Efesios

Efesios

¹ Jesucristonö wale lä shimöleno wei, ei camiyä Pablo cä ya, Yai Bada tänö wale ca̦i shimaö fa bufinö. Efesoteli Yai Bada wama ecö lä cui lija ya tä a̦ oni shimaö, Jesucristo wama a nofi yai lä mölabou wei wamacö lija. ² Bei. Fayä Yai Bada lija wamacö shi̦lo bayeliblamobä, Bada tä Jesucristo lija ca̦i. Wamacö bufi shi̦lo yanöcömaboböbä. Wamacö nofi ca̦i shi̦lo ojodaboböbä. ³ Yai Bada tä nofi shi̦lo yai doablamobä a, Bada tä Jesucristo bä Fö̦ö e lä cui. Jesús lija a lä bufiblamou wei a showawä lä cui. Cristo lija bämacö yädäa yalo, bämacö bufi nia yai lä bayeliblamou wei täbä ja, bämalecö dobäö waiquia lä culadi. ⁴ ¿Ö̦jö tawä? Yedu ja, bita a tablaö showaa mlai ja, Yai Bada tänö bämalecö yaia balölema, Jesucristo lija bämacö yädäobä. Bämacö a̦fa tamobä tä cua mlai ja, cama bäma ecö dodijidawä yai cuobä bämalecö yaia waiquilema. ⁵ A bufi nofia yalo, Jesucristo a lä cuaano wei tä ja bämalecö nofi nia ijiluaö showadaoma. Inaja bämalecö taamaö bufi doblao waiquioma. ⁶ Bä Ijilubö Jesucristo a nofimaö dodijiwä. Ö̦jö a lä cuaano wei tänö bämacö yai li bayeliblamou. Bämalecö nofi ojodabou fe balojooma yalo, bäma a nofi showadi da doabla. ¡A doblao dodijiwä! ⁷ Wa̦lidiwä tä ja, Jesucristo i̦yäbönö bämalecö fujeblamalema. Bämacö doblou lä mlai tä nowa mladamalema. ¿Ö̦jö tawä? ¡Bejedi lä bämalecö nofi ojodabou! ⁸ Bämalecö nofi yai ojodabou fe balojoa. ⁹ Yai Bada a nia lä cuaaö wei tä a̦ jaba jo̦yaoma ma cui, Cristo a lä cuaano wei tänö bämalecö bufi jaducäblamalema. Bämalecö bufi möblamalema. ¹⁰ ¿Ö̦jö tawä? A nia lä cuaano wei, obi tä nia jödödöblaö. Cristo a nia Bada lämabou. A nia lä läamaö wei tä cublou däjä a nia lämabou. Bita jamö ma cui, fedu jamö ma cui, ö̦jamö täbä bluca lä tablamolayono wei täbä lija, Cristo a nia Bada läo. ¹¹ Yai Bada a lä cuinö, tä tamaö lä bufii wei showadi tä jödödöblaö. Cama yama ecö cuo mö feduobä, Cristo lija yamalecö yädämaquema. Inaja yamalecö taamaö bufii fa showadaonö, yamalecö taamama. ¹² Cristo yama a nofi jaba lä mölabono wei yamacö lä cuinö, Yai Bada yama tä doblao dablamabä yamalecö cadidilema. Bluca täbä lija a nofi doablamou cuaabä. ¹³ Cafä wamacö ma cuinö, bejedi wama tä a̦ ca̦i ji̦lilema, wamacö fucäamobä tä a̦ dodijidawä lä cui. Cristo wama a bejedi fa bufilänö, ö̦jö lija wamacö yädäblaliyoma. ¿Ö̦jö tawä? Wamacö yädäo yalo, cafä wamacö lija Yai Bada tä Bufi jibämoquema, tä a̦fa Bufi wäamou lä balöono wei, cama wama ecö nö ö̦jöböamobä. ¹⁴ Bämalecö nia lä dobädayou wei bäma tä däaö showao mlaodayou däjä, a Bufi jibämoa balöbema, bämacö mölaö showaobä. Obi bämacö nia shi̦lo yai dobämodayou, Yai Bada tä nofi doblao doablamodayobä. ¹⁵ Ö̦jö cudeenö, Bada tä Jesús wama a nofi lä mölabou wei ya tä a̦ fa ji̦lilänö, Jesucristo ai wama ebä bluca lä nofimaö wei ya tä a̦ ca̦i fa ji̦lilänö, ¹⁶ ya bufi doblalou. Cafä wamacö nowa ja, Yai Bada lija ya bufi a̦fa shi̦lo doblalou wäyämou. Showadi bämacö nö bayeli nacaö talei. ¹⁷ Fayä a lä doblaladi lija ya nacou, Bada tä Jesucristo lija a lä bufiblamou wei a lä cui. Wamacö bufi jaducämabobä ya wa̦ faö. Yai Bada wama a jaba lä dale, wama a yai daö balafälöbä. ¹⁸ Wamacö bufi yai möblobä ya wa̦ faö, wamacö dobäö bufi lä doblao wei tä ja wamacö bufi jaducäblobä. Wamacö bufi nia lä bayelibou wei tä ja wamacö yai mölaö cadidiobä. Wamacö dobäö bufi doblao waiquiwä ja, cama wama ecö cublobä wamacö malä nacano wei. ¹⁹ Cama wama etä lofote dablabä ya ca̦i nacou. ¿Ö̦jö tawä? Ö̦jö a shi̦lo yai lofote dodijiwä. Cama etä lofotenö, bäma a bejedi lä bufii wei bämacö lä cui bämalecö bayelibou. Ö̦jö etä yai lofote showawä lä cuinö, ²⁰ Cristo a demi jocädamaö co̦layoma. Fedu jamö, cama jayu boco mashi jamö, a ca̦i dicämaquedayoma. ²¹ Ö̦jamö culanö Cristo a Bada läadayoa. Yanowamö bada täbä cublawä ma cui, yai täbä lä nosiemou wei täbä ca̦i cuadayoa ma cui, moli Cristo a shi̦lo yai Bada cua ayaa. Ö̦jö bä lofotoblawä bäwä ma cui cama a shi̦lo yai lofote. Bluca bä a̦fa lofote ma jayumaö wejei ma cui, Cristo a wa̦fa yai lofote wäyämamobä, ¡ö̦jö a shi̦lo yai! Fei däjä ma cui, obi ma cui, Cristo a wa̦fa nia shi̦lo yai lofote wäyämou ayao. ²² Cristonö jödödöwä tä yai fuwäbou ayaobä, Yai Bada tänö Bada a tablamalema. Cama bäma ecö lä yododoblai bämacö lä cui, Cristo lija bämacö shi̦lo yai nosiemamobä a Bada lämabou. ²³ ¿Ö̦jö tawä? Cama lija bämacö fa yädäblalunö, cama sho moli bämacö cublaliyoma. Jesucristo cama bei a lä cui, camiyä bämacö waiquiwä. Cama a shi̦lonö, bämacö demi cua. Cama a showawä malä jödödöle.

¹ Cafä wamacö lä cui, wa̦lidiwä talewä wamacö jaba fa cuonö, jai nomawä wamacö cuoma. ¿Ö̦jö tawä? Wamacö doblou lä mlaono wei tänö, nomawä wamacö blao ma waiquiono wei ma cui, Yai Bada tänö wamacö demiblamalema. ² Wa̦lidiwä tä jamö yanowamö täbä showadi cuaaö lä showainaja, wamacö cafä ca̦i jaba cuaaö balöoma. Fecula bada lija wamacö luluamoma, fecula ösö jamö bä lä cublai bä lä nosiemaö wei a lä cui lija. Yai Bada tä a̦ fuaö lä mlajei bä lä cui, ö̦jö fecula bada lija bä luluamou showaa lä cudi. ³ Ö̦jö bä lä cuaaö weinaja, camiyä bämacö bluca ma cui, inaja bämacö ca̦i jaba cuaama. Wa̦lidiwä bäma tä lä didibole tä ja, bämacö showadi luluamoma. Bämacö cuaaö bufi lä doblaono wei tä ja, bämacö cuaaö shalilioma. Wa̦lidiwä bämacö cuo waiquioma yalo, Yai Bada tä nö wa̦lowä lä jushudou wei a lä cuinö bämalecö nö nia blemaboma, ai bä nö nia lä blemabou weinaja showawä. ⁴ Ö̦jö ma cui, Yai Bada a bufi asio fe balojoo. Bämalecö yai nofimaö fa dodijionö, ⁵ wa̦lidiwä tänö jai nomawä bämacö ma blaono wei ma cui, Cristo lija bämalecö fa yädämacönö bämalecö ca̦i demiblamalema. ¿Ö̦jö tawä? Wamacö nofi ojodaboma yalo wamacö malä fucäano wei. ⁶ Cristo lija bämalecö fa yädämacönö, nomawä bämacö ma cuono wei, bämalecö demidamaö co̦layoma. Cristo a Bada lä dicämaboladi jamö bämacö dicäo mö feduodayobä, bämalecö tablalema, ⁷ bämalecö nofi yai lä ojodabou wei, obi ma cui tä dablamou showaobä. ¿Ö̦jö tawä? Jesucristo lija bämacö yädäa yalo, bejedi lä bämalecö bufi bayelibou. ⁸ Wamacö nofi ojodabou yalo, Jesucristo wama a nofi fa mölabonö wamacö malä fucäleno wei. ¿Ö̦jö tawä? Wama a nofi lä mölabou wei tä ma cui, Yai Bada tänö no mlai ja wamacö bayeliblaö mlao fa cunoja, wama a nofi nö ca̦i mölabou bädaobö mlai. ⁹ Täbä lä dodijaö wei tänö täbä fucäamoimi yalo, cama bä dodijidawä jimöobä etä cuami. ¹⁰ Fei däjä Jesucristo lija bämacö lä yädäle, Yai Bada tänö bämalecö inaja fa taamanö bämacö malä cule. Dude bämalecö tablamaö co̦layoma, bämacö dodijabä. Jaba däjä ma cui, inaja Yai Bada tänö bämalecö nia taamaö showaoma, bämacö dodijadibä. ¹¹ Wamacö a̦fa shomi lä jilabou wejei wamacö lä cui, bä bufi da daeo. ¿Ö̦jö tawä? Cafä wamacö mosi sicö joyamoimi yalo, judio bänö wamacö nofi jaba tabonomije. Cama judio bä mosi sicö li joyamou fa ayaonö, bei bä sibo shi̦lo taamamou bädao ma cui, “Camiyä Yai Bada yama ecö ijilubö yaiwä”, bä jole cuma. ¹² ¿Ö̦jö tawä? Cristo wama a danomi showawä. Tä nofi da jaducäleje. Isaeli nodiwä ebä lä cuinö wamacö nofi tabonomije. Cama ebä lija Yai Bada tä a̦ nö ma wäono wei ma cui, bayeli tä a̦fa ca̦i ma wäqueno wei ma cui, ö̦jö cafä wamacö befi cuonomi. Ö̦jö wama tä a̦ bufiblaö mlai ja, Yai Bada wama a ca̦i daö mlai ja, wamacö bälödalou nö beblalodii buoma. ¹³ Yai Bada tä lä cule jamö culanö wamacö bälöo blajaoma ma cui, fei däjä, Jesucristo lija wamacö yädäblaliyoma yalo, ö̦jönö wamacö ca̦i bälöa ajedeblou majölayoma. Cristo a fa shämolunö i̦yäbö falayoma. ¿Ö̦jö tawä? Ö̦jö i̦yäbö nowa ja wamacö ajedeblaliyou lä cufe. ¹⁴ Judio wamacö lä mlai wamacö sho bämacö bluca nofimayou majöobä, ö̦jö a Jesucristo waiquiwä malä cui. Bämacö bufi yai yanöcöblobä. Bämacö nofi jaba lä wa̦liayono wei tä lä cui, Cristonö tä wa̦lia waiquilema. ¹⁵ ¿Ö̦jö tawä? Judio yamacönö, Yai Bada yama etä a̦ tabou ayao balöblaoma. Tä nabä yai lä shimöqueno wei tä a̦ bluca ma cui, showadi yamacö nia cuaaö lä nodiablalono wei tä a̦ ma cui, camiyäteli yamacönö yama tä a̦ bluca oniboma. Ö̦jö ma cui, Cristo a nomaö lä lälayono wei tänö, ö̦jö tä a̦ joyalema, judio yamacö ma cui, judio wamacö ma mlai ma cui, cama lija bämacö bluca yädäo fe usucuo showadaobä. Moli bämacö fa cublalunö bämacö dodijidawä nofimayobä. Bämacö bufi yai yanöcöblobä. ¹⁶ Tefi lä balitaono wei jamö a lä shämolayono wei tänö, moli bämalecö tablamalema, Yai Bada lija bämacö bluca ajedou showaobä. Bämacö nofi wa̦liayou co̦daaö mlaobä. ¹⁷ Eja Cristo a fa waloiquiyonö, täbä bufi lä yanöcödamaö wei tä a̦ wäyäyoluma. Yai Bada tä lä cule jamö culanö wamacö bälöo lä blajaono wei wamacö ma cui, judio yamacö ajedeo lä waiquiono wei yamacö ma cui, ö̦jö tä a̦nö Yai Bada lija bämacö bufi yanöcou fe usucuaaö showaobä. ¹⁸ Cafä wamacö ma cui, camiyä yamacö ma cui, Cristo a lä cuaano wei tänö, bä Fö̦ö e lija bämalecö bluca ajedamaö dao malä cui. Ö̦jö cama a Bufi showawänö bämacö ajedou. ¹⁹ ¿Ö̦jö tawä? Ö̦jö cudeenö, judio wamacö lä mlai, shomi wamacö a̦fa nia jilamou co̦omi. Fei däjä wamacö nia bälöblalou bädaomi. Ma, Jesucristo wama ecö mö feduwä. Yai Bada tänö cama ebä ca̦i lä cule bä lija wamacö co̦caa waiquia. ²⁰ Yai Bada bäma ecö yafibö cublou majöa lä cule. Jesucristonö yamalecö lä shimöleno wei yamacö ma cui, Yai Bada a wa̦no wäyälewä bä jaba lä cuono wei bä ma cui, ö̦jö yama ecö yafi li colo. Tä yafi nia colo lä lofotomabou wei, cama Jesucristo a waiquiwä. ²¹ Cama lija bämalecö bluca fa yädäblamalönö etä yafi blaucublamaö lä cule, Bada bäma ecö yafibö dodijidawä yaiobä. ²² ¿Ö̦jö tawä? Cafä wamacö ma cui, Cristo lija wamacö yädäa yalo, cama ai yama ecö lija Yai Bada a Bufi lofotenö wamacö co̦cablamaö, bämacö bluca fa co̦cablamolunö, Yai Bada bäma ecö yafibö yai cuobä.

¹ Ö̦jö cudeenö, cafä judio wamacö lä mlai wamacö lija Jesucristo ya tä a̦ wäyäö nofi jushuaö yalo, camiyä Pablo wale fe labouje. ² ¿Ö̦jö tawä? Yai Bada tänö täbä nofi lä ojodabou wei wama tä a̦ ca̦i ji̦liaö mö feduobä, Yai Bada tänö wale cadidilema. Ö̦jö wama tä a̦ ca̦i ji̦libou waiquile cätä. ³ Yai Bada tänö tä a̦ jaba lä jo̦yabono wei, camiyä lija tä a̦ wawäblamalema. Ö̦jö ya tä a̦ jolodowä oniblaö waiquio lä cufe. ⁴ Ei wama tä a̦ doaö däjä wamale bufi nia jaducäwä dablaö. Yai Bada tänö tä a̦ jaba lä jo̦yabono wei ya tä a̦ daö, Cristo a nia lä cuaano wei tä a̦ showawä lä cui. ⁵ Bämacö nö badabö lija tä a̦ jaba wawämano ma mlai ma cui, fei däjä Jesucristonö yamalecö lä shimöleno wei yamacö lija tä a̦ li ya̦cumö wawäblamalema, bei a Bufinö. Jesucristo ebä yododabä jamö etä a̦ ca̦i lä wäyäö wejei bä lija ca̦i. Yai Bada tänö yamalecö yaia cadidilema. ⁶ Tä a̦ jo̦yabou lä showaono wei, ei tä a̦. Yai Bada tänö judio yamalecö nia lä bayelibono weinaja, judio wamacö lä mlai wamacö nia ca̦i bayelibou mö feduo lä showaono wei, ö̦jö bei tä a̦ waiquiwä. Moli bämalecö nia bluca tablamaö majöoma. Jesucristo a wa̦fa wäyäö lä balöono wei etä a̦ dodijidawä fa wäyämonö, ö̦jö lija judio yamacö fa yädäicunö yamacö nia bayeliblamoma. Inaja showawä, judio wamacö lä mlai wamacö nia ca̦i bayeliblamou mö feduo showaoma. ⁷ ¿Ö̦jö tawä? Cama etä lofotenö ö̦jö ya etä a̦ dodijidawä wäyäö. Ya etä a̦ wäyäbä, wale nofi ojodabou yalo wale shimölema. ⁸ Cama ai ebä shi̦lo dodijaö ma ayaono wei ma cui, camiyä wale nofi fa ojodadalönö wale shimöa fe yadilema. Cristo lija täbä yai bayeliblamou fe lä balojoo wei, judio wamacö lä mlai wamacö lija ya tä a̦ wäyäbä. ⁹ Yai Bada tänö tä a̦ jaba lä jo̦yabono wei tä a̦ wawäblou fe yadiobä, camiyä lija täbä bufi nia bluca jaducäblamama. ¿Ö̦jö tawä? Yai Bada a lä cuinö, täbä bluca lä tablaleno wei a showawä lä cuinö, cama a nia cuaaö lä ja̦toono wei tä a̦ nia ya̦cumö wawäblamama. ¹⁰ Fedu fe dole jamö, a̦jele bä lä cublai bä lija a bufi lä jaducäi tä dablamodayobä, inaja a li cuaama. A̦jele ai bä bada lä nosiemou wei bä ca̦i lija. Yai Bada a bufi shi̦lo yai jaducäwä fe balojowä. ¿Ö̦jö tawä? Jesucristo ebä lä yododoblai bä lä cui, ö̦jö bä lä bayelibou wei tänö a bufi nia yai jaducäwä dablamoma. ¹¹ Ei tä ulufi tablaö showao mlao däjä, inaja a nia cuaaö showaoma. Bada tä Jesucristo a lä cuaano wei tänö tä wawäblamalema. ¹² Ö̦jö bäma a nofi lä mölabou wei tänö, quilii mlai ja Yai Bada lija bämacö bufi mölaö ca̦i icuo dao. ¹³ Ö̦jö cudeenö abenaja ya cuu. Cafä wamacö lija ya tä a̦ lä wäyäö wei tä nowa ja wale nö ma bleaamaö wejei ma cui, bä bufi fo̦lijo dijä. Cafä wamacö doblao cuobä tä malä cui. ¹⁴ Ö̦jö cudeenö, Fayä lija ya möfe bolanö ya wa̦ faö talei. ¹⁵ Fedu jamö bä lä culadi bä ma cui, bita jamö bä lä cublai bä ma cui, ö̦jö cama ebä a̦fa bluca jilamou. ¹⁶ Cama ebä showadi bayelibou fe balojoo yalo bämacö nö bayeli nacaö, cama bei Bufinö wamacö nö wa̦lojomabobä. Wamacö bufi yai lofotomabobä. ¹⁷ Cristo wama a nofi mölabou ja, cafä wamacö bufi jamö a cudiobä ya wa̦ ca̦i faö. Wamacö bufi yai nofiobä ya wa̦ ca̦i faö, fii fibä nasöcö fa dalonö, tefibä ublao lofotoo lä culenaja, wamacö bufi yai lofotoo cuobä. Yafi bä colo lofotoo däjä, bä yafi wäcäö dao lä mlainaja wamacö yai cuo mö feduobä. ¹⁸ Yai Bada ai ebä bufi nö bluca wa̦lojomabou lä cuaaö weinaja, cafä wamacö ma cui wamacö bufi nö ca̦i wa̦lojomabou cuo mö feduobä. Cristonö bämalecö yai nofimaö fe lä balojoo wei tä ja, wamacö bufi möblou fe yadiobä. ¹⁹ Cristonö bejedi lä bämalecö nofimaö fe balojowä. ¿Ö̦jö tawä? Bämalecö nofimaö fe lä balojoo wei tä ja bämacö bufi yai jaducäblou fa cunoja, bämacö bufi nö fejelobö wei. Inaja wamacö bufi jaducäwä cuobä ya wa̦ faö talei, Yai Bada tä lä culenaja wamacö bufi yai cublobä. ²⁰ Bämalecö nia bayeliblaö nö lä wa̦lojoo wei, ö̦jö Yai Bada a, cama etä lofote showawänö bämacö showadi lä bayeliblamou wei a lä cui. Camiyä bämacö bufi lä cuablalou weinaja bädawä mlai, bämacö lä bayeliblamou wei tä ja, bämalecö nia yai fejeleamaö. ²¹ Ö̦jö a nofi shi̦lo yai doablamobä. Jesucristo a lä cuaano wei tänö, showadi a doblao dablamobä. Cama bäma ecö lä yododaö wei bämacö ma cuinö, showadi bäma a doblao ca̦i dablamabä. Inaja lä tä cuo shi wa̦libä.

¹ Ö̦jö cudeenö, Bada ya wa̦no wäyäö fe yadio yalo wale fe lä labolajei ya lä cuinö bämacö nowa taö. Wamacö yai dodijabä ya wa̦ fe blacäjou. Dodijidawä wamacö cuobä Yai Bada tänö wamacö malä nacano wei. ² Bufi oquewä bä yai da cuo. Bä bufi yai yanöcöo fe da yadio. Bä ca̦i nofimayou fe da yadio. ³ Yai Bada tä Bufinö moli wamacö mashi tablamalema yalo, bä a̦ majöablalo dijä. Wamacö bufi wedinajamobä tä cua ja, wamacö bufi yanöcölanö, tä cadejeblaö bufi doblao da showadaoje, wamacö bufi shalilio fe yadiobä. ⁴ Moli a lija bämacö bluca yädäa yalo, moli bämacö. Bluca bämacö lija, moli a lä cui a Bufi bälöblawä. Yai Bada tänö bämalecö lä nacano wei däjä, bämalecö a̦fa bayeliblou lä wäyäno wei tä a̦ moli ja, bämacö bluca mölaö. ⁵ Bäma a nofi bluca lä Badabole, moli a. Bäma tä a̦ nofi lä mölabole, moli tä a̦. Moli a lija bämacö bluca yädäobä, bämacö fe ojomamou. ⁶ Yai Bada moli cätä waiquiwä, bäma a nofi bluca lä Fö̦ömale. Ö̦jö a shi̦lo yai Bada. Ö̦jö lija bämacö bluca bayeliblamou. Bluca bämacö lija ö̦jö a cudia. ⁷ Ö̦jö ma cui, Yai Bada lija bämacö ojodamolanö bämacö nö bluca wa̦lojaö shedecobä, Cristonö bämalecö dobäö cuaama. ⁸ Ö̦jö cudeenö abenaja tä a̦ oni cuu balöoma. Ösö jamö a lä yamobefälöno wei däjä, yanowamö bluca täbä fa däfälönö, täbä lululefälöma. Täbä fa lululäfälönö, täbä dobädayoma. Einaja tä a̦ oni cuu. ⁹ ¿Ö̦jö tawä? “Ösö jamö a lä yamobefälöno wei däjä” tä a̦ lä cuu wei, ¿wedinaja bäma tä a̦ nofi tabobä tä a̦? Abenaja bämacö bufi cubä tä a̦. Ösö jamö a jo̦wa lä funo wei, mashita a co̦jomo jamö a fa fuobalöcölönö, a ösöa co̦layoma. ¹⁰ Ösö jamö a lä itolayono wei a lä cui, fedu fe dole jamö a dua lä co̦befälöno wei, ö̦jö a showawä. Jödödöwä tä nia dodijidawä fa tamabonö, a li inaja cuaama. ¹¹ Täbä jo̦wa yanowamö lä dobädayono wei, abenaja täbä jo̦wa taamama. Jesucristo a wa̦no wäyäö cuaabeje, ai bä shimama. Jesús ebä yododabä jamö etä a̦ wäyäbeje, ai bä dobäma, bä a̦ nö wa̦lojabä. Mojodi täbä lija Jesucristo etä a̦ dodijidawä wäyäö cuaabeje, ai bä dobäö mö feduoma. Cama ebä ca̦i yododabeje, ebä ca̦i damabeje, ai bä ca̦i dobäö mö feduo showaoma. ¹² Jesucristo ebä bayeliblabeje bä dobäö cuaama, ebä fa bayeliblalöjenö, Yai Bada lija dodijidawä cama ebä bluca ojodamobä. Cristo lija bä bluca lä yädäo wei bä bufi bluca lofotoafälöbä. ¹³ Yai Bada bäma a nofi bluca lä mölabou wei, bei Ijilubö bäma a ca̦i lä daö wei bämacö bluca lä cui, bämacö bufi bluca fa shalililonö bämacö bufi badafälöbä. ¿Ö̦jö tawä? Cristo a lä culenaja bäma ecö cuo mö feduobä. ¹⁴ Ö̦jö däjä, shomi tä a̦ ca̦i lä fuaö wejei bä a̦ ja bämacö nia mölaimi majöo. Bämalecö yaclämaö bufi lä doblao wejei bä a̦ ja, oshe bä bufi shelelewä lä culenaja bämacö bufi nia cuaaö majöomi. Wadoli a badanö, mau u jamö täbä befi ca̦i shäyäjaö lä cuaaö weinaja bämacö bufi taamamou dicoo mlaobä. ¹⁵ Ma, bämacö bufi yai nofilanö, bämacö caficö a̦ yai da bejedimo. Inaja bämacö cuaalanö, bämacö bufi nia badafälöö, Cristo a lä culenaja bämacö cuobä. ¿Ö̦jö tawä? Bämacö bayeliobä, Cristo lija bämacö yädäa waiquia. Camiyä bämacö fe lä cui, Cristo bei a. Cristo bei a lä cui, camiyä bämacö. ¹⁶ Cama a showawänö bämalecö co̦camabou. ¿Ö̦jö tawä? Oshe bä dodijidawä tablamou lä waiquio wei bä dodijidawä badaö lä culenaja, camiyä bämacö ma cui, dodijidawä bämacö badaö cuobä. Cristo bäma ecö nofimayolanö, cama a lofotenö bäma ecö badafälöbä. ¹⁷ Ö̦jö cudeenö ya wa̦ fe blacäjou a lä cule. Bada ya wa̦no taö. Yai Bada tä daö lä mlajei bä lä cuaaö weinaja bä cuaaö da mladalu. Inaja bä bufi lä cuaablalou wei bä bufi nö bleaaö. ¹⁸ Bä bufi mö didi yalo, Yai Bada lija bä bufi nö jaducäblobimi waiquiwä. Bä bufi jifuwä yalo bä bufi mojodi. Bä bufi mojodi cudeenö, Yai Bada lija ba̦limi bä nö tablamobimi waiquiwä. ¹⁹ Wa̦lidiwä tä ja bä bufi quilijoimi. Bä wasömamou mlai, yanowamö täbä showadi lä cuaaö wei, ö̦jö tä nabä shi̦lo yai cadidouje. Shami tä bluca ma cui ja bä nö shijilobimi. ²⁰ Cristo tä a̦ ja wamacö damamou däjä, inaja wamacö taamanomije. ²¹ ¿Ö̦jö tawä? Wama a̦fa ji̦libou malä waiquile. Ö̦jö lija wamacö lä yädäqueno wei däjä, Jesús bejedi etä a̦ lä cui ja wamacö damamaje. ²² Wamacö bufi jaba lä cuaablalono wei tä lä cui, tä daa da showadacöje. Inaja wamacö jaba cuaama ma cui, wamacö bufi lä waiyono wei tä ja wamacö mölaö buoma. Ö̦jö tänö wamacö wa̦lidiadima. ²³ Yai Bada tä Bufinö fei däjä bä bufi da shomiblalu. ²⁴ Yai Bada tänö dude wamacö bufi tablamalema, cama a lä culenaja showawä. Wamacö bufi yai dude lä cui ja bä da luluamo, wamacö yai bejedimobä. Dodijidawä wama ecö yaiobä. ²⁵ Ö̦jö cudeenö bä caficö jolemo dijä. Aifä bä lija wamacö caficö bluca shi̦lo yai bejedimobä. Moli bämacö mashi waiquiwä malä cui. ²⁶ Wamacö jushudou bädao ja bä da moyaweicu, wa̦lidiwä wama tä taö mlaobä. Wamacö jushuo showalanö bä fe weya dijä. ²⁷ Fecula bada a nö wa̦lojama dijejä. ²⁸ Wamacö jaba lä tomömono wei wamacö lä cui, bä tomömou co̦daa dijä. Bä yai da ojodamo. Dodijidawä wamacö fa ojodamonö, bä nö fo̦li lä bleaaö wei wama bä yai bayeliblabä. ²⁹ Wa̦lidiwä wamacö a̦ fabä, bä caficö caloblou bädao dijä. Dodijidawä bä a̦ shi̦lo da fa, wama täbä bufi lofotoamabä. Wama bä bufi bayeliblabä tä cua ja, wamacö a̦ shi̦lo dodijidawä faö showadaobä. ³⁰ Yai Bada tä Bufi lä jibämoqueno wei tä Bufi ca̦i wa̦lidiwä bälömabo dijejä. Cama wama ecö nö ö̦jöböamobä a Bufi malä jibämoqueno wei. Wamacö co̦aö showao mlao däjä wamacö ca̦i cudio balöobä. ³¹ Wama täbä nofi wa̦libou lä ja̦tomou wei tä da blajamalöje. Wamacö nö wa̦lowä lä jushudou wei tä ca̦i. Wamacö jushudou lä bädao wei tä ca̦i. Wamacö a̦ lä läblou wei tä ca̦i. Wamacö a̦fa lä tayou wei tä ca̦i. Wamacö nö lä nabämou wei, tä jödödöwä da blajamalöje. ³² Dodijidawä täbä ca̦i shi̦lo yai da cuoje. Täbä nofi da ojodaboje. Cristo lija wamacö fa yädäicunö, Yai Bada tänö wamacö nofi asibou lä cuono weinaja, cafä wamacö ma cui wamacö nofi nia asiboyou cuo.

¹ Ö̦jö cudeenö, Yai Bada bei ijilubö wama ecö yalo, ö̦jö a shi̦lo yai da owämaje. Wamacö nofimaö fe balojowä. ² Wama täbä nofimalanö bä ca̦i da cuoje, Cristonö bämalecö nofimaö lä culenaja showawä. Bämalecö bayeliblabä a nomaa lälayoma. Yai Bada lija täbä wa̦queshi nö li̦yoli lä u̦cucamou wei täbä dodobou lä cuaaö wejeinaja, inaja showawä, Cristo cama a jibäamou bufi doblao cuoma, Yai Bada a bufi doblamabobä. ³ ¿Ö̦jö tawä? Wamacö nofi nia beshili jushuaimi. Shami wama tä nia fuliimi. Ai täbä jamö wamacö bufi nia waiyoblaloimi. Yai Bada wama ecö lä cui, inaja wamacö a̦fa wayoamou cuobä wamacö malä mlai. ⁴ Wa̦lidiwä tä a̦ wayoa dijejä. Wamacö a̦ biyäcäblalou bädaobä wamacömi. Wamacö nö lä quililaliyobö wei tä a̦ ja, bä a̦ ca̦i wayoablalou bashio dijä. Ma, cafä wamacö lija ö̦jö tä a̦ ji̦limamou mlai ja, Yai Bada lija wamacö bufi a̦fa shi̦lo doblao lä wäyämou wei, ö̦jö tä a̦ shi̦lo yai ji̦liabeje, ö̦jö lä. ⁵ Möla dijä. Bä nofi lä jushublalou wei bä ma cui, shami tä fulii bufi lä doblao wejei bä ma cui, ai täbä jamö bä bufi shi̦lo lä waiyou wei bä ma cui, Yai Bada sho, Cristo sho cäcöbä bälöo lä dodijio wei jamö, ö̦jö bä befi nia cubloimi. Ö̦jö bä bufi shi̦lo lä waiyou wei bä lä cuinö, Yai Bada a bufiblaö mlajei, shomi täbä shi̦lo malä bufijadii wejei. ⁶ Bä a̦ lä jolemou wei bä lija bä möla dijä. ¿Ö̦jö tawä? Inaja täbä cuaadii yalo, Yai Bada tä nö wa̦lowä lä jushudou wei däjä a nosie fuaö lä mlajei bä lä cui bä nö nia malä bleaamaö wei. ⁷ Ö̦jö cudeenö, inaja bä lä cuaaö wei bä lija bä yädäblo dijä. ⁸ Wamacö bufi mö jaba dödöoma ma cui, fei däjä Bada wama ecö li yalo, tä lä wacacai jamö wamacö cua malä majöle. ¿Ö̦jö tawä? Tä mö lä wacacai jamö täbä dodijaö lä cuaalenaja bä shi̦lo yai da cuaa. ⁹ Tä mö lä wacacai jamö täbä cua yalo, täbä malä dodijaö wei. Bä bejedimou. Bejedi tä a̦ jamö bä cadidou. ¹⁰ Bada wama tä bufi nia lä doblamabou wei tä nabä shi̦lo da cadidoje. ¹¹ Täbä bufi mö lä didi wei bä nö bleaaö. Ö̦jö bä lä cuaaö wei tä ja bä yädäblou bufio dijä. Bä lä cuaale wama etä nia yai wäaö. ¹² Ö̦jö bä cuaaö lä ja̦too wei tä a̦fa wayoamou bädao ma cui, tä a̦ ji̦limamou wa̦lidiwä malä cui. ¹³ Ö̦jö ma cui inaja bä lä cuaaö wei, bei tä shi̦inö tä dablamou däjä tä wawäblou. Tä nia yai lä wawäblou wei, ö̦jö lä bei tä shi̦i waiquiwä. ¹⁴ Ö̦jö cudeenö abenaja tä a̦ oni cuu. Wa lä mile, ¡a da la̦lö! Nomawä wa lä blale, ¡a da jocäblalu! Ö̦jö däjä Cristonö wamacö bufi nia yai wacacamabou. Einaja tä a̦ oni cuu. ¹⁵ Wamacö lä cuaaö wei tä ja bä da moyaweicu, ö̦jö lä, bä bufi jaducäwä lä mlai bä lä cuaaö weinaja wamacö cuaaö dicoo mlaobä. Bä bufi yai lä jaducäi bä lä cuaaö weinaja, inaja wamacö shi̦lo yai cuaabä. ¹⁶ Fei däjä wa̦lidiwä tä bluca taö lä cudujei. Ö̦jö cudeenö, wamacö dodijabä tä cua waiquia ja, bä yai dodijaö da showadao. ¹⁷ Bä bufi mojodi cuo dijä. Bada tänö tä taamaö lä bufii wei tä yai da dalalöje. ¹⁸ Nashiwä toubänö bä shi ca̦i wa̦li dijä. Ö̦jö toubä wayunö täbä malä wa̦lidiblou wei. Ö̦jö toubä ja wamacö taamamou mlai, Yai Bada tä Bufi lija bä bufi yai da jödödöblamamolu. ¹⁹ Wamacö yododabä jamö, Yai Bada lija täbä a̦ amowa lä yädäblai täbä a̦ shi̦lo da taje. Nö badabö David etäbä a̦ ca̦i. Yai Bada tä Bufinö täbä a̦ lä bädamaö wei täbä a̦ ca̦i. ¿Ö̦jö tawä? Bada tänö wamacö a̦ bufi doblalou ji̦liadayobä wama täbä a̦ amowa nia taö. ²⁰ Tä cublou lä bädao wei tä ma cui ja, Bada tä Jesucristo a wa̦nö, Fayä Yai Bada lija bä bufi a̦fa shi̦lo doblalou da wäyämo. ²¹ Cristo lija wamacö quililanö, dodijidawä bä a̦ da ji̦liayo. ²² Bä suwäbö wama ecö lä cui. Fe̦yalofä bä a̦ da ji̦liaje, Bada wama a wa̦ nö ji̦lia lä talebö weinaja showawä. ²³ Fe̦yalofä wama bä a̦ nosie fuabä bä waiquiwä malä cui, cama bäma ecö lija Cristo a wa̦ nosie fuamou lä culenaja showawä. Bämalecö lä nowamöbou wei, ö̦jö lä Cristo a waiquiwä. Cama bäma ecö lä yododaö wei bämacö lä cui, Jesucristo sho jai moli bämacö cuwä. ²⁴ Cristo bäma a nosie fuabä bämacö. Inaja showawä, bä suwäbö wama ecö lä cuinö, fe̦yalofä wama bä nosie nia ca̦i fuaö. ²⁵ Bä fe̦yalobö wama ecönö, suwäböfä bä yai da nofimaje, cama bäma ecö lä cui, Cristonö bämalecö nofimaö lä cuaano weinaja showawä. Bäma ecö bayeliblobä a noshi malä ö̦jödaono wei. ²⁶ ¿Ö̦jö tawä? Yai Bada lija bämacö yaiblamobä a noshi ö̦jödaoma. Mau unö täbä aublou lä culenaja bämalecö aublalema, cama a wa̦ lä wäyämono wei tänö. ²⁷ Bämalecö dodijidawä ajedemabobä, inaja bämalecö li taamama. Wiisibö tä wai wa̦lidiwä sudia mlai ja, bämacö sicö wai wa̦iquiblalou mlai ja, bäma ecö a̦fa tamobä tä cua mlai ja, bäma ecö dodijidawä cuobä. ²⁸ Inaja showawä, bä fe̦yalobö ebänö bä suwäbö ebä nia yai nofimaö cuoje, cama bä nofimamou lä culenaja showawä. Bä suwäbö e lä nofimaö wei, cama a nofimamou. ¿Ö̦jö tawä? ²⁹ Cama a nowamöo lä mlai a yanowamö cua malä mlai. Bä dodijidawä cuobä bä iyaö. Bä nowamöo. Cama bäma ecö lä cui, Cristonö bämalecö nowamaö lä culenaja showawä. ³⁰ Cristo sho jai moli bämacö cuwä yalo, cama a lä nowamöo wei däjä, camiyä bämacö ma cui bämacö nowamamou cuquei. ³¹ Abenaja tä a̦ cuu. Täbä doayou däjä, täbä shelelou nodiablalou showawä. Bä fö̦ö lijamö, bä nöö lijamö bä jaba ma cublamou wei ma cui, bei suwäbö bä nia fa ajedemabojenö, bä sheleleblou majöo,moli bä cublou majöobä. Einaja tä a̦ cuu. ³² Ei tä a̦ jamö tä a̦ yai lä dodijidai tä a̦ ca̦i jo̦yaa. Cäcöbä lä doayou wei cäcöbä a̦fa wayoamou bädao mlai ja, Cristo a wa̦fa yai wayoamou, cama bäma ecö sho. ³³ ¿Ö̦jö tawä? Ö̦jö ma cui, cafä wamacö bufi jaducäblobä tä a̦ ca̦i showawä, wamacö suwäbö lä cui wama bä nofimabä. Cafä wamacö nofi fo̦lio lä culenaja, inaja showawä suwäböfä wama bä nofi tabolanö wama bä nofimabä. Bä suwäbö wama ecö ma cuinö, dodijidawä fe̦yalofä wama bä nosie ca̦i fuabä.

¹ Ijilu wamacö. Bada wama ecö yalo, faafä wama a wa̦ fuabä wamacö waiquiwä. Naafä a ca̦i. Tä malä dodijidai. ² Abenaja tä a̦ cuu. Faafä a ma cui, naafä a ma cui, dodijidawä wama bä ca̦i fa cuonö, wama bä a̦ nia fuaö. Einaja tä a̦ cuu. ¿Ö̦jö tawä? Inaja wamacö cuaaö ja wamacö nia jo̦wa bayeliblamou. Yai Bada tänö tä tamaö lä bufii wei 10 täbä a̦ jibämoquema, Moisesi lija. Ö̦jö colo tä a̦ ja täbä nia lä bayeliblamou wei tä a̦fa wäyämono ma mlai ma cui, bä fö̦ö, bä nöö bä a̦ nia lä fuaö wejei tänö täbä nia jo̦wa shi̦lo yai bayeliblamoma. ³ Bä fö̦ö, bä nöö bä a̦ fuamaö fa bufinö, abenaja tä a̦ cuu majöo malä cui. Dodijidawä wamacö demi cudiobä, wama bä a̦ nia fuaö. Einaja tä a̦ malä cuu wei. ⁴ Bä fö̦ö wama ecönö, ijilufä bä jushuo lulubo dijejä. Wama bä ca̦i dodijidawä fa cuonö, wama bä yai wasöbobä. Wama bä yai yömölabobä. Bada tänö tä tamaö lä bufii weinaja showawä. ⁵ Bä nosie fuamobä wamacö lä tabou wejei wamacö lä cui lija ya wa̦ faö majöo. Wamacö lä tabou wejei bä lija wamacö quilibä bä li. Cristo wama a bufi doblamabobä, wamacö bufi cadidilanö bä nosie da fuaje, ⁶ bä mamo showao däjä shi̦lo mlai. Ö̦jö bä lija wamacö nofi doablamobä mlai. Cristo wama a nosie nö lä fulebö weinaja, wama bä nosie yai fuaö cuobä. Yai Bada tänö wamacö lä taamaö weinaja, bufi doblalolanö wama tä yai tabä. ⁷ Dodijidawä bä da ojodamo. Jai yanowamö täbä lija mlai, jai Bada tä Jesucristo lija, bufi doblalolanö wamacö nö yai ojodamou lä cuquebö weinaja showawä. ⁸ Bämacö cuaaö lä bädao wei tä ma cui, bämacö dodijaö ja, Bada tä lija bämacö nia malä dobämou wei. Wama tä daö. Täbä nosie fuamobä wamacö lä tabou wejei wamacö ma cui, wamacö tabou lä mlajei wamacö ma cui, inaja showawä wamacö nia bluca dobämou cuo. ⁹ Wamacö nosie fuamobä wama bä lä tabole wamacö lija ya wa̦ faö majöo. Afä wama bä lä tabole bä lä cui, dodijidawä bä ca̦i da cuoje. Bä a̦ waitelimo dijä. Cama bä ma cui lija, cafä wamacö ma cui lija, a nosie nia yai lä fuamou wei a lä cui, fedu jamö a malä culadi. Ö̦jö a lä cuinö täbä bluca jimaö fe malä usucuo wei. ¹⁰ Abenaja nomöjöwä, ya wa̦ waicobä. Bada tä Jesucristo lija bä bufi shi̦lo da lofotoicu. Cama etä lofotenö wamacö nö wa̦lojabä. ¹¹ Bä shäyobä jamö bä nowamöobä, sodado bänö duo shibä läbou lä cuaaö wejeinaja bä bufi nowamöo da cuo. Yai Bada lija wama tä bayeli fa dälänö bä da nowamöo, fecula badanö wamacö mölamaö bufi lä doblao wei däjä, wamacö ublao lofotoablalou showaobä. ¹² Yanowamö täbä bädawä lija bämacö ishou malä mlai. Fecula bä yai lija bämacö ishou malä cui. Cama fecula ebä bada lä nosiemou wei bä ca̦i lija. Ei tä mö lä didi wei jamö bä bada läblawä. Ösö jamö ma cui, bä ca̦i bluca wa̦lidiwä cuadayoa. ¹³ Ö̦jö cudeenö, Yai Bada lija wama tä bayeli fa dälänö bä da nowamöo, tä wa̦lidiblou däjä wamacö nö yai wa̦lojaö fe yadiobä. ¿Ö̦jö tawä? Wamacö nö wa̦lojalanö, wamacö ublao lofotoo showaobä. ¹⁴ Bä ublaa da lofotoicu, ö̦jö lä. Bä ishobä jamö, bä lä didio wei sibä ja sodado bä ja̦locaö mlaobä, sibä o̦cabou malä lofotoo wejei. Inaja showawä, cafä wamacö yabäcamou mlaobä, bejedi tä a̦ shi̦lo da bufiboje. Wamacö shi̦lo lä bejedimou wei tänö wamacö nia nowamöo, duo shibänö sodado bä balöcö nowamöablalou lä cuaaö weinaja showawä. ¹⁵ Sodado bä mamicö lofotoablalobä bä mamicö didio lä cuo weinaja, inaja showawä bä mamicö ca̦i lofotoa da cuicu. Täbä bufi lä yanöcödamaö wei tä a̦ dodijidawä lä cuinö, wamacö cajejou mlai ja wamacö yai fuu lofotoablalou showao fe yadiobä. ¹⁶ Inaja wamacö cuaalanö bä bufi yai da nowamöo, sodado bä balöcö nowamöablalou lä cuaaö weinaja showawä. Bä ishobä jamö täbä niyayou lä cuaaö weinaja, tä yai lä wa̦lidii a lä cuinö, cowa wacä befi ca̦inö wamacö befi ma niyaaö wei ma cui, Jesús wama a nofi lä mölabou wei tänö, ö̦jö wama e wacä befi ca̦i nia yaclämaö. ¹⁷ Sodado bä fe nowamöo lä culenaja, Yai Bada lija wamacö fucäamou lä waiquile, ö̦jö tä shi̦lo da bufiboje. Yai Bada tä Bufi lä cui, ö̦jö e ca̦i sibala da showaboje. Ö̦jö e sibala lä cui, Yai Bada etä a̦ waiquiwä. ¹⁸ Yai Bada tä Bufi lija wamacö a̦ fa luluamonö bä nö bayeli shi̦lo da nacao. Ö̦jö lija bä shi̦lo showadi da naco. Bä ca̦i da moyaweicu, wamacö nacou mojiblou mlaobä. Yai Bada ebä lä cui, showadi ö̦jö wama ebä nö bayeli bluca nacabä. ¹⁹ Camiyä ma cui wamale nö ca̦i bayeli da naca, ya tä a̦ wäyäbä jamö ya wa̦ cadidobä. Jesucristo tä a̦ dodijidawä lä jo̦yaono wei ya tä a̦ wawämaö däjä, quilii mlai ja ya tä a̦ wawämaö fe yadiobä. ²⁰ Jesucristo ya wa̦no wäyäbä wale lä shimöleno wei ya lä cui, ya wa̦no wäyäö nofi jushuadii yalo wale fe labouje. ¿Ö̦jö tawä? Quilii mlai ja ya wa̦no wäyäö walalao fe yadiobä, wamale da bayelima. Ya wa̦no wäyäö walalaobä ya waiquiwä malä cui. ²¹ Camiya ya lä cule, eja ya ca̦i lä cuaaö wei, wama tä a̦ bluca ji̦liabä Diquiconö wamacö nia yömölaö, Jesucristo ai e lä cuinö. Ö̦jö yama a yai nofimaö. Dodijidawä Bada tä a̦ shi̦lo fuaö talei. ²² Tä a̦ bluca wäyäbä ya shimaö lä cule, camiyä yamacö lä cule wama tä a̦ ca̦i ji̦liabä. Wamacö bufi ca̦i lofotoblamabä. ²³ Bei. Fayä Yai Bada lija showadi wamacö bayeliblamobä, Bada tä Jesucristo lija ca̦i. Wamacö bufi shi̦lo yanöcömaboböbä. Wamacö bufi ca̦i nofimaboböbä. ¿Ö̦jö tawä, iba wamacö? Jesucristo showadi wama a nofi ca̦i mölabou fe yadiobä. ²⁴ Bada tä Jesucristo a nofimaö shi wa̦lii lä waiquilajei bä lä cui, bä nofi shi̦lo ca̦i ojodaboböbä.