Hechos

Hechos

¹ Deofilo, cafä nija ya si jaba lä oniblaleno wei si ja, Jesús ya wa̦fa wäyäö balöoma. A lä cuaano wei tä ma cui ja, täbä lä yömölano wei tä ma cui ja, ö̦jö ya tä a̦ bluca wäyäö waiquioma, ² a ösöö showao mlao däjä, a lä cuaano wei tä a̦ lä cui. ¿Ö̦jö tawä? Fedu jamö a co̦amamou showao mlao däjä, cama ebä nosiemaö balöoma, bä lä shömöleno wei bä lä cui. Yai Bada tä Bufinö a wa̦ fa cadidonö, bä nosiemama. ³ A nö lä bleaamano wejei däjä a fa nomalönö, a demi ca̦i jocädou fa co̦lonö, cama ebä showawä lä cui nija a demi damoa co̦laliyoma. A lä cuaano wei tä blucanö, a nö demi ö̦jöbömolayoma. 40 tä mö didi cublou jaöo mlao däjä, ö̦jö bä nija a dablamou lä cuaale jamö, Yai Badanö cama ebä nia ca̦i lä cuo wei tä a̦ wäyäö cuaama. ⁴ ¿Ö̦jö tawä? Jesúsnö bä ca̦i cuo showao däjä, bä juu wasöma. —Äyämö, Jelusale jamö bä da yanöcöicu —a cuma—. Fayänö tä a̦fa wäyäö lä balöono wei tä ja, bä nö da daicu, cafä wamacö nija ya tä a̦fa da wäyäblei tä lä cui. ⁵ Juan a lä cuinö, mau u ja bä fe ojomaö ja, mau unö bä jödödöblamama ma cui, tä nö dedejeblou mlai ja, inaja showawä, Yai Bada tä Bufi yainö wamacö nia jödödöblaö nomöjöo —a cuma. ⁶ Ö̦jö cudeenö, bä lä yododano wei däjä, Jesús a wa̦limaje. —Bada tä. Isaeli yama ecö lä cui, eja yamacö nia bälöo shi ma wa̦lio wei ma cui, shomi bä bälöa läa showaa bashia lä cule. ¿Fei däjä, yamalecö bälöa lojodomabobä, ei tä waiquiwä tawä? —bä cuma. ⁷ Jesús a wa̦ juo ja, abinaja bä nowa tama. —Ö̦jö tä lä cui wama tä dabä wamacömi. Fayänö ö̦jö tä shino daö ayao. “Fei däjä dodijiwä”, a cubä, ö̦jö a shino. ⁸ Ö̦jö ma cui, cafä wamacö nija Yai Bada tä Bufi bälöo däjä, wamacö nö wa̦lojoblobä, wamacö nia bayeliblamou. Ö̦jö däjä, Jelusaleteli bä nija wamale a̦fa nia wäyäö. Judea jamö ma cui, Samalia jamö ma cui, wamale a̦fa wäyäö fa cuaaimadunö, täbä bälöo lä jödödole jamö ma cui, wamale a̦fa nia wäyäö cuaaö —a cuma. ⁹ Inaja bä nowa fa talönö, bä mamo showao däjä, Yai Bada tänö a ösömalefälöma. Ölajashi anö, a nö daamou mladaliyoma. ¹⁰ Fedu jamö Jesús a lä ösöimadi jamö, bä mö nonoo showao däjä, bolacabö täcöbö bädaliyoma. Camishi shuducaje cäcö labe ja, täcöbö didioma. ¹¹ Abinaja bä nowa taböma. —Calilea tä ulifi jamö wamacö lä bälöle, ¿wedi tä tabä, bei wamacö mö li nonodia cule? Ö̦jö Jesús a lä cui, fedu jamö a lä ösölöfe, wamacö lä dacöfe a lä cui, a nia itou co̦oyoluu. Cafä wamacö mamo showao däjä, fedu jamö a ösöa lä culufenaja, inaja a nia cublou co̦o. ¹² Oliba tä a̦fa balöcö lä jilabolajei jamö, Jesús a fa co̦lufälönö, cama ebä lä nocamabono wei bä lä cui, Jelusale jamö ebä co̦a co̦layoma. Yo ajededaoma. ¹³ Bä fa yafilönö, bä bälöblao lä feyacaono wei jamö bä fa dubofälönö, bä lucälayoma. Abinaja bä bluca cuoma, Pedro, Juan, Santiago, Andrés, Felipe, Tomás, Badolomei, Mateo, ö̦jö bä bluca lucälayoma. Afeo bä ijilubö Santiago a ca̦i lä cui. Simón a ca̦i lä cui, Lomateli täbä lämabou nofi lä wa̦libono wei a lä cui. Santiago bä ijilubö Juda a ca̦i lä cui. ¹⁴ Ö̦jö bä lä cui, Yai Bada nija showadi bä a̦ fadima. Ö̦jö bä ma cui, suwä bä ma cui, Jesús bä nöö María e ma cui, Jesús bä fääshä ebä ma cui, inaja bä bluca cuoma. ¹⁵ Bei. Jesucristo ebä lä yododano wei jamö, jai 120 bä cuoma. Ö̦jö bä nija Pedro a fa ubladalunö, a wa̦ falayoma. ¹⁶ —Iba wamacö. Juda a lä cuaano wei tä ja, bämacö bufi wedinajamobä tämi, Jesús a juwäabeje, täbä lä lulubono wei a lä cui. Ö̦jö tä da cublalui, Yai Bada a wa̦no bejedi wawäblobä, tä li cublaliyoma. ¿Ö̦jö tawä? Nö badabö David a lä cui, Yai Bada tä Bufinö a wa̦ fa cadidamanö, a wa̦fa wayoaö malä balöono wei. ¹⁷ Camiyä yamacö ai a cuoma. Yai Bada a nosie juamobä, ö̦jö a ma cui a ca̦i taamaö mö feduo showaoma. ¹⁸ ¿Ö̦jö tawä? —Pedro a cuma—. Ö̦jö a doblou lä mlaono wei tä nowa ja, blada bä fa lululänö, ö̦jö bä ja, tä nowa ulifi co̦amamoma. Ö̦jö tä ulifi showawä ja a fa quelunö, bei shibä bläshäblaliyoma. ¹⁹ Ö̦jö tä lä cui, Jelusaleteli bä blucanö tä a̦ ji̦lilemaje. Ö̦jö tä a̦ ji̦lilemaje yalo, I̦yäbö wei tä a̦fa ulifi jilaquemaje. Cama bä caficö a̦ ja, Asedama tä a̦ li cuoma. ²⁰ ¿Ö̦jö tawä? Tä a̦ oni malä cule. Amowa täbä a̦ oni ja, tä a̦ lä cuu weinaja showawä. Fei däjä a yafibö nia blocoo. Ö̦jamö lä ai a nia bälöo nodiomi. ’Einaja tä a̦ cuu. Abinaja ai tä a̦ ca̦i —Pedro a cuma—. Cama a bada läobä tä ma cuono wei ma cui, fei däjä ai a nia läo juo nomöjöo. ’Einaja tä a̦ cuu. ²¹ - ²² Ö̦jö cudeenö, ai yama a nia lämabou nomöjöo —Pedro a cuma—. Bada tä Jesúsnö yamalecö ca̦i juu lä cuaano wei jamö, showadi bä lä co̦loloablalono wei bä lä cui, eja ai bä coyocoa. Juan nija Jesús a fe lä ojoblamono wei däjä, bä coyocoo fa showaonö, showadi camiyä yamacö nija bä yädäablalou cuaama. Fedu jamö Jesús a lä co̦amamono wei däjä ma cui, ö̦jö däjä bä ca̦i yädäo showaoma. Ö̦jö bä nija moli a nia yaiamou, Jesús yama a wa̦fa demi jocädou wäyäö cuaabä jamö, ö̦jönö yamalecö a̦ bayeliblaö cuaabä —a cuma. ²³ Jesucristo ebänö, ö̦jö a wa̦ fa ji̦liläjenö, bolacabö cäcöbö jömöblalemaje. Ai bänö, José Basabaa, a jömöblalemaje, Juto a wa̦fa ca̦i lä cuono wei. Madia a ca̦i jömöblaö mö fedulayomaje. ²⁴ Ö̦jö däjä, Yai Bada nija bä nö bayeli nacao ja, abinaja bä cuma. —Bada tä. Cafänö wa täbä bufi bluca yai lä daö wei, cafä wa. Ei cäcöbö nija wa yaiamaö lä bufile, camiyä yamacö nija a jömaö da cadido, ö̦jö a yai cuobä. ²⁵ Cafä wa nosie juamobä a Juda lä cuono wei jamö, a bada läo nomöjöobä. Jesucristonö bä lä shömöleno wei bä nija a yädäobä. Ö̦jö bä nija Juda a yädäobä a ma cuono wei ma cui, a yacläa dicolayoma. A nö bleaabä jamö a alayoma —Yai Bada nija bä cuma. ²⁶ Ö̦jö däjä, madofi a jamö cäcöbö a̦fa fa oniblalöjenö, a nia lä yaiono wei a wa̦fa nia oni wawäö mömaje. ¿Ö̦jö tawä? Inaja bä fa cuaanö, Madia a wa̦fa oni wawälayoma. Ö̦jö a wa̦fa fa wawälönö, Jesucristonö bä lä shömöleno wei bä nija a yädäquema.

¹ Showadi bä nii lalou däjä, judio bä iyaö ca̦i lä co̦camou wei tä cublou fa co̦lonö, bä yododabä jamö Jesucristo ebä bluca co̦cablou co̦layoma. ² Yedu jai wadoli a wa̦ bada cuwä tä a̦ fa itoimanö, bä lä loono wei a yafi lä cui jamö, a wa̦ jödödöblaliyoma. ³ Ö̦jö bä nija, jai cowa wacöbä cuwä wacöbä wai fa shedequeblalunö, ö̦jö bä bluca nija wacöbä wai döcäcäolaliyoma. ⁴ Inaja tä fa cuonö, Jesucristo bluca ebä nijamö, Yai Bada a Bufi fa jödödöblalunö, bä a̦ faö shomiblamalema. Yai Bada a Bufinö bä a̦ fa bädamanö, shomi bä caficö a̦ ja bä a̦ bluca fadou cuaama. ⁵ Bei. Ö̦jamö, Jelusale jamö, judio bä bluca bälöblaama, Yai Bada nija bä bejedimou bufi lä doblaono wei. ⁶ Ö̦jö a wa̦ bada lä ji̦lileno wejei däjä, bä bluca co̦cabloyoluma. Bä a̦ faö lä shomiblaliyono wei bä a̦ fa ji̦liläjenö, bä bufi wedinajamoma. Cama bä caficö a̦ showadawä ja, tä a̦ ji̦lilemaje yalo, ⁷ bä bufi shädayaimoma. Bä bufi wedinajamolanö bä a̦ fama. —Ei bä a̦ bluca lä cui, ¿cama Calileateli bä mlai daanö? ⁸ ¿Wedinaja tawä? Camiyä bämacö a̦ caficö cadidiwä showawä ja, bä a̦ faö mö feduwä. ⁹ Bluca bämacö shomi coyocoa lä cule. Badia jamö bä lä bälöle bä ma cui, Media jamö bä lä bälöle bä ma cui, Elama jamö bä lä bälöle bä ma cui, bä cua lä cule. Mesobodamia jamö bä lä bälöle bä ma cui, Judea jamö bä lä bälöle bä ma cui, Cabadosia jamö bä lä bälöle bä ma cui, Bo̦do jamö bä lä bälöle bä ma cui, Asia jamö bä lä bälöle bä ma cui, bä bluca coyocoa. ¹⁰ ’Judio bämacö waiquiwä bämacö ma cui, judio bämacö nija bä lä co̦cao wei bä ma cui, bä bluca coyocoa mö fedua —bä cuma—. Flijia jamö bä lä bälöle bä ma cui, Ba̦filia jamö bä lä bälöle bä ma cui, Ejido jamö bä lä bälöle bä ma cui, ö̦jö bä ca̦i bluca cua lä cule. Libia jamö, Sileneteli bä lä bälöle tä ajede jamö, ö̦jamö bä lä bälöle bä ma cui, Lomateli bä fama lä co̦blaliyono wei bä ma cule, ö̦jö bä bluca coyocoa. ¹¹ Cleda jamö bä lä bälöle bä ma cui, Alabia jamö bä lä bälöle bä ma cui, bämacö bluca cua. Camiyä bämacö a̦ caficö cadidiwä showawä ja, bä a̦ faö lä cule. Yai Bada a wa̦fa lojode lä wäyäö wejei, camiyä bämacö a̦ faö lä culenaja, bä a̦ faö cuaaö cudeenö, walalawä bäma bä a̦ ji̦liaö lä cule —bä cuma. ¹² Bä bufi bluca shädayaimoma. Bä bufi wedinajamoma yalo, cama bä ca̦i wa̦liyodima. —¿Wedinaja dodijiwä tawä? ¹³ Ö̦jö ma cui, ai bä lä cuinö bä noca flecamaje. —Shi wa̦limamodima ubä dude fa coalalöjenö, bä a̦ li biyäcäblalou lä cubiyei. Nashiwä toubänö bä shi li wa̦lii —bä cuma. ¹⁴ Ö̦jö ma cui, Pedro a wa̦ juo showadaoma. Ai bä 11 lä cuono wei bä ca̦i fa ubladalunö, a wa̦ i̦cali fama. —Judio wamacö mö lä fedui. Jelusale jamö wamacö lä bälöle wamacö. Ei ya wa̦ lä cui, wamale a̦ da ji̦lilä. ¹⁵ Ei bä lä cui, wama bä shi a̦fa wa̦lii lä tafe, bä shi wa̦lii malä mlai. Einaja a motoca jaba ösöblou cuo däjä, täbä shi wa̦libä tä cuami. ¹⁶ Ma, ei bä a̦ lä shomiblalufe, yedu jamö Yai Bada a wa̦no wäyälewä Joeli a lä cuinö, ö̦jö tä a̦fa ca̦i wäyäö balöo showaoma. Abinaja tä a̦ cuu. ¹⁷ Yai Bada ya wa̦no taö lä cule. Yai Bada tänö täbä nia lä jömaö wei tä cublou ajedou däjä, bluca bä nija Yai Bada tä Bufi nia jo̦wa yai jöbömou. Wamacö ijilubö bä ma cuinö, wamacö tääbö bä ma cuinö, a wa̦no nia wäyäöje. Tä nia lä cublou wei, cafäteli ai bä fiyanö, tä yai nia wawädou mööje. Bada bä lä cuinö, tabi tä nia li dablaöje. ¹⁸ Bejedi lä ya wa̦. Yai Bada a nosie juamobä bä suwä ma cui nija, bä wa̦lo ma cui nija, Yai Bada cama a Bufi nia jöböamou. A Bufi fa jöbömoicunö, a wa̦no nia jo̦wa wäyäöje. ¹⁹ Täbä bufi möblobä, fedu jamö tä nö lä quilijii, tä nia bluca wawämadayou. Bita jamö ma cui, yanowamö bämacö lä cule jamö, a mayo nia ca̦i jo̦wa dablamou nö quiliaö. I̦yä i̦yä bä ma cui, cowa wacöbä ma cui, waqueshi bä bada lä tolucou wei bä ma cui, ö̦jö täbä nia bluca wawäblou. ²⁰ Bada tä nö nia yai lä quiliaö wei, tä mö jalu cublou showao mlao däjä, motoca a shi̦i nia jo̦wa lublou balöo. Belibo a ma cui, i̦yä i̦yä bä wacä lä culenaja, a nia cublou nö quilio. ²¹ Ö̦jö däjä, Bada a nija a bayeliblamou lä bufio wei a lä cui, a nia jo̦wa jucäamou. ’Einaja tä a̦ cuu. ¿Ö̦jö tawä? —Pedro a cuma—. ²² Isaeli cä wama ecö. Nasaleteli Jesús ya wa̦fa wäyäö ja, wamale a̦ da ji̦lilä. Yai Bada tänö cafä wamacö nija Jesús a fa shömölönö, a nö wa̦lojoblamalema, wamacö bufi jaducublobä. Yai Bada tänö a nia lä shömano wei, “Fei a waiquiwä”, wama a nofi tabobä. ¿Ö̦jö tawä? Cafä wamacö nija a da cuoblei däjä, Yai Bada a lä cui, ¡bejedi a lojode damalalema! Tä nö lä quilijii tä bluca wawämalema. Jesús nija Yai Bada a lojode damoa dodijilaliyoma. ’¿Ö̦jö tawä? —a cuma—. ²³ Ö̦jö a Jesús shäbeje, wama a jöbäa dicoquema. Yai Bada tänö inaja a taamaö bufi doblao waiquioma yalo, tä cublaliyoma. Tä daö waiquioma. Wa̦lidiwä talewä bä nija, fii balitama defi jamö wama a shäa dicomalema. ²⁴ Ö̦jö ma cui, a ma shäleno wejei ma cui, Yai Bada tänö a jucäa fe yadilema. A ca̦i demi jocädamaö co̦layoma. A nomaö shi wa̦lijiobä a cuono malä mlai. ²⁵ ¿Ö̦jö tawä? Ö̦jö yedu ja, Davidnö a wa̦fa wäyäö balöoma. Abinaja a cuma. Bada a lä cui, showadi ya bufibou. Ya shominajablou mlaobä, wale malä ajedebou wei. ²⁶ Ö̦jö cudeenö, ya bufi doblalou. Ya wa̦ bufi ca̦i doblao faö. Quilii mlai ja ya nia cudio. ²⁷ Bä lä nomaö wei bä cuobä jamö, wale noshi nia ö̦jödabou malä mlai. Camiyä wale lä yaileno wei ya lä cui, wale sicö nia jodemaimi. ²⁸ Dodijidawä ya cudiobä, cafänö wale damama. Wale ca̦i lä cua wei tänö, showadi ya bufi nia doblalou. ’Einaja a cuma —Pedro a cuma—. ²⁹ Iba wamacö. Wamacö bufi yai jaducublobä, ya wa̦ nia wawädoablalou. Nö badabö David a lä cui, ö̦jö tä a̦fa lä tano wei ja, cama a wa̦fa tamonomi. ¿Ö̦jö tawä? David a fa nomalönö, mashita jamö nomawä a didiquemaje. Bäma a didibou malä showale. ³⁰ Ö̦jö ma cui, Yai Bada a wa̦no wäyälewä a li David cuoma cudeenö, tä nia lä cublou wei tä ja, a moyawäo showaoma. Yai Bada a wa̦ lä wäono wei, tä a̦ ca̦i daö waiquioma, cama David a bada läo lä cuono weinaja, e nia bada nodiwä lämabou lä juono wei tä a̦ lä cui. ³¹ ’Ö̦jö cudeenö, tä cublou showao mlao däjä, Yai Bada tänö a shömabä a lä yaileno wei, a nia demi jocädou lä co̦ono wei tä ca̦i daö showaoma. ¿Ö̦jö tawä? Bä lä nomaö wei bä cuobä jamö, a noshi nia a̦fa ö̦jödaboimi lä wäyäno wei ja, cama a wa̦fa tamou mlai ja, a nia lä shömano wei bei a wa̦fa li wäyäma. Ö̦jö sicö yai jodemanomi. ³² Ö̦jö Jesús a lä cui, Yai Bada tänö a demi jocädamaö co̦layoma. Camiyä bluca yamacö mamocunö, yama a demi daa co̦lalei cublelei. ³³ ’¿Ö̦jö tawä? —a cuma—. A nö Bada ö̦jöböamobä, cama Yai Bada jayu boco mashi jamö, a döcämabou lä culadi. Ö̦jamö a Bada lä döcämaqueno wei däjä, bä Fö̦önö a dobälema. Cama a Bufi a̦fa wäyämamou lä balöono wei tä ja, a dobälema. Ö̦jö tä ja, cama a fa dobämamoludunö, camiyä yamalecö dobäa fe dolea nomöjölema. Ei wama tä lä möle, wama tä a̦ lä ji̦liale, ö̦jönö tä wawäblamalei lä cufe. ³⁴ Cama David a ösöono malä mlai, fedu jamö. A ösöono ma mlai ma cui, abinaja a cuma. Iba Bada a nija, abinaja Bada a yai lä cui a cuma. Eja, camiyä ya lä cule jamö a da döcäiquiyo, jayu ya boco mashi jamö. ³⁵ Eja wa döcäo showao däjä, bä nö lä nabämou wei bä lä cui, cafä nija ya bä möfe nia quilili bomabou. ’Einaja a cuma. ¿Ö̦jö tawä? —Pedro a cuma—. ³⁶ Isaeli wama ecö bufi bluca jaducublobä ya wa̦. Ö̦jö Jesús a lä cui, fii balitama defi ja wama a lä shämaleno wei a showawä lä cui, Yai Bada tänö Bada bei a yai tablamalema. A shömabä a lä yaileno wei, ö̦jö a —a cuma. ³⁷ ¿Ö̦jö tawä? Pedro a wa̦ fa ji̦liläjenö, bä bufi nö yai bleaaö fe balojooma. Pedro a ma cui nija, Jesucristonö bä lä shömöleno wei ai bä ma cui nija, abinaja bä cuma. —Shädayai. Iba wamacö. ¿Wedinaja yamacö li cuaaö dodijiobä? —bä cuma. ³⁸ A wa̦ juo ja, abinaja Pedro a cuma. —Wedinaja mlai. Wa̦lidiwä tä ja, bä bufi da lädalu. Jesucristo nija wamacö bufi fa cuicunö, ö̦jö a wa̦nö, bä fe da ojomamo. Wamacö doblou lä mlai tä ma cule, tä nowa mladamabä. Inaja wamacö cublaliyo ja, cama Yai Bada tä Bufi ja, wamacö nia dobämamou. ³⁹ Cafä wamacö ma cui nija, wamacö ijilubö nodiwä ma cui nija, bä blajawä lä bälöle bä ma cui nija, bluca wamacö bayeliblamobä tä a̦ wäa malä balöqueno wei. ¿Ö̦jö tawä? Yai Bada bäma a lä bufiblaö wei a wa̦ nö wäoma, bäma a nofi lä Badabole a lä cui. Cama nija bä ajedou co̦obä bä bufi lä taamaö wei bä lä cui nija a wa̦ nö wäquema, täbä bluca bayeliblabä —a Pedro cuma. ⁴⁰ Jesús a wa̦fa wäyäö ja, bä yömöladima. Yai Bada etä a̦ ja bä nowa talanö, abinaja a ca̦i cuablaloma. —Ei bä lä bälöblai, bä dobloimi waiquiwä. Ö̦jö bä lä cui bä nö bleaabä jamö, wamacö nö bleaaö bashio mlaobä, bä da nowamöo —a cuma. ⁴¹ Ö̦jö cudeenö, Pedro a wa̦ fa ji̦liläjenö, tä a̦ dädaö lä showalayono wejei bä lä cui, bä fe bluca fa ojoblamolunö, Jesucristo ebä nija bä yädäblou showadalayoma. Bä lä yädäblaliyono wei bä lä cui, jai 3.000 bä cuoma. ⁴² Jesucristonö bä lä shömöleno wei bä a̦ ji̦liaö bufi doblaomaje. Ö̦jö bä sho, bä nofi tamayou bufi doblaoma. Bä iyabä jamö ma cui, bä ca̦i co̦caablalou bufi doblaoma. Yai Bada nija bä nö bayeli nacaobä jamö ma cui, bä ca̦i yädäablalou bufi doblao showaoma. ⁴³ Jesucristonö bä lä shömöleno wei bä lä cuinö, tä nö lä quilijii showadi tä bluca wawämamaje, tä tamou dao lä mlai. Ö̦jö cudeenö, ö̦jamö lä bä bluca lä cuono wei bä quilima. ⁴⁴ Jesús a bejedi lä bufibono wejei, cama bä bluca yaiblamolayoma. Bä bayeliblayou bufi doblaoma. Cama bä madofibö ma cui ja, bä bufi läablalou mlai ja, bä madofibö nofi bluca ibamayoma. ⁴⁵ ¿Ö̦jö tawä? Abinaja bei bä taamayoma. Ai bä jo̦li ja, ulifi bä lä tabou wejei bä ma cui, madofi bä lä tabou wejei bä ma cui, blada bä ja bä jöböqueije. Ö̦jö däjä, ö̦jö blada bä ja, bä lä jo̦lio wei bei bä bluca dobäleije, bä cuaama. ⁴⁶ Cama bä bluca lä cui, showadi Yai Bada e yafi jamö bä yododaö nosi blacäcodima. Cama bä yafibö jamö bä iyaö ca̦i co̦camodima. Bä iyamayou bufi doblaoma. ⁴⁷ Yai Bada a lä cui, showadi a nofi dodijaö doablamaje. Dodijidawä bä cuoma yalo, ö̦jamö bä lä bälöle bä blucanö, bä nofimamaje. Inaja bä cuaalanö, Yai Bada tänö bä jucäaö lä nocamono wei bä lä cui, Jesucristo ebä nija bä yädäblamaö nosi blacäcofälöma.

¹ Bei. Yai Bada nija showadi bä nö bayeli nacaobä tä cublou däjä, motoca a yadodafälöö däjä, Yai Bada etä yafi jamö Pedro, Juan sho cäcöbö alayoma. ² Ö̦jamö, bä lä fablaaö wei jamö, a wa̦lo juno lä mlai a bälaquemaje, Dodijidawä yoca a̦fa lä jilabou wejei jamö. Ö̦jö yoca lä jolale jamö, bä lä faö wei bä nija a nofi ojode tablamobä, showadi a lomabodimaje, a nacobä. A oshe lä cublono wei däjä, a wa̦lidio fa showadaonö a li wa̦lidioma. ³ Ö̦jö a lä cuinö, Yai Bada etä yafi jamö Pedro, Juan sho cäcöbö lucäö fa dalalönö, a nofi ojode tablamobä, a nacoma. ⁴ Ö̦jö nija cäcöbö mamo fa showaicunö, Pedro a wa̦ fama. —Camiyä yafäcö nijamö mamo da showaicu. ⁵ Ö̦jö cudeenö, a mölaa fa showadaicunö, ö̦jö cäcöbö nija a mamo showadaliyoma ma cui, ⁶ abinaja Pedronö a nowa taö nomöjöoma. —Blada ya bä tabou ma mlai, ya tä lä tabole tä ja, bäfä nia yai dobäö. Nasaleteli Jesucristo a wa̦ lojodenö, wa fa ublaicunö, a da ju. ⁷ Inaja a fa cunö, Pedronö jayu boco fa dälänö, a fa ublamaimadunö, ö̦jö däjä showawä, yedu bei mamicö ma cui, bei wa̦yamobö ma cui, a jödödöwä jifudou showalayoma. ⁸ Ö̦jö a lä jifudole däjä, a shi jaliwä ca̦i yudu yudumou showadaoma. A ca̦i lojode juda judaablaloma. Ö̦jö däjä, Yai Bada etä yafi jamö cäcöbö ca̦i lä lucäle däjä, a wa̦ ca̦i yudu yudumou showai, a wa̦ ca̦i juda judaablalou showai, cäcöbö ca̦i lucälayoma. Yai Bada a nofi doablaö dodijioma. ⁹ Yai Bada e yafi jamö bä bluca lä cuono wei bä lä cuinö a juu dalalemaje. Yai Bada a nofi lä doano wei, a wa̦ ca̦i ji̦lilemaje. ¹⁰ A nö ca̦i ö̦jöbölemaje. Yai Bada e yafi ja, Dodijidawä a wa̦fa yoca lä jilabou wejei jamö, a wa̦lidiwä lä lodiono wei a malä cuono wei, a nofi ojode tablamobä showadi a lä nacono wei. Ö̦jö a dodijidablaliyoma yalo, bä bufi shädayaimoma. Bä shi bluca ca̦i jalimolayoma. ¹¹ A juno lä mlai a wa̦lo lä cuinö, Pedro, Juan sho cäcöbö juwäbou showao däjä, ai bä lä cui bä a̦ ca̦i bluca läläaimama. —¡Shädayai! ¿Wedi tä mayo li dodijiwä? —bä bufi wedinajamolanö, bei bä cuma. Tä yafi yädäa lä boale ja bä cuoma, Salomo tä a̦fa yafi lä jilabolajei jamö. ¹² Bä bluca lä co̦camole tä fa dalalönö, abinaja Pedronö bä nowa tama. —Isaeli wama ecö. ¿Wedi tä ja, wamacö bufi li wedinajamou cule? ¿Wedi tabä camiyä yafäcö nija wamacö mamo li showaa cule? Ei yama a lä jumale, camiyä yafäcö a̦ lojodenö tä cublonomi, camiyä yafäcö dodijaö lä showadaono wei tänö mlai. ¹³ Bämacö nö badabö Ablaamö a ma cui nija, Isaacö a ma cui nija, Jacobo a ma cui nija, ö̦jö bä nija a lä bufiblamou wei a lä cuinö, Jesús a doblao damalalema. ¿Ö̦jö tawä? Ö̦jö Jesús a lä cui, Yai Bada a nosie yai lä juaö wei a, bada bänö a shäbeje, wama a noshi lä ö̦jödabono wei a lä cui. Biladonö ö̦jö a nia ma jujeblano wei ma cui, ö̦jö a mamo mötale däjä, wama a waia dicolema. ¹⁴ ’Yai Bada a wa̦ yai juabä, a ma yaiono wei ma cui, ö̦jö a shino ma bejedimono wei ma cui, wama a wailema. Bilado wama a fa wa̦linö, a lä unocai wei wama a yai shino jujeblamaö bufi doblao dicooma. ¹⁵ ¿Ö̦jö tawä? —a cuma—. Täbä lä demidamaö wei, wama a shäa dicomalema. Wama a ma shämaleno wei ma cui, Yai Bada tänö a demi jocädamaö co̦layoma. Camiyä yamacönö, yama a demi daa co̦lalema. ¹⁶ ’Ei a wa̦lo lä cui, wama a lä dale, eja wama a lä möle, ö̦jö Jesús a wa̦ lojodenö bei a li lojodoblou co̦layoma, Jesús yafä a nofi mölabou yalo. ¿Ö̦jö tawä? Jesús yafä a nofi lä mölabole tänö, cafä wamacö nijamö ei a wa̦lo demi ublaa wawädoa lä cule. ¹⁷ ’Bei —a cuma—. Iba wamacö. Cafä wamacö ma cui, cafä wamacö nija bä bada lä läo wei bä ma cui, wamacö bufi mojoduoma yalo, ö̦jö wama tä taö dicooma. Ö̦jö ya tä daö. ¹⁸ Ö̦jö ma cui, yedu jamö Yai Bada a wa̦no wäyälewä bä a̦ fa cadidonö, tä a̦ wäyäö balöomaje. A shömabä a lä yaileno wei e lä cui, ö̦jö a nö nia lä bleaano wei, tä a̦ ca̦i wäablalaö showaomaje. ¿Ö̦jö tawä? Fei däjä tä a̦ bejedi wawäblaliyoma. Wamacö cuaaö lä dicoono wei tä ja, Yai Bada tänö tä a̦ bejedi wawäblamalema. ¹⁹ ’Ö̦jö cudeenö, bämacö nowa taö lä cule —a cuma—. Wa̦lidiwä tä ja, bä bufi da lädalu. Yai Bada nija bä bufi da cuicu. Wamacö doblou lä mlaono wei tä lä cui, tä nowa mladamabä. Inaja wamacö cuaaö ja, tä dodijidablamaö fa co̦lonö, Yai Bada tänö wamacö bufi lojodoaamadibä. ²⁰ Jesús a ca̦i shömaö co̦obä, a shömabä a lä yaileno wei a lä cui. ²¹ Fedu jamö Jesús a cublaa balöadayoa. Eja Yai Bada tänö tä bluca cadejeblaö lä bufiole däjä, a shömaö co̦o wä. Inaja Yai Bada tä malä cuno wei. ¿Ö̦jö tawä? Yai Bada a wa̦no wäyälewä bä a̦ fa cadidonö, ö̦jö tä a̦fa wayoaö malä balöono wejei. ²² Moisesi a ma cuinö, Jesucristo a wa̦fa wäyäö balöoma. Abinaja tä a̦ cuu. Yai Bada a wa̦no wäyäbä, camiyä wale shömaö lä cuaano weinaja, cafä Isaeli wama ecö nodiwä nija, ai a nia shömaö cuo nomöjöo. Ö̦jönö wamacö yömölaö lä bädao wei tä ma cui ja, wama a wa̦ nia ji̦liaö. ²³ Ö̦jö Yai Bada a wa̦no wäyälewä a nia lä shömaö wei a lä cui, ai anö a wa̦ ji̦liaimi ja, Yai Bada ebä nija a nia co̦caomi. A nia nomamaö. ’¿Ö̦jö tawä? —Pedro a cuma—. Einaja tä a̦ cuu. ²⁴ Fei däjä tä lä wawäblole, Yai Bada a wa̦no wäyälewä bä bluca lä cuono wei bänö, ö̦jö tä a̦fa wäyämaje. Samuel a ma cuinö, bä cublou lä nodiono wei bä ma cuinö, ei tä lä wawäblole tä a̦fa bluca wäyämaje. ²⁵ ¿Ö̦jö tawä? Yai Bada a wa̦no wäyälewä bä cuo lä balöono wei, wama ecö nodiwä. Cafä wamacö nö badabö nija Yai Bada a wa̦ nö lä wäono wei däjä, abinaja Ablaamö a nowa tama. Bluca bä bälöjöwä lä yaiblai bä ma cui, ijilufä ebä nodiwä nija bä nia bayeliblamou mö feduo. ’¿Ö̦jö tawä? —a cuma—. Einaja tä a̦ cuu. Cafä wamacö lä cui, ö̦jö Ablaamö wama ecö li nodiwä waiquiwä. ²⁶ Ö̦jö cudeenö, Yai Bada a wa̦ yai lä juaö wei a fa wawämalönö, cafä wamacö nija a shömöa balölema, wamacö doblou lä mlai tä ja, wamacö fe bluca fa dadomalönö, wamacö yai bayeliblamobä —a Pedro cuma.

¹ Ö̦jö bä nija Pedro, Juan sho cäcöbö a̦ faö showao däjä, bada bänö cäcöbö nabä waloaliyomaje. Nofi bäyäalewä blowäjäwä bä ma cui, Yai Bada etä yafi nowamabeje bä ca̦i lä cuono wei a ma cui, saduseo bä ca̦i bada ma cui, ö̦jö bä bluca icuquema. ² Jesús a wa̦fa wäyäböma yalo bä jushuoma. ¿Ö̦jö tawä? Jesús a demi jocädou lä culayono weinaja, yanowamö täbä nia demi ca̦i jocädou co̦o, cäcöbö nofi cuu jushuama cudeenö, bä bada jushuoma. ³ Ö̦jö däjä cäcöbö juwäa showalemaje. Tä mö weyaa jaödalayoma cudeenö, cäcöbö fe lao fe jalubä, cäcöbö didiquemaje. ⁴ Ö̦jö ma cui, Pedro, Juan sho cäcöbö nija tä a̦ lä ji̦lileno wejei ai bä bluca mö feduwä lä cuinö tä a̦ bejedi bufiblaö fa showadalojenö, Jesucristo ebä bluca cublaliyoma. Ö̦jö däjä, Jesucristo ebä lä cui, jai 5.000 bä wa̦lo cublou majölayoma. ⁵ Ö̦jö tä fena ja, judio bä bada lä nosiemou wei bä ma cui, ai bä ca̦i bada ma cui, Moisesi tä a̦ ja täbä lä damaö wejei bä ma cui, Jelusale jamö ö̦jö bä bada co̦cablaliyoma. ⁶ Anasi lija bä yododoblaliyoma, nofi bäyäalewä a bada lä cui lija. Ö̦jö bä lä co̦cablaliyono wei jamö, Anasi ai ebä cuo mö feduoma, Caifasi a ma cui, Juan a ma cui, Alejado a ma cui, ö̦jö ebä bluca cuo mö feduoma. ⁷ Pedro, Juan sho cäcöbö fa mötalömabalöjenö, cäcöbö wa̦limaje. Abinaja cäcöbö nowa tamaje. —¿Wedi tä lojodenö, ö̦jö wafä a li wa̦lo jalomalema? ¿Wedi a wa̦nö, wafäcö inaja li cuaaö bashio? —cäcöbö nowa tamaje. ⁸ Ö̦jö däjä, Yai Bada tä Bufinö Pedro a fa jödödöblalönö, a wa̦ juo shalilioma. —Bada wamacö lä läo wei wamacö. Wamacö bufi lä walalai wamacö ca̦i bada. ⁹ Ei a wa̦lo juu lä mlaono wei a lä cui, wama a bayeliblaö wa̦lii ja, a lä jalolayono wei wama tä ca̦i wa̦lii ja, ¹⁰ bä yömöca da daicu, ö̦jö lä. Cafä wamacö ma cui nija, Isaeli bluca ebä ma cui nija, ya wa̦ wawädou showadaobä. Nasaleteli Jesucristo a lä cui, fii balitama defi ja wama a lä shämaleno wei a lä cui, Yai Bada tänö a demi jocädamaö co̦layoma. Ö̦jö a wa̦ lojode showawänö, ei wama a wa̦lo demi ublaa dablaö lä cule. ¹¹ Jai maa mabä ja, wama a yafi nia lä i̦tamaö wei wamacö bada lä culenö, maa wama ma lä waileno wei, ö̦jö Jesucristo a li waiquiwä. Ö̦jö wama ma lä waileno wei, fei däjä a yafi colo lojodoobä, ma yai li cublou nomöjölayoma. ¹² Ai a nija bämacö nia lä jucäamou wei a cuami. Jödödöwä täbä lä bälöblai täbä ma cui nija, ai a wa̦fa wäyämamou malä mlai, bämacö jucäamobä —Pedronö bä nowa tama. ¹³ Pedro, Juan sho cäcöbö a̦ waiteli lä juono wei tä fa dalalöjenö, bada bä bufi wedinajamoma. Oni sibä ja, cäcöbö damamou fe balojoono malä mlaono wei. Showadi ai bä cua lä bädalenaja cäcöbö cuo mö malä feduono wei. Bä bufi fa möblalunö, “Jesús nija showadi cäcöbö lä nocaablalodino wei cäcöbö nofi yaiwä”, cäcöbö nofi tadalemaje. ¹⁴ Ö̦jö ma cui, cäcöbö nofi ma wa̦libono wejei ma cui, a lä jalomaböleno wei a ca̦i ublaoböma yalo, bä a̦ läobä tä cuonomi. ¹⁵ Ö̦jö däjä, sibo jamö cäcöbö ca̦i famaö fa bufijenö, bä lä yododoono wei jamö, bada bä a̦ bluca wayou juoma. ¹⁶ Abinaja bä nowa tayoma. —¿Wedinaja bei bäma cäcöbö li taamabä tawä? Ei cäcöbö a̦ lä fafe cäcöbönö, tä nö lä quilijii tä malä wawämaböno wei. Bäma cäcöbö a̦fa jolemou tabä tä cuami waiquiwä. Jelusaleteli bä blucanö, ö̦jö tä daö malä waiquilajei. ¹⁷ Ö̦jö ma cui, ei tä a̦ lä wäyäfe, tä a̦ ji̦limou blaucublou mlaobä bäma cäcöbö a̦ shino da wasö, moli a bädawä ma cui nija Jesús a wa̦fa wäyäböö co̦daaö mlaobä —bä nowa tayoma. ¹⁸ Ö̦jö cudeenö, cäcöbö nacaa fa co̦malöjenö, cäcöbö wasöö dodijiomaje. —Jesús wafä a̦fa nia wäyäö co̦daaimi. Ö̦jö etä a̦ ma cui ja, wafä bä nia yömölaö co̦daaimi —bä cuu fe blacäjoma. ¹⁹ Cäcöbö ma wasöno wejei ma cui, Pedro, Juan sho cäcöbö a̦ juo ja, abinaja cäcöbö cuma. —¿Wedi jamö tä lä cui tä yai dodijidawä, ö̦jö lä? Yai Bada etä a̦ yai ji̦limamou mlai ja, cafä wamacö lä cuu wei, ¿ö̦jö tä a̦ shino yai juamamobä daanö? ¿Wedinaja cafä wamacö bufi li cuu? Ma, cafä wamacö a̦ nia yai juamamoimi. ²⁰ Yafä tä lä möno wei tä ma cui, yafä tä a̦ lä ji̦lileno wei tä a̦ ma cui, yafä tä a̦ wäyäö mladobä tä cua malä mlai —cäcöbö cuu mö feduoma. ²¹ Cäcöbö wasööje ja, bada bä a̦ nö quiliama. Ö̦jö däjä, cäcöbö jujeblalemaje. Cäcöbö nö ninili bleaamaö bufi ma doblaono wejei ma cui, yanowamö täbä nija bä quilima. Täbä shi doo malä waiquiono wei. A lä jalomaböleno wei tä nowa ja, bluca bänö Yai Bada a nofi doablaamaje. ²² Ö̦jö a lä cui, Yai Bada tä lojode dablabeje, a lä jalomaböleno wei a wa̦lo lä cui, a badao malä waiquiono wei. A wa̦lidio showao däjä, lasha 40 a malä jayublamaleno wei. ²³ Cäcöbö fa jujeblalöjenö, cama ebä nija cäcöbö co̦blou lä co̦ono wei jamö, cäcöbö a̦ nö wäoma. Nofi bäyäalewä blowäjäwä bä ma cui, bä bufi lä walalai bä bada mö feduwä ma cui, ö̦jö bä wa̦no wäyäböö showadaojoloma. ²⁴ Ö̦jö cäcöbö a̦ fa ji̦liläjenö, Yai Bada nija cama bä a̦ bluca faö showadaoma. —Bada tä. Yai Bada wa tä. Judu wa mösö lä tablaleno wei wa. Ulifi a bada ma cui, modu ubä lä cublai ubä ma cui, wa ubä tablalema. Fedu jamö bä bluca lä culadi bä ma cui, bita jamö bä bluca lä cule bä ma cui, mau jamö bä bluca lä cublai bä ma cui, wa bä bluca lä tablaleno wei, ö̦jö cafä wa dodijiwä. ²⁵ Wa wa̦ juamobä, camiyä yamacö nö badabö David a lä cuono wei, bei wa Bufinö wa wa̦ macocamama. Abinaja wa cuma. ¿Wedi tä tabeje, judio bä lä mlai bä jushudou fe balojolayoma? Ö̦jö bä shomi lä cuinö, ¿wedi tä tabeje, Yai Bada a nofi jole jole li washublalamaje? ²⁶ Bä bälöo lä dodijio wei bä bluca lä cublai, bä wayu itoblaliyoma. Bä bada lä läo wei bä lä cui, bä co̦cablaliyoma. Bada tä lä bufiblamou wei tä ma cui, cama e lä yaileno wei a ma cui, cäcöbö nabä queobeje bä toujublaliyoma. ’Einaja wa cuma —Yai Bada nija bä cuma—. ²⁷ Eja, Jelusale jamö bä mada toujablei. Elode a ma cui, Bo̦sio Bilado a ma cui, judio bä lä mlai bä sho, Isaeli nodiwä ebä ca̦i bluca sho, ö̦jö bä bluca co̦cablaliyoma. Afä wa lä yaileno wei a lä cui, ö̦jö Jesús a nabä co̦camoamaje. ²⁸ A nia lä taamano wejei, yedu jamö ma cui, cafänö wa tä taamaö bufi doblao waiquioma. Wa tä taamaö bufi fa doblaonö, cafä wa lojodenö wa tä wawäblamalema. ²⁹ ’Fei däjä ma cui, ei wa bä a̦ ji̦liaö, Bada tä —bä cuma—. Bä jo̦wa waitelimou bufi doblao. ¿Ö̦jö tawä? Cafä wa wa̦ juamobä yamacö lä cui, yamacö bufi da lojodomabo, quilii mlai ja, afä yama tä a̦ wäyäö fe yadiobä. ³⁰ Yama tä a̦ wäyäbä jamö, bä lä jalili wei bä ca̦i da jaloma, cafä wa mayo dablamobä. Wa wa̦ juamobä, afä wa lä yaileno wei a Jesús lä cui, ö̦jo a wa̦ lojodenö, tä nö lä quilijii yama tä bluca wawämaö showadaobä —bä cuma. ³¹ Yai Bada nija bä a̦ faö waicou däjä, bä lä co̦cablono wei a yafi lä cui, a yafi qui̦da qui̦damou nö quiliama. Ö̦jö bä bluca lä cui, Yai Bada tä Bufinö bä fa jödödöblalunö, bä quilii mlai ja etä a̦ wäyäö waiteliblou showadalayomaje. ³² Jesucristo bufilewä bä lä cui, bä bufi shedecou mlai ja, moli tä ja bä bufi bluca yaimoma. Bä bluca lä tabono wejei bä ma cui ja, “Ei iba moli tä li cuobä”, bä cunomi. Bä bufi läablalou mlai ja, bä madofibö nofi bluca ibamayoma. ³³ Jesucristonö bä lä shömöleno wei bä lä cuinö, Bada tä Jesús a wa̦fa demi jocädou wäyäöje däjä, Yai Bada a lojode damoa dodijia showadalaliyoma. Yai Bada tänö wawädowä bä bayeliblaö cuaama. ³⁴ Cama bä nija, moli a ma cui a jo̦limobä a cuonomi. Abinaja bä showadi cuaama. Ulifi bä nofi lä tabono wejei bä lä cuinö, blada bä ja bä ulifibö jöböamaje. Yafi bä lä tabono wejei bä ma cuinö, inaja showawä, bä yafibö jöböamou cuoma, blada bä ja. Ö̦jö bä ja, bä blada lä doano wejei, bä blada ca̦i fa waloojenö, ³⁵ Jesucristonö bä lä shömöleno wei bä nija, bä blada jöbömaje. Ö̦jö bä lä cuinö, bä lä jo̦li wei bä dobäö fe dolemou nomöjöomaje. ³⁶ ¿Ö̦jö tawä? Inaja showawä, Shibleteli ai a ca̦i cuaaö mö feduoma, José a wa̦fa lä cuono wei. Lewi nodiwä ö̦jö e li cuoma. Showadi täbä bufi lojodoaamaö cuaaö cudeenö, Jesucristonö bä lä shömöleno wei bä lä cuinö a wa̦fa Benabei jilaa nömöjöquemaje. ³⁷ Ö̦jö Benabei a lä cuinö, cama etä ulifi fa jöböcönö, blada bä dälema. Ö̦jö bä blada ca̦i fa waloicunö, Jesucristonö bä lä shömöleno wei bä nija bä jöböquema, bä lä jo̦li wei bä dobäö mö feduobeje.

¹ Inaja bä ma cuaaö däjä ma cui, abinaja Anania a cuaaö dicooma, bä suwäbö Safila sho cäcöbö lä cui. Cama a ficalibö ca fa jöbömoicunö, blada bä dälema. ² Bä suwäbö e sho cäcöbö a̦ wayou balöo ja, ai bä blada mashi jo̦yaquema. Ai bä blada mashi lä cui, Jesucristonö bä lä shömöleno wei bä nija, jai bä comi jöböquema a wa̦ cuaama. ³ Ö̦jö ma cui, abinaja Pedronö a nowa tama. —Anania. ¿Wedi tä tabä fecula bada a Sadanasi nija bei wa bufi li lulumoa dicolayoma? ¿Wedi tabä Yai Bada a Bufi nija wa li jolemolayoma? Afä ficali wa täca lä nomöjöqueno wei täca nowa ja, wa bä blada lä däleno wei, wa bä mashi tabou malä showale. ⁴ ’Wa täca jöböaö showao mlao däjä, afä täca cadidiwä cuoma. Wa täca fa jöböcönö, ö̦jö täca nowa ja wa bä blada lä däleno wei, afä bä ca̦i blada cuo showaoma. Wa bä jöböaö bufi doblao ja, wa bä jöböabä bä li cuoma. Wa bä noshi umabou bufi doblao ja, wa bä noshi ca̦i umabobä. Einaja tä yai ma cuono wei ma cui, ¿wedi tä tabä, jai wa bä comi jöböquema bei wa wa̦ li cuaaö dicooma? Yanowamö yamacö nija wa jolemonomi. Yai Bada nija wa yai jolemoa dicolayoma —Pedronö a nowa tama. ⁵ Ananianö ö̦jö a wa̦ fa ji̦lilänö, a nomawä wäcädou showalayoma. Ö̦jö tä a̦ lä ji̦liano wejei, bä bluca quilia fe balojolaliyoma. ⁶ Fiya bänö, acadafu sicönö a nomawä fa o̦cablalöjenö, sibo jamö a ca̦i fa alujenö, a didiquemaje. ⁷ Inaja tä cublou waiquilayono wei ja, tä nö fa dedejedalunö, ö̦jamö lä bä suwäbö e mojodi waloa jäqueyoluma. ⁸ Ö̦jö nija Pedro a wa̦ faö nomöjöoma. —Ficali täca nowa ja, ¿einaja bä cudale wafä bä dälema? —a cuma. —Awei —a jole cuma—. Wa lä cufenaja bä cudale yafä bä dälema —a cuma. ⁹ Einaja a cuu ja, abinaja Pedronö a nowa tama. —¿Wedinaja wafäcö bufi cuu fa dicoonö, inaja bei wafäcö nowa li tayoma? ¿Wedi tabä Yai Bada wafä a Bufi mölamabä, bei wafäcö li wabäo dicoblaoma? Bei. ¡Fe̦yalofä a nomawä lä didiqueno wejei, bä mamicö jo̦wa blölölömou co̦a lä cuimi! Ö̦jamö lä, cafä wa nomawä nia bälaö nomöjöoje —a cuma. ¹⁰ Pedro a cotä ja, a suwä fa wäcäblaicunö, a waicou showadaoma. Fiya bä fa falönö, a nomawä fa dalalöjenö, sibo jamö ö̦jö a ca̦i aa nomöjölayomaje. Bä fe̦yalobö a didia lä balöqueno wejei jamö, ö̦jö a didia yädäquemaje. ¹¹ Jesucristo ebä bluca lä cui, bä quilii dodijioma. Ai bä ma cui, tä a̦ lä ji̦liano wejei bä bluca ca̦i quilii fe balojooma. ¹² Jesucristonö bä lä shömöleno wei bä lä cuinö, Jelusaleteli bä nijamö, tä nö lä quilijii bluca tä wawämamaje. Yai Bada etä yafi yädäa lä boale ja, showadi bä bluca yododoblaama, Salomo e a̦fa yafi lä cule jamö. ¹³ Ai täbä lä cui, ö̦jö bä nija täbä jole jole yädäblou quilima. Ö̦jö ma cui, Jelusaleteli bä lä cuinö, “Ö̦jö bä nofi yai dodijaö”, Jesucristo ebä nofi tabou fe balojoomaje. ¹⁴ ¿Ö̦jö tawä? Jesucristo a bejedi fa bufilöjenö, showadi bä yädäblou nosi ma blacäcono wei ma cui, ¡ö̦jö däjä yai! Wa̦lo bä ma cui, suwä bä ma cui, Bada tä nija bä bluca yädäblou dodijilayoma. ¹⁵ Jalili bä jalomaö fa dalalöjenö, bä shi fa jalimolunö, cama jalili ebä ca̦i bluca sibolayomaje. Pedro a jayuabä jamö, bei yo casö jamö bä jalili blaaquemaje. Täbä maqueobä täbä ja, bä maqueaquemaje. ¿Ö̦jö tawä? Ö̦jamö lä Pedro a jayuaö däjä, “Bei a malashinö bä fa jo̦yablamafälönö bä jalobä”, a nofi tabomaje. ¹⁶ Jelusaleteli bä shabonobö jamö ai bä yanobö lä siboblamono wei jamö ma cui, ai bä bluca ca̦i waloblaaö mö feduoma. Jalili bä ma cui, bä lä feculaböono wei bä ma cui, ö̦jö bä ca̦i fa waloicujenö, bä bluca jalolaliyoma. ¹⁷ Ö̦jö ma cui, nofi bäyäalewä a bada lä cui, a bufi jushujuo fe balojooma. Cama nija bä cuo mö lä feduono wei bä saduseo ma cui, ö̦jö bä bufi ca̦i bluca jushujuo mö feduo showaoma, Yai Bada yafi jamö bä lä badamou wei bä lä cui. Jesucristonö bä lä shömöleno wei, bä nofi doablamou ayao cudeenö, bä jushuoma. ¹⁸ Ö̦jö däjä, bä juwäa fa co̦malöjenö, bä doblou lä mlai bä fe lä laono wei jamö, bä fe laa co̦maquemaje. ¹⁹ Ö̦jö ma cui, didi däjä Yai Bada tänö a̦jele etä fa shömöludunö, bä fe lä laono wei yoca fa caloblalönö, bä öböa siboblaö co̦layoma. Abinaja bä nowa tama. ²⁰ —Yai Bada etä yafi jamö wamacö cua fa co̦lunö, bä yömölaö da co̦oduje. Fei däjä, Yai Bada nija dodijidawä wamacö cua lä nomöjöle, bä a̦ da wäyämo —bä nowa tama. ²¹ A̦jele a wa̦ fa ji̦liläjenö, Yai Bada etä yafi jamö bä lucäa fa fenalunö, tä a̦ wäyäö co̦o fenaomaje. Bei. Bä nia lä yododano wei jamö, nofi bäyäalewä a badanö, cama ebä ca̦i waloa fenaquema. Ö̦jö däjä, Isaeli ebä bada lä cui, bä bluca nacaa fenaalalema, bä a̦ wayobä. Bä bluca fa co̦cablalunö, Jesucristo ebä nia co̦aö fa fenaojenö, ai ebä shömölemaje, bä fe lä lamaqueno wejei jamö. ²² Ö̦jö ma cui, bä fe lä laono wei jamö bada bä waloo däjä, bä cuonomi. Ö̦jö däjä, bä cuono lä mlai tä a̦ wäyäö co̦jolomaje. Abinaja bä cuma. ²³ —Bä fe lä lao wei tä yafi jamö, yoca lojodooma ma cui, sibo jamö yoca nofi lä läbou wejei bä läo ma showao däjä ma cui, yama yoca fa caloblalönö, a yafi blocooma —bä nowa tamaje. ²⁴ Ö̦jö däjä, ö̦jö tä a̦ fa ji̦liläjenö, bä bufi wedinajamolayoma. Yai Bada etä yafi nowamabeje bä ca̦i lä cule a bada ma cui, nofi bäyäalewä blowäjäwä bä ma cui, “Shädayai. ¿Wedinaja bei tä nia cublou nomöjöo, ö̦jö lä?”, bä bufi cudaliyoma. ²⁵ Ö̦jö däjä, ai a co̦blou fa nomöjölonö, ö̦jönö bä yömölaö nomöjöoma. —¡Quija, quija! Wama bä fe lä laqueno wei bä lä cui, Yai Bada etä yafi jamö bä cua co̦a lä cubiyei. Täbä yömölaö co̦a lä cubiyejei —a cuma. ²⁶ Ö̦jö däjä, Yai Bada etä yafi nowamabeje bä ca̦i lä cule a bada lä cuinö, cama ebä fa nacalänö, bä co̦a co̦lemaje. Yanowamö täbä nija bä quilima yalo, dodijidawä bä öböalalefälömaje. “Maa ma bänö yamalecö shäö mlaobeje”, bä bufi fa cunö, bä i̦cali öbömanomije. ²⁷ Bä ca̦i waloa fa co̦icujenö, bada bä lä yododoono wei jamö, bä mötaleblamalemaje. Nofi bäyäalewä a bada lä cuinö, abinaja bä nowa tama. ²⁸ —Jesús wama a wa̦fa wäyäö co̦daaö mlaobä, bämacö wasöö ma dodijiono wei ma cui, Jelusaleteli bä nijamö, ö̦jö wama tä a̦ jo̦wa jödödöblamaö waiquia lä cule. Ö̦jö bädawä mlai, ö̦jö a lä shämono wei a lä cui, camiyä yamacö nija wama tä nowa jo̦wa shadimabou bufi doblao —a cuma. ²⁹ Ö̦jö ma cui, Pedro, Jesucristonö bä lä shömöleno wei ai bä sho, abinaja bä cuma. —Yai Bada yama a wa̦ yai ji̦liabä yamacö. Yanowamö wamacö a̦ ma läo wei ma cui, bämacö a̦ ca̦i nia ji̦liaimi. ³⁰ Fii balitama defi ja wama a fa basumacönö, Jesús wama a shämalema. Wama a ma shämaleno wei ma cui, Yai Badanö a demi jocädamaö co̦layoma, bämacö nö badabö nija a lä bufiblamou wei a lä cuinö. ³¹ ’¿Ö̦jö tawä? A nö Bada ö̦jöböamobä, cama Yai Bada jayu boco mashi jamö, a döcämabou lä culadi. Yanowamö täbä jucäabä, ö̦jö a Bada. Wa̦lidiwä tä ja, Isaeli nodiwä ebä bufi lädamabä, a Bada tablamalema, bä doblou lä mlai tä ma cule, tä nowa mladamabä. ³² ¿Ö̦jö tawä? Tä lä cublaliyono wei yama tä a̦fa wäyäbä, ö̦jö yamacö. Yai Bada a Bufi ma cuinö tä a̦fa ca̦i wäyäö. A wa̦ lä juaö wejei bä nija a Bufi jöböamou —bä cuma. ³³ Inaja bä cuma yalo, bä bada jushudou fe fa balojolonö, bä shäö bufi doblaomaje. ³⁴ Ö̦jö ma cui, bä lä yododano wei bä nijamö, ai a faliseo lä cui a bada ubladaliyoma. Camalieli a wa̦fa cuoma. Moisesi tä a̦ ja täbä lä damaö wei ö̦jö a bada cuoma. Judio bä blucanö a nofi tabomaje. Ö̦jö a fa ubladalunö, Jesucristonö bä lä shömöleno wei bä lä cui, bä sibomaö balöo bufima, cama bada bä a̦ wayou juo balöobä. ³⁵ Ö̦jö bä fa famalöjenö, bada bä lä yododoono wei bä nija abinaja Camalieli a cuu juoma. —Isaeli wama ecö. Ei wama bä nia lä taamaö wei tä ja, bä bufi da moyaweicu. ¿Ö̦jö tawä? ³⁶ Ei tä cublou showao mlao däjä, ai tä wawäblou mada balöoblei. Ö̦jö Deuda a wa̦fa lä cuono wei a fa wawäblalönö, a wa̦ bada wäyämamou fa cuaanö, cama nija bluca bä lulolayoma. Ö̦jö nija jai 400 bä nocaoma. Ö̦jö ma cui, a fa shälöjenö, cama ebä bluca lä nocamabono wei bä mada sheleleblalui. Ö̦jö däjä, tä a̦ ji̦limamou co̦daaö mlai, tä a̦ mladou showalayoma. ³⁷ Ö̦jö a nodi jamö, Calileateli a Judanö, cama ai ebä lulubou nomöjöoma. ¿Ö̦jö tawä? Bämalecö a̦fa bluca da onimablejei däjä, a wawäblaliyoma. Ö̦jö a fa shälöjenö, cama ebä lä nocamabono wei bä bluca ca̦i sheleleblou nomöjölayoma. ³⁸ ’Fei däjä ma cui, abinaja ya cuu ja wamale a̦ da ji̦lilä. Ei bä lä cui bä yabäca dijejä. Bä cuobä. Ei tä a̦ ma tabolajei ma cui, yanowamö tä a̦ bädawä ja, tä a̦ cudio mlaicätä. ³⁹ Ö̦jö ma cui, ei Yai Bada tä mayo waiquiwä cua ja, ö̦jö bä nija wamacö nö nia wa̦lojaimi. Yai Bada tä ma cui nija wamacö a̦ läo dicoo wei, ¿ö̦jö tawä? —a cuma. ⁴⁰ Inaja a lä cuu wei, a wa̦ ji̦lilemaje. Jesucristonö bä lä shömöleno wei bä lä cui, bä lucäa fa co̦malöjenö, bä si yafelilalemaje. Jesús a wa̦fa wäyäö co̦daaö mlaobeje, bä wasöö co̦omaje. Ö̦jö däjä, bä jujeblaö showalayomaje. ⁴¹ Bada bä lä co̦caono wei jamö, bä faa co̦layofälöma. Jesús a nowa ja bä nö li bleaama cudeenö, bä bufi doblaloma. Inaja Yai Bada tänö bä taamaö bufi doblao ja, bä bufi yai doblaloma. ⁴² Yai Bada etä yafi jamö ma cui, cama bä yafibö jamö ma cui, showadi bä damaö fe yadiomaje. Täbä yömölaöje ja, abinaja bä cudima. —Yai Bada tänö a shömabä a lä yaileno wei a lä cui, ö̦jö Jesús a waiquiwä.

¹ Bei. Ö̦jö däjä, Jesucristo nija bä lä nocao wei ebä blucablou däjä, cama bä showawä bä a̦fa tayoma. Clesiateli bä caficö a̦ lä däleno wejei bä judio lä cui, bä nacömoma, cama judio bä caficö a̦ lä showabono wejei bä nija. Nii showadi bä jöbäö lä shedecaö wejei bä ja, camateliyoma bä lä feiblono wei bä walablaö dicooje ja, bä jushudaliyoma. ² Jesucristo 12 ebä lä cuinö tä nia fa cadejeblajenö, Jesucristo nija bä lä nocaono wei ebä bluca co̦camomamaje. Abinaja bä nowa tamaje. —Yai Bada yama etä a̦ wäyäbä, ö̦jö yamacö li waiquiwä. Nii bä ja yamacö yabäcamou ja tä dodijidawämi. ³ ¿Ö̦jö tawä, iba wamacö? Ö̦jö cudeenö, cafä wamacö nija 7 wama bä nia yaiaö, nii showadi bä jöbäbeje jamö, yama bä lämabobä. Bä a̦fa wayoamou dao lä mlai wama bä nia yaiaö, Yai Bada tä Bufinö bä lä jödödöbou wei, bä bufi ca̦i lä jaducui. ⁴ Inaja cama bä li ma cuaaö däjä, camiyä Yai Bada nija yamacö a̦ fadibä, yama etä a̦ ca̦i wäyädibä, showadi ö̦jö yama tä nabä nia cadidou mö feduo —bä cuma. ⁵ Ö̦jö bä a̦ ja, bä bufi bluca fa doblalonö, ei bä a̦fa lä cule bä yailemaje. Esteban a yailemaje, a bufi cadidilanö Jesucristo a nofi lä mölabono wei a lä cui. Yai Bada tä Bufinö a jödödöbou ja, showadi a cadidoma. Felipe a ca̦i yailemaje. Blocolo a ma cui, Nicanolo a ma cui, Dimono a ma cui, Bamena a ma cui, Nicolasi a ma cui, ö̦jö bä bluca yaialalemaje. Nicolasi a lä cui, Adioquiateli a cuoma. Judio a jaba cuono ma mlai ma cui, ö̦jö bä nija a fa yädäblalunö, Jesucristo nija a bufi cuquema. ⁶ Ö̦jö bä 7 lä cui, Jesucristonö bä lä shömöleno wei bä nija bä ca̦i jumaje. Wawädowä bä bada nia fa lämabojenö, bä imicö maquelanö, Yai Bada nija bä nö bayeli nacamaje. ⁷ Inaja bä fa cuaanö, Yai Bada tä a̦ ji̦limou blaucou cuaama. Ö̦jö däjä, Jelusale jamö, Jesucristo nija bä nia lä nocao wei ebä blucablou dodijilayoma. Nofi bäyäalewä ai bä bluca ma cuinö, Jesucristo etä a̦ fa julejenö, a bufilemaje. ⁸ Yai Bada tänö Esteban a bayelibou wawädooma, a nö ca̦i wa̦lojomaboma. Yanowamö täbä nija, tä nö lä quilijii tä bluca wawämama, tä tamou dao lä mlai. ⁹ Ö̦jö däjä, Esteban nija judio ai bä a̦ läoma. Ö̦jö Sileneteli ai bä cuoma. Alejadiateli ai bä cuo mö feduoma. Shomi bä judio lä yododaö wei yafi jamö, showadi ö̦jö bä co̦cabloma, Jujeblano tä a̦fa yafi lä jilabono wejei jamö. Silisia jamö bä judio lä bälöle ai bä ma cui, Asia jamö bä judio lä bälöle ai bä ma cui, ö̦jö bä lä cui bä a̦ ca̦i bluca läoma. ¹⁰ Ö̦jö ma cui, Yai Bada tä Bufinö a wa̦ faö fa moyawäonö, Estebannö bä a̦ nö wa̦lojamanomi. ¹¹ Ö̦jö däjä, ai täbä nija Esteban a nofi washuquemaje, bada bä nija a wa̦fa jole wäyäbeje. Ö̦jö bä lä cui, abinaja bä jole cuma. —Estebannö Moisesi a nö lä waiblano wei, yama a wa̦ ji̦lilema. Yai Bada tä ma cui, tä nö ca̦i waiblama. Yama a wa̦ ji̦lilema —bä jole cuma. ¹² Ö̦jö bä a̦ ja, ai bä shi bluca jalimoa showadalayoma. Bada bä ma cui, Moisesi tä a̦ ja täbä lä damaö wejei bä ma cui, ai bä ma cui, ö̦jö bä shi fa jalimolunö, Esteban a nabä juu showadaomaje. A fa juwälöjenö, bada bä yododoobä jamö a shailefälömaje. ¹³ Esteban a wa̦fa jole wäyäbeje, ai bä fa ublamacöjenö, abinaja ö̦jö bä jole cuma. —Ei Yai Bada yama etä yafi lä yaibole tä ma cui, tä yafi nö waiblaö dicoo. Moisesi tä a̦ ma cui, showadi tä a̦ nö ca̦i waiblaö. ¹⁴ Yama a wa̦ malä ji̦lileno wei. Nasaleteli Jesús a lä cuinö, ei bei a yafi nia jo̦wa wa̦liaö. Moisesinö yamalecö taamaö lä bufino wei tä a̦ lä cui, ö̦jö bei tä a̦ nia jo̦wa shomiblamaö nomöjöo—bä cuma. ¹⁵ Bada bä lä yododoono wei bä lä cui, Esteban nija bä mamo fa showaicunö, wäyäcu shi̦i lä wacalamiono wei wäyäcu dalalemaje, a̦jele bä wäyäcu lä culenaja showawä.

¹ Nofi bäyäalewä a bada lä cui, Esteban nija abinaja a cuma. —¿Fei bä a̦ lä fafe, bä a̦ bejedi daanö? ² Abinaja Esteban a cuu nomöjöoma. —Iba wamacö. Bada wamacö. Wamale a̦ da ji̦lilä. Camiyä bämacö nö badabö Ablaamö a lä cui nija, Yai Bada etä shi̦i wawälayoma. ¿Ö̦jö tawä? Mesobodamia jamö a bälöo showao däjä, Alana jamö a waloo showao mlao däjä a fa damolalunö, ³ abinaja Ablaamö a nowa taö ja, a cuma. Afä wa tä ulifi tabi fa feicänö, afä wa bä fa dacönö, a da alufälö. Cafä nija ya tä ulifi nia lä jömöaö wei jamö, wa waloobä. ¿Ö̦jö tawä? —Esteban a cuma—. Einaja Yai Bada a cuma. ⁴ Inaja a nowa fa talönö, cadeo bä ulifibö tabi fa feicöfälönö, Alana jamö a bälöblaa nomöjöquefälöma. Ö̦jamö lä bä fö̦ö e bufi fa mlaicunö, Yai Bada tänö eja a bälaa nomöjöqueyoluma, bämacö bälöa lä showale tä ulifi ja. ⁵ Eja a ma bälaqueno wei ma cui, camanö tä ulifi nofi yai tabobä, wajaquemi tä wai ulifi ma cui tä jöböanomi. Tä jöböaö showadaono ma mlai ma cui, tä ulifi tabou juobeje tä a̦fa wäyäö balöo showaoma. ’¿Ö̦jö tawä? Bä ijilubö e cuo showaono ma mlai ma cui, cama nodiwä ebä nija tä ulifi nofi nia tamabou nodiablalou showaoma. ⁶ Yai Bada tänö a yömölaö ja, cama nija bä nia lä nodiblono wei tä a̦fa wäa showaquema, shomi täbä nija bä nia lä bälöblaono wei tä a̦ ja. Ö̦jamö bä nosie juamobä bä shi nia wa̦limabomaje. Bä nö bleaamaö showaoje däjä, lasha bluca 400 a nia jo̦wa famaö nodiablalou showaomaje. ⁷ Abinaja Yai Bada a cuma. Bä nosie juamobä bä nia ma tabou wejei ma cui, camiyänö ö̦jö ya bä nö nia bleaamaö mö feduo. Ö̦jö ya bä nö bleaamaö fa balöonö, iba bä lä cuinö tä ulifi nia daafälööje. Camiyä nija bä nö bayeli nacaobä, eja wale nofi nia co̦camoayoluuje. ’¿Ö̦jö tawä? —Esteban a cuma—. Einaja Yai Bada a cuma. ⁸ Ö̦jö däjä, Ablaamö a nia lä bayeliblano wei tä a̦ fa wäcönö, bei bä mosi sicö joyamaö bufima, cama ebä nö ö̦jöböamobä. A wa̦ nofi jaducubolajenö, bei bä mosi sicö joyamaö nodiablalobeje. Ö̦jö cudeenö, Ablaamö bä ijilubö Isaacö e oshe lä cublono wei däjä, 8 tä mö didi fa tablamalönö, bä fö̦ö enö mosi sicö joyalema. Ö̦jö Isaacö a lä cuinö, inaja showawä bä ijilubö Jacobo e taamaö nomöjöoma. Jacobo a lä cuinö, inaja showawä bä ijilubö 12 ebä taamaö nomöjöo nodiama. Ö̦jö 12 ebä nija bämacö yaiablalou nodiablalou showawä. ⁹ ’¿Ö̦jö tawä? —a cuma—. Ö̦jö 12 bäma ecö nodiwä lä yaile bä lä cuono wei bänö, bä fääshä José e nofi wa̦libomaje. Cama a nofimamou ayao ja, a nofi fa wa̦libojenö, Ejido jamö a bälabeje a jöböquemaje, blada bä ja. Ö̦jö ma cui, Yai Bada tänö a bayelibou fa showaonö, ¹⁰ a nö ma bleaamano wejei ma cui, a bayelibladima. A bufi fa moyawämabonö, Ejido jamö a bälöo lä dodijiono wei a lä cuinö, José a nofi mölaboma. Bada a tablamalema, Ejido tä ulifi jamö a bada läobä. Cama etä yafi jamö ma cui, ö̦jamö a ca̦i lämaboma. ¹¹ ’Ö̦jö däjä, Ejido ma cui jamö, Canaana ma cui jamö, ofi tä blaucublaliyoma —a cuma—. Täbä nö ofili bleaama. Bämacö nö badabö iyabä tä cuonomi dodijiwä. ¹² Ö̦jö ma cui, Jacobonö Ejidoteli bä ulifibö a̦fa nö niji ji̦lilema. Ö̦jö däjä, ö̦jamö bä ijilubö ebä jaba shömöa balölema, camiyä bämacö nö badabö lä cui. ¹³ Bä juu lä co̦ono wei däjä, bä a̦iyobö ebä nija José a wa̦fa fa wäamonö, a nö ö̦jöbömolayoma. Bada a yai lä cui nija, José ebä bluca damoa showalaliyoma. ¹⁴ Josénö bä fö̦ö Jacobo e fa nacamalänö, cama nija bä bluca lä cuono wei bä ca̦i nacaa mö fedua showamalema. Ö̦jö bä bluca lä cui, 75 bei bä cuoma. ¹⁵ ’Ö̦jö däjä, Ejido jamö Jacobonö cama ebä ca̦i alayoma —a cuma—. Ö̦jamö lä cama a ya̦cumö fa nomalönö, camiyä bämacö nö badabö yanöcö nomablou cuaaö mö feduoma. ¹⁶ Bä fa nomalalunö, Siquemö jamö bei toubä maloco bälaö co̦omaje. Ö̦jamö lä maa maca jamö toubä didiquemaje, Ablaamönö tä ulifi lä lululeno wei jamö. Amolo bä ijilubö ebä nija, blada bä ja tä ulifi lä däleno wei jamö. ¹⁷ ’Ö̦jö ma cui, Yai Badanö Ablaamö nija tä a̦fa wäyäö lä balöono wei tä a̦ wawäblou bufio däjä, Ejido jamö Jacobo nodiwä ebä fa balalönö, bä blucablaliyoma. ¹⁸ Bä balaö showao däjä, Ejido jamö ai a bada läa nomöjöaliyoma. José nija bä jaba lä bayeliblamono wei, ö̦jönö tä danomi. ¹⁹ Ö̦jönö bämalecö nö badabö mölamalema. Bä ijilubö lä cublono wei bä wawäblamaö bufima, bä nomamabä. ²⁰ ’Ö̦jö däjä, Moisesi a oshe cublaliyoma —a cuma—. A ca̦i wai liyäjäo dodijioma. Bä fö̦ö e nija a oshe lä cuono wei däjä, belibo 3 bä lublamalema. ²¹ Ö̦jö däjä, a fa wawäblamalöjenö, bada bä tää enö a däa nomöjölema. Jai cama e dodijiwä dejemi a nofi fa taalönö, a badaalema. ²² Ejidoteli bä nija Moisesi a fa damamonö, cama bä bufi jaducuwä lä culenaja a cublou mö fedulayoma. A wa̦ lä fano wei tä ma cui ja, a ca̦i lä cuaano wei tä ma cui ja, a nö wa̦lojaö dodijioma. ²³ ’Moisesinö lasha 40 a fa famalönö, cama ebä cadidiwä möö bufi doblaoma, Isaeli ebä nodiwä lä cui. ²⁴ Ö̦jö bä nija a fa waloicunö, Ejidotelinö Moisesi camateli a nö bleaamaö fa dalalönö, a nö yuabä a icuquema. A shäa showadalema. ²⁵ Abinaja a bufi cuma. “Ya bä bayeliblabä, Yai Bada tänö wale lämabou a lä cule”, Moisesi a bufi cuma. “Ya bä nia lä bayeliblaö wei tä ja, iba bä bufi ca̦i jaducua mö fedule dao”, a bufi ma cuno wei ma cui, bä bufi jaducuonomi. ²⁶ ’Ö̦jö tä fena ja, a aa fa co̦lunö, cama Isaeli ecöbö a̦fa tayou dalalema. Cäcöbö nofimayou co̦obä, a wa̦ faö läoma. “Iba wafäcö. Cafä wafäcö ma cui, ¿wedi tabä wafäcö a̦fa tayou dicoa cule? Wafäcö nö bleaamayobä wafäcömi”, a cuma. ²⁷ Inaja a cuma ma cui, a yai doblou lä mlaono wei a lä cui, a wa̦ lafujolanö a fa ja̦ilönö, a nowa tama. “Camiyä yamacö nija, ¿wedinö cafä bei wa li bada tamaquema, yamalecö dobloimi jömabä? ²⁸ Weyaja, Ejidoteli wa shäa lä taleno weinaja, ¿wale nia shaö cuo mö feduo daanö?” a cuma. ²⁹ Ö̦jö a wa̦ fa ji̦lilänö, Madiana tä ulifi jamö Moisesi a docua mö cua showalayoma. Ö̦jamö a fa bälöalunö, suwä a fa dälönö, bä ijilubö bolacabö ecöbö taquema. ³⁰ ’¿Ö̦jö tawä? —Esteban a cuma—. Ö̦jamö lä, lasha 40 a faa fa co̦malönö, Sinai cäcö ajede jamö, Yai Bada a wa̦ faö bufio ja, Moisesi nija a̦jele etä shömöledayoma. Fii defi wacö lä wao wei jamö, tä wawälayoma, ulifi bloque jamö. ³¹ Ö̦jö tä fa dalalönö, tä mömou nö quilijioma yalo, a bufi mlama. Tä möö ajedeobä a blacäö däjä, Bada tä a̦ bädaliyoma. ³² Abinaja a cuma. Cafä wamacö nö badabö nija ya lä bufiblamou wei ya. Ablaamö ma cui nija, Isaacö ma cui nija, Jacobo ma cui nija, ö̦jö bä nija ya lä bufiblamou wei ya. ’Einaja a cuma. Ö̦jö däjä, Moisesi a quilili blösö blösömoma. Tä möö fa quilinö, a mö jö̦cöoma. ³³ Abinaja Bada tänö a nowa taö ja a cuma. Wa mamicö lä didile täcö da jayublalö. Eja camiyä ya li cua yalo, miji wa tä ulifi lä cabale tä ulifi yaia. ³⁴ Ejido jamö, iba bä nö lä bleaamalajei ya bä dablaö dodijia waiquia lä cule. Ya bä a̦ nö bleaaö ji̦liaö waiquiwä. Ejidoteli bä nija ya bä jucäabä, ya itou waiquia lä cule. ¿Ö̦jö tawä? Bei. Ejido jamö cafä bäfä nia shömaö. ³⁵ ’¿Ö̦jö tawä? Einaja a cuma —Esteban a cuma—. Ö̦jö Moisesi a lä cui, a wailemaje. “¿Wedinö bei wa li bada tamaquema, yamalecö dobloimi jömabä?”, bä cuma. Ö̦jö ma cui, a ma waileno wejei ma cui, Yai Bada tänö bada ö̦jö a fa tablamalönö, a shömölema, bä nö bleaabä jamö bä jucäabä. Fii defi möamo jamö, Yai Bada a̦jele etä lä wawälayono wei a wa̦ ja, a shömölema. ³⁶ Ö̦jönö bä lulubou co̦oma. Ejido jamö ma cui, modu Wacä u jamö ma cui, Yai Bada tä lojode dablamaö ja, tä nö lä quilijii tä bluca wawämaö cuaama, tä tamou dao lä mlai. Ulifi bloque jamö ma cui, ö̦jamö lasha 40 a famaö lä cuaafälöno wejei jamö, inaja a cuaaö showalanö bä lulubou cuaama. ³⁷ ’Ö̦jö a Moisesi showawä lä cuinö, abinaja Isaeli nodiwä bä nowa tama. Yai Bada a wa̦no wäyäbä, camiyä wale shömaö lä cuaano weinaja, cafä Isaeli wama ecö nodiwä nija, inaja showawä ai a nia shömaö cuo nomöjöo. ’Einaja bä nowa tama —Esteban a cuma—. ³⁸ Tä ulifi blocoobä jamö, Isaeli nodiwä bä co̦camolanö, bä juu lä cuaafälöno wei, ö̦jö Moisesinö bä ca̦i cuoma. Sinai cäcö jamö ö̦jö Moisesi nija showawä, Yai Bada tänö cama a̦jele etä lä shömöleno wei a wa̦ fama. Camiyä bämacö nö ca̦i badabö cuoma, Moisesinö. Yai Bada nija dodijidawä bä ba̦limi cuobä, Moisesi nija tä a̦ bluca wäyäö fa balöonö, bämacö nö badabö nija tä a̦ wäyäö fe dolemou nomöjöoma. ³⁹ ’Ö̦jö ma cui, camiyä bämacö nö badabönö a wa̦ ji̦liaö bufio dicoo fa mlacujenö, a wa̦ juanomije —a cuma—. A wa̦ wailemaje. Ejido jamö bä bufi mö shino yabajaoma. ⁴⁰ Abinaja Aaloni nija bä cuma. “Bei. Yama täbä bufiblabä, täbä nö idubö da tablalö. Ö̦jö bäma täbä ca̦i fa balömabonö, ö̦jö bä nija bämacö yai nocaobä. Ö̦jö Moisesi a lä cui, Ejido jamö bämalecö lä co̦leno wei a lä cui, ‘Ö̦ja lä a cule daanö’, yamacö bufi cuimi waiquiwä”, bä cuma. ⁴¹ ’Ö̦jö däjä, baca ocalo a nö idubö tablalemaje. A bufiblabeje a lä tablaleno wejei a ja, yalo bä ö̦shö dodobou showaomaje. A nö idubö lä tablaleno wejei a ja, bä bufi doblalou dodijioma. ⁴² Ö̦jö cudeenö, wa̦lidiwä tä ja Yai Bada tänö bä noshi ö̦jödabou nomöjöoma, judu mösö jamö bä bluca lä culadi bä nija, bä jole bayeliblamou nomöjöobä. Ö̦jö bä nija bä möfe bolanö, bä nö jole bayeli nacaobä. Yai Bada a wa̦no wäyälewä bänö, tä lä oniblaleno wejeinaja showawä. Yai Bada a wa̦no wäyäö ja, abinaja ai a cuma. Isaeli wama ecö. Ulifi bloque jamö, lasha 40 wama a famaö lä cuaafälöno wei däjä, ¿cama Yai Bada a dodijiwä nija wama bä yalo ö̦shö yai dodobou yaio nowa tawä? Ma. Inaja wamacö nofi cuaanomi. ⁴³ Wamacö jocäö lä cuaafälöno wei jamö, ö̦jö shomi bä nija a lä bufiblamou wei, Moloco a lä cui, ö̦jö bei wama e yano ca̦i jocädou cuaafälöma. Shomi bä nija a bufiblamou mö lä feduo wei a shidicali ma cui, ö̦jö bei wama a nö idubö shino ca̦i judou cuaafälöma. Lefana wama a wa̦fa shidicali lä jilaö wei. Ö̦jö bä nija wamacö nö bayeli nacaobä, wama bä nö idubö tablalema. ¿Ö̦jö tawä? Ö̦jö cudeenö, bä nö lä nabämou wei bä nija, Babilonia tä fe biyä jamö wamacö nia bälamou nomöjöo. ’¿Ö̦jö tawä? —Esteban a cuma—. Einaja Yai Bada a cuma. ⁴⁴ Ulifi bloque jamö, camiyä bämacö nö badabönö Yai Bada etä yano tabomaje, bä bufi jaducuafälöbä. Moisesi nija Yai Bada tänö tä taamaö lä bufino weinaja, a yano tablamama. “Einaja tä mömou cuo dodijiobä”, Yai Bada a lä cuno weinaja, inaja showawä Moisesinö a yano tablamalema. ⁴⁵ ’¿Ö̦jö tawä? Camiyä bämacö nö badabö lä cui, Josuénö bä ca̦i waloa lä nomöjöqueyoluno wei däjä, Yai Bada etä yano ca̦i fa juimajenö, e ca̦i waloqueyolumaje. Yai Badanö, eja shomi bä lä bälöjömono wei bä fa yashublalönö, ö̦jö bä bälöa läa nomöjömaquema. Yai Bada etä yano tabou fa showaojenö, nö badabö David a bälöo lä nodiono wei däjä ma cui, e yano tabou nodio showaomaje. ⁴⁶ ’Ö̦jö David a lä cuinö, Yai Bada a bufi doblamaboma —Esteban a cuma—. E yafi tablaö bufi doblaoma, ö̦jamö Jacobo nija a lä bufiblamou wei a yai cuobä. ⁴⁷ E yafi tablaö bufi ma doblaono wei ma cui, bä ijilubö Salomo e lä cuinö etä yafi yai tablalema. ⁴⁸ Ö̦jö ma cui, yanowamö bämacönö bäma bä yafi lä tablaö wei jamö, ö̦ja Yai Bada a shino Bada lä ayai a lä cui, a nia cuomi. Yai Bada a wa̦no wäyälewä a lä cuno weinaja showawä. Abinaja tä a̦ cuu. ⁴⁹ Fedu jamö Bada a yai läo. Bita a lä cui, a mamicö li maqueobä a li. ¿Wedi wama tä yafi fa tablalönö, bei wama a nia bälömabou? ¿Wedi jamö wama a nia li yanöcömabou? ⁵⁰ Cama a showawänö ¿fei täbä bluca ca̦i tablanomi daanö? ’¿Ö̦jö tawä? —a cuma—. Einaja tä a̦ cuu. ⁵¹ Wamacö bufi nofi jifuwä. Jai Yai Bada wama a wa̦ nofi mojodubou, wamacö cuwä. Wama a wa̦ juaimi. Wama tä a̦ ji̦liblaimi. Yai Bada a Bufi ma cui, ö̦jö showadi wama a wa̦ ca̦i waibou. Wamacö nö badabö lä cuaano weinaja, wamacö cuaaö nodiablalou showawä. ⁵² Yai Bada a wa̦no wäyälewä bä lä cui, ¿bä nö bluca bleaamanomi sijewä? Yai Bada a wa̦ juamobä a lä yaileno wei a ma cui, ö̦jö a wa̦fa juu wäyäö lä balöono wejei bä bluca ca̦i shäa balöalalemaje. Ö̦jö a wa̦fa juu lä wäyäno wejei a lä cui, cafä wamacö lä nodiblaliyono wei wamacö ma cuinö, fei däjä wama a fa nomojolilänö wama a shämalema. ⁵³ Cafä wamacönö wama tä a̦ tabobä, Yai Bada a̦jele etäbä nija Moisesinö tä a̦ ma däleno wei ma cui, wama tä a̦ ji̦liaö bädaonomi —Esteban a cuma. ⁵⁴ ¿Ö̦jö tawä? Esteban a wa̦ fa ji̦liläjenö, bä jushudou fe fa balojolonö, bä asi asimou showadaoma. ⁵⁵ Ö̦jö ma cui, Yai Bada tä Bufinö Esteban a fa jödödöblalunö, fedu jamö a mö fa nonoicunö, Yai Bada bei tä shi̦i dalalema. Jesús a ca̦i ublaa dalalema, Yai Bada jayu boco mashi jamö. ⁵⁶ Ö̦jö tä fa dalalönö, abinaja Esteban a cuma. —Bei. ¡Quiji tä da möje! Judu mösö ca fa jolablalunö, Yai Bada jayu boco mashi jamö, a lä yanowamöblaleyoluno wei bei ya ublaa dablaö lä cule —a cuma. ⁵⁷ Ö̦jö a wa̦nö, bä jushudou fe fa balojolonö, bä a̦ nacli faa showalayoma. Bä yömöcacö fa jumödalunö, ö̦jö lä bä bluca showadawänö, Esteban a nabä läläa showadaquemaje. ⁵⁸ A nabä fa queicujenö, shabono a sibo jamö a shailefälömaje. Ö̦jö däjä, bä nia lä ishou wei bänö, camishi ebä jayua fa balölalöjenö, fiya a ublao lä yädäono wei a cotä jamö, bä jilaaquemaje. Bä fa jilaacöjenö, maa mabänö Esteban a fa shäyälalöjenö a nomamalemaje. Ö̦jö a fiya ublao lä yädäono wei a lä cui, Saulo a wa̦fa cuoma. ⁵⁹ Maa mabänö, inaja a ma taamaöje däjä ma cui, a wa̦ Esteban faö fe fa yadionö, Jesucristo nija a nö bayeli nacaoma. —¡Bada tä! ¡Jesús! —a cudaliyoma—. Wale bufi da co̦lö. ⁶⁰ Ö̦jö däjä, Esteban a fa diyäliicunö, moli a wa̦ i̦cali faa co̦layoma. —Bada tä. Ei wale lä shälajei bä nija, wale nö bäshölö tabo dijä —a fa cudalunö, a bufi mlaa showadaquema.

¹ Esteban a shäbeje jamö, ö̦jö a fiya Saulo lä cuono wei, a wa̦ ca̦i yädäoma. Ö̦jö tä mö jalu showawä ja, Jelusale jamö Jesucristo ebä lä yododaö wei bä nö bluca bleaamabeje, bä nabä quea showadaquemaje. Bä nö bleaamaö dodijiomaje yalo, Judea jamö ma cui, Samalia jamö ma cui, Jesucristo ebä bluca sheleleomobodayoma. Jesucristonö bä lä shömöleno wei bä shino waiquio juoma. ² Yai Bada nija bä bejedimou bufi lä doblaono wei ai bä lä cuinö, Esteban a nomawä fa co̦löjenö, a didiquemaje. A nomöa ca̦i däbou fe balojoomaje. ³ Ö̦jö ma cui, Saulonö, Jesucristo ebä lä yododaö wei bä nö bleaamaö fe balojoo showaoma. Cama bä yafibö jamö a lucäblou fa cuaanö, wa̦lo bä ma cui, suwä bä ma cui, bä läcäamaö cuaama. Bä läcäamaö fa cuaanö, bä fe lamaquema. ⁴ Bei. Jesucristo ebä lä sheleleblaliyono wei ebänö, etä a̦ wäyäö cuaamaje. ⁵ Felipe a lä cui, Samalia tä ulifi jamö a alayoma. A fa alufälönö, shabono ai a jamö a fa co̦blalunö, Yai Bada tänö a shömabä a lä yaileno wei a wa̦fa wäyäma. ⁶ Felipe nija bä yömöca fa daonö, Yai Bada tä lojode lä dablamaö wei tä ca̦i fa möjenö, ö̦jö bä blucanö a wa̦ ji̦liamaje. ⁷ Bä bluca malä jalolaliyono wei. ¿Ö̦jö tawä? Bä lä feculaböono wei bä jalomama. Fecula ebä fa si̦lalamooblonö, bä docuoblofälöma. Ai bä mö feduwä lä cui, bä lä ya̦toliböono wei bä ma cui, bä juno lä mlai bä ma cui, ö̦jö bä bluca ca̦i jalomaö mö feduo showaoma. ⁸ Ö̦jö cudeenö, ö̦jö a shabono jamö bä bufi bluca doblaloma. ⁹ Ö̦jö a shabono ja, Simón a wa̦fa lä cule a bada shaboli fa bälöonö, a feculamoma. A feculamou nö quiliama cudeenö, cama a wa̦fa ca̦i bada wäamoma yalo, Samalia jamö bä lä bälöblai bä bufi bluca shädayaimomama. ¹⁰ Bada bä ma cuinö, oshe bä ma cuinö, a wa̦ bluca ji̦limaje. Abinaja bä nowa tayoma. —Fei Simón a lä cui, Yai Bada etä a̦fa yai lojode lä wäyämou wei, fei ö̦jö lä a waiquiwä —bä nowa tayoma. ¹¹ Simón a nö feculamou quiliaö nö dedeama yalo, ö̦jö nija bä bufi shädayaimou dodijioma. Showadi a wa̦ ji̦limaje. ¹² Ö̦jö ma cui, Felipe a fa waloicunö, bluca bä nija tä a̦ dodijidawä wäyäma. Yai Bada tänö cama ebä ca̦i lä cuo wei tä a̦ fa wäyänö, Jesucristo a wa̦fa ca̦i wäyäö mö feduo showaoma. Ö̦jö tä a̦ bejedi fa ji̦liläjenö, tä a̦ bufilemaje. Tä a̦ fa bufilöjenö, wa̦lo bä ma cui, suwä bä ma cui, bä fe bluca ojoblamoa showadalayoma. ¹³ Cama Simón a ma cui, ö̦jö tä a̦ ca̦i fa bufilänö, a fe ca̦i ojoblamolayoma. A fe fa ojoblamolunö, Felipe nija a nocaablalou showadaquema. ¿Ö̦jö tawä? Felipenö Yai Bada tä lojode dablamaö dodijioma. Tä nö lä quilijii tä bluca tama, tä tamou dao lä mlai. Ö̦jö tä bluca fa mönö, Simón a bufi shädayaimoma. ¹⁴ Bei. Jelusale jamö, Jesucristonö bä lä shömöleno wei bä lä cuinö tä a̦ ji̦lilemaje. Samaliateli bänö Yai Bada etä a̦ bejedi lä däleno wejei tä a̦ fa ji̦liläjenö, ö̦jamö lä Pedro, Juan sho cäcöbö shömöa showadaalemaje. ¹⁵ Ö̦jamö cäcöbö fa waloicunö, Samaliateli bä nö bayeli nacaböma, Yai Bada a Bufi lucäbä. ¹⁶ Ö̦jö bä nija a Bufi lucänomi showawä cudeenö, Yai Bada nija cäcöbö a̦ fama. Bada tä Jesús a nofi mölabomaje yalo, bä fe shino ojoblamoa bälayoma. ¹⁷ Ö̦jö däjä, ö̦jö bä nija cäcöbö imicö fa maqueicunö, Yai Bada a Bufi lucäo showadaolaliyoma. ¹⁸ Jesucristonö bä lä shömöleno wei cäcöbö imicö fa maqueicunö, Yai Bada a Bufi lucäö lä showadaono wei, Simón a lä cuinö tä möma. Ö̦jö tä fa mönö, blada bä dodoboma. ¹⁹ Abinaja cäcöbö nowa tama. —Cafä wafäcö lä cuinö, lojode wafä tä lä tabole tä ja wafäle da dobälö, camiyä ya ma cuinö, inaja showawä ya bä taamaö mö feduobä. Camiyä ya imicö lä maqueo wei däjä, Yai Bada a Bufi lucäö showadaobä —a cuma. ²⁰ Ö̦jö ma cui, abinaja Pedronö a nowa tama. —Yai Bada tänö no mlai ja, bämalecö ma bayeliblaö wei ma cui, “Blada bä ja ya dobämobä”, ¿bei wa bufi li cuu dicowä? Shobali wacö jamö afä bladafä bä ca̦i da culu. ²¹ Camiyä yafäcö ojodamobä jamö, cafä wa nia yädäomi. Yai Bada nija wa bufi cadidia malä mlai. ²² Ei wa doblou lä mlale tä ja, a bufi da lädalu, ö̦jö lä. Wa bufi lä cuole tä nowa mladamabä, Bada tä nija a wa̦ da wämoicu. Wa bayeliblaö ja̦toa bälayou fa cui. ²³ Bufi waiyou tä lä cuinö wa lä wa̦lidiblole, bäfä dobloimi dablaö malä waiquile —Pedronö a nowa taö showadaoma. ²⁴ Simón abinaja a cuu mö feduoma. —Bada tä nija wafäle da bayelima, wafäcö lä cufenaja wale taamaö dicoo mlaobä —a cuma. ²⁵ ¿Ö̦jö tawä? Pedro, Juan sho cäcöbö lä cuinö, ö̦jamö bä lä bälöle bä nija Bada tä a̦fa wäyäböma. A wa̦no wäböquema. Ö̦jö däjä, Jelusale jamö cäcöbö co̦o ja, Samalia jamö bä lä bälöblai bä bluca nijamö, Jesucristo etä a̦ dodijidawä wäyäböö jayuaö co̦ofälöma. ²⁶ Bei. Felipe nija Yai Bada tänö a̦jele etä fa shömöludunö, abinaja Felipe a nowa tama. —A da alufälö. Motoca a queo lä mlai jamö wa fa culufälönö, yo lä jafedile yo ja wa cuobä. Jelusaleteli bä lä bälöle yo lä cui, Casa jamö yo lä shadile yo ja, wa cuicu —a nowa tama. Ö̦jö yo lä cui, ulifi bloque jamö yo jayua. ²⁷ Inaja a nowa taö ja, a aa showadalayoma. Ö̦jö yo jamö a fa waloicunö, Ediobiateli a bada lä yädäono wei a juu dalalema. Ediobia jamö bada a lä nosiemono wei a suwä lä cuinö a bada lämaboma, cama madofi ebä bluca nowamabä. Ö̦jö a lä cui, Jelusale jamö Yai Bada a wa̦fa nia Bada doblao fa tanö, a alayoma. A fa alunö, ²⁸ a co̦o co̦imama. Läläamodima cäcö jamö a befi ca̦i läläalanö, tä a̦ oni möfälöma. Tä a̦ oni lä doafälöno wei tä a̦ lä cui, Yai Bada a wa̦no wäyälewä Isaia etä a̦ cuoma. ²⁹ ¿Ö̦jö tawä? Yai Bada a Bufinö, Felipe nija ö̦jö a nabä shömöquema. —Läläamodima cäcö jamö a befi ca̦i lä läläale jamö, e da boaicu —a cuma. ³⁰ Ö̦jö cudeenö, ö̦jö nija Felipe a fa läläicunö, a läläaö boaama. Ö̦jö däjä, Yai Bada a wa̦no wäyälewä Isaia etä a̦ lä doaö wei a wa̦ fa ji̦lilänö, a wa̦lima. —Miji wa tä a̦ oni lä doale tä a̦ ja, ¿wa bufi jaducua cube? —a cuma. ³¹ Abinaja Ediobiateli a cuma. —Tä a̦ wawämabä a cuami ja, ya bufi jaducublou mlaicätä —a cuma. Einaja a fa cunö, cama a befi ca̦i lä läläale täcö jamö, Felipe a döcäa ajedeamaö bufima. ³² Tä a̦ lä doafälöno wei tä a̦ lä cui, abinaja tä a̦ oni cuma. Oweja a shäbeje jamö a lulumamou lä culenaja, a lulumamou cuoma. Oweja ocalo a co̦icö jasömamou däjä, mamicai a cadödio lä culenaja, a mamicai cudioma. ³³ A nö waiblamaje. A wa̦fa jole fa wäyäjenö, a shämaö bufimaje. Cama nodiwä ebä nia bälöo juomi. A bälöa mladou malä waiquilayono wei. Einaja tä a̦ oni cuma. ³⁴ Ö̦jö däjä, bada a lä cuinö, Felipe nija tä a̦ wa̦lima. —¿Wedi bei tä a̦fa li tamou dodijio, ö̦jö lä? Yai Bada a wa̦no wäyälewä a lä cui, ¿cama bei a wa̦fa wäyämamou daanö? Ma, cama a wa̦fa wäyämamou mlai, ¿ai bei a wa̦fa wayoaö daanö? —a cuma. ³⁵ Ö̦jö däjä, Felipe a wa̦ fama. Ö̦jö tä a̦ wawäa fa balömalönö, Jesús dodijawä etä a̦ wäyäö nomöjöoma. ³⁶ Ö̦jö yo jamö cäcöbö befi ca̦i fa lälälönö, mau u jamö cäcöbö waloquema. Ö̦jö däjä, abinaja bada a cuma. —Fei mau u da mö, fei, fei. Camiyä ya fe ojoblamou showadaobä, ¿ai bei tä läami daanö? —a cuma. ³⁷ —Jesús wa wa̦ bejedi bufii ja, wa fe ojoblamobä wa waiquiwä —a Felipe cuu mö feduoma. ³⁸ Ö̦jö däjä, bada a lä cuinö, läläamodima cäcö yanöcödamaö fa bufinö, Felipe sho cäcöbö fa itoblalunö, mau u ja cäcöbö itoquema. Felipenö a fe ojoblalema. ³⁹ Cäcöbö washölöblou fa co̦lonö, Yai Bada tä Bufinö Felipe a däa showadalefälöma. ¿Ö̦jö tawä? Bada tänö Felipe a dablaö co̦o mlai ja, a bufi ca̦i doblao co̦a co̦layoma. ⁴⁰ Yai Bada a Bufinö Felipe a däa fa showadalefälönö, Asodo jamö a bälaa fa nomöjöcönö, ö̦jamö lä a damoa nomöjölaliyoma. Ö̦jamö lä a jayualanö, bluca bä shabonobö jamö, Jesucristo etä a̦ dodijidawä wäyäö fa jayuaimadunö, Sesalea jamö a waloa nomöjöquema.

¹ Bei. Ö̦jö Saulo a lä cui, a wa̦ waitelimou showai ja, Bada tä nija bä lä nocao wei bä nia jo̦wa waicama. Nofi bäyäalewä a bada lä cui nija a fa icuicunö, ² si oniblamalema, Damaco jamö si oni ca̦i jubä. Ö̦jamö, judio bä yododabä yafi bä jamö, ö̦jö tä a̦ oni ca̦i fa co̦blalunö, bada bä nija tä a̦ nia oni mömaö cuaama. Ö̦jö tä a̦ oni fa möjenö, Jesucristo a wa̦ lä juaö wejei bä cublawä ja, bä jömabeje. Wa̦lo bä ma cui, suwä bä ma cui, Saulonö bä fa dalalönö, bä juwäa fa showadalönö, Jelusale jamö bä nia bococu o̦cama bälaö co̦oma. ³ ¿Ö̦jö tawä? Saulonö bä co̦aö mö jufälöö däjä, Damacoteli bä nijamö a co̦blou bufio däjä, fedu jamö tä shi̦i fa bädalunö, cama a lä cule jamö tä shi̦i bada wacacadioma. ⁴ Ö̦jö däjä, a fa wäcäblaicunö, a wa̦ ji̦lia showalema. —Saulo, Saulo —a cuma—. ¿Wedi tabä wale nö bleaamaö dicoa cule? ⁵ —Bada tä —Saulo a cuma—. ¿Wedi bei wa jo̦wa? —Wale nö lä bleaamaö wei Jesús ya wa̦ —a cuma—. ⁶ Abinaja wa yai cuaabä. Wa fa jocädalunö, Damaco shabono jamö a da yafilö. Wa nia yai lä cuaaö wei tä ja, ö̦jamö lä wa nia yömölamou nomöjöo —a cuma. ⁷ Saulonö bä ca̦i lä juno wei bä lä cui, ö̦jö a wa̦ ja, mamicai bä ublajaoma. Bei a yai dablaö ma mlajei ma cui, a wa̦ shino ji̦liaö buomaje. ⁸ Saulo a fa jocädalunö, mamo casicö ma yobadaliyono wei ma cui, tä möblanomi. Ö̦jö cudeenö, a fa öbölöfälöjenö, Damaco jamö a ca̦i co̦blaliyomaje. ⁹ Ö̦jamö a jubäbö cuo showao däjä, bolacabö tä mö didi ma tablamaleno wei ma cui a jubäbö cuo showaoma. A ca̦i iyanomi showawä. A amishi ca̦i co̦onomi showawä. ¹⁰ Bei. Damaco jamö Jesucristo nija a lä nocao wei, a wa̦fa Anania cuoma. Cama nija Bada tä Jesucristo wawädowä a fa bädalunö, abinaja a nowa tama. —Anania. Anania abinaja a cuma. —Aö. ¿Wedi cätä, Bada tä? ¹¹ Bada tänö abinaja a nowa tama. —Shaliliwä yo a̦fa lä jilabou wejei yo jamö wa fa alufälönö, Juda e yafi jamö, Dasoteli a wa̦ da wa̦li, Saulo a wa̦fa lä cule. Ö̦jamö a nö bayeli nacao lä cubiyei. ¹² Cafä Anania wa lä cui, wawädowä wa dablaö waiquia lä cule. Jai wa co̦blou, wa nofi tabou waiquiwä. Bei mamocu dodijidablou co̦obä, wa imicö maqueo dablaö waiquiwä —a nowa tama. ¹³ Ö̦jö ma cui, abinaja Anania a cuma. —Bada tä. Ö̦jö wa wa̦fa lä wäyäfe, bluca bä nija ya wa̦fa ji̦libou waiquia. Jelusale jamö afä bä lä cui bä nö jo̦wa bleaamaö dodijioma. ¹⁴ Nofi bäyäalewä blowäjäwä bä lä cuinö, eja a shömaö nomöjöomaje. Ö̦jö bä a̦ ja, camiyä yamalecö nia jo̦wa o̦caö nomöjöo, cafä bäfä nofi lä mölabou wei yamacö lä cui —a cuma. ¹⁵ Ö̦jö ma cui, abinaja Bada tänö a nowa taö fe yadioma. —Ma, a da alufälö. Wale a̦fa wäyäö cuaabä, iba ya yaia malä waiquilöfe. Judio bä lä mlai bä ma cui, bada bä bälöo lä dodijio wei bä ma cui, Isaeli nodiwä ebä ma cui, ö̦jö bä nia bluca yömölaö cuaaö. ¹⁶ Wale a̦fa wäyäö tä nowa ja, a nö nia lä bleaamaö wejei tä ja, camiyänö ya nia yömölaö —Jesús a cuma. ¹⁷ Inaja a nowa fa talönö, Anania a aa showalayofälöma. A fa yafilönö, Saulo a dalalema. Imicö maquelanö, abinaja a nowa tama. —U̦asi. Saulo. Cafä nijamö, Bada tä Jesúsnö wale shömölei lä cufe, wa juimabä jamö a dablamou lä läono wei a lä cuinö. Wa mamocu dodijidablou co̦obä wale shömölema, Yai Bada tä Bufinö wa ca̦i jödödöblou showaobä —a cuma. ¹⁸ Yedu, Saulo mamocu jamö jai yuli niyosibä cuwä täcö fa quelunö, tä möö dodijidablou co̦layoma. A fa jocädalunö, a fe ojoblamoa showadalayoma. ¹⁹ Ö̦jö däjä a iyaö fa co̦onö, a lojodoblou co̦layoma. Jesucristo nija bä lä nocao wei bä nija a fa yädäblalunö, Damaco jamö a fe weyablaama. ²⁰ Judio bä yododabä yafi bä jamö, Yai Bada Ijilubö e a̦fa Jesús wäyäö cuaaö ja, abinaja bä nowa tablaama. —Jesucristo a lä cui, Yai Bada cä tä Ijilubö waiquiwä —bä nowa tablaama. ²¹ A wa̦ lä ji̦liaö wejei bä lä cui, bä bufi bluca shädayaimoma. Abinaja bä nowa tayoma. —Jelusale jamö, Jesús a nofi lä mölabou wejei bä nö lä bleaamano wei, ö̦jö a nofi lä cui. Eja ma cui, inaja a nia cuaaö fa co̦oyonö, Jesucristo bäma ecö nabä malä co̦blalufe. Nofi bäyäalewä blowäjäwä bä nija, o̦cama bämalecö nia bälaö fa co̦onö —bä nowa tayoma. ²² ¿Ö̦jö tawä? Ö̦jö ma cui, Jesucristo a wa̦fa wäyäö ja, Saulo a wa̦ faö fa lojodoablaloimadunö, a wa̦ nö wa̦lojoblaliyoma. Damacoteli judio bä lä cui, bä a̦ ma lämono wei ma cui, bä a̦ nö wa̦loblamanomi. Abinaja Saulonö bä nowa shino tadima. —Jesús a lä cui Yai Bada tänö a shömabä a lä yaileno wei, ö̦jö a waiquiwä —bä nowa taö lojodoama. ²³ Tä nö fa dedelönö, judio bä yododama. Saulo a nofi lämabeje, a wa̦fa ma wayoano wejei ma cui, ²⁴ Saulo a moyawälayoma. A shäbeje, ala nacö jamö yoca lä joleono wei jamö bä läoma. Jalu däjä ma cui, didi däjä ma cui, ö̦jamö bä ma lämodino wei ma cui, ²⁵ cama ebä lä nocaono wei bänö, shomi jamö a documalemaje. Didi däjä, ala nacö jamö a ca̦i fa dubofälöjenö, yolofi a ja a fa didiicunö, tocota cäcönö sibo jamö a befi ca̦i itoa ja̦tomalemaje. ²⁶ A fa doculunö, Jelusale jamö a co̦blaliyoma. Ö̦jö däjä, Jesucristo nija bä lä nocao wei ebä nija, a yädäblou bufi doblaoma ma cui, ebä quilii dicooma. “Jesucristo nija ö̦jö a ca̦i nocaa mö fedua lä cule”, ebä bufi cuno malä mlai. ²⁷ Ö̦jö ma cui, Benabei a lä cuinö a bayeliblaö fe yadilayoma. Jesucristonö bä lä shömöleno wei bä nija a ca̦i fa junö, a nofi bäyäama. Bei yo jamö, Saulo nija Bada tä Jesús a lä bädaliyono wei, tä a̦fa wäyäma. Jesúsnö a wa̦ lä wayomano wei tä a̦ ca̦i. Damaco jamö, Jesús a wa̦fa wäyäö lä waiteliblaliyono wei tä a̦ ca̦i. ²⁸ Ö̦jö cudeenö Jelusale jamö, Saulonö Jesucristo ebä ca̦i dodijidawä juu cuaaö nomöjöoma. ²⁹ Showadi Bada tä a̦fa wäyädima. Ö̦jö ma cui, ai bä judio mö feduwä lä cuinö a wa̦ ji̦lianomije. Clesiateli bä caficö a̦ lä däleno wejei bä judio lä cui, ö̦jö bä ca̦i ma yömölano wei ma cui, bä a̦ shino lämodima. Bä bufi nia möblamaö fe fa yadionö, a wa̦ ma lojodoano wei ma cui, Saulo a shäbeje a nofi washuamaje. ³⁰ Jesucristo ebä lä cui, ö̦jö tä a̦ ja bä fa moyawälönö, Saulo a documalemaje. Sesalea jamö a ca̦i waloa fa balöicujenö, Daso jamö a shömöa co̦lemaje. ³¹ Ö̦jö däjä, Judea jamö ma cui, Calilea jamö ma cui, Samalia jamö ma cui, Jesucristo ebä bluca lä yododoblai bä yanöcöblou jälayoma. Bä nö bleaamaö co̦daaö jaöonomije. Bä bufi lojodoblaliyoma. Bada tä nija bä fa quilinö, bä bejedimoma. Yai Bada tä Bufinö bä bayeliboma. Inaja bä dodijidawä fa cuaanö, bä blucablaliyoma. ³² Bei. Pedro a lä cuinö, Yai Bada ebä lä bälöblai bä fe walou cuaama. Lidateli bä nijamö a fa alufälönö, ö̦jö bä fe ca̦i walolema. ³³ Ö̦jamö Eneasi a jalili dalalema. A ya̦toliböoma. A jalili blao showao däjä, lasha 8 a faa waiquimalema. ³⁴ Ö̦jö nija Pedro a wa̦ fama. —Eneasi. Jesucristonö wa jalomaö lä cule. Wa fa jocäblaluno, wa lä maquele täcö da cofublalö —a cuma. Inaja Pedro a fa cunö, a jalili jocädou showalayoma. ³⁵ Lidateli bä bluca ma cuinö, Salonateli bä bluca ma cuinö, ö̦jö a jalou fa dalalöjenö, Bada tä Jesús a bufia showalemaje. ³⁶ Bei. Jobe jamö, a wa̦fa suwä Dabida cuoma. Jesucristo nija a lä nocaono wei a suwä cuoma. Clesiateli bä caficö a̦ ja, Doca a wa̦fa jilabomaje. A dodijama. Bä lä jo̦li wei showadi bä shino bayelibladima. ³⁷ Ö̦jö däjä, a fa jalililalunö a bufi mlaquema. A nomawä fa yalublalöjenö, a yano lä feyacale jamö a nomöa bobeje a blabejelayomaje. ³⁸ ¿Ö̦jö tawä? Jobe tä ajede jamö, Lidateli bä shabonobö blao mö feduoma, Pedronö bä fe lä walono wei jamö. Ö̦jö cudeenö, ö̦jamö Pedro a jo̦wa juu fa ji̦liläjenö, Jesucristo nija bä lä nocao wei ebänö, bolacabö cäcöbö shömölemaje, Pedro a nacaböbä. Cäcöbö fa co̦blalunö, Pedro nija cäcöbö a̦ fajaloma. —Lobe, lobe —cäcöbö cuma—. Camiyä yafäcö nija a yaua da showaiquiyo, ¿ö̦jö tawä? ³⁹ Inaja cäcöbö cuu ja, Pedro a yaua showalayofälöma. Ö̦jamö lä a ca̦i fa waloböicunö, a yano lä feyacale jamö a ca̦i duböa showabefälöma. Ö̦jamö lä Pedro a lä ublale jamö, bä suwä ö̦cöö ca̦i ajedeblaliyoma, bä lä yamiblaliyono wei bä suwä bluca lä cui. Bä didimabobä, Docanö camishi ebä lä diyälaleno wei ebä ca̦i yocoamaje. ¿Ö̦jö tawä? Bä lä feyacabono wejei bä ma cui, bä lä u̦eshibono wejei bä ma cui, bä ca̦i cuo showao däjä, bä bluca diyälalema. ⁴⁰ Pedronö sibo jamö bä bluca fa shömölönö, Yai Bada nija a nö bayeli nacabä, a dijoblaquema. A nö bayeli fa nacalänö, nomawä a lä cui nija a mamo showadou nomöjölayoma. A mamo fa showadalunö abinaja e cuu nomöjöoma. —Dabida, wa fa jocädalunö, a ublaa da co̦lu —e cuma. Einaja a cuu ja, ö̦jö a suwä lä nomalayono wei a mamo casö jocädaliyoma. Pedro a fa dalalönö, a loquema. ⁴¹ Ö̦jö däjä, Pedronö boco fa dälönö, a ublamafälöma. Yai Bada ebä nacaa fa co̦alalönö, bä suwä lä yamiblono wei bä ca̦i nacaa fa co̦alalönö, ö̦jö bä nija Doca a demi daa co̦malalema. ⁴² Jobeteli bä nija ö̦jö tä a̦ ji̦limou fa blaucublalunö, ö̦jö ai bä bluca lä cuinö, Bada tä Jesús a bejedi bufia showalemaje. ⁴³ Jobeteli Simón a wa̦fa lä cule nija Pedro a fa cualunö, ö̦jamö lä a fe weyablaama. Ö̦jö a Simón lä cui, showadi yalo sibä lä dodijamano wei a li cuoma.

¹ Sesalea jamö, Conelio a wa̦fa lä cule a bälöoma. Judio a cuonomi. Sodado 100 bä ca̦i lä cuono wei a bada cuoma. Ö̦jö 100 bä ca̦i lä cuono wei bä lä cui, Italiano ebä a̦fa sodado jilabomaje. ² Ö̦jö a lä cui, Yai Bada nija a bejedimou bufi doblaoma. Cama a ma cuinö, cama ebä ma cuinö, Yai Bada tä nö quili bluca tamaje. A bufi läo mlai ja, judio bä lä jo̦li wei showadi bä dobäma. Yai Bada nija a nö shino bayeli nacaodima. ³ ¿Ö̦jö tawä? Motoca a lä yajadodoblole däjä, Yai Bada tänö cama a̦jele etä fa shömöludunö, Conelionö wawädowä tä möma. Conelio a lä cule jamö a fa lucälönö, a wa̦ wawälayoma. —Conelio —a cuma. ⁴ Yai Bada tä a̦jele nija a mamo quilili showalanö, a wa̦ juoma. —¿Wedi cätä, Bada tä? Abinaja a̦jele e cuma. —Showadi Yai Bada nija wa nö bayeli lä nacao wei tä a̦ ji̦limou culadi. Bä lä jo̦li wei, wa bä showadi lä dobäö wei, ö̦jö tä ca̦i dablamodayou. Yai Bada tänö cafä wa nofi jaducubou. ⁵ ¿Ö̦jö tawä? Jobe jamö, afä wa bä fa shömölönö, Simón a co̦amaö da bufi, Pedro a wa̦fa lä yädäle. ⁶ Yalo sibä lä dodijamaö wei a Simón lä cuinö a bälömabou lä cule, modu u casö jamö —a̦jele e cuma. ⁷ A wa̦ lä wayomano wei a̦jele tä fa co̦lunö, Conelionö cama ai ebä nacajelema. Showadi a wa̦ lä juaö wejei bä nija, bolacabö ecöbö nacalema. Sodado bä ca̦i lä cuono wei bä nija, moli a ca̦i nacaa mö fedulema, Yai Bada nija a bejedimou bufi lä doblaono wei a lä cui. ⁸ A̦jele a lä cuno wei tä a̦ ja, bä fa yömölalönö, Jobe jamö bä shömöa showadaalema. ⁹ Ö̦jö tä fena ja, Pedro a co̦abeje, Jobe jamö bä ajedequeyoluma, motoca a yo̦loloblou däjä. A nia lä co̦aö wejei bä ajedou däjä, Pedro a nö bayeli nacaobä, feyaca yafi jamö a dubefälöma. ¹⁰ Ö̦jamö lä a fa ofälöjulunö, nii bä löbömaö bufima. Ö̦jö ma cui, nii bä löbömaö showaoje däjä, cama nija wawädowä etä bädaliyoma. ¹¹ Tä fa mödalönö, judu mösö ca jolaa dalalema. Ö̦jamö lä, jai acadafu sicö bada cuwä, tä itolayoma. Sicö casö jududuoma. Sicö fa itoimadunö, mashita jamö sicö blaaliyoma. ¹² Ö̦jö sicö jamö, yaitawä bä ma cui bä yalo bluca coyocomoma. Bä yalo lä jölölou wei bä ma cui, bä lä yäö wei bä ma cui, bä bluca didioma. ¹³ Ö̦jö däjä, tä a̦ wawälayoma. —Bei, Pedro. Miji bä da shäalalö, wa iyabä —tä cuma. ¹⁴ Ö̦jö ma cui, abinaja Pedro a cuma. —Ma, Bada tä. Wa bä a̦fa shami lä taö wei ya bä waimi waiquiwä. Wamodima bämi —a Pedro cuma. ¹⁵ Ö̦jö däjä, a wa̦ wawäö lä balöono wei, a wa̦ faö co̦oma. —Camiyä Yai Bada ya lä cuinö ya täbä aublaö lä waiquile, wa täbä a̦fa shami taö mlai —a cuma. ¹⁶ ¿Ö̦jö tawä? Pedro nija tä lä wawälayono wei tä lä cui, tä wawäa bolacablou fa co̦lonö, ö̦jö däjä showawä, fedu jamö tä befi ca̦i co̦moa co̦layofälöma. ¹⁷ Bei. Cama nija tä lä wawälayono wei tä ja, Pedro a bufi wedinajamou showao däjä, Conelionö bä lä shömöleno wei bä waloquema. Bä fa waloicunö, bei yoca sibo jamö bä ublaqueyoluma. Simón e yafi wa̦liadalaö fa cuaaimadujenö, bä waloa cadidibeyoluma. ¹⁸ Sibo jamö bä ublalanö, bä comöma. —¿Mijamö Pedro a cua culawä, Simón a wa̦fa lä yädäle? —bä cuma. ¹⁹ Cama nija tä lä wawälayono wei tä ja, Pedro a bufi dayäblalou showao däjä, Yai Bada tä Bufinö abinaja a nowa tama. —Bei. Fama 3 bänö wa dayäö lä cuboyojei. ²⁰ A itoa da co̦lufälö. Ö̦jö bä nija a yauo quilii dijä, camiyänö ya bä malä shömöleno wei —a nowa tama. ²¹ A fa itolufälönö, fama bä nija Pedro a wa̦ fama. —Wamale lä dayäle cä ya. ¿Wedi wama tä nabä li juu cufe? —a Pedro cuma. ²² Abinaja bä cuu mö feduoma. —Bada tä Conelio e yafi jamö bäfä nia luluaö fa co̦ofälönö, yamacö waloquei lä cufe. Ö̦jö Conelio a lä cuinö, sodado 100 bä ca̦i lä cule a. A bejedimou bufi doblao. Yai Bada nija a quilii dodijiwä. Judio bä blucanö, a wa̦fa dodijaö taöje. ¿Ö̦jö tawä? Ö̦jö nija Yai Bada a̦jele etä fa wawälönö, cafä wa nacamaö bufima, Conelionö wa wa̦ ji̦liabä —bä cuma. ²³ Ö̦jö cudeenö, cama nija bä cuo fe jalubä, Pedronö bä nacalema. Ö̦jö tä fena ja, fama bä nija Pedro a nocalayofälöma. Ö̦jamö Jobeteli Jesucristo ai ebä lä cui, Pedro nija bä ca̦i nocaquema. ²⁴ Moli bä fa miicufälönö, Sesalea jamö bä co̦blaliyoma. Conelionö bä nö daboma. Cama mashi ebä ma cui, cama nofi ebä ma cui, ö̦jö bä bluca fa co̦cablamalönö, bä yododaö mö baoma. ²⁵ Pedro a ajedou fa dalalönö, Conelionö a nabä läläa mö baquema. Ö̦jö a cotä jamö, a möfe fa deiblaicunö, a wa̦fa bada doblao tama ma cui, ²⁶ Pedronö a ublamaö co̦oma. Abinaja a cuma. —A da ublaicu. Yanowamö bäfäcö malä cui —a cuma. ²⁷ Conelio a wa̦ wayomaö showale, yafi jamö a ca̦i falayoma. A ca̦i fa falönö, bluca bä co̦camou dalalema. ²⁸ Ö̦jö bä nija a wa̦ faö showadaoma. —Judio yamacö lä waio wei, cafä wamacönö yamalecö daö waiquiwä. Judio bä lä mlai yama bä ca̦i cuo daomi. Shomi yama täbä fe ca̦i waloimi. Ö̦jö ma cui, Yai Bada tänö yale bufi jaducublamaö waiquiwä, judio bä lä mlai ya bä waii dicoo mlaobä. Ya bä a̦fa shami taö mlaobä. ²⁹ Ö̦jö cudeenö, cafä wamacö ma cuinö, wamale nacamaö lä bufino wei däjä, ya wa̦ läo mlai ja, ya yaua showaquema ya malä cui. Bei. ¿Wedi wama tä tabä, wamale li nacamaö bufima, ö̦jö lä? —Pedro a cujoloma. ³⁰ Abinaja Conelio a cuma. —Weyajada ja, einaja motoca cuo däjä, Yai Bada nija ya wa̦ fama, showadi bä nö shino weyade bayeli lä nacao wei däjä. ¿Ö̦jö tawä? 4 tä mö didi cua waiquia. Iba yafi jamö ya wa̦ faö däjä, bei a wa̦lo bädaliyoma. Shuducaje shi̦ wacalawä sicö ja, a lä didile a fa wawäblalunö, camiyä ya mö cuobä jamö a ubladaliyoma. ³¹ Ö̦jamö a fa ubladalunö, a wa̦ fama. “Conelio”, a cuma. “Showadi Yai Bada nija wa nö bayeli lä nacao wei, tä a̦ ji̦limou culadi. Bä lä jo̦li wei wa bä showadi lä dobäö wei, ö̦jö tä ca̦i dablamodayou. Yai Bada tänö wa nofi jaducubou lä culadi. ³² Ö̦jö cudeenö, abinaja wa nia cuaaö. Jobe jamö afä wa bä fa shömölönö, Simón a co̦amaö da bufi, Pedro a wa̦fa lä yädäle. Yalo sibä lä dodijamaö wei a Simón lä cuinö a bälömabou lä cule, modu u casö jamö”, a cuma. ³³ ’Ö̦jö cudeenö cafä bäfä nacamaö showadao bufima —Conelio a cuma—. Wa juu fa ojodaonö wa malä co̦blalufe. Bei. Yamalecö da yömöla. Bäfä a̦ nia fa ji̦lianö, eja yamacö bluca co̦camou lä cule. Yai Bada tänö bämalecö ca̦i malä cule. Bada tänö tä a̦ wäyämaö lä bufile tä a̦ da wäba —a cuma. ³⁴ Ö̦jö däjä, Pedro a wa̦ fama. —Fei däjä ya bufi jaducua lä cule. Yai Bada tänö ai täbä shino nofimaö ayaomi. ³⁵ Jödödöwä bä bälöblawä lä yaiblai bä ma cui nija, Yai Bada tä nö quili lä taö wejei, bä lä cadidou wei bä lä cui, ö̦jö bä nia waiimi. ³⁶ Camiyä Isaeli yama ecö nija tä a̦ lä shömöleno wei, wama etä a̦ ji̦libole cätä. Tä a̦ dodijidawä. Jesucristo a lä cuaano wei tänö, Yai Bada tänö yanöcöwä bämalecö ca̦i nia jo̦wa cuo. Ö̦jö Bada tä Jesucristo lä cui, bäma a nofi bluca Badabobä a. ³⁷ ’Juan nija bä fe ojoblamobä, camanö bä yömölaö balöoma. Ö̦jö däjä, Calilea jamö tä bluca lä cublaliyono wei, wama tä a̦ ji̦libou waiquile cätä. Ya̦cumö, Judea tä ulifi jödödöwä jamö, tä a̦ wäyämou cuaama. ³⁸ Ö̦jö Nasaleteli Jesús a lä cui, Yai Bada tänö a bayelibou ja, bei Bufinö a jödödöboma. A nö ca̦i wa̦lojomaboma. ¿Ö̦jö tawä? Täbä shino bayeliblaö cuaama. Fecula bada tänö bä nö lä bleaamano wei, bä bluca ca̦i jalomaö cuaama. Yai Bada tänö a ca̦i malä cuono wei. ³⁹ Judio yamacö bälöa lä blaucole jamö ma cui, Jelusale jamö ma cui, Jesús a lä cuaano wei yama tä bluca dalalema. Fii balitama defi ja a fa basumacöjenö, a shämalemaje. ⁴⁰ ’Ö̦jö ma cui, bolacabö tä mö fa dödölönö, Yai Bada tänö a demi jocädamaö fa co̦lonö, a demi daa co̦malalema. ⁴¹ Judio bä bluca nija mlai, camiyä yama ecö yai co̦dawä nija a demi damalalema, yama a wa̦fa wäyäö cuaabä yamalecö lä yaileno wei yamacö nija. A demi jocäblou fa co̦lonö, yama a ca̦i lä iyano wei yamacö lä cui nija. ⁴² ’Ö̦jö däjä, yanowamö yama bä yömölabä yamalecö nosiemama, Yai Bada tänö a Bada lä tablamaleno wei yama a wa̦fa wäyäbä. Bämacö demi lä showai bämacö ma cui, bä nomaa lä waiquilaliyono wei bä ma cui, bämalecö nia bluca lä jömaö wei, ö̦jö a. Bämacö dodijaö ma cui, bämacö doblou ma mlai ma cui, ö̦jönö bämalecö nowa nia taö. Ö̦jö yama tä a̦ bluca wäyäbä yamalecö nosiemama. ⁴³ ¿Ö̦jö tawä? Yai Bada a wa̦no wäyälewä bä bluca lä cuinö, Jesucristo a wa̦fa wäyäö balöomaje. Ö̦jö a bejedi lä bufibou wejei bä bluca lä cui, bä doblou lä mlai tä ma cule, Yai Bada tänö tä nowa nia jo̦wa mladamama. Inaja bä jo̦wa cuu balöoma —Pedronö bä nowa tama. ⁴⁴ Pedro a wa̦ faö showao däjä, Jesucristo etä a̦ lä ji̦liano wejei bä bluca nija, Yai Bada tä Bufi lucäa showadalayoma. ⁴⁵ Pedro nija bä lä yauono wei bä bufi shädayaimoma, Jesucristo a bejedi lä bufibono wejei bä judio lä cui. Judio bä lä mlai bä ma cui nija Yai Bada tä Bufi lucäö fe yadio ja, bejedi bä bufi möaama. ⁴⁶ Bä caficö a̦ lä shomiblaliyono wei tä a̦ malä ji̦lileno wejei, Yai Bada tä nofi doablaöje ja. Ö̦jö däjä, Pedro a wa̦ falayoma. ⁴⁷ —Camiyä judio yamacö nija Yai Bada tä Bufi lucäa lä culufenaja, fei bä ma cui nija, inaja a Bufi lucäa cua mö feduolaliyou lä cufe. Mau u ja bä fe ojoblamou showadaobä, bämacö a̦ läablalobä tä cuami waiquiwä —a cuma. ⁴⁸ Ö̦jö däjä, Jesucristo a wa̦nö, bä fe ojoblamaö showadao bufima. Bä fe fa ojoblamolunö, cama bä nija Pedro a fe weyamaö bufimaje.

¹ Bei. Jesucristonö bä lä shömöleno wei bä ma cui nija, Judea jamö Jesucristo ebä lä cuono wei bä ma cui nija tä a̦no waloquema. Judio bä lä mlai bänö Yai Bada etä a̦ lä bufiblaleno wejei tä a̦ ji̦lilemaje. ² Ö̦jö cudeenö, Jelusale jamö Pedro a co̦a fa co̦bonö, Jesucristo bufilewä ai bä judio lä cuinö a bäyäblaö mö baomaje, Moisesi tä a̦ nofi lä yaibono wejei bä lä cuinö. ³ Abinaja a nowa tamaje. —¿Wedi tä tabä judio bä lä mlai bä nija wa fa falönö, wa iyaö ca̦i li co̦cao dicooma? ⁴ Ö̦jö däjä, Pedro a wa̦ fa falönö, tä bluca lä cublaliyono wei tä a̦ wäyäma. Abinaja a cuma. ⁵ —Jobe jamö ya cuo däjä, Yai Bada nija ya nö bayeli nacaoma —a cuma—. Ö̦jö däjä, tä fa wawäblalunö, jai acadafu sicö bada cuwä ya tä itou dalalema. Jai sicö casöcö juwäbouje, sicö casö jududuo cuoma. Sicö fa itoimadunö, camiyä nija sicö itoimama. ⁶ Ö̦jamö lä ya täbä cua möö ja, bluca ya bä yalo coyocoa dalalema. Bä yalo ji̦ima lä tabou wejei bä ma cui, ulifi jamö bä yalo lä juu wei bä ma cui, bä lä jölölou wei bä ma cui, bä lä yäö wei bä ma cui, ya bä bluca dalalema. ⁷ ’Ö̦jö däjä, ya wa̦ ji̦lilema. Abinaja wale nowa tama. “Bei, Pedro. Bä da shäalalö, wa iyabä”, wale nowa tama. ⁸ Ö̦jö ma cui, abinaja ya e cuma. “Ma, Bada tä. Wa bä a̦fa yalo shami lä taö wei bä ja, ya caficö shamiaö daimi waiquiwä. Wamodima bämi”, ya e cuma. ⁹ Ö̦jö ma cui, fedu jamö a wa̦ fa bädalunö, a wa̦ faö co̦oma. “Yai Bada tänö täbä aublaö lä waiquile, wa täbä a̦fa shami taö mlai”, a cuma. ¹⁰ ’¿Ö̦jö tawä? —Pedro a cuma—. Tä lä wawälayono wei, bolacabö tä cublou co̦layoma. Jödödö tä lä cuaano wei däjä, fedu jamö bä befi ca̦i bluca co̦molayoma. ¹¹ Ö̦jö tä lä cublole däjä, yamacö lä cuono wei a yafi jamö, fama 3 bä walobeyoluma, Sesalea jamö culanö, camiyä nija bä lä shömöleyoluno wei. ¹² Yai Bada tä Bufinö, wale yauamaö bufii showadaoma. Jesucristo ai 6 ebä lä cule, camiyä nija bä fa yauicunö, Conelio e yafi jamö yamacö co̦blaliyoma. ¹³ ’Ö̦jö Conelio a lä cuinö yamalecö yömölaö mö baoma —a cuma—. Cama e yafi jamö, Yai Bada a̦jele etä jo̦wa wawälayoma. Ö̦jamö lä e fa ublaicunö, abinaja a nowa jo̦wa tama. “Jobe jamö Simón a co̦amaö da bufi, Pedro a wa̦fa lä yädäle. ¹⁴ Ö̦jönö wa nia yömölaö. Cafä wa ma cui, afä wa bä ca̦i lä cule bä ma cui, wamacö bluca bayeliblamobä, tä a̦ nia wäyäö”, a̦jele tänö bei a nowa jo̦wa tama fa talei. ¹⁵ ’Ö̦jö däjä, ya wa̦ jaba faö däjä, lobe, ö̦jö bä nija Yai Bada tä Bufi lucälayoma, camiyä bämacö nija a Bufi lucäa da culuinaja showawä —a cuma—. ¹⁶ Ö̦jö däjä Bada a wa̦ jaba lä fano wei, ya tä a̦ nofi jaducubou showadaoma. Abinaja a lä cuno wei. “Juan a lä cuinö, mau u ja bä fe ojomaö ja, mau unö bä jödödöblamama ma cui, Yai Bada tä Bufinö wamacö nia jödödöblaö cuo.” Einaja a cuma. ¹⁷ ’¿Ö̦jö tawä? —Pedro a cuma—. Bada tä Jesucristo bäma a lä bufiblaö wei bämacö lä cui, cama a Bufi ja, Yai Bada tänö bämalecö dobälalema. Inaja showawä, judio bä lä mlai bä ma cui, ö̦jö bä ca̦i dobäa mö fedua showalalema. Inaja bämalecö bluca taamaö fe usucuwä waiquiwä yalo, Yai Bada nija ya wa̦ läo bashiobä tä cuonomi, ¿ö̦jö tawä? —a cuma. ¹⁸ Ö̦jö tä a̦ fa ji̦liläjenö, Pedro a bäyäblaö co̦daanomije. Yai Bada tä nofi yai doablamaje. Abinaja bä cuma. —Ja̦o. Judio bä ma mlai ma cui, ¡Yai Bada tänö bä nofi ca̦i bayeliblaö bufi doblao yai! Ö̦jö bä ma cui, bä bufi lädobä, Yai Bada tänö bä bufi malä jaducublamaleno wei, bä ba̦limiobä —bä cuma. ¹⁹ Esteban a lä shäleno wejei däjä, Jesucristo ebä nabä bluca quea lä showadaqueno wejei däjä, bä docua blajaa showadaaliyoma. Fenisia jamö ma cui, Shible jamö ma cui, Adioquiateli bä lä bälöle jamö ma cui, bä blajao shedequeomobodayoma. Bä lä docuolaliyono wei jamö, Jesucristo etä a̦ dodijidawä wäyäö cuaama ma cujei, judio bä shino yömölaö ayaomaje. ²⁰ Ö̦jö ma cui, Shibleteli ai bä ma cui, Sileneteli ai bä ma cui, abinaja cama bä cuaama. Adioquia jamö bä fa waloicunö, judio bä lä mlai bä ca̦i fa yömölajenö, Bada tä a̦fa Jesús wäyämaje. ²¹ Yai Bada tä lojodenö bä fa bayeliblamonö, bluca bänö tä a̦ bejedi fa bufiläjenö, Bada tä Jesucristo a bufilemaje. ²² Jelusale jamö, Jesucristo ebä lä yododano wei bä lä cuinö, ö̦jö tä a̦ fa ji̦liläjenö, Adioquia jamö Benabei a shömölemaje. ²³ Ö̦jamö a fa co̦blalunö, Yai Bada tänö bä lä bayeliblaleno wei tä fa dalalönö, a bufi doblaloma. Ö̦jö däjä, abinaja bä nowa tama. —Bada tä nija showadi wamacö bufi bejedimou fe yadiobä, bä bufi yai da shaliliicu —Benabeinö bä nowa tama. ²⁴ Cama Benabei a dodijama. Yai Bada tä Bufinö a fa jödödöblalunö a showadi cadidoma. A bufi cadidilanö Jesucristo a nofi mölabou dodijioma. Ö̦jamö, Bada tä Jesús a fa bufiläjenö, cama nija bluca bä yädäblaliyoma. ²⁵ Ya̦cumö, Benabei a lä cuinö, Daso jamö Saulo a nia fa dayäanö a alayoma. ²⁶ A daa fa co̦lalönö, Adioquia jamö a ca̦i juu co̦oma. Lasha ai a lalou jaöo mlao däjä, Jesucristo ebä yododabä jamö showadi cäcöbö fa co̦cablonö, bluca bä yömölabödima. Ö̦jamö lä, Adioquia jamö, Jesucristo nija bä lä nocao wei ebä lä cui, Cristo bufilewä bä a̦fa jaba jilabomaje. ²⁷ Bei. Ö̦jö lä däjä, Jelusale jamö Yai Bada a wa̦no wäyälewä bä lä cuono wei, Adioquia jamö ai bä alayofälöma. ²⁸ Ö̦jö ai a lä cui, Acabo a wa̦fa cuoma. Bä lä yododano wei jamö ö̦jö a fa ublaicunö, Yai Bada tä Bufinö a wa̦ fa macocoamanö, ofi a nia lä cublono wei bei tä a̦fa wäyäö balöoma. Jödödöwä bä lä bälöblai, ofi tänö bä nö nia jo̦wa bleaaö cuaama. A la cuno weinaja, inaja showawä tä cublaliyoma. Lomateli bada Claudio a lä läono wei däjä, tä bejedi wawäblaliyoma. ²⁹ Ö̦jö cudeenö, Jesucristo nija bä lä nocao wei ebä bufi shaliliblou showadalayoma, bufi läo mlai ja, blada bä shömabeje. Judea jamö Jesucristo ebä bälöo mö lä feduono wei bä bayeliblabeje. ³⁰ Inaja showawä bä cuaama. Blada bä fa co̦camalöjenö, Benabei, Saulo cäcöbö nija bä jöböquemaje. Jelusale jamö, Jesucristo ebä ca̦i lä yododaö wejei bä bada nija bä jöböaböö fe doleobä.

¹ Ö̦jö däjä, bada tä Elode lä cui, Jesucristo ai ebä nija a jaba waitelimoma. ² Juan bei a̦iyobö Santiago a lä cui, shocobi anö a shämalema. ³ Santiago a lä shämaleno wei tä ja, judio bä bufi doblalou fa dalalönö, a waitelimou co̦oma. Showadi, nii bä juluu lä mlai bä ja, judio bä iyaö ca̦i lä co̦camou wei tä cublou co̦o däjä, Pedro a juwäa nomöjömalema. ⁴ A fa juwämalönö, a fe lamaquema. Judio bänö Yai Bada a waiteli lä jayuano wei a nofi co̦camoaö co̦obeje, bä co̦cablou waiquiono wei ja, ö̦jö a nia shämaö nomöjöoma. Pedro a docuu mlaobä, sodado bluca bä lämaquema. Bä nia läo lä nomöjono wei, 4 bä sodado toujublamalema. ⁵ ¿Ö̦jö tawä? Pedro a fe labomaje. Ö̦jö ma cui, Jesucristo ebä bufi cadididilanö, Yai Bada nija a nö bayeli nacadimaje. ⁶ Elodenö a shämaö fenao lä bufiono wei däjä, ö̦jö tä didi showawä ja, Pedro a mioma. A nofi lä lämaböno wei cäcöbö sodado lä cuinö, Pedro a o̦cama möamomaboböma. Boo bolacabö shicönö a bococu o̦cao yädäoma. Ai bä lämou mö lä feduono wei bä lä cui, bei yoca lä joleono wei yoca sibo jamö, bä läo mö feduoma. ⁷ Ö̦jö däjä, Yai Bada tänö cama a̦jele etä fa shömöludunö, a bädaliyoma. A fa bädalunö, Pedro a fe lä laono wei jamö tä shi̦i wacacablaliyoma. A̦jele a lä cuinö a fa jushulunö, Pedro a la̦malema. —¡Lobe, lobe! A da jocäblalu —a fa cunö, bococu lä o̦cao wei boo eshicö wajeblou showadalayoma. ⁸ Abinaja Pedro a nowa ca̦i tama. —Bäshäcu ja sicö da a̦yolä. Mamicö da besiblalu. A taamaö lä bufino weinaja, Pedro a cuaaö showadaoma. Ö̦jö däjä, a̦jele a wa̦ faö co̦oma. —Wa sicö fa jalelänö, camiyä nija a da yauiquiyo —a cuma. ⁹ A fe lä laono wei jamö, Pedro a faa fa co̦lufälönö, Yai Bada a̦jele etä nija a yaua showaquema. A ma yauqueno wei ma cui, “Wale yai bayeliblaö da culanö”, a bufi cuu mlai ja, tabi a bufima. ¹⁰ Bei yoca nofi lä lämano wejei bä sodado nijamö, cäcöbö jayua mötalöquema. Bä läo lä bayäcäono wei bä nijamö, cäcöbö jayua fa nomöjöicufälönö, shabono jamö bä lä joleblou wei yoca jamö cäcöbö waloquema, boo shicönö yoca lä tablaleno wejei yoca jamö. Cama yoca caloblou fa bädalonö, cäcöbö falayoma. Ai a yafi mashi jamö cäcöbö fa cadidofälönö, yedu a̦jele tä dablamou mladaliyoma. ¹¹ Ö̦jö lä däjä, Pedro a bufi yai möblaliyoma. “¡Bejedi lä!” a bufi cudaliyoma. “Bada tänö a̦jele e fa shömöludunö, wale nofi bayeliblaö lä mlaloiyofe, Elodenö wale shämaö mlaobä. Judio bänö wale shaö nö lä dabou wejei tä ma cui ja, ¡wale bayeliblalei lä cufe!”, a bufi cudaliyoma. ¹² A bufi fa möblalunö, María e yafi jamö a cadidiblaliyofälöma. Ö̦jö María a lä cui, Juan Marcos bei bä nöö e cuoma. Yai Bada nija bä a̦ fabä, ö̦jö e yafi jamö bä bluca yododooma. ¹³ Bä jaba lä faö wei jamö, yoca fe lä laono wei yoca cloocama. Tä jo̦wa lä cloocamole tä möblaabä, bei yoca lä lale ja, Lode a wa̦fa moco lä cule a icuquema. ¹⁴ Pedro a wa̦ nö fa ö̦jöbölönö, ö̦jö a wa̦ ja, a bufi fa doblalonö, yoca caloblaö mlai ja, a läläa mö yabaquema. Bei yoca sibo jamö, Pedro a wa̦fa ublao wäyäma. ¹⁵ —Wa wa̦ li biyäcäblalou mlai a da cuicu —a nowa tama ma cujei, moco a wa̦ fe fa blacäjonö, —Bolebole a jo̦wa —bä cuu nomöjöoma. ¹⁶ Ö̦jö ma cui, Pedronö yoca cloocadii juo showaoma. Ya̦cumö yoca fa caloblalöjenö, bei a dalalemaje. A fa dalalöjenö, bä bufi yai shädayaimoma. ¹⁷ Bei imicönö, Pedronö bä a̦ fa wasölönö, a wa̦ nö wäoma. A fe lä laono wei jamö, Bada tänö a famaö lä cuaano weinaja tä a̦ fa wäyänö, abinaja a cuma. —Jacobo ma cui nija, Jesucristo ai ebä ma cui nija, wamale a̦fa da wäyä, ¿ö̦jö tawä? —a cuma. Ö̦jö däjä, shomi jamö a aa showalayofälöma. ¹⁸ Tä mö fa jalulunö, Pedro a dabloimi yalo, a docuu mlaobä bä sodado lämou lä nomöjono wei bä a̦fa tayou fe balojooma. ¹⁹ Elode a bada lä cuinö, Pedro a ma dayäamano wei ma cui, a dablanomije. Ö̦jö däjä, a nofi lä lämano wejei bä fa nacamalänö, bä wa̦lii cadidioma. Pedro a lä documaleno wejei tä nowa ja, bä bluca shäamalalema. Ö̦jö däjä, Elodenö Judea tä ulifi fa daacöfälönö, Sesalea jamö a bälöa nomöjöquema. ²⁰ Bei. Diloteli bä ma cui nija, Sidonoteli bä ma cui nija, ö̦jö bä nija bada tä Elode a lä cui, a jushuoma. Nii bä ja, ö̦jö nija bä shino dobämoma yalo, Elode a jushuo fa dalalöjenö bä bufi nofi jushublaoma. A wa̦ nia fa wayomajenö, Blato nija bä a̦ faö balöoma, Elode e yafi jamö a bada lä läono wei a lä cui nija. Ö̦jönö bä fa famalönö, bada a wa̦ oquemabeje, cama bluca showadawä bä icuquema. ²¹ Bä a̦ wayobä tä lä cublaliyono wei däjä, camishi liyäjäwä cäcö ja Elode a didioma, bada bä yai lä didio wei cäcö ja. Ö̦jö däjä, bada bä döcäobä täcö jamö, a fa döcäicunö, a wa̦ cadidolanö tä a̦ labamalema. ²² Cama a wa̦ ja, bä a̦ shi bluca dolayoma. —¡Camiyä yanowamö bämacö a̦ faö lä cuaaö weinaja mlai, yai täbä a̦ cadidou lä cuaaö weinaja a wa̦ ji̦limamou cuwä! —bä shi jaliwä ca̦i cuma. ²³ Yai Bada a nofi shino doablamobä tä ma cule ma cui, cama Elode a nofi yaimamou bufi fa doblaonö, yedu Yai Bada a̦jele etä isholayoma. Mosha bä nija Elode a nabä fa shömöcönö, a nomamalema. ²⁴ ¿Ö̦jö tawä? Yai Bada etä a̦ ji̦limamou balaa showalayoma. Etä a̦ bejedi lä bufino wejei bä blucablou fe balojolayoma. ²⁵ Benabei, Saulo sho cäcöbö lä cuinö, Jelusale jamö bä blada bälaböö fa balöonö, Adioquia jamö cäcöbö co̦a co̦layoma. Juan a ca̦i co̦böa co̦layofälöma, Marcos a wa̦fa lä yädäle.

¹ Bei. Adioquia jamö, Jesucristo ebä lä yododano wei bä nijamö, Yai Bada a wa̦no wäyälewä bä cuoma. Ö̦jö bä showawä lä cuinö, Yai Bada etä a̦ ja bä ca̦i damamaje. Abinaja bä cuoma. Benabei a cuoma, Simón a ca̦i, Ushiteli a wa̦fa ca̦i lä yädämabono wejei. Sileneteli a ca̦i Lusio cuoma, Maneno a ca̦i. Ö̦jö Maneno a lä cui, Elode a bada sho cäcöbö badalayoma. Saulo a ca̦i cuoma. ² Ö̦jö bä lä cui, bä iyaö yabäcou mlaobä, nii bä ja bä wasöolanö Bada tä nija bä nö bayeli nacaodima. Inaja bä cuaaö däjä, cama bä nija Yai Bada a wa̦ Bufi bädaliyoma. Abinaja a cuma. —Benabei, Saulo sho ya cöbö yaia waiquilema. Ya cöbö shömabä jamö cäcöbö ojodamobä, iba cäcöbö da yaimacöje —a cuma. ³ ¿Ö̦jö tawä? Nii bä ja bä yabäcou mlai ja Yai Bada nija bä nö bayeli nacao däjä a wa̦ bädaliyoma. Ö̦jö däjä, bä a̦ faö waicou ja, ö̦jö cäcöbö nija bä imicö maqueoma. Bä imicö maquelanö, cäcöbö yaimaquemaje. Ö̦jö däjä cäcöbö shömöa showadalemaje. ⁴ Yai Bada tä Bufinö cäcöbö shömama yalo, cäcöbö alayoma. Seleusia jamö cäcöbö fa waloicunö, Shible tä ulifi lä jo̦cole jamö bä befi ca̦i caläfälöma. ⁵ Salaminateli bä nijamö cäcöbö befi ca̦i fa waloicunö, judio bä yododabä yafi bä jamö, Yai Bada etä a̦ wäyäböö cuaama. Juan Marcos a luluboböma, cäcöbö bayeliblafälöbä. ⁶ Ö̦jö tä lä jo̦cole jamö, bä bluca lä bälöblai bä fe waloo fa cuaajenö, Bafositeli bä nijamö bä waloa nomöjöquema. Ö̦jamö lä judio a bada shaboli lä cui, a dalalemaje, Yai Bada a wa̦no jole lä wäyäno wei a lä cui. Bajesusi a wa̦fa cuoma. ⁷ Ö̦jamö a bada lä läono wei a lä cuinö a shaboli yädämaboma, Sejio Baulo a wa̦fa lä culenö. Ö̦jö a bada lä cui, a bufi jaducaö si ijejeoma. Yai Bada etä a̦ ji̦liaö bufi fa doblaonö, Benabei, Saulo sho cäcöbö nacamalema. ⁸ Ö̦jö ma cui, shaboli Bajesusi a bada lä cuinö tä a̦ ji̦liamaö bufio fa mlacunö a wa̦ läoma, bada anö Jesucristo a nofi mölabou mlaobä. Ö̦jö a bada shaboli lä cui, Clesiateli bä caficö a̦ ja, Elima bei a wa̦fa ca̦i cuo mö feduoma. ⁹ Ö̦jö a wa̦ ma lämono wei ma cui, Saulo nija Yai Bada tä Bufi fa jödödöblalunö, a möö shalilioma. Ö̦jö Saulo a lä cui, Pablo a wa̦fa ca̦i yädäa lä cule. ¹⁰ Ö̦jö a möö fa cadidionö, a wa̦ fama. —¡Fecula bada wa ijilubö! Tä lä dodijidai wa tä nofi bluca lä wa̦libole wa. Showadi wa täbä mölamaö. Wa̦lidiwä showadi wa tä tadii. Yai Bada etä a̦ lä bejedi wei, wa etä a̦ shomiblamabä, ¿bei wa nia shijilodoimi? ¹¹ Bei. Bada wa tä lojode möbä. Wa nia jubäbömaö. Wacacawä wa tä ca̦i dablaö jaöo mlaicätä —Pablonö a nowa tama. Inaja Pablonö a nowa lä tale däjä, yedu tä möö mladou showadalayoma. A jubäbölayoma. A öbömamobä tä dayäblalama. ¹² Ö̦jö tä fa dalalönö, bada a lä cuinö, bejedi tä a̦ bufia showalema. Yai Bada a wa̦fa lä wäyämono wei tä a̦ ja, a bufi malä shädayaimolayono wei. ¹³ Ö̦jö däjä, Pablonö bä ca̦i lä cule, bä befi ca̦i caläa co̦layofälöma. Bafosi jamö bä fa jocälöfälönö, Ba̦filia tä ulifi jamö, Bejeteli bä lä bälöle bä nija, bä befi ca̦i waloaliyoma. Ö̦ja lä Juan Marcosnö bä fa dacöfälönö, Jelusale jamö a co̦a mö yabaa co̦layofälöma. ¹⁴ Ö̦jö däjä, Bejeteli bä nijamö cäcöbö shu̦lucoa fa co̦läfälönö, Bisidia tä ulifi jamö cäcöbö waloa nomöjöquema, Adioquia tä a̦fa shabono cuo mö lä feduono wei jamö. Täbä yanöcöobä tä mö jalu ja, judio bä yododabä yafi jamö cäcöbö fa falönö, cäcöbö fama looma. ¹⁵ Bä lä yododano wei jamö, Moisesi tä a̦ oni fa doajenö, Yai Bada a wa̦no wäyälewä etäbä a̦ oni ca̦i doaö mö fa feduojenö, bada bänö fama cäcöbö wa̦limaje. —Bei. Iba wafäcö lä cui. Yai Bada etä a̦ ja, yamalecö yömölaö bufi doblao ja, fei däjä yamalecö da yömölabö, ö̦jö lä —bä cuma. ¹⁶ Ö̦jö cudeenö, Pablo a fa ublaicunö, bei imicönö bä a̦ fa wasölönö, abinaja a cuma. —Isaeli wama ecö mö lä fedui. Yai Bada wama a nö quili lä tale. Wamale a̦ da ji̦lilä. ¹⁷ Yai Badanö, Isaeli bäma ecö nö badabö fa yailönö, Ejido jamö bä fa blucablamalönö, cama a lojodenö bä lulubou co̦ofälöma. ¹⁸ Ulifi bloque jamö bä ca̦i wayumö lä culayofälöno wei däjä, lasha jai 40 a lalou jaöo mlao däjä, bä doblono ma mlai ma cui, bä bayeliblaö fe yadiofälöma. ¹⁹ Canaana jamö, 7 bä bälöblawä lä yaiblai bä mö bluca watäblaö fa baläläonö, ö̦jö bä ulifibö jamö bä bälömabou juoma. Lasha jai 450 a lalou jaöo mlao däjä, ö̦jö bä lä cuinö tä ulifi juwäbou nö dedeaö nomöjöomaje. ²⁰ ’Inaja Yai Badanö bä taamaö fa balöonö, bä lulubobeje ai bä bada lämabou nomöjöoma —a cuma—. Ö̦jö däjä, Samuel a shömöa nomöjölema, Yai Bada a wa̦no lä wäyäno wei. ²¹ Ö̦jönö bä ca̦i ma bälöono wei ma cui, bada a yai lämabou bufi fa doblaojenö, Yai Bada tänö Sisi bä ijilubö Saulo a shömöa nomöjölema, ö̦jönö bä ca̦i bälöobä. Bejamino nodiwä e li Saulo cuoma. Lasha jai 40 a lalou jaöo mlao däjä Saulo a bada läo bälöoma. ²² Ö̦jö a Saulo waia fa majölönö, David bada a yai tablamaö nomöjölayoma, ö̦jamö a läobä. Yai Bada tänö ö̦jö David a wa̦fa dodijaö tama. Abinaja a cuma. Isai bä ijilubö David a lä cuinö wale bufi doblamabou fe balojoo. Ya tä tamaö lä bufii wei, tä nia taö jödödou. ’¿Ö̦jö tawä? —Pablo a cuma—. Einaja Yai Bada a cuma. ²³ Ö̦jö David nija Yai Bada tänö a wa̦fa wäyäö lä balöono wei tä a̦ bejedi cublaliyoma. Isaeli bäma ecö jucäabä, David nodiwä e ya̦cumö wawäblamalema, Jesús a lä cui. ²⁴ ’A wawäblou mlao showao däjä, Juan a wawäblou balölayoma —a cuma—. Isaeli nodiwä bä bluca yömölabou balöoma. Abinaja bä nowa tama. “Wa̦lidiwä tä ja wamacö bufi fa lädalunö, bä fe da ojomamo”, bä nowa tama. ²⁵ Ö̦jö Juan a lä cuinö bä yömölaö waicou ajedou däjä, abinaja bä nowa ca̦i tama. “¿Wedinaja bei wamale nofi li tabou dicoa cule? Showadi bäma a nö lä dabou wei, ö̦jö ya mlai. Ma, camiyä ya nodi jamö, ö̦jö a nia shino wawäblou nomöjöo. Ö̦jö a lä cui a shino yai doblaa ayaa cudeenö, bei mamicö busi nata bädawä ma cui ja, ya nö bayeliblabimi”, bä nowa Juan tama. ¿Ö̦jö tawä? ²⁶ ’Iba wamacö —a cuma—. Ablaamö nodiwä wamacö lä cui. Shomi wamacö ca̦i, Yai Bada wama a nö quili lä taö wei wamacö. Bämacö nia lä jucäamou wei tä a̦ lä cui, camiyä bämacö nija tä a̦ shömölema, ¿ö̦jö tawä? ²⁷ Bämacö jucäabä a ma cuono wei ma cui, Jelusaleteli bä ma cuinö, bä ca̦i lä culajei bä ma cuinö, ö̦jö a nö ö̦jöböblanomije. Täbä yanöcöobä tä mö jalu ja, Yai Bada a wa̦no wäyälewä, showadi bä a̦ oni doaö daö ma cujei, tä a̦ nofi jaducubonomije. ¿Ö̦jö tawä? Tä a̦ nofi jaducubou fa mlacujenö, tä a̦fa lä wäyämou wei tä a̦ bejedi wawäa dicoblamalemaje. A shämaö malä bufino wejei. ²⁸ ¿Ö̦jö tawä? Tä nowa cua mlai ma cui, bä a̦ faö buoma. Bilado nija a shämalemaje. ²⁹ ’¿Ö̦jö tawä? —a cuma—. Yai Bada etä a̦ oni jamö, Jesucristo a wa̦fa bluca lä wäyämono wei tä a̦ bejedi wawäblaliyoma. Ö̦jö däjä, fii balitama defi ja a lä basuono wei, a nomawä itomalemaje. Maa maca jamö a nomawä ma didiqueno wejei ma cui, ³⁰ Yai Bada tänö a demi jocädamaö co̦layoma. ³¹ Calilea jamö, cama nija bä showadi lä yauono wei bä lä cui bä nija a dablamou nö dedeama, Jelusale jamö bä ca̦i lä alayofälöno wei bä lä cui bä nija. Fei däjä ö̦jö bä lä cuinö, yanowamö täbä nija a wa̦fa wäyäö cuaabeje bä li. ³² ’Yama tä a̦ dodijidawä wäabä, cafä wamacö nija yamacö waloo lä cule —a cuma—. Bämacö nö badabö nija, Yai Bada tänö tä a̦fa wäyäö lä balöono wei tä a̦ lä cui, ³³ camiyä bämacö lä nodiblaliyono wei bämacö nija tä a̦ bejedi cublaliyoma. ¿Ö̦jö tawä? Jesús a demi jocädamaö lä co̦layono wei ja, tä a̦ bejedi wawäblamalema, Amowa tä a̦ lä cuu weinaja showawä. Abinaja tä a̦ cuu. Ijiluyä bei wa. Fei däjä wawädowä iba bäfä nö yai ö̦jöböamaö lä cule. ’Einaja tä a̦ cuu —a cuma—. ³⁴ Yai Bada tänö, ba̦limi a demi nia jocädamaö lä co̦ono wei tä ma cui, ö̦jö tä a̦fa ca̦i wäyäö balöoma. Abinaja tä a̦ oni cuu. Iba wamacö lä cui, bämacö bayeliblaö weicätä, David nija ya wa̦ nö lä wäono weinaja showawä. Ya wa̦ shomiblou majöo mlaicätä. ³⁵ ’Einaja tä a̦ cuu —a cuma—. Ö̦jö cudeenö, ai tä a̦ li amowa ja, abinaja a cuu mö feduo. Camiyä wale lä yaileno wei ya lä cui, wale sicö nia jodemaimi. ³⁶ ’¿Ö̦jö tawä? —Pablo a cuma—. Einaja tä a̦ cuu. David a lä cuinö, cama ebä ca̦i cuo showao däjä, Yai Bada tänö a tamaö lä bufino wei tä ja, a cadidoma. Ö̦jö däjä, a bufi fa mlaicunö, a nomawä didiquemaje, cama showadi ebä nomawä lä taamaö wejeinaja showawä. A nomawä fa didicöjenö sicö jodelayoma. ³⁷ Ö̦jö ma cui, Yai Bada tänö a demi jocädamaö lä co̦layono wei a lä cui, sicö yai jodeonomi. ³⁸ ’¿Ö̦jö tawä? —a cuma—. Iba wamacö. Ei ya wa̦ lä cui, wamale a̦ da ji̦lilä. Ö̦jö a demi jocädamaö lä co̦layono wei a lä cui, wama a nofi mölabou ja, wamacö doblou lä mlai tä ma cule, Yai Bada tänö tä nowa mladamalei. Tä nowa lä mladamaö wei tä a̦ ja, bämacö yömölaö lä cule. ³⁹ Moisesi tä a̦ nofi lä mölabou wejei bä nija tä nowa mladobä tä cuono ma mlai ma cui, Jesucristo a bejedi yai lä bufibou wejei bä bluca lä cui nija, Yai Bada tänö tä nowa taboimi waiquiwä. ⁴⁰ ¿Ö̦jö tawä? Bä da moyaweicu, ö̦jö lä, Yai Bada a wa̦no wäyälewä a wa̦ nö lä quiliano weinaja, wamacö taamamou dicoo mlaobä. Abinaja tä a̦ cuu. ⁴¹ Bei. Yai Bada wama a wa̦ nö lä waiblaö wei wamacö lä cui. Wamacö bufi nia möblou ca̦i nomaö. Cafä wamacö bälöo däjä, ya tä nia taö nö malä quiliaö wei. Wamacö ma yömölaö wejei ma cui, wama tä a̦ nia bejedi bufiimi. ’¿Ö̦jö tawä? —Pablo a cuma—. Einaja tä a̦ cuu. ⁴² Pablo, Benabei sho cäcöbö mini sibou däjä, cäcöbö nacabou co̦omaje, täbä yanöcöobä tä mö jalu cublou co̦o däjä, tä a̦ wäyäböö co̦oyolubä. ⁴³ Ö̦jö däjä, judio bä yododabä yafi jamö bä a̦ wayou lä waicou wei däjä, bä bluca faa co̦layofälöma. Bä faa lä co̦layofälöö wei däjä, Pablo, Benabei nijamö judio ai bä yaua showalayofälöma. Yai Bada nija bä bejedimou bufi fa doblaonö, judio bä nija bä lä yädäono wei ai bä ma cui, ö̦jö bä ca̦i nocaa showalayofälöma. Ö̦jö däjä bä lä nocaono wei bä yömölaböö cuaaö co̦ofälöma, Yai Bada tänö bä nofi lä ojodabou wei tä shino yai bufibobeje. ⁴⁴ Täbä yanöcöobä tä mö jalu cublou co̦o däjä, Yai Bada etä a̦ nia ji̦liaö fa co̦ojenö, bä yododaö co̦oma. Ö̦jö däjä, ö̦jö täbä shabonobö jamö, bä bluca lä bälöono wei bä nö mlaoma. ⁴⁵ Ö̦jö ma cui judio bada bänö täbä bluca co̦camou fa dalalöjenö, bä jushudaliyoma. Cama bä a̦ bada ji̦liamou bufi doblao fa ayaonö, bä bufi jalujoma. Pablo a wa̦ faö däjä bä a̦ lämodima. A nö ca̦i waiblamaje. ⁴⁶ Ö̦jö däjä, Pablo, Benabei sho cäcöbö a̦ faö waiteliama. Abinaja cäcöbö cuma. —Ja̦o. Cafä judio wamacö nija Yai Bada etä a̦ wäyämou balöobä tä ma cuono wei ma cui, wama tä a̦ waii waiquiwä yalo, judio bä lä mlai bä nija yama tä a̦ nia wäyäö nomöjöo. Wamacö ba̦limiblou moji waiquiwä. ⁴⁷ Bada tänö yamalecö nosiemaö ja, abinaja tä a̦ malä cuu wei. Bämacö yaia waiquilema. Judio bä lä mlai bä nijamö, jai shi̦i jilajawä wama ecö nia cuo, bä bufi möblobä. Bä bälöo lä jödödole jamö ma cui, bä jucäamobä wama tä a̦ wäyäö cuaabä. ’¿Ö̦jö tawä? —Pablo a cuma—. Einaja tä a̦ cuu. ⁴⁸ Judio bä lä mlai bänö, Pablo a wa̦ fa ji̦liläjenö, bä bufi doblaloma. Yai Bada etä a̦ ji̦liaö bufi doblaomaje. Bä ba̦limiobä, Yai Bada tänö bä yaia lä waiquileno wei bä bluca lä cuinö, bejedi tä a̦ bufia showalemaje. ⁴⁹ Ö̦jamö Bada etä a̦ ji̦limamou blaucou cuaaö showaoma. ⁵⁰ Ö̦jö ma cui, suwä bä nö lä madofibö wei, judio bänö bä jushuo lulubomaje, Yai Bada nija bä bejedimou bufi lä doblaono wei bä suwä lä cui. Bada bä a̦ showadi lä ji̦liono wei bä ma cui, ö̦jö bä shi ca̦i jalimomaö mö feduo showaomaje. Pablo, Benabei sho cäcöbö nö bleaamabeje, bä bluca fa jushudamalöjenö, shomi jamö cäcöbö yashublalemaje. ⁵¹ Yai Bada etä a̦ wailemaje yalo, bä nia dobloimi fa jömabönö, bei cäcöbö mamicö jamö bä mashita lä sudiono wei bä fa yaösöblaböläfälönö, Iconio jamö cäcöbö docua showalayoma. ⁵² Ö̦jö ma cui, Adioquia jamö Jesucristo nija bä nocao bufi lä doblaono wei bä lä cui, bä bufi yai doblaloma. Yai Bada tä Bufinö bä fa jödödöblalönö, ö̦jö nija bä luluamou bufi doblaoma.

¹ Bei. Iconio jamö cäcöbö fa co̦blalunö, judio bä yododabä yafi jamö cäcöbö falayoma. Ö̦jamö cäcöbö a̦ lä fano wei cäcöbö a̦nö, bluca bä bufi tamaböquema. Judio bä ma cuinö, judio bä lä mlai bä ma cuinö, bluca bänö tä a̦ bejedi bufilemaje. ² Ö̦jö ma cui, tä a̦ bejedi bufii lä mlajei bä judio lä cuinö, bä judio lä mlai bä jushuo lulubomaje. Jesucristo ebä a̦fa wäyäö fa dicoojenö, bä nofi wa̦lilemaje. ³ Ö̦jamö Pablo, Benabei sho cäcöbö bälöo yanöcöblaoma. Bada tä a̦fa wäyäböö ja, cäcöbö a̦ faö waiteliama. Yai Bada tänö täbä nofi lä ojodadaö wei tä a̦fa wäyäböbä jamö, cama tä lojode dablamoma, tä a̦ bejedi bufibeje. Cäcöbö nö fa wa̦lojoblamalönö, tä nö lä quilijii bluca tä wawämaböma, tä tamou dao lä mlai. ⁴ Ö̦jö ma cui, ö̦jamö bä lä bälöle bä lä cui, bä bufi sheleleblaliyoma. Ai bänö, judio bä a̦ ji̦lii bufi doblaomaje. Ai bä mö feduwä lä cuinö, Jesucristonö bä lä shömöleno wei cäcöbö a̦ ji̦lii bufi doblao mö feduomaje. ⁵ Ya̦cumö tä wa̦lidiblaliyoma. Judio bä lä mlai bä ma cuinö, judio bä ma cuinö, cama bada ebä ma cuinö, ö̦jö bä blucanö maa ma bänö cäcöbö nia shäyämaje. Cäcöbö nö nia lä bleaamano wejei däjä ⁶ cäcöbö fa moyawälönö, Licaonia jamö cäcöbö docua cua majölayoma. Litateli bä lä bälöle bä ma cui nijamö, Debeteli bä lä bälöle bä ma cui nijamö, ai bä bälöo lä ajedele bä ma cui nijamö, ö̦jamö cäcöbö cua majölayoma. ⁷ Ö̦jamö cäcöbö fa cualunö, ö̦jö bä nija tä a̦ dodijidawä wäyäböö nomöjöoma. ⁸ Bei. Litateli bä nija a jalili looma. A oshe lä cublono wei däjä mamicö wa̦lidio fa showadaonö, a juu doblonomi showawä. ⁹ Ö̦jö a lä cui, Pablo nija a yömöca daoma. ¿Ö̦jö tawä? Pablonö ö̦jö a möö fa shalilonö, a bufi lä cuaablalou wei etä dalalema. A jalobä, Jesucristo a nofi mölabou waiquioma. ¹⁰ Ö̦jö etä fa dalalönö, i̦cali a nowa tama. —A da ubladalu. A ubladou fa showadalonö, a juma. ¹¹ Pablo nija a jalomaö fa dalalöjenö, bä lä co̦camono wei bä a̦ shi bluca jalimolayoma. Cama Licaoniateli bä caficö a̦ ja, abinaja bä nowa tayoma. —¡Täcöbä lä bufiblamou wei täcöbä waloqueyoluu lä cufe! ¡Camiyä yanowamö bämacö lä culenaja cäcöbö fa cublalunö, cäcöbö cuaaö lä cubiyei! ¹² Yai täcöbö fa bufijenö, cäcöbö a̦fa jilamaje. Benabei a lä cui, fecula Jubide a fa bufijenö, Jubide a wa̦fa jilamaje. Pablo a lä cui, a wa̦ yai faö lojode yalo, fecula Meculio a bufimaje. Ö̦jö cudeenö, Meculio a wa̦fa jilaö mö feduomaje. ¹³ Ö̦jamö lä, fecula Jubide nija täbä nofi lä bäyäbono wei a bada cuoma. Jubide nija bä nö bayeli nacaobä yafi jamö a bada läoma, shabono a sibo jamö. Ö̦jö a lä cuinö, jole jole bä fa ji̦ilalönö, baca bä baushiblalema. Bä fa baushiblalönö, bei yoca jamö bä ca̦i waloquema. ¿Ö̦jö tawä? Cama ebä nia fa yododoblamanö, fecula Jubide a lä bufino wei nija yalo bä nia ö̦shö dodoboma. ¹⁴ Ö̦jö ma cui, Benabei, Pablo cäcöbönö tä a̦ ji̦libölema, Jesucristonö cäcöbö lä shömöleno wei cäcöbö lä cuinö. Tä a̦ fa ji̦libölänö, bä lä yododale bä nijamö, cäcöbö bufi jalujuwä ca̦i läläablaloma. Cäcöbö bufi jaluaö yalo, cäcöbö camishibö cacablamolayoma. Abinaja cäcöbö cuma. ¹⁵ —¿Wedi tabä inaja wamacö li cuaaö dicoa cule? Cafä wamacö lä culenaja, yafäcö cuwä mö feduwä yafäcö. Yanowamö bämacö bluca. ¿Ö̦jö tawä? Yafä tä a̦ dodijidawä bälaö mö juu lä cufe. Wama bä jole lä bufiblaö wei wama bä fa dacönö, Yai Bada nija wamacö bufi yai cuobä. Ö̦jö a shino ba̦limi cua ayaa. Judu mösö ma cui, bita a ma cui, modu u ma cui, ö̦jö bä bluca tablalema. Ö̦jö bä jamö bä bluca lä cule, bä ca̦i tablaö showaoma. ¹⁶ ’Jaba däjä, bämacö nö badabö bälöblawä lä yaiblamono wei bä lä cui, cama etä jamö bä cuaaö ma cadidiono wei ma cui, Yai Bada tänö bä nö bleaamaö jaöonomi. ¹⁷ Ö̦jö ma cui, wama a daö fe yadiobä, wamacö bayeliblaö showaoma. Maa showadi a blälämama. Nii showadi bä ca̦i lalomama. Nii bä ja wamacö bufi fa doblalamanö, ö̦jönö wamacö dodijidawä tabou ja̦too showaoma —cäcöbö cuma. ¹⁸ Pablo, Benabei cäcöbö nija yalo bä ö̦shö dodobou bufi doblao fe fa yadiojenö, bä mini ja̦amodou ma mlai ma cui, ö̦jö cäcöbö a̦nö bä ya̦cumö wasömolayoma. ¹⁹ Ö̦jö ma cui, judio ai shomi bä fa waloicunö, Pablo a nofi wa̦libobeje bä a̦ fama. Adioquiateli bä judio ma cuinö, Iconioteli bä judio ma cuinö, ö̦jö bä a̦nö bä bufi tablamalemaje. Ö̦jö däjä, maa mabänö Pablo a fa shäyälalöjenö, nomawä a fa bufijenö, shabono a sibo jamö a shailefälömaje. ²⁰ Ö̦jö ma cui, Jesucristo nija bä lä nocao wei bänö Pablo a fe fa̦yoblaöje däjä, a jocädou co̦layoma. Shabono jamö a yafia co̦layoma. Ö̦jö tä fena ja, Debe jamö Benabei sho cäcöbö cua nomöjöa showalayoma. ²¹ Debe jamö tä a̦ dodijidawä fa wäyäbönö, Jesucristo nija bä nocao mö feduobä bä bluca tablamabölema. Ö̦jö däjä, cäcöbö mö yabaö fa co̦imadunö, Lita jamö cäcöbö waloa fa co̦icunö, Iconio jamö cäcöbö waloa fa majöicunö, Adioquia jamö cäcöbö waloa co̦quema. ²² Cäcöbö jayuaö co̦lanö, Jesucristo nija bä lä nocao wei, ebä bufi lojodoamaböö cuaaö co̦ofälöma. A nofi mölabou fe yadiobeje, bä yömölaböö cuaama. Abinaja bä nowa taböma. —Yai Bada tänö cama ebä nia ca̦i lä cuo wei tä cublou showao mlao däjä, bämacö yanöcöobä tä cuami waiquiwä. Jesucristo bäma a nofi lä mölabou wei, showadi bämalecö nö nia bleaamaöje —bä nowa taböö jayuaö co̦ofälöma. ²³ Jesucristo ebä lä yododoblai bä nijamö bä bada cublamobä, bä ca̦i taamaböö cuaafälöma, Jesucristo ebä ca̦i yododaö juobeje. Ö̦jö däjä, cäcöbö iyaö wasöolanö, bä nö bada bayeli nacaböö showaoma, Bada tä Jesucristo a nofi lä mölabono wejei a showawä lä cui nija bä bayeliblamobä. ²⁴ Ö̦jö däjä, Bisidia jamö cäcöbö fa jayuicunö, Ba̦filia jamö cäcöbö waloquema. ²⁵ Ö̦jamö, Bejeteli bä nija Jesucristo etä a̦ wäyäböö fa jayuaimadunö, Adalia jamö cäcöbö waloa majöquema. ²⁶ Ö̦jö däjä, Adioquia jamö cäcöbö befi ca̦i caläa cuaa co̦layoma, Yai Bada tänö cäcöbö bayeliblaö cuaabä, cäcöbö nö bayeli jaba lä nacano wejei jamö. ¿Ö̦jö tawä? Bä yömölaböö fa jödödöabodunö, cäcöbö lä shömano wejei bä nijamö cäcöbö co̦blou co̦layoma. ²⁷ Adioquia jamö cäcöbö co̦a fa co̦bonö, Jesucristo ebä lä yododaö wei bä nacaböalalema. Yai Bada tänö cäcöbö nö wa̦lojamaö lä cuaano wei, tä a̦ wäyäböö co̦joloma. Jesucristo a nofi mölabou mö feduobeje, judio bä lä mlai bä bufi jaducublamaö lä cuaaimano wei tä a̦ ca̦i. ²⁸ Ö̦jamö Jesucristo nija bä lä nocao wei ebä nija, cäcöbö nö dedeblaliyoma.

¹ Judea jamö ai bä lä bälöle, Adioquia jamö bä fa waloicunö, Jesucristo ebä judio lä mlai bä yömölamaje. Abinaja bä nowa tamaje. —Moisesi tä a̦ ja wamacö cadidoimi ja, wamacö mosi sicö janöblamoimi ja, wamacö jucäamou daomi —bä nowa tamaje. ² Pablo, Benabei sho cäcöbö a̦ läblaliyoma. Cäcöbö a̦ lojodoaama ma cui, bä a̦ faö fe blacäjou showaoma. Ö̦jö cudeenö, Jesucristonö bä lä shömöleno wei bä bada wa̦lidayobeje, Pablo a ma cui, Benabei a ma cui, ai bä ma cui, Jelusale jamö bä shömölemaje. Ö̦jamö lä, Jesucristo ebä ca̦i lä yododano wejei bä a̦ bada ji̦liabeje. ³ Ö̦jö cudeenö, Jesucristo ebä lä yododaö wei bä lä cuinö, ö̦jö bä fa shömölöjenö, bä aa showalayofälöma. Fenisia jamö ma cui, Samalia jamö ma cui, bä bluca yömölaö jayuaö cuaafälömaje. Judio bä lä mlai bä Jesucristo bufilewä ca̦i cublou mö lä fedulayono wei, tä a̦ wäyäö fa cuaaimadujenö, Jesucristo ebä bufi bluca doblaloma. ⁴ Jelusale jamö bä waloo däjä, Jesucristo ebä lä yododaö wei bä bufi doblaloma. Bä ca̦i lä yododaö wejei bä bada ma cuinö, bä ca̦i fama möö bufi doblao mö feduomaje. Jesucristonö bä lä shömöleno wei bä ma cuinö, inaja showawä. Ö̦jö bä bluca nija, Yai Bada tänö bä nö wa̦lojamaö lä cuaano wei tä a̦ bluca wäyäö co̦ojolomaje. ⁵ Ö̦jö ma cui, Jesucristo a bejedi lä bufino wejei bä a̦ bada faliseo shomiaö dicooma, Moisesi tä a̦ nofi lä yaibou wejei bä lä cui. Ö̦jö bä fa ublaicunö, abinaja bä cuma. —Ö̦jö bä judio lä mlai, wama bä a̦fa Jesucristo bufilewä lä wäyäö wei, ö̦jö bäma bä mosi sicö nia joyamaö bufii. Moisesi tä a̦ nofi cadididobeje bäma bä nia ca̦i yömölaö, dodijidawä bä cuobä —bä faliseo cuma. ⁶ Ö̦jö tä a̦ wayoabeje, Jesucristonö bä lä shömöleno wei bä ma cui, Jesucristo ebä ca̦i lä yododaö wejei bä bada ma cui, bä bluca co̦camolayoma. ⁷ Bä a̦ wayou nö dedeaö waiquiwä ja, ö̦jö däjä Pedro a fa ubladalunö, a wa̦ fama. —Iba wamacö. Judio bä lä mlai bä nija, Jesucristo ya etä a̦ dodijidawä wäyäbä, Yai Bada tänö camiyä wale jaba lä yaileno wei, wama tä daö. Camiyä ya wa̦nö, tä a̦ bejedi bufibeje. ⁸ ¿Ö̦jö tawä? Yanowamö täbä bufi lä daö wei a Yai Bada lä cuinö, ö̦jö bä nija a Bufi fa jöbömoicunö, cama ebä jömaö wawädooma, camiyä bämacö nija a Bufi lä jöbömoqueno weinaja showawä. ⁹ Judio bämacö ma cui, judio bä lä mlai bä ma cui, bämalecö fe bluca usucumabou showaoma. Jesucristo a nofi mölabouje yalo, cama bä ma cui, bä bufi ca̦i aumaö mö feduo showaoma. ¹⁰ ’Ö̦jö cudeenö, abinaja ya cuu —a cuma—. ¿Wedi tä tabä Yai Bada wama a li wabaö bufi doblao, wama a jushuo lulubobä? Jesucristo nija bä lä nocao wei ebä lä cui, Moisesi tä a̦ ja wama bä yabäcaö dicoo ja, wama bä nia doblamaimi. Camiyä bämacö nö badabö ma cui, camiyä bämacö ma cui, ö̦jö tä a̦nö bämacö doblono malä mlai. ¹¹ Ma. Bada tä Jesúsnö bämalecö nofi lä ojodadaleno wei tänö, bämacö nia jucäamou. Ö̦jö bäma tä a̦ bejedi bufii waiquia. Ö̦jö tä showawänö, cama bä ma cui bä nia ca̦i jucäamou mö feduo showao —Pedro a cuma. ¹² Ö̦jö däjä bä a̦ bluca fa waidalunö, Benabei, Pablo cäcöbö nija bä yömöca daoma. Judio bä lä mlai bä nijamö cäcöbö lä juno wei däjä, Yai Bada tänö cäcöbö nö wa̦lojamaö lä cuaano wei tä a̦ wäyäböma. Yai Bada tä lojode dablamobä, tä nö lä quilijii tä bluca lä wawämaböno wei tä a̦ ca̦i, tä tamou dao lä mlai. ¹³ Cäcöbö a̦ faö fa waiconö, Santiago a wa̦ faö nomöjöoma. —Iba wamacö. Wamale a̦ da ji̦lilä. ¹⁴ Simón Pedro bäma a wa̦ ji̦lia waiquilei lä cufe, ¿ö̦jö tawä? Yai Bada tänö cama ebä tabobä, judio bä lä mlai bä jaba lä bayeliblaleno wei tä ja, bämalecö yömölalema. ¹⁵ Yai Bada a wa̦no wäyälewä bä lä cuinö, ö̦jö tä a̦fa ca̦i wäyäö balöomaje. Abinaja tä a̦ cuu. ¹⁶ Yai Bada ya wa̦no wäyäö lä cule. Obi a nia juu co̦o. David e yafi lä wäcälayono wei e yafi nia taö co̦o. Defibä lä jilale defibä fa co̦alalunö ö̦jö defibä showawä ja, yafi nia dodijidawä i̦tabou, ¹⁷ ai bä lä bälöblai bä blucanö, Bada tä bufiblabeje. Judio bä ma mlai ma cui, cama ebä blucanö, a bufiblabeje. ¹⁸ Einaja Yai Bada bei a cuma, showadi täbä lä yömölabou wei a lä cui. ¹⁹ ’¿Ö̦jö tawä? — Santiago a cuma—. Einaja tä a̦ cuu yalo, abinaja bämacö nowa taö lä cule. Judio bä lä mlai, Yai Bada tä lä bufiblaö wejei, bäma bä yabäcaö mlai. ²⁰ Oni bäma tä a̦ shino yai fa shömölönö, bäma bä wasöbä. Nö idubö täbä ja, bä nii lä dodobou wejei bä ja, bäma bä iyaö wasöbä. Bä lä joleblalou wei tä ma cui ja, bäma bä ca̦i wasöbä. Yalo bä olami lä shi̦amou wei bä ja, bäma bä ca̦i iyaö wasöbä, i̦yäbö cua lä showale a ja. I̦yä i̦yä bäma bä ca̦i waö wasöö showadaobä. ²¹ Yedu jamö ma cui, jödödöwä täbä shabonobö jamö, Moisesi tä a̦ ja bä yömölamou malä waiquii. Täbä yanöcöobä tä mö jalu ja, judio bä yododabä yafi bä jamö, ö̦jö tä a̦ oni doamou blaucou malä cui —a cuma. ²² Ö̦jö a wa̦ fa ji̦liläjenö, Jesucristo ebä lä yododaö wei bä a̦ bluca wayoma. Jesucristonö bä lä shömöleno wei bä ma cui, cama ebä ca̦i lä yododaö wejei bä bada ma cui, bä a̦ bluca wayou fa balöonö, bä bufi shaliliblaliyoma. Adioquiateli bä nijamö cäcöbö shömabeje, bolacabö cäcöbö bada yailemaje, Pablo, Benabei sho cäcöbö co̦ofälöbä jamö, cäcöbö yauo showaofälöbä. Bada cäcöbö lä yaileno wejei, Juda Basabaa ai a wa̦fa cuoma, Sila ai a wa̦fa cuo mö feduoma. ²³ Ö̦jö cäcöbönö tä a̦ oni bälaböbä, si jöböquemaje. Abinaja tä a̦ oni cuma. Adioquiateli wamacö nija. Silia jamö wamacö lä bälöle wamacö ca̦i nija. Silisia jamö wamacö lä bälöle wamacö ca̦i nija. Cafä Jesucristo wama ecö lä cui nija yama tä a̦ oni shömaö bufi doblaa lä cule, judio wamacö lä mlai wamacö nija. Jesucristonö yamalecö lä shömöleno wei yamacö ma cuinö, cama ebä ca̦i lä yododaö wejei bä ca̦i bada ma cuinö, ö̦jö yamacö blucanö, yama tä a̦ oni shömaö lä cule. ¿Dodijidawä wamacö cua culawä? ²⁴ Cafä wamacö nija, ai yamacö jo̦wa juu fa ja̦toonö, wamacö bufi jo̦wa wedinajamomaö dicoomaje, shomi tä a̦ lämaö bufi doblao fa dicoojenö. Camiyä yamacö badanö, yama bä shömanomi. Inaja bä jo̦wa cuaama yalo, ²⁵ ai yama cäcöbö nia shömaö. Yama cäcöbö shömaö bufi doblaa lä cule, tä cadejeblaböbä. Ö̦jö yama tä a̦ fa wayoanö, yamacö bufi bluca shaliliblaliyoma. Ai yama cäcöbö fa yailönö, Benabei, Pablo sho cäcöbö co̦ofälöbä jamö, cafä wamacö nija yama cäcöbö nia shömaö. Benabei ¡bejedi lä yama a nofimaö, Pablo a ca̦i! ²⁶ Cäcöbö nia ma shäno wejei ma cui, cäcöbö waiquidonomi. Bada tä Jesucristo a wa̦ juaböö bufi fa doblaonö, etä a̦ wäyäböö fe yadioma. ²⁷ Ö̦jö cudeenö, Juda yama a nia shömaö, Sila a ca̦i, ei yama tä a̦ lä oniblale tä a̦ wäyäböbä. ²⁸ Yamalecö cadidamabä, Yai Bada tä Bufinö yamalecö bufi shaliliblamalema. Cafä wamacö nija bluca yama tä a̦ nia läamaimi. Ei tä ja bämacö nia shino wasöö, dodijidawä wamacö cuobä. ²⁹ Nö idubö täbä ja, bä nii lä dodobou wejei bä wa dijejä. I̦yä i̦yä bä ca̦i wa dijejä. Yalo bä olami lä shi̦amou wei, bä ca̦i wa dijejä. Bä ca̦i joleblalo dijä. Inaja lä waiquiwä. Einaja tä a̦ oni cuma. ³⁰ Ö̦jö cudeenö, cäcöbö fa shömölöjenö, Adioquia jamö bä bluca aa showadalayofälöma. Ö̦jamö bä fa waloicunö, Jesucristo ebä lä yododano wei bä bluca fa nacaalalöjenö, cama bä nija si oni jöböquemaje. ³¹ Tä a̦ oni fa ji̦liläjenö, bä bufi lojodoblaliyoma. Bä bufi ca̦i doblaloma. ³² Juda a ma cuinö, Sila a ma cuinö, Yai Bada a wa̦no wäyälewä cäcöbö cuoma yalo, bä yömölaböö dodijioma. Bä bufi lojodoblamabölema. ³³ - ³⁴ Ö̦jamö cäcöbö nö dedeblou fa balölonö, Jesucristo ebänö, dodijidawä cäcöbö shömöa co̦lemaje, cäcöbö lä shömöleno wejei bä nijamö. ³⁵ Ö̦jö ma cui, Pablo, Benabei sho cäcöbö yanöcöa showaquema, Adioquiateli bä yömölaböö juo showaobä. Cama cäcöbö ma cuinö, ai bä bluca mö feduwä ma cuinö, bluca bänö bä yömöladimaje. Bada tä a̦fa wäyädimaje. ³⁶ Tä nö dedea fa co̦lunö, Benabei nija abinaja Pablo a cuma. —Bada tä Jesucristo bäfä a̦fa lä wäyäno wei jamö, bäfäcö mö yabaö da co̦ofälö, Jesucristo ebä bluca lä cublai, bäfä bä dodijaö möö cuaaö co̦ofälöbä —a cuma. ³⁷ Benabei a lä cuinö, Juan Marcos a nocamabou bufi ma doblaono wei ma cui, ³⁸ Pablo a wa̦ lämoma. —Ö̦jö a mlai —a cuma—. Ba̦filia jamö bäfäcö da cuoblei däjä, ö̦jönö bäfälecö daa fa dicocufälönö, bäfälecö bayeliblaö mada maoblei —a cuma. ³⁹ Inaja Pablo a cuu ja, cäcöbö jushuo lulayoa fa dicolunö, cäcöbö shedequeblaliyoma. Benabei a lä cuinö, Juan Marcos a fa nacaläfälönö, Shible jamö, ö̦jö sho cäcöbö befi ca̦i caläö co̦ofälöma. ⁴⁰ Ö̦jö ma cui, Pablonö Sila a yaia mö fa fedulönö, ö̦jö a ca̦i aa mö fedua showalayoma. Bada tänö cäcöbö bayeliblaö cuaabä, Jesucristo ebä lä cuinö cäcöbö nö bayeli nacaö fa balöojenö, cäcöbö shömölemaje. ⁴¹ Silia jamö ma cui, Silisia jamö ma cui, cäcöbö jayuaö lä cuaano wei jamö, Jesucristo ebä lä yododoblai bä fe bluca waloböö cuaama. Bä bufi bluca lojodoamaböö co̦ofälöma.

¹ Pablo a jayuablalou fa showaimadunö, Debe ma cui jamö, Lita ma cui jamö, ö̦jamö a waloa nomöjöquema. Ö̦jamö Jesucristo nija a lä nocao wei a wa̦fa Timoteo fiya lä cule, a dalalema. Timoteo bä nöö e lä cui, judioteliyoma e cuoma. Jesucristo a bejedi bufiboma. Ö̦jö ma cui, bä fö̦ö e lä cui, judio a cuonomi. ² Jesucristo ebä bluca lä cuinö, Litateli bä ma cuinö, Iconioteli bä ma cuinö, Timoteo a wa̦fa bluca dodijaö tamaje. ³ Pablonö Timoteo a nocamabou bufi fa doblaonö, mosi sicö joyaa balömalema, ö̦jamö bä lä bälöblai bä judio lä cuinö a waii dicoo mlaobeje. Timoteo bä fö̦ö e lä cui, judio a lä mlai a malä dano wejei, Moisesi etä a̦ tabou lä mlai. ⁴ Bluca bä lä bälöjöi bä fe waloo fa cuaaimadujenö, bä yömölaö cuaamaje. Jelusale jamö bä bada lä yododano wei, bä wa̦no ca̦i wäyämaje, bä a̦ juabeje. Jesucristonö bä lä shömöleno wei bä ma cui, cama ebä ca̦i lä yododaö wejei bä ca̦i bada ma cui, ö̦jö bä bufi shalililanö bä a̦ lä fano weinaja showawä. ⁵ Tä a̦ fa ji̦liläjenö, Jesucristo ebä lä yododoblai bä bufi lojodoblaliyoma. Jesucristo a nofi shino yai mölabou cadidiomaje. Bä Jesucristo bufilewä ca̦i cuaaö nosi blacäcoma. ⁶ Pablonö bä ca̦i lä cuono wei bä nija, Asia jamö Yai Bada tä Bufinö tä a̦ wäyäö wasöma. Ö̦jö cudeenö, Flijia ma cui jamö, Calasia ma cui jamö, ö̦jamö lä bä shino jayuquefälöma. ⁷ Misia jamö bä fa waloicunö, Bidinia jamö bä nia juu ma nomöjöono wei ma cui, Jesús a wa̦ Bufi läoma. ⁸ A wa̦ läoma cudeenö, Misia jamö bä jayua fa showadaicufälönö, Doasi jamö bä cua nomöjölayoma. ⁹ Ö̦jamö lä, Pablo nija wawädowä etä bädou fe jalulayoma. Masedoniateli e wawädowä fa ubladaliyonö, e a̦ bädaliyoma. —Jabo. Eja Masedonia jamö wa fa juimanö, yamalecö da bayeliblaliyo —a majali nowa tama. ¹⁰ Pablonö ö̦jö tä a̦ fa ji̦lilänö, yamacö shu̦lucou showadaoma, Masedonia jamö yamacö jubä. “Ö̦jö lä Yai Bada tä mayo waiquiwä”, yamacö bufi cuma. “Masedoniateli bä nija yama tä a̦ dodijidawä wäyäbä, Yai Bada tänö yamalecö shömöa cadidia waiquilei lä cufe”, yama a nofi taboma. ¹¹ Ö̦jö cudeenö, Doasi jamö yamacö shu̦lucua fa co̦lufälönö, Samodasia jamö yamacö befi ca̦i caläö cadidou showadaofälöma. Ö̦jö tä fena ja, Neaboli jamö yamacö jua fa nomöjölofälönö, ¹² Filiboteli bä nijamö yamacö waloa nomöjöquema, Masedonia tä ulifi jamö bä jaba lä bälöle bä nija, Lomateli bä bälöo lä balöono wei jamö. Ö̦jamö yamacö fe fa weyablalunö, ¹³ täbä yanöcöobä tä mö jalu ja, yamacö fa sibolunö, mau u casö jamö yamacö judayoma. “Ö̦jamö lä bei täbä nö bayeli nö nacaobö”, yamacö bufi cuma cudeenö, yamacö fa alufälönö, yamacö loaliyoma. Yamacö fa loalunö, suwä bä lä yododano wei bä nija yama tä a̦ wäyäma. ¹⁴ Yamalecö a̦ lä ji̦lileno wei a suwä ai lä cui, Diadilateliyoma a cuoma, Lidia a wa̦fa lä cule. Camishi ushujuwä bä lä nomöjöano wei a li suwä cuoma, bä camishi nowa lä bluca wei. Yai Bada nija a möfe bolanö, showadi a wa̦fa Bada doblao tama. Ö̦jö a suwä lä cuinö, Pablo a wa̦ ji̦liaö shaliliobä, Bada tänö a bufi jaducublamalema. ¹⁵ A bufi fa jaducublalunö a fe ojoblamolayoma, bä ca̦i lä cuono wei bä sho. Ö̦jö däjä, abinaja yamalecö nowa taö fe blacäjoma. —“Bejedi lä, Bada tä lä culadi a nö bufibou waiquiobö lä”, wamale nofi tabou ja, camiyä yamacö nijamö bä da cuiquiyo —a cudima. ¹⁶ Yai Bada nija bä nö bayeli nacaobä jamö, yamacö juu co̦o däjä, bä nosie juamobä a suwä lä tabono wejei a lä cui, yama a mö bamalema. A feculaoma. A fecula lä bälöono wei a wa̦nö, a wa̦ suwä shomioma. Tä nia lä cublou wei tä a̦ wawämaö balöoma. Ö̦jö a wa̦ ji̦lii bufi doblaomaje cudeenö, a suwä lä tabono wejei bä lä cuinö, blada bä fa nacajenö, a wa̦ ji̦limamaje. Cama suwä a wa̦ ja, blada bluca bä däamaje. ¹⁷ Pablonö yamalecö ca̦i lä juno wei jamö, a wa̦ suwä ca̦i yauama. Abinaja a i̦cali cufälöma. —Yai Bada tä Bada lä ayai a nosie juabeje, fei bä li. Cafä wamacö nija etä a̦ wäyäöje, wamacö jucäamobä —a suwä cuma. ¹⁸ Einaja a cuaaö showao däjä, tä nö dedejedaliyoma. A wa̦ faö wa̦lioblodii nojaaö ja, ya̦cumö Pablo a mö fa yabadalunö, a fecula lä bälöono wei a nija a wa̦ fama. —Jesucristo a wa̦ lojodenö, bäfä shömaö lä cule. A suwä da dacöfälö—a cuma. Einaja a fa cunö, a suwä daa showadaquefälöma. ¹⁹ Ö̦jö ma cui, a suwä lä tabono wejei a blocoblou nofi jushulayou ja, bä nö bayeliblamou co̦daabimi yalo, bä jushudaliyoma. Ö̦jö däjä, Pablo, Sila cäcöbö fa juwämalöjenö, bada bä yododabä jamö, cäcöbö läcämalefälömaje, nii bä showadi lä luluamou wei jamö. ²⁰ Bada bä nija cäcöbö ca̦i fa icuicujenö, abinaja bada bä nowa tamaje. —Fei judio cäcöbö li. Eja Lomateli yamacö lä bälöle yamalecö yabäcaböö dodijia. ²¹ Yamalecö taamaböö lä bufii weinaja, camiyä Lomateli yamacö cuaabä yamacömi. Tä a̦ läa. “Ja̦o”, yamacö cubä yamacö ma mlai ma cui, cäcöbö a̦ fe blacäjou —bä cuma. ²² Ö̦jö tä a̦ fa ji̦liläjenö, ö̦jamö bä bluca lä yododano wei bä fa jocäcädalunö, Pablo, Sila cäcöbö nabä quea showadaquemaje. Bada bänö cäcöbö fa juwälöjenö, cäcöbö camishibö cacalalemaje. Fii fibänö cäcöbö si yowamalalemaje. ²³ Cäcöbö si fa yowamalalöjenö, bä doblou lä mlai bä fe lä labou wejei jamö, cäcöbö fe jalili lamaquemaje. Ö̦jamö a lä lämono wei a nosiemäo showadaomaje, cäcöbö documaö mlaobä. ²⁴ Inaja a nowa tamaje yalo, u̦eshi yano jamö cäcöbö lojodomabou showaoma. Cäcöbö docuu mlaobä, madofi jude tänö cäcöbö matacö badädäa showaaquema. ²⁵ Bäshäcuoladi, Yai Bada nija Pablo, Sila sho cäcöbö nö bayeli nacao fe jaluma. Yai Bada tä nija cäcöbö ca̦i amowamoma. Ai bä fe lao mö lä feduono wei bä lä cui, bä yömöca daoma. ²⁶ Ö̦jö däjä, yedu mashita i̦cali a fa qui̦da qui̦damonö, bä fe lä laono wei a yafi colo bloloblaliyoma. A yafi colo lä bloloblaliyo wei ja, bei yocabä ca̦i caloa showaolaliyoma. Bä fe lä labono wejei bä matacö ca̦i lä badädäbono wejei, täbä madofi bluca jayoyolaliyoma. ²⁷ A lä lämou wei a lä cui, yedu a fa jocädalunö, bei yocabä bluca caloa fa dalalönö, a quililaliyoma. “Ya bä documaö tä nowa ja, bada tänö wale nia shämaö showadao”, a bufi cuma yalo, cama enö a nia shämou showadaoma. Shocobi a fa ucädalänö, cama a mini shämou däjä, ²⁸ Pablo a wa̦ i̦cali läblaliyoma. —Cafä a shämo dijä. Eja yamacö bluca jilaa showaa lä cule —a cudaliyoma. ²⁹ A lä lämono weinö, cowa wacö fa nacalänö, u̦eshi yano jamö a shi jali falayoma. Pablo, Sila cäcöbö cotä jamö, a fa yäläblaicunö, a quilili blösö blösömoma. ³⁰ Cäcöbö siboa fa showadamalönö, abinaja cäcöbö nowa tama. —Cafä bada wafäcö, ¿wedinaja ya fa cuaanö, ya li jucäamobä? —a cuma. ³¹ Abinaja a nowa taböma. —Bada tä Jesús a bejedi da bufi, afä bä bluca sho, wamacö jucäamobä —cäcöbö cuma. ³² Cama a ma cui nija, bä ca̦i lä cule bä ma cui nija, Bada tä a̦fa Jesucristo wäyäböö showadaoma. ³³ Ö̦jö tä didi showao däjä, a lä läono wei a lä cuinö cäcöbö fa nacaläfälönö, cäcöbö i̦yä yalulema. Ö̦jö däjä showadawä, cama a ma cui, bä ca̦i lä cule bä ma cui, bä fe bluca ojoblamoa showalayoma. ³⁴ Ö̦jö däjä, cama ebä ca̦i lä bälöo wei jamö, cäcöbö ca̦i dua fa co̦bofälönö, cäcöbö niibö baaquema. Cama a ma cui, bä ca̦i lä cule bä ma cui, Yai Bada etä a̦ bejedi bufilemaje yalo, bä bufi yai doblalou dodijioma. ³⁵ Ö̦jö tä fena ja, bä bada lä läono wei bänö cama ebä fa shömölöjenö, cäcöbö cushäblamaö bufimaje. ³⁶ Cäcöbö fe lä laono wei yafi jamö, a lä lämono wei a lä cuinö, Pablo a yömölaö ja, abinaja a cuma. —Bada bä wa̦no taö mö waloquei lä cufajei, bäfäcö cushäblaö co̦obä. ¿Ö̦jö tawä? Jabo. Dodijidawä wafäcö juu co̦ofälöbä —cäcöbö nowa tama. ³⁷ Ö̦jö ma cui, bä lä waloqueno wei bä nija Pablo a wa̦ fama. —Bada bänö yafälecö dobloimi jömano ma mlajei ma cui, fii fibänö wawädowä yafälecö si yowamalalemaje. Lomateli bänö yafälecö nofi lä tabou wejei yafäcö ma cui, täbä fe lä lamaö wejei yafi jamö yafälecö fe laquemaje. ¿Ö̦jö tawä? Wawädowä yafälecö nö bleaamama ma cujei, fei däjä ¿yafälecö nia shömaö ja̦tooje daanö? Mlaicätä. Eja cama bä yai fa waloiquiyonö, wawädowä yafälecö nö bleaamaö lä cuofajeinaja, wawädowä yafälecö yai famaö co̦obeje —Pablo a cuma. ³⁸ Bada bä lä läono wei ebä lä cuinö, Pablo a wa̦no wäyäjälomaje. “Wama cäcöbö fe lä laqueno wei, Lomateli bänö cäcöbö nofi lä tabou wejei cäcöbö jo̦wa fa tai”, bä cuu fa ji̦liläjenö, bä quililaliyoma. ³⁹ Bä fa quililalunö, bä icua showadaquema. —Shädayai —bä cuma— “Lomateli bänö ei cäcöbö nofi tabouje”, yamacö bufi cuu fa mlacunö, inaja bäfäcö li taamamaö dicooma —bä cuma. Einaja bä fa cunö, cäcöbö faa fa showadamalöjenö, cäcöbö shömöa co̦lemaje. ⁴⁰ ¿Ö̦jö tawä? Cäcöbö fe lä labono wejei yafi fa daböcöfälönö, Lidia e yafi jamö cäcöbö juu nomöjöoma. Ö̦jamö lä Jesucristo ebä möböö fa co̦onö, Yai Bada etä a̦ ja bä yömölaböö fa jayuaimadunö, cäcöbö cadidiblou co̦layofälöma.

¹ Bei. Afiboliteli bä lä bälöle jamö, Pablo, Sila sho cäcöbö jayuaö fa balöonö, Aboloniateli bä lä bälöle jamö cäcöbö jayua fa nomöjöicufälönö, Desalonicateli bä nijamö cäcöbö waloquema. Ö̦jamö judio bä yododabä yafi cuoma. ² Ö̦jamö lä Pablo a alayoma, showadi a lä cuaano weinaja showawä. Täbä yanöcöobä tä mö jalu ja, 3 a juu fa cublalunö, Yai Bada a wa̦no oni jömaö cuaaö ja, a wa̦ lojodoama. ³ Ö̦jö tä a̦ oni ja, Yai Bada tänö a shömabä a lä yaileno wei tä a̦ wawämama. A nö nia lä bleaano wei tä a̦ ma cui, a nia demi jocädou lä co̦ono wei tä a̦ ma cui, ö̦jö tä a̦ ja a wa̦ cadidiablalou ja, bä a̦ läobä etä cuonomi. Abinaja a cuma. —Cafä wamacö nija fei Jesús ya wa̦fa lä wäyäle, ö̦jö Yai Bada tänö a shömabä a lä yaileno wei a waiquiwä —a cuma. ⁴ Pablo a wa̦nö, judio ai bä bufi taamamou dodijioma. Pablo, Sila cäcöbö nija bä yädäa showadablaliyoma. Judio bä lä mlai, Yai Bada nija bä bejedimou bufi lä doblaono wei bä ma cui, bä suwä bufi lä jaducui bä ma cui, inaja showawä bä bluca ca̦i cuaaö mö feduo showaoma. ⁵ Ö̦jö ma cui, judio ai bä lä cui, cama bä a̦ ji̦limamou bufi doblao fa ayaonö, bä jushuoma. Bä nofi lä jushuaö wei bä juu fa dalalöjenö, bä nacabalemaje. Ö̦jö bä sho bä a̦ shi jaliwä wayou ja, ai bä bluca co̦cablaliyoyoluma. Ö̦jö däjä, ö̦jö bä a̦nö bluca bä lä bälöle bä shi bluca dolayoma. Bada bä nija Pablo, Sila cäcöbö öböaö showadaofälöbeje, Jasono e yafi jamö bä lucälayoma. ⁶ Ö̦jamö lä cäcöbö dayäma ma cujei, cäcöbö dablaö fa mlacujenö, Jasono a ma cui, Jesucristo ai ebä ma cui, bada bä nija ö̦jö bä läcäa yacläaquemaje. Abinaja bada bä nowa tamaje. —Jödödöwä täbä lä bälöblai jamö cäcöbö a̦ nofi jushuadii lä cuaaö wei, bä shi bluca lä jalimomaböö wei, eja cäcöbö fa waloaliyonö, ⁷ fei Jasono a lä cuinö cäcöbö jo̦wa bälömabou lä cubiyei. Sesa a wa̦ bada ma faö wei ma cui, fei bä bluca lä cuinö a wa̦ ji̦lia möablaimije. Ai a bada wa̦fa wäyäö yacläo dicooje, Jesús a wa̦fa lä cule —bä jushuolanö bä cuma. ⁸ Bä bluca lä toujono wei bä ma cui, bada bä lä läono wei bä ma cui, ö̦jö bä a̦nö bä bluca shifilimoma. ⁹ Jasono a ma cui, ai bä juwäbou mö lä feduono wejei bä ma cui, bä nofi jo̦wa lä jushuano wei tä nowa ja, bada bänö blada bä nacamaje. Ö̦jö däjä, cama bä nowa fa co̦amamoicunö bä jujeblamolayoma. ¹⁰ Didi däjä Jesucristo ebä lä cuinö, Belea jamö Pablo, Sila cäcöbö shömöa fe jalua showadalemaje. Ö̦jamö cäcöbö fa yafilönö, judio bä yododabä yafi jamö cäcöbö falayoma. ¹¹ Ö̦jö bä judio lä cuinö tä a̦ ji̦liaö bufi doblaomaje. Ö̦jö bä bufi shino yai walalao dodijioma, Desalonicateli bä bufi lä cuono weinaja mlai. Cäcöbö a̦ nia bejedi fa möjenö, Yai Bada showadi etä a̦ oni mömaje. ¹² Inaja bä cuaama yalo, tä a̦ bejedi bufilemaje. Judio bä lä mlai bä nö suwä lä madofibö wei bä bluca ma cuinö, ö̦jö bä ca̦i wa̦lo mö feduwä ma cuinö tä a̦ ca̦i bejedi bufia mö fedulemaje. ¹³ Ö̦jö ma cui, Desalonicateli bä judio lä cuinö, Belea jamö Pablonö Yai Bada etä a̦ wäyäö lä nomöjöle tä a̦ fa ji̦liläjenö, ö̦jamö ma cui a nabä aa majölayomaje. Ö̦jö bä a̦nö bä lä co̦camono wei bä shi fa jalijimomalöjenö, bä jushuo lulubomaje. ¹⁴ Ö̦jö lä däjä, Jesucristo ebänö modu u casö jamö Pablo a shömöa showadalemaje, a befi ca̦i caläö co̦ofälöbä. Ö̦jö ma cui, Sila, Timoteo ö̦jamö cäcöbö jäquema. ¹⁵ Ö̦jö däjä, Pablo a lä bälano wejei bä lä cui, Adena jamö Pablo a ca̦i fa waloicujenö, Pablonö bä shömöa mö yabaa co̦lema, Sila, Timoteo cäcöbö shömaö jaödaobeje. ¹⁶ Adena jamö Pablonö cäcöbö nö dabolanö, ö̦jamö bä lä bälöle bä nö bayeli lä nacao wei täbä nö idubö bluca möö cuaama. Ö̦jö täbä nö idubönö Adenateli bä shabonobö jödödöoma. Ö̦jö bä bluca fa dalalönö, Pablo a bufi jalujou dodijioma. ¹⁷ Ö̦jö cudeenö, judio bä yododabä yafi jamö a wa̦ fama. Judio bä ma cui nija, Yai Bada nija ai bä bejedimou bufi lä doblao wei bä ma cui nija, ö̦jö bä nija Pablo a wa̦ lojodoama. Nii bä showadi lä luluamou wei jamö ma cui, ö̦jamö bä lä waloblaaö wei bä ma cui nijamö, showadi a wa̦ fadii cuaama. ¹⁸ Shomi täbä a̦ ja, bä damaö mö lä feduono wejei ai bä cuoma. Ö̦jö bä lä cuinö, Pablo a dalalemaje. Ai etä a̦ nofi lä yaibono wejei, ebiculeo bä a̦fa jilabomaje. Ai etä a̦ tabou mö lä feduono wejei, etoico bä a̦fa jilabou mö feduomaje. Pablo a wa̦ wayoaöje ja, abinaja cama ai bä cuma. —¿Wedinaja a cuu ja, bei a wa̦ li shifilimou cubiyei? Jesús a lä nomalayono wei, a demi jocädou lä co̦layono wei tä a̦fa wäyäö yalo, abinaja ai bä cuu mö feduoma. —Cuwi. Shomi täbä lä bufiblaö wejei, bei täbä a̦fa wäyäö buo fa cui —bä cublaloma. ¹⁹ ¿Ö̦jö tawä? Pablo a nacaa fa showadalöfälöjenö, bada bä yododabä jamö a lululefälömaje, bada bä a̦ lä ji̦liamou wei jamö. Abinaja bä cuma. —Wa tä a̦ lä wäyäö wei yama tä a̦ ji̦liaö bufi doblao, ¿ö̦jö tawä? ²⁰ Yama tä a̦ jaba ji̦liaö fa mlacunö, yama tä a̦ ji̦liaö doblaimi showawä. Yamacö bufi jaducublobä, tä a̦ da wäba —bä cuma. ²¹ ¿Ö̦jö tawä? Adenateli bä yai ma cui, shomi bä lä coyocoi bä ma cui, ö̦jö bä bluca lä cui abinaja bä showadi cuaama. Tä a̦ daö balöono lä mlajei tä a̦ shino ji̦liaö bädao bufi doblaomaje. Tä a̦ ca̦i wayoaö bufi doblaomaje. Inaja bä cuaalanö, shomi tä a̦ ja bä showadi yabäcäaliyoma. ²² Ö̦jö cudeenö, bada bä yododabä jamö Pablo a ublaa fa möamodalunö, bä yömölalema. —Adenateli wamacö. Wamacö nö bayeli nacaobä, wama täbä nö idubö bluca lä tabole, ya täbä dablaö cuaaö waiquia. Bluca täbä ja wamacö nofi quilii yaio. ²³ Afä wama täbä lä bufiblaö wei ya täbä nö idubö möö cuaama, wama täbä a̦fa lojode lä wäyäö wei täbä lä cui. Ya täbä möö fa cuaaimadunö, ai tä nö idubö ja, abinaja ya tä a̦ oni dalalema, “Bäma tä nofi lä mojodubole”, tä a̦ oni cuu culai. ¿Ö̦jö tawä? Wama tä nofi ma mojodubole ma cui nija wamacö nö bayeli nacaobä wama etä yafi wai tabou. Ö̦jö wama tä daö lä mlale tä ja, wawädowä bämacö yömölaö lä cule. ²⁴ ’Bei —Pablo a cuma—. Mashita a bada lä tablaleno wei a lä cui, jödödöwä bä lä cublai bä ca̦i lä tablaleno wei a showawä lä cui, ö̦jö Yai Bada cätä. Fedu jamö ma cui, bita jamö ma cui, ö̦jö a shino Bada cua ayaa. Ö̦jö cudeenö, wamacö nö bayeli nacaobä wama e yano ma tablalei wei ma cui, a nia bälöomi. ²⁵ ’Camiyä bämacö nija a nia bayeliblamoimi. A jo̦liimi. Camanö bämalecö nia shilo yai bayeliblaö ayao. Camanö bämalecö bayelibou yalo bämacö demi, bämacö ca̦i je̦le je̦lemou. Täbä bluca lä cublai täbä ja, bämacö dobäö talei. ²⁶ Moli a jaba lä cuono wei a nija, bluca bämacö bälöjöwä lä yaiblai bämalecö bluca balamalema. Bämacö bälöa yaiblamobä, bämacö ulifibö jöböa cadidia sheleleabodayoma. Ö̦jamö bämacö fe nia lä wädäo wei tä daö lä waiquilenaja, bämacö bälöa taamabou lä cudi. ²⁷ ’¿Ö̦jö tawä? —a cuma—. Inaja bämalecö lä taamaö wei, cama bäma a bufijabä a li, bäma a dayäbä. Ö̦jö ma cui, camiyä bämacö bluca nijamö a ajedeblawä waiquiwä. ²⁸ Afä ai wama bä a̦ showadi lä ji̦liaö wei, bä cuu lä waiquio weinaja showawä. Abinaja bä cuu. “Bämacö lä demöo wei tä ma cui, bämacö lä qui̦aaö wei tä ma cui, cama a lojodenö bämacö cua lä cule”, bä cuu. Abinaja ca̦i, “Cama bäma ecö ijilubö malä cui”, bä ca̦i cuu. ²⁹ ’¿Ö̦jö tawä? —Pablo a cuma—. Yai Bada bäma ecö ijilubö waiquiwä yalo, bämacö bufi jaducublobä, ö̦jö lä. Olo bä ma cui ja, blada bä ma cui ja, maa mabä ma cui ja, ö̦jö bä ja bä nö idubö lä tablamou wei bä lä culenaja, Yai Bada tä cuwämi. Inaja bäma a nofi tabobä bämacömi. Yanowamö täbä bufi fa dayäonö, täbä li tablaö bädaomaje täbä li. ³⁰ ’Täbä yanowamö bufi jaba lä mojoduono wei däjä, Yai Bada tänö bä nö bleaamaö jaöono ma mlai ma cui, fei däjä bluca bämacö lä bälöblai bämalecö wasöö, wa̦lidiwä tä ja bämacö bufi lädobä. ³¹ Yanowamö täbä obi nia malä jömaö wei. Bämacö dodijaö ma cui, bämacö doblou ma mlai ma cui, bämalecö nowa taö ja a wa̦ nia cadidou. A wa̦ nia lä famaö wei a yaia waiquilema. “Bejedi lä ö̦jö lä a waiquiwä”, bämacö bluca cubä, a nofi lä yaibole a ma nomalayono wei ma cui, a demi jocädamaö co̦layoma —Pablo a cuma. ³² A demi a̦fa jocädou taö ja, ai bä lä cuinö a nö waiblamaje. Ö̦jö ma cui, ai bä mö feduwä lä cuinö a wa̦ nia shino ji̦liaö co̦omaje. ³³ Inaja bä cuu fa ji̦lilänö, Pablo a faa co̦layofälöma ma cui, ³⁴ cama nija ai bä yädäblou showadalayoma. Jesucristo a wa̦fa lä wäyämono wei tä a̦ bejedi bufilemaje. Ai a lä cui, Dionisio a wa̦fa cuoma, bada bä yododabä jamö showadi bä a̦ lä ji̦lidino wei. Ai a lä cui, a wa̦fa suwä Damali cuoma. Ö̦jö cäcöbö nija ai bä ca̦i yädäo showaoma.

¹ Tä fe fa weyadalunö, Adena jamö Pablo a fa jocälönö, Colido jamö a juu nomöjöoma. ² Ö̦jamö Bo̦doteli a judio dalalema, Aquila a wa̦fa lä cule. Italia tä ulifi jamö, bä suwäbö Blisila sho cäcöbö jaba bälöoma, Lomateli bä nijamö. Ö̦jö ma cui, ö̦jamö bada tä Claudionö judio bä bälömabou fa mojiblalunö, bä yashublamaö bufima. Colido jamö cäcöbö bälömou dudo däjä Pablonö cäcöbö fa dalalönö, cäcöbö fe walolema. ³ Blada bä lulubobä, Aquilanö yalo sibä ja bä lä wejejou wei sibä diyädima. Ö̦jö sibä ja Pablo a ca̦i showadi ojodamou mö feduoma yalo, ö̦jö cäcöbö nija a bälöquema. A fa bälöalunö, ö̦jö esibä mashi diyäö mö feduoma. ⁴ Täbä yanöcöobä tä mö jalu ja, judio bä yododabä yafi jamö, showadi Pablo a fa waloonö, Yai Bada tä a̦ wäyäö ja a wa̦ lojodoaama. Judio bä ma cui, judio bä lä mlai bä ma cui, bä bufi taamaö fe yadioma. ⁵ Masedonia jamö culanö, Sila, Timoteo sho cäcöbö waloa co̦aliyoma. Pablo nijamö cäcöbö waloa fa co̦alunö, shomi tä ja Pablo a yabäcou mlai ja, showadi Yai Bada etä a̦ shino yai wäyädima. Judio bä nija tä a̦ wäyäö ja, abinaja a cudima. —Yai Bada tänö a shömabä a lä yaileno wei, ö̦jö Jesús a waiquiwä —a cuma. ⁶ Ö̦jö ma cui, bä a̦ läblaliyoma. A nö waiblalemaje. Ö̦jö däjä, Yai Bada etä a̦ wailemaje yalo, Pablonö bä nia dobloimi fa jömanö, a lä didile ecö libubö yaösöblalefälöma. Cäcö yaösöblalanö, abinaja bä nowa taa showalema. —Ja̦o. Wamacö nia lä shämou wei, cafä wamacö mayo. “A wa̦ fanomi”, wamacö nia cuimi. Fei däjä, judio bä lä mlai ya bä yömölaö nomöjöo. ⁷ Einaja bä nowa fa talönö, a faa fa showalöfälönö, Disio Juto e yafi jamö a waloa nomöjöquema, judio a lä mlai a nija. Ö̦jö a lä cui, Yai Bada nija showadi a nö bayeli nacaoma. Judio bä yododabä yafi ja, cama e yafi ublaa bayäcäoma. ⁸ Bei. Judio bä yododabä yafi jamö a bada lä läono weinö, Bada tä Jesucristo a bejedi bufilema, Clibo a lä cuinö. Cama a ma cuinö, cama ebä ca̦i lä cuono wei bä bluca ma cuinö, Bada tä bufilemaje. Colidoteli bä bluca ma cuinö, Pablo a wa̦ fa ji̦liajenö, Jesucristo a fa bufilöjenö bä fe bluca ojoblamolayoma. ⁹ Ö̦jamö lä, Pablo nija Bada tä Jesucristo a fa bädalunö, a nowa taö fe jaluma. —A quili dijä. Bä yömölaö fe da yadio. A wa̦ si waiblo dijä. ¹⁰ Camiyänö bäfä ca̦i malä cule. Wa nabä nia queomije. Ei a shabono ja, iba bä bluca cua malä waiquibiyei —a cuma. ¹¹ Colido jamö Pablonö Yai Bada etä a̦ wäyäö nö dedeama. Lasha ai a faa fa balömalönö, ai a lasha famaö bäshäcuaö co̦o däjä, a wa̦fa wäyäö showaoma. ¹² Ö̦jö ma cui, ö̦jö Acaya jamö showawä Caliono a bada läo däjä, judio bä bluca fa toujublalunö, Pablo a nabä fa queicujenö a juwälemaje. Ö̦jö däjä, bada a nija a wa̦fa wäyäbeje a ca̦i jumaje, Pablo a dobloimi jömabä. ¹³ Abinaja bada a nowa tamaje. —Fei a lä cuinö, Yai Bada nija bä bayeliblamaö lä bufii wei tä dodijidawämi. Tä taö ma wasöö wejei ma cui, a wa̦ fe fa blacäjonö, bä bufi taamaö fe yadia lä cule —bä cuma. ¹⁴ Ö̦jö ma cui, Pablo a wa̦ mini faö däjä, Caliono a lä cuinö, abinaja judio bä nowa tama. —Judio wamacö. Fei a yai doblou mlao fa cunoja, a nofi waiteli jushuaö fa cunoja, “Ja̦o”, ya bufi nö cudaliyobö wei ma cui ya bufi cudoimi. ¹⁵ Afä wama tä a̦ lä tabole tä a̦nö wamacö li bäyäblayou bädao dicoo ja, bämacö a̦ ji̦liaö moji waiquiwä. Cafä wamacö showadi lä cuaaö wei, wamacö showadi lä wasöo wei, afä tä li waiquiwä. Afä wama tä a̦ nofi li bäyäbobä cafä wamacö li. Ö̦jö ya tä a̦ ji̦libä ya nia cuomi —a cuma. ¹⁶ Inaja a fa cunö, bä lä yododano wei a yafi jamö bä yashublamalema. ¹⁷ Ö̦jö däjä, judio bä yododabä yafi jamö a bada lä läono wei a juwäa nomöjölemaje, Sodene a wa̦fa lä cule. Caliono a lä cuinö, bada bä ca̦i lä yododano wei a yafi je̦fa jamö, ö̦jö a öböa nomöjölefälömaje. Ö̦jamö Caliono a mötale ja a nabä quequema ma cujei, Caliono a wa̦ faö co̦daanomi. ¹⁸ Ö̦jö tä cublou fa waiquilonö, ö̦jamö Pablo a nö dedejeblou fa co̦lonö, a shu̦lucou co̦oma. A nia lä juu wei, Jesucristo ebä nija tä a̦ fa wäyänö, Silia jamö a befi ca̦i caläfälöma. Aquila ma cui, bä suwäbö Blisila a ma cui, Pablo nija cäcöbö yaua showalayofälöma. Yai Bada nija Pablo a wa̦ nö fa wäicunö, a bejedimou dablamobä, Seclea jamö a fe malocoblamolayoma, judio bä showadi lä cuaano weinaja showawä. ¹⁹ Efeso jamö Pablonö cäcöbö ca̦i fa washölöblalunö, cäcöbö tabi feiquefälöma. Cäcöbö tabi fa feiquefälönö, judio bä yododabä yafi jamö cama Pablo a falayoma. Ö̦jamö Jesucristo etä a̦ wäyäö ja, judio bä nija a wa̦ lojodoama. ²⁰ Ö̦jamö ai bä lä cuinö a fe weyablamaö ma bufino wejei, bä a̦ juanomi. ²¹ Ö̦jö ma cui, a nia lä juu wei tä a̦fa wäyäö ja, abinaja a cuma. —Eja Yai Bada tänö wale shömaö co̦o ja, bämacö fe waloo co̦ofälöö weicätä —a cuma. Ö̦jö däjä, Efeso jamö a fa shu̦luculonö, a befi ca̦i caläa showalayofälöma. ²² Sesalea jamö Pablo a fa waloicunö, a fa itoblalunö, Jelusale jamö a aa nomöjölayoma, Jesucristo ebä möbä. Ö̦jö däjä, Adioquiateli bä nijamö a aa nomöjölayoma. ²³ Ö̦jamö a fe fa weyalönö, a aa co̦layofälöma. Calasia tä ulifi ma cui jamö, Flijia tä ulifi ma cui jamö, ö̦jamö bä lä bälöjöi bä fe waloadalaö fa cuaaimadunö, Jesucristo nija bä lä nocao wei ebä bufi lojodoamaö cuaafälöma. ²⁴ Bei. Alejadiateli Abolo a judio cuoma. Efesoteli bä nijamö a waloquema. Aca jayu a cuoma. Yai Bada etä a̦ ca̦i daö dodijioma. ²⁵ Bada tänö bä taamaö lä bufii wei tä ja, a damamou cadidou waiquioma. Tä a̦ wäyäö bufi fa doblaonö, Jesús a wa̦fa wäyäö cadidou dodijioma. Ö̦jö ma cui, Juan a lä cuinö, mau u ja bä fe lä ojomano wei tä shino daö ayaoma. ²⁶ Judio bä yododabä yafi jamö, a wa̦ jaba faö ja, tä a̦ wawädowä wäyäma. Aquila bä suwäbö Blisila sho cäcöbö lä cuinö a wa̦ fa ji̦libölänö, a nacabölema. A fa nacabölänö, Yai Bada tänö täbä taamaö lä bufii wei tä a̦ ja, a yömölaböö fa shalilionö, a bufi moyawäblamabölema. ²⁷ Ö̦jö däjä, Acaya jamö Abolo a juu nomöjöobä, Jesucristo ebänö a bayeliblalemaje. Acaya jamö bä lä bälöle bänö dodijidawä a wa̦ ji̦liabeje, ö̦jamö Jesucristo nija bä lä nocao wei bä nija tä a̦ oniblalemaje. Ö̦jamö Abolo a fa waloicunö, Jesucristo ebä bufi bayeliblaö fe balojooma, Yai Bada tänö bä nofi fa ojodabonö, tä a̦ bejedi bufia lä waiquileno wejei bä lä cui. ²⁸ Judio bä nija wawädowä a wa̦ faö fa lojodoablalonö, bä a̦ nö wa̦lojamanomi. Yai Bada a wa̦no oni jömaö fa cuaanö, abinaja bä nowa tama. —Yai Bada tänö a shömabä a lä yaileno wei, bäma a nö lä dabono wei, ö̦jö a li Jesús waiquiwä —bä nowa tama.

¹ Colido jamö Abolo a cuo showao däjä, jefu bä jamö Pablo a jayuyou fa cuaaimadunö, Efeso jamö a co̦blaliyoma. Ö̦jamö a fa waloicunö, Jesucristo nija bä lä nocao wei ai ebä dalalema. ² Cama bä nija abinaja a cuma. —Jesucristo wama a bejedi lä bufileno wei däjä, ¿cafä wamacö nija Yai Bada tä Bufi lucäa showadalayoma daanö? —a cuma. —Ma —bä cuma—. Yai Bada yama tä Bufi a̦fa ca̦i ji̦liboimi. ³ Ö̦jö däjä, Pablonö bä wa̦lii co̦oma. —¿Wedi a wa̦nö wamacö fe li ojoblamolayoma, ö̦jö lä? Bä a̦ juo ja, abinaja bä cuma. —Juan yama a wa̦ bejedi fa bufinö, ö̦jö nija yamacö fe ojomamolayoma —bä cuma. ⁴ Abinaja Pablonö bä nowa tama. —Wa̦lidiwä tä ja, bä bufi lä lädaliyono wei bä judio lä cui, Juannö bä fe ojoblalema. Bä yömölaö showadaoma, cama a nodi jamö a juu lä nomöjöono wei a bejedi yai bufii cadidiobeje. Ö̦jö a wa̦fa li Jesús wayoama —Pablonö bä nowa tama. ⁵ Pablo a wa̦ fa ji̦liläjenö, Bada tä Jesús a wa̦nö bä fe ojoblalema. ⁶ Ö̦jö däjä, cama bä nija Pablo imicö fa maqueicunö, Yai Bada tä Bufi lucälayoma. A Bufi fa lucälönö, bä a̦ faö shominajadaliyoma. Yai Bada etä a̦ ca̦i wäyäö showadaomaje. ⁷ Ö̦jö bä lä cui, jai 12 bä bluca cuoma. ⁸ Ö̦jamö Pablo a yanöcöo däjä, belibo 3 bä famalema. Judio bä yododabä yafi jamö showadi a fa judinö, a wa̦ faö waiteliama. Yai Bada tänö cama ebä ca̦i lä cuo wei tä a̦fa wäyäma. Bä bufi taamaö fe yadiobä a wa̦ lojodoama. ⁹ Ö̦jö ma cui, ai bä bufi jifuo fa dicoonö, tä a̦ bejedi bufinomije. Jesucristo a wa̦ lä juamou wei, wawädowä etä a̦fa ji̦limamou wa̦lidiwä taö dicooje ja, Pablonö bä yömölaö mladaliyoma. Dilano e yafi jamö Jesucristo nija bä lä nocao wei ebä ca̦i juu majöoma, ö̦jamö bä lä bälöle bä a̦ showadi lä ji̦liayono wei jamö. Ö̦jamö tä a̦ wäyäö nomöjöo ja, a wa̦ lojodoama. ¹⁰ Ö̦jamö tä a̦ wäyäö showao däjä, bolacabö lasha a famalema. Inaja a cuaadima yalo, Asia jamö bä bluca lä bälöblai bänö, Bada etä a̦ ji̦liamaje. Judio bä ma cuinö, judio bä lä mlai bä ma cuinö, tä a̦ bluca ji̦liamaje. ¹¹ Yai Bada nija Pablo a bayeliblamou fa dodijionö, tä nö lä quilijii tä bluca wawäblamalema. ¹² Pablonö camishi cäcö lä labou wei cäcö ma cui, cäcö lä yojobou wei cäcö ma cui, jalili bä nijamö ö̦jö cäcö ca̦i jumaje. Ö̦jö ecö camishi bäwä ma cuinö, bä lä jaliliono wei bä bluca jalolaliyoma. Bä lä feculaböono wei bä ma cui, bä fecula fa yashublamolunö bä ca̦i jaloa co̦laliyoma. ¹³ ¿Ö̦jö tawä? Ö̦jamö, showadi fecula bä shömaö lä cuaano wejei, ai bä judio cuoma. Ö̦jö bä lä cui, bä a̦ wabäoma. Bä lä feculaböono wei bä jalomabeje, Bada tä Jesús bei a wa̦fa yublamaje. Bä fecula lä bälöle nija bä a̦ faö cadidou fa showadaonö, abinaja bä cuma. —Jesús a wa̦nö bämacö shömaö lä cule, Pablonö a wa̦fa lä wäyäö wei a wa̦ showawänö —bä cuma. ¹⁴ Inaja bä lä cuaano wei bä 7 lä cui, nofi bäyäalewä bada a wa̦fa Eseba lä cule, ö̦jö bä ijilubö ebä cuoma. ¹⁵ Ö̦jö ma cui, fecula abinaja a cuu mö feduoma. —Jesús ya daö. Pablo ya ca̦i daö. Ö̦jö ma cui, cafä wamacö lä cui, ¿wedi bei wamacö li bashiwä? —a fecula cuu nomöjöoma. ¹⁶ Ö̦jö däjä, a lä feculaböono wei, lobe a fa niyablaicunö, bä nabä quequema. Bä bluca fa famimalalönö, bä nö blemalalema. Bä lä didile bä fa cacalalönö, sibo jamö shinoco bä jalili docuamaquema. ¹⁷ Judio bä ma cuinö, judio bä lä mlai bä ma cuinö, Efesoteli bä blucanö ö̦jö tä a̦ fa ji̦liläjenö, bä quililaliyoma. Ö̦jö däjä, Bada tä Jesús a wa̦fa nofi lojode doablaö dodijiomaje. ¹⁸ Abinaja bä ca̦i cuaama. Jesucristo bufilewä dude bä lä cublou wei, ö̦jö bä fa waloicunö, wawädowä bä a̦ nö wäoyoluma. Bä doblou lä mlaono wei tä a̦ bluca wawämalemaje. ¹⁹ Bä lä shaboliono wei bä lä cuinö, Jesucristo a fa bufilöjenö, cama oni etäbä ca̦i waloqueyolumaje. Sibä wawädowä yablalemaje, fecula täbä nija bä damamobä sibä lä cuono wei sibä lä cui. Ö̦jö oni sibä fa wabajenö, sibä nowa blucaoma. Blada 50.000 sibä nowa cuoma ma cui, sibä yablalemaje. ²⁰ Inaja bä cuaama yalo, Bada tä a̦ lä ji̦liaö wejei bä lä cui, ¡bejedi lä bä yai blucablou fe balojolayoma! ²¹ Inaja tä cublou fa balölonö, shomi jamö a juu nomöjöobä, Pablo a bufi cadidiblaliyoma. Masedonia ma cui jamö, Acaya ma cui jamö, ö̦jamö a fa jayuicunö, Jelusale jamö a nia juu nomöjöoma. Abinaja a ca̦i cuma. —Jelusale jamö ya juu fa balöonö, Loma jamö bä lä bälöle ya bä nia möö —a cuma. ²² Ö̦jö däjä, Pablonö Masedonia jamö Timoteo, Elato cäcöbö shömölema, cama a lä bayeliblano wejei ai cäcöbö lä cui. Ö̦jamö cäcöbö ma shömano wei ma cui, Asia jamö cama a cuo showao juoma. ²³ Ö̦jö lä däjä, Jesucristo a wa̦ lä juamou wei tä a̦ ja, ai bä a̦ fa lämonö, tä wa̦lidiblaliyoma. ²⁴ Abinaja tä cublaliyoma. Showadi, blada bä ja bä nö idubö lä tano wei a wa̦fa Demedio cuoma. Feculayoma Diana nija bä nö bayeli nacaobä yafi lä cui, ö̦jö bä yafi nö idubö tablaö ja, blada bä luluama. Nö idubö bä bluca tablamobä, cama a lä bayeliblano wejei bä ma cui, ö̦jö bä nö ca̦i bluca bladaböa mö fedulaliyoma. ²⁵ Ö̦jö cama ebä fa co̦cablamalönö, ai bä nö idubö tablaö mö lä feduono wejei bä ca̦i fa nacaalalönö, ö̦jö bä bluca yömölama. —Bei —a cuma—. Diana nija bämacö nö bayeli nacaobä bäma bä yafi nö idubö tablaö ja, bämacö nö bladaböaö lä cule. Ö̦jö wama tä daö. ²⁶ Pablo a lä cuaaö wei wama tä dablaö, ¿ö̦jö tawä? Efeso jamö bädawä mlai, ö̦jö a wa̦nö Asia tä ulifi mini jödödöblou waiquia lä cule. Wama a wa̦fa ji̦libou. Diana nija täbä mölaö mladobä, a wa̦ fe fa blacäjonö, täbä bufi yanöcamaö waiquia lä cudi. Abinaja bä nowa taö, “Nö idubö täbä ja wamacö nia bayeliblamoimi. Yanowamö täbä bädawä nija bä malä tablamou wei”, bä nowa taö. ²⁷ ’Yafi bäma bä nö idubö lä tablaö wei, bä nia bufiblaö co̦daaimije —a cuma—. Blada bäma bä lulubobä, tä nia cuo co̦daaimi. Feculayoma Diana a lä cui, a nofi yai doamobä a ma cui, ö̦jö nija bä nö bayeli nacaobä, a yafi nia bufiimi nomöjöoje. ¿Ö̦jö tawä? ¡Inaja dicowä mlai! Asia jamö bä bluca lä bälöblai bä ma cui, jödödöwä bä bälöblawä lä blaucui bä ma cui, ö̦jö nija bä nö shino bayeli malä nacaodii wei. Ö̦jö a shino feculayoma dodijaö ma cui, Pablo a wa̦nö a nia joyaö majöoje —a cuma. ²⁸ Inaja a cuu ja bä jushudaliyoma. Bä fa jushudalunö bä a̦ fama. —Efesoteli bämacönö bäma a Diana lä bufiblaö wei, ¡ö̦jö a shino yai! —bä i̦cali cudaliyoma. ²⁹ Ö̦jö bä a̦nö, ö̦jamö bä bluca lä bälöle bä shi bluca jalimolayoma. Masedoniateli cäcöbö juwäa showalemaje, Pablo nija cäcöbö lä yauono wei cäcöbö lä cui. Ai a wa̦fa Cayo cuoma. Ai a mö lä fedule, Alidaco a wa̦fa cuo mö feduoma. Efesoteli bä showadi lä yododoblaano wei jamö, cäcöbö läcälefälömaje. ³⁰ Bä lä toujole jamö Pablo a wa̦ fabä, a nia ma lucäno wei ma cui, Jesucristo nija bä lä nocao wei ebä lä cuinö a wasölemaje. ³¹ Asia tä ulifi jamö bä bada lä läono wei bä ma cuinö, Pablo cama nofi ebä cuoma yalo, a ca̦i wasömaö bufimaje. Bä a̦ fe blacäjoma. ³² Bä bluca lä toujono wei bä lä cui, bä shifilimou fa bädaonö, bä a̦ faö shalilionomi. Cama bä bluca mö feduwä lä cuinö, tä a̦fa nia lä wayoaö wejei tä nofi jaducubou mlajei ja, bä a̦ shi ca̦i jaliwä fablalou buoma. ³³ Judio bänö Alejado a wa̦ famaö bufi fa doblaojenö, bä lä toujono wei ai bä lä cuinö a möamoblamalemaje. Judio bä nofi bäyäabä, bei imicönö bä a̦ wasöma ma cui, ³⁴ judio a nö fa ö̦jöbölöjenö, a wa̦ faö doblamanomije. Bluca showadawä bä a̦ shi doa showadalayoma. —Efesoteli bämacönö bäma a Diana lä bufiblale, ¡ö̦jö a shino yai! —bä shi jalijiwä ca̦i cublalou nö dedeama. ³⁵ Efesoteli a bada lä cui, showadi a wa̦ lä ji̦liono wei a lä cuinö bä a̦ fa wasöblalönö, abinaja bä nowa tama. —Ja̦o. Bluca bämacönö ö̦jö bäma tä malä dale. Camiyä Efesoteli bämacö lä cuinö, Diana nija bä nö bayeli nacaobä e yafi lä cui, ö̦jö bäma e yafi nowamabä bämacö waiquiwä, Diana a lä dodijaö wei e yafi lä cui. Maa bäma ma nofi shino lä mölabou wei ma ma cui, ö̦jö bäma ma ca̦i nowamabä bämacö li, fedu jamö ma lä cuono wei ma lä quelayono wei ma lä cui. ³⁶ Inaja tä cua waiquia cudeenö, tä shominajablamaö majöobeje tämi. ’¿Ö̦jö tawä? —a cuma—. Ö̦jö cudeenö mamicai bä da cuicu. Bä a̦ shifilimo dijä. ³⁷ Eja ei wama cäcöbö lä öbölöfe cäcöbö lä cuinö, Diana nija bämacö nö bayeli lä nacao wei yafi jamö täbä madofi lä cule, täbä madofi tomöaböno malä mlai. Feculayoma a Diana ma cui, a nö ca̦i waiblabönomi. ³⁸ ’Demedio a ma cuinö, nö idubö bä tablaö mö lä feduo wejei bä ma cuinö, ei cäcöbö bäyäblabeje tä cua ja, bada bä nija bä a̦ nia faö balöo. Bä dobloimi lä jömaö wejei yano fe laa malä mlai. Ö̦jamö lä showadi bada bä malä läo wei. ¿Ö̦jö tawä? Ö̦jamö lä bä a̦fa yai tabeje. ³⁹ ’Cafä wamacö a̦ faö bufi doblao fe yadio ja, bada bänö showadi bämalecö ca̦i lä yododaö wejei jamö wamacö a̦ yai fabä. Ö̦jamö lä tä cadejeblaö wejeicätä. ⁴⁰ Lomateli bada bänö bämalecö wa̦no ji̦liaöje ja, bämalecö a̦fa tabeje tä cua waiquia, bämacö shifilimou dicoo ja —a cuma. ⁴¹ Ö̦jö tä ja bä fa yömölalönö, bä nowa tama. —Inaja lä waiquiwä. Bä da co̦omobodu —a cudaliyoma.

¹ Bä shi lä dono wei bä yanöcöblou fa co̦lonö, Jesucristo nija bä lä nocao wei, Pablonö bä nacamalema. Yai Bada etä a̦ ja, bä yömölaö fa balöonö, a nia lä juno wei tä a̦fa wäyäma. Ö̦jö däjä, Masedonia jamö a juu nomöjöobä, a aa showalayofälöma. ² Masedonia jamö Jesucristo ebä bufi lojodoamaö fa cuaaimadunö, Clesia tä ulifi jamö a waloa nomöjöquema. ³ Ö̦jamö 3 belibo a faa fa co̦malönö, Silia jamö a befi ca̦i mini caläö däjä, a nofi nia fa lämajenö judio bä a̦ wayoma. Ö̦jö tä a̦ fa ji̦lilänö, Masedonia tä ulifi jamö a fe dadou co̦ofälöbä a bufi shaliliblaliyoma. ⁴ Cama nija Beleateli Sobade a yaua showalayofälöma, Bilo bä ijilubö e lä cui. Desalonicateli cäcöbö ca̦i, Alidaco a wa̦fa lä cule, Secudo a wa̦fa ca̦i lä cule. Debeteli Cayo a ca̦i, Timoteo a ca̦i. Asia jamö cäcöbö lä bälöle cäcöbö ca̦i, Diquico a wa̦fa lä cule, Dofimo a wa̦fa lä cule a ca̦i. ⁵ Ö̦jö bä bluca fa balölönö, Doasi jamö yamalecö nö dabou balöojolayomaje. ⁶ Nii bä juluu lä mlai bä ja, judio showadi bä iyaö ca̦i lä co̦camou wei tä fa jayuicunö, Filiboteli bä nijamö culanö yamacö shu̦luculayoma. Yamacö befi ca̦i caläö showalanö, 5 yama tä mö didi fa tablamalöfälönö, Doasi jamö cama bä nija yamacö waloa jäquema. Ö̦jamö 7 yamacö fe cublaliyoma. ⁷ Jaba tä mö jalu ja, yamacö weyade iyaö ca̦i co̦camobä jamö, Pablonö bä yömöladima. Ö̦jö tä fena ja yamacö nia shu̦lucou showadao yalo, a wa̦ faö showao däjä tä nö bäshäcublamalema. ⁸ A yano fe lä döbädäono wei jamö, yamacö lä co̦camono wei jamö, cowa wacö bluca bä cublamoma. ⁹ Eudico a wa̦fa fiya lä cule, yafi a fe wädöobä ja a döcäojolayoma. Pablonö tä a̦ labamafälöö ja, a fiya fa malishalönö, a miquema. Ya̦cumö a mia fa sublaicunö a malishi quelayofälöma. Yano fe döbädäwä ajamö a fa quelunö, ö̦jamö nomawä a jocälemaje. ¹⁰ Ö̦jö ma cui, ö̦jamö Pablo a fa itolunö, ö̦jö a fiya nija a maqueoma. I̦cali a fa fa̦locolänö abinaja bä nowa tama. —Bä bufi jo̦lijo dijä. A demi co̦a lä cule. ¹¹ Yano fe döbädäwä ajamö Pablo a dua fa co̦bofälönö, nii a ja bä ca̦i iyajalayoma. Ö̦jö däjä bä a̦ wayou fe fa jalunö, tä mö jaba jaluimaö däjä bä fa waiconö, ö̦jö däjä Pablo a jua fenaa showalayoma. ¹² Fiya a lä quelayono wei dodijidawä a ca̦i co̦maje yalo, bä bufi dodijidablou co̦layoma. ¹³ Modu u casö jamö Pablo a nia fa watoafälönö, Aso jamö yamalecö shömöa balölema, canawä a bada ja. Aso jamö yamacö waloo däjä, canawä a jamö Pablo yama a nia döcäamaö jayuafälöma. ¹⁴ Ö̦jö cudeenö, Aso jamö Pablo a mö bao däjä, yama a döcämalefälöma. Ö̦jö däjä yamacö befi ca̦i bluca fa calälönö, Midilene jamö yamacö waloa majöquema. ¹⁵ Yamacö befi ca̦i caläö fa co̦ofälönö, moli yamacö fa miicufälönö, Quio jamö yamacö jayuquema. Ö̦jö tä fena ja, Samo jamö yamacö washölöa nomöjöquema. Ö̦jö tä fena ja nomöjöwä, Miledo jamö yamacö waloquema. ¹⁶ Asia jamö Pablo a yanöcöo bufio fa mlacunö, Efeso jamö lobe a nia caläö jayuoma. Jelusale jamö a waloo shi malä jalimono wei. Showadi bä nii lalou däjä, judio bä iyaö ca̦i lä co̦camou wei jamö, a cadidou bufi doblaoma. ¹⁷ Miledo jamö a culanö, Efeso jamö Pablonö ai bä fa shömölönö, Jesucristo ebä ca̦i lä yododaö wejei bä bada nacamalema. ¹⁸ Cama nija bä fa waloicunö, abinaja bä nowa tama. —Äyämö, Asia tä ulifi jamö, cafä wamacö nija ya showadi lä cuaaö wei wamale daö. Ya jaba da cuaableinaja ya cuaaö fa showaonö, ya cuaaö lä cule. ¹⁹ Bada tä Jesucristo dodijidawä ya nosie lä juaaö wei wama tä ca̦i daö. “Camiyä yai”, ya nofi tamamonomi. Ya lä ö̦cöno wei tä ma cui, wamale daö. Judio bänö wale nofi lä lämano wejei, wale nö lä bleaamano wejei, wama tä ca̦i daö. ²⁰ ’Wamacö bayeliblamobä, ya wa̦ wawädou mada showadaoblei. Yai Bada etä a̦ ja, bämacö lä yömölano wei wama tä ca̦i daö. Wamacö yododabä jamö ma cui, wamacö yafibö jamö ma cui, ya tä a̦ ca̦i wäyäö cuaama. ²¹ Judio bä ma cui, judio bä lä mlai bä ma cui, ö̦jö ya bä yömölaö ja, ya wa̦ wawäama. Abinaja ya bä nowa tama. “Wa̦lidiwä tä ja, wamacö bufi fa lädalunö, Yai Bada nija bä bufi da cuicu. Bada tä Jesucristo a nofi da mölaboje”, ya bä nowa tama. ²² ’¿Ö̦jö tawä? —a cuma—. Fei däjä, Jelusale jamö ya nia juu. Yai Bada tä Bufinö wale shömaö lä cule. Ö̦jamö lä wale nia lä taamaö wejei ya tä daimi. ²³ Ya tä daö ma mlai ma cui, Yai Bada tä Bufinö wale yömölaö ja, a wa̦ li wawäaö. “Wa juaö ma bädao wei jamö ma cui, showadi wa nö nia bleaamaöje. Wa fe nia labouje”, wale nowa taö. ²⁴ Ö̦jö ma cui, ya demi cuobä tä nowa cuami. Ya nofi jo̦lijiomi. Bada tä Jesucristonö wale nowa li taö lä cadidou wei tä ja, ö̦jö tä lä cui ya tä nofi shino li yaibou. Cama dodijidawä ya etä a̦ wäyäbä ya nabä cadidou, Yai Bada tänö täbä nofi lä ojodabou wei tä a̦ lä cui. ²⁵ ’Bei —a cuma—. Yai Bada tänö cama ebä ca̦i lä cuo wei tä a̦ ja, bämacö bluca yömölaö ma cuaano wei ma cui, wamale wäyäcu nia dablaö co̦daaimi. Ö̦jö ya tä daö. ²⁶ ¿Ö̦jö tawä? Ö̦jö cudeenö, ya wa̦ wawädoo lä cule. Shobali wacö jamö ai wamacö juu fe yadio ja, cafä wamacö mayo. Camiyä nija tä nowa nia cuomi. ²⁷ Yai Bada tänö täbä taamaö lä bufii wei tä a̦ ja, wawädowä bämacö malä yömölano wei. ²⁸ Bä da moyaweicu, wamacö bejedimobä. Jesucristo ebä lä yaile ebä bluca bejedimou mö feduobä, bä da cadidamaje. Yai Bada cama ebä li. Cama bä Ijilubö a lä shämono wei ja, bei i̦yä bänö bä nowa fa comacönö bä li tabou. Wama ebä ca̦i cuobä, Yai Bada tä Bufinö wamacö li lämabou. ²⁹ ’¿Ö̦jö tawä? —Pablo a cuma—. Eja ya juu mladou däjä, cafä wamacö nia yabäcaö lä juo wejei ya tä daö. Yalo bä ishou lä culenaja, bä waitelimou cuaaö fa jeicunö, Yai Bada ebä nabä nia queoje. ³⁰ Cafä wamacö ma cui, ai wamacö a̦ nia shominajablou juo. Ö̦jö bä a̦ nia lä shominajablou wei bä lä cui, bä bejedimou fa mlacunö, cama ebä nia ca̦i sheleleblouje. Cama bä a̦ nia ji̦liamou fa ayaonö, Jesucristo nija bä lä nocao wei ebä nia shedequeblamaö juoje. ³¹ Ö̦jö cudeenö, bä da moyaweicu. Camiyä ya lä cuaano wei tä nofi da jaduculäje, wamale owäbobä. Jalu däjä ma cui, didi däjä ma cui, ya ö̦cölanö ya bä bluca yömöladima. Inaja ya wajäblalou waiquilanö lasha 3 ya famalema. ³² ’Bei —a cuma—. Wamacö bayeliblamou juobä, Yai Bada nija bämacö nö bayeli nacaö. Camanö wamacö nofi lä ojodabou wei tä a̦ lä cuinö wamacö bayeliblamobä. Wamacö bufi nia lä lojodoo wei, ö̦jö lä tä a̦ waiquiwä. Cama bluca ebä dobäbä, tä a̦fa bluca lä wäqueno wei tä ma cui ja, cafä wamacö ca̦i dobäö mö feduobä. ³³ ’Cafä wamacö madofibö ja, ya bufi waiyonomi —a cuma—. Blada bä ma cui ja, olo bä ma cui ja, camishi bä ma cui ja, ö̦jö täbä ja ya bufi waiyonomi. ³⁴ Wamale daö waiquiwä. Camiyä ma cui, ya bä ca̦i lä cuo wei bä ma cui, yamacö jo̦lio mlaobä ya mada ojodamoblei. ³⁵ Camiyä ya lä cuaano wei tä ja, bämacö damaö waiquioma. Bämacö ojodamobä lä. Bada tä Jesús bäma a wa̦ nofi jaducubolanö, jalili bäma bä bayeliblabä. Abinaja a malä cuno wei, “Wamacö dobämou ja wamacö bufi ma doblao wei ma cui, cafä wamacönö ai wama bä yai dobäö ja, ö̦jö däjä bei wamacö bufi nia shino yai doblalou”, a Jesús cuma —Pablonö bä nowa tama. ³⁶ Pablo a wa̦ fa waiconö, a fa dijoblaicunö, a möfe deialiyoma. Bä ca̦i lä cuono wei bä sho, Yai Bada nija bä nö bluca bayeli nacao showadaoma. ³⁷ Bä fa wajäanö, bä bluca ö̦cöma. Pablo a ca̦i fa̦locamaje. ³⁸ Cama a wa̦nö bä ö̦cöö dodijioma, a wäyäcu nia dablamou co̦daaimi ja. Ö̦jö däjä, a caläö co̦fälöbä, canawä ajamö a ca̦i jumaje.

¹ Ö̦jö yama bä bada fa dacöfälönö, yamacö befi ca̦i caläa co̦layoma. Cosi jamö yamacö cadidou showaofälöma. Ö̦jö tä fena ja, Loda jamö yamacö waloa nomöjöquema. Ö̦jamö culanö, Badala jamö yamacö juu nomöjöoma. ² Fenisia jamö täbä lä bälaö wejei a bada canawä lä cui, yama a fa dalalönö, ö̦jamö yamacö fa döcäcäobalunö, yamacö befi ca̦i caläa co̦layofälöma. ³ Shible tä lä jo̦cole yama tä ulifi labajami fa dalalönö, yamacö ja̦loaö showadaofälöma. Ö̦jö yama tä ulifi fa dacöfälönö, Silia tä ulifi jamö yamacö befi ca̦i cadidilayofälöma. Diloteli bä lä bälöle jamö bä madofi washölöblaamabeje, ö̦jamö yamacö befi ca̦i cadöquema. ⁴ Ö̦jamö yamacö fa washölöblalunö, Jesucristo nija bä lä nocao wei ai yama ebä fa dalalönö, ö̦jamö lä 7 yamacö fe didi cublaliyoma. Ö̦jö bä lä cui, Yai Bada tä Bufinö bä a̦ fa cadidonö, Jelusale jamö Pablo a juu wasömaje. ⁵ Ö̦jö ma cui, yamacö shu̦lucua fa co̦lunö, yamacö juu co̦oma. Ö̦jö bä Jesucristo bufilewä lä cuinö yamalecö ca̦i sibolayomaje. Cama bä ma cui, bä suwäbö ebä ma cui, bä ijilubö ebä ma cui, bei u casö jamö yamacö bluca waloquema. Ö̦jamö yamacö fa dijojolalunö, Yai Bada nija yamacö nö bayeli bluca nacaoma. Ö̦jö däjä, dodijidawä yamalecö shömöa co̦lemaje. ⁶ Canawä ajamö yamacö döcäcäa fa co̦balunö, cama bä co̦a co̦layoma. ⁷ Dilo jamö culanö yamacö befi ca̦i lä caläfälöö wei ja, Dolemaida jamö yamacö washölöblaliyoma. Ö̦jamö Jesucristo yama ebä fe walou ja, moli yamacö fe didilayoma. ⁸ Ö̦jö tä fena ja, yamacö jua fa co̦lunö, Sesalea jamö yamacö waloa majöquema. Felipe e yafi jamö yamacö co̦blaliyoma, dodijidawä tä a̦ shino lä wäyädii wei e yafi jamö. Jesucristo ebä bayeliblabeje, bä 7 lä yaileno wejei däjä, ö̦jö a yaia mö lä feduleno wejei a li Felipe cuoma. ⁹ Cama bä tää 4 ebä shinoco lä cuono wei bänö, Yai Bada a wa̦no lä wäyäö wejei bä suwä cuoma. ¹⁰ Ö̦jamö yamacö fe weyaö däjä, Yai Bada a wa̦no wäyälewä Acabo a lä cui, Judea jamö a lä bälöle, a fama co̦blaliyoma. ¹¹ Camiyä yamacö nija a fa icubonö, Pablonö sicö acadafu lä ya̦bono wei sicö fa jayulänö, cama bei mamicö, bei imicö sho, a o̦cablamolayoma. Abinaja Acabo a cuma. —Yai Bada ya Bufi wa̦no taö lä cule. Camiyä ya o̦cao lä tablamolufenaja, inaja showawä Jelusaleteli bä judio lä cuinö, ei ya esicö lä tabole a nia o̦cablaö cuoje. Bä judio lä mlai bä nija a nia o̦cama jöböaöje —bei a cuma. ¹² Ö̦jö yama a wa̦ fa ji̦lilänö, Jelusale jamö Pablo yama a juu wasöma. Camiyä yamacö ma cuinö, ö̦jamö bä lä bälöle bä ma cuinö, bluca yamacönö yama a juu wasöö dodijioma. ¹³ Ö̦jö däjä, Pablo a wa̦ juo ja, abinaja yamalecö nowa taö nomöjöoma. —¿Wedi wama tä tabä wamacö li ö̦cöblalou? ¿Wedi tabä wamale bufi li wajäblalamaö? Jelusale jamö Bada tä Jesús ya wa̦fa wäyäö tä nowa ja, yale nia ma o̦cablaö wejei ma cui, ya ojode fe yadiwä. Yale nia yai ma shäö wejei ma cui, ya quiliimi —Pablo a cuma. ¹⁴ Yamalecö a̦ ji̦liaimi waiquiwä ja, yama a wasöö fe yadiblonomi. Abinaja yamacö shino cuma. —Ja̦o. Bada tänö tä tamaö lä ojode wei, ö̦jö tä tamobä, ö̦jö lä —yama ecö cudaliyoma. ¹⁵ Ö̦jö tä cublou waiquio däjä, yamacö fa shu̦luculonö, Jelusale jamö yamacö aa showadalayofälöma. ¹⁶ Sesalea jamö ai bä lä bälöle, Jesucristo nija bä lä nocao wei ebä lä cui, camiyä yamacö nija, ö̦jö bä yauoma. Shibleteli Masono e yafi jamö yamalecö bälaquemaje, ö̦jö nija yamacö cuobä. Ö̦jö a lä cui, Jesucristo nija a nocaaö nö dedeaö waiquiwä a cuoma. ¹⁷ Jelusale jamö yamacö fa waloicunö, Jesucristo ebä lä cuinö, dodijidawä yamalecö walomaquemaje. ¹⁸ Ö̦jö tä fena ja, Jacobo yama a möbä, Pablonö yamalecö ca̦i falayoma. Ö̦jamö Jesucristo ebä ca̦i lä yododaö wejei, bä ca̦i bluca looma. ¹⁹ Bä dodijidawä lä cule, Pablonö bä wa̦lii fa balöonö, Yai Bada tänö a nö wa̦lojamaö lä cuaano wei tä a̦ ja, bä yömölaö cadidioma. Judio bä lä mlai bänö, Jesucristo a nofi mölabou mö feduobeje, Yai Bada tänö bä bufi jaducublamaö lä cuaafälöno wei, tä a̦ bluca wäyäma. ²⁰ Ö̦jö tä a̦ fa ji̦liläjenö, Yai Bada a nofi doaö dodijiomaje. Ö̦jö däjä, abinaja ai a cuma. —A̦i. Eja bämacö lä cuaaö wei, wa tä daö. Judio bämacö nija, Jesucristo a bejedi lä bufii wejei, fei däjä bluca bä 1.000 cua. Moisesi tä a̦ nofi ca̦i yaibou fe balojooje, ¿ö̦jö tawä? ²¹ Shomi bä nijamö bä judio lä bälöblai wa bä jo̦wa lä taamaö wei wa wa̦no ji̦libou waiquiweje. Moisesi wa tä a̦ jo̦wa joyamaö bufii. Judio showadi bämacö ijilubö mosi sicö lä joyao wei tä ma cui, showadi bämacö lä cuaaö wei tä ma cui, ö̦jö wa tä jo̦wa taö wasöö. ²² ’Wa lä waloicufe, wa wa̦ ji̦liaö waiquilajei cätä —a cuma—. Dodijidawä wa bä ca̦i cuobä, ¿wedinaja wa li cuaabä? ²³ Wedinaja mlai, abinaja wa yai cuaabä. Bäfä yömölaö a lä cule. Yai Bada nija bä a̦ nö wäo lä shaliliono wei, eja 4 bä cua. ²⁴ Bä a̦ nia cadidou fa dablamonö, bä fe nia malocoblamou. Yai Bada etä yafi jamö cafänö bä ca̦i da jufälö, ö̦jö lä. Yai Bada ebä dodijidawä cuobä, nofi bäyäalewä bänö bä nia lä taamaö wejei däjä, cafä wa ca̦i yädäobä. Bä yalo nia lä dodobou wejei, cafänö wa ebä nowa fa comacönö, bä fe malocoblamobä. Ö̦jö däjä inaja wa cuaaö fa dalalöjenö, Jesucristo bufilewä bä judio lä cui, bä bufi nia jaducublou. Wa wa̦no lä ji̦libono wejei tä a̦ ja, bä nia mölaö majöomi. “Cama a ma cui, Moisesinö tä tamaö lä bufii wei tä ca̦i taö mö malä fedule”, wa nofi nia tabouje. ²⁵ ’¿Ö̦jö tawä? —a cuma—. Jesucristo a bejedi lä bufii wejei bä judio lä mlai bä lä cui, ö̦jö bä dodijidawä cuobä, yama tä a̦ oni shömaö waiquioma. Yama bä nowa ca̦i taö shalilou waiquioma. Nö idubö täbä ja, bä nii lä dodobou wejei bä ja, yama bä ca̦i iyaö wasöma. I̦yä i̦yä yama bä ca̦i wamaö nofi wa̦liboma. Yalo bä olami lä shi̦amou wei, yama bä ca̦i waö wasöma. Yama bä ca̦i joleblalou wasöma —a cuma. ²⁶ Ö̦jö däjä, Yai Bada nija bä a̦ nö wäo lä cadidiono wei bä 4 lä cui, Pablonö bä ca̦i aa showalayoma. Ö̦jö tä fena ja, Yai Bada dodijidawä ebä cuobä, cama sho bä bluca fa taamamonö, Yai Bada etä yafi jamö Pablonö bä ca̦i lucälayoma. Ö̦jamö Pablo a wa̦ nö wäo ja, abinaja a cuma. —Yai Bada dodijidawä yama ecö cuobä, yamacö jaba taamamou a lä cule. Inaja yamacö no fa cublalunö, jödödöwä yamacö dodijidablaliyono wei ja, Yai Bada yama a dobäyoluu wä —a cuma. ²⁷ Dodijidawä Yai Bada ebä cuobä, 7 tä mini lä cublole däjä, Asia jamö bä judio lä bälöle bänö, Pablo a dalalemaje. Yai Bada etä yafi jamö a fa dalalöjenö, bä a̦ shi jaliwä fama. Cama bä a̦nö, bä bluca lä yododoono wei bä shi fa jalimomalöjenö, a juwälemaje. ²⁸ A juwäalajenö bä a̦ i̦cali fama. —¡Bä da jaboje! Isaeli wama ecö mö feduwänö, wamalecö da bayeliblayo. Täbä jole damaö lä cuaadi, ¡ei bei a, ei, ei! Judio bämalecö a̦fa lä wayoaö wei a, Moisesi tä a̦ joyamaö bufi lä doblao wei a lä cuinö. Yai Bada ei tä yafi lä cui, tä yafi nö waiblaö lä cuboyoi. Abinaja ca̦i. Yai Bada ei etä yafi ma yaile ma cui, bä judio lä mlai bä fa lucämalalönö, etä yafi shamimalalei lä cufe —bä cuma. ²⁹ ¿Ö̦jö tawä? Jelusale jamö Pablo sho, Efesoteli Dofimo sho cäcöbö juu fa dalalöjenö, “Yai Bada etä yafi jamö, ö̦jö a lucämaö waiquio ja̦tooma”, bä bufi jole cuma yalo bä a̦ cuoma. ³⁰ Jelusaleteli bä blucanö bä a̦ fa ji̦liläjenö, bä shi jaliwä läläaimama. Yai Bada etä yafi jamö Pablo a fa juwälöjenö, sibo jamö a läcälefälömaje. Lobe yoca laa jäa showadaquemaje. ³¹ A nomamaö shi wa̦lijiobeje a shäö showadaoje däjä, sodado bada a lä cui nija bä shi lä dono wei bä a̦fa wäyämaje. Jelusaleteli bä bluca jo̦wa waitelimou ja, ³² cama ebä nacaö showadaofälöma. Sodado ebä ma cui, ö̦jö 100 bä ca̦i lä cublamono wejei ebä ma cui, ö̦jö bä nacaa fa showadaläfälönö, bä nabä läläaimamaje. Bada a läläaö fa dalalöjenö, sodado ebä ca̦i läläaö fa dalalöjenö, Pablo a shäö waicou mö baomaje. ³³ Pablo nija sodado bada a fa icuicunö, a juwämalema. Boo bolacabö shicö badanö, a bococu o̦cablamaö bufima. Bä lä ublale bä nija Pablo a wa̦lima. —¿Ei wedi bei a dodijiwä? ¿Wedinaja a cuaaö ja, bei wama a li shäö cule? —a cuma. ³⁴ Ö̦jö ma cui, bä lä toujono wei bä a̦ wawäblou mlai ja, bä a̦ i̦cali faablalou bädaoma. Pablo a lä cuaano wei tä a̦ yai ji̦liabä, bada tänö tä ma wa̦lino wei ma cui, tä a̦fa wäaö fa mlacujenö, camanö sodado bä ca̦i lä bälöono wei a yafi jamö, a bälamaö bufima. ³⁵ Ö̦jö a yafi jamö Pablo a fa bälacöjenö, yafi lä feyacale jamö a mini ca̦i duoje däjä, bä lä toujono wei bä waitelimou fe balojooma. Ö̦jö bä nija Pablo a noshi umabouje ja, sodado bänö a yalucälefälömaje. ³⁶ Pablo a ca̦i jubeje jamö, bä a̦ ca̦i yaua malä showadaqueno wei. Bä a̦ i̦cali faö ja, abinaja bä cuma. —¡Fei däjä bäma a shäö da showadao! —bä cuma. ³⁷ Sodado bä yafibö jamö, Pablo a mini ca̦i lä lucälayono wejei däjä, sodado bada a nija abinaja Pablo a cuma. —Cafä nija ya wa̦ faö bufii —a Pablo cuma. Abinaja bada a cuu mö feduoma. —¿Clesiateli wa bä caficö a̦ ca̦i daö daanö? ³⁸ Cafä ¿wedi bei wa dodijiwä? Ö̦jö Ejidoteli a nofi da jushuadiblei bäfä bufima, Lomateli yamalecö yashublabeje, ebä shi bluca da jalimomablei a lä cui. Ulifi bloque jamö, yanowamö shädimi 4.000 ebä bluca da luluboblei, ¿ö̦jö wami daanö? —a cuma. ³⁹ —Ma, ö̦jö yami —Pablo a cuma —Judio cä ya. Silisia tä ulifi jamö ya jaba lä bälöono wei, ö̦jö ya. Dasoteli bä nijamö ya oshe cublaliyoma, showadi tä a̦fa ulifi lä juyumadii wejei jamö. Ei bä lä toujole bä nija ya wa̦ da fa, ¿ö̦jö tawä? —a cuma. ⁴⁰ Bada tänö a wa̦ famaö fa bufinö, bä lä duo wei jamö a ublalanö, bei imicönö bä a̦ wasöma. Bä a̦ yanöcödou lä dodijio wei däjä, judio bä caficö a̦ ja, a wa̦ fama. Abinaja a cuma.

¹ —Iba wamacö —Pablo a cuma—. Bada wamacö. Bei. Ya nofi bäyäo ja, wamale a̦ da ji̦lilä —a cuma. ² Judio bä caficö a̦ ja Pablo a wa̦ faö fa ji̦liläjenö, mamicai bä yömöca yai daoma. Abinaja a Pablo cuma. ³ —Judio cä ya. Silisia tä ulifi jamö ya oshe cublaliyoma, Dasoteli bä nijamö. Eja, Jelusale jamö, ya yawälayoma. Camiyä bämacö nö badabö cuaaö lä cadidiono wei tä ja, ya cadidou nodiablalou showaobä, Camalieli nija ya ca̦i damamoma. Cafä wamacönö, Yai Bada wama a wa̦ nofi lä yaibou weinaja, camiyä ya ma cui ya tä a̦ nofi yaibou cua mö fedua. ⁴ ’¿Ö̦jö tawä? —Pablo a cuma—. Jesucristo a wa̦ lä juaö wejei ya bä shämaö ja, ya bä nö jaba bleaamama. Wa̦lo bä ma cui, suwä bä ma cui, ya bä fa o̦cablamanö, täbä fe lä lamaö wejei jamö ya bä fe lamaboma. ⁵ Nofi bäyäalewä bada a ma cuinö, bada bä lä yododaö wei bä ma cuinö wale a̦ bejedi daöje. Cama bä nija oni ya si dälema, Jesucristo ya ebä juwäamaö lä bufino wei tä oni. Judio bä nija ya si oni ca̦i jubä. Ö̦jö däjä, Damaco jamö ya juma, ö̦jamö Jesucristo bufilewä bä lä cuono wei ya bä juwäamabä. Jelusale jamö bä nö bleaamabeje, o̦cama ya bä nia bälaö co̦oma. ⁶ ’Ya jufälöö däjä, motoca a yo̦loloblodayou däjä, Damacoteli bä nijamö ya ajedodayoma. Ö̦jö däjä fedu jamö tä shi̦i bada fa bädalunö, camiyä ya lä cule jamö tä shi̦i wacacadaliyoma. ⁷ Ya fa wäcäblaicunö, ya wa̦ ji̦lilema. “Saulo, Saulo”, a cuma. “¿Wedi tabä wale nö bleaamaö dicoa cule?” a cuma. ⁸ Ya wa̦ juo ja, abinaja ya e cuma. “Bada tä, ¿wedi bei wa jo̦wa?” Abinaja cama a cuu mö feduoma. “Wale nö lä bleaamale, Jesús ya wa̦”, a cuma. ⁹ ¿Ö̦jö tawä? Ya bä ca̦i lä juno wei bä lä cuinö tä shi̦i bada ma dalaleno wejei ma cui, wale a̦ lä wayomaö wei, bei a wa̦ ji̦lianomije. ¹⁰ ’Abinaja camiyä ya cuu nomöjöoma —a cuma—. “Bada tä”, ya cuma. “¿Wedinaja ya yai cuaabä?” Inaja ya cuu ja, Bada tänö wale nowa tama. “Wa fa jocädalunö, Damacoteli bä shabonobö jamö a da yafilö. Bäfä nia yai lä shömaö wei tä ja, ö̦jamö lä wa nia yömölamou nomöjöo”, wale nowa tama. ¹¹ ’Ö̦jö tä shi̦inö, ya mamocu shi fa doblalunö, ya tä möblanomi —Pablo a cuma—. Ö̦jö cudeenö, ya bä ca̦i lä cuono wei bänö, wale fa öbölöfälöjenö, Damaco jamö wale ca̦i co̦blaliyomaje. ¹² ’Ö̦jamö Damacoteli Anania a cuoma. Yai Bada nija ö̦jö a bejedimou dodijioma. Moisesi tä a̦ nofi cadidiboma. Ö̦jamö bä judio bluca lä bälöle bänö, a wa̦fa dodijaö tamaje. ¹³ Ö̦jö a fa waloiquiyonö, camiyä nija a fa icubonö, abinaja wale nowa tayoluma. “U̦asi, Saulo. Mamocu dodijidablou da co̦lu”, wale nowa tayoluma. Inaja a fa cunö, yedu ya mamocu dodijidablou fa co̦lonö, ya dalalema. ¹⁴ ’Abinaja wale nowa taö showadaoma —a cuma—. “Camiyä bämacö nö badabö nija tä lä bufiblamono wei tä Yai Bada lä cuinö, cafä wa yailema, camanö täbä taamaö lä bufii wei wa tä dabä. Cama a nosie yai lä juaö wei a lä cui wa dablabä, a yai lä dodijaö wei a lä cui. Ö̦jö wa wa̦ yai ji̦liabä. ¹⁵ Bluca bä nija ö̦jö wa wa̦fa nia wäyäö. Wa lä möno wei tä ma cui, wa wa̦ lä ji̦lileno wei tä ma cui, ö̦jö wa wa̦fa nia wäyäö. ¹⁶ ¿Ö̦jö tawä? Bei. A fe da ojomamo. Bada tä nija wa nö bayeli fa nacaonö, wa doblou lä mlai, ö̦jö nija tä da mladamalö”, wale nowa tama —a Pablo cuma. ¹⁷ Abinaja Pablo a cuu co̦oma. —Jelusale jamö ya waloo co̦o däjä, Yai Bada yafi jamö ya nö bayeli nacao däjä, tä bädaliyoma. ¹⁸ Wawädowä ya tä fa dalalönö, abinaja wale nowa tama. “Lobe wa fa shu̦luculonö, shomi jamö a da alufälö. Eja, Jelusale jamö wale a̦fa lä wäyäö wei tä a̦ bejedi nia bufiimije”, wale nowa tama. ¹⁹ ’Abinaja ya e cuma. “Bada tä”, ya e cuma. “Camiyä ya lä cuaano wei tä ja, bä bufi jaducublou ja̦too weicätä. Judio bä yododabä yafi bä jamö, afä ya bä nö bleaamaö lä cuaano wei, tä daö waiquiaje. Cafä wa bejedi lä bufii wejei, ya bä fe lä lamabono wei, ya bä lä shämaleno wei, tä daöje. ²⁰ Wa wa̦fa lä wäyäno wei a Esteban ma cui, ö̦jö a lä shäleno wejei däjä, ö̦ja ya ca̦i ublao yädäoma. A shäbeje ya wa̦ ca̦i fama. Bä lä ishono wei bä lä cui, camiyä nija bä camishibö fa jilamoicunö, ya bä nowamama”, ya e cuma. ²¹ ’Ö̦jö ma cui, abinaja Bada tänö wale nowa tama. “A da alufälö. Blajai jamö bäfä nia shömaö, judio bä lä mlai bä nija”, wale nowa tama —Pablo a cuma. ²² ¿Ö̦jö tawä? Pablo nija dodijidawä bä yömöca jaba ma daono wei ma cui, bä judio lä mlai bä a̦fa jayumaö ja, bä a̦ nacläaö co̦oma. —¡A da shälöje! Miji a demi cuobä ami —bä cuma. ²³ Bä a̦ i̦cali falanö, cama bä camishibö shi jaliwä ya̦wedoablalamamoma. Coshi coshi bä ma cui, bä bluca shäyäjamaje. Inaja bä cuaaö showao däjä, ²⁴ sodado bada a lä cui, cama ebä nija a wa̦ fama. Cama bä lä cule jamö, Pablo a lucämaö bufima. Judio bänö a shäö shi jalimomaje yalo, bada a lä cui a bufi wedinajamoma. Ö̦jö cudeenö, Pablo a wa̦ nö nia wäamaö fe fa yadionö, a si yowamaö bufima. ²⁵ Ö̦jö ma cui, Pablo a o̦cabou waiquilajenö, sodado 100 bä ca̦i lä cule a ublao yädäo däjä, a wa̦ Pablo fama. Abinaja a cuma. —Lomateli bänö wale nofi la tabou wejei ya ma cui, bada bänö wale dobloimi jömaö ma mlajei ma cui, ¿wamale si nia li yowaö? ²⁶ Inaja a fa cunö, sodado 100 bä ca̦i lä culenö, Pablo a wa̦ fa ji̦lilänö, bada e nija a wa̦ wäyäö showadaoma. —Wa tä nia lä taö wei tä ja, a da moyaweicu —a cuma—. Lomateli bänö a nofi lä tabou wejei, a jo̦wa. ²⁷ Ö̦jö cudeenö, sodado bada a lä cui a fa icuicunö, Pablo nija a wa̦ fama. —A wa̦ da cadidibo. Lomateli bänö ¿cafä wa nofi tabouje? —Awei. Ö̦jöteli ya —Pablo a cuma. ²⁸ Sodado abinaja a bada cuu mö feduoma. —Shädayai. Cama bä nija ya co̦caobä, blada bluca ya bä jöböquema —a cuma. Abinaja Pablo a cuu nomöjöoma. —Ö̦jö ma cui, camiyä Lomateli bä nija ya oshe cublaliyoma cudeenö, Lomateli ya showadawä —Pablo a cuma. ²⁹ Ö̦jö cudeenö, Pablo a wa̦ wäamabeje a si nia lä yowano wejei, bä jäwäjäblaliyoma. Sodado bada a ma cui, Pablo a wa̦ ja, a quilia majölaliyoma. Lomateli bänö a nofi lä tabou wejei a ma cui, a o̦cablamaö dicooma cudeenö, a quilima. ³⁰ Sodado bä nija a bada lä läono wei a lä cuinö, Pablo a cushäblamalema. Ö̦jö tä fena ja, judio bä nia wa̦lii fa shalilionö, bada bä yododamaö bufima. Nofi bäyäalewä blowäjäwä bä ma cui, judio bada bä ma cui, ö̦jö bä yododoo waiquio däjä, Pablo a fa nacamalönö, a mötalömabalema.

¹ Pablonö judio bada bä möö fa shalilionö, abinaja bä nowa tama. —Iba wamacö. Yai Bada nija showadi ya dodijidawä lä cuaano weinaja, ya cuaaö showaa lä cule. ² Inaja Pablo a cuu ja, bä ublaa lä ajedele bä nija, nofi bäyäalewä Anania a badanö, bei caficö shäamaö bufima. ³ Ö̦jö nija Pablo a wa̦ jushuo ca̦i faö showadaoma. —¡Yai Bada tänö cafä wa shäö nomöjöo weicätä! Jole jole wa li mömou liyäjäwä bäwä. Moisesi wa tä a̦ nofi jaducubolanö, wale jömabä wa ma cui, bei wale li shämaö dicoa cule. Moisesinö ö̦jö tä taö wasöö malä cui —a Pablo cuma. ⁴ Bä ublaa lä ajedele bä a̦ fama. —Yai Bada tänö nofi bäyäalewä a bada ma tamabole ma cui, ¿ö̦jö nija bei wa wa̦ li lafujou? ⁵ Abinaja Pablo a cuu nomöjöoma. —Iba wamacö. “Fei nofi bäyäalewä bada a”, ya bufi cunomi. Abinaja tä a̦ oni malä cuu wei, Cafä wamacö nija a bada lä läo wei, wama a wa̦fa nia taimi. ’¿Ö̦jö tawä? —a Pablo cuma. ⁶ Bä lä yododano wei ai bä lä cui, Yai Bada etä yafi jamö bä bada lä läo wei bä saduseo cuoma. Ai bä bada faliseo cuo mö feduoma. Pablonö ö̦jö bä bluca loo coyocoa fa dalalönö, faliseo bä nija a nofi nia fa bäyäamamonö, a wa̦ i̦cali fama. —Iba wamacö. Camiyä, faliseo cä ya. Iba bada bä ma cui, faliseo cäbä. Faliseo ya waiquiwä cudeenö, bä lä nomaö wei bä lä cui, bä nia demi jocädou lä co̦o wei tä ja ya bufi shalilia. Ö̦jö tä ja ya mölaö yalo, eja wale tabou lä culajei, wale nia dobloimi fa jömajenö —a cuma. ⁷ Inaja Pablo a cuma yalo, faliseo bä sho, saduseo bä sho bä a̦fa bluca lafumayoma. Bä bufi bluca shedequeblaliyoma. ⁸ Saduseo bänö, nomawä bä demi nia jocädou lä co̦o wei, tä a̦ bejedi bufii malä mlajei. Yai Bada a̦jele etäbä lä culadi bä ma cui, yai ai täbä lä cublai bä ma cui, bä a̦fa cuami taö jödödöweje. Ö̦jö ma cui, faliseo bänö ö̦jö bä a̦fa bluca cua taöje. ⁹ Ö̦jö däjä, saduseo bä ma cui, faliseo bä ma cui, bä a̦fa lafujayou nacläaö fa showadaonö, faliseo ai bä ubladaliyoma, Moisesi tä a̦ ja bä showadi lä damaö wejei bä lä cui. Pablo a nofi bäyäaöje ja, abinaja bä cuma. —Ei Pablo a doblou lä mlai yama etä daimi. Cama nija a wa̦ jo̦wa faö lä ja̦toono wei, Yai Bada etä a̦ a̦jele wawäa ja̦tolayoma. Cuwi, ai etä a̦ yai faö ja̦tooma fa cui. Ö̦jö yai tabä malä cublai —bä cuma. ¹⁰ Ö̦jö däjä, bä a̦ nö fa quilianö, sodado bada a lä cuinö Pablo a nofi jalujuboma. “A cacalaleije daanö”, a nofi fa tabonö, cama ebä shömöquema. —Bei, bei, bei. Ö̦jö bä nija wama a jucäa fe fa yadilönö, yafi jamö a lucäa da cömalöje —bä nowa tama. ¹¹ Tä fa dödölönö, Pablo nija Bada tä Jesucristo a fa bädalunö, a ubladaliyoma. Abinaja a cuma. —A bufi da lojodoicu. Jelusale jamö wale a̦fa wäyäö lä cuaano weinaja, Loma jamö ma cui, ö̦jamö wale a̦fa wäyäö nomöjöobä, ö̦jö wa —a cuma. ¹² Tä mö jaluu co̦o däjä, Pablo a shäbeje judio bä a̦ wayoma. A nia shäö fa showadaojenö, Yai Bada ma cui nija bä a̦ nö wäa cadidiquema. Abinaja bä cuma. —Pablo yama a shäö showao mlao däjä, yamacö nia iyaö co̦daaimi. Yamacö amishi nia ca̦i co̦omi—bä cuma. ¹³ Pablo a shäbeje bä a̦ nö lä wäono wei bä blucaoma. 40 tä nojablamalemaje. ¹⁴ Nofi bäyäalewä blowäjäwä bä ma cui nija, judio bada bä ma cui nija, ö̦jö bä nija bä fa icuicunö, abinaja bä nowa tamaje. —Pablo yama a nia shäö. Yama a shäö showao mlao däjä, nii moli ma cui yama a nia wabaö bädaomi. Yai Bada nija yamacö a̦ nö wäa waiquiquema. ¹⁵ ¿Ö̦jö tawä? Fei däjä sodado bada a nija wamacö a̦ nia faö. Ö̦jö nija ai wama bä fa shömölönö, judio bada wama bä wa̦no tayolubä. Jai Pablo dodijidawä wama a wa̦lii co̦obä, a shömamaö da bufije. Yama a nofi nia lämaö. A ajedou showao mlao däjä, yama a nia shäö showadao —bä cuma. ¹⁶ ¿Ö̦jö tawä? Pablo bä fecamabö enö, bä a̦fa lämou fa ji̦lilänö, sodado bä yafibö jamö a fa lucälönö, Pablo a yömölalema. ¹⁷ Ö̦jö däjä, sodado 100 bä cai̦ lä cule ai a fa nacalänö, abinaja Pablo a cuma. —Afä bada a nija, ei fecamayä a da lululäfälö, a wa̦ nö wäobä —a cuma. ¹⁸ Sodado bada a nija, Pablo bä fecamabö e ca̦i aa fa showadalunö, abinaja e cuyoluma. —Cafä nija Pablonö ei wale ca̦i shömaö lä cufe, wa fe lä labole a lä cuinö. Cafä nija a nö wäobä, a bälamaö bufima —a cuma. ¹⁹ Sodado bada anö fiya a fa öbölönö, cäcöbö fa bayäqueicunö, a wa̦lima. —¿Wedinaja bei wa nia cuu cufawä? —a cuma. ²⁰ Abinaja a fiya cuma. —Cafä nija judio bä a̦ fayolubä, bä a̦ wayoma. Bada bä yododoobä jamö, Pablo a nia jo̦wa bälamaö bufiije. Jai dodijidawä a wa̦lii co̦obeje, bä a̦ dodijidawä nia ma faö wei ma cui, ²¹ bä nosie jua dijä. Bluca bänö a nofi lämaö waiquiweje. 40 tä jayublamaöje. Pablo a shäbeje, Yai Bada nija bä a̦ nö wäa waiquiquema. A shäö showao mlaoje däjä, bä nia jo̦wa iyaimi. Bä nia ca̦i amishi co̦omi. ¿Ö̦jö tawä? A shäbeje, bä läa waiquia lä cule. Cafä wa wa̦ nö shino dabou lä culajei —a fiya cuma. ²² Ö̦jö däjä, sodado bada anö fiya a wa̦ fa wasölönö, a shömöa co̦lema. Abinaja a cuma. —Camiyä wale lä moyawämalufe, moli a ma cui nija tä a̦ wäaö fe balojoo dijä —a cuma. ²³ Ö̦jö däjä, sodado bada a lä cuinö, sodado 100 bä ca̦i lä cule, bolacabö cäcöbö nacalema. Abinaja cäcöbö nowa tama. —200 wafä bä ca̦i sodado jubä, bä ca̦i shu̦lucobö da showadao. Tä mö didi sublablou däjä, wafä bä nia ca̦i alayou. Cabayo bä jamö bä befi ca̦i lä läläaö wei, 70 bä ca̦i. Namo bä ca̦i juu mö feduobeje, 200 bä ca̦i. Sesalea jamö wafä bä ca̦i jubä. ²⁴ Pablo a befi ca̦i läläaö mö feduobä, wafä ebä cabayo däaö mö feduo showaobä. Bada tä Feli nija dodijidawä wafä a bälabä —bada anö cäcöbö nowa tama. ²⁵ Ö̦jö däjä, Feli nija si jöböaböbä, si oniblalema. Abinaja tä a̦ oni cuma. ²⁶ Camiyä Claudio Lisia cä ya. Cafä Feli bada wa nija ya si oniblaö, wa bada bälöa lä dodijile wa nija. ¿Dodijidawä wa cua culawä? ²⁷ Cafä nija ei ya lä shömale, judio bänö a fa juwälöjenö a mini shälemaje. “Ö̦jö Lomateli bänö a nofi lä tabou wejei a”, ya bä cuu fa ji̦lilänö, sodado ya bä ca̦i lobe läläaö fa showaonö, yama a jucälema. ²⁸ Judio bada bä lä yododaö wei bä nija ya bälaquema, a jo̦wa doblono lä mlai, ya tä a̦ ji̦liabä. ²⁹ Ö̦jö ma cui etä cuonomi. Judio bä nö badabö tä a̦ ja, a jo̦wa doblono lä mlai, tä a̦fa shino wayoaö bädaomaje. A shämobä etä cuonomi. Täbä fe lä lamaö wejei yafi jamö a fe laobä tä ma cui, etä ca̦i cuonomi. ³⁰ Ö̦jö däjä, a shäbeje a nofi jo̦wa lä lämaö wejei ya tä a̦ fa ji̦lilänö, cafä nija ya shömöa showadalei lä cufe. A wa̦fa lä wäyäö wejei bä ma cui, cafä nija bä a̦ nö wäo shaliliobä, ya bä ca̦i shömölei lä cufe. Einaja bei tä a̦ oni cuma. ³¹ Ö̦jö cudeenö, sodado bänö Pablo a fa nacaläfälöjenö, Adibadi jamö a bälaa fe jaluquemaje, bä nowa lä tano weinaja showawä. ³² Ö̦jö tä fena ja, Jelusale jamö sodado bä balöa co̦layofälöma, cama bä lä cule jamö. Bä balöa fa co̦lunö, cabayo bä jamö bä befi ca̦i lä läläaö wei bänö, Pablo a ca̦i blajaö co̦ofälömaje. ³³ Sesalea jamö bä fa waloicunö, bada tä nija oni si jöböa fa balöcöjenö, Pablo a ca̦i icua nomöjöquemaje. ³⁴ Bada tänö tä a̦ oni fa doanö, Pablo a wa̦lima. —Cafä ¿wedi jamö bei wa oshe cuoma? —Silisia tä ulifi jamö ya cuoma —Pablo bei a cuma. Ö̦jö däjä, ³⁵ abinaja Pablo a nowa tama. —Wa wa̦fa lä wäyäö wejei bä waloo däjä, eja bämacö bluca culanö, bäfä a̦ nia shino yai ji̦liaö —a cuma. Inaja a fa cunö, Elodenö a yafi bada lä tablaleno wei jamö, Pablo a fe lamaquema. A docuu mlaobä, sodado bä lämaquema.

¹ Bei. 5 tä mö didi fa cublalunö, nofi bäyäalewä Anania a bada waloquema. Judio bada bä ca̦i. Dedulo a ca̦i waloquema, Pablo a wa̦fa wäyäbeje jamö bä a̦ nia lä bayeliblano wei. Ö̦jö däjä a wa̦fa dobloimi wäyäbeje, bada tä Feli nija bä a̦ fama. ² Dedulo a wa̦ famaö fa bufinö, Pablo a wa̦fa wäyäö cadidiobä a wa̦ falayoma. Bada nija abinaja a cuma. —Cafä Feli wa bada läa yalo, yamacö bälöa yanöcöa dodijia. Cafa bada wanö judio yamalecö bluca bayelibou cudeenö, dodijidawä yamacö cua majöa lä cule. ³ Ö̦jö cudeenö, yamacö lä bälöblai yamacö bufi doblalou lä cudi. ⁴ ¿Ö̦jö tawä? Bäfä yabäcaö bufiimi yalo, ya wa̦ nia dedeimi. Ya wa̦ ononowä lä faö wei, dodijidawä wale a̦ da ji̦lilä. ⁵ ’Fei Pablo a lä cuinö, bä lä yabäcaö wei yama a daö waiquiwä. Judio bluca bä lä bälöblai bä nijamö ma cui, fei a wa̦nö bä bluca shifilimou talei. Nasaleteli Jesús ebä nija, fei a bada lä läle a. ⁶ Yai Bada etä yafi shamiamabä jamö, yama a juwälema. Inaja bä lä cuaaö wei, Moisesinö bä tamaö lä bufii wei yama a mini taö showadaoma ma cui, ⁷ sodado bä nija Lisia a bada lä lälenö, a nowamaö fa dicoonö, a jucäa lälema. ⁸ Cafänö yamalecö a̦ yai ji̦liabä, yamalecö shömölema. ¿Ö̦jö tawä? Cafä ma cuinö Pablo a da wa̦li, yamalecö a̦ bejedio nowa möbä, ö̦jö lä —Dedulo a cuma. ⁹ Pablo a wa̦fa wäyäö däjä, judio bä a̦ faö nocamou mö feduoma. ¹⁰ Bada tänö bei imicönö Pablo a wa̦ famaö fa bufinö, a nofi bäyäobä a wa̦ juoma. —Judio yamacö nija wa nö bada läo dedewä lä waiquii, ya tä daö. Yamalecö lä jömaö wei wa. Ö̦jö ya tä daö yalo, cafä nija bufi doblalanö ya nofi bäyäo lä cule. ¹¹ Yai Bada nija ya nö bayeli nacaobä, Jelusale jamö weyajada ja ya waloquei cublelei. Wa bä wa̦lii ja, wale nia bejedi dablaö. Ö̦jamö ya lä waloqueno wei däjä, 12 tä mö didi cubloimi showawä. ¹² Wale a̦ lafujou dablanomije. Yai Bada yafi jamö ma cui, judio bä yododabä yafi bä jamö ma cui, shabono jamö ma cui, ya bä shifiliwä ca̦i tamabou mlai ja, mamicai ya cuoma. ¹³ Yale a̦fa lä wäyälajei bä bejedimoimi waiquiwä. Ya nofi jo̦wa lä jushuaö wei, cafä nija tä nö dablamabimi waiquiweje. ¹⁴ ’Ö̦jö ma cui fei däjä cafä nija ya wa̦ nö wäo cadidia lä cule —Pablo a cuma. —Jesucristo a wa̦ lä juamou wei etä a̦fa jole ma taö wejei ma cui, ö̦jö ya tä a̦ bejedi bufibou. ¿Ö̦jö tawä? Ö̦jö ya tä a̦ bejedi bufibolanö, Yai Bada nija ya nö bayeli nacao, camiyä yamacö nö badabönö a lä bufiblano wejei a showawä lä cui nija. Moisesinö tä a̦ bluca lä oniblaleno wei tä a̦ ma cui, Yai Bada a wa̦no wäyälewä bänö tä a̦ onia mö lä fedublaleno wejei tä a̦ ca̦i bluca ma cui, ya tä a̦ bejedi bluca bufii a lä cule. ¹⁵ ’Yai Bada ya nofi mölabou. Bä lä dodijaö wei bä ma cui, bä doblou lä mlai bä ma cui, bä nia bluca demi jocädou lä co̦o wei tä ja, showadi ya mölaö. Fei bä lä ublale bä ma cuinö, ö̦jö tä a̦ ca̦i tabou mö feduaje. ¹⁶ Ö̦jö cudeenö, Yai Bada tä ma cui nija, yanowamö täbä ma cui nija, ya dodijidawä cuobä ya cadidou fe yadio. ¹⁷ ’Bei —a cuu co̦oma—. Shomi täbä ulifibö jamö ya juu nö fa dedelönö, iba judio bä mö feduwä lä cui ya bä bayeliblabä ya co̦a co̦layoma. Bä lä jo̦li wei ya bä dobäbä, ya bä ca̦i blada waloquema. Yai Bada ya dobäbä, ya bä ca̦i tabou mö feduoma. ¹⁸ Ö̦jö ya tä taö ja, Yai Bada etä yafi jamö wale dalalemaje. Yai Bada nija dodijidawä ya cuobä ya fa tablamolunö, wale dalalemaje. Ai bä toujonomi. Bä a̦ fanomi. ’Inaja bä cuaano ma mlai ma cui, ö̦jö däjä Asia jamö ai bä lä bälöle bä judio waloquema. ¹⁹ Ö̦jö bä lä cui, eja bä ublaa yädäo fa cunoja, tä nö doblaobö wei. Camiyä nija tä nowa tabouje ja, cafä nija bä a̦ faö shalilio showadao fa cunoja, ö̦jö tä nö shino doblaobö wei. ²⁰ Ö̦jö ma cui, fei bä lä ublale cama bä a̦ ca̦i faö dao. Bada bä nija ya nofi lä bäyäono wei däjä, wale dobloimi lä dablano wejei tä a̦ wäabeje. ²¹ Cama bänö wale ublaa lä möamoblamaleno wejei däjä, moli ya lä cuno wei tä a̦ ja, bä jushudaliyoma. Abinaja ya cuma. “Bä lä nomablou wei bä nia demi jocädou lä co̦o wei tä ja, showadi ya mölaö yalo, wale dobloimi jömaöje.” Einaja ya cuma. Ö̦jö tä a̦ lä cui ja, bä jushudaliyoma —Pablo a cuma. ²² Ö̦jö ma cui, Feli a lä cuinö, Jesucristo a wa̦ lä juamou wei etä a̦ ji̦libou fa waiquionö, bä a̦ bluca wasölema. —Inaja lä waiquiwä, —a cuma—. Eja Lisia ya nö nia dabou, sodado bä nija a bada lä läle. Ö̦jö a bada waloo däjä, ö̦jö ya wa̦ ji̦lia fa balölönö, ya wa̦ faö cadidio weicätä —a cuma. ²³ Ö̦jö däjä, Pablo a docuu mlaobä, sodado 100 bä ca̦i lä cuono wei a nija a wa̦ fama. —A da moyaweicu —a cuma—. Ö̦jö ma cui, ajede jamö wa nia juadalamaö. Cama nofi ebänö a bayeliblabeje a fe walooje däjä, wa wa̦ nia läomi —a cuma. ²⁴ Tä fe weyadou däjä, Feli a lä cuinö, bä suwäbö Dusila e ca̦i waloquema. Ö̦jö a suwä lä cui, judioteliyoma a cuoma. Felinö Pablo a wa̦ ji̦liaö bufi fa doblaonö a nacamalema. Jesucristo a nofi lä mölabou wejei tä a̦ wäyäö ja, a yömöca daoma. ²⁵ Täbä lä bejedimou wei tä a̦ ma cui, täbä bufi lä wasöo wei tä a̦ ma cui, Yai Bada tänö täbä nia obi lä jömaö wei tä a̦ ma cui, Pablonö ö̦jö tä a̦ bluca wawämaö ja, a wa̦ lojodoama. Feli a quilima. —Inaja lä waiquiwä —a cuma—. Fei däjä a co̦jamö da balöo. Obi, ya yabäcoimi ja, bäfä nacamaö co̦o weicätä —a cuma. ²⁶ Abinaja Feli a bufi ca̦i cuma. “Pablo ya jujeblabä, camiyä nija blada bä a̦fa wäyäö ja̦too weicätä”, a bufi fa cunö, showadi a nacadima, cäcöbö a̦ wayobä. ²⁷ Ö̦jö ma cui, lasha bolacabö cäcöbö fa falönö, shomi jamö bada bänö Feli a shömöa fa nomöjölöjenö, ö̦jamö Bo̦sio Fedo a lämabou nomöjöomaje. ¿Ö̦jö tawä? Shomi jamö Feli a juu lä bufiole däjä, judio bä bufi nia fa doblamabonö, täbä fe lä lamaö wejei yafi jamö Pablo a daa showadaquefälöma.

¹ Sesalea jamö Fedo a bada läo nomöjöobä a fa waloicunö, 3 tä mö didi fa cublalunö, Jelusale jamö a alayofälöma. ² Ö̦jamö, nofi bäyäalewä blowäjäwä bä ma cuinö, judio bada bä ma cuinö, cama nija Pablo a wa̦fa jole wäyämaje. Bä a̦ fe blacäjoma, ³ Fedo nija bä bayeliblamobä. Jelusale jamö Pablo a shömaö bufimaje. A juimaö däjä a nofi nia fa lämajenö, a nia shäö showadaomaje. ⁴ Abinaja Fedo a cuma. —Sesalea jamö Pablo a fe labodayouje. Camiyä ma cui ö̦jamö ya nia juu jaödaofälöö. ⁵ ¿Ö̦jö tawä? —a cuma—. Camiyä nija bada wamacö nocao showadaobä. Ö̦jamö cama sho bämacö bluca cuobä jamö, a doblou lä mlaono wei wama tä a̦fa wäyäbä —Fedo a cuma. ⁶ Ö̦jö bä nija a nö fa dedejedalunö, jai 8, cuwi jai 10 a fe didi fa cublalunö, Sesalea jamö a aa co̦layofälöma. Ö̦jö tä fena ja, bada bänö täbä showadi lä jömaö wejei jamö, a döcäquema. Ö̦jö däjä, Pablo a nacamaö bufima. ⁷ Ö̦jamö Pablo a fa waloicunö, Jelusaleteli bä judio lä cuinö a wa̦fa nia fa tajenö, bä ublaa fe fa̦yoblaliyoma, ö̦jamö bä lä nocaono wei bä lä cuinö. A wa̦fa dobloimi fe balojowä ma wäyäno wejei ma cui, a doblono lä mlai, ö̦jö bada a lä cui nija etä dablamaö doblonomije. ⁸ Pablo a nofi bäyäo ja, abinaja a cuma. —Judio yamacönö yama tä a̦ lä tabou wei, ya tä a̦ nö waiblanomi. Yai Bada ya yafi nö ca̦i waiblanomi. Lomateli Sesa a bada ma cui, ya wa̦fa ca̦i wayoanomi. Wale a̦fa lä wäyäfajei, ya tä daimi —a Pablo cuma. ⁹ Ö̦jö ma cui, Fedonö judio bä bufi doblamabou bufi fa doblaonö, abinaja a cuma. —Jelusale jamö ¿wa juu ojodaa cule? Ö̦jamö camiyänö ya bä a̦ bluca fa ji̦lilänö ya bä a̦ bejedi möbä —a cuma ma cui, ¹⁰ Pablo a wa̦ lämoma. —Mlaicätä. Wa bä dobloimi jömabä, Lomateli Sesa a bada lä cuinö, eja wa li tamabou waiquia lä cule. Judio bä nija ya doblou lä mlaono wei tä cuami waiquiwä. Wa tä daö malä waiquile. ¹¹ Ya doblou mlao fa cunoja, ya shämobä ya tä tabou fa cunoja, ya noshi nö umlaobö mlai. Ö̦jö ma cui wale a̦fa lä wäyäö wejei bä bejedimi ja, cama bä nija ya nia jöböamoimi. Sesa a bada lä cui nija wale da shömölö, ö̦jö lä. Ö̦jönö wale a̦ yai shino ji̦liabä —a Pablo cuma. ¹² Ö̦jö däjä, Fedonö bä bada lä yädämabono wei bä sho, bä a̦ wayou fa balöonö, abinaja Pablo a nowa tama. —Ja̦o. Sesa nijamö wa jo̦wa juu bufi doblao waiquiwä. Ö̦jö nijamö wa jubä, ö̦jö lä. ¹³ Tä nö fa dedeblalunö, Sesalea jamö Fedo a bada läo dude yalo, bada tä Acliba sho, bä suwäbö Belenise sho, a fe waloböma. ¹⁴ Ö̦jö nija cäcöbö fa yanöcöicunö, Fedonö bada tä yömölama. Pablo a wa̦fa dobloimi lä wäyäno wejei tä a̦ bluca wäyäma. Abinaja a cuma. —Bada tä Felinö a fe lao lä daqueno wei, eja a showaa lä cule. ¹⁵ Jelusale jamö ya lä cuono wei däjä, nofi bäyäalewä bä blowäjäwä ma cuinö, judio bä bada ma cuinö, ö̦jö bänö a wa̦fa wäyämaje. Ya dobloimi jömabä bä a̦ fama, ya nö bleaamabä. ¹⁶ Ya wa̦ juo ja, abinaja ya bä nowa tama. “Inaja Lomateli yamacö cuaaö daomi. A wa̦fa lä tamou wei sho, a wa̦fa lä taö wejei bä sho, bä a̦ bluca ji̦liayou showao mlao däjä, yama bä nö bleaamaimi. A wa̦fa lä taö wejei ya bä a̦ fa ji̦lilänö, a nofi lä bäyäo wei ya wa̦ ca̦i ji̦lia mö fa fedulänö, ya wa̦ shino faö cadidiobä”, ya bä nowa tama. ¹⁷ ’Ö̦jö cudeenö, eja bä bluca lä waloqueno wei däjä, ya yanöcöonomi —a cuma—. Ö̦jö tä fena ja showawä, bada bämacönö bäma täbä showadi lä jömaö wei jamö ya fa döcäicunö, Pablo ya nacamaö bufima. ¹⁸ A wa̦fa lä tano wejei bä fa ublaicunö, ö̦jö bä a̦nö ya bufi wedinajamoma. “A wa̦fa yai dobloimi tabeje daanö”, ya bufi ma cuno wei ma cui, ¹⁹ cama judio bä nö badabö tä a̦ ja bä bäyäblayou buoma. Judio a wa̦fa Jesús lä cule a wa̦fa wayoaöje ja, bä a̦fa ca̦i tayoma. Ö̦jö a jo̦wa ma nomalayono wei ma cui, Pablonö a wa̦fa demi jocädou tama. ²⁰ ’Ya tä bejedi yai dablabä tä cuo fa mlacunö, ya bufi wedinajamolayoma. Pablo ya wa̦lima. “Jelusale jamö wa bejedi yai dablamobä, ¿wa juu ojodaa cule?”, ya nowa tama ma cui, ²¹ eja a cua showalanö, bada tä Sesa nija a wa̦ ji̦limamou bufi doblaoma. Ö̦jö cudeenö, Sesa nija ya bälaö showao mlao däjä, eja a fe labou showaobeje, sodado ya bä nosiemama —Fedo a cuma. ²² Fedo nija abinaja bada tä Acliba a cuma. —Camiyänö ma cui, ö̦jö ya wa̦ ji̦liaö bufi doblao mö fedua lä cule. —Jao̦. Fena ja wa wa̦ ji̦liaö wä —Fedonö a nowa tama. ²³ Ö̦jö cudeenö, ö̦jö tä fena ja, bada bä yododabä jamö Acliba, Belenise sho cäcöbö waloquema. Täbä nofi doamobä, showadi täbä bada yafii lä culenaja, cäcöbö yafia culayoma. Sodado bä nija bä bada lä läblai bä ma cui, ö̦jamö bä bada lä cule bä ma cui, ö̦jö bä ca̦i bluca fabölayoma. Ö̦jö däjä Fedo a wa̦ fa fanö, Pablo a icumaquemaje. ²⁴ Fedo a wa̦ falayoma. —Bada tä Acliba. Cafä bluca wamacö lä cule. Fei wama a dablaö lä cule. Judio bluca bä lä bälöblai bänö camiyä nija a shämaö lä bufino wejei a. Jelusale jamö ma cui, eja ma cui, a nomabä bä a̦ shi bluca dolayoma. ²⁵ Ö̦jö ma cui, ya ma wa̦lino wei ma cui, a shämobä ya etä dablanomi. Lomateli bada a yai lä cui nija a wa̦ ji̦limamobä a wa̦ fama yalo, ö̦jamö ya shömabä ya bufi shaliliblaliyoma. ²⁶ Ö̦jö ma cui, bada nija ya si oniblabä tä cuami. Pablo ya wa̦fa wäyäbä ya tä taboimi. Ya tä taboimi cudeenö, cafä wamacö nija ya icuamaö lä cule, cafä wamacönö wama a wa̦ ji̦liabä. Acliba, cafänö wa wa̦ yai ji̦liabä, bada wa lä cuinö. Bäma a wa̦ fa ji̦lianö, Lomateli bada tä Sesa nija ya ca̦i oni shömabä. ²⁷ Ya fe lä labole a doblou lä mlaono wei ya etä oni shömaö mlalanö, bada nija ya shömaö dicoo ja, tä nö doblobimi —a cuma.

¹ Ö̦jö däjä, Pablo nija abinaja bada tä Acliba a cuma. —Bei. Cafä wa wa̦ fabä. Inaja bada tä fa cunö, Pablo a nofi bäyäo ja a fa ubladalunö, imicö cudaliyoma. ² —Bei. Bada tä Acliba. Judio bänö wale a̦fa bluca lä wäyäö wejei tä ja, cafä nija ya wa̦ nia fei däjä wawädoo. Ya nofi bäyäobä, cafä wa yai lä cui nija ya wa̦ faö bufi doblaa lä cule, ³ judio showadi yamacö lä cuaaö wei, cafänö wa tä yai daö cudeenö. Showadi yamacö a̦ lä läablalou wei wa tä ca̦i daö. Ö̦jö cudeenö dodijidawä wale a̦ da ji̦lilä. ⁴ ’¿Ö̦jö tawä? —Pablo a cuma—. Iba tä ulifi jamö ma cui, Jelusale jamö ma cui, judio bä sho yamacö bluca fa yawälönö, ya showadi lä cuaano wei judio bluca bänö tä daöje. ⁵ Faliseo bä nija ya yädäblaliyoma, judio yamacö nö badabö tä a̦ nofi lä yaibolajei bä bada lä cui nija. Yai Bada nija bä cadidou bufi lä doblao weinaja, ya cuaaö mö lä feduo wei, tä ca̦i daöje. Yedu ja ma cui, tä daö showaomaje. Bä a̦ faö ojode ja, wale a̦fa nia bejedi taöje. ⁶ Camiyä yamacö nö badabö nija, Yai Bada tä a̦ nö wäo lä balöono wei ya tä a̦ nofi mölabou yalo, wale a̦fa dobloimi wäyäöje. Ö̦jö tä nowa ja cafä nija wale o̦cama ublamabou lä culajei. ⁷ ’Yai Bada a wa̦ nö wäo lä balöono wei, yama tä a̦ nofi mölabou —a cuma—. Jacobo bä ijilubö 12 yama ecö nodiwä yamacö lä cuinö, yama tä a̦ nofi mölabolanö, didi däjä ma cui, jalu däjä ma cui, yamacö nö bayeli malä nacaodii wei. Ö̦jö ya tä a̦ nofi mölabou yalo, fei bä judio showawä lä cuinö wale a̦fa dobloimi wäyäöje. ¿Ö̦jö tawä, Bada tä? ⁸ ¡Ya tä a̦ nofi mölabobä lä! ’Judio wamacö. ¿Wedi tä tabä cafä wamacö ma cuinö, Yai Bada tänö bä demi jocädamaö lä co̦o wei, wama tä a̦ bejedi nia bufiimi majöwä dicoo? ⁹ ’Camiyä ma cui, Nasaleteli Jesús ya wa̦ ji̦liaö nofi fa wa̦libonö, ya bufi jaba lämou dodijioma —a cuma—. Ya lämobä ya bufi fa shalilionö, bluca ya shomiablaloma. ¹⁰ Jelusale jamö cama ya ebä nö bleaamama. Nofi bäyäalewä blowäjäwä bä lä cuinö tä tamaö fa bufijenö, täbä fe lä lamaö wejei yafi jamö, Yai Bada bluca ya ebä fe lamaboma. Ö̦jö bädawä mlai, bä lä shäblamano wejei bä nija, ya wa̦ ca̦i yädäo dicooma. ¹¹ Judio bä yododabä yafi bä jamö, bluca ya bä nö bleaamaö cuaama. Jesucristo a nofi lä mölabono wejei ya tä joyamaö bufii ja, ya wa̦ fe blacäjoma. Ya jushuo fa dodijionö, shomiteli bä shabonobö jamö ma cui, ya bä nö blajawä bleaamaö cuaaö fe yadioma —Pablo a cuma. ¹² Pablo a wa̦ faö showai ja, abinaja a cuma. —Inaja tä fa cuonö, nofi bäyäalewä blowäjäwä bä lä cuinö wale fa shömölöjenö, ö̦jö bä a̦nö, Damaco jamö ya alayoma. ¹³ Ya jufälöö däjä, motoca a yo̦loloblaliyoma. ¿Ö̦jö tawä, bada tä? Ö̦jö däjä, camiyä ya ma cui nija, ya bä ca̦i lä juno wei bä ma cui nija, fedu jamö culanö tä shi̦i fa bädalunö, tä shi̦i bada wacacadalioma. ¿Ö̦jö tawä? Motoca a mömou shi̦i dowäjäwä ma cui, ö̦jö tä shi̦i mömou yai dowäjäo fe balojooma. ¹⁴ Yamacö bluca fa wäcäcälalunö, yamacö jilao däjä, judio yamacö caficö a̦ ja ya wa̦ ji̦lilema. Abinaja a cuma. “Saulo, Saulo. ¿Wedi tä tabä wale nö li bleaamaö dicoa cule? Camiyä nija wa ishou dicoo ja, cafä wa nia famii ayao”, wale nowa tama. ¹⁵ ’Abinaja ya cuma. “Bada tä. ¿Wedi bei wa jo̦wa?” ya cuma. Ö̦jö däjä, Bada a wa̦ juoma. “Jesús cä ya, wale nö lä bleaamale. ¹⁶ A da ublaicu. Bäfä shömabä, cafä nija ya dablamou lä cule. Wale a̦ juabä bäfä yailema, wale a̦fa wäyäö cuaabä. Fei däjä ya lä dablamole ma cui, cafä nija ya nia obi lä dablamou wei ma cui, ö̦jö wa tä a̦ bluca wäyäbä. ¹⁷ Judio bä nija bäfä nowamaö wä. Shomi jamö bäfä nia lä shömaö wei jamö ma cui, ö̦jö bä ma cui nija bäfä nowamaö showao wä, judio bä lä mlai bä nija. ¹⁸ Wa bä bufi möblamabä bäfä nia shömaö, bä mö jamoliblobä. Tä mö lä didi wei jamö bä ma cule ma cui, tä shi̦i lä wacacai jamö bä mö shino yaiblou nomöjöobä. Fecula bada tänö bä ma lojodobou däjä, ö̦jö tä fa dacöjenö, camiyä Yai Bada nija bä mö cublou nomöjöobä. Bä doblou lä mlai tä bluca ma cule, tä nowa mladobä. Camiyä wale nofi lä mölabou wejei tänö, iba bä lä yaile bä nija bä yädäblobä”, camiyä nija Bada tä cuma. ¿Ö̦jö tawä? —Pablo a cuma. ¹⁹ Pablo a wa̦ faö showaoma. —Bada tä, Acliba. Ö̦jö cudeenö fedu jamö culanö, camiyä nija Jesús a lä bädaleyoluno wei ya wa̦ fa ji̦lilänö, ya wa̦ jua showadalema. ²⁰ Damacoteli ya bä yömölaö balöoma. Ö̦jö däjä Jelusale jamö ya bä yömölaö nomöjöoma. Ö̦jö däjä, Judea jamö bä lä bälöblai bä nija ya tä a̦ wäyäö fa cuaanö, judio bä lä mlai ya bä ca̦i yömölaö majöoma. Abinaja ya bä nowa tama. “Wa̦lidiwä tä ja wamacö bufi fa lädalunö, Yai Bada nijamö bä mö da yaiblalu. Wa bejedimou dablamobä, bä yai da dodija”, ya bä nowa tama. ²¹ Ö̦jö tä nowa ja, Yai Bada etä yafi jamö ya cuo däjä, judio bänö wale juwälemaje. Wale shäö bufi fa doblaojenö, wale nabä quequemaje. ²² Ö̦jö ma cui, Yai Bada nija ya fa bayeliblamonö, ya li bayeliblamou showaa lä cule. ’Ö̦jö cudeenö, bada bä ma cui nija, bada bä lä mlai bä ma cui nija, ya tä a̦fa wäyäö showalanö eja ya ublaa —a cuma—. Ya tä a̦ lä wäyäö wei tä a̦ shomimi. Yai Bada a wa̦no wäyälewä bä ma cuinö, Moisesi a ma cuinö, ö̦jö bänö tä a̦fa wäyäöje ja, tä nia jo̦wa lä cublono wei tä ya̦cumö wawäblaliyoma. Ö̦jö ya tä a̦ li wäyäö shalilou. ²³ Yai Bada tänö a shömabä a lä yaileno wei a wa̦fa wäyäö balöoje ja, a nö nia jo̦wa bleaamamaje. A fa shäblamonö, ba̦limi a nia demi jocädou co̦oma. ¿Ö̦jö tawä? Ai bä ba̦limiblou balöa mlai ja, cama a nia shino demi jocädou balöoma. A demi jocädou lä co̦ono wei tänö, Yai Bada tä shi̦i a̦fa nia wäyämou blaucoma, judio bä ma cui, judio bä lä mlai bä ma cui, bä bufi bluca jaducublobä —a cuma. ²⁴ Inaja Pablo a nofi bäyäo showai ja, Fedo a wa̦ i̦cali falayoma. —¡Pablo, wa shi wa̦lii! Oni wa sibä showadi mödii ja, wa shi wa̦lijou. ²⁵ Ö̦jö ma cui, abinaja Pablo a cuma. —Ma, ya shi ca̦i wa̦liimi. Cafä bada wa bälöa lä dodijile wa nija, bejedi ya tä a̦ wäyäö lä cule. ²⁶ Ya tä a̦ lä wäyäle, bada tä Aclibanö tä a̦ bluca daö waiquiwä yalo, cama nija ya wa̦ wawädoablalou. Tä bluca lä cublaliyono wei tä nofi mojodubobä ami. Tä jo̦yaono malä mlai. ²⁷ Bada tä, Acliba. Yai Bada a wa̦no wäyälewä bänö tä a̦ lä oniblaleno wejei, ¿wa tä a̦ bejedi bufii culawä? Wa tä a̦ bejedi lä bufii wei, bäfä daö waiquiwä —Pablo a cuma. ²⁸ Pablo nija abinaja Acliba a cuma. —Cafä wa wa̦nö Jesucristo ya e cuobä, ¿wale nia tablamaö showadao daanö? ²⁹ Ö̦jö däjä, abinaja Pablonö a nowa tama. —Fei däjä showao ma cui, obi ma cui, ö̦jö tä nö doblaobö wei. Cafä bädawä mlai, wamale a̦ lä ji̦lile wamacö bluca ma cui, Yai Bada nija cafä bämacö bayelimaö, camiyä ya lä culenaja wamacö cublou mö feduobä. ¿Ö̦jö tawä? Ya o̦cama lä culenaja mlai, Jesucristo ya lä bufiblalenaja wamacö ca̦i cuo mö feduobä —Pablonö a nowa tama. ³⁰ Ö̦jö däjä, bada tä Acliba a ubladou fa balölonö, Fedo a bada ma cui, Belenise a ma cui, ai bä loo mö lä feduono wei bä ma cui, ö̦jö bä bluca fa ublaolalunö, ³¹ bä faa co̦layofälöma. Bä faa fa co̦lufälönö, abinaja bä nowa tayoma. —Fei a fe lä labole a shämobä tä cuami waiquiwä. A fe labobä ma cui tä cuami —bä nowa tayoma. ³² Fedo nija abinaja Acliba a cuma. —Shädayai. Sesa nija a wa̦ ji̦liamobä a wa̦ faö mlao fa cunoja, a nö jujeblamoa showadalayobö wei —a cuma.

¹ Sesa nija Pablo a wa̦ ji̦liamobä, Loma jamö yamalecö nia shömamaje, Italia tä ulifi jamö. Ö̦jamö yamalecö shömabeje bada a bufi shaliliblou däjä, sodado 100 bä ca̦i lä cuono wei a nija a wa̦ fama, Julio a bada nija. Cama 100 bä ca̦i lä cuono wei bä lä cui, bada tä Aucuto ebä a̦fa sodado jilabomaje. Pablo a ma cui, ai bä fe lao mö lä feduono wei bä ma cui, ö̦jö bada tä Julio nija bä bluca bälaquemaje, camanö bä ca̦i caläfälöbä. ² ¿Ö̦jö tawä? Adamidioteli bä canawäbö bada jamö, yamacö bluca fa döcäcäobalunö, yamacö befi ca̦i caläa showalayoma. Ö̦jö a canawä jamö bä lä juno wei bä lä cui, Asia tä ulifi jamö, modu u casö jamö bä lä bälöjöi bä nijamö, bä nia washölöblou cuaafälöma. Camiyä yamacö nija, Desalonicateli Alidaco a nocalayoma, Masedonia tä ulifi jamö a lä bälöle a lä cui. ³ Ö̦jö tä fena ja, Sidonoteli bä lä bälöle jamö yamacö fa waloicunö, yamacö befi ca̦i cadöquema. Julio a bada lä cuinö, Pablo a nofi ojodaboma yalo a washölöo wasönomi. Cama nofi ebä fe walobä, a washölömaquema, cama bä nija a bayeliblamofälöbä. ⁴ Yamacö befi ca̦i caläa fa co̦löfälönö, wadoli a badanö yamalecö mini doblamanomi yalo, Shible tä ulifi lä jo̦cole ai tä mashi jamö, yamacö befi ca̦i ja̦loquefälöma, tä wadoli cua lä mlai jamö. ⁵ Silisia tä ulifi ma cui, Ba̦filia tä ulifi ma cui, ö̦jö yama tä ulifi fa jayucufälönö, Lisia jamö yamacö waloquema, Milateli bä lä bälöle bä nijamö. ⁶ Ö̦jamö sodado 100 bä ca̦i lä cuono wei a lä cuinö, Alejadiateli bä canawäbö bada ca̦a dalalema. Ö̦jö a ja, Italia jamö ai bä befi ca̦i nia caläö fa showadaonö, ö̦jö bä nija yamalecö döcäa co̦camaquema. ⁷ Tä wadolimou dicoo ja, obisi yamacö befi ca̦i calädii däjä, tä nö dedelayoma. Ya̦cumö Nido tä ulifi jamö yamacö ajedea fe yadialiyoma ma cui, ö̦jamö wadolinö yamalecö doblamaimi majöa ja, shomi jamö yamacö culayoma. Cleda tä ulifi lä jo̦cole ai tä mashi jamö, tä wadolimou lä mlai jamö, yamacö befi ca̦i watolayofälöma, Samono tä ajede jamö. ⁸ Ö̦jamö Cleda tä ulifi casö jamö, yamacö befi ca̦i lä watoafälöno wei jamö, yamacö doblou jaödaonomi. Ya̦cumö u lä ononoi jamö yamacö befi ca̦i waloquema, Laseateli bä bälöa lä ajedele jamö. ⁹ Yamacö befi ca̦i caläö nö dedeaö waiquioma yalo, maa a nö lä wadoli wei a nia quei fa co̦onö, modu u jaba wayuama. ¿Ö̦jö tawä? Bä iyaö wasöolanö, judio showadi bä lä co̦camou wei tä cai̦ jayublou waiquilayoma. Ö̦jö cudeenö Pablonö bä wasöö ja, ¹⁰ abinaja a cuma. —Iba wamacö. Bämacö caläö fe yadio dicoo ja, bejedi lä bämacö nö nia bleaaö. Ya tä wayu daö waiquiwä. Bämacö nia befi ca̦i bluca löblou. Madofi bä nia caläblou. Canawä a nia shäblou. Camiyä bämacö mishi nia duoblou —bä nowa tama. ¹¹ Ö̦jö ma cui, sodado 100 bä ca̦i lä cuono wei a lä cuinö, Pablo a wa̦ ji̦lianomi. Canawä a lä cadidamaö wei a ma cui, cama e canawä lä cuono wei a ma cui, ö̦jö cäcöbö a̦ shino yai ji̦liaö dicooma. ¹² Abinaja bä bufi bluca cuma. “Maa däjä, eja bäma a canawä nia ca̦abou dobloimi. Cleda jamö bämacö juu wabäo da showadao, Feniseteli bä lä bälöle jamö, tä wadolimou lä mlai jamö. Maa däjä ö̦jamö bämacö shino yai yanöcöobä, showadi bä canawä lä ca̦ablaö wejei jamö”, bä bufi cuma. Einaja bä bufi bluca cuu ja, bä juu fe yadioma. ¹³ Motoca a cuaaö lä mlai tä mashi jamö, juliliwä tä wai fa yaläimanö, “Fei däjä waiquiwä dao”, bä bufi cudaliyoma. Ö̦jö däjä, canawä a caläö mlaobä, tä jude lä ca̦bono wejei tä fa co̦läjenö, yamacö befi ca̦i caläa co̦layofälöma. Dodijidawä yamacö befi ca̦i caläfälöbä, Cleda tä ulifi casö jamö yamacö befi ca̦i watoafälöma ma cui, ¹⁴ yamacö blajaö showao mlao däjä, ulifi jamö wadoli a bada cuaaimama. ¹⁵ Modu u u̦eshi jamö, wadolinö canawä a i̦cali jilulaö fa dicoonö, yamacö casöblou doblou fa mlacunö, ya̦cumö tä ya̦colemaö jujeblaliyomaje. Wadoli anö yamalecö befi ca̦i jilulua bälefälöma. ¹⁶ Ö̦jö däjä, Cauda tä ulifi wai lä jo̦cole ai tä mashi jamö, wadoli a ja yamacö nofi fa bäyälonö, tä wiisibö dodijidablou co̦layoma. Yamacö nö wa̦lojaö fe fa yadionö, canawä yama a wai shaibou lä yädäono wei, yama a o̦caa lojodobalema. ¹⁷ Ö̦jö a wai canawä fa maquebalöjenö, yamacö befi ca̦i lä caläno wei, a canawä colo o̦caa nomöjöquemaje, bada nata badanö. Ö̦jö däjä, mlaca mlaca a cuobä jamö bä befi ca̦i ja̦o fa quilinö, camishi bä bada lä lelemabono wejei bä jayulalemaje, bä befi ca̦i jilulamofälöbä bä showadi lä lelemabou wejei bä lä cui. Inaja bä fa cuaanö, yamacö befi ca̦i cadidobä tä cuo fa mlacunö, u bada lä shäyä shäyämou wei unö, yamacö befi ca̦i jilulaö buofälöma. ¹⁸ Ö̦jö tä fena ja, wadoli a badanö yamacö befi ca̦i shäyäjaö showawä ja, bä madofi lä didibono wejei ai bä queamabalemaje, jelejewä yamacö befi ca̦i caläö fe yadiobä. ¹⁹ Ö̦jö tä fena ja, yamacö nö bleaaö showao däjä, camishi bada bä showadi lä lelemabou wejei ai bä ma cui, canawä a cadidamabeje ai bä madofi ma cui, ö̦jö bä quea nomöjöamabalemaje. ²⁰ Motoca a ma cui, shidicali bä ma cui, bä dablamou mlai ja tä nö fa dedelönö, maa a nö lä wadoli wei a quei nö quiliaö fa showadabalunö, yamacö bufi ya̦cumö jaluama. “Fei däjä bämacö nia bayeliblamoimi”, yamacö bufi cudou dodijilayoma. ²¹ Yamacö iyaö mlai ja yamacö nö dedeaö waiquioma yalo, Pablo a wa̦ fabä a möamoblaliyoma. —Iba wamacö. Cleda jamö bämacö da wasöblei däjä, wamale a̦ juaö fa cunoja, tä nö doblaobö wei. Ö̦jamö bämacö jocäö mlao fa cunoja, bämacö nö bleaabö mlai. Madofi bäma bä nö bluca tabou showaobö wei. Demi bämacö nö cuobö wei. ²² Ö̦jö ma cui, bä bufi da lojodoicu, ¿ö̦jö tawä? Canawä a nia ma wa̦lioblou wei ma cui, wamacö nia nomaimi dodijiwä. ²³ ’Ei tä didi showawä ja, Yai Bada a̦jele etä fa wawäblaliyonö, wale yömölalei lä cufe —a cuma—. ¿Ö̦jö tawä? Yai Bada ya lä bufiblaö wei a lä cuinö, cama a̦jele etä shömöledayoma, camiyä ya e lä cui nija. Camiyä nija a ublaa fa yädäicunö, ²⁴ abinaja wale nowa tama. “A quili dijä, Pablo. Sesa nija wa icuobä wa waiquiwä. Wa bä befi ca̦i lä caläle bä ma cui, Yai Bada tänö ö̦jö bä bayeliblaö bufi doblaa mö fedua lä cule”, wale nowa tama. ²⁵ ¿Ö̦jö tawä, iba wamacö? Bä bufi da lojodoicu, ö̦jö lä. Yai Bada tä lä cuno weinaja tä cuobä, ya mölaö showaa lä cule. ²⁶ Ö̦jö ma cui, bämacö bluca demi washölöo fe yadiobä, ai tä ulifi lä jo̦cole jamö, bämacö befi ca̦i nia jilulamou buo —a Pablo cuma. ²⁷ Ö̦jö däjä, 14 tä mö didi fa cublalunö, wadolinö yamalecö befi ca̦i fa jilulaimadunö, modu Adiadico u u̦eshi jamö, yamacö befi ca̦i jilulamou showaofälöma. Tä bäshäcublou däjä, canawä a lä juwäbono wejei bä bufi möblaliyoma. “Ulifi a jamö bämacö nofi ajedou yaia lä cule”, bä bufi cudaliyoma. ²⁸ Ö̦jö däjä, jude wabamodima tä nata cua tänö, u o̦qui wabamaje. Abinaja bä cuma. —¡36 tä jamö u o̦qui fe wädöa lä cubodi! —bä cuu balöoma. Bä fa colojoblalucölönö, u wabaö co̦omaje. —¡27 tä jamö u o̦qui fe wädöo nomöjölayou lä cufe! ¡U badedeadalou a lä cuimadi! —bä cuu nomöjöoma. ²⁹ Maa mabä ja bä befi ca̦i difequio fa quilinö, canawä a colo jamö 4 täbä lä jude wei täbä ca̦aquemaje, bä befi ca̦i yanöcöo fe jalubä. Ö̦jö däjä tä mö jaluu jaödaobä, bä nö bayeli nacaoma. ³⁰ Ö̦jö däjä canawä a lä juwäbono wejei, bä mini docua jalua showalayofälöma. Canawä ola jamö, jude ai bä nia jo̦wa ma queamano wejei ma cui, bä jolemoma. Canawä a wai lä maquebono wejei, a ca̦a co̦a ja̦toquemaje. Inaja bä cuaaö showai ja, ³¹ sodado 100 bä ca̦i lä cuono wei a ma cui, cama sodado bä showawä ma cui, Pablonö bä bluca yömölaö showadaoma. —Canawä jamö, fei bä yanöcöomi ja, wamacö nia demi cuomi —bä nowa tama. ³² Ö̦jö däjä, sodado bänö canawä a wai nata fa bäblalöjenö, a caläa bädamalemaje. ³³ Tä mö jaluaimaö däjä, Pablonö bä bluca iyamaö bufima. Abinaja bä nowa tama. —Eja wamacö nö lä bleaale, iyaö mlai ja 14 wama tä mö didi tablamaö waiquiwä, nii wama a waö mlai ja. ³⁴ Ö̦jö cudeenö wamacö iyabä ya wa̦ fe blacäjäa lä cule. Wamacö lojodoblou co̦obä. ¿Ö̦jö tawä? Moli ma cui wamacö nia famiimi waiquiwä —bä nowa tama. ³⁵ Inaja a fa cunö, bä mamo bluca yäo showai ja, nii a fa dälönö, Yai Bada nija a bufi a̦fa doblalou wäyämoma. Ö̦jö däjä nii a fa joyolänö, a iyama. ³⁶ Ö̦jö däjä, bä bufi bluca lojodoblou fa co̦lonö, cama bä ma cuinö, nii a ca̦i waa mö fedulemaje. ³⁷ Yamacö befi ca̦i lä caläno wei, bluca yamacö cuoma. 276 yamacö didioma. ³⁸ Canawä a lä juwäbono wejei bä fa iyaolalunö, jelejewä bä nia caläö fa co̦ofälönö, bä madofi shee lä jäblaliyono wei bä quea co̦mabalemaje. ³⁹ Bei. Tä mö fa jalulunö, tä nö ulifi ö̦jöböanomije. Ö̦jö ma cui, modu u casö mlaca mlacaböobä jamö, mau u lä ononoi u bajadedewä dalalemaje. Canawä a wa̦lioblou fe balojoo mlaobä, ö̦jamö bä befi ca̦i nia ja̦o fa showaonö, bä a̦ wayoma. ⁴⁰ Ö̦jö cudeenö, jude täbä lä queamano wejei täbä nata fa bafedilalöjenö, täbä daaquemaje. Canawä a colo lä o̦cabono wejei toto bloloamaö co̦omaje, canawä a cadidamaö dodijiofälöbeje. Ö̦jö däjä canawä ola jamö acadafu sicö ösöa fa co̦malöjenö, sicö lelea fa co̦macöjenö, mau u bajadedewä jamö bä befi ca̦i cadidou showaofälöma, bä befi ca̦i ja̦obä. ⁴¹ Ö̦jö ma cui, bä ijede blajajawä showai ja, mlaca mlaca ai a läa fa ja̦tobalunö, canawä a ola ja̦quema. Ö̦ja a fa ja̦alunö, a lojodobaliyoma. Modu u bada lou loumou fa showaonö, canawä a bada colo shäblou showadalayoma. ⁴² Bä fe lä labono wejei bä documaö mlaobeje, sodado bä lä cuinö bä nia bluca shäblaö showadaomaje, mau u jamö bä fa caläfälönö bä washölöblou mlaobä. ⁴³ Ö̦jö ma cui cama 100 bä ca̦i lä cuono wei a lä cuinö, Pablo a nowamaö bufi fa doblaonö bä yanöcöblamalema. Abinaja yamalecö nowa tama. —Wamacö caläö lä daö wei wamacö queo balöobä. Wamacö fa caläfälönö wamacö washölöobä. ⁴⁴ Ai wamacö lä cui, fii acadafu fibä ma cui ja, canawä acadafu bä ma cui ja, ö̦jö bä ja wamacö fa yädäicunö, wamacö befi ca̦i caläö mö feduofälöbä —yamalecö nowa tama. Inaja yamacö bluca fa cublalunö, demi yamacö bluca washölöblaliyoma.

¹ Ö̦jö tä ulifi lä jo̦cole jamö yamacö fa washölöolalunö, yama tä a̦fa ulifi ji̦lilema. Mada tä a̦fa ulifi jo̦wa cuoma. ² Madateli ¡bejedi bä nofimou fe balojooma! A fa maböonö, tä ca̦i fa wajalionö, cowa wacö bada fa tacöjenö, yamalecö bomomabeje yamalecö bluca nacalemaje. ³ Pablonö co̦wa a̦yobä fa jocälalänö, wacö lä yäqueno wejei jamö a̦yobä maquequeaquema. Ö̦jö a̦yobä ja wacö ömöo ja, olu ecö wawäblaliyoma. Pablo bei imi ja, cäcö shadiblaquema. ⁴ Madateli bänö cäcö shadia fa dalalöjenö, abinaja bä nowa tayoma. —Ei a lä cui, yanowamö shädimi a nofi yaiwä. Modu u jamö a ma docubeno wei ma cui, yai tä nö yualewä lä cuinö a demi nia tamaboimi —bä nowa tayoma. ⁵ Inaja bä nowa ma tayono wei ma cui, Pablonö olu cäcö fa yomösöbanö, cäcö yabema. A ca̦i jaliliblou bädaonomi. ⁶ Madateli bänö, Pablo imicö shuwäö nö dabomaje. A nomawä wäcädou nö ca̦i daboma ma cujei, tä nö fa dedejedalunö, a nö bleaaö dablaö fa mlacujenö, bä a̦ shomiblou nomöjölayoma. Yai tä bufii nomöjöomaje. ⁷ Bei. Ö̦jö tä ajede jamö, bada tä Bublio ficali etäca bä blaoma. Ö̦jö Bublio a lä cui, Mada tä ulifi lä jo̦cole jamö a bada läoma. Ö̦jönö yamalecö fa nacalänö, dodijidawä yamalecö iyamaö showao däjä, bolacabö tä mö didi ma cublaliyono wei ma cui, yamalecö iyamadii showaoma. ⁸ ¿Ö̦jö tawä? Bublio bä fö̦ö e lä cui, e jalili blaoma. Shuu wayu anö a fa dälänö, a nö bleaama. A ca̦i yobladima. Pablonö ö̦jö a fe fa waloonö, Yai Bada nija a bayelimama. Ö̦jö däjä Pablo imicö fa maqueicunö, a jalomalema. ⁹ Inaja a fa cuaanö, ö̦jö tä ulifi lä jo̦cole jamö ai bä jalili lä bälöblaono wei bä fa waloiquiyonö, bä bluca jalomalalema. ¹⁰ Bluca täbä ja, yamalecö dobämaje. Canawä ai a bada jamö, ya̦cumö yamacö döcäa fa co̦icunö, dodijidawä yamacö befi ca̦i caläfälöbä täbä bluca didibalemaje. ¹¹ Mada tä ulifi lä jo̦cole jamö, belibo 3 yama a fa famalönö yamacö befi ca̦i caläö co̦ofälöma, maa däjä ö̦jamö a canawä lä yanöcöono wei a canawä ja. Alejadiateli bä canawäbö bada cuoma. Yai täcöbö lä e̦lequeblaliyono wei, a wa̦fa bada canawä jilabomaje. ¹² Silacusateli bä lä bälöle jamö yamacö fa washölöblalunö, 3 yama tä mö didi tablamalefälöma. ¹³ Ö̦jamö culanö yamacö befi ca̦i caläö fa shoqueafälönö, Lejioteli bä lä bälöle jamö yamacö waloquema. Ö̦jö tä fena ja, motoca a juu lä mlai jamö wadoli a juu fa bädaoimanö, bolacabö yama tä mö didi tablamaö fa co̦lofälönö, Budeoli jamö yamacö waloa nomöjöquema, showadi bä canawä lä ca̦abou wejei jamö. ¹⁴ Ö̦jamö Jesucristo ai yama ebä dalalema. Yamalecö nacalemaje. Ö̦jö bänö yamalecö bälömabou showaoje däjä, 7 yama tä mö didi tablamalema. Inaja yamacö fa cuadaloimadunö, Loma jamö yamacö yanöcöwä waloquema. ¹⁵ Ö̦jamö Jesucristo ebä lä bälöle bänö yamacö ajedou fa ji̦liläjenö, yamalecö mö baamayolumaje. Abio jamö ai bä waloqueyoluma, nii bä lä lulublaaö wejei jamö. Ai bä mö feduwä lä cui, 3 bä yafi lä i̦tale jamö bä ca̦i waloa mö feduqueyoluma. Pablonö bä fa dalalönö, Yai Bada nija a bufi doblaloma. A bufi lojodoblou co̦layoma. ¹⁶ Lomateli bä shabonobö cadidiwä jamö yamacö yafiblou däjä, Lomateli bada bänö Pablo a fe labonomije. Dodijidawä a yami bälöo mö feduobä, a tamaquemaje. A docuu mlaobä, Pablo nija sodado moli a bälöa mö fedumaquemaje. ¹⁷ Ö̦jö däjä, 3 tä mö didi fa cublalunö, Pablonö ö̦jamö judio bä bada lä bälöle bä nacamalema. Bä fa co̦cablamalönö, abinaja bä nowa tama. —Iba wamacö. Camiyä ya lä cui, judio bä nija ya doblou lä mlai tä cuono ma mlai ma cui, wale juwälemaje. Bämacö nö badabö owämabeje ya bä wasöno ma mlai ma cui. Jelusale jamö wale fe jaba fa lamabojenö, Lomateli bä nija o̦cama wale bälaa nomöjöquemaje. ¹⁸ Lomateli bada bänö wale nia dobloimi fa dablajenö, wale ma wa̦lino wejei ma cui, iba tä dablanomije. Ya shämobä tä cuo fa mlacunö, wale jujeblamaö bufima ma cujei, ¹⁹ judio bä a̦ läblaliyoma. ¿Ö̦jö tawä? Sesa nija ya nofi bäyäobä ya bufi cuno ma mlai ma cui, wale jujeblamaö fa mojiojenö, ö̦jö nija ya̦cumö ya shömamou bufioma, iba judio bä mö feduwä lä cui ya bä a̦fa wäyäö mö feduobä tä cuono ma mlai ma cui. ²⁰ Ö̦jö cudeenö, cafä bämacö möö bufi doblaoma, bämacö a̦ wayomabä. Isaeli bäma ecö blucanö, bäma tä nö showadi lä dabodii wei tä nowa ja, ei boo shicönö ya malä o̦cale —bä nowa tama. ²¹ Pablo nija abinaja bä cuma. —Judea jamö bä lä bälöle bänö, camiyä yamacö nija cafä wa wa̦fa wayoaimije. Oni tä ma cui, tä shömaimije. Eja judio bä fama ma juu wei ma cui, wa wa̦fa ca̦i dobloimi wäyäimije. ²² Ö̦jö ma cui, cafä bäfä a̦ ji̦liaö bufi doblaa lä cule. Wa bufi lä cuu wei, yama tä a̦ ji̦liabä. Jesucristo bufilewä bä a̦fa dobloimi wäyäö cuaaö malä cudujei, cafänö wa bä ca̦i lä cule bä lä cui —bä cuma. ²³ Pablo a lä bälöono wei a yafi jamö bä co̦cablou co̦obä, tä a̦fa mö jalu fa wäyäjenö, bluca bä waloa co̦queyoluma. Ö̦jö bä nija Pablonö tä a̦ jaba wäyäö fa fenaonö, a wa̦ wayou showai a fe weyalayoma. Yai Bada tänö cama ebä ca̦i lä cuo wei tä a̦ wawäblamalema. Jesús a wa̦fa wäyäö ja, Moisesi tä a̦ ma cui, Yai Bada a wa̦no wäyälewä bä a̦ ma cui, ö̦jö tä a̦fa bluca jayumaö showaoma, bä bufi jaducublamaö fe yadiobä. ²⁴ Pablonö tä a̦ lä wäyäö wei tä a̦ ja, ai bä bufi jaducublaliyoma ma cui, ai bä mö feduwä lä cuinö tä a̦ bejedi bufinomije. ²⁵ Ö̦jö cudeenö, ö̦jö tä a̦ ja bä bufi shalilio fa mlacunö, bä a̦ lämoma. Bä co̦o lä bufiole däjä, Pablo moli a wa̦ faö co̦oma. —Yai Bada tä Bufi lä cui a wa̦ cadidou dodijioma. Cafä wamacö nö badabö nija a wa̦no wäyämobä, abinaja Isaia a nowa tama, Yai Bada a wa̦no wäyälewä a lä cui. ²⁶ Ei bä nija wa wa̦ fabä. Camiyä wale a̦no ca̦i tabä. Tä a̦ nia yai ji̦liaö ma cui, bä bufi nia jaducubloimi waiquiwä. Bä mamo nia ma showao wei ma cui, bä bufi nia yai möbloimi. ²⁷ Bä bufi yai walalaobä tä cua ma cule, bä bufi jaducudalou malä mlai. Tä a̦ yai ji̦liaö walalaobeje tä ma cule, jai bä yömöcacö quefua bä cuaadii. Tä dablamobä tä ma cule, jai bä mamo casö midou bä cuaaö. Wale yai bufiblaö fa cunojeja, ya bä nö demi tamabobö wei. ’Einaja Yai Bada tä Bufinö Isaia a nowa tama. ²⁸ ’Ja̦o —a cuu co̦oma—. Bämacö nowa taö lä cule. Yai Bada tä a̦ lä cui, judio bä lä mlai bä nija tä a̦ shömamou nomöjöa lä cule, ö̦jö bä bayeliblamobä. Ö̦jö bänö tä a̦ nia shino yai ji̦liaöje —Pablonö bä nowa tama. ²⁹ Pablonö inaja bä nowa fa talönö, bä co̦a showalayoma. Tä a̦ lä wäyäno wei tä a̦ ja, bä bufi shaliliblou mlai ja, bä nowa shino tayou dicoofälöma. ³⁰ Ö̦jamö Pablo a bälöa nö dedeaö ja, lasha bolacabö a famalema. Ö̦jö a yafi jamö a cuobä, camanö tä nowa comaquema. A fe lä walono wejei bä lä cui, dodijidawä bä fa walomacönö, ³¹ bä bluca yömöladima. Yai Bada tänö cama ebä ca̦i lä cuo wei tä a̦ wäyäma. Bada tä Jesucristo wawädowä a wa̦fa wäyäö ja, a yabäcaö mlajei ja bä yömöladima.