Colosenses

Colosenses

¹ Jesucristonö wale lä shimöleno wei, ei camiyä Pablo cä ya, Yai Bada tänö wale ca̦i shimaö fa bufinö. Bämacö ai Timoteo sho yafäcö cua lä cule. ² Colosa jamö Yai Bada wama ecö bluca lä bälöle wamacö lija ya tä a̦ oni shimaö, Cristo lija wamacö lä cadidou wei wama ecö lä cui lija. Bei. Fayä Yai Bada a lä cuinö, showadi wamacö shi̦lo bayeliblabä. Wamacö bufi shi̦lo yanöcömabobä. Wamacö nofi ca̦i shi̦lo ojodabobä. ³ Cafä bämacö bayelimaö ja, Yai Bada lija yamacö bufi a̦fa doblalou wäyämou talei, Bada tä Jesucristo bä Fö̦ö e lä cui lija. ⁴ Jesucristo wama a nofi jo̦wa lä mölabole, bämacö a̦fa malä ji̦libou wei. Yai Bada cama wama ebä bluca ca̦i jo̦wa nofimaö. ¿Ö̦jö tawä? ⁵ Yai Bada tänö wamacö nia lä dobädayou wei tä ja wamacö mölaö yalo, inaja wamacö jo̦wa li cuaaö. Ö̦jö wama tä a̦ bejedi ji̦lia waiquilema, Jesucristo wama tä a̦ dodijidawä lä ji̦lileno wei däjä. ⁶ Cafä wamacö lija tä a̦ ca̦i malä waloqueno wejei. Jödödöwä täbä lä bälöblai täbä ma cuinö tä a̦ ji̦liaö balaö lä cudujei. Tä a̦ ji̦liaöje yalo, bluca bä lä cublai Jesucristo ebä cublou lä cudi. Cafä wamacö ma cuinö, Yai Bada tänö täbä nofi lä ojodabou wei wama tä a̦ jaba fa ji̦lilänö, ö̦jö tä a̦ bejedi ja, wamacö bufi jaba fa jaducäblalunö, inaja showawä cafä wamacö ca̦i jo̦wa dodijaö balaö lä cuimadi. ⁷ Jesucristo tä a̦ ja, Ebafla lija wamacö damamoma. ¿Ö̦jö tawä? Ö̦jö a lä cui yama a nofimaö dodijio. Jesucristo lija camiyä yamacö ojodamou lä cuaaö weinaja, cama a ma cui a ca̦i ojodamou cuaaö mö feduo. Cristo a wa̦fa wäyäö cadidou dodijio talei. Cafä wamacö lija, ö̦jö yama a fa shimölönö, ⁸ wamacö a̦fa wäa co̦bejeloma. ¿Ö̦jö tawä? Yai Bada tä Bufinö wamacö jo̦wa yai nofiblamaö majöa lä cule. ⁹ Ö̦jö cudeenö, cafä bämacö wa̦no jaba lä ji̦lileno wei däjä, bämacö bayelimaö showaoma. Inaja showawä bämacö bayelimaö cuwä showawä. Yai Bada tänö wamacö bufi jaducämabobä yamacö a̦ faö, wamacö taamaö lä bufio wei wama tä daö jödödöblobä. Bufi dao wamacö yai cuobä. ¹⁰ Dodijidawä wamacö cuobä ya wa̦ faö. Bada tä Jesucristo bäma ecö lä cui, dodijidawä bämacö cuobä bäma ecö waiquiwä malä cui, Jesucristo bäma a bufi yai doblamabobä. Wamacö lä bayeliblayou wei tä lä cui, ö̦jö wama tä shi̦lo yai balamabä yamacö a̦ ca̦i faö. Yai Bada tä lä cui, wama tä ca̦i daö cadidiobä. ¹¹ Cama tä lofotenö wamacö nö yai wa̦lojomabobä. Ö̦jö tä lä doblale a shi̦lo yai lofote cua. Wamacö nö yai lä wa̦lojomabou wei däjä, wamacö bufi shi̦lo yai doblao fe yadiobä. Wamacö bufi ca̦i shi̦lo yanöcöwä cuo fe yadiobä. ¹² Inaja wamacö cuaalanö, bämacö lä Fö̦ömole tä lija wamacö bufi a̦fa shi̦lo doblalou wäyämobä. Cama ebä befi lä taboladi täbä ja bämacö dobämou mö feduodayobä, bämalecö malä tablamaleno wei, tä shi̦i lä wacalamiladi jamö. ¹³ Didi tä jamö tä bada lä läle tänö bämalecö tabou ma balöono wei ma cui, Yai Bada tänö bämalecö fujeblamaö majölayoma. Bä Ijilubö e yai lä nofimaö wei a Bada lä läle jamö, bämalecö yai taa majömaquema. ¹⁴ Ö̦jö lija bämacö nowa co̦molayoma. Bämacö doblou lä mlai, tä nowa bluca mladamalema. ¹⁵ Bei bämacö mamocu yainö Yai Bada bäma a dablaö ma mlai ma cui, cama a lä owäbole a damalalema, bä Ijilubö e lä cui. Yai Bada tänö täbä jödödöwä lä tablaleno wei täbä ja, bä Ijilubö e Bada läa. ¹⁶ Fedu jamö ma cui, bita jamö ma cui, täbä wawädowä lä dablamou wei täbä ma cui, täbä dablamou lä mlai täbä ma cui, ö̦jö lä täbä lä cui, bä Ijilubö e lija, Yai Bada tänö täbä bluca tablamalema. A̦jele bä lä culadi bä ma cui, ai yai täbä bada lä lofote wei täbä ma cui, yanowamö täbä bada lä läblai täbä ma cui, ö̦jö täbä ca̦i tablaö mö fedua showadalayoma. Cama etäbä cuobä, cama lija täbä bluca tablamalema. ¹⁷ Ö̦jö täbä lä cui täbä cua showaa mlai ja, Yai Bada bä Ijilubö e cuo balöo showaoma. Cama a showawänö täbä bluca fuwäbou showaa lä cule. ¹⁸ ¿Ö̦jö tawä? Cama ebä lija, ö̦jö lä a Bada läo. Ö̦jö lä ebä bluca lä cui, cama bei lä fe waiquiwä, cama ebä dodijidawä cuobä. Ai bä demi jocädou balöa mlai ja, cama a shi̦lo demi jocädamaö balölayoma, ba̦limi a cudio shi wa̦libä. ¿Ö̦jö tawä? Jödödöwä täbä lä cublai täbä ja a Bada läobä, inaja a li tablamalema. ¹⁹ Bä Ijilubö e lija, cama Yai Bada tä owämobou bufi malä doblaono wei. ²⁰ Bä Ijilubö e showawä lija tä bluca cadejeblamaö bufi ca̦i doblao co̦oma, cama Yai Bada lija täbä nofio co̦obä. Bita jamö täbä bluca lä cule täbä ma cui, fedu jamö täbä bluca lä culadi täbä ma cui, Yai Bada lija täbä bluca dodijidawä ca̦i cuo co̦obä. Fii balitama tefi jamö, Cristo a i̦yä nö lä bleono wei tä nowa ja, Yai Bada tänö bufi yanöcöwä bämalecö ca̦i cua. ²¹ Cafä wamacö lä cui, Yai Bada tänö wamacö ajedebou balöonomi. Wa̦lidiwä showadi wama tä shi̦lo tama cudeenö, wamacö bufi nö nabämoma. ²² Ö̦jö ma cui, wamacö ajedeamaö co̦obä, bä Ijilubö e fa yanowamöblamalönö, a shämalema. ¿Ö̦jö tawä? Dodijidawä cama wama ecö yaiobä, a shämoa lälayoma. Wamacö a̦fa tamobä tä cua mlai ja, cama a lä cule jamö dodijidawä wamacö ublamabobä. ²³ Bufi lofotolanö, wama a wa̦ nofi mölabou showao däjä, inaja wamacö nia yai taamaö, wamacö bufi cadidou showao däjä. ¿Ö̦jö tawä? Wama tä a̦ dodijidawä lä ji̦lileno wei tä a̦ nofi da cadidileje, ö̦jö lä. Jödödöwä täbä lä bälöblai täbä ma cui lija tä a̦ wäyämamou waiquia lä cudi. Ö̦jö ya tä a̦ wäyäö cuaaö mö feduobä, camiyä Pablo ya ma cui ya e cublaliyoma. ²⁴ Cafä bämacö lä bayeliblaö wei tä nowa ja, wale nö bleaamaö ma culajei, bufi doblalolanö ya nö li fei däjä bleaaö lä cule. Inaja showawä, cama ebä bayeliblabä, Cristo a ma cui a nö bleaaö malä balöono wei. ¿Ö̦jö tawä? Cama ebä lä cui, ö̦jö cama bei a. Camiyä ma cui, cama ya ebä bayeliblabä ya nö ca̦i bleaaö mö feduobä tä cua ja, ya nö bleaaö cuquei lä. ²⁵ Cafä judio wamacö lä mlai wamacö bayeliblamou mö feduobä, Yai Bada tänö camiyä wale lämaquema. Cafä wamacö lija, Yai Bada jödödöwä ya etä a̦ wawäblamabä, ö̦jö ya e. ²⁶ Täbä jaba lä bälöono wei täbä lija, Yai Bada tänö tä a̦ ma jo̦yabono wei ma cui, fei däjä cama ebä lija tä a̦ yai wawäblamalema. ²⁷ Ö̦jö tä a̦ jaba lä jo̦yaono wei tä a̦ lä cui, cama bluca ebä lija tä a̦ ya̦cumö wawäblamaö bufi doblaoma, judio bä lä mlai bä nia lä bayeliblamono wei tä a̦ dodijidawä lä cui. Ö̦jö tä a̦ lofote dodijiwä. Judio wamacö lä mlai wamacö lija, Cristo a Bufi nia lä bälöo wei, ö̦jö tä a̦ li waiquiwä. Cristo wama a Bufi tabou waiquia yalo, wamacö nia lä doblaodayou wei tä ja wamacö mölaö. ²⁸ Wawädowä, ö̦jö yama a wa̦fa shi̦lo yai wäyäö. Yamacö a̦ moyawälanö yama bä bluca wasöbou, yama bä bluca ca̦i yömölabou, Yai Bada lija bä nia lä icuo wei däjä, Cristo ebä bufi bluca jaducäwä ca̦i icuobä. ²⁹ Inaja ya bä nia fa taamanö, ya ojodamou. Cristo a lofotenö ya nö yai wa̦lojaö lä cule.

¹ ¿Ö̦jö tawä? Jesucristo wama ecö bluca bayeliblamobä, ya nö wa̦lojaö cuaaö talei. Ö̦jö lä wama tä dabä ya wa̦. Cafä wama ecö ma cui, Laodisea jamö ebä lä bälöle bä ma cui, wale daö lä mlajei ebä ca̦i bluca ma cui, wamacö bluca bayeliblamobä. ² Wamacö bufi ca̦i bluca lofote cuobä ya ojodamou. Wamacö lä nofimayou wei tänö, jai moli wamacö mashi cublobä. Bufi jaducälanö, Jesucristo wama tä a̦ nofi yai mölabobä. Yai Bada tänö tä a̦ jaba lä jo̦yabono wei wama tä a̦ fa dalalönö, ö̦jö tänö Cristo wama a yai dablabä. Ö̦jö däjä wamacö bufi nia shi̦lo yai doblalou. ³ Cristo lijamö tä nowa yai lä bluca wei tä cua. Bufi jaducäwä tä ma cui, bufi dao tä ma cui, ö̦jö lija tä shi̦lo yai dablamou ayao. ⁴ Shomi bä a̦ ja, wamacö mölamamou mlaobä ya wa̦. Bä a̦ faö ma liyäjäablalou wei ma cui, bä möla dijä. ⁵ Mijamö wamale möö ma mlai ma cui, bämacö bufibou showao. Wamacö bufi shedecoimi yalo ya bufi doblalou, Cristo wama a nofi ca̦i lofote mölabou yalo. ⁶ Jesucristo a wa̦fa Bada lä wäyämou wei, ö̦jö wama tä a̦ bejedi bufibou waiquia. Wama a nofi Badabou waiquia ja lä, ö̦jö a nosie shi̦lo yai da fuaje, ö̦jö lä. ⁷ Fii fibä nasöcö fa dalonö, tefibä yai ublao lofotoo lä culenaja, tefibä yai ösöö lä culenaja, inaja showawä Cristo lija bä bufi ca̦i lofote yai da cuo. Wamacö yömölamou däjä, Cristo a wa̦fa lä wäyämono wei tä a̦ nofi shi̦lo yai lofote da mölaboje. Yai Bada tänö wamacö bayeliblaö cudeenö, ö̦jö lija bä bufi a̦fa shi̦lo doblao da wäyämo. ⁸ Bä da moyaweicu. Yai Bada etä a̦fa jole lä wäyäö wejei bänö wamacö mölamaö mlaobeje. Bä a̦ bejedimi. Bä a̦ ca̦i nowa cuami. Yai Bada tä a̦ mlai, ö̦jö yanowamö tä a̦ li. Fecula tä a̦. Ö̦jö bä lä cuinö, Cristo etä a̦ lä bejedi wei tä a̦ wäyäimije. ⁹ Bä möla dijä. Cristo a ma yanowamöblaleyoluno wei ma cui, Yai Bada a cuwä lä dodijiinaja a cuwä mö feduwä showaoma. ¹⁰ Cafä wamacö ma cui, ö̦jö lija wamacö yädäa yalo, dodijidawä wamacö tamabou malä waiquile. Wamacö nö nia yai lä bleaaö wei tä cuami. Bada täbä bluca lä läblai täbä ma cui, täbä bada lä nosiemou wei täbä bluca ma cui, ö̦jö täbä lija Cristo a yai Bada läa. ¹¹ Cristo lija wamacö yädäa yalo, jai wamacö mosi sicö joyamolayoma wamacö cuwä waiquiwä. Bei wamacö mosi sicö joyamou mlai ja, bei wamacö bufi showadi lä läono wei, ö̦jö lä wamacö bufi shi̦lo yai joyamolayoma. ¿Ö̦jö tawä? Yanowamö täbä lija wamacö mosi sicö joyamou mlai ja, Cristo lija bei wamacö bufi wa̦lidiwä joyamolayoma. ¹² Wamacö fe lä ojomamono wei däjä, Cristonö wamacö ca̦i nomawä lä didiodayono wei wama tä jimama. Wamacö bocäblou lä co̦ono wei däjä, camanö wamacö ca̦i demi lä jocädaliyono wei wama tä ca̦i jimaö mö feduo showaoma. ¿Ö̦jö tawä? Yai Bada tä lofotenö Cristo a demi lä jocädamaleno wei tä lä cui, ö̦jö wama tä a̦ bejedi bufilema yalo, inaja wamacö taamamou mö feduo showaoma. ¹³ Cafä Colosateli wamacö lä cui, wamacö doblonomi. Judio wamacö cuonomi yalo, Yai Bada wama a danomi. Ö̦jö cudeenö, jai nomawä wamacö jaba cuoma. Ö̦jö ma cui, Cristo a demi jocädou lä co̦layono wei jamö, cafä wamacö ma cui wamacö demi ca̦i jocädamaö yädäa showalayoma. Bämacö doblou ma mlai, Yai Bada tänö ö̦jamö lä tä nowa bluca mladamalema. ¹⁴ ¿Ö̦jö tawä? Wa̦lidiwä bäma tä lä tano wei, bämalecö a̦fa oniboma. Bämacö nowa nia lä co̦amamono wei tä a̦ ca̦i. Bämalecö nö bleaamabä tä cuo waiquioma. Ö̦jö däjä, Cristo a lä shämolayono wei tefi jamö, ö̦jö tä a̦ oni ca̦i shadia fa yädämacönö, ö̦jö lija tä nowa bluca mladamaö showadalayoma. ¹⁵ Bämalecö lofotobou co̦daaö mlaobeje, fecula bä ca̦i bluca ujudua showamalema, cama ebä bada lä läle bä ca̦i. Cristo a shämou lä läono wei tänö, wawädowä bä nö bluca blemalalema. ¹⁶ ¿Ö̦jö tawä? Wamacö bayeliblamobä, ö̦jö lä tä waiquiwä. Wamacö a̦fa nö bleaaö ma taöje däjä ma cui, bä a̦ ji̦lia dijejä. Nii ai bä ja wamacö lä waio wei wamacö bayeliblobä, tä a̦fa ma wäyäö wejei ma cui, bä jolemou. Judio täbä iyaö ca̦i co̦camobä jamö wamacö ca̦i lä loo wei tänö ca̦i mlai. Ai wama a nofi belibo lä jaducäbou wei tänö ca̦i mlai. Sábado däjä täbä lä yanöcöo wei, ö̦jö wama tä nofi jalu ca̦i ma jaducäbou wei ma cui, ö̦jö tänö wamacö nia ca̦i bayeliblamoimi. Bä a̦ ji̦lia dijejä. ¹⁷ Moisesinö ö̦jö tä a̦ jaba ma wäyäno wei ma cui, ö̦jö tä a̦ cuo balöblaobä tä a̦ li cuoma, tä nia yai lä cuono wei bäma tä nö e̦le dablabä. Fei däjä Cristo a yai wawäblaliyoma yalo, tä a̦ jaba lä läono wei tä a̦ nia bufiblamou co̦omi. ¹⁸ Bä da moyaweicu, Yai Bada lija wamacö nowa nia lä co̦amamodayou wei tä wa̦liaö dicoo mlaobeje. Bä jolemou. A̦jele bä bufiblamobä, tä nabä ca̦i shimaö dicooje. Cama bä lija tä jo̦wa wawädowä lä mömono wei tä nofi ca̦i yaibouje. Cama bä bufi jole cuu lä bashio wei tä a̦ ma cui, tä a̦ wäyäöje. Bä nofi yaimobobä tä cua ma mlai, bä nofi doo. ¹⁹ Cristo lija ö̦jö bä yädäami, bei bämacö fe lä cui lija. ¿Ö̦jö tawä? Bei bämacö fe lä cui, ö̦jö Cristo a waiquiwä. Yanowamö bämacö bayucuwä yalo bämacö bayelio. Inaja showawä, Cristo lija bämacö bayeliobä bämalecö co̦camabou. Ö̦jö lija bämacö co̦caa yalo, Yai Bada tänö dodijidawä bämalecö bufi badamaö. ²⁰ Yanowamö wama täbä a̦ bufiblaö mladobä, Cristonö wamacö ca̦i nomaa waiquilayoma ja lä, ¿wedi tä tabä yanowamö täbä a̦ bädawä ma cui ja, wamacö nia inaja cuaaö fe yadiblou? Yanowamö täbä lija wamacö yädäobä wamacömi. Cama etä a̦ lämaö bufi lä doblao wejei bä lija, ¿wedi tä tabä ö̦jö bä lija wamacö noshi ö̦jödaa dicoquei? ²¹ Wamacö wasööje däjä, abenaja bä cuu. —Ö̦jö wama täbä nia fuliimi. Ö̦jö wama täbä nia waimi. Ö̦jö wama täbä nia fubaö bädaomi —bä cuu. ²² Ö̦jö yanowamö täbä a̦ bluca. Ö̦jö täbä ba̦limi malä mlai, tä a̦ lämaö bashiblaobeje. ²³ Ö̦jö bä a̦ lä fuaö wejei bä lä cui, yanowamö täbänö bä bufi a̦fa jole jaducäwä taö ma dao wejei ma cui, bä jolemou. Bä a̦ fuamou si ijejeo ma mlai ma cui, bä nia cadidou fa dablamonö, bä wabäo fe yadio. Bä dodijidawä dablamobä, cama bä ma cui, bä nö bleaamamou ojode. Ö̦jö ma cui, ö̦jö bä a̦ fuaö fe ma yadio wejei ma cui, bei bä bufi jamö etä wa̦lidiwä bädou däjä, bä nö wasöobimi waiquiwä. Bä bayeliblamoimi.

¹ ¿Ö̦jö tawä? Cristonö wamacö demi ca̦i jocädou waiquilayoma ja lä, fedu jamö tä bluca lä cule tä ja, bä bufi shi̦lo yai da cuo. Ö̦jamö Yai Bada jayu boco mashi jamö, Cristo a dicäadayoa. ² Ö̦jamö täbä lä culadi täbä ja, bä bufi shi̦lo yai da daeo, bita jamö täbä lä cublai täbä ja mlai. ³ Cristonö wamacö ca̦i nomaa malä waiquilayono wei. Ö̦jö sho ba̦limi wamacö nia lä cuo wei, Yai Bada tänö a wawämaimi showawä ma cui, ⁴ Cristo a bädodayou däjä, inaja showawä cafä wamacö nia ca̦i bädou cuo. Ba̦limi bämalecö yai lä tablamaö wei, ö̦jö a. Cama a doblao lä culenaja, wamacö ca̦i nia doblao cuo mö feduo. ⁵ ¿Ö̦jö tawä? Yanowamö täbä showadi lä cuaaö weinaja wamacö cuaaö mö feduobä wamacömi. Bä cuaa dijä, ö̦jö lä. Wamacö nofi beshili jushublalobä wamacömi. Shami wama tä nia fuliimi. Wamacö bufi nia ca̦i waiyoimi. Wa̦lidiwä tä taö bufi doblao dijejä. Madofi täbä ma cui ja, wamacö bufi nia ca̦i waiyoimi. Bä bufi lä waiyou wei bä lä cui, Yai Bada a bufiblaö mlajei ja, shomi täbä ja bä bufi shi̦lo cuablalou dicoo. ⁶ Inaja täbä yanowamö cuaaö dicoo yalo, Yai Bada tä nö wa̦lowä lä jushudou wei tä nia wawäblou. ⁷ ¿Ö̦jö tawä? Wamacö mojodi bälöo showao däjä, inaja wamacö jaba cuaama. ⁸ Ö̦jö ma cui fei däjä, ei wama tä nia bluca mladamaö. Jushuo tä lä cui, täbä nö wa̦lowä lä jushudou wei tä ca̦i lä cui, täbä nofi lä wa̦libou wejei tä ca̦i lä cui, ö̦jö wama tä nia bluca mladamaö. Ai täbä a̦fa lä wayoaö wejei tä ca̦i lä cui, bä caficö a̦ shami lä faö wei tä ca̦i lä cui, ⁹ täbä lä joleblamaö wejei tä ca̦i lä cui, ö̦jö wama tä nia ca̦i bluca mladamaö. Yanowamö täbä bufi showadi lä cuaablalou wei, wama tä waia malä waiquileno wei. Wamacö jaba lä cuaano wei tä ca̦i. ¹⁰ Yai Bada lija, dude wamacö bufi tablamoa waiquilayoma. Cama a lä culenaja wamacö bufi cuo mö feduobä wamacö bufi malä jaducäamaimadi, cama wama a yai daö shaliliobä. ¹¹ Ö̦jö bäma ecö bluca waiquiwä cudeenö, moli bäma ecö mashi waiquiwä. Clesiateli bä ma cui, judio bä ma cui, bä mosi sicö lä joyamou wei bä ma cui, bä mosi sicö joyamou lä mlai bä ma cui, ö̦jö bäma ecö bluca. Shomi täbä ma cui, oni sibä daö lä mlajei täbä ma cui, täbä a̦ fuamobä bä lä tabou wejei bä ma cui, bä tabou lä mlajei bä ma cui, inaja showawä. Camiyä bämacö nofi yaimamobä bämacö mlai, bäma a nofi nia lä yaibou wei, ö̦jö Cristo a waiquiwä. Cama bäma ecö bluca lija a cua. ¹² Yai Bada tänö wamacö lä yaileno wei wama ecö waiquiwä. Ö̦jö wama ecö yaia. Cafä wamacö yai nofimaö. Ö̦jö cudeenö abenaja bä yai da cuaa. Bä nofi yai ojode da tayo. Dodijidawä bä ca̦i da cuoje. “Camiyä yai”, bä bufi cu dijä. Bufi oquewä bä yai da cuo. Bä bufi yai yanöcöo fe da yadio. ¹³ Täbä nofimaö fe da yadioje. Wamacö ma taamaö wejei ma cui, tä nowa tabo dijejä. Yai Bada tänö wamacö nofi lä asibono weinaja, cafä wamacö nofi asiboyou mö feduobä wamacö. ¹⁴ Abenaja bä shi̦lo yai da cuaa. Bä bufi yai da nofio, ¿ö̦jö tawä? Wamacö yai lä nofimayou wei tänö, dodijidawä wamacö nia shi̦lo yai cuo. ¹⁵ Jai moli wamacö dodijidawä cuobä, Yai Bada tänö wamacö bufi yanöcömabou. Wama bä bufi yanöcöwä ca̦i cuobä, wamacö nacama. Ö̦jö tä nabä shi̦lo yai da cadidoje. Yai Bada lija wamacö shi̦lo lä bayeliblamou wei tä ja, bä bufi a̦fa shi̦lo doblalou da wäyämo. ¹⁶ Cristo etä a̦ jamö, bä bufi yai shi̦lo da taamamo. Wamacö bufi jaducälanö bä da yömölayo. Bä ca̦i da wasöyo. Yai Bada tä ja wamacö bufi doblalanö, ö̦jö lija täbä a̦ amowa lä yädäblai täbä a̦ shi̦lo da taje. Nö badabö David etäbä a̦ ca̦i. Yai Bada tä Bufinö täbä a̦ lä bädamaö wei täbä a̦ ca̦i. ¹⁷ Wamacö cuaaö lä bädao wei tä ma cui ja, Bada tä Jesús wama a nofi jaducäbolanö, wamacö yai cuaabä. Wamacö a̦ faö lä bädao wei tä ma cui ja, inaja showawä wama a nofi nia shi̦lo jaducäbou cuo. Inaja wamacö cuaalanö, Bada tä Jesús a wa̦nö, Yai Bada bäma a nofi lä Fö̦ömale lija bä bufi a̦fa doblalou da wäyämo. ¹⁸ Bei. Bä suwäbö wama ecönö, fe̦yalofä bä a̦ da ji̦liaje. Bada wama ecö yalo, inaja wamacö cuaabä wama ecö waiquiwä. ¹⁹ Bä fe̦yalobö wama ecönö, suwäböfä bä yai da nofimaje. Dodijidawä bä ca̦i da cuoje, bufi jushujulanö mlai. ²⁰ Bä ijilubö wama ecö lä cuinö, naafä, faafä dodijidawä showadi bä a̦ shi̦lo da fuaje. Inaja wamacö cuaaö ja, Bada wama tä bufi nia malä doblamabou wei. ²¹ Bä fö̦ö wama ecö. Ijilufä wama bä lä wasöablalaö wei tänö, bä bufi nö bleaama dijejä, wama bä bufi wa̦lidiblamaö dicolo. ²² Bä nosie fuamobä wamacö lä tabou wejei wamacö lä cui lija ya wa̦ faö majöo. Bita jamö wamacö bälöo showao däjä, wamacö lä tabou wejei dodijidawä bä a̦ da fuaje. Bä mamo showao däjä shi̦lo mlai. Yanowamö täbä lija wamacö dodijidawä dablamobä ca̦i mlai. Bada tä Jesucristo lija wamacö fa quilinö, bufi cadidilanö wama bä a̦ shi̦lo yai fuabä. ²³ Tä nabä shimaö lä bädao wejei tä ma cui ja, dodijidawä wamacö ojodamobä. Jai yanowamö täbä lija mlai, jai Bada tä Jesucristo lija, bufi doblalolanö wamacö nö yai ojodamou cuaaö lä cuquebö weinaja showawä. ²⁴ Yai Bada tänö wamacö no nia ojode lä co̦amaö wei, wama tä malä dale. ¿Ö̦jö tawä? Cama ebä lija täbä nia lä jibäadayou wei täbä ja, cafä wamacö ma cui, wamacö nia ca̦i malä dobäö wei. Bada tä Cristo wama a nosie yai fuaö malä cui. ²⁵ ¿Ö̦jö tawä? Wa̦lidiwä talewä bä ma cui, cama etä nowa nia ca̦i co̦amamou. ¿Ö̦jö tawä? Bä lä dodijaö wei bä lä cui, bä nowa nia shi̦lo co̦amamou ayao malä mlai. Jödödöwä tä lä tamou wei tä ma cui, tä nowa nia co̦amamou.

¹ Wamacö a̦ fuamobä wama bä yanowamö lä tabou wei wamacö lija ya wa̦ faö majöa. Afä wama bä lä tabole, dodijidawä bä da taamaje. Bä nö bleaama dijejä. Afä wama bä tabou lä culenaja, cafä wamacö ma cui, Yai Bada tänö wamacö ca̦i tabou mö fedua malä culadi, wama a nosie fuabä. ² Yai Bada lija showadi bä da naco. Wamacö a̦ faö mojiblou mlaobä, bä ca̦i da moyaweicu. Bä bufi a̦fa ca̦i doblalou da wäyämo. ³ Camiyä yamacö ma cui, yamalecö nö bayeli ca̦i da naca, Yai Bada tänö tä tamabou ja, Cristo etä a̦ daö lä mlalajei jamö yama etä a̦ wäyäbä, etä a̦ jo̦yao lä balöono wei etä a̦ lä cui. Ö̦jö ya tä a̦ wäyäö nofi jushuaö yalo wale fe labou lä culajei. ⁴ Ya tä a̦ wäyäö walalao fe yadiobä, yamale da bayelima. Yai Bada tänö, walalawä tä a̦ wäyämaö lä bufio weinaja showawä. ⁵ Bä bufi da moyaweicu, Jesucristo ebä lä mlai wama bä ca̦i cuo däjä, showadi wamacö dodijabä. ¿Ö̦jö tawä? Wamacö dodijabä tä cua ja, bä dodijaö da showadao. ⁶ Dodijidawä bä a̦ da wayomaje, wamacö a̦ ji̦liaö bufi doblaobeje. Inaja wamacö fa cuaanö, wamacö yai wa̦liije däjä, bufi jaducälanö wamacö a̦ nia fuo showadao. ⁷ Camiya ya lä cule, eja ya ca̦i lä cuaale wama tä a̦ bluca ji̦liabä, Jesucristo ai e lä cuinö, Diquico a wa̦fa lä culenö, mijamö wamacö nia yömölajalayou. Ö̦jö yama a yai nofimaö. Bada tä lä cui, dodijidawä a wa̦ shi̦lo fuaö talei. ⁸ Tä a̦ bluca wäyäbä ya shimaö lä cule, camiyä eja yamacö lä cuaale yamalecö a̦ ji̦liabä. Ö̦jönö wamacö bufi nia ca̦i lofotoamaö. ⁹ Onesimo ya nia ca̦i shimaö, cafäteli ai a mö feduwä lä cui. Jesucristo ö̦jö lä e ca̦i. Ö̦jö yama a ca̦i nofimaö. A shi̦lo cadidou talei. Eja tä bluca lä cublole wama tä a̦ ji̦liabä, ö̦jö cäcöbänö wamacö nia yömölaböö. ¹⁰ Eja yafälecö fe lä labolajei a lä cui, cafä wamacö lija a wa̦fa ca̦i wäamou bufi doblao, Alidaco a wa̦fa lä cule. Marcos a ma cui, a wa̦fa ca̦i wäamou bufi doblaa lä cule, Benabei bä jeli e lä cui. Cafä wamacö lija, Marcos ya wa̦fa wäyäö mada waiquioblei, ¿ö̦jö tawä? Mijamö cafä wamacö lijamö a waloo ja, dodijidawä a da walomacöje. ¹¹ Jesusi a ma cui a wa̦fa ca̦i wäamou bufi doblao, Juto a wa̦fa ca̦i lä cule. Ö̦jö bä lä cui, judio bä mö feduwä. Yai Bada tänö dodijidawä cama ebä ca̦i lä cuo wei, ö̦jö lä bä sho yama etä a̦ wäyäö. Yama etä a̦ lä wäyäö wei yamacö lä cui lija, judio ai bä cuami. Ö̦jö lä yamacö waiquiwä. Ö̦jö lä bänö wale bufi shi̦lo yai lofotoamaöje. ¹² Ebafla a ma cui, cafä wamacö lija a wa̦fa ca̦i wäamou bufi doblao, cafäteli ai a mö feduwä lä cui. Jesucristo showadi a nosie fuaö. Ö̦jönö showadi wamacö nö shi̦lo bayeli yai nacaö dodijio talei, Jesucristo lija wamacö bufi shi̦lo yai lofote cuobä. Yai Bada tänö wamacö taamaö lä bufii wei tä ja, wamacö bufi wedinajamou mlai ja, wama tä a̦ yai lofotobobä, wamacö nö bayeli nacaö. ¹³ ¿Ö̦jö tawä? Cafä wamacö bayeliblamobä, a nö wa̦lojaö talei. Ya daö. Laodisea jamö ma cui, Yelaboli jamö ma cui, ö̦jamö Jesucristo ebä lä bälöblai bä ca̦i bayeliblamou mö feduobä, a nö wa̦lojaö. ¹⁴ Luca a ma cui, cafä wamacö lija a wa̦fa wäamou bufi doblao mö feduo, täbä fe jalili lä coamaö wei a lä cui. Ö̦jö yama a ca̦i nofimaö dodijia. Dema a ma cui, a wa̦fa ca̦i wäamou bufi doblao. ¹⁵ Laodisea jamö Jesucristo ebä lä bälöle bä lija wale a̦fa da wäyäje, ¿ö̦jö tawä? Nifa lija ca̦i, cama e yafi jamö bä lä yododaö wei bä lija ca̦i. ¹⁶ Ei ya tä a̦ lä oniblale, cafä wamacö lija tä a̦ doamou fa balöonö, Laodisea jamö Jesucristo ebä lä yododaö wei bä lija si shimaö da majöoje, öjamö tä a̦ ca̦i doamou mö feduobä. Laodiseateli bä lija ya tä a̦ oni lä shimöleno wei, wama si ca̦i fa nacalänö, cafä wamacö ma cuinö, ö̦jö wama tä a̦ nia ca̦i doaö mö feduo. ¹⁷ Aquibo lija wamale a̦no da wäya. Cama lija Bada tänö tä tamaö lä bufi wei tä ja, a mojimou mlaobä. A wa̦ yai fuabä. ¹⁸ Camiyä Pablo ya lä cuinö, camiyä ya imicönö ei ya tä a̦ oni taö lä cule, cafä wamacö lija ya wa̦fa wäyämobä. Eja wale fe lä labolajei wamale nofi da jaducäbo, wamale bayelimabä. Bei. Yai Bada a lä cuinö, showadi wamacö bayeliblabä. Wamacö nofi ojodabobä.