamou co̦daaimi, bä nia joyamou showadao. ¿Ö̦jö tawä? Wamacö yömöcacö lä walalai, bä yömöca daa da dodijiicu.

¹ Bei. Lomateli bada bä befi bä blada lä doaö wejei bä ma cui, wa̦lidiwä talewä ai bä ma cui, Jesús a wa̦ ji̦libeje bä bluca co̦camoyoluma. ² Ö̦jö cudeenö faliseo bä bada ma cui, Moisesi tä a̦ ja täbä lä damaö wejei bä ma cui, bä bufi jushujolanö abinaja bä cuma. —Ei a lä cui, wa̦lidiwä talewä bä nija a nofimodii. Bä ca̦i iyaö talei —bä cuma. ³ Ö̦jö cudeenö, bä bufi dayäamabä Jesúsnö ei tä a̦ wäyäö yacläo showadaoma. ⁴ —Cafä ai wa lä cuinö, yalofä 100 wa bä oweja tabou ja, afä moli a mojolua dicolayou ja, wa nia dayäaö, ¿ö̦jö tawä? Tä ulifi wawädoobä jamö, 99 bä lä jäle wa bä fa dacönö, afä moli a lä mojolulayono wei wa nia dayäö cuaaö. Wa dablaö mlao showao däjä wa nia dayädii. ⁵ ’¿Ö̦jö tawä? —a cuma—. Wa daa fa co̦lalönö, bufi doblalolanö wa nia lucäbou co̦imaö. ⁶ Wa ca̦i co̦a fa co̦bonö, afä nofi bä ma cui, afä wa bä bälöa lä ajedemabole bä ma cui, wa bä bluca fa nacaalalönö, abinaja wa bä nowa nia taö. “Bämacö bufi doblalolanö bämacö da co̦camo. Iba yalo a ma mojolulayono wei ma cui, ¡ya co̦a co̦lei lä cufe!”, wa bä nowa nia taö. ⁷ ’¿Ö̦jö tawä? —a cuma—. Cafä bämacö nowa taö lä cule. Inaja showawä, wa̦lidiwä talewä a lä cui, Yai Bada nija a bufi mö yabablou lä co̦le däjä, fedu jamö bä bufi nia ca̦i doblalodayou. Bä 99 la dodijaö wei, bä bufi mö yabajadou co̦obä bä lä mlai, ö̦jö bä nija bä bufi ca̦i ma doblalou wei ma cui, wa̦lidiwä talewä moli a bufi mö yabablou lä co̦o wei a lä cui, ö̦jö nija bä bufi nia shino yai doblalodayou. ⁸ ’Abinaja ca̦i —Jesús a cuma—. Suwä anö blada 10 bä nowa lä bluca wei ai e nofi blada mojodumaö ja, ¿wedinaja a nia cuaaö? Cowa wacö fa yäcönö, ö̦jö wacö shi̦i ja a yafi nia jo̦waö. E dablaö mlao showao däjä a nia dayädii, ¿ö̦jö tawä? ⁹ E blada dablaö co̦o däjä, bufi doblalolanö cama nofi ebä ma cui, bä bälöa lä ajedemabole ebä ma cui, bä fa nacaalalönö abinaja bä nowa nia taö. “Bämacö bufi doblalolanö bämacö da co̦camo. Bladayä ya nofi da mojodumalii, ya daa co̦lalei lä cufe”, a nia cuu. ¹⁰ ’¿Ö̦jö tawä? —a cuma—. Cafä bämacö nowa taö lä cule. Inaja showawä, Yai Bada a̦jele etäbä lä culadi bä nijamö, wa̦lidiwä talewä moli a bufi mö yabablou lä co̦o wei a lä cui nija, bä bufi nia shino yai doblalodayou —a cuma. ¹¹ Abinaja Jesús a cuu co̦oma. —Bä ijilubö ecöbö lä bolacaono wei a cuoma. ¹² Oshe a lä cuinö, abinaja bä fö̦ö e nowa tama. “Fabe. Afä obi yafä bä nia tabou lä juo wei, wa bä sheleleblaö fa showadalonö wale dobäa da showadalö”, a cuma. Inaja a cuma cudeenö, bä ijilubö ecöbö nija, bä fö̦ö enö ebä bluca shelelea showadaquema. ¹³ Tä mö fa weyadalunö, bä ijilubö oshe e lä cuinö, cama ebä bluca fa co̦alalönö, blajai jamö bä ca̦i aa showalayofälöma. ’¿Ö̦jö tawä? —Jesús a cuma—. Ö̦jamö, a doblou mlaobä jamö, ebä bluca wa̦lia bädalema. A shijilonomi dodijiwä. ¹⁴ Cama blada ebä waicaö däjä, tä nö ulifi ofäblaliyoma. A nö jo̦lili bleaaö nomöjöoma. ¹⁵ Ö̦jö cudeenö, ö̦jöteli ai a nija a ojodamobä, a yädäblaliyoma. Ö̦jönö coshino ebä iyamadayobä a shömölema. ¹⁶ A nö ofili bleaaö fe fa balojoonö, coshino bänö bä canosi lä wano wejei bä ma cui ja, a bufi waiyoma. A dobänomi dodijiweje. ¹⁷ ’Ya̦cumö a bufi fa möblalunö, abinaja cama a nowa tamoma. “Fayä nija bä ojodamou lä jäle bä dodijidawä ma iyaö däjä ma cui, ofi ofi tänö bä ijilubö ya e bufi ofili mlao shomita bashia cuboyoi. ¹⁸ Fayä nijamö ya co̦obä ya nia shu̦lucou showadao. Ya co̦blou yalo, abinaja ya nowa tajalobä. ‘Fabe. Yai Bada tä ma cui nija, cafä wa ma cui nija, ya doblonomi fe balojowä. ¹⁹ Ijilufä wa nofi nö lä tabobö weinaja wale nofi tabou co̦obä yami. Ya quilii majöo. Cafä nija bä lä ojodamou wei wa bä nofi lä tabolenaja, wale nofi tabou da bädao.’ Einaja ya e cuu wei dao”, cama a nowa tamoma. ²⁰ ’¿Ö̦jö tawä? —Jesús a cuma—. A shu̦lucua fa showadaalunö, bä fö̦ö e nijamö a co̦a co̦bema. Bä fö̦ö enö a nö blajawä fa ö̦jöbölönö, a nofi fa ojodadalönö a läläa mö balayofälöma. A fa̦locoa mö balema. ²¹ Bä fö̦ö e nija abinaja bä ijilubö a cuma. “Fabe. Yai Bada tä ma cui nija, cafä wa ma cui nija, ya doblonomi fe balojowä. Ijilufä wa nofi nö lä tabobö weinaja wale nofi tabou co̦obä yami. Ya quilii majöo”, a cuma. ²² ’¿Ö̦jö tawä? —Jesús a cuma—. Ö̦jö ma cui, bä fö̦ö e nosie juamobä ebä nija a wa̦ shi jali falayoma. “¡Lobe, lobe! Camishi cäcö yai lä dodijidai wama cäcö ca̦i fa juimanö, a da lucämaliyoje. Imicö da baushiblalöje. Mamicö ca̦i da lucämalöje. ²³ Bämacö iyabä, baca bäma a ocalo blewä lä tabole a da shälöje, bufi doblalolanö bämacö iyabä. ²⁴ Ei ijiluyä ya nomöa ma däblalano wei ma cui, eja a demi cua co̦a lä cule. A ma mojolulayono wei ma cui, a ya̦cumö dablamou co̦a lä cule”, bä fö̦ö e cuma. A fa cunö, bä bufi doblalou ca̦i cuaaö showadaoma. ²⁵ ’Bei —a cuma—. Bä ijilubö bada e lä cui, ficali ca jamö a ojodamoma. A co̦imabä jamö a ajedou däjä, bä bufi doblalou ca̦i lä blaöano wei bä a̦ ji̦lilema. Amowa bä a̦ ca̦i ji̦lilema. ²⁶ A nosie juamobä ai e fa nacalänö a wa̦lima. “¿Wedi bei tä nofi jo̦wa li co̦camoaö cubiyejei?” a cuma. ²⁷ Abinaja ö̦jö e cuma. “Fääshäfä a co̦bei lä cufe. Faafä nija dodijidawä a waloo co̦oma cudeenö, a bufi doblalou. Baca wama a ocalo blewä lä tabono wei a shämalema, bä iyabä”, a cuma. ²⁸ Ö̦jö ma cui, bä ijilubö bada e lä cui, a jushudou fa dicolonö a yafinomi. ’¿Ö̦jö tawä? —Jesús a cuma—. Bä fö̦ö enö a famaö fe yadiobä a sibolayoma ma cui, ²⁹ abinaja bä fö̦ö e nowa taö dicooma. “Camiyänö dodijidawä bäfä nosie jaba lä juano weinaja, lasha bluca ya famaö ma cui ya cuaaö lä showale. Moli bäfä a̦ waii bädaomi ma cui, inaja camiyä wale li taamaimi. Bufi doblalolanö iba nofi ya bä ca̦i iyabä, shibo a wai ma cui ja camiyä wale dobänomi. ³⁰ Ö̦jö ma cui, ö̦jö ijilufä a doblou lä mlai bei wa nofi nia shino li co̦camoamaö. Bä suwä lä dodoo wei jamö, afä blada bä bluca ma joyaleno wei ma cui, ö̦jö wama a nofi yai co̦camoabä, baca bäma a ocalo blewä lä tabono wei wa jo̦wa shäa dicoblamalei lä cufe”, a cuma. ³¹ ’¿Ö̦jö tawä? —Jesús a cuma—. Abinaja bä fö̦ö e cuma. “U̦asi. Cafä showadi camiyä nija wa cua waiquia lä cule. Ya bä bluca lä tabole afä bä li waiquiwä. ¿Ö̦jö tawä? ³² Bämacö bufi doblalobä lä. Fääshäfä bäma a nomöa ma bono wei ma cui, a demi co̦a malä co̦bofe. A ma mojolulayono wei ma cui, a dablamou malä co̦le”, e cuma.

¹ Cama ebä lä nocamabono wei bä nija abinaja Jesús a ca̦i cuma. —A nö lä madofibö wei a bada cuoma. A nosie juamobä, a bufi yai lä jaducui a lämaboma, cama etäbä madofi nowamabä. Ö̦jö däjä, ö̦jö a lä lämaqueno wei a lä cui, bada a nija a wa̦fa dobloimi wäyämaje. Madofi bä ja bada a nö jo̦wa waiblaö dicooma. ² Ö̦jö cudeenö, bada anö a lä lämabono wei a nacamalema. Abinaja a nowa taö ja e cuma. “Bäfä wa̦no ji̦liaö dicoa lä cule. Madofi bä ja wale nö jo̦wa waiblaö. ¿Ö̦jö tawä? Iba wa täbä bluca lä julii wei ya tä a̦ oni möbä, sibä oni ca̦i da juima. Cafä bäfä nia lämabou co̦daaimi”, a bada cuma. ³ ’A lä läono wei a bufi dayäoma. “Shädayai”, a bufi cudaliyoma. “Bada anö fei däjä yale nia lämabou co̦daaimi. Iba blada ya bä däabä, ¿wedinaja ya li cuaaö nomöjöobä?”, a bufi cuma. “Ya lojodemi. Jude tä ja, ya nö ojodamobimi. Ya ca̦i nacodii buobä yami. Ya quilii. ⁴ Ja̦o”, a bufi cudaliyoma. “Ya nia lä cuaaö wei tä ja, ya bufi cadidia waiquia. Bada anö wale yai joyaö däjä, ai bänö wale tabou nomöjöobeje ya bä nia nofiamaö”, a bufi cudaliyoma. ⁵ Ö̦jö cudeenö, bada a lä cui ebä madofi lä majöbono wejei bä moli nacadaö cuaaö co̦oma. ’¿Ö̦jö tawä? —Jesús a cuma—. Jaba a lä waloqueno wei a wa̦lima. “Iba bada a lä cuinö, cafä nija ¿wedinaja bei tä nowa tabou cule?”, e cuma. ⁶ Abinaja e cuma. “Dabö dabö 100 ya ubä talö lä däleno wei ubä nowa tabou lä cule”, a cuma. A lä läono wei abinaja e cuma. “Bei, lobe. Cafä nija tä nowa lä tabole ei tä a̦ li oni waiquiwä. Wa tä oni fa wa̦lialönö, ai wa tä nia oniaö nomöjöo. ¿Ö̦jö tawä? Dabö dabö 100 ubä nowa talö tabou ma cule, 50 a taa da nomöjöcö”, e cuma. ⁷ ’¿Ö̦jö tawä? —Jesús a cuma—. Ö̦jö a faa fa co̦malönö, ai a nacaa nomöjömalema. Inaja showawä e cuma. “Iba bada anö cafä nija ¿wedinaja bei tä nowa tabou cule?”, e cuma. Ö̦jö abinaja e cuu mö feduoma. “Nii 100 ya ji̦bä talö lä däleno wei bä nowa tabou lä cule”, e cuma. A lä läono wei, abinaja e nowa tama. “Bei. Cafä nija tä nowa lä tabole ei tä a̦ li oni waiquiwä. Wa tä oni fa wa̦lialönö, ai wa tä nia oniaö nomöjöo. ¿Ö̦jö tawä? Nii 100 ji̦bä nowa tabou ma cule, 80 a taa da nomöjöcö”, a nowa tama. ⁸ ’¿Ö̦jö tawä? —Jesús a cuma—. Bada madofi ebä nowamabä a lä läono wei a lä cui, cama a nia fa bayeliblamonö, a jolemoma. Ö̦jö ma cui, a lä cuaano wei bada enö etä a̦ fa ji̦lilänö, a bufi a̦fa moyawe tama. ¿Ö̦jö tawä? Bä bufi lä wacacai, inaja bä bufi cuu fe balojoo ma mlai ma cui, bita jamö täbä yanowamö lä bälöblai, cama bä bayeliblamobä bä malä moyawäablalou wei —a cuma. ⁹ Ö̦jö däjä abinaja Jesús a cuma. —Inaja showawä, cafä bämacö nowa taö lä cule. Blada bä ma cui, madofi bä ma cui, ö̦jö wama bä noshi ö̦jödabou anö täbä da nofiamaje, fedu jamö wamacö bayeliblamodayobä. ¿Ö̦jö tawä? Wama bä bayeliblaö yalo, blada bä bufijamou lä mlai jamö, fedu jamö ba̦limi wama bä ca̦i bälöo nomöjöodayobä. ¹⁰ ’¿Ö̦jö tawä? —a cuma—. Täbä nowa lä bolacami wei täbä ja a bejedimou waiquiwä ja, inaja showawä täbä nowa lä bluca wei täbä ma cui ja, a nia bejedimou cuo. Ö̦jö ma cui, täbä nowa lä bolacami wei täbä ja, a jolemou si ijejewä ja, inaja showawä täbä nowa lä bluca wei täbä ma cui ja, a nia jolemou cuo. ¹¹ ¿Ö̦jö tawä? Blada bä bädawä ma cui ja, madofi bä bädawä ma cui ja, ö̦jö bä ja wamacö bejedimoimi ma waiquii ma cui, täbä nowa yai lä bluca wei täbä ja, ¿wamacö nia dobämou majöo daanö? ¹² Shomi etäbä ja wamacö bejedimoimi ma waiquii ma cui, afä wa täbä tabou cadidiobä, ¿täbä nia jöböaö majöoje daanö? —a cuma. ¹³ Abinaja Jesús a cuu co̦oma. —A lä ojodamou wei a lä cuinö, moli a nosie nia shino juaö cadidio. Ai a wa̦ ma fale ma cui, bolacabö cäcöbö nosie nö juamamou doblobimi waiquiwä. Ai a nosie juaö mlai ja, ai a nosie nia shino yai juaö ayao. Ai a wa̦ shino juaö bufi doblao waiquiwä cudeenö, ai a wa̦ nia waii. Inaja showawä, madofi wama bä nofi yaibou dicoo ja, Yai Bada wama a nofi nö yaibobimi waiquiwä, wama a nosie juabä —Jesús a cuma. ¹⁴ Jesús nija faliseo bä bada yömöca ma daono wei ma cui, blada bä nofi yaibou waiquiaje cudeenö, a wa̦ nö waiblamaje. ¹⁵ Ö̦jö ma cui, abinaja Jesúsnö bä nowa tama. —Ai täbä nija jai dodijidawä wamacö dablamou bufi ma doblao wei ma cui, Yai Bada tänö wamacö bufi daö. ¿Ö̦jö tawä? Yanowamö täbänö tä a̦fa showadi dodijidawä lä taö wejei tä ja, Yai Bada a shi doimi. Tä nofi yai wa̦libou —bä nowa tama. ¹⁶ Abinaja Jesús a cuu co̦oma. —Fe ojomalewä Juan a wawäö showao mlao däjä, Moisesi tä a̦ ma cui, Yai Bada a wa̦no wäyälewä bä a̦ ma cui, judio bämacö nija ö̦jö bä a̦ wäyämamou balöoma. Fei däjä, Yai Bada tänö cama ebä ca̦i nia lä cuo wei tä a̦ wäyämou nomöjöa lä cule. Juan a wawäblou däjä tä a̦ jaba fa wäyänö, ö̦jö yama tä a̦ dodijidawä wäyäö lä showale. Yai Bada ebä cublobä, fei däjä bluca bä wabäo fe yadia. ¹⁷ ’Ö̦jö ma cui, Moisesi tä a̦ nia joyamoimi —a cuma—. Judu mösö ma cui, bita a ma cui, ö̦jö bä joyamoimi ma waiquii ma cui, Moisesi bei etä a̦ yai joyamoimi yaiquei. Moli tä mamo wai lä onile ma cui tä nia oni joyamoimi. ¹⁸ ’¿Ö̦jö tawä? —a cuma—. Ai a lä cuinö, bä suwäbö e fa joyalönö, ai a suwä däaö majöo ja, a dobloimi. “Iba ya däa majölei lä cufe”, cama a bufi cuu ma bäle ma cui, inaja Yai Bada a bufi cuimi. Ma. “A lä joleblalou wei a”, Yai Badanö a nofi li tabou. Inaja showawä, ai a wa̦lo lä cuinö, suwä joyano a däaö majöo ja, ö̦jö a ca̦i dobloimi mö feduwä. “Bä fe̦yalobö enö a malä joyaleno wei”, a bufi cuu ma bäle ma cui, inaja Yai Bada a bufi cuimi. Ma. “A lä joleblalou wei a”, Yai Badanö ö̦jö a nofi ca̦i tabou —Jesús a cuma. ¹⁹ Abinaja Jesús a cuma. —A nö lä madofibö wei a cuoma. Camishi bä no lä bluca wei bä ja, showadi a didioma. Shi de̦lelewä ai ebä liyäjäwä cuoma. Shuducaje, au ai ebä dodijidawä cuoma. Nii dodijidawä bä ja, showadi a iyadima. ²⁰ ’A nö jo̦lili lä bleaaö wei, a wa̦fa Lasalo cuo mö feduoma —a cuma—. A nö lä madofibö wei e yafi sibo jamö, showadi a bladaloma, täbä lä fablaaö wei jamö. Walacasi bänö a jödödöblalema yalo, a nö bleaama. ²¹ A nö ofili bleaaö fe fa balojoonö, a nö lä madofibö wei a iyabä jamö, bä canosi lä bläläö wei bä ja, a bufi waiyoma. A nö bleaaö ma waiquio däjä, ji̦ima bä fa waloiquiyonö a walacasibö nacoaö majöoyolumaje. ²² ’¿Ö̦jö tawä? —Jesús a cuma—. A nö jo̦lili lä bleaano wei a fa nomalönö, Ablaamö a cuodayobä jamö Yai Bada etäbä a̦jele lä cuinö a bäladayomaje. A nö lä madofiböono wei a ma cui, a bufi ca̦i mlaa mö feduquema. A nomawä didiquemaje. ²³ ’Ö̦jö däjä, shobali wacö jamö a nö lä madofibö wei a fa cuicunö, a nö ninili bleaaö fe balojooma —a cuma—. A mö fa nonoicunö, Ablaamö a blajawä dalalema. Ablaamö nija Lasalo a lä ajedeono wei a ca̦i daa mö fedua showalalema. ²⁴ Ablaamö nija a comöö ja, abinaja e cuma. “Fabe, Ablaamö. Wale nofi da ojodaboyo. Lasalo a da shömölö, mau u jamö bei imi fa cadalönö, wale aca si ajiamabä. Ei wacö jamö ya nö ninili bleaaö malä cule”, a cuma. ²⁵ ’Ö̦jö ma cui, abinaja Ablaamönö a nowa tama. “U̦asi, a bufi da jaducuicu. Wa demöo däjä, afä wa täbä dodijidawä fa dälönö, wa dodijidawä cuo ayaoma. Ö̦jö waiquiwä. Lasalo dodijidawä a cunomi. Ö̦jö ma cui fei däjä cama a bufi shino dodijidawä cua nomöjöa lä cule. Cafä fei däjä wa nö li bleaaö nomöjöa. ²⁶ Abinaja ca̦i. Eja bä lä cule, cafä wamacö nija bä bucaduo mlaobä, Yai Bada tänö täca nö bloque dalowä quilijiwä malä lämabole. Mijamö wamacö lä cule, eja wamacö bucaduo dobloimi mö feduwä”, Ablaamönö a nowa tama. ²⁷ ’Ablaamö nija abinaja a cuu nomöjöoma. “Fabe. Eja a juimi waiquiwä ja lä, fayä nijamö Lasalo a da shömölö, ¿ö̦jö tawä? ²⁸ Iba mashi 5 bä bälöa malä jäle. Ö̦jö bä yai wasöbä, ¿ö̦jö tawä? Eja yamacö nö bleaabä jamö, ö̦jö bä ca̦i juu dicoo mlaobä”, a cuma. ²⁹ Ö̦jö ma cui, abinaja Ablaamönö a nowa tama. “Ma. Moisesi tä a̦ tabouje. Yai Bada a wa̦no wäyälewä bä a̦ bluca ca̦i tabou mö feduaje. Ö̦jö bä a̦ yai ji̦liabeje”, a nowa tama. ³⁰ ’Ö̦jö däjä, Ablaamö nija abinaja a cuu nomöjöoma. “Ma, ö̦jö bä a̦ nia ji̦liaimije. Fabe, Ablaamö. A yai lä nomalayono wei a demi jocädou fa co̦lunö, ö̦jö a wa̦ yai fa ji̦liajenö, wa̦lidiwä tä ja bä bufi lädou weicätä”, a cuma. ³¹ Abinaja Ablaamönö a nowa tama. “Moisesi tä a̦ ji̦liaö moji waiquiweje ja, Yai Bada a wa̦no wäyälewä bä a̦ ca̦i ji̦liaö moji waiquiweje ja, ai a demi jocädou ma co̦o wei ma cui, ö̦jö a wa̦ ma cui ja bä bufi nia jaducubloimi”, a cuma. ¿Ö̦jö tawä? —Jesús a cuma.

¹ Cama ebä lä nocamabono wei bä nija abinaja Jesús a cuma. —Täbä doblamaö mlaobä showadi tä nia lädio ma cui, täbä yai doblamaö lä mlajei bä lä cui, Yai Bada tänö bä nö nia bleaamaö fe balojoo. ² Yanowamö a ja, bei olafi jamö maa ma bada fa jalemacöjenö, modu u jamö a befi ca̦i queamaöje ja, ö̦jö a nö bleaaö ma cuquei wei ma cui, iba ai a wai lä wa̦lidiamale a lä cui, ö̦jö bei a nö nia shino yai bleaaö cuquei. ³ Bä da moyaweicu, ö̦jö lä. ’Aifä a yabäcäo dicoo ja a da wasö —a cuma—. A bufi mö yabablou co̦o ja, a jushuo dijä. Wa nowa lä tabole tä da mladamalö. ⁴ Moli tä mö jalu showawä ma cui ja, 7 wa yabäcaö cua ja, inaja showawä 7 wa nia wasöö cublou mö feduo. Wa lä yabäcano wei, 6 wa etä nowa mladamaö ma waiquiono wei ma cui, inaja a cublou co̦daa ja, “¡Uo!”, wa bufi nia cuimi. A bufi jo̦wa yabablou co̦o ja, 7 ma cui ja wa etä nowa nia mladamaö co̦o —a cuma. ⁵ Jesúsnö bä shömabä bä lä nocamabono wei bä lä cui, abinaja Bada tä nija bä cuma. —Yai Bada yama a nofi yai mölabou shaliliobä, yamalecö bufi da bayeliblalö —bä cuma. ⁶ Ö̦jö däjä, abinaja Bada tänö bä nowa tama. —Yai Bada wama a nofi lä mölabole, wamacö bufi nö wiisibö wa̦lojolanö wama a nofi bejedi mölajadaö bädao fa cunoja, wamacö nö doblobö wei. Nana shimono wai wiisibö ma cui, shifibä malä badaö wei. Ö̦jö däjä, quiji fii defi ma cui, Yai Bada wama a nofi yai mölabolanö wama fi nowa taö fa cunoja, fi nö majöblobö wei. “¡Cafä fii wa defi lä cui, defi da ucablamolu! ¡Modu u jamö, defi dömoa da nomöjöbalufälö!”, wamacö cuu fa cunoja, wamacö a̦ nö julebö wei —a cuma. ⁷ Jesúsnö bä yömölaö showao ja, abinaja a cuma. —Cafä wamacö ai a lä cuinö wa nosie juamobä wa shömaö ja, ficali täca jamö ma cui, oweja bä cuobä jamö ma cui, ö̦jamö a nia ojodamou. ¿Ö̦jö tawä? A fa ojodamonö, yafi jamö a co̦a co̦bei. Ö̦jö däjä, wa iyamabä, ¿wa nia nacaaö showadao daanö? Mlaicätä. ⁸ Abinaja wa nowa nia yai taö. “Iba nii bä taö da nomöjöo. Camishi au wa cö a̦yoa fa dodijidalänö, bä da baquiyo. Camiyä ya iyaa fa balölönö, waija, cafä wa iyaö nomöjöobä”, wa nowa nia taö. ⁹ ’¿Ö̦jö tawä? —a cuma—. Wa nosie juaö tä nowa ja, wa bufi nia a̦fa doblalou wäyämoimi. Wa nosie juamobä a li waiquiwä malä cui. ¹⁰ Inaja showawä, Yai Bada a nosie juamobä wamacö. Wama a nosie juaö jödödou däjä, abinaja wamacö nia cuu. “Yamacö nofi doablamobä yamacömi. Yai Bada a nosie juamobä yama ecö waiquiwä malä cui”, wamacö nia cuu —Jesús a cuma. ¹¹ Jelusale jamö Jesús a juu däjä, Samalia, Calilea tä ulifi möamo jamö, a jayuquefälöma. ¹² Ö̦jamö lä ai a shabono jamö a yafii ja, jalili 10 bänö a mö fa bamalöjenö, bä bayäcäwä ublajao mö baoma. Täbä sicö lä jodemaö wei tä wayunö bä nö bleaama. ¹³ I̦cali bä a̦ blajawä fama, bä nofi nia ojode fa tablamonö. —¡Bada tä! ¡Jesús! Yamalecö nofi da ojodadalö —bä cuma. ¹⁴ Jesúsnö bä möö däjä abinaja bä nowa tama. —Nofi bäyäalewä bä nija bä da mömodu —bä nowa tama. Ö̦jamö bä juolanö bä jaloa showalayofälöma. ¹⁵ Ai a lä cui, cama a jalou fa damolalunö, Yai Bada a nofi i̦cali doablalanö, Jesús nija a läläa mö yabaa co̦quema. ¹⁶ Jesús a cotä jamö a möfe fa deialunö, a bufi a̦fa doblalou wäyämoma. ¿Ö̦jö tawä? Judio ö̦jö a cuonomi, Samaliateli a li cuoma. ¹⁷ Ö̦jö däjä, abinaja Jesúsnö bä nowa bluca tama. —¡10 ya bä nofi bluca jaloa lä showamalalöfe! Ai bä 9 lä cui, ¿wedi jamö bei bä li? ¹⁸ Yai Bada a nofi doablaö co̦oyolubä, ei shomi a lä cui, ¿yami a mö läläaö yabaö ayaobä a li tawä? —bä nowa tama. ¹⁹ Ö̦jö däjä a lä jalolayono wei a nija a wa̦ fama. —Wa fa ublaicunö a da alufälö. Wale nofi mölaboma yalo, bäfä jalomalei lä cufe —a cuma. ²⁰ Faliseo bä bada lä cuinö, Jesús a wa̦limaje. —Yai Bada tänö cama ebä nia ca̦i lä cuo wei tä lä cui, ¿wedi däjä tä nia yai wawäblou? —bä cuma. Abinaja Jesús a cuma. —Wamacö mamo ma showadio wei ma cui, “¡Fei däjä Yai Bada tänö cama ebä nia ca̦i cuo!” wamacö cubä tä nia dablamoimi. ²¹ ¿Ö̦jö tawä? “¡Eja, eja! Bada tänö cama ebä nia ca̦i lä cuo wei, eja tä wawäblou lä cule”, bä nia cuimi. “¡Quija, quija!”, bä nia ca̦i cuimi. Cama ebä ca̦i lä cuo wei, wawädowä tä dablamou mlai, cama ebä bufi jamö a läo ja̦too —a cuma. ²² Cama ebä lä nocamabono wei bä nija a wa̦ faö nomöjöo ja, abinaja bä nowa taö ja a cuma. —Obi, täbä nö nia yai lä bleaaö wei tä nia wawäö. Ö̦jö däjä, camiyä ya lä yanowamöblaleyoluno wei, bejedi lä wamale nia bufijaö. “Ö̦jönö, moli yamalecö ca̦i yai bälöo dodijio fa cunoja”, wamacö bufi nia ma cuu wei ma cui, tä nia wawäö jaöomi. ²³ ’Wale a̦fa ma wäyäö wejei ma cui, bä möla dijä —a cuma—. “¡Bei, bei! ¡Quijamö a wawäö lä cule!”, bä ma cuu wei ma cui, “¡Bei, bei! ¡Eja a wawälayoyoluu lä cufe!”, bä ca̦i ma cuu wei ma cui, bä ju dijä. Ö̦jö bä nija bä nocao dijä. ²⁴ Camiyä ya lä yanowamöblaleyoluno wei ya juu co̦o däjä, ya nia juu ja̦toomi. Tä wacö ije ijemou däjä, mösö wawädoblou lä culenaja ya nia wawädowä dablamou. ²⁵ Ö̦jö ma cui, ö̦jö tä cublou showao mlao däjä yale nö nia bleaamaö balöoje. Ei bä bluca lä bälöblai bänö wale nia waiije. ²⁶ ’¿Ö̦jö tawä? —a cuma—. Noewä däjä bä yanowamö lä cuaano weinaja, inaja showawä, camiyä ya lä yanowamöblaleyoluno wei ya juu co̦o lä bufiole däjä, bä nia cuaaö co̦o. ²⁷ Bä showadi iyaö ca̦i co̦camoma. Bä ca̦i doayoma. Inaja bä cuaaö showao däjä, bä nö dao mlai ja, canawä a bada jamö Noewä a lucälayoma. Ö̦jö däjä tä fe ulifi bada baoblaliyoma. Bä bluca waicaö showadaolaliyoma. ²⁸ ’Lodo a bälöo lä nodiono wei däjä ma cui, inaja tä cuo showaoma —a cuma—. Bä showadi iyaö ca̦i co̦camoma. Madofi bä nomöjayoma. Bä ficalimoma. Bä yafimoma. Inaja bä cuaaö showao däjä, bä nö dao mlai bä cuaaö showaoma. ²⁹ Ö̦jö ma cui, Sodomateli bä nijamö Lodo a siboo däjä, fedu jamö culanö Yai Bada tänö cowa yaitawä wacö blälämalalema, wacöbä nö u̦cucamou lä nacli wei. Ö̦jö däjä, bä bluca waicaö showadaolaliyoma. ³⁰ ’¿Ö̦jö tawä? —a cuma—. Camiyä ya lä yanowamöblaleyoluno wei ya wawäblou cadidio däjä, inaja showawä, bä showadi lä cuaaö weinaja bä cuaaö showao däjä, ya nia wawäblou co̦oyoluu. ³¹ Wamacö siboa waiquilayou ja, yafi jamö bä lucäö co̦daa dijä. Madofi wama bä co̦ablaö mlai ja, bä docua cua da showaolalu. Ficali ca jamö wamacö juu lä waiquile däjä, wamacö mö yabaaö co̦daaö mlai ja, ö̦jamö lä showawä wamacö nia docublou cuaaö. ³² Lodo bä suwäbö a nofi da juduculeje, tä möö mö yabaaö lä dicoono wei a lä cui. ³³ ’Bita ja bä nia demi lä cudio wei tä ja bä bufi mö lä blucao wei bä lä cui, bä ba̦limi nia cuoimi —a cuma—. Ö̦jö ma cui, camiyä ya nowa ja bä shämou lä ojodao wei bä lä cui, ö̦jö bä nia shino ba̦limi cuo ayao. ³⁴ Cafä bämacö nowa taö lä cule. Ö̦jö tä didi däjä, bolacabö cäcöbö nia mio ca̦i ma yacajao wei, ai a nia co̦amou ayao, ai a nia daamou. ³⁵ Nii bä jölöcaböbä jamö, suwä bolacabö cäcöbö nia ma ojodamou wei, ai a nia co̦amou ayao, ai a nia daamou. ³⁶ Ficali ca jamö bolacabö cäcöbö nia ma ojodamou wei, ai a nia co̦amou ayao, ai a nia daamou. ¿Ö̦jö tawä? —Jesús a cuma. ³⁷ Jesús a wa̦liije ja, abinaja bä cuma. —Bada tä. ¿Wedi jamö bei wa nia yai wawäblou? —Wamacö bufi jaducublobä tä cuo weicätä —a cuma—. Ai bei tä jode blaobä jamö, waduba bä lä co̦camou wei tä malä wawädole —a cuma.

¹ Jesúsnö täbä yömölaö ja, shominaja tä a̦ wäyäö ja̦looma. Bä bufi ujudublou mlai ja, Yai Bada nija bä nö bayeli shino nacaodibä, bä yömölalema. ² Abinaja bä nowa taö ja a cuma. —Ai a shabono jamö, bä doblou lä mlai bä jömabä a bada läoma. ¿Ö̦jö tawä? Yai Bada tä nö quili tanomi. Yanowamö täbä ma cui nija a quilinomi. ³ ’Ö̦jamö a suwä lä feiblaliyono wei a ca̦i bälöoma —a cuma—. A nö bleaama yalo, bada a nija a nofi ojode tablamobä, a wa̦ shino fayoluma. “Wale nofi lä wa̦libole nija wale nofi da bäyäle”, a cuu nocamoma. ⁴ A wa̦ ma fadii wei ma cui, a wa̦ ji̦liblaö jaöonomi. Ya̦cumö abinaja bada a bufi cudaliyoma. “Uo. Yai Bada ya nö quili taö ma mlai ma cui, yanowamö täbä nija ya ca̦i quilii ma mlai ma cui, ⁵ ei a suwänö wale yabäcaö yalo, ya nofi nia bäyäaö showadao. A wa̦ shino fadii ja, ya̦cumö yale modamaö mlaobä”, a bufi cudaliyoma —a cuma. ⁶ Ö̦jö däjä abinaja Bada tä Jesús a cuma. —Ö̦jö bada a doblou lä mlaono wei a lä cuno wei tä ja, bä bufi da jaducuicu. ⁷ A doblono ma mlai ma cui, a suwä nofi ya̦cumö bäyäa fe yadilema. ¿Ö̦jö tawä? Yai Bada a lä cuinö, cama ebä lä yaileno wei ebä nofi yai bäyäabä a. Jalu däjä ma cui, didi däjä ma cui, cama nija bä nofi ojode tablamobä bä nö bayeli lä nacaodii wei bä lä cui, lobe bä a̦ nia juaö. ⁸ Cafä bämacö nowa taö lä cule. Bä nofi lobe bäyäaö weicätä. ’Ö̦jö ma cui, camiyä ya lä yanowamöblaleyoluno wei ya juu co̦o däjä, ¿Yai Bada nija bä mölaö lä cadidio wei, ya tä nia dablayoluu daanö? —a Jesús cuma. ⁹ Jesús nija bä yömöca lä daono wei ai bä lä cui, cama bä nofi mölamamoma. “Camiyä yamacö shino yai dodijaö ayao”, bä bufi fa cunö, ai bä nofi wa̦libomaje. Jesúsnö ö̦jö bä bufi jaducublamabä, shominaja ei tä a̦ li wäyäö yacläoma. ¹⁰ —Yai Bada etä yafi jamö, bolacabö cäcöbö nö bayeli nacao mö juma —a cuma—. Ai a lä cui, faliseo a bada cuoma. Ai a mö feduwä lä cui, Lomateli bada bä befi bä blada lä doaö wei a li cuo mö feduoma. ¹¹ ’¿Ö̦jö tawä? —a cuma—. Faliseo a bada fa ublaicunö, Yai Bada nija a wa̦fa wäyämoma. Abinaja a cuma. “Cafä Yai Bada wa nija ya bufi doblalou lä cule. Ai bä nofi jushuaö lä cuaaö weinaja ya cuaaimi cudeenö ya bufi doblalou. Ö̦jö bä lä cuinö, madofi bä ja bä mölamaö dicooje. Bä dodijaimi. Bä joleblalou. Ei blada doalewä a ma cui, cama a lä cuaaö weinaja camiyä ya cuaaimi. ¹² Täbä yanöcöobä tä mö jalu cublou showaa mlai ja, bolacabö ya iyaö wasöo talei. Ya iyaö yabäcou mlai ja, cafä nija ya wa̦ fabä, nii bä ja ya wasöo. ¿Ö̦jö tawä? Abinaja ca̦i. Ya täbä bluca lä däaö wei, fe usucuwä 10 ya täbä fa shedequeblalönö, ai moli täbä ja, cafä bäfä dobäblaaö”, a cuma. ¹³ ’¿Ö̦jö tawä? —Jesús a cuma—. Inaja cama a ma cuno wei ma cui, Lomateli bada bä befi bä blada lä doaö wei a lä cui, a ublaa bayäcälanö, Yai Bada tä lä culadi jamö a mö nonoo quilima. A bufi wa̦lidiwä yalo, a balöcö shäablamolanö a wa̦ fama. “Cafä Yai Bada wa lä cui nija ya wa̦ faö lä cule”, a cuma. “Camiyä wa̦lidiwä talewä ya lä cui wale nofi da ojodadalö.” Einaja a cuma. ¹⁴ ’Cafä bämacö nowa taö lä cule —a cuma—. A nofi ojode tablamobä a wa̦ lä fano wei a lä cui, Yai Bada tänö ö̦jö a nofi shino yai dodijaö tabou ayalanö, a co̦a co̦layoma. Bä lä jömöo wei bä lä cui, Yai Bada tänö bä nia quilimaö malä majöo wei. Bä jömöo lä mlai bä lä cui, wawädowä ö̦jö bä nia shino yai tamabou. ¿Ö̦jö tawä? —Jesús a cuma. ¹⁵ Bei. Ijilu oshe bä ma cui, bä ca̦i waloblaamaje, Jesús imicö maquelanö Yai Bada nija bä bayelimabä. Cama ebä lä nocamabono wei bänö, ö̦jö bä ca̦i juu fa dalalöjenö bä wasöma ma cujei, ¹⁶ Jesúsnö bä nacaa fe yadilema. Bä lä nocaono wei bä nija abinaja a cuma. —Wamacö a̦ läablalou dicoo mlai. Camiyä nija ijilu wama bä yai jumabä bä li. Ijilu bä a̦ juo si ijejewä lä culenaja bä lä cui, Yai Bada tänö ö̦jö bä ca̦i cuobä bä malä cui. ¹⁷ Ei ya wa̦ lä cui, bejedi lä ya wa̦. Ijilu bänö Yai Bada a wa̦ juaö si ijejewä lä culajeinaja bä cuwä lä mlai, Yai Bada tänö cama ebä ca̦i cuobä jamö, ö̦jö bä nia cuomi waiquiwä —Jesús a cuma. ¹⁸ Bada ai anö Jesús a wa̦lima. —Tä a̦ wäyäle, cafä wa yai lä dodijaö wei. ¿Wedinaja camiyä ya yai fa cuaanö, ya li ba̦limi cuobä? ¹⁹ Abinaja Jesúsnö a nowa tama. —¿Wedi tabä camiyä wale a̦fa dodijaö li taö? Yai Bada a lä cui, ö̦jö moli a shino dodijaö ayao. ²⁰ Moisesi wa etä a̦ daö. Abinaja tä a̦ lä cuu wei. Wamacö nia joleblaloimi. Yanowamö wama täbä nia shäimi. Wamacö nia tomömoimi. Ai wama bä a̦fa nia jole jole wäyäimi. Faafä a ma cui, naafä a ma cui, dodijidawä wama bä ca̦i fa cuonö, wama bä a̦ nia juaö. ’Einaja tä a̦ cuu —Jesúsnö a nowa tama. ²¹ Abinaja bada a cuu mö feduoma. —Oshe yanö ya tä a̦ lä ji̦lileno wei, ya tä a̦ nofi bluca jaducubou showaa lä cule —a cuma. ²² Jesúsnö a wa̦ fa ji̦lianö, abinaja a nowa tama. —Ei moli wa tä yai taö fa cunoja, wa nö dodijaö cuquebö wei. Wa bä bluca lä tabole, blada bä ja wa bä fa nomöjöacönö, ö̦jö lä bä blada ja, täbä nö jo̦lili lä bleaaö wei täbä da dobälalö. Inaja wa yai cuaaö ja, afä täbä nowa lä bluca wei wa täbä nia tabodayou. Ö̦jö däjä, camiyä nija a nocaa da showadaiquiyo —a nowa tama. ²³ Ö̦jö ma cui, Jesús a wa̦ ji̦liaö ja a bufi wajäblaliyoma, madofi bä bluca tabou dodijioma cudeenö. ²⁴ Cama nija Jesús a mamo fa showaicunö, abinaja a cuma. —Bä nö lä madofibö wei bä lä cui, Yai Bada tänö cama ebä ca̦i cuobä jamö, ö̦jö bä juu si ijejewämi. ²⁵ Mösöcö aca jamö cameyo bä lucäö si ijejewä malä mlai. Bä nö lucäbimi waiquiwä. ¿Ö̦jö tawä? Mösöcö aca jamö cameyo bä lucäimi ma waiquii, bä nö lä madofibö wei bä lä cui, Yai Bada tänö cama ebä ca̦i cuobä jamö ö̦jö bei bä lucäimi yaiquei —a cuma. ²⁶ A wa̦ lä ji̦liano wejei abinaja bä cudaliyoma. —Ja̦o. Yai Bada nijamö ö̦jö lä bä nö cuobimi waiquiwä ja, ¿wedi bei bä nia shino yai jucäamou, ö̦jö lä? —bä cudaliyoma. ²⁷ Ö̦jö ma cui, abinaja Jesús a cuu nomöjöoma. —Ma. Cama yanowamö täbä bayeliblamou buobä, tä cuami waiquiwä. Ö̦jö ma cui Yai Bada tänö täbä bayeliblabä, ö̦jö a —a cuma. ²⁸ Abinaja Pedro a cuma. —Camiyä yamacö yafibö fa damoicunö, cafä nija yamacö nocaa lä cule —a cuma. ²⁹ - ³⁰ Abinaja Jesúsnö bä nowa taö ja a cuma. —Cafä wamacö nija ei ya wa̦ lä cui, bejedi lä ya wa̦. Yai Bada tänö cama ebä nia ca̦i lä cuo wei tä ja bä bufi mö blucao yalo ebä madofi daaöje ja, bä nö bleaaö mlaicätä. Bä yafibö ma daamamou wei ma cui, bä suwäbö ma damoquei wei ma cui, cama mashi ebä ma damoquei wei ma cui, bä fö̦ö, bä nöö bä bluca ma daquei wejei ma cui, bä ijilubö ebä ma daaö wejei ma cui, Yai Bada tänö eja bä dobäö fa balöonö, obi bä nia ba̦limiblamadayou —a cuma. ³¹ Jesúsnö cama 12 ebä ca̦i fa bayäqueicunö abinaja a cuma. —Bei. Jelusale jamö bämacö juu lä cuimadi. Ö̦jamö lä bämacö waloo däjä, Yai Bada a wa̦no wäyälewä bänö wale a̦fa wäyäö lä balöono wejei, tä a̦ nia bejedi cublou. Camiyä ya lä yanowamöblaleyoluno wei yale nia jo̦wa lä taamano wejei, ö̦jö tä nia bluca wawäblou. ³² Wale fa juwälöjenö, judio bä lä mlai bä nija wale nia jöböaöje. Ö̦jö bänö wale nö fa waiblajenö, wale nö nia bleaamaö nö quiliaöje. Wale nia ca̦i cläshaöje. ³³ Wale si fa yafelimalalöjenö, wale nia ca̦i shäöje. Wale ma shälei wejei ma cui, bolacabö tä mö didi fa cublalunö ya demi nia jocädou co̦o —a cuma. ³⁴ Ö̦jö ma cui, Jesús a lä cuno wei tä ja bä bufi jaducuanomi dodijiwä. Yai Bada tänö tä a̦ jo̦yamaboma. Tä a̦ ji̦limou nofi fa mojoduonö bä bufi möblonomi. ³⁵ Jelico jamö Jesúsnö bä ca̦i ajedou däjä, bei yo casö jamö a jubäbö loo mö baoma. Bä lä jayuaö wei bä nija a nofi ojode tablamobä, a nacodima. ³⁶ Bä a̦ bluca lä juimi bä a̦fa jayuaö fa ji̦lilänö, bä wa̦lima. ³⁷ Abinaja a nowa tamaje. —Nasaleteli Jesús a jayuo lä cube —a nowa tamaje. ³⁸ Ö̦jö däjä, a lä jubäböono wei a lä cui i̦cali a comöma. —¡Jesús! ¡David nodiwä wa e lä cui! ¡Wale nofi da ojodadaliyo! ³⁹ Mamicai a nia fa lomabojenö, bä lä balöono wei bänö a wa̦ ma wasöno wejei ma cui, a wa̦ yai nacläa majöa dicolayoma. —¡David nodiwä wa e lä cui! ¡Wale nofi da ojodadaliyo! ⁴⁰ Jesús a ublaa fa yanöcödalunö, a lä jubäböono wei a ajedeblamaö bufima. A ajedebloyoluu däjä, a wa̦lima. ⁴¹ —¿Wedinaja bäfä li taamabä, bei wale li nacaa lälei? —a cuma. —Bada tä. Ya täbä möbä wale mamocu da dodijidablaliyo —a cuma. ⁴² Ö̦jö däjä, abinaja Jesúsnö a nowa tama. —Mamocu da dodijidablalu. Wale nofi mölaboma yalo, wa jalou lä cule —a nowa tama. ⁴³ Ö̦jö däjä a mamocu dodijidablou fa showadalonö, Yai Bada tä nofi doablalanö a yaua showaquema. Bluca bä lä co̦camono wei bä ma cuinö, a jalou dablaöje däjä, Yai Bada tä nofi bluca doablamaje.

¹ Jelico jamö Jesús a fa waloicunö, a jayuaö cuaama. ² Lomateli bada bä befi bä blada lä doano wei a bada lä cui, ö̦jamö a bada bälöoma. Saqueo a wa̦fa cuoma. A nö madofiböo dodijioma. ³ Jesús a möö bufi doblaoma ma cui, bä lä co̦camou wei bä fa mashiquionö bä läo dicooma. A labajao fa mlacunö a möö doblonomi. ⁴ Ö̦jö cudeenö, Jesús a juu cuaafälöbä jamö a läläa fa balölönö, ico fi bada ja a dua balöbedayoma. Ö̦jamö a nia malä jayuano wei. ⁵ Saqueo a döcäodayobä jamö Jesús a fa waloicunö, a mö fa nonodalunö a nowa tama. —Saqueo. Lobe a da itolu. Fei däjä, afä yafi jamö ya nia malä cuo wei —a nowa tama. ⁶ Ö̦jö cudeenö, Saqueo a shi jaliwä itolayoma. Cama e yafi jamö, bufi doblalolanö Jesús a walomaquema. ⁷ ¿Ö̦jö tawä? Saqueo nija Jesús a co̦blou fa dalalöjenö, ai bä bufi bluca jushujudaliyoma. —Wa̦lidiwä talewä nijamö a nofi fama lä waloicufe —bä nowa tayoma. ⁸ Ö̦jö däjä, Bada a nija Saqueo a fa ubladalunö, abinaja a cuma. —Bada tä. Ya bä bluca lä tabole, bä nö jo̦lili lä bleaaö wei bä nija ai ya bä mashi nia shelelaö cuaaö. ¿Ö̦jö tawä? Ai ya ebä blada däa lä ja̦toleno wei ya bä nia co̦amaö. Ya bä co̦amaö ja, ya bä lä däleno wei ya tä co̦amaö bädao mlai, ai ya bä nia yädädamaö cuaaö majöo. Moli ya lä däleno wei a ja, 4 ya bä nia co̦amaö. Inaja showawä ya bä nia yädädamaö cuaaö—a cuma. ⁹ Abinaja Jesúsnö a nowa tama. —Ablaamö a lä cuinö, Yai Bada a nofi lä mölabono weinaja wa nofi mölabou nodia cua yalo, afä wa bä ca̦i lä cule wamacö nia bayeliblamou. Wamacö nia lä jucäamou wei, cafä wamacö nija tä a̦ fei däjä waloqueyoluu lä cufe. ¹⁰ Camiyä ya lä yanowamöblaleyoluno wei ya lä cuinö, bä lä mojoluu wei ya bä dayäabä ya malä waloqueyoluno wei, ya bä co̦ablaö co̦obä —a nowa tama. ¹¹ Jesús a wa̦ ji̦lifälöbeje jamö, Jelusale jamö bä ajedou waiquia yalo, shominaja tä a̦ li wäyäö yacläoma. “Fei däjä, Jelusale jamö Yai Bada tänö cama ebä nia ca̦i cuo dodijio”, bä bufi ca̦i jole cuma cudeenö. ¹² Ö̦jö cudeenö, abinaja Jesús a cuma. —A nia bada läo lä nomöjöono wei a wa̦lo cuoma. Bada a yai tablamodayobä, blajai jamö a nia juu balöoma. Ö̦jö däjä, cama etä yai ulifi jamö a nia waloo co̦oma. ¹³ A juu showao mlao däjä, a nosie juamobä 10 bä yai lä dodijano wei ebä nacalema. Ö̦jö 10 bä nija, blada moli ebä jöbödaö fa cuaanö, 10 ebä jöböa taquema, bä nowa lä bluca wei. Abinaja bä nowa tafälöma. “Ya waloo showao mlao däjä, dodijidawä iba wama bä blada nia nomöjöaö juo, wama bä omaö juobä”, bä nowa tafälöma. ¹⁴ ’¿Ö̦jö tawä? —a cuma—. Ö̦jö ma cui, cama ai ebänö a nofi wa̦libomaje. A nofi fa wa̦libojenö, ai ebä shömöa nodia jelemaje, bada a tabladayobeje jamö, ebä a̦ läobä. “Camiyä yamacö nijamö a bada bälöobä, yama a bufiimi waiquiwä”, bä cubä. ¹⁵ Ö̦jö ma cui, a bada tablamaö fe fa yadiojenö, a co̦a co̦bema. A co̦a fa co̦bonö, cama a wa̦ juamobä 10 ebä nacamaö bufima, blada bä ja bä lä dobälalefälöno wei bä lä cui. Cama blada ebä oa lä jämaleno wejei, bä nia bluca fa mönö, bä nia wa̦lima. ¹⁶ ’A jaba lä waloqueno wei, bada nija a icuquema —Jesús a cuma—. A fa icuicunö abinaja e cuma. “Bada tä. Camiyä nija afä wa blada lä jämaqueno wei, dodijidawä ya nomöjöaö fa juonö, 10 ya bä blada yädäblamaö co̦layoma”, e cuma. ¹⁷ Abinaja bada anö a nowa tama. “¡Wa dodijaö juo waiquioma lä! Ya blada wai da jöböquii a ma moliono wei ma cui, wa dodijaö juo fe yadioma yalo cafä bada bäfä nia tablamaö. Shabono 10 bä jamö wa nia bada läo”, a nowa tama. ¹⁸ ’¿Ö̦jö tawä? —Jesús a cuma—. Ai e mö feduwä lä cui, ö̦jö a icua nomöjöquema. Abinaja a cuma. “Bada tä. Camiyä nija afä wa blada lä jämaqueno wei, dodijidawä ya nomöjöaö fa juonö, 5 ya bä blada yädäblamaö co̦layoma”, e cuma. ¹⁹ Cama nija a wa̦ faö mö feduo ja, abinaja e cuma. “Shabono 5 bä jamö wa bada läobä cafä wa”, a nowa tama. ²⁰ ’Ai e icua fa nomöjöicönö, abinaja e cuma. “Bada tä. Camiyä nija afä wa blada lä jämaqueno wei, ei a. Camishi acadafu cäcönö ya fa ja̦loblalönö ya ja̦lobou showaa lä cule. Bei. ²¹ Bäfä daö yalo ya malä quilino wei. Afä wa bä fe blacäjamaö talei. Ai bä ojodamobä jamö showadi cafä wa shino bayeliblamou talei”, e cuma. ²² ’¿Ö̦jö tawä? —Jesús a cuma—. Abinaja bada enö a nowa tama. “Cafä wa wa̦ showawä ja, bäfä nia dobloimi jömaö. Wale a̦ juaö dobloimi waiquiwä. Cafä wa wa̦ faö ja, iba ya bä fe jo̦wa lä blacäjamaö wei wa tä jo̦wa daö waiquioma. Ai bä ojodamobä jamö camiyä ya jo̦wa shino lä bayeliblamou wei wa tä ca̦i malä dale. ²³ Inaja ya jo̦wa cuaaö waiquiwä ja lä, iba wa blada omabä, ¿wedi tabä bei wa li wabäonomi, ö̦jö lä? Bä blada lä nomöjöaö wejei bä nija wa blada majöaö fa cunoja, iba ai wa bä nö shino wai co̦cablamalebö wei”, a nowa tama. ²⁴ ’Ö̦jö däjä, bä ublao lä ajedeono wei bä nija abinaja bada a cudaliyoma. “Quijinö moli a blada lä tabole a da co̦leje. 10 bä lä tabole nija e jöbäa da majöcöje”, a cuma. ²⁵ Bada nija abinaja bä cuma. “Ma, bada tä. Ö̦jö 10 ebä li cua malä waiquile”, bä cuma. ²⁶ Ö̦jö däjä, bada a wa̦ fama. “Ma, cafä bämacö nowa taö lä cule. Bä li dodijaö yalo, bä lä tabolajei bä nija ai bä nia jöböamou co̦o. Ö̦jö ma cui, bä tabou lä mlajei bä nija, wiisibö a tabou ma bälajei ma cui, a nia co̦amamou, bä li dodijaimi waiquiwä cudeenö. ²⁷ ’Ja̦o. Ö̦jö ma cui, camiyä nija bä nö lä nabämou wei ya bä nö nia yai bleaamaö, bada wale lämaö nofi lä wa̦libono wejei bä lä cui. Eja ö̦jö bä bluca ca̦i da juimaje. Ya mamo showao däjä wama bä shäyolubä”, a bada cuma. ¿Ö̦jö tawä? —Jesús a cuma. ²⁸ Ö̦jö tä a̦ wäyäö fa waiconö, Jelusale jamö bä lulua taa co̦lefälöma. ²⁹ Befajeiteli bä lä bälöle jamö, Jesúsnö cama ebä ca̦i ajedeblaleyoma, Bedaniateli bä ca̦i bälöo mö lä fedule jamö. Oliba tä balöcö jamö bä ca̦i fa waloicunö, ö̦jamö culanö bä lä nocamabono wei ai cäcöbö shömöa balölema. ³⁰ Abinaja cäcöbö nowa tama. —Wafäcö juu fa shaliloimadunö, quiji a shabono jamö cäcöbö da yafilujulu. Wafäcö lä co̦blole jamö, yalo bulo a nata lä cule wafä a nia ijilubö dablajalayou, täbä döcämabou showaono lä mlai. Ö̦jö wafä a nata fa cushälänö, äyämö a ca̦i juböö da co̦ima. ³¹ Ai anö wafäcö wa̦lii bädao ja, “¿Wedi tä tabä wafä a nata cushälei cufe?”, a cuu bädao ja, abinaja wafäcö cuu. “Bada anö a majöamaö bufii cublei”, wafäcö cubä —Jesúsnö cäcöbö nowa tama. ³² Ö̦jö cudeenö, cäcöbö lä shömöleno wei cäcöbö aa fa showalöfälönö, Jesús a lä cuno weinaja, inaja showawä tä dabölalema. ³³ Bulo a nata ijilubö fa cushäblabölönö, cama ebä yalo lä cuono wei abinaja ebä cuma. —¿Wedi tä tabä bulo bei wafä a nata li ijilubö cushäaö cule? —ebä cuma. ³⁴ —Bada tänö a majöaö bufii cublei —cäcöbö cuma. ³⁵ Jesús nija bulo a ca̦i waloböa co̦queyoluma. Cäcöbö ca̦i waloböa fa co̦iquiyonö, yalo a mabucabö ja, cama cäcöbö camishibö maquea fa balöaböcönö, Jesús a döcämaböquema. ³⁶ Ö̦jö däjä, Jesús a befi ca̦i jufälöbä jamö, bufi doblalolanö a befi ca̦i jayuamamaje. A befi ca̦i nia lä jayuono wei yo jamö, bä camishibö ca̦i jilablaamou läafälöma. ³⁷ Oliba tä balöcö ja, yo dömöobä ja bä fa waloicunö, Jelusale tä casö ja bä ajedolanö, Jesús nija bä lä nocaono wei bä a̦ shi bluca dou cuaama. Jesúsinö Yai Bada tä lojode dablamaö lä cuaano wei tä ja, a noshi jaliwä fa queboimadujenö, Yai Bada tä nofi doablaö cuaaö dodijiofälömaje. ³⁸ Abinaja bä cufälöma. —¡Yai Bada a wa̦nö a lä juimi, ö̦jö Bada cä tä! ¡Ö̦jö lä a shino yai bayeliblamobä a! Fedu jamö tä lä cule a sho, ¡dodijidawä bämacö bälöo yanöcöobä! ¡Bada tä lä culadi a nofi shino yai doablamobä! —bä cufälöma. ³⁹ Bä lä co̦camono wei bä nija, faliseo bä bada lä coyocoono wei bä a̦ fama. —Tä a̦ wäyäle. Wa bä lä nocamabole bä a̦ da wasö —bä cuma. ⁴⁰ Ö̦jö ma cui, abinaja Jesús a cudaliyoma. —Cafä bämacö nowa taö lä cule. Ei bä a̦ waidou fa cunoja, wale nofi doablabeje, maa mabä ma cui mabä a̦ nö bädou nomöjölayobö wei —a cuma. ⁴¹ Jelusaleteli bä shabonobö jamö Jesús a ajedolanö, bä yafibö dablaö däjä a fa wajäblalunö, bä nofi ojode taö ja, a ö̦cöma. ⁴² Abinaja a blajawä cuma. —Wamacö bufi nia yai lä yanöcöo wei wama tä daö fa cunoja, fei däjä ma cui wamacö nö bayeliblamou showadaobö wei. Ö̦jö ma cui, cafä wamacö nija Yai Bada tänö tä a̦ jo̦yabou lä cule. ⁴³ ’Wamacö nö nia lä bleaaö wei tä nia obi wawäö. Bä nö lä nabämou wei bänö wamacö nabä fa juimajenö, wamacö fe fa fa̦yoblalöjenö bä nia alanamou shoqueaö, wamacö shi wa̦limabobeje. ⁴⁴ Cafä wamacö yafibö nabä fa quebojenö, wamacö lä bälöle wamacö mö nia watäblaöje. Wamacö yafibö wa̦lia fa jödödöblalöjenö, ai ma jamö ma nia maqueo feibloimi. Yai Bada tänö wamacö bayeliblabä ya ma waloqueyoluno wei ma cui, wamale nö ö̦jöböaö fa mlacunö wamacö nö nia bleaaö —a Jesús cuma. ⁴⁵ Jelusale jamö a fa waloicunö, Yai Bada etä yafi sibo lä ji̦coloi jamö Jesús a lucälayoma. Ö̦jamö lä blada bä ja täbä madofi lä jöbäö wejei bä lä cui bä yashublaö ja, ⁴⁶ abinaja a cudaliyoma. —Abinaja Yai Bada etä a̦ oni cuu. Iba yafi a lä cui, camiyä nija bä nö bayeli nacaobä a yafi cuobä. ’Einaja etä a̦ ma cuu wei ma cui, täbä lä tomömou wei bei wama a yafi li tablaö bashiblalayoma —Jesús a cuma. ⁴⁷ Yai Bada etä yafi jamö showadi täbä yömöladima. Nofi bäyäalewä blowäjäwä bä ma cuinö, Moisesi tä a̦ ja täbä lä damaö wejei bä ma cuinö, judio ai bä bada ma cuinö, a shäbeje a nofi washuamaje. ⁴⁸ Ö̦jö ma cui, a wa̦ lä ji̦lii wejei bä bluca mashiquioma cudeenö a shäö ja̦toobeje etä cuonomi.

¹ Ai däjä, Yai Bada etä yafi jamö Jesúsnö bä damaö co̦oma. Tä a̦ lä dodijidai tä a̦ wäyäö däjä, bada bänö a nabä icuquemaje. Nofi bäyäalewä blowäjäwä bä ma cuinö, Moisesi tä a̦ ja täbä lä damaö wejei bä ma cuinö, judio ai bä bada ma cuinö, Jesús a nabä fa icuicunö, ² abinaja a nowa tayolumaje. —Bei. Yamalecö da yömöla. Einaja wa cuaabä, ¿cafä bada bei wa tawä? ¿Wedinö bada bei wa li tablamalema, ö̦jö lä? —a nowa tamaje. ³ Jesús a wa̦ juo ja, abinaja bä nowa tama. —Cafä wamacö ma cui, bämacö nia wa̦lii mö feduo. Wamale da yömöla, ö̦jö lä. ⁴ Ja̦o. ¿Wedinö Juan a shömölema, täbä fe ojomabä? ¿Yai Bada tänö a shömölema tawä? Ma, ¿yanowamö täbänö a shömölema sijewä? —Jesúsnö bä nowa tama. ⁵ Bä nowa nia lä juo wei tä a̦fa wayoaö balöoje ja, bä a̦ shino läablalodii buoma. Abinaja bä nowa tayoma. —“Juan a lä cui, Yai Bada tänö a shömölema”, bämacö cuu dicoo ja, “Inaja lä wama a nofi ma tabole ma cui, ¿wedi tä tabä, wama a wa̦ bejedi li bufinomi?”, a nia cuu majöo dicoo. ⁶ Ö̦jö ma cui, “Yanowamö täbä nija a shömamoma”, bämacö cuu dicoo ja, ei täbä bluca lä ublale bä nia jushudou. Maa ma bänö bämalecö nia shäyäöje. “Yai Bada a wa̦no wäyälewä Juan a cuoma”, bä cuu malä shalilio wei —bä nowa tayoma. ⁷ Ö̦jö cudeenö, bä a̦ jo̦wa mojodumoma. —Cuwi. “Ö̦jönö Juan a shömölema a”, yama a nofi ca̦i taboimi —bä cuma. ⁸ —Ja̦o —Jesús e cuma—. Camiyä ma cui, cafä wamacö nija “Ö̦jönö wale shömölema ya”, ya ca̦i nia cuu ayaomi —a cuma. ⁹ Shominaja ei tä a̦ nia wäyäö yaclämou ja, bluca bä nija Jesús a wa̦ faö co̦oma. —Ai anö uba too tobä bluca fa döalalönö, shomi täbä bälömaquefälöma, etäca nowamaö juobeje. Ö̦jö däjä, shomi täbä ulifibö jamö a fa alufälönö, a nö dedeadayoma. ¹⁰ ’Uba a fabä tä cublou däjä, ficali ca ja bä lä bälöblamabole bä nija, a nosie lä juaö wei ai e fa shömölönö, uba bä yefimaö co̦o bufima. Ö̦jö ma cui, bä lä bälöblamabole bä lä cuinö a nabä quea mö fa baicöjenö, a si yafelilalemaje. A shinoco ca̦i shömöa mö yabaa co̦lemaje. ¹¹ Cama ai e shömöa ma co̦leno wei ma cui, bä doblou co̦o fa mlacunö a si yoalalemaje. Ö̦jö däjä, a shinoco shömöa mö yabaa co̦lemaje. ¹² Ö̦jö däjä, ai e shömöa nomöjölema. Ö̦jö a famia fa balömalöjenö, a fa ja̦ilöjenö a i̦cali sibomalemaje. ¹³ ’Ö̦jö däjä, cama ficali etäca lä cuono wei abinaja a bufi cuma. “¿Wedinaja ya li cuaabä da tawä? Ja̦o. Iba ijiluyä ya lä nofimaö wei ya nia shömaö. Ö̦jö a nofi tabou ja̦too wejeicätä”, a bufi cuma. ¹⁴ Ö̦jö ma cui, bä lä bälöblamabole bä lä cuinö, bada tä ijilubö e cadidiwä fa dalalöjenö abinaja bä nowa tayolayoma. “Ei bada tä ijilubö e cadidiwä, ficali ca nia obi tabou lä juo wei. Ö̦jö bäma a shäa fa showadalönö, camiyä bämacönö bäma täca ficali tabou juo nomöjöobä”, bä nowa tayolayoma. ¹⁵ Ö̦jö däjä, ficali täca casö jamö a fa ja̦ilöjenö, a shälemaje. ¿Ö̦jö tawä? —Jesús a cuma—. Bada anö ¿wedinaja ö̦jö bä nia taamaö, ö̦jö lä? ¹⁶ Wedinaja mlai. Bä nia waicaö mö juimaö. Shomi täbä nija täca nia jöböamou majöo —Jesús a cuma. Ö̦jö a wa̦ fa ji̦liläjenö, cama bä a̦fa lä wayoale bä nö fa ö̦jöbömolunö, bä ushuyaimou dodijioma. —¡Inaja dicoo mlai! —bä lobe cudaliyoma. ¹⁷ Ö̦jö ma cui, cama bä nija Jesús a mamo fa showaicunö, abinaja a cuu nomöjöoma. —¿Inaja mlai daanö? ¿Wedi tabä ei tä a̦ oniblalema, ö̦jö lä, camiyä wale a̦fa wäyäö lä balöono wei tä a̦ lä cui? Abinaja tä a̦ cuu. Maa mabä ja a yafi nia lä i̦tamaö wejei bä lä cuinö, ma wailemaje. Ö̦jö ma cui, ma lä waileno wejei ma lä cui, a yafi colo lojodoobä ma yai li cublaliyoma. ’Einaja tä a̦ oni cuu. ¹⁸ Ö̦jö ma jamö bä fa yudublaicunö bä lä quelayou wei bä lä cui, bä nö nia bleaaö fe balojoo. Ö̦jö bä nö nia ma bleaaö wei ma cui, ai bä lä cui, ö̦jö ma showawänö bä fe yai shäo däjä, ö̦jö bä nia yai cobequeblou fe balojoo —a cuma. ¹⁹ Moisesi tä a̦ ja täbä lä damaö wejei bä ma cuinö, nofi bäyäalewä blowäjäwä bä ma cuinö, a mili juwäamaö showadaomaje. A wa̦ lä shomiano wei tä a̦ ja, cama bä nö malä ö̦jöbömolayono wei. Ö̦jö ma cui yanowamö täbä nö quili tamaje yalo, bä waiquidaliyoma. ²⁰ Bä jushuo waiquioma cudeenö, Jesús nija showadi bä mamo showadioma. Jai dodijidawä a nia fa wa̦liijenö cama ai ebä shömöa ja̦tolemaje. Jole jole bä nofimolanö a wa̦ nia fa ji̦liajenö, Lomateli bada a yai lä cui nija a wa̦no nia wäyäö majöomaje, ö̦jönö a yai juwäamabä. ²¹ Jesús a wa̦liije ja, abinaja bä cuma. —Tä a̦ wäyäle. Wa lä bejedimou wei bäfä daö. Wa bä yömölaö ja, wa wa̦ cadidou. Bada bä ma cui, bada bä lä mlai bä ma cui, wa bä nofi tabou fe usucuo fa showaonö, Yai Bada tänö bämalecö taamaö lä bufii wei, quilii mlai ja wa tä a̦ shino yai wäyäö shalilou. Ö̦jö cudeenö bäfä nia wa̦lii. ²² Lomateli bada Sesa a lä cui, ö̦jö befi bä blada lä nacaö wejei, judio bämacö ma cuinö, ¿bäma bä blada jöböabä tawä? ¿Tä a̦ läami daanö? Ma, ¿tä a̦ läa tawä? —bä cuma. ²³ Ö̦jö ma cui, Jesúsnö bä daö waiquioma yalo a mölanomi. Abinaja a cuma. ²⁴ —Blada a da dodobla. Ei ¿wedi bei fe nö e̦le? ¿Wedi bei a wa̦fa oni? —a cuma. —Lomateli bada tä Sesa —bä cuu mö feduoma. ²⁵ —Ja̦o —e cuma—. Sesa cama etäbä ja, wama a li dobäbä, ö̦jö lä. Yai Bada cama etäbä mö feduwä lä cui täbä ja, cama wama a li dobäö mö feduobä —a Jesús cuma. ²⁶ Bluca bä mamo showao däjä, Jesús a wa̦ shominajamaö bufi ma doblaono wejei ma cui, a wa̦ shaliliablalou yalo, mamicai bä bufi shino shädayaimou bädaoma. ²⁷ Ö̦jö däjä, saduseo bä bada lä cuinö, Jesús a nabä icua nomöjöquemaje. Ö̦jö bä saduseo lä cui, abinaja bä bufi shino cuu. “Täbä lä nomaö wei bä demi jocädou co̦o mlaicätä”, bä bufi shino cuu. ²⁸ Inaja bä bufi cuu waiquiwä cudeenö, a wa̦ nia fa yaclämajenö a wa̦limaje. —Tä a̦ wäyäle. Moisesi tä a̦ oni jamö, abinaja judio bämalecö nowa tama. A ijilubö cuo showao mlao däjä, ai e mashi nomaö dicoo ja, bä suwäbö e lä feiblou wei a nia däaö nomöjöo. Ö̦jö a suwä nija bä ijilubö ebä fa tacönö, a lä nomalayono wei a lä cui, ö̦jö bä ijilubö ebä a̦fa nia jilabou nodio juoje. ¿Ö̦jö tawä? ²⁹ ’Bei —bada bä cuu co̦oma, Jesús nija—. Cama cäbä mashi 7 cuoma. Jaba a lä cui, a suwä lä däleno wei a ijilubö cua showaa mlai ja, a mladaliyoma. ³⁰ Ö̦jö a mashinö e däa nomöjölema. Ö̦jö ma cui, bei ijilubö e cuo showao mlao däjä, cama a ma cui a ca̦i nomaa majölayoma. ³¹ Cama ai a mashinö, e däa ma nomöjöleno wei ma cui, inaja showawä. ¿Ö̦jö tawä? Jödödöwä bä 7 lä cuinö, a suwä däa ma nodiadalano wejei ma cui, bä ijilubö cublou showao mlao däjä bä bluca nomalaliyoma. ³² Ya̦cumö, suwä a ma cui, a ca̦i mladaliyoma. ³³ ’¿Ö̦jö tawä? —bä cuma—. Inaja tä cuoma cudeenö bäfä wa̦lii. Yai Bada tänö täbä demi nia jo̦wa jocädamaö lä co̦o wei däjä, ¿wedi jamö a lä cui bei a suwäbö yai nia cuodayou, ö̦jö lä? Bluca bä 7 wa̦lo lä cuinö a däadalaö malä cuaano wejei —ebä cuma. ³⁴ Abinaja Jesúsnö bä nowa tama. —Yanowamö täbä showadi doayou ma cui, ³⁵ Yai Bada tänö täbä demi jocädamaö co̦o däjä, täbä nia inaja cuaaimi. “Ei a ba̦limi cuobä a”, Yai Bada tänö täbä nofi lä tabou wei, täbä nia doayou co̦daaimi. Täbä nia ca̦i suwäbö jöböamou co̦daaimi. ³⁶ Täbä nia nomaö co̦daaö malä mlai. A̦jele täbä doayou lä mlainaja täbä li cublou showadalayou. Yai Badanö täbä demi jocädamaö yalo, ö̦jö ijilubö ebä nia yai cuo. ³⁷ ’¿Ö̦jö tawä? —Jesús a cuma—. Täbä demi nia jocädou lä co̦o wei, Moisesi a ma cuinö tä a̦ jaba wawäblamalema. Fii defi wacö lä waono wei jamö Yai Bada a wa̦fa wäyämou däjä, abinaja a malä cuno wei. Ablaamö a ma cui nija, Isaacö a ma cui nija, Jacobo a ma cui nija, ö̦jö bä nija ya lä bufiblamou wei ya. ’¿Ö̦jö tawä? —Jesús a cuma—. Einaja Yai Bada a cuma. ³⁸ A lä bufiblamou wei a lä cui, nomawä täbä nija a bufiblamoimi. Bä lä demi wei bä nija a yai bufiblamou. Yai Bada ebä bluca lä cui, bä demi malä tabole —a cuma. ³⁹ Ö̦jö däjä, Moisesi tä a̦ ja täbä lä damaö wejei, ai bä a̦ fama. —Tä a̦ wäyäle. Wa wa̦ juo ja, wa wa̦ cadidoma —bä cuma. ⁴⁰ Bä malä quilino wei. Bä fa quililalunö a wa̦lii co̦daanomije. ⁴¹ Jesúsnö bä bufi dayäamaö ja, abinaja bä nowa tama. —A shömabä Yai Bada tänö a lä yaileno wei a lä cui, Bada tä David nodiwä e jo̦wa. ¿Wedinaja bä bufi li fa cunö, David nodiwä e a̦fa li jilabouje? ⁴² David cama a showawä ma cui, amowa etä a̦ oni jamö, abinaja a malä cuno wei. Iba Badayä a nija, abinaja Bada tä yai lä cui a cuma. “Äyämö, camiyä jayu ya boco mashi jamö a döcäa da balöiquiyo. ⁴³ Bä nö lä nabämou wei bä lä cui, cafä nija ya bä möfe nia quilili bomabou.” ’¿Ö̦jö tawä? —Jesús a cuma—. Einaja a cuma. ⁴⁴ Bada tä David a lä cuinö a nofi ma badabole ma cui, ¿bei e jo̦wa nia li nodiblou majöo tawä? Bä bufi da dayäo, ö̦jö lä —a cuma. ⁴⁵ Bä yömöca bluca dao däjä, abinaja Jesús a cuma, bä lä nocamabono wei bä nija. ⁴⁶ —Moisesi tä a̦ ja täbä lä damaö wejei bä nija bä da moyaweicu. Camishi labe bä ja bä shino didio bufi doblao talei, bä nowa lä bluca wei bä ja. Madofi bä luluabeje jamö bä lä co̦camou wei bä lä cui nija, bä nö bada ö̦jöböamou bufi ca̦i doblao. Judio bämacö yododabä jamö, bada bä lä döcäo wei jamö bä döcäo yaimou mö feduo. Täbä iyaö ca̦i co̦camobä jamö ma cui, bada bä nijamö bä loo coyocoo bufi ca̦i doblao. ⁴⁷ ’Ö̦jö bä lä cuinö, suwä bä lä feiblou wei bä fa mölamajenö, bä madofibö bluca däablaö läoje. Ö̦jö däjä, bä mömou nia liyäjäo fe fa yadionö, Yai Bada nija bä nö bayeli nacao ja bä a̦ jole jole labaaö bädao. Yai Bada tänö ö̦jö bä nö nia shino yai bleaamaö fe balojoo —a cuma.

¹ Yai Bada nija bä blada jöbööje ja bä blada lä didiblaaö wejei jamö, Jesús a cuoma. Tä fa mödalönö, bä nö lä madofibö wei bänö bä blada didiabeje jamö, bä nö daama. ² Ö̦jö däjä, suwä a yami nö jo̦lili lä bleaano wei a fa waloicunö, blada cäcöbö wai nowa lä bolacami wei cäcöbö wai didiaö dalalema. ³ Abinaja Jesús a cuma, cama ebä nija. —Cafä wamacö nija ei ya wa̦ lä cui, bejedi lä ya wa̦. Bä nö lä madofibö wei bä lä cuinö, blada bluca bä ma didiaöje däjä ma cui, fei suwä a yami nö jo̦lili lä bleaale a lä cui, ö̦jö lä a shi shino yai ö̦jöde fe balojowä. ⁴ Ai bä lä cuinö, bluca bä li tabomaje yalo Yai Bada a malä dobälufajei. Ö̦jö ma cui, fei a suwä nö jo̦lili lä bleaale a lä cuinö, nii bä luluabä cäcöbö shino wai ma tabono wei ma cui, ö̦jö cä lä, cäcöbö jöböa nö mlaquei lä cufe —a Jesús cuma. ⁵ Bä lä nocaono wei bänö Yai Bada etä yafi a̦fa liyäjäwä tamaje. Maa dodijidawä mabä ma cuinö, madofi bä no mlai ja lä jöböano wejei bä ma cuinö, e yafi baushi liyäjäoma. Ö̦jö tä a̦fa wayoalajenö, abinaja Jesús a cuma. ⁶ —Ei wama bä yafi lä möle bä lä cui, bä nia cudiomi. Wama bä nofi dobou ma bäle ma cui, bä nia obi wa̦liaöje. Ö̦jö däjä, ai ma jamö, moli ma cui ma nia maqueo feibloimi —a cuma. ⁷ A wa̦liije ja, abinaja bä cuma. —Tä a̦ wäyäle. Wa tä a̦fa lä wäyäblei, ¿wedinaja tä nö yai fa cublalunö, bei tä nia yai wawäblou? Tä tamou bufio däjä, ¿wedi tä dodijiwänö yamacö li moyawäobä? —bä cuma. ⁸ Abinaja Jesúsnö bä nowa tama. —Bä da moyaweicu, ö̦jö lä, wamacö mölamaö mlaobeje. Obi, bä lä jolemou wei bluca bä nia wawäblou. Camiyä ya wa̦fa nia ma wäyämou wei ma cui, bä möla dijä. “Ö̦jö ya”, bä nia cuu. “Tä bluca waicou bufio lä cule”, bä nia ca̦i ma cuu wei ma cui, ö̦jö bä nija bä nocao dijä. ⁹ ’Bä lä bälöblai bä nabä nia queayou. Ai bä mö feduwä lä cui, inaja showawä bä nia shifilimou cuo mö feduo. Ö̦jö wama bä wa̦no ji̦liaö däjä, bä quili dijä. Ö̦jö tämi. Ö̦jö tä nia bluca cublou ma balöo wei ma cui, tä nia bluca waicou jaödaomi showawä —a cuma. ¹⁰ Ö̦jö däjä, abinaja Jesúsnö bä nowa tama. —Bä shomi lä cublai bä nabä nia queayou balöo. Bä bälöblawä lä yaiblai bä ca̦i. ¹¹ Mashita a nia bada qui̦da qui̦damou nö quiliaö. Bluca täbä ulifibö lä cublai jamö, ofi tä nia blaucublou. Shawala a ca̦i. Judu mösö jamö tä nia lä cublou wei tänö bä bufi nö nia beblalou. Yai Bada tä nia lojode dablamou nö quiliadayou —Jesúsnö bä nowa tama. ¹² Jesús abinaja a cuma. —Ö̦jö ma cui, ö̦jö tä cublou showao mlao däjä, wamacö nia juwäaö balöoje. Wamacö nö nia bleaamaöje. Judio bä yododabä yafi bä jamö wamacö nia ca̦i juuje, bada bä nija wamacö noshi ö̦jödabobeje. Wamacö a̦fa dobloimi fa wäyäjenö, wamacö fe nia lamabouje. Iba wamacö yalo, bada bä bälöo lä dodijio wei bä ma cui nija wamacö nia ca̦i jublou cuaaöje, wamacö dobloimi jömabeje. Cama ebä lämabou mö lä feduo wejei bä ma cui nija, inaja showawä. ¹³ Ö̦jö ma cui, ö̦jö bä nija wamale a̦fa wäyäbä, ö̦jö tä nia cuo. ¹⁴ ’¿Ö̦jö tawä? —a cuma—. Wamacö nofi nia lä bäyäo wei tä ja, bä bufi jalujou dicoo dijä. Fei däjä ma cui, bä bufi shalilia da showadaicu. ¹⁵ Wamacö a̦ moyawe juobä, camiyänö bämacö a̦ nia malä macocamaö wei. Bämacö a̦ lä bayeliblaö wei däjä, bä nö lä nabämou wei wama bä a̦ nö nia wa̦lojamaimi. ¹⁶ ’Afä bä ma cuinö wamacö nö bleaamabeje, wamacö noshi nia ö̦jödabouje —a cuma—. Faafä bä ma cuinö, naafä bä ma cuinö, afä mashi bä ma cuinö, aifä bä ma cuinö, afä nofi bä ma cuinö, ai wamacö shämaö cadidiobeje, wamacö nia jömaöje. ¹⁷ Iba wamacö yalo, bluca bänö wamacö nofi nia wa̦libouje. ¹⁸ Inaja ma cui, wamacö nö bleaaö shi wa̦libä tämi. Bei wamacö feta u̦cu bädawä ma cui, Yai Bada tänö wamacö nowamaö daö. ¹⁹ Wamacö nö wa̦lojaö fe lä yadio wei tänö wamacö nia ba̦limi cuodayou —Jesús a cuma. ²⁰ Jesúsnö abinaja bä nowa tama. —Jelusaleteli bä yafibö sibo jamö, wayu wama bä toujou fe fa̦yoaö dablaö däjä, bä da moyaweicu. Bä yafibö ca̦i waicaö ajedeweje. ²¹ Ö̦jö däjä, Judea jamö wamacö lä bälöle wamacö lä cui, tä lä jefubö wei jamö bä docuo cuo da showadaomobodu. Jelusale jamö bä lä bälöo wei bä sibou showadaofälöbä. Sibo jamö bä cublawä lä waiquii, shabono jamö bä lucäö co̦o mlai. ²² Jelusaleteli bä nija, Yai Bada tä nö nia lä bäshälöo wei tä malä cule. Yai Bada a wa̦no wäyälewä esibä oni jamö, bä nö nia jo̦wa lä bleaamaö wei tä a̦ bejedi bluca wawäblobä. ²³ ’Bä lä shöbönabö wei, ¡bejedi lä ö̦jö bä nö nia bleaaö fe balojoo! —a cuma—. Ijilu bä lä shadimabou wejei, inaja showawä bä nö nia bleaaö cuo. Judio bä lä bälöblai bä ulifibö nö nia malä wayuböo wei. Ö̦jö bä nija Yai Bada a nia lä ishou wei tä nia wawäblou fe malä balojoo wei. ²⁴ Shocobi bänö, judio bluca bä nia waicaöje. Shomi täbä bälöblawä lä yaiblai täbä ulifibö jamö, ai bä nia bälaöje. Jelusaleteli ai bä lä jäblou wei bä nijamö, shomi täbä bälöa läa fa jäicunö bä nö nia bleaamadii juoje. Ö̦jö judio bä lä mlai bä lä cui, Yai Bada tänö bä lämabobä tä mladou showaa mlai ja, inaja bä nia cuaaö balöo —Jesús a cuma. ²⁵ Abinaja Jesús a cuma. —Motoca a ma cui, belibo a ma cui, shidicali bä ma cui, bä nia shomiaö nö quiliadayou, yanowamö täbä moyawäobä. Bita jamö ma cui, täbä bälöblawä lä yaiblai bä bufi nö nia bluca bleaaö cuaaö. Modu u a̦ nö nia bada quiliaö ja, u bada fa bolilonö bä bufi nia wedinajamou. ²⁶ Bita jamö tä nia lä cublou wei tä ja, ai bä nia quilili wäcäcou. Judu mösö jamö bä lä shadiladi bä nia ca̦i layäcäbladayou. ²⁷ Ö̦jö däjä, camiyä ya lä yanowamöblaleyoluno wei ya nia shino yai bädoyoluu. Ölajashi a ja ya shi̦i ca̦i bada fa itoimadunö, wale nia lojode dablaöje. ²⁸ ’¿Ö̦jö tawä? Inaja wama tä cuaaö dablaö ja, wamacö bufi lojodolanö bä nö da daicu. Wamacö nia yai lä bayeliblamou wei tä malä ajedei —a Jesús cuma. ²⁹ Cama bä nija ei tä a̦ wäyäö yacläoma. —Ico fibä ma cui ja, bluca defibä ma cui ja, wamacö bufi dao talei. ³⁰ Defi jenabä ducuu däjä, “Fei däjä motoca shi̦i ajeo co̦a nö culai”, wamacö bufi shino cuu. ³¹ Inaja showawä, ei ya tä a̦ bluca lä wäyäfe tä wawäblou däjä, wamacö bufi daobä cätä. “Fei däjä Yai Bada tänö cama ebä ca̦i nia lä cuo wei tä ajedou lä cule”, wamacö cubä. ³² ’Cafä wamacö nija ei ya wa̦ lä cui, bejedi lä ya wa̦ —a cuma—. Wamacö fei däjä lä bälöblai wamacö bluca nomaö showaono mlai ja, ö̦jö tä nia bluca wawäblou balöo. ³³ Judu mösö ma cui, bita a ma cui, ö̦jö bä bluca ma mlaolaliyo wei ma cui, camiyä ya wa̦ nia mladoimi —a cuma. ³⁴ Abinaja Jesúsnö bä nowa ca̦i tama. —Bä da moyaweicu, Yai Bada nija wamacö bufi walalao fe yadiobä. Täbä iyaö ca̦i lä co̦camou wei jamö bä bufi mö blucao dijä. Bä shi wa̦limamo dijä. Eja dodijidawä wamacö nia lä bälöo wei tä ja, bä bufi ca̦i cuaablalo dijä. ¿Ö̦jö tawä? “Fei däjä dao”, wamacö bufi cuu mlalanö wamacö lobe quiliblou dicoo mlaobä. ³⁵ ’Ya juu co̦o lä bufio wei däjä, tä nia lä cublou wei, bita jamö täbä lä bälöblai täbä bluca nijamö tä nia wawäblou nö malä quiliaö wei. ³⁶ Bä nö da daicu, ö̦jö lä. Yai Bada nija bä nö bayeli da nacao, tä cublou nö ma quiliaö wei ma cui, wamacö nö fa wa̦lojomabonö, wamacö dodijaö fe yadiobä. Ya lä yanowamöblaleyoluno wei ya juu co̦o däjä, camiyä nija dodijidawä wamacö icuo mö baobä —a cuma. ³⁷ Showadi Yai Bada etä yafi jamö Jesúsnö täbä yömöladima ma cui, didi däjä a fa juoblofälönö, Oliba tä balöcö jamö a shino cuo fe jaluma. ³⁸ Ö̦jö däjä, a wa̦ nia ji̦liaö fa co̦ojenö, fena däjä Yai Bada etä yafi jamö täbä shino bluca waloblaaö co̦o fenaoma.

¹ Bei. Nii juluno mlai bä ja, judio showadi bä iyaö ca̦i lä co̦camou wei tä ajeoma. Yai Bada a waiteli lä jayuano wei a nofi showadi lä co̦camoaö wejei tä lä cui. ² Nofi bäyäalewä blowäjäwä bä ma cuinö, Moisesi tä a̦ ja täbä lä damaö wejei bä ma cuinö, Jesús a shäbeje a nofi washuamaje. Yanowamö täbä nö quili tamaje yalo, a wa̦fa wayoaö ja̦toomaje. ³ Ö̦jö däjä, Juda nija Sadanasi a lucälayoma, Juda Icaliode a wa̦fa lä cuono wei nija. ¿Ö̦jö tawä? Jesús nija bä 12 lä nocaono wei ai e cuoma. ⁴ Nofi bäyäalewä blowäjäwä bä ma cui, Yai Bada etä yafi jamö bä bada lä läono wei bä ma cui, ö̦jö bä sho bä a̦ wayobä, Juda a alayoma. Ö̦jö bä nija a jömabä, Jesús a nia lä nomojoliano wei a wa̦fa wäamoma. ⁵ Bä bufi bada doblaloma. Jesús a nia lä jömaö wei tä nowa ja, blada ebä a̦fa wäa showadaquemaje. ⁶ Juda a fa ja̦omodonö, a nia lä nomojoliano wei tä nofi dayäaö showadaoma. Bä showadi lä co̦camou wei bä cuo mlao däjä, a nia nomojoliaö balöoma. ⁷ Nii bä juluu lä mlai bä ja bä iyaö ca̦i co̦camou co̦obä, oweja ocalo bä shäbeje tä mö jalu cublaliyoma. ⁸ Ö̦jö cudeenö, Jesúsnö Pedro, Juan sho cäcöbö shömöa balölema. Abinaja cäcöbö nowa tama. —Yai Bada a waiteli lä jayuano wei bäma a nofi co̦camoaö co̦obä, täbä da baböcudu, bämacö iyabä —cäcöbö nowa tama. ⁹ A wa̦liböö ja, abinaja cäcöbö cuma. —¿Wedinaja wa bufi cuu? ¿Wedi jamö yafi lä cui jamö yafä bä nii baabä? ¹⁰ Abinaja cäcöbö nowa tama. —Bei. Shabono jamö wafäcö co̦blou däjä, mau ubä befi ca̦i lä döcömabole wafä a mö nia wa̦lo baamadayou. Ö̦jö nija wafäcö fa nocalofälönö, cama a lä faö wei jamö wafäcö falö. ¹¹ Ö̦jö a yafibö lä cui nija, ya tä a̦ lä wäyäö wei ya lä cui wafäle wa̦no wäabä. Wafä yano wa̦li. Ö̦jamö iba bämacö lä nocamabole wamacö sho bämacö nia iyaö, Yai Bada a waiteli lä jayuano wei bäma a nofi co̦camoaö co̦obä. ¹² A yano lä feyacale tä bada jömöaö wä, madofi bä befi ca̦i. Ö̦jamö lä bämacö iyabä wafä bä nii bacö —cäcöbö nowa tama. ¹³ Cäcöbö fa alufälönö, Jesús a lä cuu weinaja inaja showawä tä dabölalema. Yai Bada a waiteli lä jayuano wei a nofi co̦camoaö co̦obeje, ö̦jö a yafi jamö täbä nii baböquema. ¹⁴ Bä iyabä tä cublou däjä, Jesúsnö bä shömabä bä lä yaileno wei bä ca̦i looma, bä iyabä. ¹⁵ Abinaja Jesús a cuma. —Yale nö bleaamaö showao mlaoje däjä, cafä wamacö nija ya iyaö ca̦i co̦camou bufi doblaoma, Yai Bada a waiteli lä jayuano wei bäma a nofi co̦camoaö co̦obä. ¹⁶ Bämacö lä cuaale ya tä nia taö co̦o jaöo malä mlai. ¿Ö̦jö tawä? Cafä bämacö nowa taö lä cule. Yai Bada tänö cama ebä ca̦i cuobä jamö, cama ebä yai co̦aö cadidio däjä, ö̦jö däjä ya tä nia shino waö co̦o —a cuma. ¹⁷ Ö̦jö däjä ji̦shima a fa dälönö, toubä nia lä coano wejei toubä ja, Yai Bada nija a bufi a̦fa doblalou fa wäyämonö, cama ebä nija a wa̦ fama. —Bei. Ei ji̦shima a ja wamacö nö bluca liyobä, a da dälöje. ¹⁸ Cafä bämacö nowa taö lä cule. Ei uba bäma nashiwä toubä lä coale ya toubä nia coaö co̦o jaöomi. Yai Bada tänö cama ebä ca̦i cuobä jamö, ö̦jamö ya toubä nia shino coaö co̦o —a cuma. ¹⁹ Ö̦jö däjä nii a fa dälönö, Yai Bada nija a bufi a̦fa doblalou wäyämou co̦oma. Ö̦jö däjä a fa joyolalönö cama ebä nija bä jöbäö cuaama. Bä jöbälanö abinaja bä nowa tama. —Ei nii a lä cui, camiyä ya nia lä jöböo wei, ei bei ya ya̦ji nö owä, cafä wamacö bayeliblamobä ya nia lä jöböo wei. Bämacö iyaö lä cuaalenaja bä cuaaö da juo, wamale nofi jaducubobä —bä nowa tama. ²⁰ Inaja showawä, bä fa iyalönö, ji̦shima a ja, nashiwä toubä befi ca̦i däa nomöjölema. Abinaja a cuma. —Yai Bada tänö tä a̦fa lä wäqueno wei tä a̦ bejedi cublobä, ö̦jö bei lä ya i̦yäbö nö owä. Wamacö bayeliblamobä ya i̦yäbö läblalio. Ö̦jö wama tä a̦ nofi dude jaducubobä, ei a li ji̦shima. ²¹ ’Ö̦jö ma cui, yale nia lä nomojoliaö wei a lä cui, camiyä bämacö nija a iyaö ca̦i coyocoa lä cule. ²² Camiyä ya lä yanowamöblaleyoluno wei ya lä cui, bejedi lä wale nia nomamaöje, Yai Bada tänö tä taamaö lä bufiono weinaja showawä. Ö̦jö ma cui, wale yai nia lä nomojoliaö wei a lä cui, ö̦jö a nö nia shino yai bleaaö dodijio —a cuma. ²³ Cama ebä wa̦liyou ja, abinaja bä cuma. —Bä nö lä nabämou wei bä nija, ¿wedi jamö a lä cuinö a nia jömöaö? —bä cuma. ²⁴ Jesús nija bä lä nocaono wei, cama bä bada cuo bufi doblao fa ayaonö, bä a̦fa tayoa dicolayoma. ²⁵ Abinaja Jesúsnö bä nowa tama. —Bluca bä lä bälöblai bä nijamö bä bada lä läblai, cama bä a̦ shino ji̦liamou bufi doblao talei. Cama bä bada lä cui, “Ya bä bayeliblabä ya li läo”, bä li cama cuu. ²⁶ Ö̦jö ma cui, inaja cafä wamacö nofi tamamobä wamacömi. Ma, cafä wamacö nija bada a cuo bufi lä doblao wei a lä cui, jai a oshe a shino yai cublobä. A lä nosiemou wei a lä cuinö bä nosiemaö fe balojoo mlai, bä shino yai bayeliblabä. ¿Ö̦jö tawä? ²⁷ ’Ai a lä cui, a iyabä a loquei. Ai a mö feduwä lä cuinö a iyamabä ebä nii baaquei. ¿Wedi jamö a lä cui, a yai bada, ö̦jö lä? A lä iyale a shino yai bada, ¿ö̦jö tawä? Ö̦jö ma cui, camiyä ya lä cui, cafä wamacö nijamö ya lä cuaale, jai bämacö nosie juabä ya cua yalo, ya ja̦omou si ijejewä. ²⁸ ’¿Ö̦jö tawä? —a cuma—. Wale nö ma bleaamaö wejei ma cui, wamacö nocao fe lä yadio wei wamacö. ²⁹ Ö̦jö cudeenö bada bämacö nia tablaö, Fayänö camiyä wale lä taamano weinaja showawä, ³⁰ iba ya bä ca̦i nia lä cuo wei jamö, camiyä nija wamacö nö liyobä. Bada bä döcäobä täbä lä cui, afä 12 täbä ja wamacö fa döcäalunö, Isaeli ebä nija wamacö nia bada läo, ö̦jö bä ijilubö 12 ebä nodiwä lä yaiablalou wei bä nija—a cuma. ³¹ Simón Pedro nija abinaja Jesús a cuma. —Simón. Wale a̦ da ji̦lilä, Simón. Sadanasinö wa wababä, Yai Bada nija a wa̦ faö waiquiwä. I̦cali wa fa laecanö, nii bä lä taö wejei jamö bei tesibä joyamou lä culenaja, wa nia tablamou. ³² Ö̦jö ma cui, Yai Bada nija bäfä nö bayeli nacaö waiquiwä, wa bufi lojodoo fe yadiobä. Wa bufi mö yabajablou co̦o däjä, aifä wa bä bufi lojodoamaö mö feduobä —a cuma. ³³ Abinaja Pedro a cuma. —Tä a̦ wäyäle. Bäfä nia daaimi. Täbä fe lä lamaö wejei jamö wa fe ma laquei wejei ma cui, wa shäö ma cujei, cafä nija ya nia nocao fe yadio showao —a cuma. ³⁴ —Ma, Pedro —Jesús a cuma—. Bäfä nowa taö lä cule. Cadala a wa̦ faö showao mlao däjä, 3 wale nofi nia jole jole mojodubou cuo —a cuma. ³⁵ Cama ebä nija abinaja Jesús a ca̦i cuma. —Bämacö jaba lä shömano wei däjä, blada wama bä besibonomi. Wama täbä didibofälöbä tä ma cui, wama täbä däanomi. Wamacö mamicö didio nomöjöobä täcö ma cui, wama täbä bolacabonomi. Wamacö shinoco lä juno wei däjä, ¿wamacö nö bleaama tawä? —a cuma. —Ma, bleaanomi —bä cuma. ³⁶ Abinaja bä nowa taö nomöjöoma. —Ö̦jö ma cui, abinaja ya cuu nomöjöo. Blada wama bä besibou ja, ö̦jö bä ca̦i da juje. Wama täbä didibofälöbä wama tä tabou ja, inaja showawä. Ai wanö, shocobi wa taboimi ja, camishi wa cö fa jöböcönö, shocobifä a da lululä. ³⁷ Bämacö nowa malä tale. Yai Bada etä a̦ oni jamö ya wa̦fa lä tamou wei tä a̦ nia bejedi wawäblou. Abinaja tä a̦ cuu. Wa̦lidiwä talewä bä nija a yädämaquemaje. ’¿Ö̦jö tawä? —a cuma—. Einaja tä a̦ cuu. Yai Bada etä a̦ ja, ya wa̦fa lä tamou wei tä bluca wawäblobä tä malä cui. ³⁸ Abinaja bä cuma. —Tä a̦ wäyäle, möblaa. Ei shocobi bolacabö cäcöbö cua —bä cuma. —Inaja lä waiquiwä —a cuma. ³⁹ A fa sibolunö, Oliba tä balöcö jamö Jesús a ayofälöma, showadi a lä cuaano weinaja showawä. Cama ebä lä nocamabono wei bä yauablalou showaoma. ⁴⁰ Bä showadi lä cublaaö wei jamö bä fa waloicunö, abinaja bä nowa tama. —Yai Bada nija bä nö ca̦i bayeli da nacao, Sadanasinö wamacö yabäcäblaö däjä wama a wa̦ juaö yacläo dicoo mlaobä —bä nowa tama. ⁴¹ Cama bä jilao juo däjä, maa mabä blajawä shäyämou lä culenaja Jesús a bayäcäwä fa cuicudunö, a diyäliquedayoma. A fa diyälibodunö a nö bayeli nacaoma. ⁴² —Fabe. Fei däjä wale nö yai nia lä bleaamaö wejei tä lä cui, wa tä blajamabä tä cua ja, tä da blajamalö. Ö̦jö ma cui, camiyä ya cuaaö bufi lä doblao weinaja mlai, cafänö wale taamaö bufi lä doblao weinaja wale da taama —a cuma. ⁴³ Ö̦jö däjä Yai Bada etä a̦jele fa wawäblaliyonö, a bufi lojodoblamalema. ⁴⁴ Ö̦jö däjä Jesús a bufi jo̦lijou fe fa balojoonö, a nö bayeli yai nacao fe balojooma. Bei wäyäcu yobli lä cui, mashita jamö jai i̦yä i̦yä bä cuwä bä bläläma. ⁴⁵ Yai Bada nija a wa̦ faö fa waiconö, a fa ubladalunö, cama ebä lä nocamabono wei bä jilaa lä jäle jamö a waloa fa co̦iquiyonö, bä mia dalalema. Wajä wajä bänö bä fa malishalönö bä mioma. ⁴⁶ Abinaja bä nowa tama. —¿Wedi tä tabä wamacö li mia dicoa cule? Bä da jocäcälalu. Yai Bada nija bä nö ca̦i bayeli da nacao, Sadanasinö wamacö yabäcäblaö däjä wama a wa̦ juaö yacläo dicoo mlaobä —bä nowa tama. ⁴⁷ Jesúsnö inaja bä nowa taö showao däjä, bä lä toujublaliyono wei bä bluca juu showaimama. Jesúsnö bä 12 lä nocamabono wei ai e lä cuinö bä luluboma, Juda a wa̦fa lä cuono wei a lä cuinö. Jesús nija a icua ajedequema, a nomojoli mamocacö buyucabä. ⁴⁸ Ö̦jö ma cui, abinaja Jesús a cuma. —Juda. Wale nomojoli lä buyucaö wei tänö, camiyä ya lä yanowamöblaleyoluno wei ya lä cui, bä nö lä nabämou wei bä nija, ¿bei wale nia li jömöaö dicoo? —a cuma. ⁴⁹ Jesús ebänö tä nia lä cublou wei tä fa dalalöjenö, abinaja Jesús nija bä cuma. —Tä a̦ wäyäle. Shocobi bänö bäma bä nabä quequei tawä? —bä cudaliyoma. ⁵⁰ Inaja bä fa cudalunö, ai e isholayoma. Nofi bäyäalewä bada a nosie juamobä a nabä fa queicunö, a yömöca baquequeblalema. ⁵¹ Ö̦jö ma cui, Jesúsnö a wasölema. —Ma, bä isho dijä —a fa cunö, bei yömöcacö lä baquequeblaleno wei yömöcacö fa jubanö, a jaloa co̦malema. ⁵² Ö̦jö däjä, a nabä lä juno wejei bä nija Jesús a wa̦ fama. Nofi bäyäalewä blowäjäwä bä ma cui nija, Yai Bada etä yafi jamö bä lä läono wei bä ma cui nija, judio bada ai bä ma cui nija, abinaja Jesús a cuma. —Tomömolewä bä nabä juu lä culajeinaja, ¿wedi tä tabä bei wamale nabä li juu cuaaö dicoo cufe? ¿Wedi tä tabä shocobi, nablushi wama bä ca̦i juu cuboyoi? ⁵³ Yai Bada etä yafi jamö bämacö ca̦i loo däjä wamale juwäano malä mlai. Ö̦jö ma cui, wamacö cuaaö bufi lä doblao wei wamacö cuaabä tä cublou lä cule, mö didi jamö a bada lä läle a nosiemobä —a cuma. ⁵⁴ Ö̦jö däjä Jesús a fa juwälöjenö, nofi bäyäalewä bada e yafi jamö a öbölefälömaje. Pedro a jäwäjäwä yauafälöma. ⁵⁵ Yafi sibo lä ji̦coloi tä möamo ja, cowa wacö fa yäbalöjenö, bä bomobä bä loquema. Ö̦jö däjä Pedro a ca̦i loo coyocoquema. ⁵⁶ ¿Ö̦jö tawä? Pedro a loobä jamö, cowa wacö shi̦i wacacawä ja a fa dalalönö, bada a wa̦ juamobä a suwä lä cuinö a möö dodijoma. Yoca lä jolemabou wei a suwä cuoma. Ai e nija abinaja a cuma. —Jesús nija fei a ca̦i cuoma —a cuma. ⁵⁷ Ö̦jö ma cui a wa̦ jole mojodumou ja, abinaja a Pedro cuma. —Ma. Ö̦jö ya daimi —suwä nija a cuma. ⁵⁸ Tä nö fa dedejedalunö, ai anö Pedro a daa fa nomöjölalönö, abinaja e cuma. —Cafä ma cui cama wa e ca̦i —a cuma ma cui, —Ma, ö̦jö ya emi —Pedro a cuma. ⁵⁹ Tä nö dedejedou fa co̦lonö, ai a wa̦ faö nomöjöo ja, a wa̦ fe blacäjoma. —Bejedi lä ö̦jö bä nija ei a ca̦i co̦caoma. Calileateli a malä cui —a cuma. ⁶⁰ Ö̦jö ma cui abinaja Pedro a cuu mö feduoma. —Cuwi. Camiyä nija wa lä cufe ya tä daimi —a cudou däjä, yedu cadala a wa̦ nocablaliyoma. ⁶¹ Ö̦jö däjä Bada tänö Pedro a möa ashädalema. A fa mödalönö, Bada anö a nowa lä tano wei Pedronö tä nofi jaducudalema. “Cadala fei däjä a wa̦ faö showao mlao däjä, 3 wale nofi nia jole mojodubou”, a nowa malä tano wei. ⁶² Ö̦jö däjä a bufi fa wajäblalunö, a siboa fa showadalunö a ö̦cöma. ⁶³ Jesús a lä juwäbono wejei bänö a nö waiblamaje. A ca̦i shämaje. ⁶⁴ Mamocu fa jo̦yabojenö, a nö waiblaöje ja, a ca̦i wa̦limaje. —Yai Bada a wa̦no wäyälewä wa jo̦wa lä cui, tä a̦fa wäa da cadidiba. ¿Wedinö bei wa shälei cufe? —a nowa tamaje. ⁶⁵ Bä a̦ wa̦lidiwä falanö a nö waibladimaje. ⁶⁶ Tä mö fa jalulunö, judio bada bä yododaö fenaoma. Nofi bäyäalewä blowäjäwä bä ma cui, Moisesi tä a̦ ja täbä lä damaö wejei bä ma cui, ö̦jö bä yododoobä jamö a icuobä, Jesús a öbölefälömaje. Abinaja a nowa tamaje. ⁶⁷ —Yai Bada tänö a shömabä a lä yaileno wei, ö̦jö lä cafä bei wa e waiquiwä ja, a wa̦ nö da wäbo —bä cuma ma cui, abinaja Jesús a cuma. —Bämacö nowa taö ma cui ja, wamale a̦ nia bejedi bufiimi. ⁶⁸ Cafä bämacö wa̦lii ma cui ja, wamale a̦ nia ca̦i juaimi. ⁶⁹ Ö̦jö ma cui, ya fe fa weyadalunö, camiyä ya lä yanowamöblaleyoluno wei ya lä cui, Yai Bada tä nö wa̦lojaö lä ayao wei boco jayu mashi jamö ya nia döcöodayou —a cuma. ⁷⁰ Ö̦jö däjä, abinaja bä bluca cuu showaoma. —¿Yai Bada cafä bei wa e Ijilubö, ö̦jö lä? —bä cuma. —Wamacö a̦ cadidou. Ö̦jö ya e —Jesús a cuu mö feduoma. ⁷¹ Ö̦jö däjä, abinaja cama bä nowa tayoma. —¿Ö̦jö tawä? ¿Wedi tä tabä ai bäma bä a̦ li ji̦liaa co̦lei? Cama bäma a wa̦ ji̦lia malä waiquilufe —bä nowa tayoma.

¹ Ö̦jö däjä, bä bluca fa ubladalunö, Lomateli bada tä Bilado nija Jesús a ca̦i fa jujenö, ² a wa̦fa dobloimi wäyämaje. Abinaja bä cuma. —Ei a lä cuinö, judio yamalecö yaclämaö bufi lä doblao wei yama a daö. Cafä Lomateli bada bämacö a̦ juaö mlaobä a wa̦ faö. Bada tä Sesa nija blada bä jöböamobä tä ma cule, yamalecö wasöö. Cama a wa̦fa bada jilou, Yai Bada tänö a shömabä a lä yaileno wei. A nia jo̦wa yai bälöo dodijio —bä cuma. ³ Biladonö a wa̦lii ja, abinaja a cuma. —Cafä ¿judio bada bei wa? —a cuma. —Awei. Wa wa̦ cadidou —Jesús a cuma. ⁴ Ö̦jö däjä, nofi bäyäalewä blowäjäwä bä ma cui nija, bä lä toujono wei bä ma cui nija, abinaja Bilado a cuma. —Ei a doblou lä mlai ya etä daimi —a cuma. ⁵ Ö̦jö ma cui, bä a̦ fe blacäjoma. —Judea tä ulifi jamö bä lä bälöblai bä shi bluca jalimomaö lä cudi. Calilea jamö bä jaba fa yömölanö, etä a̦ wäyäö fa cuaaimanö, eja ma cui etä a̦ ca̦i wäyäö showawä —bä cuma. ⁶ Biladonö ö̦jö tä a̦ fa ji̦lilänö bä wa̦lima. —¿Fei Calileateli bei a? —a cuma. ⁷ A wa̦fa Calileateli fa ji̦lilänö, ö̦jö bä nija a bada lä läono wei nija, Jesús a shömöa fe dolea majölema, Elode a bada nija. Jelusale jamö Elode cama a fama ca̦i cuo ajedeoma. ⁸ Jesús a möö ja, Elode a bufi doblaloma. A wa̦no bluca ji̦libou waiquioma yalo, a möö bufi doblao nö dedeaö waiquioma. Tä nö lä quilijii tä jo̦wa lä wawämano wei, tä ca̦i möö bufi doblaoma. ⁹ Ö̦jö cudeenö a wa̦lii nö dedeama ma cui, Jesús a wa̦ juo bädaonomi. ¹⁰ Nofi bäyäalewä blowäjäwä bä ma cui, Moisesi tä a̦ ja täbä lä damaö wejei bä ma cui, ö̦jamö bä ca̦i fa ublajaicunö, Jesús a wa̦fa dobloimi wäyäöje ja, bä a̦ faö wa̦lidioma. ¹¹ ¿Ö̦jö tawä? Elode a ma cuinö, cama sodado ebä ma cuinö, a nö waiblamaje. A noca flecamaje. Camishi liyäjäwä cäcö ja, a jole jole lucäa fa nomöjömalönö, Bilado nija a shömöa co̦lema. ¹² ¿Ö̦jö tawä? Ö̦jö tä cublou showao mlao däjä, Elode, Bilado sho cäcöbö nofi ma wa̦liayono wei ma cui, ö̦jö däjä cäcöbö nofimayou majöoma. ¹³ Ö̦jö däjä, Biladonö bä co̦camomalema. Nofi bäyäalewä blowäjäwä bä ma cui, judio bada ai bä ma cui, ai bä bluca ma cui, ö̦jö bä fa co̦camomalönö, ¹⁴ abinaja bä nowa tama. —Bei. Ya dobloimi jömabä fei wama a bälaqueyoluma. Wamacö jo̦wa yaclämaö bufi doblaoma, Lomateli bada yamalecö a̦ juaö mlaobä. Cafä wamacö mamo mötale ja ya ma wa̦lino wei ma cui, wamacö lä cuno wei moli ma cui ya etä dablanomi. ¹⁵ Elode ma cuinö etä ca̦i dablanomi. A shömöa malä co̦leno wei. ¿Ö̦jö tawä? A nomabä etä cuami. ¹⁶ Ö̦jö cudeenö, ya si yafelia fa bämalalönö ya nia jujeblamaö —a cuma. ¹⁷ ¿Ö̦jö tawä? Yai Bada a waiteli lä jayuano wei a nofi co̦camoaöje däjä, Bilado nija judio showadi bä a̦ shino fama. Bä fe lä laono wei bä lä cui, moli täbä shino jujedamaö bufimaje. ¹⁸ Ö̦jö cudeenö, bä lä yododano wei bä a̦ bluca faö fa showadaonö, abinaja bä cuma. —¡Miji a da shämalö! ¡Balabasi a yai shino da famaliyo! —bä cuma. ¹⁹ Ö̦jö Balabasi a lä cui, Lomateli bada bä joyabeje, Jelusaleteli bä shifilimomaö ja, a fe labomaje. Ai a lä shälei wei tä nowa ca̦i ja. ²⁰ Jesús a jujeblaö bufi doblao waiquiwä yalo, bä lä co̦camono wei bä nija Bilado a wa̦ faö co̦oma. ²¹ Ö̦jö ma cui, bä a̦ shi doa dicolayoma. —¡Fii balitama defi jamö a shino da basumacö! ¡A da basumacö! —bä cublaloma. ²² Bilado a wa̦ faö co̦oma. —¿Wedi tabä fii balitama defi jamö ya li basua bädamaquei? ¿Wedi bei tä li taö dodijioma? A doblou lä mlai ya etä daimi, a shämobä. Ö̦jö cudeenö ya si yafelia fa bämalalönö, ya nia jujeblamaö —a Bilado cuma. ²³ Ö̦jö ma cui, bä a̦ shi doa dicolayoma. Fii balitama defi ja a basuamabä, bä a̦ fe blacäjoma. Bä a̦ nacläalanö, Bilado a nowa tadiimaje. ²⁴ Ö̦jö cudeenö, ya̦cumö Biladonö a shämaö bufima, bä lä cuno weinaja showawä. ²⁵ Ai a fe lä labono wejei a shino jujeblamaö ayalayoma, a wa̦fa lä yubono wejei. ¿Ö̦jö tawä? Lomateli bada bä joyabeje, Jelusaleteli bä lä shifilimomaleno wei a lä cui, ai a ca̦i lä shäleno wei, ö̦jö a jujeblalema. Ö̦jö ma cui, Jesús a taamaö bufi lä doblaono wejeinaja a taamabeje, a noshi ö̦jödadalema. ²⁶ Jesús a öböbou ca̦i lä juimadujei jamö, Sileneteli Simón a co̦imabä jamö a mö bamalemaje. A mö fa bamalöjenö a juwälemaje. Ö̦jö nija, fii defi nia lä blilio wei defi yalucua nomöjöa fe yadimaquemaje, Jesús a nodi jamö edefi ca̦i nojaobä. ²⁷ A shäbeje jamö, Jesús nijamö bluca fe balojowä bä nocalayofälöma. Suwä bä ca̦i. Ö̦jö suwä bä balöcö shäolanö a nomöa bofälömaje. ²⁸ Ö̦jö bä nija Jesús a mö fa yaiblalunö, abinaja bä nowa tama. —Jelusaleteliyoma wamacö. Wamale nomöa bo dijä. Cafä bä nomöa yai da yuamo. Ijilufä bä nomöa ca̦i yai da boje. ²⁹ Tä yai wa̦lidiblou däjä, bä lä shöbönabö wei bä nö nia malä bleaaö wei. Bä ijilubö ca̦i lä cui, inaja showawä. Ö̦jö däjä, abinaja täbä nia cuu. “Bä shöbönabödalou lä mlai bä bufi yai doblalobä, ö̦jö bä li. Bä ijilubö tablaö dao lä mlai, bä shadimabou dao lä mlai, ö̦jö bä bufi yai doblalobä”, bä nia cuu. ³⁰ Ö̦jö däjä, bei macö ma cui ja bä a̦ nia faö. “¡Bei wamacö fa wäcälönö, yamalecö fe da shäbalu!”, bä nia cuu. Jefu bä ma cui ja, bä a̦ nia ca̦i faö. “¡Jefu wamacö fa wäcälönö, yamalecö da badädäbalö!”, bä nia cuu —Jesúsnö bä nowa tama. ³¹ Abinaja a ca̦i cuma. —Camiyä fii ya defi liyä lä cui, inaja wale taamaö dicooje ja, cafä fäwä wamacö defibä lä cui wamacö nö nia yai bleaamaö fe balojooje —a cuma. ³² Cäcöbö ca̦i shämou mö feduobä, ai cäcöbö öböa mö fedua showalemaje. Cäcöbö doblonomi yalo, Jesús a shämobä jamö cäcöbö nia ca̦i shäö mö feduo showadaomaje. ³³ Felosi blaobä tä a̦fa ulifi lä jilabou wejei jamö a ca̦i fa walobojolujenö, fii balitama defi jamö Jesús a basuquemaje. Cäcöbö doblou lä mlai cäcöbö ca̦i basua lu̦locua mö feduquemaje. Acasi boco mashi jamö ai a, jayu boco mashi jamö ai a, cäcöbö basua taaquemaje. ³⁴ Ö̦jö däjä Yai Bada nija Jesús a wa̦ falayoma. —Fabe. Fei bä nija wale nö bäshälö tabo dijä. Bä mojodili cuaaö dicoa —a cudaliyoma. Jesús a lä didiono wei bä camishi ja, ai bä bufi fa waiyonö, jömamodima bä wai shäyäjamaje, ebä nia yai lä däaö wei etä wawäblobä. ³⁵ Bä nö daobä, bluca bä ublajaoma. Judio bada bänö a nö waiblaöje ja, abinaja bä cuma. —Ai täbä jo̦wa bayeliblaö ma cuaano wei ma cui, ¿wedi tä tabä cama bei a li bayeliblamoimi? Yai Bada tänö a shömabä a lä yaileno wei, ei a waiquiwä ja, fei däjä cama a yai bayeliblamobä, ö̦jö lä —bä cuma. ³⁶ Sodado bänö a nö ca̦i waiblamaje. Bä fa ajedeicunö, nashiwä toubä dodobolajenö, ³⁷ abinaja a nowa tamaje. —Cafä judio bada bei wa waiquiwä ja, cafä a yai da bayeliblamolu, ö̦jö lä —bä cuma. ³⁸ Jesús a feduböcö ja, etä a̦ oni ca̦i shadimaquemaje. Abinaja etä a̦ oni cuma. “Judio bä nija a bada cuobä, ei a”, etä a̦ oni cuma. ³⁹ A doblou lä mlai ai a basua mö lä fedule a lä cui, Jesús nija abinaja a jushuo ca̦i cuma. —Yai Bada tänö a shömabä a lä yaileno wei, ¿ö̦jö lä wami tawä? A da bayeliblamolu, ö̦jö lä. Camiyä yafälecö ca̦i bayeliblaö mö da fedulo —a cuma. ⁴⁰ Ö̦jö ma cui, Jesús ai tä mashi jamö a lä basule a lä cuinö a wa̦ wasölema. —¿Yai Bada bei wa tä nö quili taimi? Cafä wa ca̦i nomaö mö feduobä wa. ⁴¹ Bäfäcö doblou fa mlacunö, bäfäcö nofi nacalayoma ma cui, ei a lä cui a nomabä etä cuami —a cuma. ⁴² Ö̦jö däjä, Jesús nija a wa̦ faö cadidioma. —Jesús. Afä wa bä ca̦i cuobä jamö, wale nofi da jaducule —a cuma. ⁴³ Abinaja Jesús a cuu mö feduoma. —Cafä nija ei ya wa̦ lä cui, bejedi lä ya wa̦. Fei däjä showadawä, camiyänö fedu jamö bäfä ca̦i cuodayou wä —a cuma. ⁴⁴ - ⁴⁵ Bei. Motoca a yo̦loloblojolayou däjä, tä mö jödödöwä dödölayoma. Motoca lublodayou däjä, Yai Bada etä yafi jamö cäcö bada acadafu lä läono wei, cäcö cacablou mö wädätefälöma. Motoca yajadou däjä, tä shi̦i jomoblou co̦layoma. ⁴⁶ Ö̦jö däjä Jesús a wa̦ i̦cali la̦amou ja, abinaja a cuma. —¡Fabe! Cafä nija ya cuobä wale bufi da co̦lö. Inaja a fa cunö a je̦le je̦lemou mladaliyoma. ⁴⁷ Sodado 100 bä ca̦i lä cuono wei a bada lä cuinö, ö̦jö tä bluca lä cublaliyono wei tä fa dalalönö, Yai Bada a nofi doablama. Abinaja a cuma. —Bejedi lä, ei a doblou lä mlai etä cuonomi. ⁴⁸ A shäö nö daabeje bä bluca lä co̦caono wei bä lä cuinö, ö̦jö tä fa dalalöjenö, bä balöcö shäolanö bä bufi wa̦lidiwä ca̦i sheleleo co̦olaliyoma. ⁴⁹ Jesús nofi ebä ma cui, Calilea jamö culanö bä suwä lä nocaono wei bä ma cui, ö̦jö bä bluca jäwäjäwä ca̦i fa ublajaonö, bä nö ca̦i labajami dablalou showaoma. ⁵⁰ Ö̦jamö Alimadeateli José a wa̦fa lä cule, a ca̦i cuoma. Ö̦jö Alimadeateli bä lä cui, Judea tä ulifi jamö bä bälöo mö feduoma. Ö̦jö José a lä cui, a bejedimou bufi doblaoma, a dodijama. Judio bada bä lä läono wei bä nija a coyocooma. ⁵¹ ¿Ö̦jö tawä? Jesús a lä waileno wejei däjä a waimaö bufinomi. Yai Bada tänö cama ebä nia ca̦i lä cuo wei, tä nö shi jaliwä daboma. ⁵² Ö̦jö a José lä cui, Bilado nija a fa icuicunö, Jesús a wa̦fa nomawä boma, a didiabä. ⁵³ A nomawä fa i̦tomalönö, camishi acadafu au cäcönö a ja̦loblalema. Maa maca ja a maquequema, nomawä bä maqueblaabeje, maca lä tablaleno wejei maca jamö. Nomawä ai bä maquebou balöono lä mlajei maca cuoma. ⁵⁴ ¿Ö̦jö tawä? Täbä yanöcöobä tä mö jalu nia cublou lä fenao wei tä weyade cuo waiquioma cudeenö bä shi jalimoma, tä nia lä tamou wei tä taö showadaobeje. ⁵⁵ Calilea jamö culanö, Jesús nija bä suwä lä yauono wei bä lä cuinö, José nija bä nocaa fa showadaicunö maca dalalemaje. A lä maqueono wei tä ca̦i fa dalalöjenö, ⁵⁶ bä lä bälöle jamö bä co̦a co̦layofälöma. Nomawä bä showadi jölöcaö lä cuaano wejeinaja a taamabeje, dabö dabö toubä nö lä li̦oli wei toubä tamaje. Täbä nö lä cle̦deli wei tä ca̦i coyocamaje. ⁵⁷ Ö̦jö ma cui, sábado däjä täbä yanöcöo balöoma, Moisesi tä a̦ lä cuu weinaja showawä.

¹ Ö̦jö tä fena ja, domingo tä mö jalu lä cublole däjä, suwä bä jocäblou fa fenablalonö, maa maca jamö bä aa fenalayofälöma, motoca a jaba juimaö däjä. Dabö dabö toubä nö lä li̦oli wei toubä lä tano wejei, ö̦jö toubä ca̦i. ² Maa maca jamö bä fa waloicunö, yoca lä laono wei ma bada jilulano dalalema ma cujei, ³ bä fa lucälönö maca bloque dalalemaje. A nomawä cuonomi. ⁴ Ö̦jö tä ja, bä bufi wedinajamou yaio däjä, yedu bolacabö täcöbö damolaliyoma. Täcöbö camishibö mömou shi wacalaoma. ⁵ Bä suwä fa quililalunö, mashita ajamö bä möfe deiolaliyoma. Ö̦jö däjä täcöbö lä damolaliyono wei täcöbö lä cuinö, abinaja bä nowa suwä taböma. —¿Wedi tabä nomawä bä cuobä jamö, demi bei wama a li dayäaö? ⁶ Calilea jamö wamacö ca̦i cuo showao däjä, wamacö malä yömölano wei. Tä a̦ nofi da jaduculeje. ⁷ A lä yanowamöblaleyoluno wei a lä cui, wa̦lidiwä talewä bä nija a noshi nia jo̦wa ö̦jödabomaje. ¿Ö̦jö tawä? Fii balitama defi ja a nia basuamamaje. Ö̦jö däjä bolacabö tä mö fa dödölönö, a demi nia jo̦wa jocädou co̦oma —täcöbö cuma. ⁸ Cama täcöbö a̦nö bä bufi suwä möblaliyoma. Jesús a lä cuno wei tä a̦ nofi jaducudalemaje. ⁹ Ö̦jö däjä maa maca jamö bä faa fa co̦lufälönö, Jesús 11 ebä ma cui nija, ai bä bluca ma cui nija, tä a̦ bluca wäyäö co̦ojolomaje. ¹⁰ ¿Ö̦jö tawä? Jesúsnö bä lä shömöleno wei bä nija tä a̦ lä wäyäno wejei bä lä cui, ei bä a̦fa suwä cuoma. Madalateliyoma María a cuoma, Wana a ca̦i. Santiago bä nöö e ca̦i cuoma, María a wa̦fa cuo mö lä feduono wei. Ai bä ca̦i suwä. ¹¹ Ö̦jö ma cui, tä a̦ ji̦limamou nofi fa mojoduonö, bä a̦ bejedi bufinomije. ¹² Ö̦jö ma cui, Pedro a fa jocädalunö, maa maca jamö a läläa fe yadilayofälöma, Jesús a lä maquequeno wejei jamö. Ö̦jamö a fa lodalunö, tä möö mö wädäama. Ö̦jö ma cui cama bei a möö mlai ja, camishi acadafu au bänö a lä ya̦icoloono wei bä lä cui, ö̦jö bä shino jilaa dalalema. Ö̦jö däjä a bufi wedinajamou ca̦i co̦a co̦layofälöma. ¹³ Ö̦jö tä mö jalu showawä ja, Emausi tä a̦fa shabono lä cule jamö, Jesús nija bä lä nocaono wei ai cäcöbö alayoma. Moli tä mö jalu ja täbä blajawä juu lä culenaja, tä shabono blajadawä cuoma. ¹⁴ Tä bluca lä cuaano wei tä a̦fa wayoaböfälöma. ¹⁵ Ö̦jö tä a̦fa wayoaböfälöö däjä, cama Jesús a fa ajededalunö a juu boaafälöma ma cui, ¹⁶ Yai Bada tänö a nö ö̦jöböamanomi. ¹⁷ Ö̦jö cäcöbö nija abinaja Jesús a cuma. —¿Wedi bei wafä tä a̦fa li wayoaö dodijia lä cuimadi, wafäcö jufälöbä jamö? —a cuma. Cäcöbö bufi wa̦lidiwä ca̦i fa ubladalunö, ¹⁸ Cleofa a wa̦fa lä cuono wei a wa̦ juoma. —Jelusale jamö tä da cublalui ai bä fama bluca lä bälölenö tä daö ma ayaoje däjä ma cui, ¿cafä moli wanö bei wa tä li daö bashia showaa mlaa cule? —a cuma. ¹⁹ Abinaja Jesús a cuu co̦oma. —¿Wedinaja täbä lä cuaano wei tä lä cui? —a fa cunö, abinaja cäcöbö cuma. —Nasaleteli Jesús a lä taamano wejei —cäcöbö cuma—. Yai Bada a wa̦no wäyäö nö wa̦lojaö fe balojooma. Tä nö lä quilijii tä bluca wawämaö dodijioma. ¿Ö̦jö tawä? Yai Bada tänö a nofimaö wawädooma. Yanowamö bluca bä ma cuinö a nofi ca̦i dobomaje. ²⁰ Bada bänö, Lomateli bada a nija a noshi ö̦jödadalemaje, a shämabä. Nofi bäyäalewä blowäjäwä bä ma cuinö, camiyä yamacö nija bä bada lä läle bä ma cuinö, ö̦jö nija a fa jöbäcöjenö, fii balitama defi ja a basuamaö fa bufinö a shämalemaje. ²¹ ’¿Ö̦jö tawä? —cäcöbö cuma—. Ö̦jö ma cui, ö̦jö nija yamacö mölaö fe balojooma. “Isaeli bäma ecö nija fei tä ulifi nia jo̦wa däamaö lä co̦ono wei, ö̦jö a waiquiwä”, yama a nofi tabou dodijio cublelei. ¿Ö̦jö tawä? A lä shäleno wejei bolacabö tä mö didi cublou waiquia lä cule. ²² ’Abinaja ca̦i —cäcöbö cuma—. Camiyä yamacö nija ai bä suwä lä culenö, fei däjä yamalecö bufi shädayaimomaö dodijiomaje. Maa maca jamö bä juu fa fenaonö, ²³ a jo̦wa nomawä dablanomije. Bä co̦a fa co̦bonö, a̦jele täcöbö a̦fa ca̦i wäyäö co̦ojolomaje. Suwä bä nija täcöbö jo̦wa nofi fa damolalunö, Jesús a wa̦fa jo̦wa demi jocädou taböma. ²⁴ Ai yamacö lä cui, maa maca jamö bä aa fa nomöjölöfälönö, maca bloque daa nomöjölalecölömaje, suwä bä lä cuno weinaja showawä. Ö̦jö ma cui ö̦jö bei a dablanomije —cäcöbö cuma. ²⁵ Abinaja Jesúsnö cäcöbö nowa tama. —¡Wafäcö bufi jaducuwä lä mlai! Yai Bada a wa̦no wäyälewä bänö tä a̦fa bluca wäyäö ma balöono wejei ma cui, ¡wafä tä a̦ bejedi bufii si ijejewämi! ²⁶ Yai Bada tänö a shömabä a lä yaileno wei a lä cui, a nö bleaamabeje etä cuo waiquioma. A demi jocädamaö fa co̦lonö, cama etä shi̦i lä doblaladi jamö a döcömabou nomöjöodayobä. ¿Ö̦jö tawä? —a cuma. ²⁷ Ö̦jö däjä, cäcöbö bufi jaducublobä, Yai Bada etä a̦ oni jamö cama a wa̦fa lä tamou wei tä a̦ bluca wawämafälöma. Moisesi tä a̦ wawäa fa balömalönö, Yai Bada a wa̦no wäyälewä ai täbä a̦ bluca wawäa nomöjömalema. ²⁸ Cäcöbö lä juu wei a shabono jamö bä ajedou däjä, Jesús jai a jayublobä a cuaama. ²⁹ Ö̦jö ma cui a nacaa cadidibölema. —Camiyä yafäcö nija a mia fe da jaluiquiyo. Tä weyade waiquiwä —cäcöbö cuma. Ö̦jö cudeenö, cama cäcöbö nija a cublaquema. ³⁰ Bä iyaö ca̦i loobä jamö nii a fa dälönö, Yai Bada nija a bufi a̦fa doblalou wäyämoma. Ö̦jö däjä nii a fa joyolalönö, cäcöbö dobälema. ³¹ Inaja a lä cuaale däjä, Yai Bada tänö a nö ö̦jöbömalema. A nö ö̦jöböaböö däjä, a mojodudou showalayoma. ³² Ö̦jö däjä abinaja cäcöbö nowa tayou juoma. —Bämacö juimabä jamö, cama a wa̦nö, bejedi lä bäfälecö bufi shi jalijiblamaö dodijilayoma, Yai Bada etä a̦ wawämaö lä cuaaimano wei tä a̦ ja —cäcöbö nowa tayou juoma. ³³ Ö̦jö däjä showawä cäcöbö mö yabaa fa co̦lufälönö, Jelusale jamö cäcöbö waloa co̦quema. Jesús 11 ebä lä nocaono wei bä yododabä jamö cäcöbö fa waloicunö, bä dabölalema, ai bä ca̦i lä yododano wei bä sho. ³⁴ Abinaja cäcöbö nowa taö mö baomaje. —¡Bejedi lä, Bada tä demi jocädou co̦layoma! ¡Simón Pedro nija a damolaliyoma! —cäcöbö nowa taö mö baomaje. ³⁵ Ö̦jö däjä cama cäcöbö a̦ nö ca̦i wäo mö feduoma. Emausiteli bä nijamö cäcöbö jufälöö däjä, tä lä cublaliyono wei tä a̦fa wäyäböma. Jesúsnö nii a fa joyolalönö, a nö lä ö̦jöbömaleno wei tä a̦fa ca̦i. ³⁶ Ö̦jö tä a̦fa wäyäböö showao däjä, yedu cama Jesús a fa bädaliyonö, cama bä mötale jamö a ublaa damoa bädalaliyoma. —Bä bufi da yanöcöicu —bä nowa tama. ³⁷ Ö̦jö ma cui, bä bufi shädayaimou ja, bä ca̦i quilii ja, “Bolebole a daanö”, bä bufii cuu dicooma. ³⁸ Abinaja bä nowa taö majöoma. —Bä bufi wedinajamo dijä. ¿Wedi tabä wamacö bufi li jaducubloimi? ³⁹ Wamale imicö dusi da mö. Wamale mamicö da mö. Ö̦jö ya showawä. ¿Ö̦jö tawä? Wamale da juba, ö̦jö lä. Bei ya ya̦jicö ca̦i malä cule, bei ya ubä ca̦i malä cule. Inaja bolebole bä cuwä malä mlai —bä nowa tama. ⁴⁰ Inaja a fa cunö, bei imicö mömou wawädooma, bei mamicö ca̦i. ⁴¹ Bä bufi ma doblalono wei ma cui, bä bufi ca̦i wedinajamou coyocoo showawä ja, a wa̦ bejedi bufii shalilionomije. Ö̦jö cudeenö, abinaja cama bä nija a cuma. —Ya iyabä, ¿wama tä tabou cule? —a cuma. ⁴² Yuli löbö acadafu fa jöböcöjenö, ⁴³ bä mamo showao däjä a walema. ⁴⁴ Ö̦jö däjä abinaja bä nowa ca̦i tama. —Yai Bada etä a̦ oni ja ya wa̦fa lä tamou wei tä bluca wawäblobä cätä. Moisesi tä a̦ ma cui ja, Yai Bada a wa̦no wäyälewä bä a̦ ma cui ja, amowa bä a̦ ma cui ja, ö̦jö waiquiwä. Cafä bämacö ca̦i juu showao däjä, inaja ya mada cublei —bä nowa tama. ⁴⁵ Ö̦jö däjä bä bufi jaducublamalema, Yai Bada etä a̦ ja bä bufi möblobä. ⁴⁶ Abinaja bä nowa ca̦i tama. —Tä a̦ oni malä cuu wei. Yai Bada tänö a shömabä a lä yaileno wei a nö nia bleaamamaje, a nomabä. A shäö fa cadidiojenö, bolacabö tä mö fa dödölönö a demi nia jocädou co̦oma. ¿Ö̦jö tawä? ⁴⁷ Bluca bä bälöjöwä lä yaiblai bä nija, camiyä ya wa̦ lojodenö, tä a̦ nia wäyämou blaucubloma, wa̦lidiwä tä ja bä bufi lä lädou wei, Yai Bada tänö tä nowa nia lä mladamaö wei tä a̦ lä cui. Jelusale jamö tä a̦ nia wäyämou fa balöonö, bluca bä lä bälöblai bä nija tä a̦ nia wäyämou cuaaö nomöjöoma. ⁴⁸ ’Ya showadi lä cuaano wei wamale möma cudeenö, wamale a̦fa wäyäbä wamacö waiquiwä. ⁴⁹ ¿Ö̦jö tawä? Fayänö tä a̦fa wäyäö lä balöono wei ya tä nia shömaö. Yai Bada tänö wamacö nö nia lä wa̦lojomabou wei wama tä nö dabou showalanö, eja Jelusale jamö bä cua da balöicu —bä nowa tama. ⁵⁰ Ö̦jö däjä, bä ca̦i faa fa co̦lufälönö, Bedania tä shabono ajede jamö bä lululefälöma. Bococu fa lelejeicunö, Yai Bada nija bä bayeliblamaö bufima. ⁵¹ Bä bayelimaö showale a ösöfälöma. Fedu jamö a co̦molayoma. ⁵² Cama ebä möfe bolanö a wa̦fa Bada doblao taö juomaje. Ö̦jö däjä, Jelusale jamö, bä bufi doblalolanö bä co̦a co̦layoma. ⁵³ Yai Bada etä yafi jamö bä showadi fa jublaadinö, bä bufi doblalolanö Yai Bada a nofi shino doablamaje.