Galatas

Galatas

¹ Jesucristonö wale lä shimöleno wei, ei camiyä Pablo cä ya. Yanowamö täbänö mlai, Jesucristonö wale shi̦lo yai shimöa cadidilema. Yai Bada bäma a nofi lä Fö̦ömale tä ca̦inö, ö̦jö a demi jocädamaö lä co̦layono wei a lä cuinö. ² Jesucristo ai ya ebä ca̦i bluca lä cule, Calasia jamö ö̦jö wama ecö lä yododaö wei wamacö lija bä a̦fa ca̦i wäamamou bufi doblaa lä cule. ³ Bei. Fayä Yai Bada lija wamacö shi̦lo bayeliblamobä, Bada tä Jesucristo lija ca̦i. Wamacö bufi shi̦lo yanöcömaboböbä. Wamacö nofi ca̦i shi̦lo ojodaboböbä. ⁴ Bämacö doblou lä mlai tä nowa ja, Jesucristo a shämou läobä a noshi ö̦jödaoma. Yanowamö täbä bluca lä bälöblai bä nö bleaabä jamö, bämacö nö bleaaö mö feduo mlaobä. Fayä Yai Badanö, inaja tä tamaö bufi doblaoma. ⁵ Ö̦jö bäma a nofi shi̦lo doblao dobou shi wa̦libä. Inaja lä tä cuobä. ⁶ Yai Bada lija lobe wamacö mö fuludou fa dicoonö, ¡shädayai! wamale bufi taamaö dodijia lä cule. Ö̦jö a lä cuinö, no mlai ja wamacö nofi ojodabobä wamacö ma nacano wei ma cui, shomi wama tä a̦ jo̦wa ji̦liaö majöblaa dicoa, tä a̦fa jole dodijidawä lä taö wejei tä a̦. ⁷ Täbä nia lä bayeliblamou wei, ai tä a̦ dodijidawä cua ma mlai ma cui, wamacö lä yabäcaö wejei bä läblawä, Cristo dodijidawä etä a̦ shominajablamaö bufi lä doblao wejei bä lä cui. ⁸ Cafä wamacö lija dodijidawä yama tä a̦ wäyäö waiquioma. Shomi tä a̦ lämaö majöo dicooje ja, ¡Yai Bada lija bä waimamobä cäbä waiquiwä! ¿Ö̦jö tawä? Camiyä yamacö ma cui, a̦jele a lä culadi a ma cui, inaja yamacö cuaaö dicoo ja yamacö waimamobä lä yamacö waiquiwä. ⁹ Yamacö cuu da balöobleinaja ya cuu co̦a lä cule. Wama tä a̦ dodijidawä da fuablei tä a̦ jamö, ai a bädawä ma cuinö, shomi tä a̦ lämaö majöo dicoo ja, Yai Bada lija a waimobä lä a waiquiwä. ¹⁰ ¿Yanowamö ya täbä bufi doblamabobä ya wa̦ daanö? Ma. Yai Bada ya bufi nia yai fa doblamabonö ya wa̦. Yanowamö ya täbä bufi nia doblamabou bashio fa cunoja, Cristo ya nosie fuabä, ya e nö cuobö mlai. ¹¹ Iba wamacö. Wamacö bufi jaducäblobä ya wa̦. Ya tä a̦ dodijidawä da wäyäblei, yanowamö täbä lija ö̦jö tä a̦ cuonomi. ¹² Yanowamö täbä lija ya tä a̦ däano malä mlai. Yanowamö täbä lija ya ca̦i damamonomi. Jesucristo a showawä lä cuinö camiyä lija tä a̦ yai wawämalema. ¹³ ¿Ö̦jö tawä? Judio ya mö feduwä cudeenö, Moisesi ya etä a̦ fuaö bufi doblaoma. Ö̦jö tä a̦ ja ya jole cadidou bufi ca̦i fa doblaonö, Yai Bada ebä lä yododoblai ya ebä nö bleaamaö balöoma. Wamale a̦fa ji̦libou waiquile cätä. Ya bä mö watäblaö showadaobä, ¡bejedi ya waitelimoma! ¹⁴ Camiyä ya bada lä culenaja bä cuwä mö lä fedui ai bä bluca lä cuinö, Moisesi etä a̦ ca̦i fuaö mö ma feduono wejei ma cui, camiyä ya fe yai dolejeo dodijio balöoma. Judio bämacö nö badabö jaba lä cuno wei ya tä a̦ joyamaö nofi fa jalubonö, camiyä bejedi lä ya wa̦ shi̦lo lämodima. ¹⁵ - ¹⁶ Ö̦jö ma cui, ya oshe cublou showao mlao däjä, Yai Bada tänö wale yaibou showaoma. Wale nofi fa ojodabonö wale nacalema. Judio bä lä mlai bä lija ya e a̦fa wäyäö cuaabä, camiyä lija bä Ijilubö Jesús e wawäblamaö bufi doblaoma. ¿Ö̦jö tawä? Bä Ijilubö e fa wawämaliyonö, yanowamö täbä lija ya shimamobä ya icuonomi. ¹⁷ Ma. Jelusale jamö ma cui ya ca̦i funomi, Jesucristo ebä bada lä läle jamö. Jesucristonö camiyä wale shimaö showao mlao däjä, ö̦jö bä shimöa ma balöleno wei ma cui, ö̦jö ya bä wa̦linomi. Ö̦jamö lä ya fuu balöa mlai ja, Alabia jamö ya aa cadidia showalayofälöma. Ö̦jamö lä ya cuoma Damaco jamö ya co̦blou co̦layoma. ¹⁸ Camiyä lija Jesucristo a wawäa waiquilayono wei ja, lasha 3 a cuo däjä, Jelusale jamö ya̦cumö ya alayoma, Pedro ya möbä. Ö̦jö lijamö ya cua showalanö, 15 ya fe didi cublaliyoma. ¹⁹ Jesucristonö bä lä shimöleno bä lä cui, ö̦jö ya bä dablanomi. Bada tä Jesús bä fä̦äshä Santiago e lä cui, ö̦jö ya e shi̦lo moli dalalema. ²⁰ ¿Ö̦jö tawä? Ei ya tä a̦ lä oniblale, ya wa̦ bejedi. Yai Bada tänö wale malä dale. ²¹ ¿Ö̦jö tawä? Jelusale jamö ya fuu fa balöonö, Silia tä ulufi jamö ya fuu nomöjöoma, Silisia tä ulufi jamö ca̦i. ²² Judea jamö Cristo ebä lä yododoblai bä lä cuinö wale dablaö mlajei ja, bä mojodi li cuo showaoma. ²³ Wale a̦fa shi̦lo ji̦libou buomaje. Abenaja bä jo̦wa cuma. “Jesucristo yama a bufibou tä nowa ja yamalecö nö jaba da bleaamablei a lä cuinö, fei däjä Jesucristo tä a̦ ja täbä jo̦wa yömölaö majöa lä cule. Tä a̦ joyamaö ma bufino wei ma cui, fei däjä tä a̦ yai li wäyäö majöo”, bei bä jo̦wa cuma. ²⁴ ¿Ö̦jö tawä? Ya lä cuaano wei tä a̦ fa ji̦liläjenö, Yai Bada tä nofi yai doablamaje.

¹ Ö̦jö däjä, lasha 14 ya faa fa majömalönö, Jelusale jamö ya aa co̦layofälöma. Benabei sho yafäcö alayoma. Tito a ma cui, ö̦jö ya ca̦i nocamaboma. ² ¿Ö̦jö tawä? Ö̦jamö Yai Bada tänö wale fumaö bufi doblao cudeenö, a wa̦ wawälayoma. A wa̦ wawälayoma yalo, ya alayoma. Ö̦jamö ya culanö Jesucristo ebä bada lä läono wei bä sho, yamacö yododoblaliyoma. Judio bä lä mlai bä lija, showadi ya tä a̦ dodijidawä wäyäö lä cuaaö wei ya tä a̦ wawämalema. ¿Ö̦jö tawä? “Awei. ¡Inaja lä wa cubä lä!”, ya bä bufi nia fa tadamanö ya bä yömölama. Jesucristo ya etä a̦ jaba lä wäyäno wei tä ma cui ja, ya ojodamou lä showale tä ma cui ja, wale nö a̦fa bleaaö taö mlaobeje. ³ ¿Ö̦jö tawä? Jelusale jamö Tito ya nocamaboma. Judio a cuo fa mlaonö, mosi sicö joyamono ma mlai, a nofi tabou fe yadiomaje. Mosi sicö joyamobä, bä a̦ fe yadiblonomi. ⁴ Ai bä a̦ wabäo buoma ma cui. Ö̦jö bä a̦ lä wabäono wei bä lä cui, Jesucristo ebä lija bä jole fa yädäblalunö bä faa ja̦tomalalemaje, judio tä a̦ ja bämalecö nia cadidoimi fa möjenö. ¿Ö̦jö tawä? Jesucristo lija bämacö yädäa waiquia yalo, judio tä a̦ ja bämacö fujeblamoa ma waiquilayono wei ma cui, tä a̦ nia lämaö co̦o fe yadiomaje. Ö̦jö tä a̦ ja bämacö nosiemamou ja, bämacö nö bleaaö lä buono weinaja bämalecö nia taamaö co̦omaje. ⁵ Ö̦jö ma cui ö̦jö yama bä a̦ ji̦lianomi waiquiwä, cafä wamacö lija yama tä a̦ da wäyäblei tä a̦ shomiblou majöo mlaobä. Ö̦jö lä tä a̦ bejedi waiquiwä. ⁶ ¿Ö̦jö tawä? Jelusale jamö bä bada lä läle bänö wale a̦ fa ji̦liläjenö, ai tä a̦ ca̦i lämaö majöonomije. Ö̦jö bä lä cui bä a̦fa bada jilabouje. Cuwi. Bä bada fa cui. Yai Bada a lä cuinö, fe usucuwä täbä nofi bluca malä tabou wei. Inaja showawä, camiyänö ya bä nofi ca̦i tabou. ⁷ Ma, wale wasöö mlajei ja, Yai Bada tänö wale lä shimöleno wei tä nö yai ö̦jöbölemaje. Pedro lija judio bä nabä shimöa lä taqueno weinaja, inaja showawä camiyä lija, judio bä lä mlai bä nabä shimöa taa mö fedubema, ö̦jö bä lija Jesucristo dodijidawä ya etä a̦ wäyäö cuaaö mö feduobä. ⁸ Judio bä lä cui bä yömölabä, Yai Bada tänö Pedro a nö lä wa̦lojomabou weinaja, camiyä wale nö wa̦lojomabou mö malä fedui, judio bä lä mlai ya bä yömölaö mö feduobä. ⁹ ¿Ö̦jö tawä? Santiago, Pedro, Juan bä lä cuinö, bä a̦fa yai bada lä jilabono wejei bänö, Yai Bada tänö wale lä bayeliblaö wei tä nö ö̦jöbölemaje. Ö̦jö däjä, —Awei, tä dodijidawä waiquiwä —wawädowä Benabei sho yafälecö nowa talemaje. Judio bä lä mlai yafä bä yömölabä wawädowä yafälecö shimölemaje. Cama bä mö feduwänö judio bä yömölaö mö feduobeje. ¹⁰ Abenaja bä shi̦lo cuma. —Bä fo̦li nö lä bleaaö wei, bä yai shi̦lo da bayeliblaje —bä cuma. Camiyä ya ma cui, inaja ya cuaaö bufi ca̦i doblao mö feduo showaoma. ¹¹ Ö̦jö ma cui, Adioquiateli bä lijamö Pedro a fa waloicunö, judio bä lä mlai bä lijamö bejedi lä ya nowa taö dodijioma. A shominajaaö fa dicoonö wawädowä ya nowa talalema. ¹² Abenaja tä cuoma. Judio bä lä mlai bä Jesucristo bufilewä iyabä jamö, Pedro dodijidawä a nö jaba liyoma. Ö̦jö Adioquiateli bä lä cui, judio bä cuono ma mlai ma cui bä nofi shamibonomi. Dodijidawä bä ca̦i iyama. Ö̦jö ma cui Santiagonö judio bä lä shimöleno wei bä lä cui, bä co̦blou fa dalalönö, a wa̦fa tamou quililayoma. Ö̦jö bä lä cuinö täbä mosi sicö joyamou lä mlai täbä nofi shamibouje yalo, Pedro a quilia fa majölalunö, a jole waiblalou majöoma. ¹³ ¿Ö̦jö tawä? Pedro a quilili cuaaö fa dicoonö, judio ai bä ma cui Pedro lija bä lulumoa dicolayoma. Benabei a ma cui, a ca̦i lulumoa dicolayoma. ¹⁴ ¿Ö̦jö tawä? Jesucristo tä a̦ dodijidawä lä cui tä a̦ yai ma bejedio däjä ma cui, tä a̦ nofi cadidibonomije. Ö̦jö ya tä fa dalalönö, bä yömöca bluca dao däjä abenaja wawädowä Pedro ya nowa tama. —Ei Adioquiateli bä lä cui, judio bä ma mlai ma cui, ¿wedi tä tabä judio bä yai lä cuaaö weinaja, wa bä li taamaö bashiquei? A da bejedimo. Cafä judio wa ma cui, judio bä yai lä cuaaö weinaja wa cuaaö malä mlai —ya nowa tama. ¹⁵ ¿Ö̦jö tawä, judio wamacö? Camiyä judio bämacö oshe cuo showadaoma. Judio bä lä mlai bä a̦fa wa̦lidiwä talewä lä jilabolajei, ö̦jö bämacömi. ¹⁶ Camiyä judio bämacö yai ma cui, ei bäma tä daö. Jai bä dodijidawä waiquiwä, Yai Bada tänö bä nofi lä tabou wei bä lä cui, Jesucristo a nofi li mölabouje yalo bä nofi li tamamou. Moisesi tä a̦ ja bä fa cadidonö mlai. Camiyä judio bämacö ma cuinö, Jesucristo bäma a ca̦i bejedi malä bufibou wei. ¿Ya jolemou daanö? Moisesi tä a̦ ja bämacö lä cadidou wei tänö mlai, Cristo bäma a nofi yai mölabou yalo, jai bämacö dodijidawä waiquiwä bämalecö nofi li tabou. ¿Ö̦jö tawä? Yai Bada lija a nofi nia dodijidawä lä tamamou wei, Moisesi tä a̦ ja moli ma cui a cadidou malä mlai. ¹⁷ Yai Bada lija bämacö dodijidawä dablamobä, Cristo bäma a nofi yai mölabou. Ö̦jö bäma a nofi mölabou yalo, judio bänö bämalecö a̦fa dobloimi taöje. Ö̦jö ma cui, ¡ma! Bämacö nia doblou lä mlai jamö Cristonö bämalecö lulubobä a malä mlai. ¹⁸ Ö̦jö ma cui, judio ya tä a̦ joyaa ma waiquileno wei ma cui, ya tä a̦ däaö co̦o dicoo ja ya nia yai dobloimi. ¹⁹ Moisesi etä a̦ ja ya nö cadidobimi waiquiwä yalo, ya nomawä blaa damoa malä bälaliyono wei. Ö̦jö däjä ya nia cadidou fe lä yadiono wei tä ja, ya mölaö mladou showadalayoma, Yai Bada lija ya yai luluamou majöobä. ²⁰ ¿Ö̦jö tawä? Fii balitama tefi jamö Cristo a lä shäleno wejei däjä, camiyä ya ca̦i shämoa yädäa showalayoma. Fei däjä ya demi lä cule, Cristonö wale ca̦i demi cua. Camiyä ya bufi lä cuaablalou weinaja ya cuaaimi. ¿Ö̦jö tawä? Eja ya demi cua lä showale, Yai Bada bei Ijilubö ya e nofi mölabolanö ya e cua lä cule. Wale fa nofilänö, wale bayeliblabä cama a jibämoquema. ²¹ Yai Bada tänö bämalecö nofi lä ojodabou wei ya tä waii mlaicätä. Ö̦jö tänö, Yai Bada lija bämacö shi̦lo yai dodijidawä dablamou. Moisesi tä a̦ ja täbä bayeliblamou dao waiquio fa cunoja, Cristo a nö nomaö buobö mlai.

¹ Shädayai, Calasiateli wamacö. ¿Wedi jamö täbä a̦ ja wamacö mölaö fa majöblaonö, bei wamacö bufi jaducäwämi majöwä? Fii balitama tefi jamö Jesucristo a shämou lä läono wei, wawädowä ya wa̦fa mada wäyäblei. Wama tä a̦ ji̦lia walalalema. ² Bämacö wa̦lii ojode. Cafä wamacö lija Yai Bada tä Bufi lä lucälayono wei tä lä cui, ¿wedi tä nowa ja bei a Bufi li lucälayoma? Moisesi etä a̦ ja wamacö cadidou yalo, ¿a Bufi li lucälayoma daanö? Mlaicätä. Jesucristo wama tä a̦ nofi mölaboma yalo a Bufi li lucälayoma. ³ ¿Wamacö bufi nö jaducäblobö lä mlai wamacö waiquiwä daanö? Yai Bada bei tä Bufinö wamacö jaba ma bayeliblamono wei ma cui, fei däjä cafä wamacö nö nia lä wa̦lojaö wei tänö, ¿bei wamacö nia bayeliblamou majöo? ⁴ Jesucristo wama a bejedi bufibou nofi jushuaö yalo, judio bänö wamacö nö jaba bleaamaö balöomaje. Wamacö nö ma bleaamaöje däjä, quilii mlai ja wama a bufibou fe yadioma. Inaja wamacö cuaaö ma waiquiono wei ma cui, ¿fei däjä wamacö bufi nia li shomiblou majöo? Inaja wamacö cuaaö majöobä wamacömi. ⁵ Cafä wamacö lija Yai Bada a Bufi lucälayoma. Tä nö lä quilijii, cafä wamacö lija tä ca̦i bluca wawämaö, ¿ö̦jö tawä? ¿Wedi tä nowa ja inaja bei wamacö li taamaö? Moisesi etä a̦ ja wamacö cadidou yalo, ¿tä nö lä quilijii bei tä wawämaö daanö? Mlaicätä. Jesucristo wama tä a̦ nofi mölabou yalo tä li wawämaö. ⁶ Bä bufi da daeo. Yai Bada etä a̦ oni jamö Ablaamö a wa̦fa wayoamou. Wama tä a̦ daö. Yai Bada a wa̦ fa ji̦limolunö, Ablaamönö a wa̦ bejedi bufiblaö showadalayoma. Cama Yai Bada a wa̦ bufiblamou fa damolalunö, jai a cadejewä waiquiwä Ablaamö bei a nofi tadaö showalayoma. ⁷ ¿Ö̦jö tawä? Yai Bada tä a̦ nofi lä mölabou wejei bä lä cui, ö̦jö Ablaamö nodiwä bei ebä yai. ⁸ Yedu jamö ma cui, Ablaamö lija tä a̦ dodijidawä wäyämamou showao balöoma. ¿Ö̦jö tawä? Judio bä lä mlai bänö Yai Bada tä a̦ nofi mölabouje ja, jai bä dodijaö waiquiwä bä nofi nia tabou showaoma. Abenaja tä a̦ oni cuu malä balöono wei. Cafä bä bayelibou fa balöonö, bluca bä bälöjöwä lä yaiblai, afä a nodiwä lija bä nia bayeliblamou nomöjöo. Einaja tä a̦ cuu. ⁹ ¿Ö̦jö tawä? Ablaamönö Yai Bada a nofi mölaboma yalo, a bayeliblamoma. Inaja showawä, Yai Bada a nofi lä mölabou wejei bä bluca lä cui, ö̦jö bä ca̦i nia bayeliblamou mö feduo. ¹⁰ Ai bä mö feduwä lä cui, “Dodijidawä ya cuobä Moisesi tä a̦ ja ya cadidou weicätä”, bä bufi lä cuu wei bä bluca lä cui, bä waimobä bä li waiquiwä. Abenaja tä a̦ malä cuu wei. Moisesi tä a̦ jödödöwä lä cui, tä a̦ nofi showadi cadidibou lä mlajei bä lä cui, Yai Bada lija bä waimobä bä waiquiwä. Einaja tä a̦ malä cuu wei. ¹¹ Tä malä wawädole. Moisesi etä a̦ ja täbä cadidoimi waiquiwä, Yai Bada lija bä dodijidawä dablamobä. Moli ma cui a dodijidawä dablamoimi waiquiwä. Abenaja tä a̦ malä cuu wei. A nofi mölabouje yalo, jai bä dodijaö waiquiwä Yai Bada tänö bä nofi lä tabou wei bä lä cui, ö̦jö bä nia ba̦limiblou ayao. Einaja tä a̦ cuu. ¹² ¿Ö̦jö tawä? Moisesi etä a̦ nofi mölabobeje etä a̦ cuonomi. Ma. Tä a̦ nofi mölabobeje mlai, tä a̦ shi̦lo yai fuabeje tä a̦ lämaquema. Abenaja tä a̦ malä cuu wei. Moisesi etä a̦ nofi bluca lä cadidibou wejei bä lä cui, ö̦jö bä nia shi̦lo ba̦limi cuo. Einaja tä a̦ cuu. ¹³ Moisesi etä a̦ ja bämacö nö cadidobimi waiquiwä yalo, bämacö waimolayoma. Ö̦jö ma cui bämacö bayeliblamou fe yadiobä, Cristonö bämalecö nowa co̦maquema. Bämacö nö lä beblalole jamö a shämoa fa lälönö, cama a waimoa yaclälayoma. Abenaja tä a̦ oni malä cuu wei. Fii balitama tefi jamö bä lä basuo wei, bä bluca waimobä bä li waiquiwä. Einaja tä a̦ oni malä cuu wei. ¹⁴ ¿Ö̦jö tawä? Judio bä lä mlai, Jesucristo lija bä bayeliblamou mö feduobä bä nowa comaquema. Ablaamö a bayeliblamou lä culayono weinaja bä bayeliblamou cuo mö feduobä. Jesucristo bäma a nofi fa mölabonö, Yai Bada tä Bufi a̦fa lä wäyämono wei bäma tä Bufi däabä. ¹⁵ Judio bämacö showadi lä cuaaö wei tä lä cui, ya tä a̦fa nia wäyäö ja̦loo, wamale a̦ ji̦liaö walalaobä. ¿Ö̦jö tawä? Yanowamö a lä cui a wa̦fa wäamou cadidio waiquio däjä, ai bänö a wa̦fa nia shomiblamaö majöomije. ¹⁶ ¿Ö̦jö tawä? Inaja showawä, Ablaamö lija Yai Bada tänö tä a̦fa jaba lä wäqueno wei tä a̦ lä cui, tä a̦ shomiblamaö majöobeje tä a̦mi. Ablaamö lija a wa̦ nö wäo däjä, a wa̦fa bayeliblaö wäquema. Ablaamö nodiwä a ma cui, a nia ca̦i jo̦wa bayeliblamou nodio mö feduoma. Ablaamö nodiwä bluca bä a̦fa wayoaö mlai, moli a wa̦fa nodiwä yai wayoama, Cristo a lä cui. Ö̦jö a wa̦fa shi̦lo yai tama. ¹⁷ Abenaja ya cuu. Yedu ja, Ablaamö lija Yai Bada tä a̦ nö wäo balöoma. ¿Ö̦jö tawä? Lasha 430 a fa falönö, Moisesinö tä a̦ ca̦i läobä, ö̦jö etä a̦ jibäa nomöjöquema. Ö̦jö ma cui, tä a̦ läa lä nomöjömaqueno wei tä a̦ lä cuinö, Ablaamö lija tä a̦ nö wäo lä balöono wei tä a̦ wa̦lianomi. Yai Bada tä a̦ nö wäo malä waiquiono wei. ¹⁸ ¿Ö̦jö tawä? Yai Bada lija wamacö lä bayeliblamole wamacö lä cui, ¿wedi tä ja bei wamacö li bayeliblamou, ö̦jö lä? Moisesi etä a̦ ja wamacö lä cadidou wei tänö mlai. Ma. Cama Yai Bada tä a̦ nö wäa waiquiquema yalo wamacö malä bayeliblamole. Inaja showawä, Ablaamö lija Yai Bada tä a̦ nö wäo waiquioma cudeenö, a li bayeliblaö balölayoma. ¹⁹ “Ja̦o. Moisesi etä a̦ ja, täbä nia bayelibloimi waiquiwä ja lä, ¿wedi tabä tä a̦ li wäa bäquema, ö̦jö lä?”, ai bä nia cuu ja̦too fa cui. Wedi tabä mlai. Ablaamö nodiwä a wawäblou jaöo mlao däjä, wa̦lidiwä tä lä taö wejei täbä nia ja̦amabou fa balöonö tä a̦ li lämaboma. ¿Ö̦jö tawä? Ablaamö lija Yai Bada a wa̦ nö wäo däjä, a wa̦fa nodiwä bayeliblamou wäyäö balöoma. Tä nö dedea fa nomöjölönö, Moisesi lija a̦jele bänö Yai Bada a wa̦no wäyäö nomöjöomaje, ö̦jö a lä cuinö tä a̦ wäyäö fe dolemobä. ²⁰ ¿Ö̦jö tawä? Yanowamö täbä lija täbä wa̦no li wäyämou ma cui, inaja Yai Bada a cuaanomi. Ma, Ablaamö lija a wa̦fa wäamou shalilou showadaoma. ²¹ ¿Abenaja ai wamacö bufi cuu tawä? “Yai Bada tänö Ablaamö a wa̦fa bayeliblamou wäyaö ma waiquiono wei ma cui, Moisesi lija ai tä a̦ läamaö majöo ja, a wa̦ li shomiblou majöa dicolayoma.” ¿Einaja ai wamacö bufi cuu tawä? Ma. Moisesi tä a̦ ja bämacö ba̦limiblobä tä a̦ cuonomi. Tä a̦ cuo fa cunoja, ö̦jö tä a̦nö jai bämacö dodijidawä waiquiwä, Yai Bada tänö bämalecö nofi nö tabou showadaobö wei. ²² Ö̦jö ma cui, inaja Yai Bada etä a̦ oni cuimi. Bluca bämacö ma cui, wa̦lidiwä tä ja bämacö nö fujeblobimi waiquiwä yalo, bämacö jo̦wa dobloimi. Ö̦jö cudeenö, Jesucristo a bejedi lä bufibou wejei bä lä cui lija, Yai Bada tä a̦fa Bufi wäyämou showaoma, bä bayeliblamou fe yadiobä. ²³ ¿Ö̦jö tawä? Jesucristo a wawäblou showaa mlai ja, Moisesi etä a̦ jamö judio yamacö li ja̦adalou balöoma. Ö̦jö tä a̦nö yamalecö ja̦amaboma. Inaja yamacö cuo showao däjä, Cristo a ya̦cumö wawäblaliyoma, ö̦jö yama a nofi yai mölabolanö, Yai Bada lija yamacö yai dodijidawä dablamobä. ²⁴ ¿Ö̦jö tawä? Cristo a wawäö showao mlao däjä, Moisesi etä a̦ läo balöoma, ö̦jö tä a̦ ja yamacö bufi jaducäblobä. Cristo a fa wawälönö yama a nofi mölabou showadaobä. Yama a nofi mölabou yalo, jai yamacö dodijidawä waiquiwä, Yai Bada tänö yamalecö nofi tabobä. ²⁵ Fei däjä Cristo yama a nofi mölabou waiquiwä yalo, tä a̦ lädio showaobä tä cuami. ²⁶ Jesucristo lija wamacö lä yädäle wamacönö, ö̦jö wama a nofi mölabou yalo, Yai Bada bei ijilubö wama ecö li bluca cublou malä majölayono wei. ²⁷ Cristo lija wamacö yädäo jimamobä, wamacö fe bluca baoblamolayoma. Wamacö fe lä baoblamolayono wei wamacö lä cui, ilo dude sibä ja täbä didio lä cuo weinaja, Cristo lija wamacö didia majöaliyoma. Ö̦jö a lä culenaja wamacö cublou mö feduobä. ²⁸ ¿Ö̦jö tawä? Jesucristo lija täbä moliblou. Judio bä ma cui, judio bä lä mlai bä ma cui, bä nosie fuamobä bä lä tabou wejei bä ma cui, bä tabou lä mlajei bä ma cui, wa̦lo bä ma cui, suwä bä ma cui, Jesucristo lija, moli bä bluca cublou. ²⁹ Cristo wama ecö waiquiwä ja lä, Ablaamö ö̦jö wama ecö ca̦i nodiwä waiquiwä. Yai Bada tänö Ablaamö a wa̦fa bayeliblamou wäyäö lä balöono weinaja, wamacö ca̦i bayeliblamou cuo nodiobä.

¹ ¿Ö̦jö tawä? Abenaja ya cuu. Ijilu a lä cuinö, bä fö̦ö madofi ebä ma blucao däjä ma cui, a bufi jaducäwämi showawä cudeenö bä fö̦ö etäbä nia fulii jaöomi. Ö̦jö etäbä ja, a nia obi lä läo wei a waiquiwä ma cui, a nia läo jaöomi. Bä ijilubö e yai ma cui, a nosie fuamobä bä tabou lä bädao wejeinaja e nia cuo balöo. ² A ca̦i lä culajei bänö a bufi nia jaducäblamaö balöoje. Ö̦jö bä lija a nia damamou balöo. Bä fö̦ö e lä cuu weinaja a nia taamaö balöoje. “Ijiluyä einaja a bufi ca̦i jaducäwä cublou däjä, iba täbä ja a nia lämou nomöjöo”, bä fö̦ö e lä cuu weinaja, inaja showawä a nia taamaöje. ³ ¿Ö̦jö tawä? Camiyä bämacö ma cui, bämacö bufi jaducäo showao mlao däjä, inaja showawä bämacö cuaaö balöoma. Täbä nosie fuamobä bä lä tabou wejei bä lä cui bä nosiemamou lä culenaja, nö badabö tä a̦ ja bämacö nosiemamou balöoma, fecula bä lija ca̦i. ⁴ Ö̦jö ma cui, Yai Bada tänö bä Ijilubö e shimabä tä yai lä cublaliyono wei däjä, suwä a lija a fa tablamolunö, a yanowamöblaleyoluma. Judio bä lija a cublaliyoma yalo, Moisesi etä a̦ ja a nosiemamobä a li cuo mö feduoma. ⁵ Moisesi etä a̦ ja bämacö nosiemamou mö lä feduo wei bämalecö nowa co̦amabä a waloquema. Yai Bada bä ijilubö wawädowä bäma ecö yai cublobä. ⁶ Cafä sho ö̦jö bä ijilubö bäma ecö bluca waiquiwä yalo, bä Ijilubö e Bufi shimöledayoma, camiyä bämacö bufi jamö a bälöobä. Bäma a Bufi tabou yalo, “Fabe, Fabemi”, bämacö cuu. ⁷ ¿Ö̦jö tawä? Yai Bada tänö wamacö bayelibou yalo, fei däjä wamacö nofi yai ijilumaö. Bä a̦ fuamobä täbä tabou lä buo wejeinaja mlai. Bä ijilubö wama ecö cadidiwä waiquiwä yalo, cama etäbä ja wamacö dobämobä, wama ecö li waiquiwä. ⁸ Jaba däjä, Yai Bada wama a daö showao mlao däjä, fecula bä lija wamacö nosiemamou balöoma, täbä bufiblamobä täbä lä mlai täbä lija. Wamacö nö beblalou buoma. ⁹ Ö̦jö ma cui fei däjä Yai Bada wama a daö. Ma, camanö cafä wamacö li yai daö. ¿Ö̦jö tawä? Ö̦jö wama a daö ma waiquile ma cui, ¿fecula wama bä nia bufijaö co̦o daanö? Ö̦jö bä ujudi. Ö̦jö bänö täbä bayeliblamoimi. Ö̦jö bä lija wamacö jaba nosiemamou nö ma bleaano wei ma cui, ¿wamacö nia jibäamou mö yabao co̦o dicoo daanö? ¹⁰ Abenaja wamacö jo̦wa cuaaö, wamacö nia fa bayeliblamonö. Judio showadi täbä shi̦lo iyaö ca̦i lä co̦camoblaaö wei, cafä wamacö ma cuinö, ö̦jö wama täbä nofi jalu cai̦ tabou mö feduo dicoo. Belibo ai a faö lä co̦o wei a ma cui, ö̦jö wama a nofi jo̦wa ca̦i jaducäbou cuaaö mö fedua. Lasha a lä faö wei ma cui, wama bä ca̦i jo̦wa wabaö, cama bä lä cuaaö weinaja showawä. ¹¹ ¡Uo! Cafä bämacö yömölaö cadidiobä ya nö ma wa̦lojoablalono wei ma cui, ¡shädayai! ¡Ya nö nofi bleaablalou buo yaiyono wei!, wamale bufi tamaö majöa lä cule. ¹² Iba wamacö. Cafä wamacö lija ya wa̦ fe blacäjou. Camiyä wamale da owälä. Moisesi ya etä a̦ bufiblaö mladaliyoma. Cafä judio wamacö lä mlai wamacönö, wama tä a̦ nofi tabono lä mlainaja ya mada cublalui. ¿Wedinaja wamale nofi yai tabou cule? Jaba däjä wamale daö ma mlai ma cui, dodijidawä wamale ca̦i cuoma, ¹³ Jesucristo dodijidawä tä a̦ ja bämacö jaba da yömölablei däjä. Ya nö jalili beblaloma yalo, cafä wamacö lija ya co̦blaliyoma. Wamale daö. ¹⁴ Wamale jalili bayeliblaö ja, wamacö nö bleaablaloma ma cui wamale nö waiblanomi. Ma, wamale nofi wa̦libou mlai ja, Yai Bada a̦jele wama etä dodijidawä bälömabou nö lä cuobö weinaja, inaja showawä camiyä lija wamacö ca̦i cuaama. Jesucristo wama a nofi nö lä tabobö weinaja showawä. ¹⁵ ¿Ö̦jö tawä? Wamale bayeliblaö bufi mada doblaoblei. ¿Wedinaja wamacö bufi li cuu majöa cule? Bejedi lä wamacö dodijama. Cafä wamacö mamocu fa jocäblamolunö, camiyä lija wamacö mamocu nö didia majöquebö wei wamacö cuoma. ¹⁶ Fei däjä, bejedi tä a̦ ja bämacö yömölaö shalilio tä nowa ja, ¿wamale nofi nia wa̦libou majöo dicoblao daanö? ¹⁷ Moisesi tä a̦ lämaö bufi lä doblao wejei bänö, bluca wamacö dayäaö ma cujei, ö̦jö bä lija wamacö bufi nia bayeliblamoimi. Camiyä lija wamacö bufi cuo mlaobä wamacö taamaö bufi doblao buoje, cama bä a̦ shi̦lo yai ji̦liamou ayaobä. ¹⁸ ¿Ö̦jö tawä? Wamacö bufi nia yai bayeliblaö fa cunojeja, camiyä ya cua mlai ja ma cui, “Awei, ö̦jö wama bä a̦ shi̦lo yai ji̦liabä”, ya nö cubö wei. ¹⁹ U̦asimi cäbä. Ijilu bä ninibouje ja, bä nofi fo̦limamolanö bä tablaö shi jalimou lä cuaaö wejeinaja, inaja showawä Cristo wama ecö cublobä ya shi ca̦i jalimou cuoma. Fei däjä ma cui, Cristo lija wamacö bufi yai jaducäblobä, bufi yanöcöa mlai ja, shi jalimolanö bämacö yai taamaö bufi doblaa showaa lä cule. ²⁰ Shädayai. Cafä wamacö lija ya yai cuo fa cunoja ya wa̦ nö cadidiablalobö wei. Wamale bufi malä wedinajamomale. ²¹ Moisesi etä a̦ ja, wamacö nosiemamou bufi lä doblale wamacö lä cui, ¿wama tä a̦ daö dodijia da culanö? ²² Ablaamö bä ijilubö 2 ecöbä cuoma. Yai Bada etä a̦ oni jamö, cäcöbä a̦fa wayoamou. Ai a lä cui, cäcöbä nosie fuamobä a lä cui lija a taquema, Acala a wa̦fa lä cuono wei a lija. Bä ijilubö ai e mö feduwä lä cui, Sara e li cuo mö feduoma. Ö̦jö Sara a lä cui, Ablaamö a wa̦ fuamobä a bädawä mlai, bä suwäbö e yai li cuoma. ²³ ¿Ö̦jö tawä? A nosie fuamobä a suwä lä tabono wei sho cäcöbä fa cuaanö, bä ijilubö e tablamolayoma, showadi ijilu bä lä taaö wejeinaja showawä. Ö̦jö ma cui, bä suwäbö e yai lija a lä cuono wei a lä cui, Yai Bada tänö ö̦jö a wa̦fa li wäaö balöoma yalo, a li cublaliyoma. A wa̦fa wäaö mlao fa cunoja, a nö cublobö lä mlai a cuoma. ²⁴ Ei cäcöbä suwä lä cui, cäcöbä a̦fa wayoamou ja̦loobä cäcöbä li. Yai Bada a wa̦ nö wäo lä bolacaono wei cäcöbä a̦ lä culenaja, inaja cäcöbä suwä cuwä mö feduwä. Ablaamö lija a wa̦ nö wäo fa balöonö, Moisesi lija a wa̦ nö wäo majöoma, Sinai cäcö jamö. Ö̦jö tä a̦ lä culenaja, Acala a li cuwä. Ablaamö, bä suwäbö e sho cäcöbä nosie fuamobä a taboböma. Cama a ma cui, cama bä ijilubö ebä ma cui, bä fujeblamobä etä cuonomi. Inaja showawä, Moisesi etä a̦ ja täbä lä nosiemamou wei bä lä cui, bä nö ca̦i fujeblamobimi mö feduwä. ²⁵ ¿Ö̦jö tawä? Alabia tä ulufi jamö, Sinai cäcö bada lä ublale, cäcö ca̦i owäbou balöoma, Acalanö. Jelusale tä shabono lä blale, tä ca̦i owäbou mö feduo showaoma. Jelusaleteli bä cua lä nodile, Moisesi tä a̦ oni ja bä nosiemamou ja, bä nö bleaaö showao malä cui. ²⁶ Ö̦jö ma cui fedu jamö, Jelusale tä shabono dude blaa lä culadi. Ö̦jö a shabono lä cui, Saranö ö̦jö tä shi̦lo yai owäbou balöoma. A nosiemamou ja, a nö bleaaö buobä a cuonomi. ¿Ö̦jö tawä? Camiyä bämacö lä cui, Sara lija bämacö li nöömou. ²⁷ Abenaja tä a̦ oni malä cuu wei. Wa shibönabödalou fa mlacunö, wa ijilubö cua lä mlai, a bufi yai da doblalo. Ijilu wa nini tabou lä mlai, a wa̦ shi dou fe da yadio. Bä fe̦yalobö e lä tabou wei a lä cui, ö̦jö a ijilubö bluca ma jilale ma cui, a shi̦loco nö lä beblalou wei a lä cui, ö̦jö bei a ijilubö shi̦lo yai blucablou yailayou. Einaja tä a̦ cuu. ²⁸ ¿Ö̦jö tawä, iba wamacö? Sara bä ijilubö Isaacö e lä cui, ö̦jö wama e li owäbobä wamacö. Yai Bada tänö a wa̦fa li wäquema yalo, a li cublaliyoma. Inaja showawä, cafä wamacö ma cui wamacö a̦fa ca̦i wämoa balöquema. ²⁹ Ablaamö a lä bälöono wei däjä, Acala bä ijilubö Isimali e lä cuinö, Isaacö a nö bleaamama. ¿Ö̦jö tawä? Showadi ijilu bä lä taaö wejeinaja a lä cublaliyono wei a lä cuinö, Yai Bada tä Bufi lofotenö a cublou mö lä fedulayono wei a lä cui a nö bleaamama. Inaja täbä yanowamö cuaaö showawä. Yai Bada tä Bufi lofotenö bä lä cublou wei bä lä cui, ö̦jö bä nö yai bleaamaö showawä malä cujei. ³⁰ Ö̦jö ma cui, ¿wedinaja Yai Bada etä a̦ oni cuma? A nosie fuamobä a suwä lä cui, a ijilubö nia ca̦i shimamou co̦oma. Ö̦jö bä ijilubö lä cuinö, bä fö̦ö ebä madofi nia shelelebou juonomi. Ablaamö bä suwäbö e yai lä cui, a nosie fuamobä e lä mlai, ö̦jö bä ijilubö e lä cuinö bä nia shi̦lo bluca tabou juoma. ³¹ ¿Ö̦jö tawä, iba wamacö? Camiyä bämacö lä cui, Ablaamö a nosie fuamobä a suwä lä cui lija bämacö nodiwä cublonomi. Acala lija mlai, bä suwäbö Sara e yai lija bämacö nodiblaliyoma. Ö̦jö a suwä lä cui a nosie fuamou bädaobä mlai, bä suwäbö e li yai cuoma.

¹ Bämacö nö bleaaö buo mlaobä, Moisesi etä a̦ ja Cristonö bämalecö fujeblamalema. Bä bufi da lofotoicu, ö̦jö lä. Moisesi tä a̦ ja bä nosiemamou co̦daa dijä. Bä noshi yai da umlao, wamacö nö bleaaö dicoquei. ² Camiyä Pablo ya lä cui, abenaja ya cuu. Yai Bada lija wamacö dodijaö dablamobä wamacö mosi sicö joyamou dicoo ja, Cristo lija wamacö bayeliblamobä tä cuami waiquiwä. ³ ¿Ö̦jö tawä? Bämacö nowa bluca taö lä cule. Dodijidawä wamacö cuobä wamacö mosi sicö joyamou dicoo ja, Moisesi ai etä a̦ jamö ma cui, wamacö yädäa waiquiquema. Inaja wamacö cuaaö dicoo ja, ai tä a̦ bluca mö feduwä ma cui ja wamacö nosiemamobä wamacö waiquiwä. ⁴ Moisesi etä a̦ ja, ai wamacö nosiemamou bufi jo̦wa doblao, Yai Bada lija dodijidawä wamacö dablamobä. Inaja wamacö lä cuaaö wei wamacönö, Cristo wama a nofi taboimi majöwä. Yai Bada tänö wamacö nofi lä ojodabou wei wama etä waii dicoo. ⁵ Jesucristo bäma a nofi mölabou yalo, jai bämacö dodijaö waiquiwä Yai Bada tänö bämalecö nofi tabou waiquiwä. ¿Ö̦jö tawä? Yai Bada tä Bufinö, inaja bämalecö bufi malä taamaö wei. ⁶ Bämacö mosi sicö ma joyamou wei ma cui, bämacö mosi sicö joyamou ma mlai lä ma cui, ö̦jö lä tä nowa cuami waiquiwä. Jesucristo bäma a nofi lä mölabou wei, ö̦jö lä tä nowa shi̦lo yai cua, cama lija bämacö yädäobä. Ö̦jö bäma a nofi yai lä mölabou wei däjä, yanowamö bäma täbä yai nofiablaö. ⁷ ¡Wamacö nofi da cadidoblei! ¿Wedinö wamacö yacläa majöblamalema, bejedi tä a̦ lä cui wama tä a̦ fuaö mladobä? ⁸ Yai Bada tänö inaja wamacö taamaö mada mlaoblei, wamacö lä yaileno wei a lä cuinö. ⁹ Wajaquemi moli tä a̦ wai jole ma cuinö täbä bluca yacläoblou. Nii julumamodima wiisibö a wai bädawänö, nii comi bä malä juluoblou wei. ¹⁰ ¿Ö̦jö tawä? Bada ya nofi mölabou, camiyä ya bufi lä cuu weinaja, cafä wamacö ma cui wamacö bufi taamaö cuo mö feduobä. Wamacö lä yaclämaö wei a lä cui, a nö nia bleaamaö. ¹¹ Iba wamacö. Camiyä ya lä cuinö ya bä yömölaö däjä, täbä mosi sicö joyamobä ya tä nabä shimaimi. Täbä jolemou. Ö̦jö ya tä nabä shimaö fa cunoja, judio bänö wale nö bleaamabö mlajei. Fii balitama tefi jamö Jesucristo a shämoa lä lälayono wei ya tä a̦ wäyäö mlai ja, ö̦jö ya tä nabä shi̦lo yai shimaö fa cunoja bä nö jushuobö mlai. ¹² ¿Ö̦jö tawä? Ö̦jö yabäcalewä bä lä cui, wamacö janöblamaö bufi lä doblao wejei bä lä cui, ö̦jö cama bä shi̦lo yai wa̦liamamou buobä. ¹³ Moisesi tä a̦ ja wamacö yai fujeblobä, wamacö malä nacaleno wei. Wamacö lä fujeblou wei wamacö lä cui, wamacö fa nofimayonö wamacö nia li yai bayeliblayou. ¿Ö̦jö tawä? Abenaja wamacö nia cuimi. “Ja̦o. Ö̦jö ya tä a̦ fuabä tä cuami majöwä waiquiwä cudeenö, ya cuaaö bufi lä doblao weinaja ya shi̦lo yai da cuaa, ö̦jö lä.” Ma. Inaja wamacö nia cuimi. ¹⁴ Yai Bada tänö täbä nabä bluca lä shimöqueno wei tä a̦ ja, wamacö cadidou showadaobä ei tä a̦ malä cule. Cafä wa nofi fo̦lio lä culenaja, inaja showawä aifä wa bä nofi tabolanö, wa bä nofimabä. Einaja tä a̦ cuu. ¹⁵ Ö̦jö ma cui bä da moyaweicu, ö̦jö lä, wamacö nofi wa̦liayou fa dicoblaicunö, yalo bä nabä queayou lä culenaja wamacö taamayou mlaobä. Wamacö mö watäblayou dicoo mlaobä. ¹⁶ Ö̦jö ma cui, abenaja bämacö nowa taö. Yai Bada tä Bufi ja, bä noshi yai shi̦lo da ö̦jödao. Yanowamö täbä showadi cuaaö bufi lä doblao wei tä ja, bä cuaa dijä. ¹⁷ ¿Ö̦jö tawä? Yanowamö täbä showadi lä cuaaö wei tä ja, Yai Bada tä Bufi läa malä cui. Inaja showawä, Yai Bada tä Bufinö täbä taamaö bufi lä doblao wei tä ma cui ja, yanowamö täbä bufi läa mö fedua. Täbä doblamaö mlaobä showadi tä läa. ¹⁸ Ö̦jö ma cui Yai Bada tä Bufi lija wamacö luluamou ja, Moisesi etä a̦ ja wamacö nosiemamobä wamacömi. Yai Bada tä Bufi lija wamacö luluamou malä waiquii. ¹⁹ Yanowamö täbä showadi lä cuaaö wei tä wawädowä. Bä joleblalou. Shami tä bluca ja, bä nofi ca̦i jushublalou. Bä nofi beshili ca̦i jushuaö. ²⁰ Yai Bada a bufiblaö mlajei ja, shomi täbä shi̦lo li bufiblaöje. Bä feculamou. Bä nofi ca̦i wa̦liayou. Bä a̦fa ca̦i lafujayou. Ai täbä dodijaö ayao däjä, täbä nofi ca̦i wa̦libouje. Bä ca̦i jushudou si ijejewä. Bä shi ca̦i imi. Bä a̦ ca̦i lämou. Täbä nofimaö fe usucuwä mlajei, ai täbä ca̦i shi̦lo nofimaö ayaoje. ²¹ Bä bufi ca̦i waiyou. Cama bä shi ca̦i wa̦limamou. Bä nofi jushuabä, bä iyaö ca̦i co̦camou. Inaja showawä, ai tä ca̦i bluca ma cui ja bä cuaablalou. Bämacö wasöö ja bämacö nowa jaba da tableinaja, bämacö nowa taö co̦a lä cule. Inaja bä lä cuaaö wei bä lä cui, Yai Bada tänö cama ebä ca̦i cuobä jamö, ö̦jö bä nia cuomi. ²² Ö̦jö ma cui, Yai Bada tä Bufi ja bä lä luluamou wei bä lä cui, abenaja bä cuaaö. Bä bufi nofio. Bä bufi ca̦i doblalou. Yanöcöwä bä bufi ca̦i cuo. Bä shi jalimoimi. Täbä ca̦i bayeliblaö bufi doblaoje. Dodijidawä bä ca̦i cuoje. Bä ca̦i li cadidou. ²³ Oquewä bä a̦ ca̦i faö. Bä ca̦i wasöo dao. Einaja bä dodijidawä cuaaö mlaobä tä a̦ läami. ²⁴ ¿Ö̦jö tawä? Yanowamö showadi täbä bufi waiyou nofi lä jushuaö weinaja, Jesucristo ebä bufi jaba cuaaö mö ma feduono wei ma cui, fei däjä bä cuaaimi majöwä. Fii balitama tefi jamö Jesucristo a lä shämolayono wei däjä, cama etä ca̦i shadia yädämaquemaje. ²⁵ Yai Bada tä Bufinö ba̦limi bämacö cua waiquia ja lä, ö̦jö lä tä Bufi ja bämacö yai da luluamo. ²⁶ ¿Ö̦jö tawä? Bämacö dodijidawä jimöobä mlai. Bäma täbä a̦ ca̦i lulubobä mlai. Camiyä bämacö ai bä lä cui, bä ma dodijaö ma ayao däjä ma cui bäma bä nofi wa̦libobä mlai.

¹ Iba wamacö. Wa̦lidiwä tä jamö aifä a lä cui a dobloimi dicoo ja, Yai Bada a Bufi lija wa lä luluamole wanö, wa yai nia bayeliblaö. Oquewä wa wa̦ falanö, wa nia cadidamaö co̦o. ¿Ö̦jö tawä? A da moyaweicu. “Camiyä inaja ya nö cuaabö lä mlainaja”, wa bufi jole cuu dicoo ja, inaja showawä cafä wa ma cui wa cublou dicolo. ² Aifä a lä cui a bufi nö bleaaö ja, a da bayelibla. Inaja wamacö taamayou ja, Cristo wama a nosie yai fuaö malä cui. ³ “¡Camiyä shi̦lo yai!”, wa bufi cuu dicoo ja wa jolemou cuquei. ⁴ Cafä wa lä cuaaö wei tä ja, a bufi shi̦lo da daeo, ai bä lä cuaaö wei tä ja mlai. Ö̦jö däjä wa dodijaö ja, aifä wa bä jimaö mlai ja, cafä wa lä cuaaö wei tä ja wa bufi nia shi̦lo yai doblalou. ⁵ Bämacö cuaablalou lä bädao wei tä ma cui ja, bämacö dodijabä bämacö malä cui. ⁶ Yai Bada tä a̦ ja wamacö lä damaö wejei bä lä cui, bä da dobäje. Dodijidawä täbä bluca ja wama bä dobäbä. ⁷ Yai Bada a nö waiblamoimi. Bä möla dijä. Wamacö lä cuaaö wei tä nowa nia co̦amamou. Mobä lä döaö wejei bänö, ö̦jö mobä co̦ablaö mö yabaaö malä co̦o wejei. ¿Ö̦jö tawä? Wa̦lidiwä wama tä taö ja, ö̦jö wama tä wa̦lidiwä nia co̦aö mö yabao co̦o. ⁸ Yanowamö täbä cuaaö bufi lä doblao wei tä ja bä luluamou dicoo ja, bä nia nomaö shi wa̦lijio. Ö̦jö ma cui, Yai Bada tä Bufi ja bä lä luluamou wei bä lä cui, ba̦limi bä nia li cuo. ⁹ Dodijidawä tä ja bämacö bufi modablao mlai. Dodijidawä bäma tä lä taö wei bämacönö, dodijidawä bäma tä nia co̦aö mö yabao co̦o malä cui. ¹⁰ ¿Ö̦jö tawä? Dodijidawä bäma tä tabä tä cua ja, bäma tä taö showadaobä, ö̦jö lä. Yanowamö jödödöwä bäma bä ma bayeliblaö däjä, Jesucristo a nofi lä mölabou wejei, ö̦jö bäma bä yai bayeliblabä. ¹¹ Cafä wamacö lija camiyä ei ya imicönö, ei ya tä a̦ bada lä oniblale tä a̦ oni da möje. ¹² Wamacö mosi sicö nia fa joyamajenö bä lä nosiemou wei bä lä cui, judio bä lija bä dodijidawä dablamou bufi doblao yalo bä a̦. Ö̦jö bä lija bä nö bleaaö mlaobä bä a̦ li. “Fii balitama tefi jamö Cristo a lä shämolayono wei tä nofi shi̦lo yai da mölaboje”, bä cuu quilii. ¹³ Ö̦jö bä lä cui, ¿wedi tabä cafä wamacö lija bä a̦ fe li blacäjou? Moisesi etä a̦ fuamaö nofi fa jalubojenö mlai. Cama bä mosi sicö ma joyamou wei ma cui, etä a̦ fuaö malä mlajei. Ma. Judio ai bä lija, cafä wamacö mosi sicö lä joyamaö wejei tä a̦fa wäaö bufi doblaoje yalo, bä a̦ fe li blacäjou, ö̦jö bä judio lija cama bä nofi nia fa doablamonö. ¹⁴ Shädayai. Inaja camiyä ya nö cuaabö mlai. Camiyä ya lä cuaaö wei ya tä a̦fa nö ca̦i wäabö mlai. Fii balitama tefi jamö Bada tä Jesucristo a lä shämolayono wei, ö̦jö ya tä a̦fa nö shi̦lo yai tabö wei. Cama a lä cuaano wei tänö ya shomiblaliyoma. Fei däjä yanowamö täbä showadi cuaaö bufi lä doblao weinaja, ya cuaabä yami. Cama bä ma cui, camiyä ya cuaaö bufi lä doblao weinaja bä nö ca̦i cuaabimi mö feduwä. Ma, camiyänö Jesucristo ya wa̦fa shi̦lo wäyäö. ¹⁵ Täbä mosi sicö lä joyamou wei tä nowa cua malä mlai. Täbä mosi sicö joyamou lä mlai tä ma cui, ö̦jö tä nowa ca̦i cuami mö feduwä. Dude bämacö tablamou lä majöo wei, ö̦jö tä nowa shi̦lo cua. ¹⁶ ¿Ö̦jö tawä? Ya lä cufenaja wamacö cuaaö ja, Yai Bada tänö wamacö bufi nia yanöcömabou. Wamacö nofi ca̦i nia asibou. Inaja bä lä cuaaö wei bä lä cui, ö̦jö Yai Bada ebä yai. ¹⁷ ¿Ö̦jö tawä? Camiyä wale yabäcaö co̦daaö mlajei ja, bä yanöcöwä cuobä. Jesús ya etä a̦ bejedi wäyäö cudeenö wale dusimabou malä waiquilajei. ¹⁸ Bei, iba wamacö. Bada tä Jesucristo lija showadi wamacö bufi bayeliblamobä. Wamacö nofi ojodabobä. Wamacö bufi bayeliblamobä. Inaja lä tä cuobä.