San Juan

San Juan

¹ Bita a cuo showao mlao däjä, Bei Tä a̦, a wa̦fa lä jilou wei a cuo showao balöoma. Yai Bada sho cäcöbö cuo showadaoma. Ö̦jö a lä cui, Yai Bada bei a cuoma. ² Jaba däjä, Yai Bada a jaba cuo lä showaono wei däjä, Bei Tä a̦, a wa̦fa lä jilou wei a ma cui, ö̦jö a ca̦i cuo mö feduo showaoma. ³ Täbä bluca lä tablamolayono wei däjä, ö̦jö lä a wa̦nö, täbä bluca tablamolayoma. Bei Tä a̦, a wa̦fa lä jilou wei a lä cuinö, ö̦jönö täbä tano lä mlai täbä cuami waiquiwä. ⁴ Täbä lä ba̦limiblamaö wei, ö̦jö a cuoma. Ö̦jö ba̦limiblamodima tä shi̦i lä cuinö, täbä bufi nia bluca wacacamaboma. ⁵ Mö didi tä jamö ö̦jö tä shi̦i wacacawä cudio showao. Didi tänö tä shi̦i lublamaimi. ⁶ Bei. Ya̦cumö Yai Bada a wa̦no wäyämobä, a wa̦lo shömölema. Juan a wa̦fa cuoma. ⁷ Ö̦jö tä shi̦i a̦fa wäyäbä Juan a waloquema, ba̦limiblamodima tä shi̦i a̦fa yai wäyäö shaliliobä. Yanowamö täbä bluca lä cuinö tä a̦ bejedi bufibeje. ⁸ Tä shi̦i a̦fa lä wäyäno wei, cama Juan a wa̦fa wäyämamonomi. Ma, Jesús a wa̦fa yai wäyäma. Ö̦jö bei tä shi̦i a̦fa yai wäyäbä a waloquema. ⁹ Jödödöwä täbä bufi nia lä wacacamabou wei tä shi̦i bejedi lä cui, ö̦jö Jesús a li cuoma. Bita jamö a juu waiquiimama, yanowamö täbä nijamö. ¹⁰ Bei Tä a̦, a wa̦fa lä jilou wei a lä cui, bita jamö a waloqueyoluma. Cama a wa̦nö täbä bluca ma tablamolayono wei ma cui, a nö ö̦jöböanomije. ¹¹ Cama ebä cadidiwä nijamö a ma waloqueno wei ma cui ebä a̦ juonomi. ¹² Ö̦jö ma cui, a wa̦ juaö fe lä yadiono wejei bä lä cui, a wa̦ bejedi lä bufino wejei, Yai Bada ijilubö ebä cuobä, bä tablamalema. ¹³ ¿Ö̦jö tawä? Yanowamö täbä oshe tablamou lä culenaja mlai. Cama yanowamö täbä inaja taamamou fa ojodaonö mlai. Yai Bada tänö cama ebä tablamaö ojodao fa showadaonö, bä li tablamalema. ¹⁴ Awei. Ö̦jö bei tä a̦ jaba cuo lä showaono wei tä a̦ lä cui, ya̦cumö tä a̦ yanowamöblaleyoluma. A fa yanowamöblalunö, ö̦jönö yamalecö ca̦i bälöoma. Yama a doblao dalalema. Bä Ijilubö moli e cuoma yalo, bä Fö̦ö enö a doblamabou dodijioma. Bejedi lä. Täbä jödödöwä nofi showadi ojodaboma. Showadi a bejedimoma. ¹⁵ Fe ojomalewä Juan a lä cuinö, ö̦jö a wa̦fa wäyäö ja, abinaja a wa̦ i̦cali faö ja, a cuma. —Ya wa̦fa da wäyäblei, ei a waiquiwä. Abinaja bämacö nowa da tablei. “Camiyä ya nodi jamö, a juu lä jäimi, ö̦jö a shino Bada. Camiyä ya cuo mlao däjä, a cuo showao balöoma yalo, ö̦jö ya wa̦fa Bada wäyäö lä cule”, bämacö nowa da tablei —Juan a cuma. ¹⁶ Ö̦jö a nia juu lä juono wei a lä cuinö, täbä nofi showadi ojodabou yalo, showadi a bejedimou yalo, ö̦jö nija bämacö shino bayeliblamou. Showadi bämalecö nia shino bayelibladii. ¹⁷ Yai Bada tänö tä tamaö lä bufii wei, Moisesi nija tä a̦ ma jöbäqueno wei ma cui, täbä nofi nia yai lä ojodabou wei tä lä cui, Jesucristo nija ö̦jö tä shino yai wawälayoma, tä a̦ yai lä bejedii tä a̦ ca̦i. ¹⁸ Yanowamö bämacö nija Yai Bada tä dablamoimi. Tä dablamou ma mlai ma cui, bä Ijilubö moli e lä cuinö, bä Fö̦ö e nija a lä ajedelenö, ö̦jönö tä damalalema. ¹⁹ Fe ojomalewä Juan a lä cui, a wa̦liije däjä, a wa̦ nö wäo shalilioma. Jelusale jamö nofi bäyäalewä ai bä lä cuono wei, Lewi nodiwä ai bä cuo mö lä feduono wei sho, Juan nijamö judio bänö ö̦jö bä shömölemaje. Abinaja Juan nija bä cuyoluma. —Ei wa lä cuaale, ¿wedi cafä bei wa? —bä cuma. ²⁰ A wa̦ juo quilii mlai ja, Juan a wa̦ nö wäo shalilio showadaoma. —Yai Bada tänö a shömabä a lä yaileno wei a lä cui, ö̦jö yami —a cuma. ²¹ A wa̦lii co̦oje ja, abinaja bä cuma. —Ja̦o. ¿Wedi bei wa dodijiwä, ö̦jö lä? Elia a lä cuono wei, ¿ö̦jö wa tawä? —bä cuma. —Ma. Ö̦jö ya ca̦imi —Juan a cuma. —Yai Bada a wa̦no wäyälewä a nia jo̦wa lä waloono wei, ¿ö̦jö bei wa? —bä cuu nomöjöoma. —Ma —a cuma. ²² Ö̦jö däjä, abinaja a nowa tamaje. —Ja̦o. ¿Wedi bei wa, ö̦jö lä? Yamalecö lä shömöleno wejei bä nija, ¿wedinaja yama tä a̦ wäaö cuojolobä? Cafä ¿wedi bei wa wa̦fa jilou? ²³ Ö̦jö däjä, abinaja Juan a cuma. —Yai Bada a wa̦no wäyälewä Isaia a lä cuinö wale a̦fa wäyäö lä balöono wei, ö̦jö ya. Ulifi bloque jamö a wa̦ nia jo̦wa lä lojodoano wei, ei ö̦jö lä ya wa̦. Abinaja ya nia jo̦wa lä cuno wei. “¡Bada tä juu lä cuimi! A nia lä juu wei jamö, e yo shaliliblamaö da balöloje.” Einaja ya nia jo̦wa lä cuno wei ya wa̦ —Juan a cuma. ²⁴ ¿Ö̦jö tawä? Faliseo bä bada nija ö̦jö bä shömamoma. ²⁵ A wa̦lii co̦oje ja, abinaja bä cuma. —Yai Bada tänö a shömabä a lä yaileno wei a lä cui, ö̦jö wami ja, Elia wa ca̦imi ja, Yai Bada a wa̦no wäyälewä wa ca̦imi ja, ¿wedi tä tabä bei wa täbä fe li ojomaö, ö̦jö lä? —bä cuma. ²⁶ Abinaja Juan e cuma. —Camiyänö ya bä fe ojoblaö däjä, mau u ja ya bä jödödöblamaö. Ö̦jö ma cui, cafä wamacö nijamö wama a nö ö̦jöböaö lä mlale a coyocoa, ²⁷ camiyä ya no jamö, a nia jo̦wa lä juno wei. Ö̦jö a shino yai doblaa ayaa cudeenö, ya bayeliblaö bädaobä tä ma cui ja, ya nö quilibö wei. Bei mamicö lä didio wei etäcö nata bädawä ma cui, ya etäcö nö cushaö quilibö wei —a Juan cuma. ²⁸ ¿Ö̦jö tawä? Jodana ai u mashi jamö, täbä fe lä ojomaö wei jamö, Juan a wa̦limaje, Bedania tä a̦fa ulifi lä cule jamö. ²⁹ Ö̦jö tä fena ja, Jesús a juu fa dalalönö, Juan a wa̦ fama. —¡Ei, ei! Quiji a lä cui, Yai Bada tänö a shömölema. Oweja a wa̦fa ocalo lä jilamou wei a. Bita jamö täbä lä bälöblai täbä nowa wa̦lidiwä mladamabä, a nia lä shämou wei, ö̦jö lä a. ³⁰ Ya wa̦fa da wäyäblei, ö̦jö a waiquiwä. Abinaja ya da cublei. “Camiyä ya nodi jamö a juu lä jäimi, ö̦jö a shino Bada. Camiyä ya cuo mlao däjä a cuo showao balöoma yalo, ö̦jö ya wa̦fa Bada wäyäö lä cule”, ya da cublei. ³¹ Camiyänö ma cui ya nö ö̦jöböanomi —Juan a cuma—. Ö̦jö ma cui, Isaeli nodiwä bä nija a dablamou wawädoobä, mau u ja, ya bä fe ojomaö mö juma —a cuma. ³² A wa̦fa wäyäö showawä ja, abinaja Juan a cuma. —Fedu jamö, jai joledo a cuwä, Yai Bada ya Bufi itou dalalema. Jesús nija a Bufi yanöcöquema. ³³ ¿Ö̦jö tawä? Camiyänö ya nö ö̦jöböano ma mlai ma cui, mau u ja ya bä fe ojomabä wale lä shömöleno wei a lä cuinö wale yömölama. Abinaja a cuma. “Wale Bufi nö nia itou lä daaö wei, ya Bufi lä yanöcöo wei nija, ö̦jö a lä cuinö, camiyä ya Bufinö täbä lä jödödöblamaö wei, ö̦jö bei a”, a cuma. ³⁴ ¿Ö̦jö tawä? Ö̦jö ya dalalema. Ya fa dalalönö, Yai Bada bei ya e a̦fa Ijilubö wäyäö malä cui. Ö̦jö a waiquiwä —Juan a cuma. ³⁵ Ö̦jö tä fena ja, Juan a lä ublaono wei jamö, cama ai ecöbö lä nocamabono wei ecöbä ublao fa yädäonö, ³⁶ Jesús a jayuama. A jayuaö fa dalalönö, abinaja cäcöbö nowa tama. —¡Ei, ei! Quiji a lä cui, Yai Bada tänö a shömölema. Oweja a wa̦fa ocalo lä jilamou wei a —cäcobö nowa tama. ³⁷ Cäcöbö lä nocamabono wei cäcöbö lä cuinö, Juan a wa̦ fa ji̦libölänö, Jesús nija cäcöbö yaua nomöjölayoma. ³⁸ Jesús a mö fa yabadalunö cäcöbö yaua dalalema. Cäcöbö wa̦lii ja, abinaja a cuma. —¿Wedi bei wafä tä dayäö cule? —a cuma. —Tä a̦ wäyäle —cäcöbö cuma—. ¿Wedi bä nija bei wa li bälöblaa cule? ³⁹ Cäcöbö nacaa showalema. —Jabo. Ya lä cule jamö, wafä tä möbä —a cuma. Motoca a yajadou waiquioma. Cäcöbö nocaa fa showadalofälönö, a lä cuono wei tä yafi dabölalema. Ö̦ja cäcöbö fe weyalayoma. ⁴⁰ Juan a wa̦ fa ji̦libölänö, Jesús nija cäcöbö lä yauono wei ai a lä cui, Andrés a wa̦fa cuoma, Simón Pedro bä fääshä e lä cui. ⁴¹ Ö̦jö a lä cuinö, bä a̦iyobö Simón a fa dayäblalönö a yömölalema. —Yai Bada tänö a shömabä a lä yaileno wei, yama a dalalei culoi, Cristo a wa̦fa lä jilabou wejei —a cuma. ⁴² Ö̦jö däjä, Jesús nija Simón a ca̦i juma. Ö̦jö nija Jesús a mamo fa showaicunö, a wa̦ ca̦i fama. —Jonasi bä ijilubö Simón wa e. ¿Ö̦jö tawä? Sefa wa wa̦fa ca̦i nia yädäo —a cuma. ¿Ö̦jö tawä? “Sefa”, a lä cudaliyono wei, “Pedro”, a yai cuma. ⁴³ Ö̦jö tä fena ja, Calilea jamö Jesús a bufi cadidioma. Felipe a fa dalalönö, a nacalema. —Jabo. Camiyä nija a da yauiquiyo —e cuma. ⁴⁴ Felipe a lä cui, Besaidateli a cuoma. Andrés a ma cui, Pedro a ma cui, ö̦jöteli bä bluca cuoma. ⁴⁵ Felipe a lä cuino, Nataniel a fa dayäblalönö, abinaja e cuma. —Moisesi etä a̦ oni jamö a wa̦fa wäyämou lä balöono wei, yama a dalalei culoi. Yai Bada a wa̦no wäyälewä bä ma cuinö, a wa̦fa ca̦i onibomaje. Nasaleteli Jesús, ö̦jö a waiquiwä, José bä ijilubö e lä cui —e cuma. ⁴⁶ Abinaja Nataniel e cuma. —Nasaleteli bä nijamö, ¿tä nö bayeli cublou yai tawä? —e cuma. Felipe abinaja e cuma. —Ja̦o. Jabo, ö̦jö lä. Wa möblabä. ⁴⁷ Jesúsinö Nataniel a waloo fa dalalönö, abinaja a cuma. —Fei a lä waloole, Isaeli nodiwä cä a yai. A jolemou daomi —a cuma. ⁴⁸ Nataniel abinaja e cudaliyoma. —Ja̦o. ¿Wedi tänö bei wale li daö cule? Abinaja Jesús a cuma. —Felipenö wa nacaö showao mlao däjä, ico fi cotä jamö wa da lole bäfä dalalema —a cuma. ⁴⁹ Nataniel abinaja e cuma. —Tä a̦ wäyäle. Cafä Yai Bada wa e Ijilubö waiquiwä. Isaeli bäma ecö nija wa Bada nia lä läo wei, ¡ö̦jö wa dodijiwä! ⁵⁰ Abinaja Jesús a cuma. —“Ico fi cotä jamö bäfä dalalema”, ya cuu ja, ö̦jö tä wai bädawä ma cuinö, ¿wale a̦ nia bejedi bufii tawä? Tä yai lä lojode wei, wa tä nia bluca dablaö —a cuma. ⁵¹ Abinaja Jesús a cuma. —Cafä wamacö nija ei ya wa̦ lä cui, bejedi lä ya wa̦. Judu wama mösö cacablou fa dalalönö, camiyä ya lä yanowamöblaleyoluno wei ya nija, Yai Bada wama etäbä a̦jele nia juu dablaö. ¿Ö̦jö tawä? Wama bä nia itou dablaö, wama bä nia ca̦i duo dablaö —a cuma.

¹ Bolacabö tä mö didi fa cublalunö, Calilea tä ulifi jamö, Canaateli bä co̦camolayoma. Cäcöbö lä doayou wei cäcöbö nofi co̦camoabeje jamö, Jesús bä nöö e ca̦i loo coyocooma. ² Jesús a ma cui, cama ebä lä nocamabono wei bä ma cui, ö̦jö bä bluca nacalemaje, cäcöbö nofi co̦camoabeje. ³ Bä co̦camobä jamö, nashiwä toubä waicoma cudeenö, Jesús nija abinaja bä nöö e cuma. —Nashiwä e toubä jo̦wa waicoma tai —e cuma. ⁴ Abinaja Jesúsnö bä nöö e nowa tama. —Nabe. Cafänö wale shömabä wami. Ya tä taö mö lä juno wei, ya tä taö showadaobä tämi —a nowa tama. ⁵ Ö̦jö däjä, cama e yafi lä cuono wei a wa̦ juamobä ebä lä cui, Jesús bä nöö enö bä yömölama. —Ijiluyänö wamacö nowa taö ja, wama a wa̦ nia juaö —a cuma. ⁶ Bei. Jai oshoboli bä bada cuwä, 6 täbä bada i̦tao ajedeoma, maa mabä ja bä lä tablaleno wejei bä bada. Judio bä showadi aumamou lä cuaaö weinaja bä aumamou cuaabä, ö̦jö ubä li cuoma, Moisesinö bä taamaö lä bufino weinaja showawä. ⁷ Bada a wa̦ juamobä ebä nija abinaja Jesús a cuma. —Fei bä bada lä i̦tatale bä jamö, mau ubä fe da lajoaboduje —a cuma. A wa̦ juaö fa showadalöjenö, ubä casö malöcöabodayomaje. ⁸ Ö̦jö däjä, bä iyabä jamö a bada lä loono wei a nija, ubä wabamaö bufima. Abinaja Jesúsnö bä nowa tama. —Bei. Fei däjä wama ubä fa jiquelönö, bada a nija ubä da jöbäcuduje —bä nowa tama. Inaja bä nowa tama yalo, ubä fa jiquelöjenö, e ubä ca̦i icuquemaje. ⁹ Ö̦jö däjä, bä iyabä jamö a bada lä loono wei a lä cuinö, nashiwä toubä cublou lä nomöjölayono wei toubä wabama. Mau ubä ja toubä lä tablamolayono wei tä ja, a mojoduoma. ¿Ö̦jö tawä? Toubä lä jiqueleno wejei bänö, ubä shino daö ayaomaje. Ö̦jö däjä bada a lä cuinö toubä fa wabanö, a bufi shi jalimolayoma. A suwäbö nia lä däono wei a fiya nacaamaö showadao bufima. ¹⁰ Abinaja a shi jalimolanö, a cuma. —¡Ei toubä shino yai coamamou dodijidawä! Ai täbä lä cuaaö weinaja mlai, cafä wa shino yai dodijaö. Ai täbä lä cuinö, nashiwä dodijidawä toubä coablamaö fa balöojenö, täbä bädöa waiquilaliyono wei ja, ö̦jö däjä wa̦lidiwä toubä li wawäblamaö majöo dicooje. Ö̦jö ma cui, cafänö wa toubä wawäblamaö lä majöle, toubä shino yai dodijidawä fe balojowä —a cuma. ¹¹ Inaja Jesús a cuaaö ja, tä nö lä quilijii tä jaba wawäblamalema, Yai Bada e nö ö̦jöböamobä. Inaja a doblao damoa fa culalunö, cama ebä lä nocamabono wei bä lä cuinö a wa̦ bejedi bufilemaje. Calilea tä ulifi jamö a cuo däjä, inaja a cuaama, Canaateli bä nijamö. ¹² Ö̦jö tä cublou waiquilayono wei ja, Cabenaoteli bä shabonobö jamö, Jesúsnö cama ebä ca̦i cua nomöjölayofälöma. Bä nöö e cuoma, bä fääshä ebä ca̦i, cama ebä lä nocamabono wei ebä ca̦i. Ö̦jamö bä fe weyablaliyoma. ¹³ Judio bänö Yai Bada a waiteli lä jayuano wei a nofi co̦camoaö co̦obeje, tä cublou ajedeoma. Ö̦jö cudeenö Jelusale jamö Jesús a ayoma. ¹⁴ Yai Bada etä yafi je̦fa jamö a fa falönö, blada bä ja yalo bä lä jöbäö wejei bä dalalema. Baca bä tabomaje, oweja bä ca̦i, joledo bä ca̦i. Blada bä lä nomöjöano wejei bä ca̦i läa dalalema. ¹⁵ Ö̦jö däjä, tocuta bä fa däalalönö, bä si yoabä täcö fa diyäblalönö, bä bluca yashuaquema. Oweja ebä sho, baca ebä sho, Yai Bada etä yafi je̦fa jamö bä lä cuono wei bä bluca yashuaquema. Blada bä lä nomöjöano wejei bä ma cui, bä bladabö ca̦i liyäyaö cuaama. Bä bladabö lä maquecono wei, täbä ca̦i jocäabodayoma. ¹⁶ Joledo bä lä nomöjöano wejei bä lä cui, abinaja bä nowa ca̦i tama. —Fei bä ca̦i da blajalöje. Fayä e yafi lä cui, yalo bä lulamobä e yafi tablama dijejä —bä nowa tama. ¹⁷ Ö̦jö däjä, cama ebä lä nocamabono wei ebä lä cui, tä a̦ oni cuo lä balöono wei tä a̦ ja bä bufi möblaliyoma. Abinaja tä a̦ oni cuu. Afä ya tä yafi nofi lä jalubou wei tänö, ya bufi nia wajäblou jödödöo. Einaja tä a̦ oni cuu. ¹⁸ Inaja Jesús a cuaaö yalo, judio bänö a wa̦limaje. —¿Wedi a wa̦nö, wa li inaja cuaaö bashio? Tä nö lä quilijii tä da wawämalö, Yai Bada wa e nö ö̦jöböamobä. “Ö̦jö lä a wa̦nö waiquiwä”, yamacö cubä —bä cuma. ¹⁹ Abinaja Jesús e cuma. —Ja̦o. Ei a yafi da wa̦lialöje, ö̦jö lä. Bolacabö tä mö didi fa cublalunö, ya yafi i̦tamaö co̦o wä —a cuma. ²⁰ Ö̦jö däjä, abinaja judio bä cuu nomöjöoma. —Ei Yai Bada etä yafi i̦tamaöje däjä, lasha 46 a lalomalema ma cujei, bolacabö wa tä mö didi fa tablamalönö, ¿wa yafi nia i̦tamaö co̦o showadao daanö? —bä cuma. ²¹ Ö̦jö ma cui, Yai Bada etä a̦fa yafi wäyäö lä yacläono wei, cama a wa̦fa yai wäyämamoma. Yai Bada a tabou yalo, cama a yafibö a̦fa taoma. ²² ¿Ö̦jö tawä? Jesús a fa nomalönö, a demi jocädou lä co̦layono wei däjä, cama ebä lä nocamabono wei ebä bufi jaducublaliyoma. Yai Bada tä yafibö a̦fa lä tamono wei tä nofi fa jaducubojenö, Yai Bada etä a̦ bejedi bufilemaje. Jesús a wa̦ bejedi ca̦i bufia showalemaje. ²³ Jelusale jamö, Yai Bada a waiteli lä jayuano wei a nofi co̦camoaö co̦oje däjä, Jesús a cuoma. Ö̦jamö lä a culanö, Yai Bada e nö ö̦jöböamobä, tä nö lä quilijii tä bluca wawämalema. Ö̦jö tä dalalemaje yalo, bluca bänö a wa̦ bejedi bufilemaje. ²⁴ Ö̦jö ma cui, ö̦jö bä nija Jesús a mölanomi. ²⁵ Bä bluca daö waiquioma yalo, a mölanomi. Cama nija yanowamö täbä a̦fa wäyäbeje, tä cuono malä mlai. Cama a showawänö, bä jödödöwä daö malä showadaono wei.

¹ Faliseo ai a wa̦fa Nicodemo lä cuono wei, judio bada a cuoma. ² Ö̦jö a lä cui, didi däjä Jesús nija a icua fe fa jaluicunö, abinaja e cuma. —Tä a̦ wäyäle. Yamalecö yömölayolubä, Yai Bada tänö wa shömölema. Ö̦jö yama tä daö. Ö̦jö wa e nö ö̦jöböamobä, tä nö lä quilijii bluca wa tä wawämaö. Yai Bada tänö wa ca̦i cuo mlao fa cunoja, inaja wa nö cuaabö mlai —e cuma. ³ Abinaja Jesús e cuma. —Cafä nija ei ya wa̦ lä cui, bejedi lä ya wa̦. A tablamou co̦o lä mlai a lä cuinö, Yai Bada tänö cama ebä nia ca̦i lä cuo wei tä nia dablaimi —e cuma. ⁴ Abinaja Nicodemo e cuma. —Yanowamö täbä badao waiquio däjä, ¿wedinaja bä tablamou li cuo co̦obä? Bä tablamou co̦obä, bä nöö bä nija bä didio co̦obä tä cua malä mlai —e cuma. ⁵ Abinaja Jesús e cuma. —Cafä nija ei ya wa̦ lä cui, bejedi lä ya wa̦. Mau u ma cuinö, Yai Bada tä Bufi ma cuinö, ö̦jö tänö a tablamou co̦o lä mlai a lä cui, Yai Bada tänö cama ebä ca̦i cuobä jamö a cuo daomi. ⁶ ¿Ö̦jö tawä? Yanowamö täbä nija bä lä tablamou wei, yanowamö täbä ijilubö. Yai Bada tä Bufinö bä tablamou lä co̦o wei bä lä cui, ö̦jö Yai Bada bei ijilubö ebä li. ⁷ ¿Ö̦jö tawä? “Wamacö tablamou co̦obä lä”, bäfä nowa lä tafe tä ja, a bufi mla dijä. ⁸ Wadoli wa malä dale. A wadoli juu bufiobä jamö, a nia juimaö. A jayuabä jamö, wa wa̦ ji̦liaö bäa ma cule, wa nia dablaimi. “Ö̦jamö lä a cuoma a jayuquei lä cufe”, wa nofi nia ca̦i taboimi. A nia juu lä nomöjöo wei jamö ma cui, wa tä nia ca̦i daimi. Wa tä daö ma mlai ma cui, a malä cuaaö wei. Inaja showawä, Yai Bada tä Bufinö bä tablamaö lä co̦o wei, wa tä dablaö ma mlai ma cui, a cuaaö lä —Jesús e cuma. ⁹ Nicodemo abinaja e cuma. —¿Wedinaja täbä li fa taamamonö, täbä nia li tablamamou co̦o? —e cuma. ¹⁰ Abinaja Jesús e cuma. —Cafänö, Isaeli nodiwä wa ebä yömölabä wa ma cui, ¿wa tä li daimi tawä? ¹¹ Cafä nija ei ya wa̦ lä cui, bejedi lä ya wa̦. Yama tä lä daö wei yama tä a̦fa wäyäö. Yama tä lä möno wei yama tä a̦fa taö. Ö̦jö ma cui, yama tä a̦fa lä taö wei, wama tä a̦ bufiboimi dicowä. ¹² Eja täbä lä cuaaö wei tä ja, bämacö yömölaö ma cule, wamale a̦ bejedi bufiimi waiquiwä. Fedu jamö wama tä möö lä mlai tä ja bämacö yömölaö ja, bei wamale a̦ bejedi bufiimi yaiquei —Jesús a cuma. ¹³ Abinaja e cuu co̦oma. —Fedu jamö a yanowamö lä ösölayono wei a cuami, wama a wa̦ ji̦liabä. Ö̦jamö lä ya cuoma ya lä itolayono wei ya lä cuinö ya tä shino li daö, ya lä yanowamöblaleyoluno wei ya lä cuinö. ¹⁴ ¿Ö̦jö tawä? Ulifi bloque a jamö, Moisesinö olu cäcö nö ijidubö befi ca̦i lä i̦taqueno weinaja, inaja showawä camiyä ya lä yanowamöblaleyoluno wei, ya befi ca̦i i̦tao cuobä ya. ¹⁵ Camiyä wale a̦ bejedi lä bufii wejei bä bluca lä cui, bä ba̦limi cuobä. ¹⁶ ’Yai Bada tänö yanowamö täbä nofimaö fa dodijionö, bä Ijilubö moli ya e lä cui yale shömölema. Wale a̦ bejedi lä bufii wejei bä bluca lä cui, bä nomaö mlai ja bä ba̦limi cuobä. ¹⁷ Yai Bada tänö bita jamö bä Ijilubö wale lä shömöleno wei ya lä cui, yanowamö ya täbä nö bleaamabä wale shömano malä mlai. Ya täbä yai jucäabä wale shömölema. ¹⁸ ’Wale a̦ bejedi lä bufii wejei bä lä cui, Yai Bada tänö ö̦jö bä nö bleaamabä bämi —a cuma—. Wale a̦ bejedi bufii lä mlajei bä lä cui, ö̦jö bä nö bleaamabä cäbä. Yai Bada bei Ijilubö moli ya e lä cui, wale a̦ bejedi bufiimije yalo, bä nö bleaamabä bä li waiquiwä. ¹⁹ ’Yanowamö täbä bufi wacacamabobä, bita jamö Yai Bada etä shi̦i ma waloole ma cui, etä shi̦i bufiimije. Mö didi tä shino yai bufiije, ¿ö̦jö tawä? Bä dobloimi waiquiwä cudeenö bä jo̦yao bufi doblao. Inaja bä cuaaö cudeenö bä nö nia bleaamaö. ²⁰ Wa̦lidiwä talewä bä bluca lä cuinö, Yai Bada etä shi̦i nofi wa̦libouje. Bä lä cuaaö wei bä dablamou bufiomi yalo, tä wacacaobä jamö ö̦jö bä juimi. ²¹ Ö̦jö ma cui, bä lä bejedimou wei bä lä cui, tä wacacaobä jamö ö̦jö bä shino yai icuo, Yai Bada etä a̦ lä juaö wejei wawädowä bä dablamobä —Jesús a cuma. ²² Ö̦jö tä cublou waiquilayono wei ja, Judea tä ulifi jamö Jesúsnö cama ebä lä nocamabono wei bä ca̦i juma. Ö̦jamö lä bä ca̦i fa yanöcöblaicunö, täbä fe ojomamama. ²³ Bä fe lä ojomano wei a Juan lä cuinö, Enono jamö ai bä fe ca̦i ojomaö mö feduo showama, Salimiteli bä shabonobö ajede ja. Ö̦jamö mau bluca ubä ajedeoma yalo, Juan nija bä fa icuicunö, bä fe ojomamoma. ²⁴ Bä doblou lä mlai bä fe laobä jamö, Juan a fe lao showaono malä mlai. ²⁵ Bei. Yai Bada nija bä dodijidawä dablamobä, judio bä showadi lä aumamou wei tä a̦fa wayoaöje ja, Juannö bä lä nocamabono wei bä sho, judio ai a sho, bä a̦ bluca lämoma. ²⁶ Ö̦jö däjä, Juan nija bä fa junö, abinaja bä cuma. —Tä a̦ wäyäle. Jodana ai u mashi jamö, cafä nijamö a lä icuono wei a lä cui, wa wa̦fa wäyäö da balöoblei a lä cui, fei däjä quiji a cua co̦a lä cule. Täbä fe ojomaö dicoo. ¿Ö̦jö tawä? Ö̦jö nija bä bluca juu bashia majöa lä cule —bä cuma. ²⁷ Juan abinaja a cuu mö feduoma. —Ö̦jö a nö bada ö̦jöböaöje ja, ö̦jö Yai Bada tä mayo waiquiwä. Yai Bada tänö yanowamö täbä nofi bada tamaboimi ja, bä nofi nia taboimi bädaoje. ²⁸ Cafä wamacönö wamale a̦ malä ji̦lileno wei. “Yai Bada tänö a shömabä a lä yaileno wei a lä cui, ö̦jö yami”, ya mada cublei. Ö̦jö a balö jamö Yai Bada tänö yale shömöa balölema. ²⁹ ’¿Ö̦jö tawä? —Juan a cuma—. Wa̦lonö suwä a däaö ja, cama e li suwä. Ö̦jö a wa̦ ja, cama e nofi lä cui, e bufi nia doblalou mö feduo. Inaja showawä, ö̦jö a nö Bada ö̦jöböaöje ja, fei däjä ya bufi shino yai doblalou. ³⁰ Cama a nö Bada lä ö̦jöböamou wei, ö̦jö tä shino yai balafälöbä. Camiyä nija bä bufi cuo lä balöono wei, ö̦jö tä shino mlaaö majöofälöbä —a cuma. ³¹ Bä fe lä ojomano wei a Juan lä cui, abinaja a cuma. —Fedu jamö a cuoma a lä itolayono wei a lä cui, ö̦jö a shino Bada ayawä. Bita jamö camiyä sho bämacö li lä bälöle, ö̦jö ya. Bita jamö täbä lä cuaaö wei, camiyänö ö̦jö ya tä a̦fa shino wayoaö. ¿Ö̦jö tawä? Fedu jamö a lä cuono wei a lä cui, ö̦jö a shino Bada ayawä. ³² ’Tä lä mödayono wei, tä a̦ ca̦i lä ji̦liledayono wei, ö̦jö tä a̦fa bluca wäyäö ma cui, a wa̦ bejedi bufiimije. ³³ A wa̦ nofi yai mölabou fe lä yadio wejei bä lä cuinö, Yai Bada a wa̦fa ca̦i bejedi taöje. ³⁴ ¿Ö̦jö tawä? Yai Bada tänö a lä shömöleno wei a lä cui, ö̦jönö cama a wa̦no wäyäö. Yai Bada tänö a fa dobälönö, bei a Bufinö a malä jödödöbole. ³⁵ Bämacö lä Fö̦ömole a lä cuinö, showadi bä Ijilubö e yai nofimaö. Jödödöwä täbä lojodobobä, a Bada tablamalema. ³⁶ Ö̦jö bä Ijilubö e a̦ bejedi lä bufii wejei bä lä cui, ba̦limi bä cuobä bä li. Ö̦jö ma cui, bä Ijilubö e a̦ juaö lä mlajei bä lä cui, ö̦jö bä nia ba̦limi cuomi. Yai Bada tä nö wa̦lowä lä jushudou wei tänö bä nö bleaabä ö̦jö bä li.

¹ Fe ojomalewä Juan a lä cuinö, cama ebä lä nocamabono wei bä fe bluca ojomama. Bada tä Jesús ma cui, inaja cama a ca̦i cuaaö mö feduo showaoma. ¿Ö̦jö tawä? Jesús ebä shino yai lä blucaono wei, faliseo bä bada lä cuinö tä a̦ fa ji̦liläjenö, bä a̦ wayoma. Ö̦jö däjä, Jesúsnö bä wa̦no fa ji̦lilänö, ² - ³ ö̦jamö, Judea tä ulifi lä cui jamö, a bälöo bufionomi. Calilea jamö a juu co̦obä, a aa co̦layofälöma. ¿Ö̦jö tawä? Ö̦jö ma cui, Jesús a cadidiwänö täbä fe ojomanomi. Cama ebä lä nocamabono wei bä nija täbä fe li ojomamoma. ⁴ Bei. Calilea jamö Jesús a lä co̦imadi däjä, Samalia tä ulifi jamö a jayuquefälöma. ⁵ A jayuaö showale, Sicalateli bä shabonobö jamö a co̦blaliyoma. Bä ijilubö José e nija, Jacobo a bada lä cuono wei anö, etäca ficali lä jöbäqueno wei täca ajede jamö, bä shabonobö blaoma. ⁶ Ö̦jamö lä, Jacobonö uca yedu ja lä diyäno wei, uca cuo showaoma. ¿Ö̦jö tawä? Motoca a yo̦loloblodayou däjä, Jesús a wa̦shimi jolou ja, ö̦jö uca casö jamö a loofälöma. ⁷ Samaliateliyoma ai anö mau u jiquei ja a fa juimanö, Jesús e a̦ fama. —Ai u da jiquebayo —e cuma. ⁸ ¿Ö̦jö tawä? Jesúsnö bä lä nocamabono wei bä cuonomi. Sicalateli bä nijamö, nii bä luluabeje bä ayoma yalo, Jesús a yami loo juoma. ⁹ Abinaja Samaliateliyoma e cuma. —Cafä judio wa ma cui, Samaliateliyoma ya nija, ¿mau bei wa u li nacaö cule? —e cuma. ¿Ö̦jö tawä? Judio bänö Samaliateli bä möö ojodaono malä mlajei. ¹⁰ Jesús e a̦ juo ja, abinaja e cuma. —Yai Bada tänö tä lä jöbäaö wei wa tä daö fa cunoja, cafä nija mau ya u lä nacafe wale nö ca̦i ö̦jöböaö fa cunoja, camiyä nija wa nö yai nacobö wei. Cafä nija ba̦limiblamamodima ya u nö jöbäquebö wei —e cuma. ¹¹ Abinaja suwä e cuma. —U blajaa a lä cubocöli. Wa u jiqueabä wa tä ca̦i taboimi. ¿Ö̦jö tawä? ¿Wedi jamö ö̦jö ba̦limiblamamodima wa u nia li däaö? ¹² Ei uca lä cui, Jacobonö yedu ja uca li diyäma. Cama nodiwä yama ecönö yama uca nofi tabou showaa. Cama a ma cui, bä ijilubö ebä ma cui, yalo ebä ca̦i bluca ma cui, ei u ja bä amishi bluca co̦oma. Inaja cama a jaba ma cuaano wei ma cui, ¿cafä wa wa̦fa nia shino lojode wäyämamou ayao daanö? —e cuma. ¹³ Abinaja Jesúsnö a nowa suwä tama. —Ei u ja, bä amishi lä co̦o wei bä lä cui, bä nia amishi mladou ma mlai ma cui, ¹⁴ camiyänö ya u lä jöbäaö wei u co̦aöje ja, bä amishaö co̦daaö mlaicätä. Ubä fe lä jojoblai jamö ubä fadii shi wa̦lii lä cuaaö weinaja, ba̦limiblamodima ya u nia lä jöbäaö wei, inaja u fa cuaadinö, ba̦limi bä nia cuo shi wa̦lii —a nowa tama. ¹⁵ Abinaja suwä e cuma. —Ja̦o. Ö̦jö u da jöbäbayo, ya amishaö co̦daaö mlaobä. Äyämö ya u jiquei mö juu co̦o mlaobä —e cuma. ¹⁶ Jesús abinaja e cuma. —Bei. Fe̦yalofä a da nacajalu, äyämö wa ca̦i juu co̦ima —e cuma. ¹⁷ —Ya fe̦yalobö cuami —a suwä cuma. —Bejedi lä wa wa̦ —Jesús a cuma—. Fe̦yalofä a cuami lä. ¹⁸ Afä wa̦lo 5 wa bä ma tabono wei ma cui, fei däjä wa lä tabole a lä cui, afä a malä mlai. Miji wa tä a̦ lä tafe tä a̦ ja, wa bejedimou —a cuma. ¹⁹ Abinaja suwä e cuma. —Fei däjä bäfä nö ö̦jöböaö. Yai Bada a wa̦no wäyälewä wa —e cuma. ²⁰ Ö̦jö däjä, abinaja a cuma. —Camiyä yamacö bada lä cuono wei bä lä cuinö, ei macö jamö Yai Bada nija showadi bä möfe bolanö, a wa̦fa Bada doblao tablaama ma cujei, abinaja judio wamacö shino cuu dicoo. “¡Jelusale jamö yai! Ö̦jamö täbä möfe bolanö, a wa̦fa Bada nia shino doblao taöje”, wamacö shino cafä cudii —a suwä cuma. ²¹ Abinaja Jesúsnö a nowa tama. —Ei ya wa̦ lä cui tä a̦ nia bejedi wawäblou. Fayä nija bä möfe bolanö, a wa̦fa Bada doblao tabeje, fei macö nia yaiomi. “Jelusale jamö shino”, bä nia ca̦i cuimi. ²² Cafä Samaliateli wamacö lä cuinö, Yai Bada nija wamacö möfe bolanö, wama a wa̦fa Bada doblao ma taö wei ma cui, wama a yai daimi. Judio yamacönö yama a yai dalanö, yamacö möfe bolanö, yama a wa̦fa Bada doblao taö. Yanowamö täbä nia lä jucäamou wei, judio yamacö nija tä wawäblobä tä malä cui. ²³ ’Ö̦jö ma cui, abinaja tä nia shino cuo. Tä wawäblou waiquia lä cule. Bä möfe bolanö, Fayä a wa̦fa Bada doblao lä taö wejei bä lä cui, bei bä bufi yainö bä a̦ nia faö. Bä bejedimolanö bä möfe nia bou. ¿Ö̦jö tawä? Inaja bä lä cuaaö wei, Fayänö bä malä bufii wei. ²⁴ Yai Bada a lä cui, yai bei cätä. ¿Ö̦jö tawä? Ö̦jö nija bä möfe lä bou wei bä lä cui, bei bä bufi yainö, a wa̦fa nia Bada doblao taöje. Bä bejedimolanö, bä a̦ nia faö —Jesúsnö a nowa tama. ²⁵ Abinaja suwä e cuma. —Yai Bada tänö a shömabä a lä yaileno wei a lä cui, ö̦jö a nia juu, Cristo a wa̦fa lä jilamou wei a lä cui. Ö̦jö ya bufibou. Ö̦jö a waloqueyoluno wei ja, jödödöwä tä ja, yamalecö nia yai yömölaö, ö̦jönö —e cuma. ²⁶ Ö̦jö däjä, abinaja Jesús e cuma. —Bäfäcö a̦ lä wayole, ö̦jö ei lä ya waiquiwä, ya cua shi lä wa̦lile —e cuma. ²⁷ Ö̦jö däjä, cama ebä lä nocamabono wei ebä waloa co̦quema. Samaliateliyoma sho cäcöbö a̦ lä wayou wei cäcöbö fa dalalöjenö, bei bä bufi shädayaimoma ma cui, bä a̦ fanomi. “¿Wedi wa tä taö?”, bä cunomi. “Samaliateliyoma a ma cui, ¿wedi tä tabä wa wa̦ li wayomaö cule?”, bä ca̦i cunomi. ²⁸ Ö̦jö däjä, ö̦jamö oshoboli e fa i̦tablacöfälönö, shabono jamö a suwä aa balölayoma. A fa co̦blalunö, abinaja bä nowa taö co̦ojoloma. ²⁹ —Bä da jaboje. Quijamö wa̦lo a da möcöliyoje. Camiyänö ya tä bluca lä tano wei tä a̦ wawämaö cadidou cublei. Yai Bada tänö a shömabä a lä yaileno wei, ¿ö̦jö lä a mada tawä? —bä nowa tama. ³⁰ Ö̦jö däjä, shabono jamö bä fa falalunö, ö̦jö nijamö bä bluca ayoma. ³¹ ¿Ö̦jö tawä? Cama bä juu showao däjä, Jesús a nia iyamaö fe fa yadiojenö, cama ebä lä nocamabono wei bä a̦ fe blacäjoma. —Tä a̦ wäyäle. A da iyayo, ¿ö̦jö tawä? —ebä cudima. ³² Ö̦jö ma cui, abinaja a cuma. —Wama a nii daö lä mlai ya li tabou waiquia, ya iyabä —a cuma. ³³ Inaja a cuma cudeenö, cama ebä lä nocamabono wei bä wa̦liyoma. Abinaja bä cuma. —¿Ai täbänö, ebä nii bälaa jäquemaje tawä? —bä cuma. ³⁴ Abinaja Jesúsnö bä nowa tama. —Yale lä shömöleno wei ya wa̦ juaö bufi doblao. Tä tamaö lä bufii wei ya tä jödödöblaö. Ö̦jö iba nii bä waiquiwä. ³⁵ ¿Ö̦jö tawä? Abinaja wamacö cuu. “Belibo 4 bä cublou däjä, nii bäma bä nia taö”, wamacö cuu malä dao wei. ¡Tä da möje, ö̦jö lä! Bämacö nowa taö lä cule. Yai Bada etäca ficali jamö, fei däjä bä nii tamou showaobä cätä. Täbä yanowamö lä yömölamou wei, jai nii bä tamobä, bä waiquiwä. ³⁶ ’¿Ö̦jö tawä? Nii bä lä taö wejei, bä nowa ojode coamamou. Ai bä nijamö, nii bä bälaö lä cuaaö wejeinaja, camiyä nija bä yanowamö lulubou cuoje, ba̦limi bä cuobä. Mobä döaö lä balöo wejei bä ma cui, nii bä taö lä nomöjöo wejei bä ma cui, ö̦jö bä bufi bluca doblalobä. ³⁷ Abinaja bä showadi lä cuu wei, bä a̦ nö malä bejediaö wei. “Ai bänö mobä döaöje, ai bä mö feduwä lä cuinö nii bä taöje”, bä cuu. ³⁸ ¿Ö̦jö tawä? Wamacö jaba ojodamou lä mlaono wei jamö, wama bä nii tabä bämacö shömölema. Ai bä ojodamou lä balöono wei jamö, fei däjä cafä wamacö ojodamou yädäblou nomöjöa lä cule —Jesúsnö bä nowa tama. ³⁹ ¿Ö̦jö tawä? Ö̦jö Samaliateliyoma a lä cuinö, Jesús a wa̦fa wäyäö co̦ojolobä jamö abinaja a cuma. “Camiyänö ya tä bluca lä tano wei tä a̦ wawämaö cadidio cublei”, a cuma. Einaja a cuma yalo, Samaliateli ai bä bluca lä cuinö, Jesús a wa̦ bejedi bufilemaje, ö̦jö shabono jamö bä lä bälöle bä lä cuinö. ⁴⁰ Ö̦jö cudeenö, Jesús nija ö̦jö Samaliateli bä fa waloicunö, a fe weyamaö fa bufiijenö, ö̦jö bä nija bolacabö a fe dödölayoma. ⁴¹ Jesús a wa̦ fa ji̦liläjenö, cama ai bä bluca lä cuinö a wa̦ bejedi ca̦i bufia mö fedulemaje. ⁴² Ö̦jö bä lä cui, abinaja Samaliateliyoma nija bä cuma. —Fei däjä, ö̦jö bäma a wa̦ bejedi bufii lä cule, cafä wa wa̦ ja bädawänö mlai. Camiyä yamacö ma cuinö yama a wa̦ malä ji̦lileno wei. Yama a daö. Yanowamö jödödöwä täbä nia lä jucäaö wei, ö̦jö lä a waiquiwä —bä cuma. ⁴³ Sicalateli bä nija a fe didi fa bolacablalufälönö, Calilea jamö Jesús a aa majölayoma. ⁴⁴ Yai Bada a wa̦no wäyälewä bä lä cui, cama bä ulifibö yai ja, showadi bä a̦ ji̦liblaö lä mlajei tä a̦fa wäyäö malä waiquiono wei. ⁴⁵ Calilea jamö a fa co̦blalunö, ö̦jamö bä lä bälöle bänö dodijidawä a co̦blamalemaje. Jelusale jamö bä iyaö ca̦i co̦camobä jamö, Jesús a dodijaö dablaö malä waiquiono wejei. ¿Ö̦jö tawä? Bä iyaö ca̦i co̦camobä jamö cama bä ca̦i cuoma. ⁴⁶ Calilea tä ulifi jamö a fa co̦blalunö, Canaateli bä nija a waloa co̦aliyoma, uba nashiwä ubä cublou lä nomöjölayono wei ubä mau lä taamano wei jamö. ¿Ö̦jö tawä? Ö̦jö tä mashi biyä jamö, Cabenaoteli bä nija bä bada lä läono wei ai a lä cui, bä ijilubö e jalilioma. ⁴⁷ Judea jamö a cuoma Calilea jamö Jesús a wa̦fa co̦blou fa ji̦lilänö, a nacaaö mö ayoma. Bä ijilubö e jalomadayobä, a wa̦ fe blacäjoma. A nomaö ajedewä, a cuoma. ⁴⁸ Ö̦jö cudeenö, abinaja Jesús e cuma. —Tä nö lä quilijii ya tä wawämaimi ja, wamale a̦ bejedi bufiimi dicowä —e cuma. ⁴⁹ Bada a lä cuinö, abinaja Jesús a nowa tama. —Tä a̦ wäyäle. Ijiluyä a fö̦shöacö mladono mlai ja, ¡a jabo da showadao! —a nowa tama. ⁵⁰ Abinaja Jesús e cuma. —A da co̦bofälö. Ijilufä a nia jalou —e cuma. Jesús a lä cuno wei a wa̦ bejedi bufibole a co̦layofälöma. ⁵¹ A co̦ofälöö däjä, a wa̦ juamobä ebä mö balayoma. A yömölaöje ja, bä ijilubö e a̦fa demi wäyämaje. ⁵² A wa̦fa demi wäyämaje yalo, bä wa̦lii cadidoma. —¿Wedi jamö motoca a yai cuo däjä, a jaba ononoblaliyoma? —a cuma. Abinaja bä cuma. —Weyaja a motoca yo̦lolodayou däjä, a yobli mladou showadalayoma —bä cuma. ⁵³ Ö̦jö bä a̦ ja, a bufi jaducublaliyoma, bä ijilubö e lä jaliliono wei a lä cui. “Ijilufä a nia jalou”, Jesúsnö a nowa lä tano wei däjä, ö̦jö däjä showadawä, a jo̦wa jaloa showalayoma. Ö̦jö däjä, cama a ma cuinö, cama ebä bluca ma cuinö, Jesús a wa̦ bejedi bufia showadalemaje. ⁵⁴ ¿Ö̦jö tawä? Judea tä ulifi jamö culanö, Calilea jamö a waloa fa majöicunö, tä nö lä quilijii tä jaba wawämalema, Yai Bada e nö ö̦jöböamobä. Ö̦jö däjä a juu co̦obä jamö, bada bä ijilubö e jalomaö däjä, inaja showawä a cuaaö co̦oma. Yai Bada e nö ö̦jöböamobä, a nö quiliaö co̦oma.

¹ Ö̦jö tä cublou waiquilayono wei ja, Jelusale jamö judio bä nia iyaö ca̦i fa co̦camonö, ö̦jamö Jesús a alayoma. ² ¿Ö̦jö tawä? Jelusaleteli bä shabonobö jamö, oweja yoca lä cule jamö mau uca cuoma. Ebleo bä caficö a̦ ja, Besada uca a̦fa jilabouje. Ö̦jö u casö jamö, yano bloque 5 maloco bä fe fa̦yooma. ³ Ö̦jö bä yano jamö, bä lä wa̦lidii bä bluca blaoma. Ai bä jubäböoma, ai bä mata wa̦lidioma, ai bä ya̦toliböoma. ⁴ ¿Ö̦jö tawä? Yai Bada etä a̦jele fa itoblaayonö, u qui̦yaamaö ja, a jalili itoo lä balöo wei a lä cui, bä jaloobloma. ⁵ Bei. Ö̦jamö lä ai a jalili nö dedeaö däjä, lasha 38 a faa ma waiquimaleno wei ma cui, a jalili cuo showaoma. ⁶ Jesúsnö ö̦jö a dablaö däjä, a jalili blao nö lä dedeano wei tä daö waiquioma yalo, a wa̦lima. —¿Wa jalou bufi doblaa cule? —e cuma. ⁷ Abinaja a jalili cuma. —Tä a̦ wäyäle. Mau u qui̦yaamaö däjä, lobe wale itoblamabä a cuami. Ya nö icublobimi. Ya obisai juu showai ja, ai bä shino itou balöo dicoo —a cuma. ⁸ Abinaja Jesúsnö a nowa tama. —Bei. A da ubladalu. Wa lä maquele wa täcö fa jocälänö, täcö cai̦ co̦jamöö da co̦o —a nowa tama. ⁹ A jaloa fa showadalunö, a lä maqueono wei täcö fa jocälänö, täcö ca̦i co̦layoma. ¿Ö̦jö tawä? Täbä yanöcöobä tä mö jalu sábado cuoma. ¹⁰ Ö̦jö cudeenö, abinaja judio bä cuma, a lä jalolayono wei a nija. —Bämacö yanöcöobä tä mö jalu. Wa lä maqueono wei wa täcö ca̦i jubä tämi. Tä a̦ läa —bä cuma. ¹¹ Ö̦jö ma cui, abinaja a cuma. —Wale lä jalomaleno wei a lä cuinö, abinaja wale nowa tama. “Wa lä maquele wa täcö fa jocälänö, täcö ca̦i co̦jamöö da co̦o”, wale nowa tama —a cuma. ¹² Abinaja faliseo bä bada cuma. —Wa täcö fa jocälänö wa täcö ca̦i co̦jamöbä, ¿wedinö bei wa li shömölei cufe? —bä cuma. ¹³ ¿Ö̦jö tawä? A lä jalolayono wei a lä cuinö, Jesús a daö fa mlacunö a danomi showawä. A ca̦i dablaö co̦daanomi. Täbä bluca lä mashicono wei jamö, a nofi mojodudou showalayoma. ¹⁴ Ö̦jö tä cublou fa waiquilonö, a lä jalomaleno wei a lä cui, Yai Bada etä yafi jamö Jesúsnö a daa fa co̦lalönö, e a̦ fama. Abinaja e cuma. —Fei däjä wa demi, ¿ö̦jö tawä? Wa̦lidiwä tä taö co̦daa dijä, wa nö yai bleaaö fe balojoa dicoicu —a cuma. ¹⁵ Ö̦jö däjä, a lä jalomaleno wei a lä cui, judio bada bä nijamö a fa alunö, Jesús a wa̦fa wäyäö showadaoma. —Wale lä jalomaleno wei, ö̦jö Jesús a waiquiwä —a cuma. ¹⁶ Täbä yanöcöobä tä mö jalu jamö Jesúsnö a jalomalema yalo, judio bada bänö a bäyäblabeje a nabä jumaje. ¹⁷ Ö̦jö ma cui Jesús a nofi bäyäo ja, abinaja bä nowa tama. —Fayä a yanöcöblao mlai ja, showadi täbä bayeliblaö ojodao. Inaja showawä, camiyä ya ca̦i cuaaö mö fedua —bä nowa tama. ¹⁸ Täbä yanöcöobä tä mö sábado jalu ma cui ja a wasöomi cudeenö, Jesús a shäö bufi doblao waiquiomaje. Yai Bada nija a ca̦i Fö̦ömou fa cadidionö, bä jushuo balaö showadaoma, Yai Bada a sho cama cäcöbö a̦fa wäyämoma yalo. ¹⁹ Abinaja Jesúsnö bä nowa tama. —Cafä wamacö nija ei ya wa̦ lä cui, bejedi lä ya wa̦. Yai Bada bei Ijilubö ya e lä cui, camiyä ya cuaaö bufi lä doblao wei tänö ya cuaaimi. Fayä a lä cuaaö wei ya tä möö yalo, inaja camiyä ya e ca̦i cuaaö mö fedua. Fayänö tä lä taö wei, bä Ijilubö ya enö ya tä cai̦ taö mö fedua. ¿Ö̦jö tawä? ²⁰ ’Fayänö bä Ijilubö wale nofimaö dodijia yalo, a lä cuaaö wei camiyä nija tä bluca wawämaö. Ya lä cuaafenaja bädawä mlai, tä yai lä lojode wei tä nia wawämaö cuaaö. Camiyä nija tä fa wawämalönö, inaja showawä, yanowamö wamacö nija ya etä nia wawämaö cuo mö feduo, wamacö bufi yai shädayaimobä. ²¹ Bä lä nomaö wei, Fayänö bä demi jocädamaö lä co̦o weinaja, inaja showawä, bä Ijilubö ya e cuaaö mö feduo. Ya bä demi jocädamö lä ojode wei, ya bä li jocädamaö. ²² ’¿Ö̦jö tawä? —Jesús a cuma—. Fayänö yanowamö täbä dobloimi jömaimi. Bä Ijilubö ya enö, ya täbä dobloimi jömabä wale yai tablamalema, ²³ wale nofi dodijidawä tabobeje. Fayä Yai Bada a lä cui, a nofi dodijidawä lä tabou wejeinaja, bä Ijilubö ya e ma cui wale nofi ca̦i tabou mö feduobeje. Bä Ijilubö wale nofi dodijidawä tabou lä mlajeinaja, Fayä a ma cui inaja showawä a nofi ca̦i taboimi mö feduweje, wale lä shömöleno wei a lä cui. ²⁴ ’Cafä wamacö nija ei ya wa̦ lä cui, bejedi lä ya wa̦—a cuma—. Wale a̦ fa ji̦liajenö, wale lä shömöleno wei a wa̦ bejedi lä bufii wejei bä lä cui, ba̦limi bä cuobä bä li waiquiwä. Bä dobloimi jömamobä bämi. Ö̦jö bä lä cui, bä nomabä bä ma cuono wei ma cui, bä ba̦limiblou nomöjöa lä cule. ²⁵ ’Cafä wamacö nija ei ya wa̦ lä cui, bejedi lä ya wa̦ —a cuma—. Abinaja tä nia cuo. Tä cua waiquia a lä cule. Bufi nomawä bä lä cuinö, camiyä Yai Bada bei Ijilubö wale a̦ nia ji̦liaöje. Wale a̦ fa ji̦liläjenö, ba̦limi bä nia cuo. ²⁶ Ba̦limi bä cuobä Fayänö bä lä taamaö weinaja, bei Ijilubö ya e ma cui, inaja showawä ya e ca̦i cuaaö mö feduobä wale malä tablamaleno wei. ²⁷ Ya täbä dobloimi jömabä wale ca̦i lämabou, ya lä yanowamöblaleyoluno wei ya waiquiwä cudeenö. ²⁸ ’Camiyä ei ya wa̦ lä cui ja, bä bufi mla dijä —a cuma—. Abinaja tä nia malä cublou wei. Bä lä nomalaliyono wei bä bluca lä cuinö, wale a̦ fa ji̦liläjenö, ²⁹ bä demi nia jocäcou. Demi bä cuo däjä, bä lä bejedimono wei bä lä cui, ba̦limi bä cuobä bä nia jocäcou. ¿Ö̦jö tawä? Wa̦lidiwä talewä bä lä cui, bä dobloimi jömamobä, bä nia ca̦i cama jocäcou mö feduo, bä nö yai bleaaö nomöjöobä. ³⁰ Abinaja Jesús a cuma. —Camiyä ya cuaaö bufi lä doblao wei tänö ya cuaaimi. Fayä ya wa̦ fa ji̦linö, ya bä yanowamö li jömaö. Camiyä ya cuaaö bufi lä doblao weinaja mlai, wale lä shömöleno wei a lä cuinö wale yai taamaö bufi lä doblao weinaja, ya li cuaaö. Ö̦jö cudeenö, ya bä jömaö ja ya bejedimou showadawä. ³¹ ’¿Ö̦jö tawä? —Jesús a cuma—. Camiyä ya wa̦fa shino wäyämamou ayao fa cunoja, wamale a̦ bejedi bufibä tä nö cuobö mlai. ³² Ai tänö wale a̦fa li yai wäyäö culadi. ¿Ö̦jö tawä? Ö̦jönö wale a̦fa lä wäyäö wei, ya bejedimou daö. ³³ ’Bä fe lä ojomaö wei a Juan ma cui nija afä wama bä ca̦i shömölema, wama a wa̦no ji̦liaö co̦ojolobä. ¿Ö̦jö tawä? —a cuma—. Ö̦jönö wale a̦fa wäyäö ja, a ca̦i bejedimoma. ³⁴ ¿Ö̦jö tawä? Yanowamö täbä a̦ ja, ya mölabä ya mlai ma cui, cafä wamacö bufi jaducublobä ya wa̦. Juannö wale a̦fa lä wäyäno wei, wama tä a̦ bejedi fa bufinö, wamacö jucäamou fe yadiobä. ³⁵ Cowa wacö shi̦i lä culenaja a li Juan cuoma. Ö̦jö wama tä shi̦i nofi jaba doaö ma ojodaono wei ma cui, wamacö nö dedejeblonomi dicowä. ³⁶ ’Ö̦jö ma cui, Juannö wale a̦fa ma wäyäö wei ma cui, yale a̦fa yai bejedi wäyäö lä lojode wei, ai tä cua. ¿Ö̦jö tawä? Ya lä cuaaö wei tä showawänö, Fayänö wale lä shömöleno wei tä dablamou malä wawädole. Camanö wale taamaö cudeenö, ya e li cuaaö. ³⁷ ’Fayä cama a showawä ma cuinö wale a̦fa ca̦i bejedi wäyäö mö feduo, wale lä shömöleno wei a lä cuinö —a cuma—. Ö̦jö wama a wa̦ ji̦liaö mlai ja, wama a dablaö mlai ja, wamacö cua showaa. ³⁸ Wale lä shömöleno wei ya lä cui, wamale a̦ ca̦i bejedi bufiimi dicowä ja, cama ma cui wama a wa̦ ca̦i bejedi taboimi. ³⁹ ’Ba̦limi wamacö cuobä, Yai Bada showadi wama tä a̦ oni mödii. ¿Ö̦jö tawä? Camiyä ya wa̦fa yai lä wäyämou wei, ö̦jö lä tä a̦ oni waiquiwä. ⁴⁰ Ö̦jö ma cui, wamacö ba̦limi cuobä, camiyä nija wamacö juu moji dicowä. ⁴¹ ’Yanowamö täbä nija ya nofi doamobä, ya tä dayäimi —a cuma—. ⁴² Ö̦jö ma cui, cafä bämacö daö. Bei wamacö bufi yainö, Yai Bada wama a nofimaimi. ⁴³ Fayänö wale ma shömöleno wei ma cui, wamale a̦ juaimi. Ai a lä cui, a juu bufi doblao lä bädao wei a lä cui, ö̦jö lä wama a wa̦ nia shino yai juaö. ⁴⁴ Yai Bada a yami lä cule nija wamacö a̦fa dodijaö tamobä tä ma cule ma cui, ö̦jö tä lä cui wama tä nofi yai cadidiboimi. Ma, Yai Bada nija mlai, yanowamö täbä nija wamacö a̦fa shino dodijaö tamou bufi doblao. Ö̦jö cudeenö, camiyä wamale a̦ bejedi nö bufibimi waiquiwä. ⁴⁵ ’Fayä nija camiyänö bämacö a̦fa nia taimi —a cuma—. Inaja wale nofi tabo dijejä. Moisesi a yai lä cuinö, wama a nofi lä mölabou wei a showawä lä cuinö, ö̦jönö wamacö a̦fa nia dobloimi taö. ⁴⁶ Moisesi wama a wa̦ bejedi bufii fa cunoja, camiyä wamale a̦ nö ca̦i bejedi bufii mö feduobö wei. Cama etä a̦ oni jamö, camiyä wale a̦fa malä wäyäno wei. ⁴⁷ Ö̦jö ma cui, Moisesi wama tä a̦ bejedi bufiimi waiquiwä ja lä, camiyä ¿wedinaja wamale a̦ bejedi bufii li cuo ayaobä?

¹ Ö̦jö tä cublou waiquilayono wei ja, modu Calilea ai u mashi jamö Jesús a bucadubaliyoma, Dibelia u a̦fa ca̦i lä cule jamö. ² Ö̦jamö lä, Jesús nijamö bluca dodijiwä bä nocalayoma. Yai Bada e nö ö̦jöböamobä, jalili bä jalomaö nö lä quiliano wei tä fa dalalöjenö, bä bluca nocalayoma. ³ ¿Ö̦jö tawä? Jefu a balöcö jamö, Jesúsnö bä lä nocamabono wei bä ca̦i fa dolequebofälönö, bä ca̦i lobejelayoma. ⁴ ¿Ö̦jö tawä? Judio bä nia iyaö lä co̦ono wei tä ajedoma. Yai Bada a waiteli lä jayuano wei a nofi nia co̦camoaö co̦maje. ⁵ Jesúsnö tä fa mödalönö, cama nija täbä comi juu lä ajedofälöno wei täbä bluca fa dalalönö, Felipe nija a wa̦ fama. —¿Wedinaja bämacö li fa cuaanö, nii bäma bä li luluabä, ei bä lä juimi bä iyabä? —a cuma. ⁶ Felipe a nia fa wabanö, a wa̦ li cuoma. Camanö tä nia lä taö wei tä daö malä waiquiono wei. ⁷ Abinaja Felipe a cuma. —Cuwi. Blada 200 bä ma cui ja, bäma bä nii ma dälei wei ma cui, bä nö obimi. Nii wajaquemi bä wai jöbädamou ma cuaaö wei ma cui, ai bä nö damolayobö —a cuma. ⁸ Cama ebä lä nocamabono wei ai a lä cui, Simón Pedro bä fääshä Andrés e lä cui, abinaja e cuma. ⁹ —Nii bä nowa bluca lä mlai, eja ijilu a lä cuinö 5 bä wai nii tabou, yuli bolacabö cäcö ca̦i. Ö̦jö ma cui, bä nia oimi. Ei bä lä yododole bä bluca fe balojowä —e cuma. ¹⁰ Abinaja Jesúsnö bä nowa tama. —Bä da loamaboduje —bä nowa tama. Bä yododoobä jamö, moimoima a blaucuoma yalo bä loomobodayoma. Wa̦lo jai 5.000 bä cuoma. ¹¹ Ö̦jö däjä, nii 5 bä lä cuono wei, Jesúsnö bä dälema, yuli bolacabö cäcö ca̦i. Ö̦jö bä fa dälönö, fedu jamö a mö fa nonoicunö, bä nia lä iyano wei tä ja Yai Bada nija a bufi a̦fa doblalou wäyämoma. Ö̦jö däjä, bä bluca lä loono wei bä nijamö, bä jöböamaö cuaaö bufima. Yuli cäcöbö ma cui, inaja showawä, bä bufi läablalou mlai ja, bä jöbäaö cuaabeje. ¹² ¿Ö̦jö tawä? Täbä bluca fa iyaolalunö, bä bädöolaliyoma. Ö̦jö däjä, cama ebä lä nocamabono wei bä lä cui, abinaja Jesúsnö bä nowa taö nomöjöoma. —Bei. Nii bä sheje lä damalajei bä da co̦ablaje, bä wa̦lio bädao mlaobä —bä nowa tama. ¹³ Inaja bä nowa tama yalo, ö̦jö nii 5 bä nowa bluca lä mlai, bä sheje co̦a showaabodayomaje. Bä lä iyano wei bä lä cuinö, nii bä sheje lä damano wejei bä fa co̦läjenö, wöö 12 bä ja bä nii sheje fe lajoblamalemaje. ¹⁴ Nii bä wai bolacami ma cui ja, Jesúsnö täbä bluca lä iyamaleno wei tä fa dalalöjenö, ö̦jö däjä Yai Bada e nö ö̦jöbölemaje. Abinaja bä cuma. —Yai Bada a wa̦no wäyälewä a nia jo̦wa lä juno wei, ¡fei ö̦jö lä a waiquiwä! —bä cuma. ¹⁵ ¿Ö̦jö tawä? Bada a yai tablamaö fe yadiobeje, a nabä juu lä bufiono wejei tä dama cudeenö, jefu a jamö a fe yami doleblaliyofälöma. ¹⁶ Tä mö weyaö däjä, modu u jamö cama ebä lä nocamabono wei bä dömöbaliyoma. Bä fa dömöbalunö, ¹⁷ canawä a ja bä fa döcäcälonö, Cabenao jamö bä bucaduobä bä befi ca̦i calälayoma. Tä mö didi ji̦cocoo ma waiquiono wei ma cui, cama bä nija Jesús a waloonomi showawä. ¹⁸ Ö̦jö däjä, wadoli a bada fa yacolemonö, modu u bada shäyäjama. ¹⁹ Ö̦jamö lä, modu u möamo ja bä yacolemou showao däjä, modu u feyaca jamö Jesús a jelejewä juu ajedoimama. Bä quilia fe balojolaliyoma. ²⁰ Ö̦jö ma cui, Jesúsinö lobe bä quilii wasöblalema. —Ei camiyä cä ya. Bä quili dijä —bä nowa tama. ²¹ A döcäamaö bufi doblaomaje. Canawä a ja a fa döcäicunö, yedu bä nia juu bucaduo lä cuono wei jamö, bä befi ca̦i waloa showadaquema. ²² Ö̦jö tä fena ja, ai u mashi jamö bä bluca cuo lä juono wei bä nö dadio juoma. ¿Ö̦jö tawä? Jesús ebä lä nocamabono wei bä lä cui, canawä a jamö bä lä döcäcäbaliyono wei däjä, bä nö daamaje. Ö̦jö bä nijamö Jesús a coyocoonomi. Bä befi ca̦i yamili lä calälayono wei tä nö ca̦i daamaje. Ai a canawä ca̦i ca̦onomi. ²³ Ö̦jö däjä, Dibelia jamö culanö bä befi ca̦i lä caläno wei, ai bä ca̦i canawä washölöblaliyomaje. ¿Ö̦jö tawä? Bada a lä cui, Yai Bada nija a bufi a̦fa doblalou wäyämou fa balöonö, bä nii lä wano wejei tä ajede jamö bä washölöquema. ²⁴ Ö̦jö cudeenö, ö̦jamö Jesús a dablaö fa mlacujenö, cama ebä lä nocamabono wei bä ca̦i dablaö fa mlacujenö, ö̦jö bä canawä jamö bä döcäcäobaliyoma. Bä fa döcäcäobalunö, Cabenao jamö bä befi ca̦i caläa showalayofälöma, bucadu jamö Jesús a dayäbeje. ²⁵ Ai modu u mashi jamö a dablaöje däjä, abinaja bä cuma. —Tä a̦ wäyäle. ¿Fei däjä wa co̦bei cufe? —bä cuma. ²⁶ Jesúsnö abinaja bä nowa tama. —Cafä wamacö nija ei ya wa̦ lä cui, bejedi lä ya wa̦. Yai Bada ya e nö ö̦jöböamobä, tä nö lä quilijii ya tä ma wawämano wei ma cui, ö̦jö tänö wamacö bufi fa jaducublalunö wamale dayäimi. Ma, nii bänö wamacö bädölayoma yalo wamale li dayäaö. ¿Ö̦jö tawä? ²⁷ ’Nii bä mladou si lä ijejei bä ja, bä cuaablalou fe balojoo dijä. Täbä ba̦limi cuobä cäcö nii ja, wamacö shino yai ojodamobä. Ö̦jö cäcö nii ja wamacö dobämobä, ei lä ya waiquiwä, camiyä ya lä yanowamöblaleyoluno wei ya lä cui. Fayä Yai Bada tänö wale nö malä ö̦jöböamale —bä nowa tama. ²⁸ Ö̦jö däjä, Jesús nija abinaja bä cuma. —¿Wedinaja yamacö yai cuaabä, ö̦jö lä, Yai Bada nija yamacö ojodamobä? —bä cuma. ²⁹ Abinaja Jesús e cuma. —Yai Bada tänö wale lä shömöleno wei wamale a̦ bejedi da bufi, ö̦jö lä. Ö̦jö lä tä nabä shino shömaö —e cuma. ³⁰ Ö̦jö cudeenö, abinaja bä cuu nomöjöoma. —Yai Bada wa e nö ö̦jöböamobä, tä nö lä quilijii tä da wawämalö, ö̦jö lä. Ö̦jö yama tä fa dalalönö, bäfä a̦ bejedi bufibä. ¿Wedi wa tä yai tabä, cafä bei wa? ³¹ Camiyä bämacö bada bä lä cuono wei bä lä cui, ulifi bloque jamö Moisesinö bä ca̦i juu ja, manaa bä ja bä iyama, tä a̦ oni lä cuu weinaja showawä. Abinaja tä a̦ cuu. Fedu jamö bä nii lä bläläno wei bä ja, bä iyamama. ’Einaja tä a̦ cuu —bä cuma. ³² Ö̦jö däjä, abinaja Jesús e cuma. —Cafä wamacö nija ei ya wa̦ lä cui, bejedi lä ya wa̦. Fedu jamö bä nii lä bläläno wei bä ja bä lä iyamano wei a lä cui, Moisesi a cuonomi. Ö̦jö lä Fayä a yai li cuoma, fedu jamö culanö, nii cäcö yai ja wamacö dobäö lä showale a lä cui. ³³ Yai Bada tänö cäcö nii lä jöböaö wei cäcö lä cui, fedu jamö cäcö cuoma cäcö itolayoma. Yanowamö täbä ba̦limi cuobä, ö̦jö cäcö nii yai —Jesús e cuma. ³⁴ Abinaja bä cuma. —Tä a̦ wäyäle. Showadi ö̦jö cäcö ja yamalecö da dobäblaayo —bä cuma. ³⁵ Abinaja Jesúsnö bä nowa taö ja a cuma. —Bä ba̦limi cuobä cäcö nii lä cui, ö̦jö bei ya. Camiyä nija bä lä juu wei bä nia ofäimi. Camiyä wale a̦ bejedi lä bufii wejei bä nia amishaö co̦daaimi. ³⁶ Ö̦jö ma cui, cafä wamacö nija ya mada cublei. Wamale ma dablaö wei ma cui, wamale a̦ bejedi bufiimi waiquiwä. ³⁷ ’Camiyä nija Fayänö bä yanowamö lä jöböaö wei bä bluca lä cui, camiyä nija ö̦jö bä nia juu. ¿Ö̦jö tawä? Camiyä nija bä lä juu wei bä lä cui, ya bä waii mlaicätä. ³⁸ Fedu jamö culanö ya lä itolayono wei ya lä cuinö, camiyänö ya tä taö lä bufii wei ya tä tabä, ya itono malä mlai. Wale lä shömöleno wei a lä cuinö, ö̦jönö tä tamaö lä bufii wei ya tä yai tabä, ya malä itolayono wei. ³⁹ ’¿Ö̦jö tawä? —a cuma—. Wale lä shömöleno wei a lä cuinö, abinaja wale taamaö bufi doblao. Tä lä jödödöblole däjä, moli ya feimabou mlai ja, iba bä lä jöböbeno wei ya bä demi bluca jocädamaö co̦obä, wale tamabou bufi doblao. ⁴⁰ Abinaja Fayänö täbä taamaö bufi doblao malä cui. Bä Ijilubö wale nö yai lä ö̦jöböaö wejei bä lä cui, wale a̦ bejedi bufiije ja, bä ba̦limi tamabou bufi doblao. Tä lä jödödöblole däjä, ö̦jö ya bä nia demi jocädamaö co̦o —a cuma. ⁴¹ Ö̦jö däjä, Jesús a wa̦ ja judio bä bufi jushujuablaloma. “Fedu jamö ya cö nii lä cuono wei ya cö itolayoma”, a cuma yalo, bä a̦ lämoma. ⁴² Abinaja bä cuma. —José bä ijilubö Jesús a wa̦fa lä cui, ¿fei ö̦jö a mlai daanö? Bä fö̦ö e ma cui, bä nöö e ma cui, bäma cäcöbö malä dale. ¿Wedi tabä “Fedu jamö culanö ya itolayoma”, bei a li cuu dicoo? —bä cuma. ⁴³ Abinaja Jesúsnö bä nowa tama. —Bä bufi jushujuwä ca̦i fa dijä. ⁴⁴ Wale lä shömöleno wei, Fayä a lä cuinö bä blacämaimi ja, camiyä nija cama bä nia juu bädaomi. Bä lä blacämaö wei bä lä cui, tä lä jödödöblole däjä, ö̦jö ya bä nia jocädamaö co̦o. ⁴⁵ Yai Bada a wa̦no wäyälewä ai a wa̦ oni jamö, abinaja tä a̦ cuu. Yai Bada nija täbä nia bluca damamou. ’¿Ö̦jö tawä? —a cuma—. Einaja tä a̦ cuu. Fayä a wa̦no fa ji̦liläjenö, bä yai lä damamou wei bä lä cui, camiyä nija bä juu. ⁴⁶ Ö̦jö ma cui, Fayä nija bä bufi ma damamou wei ma cui, yanowamö täbä lä cui nija Fayä a dablamoimi. Yai Bada tänö wale lä shömöleno wei ya lä cuinö, Fayä ya shino dablaö ayao. ⁴⁷ ’Cafä wamacö nija ei ya wa̦ lä cui, bejedi lä ya wa̦ —a cuma—. Wale a̦ bejedi lä bufii wejei bä lä cui, ba̦limi bä cuobä bä li waiquiwä. ⁴⁸ Ba̦limiblamamodima cäcö nii lä cui, ö̦jö lä ya. ⁴⁹ ’Afä bada bä jaba lä cuono wei bä lä cuinö, manaa bä ma wano wejei ma cui, bä nomalaliyoma. ⁵⁰ ¿Ö̦jö tawä? Ya cö a̦fa nii lä wäyäle, fedu jamö culanö cäcö itolayoma, ö̦jö cäcö ja bä lä iyaö wei bä nomaö mlaobä. ⁵¹ Bä ba̦limi cuobä cäcö nii lä cui, ö̦jö bei ya waiquiwä, fedu jamö culanö ya lä itolayono wei ya lä cui. Camiyä ya cö nii lä cui ja bä lä iyaö wei bä lä cui, ba̦limi bä nia cuo. ¿Ö̦jö tawä? Yanowamö täbä ba̦limi cuobä ya cö nii lä jöböaö wei, bei ya ya̦ji nia jöböamou —a cuma. ⁵² Ö̦jö däjä, Jesús a wa̦ ja judio bä a̦ lafumayoma. Abinaja bä cuma. —¿Wedinaja bei ya̦ji nia li jöböamou cuo, bäma ya̦ji wabä? ⁵³ Ö̦jö cudeenö, abinaja Jesúsnö bä nowa tama. —Cafä wamacö nija ei ya wa̦ lä cui, bejedi lä ya wa̦. Ya lä yanowamöblaleyoluno wei ya lä cui, wamale ya̦ji waimi ja, wamale i̦yäbö coaimi ja, ba̦limi wamacö nia cuomi. ⁵⁴ Wale ya̦ji lä waö wejei, wale i̦yabö ca̦i lä coaö wejei bä lä cui, ba̦limi bä cuobä ö̦jö bä li. Tä lä jödödöblole däjä, ö̦jö ya bä demi nia jocädamaö co̦o. ⁵⁵ Bei ya ya̦ji lä cui, ö̦jö nii cäcö yai malä cui. Bei ya i̦yäbö lä cui, bä amishi yai co̦obä, ö̦jö cäbä. ⁵⁶ Wale ya̦ji lä waö wejei, wale i̦yabö lä coaö wejei, ö̦jö bä lä cui camiyä nija bä yanöcöwä cua, cama bä nija ya ca̦i yanöcöwä cua mö fedua. ⁵⁷ ’Fayänö wale shömölema, täbä lä ba̦limiblamaö wei a lä cuinö —a cuma—. Ba̦limi ya cuobä, camanö wale tablalema. Inaja showawä, wale lä waö wejei bä lä cui, camiyänö ba̦limi ya bä nia tablamaö. ⁵⁸ Fedu jamö ya cuoma ya cö nii lä itolayono wei ya lä cui, ö̦jö camiyä ya cö a̦fa nii wäyämamou lä cule, camiyä bämacö bada bä lä cuono wei bänö, bä nii lä wano wejei mlai. Ö̦jö lä bä ma wano wejei ma cui, bä li nomalaliyoma. Camiyä ya cö a̦fa nii lä wäyämole ya cö ja bä lä iyaö wei, ba̦limi bä yai nia cuo —a cuma. ⁵⁹ ¿Ö̦jö tawä? Judio bä yododabä yafi jamö, inaja bä nowa tama, Cabenao jamö tä a̦ wäyäö däjä. ⁶⁰ Jesús nija bä lä nocaono wei ai bä lä cui, ö̦jö a wa̦ fa ji̦liläjenö, abinaja bä nowa tayoma. —Ö̦jö tä a̦ ji̦limamou nofi jaducuwämi. Tä a̦ ji̦lio nö möblobimi —bä cuma. ⁶¹ Ö̦jö ma cui, Jesúsnö bä bufi jushujuwä ca̦i lä fano wei tä daö fa showadaonö, abinaja bä nowa tama. —Camiyä ei ya wa̦ ja, ¿wamacö nia ja̦amodou daanö? ⁶² Ya lä yanowamöblaleyoluno wei ya lä cui, ya jaba lä cuono wei jamö wamale yai ösöö dablaö fa cunoja, ¿wedinaja wamacö bufi nö cuu nomöjöobö wei? ⁶³ Yai Bada tä Bufinö täbä shino yanowamö ba̦limiblamaö, cama yanowamö täbä showawänö mlai. Cafä wamacö nija ya wa̦ lä faö wei ya wa̦nö, bämacö bufi jaducublamabä ya wa̦, Yai Bada tä Bufinö wamacö ba̦limiblobä. ⁶⁴ Ö̦jö ma cui, cafä ai wamacö lä cuinö wamale a̦ bejedi bufiimi —bä nowa tama. ¿Ö̦jö tawä? Jaba däjä ma cui, a wa̦ bejedi bufii lä mlajei bä daö malä showaono wei. A nia lä nomojoliano wei a ca̦i. ⁶⁵ Abinaja a ca̦i cuma. —Ö̦jö cudeenö bämacö nowa taö mada waiquioblei. Fayänö bä blacämaö lä mlai, camiyä nijamö cama bä nia juu bädaomi —a cuma. ⁶⁶ Ö̦jö tä cublou waiquilayono wei ja, cama nija bä lä nocaono wei ai bä bluca waicoma. A lä juaaö wei jamö, bä yauo mladaliyoma. ⁶⁷ Cama 12 ebä nija abinaja Jesús e cuu juoma. —Cafä wamacö ma cui, ¿inaja showawä wamacö cublou ojode tawä? —a cuma. ⁶⁸ Simón Pedro abinaja e cuma. —Tä a̦ wäyäle. ¿Wedi jamö a lä cui nija yamacö juu nomöjöobä? Täbä nia lä ba̦limiblou wei, cafänö wa tä a̦ yai li tabou. ⁶⁹ Camiyä yamacönö bäfä a̦ li bejedi bufii waiquiwä. Yamacö bufi ca̦i jaducublaliyoma. Yai Bada tänö a lä yaileno wei, ö̦jö cafä bei wa dodijiwä —e cuma. ⁷⁰ Abinaja Jesús e cuma. —Iba 12 wamacö lä cui bämacö yaia waiquilema. Ö̦jö ma cui, cafä wamacö ai a lä cui, fecula a —e cuma. ⁷¹ Simón Icaliode bä ijilubö Juda a wa̦fa wäyäma. Cama 12 ebä nija a ma cuono ma cui, a nia malä nomojoliano wei.

¹ Ö̦jö tä cublou waiquilayono wei ja, Calilea jamö Jesús a juu cuaama. Judio bänö a shäö bufi doblao waiquiomaje cudeenö, Judea jamö a juu bufionomi. ² Bei. Yano bä wai jamö bä cublamou däjä judio bä showadi iyaö ca̦i lä co̦camou wei, tä ajeoma. ³ Ö̦jö cudeenö, Jesús bä fääshä ebänö abinaja a nowa tamaje. —Eja wa cudio mlai ja, Judea jamö a yai da ju, ö̦jamö cafä nija bä nocao bufi lä doblao wei bä lä cuinö wa dablabeje. Wa lä cuaaö wei tä ca̦i möbeje. ⁴ Wawädowä bä nö ö̦jöböamou bufi lä doblao wei bä lä cui, bä cuaaö ja̦too malä mlai. Wa jo̦wa lä cuaaö wei wa tä taö ja, yanowamö täbä nija a da damolaludu —a nowa tamaje. ⁵ Bä fääshä ebä ma cuinö a wa̦ bejedi bufino malä mlajei. ⁶ Abinaja Jesúsnö bä nowa tama. —Cafä wamacö juu bufi doblao däjä, wamacö juu showadaobä wamacö ma cule, ö̦jamö lä camiyä ya jubä tä cuami showawä. ⁷ Yanowamö bänö cafä wamacö nofi wa̦libou dao ma mlajei ma cui, camiyänö ya täbä a̦fa dobloimi wäyäö yalo, wale nofi yai li wa̦libouje. ⁸ Bä iyaö ca̦i co̦camobä jamö, cafä bä da ju. Fei däjä camiyä ya nia juimi. Ya nia yai lä juu wei tä cua showaa malä mlai —bä nowa tama. ⁹ Einaja bä nowa fa talönö, Calilea jamö yanöcöwä a cuo juoma. ¹⁰ Ö̦jö ma cui, bä iyaö ca̦i co̦camobä jamö bä fääshä ebä aa waiquilayono wei ja, wawädowä a juu mlai ja, ja̦towä Jesús a nodia jälayoma. ¹¹ Bä iyaö ca̦i co̦camobä jamö judio bänö a dayäalajenö, a wa̦liadalaö cuaamaje. —¿Wedi jamö ö̦jö lä bei a li? —bä cuma. ¹² Bluca bänö a wa̦fa wajado wayoaö cuaamaje. —A dodijaö —ai bä cuma. —Ma. Täbä mölamaö dicoo talei —ai bei bä cuu mö feduoma. ¹³ Ö̦jö ma cui, judio bada bä nö quili fa tajenö, wawädowä a wa̦fa wayoanomije. ¹⁴ Bä iyaö ca̦i lä co̦camou wei bä nö dedejeblou waiquio däjä, Jesús a aa fa jälönö, Yai Bada etä yafi jamö a co̦blou jälayoma. A co̦blou fa jälonö, Yai Bada etä a̦ ja bä yömölama. ¹⁵ A wa̦ lä macocoablalou wei a wa̦ ja, judio bä bufi shädayaimoma. Abinaja bä cuma. —¿Wedinaja dodijiwä? Bada bä nija ei a damamono ma mlai ma cui, ¡tä nofi daö dodijiwä yai!—bä cuma. ¹⁶ Ö̦jö däjä, abinaja Jesúsnö bä nowa tama. —Ya tä a̦ lä wäyäö wei, camiyä ya wa̦ bädawämi. Wale lä shömöleno wei, ö̦jö lä ya wa̦no li wäyäö. ¹⁷ ¿Ö̦jö tawä? Yai Bada tänö bä taamaö lä bufii wei tä ja bä lä ojodao wei bä lä cuinö etä a̦ nö nia ö̦jöböaöje. Camiyä ya bufi cuu lä bädao weinaja ya tä a̦ wäyäö dicoo ja, wale nia ca̦i daöje. ¹⁸ Cama bä bufi cuu lä bädao weinaja tä a̦ lä wäyäö wejei bä lä cui, cama bä a̦fa dodijidawä nia fa tamamonö bä a̦ li bädawä. Ö̦jö ma cui, a lä shömöleno wei a nö nia dodijidawä lä ö̦jöböamaö wei a lä cui, ö̦jö a shino yai bejedimou. A jolemou daomi. ¹⁹ ’Yai Bada tänö tä tamaö lä bufii wei, cafä wamacö nija Moisesinö tä a̦ jöböquema, ¿ö̦jö tawä? —a cuma—. Tä a̦ ma jöböqueno wei ma cui, moli ai wamacö ma cuinö wama etä a̦ nofi cadidiboimi. ¿Wedi tabä bei wamale shäö bufi li doblao, ö̦jö lä? ²⁰ Abinaja bä cuma. —¡Jolemou dijä! Fecula wa tabou yalo, wa wa̦ li faö mojodi. ¿Wedi jamö a lä cuinö wa li shäö bufi doblao? —bä cuma. ²¹ Abinaja Jesúsnö bä nowa tama. —Täbä yanöcöobä tä mö jalu sábado jamö, tä nö lä quilijii moli ya tä wawämaö ja, wamacö bufi bluca wedinajamou. ²² Wamale a̦fa ma taö wei ma cui, inaja showawä cafä wamacö malä cuaaö wei. Wamacö mosi sicö lä joyamou wei tä lä cui, Moisesinö tä nabä li shömöquema, ¿ö̦jö tawä? Ijilufä bä mosi sicö nia yai lä joyamou wei tä cublou däjä, täbä yanöcöobä tä mö jalu ma cui ja, wama bä mosi sicö joyaö fe yadio. ¿Ö̦jö tawä? Moisesinö tä jaba tamano ma mlai ma cui, bämacö nö badabö ai a jaba lä bälöono wei a lä cuinö, ö̦jönö tä yai jaba tamaö bufima. ²³ ’Moisesinö tä tamaö lä bufii wei tä ja wamacö cadidobä, täbä yanöcöobä tä mö jalu ma cui ja, ijilufä wama bä mosi sicö joyaö dao. Inaja wamacö ma cuaaö däjä ma cui, ¿wedi tabä ö̦jö tä mö jalu jamö ai ya jalomaö ja, camiyä nija bei wamacö shino li jushudou? ²⁴ Wama täbä jömaö däjä, bä bufi yai da dayäo. Wamacö bejedimolanö bä yai jömaö da cadidioje. Inaja tä mömou cuwä ma cui, wamacö bufi nia lobe cuu jaödaomi —bä nowa tama. ²⁵ Wawädowä Jesúsnö bä damaö cudeenö, abinaja Jelusaleteli ai bä cuma. —A shäö bufi lä doblao wejei, ¿fei bei ami? ²⁶ Eja wawädowä a wa̦ ma fale ma cui, a wa̦ wasöimije. “Yai Bada tänö a shömabä a lä yaileno wei a lä cui, ö̦jö lä a waiquiwä”, bada bänö ¿fei bei a nofi tabou cadidia da culajenö? ²⁷ Ö̦jö ma cui, fei a lä cui, cama bäma ebä mashi malä daö wei. Yai Bada tänö a shömabä a lä yaileno wei a yai wawäblou cadidio däjä, a nia daimije —bä cuma. ²⁸ Inaja bä cuma yalo, Yai Bada etä yafi jamö Jesúsnö bä damaö ja, a wa̦ i̦cali fama. Abinaja a cuma. —¿Camiyä wamale daö da culanö? Camiyä ma cui, ya jaba lä cuono wei jamö wama tä daimi. Ö̦jö ma cui, camiyä ya juu bufi doblao tänö ya juu bädaonomi. Wale lä shömöleno wei a lä cui a bejedimou. Ö̦jö wama a ca̦i daimi. ²⁹ Camiyänö ya shino daö lä cule. Cama a lä culadi jamö ya cuoma ya malä waloqueno wei. Ö̦jönö wale shömölema —a cuma. ³⁰ Inaja a cuu yalo, a nia juwäama ma cujei, a nia yai lä shämou wei etä cuonomi showawä yalo, bä imicö queonomi. ³¹ Ö̦jö ma cui, ai bä bluca lä cuinö a wa̦ bejedi bufia fe yadilemaje. Abinaja bä cuma. —Yai Bada tänö a shömabä a lä yaileno wei a lä cui, fei a waiquiwä. ¿Wedi tabä ai bäma tä nö li dabou nomöjöquei? Yai Bada e nö ö̦jöböamobä, fei a lä cuinö, tä nö lä quilijii tä bluca wawämaö malä waiquii—bä cuma. ³² Jesús a wa̦fa wajado lä wayoaö wejei, faliseo bä bada lä cuinö bä a̦ fa ji̦liläjenö, cama bä ma cuinö, nofi bäyäalewä blowäjäwä bä ma cuinö, Yai Bada etä yafi jamö bä bada lä läono wei bä nija, Jesús a juwäamaö bufimaje. ³³ Ö̦jö däjä, judio bä nija abinaja Jesús a cuma. —Cafä wamacö nija ya nö dedejedou fa bälonö, wale lä shömöleno wei nijamö ya nia juu co̦o. ³⁴ Ö̦jö däjä, wamale nia ma dayäö wei ma cui, wamale nia dablaimi. Ya nia lä cuo wei jamö, wamacö juu daomi —a cuma. ³⁵ Judio bä wa̦liyou ja, abinaja bä cuma. —Fei a lä cui, ¿wedi jamö a nia li juu fa nomöjöonö, a wa̦ li? Bei bäma a nia jo̦wa dablaö co̦daaimi. Clesiateli bä nijamö, ai bämacö judio lä coyocole bä nijamö, ¿ö̦jamö a nia juu tawä, shomi täbä nija tä a̦ li wäyäö nomöjöobä? ³⁶ “Wamale nia ma dayäö wei ma cui, wamale nia dablaimi”, a cuma. “Ya nia lä cuo wei jamö, wamacö juu daomi”, a ca̦i cuma. ¿Ö̦jö tawä? ¿Wedinaja a bufi yai fa cunö, bei a wa̦ li cuo cufe? —bä cuma. ³⁷ Bä iyaö waicou lä bufiono wei däjä, bä yai co̦camobä jamö, Jesús wawädowä a ubladaliyoma. A fa ubladalunö, a wa̦ i̦cali faö ja, abinaja a cuma. —Ai bä amishaö bädao ja, camiyä nija bä yai fa icubonö, bä amishi co̦oyolubä. ³⁸ Camiyä wale a̦ bejedi lä bufii wejei bä lä cui, bei bä bufi jamö, ba̦limiblamamodima u fa bäda bädamonö u nia caläö cuaaö, Yai Bada etä a̦ lä cuu weinaja showawä —a cuma. ³⁹ ¿Ö̦jö tawä? Cama a wa̦ bejedi lä bufii wejei bä lä cui nija, Yai Bada tä Bufi nia lä jöböamou wei tä a̦fa yai tama. Fedu jamö a doblaodayobä a ösönomi showao yalo, a Bufi jöböamou showaono malä mlai. ⁴⁰ Jesús a wa̦ ji̦liaöje däjä, abinaja ai bä cuma. —Yai Bada bäma a wa̦no wäyälewä nö lä dabole, fei a waiquiwä —ai bä cuma. ⁴¹ Ai bä lä cui, abinaja bä cuma. —Yai Bada tänö a shömabä a lä yaileno wei, fei ö̦jö a waiquiwä —ai bä cuu mö feduoma. Ö̦jö ma cui, ai bä mö feduwä lä cui, abinaja ö̦jö bä li cuma. —A shömabä a lä yaileno wei a lä cui, Calilea jamö a oshe nia wawäblono malä mlai. ⁴² Yai Bada etä a̦ oni cuu malä wawädoo wei. A shömabä a lä yaileno wei a lä cui, bada tä David a nodiwä nia cuo. Belenateli bä nijamö a nia oshe tablamou, David a oshe lä cuono wei jamö showawä, ¿ö̦jö tawä? —bä cuma. ⁴³ Inaja bä a̦ cuablalou ja, Jesús a wa̦ ja, bä bufi bluca sheleleolaliyoma. ⁴⁴ Ai bä lä cuinö a juwäamaö bufi ma doblaono wejei ma cui, moli ma cui imicö queo bädaonomi. ⁴⁵ Ö̦jö däjä, Jesús a juwäabeje, bada bä lä shömöleno wejei bä lä cui, shinoco bä waloa co̦quema. Nofi bäyäalewä bä lä blowäjäi bä ma cuinö, faliseo bä ma cuinö, abinaja ö̦jö bä nowa tamaje. —¿Wedi tabä bei wama a ca̦i li juu showadaonomi? —bä nowa tamaje. ⁴⁶ Bä lä shömöleno wejei bä bada lä cui, abinaja bä cuma. —Quiji a lä cui, a wa̦ yai walalawä fe balojowä. Ö̦jö a wa̦ yai ji̦limamou lä culenaja, yedu ja ma cui, fei däjä ma cui, ai bä a̦ ji̦limamou cuwämi waiquiwä —bä cuma. ⁴⁷ Abinaja faliseo bä bada cuu nomöjöoma. —Cafä wamacö ma cui, ¿ö̦jö nija wamacö nia ca̦i luluamou dicoo tawä? ⁴⁸ Bada ai bä ma cuinö, faliseo ai yamacö ma cuinö, ¿ö̦jö yama a wa̦ bejedi lä bufii wei, wama tä a̦ ji̦libou da culanö, wama a bufii mö feduobä? ⁴⁹ Ö̦jö ma cui, fei bä lä co̦camole bänö Moisesi etä a̦ daö fa mlacujenö, bä li lulamou. Yai Bada nija bä waimobä cäbä —faliseo bä bada cuma. ⁵⁰ Ö̦jö däjä, cama faliseo ai a bada lä cui, a wa̦ fama, Nicodemo a wa̦fa lä cuono wei, Jesús nija a jaba icua fe lä jaluqueno wei a lä cui. Cama ai ebä nija abinaja a cuma. ⁵¹ —Ma, inaja mlai. Inaja Moisesi bäma etä a̦ lä tabole tä a̦ cuimi. Cama bäma a wa̦ ji̦liaö balöa mlai ja, a yai lä cuaaö wei bäma tä daö mlalanö, bäma a nia jömaö showadaomi —a cuma. ⁵² Abinaja cama nija bä cuu nomöjöoma. —¿Cafä Calileateli wa mö fedua tawä? Yai Bada etä a̦ oni da mö. Calilea jamö Yai Bada a wa̦no wäyälewä a nia lä wawäblou wei, tä a̦fa wäyämoimi —bä cuma. ⁵³ Ö̦jö däjä, cama bä yafibö jamö bä bluca co̦o co̦omobodayoma.

¹ Ö̦jö bä bluca fa co̦obomobodunö, Oliba tä balöcö jamö, Jesús a li juma. ² Tä mö jaluaimaö däjä, Yai Bada etä yafi jamö Jesús a jua fenaa fa co̦lunö, ö̦jö nija bluca täbä co̦camou fenao co̦oyoluma. A fa loicunö, tä a̦ wäyäö co̦oma. ³ Ö̦jö däjä, a joleblalobä jamö a suwä fa dalalöjenö, bada bä lija a juwämalemaje. A fa juwämalöjenö a ca̦i waloquemaje. Moisesi tä a̦ ja täbä lä damaö wejei bä ma cuinö, faliseo bä bada ma cuinö, ö̦jö bänö a suwä ca̦i fa jujenö, a möamoblamalemaje. ⁴ Abinaja Jesús nija bä cuma. —Tä a̦ wäyäle. Ei a suwä joleblalobä jamö a dalalemaje, cäcöbö yacao däjä. ⁵ ¿Ö̦jö tawä? Inaja bä lä cuaaö wei bä lä cui, Moisesinö bä yai shämaö bufima, maa mabänö. Inaja tä a̦ oni malä cuu wei. ¿Wedinaja cafänö wa nofi yai tabou? —a nowa tamaje. ⁶ ¿Ö̦jö tawä? Jesús a nia fa wabajenö bä a̦ li cuoma, Moisesi etä a̦ ja a wa̦ shominajaaö ja, a wa̦fa dobloimi tabeje. Jesús a lolanö, bei iminö, coshi coshi bä jamö tä a̦ onimama. ⁷ A wa̦lidiije ja, a ubladaliyoma. A fa ubladalunö, abinaja bä nowa tama. —Ja̦o, ö̦jö lä. Cafä ai wa lä cuinö, wa̦lidiwä wa tä taö dao lä mlai wanö, fei a suwä nija wa ma jaba shäyäabä, ö̦jö lä. ⁸ Inaja bä nowa fa talönö, a loa fa co̦icunö, coshi coshi a jamö bei iminö a onimou co̦oma. ⁹ Ö̦jö ma cui, Jesús a wa̦ fa ji̦liläjenö, bä yanöcöwä bluca co̦oquema. Bada bä co̦o fa balöoicunö, fiya bä co̦o juoquema. Jesús a loo juobä jamö, suwä a yami ublaa jäaliyoma. ¹⁰ Suwä nija Jesús a mamo fa showaicunö, abinaja e cuma. —Wa shäö bufi lä doblao wejei, ¿wedi jamö bei bä li cuoquei cufe? Wa shämobä, moli a ma cui, ¿bei a wa̦ ca̦i faö nomöjöo mlao cufe? —e cuma. ¹¹ —Ma, tä a̦ wäyäle. Moli ma cui, a wa̦ ca̦i fanomi —a suwä cuma. Abinaja Jesús e cuma. —Camiyä ma cui, ya wa̦ ca̦i nia faimi. A da co̦jamö. Wa̦lidiwä wa tä taö co̦daaö mlai —e cuma. ¹² Judio bä nija Jesús a wa̦ faö co̦o ja, abinaja a cuma. —Yanowamö ya täbä wacacamabobä, camiyä ei ya shi̦i. Camiyä nija bä lä nocao wei bä lä cui, mö didi jamö bä nia juimi. Camiyä ya shi̦i wacacaobä jamö bä cuo ja, ba̦limi bä nia cuo —a cuma. ¹³ Ö̦jö däjä, Jesús nija abinaja faliseo bä bada cuma. —Cafä wa wa̦fa wäyämamou bädao dicoo ja, wa wa̦fa bejedimou tabeje, tä cuami waiquiwä —bä cuma. ¹⁴ Abinaja Jesús e cuu mö feduoma. —Camiyä ya wa̦fa wäyämamou ma bädao wei ma cui, ya bejedimou. Ya cuo lä balöono wei tä ma cui, ya nia lä juu wei tä ma cui, ya tä malä dale. Ö̦jö ma cui, cafä wamacö lä cuinö, ya cuo lä balöono wei wama tä shino daimi. Ya nia lä juu wei tä ma cui, wama tä ca̦i daimi. ¹⁵ ’Cafä wamacö lä cuinö, yanowamö showadi bä bufi lä cuaablalou weinaja, wamacö bufi fa cuaablalonö, wama täbä li jömaö. Camiyä ya lä cuinö ya täbä jömaimi. ¹⁶ Ö̦jö ma cui, ya täbä jömaö ma bädao wei, bejedi lä ya wa̦. Ya täbä jömaö cadidobä, camiyä ya bufi lä cuu weinaja ya nia cuu bädao malä mlai. Wale lä shömöleno wei a lä cuinö, wale a̦ fa bayelibonö ya wa̦ faö malä cui. ¹⁷ Moisesi wama etä a̦ oni lä tabole sibä jamö, abinaja tä a̦ cuu. Bolacabö cäcöbö a̦ nö wäo fe usucuwä ja, “Bejedi lä wafäcö a̦”, wama cäcöbö nofi nia tabou. ’Einaja tä a̦ cuu. ¿Ö̦jö tawä? ¹⁸ Camiyä ya wa̦fa wäyämamou. Fayä a ma cuinö, wale lä shömöleno wei a showawä lä cuinö, ö̦jönö yale a̦fa ca̦i wäyäö —Jesús a cuma. ¹⁹ Inaja a cuma yalo, abinaja bä cuu nomöjöoma. —¿Wedi jamö Faafä bei a, ö̦jö lä? Abinaja Jesúsnö bä nowa tama. —Fayä wama a daimi waiquiwä. Camiyä wamale ca̦i daimi. Camiyä wamale daö fa cunoja, Fayä a ma cui, wama a nö ca̦i daö mö feduobö wei—bä nowa tama. ²⁰ Yai Bada etä yafi jamö bä yömölaö ja, einaja a cuma, Yai Bada nija bä blada lä jöböblaaö wejei, bä blada didiobä tä lä cule jamö. Ö̦jamö bä yömölaö ma wawädoono wei ma cui, a juwäamanomije. A yai nia lä shämou wei etä cuo showadaono malä mlai. ²¹ Judio bä nija abinaja Jesús a cuu co̦oma. —Ya nia julayou. Wamale nia ma dayäö wei ma cui, wamacö wa̦lidiwä showai wamacö nia nomalaliyo. Ya nia lä cuo wei jamö, wamacö juu daomi —a cuma. ²² Ö̦jö däjä, judio bä wa̦liyoma. —¿Cama a nia shämou daanö? “Ya nia lä cuo wei jamö, wamacö juu daomi”, a malä cui wei —bä cuma. ²³ Abinaja Jesús a cuma, ö̦jö bä nija. —Eja cafä wamacö li cuo showadaoma wamacö, camiyä fedu jamö ya li cuo balöoma. Bita jamö wamacö lä bälöblai, ö̦jö lä wamacö showawä, camiyä ya shino shomi. ²⁴ Wa̦lidiwä showawä wamacö nia lä nomablou wei tä ja, bämacö yömölalema. ¿Ö̦jö tawä? “Yai Bada tänö a nia lä shömano wei, fei a waiquiwä”, wamale nofi taboimi ja, wamacö wa̦lidiwä showai wamacö nia malä nomablou wei —a cuma. ²⁵ Abinaja cama nija bä cuma. —Cafä ¿wedi bei wa dodijiwä? Abinaja Jesúsnö bä nowa tama. —Ya wa̦fa jaba da wäyämoblei däjä, bämacö nowa da tableinaja, ö̦jö ya waiquiwä. ²⁶ Cafä bämacö a̦fa tabä, bluca ya tä tabou. Bämacö jömabä tä bluca. Ö̦jö ma cui, wale lä shömöleno wei ya wa̦ fa ji̦lilänö, yanowamö täbä nija, ö̦jö lä ya wa̦ nia shi̦lo yai wäyäö. Ö̦jö a bejedimou —bä nowa tama. ²⁷ ¿Ö̦jö tawä? Bä Fö̦ö e a̦fa yai lä wayoano wei tä ja, bä bufi jaducublonomi. ²⁸ Ö̦jö cudeenö, abinaja Jesúsnö bä nowa taö nomöjöoma. —Ya lä yanowamöblaleyoluno wei ya lä cui, wamale befi ca̦i i̦tamaö waiquio däjä, ö̦jö lä däjä, wamale nö nia bejedi ö̦jöböaö. “Ö̦jö lä a waiquiwä cuoma, a da cubleinaja showadawä”, wamale nofi nia tabou. “Cama a bufi cuu lä bädao weinaja, a cuaanomi. Bä Fö̦önö tä a̦ wäyäö ja, a wa̦ yai cuoma”, wamale nofi nia tabou. ²⁹ Wale lä shömöleno wei a lä cuinö wale ca̦i cua showaa lä cule. Wale daanomi. Ya yamimi. Showadi ya bufi malä doblamabou wei —bä nowa tama. ³⁰ Inaja a wa̦ cuablalou showao däjä, bluca bänö a wa̦ bejedi bufilemaje. ³¹ Ö̦jö däjä, Jesús a wa̦ bejedi lä bufileno wejei bä judio lä cui bä nija abinaja a cuma. —Showadi wamale a̦ nofi cadidibou ja, camiyä nija bejedi lä wamacö nia shino yai nocao. ³² Yai Bada nija tä a̦ bejedi lä cule, wama tä a̦ bejedi fa dalalönö, ö̦jö tä a̦nö wamacö nia shino jujeblamolayou —a cuma. ³³ Abinaja Jesús nija bä cuma. —Ablaamö nodiwä yama ecö waiquiwä. Yedu ja ma cui, shomi täbä nija yamacö ca̦i nosiemamou mlai ja, yamacö showawä. ¿Wedi tabä “Wamacö nia jujeblamolayou”, wa li cuu dicoo cufe? ³⁴ Abinaja Jesúsnö bä nowa tama. —Cafä wamacö nija ei ya wa̦ lä cui, bejedi lä ya wa̦. Wa̦lidiwä tä lä taö wejei bä lä cui, wa̦lidiwä tä ja, bä li nosiemamou waiquiwä. Ö̦jö lä wa̦lidiwä tänö bä yai tabou. ¿Ö̦jö tawä? ³⁵ Täbä ojodamobä täbä lä tabou wejei, wama tä daö. Shomi täbä nija bä lä nosiemamou wei bä lä cui, ö̦jö bä nija bä yanöcöwä cudiobä bämi. Bä ojodamobä bä li tabouje. Bä ijilubö ebä cadidiwä lä cui, ö̦jö ebä nia shino yanöcöwä cudio. ³⁶ Ö̦jö cudeenö, Yai Bada bei Ijilubö ya e waiquiwä lä cuinö, wa̦lidiwä tä ja bämacö yai jujeblaö ja, wamacö nia yai jujeblamolayou. ³⁷ ’Ablaamö nija wamacö lä nodiblaliyono wei, ya tä daö lä. Ö̦jö wama ecö bäwä ma cui, wamale a̦ waii dicoo yalo, wamale shäö bufi doblao. ³⁸ Fayä nijamö ya tä lä möno wei ya tä a̦fa wäyäö. Inaja showawä, cafä wamacö yai lä fö̦ömou wei nija wama tä a̦ lä ji̦lileno wei, wama tä li taö dicoo —bä nowa tama. ³⁹ Abinaja bä cuma. —Ablaamö a lä cui nija yamacö yai fö̦ömou. —Ma —Jesús a cuma—. Ablaamö wama ecö ijilubö yai cuo fa cunoja, ö̦jö a lä cuaano weinaja, wamacö nö ca̦i cuaaö yauabö wei. ⁴⁰ Ö̦jö ma cui, inaja wamacö cuaaimi dicowä. Yai Bada nijamö ya wa̦ lä ji̦lileno wei, cafä wamacö nija ya tä a̦ bejedi ma wäyäö wei ma cui, wamale shäö bufi doblaa dicoa lä cule. Inaja Ablaamö a cuaano malä mlai. ⁴¹ Wamacö fö̦öbö yai lä cuaano weinaja, wamacö cuaaö yauaö dicoa lä cule —Jesús a cuma. Abinaja bä cuma. —Shomi yamacö ijilubö malä mlai. Yamacö yai lä fö̦ömou wei, ö̦jö lä Yai Bada tä waiquiwä —bä cuma. ⁴² Abinaja Jesúsnö bä nowa tama. —Yai Bada wama ecö ijilubö cuo fa cunoja, wamale nö nofimabö wei. Ö̦jö lä Yai Bada nija ya cuoma ya malä juno wei. Camiyä ya juu bashio bufi fa doblaonö mlai, ö̦jönö wale yai shömölema. ⁴³ ¿Wedi tabä wamale a̦ ji̦lia möblaimi ö̦jö lä? Wedi tabä mlai. Wamale a̦ ji̦liaö moji waiquiwä yalo, wamale a̦ ji̦lia möblaimi. ⁴⁴ ’Faafä fecula bada wama ecö yai ijilubö. Ö̦jönö tä tamaö lä bufii weinaja, wamacö cuaaö bufi doblao. Jaba däjä ma cui, täbä shäö bufi doblao showaoma. A bejedimou daimi yalo, tä lä bejedi wei tä julii daimi waiquiwä. A jolemou däjä, cama a bufi lä cuaaö wei etä wawälayou. Jolemolewä a waiquiwä malä cui. Bä lä jolemou wei bä lä cui, ö̦jö nija bä li fö̦ömou. ⁴⁵ ’Ö̦jö ma cui, camiyä ya li bejedimou. ¿Ö̦jö tawä? Cafä wamacö nija bejedi ya tä a̦ li yai wäyäö cudeenö, wamale a̦ bejedi bufiimi. ⁴⁶ ¿Wedi jamö a lä cuinö wale nia dobloimi jömaö, ö̦jö lä? Ya jolemoimi waiquiwä ja lä, ¿wedi tabä wamale a̦ bejedi bufiimi? ⁴⁷ Yai Bada ebä lä cuinö, cama Yai Bada etä a̦ ji̦liaöje. Yai Bada wama ecö waiquiwämi yalo, wama etä a̦ li ji̦liaimi —bä nowa tama. ⁴⁸ Judio bä a̦ juoma. —Cafä Samaliateli bäfä a̦fa wa̦li wäyäö ja, yamacö a̦ bejedi. Fecula wa lä bälömabolenö, wa wa̦ li —bä cuma. ⁴⁹ Abinaja Jesús a cuma. —Fecula ya bälömaboimi. Fayä ya nö yai dodijidawä ma ö̦jöböamaö wei ma cui, cafä wamacönö wamale nö li waiblaö. ⁵⁰ Ö̦jö ma cui, wale a̦fa doblao tabeje, camiyänö ya tä dayäimi. Ö̦jö tä shino lä dayäö wei tä cuadayoa. Ö̦jönö wale nia shino jömaö. ⁵¹ Cafä wamacö nija ei ya wa̦ lä cui, bejedi lä ya wa̦. Wale a̦ nofi lä cadidibou wejei bä lä cui, bä nomaö mlaicätä —a cuma. ⁵² Jesús nija abinaja judio bä cuma. —Ei malä cui, ¡fecula wa malä bälömabole! Ablaamö a ma cui, a nomalayoma. Yai Bada a wa̦no wäyälewä bä ma cui, inaja showawä. Ö̦jö ma cui, “Wale a̦ nofi lä cadidibou wejei bä nomaö mlaicätä”, bei wa li cuu. ⁵³ Bämacö nö badabö Ablaamö a ma cui, a nomalayoma. ¿Cafä wa shino yai lojode ayawä daanö? Yai Bada a wa̦no wäyälewä bä ma cui, bä ca̦i nomalaliyoma. Cafä ¿wedi bei wa wa̦fa yai li jilou? —bä cuma. ⁵⁴ Jesús abinaja a cuu mö feduoma. —Camiyä ya wa̦fa doblao tamamou bädao ja, tä nowa cuami waiquiwä. Wale a̦fa yai doblao lä taö wei a lä cui, Fayä a, wama a jo̦wa lä bufibou wei a showawä lä cui. ⁵⁵ Ö̦jö ma cui, Fayä wama a daimi. Camiyänö ya shino daö. ¿Ö̦jö tawä? “Ya daimi”, ya cuu fa cunoja, cafä wamacö jolemou lä culenaja, ya nö cuo mö feduobö wei. Ö̦jö ma cui ya daö lä. Ya wa̦ nofi ca̦i cadidibou. ⁵⁶ Wamacö nö badabö Ablaamö a lä cuinö, a bufi doblalolanö wale nö daboma. Ya nia lä wawäblou wei tä daa fa balölalönö, a bufi doblao dodijioma —a cuma. ⁵⁷ Ö̦jö däjä, abinaja Jesús nija judio bä cuma. —Jolemo dijä. Lasha 50 wa famaö showao ma mlao däjä ma cui, ¿“Ablaamö ya daö”, bei wa li cuu? —bä cuma. ⁵⁸ Abinaja Jesús e cuma. —Cafä wamacö nija ei ya wa̦ lä cui, bejedi lä ya wa̦. Ablaamö a cua showaa mlai ja, ya cuo lä balöono wei, ei ya —e cuma. ⁵⁹ Inaja a cuma yalo, maa mabä ya̦caalalemaje, a shäyäbeje. Ö̦jö ma cui, Jesús a nofi fa mojodublalufälönö, Yai Bada etä yafi jamö a siboa co̦a ja̦toa showalayofälöma.

¹ Jesús a jayualanö jubäbö tä dalalema, jubäbö showadawä a oshe lä tablaleno wei a lä cui. ² Cama ebä lä nocamabono wei bänö a wa̦liije ja, abinaja bä cuma. —Tä a̦ wäyäle. Ei a lä cui, ¿wedi mayo ja, a li jubäböblaliyoma? Cama a doblou lä mlai tä nowanö, ¿inaja a li tablamolayoma daanö? Ma, bä nöö, bä fö̦ö, ¿ö̦jö lä cäcöbö mayonö a jubäbö tawä? —bä cuma. ³ Abinaja Jesúsnö bä nowa tama. —Ma. Fei a lä jubäbö wei, cama etä nowanö mlai. Bä nöö e ma cui, bä fö̦ö e ma cui, ö̦jö cäcöbö mayonö ca̦i mlai. Cama nija Yai Bada etä lojode nia yai fa dablamonö, ö̦jö a waiquiwä. ⁴ Wale lä shömöleno wei a lä cuinö tä tamaö lä bufii wei bäma tä taö showadaobä cätä, tä wacacawä lä showai däjä. Tä mö fa dödölönö, täbä ojodamou daomi. ⁵ Eja, ei ya cua lä showale däjä, yanowamö ya täbä wacacamabobä ya shi̦i —bä nowa tama. ⁶ Einaja a cuolanö, mashita jamö tä fa cläshäcönö, bei canojoli bänö tä a̦jiblamalema. Inaja a fa tablalönö, a̦ji a̦ji cäcönö, jubäbö a lä cui mamo casöcö ya̦leblalema. ⁷ Abinaja a nowa taö showadaoma. —Siloe uca jamö, a mö da ya̦lömolöcölö —a nowa tama. ¿Ö̦jö tawä? Siloe tä a̦ lä cui, “Shömano”, tä a̦ li cuu. Bei. Einaja Jesúsnö a nowa tama yalo, a mö ya̦lömobä a ayoma. A mö fa ya̦lömolönö, a lä co̦layou wei, tä möablalaö cuaalanö a co̦layofälöma. ⁸ A lä jubäböono wei nija bä bälöo lä ajedeono wei bä lä cui, bä bufi wedinajamoma. A jubäbö nacou ja, imicö dodoablalou lä läaano wei a lä möno wejei bä lä cui, inaja showawä bä bufi wedinajamou ca̦i cuo mö feduoma. Abinaja bä cuma. —Quijamö a lolanö, imicö dodoablalou da läodiblei, ¡fei a nofi lä cui! —bä cuma. ⁹ —Awei. Ö̦jö lä a —ai bä cuma. —Ma —ai bä cuu mö feduoma—. Ö̦jö a mö li owäbou bäa lä cule. A lä jubäböono wei a lä cui, abinaja cama a cuma. —Ö̦jö lä ya —a cuma. ¹⁰ Abinaja bä cuma. —Ja̦o. Ö̦jö lä wa ja lä, ¿wedinaja wa mamocu li jaloa cua bälayoma? —bä cuma. ¹¹ Abinaja a cuma. —Jesús a wa̦fa lä culenö, a̦ji a̦ji cäcönö wale mamo casöcö fa ya̦lelönö, Siloe uca jamö wale shömölema, ya mö ya̦lömobä. Ö̦jö cudeenö, ya julayoma. Ya mö fa ya̦lömolönö, bei ya mamocu yai jalolayou cublei —a cuma. ¹² —Ö̦jö a lä cui, ¿wedi jamö a li culayou cufe? —bä cuma. —Cuwi —a cuma. ¹³ Ö̦jö däjä, a lä jubäböono wei a lä cui, faliseo bä bada nija a ca̦i jumaje. ¹⁴ ¿Ö̦jö tawä? Jesúsnö a̦ji a̦ji lä tablaleno wei, mamocu ca̦i lä jalomaleno wei tä lä cui, täbä yanöcöobä tä mö jalu jamö tä tama. ¹⁵ Mamocu lä jalomaleno wei tä ja, faliseo bä badanö a wa̦lii co̦omaje. A wa̦liije ja, abinaja bä nowa tama. —A̦ji a̦ji cäcönö wale mamo casöcö fa ya̦lelönö, ya mö ya̦lömoa fa majölönö, ya täbä möö lä cule —bä nowa tama. ¹⁶ Faliseo ai bä bada lä cui, abinaja bä cuma. —Ma. Ei a lä jalomalöfe, Yai Bada tänö a shömanomi. Täbä yanöcöobä, tä mö jalu nofi cadidibou malä mlai —bä cuma. Ö̦jö ma cui, abinaja ai bä cuu mö feduoma. —Wa̦lidiwä talewä a cuo fa cunoja, tä nö lä quilijii tä lä wawämafenaja, a nö cuaaö fe balojoobö mlai —bä cuu mö feduoma. Einaja bä bluca cuu majöadalou ja, bä bufi shedequeblaliyoma. ¹⁷ Ö̦jö däjä, a lä jubäböono wei nija Jesús a wa̦lii cadidiomaje. —Cafä wa mamocu lä jalolayono wei wanö, ¿wedinaja cafänö wa nofi li tabou? —bä cuma. —“Yai Bada a wa̦no wäyälewä, ö̦jö a”, ya nofi tabou —a cuma. ¹⁸ A mamocu lä jalolayono wei, a jaba daö fa mlacujenö, judio bänö a wa̦ bejedi bufii jaöonomije. “A ma jubäböono wei ma cui, mamocu jalomalema”, a nofi tabonomije. Ö̦jö cudeenö, bei bä nöö e sho, bei bä fö̦ö e sho cäcöbö nacamaje. ¹⁹ Cäcöbö wa̦liije ja, abinaja bä cuma. —¿Ei ijilufä a tawä, jubäbö showadawä wafä a jo̦wa lä tano wei a lä cui? ¿Wedinaja a li fa cublalunö, täbä li möö majöwä? —bä cuma. ²⁰ Bä nöö e, bä fö̦ö e sho, abinaja cäcöbö cuma. —Ei ijiluyä a. Yafä a daö. Jubäbö showadawä yafä a lä tano wei, yafä tä ca̦i daö. ²¹ Ö̦jö ma cui, fei däjä täbä möö lä nomöjöo wei, yafä tä daimi. Mamocu lä jalomaleno wei a ma cui, ö̦jö yafä a daimi. Ijiluyä a bada malä waiquii, cama a da wa̦lije. Cama a wa̦ nö wäobä a —cäcöbö cuma. ²² Judio bä nija cäcöbö quilima yalo cäcöbö a̦ li cuoma. ¿Ö̦jö tawä? Judio bada bä a̦ wayou malä waiquiono wei. “Yai Bada tänö a shömabä a lä yaileno wei, ö̦jö Jesús a waiquiwä”, wawädowä bä lä cuu wei, bä nia joyamaje. Judio bä yododabä yafi jamö, bä nia coyocomabou co̦daanomije. ²³ Ö̦jö cudeenö, bä nöö e ma cui, bä fö̦ö e ma cui, cäcöbö a̦ cuoma. “A bada malä waiquii, cama a da wa̦lije”, cäcöbö lä cuno wei. ²⁴ Einaja cäcöbö cuma yalo, a lä jubäböono wei a nacaö co̦omaje. Abinaja a nowa tamaje. —Yai Bada tä nofi shino yai da doabla. Wa mamocu lä jalomaleno wei, yama a dobloimi daö waiquiwä —bä cuma. ²⁵ Abinaja e cuu mö feduoma. —Cuwi. Ö̦jö a doblou lä mlai ya etä daimi. Ya lä jalolayono wei ya tä shino yai daö. Ya ma jubäböono wei ma cui, fei däjä ya täbä dablaö —e cuma. ²⁶ A wa̦lii co̦oje ja, abinaja bä cuma. —¿Wedinaja wa li fa taamanö, wa li jalolayoma? ¿Wedinaja a fa cuaanö, wa mamocu li wacacablamalema? —bä cuma. ²⁷ Abinaja e cuma. —Uo. Bämacö yömölaö ma waiquiono wei ma cui, wamale a̦ ji̦lianomi. ¿Wedi tä tabä, wamale a̦ ji̦liaö bufi doblao co̦o? Ja̦o. Cafä wamacö ma cui, ö̦jö nija wamacö nocaobä, ¿bei wamale wa̦lii co̦o daanö? —e cuma. ²⁸ A wa̦ lafujalajenö, abinaja a nowa tamaje. —Ö̦jö nija wa nocaobä, cafä wa. Camiyä yamacö lä cui, Moisesi nija yamacö nia lä nocao wei yamacö li cua waiquia. ²⁹ Moisesi nija Yai Bada tä a̦ lä fano wei, yama tä daö ma cui, fei a lä cui, a jaba lä cuono wei yama etä daimi. ³⁰ A mamocu lä jalolayono wei a lä cuinö abinaja bä nowa tama. —¡Shädayai! A jaba lä cuono wei wama etä daö ma mlai ma cui, ¡wale mamocu nofi lä jalomaleno wei! ³¹ Yai Bada tänö wa̦lidiwä talewä bä a̦ ji̦liaimi. Ö̦jö bäma tä daö. Yai Bada nija bä möfe bolanö, a wa̦fa Bada doblao lä taö wejei bä lä cui, ö̦jö bä a̦ shino ji̦liaö ayao, tä tamaö lä bufii wei tä ja, bä lä cadidou wei bä lä cui. ³² Bita jamö täbä yanowamö lä bälöle, yedu ja täbä jaba ma bälöaliyono wei ma cui, camiyä wale lä taamano weinaja, moli ma cui, tä a̦ ca̦i jaba ji̦limou buonomi. Fei däjä ma cui, tä a̦ ji̦limamoimi showawä. Jubäbö showadawä bä lä tablamou wei bä lä cui, bä mamocu nö dodijidablobimi waiquiwä. ³³ Fei a lä cui, Yai Bada tänö a shömaö mlao fa cunoja, a nö cuaabö mlai —bä nowa tama. ³⁴ Abinaja a nowa tamaje. —Cafä wa̦lidiwä talewä wa oshe fa cublalunö, wa cua lä showale wa lä cuinö, ¿camiyä wamalecö nia damaö majöo daanö? —a nowa talajenö, sibo jamö i̦cali a jilululemaje. ³⁵ Mamocu lä jalolayono wei, Jesúsnö a wa̦fa jilulamou ji̦lilema. Ö̦jö däjä, a fa dayäblalönö, abinaja e cuma. —A lä yanowamöblaleyoluno wei a lä cui, cafänö ¿wa wa̦ bejedi bufii cule? —e cuma. ³⁶ —Bada tä. ¿Wedi jamö a lä cui, bei a yanowamöblaliyoma, ya wa̦ bejedi bufibä? —a cuma. ³⁷ —Fei ya lä yanowamöblaleyoluno wei, wale möö a lä cule —Jesús e cuma—. Cafä nija ya wa̦ lä fale, ö̦jö ya waiquiwä. ³⁸ —Bada tä. Cafä bäfä a̦ bejedi bufii lä cule —e fa cudalunö, a möfe bodou fa showadalonö, a wa̦fa Bada doblao tama. ³⁹ Jesús abinaja e cuma. —Täbä dobloimi jömamobä, eja, bita jamö ya waloqueyoluma. ¿Ö̦jö tawä? Täbä lä jubäbö wei bänö tä möbeje, ya juma. Bä mamocu a̦fa dodijidawä waiquiwä lä tamou wei bä lä cui, jai jubäbö bä cuo mö feduobä —e cuma. ⁴⁰ Faliseo ai bä lä ajedeono wei bä bada lä cui, ö̦jö a wa̦ fa ji̦liläjenö, abinaja bä cuma. —Camiyä yamacö ma cui, ¿yamalecö a̦fa ca̦i möbloimi taö mada tawä? —bä cuma. ⁴¹ Ö̦jö bä nija abinaja Jesús a cuma. —Wamacö mamocu a̦fa wa̦lidiwä tamou showadao fa cunoja, afä tä nowa nö cuobö mlai. Täbä lä jubäbö wei, täbä shino bayeliblamou malä cui. Ö̦jö ma cui, “Yama tä dodijidawä möö waiquia lä cule”, wamacö cuu dicoo ja, afä tä nowa cua showaa.

¹ Jesús a wa̦ faö co̦oma. —Cafä wamacö nija ei ya wa̦ lä cui, bejedi lä ya wa̦. Oweja bä lä ji̦colobou wejei yoca jamö bä faö lä mlai, casö jamö bä lucäö lä ja̦too wei bä lä cui, bä lä tomömou wei ö̦jö bä li. Shomi bä madofibö lä lämaö wejei, ö̦jö lä bä showawä. ² ’Ö̦jö ma cui, bei yoca jamö a yai lä faö wei a lä cui, oweja bä lä nowamaö wei ö̦jö a yai. ³ Ö̦jö a faö bufio ja, yoca lä jolemabou wei a lä cuinö e yoca caloblaö showadao. ¿Ö̦jö tawä? Oweja bänö ö̦jö a wa̦ ji̦lileije. Oweja bä a̦fa jayumalanö, sibo jamö bä lululefälöö. ⁴ Sibo jamö, cama ebä ca̦i bluca fa falönö, a balöafälöö. A wa̦ nö fa ö̦jöböajenö, ö̦jö nija oweja bä li yauquei. ⁵ Shomi nija bä yauomi, bä shino doculayou. Shomi bä a̦ nö ö̦jöböaö malä mlajei —a cuma. ⁶ Inaja a cuu yacläoma yalo, tä a̦ a̦fa yai lä wayoano wei, tä a̦fa ji̦liaö cadidionomije. ⁷ Tä a̦ ji̦liaö möblanomi cudeejenö, abinaja Jesús a cuma. —Cafä wamacö nija ei ya wa̦ lä cui, bejedi lä ya wa̦. Oweja bä lä faö wei, camiyä bei ya yoca. ⁸ Ya juu showao mlao däjä, bä bluca waloo lä baloöno wei bä lä cui, bä lä tomömou wei, ö̦jö lä bä li cuoma. Shomi etäbä lä lämaö wejei, ö̦jö lä bä showawä. Ö̦jö ma cui, ö̦jö bä nija oweja bä a̦ juonomi. ⁹ Camiyä ö̦jö bei cä ya yoca. Camiyä nija bä lä faö wei, bä nia jucäamou. Bä iyabä, quilii mlai ja bä nia fadii. ¹⁰ Bä lä tomömou wei bä lä cui, ö̦jö bä li tomömou mö juu. Bä shäö mö juuje. Bä mö watäblaö mö juuje. Camiyä ya lä cui, bä ba̦limi cuobä ya li waloquema, bä yai dodijidawä cudiobä. ¹¹ ’Oweja ya bä yai lä nowamaö wei, ei ya. Ö̦jö ya lä cuinö, oweja ya bä nowamabä, ya nia lä shämou wei tä ma cui ja, ya ojode. ¹² Ai bä lä cuinö, oweja bä nowamabeje bä ma mlai ma cui, bä dobämou bufi fa doblaonö, bä jole jole läo. Oweja cama ebämi waiquiwä cudeenö, yalo waiteli a juu dablaöje däjä, oweja bä fa dacöfälöjenö, cama bä docua ayalayou. Yalo a waitelinö, oweja ba nabä quea fa jeicunö, bä shedequea jäamaquei. ¹³ Ö̦jö bä lä cui, blada bä nowa ja bä läo bädao yalo, bä doculayou. Oweja bä yai nofimaimije —Jesús a cuma. ¹⁴ - ¹⁵ Abinaja Jesús a cuu co̦oma. —Oweja ya bä yai lä nowamaö wei, ö̦jö bei ya. Fayänö wale daö lä culenaja, cama ya ca̦i daö cuwä mö lä fedulenaja, inaja showawä, iba ya bä daö cuwä mö feduwä. Iba bä lä cuinö camiyä wale cai̦ daö mö fedua lä culajei. ¿Ö̦jö tawä? Oweja ya bä nowamabä, ya nia lä shämou wei tä ma cui ja, ya ojode. ¹⁶ ’Ai ya bä oweja ca̦i tabou, fei ya bä lä ji̦colobole mlai. Ö̦jö ya bä blacämaö mö feduobä ya. Ö̦jö bänö wale a̦ ca̦i nia ji̦liaöje. Ö̦jö ya bä fa co̦lönö, oweja moli bä nia shino yododoo. Ya bä nowamabä, moli ya nia shino läo. ¹⁷ ’Iba ya bä bayeliblabä, ya shämou ojode yalo, Fayänö wale nofimaö. Ya demi nia jocädou co̦o cudeenö, ya shämou ojode. ¹⁸ ¿Ö̦jö tawä? Cama bä lojodenö wale nia shäimije. Camiyä ya shämou li fa ojodaonö, ya nia li shämou. Ya shämou ojodaobä, Fayänö wale nö li wa̦lojomabou. Ya demi nia ca̦i jocädou lä co̦o wei, inaja showawä —Jesús a cuma. ¹⁹ Jesús a wa̦ ja, judio bä bufi shedecou co̦oma. ²⁰ Abinaja ai bä cuma. —Fecula a lä bälömabole, a wa̦. A wa̦ faö nofi malä mojodi wei. ¿Wedi tabä bei wama a wa̦ li ji̦lidii? ²¹ Abinaja judio ai bä cuu mö feduoma. —Fei a wa̦ shaliliablalou lä cuaaö weinaja, fecula bänö bei bä a̦ famaö cuwämije. Fecula bänö ¿jubäbö bä mamocu jalomaö daö mada sijewä? —bä cuma. ²² Jelusale jamö judio bä iyaö ca̦i co̦camobä, tä cublou co̦layoma. Judio bä nö badabö lä cuinö, bufi doblalolanö Yai Bada etä nofi yafi jaba lä co̦camoano wejei, ö̦jö tä nofi jaducubolajenö, bä nia iyaö ca̦i co̦camou co̦oma. ²³ ¿Ö̦jö tawä? Maa a quei lä dodijio wei tä cuoma. Yai Bada etä yafi jamö Jesús a juadaloma, a yano lä boaono wei jamö. Salomo ö̦jö e yano a̦fa jilabomaje. ²⁴ Yai Bada etä yafi jamö a juma cudeenö, cama nija judio bä fa co̦camoliyonö, a wa̦lii cadidioyolumaje. —Bei. Cafä bäfä a̦ nö dabou showaa lä cule. ¿Wedi tabä yamalecö yömölaö cadidiomi? Yai Bada tänö a shömabä a lä yaileno wei a lä cui, ö̦jö lä wa waiquiwä ja, wawädowä a wa̦ da wämobo —bä cuma. ²⁵ Abinaja Jesús a cuma. —Bämacö yömölaö waiquiwä ma cui, wamale a̦ bejedi bufiimi. Fayänö tä tamaö lä bufii wei ya tä taö yalo, ya bejedi dablamobä ya waiquiwä. ²⁶ Ö̦jö ma cui, iba oweja wamacömi yalo, wamale a̦ bejedi bufiimi. ²⁷ Iba oweja bä yai lä cuinö wale a̦ yai ji̦liaöje. Ya bä ca̦i daö. Camiyä nija bä ca̦i yauo. ²⁸ Ö̦jö bä lä cui ya bä ba̦limiblamaö. Bä nia ca̦i nomaimi. Camiyä nija ö̦jö bä nia lä jucäaö wei, moli ma cui a ca̦i cuami. ²⁹ Iba oweja bä lä cui, Fayänö bä jöböbema. Ö̦jö a shino yai lojode ayawä. Fayä a ma cui nija bä nia ca̦i jucäamoimi. Ö̦jö nija bä jucäabä, moli ma cui a ca̦i cuami. ³⁰ Fayä sho, ö̦jö yafäcö waiquiwä —a cuma. ³¹ Einaja a lä cuu wei a wa̦ ja, judio bänö maa mabä ya̦caa co̦alalemaje, Jesús a shäyäbeje. ³² Abinaja Jesúsnö bä nowa tama. —Fayänö dodijidawä tä wawämaö lä bufii wei, cafä wamacö nija bluca ya tä wawämalema. ¿Wedi jamö tä nowa yai ja, maa mabänö bei wamale nia li shäyäö? —bä nowa tama. ³³ Abinaja bä cuma. —Wa tä dodijidawä lä wawämaleno wei tä nowa ja mlai, Yai Bada wa tä nö lä waiblaö wei tä nowa ja, bäfä nia yai shäyäö. Yanowamö wa mö feduwä ma cui, cafä Yai Bada wa wa̦fa jilou nofi jushuaö cudeenö, wa nia shäyämou —bä cuma. ³⁴ Cama bä nija Jesús abinaja a cuma. —Yai Bada wama etä a̦ oni lä tabole jamö, ¿Yai Bada tänö cafä Isaeli wama ecö a̦fa bufiblamou wäyänomi daanö? ³⁵ Yai Bada etä a̦ lä cuu wei, tä a̦ ca̦i shominajaö majöo daomi. ¿Ö̦jö tawä? Cafä wamacö nija Yai Bada a wa̦no waloa fa ayaicunö, wamacö jowa bufiblamou. Cafä wamacö bufiblamou wa̦fa wäyämoma ja lä, ³⁶ ¿camiyä bei wamale nia li bufiblaimi, eja, bita jamö Fayänö wale shömabä, wale lä yaileno wei ya lä cui? Yai Bada ya a̦fa Ijilubö jilou yalo, ¿wedi tabä “Yai Bada wa tä nö waiblaö”, wamale nowa li taö dicoo? ³⁷ ’Fayänö tä bluca tamaö lä bufii wei ya tä taimi ja, wamale a̦ bejedi bufi dijä, ö̦jö lä. ³⁸ Ö̦jö ma cui, ya tä yai taö däjä, camiyä wamale a̦ bejedi bufii ma mlai ma cui, ya tä bluca lä taö wei tänö, bä bufi juducua fe da yadiicu. Camiyä nija Fayä a lä cule, wama tä daö fe yadiobä. Cama nija camiyä ya ca̦i lä cule, wama tä ca̦i dabä. Ö̦jö yafäcö —Jesús a cuma. ³⁹ Bada bänö a juwäamaö wabaö ma co̦ono wejei ma cui, a fa moyawäonö a juwäamonomi. ⁴⁰ Jodana u mashi bucadu jamö, Juannö bä fe jaba lä ojomano wei jamö, Jesús a aa fa co̦lufälönö, ö̦jamö a yanöcöquema. ⁴¹ Ö̦jamö Jesús nija bluca bä co̦camolayoma. Bä a̦ wayomayou ja, abinaja bä nowa tayoma. —Fe ojomalewä Juan a lä cuinö, tä nö lä quilijii tä wawämano ma mlai ma cui, fei a wa̦fa da wäyäblei a wa̦ bluca bejedioma —bä cuma. ⁴² Ö̦jamö ai bä blucanö a wa̦ bejedi bufilemaje.

¹ - ² Bedaniateli a Lasalo cuoma. Bä yaö ecöbö ca̦i bälöoma. Marta ai e a̦fa cuoma, María ai e a̦fa cuo mö feduoma. Ö̦jö María a lä cui, toubä nö lä cle̦deli wei toubänö, Bada tä Jesús mamicö fe lä löblaleno wei a suwä cuoma, cama fe̦ta ucunö, mamicö ya̦jöblaö lä majölayono wei a suwä lä cui. ¿Ö̦jö tawä? María bä a̦iyobö Lasalo e lä cui, e jalilioma. ³ Ö̦jö cudeenö, Jesús nija a wa̦fa wäyäbä, bä yaö ecöbönö, ai a shömöbölema. Abinaja a nowa nia tayoluma. “Tä a̦ wäyäle. Afä nofi a jalili tai”, a nowa nia tayoluma. ⁴ Ö̦jö ma cui, Jesúsnö a wa̦fa jalili ji̦liaö däjä, abinaja a cuma. —A lä jaliliale tä wayunö, a nia nomawä cudiomi. Yai Bada a wa̦fa doblao tamobä tä li, Yai Bada ya Ijilubö doblao dablamobä —a cuma. ⁵ Bei. Marta sho, bä fääshä María sho, bä a̦iyobö Lasalo sho, Jesúsnö ö̦jö bä bluca yai nofimaö dodijioma. ⁶ Ö̦jö cudeenö, Lasalo a wa̦fa jalili ji̦liaö däjä, a lä cuono wei jamö a yanöcöa balöquema. Ö̦jamö a fe weyaa bolacalayoma. ⁷ Ö̦jö däjä, cama ebä lä nocamabono wei bä nija abinaja a cuma. —Bei. Judea jamö bämacö juu da co̦o —a cuma. ⁸ Abinaja cama ebä cuma. —Tä a̦ wäyäle. Maa mabänö, judio bänö weyajada ja wa nia ma shäyäno wejei ma cui, ¿ö̦jamö bei wa mö nia li yabaö co̦ofälöö? —bä cuma. ⁹ Abinaja Jesús a cuma. —Bä quili dijä. Tä mö jaba wacacablou lä fenao wei däjä, ¿tä mö wacacawä nö dedeaimi daanö? Tä mö wacacao showaobä jamö täbä juu ja, motoca shi̦i cua yalo, täbä nö mojodili bleaaimi. ¹⁰ Ö̦jö ma cui, didi däjä täbä juu dicoo ja, tä lä wacacai etä cuami yalo, täbä wäcäblou si ijejewä —a cuu ja̦looma. ¹¹ Inaja a cuu fa balöonö, abinaja bä nowa taö nomöjöoma. —Bäma a lä nofimaö wei a Lasalo miquema ma cui, ya la̦maö co̦obä ya nia juu —bä nowa tama. ¹² Cama ebä lä nocamabono wei bä lä cui, abinaja bä cuma. —Tä a̦ wäyäle. A miquema ja lä, a jalou co̦o weicätä —bä cuma. ¹³ A lä nomalayono wei, Jesúsnö tä a̦fa yai wayoama ma cui, showadi täbä modawä ca̦i lä mio wei tä a̦fa bufimaje. ¹⁴ Ö̦jö däjä, Jesús a wa̦ yai wawädoblaliyoma. —Lasalo a nomalayoma. ¹⁵ ¿Ö̦jö tawä? Cama nijamö ya cuonomi yalo ya bufi doblalou, ya cuo lä mlaono wei tänö, wamacö bufi yai jaducublobä. Wamale a̦ bejedi yai bufibä. Bei. Cama nijamö bämacö da ju —a cuma. ¹⁶ Jesúsnö bä nocamabou mö lä feduono wei bä lä cui nija, Tomás a wa̦ fama, Cäcöbä lä e̦lequeblaliyono wei a, a wa̦fa ca̦i lä jilabono wejei a lä cui. Abinaja a cuma. —Jabo. Bämacö ca̦i da ju. Jesús a nomabä jamö, bäma ecö nomaö yädäo mö feduo showadaobä —a cuma. ¹⁷ Bei. Maa maca jamö, Lasalo a nomawä maquebou waiquioje däjä, 4 tä mö didi cublou waiquilayono wei ja, Jesús a co̦blou jälayoma. ¹⁸ Bedaniateli bä shabonobö jamö, Jelusale tä ulifi ajedeoma yalo, ¹⁹ ö̦jamö culanö judio bluca bä juimama, bä a̦iyobö e ja, Marta, María cäcöbö a̦ nofi ojode tabeje. ²⁰ Marta a lä cuinö, Jesús a wa̦fa juu fa ji̦lilänö, María yafi jamö a loo juo däjä, Jesús a mö baamabä a julayoma. ²¹ Abinaja e cuyoluma. —Bada tä. Eja wa yai cuo fa cunoja, a̦iwä a bufi nö mlaobö mlai. ²² Fei däjä ma cui, Yai Bada tänö cafä wa wa̦ lä ji̦liaö wei ya tä daö. Wa tä bayeli nacaö lä bädao wei tä ma cui, tä nia bayeli shömaö —e cuma. ²³ —A̦iyofä a demi nia jocädou co̦o —Jesús e cuma. ²⁴ Abinaja Marta e cuma. —Awei, ö̦jö ya tä daö. Tä lä jödödöblole däjä, Yai Bada tänö täbä demi bluca jocäcamaö co̦o däjä, ö̦jö däjä a demi nia jocädou co̦o —e cuma. ²⁵ Abinaja Jesúsnö a nowa tama. —Täbä demi nia jocäcou lä co̦o wei, ö̦jö lä ei ya waiquiwä —Jesús a cuma—. Ba̦limi bä cuobä, camiyä ya showawä. Camiyä wale a̦ bejedi lä bufii wejei, bä ma nomaö wei ma cui, bä nia cudio fe yadio. ²⁶ Bä demi lä cublai bä lä cuinö, wale a̦ bejedi bufiije ja, bä nomaö mlaicätä. ¿Ö̦jö tawä? ¿Wale a̦ bejedi bufii cule? —a cuma. ²⁷ Abinaja Marta e cuma. —Awei, bada tä. Bäfä a̦ bejedi bufii. Yai Bada tänö a shömabä a lä yaileno wei a lä cui, ö̦jö cafä wa waiquiwä. Yai Bada tä Ijilubö wa e, bita jamö wa wa̦fa juu lä wäyäno wejei —e cuma. ²⁸ Einaja a fa culunö, bä fääshä María a nacaö mö alayoma. Abinaja e wajado cuma. —Tä a̦ lä wäyäö wei a waloquei lä cufe. Cafä wa nacaö tai —e cuma. ²⁹ A wa̦ fa ji̦lilänö, yedu María a jocädaliyoma, Jesús nijamö a juu showadaobä. ³⁰ Bedaniateli bä shabonobö jamö, Jesús a yafinomi showawä. Martanö a mö lä bamaleno wei jamö, ö̦jamö a yanöcöo juoma. ³¹ ¿Ö̦jö tawä? María yedu a fa jocädalunö, a sibolayofälöma. A nofi ojode tabeje, yafi jamö a ca̦i lä loono wejei bä judio lä cuinö a juu dalalemaje. “A nomawä maquebobeje jamö a ö̦cödayobä”, a nofi fa tabojenö, bä yaua showalayofälöma. ³² Ö̦jö däjä, Jesús a lä cuono wei jamö, María e fa ajedeblalunö, a dalalema. A fa dalalönö, bei a cotä jamö a möfe bolanö, a wa̦ fama. —Bada tä. Eja wa yai cuo fa cunoja, a̦iwä a bufi nö mlaobö mlai —e cuma. ³³ María a ma cuinö, a ca̦i lä juno wejei bä judio ma cuinö, Lasalo a nomöa bluca bomaje. Bä bufi nö bleaaö fa dalalönö, Jesús a bufi nofi jushublaoma. ³⁴ Abinaja a cuma. —¿Wedi jamö wama a nomawä maquequema? —Jabo, tä a̦ wäyäle —bä cuma—. Wa tä möblaabä. ³⁵ Jesús a ö̦cöma. ³⁶ A ö̦cöma cudeenö, abinaja judio bä cuma. —¿Ö̦jö tawä? A malä nofimano wei —bä cuma. ³⁷ Ö̦jö ma cui, abinaja ai bä cuu mö feduoma. —A jubäbö lä cuono wei, a mamocu lä jalomaleno wei, ö̦jö a waiquiwä. ¿Wedi tabä Lasalo a ma cui, a bayeliblanomi, a nomaö mlaobä? ³⁸ Ö̦jö däjä, Jesús a bufi nofi jushublaa fa co̦icunö, a nomawä lä maquebono wejei täca jamö, a ajedeblaliyoma. Maa maca bada cuoma. Maa ai manö maca fe laoma. ³⁹ Abinaja Jesúsnö bä nowa tama. —Maa ma da blajamalöje —bä nowa tama. Inaja a cuu ja, Marta a wa̦ lämoma, bä a̦iyobö e bufi lä mlaqueno wei a lä cui. Abinaja e cuma. —Bada tä. Tä ni ji̦tali waiquiwä cätä. A nomawä maquea lä waiquile, 4 tä mö didi cublou waiquia —e cuma. ⁴⁰ Abinaja Jesús e cuma. —Wale a̦ bejedi bufii ja, Yai Bada wa tä doblao dablaö wä. ¿Inaja bäfä nowa tanomi daanö, ö̦jö lä? —e cuma. ⁴¹ Inaja a cuma yalo, ma blajaa fe yadimalemaje. Ö̦jö däjä, Jesús a mö fa nonoicunö, abinaja a cuma. —Fabe. Cafänö wale a̦ ji̦liaö ja, ya bufi doblao. ⁴² Showadi wale a̦ shino lä ji̦liaö wei, ya tä daö waiquiwä ma cui, ei bä ublaa lä ajedele bä bufi jaducublobä ya wa̦. Cafänö wale lä shömöleno wei, tä a̦ yai bejedi bufibeje —a cuma. Inaja a cuu fa balöonö, a wa̦ i̦cali falayoma. —¡Lasalo! ¡Fäyämö a da fabo! ⁴⁴ A lä nomalayono wei, a demi jocädou fa co̦lonö, a faa showalayoma. Bei imicö ma cui, bei mamicö ma cui, camishi acadafu bänö a o̦camaoma. Ai cäcönö a mö jo̦yao mö feduo showaoma. Jesúsnö a nabä shimöquema. —A da cushäblalöje, a jubä —a cuma. ⁴⁵ Ö̦jö cudeenö, Lasalo a lä taamano wei tä fa dalalöjenö, María a ca̦i lä juno wejei bä judio bluca mö feduwä lä cuinö, Jesús a wa̦ bejedi bufilemaje. ⁴⁶ Ö̦jö ma cui, ai bä mö feduwä lä cui, faliseo bä bada nijamö bä jua showalayoma. Jesús a lä cuaano wei tä a̦ wäquemaje. ⁴⁷ Ö̦jö cudeenö, nofi bäyäalewä blowäjäwä bä lä cuinö, faliseo bä mö ca̦i feduwä lä cuinö, bada bä yododoblamalemaje, bä a̦ wayobä. Abinaja bä nowa tayoma. —¿Wedinaja bämacö yai cuaabä, ö̦jö lä? Yai Bada e nö nia fa ö̦jöböamonö, quiji a lä cuinö, tä nö lä quilijii bluca tä wawämadii. ⁴⁸ Bäma a ja̦amaimi ja, jödödöwä bänö a wa̦ bejedi nia bufiije. “Ei a waiquiwä”, bä fa cunö, bä shi nia dou. Ö̦jö däjä, Lomateli bänö bämalecö nabä nia waloyoluuje. Yai Bada etä yafi nia wa̦liaöje. Judio bämalecö mö nia ca̦i watäblaöje —bä nowa tayoma. ⁴⁹ Ö̦jö ma cui, cama ai a wa̦ bada fama, Caifasi a wa̦fa lä cuono wei. Nofi bäyäalewä ö̦jö a bada cuoma, ö̦jö däjä. Abinaja bä nowa tama. —Uo. Wiisibö ma cui wamacö bufi nofi jaducubloimi dodijiwä yai. ⁵⁰ Wamacö nia yai lä bayeliblamou wei, wama tä daimi. Täbä bluca waicaö mlaobeje, moli a lä cui a shämou ja, ö̦jö tä dodijidawä waiquiwä. Judio bämacö mö bluca watäblamou showadao mlaobä —bä nowa tama. ⁵¹ Cama a bufi lä cuu weinaja, a wa̦ bädao cuonomi. Nofi bäyäalewä ö̦jö däjä a bada läoma cudeenö, ö̦jö nijamö Yai Bada a wa̦no tamou ja̦tooma. Judio bä bluca bayeliblamobä, Jesús a nia shämou lä läono wei, ö̦jö tä a̦fa yai wäyäö ja̦tooma. ⁵² ¿Ö̦jö tawä? Cama judio bä bayeliblamou ayaobä mlai. Yai Bada bei ijilubö ebä bälöblawä lä shedequeblai, bä co̦amodayobä a nia shämoma, Yai Bada bei ijilubö moli ebä cuobä. ⁵³ Inaja bä nowa tayoma yalo, Jesús a shäbeje tä nofi cadidibomaje. A nia yai lä taamano wejei tä ja, bä a̦ showadi wayoma. ⁵⁴ Inaja a nofi washuamaje yalo, judio bä nija Jesús wawädowä a juu mlaa showadaaliyoma. Judea tä ulifi jamö a cuo bufio fa mlacunö, ulifi bloque tä ajede jamö a juu nomöjöoma, Eflaini ebä nodiwä ulifibö jamö. Ö̦jamö cama ebä lä nocamabono wei bä ca̦i yanöcöblaoma. ⁵⁵ Yai Bada a waiteli lä jayuano wei, judio bänö a nofi nia co̦camoaö jaödao co̦omaje. Ö̦jö cudeenö, bluca bä lä bälöjöi Jelusale jamö bä juma. Bä iyaö showao mlao däjä, bä nia dodijidablamou balöoma, Moisesinö tä tamaö lä bufino weinaja showawä. ⁵⁶ Ö̦jamö Jesús a dayäamaje. Yai Bada etä yafi jamö bä ublajalanö, bä wa̦liyoma. —Cafä ¿wedinaja wa bufi cuu dodijia cube? Bämacö iyabä jamö, ¿Jesús a juu mlai daanö? —bä cuma. ⁵⁷ ¿Ö̦jö tawä? Nofi bäyäalewä blowäjäwä bä ma cuinö, faliseo bä bada ma cuinö, ö̦jö bänö täbä nowa bluca taö waiquiomaje. Jesús a dablaö bädaoje ja, cama bä yömölaö showadaobeje bä a̦ fama, a juwäamaö showadaobeje.

¹ Bei. Yai Bada a waiteli lä jayuano wei, 6 tä mö jalu cublou däjä tä nofi nia co̦camoaö co̦omaje. Bä iyaö showaa mlai ja, Bedaniateli bä nijamö Jesús a waloa balöquedayoma. Ö̦jamö Lasalo a bälöoma, Jesúsnö a demi jocädamaö lä co̦layono wei a lä cui. ² Ö̦jamö Jesús a ca̦i iyabeje, bä yododama. Martanö nii bä bablaaö cuaama. Bä iyabä bä lä loono wei jamö, Lasalo a ca̦i cuoma. ³ Ö̦jö däjä, Maríanö toubä nö lä cle̦deli wei toubä besi fa dälänö, Jesús mamicö fe löblalema. Toubä nowa blucao dodijioma. Cama suwä fe̦ta ucunö, mamicö ca̦i ya̦jöblaö nocalayoma. ¿Ö̦jö tawä? Mamicö fe löblaö ja, a yafi nö cle̦deli jödödöblaliyoma. ⁴ Ö̦jö ma cui, Juda Icaliode a wa̦ läblaliyoma. Jesúsnö bä lä nocamabono wei ai e cuo mö feduoma, a nia lä nomojoliano wei a lä cui. Abinaja a cuu dicooma. ⁵ —Fei toubä nowa bluca fe balojowä. Ö̦jö lä toubä ja, ¿wedi tabä blada 300 bä däanomi, bä lä jo̦li wei bä yai bayeliblamobä? —a cuma. ⁶ Inaja a lä cuno wei a lä cui, bä lä jo̦li wei bä nofi jalujubou yalo a wa̦ cuonomi. Showadi a tomömoma yalo a wa̦ li cuoma. Cama bä bladabö talö yefiboma yalo, bä shino doaö ja̦tooma. ⁷ Abinaja Jesúsnö a nowa tama. —A suwä wasö dijä. Toubä shee lä jäblalufe toubä tabobä, wale nomawä maquebobeje jamö, wale jölöcaö co̦obä. ⁸ Bä lä jo̦li wei bä lä cui, cafä wamacö nijamö showadi bä nia malä cudio wei, wama bä bayeliblabä. Ö̦jö ma cui, camiyä ya yai nia cudiomi —a nowa tama. ⁹ Bedaniateli bä nijamö Jesús a jo̦wa cuoma yalo, Jelusale jamö bä judio lä co̦camono wei bä lä cui, Bedania jamö bä lobe aa balölayofälöma. Jesús a shino möbeje mlai. Lasalo a ma cui, ö̦jö a ca̦i möö bufi doblaomaje, Jesúsnö a jo̦wa demi jocädamaö lä co̦layono wei a lä cui. ¹⁰ Ö̦jö cudeenö, nofi bäyäalewä blowäjäwä bä lä cuinö, Lasalo a nofi ca̦i washuaö mö feduo showadaomaje, a shämobä. ¹¹ ¿Ö̦jö tawä? Lasalo a demi lä jocädamaleno wei tä nowanö, Jesús nija bä bufi mö blucablou fa nomöjölonö, judio bä blucanö a bejedi malä bufileno wejei. ¹² Ö̦jö tä fena ja, bä iyaö ca̦i co̦camobä bä bluca lä yododano wei bä lä cuinö, Jelusale jamö Jesús a wa̦fa juu ji̦lilemaje. ¹³ Ö̦jö cudeenö, jai lasha si jenabä cuwä jenabä fa däabodujenö, bä a̦ noshi fa jalilaimadunö, Jesús a nabä aa mö balayomaje. Abinaja bä cufälöma. —¡Yai Bada a nofi shino yai da doablaje! Bada a wa̦nö a lä juimi, ¡ö̦jö a shino yai bayeliblamobä a! ¡Isaeli nodiwä bäma ecö nija a Bada läobä a! —bä cuma. ¹⁴ Jesúsnö bulo a ji̦ima fa dälänö a döcäquema, a befi ca̦i jubä, Yai Bada etä a̦ oni lä cuu weinaja showawä. Abinaja tä a̦ cuu. ¹⁵ Sionoteli wamacö. Bä quili dijä. Bulo a ocalo ja a döcälanö, ¡cafä wamacö nija a Bada läobä, a juu lä cuimi! ¿Ö̦jö tawä? Einaja tä a̦ cuu. ¹⁶ Ö̦jö tä lä cublaliyono wei tä ja, cama ebä lä nocamabono wei ebä bufi jaducublou showadaonomi. Ö̦jö ma cui, fedu jamö Jesús a lä doblaquedayono wei däjä, Yai Bada etä a̦ oni jamö, a wa̦fa lä wäyämono wei, tä a̦ nofi jaducudaö jälayomaje. Yai Bada etä a̦ oni jamö, a wa̦fa bluca wäyäö lä balöono wejeinaja, a yai bejedi taamamaje. Ö̦jö tä ja, bä bufi yai jaducublou jälayoma. ¹⁷ ¿Ö̦jö tawä? Lasalo a nomawä lä maquebono wejei jamö, Jesúsnö a demi famaö lä co̦ono wei däjä, bä mamo bluca lä showaono wei bä lä cuinö tä a̦fa wäyädimaje. ¹⁸ Ö̦jö bä a̦ fa ji̦liläjenö, bluca bänö Jesús a nabä co̦camoaö mö baomaje, Yai Bada e nö ö̦jöböamobä, a nö lä quiliano wei tä a̦ ji̦lilemaje yalo. ¹⁹ Ö̦jö däjä, abinaja faliseo bä nowa tayoma. —Tä da möblaaje. Bäma a nö ja̦amabimi waiquiwä. Bluca bä lä bälöblai bänö, a bufii waiquiweje —bä nowa tayoma. ²⁰ Jelusale jamö bä iyaö ca̦i co̦camobä bä lä juno wei bä nija, clieco bä ca̦i co̦yocomoma. Yai Bada nija bä möfe bolanö, a wa̦fa ca̦i nia Bada doblao fa tajenö, bä juma. ²¹ Ö̦jö lä bä shominö, Besaidateli Felipe nija bä icuquema, Calilea tä ulifi jamö a Felipe lä bälöono wei nija. Abinaja a nowa tamaje. —Tä a̦ wäyäle —bä cuma—. Jesús yama a möö ojode. ²² Andrés nija Felipe a wa̦ faö fa balöonö, Jesús nija cäcöbö fa junö, a yömölaböma. ²³ Jesús abinaja a cuu mö feduoma. —Ya lä yanowamöblaleyoluno wei ya lä cui, Yai Bada tänö wale nia doblao dablamaö. Tä cublou ajedewä waiquia lä cule— a cuma. ²⁴ Cama a nia lä taamamono wei tä a̦fa wäyäö ja, abinaja a cuu nomöjöoma. —Cafä wamacö nija ei ya wa̦ lä cui, bejedi lä ya wa̦. Mashita jamö, nii mo befi ca̦i lä quei wei, dude mo cuo däjä, mo nia cauu showadaomi. Mo nia yami blao. Wa̦lidiwä mo fa cublalunö mo shino caulayou. Mo fa caulunö, moli mlai, bluca mobä nia yädäo. ²⁵ Inaja showawä, yanowamö bä ma cui, eja bä demi nia lä cudio wei tä ja, bä bufi mö lä blucao wei bä lä cui, bä ba̦limi nia cuodayoimi. Eja bä demi nia lä cudio wei tä ja, bä bufi mö blucao lä mlai bä lä cui, ö̦jö bä nia shino ba̦limi cuo ayao. ²⁶ Wale a̦ juaö lä ojodao wejei bä lä cui, camiyä nija bä nocaobä ö̦jö bä li. Camiyä ya cuobä jamö, ö̦jö bä nia shino cuo. Wale a̦ juaö lä ojodao wejei bä lä cui, Fayänö bä nofi nia dodijidawä tamabou —a cuma. ²⁷ Abinaja Jesús a cuma. —Ya bufi nofi jushublaa lä cule. ¿Wedinaja ya yai cubä? “Fabe. Fei däjä ya nö nia lä bleaaö wei tä ja, ¿wale noshi da umabo”, ya e cubä daanö? Ma, inaja ya taamamobä, ya malä waloqueyoluno wei —a cuma. ²⁸ Ö̦jö däjä, Yai Bada nija abinaja a cuma. —¡Fabe! —a cuma—. Cafä a shino yai doblao da damolalu. Einaja a cuu ja, fedu jamö a culanö a wa̦ bädaliyoma. —Ya doblao damoa waiquilaliyoma. Ya nia ca̦i doblao dablamou co̦o —a cuma. ²⁹ Bä bluca lä co̦caono wei bänö, a wa̦ fa ji̦liläjenö, ya̦lu a wa̦ bufimaje. Ai bä lä cui, abinaja bä cuu mö feduoma. —A̦jele anö a wa̦ wayomaö lä cufe —bä cuma. ³⁰ Jesús abinaja a cuma. —Camiyä ya bufi jaducublobä a wa̦ cuonomi. Cafä wamacö bufi yai jaducublobä a wa̦ julayou lä cufe. ³¹ Fei däjä Yai Bada tänö yanowamö täbä nia jömaö. Fei däjä fecula bada a nö nia bleaamaö, bita jamö a lä nosiemou wei a lä cui. ³² Camiyä ya lä cui, ya befi ca̦i nia i̦tao. Ö̦jö däjä, bluca bä lä bälöblai, camiyä nija ya bä nia ajedamaö —a cuma. ³³ ¿Ö̦jö tawä? A shämobä, a nia yai lä taamano wejei tä jömabä, a wa̦ li cuoma. ³⁴ Bä bluca lä co̦caono wei bä lä cui, abinaja bä cuma. —Yai Bada yama tä a̦ oni daö. A shömabä a lä yaileno wei a lä cui, a nia jo̦wa cudio. ¿Ö̦jö tawä? Wa lä yanowamöblaleyoluno wei wa lä cui, ¿wedi tabä wa befi ca̦i a̦fa i̦tao li wäyämamou dicoo? ¿Wedi jamö a lä cui, bei wa wa̦fa yanowamöblou li taö, ö̦jö lä? ¿Cafä mlai daanö? —bä cuma. ³⁵ Abinaja Jesúsnö bä nowa tama. —Cafä wamacö nija lobe tä shi̦i cublaa. Ei tä shi̦i cua lä showale däjä, bä da cadidofälö, mö didi tä ja wamacö shi wa̦lia dicoicu. Tä mö didiobä jamö bä lä juu wei, bä mojodili ca̦i juu. ³⁶ Cafä wamacö nija ya shi̦i cua lä showale däjä, wamale a̦ bejedi da bufi, tä wacacaobä jamö wamacö lä cuo wei, wamacö yai cublobä —bä nowa tama. Einaja bä nowa fa talöfälönö, shomi jamö a cua showalayofälöma, a dablaö mlaobeje. ³⁷ Täbä mamo showao däjä, bejedi lä Jesús a nö quiliama. Yai Bada e nö ö̦jöböamobä, tä nö lä quilijii tä bluca ma wawämano wei ma cui, a wa̦ bejedi bufinomije. ³⁸ ¿Ö̦jö tawä? Yai Bada a wa̦no wäyälewä Isaia a wa̦ bejedi cublobä, ö̦jö lä tä li cuoma. Abinaja tä a̦ cuu. Tä a̦ wäyäle. Yama tä a̦ lä wäyäö wei, tä a̦ bejedi bufiimije. Cafä Bada wa nö lojode ö̦jöböamobä tä ma cule ma cui, bä bufi jaducubloimi. Einaja tä a̦ cuu. ³⁹ ¿Ö̦jö tawä? Tä a̦ bejedi bufibeje, bä cuonomi waiquiwä. Yai Bada a wa̦no wäyäö ja, Isaia a lä cuno weinaja showawä. Abinaja tä a̦ cuu. ⁴⁰ Jai bä mamo casö miblawä, Yai Bada tänö bä tablamalema. Bä bufi ca̦i jifumaboma, tä lä dablaö wejei tä nö ö̦jöböaö mlaobeje. Bä bufi yai jaducublou mlaobä. Bä demi cudiobä, Yai Bada nija bä bufi mö yabajadou mlaobä. Einaja tä a̦ cuu. ⁴¹ ¿Ö̦jö tawä? Jesús a nia lä doblaodayou wei a daa showalalema yalo, Isaianö a wa̦fa wäyäö balöoma. ⁴² Inaja tä ma cuono wei ma cui, bada bä ca̦i bluca ma cuinö, Jesús a wa̦ bejedi bufia fe yadilemaje. Ö̦jö ma cui, faliseo bä nö bada quili fa tajenö, wawädowä bä a̦ nö wäonomi, judio bä yododabä yafi jamö bä coyocamabou mladou mlaobeje. ⁴³ ¿Ö̦jö tawä? Yai Bada nija mlai, yanowamö täbä nija bä a̦fa nia dodijidawä lä tamou wei tä ja, bä bufi mö yai blucao dicooma. ⁴⁴ Jesús a wa̦ i̦cali faö ja, abinaja a cuma. —Wale a̦ bejedi lä bufii wejei bä lä cuinö, camiyä wale a̦ bufii ayaomije. Wale lä shömöleno wei a ma cui, ö̦jö lä a wa̦ bejedi ca̦i bufii showaweje. ⁴⁵ Camiyä wale lä dablaö wejei bä lä cuinö, wale lä shömöleno wei a ma cui, ö̦jö a ca̦i dablaö waiquiweje. ⁴⁶ Cowa wacö shi̦i lä culenaja ya shi̦i cuobä, bita jamö ya waloqueyoluma, wale a̦ bejedi lä bufii wejei bä bluca lä cui, tä mö didiobä jamö bä shi wa̦lio mlaobä. ⁴⁷ ’Ai bänö wale a̦ ma ji̦liaö wejei ma cui, wale a̦ nofi cadidiboimije ja, ö̦jö bä lä cui ya bä nia jömaö showadaomi. Yanowamö ya täbä jömaö showadaobä, bita jamö ya juno malä mlai. Ya täbä jucäabä, ya yai juma. ⁴⁸ Wale lä waii wejei, wale a̦ juaö lä mlajei bä lä cui, obi bä nia yai jömamou. Tä lä jödödöblole däjä, wale a̦ lä waileno wejei ya wa̦ showawänö, bä nia jömamou. ⁴⁹ Camiyä ya bufi lä cuu weinaja ya tä a̦ wäyäö bädao malä mlai. Fayänö wale lä shömöleno wei a showawä lä cuinö wale nosiemaö ja ya wa̦. Cama a wa̦nö ya wa̦ cadidou. ⁵⁰ Yai Bada tänö tä tamaö lä bufii wei tä ja bä cadidou ja, ba̦limi bä nia cuo. Ö̦jö ya tä daö cudeenö, Fayänö tä a̦ wäyämaö lä bufii wei, ya tä a̦ li wäyäö —a cuma.

¹ Yai Bada a waiteli lä jayuano wei tä nofi nia co̦camoaö jaödao co̦omaje. Bä Fö̦ö e nijamö a nia co̦o lä jaödaono wei, Jesúsnö tä daö waiquioma. Ei tä bita tabi nia feiaö co̦oma. Cama ebä bita jamö lä cule, bä showadi lä nofimadino wei, bä nofimaö mladonomi. A waicobä jamö ma cui bä nofimaö fe yadio showaoma. ² Bei. Simón bä ijilubö Juda Icaliode a lä cui, fecula bada anö a bufi taamaö waiquioma, bä weyade lä iyano wei däjä. Jesús a nia nomojoliama. ³ Jesús a lä cuinö, jödödöwä täbä lojodobobä, bä Fö̦ö enö Bada a yai tablamaö lä waiquilayono wei tä daö waiquioma. Yai Bada nija a cuo lä balöono wei tä ca̦i daö showaoma. Ö̦jö nijamö a nia lä co̦o wei tä ca̦i. ⁴ Ö̦jö tä daö waiquioma yalo, bä weyade iyabä jamö a fa ublalonö, cäcö lä feyacabono wei cäcö fa jayublalönö, cäcö casömalema. Ö̦jö däjä, täbä lä wejemamou wei cäcö a̦yoa majölema. ⁵ Madofi a jobocowä jamö ubä fa lölänö, cama ebä lä nocamabono wei bä mamicö yaluu ja, bä nabä jaba quequema. Bä mamicö fa yaludanö, cäcö lä a̦yobono wei cäcönö, bä mamicö ya̦jödaö nocamou showadaoma. ⁶ Simón Pedro nija a icua fa majöicunö, Pedro a wa̦ lämoma. —Bada tä. Camiyä wale mamicö yalubä yami —a cuma. ⁷ Jesús a wa̦ juoma. —Ei ya tä lä tale tä ja, fei däjä wa bufi jaducua ma mlale ma cui, wale nia lä taamaö wejei tä cublou balölayono wei ja, ö̦jö däjä wa bufi nia jaducublou nomöjöo —e cuma. ⁸ —Ma. Camiyä wale mamicö nia yaluimi —Pedro a cuu co̦oma. Jesús abinaja e cuma. —Bäfä yaluimi ja, camiyä nija wa nia yädäomi —e cuma. ⁹ Ö̦jö däjä, abinaja Simón Pedro a cuma. —Bada tä. Inaja wa cuu ja, bei ya mamicö bädawä mlai, bei ya imicö ca̦i da yalulu, bei ya fe ca̦i —a cuu nomöjöoma. ¹⁰ Abinaja Jesús e cuma. —A ya̦lömou lä waiquilayono wei a jödödöwä au waiquiwä. Bei mamicö nia shino ya̦lömou co̦o. ¿Ö̦jö tawä? Cafä wamacö au waiquiwä ma cui, moli ai wamacö lä cui a shino aumi —e cuma. ¹¹ A nia lä nomojoliano wei a malä dano wei. Ö̦jö cudeenö, “Moli ai wamacö lä cui a shino aumi”, a cuma. ¹² Bä mamicö yalua fa jödödöblalönö, cäcö lä feyacabono wei cäcö co̦a fa co̦lunö, bä lä iyano wei jamö a loa co̦quema. Abinaja bä nowa tama. —Fei bämacö lä taamafe tä ja, ¿wamacö bufi jaducua culawä? ¹³ Wamale a̦fa jayumaö ja, “Tä a̦ wäyäle”, wamacö cudou. “Bada tä”, wamacö ca̦i cudou, ¿ö̦jö tawä? Wamacö bejedimou. Ö̦jö ya malä cui. ¹⁴ Wamale nofi lä Badabou wei ya ja lä, ya tä a̦ ca̦i lä wäyäö wei ya ja lä, wamale nia owäbou. Cafä bämacö mamicö yaluu lä cuaafenaja, cafä wamacö ma cui, wamacö taamayou mö feduobä wamacö. ¹⁵ Wamale owämabä ya tä malä tafe, cafä bämacö taamaö lä cuaafenaja wamacö taamayou mö feduobä. ¹⁶ ’Cafä wamacö nija ei ya wa̦ lä cui, bejedi lä ya wa̦ —bä nowa tama—. Bada a lä cui a nofi tabou mlaoje däjä, cama ebä nofi nia tabou ayaomi. Inaja showawä, bä lä shömaö wei a lä cui a nofi tabou mlaoje däjä, bä lä shömamou wei bä nofi tabou ayao mlajeicätä. ¹⁷ ¿Ö̦jö tawä? Bämacö lä yömölale tä ja, wamacö bufi fa jaducuicunö wamale a̦ juaö ja, wamacö bufi nia yai doblalou. ¹⁸ ’Cafä bluca bämacö a̦fa wayoaimi —Jesús a cuu co̦oma—. Iba ya bä lä yaileno wei, ya bä daö. Tä nia lä cublou wei tä lä cui, Yai Bada etä a̦ bejedi wawäblou bufio yalo, tä nia li cublou. Abinaja tä a̦ oni cuu. Camiyä nija a showadi lä iyano wei a lä cuinö wale nomojoliaö nomöjöa lä cule. ’Einaja tä a̦ cuu. ¿Ö̦jö tawä? ¹⁹ Tä cublou showaa mlai ja, bämacö yömölaö balöa lä cule, tä bejedi cublou däjä wamacö bufi yai möblobä. Ya wa̦fa showadi lä wäyämamou wei, wamale a̦ bejedi bufibä. ²⁰ ’Cafä wamacö nija ei ya wa̦ lä cui, bejedi lä ya wa̦. Ya bä lä shömaö wei bä lä cui, dodijidawä bä co̦blamaöje ja, camiyä ma cui wale dodijidawä co̦blamaö mö feduoje. Inaja showawä, camiyä dodijidawä wale lä co̦blamaö wejei bä lä cuinö, wale lä shömöleno wei a ma cui, ö̦jö a dodijidawä co̦blamaö mö feduoje —a cuma. ²¹ Einaja Jesús a fa culunö, a bufi nofi fa jushublaonö, cama a wa̦fa wäyämou shalilioma. —Cafä wamacö nija ei ya wa̦ lä cui, bejedi lä ya wa̦. Ya jolemoimi. Cafä wamacö ai a lä cuinö wale nia nomojoliaö—a cuma. ²² Jesúsnö bä lä nocamabono wei bä lä cui, “Ö̦jö a wa̦fa yai wayoaö daanö”, bä bufi cunomi yalo, bä wäyäcu möyou cuaama. ²³ ¿Ö̦jö tawä? Jesúsnö bä lä nocamabono wei ai e lä cui sho cäcöbö jö̦cöjöoma, a yai lä nofimano wei e lä cui sho. ²⁴ Jesús nija ö̦jö a ajedeoma yalo, bei imicönö Simón Pedronö a wa̦limaö bufima. Abinaja e cublaloma. —Wa wa̦ fa ji̦lilänö yamalecö da yömöla. ¿Wedi jamö a lä cui, bei a wa̦fa yai li taö? —a cuma. ²⁵ Ö̦jö cudeenö, Jesús nija a loo lä jö̦cöjöono wei a lä cui, abinaja e cuma. —Bada tä. ¿Wedi jamö a lä cuinö bei wa nia jömaö dodijio? ²⁶ Abinaja Jesús e cuma. —Ei nii ya fa ödäblalönö, ya e nia lä jöböaö wei, ö̦jö lä a waiquiwä —e cuma. Ö̦jö däjä, nii a fa ödäblalönö, Juda nija a jöböquema, Simón Icaliode bä ijilubö e lä cui nija. ²⁷ Nii a fa dälänö, cama nija Sadanasi a lucäa showadalayoma. Abinaja Jesús e cudaliyoma. —Wa tä nia lä taö wei, fei däjä tä taö da showadao —e cudaliyoma. ²⁸ ¿Ö̦jö tawä? Bä iyabä jamö bä lä loono wei bä lä cui, Jesús a lä cuno wei tä ja, bä bufi jaducuonomi. ²⁹ Judanö blada bä talö yefiboma yalo, abinaja ai bä bufi cuma. “Bämacö iyabä, nii bä luluamaö bufii”, bä bufi cuma. Abinaja ca̦i. “Bä lä jo̦li wei bä dobäbä, a shömaö lä cule”, ebä bufi ca̦i cuu yacläoma. ³⁰ ¿Ö̦jö tawä? Nii a fa dälänö, Juda a siboa showadalayoma. Tä mö dödöoma. ³¹ Juda a siboa waiquilayofälöno wei ja, abinaja Jesúsnö bä nowa taa jelema. —Fei däjä ya lä yanowamöblaleyoluno wei ya lä cui, ya nia doblao dablamou. Ya lä cuaaö wei tänö Yai Bada ya nia ca̦i doblao dablamaö. ³² ¿Ö̦jö tawä? Yai Bada ya doblao dablamaö ja, cama Yai Bada tänö camiyä ya lä yanowamöblaleyoluno wei ya lä cui, wale nö nia ca̦i doblao ö̦jöböamaö showadao. ³³ ’Ijiluyä wamacö —a cuu co̦oma—. Cafä wamacö nija lobe ya cublaa lä cule. Wamale nia dayäö. Judio bä nija ya lä cuno weinaja, cafä wamacö ma cui, bämacö nowa taö co̦a lä cule. Ya nia lä cuo wei jamö, wamacö juu daomi. ³⁴ Cafä wamacö nija ya tä tamaö lä bufii wei, ya tä a̦ dude wäaö lä cule. Bä da nofimayo. Cafä bämacö nofimaö lä waiquilenaja, inaja showawä, bä nofimayou da cuo. ³⁵ Wamacö yai lä nofimayou wei tänö, camiyä nija wamacö lä nocao wei, bluca täbä nija wamacö nö nia yai ö̦jöböamou —a cuma ³⁶ Abinaja Simón Pedro e cuma. —Bada tä. ¿Wedi jamö wa nia yai juu? Jesús abinaja a cuma. —Ya nia lä juu wei jamö, fei däjä wa yauo daomi. Ö̦jö ma cui, obi wa nia shino juu nomöjöo —e cuma. ³⁷ Pedro abinaja e cuma. —Tä a̦ wäyäle. ¿Wedi tabä wale li yaumabou showadaomi? Cafä bäfä bayeliblabä, ya shämobä tä ma cui ja, ya ojodaa lä cule —e cuma. ³⁸ Abinaja Jesús e cuma. —¿Bei wa shämou ojode daanö? Cafä nija ei ya wa̦ lä cui, bejedi lä ya wa̦. Cadala a wa̦ faö showao mlao däjä, 3 wale nofi nia jole jole mojodubou cuo —e cuma.

¹ Jesúsnö abinaja bä nowa tama. —Bä bufi nofi jushublao dijä. Yai Bada tä a̦ shino bejedi da bufije. Camiyä wamale a̦ bejedi ca̦i da bufi. ² Fayä e yafi jamö, täbä nia lä bälöo wei bä yano bluca. Inaja tä cuo mlao fa cunoja, ya tä a̦ nö wäyäbö mlai. Ö̦jamö lä wamacö bälödiobä, bämacö yanobö nia dodijidabladayou. ³ Cafä wamacö bälöobä, ya tä dodijidablaö fa balölonö, bämacö nabä nia juimaö. Camiyä ya cuobä jamö wamacö cuo mö feduobä, bämacö nia co̦ablaö. ⁴ Ya nia lä juu wei jamö, wama yo daö waiquia —a cuma. ⁵ Tomás abinaja e cuma. —Bada tä. Wa nia lä juu wei jamö yama tä daimi. ¿Wedinaja yama yo li daö cuobä? ⁶ Abinaja Jesús a cuma. —Camiyä ö̦jö ya yoca waiquiwä. Bejedi tä lä cui, ö̦jö ya ca̦i. Täbä ba̦limi cuobä, ö̦jö ya showawä. Camiyä nija bä juu lä mlai, Fayä nija bä waloo daomi. ⁷ Camiyä wamale daö ja, Fayä wama a ca̦i daö waiquiwä. ¿Ö̦jö tawä? Fei däjä wama a yai daö. Wama a möö waiquiwä —a cuma. ⁸ Felipe abinaja e cuma. —Bada tä. Faafä a da jömöba, “Inaja lä waiquiwä”, yamacö cubä. ⁹ Abinaja Jesús e cuma. —Felipe. Cafä wamacö nija ya nö ma dedeale ma cui, ¿wale daimi showawä tawä? Camiyä wale lä möö wejei bä lä cuinö, Fayä a möö waiquiweje. ¿Wedinaja wa bufi li fa cunö, “Faafä a da jömöba”, bei wa li cuu cule? ¹⁰ Fayä nija ya lä cule, camiyä nija Fayä a ca̦i lä cule, ¿wama tä a̦ bejedi bufii yailawä? Cafä wamacö nija ya tä a̦ lä wäyäö wei, camiyä ya wa̦ bädawämi. Fayä ya wa̦no wäyäö. Ya ma cuaaö wei ma cui, camiyä nija Fayä a yai culanö, ö̦jönö tä taö. ¹¹ Fayä nija ya lä cule, camiyä nija Fayä a ca̦i lä cule, tä a̦ bejedi da bufije. Ö̦jö lä yafäcö. ¿Ö̦jö tawä? Camiyä wamale a̦ bejedi bufii ma mlai ma cui, ya tä bluca lä taö wei tänö, bä bufi jaducua fe da yadiicu, wamale a̦ bejedi bufii fe yadiobä. ¹² ’Cafä wamacö nija ei ya wa̦ lä cui, bejedi lä ya wa̦ —a cuu co̦oma—. Wale a̦ bejedi lä bufii wejei bä lä cuinö, Yai Bada ya mayo wawämaö lä cuaaö weinaja bä nia cuaaö mö feduo. ¿Ö̦jö tawä? Fayä nija ya co̦o yalo, bä nia yai cuaaö. ¹³ Camiyä ya wa̦nö, wamacö nö bayeli nacao ja, wama tä nacaö lä bädao wei tä ma cui ja, bämacö a̦ nia juaö, Fayä ya doblao dablamabä. ¹⁴ ¿Ö̦jö tawä? Camiyä ya wa̦nö, wamacö nö bayeli nacao lä bädao wei tä ma cui ja, ya tä nia taö —Jesús e cuma. ¹⁵ Jesús a wa̦ faö co̦oma. —Wamale nofimaö ja, ya tä tamaö lä bufii wei wama tä nofi nia cadidibou. ¹⁶ Fayä nija cafä bämacö nö bayeli fa nacalänö, cafä wamacö nija Bayeliawä ai a nia shömaö. Ö̦jönö wamacö ca̦i nia cuo shi wa̦lii. ¹⁷ Yai Bada tä Bufi lä cui, ö̦jö lä ya tä a̦fa taö, tä a̦ bejedi lä wäyäö wei. Yanowamö täbä lä cuinö, tä nö ö̦jöböaimije yalo, tä ca̦i daö fa mlacujenö, tä a̦ waibouje. Ö̦jö ma cui, cafä wamacönö wama tä li daö. Wamacö ca̦i malä cule. Cafä wamacö nija tä nia yai cuo cadidio. ¹⁸ ’Bämacö ma daquei wei ma cui, bämacö nö nia beblalamaimi —a cuma—. Bämacö nabä nia juu co̦imaö. ¹⁹ Tä nö dedeblou mlai ja, yanowamö täbänö wale nia dablaö co̦o ma mlajei ma cui, cafä wamacönö wamale nia shino yai dablaö. Camiyä ba̦limi ya cua waiquia yalo, inaja showawä wamacö nia ba̦limi cuo mö feduo. ²⁰ Ö̦jö däjä, wamacö bufi nia yai jaducublou. Fayä nija camiyä ya lä cule, wama tä nia daö wawädoo. Camiyä nija cafä wamacö lä cule, wama tä ca̦i nia daö. Cafä wamacö nija camiyä ya cua mö lä fedule tä ca̦i. ²¹ ’¿Ö̦jö tawä? Ya tä tamaö lä bufii wei tä nofi lä cadidibou wejei bä lä cuinö, ö̦jö bä lä cuinö wale yai nofimaöje. Wale lä nofimaö wejei bä lä cui, Fayänö bä nia nofimaö mö feduo. Camiyä ya ma cuinö ya bä nia ca̦i nofimaö. Ö̦jö bä nija ya nia dablamou —a cuma. ²² Jesús nija Juda ai a lä cui a wa̦ fama, Juda Icaliode mlai. Abinaja e cuma. —Bada tä. ¿Wedi tabä afä yamacö lä cui nija wa nia shino li dablamou ayao? ¿Wedi tabä yanowamö täbä nija wa nia dablamoimi? —e cuma. ²³ Abinaja Jesús e cuma. —Wale lä nofimaö wejei bänö, wale a̦ nofi nia cadidibouje. Fayänö bä nia nofimaö. Ö̦jö bä nija yafäcö nia walooyoluu, yafäcö bälödiobä. ²⁴ Wale nofimaö lä mlajei bänö wale a̦ nofi cadidiboimije. ¿Ö̦jö tawä? Cafä wamacö nija ya tä a̦ lä wäyäle, camiyä ya wa̦ bädawämi, Fayänö wale lä shömöleno wei ya wa̦no taö. ²⁵ ’Cafä wamacö nija ya cua showalanö, ei ya tä a̦ bluca wäyäö waiquia —a cuma—. ²⁶ Ö̦jö ma cui camiyä ya wa̦nö, Fayänö Bayeliawä a nia shömaö, cama a Bufi showawä lä cui. Ö̦jö a lä cuinö, bluca tä lä cule tä ja wamacö nia yömölabodii juo. Cafä wamacö nija ya tä a̦ bluca lä wäyäno wei tä a̦ ja, wamacö bufi nia jaducuamaö juo. ²⁷ ’Dodijidawä wamacö cuo juobä, bufi yanöcöwä tä ja bämacö dobäö lä cule. Camiyä ya bufi yanöcöwä lä culenaja wamacö bufi cuo mö feduobä. ¿Ö̦jö tawä? Yanowamö täbänö täbä bufi yanöcömabou daomije. ’Tä nia lä cublou wei tä ja, bä bufi nofi jushublao dijä —a cuma—. Bä quili dijä. ²⁸ Ya nia lä co̦o wei, ya nia obi ca̦i juu lä co̦o wei, cafä wamacö nija ya wa̦fa wäyämou waiquia. Wamale yai nofimaö fa cunoja, Fayä nija ya nia lä co̦o wei tä ja, wamacö bufi nö yai doblalobö wei. Ö̦jö a shino yai Bada malä cui. ²⁹ ¿Ö̦jö tawä? Tä cublou showao mlao däjä, fei bämacö nowa taö balöa lä cule. Tä yai cublou däjä wamale a̦ bejedi bufibä. ³⁰ ’Bei —a cuma—. Fei däjä bämacö a̦ wayomadibä tä cuami waiquiwä. Fecula bada a ajeo lä cule, ei tä ulifi jamö a lä nosiemou wei a lä cui. Cama nija camiyä ya nosiemamoimi. ³¹ Fayänö wale lä nosiemaö wei tä ja ya li yai cadidou, yanowamö täbä bufi jaducublobä. Fayänö wale lä nofimaö wei tä dablabeje. ¿Ö̦jö tawä? Bei. Bämacö da jufälö —a cuma.

¹ Jesús a wa̦ faö co̦oma. —Fayä ficali etäca jamö, camiyä too bei ya toto colo yai. Uba comi bä lalobä, too totobä lä dodijidablaö wei, ö̦jo Fayä bei a. ² Ai ya totobä boco lä cui jamö, uba bä laloimi. Ö̦jö totobä boco nia bloque joyamou. Ai ya totobä boco lä cui jamö, uba bä ma faö wei ma cui, totobä fa aublalönö totobä nia boco ola joyaö, uba bä bluca yai fabä. ³ Cafä wamacö lä cui nija ya tä a̦ lä wäyäno wei tä a̦nö, wamacö aublamoa waiquilayoma, wamacö yai dodijabä. ⁴ ’Camiyä nija bä yanöcöwä da cuicu —a cuma—, cafä wamacö nijamö ya lä culenaja showawä. Colo toto jamö totobä boco shadiomi ja, uba bä ca̦i nia faimi waiquiwä. ¿Ö̦jö tawä? Inaja showawä, camiyä nija wamacö yanöcöwä cuomi ja, cafä wamacö nija dodijidawä tä nia wawäbloimi. ⁵ Camiyä bei ya toto colo, ¿ö̦jö tawä? Cafä wamacö lä cui, bei ya totocu boco. Camiyä nija bä lä yanöcöo wei bä lä cui, cama bä nija ya ca̦i yanöcölanö, ö̦jö bä nia dodijaö. Ö̦jö bä lä cuinö, uba bä dodijidawä lalou lä culenaja, bluca tä nia dodijidawä wawämaö cuoje. Camiyä nija bä yanöcöomi ja, bä dobloimi malä waiquii. ⁶ Camiyä nija bä yanöcöwä cuo lä mlai, totobä boco fa manöblalönö, totobä boco fäö lä culenaja bä nia taamamou. ¿Ö̦jö tawä? Ö̦jö däjä, totobä boco fa dolalöjenö, cowa wacö jamö totobä shäyäblaaöje, totobä ö̦shöbä. ⁷ ’Camiyä nija wamacö yanöcöwä cuo ja, showadi wamale a̦ nofi ca̦i jaducubou ja, camiyä nija wamacö nö bayeli nacao lä bädao wei tä ma cui ja, wamacö a̦ nia juamou —a cuma—. ⁸ Wamacö showadi lä dodijaö wei tänö, camiyä nija wamacö lä nocao wei tä nia dablamou. Ö̦jö däjä, Fayä a wa̦fa ca̦i nia doblao tamou. ⁹ Fayänö camiyä wale nofimaö lä culenaja, bämacö nofimaö cuwä mö feduwä. Bämacö lä nofimale tä ja bä da yanöcöicu. ¹⁰ Wamale a̦ nofi cadidibou ja, bämacö lä nofimale tä ja wamacö nia yanöcöo. Fayä ya wa̦ nofi cadidibolanö, camanö wale lä nofimale tä ja ya e yanöcöwä lä culenaja showawä. ¹¹ ’Camiyä ya bufi doblalou lä culenaja wamacö cuo mö feduobä, bämacö yömölaö lä cule —a cuma—. Wamacö bufi shino yai doblalobä. ¹² Ya tä taamaö lä bufii wei, ei ya wa̦. Bä da nofimayo, ö̦jö lä, camiyänö bämacö nofimaö lä culenaja showawä. ¹³ Cama nofi ebä bayeliblabä a shämou lä läo wei a lä cui, ö̦jö a yai nofi fe balojowä. ¹⁴ Ya tä taamaö lä bufii wei wama tä taö ja, iba nofi lä wamacö. ¹⁵ ’Bada a wa̦ juamobä bä lä cui, a bayeliblabeje bä li tabou —a cuma—. Bada a lä cui, cama a nia yai lä cuaaö wei, ö̦jö bä nija tä a̦fa nia wäaimi. Bä ojodamou buobä cäbä. Ö̦jö cudeenö, camiyä ya lä cuinö, “Ya wa̦ juamobä cäbä”, bämacö nofi fei däjä tabou bäami. Ma, “Iba ya bä nofimaö lä dodijile cäbä”, bämacö nofi yai tabou majöa lä cule. Fayä nija ya tä a̦ bluca lä ji̦lileno wei wama tä a̦ daö mö feduobä, ya tä a̦ bluca wäa malä waiquiqueno wei. ¹⁶ ’Cafä wamacönö camiyä wamale yaianomi —a cuma—. Ma, camiyänö cafä bämacö yai yailema. Bämacö nia fa shömanö, bämacö cadidialalema, nii bä wawäblou lä culenaja, cafä wamacö ma cuinö, dodijidawä wama tä wawäblamaö cuobä. Wama tä dodijidawä lä wawäblamaö wei tä lä cui tä mladou mlai ja, tä cudalodibä. Inaja wamacö cuaaö ja, camiyä ya wa̦nö, Fayä nija wamacö nö bayeli nacao lä bädao wei tä ma cui ja, Fayänö wamacö nia dobäö. ¹⁷ ¿Ö̦jö tawä? Bämacö yai taamaö lä bufii weinaja, ei ya wa̦ waiquiwä, wamacö nofimayobä, ö̦jö lä —Jesús a cuma. ¹⁸ Abinaja Jesús a cuu co̦oma. —Yanowamö täbänö wamacö nofi wa̦libouje ja, bä bufi da jaduculu. Camiyä wale nofi wa̦libou balöoma cudeejenö, inaja showawä wamacö nofi wa̦libou cuo nomöjöoje. ¹⁹ Yanowamö täbä bufi lä cuaablalou weinaja wamacö bufi cuaaö mö feduo fa cunoja, wamacö nö shino nofimabö wejei. ¿Ö̦jö tawä? Yanowamö ai täbä lä culenaja wamacö cuo ma balöono wei ma cui, iba wamacö cuo nomöjöobä, bämacö yailema. Ö̦jö cudeenö wamacö nofi wa̦libouje. ²⁰ ’Cafä wamacö nija ya lä cuno wei, tä a̦ nofi da jaduculeje. Bada a lä cui a nofi tabou mlaoje däjä, cama ebä nofi nia tabou ayaomije. ¿Ö̦jö tawä? Camiyä wale nö bleaamaö waiquiaje ja, inaja showawä, cafä wamacö nö nia ca̦i bleaamaö mö feduoje. Camiyä wale a̦ nofi cadidibou waiquiaje ja, inaja showawä, cafä wamacö a̦ nofi nia ca̦i cadidibou cuo mö feduoje. ²¹ Ö̦jö ma cui, wale lä shömöleno wei a daimije yalo, iba wamacö cudeenö wamacö nia inaja taamaö dodijioje. ²² ’¿Ö̦jö tawä? —a cuma—. Yanowamö ya bä nowa tabä ya waloo mlao fa cunoja, bä nö wa̦lidiwä jömamobö mlai. Ö̦jö ma cui, fei däjä bä a̦fa mojodi tamobä, tä yai cuami. ²³ Wale nofi lä wa̦libou wejei bä lä cuinö, Fayä a ma cui a nofi ca̦i wa̦libou mö feduoje. ²⁴ Cama bä nijamö tä nö lä quilijii ya tä bluca wawämaö mlao fa cunoja, bä nö wa̦lidiwä jömamobö mlai. Ö̦jö ma cui, ya lä cuaano wei tä ma dalaleno wejei ma cui, wale nofi wa̦libou fe yadioje. Fayä a ma cui, a nofi ca̦i wa̦libou mö feduoje. ²⁵ Moisesi tä a̦ oni lä tabou wejei sibä jamö, tä a̦ lä cuole tä a̦ bejedi wawäblou bufio yalo bä li cuaaö. Abinaja tä a̦ cuu. No mlai ja wale nofi wa̦libomaje. ’Einaja tä a̦ cuu —Jesús a cuma—. ²⁶ ¿Ö̦jö tawä? Ö̦jö ma cui, Fayä nijamö Bayeliawä a lä culadi, cafä wamacö nija ya nia shömadayou, tä a̦ bejedi lä wäyäö wei a lä cui. Fayä nija a culanö eja a waloo däjä, wale a̦fa nia wäyäö. ²⁷ Cafä wamacö ma cuinö wamale a̦fa wäyäbä wamacö li. Ya bä jaba lä yömölano wei däjä, camiyä nija wamacö cudio fa showaonö, wamacö cua showaa malä cule.

¹ Abinaja Jesús a cuu co̦oma. —Ei ya tä a̦ bluca lä wäyäle, wamale nofi lä mölabou wei, wama tä mladamaö mlaobä ya wa̦. ² Judio bänö wamacö nia joyaöje. Bä yododabä bä yafi jamö wamacö nia coyocomabou co̦daaimije. Ö̦jö bädao mlai, abinaja bä bufi ca̦i nia cuu dicoo. “Ei bä lä cui ya bä shäö ja, jai Yai Bada ya yai bayeliblaö ya nia cuaaö”, bä bufi nia cuu dicoo. ³ Camiyä wale daimije yalo, Fayä a ca̦i daimije cudeenö, bä nia inaja cuaaö. ⁴ ’Bämacö yömölaö balöa lä cule. Inaja cama bä yai cuaaö däjä, ya bä a̦fa lä wäyäfe wama tä a̦ nofi jaducubobä. Jaba däjä inaja bämacö nowa taö showadaonomi. Bämacö ca̦i nia cudioma yalo, ya wa̦ faö jaöonomi. Fei däjä, wawädowä bämacö nowa taö lä cule. ⁵ Abinaja Jesús a cuma. —Ö̦jö ma cui, wale lä shömöleno wei a lä cui nijamö, fei däjä ya nia co̦o ma cui, ya nia yai lä juu wei jamö wama tä wa̦liimi. ⁶ ¿Ö̦jö tawä? Cafä wamacö nija ei ya tä a̦ wäyäö yalo, wamacö bufi yai wa̦lidiwä jödödöwä. ⁷ Wamacö bufi ma wa̦lidii ma cui, wamale a̦ da ji̦lilä. Bejedi lä ya wa̦. Ya nia lä co̦o wei tä ja, wamacö nia yai bayeliblamou. Ya co̦o mlao fa cunoja, cafä wamacö nija Bayeliawä a nö waloobö ma mlai ma cui, ya co̦o däjä, cafä wamacö nija ya nia shömadayou. ⁸ Ö̦jö a yai waloyoluu däjä, yanowamö täbä bufi nia taamaö, tä lä wa̦lidii tä nö ö̦jöböabeje. Tä lä dodijidai tä ca̦i. Wa̦lidiwä talewä bä nia lä jömamou wei, tä nö ca̦i ö̦jöböabeje. ⁹ ’¿Ö̦jö tawä? —a cuma—. Camiyä wale a̦ bejedi bufiimije yalo, Bayeliawänö tä nö nia wa̦lidiwä ö̦jöböamaö. ¹⁰ Camiyä ya yai lä dodijaö wei tä ja, bä bufi nia ca̦i jaducublamaö. Ya dodijama yalo, Fayä nijamö ya fa co̦lunö, wamale nia dablaö co̦daaimi. ¹¹ Yai Bada tänö täbä nia lä jömaö wei tä ja, Bayeliawänö täbä bufi nia ca̦i jaducublamaö. Bita jamö a yai lä nosiemou wei a fecula bada lä cui, ö̦jö a jömöbou malä waiquile. ¹² ’Cafä wamacö nija ya tä a̦ nia lä wäyäö wei, bluca ya tä a̦ tabou ma showale, fei däjä wamale a̦ nö yai ji̦liabimi —a cuma—. ¹³ Yai Bada tä Bufi waloyoluu däjä, bejedi tä a̦ jamö wamacö nia lulubou. Cama Bayeliawä a bufi lä cuu weinaja, a wa̦ nia faö bädaomi. Fayä nija tä a̦ bluca lä ji̦liaö wei tä a̦ nia yai wäyäö. Tä nia lä cublou wei, cafä wamacö nija tä a̦ nia ca̦i bluca wäwämaö. ¹⁴ Bayeliawä a lä cuinö, camiyä wale nia doblao dablamaö. Camiyä wale a̦ fa ji̦lilänö, cafä wamacö nija tä a̦ nia malä wawämaö wei. ¹⁵ Fayänö tä a̦ bluca lä tabole, iba tä a̦ li waiquiwä yalo ya wa̦. Ö̦jö cudeenö, “Camiyä ya wa̦ fa ji̦lilänö, cafä wamacö nija tä a̦ nia wawämaö”, ya malä cufe. ¹⁶ ’Tä nö dedejeblou mlai ja, wamale nia möö mladou. Tä nö dedejeblou co̦o däjä, wamale nia shino dablaö co̦o —a cuma. ¹⁷ Cama ebä lä nocamabono wei ai ebä lä cui, abinaja bä nowa tayoma. —¿Wedinaja a bufi li fa cunö, einaja bämalecö nowa li taö cufe? Tä nö dedejeblou mlai ja, bäma a nia jo̦wa dablaö mladou. Tä nö dedejeblou fa co̦lonö, bama a nia jo̦wa shino dablaö co̦o. “Fayä nijamö ya co̦o yalo”, a ca̦i lä cufe, ¿wedinaja a bufi li fa cunö, bei a wa̦ li? —bä nowa tayoma. ¹⁸ Abinaja bä nowa ca̦i tayoma. —¿Wedinaja a cuu bufio yalo, “Tä nö dedejeblou mlai ja”, a li cuu cufe? Bäma a wa̦ ji̦liblaimi waiquiwä —bä nowa tayoma. ¹⁹ A wa̦lii bufi lä doblaono wejei Jesúsnö tä daö waiquioma yalo, abinaja bä nowa tama. —Bämacö nowa lä tafe tä a̦ ja, ¿wamacö wa̦liyo da culanö? Abinaja ya cuma. Tä nö dedejeblou mlai ja, wamale nia dablaö mladou. Tä nö dedejeblou co̦o däjä, wamale nia shino dablaö co̦o. ¿Ö̦jö tawä? ²⁰ Cafä wamacö nija ei ya wa̦ lä cui, bejedi lä ya wa̦. Wamacö bufi nia jo̦liblou. Cafä wamacö lä cui, wamacö nia yai ma ö̦cöö wei ma cui, yanowamö täbä bufi nia bluca doblalou. ¿Ö̦jö tawä? Wamacö bufi ma jo̦liblaliyo wei ma cui, wamacö bufi nia dodijidablou co̦o. ²¹ ’¿Ö̦jö tawä? —a cuma—. Suwä a lä cuinö ijilu a ninibou däjä, a nö bleaaö. Bä ijilubö e tablabä etä cublou waiquia cudeenö, a nö yai bleaaö. Ö̦jö ma cui, bä ijilubö e fa tablalönö, a nö lä bleaano wei tä ja, a nofi jo̦lio majöomi. Bä ijilubö dude e wai tabou yalo, a bufi doblalou majöquei. ²² Inaja showawä, fei däjä wamacö bufi nia ma cublou wei ma cui, bämacö wäyäcu möyou co̦a yalo, wamacö bufi nia shino doblalou co̦o. Ö̦jö lä däjä, wamacö taamaö ma bälajei ma cui, wamacö bufi nia doblalou fe yadio. ²³ ’Ö̦jö däjä camiyä nija wamacö nia nacoimi —a cuma—. Cafä wamacö nija ei ya wa̦ lä cui, bejedi lä ya wa̦. Inaja tä cublou däjä, Fayä nija, camiyä ya wa̦nö wamacö nö bayeli nacao lä bädao wei tä ma cui ja, wamacö nia dobämou. ²⁴ Fayä nija, camiyä ya wa̦nö wamacö nö bayeli nacaomi showawä. Bä da naco. Wamacö nö bayeli fa nacaonö, wamacö nia dobäö, wamacö bufi yai doblalou fe balojoobä —a cuma. ²⁵ Abinaja Jesús a cuma. —Cafä wamacö nija ya tä a̦ wäyäö däjä, ya wa̦ faö yaclämou talei. Ö̦jö ma cui, ya wa̦ faö yaclämou mlai ja, wawädowä ya wa̦ nia lä faö wei tä cublou ajedewä waiquiwä. Fayä ya wa̦fa nia wawädowä wäaö. ²⁶ Fayä ya wa̦fa wawädowä wäaö däjä, camiyä ya wa̦nö wamacö nö nia bayeli nacao. Ö̦jö däjä, camiyänö Fayä nija bämacö nia bayelimaimi. Ma, inaja tä nia cuomi. ²⁷ Cama Fayä a showawä lä cuinö wamacö malä nofimaö wei. Camiyä wamale nofimaö yalo, Fayänö wamacö nofimaö. Fayä nijamö ya cuoma ya lä waloqueyoluno wei wama tä a̦ bejedi bufii yalo, wamacö nofimaö. ²⁸ Fayä nijamö ya culanö, bita jamö ya waloqueyoluma. Fei däjä ei bita ya tabi fa feicönö, Fayä nijamö ya nia co̦jamöö —a cuma. ²⁹ Jesúsnö bä lä nocamabono wei, abinaja bä cuma. —Ja̦o. Fei däjä wa wa̦ faö yacläablalou mlai ja, wawädowä wa wa̦ faö. ³⁰ Cafänö jödödöwä wa tä daö nö mlawä. Fei däjä, ö̦jö yama tä daö. Wa wa̦lii showao ma mlajei ma cui, cama bä bufi lä cuu wei, wa tä daö waiquiwä. Ö̦jö lä tänö yamacö bufi yai taamamou lä cule. Yai Bada nijamö wa cuoma wa lä waloqueyoluno wei tä lä cui, ö̦jö yama tä a̦ bejedi yai bufii lä cule —bä cuma. ³¹ —¿Ö̦jö tawä? —Jesús a cuma—. ¿Wamale a̦ bejedi bufii dodijia culawä, ö̦jö lä? ³² Wamale nia lä daaö wei tä nia cublou. Tä cublou waiquia lä cule. Wamacö nia sheleleblamodayou. Cafä wamacö yafibö jamö wamacö nia co̦oblou. Ö̦jö ma cui, ya yamimi. Fayänö wale ca̦i cua lä cule. ³³ Camiyä nija wamacö culanö, wamacö bufi yanöcöo fe yadiobä ya wa̦. Bita jamö wamacö cua showalanö, wamacö nö nia ma bleaamaö wejei ma cui, bä bufi nö da wa̦lojoicu. Bita jamö a lä nosiemou wei a nija ya nö wa̦loblou waiquilayoma —a cuma.

¹ Inaja Jesús a fa culunö, fedu jamö a mö fa nonoicunö a wa̦ fama. —Fabe, Fabemi. Wale taamaö lä bufio wei, fei däjä tä cublou waiquia lä cule. Ijilufä wale doblao da damalalö, cafä bäfä ca̦i doblao dablamaö mö feduo showadaobä. ² Jödödöwä ya täbä juwäbobä, Bada wale malä tablamaleno wei, camiyä nija wa bä bluca lä jöböbeno wei, ba̦limi ya bä tablamabä. ³ Cafä Yai Bada wa bejedi cua lä ayale wa daöje ja, camiyä Jesucristo wale lä shömöleno wei wale ca̦i daö mö feduoje ja, ö̦jö tänö bä nia ba̦limi cuo. ⁴ Bita jamö ya cua showalanö, camiyä nija wa tä tamaö lä bufino wei, ya tä jödödöblalema. Inaja ya lä cuaano wei tänö, cafä bäfä doblao damalalema. ⁵ Fabe. Cafä wa lä cule jamö camiyä wale doblao da damalalö. Bita wa tablaö showao mlao däjä, cafä sho bäfäcö doblao lä cuono weinaja showawä. ⁶ ’Fabe —a cuma—. Ei bita jamö afä wa bä lä tabono wei, camiyä nija wa bä jöböbema. Wa bä lä jöböbeno wei bä nija, cafä bäfä damalalema. Wa wa̦ nofi cadidibouje. ⁷ Cafänö wale lä dobäö wei tä lä cui, fei däjä tä daöje. Cafä nija showadi ya dobämou. ⁸ Cama bä nija, cafä bäfä a̦no malä wäyäno wei. Wa wa̦no ji̦liamaje. Cafä nijamö ya cuoma ya lä waloqueyoluno wei tä lä cui, ö̦jö tä bejedi ca̦i daöje. Cafänö wale lä shömöleno wei tä ma cui, ö̦jö tä a̦ ca̦i bejedi bufiije. ⁹ ’Ö̦jö ya bä nö bayeli nacaö lä cule —a cuma—. Yanowamö ya täbä nö bayeli nacaö ma mlai ma cui, cafänö wa bä lä jöböbeno wei, ö̦jö ya bä shino yai bayelimaö. Afä bä malä cui. ¹⁰ Iba bä bluca lä cule, afä bä li. Inaja showawä, cafänö wa bä nofi lä ibabole, iba bä ca̦i waiquiwä. Ö̦jö bänö wale doblao dablamaöje. ¹¹ Fei däjä, ei bita a lä cui ya nia daaö. Iba bä cuo juo däjä, cafä nijamö ya nia co̦o. ’Fabe. Cafä yami wa yaia —a cuma—. Cafä sho bäfäcö moli lä culenaja bä molio mö feduobä, bä da nowama. Cafä wa lojodenö wa bä nowamabä, camiyä nija wa lojode lä wäyämono wei tä showawä lä cuinö. ¹² Ö̦jö ya bä ca̦i cuo showao däjä, camiyä nija wa lojode lä wäyämono wei tä showawänö, ya bä nowamadima. Ya bä noshi umaboma. Dodijidawä bä cua lä cule. A nomabä, moli a cuo lä showadaono wei a lä cui, ö̦jö a shino wa̦lidiblaliyoma. Cafä wa wa̦no oni jamö, tä a̦ lä cuu weinaja tä bejedi wawäblou bufioma yalo, ö̦jö tä li cublaliyoma. ¹³ ’Ö̦jö ma cui, fei däjä cafä nija ya co̦o —Jesús a cuma—. Camiyä ya bufi doblalou lä culenaja, bä bufi doblalou cuo mö feduobä, eja ya cuo showao däjä ya tä a̦ bluca wäyäö. ¹⁴ Iba bä nija bäfä a̦no wäyäö ja, bä shomiblaliyoma. Yanowamö täbänö bä nofi wa̦libouje, cama bämi cudeenö. Camiyä ya shomi lä culenaja, iba bä cuwä mö feduwä yalo, bä nofi li wa̦libouje. ¹⁵ ’Bita jamö iba bä lä cublai wa bä co̦aö showadaobä ya nacoimi —a cuma—. Ma. Fecula bada a yai lä wa̦lidii a lä cui nija wa bä noshi yai umabobä ya wa̦. ¹⁶ Yanowamö täbänö bä nofi taboimije. Cama ebämi. Bä li shomi, camiyä ya shomi lä culenaja showawä. ¹⁷ Afä dodijidawä bä cuobä, bejedi tä a̦nö bä da yaimacö. Cafä wa wa̦ lä cui, ö̦jö bejedi lä tä a̦ waiquiwä. ¹⁸ Yanowamö täbä nijamö camiyä wale lä shömöleno weinaja, cama bä ma cui, ya bä ca̦i shömöa mö fedulema. ¹⁹ Iba ya bä bayeliblabä, cafä nija ya jöböamou. Afä bejedi tä a̦ fa ji̦liläjenö, afä bä dodijidawä yaiobä. ²⁰ ’Fei iba bä waiquiwä lä cui, ya bä nö bayeli nacaö ayaomi —a cuma—. Cama bä a̦nö wale a̦ nia bejedi lä bufiaö wejei, ö̦jö ya bä nö ca̦i bayeli nacaö. ²¹ Jai moli bä bluca cublobä ya wa̦. Fabe. Camiyä nija cafä wa lä culenaja, cafä nija camiyä ya cua mö lä fedulenaja, inaja showawä camiyä bäfäcö nija ö̦jö bä cuo mö feduobä. Ö̦jö bämacö bluca cublobä. Inaja lä bämacö lä cuaaö wei tänö, yanowamö täbä bufi jaducublobä ya wa̦. Cafänö wale lä shömöleno wei tä lä cui, tä a̦ bejedi bufiabeje. ²² ’Cafänö wale lä doblaamaö weinaja, camiyänö iba ya bä ca̦i doblao taamaö mö feduoma, cafä sho bäfäcö moli lä culenaja, ö̦jö bä moli cublou mö feduobä. ²³ Cama bä nija ya culanö, camiyä nija cafä wa ca̦i cuobä. Ö̦jö däjä, cama bä ma cui, moli dodijiwä bä ca̦i cuo mö feduo showaobä. Yanowamö täbä bufi jaducublobä. Cafänö eja camiyä wale lä shömöleno wei wale dabeje. Cafänö camiyä wale lä nofimalenaja, iba wa bä nofimaö mö lä feduo wei tä lä cui, ö̦jö tä ca̦i dabeje. ²⁴ ’Fabe —a cuma—. Camiyä ya cuobä jamö, iba wa bä lä jöböbeno wei bä ca̦i cuo mö feduobä ya nacou, wale doblao dabladayobeje. Cafänö wale nofimama yalo, ei bita a colo cua showaa mlai ja, wale doblamabou lä showaono wei, wale dablabeje. ²⁵ ’Fabe, cafä wa lä cadidou wei wa. Yanowamö täbänö wa daö ma mlajei ma cui, camiyänö bäfä daö. Iba bä lä cuinö, eja wale lä shömöleno wei, wale ca̦i daöje. ²⁶ Fei bä nija cafä bäfä damalalema. Inaja showawä, bäfä nia dablamaö cuo showao, cafänö wale lä nofimaö weinaja, yanowamö täbä nofimaö cuo mö feduobeje. Cama bä nija ya yai cuobä —a cuma.

¹ Einaja Jesús a fa culunö, cama ebä lä nocamabono wei ebä ca̦i falayoma. Sedono u jamö bä ca̦i fa bucaduicufälönö, ö̦jamö lä ficali täca lä blaono wei jamö, bä ca̦i wawäblaliyoma. ² Jesúsnö bä lä nocamabono wei, ö̦jamö lä bä ca̦i juu yaimoma yalo, Judanö täca ca̦i daö waiquioma, a nia lä nomojoliano wei a lä cuinö. ³ Judanö täca dama cudeenö, Jesús a nabä jubeje bä fa nacalänö, bä ca̦i ayofälöma. Lomateli ai bä sodado coyocomoma. Yai Bada etä yafi jamö bä lä läono wei ai bä ca̦i. ¿Ö̦jö tawä? Nofi bäyäalewä blowäjäwä bänö bä shömölemaje, faliseo bä bada ca̦inö. Cowa wacöbä shi̦i cuobä täbä däaquemaje. Wacöbä ca̦i ji̦ibomaje. Bä ishobä täbä ca̦i showabou showadaomaje. ⁴ Ö̦jö däjä, a nia lä taamano wejei tä daö waiquilanö, Jesús a wawäblaliyoma. Bä mö fa bamalänö, abinaja bä nowa tama. —¿Wedi jamö a lä cui, bei wama a nabä li juu cuimi?—bä nowa tama. ⁵ —Nasaleteli a wa̦fa Jesús lä cule —bä cuma. —Camiyä ö̦jö lä ya —Jesús a cuu showadaoma. Ö̦jö bä nija Juda a ublao coyocooma, a lä nomöjoliano wei a lä cui. ⁶ Jesús a lä cui, “Camiyä ö̦jö lä ya”, a cuu ja, a nabä lä juno wejei bä lä cui, bä quilili wäcäcäolaliyoma. ⁷ Ö̦jö däjä, Jesús a wa̦ faö co̦oma. —¿Wedi jamö a lä cui, wama a li dayäaö? —a cuu co̦oma. —Nasaleteli a wa̦fa Jesús lä cule —bä cuu co̦oma. ⁸ Jesús abinaja a cuu mö feduoma. —Camiyä ö̦jö lä ya. Ya cuu malä waiquiofe. Camiyä wamale nabä yai juu yalo, ei bä lä cui bä juwäma dijejä —a cuma. ⁹ A cuu lä balöono wei tä a̦ bejedi wawäblobä, a wa̦ li cuoma. Abinaja bä Fö̦ö e nija a lä cuno wei. “Wa bä lä jöböbeno wei bä lä cui, moli ma cui ya wa̦lidiblamanomi”, a lä cuno wei. ¹⁰ Ö̦jö däjä, Simón Pedro a lä cuinö, sibala a fa ucädalänö, a ishoa mö balayoma. Nofi bäyäalewä bada a wa̦ juamobä e nabä fa queicunö, jayu boco mashi lä cui jamö e yömöca baquequeblalema. Ö̦jö a nabä lä queono wei a lä cui, Maco a wa̦fa cuoma. ¹¹ Pedro nija abinaja Jesús a cuu showadaoma, —Sibalafä a taa da co̦cu. Ya nö yai bleaabä, Yai Bada tänö tä däamaö lä ojode wei tä ja, ya noshi umlaobä ya malä mlai —a cuma. ¹² Ö̦jö cudeenö, a nabä lä juno wejei bä lä cuinö, Jesús a juwäa showadalemaje. Sodado bä ca̦i lä cuono wei a bada ma cuinö, cama ebä ma cuinö, judio bä bada ma cuinö, Jesús a juwäa fa showadalöjenö, a bococu o̦cablalemaje. ¹³ Ö̦jö däjä, Anasi a bada nija a öböa balöquemaje. Nofi bäyäalewä, ö̦jö däjä a bada lä cuono wei a Caifasi lä cui nija a fecamamoma. ¹⁴ ¿Ö̦jö tawä? Judio bä lä yömölano wei, ö̦jö Caifasi a li cuoma. Judio bä bluca waicaö mlaobeje, moli a shämou ja tä a̦fa dodijidawä lä tano wei a lä cui. ¹⁵ Simón Pedro a lä cui, Jesús nija a jäwäjäwä yauaö jäafälöma. Jesús nija ai a nocao mö lä feduono wei a sho. Ö̦jö ai a lä cui, nofi bäyäalewä a badanö a dama yalo, a jamabonomije. Ö̦jö bada e yafi je̦fa jamö a faa cadidilayoma, Jesús a lä öbölefälöno wejei jamö. ¹⁶ Ö̦jö a ma fafälöö däjä ma cui, bei yoca sibo jamö Pedro a ublao siboo juoma. Ö̦jö cudeenö, Jesús nija ai a nocao mö lä feduono wei a lä cui, nofi bäyäalewä bada anö a lä dano wei a lä cui, ö̦jö a siboa co̦layoma. Yoca lä jolemabou wei a suwä nija a wa̦ fa fanö, Pedro a famalema. ¹⁷ Ö̦jö däjä, yoca lä jolemabou a suwä lä cui, Pedro nija abinaja a cuma. —Ö̦jö Jesúsnö bä lä nocamabono wei, cafä ai wa e nofima. ¿Ö̦jö tawä? —Ma, ö̦jö yami —Pedro a cuma. ¹⁸ Tä si ajioma yalo, bada a wa̦ juamobä ebä lä cuinö, ö̦jamö bä lä läono wei bä ca̦i badanö, acanafu bä wacö fa jolacöjenö, bä bomou ca̦i ublajaoma. Ö̦jö bä ublajaobä jamö, Pedro a ca̦i bomobä a coyocooma. ¹⁹ Ö̦jö däjä, nofi bäyäalewä a bada lä cuinö, Jesúsnö bä lä nocamabono wei bä wa̦lima, tä a̦ lä wäyäno wei etä a̦ ca̦i. ²⁰ Jesús abinaja e cuu mö feduoma. —Yanowamö täbä nijamö, wawädowä ya wa̦ shino faö talei. Judio bämacö yododabä yafi bä jamö ya tä a̦ shino wäyäö, Yai Bada etä yafi jamö ca̦i, judio bä bluca lä yododadii wei jamö. Moli ma cui, ya tä a̦ wäaö ja̦toonomi. ²¹ Wale a̦ lä ji̦lileno wejei bä lä cui nija wale a̦ yai da wa̦li, camiyä nija mlai. Ya bä nowa lä tano wei tä lä cui, cama bänö tä daöje —a cuma. ²² Inaja Jesús a cuu däjä, ö̦jamö bä lä läono wei ai a bada ublao lä ajedeono wei a lä cuinö, bei imicönö a si baiblalema. Abinaja e cuma. —Nofi bäyälewä bada a ma cui nija, ¿inaja bei wa e nia li cuu? ²³ Abinaja Jesús e cuma. —Ya wa̦ faö wa̦lidiwä ja lä, tä lä wa̦lidii tä da jömöba. Ö̦jö ma cui, ya wa̦ cadidiwä waiquiwä ja, wale si baiblaö buobä tä cuami —e cuma. ²⁴ Ö̦jö däjä, nofi bäyäalewä a bada Caifasi lä cui nijamö, Anasinö a bococu o̦cama shömöa nomöjölema. ²⁵ Simón Pedro a bomou ca̦i ublao däjä, a wa̦lii co̦omaje. —Ö̦jö Jesúsnö bä lä nocamabono wei, cafä ai wa e nofima. ¿Ö̦jö tawä? —a cuma. A wa̦ jole mojodumou co̦o ja, abinaja a cuma. —Ma. Ö̦jö ya e mlaicätä —a cuma. ²⁶ Nofi bäyäalewä a wa̦ bada juamobä ai e lä cui e a̦ fama, Pedronö yömöca lä baquequeblaleno wei e mashi lä cui. —Cafä wa lä cui, ¿Jesús sho ficali ca jamö bäfäcö dablanomi daanö? ²⁷ Ö̦jö däjä, Pedro a wa̦ mojodumou fa co̦onö, yedu cadala a wa̦ nocablaliyoma. ²⁸ Ö̦jö däjä, Caifasi e yafi jamö Jesús a ca̦i faa fa co̦löfälöjenö, Lomateli bada e yafi jamö a öböa fenalefälömaje. Ö̦jö ma cui, Lomateli bä shomi yalo, judio bänö bä nofi fa shamibojenö, u̦eshi jamö a ca̦i fanomije. Yai Bada a waiteli lä jayuano wei a nofi co̦camoaö co̦obä jamö, bä iyaö bufi doblaoma cudeenö, bä shamiaö bufionomi. ²⁹ Ö̦jö cudeenö, cama bä nija Bilado a fa sibolunö, abinaja a cuma. —Ei a lä cui, ¿wedinaja a fa cuaanö, bei wama a wa̦fa li dobloimi taö? —a cuma. ³⁰ Abinaja bä cuma. —Wa̦lidiwä talewä ei a cuo mlao fa cunoja, cafä nija yama a nö jöböabö mlai. ³¹ —A ca̦i juu da co̦lufälöje —Lomateli a bada Bilado cuma—. Wama bä dobloimi jömabä, afä Moisesi wama etä a̦ malä tabole. Abinaja judio bä cuma. —Yama a nia shäö lä showadao wei tä cuami. Tä a̦ läa. Lomateli wamacönö yamalecö malä wasöbole —bä cuma. ³² ¿Ö̦jö tawä? Jesús a befi ca̦i nia lä i̦tamano wejei, cama a wa̦fa wäyämamou balöoma. Ö̦jö a wa̦ bejedi wawäblou bufio yalo, Lomateli a bada nija Jesús a jöböaö ojodaomaje. ³³ Cama etä yafi jamö Bilado a faa fa co̦lunö, Jesús a nacamaö bufima. Abinaja e cuma. —Cafä ¿judio bada bei wa? —a cuma. ³⁴ Abinaja Jesús e cuma. —Judio wale bada lä wa̦life, cafä wa bufi wedinajamou ja, ¿bei wa wa̦ cuo da cufanö? Ma, wale a̦ ji̦libou bäa ja, ¿bei wale wa̦lii cufe? —e cuma. ³⁵ Bilado abinaja e cuma. —¿Camiyä judio ya daanö, ya bufi wedinajamobä? Cafä bäfä dobloimi jömabä, afä bä judio showawä ma cuinö wa bälaqueyolumaje. Nofi bäyäalewä bä blowäjäwä ma cuinö. ¿Wedinaja wa cuaaö dicooma? —e cuma. ³⁶ Abinaja Jesús e cuma. —Bita jamö ya bada läobä yami. Yanowamö täbä nija ya bada läobä ya cuo fa cunoja, wale a̦ lä juaö wejei bä lä cui bä nö ishobö wei, judio bä nija ya jöböamou mlaobä. Ma, bita jamö bä bada lä nosiemou weinaja, ya bada cuobä yami —e cuma. ³⁷ —Ö̦jö waiquiwä —Bilado e cuma—. Bada wa wa̦fa jilou malä waiquiofe. —Cafänö wale a̦fa shino bada jilaö lä cufe —Jesús e cuma—. Bejedi ya tä a̦ wawämabä ya oshe tablamolayoma. Inaja ya cuaabä ya bita jamö waloqueyoluma. Bejedi tä a̦ nofi lä yaibou wejei bä blucanö, wale a̦ ji̦liaöje —e cuma. ³⁸ —¿Wedi bei tä a̦ li bejedi? —Bilado e cuma. Inaja a fa culunö, judio bä nija a faa co̦layoma. Abinaja bä nowa tama. —Jesús a doblou lä mlai ya etä daimi. ³⁹ Ö̦jö ma cui, abinaja wamacö showadi cuaaö. Yai Bada a waiteli lä jayuano wei wama a nofi co̦camoaö co̦o däjä, afä ya fe lä lamabou wei moli wama a famaö bufio talei. ¿Ö̦jö tawä? Fei däjä, judio wamacö nija a bada cuobä a lä cui, ¿ö̦jö bei wama a jujeblamaö bufii cule?—bä nowa tama. ⁴⁰ I̦cali bä a̦ faö co̦oma. —¡Miji mlai! ¡Balabasi a yai shino da cushäblalö! ¿Ö̦jö tawä? Ö̦jö Balabasi a lä cui, shomi bä madofibö lä lämadii wejei, ö̦jö a li cuoma.

¹ Ö̦jö däjä, cama ebä nija, Biladonö Jesús a öböamaö bufima, a si yafelimabeje. ² ¿Ö̦jö tawä? Sodado bänö too totocö ca̦i mösöcöbö fa motoleblalöjenö, Jesús nija totocö yojoquemaje, bada bänö olo bä showadi yojobou lä cuaaö wejeinaja showawä. Ushi wacäjäwä cäcö labe ja, a jole jole ca̦i lucäa mö fedumalemaje. ³ Cama nija bä fa icublaanö, abinaja a nowa jole tamaje. —¡Bada tä! Judio bä nija wa bada lä läle, ¡dodijidawä wa bälödiobä! —a nowa jole tamaje. Inaja a nowa talajenö, bei bä imicönö, a si bluca baidamaje. ⁴ Bilado a siboa fa co̦lunö, abinaja judio bä nowa tama. —Bei. Cafä wamacö nija ya nia bälamaö co̦o, ya etä wa̦lidiwä dablaö lä mlai tä ja, wamacö bufi jaducublobä —bä nowa tama. ⁵ Ö̦jö däjä, mösöcö totocö yojobou showale, Jesús a ca̦i falayomaje. Ushi wacäjäwä cäcö ca̦i labe lucäbou showaoma. Biladonö a jömalanö, abinaja judio bä nija a cuma. —Bei. Fei a waiquiwä. A da dalalöje —a cuma. ⁶ Nofi bäyäalewä blowäjäwä bä lä cuinö, ai bä ca̦i bada lä cuinö, Jesús a fa dalalöjenö bä a̦ shi doa dicolayoma. —¡Fii balitama defi jamö a shino da basumacö! ¡A da basumacö! —¡Uo! —Bilado a cudaliyoma—. Cafä wamacö showawänö a da basucuduje, ö̦jö lä. A doblou lä mlai, camiyänö ya etä dablano malä mlai —a cuma. ⁷ Judio bä a̦ juo ja, abinaja Bilado a nowa tamaje. —Camiyä yamacönö, Moisesi yama etä a̦ tabou. Yama tä a̦ daö. Miji a lä cui, Yai Bada bei tä a̦fa Ijilubö jilou yalo, a nomabä a waiquiwä—a nowa tamaje. ⁸ Yai Bada bei tä a̦fa Ijilubö lä jilou wei, Biladonö tä a̦ fa ji̦lilänö, a yai quilia fe balojolaliyoma. ⁹ Cama etä yafi jamö a lucäa fa co̦lunö, Jesús a wa̦lii co̦oma. —Cafä ¿wediteli wa dodijiwä? —e cuma ma cui, Jesús e a̦ juonomi. ¹⁰ E a̦ juonomi yalo, abinaja e cuu nomöjöoma. —Camiyä nija ¿bei wa wa̦ juo mlaquei? Camiyä ya wa̦nö wa nia lä cushäblamou wei ya. Camiyä ya wa̦ showawänö, fii balitama defi jamö wa nia lä basuo wei ya —e cuma. ¹¹ Jesús abinaja e cuma. —Camiyä wale nia lä taamaö wejei tä ja, wa lä läle wa lä cui, Yai Bada tänö wa lämabou mlao fa cunoja, wa nö läobö mlai. ¿Ö̦jö tawä? Cafänö wale shämaö ja, cafä nija tä nowa nia ma shadio wei ma cui, cafä nija wale lä jöböano wei a lä cui, ö̦jö etä nowa nia shino yai cuo —a cuma. ¹² Ö̦jö a wa̦ fa ji̦lilänö, Biladonö a cushäblabä a wa̦ ma lojodoano wei ma cui, judio bä a̦ nö wa̦yäama. —Miji a lä cui wa cushäblamaö dicoo ja, Lomateli bada tä Sesa lä cui, wa nofimaimi waiquiwä. Bä a̦fa bada lä jilou wei bänö, Sesa a nofi malä wa̦libou wejei —bä cuma. ¹³ Ö̦jö bä a̦ fa ji̦lilänö, Jesús a wawäa co̦malema. Wa̦lidiwä talewä bä jömabeje, bada bä döcäobä täcö jamö Bilado a döcäquema. A lä döcäqueno wei tä ulifi lä cui, Maa mabä wei, tä a̦fa ulifi jilabouje. Ebleo bä caficö a̦ ja, Cabada tä a̦fa ulufi jilaö mö feduoje. ¹⁴ Ö̦jö tä fena ja, Yai Bada a waiteli lä jayuano wei a nofi nia yai co̦camoaö co̦omaje. ¿Ö̦jö tawä? Motoca a yo̦lolodayoma. Judio bä nija abinaja Bilado a cuma. —Cafä wamacö nija a bada läobä, fei a waiquiwä. ¡A da möje! ¹⁵ Bä a̦ i̦cali faö ja, abinaja bä cuma. —¡A befi ca̦i da i̦tamacö! ¡A befi ca̦i da i̦tamacö! ¡Fii balitama defi jamö a da basumacö! Bilado abinaja a cuma. —Cafä wamacö nija a bada läobä a lä cui, ¿fii balitama defi jamö, ya basuamabä a daanö? Nofi bäyäalewä blowäjäwä bä lä cui, bä a̦ juoma. —Yama a nofi badabobä, Lomateli bada Sesa a lä cui, ö̦jö a waiquiwä —bä cuma. ¹⁶ Ö̦jö däjä, fii balitama defi jamö a basuamabeje, ö̦jö bä nija Biladonö a noshi ö̦jödadalema. ¹⁷ Ö̦jö cudeenö, Jesús a ca̦i fa alujenö, a juma. A nia lä basuano wejei defi lä cui, camanö defi yalucua showalefälöma. Fe̦losi blaobä tä a̦fa ulifi lä cule jamö a ca̦i jumaje, ebleo bä caficö a̦ ja, Cocoda a wa̦fa lä jilabou wejei jamö. ¹⁸ Ö̦jamö lä, fii defi jamö a basuquemaje. Jesús a basua fa möamobalöjenö, ai cäcöbö ca̦i basua lu̦locua mö feduquemaje. Acasi boco mashi jamö ai a, jayu boco mashi jamö ai a, cäcöbö basua taaquemaje. ¹⁹ Jesús a lä basuono wei defi jamö etä a̦ oni shadiobä, Biladonö etä a̦ oniblamalema. Abinaja etä a̦ cuma. “Judio bä nija a bada cuobä, ei Nasaleteli Jesús a”, etä a̦ cuma. ²⁰ Shabono ajede jamö Jesús a basuquemaje yalo, judio bluca bänö tä a̦ doblaö jayuamaje. Judio bä caficö a̦ ja tä a̦ oni cuoma. Lomateli bä caficö a̦ ca̦i ja. Clesiateli bä caficö a̦ ca̦i ja. ²¹ Judio bä nofi lä bäyäbou wejei bä blowäjäwä lä cuinö, ö̦jö tä a̦ oni fa möjenö, abinaja Bilado nija bä cuma. —“Judio bä nija a bada cuobä a”, tä a̦ oni nofi cuu lä dicoo wei. Inaja mlai. Abinaja tä a̦ oni yai cubä. “Judio bä nija a bada cuobä a wa̦fa lä jilou wei a”, tä a̦ yai oni cubä —bä cuma. ²² Bilado abinaja a cuma. —Ya tä a̦ lä oniblamalöfe, ö̦jö waiquiwä —a cuma. ²³ Sodado bänö Jesús a fa basucöjenö, a lä didiono wei ebä camishi däalalemaje. Cama sodado 4 bänö bä nia fa tabojenö, bä shelelealalemaje. Labe ecö ca̦i. Ö̦jö ma cui, labe ecö lä cui, comadiwä cäcö diyäblamoa lä showadalayono wei cäcö cuoma. ²⁴ Ö̦jö cudeenö, abinaja bä nowa sodado tayoma. —Bäma cäcö cacaö mlai ja, jömamodima a ja bämacö shino da wabäo, cäcö nia lä tabou wei a jömamobä —bä cuma. ¿Ö̦jö tawä? Yai Bada etä a̦ oni lä cule tä a̦ bejedi cublobä etä cuoma. Abinaja tä a̦ cuu. Ya lä didio wei cäcö shedequeblaleije. Ecö nia lä däablaö wejei bä nia fa jömamonö, madofi a ja, bä wabäo balöo. Einaja tä a̦ cuu. ²⁵ Inaja bä sodado cuaaö showao däjä, Jesús a lä basuono wei defi cotä jamö, bei bä nöö e ublaoma. Bä nöö ai e ca̦i. Cleofa bä suwäbö María a wa̦fa lä cule a ca̦i. Madalateliyoma a wa̦fa María lä cule a ca̦i. ²⁶ Jesúsnö bä nöö e dalalema. A lä nocamabono wei ai e lä cui, e ca̦i ublao ajedeoma, a yai lä nofimano wei e lä cui. Cäcöbö fa dalalönö, abinaja bä nöö e nija a cuu balöoma. —Nabe, nabemi. Ijilufä wa nofi nö lä tabobö weinaja, miji wa nofi nia tabou —a cuma. ²⁷ Ö̦jö däjä, a lä nocamabono wei a lä cui nija abinaja a cuu nomöjöoma. —Bei. Naafä wa nofi nö lä tabobö weinaja, inaja showawä nayä wa nofi nia ca̦i tabou juo —a cuma. Inaja cäcöbö nowa fa talönö, a lä nocaono wei e lä cuinö, cama e yafi jamö a bälöobä, a nofi taa showadaalema. ²⁸ Öjö däjä, tä bluca lä jödödöblaliyono wei tä fa dalalönö, a wa̦ Jesús fama. Yai Bada etä a̦ oni jamö tä a̦ lä cuu weinaja tä a̦ bejedi cublobä, abinaja a cuma. —Ya amishi —a cuma. ²⁹ Ö̦jamö lä showawä, nashiwä toubä befi ca̦i i̦taoma. Inaja a cuu ja, ö̦jö toubä ja tä madofi wai fa ca̦dalöjenö, fii fi ja tä fa ji̦ibajenö, Jesús caficö ja toubä befi ca̦i dodobou ajedeojolayomaje. ³⁰ Nashiwä toubä fa uyucanö, a wa̦ Jesús fama. —Tä jödödöblou waiquilayou lä cufe —a cudaliyoma. Ö̦jö däjä, a fe fa leidalunö, a möshöa jawäa fa showadaicunö, a nomalayoma. ³¹ Ö̦jö tä fena ja, Yai Bada a waiteli lä jayuano wei a nofi nia yai co̦camoaö co̦omaje. Täbä yanöcöobä tä mö nia ca̦i jalu sábado cuo showaoma yalo, tä nofi tabou bolacaomaje. ¿Ö̦jö tawä? Täbä yanöcöobä tä mö jalu ja, bä nomawä basudio showao dicoo mlaobä, Bilado nija judio bä a̦ fama. Fii defi jamö bä lä basuo wei bä lä cui, bä ucu yafequiblamaö bufimaje, bä nomaö showadaobä. Täbä yanöcöobä tä mö jalu sábado cublou showao mlao däjä, bä nomawä nia itomaö showadaomaje. ³² Ö̦jö cudeenö, sodado bä fa icuicunö, Jesús nija cäcöbö basua lä lu̦locuono wei, cäcöbö ucu yafequia balölalemaje. ³³ Ö̦jö ma cui, Jesús nija bä icua fa nomöjöicunö, a nomawä waiquiwä fa dalalöjenö ucu yafequiblanomije. ³⁴ Ö̦jö ma cui, sodado ai a lä cuinö, boo shi bada namonö, Jesús leboco diquibalejelayoma. Leboco fa diquibalujulunö, i̦yäbö falayoma, mau ubä ca̦i. ³⁵ ¿Ö̦jö tawä? Camiyänö ya tä daa fa cadidilalönö ya tä a̦ wäyäö lä cule, cafä wamacö ma cuinö, wama tä a̦ ca̦i bejedi bufii mö feduobä. Ya bejedimou. Yale a̦ nofi mölabobä ya wa̦. ³⁶ Ö̦jö tä lä cublaliyono wei tä lä cui, Yai Bada etä a̦ oni lä cuu weinaja tä a̦ bejedi wawäblobä tä li cublaliyoma. Abinaja tä a̦ cuu. Moli ma cui, u nia cäblamoimi. Einaja tä a̦ cuu. ³⁷ ¿Ö̦jö tawä? Abinaja ai tä a̦ ca̦i cuu mö fedua. A lä diquiano wejei a lä cui nija bä mamo nia showao. Einaja tä a̦ cuu. ³⁸ Ö̦jö tä cublou fa waiquilonö, Alimadeateli a wa̦fa José lä culenö Bilado a wa̦lima, Jesús a nomawä co̦abä. Ö̦jö José a lä cui, Jesús nija a nocaobä a ma cuono wei ma cui, judio bä nija a quilii ja, a wa̦ wawäanomi. Biladonö a wa̦ fa ji̦lilänö, a co̦amaö bufima. Ö̦jö däjä, a aa fa showadaalufälönö, a co̦lejelayoma. ³⁹ Nicodemo a ca̦i juma, didi däjä Jesús nija a jaba icua fe lä jaluqueno wei a lä cui. Nö cle̦deli täbä bluca fa co̦cablalönö, täbä besi ca̦i jude waloquema. ⁴⁰ Bei. Jesús a nomawä fa co̦bölönö, camishi acadafu au bä jamö, täbä nö lä cle̦deli wei täbä jädamaböö cuaama, a nomawä ya̦icoloblaböö nomöjöobä. Täbä nomawä lä maqueblaaö wejei jamö, inaja judio bä showadi cuaama. ⁴¹ Fii balitama defi ja, Jesús a lä basuqueno wejei jamö, ficali täca ajedeo blaoma. Ö̦jamö lä, nomawä bä maqueblaabeje maca lä tablaleno wejei maca dude cuoma, bä nomawä maquebou balöono lä mlajei maca. ⁴² ¿Ö̦jö tawä? Täbä yanöcöobä tä mö jalu nia cublou lä fenao wei tä weyade cuo waiquioma cudeenö, bä shi jalimoma, tä nia lä tamou wei tä taö showadaobeje. Ö̦jö maca ajedeo waiquioma cudeenö, ö̦jamö Jesús a nomawä maqueböquema.

¹ Domingo tä mö jalu lä cublole däjä, Madalateliyoma María a lä cui, a jocäblou fa fenablalonö, maa maca jamö a aa fenalayofälöma, motoca a jaba juimaö däjä. Bei täca jamö, maa ma bada lä läono wei, shomi jamö ma bada casöa dalalema. ² Ö̦jö tä fa dalalönö, tä a̦ wäyäbä a läläa co̦layoma. Simón Pedro a yömölajaloma, Jesúsnö bä lä nocamabono wei, ai a mö feduwä lä cui a ca̦i, a yai lä nofimano wei a lä cui. Abinaja cäcöbö nowa tama. —Bada tä nomawä lä maqueono wei täca jamö, a cuami tai. A nofi fa dälöjenö, a nomawä maquea lä nomöjöqueno wejei, yama tä daimi —cäcöbö nowa tama. ³ Pedro sho, Jesúsnö ai a lä nocamabono wei a lä cui sho, cäcöbö faa fa showalöfälönö, nomawä a lä maquequeno wejei täca jamö, cäcöbö cadidiblaliyofälöma. ⁴ Bolacabö cäcöbö läläa ma showalayono wei ma cui, Jesús nija a lä nocaono wei ai a lä cuinö, Pedro a nojablamalema. A nomawä lä maqueono wei täca jamö, a waloa balöblabalecölöma. ⁵ Ö̦jamö a fa lodalunö, tä möö mö wädäama. Camishi acadafu au bänö, a lä ya̦icoloono wei bä jilaa ma dalaleno wei ma cui, bei täca jamö a lucänomi. ⁶ Ö̦jö däjä, Simón Pedro a waloa nomöjöquema. A nomawä lä maqueono wei täca jamö, a lucäa showalayofälöma. Camishi acadafu au bänö a lä ya̦icoloono wei bä jilaa fa dalalönö, ⁷ a mö lä jo̦yaono wei cäcö ca̦i daa mö fedua showalalema. Camishi acadafu bä lä jilaono wei jamö mlai, yami, shomi jamö cäcö cofuma li blaoma. ⁸ Ö̦jö däjä, Jesúsnö bä lä nocamabono wei ai a lä cui, bei täca jamö, a waloa lä balöqueno wei a lä cui, ö̦jö a lucäa nomöjölayoma. Ö̦jö tä bluca fa dalalönö, Jesús a demi jocädou lä co̦layono wei tä a̦ bejedi bufia showadalema. ⁹ Ö̦jö ma cui, Yai Bada etä a̦ oni jamö, Jesús a wa̦fa lä wäyäö wei tä a̦ ja, cäcöbö bufi jaducuo mlai ja, cäcöbö cuo showaoma. “Inaja lä a demi jocädou co̦obä lä”, cäcöbö bufi cunomi showawä. ¹⁰ Ö̦jö däjä, Jesúsnö cäcöbö lä nocamabono wei cäcöbö co̦a co̦layoma. ¹¹ Cäcöbö ma co̦layono wei ma cui, a nomawä lä maqueono wei täca sibo jamö, María a ö̦cöö ca̦i ublao juoma. A ö̦cölanö, a fa lodalunö, a mö yejeblaquema. A nomawä lä maqueono wei täca u̦eshi jamö tä fa mödalönö, ¹² a̦jele bolacabö cäcöbö dalalema. Camishi au cäcö ja, cäcöbö didioma. Jesús a nomawä lä maqueono wei jamö, cäcöbö döcäcäoma. Bei fe lä cuono wei jamö ai, bei mamicö cuo mö lä feduono wei jamö, ai a mö feduwä. ¹³ María nija cäcöbö a̦ faö ja, abinaja cäcöbö cuma. —¿Wedi tä ja bei wa wa̦ li dedeblalou cule? —cäcöbö cuma. —Ya nofi lä Badabou wei, a nomawä nofi fa dälöjenö, shomi jamö a maquea nomöjömaquemaje. Ö̦jö ya tä daimi yalo, ya bufi jo̦liblalou dodijia yalo ya wa̦ —a cuma. ¹⁴ Einaja a fa culunö, a mö fa lacödalunö, Jesús a ublaa dalalema ma cui, a nö ö̦jöböanomi. ¹⁵ Abinaja Jesús e cuma. —¿Wedi tä ja bei wa wa̦ li dedeblalou cule? ¿Wedi jamö a lä cui, bei wa li dayäö cuboyoi? —e cuma. ¹⁶ Ficali ca jamö a lä ojodamou wei a fa bufinö, abinaja e cuma. —Bada tä. Cafänö shomi jamö wa nomawä maquea nomöjömaquema ja, a jömöa da co̦bayo, ya co̦aö showadaobä —e cuma. Jesús abinaja e cuma. —María— e cuma. A wa̦fa jayublamolayou ja, María a mö lacöblaliyoma. Ebleo bä caficö a̦ ja, abinaja e cudaliyoma. —¡Tä a̦ wäyäle! —e cudaliyoma. ¹⁷ —Wale jubaö shi jalimou dicoo dijä —Jesúsnö a nowa tama—. Fayä a lä culadi jamö ya junomi showawä. Fääshäyä bä nija wale a̦fa yai da wäyädu. Fayä nijamö ya juu, cafä wamacönö wama a nofi Fö̦ömaö lä showale a lä cui nijamö. ¿Ö̦jö tawä? Yai Bada ya lä bufiblale a lä cui nija ya juu, wama a ca̦i bufiblaö mö lä feduo wei a nija —a nowa tama. ¹⁸ Madalateliyoma a María lä cui, Jesúsnö bä lä nocamabono wei bä nijamö a fa alunö, abinaja a cuma. —Bada ya tä daa fenalalei cublei —a fa cunö, Jesús a lä cuno weinaja, a wa̦no wäyäö showadaojoloma. ¹⁹ Jaba tä mö jalu cuoma, domingo tä lä cui. Tä mö jaba ji̦cocaö däjä, Jesúsnö bä lä nocamabono wei bä bluca dödöjöwä co̦camoma. Judio bä nö quili tamaje yalo, yocabä quefubomaje. Yedu Jesús a fa bädaliyonö, cama bä mötale jamö a ublaa damoa bädaalaliyoma. —Bä bufi da yanöcöicu —bä nowa tama. ²⁰ Inaja a fa cunö, Jesús cama bei imicö mömou wawädooma, bei leboco ca̦i. Ö̦jö däjä, cama ebä lä nocamabono wei bä lä cuinö, Bada a nö fa ö̦jöbölöjenö, bä bufi doblaloma. ²¹ Ö̦jö däjä, —Bä bufi da yanöcöicu —a cuu co̦oma—. Fayänö wale lä shömöleno weinaja, cafä wamacö ma cui, bämacö shömaö mö fedua lä cule —a cuma. ²² Einaja a fa culunö, cama ebä nija a fa jolashicönö, abinaja bä nowa tama. —Yai Bada tä Bufi da taaleje. ²³ Täbä doblou lä mlai, ai wama etä nowa taboimi ja, etä nowa nia cuomi. Wama etä nowa tabou showawä ja, etä nowa nia cudio —bä nowa tama. ²⁴ Jesús a lä bädaliyono wei däjä, cama 12 a wa̦ lä juaö wejei ai e a̦fa Tomás lä cui, a cuonomi. Cäcöbö lä e̦lequeblaliyono wei a, a wa̦fa ca̦i lä jilamono wei a lä cui. ²⁵ A cuonomi yalo Jesúsnö bä lä nocamabono wei ai bä lä cuinö a yömölaö juomaje. —Bada yama a daa co̦lalema —bä cuma ma cui, abinaja Tomás a cuu dicooma. —Jesús bei imicö lä basuono wei ya täca dablaö showao mlao däjä, bei ya imicönö ya dusi jubaö mlao däjä, bei leboco jamö ya imicö ca̦i lucäö mlao däjä, bämacö a̦ bejedi bufii mlaicätä —a cuma. ²⁶ Ö̦jö däjä, 8 tä mö didi fa cublalunö, ö̦jö a yano jamö, Jesúsnö bä lä nocamabono wei bä jilao co̦oma. Ö̦jö däjä Tomás a ca̦i co̦caoma. Yocabä ma quefufubono wejei ma cui, yedu Jesús a bädaleyoluma. A fa bädaliyonö, cama bä mötale jamö a ublaa fa wawädoblalunö, —Bä bufi da yanöcöicu —a cuma. ²⁷ Ö̦jö däjä, Tomás nija abinaja a cuma. —Eja wale imicö da jubayo. Wale imicö da möyo. Wa fa ajedeblaliyolunö, bei ya leboco jamö imicö da lucäliyo. Wa mölaö lä mlai tä da joyalö. Wale nofi yai da mölabo —a cuma. ²⁸ Tomás abinaja e cuu mö feduoma. —¡Bada tä! Cafä bäfä shino yai bufiblabä wa. ²⁹ Jesús abinaja e cuma. —Wale li möö yalo, wale a̦ bejedi li bufiblaö lä cule. Wale möö ma mlajei ma cui, wale a̦no bejedi bufii fe lä yadio wejei bä lä cui, ö̦jö lä bä bufi nia yai doblalou —e cuma. ³⁰ ¿Ö̦jö tawä? Inaja lä tä cuoma. Camiyänö ya tä lä dalaleno wei, ya tä a̦fa wäyäö. Yai Bada e nö ö̦jöböamobä, tä nö lä quilijii, Jesúsnö bluca tä wawämaö cuaama. Ei sibä jamö tä a̦ oni bluca wäyämamou. Yamalecö lä nocamabono wei yamacö mamo showao däjä, tä nö lä quilijii, ai tä bluca wawämaö showao mö feduoma, ei sibä jamö tä a̦ cua lä mlai. ³¹ Ö̦jö ma cui, Jesús wama tä a̦ bejedi bufibä, ya tä a̦ oni taaö lä cule. “Yai Bada tänö a shömabä a lä yaileno wei, ö̦jö Jesús a waiquiwä”, wama a nofi yai tabobä. “Yai Bada bei Ijilubö e”, wama a nofi ca̦i tabobä. Inaja wama a nofi tabolanö, cama a wa̦nö ba̦limi wamacö cuobä.

¹ Ö̦jö tä cublou waiquilayono wei ja, modu Dibelia u casö jamö, cama ebä lä nocamabono wei bä nija Jesús a damoa co̦laliyoma. Ö̦jö däjä, abinaja tä cublaliyoma. ² Cama ebä lä nocamabono wei, ei 7 ebä li cuoma. Simón Pedro a cuoma, Tomás a ca̦i, Cäcöbö lä e̦lequeblaliyono wei a, a wa̦fa ca̦i lä jilamou wei a lä cui. Canaateli Nataniel a wa̦fa lä cule a ca̦i. Sebedeo bä ijilubö ecöbö ca̦i. Jesúsnö bä lä nocamabono wei ai ecöbö ca̦i. ³ Simón Pedro abinaja e cuma. —Yuli ya bä nia ya̦caö —a cuma. —Camiyä sho, bämacö nia bluca juu —ebä fa cunö, bä bluca alayoma. Canawä a jamö bä fa döcäcäolalunö, bä caläa showalayoma. Ö̦jö ma cui, yuli bä ya̦caö mlajei ja, bä nö bleaaö fe jaludii buoma. ⁴ Tä mö wacacadou däjä, modu u casö jamö Jesús a ublaa ja̦toaleyoluma. Ö̦jö ma cui, cama ebä lä nocamabono wei bä lä cuinö a nö ö̦jöböanomije. ⁵ Ö̦jö bä nija abinaja Jesús a cudaliyoma. —Ijilubä. ¿Yuli wama bä ya̦caaö mlao cufe? —a cuma. —Ma. Yama bä ca̦i ya̦caaö buonomi —bä cuma. ⁶ Abinaja bä nowa taö nomöjöoma. —Jayu wamacö boco mashi jamö, ya̦camodima cäcö da quemabalöje. Ö̦jö däjä yuli wama bä nia dalalei —bä nowa tama. Ö̦jö cudeenö, ö̦jamö lä cäcö quea fa tamabalöjenö, yuli bä bluca cublaliyoma. Bä bluca cublaliyoma yalo, canawä a jamö bä tablaö doblonomije. ⁷ Jesúsnö bä lä nocamabono wei ai e lä cui, a yai lä nofimano wei e lä cui, abinaja Pedro nija ö̦jö a cuma. —Casö jamö quiji a lä ublale, ¡Bada cätä! —a cuma. ¿Ö̦jö tawä? Bä yulimobä jamö, Pedro a lä didiono wei ecö camishi jayublaö ma waiquilayono wei ma cui, “Bada cätä”, a wa̦ cuu fa ji̦lilänö, a lucäa co̦a showadaaliyoma. Ö̦jö däjä, modu u jamö a quea showadabaliyoma, lobe a washölöblou balöobä. ⁸ Ö̦jö ma cui, cama ebä lä nocamabono wei ai bä lä cui, yuli bä befi ca̦i fa shaiboimajenö, bä befi ca̦i yanöcö washölöblou jälayoyoluma. Modu u casö ajede jamö, bä befi ca̦i malä ca̦ono wei. ⁹ Bä fa washölöblalunö, acanafu bä wacö ja, yuli bä yaa dalalemaje, nii cäcö ca̦i. ¹⁰ Abinaja Jesúsnö bä nowa tama. —Wama bä yuli lä ya̦calöfe, ai bä da boimaje. ¹¹ Inaja bä nowa tama cudeenö, canawä a jamö Simón Pedro a didiblaa fa co̦baludunö, ya̦camodima cäcö ja, yuli bä befi ca̦i fa shaiboimanö, bä washölöblamalema. Yuli bä badanö cäcö fe lajooma. ¿Ö̦jö tawä? Yuli 153 bä cuoma. Inaja bä bluca ma cuono wei ma cui, cäcö ca̦i jädöö buonomi. ¹² Jesúsnö abinaja bä nowa tama. —Jabo. Bämacö da iya. ¿Ö̦jö tawä? Cama ebä lä nocamabono wei bä lä cui, moli ma cui a wa̦ faö bädaonomi. Bada tä Jesús a nö ma ö̦jöböleno wejei ma cui, “¿Cafä wa tawä?”, ebä cuu quilima. ¹³ Jesús a fa icuicunö, nii cäcö fa dälänö, bä dobälalema. Yuli bä ca̦i ja. ¹⁴ ¿Ö̦jö tawä? A demi jocädou fa co̦lonö, cama ebä lä nocamabono wei bä nija Jesús a lä damolaliyono wei, ö̦jö 3 a cuo waiquioma. ¹⁵ Bä iyaö fa jödödöblalunö, Simón Pedro nija abinaja Jesús a cuma. —Jonasi ijilubö Simón wa lä cui. Ei bänö wale ma nofimaö wejei ma cui, ¿cafänö wale shino yai nofimaö dodijia da culanö? —Awei —a cuma—. Wale daö. Bäfä nofimaö —Pedro a cuma. —Wale nofimaö ja lä, iba bä lä cui, iba oweja bä wai lä cui bä da iyama —a cuma. ¹⁶ Jesúsnö a wa̦lii co̦oma. —Jonasi ijilubö Simón wa lä cui. ¿Wale nofimaö da culanö? —Awei, tä a̦ wäyäle —Pedro a cuma—. Wale daö. Bäfä nofimaö lä. Abinaja Jesús e cuma. —Wale nofimaö ja lä, iba oweja bä da nowama —e cuma. ¹⁷ Ö̦jö däjä, Jesúsnö 3 a wa̦lii co̦oma. —Jonasi ijilubö Simón wa lä cui. ¿Wale nofimaö da culanö? —e cuu co̦oma. ¿Ö̦jö tawä? “¿Wale nofimaö da culanö?”, 3 a cuu co̦o ja, Pedro a bufi nö bleaama. Abinaja e cuma. —Bada tä. Wa tä daö jödödöwä. Bäfä lä nofimaö wei wale daö —e cuma. —Wale nofimaö ja lä, iba oweja bä da iyama, ö̦jö lä. ¹⁸ ¿Ö̦jö tawä? Cafä nija ei ya wa̦ lä cui, bejedi lä ya wa̦. Wa osheo däjä, camishi wa cäcö fa a̦yolänö, wa juu lä ojode wei jamö wa juma. Ö̦jö ma cui, wa wa̦lobadao däjä, wa bococu nia leleo. Cafä nija ai anö täcö fa o̦cacönö, wa juu ojode lä mlai jamö wa nia öböafälöö —e cuma. ¹⁹ Einaja a lä cuno wei, Pedro a nia lä shämono wei tä yai jömama, fii defi jamö bococu nia lä lelemabono wejei. A lä shämono wei tänö, Yai Bada tä nia doblao dablamama. Inaja a nowa fa talönö, —Camiyä nija a yai da nocaicu—e cuma. ²⁰ Pedro a mö fa lacödalunö, Jesúsnö bä lä nocamabono wei, ai a yaua dalalema, a yai lä nofimano wei e lä cui. Bä lä iyano wei jamö, Jesús sho cäcöbö lä jö̦cöjöono wei, ö̦jö a cuoma. Jesús a wa̦lii däjä, “Bada tä. ¿Wedi jamö a lä cuinö wa nia nomojoliaö?” e lä cuno wei a lä cui. ²¹ Pedronö ö̦jö a yaua fa dalalönö, abinaja Jesús nija a cuma. —Bada tä. Quiji a nodiaö lä jäimi, ¿wedinaja ö̦jö a nia li taamamou? —a cuma. ²² Jesús abinaja e cuma. —Äyämö ya juu co̦o showao mlao däjä, ya demi tabou ojodao ja, ya nia tamabou. Cama a nia lä taamamou wei tä ja, a bufi cuaa dijä. Camiyä nija a yai da nocaicu —e cuma. ²³ ¿Ö̦jö tawä? Ö̦jö däjä, Jesús ai ebä nija, ö̦jö tä a̦ ji̦limou blaucublaliyoma. Abinaja bä nowa tayou cuaama. —Jesús nija a lä nocao wei ö̦jö a lä cui, a nia jo̦wa nomaimi fa talei—bä cuma. Bä cuma ma cui, inaja Jesús a cunomi. Abinaja a shino cuma. “Äyämö ya juu co̦o showao mlao däjä ya demi tabou ojode ja, ya nia tamabou. Cama a nia lä taamamou wei tä ja, a bufi cuaa dijä”, Pedro nija a shino cuu bädaoma. ²⁴ ¿Ö̦jö tawä? Ö̦jö a wa̦fa yai lä wäyämono wei a lä cui, Jesúsnö bä lä nocamabono wei ai e mö feduwä lä cui, camiyä Juan, ö̦jö lä bei ya e. Ei ya tä a̦fa bluca lä wäyäle, ö̦jö lä ya showawä. Camiyänö, ö̦jö bei ya tä a̦ bluca oniblaö lä cule. Ya tä a̦ lä wäyäle, yama tä a̦ bejedi daö. ²⁵ Ö̦jö ma cui, ei bädawä mlai, Jesús a lä cuaano wei ai tä bluca cua showaa. Tä a̦ jödödöwä oniblaö fa cunoje ja, sibä nö blucao fe balojoobö wei. Bita a bada blaucuwä ma cui, ö̦jö sibä cuobä a nö obö mlai, ya bufi cuu.