Hebreos

Hebreos

¹ Yedu ja, Yai Bada a wa̦no wäyämamoma, camiyä judio bämacö nö badabö lija. Cama a wa̦no wäyälewä bä blucanö, a wa̦no wäyäö cuaamaje. ² Ö̦jö ma cui, fei däjä, Yai Bada tänö täbä nia lä jimaö wei tä cublou ajedou däjä, camiyä bämacö lija a wa̦no wäyämamou nomöjöobä, bä Ijilubö e yai shimöledayoma. ¿Ö̦jö tawä? Bä Ijilubö e lija, Yai Bada tänö jödödöwä tä lä cule tä bluca tablamalema. Ö̦jö täbä bluca ja a Bada läobä, a yaia showadalema. ³ Yai Bada bä Ijilubö e lä cuinö, bä Fö̦ö e doblao damalalema. Yai Bada a cuwä lä dodijiinaja, inaja showawä bä Ijilubö e cuwä mö feduwä. Cama a wa̦ lofotenö, jödödöwä tä fuwäbou showaa lä cule. ¿Ö̦jö tawä? Yanowamö täbä doblou lä mlai täbä bufi aublobä tä tama. Ö̦jö däjä, Yai Bada tä nö shi̦lo wa̦lojaö lä ayai tä lä dicäladi jamö, a dicäquedayoma. Yai Bada jayu boco mashi jamö a dicäquedayoma. ⁴ A̦jele bä lä culadi, bä dodijidawä bäwä ma cui, Yai Bada bä Ijilubö e shi̦lo yai dodijidawä cuadayoa. Inaja showawä, cama dodijidawä bei bä a̦fa cublawä ma cui, bä Ijilubö e lä cui, ö̦jö e a̦fa shi̦lo yai dodijidawä. ⁵ A̦jele moli a bädawä ma cui lija, Yai Bada tä ijilumoimi waiquiwä. Ma. Bä Ijilubö e yai lija abenaja a shi̦lo cuma. Ijiluyä cä wa. Fei däjä, iba cafä bä nö wawädowä ö̦jöböamaö lä cule. Einaja e shi̦lo cuma. Abenaja a ca̦i cuma. Camiyä wale nofi nia yai Fö̦ömaö. Camiyänö bä nofi nia ca̦i Ijiluaö mö feduo. Einaja Yai Bada a cuma. ⁶ Bä Ijilubö moli e lä cui, bita jamö e lä wawäblamaleyoluno wei däjä, abenaja a ca̦i cuma. Yai Bada a̦jele ebä bluca lä culadinö, ei lija bä möfe bolanö, a wa̦fa nia Bada doblao taöje. ¿Ö̦jö tawä? Bä Ijilubö e a̦fa wayoaö ja, einaja a cuma. ⁷ Ö̦jö ma cui, a̦jele ebä a̦fa li wayoaö ja, abenaja Yai Bada a cuu. Wadoli a lä culenaja iba a̦jele ya bä taamaö. Wale nosie lä fuaö wejei bä a̦jele lä cui, cowa wacä lä culenaja ya bä ca̦i taamaö. ⁸ A̦jele einaja bä a̦fa li wayoaö cuaama. Ö̦jö ma cui, bä Ijilubö e jamö, abenaja Yai Bada e cuma. Cafä wa lä bufiblamou wei wa lä cui, Bada wa nia cuo shi wa̦lio. Wa Bada lä läo wei, showadi wa bejedimou. ⁹ Tä lä dodijidai tä jamö, showadi wa bufi shi̦lo cudalodii. Wa̦lidiwä tä lä cui wa tä nofi shi̦lo wa̦libou. Ö̦jö cudeenö, camiyä Yai Bada ya lä cuinö bä yailema, cafä lija ya lä bufiblamou wei ya lä cuinö. Bä bufi ca̦i doblamabou. Afä ya bä dodijidawä ma tamabole ma cui, cafä bä yai shi̦lo dodijidawä tamabou. Einaja a cuma. ¹⁰ Abenaja Yai Bada a ca̦i jo̦wa cuma, bä Ijilubö e lija. Cafä Bada wa lä cui, jaba däjä bita wa colo lä lofotoblamaleno wei wa. Judu mösö ma cui, cafä wa showawänö, wa mösö ca̦i lelemaquema. ¹¹ Ö̦jö täbä nia bluca ma mladou wei ma cui, cafä wa nia shi̦lo cuo showao. Täbä lä didio wei sibä jolebö lä cublou weinaja, bä nia jode cublou mö feduo. ¹² Wa bä bluca lä tablaleno wei bä lä cui, ilo sibä jode joyamou lä culenaja, wa bä nia jode joyaö cuo mö feduo. Ö̦jö täbä nia ma nomöjöblamou wei ma cui, cafä wa nia nomöjöblamoimi. Fei däjä inaja wa cuwä lä showainaja, wa nia cuo shi wa̦lio. Wa nia shomibloimi. Bä Ijilubö e lija, einaja Yai Bada a cuma. ¹³ ¿Ö̦jö tawä? Abenaja a ca̦i cuma. Eja, jayu ya boco mashi jamö, a da dicäiquiyo. Eja wa dicäoyoluu däjä, cafä wa cotä jamö wa nofi lä wa̦libou wejei ya bä möfe nia boblaamayoluu. Einaja a cuma. ¿Ö̦jö tawä? Inaja a lä cuno wei, ¿wedi jamö a lä cui lija a yai cuma? A̦jele a lija mlai. ¹⁴ Ma. A̦jele bä lä cui, yai cäbä lä tablaleno wei, ö̦jö cäbä bädawä. Yai Bada tä a̦ fuabeje bä li bluca. Täbä nia lä fucäamou wei bä bayeliblayolubeje, bä shimadayou.

¹ Ö̦jö cudeenö, bäma tä a̦ lä ji̦liano wei bäma tä a̦ yai ji̦liaö da dodijio, bämacö yacläö majöo mlaobä. ² A̦jele bä bädawä ma cuinö, bämacö nö badabö lija tä a̦ lä wäyäno wejei tä a̦ bejedi wawäblaliyoma. Bä doblono lä mlai bä lä cui, tä a̦ fuano lä mlajei bä ca̦i lä cui, ö̦jö bä lija etä nowa cadidiwä co̦amaö cuaama. ¿Ö̦jö tawä? Ö̦jö bä nö jaba bleaamaö waiquioma ja lä, ³ bämacö bufi yai da jaducäblo, ö̦jö lä, camiyä bämalecö nö bleaamaö nomöjöo mlaobä. Bämacö nia lä fucäamou wei tä a̦ lä cui, cama Bada tä showawänö, tä a̦ wäyäö balöoma. Ö̦jö däjä, camiyä bämacö lija a wa̦ lä ji̦liano wejei bänö, walalawä a wa̦no wäyäö nomöjöomaje. ⁴ Tä a̦ bejedi. Yai Bada tä ma cuinö, ö̦jö tä a̦ bejedi yai dablamaö cuaama. Tä a̦ ji̦liamobä jamö, tä nö lä quilijii tä bluca ca̦i wawämaö cuaama. Cama ebä lä cuaano wei jamö, a nö lofote ca̦i ö̦jöböamou cuaama. Bei tä Bufi fa jibämoicunö, cama ebä dobäö bufi doblao lä cuono weinaja, bä ca̦i taamaö cuaafälöma. ⁵ Ma, a̦jele bä lä cui, Yai Bada tänö ö̦jö bä a̦fa bada wäyäimi. Jödödöwä tä nia dude lä cublou wei, a̦jele bänö tä nofi tabobeje bä bada tablamano malä mlai, bäma tä a̦fa ulufi lä wayoale tä ulufi lä cui. ⁶ Ma, a̦jele bä nofi tabou mlai, yanowamö bä nofi yai tabou. Yai Bada etä a̦ oni jamö, abenaja ai tä a̦ ca̦i cuu. Yanowamö ¿wedi bei bä li, Yai Bada wa lä cuinö wa bä nofi tabou fe balojoobä? Yanowamö täbä ijilubö bädawä ma cui, ¿wedi tabä ö̦jö wa bä li bufibou? ⁷ A̦jele bä doblao lä culenaja, wa bä yanowamö tablamanomi showawä ma cui, tä nö dedejeblou mlai ja, dodijidawä wa bä nia yai tamabou. Wawädowä wa bä nofi nia tamabou. ⁸ Jödödöwä täbä lä cublai täbä nofi bluca tabobeje, yanowamö wa bä nia lämabou. Einaja tä a̦ cuu. ¿Ö̦jö tawä? Ö̦jö yanowamö bä nia yai lä lämabou wei bä lä cui, bä nia jo̦wa lämabou jödödöo. Bä nia läo lä mlai, etä nia jo̦wa cuomi. ¿Ö̦jö tawä? Jödödöwä tä jamö bä nia lä läo wei, bäma tä daimi showawä ma cui, ⁹ Jesús bäma a daö, a lä yanowamöblaleyoluno wei a lä cui. A̦jele bä ba̦limi lä culenaja a jaba ma cuono wei ma cui, yanowamö bämacö ba̦limi lä mlainaja a li cublou majölayoma. Yai Bada tänö bämalecö nofi lä ojodabole jamö, a nia nomamaö fa läonö, a li yanowamöblamalema. A nomaö däjä a nö ninili bleaama yalo, dodijidawä fe balojowä a tabou majöadayoa. Wawädowä a nofi yai tabou. ¹⁰ ¿Ö̦jö tawä? Yanowamö täbä fucäamobä, Yai Bada tänö Jesús a nö bleaamaö fa balöonö, a doblaa majömaquema. Yai Bada a shi̦lo malä dodijaö wei. Jödödöwä täbä fa tablalönö, ö̦jö etäbä bluca fuwäbou showaa lä cule. Yai Bada a doblao lä culenaja, cama ebä doblao cuo mö feduobä, bä Ijilubö Jesús lija bä lulumabou. ¹¹ Jesús a lä cui, cama ebä lä yaile bä sho, cama bä bluca malä cui. Cama bä bluca waiquiwä yalo, Jesúsnö cama ebä a̦fa jilaö quiliimi. ¹² Yai Bada etä a̦ oni jamö abenaja Jesús a jo̦wa cuu. Fääshäyä bä lija, cafä bä a̦fa nia dodijaö wäyäö. Yamacö yododabä jamö, cafä bä nofi nia doablaö. Einaja a cuu. ¹³ Abenaja a cuu co̦a. Camiyänö, Yai Bada ya nofi nia mölabou. Abenaja ca̦i. Yai Bada tänö bä lä jibäbeno wei, eja bä ijilubö ya ebä ca̦i bluca cua lä cule. Einaja tä a̦ cuu. ¹⁴ Ö̦jö ijilu bäma ecö lä cui, yanowamö bei bämacö, yai bämacömi. Bämacö ya̦ji cublawä. Bämacö i̦yäbö ca̦i cublawä. Camiyä bämacö lä culenaja a cublou mö feduobä, cama a yanowamöblaleyoluma, camiyä bämacö nomaö lä cuo weinaja a nomaö cuo mö feduoyolubä. Yanowamö a fa cublaliyonö, a lä nomaö wei tänö, fecula bada a nia wa̦liaö showadaoma, täbä yanowamö lä nomamaö wei a bada lä cui. ¹⁵ ¿Ö̦jö tawä? Nomaö tä lä cui ja, yanowamö täbä showadi quilili nö malä beblalou wei. Ö̦jö ma cui, bämacö quilii majöo mlaobä, bämalecö nia ca̦i nowamaö showadaoma. ¹⁶ A̦jele bä bayeliblabä a funo malä mlai. Ablaamö ebä nodiwä nofi yai fo̦lijibou dodijioma. ¹⁷ Jesús bäma ecö fääshäbö cuwä lä dodijiinaja Jesús a cublou mlao fa cunoja, Yai Bada tä lä cule jamö dodijidawä bämalecö nofi nia lä bäyäbou wei, a nö Bada cuobö mlai. Camiyä bämacö lä culenaja a cuoma cudeenö, a bufi asimou. Bäma a nofi mölabobä a. Yanowamö bämacö lija tä nowa ma cule ma cui, a shämou läoma, bämalecö nowa mladamabä. ¿Ö̦jö tawä? ¹⁸ Cama a nö bleaaö daö waiquiwä yalo, fecula badanö täbä lä yabäcaö wei tä ca̦i daö cudeenö, bämalecö yabäcaö mö lä fedule bämalecö bayeliblabä, ö̦jö a waiquiwä.

¹ ¿Ö̦jö tawä, iba wamacö? Jesucristo ai ebä yaia lä culenaja, cafä wama ecö ma cui, wama ecö yaia cua mö fedua. Cafä wamacö ma cui, wamacö ca̦i cadidia mö fedulema. Jesús lija bä bufi da daeo, Yai Bada a wa̦no wäyäyolubä a lä shimöledayono wei a lä cui lija. Nofi bäyäalewä bäma a shi̦lo Bada bufibobä, ö̦jö Jesús a waiquiwä. ² A lä yaileno wei a lä cui, Jesúsnö a wa̦ fuaö cadidioma. Yai Bada ebä lijamö Moisesi a läo däjä, ö̦jö a cadidou lä cuaano weinaja showawä. ³ Ö̦jö ma cui, Moisesi mlai, Jesús a wa̦fa shi̦lo yai doblao tamobä a. ¿Ö̦jö tawä? A yafi dodijidawä lä tablaö wei a lä cui, a wa̦fa dodijaö tamou lä culenaja showawä. A yafi a̦fa dodijidawä ma tamou däjä ma cui, a lä tablaleno wei a lä cui, ö̦jö a wa̦fa nia shi̦lo yai dodijaö tamou. ⁴ Yafi bä bluca lä cublai, yanowamö täbä lija bä ma tablamou wei ma cui, jödödöwä täbä lä cublai, Yai Bada lija täbä li tablamolayoma. ⁵ Yai Bada etä yafi jamö Moisesi a ojodamou ja, a dodijama. Yai Bada a wa̦ fuaö cadidioma. A ojodamou ja, Yai Badanö tä a̦fa nia obi wäyäö lä nomöjöono wei, tä jimaö balöo showaoma. ⁶ Ö̦jö ma cui, Cristo a lä cui, täbä ojodamou cuaaö lä bädao weinaja mlai, bä ijilubö ebänö bä fö̦ö ebä a̦ dodijidawä fuaö lä cadidio wejeinaja, inaja Cristo a yai cuaama. ¿Ö̦jö tawä? Yai Bada e yafi lä cui, ö̦jö camiyä bäma ecö. Ö̦jö e yafi showawä jamö bä Ijilubö e Bada läa, camiyä bäma ecö lija. Bufi lofotolanö bäma a nofi mölabou showao ja, ö̦jö lä bäma ecö li yafi. ⁷ Ö̦jö cudeenö, Yai Bada a Bufi lä cui, abenaja a cuma. Ei däjä, Yai Bada wamale a̦ ji̦liaö ja, ⁸ bä bufi jifublou dicoo dijä. Ulufi bloque jamö wale yai lä wabano wejei däjä bä lä cuaano weinaja mlai. Ö̦jö bä lä cui bä ja̦amodonomi. ⁹ Lasha 40 a faö showao mlao däjä, ya lä dodijaö wei tä ma mödino wejei ma cui, wale wabaö fe blacäjomaje, cafä wamacö nö badabö lä cuinö. ¹⁰ Ö̦jö cudeenö, ö̦jö bä bluca lija ya fa jushudalunö, abenaja ya cudaliyoma. “Showadi bä bufi lä yacläö wei, ö̦jö bä waiquiwä. Ya bä taamaö lä bufii wei tä ja, bä bufi jaducädaloimi”, ya cudaliyoma. ¹¹ Ya fa jushudalunö, ya wa̦ nö wäo ja abenaja ya ca̦i cuma. “Ya bä nia yai lä yanöcömabono wei tä ulufi ja, obi ma cui, ei bä lä cui bä nia waloomi waiquiwä”, ya cuu majöoma. Yai Bada a Bufi lä cui, einaja a cuma. ¹² Bä da moyaweicu, ö̦jö lä, iba wamacö. Wamacö bufi wa̦lidiblou fa dicolonö, Yai Bada wama a wa̦ bejedi bufii fa mlacunö, Yai Bada tä demi cua shi lä wa̦lile tä lija, ai wamacö mö fulublou mlaobä. ¹³ Showadi bä da yömölayo, Yai Bada bäma a wa̦ nia lä ji̦liaö wei tä cuo showao däjä, ai wa bädawä ma cui wa bufi jifublou dicoo mlaobä. ¿Ö̦jö tawä? Wa̦lidiwä tä ja täbä mölaö yalo, täbä bufi li jifublou. ¹⁴ Cristo bäma a nofi jaba lä mölabono weinaja, bäma a nofi tabou cadidia fe yadia showalanö, cama a ojodamobä jamö bämacö yädäa. ¹⁵ Yai Bada etä a̦ oni lä cuu wei, ei tä a̦ showawä malä cui. Ei däjä, Yai Bada wamale a̦ ji̦liaö ja, bä bufi jifublou dicoo dijä. Ulufi bloque jamö, bä ja̦amodou lä mlaono weinaja mlai. Einaja tä a̦ oni cuu. ¹⁶ Yai Bada tä a̦ ma ji̦liano wejei, bä jo̦wa ja̦amodono lä mlai bä lä cui, ¿wedi bei bä jo̦wa doblonomi? Ejido tä ulufi fa dacöfälöjenö, Moisesinö bä lulubou lä cuaano wei, ¿ö̦jö bä mlai daanö? ¹⁷ Lasha 40 a lalou showaa mlai ja, ö̦jö bä showawä lija Yai Bada showadi tä shi̦lo jushuodima. ¿Ö̦jö tawä? Bä doblou fa mlacunö, ulufi bloque a jamö täbä nomawä bluca yabucuolaliyoma. ¹⁸ Ö̦jö bä lä cui, Yai Bada tä a̦ fuano lä mlajei bä showawä lä cui bä lija, Yai Bada a wa̦ nö wäoma. Bä nia yai lä yanöcömabono wei jamö, bä nia jo̦wa waloamanomi majöwä. ¹⁹ ¿Ö̦jö tawä? Bämacö bufi jaducäblobä tä a̦. Yai Bada tä a̦ bejedi bufinomije yalo, bä waloo doblonomi.

¹ ¿Ö̦jö tawä? Fei däjä ma cui, bämalecö nia lä yanöcömabou wei, Yai Bada tänö tä a̦fa wäyäö showaa lä cule. Bämacö da moyawäo, ö̦jö lä, bämalecö nö badabö nofi tabou lä mladaliyono weinaja, ai wa bädawä ma cui wa nofi tadaö mlaobä. Wa nia lä yanöcöo wei tä ja, wa daamou majöo mlaobä. ² Cama ebä lija, Moisesinö etä a̦ dodijidawä ca̦i jaba lä waloqueno weinaja, camiyä bämacö ma cui lija, Jesucristonö tä a̦ dodijidawä ca̦i waloa malä majöqueno wei. Ö̦jö ma cui, ö̦jö bänö Moisesi etä a̦ ma ji̦liano wejei ma cui, tä a̦ nofi mölabou fa mlacujenö, bä bayeliblamonomi. ³ Yai Bada bäma a wa̦ bejedi lä bufibou wei bämacö lä cui, camiyä bämalecö bufi nia shi̦lo yai yanöcömabou. A wa̦ bejedi bufi lä mlaono wejei bä a̦fa wäyäö ja, abenaja a malä cuno wei. Ya fa jushudalunö, ya wa̦ nö wäo ja abenaja ya cudaliyoma. “Ö̦jö ya bä nia lä yanöcömabono wei, obi ma cui tä nia cuomi”, ya cuma. Einaja Yai Bada a cuma. Jaba däjä, bita a colo lä lofotoblamaleno wei däjä, a nia yai lä cuaano wei tä daö showaoma. ⁴ Täbä lä yanöcödou wei, yedu jamö ma cui tä a̦fa wayoaö malä balöono wei, Yai Bada ai tä a̦ jamö. Abenaja tä a̦ cuu. Täbä cobeblaö jödödöa fa waiquilonö, 7 tä mö jalu lä cublaliyono wei däjä, Yai Bada tä ojodamou yanöcödaliyoma. Einaja tä a̦ cuu. ¿Ö̦jö tawä? ⁵ Täbä lä yanöcödou wei, ai bäma tä a̦ oni möö lä waiquiono wei jamö, tä a̦fa ca̦i wayoaö co̦oma. Abenaja tä a̦ lä cuno wei jamö. Ö̦jö ya bä nia lä yanöcömabono wei, obi ma cui tä nia cuomi. Einaja a cuma. ⁶ Bä a̦fa nia yanöcömabou lä wäyäno wei bä lä cuinö, Yai Bada tä a̦ bejedi bufii fa mlalalujenö bä yanöcödonomi. ¿Ö̦jö tawä? Bä mili lä yanöcömabono wei bä yanöcödonomi cudeenö, tä läa showaa lä cule. Täbä nia yanöcömabou lä majöo wei, tä fei däjä yai cua lä cule. ⁷ ¿Ö̦jö tawä? Tä nö fa dedelönö, bada tä David lija Yai Bada a wa̦ faö malä co̦ono wei. Täbä nia bayeliblamou lä showaono wei tä a̦ ja, a wa̦ nö wäo co̦oma. Abenaja bä nowa tama. Ei däjä, Yai Bada wamale a̦ ji̦liaö ja, bä bufi jifublou dicoo dijä. ¿Ö̦jö tawä? A wa̦ nö wäo ja, einaja bä nowa taö co̦oma. ⁸ Yai Bada tänö bä nia lä yanöcömabono wei jamö, Josué a lä cuinö Isaeli nodiwä bä ca̦i yai waloo cadidio showadao fa cunoja, Yai Bada tä a̦ nö obi wäo co̦obö mlai. ⁹ Ö̦jö cudeenö, Yai Bada bäma ecö lä cui, bämalecö nia yai lä yanöcömabou wei tä cua showaa. Bämacö nia yanöcödou, 7 tä mö jalu lä cublaliyono wei däjä, Yai Bada tä ojodamou lä yanöcödaliyono weinaja showawä. ¹⁰ Bämacö nia fa yanöcömabonö, tä a̦ lä wäqueno wei bäma tä a̦ dädaö däjä, bämacö nia yai yanöcödou. Yai Bada tä ojodamou yanöcödou lä culayono weinaja, bämalecö bufi nia tadamaö. ¹¹ ¿Ö̦jö tawä? Yai Bada tänö bämalecö bufi nia yai lä yanöcömabou wei tä ja, bämacö nö da wa̦lojoo, ö̦jö lä. Bämacö nö badabönö Yai Bada tä a̦ fuaö lä mlaono wejeinaja, ai bämacö cuaaö nodio dicoo mlaobä. ¹² Yai Bada tä a̦ malä cule. Tä a̦ lofote. Sibala bä ma namo wei ma cui, Yai Bada bei tä a̦ yai lucäö si ijejewä yaiwä. Bei täbä bufi yai wawäblamaö. Bä nia lä cuaaö wei tä ma cui, bä bufi cuaablalou lä ja̦too wei tä ma cui, wawädowä etä dablamaö. ¹³ Yai Bada lijamö a nia lä jo̦yao wei, moli ma cui a cuami waiquiwä. Täbä jödödöwä wawädobou. Ö̦jö a showawä lä cuinö bämalecö a̦ nö nia wäamaö. ¹⁴ ¿Ö̦jö tawä? Fedu fedole jamö bämalecö nofi lä bäyäbou wei, Yai Bada tä Ijilubö Jesús a cua waiquiadayoa. Nofi bäyäalewä ö̦jö a Bada. Ö̦jö cudeenö, Jesucristo bufilewä bämacö a̦fa lä jilou wei bämacönö, bäma a nofi yai mölabou da dodijio. ¹⁵ Bämalecö nofi lä bäyäbou wei a Bada lä cuinö, bämacö lä yabäcamou wei tä malä dale. Bämalecö nofi jalujubou. Fecula bada lija camiyä bämacö lä yabäcamou weinaja, cama a ca̦i yabäcamou cuo mö feduoma ma cui, wa̦lidiwä tä tanomi. ¹⁶ ¿Ö̦jö tawä? Bämalecö nofi lä ojodabou wei bäma a bufibolanö bämacö da icuo, ö̦jö lä, bämacö bayeliblamobä. Bämacö nö yai lä bleaale däjä, dodijidawä bämalecö taamaö fe fa yadionö, bämalecö nia yai bayelibou.

¹ Nofi bäyäalewä bada bä lä nomöjöadalou wei bä lä cui, yanowamö täbä lijamö Yai Bada tänö bä bluca yaiamaö cuaaö, täbä nofi bäyäbobeje. Täbä doblou lä mlai etä nowa mladobä, Yai Bada tä dobäöje. Yalo bä shäö fa läojenö, bä ö̦shö dodobouje. ² Nofi bäyäalewä a bada lä läo wei a lä cui, yanowamö a mö feduwä cudeenö, bä bufi lä yabäcamou wei tä ca̦i daö. Tä daö yalo, bä bufi lä mojodi wei bä lija a wa̦ oquewä fabä a waiquiwä. Bä bufi lä yacläö wei bä lija ca̦i. ³ ¿Ö̦jö tawä? Cama a bufi yabäcamou mö feduwä yalo, ai täbä doblono lä mlai etä nowa mladobä, tä nia taö ayaomi. Cama a showawä ma cui, a doblono lä mlai etä nowa mladobä, tä ca̦i taö mö feduo showadao. ⁴ Nofi bäyäalewä a bada lä cui, inaja cama a bada cuo bufi fa doblaonö a cubloimi. Ma, Yai Bada tänö a fa cadidilönö a shi̦lo bada läo. Jaba däjä, nofi bäyäalewä Aaloni a lä cadidileno weinaja showawä. ⁵ Cristo a ma cui, nofi bäyäalewä a Bada cuobä, cama a jimamonomi. Ma, Yai Bada tänö a yailema, abenaja a nowa lä tano wei a lä cuinö. Ijiluyä wa. Fei däjä, iba bä nö wawädowä ö̦jöböamaö. Einaja a nowa tama. Ai tä a̦ oni jamö, abenaja Yai Bada tä ca̦i cuu. Showadi wa täbä nofi bäyäaö shi wa̦libä wa. Mequisedeco a lä cuinö täbä nofi jaba lä bäyäbono weinaja, wa cuaaö nomöjöobä. Einaja Yai Bada tä ca̦i cuu. ⁷ Eja Jesús yanowamö showawä a cuo däjä, Yai Bada lija a nö bayeli nacaoma. A nomaö mlaobä, a noshi umlabou lä dao wei a lä cui lija a ö̦cölanö a wa̦ i̦cali fama. Yai Bada tä nö quili tama yalo, a wa̦ ji̦limolayoma. ⁸ ¿Ö̦jö tawä? Yai Bada tä Ijilubö ma cui, bä Fö̦ö e a̦ fuaö dablobä, a wabamoma. A nö lä bleaaö wei tänö, Yai Bada a wa̦ nia fuaö fe lä yadio wei tä dalalema. ⁹ A wa̦ fuaö fe lä yadiono wei tänö, a nia lä doblao wei a yai cublou dodijilayoma. Inaja a fa cublalunö, cama a wa̦ lä fuaö wejei bä lä cui, bä fucäaö shi wa̦libä e cublou showadalayoma. ¹⁰ Nofi bäyäalewä a Bada cuobä, Yai Bada tänö a cadidilema, Mequisedeco a lä cuinö täbä nofi jaba lä bäyäbono weinaja bä nofi bäyäbou cuo nomöjöobä. ¹¹ Ö̦jö yama tä a̦ wäyäö showaobä tä a̦ bluca ma cule, wamacö bufi jaducäblou si ijejewämi dicowä. ¹² Wamacö nö dedeaö waiquiwä yalo, ai wama täbä damaö mö feduobä wamacö ma cui, wamacö doblou malä mlai. Ai wama bä damaö mlai ja, ai bä lija cafä wamacö yai damamou co̦obä wamacö, Yai Bada colo tä a̦ lä cui ja wamacö bufi yai jaducäblobä. Ijilu oshe bä lä culenaja wamacö cuwä showawä. Nii bä wabeje bämi. Sifu ubä ja bä shadio showawä cäbä. ¹³ Sifu ubä ja bä lä shadio wei bänö, dodijidawä tä nö ö̦jöböaö malä mlajei. Wa̦lidiwä tä nö ca̦i ö̦jöböaö malä mlajei. Bä oshe malä cui. ¹⁴ Nii a yai lä cui, bada cäbä befi. Ö̦jö bä lä cui bä bufi wasöo fa wabäodinö, tä lä wa̦lidii tä daöje. Tä lä dodijidai tä ca̦i.

¹ Ö̦jö cudeenö bämacö bufi yai da walalaafälö. Cristo bäma tä a̦ jaba lä ji̦lileno wei bäma tä a̦ daö waiquiwä. Bämacö jaba lä cuaano wei tä ja, bämacö nia nomaö shi lä wa̦lijio wei tä a̦ ca̦i. Bämacö bufi mö fa yabajadalunö, Yai Bada bäma a nofi nia yai lä mölabou wei tä a̦ ca̦i. Ö̦jö bäma tä a̦ daö waiquiwä cudeenö, bäma tä a̦ wayoadii showaobä tä cuami. ² Täbä fe lä ojomamou wei tä a̦ ma cui, Jesucristo ebä lija bada bä imicö lä maqueo wei tä a̦ ma cui, ö̦jö bäma tä a̦ ca̦i daö waiquiwä. Täbä nia demi jocädou lä co̦o wei tä a̦ ma cui, Jesucristo ebä lä mlai bä nö nia bleaaö shi lä wa̦lii wei tä a̦ ma cui, ö̦jö lä tä a̦ ja, bämacö yömölaö co̦obä tä cuami. ³ ¿Ö̦jö tawä? Yai Bada tänö bämalecö bayeliblaö bufi doblao ja, fei däjä bämacö bufi nia yai walalao. ⁴ Jesucristonö bä bufi ma wacacablamaleno wei ma cui, a bufiboimi majöo dicoweje ja, Yai Bada lija bä bufi mö yabäjadou co̦obä, etä cuami waiquiwä. No mlai ja Yai Bada tänö bä lä dobäleno wei tä daöje. Yai Bada tä Bufi ca̦i däa mö fedua waiquilemaje. ⁵ Yai Bada tä a̦ ca̦i dodijidawä daa waiquilalemaje. Yai Bada tänö cama ebä ca̦i lä cuo wei, etä ca̦i lofote daö waiquiomaje. ⁶ Ö̦jö bä lä cui, Jesucristo a yai bufiboimi majöo dicoweje ja, bä yai dobloimi. Jai fii balitama tefi jamö Jesucristo a shäö co̦aje ö̦jö bä li cuaaö malä cui, cama bä lä cuaaö wei tänö. Wawädowä a nö waiblamaöje. ⁷ ¿Ö̦jö tawä? Ficali täcabä ma cui, Yai Bada tänö ai täcabä bayelibou malä dodijio wei. Maanö täcabä fa jäläamanö, bä lä ficalimou wei bä iyabä, nii bä caumaö. ¿Ö̦jö tawä? Yai Bada tänö täcabä dodijidawä fa dalalönö, täcabä nö yai nijiblamaö. ⁸ Ö̦jö ma cui, täcabä shi̦lo mösöcöböblou bädawä ja, täcabä shi̦lo bluca baömöö bädawä ja, täcabä nowa nia cublomi majöo. Yai Bada tänö ö̦jö täcabä a̦fa waimou tabä täcabä. ¿Ö̦jö tawä? Täcabä a̦fa waimou lä wäyäö wei, täcabä nia ya̦cumö ö̦shömaö. ⁹ ¿Ö̦jö tawä? Inaja yamacö cuu ma cui, cafä bämacö lä nofimale wamacö lä cui, Yai Bada tänö wamacö lä bayelibou wei yama tä daö waiquiwä. Yai Bada tänö täbä lä fucäaö wei täbä lä cui, täbä dodijaö lä cuaaö weinaja wamacö cuaale cätä. ¹⁰ Cama lija wamacö lä ojodamou wei tä lä cui, Yai Bada tänö tä nofi mojodubobä a malä mlai. A dodijaö. Yai Bada wama a nofimaö yalo, cama wama ebä lä bayeliblano wei, wama ebä bayeliblaö lä showale, tä daö. ¹¹ ¡Showadi wamacö dodijadii bufi doblaobä, ö̦jö lä! Inaja bämacö taamaö bufi doblao. Wamacö mölaö showao däjä, wama tä nö lä dabole tä bejedi wawäblobä. ¹² Wamacö mojimou mlai ja, bä lä dodijaö wei wama bä yai owämabä. Bä lä dodijaö wei bä lä cui, bä bufi yanöcöwä ca̦i mölaö fa showaonö, Yai Bada tänö tä a̦fa lä wäqueno wei tä nia yai däaöje. ¹³ Ablaamö lija Yai Bada tä a̦ nö lä wäono wei däjä, a wa̦ yai lofotoblaliyoma. Cama a shi̦lo yami Bada cuo fa waiquiicunö, ai a wa̦fa wäaö mlai ja, cama a wa̦fa shi̦lo wäamou showadaoma, a bejedimou dablamobä. ¹⁴ Abenaja a cuma. Cafä bejedi bä bayelibou weicätä. Afä ya bä nodiwä fa balamalönö, bä nia blucablou dodijio. Einaja a cuma. ¹⁵ Ö̦jö cudeenö, bufi yanöcölanö Ablaamö a nö fa dadionö, Yai Bada tänö tä a̦fa lä wäqueno wei tä ya̦cumö dälema. ¹⁶ Showadi täbä malä cuaaö wei. Täbä a̦ nö wäo bufio däjä, bada täbä a̦fa shi̦lo wäyäöje. Abenaja bä cuu. “Ya wa̦ wawädoo da showadao. Bada tä malä cule”, bä cuu. ¿Ö̦jö tawä? Ai bä a̦ ma läablalou wei ma cui, bada a wa̦fa yai wäyäö cadidioje ja, bä a̦ faimi majöwä. ¹⁷ Inaja showawä Yai Bada a ma cui, a cuaama. Ablaamö lija a wa̦ nö wäo däjä, cama Yai Bada tä shi̦lo Bada lä ayai a wa̦fa wäamoma, a bejedimou dablamobä. Ablaamö a ma cuinö, camiyä nodiwä bäma ecö ma cuinö, bäma a wa̦ nofi mölabobä. ¹⁸ Yai Bada a wa̦ nö wäo ja a wa̦ cadidou showadao. A wa̦ nia shominajaö majöomi. Inaja showawä, cama a caficö jolemou dao lä mlai a wa̦fa wäyämou ja, a wa̦ nö shominajaaö majöobimi waiquiwä. ¿Ö̦jö tawä? A wa̦ nö lä wäono wei tä a̦ lä cui ja, bämacö mölaö lofotoo showaobä tä a̦. Yai Bada lija bämacö nofi lä yashuo wei bämacö lä cui, bämacö nia lä bayeliblou wei tä a̦ ja, bämacö mölaö showao fe yadiobä. ¹⁹ Bäma a nofi lä mölabou wei tänö bämacö bufi lofote ca̦i cudia. Modu u jamö, wadoli anö täbä befi ca̦i jilulamou mlaobä, fude täbä bada fa ca̦bojenö, täbä befi ca̦i lofotomabou fe lä yadio wejeinaja showawä. ¿Ö̦jö tawä? Bäma a nofi mölabou yalo, jai Yai Bada etä yafi lä culadi jamö bämacö lucäa waiquilayodayoma bämacö li cuwä. Yano a yai nowamaö lä dodijiladi jamö ma cui, acadafu cäcö lä läle jamö bämacö fa jayublalufälönö, jai bämacö u̦eshiblou waiquilayodayoma bämacö cuwä. ²⁰ Nofi bäyäalewä a Bada cuo shi wa̦libä Jesús a fa cublalunö, ö̦jamö lä a fua waiquia balölayoma. Mequisedeco a lä cuinö täbä nofi bäyäbou cuo lä balöono weinaja, bämalecö nofi bäyäbou cuo nomöjöodayobä.

¹ Ö̦jö Mequisedeco a lä cui, Salemiteli bä lija a bada lä läono wei, bei a cuoma. Yai Bada tä Bada lä ayai a lä cui lija a ojodamou ja, täbä nofi bäyäboma. Ablaamö a lä cuinö, bada bä bluca shäa fa waiquimalalönö, cama ebä ca̦i co̦imabä jamö Mequisedeco a icua mö baquema. Yai Bada lija Ablaamö a bayelimaö bufima. ² Ö̦jö däjä, täbä lä co̦leno wei täbä ja, Ablaamönö Mequisedeco a dobälema. Täbä bluca lä coleno wei, fe usucuwä 10 täbä fa shedequeblalönö, ö̦jö ai moli täbä ja Mequisedeco a dobälema. ¿Ö̦jö tawä? “Mequisedeco”, täbä lä cudou wei, “Bada tä yai lä bejedimou wei”, täbä cudou. “Salemiteli bada”, täbä lä cuu wei, “Täbä bufi lä yanöcömabou wei a bada”, täbä cuu. ³ Mequisedeco bä fö̦ö e ma cui, bä nöö e ma cui, bei tä a̦ oni jamö cäcöbä a̦fa ca̦i cuami. Cama bä nö badabö cuo lä balöono wei bä ma cui, inaja showawä. A oshe lä cublono wei tä ma cui, a bufi lä mlaqueno wei tä ma cui, tä a̦fa oni ca̦i cuami. Yai Bada tä Ijilubö e lä culenaja a cuwä. Täbä nofi bäyäbou shi wa̦lii. ⁴ Mequisedeco a lä cui, bada wama a nö yai ö̦jöböabä ya wa̦. Nö badabö Ablaamö a ma cuinö, camanö bä lä coleno wei bä ja, fe usucuwä 10 bä fa shedequeblalönö, moli bä ja Mequisedeco a dobälema. ⁵ ¿Ö̦jö tawä? Moisesi etä a̦ oni wawädowä. Ablaamö ebä nodiwä ma cuinö, nofi bäyäalewä bä nia lä dobäö wejei tä nabä shimöquema. Bluca täbä lä tabou wejei täbä ja, fe usucuwä 10 bä fa shedequeblajenö, ai moli täbä ja Lewi ebä nodiwä nia dobämaje, nofi bäyäalewä bä lä cui. ¿Ö̦jö tawä? Cama Lewi bä mashi ma cui bä nia dobämaje. ⁶ Ö̦jö ma cui, ei Mequisedeco a wa̦fa lä cui, Lewi ebä nodiwä cuono ma mlai ma cui Ablaamö lija a dobämolayoma. Täbä lä co̦leno wei, fe usucuwä 10 täbä fa shedequeblalönö, ai moli täbä ja Mequisedeco a dobälema. Ö̦jö däjä, Mequisedeco a lä cuinö, Yai Bada lija Ablaamö a bayelimaö bufima. ¿Ö̦jö tawä? Yai Bada a wa̦ nö wäo ja, a nia jo̦wa lä bayeliblamono wei a lä cui, ö̦jö a showawä lä cui, Mequisedeconö a bayelimaö bufima. ⁷ ¿Ö̦jö tawä? Bä yai lä bada wei bä lä cuinö, bä bada lä mlai bä a̦fa shi̦lo bayeliblaö wäyäö talajei. Ö̦jö bäma tä daö waiquiwä. ⁸ Nofi bäyäalewä bä ma nomablou wei bä ma cui, eja bä dobämamou talei. Bluca täbä lä tabou wejei, fe usucuwä 10 täbä fa shedequeblajenö, ai moli täbä ja bä dobäöje. Ö̦jö ma cui Yai Bada etä a̦ oni jamö, ö̦jö Mequisedeco a lä cui, a wa̦fa nomaö wäyämamoimi. A demi showawä. ¿Ö̦jö tawä? ⁹ Ablaamö bei ijilubö nodiwä Lewi a lä cui, nofi bäyäalewä a cuoma yalo, ai täbä lija showadi a dobämamoma. Cama ebä nodiwä ma cui, bä dobämamou malä showai. Bluca täbä lä tabou wejei, fe usucuwä 10 täbä fa shedequeblajenö, ai moli täbä ja showadi bä dobäöje. Ö̦jö ma cui, Lewi a oshe wawäblou showao mlao däjä ma cui, Ablaamö lija Mequisedeco a lä dobämono wei däjä, jai cama Lewi a showawä ma cui lija a dobämamoa culayoma. ¹⁰ Mequisedeconö a mö lä bamaleno wei däjä, Ablaamönö Lewi a nia lä taaö wei a didibou showao ja̦too däjä a malä dobäleno wei. ¹¹ Wamale a̦ da ji̦lilä. Lewi ebä nodiwä lä cuinö, Isaeli ebä nofi nia lä bäyäbono wejei bä cuoma, Moisesi etä a̦ ca̦i läobeje. Ö̦jö ma cui, Aaloni a lä cuaano weinaja, bä cuaaö lä nodiono wei bä nofi bäyäalewä lä cuinö, yanowamö täbä doblamabeje etä cuonomi waiquiwä. Etä cuo fa mlacunö, Yai Bada tänö shomi ai a nia lämabou majöoma. A nia läo lä majöo wei a lä cui, Aaloni e nodiwä mlai, Mequisedeco a lä culenaja a cuwä mö lä fedui, Yai Bada tänö ö̦jö a nia shi̦lo yai lämabou majöoma. ¹² ¿Ö̦jö tawä? Nofi bäyäalewä shomi a nia läo majöo däjä, shomi tä a̦ nia ca̦i malä läo wei. Showadi inaja täbä malä cuaaö wei. ¹³ - ¹⁴ Ai shomi a wa̦fa bada läo lä wäyämono wei a lä cui, Bada tä Jesús a wa̦fa yai wayoamoma. Lewi a nodi jamö mlai, ö̦jö cama e mashi lija a malä nodiblaliyono wei, Judawä lija. Ö̦jö e mashi lä cui lija bä lä nodiblaliyono wei bä lä cui, nofi bäyäalewä bä cuonomi. Yalo bä lä dodoblamou wei bä maqueblamobä täcö jamö, Judawä nodiwä moli ma cui a ajedou bädaonomi. Judawä ebä nodiwä lä cui, Moisesinö nofi bäyäalewä bä a̦fa ca̦i jilanomi. ¹⁵ ¿Ö̦jö tawä? Ö̦jö malä cui. Nofi bäyäalewä ai shomi a waloa waiquiqueyoluma, Jesús a lä cui, Mequisedeco a lä culenaja a cuwä mö lä fedui. ¹⁶ Jaba däjä, bä fö̦ö ebänö täbä nofi bäyäbomaje yalo, bä ijilubö ebänö täbä nofi bäyäbou nodiablalobeje bä li cuo balöoma, Moisesinö tä tamaö lä bufino weinaja showawä. Fei däjä shomi tä a̦ läa majöa. Bamacö bufi jaducäblobä ö̦jö tä a̦ waiquiwä. Nofi bäyäalewä Jesús a tablamaö majölayoma. ¿Ö̦jö tawä? Cama bä bada cuo lä balöono wei bä lä cui, nofi bäyäalewä bä cuo fa showadaonö mlai. Jesús a lä cui, a ba̦limi cua waiquia cudeenö a li lämaboma. ¹⁷ Cama a wa̦fa wäyämou ja, abenaja ai tä a̦ oni malä cuu wei. Showadi wa täbä nofi bäyäbou shi wa̦libä wa. Mequisedeconö täbä nofi jaba bäyäaö lä cuaano weinaja wa cuaaö nomöjöobä. Einaja tä a̦ malä cuu wei. ¹⁸ Moisesi etä a̦ jaba lä läono wei tä a̦ lä cui, tä a̦ ujudi waiquiwä yalo tä a̦ casöblamaö majölayoma. Ö̦jö tä a̦ ja, täbä bayeliblanomi waiquiwä yalo. ¹⁹ Moisesi etä a̦nö täbä doblono malä mlai. Fei däjä, shomi tä a̦ nomöjöblaö majöa lä cule, tä yai lä doblale bäma tä nö yai dabou majöobä. Ö̦jö bäma tä nö dabolanö, Yai Bada lija bämacö ajedou. ²⁰ Bämalecö nofi bäyäadayobä Jesús a lä lämaqueno wei däjä, Yai Bada a wa̦ nö wäolanö, a lämaquema. ²¹ Nofi bäyäalewä bä jaba lä läono wei bä lä cui, Yai Bada a wa̦ nö wäo mlai ja bä bada läolaliyoma ma cui, Jesús a lä lämaqueno wei däjä, a wa̦ nö yai wäo majöoma. A wa̦ nö nia lä wäono wei, Yai Bada etä a̦ oni jamö tä a̦fa wäaö showaoma. Abenaja tä a̦ cuu. Bada tä a̦ nö wäo waiquio lä cufe. A wa̦ nia shominajaaö majöomi. Abenaja e cuma. “Cafä nofi bäyäalewä wa nia cuo shi wa̦lii”, e cuma. Einaja tä a̦ cuu. ²² Jesús a lä lämaqueno wei däjä, Yai Bada a wa̦ nö wäoma yalo, tä a̦ läa lä majöle yama tä a̦ yai doblao dablaö. Jesúsnö ö̦jö tä a̦ ca̦i läa cudeenö, bäma tä a̦ nofi yai mölabou. ²³ Bä nomabä etä cuo waiquioma yalo, nofi bäyäalewä bä nia bada lä lädio wei etä cuonomi. Bä showadi nodiablaloma yalo bä li blucaoma. ²⁴ Ö̦jö ma cui, Jesús a ba̦limi waiquiwä yalo, nofi bäyäalewä ö̦jö a nia shi̦lo läo shi wa̦lii. ²⁵ Ö̦jö cudeenö, Jesús a lä cuaano wei tänö, Yai Bada lija bä lä ajedou wei bä lä cui bä nia nowamaö. Bä nowamabä ö̦jö Jesús a waiquiwä. Showadi bä bayelimaö bufibä a ba̦limi cua malä waiquiladi. ²⁶ Bämalecö nofi nia lä bäyäbou wei, ö̦jö Jesús a waiquiwä. Ö̦jö a lä cui, nofi bäyäalewä Bada a. A yaia. A wa̦fa ca̦i tamobä etä cuami. Etä ca̦i shami läami. Wa̦lidiwä talewä bämacö lä cui lijamö a coyocomabou mlai ja, fedu fe dole jamö Yai Bada tänö a yai doblamabodayou. ²⁷ Nofi bäyäalewä bada bä jaba lä cuono wei bänö, yalo showadi bä shäö fa läojenö, Yai Bada lija bä ö̦shö dodoblaamaje. Cama bä doblou lä mlai etä nowa mladobä tä taö fa balöojenö, ai bä doblou lä mlai etä nowa mladou mö feduobä, etä taö nomöjöomaje. Inaja cama bä li showadi cuaaö balöoma ma cui, inaja Jesús a cuaaö mö feduobä etä cuami. A shämou lä läono wei, moli a shi̦lo dodoo läoma, cama a showawä lä cui. Cama a dodoo waiquioma cudeenö, ai täbä dodobou majöobä etä cuami waiquiwä. ²⁸ ¿Ö̦jö tawä? Nofi bäyäalewä bada bä nodiablalou cuaabä, yanowamö täbä bädawä ma cui bä yaiamou cuaaö, Moisesi etä a̦ lä cuu weinaja showawä. Yanowamö bämacö ujudi lä culenaja, inaja showawä bä ujudi cuwä mö feduwä. Ö̦jö ma cui, Moisesi etä a̦ cuo waiquio däjä, Yai Badanö shomi tä a̦fa wäa majöquema. A wa̦ nö wäolanö, bä Ijilubö e yaia majömaquema. Ö̦jö a shi̦lo doblamabou shi wa̦lii waiquiadayoa.

¹ Ö̦jö a lä cuinö, bämalecö nofi nia lä bäyäaö wei, ö̦jö a bada waiquiwä. Inaja bämacö nowa tabä, yama tä a̦ oniblaö lä cule. Fedu jamö a dicäa waiquiadayoa, Yai Bada tä lä doblaladi jamö. ¿Ö̦jö tawä? Yai Bada jayu boco mashi jamö a dicäa. ² Yai Bada etä yano lä i̦taladi jamö a Bada läadayoa. E yano yai nowamaö lä dodijiladi jamö ma cui, ö̦jamö lä a ca̦i läa. Ö̦jö a yano lä culadi, Yai Bada etä yano shaliliwä. Cama Bada a showawänö etä yano i̦tabou. Yanowamö täbä lä cui lija, ö̦jö a yano tablamonomi. ³ Nofi bäyäalewä bada bä bluca lä cui, Yai Bada tä dobäbeje bä yaimamou, yalo bä shäö fa läojenö bä ca̦i dodobobeje. Ö̦jö cudeenö, nofi bäyäalewä Jesús a Bada ma cuinö, cama etä ca̦i dodobou mö feduobä etä ca̦i cua. ⁴ Bita jamö yanowamö Jesús a cuo showao fa cunoja, nofi bäyäalewä a nö cuobö mlai. Ai bä nofi bäyäalewä cua malä waiquile. Ö̦jö bä lä cuinö, Yai Bada lija täbä li dodobouje, Moisesi etä a̦ lä cuu weinaja showawä. ⁵ Ö̦jö bä lä läo wei bä lä cui, Yai Bada etä yafi lä tablaleno wejei jamö, bä li ojodamou. Ö̦jö etä yafi lä cui, Yai Bada etä yano lä culadi etä yano nö li owä. Jaba däjä, Moisesinö Yai Bada etä yano nia jaba lä i̦tamano wei däjä, a malä yömölaleno wei. Abenaja Yai Bada tänö a nowa talema. A da moyaweicu. Sinai cäcö jamö ya culanö, cafä lija ya täbä jimaö da cuobleinaja, inaja showawä wa täbä bluca tablamaö cadidio showadaobä. Einaja a nowa talema. ⁶ Nofi bäyäalewä bä nia lä cuaano wei, Yai Bada tänö etä nabä bluca shimöquema ma cui, fei däjä Jesús lija tä yai lä dodijidai tä nabä shimöa majöquema, bämalecö nofi bäyäbodayobä. Jesús tä a̦ yai dodijidawä malä cui, Moisesi tä a̦ lä culenaja mlai. ¿Ö̦jö tawä? Yai Bada tänö fei däjä tä yai lä dodijidai tä a̦fa wäquema yalo, Jesús a lä cuaano wei tänö, dodijidawä cama bäma ecö nia yai cuo. ⁷ Yai Bada tänö tä a̦fa jaba lä wäqueno wei, tä a̦ dodijidawä waiquio fa cunoja, a wa̦ nö nö wäo co̦obö mlai. ⁸ ¿Ö̦jö tawä? Yai Bada tänö cama ebä dobloimi lä jimano wei däjä, a wa̦ nö nia wäo lä majöono wei tä a̦fa taö showaoma. Abenaja tä a̦ oni cuu. Bada ya tä a̦no taö lä cule. Judawä ebä lija ma cui, Isaeli ai ebä mö feduwä lija ma cui, obi, a wa̦ nö nia jo̦wa wäo co̦o. ⁹ Ejido jamö, cama bä nö badabö lä co̦leno wei däjä, dodijidawä bä lä öbölefälöno wei däjä, a wa̦ nö wäo balöoma. Ö̦jö tä a̦ lä culenaja tä a̦ nia cuomi. A wa̦ nö jaba lä wäono wei tä a̦ nofi cadidibonomije. Tä a̦ nofi cadidibou fa mlacufälöjenö, bä nowamaö malä mladaliyono wei. Inaja Bada tä cuma. ¹⁰ Isaeli ebä lija a wa̦ nö nia wäo lä co̦o wei däjä, abenaja Bada a nia jo̦wa cuaaö. Bä taamaö lä bufii wei, bei bä bufi jamö tä a̦ nia yai lämabou. Bei bä bufi nia yai taamaö. Cama bä lija a nia yai bufiblamou. Bä nofi nia yai tabou. ¹¹ Ö̦jö däjä, “Bada wa tä yai dabä”, bä nowa nia jo̦wa tayoimi. Cama bä blucanö a nia daö malä waiquio wejei. Bada bä ma cuinö, bada bä lä mlai bä ma cuinö, a nia jödödöwä daöje. ¹² Bä doblou ma mlai ma cui, a bufi nia malä asimou wei. Bä doblono lä mlai tä nofi nia jaducäboimi majöo. Einaja Bada tä cuma. Einaja tä a̦ oni cuu. ¹³ A wa̦ nö nia wäo lä co̦o wei tä a̦fa wäyäö ja, tä a̦ cuo lä balöono wei, jai tä a̦ nomöjöblaö waiquilayoma, tä a̦ ji̦limamou cuwä. ¿Ö̦jö tawä? Shomi tä a̦ nia lämabou malä majöono wei. Tä a̦ nia nomöjöblaö waiquioma yalo, tä a̦ cudiobä tä a̦mi waiquiwä.

¹ ¿Ö̦jö tawä? Yai Bada a wa̦ nö wäo lä balöono wei tä a̦ ma cui, tä a̦ nofi cadidibobeje tä a̦ li cuoma. Yai Bada lija täbä ajedobä, cama bä bufi cuu lä bädaono wei tä ja bä nia cuaanomi. Bä möfe bolanö bä nö bayeli nia lä nacaono wei däjä, inaja showawä. Cama bä bufi cuu lä bädaono wei tä ja mlai. Tä a̦ nofi cadidibolajenö bä nia cuaama. ² Yai Bada e yano ma cui, a wa̦ nofi cadidibolajenö e yano i̦tamamaje. Täbä jaba lä faö wei jamö, ö̦jamö cowa wacäbä shi̦i cublamobä tä i̦tabomaje. Nii bä maquebobeje tä ca̦i. Nii bä nia lä maqueo wei bä ca̦i. Ö̦jö a yano lä cui, “A yano lä nowamaö wejei”, a yano a̦fa jilabomaje. ³ Acadafu cäcö lä läle tä mashi jamö, ai a yano olaoma. Ö̦jö a lä cui, “A yano yai nowamaö lä dodijio wejei”, a wa̦fa yano jilabou mö feduomaje. ⁴ Ö̦jamö, täbä wa̦queshi ni cle̦deli u̦cucamobä, täbä maqueobä täcö ca̦i cuoma. Täcö lä oloblaleno wejei täcö lä cui. Yai Bada a wa̦no oni didiobä tefi ca ca̦i cuoma, tefi ca ca̦i jödödöwä lä oloblaleno wejei tefi ca lä cui. Ö̦jö tefi ca jamö, manaa bä befi ca̦i didibomaje. Bä lä didiono wei tä ma cui, tä ca̦i sibosi oloblalemaje. Aaloni etefi lä cabudulayono wei tefi ma cui, ö̦jö tefi ca jamö etefi ca̦i didibomaje. Maa macö ca̦i oni, Yai Bada tä a̦ nö wäo däjä, maa macö ja tä a̦ lä oniblamolayono wei macöbä lä cui. ⁵ Ö̦jö tefi ca fe laobä tä feyaca fedu jamö, yai waiteli täcöbä nö ijidubö cuoma. Bei täcöbä majecö fa lelejeicunö, jai tefi ca nowamöboböö täcöbä majecö cuoma. ¿Ö̦jö tawä? Fei däjä ö̦jö yama tä̦ a̦fa nia wayoaö fe balojoomi. ⁶ Inaja Yai Bada etä yano tablaö fa balölojenö, ö̦jamö nofi bäyäalewä bä läa. Bä ojodamou lä cuaaö wei, Yai Bada etä yano lä nowamaö wejei jamö bä fuu ja, bä li cuaaö. ⁷ Ö̦jö ma cui, ai a yano lä cui jamö, a yano yai nowamaö lä dodijio wejei jamö, bä fuimi. Ö̦jamö lä nofi bäyäalewä bada a shi̦lo fuu dao. A fuu ma dao wei ma cui, a showadi fuimi. Moli a shi̦lo fudou. Lasha ai a faö lä co̦le däjä ma cui, ai a faö lä co̦le jamö ma cui, ai a ja ma cui, moli a shi̦lo fudou cuaaö. Yalo i̦yäbö mlai ja a ca̦i lucäö buomi. Yalo i̦yäbö mashi fa dälänö, i̦yäbö ca̦i faö. Cama a ma cui, ai täbä mö feduwä ma cui, bä doblono lä mlai etä nowa mladobä, i̦yäbö dodobou. ⁸ Inaja bä lä cuaaö wei tänö, Yai Bada tä Bufinö bämalecö bufi shi̦lo yai jaducäblamaö. Yai Bada a wa̦ jaba lä wäono wei tä a̦ ca̦i läo showaoje däjä, Yai Bada lija täbä ajedobä etä cuami. ¿Ö̦jö tawä? Yai Bada etä yano i̦tabou showaoje däjä, e yano yai nowamaö lä dodijio wejei jamö bä lucäö dao malä mlai. ⁹ Bämacö fei däjä lä bälöle bämacö lä cui, bämacö bufi jaducäblobä, ö̦jö lä tä a̦ waiquiwä. Moisesi etä a̦ lä fuaö wejei bä lä cuinö, bä möfe bolanö Yai Bada tä dobäöje. Yalo bä ö̦shö ca̦i dodobouje. Inaja bä ma cuaaö wei ma cui, bei bä bufi jamö tä lä läle tä mladoimi. ¹⁰ Ö̦jö Moisesi etä a̦ jamö, nii bä a̦fa shi̦lo wayoamou bädao. Toubä lä coaö wejei toubä ca̦i. Täbä dodijidablou co̦obä, bä nia lä cuaaö wei tä ca̦i. ¿Ö̦jö tawä? Shomi tä a̦ läo showao mlao däjä, bei bä sibo nia lä taamamou wei tä a̦ shi̦lo läo showao balöoma. ¹¹ Ö̦jö ma cui, ya̦cumö nofi bäyäalewä Cristo a Bada wawäblaliyoma. Fei däjä tä a̦ yai dodijidawä lä waloqueno wei, tä a̦ ca̦i li läa. A lä läladi a lä cui, etä yano shi̦lo yai doblaa culadi. Ö̦jö a yano lä cui, yanowamö täbänö e yano tablanomije. Ei tä ulufi lä tablamolayono wei jamö e yano ca̦i cuami. ¹² E yano yai nowamaö lä dodijiladi jamö, Cristo moli a fadou waiquilayoma. A lucäö co̦obä etä cuami. Shibo bä i̦yäbö ca̦i mlai ja, baca bä ocalo ca̦i i̦yäbö mlai ja, cama i̦yäbö ca̦i yai famolayoma, ö̦jö i̦yäbö ja, bämacö doblou lä mlai tä nowa co̦amamou shi wa̦lii showadaobä. ¹³ Yai Bada tänö, yanowamö täbä nofi lä shamibou wei, Moisesi tä a̦ jamö tä a̦ wayoamou. Yai Bada lija dodijidawä täbä nia mömou fe fa yadionö, shibo bä ma cui, baca bä ocalo ma cui, ö̦jö bä i̦yäbönö bä nia yomösamoma, baca a ö̦shö lä dodobou wejei ushibä ca̦inö. Ö̦jö täbä bädawä ma cuinö, dodijidawä bä nofi nia jo̦wa tamamou co̦oma cudeenö, ¹⁴ ¡fei däjä yai! Cristo i̦yäbönö fei däjä bei wamacö bufi yai aublou dodijia yailayou. Etä wa̦lidiwä cua mlai ja, Yai Bada lija a dodomoquema. Yai Bada tä Bufi lä ba̦limi wei tä lofotenö, a dodijidawä dodomoquema. Wamacö lä cuaano wei tänö wamacö mili nomama ma cui, bei wamacö bufi jamö tä wa̦lidiwä lä läono wei, Cristo i̦yäbönö tä mladamalema. Wamacö bufi aublou majölayoma. Fei däjä wamacö yai au, Yai Bada a cua shi lä wa̦lile wama a nosie yai fuaö majöobä. ¹⁵ Ö̦jö cudeenö, Yai Bada a wa̦ nö wäo lä majöono wei tä a̦ lä cui, Cristonö ö̦jö tä a̦ ca̦i läa waiquia, bä lä nacaö wei bä lä cui bä ba̦limi cuobä, Yai Bada a wa̦ nö lä wäono weinaja showawä. Tä a̦ läo lä balöblaono wei tä a̦nö bä a̦fa nomaö tama ma cui, bä doblou lä mlai etä nowa co̦wamabä, Cristo a nomaa lälayoma. ¹⁶ ¿Ö̦jö tawä? Cama madofi ebä nia shelelemabou lä juo wei a lä cuinö, a demi showao däjä bä nia madofi däamaö balöo malä mlai. A lä nomalayono wei a wa̦fa nomaö ji̦liaö däjä, ebä madofi nia shi̦lo shelelaö juo. ¹⁷ Cama madofi ebä shelelemabou lä bufio weinaja, tä a̦ oni tablaö fa balölonö, ö̦jö tä a̦ lä cui, bada anö tä a̦ nia shi̦lo oni möö juo, cama a nomaa waiquilayono wei ja. Camanö madofi bä ca̦i cuo showao däjä, tä a̦ oni möbä etä cua malä mlai. ¹⁸ ¿Ö̦jö tawä? Ö̦jö cudeenö, Yai Bada a wa̦ nö jaba lä wäono wei däjä ma cui, yalo a nomaö mlao däjä, etä nia cadejeblonomi. I̦yä i̦yä bä cua mlai ja täbä nia bayeliblamonomi. ¹⁹ ¿Ö̦jö tawä? Moisesinö, Yai Bada etä a̦ oni bluca däa fa jödödölänö, Isaeli nodiwa bluca bä lija tä a̦ wäyäma. Ö̦jö däjä, baca i̦yäbö dälema, shibo i̦yäbö ca̦i. Ö̦jö bä i̦yä i̦yä fa dälönö, ai bei i̦yä i̦yä mashi lä baono wei jamö, mau ubä ca̦i coyocoquema. Ö̦jö däjä, naa jenabä nabä lä shömaö wei jenacö fa cälönö, jenacö fito befi ca̦i o̦caquema, shinalu wacä unö. I̦yä i̦yä bä lä baono wei bä ja, jenacö fa ca̦danö, täbä yomösaö cuaama. Yai Bada etä a̦ oni ma cui, tä a̦ oni ca̦i yomösama. ²⁰ Bä yomösalanö abenaja bä nowa tama. Yai Bada tänö wamacö nowa lä tano wei, wama tä a̦ malä ji̦liläfe. Wama a wa̦ nia ca̦i malä fuaö wei. Inaja lä tä cuo dodijiobä. Ö̦jö cudeenö ei i̦yä i̦yä bänö bämacö yomösaö lä cule. Einaja bä nowa tama. ²¹ Inaja showawä, Yai Bada etä yano ma cui, i̦yä i̦yä bänö a yano yomösaö cuo mö feduoma. Nofi bäyälewä bänö täbä madofi lä fulino wejei täbä ma cui, täbä ca̦i yomösaö mö feduoma, täbä didibobeje täbä lä cui. ²² Moisesi tä a̦ oni jamö, showadi i̦yäbö a̦fa malä wäyämou wei. Täbä jödödöwä nia lä aublou wei, i̦yä i̦yä bänö täbä fa taamajenö täbä nia shi̦lo dodijidablou co̦o. Bei i̦yä bä faö mlao däjä, täbä doblou lä mlai etä nowa mladobä tä cuami waiquiwä. ²³ Yai Bada etä yano ma cui, ö̦jamö lä täbä madofi bluca lä fulii wejei täbä ma cui, täbä nofi lä shamibou wejei täbä dodijidablou co̦obä, inaja tä taamaö bufima. Fedu jamö täbä lä culadi, ö̦jö täbä nö owä cuo balöoma täbä. Ö̦jö ma cui, Yai Bada tä yano yai lä culadi jamö täbä auobä, tä nowa yai lä bluca wei tänö täbä shi̦lo yai aublou. ²⁴ Ö̦jö cudeenö, yanowamö täbänö Yai Bada etä yano lä tablaleno wejei jamö, Cristo a fanomi. Ö̦jö a yano lä cui, fedu jamö a yano yai lä culadi a nö li owä cuo balöo bädaoma. Fedu jamö, Yai Bada etä yai yano lä culadi jamö, Cristo a shi̦lo yai falayoma, Yai Bada tä lä culadi jamö bämalecö nofi yai bäyäbodayobä. ²⁵ Eja Yai Bada etä yano yai nowamaö lä dodijio wejei jamö, nofi bäyäalewä bada a shi̦lo fuu lä cuaadii weinaja mlai. Lasha ai a faö lä co̦le däjä ma cui, ai a faö lä co̦le jamö ma cui, ai a ja ma cui, i̦yäbö shi̦lo ca̦i malä fuu wei. ¿Ö̦jö tawä? Cama i̦yäbö mlai, yalo i̦yäbö ca̦i fuu. Ma, inaja Jesús a cuaanomi. Cama a nia dodoo cuaadino malä mlai. ²⁶ Einaja etä cuo fa cunoja, bita a colo jaba lä tablamolayono wei däjä a jaba shämou fa showadaonö, ai a lasha jamö, a showadi shämou fa co̦onö a cuaaö fa cunoja, ¡bejedi a nö nö bleaadii shi wa̦liblodibö wei! Ma, inaja a cuaanomi. Tä nia lä jödödöblou wei tä cublou ajedou däjä, ö̦jö däjä a shi̦lo moli bädaliyoma, Yai Bada lija a jibämoa fa läicunö, täbä doblou lä mlai tä nowa bluca mladamaö showadaobä. ²⁷ Yanowamö täbä nia lä nomaö wei, moli bä nia shi̦lo nomaö. Ö̦jö däjä Yai Bada lija bä nia icuo, bä jimamobä. ²⁸ Inaja showawä, täbä bluca doblou lä mlai etä nowa mladamabä, Cristo moli a dodomoa waiquiquema yalo, a nia bädou co̦o. A nia fuu lä co̦o wei däjä, wa̦lidiwä tä nowa mladamaö co̦obä a nia fuimi. Ma, bufi doblalolanö a nö lä dabou wejei bä lä cui, ö̦jö bä nabä nia li fuu, bä fucäabä.

¹ Moisesi tä a̦ ja, täbä a̦fa lä wayoaö wei täbä lä cui, obi täbä nia dodijidawä lä wawäblou wei, ö̦jö täbä nö owä cuo balöo showaoma. ¿Ö̦jö tawä? Yai Bada lija yalo bä ö̦shö dodoblaabeje, ai a lasha faö co̦o däjä ma cui, showadi bä yalo ca̦i shi̦lo lucäö co̦oje. Ö̦jö ma cui, tä yai lä bejedi wei etä manashi cuo fa bädaonö, täbä dodijidawä tamabou showadaobä etä cuami waiquiwä. ² Dodijidawä täbä cuo showadao fa cunoja, yalo bä nö ca̦i lucäö showaobö mlajei. Bä möfe bolanö bä nö bayeli lä nacao wei bä lä cui, täbä yai aublou showadao fa cunoja, bei täbä bufi jamö etä nö ca̦i wa̦lidiwä läo showaobö mlai. ³ Yai Bada lija bä yalo ö̦shö lä dodobodii wejei, ai a lasha faö co̦o däjä ma cui, showadi bä inaja cuaaö yalo, showadi bä bufi nö wa̦lidiwä ö̦jöböamou. ⁴ Baca bä ma cui, shibo bä ma cui, täbä doblou lä mlai, ö̦jö i̦yäbö yalonö etä nowa nö mladobimi waiquiwä. ⁵ Ö̦jö cudeenö, bita jamö Cristo a wawäblou däjä, Yai Bada lija a wa̦ fama. Abenaja a jo̦wa cuma. Bä yalo shäö lä läo wejei tä ma cui, wa lä dobäö wejei tä ma cui, ö̦jö wa tä bufijaimi waiquiwä. Wale nia lä yanowamöblamaö wei, ö̦jö wa tä shi̦lo bufii showadaoma. ⁶ Yalo bä ö̦shö lä dodobou wejei bänö wa bufi cafä doblaloimi. Wa̦lidiwä etä nowa mladobä, täbä lä dodobou wejei täbänö ca̦i mlai. ⁷ Ö̦jö däjä, abenaja camiyä ya cuma, cafä lija. “Yai Bada wa tä. Bei. Wa tä tamaö lä bufii wei ya tä taö mö fuma.” Einaja ya cuma. Afä tä a̦ oni jamö ya nia jo̦wa lä cuaano weinaja showawä. Einaja Cristo a jo̦wa cuma. ⁸ ¿Ö̦jö tawä? Cristo a lä cuno wei, ¿wama tä a̦ ji̦liaö culawä? Bä yalo shäö lä läo wejei tä ma cui, Yai Bada tä lä dobäö wejei tä ma cui, yalo bä ö̦shö lä dodobou wejei tä ma cui, Yai Bada tänö ö̦jö tä jo̦wa bufiboimi. Wa̦lidiwä etä nowa mladobä bä lä cuaaö wei tä ma cui, inaja showawä. Moisesi tä a̦ ja, bä ma nosiemamou wei ma cui, inaja a li cuma. ⁹ Ö̦jö däjä, abenaja Cristo a cuu nomöjöoma. —Bei. Wa tä tamaö lä bufii wei, ya tä taö mö fuma —a cuu nomöjöoma. ¿Ö̦jö tawä? Yai Bada tänö, tä yai lä bufii wei tä bejedi cublobä, tä a̦ läo lä balöono wei tä a̦ li joyamalema. ¹⁰ ¿Ö̦jö tawä? Yai Bada tänö tä tamaö lä bufii wei, Jesucristonö tä taö waiquioma yalo, fei däjä Yai Bada dodijidawä bäma ecö waiquiwä. Bämacö bluca bayeliblobä, ö̦jö cä lä cama moli a dodomoa showadaquema. ¹¹ Nofi bäyäalewä bä lä cui, ai tä mö jalu lä co̦le tä ma cui däjä, showadi bä lädalou. Yalo ai bä shäö fa co̦ojenö, showadi bä li dodoblaaöje. Ö̦jö ma cui, bä lä dodobou wejei tänö, yanowamö etä nö wa̦lidiwä mladobimi waiquiwä. ¹² ¿Ö̦jö tawä? Ö̦jö ma cui, täbä doblou lä mlai etä nowa jödödöwä mladou showadaobä, Cristo moli a fa dodomoicunö, Yai Bada jayu boco mashi jamö a dicäquedayoma, ¹³ a nö dao balöodayobä. Ö̦jamö a dicäo showao däjä, cama a cotä jamö, a nofi lä wa̦libou wejei bä lä cui, Yai Bada tänö bä möfe nia boblaamadayou. ¹⁴ Ö̦jö cä lä cama moli a dodomoa lä showadaqueno wei tänö, Yai Bada bäma ecö dodijidawä taamabou shi malä wa̦lii wei. ¹⁵ Yai Bada tä Bufi ma cuinö, camiyä bämacö lija tä a̦fa ca̦i wäyäö. Abenaja a cuu balöoma. ¹⁶ Bada ya wa̦no taö lä cule. Cama ebä lija, obi a wa̦ nö nia jo̦wa wäo co̦o. A wa̦ nö nia wäo lä co̦o wei däjä, abenaja a nia jo̦wa cuaaö. Bei täbä bufi jamö tä a̦ nia lämabou. Bei täbä bufi nia yai taamaö. ¹⁷ ¿Ö̦jö tawä? Abenaja a cuu nomöjöoma. Bä doblou lä mlai tä ma cui, wa̦lidiwä tä lä taö wejei tä ma cui, ö̦jö tä nofi nia jaducäboimi majöo. Einaja Yai Bada bei tä Bufi cuma. ¹⁸ ¿Ö̦jö tawä? Wa̦lidiwä tä lä taö wejei tä nowa taboimi waiquio däjä, bä yalo shäö läo co̦obeje tä cuami waiquiwä. ¹⁹ Ö̦jö cudeenö, iba wamacö. Jesús i̦yäbö dodomoa waiquiquema yalo, Yai Bada etä yano yai nowamaö lä dodijiladi jamö ma cui, bäma a bufibolanö bämacö fuu dao. ²⁰ Yai Bada tä lä cule jamö täbä ajedou mlaobä, acadafu sicö jaba läoma ma cui, Jesúsnö dude yoca caloblalema, ba̦limi bämacö yai cuobä. Yai Bada lija Jesús a dodomamobä a jibämoquema. ²¹ Yai Bada etä yano jamö bämalecö nofi nia lä bäyäbou wei, a ca̦i läa waiquiadayoa. Ö̦jö cudeenö, ²² bämacö bufi da bejedimo. Bäma a bufibolanö, Yai Bada lija bämacö icuobä. Bämacö lä cuaaö wei, bei bämacö bufi jamö tä läa mlai ja, jai mau ubänö bämacö aublamolayoma bämacö culanö, dodijidawä bämacö icuobä. ²³ Jesucristo bufilewä bämacö a̦fa lä jilou wei bämacönö, bäma a nofi yai mölabou da cadidio. A wa̦ nö lä wäono wei a wa̦ cadidou malä cui. ²⁴ Dodijidawä bämacö nia lä cuo wei tä ja, bämacö bufi ca̦i da daeo. Bämacö bufi fa lofotoamayonö, bämacö bufi bluca nofiobä. Dodijidawä tä jamö bämacö bluca cuobä. ²⁵ Bämacö nia lä yododaö wei tä jamö, ai bä bufi cadidoimi waiquiwä talei. Inaja bämacö cuaaö dicoo mlai. Ma, bämacö bufi yai lofotoamayodibä. ¿Ö̦jö tawä? Bada tänö täbä nia lä jimaö wei etä ajedou waiquiwä yalo, bämacö bufi shi̦lo yai lofotoamayou da dodijio. ²⁶ Bei bämacö bufi jamö dodijidawä bäma tä a̦ tabou ma waiquile ma cui, bämacö fe ou majöablalou dicoo ja, wa̦lidiwä bäma tä fulii mö yabaaö lä co̦le däjä, bämacö doblou lä mlai tä nowa mladobä, tä nia cuo co̦o majöomi. Ai a shämou co̦obä, a nia cuo co̦daaimi. ²⁷ Yai Bada tänö bämalecö nö nia lä bleaamaö wei tä nia shi̦lo cuo, bämacö quilibä. Cowa wacä nö lä quilijii wacä ca̦i, Yai Bada tä nö lä nabämaö wejei bä mö nia lä watäblamou wei wacä lä cui. ²⁸ ¿Ö̦jö tawä? Moisesi etä a̦ ma cui, etä a̦ fuaö lä mlajei bä shämobä bä malä cuono wei. Bolacabö cäcöbä ma cuinö, 3 bä ma cuinö, a wa̦fa wäyäö fe usucuoje ja, täbä bufi asimou mlai ja a nia nomamaö showadaomaje. ²⁹ ¿Ö̦jö tawä? Wa̦lidiwä tä fulii mö yabaaö lä co̦o wejei bä nö bleaabä bä li waiquiwä. Ö̦jö ma cui, Yai Bada bei Ijilubö a waii lä majöblao wejei bä lä cui, ö̦jö bä nö nia yai bleaaö dodijio. ¿Ö̦jö tawä? Yai Bada a wa̦ nö wäo lä co̦ono wei tä a̦ ca̦i läobä, Jesucristo a shämolayoma. I̦yäbö falayoma. Ö̦jö i̦yäbönö bä doblou lä mlai etä nowa mladamalema ma cui, inaja bä lä cuaaö wei bä lä cuinö i̦yäbö nö waiblaö majöoje. Yai Bada tänö täbä nofi ojodabobä a Bufi läa ma waiquile ma cui, a Bufi nö ca̦i waiblaöje. ³⁰ ¿Ö̦jö tawä? Yai Bada bäma a malä dale, abenaja a lä cuno wei a lä cui. Nö yualewä camiyä ya yai. Ya tä no nia co̦aö. Einaja a cuma. Abenaja etä a̦ oni ca̦i cuu. Bada tänö cama ebä nia jimaö. Einaja tä a̦ cuu. ³¹ Yai Bada tä demi cua shi lä wa̦lile tänö täbä yai fuwäablaö fa cadidionö, bä nö nia shi̦lo yai quilili bleaamaö. ³² Jesucristonö wamacö bufi lä wacacablamaleno wei däjä, wamacö dodijidawä jaba da cuoblei, tä nofi da jaducälöje. Wamacö nö bleaamaö ma dodijiono wejei ma cui, wamacö nö wa̦lojaö fe yadioma. ³³ Ai däjä, wawädowä wamacö nö waiblamaje, wamacö nö ca̦i bleaamamaje. Ai däjä, Jesucristo ebä nö lä bleaamano wejei bä lija wamacö yädäoma yalo, cafä wamacö ma cui, wamacö ca̦i taamaö yädäo mö feduo showaomaje. ³⁴ Bä fe lä labono wejei bä lä cui, wama bä nofi ca̦i malä ojodabono wei. ¿Ö̦jö tawä? Afä täbä madofi ma däablaöje däjä ma cui, wamacö bufi doblao ca̦i cuo fe yadioma. Afä ba̦limi täbä yai dodijidawä lä culadi wama täbä bufiblaö waiquioma cudeenö, dodijidawä wamacö cuo fe yadioma. ³⁵ Ö̦jö cudeenö bä nö wa̦lojaö fe da yadio, ö̦jö lä. Wamacö nö wa̦lojaö fe lä yadio wei tänö, wamacö nia malä dobämodayou wei. ³⁶ Wamacö nö wa̦lojabä tä waiquiwä. Yai Bada tänö tä tamaö lä bufii wei wama tä taö fa cadidionö, tä a̦fa lä wäqueno wei wama tä yai däadayobä. ³⁷ Yai Bada etä a̦ oni jamö, abenaja tä a̦ cuu. Tä nö fa dedejedalunö, a nia lä fuu wei, a nö daablalou co̦a mlai ja, a nia fuu showadao. ³⁸ Iba bä lä cuinö, wale nofi mölabouje yalo bä demi nia cuo. Ö̦jö ma cui, bä bufi mö yabablou co̦o dicoo ja, wale bufi nia doblamaboimije. Einaja tä a̦ cuu. ³⁹ Ö̦jö ma cui, camiyä bämacö lä cui, bämacö bufi mö yabablou co̦obä bämacö malä mlai. ¿Ö̦jö tawä? Bämacö mö watäblamobä bämacömi. Ma, bäma a nofi yai mölabou. Ö̦jö lija bämacö lä nowamöo wei bämacö, bämacö dodijidawä cudio fe yadiobä.

¹ Yai Bada a wa̦ nofi bejedi lä mölabou wejei bä lä cuinö, täbä a̦fa lä wäaö wei täbä bufibou cadidioje. Täbä dablaimi showawä ma cujei, täbä nofi yai tabou cadidilajenö bä cuo. ² Bämacö nö badabö lä cuinö, Yai Bada a wa̦ nofi mölabou fa cadidiojenö, a bufi malä doblamabono wejei. ³ Yai Bada bäma a wa̦ nofi mölabou yalo, bämacö bufi jaducäwä. Yai Bada a wa̦nö, jödödöwä tä lä tablamolayono wei bäma tä daö. Bäma täbä lä möö wei täbä lä cui, tä dablamou lä mlai tä ja täbä li tablamolayoma täbä. ⁴ Abele a lä cuinö, Yai Bada a wa̦ nofi mölaboma yalo, dodijidawä etä dodoboma. Bä a̦iyobö Cainonö täbä dodobou lä cuono weinaja mlai. Ö̦jö cudeenö, Abele lija Yai Bada a dobämamou bufi doblaoma. A wa̦fa dodijidawä wäyäma. ¿Ö̦jö tawä? Abele a nomamalema ma cui, Yai Bada a wa̦ nofi lä mölabono wei tä lä cui, fei däjä ma cui tä a̦ ji̦limamou showawä. ⁵ Enocö a lä cuinö, Yai Bada a wa̦ nofi mölabou waiquioma yalo, demi a co̦lefälöma, a nomaö mlaobä. A fa co̦läfälönö, a dablamou co̦daanomi. A co̦aö showao mlao däjä, Yai Bada a bufi lä doblamabono wei, tä a̦fa wäyämou showaoma. ⁶ ¿Ö̦jö tawä? Yanowamö täbä lä cuinö a wa̦ nofi mölabou mlaoje däjä, Yai Bada a bufi doblamabobeje etä cuami waiquiwä. Yai Bada lija bä nia lä ajedou wei bä lä cui, “Yai Bada a cua lä”, bä bufi cuu mlao däjä, bä nia ajedou malä mlai. “Ya nö bayeli nacao ja, wale dobäö weicätä”, bä bufi cuu mlao däjä, bä nia ajedou buomi. ⁷ Noewä a lä cuinö, Yai Bada a wa̦ nofi mölaboma yalo, a wa̦ li fulema. Tä nia lä cublono wei tä ja Yai Bada tänö a yömölaa fa balölönö, canawä a tablalema, cama ebä nofi ca̦i yashuobä. Yai Bada a nosie fuaö lä ayaono wei tänö, ai täbä lä bälöblai bä dobloimi jimamoma. Ö̦jö cudeenö, Yai Badanö bä nö bluca blemalalema. ¿Ö̦jö tawä? Noewänö a wa̦ nofi mölaboma cudeenö, Yai Bada tänö jai a cadejewä waiquiwä a nofi tabou showaoma. ⁸ Ablaamö a lä cuinö, Yai Bada a wa̦ nofi mölaboma yalo a wa̦ fulema. ¿Ö̦jö tawä? Ablaamö lija Yai Bada tänö etä ulufi nia fa jibäanö, a nacalefälöma. A fa nacaläfälönö, bei yo daö balöa ma mlai ma cui, a aa showadalayofälöma. ⁹ A wa̦ nofi mölaboma yalo, tä a̦fa ulufi lä wäqueno wei jamö a bälöblaquefälöma, shomi bä wayumö bälöblao lä culenaja showawä. Bä ijilubö Isaacö e ma cui, ö̦jö bä ijilubö Jacobo e mö feduwä ma cui, ö̦jamö bä yanomou mlai ja, yalo sibä ja bä shi̦lo wejedou cuaafälöma. Yai Bada tänö tä a̦fa lä wäqueno wei, Isaacö a ma cui lija, Jacobo a ma cui lija tä a̦fa ca̦i wäyämamou mö malä feduono wei. ¹⁰ Ablaamö a lä cuinö, Yai Bada tänö a shabono lä tablaladi a malä bufibono wei, a colo lä lofotoboladi a lä cui. ¹¹ Sara a lä cuinö, Yai Bada a wa̦ nofi mölaboma yalo, a lofotomaboma. A suwäbada ma waiquiono wei ma cui, a nia shibönaböö fe lä yadiono wei tä ja, a nö wa̦lojomaboma. Bä ijilubö e a̦fa lä wäqueno wei a wa̦ bufiblalema yalo, e cublaliyoma. ¹² Inaja tä fa cublalunö, Ablaamö a wa̦lobada ma waiquiono wei ma cui, bä ijilubö e taa fe fa yadicönö ebä nodiwä blucablaliyoma. Fedu jamö shidicali bä nö wabamobimi lä culenaja bä bluca cublou mö feduoma, modu u casö jamö mlaca mlaca bä nö ca̦i wabamobimi lä culenaja showawä. ¹³ Yai Bada a wa̦ nofi mölabou showalajenö, ö̦jö bä bufi bluca mlao cuaama. Yai Bada tänö tä a̦fa ulufi lä wäqueno wei tä wawädowä möno ma mlajei, tä nia jo̦wa lä cublono wei a wa̦ bejedi bufibou showao fe yadiomaje. A wa̦ bejedi bufibomaje yalo, bä bufi doblaloma. Bita jamö bä nia cudio lä mlai, cama bä a̦fa wawädowä wäyämoma. Bä a̦fa shomi jilamoma. ¹⁴ ¿Ö̦jö tawä? Inaja bä lä cuno wei bä a̦ ji̦limamou walalaoma. Bä nia yai lä cudiodayou wei tä a̦fa ulufi malä wäyäno wejei. ¹⁵ Cama etä ulufi lä daquefälöno wejei etä ulufi bufibou showao fa cunoje ja, ö̦jamö bä mö nö yabaaö co̦ofälöbö wei. ¹⁶ Ma, tä ulufi yai lä dodijidai tä bufibomaje, fedu jamö tä ulufi lä culadi. Ö̦jö cudeenö, Yai Bada tänö wawädowä cama ebä a̦fa jilabou. Dodijidawä bä nia fa bälömabonö, bä shabonobö tabou malä waiquiladi. ¹⁷ Ablaamö a lä wabamono wei däjä, Yai Bada a wa̦ nofi mölaboma yalo, bä ijilubö Isaacö a ma cui, a nia lä shämono wei jamö a maquebou waiquioma. ¿Ö̦jö tawä? Yai Bada tänö, Ablaamö lija Isaacö a wa̦fa wäa ma balöblaqueno wei ma cui, ö̦jö a shämobä a maquea majöa dicoquema, bä ijilubö moli a lä cui. ¹⁸ Yai Bada tänö a wa̦fa wäyäö ja, abenaja a cuma. Afä ya bä a̦fa nodiwä bluca lä wäyäno wei, ijilufä Isaacö lija bä nia bluca nodiblou. Einaja a cuma. ¹⁹ Einaja a cuu waiquioma yalo, Ablaamö a mölaö showao fe yadioma. “Täbä ma nomablou wei ma cui, Yai Bada tänö täbä demi jocädamaö daö”, a bufi cuu lofotooma. Jai a nomaö waiquiwä, Ablaamönö a nofi tabou ma waiquiono wei ma cui, a demi tabou fe yadioma. ²⁰ Isaacö a lä cuinö, Yai Bada a wa̦ nofi mölaboma yalo, bä ijilubö ecöbä a̦fa bayeliblamou wäyäma. Jacobo, Esau cäcöbä nia obi lä bayeliblamou wei tä a̦fa wäyäö balöoma. ²¹ Jacobo a nomaö ajedeo däjä, Yai Bada a wa̦ nofi mölaboma yalo, José bä ijilubö ecöbä a̦fa bayeliblamou wäa nomöjöquema. Dee anö a baijilanö, a möfe fa boalunö, Yai Bada a wa̦fa doblao tama. ²² José a lä cuinö, Yai Bada a wa̦ nofi mölaboma yalo, a bufi mlao lä ajedeono wei däjä, cama ebä nowa talefälöma. Isaeli ebä lä cuinö, Ejido tä ulufi nia lä daafälöno wejei tä a̦ wäyäö fa balöonö, cama a nia lä nomaö wei däjä a nia lä taamamou wei, a wa̦fa ca̦i wäyämou showaoma. Ubä co̦amamou bufioma, Canaana tä ulifi jamö bä ya̦cumö fublou däjä, ubä ca̦i fufälöbeje. ²³ Moisesi bä fö̦önö, Yai Bada a wa̦ nofi ca̦i mölaboma, bä nöö e ma cuinö, inaja showawä. A nofi mölaboböma yalo, Ejidoteli bada a wa̦ nö quili tabönomi. Isaeli ebä ijilubö nia ma shämaö wei ma cui, Moisesi a oshe liyäjäwä fa dabölalönö a jo̦yaboböö showao däjä, belibo 3 ebä lublamabölema. ²⁴ Ejidoteli bada a lä cui bä tää enö, Moisesi a nofi jaba oshe ma ijiluano wei ma cui, a lä badalayono wei däjä, ö̦jö e a̦fa jilobä, etä waia majölema. ²⁵ Wa̦lidiwä talewä bä sho, a bufi jole dobladobä etä ma cuono wei ma cui, Yai Bada ebä nö lä bleaamano wejei bä lija a co̦caobä etä shi̦lo yaia majölema. ²⁶ Ejidoteli bä nö yai madofiböoma ma cui, cama etäbä ca̦i bluca wailema. Yai Bada tänö a shimabä a lä yaileno wei a bufibou waiquioma yalo, a nö bleaabä etä ma cuono wei ma cui, ö̦jö tä jamö a bufi mö shi̦lo yai blucaoma. A nia lä dobämodayou wei tä malä bufibono wei. ²⁷ Yai Bada a wa̦ nofi mölaboma yalo, Ejidoteli bada a nö quili taö mlai ja, tä ulufi daaquefälöma. Yai Bada a dablamou ma mlai ma cui, jai a daa waiquilalema a nofi tabolanö, a nö wa̦lojaö fe yadioma. ²⁸ Yai Bada a wa̦ nofi mölaboma yalo, Yai Bada a nia waiteli lä jayuano wei däjä, bä nowamöo fe yadiobä, i̦yä i̦yä bänö bei yocabä ya̦blaö bufima. Yai Bada a̦jele etä Waicalewä lä cuinö, bä ijilubö jaba bä lä cublai bä shäö mlaobä, bä li inaja cuaama. ¿Ö̦jö tawä? Yai Bada a nia waiteli lä jayuaö wei, a nofi ca̦i co̦camoaö malä showaodaono wejei. ²⁹ Isaeli ebä nodiwä lä cuinö, Yai Bada a wa̦ nofi mölabomaje yalo, modu Wacä u bada jamö ma cui, jai wejediwä tä cuwä jamö bä bucadubaliyoma. Ö̦jö ma cui Ejidoteli bä lä cui, inaja cama bä nia bucaduo cuo ma juono wei ma cui, bä mishi bluca duobaliyoma. ³⁰ Yai Bada a wa̦ nofi mölabomaje yalo, Jelicoteli bä shabonobö sibo jamö bä shoqueblaaö cuaaö showao däjä, 7 tä mö didi fa tablamalöjenö, Jelicoteli bä alabö na blälälaliyoma. ³¹ Laaba a lä cuinö, showadi a suwä lä dodoono wei a lä cuinö, Yai Bada a wa̦ nofi ca̦i mölabou mö feduoma. A wa̦ nofi mölaboma yalo, bä ja̦amodou lä mlai bä mö bluca watäblaöje däjä, cama a demi feiblamalemaje. Tä ulufi lä bomaböno wei cäcöbä lä cui, cäcöbä dodijidawä walomaquema yalo a nowamamaje. ³² Ai ya bä a̦fa jayumaö ma dao wei ma cui, ya tä a̦ labamaö bufiomi. Jedeoni a ca̦i malä cule, Balaco a ca̦i, Sasono a ca̦i, Jedei a ca̦i, David a ca̦i, Samuel a ca̦i, Yai Bada a wa̦no wäyälewä bä ca̦i bluca. ³³ Ö̦jö bä lä cuinö, Yai Bada a wa̦ nofi bluca mölabomaje. ¿Ö̦jö tawä? A wa̦ nofi mölabomaje yalo, ai bä lä cuinö, täbä bälöjöwä lä yaiblai bä bälöo yanöcömabou fe yadiomaje. Ai bä mö feduwä lä cui bä a̦ lofotoaö fa ayaonö, dodijidawä tä jamö täbä tamabou fe yadiomaje. Ai bä lä cui lija, Yai Bada tänö tä a̦fa lä wäqueno wei etä bejedi cublaliyoma. Ai bä lä cuinö, öla bä caficö fuwädamaje. ³⁴ Ai bä mö feduwä lä cuinö, cowa wacä bada lublamamaje. Ai bä showawä lä cui, sibala bänö bä mili ma shäö wejei ma cui, bä docua fe yadilayoma. Ai bä lä cui bä ujuduo ma waiquiono wei ma cui, bä lofotoblou co̦layoma. Ai bä mö feduwä lä cui, bä ishobä jamö bä nö yai wa̦lojaö dodijioma. Ai bä showawä lä cuinö, shomi bä lä bälöblai bä wayu yashublalemaje. ³⁵ Ai bä suwä lä cuinö, Yai Bada a wa̦ nofi mölabomaje yalo cama ebä nomöa lä bono wejei ebä demi jocädou co̦oma. ¿Ö̦jö tawä? Ai bä mö feduwä lä cuinö, Yai Bada tä a̦ nia fa joyamajenö, bä nö ninili ma bleaamano wejei ma cui, tä a̦ daanomije. Bä bufi bejedio waiquioma yalo, bä fujeblabeje etä ma cuono wei ma cui, “Ma, ya tä a̦ nö joyabimi”, bä cuma. ¿Ö̦jö tawä? Bä nia lä doblaodayou wei tä bufibou waiquiomaje yalo, bä nö bleaamamou ojodaoma. ³⁶ Ai bä lä cui bä nö waiblamaje. Bä si ca̦i yafelimamaje. Boo shibä badanö ai bä ca̦i o̦cabomaje. Bä fe ca̦i labomaje. ³⁷ Ai bä lä cui, maa mabänö bä ca̦i shäyämaje. Ai bä fe ca̦i jafedimamaje. Sibala bänö ai bä ca̦i duyämaje. ¿Ö̦jö tawä? Ai bä lä cui bä nö fo̦lili bleaablaloma. Täbä lä didio wei sibä ja bä didio mlai ja, oweja sibä shi̦lo läbou bädaomaje, shibo sibä ca̦i. Bä nö ninili ca̦i bleaablaloma. Bä nö ca̦i blemabomaje. ³⁸ Yanowamö täbänö bä nofi tabono ma mlajei ma cui, ö̦jö bä shi̦lo yai dodijidaoma. Tä ulufi bloque jamö ma cui, bei macö jamö ma cui bä bälöblalou cuaama. Maa maca bä jamö ma cui, täcabä lä cublai jamö ma cui bä li cublaloma. ³⁹ Ö̦jö bä bluca lä cuinö, Yai Bada a nofi mölabou cadidiomaje. Yai Bada cama a ma cuinö, bä dama. Ö̦jö ma cui, tä a̦fa lä wäyäno wei tä ja bä dobämou showaa mlai ja, bä nomalaliyoma. ⁴⁰ Yai Bada tänö dodijidawä bämalecö nia bluca lä tamabou wei tä daö waiquioma yalo, bä dobäö showadaonomi. Camiyä bämacö lä nodiblole bämacö mlai ja, cama bä doblamabou balöo ayao mlaobä.

¹ Ö̦jö bä jaba lä cuono wei bä lä cuinö, Yai Bada a wa̦ nofi lä mölabou wejei tä wawädowä damalalemaje. ¿Ö̦jö tawä? Jai bämalecö fe fa̦yobouje bä cuwä waiquiwä yalo, bämacö ca̦i dodijaö mö da feduo, ö̦jö lä. Bämacö lä yabäcamou wei bäma tä da joya. Wa̦lidiwä bäma tä fujeblaö si ijejewä lä mlai tä ca̦i. Ö̦jö däjä Yai Bada tänö bämalecö taamaö lä bufii weinaja, bämacö cuaaö cadidou fe da yadio. ² Jesús lija bämacö bufi mö shi̦lo yai da cudio, bämalecö lä lulubou wei a lä cui lija. Bämacö mölaö showaobä bämalecö bufi lofotomabou. Fii balitama tefi ja a nö bleaabä etä ma cuono wei ma cui, a bufi nia doblao ca̦i cuo lä majöono wei tä bufiboma yalo, a ojodao fe yadioma. Jai wa̦lidiwä talewä a nia mömou ma cuono wei ma cui, a bufi quilinomi. Inaja a cuaaö fe yadioma yalo, fei däjä Yai Bada jayu boco mashi jamö a dicäadayoa. ³ Wa̦lidiwä talewä bänö a nofi wa̦libomaje yalo, inaja a taamamaje. Ö̦jö ma cui a bufi nö wa̦lojoablalou fe yadio showaoma. Ö̦jö lija bä bufi da daeo, cama a lä taamamono weinaja wamacö ca̦i taamamou mö feduo ja, wamacö modablou mlai ja, wamacö bufi lofote ca̦i cuo fe yadiobä. ⁴ Wa̦lidiwä talewä bänö wamacö ma yabäcaöje däjä ma cui, wamacö shäö showadao malä mlajei. ⁵ Yai Bada tänö bä ijilubö bäma ecö nowa lä taö wei, ¿wama tä a̦ nofi mojodubou tawä? Bämacö ma yabäcamou wei, bämalecö bufi lofotoamaö fe yadiobä, abenaja tä a̦ cuu. U̦asi. Bada tä lä culadinö wa lä cadidamaö wei tä ja, a bufi da jaducälö. Wa nö bleaamaö ja, a bufi ca̦i ujudua dijä. ⁶ Tabä yai nofimaö cudeenö, Bada tänö täbä cadidamaö malä cui. Täbä nofi bluca lä ijilumaö wei bä cadidamabä, bä malä taamaö wei. Einaja tä a̦ cuu. ⁷ Wamacö nö bleaaö däjä, “Yai Bada tänö wale cadidamabä ya nö li bleaaö”, bä bufi yai da cu. Yai Bada tänö wamacö nofi ijilumaö yalo, wamacö malä taamaö wei. Bä fö̦ö ebä lija, showadi bä ijilubö ebä shi̦lo cadidamamou malä cui. ⁸ Yai Bada tänö bä ijilubö ebä cadidamaö lä cuaaö weinaja wamacö taamaimi ja, bä ijilubö wama ecömi waiquiwä. Jole jole wama a nofi fö̦ömaö bädaa lä cule. ⁹ Eja bämacö lä fö̦ömole bä lä cuinö bämalecö cadidamaöje ja, bäma bä nö quili talanö bäma bä a̦ fuaö malä cui. Bei bämacö bufinö bäma a nofi yai lä Fö̦ömale a lä cui, ö̦jö bäma a wa̦ shi̦lo yai fuabä a, bämacö demi cuobä. ¹⁰ Yanowamö bäma bä nofi lä fö̦ömaö wei bänö bämalecö cadidamaöje ja, cama bä cuaaö bufi lä doblao weinaja bämalecö nia wanonowä taamaö balöoje. Ö̦jö ma cui Yai Bada a lä cuinö, dodijidawä bämacö cudiobä bämalecö yai cadidamaö. Cama a lä culenaja bäma ecö yai dodijidawä cuo mö feduobä. ¹¹ Yai Bada tänö bämalecö cadidamaö däjä, bämacö bufi doblalou mlai ja bämacö bufi nö yai bleaaö balöo. Ö̦jö ma cui bämalecö lä taamaö wei tänö, bämacö bufi yai jaducäblou ja, bämacö bufi yanöcölanö bämacö nia shi̦lo yai dodijaö majöo. ¹² Ö̦jö cudeenö, jai ujudi bä cublou dijä. Bä shi̦lo yai ublaa da lofotoablalo. ¹³ Yai Bada lija wamacö nia lä cadidofälöö wei tä ja bä bufi yai da shalilo, wamacö doblou lä mlai wamacö wa̦lidiblou fe balojoo mlai ja, wamacö yai dodijidablou co̦obä. ¹⁴ Bufi yanöcöwä wama bä ca̦i cuo fe yadiobä bä nö shi̦lo da wa̦loja. Yai Bada dodijidawä wama ecö yaiobä bä cuo fe da yadio. ¿Ö̦jö tawä? Inaja bä cuaaö lä mlai bänö Bada tä nia möimi waiquiweje. ¹⁵ Bä da moyaweicu, ö̦jö lä, cafä ai wamacö lä cui, Yai Bada tänö wamacö nofi ojodabobä wamacö waiquiwä ma cui, wamacö bufi mö yabablou co̦o mlaobä. Inaja ai wamacö cuaaö coyocoo dicoo ja, wamacö bluca yabäcamou cuquei. Cowamilimi cosinö möjödadilimi cocobä fuamaö lä culenaja, inaja wamacö cublou dicolo. ¹⁶ ¿Ö̦jö tawä? Bä da moyaweicu, ai wamacö nofi jushuaö ja̦too mlaobä. Nö badabö Esau a lä cuinö, Yai Bada a nofi tabono lä mlainaja wamacö ca̦i cuaaö dicoo mlaobä. Bä ijilubö jaba e cuoma yalo, bä fö̦ö lija a yai bayeliblamobä a ma cuono wei ma cui, moli a lä iyalayono wei tänö etä nomöjöquema, bä fääshä e lija. ¹⁷ Wama tä a̦ malä dale. Tä nö fa dedejedalunö, bä fö̦ö lija a bayeliblamou ma bufiono wei ma cui, a waimoa majölayoma. A ma ö̦cöno wei ma cui, a wa̦ nö wäo waiquioma yalo, a wa̦ shominajaaö majöobä etä cuonomi. ¹⁸ ¿Ö̦jö tawä? Cafä wamacö lä cui, Sinai cäcö jamö wamacö ajedobä wamacö waloyolunomi, cäcö yai lä dablamou wei cäcö lä cui jamö. Fei däjä cowa wacä bada ömöo nö quiliaimi. Tä mö didi ca̦i sublaomi. Wadoli a nö ca̦i bada quiliaimi. ¹⁹ Tä madofi lä jolamou wei tä a̦ ca̦i ji̦liomi. A wa̦ nö bada ji̦liamou lä quiliano wei, a wa̦ ca̦i fei däjä ji̦liamoimi. Ö̦jö a wa̦ nö jaba fa quilianö, a wa̦ lä ji̦lileno wejei bä lä cui bä yömölamou quilii fe balojooma. Moisesi lija a wa̦ faö wasömaje, ²⁰ ö̦jö lija bä nö nosiemamobimi waiquiwä cudeenö. ¿Ö̦jö tawä? Yalo a bädawä ma cuinö, Sinai cäcö colo jubaö bädao ja, maa mabänö a shäyämaö bufima, a nomaö showadaobä. ²¹ ¿Ö̦jö tawä? Bejedi tä mömou nö quiliama. Moisesi a ma cui, cama a wa̦fa ca̦i quilili blösö blösomou wäyämoma. ²² Ma, Sinai cäcö jamö mlai, Siono cäcö jamö wamacö yai waloa waiquiqueyoluma. Yai Bada tä demi cuo shi lä wa̦lile e shabono jamö wamacö cua, Jelusale tä shabono dude yai lä culadi jamö, a̦jele bluca fe balojowä bä bufi doblalou ca̦i lä co̦camoladi jamö. ²³ ¿Ö̦jö tawä? Yai Bada bä ijilubö ebä lä co̦camoladi jamö wamacö co̦caa, fedu jamö bä a̦fa bluca lä oniboladi bä lä cui lija. Bä ijilubö jaba bä nofi dobou lä culajeinaja, cama ebä nofi bluca tabou. Yai Bada tä lä culadi jamö wamacö yai cua lä cule, täbä jimaö lä cadidio wei a lä cui lija. Cama ebä jaba lä cuono wei ma cui, ö̦jö bä ca̦i co̦caa. Bä lä bälöono wei däjä, dodijidawä bä li cuoma yalo, fei däjä doblao bä tamabou lä culadi, bei bä bufi lä cui. ²⁴ Jesús a lä culadi jamö wamacö cua, dude tä a̦ ca̦i lä läle a lä cui lija, cama i̦yäbö lä yomösamodayono wei jamö. Abele i̦yäbö nö yuamou lä bufiono weinaja mlai, camiyä bämalecö nofi nia lä ojodabou wei i̦yäbö a̦fa shi̦lo wäyämamou. ²⁵ Bada tä lä culadi a wa̦fa lä ji̦liole däjä, bä yömöcacö comao dijä. Bita jamö bä wasöö lä balöono wei däjä, a wa̦ ji̦liano lä mlajei bä nö bleaamaö malä balöono wei. Fei däjä fedu jamö culanö bämalecö yai lä wasöladi däjä, bäma a wa̦ ji̦liablaimi ja, bei bämalecö nö bleaamaö yaiquei. ²⁶ Sinai cäcö jamö a wa̦ lä fano wei däjä, bei a wa̦ lofotenö tä ulufi ma qui̦da qui̦damomano wei ma cui, fei däjä a wa̦ nö wäo co̦o ja, abenaja a cuu. Inaja ya nia cuaaö lä co̦o wei däjä, ulufi ya nia qui̦da qui̦damomaö buomi. Judu mösö ma cui, inaja showawä ya mösö nia qui̦da qui̦damomaö cuo. Einaja a cuu. ²⁷ ¿Wama a wa̦ ji̦liaö cule? Ulufi a jaba lä qui̦da qui̦damomano weinaja a nia jo̦wa cuaaö co̦o. Täbä bluca lä tablaleno wei täbä qui̦da qui̦damomaö fa co̦onö, täbä nia jo̦wa joyaö. Ö̦jö däjä täbä joyamou dao lä mlai tä nia shi̦lo feiblou. ²⁸ ¿Ö̦jö tawä? Tä ulufi joyamou dao lä mlai tä ja bämalecö nia dobäö cudeenö, bämacö bufi doblalou ca̦i da cuo. Camiyä bämacö lija a bufi doblalou ca̦i cuodayobä, bäma ecö yai da bejedimo. Bäma a nö quili talanö, bäma ecö nö bayeli da nacao. ²⁹ A nö quili tamobä a malä cui, cowa wacä lä ömöo wei wacä nö quili tamou lä culenaja showawä, täbä mö bluca lä watäblaö wei wacä lä cui.

¹ Jesucristo wama ecö nofimayou lä cuaaö weinaja, inaja showawä bä shi̦lo yai da cuaa. ² Shomi täbä yafia bädalayou ja, täbä shi̦lo bälömabou bufi da doblaoje. Ai bänö shomi täbä bälömabou bufi fa doblaojenö, a̦jele täbä tabou malä ja̦toono wejei. ¿Ö̦jö tawä? ³ Bä fe lä labolajei bä lä cui, bä nofi da jaducäboje. Cafä wamacö fe labou fa cunoje ja, wamacö nö bayeliblamou cuo lä bufiobö weinaja, inaja showawä, bä nofi yai da taboje. Bä nö lä bleaamaö wejei bä lä cui, ö̦jö bä nofi da ojodaboje. Cama bä ujudi lä culenaja wamacö cuwä mö feduwä malä cui. ⁴ Bä fe̦yalobö wama ecö lä cuinö, suwäböfä bä nofi da taboje. Bä suwäbö wama ecö mö feduwänö, inaja showawä, fe̦yalofä wama bä nofi ca̦i tabou mö feduobä. Wamacö joleblalolanö wamacö nö waiblayou mlai. Bä nofi lä jushublalou wei bä ma cui, bä ca̦i lä joleblalou wei bä ma cui, Yai Bada tänö ö̦jö bä nö nia bleaamaö malä cui. ⁵ Blada bä ma cui, madofi bä ma cui, ö̦jö bä nofi yaibo dijejä. Wama täbä tabou lä waiquile täbä ja, bä bufi shi̦lo yai cuo shalilio da showadao. Abenaja Yai Bada a malä cuu wei. Obi ma cui bämacö nia daaimi. Bämacö nia ca̦i joyaö majöomi. Einaja Yai Bada a malä cuu wei. ⁶ Bamalecö nia joyaimi waiquiwä yalo, Yai Bada etä a̦ oni jamö tä a̦ lä cuolenaja, camiyä bämacö ma cui bämacö ca̦i cuu dao. Wale lä bayelibou wei a lä cui, ö̦jö Bada tä waiquiwä. Ya quilibä tä cuami. ¿Wedi tabä yanowamö täbä bädawä ma cui ya bä nö quili taö bashiquei? Einaja bämacö cuu dao. ⁷ Cafä Jesucristo wama ecö lija bä jaba bada lä läono wei bä lä cui, ö̦jö bä lija bä bufi da daeo, Yai Bada etä a̦ ja wamacö jaba lä yömölano wejei bä lä cui bä lija. Bä dodijidawä cuo fe lä yadiono wei tä ja, wamacö bufi fa daeonö, bä da owäboje. Yai Bada a nofi mölabou cuo fe lä yadiono wejeinaja, wama a nofi mölabou cuo mö feduo nomöjöobä. ⁸ Jesucristo a bufi nia shomiblou majöomi. Jaba däjä a cuo lä balöono weinaja, fei däjä ma cui a cuwä showawä. Obi ma cui, inaja showawä a nia cuo shi wa̦lii. ⁹ Shomi tä a̦ ma wäyämou wei ma cui, shomitawä tä a̦ ca̦i ma waloo wejei ma cui, ö̦jö bä a̦ ja bä bufi luluamo dijä. Judio bänö nii bä a̦fa showadi ma wayoaö wejei ma cui, nii bänö täbä bufi bayeliblamoimi. Cama bä ma cui bä bufi bayeliblamou malä mlai. Yai Bada tänö wamacö nofi lä ojodabou wei tä a̦nö, wamacö bufi nia shi̦lo yai lofote cuo. ¹⁰ ¿Ö̦jö tawä? Camiyä bämacö bayeliblamobä a lä dodomoqueno wei a lä cui, bäma a daö. Yai Bada etä yano jamö, nofi bäyäalewä bä judio ojodamou ma buo wei ma cui, camiyä Jesucristo bufilewä bämacö lija bä yädäobä bämi. ¹¹ Abenaja judio bä cuaaö. Nofi bäyälewä bada a lä cuinö, Yai Bada etä yano yai nowamaö lä dodijio wejei jamö, yalo i̦yäbö ca̦i lucäö, täbä doblou lä mlai etä nowa mladamabä. Inaja a cuaaö fa balöonö, bä yalo lä shäö wejei bä lä cui, täbä lä bälöle tä sibo jamö bä yalo ö̦shömaö nomöjöoje. ¿Ö̦jö tawä? ¹² Inaja showawä, täbä lä bälöle tä sibo jamö, Jesús a ca̦i shämoa culayoma, cama i̦yäbö showawänö bäma ecö yaiobä. ¹³ Ö̦jö cudeenö, cama lija bämacö yaua fa showadaicunö, Jesús a nö ca̦i yamili bleaamaö siboo lä cuono wejeinaja, inaja bämacö taamamou ojodao cuo mö feduobä. ¹⁴ Eja bämacö nia lä cudalou wei bämacö shabonobö cua malä mlai. Ma, tä shabono nia obi lä wawäblou wei, ö̦jö bäma tä nö shabono yai dabou. ¹⁵ Jesúsnö camiyä bämalecö nofi bäyäbobä a läa waiquiadayoa yalo, Yai Bada bäma a shi̦lo yai da dobä. ¿Ö̦jö tawä? Wedi tä ja mlai. Ö̦jö lija bämacö bufi a̦fa doblalou lä wäyämou wei, jai bäma a dobäö tä nofi tabodayoa. Bufi doblalolanö bäma a nofi Badabou da wawädoo. ¹⁶ Wamacö dodijabä tä cua waiquia ja, ai wama bä nia lä dobäö wei tä cua waiquia ja, bä mojimo dijä. Ai bäma bä bayeliblaö däjä, jai cama Yai Bada bäma a dobäö cadidio, tä nofi tabodayoa. Ö̦jö lä tänö bäma a bufi shi̦lo yai doblamabou. ¹⁷ Cafä Jesucristo bufilewä wamacö lija bä bada lä läo wei bä lä cui, dodijidawä bä a̦ da fuaje. Wamacö bufi ca̦i dodijidawä tamabobeje bä malä läo wei. Yai Bada tänö bä lämabou yalo, ö̦jönö bä a̦ nö nia wäamaö. Bufi doblalolanö bä ojodamobä, bä bufi wa̦lidiwä ca̦i bälömabo dijejä. Wama bä bufi wa̦lidiamaö dicoo ja, wamacö nia bayeliblamou malä mlai. ¹⁸ Yai Bada lija yamalecö nö bayeli shi̦lo da nacaje. Shominaja yamacö cuaaö malä mlai. Bei yamacö bufi jamö yama tä lämabou mlai ja, showadi yamacö dodijaö bufi malä doblao wei. ¹⁹ ¿Ö̦jö tawä? Wamale bayelimaö da dodijio, cafä wamacö lijamö Yai Bada tänö wale shimaö co̦obä. ²⁰ Bei. Yai Bada tänö bämalecö bufi lä yanöcömabou wei a lä cui lija wamacö yai bayeliblamobä, ö̦jö lä, Bada tä Jesús a demi jocädamaö lä co̦layono wei a lä cui lija. Ö̦jö oweja bäma ecö lä cui, bämalecö yai nia lä nowamaö wei, ö̦jö a Bada. Cama i̦yäbönö bämalecö nia nowamaö shi lä wa̦lii wei tä a̦ ca̦i läa, Yai Bada tä a̦ nö wäo ja a lä cuno weinaja showawä. ²¹ Dodijidawä tä bluca lä cui ja wamacö bayeliblamobä, bämacö nö bayeli nacaö, tä tamaö lä bufii wei wama tä yai tabä. Yai Bada wama a bufi doblamabobä, cama a showawänö wamacö nia cadidimabou, Jesucristo wama ecö yalo. Ö̦jö bäma a nofi doablaö shi wa̦libä a waiquiwä. Inaja lä tä cuobä. ²² Iba wamacö. Wamacö moyawäobä, ei jolodowä ya tä a̦ oni shimaö lä cule. Dodijidawä wamale a̦ nia ji̦liaö, ¿ö̦jö tawä? ²³ Timoteo a fujeblaö co̦layou lä cufajei. Ö̦jö lä wama tä dabä ya wa̦. Eja a waloo jaödaoyoluu ja, ö̦jö sho bämacö fe nia walou. ²⁴ Jesucristo bufilewä wamacö ca̦i lä culajei bä bada lija, wamalecö a̦fa da wäyäje. Cama Yai Bada ebä bluca lija ca̦i. Italiateli bä Jesucristo bufilewä lä cui, cafä wamacö lija bä a̦fa ca̦i wäyämamou bufi doblaa lä cule. ²⁵ Bei. Yai Bada lija wamacö shi̦lo bayeliblamobä, wamacö nofi bluca ojodabobä.