Santiago

Santiago

¹ Camiyä Santiago cä ya. Yai Bada ya nosie juabä ya, Bada tä Jesucristo ca̦i. Isaeli bä ijilubö 12 wama ecö bälöa lä nodile wama ecö nija, ei ya tä a̦ oni shömaö. ¿Dodijidawä wamacö cua showaa culawä? ² Iba wamacö. Wamacö nö ma bleaaö wei ma cui, bä bufi yai doblao fe da yadio. ³ Ei wama tä daö malä waiquii. Wamacö nö bleaaö däjä, Jesús wama a nofi mölabou fe lä yadio wei tänö, showadi wamacö bufi nö wa̦lojoablalou talei. ⁴ Bä bufi nö shino yai da wa̦loja, ö̦jö lä, wamacö bufi yai bayeliblamobä. Wamacö bufi nö bleaaö mlai ja, wamacö bufi walalawä ca̦i cuobä. Ö̦jö däjä wamacö bufi nia ujuduaimi. ⁵ Ai wamacö bufi wedinajamou bädawä ja, Yai Bada nija bä nö bayeli da nacao. Wamacö bufi jaducublamaö weicätä. A bufi läo mlai ja, bluca täbä nija a shi ö̦jöde dablamou talei. ⁶ Ö̦jö ma cui a bufi jaducublamabä a lä nacou wei a lä cui, a bufi fa bolacaicunö mlai, moli tä jamö a bufi culanö a nacou shalilio showadaobä. Bolacabö täcö bufibolanö a wa̦ faö dicoo ja, wadoli anö mau u shäyäjaö lä culenaja a bufi cuwä waiquiwä dicowä. ⁷ Inaja a bufi cuwä waiquiwä ja, a mölaa bälayou. Yai Bada nija a nia dobämoimi. ⁸ A bufi lä shedecou wei a lä cui, cama a nia lä cuaaö wei etä ma cui ja, a bufi shaliliwämi. Bada tä nija, ö̦jö a lä cui a nia bayeliblamoimi waiquiwä. ⁹ Jesucristo ai ebä ma jo̦li wei ma cui, bä bufi doblalobä cäbä. Yai Bada tänö bä nofi tabou fe yadio cudeenö bä bufi nia yai doblalou. ¹⁰ Jesucristo ai ebä lä cui, bä nö lä madofibö wei, ö̦jö bä bufi ca̦i doblalou mö feduobä cäbä. Madofi bä ja mlai. Ma, Yai Bada nija bä yai bayeliblamou cudeenö bä bufi nia doblalou. ¿Ö̦jö tawä? Madofi ebä nia cudio malä mlai. Cama bä ma cui, moimoima bei bä jole mlaaö lä cuaaö weinaja bä cuaaö mö feduo malä cui. ¹¹ Moimoima bei bä jole lä cublai bä ma liyäjäi ma cui, motoca shi yoblao däjä bä wa̦blädaö malä majöo wei. Bä jole bläläa majölaliyo. Bä nö lä madofibö wei bä lä cui, inaja showawä bä ca̦i cuaaö. Bä dodijidawä ma bälöo däjä, bä bufi fa mlaicunö, bä nia cuo majöomi. ¹² Bä bufi ma wabamou wei ma cui, bä nö wa̦lojaö fe lä yadio wei bä lä cui bä bufi nia doblalou. Dodijidawä bä cua fe yadia cudeenö, Yai Badanö bä nia malä ba̦limiblamaö wei. ¿Ö̦jö tawä? A wa̦ nö wäa waiquiquema. A lä nofimaö wejei bä nia ba̦limiblamaö. ¹³ ¿Ö̦jö tawä? Wa̦lidiwä tä ja wamacö yabäcamou ja, “Yai Bada tänö wale yabäcamaö da culanö”, bä bufi cu dijä. Yai Bada a lä cui, wa̦lidiwä tä ja a nö yabäcamobimi. Yanowamö bä ma cui, wa̦lidiwä tä ja cama Yai Bada tänö bä ca̦i yabäcamaimi. ¹⁴ Ma. Bä lä yabäcamou wei bä lä cui, wa̦lidiwä tä ja bä bufi li fa luluamonö bä li yabäcamou, cama bä bufi waiyou waiquiwä cudeenö. ¹⁵ ¿Ö̦jö tawä? Wa̦lidiwä ta ja bä bufi cuaablalou cudeenö, bä nia wawädowä icuo. Ö̦jö däjä, wa̦lidiwä tä lä taö wejei tänö bä ya̦cumö nomaoblou. ¹⁶ ¿Ö̦jö tawä? Bä möla dijä, iba bämacö lä nofimaö wei wamacö. Wa̦lidiwä tänö täbä doblamaimi. ¹⁷ Täbä yai lä doblamaö wei a lä cui, ö̦jö Yai Bada a waiquiwä, fedu jamö a lä culadi. Ö̦jamö culanö bämalecö yai bayeliblaö. ¿Ö̦jö tawä? Bäma a nofi lä Fö̦ömale a lä cuinö tä ulifi wacacamabobä, judu mösö jamö täbä shi̦i shadimaquedayoma. Tä shi̦i yai lä doblaladi, cama a waiquiwä. Tä mö dödöjöblou majöobä a nia shomibloimi. ¹⁸ Cama bejedi etä a̦nö, dude bämalecö tablaö co̦layoma, Jesús nija jaba bämacö bufi lä cuqueno wei bämacö lä cui, cama bäma ecö yaiobä. ¿Ö̦jö tawä? Judio bänö Yai Bada a dobäbeje, döano sibä ja bä jaba lä lalou wei ebä yaimabou lä culajeinaja, inaja showawä camiyä jaba bei bäma ecö yaia mö fedua lä cule. ¿Ö̦jö tawä? Dude bämalecö tablamaö bufi fa doblaonö bämalecö li tablamalema. ¹⁹ Wamale a̦ da ji̦lilä, iba bämacö lä nofimale wamacönö. Ai bä a̦ faö däjä lobe bä a̦ da ji̦liaje. Bä a̦ faö shi jalimo dijä. Bä ca̦i jushudou showadao dijä. ²⁰ Täbä jushudou si lä ijejei täbänö Yai Bada a bufi doblamaboimije. Täbä dodijaö malä mlai. ²¹ Ö̦jö cudeenö, bei wamacö bufi jamö wama tä shami lä lämabole tä bluca da joyalöje. Wa̦lidiwä wama tä lä taö wei tä ca̦i. Ö̦jö däjä, Yai Bada wama etä a̦ tabou lä waiquile tä a̦ da bufiblaje. Wamacö bufi oquewä ca̦i fa cuonö, ö̦jö tä a̦ ja bä bufi shino yai da dayäo. Wamacö nia lä jucäamou wei, ö̦jö tä a̦ waiquiwä. ²² Ö̦jö ma cui, Yai Bada wama tä a̦ ji̦liaö bädao mlai ja, tä a̦ lä cuu weinaja wamacö yai cuaabä. Wama tä a̦ ji̦liaö bädao ja, wamacö nia mölaa bälayou. ²³ Tä a̦ juaö mlajei, tä a̦ shino ji̦liaö lä bädao wejei bä lä cui, abinaja bä cuwä. Möle ajamö bä wäyäcu moli lä mömou wei bä lä culenaja, inaja bä cuwä mö feduwä. ²⁴ Bä wäyäcu ma mömou wei ma cui, bä fa alufälönö, bä wäyäcu mömou lä cuono weinaja tä nofi mojodudaö majölayouje. ²⁵ Ö̦jö ma cui, Jesucristo etä a̦ dodijidawä lä cui tä a̦ fa ji̦liläjenö, tä a̦ nofi jaducubou fe lä yadio wejei bä lä cui, ö̦jö bä nia shino yai bayeliblamou, tä a̦ juaöje yalo. Bä bayeliblamobä tä a̦. Sadanasinö täbä ma tabou wei ma cui, täbä nia jujeblamou fe lä yadio wei, ö̦jö lä tä a̦. ¿Ö̦jö tawä?Ö̦jö ma cui, tä a̦ ji̦liaö lä buo wejei bä lä cui, tä a̦ nofi mojodubou majöo dicooje ja, bä nia bayeliblamoimi. ²⁶ “Yai Bada nija ya dodijidawä cuobä ya malä cuaaö wei”, bä nofi lä tamamou wei bä lä cui, inaja bä nofi ma tamamou wei ma cui, bä caficö a̦ wasöomi ja, cama bä nofi mölamamou nö beblalou lä cule. Ö̦jö bä lä cui, bä jole ma dodijiablalou wei ma cui, cama bä caficö a̦ jäo fa mlacunö, Yai Bada tänö bä dodijaö dablaimi waiquiwä. ²⁷ Yai Bada bäma a nofi lä Fö̦ömale a lä cuinö bämalecö dodijaö dablabä, abinaja bämacö nia yai cuaaö. Ijilu wajadi bä lä cui bäma bä nofi nia tabou. Suwä bä lä feiblou wei bä ca̦i. Bä nö bleaaö cudeenö bäma bä nia bayeliblaö. ¿Ö̦jö tawä? Yanowamö täbä showadi lä cuaaö wei tä ja, bämacö nia ca̦i yädäbloimi. Inaja bämacö yai cuaaö ja, Yai Bada tänö bämalecö nia shino yai dodijaö dablaö.

¹ Iba wamacö. Bada tä Jesucristo a yai lä doblao wei wama a nofi mölabou yalo, yanowamö fe usucuwä wama bä nia nofimaö. Bä mömou ma wa̦lidii ma cui, bä mömou ma liyäjäi ma cui, fe usucuwä wama bä ca̦i dodijidawä cuobä. ² ¿Ö̦jö tawä? Cafä wamacö lä yododaö wei jamö, camishi liyäjäwä cäcö ja a lä didile a waloquei, imicö ca̦i lä baushi wei a lä cui. Ö̦jö däjä, lebesi cäcö ja ai a lä didile a ca̦i waloa mö feduquei. ³ A mömou lä liyäjäi a nija wamacö bufi doblalou cudeenö, “Eja a da loiquiyo”, wama a nowa taö. Ö̦jö ma cui, a jo̦li nö lä bleaaö wei wama a nofi doaö mlai ja, a co̦blou bälayou. Wama a ca̦i loamaö mlai ja, cama a loa bädaquei. Inaja wamacö cuaaö dicoo ja, fe usucuwä wama cäcöbö nofimaimi waiquiwä. Inaja wamacö lä cuaaö wei ⁴ wamacö dobloimi. Bä mömou lä dodijidai tä ja bä möla dijä. Bei bufi mlai, bei wama bä sibosi li möö buo malä cui. ⁵ Bämacö lä nofimaö wei wamacö. Wamale a̦ da ji̦lilä. Yanowamö täbä jo̦li lä bälöblai, Yai Bada tänö ö̦jö bä yaia cadidilema, tä nowa yai lä bluca wei tä tabobeje. Cama a nofi nia mölabou lä cadidio wejei, ö̦jö tä nowa shino yai bluca. Cama nija bä nia lä cuo wei tä ca̦i. ¿Ö̦jö tawä? A lä nofimaö wejei bä lä cui, ö̦jö bä nia ca̦i bälöo lä dodijio wei tä a̦fa malä wäqueno wei. ⁶ Ö̦jö ma cui, cafä wamacö lä cuinö, bä lä jo̦li wei wama bä nofi taboimi dicowä. ¿Wedi tä tabä bä nö lä madofibö wei, ö̦jö bei wama bä nia li bufibou? Wamacö showadi lä yabäcaö wejei, ¿ö̦jö bämi tawä? Bada bä nija wamacö a̦fa dobloimi lä wäyäö wejei, ö̦jö bä li showawä malä cui. ⁷ Ö̦jö bä lä cuinö, ¿Bada tä Jesucristo a nö waiblaimi sijewä? ¿Ö̦jö daanö? Afä a lä cui, a nö bejedi waiblaö dodijiweje. ⁸ Yai Bada tänö tä nabä yai lä shömöqueno wei, ei tä a̦. Cafä wa nofi jo̦lio lä culenaja, inaja showawä aifä wa bä nofi tabolanö wa bä nofimabä. Einaja Yai Bada etä a̦ cuu. Inaja wamacö yai cuaaö ja, wamacö nia shino dodijaö cuquei. ⁹ Ö̦jö ma cui, ai wama bä nofi shino tabou ayao dicoo ja, wamacö dobloimi waiquiwä. Moisesi tä a̦nö wamacö a̦fa wa̦lidiwä talewä tamou, wamacö waimobä. ¹⁰ Moisesi tä a̦ ja, wamacö mili cadidou ma cui, ai moli tä ja wamacö cadidoimi dicoa ja, wamacö waimobä wamacö waiquiwä malä cui. Wama tä a̦ nofi bluca cadidibou malä mlai. ¹¹ ¿Ö̦jö tawä? Täbä joleblalou lä wasöö wei a lä cuinö, yanowamö täbä ca̦i shäö wasöö malä cui. ¿Ö̦jö tawä? Wamacö joleblalou ma mlai ma cui, yanowamö wama täbä shäö dicoo ja, wama etä a̦ nofi cadidiboimi waiquiwä. ¹² Moisesi tä a̦nö wamacö waimou mlaobä, Jesucristonö wamacö jujeblamalema, cama dodijidawä etä a̦ ja wamacö nosiemamou majöobä. Ö̦jö etä a̦nö wamacö nia shino jömamou cudeenö, bä a̦ da wasöo. Bä shino da dodija. ¹³ Yai Bada tänö täbä jömaö däjä, yanowamö täbä nofi ojodabono lä mlajei bä lä cui, cama bä nofi nia ca̦i ojodaboimi mö feduwä. Ö̦jö ma cui, täbä nofi lä ojodabono wejei bä lä cui, ö̦jö bä nia jömamou quiliimi. ¹⁴ Iba wamacö. “Yai Bada ya nofi mölabou”, wa ma cuu wei ma cui, wa dodijaimi ja, ¿wa nia bayeliblamou daanö? Wa wa̦ lä faö wei wa wa̦nö, ¿bei wa nia jucäamou daanö? ¹⁵ Wamale a̦ da ji̦lilä. Jesucristo bufilewä ai a lä cui, a nia lä didio wei ecö camishi cuami ja, a nia lä iyaö wei ebä nii ca̦i cuami ja, ¹⁶ bei wa wa̦ bädawänö, ¿ö̦jö a bayeliblamolayou daanö? “Dodijidawä a da co̦jamö”, wa nowa taö. “Camishi cäcö ja a da didiicu, wa nö wajadili bleaaö mlaofälöbä”, wa nowa ca̦i taö. “Dodijidawä a da iya”, wa nowa ca̦i taö ma cui, einaja wa lä cudou wei wa wa̦nö, ¿a nia bayeliblamou daanö? Ma. Inaja wama a nowa ma taablalale ma cui, wama a yai dobäö mlao däjä, a nia bayeliblamou buo malä mlai. ¹⁷ Inaja showawä, “Yai Bada ya nofi mölabou”, bä ma cuu wei ma cui, bä dodijaimi ja bä jolemou waiquiwä. Bä bayeliblamobä etä cuami. ¹⁸ Abinaja ai wa lä cui, wa jo̦wa cuu dicoo. “Jesucristo ya nofi ma mölabole ma cui, bei ya li dodijaimi bäwä.” ¡Inaja dicoo mlai! Jesucristo wa nofi jo̦wa ma mölabou wei ma cui, wa dodijaimi ja, ¿wedi tänö wa nö bejedi li ö̦jöböamobä, ö̦jö lä? Camiyä ya lä cuinö, Jesucristo ya nofi lä mölale ya tä nia yai dablamaö, ya lä dodijaö wei tänö. ¹⁹ “Yai Bada a lä cui, yami tä Yai Bada cua ayaa”, wa bufi jo̦wa cuu. Bejedi lä wa wa̦. Ö̦jö wa tä a̦ daö bäa ma cule, ö̦jö tä a̦nö wa nia jucäamoimi. Fecula bä jucäamou malä mlai. Yai Bada a lä cule tä daö ma cujei, bä jucäamou mlai ja, bä shino quilili blösö blösömou bädao. ²⁰ ¿Wedinaja bäfä nowa li fa tanö, bäfä bufi nia yai möblamaö? ¡A bufi da jaduculu! “Yai Bada ya nofi mölabou”, täbä ma cuu wei ma cui, bä dodijaimi ja bä jolemou waiquiwä. ²¹ Camiyä bämacö nö badabö Ablaamö a lä cuinö, Yai Bada nija bä ijilubö Isaacö e dodoabä, e maqueboma. ¿Ö̦jö tawä? Inaja a cuaama yalo, a dodijama cudeenö, jai a dodijidawä waiquiwä Yai Bada tänö a nofi li taboma. ²² ¿Ö̦jö tawä? Ei malä cui. Yai Bada a nofi mölabolanö Ablaamönö a wa̦ li juaö cadidioma. A lä dodijano wei tänö, Yai Bada a nofi lä mölabono wei etä damalalema. ²³ Yai Bada etä a̦ oni lä cuu weinaja tä cublaliyoma. Abinaja tä a̦ cuu. Yai Bada a wa̦ fa ji̦limolunö, Ablaamönö a wa̦ bejedi bufia showadaalema. Cama Yai Bada a wa̦ bufiblamou fa damolalunö, jai a cadejewä waiquiwä bei a nofi Ablaamö tadaö showadalayoma. Einaja tä a̦ oni cuu. Ablaamö a lä cui, Yai Badanö cama nofi e a̦fa jilaboma. ²⁴ Ei malä cui. Täbä dodijaö yalo, jai bä dodijidawä waiquiwä Yai Bada tänö bä nofi yai tabou. A nofi lä mölabou wejei tä bädawänö mlai. ²⁵ Laaba a ma cui, inaja showawä, ¿Yai Bada tänö a nofi ca̦i tabou balöonomi daanö, showadi a suwä lä dodoono wei a lä cui? Abinaja a suwä cuaama. Isaeli ecöbö lä cuinö, Jelico tä ulifi bomaböö lä balöano wei däjä, cäcöbö dodijidawä walomaquema. Cäcöbö nowamama yalo, shomi jamö cäcöbö shömöa taa co̦lema. A dodijama yalo, jai a dodijidawä waiquiwä Yai Badanö a nofi li taboma. ²⁶ Abinaja ya cuu. Yanowamö a bufi lä mlaqueno wei, nomawä bloque a nia cuo juo. ¿Ö̦jö tawä? Yai Bada a nofi jo̦wa ma mölabou wejei ma cui, bä dodijaimi ja, inaja showawä bä bloque cuwä.

¹ Iba wamacö. “Ya täbä yömölabä ya waiquiwä”, bä nofi shi jaliwä tamamo dijä. Yai Bada tä a̦ ja, yama bä lä damaö wei yamacö lä cui, yamalecö nowa yai talanö yamalecö nia malä jömaö wei. Tä wayu. ² ¿Ö̦jö tawä? Showadi bämacö bluca yacläö si malä ijejeoblou wei. Ö̦jö ma cui, bei a wa̦ lä wasöo wei a lä cui, ö̦jö a bufi shino yai walalawä waiquiwä. A cuu lä bufio wei tä ma cui ja, a nia lä cuaaö wei tä ma cui ja, a wasöo dao. ³ Cabayo bä caficö jamö tä madofi lä o̦cabou wejei tänö, bä jumaö lä bufio wejei jamö bä cadidamaöje. Ö̦jö bä yalo bada ma cui, ö̦jö lä tä wai madofi natanö bä jumaö shaliliablalouje. ⁴ Canawä bä ma cui ja, bä bufi ca̦i da dayäo, ö̦jö lä. Wadoli a badanö, modu u jamö bä bada ma jilulamou wei ma cui, canawä a colo lä cadidamaö wei a lä cuinö, wiisibö etä wai madofinö a bada cadidiablalamaö, cama a befi ca̦i cuaaö lä bufio wei jamö a cadidou cuaafälöbä. ⁵ Inaja showawä, bei bämacö caficö wai ma wajaquemi wei ma cui bämacö caficö a̦ wayu. Wiisibö bämacö a̦ wa̦lidiwä fadou ma buo wei ma cui, jödödöwä bäma tä wa̦lidiblamaö. Cowa wacö wai ma wajaquemi wei ma cuinö, wacö wai fa balalönö tä ulifi ö̦shöoblou malä cui. ⁶ Bei bämacö caficö lä cui, jai cowa wacö lä culenaja bämacö caficö a̦ ca̦i wayu cuwä mö feduwä. Bämacö caficö a̦ wasöomi ja, wa̦lidiwä bluca tä lä cule bäma tä wawämaö talei. Inaja bämacö cuaaö dicoo ja, cowa wacö wai biyäblou lä culenaja, wa̦lidiwä tänö bämacö comi jödödöwä wa̦lidiblaliyo, shobali wacönö täbä bluca mö nia lä watäblaö weinaja showawä. ⁷ Yanowamö täbänö yalo bä ji̦ima tabouje ja, bä yanöcömabouje. Bä ji̦ima tabouje cudeenö, a yalo waitelimou ma bufio wei ma cui etä bluca mladamaleije. Bä yalo lä juu wei bä ma cui, bä lä yäö wei bä ma cui, bä lä joleaö wei bä ma cui, modu u jamö bä bluca lä juu wei bä ma cui, bä yanöcömabou daöje. Bä waitelimobä bä ma cui, bä wasöbouje. ⁸ Ö̦jö ma cui, cama yanowamö täbä caficö a̦ nö wasömamobimi waiquiwä. Wa̦lidiwä tä a̦ ja täbä caficö a̦ nö yanöcöblobimi. Täbä caficö a̦ wayu fe balojowä. ⁹ Bei bämacö caficönö, Bada bäma tä nofi lä Fö̦ömale bäma tä a̦fa doblao wäyäö. Ö̦jö lä bämacö caficö showawänö, yanowamö bäma bä wafäö. Inaja dicoo mlai. Yai Bada a lä culenaja bä cuobä bä yanowamö ma tablamolayono wei ma cui, Yai Bada a Bufi owäbobeje bä waiquiwä ma cui, ¿wedi tabä bäma bä a̦fa nia li taö dicoo? ¹⁰ ¿Ö̦jö tawä? Moli bämacö caficö showawä jamö, Yai Bada bäma tä a̦fa doblao lä taö wei tä a̦ faö, bäma täbä lä wafäblaö wei tä a̦ ca̦i showawä. Shädayai, iba wamacö. Inaja dicowä mlai. ¹¹ U fe lä jojole jamö, dodijidawä u faö lä waiquile jamö, ¿wa̦lidiwä u nia coyocoblou daanö? Mlaicätä. ¹² ¿Ico fibä jamö oliba mabä nia lalou daanö? Ma, iba wamacö. Nii cama cäcö nia yaio, cäcö nia majöbloimi. Uba totobä jamö ma cui, ico bä ca̦i nia faimi. Inaja showawä, u mosidiwä waiquiwä ja, dodijidawä u nia jiqueamoimi. ¹³ ¿Cafä ai wamacö bufi jaducuwä cublawä tawä? ¿Wamacö bufi ca̦i dao tawä? Wamacö bufi lä jaducui wamacö nia jömöomi. Wamacö bufi oquejelanö, wamacö nia shino cudio. Wamacö lä dodijaö wei tänö wamacö bufi nia jaducuwä damolaliyo. ¹⁴ Ö̦jö ma cui, täbä dodijaö lä ayao wei wama bä nofi wa̦libou dicoo ja, “Camiyä shino yai”, wamacö bufi cuu dicoo ja, bä jolemo dijä, ö̦jö lä. Bä dodijidawä jömöo dijä. Wamacö bejedimou malä mlai. ¹⁵ Wamacö bufi a̦fa jaducuwä ma tao wei ma cui, inaja wamacö lä cuaaö wei wamacö lä cui, wamacö bufi jaducuwämi. Yai Bada nija wamacö bufi taamamou malä mlai. Ma, yanowamö showadi täbä lä cuaaö weinaja, wamacö cuaaö bädawä dicowä. Yai Bada tä Bufi ja wamacö luluamou mlai ja, fecula bada a nija wamacö yai luluamou dicoa. ¹⁶ ¿Ö̦jö tawä? Täbä dodijaö lä ayao wei täbä nofi wa̦libouje ja, “Camiyä shino yai”, bä bufi cuablalou dicoo ja, tä nia jödödöwä wa̦lidiblou. Wa̦lidiwä tä bluca lä cui ja, täbä nia yai cublou majöo. ¹⁷ Ö̦jö ma cui, Yai Bada nija bä bufi yai lä jaducuo wei bä lä cuinö, wisibö tä nia ca̦i wa̦lidiwä jubaö bädaomije. ¿Ö̦jö tawä? Bä bufi nia shino yanöcöwä ca̦i cuo. Bufi oquewä bä nia ca̦i bälöo. Cama bä bufi lä cuu wei bädao mlai, ai bä ma cui bä a̦ nia ca̦i ji̦liaö mö feduoje. Täbä nofi nia ca̦i shino ojodabouje. Bä nia shino dodijaö. Ai täbä nofi nia tabou ayaomije. Bä nia shino bejedimou. ¹⁸ ¿Ö̦jö tawä? Täbä nofi wa̦liayou balaö mlaobä, bä bufi lä yanöcöo wei bä lä cuinö täbä bufi yanöcömabouje. Täbä fa yanöcömabojenö, yanöcöwä täbä ca̦i bluca bälöo nomöjöoje.

¹ ¿Wedinaja wamacö bufi fa cunö wamacö li ishou? ¿Wedi tabä wamacö li shäyou? Wedi tabä mlai. Wamacö wasömamou bufio fa mlacunö wamacö inaja cuaaö, cafä wamacö cuaaö lä ojode wei wama tä nofi yaibou fa dicoonö. ² Wama tä lä bufii wei wama tä taboimi yalo, wamacö niyayou. Wamacö bufi ma waiyou wei ma cui, wama tä nö däabimi yalo wamacö li shäyou. Wamacö ishou. ¿Ö̦jö tawä? Wama tä tabou lä mlale, Yai Bada nija wamacö nacou fa mlacunö wama tä li taboimi. ³ Ai däjä wamacö nacou ma buo wei ma cui, wamacö nacou dobloimi waiquiwä cudeenö wama tä nö däabimi waiquiwä. Wamacö cuaaö bufi lä doblao wei tä jamö wamacö cuaabä, wamacö shino yai bayeliblamou bufi doblao dicoo malä cui. ⁴ ¡Uo! Shominaja wamacö bufi lä cuaablalou wei wamacö lä cuinö, ¿ei bei wama tä daö mlaa culawä? Yanowamö täbä showadi lä cuaaö wei tä ja wamacö bufi cuo dicoo ja, Yai Bada wama tä nö nabämaö waiquiwä. Ö̦jö cudeenö, ö̦jö tä jamö wamacö cuo bufi lä doblao wei wamacö lä cui, Yai Bada nija wamacö nö nabämobä wamacö li cuaaö. ⁵ ¿Yai Bada a jolemou daanö? Abinaja etä a̦ oni cuu. Camiyä bämacö nija, Yai Bada a Bufi bälöobä a lä shömamono wei a lä cuinö bämalecö nofi jalujubou talei. ¿Ö̦jö tawä? Einaja etä a̦ cuu dodijio. ⁶ Ö̦jö ma cui, Yai Bada tänö bämalecö nofi yai ojodabou lä dodijio wei etä wawäblou talei. Ö̦jö cudeenö abinaja tä a̦ ca̦i cuu. Cama bä lä jömöo wei bä lä cui nija Yai Bada a wa̦ Bufi lämou. Ö̦jö ma cui, bä jömöo lä mlai bä lä cui bä nofi yai ojodabou. ⁷ ¿Ö̦jö tawä? Yai Bada tä a̦ shino yai da juaje, ö̦jö lä. Fecula bada wama a wa̦ waii showadao ja, a nia doculayou. ⁸ Yai Bada nija bä da ajedofälö, camanö wamacö ajedemabobä. Wa̦lidiwä talewä wamacö lä cui, dodijidawä wamacö fa cuicunö bä yai da aublamolu. Wamacö bufi lä shedecou wei, moli tä ja bä bufi yai da shaliliicu. ⁹ Wamacö doblou lä mlai, ¡bä bufi wa̦lidiwä yai da damolalu! ¡Bä yai da ö̦cö! Wamacö i̦cablalou lä bashiblao wei, ¡bä bufi yai da wa̦lidiblalu! Wamacö bufi shi jaliblalou mlai ja, ¡bä bufi yai shino da shädayaimo! ¹⁰ Yai Bada nija wamacö jömöo mlai, bä a̦fa shino dobloimi da wäyämo. Ö̦jö däjä, dodijidawä wamacö nia taamabou fe yadio. ¹¹ Iba wamacö, bä a̦fa wayoayo dicoo dijä. Aifä wama bä a̦fa wayoaö dicoo ja, wama bä jömaö dicoo ja, wamacö doblou malä mlai. Inaja wamacö cuaaö dicoo ja, Cristo wama etä a̦ juaimi. Wama etä a̦ juaö lä moji wei tänö, wama etä a̦ wa̦lidiwä ca̦i jömaö waiquiwä. ¿Ö̦jö tawä? Cafä wamacö lä cuinö, Cristo wama etä a̦ wa̦lidiwä jömaö dicoblaobä wamacö malä mlai. Wama etä a̦ yai juabä wamacö. ¹² A yai nosiemobä, ö̦jö moli a shino yai cua. Ö̦jö lä a showawänö täbä nia jömaö. Ö̦jönö täbä jucäaö dao, täbä mö ca̦i watäblaö dao. ¿Ö̦jö tawä? Cafä ¿wedi bei wamacö li, aifä wama bä jömaö bashiblaobä? ¹³ Bei tawä, cafä wamacö a̦ faö lä dicoblao wei. Shomi jamö wamacö nia jo̦wa lä juu wei, wamacö a̦fa wäamamou. Madofi wama bä nia jo̦wa nomöjaö. Wamacö jo̦wa nia madofiböblou. Fei däjä wamacö juimi ja, fena ja wamacö nia jo̦wa juu. Ö̦jamö lä wamacö bälöaö showao däjä, lasha moli wama a nia jo̦wa lalomaö. ¹⁴ Inaja wamacö ma cuu wei ma cui, fena ja tä nia lä cublou wei wama tä daimi waiquiwä. Wamacö nia demi lä cuo wei wama tä ca̦i daimi. Ölajashi a faö lä fenao wei a lä cui, a nö dedejeblou mlai ja, lobe a mladou malä cui. Inaja showawä, cafä wamacö ca̦i cuwä mö feduwä. ¹⁵ Abinaja wamacö yai cuu fa cunoja tä nö shino yai doblaobö wei. “Bada tänö wale taamaö ojode ja, ya demi cua showaa ja, inaja ya nia cuaaö”, wamacö shino yai cuu fa cunoja tä nö dodijidaobö wei. ¹⁶ Ö̦jö ma cui wamacö nofi yaimamou fa dicoonö, jai cafä wamacö showawänö wama tä bluca cadejebou waiquiwä, wamacö a̦ ji̦limamou cuwä dicowä. Inaja täbä a̦fa wäamamou lä cuo wei tä wa̦lidiwä waiquiwä. ¹⁷ ¿Ö̦jö tawä? Tä lä dodijidai bäma tä nö ma ö̦jöböaö wei ma cui, bäma tä taimi ja bämacö dobloimi waiquiwä.

¹ Bei tawä, wamacö nö lä madofibö wei wamacö lä cui. Wamacö bufi doblalou mlai ja, bä yai da ö̦cö. Cafä bä nomöa yai da yuamamo. Wamacö nö nia lä bleaaö wei tä ajedewä waiquiwä. ² Wamacö madofibö nowa cuami waiquiwä. Jai täbä jodelaliyoma täbä cuwä waiquiwä. Wamacö camishibö ma cui, jai bä wädölalemaje bä cuwä waiquiwä. ³ Afä olo bä ma cui, afä blada bä ma cui, jai bä bluca amu ushibö waiquiwä bä cuwä. Bä amu ushibö cudeenö, wama täbä tabodii lä buono wei wama tä dablamaö waiquia dicoa lä cule, Yai Bada nija wamacö jömamobä. Ei tä ulifi nia cudio malä mlai, wama täbä madofi shimomaö fe yadiobä. Ö̦jö bä nija wamacö bayeliblamou mlai ja, wamacö mö nia shino yai watäblamou, cowa wacönö täbä mö watäblaö lä culenaja showawä. ⁴ ¿Ö̦jö tawä? Cafä wamacö ficalibö ca jamö wama bä lä shömöleno wei bä lä cui, bä ma ojodamono wei ma cui wama bä nowa co̦amanomi dicowä. Wama bä mölaa dicomalema. Bei. Cama bä nowa co̦amamobä bä blada lä cule, wama bä blada jibäano lä mlai, bä a̦ blada ji̦lio lä cule. Wama bä blada nofi jo̦wa tabou fa showaonö bä co̦möö, wamacö jolemou dablamobä. Wama bä lä ojodamomano wei bä ma cui, i̦cali bä nacömou. Bada tä shino lojode cua lä ayaladinö bä a̦ ji̦liaö culadi. ⁵ Madofi wama bä ca̦i bälöo bufi doblao dicooma. Wamacö cuaaö bufi lä doblao weinaja wamacö cuaaö cadidioma. Baca bä ocalo blewä lä culenaja wamacö cuwä, bä shämobä bä lä blemalajei bä baca lä culenaja. Cafä inaja wamacö ca̦i nia fa tablamamonö wamacö blelaliyoma. ⁶ Bä lä cadidou wei bä lä cui wama bä jole jömaö fa dicoonö, wama bä shäa yacläa dicomalalema. Cafä wamacö a̦ shino lojodoaö fa ayaonö, bä nofi bäyäobä etä cuonomi. ⁷ ¿Ö̦jö tawä, iba wamacö? Bada tä nia lä juu wei, wamacö bufi yanöcölanö wama a nö dabobä, ö̦jö lä. Täbä lä ficalimou wei täbä lä cuinö, bufi yanöcölanö cama nii ebä malä bufibou wejei. Bä nia lä iyaö wei tä ja bä möladii. Maa a jaba lä quei wei a ma cui, a quei lä co̦o wei a ma cui, a nö dabou malä cujei, sibä badablobä. ⁸ ¿Ö̦jö tawä? Cafä wamacö ma cui, wamacö bufi ca̦i yanöcöwä cuo mö feduobä. Bä bufi da shalilo, Bada tä juu ajedewä malä cui. ⁹ Wamacö bufi jushuolanö ai wama bä a̦fa wayoaö mlai, iba wamacö, wamacö jömamou dicoo mlaobä. ¿Ö̦jö tawä? Täbä nia bluca lä jömaö wei a lä cui, yoca lä jolele jamö a icuo ajedeo waiquia lä cule. ¹⁰ Bada tä wa̦no wäyälewä bä lä cuono wei bä nija bä bufi yai da dayäo, ö̦jö wama bä owäbobä. Bä nö ma bleaano wei ma cui, bufi yanöcöwä bä cuo showao fe yadioma. ¹¹ ¿Ö̦jö tawä? Bä nö wa̦lojaö fe lä yadiono wei bä lä cui, bäma bä bufi a̦fa doblalou wäyäö talei. Jobö a ma cui wama a̦fa malä ji̦libole, bufi yanöcölanö a nö wa̦lojaö fe lä yadiono wei a lä cui. Bada tänö dodijidawä ö̦jö a nia taamaö fe lä yadiono wei wama tä a̦ ca̦i daö. ¿Ö̦jö tawä? Bada tä bufi asimou talei. Täbä nofi ca̦i ojodabou talei. ¹² Abinaja bämacö nowa ca̦i taö, iba wamacö. Ei ya wa̦ lä cui wamale a̦ yai da ji̦lilä. Wamacö bejedimou dablamobä, Yai Bada wama a wa̦fa nia jayumaö buomi. Abinaja bä cu dijä. “Ya jolemoimi. Yai Bada a malä cule”, bä cuu dodijio dijä. Inaja bä lä cuu wei bä jolemou bädao ja, Yai Bada nija bä nofi nia nacao. ¿Ö̦jö tawä? Yai Bada wama a wa̦fa jayumaö mlai ja, bä bejedimou da showadao. Yai Bada a ma cui, judu mösö ma cui, bita a ma cui, ¿wedi tabä ö̦jö bei wama bä a̦fa nia jayumaö majöo? “Awei”, wamacö nia lä cuu wei, wamacö bejedimobä bä bufi cadidia da showadaicu. “Ma”, wamacö nia lä cuu wei, inaja showawä, Yai Bada tänö wamacö nö bleaamaö mlaobä. ¹³ Cafä wamacö nija ai a lä cui a nö bleaaö ja, Yai Bada nija a nö bayeli nacaobä, ö̦jö lä. Ai a mö feduwä lä cui a bufi doblalou ja, amowa tä a̦nö Yai Bada a nofi doablabä. ¹⁴ Ai a showawä lä cui a jalili ja, bada bä nacabä, Jesucristo ebä ca̦i lä yododaö wejei bä bada lä cui. Ö̦jö bä fa waloicunö, täbä lä jölöcamou wei toubä dabönö a nia jalili jölöcaöje. Inaja a taamalajenö a nö nia bayeli nacaöje, Bada tä Jesús a wa̦nö. ¹⁵ A nofi mölabolajenö a nö bayeli nacaöje ja, a lä jalili wei a nia jalou. Bada tänö a demi nia ubladamaö co̦o. A doblono lä mlai etä cua ja, etä nowa nia mladamaö showadao. ¹⁶ Ö̦jö cudeenö wamacö doblou lä mlai, wawädowä wamacö a̦ nö fa wäonö, Yai Bada nija bä da bayelimayo, wamacö jalou co̦obä. Yai Bada nija a lä cadidou wei a wa̦ faö ja, a wa̦ nia ji̦liaö si ijejeo. A nö bayeli nacao däjä cama etä nia yai cublou. ¹⁷ ¿Ö̦jö tawä? Yai Bada a wa̦no wäyälewä Elia a lä cuaano wei wama tä a̦ malä dale. Camiyä bämacö lä culenaja Elia a cuo mö feduoma ma cui, a wa̦ yai ji̦liodayoma. Yai Bada a nofi mölabolanö a wa̦ faö ja, maa a ja̦mabou bufima. Yai Bada tänö a wa̦ fa ji̦lilädunö, lasha 3 a lalou ma cuono wei ma cui, ai a lalou bäshäcuaaö ma co̦ono wei ma cui, maa a quenomi showawä. ¹⁸ Ö̦jö däjä Yai Bada nija a wa̦ faö fa co̦onö, maa a quea fa co̦lunö, tä ulifi nö nijiblou co̦layoma. ¹⁹ Iba wamacö. Bejedi tä a̦ jamö wamacö ma cuo wei ma cui, shomi tä ja ai wamacö yacläö majöo dicoo ja, cafä wamacö ai a lä cuinö, Yai Bada nija a bufi mö nia yabablamaö co̦o. ²⁰ Abinaja tä malä cule. Wa̦lidiwä talewä a cadidamaö co̦o ja, a nomaö mlaobä a co̦aö cule. A doblono lä mlai etä nowa bluca mladobä a cadidamaö.